MAT 1:1 येसु किरिस्‍तुना पेद्‍दाल्कुना तंतुल्क इल्‍हा मंतां. येसुना एनकटा मातिर-दादाल अब्राहाम आंदुर. अब्राहामुना तंतुनाल दाविद राजाल पुटतोर, दाविदुना तंतुनाले येसु सामि वातोर.
MAT 1:2 अब्राहामुंक इसाक पुटतोर, इसाकुना मर्रि याकोब, याकोबुना मर्क यहुदल आनि ईना दादालोर-तम्मुह्‍क.
MAT 1:3 यहुदाना मर्क पेरेस आनि जेराल, ईरा यावन पोरोल तामरि आंद. पेरेसुना मर्रि हेसरोन, हेसरोनुना मर्रि अराम,
MAT 1:4 अरामुना मर्रि अमिनादाब, अमिनादाबुना मर्रि नहसोन, नहसोनिना मर्रि सलमोन,
MAT 1:5 सलमोनुना मर्रि बोआज, बोआजुना यावन पोरोल राहोबी आंद. बोवाज आनि ओना मुत्‍तो रूतुंकु ओबेद पुटतोर. ओबेदुना मर्रि यिस्‍सल,
MAT 1:6 यिस्‍साना मर्रि दाविद राजाल. दाविदना मर्रि सुलेमान, सुलेमानना यावल मोदाला उरियाना मुत्‍तो मत्‍ता.
MAT 1:7 सुलेमानुंकु रहोबाम पुटतोर. रहोबामुना मर्रि अबियेल, अबियेलुंकु आस्यल पुटतोर.
MAT 1:8 आस्यना मर्रि येहोसपात, यहोसपातुना मर्रि योराम, योरामुना तंतुनाल उजियाल पुटतोर.
MAT 1:9 उजियाना मर्रि योताम आनि योतामुना मर्रि अहाज, अहाजना मर्रि हिजकियल.
MAT 1:10 हिजकियन हेंदाल मनसे पुटतोर, मनसेना मर्रि आमोन, आमोनुना मर्रि योसियाल.
MAT 1:11 इस्राएल लोकुल्‍कुन गुलाम कीसि बेबिलोन देसेमते ओयनेंके योसियांक येकोनियेल आनि इंका ईना तम्मुह्‍क आतुर.
MAT 1:12 बेबिलोन ओता पजा येकोनियंकु सलितिएल पुटतोर, सलितिएलुन मर्रि जेरुबाबेल.
MAT 1:13 जेरुबाबेलुना मर्रि अबियुद, अबियुदुना मर्रि एलकिमु, एलकिमुंकु अजिरल पुटतोर.
MAT 1:14 अजिरना मर्रि सादोक, सादोकुना मर्रि याकिम, याकिमुंकु एलहुदल पुटतोर.
MAT 1:15 एलहुदना मर्रि एलियाजर, एलियाजरना मर्रि मत्‍तन, मत्‍तानिंकु याकोब पुटतोर.
MAT 1:16 याकोबुना मर्रि योसेप, योसेपुन मुत्‍तो मरियम. मरियम “किरिस्‍तु” इनना येसु सामिन यावल आंद.
MAT 1:17 ई परकारम अब्राहामुनगटाल दाविदुनदाका पडनालुं तंतुल्क. दाविदुनगटाल बेबिलोनते गुलाम कीसि ओयानदाका पडनालुं तंतुल्क. अल्हे बेबिलोनते यहुदिल्कुन गुलाम कीसि ओतागटाल अय्ते येसु किरिस्‍तु पुट्‍टनदाका पडनालुं तंतुल्क आतां.
MAT 1:18 येसु किरिस्‍तुना पुटमळ इल्‍हा जर्गता. मरियमुन योसेपुंक तल्किस एर्रा बोट्‍टु कीतुर. योसेप मरियमुन इट्‍टक मुन्‍नेने पवित्र आत्माता हेंदाल मरियमुंकु पीर आता.
MAT 1:19 मरियमुन तल्कता योसेप न्‍यायमते ताकाना मनकल मत्‍तोर. अद पीटे मत्‍ता संगति ओन्क तेळियतस्के दान अंटोरा मुन्‍ने बदनाम कियामन्‍नि इन्कुत्‍तोर. अदुनहाटीं बोर्के तेळियाकोंटा मरियमुन होळसना विचारम कीसेक मत्‍तोर.
MAT 1:20 गानि इल्‍हा विचारम कीसेक मनानेंके पेनदा दूता कलाते वासि, “योसेपु, दाविदुन वंसमतोना, निमे मरियमुन नीवा मुत्‍तो इंचि ओप्‍कुनालय वेरियमा. बारित्‍ते दाना पीटे मनना पिंडेम पवित्र आत्माहेंदाल आसि मंता.
MAT 1:21 अद पेडन कनंता, ओर ओना लोकुल्‍कुन ओरा पापाल्कुनाल पिसागोटंतोर. अदुनहाटीं ओना पोरोल येसु दोस्‍सा,” इंचि वेहता.
MAT 1:22 मुन्‍ने पेनदा कबुरतोर रासता पोल्‍ले निजम आयनाहाटीं आता. अद पोल्‍ले इल्‍हा मंता.
MAT 1:23 “हुळाट, मरमिं आयवा पेगिड्‍क पीर आसि, वरोर मर्रिन कनांता. ओना पोरोल इम्मानुएल दोस्सानुर.” इत्‍ते, “मनातोनि पेन मंता,” इंचि ई पोरोल्क अर्तम.
MAT 1:24 अस्‍के निद्रताल तेदतारित्‍ते योसेप पेनदा दूता वेहता परकारम कीतोर. ओर मरियमुन ओना मुत्‍तो इंचि स्विकारम कीतोर.
MAT 1:25 अय्नागानि अद एर पूरानाल ओर दानतोनि मींडा हिल्‍लोर. ओर पेडन पोरोल येसु इंचि दोसतोर.
MAT 2:1 येसु यहुदिया एरियाता बेतलहेम नाटे पुटतस्के अगा हेरोद इनना राजाल राज्येम कीसेक मत्‍तोर. अदे कालमते पोळ्‍द पेयसनाहेंदाल बोरो पंचांगम हूळानोर येरुसलेम सहरते वातुर.
MAT 2:2 वासि राजांक कलियसि, “पूनें-पूने पुटता यहुदिल्कुना राजाल बगा मंतोर? पोळ्‍द पेयसनाहेके ओर पुटताप मोमोट उंदि सुक्‍कातुन हूळतोम. ओना काल्क मोळ्‍कालय मोमोट वातोम,” इंचि राजन पूसकीतुर.
MAT 2:3 इद केंजसि हेरोद राजाल आनि येरुसलेम सहरअंता वेरिय्‍कुत्‍तुर.
MAT 2:4 अस्‍के हेरोद राजाल येरुसलेम सहरता पेद्‍दा पेर्मालोर्कुन आनि अगाटा दर्मसास्‍त्रम कराहना गुरुल्‍कुन अंटोर्कुन केय्‍सि, “किरिस्‍तु बगा पुट्‍टनद मत्‍तोर?” इंचि पूसकीतोर.
MAT 2:5 अस्‍के ओर, “यहुदिया एरियाता बेतलहेम नाटेने,” इंचि वेहतुर.
MAT 2:6 एनकटा पेनदा कबुरतोर रासताप, “ए यहुदिया एरियाता बूमिपोर्रो मंदना बेतलहेम नाटेनोरिटा, मिमेट मीवा नार, सिन्‍नादे इंचि इनकुन्‍मट. बारित्‍ते नावा इस्राएल देसेमता लोकुल्‍कुन कापाळनोर, आ राजाल मीवा नाटेनेन पुटनद मंता.”
MAT 2:7 अस्‍के पोळ्‍द पेय्सनाहेंदाल वाता पंचांगम हूळानोर्कुन हेरोद राजाल सपुडदाका कलियसि “सुक्‍का बद वेलाक दिसता?” इंचि पूस कीसि एरपाट कीकुत्‍तोर.
MAT 2:8 पजा “मिमेट होंचि आ पुटता पेडन बेस पह्कट आनि दिसतारित्‍ते नाकु वासि वेहट, अस्‍के ननागुडा होंचि ओना काल्क मोळ्‍ककन,” इंचि वेहचि ओर्कुन बेतलहेम नार लोहचीतोर.
MAT 2:9 पजा राजाल वेहता पोल्‍लें केंजसि आ पंचांगम हूळानोर अगटाल पेय्‍स्‍तुर. मुन्‍ने बद सुक्‍का दिस्‍सि मत्‍तानो अद सुक्‍का ओरा मुन्‍ने-मुन्‍ने होंचि आ पेडल मत्‍ता जेगा पोर्रेन आगुता.
MAT 2:10 आ सुक्‍कातुन हूळसि ओर्कु इरगा आनंदम आता. पंचांगम हूळानोर येसु पुटतगा बेतलहेम नाटे होत्‍तुर.
MAT 2:11 ओर लोता लोप्पो होंचि आ पेडन तल्‍लुर मरियमनगा हूळतुर. आ पेडाना काल्कुनपोर्रो अरसि मोळ्‍कतुर. आयंका ओर जोरानाल बंगारम, गंदकम, ऊदु इसंटा एक्‍को दराता वस्‍तुक तेंडसि ओन्क हीतुर.
MAT 2:12 आयंका “मल्सि हेरोदनाहेके होनमट” इंचि पेन कलाते वेहताहेंका ओर इंकुंदि हर्रि पीसि ओरा देसेम पेय्सि होत्‍तुर.
MAT 2:13 पंचांगम हूळानोर होत्‍तारित्‍ते, योसेपुंक उंदि पेनदा दूता कलाते दिस्‍सि, “निमे तेदा, पेडन आनि ओना तल्‍लुन पीसि इजिप्‍त देसेम पेय्सि होन. हेरोद राजाल पेडन हव्कनाहाटीं पह्कांतोर. अदुनहाटीं नना नीकु मर्रा वेहनदाका अग्गेन मन्‍नु,” इंचि वेहता.
MAT 2:14 अस्‍के योसेप अदे नर्का पेडन आनि पेडाना तल्‍लुन पीकुंचि इजिप्‍त देसेम्‍कु पेय्सि होत्‍तोर.
MAT 2:15 हेरोद राजाल हासोननदाका अग्गेन मत्‍तोर. “नना नावा मर्रिन इजिप्‍त देसेमताल केयतन” इंचि वेल्‍लेन वर्सां मुन्‍ने पेनदा कबुरतोराहेंदाल वेहामळ जर्गता, पोल्‍ले निजम आयगोम इंचि इदंता जर्गता.
MAT 2:16 आ पंचांगम हूळना लोकुल्‍क ओन नाडहे कीतद एरपाट कीसि, हेरोद राजांक इरगा होंग वाता. आ पंचांगम हूळानोराहेंदाल आ पेडल पुटता वेला एर्का कीकुंचि मत्‍ताहेंका बेतलहेम आनि पकापीसि मत्‍ता नाटेने मनना रोंडु वर्सानोर, इंका रोंडु वर्सांकन्‍ना सिन्‍नोर्क अंटोर मांड्‍सा पिलाल्कुन हव्कट इंचि हेरोद राजाल आदेस हीतोर.
MAT 2:17 ई परकारम यिर्मयाह इनना एनकटा पेनदा कबुरतोर वेहता पेनदा पोल्‍ले निजम आता. अद पोल्‍ले इल्‍हा मत्‍ता:
MAT 2:18 “रेचेलना पिलाल्क हासि होत्‍तुर, इंचि रामाह इनना नाटे दुक्‍कमते अळाना सप्पुड केंजावाता. अद दाना पिलाल्‍कुनाहाटीं अळसेके मत्‍ता, बोर सम्‍मत किय्यिनागानि अद समत आयाहिल्‍ले.”
MAT 2:19 कोन्‍नि रोजकुंक हेरोद राजाल हातोर. अस्‍के इजिप्‍तते मनना योसेपुनतोनि कलाते पेनदा दूता वासि,
MAT 2:20 “तेदा, पेडन हव्कालय हूळसेक मत्‍तोर हातोर, अदुनहेंके निमे पेडन आनि ओना तल्‍लुन पीसि इस्राएल देसेमते मल्सि होन,” इंचि इत्‍ता.
MAT 2:21 अस्‍के योसेपु पेडन आनि पेडाना तल्‍लुन पीसि इस्राएल देसेमते मल्सि होत्‍तोर.
MAT 2:22 गानि यहुदिया एरियाता हेरोद राजाल हातारित्‍ते “ओना जेगाते ओना मर्रि अर्केलाल राजाल आतोर,” इंचि तेळियतारित्‍ते ओर अगा होनालासि वेरियतोर. आयंका कलाते पेन वेहताहेंका ओर गालिल एरियाते होत्‍तोर.
MAT 2:23 अगा ओर नासरेत इनना नाटे होंचि जेगा पीतोर. इंचि “ओन नासरेततोर इंतुर.” इल्‍हा पेनदा कबुरतोर मुन्‍नेने वेहचि मत्‍तद इंदके निजम आता.
MAT 3:1 अदे कालमते, पेनदा पोरोलते एते मुळ्‍हाचि बापतिस्मा हियना योहान यहुदिया एरियाता बय्‍लि जेगाते वातोर. वासि, “स्वर्ग राज्येम दग्गेर्क एव्ता, मिमेट मनसु मार्सकुंटु,” इंचेके वरगेयसि वेहालय दल्‍गतोर.
MAT 3:3 एनकटा कालमते यसायाहल इनना पेनदा कबुरतोर, ई योहानुना बारेमते इल्‍हा वळ्‍किसि मत्‍तोर गदा: “सामिनाहाटीं हर्रि तयार कीम्‍टु, ओना हर्रि सवरगा कीम्‍टु, इंचि केडाते केयानद उंदि अल्किर केंजावाता.”
MAT 3:4 आ योहान लोटापेटा बूराते तयार कीता कपडिं केरसि तोल्‍दा पट्‍टा नडिक तासकुनुंदुर. ओर गोल्‍लाबामां आनि तेने इवे तिंडि तिनुंदुर.
MAT 3:5 येरुसलेम सहरताल, यहुदिया राज्येमता अन्‍नि जेगानाल आनि योर्दन बेरेटा सुट्‍टु-मट्‍टुना जेगाता लोकुल्‍क योहानुनगा वातुर.
MAT 3:6 वासि ओरा पापाल्क ओप्‍कुंचि ओनहेंदाल योर्दन बेरेटे बापतिस्मा येतकुत्‍तुर.
MAT 3:7 बापतिस्मा हियना जेगातगा वेल्‍लेन मंदि परिसिल्क,सदुकिर्क वायानद हूळसि योहान ओर्कुन, “ए कट्‍ला तरासनसंटोरिटा, पेनदा होंगुनाल तपिच्‍कुनालय बापतिस्मा येतट इंचि मीकु बोर वेहतुर?
MAT 3:8 अय्ते मरि, निजमे मीवा मनसु मार्सुकुत्‍तिर इंचि रुजुव कीसि हुप्‍सट.
MAT 3:9 वट्‍टिदे, मोमोट अब्राहामुना वंसमतोरम आंदुम, इंचि बस्‍केने इनकुनमट. नना मीकु निजम वेहांतन, पेन अब्राहामनाहाटीं ई बंडानालगुडा पिलाल्क पुट्‍टिचि हिया परंता.
MAT 3:10 इंदके मराकुना हिह्‍कुनगा मर्सु इरसि मंता. बव मराकुंक अय्ते बेसता पंडिं हादोंगों, अवुन नर्किसि तडमिते वाटमळ जर्गंता.
MAT 3:11 मिमेट मीवा मनसु मार्सकुत्‍ताहाटीं नना मीकु एते मुळ्‍हाचि बापतिस्मा हीसेक मंतन. गानि नाकन्‍ना सक्‍तिमंतुड नावा पज्जोटाल वासंतोर. ओना हेरपुह्कुन इटाना लायकगुडा नना हिल्‍लेन. ओरे मीकु पवित्र आत्माते आनि तडमिते बापतिस्मा हींतोर.
MAT 3:12 ओना कय्‍दे हेती मंता. ओर ओना कडातुन बेस साप कीतारित्‍ते गोह्कुन तूरपाल्क पीसि गुम्मिते दोसंतोर, पोट्‍टुनबारे बस्‍केने पिर्रुवा तडमिते वाटसि बोळसंतोर,” इंचि इत्‍तोर.
MAT 3:13 पजा येसु, गालिल एरियाताल योर्दन बेरेटगा, योहानुनाहेंदाल बापतिस्मा एतालय वातोर.
MAT 3:14 अस्‍के “नना नीवा कयदाल बापतिस्मा येतकुनगोम, गानि निमे नहगा वासि बापतिस्मा एतकुन्‍मळा!” इंचि योहान येसुन आपालय हूळतोर.
MAT 3:15 अस्‍के येसु, “पेनदा इच्‍चागुडा मनम इल्हेन कियाना इंचि मंता. अदुनहाटीं ई नीतिता दंडकम इल्हेने जर्गिकांटी,” इंचि इत्‍तोर. इल्‍हा योहान येसुंक बापतिस्मा हियालय तयार आतोर.
MAT 3:16 येसु बापतिस्मा एतसि एताल पलाते पेय्‍स्‍तस्‍के मब्बु बय्यारा आता. पेनदा आत्मा उंदि पावरेम पिट्‍टेतालेसीं आसि येसुनपोर्रो रेयतद येसु हूळतोर.
MAT 3:17 अस्‍केन स्वर्गमताल, “ईर ना पावरमगल्‍ला मर्रि आंदुर. ईर इत्‍ते नाकु बच्‍चोनो संबरम,” इंचि उंदि अल्किर केंजावाता.
MAT 4:1 पजा पेद्‍दा देय्यम येसुना पट्‍टु हूळागोम इंचि पेनदा आत्मा ओन बय्‍लि जेगाते ओता.
MAT 4:2 अगा येसु नल्‍पै रोजकु, नल्‍पै नर्कां उपासम मत्‍तोर. अदुनहाटीं येसुंक इरगा कर्वेस्‍ता.
MAT 4:3 अस्‍के आ पट्‍टु हूळानोर येसुनगा वासि, “ओक्‍कला निमे पेनदा मर्रिन आते ई बंडां हारिं आयिं इंचि आदेस हीम,” इंचि इत्‍ता.
MAT 4:4 अस्‍के येसु इल्‍हा जवाब हीतोर, “मनकल सिराप वट्‍टि हारिं तिंचे पिस्‍सोर, गानि पेनदा तोळ्‍दाल पेय्‍सना उंदि-उंदि पोल्‍लेताहेंदाल पिस्संतोर. इल्‍हा दर्मसास्‍त्रमते रासि मंता.”
MAT 4:5 पजा आ पेद्‍दा देय्यम येसुन येरुसलेम इनना पवित्र सहरते ओसि, गुळि पोर्रो कोस्‍सक निल्‍हाचि इल्‍हा इत्‍ता.
MAT 4:6 “ओक्‍कला निमे पेनदा मर्रिन आते हिळु दुनका, बारित्‍ते, नीकुन कापाळालय पेन दाना दूतांक आदेस हींता, आनि आ दूतां वासि नीवा काल्कुंक देब्बां दल्‍गामन्‍नि इंचि, नीकुन पोर्रोटद पोर्रेन अंदकुंतां, इल्‍हा दर्मसास्‍त्रमते रासि मंता.”
MAT 4:7 अस्‍के येसु दान इल्‍हा इत्‍तोर, “निमे सामि इनना नीवा पेनदा पट्‍टु हूळमा, इल्‍हागुडा दर्मसास्‍त्रमते रासि मंता.”
MAT 4:8 पजा आ पेद्‍दा देय्यम येसुन उंदि एत्‍तु गुट्‍टापोर्रो ओसि ओन्क दुनियाता अन्‍नि राज्येल्‍क, अवुना पेद्‍दातनाल्‍क बोत्‍तिगा हुपिच्‍चि,
MAT 4:9 “निमे नावा मुन्‍ने वंगिसि, नावा काल्क मोळ्‍कानय्‍ते, अवंता बोत्‍तिगा नीके हींतन,” इंचि इत्‍ता.
MAT 4:10 अस्‍के, “ए देय्यमतुना हब्बेर होन, बारित्‍ते निमे नीवा पेनदुने मोळ्‍कना, सिराप दानादे सेवा कियना, इल्‍हा दर्मसास्‍त्रमते रासि मंता.” इंचि येसु दान इत्‍तोर.
MAT 4:11 अल्हा इत्‍तरित्‍ते पेद्‍दा देय्यम ओन होळसि होत्‍ता. अस्‍के हुळाट! पेनदा दूतां वासि येसुना सेवा कीतां.
MAT 4:12 योहानुन जेलते वाटतुर इंचि येसुंक तेळिय्ताहेंका ओर गालिल एरियाता नासरेत नाटेने होत्‍तोर.
MAT 4:13 अगटाल नासरेत नाटेने आगाकोंटा कपर्नाहुम इनना सहर होंचि मनालय दल्‍गतोर. आ सहर गालिल सेरवु पकापीसि मनना नप्‍तालि आनि जबलुन इनना एरियांक दल्‍गिसि मंता.
MAT 4:14 ओर अगा मत्‍ताहाटीं यसायाह इनना पेनदा कबुरतोनतोनि पेन वेहता पोल्‍ले निजम आता. आ पोल्‍ले इल्‍हा मत्‍ता,
MAT 4:15 “जबलुन आनि नप्‍तालि एरियाता सेरवुना हरदाहेंदाल, योर्दन बेरेटा हब्बेटा बाजुंक, यहुदि आयवोरा गालिल एरियाते,
MAT 4:16 बोर अय्ते लोकुल्‍क हीकटते उदिस मत्‍तुरो ओर पेद्‍दा वेलगुन हूळतुर. आनि बोरपोर्रो अय्ते हामुरता नीडा अर्सि मत्‍तानो, ओर अंटोरपोर्रो वेल्‍गु अरता.”
MAT 4:17 अस्‍केटाल येसु इल्‍हा वेहालय सुरुव कीतोर, “स्वर्ग राज्येम दग्गेर्क एव्ता इंचि मिमेट मनसु मार्सकुंटु.”
MAT 4:18 येसु गालिल समुद्रम ओड्‍डु पीसि होननेंके वरोर सिमोनुन ओन पत्रुगुडा इनुंदुर आनि ओना तम्मुर अंदरियन हूळतोर. ओर जिम्मां पिय्‍यानोर आताहाटीं, समुद्रमते ओल्‍लां वाटसि जिम्मां पीसेक मत्‍तुर.
MAT 4:19 ओर्कुन हूळसि, “नावा पज्जो वट, नना मीकुन मनकालोर्कुन नहगा तायानोर कींतन,” इंचि येसु इत्‍तोर.
MAT 4:20 अस्‍के ओर, बिराना ओरा ओल्‍लां अग्गेन होळसि ओना पज्जो होत्‍तुर.
MAT 4:21 अगटाल इंकिच्‍चो मुन्‍नेळ्‍क होत्‍तारित्‍ते येसु इव्वुर दादाल-तम्मुन इत्‍ते जब्‍दिना मर्कु याकोब आनि ओना तम्मुर योहानुन हूळतोर. ओर ओना बाबोनतोनि डोंगापोर्रो ओल्‍लां सवरिच्‍नेंके येसु ओर्कुन केयतोर.
MAT 4:22 अस्‍के ओर, बिराना ओरा बान आनि डोंगातुन होळसि ओना पज्जो होत्‍तुर.
MAT 4:23 यहुदिल्कुना दर्मसास्‍त्रम कराहना लोतागा येसु पेनदा पोल्‍लें कराहतोर. स्वर्ग राज्येम बारेमते बेसता कबुर वेहचेके, लोकुल्‍कुना अन्‍नि तीरकुना रोगाल्‍कुन, कमजोरिन बेस कीसेके गालिल एरियाते पूरा तिरियतोर.
MAT 4:24 येसु कियना कबळ पूरा सिरिया देसेमंता तेळियसि होत्‍ता. दानहाटीं तीरतीराता रोगाल्कुनोर, नोप्पिनोर, देय्याल्क पीतोर, कुंदेल रोगमतोर आनि लकवा बिमारतोर इसंटा लोकुल्‍कुन ओनगा तत्‍तुर. येसु ओर अंटोर्कुन बेस कीतोर.
MAT 4:25 गालिल एरिया, देकापोलिस एरिया, येरुसलेम सहर, यहुदिया एरिया आनि योर्दन बेरेटा हब्बेटाल वाता लोकुल्‍कुना मंदा येसुना पज्जो होनालय दल्‍गुतुर.
MAT 5:1 वेल्‍लेटुर लोकुल्‍कुना मंदातुन हूळसि येसु गुट्‍टापोर्रो होंचि उदतोर. उदतस्‍के सिस्युल्क इंका ओना दग्‍गेरा वातुर.
MAT 5:2 अस्‍के येसु ओर्क इल्‍हा कराहलय दल्‍गुतोर.
MAT 5:3 “बोर अय्ते आत्माताल गरिब मंतुर पेन ओर्के आसिर्वाद हींता, स्वर्ग राज्येम ओरदे आंद.
MAT 5:4 दुक्‍कमते मत्‍तोर्कुंक पेन आसिर्वाद हींता, अद ओर्क दैरनेम हींता.
MAT 5:5 सादा सिंपल गुनम मत्‍तोर्कुंके पेन आसिर्वाद हींता, अद ई बूमि ओर्के हीसींता.
MAT 5:6 नीतिताहाटीं कर्वु दूपा इनाका कस्‍टम कियानोर्कुंके पेन आसिर्वाद हींता, पेन ओर्के समादानम हींता.
MAT 5:7 दया कियानोर्कुनपोर्रो पेन दया कींता, पेन ओर्के आसिर्वाद हींता.
MAT 5:8 बोर ओना मनसु पेनदापोर्रो इर्रंतोर, पेन ओन्‍के आसिर्वाद हींता, उंद रोजु ओरे पेनदुन हूळांतोर.
MAT 5:9 पगातोर्कुन उंदि कियानोर्कुंके पेन आसिर्वाद हींता, ओर्कुने पेनदा पिलाल्क इंचि इंतुर.
MAT 5:10 पेनदा सत्‍तेमते ताकनाहाटीं तकलिप, दुक्‍कम अर्रानोर्कुंके पेन आसिर्वाद हींता, अद स्वर्ग राज्येम ओराहाटींगे मंता.”
MAT 5:11 “मिमेट नावा सिस्युल्क आताहाटीं लोकुल्‍क मीवा अपमानम कींतुर, तिप्‍पल्‍क कींतुर, मीवा विरोदमते बच्‍चुंगो आबद्‍दम पोल्‍लें वेहांतुर, अस्‍के मीकुगुडा पेन आसिर्वाद हींता.
MAT 5:12 मीकन्‍ना मुन्‍नेटा पेनदा कबुरतोर्कुनगुडा लोकुल्‍क इल्हेने तकलिप कीतुर. अदुनहाटीं मिमेट कुसिते मंटु, आनंदमते मंटु. स्वर्गमते मीकु पेद्‍दा इनाम दोर्कंता.”
MAT 5:13 मिमेट दुनियातोराहाटीं होव्वोरतसंटोर आंदिर. ओक्‍कला होव्वोर, होव्वोरलेसीं रुसि वायाकोंटे अव्टे मर्रा बल्हा होव्वोर रुसि तरा परांतोम? अस्‍के अद बता कबळ्‍क ओज्‍जो. अद पलाते पोहचियना कबळ्‍के ओज्जंता, लोकुल्‍क दान जारसेके दांतुर.
MAT 5:14 गुट्‍टापोर्रो मत्‍ता नार दिसाकोंटा मन्‍नो. अल्‍हेने मिमेट दुनियाताहाटीं वेलगु आंदिर.
MAT 5:15 बोरे आयिर वेडसि निरिच्‍चि, दान गुल्‍ला हिळु इर्रुर. एत्‍तुने उंदि दीसोडिपोर्रो इर्रंतुर. अस्‍के अद लोतोर अंटोर्कुंक वेल्‍गु हींता.
MAT 5:16 अदुनहाटीं मीवा पिस्वर लोकुल्‍कुना मुन्‍ने इल्‍हा मनना गदा मीवा वेलगुनसोंटा बेसता कबाह्‍कुन हूळसि वेरेतोर स्वर्गमता बाबानद कदर कियानुर.
MAT 5:17 नना मूसाना नियमतुन, पेनदा कबुरतोर रासतदुन रद्‍द कियालय वातन इनकुनमटु. नना दान रद्‍द कियालय आयो गानि अव्टे नावा बारेमते रासता पोल्‍लेन पुरागा कियालय वातन.
MAT 5:18 नना मीकु निजम वेहचेके मंतन, बूमि मब्बु नासडेम आयानदाका दर्मसास्‍त्रमतद उंदि सिन्‍ना गीता, पोल्‍लेगुडा रद्‍द आयो.
MAT 5:19 मिमेट अंटोर आदेस परकारम ताकना. बोरे आयिर पेनदा सिन्‍ने आदेसतुनगुडा पालन कियाकोंटा, अल्‍हेने वेरेतोन्‍कगुडा वेहानय्ते, ओर स्वर्ग राज्येमते सिन्‍नासि मनंतोर. गानि बोर अय्ते नियम परकारम ताकंतोर आनि इंकावरोंक दाना परकारम ताकालय वेहांतोर ओर स्वर्ग राज्येमते बच्‍चोनो पेद्‍दा आयानुर.
MAT 5:20 नना मीकु वेहासेक मंतन केंजट. दर्मसास्‍त्रम कराहना गुरुल्क आनि परिसिल्क ईरकन्‍ना मिमेट एक्‍को नीतिमंतुल्क आयवा स्वर्ग राज्येमते नेंगा पर्रिट.
MAT 5:21 मिमेट बोन हव्कमट, बोर अय्ते हव्कंतोर ओन्क कोरटताल सिक्‍सा आंता इंचि मीवा एनकटा पेद्‍दाल्कुंक पेन वेहतद मिमेट केंजसि मंतिर.
MAT 5:22 गानि नना मीकु वेहंतन गदा, बोर अय्ते ओना दंटातोनपोर्रो होंग आंतोर ओर पेनदा कोरटता सिक्‍सालायक आंतोर. अल्‍हेने बोर अय्ते ओना दंटातोना अपमानम कींतोर, ओर पेद्‍दाल्कुना कोरटता सिक्‍सालायक आंतोर. बोरन्‍ना अरे मुर्का इनानय्ते ओन्क देय्याल्क मनना अग्नि गुंडमता सिक्‍सा आयार.
MAT 5:23 दानहाटीं निमे ओक्‍कला पेन गद्‍देतगा उपारम वाटानेंके नीवा दंटातोर नीवा पोर्रो होंग आसि मंतोर इंचि मति वायानय्ते,
MAT 5:24 निमे आ उपारमतुन अग्गेन होळसिसि मुन्‍ने दंटातोनगा होन. दंटातोन समत कीतारित्‍ते वासि उपारम वाटा.
MAT 5:25 नीवा पगातोर नीकुन कोरटते ओयानेंके, निमे बिराना हरदेन ओन दोस्ती कीम. हिलाकोंटे ओर नीकुन ओसि मजिस्‍टरुंक अप्‍पजेपनुर. मजिस्‍टर पोलिसुंक अप्‍पजेपनुर, पोलिस ओसि नीकुन जेलने वाटानुर.
MAT 5:26 नना नीकु निजम वेहांतन, कोत्‍तक-कोत्‍ता दोहनदाका निमे अगटाल पेय्‍सा पर्रिन.
MAT 5:27 बोगमतनम कियमट इंचि एनकटा वेहतद मिमेट केंजसि मंतिर.
MAT 5:28 गानि नना मीकु वेहसेके गदा बोरन्‍ना आयिर, बदाना मुरतळता हेके पापि नदरते हूळानय्ते ओर ओना मनसुने दानतोनि बोगमतनम कीतापे.
MAT 5:29 अदुनहाटीं तिना कळुगिंटा पापम किया वेहते, दान तेंडसि पोहतेने नीकु बेस मनंता. बारित्‍ते पूरा मेंदुल नरकमते होननदानकन्‍ना उंदि कळु होत्‍ते होन्‍नि.
MAT 5:30 अल्हेन ओक्‍कला नीवा तिना कय नीकुन पापम किया वेहते, दान नर्किसि पोहतेने बेस मनंता. बारित्‍ते नीवा पूरा मेंदुल नरकमते होननदानकन्‍ना मेंदुलता उंदि कय होत्‍ते होन्‍नि.
MAT 5:31 बोरन्‍ना ओना मुत्‍तोन होळसियाना मत्‍ते, दानकु ओर सोडसिट्‍टि हीसि होळसिय्यिर, इल्‍हा मूसाना नियमते वेहचि मंता.
MAT 5:32 गानि नना मीकु वेहासेक गदा, बोरन्‍ना ओना मुत्‍तोन बोगमतनमता कारनम तप्‍पा वेरे कारनमते होळसियानय्ते ओर दानतोनि बोगमतनम किया वेहांतोर. होळसीता मुत्‍तोनतोनि बोरन्‍ना मरमिं आयानय्ते ओरगुडा बोगमतनम कींतोर.
MAT 5:33 ओक्‍कला निमे ओट्‍टु तिनानय्ते, दान नेमुह्‍मा, गानि निमे तित्‍ता ओट्‍टुन पेनदाहाटीं पूरा कीम इल्‍हा मूसाना नियमते पेद्‍दाल्कुंक वेहतद मिमेट केंजतिर.
MAT 5:34 नना मीकु वेहासेक मंतन गदा, निमे ओट्‍टु तिनने तिनमा. स्वर्गम पेनदा राजगद्‍दे आंद, इंचि निमे दाना ओट्‍टु तिनमा.
MAT 5:35 अल्हेन बूमि, पेन काल्क इर्रना जेगा आंद, अदुनहाटीं बूमि तोड इंचि दानदगुडा ओट्‍टु तिनमा. आनि येरुसलेम सहर पेद्‍दा महाराजानद इत्‍ते पेनदाद आंद, इंचि दानदगुडा ओट्‍टु तिनमा.
MAT 5:36 नीवा तल्‍लातद उंदिंका केल्‍दुन तेल्‍लगा हिलाकोंटे नल्‍लगा किया पर्रिन, बारित्‍ते अन्‍नि पेनदा कय्‍देन मंता, इंचि तल्‍लतदगुडा ओट्‍टु तिनमा.
MAT 5:37 दानहाटीं नीवा वळ्‍कुमळ हो इत्‍ते हो, हिलाकोंटे हिल्‍ले इत्‍ते हिल्‍ले इंचि मन्‍नि. नीवा पोल्‍लेतुन निजम कियालय ओट्‍टु तिनानय्ते अद देय्यमताहेंदाल वाता.
MAT 5:38 कळदुक बदला कळु, पलदुक बदला पल्‍लु तेंडाना इंचि मूसाना नियमते वेहता पोल्‍लेतुन मिमेट केंजतिर गदा.
MAT 5:39 गानि नना मीकु वेहासेके मंतन गदा, मिमेट मीवा पगातोरकुंक एदुर तिरियमटु. ओक्‍कला बोरन्‍ना नीकुन तिना सेंपापोर्रो तंते निमे इंकुंदि सेंपागुडा तिरहा.
MAT 5:40 बोरन्‍ना नीपोर्रो केस कीसि नीवा कोट तेंडकुननय्ते ओन्क नीवा अंगिगुडा हीम.
MAT 5:41 अल्हेन बोरन्‍नागिंटा नीकुन उंदि कोसेड लक्‍कु सामान पीसि वांतिना, इंचि बल्‍मि कियानय्ते, निमे आ मनकनतोनि रोंडु कोसकुना लक्‍कु होन.
MAT 5:42 बोरन्‍ना नीकुन बतलन्‍ना तल्‍कते अद ओन्क हीम. उद्‍देरा तल्किनागानि, हिल्‍ले इनमा.
MAT 5:43 “निमे नीवा दंटातोर्कुन पावरम कीम, पगातोर्कुन बारे हय्स्मा,” इंचि इत्‍तद मिमेट केंजतिर.
MAT 5:44 गानि नना मीकु वेहानद बतल इत्‍ते, मीवा पगातोर्कुन पावरम कीम्‍टु. मीकुन तकलिप कियानोराहाटीं मिमेट पारतना कीम्‍टु. अस्‍के मिमेट मीवा स्वर्गमते मनना बाबाना पिलाल्क आंतिर.
MAT 5:45 बारित्‍ते सेड्‍डोर्क, बेसतोर्क इव्वुर्किंका पोळ्‍दुनाहेंदाल वेलगु ओरे हींतोर. अल्हेन पापिल्कुंक नीतिमंतुल्‍कुंक पिर्रुगुडा ओरे हींतोर.
MAT 5:46 अयना मीकुन पावरम कियानोर्कुने मिमेट पावरम कीते मीकु पेनदाहेंदाल बता इनाम दोर्कंता? कर वसुल कियानोरगुडा अल्हे कींतुर.
MAT 5:47 निमे ओक्‍कला नीवा दंटातोर्कुनतोने बेस मत्‍ते, निमे वेरे बतल बेस कीसंतिन? यहुदि आयवोरगुडा अल्हे कींतुर.
MAT 5:48 अदुनहाटीं स्वर्गमते मंदना मीवा पेनबाबाल बल्हा पुरागा मंतोर अल्हे मिमेटगुडा मंटु.
MAT 6:1 उसारते मंटु! मिमेट लोकुल्‍कुंक हुप्‍सनाहाटीं नीति कबाह्‍क कियमट. अल्हा कीते, स्वर्गमते मनना मीवा पेनबाबानहेंदाल मीकु बतले इनाम दोर्को.
MAT 6:2 अदुनहेंके मिमेट बोनकन्‍ना दर्मम कियनेंके डप हाटमट. बारित्‍ते अल्हा डोंगि लोकुल्‍क मिटिंगुल्कुना जेगाते, हरकुन पीसि ओर्कुन कदर कियगोम इंचि कींतुर. नना निजम वेहंतन, बोर अय्ते अल्हा कींतुरो ओर्कु ओरा इनाम दोर्कुता.
MAT 6:3 मिमेट बोनकन्‍ना दर्मम कियनेंके मीवा तिना कय बतल कींतनो अद रोड्‍डा कय्‍दुक बिल्कुल तेळियामन्‍नि.
MAT 6:4 अल्हा कीते मिमेट कियना दर्मम बोनकु तेळियाकोंटा मनंता, अद बतल आंदो मीवा पेनबाबांक एर्के मंता. अदुन हूळसे मीकु इनाम हींतोर.
MAT 6:5 अल्‍हेने बस्के अय्ते मिमेट पारतना कींतिरो, अस्‍के डोंगि लोकुल्‍कुनलेसीं कियमट. डोंगि लोकुल्‍क हरकुना मूलनपोर्रो, पंचादिं कियना जेगाने नित्‍तिसि पारतनां कींतुर, अल्हा कीते वेल्‍ले लोकुल्‍क ओर्कुन हूळंतुर इंचि ओर्कु अनपिंचंता. गानि नना मीकु निजम वेहंतन, ओरा इनाम ओर्कु दोर्कुता.
MAT 6:6 गानि मिमेट पारतना कियना वेलाक लोता लोप्पोटा अर्राते होंचि तल्‍पु वाटकुंचि बोर्के दिसुवा मीवा पेनबाबांक पारतना कीम्‍टु. अस्‍के मीवा पेनबाबाल मीकु अद पारतनाता जवाब हींतोर.
MAT 6:7 वेरे जातितोर पारतना कियनेंके उंदे पोल्‍लेतुन वेल्‍लेन मल्कां वळकांतुर, अल्हा कीते पेन ओरद केंजंता इंचि ओर्क अनपिच्‍चंता.
MAT 6:8 गानि मिमेट ओरा लेह्का आयमट. बारित्‍ते मीकु बतल गावालेनो अद तल्कका मुन्‍नेन पेनदुक एरपाट मनंता.
MAT 6:9 अदुनहाटीं मिमेट पारतना कियनेंके इल्‍हा पारतना कीम्‍टु: “ए स्वर्गमते मनना मावा पेनबाबा, नीवा पोरोलतुन अंटोर कदर कियिरकांटी.
MAT 6:10 निमेन मापोर्रो राज्येम कीम, स्वर्गमते नीवा इच्‍चा बल्हा पूरा आंतानो, अल्हेन ई बूमिपोर्रोगुडा आयिकांटी.
MAT 6:11 माकु रोजता तिंडि इय्यालागुडा हीम,
MAT 6:12 माकु विरोदमते कीता तप्‍पुकुन मोमोट बल्हा माप कीतोमो, निमेगुडा मोमोट कीता तप्‍पुकुन माप कीम.
MAT 6:13 माकुन पट्‍टुने अर्राकोंटा कापाळा, सेड्‍डातनमताल माकुन पिसागोट्‍टा. बस्केळक राजाल निमेन आंदिन. अदुनहाटीं ताकत आनि महिमा बस्केळक नीवदे आंद.” आमीन!
MAT 6:14 मिमेट वेरेतोरा तप्‍पुकुन माप कीते, स्वर्गमते मनना पेनबाबालगुडा मीकुन माप कींतोर.
MAT 6:15 गानि उंदि वेलाते मिमेट मनकालोरा तप्‍पुकु मापि कियाकोंटे स्वर्गमते मनना मीवा पेनबाबालगुडा मीकुन मापि किय्योर.
MAT 6:16 मिमेट बस्के ओक्‍कापोद्‍दु मनंतिटो अस्‍के मिमेट जिव्वरा मोकोम कीसि मनमट. डोंगि लोकुल्‍क अल्हेन कींतुर. ओर्कु अनपिंचंता गदा जिव्वरा मोकोम कीसि मत्‍ते लोकुल्‍क ओर्कुन हूळसि ईर ओक्‍कापोद्‍दु मंतुर इंचि इंतुर. गानि नना मीकु निजम वेहंतन, ओर्कु ओरा इनाम दोर्कुता.
MAT 6:17 अदुनहाटीं मिमेट बस्के अय्ते ओक्‍कापोद्‍दु मनंतिटो, अस्‍के तल्‍लाक निय होकसि मोकम नोर्राट.
MAT 6:18 अल्हा कीते ओक्‍कापोद्‍दु मत्‍तद बोर्के दिस्सो गानि बोर्के दिसुवा मीवा पेनबाबाल मात्रम ओक्‍का पोद्‍दुन हूळांतोर. अदुनहेंके मीकु इनाम हींतोर.
MAT 6:19 मिमेट बूमिपोर्रो दनम जमा कीते अदुन सेदेल तिंचि, सिलुम पीसि नासडेम आंता आनि दोंगाल्क दोसकुंचि ओंतुर. अदुनहाटीं ई बूमिते दनम जमा कियमट.
MAT 6:20 गानि मिमेट मीवाहाटीं स्वर्गमते दनम जमा कीम्‍टु, अगा अवुन सेदेल तिन्‍नो, सिलुम पिय्यो, दोंगाल्कगुडा दोसकुंचि ओयुर.
MAT 6:21 बारित्‍ते मीवा दनम बगा मत्‍ते अग्गेन मीवा मनसु मनंता.
MAT 6:22 मीवा कळु मेंदुलता वेडसि आंदु. अदुनहाटीं मीवा कळु बेस मत्‍ते, मीवा मेंदुलंता वेलगु मनंता.
MAT 6:23 मीवा कळु बेस हिलाकोंटे मीवा मेंदुलंता हीकटे मनंता. दानहाटीं मिमेटगिंटा पेनदा वेलगुन हूळाकोंटे मीवा पिस्वरंता हीकटे मनंता.
MAT 6:24 अल्हेन वरोर मनकल इव्वुर मालकुल्कुनगा सेवा किया पर्रोर. अल्हा सेवा कीते ओर वरोन बेस पावरम कींतोर, इंकावरोन हयसोर. हिलाकोंटे वरोना पोल्‍ले बेस केंजंतोर इंकावरोना पोल्‍ले बारे केंजोर. इंचि मिमेट पेनदुन आनि दनमतुन उंदे मल्का सेवा किया पर्रिर.
MAT 6:25 अदुनहाटीं नना मीकु वेहनद बतल इत्‍ते जीवा तिंडिकन्‍ना मुक्‍केम, मेंदुल कपडींकन्‍ना मुक्‍केम आंदु. इंचि पिस्‍सनाहाटीं तिनकोम बतल, उनकोम बतल, इंका मेंदुल्ताहेंका केर्कोम बतल इंचेके रंदि कियमट.
MAT 6:26 आ पिट्‍टेनहेके हुळट, अव वीतों आनि कोय्यों, अचोने आयका गुम्मिने जमागुडा किय्यों, अय्नागानि मीवा स्वर्गमते मनना पेनबाबाल अवुंक तिंडि हींतोर. मीकु अय्ते पेनदा मुन्‍ने पिट्‍टेंकन्‍ना बच्‍चोनो विलवा मंता इदु मीकु एर्के मंता.
MAT 6:27 अय्नागानि रंदि कीसि ओना आवसुन उंदि गंटा एक्‍को बेरसागोटतोर मीवा नड्‍डुम बोरन्‍ना मंतोरा?
MAT 6:28 मरि मिमेट केर्रना कपडिनहाटीं रंदि बारि कींतिट? केडाते पूयाना आ पूतनहेके हुळट अव बल्हा बेर्ससंतांगो! अव कबळ किय्यों, कपडिं इंका कुट्‍टों.
MAT 6:29 गानि नना वेहानद बतल इत्‍ते, सुलेमान राजाल वेल्‍लेन सिरमंत मंचिगुडा ओना कपडिं आ पूतानाल उंदि पूतातच्‍चोगुडा सोकु मनाहिल्‍लें.
MAT 6:30 अरे विस्वासम तक्‍को लोकुरिटा, जाडि इय्याला मंता, नाडि तडमिते वेसि दांता. अयना पेनबाबाल अवुंक इच्‍चो बेसता कपडिं हींतोर, अय्ते अवुंकन्‍ना बेसता कपडिं मीकु हिय्या पर्रोरा?
MAT 6:31 अदुनहाटीं बतल तिंदकोम, बतल उंडकोम, बतल केर्कोम इंचि रंदि कीसेक मनमट.
MAT 6:32 विस्वासम कियवोरगुडा इव गावाले इंचि तनलाळसेक मनांतुर. गानि मीकु इव अन्‍नि गावाले इंचि स्वर्गमते मनना मीवा पेनबाबांक एर्के मंता.
MAT 6:33 अदुनहाटीं मिमेट मुन्‍ने स्वर्ग राज्येमतुन आनि पेनदा नीतितुन पह्कट, अस्‍के इव अन्‍निगुडा मीकु दोर्कनुं.
MAT 6:34 बस्केळक बद्‍दना बद रंदि मनंता. इंचि नाडीता रंदि इयालेन कियमट. नाडीता रंदि नाडीताहाटीं होळसीम्टु.
MAT 7:1 मिमेट वेरेतोरपोर्रो दोसेम दोसमट, अस्‍के मीपोर्रोगुडा पेन दोसेम दोस्‍सो.
MAT 7:2 मिमेट बल्हा दोसेम दोस्‍संतिरो, अल्‍हेने मीपोर्रोगुडा पेन दोसेम दोस्‍संता. बद कोल्ताते मिमेट हींतिरो, अदे कोल्ताते मीकु हियमळ जर्गंता.
MAT 7:3 अरे डोंगि मनका, नीवा कळ्‍दे अरता सित्‍कुन तेंडका, नीवा दंटातोना कळ्‍दे अरता बुस्सितुन निमे बारि तेंडा हूळंतिन?
MAT 7:4 नीवा कळ्‍देन सित्‍कु अर्सि मननेंके, “नीवा कळ्‍दे अरता बुस्सितुन तेंडाहीम इंचि नीवा दंटातोन बल्हा इना पर्रांतिन?”
MAT 7:5 मोदाला नीवा कळ्‍दा सित्‍कुन तेंडा. अस्‍के नीवा दंटातोना कळ्‍दा बुस्सितुन तेंडालय नीकु बेस दिस्‍सार.
MAT 7:6 पवित्र वस्‍तुक नय्‍कुन मुन्‍ने वाटमट, पद्‍दिना मुन्‍ने मुच्‍च्याल्‍क पोच्‍चुमट. अल्हा कीते पद्‍दिं अवुन काल्कुने जारांतां, नय्‍कु बारे मीपोर्रो अर्सि मीकुने कस्कंतां.
MAT 7:7 पेनदुन तल्‍कट मीकु हिय्यार, पह्कट मीकु दोर्कार, तल्‍पुन तनट तल्‍पु तेंडार.
MAT 7:8 बारित्‍ते बोर अय्ते तल्कंतोर ओन्क हियमळ जर्गंता, बोर अय्ते पह्कंतोर ओन्क दोर्कंता, बोर अय्ते तल्‍पुन तनंतोर ओनाहाटीं तल्‍पु तेंडमळ जर्गंता.
MAT 7:9 मीलोप्‍पो बोरन्‍ना मनकल मंतोरा, ओना मर्रि हारि तल्‍कते बंडा हियानोर?
MAT 7:10 हिलाकोंटे जिम्मा तल्‍कते तरास हियना मनकल मंतोरा? इल्‍हा बोरे किय्योर.
MAT 7:11 अय्ते मिमेट सेड्‍डोर्क आसिगुडा मीवा पिलाल्कुंक बेसतव हियना इंचि मीकु तेळियतस्के, स्वर्गमते मनना मीवा पेनबाबाल ओन तल्कानोर्कुंक वेल्‍लेन बेसतव हिय्योरा?
MAT 7:12 अदुनहाटीं लोकुल्‍क मीवातोनि बल्हा मनना इंचि मिमेट इनकुंतिरो, अल्हेन मिमेट ओरतोनि मंटु. इदे पोल्‍ले मूसाना नियम आनि पेनदा कबुरतोर रासतदगुडा वेहंता.
MAT 7:13 नासडेमताहेके होनना हर्रि, तल्‍पु नेर्वुंक नेरवु मंता, आ हरपीसि वेल्‍ले मंदि दांतुर. अदुनहाटीं इर्कुटोम मत्‍ता हरपीसि होळियट.
MAT 7:14 पिस्वरताहेके होनना हर्रि आनि तल्‍पु वेल्‍ले इर्कुटोम मंता. आ हर्रि वेल्‍ले तक्‍को मंदिक दोर्कंता.
MAT 7:15 आबद्‍दम कबुरतोरागटाल उसारते मंटु. ओर मिहगा सादा गोर्रेतालेसीं वांतुर गानि ओरा लोप्पो तोडेल्‍लिता गुनम मनंता.
MAT 7:16 ओर कियाना कबाह्‍कुन हूळसे ओर डोंगि कबुरतोर इंचि एरपाट कींतिर. बल्हा अय्ते हाह्कुना जप्‍पिताल अंगुर पंडिं हादों, हिलाकोंटे ईरामुस्‍टी मराकुनाल मरका पंडिं हादों,
MAT 7:17 अल्हेन बेसता मराकु बेसता पंडिं हादंतां, कराब मराकु कराब पंडिं हादंतां.
MAT 7:18 बेसता मराकु कराब पंडिं हादों कराब मराकु बेसता पंडिं हादों.
MAT 7:19 बव मराकु बेसता पंडिं हादों असोंटव अन्‍नि मराकुन नर्किसि तडमिते वाटंतुर.
MAT 7:20 इंचि डोंगि कबुरतोर्कुन मिमेट ओर कियाना कबाह्‍कुन हूळसे एरपाट कीकिट.
MAT 7:21 नाकुन सामि सामि इनानोर अंटोर स्वर्ग राज्येमते होळयुर. गानि स्वर्गमते मनना नावा पेनबाबाना मनसु मत्‍ताप बोर अय्ते ताकंतुर ओरे स्वर्ग राज्येमते होळियंतुर.
MAT 7:22 नना न्‍यायम कियाना आकिर रोजुने वेल्‍लेटुर नहगा वासि, सामि मोमोट नीवा पोरोलते बविस्यवानि कीतोम, नीवा पोरोलते देय्याल्क-बूताल्कुन पेचाहतोम, नीवा पोरोलते बच्‍चुंगो अद्‍बूतामाता कबाह्‍क कीतोम, इंचेके इनानुर.
MAT 7:23 अस्‍के ओर्कुन, ए सेड्‍डा कबाह्‍क कियानोरिटा! नना मीकुन एरपाट किय्योन. मिमेट इगेटाल पेय्सि होंटु इंचि इंतन.
MAT 7:24 अदुनहाटीं नावा पोल्‍लें केंजसि दाना परकारम ताकाना हरेक मनकल, बंडा पुनादिपोर्रो लोन दोहकुता तेल्‍विता मनकनलेसीं मंतोर.
MAT 7:25 पिर्रु वाता, कम्मुड वाता, वळि-दुमारम वासि लोतुक दल्‍गिना गानि अद कूला हिल्‍ले. बारित्‍ते अद लोता पुनादि बंडातोनि दोहाचि मंता.
MAT 7:26 गानि नावा पोल्‍लें केंजसि, दाना परकारम ताकवा हरेक मनकल, उस्केते लोन दोहकुता तेल्वि हिल्वासंटोर आंदुर.
MAT 7:27 पिर्रु वाता, कम्मुड वाता वळि-दुमारम वासि लोतुक दल्‍गता अस्‍के अद लोन पूरा कूल्‍सि पाड आता, इंचि येसु इत्‍तोर.
MAT 7:28 येसु पेनदा पोल्‍लें कराहमळ महातस्के ओना कराहमळतुन केंजसि लोकुल्‍क वेल्‍ले इचंत्रम आतुर.
MAT 7:29 बारित्‍ते येसु ओर्कु ओरा दर्मसास्‍त्रम कराहना गुरुल्‍कुनलेसीं आयो गानि अदिकारम मत्‍ताप कराहतोर.
MAT 8:1 येसु गुट्‍टा पोर्रोटाल हिळु रेयतस्के वेल्‍लेन लोकुल्‍क ओना पज्जो-पज्जो वासेक मत्‍तुर.
MAT 8:2 हुळाट! अस्‍के वरोर कुस्‍टरोगम आता मनकल येसुनगा वासि ओना काल्कुनपोर्रो अर्सि, “सामि, निमे इन्‍कुत्‍ते नाकुन बेस किया पर्रांतिन,” इंचि इत्‍तोर.
MAT 8:3 अस्‍के येसु कय मुन्‍नेळ्‍क कीसि ओन इट्‍सि इल्‍हा इत्‍तोर, “निमे बेस आयगोम इंचि नावा मनसु मंता, बेस आम” इंचि इत्‍ता इन्‍मळे आ कुस्‍टरोगम आसि मत्‍ता मनकल बेस आतोर.
MAT 8:4 पजा, “इगे जर्गतद बोर्के वेहमा. गानि निमे होंचि मीवा पेर्मांक हुप्‍सा. कुस्‍टरोगमताल निमे बेस आता गवाइ इंचि मूसाल वेहता मोक्‍कु हीम. अदुन हूळसि निमे बेस आतिन इंचि लोकुल्‍कुंक एरपाट आंता,” इंचि येसु ओन इत्‍तोर.
MAT 8:5 येसु कपर्नाहुम सहर होत्‍तस्के ओनगा वरोर दरोगल वासि,
MAT 8:6 “सामि, नावा जीतागाड लकवा बिमारते इरगा तकलिपने लोन मंतोर,” इंचि सहायमहाटीं विनंति कीतोर.
MAT 8:7 अस्‍के, “नना वासि ओन बेस कींतन,” इंचि येसु दरोगन इत्‍तोर.
MAT 8:8 गानि आ दरोगल, “सामि, निमे नावा लोन वायानच्‍चो पेद्‍दातनम नहगा हिल्‍ले. ननागुडा वरोर अदिकारिना कय्‍दा हिळु कबळ कींतन; नावा कय्‍दा हिळुगुडा सिपाइल्क मंतुर. नना अव्टेटाल वरोन ‘होन’ इत्‍ते ओर दांतोर, इंकावरोन ‘वा’ इत्‍ते ओर वांतोर. अचोने आय्‍का नावा दासुन, ‘इद कीम’ इत्‍ते ओर कींतोर. अदुनहाटीं निमे सिराप उंदि पोल्‍ले इन, नावा जीतागाड बेस आंतोर.” इंचि येसुन इत्‍तोर.
MAT 8:10 इद केंजसि येसुंक वेल्‍ले इचंत्रम आता. अस्‍के ओना पज्जो ताकसेक मत्‍तोर्कुन इल्‍हा इत्‍तोर, “नना मीकु निजम वेहांतन, इस्राएल लोकुल्‍कुन लोप्‍पोगुडा इच्‍चोन विस्वासम मत्‍ता मनकल नाकु बग्‍गेन दोर्का हिल्‍लोर.
MAT 8:11 इंका नना मीकु वेहंतन गदा, वेल्‍लेटुर लोकुल्‍क पोळ्‍द पेय्‍सनाहेंदाल, पोळ्‍द अर्रानाहेंदाल वासि, अब्राहाम, इसाक, याकोब ईरतोनि स्वर्ग राज्येमते उद्‍दानुर.
MAT 8:12 गानि बोर अय्ते, ‘मोमोट पेनदा संतानम आंदुम’ इनकुंतुरो, ओर्कुन मात्रम पेन पलाते हीकटते वाटसींता. अगा सिराप अळमळ, पल्कु कोर्कमळे मनंता,” इंचि वेहतोर.
MAT 8:13 पजा येसु आ दरोगन, “निमे होन, नीवा विस्वासम बल्हा मंतनो अल्हेन नीकु जर्गंता” इंचि इत्‍ता इनमडे ओना जीतागाड बेस आतोर.
MAT 8:14 पजा येसु पत्रुना लोन वातस्के ओना पोरड एळकि वासि मींडसि मत्‍तद हूळतोर.
MAT 8:15 येसु दाना कयदुन इट्ता इट्‍टुडे एळकि रेय्ता. अस्‍के अद तेदसि येसुना सेवा कियालय दल्‍गता.
MAT 8:16 पजा पोळ्‍द होंचि लोकुल्‍क देय्याल्क पीतोर्कुन वेल्‍लेन मंदितुन येसुनगा पीसि वातस्के ओर उंदे पोल्‍लेते देय्याल्कुन गेदमिसि, बिमार मत्‍ता अंटोर्कुन बेस कीतोर.
MAT 8:17 अद अल्हा बारि जर्गुता इत्‍ते एनकटा बस्‍केनो यसायाह इनना पेनदा कबुरतोर वेहता पोल्‍ले पुरागा आयना इंचि जर्गुता. यसयाल इल्‍हा वेहचि मत्‍तोर: “ओर मना रोगाल्‍कुन तेंडसि पोहतोर मना बादन एतकुत्‍तोर.”
MAT 8:18 येसु ओना सुट्‍टु वेल्‍लेन मंदि मत्‍तद हूळसि ओना सिस्युल्कुन मिमेट समुद्रमता हब्बेटा बाजुंक होंट, इंचि आदेस हीतोर.
MAT 8:19 पजा वरोर दर्मसास्‍त्रम कराहना गुरु ओनगा वासि, “गुरु, निमे बगा दांतिनो अगा नना नीवा पज्जो वांतन.” इंचि इत्‍तोर.
MAT 8:20 अस्‍के येसु ओन इल्‍हा इत्‍तोर, “नक्‍कांक बारे मनालय सोर्रें मंतां, पिट्‍टेंक मनालय गूडां मंतां, गानि मनकना रूपमते पुटतोन नाकु मात्रम तल्‍ला इर्रालयगुडा जेगा हिल्‍ले.”
MAT 8:21 अस्‍के येसुना पज्जो वातोरव्टेटाल वरोर, “सामि, नाकुन मोदाला होनाहीम, नावा बाबाल हातास्के ओन गति कीसि वांतन.” इंचि येसुन इत्‍तोर.
MAT 8:22 गानि, “हिल्‍ले, निमे इंदकेन नावा पज्जो वा. बोर अय्ते हाताप मंतुरो, ओरे ओरा हातोरा गति किय्‍यिर,” इंचि येसु ओन इत्‍तोर.
MAT 8:23 पजा येसु डोंगाते एक्‍कुतंका ओना सिस्युल्क इंका ओना पज्जेन एक्‍कुतुर.
MAT 8:24 अस्‍के समुद्रमते उंदि पेद्‍दा दुमारम वाता. आ दुमारम इच्‍चो पेद्‍देद मत्‍ता गदा, एता तळाने डोंगा मुळगालय दल्‍गता. गानि येसु मात्रम आ डोंगाते मींडसि मत्‍तोर.
MAT 8:25 अस्‍के सिस्युल्क ओनगा होंचि ओन निद्रताल तेहाचि, “सामि, माकुन कापाळा, मनम नासडेम आसि होंचंतोम,” इंचि इत्‍तुर.
MAT 8:26 अस्‍के, “अरे विस्वासम तक्‍को लोकुरिटा, बारि वेरियंतिर?” इंचि येसु ओर्कुन इत्‍तोर. पजा तेदसि आ वळि-दुमारमतुन आनि समुद्रमतुन गदरिचतोर अय्ते अव सांत आतां.
MAT 8:27 अद हूळसि सिस्युल्कुंक पेद्‍दा इचंत्रम आता. अस्‍के ओर, “अरे ईर बसोंटा मनकल रो, वळि, समुद्रमगुडा ईना पोल्‍ले केंजंता!” इंचि इत्‍तुर.
MAT 8:28 पजा ओर समुद्रमता हब्बेटा बाजुंक मनना गदरेकरकुना एरियक एव्‍तुर. अस्‍के इव्वुर देय्याल्क पीता मनकालोर तापळन बोग्‍ळाताहेंदाल येसुनगा वातुर. ओर इरगा वेरियनाल मत्‍तुर इंचि ओर मत्‍ता हरदाहेके बोरे ताकाकोंदुर.
MAT 8:29 हुळाट! ओर इव्वुर येसुनगा वासि, “पेनदा मर्रिना, मातोनि नीकु बता कबळ? इत्‍ता वेलाकन्‍ना मुन्‍नेन निमे माकु सिक्‍सा हियालय वातिना?” इंचि मोत्‍कुत्‍तुर.
MAT 8:30 ओर नित्‍तिसि मत्‍तगटाल इच्‍चोन लक्‍कु पद्‍दिना मंदा मेय्‍सेके मत्‍ता.
MAT 8:31 अस्‍के, “ओक्‍कला निमे माकुन इराव्टेटाल तेंडानय्ते माकुन आ पद्‍दिना मंदाते होनाहीम,” इंचि आ देय्याल्क येसुन विनंति कीतां.
MAT 8:32 अय्ते ओर आ देय्याल्कुन, “होंट” इंचि इत्‍तोर, इत्‍तस्के आ देय्याल्क ओराव्टेटाल पेय्सि पद्‍दिना मंदाते होत्‍तां. हुळाट! पजा आ पद्‍दिना मंदा समुद्रम ओड्‍डुन पोर्रोटाल हिळतुक वितसि एते मुळ्‍गिसि हासोत्‍तां.
MAT 8:33 अस्‍के आ पद्‍दिं मेहानोर नाटे वित्‍सि होंचि अगा जर्गतद आनि आ देय्याल्क पीतोरद बतल आता अन्‍नि वेहतुर.
MAT 8:34 हुळाट! अस्‍के पूरा नाटेना लोकुल्‍क येसुंक कलियालय वातुर. वासि ओर बस्के अय्ते येसुन हूळतुरो अस्‍के, “मावा एरियाताल पेय्सि होन,” इंचि ओन विनंति कीतुर. बारित्‍ते पद्‍दिं हाताहेंका अद नाटेनोरद वेल्‍लेन नुकसान आता.
MAT 9:1 येसु डोंगाते उदिस सेरवु दाटसि ओना सहर मल्सि वातोर.
MAT 9:2 हूळा! अस्‍के इच्‍चुर लोकुल्‍क वरोर लकवा बिमारतोन कटुलते वाटसि येसुनगा तत्‍तुर. ओरा विस्वासमतुन हूळसि येसु लकवा बिमारतोन, “कोको, दैरनेम इर्रा. नीवा पापाल्क मापि आतां,” इंचि इत्‍तोर.
MAT 9:3 अस्‍के हूळा, “ई मनकल पेनदा अपमानम कीसंतोर.” इंचि अगा मत्‍ता दर्मसास्‍त्रम कराहना गुरुल्क ओर-ओरे गुसगुसा इनालय दल्‍गुतुर.
MAT 9:4 ओरा विचाराल्क एरपाट कीसि येसु ओर्कुन इल्‍हा इत्‍तोर, “मी मनसुने मिमेट कराब विचाराल्क बारि कींतिर?
MAT 9:5 बद अल्कगा मंता? बिमारतोन, ‘नीवा पापाल्क मापि आतां इंचि इनमळा, हिलाकोंटे तेदिस ताका इनमळा?’
MAT 9:6 गानि मनकना रूपमते पुटतोन नाकु बूमिपोर्रोटा पापाल्कुन माप कियना अदिकारम मंता इंचि मिमेट एरपाट कियमळ गावाले,” इंचि इत्‍तोर. आ लकवा बिमारतोनगुडा “तेदसि कटुल पीसि लोन होन,” इंचि वेहतोर.
MAT 9:7 ओर तेदसि लोन होत्‍तोर.
MAT 9:8 अगा मत्‍ता लोकुल्‍कुंक अद हूळसि वेरियसि इचंत्रम आता. “इच्‍चोर पेद्‍दा अदिकारम पेन मनकालोर्कुंक हीता,” इंचि आ पेनदा स्‍तुति कीतुर.
MAT 9:9 आयंका येसु अगटाल होननेंके मत्‍तयाल इनना वरोर मनकल कर वसुल कियना नाकातगा उद्‍दिसि मत्‍तद हूळतोर. ओन नावा पज्जो वा! इंचि इत्‍तस्के ओर तेदसि ओना पज्जो होत्‍तोर.
MAT 9:10 पजा येसु मत्‍तयाना लोन गाटो तिंचेके मननेंके वेल्‍लेटुर कर वसुल कियानोर आनि पापि लोकुल्‍क वासि येसु आनि ओना सिस्युल्कुनतोनि गाटो तिनालय उदतुर.
MAT 9:11 अदुन हूळसि, “मी गुरु कर वसुल कियानोरतोनि आनि पापि लोकुल्‍कुनतोनि गाटो बारि तिंतोर?” इंचि परिसिल्क ओना सिस्युल्कुन पूसकीतुर.
MAT 9:12 अस्‍के येसु अद केंजसि ओर्कुन इल्‍हा इत्‍तोर, “बिमार हिल्‍वोर्कुंक डाक्‍टरना अव्‍सरम मन्‍नो गानि बिमार मत्‍तोर्कुंक डाक्‍टरना अव्‍सरम मनंता. अदुनहाटीं, मिमेट होंट, होंचि ‘नना कोरानद दया आंद, मोक्‍कु आयो,’ इंचि दर्मसास्‍त्रमते रासि मनना पोल्‍लेता अर्तमतुन तेळियागोटकुंटु. बारित्‍ते नना नीतिमंतुल्‍कुन केयालय आयो गानि पापि लोकुल्‍कुन केयालय वातन,” इंचि इत्‍तोर.
MAT 9:14 आयंका बापतिस्मा हियना योहानुना सिस्युल्क येसुनगा वासि, “गुरु, परिसिल्क आनि मोमोट ऊके ओक्‍कापोद्‍दु मनंतोम गानि नीवा सिस्युल्क बस्‍केने ओक्‍कापोद्‍दु मन्‍नुर. अल्हा बारि?” इंचि पूसकीतुर.
MAT 9:15 अस्‍के येसु ओर्क इल्‍हा वेहतोर, “मरमिन पेडल मरमिं वाता हेडमितोरतोनि मननेंके, ओर्कु दुक्‍कम आयाना अव्‍सरम मनंतना? मन्‍नो. गानि मरमिन पेडल ओरागटाल लक्‍कु आयाना रोजकु वायनुं, अस्‍के ओर ओक्‍कापोद्‍दु मनानुर.”
MAT 9:16 पजा येसु ओर्कु रोंडु सिन्‍ना वेसुडिं वेहतोर. “बोरे आयिर, पडना कप्‍पिड हर्ते दानकु पूना कप्‍पिडता गंडा अंटा वाट्‍सि कुट्‍टोर. अल्हा कुट्‍टानय्ते अंटा वाटता कप्‍पिड गंडा पडना कप्‍पिडतुन इंकिच्‍चो हरहंता.
MAT 9:17 अल्‍हेने पूना अंगुर पानकमतुन पडना तोलपुर्काते बोरे दोस्सुर. ओक्‍कला दोस्‍सानय्ते आ तोलपुर्का पय्सि पानकम पोंगिस दांता आनि तोलपुर्कागुडा नासडेम आंता. इंचि पूना अंगुर पानकम पूना तोलपुर्कातेन दोसंतुर. अस्‍के रोंडुगुडा बेस मनंतां.” इंचि वेहतोर.
MAT 9:18 इव पोल्‍लें येसु ओरतोनि वळकसेके मन्‍नेंकेन, दर्मसास्‍त्रम कराहना लोता वरोर अदिकारि अगा वासि, “नावा मिय्यड इंदकेने हाता गुरु, गानि निमे वासि दानपोर्रो कय इरते, दान्क मर्रा जीवा अर्रंता,” इंचि येसुना काल्कुनपोर्रो अर्सि विनंति कीतोर.
MAT 9:19 अस्‍के येसु तेदसि, ओना सिस्युल्कुनतोनि आ अदिकारिन पज्जो होत्‍तोर.
MAT 9:20 होननेंके पन्‍नेंड वर्सानाल उंदेतीर कप्‍पिड आयना मुरतळ कलियता. कलियसि, “नना सिराप येसुना कप्‍पिडतुन इट्‍टिनागानि बेस आंतन,” इंचि दाना मनसुने इनकुत्‍ता. आनि पज्जोटाल वासि ओना कप्‍पिडता अंचुन इट्ता.
MAT 9:22 इट्तारित्‍ते येसु पज्जो मल्सि हूळसि, “दैरनेम इर्रा पेगिटुना, नीवा विस्वासमे नीकुन बेस कीता,” इंचि इत्‍तोर. अस्‍केने अद बेस आता.
MAT 9:23 पजा ओर दर्मसास्‍त्रम कराहना लोता अदिकारिना लोन होत्‍तस्के, हामुरता डोलकु-बाजें, लोकुल्‍क जमा आसि अळानद, मोत्‍कुनानद हूळतोर.
MAT 9:24 अस्‍के येसु ओर्कुन “पलाते होंट पेगिड हाया हिल्‍ले, अद अय्ते मींडसि मंता.” इंचि इत्‍तोर. अस्‍के लोकुल्‍क येसुन कव्‍तुर.
MAT 9:25 अगा मत्‍ता लोकुल्‍क पलाते पेय्सतारित्‍ते, येसु पेगिड मत्‍ता अर्राते होळियसि दाना कयदुन पीतोर अस्‍के अद तेदसि उद्‍दुता.
MAT 9:26 अद पोल्‍ले पूरा एरिया अंता तेळियसि होत्‍ता.
MAT 9:27 येसु अगटाल पेय्सि होननेंके, इव्वुर गुड्‍डोर्क ओना पज्जो-पज्जो होंचि, “ए दाविद राजाना वंसमतोना! निमे मापोर्रो दया कीम.” इंचि वरगेयतुर.
MAT 9:28 येसु लोता लोप्पो होळियतस्‍के ओर गुड्‍डिर ओनगा वातुर. अस्‍के येसु ओर्कुन, “नना बेस कींतन इंचि मीकु विस्वासम मंताना?” इत्‍तस्के, “हो सामि,” इंचि ओर इत्‍तुर.
MAT 9:29 “अल्हा अय्ते मीवा विस्वासम मत्‍तापे आयि,” इंचि येसु ओरा कळ्‍कुन इटतोर.
MAT 9:30 अस्‍केन ओरा कळ्‍कु दिसालय दल्‍गतां. पजा येसु ओर्कु, “इद पोल्‍ले बोर्के तेळियामन्‍नि.” इंचि गट्‍टिगा हुकुम हीतोर.
MAT 9:31 गानि ओर अगटाल होंचि, ओना बारेमते पूरा एरिया अंता तेळियागोटतुर.
MAT 9:32 ओर इव्वुर अगटाल पेय्सि होननेंके, लोकुल्‍क वरोर देय्यम पीता मूकन येसुनगा तत्‍तुर.
MAT 9:33 येसु देय्यमतुन पेचाहतोर, अस्‍के मुन्‍ने वळकुवा मूकल वळकालय दल्‍गतोर. इदुन हूळसि अंटोर लोकुल्‍क इचंत्रमते, “इस्राएल देसेमते इल्‍हा आतद बस्‍केने हूळा हिल्‍लोम,” इंचि इत्‍तुर.
MAT 9:34 गानि परिसिल्क, “ईर अय्ते देय्याल्कुना मुक्‍यना बलमते देय्याल्क तेंडांतोर,” इंचि इत्‍तुर.
MAT 9:35 पजा येसु अगाटा दर्मसास्‍त्रम कराहना लोतागा पेनदा पोल्‍लें कराहतोर. स्वर्ग राज्येम बारेमते बेसता कबुर वेहचेके, लोकुल्‍कुना अन्‍नि तीरकुना रोगाल्‍कुन, कमजोरिन बेस कीसेके अन्‍नि सहरकुने, नाह्कुने तिरियतोर.
MAT 9:36 तिरियनेंके येसुन नदर लोकुल्‍कुनपोर्रो होत्‍ता. कोहानोर हिल्वा गोर्रें बल्हा तकांचि, सिल्‍लर-सिल्‍लर आसि मनांतंगो अल्हा आ लोकुल्‍क आसि मत्‍तुर, इंचि ओर्कुन हूळसि येसुंक दया वाता.
MAT 9:37 अस्‍के ओर ओना सिस्युल्कुन “पंटा वेल्‍लेने पंडुता, गानि बूतिनोर तक्‍को मंतुर.
MAT 9:38 अदुनहाटीं पंटाता मालकुंक बूतिनोर्कुन पंटा कोय्‍यालय लोहा इंचि विनंति कीम्‍टु,” इंचि वेहतोर.
MAT 10:1 येसु ओना पन्‍नेंड सिस्युल्कुन दग्‍गेरा केय्‍सि, ओर्कु देय्याल्क गेदमना अदिकारम हीतोर. अचोने आयका अन्‍नि तीरकुना रोगाल्क, बादन बेस कियना अदिकारमगुडा हीतोर.
MAT 10:2 आ पन्‍नेंडु मंदि प्रेरितुल्कुना पोरोलीं इल्‍हा मंतां: मोदाला सिमोन (ओन पत्रुगुडा इंतुर), ओना तम्मुर अंदरियल, जब्‍दिना इव्वुर मर्क याकोब, योहान,
MAT 10:3 पिलिप, बरतलमय, तोमल, कर वसुल कियना मत्‍तयाल, अल्‍पिना मर्रि याकोब, तद्‍दि,
MAT 10:4 सिमोन कनानि, इस्‍कारियोत यहुदल (ईरे येसुन पीसि हीतोर).
MAT 10:5 ई पन्‍नेंड मंदि सिस्युल्कुंक येसु इसोंटा हुकुम हीसि लोहचीतोर: यहुदि आयवोरा नड्‍डुम होनमट, सामरिया लोकुल्‍कुना बद्‍दे नाटेने होळियमट.
MAT 10:6 दानकु बदुलु इस्राएलता तप्‍सोत्‍ता आ गोर्रेनहेके होंट.
MAT 10:7 मिमेट होनानेंके, “स्वर्ग राज्येम दग्गेर्क एव्ता,” इंचि वेहासेक होंट.
MAT 10:8 रोगाल्‍कुन बेस कीम्‍टु, हातोर्कुंक जीवा अरहट, कुस्‍टरोगम आतोर्कुन बेस कीम्‍टु, देय्याल्कुन गेदमिसिम्टु. मीकु ई हक्‍कु पुक्‍कटते दोर्कुता इंचि मिमेट इंका इसोंटा सेवा पुक्‍कटते कीम्‍टु.
MAT 10:9 होननेंके मी नडिक बंगारम, एंडि, रागिता कोत्‍तां इरमट.
MAT 10:10 जोरा ओयमट, एक्‍कोतव अंगिं, हेरपुह्क ओयमट. दुड्‍डुगुडा ओयमट. बारित्‍ते कबळ कियनोंक ओना बूति ओन्क दोर्कमळ गावाले.
MAT 10:11 मिमेट मोदाला बद नाटे, बद सहरते अय्ते दांतिटो, अद नाटे वरोर बेसता मनकना बारेमते जाडा कीम्‍टु. मिमेट अगटाल पेय्सि होननाल ओना लोने मंटु.
MAT 10:12 मिमेट लोते होळियनेंके, “सांति मन्‍निकांटी,” इंचि होळियट.
MAT 10:13 ओक्‍कला आ लोन बेसतद आते मिमेट हीता सांति अगा मनंता. गानि ओक्‍कला आ लोन बेसतद आयाकोंटे मिमेट हीता आ सांति मिहागेन वापस वांता.
MAT 10:14 बोर अय्ते मीकुन लोप्पो वाया हिय्‍युरो मी पोल्‍लें केंजुरो अस्‍के ओना लोतालो मरि नाटेनालो पेय्सनेंके मिमेट मी कादा दुब्बा अग्गेन दुल्‍पिसि पेय्‍सट.
MAT 10:15 नना मीकु निजम वेहासेक गदा, पेन न्‍यायम कियना रोजुने सदोम आनि गमोरा सहरकुना परिस्तिति आ नाह्‍कुंकन्‍ना बच्‍चोरो बेस मनंता.
MAT 10:16 हुळाट, तोडेल्‍लिन लोप्पो गोर्रेन लोहताप नना मीकुन लोहचंतन, इंचि मिमेट तरासुनलेसीं जेगर्ता आनि पावरेम पिट्‍टेनलेसीं इमानदार मंटु.
MAT 10:17 मनकालोर मीकुन पंचादितोरा कय्‍दे अप्‍पजेपनुर आनि दर्मसास्‍त्रम कराहना लोह्कुने ओसि मीकुन पोट्‍टे देब्बांगुडा तना परांतुर. इंचि मिमेट मनकालोरागटालगुडा जेगर्ता मंटु.
MAT 10:18 नाहेंका मीकुन ओर राज्यपाल आनि राजालोरा मुन्‍ने ओयानुर अस्‍के ओरा मुन्‍ने, विस्वासम कियवोरा मुन्‍ने नावा बारेमते मिमेट गवाइदार्क आकिट.
MAT 10:19 वळकानोर मिमेट आयो मीलोप्‍पो मनना पेनबाबाना आत्मा आंद. अदुनहाटीं मीकुन बस्के अय्ते ओरा कय्‍दे अप्‍पजेपंतुरो अस्‍के अगा बतल वळ्कना, बतल वळ्‍कानायो इंचि रंदि कियमट. वेलापोर्रेन मिमेट बतल वळकुगोमो अद मीकु पेन वेहंता.
MAT 10:21 कासा दादल-तम्मुह्‍क पगां आसि हव्कालय अप्‍पजेपनुर. पिलाल्क ओरा तल्‍लुर-बाबोंक अड्‍डम तिरियसि ओर्कुन हव्का वेहांतुर.
MAT 10:22 नावा पोरोलताहेंका अंटोर लोकुल्‍क मीकुन हय्सुर. गानि बोर अय्ते आकिरदाका ओर्सकुंचेके ओप्के पीसि मनंतुर, ओर्के मुक्‍ति दोर्कंता.
MAT 10:23 मीकुन उंदि नाटे तकलिप हियानय्ते मिमेट इंकुंदि नाटे पेय्सि होंट. नना निजम वेहासेक मंतन, इस्राएलता अन्‍नि नाह्कुने तिरियसि पेनदा बेसता कबुर वेहामळ मारवा मुन्‍नेने मनकना रूपमते पुटतोन नना वांतन.
MAT 10:24 गुरुंकन्‍ना सिस्युड पेद्‍दोड आयोर, अल्‍हेने मालकुंकन्‍ना जीतागाड पेद्‍दोड आयोर.
MAT 10:25 सिराप सिस्युड गुरुनलेसीं, जीतागाड मालकुनालेसीं आयगोम अचोने सालु. ओक्‍कला लोता मालकुन नाकुने बेलजेबुल इनानय्ते, लोते मनना मीवद अंटोरद बद गति आयार!
MAT 10:26 गानि ओर्कु मिमेट वेरियमट. मुच्‍चिसि मत्‍तव अन्‍नि पोल्‍लें बय्यर आंता, तेळियाकोंटा मत्‍तव अन्‍नि वस्‍तुक पलातुक वांतां.
MAT 10:27 नना मीकु हीकटते वेहतवुन, मिमेट वेलगुने होंचि वेहट. नना मी केव्‍कुने वेहतवुन मिमेट येनागर्रापोर्रो एक्‍किसि वेहट.
MAT 10:28 बोर अय्ते मीवा मेंदुल्तुन हव्का परांतुर गानि मी आत्मातुन हव्का परुर ओर्क मिमेट वेरियमट. गानि बोर अय्ते मेंदुल्तुन आनि आत्मातुन नरकमते वाट्‍सि नासडेम किया परांतोर ओन्‍के वेरियट.
MAT 10:29 रोंडु कोळ्‍का पिट्‍टें रोंडु कोत्‍तांकु अम्मुड दांतां गदा! अय्नागानि पेनबाबाना इच्‍चा हिल्वा अवुनाल उंदिगुडा बूमिपोर्रो अर्रो.
MAT 10:30 मीवा तल्‍लाता उंदि-उंदि केल्‍लु लेक्‍किस मंता.
MAT 10:31 अदुनहाटीं वेरियमट! पेनदा मुन्‍ने मिमेट वेल्‍लेन कोळ्‍का पिट्‍टेंकन्‍ना बच्‍चोरो विल्‍वा मत्‍तोर आंदिर.
MAT 10:32 बोर अय्ते लोकुल्‍कुना मुन्‍ने नाकुन एरपाट कींतन इंचि ओप्‍कुंतोरो, ओन ननागुडा स्वर्गमते मनना पेनबाबाना मुन्‍ने नावा सिस्युड इंचि ओप्‍कुंतन.
MAT 10:33 गानि बोर अय्ते लोकुल्‍कुना मुन्‍ने नाकुन एरपाट किय्योन इंतोरो, ननागुडा ओन नावा स्वर्गमते मनना पेनबाबाना मुन्‍ने एरपाट किय्योन इंतन.
MAT 10:34 नना इद बूमिपोर्रो सांति हियालय वातन इंचि इनकुनमट. मर्रिनद बाबोनतोनि अर्राकोंटा, मिय्‍याटद तल्‍लुनतोनि अर्राकोंटा आनि कोळियाटद पोरळतोनि अर्राकोंटा कियालय नना वातन. इंचि नना सांति हियालय आयो गानि ओर्कुन वेरे-वेरे कियालय वातन.
MAT 10:36 मनकना पगातोर ओना लोतोर्के आयानुर.
MAT 10:37 बोर अय्ते तल्‍लुर-बाबोन पोर्रो नाकन्‍ना एक्‍को पावरम कींतोर, ओर नावा सिस्युड आयनलायक हिल्‍लोर. बोर अय्ते मियाह्क-मर्कुन पोर्रो नाकन्‍ना एक्‍को पावरम कींतोर, ओरगुडा नावा सिस्युड आयनलायक हिल्‍लोर.
MAT 10:38 बोर अय्ते ओना सतता क्रुस पीसि नावा पज्जो वायोन इंतोर, ओरगुडा नावा सिस्युड आयनलायक हिल्‍लोर.
MAT 10:39 बोर अय्ते ओना जीवातुन पिसागोटालय हूळांतोर, ओर ओना जीवातुन पोगोटकुंतोर. बोर ओना जीवातुन नावाहाटीं पोगोटंतोर, ओन्क जीवा दोर्कंता.
MAT 10:40 बोर अय्ते मीकुन दग्‍गेरा कींतोर, ओर नाकुन दग्‍गेरा कीतापे. बोर अय्ते नाकुन दग्‍गेरा कींतोर, ओर नाकुन लोहता पेनदुनगुडा दग्‍गेरा कीतापे.
MAT 10:41 बोर अय्ते पेनदा कबुरतोन, कबुरतोर इंचि ओप्‍कुंतोर ओन्क पेनदा कबुरतोंकु दोर्कना इनाम दोर्कंता. नीतिमंतुन नीतिमंतुड इंचि बोर ओप्‍कुंतोर ओन्क नीतिमंतुक दोर्कना इनाम दोर्कंता.
MAT 10:42 ओक्‍कला बोरन्‍ना, ई सीदा-सादा सिस्युल्कुना लोप्पोटाल वरोंकु, नावा सिस्युड इंचि गिलासमेड सल्‍लाटेर उनालय हियानय्ते, नना मीक निजम वेहांतन, ओन्क तप्‍पाकोंटा इनाम दोर्कंता.
MAT 11:1 येसु ओना पन्‍नेंडु सिस्युल्कुंक आदेस हीतारित्‍ते, अगटाल पेय्सि गालिल एरियाता नाहकुने प्रचार कियालय आनि पेनदा पोल्‍लें कराहलय होत्‍तोर.
MAT 11:2 बापतिस्मा हियना योहान जेलने मत्‍तस्के किरिस्‍तुना कबाह्‍कुना बारेमते केंजतोर. अस्‍के ओर ओना सिस्युल्कुंक इल्‍हा पूसकियालय येसुनहेके लोहतोर. “बोर अय्ते पिसागोटनोर वायानद मत्‍ता ओन निमेन ना? हिलाकोंटे मोमोट इंकावरोना एदुर हूळमळा?”
MAT 11:4 येसु ओर्कु इल्‍हा जवाब हीतोर. “बतल अय्ते मिमेट केंजसंतिरो, हूळसंतिरो अवुन योहानुनगा होंचि वेहट.
MAT 11:5 गुड्‍डोर्क हूळसंतुर, कुंटोर्क ताकसंतुर, कुस्‍टरोगम आतोर बेस आसंतुर, सेव्टोर्क केंजसंतुर, हातोर्कुंक जीवां अरसंतां आनि गरिबोर्कुंक बारे बेसता कबुर एवसंता.
MAT 11:6 बोर अय्ते नावा बारेमते अन्‍समन्‍स किय्योर, ओन्‍के आसिर्वाद दोर्कंता,” इंचि इत्‍तोर.
MAT 11:7 योहानुना सिस्युल्क अगटाल पेय्सि होत्‍तस्के, योहानुना बारेमते येसु लोकुल्‍कुंक इल्‍हा वेहालय दल्‍गतोर, “मिमेट बय्‍लि जेगाते बतल हूळालय होत्‍तिर? वळिक ऊंगना जाडितुना?
MAT 11:8 मिमेट बतल हूळालय होंचि मत्‍तिर? मेत्‍तटा कपडिं केर्ता मनकन हूळालय होत्‍तिरा? मेत्‍तटा कपडिं केर्रानोर राजवाडाने मनांतुर.
MAT 11:9 अय्ते मरि मिमेट बतल हूळालय होत्‍तिर? पेनदा कबुरतोन हूळालय होत्‍तिरा? हो. नना मीकु वेहासेक मंतन, मिमेट बोन अय्ते हूळतिर ओर पेनदा कबुरतोनकन्‍ना बच्‍चोरो पेद्‍दा मंतोर.
MAT 11:10 ओना बारेमते पेन इल्‍हा वेहचि मत्‍ता. हूळा! नना नीकन्‍ना मुन्‍नेने नावा कबुरतोन लोहंतन, ओर नीवाहाटीं हर्रि तयार कींतोर. इंचि दर्मसास्‍त्रमते रासि मंता.”
MAT 11:11 नना मीकु निजम वेहासेक मंतन, पुट्तोराव्‍टेटाल बापतिस्मा हियना योहानुंकन्‍ना पेद्‍दा बोर पुट्‍टा हिल्‍लुर. अय्नागानि स्वर्ग राज्येमते सिन्‍ना मनकलगुडा योहानुंकन्‍ना पेद्‍दोडे.
MAT 11:12 बापतिस्मा हियना योहानुना रोजकुनस्केटाल अय्ते इदवेरदाकागुडा लोकुल्‍क स्वर्गमते जबरदस्‍तिते होळियसेक मंतुर. गानि बदमास लोकुल्‍क मात्रम अड्‍डम तिरियसि आपालय हूळसंतुर.
MAT 11:13 बारित्‍ते योहानुन दाका मूसाल आनि अंटोर पेनदा कबुरतोर स्वर्ग राज्येमता बारेमते बविस्यवानिं कीसेक मत्‍तुर.
MAT 11:14 मिमेटगिंटा अव बविस्यवानिन ओपकुनानय्ते, पेनदा कबुरतोर एलियाल वायनद मंता इंचि इत्‍तुर, ओर ईरे योहान आंदुर.
MAT 11:15 बोर्कु केंजालय केव्क मंतां ओर केंजट.
MAT 11:16 “गानि नना ई पीळिता लोकुल्‍कुन बोरा लोप्पो कल्‍पकन? मिमेट अय्ते बजारते उद्‍दिसि, वरोंक-वरोर केय्‍सि,
MAT 11:17 मोमोट मीहाटीं तूरीला उह्कुतोम, गानि मिमेट एगरा हिल्‍लिर. मोमोट दुक्‍कमता पाटां पारतोम, गानि मिमेट अळा हिल्‍लिर, इंचि इनना पिलाल्कुनालेसीं मंतिर.
MAT 11:18 बारित्‍ते योहान बतल तिनाकोंटा उनाकोंटा वातोर. अयना लोकुल्‍क मात्रम ओन देय्यम पीता इनुंदुर.
MAT 11:19 अल्हेन मनकना रूपमते पुटतोन नना तिंचेके-उंचेके वातन गानि लोकुल्‍क मात्रम, हुळाट, ईर बच्‍चोर तिंतोर, बच्‍चोर उंटोर? कर वसुल कियानोर आनि पापि लोकुल्‍क ईना दंटातोर आंदुर, इत्‍तुर. गानि पेनदा बुद्‍दि सत्‍तेमतद आंद इंचि, दाना बुद्‍दिते ताकानोर कियाना कबाह्‍कुन पोर्रोटाल तेळियंता,” इंचि वेहतोर.
MAT 11:20 आयंका येसु बव नाह्कुने एक्‍को अद्‍बूताल्‍क कीतोरो, आ नाहकुना लोकुल्‍क मनसु मार्सकुंचि पेनदाहेके तिरिया हिल्‍लुर. दानहाटीं येसु आ नाह्कुन पोर्रो दोसेम दोसतोर.
MAT 11:21 “ए कोरजिना आनि बेतसेदा नाटेना लोकुरिटा, मीकु गोसा तप्‍पो! ओक्‍कला मिहगा बव अद्‍बूताल्‍क आतां, अवे गिंटा सूर, सिदोन नाह्कुने आसि मत्‍ते अगाटा लोकुल्‍क बिराना बोंतां हुट्‍सि, मेंदुल्क बूळ्‍दि होकसि, दुक्‍कमते मनसु मार्सकुंचि मन्‍नेर.
MAT 11:22 गानि नना मीकु वेहासेक गदा, पेन न्‍यायम कियना रोजुने सूर आनि सिदोनतुरा परिस्तिति मीकन्‍ना बच्‍चोरो बेस मनंता.”
MAT 11:23 “ए कपर्नाहुम सहरता लोकुरिटा, मिमेट स्वर्गमते दांतोम इनकुंचंतिरा? मिमेट नरकमते दांतिर. ओक्‍कला मिहगा जर्गता अद्‍बूताल्‍क सदोम सहरते जर्गिसि मत्‍ते, अद सहर इदवेरादाका आगवड.
MAT 11:24 गानि नना मीकु वेहासेक गदा, पेन न्‍यायम कियना रोजुने सदोम सहरता परिस्तिति मीकन्‍ना बच्‍चोरो बेस मनंता,” इंचि इत्‍तोर.
MAT 11:25 आ वेलाते येसु इल्‍हा इत्‍तोर: “ए नावा बाबा, बूमि आनि स्वर्गमता सामि, तेल्‍विगल्‍लोर्क आनि समजदार लोकुल्‍कुनगटाल इव पोल्‍लें मक्‍किचि इरतिन, सादा-सिंपल लोकुल्‍कुंक बारे इव पोल्‍लें हुपिस्‍तिन, इंचि नना नीवा स्‍तुति कीसेक मंतन.
MAT 11:26 हो बाबा! नीकु इदे बेस अनपिस्ताहाटीं निमे इल्‍हा कीतिन.”
MAT 11:27 मर्रा येसु लोकुल्‍कुनतोनि इल्‍हा वळकुतोर. “नावा बाबाल नाकु अन्‍नि अप्पजेपतोर. बाबान तप्‍पा मर्रिन बोरे एरपाट किय्युर, मर्रिन तप्‍पा बाबान बोरे एरपाट किय्युर. मर्रि ओना इस्‍टमाताप बाबाना बारेमते बोर्क अय्ते तेळियानाल वेहांतोर ओरे बाबान एरपाट कींतुर.”
MAT 11:28 “अरे बर्वु कांजसि नेरबडता लोकुल्‍कुनिटा! मिमेट अंटोर नाहेके वट, नना मीकु आराम हींतन.
MAT 11:29 ना कांडी मिमेट तेहाकुंचि नावातोनि करियट, नना बेस आनि सादा-सिंपल मंतन. इंका नावा कांडी सवरगा मंता नावा बर्वु अल्कगा मंता. इंचि मी आत्माकु सांति दोर्कंता.”
MAT 12:1 उंदि नोमकेम रोजुने येसु आनि सिस्युल्क पोलाल्‍कुनाल होंचेके मत्‍तुर. अस्‍के सिस्युल्कुंक कर्वेस्‍सि मत्‍ताहेंके हेनकु नल्‍सि तिंचेक मत्‍तुर.
MAT 12:2 परिसिल्क अदुन हूळसि, “हूळा! नोमकेम रोजुने बद कबळ अय्ते कियमळ नियम परकारम ओज्‍जोनो, अदे कबळ नीवा सिस्युल्क कीसंतुर,” इंचि येसुन इत्‍तुर.
MAT 12:3 अस्‍के येसु ओर्कुन, “दाविदुंक आनि ओना दंटातोर्कुंक कर्वेस्‍तस्‍के ओर बतल कीतोर, मिमेट हदवा हिल्‍लिरा?
MAT 12:4 ओर पेनदा गुळिते होळियसि, पेनदुक मोळ्कता हारिन अंटोर तित्‍तुर. अव हारिं तिनमळ इत्‍ते दर्मसास्‍त्रम परकारम विरोदमते मत्‍ता. अव हारिं सिराप पेर्मालोर्क तप्‍पा इंका बोरे तिना पर्रुर.
MAT 12:5 अचोने आयका पेर्मालोर्क नोमकेमता रोजु गुळिते कबळ कींतुर इत्‍ता संगति मूसाना नियमते मंता इद मीकु एर्के मंता. अल्हा कियमळ तप्पु आयो.
MAT 12:6 नना कोरानद दया आंद, मोक्‍कु आयो, इंचि दर्मसास्‍त्रमते रासि मनना पोल्‍लेना अर्तम मीकु तेळियसि मत्‍ते ई दोसेम हिल्वोरपोर्रो मिमेट दोसेम दोस्‍सा कोन्‍नेर. नना वेहनद बतल इत्‍ते, गुळिकन्‍ना पेद्‍दोड वरोर इगे मंतोर. बारित्‍ते मनकना रूपमते पुटतोन नना, नोमकेमता रोजुना मालकगुडा आंदुन.” इंचि इत्‍तोर.
MAT 12:9 येसु अगटाल पेय्सि यहुदिल्कुना दर्मसास्‍त्रम कराहना लोते होत्‍तोर.
MAT 12:10 अगा वरोर कय वत्‍सोत्‍ता मनकल मत्‍तोर. येसुन बल्हा तप्पुने पियना इंचि, “नियम परकारम, नोमकेम रोजुने बोनना बेस कियमळ बेसा, बेस आयोना?” इंचि परिसिल्क ओन पूसकीतुर.
MAT 12:11 अस्‍के येसु ओर्कुन इल्‍हा इत्‍तोर, “मिहागटाल बोनागन्‍ना उंदि गोर्रे मंता इनकुंटु, अदगिंटा नोमकेम रोजुने पोक्‍काते अर्रानय्ते दान तेंडिरा? तेंडांतिर!
MAT 12:12 इगे अय्ते, गोर्रेकन्‍ना मनकना जीवाक बच्‍चोरो विलवा मंता! अदुनहाटीं दर्मसास्‍त्रम परकारम नोमकेम रोजुने बेस किया परांतिर,” इंचि इत्‍तोर.
MAT 12:13 अस्‍के येसु, “नीवा कय मुन्‍नेळ्‍क हहा,” इंचि कय वत्‍सोत्‍तोन इत्‍तोर. ओर कय मुन्‍नेळ्‍क हाहतस्‍के अद कय इंकुंदि कयदालेसीं बेस आता.
MAT 12:14 पजा परिसिल्क अगटाल पलाते पेय्‍स्‍तुर. पेय्सि, येसुन बल्हा हव्कना? इंचि येसुना विरोदमते वळ्‍क्‍कुत्‍तुर.
MAT 12:15 ओर वळकानद कन्‍कुंचि येसु अगटाल पेय्सि होत्‍तोर. वेल्‍लेटुर लोकुल्‍क ओना पज्जो होत्‍तुर. अस्‍के येसु ओर्कुन अंटोर्कुन बेस कीतोर.
MAT 12:16 पजा, “नावा बारेमते बोर्के बतले वेहमट इंचि अंटोर्क हुकुम हीतोर.”
MAT 12:17 इत्‍ते यसायाह इनना पेनदा कबुरतोर इत्‍तव पोल्‍लें पूरा आयना इंचि येसु सामि इल्‍हा कीतोर.
MAT 12:18 यसयाना बविस्यवानि इल्‍हा मत्‍ता: “ईर नावा सेवक आंदुर, ईन नना पेर्कुत्‍तन. नना ईन पावरम कींतन ईना बारेमते कूस मंतन. नना नावा पवित्र आत्मा ईना पोर्रो इर्रंतन, ईर नावा न्‍यायमतुन अन्‍नि जातिनोर्क वेहांतोर.
MAT 12:19 ईर बोनतोने तेरहानोर आयोर, जोरते वरगेयानोर आयोर, हरकुन पीसि लोकुल्‍कुंक ईना अल्किर केंजा वायो.
MAT 12:20 नावा न्‍यायम गेल्सनाजेम ईर दुरसोत्‍ता बोंगुनगुडा उरहोरु, इंका पिर्रना वेडसितुनगुडा पिरहोर.
MAT 12:21 दानहाटीं अन्‍नि जातिनोर ईना पोरोलते आसेते मंदनुर.”
MAT 12:22 पजा वरोर देय्यम पीता गुड्‍डि-मूकन लोकुल्‍क येसुनगा तत्‍तुर. येसु ओन बेस कीतोर. अस्‍के आ मनकल हूळालय-वळकालय दल्‍गतोर.
MAT 12:23 इदुन हूळसि अगाटा अंटोर लोकुल्‍क इचंत्रमते, “वरोर दाविद राजाना तंतुने पुट्‍टनोर मत्‍तोर, ओर ईरे आयोर गदा?” इंचि इत्‍तुर.
MAT 12:24 गानि अगा मत्‍ता परिसिल्क दीन केंजसि, “ईर अय्ते बेलजेबुल इनना देय्याल्कुना मुक्‍यना बलमते देय्याल्क तेंडांतोर” इंचि इत्‍तुर.
MAT 12:25 परिसिल्कुना मनसुना विचाराल्कुन एरपाट कीसि येसु ओर्कुन इल्‍हा इत्‍तोर, “बद राज्येम लोप्पो वरोना पोल्‍ले-वरोंक अर्राकोंटा आंता, अद राज्येम पाडासि दांता. अल्‍हेने लोते आयि, नाटे आयि वरोना पोल्‍ले-वरोंक अर्राकोंटे बतले नित्‍तापर्रो.
MAT 12:26 अल्‍हेने देय्यम दाना दंटाता देय्याल्कुन पेचाह्‍चि गेदुमते, अवुना लोप्पेन अर्राकोंटा आंता. अस्‍के अवुना राज्येम बल्हा नित्‍तंता?
MAT 12:27 मिमेट इत्‍ताप नना ओक्‍कला बेलजेबुलना सहायमते देय्याल्कुन गेदमंतन इन्‍कुंटु. गानि मीवा लोकुल्‍कगुडा देय्याल्कुन गेदमंतुर, ओरगुडा देय्यमता सहायमतोने गेदमंतुरा? अदुनहाटीं मीवा लोकुल्‍के मीवा न्‍यायम कींतुर.
MAT 12:28 गानि नना ओक्‍कला पेनदा आत्माता सहायमते देय्याल्कुन गेदमानय्ते, पेनदा राज्येम मीवा दग्गेर्क एव्ता इंचि एरपाट कीम्‍टु.
MAT 12:29 बोरे आयिर, वरोर ताकतवर मनकना लोते होळियसि ओना सामानतुन दोंगा कियना इत्‍ते, मोदाला आ ताकतवर मनकन दोहचि वाटतेन, दोंगा किया परांतोर.
MAT 12:30 बोर अय्ते नावा दंटाते मन्‍नोर, ओर नावा विरोदमते मंतोर, बोर अय्ते नाकु सहायम किय्योर, ओर नाहगटाल पायिचना कबळ कींतोर.”
MAT 12:31 नना मीकु वेहनद बतल इत्‍ते, मनकना अन्‍नि पापाल्कुन, ओर कीता अपमानमतुन पेन मापि किय्‍यार. गानि पवित्र आत्माता अपमानम कियानोन मात्रम पेन माप किय्‍यो.
MAT 12:32 अल्‍हेने मनकना रूपमते पुटतोन नाकु विरोदमते बोर वळ्‍किना, पेन ओना तप्‍पुकुन मापि किय्‍यार. गानि पवित्र आत्माकु विरोदमते वळ्‍कानोन मात्रम पेन माप किय्‍यो. इद कालमते आयि, वायना कालमते आयि, बस्‍केने माप किय्‍यो.
MAT 12:33 पजा येसु परिसिल्कुनतोनि इल्‍हा वळकालय दल्‍गुतोर. “केंजट, पंडितुन हूळसे मिमेट मरातुन एरपाट कीकिर, मरा बेसतद इत्‍ते दाना कायां इंका बेसतवे. अल्‍हेने मरा कराबतद इत्‍ते दाना कायां इंका कराबतवे.
MAT 12:34 ए कट्‍ला तरास पोरिह्कुनसंटोरिटा, मिमेट कराबतोर आसि, मीवा तोळ्‍दाल बेसतां पोल्‍लें बल्हा पेय्‍सनुं? बारित्‍ते मनसुने मनना पोल्‍लेंगे तोळ्‍दाल पलाते पेय्‍संतां.
MAT 12:35 बेसता मनकल ओना मनसुने मनना बेसता पोल्‍लेंगे पेच्‍हांतोर, अल्‍हेने कराब मनकल ओना मनसुने मनना कराब पोल्‍लेंगे पेच्‍हांतोर.
MAT 12:36 इंका नना मीकु वेहानद बतल इत्‍ते, पज्जो-मुन्‍ने विचारम कियाका मीवा तोळ्‍दाल पेय्सता उंद-उंदि वट्‍टि पोल्‍लेता लेक्‍का आकिर न्‍यायम कियना रोजु पेन मीवाहेंदाल एतार.
MAT 12:37 मी पोल्‍लेना पोर्रोटाले मिमेट दोसेम हिल्‍वोरा लेक्‍काते वांतिर, इंका मिमेट वळ्कता पोल्‍लेना पोर्रोटाले मीपोर्रो दोसेम दोसमळ जर्गंता.” इंचि इत्‍तोर.
MAT 12:38 अस्‍के इच्‍चुर परिसिल्क आनि दर्मसास्‍त्रम कराहना गुरुल्क येसुनगा वासि, “गुरु, नीवा कयदाल माकु उंदि चिन्‍ह हूळना मंता,” इंचि इत्‍तुर.
MAT 12:39 अस्‍के येसु ओर्कुन इल्‍हा इत्‍तोर, “सेड्‍डोर्क आनि बोगमतनम कियाना पीळिता लोकुल्‍क, चिन्‍ह हुप्‍सा इंतुर. गानि योनाल इनना पेनदा कबुरतोना चिन्‍ह तप्‍पा ओर्कु इंकुंदि चिन्‍ह हुपिच्‍मळ जर्गो.
MAT 12:40 इत्‍ते योनाल बल्हा नर्का-पिय्यल मूड रोजकु पेद्‍दा जिम्माता पीटा लोप्पो मत्‍तोर, अल्‍हेने मनकना रूपमते पुटतोन नना, नर्का-पिय्यल मूड रोजकु बूमिता पीटा लोप्पो मनंतन.
MAT 12:41 योनाल वेहता कबुर केंजसि निनवे सहरतोर अय्ते ओरा मनसु मार्सकुत्‍तुर. गानि हुळाट, योनांकन्‍ना पेद्‍दोड इंदके मी मुन्‍ने नित्‍तिसि मंतोर. अय्नागानि मिमेट मनसु मार्सकुंचेके हिल्‍लिर. अदुनहाटीं आकिर न्‍यायमता रोजुने निनवे सहरतोर नित्‍तिसि इद पीळिता लोकुल्‍कुनपोर्रो दोसेम दोस्‍सनुर.”
MAT 12:42 “अल्‍हेने सिबा देसेमता रानि सुलेमान राजाना तेल्‍विता पोल्‍लें केंजालय वेरे देसेमताल अगा वासि मत्‍ता. हुळाट, सुलेमानुंकन्‍ना पेद्‍दोड वरोर मी मुन्‍ने नित्‍तिसि मंतोर. अय्नागानि मिमेट नावा बुद्‍दिता पोल्‍लें केंजसेक हिल्‍लिर. अदुनहाटीं आकिर न्‍यायमता रोजुने आ रानि इद पीळिता लोकुल्‍कुनपोर्रो दोसेम दोस्‍सार.”
MAT 12:43 “उंदि देय्यम बस्के अय्ते वरोर मनकानाल पेय्सि दांता, अस्‍के अद आराम कियालय एर हिल्वा जेगा पह्‍कंता, गानि दान्क असंटा जेगा दोर्को.
MAT 12:44 अस्‍के अद देय्यम, ‘नना बद लोताल अय्ते पेय्सि वातानो, अदे लोते मर्रा मल्सि दांतन,’ इन्‍कुंता. मर्रा अगा होंचि हूळतस्‍के मुन्‍नेटा लोन रिकम आताप, मंचिगा ऊसताप दानकु बेस दिसंता.
MAT 12:45 अस्‍के अद देय्यम तिरियसि होंचि दानकन्‍ना एक्‍को सेड्‍डातव एडुं देय्याल्कुन पीसि वांता. पजा अंटव कलियसि अदे लोते मनालय दल्‍गंतां. इल्‍हा आ मनकना परिस्तिति मोदाटा परिस्तितिकन्‍ना एक्‍को कराब मनंता. इद कालमता लोकुल्‍कुना जीवाते पेनदा पोल्‍लेक जेगा हिलाकोंटे इसोंटा गोसे आयार,” इंचि इत्‍तोर.
MAT 12:46 मंदितोनि येसु वळ्कसेक मननेंके ओना यावल, ओना तम्मुह्‍क वासि, ओनतोनि वळकानद मंता इंचि लोता पलाते नित्‍तिसि मत्‍तुर.
MAT 12:47 अस्‍के, “गुरु, नीवा यावल, नीवा तम्मुह्‍क नीतोनि वळकानद मंता इंचि पलाते नित्‍तिसि मंतुर,” इंचि बोरो येसुंक वेहतोर.
MAT 12:48 अस्‍के, “बद ना यावल, बोर ना तम्मुह्‍क?” इंचि येसु ओन्क वेहता मनकन पूसकीतोर.
MAT 12:49 पजा ओना सिस्युल्कुनहेके कय हुपिच्‍चि, “हुळाट, ईरे ना यावल, ईरे ना तम्मुह्‍क आंदुर.
MAT 12:50 बोर अय्ते नावा स्वर्गमता बाबाल वेहताप ताकंतोर, ओरे नावा तम्मुर, हेलड आनि यावनलेसीं दग्‍गेटोर आंदुर,” इंचि येसु इत्‍तोर.
MAT 13:1 अदे रोजु येसु लोताल पेय्सि समुद्रम ओड्‍डुनगा होंचि उदतोर.
MAT 13:2 वेल्‍लेटुर लोकुल्‍क ओनगा जमा आताहेंका ओर उंदि डोंगा एक्‍किस उदतोर. लोकुल्‍क बारे ओना मुन्‍ने समुद्रम ओड्‍डुनपोर्रो नित्‍तिसि मत्‍तुर.
MAT 13:3 अस्‍के ओर वेल्‍लेन पोल्‍लें वेसुडिं वेहासेक कराहतोर. अव्टेटाल उंदि वेसुडि इल्‍हा मंता: “केंजट, वरोर कास्‍तकरि मनकल विज्‍जां वीतालय पेय्‍स्‍तोर.
MAT 13:4 ओर वीतनेंके इच्‍चुं विज्‍जां हरदगा अरतां, अस्‍के अवुन पिट्‍टें वासि पेर्सि तित्‍तां.
MAT 13:5 इच्‍चुं विज्‍जां बंडाना गेर्सेपोर्रो अरतां. अगा तोळि एक्‍को हिलुवादानकु आ विज्‍जां बिराने मोलियतां.
MAT 13:6 गानि हिह्‍कु लोप्‍पोळ्‍क होनवाहेंका पोळ्‍द पेय्‍स्‍तस्‍के मोल्‍कां वत्‍सि हासोत्‍तां.
MAT 13:7 इंका इच्‍चुं विज्‍जां हाह्कुना पोदाने अरतां. हाह्कुना पोदां इरगा बेर्सि अव विज्‍जन बेर्सा हिया हिल्‍लें.
MAT 13:8 इच्‍चुं विज्‍जां बेसता जेगाते अरतां. बेस पंटा पेय्‍स्‍ता. अव उंद-उंदि मोदोल्कु बगा मुप्‍पै अंताल्‍क, बगा अरवै अंताल्‍क, बगा नूर अंताल्कुना पंटा पेय्‍स्‍ता.
MAT 13:9 बोर्कु केंजालय केव्क मंतां ओर केंजट.”
MAT 13:10 पजा सिस्युल्क ओनगा वासि, “गुरु, निमे लोकुल्‍कुनतोनि वळकानेंके वेसुडिं वेहासेक बारि वळकांतिन?” इंचि पूसकीतुर.
MAT 13:11 येसु अस्‍के ओर्कु इल्‍हा वेहतोर. “मीक अय्ते स्वर्ग राज्येमता बारेमता मर्ममतुन एरपाट कीकुनालय बुद्‍दि मंता, गानि ओर्कु हिल्‍ले.
MAT 13:12 बारित्‍ते, बोनगा अय्ते मंता, ओन्क पेन इंका हींता, अस्‍के ओन्क वेल्‍लेन आंता. गानि बोनगा अय्ते हिल्‍ले, ओनागटाल मात्रम मत्‍तदुनगुडा पेन वापस एतकुन्‍नार.
MAT 13:13 ओर हूळुळ अय्ते हूळंतुर, गानि ओर्कु अद दिस अर्रो. ओर केंजुड अय्ते केंजांतुर, गानि ओर्कु केंजा वायो, अद ओर्कु तेळियोगुडा. अदुनहाटीं नना वेसुडिं वेहासेक ओरतोनि वळ्‍कंतन.
MAT 13:14 यसायाह इनानोर ओरा बारेमते रासतद पेनदा पोल्‍ले इंदके इल्‍हा निजम आता: “मिमेट केंजंतिर निजमे, गानि बस्‍केने अर्तम कीकुन्‍निर. कळ्‍कुने हूळंतिर, गानि अद मीकु तोसो.
MAT 13:15 ओर कळ्‍कुने हूळसि, केव्‍कुने केंजसि, मनसुनाल अर्तम कीकुंचि नाहेके तिरियतस्के ओर्कुन नना बेस कीकन. इल्‍हा बस्‍केने जर्गामन्‍नि इंचि ओरा मनसु गट्‍टि पडता, केव्क बारे मंदोम आसि केंजा वायाकोंटा आतां, कळ्‍कुन बारे मुचकुतुर.” इद पोल्‍ले नावां केंजवोरा बारेमते निजम आता.
MAT 13:16 गानि मीवा कळ्‍कु हुळंतां, केव्क केंजंतां इंचि मिमेट आसिर्वाद दोर्कतोर आंदिर.
MAT 13:17 नना मीकु निजम वेहांतन, इय्याला मिमेट बव हूळसंतिरो, केंजसंतिरो, अवुन वेल्‍लेटुर पेनदा कबुरतोर आनि नीतिमंतुल्क हूळालय, केंजालय तन्‍लाळुंदुर. गानि ओर्क हूळालय, केंजालय दोर्काहिल्‍ले.
MAT 13:18 मिमेट इंदके विज्‍जां वीतानोना वेसुडिता अर्तम केंजट.
MAT 13:19 स्वर्ग राज्येमता बारेमता कबुरतुन केंजसि बोर दान अर्तम कीकुन्‍नोर, ओना मनसुने बतल अय्ते वीतिस मत्‍तनो अदुन देय्यम वासि इग्‍गिस ओंता. आ लोकुल्‍क इत्‍ते विज्‍जां अरता हर्दा जेगातसंटोर आंदुर.
MAT 13:20 बोर अय्ते पेनदा पोल्‍लेतुन केंजसि कूस आसि बिराना दान ओप्‍कुंतोर, ओर इत्‍ते विज्‍जां अरता बंडाना गेर्से जेगातसंटोर आंदुर.
MAT 13:21 ओनालोप्‍पो पेनदा पोल्‍लेता हिह्‍कु गट्‍टि पळुवाहाटीं, ओर कोन्‍नि रोजके अव्टे निल्‍सि मनांतोर. पजा पेनदा पोल्‍लेताहाटीं तिप्‍पल्‍क, कस्‍टाल्‍क वातस्के, विस्वासमताल ओर बिराना लक्‍कु आंतोर.
MAT 13:22 बोर अय्ते पेनदा पोल्‍लेतुन केंजांतोर गानि सम्‍सारमता रंदि, दनमता आस्‍ति, इसोंटा विचाराल्क ओर केंजता पोल्‍लेतुन ओनालोप्‍पो बेर्सा हिय्यों. अस्‍के अद पोल्‍लेताल बतल पायदा आयो. असंटोर इत्‍ते, विज्‍जां अरता हाह्कुना पोदाना जेगातसंटोर आंदुर.
MAT 13:23 बोर अय्ते पेनदा पोल्‍लेतुन केंजसि, ओप्‍कुंचि तेळियागोटकुंतोर, ओर इत्‍ते विज्‍जां अरता बेसता जेगातसंटोर आंदुर. ओर बेस पायदा तरांतोर. बगा मुप्‍पै अंताल्‍क, बगा अरवै अंताल्‍क, बगा नूर अंताल्‍क इल्‍हा पलांचंतोर.
MAT 13:24 येसु इंकुंदि वेसुडि वेहतोर. बोर मनकल अय्ते ओना पोलमते गोह्कुना बेस विज्‍जां वीततोर, आ मनकन लेह्का स्वर्ग राज्येम मंता.
MAT 13:25 गानि अंटोर लोकुल्‍क मींडतद हूळसि ओना पगातोर वासि गोह्कुने हकोलिं वीतिस होत्‍तोर.
MAT 13:26 पजा गोह्कु मोलिय्सि पोट्‍टाक वासि मियतां, हकोलिं इंका दिसतां.
MAT 13:27 अस्‍के नेदा मालकुनगा जीतागाह्‍क वासि, “मालक, निमे अय्ते नीवा नेदे बेसता विज्‍जां वीत्सि मत्‍तिन गदा? मरि अगा हकोलिं बेंदाल वातां?” इंचि पूसकीतुर.
MAT 13:28 अस्‍के “इदु बोरो पगातोर कीता कबळ आंद.” इंचि मालक इत्‍तोर. “अय्ते निमे बतल इंतिन मरि, मोमोट होंचि हकोलितुन पीक्‍सि पोहकोमा?” इंचि जीतागाह्‍क मालकुन पूसकीतुर.
MAT 13:29 अस्‍के मालक, “मन्‍नि, हकोलितुन पीकनेंके गोह्कुनगिंटा पीकिकिट!
MAT 13:30 कोताक वयनदाका अव रोंडुगुडा कलियसे बेर्सिंकांटी. पजा कोताक वातस्के कोय्यानोर्कुंक नना, ‘मुन्‍ने हकोलिन कोय्‍सि, हेरकीं दोहाचि अवुन बोडसि पोहट. पजा नावा गोह्कुन जमा कीसि गुम्मिते दोस्सटु इंतन,’ इंचि जीतागाह्कुंकु वेहतोर.”
MAT 13:31 पजा येसु ओर्कु इंकुंदि वेसुडि वेहतोर. “स्वर्ग राज्येम, आवाल्‍कुना उंदि पेडेतसोंटद आंद. आ पेडेतुन बोरो वरोर मनकल ओसि, ओना तोटाते वीततोर.
MAT 13:32 आवाल्‍कुना पेळे अन्‍नि पेडेकुंकन्‍ना सिन्‍नागा मनंता, गानि बेरस्तस्के अद तोटाते मनना अन्‍नि मराकुंकन्‍ना पेद्‍दा मरा आंता. मब्बुने परियना पिट्‍टें वासि दाना कोम्मांक गूडां दोहंतां.”
MAT 13:33 येसु पजा ओर्कु इंकुंदि वेसुडि वेहतोर. “स्वर्ग राज्येम पुल्‍लटा पिंडितसोंटद आंद. बदो उंदि मुरतळ पुल्‍लटा इच्‍चुर पिंडितुन मूड तव्‍वना पिंडिते कल्‍पता. अय्ते मेल्‍लगा-मेल्‍लगा आ पूरा पिंडिअंता पुल्‍लगा आता.”
MAT 13:34 इव अन्‍नि पोल्‍लें येसु लोकुल्‍कुंक वेसुडिनेन वेहतोर. वेसुडि वेहाका ओर्कु बतले वेहाकोंदुर.
MAT 13:35 बारित्‍ते पेनदा कबुरतोराहेंदाल मुन्‍ने वेहचि मत्‍ता पोल्‍ले इंदके निजम आता, अद पोल्‍ले इल्‍हा मंता: “नना नावा तोळ्‍दे वेसुडिं वेहंतन. दुनिया पुट्‍तस्‍केटाल मक्‍सि मत्‍ता पोल्‍लेन नना वळ्‍किसि वेहंतन.”
MAT 13:36 पजा येसु लोकुल्‍कुन होळसिसि लोन होत्‍तोर. अस्‍के सिस्युल्क ओनगा वासि, “गुरु, पोलमते वीतता हकोलिता वेसुडतुन माकु तेळियागोट्‍सि वेहा.” इत्‍तुर.
MAT 13:37 अस्‍के येसु ओर्कु इल्‍हा वेहतोर. “केंजट, बेसता विज्‍जां वीतानोर इत्‍ते मनकना रूपमते पुटतोन नना आंदुन.
MAT 13:38 पोलम इत्‍ते ई दुनिया आंदु. आनि बेसता विज्‍जां इत्‍ते पेनदुन ‘मावा राजाल’ इंचि विस्वासम कीतोर, हकोलिं इत्‍ते देय्याल्कुन पोल्‍लें केंजानोर आंदुर.
MAT 13:39 हकोलिं वीतुता पगातोर इत्‍ते, देय्यम आंद. पंटा कोयना वेला इत्‍ते दुनिया मुंळगना आकिर वेला. कोय्‍यानोर इत्‍ते पेनदा दूतां आंद.
MAT 13:40 अस्‍के बल्हा हकोलितुन कोयसि, जमा कीसि तडमि दोसतुर, अल्‍हेने इद दुनिया मुंळगना आकिर वेलाते आयार.
MAT 13:41 बारित्‍ते अद वेलाते मनकना रूपमते पुटतोन नना, नावा दूतन लोहंतन. अव नावा राज्येमते मनना पापिर्कुन आनि पापम किया वेहानोर्कुन अंटोर्कुन पेच्‍हासि,
MAT 13:42 बस्‍केने पिर्रकोंटा पोत्‍तना तडमिते वाटसींतां. अगा बस्‍केळ्‍क अळमळ, किटुर-किटुर पल्कु कोर्कमळे मनंता.
MAT 13:43 अस्‍के नीतिमंतुल्क बोर अय्ते मंतुरो ओर ओरा पेनबाबाना राज्येमते पोळ्‍दुन लेह्का मेर्सेके मनांतुर. बोर्कु केंजालय केव्क मंतां ओर केंजट.”
MAT 13:44 स्वर्ग राज्येम बारेमते इंकुंदि वेसुड वेहंतन केंजट. उंदि पोलमते दनम मक्‍किचि मत्‍ता. बोरो वरोर मनकल आ मक्‍किचि मत्‍ता दनमतुन हूळतोर. आनि मर्रा अग्गेन मक्‍किचि इरगा कूस आसि लोन होत्‍तोर. पजा ओर ओना लोन मत्‍तद-हिलवद अन्‍नि अमकुंचि वाता कोत्‍ताने अद पोलमतुन असकुत्‍तोर.
MAT 13:45 स्वर्ग राज्येम बारेमते इंकुंदि वेसुड वेहासेक केंजट. वरोर व्यापारि बेसता मुच्‍च्याल्‍क पहकसेक मत्‍तोर.
MAT 13:46 अय्ते ओन्क उंदि वेल्‍ले दराता मुच्येम दिसता, अस्‍के ओर लोन होंचि ओनगा मत्‍तद-हिलवद अन्‍नि अमकुंचि वाता कोत्‍ताने अद मुच्येमतुन असकुत्‍तोर.
MAT 13:47 “स्वर्ग राज्येम बारेमते मर्रा उंदि वेसुड वेहासेक केंजट. उंदि ओल्‍ला मत्‍ता. अद ओल्‍लातुन बेरेडते इसुरतस्के अन्‍नि रकाल्कुना मीन्कु अरतां.
MAT 13:48 ओल्‍लामेड मीन्कु अरतस्के, मीन्कु पिय्‍यानोर दान ओड्‍डुंक इग्गुतुर बेसतवुन पेर्सि तोत्‍तिते वाटतुर, अल्‍हेने कराबतवुन बारे पोहचीतुर.
MAT 13:49 इद दुनिया मुंळगना आकिर वेलातेगुडा अल्हेन आयार. पेनदा दूतां वासि, सेड्‍डोर्कुन नीतिमंतुल्‍कुनाल वेरे कींता.
MAT 13:50 कीसि ओर्कुन बस्‍केने पिर्रकोंटा पोत्‍तना तडमिते वाटसींतां. अगा बस्‍केळ्‍क अळमळ, किटुर-किटुर पल्कु कोर्कमळे मनंता,” इंचि वेहतोर.
MAT 13:51 पजा “इव अन्‍नि पोल्‍लें मीकु तेळियतंगा?” इंचि येसु सिस्युल्कुन पूसकीतोर. अस्‍के “हां गुरु, माकु तेळियतां,” इंचि ओर इत्‍तुर.
MAT 13:52 अस्‍के येसु “बोर मनकल अय्ते ओना कजानाताल पूनद-पळानद सोम्मुन पलाते पेच्‍हांतोर, आ मनकन लेह्कने स्वर्ग राज्येमता सिस्युड मत्‍ता हरेक दर्मसास्‍त्रम कराहना गुरु मनांतोर, ओर यहुदि लोकुल्‍कुना पडाना आनि पूना बोदा रोंडु इंका करहा परांतोर.” इंचि ओर्कु वेहतोर.
MAT 13:53 पजा इव वेसुडिं वेहमळ महासि येसु अगटाल पेय्सतोर.
MAT 13:54 ओना नार वासि अगाटा दर्मसास्‍त्रम कराहना लोते होंचि लोकुल्‍कुंक पेनदा पोल्‍लें कराहलय दल्‍गतोर. अस्‍के अव पोल्‍लें केंजसि अंटोर लोकुल्‍क इचंत्रम आसि, “ईनकु इच्‍चोर बुद्‍दि, अद्‍बूताल्‍क कियना ताकत, बगटाल दोर्कता?
MAT 13:55 ईर अय्ते वडलना मर्रे गदा? ईना तल्‍लुर अय्ते मरियमे आंद, इंका याकोब, योसेप, सिमोन, यहुदल ईर अय्ते ईना तम्मुह्के आंदुर.
MAT 13:56 अचोने आयका ईना हेलाह्कगुडा मना नड्‍डुमे मंतां. अय्ते मरि ईन्कु इवन्‍नि पोल्‍लें, कबाह्‍क बोर हीतुर?” इंचि नाटेनोर वळ्ककुनुंदुर.
MAT 13:57 अदुनहाटीं ओर येसुनपोर्रो होंग आतुर. अस्‍के येसु ओर्कुन इल्‍हा इत्‍तोर, “पेनदा कबुरतोंकु ओना नाटे, ओना लोते तप्‍पा दुनियांता कदर दोर्कंता.” इत्‍तोर.
MAT 13:58 ओर विस्वासम कियवाहाटीं अगा येसु वेल्‍ले अद्‍बूतामाता कबाह्‍क किया हिल्‍लोर.
MAT 14:1 अद वेलाते गालिल एरियाता राजाल, हेरोद इनानोर, येसुना बारेमते केंजतोर.
MAT 14:2 केंजसि “ई येसु इत्‍ते बापतिस्मा हियना योहान आंदुर. ओर हातोराव्टेटाल मर्रा तेदतोर. अदुनहाटीं ओर इसंटा अद्‍बूतामाता कबाह्‍क कीसंतोर.” इंचि ओना सेवाकुल्कुंक वेहतोर.
MAT 14:3 बारित्‍ते हेरोद राजाल ओना तम्मुर पिलिपुना मुत्‍तो हेरोदियान इरकुंचि मत्‍तोर अस्‍के, “नीवा तम्मुना मुत्‍तोन निमे निहगा इरमळ नियम परकारम बेस आयो,” इंचि योहान हेरोद राजांक वेहचि मत्‍तोर. अदुनहाटीं हेरोद राजाल योहानुंक बेडीं वाटसि ओन जेलने वाटतोर.
MAT 14:5 अस्‍केटाल हेरोद राजाल योहानुन हव्कालय कोरसेके मत्‍तोर, गानि लोकुल्‍क योहानुन पेनदा कबुरतोर इंचि नम्मुंदुर, अदुनहेंके राजाल लोकुल्‍कुंक वेरियसि योहानुन हव्काकोंदुर.
MAT 14:6 गानि हेरोद राजाना पुटता रोजु मत्‍तस्के अगा हेरोदियाना मिय्यड लोकुल्‍कुन मुन्‍ने एगरिसि ओन कूस कीता.
MAT 14:7 अस्‍के राजाल कूस आसि, “निमे बतल तल्कंतिन अद नीकु हींतन” इंचि ओट्‍टु तिंचि वेहतोर.
MAT 14:8 अस्‍के अद दाना तल्‍लुर वेहता परकारम, “बापतिस्मा हियना योहानुना तल्‍ला उंदि गिन्‍नेते वाटसि नाकु हीम,” इंचि इत्‍ता.
MAT 14:9 इद केंजसि राजांक इरगा दुक्‍कम वाता. गानि अगा मत्‍ता अंटोर हेडमितोराहाटीं आनि तित्‍ता ओट्‍टुहाटीं, अद तल्कतद दान्क हीम्टु इंचि आदेस हीतोर.
MAT 14:10 जेलते मत्‍ता योहानुन हव्‍किसि ओना तल्‍ला कोय्‍सि तायलय मनकन लोहतोर.
MAT 14:11 अस्‍के योहानुना तल्‍ला गिन्‍नेते वाट्‍सि दान्क हीते अद ओसि दाना यावांक हीता.
MAT 14:12 पजा योहानुना सिस्युल्क ओना पीनगुन ओसि बोंदा दोसतुर. होंचि इद पोल्‍लेतुन येसुंक वेहतुर.
MAT 14:13 इद पोल्‍ले केंजसि येसु डोंगाते उदिस बदो अलग-सलग जेगाते पेय्सि होत्‍तोर.
MAT 14:14 ओर होतद एरपाट आतारित्‍ते लोकुल्‍क ओरा नाहकुनाल ताक्‍सेक ओना पज्जो पेय्‍स्‍तुर. पजा येसु डोंगाताल रेय्तोर अस्‍के ओन्क अगा वेल्‍लेने मंदि दिसतुर. अय्ते येसुंक ओरपोर्रो दया वासि, ओरा रोगाल्कुनंता बेस कीतोर.
MAT 14:15 पोळ्‍द होनना वेलाक सिस्युल्क येसुनगा वासि, “मनम सुनसान जेगाते मंतोम, वेलागुडा बागेन आता. पोळ्‍द अर्राका मुन्‍नेन ईर दग्‍गेटा नाह्कुने होंचि ओराहाटीं तिनालय बतलन्‍ना अस्‍कुन्‍निर, ईरकुन लोहा,” इंचि इत्‍तुर.
MAT 14:16 अस्‍के “ओर्क बेके होनना अव्‍सरम हिल्‍ले, मिमेटे ओर्कु बतलन्‍ना तिनालय हीम्टु,” इंचि येसु इत्‍तोर.
MAT 14:17 अस्‍के सिस्युल्क “महगा अय्ते सिराप हेय्युं हारिं आनि रोंडु जिम्मां मंतां,” इंचि इत्‍तुर.
MAT 14:18 अस्‍के, “अय्ते अवुन नहगा पीसवटु,” इंचि येसु इत्‍तोर.
MAT 14:19 अगा मत्‍ता मंदितुन जाडि पोर्रो उद्‍दा वेहतोर. हेय्युं हारिं, रोंडु जिम्मां पीसि पोर्रो हूळसि पेनदुक दन्यवाद कीतोर. पजा हारिन तुकडां कीसि आ तुकडन सिस्युल्कुंक हीतोर. सिस्युल्क बारे लोकुल्‍कुंक हीतुर.
MAT 14:20 अस्‍के ओर अंटोर पीरनिंडा तित्‍तुर. अंटोर तिननेंके मिगुल्ता हारिना तुकडां ओर जमा कीतुर अय्ते पन्‍नेंड तट्‍टां पेय्सतां.
MAT 14:21 तित्‍ता मंदिताल हेय्युं वेय्‍कु मांडसे मत्‍तुर, इंका मुर्ताह्क, पिलाल्कुनद अय्ते लेक्‍के हिल्‍ले!
MAT 14:22 पजा अस्‍केन येसु अंटोर लोकुल्‍कुन सार्ला कियाका मुन्‍नेन ओना सिस्युल्कुन उंदि डोंगाते उपिच्‍चि ओनकन्‍ना मुन्‍नेन सेरवुना हब्बेटा बाजुंक दाटसि होनालय वेहतोर.
MAT 14:23 अंटोर लोकुल्‍कुन सार्ला कीता पजा, येसु वरोरे पारतना कियालय गुट्‍टापोर्रो होत्‍तोर. पोळ्‍द होनिनागानि ओर वरोरे अगा मत्‍तोर.
MAT 14:24 अद वेलाते सिस्युल्कुना डोंगा समुद्रम ओड्‍डुनाल वेल्‍लेन लक्‍कु होंचि मत्‍ता. अस्‍के ओर्क एदुर वळि वायालय दल्‍गताहेंका एता तडांक डोंगा डव्क-डिव्क आयालय दल्‍गता.
MAT 14:25 नर्कटां मूड-नालुं एगनेंके येसु एता पोर्रोटाल ताकसेक ओरहेके वातोर.
MAT 14:26 ओर एता पोर्रोटाल ताकसेक वायानद हूळसि, “देय्यम वासंता!” इंचि सिस्युल्क वेरियसि वरगेयालय दल्‍गुतुर.
MAT 14:27 अस्‍के येसु बिराने ओर्कुन, “ननाने आंदुन, वेरियमट, दैरनेम इर्राट,” इंचि इत्‍तोर.
MAT 14:28 पजा पत्रु येसुन, “सामि, ओक्‍कला निमेने आयानय्ते नाकुन नीहेके एता पोर्रोटाल ताकसेक वायालय वेहा,” इंचि इत्‍तोर.
MAT 14:29 “अय्ते हीके वा,” इंचि येसु इत्‍तोर. अस्‍के पत्रु डोंगाताल रेय्‍सि एता पोर्रोटाल ताकसेक येसुनहेके होनालय दल्‍गुतोर.
MAT 14:30 गानि वळि वायनद हूळसि, वेरियसि मुळगालय दल्‍गुतोर. अस्‍के “सामि, नाकुन पिसागोट्‍टा,” इंचि मोत्‍कुत्‍तोर.
MAT 14:31 अस्‍के बिराना कय हाह्सि येसु ओन पीसि, “अरे तक्‍को विस्वासमतोना, निमे नापोर्रो अनमानम बारि कीतिन?” इंचि इत्‍तोर.
MAT 14:32 पजा ओर इव्वुर डोंगा एकतस्के, वळि वायमळ आगुता.
MAT 14:33 अस्‍के, “सामि, निमे निजमे पेनदा मर्रिन” इंचि डोंगाते मत्‍तोर ओना काल्कुनपोर्रो अरतुर.
MAT 14:34 पजा ओर अद समुद्रम दाटसि गेनेसरेत इनना नाटे वातुर.
MAT 14:35 अगाटा लोकुल्‍क येसुन एरपाट कीसि दग्‍गेर पट्‍कुनव अन्‍नि नाहकुंक कबुर लोहचि बिमार मत्‍तोर्कुन अंटोर्कुन पीसि वातुर.
MAT 14:36 पजा “सिराप नीवा कप्‍पिडता अंचुन इट्‍टा हीम,” इंचि विनंति कियुंदुर. बोर-बोर अय्ते ओना अंचुन इट्‍तुरो, ओर अंटोर पुरागा बेस आतुर.
MAT 15:1 पजा येरुसलेमताल इच्‍चुर परिसिल्क आनि दर्मसास्‍त्रम कराहना गुरुल्क येसुनगा वासि, “नीवा सिस्युल्क पेद्‍दाल्कुना रीति-रिवाजुने बारि ताकुर? ओर तिनाका मुन्‍ने कय्‍क बारि नोर्रुर?” इंचि पूसकीतुर.
MAT 15:3 अस्‍के येसु ओर्क इल्‍हा जवाब हीतोर. “मिमेट अय्ते मीवां मुन्‍नेटा रीति-रिवाजकुन ताकसालय पेनदा आदेसतुन होळसेक मंतिर.
MAT 15:4 पेन अय्ते इत्‍ते गदा, निमे नीवा तल्‍लुर-बाबोना कदर कीम. अचोने आय्‍का बोर अय्ते तल्‍लुर-बाबोन रांगंतोर, ओन हव्कमळे गावाले इंचिगुडा पेन इत्‍ता.
MAT 15:5 गानि मिमेट अय्ते, बोरन्‍ना मनकल ओना तल्‍लुर-बाबोन, नना मीकु हियानद पूरा पेनदुके हींतन, दानहाटीं मीवा सहायम किया पर्रोन, इल्‍हा तल्‍लुर-बाबोना कदर इर्रना अव्‍सरम हिल्‍ले, इंचि कराहंतिर.
MAT 15:6 इत्‍ते मिमेट मीवा रीति-रिवाजकुनाहाटीं पेनदा पोल्‍लेतुन होळसेक मंतिर.
MAT 15:7 अरे डोंगिरिटा, यसायाह इनना पेनदा कबुरतोर मीवसोंटा डोंगिरा बारेमते निजमे वेहतोर, ओर इत्‍ताप
MAT 15:8 ईर लोकुल्‍क सिराप तोळ्‍देने नावा कदर कींतुर, गानि ईरा मनसु मात्रम नहागटाल बच्‍चोनो लक्‍कु मनंता.
MAT 15:9 ईर अंगडमे नावा आरादना कीसेके मनांतुर. बारित्‍ते ओराहाटीं मनकालोर तयार कीता रीति-रिवाजके निजमतव, अवुना पालन कियमळे दर्मम इंचि कराहंतुर,” इल्‍हा वेहतोर.
MAT 15:10 अस्‍के येसु लोकुल्‍कुन दग्गेर्क केय्‍सि इल्‍हा इत्‍तोर, “केंजट आनि अर्तम कीकुंटु.
MAT 15:11 बतल अय्ते तोळ्‍दाल लोप्पो दांतनो अद मनकन हेळ्‍हो, गानि बद अय्ते तोळ्‍दाल पलाते वांता, अदे मनकन हेळ्‍हंता.” इंचि इत्‍तोर.
MAT 15:12 पजा सिस्युल्क येसुनगा वासि, “निमे वेहतद केंजसि परिसिल्क होंग आतुर इद नीकु तेळियतना?” इंचि पूसकीतुर.
MAT 15:13 अस्‍के येसु जवाबुने, “स्वर्गमते मनना नावा बानाहेंदाल वाटुवद बदे मोल्का आयि, दान पीकिस पोहमळ जर्गंता.
MAT 15:14 ओरद होन्‍नि, ओर गुड्‍डोर्कुंक हर्रि हुप्‍सना गुड्‍डोर्क आंदुर. ओक्‍कला वरोर गुड्‍डि मनकल इंकावरोर गुड्‍डि मनकंक हर्रि हुप्‍सालय होत्‍ते इव्वुरगुडा पोक्‍कातेन अर्रंतुर,” इत्‍तोर.
MAT 15:15 पजा पत्रु, “निमे वेहता इद वेसुडितद अर्तम बतल माकु वेहा,” इंचि इत्‍तोर.
MAT 15:16 अस्‍के येसु ओर्कुन इल्‍हा इत्‍तोर. “मीकु इंदकेगुडा तेळिया हिल्‍लेना?
MAT 15:17 बतल अय्ते तोळ्‍दाल पीटे दांता, अदंता पजा पलाते अर्रंता. इद मीकु इंकागुडा तेळियोना?
MAT 15:18 गानि बतल अय्ते तोळ्‍दाल पलाते पेय्संता, अद मनसुनाल वांता, अदे मनकन हेळ्‍हंता.
MAT 15:19 इत्‍ते कराब विचाराल्क, हव्‍कमळ, बोगमतनम, व्यबिचारम, दोंगातनाल्‍क, आबद्‍दम वळ्‍कमळ, अपमानम कियमळ इवन्‍नि पापि कबाह्‍क मनसुनाले पलाते पेय्‍संतां.
MAT 15:20 इवे पोल्‍लें मनकन हेळ्‍हंतां. गानि कय नोर्राकोंटा तिनानय्ते मनकल हेळोर.” इंचि वेहतोर.
MAT 15:21 पजा येसु अगटाल पेय्सि सूर, सिदोन एरियाते होत्‍तोर.
MAT 15:22 अस्‍के हूळा! उंदि कनानि मुरतळ येसुनगा वासि अळसेके, “सामि, दाविद राजाना वंसमतोना, नावा मिय्यटुन देय्यम पीसि वेल्‍ले तकलिपने मंता, नापोर्रो दया कीम” इंचि मोत्‍कुनालय दल्‍गता.
MAT 15:23 गानि येसु मात्रम बतले वळकाकोंटा सपुडदाका मत्‍तोर. अस्‍के सिस्युल्क येसुनगा वासि, “आ मुरतळ मना पज्जो मोत्‍कुंचेके वासंता दान वापस लोहचीम.” इंचि विनंति कीतुर.
MAT 15:24 अस्‍के येसु, “गानि नाकुन पेनबाबाल सिराप इस्राएलता तप्‍सोत्‍ता लोकुल्‍कुनाहाटीं लोहचीतोर.” इंचि इत्‍तोर.
MAT 15:25 अयना आ मुरतळ मर्रा येसुनगा वासि टोंगरां ऊनसि, “सामि नाकु सहायम कीम,” इंचि इत्‍ता.
MAT 15:26 अस्‍के येसु, “पिलाल्कुना हारिं तेंडकुंचि अवुन नय्‍कुंक वाटमळ बेस आयो,” इंचि जवाब हीतोर.
MAT 15:27 अस्‍के आ मुरतळ, “अद निजमे सामि, गानि मालक तिननेंके हिळु अरता अंटकुल्‍कुन अय्ते नय्‍के तिंतां गदा!” इंचि येसुन इत्‍ता.
MAT 15:28 अस्‍के “बाई नीवा विस्वासम गट्‍टिदि. इंचि नीवा इच्‍चा मत्‍ताप नीकु जर्गीकांटी,” इंचि येसु इत्‍तोर. अस्‍केन दाना मिय्यड बेस आता.
MAT 15:29 पजा येसु अगटाल गालिलता सेरवुनहेके होत्‍तोर अगा उंदि गुट्‍टापोर्रो एक्‍किस उदुतोर.
MAT 15:30 अस्‍के वेल्‍लेन मंदि लोकुल्‍क ओनगा वातुर. वायनेंके गुड्‍डोर्क, गूनोर्क, कुंटोर्क-तोंटोर्क, मूकालोर्क आनि इंका वेरे रोगाल्कुनोर्कुन पीसि ओनगा तायसि ओना काल्कुनगा इरतुर. येसु अंटोर्कुन बेस कीतोर.
MAT 15:31 अस्‍के मूकालोर्क वळकालय दल्‍गुतुर, कुंटोर्क ताकालय दल्‍गुतुर, तोंटोर्क सवरगा आतुर, गुड्‍डोर्क हूळालय दल्‍गुतुर. इवंता हूळसि जमा आता लोकुल्‍कुंक इचंत्रम आता, आनि इस्राएलता पेनदा स्‍तुति कीतुर.
MAT 15:32 पजा येसु ओना सिस्युल्कुन दग्गेर्क केय्‍सि, “ईर लोकुल्‍क नहगा मूड रोजकुनाल मंतुर, ईरगा तिनालय बतल हिल्‍ले. ईरकुन उपासम लोहुड बेस आयो. ओक्‍कला अल्हे लोहते कर्वेस्‍सि नड्‍डुम हरदे बगानना कूलाबडनुर. अदुनहाटीं नाकु ई लोकुल्‍कुन हूळसि पापम अनपिच्‍चंता,” इंचि इत्‍तोर.
MAT 15:33 अस्‍के, “इच्‍चो वेल्‍ले लोकुल्‍कुंक हालानाल तिंडि, ई उस्‍के बूमिते मनाकु बगा दोर्कार?” इंचि सिस्युल्क येसुन इत्‍तुर.
MAT 15:34 अस्‍के, “मिहगा बच्‍चुं हारिं मंतां?” इंचि येसु ओर्कुन पूसकीतस्‍के ओर “एडुं हारिं आनि इच्‍चुं सिन्‍ने जिम्मां मंतां.” इंचि इत्‍तुर.
MAT 15:35 अस्‍के येसु मंदितुन हिळु बूमिपोर्रो उद्‍दा वेहतोर.
MAT 15:36 पजा येसु आ एडुं हारिं आनि आ जिम्मान कय्‍दे पीसि पेनदुक दन्यवाद कीतोर. पजा अवुन तुकडां कीसि सिस्युल्कुना कय्‍दे हीतस्के सिस्युल्क आ हारि तुकडन अगा मत्‍ता मंदिकु तूसि हीतुर.
MAT 15:37 अगा मत्‍तोर अंटोरगुडा पीरनिंडा तित्‍तुर. पजा मिगुल्ता हारि तुकडन जमा कीते अव एडुं तट्‍टां आतां.
MAT 15:38 अगा तित्‍तोरव्टे मुर्ताह्क, पिलाल्कुन होळसि नालुं वेय्‍कुना मंदि मांडसे मत्‍तुर.
MAT 15:39 पजा अगा मत्‍ता मंदितुन होनालय वेह्‍चि, ओर डोंगाते उद्‍दिसि मगदान इनना एरियाक होत्‍तोर.
MAT 16:1 परिसिल्क आनि सदुकिर्क येसुनगा वातुर. ओर येसुना पट्‍टु हूळना उद्‍देसमते “निमे पेनदा अदिकारम पीसि वातिन इंचि नम्‍मालय, स्वर्गमताल माकु उंदि चिन्‍ह हुप्‍सा,” इंचि इत्‍तुर.
MAT 16:2 अस्‍के येसु ओर्कु इल्‍हा जवाब हीतोर. “पोळ्‍द होंचि मब्बु एर्रगा आयानय्ते मिमेट पिर्रु वायो इंतिर,
MAT 16:3 हक्‍केर्कु मब्बु एर्रगा, गुम्मरा आयानय्ते, इय्याला वळि दुमारम वांता बारे मिमेट इंतिर. मीकु मब्बुना रूपाल्‍कु एरपाट किया वांता, गानि वेलाना चिन्‍हन हूळसि अवुन मिमेट बारि एरपाट कीसेक हिल्‍लिर.
MAT 16:4 सेड्‍डोर्क आनि बोगमतनम कियाना पीळिता लोकुल्‍क चिन्‍ह हुप्‍सा इंतुर. गानि योनाल इनना पेनदा कबुरतोना चिन्‍ह तप्‍पा ओर्कु इंकुंदि चिन्‍ह हुपिच्‍मळ जर्गो,” इंचि इत्‍तोर. आनि ओर्कुन होळसि होत्‍तोर.
MAT 16:5 सिस्युल्क समुद्रमता हब्बेर ओड्‍डुंक एव्‍तुर, गानि ओर हारिं ओयालय मरुंगतुर.
MAT 16:6 पजा येसु ओर्कुन इल्‍हा इत्‍तोर, “परिसिल्क आनि सदुकिर्कुना पुल्‍लटा पिंडिता बारेमते जेगर्ता मंटु,” इत्‍तोर.
MAT 16:7 अस्‍के, “मनम हारिं तर्रालय मर्गताहाटीं ओर अल्हा इंतोर बारे,” इंचि ओर ओरे वळ्‍ककुत्‍तुर.
MAT 16:8 गानि येसु अदुन एरपाट कीसि, “अरे विस्वासम तक्‍को लोकुरिटा, मनागा हारिं हिल्‍लें इल्‍हा विचारम मिमेट बारि कीसेक मंतिट?
MAT 16:9 इदवेरदाकागुडा मीकु तेळिया हिल्‍लेना? हेय्युं हारिंने, हेय्युं वेय्‍कुना मंदि तित्‍तदगुडा मीकु मति हिल्‍लेना? तित्‍तारित्‍ते बच्‍चुं तट्‍टाना हारिं मिमेट जमा कीतिर मीकु मति हिल्‍लेना?
MAT 16:10 अचोने आयाका एडुं हारिनतोनि नालुं वेय्‍कुना मंदि तित्‍तस्के, बच्‍चुं तट्‍टाना हारिं जमा कीतिर मीकु मति हिल्‍लेना?
MAT 16:11 नना वळ्‍कानद हारिना बारेमते आयो इंचि मीकु बल्हा तेळियसेक हिल्‍ले? नना बारे परिसिल्क आनि सदुकिर्कुना पुल्‍लटा पिंडिता बारेमते जेगर्ता मंटु इत्‍तन,” इंचि इत्‍तोर.
MAT 16:12 अस्‍के ओर्कु, “हारिना होयता पिंडिता बारेमते उसारते मंटु,” इंचि वेहा हिल्‍लोर गानि परिसिल्क आनि सदुकिर्कुना कराहना बारेमते उसारते मनालय वेहतोर इंचि तेळियता.
MAT 16:13 येसु कैसरिया पिलिपिया एरियाते होत्‍तारित्‍ते, “मनकना रूपमते पुटतोन नना बोन आंदुन इंचि लोकुल्‍क इंतुर?” इल्‍हा येसु सिस्युल्कुन पूसकीतोर.
MAT 16:14 अस्‍के सिस्युल्क इल्‍हा इत्‍तुर. “इच्‍चुर इंतुर निमे बापतिस्मा हियना योहानुन आंदिन, इंका इच्‍चुर इंतुर निमे एलियाल आंदिन, इंका बोरो इंतुर निमे यिर्मयाहन हिलाकोंटे पेनदा कबुरतोरा लोप्पोटाल बोनो वरोन आंदिन,” इत्‍तुर.
MAT 16:15 “अय्ते मरि, मिमेट, नना बोन आंदुन इंतिर?” इंचि येसु ओर्कुन पूसकीतोर.
MAT 16:16 “निमे जीवाते मनना पेनदा मर्रिन किरिस्‍तुन आंदिन,” इंचि सिमोन पत्रु इतोर.
MAT 16:17 अस्‍के येसु “योनाना मर्रि सिमोनु! नीकु आसिर्वाद दोर्कुता. बारित्‍ते, इद पोल्‍ले नीकु बोर मनकल वेहा हिल्‍लोर, गानि नावा स्वर्गमता बाबाल नीवा लोप्पोटाल वेहतोर.
MAT 16:18 इंदके नना नीवा पोरोल पत्रु इंचि इरसंतन, बारित्‍ते इदे बंडापोर्रो नना नावा कलिसिया निलाहंतन. दीन हामुरता ताकतगुडा कूल्हा पर्रो.
MAT 16:19 नना नीकु स्वर्ग राज्येमता तालम कय्‍क हीसंतन, निमे बूमिपोर्रो बदुन अय्ते दोहंतिनो, अदुन स्वर्गमतेगुडा दोहमळ जर्गंता. निमे बूमिपोर्रो बदुन अय्ते लेहांतिनो, अदुन स्वर्गमतेगुडा लेहमळ जर्गंता.” इंचि इत्‍तोर.
MAT 16:20 पजा, “ननाने किरिस्‍तुन आंदुन इंचि मिमेट बोर्के वेहमट,” इंचि येसु ओर्क गट्‍टिगा हुकुम हीतोर.
MAT 16:21 अस्‍केटाल येसु ओना सिस्युल्कुंक इल्‍हा वेहालय दल्‍गतोर. “नाकु येरुसलेम होनापींता. अगा यहुदि पेद्‍दाल्क, पेद्‍दा पेर्मालोर आनि दर्मसास्‍त्रम कराहना गुरुल्कुनाहेंदाल वेल्‍ले तिप्‍पल्‍क कीसि नाकुन हव्कानुर. मूडोव रोजुने नना मर्रा जीवाते तेदंतन,” इत्‍तोर.
MAT 16:22 अस्‍के पत्रु ओन अलग ओसि, “अल्हा वळ्का मन्‍नि सामि! पेन दीन तपिचगोम. नीकु इल्‍हा बस्‍केने आयामन्‍नि,” इंचि ओन रांगतोर.
MAT 16:23 गानि येसु पत्रुनहेके तिरियसि हूळसि, “अरे देय्यम, नावा मुन्‍नेटाल पेय्सि होन. निमे मनकालोरा तेल्‍विते वळ्‍कसंतिन, पेनदा विचारमते वळ्कसेक हिल्‍लिन. निमे नावाहाटीं उंदि आपत आंदिन.” इंचि इत्‍तोर.
MAT 16:24 अस्‍के येसु ओना सिस्युल्कुंक इल्‍हा वेहतोर. “ओक्‍कला बोरन्‍ना मनकल नावा पज्जो वायना इत्‍ते, ओर ओना पूरा इस्‍टाल्क होळसिसि सतता क्रुस तेह्‍कुंचि नावा पज्जो वायिर.
MAT 16:25 बोर अय्ते ओना जीवातुन पिसागोटालय हूळांतोर, ओना जीवा होन्‍नार. गानि बोर अय्ते नावाहाटीं जीवा होनागोटंतोर अद ओन्क दोर्कंता.
MAT 16:26 ओक्‍कला मनकल पूरा दुनियातुन संपलिच्‍चि ओना जीवातुन पोगोटकुत्‍ते ओन्क बता पायदा आंता? हिलाकोंटे मनकल ओना जीवाहाटीं बदला बतल हियानुर?
MAT 16:27 मनकना रूपमते पुटतोन नना नावा बाबाना महिमाते दूतनतोनि वांतन, आ वेलाते बोरे मनकल आयिर, ओर कीता कबाह्‍कुना परकारमे ओर्क इनाम हींतन.
MAT 16:28 नना मीकु निजम वेहांतन, इग्‍गे नित्‍तिसि मनानोरा लोप्पोटाल इच्‍चुर इल्‍हा मंतुर गदा, मनकना रूपमते पुटतोन नाकुन नावा राज्येमते वायनेंके बदवेरदाका अय्ते हूळुर, अदवेरदाका ओर्कु हामुर वायो,” इंचि इत्‍तोर.
MAT 17:1 हारुं रोजकु आतारित्‍ते येसु पत्रुन, याकोबुन आनि ओना तम्मुर योहानुन पीकुंचि उंदि एत्‍तु गुट्‍टापोर्रो होत्‍तोर.
MAT 17:2 अगा ओरा मुन्‍ने ओना रूपम मारिय्ता. ओना मोकम पोळ्‍दुनलेसीं मेर्सता, ओना कपडिं वेल्‍गुनलेसीं तेल्‍लगा आतां.
MAT 17:3 हुळाट! मूसाल आनि एलियाल अगा वासि येसुनतोनि वळ्‍कानद ओर्कु दिसतुर.
MAT 17:4 अस्‍के पत्रु येसुन, “मनम इग्‍गे मनमळ बेस मंता सामि! नीवा मनसु मत्‍ते, उंदि नीहाटीं, उंदि मूसानाहाटीं, उंदि एलियानाहाटीं इल्‍हा मूड गुडसें वाटंतन,” इंचि इत्‍तोर.
MAT 17:5 पत्रु वळ्‍कसेकेन मत्‍तोर, अस्‍केन उंदि तेल्‍ला मब्बु तेर्पे ओरापोर्रो नीडा कीता, आ मब्बुनाल उंदि इसंटा अल्किर केंजावाता, “ईर नावा पावरमगल्‍ला मर्रि आंदुर, ईनतोनि नना कूस मंतन, मिमेट ईना पोल्‍लें केंजट.”
MAT 17:6 आ अल्किर केंजतस्के येसुनतोनि मत्‍ता सिस्युल्क वेरियसि बूमिपोर्रो मुसकिर कुच्‍चि अरतुर.
MAT 17:7 अस्‍के येसु ओरा दग्‍गेर वासि ओर्कुन इट्‍टिसि, “वेरियमट, तेदट” इत्‍तोर.
MAT 17:8 अस्‍के ओर तेदसि कळ्‍कु विच्‍चि पोर्रो हूळते, ओर्कु येसुंक तप्‍पा अगा बोरे दिसा हिल्‍लुर.
MAT 17:9 ओर गुट्‍टा पोर्रोटाल हिळु रेय्‍नेंके येसु सिस्युल्कुंक इल्‍हा आदेस हीतोर गदा, “मनकना रूपमते पुटतोन नना, हामुरताल मर्रा तेदनदाका, गुट्‍टापोर्रो मिमेट बतल अय्ते हूळतिरो अद बोर्के वेहमट,” इत्‍तोर.
MAT 17:10 अस्‍के सिस्युल्क, “मरि किरिस्‍तुंकन्‍ना मुन्‍ने, एलियाले वायमळ गावाले इंचि दर्मसास्‍त्रम कराहना गुरुल्क बारि इंतुर?” इंचि पूसकीतुर.
MAT 17:11 अस्‍के येसु इल्‍हा जवाब हीतोर. “एलियाल तप्‍पाकोंटा वांतोर, वासि मोदाला बल्हा मत्‍ता अल्हे अन्‍निन कींतोर.
MAT 17:12 गानि नना मीकु वेहानद बतल इत्‍ते, एलियाल वासे मंतोर गानि ओन बोरे एरपाट किया हिल्‍लुर. अदुनहाटीं लोकुल्‍क ओरा मनसुंक वाताप ओनतोनि कीतुर. मनकना रूपमते पुटतोन ननागुडा ओराहेंदाल अल्हेन तकलिप्‍कु बोगांचना मंता.” इंचि वेहतोर.
MAT 17:13 येसु बापतिस्मा हियना योहानुना बारेमते वेहासेक मंतोर इंचि सिस्युल्कुंक अस्‍के तेळियता.
MAT 17:14 येसु आनि ओना सिस्युल्क लोकुल्‍कुनगा वातस्के, वरोर मनकल येसुनगा वासि ओना मुन्‍ने टोंगरां ऊनसि,
MAT 17:15 “सामि! नावा मर्रिनपोर्रो दया कीम. ओन्क कुंदेल रोगम अर्रंता. अरतस्के ओर ऊके-ऊके तडमिते आनि एते अर्रंतोर, ओन्क इरगा तिप्‍पल्‍क आसेक मंता.
MAT 17:16 नना ओन नीवा सिस्युल्कुनगा तत्‍तन गानि ओर बेस किया पराहिल्‍लुर,” इंचि इत्‍तोर.
MAT 17:17 अस्‍के येसु ओर्कुन, “अरे विस्वासम तक्‍को आनि हर्रि तप्‍ता पीळितोरिटा, नना बदवेरदाका मीतोनि मनकन? बदवेरदाका नना मीकुन सहन कीकन? ओन नाहेके तटु.” इंचि इत्‍तोर.
MAT 17:18 ओन तत्‍तस्के येसु आ पेडन पीता देय्यमतुन गद्‍दरिच्‍चि गेदुमतोर. अस्केटद अस्‍केन आ पेडल बेस आतोर.
MAT 17:19 पजा बोर हिल्वस्के सिस्युल्क येसुनगा वासि, “आ देय्यमतुन मोमोट बारि गेदमा पर्रा हिल्‍लोम?” इंचि पूसकीतुर.
MAT 17:20 अस्‍के येसु ओर्कु इल्‍हा वेहतोर. “मीवद पेनदापोर्रो गट्‍टिगा विस्वासम हिल्‍ले. नना मीकु निजम वेहांतन, ओक्‍कला मीलोप्‍पो आवाल्‍कुना पेळेतच्‍चो विस्वासम मनिनागानि, ‘ई गुट्‍टातुन इग्‍गेटाल अगा होन’ इंचि मिमेट वेहानय्ते अद होंदार. अस्‍के मिमेट अन्‍नि कबाह्‍क किया परांतिर.
MAT 17:21 गानि इसंटा देय्याल्क सिराप पारतना आनि ओक्‍कापोद्‍दूक कीतेने दांतां,” इंचि येसु इत्‍तोर.
MAT 17:22 ओर गालिलते वासि उंदि जेगाते जमा आतस्के येसु ओर्कुन इल्‍हा इत्‍तोर. “मनकना रूपमते पुटतोन नाकुन, लोकुल्‍कुना कय्‍दे दोर्कापीसि हियानद मंता.
MAT 17:23 ओर नाकु हव्कानुर गानि, मूडोव रोजुने नाकु मर्रा जीवा अर्रार,” इत्‍तोर. इद केंजसि सिस्युल्कुंक इरगा दुक्‍कम अनपिस्ता.
MAT 17:24 अगटाल येसु कपर्नाहुम नाटेंक वातस्के गुळिना कर वसुलि कियानोर पत्रुनगा वासि, “मीवा गुरु, गुळिता कर दोहोरा?” इंचि पूसकीतुर.
MAT 17:25 अस्‍के पत्रु, “आ दोहंतोर!” इंचि इत्‍तोर. ओर लोता लोप्पो होत्‍तोर, होंचि येसुंक वेहाक मुन्‍नेन येसु, “सिमोनु, नीकु बतल अनपिच्‍चेक मंता? ई दुनियाते मनना राजुकु जकात आयि कर आयि बोराहेंदाल एतंतुर, ओरा मर्कुन हेंदाला मरि इंका बोरन्‍ना वेरेतोरा हेंदाला?” इंचि पूसकीतोर.
MAT 17:26 अस्‍के पत्रु, “वेरेतोरा हेंदाल,” इंचि इत्‍तरित्‍तेन येसु ओन, “अय्ते मर्क पिरि मंतुर मरि!
MAT 17:27 अयना ओर्कुन नाराज कियामन्‍नि इंचि निमे गालम वाटालय होन्‍नु आनि मुन्‍ने अरता जिम्मातुन पीसि दाना तोळ्‍दुन पर्हा, पर्हातारित्‍ते उंदि कल्‍दार दोर्कार. अद ओसि नावा आनि नीवा पोरोलते कर दोहासि हीम.” इंचि इत्‍तोर.
MAT 18:1 आ वेलाते सिस्युल्क येसुनगा वासि, “स्वर्ग राज्येमते अंटोर्कन्‍ना पेद्‍दा बोर?” इंचि पूसकीतुर.
MAT 18:2 अस्‍के येसु वरोर सिन्‍ना पेडन केय्‍सि, ओरा नड्‍डुम निलाहचि इल्‍हा वेहालय दल्‍गुतोर. “नना निजम वेहांतन, मीवा गुनाल्‍कुन मार्सकुंचि मिमेट पेडनलेसीं आयवा, स्वर्ग राज्येमते बस्‍केने होना परिर.
MAT 18:4 दानहाटीं बोर अय्ते ओनाद ओरे ई सिन्‍ना पेडन लेह्का सादा-सिंपल मनांतोर, ओरे स्वर्ग राज्येमते पेहरोर आंदुर.
MAT 18:5 बोर अय्ते नापोर्रो विस्वासम कियना ई सिन्‍ना पेडनसंटोन बेस हूळांतोर, ओर नाकुन बेस हूळतापे.
MAT 18:6 गानि नापोर्रो विस्वासम कियना ई सिन्‍ना पेडानसंटोन बोरन्‍ना पापमते अरहते, ओना बोंळगेक जोत्‍ता बंडा दोहाचि ओन समुद्रमते लोतु एते ओसि मुळुहमळे बेस मनंता.
MAT 18:7 पापमते अरहना पोल्‍लें ई दुनियाते वेल्‍लेन मंतां. अवुनहेंदाल दुनिया लोकुल्‍कुन पापमते अरहंता. अदुनहाटीं ई दुनियाक बच्‍चोन गोसा वायार! पापमते अरहना पोल्‍लें अय्ते वायमळे गावाले, गानि अव बोनाहेंदाल अय्ते वांतांगो ओन्क बच्‍चोन गोसा वायार!”
MAT 18:8 ओक्‍कला नीवा कय आयि काल आयि नीकुन पापम किया वेह्ते दान नर्किसि पोहा. बारित्‍ते रोंडु कय्‍क, रोंडु काल्क मंचि बस्‍केळ्‍क पोत्‍सेके मनना तडमिता नरकमते होननदानकन्‍ना, अपंग हिलाकोंटे कूटाल आसि पिस्वरते होनमळे नीहाटीं बेस.
MAT 18:9 अल्‍हेने, ओक्‍कला नीवा कळु नीकुन पापम किया वेहते दान तेंडसि पोहा. बारित्‍ते रोंडु कळ्‍क मंचि नरकमता तडमिते होननदानकन्‍ना गुड्‍डि आसि पिस्वरते होनमळे नीहाटीं बेस मनंता.
MAT 18:10 हुळाट, नावापोर्रो विस्वासम कीता ई सिन्‍नोरकुन बोने तेंडसि पोहमटु. नना वेहनद बतल इत्‍ते, ओरा पेनदा दूतां स्वर्गमते मनना नावा पेनबाबांक बस्केळक कलियसेके मनंतां.
MAT 18:11 अचोने आयका मनकना रूपमते पुटतोन नना तप्‍सोत्‍तोर्कुन पिसागोटलय वातन.
MAT 18:12 “ओक्‍कला वरोर मनकानगा नूर गोर्रें मंतां इनकुंटु. अवुनाल उंदि गोर्रे तप्‍पिस होनानय्ते, कळमता टोंबै तोम्मिद गोर्रेन ओर अग्गेन होळसिसि, तप्‍सोत्‍ता आ उंदि गोर्रेतुन पहकालय होन्‍नोरा? दांतोर.
MAT 18:13 नना निजम वेहांतन, ओक्‍कला ओन्क होत्‍ता गोर्रे दोर्कानय्ते, आ टोंबै तोम्मिद तप्‍पिस होनवा गोर्रेंकन्‍ना, तप्‍सोत्‍ता आ उंदि गोर्रेपोर्रो एक्‍को आनंदम आयानुर.
MAT 18:14 अल्‍हेने ई सिन्‍नोरकुनाल वरोर इंका नासडेम आयामन्‍नि इंचि स्वर्गमते मनना मीवा बाना मनसु मंता.”
MAT 18:15 ओक्‍कला तम्मुर आयि दादाल आयि नीवा विरोदमते पापम कियानय्ते, निमे वरोने ओनगा होंचि ओर कीता पापम ओन्क तेळियागोट्‍सि वेहा. ओर ओक्‍कला नीवा पोल्‍ले केंजानय्ते निमे ओना मनसुन गेल्सताप.
MAT 18:16 उंदि वेला ओरगिंटा नीवा पोल्‍ले केंजुवस्के, वरोर-इव्वुरकुन नीवा पज्जो पीसि होन. बारित्‍ते, अगा बतल जर्गुतनो अदुन वेहालय ओर गवाइ मनांतुर.
MAT 18:17 ओक्‍कला ओर ओरा पोल्‍लेगुडा केंजाकुंटे कलिसियातोर्क वेहा. कलिसियातोर वेहतदगुडा केंजाकुंटे, ओर पेनदा मनकल आयोर इंचि इनकुन. हिलाकोंटे कर वसुल कियानसंटोर इनकुन.
MAT 18:18 “नना मीकु निजम वेहांतन, मिमेट बूमिपोर्रो बदुन अय्ते दोहंतिरो, अदुन स्वर्गमतेगुडा दोहमळ जर्गंता, मिमेट बूमिपोर्रो बदुन अय्ते लेहांतिरो, अदुन स्वर्गमतेगुडा लेहामळ जर्गंता.
MAT 18:19 अचोने आयका नना वेहनद निजम बतल इत्‍ते, ई बूमिपोर्रो मीवा लोप्पोटाल बोरन्‍ना इव्वुर उंदि आसि मीकु बतल अय्ते गावालेनो अद तल्कानय्ते स्वर्गमते मनना नावा पेनबाबाल तप्‍पाकोंटा हींतोर.
MAT 18:20 बारित्‍ते बगा अय्ते नावा पोरोलते इव्वुर-मुव्वुर उंदगा जमा आंतुरो, अगा ओरा नड्‍डुम नना मनांतन,” इंचि येसु इत्‍तोर.
MAT 18:21 अस्‍के पत्रु येसुनगा वासि, “सामि, वरोर तम्मुर आयि दादाल आयि नावा विरोदमते पापम कियानय्ते, नना ओन बच्‍चुं मल्कां मापि कीकन? एडुं मल्कंगां?” इंचि पूसकीतोर.
MAT 18:22 अस्‍के येसु ओन्क, “एडुंगें मल्कां आयो, ओर बच्‍चुं मल्कां तप्पु किय्यिनागानि ओन निमे माप कीसेक मन्‍नु,” इंचि वेहतोर.
MAT 18:23 पजा येसु इल्‍हा वेहालय दल्‍गुतोर, स्वर्ग राज्येम वरोर राजन लेह्का मंता. आ राजाल ओन्क बाकि मत्‍ता जीतागाह्कुना हेंदाल बाकीं वसुल कियना इंचि विचारम कीतोर.
MAT 18:24 बस्के अय्ते ओर वसुल कियालय सुरुव कीतोर, अस्‍के वरोर लक्‍सेना बाकि मत्‍ता जीतागान राजानहेके तत्‍तुर.
MAT 18:25 आ जीतागानगा ओना मालकुना बाकि दोहालय बतले मनाहिल्‍ले. अस्‍के ओर ओन्क आदेस हीतोर गदा, “ओर ओना मुत्‍तो-पिलाल्क, लोन-दारा अचोने आय्‍का ओनगा बतल अय्ते मंतनो अव अन्‍नि अम्मिसि, वाता कोत्‍तानाल बाकि दोहिरकांटी,” इंचि वेहतोर.
MAT 18:26 अस्‍के आ जीतागाल राजाना काल्कुनपोर्रो अर्सि बात्मिलाडतोर, “राजा नाकु कोन्‍नि रोजकुना मुदत हीम, मेल्‍लगा-मेल्‍लगा नावा बाकि पुरागा दोहंतन,” इंचि इत्‍तोर.
MAT 18:27 अस्‍के आ मालकुंक ओना जीतागानपोर्रो दया वासि ओना बाकि अंता पुरागा माप कीसि होळसीतोर.
MAT 18:28 पजा आ जीतागाल अगटाल पेय्सि होननेंके ओन्क नूर रूपें बाकि मत्‍ता ओना दंटाता जीतागाल हरदे कलियतोर. अस्‍के ई मुन्‍नेटा जीतागाल आ जीतागाना बोंळ्‍गे पीसि, “नाकु हियना कोत्‍तां बस्के हींतिन? नाकु इंदकेटद इंदकेन हीम,” इंचि ओन इत्‍तोर.
MAT 18:29 पजा आ जीतागाल मुन्‍नेटा ओना दंटाता जीतागाना काल्कुना पोर्रो अर्सि विनंति कीसि, “निमे कोन्‍नि रोजकु ओप्के पीम, नना नीवा बाकीं नीकु हींतन,” इंचि इत्‍तोर.
MAT 18:30 अयना ओर बतले केंजाकोंटा, ओर बाकि दोहनाल ओन जेलने वाटसीतोर.
MAT 18:31 अस्‍के अगा जर्गतद ओना दंटाता जीतागाह्‍क हूळतुर ओर्कु वेल्‍ले दुक्‍कम आता. ओरा मालकुनगा होंचि जर्गतव अंता वेहतुर.
MAT 18:32 अस्‍के मालक ओन केय्‍सि इत्‍तोर, “अरे तेल्वि तक्‍को जीतागा, नीकु इच्‍चोरगुडा दया वाया हिल्‍लेना? निमे नावा काल्क पीसि विनंति कीतिन अय्ते नना नीवा पूरा बाकितुन माप कीतन.
MAT 18:33 नना बल्हा नीवा पोर्रो दया कीतनो अल्‍हेने निमे नीवा दंटाता जीतागाना पोर्रो दया किया मत्‍तिन.”
MAT 18:34 इंचि मालक ओनपोर्रो होंग आसि ओन जेलने वाटसीतोर. ओना बाकि नेम्मनजेप ओन जेलनाल होळसा हिल्‍लोर.
MAT 18:35 इल्हेने मिमेटगुडा मीवा तम्मुन आयि दादान आयि मनसुनाल मापि कियाकोंटे ई राजाल बल्हा कीतोरो अल्‍हेने नावा स्वर्गमते मनना बाबालगुडा मीकुन मापि किय्योर.
MAT 19:1 इव अन्‍नि पोल्‍लें वेहामळ आतारित्‍ते येसु गालिल एरियाताल पेय्सि योर्दन बेरेडता हब्बेर ओड्‍डुंक मनना यहुदिया एरियाते होत्‍तोर.
MAT 19:2 अस्‍के वेल्‍लेन मंदि ओना पज्जो होत्‍तुर. येसु ओर्कुन बिमारकुनाल बेस कीतोर.
MAT 19:3 अगा इच्‍चुर परिसिल्कगुडा वातुर. येसुना पट्‍टु हूळना इंचि, “मूसाना नियम परकारम, बद कारनमताहाटीं अयना मुत्‍तोन होळसिय्या वच्‍चा?” इंचि येसुन पूसकीतुर.
MAT 19:4 येसु इल्‍हा जवाब हीतोर, “बस्के अय्ते पेन मनकन कीतानो, अस्‍केन ओर्कुन मांड्‍सा मुरतळ इल्‍हा इंचि कीता. इदु मिमेट हदवा हिल्‍लिरा?
MAT 19:5 दीनाहाटीं मांड्‍सा यावन-बाबान होळसिसि, ओना मुत्‍तोन पीसि मनांतोर. ओर इव्वुर उंदे मेंदुल आसि मनांतुर.
MAT 19:6 अदुनहाटीं ओर इव्वुर उंदे मेंदुल आसि मनांतुर. इल्‍हा पेने ओर्कुन कल्‍पताहाटीं, मनकल वेरे कियानायो,” इंचि इत्‍तोर.
MAT 19:7 इद केंजसि, “अल्हा अय्ते मरि, मनकल ओना मुत्‍तोंक सोडसिट्‍टि हीसि होळसियना आदेस मूसाल बारिंक हीतोर?” इंचि परिसिल्क मर्रा पूसकीतुर.
MAT 19:8 अस्‍के येसु ओर्कुन इल्‍हा इत्‍तोर. “मीवा मनसु बंडालेसीं मत्‍ताहाटीं मूसाल मुत्‍तोह्‍कुन होळसिय्या वच्‍चु इत्‍तोर, गानि मुन्‍नेटाल इसोंटा रिवाज मनाहिल्‍ले.
MAT 19:9 नना मीकु वेहासेक गदा, बोरन्‍ना ओना मुत्‍तोन बोगमतनमता कारनम तप्‍पा वेरे कारनमते होळसिसि इंकुंदानतोनि मरमिं आयानय्ते, ओर बोगमतनम कींतोर.” इल्‍हा इत्‍तोर.
MAT 19:10 इद केंजसि ओना सिस्युल्क ओन, “अय्ते मुत्‍तो मुय्दोन नड्‍डुम इसंटा लेक्‍का मत्‍ते मरमिं आयाकोंटेन सूटि,” इंचि इत्‍तुर.
MAT 19:11 येसु ओर्कु इल्‍हा समजांस्तोर, “मिमेट इत्‍ता पोल्‍लेतुन ओप्कुनमळ अंटोर्क कुदुरो, गानि बोनकु अय्ते ई पोल्‍लेन पीसि ताकना ताकत पेन हीतनो ओरे ओप्कुना परांतोर.
MAT 19:12 बारित्‍ते बोरो-बोरो तलुह्कुना पीटाले आडिगुंलोर्क आसि पुटतोर मंतुर, मनकालोरा कयदालगुडा आडिगुंलोर्क आतुर मंतुर, आनि स्वर्ग राज्येमता हेंका इच्‍चुर मंदि मरमिं आयाकोंटा मंतुर. इंचि बोर्क अय्ते ई पोल्‍लें नच्‍चंतंगो ओर इदुन ओपकुनिरकांटी.”
MAT 19:13 पजा इच्‍चुर लोकुल्‍क ओरा पिलाल्कुनपोर्रो येसु कय इर्सि पारतना कियाना इंचि ओनगा पीसि वातुर, गानि सिस्युल्क ओर्कुन रांगतुर.
MAT 19:14 गानि येसु, “पिलाल्कुन नाहेके वायाहीम्ट, ओर्कुन आपमट. स्वर्ग राज्येम इसंटोरदे आंद,” इंचि इत्‍तोर.
MAT 19:15 पजा येसु पिलाल्कुनपोर्रो कय इर्सि अगटाल पेय्सि होत्‍तोर.
MAT 19:16 वरोर मनकल येसुनगा वासि, “गुरु, बस्‍केळ्‍क पिस्सना पिस्वर गावाले मत्‍ते नना बव बेसता कबाह्‍क कीते सरे?” इंचि पूसकीतोर.
MAT 19:17 अस्‍के येसु ओन इल्‍हा इत्‍तोर, “बेस इत्‍ते बतल, नाकुन बारि पूसकींतिन? बेसतद अय्ते सिराप पेन उंदे आंद. ओक्‍कला नीकु बस्‍केळ्‍क पिस्सना पिस्वर गावाले अनपिस्‍ते पेनदा आदेसकुना परकारम ताका,” इत्‍तोर.
MAT 19:18 “बव आदेसकु?” इंचि आ मनकल इत्‍तस्के, “बोने हव्कमा, बोगमतनम कियमा, दोंगातनम कियमा, आबद्‍दम गवाइ हियमा,
MAT 19:19 नीवा तल्‍लुर-बाबाना कदर कीम. नीवद निमे बच्‍चोन पावरम कींतिनो, अचोने पावरम इंकावरोनगुडा कीम.” इंचि येसु वेहतोर.
MAT 19:20 अस्‍के, “नना अय्ते इव अन्‍नि कीसेकेन वातन, इंका नावा लोप्पो बतल तक्‍को मंता?” इंचि आ लेय्योड येसुन इत्‍तोर.
MAT 19:21 अस्‍के येसु इत्‍तोर. “ओक्‍कला नीकु सत्‍तेमते पुरागा आयानद मत्‍ते, होन, निहगा बतल अय्ते मंता अदुन पूरा अम्मिसि, गरिबोर्कुंक तूसि हीम. अस्‍के नीकु स्वर्गमते दनम दोर्कार. पजा नहगा वासि ना पज्जो ताका,” इत्‍तोर.
MAT 19:22 गानि ओनगा सोम्मु वेल्‍लेन मत्‍ताहाटीं ई पोल्‍ले केंजसि लेय्योड सिम्मरा आसि पेय्सि होत्‍तोर.
MAT 19:23 अस्‍के येसु ओना सिस्युल्कुन इल्‍हा इत्‍तोर. “नना मीकु निजम वेहांतन, स्वर्ग राज्येमते सिरमंत मनकल होळियमळ इत्‍ते वेल्‍लेन कस्‍टम.
MAT 19:24 नना मर्रा वेहांतन, पेनदा राज्येमते सिरमंत मनकल होळियमळकन्‍ना लोटापेटा सूदि बोंगाताल होनमळ अल्कगा मनंता,” इत्‍तोर.
MAT 19:25 इद केंजसि सिस्युल्कुंक वेल्‍लेन इचंत्रम आता. अदुनहाटीं, “अय्ते मरि मुक्‍ति बोर्क दोर्का पर्रंता?” इंचि पूसकीतुर.
MAT 19:26 अस्‍के येसु सिस्युल्कुनहेके हूळसि, “मनकालोरतोनि अय्ते इद आयापर्रो, गानि पेन मात्रम अन्‍नि किया पर्रंता.” इंचि इत्‍तोर.
MAT 19:27 अस्‍के पत्रु येसुन इल्‍हा इत्‍तोर. “हूळा, मोमोट अय्ते मत्‍तद-हिलवद अन्‍नि होळसिसि नीवा पज्जो वातोम. अय्ते माकु बतल दोर्कार?” इत्‍तोर.
MAT 19:28 “नना मीकु निजम वेहांतन, पूना दुनियाते, मनकना रूपमते पुटतोन नना नावा महिमाता राजगद्‍देपोर्रो उद्‍दंतन, अस्‍के नावा पज्जो मनानोर मिमेटगुडा पन्‍नेंड राजगद्‍देन पोर्रो उद्‍दिसि, इस्राएलना पन्‍नेंड गोत्राल्कुनोरा न्‍यायम कीकिर.
MAT 19:29 अचोने आयका नावाहाटीं बोर अय्ते लोन-दारातुन, दादल-तम्मुह्‍कुन, अक्‍कल-हेलाह्कुन, तल्‍लुर-बाबोन, पिलाल्कुन, इंका बूमिं-जेगान होळसीतुरो ओर्कु आ होळसीतवुंकन्‍ना नूर अंताल्‍क एक्‍को दोर्कार. इंका ओर बस्‍केळ्‍क पिस्सना पिस्वरता वारसदार आयानुर.
MAT 19:30 गानि मुन्‍ने मत्‍तोर वेल्‍लेटुर पज्जो आयानुर. पज्‍जोटोर मुन्‍ने आयानुर,” इंचि येसु ओन इत्‍तोर.
MAT 20:1 येसु मर्रा इल्‍हा इत्‍तोर. नना मीकु स्वर्ग राज्येम बारेमते उंदि वेसुड वेहंतन केंजट. वरोर मालक मत्‍तोर. ओर हक्‍केरेने तेदसि, ओना अंगुर बगिचाते कबळ कियालय बूतिनोराहाटीं पलाते होत्‍तोर.
MAT 20:2 मनकंकंटिकि उंदि रोजुना बूति हींतन इंचि करार कीसि, ओर्कुन अंगुर बगिचाते कबळ्‍क लोहतोर.
MAT 20:3 जावोळ्‍द पोळ्‍द आतस्के आ नेदा मालक हाटुमते होंचि हूळतोर, अस्‍के रिकम मनानोर इच्‍चुर मंदि ओन्क दिसतुर.
MAT 20:4 मिमेटगुडा नावा अंगुर बगिचाते कबळ कियालय होंट. मीवा कबळलायक बूति मीकु हींतन, इंचि मालक ओर्क वेहतोर. अल्हा इत्‍तारित्‍ते ओरगुडा बगिचाते कबळ कियालय होत्‍तुर.
MAT 20:5 आ मालक पियाटील आनि पोंटेकु मर्रा हाटुमते होत्‍तोर. रोंडु मल्कां इंका बूतिनोर्कुन तच्‍चि बगिचाते कबळ कियालय वेहतोर.
MAT 20:6 पोळ्‍द अर्रालय गंटामेड मत्‍तस्के आ मालक मर्रा उंदि मल्का हाटुमते होत्‍तोर, अस्‍के इंका इच्‍चुर मंदि रिकम मत्‍तोर्कुन हूळतोर. “मिमेट इगे पोळ्‍दमेड वट्‍टिदे बारि नित्‍तिसि मंतिर?” इंचि मालक ओर्कुन पूसकीतोर.
MAT 20:7 अस्‍के, “माकुन बोरे बूतिक केया हिल्‍लुर, दानहेंके मोमोट नित्‍तिसि मंतोम दादा!” इंचि ओर इत्‍तुर. अस्‍के, “अल्हा अय्ते मिमेट इंका नावा अंगुर बगिचाते कबळ कियालय होंट,” इंचि आ मालक ओर्कुन वेहतोर. अस्‍के ओर होत्‍तुर.
MAT 20:8 “पोळ्‍दु होत्‍तारित्‍ते अंटोर बूतिनोर्कुन केय्‍सि, अंटोर्क बूति हीम, आकिर वातोरकुंक मुन्‍ने हीम, मुन्‍ने वातोर्कुंक आकिर हीम,” इंचि मालक ओना जीतागानकु वेहतोर.
MAT 20:9 पोळ्‍दु अर्रालय गंटामेड मत्‍तस्के बूतिक वातोर, बूति एतालय होत्‍तुर, अस्‍के ओर्कु पोळ्‍दमेटा बूति दोर्कुता.
MAT 20:10 अदुन हूळसि “माकु वेल्‍लेन कोत्‍तां दोर्कनुं बारे,” इंचि हक्‍केरे वाता बूतिनोर इनकुत्‍तुर. गानि ओर्कु इंका अचोने बूति दोर्कुता.
MAT 20:11 आ बूति एततस्के ओर मालकुन इत्‍तुर, “ईर पज्जो वासि उंदि गंटा कबळ कीतुर, मोमोट अय्ते ईरकन्‍ना एक्‍को कस्‍टमते, एर्रना एद्‍दिते कबळ कीतोम. गानि निमे माकु ओरा अचोने बूति हीतिन, इद माकु नच्‍चा हिल्‍ले,” इंचि गुल्‍गतुर.
MAT 20:13 “नना नीकु बतल अन्‍यायम किया हिल्‍लेन, नना नीकु उंदि रोजुना बूति हींतन इंचि इत्‍तस्के निमे ओप्कुतिन गदा?
MAT 20:14 अदुनहाटीं निमे गुल्‍गाकोंटा नीवा बूति पीसि होन. नीकु नना बच्‍चोन बूति हीतन, अचोने बूति ईर आकिरते वातोर्क इंका हियना नावा मनसु मंता.
MAT 20:15 नना नावा कोत्‍तन नावा मनसु मताप कर्स कियना हक्‍कु नाकु हिल्‍लेना? नना बेस मनकन मत्‍ताहाटीं निमे नापोर्रो बारि अळसंतिन?” इंचि ओरा अव्टेटाल वरोन मनकन मालक इत्‍तोर.
MAT 20:16 इल्‍हा बोर अय्ते पज्जो मंतुर, ओर मुन्‍ने आयानुर, मुन्‍ने मत्‍तोर पज्जो आयानुर, इंचि वेह्‍चि, येसु वेसुडि वेहमळ आपतोर.
MAT 20:17 येसु येरुसलेम होननेंके, पन्‍नेंडु सिस्युल्कुन उंदि बाजुंक ओसि,
MAT 20:18 “हुळाट, मनम येरुसलेम होंचंतोम, अगा होत्‍ता पजा मनकना रूपमते पुटतोन नाकुन पेद्‍दा पेर्मालोर्कुना आनि दर्मसास्‍त्रम कराहना गुरुल्कुना कय्‍दे पीसि हियानुर. ओर नाकु हामुर सिक्‍साता आदेस हियानुर.
MAT 20:19 पजा यहुदि आयवोरा कय्‍दे अप्‍पजेपनुर, ओर नाकुन सिडांच्‍नुर, नापोर्रो उस्कानुर, पोट्‍टेते तन्‍नानुर, पजा नाकुन क्रुसुनपोर्रो मोल्‍लां कोह्कानुर. गानि मूडोव रोजुने नना मर्रा जीवाते तेदंतन,” इंचि इत्‍तोर.
MAT 20:20 अच्‍चोटेन जब्‍दिना मुत्‍तो दाना मर्क याकोब आनि योहानुन पीसि, येसुनगा वासि ओना काल्कुनपोर्रो अर्सि उंदि विनंति कीता.
MAT 20:21 “नीकु बतल गावाले?” इंचि येसु दान पूसकीतस्‍के, “निमे नीवा राज्येमते नावा इव्वुर मर्कुन, नीवा तिना बाजुंक वरोन, डेमा बाजुंक वरोन उद्‍दाना आदेस हीम” इंचि अद इत्‍ता.
MAT 20:22 जवाबुने, “मिमेट बतल पूसकीसंतिरो, अद मीक तेळियसेक हिल्‍ले. नना बव कस्‍टाल्‍क अय्ते बोगांचना मंता, अवुन मिमेट बोगांचा परकिटा?” इंचि येसु इत्‍तस्के, “हो, मोमोट तयार मंतोम,” इंचि ओर इत्‍तुर.
MAT 20:23 पजा येसु ओर्कुन इल्‍हा इत्‍तोर, “नना कस्‍टाल्‍क बोगांचताप मिमेट बोगांचा परकिट, निजमे! गानि राज्येम कियनेंके, नावा तिना बाजुंक आनि नावा डेमा बाजुंक उपिच्‍चना अदिकार नाक हिल्‍ले. अव जेगां बोराहाटीं ना बाबाल तयार कीतोरो, ओरे अगा उद्‍दंतुर,” इत्‍तोर.
MAT 20:24 आ दादाल-तम्मुना पोल्‍लें केंजसि, अगा मत्‍ता कळमता पदि मंदि सिस्युल्क ओरापोर्रो होंग आतुर.
MAT 20:25 अस्‍के येसु सिस्युल्कुन ओना दग्‍गेरा केय्‍सि, “यहुदि आयवोरा राजालोर ओरा जीतागाह्कुन, ओरा कय्‍दा हिळु इर्रालय हूळंतुर, अल्‍हेने ई दुनियाता पेद्‍दा मनकालोरगुडा सिन्‍ना मनकालोरपोर्रो अदिकारम ताकसालय हूळंतुर, इद मीकु एर्के.
MAT 20:26 गानि मिमेट मात्रम ओरालेसीं कियानायो. मी लोप्पोटाल बोर अय्ते पेद्‍दा आयालय हूळांतोरो, ओर मीवा सेवा कियानोर आयापींता.
MAT 20:27 इंका मी लोप्पोटाल बोर अय्ते लीडर आंतन इंतोरो, ओर मीवा दासुड आयापींता.
MAT 20:28 बारित्‍ते मनकना रूपमते पुटतोन नना, सेवा कियागोटकुनालय वाया हिल्‍लेन गानि वेरेतोरा सेवा कियालय आनि वेल्‍लेटोर्कुन पापमताल पेचाहलय, ओराहाटीं नावा जीवा हियालय वातन,” इत्‍तोर.
MAT 20:29 येसु आनि ओना सिस्युल्क यरिहो सहरताल पेय्सि होननेंके, ओना पज्जो लोकुल्‍कुना पेद्‍दा मंदा वाता.
MAT 20:30 अस्‍के हर्दा पक्‍काते इव्वुर गुड्‍डोर्क उद्‍दिसि मत्‍तुर. मावा मुन्‍नेटाल येसु होंचंतोर, इंचि ओर्कु एरपाट आतस्के ओर येसुन, “ए सामि, दाविद राजाना वंसमतोना! निमे मापोर्रो दया कीम,” इंचि वरगेयतुर.
MAT 20:31 अस्‍के, “चुपचाप मंटु” इंचि लोकुल्‍क आ गुड्‍डोर्कुन रांगतुर. गानि आ गुड्‍डोर्क मात्रम, लगांचि, “ए सामि, दाविद राजाना वंसमतोना, मापोर्रो दया कीम,” इंचि मोत्‍कुनालय दल्‍गुतुर.
MAT 20:32 अस्‍के येसु आगसि, ओर्कुन केय्‍सि इल्‍हा इत्‍तोर. “नना मीहाटीं बतल कियना इंचि मीवा मनसु मंता?” इत्‍तोर.
MAT 20:33 अस्‍के ओर, “माकु दिस्‍सानाल मावा कळ्‍कुन बेस कीम सामि!” इंचि येसुन इत्‍तुर.
MAT 20:34 येसुंक ओरापोर्रो दया वासि ओरा कळ्‍कुन इटतोर. इट्ता इट्‍टुडे ओरा कळ्‍कु बेस आसि, दिसालय दल्‍गतां. अस्‍के ओरगुडा येसुना पज्जो होत्‍तुर.
MAT 21:1 ओर अंटोर येरुसलेम सहरता दग्‍गेरा जय्‍तुन मराकुना गुट्‍टापोर्रो मनना बैतपागे इनना नाटेना दग्‍गेरा एव्‍तुर. पजा येसु इव्वुर सिस्युल्कुन केय्‍सि,
MAT 21:2 ओर्क इल्‍हा वेह्‍चि नाटे लोहतोर. “मी मुन्‍ने दिस्‍सना नाटे होंट, अगा एव्ता एव्‍वुडे मीकु उंदि दोहाचि मत्‍ता गाडदि आनि दाना पोरि दिसंता. अवुन लेहकुंचि नहगा पीसि वटु.
MAT 21:3 ओक्‍कला अवुन पीसि वायनेंके बोरन्‍ना मीकुन बतलन्‍ना इत्‍ते, ‘सामिंक इवुना अव्‍सरम मंता,’ इंचि वेहट. अस्‍के ओर अवुन बिराना ओम्टु इंचि इंतोर.”
MAT 21:4 एनकटा पेनदा कबुरतोर वेहता पोल्‍लें निजम आयगोम इंचि इल्‍हा जर्गता. अद पोल्‍ले इल्‍हा मंता:
MAT 21:5 “सियोनुना मिय्यळ्‍क वेहट गदा, हुळाट, मीवा राजाल मीहेके वासंतोर, ओर सांत बुद्‍दितोनि, बर्वु कांजना गाडदि पोरिनपोर्रो उद्‍दिस वासंतोर.”
MAT 21:6 अस्‍के सिस्युल्क होंचि येसु वेहताप कीतुर.
MAT 21:7 सिस्युल्क गाडदि आनि गाडदि पोरिन येसुनगा पीसि वातुर. पजा अवुनपोर्रो ओरां कपडिं तारतुर. तारतारित्‍ते येसु आ गाडदि पोरिनपोर्रो उदुतोर.
MAT 21:8 आ गर्दिते वेल्‍ले लोकुल्‍क येसुनहाटीं ओर केर्ता कपडिं तेंडसि हर्दे तारतुर. इंकिच्‍चुर अय्ते मराकुना कोम्मां नर्किसि हर्दे तारतुर.
MAT 21:9 अचोने आयका, “दाविद राजाना मर्रिंक होसन्‍ना! पेनबाबाना अदिकार पीसि वायानोंक, आसिर्वाद दोर्किकांटी! स्वर्गमता पेनबाबाना स्‍तुति आयिकांटी.” इल्‍हा वरगेयसेके येसुना पज्जो-मुन्‍ने लोकुल्‍कुना मंदा ताकसेक होनुंदुर.
MAT 21:10 येसु येरुसलेम सहरते होळियतोर, अस्‍के पूरा सहरअंता उंदे रोद्‍दा आता. “ईर बोर आंदुर?” इंचि अंटोर पूसकियुंदुर.
MAT 21:11 अस्‍के, “ईर गालिल एरियाता नासरेत नाटेना पेनदा कबुरतोर येसु आंदुर,” इंचि लोकुल्‍क वेहुंदुर.
MAT 21:12 पजा येसु अगाटा गुळिते होंचि, अगा अम्मानोर्कुन, अस्सानोर्कुन अंटोर्कुन पेच्‍हाचि गेदुमतोर. अचोने आयका अगा मत्‍ता कोत्‍तां अदला-बदला कियानोरा बल्‍लन पावरेल्क अम्मानोरा कुर्सिन मिड्हाचि वाटतोर.
MAT 21:13 पजा येसु ओर्कुन इल्‍हा इत्‍तोर. “नावा लोतुन, पारतना कियाना लोन इंतुर, इंचि दर्मसास्‍त्रमते रासि मंता, गानि मिमेट दीन दोंगाल्क मक्‍कना जेगा कीतिर,” इत्‍तोर.
MAT 21:14 गुळिते येसुनगा गुड्‍डोर्क, कुंटोर्क वातुर, ओर्कुन अंटोर्कुन येसु बेस कीतोर.
MAT 21:15 गुळितगा येसु कीता पेद्‍दा-पेद्‍दा इचंत्रमता कबाह्‍क हूळसि “दाविद राजाना मर्रिंक होसन्‍ना” इंचि पिलाल्कुना मोत्‍कुन्‍मडतुन केंजसि अगा मत्‍ता पेद्‍दा पेर्मालोर दर्मसास्‍त्रम कराहना गुरुल्क इरगा होंगुंक वातुर.
MAT 21:16 अस्‍के ओर येसुन, “पिलाल्क नीकुन बतल इंचंतुर, अद निमे केंजतिना?” इंचि पूसकीतुर. अस्‍के येसु, “हो, केंजसंतन. ए पेनबाबा, निमे सिन्‍ना पिलाल्कुंक आनि पाल उनना पिलाल्कुंक स्‍तुति कियमळ कराहतिन, इंचि दर्मसास्‍त्रमते रासि मंता. अद मिमेट बस्‍केने हदवा हिल्‍लिरा?” इंचि ओर्कुन इत्‍तोर.
MAT 21:17 पजा येसु ओर्कुन अग्गेन होळसि, सहरता पलाते बेतानि सहर होंचि, अद नर्का अग्गेन मत्‍तोर.
MAT 21:18 हक्‍केरे येसु वापस सहरताहेके होननेंके ओन्क कर्वेस्‍ता.
MAT 21:19 अस्‍के हर्दा पक्‍काते उंदि अंजिर मरातुन हूळसि आ मरातगा होत्‍तोर. गानि आ मराकु आकिं तप्‍पा बतांगे मनाहिल्‍लें. अस्‍के, “इंका नीकु बस्‍केने कायां हादा मन्‍नि,” इंचि येसु आ मरातुन इत्‍तोर. अल्हा इत्‍ता इन्‍मळे आ मरा वतसि होत्‍ता.
MAT 21:20 अल्हा आतद हूळसि सिस्युल्कुंक इचंत्रम आता. अस्‍के ओर, “अंजिर मरा इच्‍चोर बिराना बल्हा वतसि होत्‍ता?” इंचि येसुन इत्‍तुर.
MAT 21:21 अस्‍के येसु ओर्कु इल्‍हा जवाब हीतोर. “नना मीकु निजम वेहांतन, ओक्‍कला मीकु बतले अनमानम हिलाकोंटा पेनदापोर्रो विस्वासम मनानय्ते, नना बल्हा अंजिर मरातुन कीतनो अल्हा मिमेटगुडा किया परांतिर. अचोने आयो इद गुट्‍टातुन, ‘इग्‍गेटाल तेदसि समुद्रमते होंचि अर्रा,’ इंचि इनानय्ते, अद होंचि समुद्रमते अर्रंता.
MAT 21:22 मिमेट विस्वासमतोनि पारतनाते बतल तल्‍किना अद मीकु दोर्कार,” इत्‍तोर.
MAT 21:23 पजा येसु गुळिते होळियसि पेनदा पोल्‍लें कराहसेके मननेंके, अगा पेद्‍दा पेर्मालोर आनि यहुदिल्कुना पेद्‍दाल्क ओनगा वातुर. वासि, “निमे ई कबाह्‍क बद अदिकारमते कीसंतिन? नीकु ई अदिकारम बोर हीतोर?” इंचि पूसकीतुर.
MAT 21:24 अस्‍के येसु ओर्क इल्‍हा जवाब हीतोर. “ननागुडा मीकुन उंदि सवाल पूसकींतन, मिमेट जवाब हियानय्ते, नना बद अदिकारमते इव कबाह्‍क कीसंतन इत्‍तद वेहंतन.
MAT 21:25 अय्ते वेहट, योहानुंक बापतिस्मा हियाना अदिकारम बगाटाल दोर्कता? स्वर्गमताला हिलाकोंटे मनकालोराहेंदाल दोर्कतना?” इत्‍तोर. अस्‍के ओर ओरे इल्‍हा वळ्ककुनालय दल्‍गतुर. “ओक्‍कला स्वर्गमताल दोर्कता इंचि मनम इनानय्ते, ‘योहानुन बारि विस्वासम किय्‍यिर?’ इंचि इनानुर.
MAT 21:26 ओक्‍कला मनकालोराहेंदाल दोर्कता इनानय्ते, लोकुल्‍कुना वेर्रे! बारित्‍ते योहान पेनदा कबुरतोर आंदुर इंचि लोकुल्‍क नम्मंतुर.”
MAT 21:27 अदुनहाटीं ओर, “माक एर्का हिल्‍ले,” इंचि इत्‍तुर. अस्‍के, “अल्हा अय्ते, इव कबाह्‍क बद अदिकारमते कीसंतनो, ननागुडा मीकु वेहोन,” इंचि येसु इत्‍तोर.
MAT 21:28 केंजट, नना उंदि सिन्‍ना वेसुड वेहंतन, दान केंजसि मिमेट बतल इनकुंतिरो वेहट. वरोर मनकंक इव्वुर मर्क मत्‍तुर. उंदि मल्का आ मनकल ओना पेद्‍दा मर्रिनगा होंचि, “कोको, निमे इय्याला अंगुर बगिचाते होंचि कबळ कीम,” इंचि वेहतोर.
MAT 21:29 अस्‍के आ पेद्‍दा मर्रि “नना होनोन” इत्‍तोर गानि पज्जो ओर विचारम कीसि बगिचाते होत्‍तोर.
MAT 21:30 पजा आ मनकल ओना इंकावरोर मर्रिनगा होंचि, “कोको, इय्याला निमे अंगुर बगिचाते होंचि कबळ कीम” इंचि वेहतोर. अस्‍के आ मर्रि, “सरे दांतन बाबा!” इत्‍तोर, गानि ओर होनेन हिल्‍लोर.
MAT 21:31 अय्ते आ इव्वुर मर्कनाल बा मर्रि बाबोना पोल्‍ले केंजताप? इंचि येसु ओर्कुन पूसकीतोर. अस्‍के ओर, “पेद्‍दा मर्रि केंजतोर,” इंचि इत्‍तुर. “नना निजम वेहंतन, बोगामोताह्क आनि कर वसुल कियानोर मीकन्‍ना मुन्‍ने पेनदा राज्येमते दांतुर.
MAT 21:32 योहान मीकु सत्‍तेमता हर्रि हुप्‍सालय वातोर, ओन मिमेट नम्मा हिल्‍लिर. गानि बोगामोताह्क, कर वसुल कियानोर बारे ओन नमतुर, इद मीकु एर्के. अय्नागानि मीवा मनसु बदलांचि योहानुन नम्‍मालय मिमेट तयार आया हिल्‍लिर,” इंचि येसु इत्‍तोर.
MAT 21:33 पजा येसु इल्‍हा इत्‍तोर. केंजट, इंकुंदि वेसुडि वेहांतन, वरोर मनकल मत्‍तोर. ओर उंदि अंगुर तोटा कीतोर. आ तोटा सुट्‍टु गूरे दोहाचि तोटाता लोप्पेन अंगुर पंडिना पानकम तेंडालय उंदि पोक्‍का तव्‍सि गानगु तयार कीतोर. दाना दग्गेरेने कावेलहाटीं उंदि मंडा वाटतोर. पजा तोटातुन वेरेतोर्क बटाइक हीसि, वेरे देसेम होत्‍तोर.
MAT 21:34 अंगुर पंडिं कोय्याना वेला वाता, अस्‍के पालुनाहाटीं ओना दासुल्‍कुन बटाइतोरहेके लोहतोर.
MAT 21:35 अस्‍के बटाइतोर दासुल्‍कुन दोर्कापीसि, वरोन तंतुर, वरोन हव्कतुर, वरोनपोर्रो बारे बंडां हुक्‍तुर.
MAT 21:36 इद केंजसि बगिचाता मालक इंका एक्‍को दासुल्‍कुन लोहतोर. ओरतोनिगुडा बटाइतोर मोदाला कीतापे कीतुर.
MAT 21:37 आकिरते, “नावा मर्रिन बेस कदर कियानुर,” इनकुंचि ओना मर्रिन ओरहेके लोहतोर.
MAT 21:38 गानि बटाइतोर, ओना मर्रि वायानद हूळसि, “ईर अय्ते वारसदार आंदुर, दट ओन हव्‍किसि, ओना जाय्‍दाद मनम एतकुनकोम,” इंचि ओर ओरे इनकुत्‍तुर.
MAT 21:39 पजा ओन दोर्कापीसि तोटाता पलाते ओसि हव्कतुर.
MAT 21:40 अय्ते आ तोटाता मालक वायानय्ते, आ बटाइतोर्कुन बतल कियानुर?
MAT 21:41 ओर येसुन इत्‍तुर, “असोंटा दुस्‍टुल्कुन तंचि-तंचि हव्कानुर आनि बोर अय्ते पंटा पेय्‍स्‍तस्‍के ओन्क वेलापोर्रो तूस हींतोरो, ओन्क बटाइक हिय्यानुर,” इत्‍तुर.
MAT 21:42 पजा येसु ओर्कुन इल्‍हा इत्‍तोर. “मिमेट दर्मसास्‍त्रमते बस्‍केन हदवा हिल्‍लिरा? बद बंडातुन अय्ते मिस्‍त्रिल्‍क कबळ्‍क ओज्‍जो इंचि हय्‍सा हिल्‍लुर, अदे बंडा सेंकु मूलाता पुनादि बंडा आता. इद सामि कीता कबळ आंद, इद मना नदरते इचंत्रमाता कबळ आंद,” इत्‍तोर.
MAT 21:43 “मिमेट निजम इत्‍तिर. केंजट, दाना अर्तम इल्‍हा मंता. पेन मीकु हियना स्वर्ग राज्येमतुन तेंडसि, मीवा जेगाते दाना पोल्‍लेपोर्रो तिरियना वेरे जाति लोकुल्‍कुंक हींता.
MAT 21:44 बोर अय्ते इद बंडापोर्रो अर्रंतुर, ओर तुकडां-तुकडां आयनुर, गानि अद बंडा बोरपोर्रो अय्ते अर्रंता, ओर पिच्‍चि-पिच्‍चि आयानुर,” इंचि इत्‍तोर.
MAT 21:45 पेद्‍दा पेर्मालोर्क आनि परिसिल्क येसु वेहता वेसुडिं केंजसि, येसु ओरा बारेमतेन वळ्कसंतोर इंचि एरपाट कीतुर.
MAT 21:46 पजा ओर येसुन दोर्का पियालय हूळतुर, गानि लोकुल्‍कुन हूळसि वेरियतुर. बारित्‍ते लोकुल्‍क येसुन पेनदा कबुरतोर आंदुर इंचि नमतुर.
MAT 22:1 येसु मरुंदि मल्का, लोकुल्‍कुंक वेसुडि वेहासेक इल्‍हा वळकालय दल्‍गतोर.
MAT 22:2 स्वर्ग राज्येम वरोर राजानलेसीं मंता. ओर ओना मर्रिना मरमिंकु उंदि कुळ्‍पु इरतोर.
MAT 22:3 आ कुळ्‍पुंकु बोर्कुन अय्ते केय्‍सि मत्‍तोरो, ओर्कुन केय्‍सि तायालय, ओना दासुल्‍कुन लोहतोर. गानि ओर वायोम इंचि इत्‍तुर.
MAT 22:4 वायोम इंचि इत्‍तारित्‍ते, मर्रा इच्‍चुर दासुल्‍कुन राजाल इल्‍हा वेहट इंचि लोहतोर, “हुळाट, मीहाटीं नना कुळ्‍पु इरतन, बल्सता कुर्रा आनि कोंदा कोयतन, कुसिरगुडा वेसि तयार मंता. अदुनहाटीं मिमेट गाटो तिनालय ताकट इंचि इंटु,” इत्‍तोर.
MAT 22:5 राजाल वेहिनागानि, राजाना पोल्‍लेता कदर कियाकोंटा, इच्‍चुर ओरा पोलाल्‍कुनहेके होत्‍तुर, इच्‍चुर बारे ओरा कबळ दंदानहेके होत्‍तुर. इच्‍चुर बारे राजाना दासुल्‍कुन पीसि तंचि हव्‍किसि पोहतुर.
MAT 22:7 अस्‍के राजांक इरगा होंग वाता. पजा राजाल ओना सिपाइल्कुन लोहचि, ओना दासुल्‍कुन हव्कतोर्कु हव्‍किसि ओरा सहरकु तडमि दोस्‍सा वेहतोर.
MAT 22:8 पजा राजाल ओना दासुल्‍कुंक इल्‍हा वेहतोर. “मरमिना कुळ्‍पु तयार मंता. गानि केयता मनकालोर बेसटुर आयुर.
MAT 22:9 अदुनहाटीं मिमेट हर्कुन पीसि, गल्‍लीं, बजारकुन पीसि होंचि दोर्कुतोर अंटोर्कुन गाटो तिनालय केय्‍सि तटु,” इंचि इत्‍तोर.
MAT 22:10 अस्‍के दासुल्क, हर्कु, गल्‍लीं पीसि होंचि बेसतोर, सेड्‍डोर अंटोर्कुन जमा कीसि तत्‍तुर. अस्‍के मरमिना लोते हेडमितुर निंडिस होत्‍तुर.
MAT 22:11 अस्‍के वाता हेडमितोर्कुन राजाल हूळतस्‍के, मरमिन लोप्पो मरमिन लायक बेसता कपडिं केरुवा वरोर मनकल ओन्क दिसतोर.
MAT 22:12 अस्‍के राजाल ओन, “निमे मरमिन लोप्पो बेसता कपडिं केरुवा, मरमिना मंडाता हिळु बल्हा वातिन?” इंचि ओन पूसकीतोर गानि आ मनकल बतले वळका हिल्‍लोर.
MAT 22:13 अस्‍के राजाल ओना जीतागाह्कुन केय्‍सि, “ईना कय्‍क-काल्क दोहचि, पलाते हीकटते पोहचीम्ट. अगा मनानोर अळसेके, वरगेयसेके, पल्कु कोर्कसेक मनांतुर,” इंचि इत्‍तोर.
MAT 22:14 पजा, “केयतोर वेल्‍लेटुरे मंतुर. गानि पेर्कुत्‍तोरु मात्रम इच्‍चुरे मंतुर,” इंचि येसु वेसुड वेहामळ आपतोर.
MAT 22:15 पजा परिसिल्क अगटाल पेय्सि उंदगा जमा आसि, येसुन बल्हा किसन्‍ना ओर वळकाना पोल्‍लेतेन ओना तप्पु दोर्का पियाना इंचि उपायम कियालय दल्‍गुतुर.
MAT 22:16 परिसिल्क येसुन पसांचना उपायाल्‍क कीसि, ओरा इच्‍चुर सिस्युल्कुन हेरोद राजाना मनकालोरतोनि ओनाहेके लोहचीतुर. ओर येसुनगा होंचि इल्‍हा इत्‍तुर. “गुरु, निमे निजम वळ्‍कानोन, पेनदा हर्दा बारेमते सत्‍तेमते करहानोन आंदिन इंचि माक एरपाट मंता. बोर बतल इनिनागानि दाना पिकिरगुडा किय्‍यिन, निमे लोकुल्‍कुना मोकम हूळसि वळ्किन, इदिंका माकु एरके.
MAT 22:17 अय्ते माकु वेहा. नियम परकारम, कैसर राजांक कर दोहमळ न्‍यायमेना आयोना? नीवा विचारमते बतल मंता?” इत्‍तुर.
MAT 22:18 ओरा कोंटे उपायाल्‍क येसुंक मुन्‍नेटाले एर्का मत्‍ताहाटीं ओर ओर्कुन इल्‍हा इत्‍तोर. “ए डोंगिरिटा, बारि नावा पट्‍टु हूळांतिर?
MAT 22:19 मिमेट कर दोहना कोत्‍ता नाकु हुप्‍सट,” इत्‍तोर. अस्‍के आ लोकुल्‍क ओन्क उंदि एंडि बंडि हुपिस्तुर.
MAT 22:20 हुपिस्तस्के, “इद एंडि बंडिपोर्रो बोना पोटुवा आनि पोरोल मंता?” इंचि येसु ओर्कुन पूसकीतस्‍के,
MAT 22:21 “कैसर राजानद,” इंचि ओर इत्‍तुर. पजा येसु ओर्कु वेहतोर. “बद कैसर राजानद मंता, अद कैसर राजांक हीम्टु, बद अय्ते पेनदाद मंता, अद पेनदुक हीम्टु.” इत्‍तोर.
MAT 22:22 येसुना पोल्‍लें केंजसि, ओर्कु इचंत्रम आता. पजा ओर अगटाल होत्‍तुर.
MAT 22:23 अदे रोजु इच्‍चुर सदुकिर येसुनगा वातुर (ईर हासि मर्रा जीवाते तेदमळतुन ईर नम्मुर.)
MAT 22:24 वासि इल्‍हा सवाल पूसकीतुर, “गुरु, मूसाना नियम परकारम, वरोर मनकल पिलाल्क आयाका मुन्‍नेन हायानय्ते ओना मुत्‍तोनतोनि ओना तम्मुर मरमिं आसि, हातोना वंसम बेर्सागोटालय पिलाल्कुन कना परांतोर.
MAT 22:25 अय्ते महगा एडुर दादाल-तम्मुह्‍क मत्‍तुर. पेद्‍दा दादाना मरमिं आतां गानि पिलाल्क आयाका मुन्‍नेन ओर हातोर. पजा ओना मुत्‍तोन ओना तम्मुर मरमिं आतोर.
MAT 22:26 आ तम्मुरगुडा पिलाल्क आयाका मुन्‍नेन हातोर. पजा ओना पज्‍जोटोर दान मरमिं आतोर ओरगुडा हातोर. इल्‍हा एडुरगुडा दानतोनि मरमिं आसि पिलाल्क आयाका मुन्‍नेन हातुर.
MAT 22:27 अंटोर हाता पजा, आ मुरतळगुडा हाता.
MAT 22:28 अय्ते हातोर अंटोर मर्रा जीवाते तेदतस्‍के, आ एडुर लोप्पोटाल अद बोना मुत्‍तो आयार? बारित्‍ते, ओर एडुरगुडा दान मरमिं आसि मत्‍तुर,” इत्‍तुर.
MAT 22:29 अस्‍के येसु ओर्क इल्‍हा जवाब हीतोर. “मिमेट दर्मसास्‍त्रमतुन आनि पेनदा ताकततुन एरपाट कियाका तप्पु अर्तम कीकुंचंतिर.
MAT 22:30 बारित्‍ते हातोर मर्रा जीवाते तेदानुर अस्‍के, ओर मरमिं आयुर, मरमिं कीसिगुडा हिय्युर. गानि ओर स्वर्गमता पेनदा दूतनलेसीं मनांतुर.
MAT 22:31 गानि हातोर मर्रा जीवाते तेदानुर इंचि दर्मसास्‍त्रमते वेहचि मंता, अद बतल इत्‍ते, ‘नना अब्राहाम, इसाक आनि याकोबुना पेनदुन आंदुन,’ इंचि पेन इत्‍ता. अदुन हद्‍विसि दाना अर्तम बस्‍केने एरपाट किय्‍या हिल्‍लिरा? इंचि अद हातोरा पेन आयो गानि जीवाते मनानोरा पेन आंद,” इल्‍हा येसु इत्‍तोर.
MAT 22:33 येसु इच्‍चोन वळ्‍कतारित्‍ते, अगा मत्‍ता लोकुल्‍क ओना पोल्‍लें केंजसि इचंत्रम आतुर.
MAT 22:34 येसु सदुकिर्कुन वळकाकोंटा कीतोर इंचि परिसिल्कुंक तेळियतारित्‍ते ओर जमा आसि येसुनहेके वातुर.
MAT 22:35 ओरा लोप्पो मूसाना नियम बेस तेळियतोर वरोर मत्‍तोर, ओर येसुना पट्‍टु हूळालय,
MAT 22:36 “गुरु, मूसाना नियम लोप्पो अन्‍निंकन्‍ना पेद्‍दा आदेस बद आंद?” इंचि येसुन सवाल पूसकीतोर.
MAT 22:37 अस्‍के, “निमे नीवा सामि आता पेनदुन पूरा मनसुनाल, पूरा आत्माताल, पूरा बुद्‍दिताल पावरम कीम.
MAT 22:38 इदे अन्‍निंकन्‍ना पेद्‍दा आनि मोदोलता आदेस आंद.
MAT 22:39 रोंडो आदेस बतल इत्‍ते, नीवद निमे बच्‍चोन पावरम कींतिनो, अचोने पावरम इंकावरोनगुडा कीम.
MAT 22:40 इव रोंडु आदेसकुना आदारम पोर्रेने मूसाना नियम आनि पेनदा कबुरतोर रासता पुस्तकाल्क मंतां.” इंचि येसु जवाब हीतोर.
MAT 22:41 पजा परिसिल्क उंदगा जमा आसि मत्‍तस्के, येसु ओर्कुन उंदि सवाल पूसकीतोर.
MAT 22:42 “किरिस्‍तुना बारेमते मीवद बतल विचारम मंता? ओर बोना मर्रि आंदुर?” अस्‍के, “ओर दाविदना मर्रि आंदुर,” इंचि परिसिल्क इत्‍तुर.
MAT 22:43 अस्‍के येसु ओर्कुन इल्‍हा इत्‍तोर. “अय्ते, दाविद पवित्र आत्माते निंडसि इल्‍हा इत्‍तोर. सामि नावा सामिन इत्‍तोर, बदवेरदाका अय्ते नीवा पगातोर्कुन नीवा काल्कुनगा तायोन, अदवेरदाका नावा तिना बाजुंक उद्‍दिसि मन.
MAT 22:45 कुद्‍दु दाविद ओन सामि इंचि इत्‍तोर अय्ते ओर दाविदना मर्रि बल्हा आया परांतोर?” इत्‍तोर.
MAT 22:46 अस्‍के ओर बोरे येसुना पोल्‍लेक जवाब हिया पराहिल्‍लुर. आ रोजुनाल येसुन बद्‍दे सवाल पूसकियालय बोर्कु हिम्मत आयाहिल्‍ले.
MAT 23:1 सिस्युल्कुन आनि अगाटा मंदितुन हूळसि येसु इत्‍तोर गदा,
MAT 23:2 “दर्मसास्‍त्रम कराहना गुरुल्कुंक आनि परिसिल्कुंक मूसाना नियम कराहना हक्‍कु मंता.
MAT 23:3 इंचि ओर तेहते तेदा पर्रुवा मोता दोह्‍चि मनकालोरा हट्‍टनपोर्रो इर्रंतुर गानि आ मोतातुन कांजसि ओयनेंके वेलु दोस्‍सि आसरागुडा आयुर. अदुनहाटीं ओर मीकु बतल-बतल वेहंतुरो अव अन्‍नि कीसेके ताकटु, गानि ओर कीताप मात्रम कियमट.”
MAT 23:5 ओर ओरा कबाह्‍क लोकुल्‍क हूळना इंचि कींतुर. पेनदा पोल्‍लेन रासि, तायित्‍कुने निहचि पेद्‍दा-पेद्‍दा दुम्में ओरा दंडा कयकुंक, कप्पर्क दोहकुंतुर. ओरा कपडिना कोंगुल्कु जिल्‍लर-जल्‍लर होळसींतुर. लोकुल्‍क ओर्कुन “सादु” इनागोम इंचि इल्‍हा कींतुर.
MAT 23:6 अचोने आयाका दर्मसास्‍त्रम कराहना लोह्कुने, कुळ्‍पुकुने पेद्‍दाल्‍क उद्‍दाना जेगाते उदमळ इत्‍ते ओर्क वेल्‍ले इस्‍टम.
MAT 23:7 हाटुमकुने जोहार वेहागोटकुनमळ, मनकालोराहेंदाल गुरु इंचि केया वेहकुनमळ ओर्कु बेस अनपिच्‍चंता.
MAT 23:8 गानि मिमेट अंटोर दादालोर-तम्मुह्‍क आंदिर, मीवा अंटोरा गुरु वरोरे. अदुनहाटीं मिमेट मीकुन “गुरु” इंचि इनागोटकुन्‍मटु.
MAT 23:9 स्वर्गमते मनना पेने मीवा बाबाल आंदुर, अदुनहाटीं इद बूमिते मिमेट बोने “बाबा” इंचि इनमटु.
MAT 23:10 अल्‍हेने मीकु वरोरे सामि मंतोर, ओर किरिस्‍तु आंदुर. अदुनहाटीं मीकुन बोरे “सामि” इंचि केया मन्‍नि.
MAT 23:11 गानि बोर अय्ते पेनदा मुन्‍ने अंटोर्कन्‍ना पेद्‍दा आयालय हूळांतोर, ओर अंटोरा सेवा कियानोर आयिर.
MAT 23:12 बोर अय्ते, ओनद ओरे पेद्‍दा इनकुनानुर, पेन ओन सिन्‍ना किय्‍यार. अल्‍हेने बोर अय्ते पेनदाहाटीं सिन्‍ना आसि ताकांतोर, ओन पेन पेद्‍दा किय्‍यार.
MAT 23:13 अरे डोंगि परिसिल्क आनि दर्मसास्‍त्रम कराहना गुरुल्कुनिटा, मीक गोसा तप्‍पो. स्वर्ग राज्येमते होनानोरा हर्रि मिमेट बंद कीतिर. मिमेट अय्ते होन्‍निर, होनानोर्कुनगुडा होन्‍ना हिय्यिर.
MAT 23:14 अरे डोंगि दर्मसास्‍त्रम कराहना गुरुल्क आनि परिसिल्कुनिटा, मीकु गोसा तप्‍पो. मुंडामोस्ता मुर्ताह्‍कुन मुळाहंतिर. अल्‍हेने लोकुल्‍कुंक हुप्‍सालय वेल्‍लेनजेम पारतना कींतिर. मिमेट डोंगिर्क आंदिर! मीकु पेन एक्‍को सिक्‍सा हिय्यार.
MAT 23:15 अरे डोंगि दर्मसास्‍त्रम कराहना गुरुल्क आनि परिसिल्कुनिटा! वरोन मीवा मतमते तायालय मिमेट देसे-देसेम तिरियसि बूमि-मब्बु उंदि कींतिर. ओर मीलोप्‍पो वातस्के, मिमेट ओन मीकन्‍ना एक्‍को पापमते अरहचि नरकमते लोहंतिट, दानहाटीं मीकु बच्‍चोर पेद्‍दा गोसा वायार.
MAT 23:16 अरे, हर्रि हुप्‍संतोम इनना गुड्‍डिर्कनिटा! मिमेट इंतिर गदा, बोर अय्ते पेनदा गुळिता ओट्‍टु तिंतोर, ओन्क बतल आयो. गानि बोर अय्ते गुळि लोप्पोटा बंगारमता ओट्‍टु तिंतोर, ओन्क मात्रम आ ओट्‍टु परकारम ताका पींता, इंचि इंतिर. दानहाटीं मीकु बच्‍चोर पेद्‍दा गोसा वायार.
MAT 23:17 अरे गुड्‍डिर! बद पेद्‍देद, बंगारमा बंगारमतुन पवित्र कियना गुळिआ?
MAT 23:18 इंका इल्‍हा इंतिर गदा, बोरन्‍ना पेन गद्‍देता ओट्‍टु तिंचि दान परकारम ताकाकोंटे बतल आयो, गानि पेन गद्‍देपोर्रो वाटता उपारमता ओट्‍टु बोर अय्ते तिंतोर, ओन्क मात्रम आ ओट्‍टु परकारम ताका पींता.
MAT 23:19 अरे गुड्‍डिर्कनिटा! पेन गद्‍दे पेद्‍देदा मरि पेन गद्‍दे हेंदाल पवित्र आयना दानपोर्रो वाटता उपारम पेद्‍देदा?
MAT 23:20 अदुनहेंके बोर पेन गद्‍देता ओट्‍टु तिंतोर, ओर पेन गद्‍देपोर्रो मत्‍ता अन्‍निटवुना ओट्‍टु तित्‍तापे.
MAT 23:21 अल्‍हेने बोर अय्ते गुळिता ओट्‍टु तिंतोर, ओर गुळिते मनना पेनदा ओट्‍टु इंका तिंतोर.
MAT 23:22 बोर अय्ते स्वर्गमता ओट्‍टु तिंतोर, ओर पेनदा राजगद्‍दे आनि राजगद्‍देपोर्रो उदिस मनानोनद इंका ओट्‍टु तिंतोर.
MAT 23:23 अरे डोंगि दर्मसास्‍त्रम कराहना गुरुल्क आनि परिसिल्कुनिटा, मीक गोसा तप्‍पो. बारित्‍ते मिमेट पुदिना, जिल्करा, सोप इसोंटा पंटातालगुडा पदि तूसकुनाल उंदि तूस पेनदुक हींतिर. गानि न्‍यायमते तिरियमळ, दया कियमळ, पेनदापोर्रो विस्वासम इरमळ इसोंटव दर्मसास्‍त्रमता बेसता पोल्‍लेन मिमेट होळसीतिर. पदि तूसकुनाल उंदि तूस पेनदुक हियमळ इद बेसे. गानि इद कीसेक-कीसेक अवुनगुडा होळसाकोंटा ताका मत्‍तिर.
MAT 23:24 हर्रि हुप्‍संतोम इनना गुड्‍डिर्कनिटा! मिमेट नुल्‍लेतुन बारे वडा पीसि उंटिर गानि लोटापेटातुन बारे हूळवा अल्हे मिंगांतिर.
MAT 23:25 अरे डोंगि दर्मसास्‍त्रम कराहना गुरुल्क आनि परिसिल्कुनिटा, मीकु गोसा तप्‍पो. बारित्‍ते, मिमेट गिन्‍नें-गिलासकु सिराप लोकुल्‍कुंक दिसालय पलाताल तोमसि साप कींतिर, गानि लोप्पो मात्रम मीवा कराब गुनाल्‍क, पापाल्क निंडिस मंतां.
MAT 23:26 अरे गुड्‍डि परिसिल्कुनिटा! मुन्‍ने मीवा गिलासकु-गिन्‍नेन लोप्पोटाल तोमसि नोर्राटु, अस्‍के अव पलातालगुडा बेस दिसंता.
MAT 23:27 अरे डोंगि दर्मसास्‍त्रम कराहना गुरुल्क आनि परिसिल्कुनिटा, मीकु गोसा तप्‍पो. बारित्‍ते मिमेट तेल्‍लटा सुन्‍ना होकता गोरिनसंटोर आंदिर. अव पलाताल हूळालय सक्‍कगा दिसंतां, गानि लोप्पो हूळते, पीनगुना बोक्‍कां कळियसि होंचि गब्‍बु पीसि मनंतां.
MAT 23:28 अल्‍हेने मिमेट इंका पलाताल लोकुल्‍कुंक पक्‍का नीतिमंतुल्‍कुन लेह्का दिसंतिर. गानि मीवा पीट लोप्पो नडेह कियना बुद्‍दि, पापमता कबाह्‍क निंडिस मंता.
MAT 23:29 अरे डोंगि दर्मसास्‍त्रम कराहना गुरुल्क आनि परिसिल्कुनिटा, मीकु गोसा तप्‍पो. बारित्‍ते, मिमेट पेनदा कबुरतोराहाटीं गोरिं दोहांतिर आनि नीतिमंतुल्‍कुना गोरिन सोक कींतिट.
MAT 23:30 अल्हा कीसि मिमेट इंतिर, मोमोट पेद्‍दाल्कुना कालमते मंचि मत्‍ते, पेनदा कबुरतोर्कुन हव्कानेंके, ओर्क सायता आया कोन्‍नेम.
MAT 23:31 इल्‍हा इंचि, “मोमोट पेनदा कबुरतोर्कुन हव्कतोरा वंसमतोर्कुम आंदुम,” इंचि मीवद मिमेटे उल्टा गवाइ वेहकुंतिर.
MAT 23:32 अय्ते मिमेट मीवा पेद्‍दाल्क सुरुव कीता पापमतुन पूरा कीम्‍टु.
MAT 23:33 ए तरासकुनसंटोरिटा! आनि नय तरास पोरिह्कुनसंटोरिटा! मिमेट बल्हा अयना नरकमते होनमळ तप्‍पो.
MAT 23:34 अदुनहाटीं नना मीहेके पेनदा कबुरतोर्कुन, बुद्‍दिमंतुल्‍कुन आनि दर्मसास्‍त्रम कराहना गुरुल्‍कुन लोहांतन. मिमेट ओराव्टेटाल इच्‍चुर्कुन हव्‍ककिर, इच्‍चुर्कुन क्रुसुंक वेलाड वाटकिर, इच्‍चुर्कुन मीवा दर्मसास्‍त्रम कराहना लोह्कुने ओसि पोट्‍टेते तनकिर, तंचि ओर्कुन नार-नार तिराह्‍चि तिप्‍पल्‍क कीकिर.
MAT 23:35 दीनहेंदाल, नीतिमंतुड आता आबेलनगटाल अय्ते गुळि आनि गद्‍दे नड्‍डुम मिमेट हव्‍कता बर्काना मर्रि जकर्याहनगड्‍क, बचटुर नीतिमंतुल्‍कुना नेत्‍तुर अय्ते ई बूमिपोर्रो पोंगागोटमळ जर्गता, आ अंटोरा नेत्‍तुरता दोसेम पूरा मीपोर्रो अर्रार.
MAT 23:36 नना मीकु निजम वेहांतन, इव अन्‍नि पोल्‍लें ई पीळितोरपोर्रेन अर्रंतां.
MAT 23:37 ए येरुसलेमतोरिटा, ए येरुसलेमतोरिटा! मिमेट पेनदा कबुरतोर्कुन हव्‍कानोर आंदिर, इंका पेन मिहगा लोहचीतोर पोर्रो मिमेट बंडां हुक्‍कानोर आंदिर. कोर्रु दाना पीसेन रेक्‍काना हिळु बल्हा जमा कींतनो, अल्हेन ननागुडा मीवा पिलाल्कुन जमा कियना इंचि बच्‍चुंगो मल्कां कोरतन. गानि मिमेट मात्रम कोराहिल्‍लिर.
MAT 23:38 हूळा, इंदके मी लोतुन मीहाटीं कुल्‍ला होळ्‍समळ जर्गता. पूरा लोन बतल हिलाकोंटा आंता.
MAT 23:39 नना मीकु वेहानद बतल इत्‍ते, “सामिना पोरोलते वायानोर आसिर्वाद दोर्कतोर,” इंचि बदवेरदाका अय्ते मिमेट इन्‍निरो अदवेरदाका नाकुन मर्रा हूळिर.
MAT 24:1 येसु गुळिताल पलाते पेय्सि होननेंके, ओना सिस्युल्क ओन्क गुळिता बंगलां हुप्‍सालय ओनगा होत्‍तुर.
MAT 24:2 गानि येसु ओर्कु इल्‍हा जवाब हीतोर. “मिमेट इवन्‍निन हूळसंतिर गदा! नना मीकु निजम वेहांतन, इव बंडां उंदानपोर्रो उंदि मनाकोंटा कूल्‍हाना वेला वायनद मंता,” इत्‍तोर.
MAT 24:3 आयंका येसु जय्‍तुन मराकुना गुट्‍टापोर्रो होंचि उदतोर. ओर ओंटिगा मत्‍तद हूळसि ओना सिस्युल्क ओनगा होंचि इल्‍हा इत्‍तुर, “इवन्‍नि गटनां बस्के जर्गनुं माक वेहा. इंका निमे वायाना वेला आनि दुनिया मुंळगना आकिर वेला बस्के आंता इंचि मोमोट बव चिन्‍हां हूळसि एरपाट कीकोम?” इत्‍तुर.
MAT 24:4 अस्‍के येसु ओर्कु इल्‍हा जवाब हीतोर. “मीकुन बोर पसांचकोंटा मिमेट उसारते मंटु.
MAT 24:5 नावा पोरोल एतसेके बचुटूरो लोकुल्‍क वांतुर. वासि, ‘ननाने किरिस्‍तुन आंदुन’ इंचि वेल्‍लेटोर्कुन पसांचंनुर.
MAT 24:6 मिमेट लडाईं आनि लडाईना पोल्‍लेना बारेमते केंजसि वेरियमट, अल्हा तप्‍पाकोंटा आयानुंगे. गानि दुनियाता आकिर वेला अस्‍केने वायो.
MAT 24:7 देसेमपोर्रो देसेम, राज्येमपोर्रो राज्येम लडाईं आयनुं, वेरे-वेरे जेगाने बूकंपाल्क आयनुं, कर्वु अर्रार.
MAT 24:8 गानि इल्‍हा आयमळ इत्‍ते एर पूरालय नोप्‍पिं सुरुव आताप आंद.”
MAT 24:9 “मिमेट नाकुन विस्वासम कीताहाटीं लोकुल्‍क मीकुन तकलिप कियालय अदिकारिल्कुंक अप्पजेपंतुर, अस्‍के ओर मीकुन हव्कंतुर, नावा पोरोलताहेंका दुनियातोर बोरे मीकुन हय्सुर.
MAT 24:10 आ वेलाते बच्‍चटुरो विस्वासम कियानोर ओरा विस्वासम होळसंतुर. वरोंक-वरोर पगां आसि वरोंक-वरोर हयसाकोंटा आंतुर.
MAT 24:11 बच्‍चटुरो आबद्‍दम कबुरतोर, पेनदा कबुरतोर्कुम इंचेके वांतुर, लोकुल्‍कुंक सेड्‍डा हर्रि हुपसंतुर.
MAT 24:12 पापाल्क एक्‍को आसि वेल्‍ले मंदिता पावरम इंका तक्‍को आसेक दांता.
MAT 24:13 गानि बोर अय्ते पेनदापोर्रोटा विस्वासमते आकिरदाका निल्‍सि मनंतोर, ओनके मुक्‍ति दोर्कार.
MAT 24:14 पेनदा राज्येमता बारेमता बेसता कबुर दुनियाता अन्‍नि देसेल्‍कुना लोकुल्‍कुंक उंदि गवाइ इंचि तेळियागोटसि वेहतस्के, इद दुनियाता आकिर आयार.”
MAT 24:15 दानिएल पोरोलता पेनदा कबुरतोर वेहताप, बोरे हय्‍सवसोंटा नासडेम कियाना वस्तु, गुळि लोप्पो पवित्र जेगाते नित्‍तिसि मत्‍तद मिमेट हूळकिर (हद्‍वानोर इदुन अर्तम कीकुंटु.)
MAT 24:16 अस्‍के बोर अय्ते यहुदिया एरियाते मंतुरो, ओर गुट्‍टनहेके वित्‍तिर,
MAT 24:17 बोर अय्ते लोतपोर्रो मंतोर, सामान पीसि वायालय लोप्पो होळियानायो,
MAT 24:18 बोर अय्ते नेलिने कबळ कीसेक मंतोर, कपडिं पीसि वायालय मल्सि लोन होनानायो.
MAT 24:19 अव रोजकुने पीटे मत्‍ता मुर्ताह्‍कुंक आनि सिन्‍ने मर्तल्‍लुह्‍कुंक वेल्‍लेन तकलिप वांता.
MAT 24:20 पीनि कालमते अल्‍हेने नोमकेम रोजुने ई वित्‍तना वेला वायामन्‍नि इंचि मिमेट पारतना कीम्‍टु.
MAT 24:21 बारित्‍ते अद वेलाते इसोंटा तकलिप वायार गदा, दुनिया पुट्तस्केटाल अय्ते इदवेरादाका, बस्‍केन वाया हिल्‍ले. मुन्‍नेगुडा बस्‍केन वायो.
MAT 24:22 ओक्‍कला पेन अव रोजकुन तक्‍को कियाकोंटा मंचि मत्‍ते, बोरे पिसाकोन्‍नेर. गानि पेर्कुत्‍ता लोकुल्‍कुनाहाटीं पेन अव रोजकुन तक्‍को किय्‍यार.
MAT 24:23 अद वेलाते ओक्‍कला बोरन्‍ना मीकुन किरिस्‍तु इगे मंतोर, अगा मंतोर इनानय्ते, मिमेट ओर्कुन नम्मुमट.
MAT 24:24 बारित्‍ते अव रोजकुने आबद्‍दम किरिस्‍तुल्‍क, पेनदा आबद्‍दम कबुरतोर वायानुर. आनि कुदुरते पेन पेर्कुत्‍ता लोकुल्‍कुन पसांचलय पेद्‍दा-पेद्‍दा चिन्‍हां, इचंत्रमता कबाह्‍क कीसि हुप्‍सानुर.
MAT 24:25 हुळाट! नना अय्ते इव पोल्‍लें मीक मुन्‍नेने वेहचीतन.
MAT 24:26 दानहाटीं “किरिस्‍तु केडाते मंतोर” इंचि मीकु बोरन्‍ना वेहानय्ते, मिमेट अगा होनमट. इंका “किरिस्‍तु लोप्पोटा अर्राते मंतोर” इंचि मीकु वेहानय्ते मिमेट ओनापोर्रो विस्वासम इरमट.
MAT 24:27 बारित्‍ते बल्हा अय्ते पोळ्‍द पेयसनाहेके मेर्सते दाना वेलगु पोळ्‍द अर्रानगाह्क दिसंता, मनकना रूपमते पुटतोन नना वायानस्‍केगुडा अल्हे आयार.
MAT 24:28 अल्‍हेने बगा अय्ते पीनगु मनंता अग्गेन गद्‍दलिं जमा आंतां.
MAT 24:29 आ रोजकुना तकलिपकु मारता मारुडे, “पोळ्‍दुंक हीकट मुच्‍चका वायार, वेळसि वेल्‍गु हियाकोंटा आयार, मब्बुनाल सुक्‍कां हिळु अर्रानुं, मब्बुने मनना अन्‍नि सक्‍तिन कदलिच्‍मळ जर्गंता.”
MAT 24:30 पजा मनकना रूपमते पुटतोन नना वायना चिन्‍ह स्वर्गमते दिस्‍सार, अस्‍के बूमि पोर्रोटोर अन्‍नि जातिना लोकुल्‍क वेल्‍ले दुक्‍कम कियानुर. पजा मनकना रूपमते पुटतोन नना पेद्‍दा महिमा आनि ताकततोनि मब्बु तेर्पेनपोर्रो उद्‍दिसि वायानेंके लोकुल्‍क हूळानुर.
MAT 24:31 अस्‍के तूताकोमता पेद्‍दा आवाजुनतोनि, नना नावा दूतन बूमिपोर्रो लोहांतन. आ दूतां बूमिपोर्रो नालुं मूलानाल, मब्बुना ई कोस्‍साताल अय्ते आ कोस्‍सादाका नना पेर्कुत्‍ता लोकुल्‍कुन जमा कींतां.
MAT 24:32 इंदके अंजिर मराताल उंदि पोल्‍ले करियट. अंजिर मराता कोम्मांक इग्गुर बस्के अय्ते वांता, अस्‍के एद्‍दि कालम दग्‍गेरा एव्ता इंचि मिमेट एरपाट कींतिर.
MAT 24:33 इल्‍हा इव अन्‍नि गटनां जर्गनद हूळसि, ओर दग्‍गेरा मंतोर, गल्‍मातगेन मंतोर इंचि मिमेट एरपाट कींतिर.
MAT 24:34 नना मीकु निजम वेहांतन, बदवेरदाका अय्ते इव अन्‍नि पोल्‍लें पुरागा आयोंगो, अदवेरदाका ई पीळि मुळगो.
MAT 24:35 इद बूमि, मब्बु नासडेम आसि होंदार, गानि नावा पोल्‍लें बस्‍केने नासडेम आयों.
MAT 24:36 अद रोजु, अद गळिया बोर्के तेळियो. स्वर्गमता दूतांक आयि, मनकना रूपमते पुटतोन नाकु आयि बोर्के तेळियो. गानि सिराप पेनबाबांके तेळियंता.
MAT 24:37 नोहाना रोजकुने बल्हा जर्गतनो, मनकना रूपमते पुटतोन नना वायानस्‍केगुडा अल्हे जर्गार.
MAT 24:38 कम्मुड वासि नोहाल डोंगाते नेंगनादाका लोकुल्‍क तिंचेके-उंचेके मरमिं कीसेके, आसेके मत्‍तुर.
MAT 24:39 कम्मुड वासि ओर्कुन तंचि ओयनदाका ओर्कु तेळिया हिल्‍ले. मनकना रूपमते पुटतोन नना वायानस्‍केगुडा अल्हे जर्गार.
MAT 24:40 आ वेलाते नेदे इव्वुर कबळ कीसेके मनानुर, ओराव्टेटाल वरोन तेहाकुंचि ओयमळ जर्गंता, इंकावरोन अग्गेन होळ्‍समळ जर्गंता.
MAT 24:41 रोंडु मुर्ताह्क गट्‍का नोरसेक मनंतां, उंदितुन ओयमळ जर्गंता, इंकुंदितुन अग्गेन होळ्‍समळ जर्गंता.
MAT 24:42 बद रोजु मीवा सामि वायानुर अद मीकु एरपाट हिल्‍ले, अदुनहाटीं मिमेट तेल्‍विते मंटु.
MAT 24:43 गानि मिमेट उंदि पोल्‍ले बेस तेळियागोट्‍कुंटु. अद बतल इत्‍ते, दोंगल नर्कटा बद वेलाक वांतोर इंचि ओक्‍कला लोता मालकुंक मुन्‍नेन तेळियसि मत्‍ते ओर तेल्वितेन मनांतोर आनि आ दोंगन लोते होळिया हिय्योर.
MAT 24:44 अल्‍हेने मिमेट इनकुनवा वेलाते मनकना रूपमते पुटतोन नना वांतन. अदुनहाटीं मिमेटगुडा बेस तयारते मंटु.
MAT 24:45 मालक हिल्वस्के ओनगा कबळ कियानोर्कुंक वेलापोर्रो गाटो-जावा दोस्‍सालय, वरोर बेस तेल्विगल्‍लोड, विस्वासमलायक सेवक मालाकुंक गावाले. अय्ते असोंटा सेवक बोर मंतोर? बोर सेवक अय्ते, मालक मल्सि वातस्के वेहता कबळ बरोबर कीसेक मनांतोर, ओरे सेवक बेस आसिर्वाद दोर्कुतोर आंद.
MAT 24:47 नना मीक निजम वेहांतन, मालक आ सेवाकुन ओना पूरा आस्‍ति-पास्तिनपोर्रो अदिकारि इंचि इर्रंतोर.
MAT 24:48 गानि ओक्‍कला आ दुस्‍ट सेवक ओना मनसुने, “नावा मालक वायालय अय्ते इंका आल्‍सेमे मंता” इनकुंचि,
MAT 24:49 ओना दंटाता सेवाकुल्कुन तन्‍नुड-गुद्‍दुड कियमळ, इरगा तिंचि-उंचि बदमासिं कियमळ सुरुव कीतोर इनकुन!
MAT 24:50 अस्‍के आ सेवक विचारमगुडा किय्योर असोंटा रोजुने, गळियाते ओना मालक वायानुर.
MAT 24:51 वासि, आ सेवाकुंक पेद्‍दा सिक्‍सा हीसि, ओन डोंगि लोकुल्‍कुने कल्‍पानुर. अगा सिराप अळमळ, पल्कु कोर्कमळे मनंता.
MAT 25:1 येसु मर्रा उंदि वेसुड वेहालय सुरुव कीतोर. ओर इत्‍तोर, स्वर्ग राज्येम बारेमते नना उंदि वेसुड वेहंतन केंजट. पदि लेय्यां कंदिलिं पीसि वरोर मरमिना पेडांक कलियालय होत्‍तां.
MAT 25:2 अवनगटाल हेय्युं तेल्वि हिल्वव मत्‍तां, हेय्युं बारे तेल्‍वितव मत्‍तां.
MAT 25:3 तेल्वि हिल्वा लेय्यां कंदिलिं पीसि अय्ते होत्‍तां, गानि अवुनतोनि निय ओया हिल्‍लें.
MAT 25:4 तेल्‍विता लेय्यां बारे कंदिलिनतोनि डब्बाने निय इंका पीसि होत्‍तां.
MAT 25:5 मरमिना पेडल वायालय आलसेम आताहेंके, अव निद्र वासि मींडतां.
MAT 25:6 नड्‍डुम नर्का, “मरमिना पेडल वासेक मंतोर, ओन्क कलियालय दट,” इंचि लोल्‍लि केंजावाता.
MAT 25:7 अस्‍केने अव पदि लेय्यां बिराना तेदसि, कंदिलिं तयार कीतां.
MAT 25:8 तेल्वि हिल्वा लेय्यां, तेल्‍विता लेय्यान, “मिहगटा निय इच्‍चुर माकु हीम्टु, मावा कंदिलिं पिर्रालय आतां,” इंचि इत्‍तां.
MAT 25:9 गानि, “इद निय बोनकु इंचि बोनकु हालंता? इत्‍ते माकु इंका हालो, मीकु इंका हालो, अल्हा आयो गानि, मिमेट दुकानमते होंचि मीवाहाटीं निय अस्सि तटु,” इंचि तेल्‍विता लेय्यां इत्‍तां.
MAT 25:10 अव निय अस्सालय दुकानमते होत्‍तस्के मरमिन पेडल एवतोर. तयारते मत्‍तव लेय्यां मरमिन पेडनतोनि मरमिंकु होत्‍तां, पज्जो तल्‍पु वाटसीतुर.
MAT 25:11 गडसेम मत्‍तारित्‍ते, दुकानमते होत्‍तव हेय्युं तेल्वि हिल्वा लेय्यां मरमिना लोन वासि, “सामि-सामि, मोमोट वातोम, तल्‍पु तेंडा!” इंचि केयालय दल्‍गतां.
MAT 25:12 अस्‍के मरमिन पेडल, “मिमेट बोर आंदिर? नना निजम वेहचंतन, मीकुन बिल्कुल एरपाट किय्योन,” इंचि लोप्पोटाल अवुन इत्‍तोर.
MAT 25:13 पजा येसु सिस्युल्कुन इल्‍हा इत्‍तोर. “मनकना रूपमते पुटतोन नना वायानदगुडा इल्हे मनंता. अद रोजुन आनि वेलातुन मिमेट बिल्कुल एरपाट किय्‍यिर. अदुनहाटीं मिमेट तेल्‍विते मंटु,” इत्‍तोर.
MAT 25:14 पजा येसु इंकुंदि वेसुडि वेहतोर. स्वर्ग राज्येम वरोर मनकनलेसीं मंता, बोर अय्ते, पय्‍नेम होनाका मुन्‍ने ओना दासुल्‍कुन केय्‍सि ओनगा मत्‍ता दनम ओर्कु अप्पजेपतोर.
MAT 25:15 ओर ओरा उसारतनमतुन हूळसि, वरोंक बंगारमते निंडसि मत्‍ता हेय्युं मुल्‍लें हीतोर, वरोंक रोंडु मुल्‍लें हीतोर. इंकावरोंक उंदि मुल्‍ले हीतोर. पजा ओर पय्‍नेम होत्‍तोर.
MAT 25:16 बोनकु अय्ते हेय्युं मुल्‍लें दोर्कतंगो ओर बिराने अव कोत्‍तन दंदाते दोस्‍सि, इंका हेय्युं मुल्‍लेना कल्‍दार्क संपलिच्‍तोर.
MAT 25:17 अल्‍हेने रोंडु मुल्‍लें दोर्कतोर इंका दंदा कीसि, रोंडु मुल्‍लें एक्‍को संपलिच्‍तोर.
MAT 25:18 गानि उंदि मुल्‍ले दोर्कतोर बारे, लोन ओसि पोक्‍का तव्‍सि ओना मालक हीता मुल्‍लेतुन मक्‍किचि इरतोर.
MAT 25:19 वेल्‍लेन रोजकु आतारित्‍ते आ दासुल्कुना मालक मल्सि वासि, ओर हीता दनमता हिसाब तल्कतोर.
MAT 25:20 अस्‍के बोनकु हेय्युं मुल्‍लें दोर्किस मत्‍तां, ओर इंका एक्‍को हेय्युं मुल्‍लें तच्‍चि, “मालक, निमे नाकु बंगारमते निंडसि मत्‍ता हेय्युं मुल्‍लें हीसि मत्‍तिन. हूळा, नना अव कोत्‍तना दंदा कीसि, इंका हेय्युं मुल्‍लें संपलिच्‍तन,” इंचि इत्‍तोर.
MAT 25:21 अस्‍के मालक कूस आसि, “वा रे वा, निमे बेस विस्वासमलायक दासुन आंदिन. इच्‍चोटा पोल्‍लेतगा निमे विस्वासमलायक मंतिन, अदुनहाटीं नना नीकु वेल्‍लेटोरपोर्रो अदिकारम हींतन. निमे लोप्पो होंचि मालकुनतोनि कूळसि कुसिते मन,” इत्‍तोर.
MAT 25:22 पजा बोनकु अय्ते रोंडु मुल्‍लें दोर्किस मत्‍तां, ओरगुडा मालकनगा वासि, “मालक, निमे नाकु बंगारमते निंडसि मत्‍ता रोंडु मुल्‍लें हीसि मत्‍तिन. हूळा, अव कोत्‍तना दंदा कीसि, इंका रोंडु मुल्‍लें संपलिच्‍तन,” इंचि इत्‍तोर.
MAT 25:23 अस्‍के मालक कूस आसि, “वा रे वा, निमे बेस विस्वासमलायक दासुन आंदिन. इच्‍चोटा पोल्‍लेतगा निमे विस्वासमलायक मंतिन, अदुनहाटीं नना नीकु वेल्‍लेटोरपोर्रो अदिकारम हींतन. निमे लोप्पो होंचि मालकुनतोनि कूळसि कुसिते मन,” इत्‍तोर.
MAT 25:24 पजा उंदि मुल्‍ले दोर्कतोर मालकुनगा वासि, “मालक, निमे कळक मनकन आंदिन, निमे वीतवगा कोय्‍यंतिन, सल्‍लुवगा जमा कींतिन इंचि नाकु एरपाट.
MAT 25:25 अदुनहाटीं नना वेरियसि निमे हीता मुल्‍लेतुन ओसि पोक्‍का तव्‍सि मक्‍किचि इरतन. इदे, नीवा मुल्‍ले नीकु वापस हीसंतन,” इंचि इत्‍तोर.
MAT 25:26 गानि ओना मालक ओन्क इल्‍हा जवाब हीतोर. “निमे दुस्‍ट, लंडु दासुन आंदिन. नना वीतवगा कोय्‍यानोन, सल्‍लुवगा जमा कियानोन इंचि नीकु एरपाटे मत्‍ता.
MAT 25:27 अय्ते निमे नावा दनमतुन बोर्कन्‍ना वड्‍डिक हिय्या मत्‍तिन. नना मल्सि वातस्के नावा दनमतुन वड्‍डितोनि एत्‍कुंचि मन्‍नेन,” इत्‍तोर.
MAT 25:28 पजा मालक ओना दासुल्‍कुन केय्‍सि, “मिमेट ओनागटाल मुल्‍ले एतसि, पदि मुल्‍लें मत्‍तोनगा हीम्टु.
MAT 25:29 बारित्‍ते, बोनगा अय्ते पेनदा पोल्‍लेन तेल्‍पिचकुनना बुद्‍दि मंता, पेन ओन्क इंका हींता. अस्‍के ओन्क वेल्‍लेन आंता. गानि बोनगा पेनदा पोल्‍लेन तेल्‍पिचकुनना बुद्‍दि हिल्‍ले, ओनगा मत्‍ता बुद्‍दितुनगुडा पेन वापस एतकुन्‍नार.
MAT 25:30 अय्ते ई कबळ्‍क ओज्जुवा दासुन पलाते हीकटते पोहचीम्ट. अगा मननोर अळसेके, वरगेयसेके, किटुर-किटुर पल्कु कोर्कसेक मनांतुर,” इंचि मालक वेहतोर.
MAT 25:31 मर्रा येसु इल्‍हा वळकालय दल्‍गुतोर. बस्के अय्ते मनकना रूपमते पुटतोन नना नावा महिमाते राजाल आसि अन्‍नि दूतनतोनि वांतन, अस्‍के नावा अदिकारमते राजगद्‍देपोर्रो उद्‍दंतन.
MAT 25:32 पजा नावा मुन्‍ने दुनियाता अन्‍नि देसेल्‍कुना लोकुल्‍क जमा आयनुर. अस्‍के गोल्‍लल एटिनाल गोर्रें बल्हा वेरे कींतोर, अल्‍हेने लोकुल्‍कुन नना वरोनगाटाल वरोन वेरे कींतन.
MAT 25:33 अल्हा कीसि नना गोर्रेन बारे तिना बाजुंक, एटिन बारे डेमा बाजुंक कींतन.
MAT 25:34 अस्‍के राजाल तिना बाजुनोर्कुन इनानुर, “वटु, ना बाबाना आसिर्वाद मीकु दोर्कुता, मीवाहाटीं दुनिया पुटतस्केटाले राज्येम तयार कीसि मंता, दान एतट.
MAT 25:35 इद राज्येम मीवादे आंदु, बारित्‍ते नना कर्वुने मत्‍तस्के नाकु मिमेट तिनालय हीतिर, नाकु दूपातस्के उनालय एर हीतिर. नना मीकु एरपाट हिलाकुना गानि मीवा लोहकुने मनालय जेगा हीतिर.
MAT 25:36 नाकु केर्रालय कपडिं हिल्वस्के मिमेट नाकु कपडिं हीतिर, नना बिमारते मत्‍तस्के मिमेट नावा सेवा कीतिर. नना जेलने मत्‍तस्के मिमेट नाकु कलियालय वातिर.”
MAT 25:37 अस्‍के तिना बाजुंक मत्‍ता नीतिमंतुल्क ओन इनानुर, “सामि, नीकु कर्वेस्तद हूळसि बस्के तिनालय हीतोम? नीकु दूपातद हूळसि बस्के एर उनालय हीतोम?
MAT 25:38 निमे एरपाट हिलाकुना गानि बस्के नीकुन लोन ओसि मनालय जेगा हीतोम? नीकु कपडिं हिलवद हूळसि बस्के कपडिं केर्रालय हीतोम?
MAT 25:39 निमे बिमार मत्‍तस्के, जेलते मत्‍तस्के बस्के मोमोट नीकु कलियालय वातोम?”
MAT 25:40 अस्‍के राजाल, “नना मीकु निजम वेहासेक मंतन, इगे मत्‍ता नावा कदर हिलुवा विस्वासुल्‍कुनाल बोन वरोन बेस हूळिना, नाकुन बेस हूळतापे,” इंचि ओर्कुन इनानुर.
MAT 25:41 पजा ओना डेमा बाजुंक मत्‍तोर्कुन, “सापनेमते मनानोरिटा, नहागटाल पेय्सि होंट. देय्याल्कुना मुक्‍यानाहाटीं आनि अवुना दूतनहाटीं तयार कीता बस्‍केळ्‍क पोत्‍सेके मनना तडमिते होंचि अर्रट.
MAT 25:42 बारित्‍ते नना कर्वुने मत्‍तस्के, नाकु तिनालय तिंडि हिय्या हिल्‍लिर. नाकु दूपातस्के उनालय एर हिय्या हिल्‍लिर.
MAT 25:43 नना एरपाट हिलवोन लेह्का मत्‍तस्के नाकु मीवा लोहकुने जेगा हिय्या हिल्‍लिर. नाकु कपडिं हिल्वस्के मिमेट केर्रालय कपडिं हिय्या हिल्‍लिर, नना बिमार मत्‍तस्के, जेलने मत्‍तस्के मिमेट नाकु कलियालय इंका वाया हिल्‍लिर, दानहाटीं इदे मीवा सिक्‍सा आंद,” इंचि सामि इनानुर.
MAT 25:44 अस्‍के ओर, “सामि, नीकुन मोमोट, कर्वेस्‍सि मत्‍तस्के, दूपातस्के, एरपाट कियवस्के, कपडिं हिल्वस्के, बिमार मत्‍तस्के आनि जेलने मत्‍तस्के हूळसि बस्के सेवा किया हिल्‍लोम?” इंचि इनानुर.
MAT 25:45 अस्‍के राजाल ओर्कुन, “नना मीकु निजम वेहासेक मंतन, इगे मत्‍ता नावा कदर हिलुवा विस्वासुल्‍कुनाल बोन वरोनगुडा बेस हूळाकोंटे, अस्‍के नाकुनगुडा बेस हूळवापे!” इंचि इनानुर.
MAT 25:46 पजा “ई सेड्‍डा लोकुल्‍कुंक मारवा सिक्‍सा आंता. नीतिमंतुल्‍कुंक बारे बस्‍केळ्‍क पिस्सना पिस्वर दोर्कंता,” इंचि येसु इत्‍तोर.
MAT 26:1 इव अन्‍नि पोल्‍लें वेहमळ आतारित्‍ते येसु सिस्युल्कुन इल्‍हा इत्‍तोर. “नाडि आयो मन्‍ने दाटसि होनना पंडुगु मंता इंचि मीकु एरपाटे. मनकना रूपमते पुटतोन नाकुन क्रुसुनपोर्रो वेलाड वाटालय, पगातोरा कय्‍दे पीसि हियमळ जर्गंता,” इत्‍तोर.
MAT 26:3 अस्‍के कयपा इनना पेद्‍दा पेर्माना मिद्‍देते, पेद्‍दा पेर्मालोर आनि यहुदिरा पेद्‍दाल्क जमा आतुर.
MAT 26:4 येसुन सप्‍पुडदाका दोर्कापीसि हव्ककोम, इंचि ओर मीटिंगते उपायम कीतुर.
MAT 26:5 गानि “पंडुगु रोजकुना लोप्पो हव्का मन्‍नि, अल्हा कीते लोकुल्‍क गडबड किया परांतुर,” इंचि इन्‍कुत्‍तुर.
MAT 26:6 पजा येसु बेतानिया इनना नाटे होंचि, कुस्‍टरोगम आसि मत्‍ता सिमोनिना लोन आगतोर.
MAT 26:7 अस्‍के उंदि मुरतळ वेल्‍ले दराता अत्‍तर निय उंदि गुर्गिते पीसि येसुनगा वाता. ओर गाटो तिनालय उद्‍दिसि मत्‍तस्के अद मुरतळ आ नियदुन ओना तल्‍ला पोर्रोटाल वळियता.
MAT 26:8 अदुन हूळसि अगा मत्‍ता सिस्युल्कुंक होंग वासि, “ई अत्‍तर नियदुन वट्‍टिदे बारि पोचीतिन?
MAT 26:9 इद अत्‍तर निय वेल्‍ले दराते अम्मिसि अव कोत्‍तां गरिबोर्कुंक हिया वायवड गदा!” इंचि इत्‍तुर.
MAT 26:10 येसु ओर वळकानदुन एरपाट कीसि इल्‍हा इत्‍तोर. “दान बारिंक तकलिप कीसंतिर? अद नावाहाटीं बेसता कबळे कीता.
MAT 26:11 गरिबोर्क अय्ते बस्केळक मिहगा मनांतुर, गानि नना बस्केळक मिहगा मनानोन आयोन.
MAT 26:12 नावा हामुर एव्ता इंचि नावा मेंदुल्क अत्‍तर निय होकताप, अद इल्‍हा कीता.
MAT 26:13 नना मीक निजम वेहांतन, पूरा दुनियाते, बगा-बगा पेनदा बेसता कबुर वेहमळ जर्गंता, अगा ई मुरतटुन, आनि इद कीता कबळतुन मति कियानुर,” इत्‍तोर.
MAT 26:14 पजा, पन्‍नेंड सिस्युल्‍कुनाल वरोर इस्‍कारियोत यहुदल मत्‍तोर. ओर पेद्‍दा पेर्मालोरगा होत्‍तोर.
MAT 26:15 होंचि, “नना मीक येसुन पीसि हीते, मिमेट नाकु बतल हींतिर?” इंचि इत्‍तोर. अस्‍के ओर ओन्क मुप्‍पै एंडि रूपें हीतुर.
MAT 26:16 अस्‍केटाल ओर येसुन पीसि हियालय मोका हूळसेक मत्‍तोर.
MAT 26:17 पुल्‍लगा आयवा पिंडिता हारिना पंडुगुना मोदाटा रोजु, सिस्युल्क येसुनगा वासि, “गुरु, दाटसि होनना पंडुगुना गाटो तिनना तयारिं बगा कीकोम इंचि नीवा मनसु मंता?” इंचि इत्‍तुर.
MAT 26:18 अस्‍के येसु ओर्कुन इल्‍हा इत्‍तोर. “सहरते पलाना मनकानगा होंचि, नावा आकिर वेला दग्‍गेरा एव्ता. नीवा लोन नना नावा सिस्युल्कुनतोनि दाटसि होनना पंडुगु कियालय वांतन इंचि मावा गुरु वेहतोर इल्‍हा ओन्क वेहट.” इत्‍तोर.
MAT 26:19 अस्‍के येसु वेहतापे सिस्युल्क होंचि, दाटसि होनना पंडुगुना गाटो तयार कीतुर.
MAT 26:20 पोळ्‍द होत्‍तारिते, येसु ओना पन्‍नेंडु सिस्युल्कुनतोनि गाटो तिनालय उदतोर.
MAT 26:21 तिननेंके येसु ओर्कुन, “हीके केंजट नना निजम वेहचंतन, मिहगटाल वरोर नाकुन पगातोरा कय्‍दे पीसि हींतोर.” इंचि इत्‍तोर.
MAT 26:22 इदुन केंजसि ओर्कु वेल्‍लेन दुक्‍कम आता. अदुनहाटीं, “ओन नना अय्ते आयोन गदा सामि?” इंचि वरोन पज्जो वरोर येसुन पूसकीतुर.
MAT 26:23 अस्‍के, “नावातोनि गिन्‍नेते कलियसि तिनानोरे नाकुन पीसि हियनुर.
MAT 26:24 दर्मसास्‍त्रमते रासि मत्‍ताप, मनकना रूपमते पुटतोन नना अय्ते दांतने. गानि बोनाहेंदाल अय्ते नाकुन पीसि हियमळ जर्गंता, आ मनकल पुट्‍टाकोंटेन बेस आसि मनवळ,” इत्‍तोर.
MAT 26:25 अस्‍के येसुन पीसि हियना यहुदल, “ओन नना अय्ते आयोन गदा गुरु?” इंचि पूसकीतस्‍के, “निमे इत्‍तिन अल्‍हेने!” इंचि येसु इत्‍तोर.
MAT 26:26 गडसेम आतारित्‍ते ओर तिननेंके, येसु हारितुन पीसि पेनदुक दन्यवाद कीतोर. पजा हारितुन तुकडां कीसि ओना सिस्युल्कुंक हीसेक. “तिंटु, इद नावा मेंदुल आंद,” इंचि इत्‍तोर.
MAT 26:27 इंका ओर अंगुर पंडिना पानकमता गिलास कय्‍दे पीसि, पेनदुक दन्यवाद कीतोर. पजा ओर्कु हीसि, “मिमेट अंटोर दीन उंटु.
MAT 26:28 बारित्‍ते इद पूना करारता नेत्‍तुर आंदु. वेल्‍लेटुर लोकुल्‍कुना पापाल्क मापि कियालय पोंगसेक मंता.
MAT 26:29 नना मीक वेहांतन, नावा बाबाना राज्येमते पूना तरिकाते ई अंगुर पानकम उनाना रोजुनदाका, मर्रा बस्‍केने अंगुर पानकम उन्‍नोन,” इंचि येसु इत्‍तोर.
MAT 26:30 पजा ओर, पेनदा स्‍तुति कियाना उंदि पाटा पारसि, जय्‍तुन मराकुना गुट्‍टापोर्रो होत्‍तुर.
MAT 26:31 अस्‍के येसु ओर्कुन इल्‍हा इत्‍तोर. “इय्याला नर्कळ्‍क मिमेट अंटोर नाकुन होळसि वित्‍तंतिर, बारित्‍ते, गोर्रें कोहानोन नना हव्कंतन, मंदता गोर्रें बेंदव-हेके पायसि वित्‍तंतां. इंचि दर्मसास्‍त्रमते रासि मंता.
MAT 26:32 गानि नना हासि, मर्रा जीवाते तेदतंका, मीकन्‍ना मुन्‍ने गालिल एरियाते दांतन,” इत्‍तोर.
MAT 26:33 अस्‍के पत्रु, “अंटोर नीकुन होळसि होनिनागानि, नना नीकुन बस्‍केने होळसि होन्‍नोन गुरु,” इंचि येसुन इत्‍तोर.
MAT 26:34 “नना नीकु निजम वेहचंतन, इय्याला नर्कडकु गोगोड कूसाका मुन्‍ने निमे मूड मल्कां नाकुन एरपाट किय्योन इंतिन,” इंचि येसु पत्रुन इत्‍तोर.
MAT 26:35 गानि, “ओक्‍कला नाकु नीतोनि हामुर वायिना बेसे, नीकुन नना एरपाट किय्योन इंचि बस्‍केने इन्‍नोन,” इंचि पत्रु इत्‍तोर. अंटोर सिस्‍युल्‍कगुडा अल्हे इत्‍तुर.
MAT 26:36 येसु, ओना सिस्युल्कुनतोनि गेतसेमनि इनना जेगातगा एवतस्‍के, “नना इच्‍चुर मुन्‍ने होंचि पारतना कीसि वायनदाका मिमेट इग्‍गेने उद्‍दिसि मंटु,” इंचि इत्‍तोर.
MAT 26:37 पजा पत्रुन आनि जब्‍दिना इव्वुर मर्कुन पीसि ओनतोनि ओतोर. अगा ओर वेल्‍ले दुक्‍कमते सिम्मरा आतोर.
MAT 26:38 अस्‍के ओर्कुन, “नावा जीवा दांता बारे इत्‍ताप नाक वेल्‍ले दुक्‍कम आसेक मंता. मिमेट नातोनि इग्‍गेने आगसि तेल्‍विते मंटु,” इंचि इत्‍तोर.
MAT 26:39 इच्‍चुर मुन्‍ने होंचि बोकबोर्लें अर्सि ओर इल्‍हा पारतना कियालय दल्‍गुतोर, “ए बाबा, ओक्‍कला कुदुरते, नावा इद गोसा तप्‍पिसि होन्‍नि, गानि इद नावा विचारम मत्‍ताप आयो, नीवा विचारम मत्‍तापे आयि.”
MAT 26:40 पजा सिस्युल्कुनगा वासि हूळते ओर निद्रा होंचि मत्‍तुर. अस्‍के येसु पत्रुन इल्‍हा इत्‍तोर. “मिमेट उंदि गंटामेडगुडा नातोनि तेल्‍विते मंदा पर्रिरा?
MAT 26:41 मिमेट पट्‍टुने अर्राकोंटा मननाहाटीं तेल्‍विते मंचि, पारतना कीसेके मंटु. नना वेहताप कियालय मीवा आत्मा तयार मंता, गानि मीवा मेंदुल कमजोर मंता,” इत्‍तोर.
MAT 26:42 येसु मरुंदि मल्का होंचि, “नावा बाबा, नना इदुन उन्‍ने पींता इनानय्ते, नीवा विचारमे पूरा आयि,” इंचि पारतना कीतोर.
MAT 26:43 येसु मर्रा वासि हूळतस्‍के, ओर मंचि निद्रते मत्‍तुर.
MAT 26:44 ओर्कुन अग्गेन होळसि येसु मर्रा पारतना कियालय होत्‍तोर. अस्केगुडा मुन्‍ने कीतापे पारतना कीतोर.
MAT 26:45 पजा सिस्युल्कुनगा वासि ओर्कुन इल्‍हा इत्‍तोर. “मिमेट इंदकेगुडा मींडसेक, आराम कीसेके मंतिरा? हुळाट, मनकना रूपमते पुटतोन नाकुन पापिर्कुना कय्‍दे पीसि हियना वेला एव्ता.
MAT 26:46 तेदाट, मनम दाकोम. नाकुन पीसि हियानोर दग्गेरेन एव्‍तोर,” इत्‍तोर.
MAT 26:47 येसु इव पोल्‍लें इंचेकेने मत्‍तोर, अच्‍चोटेन पन्‍नेंडु सिस्युल्कुना लोप्पोटोर वरोर यहुदल इनानोर अगा वातोर. ओनातोनि पेद्‍दा पेर्मालोर आनि यहुदि पेद्‍दाल्क लोहता, गुळि कावेल कियानोरा गेंग कसेह्‍क, गुत्‍पां, पीसि वातुर.
MAT 26:48 येसुन पीसि हियानोर, “नना बोन अय्ते बुर्रांतनो, ओरे येसु आंदुर, ओन दोर्का पींटु,” इंचि मुन्‍नेन ओर्क उंदि चिन्‍ह वेह्‍चि मत्‍तोर.
MAT 26:49 पजा यहुदल बिराना येसुनगा होंचि, “जोहार गुरु” इंचि ओन बुरतोर.
MAT 26:50 अस्‍के येसु, “ना दंटातोना, निमे बद कबळ्‍क वातिन अद कीम,” इंचि इत्‍तस्के, अगा मत्‍ता मत्‍तोर मुन्‍नेळक वासि येसुनपोर्रो कय वाट्‍सि ओन दोर्का पीतुर.
MAT 26:51 अच्‍चोटेन येसुनतोनि मत्‍तोरव्टे वरोनगा कसेर मत्‍ता, ओर दान तेंडसि पेद्‍दा पेर्माना वरोर दासुन हव्कालय कसेरते हीतोर गानि, अद कसेर सिराप ओना केवदुन नेमाहकुंचि होत्‍ता.
MAT 26:52 अस्‍के येसु ओन, “नीवा कसेर नीवा नडिके मन्‍नि, बारित्‍ते कसेर पियानोर कसेरतेन हांतोर.
MAT 26:53 नना नावा बाबान तल्किस मत्‍ते, उंदि गेंगुने वेय्‍कुना दूतां मनना पन्‍नेंडु गेंगुल्कुंकन्‍ना बच्‍चुंगो वेय्‍कुना पेनदा दूतन नाकुन पिसागोटालय लोहचि मन्‍नेर, इद नीकु तेळियोना?
MAT 26:54 इल्‍हा आते दर्मसास्‍त्रमते नावा बारेमते रासता पोल्‍लें बल्हा निजम आयनुं? अव्टे इल्‍हा आयमळ गावाले, इंचि रासतद मंता,” इंचि येसु इत्‍तोर.
MAT 26:55 अस्‍के येसु मंदितुन इल्‍हा इत्‍तोर. “वरोन दोंगन पिय्‍यालय वाताप मिमेट कसेह्‍क, गुत्‍पां पीसि नाकुन पिय्‍यालय वातिरा? नना अय्ते रोजे गुळिते कराहसेक मीतोनि मनुंदुन, अस्‍के नाकुन पिया हिल्‍लिर.
MAT 26:56 गानि दर्मसास्‍त्रमते नावा बारेमते पेनदा कबुरतोर रासता पोल्‍लें पूरा आयाना इंचि इल्‍हा जर्गता,” इत्‍तोर. पजा ओना सिस्युल्क अंटोर ओन होळसि तेगा विततुर.
MAT 26:57 लोकुल्‍क येसुन पीसि कयपा इनना पेद्‍दा पेर्मानगा ओतुर. अगा दर्मसास्‍त्रम कराहना गुरुल्क आनि यहुदि पेद्‍दाल्क जमा आसि मत्‍तुर.
MAT 26:58 गानि पत्रु लक्‍कुटाले येसुना पज्जो-पज्जो पेद्‍दा पेर्माना दारादाका होत्‍तोर. अगा बतल आयार इंचि हूळालय, दाराते होंचि कावेल कियानोरतोनि उदतोर.
MAT 26:59 पेद्‍दा पेर्मालोर आनि पंचादितोर अंटोर येसुंक हामुरता सिक्‍सा हियानाहाटीं ओना विरोदमते तप्‍पुड गवाइ पह्‍कतुर.
MAT 26:60 गानि बच्‍चुटुरो वासि ओना विरोदमते आबद्‍दम गवाइ हिय्‍यिना, ओर्कु उंदिगुडा तप्पु दोर्काहिल्‍ले. आकिरते इव्वुर वासि, “पेनदा गुळितुन कूलाह्‍चि दान मूड रोजकुने मर्रा दोहा परांतन इंचि ओर इत्‍तोर,” इसोंटा गवाइ हीतुर.
MAT 26:62 अस्‍के पेद्‍दा पेर्मल तेदसि, “ईर नीकु विरोदमते बल्हा गवाइ हीसंतुर हूळा, निमे बतले जवाब हिय्‍यिना?” इंचि येसुन इत्‍तोर.
MAT 26:63 गानि येसु चुपचाप मत्‍तोर. अस्‍के पेद्‍दा पेर्मल येसुन इल्‍हा इत्‍तोर. “जीवाते मनना पेनदा ओट्‍टु तिंचि नीकुन पूसकीसंतन, ओक्‍कला निमे पेनदा मर्रि, किरिस्‍तुन आते माक वेहा,” इत्‍तोर.
MAT 26:64 अस्‍के येसु ओन इल्‍हा इत्‍तोर. “निमे इत्‍तिन अद निजमे! गानि नना मीकु वेहांतन, इंका मुन्‍ने मिमेट मनकना रूपमते पुटतोन नाकुन ताकतवर पेनदा तिना बाजुंक उद्‍दिसि मत्‍तद आनि मब्बु तेर्पेनपोर्रो उद्‍दिसि वायानेंके हूळकिर,” इत्‍तोर.
MAT 26:65 अस्‍के, पेद्‍दा पेर्मल होंगुने ओना कपडिं हराह्‍कुंचि, “ईर पेनदा अपमानम कीतोर. मनाकु इंका बतल गवाइ गावाले? ओना पोल्‍लें मिमेट केंजतिरे गदा!
MAT 26:66 अय्ते मिमेट बतल इंतिर?” अस्‍के यहुदिल्क, “ओर हामुर सिक्‍सालायक मंतोर,” इंचि इत्‍तुर.
MAT 26:67 अस्‍के इच्‍चुर लोकुल्‍क येसुना तोड्‍डि पोर्रो उस्किसि, ओन तंचि-गुद्‍दिसि,
MAT 26:68 “ए किरिस्‍तु, नीकुन बोर तंतुर, माकु बविस्यवानि वेहा,” इंचि इत्‍तुर.
MAT 26:69 हीके पत्रु पेद्‍दा पेर्माना दारातेने उदिस मत्‍तोर, अस्‍के उंदि दासि ओनगा वासि, “गालिल एरियाता येसुनतोनि निमे इंका मत्‍तिन गदा?” इंचि इत्‍ता.
MAT 26:70 अस्‍के पत्रु “निमे बतल इंचांतिनो नाकु तेळिया हिल्‍ले!” इंचि ओर अगा मत्‍तोरा अंटोर मुन्‍नेन इत्‍तोर.
MAT 26:71 आयंका ओर दाराताल पेय्सि गलमातगाह्कु होत्‍तोर. अस्‍के इंकुंदि दासि ओन हूळसि, “ईर इंका नासरेत नाटेना येसुनतोनि मत्‍तोर,” इंचि अगा मत्‍तोर्कुंक वेहता.
MAT 26:72 अस्‍के पत्रु मर्रा उंदि मल्का, ओट्‍टु तिंचि, “नना ओन बिल्कुल एरपाट किय्योन,” इंचि इत्‍तोर.
MAT 26:73 गडसेम मत्‍तारित्‍ते, अगा नित्‍तिसि मत्‍तोर इच्‍चुर लोकुल्‍क पत्रुनगा वासि, “निमे निजम ओना दंटातोने! नीवा वळकुड केंजसि निमे गालिल एरियातोन इंचि तेळियंता,” इंचि इत्‍तुर.
MAT 26:74 अस्‍के पत्रु, “नना ओट्‍टु तिंचि वेहचंतन, नना आबद्‍दम वळ्‍कानय्ते पेन नाकुन तिन्‍नि, आ मनकन नना बिल्कुल एरपाट किय्योन,” इंचि इत्‍ता इनुडे गोगोड कूसता.
MAT 26:75 “इय्याला नर्कळ्‍क गोगोड कूसाका मुन्‍ने, निमे नाकुन मूड मल्कां, एरपाट किय्योन इंतिन” इंचि येसु पत्रुंक मुन्‍ने वेह्‍चि मत्‍ता, पोल्‍ले मति वासि, ओर पलाते होंचि वेल्‍ले दुक्‍कमते इरगा अळतोर.
MAT 27:1 पंग आतारित्‍ते पेद्‍दा पेर्मालोर आनि यहुदि पेद्‍दाल्क अंटोर येसुन हव्कना निरनायम कीतुर.
MAT 27:2 पजा ओन दोह्‍चि वाट्‍सि ओसि, पिलातुस राज्यपालुंक अप्पजेपतुर.
MAT 27:3 येसुंक हामुरता सिक्‍सा दोर्कता इंचि, येसुन पीसि हीता यहुदांकु तेळियतारित्‍ते वेल्‍ले पस्तांचतोर. पजा ओर पेद्‍दा पेर्मालोर्कुंक, यहुदि पेद्‍दाल्कुंक आ मुप्‍पै एंडि कल्‍दार्क मलाह्‍चि हीसेक,
MAT 27:4 “नना तप्पु हिल्वा मनकन हव्कालय पीसि हीसि पापम कीतन” इंचि इत्‍तोर. अस्‍के ओर, “माकु बतल कियना मंता? नीवद निमे हूळकुन” इंचि इत्‍तुर.
MAT 27:5 अस्‍के यहुदल आ एंडि कल्‍दार्कुन गुळिते विसिरसि, अगटाल पलाते होंचि उर्रि दोसकुत्‍तोर.
MAT 27:6 पेद्‍दा पेर्मालोर्क अव कोत्‍तन जमा कीसि, “वरोन हव्कालय हीता कोत्‍तन, मना नियम परकारम दान पेटिते वाटा वायो,” इंचि इत्‍तुर.
MAT 27:7 दानहाटीं ओर अव कोत्‍तनतोनि, येरुसलेमते बोरन्‍ना पलाताल वातोर हायानय्ते ओर्कुन बोंदा दोसालय आंता, इंचि वरोर कुम्माना नेलि अस्तुर.
MAT 27:8 इंदके इंका आ नेदुन “नेत्‍तुर नेलि” इंचि इंतुर.
MAT 27:9 अस्‍के यिर्मयाह इनना पेनदा कबुरतोर इत्‍ता पोल्‍ले निजम आता, अद इल्‍हा मत्‍ता: “इस्राएल लोकुल्‍क ओना दरा, मुप्‍पै एंडि कल्‍दार्क कीतुर, अव ओर तेंडकुत्‍तुर.
MAT 27:10 पेन नाकु वेहताप, आ मुप्‍पै एंडि कल्‍दार्कुनतोनि, कुम्माना नेलि अस्तुर.”
MAT 27:11 पजा येसुन पिलातुस राज्यपालना मुन्‍ने निपिस्तस्‍के, राज्यपाल ओन, “निमे यहुदिल्कुना राजाना?” इंचि पूसकीतोर. अस्‍के “निमे इंचेकेने गदा,” इंचि येसु इत्‍तोर.
MAT 27:12 पेद्‍दा पेर्मालोर आनि यहुदि पेद्‍दाल्क ओनापोर्रो दोसेल्क दोसतुर. गानि येसु बतले जवाब हिया हिल्‍लोर.
MAT 27:13 अस्‍के पिलातुस येसुन, “ईर नीवा पोर्रो बच्‍चुंगो तप्पुक दोस्सेक मंतुर, नीकु केंजा वासेक हिल्‍लेना?” इंचि इत्‍तोर.
MAT 27:14 गानि ओर उंदि पोल्‍ले इंका वळका हिल्‍लोर. अदुनहाटीं पिलातुसुंक वेल्‍ले इचंत्रम आता.
MAT 27:15 दाटसि होनना पंडुगुना रोजुने, लोकुल्‍कुनाहाटीं बोनन्‍ना वरोन कैदिन होळसनद राज्यपालना रिवाज मत्‍ता.
MAT 27:16 अद वेलाते अगा जेलने वरोर पोरोल पेय्‍स्‍ता “बरब्बल” इनना कैदि मत्‍तोर.
MAT 27:17 लोकुल्‍क अगा जमा आतारित्‍ते पिलातुस ओर्कुन, “नना बोन होळ्‍सकन इंचि मीवा मनसु मंता, बरब्बन होळ्‍सकना हिलाकोंटे किरिस्‍तु इनना येसुना?” इंचि पूसकीतोर.
MAT 27:18 येसु तप्पु कियाकोन्‍ना ओना कबाह्‍कुन हूळसि कळ्‍क पोतताहेंकेन ओन तच्‍चि नाक अप्पजेपतुर इंचि पिलातुसुंक एरपाटे मत्‍ता.
MAT 27:19 अचोने आय्‍का पिलातुस न्‍यायम कियालय बस्के अय्ते गद्‍देपोर्रो उदतोर अस्‍के ओना मुत्‍तोनाहेंदाल उंदि कबुर वाता, अद इल्‍हा मत्‍ता, “नाकु उंदि कला वाता, ओर तप्पु हिलुवा मनकल आंदुर. ओन निमे बतले कियमा. नना ओनाहाटीं इय्याला पोद्‍दला दुक्‍कमते मत्‍तन.”
MAT 27:20 गानि हीके पेद्‍दा पेर्मालोर आनि पेद्‍दाल्क, बरब्बन होळसिसि येसुन हव्कना इंचि इनालय लोकुल्‍कुंक एक्‍किस्तुर.
MAT 27:21 राज्यपाल ओर्कुन, “नावा मुन्‍ने बरब्बल आनि येसु इव्वुर मंतुर, नना मीवाहाटीं ईरा इव्वुरा लोप्पोटाल बोन होळसना इंचि मीवा मनसु मंता?” इंचि पूसकीतोर. अस्‍के ओर, “बरब्बन” होळसना इंचि इत्‍तुर.
MAT 27:22 “अय्ते मरि, ‘किरिस्‍तु’ इनना येसुन बतल कियना?” इंचि पिलातुस ओर्कुन पूसकीतोर. अस्‍के “ओन क्रुसुनपोर्रो मोल्‍लां कोहकिस हव्का,” इंचि इत्‍तुर.
MAT 27:23 “बारि, ओर बतल तप्पु कीतोर?” इंचि पिलातुस पूसकीतस्‍के, “ओन क्रुसुनपोर्रो मोल्‍लां कोह्‍किसि हव्का” इंचि ओर जोरसे वरगेयतुर.
MAT 27:24 इच्‍चो वेल्‍ले लोकुल्‍कुना मुन्‍ने नावद बतले ताका पर्रो. ओर लोल्‍लि कींतुर इल्‍हा पिलातुस इनकुंचि, इच्‍चुर एर पीसि लोकुल्‍कुना मुन्‍ने कय्‍क नोर्सि, “ईना हामुटे नावद कय हिल्‍ले, मिमेटे दीना जबाबदारी मंतिर,” इंचि इत्‍तोर.
MAT 27:25 अस्‍के ओर अंटोर वरगेयसि, “ईना हामुटा जबाबदारी मावा पोर्रो आनि मावा पिलाल्कुना पोर्रेन मन्‍निकांटी,” इंचि इत्‍तुर.
MAT 27:26 अस्‍के पिलातुस, बरब्बन होळसिसि, येसुन बारे पोट्‍टेते तंचि, क्रुसुनपोर्रो मोल्‍लां कोह्‍किसि हव्कालय सिपाइल्कुना कय्‍दे अप्पजेपतोर.
MAT 27:27 पजा सिपाइल्क येसुन पीसि राज्यपालना किल्‍लाते ओतुर. अगा सिपाइल्कुना पूरा गेंगुन केया वेह्‍चि ओना सुट्‍टु जमा कीतुर.
MAT 27:28 ओना कपडिं कुळाह्‍चि, ओन्क एर्रा रंगुना कोट केराहतुर.
MAT 27:29 हाह्कुना वेलिता किरिटम कीसि ओना तल्‍लक दोसतुर, ओना तिना कय्‍दुक उंदि दुरसोत्‍ता कट्‍टे हीतुर. सिपाइल्क ओना मुन्‍ने टोंगरां ऊनसि, “यहुदिल्कुना राजांक बस्‍केने हामुर हिल्‍ले,” इंचि ओन इरगा कारेड्‍डाल्‍क कीतुर.
MAT 27:30 आयंका ओर ओनपोर्रो उस्‍कतुर, ओनागटा कट्‍टे इगकुंचि अदे कट्‍टेते ओना तल्‍लापोर्रो तंतुर.
MAT 27:31 ओन इरगा कारेड्‍डाल्‍क कीतारित्‍ते ओर केर्सि मत्‍ता कोट तेंडसि, ओना कपडिं ओन्‍के केराहतुर आनि क्रुसुनपोर्रो वेलाड वाटालय पलाते पीसि ओतुर.
MAT 27:32 येसुन पीसि पलाते होननेंके, कुरेनि सहरतोर वरोर सिमोन इनना मनकल कलियतोर. सिपाइल्क ओन वेराहचि येसुना क्रुस कांजा वेहतुर.
MAT 27:33 आयंका ओर गोलगोता इत्‍ते, “तला बोरसेम” इनना जेगातगा एवतारित्‍ते,
MAT 27:34 अंगुर पंडिना पानकमते कयमुल कल्‍पिसि येसुंक उनालय हीतुर, ओर दान नाकिसि हूळसि, उन्‍नोन इत्‍तोर.
MAT 27:35 अस्‍के ओन क्रुसुनपोर्रो वेलाड वाटतुर. वाटतारित्‍ते, “येसु, यहुदिल्कुना राजाल आंदुर,” इंचि उंदि ओना तप्पु हुप्‍सना बोर्ड रासि येसुना तल्‍लापोर्रो वेलाड वाटतुर. पजा सिपाइल्क सिट्‍टिं वाट्‍सि ओना कपडिन पंचकुत्‍तुर. आनि ओना कावेल कीसेके अग्गेन उद्‍दिसि मत्‍तुर.
MAT 27:38 इंका इव्वुर दोंगाल्कुनगुडा ओना पक्‍का पीसि हीके वरोन हेके वरोन क्रुसुनपोर्रो मोल्‍लां कोह्‍कतुर.
MAT 27:39 हर्रि पीसि होनानोर-वायानोर तल्‍लां ऊपसेके, “ओ! गुळितुन कूलाह्‍चि मूड रोजकुने दोहानोन, ओक्‍कला निमे पेनदा मर्रिन आते, क्रुसताल रेय्‍सि निमे नीवा जीवातुन पिसागोटकुन,” इंचि कारेड्‍डाल्‍क कियुंदुर.
MAT 27:41 अचोने आयका पेद्‍दा पेर्मालोर, दर्मसास्‍त्रम कराहना गुरुल्क आनि यहुदि पेद्‍दाल्कगुडा अल्हे कारेड्‍डाल्‍क कीतुर.
MAT 27:42 अव्टेटाल इच्‍चुर, “ईर अय्ते इंकावरोन पिसागोटतोर गानि ओनद ओरे पिसागोटकुना परसेके हिल्‍लोर. ईर इस्राएलतोरा राजाल गदा! अय्ते क्रुसुनपोर्रोटाल हिळु रेय्‍सि वायिरकांटी, अस्‍केने मोमोट ईनपोर्रो विस्वासम ईरा परकोम,” इंचि इत्‍तुर.
MAT 27:43 इंका इच्‍चुर बारे, “ओन्क अय्ते पेनदापोर्रो बरोसा मंता. इंका ओर, ‘नना पेनदा मर्रिन आंदुन,’ इंचि इत्‍तोर. अदुनहाटीं इंदके पेनदा मनसु मत्‍ते ओन पिसागोट्‍टि,” इंचि इत्‍तुर.
MAT 27:44 अल्‍हेने येसुना पक्‍काते क्रुसुंक वेलाड वाट्‍सि मत्‍ता दोंगाल्कगुडा ओना अपमानम कीतुर.
MAT 27:45 पजा पिय्यटा पन्‍नेंड एगानस्‍केटाल अय्ते मूड एगनदाका पूरा बूमिअंता हीकट आता.
MAT 27:46 दग्‍गेरा-दग्‍गेरा मूड एगनेंके येसु अळसेके जोरसे वरगेयसि, “एलि, एलि, लमा सबकतनि.” इत्‍ते, “ना पेनदुना, ना पेनदुना निमे नाकुन बारि होळसीतिन?” इंचि इत्‍तोर.
MAT 27:47 अस्‍के अगा नित्‍तिसि मत्‍तुर इच्‍चुर लोकुल्‍क, “ओर एलियान केयसंतोर बारे” इत्‍तुर.
MAT 27:48 पजा ओराव्टेटाल वरोर मनकल वितसि होंचि पुल्‍लटा अंगुर पंडिना पानकमते मुळाहता स्पंज तत्‍तोर आनि दुड्‍डुना कोस्‍सक ताससि येसुना तोळ्‍दगा नाकालय हीतोर.
MAT 27:49 अस्‍के कळमतोर, “जेरासेप आगाट, एलियाल ईन पिसागोटालय वांतोरा वायोरा हूळकोम,” इंचि इत्‍तुर.
MAT 27:50 येसु मरुंदाम अळसेके जोरसे वरगेयसि जीवा होळस्तोर.
MAT 27:51 हुळाट! अस्‍केने गुळिता परदा, पोर्रोटाल हिळुदाका हर्सि रोंडु तुकडां आता, बूमि अदुलता, गुट्‍टां नेर्रें हीसि पैतां.
MAT 27:52 पेनदा लोकुल्‍क बोर अय्ते हातुर ओराव्टेटाल वेल्‍ले मंदि जीवा अर्सि बोंदानाल मर्रा तेदतुर.
MAT 27:53 येसु मर्रा जीवाते तेदतस्‍के, ओर अंटोर बोंदानाल पेय्सि येरुसलेम इनना पवित्र सहरते वेल्‍लेटुर लोकुल्‍कुंक दिसतुर.
MAT 27:54 अगा जर्गुता गटनां आनि बूमि अदुल्तद हूळसि, नूर मंदि सिपाइल्कुना पोर्रो मनना अदिकारि आनि येसुनगा कावेल कीसेक मत्‍ता सिपाइल्क वेल्‍ले वेरियतुर. वेरियसि, “ईर निजमे पेनदा मर्रि आंदुर” इंचि इत्‍तुर.
MAT 27:55 येसुना सेवा कीसेक गालिल एरियाताल वातव वेल्‍लेने मुर्ताह्क अगा लक्‍कुटाल हूळसेक मत्‍तां.
MAT 27:56 अवुने मरियम मगदलेनि, याकोब आनि योसेप ईरा यावल मरियम आनि जब्‍दिना मर्कुना यावल, इव अन्‍नि अगा मत्‍तां.
MAT 27:57 आयंका पोळ्‍दु होनना वेलाक अरिमताइ नाटेनाल वरोर योसेप इनना सिरमंत मनकल वातोर. ओर इंका येसुना सिस्युड मत्‍तोर.
MAT 27:58 योसेप पिलातुसुनगा होंचि, येसुना पीनगु गावाले इंचि इत्‍तोर. अस्‍के पिलातुस, “येसुना पीनगु, योसेपुंक हीम्टु,” इंचि सिपाइल्कुंक आदेस हीतोर.
MAT 27:59 योसेपु आ पीनगुन पूना कपडिते हुटतोर.
MAT 27:60 बंडातुन तुल्हाचि ओनाहाटीं तयार कीता पूना बोंदाते, येसुना पीनगुन इर्सि, बोंगाकु उंदि पेद्‍दा बंडातुन अड्‍डम दोसतोर. पजा अगटाल पेय्सि होत्‍तोर.
MAT 27:61 गानि मगदलेनि नाटेना मरियम आनि इंकुंदि मरियम इव बोंदा मुन्‍ने उदिस मत्‍तां.
MAT 27:62 नोमकेमता मुन्‍नेटा रोजुने पेद्‍दा पेर्मालोर्क आनि परिसिल्क पिलातुसुंक कलियसि,
MAT 27:63 “महाराज, आ बोंकिच्‍चना मनकल जीवाते मननेंके, ‘नना हासि मूड रोजकुंक मर्रा जीवाते तेदंतन’ इंचि इत्‍तोर, अद माकु मते मंता.
MAT 27:64 दानहाटीं मूड रोजकुनदाका ओना बोंदातगा कडक कावेल इर्रानद आदेस हीम. बारित्‍ते ओना सिस्युल्क बस्‍केनना वासि दोंगातनमते ओना पीनगुन ओयानुर आनि ‘येसु मर्रा जीवाते तेदतोर’ इंचि लोकुल्‍कुन बोंकिचानुर. इल्‍हा गिंटा आयानय्ते मुन्‍नेटकना इंका वेल्‍ले बेकार आंता,” इंचि वेहतुर.
MAT 27:65 अस्‍के पिलातुस, “मिमेट सिपाइल्कुन ओम्टु, ओसि ओना बोंदातगा कडक कावेल इर्रट,” इंचि वेहतोर.
MAT 27:66 अस्‍के ओर सिपाइल्कुन ओसि येसुना बोंदातगा कडक कावेल इरतुर. बोंदक अड्‍डम दोसता बंडाकु सरकार सिक्‍का वाटसि अगा कावेल कीसेके मत्‍तुर.
MAT 28:1 नोमकेम आतारित्‍ते इंकुंदि रोजु अय्तारम पंग आयनेंके मगदलेनि नाटेना मरियम आनि दाना दंटातद इंकुंदि मरियम, बोंदातुन हूळालय होत्‍तां.
MAT 28:2 अस्‍के उंदि पेनदा दूता स्वर्गमताल अगा रेयताहाटीं अगा पेद्‍दा बुकंप आता. पजा आ पेनदा दूता बोंदक अड्‍डम मत्‍ता बंडातुन तेंडसि, अदे बंडापोर्रो उद्‍दुता.
MAT 28:3 दाना रूपम पोळ्‍दुनालेसीं जगा-जगा मेर्सेक मत्‍ता, दाना अंगि बारे बर्पलेह्का तेल्‍लगा मत्‍ता.
MAT 28:4 दान हूळसि कावेल कियानोर इरगा वेरियसि, गजा-गजा वनकुसेक, अल्‍हेने हाताप आतुर.
MAT 28:5 अस्‍के पेनदा दूता इल्‍हा इत्‍ता. “वेरियमट, क्रुसुनपोर्रो वेलाड वाट्‍सि हव्‍कता येसुन मिमेट पह्कसेक मंतिट, इद नाकु एरपाटे मंता.
MAT 28:6 गानि ओर इग्‍गे हिल्‍लोर, ओर वेहताप मल्सि जीवाते तेदतोर. वटु, ओना पीनगु इरता जेगातुन हुळाट.
MAT 28:7 इंका बिराना होंचि ओना सिस्युल्कुंक, ओर हामुरताल जीवाते तेदतोर, ओर मीकन्‍ना मुन्‍नेने गालिल एरियाते होंचेक मंतोर, अगा ओर मीकु दिस्‍सानुर, इंचि वेहट. बतल अय्ते नना मीकु वेहतन, अदुन मति इर्राट,” इंचि आ मुर्ताह्‍कुन इत्‍ता.
MAT 28:8 अस्‍के आ मुर्ताह्क वेर्रेते, वेल्‍लेन आनंदमते, बोंदातगाटाल जटपेट पेय्सि ओना सिस्युल्कुंक इद कबुर वेहालय विततां.
MAT 28:9 अगटाल पेय्सि होननेंके, येसु अवुंक कलियसि अवुन, “बेस पिस्‍सट,” इंचि इत्‍तोर. पजा अव ओना दग्‍गेर होंचि काल्क मोळ्‍कतां.
MAT 28:10 अस्‍के येसु अवुन, “वेरियमट होंट, नावा तम्मुह्‍कुंक गालिल एरियाहेके होनालय वेहट, अग्गेन ओर नाकुन हूळंतुर,” इंचि इत्‍तोर.
MAT 28:11 अव सिस्युल्कुंक वेहालय होंच्‍चेकेन मत्‍तां, अच्‍चोटेन बोंदातगा कावेल कीसेक मत्‍तोर इच्‍चुर सिपाइल्क सहरते होत्‍तुर, होंचि अगा जर्गुतदंता पेद्‍दा पेर्मालोर्कुंक वेहतुर.
MAT 28:12 अस्‍के ओर यहुदि पेद्‍दाल्कुंक कलियसि उंदि उपायम कीतुर. सिपाइल्कुंक वेल्‍लेन कोत्‍तां हीसि वेहतुर गदा,
MAT 28:13 “मोमोट निद्रते मननेंके ओना सिस्युल्क नर्का वासि ओना पीनगुन दोंगातनमते ओतुर, इल्‍हा लोकुल्‍कुंक वेहट.
MAT 28:14 ई पोल्‍ले गिंटा राज्यपालना केव्‍दे अर्रानय्ते मोमोट ओन समत कीसि मीकु पोल्‍ले वायकुंटा कींतोम,” इंचि इत्‍तुर.
MAT 28:15 अस्‍के ओर कोत्‍तां एतसि वेहताप कीतुर, ई पोल्‍ले यहुदिल्कुना लोप्पो इदवेरादाका इंका इल्हे ताकसेक मंता.
MAT 28:16 अद आतंका पदाकोंडु मंदि सिस्युल्क गालिल एरियाते येसु वेहता गुट्‍टापोर्रो होत्‍तुर.
MAT 28:17 अगा येसुन हूळसि ओन मोळ्‍कतुर. अय्नागानि इच्‍चुर सिस्युल्कुंक अनमानम मत्‍ता.
MAT 28:18 अस्‍के येसु ओरा दग्‍गेर होंचि ओर्कुन इल्‍हा इत्‍तोर. “स्वर्गमते आनि बूमिपोर्रोटा अदिकारम अंता नाकु हीसि मंता.
MAT 28:19 अदुनहाटीं मिमेट होंचि दुनियाता अन्‍नि देसेल्‍कुना लोकुल्‍कुन सिस्युल्क कीम्‍टु. ओर्कु बाबाना पोरोलते, मर्रिना पोरोलते आनि पवित्र आत्माता पोरोलते बापतिस्मा हीम्टु.
MAT 28:20 नना मीकु हीता आदेस परकारम ओर्कु ताकालय करहट, ई दुनिया मुंळगना आकिर वेलादाका नना बस्केळक मीतोने मनंतन,” इत्‍तोर.
MAR 1:1 पेनदा मर्रि, येसु किरिस्‍तुना बेसता कबुर इल्‍हा सुरुव आता.
MAR 1:2 पेनदा कबुरतोर यसायाहना पुस्तकमते, “हूळा! नना नीकन्‍ना मुन्‍नेने नावा कबुरतोन लोहंतन. ओर नीवाहाटीं हर्रि तयार कींतोर.” इंचि रासि मंता.
MAR 1:3 वरोना अल्किर बय्‍लि जेगाते, “सामिनाहाटीं हर्रि तयार कीम्‍टु, ओना हर्रि सवरगा कीम्‍टु,” इंचि केंजा वासेक मंता, इल्‍हा बापतिस्मा हियना योहानुना बारेमतेन पेन वेहचि मत्‍ता.
MAR 1:4 पेनदा कबुरतोर रासतापे बापतिस्मा हियना योहान बय्‍लि जेगाते वासि लोकुल्‍कुंक इल्‍हा वेहालय दल्‍गतोर, “कीता पापाल्कुन ओप्‍कुंचि मनसु मार्सकुंचि बापतिस्मा येतानय्ते, पेन मीवा पापाल्कुन मापि कींता.”
MAR 1:5 इद केंजसि पूरा यहुदिया राज्येमते, येरुसलेम सहरते मंदना लोकुल्‍क ओनगा वातुर, वासि ओरा पापाल्क ओप्‍कुंचि, ओनहेंदाल योर्दन बेरेटे बापतिस्मा येतकुत्‍तुर.
MAR 1:6 योहान लोटापेटा बूराते तयार कीता कपडिं केरसि तोल्‍दा पट्‍टा नडिक तासकुनुंदुर. ओर गोल्‍लाबामां आनि तेने इवे तिंडि तिनुंदुर.
MAR 1:7 “नाकन्‍ना सक्‍तिमंतुड नावा पज्जोटाल वासंतोर. नना ओना मुन्‍ने वंगिसि, ओना बूटकुना नोंडेन लेहना लायकगुडा हिल्‍लेन.
MAR 1:8 नना मीक एतोनि बापतिस्मा हीतन गानि ओर मीक पवित्र आत्माते बापतिस्मा हियानुर,” इंचि योहान वेहुंदुर.
MAR 1:9 अव रोजकुने येसु गालिल एरियाता नासरेत सहरताल वासि, योर्दन बेरेटे योहानुनाहेंदाल बापतिस्मा येतकुत्‍तोर.
MAR 1:10 येसु बस्के अय्ते एताल पलाते वातोर, अस्‍केने मब्बु बैय्यरा आयानद आनि पवित्र आत्मा पावरेम पिट्‍टेलेसीं ओनपोर्रो रेयानद हूळतोर.
MAR 1:11 अच्‍चोटेन मब्बुनाल, “निमे नावा पावरमगल्‍ला मर्रिन आंदिन. नीहेंदाल नना वेल्‍लेने कूस मंतन,” इंचि उंदि अल्किर केंजावाता.
MAR 1:12 अद आता पजा पेनदा आत्मा बिराना येसुन बय्‍लि जेगाताहेके लोहता.
MAR 1:13 अगा नल्‍पै रोजकु केडा जिवरासिना नड्‍डुम मननेंके, देय्यम येसुनगा वासि, ओना पट्‍टु हूळता. पजा पेनदा दूतां वासि ओना सेवा कीतां.
MAR 1:14 हेरोद राजाल योहानुन जेलते वाटता पजा, येसु गालिल एरियाते वासि, “पेन इत्‍ता वेला पुरागा आसि, पेनदा राज्येम दग्गेर्क एव्ता. अदुनहाटीं मिमेट मनसु मार्सकुंचि पेनदा बेसता कबुरपोर्रो विस्वासम इर्रट,” इंचि वेहालय दल्‍गतोर.
MAR 1:16 येसु गालिल समुद्रम ओड्‍डु पीसि होननेंके सिमोनुन आनि ओना तम्मुर अंदरियन हूळतोर. ओर जिम्मां पिय्‍यानोर आताहाटीं, समुद्रमते ओल्‍लां वाटसि जिम्मां पीसेक मत्‍तुर.
MAR 1:17 अस्‍के, “नावा पज्जो वट, नना मीकुन मनकालोर्कुन नहगा तायानोर कींतन,” इंचि येसु ओर्कुन इत्‍तोर.
MAR 1:18 अस्‍के ओर, बिराना ओरा ओल्‍लां अग्गेन होळसि ओना पज्जो होत्‍तुर.
MAR 1:19 येसु इंकिच्‍चो मुन्‍नेळ्‍क होत्‍तारित्‍ते जब्‍दिना मर्कु याकोब आनि ओना तम्मुर योहान डोंगाते ओल्‍लां सवरिच्‍नेंके हूळतोर.
MAR 1:20 येसु ओर्कुन बिराना केयतस्‍के, ओर ओरा बाबाल जब्‍दिन आनि बूतिनोर्कुन अग्गेन डोंगाते होळसि ओना पज्जो होत्‍तुर.
MAR 1:21 ओर अंटोर कूळसि कपर्नाहुम सहरते होत्‍तुर. अगा येसु नोमकेम रोजुने दर्मसास्‍त्रम कराहना लोते होंचि पेनदा पोल्‍लें कराहलय दल्‍गतोर.
MAR 1:22 येसु पेनदा पोल्‍लें ओरा दर्मसास्‍त्रम कराहना गुरुल्‍कुनलेसीं आयो गानि अदिकारम मत्‍ताप कराहतोर. अदुनहाटीं ओना कराहमळतुन केंजसि लोकुल्‍क वेल्‍ले इचंत्रम आतुर.
MAR 1:23 अदे दर्मसास्‍त्रम कराहना लोते वरोर देय्यम पीता मनकल मत्‍तोर.
MAR 1:24 ओर येसुन हूळसि, “निमे बोन आंदिनो नाक एरपाटे, निमे नासरेत सहरता येसुन, पेनदा पवित्र मनकन आंदिन. मातोनि नीकु बाता कबळ? माकुन नासडेम कियालय वातिना?” इंचि वरगेयसि इत्‍तोर.
MAR 1:25 अद केंजसि, “निमे चुपचाप मन, ओनागटाल पलाते पेय्‍सा,” इंचि येसु जोरसे गदरिच्‍तोर.
MAR 1:26 अस्‍के आ देय्यम ओन गजा-गजा ऊपसि जोरसे वरगेयसेके ओना लोप्पोटाल पेय्सि होत्‍ता.
MAR 1:27 अदुन हूळसि अगा मत्‍तोर अंटोर इचंत्रम आसि, वरोंक-वरोर इल्‍हा वळकालय दल्‍गतुर, “इद बसोंटा पोल्‍ले, इद अय्ते पूना बोदा आंदु, ईर अदिकारमते देय्याल्कुन ओना लोप्पोटाल पेय्सि होंटु इंचि आदेस हींतोर, अव ईना पोल्‍ले केंजसेक मंतां.”
MAR 1:28 इल्‍हा येसु अगा कीता गटनना बारेमते पूरा गालिल एरिया आनि सुट्‍टु-मट्‍टु मत्‍ता अन्‍नि नाह्कुने तेळियसि होत्‍ता.
MAR 1:29 येसु आनि ओना सिस्युल्कु सिमोन, अंदरियल, याकोब, योहान दर्मसास्‍त्रम कराहना लोताल बिराना पलाते पेय्सि सिमोन आनि अंदरियना लोन होत्‍तुर.
MAR 1:30 अगा सिमोनुना पोरड एळकि वासि मींडसि मत्‍ता. इद पोल्‍ले अगा मत्‍तोर बोरो येसुंक वेहतुर.
MAR 1:31 येसु होंचि दाना कय पीसि तेहतोर. अस्‍के दाना एळकि रेय्‍सि, अद ओरा सेवा कियालय दल्‍गता.
MAR 1:32 पजा पोळ्‍द होंचि, लोकुल्‍क बिमारते मत्‍तोर्कुन, देय्याल्क पीतोर्कुन अंटोर्कुन येसुनगा पीसि वातुर.
MAR 1:33 पूरा सहरतोर येसु मत्‍ता लोता गलमातगा जमा आतुर.
MAR 1:34 येसु तीरतीरकुना बिमार्क मत्‍तोर वेल्‍लेटोर्कुन बेस कीतोर, देय्याल्क पीसि मत्‍ता वेल्‍लेटोर्कुना देय्याल्कुन पेचाह्‍चि गेदुमतोर. अव ओन एरपाट कियुंदुं, अदुनहाटीं ओर अवुन वळ्का हिया हिल्‍लोर.
MAR 1:35 येसु इंकुंदि रोज हक्‍केरेने बय-बय आयानेंके तेदसि बोरे हिल्वगा होंचि पारतना कीतोर.
MAR 1:36 सिमोन आनि ओना दंटातुर तेदता पजा येसुन पहकालय दल्‍गतुर.
MAR 1:37 पह्‍किसि-पह्‍किसि दोर्किच्‍चि, “नीकुन अंटोर पह्कसेक मंतुर,” इंचि येसुन इत्‍तुर.
MAR 1:38 अस्‍के येसु ओर्कुन इल्‍हा इत्‍तोर, “मनम पकापीसि मत्‍ता नाह्कुने दाकोम, आ नाह्कुने पेनदा पोल्‍लें वेहमळ गावाले. इद कबळताहाटींगे नना वातन.”
MAR 1:39 अल्हा ओर पूरा गालिल एरियाते तिरियसेके, ओरा दर्मसास्‍त्रम कराहना लोहकुने होंचि पेनदा पोल्‍लें वेहचेके, देय्याल्क पीसि मत्‍तोरागटाल देय्याल्कुन पेचाह्‍चि गेदुमसेके होत्‍तोर.
MAR 1:40 अल्हा होंचेके मननेंके वरोर कुस्‍टरोगम आता मनकल येसुनगा वासि, ओना काल्कुनपोर्रो अर्सि, “निमे इन्‍कुत्‍ते नाकुन बेस किया पर्रांतिन,” इंचि येसुन विनंति कीतोर.
MAR 1:41 येसुंक ओनपोर्रो दया वाताहेंका कय मुन्‍नेळ्‍क कीसि ओन इट्‍सि, “निमे बेस आयगोम इंचि नावा मनसु मंता. निमे बेस आम” इंचि इत्‍तोर.
MAR 1:42 इत्‍ता इनुडे ओना कुस्‍टरोगम होत्‍ता ओर बेस आतोर.
MAR 1:43 अस्‍के, “हूळा! इगे जर्गतद बोर्के वेहमा. गानि निमे होंचि मीवा पेर्मांक हुप्‍सा. कुस्‍टरोगमताल निमे बेस आता गवाइ इंचि मूसाल वेहता मोक्‍कु हीम. अदुन हूळसि निमे बेस आतिन इंचि लोकुल्‍कुंक एरपाट आंता,” इंचि येसु ओन्क गट्‍टिगा वेहतोर.
MAR 1:45 गानि आ मनकल अगटाल पेय्सि अद पोल्‍ले अंटोर्क वेहालय दल्‍गतोर. अस्‍के, “अंटोर्क तेळियता, नाकुन हूळसि लोकुल्‍क मंदानां-मंदां वांतुर,” इन्कुंचि येसु कळमता नाह्कुने होना हिल्‍लोर. ओर अल्किर हिल्वा जेगाते मत्‍तोर, अगागुडा लोकुल्‍क नालुं-मूलानाल ओना जाडा पीसि होत्‍तुर.
MAR 2:1 कोन्‍नि रोजकु आतारित्‍ते येसु कपर्नाहुम सहरते मल्सि वातोर, ओर लोन मंतोर इंचि लोकुल्‍कुंक तेळियसि होत्‍ता.
MAR 2:2 अस्‍के लोतागा इच्‍चोर वेल्‍ले लोकुल्‍क जमा आतुर गदा, गल्‍माते नित्‍तालय जेगागुडा मनाहिल्‍ले. येसु ओर्कु पेनदा पोल्‍लें कराहतोर.
MAR 2:3 अद वेलाते नालुर मनकालोर वरोर लकवा बिमारतोन पीसि येसुनगा वातुर.
MAR 2:4 गानि वेल्‍ले गर्दि मत्‍ताहाटीं ओर येसुनगा ओया पराहिल्‍लुर. अय्ते ओर लोतपोर्रो कटुल पियानच्‍चो बोंगा कीसि लकवा बिमारतोन येसुनगा रेहतुर.
MAR 2:5 येसु ओरा विस्वासमतुन हूळसि, आ लकवा बिमारतोन, “कोको, नीवा पापाल्क मापि आतां,” इंचि इत्‍तोर.
MAR 2:6 अस्‍के अगा उद्‍दिसि मत्‍तोरा लोप्पोटाल इच्‍चुर दर्मसास्‍त्रम कराहना गुरुल्क, “ईर इल्‍हा बारि वळ्कसंतोर? ईर पेनदा अपमानम कींतोर. पेन तप्‍पा इंका बोरे पापाल्कुन मापि किया पर्रुर,” इंचि ओर-ओरे मनसुने विचारम कियालय दल्‍गतुर.
MAR 2:8 ओर-ओरे विचारम कियानद येसु ओना मनसुने बिराना एरपाट कीसि, “मी मनसुने मिमेट इसोंटा विचारम बारि कींतिर?
MAR 2:9 बद अल्कगा मंता? लकवा बिमारतोन, ‘नीवा पापाल्क मापि आतां इंचि इनमळा हिलाकोंटे, नीवा कटुल तेहकुंचि ताका’ इनमळ?” इंचि पूसकीतोर.
MAR 2:10 पजा, “गानि मनकना रूपमते पुटतोन नाकु, ई बूमिपोर्रोटा पापाल्क मापि कियाना अदिकारम मंता इंचि मीक तेळियोना?” इंचि इत्‍तोर. पजा आ लकवा बिमारतोन,
MAR 2:11 “नना नीकु वेहासेके, तेदसि नीवा कटुल तेहकुंचि लोन होन,” इंचि इत्‍तोर.
MAR 2:12 इत्‍ता इनुडे ओर तेदसि कटुल पीसि अंटोर मुन्‍नेटाल पेय्सि होत्‍तोर. अदुन हूळसि अंटोर इचंत्रम आतुर. “इल्‍हा मोमोट बस्‍केने हूळा हिल्‍लोम” इंचि पेनदा स्‍तुति कियालय दल्‍गतुर.
MAR 2:13 येसु मर्रा उंदि मल्का समुद्रम ओड्‍डुंक होत्‍तोर. वेल्‍लेटुर लोकुल्‍क ओनगा वातुर अस्‍के येसु ओर्कु पेनदा पोल्‍लें कराहलय दल्‍गतोर.
MAR 2:14 कराहमळ आतस्के अगटाल होननेंके अल्‍पिना मर्रि लेवि, कर वसुल कियना नाकातगा उद्‍दिसि मत्‍तद हूळतोर. हूळसि ओन, “नावा पज्जो वा,” इंचि इत्‍तस्के ओर तेदसि ओना पज्जो होत्‍तोर.
MAR 2:15 पजा येसु लेविना लोन गाटो तिंचेके मननेंके वेल्‍लेटुर कर वसुल कियानोर आनि पापि लोकुल्‍क वासि येसु आनि ओना सिस्युल्कुनतोनि गाटो तिनालय उदतुर. ओरव्टे वेल्‍लेटुर येसुन विस्वासम कीतोर मत्‍तुर.
MAR 2:16 कर वसुल कियानोरतोनि आनि पापि लोकुल्‍कुनतोनि येसु गाटो तिनानद परिसिल्क आनि दर्मसास्‍त्रम कराहना गुरुल्क हूळतुर. हूळसि, “कर वसुल कियानोरतोनि आनि पापि लोकुल्‍कुनतोनि येसु गाटो बारि तिंतोर?” इंचि ओर येसुना सिस्युल्कुन पूसकीतुर.
MAR 2:17 अद केंजसि येसु ओर्कुन इल्‍हा इत्‍तोर, “बिमार हिल्‍वोर्कुंक डाक्‍टरना अव्‍सरम मन्‍नो गानि बिमार मत्‍तोर्कुंक डाक्‍टरना अव्‍सरम मनंता. नना नीतिमंतुल्‍कुन केयालय आयो गानि पापि लोकुल्‍कुन केयालय वातन,” इंचि इत्‍तोर.
MAR 2:18 बापतिस्मा हियना योहानुना सिस्युल्क आनि परिसिल्क ओक्‍कापोद्‍दु मनुंदुर. अय्ते इच्‍चुर लोकुल्‍क वासि, “योहानुना सिस्युल्क आनि परिसिल्क ओक्‍कापोद्‍दु मनंतुर. गानि नीवा सिस्युल्कु मन्‍नुर. अल्हा बारि?” इंचि येसुन पूसकीतुर.
MAR 2:19 अस्‍के येसु ओर्क इल्‍हा वेहतोर, “मरमिन पेडल मरमिं वाता हेडमितोरतोनि मननेंके ओर्कु ओक्‍कापोद्‍दुना अव्‍सरम मनंतना? मन्‍नो. बदवेरादाका मरमिन पेडल ओरतोनि मनंतोर अदवेरदाका ओर ओक्‍कापोद्‍दु मन्‍नुर.
MAR 2:20 गानि मरमिन पेडल ओरागटाल लक्‍कु आयाना रोजकु वायनुं, अस्‍के ओर ओक्‍कापोद्‍दु मनानुर.”
MAR 2:21 “बोरे आयिर पडना कप्‍पिड हर्ते, दानकु पूना कप्‍पिडता गंडा अंटा वाट्‍सि कुट्‍टोर. ओक्‍कला ओर अल्हा कियानय्ते अंटा वाटता पूना कप्‍पिडता गंडा इगका होंचि पळाना कप्‍पिडतुन इंकिच्‍चो हरहंता.
MAR 2:22 अल्‍हेने पूना अंगुर पानकमतुन पळाना तोलपुर्काते बोरे दोस्सुर, अल्हा दोसते अद अंगुर पानकम, पळाना तोलपुर्कातुन हराह्‍चि पोंगिस दांता. आनि तोलपुर्कागुडा नासडेम आंता. अदुनहाटीं पूना अंगुर पानकम, पूना तोलपुर्कातेन दोसंतुर,” इंचि येसु इत्‍तोर.
MAR 2:23 उंदि नोमकेम रोजुने येसु आनि सिस्युल्क पोलाल्‍कुनाल होंचेके मत्‍तुर, होननेंके ओना सिस्युल्क हेनकु नल्‍सि तिंचेक मत्‍तुर.
MAR 2:24 परिसिल्क अदुन हूळसि, “बद कबळ अय्ते नोमकेम रोजुने कियमळ नियम परकारम ओज्‍जोनो, अदे कबळ नीवा सिस्युल्क बारि कीसंतुर?” इंचि येसुन इत्‍तुर.
MAR 2:25 अस्‍के येसु ओर्कुन, “दाविदुंक आनि ओना दंटातोर्कुंक कर्वेस्‍तस्‍के ओर बतल कीतोर मिमेट हदवा हिल्‍लिरा?
MAR 2:26 अबियातार इनानोर पेद्‍दा पेर्मल मननेंके दाविद पेनदा लोते होळियसि पेनदुक मोळ्कता हारिन तित्‍तोर, ओना दंटातोर्कुंकगुडा हीतोर. अव हारिं तिनमळ इत्‍ते दर्मसास्‍त्रम परकारम विरोदमते मत्‍ता. अव हारिं सिराप पेर्मालोर्क तप्‍पा इंका बोरे तिना पर्रुर,” इंचि ओर्कुन इत्‍तोर.
MAR 2:27 मर्रा ओरतोनि, “नोमकेम रोजु मनकनाहाटीं कीसि मंता, मनकल नोमकेम रोजुनाहाटीं आयो.
MAR 2:28 अदुनहाटीं मनकना रूपमते पुटतोन नना, नोमकेमता रोजुना मालकगुडा आंदुन,” इंचि येसु इत्‍तोर.
MAR 3:1 येसु मर्रा उंदि मल्का दर्मसास्‍त्रम कराहना लोते होत्‍तोर. अगा वरोर कय वत्‍सोत्‍ता मनकल मत्‍तोर.
MAR 3:2 नोमकेम रोजुने येसु ओन बेस कियानय्ते ओन तप्पुने पीकोम इंचि इच्‍चुर लोकुल्‍क हूळसेक मत्‍तुर.
MAR 3:3 “अंटोरा मुन्‍ने वासि नित्‍ता,” इंचि येसु, कय वत्‍सोत्‍तोन इत्‍तोर.
MAR 3:4 पजा, “नियम परकारम, नोमकेम रोजुने बेस कियमळ मंचिदा, कराब कियमळ मंचिदा? हिलाकोंटे पिसागोटते मंचिदा, हव्कते मंचिदा?” इंचि पूसकीतोर. गानि ओर चुपचाप मत्‍तुर.
MAR 3:5 ओर्क बोर्के जीवा नोय्यो इंचि कन्‍कुंचि येसुंक दुक्‍कम वासि, ओर अंटोरहेके होंगुने हूळतोर. पजा, “नीवा कय मुन्‍नेळ्‍क हहा,” इंचि आ कय वत्‍सोत्‍तोन इत्‍तोर. ओर कय मुन्‍नेळ्‍क हाहतस्‍के ओना कय बेस आता.
MAR 3:6 पजा परिसिल्क अगटाल पलाते पेय्सि, हेरोद राजाना लोकुल्‍कुंक होंचि कलियतुर. कलियसि येसुन बल्हा हव्कना? इंचि येसुना विरोदमते वळ्‍क्‍कुत्‍तुर.
MAR 3:7 येसु ओना सिस्युल्कुन पीसि अगटाल पेय्सि समुद्रमहेके होत्‍तोर. येसु कियाना इचंत्रमता कबाह्‍क केंजसि गालिल एरिया, यहुदिया एरिया, येरुसलेम सहर, इदुमिया एरिया, सूर, सिदोन इनना सहरकुनाल, योर्दन बेरेटा हब्बेटाल, आनि पकापीसि मत्‍ता नाहकुनाल वेल्‍लेटुर लोकुल्‍क ओनगा वातुर.
MAR 3:9 बिमार मत्‍तोर्कुन वेल्‍लेटोर्कुन येसु बेस कीतोर. अदुनहाटीं बिमार लोकुल्‍क येसुन इट्‍टानाहाटीं वरोंक-वरोर दोब्सेके वासेक मत्‍तुर. ओरपोर्रो अर्राकोंटा लक्‍कु मंदना इंचि, “उंदि सिन्‍ना डोंगा नाहाटीं तयार कीम्‍टु,” इंचि येसु ओना सिस्युल्कुंक वेहतोर.
MAR 3:11 देय्याल्क पीसि मत्‍ता लोकुल्‍क येसुन बस्के अय्ते हूळुंदुरो अस्‍के, “निमे पेनदा मर्रिन!” इंचि वरगेयसि ओना मुन्‍ने हिळु अर्रुंदुर.
MAR 3:12 गानि येसु मात्रम, “नावा बारेमते बोर्के बतले वेहमट,” इंचि आ देय्याल्‍कुंक गट्‍टिगा हुकुम हीतोर.
MAR 3:13 पजा येसु गुट्‍टापोर्रो होत्‍तोर. आ मंदिताल येसु बोर्कुनय्ते कोरतोर, ओर्कुन ओनगा केयकुत्‍तोर.
MAR 3:14 ओर ओनतोनि मनालय, पेनदा बेसता कबुर वेहनाहाटीं लोहालय इंचि पन्‍नेंड मंदितुन पेरतोर. पेरसि ओर्कु प्रेरितुल्क इंचि पोरोल दोसतोर. ओर्क देय्याल्क गेदमना अदिकारम हीसि निलाहतोर.
MAR 3:16 ओरा पोरोलीं इल्‍हा मंतां: सिमोन, ईनकु येसु पत्रु इंचि पोरोल दोसतोर,
MAR 3:17 जब्‍दिना मर्क याकोब आनि ओना तम्मुर योहान. ईर इव्वुर्कुन बोनेर्गेस इंचि येसु पोरोल दोसतोर, इत्‍ते गर्जना कियानोर इंचि अर्तम.
MAR 3:18 अंदरियल, पिलिपु, बरतलमय, मत्‍तयाल, तोमल, अल्‍पिना मर्रि याकोब, तद्‍दि, सिमोन कनानि,
MAR 3:19 आनि येसुन दोकाते पीसि हियानोर इस्‍कारियोत नाटेना यहुदल.
MAR 3:20 पजा येसु उंदि लोन होत्‍तोर. अगागुडा इच्‍चोर वेल्‍ले मंदि जमा आतुर गदा, येसुंक, ओना सिस्युल्कुंक गाटो तिनालयगुडा वेला दोर्काहिल्‍ले.
MAR 3:21 येसु पिसा-पिसा कीसंतोर इंचि लोकुल्‍कुनहेंदाल ओना लोतोर केंजसि ओन लोन तायालय होत्‍तुर.
MAR 3:22 येरुसलेमताल वाता दर्मसास्‍त्रम कराहना गुरुल्‍कु, येसु देय्याल्कुन गेदुमसेके इंचि, “ईना लोप्पो ‘बेलजेबुल’ इनना देय्याल्कुना मुक्‍यल होळियसि मंता, दाना बलमते ओर देय्याल्क तेंडांतोर,” इंचि इत्‍तुर.
MAR 3:23 अदुनहाटीं येसु ओर्कुन दग्‍गेरा केय्‍सि ओर्कु वेसुडिते वेहातोर. “देय्यम दाना देय्याल्कुन बल्हा तेंडा परांता?
MAR 3:24 ओक्‍कला, उंदि राज्येमते मनानोरा लोप्पो वरोनद-वरोंक अर्राकोंटे अद राज्येम निल्‍ला परांतना? बस्‍केने निल्‍ला पर्रो.
MAR 3:25 अल्‍हेने उंदि लोता लोप्पो वरोनद-वरोंक अर्राकोंटे अद लोन गट्‍टिगा मन्‍नो.
MAR 3:26 अदुनहाटीं देय्यम दाना दंटाता देय्याल्कुना विरोदमते नितते, अवुना राज्येम बल्हा नित्‍तंता? नित्‍तापर्रो, गानि नासडेम आंता.
MAR 3:27 बोरे आयिर! वरोर ताकतवर मनकना लोते होळियसि ओना सामानतुन दोंगा कियना इत्‍ते, मोदाला आ ताकतवर मनकन दोहचि वाटतेन दोंगा किया परांतोर.
MAR 3:28 नना मीक निजम वेहांतन, मनकालोरा अन्‍नि पापाल्कुन, ओर कीता अपमानमतुन पेन मापि किय्‍यार.
MAR 3:29 गानि पवित्र आत्माता अपमानम कीते, ओर बोरे आयिर, ओन्क बस्‍केने मापि हिल्‍ले. असोंटा तप्पु कीता लोकुल्‍क बस्‍केळ्‍क पापमता दोसेमतेन मनंतुर,” इंचि वेहतोर.
MAR 3:30 अल्हा बारि वेहतोर इत्‍ते, “ओनालोप्‍पो देय्यम मंता,” इंचि दर्मसास्‍त्रम कराहना गुरुल्क ओन इत्‍तुर.
MAR 3:31 पजा येसुना यावल, ओना तम्मुह्‍क ओर मत्‍ता लोतगा वातुर. ओर लोता पलाते नित्‍तिसि येसुन केयट इंचि लोहतुर.
MAR 3:32 लोकुल्‍क येसुना सुट्‍टु उद्‍दिसि मत्‍तुर. अस्‍के, “नीवा यावल, नीवा तम्मुह्‍क, हेलाह्क पलाते एदुर हूळसेक मंतुर,” इंचि ओर वेहतुर.
MAR 3:33 अय्ते, “बद नावा यावल, बोर ना तम्मुह्‍क?” इंचि येसु ओर्कुन इत्‍तोर.
MAR 3:34 अस्‍के ओना सुट्‍टु उद्‍दिसि मत्‍तोरहेके हूळसेक, “ईरे नावा यावल, ईरे ना तम्मुह्‍क आंदुर.
MAR 3:35 बोर अय्ते पेनदा इच्‍चा परकारम ताकंतुरो ओरे नावा तम्मुर, हेलड आनि यावनलेसीं दग्‍गेटोर आंदुर,” इंचि वेहतोर.
MAR 4:1 येसु मरुंदि मल्का गालिल समुद्रम ओड्‍डुनगा होंचि पेनदा पोल्‍लें कराहलय दल्‍गतोर. अस्‍के ओनगा वेल्‍लेटुर लोकुल्‍क जमा आताहेंका ओर उंदि डोंगा एक्‍किस उदतोर. लोकुल्‍क बारे बूमिपोर्रो नित्‍तिसि मत्‍तुर.
MAR 4:2 अस्‍के ओर वेल्‍लेन पोल्‍लें लोकुल्‍कुंक वेसुडिं वेहासेक कराहतोर. उंदि वेसुडि इल्‍हा मत्‍ता.
MAR 4:3 “केंजट, वरोर कास्‍तकरि मनकल विज्‍जां वीतालय पेय्‍स्‍तोर.
MAR 4:4 ओर वीतनेंके इच्‍चुं विज्‍जां हरदगा अरतां, अस्‍के अवुन पिट्‍टें वासि पेर्सि तित्‍तां.
MAR 4:5 इच्‍चुं विज्‍जां बंडाना गेर्सेपोर्रो अरतां. अगा तोळि एक्‍को हिलुवादानकु आ विज्‍जां बिराने मोलियतां. गानि हिह्‍कु लोप्‍पोळ्‍क होनवाहेंका पोळ्‍द पेय्‍स्‍तस्‍के अव वत्‍सि हासोत्‍तां.
MAR 4:6 गानि हिह्‍कु लोप्‍पोळ्‍क होनवाहाटीं पोळ्‍द पेय्सि वेल्‍ले एद्‍दि आतस्के अव वतसि कर्विसि होत्‍तां.
MAR 4:7 इंका इच्‍चुं विज्‍जां हाह्कुना पोदाने अरतां. हाह्कुना पोदां इरगा बेर्सि, अव विज्‍जन बेर्सा हिया हिल्‍लें, अदुनहाटीं पंटा पेय्‍सा हिल्‍ले.
MAR 4:8 इच्‍चुं विज्‍जां बेसता जेगाते अरतां. अव बेस मोलियसि, बेर्सि बेस पंटा पेय्‍स्‍ता. बगा मुप्‍पै अंताल्‍क, बगा अरवै अंताल्‍क, बगा नूर अंताल्कुना पंटा पेय्‍स्‍ता,” इंचि वेसुडि महतोर.
MAR 4:9 पजा मर्रा ओर्कुन, “बोर्कु केंजालय केव्क मंतां ओर केंजट,” इंचि येसु इत्‍तोर.
MAR 4:10 येसु वरोरे मत्‍तद हूळसि अगा मत्‍तोरा लोप्पोटाल इच्‍चुर लोकुल्‍क आनि ओना पन्‍नेंड सिस्युल्कु ओनगा होंचि “ई वेसुडिता अर्तम वेहा,” इंचि येसुन इत्‍तुर.
MAR 4:11 येसु ओर्कुन, “मीक अय्ते पेनदा राज्येमता बारेमता मर्ममतुन एरपाट कीकुनालय बुद्‍दि मंता, गानि पलातोर्कुंक बारे इद मर्मम तेळियालय वेसुडिने वेहा पींता.”
MAR 4:12 बारित्‍ते, “ओर हूळुळ अय्ते हूळंतुर, गानि अदुन एरपाट किय्युर. केंजुड अय्ते केंजांतुर, गानि अद ओर्क तेळियो. ओक्‍कला ओर एरपाट कीकुंचि मत्‍ते, तेळियागोटकुंचि मत्‍ते, पेनदागा मल्सि वायेर, पेन ओर्कुन मापि कियवळ,” इंचि इत्‍तोर.
MAR 4:13 मर्रा येसु ओर्कुन इल्‍हा इत्‍तोर. “मीक इद वेसुडिता अर्तम तेळिया हिल्‍लेना? इदे मीक तेळियाकोंटे इंका वेरे वेसुडिं मीक बल्हा तेळियानुं?
MAR 4:14 इगे वीतानोर इत्‍ते पेनदा पोल्‍लेतुन वेरेतोर्क वेहानोर आंदुर.
MAR 4:15 इच्‍चुर लोकुल्‍क विज्‍जां अरता हर्दा जेगातसंटोर आंदुर. ओर पेनदा पोल्‍लेतुन केंजांतुर, केंजतारित्‍ते देय्यम बिराना वासि ओर केंजतवुन तेंडसि पोहंता.
MAR 4:16 विज्‍जां अरता बंडाना गेर्से जेगातसंटोर बोर इत्‍ते, बोर अय्ते पेनदा पोल्‍लेतुन केंजसि कुसिते बिराने ओप्‍कुंतुर.
MAR 4:17 गानि ओरा मनसुने पेनदा पोल्‍लेता हिह्‍कु गट्‍टि पळुवाहाटीं कोन्‍नि रोजके विस्वासमते मनांतुर. पेनदा पोल्‍लेताहाटीं तिप्‍पल्‍क, कस्‍टाल्‍क वाते विस्वासमताल ओर बिराना लक्‍कु आंतुर.
MAR 4:18 विज्‍जां अरता हाह्कुना पोदाना जेगातसंटोर बोर इत्‍ते, बोर अय्ते पेनदा पोल्‍ले केंजांतुर,
MAR 4:19 गानि सम्‍सारमता रंदि, दनमता आस्‍ति, दिसतवंता गावाले इत्‍ता मनसु, इवन्‍नि मत्‍ताहाटीं पेनदा पोल्‍लेतुन ओनालोप्‍पो बेर्सा हिय्यों. पजा अद पोल्‍लेहेंदाल ओन्क बतल पायदा आयो.
MAR 4:20 बोर अय्ते पेनदा पोल्‍लेतुन केंजसि, ओप्‍कुंचि बेस पायदा तरांतोर, ओर इत्‍ते, विज्‍जां अरता बेसता जेगातसंटोर आंदुर ओर मुप्‍पै अंताल्‍क, अरवै अंताल्‍क आनि नूर अंताल्‍क इल्‍हा पलांचंतोर,” इंचि इत्‍तोर.
MAR 4:21 येसु मरुंदि वेसुडि वेहतोर. “बोरे आयिर वेडसि निरिच्‍चि गंजुना हिळु मुच्‍चोर, कटुल हिळुगुडा इर्रोर. गानि वेल्‍गु दिसगोम इंचि दान उंदि दीसोडिपोर्रो इर्रंतोर.
MAR 4:22 मक्‍किस मत्‍तव अन्‍नि दिस्‍सि अर्राकोंटा मन्‍नों, आनि मर्ममते मत्‍तव बवे पलाते अर्राकोंटा मन्‍नों.
MAR 4:23 बोर्कु केंजालय केव्क मंतां ओर केंजट,” इंचि येसु इत्‍तोर.
MAR 4:24 मर्रा येसु ओर्कुन इल्‍हा इत्‍तोर. “मिमेट बेस उसारते केंजट, बद कोल्ताते मिमेट हींतिरो, अदे कोल्ताते मीकु हियमळ जर्गंता, इंका दानकन्‍ना एक्‍कोगुडा हियमळ जर्गंता.
MAR 4:25 बारित्‍ते, बोनगा अय्ते मंता, ओन्क पेन इंका हींता. गानि बोनगा अय्ते हिल्‍ले, ओनगा मत्‍तदुनगुडा पेन वापस एतकुन्‍नार,” इंचि इत्‍तोर.
MAR 4:26 मर्रा येसु इल्‍हा वेहतोर. “पेनदा राज्येम इल्‍हा मंता, वरोर मनकल ओना नेलिते विज्‍जां वीतंतोर.
MAR 4:27 ओर नर्कळ्‍क मींडंतोर, पोद्‍दला तेल्‍विते मनंतोर. अद विज्जा मोलियसि बेर्स्‍सेकेन दांता. अद विज्जा बल्हा मोलियता, बल्हा बेर्सता इत्‍तद ओनकु तेळियो.
MAR 4:28 बूमि दानद अदे पंटातुन पंडागोटंता. अद बल्हा इत्‍ते मोदाला मोल्का मोलियंता, कर्रे बेर्संता, पोट्‍टक वांता, हेन्‍नु पेय्सि पेडेक निंडंतां.
MAR 4:29 गानि बस्के अय्ते पेडेक मुदरंतां अस्‍के नेलिता मालक पंटा कोतक वाता इंचि हेटेळ पीसि कोय्‍यंतोर.”
MAR 4:30 मर्रा येसु ओर्कु इल्‍हा वेहतोर, “पेनदा राज्येम बल्हा मनंता इंचि वेहकन? बद वेसुडि वेह्‍चि तेल्‍पिचकन?
MAR 4:31 पेनदा राज्येम आवाल्‍कुना उंदि पेडेतसोंटद आंद. अद बूमिपोर्रो वीततस्के, अन्‍नि पेडेकुंकन्‍ना सिन्‍ना पेडे मनंता.
MAR 4:32 गानि अद बेर्सतस्‍के अगा मनना अन्‍नि कुसिर कायाना मराकुंकन्‍ना पेद्‍दा मरा आंता. दाना पंगां पोळ्‍गुंक-पोळ्‍गु बेर्सि, पिट्‍टें इंका नीडाते गूडां किया परांतां,” इंचि इत्‍तोर.
MAR 4:33 येसु इसोंटव बच्‍चुंगो वेसुडिं वेह्‍चि, ओर्क पेनदा पोल्‍लें तेळियानाल वेहुंदुर.
MAR 4:34 वेसुडि वेहाका येसु ओर्कु बतले वेहाकोंदुर. गानि सिराप ओना सिस्युल्क मत्‍तस्के अव वेसुडिना अर्तम ओर्क तेळियागोट्‍सि वेहुंदुर.
MAR 4:35 अद रोज पोळ्‍द होनना वेलाते, “मनम हब्बेटा बाजुंक दाकोम दट,” इंचि येसु ओना सिस्युल्कुन इत्‍तोर.
MAR 4:36 ओना सिस्युल्क अगाटा मंदितुन अग्गेन होळसि, येसु उद्‍दिस मत्‍ता डोंगाते उद्‍दिस होनालय पेय्‍सतुर. ओरा पज्जो इंकिच्‍चुं डोंगांगुडा पेय्सतां.
MAR 4:37 अस्‍के उंदि पेद्‍दा वळि-दुमारम वाता. पेद्‍दा-पेद्‍दा तळां डोंगाक दल्‍गिसि एर निंडालय दल्‍गता.
MAR 4:38 गानि येसु डोंगाता पज्‍जोटा बाजुंक होंचि मेत्‍तापोर्रो मींडसेक मत्‍तोर. अस्‍के सिस्युल्कु येसुन तेहचि, “गुरु! मनम नासडेम आसि होनिनागानि नीकु बतल पिकिर हिल्‍लेना?” इंचि इत्‍तुर.
MAR 4:39 अस्‍के ओर तेदसि, वळि-दुमारमतुन आनि समुद्रमतुन, “आगा, चुपचाप मन” इंचि गदरिचतोर, अस्‍के वळि-दुमारम मग्‍गिसि, अगा पूरा सांत आता.
MAR 4:40 अस्‍के येसु सिस्युल्कुन, “मिमेट बारि वेरियंतिर? मीकु गिच्‍चचोगुडा विस्वासम हिल्‍लेना?” इंचि इत्‍तोर.
MAR 4:41 ओर इरगा वेरियसि, “ईर बोर आंदुर? वळि, समुद्रमगुडा ईना पोल्‍ले केंजंता,” इंचेके ओर-ओरे वळ्‍ककुत्‍तुर.
MAR 5:1 अस्‍के ओर समुद्रमता हब्बेटा बाजुंक मनना गिरासेन इनना एरियक एव्‍तुर.
MAR 5:2 येसु डोंगाताल रेयतस्के वरोर देय्यम पीता मनकल तापळन बोग्‍ळाताहेंदाल वासि येसुंक कलियतोर.
MAR 5:3 ओन बच्‍चुंगो मल्कां बेडिने, गोल्सुकुने दोहचि वाटतुर, गानि ओर बेडिन उराहचि पोहतोर, गोल्सुकुन नेम्‍हाचि पोहतोर. ओन बोरे आपा पराहिल्‍लुर. ओर तापळानेन मनुंदुर, ओन बोरे गोल्सुकुने दोहा पराकोंदुर.
MAR 5:5 ओर नर्का-पिय्यल तापळाने, गुट्‍टाने तिरियसेक वरगेयसेक मनुंदुर. ओनद ओरे बंडाने कोह्‍ककुंचि नोप्‍पिं कीकुंनुंदुर.
MAR 5:6 ओर लक्‍कुटाले येसुन हूळसि, विच्‍चि वासि ओना काल्क मोळ्‍कतोर.
MAR 5:7 अस्‍के, “ओनागटाल पलाते पेय्‍सा,” इंचि येसु आ मनकन पीता देय्यमतुन इत्‍तोर. अदुनहाटीं ओर येसुन, “ए अन्‍निटकन्‍ना पेद्‍दा पेनदा मर्रि येसु, नातोनि नीकु बता कबळ? निमे नाकुन तकलिप किय्योन इंचि पेनदा ओट्‍टु तिंचि वेहा,” इंचि जोरसे वरगेयसि इत्‍तोर.
MAR 5:9 मर्रा, “नीवा पोरोल बतल?” इंचि येसु पूसकीतोर. अस्‍के ओनालोप्‍पो मत्‍ता देय्यम, “मोमोट वेल्‍लेन मंदा आसि मंतोम, इंचि नावा पोरोल ‘मंदा’ आंद,” इल्‍हा जवाब हीता.
MAR 5:10 ओनालोप्‍पो मत्‍ता देय्याल्क, “माकुन इद एरियाताल पलाते गेदुममा,” इंचि येसुन बच्‍चोरो विनंति कीतां.
MAR 5:11 अद वेलाते गुट्‍टा पक्‍काते पद्‍दिना मंदा मेय्‍सेके मत्‍ता.
MAR 5:12 पजा, “माकुन आ पद्‍दिना मंदाते होनाहीम,” इंचि आ देय्याल्क येसुन विनंति कीतां.
MAR 5:13 अस्‍के येसु अवुन होना वेहतोर अय्ते, आ देय्याल्क ओनागटाल पेय्सि पद्‍दिना मंदाते होत्‍तां. अव पद्‍दिं रोंडु वेयकुनदाका मत्‍तां. पजा आ पद्‍दिना मंदा समुद्रम ओड्‍डुन पोर्रोटाल हिळतुक वित्‍सि समुद्रमते मुळ्‍गिसि हासोत्‍तां.
MAR 5:14 अद हूळसि पद्‍दिं मेहानोर वित्‍सि होंचि, सहरते, पक्‍का पीसि मत्‍ता नाह्कुने अगा जर्गतद वेहतुर. अस्‍के आ देय्याल्क पीतोरद बतल आता इंचि लोकुल्‍क हूळालय अगा वातुर.
MAR 5:15 येसुनगा वासि हूळतुर अय्ते, देय्याल्क पीसि मत्‍ता मनकल पुरागा बेस आसि, कपडिं केर्सि उद्‍दिसि मत्‍तद ओर्क दिसतोर. अल्हा मत्‍तद हूळसि ओर्क वेर्रे दल्‍गता.
MAR 5:16 येसुना कबाह्‍कुन हूळतोर अगा बोर अय्ते मत्‍तुरो ओर, देय्याल्क पीसि मत्‍ता मनकल बल्हा बेस आतोर, पद्‍दिंक बल्हा-बतल आता इवन्‍नि पोल्‍लें लोकुल्‍कुंक वेहतुर.
MAR 5:17 इवन्‍नि पोल्‍लें केंजसि, “निमे मा एरियाताल पेय्सि होन,” इंचि लोकुल्‍क येसुन विनंति कियालय दल्‍गतुर.
MAR 5:18 अस्‍के येसु होनालय डोंगाते उदसेके मननेंके, देय्याल्कुनाल बेस आता मनकल वासि, “नाकुन नीवातोनि वाया हीम,” इंचि येसुन विनंति कीतोर.
MAR 5:19 गानि येसु ओप्‍कुन्‍ना हिल्‍लोर, “सामि नीपोर्रो दया कीसि नीहाटीं बल्हा बतल कीतोरो, लोन होंचि नीवा लोतोर्कुंक वेहा,” इंचि इत्‍तोर.
MAR 5:20 अय्ते ओर मनकल अगटाल देकापोलिस एरियाते होंचि, येसु ओनाहाटीं बतल-बतल कीतोरो अव अन्‍नि पोल्‍लें वेहालय दल्‍गतोर. अद केंजसि अंटोर इचंत्रम आतुर.
MAR 5:21 येसु डोंगाते उद्‍दिसि समुद्रमता हब्बेटा ओड्‍डुंक मर्रा मल्सि होत्‍तोर. ओन हूळसि वेल्‍लेटुर लोकुल्‍क ओनगा जमा आतुर. ओर समुद्रम ओड्‍डुनगा मत्‍तोर.
MAR 5:22 अस्‍के दर्मसास्‍त्रम कराहना लोता वरोर याईर पोरोलतोर अदिकारि येसुनगा वातोर. वासि ओना काल्कुनपोर्रो अर्सि,
MAR 5:23 “नावा सिन्‍ना मिय्यड बेस हिलाका हायनाल आसि मंता. निमे वासि दानपोर्रो कय इरते, अद बेस आसि दाना जीवा पिस्‍संता,” इंचि विनंति कीतोर.
MAR 5:24 येसु आ अदिकारिनतोनि होत्‍तोर. ओना पज्जो वेल्‍लेन मंदि पेय्सि ओना सुट्‍टु वेल्‍ले गर्दि कीसि पोर्रो-पोर्रो अर्रालय आयुंदुर.
MAR 5:25 आ गर्दिते पन्‍नेंड वर्सानाल उंदेतीर कप्‍पिड आयना उंदि मुरतळ मत्‍ता.
MAR 5:26 अद वेल्‍लेटुर वैदकुल्‍कुंक हुपिस्‍ता. दानगा मत्‍ता कोत्‍तांता मार्तां गानि दाना बिमार बेस आयाका एक्‍कोने आसेके होत्‍ता. इल्‍हा अद वेल्‍लेने तकलिप बोगांचेक मत्‍ता.
MAR 5:27 अद मुरतळ येसुना बारेमते केंजसि मत्‍ता. दाना मनसुने, “नना सिराप येसुना कप्‍पिडतुन इट्‍टिनागानि बेस आंतन,” इंचि इनकुत्‍ता. अदुनहाटीं गर्दिते येसुना पज्जो वासि ओना कप्‍पिडतुन इट्ता.
MAR 5:29 इट्ता इट्‍टुडे दाना कप्‍पिड आयमळ बंद आसि बिमार बेस आता इंचि दानकु अनपिस्ता.
MAR 5:30 अदे वेलाते येसुंक ओना लोप्पोटाल ताकत पेय्सता इंचि अनपिस्ता. अस्‍के पज्जो मल्सि, “नावा कपडितुन बोर इटतुर?” इंचि येसु पूसकीतोर.
MAR 5:31 ओना सिस्युल्कु ओन, “गर्दिते लोकुल्‍क वरोनपोर्रो-वरोर अर्रानद निमे हूळसेक मंचिगुडा, नावा कपडितुन बोर इटतुर? इंचि पूसकीसेके मंतिन,” इंचि इत्‍तुर.
MAR 5:32 गानि, “नाकुन बोरन्‍ना इटसि मंदगोम,” इंचि येसु अंटोरहेके हूळसेक मत्‍तोर.
MAR 5:33 अस्‍के अद मुरतळकु, बेस आतद तेळियताहाटीं, वेर्रेक वनकुसेक येसुनगा वासि ओना काल्कुना पोर्रो अर्सि अगा जर्गतद सत्‍तेम-सत्‍तेम वेहता.
MAR 5:34 अस्‍के येसु आ मुर्ताटुन, “पेगिटुना, नीवा विस्वासमे नीकुन बेस कीता. इसोंटा बिमार मर्रा बस्‍केने वायो, सांतिते होन,” इंचि इत्‍तोर.
MAR 5:35 येसु अल्हा वळ्कसेक मननेंके, दर्मसास्‍त्रम कराहना लोता आ अदिकारिना लोताल इच्‍चुर लोकुल्‍क वासि, “नीवा मिय्यड हाता, इंदके गुरुन तकलिप कियमा,” इंचि वेहतुर.
MAR 5:36 ओर वळ्‍कानदुन केंजवाप कीसि येसु आ दर्मसास्‍त्रम कराहना लोता अदिकारिनतोनि, “निमे वेरियमा, विस्वासम इर्रा,” इंचि इत्‍तोर.
MAR 5:37 येसु अगटाल पेय्सनेंके पत्रुन, याकोबुन आनि याकोबुना तम्मुर योहानुन ओनतोनि पीकुत्‍तोर. ओर्क तप्‍पा बोने ओना पज्जो वाया हिया हिल्‍लोर.
MAR 5:38 ओर दर्मसास्‍त्रम कराहना लोता अदिकारिना लोन होत्‍तस्के अगा लोकुल्‍क इरगा अळानद, मोत्‍कुनानद हूळतोर.
MAR 5:39 अस्‍के येसु लोप्पो होळियसि, “मिमेट अडमळ-मोत्‍कुनमळ बारि कीसेक मंतिर? अद पेगिळ हाया हिल्‍ले, मींडसि मंता,” इंचि इत्‍तोर.
MAR 5:40 अल्हा इत्‍तद केंजसि ओर येसुन कव्‍तुर. गानि येसु ओर अंटोर्कुन पलाते लोहतोर. पेगिटा तल्‍लुर-बाबोन, ओनतोनि बोर अय्ते मत्‍तुर ओर्कुन पीकुंचि पेगिड मींडसि मत्‍ता अर्राते होत्‍तोर.
MAR 5:41 होंचि अद पेगिटा कयदुन पीसि, “तलिता कुम” इंचि इत्‍तोर. इत्‍ते, “पेगिटुना, नना वेहासेक, तेदा!” इंचि अर्तम.
MAR 5:42 अल्हा इत्‍ता इनुडे, आ पन्‍नेंड वर्साना पेगिड तेदिस ताकालय दल्‍गता. अदुन हूळसि, अगा मत्‍तोर वेल्‍लेन इचंत्रम आतुर.
MAR 5:43 “इगे जर्गतद बोर्के तेळिया मनि” इंचि ओर्कु गट्‍टिगा हुकुम हीतोर. पजा “अद पेगिड्‍क बतलन्‍ना तिनालय हीम्टु,” इंचि वेहतोर.
MAR 6:1 येसु अगटाल पेय्सि ओना सहरते होत्‍तोर, ओना सिस्‍युल्‍कगुडा ओना पज्जो होत्‍तुर.
MAR 6:2 नोमकेम रोजुने दर्मसास्‍त्रम कराहना लोते होंचि पेनदा पोल्‍लें कराहसेक मत्‍तोर. वेल्‍लेटुर लोकुल्‍क अव पोल्‍लें केंजसि, “ईर इच्‍चोर बेस बल्हा वेहासेक मंतोर? ईनकु इच्‍चोर बुद्‍दि बगाटाल वाता? ईर अद्‍बूतामाता कबाह्‍क बल्हा कीसेक मंतोर?
MAR 6:3 ईर अय्ते मरियमुना मर्रि वडलल आंदुर, याकोब, योसेस, सिमोन, यहुदल, ईरा दादल आंदुर. इगे मनातोनि उद्‍दिसि मनानव ओना हेलाहके आंदु,” इंचि इनालय दल्‍गतुर. अदुनहाटीं ओर येसुन ओप्कुना हिल्‍लुर.
MAR 6:4 अस्‍के येसु ओर्कुन, “पेनदा कबुरतोंक ओना संतम नाटेने, ओना जीवातोरगा आनि ओना लोन होळसिसि, कळमतव अन्‍नि जेगाने मान-मर्यादा दोर्कंता,” इंचि इत्‍तोर.
MAR 6:5 अगा येसु बतले अद्‍बूतामाता कबाह्‍क किया हिल्‍लोर, सिराप बिमार मत्‍तोर्कुन इच्‍चुर्कुन इट्‍सि बेस कीतोर.
MAR 6:6 येसुन ओर विस्वासम कियवाहाटीं ओन्क इचंत्रम आता. पजा नार-नार होंचि पेनदा पोल्‍लें कराहसेके तिरियतोर.
MAR 6:7 उंदि रोज येसु पन्‍नेंड मंदि सिस्युल्कुन दग्‍गेरा केयतोर. ओर्कुन इव्वुर-इव्वुर दंटा कीसि, ओर्क देय्याल्क गेदमना अदिकारम हीसि सेवा कियालय लोहतोर.
MAR 6:8 अदिकारम हीसि ओर्कु इल्‍हा वेहतोर, “मिमेट होननेंके मीतोनि गाटो आयि, जोरा आयि, कोत्‍ताना संचि आयि, एक्‍कोतव अंगिं आयि ओयमट. सिराप कय्‍दे दुड्‍डु, काल्कुंक हेरपुह्क ओम्टु.
MAR 6:10 मिमेट बद लोन अय्ते दांतिटो, अगटाल पेय्सनदाका अदे लोते मंटु.
MAR 6:11 बोर अय्ते मीकुन ओप्‍कुन्‍नुर, मीवा पोल्‍लें केंजुर अगटाल पेय्सनेंके ओर्क विरोदमते गवाइलेसीं मीवा काल्कुना दुम्मु दुल्‍पट. नना मीक निजम वेहासेक मंतन, न्‍यायमता रोजुने आ नाटुक वाता गोसाकन्‍ना सदोम, गमोरा सहरकुंक वायाना गोसा बच्‍चोरो तक्‍को मनंता,” इंचि वेहतोर.
MAR 6:12 अस्‍के सिस्युल्कु अगटाल होंचि, “मीवा पापाल्क ओप्‍कुंचि, मनसु मार्सकुंटु” इंचि लोकुल्‍कुंक प्रचार कीतुर.
MAR 6:13 देय्याल्क पीतोरगटाल बच्‍चुंगो देय्याल्कुन गेदुमतुर. बिमारते मत्‍तोर्कुन निय होकसि बेस कीतुर.
MAR 6:14 येसुना पोरोल अंटोर्क तेळियसि होत्‍ता. हेरोद राजालगुडा येसुना बारेमते केंजतोर. अस्‍के ओर इल्‍हा इत्‍तोर, “बापतिस्मा हियना योहान हातोराव्टेटाल मर्रा तेदतोर. अदुनहाटीं ओर इसंटा अद्‍बूतामाता कबाह्‍क कीसंतोर.”
MAR 6:15 अल्‍हेने इच्‍चुर बारे, “पेनदा कबुरतोर एलियल आंदुर,” इंकिच्‍चुर बारे, “एनकटा पेनदा कबुरतोरा लोप्पोटाल बोरन्‍ना वरोर मंदनुर,” इंचि इत्‍तुर.
MAR 6:16 गानि हेरोद राजाल इदुन केंजसि, “बापतिस्मा हिय्यना योहानुना तल्‍ला नना कोय्यागोटतन, ओरे हातोराव्टेटाल मर्रा जीवाते तेदतोर,” इंचि इत्‍तोर.
MAR 6:17 बारित्‍ते, हेरोद राजाल ओना तम्मुर पिलिपुना मुत्‍तो हेरोदियान इरकुंचि मत्‍तोर. अय्ते योहान हेरोद राजानगा होंचि, “नीवा तम्मुना मुत्‍तोन निमे निहगा इरमळ नियम परकारम बेस आयो,” इंचि वेहुंदुर. अल्हा वेहतादान्‍कु हेरोदियनहाटीं हेरोद राजाल सिपाइल्कुन लोहचि योहानुन जेलने वाटा वेहतोर.
MAR 6:19 अय्नागानि मोका दोर्कते योहानुन हव्कालय हेरोदियल हूळुंदु, गानि अद हव्का पर्राहिल्‍ले. बारित्‍ते योहान नीतिमंतुड, पवित्र मनकल इंचि हेरोद राजाल वेरियुंदुर. अदुनहाटीं ओर जेलते मननेंके ओन्क बतल आयामन्‍नि इंचि ओन कापाळसि इर्रुंदुर. हेरोद राजाल योहानुना पोल्‍लें केंजसि परेसान आसिगुडा कुसिते केंजुंदुर.
MAR 6:21 उंदि रोज हेरोदियांक मोका दोर्कता. हेरोद राजाल ओना पुटता रोज मंता इंचि ओनगा मनना पेद्‍दाल्कुन, सिपाइल्कुना अदिकारिल्‍कुन आनि गालिल राज्येमता लीडर्कुन बोजनमहाटीं केयतोर.
MAR 6:22 अस्‍के हेरोदियाना मिय्यड अगा वासि हेरोद राजाल अल्‍हेने हेळमितोरा मुन्‍ने एगरिसि ओर्कुन कूस कीता. अस्‍के राजाल आ पेगिटुन केय्‍सि, “नीकु बतल गावाले नाकुन तल्का, नना अद हींतन,” इंचि इत्‍तोर.
MAR 6:23 अल्‍हेने, “नावा सगम राज्येमगुडा नीकु हियालय तयार मंतन,” इंचि ओट्‍टु तित्‍तोर.
MAR 6:24 अस्‍के अद पेगिळ दाना यावानगा पलाते होंचि, “बतल तल्ककन” इंचि पूसकीता. अस्‍के, “बापतिस्मा हियना योहानुना तल्‍ला तल्का,” इंचि दाना यावल वेहता.
MAR 6:25 गाबरते आ पेगिड हेरोद राजानगा बिराना लोप्पो होंचि, “बापतिस्मा हियना योहानुना तल्‍ला उंदि गिन्‍नेते वाटसि नाकु हीम,” इंचि इत्‍ता.
MAR 6:26 इद केंजसि राजांक इरगा दुक्‍कम वाता. गानि अगा मत्‍ता अंटोर हेडमितोराहाटीं आनि तित्‍ता ओट्‍टुहाटीं, दानकु हींतन इत्‍तद हिय्योन इना पराहिल्‍लोर.
MAR 6:27 अस्‍के राजाल, जेलते मत्‍ता योहानुना तल्‍ला कोय्‍सि ता इंचि वरोर सिपाइंक बिराना आदेस हीसि लोहतोर.
MAR 6:28 आ सिपाइ जेलते होंचि, योहानुना तल्‍ला कोय्‍सि, उंदि गिन्‍नेते वाट्‍सि तच्‍चि पेगिड्‍क हीतोर, अस्‍के आ पेगिड अदुन दाना यावांक हीता.
MAR 6:29 इद पोल्‍ले योहानुना सिस्युल्कुंक तेळियता. अस्‍के ओर होंचि ओना पीनगुन ओसि बोंदाते इरतुर.
MAR 6:30 नार-नार होंचि मत्‍ता येसुना प्रेरितुल्क, येसुनगा मल्सि वातुर. ओर होंचि लोकुल्‍कुंक बतल-बतल कीतुर, बतल-बतल कराहतुर इवन्‍नि पोल्‍लें येसुंक वेहतुर.
MAR 6:31 ओरगा वायानुर-होनानुर लोकुल्‍क वेल्‍लेटुर मत्‍तुर, ओर्क गाटो तिनालयगुडा वेला दोर्काकोंदु. अदुनहाटीं, “मीक अराम किया पींता, बोरे हिल्वा जेगातगा दाकोम दट,” इंचि येसु ओर्कुन इत्‍तोर.
MAR 6:32 अस्‍के ओर उंदि डोंगाते उद्‍दिसि बोरे हिल्वा जेगाते होत्‍तुर.
MAR 6:33 गानि वेल्‍लेटुर लोकुल्‍क ओर्कुन होननेंके हूळसि एरपाट कीतुर. अदुनहाटीं अन्‍नि सहरकुनाल विच्‍चि वासि, ओर्कन्‍ना मुन्‍नेने अगा जमा आतुर.
MAR 6:34 येसु डोंगाताल रेयसि अद जेगातगा वेल्‍लेने मंदितुन हूळतस्‍के, कोहानोर हिल्वा गोर्रें बल्हा मनांतंगो ओर अल्हा आसि मत्‍तुर. अदुनहाटीं ओनकु ओरपोर्रो दया वासि ओर ओर्क पेनदा पोल्‍लें कराहलय सुरुव कीतोर.
MAR 6:35 पोळ्‍द होनना वेलाक सिस्युल्क येसुनगा वासि, “मनम सुनसान जेगाते मंतोम, वेलागुडा बागेन आता. लोकुल्‍कुन लोहचीम, ओर दग्‍गेटा नाह्कुने होंचि, ओराहाटीं तिनालय बतलन्‍ना अस्कुंतुर,” इंचि इत्‍तुर.
MAR 6:37 गानि, “मिमेटे ओर्क हीम्टु,” इंचि ओर्कुन येसु इत्‍तोर. अस्‍के ओर इत्‍तुर गदा, “रोंडु नुह्कुना दिनारकुनतोनि अंटोराहाटीं तिंडि अस्सि तच्‍चि हियमळा बतला?” इंचि पूसकीतुर.
MAR 6:38 “मिहगा बच्‍चुं हारिं मंतां, होंचि हुळट,” इंचि येसु इत्‍तोर. ओर अवुन हूळसि, “हेय्युं हारिं, रोंडु जिम्मां मंतां,” इंचि वेहतुर.
MAR 6:39 अस्‍के येसु, “अंटोर लोकुल्‍कुन पच्‍चाटा जाडि पोर्रो ग्रुप-ग्रुपुने उप्‍सट,” इंचि सिस्युल्कुंक आदेस हीतोर.
MAR 6:40 ओर अंटोर ग्रुप-ग्रुपकुने उदतुर, उंदि ग्रुपने एबै, नूर इल्‍हा मत्‍तुर.
MAR 6:41 अस्‍के येसु अव हेय्युं हारिं, रोंडु जिम्मां कय्‍दे पीसि, स्वर्गमताहेके हूळसि पेनदुक दन्यवाद कीतोर. अवुन तुकडें कीसि, “ओर्क पंचि हीम्ट” इंचि सिस्युल्कुंक हीसीतोर. अल्‍हेने अव रोंडु जिम्मानगुडा तुकडां कीसि हीतोर.
MAR 6:42 ओर अंटोर पीरनिंडा तित्‍तुर.
MAR 6:43 तिनुड आतस्के मिगुल्ता हारिना आनि जिम्माना तुकडां जमा कीते पन्‍नेंड तट्‍टां निंडतां.
MAR 6:44 हारिं तित्‍तोरव्टे, सिराप मांडसे हेय्युं वेय्‍कुना मंदि मत्‍तुर.
MAR 6:45 अद आता पजा येसु बिराना ओना सिस्युल्कुन डोंगाते उपिच्‍चि, “मिमेट अंटोर समुद्रमता हब्बेटा बाजुंक मंदना बेतसेदा सहरते नाकन्‍ना मुन्‍नेने होंट,” इंचि इत्‍तोर. अगा मत्‍ता लोकुल्‍कुन ओरा नाहकुनहेके होनालय सार्ला कीतोर.
MAR 6:46 ओर्कुन सार्ला कीता पजा, येसु पारतना कियालय गुट्‍टापोर्रो होत्‍तोर.
MAR 6:47 पोळ्‍द होत्‍ता पजा सिस्युल्कुना डोंगा नड्‍डुम समुद्रमते मत्‍ता, गानि येसु वरोरे ओड्‍डुनपोर्रो मत्‍तोर.
MAR 6:48 समुद्रमते वळि-दुमारम डोंगाक एदुर तेदताहाटीं सिस्युल्कुंक डोंगा ताकसालय तकलिप होंचेके मत्‍तद येसु हूळतोर. हूळसि, नर्कटां मूड-नालुं एगाना वेलाते येसु सिस्युल्कुना डोंगातेके एतपोर्रो ताकसेक होत्‍तोर. ओर ओरगटाल मुन्‍ने पेय्सि होननदे मत्‍ता,
MAR 6:49 गानि येसु एतपोर्रो ताकानद हूळसि देय्यम इंचि मोत्‍कुत्‍तुर, बारित्‍ते अंटोर ओन हूळसि वेरियतुर. अस्‍के येसु, “वेरियमट! ननाने आंदुन. दैरनेमते मंटु!” इंचि इत्‍तोर.
MAR 6:51 पजा सिस्युल्कुना डोंगाते येसु एक्‍कुता एक्‍कुडे वळि-दुमारम बंद आता. अद हूळसि ओर्क वेल्‍ले इचंत्रम आता.
MAR 6:52 बारित्‍ते मुन्‍ने हेय्युं वेय्‍कुना मंदिक गाटो दोसतद हूळसि मत्‍तुर, अय्नागानि येसु सामिना बलमतुन ओर एरपाट किया हिल्‍लुर. ओरा मनसुक बंडालेसीं आसि होत्‍तां.
MAR 6:53 पजा ओर अद समुद्रम दाटसि गेनेसरेत इनना नाटे एव्‍सि, अगा डोंगातुन आपतुर.
MAR 6:54 ओर डोंगाताल रेयनेंकेन वेल्‍लेटुर लोकुल्‍क हूळसि येसुन एरपाट कीतुर.
MAR 6:55 पकापीसि मत्‍ता नाह्कुने विच्‍चि होंचि बिमार मत्‍तोर्कुन कटुल्‍कुने वाटसि येसु बगा मंतोर इंचि तेल्‍पिचकुंचि, अगा-अगा कांजसेक ओयुंदुर.
MAR 6:56 येसु नाटेने, सहरते, नेलिने बद-बद जेगाते अय्ते होनुंदुरो, अगाटा बिमार मत्‍तोर्कुन चौकते तच्‍चि मींडिच्‍चि, “सिराप नीवा कप्‍पिडता अंचुन इट्‍टा हीम,” इंचि येसुन विनंति कियुंदुर. अल्हा बोर-बोर अय्ते ओना अंचुन इट्‍तुरो, ओर अंटोर पुरागा बेस आतुर.
MAR 7:1 उंदि रोजु येरुसलेमताल इच्‍चुर परिसिल्क आनि दर्मसास्‍त्रम कराहना गुरुल्क येसुनगा जमा आतुर.
MAR 7:2 येसुना इच्‍चुर सिस्युल्कु यहुदि लोकुल्‍कुना रीति-रिवाज परकारम सुद्‍द आयाकोंटेन इत्‍ते, कय्‍क नोर्राकेने तिनानद ओर हूळतुर.
MAR 7:3 बारित्‍ते, परिसिल्क आनि यहुदिल्क अंटोर पेद्‍दाल्कुना रीति-रिवाज मत्‍ताप कय नोर्रका तिन्‍नुर.
MAR 7:4 इंका ओर हाटुम होंचि वायना गानि एर तुंगाका तिन्‍नुर. अचोने आयका वाटिं, तालिं, रागिता बोळिं नोर्रमळ इसोंटव पेद्‍दाल्कुनाल ताकसेक वाता रीति-रिवाजकुन नोमंतुर.
MAR 7:5 अय्ते, “नीवा सिस्युल्क, पेद्‍दाल्कुना रीति-रिवाजुने बारि ताकुर, तिनाका मुन्‍ने ओर कय्‍क बारि नोर्रुर?” इंचि परिसिल्क आनि दर्मसास्‍त्रम कराहना गुरुल्क येसुन पूसकीतुर.
MAR 7:6 अस्‍के येसु ओर्कुन इल्‍हा इत्‍तोर, “यसायाह इनना पेनदा कबुरतोर, मीवसोंटा डोंगिरा बारेमते निजमे बविस्यवानि कीतोर: ‘ईर लोकुल्‍क सिराप तोळ्‍देने नावा कदर कींतुर, गानि ईरा मनसु मात्रम नहागटाल बच्‍चोनो लक्‍कु मनंता.
MAR 7:7 ईर अंगडमे नावा आरादना कीसेके मनांतुर. बारित्‍ते, ओराहाटीं मनकालोर तयार कीता रीति-रिवाजके निजमतव, अवुना पालन कियमळे दर्मम इंचि कराहंतुर,’ इल्‍हा रासि मंता.
MAR 7:8 मिमेट पेन हीता आदेसतुन होळसि, मनकल तयार कीतव रीति-रिवाजकुन पीसि ताकसेक मंतिर,” इंचि इत्‍तोर.
MAR 7:9 मर्रा ओरतोनि, “मीवा रीति-रिवाजकुन पीसि ताकानाहाटीं, पेनदा आदेसतुन लक्‍कु कियमळ मीक बेस अनपिच्‍चंता,” इंचि इत्‍तोर.
MAR 7:10 “निमे नीवा तल्‍लुर-बाबोना कदर कीम, बोर अय्ते तल्‍लुर-बाबोन रांगंतोर, ओन हव्कमळे गावाले,” इंचि मूसाल इत्‍तोर.
MAR 7:11 गानि, “मिमेट अय्ते, बोरन्‍ना मनकल ओना तल्‍लुर-बाबोन, नना मीकु हियानद पेनदुक कोर्बान इंचि हीतन इनानय्ते, मिमेट ओन ओना तल्‍लुर-बाबोना सेवा किया हिय्यिर, इंचि कराहंतिर.
MAR 7:13 इल्‍हा मिमेट तयार कीता, मीवा रीति-रिवाजकुनाहाटीं पेनदा पोल्‍लेतुन होळसेक मंतिर. इल्‍हा इंका बच्‍चुंगो कबाह्‍क कींतिर,” इंचि वेहतोर.
MAR 7:14 मरुंदि मल्का येसु लोकुल्‍कुन दग्गेर्क केय्‍सि, “मिमेट अंटोर नना वेहानद केंजट आनि अर्तम कीकुंटु,” इंचि वेहालय सुरुव कीतोर.
MAR 7:15 “पलाताल मनकना पीटे होनानव ओन हेळ्‍हों, गानि मनकना तोळ्‍दाल पलाते पेय्‍सना पोल्‍लेंगे ओन हेळ्‍हंतां,” इंचि वेहतोर. बोर्कु केंजालय केव्क मंतां ओर केंजट.
MAR 7:17 पजा येसु लोकुल्‍कुन होळसिसि, सतता लोन होत्‍तोर. अस्‍के ओना सिस्युल्कु ओर वेहता वेसुडिता अर्तम पूसकीतुर.
MAR 7:18 अस्‍के येसु ओर्कुन इल्‍हा इत्‍तोर. “पलाताल बतल अय्ते पीटे दांता, अद मनकन हेळ्‍हो इंचि मीकु इंकागुडा तेळियोना?
MAR 7:19 पलाताल होनानद ओना मनसुने होन्‍नो गानि ओना पीटे दांता. पजा पलाते अर्रंता,” अल्हा वेह्‍चि, तिनानव अन्‍नि तिंडिं तिनालय बेसतवे इत्‍तोर.
MAR 7:20 पजा ओर इल्‍हा वेहतोर, “मनकना लोप्पोटाल बतल अय्ते पलाते पेय्संता अदे मनकन हेळ्‍हंता.
MAR 7:21 बारित्‍ते मनकना मनसुनाल कराब विचाराल्क, बोगमतनम, दोंगातनाल्‍क, हव्‍कमळ, व्यबिचारम,
MAR 7:22 आस्‍ति कियमळ, दुस्‍ट गुनम, डोंगिगुनम, मेंदुलता आसे, कळ्‍क पोतमळ, अपमानम कियमळ, गर्रा आनि मुर्का गुनाल्‍क पलाते पेय्‍संतां.
MAR 7:23 इव अन्‍नि सेड्‍डा पोल्‍लें मनकना तोळ्‍दाल पलाते पेय्सि, मनकन हेळ्‍हंतां,” इंचि वेहतोर.
MAR 7:24 पजा येसु अगटाल तेदसि सूर, सिदोन एरियाते होत्‍तोर. अगा मनानद बोनके तेळिया मनि इनकुंचि, ओर उंदि लोन होंचि आगतोर. गानि मक्‍का पर्रा हिल्‍लोर.
MAR 7:25 उंदि युनानि मुरतळ येसुना बारेमते केंजता. अद सिरिया देसेमता पोनिसिया इनना नाटे पुटतद आंदु. दाना सिन्‍ना मियाटुन देय्यम पीसि मत्‍ताहाटीं अद येसुनगा वासि, ओना काल्कुनपोर्रो अरता. अर्सि “देय्यमतुन पेच्‍हाचि गेदमा,” इंचि येसुन विनंति कीता.
MAR 7:27 येसु अदुन, “पिलाल्क मोदाला पीरनिंडा तिनिरकांटी, पिलाल्कुना हारिं तेंडकुंचि नय्‍कुंक वाटमळ बेस आयो,” इंचि इत्‍तोर.
MAR 7:28 गानि आ मुरतळ, “निजमे सामि! पिलाल्क तिननेंके हिळु अरता अंटकुल्‍कुन अय्ते नय्‍के तिंतां गदा!” इंचि येसुंक जवाब हीता.
MAR 7:29 अस्‍के, “निमे इल्‍हा इत्‍ताहाटीं, नीवा मिय्यटाल देय्यम पेय्सि होत्‍ता. निमे लोन होन,” इंचि येसु इत्‍तोर.
MAR 7:30 अद मुरतळ लोन होंचि हूळतस्‍के, दाना मिय्यड कटुलते मींडसि मंता, दानाल देय्यमगुडा पेय्सि होत्‍ता इंचि अद हूळता.
MAR 7:31 अद आता पजा येसु सूर एरियाताल मल्सि सिदोन होत्‍तोर. अगटाल देकापोलिस एरिया दाटसि गालिल समुद्रमतगा वातोर.
MAR 7:32 अस्‍के इच्‍चुर लोकुल्‍क, वरोर पनकना-सेव्टि मनकन येसुनगा पीसि वासि, “नीवा कय ईना पोर्रो इर्रा,” इंचि विनंति कीतुर.
MAR 7:33 येसु आ पनकना-सेव्टि मनकन मंदिताल पक्‍कक ओसि, ओना केव्‍कुने सतता वेल्कु दोसतोर, आयंका आ वेल्कुना पोर्रो उस्किसि ओना नाल्केतुन इटतोर.
MAR 7:34 मब्बुनहेके हूळसेक जोरसे नेस्किसि “एप्पता” इत्‍तोर. इत्‍ते कुल्‍ला आम इंचि अर्तम.
MAR 7:35 अस्‍केने ओना केव्क केंजा वायालय दल्‍गतां, ओना नाल्केगुडा मेसलिसि ओर साप वळ्कालय दल्‍गतोर.
MAR 7:36 इद पोल्‍ले बोर्के वेहमट इंचि येसु ओर्कु गट्‍टिगा वेहतोर गानि लोकुल्‍कुंक ओर वेहतादानकन्‍ना एक्‍को वेहासेक होत्‍तुर.
MAR 7:37 केंजता लोकुल्‍क अंटोर इचंत्रम आसि, “ओर बतलय्ते कीतोर, बेस कीतोर. सेव्टोर्कुन केंजा वायानाल, मूकालोर्कुन वळ्का वायानाल कींतोर,” इंचि इत्‍तुर.
MAR 8:1 अव रोजकुने मरुंदि मल्का येसुनगा वेल्‍लेन लोकुल्‍क जमा आतुर. ओरगा तिनालय बतले मनाहिल्‍ले. अदुनहाटीं येसु ओना सिस्युल्कुन दग्गेर्क केय्‍सि,
MAR 8:2 “ईर लोकुल्‍क नहगा मूड रोजकुनाल मंतुर, ईरगा तिनालय बतल हिल्‍ले. अदुनहाटीं नाक ई लोकुल्‍कुन हूळसि पापम अनपिच्‍चंता.
MAR 8:3 इच्‍चुर लोकुल्‍क वेल्‍ले लक्‍कुटाल वातोर मंतुर. ननागिंटा ईर्कुन कर्वुने लोन लोहानय्ते, नड्‍डुम हर्दे बगानना कूलाबडनुर,” इंचि इत्‍तोर.
MAR 8:4 अस्‍के, “ई उस्‍के बूमिते इच्‍चो वेल्‍ले लोकुल्‍कुंक हालानाल तिंडि बगाटाल तरा परकोम?” इंचि सिस्युल्क येसुंक जवाब हीतुर.
MAR 8:5 अस्‍के, “मिहगा बच्‍चुं हारिं मंतां?” इंचि येसु ओर्कुन पूसकीतस्‍के, ओर, “एडुं हारिं मंतां” इंचि इत्‍तुर.
MAR 8:6 पजा येसु मंदितुन हिळु बूमिपोर्रो उद्‍दा वेहतोर. आ एडुं हारिं पीसि पेनदुक दन्यवाद कीतोर. हारिन तुकडां कीसि, “ओर्क तूसि हीम्टु” इंचि सिस्युल्कुंक हीतोर. अस्‍के सिस्युल्कु मंदिकु तूसि हीतुर.
MAR 8:7 ओरगा इच्‍चुं सिन्‍ना जिम्मांगुडा मत्‍तां. येसु अवुनहाटींगुडा पेनदुक दन्यवाद कीसि “लोकुल्‍कुंक तूसि हीम्टु” इंचि सिस्युल्कुंक आदेस हीतोर.
MAR 8:8 अगा मत्‍तोर अंटोरगुडा पीरनिंडा तित्‍तुर. पजा मिगुल्ता हारि तुकडन जमा कीते, अव एडुं तट्‍टां निंडतां.
MAR 8:9 अगा तित्‍तोरव्टे दग्‍गेरा-दग्‍गेरा नालुं वेय्‍कुना लोकुल्‍क मत्‍तुर. ओर अंटोर्कुन सार्ला कीसि, येसु बिराना ओना सिस्युल्कुनतोनि उंदि डोंगाते उद्‍दिसि दलमनुता एरियाक होत्‍तोर.
MAR 8:11 पजा येसुना पट्‍टु हूळना इंचि, “निमे पेनदा अदिकारम पीसि वातिन इंचि नम्‍मालय, स्वर्गमताल माकु उंदि चिन्‍ह हुप्‍सा,” इंचि परिसिल्क ओन पूसकियालय दल्‍गतुर.
MAR 8:12 अस्‍के येसु आत्माते जोरते नेस्किसि, “इद पीळितोर चिन्‍ह हुप्‍सा इंचि बारि इंतुर? नना मीक निजम वेहंतन, इद पीळितोर्क बदे चिन्‍ह हुपिच्‍मळ जर्गो,” इंचि इत्‍तोर.
MAR 8:13 पजा ओर्कुन अग्गेन होळसि, डोंगाते उद्‍दिसि समुद्रमता हब्बेटा ओड्‍डुंक होत्‍तोर.
MAR 8:14 सिस्युल्कु हारिं ओयालय मरुंगतुर. आनि ओरगा डोंगाते उंदे हारि मत्‍ता.
MAR 8:15 अस्‍के येसु ओर्कुन इल्‍हा जेगर्ता कीतोर. “परिसिल्क आनि हेरोदना पुल्‍लटा पिंडिता बारेमते जेगर्ता मंटु,” इत्‍तोर.
MAR 8:16 अद केंजसि, “मनागा अय्ते हारिं हिल्‍लें,” इल्‍हा इंचेके सिस्युल्कु ओर-ओरे वळ्‍ककुत्‍तुर.
MAR 8:17 येसु अदुन एरपाट कीसि, “हारिं हिल्‍लें इल्‍हा विचारम मिमेट बारि कीसेक मंतिट? इदवेरदाकागुडा मीकु तेळिया हिल्‍लेना? एरपाट कीसेक हिल्‍लिरा? मीवा मनसु बंडा आताना?
MAR 8:18 मीक कळ्‍कु मंचिगुडा हूळा परसेक हिल्‍लिरा? केव्क मंचिगुडा केंजा परसेक हिल्‍लिरा? मिमेट मति मर्गतिरा?
MAR 8:19 नना हेय्युं वेय्‍कुना मंदिहाटीं हेय्युं हारिं उराहचि दोसतन, अस्‍के बच्‍चुं तट्‍टाना हारिं मिमेट जमा कीसि निहतिर?” इंचि पूसकीतोर. अस्‍के, “पन्‍नेंड तट्‍टां” इंचि ओर जवाब हीतुर.
MAR 8:20 आनि “अल्‍हेने, एडुं हारिनतोनि नालुं वेय्‍कुना मंदि तित्‍तस्के, बच्‍चुं तट्‍टाना हारि तुकडां जमा कीतिर?” इंचि येसु पूसकीतोर. अस्‍के, “एडुं तट्‍टां” इंचि ओर वेहतुर.
MAR 8:21 “अय्ते मीकु इंकागुडा तेळियसेक हिल्‍लेना?” इंचि येसु इत्‍तोर.
MAR 8:22 ओर बेतसेदा इनना नाटे एव्ता पजा इच्‍चुर लोकुल्‍क वरोर गुड्‍डिन येसुनगा पीसि वासि, “निमे ईन इट्‍टा,” इंचि विनंति कीतुर.
MAR 8:23 येसु आ गुड्‍डिना कय पीसि नाटेना पलाते ओतोर. ओसि गुड्‍डिना कळ्‍कुने उस्कतोर. पजा ओनपोर्रो कय इर्सि, “इंदके नीकु बतलन्‍ना दिस्सेक मंतना?” इंचि पूसकीतोर.
MAR 8:24 अस्‍के आ गुड्‍डि मनकल पोर्रो हूळसि, “मनकालोर दिस्सेक मंतुर गानि ओर मराकु ताकताप मागुर-मागुर दिस्सेक मंतुर,” इंचि इत्‍तोर.
MAR 8:25 अस्‍के येसु मर्रा उंदि मल्का ओना कय्‍क, आ गुड्‍डिना कळ्‍कुना पोर्रो इरतोर. ओर उंदेतीर हूळता पजा नदर वाता. ओन्क अन्‍नि साप-साप दिसालय दल्‍गतां.
MAR 8:26 अस्‍के, “निमे नाटे होळियाकोंटा, सवरगा नीवा लोन होन,” इंचि येसु ओन लोहचीतोर.
MAR 8:27 येसु, ओना सिस्युल्क कैसरिया पिलिपि सहरता पकापीसि मत्‍ता नाह्कुने होत्‍तुर. होननेंके, “नना बोन आंदुन इंचि लोकुल्‍क इंतुर?” इंचि येसु सिस्युल्कुन पूसकीतोर.
MAR 8:28 अस्‍के सिस्युल्क इल्‍हा वेहतुर. “इच्‍चुर इंतुर निमे बापतिस्मा हियना योहानुन आंदिन, इंका इच्‍चुर इंतुर निमे एलियाल आंदिन, इंका बोरो इंतुर निमे पेनदा कबुरतोरा लोप्पोटाल बोनो वरोन आंदिन,” इत्‍तुर.
MAR 8:29 “अय्ते, नना बोन आंदुन इंचि मिमेट इंचेके मंतिट?” इंचि येसु ओर्कुन पूसकीतस्‍के, “निमे किरिस्‍तुन आंदिन,” इंचि पत्रु इत्‍तोर.
MAR 8:30 अस्‍के, “नावा बारेमते बोर्के वेहमट,” इंचि येसु ओर्क गट्‍टिगा वेहतोर.
MAR 8:31 पजा ओना सिस्युल्कुंक इल्‍हा कराहलय दल्‍गतोर. “यहुदि पेद्‍दाल्क, पेद्‍दा पेर्मालोर आनि दर्मसास्‍त्रम कराहना गुरुल्कुनाहेंदाल मनकना रूपमते पुटतोन नाकु तिप्‍पल्‍क अर्रापींता. ओर हय्साकोंटा आसि नाकुन हव्कानुर. गानि नना हासि मूड रोजकुंक मर्रा जीवाते तेदंतन,” इत्‍तोर.
MAR 8:32 येसु इद पोल्‍लेतुन कुल्‍ला-कुल्‍ला वेहतोर. अय्ते पत्रु येसुन अलग ओसि रांगतोर. गानि येसु सिस्युल्कुनहेके तिरियसि हूळसि पत्रुन, “अरे देय्यम, नावा मुन्‍नेटाल पेय्सि होन. निमे मनकालोरा तेल्‍विते वळ्‍कसंतिन, पेनदा विचारमते वळ्कसेक हिल्‍लिन,” इंचि ओन रांगतोर.
MAR 8:34 पजा येसु ओना सिस्युल्कुन आनि लोकुल्‍कुन ओनहेके केय्‍सि इल्‍हा वेहालय दल्‍गतोर, “ओक्‍कला बोरन्‍ना मनकल नावा पज्जो वायना इत्‍ते, ओर ओना पूरा इस्‍टाल्क होळसिसि सतता क्रुस तेह्‍कुंचि नावा पज्जो वायिर.
MAR 8:35 बारित्‍ते, बोर अय्ते ओना जीवातुन पिसागोटालय हूळंतोर, ओर ओना जीवातुन पोगोटकुंतोर. गानि बोर अय्ते नाहाटीं आनि बेसता कबुरताहाटीं जीवा हींतोर, ओर ओना जीवातुन कापाळकुंतोर.
MAR 8:36 ओक्‍कला मनकल पूरा दुनियातुन संपलिच्‍चि, ओना जीवातुन पोगोटकुत्‍ते ओन्क बता पायदा आंता?
MAR 8:37 हिलाकोंटे मनकल ओना जीवाहाटीं बदला बतल हियानुर?
MAR 8:38 बोगमतनमते, पापमते निंडिस मत्‍ता इद पीळितोर नड्‍डुम बोर अय्ते नाकुन, नावा पोल्‍लेन वेहालय सिग्गु अर्रंतोर, मनकना रूपमते पुटतोन नना बस्के अय्ते पवित्र दूतनतोनि, नावा बाबाना महिमाते वाकन, अस्‍के असोंटा मनकन नावोर इनालय ननागुडा सिग्गु अर्रंतन,” इंचि वेहतोर.
MAR 9:1 मर्रा येसु ओर्कुन इल्‍हा इत्‍तोर. “नना मीकु निजम वेहांतन, इग्‍गे नित्‍तिसि मनानोरा लोप्पोटाल इच्‍चुर इल्‍हा मंतुर गदा, पेनदा राज्येमतुन दाना ताकततोनि वातद हूळवा, ओर्कु हामुर वायो,” इत्‍तोर.
MAR 9:2 हारुं रोजकु आतारित्‍ते येसु पत्रुन, याकोबुन आनि योहानुन पीकुंचि उंदि एत्‍तु गुट्‍टापोर्रो होत्‍तोर. अगा ओरा मुन्‍ने ओना रूपम मारिय्ता.
MAR 9:3 ओना कपडिं इच्‍चोर तेल्‍लगा मेर्सेक मत्‍तां गदा, बूमि पोर्रोटोर बोरे साकलल अच्‍चोर तेल्‍लगा आयनाल हुक्‍का पर्रोर.
MAR 9:4 अस्‍के मूसाल आनि एलियाल येसुनतोनि वळ्‍कानद ओर हूळतुर.
MAR 9:5 हूळसि ओर इरगा वेरियतुर. अदुनहाटीं पत्रु येसुनतोनि बतल वळ्कना अद तेळियका, “गुरु! मनम इग्‍गे मनमळ बेस मंता. उंदि नीहाटीं, उंदि एलियानाहाटीं, उंदि मूसानाहाटीं मोमोट मूड गूळसें वाटंतोम,” इंचि इत्‍तोर.
MAR 9:7 अस्‍केने उंदि मब्बु तेर्पे वासि ओर्कुन मुच्‍ता. आ मब्बुनाल, “ईर नावा पावरमगल्‍ला मर्रि आंदुर, ईना पोल्‍लें केंजट,” इंचि ओर्क अल्किर केंजावाता.
MAR 9:8 अस्‍के अचानक ओर नालुं-मूलां हूळतुर गानि येसुंक तप्‍पा अगा बोरे दिसा हिल्‍लुर.
MAR 9:9 ओर गुट्‍टा पोर्रोटाल हिळु रेय्‍नेंके, “मनकना रूपमते पुटतोन नना हामुरताल मर्रा तेदनदाका, गुट्‍टापोर्रो मिमेट बतल अय्ते हूळतिरो अद बोर्के वेहमट,” इंचि येसु ओर्क गट्‍टिगा वेहतोर.
MAR 9:10 ओर अद पोल्‍लेतुन ओरा मनसुनेन इरतुर गानि “हातोरा लोप्पोटाल मर्रा जीवाते तेदमळ, इत्‍ते बतल?” इंचि ओर वरोंक-वरोर वळ्ककुनालय दल्‍गतुर.
MAR 9:11 पजा ओर येसुन, “किरिस्‍तुंकन्‍ना मुन्‍ने, एलियाले वायमळ गावाले इंचि दर्मसास्‍त्रम कराहना गुरुल्क बारि इंतुर?” इंचि पूसकीतुर.
MAR 9:12 अस्‍के येसु ओर्क इल्‍हा वेहतोर. “एलियाल तप्‍पाकोंटा मोदाला वांतोर. वासि मोदाला बल्हा मत्‍ता अल्हे अन्‍निन कींतोर. गानि मनकना रूपमते पुटतोन नाकु वेल्‍ले तकलिप बोगांचा पींता, नाकुन हय्सुर इंचि दर्मसास्‍त्रमते बारि रासि मंता?
MAR 9:13 गानि नना मीकु वेहानद बतल इत्‍ते, एलियाल वासे मंतोर. ओना बारेमते दर्मसास्‍त्रमते बल्हा रासि मंता, अल्‍हेने लोकुल्‍क ओरा मनसुंक वाताप ओनतोनि कीतुर,” इंचि येसु ओर्क वेहतोर.
MAR 9:14 पजा येसु आनि सिस्युल्क, हिळु मत्‍ता सिस्युल्कुनगा वासि हूळतस्‍के, ओरा सुट्‍टु वेल्‍लेन लोकुल्‍क जमा आसि मत्‍तुर. आनि दर्मसास्‍त्रम कराहना गुरुल्क ओरतोनि लोल्‍लि कीसेके मत्‍तुर.
MAR 9:15 अगा मत्‍ता लोकुल्‍क येसुन हूळसि इचंत्रमते अरतुर, पजा अंटोरगुडा बिराना विच्‍चि होंचि ओन्क जोहार कीतुर.
MAR 9:16 अस्‍के येसु, “मिमेट ईरतोनि बारि वदुरकुंचेक मंतिट?” इंचि दर्मसास्‍त्रम कराहना गुरुल्‍कुन पूसकीतोर.
MAR 9:17 अस्‍के आ मंदिताल बोरो वरोर येसुन, “गुरु, ना मर्रिंक मूका-देय्यम पीता, ओन निहगा पीसि तत्‍तन.
MAR 9:18 देय्यम ओन बस्के अय्ते पींता, अस्‍के ओन अग्गेन हिळु हुक्‍कंता. ओना तोळ्‍दाल पोंगुर पेय्संता. ओर कर्रा-कर्रा पल्कु कोर्कसेके अल्‍हेने गट्‍टिगा आंतोर. इद देय्यमतुन ओना लोप्पोटाल गेदमट इंचि नीवा सिस्युल्कुंक वेहतन गानि ओरतोनि आया पर्राहिल्‍ले,” इंचि वेहतोर.
MAR 9:19 अस्‍के येसु ओर्कुन, “अरे विस्वासम तक्‍को पीळितोरिटा! नना बदवेरदाका मीतोनि मनकन? बदवेरदाका नना मीकुन सहन कीकन? ओन नाहेके पीसि वट,” इंचि इत्‍तोर.
MAR 9:20 ओर आ पेडन येसुनगा पीसि वातुर. देय्यम येसुन हूळता-हूळुळे, पेडन तेल्हाचि हिळु अरहता. आ पेडल तोळ्‍दाल पोंगुर पेचाहसेके पोर्लालय दल्‍गतोर.
MAR 9:21 अस्‍के, “नी मर्रिंक इल्‍हा बस्केटाल आसेक मंता?” इंचि येसु पेडाना बाबोन पूसकीतोर. अय्ते ओर, “सिन्‍नस्केटाले इल्‍हा आसेक मंता. बच्‍चुंगो मल्कां तळमिते अरहचि, एते अरहचि हव्कालय हूळता गानि निमे मापोर्रो दया वासि, माहाटीं बतलन्‍ना सहायम कियापर्ते कीम,” इंचि इत्‍तोर.
MAR 9:23 येसु ओन, “कियापर्ते कीम, इत्‍ते बतल इत्‍ताप? पेनदापोर्रो विस्वासम कियानोर्क अन्‍नि आया परांतां,” इंचि इत्‍तोर.
MAR 9:24 अस्‍केने पेडाना बाबल कांडेर तेंडसेके, “नना विस्वासम कींतन सामि, नावा विस्वासम गट्‍टिगा आयालय सहायम कीम” इंचि इत्‍तोर.
MAR 9:25 वेल्‍लेटुर लोकुल्‍क विच्‍चि वासि गर्दि कियानद हूळसि येसु आ देय्यमतुन, “सेव्टि-मूका देय्यमतुना, नना नीकु हुकुम हींतन, ईनगटाल पलाते पेय्‍सा, ईन मर्रा बस्‍केने पिय्मा,” इंचि गदरिचतोर.
MAR 9:26 अस्‍के आ देय्यम ओन जोरसे तेल्हाचि, वरगेय्‍सि आ पेडाना लोप्पोटाल पेय्सि होत्‍ता. अस्‍के पेडल हातोनलेसीं आतोर. वेल्‍लेटुर लोकुल्‍क ओन हातोर इत्‍तुर.
MAR 9:27 गानि येसु ओना कय पीसि तेहातस्‍के ओर तेदसि निल्तोर.
MAR 9:28 पजा येसु लोन होतस्के बोरे हिल्‍वद हूळसि सिस्युल्क येसुनगा वासि, “आ देय्यमतुन मोमोट बारि गेदमा पर्रा हिल्‍लोम,” इंचि पूसकीतुर.
MAR 9:29 येसु ओर्कुन, “इसोंटा देय्यमतुन सिराप पारतनातोने गेदमा परांतोम,” इंचि इत्‍तोर.
MAR 9:30 पजा ओर अगटाल पेय्सि गालिल राज्येमताल होंचेक मत्‍तुर. ओर होनानद बोर्कन्‍ना तेळियमळ येसुंक इस्‍टम मनाहिल्‍ले. बारित्‍ते येसु ओना सिस्युल्कुंक, “मनकना रूपमते पुटतोन नाकुन, वरोर दोकाते पीसि, लोकुल्‍कुना कय्‍दे हींतोर. ओर नाकुन हव्कानुर गानि, मूड रोजकु आतंका नना मर्रा जीवाते तेदंतन,” इंचि कराहचेके मत्‍तोर.
MAR 9:32 गानि येसु वेहता पोल्‍ले ओर्क तेळिया हिल्‍ले. आनि ओन पूस कियालयगुडा ओर वेरियतुर.
MAR 9:33 ओर कपर्नाहुमते एवसि उंदि लोते मत्‍तस्के, “हर्रि पीसि वायानेंके मिमेट बतल वळ्कसेक वातिट?” इंचि येसु सिस्युल्कुन पूसकीतोर.
MAR 9:34 गानि “अंटोर्कन्‍ना पेद्‍दा बोर?” इंचि ओर वरोंक वरोर वळ्कसेक वातुर. अदुनहाटीं ओर चुपचाप मत्‍तुर.
MAR 9:35 अस्‍के येसु उद्‍दिसि ओना पन्‍नेंड सिस्युल्कुन केय्‍सि ओर्कुन इल्‍हा इत्‍तोर. “बोर अय्ते पेद्‍दा आंतन इनकुंतोरो, ओर अंटोर्कन्‍ना सिन्‍नोड आसि अंटोरा सेवा कियानोर आयापींता,” इंचि ओर्क वेहतोर.
MAR 9:36 वेह्‍चि, वरोर सिन्‍ना पेडन ओरा नड्‍डुम निलाहतोर. पजा ओन दग्‍गेरा पीकुंचि ओर्कुन इल्‍हा इत्‍तोर.
MAR 9:37 “बोर अय्ते ई सिन्‍ना पेडनलेसीं आसि मनानोन नावा पोरोलते ओप्कुंतुरो, ओर नाकुनगुडा ओप्‍कुंतुर. बोर अय्ते नाकुन ओप्‍कुंतुर ओर सिराप नाकुने आयो गानि नाकुन लोहतोनगुडा ओप्‍कुंतुर,” इंचि वेहतोर.
MAR 9:38 अस्‍के योहान येसुन, “गुरु! वरोर मनकल नीवा पोरोलते देय्याल्कुन पेचाहनेंके मोमोट हूळतोम, मालेसीं ओर नी पज्जो ताकानोर आयोर. अदुनहाटीं अल्हा कियमा इंचि मोमोट ओन आपतोम,” इत्‍तोर.
MAR 9:39 अस्‍के येसु ओन इल्‍हा इत्‍तोर. “बोर अय्ते ना पोरोलते अद्‍बूतामाता कबाह्‍क कींतोरो, ओर नावा विरोदमते बिराना कराब वळ्का पर्रोर, अदुनहाटीं ओन आपमट.
MAR 9:40 बारित्‍ते बोर अय्ते मनाकु विरोदमते हिल्‍लोर, ओर मना बाजुनोरे.
MAR 9:41 नना मीक निजम वेहांतन, मिमेट किरिस्‍तुना सिस्युल्क इंचि मीक बोरन्‍ना गिलासमेड एर उनालय हियानय्ते, ओन्क तप्‍पाकोंटा इनाम दोर्कंता.
MAR 9:42 नापोर्रो विस्वासम कियना ई सिन्‍ना पेडानसंटोन बोरन्‍ना पापमते अरहते, ओना बोंळगेक जोत्‍ता बंडा दोहचि समुद्रमते दोब्‍बुतेने बेस मनंता.
MAR 9:43 ओक्‍कला नीवा कय नीकुन पापम किया वेहते, दान नर्किसि पोहा. बारित्‍ते रोंडु कय्‍क मंचि बस्‍केने पिर्रकोंटा बगाबगा पोत्‍तना तडमि मनना नरकमते होननदानकन्‍ना, तोंटि कय आसि पिस्वरते होनमळे नीहाटीं बेस.
MAR 9:45 अल्‍हेने, ओक्‍कला नीवा काल नीकुन पापम किया वेहते, दान नर्किसि पोहा. बारित्‍ते रोंडु काल्क मंचि नरकमते होननदानकन्‍ना, कूटाल आसि पिस्वरते होनमळे नीहाटीं बेस मनंता.
MAR 9:47 अल्‍हेने, ओक्‍कला नीवा कळु नीकुन पापम किया वेहते, दान तेंडसि पोहा. बारित्‍ते रोंडु कळ्‍कु मंचि नरकमते होननदानकन्‍ना, उंदि कळ्‍दे पेनदा राज्येमते होनमळे नीहाटीं बेस मनंता.
MAR 9:49 बारित्‍ते हरेक मनकन तळमितोनि होव्वोरलेसीं कियमळ जर्गंता.
MAR 9:50 होव्वोर बेसे मनंता गानि होव्वोर, होव्वोरलेसीं रुसि वायाकोंटे अव्टे मर्रा बल्हा होव्वोर रुसि तरा परांतोम? अल्‍हेने मिमेटगुडा होव्वोर रुसिते बेस वरोंक-वरोर कलियसि-मेलियसि सांतिते मंदना,” इंचि येसु वेहतोर.
MAR 10:1 पजा येसु अगटाल पेय्सि योर्दन बेरेड दाट्‍सि यहुदिया एरियाते होत्‍तोर. अगागुडा लोकुल्‍क मंदानां मंदां ओनगा जमा आयालय दल्‍गतुर. अस्‍के येसु ओना अलवट परकारम ओर्क कराहलय दल्‍गतोर.
MAR 10:2 अगा इच्‍चुर परिसिल्कगुडा वातुर. वासि येसुना पट्‍टु हूळानाहाटीं ओन इल्‍हा पूसकीतुर. “नियम परकारम, वरोर मनकल ओना मुत्‍तोन होळसिय्या वच्‍चा?” इत्‍तुर.
MAR 10:3 अस्‍के येसु ओर्कुन, “मूसाल मीक बद आदेस हीतोर?” इंचि पूसकीतोर.
MAR 10:4 अय्ते, “वरोर मनकल सोडसिट्‍टि हीसि, मुत्‍तोन होळसियना इंचि मूसाना आदेस मंता,” इंचि ओर येसुन इत्‍तुर.
MAR 10:5 अस्‍के येसु ओर्कुन इल्‍हा इत्‍तोर. “मीवा मनसु बंडालेसीं मत्‍ताहाटीं मूसाल ई आदेसतुन मीकु रासतोर.
MAR 10:6 गानि बस्के अय्ते पेन ई दुनियातुन कीतानो, अस्‍केन ओर्कुन मांड्‍सा मुरतळ इल्‍हा इंचि कीता.
MAR 10:7 अदुनहाटींगे मांडसा ओना यावन-बाबन होळसिसि, ओना मुत्‍तोनतोनि कलियसि मनंतोर.
MAR 10:8 ओर इव्वुर उंदे मेंदुल आसि मनांतुर. ओर वेरे-वेरे आयुर गानि उंदे मेंदुल आंतुर.
MAR 10:9 इल्‍हा पेने ओर्कुन कल्‍पताहाटीं मनकल वेरे कियानायो,” इंचि वेहतोर.
MAR 10:10 पजा, येसु लोन मत्‍तस्के इदुना बारेमते सिस्युल्कु मर्रा उंदि मल्का ओन पूसकीतुर.
MAR 10:11 अस्‍के येसु ओर्कु इल्‍हा वेहतोर, “बोरन्‍ना ओना मुत्‍तोन बोगमतनम कारनम तप्‍पा वेरे कारनमते होळसिसि इंकुंदानतोनि मरमिं आयानय्ते, ओर मोदाटा मुत्‍तोना विरोदमते बोगमतनम कीताप आंतोर.
MAR 10:12 अल्‍हेने ओक्‍कला मुत्‍तो दाना मुय्दोन होळसिसि इंकावरोनतोनि मरमिं आयानय्ते, अद बोगमतनम कीतद आंता.”
MAR 10:13 उंदि रोज लोकुल्‍क ओरा पिलाल्कुनपोर्रो येसु कय इर्सि आसिर्वाद हियना इंचि ओनगा पीसि वातुर, गानि सिस्युल्क ओर्कुन रांगतुर.
MAR 10:14 गानि येसु ओर रांगानद हूळसि ओर्कुन इल्‍हा इत्‍तोर. “पिलाल्कुन नाहेके वायाहीम्ट, ओर्कुन आपमट. पेनदा राज्येम इसंटोरदे आंद,
MAR 10:15 नना मीक निजम वेहंतन, बोरे आयिर पेनदा राज्येमतुन सिन्‍ना पिलाल्कुनालेसीं आसि स्विकार किय्युर, ओर पेनदा राज्येमते बस्‍केने होळिया पर्रुर,” इंचि वेहतोर.
MAR 10:16 पजा आ पिलाल्कुन एत्‍कुंचि, ओरा तल्‍लापोर्रो कय इर्सि आसिर्वाद हीतोर.
MAR 10:17 येसु अगटाल पेय्सि हर्रि पीसि होननेंके, वरोर मनकल विच्‍चि वासि काल्कुनपोर्रो अर्सि, “गुरु, निमे बेसतोन आंदिन. बस्‍केळ्‍क पिस्सना पिस्वरता वारसदार आयानाहाटीं नना बतल कीते बेस?” इंचि पूसकीतोर.
MAR 10:18 अस्‍के येसु ओन इल्‍हा इत्‍तोर, “नाकुन बारि बेसतोर इंतिन? बोरे बेसतोर आयोर, सिराप पेन उंदे बेसतद आंद.
MAR 10:19 नीकु पेनदा आदेसकु अय्ते एरपाटे मंतां: बोने हव्‍कुमा, बोगमतनम कियमा, दोंगातनम कियमा, आबद्‍दम गवाइ हियमा, इंकावरोन पसांचमा, नीवा तल्‍लुर-बाबोना कदर कीम,” इत्‍तोर.
MAR 10:20 अस्‍के, “गुरु, नना अय्ते इवन्‍नि सिन्‍नास्केटाल कीसेकेन वातन,” इंचि ओर येसुन इत्‍तोर.
MAR 10:21 येसु ओनहेके हूळतोर. पावरम अनपिच्‍चि, ओन इल्‍हा इत्‍तोर. “निहगा उंदि पोल्‍ले तक्‍को मंता. होन, निहगा बतल अय्ते मंता अदुन पूरा अम्मिसि, गरिबोर्कुंक तूसि हीम. अस्‍के नीकु स्वर्गमते दनम दोर्कार, पजा नहगा वासि ना पज्जो ताका,” इत्‍तोर.
MAR 10:22 ओनगा सोम्मु वेल्‍लेन मत्‍ताहाटीं, येसुना पोल्‍ले केंजसि ओना मोकम सिम्मरा आता. पजा दुक्‍कमते अगटाल पेय्सि होत्‍तोर.
MAR 10:23 अस्‍के येसु नालुं-मूलां हूळसि सिस्युल्कुन इल्‍हा इत्‍तोर. “सिरमंतुल्‍क पेनदा राज्येमते होळियमळ इत्‍ते वेल्‍लेन कस्‍टम!” इत्‍तोर.
MAR 10:24 ओना पोल्‍लें केंजसि सिस्युल्क इचंत्रम आतुर. गानि येसु मरुंदि मल्का सिस्युल्कुन इल्‍हा इत्‍तोर, “पिलाल्‍कुनिटा! वरोर सिरमंत मनकल पेनदा राज्येमते होळियमळकन्‍ना लोटापेटा सूदि बोंगाताल होनमळ अल्कगा मनंता,” इत्‍तोर.
MAR 10:26 इद केंजसि सिस्युल्कुंक वेल्‍लेन इचंत्रम आता. अस्‍के ओर-ओरे, “अल्हा अय्ते मुक्‍ति बोर्क दोर्का पर्रंता?” इंचि वळकालय दल्‍गतुर.
MAR 10:27 अस्‍के येसु ओराहेके हूळसि, “मनकालोरतोनि अय्ते इद आयापर्रो गानि पेनतोनि आंता. बारित्‍ते पेन अन्‍नि किया पर्रंता,” इंचि इत्‍तोर.
MAR 10:28 अस्‍के पत्रु, “हूळा, मोमोट अय्ते मत्‍तद-हिलवद अन्‍नि होळसिसि नीवा पज्जो वातोम,” इंचि येसुन इत्‍तोर.
MAR 10:29 येसु ओन, “नना निजम वेहांतन. बोरे आयिर नावाहाटीं, बेसता कबुरताहाटीं ओना लोन दारातुन, तम्मुह्‍क-दादालोर्कुन, अक्‍कल-हेलाह्कुन, तल्‍लुर-बाबोन, पिलाल्कुन, बूमि-जेगातुन होळसीतोर. ओन्क इंदकेने नूर अंताल्‍क एक्‍को लोन दारा, तम्मुह्‍क-दादालोर्क, अक्‍कल-हेलाह्क, तल्‍लुह्‍क, पिलाल्क, बूमि-जेगा दोर्कार. ओन्क कस्‍टाल्‍क वायानुं गानि वायाना कालमते ओन्क बस्‍केळ्‍क पिस्सना पिस्वर दोर्कका मन्‍नो.
MAR 10:31 गानि मुन्‍ने मत्‍तोर वेल्‍लेटुर पज्जो आयानुर, पज्‍जोटोर मुन्‍ने आयानुर,” इंचि वेहतोर.
MAR 10:32 येसु आनि ओनतोनि मत्‍तोर येरुसलेमतेके होंचेके मत्‍तुर. येसु अंटोर्कन्‍ना मुन्‍ने मत्‍तोर. ओना सिस्युल्क इचंत्रमते मत्‍तुर, ओना पज्जो ताकानुर वेर्रेते मत्‍तुर. अस्‍के येसु ओना पन्‍नेंड सिस्युल्कुन बाजुंक ओसि, “हुळाट, मनम येरुसलेम होंचंतोम, अगा होत्‍ता पजा मनकना रूपमते पुटतोन नाकुन पेद्‍दा पेर्मालोर्कुना आनि दर्मसास्‍त्रम कराहना गुरुल्कुना कय्‍दे पीसि हियानुर. ओर नाकु हामुर सिक्‍साता आदेस हीसि, यहुदि आयवोरा कय्‍दे अप्‍पजेपनुर. अस्‍के ओर नाकुन सिडांचनुर, नापोर्रो उस्कानुर, पोट्‍टेते तन्‍नानुर, हव्कानुर. गानि मूड रोजकुंक नना मर्रा जीवाते तेदंतन,” इंचि मुन्‍ने जर्गना बारेमते सिस्युल्कुंक मर्रा वेहतोर.
MAR 10:35 पजा जब्‍दिना मर्क याकोब आनि योहान येसुनगा वासि, “गुरु, मोमोट बतल अय्ते तल्‍कंतोम अदुन माहाटीं निमे कियमळ गावाले इंचि मा मनसु मंता,” इंचि इत्‍तुर.
MAR 10:36 येसु ओर्कुन इल्‍हा इत्‍तोर. “मीहाटीं नना बतल कियाना इंचि मीवा मनसु मंता,” इंचि पूसकीतोर.
MAR 10:37 अस्‍के ओर, “निमे नीवा महिमाते राज्येम कियनेंके नीवा तिना बाजुंक वरोन, डेमा बाजुंक वरोन उद्‍दाहीम,” इंचि येसुन इत्‍तुर.
MAR 10:38 गानि येसु ओर्कुन, “मिमेट बतल पूसकीसंतिरो अद मीक तेळियसेक हिल्‍ले. नना बव कस्‍टाल्‍क अय्ते बोगांचना मंता, अवुन मिमेट बोगांचा परकिटा? हिलाकोंटे नना बद बापतिस्मा एतंतनो, अद मिमेट एता परकिटा?” इंचि पूसकीतोर.
MAR 10:39 अस्‍के “हो, मोमोट तयार मंतोम,” इंचि ओर इत्‍तुर. अस्‍के येसु ओर्कुन इल्‍हा इत्‍तोर, “नना कस्‍टाल्‍क बोगांचताप मिमेट बोगांचा परकिट आनि नना एताना बापतिस्मा मिमेटगुडा एता परकिट.
MAR 10:40 गानि नावा तिना बाजुंक आनि नावा डेमा बाजुंक उपिच्‍चना अदिकार नाक हिल्‍ले. अव जेगां बोराहाटीं अय्ते तयार कीसि मंतांगो, ओरे अगा उद्‍दंतुर,” इत्‍तोर.
MAR 10:41 ओर इत्‍ता पोल्‍लें केंजसि, अगा मत्‍ता कळमता पदि मंदि सिस्युल्क, याकोब, योहानुना पोर्रो होंग आतुर.
MAR 10:42 अस्‍के येसु सिस्युल्कुन ओना दग्‍गेरा केय्‍सि, “यहुदि आयवोरा राजालोर ओरा जीतागाह्कुन, ओरा कय्‍दा हिळु इर्रालय हूळंतुर, अल्‍हेने ई दुनियाता पेद्‍दा मनकालोरगुडा सिन्‍ना मनकालोरपोर्रो अदिकारम ताकसालय हूळंतुर, इद मीकु एर्के.
MAR 10:43 गानि मिमेट मात्रम ओरालेसीं कियानायो. मी लोप्पोटाल बोर अय्ते पेद्‍दा आयालय हूळांतोरो, ओर मीवा सेवा कियानोर आयापींता.
MAR 10:44 अल्‍हेने मी लोप्पोटाल बोर अय्ते लीडर आंतन इंतोरो, ओर मीवा दासुड आयापींता.
MAR 10:45 बारित्‍ते मनकना रूपमते पुटतोन नना सेवा कियागोटकुनालय वाया हिल्‍लेन गानि वेरेतोरा सेवा कियालय आनि वेल्‍लेटोर्कुन पापमताल पेचाहलय ओराहाटीं नावा जीवा हियालय वातन,” इत्‍तोर.
MAR 10:46 पजा येसु, ओना सिस्युल्कु यरिहो सहरते एव्‍तुर. अगटाल मर्रा पेय्सनेंके लोकुल्‍कुना पेद्‍दा मंदा ओरतोनि पेय्सता. तिमाउसना मर्रि बरतलमय इनानोर गुड्‍डि बिच्‍चागाड हर्दा पक्‍काते उद्‍दिसि मत्‍तोर.
MAR 10:47 नासरेत सहरता येसु इगेटाल होंचेके मंतोर इंचि ओन्क तेळियतस्के ओर, “येसु, दाविद राजाना वंसमतोना! नापोर्रो दया कीम,” इंचि जोरसे वरगेयतोर.
MAR 10:48 अस्‍के वेल्‍लेटुर लोकुल्‍क ओन, “चुपचाप मन” इंचि रांगतुर, गानि, “दाविद राजाना वंसमतोना, नापोर्रो दया कीम,” इंचि ओर जोरसे मोत्‍कुनालय दल्‍गतोर.
MAR 10:49 अस्‍के येसु आगसि, “ओन केयट,” इंचि इत्‍तोर. अस्‍के ओर आ गुड्‍डिन केय्‍सि, “दैरनेम इर्रा, येसु नीकुन केयसंतोर तेदा,” इंचि इत्‍तुर.
MAR 10:50 अस्‍के ओर मुच्‍कुंचि मत्‍ता कप्‍पिडतुन तेंडसि पोहचि बिराना तेदसि येसुनगा वातोर.
MAR 10:51 अस्‍के येसु ओन, “नना नीहाटीं बतल कियना इंचि नी मनसु मंता?” इंचि पूसकीतोर. अस्‍के, “गुरु, नावा कळ्‍कुना नदर दिस्‍सानाल कीम,” इंचि येसुन इत्‍तोर.
MAR 10:52 अय्ते येसु, “निमे होन, नीवा विस्वासमे नीकुन बेस कीता,” इंचि इत्‍तोर. अल्हा इत्‍ता इनुडे ओना कळ्‍कुंक नदर वासि ओरगुडा येसुना पज्जो होत्‍तोर.
MAR 11:1 पजा ओर अंटोर येरुसलेम सहरता दग्‍गेरा जय्‍तुन मराकुना गुट्‍टापोर्रो मनना बैतपागे आनि बेतानिया इनना नाह्‍कुना दग्‍गेरा एव्‍तुर. पजा येसु ओना इव्वुर सिस्युल्कुन केय्‍सि,
MAR 11:2 ओर्क इल्‍हा वेह्‍चि नाटे लोहतोर. “मी मुन्‍ने दिस्‍सना नाटे होंट. अद नाटे होळियता होळयुळे, बस्‍केने बोरे उद्‍दुवद उंदि गाडदि पोरि दोह्‍चि मत्‍तद मीकु दिसंता, दान लेहकुंचि पीसि वटु.
MAR 11:3 ओक्‍कला अदुन पीसि वायनेंके, इल्‍हा बारि कीसंतिर? इंचि बोरन्‍ना पूसकीते, सामिंक दीना अव्‍सरम मंता इंचि वेहट. अस्‍के ओर बिराना अदुन इग्‍गे लोहानुर,” इत्‍तोर.
MAR 11:4 येसु वेहताप ओर अद नाटे होत्‍तुर. अगा हर्दा पक्‍काते उंदि लोता तल्‍पुना दग्‍गेरा गाडदि पोरि दोहचि मत्‍तद ओर्क दिसता. अस्‍के अदुन लेहतुर.
MAR 11:5 अगा नित्‍तिसि मत्‍तुर इच्‍चुर लोकुल्‍क हूळसि, “मिमेट बतल कीसंतिर? गाडदि पोरिन बारि लेहसंतिर?” इंचि पूसकीतुर.
MAR 11:6 ओर येसु वेहतापे ओर्क वेहतस्के, आ लोकुल्‍क ओर्कुन होना हीतुर.
MAR 11:7 ओर अद गाडदि पोरिन येसुनगा तच्‍चि, दानपोर्रो ओरा कपडिं वाटतुर. अस्‍के येसु दानपोर्रो उद्तोर.
MAR 11:8 वेल्‍लेटुर लोकुल्‍क ओर केर्ता कपडिं तेंडसि, येसु होनना हर्दे तारतुर. इंकिच्‍चुर लोकुल्‍क अय्ते नेलिने मत्‍ता मराकुना कोम्मां नर्किसि हर्दे तारतुर.
MAR 11:9 येसुना पज्जो-मुन्‍ने ताकाना लोकुल्‍क वरगेयसेके इल्‍हा इनुंदुर, “सामिना पोरोलते वायानोंक, पेनदा आसिर्वाद दोर्किकाटीं, होसन्‍ना! होसन्‍ना! दाविदनालेसीं राज्येम कियालय वायानोंक, पेनदा आसिर्वाद दोर्किकाटीं, स्वर्गमते मंदना पेनदुक दन्यवाद,” इंचि इत्‍तुर.
MAR 11:11 इल्‍हा येसु येरुसलेम सहरते होळियतोर. पजा गुळितगा होंचि, सुट्‍टु अन्‍नि वस्‍तुकुन तिरियसि हूळतोर. पोळ्‍दु होत्‍ता इंचि ओना पन्‍नेंड सिस्युल्कुन पीसि बेतानिया नाटे होत्‍तोर.
MAR 11:12 इंकुंदि रोजु येसु बेतानिया नाटेनाल वायनेंके ओन्क कर्वेस्‍ता.
MAR 11:13 हरदाल इच्‍चुर लक्‍कु उंदि पच्‍चटा अंजिर मरातुन हूळसि, दानकु पंडिं मंतां बारे इंचि आ मरातगा होत्‍तोर. गानि आ मराकु आकिं तप्‍पा बतांगे मनाहिल्‍लें. बारित्‍ते अद पंडिं हादाना वेला आयो.
MAR 11:14 अस्‍के येसु अद मरातुन, “इंदकेटाल नीवा पंडिं बस्‍केने बोरे तिन्‍नुर,” इंचि इत्‍तोर. अद पोल्‍लेतुन ओना सिस्युल्कु केंजतुर.
MAR 11:15 ओर येरुसलेम एव्ता पजा येसु गुळिते होत्‍तोर. अगा गुळिते बोर अय्ते अम्मुमळ-अस्सुड कीसेक मत्‍तुर, ओर्कुन पलाते गेदुमतोर. अल्‍हेने कोत्‍तां अदला-बदला कियानोरा बल्‍लन आनि मोक्‍कु हियालय पावरेम पिट्‍टें अम्मानोर्कुना कुर्सिन मिळ्‍हाचि वाटतोर.
MAR 11:16 अल्हा कीसि गुळिताल बोने बदे वस्तु पीसि होनुळ-वायुळ किया हिया हिल्‍लोर.
MAR 11:17 पजा ओर्क इल्‍हा वेहालय दल्‍गतोर. “नावा लोतुन दुनियाता अंटोर लोकुल्‍क पारतना कियाना जेगा इनानुर, इंचि दर्मसास्‍त्रमते रासि हिल्‍लेना? गानि मिमेट दीन दोंगाल्क मक्‍कना जेगा कीतिर,” इत्‍तोर.
MAR 11:18 इल्‍हा अंटोर लोकुल्‍क येसु वेहाना पोल्‍लें केंजसि इचंत्रम आयुंदुर. अदुनहाटीं पेर्मालोर, दर्मसास्‍त्रम कराहना गुरुल्क येसुन हव्कालय हूळुंदुर. गानि ओन अल्हा बतलन्‍ना कियालय ओर वेरियुंदुर.
MAR 11:19 पजा येसु, ओना सिस्युल्कु पोळ्‍दु होत्‍तारिते येरुसलेमताल पेय्सि होत्‍तुर.
MAR 11:20 इंकुंदि रोजु हक्‍केरेने मर्रा येरुसलेमतेके वायानेंके ओर अद अंजिर मरातुन हूळतुर, अस्‍के अद मरा हिह्कुनाल अय्ते कोस्‍सादाका पूरा वतसि होंचि मत्‍ता.
MAR 11:21 येसु अद मरातुन इत्‍ता पोल्‍ले पत्रुंक मति वाता. अस्‍के ओर येसुन, “अद हूळा गुरु! निमे सापनेम हीता अंजिर मरा वतसि होत्‍ता,” इंचि इत्‍तोर.
MAR 11:22 अस्‍के येसु ओर्कु इल्‍हा जवाब हीतोर. “मिमेट पेनदापोर्रो विस्वासम इर्राट. नना मीकु निजम वेहांतन, बोरन्‍ना इद गुट्‍टातुन, ‘इग्‍गेटाल तेदसि समुद्रमते होंचि अर्रा’ इंचि बतले अनमानम हिलाकोंटा विस्वासमते इनानय्ते, अद होंचि अर्रार.
MAR 11:24 अदुनहाटीं नना मीकु वेहांतन, मिमेट विस्वासमतोनि पारतनाते बतल तल्‍किना, अद मीकु दोर्कता इंचि विस्वासम कीम्‍टु, अस्‍के अद मीवादे आंता.
MAR 11:25 अल्‍हेने मीवा मनसुनेगिंटा बोना पोर्रोनना पगा मत्‍ते, मिमेट पारतना कियालय निततस्के मुन्‍ने ओन मापि कीम्‍टु. अस्‍के स्वर्गमते मंदना पेनबाबालगुडा मीवा तप्‍पुकुन मापि कींतोर.
MAR 11:26 मिमेटगिंटा इंकावरोना तप्‍पुकुन मापि कियाकोंटे, स्वर्गमते मंदना पेनबाबालगुडा मीवा तप्‍पुकुन मापि किय्योर,” इंचि वेहतोर.
MAR 11:27 ओर येरुसलेम सहरते मर्रा वातस्के, येसु गुळिते तिरियसेक मत्‍तोर. अस्‍के पेर्मालोर, दर्मसास्‍त्रम कराहना गुरुल्क आनि यहुदि पेद्‍दाल्क येसुनगा वातुर. वासि,
MAR 11:28 “निमे ई कबाह्‍क बद अदिकारमते कीसंतिन? नीकु ई कबाह्‍क कियालय अदिकारम बोर हीतोर?” इंचि पूसकीतुर.
MAR 11:29 अस्‍के येसु ओर्कुन इत्‍तोर. “ननागुडा मीकुन उंदि सवाल पूसकींतन. मिमेट जवाब हियानय्ते, नना बद अदिकारमते इव कबाह्‍क कीसंतन इत्‍तद वेहंतन.
MAR 11:30 अय्ते जवाब हीम्टु, योहानुंक बापतिस्मा हियाना अदिकारम बगाटाल दोर्कता? स्वर्गमताला हिलाकोंटे मनकालोराहेंदाल दोर्कतना?” इत्‍तोर.
MAR 11:31 अस्‍के, ओर-ओरे इल्‍हा वळ्ककुनालय दल्‍गतुर, “ओक्‍कला स्वर्गमताल दोर्कता इंचि मनम इनानय्ते, ‘मिमेट योहानुन बारि नम्मिर’ इंचि इनानुर. ओक्‍कला मनम मनकालोराहेंदाल दोर्कता इनानय्ते, लोकुल्‍कुना वेर्रे! बारित्‍ते योहान निजमे पेनदा कबुरतोर इंचि ओर नम्मंतुर,” इत्‍तुर.
MAR 11:33 अदुनहाटीं ओर, “माक एर्का हिल्‍ले,” इंचि इत्‍तुर. अस्‍के, “अल्हा अय्ते, इव कबाह्‍क बद अदिकारमते कीसंतनो ननागुडा मीकु वेहोन,” इंचि येसु इत्‍तोर.
MAR 12:1 अस्‍के येसु ओर्कु उंदि वेसुडि वेहमळ सुरुव कीतोर, “वरोर मनकल अंगुर तोटा कीतोर. आ तोटा सुट्‍टु गूरे दोहाचि तोटाता लोप्पेन अंगुर पंडिना पानकम तेंडालय उंदि पोक्‍का तव्‍सि, दाना दग्गेरेने कावेलहाटीं उंदि मंडा वाटतोर. पजा तोटातुन वेरेतोर्क बटाइक हीसि, वेरे देसेम होत्‍तोर.
MAR 12:2 पजा बस्के अय्ते अंगुर पंडिं कोय्याना वेला वाता, अस्‍के ओरागटाल पंडिना तूस एतालय ओना वरोर दासुन बटाइतोरहेके लोहतोर.
MAR 12:3 गानि बटाइतोर आ दासुन पीसि पक्‍का तंचि, उत्‍ता कय्‍के वापस लोहतुर.
MAR 12:4 पजा मालक इंकावरोन दासुन बटाइतोरहेके लोहतोर. आ बटाइतोर ओना तल्‍ला पयाहचि ओन कदर हिलाकोंटा कीसि लोहतुर.
MAR 12:5 मालक मर्रा इंकावरोन दासुन ओरहेके लोहतोर, ओर ओन हव्कतुर. अस्‍के मालक इल्‍हा इंका वेल्‍लेन दासुल्‍कुन लोहतोर. गानि बटाइतोर इच्‍चुर्कुन तंतुर, इच्‍चुर्कुन बारे हव्कतुर.
MAR 12:6 आकिरते मालकनगा ओना पावरमगल्‍ला मर्रि वरोरे मिगिल्सि मत्‍तोर. अस्‍के मालक, ‘नावा मर्रिन बेस कदर कियानुर’ इनकुंचि ओरहेके लोहतोर.
MAR 12:7 गानि बटाइतोर ओर वायानद हूळसि, ‘ईर अय्ते वारसदार आंदुर. दट ओन मनम हव्ककोम, अस्‍के ओना जाय्‍दाद मनाक आयार,’ इंचि वरोंक-वरोर इत्‍तुर.
MAR 12:8 पजा ओन दोर्कापीसि हव्‍किसि, तोटाता पलाते ओसि पोहचीतुर.
MAR 12:9 इंदके अंगुर तोटाता मालक वासि ओर्कुन बतल कियानुर? ओर वासि बटाइतोर्कुन हव्‍किसि अद तोटातुन वेरेतोर्क अप्‍पजेपनुर,” इत्‍तोर.
MAR 12:10 पजा येसु ओर्कुन इल्‍हा इत्‍तोर. “मिमेट दर्मसास्‍त्रमते बस्‍केन हदवा हिल्‍लिरा? “बद बंडातुन अय्ते मिस्‍त्रिल्‍क, कबळ्‍क ओज्‍जो इंचि हय्‍सा हिल्‍लुर, अदे बंडा, सेंकु मूलाता पुनादि बंडा आता. इद सामि कीता कबळ आंद, इद मना नदरते इचंत्रमाता कबळ आंद,” इत्‍तोर.
MAR 12:12 पजा दर्मसास्‍त्रम कराहना गुरुल्क आनि पेद्‍दा पेर्मालोर्क, येसु वेहता वेसुडिं केंजसि, “ईर मनाकुने इंचंतोर,” इंचि एरपाट कीतुर. अदुनहाटीं ओर येसुन दोर्का पियालय हूळतुर. गानि लोकुल्‍कुना वेर्रेक ओन पिय्याकेन होळसि होत्‍तुर.
MAR 12:13 पजा, येसुन ओना पोल्‍लेन लोप्पेन दोर्का पिय्याना इंचि इच्‍चुर परिसिल्कुन आनि इच्‍चुर हेरोद राजाना मनकालोर्कुन येसुनगा लोहतुर.
MAR 12:14 ओर येसुनगा वासि इल्‍हा इत्‍तुर. “गुरु, निमे निजम वळ्‍कानोन आंदिन, बोर बतल इनिनागानि दाना पिकिरगुडा किय्‍यिन, निमे लोकुल्‍कुना मोकम हूळसि वळ्किन, इंका पेनदा हर्दा बारेमते सत्‍तेमते कराहंतिन इंचि माक एरपाटे मंता. इंदके माकु वेहा, नियम परकारम, कैसर राजांक कर दोहमळ न्‍यायमेना, आयोना?” इत्‍तुर.
MAR 12:15 येसु ओरा मनसुना कराब पिलान एरपाट कीसि, ओर्कुन इल्‍हा इत्‍तोर. “मिमेट बारि नावा पट्‍टु हूळांतिर? नाकु उंदि एंडि बंडि हुप्‍सट,” इत्‍तोर.
MAR 12:16 ओर उंदि एंडि बंडि हुपिस्तुर. अस्‍के येसु ओर्कुन इल्‍हा इत्‍तोर. “इद एंडि बंडिपोर्रो बोना पोटुवा आनि पोरोल मंता?” इत्‍तोर. “कैसर राजानद” इंचि ओर इत्‍तुर.
MAR 12:17 पजा येसु, “बद कैसर राजानद मंता, अद कैसर राजांक हीम्टु. बद अय्ते पेनदाद मंता, अद पेनदुक हीम्टु,” इंचि ओर्कुन इत्‍तोर. अस्‍के ओना पोल्‍लें केंजसि ओर वेल्‍लेने इचंत्रम आतुर.
MAR 12:18 इच्‍चुर सदुकिर येसुनगा वातुर (हासि मर्रा जीवाते तेदमळतुन ईर नम्मुर.) वासि इल्‍हा सवाल पूसकीतुर.
MAR 12:19 “गुरु, मूसाना नियम परकारम, वरोर मनकल पिलाल्क आयाका मुन्‍नेन हासि होंचि ओना मुत्‍तो मत्‍ते, दानतोनि ओना तम्मुर मरमिं आसि, हातोना वंसमताहाटीं पिलाल्क कनना इंचि रासि मंता.
MAR 12:20 अय्ते, एडुर दादाल-तम्मुह्‍क मत्‍तुर. ओरा लोप्पोटाल पेद्‍दोड मरमिं आतोर, गानि पिलाल्क आयाका मुन्‍नेन ओर हातोर.
MAR 12:21 हातस्के ओना पज्‍जोटोर दानतोनि मरमिं आतोर, ओरगुडा पिलाल्क आयाका मुन्‍नेन हातोर. अल्‍हेने ओना पज्जोटोरगुडा दानतोनि मरमिं आतोर, ओरगुडा पिलाल्क आयाका मुन्‍नेन हातोर.
MAR 12:22 इल्‍हा ओर एडुरगुडा दानतोनि मरमिं आसि पिलाल्क आयाका मुन्‍नेन हातुर. आकिरते अद मुरतळगुडा हाता.
MAR 12:23 अय्ते हातोर अंटोर मर्रा जीवाते तेदतस्‍के, आ एडुर लोप्पोटाल अद बोना मुत्‍तो आयार? बारित्‍ते ओर एडुरगुडा दान मरमिं आसि मत्‍तुर,” इत्‍तुर.
MAR 12:24 अस्‍के येसु ओर्कुन इल्‍हा इत्‍तोर. “मिमेट दर्मसास्‍त्रमतुन आनि पेनदा ताकततुन एरपाट कियाका दान मिमेट तप्पु अर्तम कीकुंचंतिर.
MAR 12:25 बारित्‍ते ओर हामुरताल जीवाते तेदानुर अस्‍के, ओर मरमिं आयुर, मरमिं कीसिगुडा हिय्युर. गानि ओर स्वर्गमता पेनदा दूतनलेसीं मनांतुर.
MAR 12:26 हातुर मर्रा जीवाते तेदाना बारेमते पेन, ‘नना अब्राहामुना पेनदुन, इसाकुना पेनदुन आनि याकोबुना पेनदुन’ इंचि दर्मसास्‍त्रमते पोत्‍तना पोदाता गटना जर्गनेंके मूसांक वेहता, अदुन मिमेट हदवा हिल्‍लिरा?
MAR 12:27 अद हातोरा पेन आयो गानि जीवाते मत्‍तोरा पेन आंद. मिमेट वेल्‍ले तप्पु कीसेक मंतिट,” इंचि इत्‍तोर.
MAR 12:28 ओर वदुरकुंचेक मत्‍तद केंजसि, अच्‍चोटेन वरोर दर्मसास्‍त्रम कराहना गुरु अगा वातोर. येसु ओर्क बेस जवाब हीतद हूळसि, “गुरु, पेन हीता आदेसकुनाल मेन आदेस बद आंद?” इंचि पूसकीतोर.
MAR 12:29 अस्‍के येसु ओन्क इल्‍हा जवाब हीतोर. “ए इस्राएल! इद केंजा, अन्‍नि आदेसकुनाल इद मेन आदेस आंद: मावा पेने सामि आंदुर.
MAR 12:30 निमे नीवा सामि आता पेनदुन पूरा मनसुनाल, पूरा आत्माताल, पूरा बुद्‍दिताल, पूरा ताकतताल पावरम कीम.
MAR 12:31 रोंडो आदेस बद इत्‍ते, नीवद निमे बच्‍चोन पावरम कींतिनो, अचोने पावरम इंकावरोनगुडा कीम. इव रोंडुन होळसि वेरे पेद्‍दा आदेस बद्‍दे हिल्‍ले,” इत्‍तोर.
MAR 12:32 अस्‍के दर्मसास्‍त्रम कराहना गुरु येसुन, “गुरु, निमे सत्‍तेम वळ्‍कतिन. पेन उंदे आंद, दान्क तपिच्‍चि इंकुंदि पेन हिल्‍ले.
MAR 12:33 अदुनहाटीं कमुरबलिं कियानदानकन्‍ना, मोक्‍कुल्क हियनदानकन्‍ना पूरा मनसुनाल, पूरा आत्माताल, पूरा बुद्‍दिताल, पूरा ताकतताल मनम पेनदुन पावरम कियमळे बेस आंद. अल्‍हेने मनद मनम पावरम कीतच्‍चोने इंकावरोनगुडा पावरम कियना.” इंचि इत्‍तोर.
MAR 12:34 अल्हा ओर तेल्‍विते वेहतद केंजसि येसु ओन, “निमे पेनदा राज्येमकु वेल्‍ले लक्‍कु हिल्‍लिन,” इंचि इत्‍तोर. दाना पजा येसुन बद्‍दे सवाल पूसकियालय बोर्कु हिम्मत आयाहिल्‍ले.
MAR 12:35 येसु गुळिते पेनदा पोल्‍लें कराहनेंके ओर्कुन इल्‍हा इत्‍तोर. “किरिस्‍तु दाविदना मर्रि आंदुर, इंचि दर्मसास्‍त्रम कराहना गुरुल्क बल्हा इना परांतुर?” इत्‍तोर.
MAR 12:36 इद पोल्‍लेतुन कुद दाविद पवित्र आत्माते निंडसि इल्‍हा इत्‍तोर, “बदवेरदाका अय्ते नीवा पगातोर्कुन, नीवा काल्कुनगा तर्रोन, अदवेरदाका नावा तिना बाजुंक उद्‍दिसि मन, इल्‍हा सामि, नावा सामिन इत्‍तोर.”
MAR 12:37 इल्‍हा दाविद ओन, सामि इंचि इत्‍तोर. अय्ते किरिस्‍तु दाविदना मर्रि बल्हा आया परांतोर? इत्‍तोर. अगा मत्‍ता लोकुल्‍क येसुना पोल्‍लें बच्‍चोरो गम्मतते केंजतुर.
MAR 12:38 येसु ओर्क कराहसेके इल्‍हा इत्‍तोर. “दर्मसास्‍त्रम कराहना गुरुल्कुनाल उसारते मंटु. पोर्रोटाल हिळुदाका पोळ्‍गु अंगिं केर्सि तिरियमळ, हाटुमकुने जोहार वेहागोटकुनमळ ओर्क बेस अनपिच्‍चंता.
MAR 12:39 इंका दर्मसास्‍त्रम कराहना लोह्कुने, कुळ्‍पुकुने पेद्‍दाल्‍क उद्‍दाना जेगाते उदमळ इत्‍ते ओर्क वेल्‍ले इस्‍टम.
MAR 12:40 ईर मुंडामोस्ता मुर्ताह्‍कुन मुळहंतुर, लोकुल्‍कुंक हुप्‍सालय वेल्‍लेनजेम पारतना कींतुर. गानि ईर्क मात्रम पेन अंटोर्कन्‍ना एक्‍को सिक्‍सा हियार,” इंचि इत्‍तोर.
MAR 12:41 येसु गुळिते दान पेटिता मुन्‍ने उद्‍दिसि, लोकुल्‍क दान पेटिते कोत्‍तां वाटनद हूळसेक मत्‍तोर. वेल्‍लेटुर सिरमंत लोकुल्‍क वेल्‍लेने कोत्‍तां वाटतुर.
MAR 12:42 पजा मुंडामोस्ता उंदि गरिब मुरतळ वासि रोंडु रागि कोत्‍तां वाटता. अवुना विलुवा वेल्‍ले तक्‍को मत्‍ता.
MAR 12:43 अस्‍के येसु ओना सिस्युल्कुन दग्‍गेरा केय्‍सि इल्‍हा इत्‍तोर. “नना मीक निजम वेहांतन, ई मुंडामोस्ता गरिब मुरतळे अंटोर्कन्‍ना एक्‍को दानम कीता. बारित्‍ते इग्‍गे सिरमंत लोकुल्‍क ओरा दनमताल दानम कीतुर, गानि इद गरिब मुंडामोस्ता मुरतटगा रोंडे रागि कोत्‍तां मत्‍तां. अद अवुनगुडा इत्‍ते दाना पिस्वरताहाटीं इरतादानगुडा पेनदुक वाटसीता,” इत्‍तोर.
MAR 13:1 येसु गुळिताल पलाते पेय्सि वातस्के ओना सिस्युल्‍कुनाल वरोर सिस्युड येसुन, “गुरु, हूळा! बच्‍चोर पेद्‍दा बंडां, बच्‍चोर बेसता बंगलां,” इंचि इत्‍तोर.
MAR 13:2 अस्‍के येसु ओन इल्‍हा इत्‍तोर. “बंडाने दोहतव पेद्‍दा-पेद्‍दा बंग्लां हूळसेक मंतिन गदा, अव बंडां उंदानपोर्रो उंदि मनाकोंटा कूल्‍हाना वेला वायनद मंता,” इत्‍तोर.
MAR 13:3 येसु अगटाल पेय्सि गुळिकु मुन्‍ने मंदना जय्‍तुन मराकुना गुट्‍टापोर्रो होंचि उदतोर. ओर ओंटिगा मत्‍तद हूळसि, पत्रु, याकोब, योहान आनि अंदरियल ओनगा होत्‍तुर.
MAR 13:4 होंचि, “इवन्‍नि गटनां बस्के जर्गनुं माक वेहा. इंका इव गटनां जर्गना मंता इन्‍नेंके माकु बतल चिन्‍ह दिस्‍सार?” इत्‍तुर.
MAR 13:5 अस्‍के येसु ओर्कु इल्‍हा वेहालय दल्‍गतोर, “मीकुन बोर पसांचकोंटा मिमेट उसारते मंटु.
MAR 13:6 नावा पोरोल एतसेके बचुटूरो लोकुल्‍क वांतुर. वासि, ‘ओन ननाने आंदुन’ इंचि वेल्‍लेटोर्कुन पसांचंनुर.
MAR 13:7 मिमेट लडाईं आनि लडाईना पोल्‍लेना बारेमते केंजसि वेरियमट, अल्हा तप्‍पाकोंटा आयानुंगे. गानि दुनियाता आकिर वेला अस्‍केने वायो.
MAR 13:8 देसेमपोर्रो देसेम, राज्येमपोर्रो राज्येम लडाईं आयनुं, वेरे-वेरे जेगाने बूकंपाल्क आयनुं, कर्वु अर्रार. गानि इल्‍हा आयमळ इत्‍ते एर पूरालय नोप्‍पिं सुरुव आताप आंद.
MAR 13:9 गानि मिमेट उसारते मंटु. बारित्‍ते मीकुन पंचादितोरा कय्‍दे अप्‍पजेपनुर आनि दर्मसास्‍त्रम कराहना लोह्कुने ओसि तनानुर. पजा नावा बारेमते गवाइ वेहालय मीकुन राज्यपाल आनि राजालोरा मुन्‍ने निलाहनुर.
MAR 13:10 गानि दीनकन्‍ना मुन्‍ने अन्‍नि देसेल्कुने तप्‍पाकोंटा पेनदा बेसता कबुर वेहमळ जर्गगोम.
MAR 13:11 अद वेलाते मीकुन पीसि ओसि पूसकियानुर. अस्‍के अगा बतल वळ्कना, बतल वळ्‍कानायो इंचि मोदाले रंदि कियमट. वळ्कानोर मिमेट आयो गानि पवित्र आत्मा आंद. अदुनहाटीं मीवा मनसुने बतल वळ्‍कागोम इंचि अनपिचंतनो अदे वळ्कट.
MAR 13:12 इंका बल्हा जर्गंता इत्‍ते, कासा तादल-तम्मुह्‍क पगां आसि हव्कालय अप्‍पजेपनुर. पिलाल्क ओरा तल्‍लुर-बाबोंक अड्‍डम तिरियसि ओर्कुन हव्का वेहांतुर.
MAR 13:13 नावा पोरोलताहेंका अंटोर लोकुल्‍क मीकुन हय्सुर. गानि बोर अय्ते पेनदापोर्रोटा विस्वासमते आकिरदाका निल्‍सि मनंतोर, ओनके मुक्‍ति दोर्कार.
MAR 13:14 गानि बस्के अय्ते, बोरे हय्‍सवसोंटा नासडेम कियाना वस्तु, गुळि लोप्पो बगा अय्ते मंदनायो अगा नित्‍तिसि मत्‍तद मिमेट हूळकिर, अस्‍के बोर अय्ते यहुदिया एरियाते मंतुरो, ओर गुट्‍टनहेके वित्‍तिर (हद्‍वानोर इदुन अर्तम कीकुंटु)
MAR 13:15 बोर अय्ते लोतपोर्रो मंतोर, बवे वस्‍तुक पीसि वायालय लोप्पो होळियानायो.
MAR 13:16 बोर अय्ते नेलिने कबळ कीसेक मंतोर, कपडिं पीसि वायालय मल्सि लोन होनानायो.
MAR 13:17 अव रोजकुने पीटे मत्‍ता मुर्ताह्‍कुंक आनि सिन्‍ने मर्तल्‍लुह्‍कुंक वेल्‍लेन तकलिप वांता.
MAR 13:18 अव तकलिपकु पीनि कालमते वायामन्‍नि इंचि पारतना कीम्‍टु.
MAR 13:19 बारित्‍ते पेन कीता ई दुनिया पुट्तस्केटाल अय्ते इदवेरादाका बस्‍केन वायवसोंटा तकलिप अव रोजकुने वायाना मंता आनि मुन्‍नेगुडा असोंटा तकलिप बस्‍केने वायो.
MAR 13:20 ओक्‍कला सामि अव रोजकुन तक्‍को कियाकोंटा मंचि मत्‍ते, बोरे पिसाकोन्‍नेर. गानि बोर्कुनय्ते पेन पेरता, ओराहाटीं अव रोजकुन तक्‍को कीता.
MAR 13:21 अव रोजकुने आबद्‍दम किरिस्‍तुल्‍क, पेनदा आबद्‍दम कबुरतोर वायानुर. आनि कुदुरते पेन पेर्कुत्‍ता लोकुल्‍कुन पसांचलय चिन्‍हां, इचंत्रमता कबाह्‍क कीसि हुप्‍सानुर. अदुनहाटीं ओक्‍कला बोरन्‍ना मीकुन, ‘हुळाट, किरिस्‍तु इगे मंतोर, अगा मंतोर’ इनानय्ते मिमेट ओर्कुन नम्मुमट.
MAR 13:23 गानि मिमेट उसारते मंटु; इव अन्‍नि पोल्‍लें नना मीक मुन्‍नेने वेहचीतन.
MAR 13:24 गानि अव रोजकुने तकलिपकु मारतस्के पोळ्‍दुंक हीकट मुच्‍चका वायार, वेळसि वेल्‍गु हियाकोंटा आयार.
MAR 13:25 मब्बुनाल सुक्‍कां हिळु अर्रानुं, मब्बुने मनना अन्‍नि सक्‍तिन कदलिच्‍मळ जर्गंता.
MAR 13:26 अस्‍के मनकना रूपमते पुटतोन नना, पेद्‍दा बलम आनि महिमातोनि मब्बु तेर्पेनपोर्रो उद्‍दिसि वायानेंके लोकुल्‍क हूळानुर.
MAR 13:27 अस्‍के नना नावा दूतन बूमिपोर्रो लोहांतन. आ दूतां बूमिपोर्रो नालुं मूलानाल, मब्बुना ई कोस्‍साताल अय्ते आ कोस्‍सादाका नना पेर्कुत्‍ता लोकुल्‍कुन जमा कींतां,” इत्‍तोर.
MAR 13:28 “अंजिर मराताल उंदि पोल्‍ले करियट. अंजिर मराता कोम्मांक इग्गुर बस्के अय्ते वांता, अस्‍के एद्‍दि कालम दग्‍गेरा एव्ता इंचि मिमेट एरपाट कींतिर.
MAR 13:29 इल्‍हा इव अन्‍नि गटनां जर्गनद हूळसि ओर दग्‍गेरा मंतोर, गल्‍मातगेन मंतोर इंचि मिमेट एरपाट कींतिर.
MAR 13:30 नना मीकु निजम वेहांतन, बदवेरदाका अय्ते इव अन्‍नि पोल्‍लें पुरागा आयोंगो, अदवेरदाका ई पीळि मुळगो.
MAR 13:31 इद बूमि, मब्बु नासडेम आसि होंदार, गानि नावा पोल्‍लें बस्‍केने नासडेम आयों.
MAR 13:32 “अद रोजु आयि, अद गळिया आयि बोर्के तेळियो. स्वर्गमता दूतांक आयि, मनकना रूपमते पुटतोन नाकु आयि बोर्के तेळियो. गानि सिराप पेनबाबांके तेळियंता.
MAR 13:33 अद वेला बस्के वांतानो मीक तेळियो. अदुनहाटीं मिमेट तेल्‍विते, उसारते मंटु.
MAR 13:34 इद वरोर मनकनलेसीं मंता, बोर अय्ते पय्‍नेम होनाका मुन्‍ने, ओना जीतागाह्कुन केय्‍सि, बोना कबळ ओनकु अप्‍पजेपसि, लोतुन कावेल कियानोन ‘तेल्‍विते मन’ इंचि आदेस हींतोर.
MAR 13:35 लोता मालक पोळ्‍द होंचि वांतोरो, नळ्‍जाम नर्का वांतोरो, गोगोड कूसानेंके वांतोरो, हक्‍केरे वांतोरो, बस्के वांतोरो मीक एरपाट हिल्‍ले. अदुनहाटीं मिमेट तेल्‍विते मंटु.
MAR 13:36 ओर अचानक वासि, मीकुन निद्र होंचि मत्‍तद हूळा मनि इंचि मिमेट तेल्‍विते मंटु.
MAR 13:37 इद नना मीक वेहतन, अल्‍हेने अंटोर्कगुडा अदे वेहासेक मंतन. तेल्‍विते मंटु,” इंचि येसु ओर्क वेहतोर.
MAR 14:1 रोंडु रोजकुना पजा दाटसि होनना पंडुगु आनि पुल्‍लगा आयवा पिंडिता हारिना पंडुगु आयाना मत्‍ता. अस्‍के येसुन सप्‍पुडदाका दोर्कापीसि हव्ककोम इंचि पेर्मालोर्क, दर्मसास्‍त्रम कराहना गुरुल्क पिलान कीसेक मत्‍तुर.
MAR 14:2 गानि, “पंडुगु रोजकुना लोप्पो हव्का मन्‍नि, अल्हा कीते लोकुल्‍क गडबड किया परांतुर,” इंचि ओर इनकुत्‍तुर.
MAR 14:3 अद वेलाते येसु बेतानिया नाटे, मुन्‍ने कुस्‍टरोगम आसि मत्‍ता सिमोनुना लोते गाटो तिनालय उद्‍दिसि मत्‍तस्के, उंदि मुरतळ तेल्‍लाटा बंडा गुर्गिते जटामासि मराताल तयार कीतद, वेल्‍ले दराता पिव्‍वर अत्‍तर निय पीसि वाता. अद गुर्गिता बुच्‍चातुन पयाहचि येसुना तल्‍लापोर्रो वळियता.
MAR 14:4 अदुन हूळसि, अगा मत्‍तोर्क इच्‍चुर्कु होंग वासि, “इद अत्‍तर निय अट्‍टिदे बारि नासडेम कीतिन?
MAR 14:5 इदुन अम्मिसि मत्‍ते मूड नुह्कुंकन्‍ना एक्‍को एंडि रूपें वायवह्कु. अवुन गरिब लोकुल्‍कुंक हियालय ओज्‍जुवाह्‍क,” इंचि दान तेराहतुर.
MAR 14:6 गानि येसु ओर्कुन इल्‍हा इत्‍तोर. “दीन बतल इनमट, मिमेट दीन बारि तकलिप कीसंतिर? इद नावाहाटीं बेसे कीता.
MAR 14:7 गरिब लोकुल्‍क मीवातोनि बस्‍केळ्‍क मनंतुर, मिमेट बस्के इनकुत्‍ते अस्‍के ओर्क बेस किया परांतिर, गानि नना मीवातोनि बस्‍केळ्‍क मन्‍नोन.
MAR 14:8 नावा मेंदुल्तुन बोंदा दोस्‍साका मुन्‍नेने अद मुरतळ नाक निय होकता. अद किया परतच्‍चोन कीता.
MAR 14:9 नना मीक निजम वेहांतन. पूरा दुनियाते बगा-बगा पेनदा बेसता कबुर वेहमळ जर्गंता, अगा ई मुरतटुन आनि इद कीता कबळतुन मति कियानुर,” इत्‍तोर.
MAR 14:10 पजा, पन्‍नेंड सिस्युल्‍कुनाल वरोर इस्‍कारियोत यहुदल मत्‍तोर. येसुन पीसि हियालय ओर पेद्‍दा पेर्मालोरगा होत्‍तोर.
MAR 14:11 अद केंजसि ओर कूस आसि, ओन्क कोत्‍तां हींतोम इंचि ओप्‍कुत्‍तुर. अदुनहाटीं ओर येसुन पीसि हियालय मोका हूळसेक मत्‍तोर.
MAR 14:12 पुल्‍लगा आयवा पिंडिता हारिना पंडुगुना मोदाटा रोजु, दाटसि होनना पंडुगुना गोर्रे पोरिन मोक्‍कु हियुंदुर. अदे रोजुने येसुना सिस्युल्कु, “गुरु, दाटसि होनना पंडुगुना गाटो तिनना तयारिं बगा कीकोम इंचि नीवा मनसु मंता?” इंचि ओन इत्‍तुर.
MAR 14:13 येसु ओना इव्वुर सिस्युल्कुन केय्‍सि ओर्क इल्‍हा वेह्‍चि लोहतोर. “मिमेट सहरते होंट. अगा वरोर मनकल अळकाते एर पीसि होननेंके कलियंतोर, ओना पज्जेन होंट.
MAR 14:14 ओर बद लोन अय्ते दांतोरो, अद लोता मालकुन, ‘नना नावा सिस्युल्कुनतोनि कलियसि, दाटसि होनना पंडुगुना गाटो तिननाहाटीं हेळमितोर आगाना अर्रा बगा मंता? इंचि गुरु पूसकीसंतोर,’ इल्‍हा इंटु.
MAR 14:15 अस्‍के ओर मीकु मिद्‍दे पोर्रोटा पेद्‍दा अर्रा सजांचि तयार कीसि मत्‍तद हुप्‍सानुर, अदे अर्राते पंडुगुना गाटो मनाहाटीं तयार कीम्‍टु,” इत्‍तोर.
MAR 14:16 सिस्युल्कु अगटाल पेय्सि सहरते होत्‍तस्के, ओर बल्हा वेहतोर अल्‍हेने अगा मत्‍ता, पजा ओर अग्गेन दाटसि होनना पंडुगुना गाटो तयार कीतुर.
MAR 14:17 पोळ्‍द होत्‍तारिते, येसु ओना पन्‍नेंडु सिस्युल्कुनतोनि अगा वातोर.
MAR 14:18 ओर गाटो तिंचेके मत्‍तुर अस्‍के येसु, “नना मीक निजम वेहसेक मंतन, मीवा लोप्पोटाल वरोर नाकुन पीसि हींतोर, ओर नावातोनि उद्‍दिसि गाटो तिंचेके मंतोर,” इंचि ओर्कुन इत्‍तोर.
MAR 14:19 अद केंजसि ओर्क वेल्‍लेन दुक्‍कम अनपिस्ता, ओर वरोन पज्जो वरोर, “ओन नना अय्ते आयोन गदा?” इंचि येसुन पूसकियालय दल्‍गतुर.
MAR 14:20 अस्‍के येसु, “ओर पन्‍नेंड मंदिताल वरोर आंदुर, ओर नावातोनि गिन्‍नेते हारि मुळाह्‍चि तिनानोरे.
MAR 14:21 दर्मसास्‍त्रमते रासि मत्‍ताप, मनकना रूपमते पुटतोन नना अय्ते दांतने. गानि बोनाहेंदाल अय्ते नाकुन पीसि हियमळ जर्गंता, आ मनकल पुट्‍टाकोंटेन बेस आसि मनवळ,” इत्‍तोर.
MAR 14:22 अल्हा ओर तिंचेके मनेंकेने, येसु हारितुन येत्‍सि, पेनदुक दन्यवाद कीसि तुकडां कीतोर. अवुन सिस्युल्कुंक हीसि, “तिंट, इद नावा मेंदुल आंद,” इंचि इत्‍तोर.
MAR 14:23 मर्रा ओर, उंदि तालिते अंगुर पानकम येत्‍सि, पेनदुक दन्यवाद कीसि ओर्क हीतोर. अदुन ओर अंटोर उट्‍टुर.
MAR 14:24 पजा, “इद करारता नावा नेत्‍तुर आंद, इद नेत्‍तुर वेल्‍लेटोराहाटीं पोंगागोटमळ जर्गंता.
MAR 14:25 नना मीक निजम वेहांतन, पेनदा राज्येमते पूना तरिकाते अंगुर पानकम उनाना रोजुनदाका, मर्रा बस्‍केने अंगुर पानकम उन्‍नोन,” इंचि वेहतोर.
MAR 14:26 पजा ओर, पेनदा स्‍तुति कियाना उंदि पाटा पारसि, जय्‍तुन मराकुना गुट्‍टापोर्रो होत्‍तुर.
MAR 14:27 अस्‍के येसु ओर्कुन इल्‍हा इत्‍तोर. “गोर्रें कोहानोन नना हव्कंतन, मंदता गोर्रें बेंदव-हेके पायसि वित्‍तंतां, इंचि दर्मसास्‍त्रमते रासि मंता. अदुनहाटीं मिमेट अंटोर नाकुन होळसि वितकिर.
MAR 14:28 गानि, नना हासि मर्रा जीवाते तेदतंका, मीकन्‍ना मुन्‍ने गालिल एरियाते दांतन,” इत्‍तोर.
MAR 14:29 अस्‍के पत्रु, “अंटोर नीकुन होळसि वित्‍तिना गानि नना नीकुन होळसि वित्‍तोन,” इंचि येसुन इत्‍तोर.
MAR 14:30 अस्‍के येसु, “नना निजम वेहासेक मंतन, इय्याला नर्कळ्‍क रोंडु मल्कां गोगोड कूसाका मुन्‍ने, निमे नाकुन मूड मल्कां ‘एरपाट किय्योन’ इंचि इनकिन,” इंचि ओन इत्‍तोर.
MAR 14:31 गानि पत्रु इंका जोसने, “ओक्‍कला नाकु नीतोनि हामुर वायिना बेसे, नीकुन नना एरपाट किय्योन इंचि बस्‍केने इन्‍नोन,” इंचि इत्‍तोर. अद केंजसि, कळमतोरगुडा पत्रु इत्‍तापे इत्‍तुर.
MAR 14:32 अगटाल ओर गेतसेमनि इनना जेगातगा होत्‍तुर. अगा एवतस्‍के, “नना पारतना कियानादाका इग्‍गेने उद्‍दिसि मंटु,” इंचि ओना सिस्युल्कुन इत्‍तोर.
MAR 14:33 पजा पत्रुन, याकोबुन, योहानुन ओनतोनि ओतोर. येसु अद वेलाते वेल्‍ले दुक्‍कमते, सिम्मरा आतोर.
MAR 14:34 अस्‍के ओर्कुन, “नावा जीवा दांता बारे इत्‍ताप नाक वेल्‍ले दुक्‍कम आसेक मंता. मिमेट इग्‍गेने आगसि, तेल्‍विते मंटु,” इंचि इत्‍तोर.
MAR 14:35 इच्‍चुर मुन्‍ने होंचि बोकबोर्लें अर्सि पारतना कीतोर, “आया परते इद तकलिपता वेला तप्‍सि होन्‍नि.
MAR 14:36 बाबा! नावा बाबा, नीतोनि अन्‍नि आया परांता, इद तकलिपता वाटितुन लक्‍कु कीम. गानि नावा इच्‍चा मत्‍ताप आयो, नीवा इच्‍चा मत्‍तापे आयि,” इंचि इत्‍तोर.
MAR 14:37 पजा सिस्युल्कुनगा वासि हूळते ओर निद्रा होंचि मत्‍तुर. अस्‍के येसु सिमोन पत्रुन इल्‍हा इत्‍तोर. “सिमोनु, मंचिगा मींडसंतिरा? उंदि गंटामेडगुडा नातोनि तेल्‍विते मंदा परिना?
MAR 14:38 मिमेट पट्‍टुने अर्राकोंटा मननाहाटीं तेल्‍विते मंचि पारतना कीसेके मंटु, नना वेहताप कियालय मीवा आत्मा तयार मंता गानि मीवा मेंदुल कमजोर मंता,” इत्‍तोर.
MAR 14:39 अस्‍के येसु मरुंदि मल्का होंचि, मुन्‍ने कीतापे मर्रा पारतना कीतोर.
MAR 14:40 येसु मर्रा वासि हूळतस्‍के, ओर मंचि निद्रते मत्‍तुर. येसुंक बतल जवाब हियना ओर्क तेळिया हिल्‍ले.
MAR 14:41 येसु मूडोव मल्का ओरगा होंचि ओर्कुन इल्‍हा इत्‍तोर. “मिमेट इंदकेगुडा मींडसेक, आराम कीसेके मंतिरा? इद वेल्‍लेन आता, मनकना रूपमते पुटतोन नाकुन पापिर्कुना कय्‍दे पीसि हियना वेला एव्ता.
MAR 14:42 तेदाट, मनम दाकोम. नाकुन पीसि हियानोर दग्गेरेन एव्‍तोर,” इत्‍तोर.
MAR 14:43 येसु वळ्‍कसेकेन मंतोर, अच्‍चोटेन पन्‍नेंड सिस्युल्कुना लोप्पोटोर वरोर यहुदल वातोर. ओनतोनि पेर्मालोर्क, दर्मसास्‍त्रम कराहना गुरुल्क, यहुदि पेद्‍दाल्क लोहचीता लोकुल्‍कुना पेद्‍दा मंदा ओर कसेह्‍क, दुड्‍डुक पीसि वातुर.
MAR 14:44 येसुन पीसि हियानोर, “नना बोन अय्ते बुर्रांतनो, ओरे येसु आंदुर. ओन दोर्कापीसि जेगर्ताते ओम्टु,” इंचि मुन्‍नेन ओर्क उंदि चिन्‍ह वेह्‍चि मत्‍तोर.
MAR 14:45 अदुनहाटीं ओर वाता वायुडे येसुनगा होंचि, “गुरु!” इंचि ओन बुरतोर.
MAR 14:46 अस्‍के ओर ओनापोर्रो कय वाट्‍सि, ओन दोर्का पीतुर.
MAR 14:47 अच्‍चोटेन अगा दग्‍गेरा नित्‍तिसि मत्‍तोरागटाल वरोर ओना कसेर तेंडसि, पेद्‍दा पेर्माना वरोर दासुना केव नेम्मानाल हीतोर.
MAR 14:48 अस्‍के येसु ओर्कुन, “वरोन दोंगन पिय्‍यालय वाताप मिमेट कसेह्‍क, गुत्‍पां पीसि नाकुन पिय्‍यालय वातिरा?
MAR 14:49 नना अय्ते रोजे गुळिते कराहसेक मीतोनि मनुंदुन, अस्‍के नाकुन पिया हिल्‍लिर. गानि दर्मसास्‍त्रमते नावा बारेमते रासता पोल्‍लें पूरा आयाना इंचि, इल्‍हा जर्गता,” इत्‍तोर.
MAR 14:50 पजा ओना सिस्युल्क अंटोर ओन होळसि तेगा विततुर.
MAR 14:51 वरोर लेय्या मनकल ओना मेंदुल्क सिराप चादर हुटकुंचि येसुना पज्जो होंचेके मत्‍तोर. लोकुल्‍क ओनगुडा पीतुर,
MAR 14:52 गानि ओर चादर होळसिसि कुळ्केंगे वीततोर.
MAR 14:53 ओर येसुन पेद्‍दा पेर्माना लोन ओतुर. अगा अंटोर पेर्मालोर्क, यहुदि पेद्‍दाल्क, दर्मसास्‍त्रम कराहना गुरुल्क जमा आतुर.
MAR 14:54 गानि पत्रु लक्‍कुटाले येसुना पज्जो-पज्जो पेद्‍दा पेर्माना दारादाका होत्‍तोर. अगा सिपाइल्कुनतोनि तडमितगा सेका कासेक मत्‍तोर.
MAR 14:55 अगा पेद्‍दा पेर्मालोर आनि पंचादितोर अंटोर येसुंक हामुरता सिक्‍सा हियानाहाटीं, ओना विरोदमते तप्‍पुड गवाइ पहकतुर, गानि ओर्क उंदिगुडा तप्‍पुड गवाइ दोर्काहिल्‍ले.
MAR 14:56 बारित्‍ते येसुना विरोदमते वेल्‍लेटोरे आबद्‍दम गवाइ वेहतुर, गानि ओरा गवाइ वरोनद वरोंक कलिया हिल्‍ले.
MAR 14:57 अस्‍के इच्‍चुर लोकुल्‍क नित्‍तिसि, “मनकालोर दोह्‍ता गुळितुन कूलाह्‍चि, मूड रोजकुने मर्रा दोहंतन, गानि अद मनकालोर दोहतद आयो, इनानेंके मोमोट केंजतोम,” इंचि येसुना विरोदमते गवाइ हीतुर.
MAR 14:59 गानि इवनेगुडा वरोना गवाइ वरोंक कलिया हिल्‍ले.
MAR 14:60 अस्‍के पेद्‍दा पेर्मल नड्‍डुम नित्‍तिसि, “ईर नीकु विरोदमते बल्हा गवाइ हीसंतुर हूळा, निमे बतले जवाब हिय्‍यिना?” इंचि येसुन पूसकीतोर.
MAR 14:61 गानि ओर चुपचाप मत्‍तोर, बतले जवाब हिया हिल्‍लोर. अस्‍के मरुंदि मल्का पेद्‍दा पेर्मल येसुन, “निमे कदरगल्‍ला पेनदा मर्रि किरिस्‍तुन आंदिना?” इंचि पूसकीतोर.
MAR 14:62 अस्‍के येसु इत्‍तोर. “हो, ननाने आंदुन. आनि मनकना रूपमते पुटतोन नाकुन ताकतवर पेनदा तिना बाजुंक उद्‍दिसि मत्‍तद आनि मब्बु तेर्पेनतोनि वायानद मिमेट हूळकिर,” इत्‍तोर.
MAR 14:63 अस्‍के पेद्‍दा पेर्मल ओना कपडिं हराह्‍कुंचि, “मनाक इंका बतल गवाइ गावाले?
MAR 14:64 ईर पेनदा अपमानम कीतद मिमेट केंजतिरे गदा! अय्ते मिमेट बतल इंतिर?” इंचि पेर्मल इत्‍तस्के, ओर अंटोर, “ओर हामुर सिक्‍सालायक मंतोर,” इंचि इत्‍तुर.
MAR 14:65 अस्‍के इच्‍चुर लोकुल्‍क येसुनपोर्रो उस्‍कतुर, इंका इच्‍चुर बारे ओना कळ्‍कुन मुच्‍चिसि तंचेके, “निमे बविस्यवानि वेहानोनाते, नीकुन बोर तंतुर वेहा,” इंचि इत्‍तुर. अल्‍हेने कावेल कियानोरगुडा ओन सेंपापोर्रो तंतुर.
MAR 14:66 अव अन्‍नि आयानेंके पत्रु हिळु दाराते उद्‍दिसि मत्‍तोर, अस्‍के पेद्‍दा पेर्मानगा पासि कबळ कियानद उंदि मुरतळ वाता.
MAR 14:67 वासि, पत्रु तळमि सेका कासेक मत्‍तद हूळसि, “निमेगुडा नासरेत नाटेना येसुनतोनि मत्‍तिन गदा!” इंचि इत्‍ता.
MAR 14:68 गानि पत्रु अद पोल्‍लेतुन ओप्कुना हिल्‍लोर. “निमे बतल इंचंतिनो, नाक तेळियो, नना एरपाट किय्योन,” इंचि पलाता गलमातगा होत्‍तोर, अच्‍चोटेन गोगोड कूसता.
MAR 14:69 अद पासि कबळ कियाना मुरतळ पत्रुन हूळसि, “ईर तप्‍पाकोंटा ओरा लोप्पोटोरे वरोर आंदुर,” इंचि अद मर्रा उंदि मल्का अगा नित्‍तिसि मननोरतोनि इत्‍ता.
MAR 14:70 गानि पत्रु मर्रा ओप्कुना हिल्‍लोर. गडसेम मत्‍तस्के अगा नित्‍तिसि मत्‍तोर पत्रुन, “निजमे, निमे ओरा लोप्पोटोने आंदिन, बारित्‍ते निमेगुडा गालिल राज्येमतोन आंदिन,” इंचि इत्‍तुर.
MAR 14:71 अस्‍के पत्रु ओर्कुन, “नना ओट्‍टु तिंचि वेहसेक मंतन, नावा पोल्‍ले आबद्‍दम आते नाकु सापनेम दल्‍गि! मिमेट बोना बारेमते वळ्‍कसंतिरो, आ मनकन नना निजम एरपाट किय्योन,” इंचि इत्‍तोर.
MAR 14:72 अल्हा इत्‍ता इनुडे गोगोड रोंडो मल्का कूसता. येसु पत्रुंक मुन्‍नेने वेह्‍चि मत्‍तोर, “गोगोड रोंड मल्कां कूसाका मुन्‍ने, निमे नाकुन मूड मल्कां एरपाट किय्योन इंतिन,” इंचि. आ पोल्‍ले पत्रुंक मति वाता. अस्‍के वेल्‍ले दुक्‍कमते अळतोर.
MAR 15:1 बल्हा अय्ते पंग आता अल्हा पेद्‍दा पेर्मालोर, यहुदि पेद्‍दाल्क, दर्मसास्‍त्रम कराहना गुरुल्क आनि पूरा पंचादितोर उंदि निरनायम कीसि, येसुन दोह्‍चि वाट्‍सि ओसि, पिलातुस राज्यपालुंक अप्पजेपतुर.
MAR 15:2 पजा पिलातुस, “निमे यहुदिल्कुना राजाना?” इंचि येसुन पूसकीतोर. “निमे इत्‍तापे” इंचि येसु जवाब हीतोर.
MAR 15:3 अस्‍के पेद्‍दा पेर्मालोर ओनापोर्रो वेल्‍लेन पोल्‍लेना दोसेल्क दोसतुर.
MAR 15:4 अदुनहाटीं पिलातुस येसुन मर्रा पूसकीतोर, “हूळा ओर नीवा पोर्रो बच्‍चुंगो तप्पुक दोस्सेक मंतुर, निमे बतले जवाब हिय्‍यिना?” इंचि इत्‍तोर.
MAR 15:5 गानि येसु बतले जवाब हिया हिल्‍लोर, इंचि पिलातुस इचंत्रम आतोर.
MAR 15:6 दाटसि होनना पंडुगुना रोजुने, लोकुल्‍कुंक इस्‍टमातोन एटा वरोन जेलनाल होळ्‍सियाना रिवाज मत्‍ता.
MAR 15:7 बरब्बल इनना वरोर मनकल ओना दंटातोरतोनि जेलने मत्‍तोर. ओर ओना दंटातोरतोनि कलियसि, बचुटूरो लोकुल्‍कुन हव्‍किसि मत्‍तोर.
MAR 15:8 लोकुल्‍क पिलातुसनगा वासि, “एटा मावाहाटीं बल्हा कियिंदिनो अल्‍हेने कीम,” इंचि इत्‍तुर.
MAR 15:9 पेर्मालोर्कुंक येसुनपोर्रो कळ्‍क पोतताहेंकेन ओन तच्‍चि नाक अप्पजेपतुर इंचि पिलातुस एरपाट कीकुत्‍तोर. अदुनहाटीं पिलातुस ओर्कुन, “मीवा बतल विचारम मंता, यहुदिल्कुना राजान मीहाटीं होळसीकाना?” इंचि पूसकीतोर.
MAR 15:11 गानि पेर्मालोर्क, “मावाहाटीं बरब्बने होळ्‍सीम इंचि मिमेट इंटु,” इल्‍हा लोकुल्‍कुन एक्‍किस्तुर.
MAR 15:12 मर्रा पिलातुस ओर्कुन, “अय्ते मिमेट यहुदिल्कुना राजाल इंचि बोनय्ते इंतिर, ओन नना बतल कीकन,” इंचि पूसकीतोर.
MAR 15:13 अस्‍के, “ओन क्रुसुनपोर्रो वेलाड वाटा!” इंचि ओर वरगेयतुर.
MAR 15:14 अस्‍के पिलातुस, “बारि, ईर बतल तप्पु कीतोर?” इंचि ओर्कुन पूसकीतोर. गानि ओर इंका जोरते, “ओन क्रुसुनपोर्रो वेलाड वाटा!” इंचि वरगेयतुर.
MAR 15:15 पिलातुसुंक लोकुल्‍कुन कूस कियाना मत्‍ता इंचि ओराहाटीं बरब्बन होळसिसि येसुन बारे पोट्‍टे देब्बां तंचि क्रुसुनपोर्रो वेलाड वाटालय सिपाइल्कुना कय्‍दे अप्पजेपतोर.
MAR 15:16 पजा सिपाइल्क येसुन पीसि राज्यपालना पिरटोरियम इनना किल्‍लाते ओतुर. अगा सिपाइल्कुना पूरा गेंगुन केय्‍सि जमा कीतुर.
MAR 15:17 ओर येसुंक नेडि पंडि रंगुना कोट केराह्‍चि, हाह्कुना वेलितुन किरिटम कीसि ओना तल्‍लक दोसतुर.
MAR 15:18 अस्‍के ओर, “यहुदिल्कुना राजांक जय!” इंचेके ओन्क जोहार कीतुर.
MAR 15:19 पजा ओर ओना तल्‍लापोर्रो दुड्‍डुने तंतुर, ओनपोर्रो उस्‍कतुर, ओर ओना मुन्‍ने वंगिस जोहार कीतुर.
MAR 15:20 ओन इरगा कारेड्‍डाल्‍क कीतारित्‍ते, ओन्क केराह्‍ता नेडि पंडि रंगुना कोट तेंडसि, ओना कपडिं ओन्‍के केराहतुर. अस्‍के ओन क्रुसुनपोर्रो वेलाड वाटालय पलाते ओतुर.
MAR 15:21 सिपाइल्क येसुन पीसि पलाते होननेंके, सिकंदर आनि रुपुसना बाबाल सिमोन इनानोर नेलिनाल अदे हर्रि पीसि वासेक मत्‍तोर. ओर कुरेनि सहरतोर मत्‍तोर. सिपाइल्क ओन वेराहचि येसुना क्रुस कांजा वेहतुर.
MAR 15:22 ओर गोलगोता इनना जागातगा येसुन पीसि वातुर. गोल्‍गोता इत्‍ते तल्‍ला बोरसेम इंचि अर्तम.
MAR 15:23 अगा ओर, मुर्र इनना मत्‍तु अंगुर पंडिना पानकमते कल्‍पिसि येसुंक उनालय हीतुर, गानि ओर उना हिल्‍लोर.
MAR 15:24 अस्‍के ओन क्रुसुनपोर्रो वेलाड वाटतुर. पजा ओना कपडिन बद बोर एताना इंचि सिट्‍टिं वाट्‍सि पंचकुत्‍तुर.
MAR 15:25 येसुन क्रुस पोर्रो मोल्‍लाने कोह्‍किसि वेलाड वाटतस्के हक्‍केटां तोम्मिद एगिस मत्‍तां.
MAR 15:26 ईर “यहुदिल्कुना राजाल” आंदुर इंचि, उंदि बल्‍लापोर्रो कसूर रासि ओना तल्‍लातगा क्रुसुंक तासतुर.
MAR 15:27 येसुनतोनि इंका इव्वुर दोंगाल्कुन, तिना बाजुंक वरोन, डेमा बाजुंक वरोन क्रुसकुन पोर्रो वेलाड वाटतुर.
MAR 15:28 इदुनहेंदाल दर्मसास्‍त्रमते रासि मत्‍ताप, “ओर दोंगाल्‍कुना लेक्‍काते वातोर” इद पोल्‍ले पूरा आता.
MAR 15:29 अद हर्रि पीसि होनानोर-वायानोर तल्‍लां ऊपसेके, “ओ! गुळितुन कूलाह्‍चि मूड रोजकुने दोहानोन, क्रुसताल रेय्‍सि निमे नीवा जीवातुन पिसागोटकुन,” इंचि अपमानम कियुंदुर.
MAR 15:31 अल्‍हेने पेर्मालोर्क, दर्मसास्‍त्रम कराहना गुरुल्कगुडा, “ओर इंकावरोन पिसागोटतोर गानि ओनद ओरे पिसागोटकुना परसेके हिल्‍लोर.
MAR 15:32 इस्राएलतोरा राजाल किरिस्‍तु क्रुसुनपोर्रोटाल हिळु रेय्‍सि वायिरकांटी, अस्‍के मोमोट हूळसि, ईनपोर्रो विस्वासम ईरा परकोम,” इंचेके ओना कारेड्‍डाल्‍क कीतुर. येसुना पक्‍काते क्रुसुंक वेलाड वाट्‍सि मत्‍ता दोंगाल्कगुडा ओना अपमानम कीतुर.
MAR 15:33 अस्‍के पिय्यटा पन्‍नेंड एगानस्‍केटाल अय्ते, मूड एगनदाका पूरा बूमिअंता हीकट आता.
MAR 15:34 पिय्यटा मूड एगनेंके येसु अळसेके जोरसे वरगेयसि, “एलि, एलि, लमा सबकतनि?” इंचि इत्‍तोर. इत्‍ते, “ना पेनदुना, ना पेनदुना निमे नाकुन बारि होळसीतिन?” इंचि इत्‍तोर.
MAR 15:35 अस्‍के अगा नित्‍तिसि मत्‍तुर इच्‍चुर लोकुल्‍क, “हुळाट! ओर एलियान केयसंतोर,” इंचि इत्‍तुर.
MAR 15:36 ओरा लोप्पोटाल वरोर विच्‍चि होंचि स्पंजतुन पुल्‍लाटा अंगुर पानकमते मुळ्‍हाचि, दुड्‍डु कोस्‍सक तासिसि ओनकु उनालय हीतोर. हीसि, “आगा! एलियाल ओन हिळु रेहालय वांतोरा वायोरा? हूळकोम,” इंचि इत्‍तोर.
MAR 15:37 अस्‍के येसु पेद्‍दा आवाजते वरगेयसि जीवा होळ्‍सीतोर.
MAR 15:38 अस्‍के गुळिता परदा पोर्रोटाल हिळुदाका हर्सि रोंडु तुकडां आता.
MAR 15:39 अस्‍के नूर मंदि सिपाइल्कुना पोर्रो मनना अदिकारि येसुना क्रुसता मुन्‍नेने नित्‍तिसि मत्‍तोर. ओर येसु वरगेयसेके जीवा होळ्‍सनद हूळतोर, हूळसि, “ईर निजमे पेनदा मर्रि आंदुर,” इंचि इत्‍तोर.
MAR 15:40 अगा मगदलेनि नाटेना मरियम, सिन्‍ना याकोब, योसेसना यावल मरियम, सलोमि इव मुर्ताह्कगुडा लक्‍कुटाले नित्‍तिसि हूळसेक मत्‍तां.
MAR 15:41 येसु गालिल एरियाते मत्‍तस्के, इव मुर्ताह्क ओना पज्जो होंचि सेवा कियुंदुं. इवे आयाका ओना पज्जो येरुसलेमदाका वातव इंका वेल्‍लेन मुर्ताह्क मत्‍तां.
MAR 15:42 नोमकेन रोजुना मुन्‍नेटा रोजु येसु हातोर, अद नोमकेमता तयारिता रोजु आंदु. अस्‍के पोळ्‍दु होंचि मत्‍ता.
MAR 15:43 अरिमताइ नाटेनोर योसेपु इनानोर वरोर मत्‍तोर. ओर यहुदिल्कुना पंचादिता वरोर मेंबर मत्‍तोर. लोकुल्‍क ओन्क कदर हियुंदुर. ओर पेनदा राज्येम बस्के वायार इंचि एदुर हूळसेक मनुंदुर. ओर दैरनेमते पिलातुसनगा होंचि, “येसुना पीनगुन नाक हीम,” इंचि तल्कतोर.
MAR 15:44 अस्‍के पिलातुस, “अरे! इच्‍चोन बिराना हातोरा” इंचि इचंत्रम आतोर. पजा नूर मंदि सिपाइल्कुना पोर्रो मनना अदिकारिन केय्‍सि, “येसु हातोरा?” इंचि पूसकीतोर.
MAR 15:45 येसु हातोर इंचि ओर अदिकारि वेहतस्के, ओना पीनगुन ओया परांतिन इंचि पिलातुस योसेपुन इत्‍तोर.
MAR 15:46 अस्‍के योसेपु उंदि पूना कपडि अस्तोर. येसुन क्रुसतगटाल हिळु रेहचि, अद कपडितुन हुटतोर. हुटसि, बंडातुन तुलाह्‍चि तयार कीता बोंदाते दोसतोर. पजा दाना बोंगाकु उंदि पेद्‍दा बंडा अड्‍डम दोसतोर.
MAR 15:47 येसुन बोंदाते दोसता जेगातुन मगदलेनि नाटेना मरियम, योसेसुना यावल मरियम इव हूळतां.
MAR 16:1 नोमकेमता रोजु मारतारित्‍ते, मगदलेनि नाटेना मरियम, याकोबुना यावल मरियम आनि सलोमि इव येसुना पीनगुंक होकालय, गमागमा गब्‍बु वायानव वस्‍तुक अस्तां.
MAR 16:2 वारमता मोदाटा रोज अय्तारम हक्‍केरेने पोळ्‍दु पेय्सता पेय्सुळे बोंदातगा होत्‍तां.
MAR 16:3 अव होननेंके, “अद बोंदक अड्‍डम दोसता बंडातुन मनाहाटीं बोर गुळाहनुर?” इंचि अवुनद अवे वळ्कसेक होत्‍तां.
MAR 16:4 अगा एवसि हूळते, अच्‍चोन पेद्‍दा बंडा गूळसि मत्‍तद अवुंक दिसता.
MAR 16:5 अव बोंदाते होळियतस्‍के वरोर लेय्या मनकल तेल्‍लाटा कपडिं केर्सि तिना बाजुंक उदिद्‍स मत्‍तद हूळसि अव वेरियतां.
MAR 16:6 ओर अवुन इल्‍हा इत्‍तोर. “वेरियमट, क्रुसुनपोर्रो वेलाड वाट्‍सि हव्‍कता, आ नासरेत नाटेना येसुन मिमेट पह्कसेक मंतिट, ओर इग्‍गे हिल्‍लोर, जीवाते तेदतोर. इद हुळाट, ओना पीनगु इरता जेगा.
MAR 16:7 ओर मीक वेहता परकारम, मीकन्‍ना मुन्‍नेने गालिल एरियाते होंचेक मंतोर, अदुनहाटीं मिमेट होंचि ओना सिस्युल्कुंक आनि पत्रुंक वेहाट, अगा ओर मीकु दिस्‍सानुर,” इत्‍तोर.
MAR 16:8 अव मुर्ताह्क इरगा वेरियसि वनकालय दल्‍गतां. अदुनहाटीं अव बोंदातगाटाल पलाते पेय्सि विच्‍चि, आ वेर्रेक बोर्क बतल वेहा हिल्‍लें.
MAR 16:9 वारमता मोदाटा रोज इत्‍ते अय्तारम रोज, येसु हामुरताल जीवाते तेदतोर. तेदता पजा मोट्‍टा मोदाला मगदलेनि नाटेना मरियमुंक दिसतोर. इदे मरियमुनगटाल एडुं देय्याल्कुन येसु गेदमिस मत्‍तोर.
MAR 16:10 अद अगटाल पेय्सि, येसुनतोनि मत्‍ता सिस्युल्कुनगा होत्‍ता. ओर वेल्‍लेने दुक्‍कमते अळसेके मत्‍तुर, ओर्क येसुना बारेमते वेहता.
MAR 16:11 येसु जीवाते तेदतोर, अद येसुन हूळता इत्‍ता पोल्‍लेतुन ओर केंजतुर गानि विस्वासम किया हिल्‍लुर.
MAR 16:12 अद आता पजा, ओरा लोप्पोटाल इव्वुर येरुसलेमताल उंदि नार होंचेके मननेंके, ओर्क वेरे रूपमते येसु दिसतोर.
MAR 16:13 ओर पज्जो मल्सि होंचि, कळमतोर्कुंक इद पोल्‍ले वेहतुर, गानि ओर ईरा पोल्‍लेन विस्वासम किया हिल्‍लुर.
MAR 16:14 पजा पदाकोंडु मंदि सिस्युल्कु उद्‍दिसि गाटो तिंचेके मननेंके येसु ओर्क दिसतोर. “नना जीवाते तेदतन इंचि वेल्‍लेटुर मीक वेहिनागानि मिमेट बारि विस्वासम किया हिल्‍लिर? मीवा मनसुक बंडालेसीं मारियतां,” इंचि तेराहतोर.
MAR 16:15 पजा ओर्कु इल्‍हा वेहतोर. “मिमेट होंचि दुनियाता अन्‍नि देसेल्‍कुना लोकुल्‍कुंक बेसता कबुर प्रचार कीम्‍टु.
MAR 16:16 बोर अय्ते विस्वासम कीसि, बापतिस्मा एतंतोर ओनके मुक्‍ति दोर्कंता, गानि बोर अय्ते विस्वासम किय्योर, ओनकु पेन सिक्‍साता आदेस हिय्यार.
MAR 16:17 नाकुन विस्वासम कियानोनगा इव चिन्‍हां मनंतां, ओर नावा पोरोलते देय्याल्कुन गेदमानुर, वेरे-वेरे बासाने वळ्कानुर,
MAR 16:18 तरासकुन पियानुर, बदे विसम वस्तु उनिनागानि ओर्क बतल आयो, बिमार्क मत्‍तुरा पोर्रो ओरा कय्‍क इरते, ओर बेस आयानुर,” इंचि वेहतोर.
MAR 16:19 येसु सामि ओना सिस्युल्कुनतोनि इव पोल्‍लें वेहता पजा, पेन ओन स्वर्गमते तेहकुत्‍ता. अस्‍के ओर दाना तिना बाजुंक उद्तोर.
MAR 16:20 पजा येसुना सिस्युल्कु नालुं-मूलां होंचि अन्‍नि जेगाने ओना बारेमते प्रचार कीतुर. सामि ओरतोनि मंचेके कबळ कियुंदुर. कबळ कियनेंके जर्गना चिन्‍हाना हेंदाल सामि ओना पोल्‍ले निजम इंचि रुजुव कियुंदुर. आमेन.
LUK 1:1 तियपिलुस सायाब, मावा नड्‍डुम येसु कीता कबाह्‍कुना बारेमते वेल्‍लेन लोकुल्‍क रासालय कोसिस कीतुर. बोर अय्ते जर्गुता आ गटनन कळ्‍कुने हूळतुर आनि पेनदा बेसता कबुरतुन कराहतुर, ओरे माकु ई पोल्‍लें एव्विचि हीतुर. माकु एव्ता पोल्‍लेन ननागुडा बेस हदविसि, परमेरका कीसि तेळियागोटकुत्‍तन. अदुनहाटीं इव अन्‍नि पोल्‍लेन बेस उंदान पज्जो उंदि नीकु रासि लोहना इंचि नाकु अनपिस्ता. दीनहेंदाल निमे बतल अय्ते करियतिनो, अदे निजम इत्‍ता संगति नीकु तेळियंता.
LUK 1:5 यहुदिया एरियापोर्रो पेद्‍दा हेरोद राजाल राज्येम कियना कालमते, जकर्याह पोरोलता यहुदि जातितोर वरोर पेर्माल मत्‍तोर. ओर आबिया इनना पेर्मालोरा गेंगुना मेंबर मत्‍तोर. जकरयाहनलेह्का ओना मुत्‍तो एलिसिबालगुडा हारून इनना पेर्माना वंसमतदे मत्‍ता.
LUK 1:6 ओर इव्वुरगुडा पेनदा नदरते नीतिमंतुल्क मत्‍तुर आनि सामि वेहता अन्‍नि नियमकु आनि आदेसकुन पीसि दोसेम हिलाकोंटा ताकुंदुर.
LUK 1:7 गानि एलिसिबाल गोडमुर्रादि मत्‍ता. अल्‍हेने ओर इव्वुर वेल्‍लेन मातरालोर आसि मत्‍तुर अदुनहाटीं ओर्कु पिलाल्क आया हिल्‍लुर.
LUK 1:8 बस्के अय्ते जकरयाना गेंगुनोरद येरुसलेम सहरते मनना गुळिते सेवा कियना वेला वाता, अस्‍के ओर अगा पेर्माल इंचि पेनदा सेवा कीसेक मत्‍तोर.
LUK 1:9 पेर्मालोरा रिवाज मत्‍ताप सिट्‍टिं वाटसि पेनदा गुळिते गुगलेम वाटालय जकरयान पेरतुर.
LUK 1:10 ओर गुगलेम वाटना वेलाते पलाते जमा आता अंटोर लोकुल्‍क पारतना कीसेक मत्‍तुर.
LUK 1:11 अच्‍चोटेन ओन्क उंदि पेनदा दूता, गुगलेम वाटना गद्‍देता तिना बाजुंक नित्‍तिसि मत्‍तद दिसता.
LUK 1:12 जकर्याहल पेनदा दूतातुन हूळसि उल्‍किसि अर्सि इरगा वेरियकुत्‍तोर.
LUK 1:13 पजा पेनदा दूता ओन, “जकर्याह, वेरियमा. पेन नीवा पारतनातुन केंजता. नीवा मुत्‍तो एलिसिबाल नेला तपसि वरोर पेडन कनंता, निमे ओना पोरोल योहान इंचि इर्रा.
LUK 1:14 पेडल पुटताहाटीं नीकु अय्ते वेल्‍लेन कुसि आंता. अचोने आयका वेल्‍लेन लोकुल्‍कुंक इंका आनंदम आंता.
LUK 1:15 बारित्‍ते आ पेडल सामिना नदरते पेद्‍दोर आंतोर. ओर अंगुर पंडिना पानकम आयि इंका वेरे बदे कल्‍लु उन्‍नोर. अचोने आयका यावाना पीटे मननास्केटाले ओर पेनदा पवित्र आत्माते निंडसि मनंतोर.
LUK 1:16 मीवा वेल्‍लेन इस्राएल लोकुल्‍कुन ओर मीवा पेनदाहेके तिरहंतोर.
LUK 1:17 ओर, बाबुर्कुना मनसुन मर्क-मियाह्कुनहेके तिरहंतोर. पेनदा पोल्‍लें केंजवोर्कुन नीतिमंतुल्‍कुना तेल्वि दोर्किच्‍कुना वेहंतोर. सामि मीवा नड्‍डुम वायका मुन्‍ने सामिनाहाटीं लोकुल्‍कुन तयार कियालय ई पेडल एलियाहनगा मत्‍ता गुनम आनि ताकततोनि सामि वायना कबुरतुन सामि वायका मुन्‍नेन वेहांतोर,” इंचि इत्‍ता.
LUK 1:18 पजा, “नना अय्ते मातरन आतन. इंका नावा मुत्‍तोगुडा वेल्‍लेन मातरि आता. अय्ते निमे इत्‍ता पोल्‍ले निजम आयार इंचि नाकु बल्हा तेळियार?” इंचि जकर्याहल पेनदा दूतातुन पूसकीतोर.
LUK 1:19 अस्‍के पेनदा दूता, “निमे नाकुन बोर इनकुंचंतिन? नना गब्रिएल दूतातुन आंदुन. नना पेनदा मुन्‍ने नित्‍तिसि मनानदुन आंदुन. नीवातोनि वळ्‍कानाहाटीं, इद बेसता कबुर वेहनाहाटीं पेने नाकुन लोहता.
LUK 1:20 नना वेहता पोल्‍लें अय्ते वेला वातस्के निजम आयानुंगे, अयना निमे नावा पोल्‍लेपोर्रो विस्वासम इर्रा हिल्‍लिन. अदुनहाटीं नावा पोल्‍ले निजम आयानदाका नीकु वळका वायो, निमे मूकन आसि मनांतिन,” इंचि वेहता.
LUK 1:21 इदंता जर्गनेंके पलाते नित्‍तिसि पारतना कीसेक मत्‍ता लोकुल्‍क इचंत्रम आसि, जकर्याहल गुळिता लोप्पो इच्‍चोन आलसेम बारि कीसंतोर, इंचेके एदुर हूळसेक मत्‍तुर.
LUK 1:22 पजा जकरयाल गुळिताल पलाते वातोर. गानि ओर लोकुल्‍कुनतोनि वळका पराहिल्‍लोर. अस्‍के लोकुल्‍क, “गुळिता लोप्पो ईर बतलो दर्सनम हूळतोर बारे! अदुनहाटीं वळका पर्राका सय्गें कीसंतोर,” इंचि इनकुत्‍तुर.
LUK 1:23 इल्‍हा ओना सेवा कियना रोजकु मारतां, अस्‍के ओर ओना लोन होत्‍तोर.
LUK 1:24 कोन्‍नि रोजकु आता पज्जो, ओना मुत्‍तो एलिसिबाल नेला तपता. नेला तपतस्के अद हेय्युं नेल्कुनदाका लोताल पलाते पेय्साकोंटा लोप्पेन मत्‍ता.
LUK 1:25 अस्‍के अद, “नाकुन गोडमुर्रद इंचि लोकुल्‍क कव्वुंदुर. गानि लोकुल्‍कुना नड्‍डुम नावा सिग्गु होनानायो इंचि सामि नाकु इल्‍हा सहायम कीतोर,” इंचि इत्‍ता.
LUK 1:26 एलिसिबाल नेला तप्‍सि हारुं नेल्क आसंतां. अवे तूकुल्कुने पेन, गब्रिएल इनना दाना दूतातुन गालिल एरियाता नासरेत पोरोलता सहरते मनना,
LUK 1:27 उंदि मरमिं आयवा पोरिनगा लोहता, आ पोरिन पोरोल मरियम. आ पोरिनद दाविद राजाना वंसमते पुटता योसेप इनना वरोर मनकनतोनि एर्रा बोट्‍टु आसि मत्‍ता.
LUK 1:28 आ गब्रिएल दूता दाना दग्गेर्क होंचि दानतोनि, “पेनदा आसिर्वाद दोर्कुता बाई, नीकु जोहार! पेन नीकु तोळ मंता,” इंचि इत्‍ता.
LUK 1:29 पेनदा दूताता पोल्‍ले केंजसि मरियम वेल्‍लेन परेसान आता. ई जोहारता अर्तम बतल आयावच्‍चु, इंचि इचंत्रमते अरता.
LUK 1:30 अस्‍के पेनदा दूता दान, “मरियम, वेरियमा! पेन नीपोर्रो दया कीता.
LUK 1:31 केंजा! निमे नेला तप्पंतिन आनि वरोर मांड्‍सा पेडन कनांतिन. निमे ओना पोरोल येसु (इत्‍ते पेन पिसागोटंता) इंचि दोस्‍सा.
LUK 1:32 ओन अंटोर ‘अन्‍निटकन्‍ना पेद्‍दा पेनदा मर्रि’ इंचि इनानुर, इल्‍हा ओर पेद्‍दा पोरोलता मनकल आयानुर. ओना वंसमता पेद्‍दा मनकल दाविद राजानलेसीं पेन ओनगुडा राजाल कींता.
LUK 1:33 अचोने आयका ओर इस्राएल लोकुल्‍कुनपोर्रो राज्येम कींतोर. इंका ओना राज्येम बस्‍केने मारो,” इंचि इत्‍ता.
LUK 1:34 अस्‍के मरियम पेनदा दूतातुन, “नावां अय्ते मरमिं इंका आया हिल्‍लें, नाकु मुय्दोगुडा हिल्‍लोर. अय्ते मरि इद बल्हा निजम आयार?” इंचि पूसकीता.
LUK 1:35 अस्‍के पेनदा दूता इल्‍हा इत्‍ता, “पेनदा पवित्र आत्मा नीवा पोर्रो वांता आनि अन्‍निटकन्‍ना पेद्‍दा पेनबाबाना ताकतहेंदाल नीवा पोर्रो उंदि नीडा अर्रंता, अस्‍के निमे नेला तप्पंतिन. दानहाटीं नीकु पुट्‍टना पेडल पवित्र मनांतोर, ओन ‘पेनदा मर्रि’ इंचि इंतुर.
LUK 1:36 केंजा! नीवा जीवातद एलिसिबा मातिरगुडा नेला तप्‍सि मंता. अंटोर लोकुल्‍क दान गोडमुर्रद इंचि इनुंदुर, गानि अद नेला तप्‍सि हारुं नेल्क आसंता.
LUK 1:37 पेन अन्‍नि कबाह्‍क किया पर्रंता, अद किया परवद बतले हिल्‍ले,” इत्‍ता.
LUK 1:38 अस्‍के मरियम, “नना अय्ते पेनदा सेवा कियनदुन आंदुन, निमे इत्‍तापे नाकु जर्गिकांटी,” इंचि इत्‍ता. पजा पेनदा दूता अगटाल पेय्सि होत्‍ता.
LUK 1:39 पजा अवे रोजकुने मरियम बतल कीता इत्‍ते, बिराना तयार आसि गाबरते गुट्‍टान लोप्पो मनना यहुदिया एरियाता उंदि नाटे होत्‍ता.
LUK 1:40 नाटे एवतस्‍के अद जकर्याहना लोन होंचि एलिसिबांक जोहार कीता.
LUK 1:41 मरियम वळकुता पोल्‍लेतुन केंजसि एलिसिबाना पीटे मत्‍ता पिंडेम मेसुलता, अस्‍के एलिसिबाल पवित्र आत्माते निंडिस होत्‍ता.
LUK 1:42 निंडिस होंचि अद पेद्‍दा आवाजते, “अन्‍नि मुरताह्कुंकन्‍ना निमे एक्‍को आसिर्वाद दोर्कुता मुरताटुन आंदिन मरियम! अल्‍हेने नीवा पीटे मनना पिंडेमगुडा वेल्‍लेन आसिर्वाद दोर्कुतद आंद.
LUK 1:43 नावा सामिना यावल नाकु कलियालय वायमळ इत्‍ते गम्मत पोल्‍ले आयो. इच्‍चोर वेल्‍ले कदर नाकु बगाटाल दोर्कुता?
LUK 1:44 हूळा! नीवा अल्किर केंजता केंजुडे नावा पीटे मत्‍ता पिंडेम कुसिते मेसुलता.
LUK 1:45 इंका निमे पेन वेहता पोल्‍लेतुन निजम आयि इंचि विस्वासम कीतिन, अदुनहाटीं निमे वेल्‍लेन आसिर्वाद दोर्कुतदुन आंदिन,” इंचि एलिसिबाल इत्‍ता.
LUK 1:46 पजा मरियम इल्‍हा इनालय दल्‍गता: “नना नावा मनसुनाल पेनदुन तल्‍सकुंतन.
LUK 1:47 नाकुन पिसागोटना पेन नावा आत्माकु कुसि हीता.
LUK 1:48 नना दाना उंदि सिन्‍ना दासिदान आंदुन, अयना पेन नावापोर्रो दाना दया हुपिस्‍ता. हूळा! इंदकेटाल पीळि-पीळिना अंटोर लोकुल्‍क, नाकुन, ‘पेनदा आसिर्वाद दोर्कुतद,’ इंचि इनानुर.
LUK 1:49 बारित्‍ते अन्‍निटकन्‍ना पेद्‍दा पेन नावाहाटीं, पेद्‍दा-पेद्‍दा कबाह्‍क कीता. दानद पोरोल पवित्रमाता पोरोल आंद.
LUK 1:50 दानकु वेरियसि दाना कदर कीसेके ताकानोरपोर्रो, दाना दया पीळि-पीळिनदाका मनंता.
LUK 1:51 अद दाना ताकत हुपिस्‍ता, गर्रा मत्‍ता लोकुल्‍कुन, ओरा विचाराल्कुन पीसि हिके-हेके पायिस्ता.
LUK 1:52 राज्येम कियानोर्कुन, ओरा राजगद्‍दे पोर्रोटाल अद हिळु रेहता. कदर हिलवोर्कुन बारे पेद्‍दा कीता.
LUK 1:53 हिल्वोंक गावाले मत्‍तव हीसि समादानम कीता. सिरमंत लोकुल्‍कुन बारे उत्‍ता कय्‍क लोहता.
LUK 1:54 अद मना एनकटा पेद्‍दाल्कुंक हीता पोल्‍ले परकारम, दाना सेवा कियना इस्राएल लोकुल्‍कुंक सहायम कीता. इत्‍ते अब्राहाम आनि ओना वंसमतोरपोर्रो, बस्‍केळ्‍क दया कियानदुन मति इरता,” इंचेके मरियम पाटा पारता.
LUK 1:56 इल्‍हा मरियम एलिसिबानगा मूड नेलकु मत्‍ता. पजा दाना लोन अद होत्‍ता.
LUK 1:57 एलिसिबांक नेलां निंडिसि अद पेडन कंता.
LUK 1:58 दानकु मर्रि पुटतोर इंचि दाना पक्‍का पीसि मत्‍ता लोहकुनोर्क, जीवातोर्क तेळियता अस्‍के, पेन दानपोर्रो वेल्‍लेन दया कीता, इंचि दानातोनि अंटोरगुडा वेल्‍लेन कूस आतुर.
LUK 1:59 आ पेडल एनमिदि रोजकुनोर आतस्के ओना कतना कियनाहाटीं ओर अंटोर वातुर. वासि आ सिन्‍ना पेडाना पोरोल ओना बाबोना पोरोल पोर्रोटाल जकर्याह इंचि दोस्‍सनद मत्‍ता.
LUK 1:60 गानि पेडाना यावल मात्रम, “मन्‍नि, ई पेडन पोरोल ‘योहान’ इंचि दोसगोम,” इत्‍ता.
LUK 1:61 अस्‍के दान ओर अंटोर, “निजमे गानि, मीवा जीवातोरा लोप्पो ई पोरोलतोर बोरे मनकल हिल्‍लोर गदा,” इंचि इत्‍तुर.
LUK 1:62 पजा ओर ओना बाबान सय्गें कीसि, “निमे ई पेडन पोरोल बतल इर्रांतन इंचि इनकुंचंतिन?” इंचि पूसकीतुर.
LUK 1:63 अस्‍के आ पेडाना बाबाल रासालय उंदि पाटि तल्कतोर आनि, “ओना पोरोल योहान आंद” इंचि रासतोर. अस्‍के रासतदुन हूळसि अंटोर्क इचंत्रम आता.
LUK 1:64 अस्‍केन जकरयांक तोड्‍डि वाता. अस्‍के ओर वळ्कसेक पेनदा स्‍तुति कियालय दल्‍गतोर.
LUK 1:65 अगा पकापीसि मत्‍तोर अंटोर इरगा वेरियतुर. इद संगति यहुदिया एरियाता गुट्‍टन पीसि मत्‍ता नाहकुने तेळियसि होत्‍ता.
LUK 1:66 ई संगति केंजता हरेक मनकल विचारम कीसि, “ई पेडल मुन्‍ने ताकसि बतल आयानुर?” इंचि इनुंदुर. बारित्‍ते आ पेडन पोर्रो निजम पेनदा कय मत्‍ता.
LUK 1:67 पजा आ पेडाना बाबो जकर्याहल पवित्र आत्माते निंडिसि होंचि, इल्‍हा बविस्यवानि वेहालय दल्‍गतोर.
LUK 1:68 “मावा इस्राएलतोरा पेनदुन नना तल्‍सकुंतन, बारित्‍ते अद दाना लोकुल्‍कुंक, सहायम कियालय वासि ओर्कु मुक्‍ति हीता.
LUK 1:69 पेन दाना पवित्र कबुरतोराहेंदाल वेल्‍ले वर्साना मुन्‍ने इत्‍ताप, अद मावाहाटीं दाना सेवक दाविदना वंसमताल, वरोन वेल्‍लेन ताकत मत्‍ता मुक्‍ति हियानोन लोहचीता.
LUK 1:71 मावा पगातोरागटाल आनि हयस्वोरागटाल माकु मुक्‍ति हींता.
LUK 1:72 मावा एनकटा तादो-बाबुरापोर्रो दया कीतन इत्‍ता. ओरतोनि कीता पवित्र करारतुन बस्‍केने मति मरगोन इंचि इत्‍ता.
LUK 1:73 ई करार मावा एनकटा पेद्‍दा मनकल, अब्राहामुनतोनि तित्‍ता ओट्‍टु आंदु.
LUK 1:74 अद करार इल्‍हा मत्‍ता गदा, मिमेट पिसतच्‍चुं रोजकु नीतिते आनि पवित्र मंचेके, वेरियाकोंटा नावा सेवा कियनाहाटीं, नना मीकुन मीवा पगातोरा कयदाल होळसींतन.
LUK 1:76 ए नावा सिन्‍ना पेडा! इंदके नीकुन अन्‍निटकन्‍ना पेद्‍दा पेनदा कबुरतोर इंचि इंतुर. बारित्‍ते निमे सामिना हर्रि तयार कियालय, ओना मुन्‍ने-मुन्‍ने ताकंतिन.
LUK 1:77 मीवा पापाल्क मापि आतेने मीकु मुक्‍ति दोर्कंता, इत्‍ता संगतितुन निमे ओना लोकुल्‍कुंक वेहांतिन.
LUK 1:78 बारित्‍ते पेन दाना पेद्‍दा दया मनापोर्रो हुप्पिचि, स्वर्गमताल वरोर पोळ्‍दुनसंटोन लोहंता.
LUK 1:79 हामुर इनना नीडा आनि पापमता हीकटते मनना मनापोर्रो, ओर वेल्‍गु अराहचि, मनाकुन सांतिता हर्दे ताकसंतोर.” इंचि इत्‍तोर.
LUK 1:80 इल्‍हा आ पेडल पेद्‍दा बेर्सतोर. अल्हे आत्मातेगुडा बेस गट्‍टिगा आतोर. ओर ओना इस्राएल लोकुल्‍कुंक पेनदा पोल्‍लें वेहना वेला एवनदाका ओर बय्‍लि जेगाने मत्‍तोर.
LUK 2:1 योहान पुटतस्के, रोम सरकारता राजाल कैसर अगस्तुस ओना कय हिळु मनना अन्‍नि देसेल्‍कुना लोकुल्‍कुनद सिरगंति कियना इंचि आदेस हीतोर.
LUK 2:2 कुरिनियुस इनना पोरोलतोर सिरिया एरियाता राज्यपाल मननेंके ई सिरगंति आता. इदे मोट्‍टा मोदाटा सिरगंति आंद.
LUK 2:3 अय्ते सिरगंतिता आदेस दोर्कुताहेंके अंटोर लोकुल्‍क पोरोलीं रासागोटकुनालय बोना नाटे ओर होत्‍तुर.
LUK 2:4 अल्हेन योसेप दाविद राजाना वंसमतोर मत्‍तोर. अदुनहाटीं ओर गालिल एरियाता नासरेत नाटेनाल यहुदिया एरियाता दाविद राजाना पुटता नार बेतलहेम इनना नाटेंक होत्‍तोर.
LUK 2:5 ओर सिरगंतिहाटीं नार होननेंके ओनतोनि एर्रा बोट्‍टु आसि मत्‍ता मरियमुन पीसि होत्‍तोर. अस्‍के अद पीटे मत्‍ता.
LUK 2:6 ओर अगा मननेंकेन दाना एरपूराना वेला वाता.
LUK 2:7 अद दाना तोल्सूर मर्रिन कंता. अगा ओर्कु आगालय बेस जेगा दोर्कुवाहेंके मरियम आ पेडन पेगुने हुटता, हुटसि कोळ्‍कते कोंदाक कुटार तासाना डालाते वाटसि इरता.
LUK 2:8 अय्ते अदे नर्का इच्‍चुर गोर्रें मेहानोर नाटेना पलाते नेलिने ओर ओरा गोर्रेना कावेल कीसेक मत्‍तुर.
LUK 2:9 अस्‍के अचानक ओरा मुन्‍ने उंदि पेनदा दूता वासि नितता. अस्‍के सामिना महिमाता वेल्‍गु ओरा सुट्‍टु एल्‍गता. अदुन हूळसि गोर्रें मेहानोर इरगा वेरियकुत्‍तुर.
LUK 2:10 अस्‍के पेनदा दूता ओर्कुन, “मिमेट वेरियमट. नना मीवाहाटीं उंदि बेस कबुर पीसि वातन. इद कबुर अंटोर लोकुल्‍कुंक बेस आनंदम हींता.
LUK 2:11 इय्याला दाविद राजाना नाटे, मीकुन पिसागोटनोर पुट्तोर, ओरे किरिस्‍तु सामि आंदुर.
LUK 2:12 ओन मिमेट एरपाट कियना चिन्‍ह बतल इत्‍ते, उंदि कोळ्‍कते पेगुने हुटसि कोंदांक कुटार तासाना डालाते वरोर सिन्‍ना पेडल मीकु दिस्‍सानुर,” इंचि इत्‍ता.
LUK 2:13 अल्हा इत्‍ता इन्‍मळे इंका वेल्‍लेन पेनदा दूतां वातां. वासि अगा मत्‍ता पेनदा दूतातोनि कलियसि पेनदुन तल्‍सकुंचेके,
LUK 2:14 “स्वर्गमते पेनदा कदर आयि, बूमिपोर्रो अद पावरम कीता लोकुल्‍कुंक सांति दोर्किकांटी,” इंचि इनालय दल्‍गतां.
LUK 2:15 पजा पेनदा दूतां ओर्कुन होळसिसि स्वर्गमते मल्सि होत्‍तां. अस्‍के आ गोर्रें मेहानोर वरोंक-वरोर, “अय्ते ताकट! मनम बेतलहेम नाटे दाकोम. होंचि, सामि मनाकु वेहताप जर्गुता गटनातुन हूळकोम,” इंचि इनालय दल्‍गुतुर.
LUK 2:16 पजा ओर अगटाल बिराना होंचि अगा मरियमुन, योसेपुन हूळतुर. इंका अगा कोळ्‍कते कोंदांक कुटार तासाना डालाते सिन्‍ना पेडल मत्‍तदगुडा हूळतुर.
LUK 2:17 हूळसि, ओर्कु आ पेडाना बारेमते पेनदा दूता बतल वेहतानो, अद पोल्‍लेतुन आ गोर्रें मेहानोर अंटोर्क वेहतुर.
LUK 2:18 ओर वेहता पोल्‍लेतुन केंजता हरेक मनकल इचंत्रमते अरतोर.
LUK 2:19 पजा आ गोर्रें मेहानोर ओर्क पेनदा दूता बतल अय्ते वेहता, अल्हेन जर्गुतदुन केंजसि, हूळसि ओर पेनदुन इरगा स्‍तुति कीसेके मल्सि होत्‍तुर. गानि मरियम मात्रम अव अन्‍नि पोल्‍लेन दाना मनसुने इरकुंचि इदुना अर्तम बतल मरि, इंचेके ऊके विचारम कीसेके मनुंदु.
LUK 2:21 इल्‍हा आ पेडल पुटसि एनमिदि रोजकु आतस्के ओनाद कतना रिवाज कीतुर. मरियम नेला तप्पका मुन्‍नेन पेनदा दूता दानकु वेहता परकारम, आ पेडाना पोरोल “येसु” इंचि इरतुर.
LUK 2:22 पजा मूसाना नियम परकारम दाना सुद्‍दिकरन कियाना वेला वातस्के ओर येरुसलेम गुळिते होत्‍तुर. होंचि “रोंडु पावरेल्क हिलाकोंटे रोंडु गुव्वां अयना मोक्‍कु हियना.” इंचि मूसाना नियमते रासि मत्‍ताप मोक्‍कु हीतुर. अल्‍हेने मूसाना नियमते, “तोल्सूर पेडन बस्‍केळ्‍क सामिंक हियना.” इंचि वेहचि मंता. अदुनहाटीं सामिना कय्‍दे येसुन अप्पजेपतुर. इल्‍हा ओर सामिना नियम परकारम मोक्‍कु हियालय येरुसलेम होत्‍तुर.
LUK 2:25 अवे तूकुल्कुने येरुसलेमते सिमोन पोरोलतोर वरोर मनकल मनुंदुर. ओर नीतिमंतुड आनि पेनदा पोल्‍लेपोर्रो ताकानोर मत्‍तोर. इस्राएलता लोकुल्‍कुंक पेन बस्के सुकम-सांति हींतनो इंचेके ओर एदुर हूळसेक मनुंदुर. ओनतोनि पवित्र आत्मा मत्‍ता.
LUK 2:26 इंका पवित्र आत्मा, “बदवेरदाका अय्ते निमे, ‘पेन लोहना किरिस्‍तुन’ हूळिन, अदवेरदाका नीकु हामुर वायो,” इंचि ओन्क वेहचि मत्‍ता.
LUK 2:27 पजा पवित्र आत्मा सिमोनुंक वेहताहेंका, योसेप आनि मरियम गुळितगा वाता रोजे ओरगुडा गुळितगा होत्‍तोर. मूसाना नियम परकारम दंडकाल्क कियनाहाटीं पेडाना तल्‍लुर-बाबो पेडन अगा पीसि वातुर.
LUK 2:28 सिमोन आ पेडन ओरागटाल तेंडकुंचि एतकुत्‍तोर, एतकुंचि पेनदुन इल्‍हा स्‍तुति कियालय दल्‍गुतोर:
LUK 2:29 “ए सामि, निमे नाकु हीता पोल्‍ले परकारम नीवा सेवक आता नना, इंदके सांतिते हाया परांतन.
LUK 2:30 बारित्‍ते निमे पेरकुत्‍ता पिसागोटनोन नना नावा कळ्‍कुन निंडा हूळतन,
LUK 2:31 निमे ओन दुनियाता अंटोर लोकुल्‍कुना मुन्‍ने पेर्कुत्‍तिन,
LUK 2:32 वेरे जातिनोर्क बेसता हर्रि हुप्‍सना वेल्‍गु, नीवा इस्राएल लोकुल्‍कुंक पेनदाहेंदाल दोर्कुता पेद्‍दातनम ओरे आंदुर.”
LUK 2:33 सिमोन मातरल येसुना बारेमते वळकाना पोल्‍लें केंजसि, ओना यावल-बाबल इचंत्रमते अरतुर.
LUK 2:34 पजा सिमोन ओर्क आसिर्वाद हीसि, येसुना यावल मरियमुंक इल्‍हा वेहतोर: “हूळा, इस्राएलते ई पेडनहेंदाल वेल्‍लेन मंदि लोकुल्‍कुंक नस्‍टम जर्गार अल्‍हेने वेल्‍लेन मंदि लोकुल्‍कुंक बेसगुडा जर्गार. ई पेडल इत्‍ते पेनदाद उंदि चिन्‍ह आंदुर. ई चिन्‍हातुन वेल्‍लेन मंदि पास्कानुर.
LUK 2:35 इदुनहेंदाल वेल्‍लेन मंदिता मनसुना विचाराल्क पलाते अर्रनुं. गानि नीकु मात्रम उंदि कसेर नीवा गुंडेताल आरपार पेय्सि होत्‍ताचोन दुक्‍कम वायार.”
LUK 2:36 अगा पेनदा कबुर वेहना उंदि मातिर मनुंदु, दान पोरोल हन्‍ना. अद अस्सेर वंसमते पुटता पनुएल पोरोलतोना मिय्यड आंद. अद वेल्‍लेन मातिर आसि मत्‍ता. मरमिं आता एडुं वर्सानेन दाना मुय्दो हासोत्‍तोर.
LUK 2:37 इल्‍हा अद मुंडामोससि एनबै नालुं वर्सां आतां. अद रोज-रोज गुळिते वासेके मनुंदु. अद बस्केळक ओक्‍कापोद्‍दु मंचेके पेनदुक पारतना कियुंदु.
LUK 2:38 सिमोन मातरल योसेप आनि मरियमुनतोनि वळ्‍कसेकेन मत्‍तोर, अस्‍केन अद ओरा दग्गेर्क वासि पेनदुक दन्यवाद कीता. पजा बोर लोकुल्‍क अय्ते, पेन इस्राएल लोकुल्‍कुन ओरा तिप्पल्कुनाल बस्के पेच्‍हार इंचेक एदुर हूळसेक मत्‍तुरो, आ अंटोर लोकुल्‍कुंक आ पेडाना बारेमते अद वेहता.
LUK 2:39 इल्‍हा सामिना नियम परकारम कियानव अन्‍नि दंडकाल्क कियमळ मारतारित्‍ते योसेप आनि मरियम गालिल एरियाते मनना ओरा नासरेत इनना नाटेंक मल्सि होत्‍तुर.
LUK 2:40 पजा आ पेडल पेद्‍दा बेर्सतोर. ओन्क पेन ताकत अल्‍हेने बुद्‍दिगुडा बेस हीता. दाना दया ओनपोर्रो मत्‍ता.
LUK 2:41 दाटसि होनना पंडुगुनाहाटीं येसुना यावल-बाबल एटा येरुसलेम सहर होनुंदुर.
LUK 2:42 अय्ते येसु पन्‍नेंड वर्सानोर आतोर, अस्केगुडा एटा होत्‍ताप येसुन पीसि पंडुगुनाहाटीं येरुसलेम होत्‍तुर.
LUK 2:43 पंडुगु मारतंका येसुना यावल-बाबल ओरा नार मल्सि होनालय पेय्‍सतुर. गानि पेडल येसु मात्रम येरुसलेमतेन आगिसि मत्‍तोर. अयना इद संगति मात्रम ओना यावल-बाबांक बिल्कुल एरपाट आयाहिल्‍ले.
LUK 2:44 मनातोनि कलियसि ताकाना मंदितेन मंतोर बारे, इनकुंचि ओर इंकुंदि रोजमेड ताकसेक होत्‍तुर. पजा ओर ओरा जीवातोर्कुन, एरपाटतोर्कुन पूसकीसेके पहकालय दल्‍गुतुर.
LUK 2:45 हीके-हेके पह्‍किसि हूळतुर गानि येसु ओर्कु दिसा हिल्‍लोर. अदुनहाटीं ओर मर्रा ओन पहकसेक-पहकसेक येरुसलेम वापस होत्‍तुर.
LUK 2:46 मूड रोजकु आतस्के गुळितगा येसु ओर्कु दिसतोर. अगा ओर यहुदि गुरुल्‍कुनतोनि उद्‍दिसि ओरा पोल्‍लें केंजसेके इंका ओर्कुन सवाल्क पूसकीसेके मत्‍तोर.
LUK 2:47 येसुना उसारतनमतुन आनि जवाब हियानदुन हूळसि अगा मत्‍तोर अंटोर इचंत्रमते अरतुर.
LUK 2:48 ओना यावल-बाबल गुडा ओन हूळसि इचंत्रम आतुर. पजा ओना यावल ओन, “निमे मावातोनि इल्‍हा बारि कीतिन पेडा? नीवा बाबल, नना इरगा परेसान आसि नीकुन बगा-बगा पहकतोम नीकु एरके ना?” इंचि पूसकीता.
LUK 2:49 अस्‍के येसु ओर्कुन, “मिमेट नाकुन बारिंक पहकतिट? नना नावा बाबाना लोतेन मनमळ बेस इंचि मीकु तेळियोना?” इंचि इत्‍तोर.
LUK 2:50 गानि येसु वळकुता पोल्‍लेना अर्तम मात्रम ओना यावल-बाबांक तेळिया हिल्‍ले.
LUK 2:51 पजा येसु ओना यावल-बाबानतोनि कलियसि नासरेत नार होत्‍तोर. तल्‍लुर-बाबो वेहता पोल्‍ले पोर्रेन ताकसेक मनुंदुर. ओना यावल इव अन्‍नि पोल्‍लें दाना मनसुने इरसि विचारम कीसेके मनुंदु.
LUK 2:52 इल्‍हा येसु, बुद्‍दिते, ताकतते बेर्स्‍सेके होत्‍तोर. इंका पेन आनि मनकालोरा नदरतेगुडा बेस ताकुंदुर.
LUK 3:1 तिबेरियुस कैसर इनना वरोर राजाल पूरा रोम राज्येमपोर्रो पेद्‍दा राजाल मत्‍तोर. ओर राज्येम कियालय दल्‍गिसि पदिहेन वर्सां पूरा आतां. अवे तूकुल्कुने पुंतुस पिलातुस इनानोर यहुदिया एरियाता राज्यपाल मत्‍तोर. अंतिपस हेरोद राजाल गालिल एरियाता राज्यपाल मत्‍तोर. इंका ओना तम्मुर पिलिप इतुरिया आनि तारकोनितिस इव एरियान पोर्रो राज्यपाल मत्‍तोर. लिसानियास इनानोर बारे अबिलेन इनना एरियाता राज्यपाल मत्‍तोर.
LUK 3:2 अस्‍के हन्‍नाल आनि ओना हडे कयपाल इनानोर इव्वुर पेद्‍दा पेर्मालोर मत्‍तुर. अवे तूकुल्कुने बतल आता इत्‍ते जकर्याहना मर्रि योहान बय्‍लि जेगाते मननेंके ओनगा पेनदा वचनम एव्ता.
LUK 3:3 अस्‍के ओर योर्दन बेरेटा सुट्‍टु-मट्‍टुना एरियंता इल्‍हा वेहासेके तिरियुंदुर, “कीता पापाल्कुन ओप्‍कुंचि मनसु मार्सकुंचि बापतिस्मा येतानय्ते, पेन मीवा पापाल्कुन मापि कींता.”
LUK 3:4 इल्‍हा यसायाह इनना पेनदा कबुरतोर वेल्‍लेन वर्सां मुन्‍ने रासतद इंदके निजम आता. अद पोल्‍ले इल्‍हा मत्‍ता: “बय्‍लि जेगाते केयानद उंदि अल्किर केंजा वांता, सामि मीवा मनसुने वायनाहाटीं हर्रि तयार कीम्‍ट, इंका ओना हर्कुन सवरगा कीम्‍ट.
LUK 3:5 इत्‍ते, अन्‍नि लोद्‍दिं-लोंका निंडमळ गावाले, अन्‍नि गुट्‍टां-गट्‍टुक समानम आयमळ गावाले. वंकर-डिंकर मत्‍ता हर्कु अन्‍नि, सवरगा आयमळ गावाले. उतार-बोगडा मत्‍ता हर्कुगुडा, समानम आयमळ गावाले.
LUK 3:6 अस्‍के अंटोर लोकुल्‍क पेन मुक्‍ति हियानदुन हूळंतुर.”
LUK 3:7 योहानुनाहेंदाल बापतिस्मा येतानाहाटीं लोकुल्‍क पेद्‍दा मंदानां-मंदां वातुर. अस्‍के बापतिस्मा हियना योहान ओर्कुन, “ए कट्‍ला तरासनसंटोरिटा! पेनदा होंगुनाल तपिच्‍कुनालय बापतिस्मा येतट इंचि मीकु बोर वेहतुर?
LUK 3:8 अय्ते मरि, निजमे मीवा मनसु मार्सुकुत्‍तिर इंचि रुजुव कीसि हुप्‍सट. वट्‍टिदे, मोमोट अब्राहामुना वंसमतोरम आंदुम, इंचि बस्‍केने इनकुनमट. नना मीकु निजम वेहांतन, पेन अब्राहामनाहाटीं ई बंडानालगुडा पिलाल्क पुट्‍टिचि हिया परंता.
LUK 3:9 इंदके मराकुना हिह्‍कुनगा मर्सु इरसि मंता. बव मराकुंक अय्ते बेसता पंडिं हादोंगों, अवुन नर्किसि तडमिते वाटमळ जर्गंता,” इंचि इत्‍तोर.
LUK 3:10 “अय्ते इंदके मोमोट बतल कियना मरि?” इंचि आ लोकुल्‍क योहानुन पूसकीतुर.
LUK 3:11 अस्‍के योहान, “बोनगा रोंडु अंगिं मंतां, ओर ओनद उंदि अंगि, अंगि हिल्वोंकु हियना आनि बोनगा अय्ते गाटो मंता, ओरगुडा हिल्वोंकु तूस कीसि हियना,” इंचि वेहतोर.
LUK 3:12 बापतिस्मा येतनाहाटीं अगा कर वसुल कियानोरगुडा वासि मत्‍तुर. ओर लोकुल्‍कुन वेल्‍लेन मुळाह्‍चि मत्‍तुर. ओरगुडा, “मोमोट बतल कीकोम गुरुजी?” इंचि पूसकीतुर.
LUK 3:13 अस्‍के योहान, “सरकार मीकुन बच्‍चोन जमा कियालय वेहता, अचोने जमा कीम्‍टु, दानकन्‍ना एक्‍को जमा कियमट,” इंचि ओर्कु वेहतोर.
LUK 3:14 अस्‍के इच्‍चुर सिपाइल्कगुडा ओनगा वासि, “अय्ते मोमोट बतल कीकोम मरि?” इंचि पूसकीतुर. अस्‍के योहान ओर्क, “मीकु दोर्कना पगारतेन मिमेट कूस मंटु, बोरहेकटाले आयि बेदरिच्‍चि हिलाकोंटे आबद्‍दम तप्पु दोस्‍सि कोत्‍तां येतमट,” इंचि वेहतोर.
LUK 3:15 पेन लोहना पिसागोटनोर बिरानेन वायानुर इंचेके लोकुल्‍क बेस आसेते एदुर हूळसेक मत्‍तुर. अदुनहाटीं योहानुन हूळसि, वायनद मत्‍ता किरिस्‍तु ईरे अय्ते आयोर गदा, इल्‍हा अंटोर ओरद-ओरे मनसुल्कुने इनकुनुंदुर.
LUK 3:16 अस्‍के योहान ओरा मनसुना विचारमतुन एरपाट कीसि ओर अंटोर्कुन, “नना अय्ते मीकु बापतिस्मा एततोने हींतन. गानि बोर अय्ते वायानोर मंतोर, ओर नाकन्‍ना एक्‍को ताकततोर मंतोर. ओर केरसि मत्‍ता हेरपुह्कुन इट्‍टना विलुवागुडा नाकु हिल्‍ले. ओर मीकु पवित्र आत्मा आनि तळमितोनि बापतिस्मा हींतोर.
LUK 3:17 ओना कय्‍दे हेती मंता. ओर ओना कडातुन बेस साप कीतारित्‍ते गोह्कुन तूरपाल्क पीसि गुम्मिते दोसंतोर, पोट्‍टुनबारे बस्‍केने पिर्रुवा तडमिते वाटसि बोळसंतोर,” इंचि इत्‍तोर.
LUK 3:18 इल्‍हा योहान वेल्‍लेन पोल्‍लें कराहसेक, ओर्क बेसता कबुर वेहुंदुर.
LUK 3:19 पजा बतल आता इत्‍ते, गालिल एरियाता राजाल हेरोद, ओना तम्मुर पिलिप पिस्सि मननेंकेन ओना मुत्‍तो हेरोदियास इनानदान ओनगा तच्‍चि इरकुत्‍तोर. हेरोद राजाल ओना अंगेनतोनि कीता पापम, इंका वेरे-वेरे वेल्‍लेन तप्पु कबाह्कुनाहाटीं हेरोद राजान योहान तेराहतोर. अदुनहाटीं हेरोद राजाल योहानुन जेलने वाटसि, ओना तप्पुकुने इंकुंदि तप्पु कल्‍पकुत्‍तोर.
LUK 3:21 योर्दन बेरेटे योहान वेल्‍लेन लोकुल्‍कुंक बापतिस्मा हीसेक मत्‍तोर. अस्‍के येसुगुडा अगा वासि योहानुना कय्‍दे बापतिस्मा एततोर. बापतिस्मा एततंका येसु पारतना कियनेंके मब्बु अंता बैय्यरा आता.
LUK 3:22 अस्‍के पवित्र आत्मा पावरेम पिट्‍टे रूपमते वासि ओनपोर्रो रेयतस्के, स्वर्गमताल उंदि अल्किर इल्‍हा केंजावाता. “निमे नावा पावरमगल्‍ला मर्रिन आंदिन, नना नीकुन वेल्‍लेन जीवा कींतन, नीवा लोप्पो नना वेल्‍लेन आनंदमते मंतन.”
LUK 3:23 येसु सेवा कियना कबळ सुरुव कीतस्‍के ओर दग्‍गेर-दग्‍गेरा मुप्‍पै वर्सानोर मत्‍तोर. लोकुल्‍क येसुन, योसेपुना मर्रि इनकुनुंदुर. योसेप एलि पोरोलतोना मर्रि आंदुर.
LUK 3:24 एलिना बाना पोरोल मत्‍तातु, मत्‍तातुना बाना पोरोल लेवि, लेविना बाना पोरोल मल्कि, मल्किना बाना पोरोल यान्‍ना, यान्‍नाना बाना पोरोल योसेपु.
LUK 3:25 योसेपुना बाना पोरोल मत्‍तियाल, मत्‍तियाना बाना पोरोल आमोस, आमोसुना बाना पोरोल नाहोम, नाहोमुना बाना पोरोल एस्‍लि, एस्‍लिना बाना पोरोल नागय्या.
LUK 3:26 नागय्याना बाना पोरोल मयातु, मयातुना बाना पोरोल मत्‍तियाल, मत्‍तियाना बाना पोरोल सिमय्या, सिमय्याना बाना पोरोल योसेकु, योसेकुना बाना पोरोल योदाल.
LUK 3:27 योदाना बाना पोरोल योहानन, योहानननुना बाना पोरोल रेसाल, रेसाना बाना पोरोल जेरुबाबेल, जेरुबाबेलना बाना पोरोल सलितिएल, सलितिएलना बाना पोरोल नेरी.
LUK 3:28 नेरीना बाना पोरोल मल्कि, मल्किना बाना पोरोल अद्‍दि, अद्‍दिना बाना पोरोल कोसाम, कोसामुना बाना पोरोल एलमादामु, एलमादामुना बाना पोरोल एर्राल.
LUK 3:29 एर्राना बाना पोरोल यहोसु, यहोसुना बाना पोरोल एलियाजर, एलियाजरना बाना पोरोल योरिमु, योरिमुना बाना पोरोल मत्‍तातु, मत्‍तातुना बाना पोरोल लेवि.
LUK 3:30 लेविना बाना पोरोल सिमोनु, सिमोनुना बाना पोरोल यहुदल, यहुदाना बाना पोरोल योसेपु, योसेपुना बाना पोरोल योनामु, योनामुना बाना पोरोल एलकिमु.
LUK 3:31 एलकिमुना बाना पोरोल मल्‍लयाल, मल्‍लयाना बाना पोरोल मिन्‍नाल, मिन्‍नाना बाना पोरोल मत्‍तातु, मत्‍तातुना बाना पोरोल नातानु, नातानुना बाबल दाविद राजाल.
LUK 3:32 दाविद राजाना बाना पोरोल यिस्‍सल, यिस्‍साना बाना पोरोल ओबेद, ओबेदुना बाना पोरोल बोआज, बोआजुना बाना पोरोल सलमोनु, सलमोनुना बाना पोरोल नहसोन.
LUK 3:33 नहसोनुना बाना पोरोल अमिनादाब, अमिनादाबुना बाना पोरोल अदमिन, अदमिनुना बाना पोरोल अरनि, अरनिना बाना पोरोल हेसरोन, हेसरोनुना बाना पोरोल पेरेस, पेरेसना बाना पोरोल यहुदा.
LUK 3:34 यहुदाना बाना पोरोल याकोब, याकोबुना बाना पोरोल इसाक, इसाकुना बाना पोरोल अब्राहाम, अब्राहामुना बाना पोरोल तेराहाल, तेराहाना बाना पोरोल नाहोर.
LUK 3:35 नाहोरुना बाना पोरोल सरुग, सरुगुना बाना पोरोल रेऊ, रेऊना बाना पोरोल पेलेग, पेलेगुना बाना पोरोल एबेराल, एबेरालना बाना पोरोल सेलाल.
LUK 3:36 सेलाना बाना पोरोल केनान, केनानुना बाना पोरोल अरपक्‍सद, अरपक्‍सदना बाना पोरोल सेमु, सेमुना बाना पोरोल नोहाल, नोहाना बाना पोरोल लामेक.
LUK 3:37 लामेकुना बाना पोरोल मतुसेल, मतुसेलना बाना पोरोल हनोक, हानोकुना बाना पोरोल यारेद, यारेदुना बाना पोरोल महलेल, महलेलना बाना पोरोल केनान.
LUK 3:38 केनानुना बाना पोरोल अनोस, अनोसुना बाना पोरोल सेतु, सेतुना बाना पोरोल आदाम, आदाम पेनदा मर्रि मत्‍तोर.
LUK 4:1 पजा येसु योर्दन बेरेटाल बापतिस्मा एतसि पवित्र आत्माते निंडतस्के, पेनदा आत्मा ओन बय्‍लि जेगाते पीसि ओता.
LUK 4:2 अगा नल्‍पै रोजकुनदाका पेद्‍दा देय्यम ओना पट्‍टु हूळता. अव रोजकुने येसु बतले तिना हिल्‍लोर. अदुनहाटीं अव रोजकु मारतस्के येसुंक इरगा कर्वेस्‍ता.
LUK 4:3 अस्‍के पेद्‍दा देय्यम ओनगा वासि, “ओक्‍कला निमे पेनदा मर्रिन आते ई बंडां हारिं आयिं इंचि आदेस हीम,” इंचि ओन इत्‍ता.
LUK 4:4 इत्‍तस्के, “मनकल सिराप वट्‍टि हारिं तिंचे पिस्‍सोर, गानि पेनदा तोळ्‍दाल पेय्‍सना, उंदि-उंदि पोल्‍लेताहेंदाल पिस्संतोर. इल्‍हा दर्मसास्‍त्रमते रासि मंता,” इंचि येसु दान्क जवाब हीतोर.
LUK 4:5 पजा पेद्‍दा देय्यम येसुन उंदि एत्‍तु जेगाते पीसि ओसि, उंदे मल्का दुनियाता अन्‍नि राज्येल्‍क हुपिस्‍ता.
LUK 4:6 हुपिच्‍चि, “इव अन्‍नि राज्येल्कुनपोर्रो अदिकारम आनि अवुना पेद्‍दातनम नीकु हींतन. बारित्‍ते अव अन्‍नि राज्येल्‍क नाके हियमळ जर्गता. नना इद अदिकारम बोन्क इत्‍ते ओन्क हिया परांतन.
LUK 4:7 अदुनहाटीं, निमे नावा काल्क मोळ्‍कानय्‍ते इव अन्‍नि नीवांगें आंतां,” इंचि पेद्‍दा देय्यम इत्‍ता.
LUK 4:8 अस्‍के, “निमे नीवा पेनदुने मोळ्‍कना, सिराप दानादे सेवा कियना, इल्‍हा दर्मसास्‍त्रमते रासि मंता,” इंचि येसु दान इत्‍तोर.
LUK 4:9 आयंका पेद्‍दा देय्यम येरुसलेमते मनना गुळितगा येसुन ओसि, गुळि पोर्रो कोस्‍सक निल्‍हाचि इल्‍हा इत्‍ता, ओक्‍कला निमे पेनदा मर्रिन आते हिळु दुनका.
LUK 4:10 बारित्‍ते, “नीकुन कापाळालय पेन दाना दूतांक आदेस हींता, आनि आ दूतां वासि, नीवा काल्कुंक देब्बां दल्‍गामन्‍नि इंचि, नीकुन पोर्रोटद पोर्रेन अंदकुंतां,
LUK 4:11 इल्‍हा दर्मसास्‍त्रमते रासि मंता.”
LUK 4:12 अस्‍के येसु दान्क इल्‍हा जवाब हीतोर. “निमे सामि इनना नीवा पेनदा पट्‍टु हूळमा, इल्‍हागुडा वेहतद मंता.”
LUK 4:13 इल्‍हा पेद्‍दा देय्यम अन्‍नि तीरुकुने येसुना पट्‍टु हूळतारित्‍ते, दान्क इंकुंदि मोका दोर्कनदाका ओन होळसि होत्‍ता.
LUK 4:14 पजा येसु पवित्र आत्माता ताकतते निंडसि गालिल एरियाते वापस वातोर, अस्‍के गालिल एरियाता अन्‍नि नाहकुनोर ओना बारेमतेन वळ्‍कुंदुर.
LUK 4:15 येसु ओरा दर्मसास्‍त्रम कराहना लोह्कुने होंचि पेनदा पोल्‍लें करहुंदुर. अंटोर ओन बेस कराहंतोर इंचि कदर हिय्युंदुर.
LUK 4:16 पजा येसु सिन्‍नास्केटाल बेर्सता नार नासरेतते होत्‍तोर. वारमता नोमकेम रोजुने ओना अलवट परकारम दर्मसास्‍त्रम कराहना लोते होंचि, दर्मसास्‍त्रम हदवालय निततोर.
LUK 4:17 अस्‍के यसायाह इनना पेनदा कबुरतोर रासता पुस्तकम ओन्क हीतुर. ओर आ पुस्तकमते उंदि पोल्‍ले दोर्किच्‍चि, इल्‍हा हदवालय सुरुव कीतोर:
LUK 4:18 “पेनदा पवित्र सेवक इल्‍हा वेहचंतोर, पेनदा आत्मा नावापोर्रो वाता. गरिबोर्कुंक बेसता कबुर वेहालय, पेन नाकुन अबिसेकम कीता. दोहचि वाटसि ओतोर्कुन, पेन होळसीता इंचि वेहालय, गुड्‍डोर्कुन, मिमेट हूळंतिर इंचि वेहालय, तकलिपते मनानोर्कुन, तकलिपताल तेंडालय,
LUK 4:19 पेन दया कियना वेला एव्‍ता, इंचि वेहालय नाकुन लोहता.” इल्‍हा रासि मत्‍तदुन हदुवतोर.
LUK 4:20 हदुवमळ आतारित्‍ते, पुस्तकमतुन बंद कीसि वरोर चपरासिंक हीसि कराहलय येसु हिळु उदुतोर. आ दर्मसास्‍त्रम कराहना लोते मत्‍ता अंटोरा नदर ओनहेकेन मत्‍ता.
LUK 4:21 अस्‍के, “इय्याला मिमेट केंजतव दर्मसास्‍त्रमता पोल्‍लें, मीवा मुन्‍ने नावा कयदाल पूरा आतां,” इंचि येसु ओर्कुन इत्‍तोर.
LUK 4:22 “ओर बेस वेहतोर, बेस-बेसतां पोल्‍लें ओना तोळ्‍दाल पेय्सुंदुं,” इंचेके ओर अंटोर इचंत्रम आतुर. आसि ओर, “ईर अय्ते योसेपुना मर्रे गदा?” इंचि इत्‍तुर.
LUK 4:23 अस्‍के येसु ओर्कुन इल्‍हा इत्‍तोर, “‘मत्‍तु हियानोना! नीवद निमेने बेस कीस हुप्‍सा,’ इंचि उंदि सात्रम मत्‍ताप, मिमेट इंका नाकुन तप्‍पाकोंटा इंतिर, इत्‍ते, ‘कपर्नाहुमते निमे कीता अद्‍बूताल्कुना बारेमते मोमोट केंजतोम, अव अद्‍बूताल्‍क नीवा संतम नाटेनेगुडा कीम,’ इंचि इंतिर.
LUK 4:24 नना मीकु निजम वेहांतन, बोरे पेनदा कबुरतोंक आयि, ओना नाटेनेन ओन्क कदर मन्‍नो.
LUK 4:25 अद बल्हा इत्‍ते, पेनदा कबुरतोर एलियाहना कालमते बतल जर्गुता मीकु एर्केना? अस्‍के पूरा देसेमते मूड वर्सां हारुं नेल्कुनदाका पिर्रु वाया हिल्‍ले, अदुनहाटीं वेल्‍ले कर्वु अर्सि मत्‍ता. नना मीकु निजम वेहांतन, अद वेलाते इस्राएल देसेमते वेल्‍लेने मुंडामोस्ता मुर्ताह्क मत्‍तां.
LUK 4:26 गानि बदे मुंडामोस्ता मुरतटगा सहायम कियनाहाटीं पेन एलियान लोहा हिल्‍ले. ओन सिराप सिदोन सहर दग्‍गेटा सारपत नाटेना वेरे जातिता मुंडामोस्ता मुरतटगा लोहता.
LUK 4:27 अल्‍हेने पेनदा कबुरतोर एलिसाना कालमते इंका कुस्‍टरोगम आतोर इस्राएल देसेमते वेल्‍लेटुरे मत्‍तुर. गानि ओराव्टेटाल वरोन इंका बेस कियालय पेन एलिसान लोहा हिल्‍ले. सिराप सिरिया देसेमता नामान इनानोने बेस कीतोर, इल्‍हा बोरे पेनदा कबुरतोंक आयि, ओना नाटेनेन ओन्क कदर मन्‍नो,” इंचि वेहतोर.
LUK 4:28 इस्राएल लोकुल्‍कुन होळसि, वेरे देसेमता लोकुल्‍कुन पेन सहायम कीता इंचि येसु वेहतस्के, दर्मसास्‍त्रम कराहना लोते उदिस मत्‍तोर अंटोर्क इरगा होंग वाता.
LUK 4:29 होंग वातस्के ओर तेदसि, येसुन ओरा नाटेनाल पलाते गुंजिस ओतुर. ओरा नार उंदि गुट्‍टापोर्रो मत्‍ता. येसुन गुट्‍टा पोर्रोटाल दोब्‍बिसि हियालय एत्‍तु मत्‍तगा ओतुर.
LUK 4:30 गानि येसु ओरा नड्‍डुमताल पेय्सि होत्‍तोर.
LUK 4:31 अगटाल येसु ओना सिस्युल्कुनतोनि गालिल एरियाता कपर्नाहुम नाटे होत्‍तोर. अगा वारमता नोमकेम रोजुननाड पेनदा पोल्‍लें कराहमळ सुरुव कीतोर.
LUK 4:32 ओर इच्‍चोन अदिकारमते करहुंदुर गदा, ओना कराहमळतुन केंजसि लोकुल्‍क इचंत्रम आतुर.
LUK 4:33 अगा दर्मसास्‍त्रम कराहना लोते वरोर देय्यम पीता मनकल मत्‍तोर. ओर येसुन हूळसि जोरते वरगेयसि केयतोर,
LUK 4:34 “ए नासरेत नाटेना येसु! मातोनि नीकु बाता कबळ? माकुन नासडेम कियालय वातिना? निमे बोन आंदिनो नाक एरपाटे, निमे नासरेत सहरता येसुन, पेनदा पवित्र मनकन आंदिन,” इत्‍तोर.
LUK 4:35 अस्‍के येसु ओनालोप्‍पो मत्‍ता देय्यमतुन, “चुपचाप मन! ओनागटाल पलाते पेय्‍सा,” इंचि गदरिचतोर. अस्‍के, अद ओन हिळु अरहचि, ओन्क बतले नोप्पि कियाकोंटा, ओना लोप्पोटाल पेय्सि होत्‍ता.
LUK 4:36 अगा मत्‍तोर लोकुल्‍क इचंत्रम आसि, वरोंक-वरोर वळकालय दल्‍गतुर, “इद बसोंटा पोल्‍ले आंदु? ओर अदिकारमते, ताकतते देय्याल्‍कुंक आदेस हींतोर, अव पेय्सि दांतां!” इंचि इत्‍तुर.
LUK 4:37 इल्‍हा येसुना पोल्‍लें सुट्‍टु-मट्‍टु मत्‍ता अन्‍नि नाह्कुने तेळियसि होत्‍ता.
LUK 4:38 येसु दर्मसास्‍त्रम कराहना लोताल पेय्सि सिमोन इननोना लोन होत्‍तोर. अगा सिमोनुना पोरळकु बागा एळकि वासि मत्‍ता. दाना एडकितुन बेस कियालय ओर येसुन विनंति कीतुर.
LUK 4:39 अस्‍के येसु दाना दग्‍गेरा नित्‍तिसि एडकितुन गदरिचतस्‍के दाना एळकि रेय्ता. पजा अद बिराना तेदसि, ओरा सेवा कियालय दल्‍गता.
LUK 4:40 पजा पोळ्‍द होनना वेलाक तीरतीरकुना बिमार्क मत्‍तोर्कुन लोकुल्‍क ओनगा पीसि वातुर. अस्‍के येसु वरोन-वरोनपोर्रो कय इरसि, ओर्कुन बेस कीतोर.
LUK 4:41 वेल्‍लेटोर्कुन देय्याल्क पीसि मत्‍तां. अव देय्याल्कुन येसु गद्‍दरिच्‍चि पेचाहतोर. देय्याल्क ओरागटाल पेय्सनेंके, येसु किरिस्‍तु आंदुर इंचि एरपाट कीसि, “निमे पेनदा मर्रिन आंदिन” इंचेके जोरते वरगेयसेके पेय्सुंदुं. गानि येसे किरिस्‍तु आंदुर इंचि अव एरपाट कियुंदुं इंचि येसु अवुन वळ्का हिया हिल्‍लोर.
LUK 4:42 पंगातस्के येसु, नाटुन होळसि बोरे हिल्वगा ओंटिगा होत्‍तोर. गानि लोकुल्‍क ओन पह्‍किसि-पह्‍किसि दोर्किच्‍चि, निमे माकुन होळसि होनमा इंचि आपालय हूळतुर.
LUK 4:43 गानि येसु ओर्कुन इल्‍हा इत्‍तोर. “पेन मनकालोरगा राज्येम कियना बेसता कबुरतुन नाकु वेरे नाह्कुने इंका वेहा पींता. इदे कबळताहाटीं पेन नाकुन लोहता,” इत्‍तोर.
LUK 4:44 पजा येसु, यहुदिया एरियाते यहुदिल्कुना दर्मसास्‍त्रम कराहना लोहकुने होंचि पेनदा पोल्‍लें वेहुंदुर.
LUK 5:1 उंदि रोजु येसु गेनेसरेत इनना समुद्रमतगा नित्‍तिसि पेनदा पोल्‍लें वेहासेक मत्‍तोर. येसु ओड्‍डुनपोर्रो नित्‍तिसि पेनदा पोल्‍लें वेहनेंके, आ पोल्‍लें केंजालय अगा वेल्‍लेने लोकुल्‍क ओना सुट्‍टु जमा आतुर.
LUK 5:2 अस्‍के येसु समुद्रम ओड्‍डुनगा रोंडु डोंगन हूळतोर. जिम्मां पियानोर डोंगानाल रेय्‍सि ओरा ओल्‍लां नोर्सेक मत्‍तुर.
LUK 5:3 येसु, अव डोंगानाल वरोर सिमोन पत्रु इननोना डोंगाते एकतोर. एकसि, अंटोर्क बेस केंजा वायना इंचि अद डोंगातुन ओड्‍डुनाल इच्‍चुर लक्‍कु ओसि निप्‍सा इंचि वेहतोर. ओर डोंगातुन लक्‍कु निपिस्‍ता पजा, येसु डोंगाते उद्‍दिसि लोकुल्‍कुंक पेनदा पोल्‍लें वेहालय दल्‍गतोर.
LUK 5:4 पेनदा पोल्‍लें वेहमळ आता पजा, “डोंगातुन वेल्‍ले लोतु मत्‍तगा ओसि मिमेट ओल्‍लां मर्रा वाटट,” इंचि येसु सिमोनुन इत्‍तोर.
LUK 5:5 अस्‍के, “गुरु! मोमोट नर्का पल्हीं तिप्‍पल्‍क अरतोम, माकु उंदिंका जिम्मा दोर्काहिल्‍ले, गानि निमे इंचेके मंतिन अदुनहाटीं नना ओल्‍ला वाटंतन,” इंचि सिमोन इत्‍तोर.
LUK 5:6 पजा सिमोन आनि ओना दंटातुर येसु वेहताप कीतुर अय्ते वेल्‍लेने जिम्मां अर्सि ओरा ओल्‍लां हर्रालय आतां.
LUK 5:7 ओल्‍लां हर्रंतां बारे इंचि वेरे डोंगाते मत्‍ता ओरा दंटातोर्कुन आसरा आयालय सय्गें कीसि केयतस्‍के, ओर वासि रोंडु डोंगाने जिम्मां निहतुर, अस्‍के ओरां रोंड डोंगा इंका मुळगालय आतां.
LUK 5:8 वेल्‍लेन जिम्मां अरतद हूळसि, सिमोन पत्रु आनि ओना दंटातुर वेल्‍ले इचंत्रम आतुर. अस्‍के सिमोन येसुना काल्कुना पोर्रो अरसि, “सामि, नना पापि मनकन आंदुन, नीवा दग्‍गेरा मनना लायक हिल्‍लेन,” इंचि इत्‍तोर.
LUK 5:10 अल्‍हेने जब्‍दि इननोना मर्क याकोब, योहान, ईर सिमोन पत्रुना दंटातोरे आंदुर, इचंत्रम आतुर. अस्‍के, “निमे वेरिय्मा, गानि इंदकेटाल निमे मनकालोर्कुन पीसि वायानोन आकिन,” इंचि येसु सिमोनुन इत्‍तोर.
LUK 5:11 पजा ओर ओरा डोंगां ओड्‍डुंक तत्‍तुर. तच्‍चि अव अन्‍नि अग्गेन होळसि ओना पज्जो होत्‍तुर.
LUK 5:12 उंदि रोजु येसु उंदि सहरते मत्‍तोर. अगा वरोर मनकल कुस्‍टरोगमते पूरा निंडसि मत्‍तोर. ओर येसुन हूळसि ओना काल्कुनपोर्रो अर्सि, “सामि, निमे इन्‍कुत्‍ते नाकुन बेस किया पर्रांतिन,” इंचि विनंति कीतोर.
LUK 5:13 अस्‍के येसु कय मुन्‍नेळ्‍क कीसि ओन इट्‍सि इल्‍हा इत्‍तोर, “निमे बेस आयगोम इंचि मनसु मंता, बेस आम,” इंचि इत्‍ता इन्‍मळे ओना कुस्‍टरोगम पुरागा होत्‍ता.
LUK 5:14 पजा, “इगे जर्गतद बोनके वेहमा. गानि निमे होंचि मीवा पेर्मांक हुप्‍सा. पजा मूसाल वेहता मोक्‍कु हीम. अस्‍के निमे बेस आतिन इंचि लोकुल्‍कुंक एरपाट आंता,” इंचि येसु ओन्क गट्‍टिगा वेहतोर.
LUK 5:15 निमे बोर्के वेहमा इंचि येसु वेहचि मत्‍तोर गानि ओना पोल्‍ले मुन्‍नेटकन्‍ना एक्‍को लोकुल्‍कुंक तेळियसेक होत्‍ता. अदुनहाटीं वेल्‍लेन लोकुल्‍क ओना पोल्‍लें केंजालय, बिमारकुनाल बेस आयालय ओना पज्जो-पज्जो वायुंदुर.
LUK 5:16 गानि येसु बोरे हिल्वगा अलग-सलग होंचि पारतना कियुंदुर.
LUK 5:17 येसु उंदि रोज वरोन लोन पेनदा पोल्‍लें वेहनेंके, अगा परिसिल्क, आनि दर्मसास्‍त्रम कराहना गुरुल्क उदिस मत्‍तुर. ओर गालिल आनि यहुदिया एरियाना अन्‍नि नाहकुनाल, अल्‍हेने येरुसलेम सहरताल वासि मत्‍तुर. पेनदा ताकत येसु सामिनगा मत्‍ताहेंके बिमारतोर्कुन बेस कियुंदुर.
LUK 5:18 हूळा! अस्‍के इच्‍चुर लोकुल्‍क वरोर लकवा बिमारतोन कटुलते वाटसि येसुनगा तत्‍तुर. तच्‍चि येसु उद्‍दिसि मत्‍तगा लोप्पो ओयालय हूळतुर.
LUK 5:19 गानि अगा वेल्‍ले गर्दि मत्‍ताहाटीं ओर लोता लोप्पो ओया पराहिल्‍लुर. अस्‍के ओर बतल कीतुर इत्‍ते लोतपोर्रो एकतुर, कटुल पियानच्‍चो बोंगा कीसि येसु लोप्पो बगा अय्ते उदिस मत्‍तोरो ओन्क सवरगा आ लकवा बिमारतोन कटुल्क कटुले ओना मुन्‍ने रेहतुर.
LUK 5:20 येसु, ओरा विस्वासमतुन हूळसि, “कोको, नीवा पापाल्क मापि आतां,” इंचि लकवा बिमारतोन इत्‍तोर.
LUK 5:21 अस्‍के दर्मसास्‍त्रम कराहना गुरुल्क आनि परिसिल्क केंजसि, “पेनदा अपमानम कियानोर, ईर बोर आंदुर? पेनदुन होळसि इंका बोरे पापाल्कुन मापि किया पर्रुर,” इंचि ओर-ओरे मनसुने विचारम कियालय दल्‍गतुर.
LUK 5:22 येसु सामि, ओरा मनसुना विचारमतुन एरपाट कीसि, “मी मनसुने इसोंटा विचारम बारि कींतिर?
LUK 5:23 बद अल्कगा मंता? ई बिमारतोन, ‘नीवा पापाल्क मापि आतां’ इनमळा? हिलाकोंटे, ‘तेदिस ताका’ इनमळा?
LUK 5:24 गानि मनकना रूपमते पुटतोन नाकु, ई बूमिपोर्रोटा पापाल्कुन मापि कियना अदिकारम मंता इंचि मीकु हुप्‍संतन,” इत्‍तोर. इंचि, “नना नीकु वेहासेके, निमे तेदसि कटुल पीसि लोन होन,” इंचि लकवा बिमार आतोन इत्‍तोर.
LUK 5:25 अस्‍के ओर बिराना अंटोरा मुन्‍ने तेदसि, बद कटुलते अय्ते ओर मींडसि मत्‍तोर अद कटुल पीकुंचि, पेनदुन तल्‍सकुंचेके लोन होत्‍तोर.
LUK 5:26 अद हूळसि, अगा मत्‍तुर अंटोर वेल्‍लेन इचंत्रम आसि, पेनदुन तल्‍सकुनालय दल्‍गतुर. पजा वेरियसि, “इदवेरादाका मोमोट बस्‍केने इसोंटा इचंत्रम आयना कबाह्‍क हूळा हिल्‍लोम,” इंचि इनालय दल्‍गतुर.
LUK 5:27 पजा येसु अगटाल होननेंके, कर वसुल कियना नाकातगा लेवि पोरोलता वरोर कर वसुल कियानोन हूळतोर. हूळसि ओन, “नावा पज्जो वा,” इंचि इत्‍तस्के
LUK 5:28 ओर, ओनगा मत्‍तव अन्‍नि अग्गेन होळसि ओना पज्जो होत्‍तोर.
LUK 5:29 पजा लेवि येसुन ओना लोन केय्‍सि, उंदि पेद्‍दा बोजनम हीतोर. अगा वेल्‍लेटुर कर वसुल कियानोर, इंका वेरेटोर लोकुल्‍क येसुनतोनि उद्‍दिसि गाटो तिंचेके मत्‍तुर.
LUK 5:30 अस्‍के परिसिल्क आनि ओरा दर्मसास्‍त्रम कराहना गुरुल्क येसुना सिस्युल्कुनगा वासि, “कर वसुल कियानोरतोनि आनि पापि लोकुल्‍कुनतोनि मिमेट तिनुळ-उनुळ बारि तिंतिर,” इंचि गुल्‍गालय दल्‍गतुर.
LUK 5:31 अस्‍के येसु ओर्कु इल्‍हा जवाब हीतोर, “बिमार हिल्‍वोर्कुंक डाक्‍टरना अव्‍सरम मन्‍नो गानि बिमार मत्‍तोर्कुंक डाक्‍टरना अव्‍सरम मनंता.
LUK 5:32 नना नीतिमंतुल्‍कुन केयालय आयो गानि पापि लोकुल्‍कुन मनसु मार्सकुननाहाटीं केयालय वातन,” इंचि इत्‍तोर.
LUK 5:33 पजा अगा मत्‍ता लोकुल्‍क येसुन इल्‍हा पूसकीतुर, “योहानुना सिस्युल्क अय्ते ऊके ओक्‍कापोद्‍दु मनंतुर, पारतनागुडा कींतुर. अल्‍हेने परिसिल्कुना सिस्‍युल्‍कगुडा कींतुर, गानि नीवा सिस्युल्क अय्ते बस्‍केळ्‍क तिंचेक-उंचेके मनंतुर. अल्हा बारि?”
LUK 5:34 अस्‍के येसु ओर्क इल्‍हा वेहतोर, “मरमिन पेडल मरमिं वाता हेडमितोरतोनि मननेंके, ओर्कुन ओक्‍कापोद्‍दु मना वेहा परकिटा? वेहा पर्रिर.
LUK 5:35 गानि मरमिन पेडल ओरागटाल लक्‍कु आयाना रोजकु वायनुं, अव रोजकुने ओर ओक्‍कापोद्‍दु मनानुर.”
LUK 5:36 पजा, येसु ओर्क इंकुंदि वेसुडि वेहतोर. “बोरे आयिर, पूना कप्‍पिडतुन हराह्‍चि पळाना कप्पिड्‍क अंटा वाट्‍सि कुट्‍टोर. ओक्‍कला ओर अल्हा कियानय्ते पूना कप्‍पिड अय्ते हेळसि दांते, अल्‍हेने पूना कप्‍पिडता तुकडा पळाना कप्पिड्‍क सोकगुडा दिस्सो.
LUK 5:37 अल्‍हेने पूना अंगुर पानकमतुन, पळाना तोलपुर्काते बोरे दोस्सुर. अल्हा दोसते अद अंगुर पानकम, पळाना तोलपुर्कातुन हराह्‍चि पोंगिस दांता. पजा आ तोलपुर्कागुडा नासडेम आंता.
LUK 5:38 अल्हा कियवा पूना अंगुर पानकम पूना तोलपुर्कातेन दोसना. अस्‍के तोलपुर्कातुन हरहो.
LUK 5:39 बोरे आयिर, पळाना अंगुर पानकम उट्‍टारित्‍ते, पूना अंगुर पानकम गावाले इन्‍नोर. ओर पळाना अंगुर पानकमे बेस मंता इंचि वेहांतोर.”
LUK 6:1 उंदि नोमकेम रोजुने येसु पोलाल्‍कुनाल होंचेके मत्‍तोर. होननेंके ओना सिस्युल्क हेनकु उरहाचि कय्‍दे नल्‍सि तिंचेके होत्‍तुर.
LUK 6:2 इच्‍चुर परिसिल्क अदुन हूळसि, “नोमकेम रोजुने बद कबळ अय्ते कियमळ नियम परकारम ओज्‍जोनो, अदे कबळ मिमेट बारि कीसंतिर?” इंचि येसुन पूसकीतुर.
LUK 6:3 अस्‍के येसु ओर्कुन, “दाविदुंक आनि ओना दंटातोर्कुंक कर्वेस्‍तस्‍के ओर बतल कीतोर, मिमेट हदवा हिल्‍लिरा?
LUK 6:4 ओर पेनदा लोते होळियसि, पेनदुक मोळ्कता हारिन तित्‍तोर, ओना दंटातोर्कुंकगुडा हीतोर. अव हारिं तिनमळ इत्‍ते दर्मसास्‍त्रम परकारम विरोदमते मत्‍ता. अव हारिं सिराप पेर्मालोर्क तप्‍पा इंका बोरे तिना पर्रुर,” इंचि इत्‍तोर.
LUK 6:5 पजा, “मनकना रूपमते पुटतोन नना, नोमकेमता रोजुना मालकगुडा आंदुन,” इंचि येसु ओर्कुन इत्‍तोर.
LUK 6:6 अल्‍हेने इंकुंदि नोमकेम रोजुने येसु दर्मसास्‍त्रम कराहना लोन होंचि कराहसेक मत्‍तोर. अगा वरोर तिना कय वत्‍सोत्‍ता मनकल मत्‍तोर.
LUK 6:7 अद लोतगा इच्‍चुर दर्मसास्‍त्रम कराहना गुरुल्क आनि परिसिल्क मत्‍तुर. नोमकेम रोजुने येसु ओन बेस कींतोरा किय्योरा? बेस कियानय्ते, नोमकेम रोजुने बल्हा बेस कीतोर इंचि तप्पुने पियालय हूळसेक मत्‍तुर.
LUK 6:8 गानि येसु मात्रम ओरा विचाराल्कुन एरपाट कीसि, “तेदसि अंटोरा मुन्‍ने नित्‍ता,” इंचि कय वत्‍सोत्‍तोन इत्‍तोर, इत्‍तस्के ओर तेदसि मुन्‍ने वासि निततोर.
LUK 6:9 पजा येसु ओर्कुन इल्‍हा पूसकीतोर, “नना मीकुन उंदि पोल्‍ले पूसकींतन वेहाट. नियम परकारम, नोमकेम रोजुने बेस कियमळ मंचिदा, कराब कियमळ मंचिदा? हिलाकोंटे उंदि जीवातुन पिसागोटते मंचिदा, नासडेम कियमळ मंचिदा? बद बेस” इत्‍तोर.
LUK 6:10 येसु अंटोरहेके हूळतोर. पजा, “नीवा कय मुन्‍नेळ्‍क हहा,” इंचि आ कय वत्‍सोत्‍तोन इत्‍तोर. ओर कय मुन्‍नेळ्‍क हाहतस्‍के ओना कय बेस आता.
LUK 6:11 गानि परिसिल्कुंक आनि दर्मसास्‍त्रम कराहना गुरुल्कुंक होंग वासि, ओर पलाते पेय्‍स्‍तुर. पेय्सि, येसुन बतल कीते सरे? इंचि ओर-ओरे विचाराल्क कियालय दल्‍गतुर.
LUK 6:12 पजा उंदि रोज पारतना कियालय येसु गुट्‍टापोर्रो होत्‍तोर. अगा ओर नर्का-पल्‍हिं पेनदुक पारतना कीतोर.
LUK 6:13 पंगातस्के ओना सिस्युल्कुन अंटोर्कुन दग्गेर्क केय्‍सि ओराव्टेटाल पन्‍नेंड मंदितुन पेरतोर. पेरसि ओर्कु, प्रेरितुल्क इंचि पोरोल दोसतोर. येसु पन्‍नेंड मंदितुन पेरकुत्‍तोर ओरे प्रेरितुल्क इंचि पोरोल दोसतोर.
LUK 6:14 पन्‍नेंड मंदि बोर-बोर इत्‍ते, सिमोन (ईन पत्रु इंचि येसु पोरोल दोसतोर), सिमोनुना तम्मुर अंदरियल, जब्‍दिना मर्क याकोब आनि योहान, पिलिप, बरतलमय,
LUK 6:15 मत्‍तयाल (ईर कर वसुल कियना लेवि आंदुर, ईन मत्‍तयालगुडा इंतुर), तोमल, अल्‍पिना मर्रि याकोब, सिमोन जिलोति
LUK 6:16 तद्‍दि यहुदल (ईना बाना पोरोल याकोब) आनि इस्‍कारियोत नाटेना यहुदल (ई यहुदले आकिरते येसुन पगातोरा कय्‍दे पीसि हीतोर).
LUK 6:17 पजा येसु ओना सिस्युल्कुनतोनि गुट्‍टा पोर्रोटाल हिळु रेय्‍सि, सपाट जेगाते वासि निततोर. अगा ओना वेल्‍लेन मंदि सिस्युल्क मत्‍तुर. अचोने आयाका पूरा यहुदिया एरिया, येरुसलेम सहर, समुद्रम ओड्‍डु पीसि मत्‍ता सूर, सिदोन इनना सहरकुनाल वेल्‍लेटुर लोकुल्‍क ओनगा जमा आसि मत्‍तुर.
LUK 6:18 ओर अंटोर येसु वेहता पोल्‍लें केंजालय, बिमारकुनाल बेस आयालय वासि मत्‍तुर. बोर्कु अय्ते देय्याल्क पीसि मत्‍तंगो ओरगुडा वासि बेस आतुर.
LUK 6:19 ओनागटाल पेनदा ताकत वासि ओर अंटोर्कुन बेस कियुंदु. अदुनहाटीं आ मंदि अंता ओन इट्‍टालय हूळसेक मत्‍तुर.
LUK 6:20 पजा येसु ओना सिस्युल्कुन हूळसि इल्‍हा इत्‍तोर, “मिमेट बोर अय्ते गरिब मंतिरो, पेन मीकु आसिर्वाद हींता, पेनदा राज्येम मी असंटोरदे आंदु.
LUK 6:21 मिमेट बोर अय्ते इंदके कर्वुने मंतिट, पेन मीकु आसिर्वाद हींता, मीवा करवु सल्‍लारंता. बोर अय्ते इंदके अळसेके मंतिट, पेन मीकु आसिर्वाद हींता, वायना रोजकुने मिमेट कव्‍सेक मनंतिर.
LUK 6:22 मनकना रूपमते पुटता पेनदा मर्रिना सिस्युल्क आताहाटीं, बस्के अय्ते लोकुल्‍क मीकुन हय्साकोंटा आंतुर, गेदमिसींतुर, अपमानम कींतुर, मिमेट हेळसोत्‍तिर इंचि, मीवा पोरोल एताकोंटा आंतुर, अस्‍के मीकु पेन आसिर्वाद हींता.
LUK 6:23 ओरा एनकटा पेद्‍दाल्कगुडा मीकन्‍ना मुन्‍नेटा पेनदा कबुरतोर्कुन, इल्हेने तकलिप कीतुर. अदुनहाटीं हुळाट! मीक तकलिप वातस्के, मिमेट कुसिते एगरट, स्वर्गमते मीकु पेद्‍दा इनाम मंता.” इंचि इत्‍तोर.
LUK 6:24 मर्रा येसु इल्‍हा इत्‍तोर, “ए दनवंतुल्कुनिटा! मीकुन पेन बेस हूळो, बारित्‍ते, मीकु सिराप इग्‍गेटा सुकम-सांते दोर्कंता.
LUK 6:25 इंदके पीरनिंडा तिनना लोकुरिटा! मीकुन पेन बेस हूळो, मुन्‍ने मिमेट कर्वुने मंदकिर. इंदके कव्वानोरिटा! मीकुन पेन बेस हूळो, वायना रोजकुने मिमेट दुक्‍कमते अळकिर.
LUK 6:26 इंदके अंटोराहेंदाल कदर दोर्किच्‍कुत्‍तोरिटा! मीकुन पेन बेस हूळो, बारित्‍ते बोर अय्ते मीक कदर हीतुर, ओरा एनकटा पेद्‍दाल्कगुडा, मुन्‍नेटा पेनदा आबद्‍दम कबुरतोर्क कदर हियुंदुर. आ आबद्‍दम कबुरतोर्क दोर्कताप, मीकुगुडा सिक्‍सा दोर्कार.”
LUK 6:27 इंदके नावा पोल्‍लें केंजानोरिटा! नना मीक वेहानद बतल इत्‍ते, मीवा पगातोर्कुन पावरम कीम्‍टु. मीकुन हय्सवोर्कुन बेस हुळाट.
LUK 6:28 बोर अय्ते मीकु सापनेम हींतोर ओन्क आसिर्वाद हीम्टु. बोर अय्ते मीकुन सिडांचंतोर, ओनाहाटीं पारतना कीम्‍टु.
LUK 6:29 बोरन्‍ना नीवा सेंपापोर्रो तंते ओनाहेके इंकुंदि सेंपागुडा तिरहा. बोरन्‍ना नीवा कोट तेंडकुत्‍ते, ओन नीवा अंगिगुडा ओया हीम.
LUK 6:30 बोरन्‍ना नीकुन बतलन्‍ना तल्‍कते, अद ओन्क हीम. बोरन्‍ना मिहागटाल बतलन्‍ना तेंडकुत्‍ते, अदुन वापस तल्कमट.
LUK 6:31 लोकुल्‍क मीवातोनि बल्हा मनना इंचि मिमेट इनकुंतिरो, अल्हेन मिमेट ओरतोनि मंटु.
LUK 6:32 मीकुन पावरम कियानोर्कुने मिमेट पावरम कीते, मीकु पेनदाहेंदाल बता पायदा दोर्कंता? पापिर्कगुडा ओर्कुन पावरम कियानोर्कुन पावरम कींतुर.
LUK 6:33 मीकुन बेस हूळानोर्कुंके मिमेट बेसता कबाह्‍क कीसि हीते, मीकु पेनदाहेंदाल बतल पायदा दोर्कंता? पापि लोकुल्‍कगुडा अल्हे कींतुर.
LUK 6:34 बोर वापस हींतुरो ओर्के बाकिक हीते, मीकु पेनदाहेंदाल बतल पायदा दोर्कंता? पापि लोकुल्‍कगुडा वापस दोर्कंतां इत्‍ता आसेते बाकिक हींतुर.
LUK 6:35 अल्हा कियाकोंटा मिमेट मीवा पगातोर्कुन पावरम कीसि ओर्कुन बेस हुळाट. बाकि वापस दोहंतोर इंचि आसे इर्राकोंटा बाकि हीम्ट. अस्‍के पेन मीकु पेद्‍दा इनाम हियार, मिमेट अन्‍निटकन्‍ना पेद्‍दा पेनदा मर्क-मियाह्क आकिट. बारित्‍ते, बोर अय्ते पेनदुन मति किय्युर आनि कराब मंतुर असोंटा लोकुल्‍कुनपोर्रो इंका पेन दया कींता.
LUK 6:36 मीवा पेनबाबाल दया कियानोर आंदुर, अदुनहाटीं मिमेटगुडा दया कियानोर आम्टु.
LUK 6:37 “मिमेट वेरेतोरपोर्रो दोसेम दोसमट, अस्‍के मीपोर्रोगुडा पेन दोसेम दोस्‍सो. मिमेट वेरेतोर्कुन, ‘दोसिल्‍क,’ इंचि इनमटु, अस्‍के पेन मीकुनगुडा ‘दोसिल्‍क,’ इंचि इन्‍नो. मिमेट वेरेतोर्कुन मापि कीम्‍टु, अस्‍के मीकुनगुडा पेन मापि किय्‍यार.
LUK 6:38 अव्‍सरम मत्‍तोर्कु बीसकेतनम कियाकोंटा हीम्ट, अस्‍के पेन मीकुगुडा हिय्यार. तव्वाते बेस निहचि, अदमिसि, कुदलिचि, पोंगानाल मीवा ओटिते वाटताप, पेन मीकु हिय्यार. बारित्‍ते, बद कोल्ताते मिमेट हींतिरो, अदे कोल्ताते मीकु हियमळ जर्गंता.”
LUK 6:39 मर्रा येसु ओर्क उंदि वेसुडि वेहतोर: “वरोर गुड्‍डि मनकल, इंकावरोर गुड्‍डि मनकंक हर्रि हुप्‍सा परांतोरा? अल्हा कीते, ओर इव्वुरगुडा पोक्‍कातेन अर्रंतुर.
LUK 6:40 सिस्युड ओना गुरुंकन्‍ना पेद्‍दा आया परोर, गानि गुरुनां पूरा करियसि ओर गुरुनलेसीं आंतोर.
LUK 6:41 “नीवा कळ्‍दे अरता सित्‍कुन तेंडका, नीवा दंटातोना कळ्‍दे अरता बुस्सितुन निमे बारि तेंडा हूळंतिन?
LUK 6:42 नीवा कळ्‍देन सित्‍कु अर्सि मननेंके, नीवा कळ्‍दे अरता बुस्सितुन तेंडाहीम इंचि नीवा दंटातोन बल्हा इना पर्रांतिन? ए डोंगि मनका! मोदाला नीवा कळ्‍दा सित्‍कुन तेंडा. अस्‍के नीवा दंटातोना कळ्‍दा बुस्सितुन तेंडालय नीकु बेस दिस्‍सार.”
LUK 6:43 “पंडितुन हूळसे, मिमेट मरातुन एरपाट कीकिर. बेसता मराकु कराब पंडिं हादों, कराब मराकु बेसता पंडिं हादों. हाह्कुना जप्‍पिताल अंगुर पंडिं हादों हिलाकोंटे ईरामुस्‍टी मराकुनाल मरका पंडिं हादों.
LUK 6:45 बारित्‍ते, मनसुने मनना पोल्‍लेंगे तोळ्‍दाल पलाते पेय्‍संतां. अदुनहाटीं बेसता मनकल ओना मनसुने मनना बेसता पोल्‍लेंगे पेच्‍हांतोर, अल्‍हेने कराब मनकल ओना मनसुने मनना कराब पोल्‍लेंगे पेच्‍हांतोर.”
LUK 6:46 “नना वेहता पोल्‍लेन केंजिर अय्ते नाकुन सामि सामि इंचि बारि इंतिर?
LUK 6:47 बोरे आयिर नहगा वासि, नावा पोल्‍लें केंजसि, दाना परकारम ताकाना हरेक मनकल, ओर बसंटोर आंदुर वेहंतन केंजाट.
LUK 6:48 ओर बसंटोर इत्‍ते, लोन दोहनेंके पायवा लोत तव्विसि, बंडातोनि पुनादि दोहचि लोन दोहतोर. बस्के अय्ते कम्मुड वाता, एता तडां वासि लोतुक दल्‍गतां. अय्नागानि अद लोन कूला हिल्‍ले. बारित्‍ते, अद लोन गट्‍टिगा दोहचि मत्‍ता.
LUK 6:49 गानि नावा पोल्‍लें केंजसि दाना परकारम ताकवा मनकल बसंटोर इत्‍ते, लोन दोहनेंके पुनादि दोहाकेन बूमिपोर्रो लोन दोहतोर. बस्के अय्ते एता तडां वासि लोतुक दल्‍गतां. अस्‍के अद लोन पूरा कूल्‍सि पाड आता,” इंचि येसु ओर्कुन इत्‍तोर.
LUK 7:1 लोकुल्‍कुंक वेहना मत्‍ता अन्‍नि पोल्‍लें वेहतारित्‍ते येसु कपर्नाहुम होत्‍तोर.
LUK 7:2 अगा वरोर रोम सरकारता दरोगाल मत्‍तोर. ओना वरोर दासुड बिमारते हायनाल आसि मत्‍तोर. ओन दरोगाल बागा पावरम कियुंदुर.
LUK 7:3 आ दरोगाल येसुना बारेमते बस्के अय्ते केंजतोरो, अस्‍के इच्‍चुर यहुदि पेद्‍दाल्कुनतोनि, “मिमेट येसुनगा होंचि, ‘दरोगाना दासुड बागा बिमारते मंतोर, ओन बेस कियालय नीकुन वा इंचि वेहालय माकुन लोहतोर,’ इंचि वेहाट,” इत्‍तोर.
LUK 7:4 ओर येसुनगा वासि, “आ दरोगाल बेसतोर आंदुर, ओर मावा यहुदि लोकुल्‍कुन पावरम कींतोर. ओर मावाहाटीं दर्मसास्‍त्रम कराहना लोनगुडा दोहचीतोर, अदुनहाटीं निमे ओन्क सहायम कीम,” इंचि येसुन बतिमलाडसेके विनंति कीतुर.
LUK 7:6 अस्‍के येसु ओरतोनि पेय्सतोर. ओर दरोगाना लोतुक दग्‍गेरा एवतस्‍के, ओर ओना दंटातोर्कुन येसुनहेके इल्‍हा वेहालय लोहतोर. “सामि, निमे तकलिप अरमा. निमे नावा लोन वायानच्‍चो पेद्‍दातनम नहगा हिल्‍ले.
LUK 7:7 अचोने आयका नना नीकु कलियाना लायकगुडा हिल्‍लेन. अदुनहाटीं निमे सिराप उंदि पोल्‍ले इन, नावा जीतागाड बेस आंतोर.
LUK 7:8 बारित्‍ते, ननागुडा वरोर अदिकारिना कय्‍दा हिळु कबळ कींतन. नावा कय्‍दा हिळुगुडा सिपाइल्क मंतुर. नना बोनना वरोन ‘होन’ इत्‍ते ओर दांतोर, इंकावरोन ‘वा’ इत्‍ते ओर वांतोर. इंका नावा दासुन, ‘इद कीम’ इत्‍ते ओर कींतोर.”
LUK 7:9 इद केंजसि येसुंक वेल्‍ले इचंत्रम आता. अस्‍के पजोळ्क तिरियसि, ओना पज्जो वासेक मत्‍ता मंदितुन इल्‍हा इत्‍तोर, “नना वेहानद केंजट, इस्राएल लोकुल्‍कुन लोप्‍पोगुडा इच्‍चोन विस्वासम मत्‍ता मनकल नाकु बग्‍गेन दोर्का हिल्‍लोर.”
LUK 7:10 येसु सामिनहेके लोहचीता दंटातोर मल्सि दरोगाना लोन वातस्के ओना दासुड बेस आसि दिसतोर.
LUK 7:11 पजा येसु नाईन इनना नाटेनहेके पेय्सतोर. ओनतोनि ओना सिस्युल्क इंका वेल्‍लेटुर लोकुल्‍क मत्‍तुर.
LUK 7:12 येसु नाटेने होळियाना गेटुना दग्गेर्क एवतोर, अच्‍चोटेन वरोन हातोन बोंदा दोसालय ओसेके मत्‍तुर. हातोना यावल मुंडामोसि मत्‍ता. दानकु ईर वरोरे मर्रि मत्‍तोर. नाटेनोर वेल्‍लेटुर लोकुल्‍क दानतोनि पेय्‍सतुर.
LUK 7:13 येसु सामिंक दान हूळसि दया वाता, अस्‍के “निमे अळमा बाई,” इंचि,
LUK 7:14 दग्‍गेरा होंचि पाडेतुन इटतोर. अस्‍के पाडेतुन कांजानोर अग्गेन आगतुर. अस्‍के येसु, “पेडा तेदा!” इंचि हातोन इत्‍तोर.
LUK 7:15 इत्‍तस्के, आ हासोत्‍ता पेडल तेदिस उद्‍दिसि वळकालय दल्‍गतोर. पजा येसु ओन ओना यावंक अप्पजेपतोर.
LUK 7:16 अगा मत्‍तोर अंटोर्क वेर्रे दल्‍गता, ओर वेरियसि, “पेन दाना लोकुल्‍कुंक सहायम कियालय वाता, मना नड्‍डुम दाना पेद्‍दा कबुरतोन लोहचीता,” इल्‍हा इंचेके पेनदुन तल्‍सकुनालय दल्‍गतुर.
LUK 7:17 येसुना इद पोल्‍ले यहुदिया एरिया आनि पक्‍का पीसि मत्‍ता अन्‍नि नाह्कुने तेळियसि होत्‍ता.
LUK 7:18 जर्गतव इव अन्‍नि पोल्‍लेना बारेमते, बापतिस्मा हियना योहान जेलने मननेंके ओना सिस्युल्क होंचि ओन्क वेहतुर. अस्‍के ओर, ओना सिस्युल्‍कुनाल इव्वुर्कुन केय्‍सि, “बोर अय्ते पिसागोटनोर वायानद मत्‍ता, ओन निमेन ना? हिलाकोंटे मोमोट इंकावरोना एदुर हूळमळा?” इंचि पूसकियालय ओर्कुन सामिनगा लोहतोर.
LUK 7:20 अस्‍के ओर सामिनगा वासि, “गुरु, ‘बोर अय्ते पिसागोटनोर वायनद मत्‍ता, ओन निमेन ना? हिलाकोंटे मोमोट इंकावरोना एदुर हूळमळा?’ इंचि नीकुन पूसकियालय, बापतिस्मा हियना योहान माकुन लोहतोर,” इंचि इत्‍तुर.
LUK 7:21 अस्‍केने येसु, बिमार मत्‍तोर्कुन, नोप्पिनोर्कुन, देय्याल्क पीसि मत्‍तोर्कुन इल्‍हा वेल्‍लेटोर्कुन बेस कीतोर, वेल्‍लेटुर गुड्‍डोर्कुना कळकु दिस्‍सानाल कीतोर.
LUK 7:22 पजा ओर्कु इल्‍हा जवाब हीतोर. “इंदके मिमेट बतल अय्ते हूळतिर, केंजतिर अद होंचि योहानुंक वेहट. गुड्‍डोर्क हूळसंतुर, कुंटोर्क ताकसंतुर, कुस्‍टरोगम आतोर बेस आसंतुर, सेव्टोर्क केंजसंतुर, हातोर्कुंक जीवां अरसंतां आनि गरिबोर्कुंक बारे बेसता कबुर एवसंता.
LUK 7:23 बोर अय्ते नावा बारेमते अन्‍समन्‍स किय्योर, ओन्‍के आसिर्वाद दोर्कंता,” इंचि इत्‍तोर.
LUK 7:24 योहानुना सिस्युल्क अगटाल पेय्सि होत्‍तस्के, योहानुना बारेमते लोकुल्‍कुंक येसु इल्‍हा वेहालय दल्‍गतोर, “मिमेट बय्‍लि जेगाते बतल हूळालय होत्‍तिर? वळिक ऊंगना जाडितुना?
LUK 7:25 हिलाकोंटे मिमेट बतल हूळालय होंचि मत्‍तिर? मेत्‍तटा कपडिं केर्ता मनकन हूळालय होत्‍तिरा? हुळाट! मेत्‍तटा कपडिं केर्रानोर आनि सिरमंतुल्‍क राजवाडाने मनांतुर, बय्‍लि जेगाते आयो!
LUK 7:26 अय्ते मरि मिमेट बतल हूळालय होत्‍तिर? पेनदा कबुरतोन हूळालय होत्‍तिरा? हो! नना मीकु वेहासेक मंतन, मिमेट बोन अय्ते हूळतिर ओर पेनदा कबुरतोनकन्‍ना बच्‍चोरो पेद्‍दा मंतोर.
LUK 7:27 ओना बारेमते पेन मुन्‍नेने इल्‍हा वेहचि मत्‍ता. “हूळा! नना नीकन्‍ना मुन्‍नेने नावा कबुरतोन लोहंतन, निमे वायानाहाटीं ओर हर्रि तयार कींतोर.” इंचि दर्मसास्‍त्रमते रासि मंता.
LUK 7:28 “नना मीकु वेहानद बतल इत्‍ते, पुट्तोराव्‍टेटाल योहानुंकन्‍ना पेद्‍दा बोरे हिल्‍लोर. अय्नागानि पेनदा राज्येमते सिन्‍ना मनकलगुडा योहानुंकन्‍ना पेद्‍दोडे,” इंचि वेहतोर.
LUK 7:29 अस्‍के वेल्‍लेटुर लोकुल्‍क आनि कर वसुल कियानोरगुडा येसु वेहता पोल्‍लेन केंजतुर. केंजसि, पेनदा हर्रि नीतिता हर्रि, इंचि इत्‍तुर. ओर्क अंटोर्क योहान मोदालेन पेनदा पोरोलते बापतिस्मा हीसि मत्‍तोर.
LUK 7:30 गानि परिसिल्क आनि मूसाना नियम बेस तेळियतोर बारे योहानुनाहेंदाल पेनदा पोरोलते बापतिस्मा एतुवा, पेन ओर्क हुपिस्‍ता हर्दे ताका हिल्‍लुर.
LUK 7:31 मर्रा येसु इल्‍हा वळकालय दल्‍गतोर, “ई पीळिता लोकुल्‍क बोरालेसीं मंतुर इंचि, ओर्कुन बोरा लोप्पो कल्‍पकन? मिमेट अय्ते चौकुने उद्‍दिसि, वरोंक-वरोर केय्‍सि, “मोमोट मीहाटीं दुक्‍कमता पाटां पारतोम, अयना मिमेट अळा हिल्‍लिर. मोमोट मीहाटीं तूरीला उह्कुतोम, गानि मिमेट एगरा हिल्‍लिर, इंचि इनना पिलाल्कुनालेसीं मंतिर.”
LUK 7:33 “अल्‍हेने बापतिस्मा हियना योहान एक्‍कोते एक्‍को ओक्‍कापोद्‍दु मनुंदुर. अंगुर पंडिना पानकमगुडा उनाकोंदुर, अयना मिमेट ओन, देय्यम पीता इंचि इत्‍तिर.
LUK 7:34 गानि मनकना रूपमते पुटतोन नना तिंचेके-उंचेके वातन. गानि मिमेट मात्रम, ‘हुळाट, ओर बच्‍चोर तिंतोर, बच्‍चोर उंटोर? कर वसुल कियानोर आनि पापि लोकुल्‍क ओना दंटातोर आंदुर,’ इंचि नाकुन इंतिर.
LUK 7:35 गानि पेनदा बुद्‍दि नीतितद आंद इंचि, दाना बुद्‍दिते ताकानोर कियाना कबाह्‍कुन पोर्रोटाल तेळियंता.”
LUK 7:36 उंदि मल्का सिमोन इनना वरोर परिसि मनकल ओना लोन गाटो तिनालय येसुन केयतोर. अस्‍के येसु ओना लोन होंचि गाटो तिनालय उदतोर.
LUK 7:37 हुळाट! आ नाटेने उंदि पापि मुरतळ मत्‍ता. येसु वरोर परिसिन लोन गाटो तिंचंतोर इंचि दान्क तेळियतस्के अद उंदि बंडाता गुर्गिते बेस गमागमा गब्‍बु वायना अत्‍तर निय पीसि वाता.
LUK 7:38 वासि येसुना पज्जो नित्‍तिसि अळसेके दाना कळ्‍कुनाल पोंगाना एरतोनि येसुना काल्‍कुन नहालय दल्‍गता. पजा दाना केल्कुनतोनि उसुमसेके, ओना काल्‍कुन बुर्सेके अत्‍तर निय होकुंदु.
LUK 7:39 अल्हा कियानद हूळसि, बोर अय्ते येसुन केयतोरो आ परिसि इल्‍हा इन्कुत्‍तोर गदा, “इद अय्ते पापि मुरतळ आंदु! ईर निजमे पेनदा कबुरतोर आसि मत्‍ते, ओन इट्‍टानद बसोंटा मुरतळ आंद इंचि ओन्क तेळियसि मनवळ. पापि मुरतळ इटते मुट्‍टुळ इंचि दान इट्‍टा हियाकोन्‍नेर,” इंचि ओर इनकुत्‍तोर.
LUK 7:40 अस्‍के येसु ओना मनसुन एरपाट कीसि, “सिमोन, नीकुन उंदि पोल्‍ले पूसकियना मंता,” इंचि इत्‍तस्के ओर, “वेहा गुरुजी,” इंचि इत्‍तोर.
LUK 7:41 अस्‍के येसु उंदि वेसुड वेहतोर, “इव्वुर मनकालोर वरोर सावकारनगटाल बाकि तेंडतुर, वरोर बारे हेय्युं नुह्कु, इंकावरोर बारे एबै एंडि बंडिं.
LUK 7:42 गानि ओर बाकि दोहा पराहिल्‍लुर. अदुनहाटीं सावकार ओरा इव्वुरा बाकितुन मापि कीतोर. अय्ते इंदके ओरा इव्वुरा लोप्पोटाल सावकारुन बोर एक्‍को पावरम कींतोर, वेहा?” इंचि पूसकीतोर.
LUK 7:43 अस्‍के, “बोर अय्ते एक्‍को बाकि मत्‍तोर, ओरे एक्‍को पावरम कियानुर बारे,” इंचि सिमोन इत्‍तोर. इत्‍तस्के, “निमे बरोबर वेहतिन,” इंचि येसु ओन इत्‍तोर.
LUK 7:44 येसु मुरतटहेके तिरियसि सिमोनुन इल्‍हा इत्‍तोर, “निमे ई मुरताटुन हूळा. नना नीवा लोन वातन, निमे नावा काल्क नोर्रालय एरगुडा हिय्या हिल्‍लिन. गानि इद बारे दाना कांडेह्कुनतोनि नावा काल्‍कुन नाहचि, केल्कुने उसुमता.
LUK 7:45 निमे नाकुन बुर्सि जोहार किया हिल्‍लिन, गानि नना लोप्पो होळियतस्केटाल इद नावा काल्‍कुन बुर्सेके मंता.
LUK 7:46 निमे नावा तल्‍लक निय होकसि नाकु कदर हिया हिल्‍लिन, गानि इद नावा काल्कुंक वेल्‍लेन दराता अत्‍तर निय होकता.
LUK 7:47 अदुनहाटीं नना नीकु वेहानद बतल इत्‍ते, दाना अन्‍नि पापाल्क मापि आतां इंचि अद वेल्‍लेन पावरम कीता, गानि बोनद इच्‍चुने पापम मापि आता, ओर इच्‍चुने पावरम कींतोर.”
LUK 7:48 पजा येसु, “नीवा पापाल्क मापि आतां,” इंचि आ मुरतटुन इत्‍तोर.
LUK 7:49 अस्‍के, “ईर बोर आंदुर, ओनद ओर पेन इन्कुंचि, पापाल्कुन मापि कींतोर?” इल्‍हा ओनतोनि गाटो तिंचेक उदिस मत्‍तुर अंटोर ओरद-ओरे वळ्ककुनालय दल्‍गुतुर.
LUK 7:50 पजा, “निमे नावापोर्रो विस्वासम कीताहाटीं पेन नीकु मुक्‍ति हीता, निमे सांतिते होन,” इंचि येसु आ मुरतटुन इत्‍तोर.
LUK 8:1 पजा इल्‍हा जर्गुता गदा, येसु अन्‍नि सहरकुने, नाह्कुने पेनदा राज्येमता बारेमता बेसता कबुर वेहासेके तिरियालय दल्‍गतोर. ओनतोनि पंन्‍नेड मंदि प्रेरितुल्क मत्‍तुर.
LUK 8:2 अगा देय्याल्कुनाल, बिमारकुनाल बेस आतव इच्‍चुं मुर्ताह्कगुडा ओरतोनि मत्‍तां. अव मुर्ताह्कुनाल उंदि मगदलेनि नाटेनद मरियम पोरोलता मुरतळ मत्‍ता. येसु दानगटाल एडुं देय्याल्कुन पेचाह्‍चि मत्‍तोर.
LUK 8:3 इंकुंदि मुरतळ योहानि इनानद, हेरोद राजाना दिवांजि कोजा इननोना मुत्‍तो मत्‍ता. अल्‍हेने सुसान्‍नल आनि वेल्‍लेन मुर्ताह्कगुडा मत्‍तां. इवन्‍नि मुर्ताह्क येसु आनि ओना सिस्युल्कुना सेवाताहाटीं अवुना संतम कोत्‍तन कर्स कियुंदुं.
LUK 8:4 अल्‍हेने उंदि रोजु वेरे-वेरे नाहकुनाल वेल्‍लेटुर लोकुल्‍क येसुनगा वासि जमा आसेक मत्‍तुर, अस्‍के येसु ओर्क उंदि वेसुड वेहतोर. अद इल्‍हा मत्‍ता.
LUK 8:5 “वरोर कास्‍तकरि मनकल विज्‍जां वीतालय पेय्‍स्‍तोर, विज्‍जां वीतनेंके इच्‍चुं विज्‍जां हरदगा अरतां. अव विज्‍जन हर्रि पीसि होनानुर-वायानुर जारतुर, पजा अवुन पिट्‍टें वासि पेर्सि तित्‍तां.
LUK 8:6 इच्‍चुं विज्‍जां बंडाना जेगाते अर्सि अव मोलियतां. गानि अगा पदन दोर्कवाहाटीं वत्‍सि हासोत्‍तां.
LUK 8:7 इच्‍चुं विज्‍जां हाह्कुना पोदाने अरतां. अवुनतोनि हाह्कुना पोदांगुडा बेर्सि अव विज्‍जन बेर्सा हिया हिल्‍लें.
LUK 8:8 इच्‍चुं विज्‍जां बेसता जेगाते अरतां. अव बेस मोलियसि नूर अंताल्कुना पंटा पेय्‍स्‍ता,” इंचि वेहचि, “बोर्कु केंजालय केव्क मंतां ओर केंजट,” इंचि जोरते इत्‍तोर.
LUK 8:9 “ई वेसुडिता अर्तम बतल गुरु?” इंचि ओना सिस्युल्कु पूसकीतुर.
LUK 8:10 अस्‍के येसु ओर्कुन इल्‍हा इत्‍तोर, “मीक अय्ते पेनदा राज्येमता बारेमता मर्ममतुन एरपाट कीकुनालय बुद्‍दि मंता. गानि वेरेतोर्कुंक बारे वेसुडिने वेहांतन. इल्‍हा कीते “ओर नावा कबाह्‍कुन हूळांतुर, गानि अव कबाह्‍कुन अर्तम कीकुन्‍नुर. ओर केंजांतुर गानि तेळियागोटकुन्‍नुर.”
LUK 8:11 “इद वेसुडिता अर्तम इल्‍हा मंता, विज्‍जां इत्‍ते पेनदा पोल्‍ले आंदु.
LUK 8:12 बोर अय्ते पेनदा पोल्‍लेतुन केंजतुर गानि, ओर विस्वासम कीसि ओर्कु मुक्‍ति दोर्कामन्‍नि इंचि देय्यम वासि ओर केंजतवुन ओरा मनसुनाल तेंडसि पोहंता. असंटोर इत्‍ते, विज्‍जां अरता हर्दा जेगातसंटोर आंदुर.
LUK 8:13 विज्‍जां अरता बंडाना गेर्से जेगातसंटोर बोर इत्‍ते, बोर अय्ते पेनदा पोल्‍लेतुन कुसिते केंजसि दान ओप्‍कुंतुर. गानि ओरा मनसुने पेनदा पोल्‍ले गट्‍टि पळुवाहाटीं, ओर कोन्‍नि रोजके विस्वासमते मनांतुर. पजा पट्‍टु हूळना वेला वातस्के विस्वासमताल ओर लक्‍कु आंतुर.
LUK 8:14 विज्‍जां अरता हाह्कुना पोदाना जेगातसंटोर बोर इत्‍ते, बोर अय्ते पेनदा पोल्‍लें केंजांतुर गानि विस्वासमते मननेंके सम्‍सारमता रंदि, दनमता आस्‍ति, दुनियाता सुकाल्क इव अन्‍नि ओर्कुन पेनदा पोल्‍लेन लोप्पो बेर्सा हिय्यों. अदुनहाटीं पेनदा पोल्‍लेनहेंदाल ओर्क बतल पायदा वायो.
LUK 8:15 गानि विज्‍जां अरता बेसता जेगातसंटोर बोर इत्‍ते, बोर अय्ते पेनदा पोल्‍लेन सत्‍तेम, बेस मनसुने केंजसि, अव पोल्‍लेन मनसुने इर्रंतुर. पजा ओर्क बच्‍चोन तकलिप वायना गानि ओप्‍केते बेसता कबाह्‍क कींतुर, असंटोर इत्‍ते विज्‍जां अरता बेसता जेगातसंटोर आंदुर,” इंचि इत्‍तोर.
LUK 8:16 “बोरे आयिर वेडसि निरिच्‍चि गंजुना हिळु मुच्‍चोर, कटुल हिळुगुडा इर्रोर. गानि लोप्पो होळियानोर्क बेस वेल्‍गु दिसगोम इंचि दान उंदि दीसोडिपोर्रो इर्रंतोर.
LUK 8:17 अल्‍हेने मक्‍किस मत्‍तव अन्‍नि दिस्‍सि अर्राकोंटा मन्‍नों, आनि मर्ममते मत्‍तव बवे पलाते अर्राकोंटा मन्‍नों.
LUK 8:18 अदुनहाटीं बेस मनसु तासि केंजट. बारित्‍ते, बोनगा अय्ते पेनदा पोल्‍लेन तेल्‍पिचकुनना बुद्‍दि मंता, पेन ओन्क इंका हींता. गानि बोनगा अय्ते पेनदा पोल्‍लेन तेल्‍पिचकुनना बुद्‍दि हिलाकोन्‍ना, मंता इनकुंतोर, अदुनगुडा पेन एतकुन्‍नार,” इंचि येसु ओर्कु वेहतोर.
LUK 8:19 अस्‍के येसुना यावल, ओना तम्मुह्‍क ओनगा कलियालय वातुर. गानि गर्दि मत्‍ताहाटीं ओर ओनकु कलिया पराहिल्‍लुर.
LUK 8:20 अदुनहाटीं, “नीवा यावल, नीवा तम्मुह्‍क नीकु कलियालय पलाते नित्‍तिसि मंतुर,” इंचि बोरो येसुंक वेहतोर.
LUK 8:21 अस्‍के, “बोर अय्ते पेनदा पोल्‍लें केंजसि अल्‍हेने ताकंतुरो, ओर्कुने नावा यावल, नावा तम्मुर इंतन,” इंचि येसु ओर्कुन इत्‍तोर.
LUK 8:22 उंदि रोज येसु ओना सिस्युल्कुनतोनि डोंगाते उद्‍दिस, “मनम समुद्रमता हब्बेटा बाजुंक दाकोम दट,” इंचि इत्‍तस्के ओर होनालय पेय्‍सतुर.
LUK 8:23 ओर डोंगाते उद्‍दिस होननेंके येसु निद्रा होत्‍तोर. अस्‍के समुद्रमते पेद्‍दा वळि-दुमारम वाता. अदुनहेंदाल डोंगाते एर निंडालय दल्‍गिसि, ओर वेल्‍ले दोकाते मत्‍तुर.
LUK 8:24 अस्‍के सिस्युल्क येसुनगा होंचि, “गुरु, गुरु मनम नासडेम आसि होंचंतोम,” इंचि इत्‍तुर. अस्‍के ओर तेदसि वळि-दुमारमतुन, एता तडान गदरिचतोर अय्ते वळि-दुमारम आगता, तडांगुडा दिसाकोंटा आतां.
LUK 8:25 अस्‍के, “मिमेट नावापोर्रो विस्वासम बारि इर्रा हिल्‍लिर?” इंचि येसु ओर्कुन इत्‍तोर. गानि ओर इरगा वेरियसि, इचंत्रमते, “ईर आदेस हीते ईना पोल्‍ले वळि, एता तडांगुडा केंजंतां, ईर बोर आंदुर?” इंचि ओर ओरे वळ्‍ककुत्‍तुर.
LUK 8:26 पजा ओर गिरासेन इनना वेरे देसेमते एव्‍तुर, अद जेगा गालिल समुद्रमता हब्बेटा बाजुंक मत्‍ता.
LUK 8:27 येसु डोंगाताल बल्हा रेयतोर अल्‍हेने अद सहरतोर वरोर देय्याल्क पीसि मत्‍ता मनकल अगा वातोर. ओर वेल्‍लेने रोजकुनाल कपडिं केर्राकोंदुर, लोन मनाकोंदुर, ओर तापळानेन मनुंदुर.
LUK 8:28 देय्यम ओन ऊके-ऊके पिय्‍युंदु, लोकुल्‍क ओन गोल्सुकुने दोहचि कावेल मनुंदुर. गानि ओर गोल्सुकुन नेम्‍हुंदुर, अस्‍के देय्यम ओन बोरे हिल्वगा ओयुंदु. येसु अद देय्यमतुन ओनागटाल पेय्सि होनालय आदेस हीतोर. अदुनहाटीं ओर येसुन हूळसि, “ए अन्‍निटकन्‍ना पेद्‍दा पेनदा मर्रि येसु, नातोनि नीकु बता कबळ? नाकु तकलिप हियमा इंचि नीकु विनंति कींतन,” इल्‍हा जोरसे वरगेयसि ओना मुन्‍ने अरतोर.
LUK 8:30 “नीवा पोरोल बतल?” इंचि येसु पूसकीतोर. ओनकु वेल्‍लेने देय्याल्क पीसि मत्‍ताहाटीं, “मोमोट वेल्‍लेन मंदा आसि मंतोम, इंचि नावा पोरोल मंदा आंद,” इंचि अव येसुन इत्‍ता.
LUK 8:31 पजा देय्याल्क येसुनतोनि, “माकुन नरकमता लोतु जेगाते होनना आदेस हियमा,” इंचि बच्‍चोरो विनंति कीतां.
LUK 8:32 अगा गुट्‍टापोर्रो पद्‍दिना उंदि मंदा मेय्‍सेके मत्‍ता. “माकुन आ पद्‍दिना मंदा लोप्पो होनाहीम,” इंचि देय्याल्क येसुन विनंति कीतां, अस्‍के येसु अवुन पद्‍दिना मंदा लोप्पो होना हीतोर.
LUK 8:33 अस्‍के आ देय्याल्क मनकना लोप्पोटाल पेय्सि पद्‍दिना मंदाते होंचि होळियतां. अस्‍के आ पूरा मंदा ओड्‍डुन पोर्रोटाल हिळतुक वित्‍सि सेरवुने मुळ्‍गिसि हासोत्‍तां.
LUK 8:34 पजा आ पद्‍दिं मेहानोर इल्‍हा आतद हूळसि वित्‍सि होंचि अद सहरते अल्‍हेने पक्‍का पीसि मत्‍ता नाह्कुने इद पोल्‍लेतुन वेहातुर.
LUK 8:35 बतल आता इंचि हूळालय अगाटा लोकुल्‍क येसुनगा वातुर. अगा वासि हूळतुर अय्ते, देय्याल्कुनाल इळबळता मनकल ओर बेस आसि, कपडिं केर्सि येसुना काल्कुनगा उद्‍दिसि मत्‍तोर. अल्हा मत्‍तद हूळसि ओर्क वेर्रे दल्‍गता.
LUK 8:36 येसुना कबाह्‍कुन हूळतोर अगा बोर अय्ते मत्‍तुरो ओर, देय्याल्क पीसि मत्‍ता मनकल बल्हा बेस आतोर इंचि लोकुल्‍कुंक वेहतुर.
LUK 8:37 अस्‍के गिरासेन एरियाता अंटोर लोकुल्‍क बागा वेरियसि, “निमे महागटाल पेय्सि होन,” इंचि येसुन विनंति कीतुर. अदुनहाटीं येसु, ओना सिस्युल्क होनालय डोंगाते उदतुर.
LUK 8:38 उदता पजा, “नाकुन नीवातोनि वाया हीम गुरु,” इंचि देय्याल्कुनाल बेस आता मनकल येसुन विनंति कीतोर. गानि येसु ओन,
LUK 8:39 “निमे लोन होंचि नीवाहाटीं पेन बतल कीता अद वेहा,” इंचि मल्‍हाचि लोहतोर. अस्‍के ओर मल्सि होंचि, येसु ओनाहाटीं बतल-बतल कीतोरो अव अन्‍नि, सहरते अंटोर्क वेहाचेके तिरियतोर.
LUK 8:40 पजा येसु गालिल एरियाते मल्सि वातस्के ओन एदुर हूळसेक मत्‍तोर वेल्‍लेटुर लोकुल्‍क कुसिते ओन्क कलियतुर.
LUK 8:41 अच्‍चोटेन दर्मसास्‍त्रम कराहना लोता अदिकारि याईर इननोर अगा वातोर. ओन्क पन्‍नेंड वर्सानद उंदे मिय्यड मत्‍ता, अद हायनाल आसि मत्‍ता. अदुनहाटीं ओर येसुना काल्कुनपोर्रो अर्सि, “नावा लोन वा,” इंचि विनंति कीतोर. अस्‍के येसु आ अदिकारिनतोनि होनालय पेय्सतोर. अगा ओना सुट्‍टु वेल्‍ले गर्दि मत्‍ताहेंके लोकुल्‍क दोब्बें-नूकें कीसि येसुन इटसेक मत्‍तुर.
LUK 8:43 आ गर्दिते उंदि मुरतळ मत्‍ता, दानकु पन्‍नेंड वर्सानाल उंदेतीर कप्‍पिड होनुंदु. अद वेल्‍लेटुर वैदकुल्‍कुंक हुपिच्‍चि दाना पूरा कोत्‍तां महता गानि दान बोरे बेस किया पराहिल्‍लुर.
LUK 8:44 अद मुरतळ येसुना पज्जो वासि, सिराप ओना कप्‍पिडता अंचुन इट्ता अय्ते अस्केटद अस्‍केने दाना कप्‍पिड आयमळ बंद आता.
LUK 8:45 अस्‍के, “नाकुन बोर इटतुर?” इंचि येसु पूसकीतोर. अगा मत्‍तुर अंटोर, “नना आयोन, नना आयोन,” इंचि इननेंके, “अंटोर नीवा सुट्‍टु आसि दोब्बें-नूकें कीसंतुर गुरु, बोरन्‍ना दल्‍गिसि मनानुर,” इंचि पत्रु इत्‍तोर.
LUK 8:46 गानि, “ना लोप्पोटाल ताकत पेय्सता इंचि अनपिस्ता. बेस आयानाहाटीं बोरो नाकुन इटतोर,” इंचि येसु इत्‍तोर.
LUK 8:47 पजा अद मुरतळ, “नना इटतद एरपाट कीतोर,” इनकुंचि वेर्रेक वनकुसेक वासि ओना काल्कुना पोर्रो अर्सि, अगा अंटोर लोकुल्‍कुन मुन्‍ने अद येसुन बारि इट्ता अद बल्हा बिराना बेस आता इंचि वेहता.
LUK 8:48 अस्‍के, “पेगिटुना! नीवा विस्वासमे नीकुन बेस कीता. सांतिते होन,” इंचि येसु दान इत्‍तोर.
LUK 8:49 येसु अल्हा वळ्कसेक मननेंके दर्मसास्‍त्रम कराहना लोता आ अदिकारिना लोताल बोरो वरोर वासि, “नीवा मिय्यड हाता, गुरुन लोन ओयालय तकलिप कीसि इंका बाता पाय्दा हिल्‍ले,” इंचि अदिकारिन इत्‍तोर.
LUK 8:50 अस्‍के अदुन केंजसि, “निमे वेरियमा, विस्वासम इर्रा! अद बेस आंता,” इंचि येसु आ अदिकारिंक जवाब हीतोर.
LUK 8:51 येसु ओना लोन वातोर, वासि पेगिळ मत्‍ता अर्राते बोर्कुने होळिया हिया हिल्‍लोर, सिराप पत्रुन, योहानुन, याकोबुन आनि पेगिटा तल्‍लुर-बाबोन पीसि लोप्पो होळियतोर.
LUK 8:52 अंटोर पेगिटाहाटीं अळमळ-मोत्‍कुनमळ कीसेके मत्‍तुर. गानि येसु ओर्कुन, “अळमट! अद हाया हिल्‍ले, मींडसि मंता,” इंचि इत्‍तोर.
LUK 8:53 अद पेगिळ हाता इंचि ओर अंटोर्क एरपाट मत्‍ता. अदुनहाटीं येसु इत्‍ता पोल्‍ले केंजसि ओर कव्‍तुर.
LUK 8:54 पजा येसु आ पेगिटा कय पीसि, “पेगिटुना, तेदा!” इंचि केयतोर.
LUK 8:55 अस्‍केन दाना जीवा मल्सि वासि, अद बिराना तेदिस उदता. अद पेगिड्‍क बतलन्‍ना तिनालय हीम्टु इंचि येसु वेहतोर.
LUK 8:56 अद हूळसि, दाना तल्‍लुर-बाबो इचंत्रम आतुर. गानि, “इगे आता पोल्‍लेतुन बोर्के वेहमटु,” इंचि येसु ओर्कु गट्‍टिगा हुकुम हीतोर.
LUK 9:1 येसु ओना पन्‍नेंड सिस्युल्कुन केय्‍सि ओर्क अन्‍नि देय्याल्कुन पेचाहनद, बिमार मत्‍तोर्कुन बेस कियना ताकत, अदिकारम हीतोर.
LUK 9:2 पजा येसु ओर्कुन, पेनदा राज्येम बारेमते बेसता कबुर वेहालय, बिमार मत्‍तोर्कुन बेस कियालय लोहतोर.
LUK 9:3 ओर्कुन लोहनेंके इल्‍हा इत्‍तोर, “मिमेट सेवा कियालय होननेंके मीवातोनि दुड्‍डु, जोरा आयि, गाटो आयि, कोत्‍तां, एक्‍कोतव अंगिं ओयमट.
LUK 9:4 उंदि नाटे होत्‍तस्के मिमेट बद लोन अय्ते दांतिटो, अद नार होळसनदाका अदे लोते मंटु.
LUK 9:5 बद नाटेना लोकुल्‍क मीकुन मना हिय्‍युरो, अद नाटेनाल पेय्सनेंके ओर कीता तप्पुन हुप्‍सालय उंदि गवाइ लेह्का मननाहाटीं, मिमेट मीवा काल्कुना दुम्मु दुल्‍पिसि पेय्‍सट” इंचि वेहतोर.
LUK 9:6 अस्‍के ओर अगटाल पेय्सि, नार-नार बेसता कबुर वेहासेके, बिमार मत्‍तोर्कुन बेस कीसेके होत्‍तुर.
LUK 9:7 पजा गालिल एरियाता राजाल हेरोद, बस्के अय्ते येसु कियना कबाह्‍कुना बारेमते केंजतोरो अस्‍के बतल जर्गसंता ओन्क बतले तेळिया हिल्‍ले. बारित्‍ते इच्‍चुर लोकुल्‍क, “योहान हातोराव्टेटाल मर्रा तेदतोर,” इंचि इनुंदुर. इंका इच्‍चुर लोकुल्‍क, “पेनदा कबुरतोर एलियल मर्रा वातोर,” इंचि इनुंदुर आनि इच्‍चुर लोकुल्‍क बारे, “एनकटा पेनदा कबुरतोरा लोप्पोटाल बोरो वरोर जीवाते तेदतोर,” इंचि इनुंदुर.
LUK 9:9 गानि, “नना अय्ते योहानुना तल्‍ला कोय्यागोटतन, इंदके इसोंटा पोल्‍लें केंजसेक मंतन, अय्ते ईर बोर आंदुर?” इंचि हेरोद राजाल ओन हूळना विचारम कीतोर.
LUK 9:10 पजा प्रेरितुल्क मल्सि वातस्के ओर बतल-बतल कीतुर अव अन्‍नि येसुंक वेहतुर. वेहतस्के, येसु ओर्कुन लोकुल्‍कुनाल अलग कीसि बोर्के तेळियाकोंटा बेतसेदा इनना सहर पीसि ओतोर.
LUK 9:11 गानि येसु बगा मंतोर इंचि लोकुल्‍कुंक तेळियतस्के ओर ओन दोर्काबेटसि ओना पज्जो होत्‍तुर. अय्ते येसु कुसिते ओरतोनि कलियसि ओर्कु पेनदा राज्येमता बारेमते वेहतोर. पजा ओरागटाल बोर्क बेस आयानद मत्‍ता ओर्कुन बेस कीतोर.
LUK 9:12 पोळ्‍द होनना वेलाक पन्‍नेंडु सिस्युल्क येसुनगा वासि, “मनम सुनसान जेगाते मंतोम, अदुनहाटीं लोकुल्‍कुन लोहचीम, ओर दग्‍गेटा नाह्कुने, नेलिने होंचि तिनालय गाटो, मींडालय जेगा दोर्किच्‍कुंतुर,” इंचि इत्‍तुर.
LUK 9:13 अस्‍के, “मिमेटे बतलन्‍ना ओर्क तिनालय हीम्ट,” इंचि येसु ओर्कुन इत्‍तोर. “महगा सिराप हेय्युं हारिं, रोंडु जिम्मां मंतां, अवुन तप्‍पा बतले हिल्‍ले. मोमोट होंचि ई अंटोर लोकुल्‍कुनाहाटीं गाटो अस्सि तायना इंचि निमे इंचेकेना?” इंचि ओर इत्‍तुर.
LUK 9:14 अगा दग्‍गेर-दग्‍गेरा हेय्युं वेय्‍कुना मंदि मांडसा मत्‍तुर. गानि येसु सिस्युल्कुनतोनि, “ओर्कुन एबै-एबै मंदि कीसि उपसट,” इंचि इत्‍तोर.
LUK 9:15 येसु वेहताप ओर अंटोर्कुन उपिस्तुर.
LUK 9:16 पजा येसु हेय्युं हारिं, रोंडु जिम्मां पीसि, स्वर्गमताहेके हूळसि पेनदुक दन्यवाद कीसि अवुन तुकडां कीतोर. कीसि, “इवुन लोकुल्‍कुंक हीम्ट,” इंचि सिस्युल्कुंक वेहतोर.
LUK 9:17 लोकुल्‍कुंक हीतस्के, ओर पीरनिंडा तित्‍तुर. मिगुल्ता तुकडां जमा कीते अव पन्‍नेंड तट्‍टां निंडतां.
LUK 9:18 उंदि रोज येसु वरोरे पारतना कीसेक मननेंके, ओना सिस्‍युल्‍कगुडा ओनतोनि मत्‍तुर. अय्ते, “नना बोन आंदुन इंचि लोकुल्‍क इंतुर?” इंचि येसु ओर्कुन पूसकीतोर.
LUK 9:19 अस्‍के ओर इल्‍हा जवाब हीतुर. “इच्‍चुर बारे नीकुन बापतिस्मा हियना योहान इंतुर. गानि इच्‍चुर बारे निमे एलियाल आंदिन इंतुर. इंकिच्‍चुर बारे एनकटा पेनदा कबुरतोरा लोप्पोटाल बोरो वरोर जीवा अरतोर इंतुर,” इत्‍तुर.
LUK 9:20 “गानि मिमेट बतल इंतिर?” इंचि येसु सिस्युल्कुन मर्रा पूसकीतोर. अस्‍के, “निमे पेन लोहता पिसागोटनोन किरिस्‍तुन आंदिन,” इंचि पत्रु इत्‍तोर.
LUK 9:21 गानि, “इद पोल्‍ले मिमेट बोर्के वेहमट,” इंचि येसु ओर्क गट्‍टिगा हुकुम हीतोर.
LUK 9:22 पजा ओर्क इल्‍हा वेहालय दल्‍गतोर. “यहुदि पेद्‍दाल्क, पेद्‍दा पेर्मालोर आनि दर्मसास्‍त्रम कराहना गुरुल्कुनाहेंदाल मनकना रूपमते पुटतोन नाकु तिप्‍पल्‍क अर्रापींता. ओर हय्साकोंटा आसि नाकुन हव्कानुर. गानि मूडोव रोजुने नना मर्रा जीवाते तेदंतन,” इत्‍तोर.
LUK 9:23 पजा येसु अंटोर लोकुल्‍कुन इल्‍हा इत्‍तोर. “ओक्‍कला बोरन्‍ना मनकल नावा पज्जो वायना इत्‍ते, ओर ओना पूरा इस्‍टाल्क होळसिसि, दररोज सतता क्रुस तेह्‍कुंचि नावा पज्जो वायिर.
LUK 9:24 बोर ओना जीवातुन पिसागोटालय हूळंतोर, ओर ओना जीवातुन पोगोटकुंतोर, ओन्क बस्केळक पिस्सना पिस्वर दोर्को गानि नावाहाटीं बोर अय्ते जीवा हींतोर, ओन्क बस्केळक पिस्सना पिस्वर दोर्कंता.
LUK 9:25 ओक्‍कला मनकल पूरा दुनियातुन संपलिच्‍चि, जीवा पोगोटकुत्‍ते हिलाकोंटे नासडेम आते, ओन्क बता पायदा आंता?
LUK 9:26 बोर अय्ते नाकुन, नावा पोल्‍लेन वेहालय सिग्गु अर्रंतोर, मनकना रूपमते पुटतोन नना बस्के अय्ते नावा महिमाते, नावा बाबाना महिमाते, पवित्र पेनदा दूताना महिमाते वांतन, अस्‍के असोंटा मनकन नावोर इनालय ननागुडा सिग्गु अर्रंतन.
LUK 9:27 गानि, नना मीकु निजम वेहांतन, इग्‍गे नित्‍तिसि मनानोरा लोप्पोटाल इच्‍चुर इल्‍हा मंतुर गदा, ओर पेनदा राज्येमतुन हूळवा, ओर्कु हामुर वायो.”
LUK 9:28 इव पोल्‍लें वेह्‍चि एनमिदि रोजकु आतां बारे! येसु पत्रुन, योहानुन, याकोबुन पीसि येसु गुट्‍टापोर्रो पारतना कियालय होत्‍तोर.
LUK 9:29 ओर पारतना कियानेंकेन ओना रूपम मारिय्ता. ओना कपडिं तेल्‍लगा मेर्सालय दल्‍गतां.
LUK 9:30 हुळाट! अचानक येसुनगा मूसाल आनि एलियाल महिमाते वासि, येसुना हामुर येरुसलेमते बल्हा पूरा आंता, इंचि वळ्कसेक मत्‍तुर.
LUK 9:32 पत्रु आनि ओना दंटातुर निद्रा होंचि मत्‍तुर. पजा ओर निद्रताल तेदतस्‍के येसुना महिमाता वेल्‍गुन हूळतुर. अचोने आयाका ओनतोनि इव्वुर मनकालोर नित्‍तिसि मत्‍तदगुडा हूळतुर.
LUK 9:33 पजा मूसाल आनि एलियाल येसुनगटाल होननेंके, “गुरु, मनम इगे मनमळ बेस मंता. अय्ते मनम मूड डेरां वाटकोम. उंदि नीहाटीं, उंदि मूसानाहाटीं उंदि एलियानाहाटीं,” इंचि पत्रु येसुन इत्‍तोर. (ओर ई पोल्‍लें वळ्कानेंके विचारम कियाकोंटेन वळ्कतोर.)
LUK 9:34 ओर ई पोल्‍लें वळकसेके मननेंकेन उंदि मब्बु तेर्पे वासि ओर्कुन मुच्‍का होत्‍ता, अस्‍के ओर मुव्वुर वेरियतुर.
LUK 9:35 ओर्कु मब्बुनाल, “ईर नावा मर्रि आंदुर, ईन नना पेर्कुत्‍तन, ईनां केंजट,” इंचि पेनदा अल्किर केंजावाता.
LUK 9:36 अद अल्किर मग्तस्‍के ओर्क अगा येसु वरोरे दिसतोर. पजा ओर चुपचाप मत्‍तुर. अगा हूळतद आ रोजकुने ओर बोर्के वेहा हिल्‍लुर.
LUK 9:37 इंकुंदि रोज ओर गुट्‍टा पोर्रोटाल हिळु रेयतस्के वेल्‍लेन लोकुल्‍क येसुंक कलियालय वातुर.
LUK 9:38 अस्‍के आ मंदिताल वरोर मनकल जोरते वरगेयसि, “गुरु, नना नीवा काल्क मोळ्कंतन, नावा मर्रिनपोर्रो दया कीम, नाकु ओर वरोरे मर्रि आंदुर.
LUK 9:39 ओन देय्यम पीतस्‍के ओर बागा वरगेयंतोर, ओना तोळ्‍दाल पोंगुर पेय्सानाल ओन तेल्हंता, अद ओन बस्‍केने होळसो, तकलिप कीसेकेने मनंता.
LUK 9:40 अदुन गेदमालय नना नीवा सिस्युल्कुंक विनंति कीतन, गानि ओरतोनि आया पराहिल्‍ले,” इंचि इत्‍तोर.
LUK 9:41 अस्‍के येसु ओर्कुन, “अरे विस्वासम तक्‍को आनि हर्रि तप्‍ता पीळितोरिटा, नना बदवेरदाका मीतोनि मनकन? इंका बदवेरदाका नना मीकुन सहन कीकन? नीवा मर्रिन इग्‍गे पीसि वा,” इंचि आ मनकन इत्‍तोर.
LUK 9:42 आ पेडल येसुनहेके वायानेंकेन देय्यम ओन हिळु अरहचि तेल्हता. अस्‍के येसु आ देय्यमतुन गदरिचतोर. पजा पेडन बेस कीसि ओना बाबांक अप्पजेपतोर.
LUK 9:43 अस्‍के अंटोर लोकुल्‍क पेनदा ताकततुन हूळसि इचंत्रम आतुर. येसु बतल अय्ते कीतोरो अद हूळसि अंटोर लोकुल्‍क इचंत्रमते मननेंके येसु ओना सिस्युल्कुन इल्‍हा इत्‍तोर,
LUK 9:44 “इंदके नना मीकु बतलय्ते वेहांतनो, अव पोल्‍लेन मिमेट बेस केंजट. मनकना रूपमते पुटतोन नाकुन, लोकुल्‍कुना कय्‍दे पीसि हियानद मंता.”
LUK 9:45 गानि येसु वेहता पोल्‍ले ओर्क तेळिया हिल्‍ले. अद पोल्‍ले ओर्क तेळियामन्‍नि इंचि मक्‍किचि मत्‍ता. आनि इदुना बारेमते ओन पूस कियालयगुडा ओर वेरियतुर.
LUK 9:46 पजा, “मनालोप्‍पो अंटोर्कन्‍ना पेद्‍दा बोर?” इदुना बारेमते सिस्युल्कुंक ओर्क-ओर्के पोल्‍लें आतां.
LUK 9:47 गानि येसु ओरा मनसुना विचाराल्कुन एरपाट कीसि, वरोर सिन्‍ना पेडन ओना दग्‍गेरा निलाहतोर.
LUK 9:48 निल्‍हाचि, “बोर अय्ते ई सिना पेडनसंटोन नावा पोरोलते स्विकार कींतोर ओर नाकुन स्विकार कीतापे. अल्‍हेने बोर अय्ते नाकुन स्विकार कींतोर ओर नाकुन लोहता पेनदुन इंका स्विकार कींतोर. अदुनहाटीं बोर अय्ते मीलोप्‍पो अंटोर्कन्‍ना सिन्‍ना मंतोर, ओरे अंटोर्कन्‍ना पेद्‍दोड आंदुर,” इंचि येसु ओर्कुन इत्‍तोर.
LUK 9:49 अस्‍के, “गुरु, वरोर मनकल नीवा पोरोलते देय्याल्कुन पेचाहनेंके मोमोट हूळतोम. मालेसीं ओर नी पज्जो ताकानोर आयोर, अदुनहाटीं अल्हा कियमा इंचि मोमोट ओन आपतोम,” इंचि योहान जवाब हीतोर.
LUK 9:50 इत्‍तस्के, “बोर अय्ते मीक विरोदमते हिल्‍लोर, ओर मीवोरे आंदुर, अदुनहाटीं ओन आपमट,” इंचि येसु योहानुन वेहतोर.
LUK 9:51 येसु स्वर्गमते होनना रोजकु दग्‍गेरा वासेक मत्‍तां. अदुनहाटीं ओर येरुसलेम होनालय गट्‍टि निरनायम कीतोर.
LUK 9:52 ओर पेय्‍सका मुन्‍ने ओना कबुरतोर्कुन लोहतोर. ओर ओन्क जेगा तयार कियालय सामरिया लोकुल्‍कुना उंदि नाटे एव्‍तुर.
LUK 9:53 गानि येसु येरुसलेम होनालय पेय्सतोर इंचि सामरि जातिता लोकुल्‍क ओन अगा आगा हिया हिल्‍लुर.
LUK 9:54 ओर्कुन अगा आगा हिया हिल्‍लुर अय्ते ओना सिस्युल्कु याकोब आनि योहान इल्‍हा इत्‍तुर, “सामि! ओर्कुन हव्कालय, मब्बुनाल तडमि अर्रि इंचि मोमोट आदेस हिय्याना, इंचि नीवा विचारम मंताना?”
LUK 9:55 अस्‍के येसु ओरहेके तिरियसि ओर्कुन तेराहतोर.
LUK 9:56 पजा ओर अगटाल वेरे नाटे होत्‍तुर.
LUK 9:57 ओर हरपीसि होंचेक मननेंके बोरो वरोर मनकल येसुनगा वासि, “निमे बगा-बगा दांतिनो, अगा-अगा नना नीवा पज्जो वांतन,” इंचि इत्‍तोर.
LUK 9:58 अस्‍के येसु ओन इल्‍हा इत्‍तोर, “नक्‍कांक बारे मनालय सोर्रें मंतां, पिट्‍टेंक मनालय गूडां मंतां, गानि मनकना रूपमते पुटतोन नाकु मात्रम तल्‍ला इर्रालयगुडा जेगा हिल्‍ले.”
LUK 9:59 पजा येसु इंकावरोन, “नावा पज्जो वा” इत्‍तोर. गानि, “सामि, नाकुन मोदाला होनाहीम, नावा बाबाल हातास्के ओन गति कीसि वांतन,” इंचि ओर येसुन इत्‍तोर.
LUK 9:60 अस्‍के येसु ओन इत्‍तोर, “बोर अय्ते हाताप मंतुरो, ओरे ओरा हातोरा गति किय्‍यिर. निमे मात्रम होंचि पेनदा राज्येम बारेमता बेसता कबुर वेहा.”
LUK 9:61 इंकावरोर मनकल इत्‍तोर, “नना नीवा पज्जो वांतन सामि, गानि मुन्‍ने नना लोन होंचि, नावा लोतोर्कुंक वेहचि वांतन.”
LUK 9:62 अस्‍के येसु ओन इत्‍तोर, “पज्जो वांतन इंचि पेय्सि, मर्रा पजोळ्क मल्सि हूळना मनकल पेनदा राज्येमता सेवा कियनालायक हिल्‍लोर,” इंचि इत्‍तोर.
LUK 10:1 अद आता पजा सामि, इंका डेब्बै रोंड मंदि सिस्युल्कुन पेरतोर. पेरसि, बव नाह्कुने अय्ते ओन्क होनना मत्‍ता अव नाह्कुने ओना सिस्युल्कुन इव्वुर-इव्वुर्कुन कीसि मुन्‍ने लोहातोर.
LUK 10:2 ओर्कुन लोहानेंके इल्‍हा वेहातोर, “पंटा वेल्‍लेने पंडुता गानि बूतिनोर तक्‍को मंतुर. अदुनहाटीं पंटाता मालकुंक बूतिनोर्कुन पंटा कोय्‍यालय लोहा इंचि विनंति कीम्‍टु.
LUK 10:3 मिमेट होंट! हुळाट, तोडेल्‍लिन लोप्पो गोर्रे पोरिह्कुन लोहताप नना मीकुन लोहचंतन.
LUK 10:4 मीवातोनि कोत्‍ताना संचि, जोरा आयि, हेरपुह्क आयिं पियमट. हर्रि पीसि होननेंके बोर कलियते ओर्कु जोहारगुडा वेहमट.
LUK 10:5 मिमेट बद लोन अय्ते दांतिटो, मोदाला, ‘इद लोतुक सांति दोर्कि’ इंचि इंटु.
LUK 10:6 अद लोते सांति गावाले इनना मनकल मत्‍ते अद सांति ओनगा दांता, गानि अगा गिंटा सांति गावाले इनना मनकल हिलाकोंटे आ सांति मिहागेन वापस वांता.
LUK 10:7 कबळ कियानोंकु बूति दोर्कंता. अदुनहाटीं मिमेट बद लोन अय्ते दांतिटो अद लोतुर बतल हींतुरो अद तिंचेक-उंचेके अदे लोते मंटु, अलग-अलग लोह्कुने मनमट.
LUK 10:8 मिमेट बद सहरते दांतिरो, अद सहरतोर मीकु बेस मान-मरयादा कीते, ओर मीक बतल तिनालय हींतुर अदे तिंटु.
LUK 10:9 अगाटा बिमारतोर्कुन बेस कीसि, ‘पेनदा राज्येम दग्गेर्क एव्ता’ इंचि ओर्क वेहाट.
LUK 10:10 गानि मिमेट बदन्‍ना सहरते होतस्के ओर मीकुन बेस मान-मरयादा कियाकोंटे, अगाटा हरकुने होंचि, ‘मिमेट माकु मरयादा कियुवा विरोदमते, मावा काल्कुंक अंटता मीवा सहरता दुब्बागुडा मोमोट इगेन दुल्‍पसंतोम. अय्नागानि इद मतिते इर्रट, पेनदा राज्येम दग्गेर्क एव्ता,’ इंचि ओर्क वेहाट.
LUK 10:12 नना मीकु वेहासेक गदा, न्‍यायम कियना रोजुने, सदोम सहरता परिस्तिति आ नाह्‍कुंकन्‍ना बच्‍चोरो बेस मनंता,” इंचि येसु ओर्क वेहतोर.
LUK 10:13 येसु मर्रा इत्‍तोर, “ए कोरजिना आनि बेतसेदा नाटेना लोकुरिटा! मीकु गोसा तप्‍पो! ओक्‍कला मिहगा बव अद्‍बूताल्‍क आतां, अवे गिंटा सूर, सिदोन नाह्कुने आसि मत्‍ते, अगाटा लोकुल्‍क बिराना बोंतां हुट्‍सि, मेंदुल्क बूळ्‍दि होकसि उद्‍दिसि दुक्‍कमते मनसु मार्सकुंचि मन्‍नेर.
LUK 10:14 गानि पेन न्‍यायम कियना रोजुने सूर आनि सिदोनतुरा परिस्तिति मीकन्‍ना बच्‍चोरो बेस मनंता.
LUK 10:15 ए कपर्नाहुम सहरता लोकुरिटा! मिमेट स्वर्गमते दांतोम इनकुंचंतिरा? मिमेट नरकमते दांतिर.”
LUK 10:16 “सिस्युल्कुनिटा! बोर मीवा पोल्‍लें केंजंतोरो, ओर नावा पोल्‍लें केंजंतोर. बोर मीकुन हय्‍सोर ओर नाकुन हय्‍सोर. नाकुन हय्सवोर नाकुन लोहता पेनदुनगुडा हय्‍सोर,” इंचि येसु वेहातोर.
LUK 10:17 पजा, येसु लोहता डेब्बै रोंडु मंदि सिस्युल्कु वेल्‍लेन कुसिते मल्सि वासि, “सामि, नीवा पोरोल्ते देय्याल्कगुडा मावा पोल्‍लेतुन केंजतां,” इंचि येसुंक वेहतुर.
LUK 10:18 अस्‍के येसु ओर्कुन इल्‍हा इत्‍तोर, “नना पेद्‍दा देय्यमतुन मब्बुनाल पिळगुनलेसीं अरनेंके हूळतन.
LUK 10:19 केंजट, नना मीकु तरासकु, मिच्‍चोन जारानद आनि पगातोरा पूरा बलमतुन गेल्सानद अदिकारम हीतन. मीपोर्रो बोरे अन्‍यायम किया पर्रुर.
LUK 10:20 अयना मीवा पोल्‍ले देय्याल्क केंजतां इंचि कूस आयमट, गानि मीवा पोरोल स्वर्गमते रासि मंता इंचि कूस आम्टु,” इंचि वेहतोर.
LUK 10:21 अस्‍केने येसु पवित्र आत्माते निंडसि कूस आसि इल्‍हा इत्‍तोर, “ए नावा बाबा, बूमि आनि स्वर्गमता सामि, तेल्‍विगल्‍लोर्क आनि समजदार लोकुल्‍कुनगटाल इव पोल्‍लें मक्‍किचि इरतिन, सादा-सिंपल लोकुल्‍कुंक बारे इव पोल्‍लें हुपिस्‍तिन, इंचि नना नीवा स्‍तुति कीसेक मंतन. हो बाबा! नीकु इदे बेस अनपिस्ताहाटीं निमे इल्‍हा कीतिन.
LUK 10:22 नावा बाबाल नाकु अन्‍नि अप्पजेपतोर. बाबान तप्‍पा मर्रिन बोरे एरपाट किय्युर, मर्रिन तप्‍पा बाबान बोरे एरपाट किय्युर. मर्रि ओना इस्‍टमाताप बाबाना बारेमते बोर्क अय्ते तेळियानाल वेहांतोर ओरे बाबान एरपाट कींतुर,” इंचि इत्‍तोर.
LUK 10:23 पजा ओर ओना सिस्युल्कुन पक्‍कक ओसि ओर्कुन इल्‍हा इत्‍तोर, “मिमेट हूळानवुन हूळना मीवा कळ्‍कु वेल्‍लेन आसिर्वाद दोर्कतव आंदुं.
LUK 10:24 बारित्‍ते नना मीकु वेहांतन, इय्याला मिमेट बव हूळसंतिरो, केंजसंतिरो, अवुन वेल्‍लेटुर पेनदा कबुरतोर आनि राजालोर हूळालय, केंजालय तन्‍लाळुंदुर. गानि ओर्क हूळालय, केंजालय दोर्काहिल्‍ले,” इंचि इत्‍तोर.
LUK 10:25 अच्‍चोटेन मूसाना नियम बेस तेळियतोर वरोर गुरु निततोर. नित्‍तिसि येसुना पट्‍टु हूळानाहाटीं, “गुरु, बस्‍केळ्‍क पिस्सना पिस्वरता वारसदार आयानाहाटीं नना बतल कीते बेस?” इंचि पूसकीतोर.
LUK 10:26 अस्‍के येसु ओन, “मूसाना नियमते बतल रासि मंता? दानहेंदाल नीकु बतल तेळियता?” इंचि इत्‍तोर.
LUK 10:27 इत्‍तस्के आ गुरु, “निमे नीवा सामि आता पेनदुन पूरा मनसुनाल, पूरा आत्माताल, पूरा ताकतताल, पूरा बुद्‍दिताल पावरम कीम. अल्‍हेने नीवद निमे बच्‍चोन पावरम कींतिनो अचोने पावरम इंकावरोनगुडा कीम. इल्‍हा रासि मंता,” इंचि जवाब हीतोर.
LUK 10:28 अस्‍के येसु ओन, “निमे बरोबर वेहतिन, अल्हेन निमेगुडा कीम, अस्‍के नीकु बस्केळक पिस्सना पिस्वर दोर्कंता,” इंचि इत्‍तोर.
LUK 10:29 ओर, नना नीतिमंतुन इंचि हुप्‍सालय, “नावा पक्‍कातोर इत्‍ते बोर आंदुर?” इंचि येसुन पूसकीतोर.
LUK 10:30 अल्हा पूसकीतस्‍के येसु ओन्क उंदि वेसुड वेहातोर: “वरोर मनकल येरुसलेम सहरताल यरिहो इनना नार होंचेके मत्‍तोर. होननेंके नड्‍डुम हरदे ओन दोंगाल्क पीतुर. ओर ओनगा मत्‍ता सामानतुन इग्गुकुत्‍तुर, कपडिं तेंडकुत्‍तुर. पजा ओन पक्‍का तंचि, डुक-डुक जीवा मननेंके होळसि होत्‍तुर.”
LUK 10:31 “पजा बतल आता इत्‍ते, अदे हरपीसि वरोर पेर्माल होंचेक मत्‍तोर. आ पेर्माल हिळु अरसि मत्‍ता मनकन हूळसि होरियसि होत्‍तोर.
LUK 10:32 ओर होतस्के वरोर लेवि जातिता मनकल अदे हर्रि पीसि वातोर. ओर इंका हिळु अरसि मत्‍ता मनकन हूळसि होरियसि होत्‍तोर.
LUK 10:33 ओर होत्‍ता पजा, अदे हर्रि पीसि वरोर सामरिया मनकल अगा एवतोर. एवतस्‍के हिळु अरसि मत्‍ता मनकन हूळसि ओनकु इरगा जीवा नोता.
LUK 10:34 ओर ओनगा वासि ओन्क देब्बां आतगा, अवुनपोर्रो निय, अंगुर पंडिना पानकम होकसि पट्‍टि दोहतोर. दोहता पजा, आ सामरि मनकल हिळु अरसि मत्‍ता मनकन ओना गाड्‍दिपोर्रो वाटसि, उंदि लाजुने ओसि ओन बेस हूळकुत्‍तोर.
LUK 10:35 इंकुंदि रोज लाजता मालकुंक रोंडु एंडि कोत्‍तां हीसि, ईन बेस हूळा, ईनाहाटीं एक्‍को कोत्‍तां कर्स आयानय्ते, नना मल्सि वातस्के अव नीकु हींतन इत्‍तोर.”
LUK 10:36 पजा येसु, “दोंगाल्कुन कय्‍दे देब्बां तित्‍ता मनकंक मुव्वुर मनकालोर कलियतुर. आ मुव्वुर लोप्पो नीवा विचारमते ओना पक्‍कातोर बोर आंदुर?” इंचि ओन पूसकीतोर.
LUK 10:37 अस्‍के आ गुरु, “बोर अय्ते ओन हूळसि ओनपोर्रो दया कीतोर ओरे,” इंचि इत्‍तोर. अस्‍के येसु, “होन, ओर कीताप निमेगुडा कीम,” इंचि ओन इत्‍तोर.
LUK 10:38 पजा येसु, ओना सिस्युल्कु हर्रि पीसि होननेंके, उंदि नाटेनगा एवतुर. अगा उंदि मार्ता इनना मुरतळ मत्‍ता. अद येसुन दाना लोन ओसि बेस हूळकुत्‍ता.
LUK 10:39 दान्क मरियम इनना उंदि हेलड मत्‍ता. अद सामिना काल्कुनगा उद्‍दिसि ओर वेहना पोल्‍लें बेस केंजसेक मत्‍ता.
LUK 10:40 गानि दाना अक्‍कल मार्ताल सेवा कीसि-कीसि, पूरा मोता दान पोर्रोने अरताप आता. अदुनहाटीं अद येसुनगा वासि, “सामि, नावा हेलड पूरा कबळ नावा पोर्रोने वाटसि हीता, इद निमे हूळसेक हिल्‍लिना? नाकु आसर आयालय दानकु वेहा,” इंचि इत्‍ता.
LUK 10:41 अस्‍के सामि दानकु इल्‍हा जवाब हीतोर. “मार्ता, निमे वेल्‍लेन कबाह्‍कुना बारेमते विचारम कीसि गाबर आंतिन.
LUK 10:42 गानि असल उंदे कबळ कियना अवसरम मंता. मरियम आ बेस कबळतुन पेरकुत्‍ता. अदुनहाटीं दानगटाल अद कबळतुन बोरे इगुकुन्‍ना परुर,” इत्‍तोर.
LUK 11:1 उंदि मल्का येसु उंदि जेगाते पारतना कीसेक मत्‍तोर. पारतना आतंका ओना सिस्युल्‍कुनाल वरोर सिस्युड ओन, “सामि, योहान ओना सिस्युल्कुंक बल्हा पारतना कियमळ कराहतोरो, अल्हेन निमे माकुगुडा पारतना बल्हा कियमळो करहा,” इंचि इत्‍तोर.
LUK 11:2 अस्‍के येसु ओर्कुन, मिमेट पारतना कियनेंके इल्‍हा इंटु, “ए मावा पेनबाबा, नीवा पोरोलतुन अंटोर कदर कियिरकांटी. निमेन मापोर्रो राज्येम कीम.
LUK 11:3 माकु रोजता तिंडि इय्यालागुडा हीम.
LUK 11:4 माकु विरोदमते कीता तप्‍पुकुन मोमोट बल्हा माप कीतोमो, निमेगुडा मोमोट कीता तप्‍पुकुन माप कीम, माकुन पट्‍टुने अर्राकोंटा कापाळा.”
LUK 11:5 पजा येसु ओर्कु इल्‍हा वेहालय दल्‍गतोर. “मीवाव्टेटाल बोरो वरोर, मीवा दंटातोनगा नडजाम नर्का होंचि, अरे दादा, नहगा इंदकेन वरोर दंटागाल वातोर. गानि ओन्क अट्‍टिस दोसालय नहगा बतले हिल्‍ले. अदुनहाटीं नाकु इच्‍चुं पर्रिक बदल हीम, इंचि इत्‍तोर इनकुंटु!
LUK 11:7 अस्‍के आ दंटागाल लोप्पोटाले, नना नावा पिलाल्कुनतोनि मींडसि मंतन, नना तेदते ओरगुडा तेदांतुर, इंका तल्‍पुगुडा लोप्पोटाल गट्‍टिगा वाटतन. अदुनहाटीं नना इंदके तेदिस नीकु बतल हिया परोन. नाकुन वट्‍टिदे परेसान कियमा, इंचि इंतोर.
LUK 11:8 नना मीकु वेहानद बतल इत्‍ते, आ दंटागाल ‘नावा दंटागाल वातोर,’ इंचि तेदसि ओन्क पर्रिक हिय्या हिल्‍लोर. गानि ओना दंटागाल ओन उंदेतीर, हीम-हीम इंचेके बातिमलाडताहाटीं ओर तेदसि ओन्क गावाले मत्‍ताचोन पर्रिक तप्‍पाकोंटा हींतोर.
LUK 11:9 अदुनहाटीं नना मीकु वेहचंतन पेनदुन तल्कसेक मंटु, मीकु हिय्यार. पह्कसेक मंटु, मीकु दोर्कार. तलपुन टोक-टोक कीसेक मंटु, मीवाहाटीं तल्‍पु तेंडार.
LUK 11:10 बारित्‍ते बोर अय्ते तल्कंतोर ओन्क हियमळ जर्गंता. बोर अय्ते पह्कंतोर ओन्क दोर्कंता. बोर अय्ते तल्‍पुन तनंतोर ओनाहाटीं तल्‍पु तेंडमळ जर्गंता.
LUK 11:11 मीलोप्‍पो बोरन्‍ना बाबो मंतोरा ओना मर्रि, जिम्मा तल्‍कते ओन्क तरास हियानोर? हिलाकोंटे मेंज तल्‍कते ओन्क मिच्‍चो हियानोर मीलोप्‍पो बोरन्‍ना बाबो मंतोरा? हिल्‍लोर.
LUK 11:13 अय्ते मिमेट सेड्‍डोर्क आसिगुडा मीवा पिलाल्कुंक बेसतद हियमळ तेळियतस्के, स्वर्गमते मनना पेनबाबाल, ओन तल्कानोर्कुंक पवित्र आत्मा बच्‍चोन वेल्‍ले हियनुर?”
LUK 11:14 वरोर मनकन देय्यम पीताहाटीं ओर मूकल आसि मत्‍तोर. पजा येसु आ मनकानाल अद देय्यमतुन पेच्‍हाचि गेदुमतोर, अस्‍के आ मूकल वळकालय दल्‍गतोर. इदुन हूळसि अगा मत्‍ता अंटोर लोकुल्‍कुंक वेल्‍लेन इचंत्रम आता.
LUK 11:15 गानि अव्टेटाल इच्‍चुर मंदि, “बेलजेबुल इनना देय्याल्कुना मुक्‍यना बलमते ओर देय्याल्क तेंडांतोर,” इंचि इनालय दल्‍गुतुर.
LUK 11:16 इंका इच्‍चुर बारे ओना पट्‍टु हूळना इंचि ओनाहेंदाल स्वर्गमताल उंदि चिन्‍ह हुप्‍सा इत्‍तुर.
LUK 11:17 ओरा मनसुना विचाराल्कुन एरपाट कीसि येसु ओर्कुन इल्‍हा इत्‍तोर, “बद राज्येम लोप्पो वरोना पोल्‍ले-वरोंक अर्राकोंटा आंता, अद राज्येम पाडासि दांता. अल्हेन उंदि लोते मनानोरा नड्‍डुम वरोनद वरोंक अर्राकोंटा मत्‍ते अद लोनगुडा नासडेम आसि दांता.
LUK 11:18 मिमेट इत्‍तिर गदा, नना बेलजेबुल इनना देय्यमता सहायमतोनि देय्याल्क गेदुमतन इंचि. अल्हा अय्ते देय्यम दाना दंटाता देय्याल्कुना विरोदमते नितते, अवुना राज्येम बल्हा नित्‍तंता?
LUK 11:19 सरे! मिमेट इत्‍ताप, नना बेलजेबुलना सहायमते देय्याल्कुन गेदमंतन इन्‍कुंटु. गानि मीवा लोकुल्‍कगुडा देय्याल्कुन गेदमंतुर, ओरगुडा देय्यमता सहायमतोने गेदमंतुरा? अदुनहाटीं मीवा लोकुल्‍के मीवा न्‍यायम कींतुर.
LUK 11:20 गानि नना ओक्‍कला पेनदा बलमते देय्याल्कुन गेदमानय्ते, पेनदा राज्येम मीवा दग्गेर्क एव्ता इंचि एरपाट कीम्‍टु.”
LUK 11:21 “वरोर ताकतवर मनकल गोर्कां, कसेह्‍क, तुपाकीं पीसि ओना लोता कावेल कीतेने, ओना लोता लोप्पो मनना अन्‍नि सामान बेस सांतिते मनंतां.
LUK 11:22 गानि ओनकन्‍ना एक्‍को ताकतवर मनकल वासि ओनतोनि लडाइ कीसि ओन ओळिच्‍चानय्ते, बव गोर्कां, कसेह्कुन पोर्रो वेल्‍लेन वर्सानाल बरोसा इरतोर, अवुन इग्गुकुंचि ओनगा मत्‍ता मालुन दोसकुंतोर. पजा अंटोर्कुंक पंचि हींतोर.”
LUK 11:23 “बोर अय्ते नावा दंटाते मन्‍नोर, ओर नावा विरोदमते मंतोर, बोर अय्ते नाकु सहायम किय्योर, ओर नाहगटाल पायिचना कबळ कींतोर.”
LUK 11:24 “उंदि देय्यम बस्के अय्ते वरोर मनकानाल पेय्सि दांता, अस्‍के अद आराम कियालय एर हिल्वा जेगा पह्‍कंता. गानि दान्क असंटा जेगा दोर्को. अस्‍के अद देय्यम, नना बद लोताल अय्ते पेय्सि वातानो, अदे लोते मर्रा मल्सि दांतन, इन्‍कुंता.
LUK 11:25 मर्रा अगा होंचि हूळतस्‍के मुन्‍नेटा लोन रिकम आताप, मंचिगा ऊसताप दानकु बेस दिसंता.
LUK 11:26 अस्‍के अद देय्यम तिरियसि होंचि दानकन्‍ना एक्‍को सेड्‍डातव एडुं देय्याल्कुन पीसि वांता. पजा अंटव कलियसि अदे लोते मनालय दल्‍गंतां. इल्‍हा आ मनकना परिस्तिति मोदाटा परिस्तितिकन्‍ना एक्‍को कराब मनंता.”
LUK 11:27 पजा बतल आता इत्‍ते, येसु इव पोल्‍लें वेहसेकेन मत्‍तोर, अच्‍चोटेन अगा मत्‍ता मंदिताल उंदि मुरतळ लगांचि, “नीकुन कंचि, पाल उहचि, बेरसागोटता आ तल्‍लुर वेल्‍लेन आसिर्वाद दोर्कुतद आंदु,” इंचि इत्‍ता.
LUK 11:28 अस्‍के येसु, “गानि बोर अय्ते पेनदा वचनाल्क केंजसि अवुन पीसि ताकंतोरो ओर एक्‍को आसिर्वाद दोर्कुतोर आंद,” इंचि इत्‍तोर.
LUK 11:29 वेल्‍लेन लोकुल्‍क जमा आयानद हूळसि येसु इल्‍हा वळकालय दल्‍गतोर: “इद पीळितोर कराब लोकुल्‍क आंदुर. अदुनहाटीं चिन्‍ह हुप्‍सा इंचि पूस कीसंतुर. गानि योनाल इनना पेनदा कबुरतोना चिन्‍ह तप्‍पा ओर्कु इंकुंदि चिन्‍ह हुपिच्‍मळ जर्गो.
LUK 11:30 बल्हा योनाल निनवे सहरता लोकुल्‍कुनाहाटीं चिन्‍ह आतोर, अल्हेन मनकना रूपमते पुटतोन नना, ई पीळितोरहाटीं चिन्‍ह आंतन.
LUK 11:31 अल्‍हेने सिबा देसेमता रानि सुलेमान राजाना तेल्‍विता पोल्‍लें केंजालय वेरे देसेमताल अगा वासि मत्‍ता. हुळाट, सुलेमानुंकन्‍ना पेद्‍दोड वरोर मी मुन्‍ने नित्‍तिसि मंतोर. अय्नागानि मिमेट नावा बुद्‍दिता पोल्‍लें केंजसेक हिल्‍लिर. अदुनहाटीं आकिर न्‍यायमता रोजुने आ रानि इद पीळिता मनकालोरपोर्रो दोसेम दोस्‍सार.
LUK 11:32 योनाल वेहता कबुर केंजसि निनवे सहरतोर अय्ते ओरा मनसु मार्सकुत्‍तुर. गानि हुळाट, योनांकन्‍ना पेद्‍दोड इंदके मी मुन्‍ने नित्‍तिसि मंतोर. अय्नागानि मिमेट मनसु मार्सकुंचेके हिल्‍लिर. अदुनहाटीं आकिर न्‍यायमता रोजुने निनवे सहरतोर नित्‍तिसि इद पीळिता लोकुल्‍कुनपोर्रो दोसेम दोस्‍सनुर.”
LUK 11:33 “बोरे आयिर वेडसि निरिच्‍चि दान गुल्‍ला हिळु मुच्‍चोर, साटुंकगुडा इर्रोर. गानि लोप्पो होळियानोर्क बेस वेल्‍गु दिसगोम इंचि दान उंदि दीसोडिपोर्रो इर्रंतोर.
LUK 11:34 नीवा कळु नीवा मेंदुल्क वेडसिलेह्का आंदुं. नीवा कळु बेस मत्‍ते नीवा मेंदुलंता बेस वेल्‍गु मनंता. ओक्‍कला नीवा कळु बेस हिलाकोंटे नीवा मेंदुलंता हीकटे मनंता.
LUK 11:35 अदुनहाटीं नीवा लोप्पो मनना वेल्‍गु पिरसोन्‍नाकुंटा बेस कापाडकुन.
LUK 11:36 नीवा पूरा मेंदुल पुरागा वेल्‍गुने मत्‍ते, अद वेडसि एल्‍गुताप बेस एल्‍गुसेके मनंता आनि गिचचो मेंदुलगुडा हीकटते मन्‍नो.”
LUK 11:37 इल्‍हा येसु ओना वळकुमळ मारतस्के वरोर परिसि ओना लोन येसुन गाटो तिनालय केयतोर. अय्ते येसु ओना लोन होंचि लोप्पो होळियसि गाटो तिनालय उदुतोर.
LUK 11:38 येसु यहुदिल्कुना रिवाज परकारम तिनाका मुन्‍ने कय्‍कु नोरसि गाटो तिनालय उद्‍दा हिल्‍लोर. अदुन हूळसि आ परिसिंक इचंत्रम आता.
LUK 11:39 अस्‍के सामि ओन इल्‍हा इत्‍तोर, “मिमेट परिसि लोकुल्‍क गिन्‍नें-गिलासकु सिराप लोकुल्‍कुंक दिसालय पलाताल तोमसि साप कींतिर, गानि लोप्पो मात्रम मीवा कराब गुनाल्‍क, वेल्‍लेन लालच निंडसि मनंता.
LUK 11:40 अरे बुद्‍दि तक्‍को लोकुरिटा! पलाताल तयार कीता पेने लोप्पोटाल तयार कीता.
LUK 11:41 अदुनहाटीं मिहगा बतल अय्ते मंतनो अदुन गरिब लोकुल्‍कुंक मनसुनाल हीम्ट. अस्‍के मीहाटीं अन्‍नि साप मनंता.
LUK 11:42 अरे परिसिल्कुनिटा! मीकु गोसा तप्‍पो. बारित्‍ते मिमेट मीवा तोटाते पुटता पुदिना, इंका वेरे अन्‍नि पंटाता पदि तूसकुनाल उंदि तूस पेनदुक हींतिर. गानि न्‍यायमतुन आनि पेनदा पावरमतुन मात्रम मिमेट मति किय्‍यिर. पदि तूसकुनाल उंदि तूस पेनदुक हियमळ इद बेसे. गानि इद कीसेक-कीसेक न्‍यायमतुन आनि पेनदा पावरमतुनगुडा होळसाकोंटा ताका मत्‍तिर.
LUK 11:43 परिसिल्कुनिटा मीकु गोसा तप्‍पो, दर्मसास्‍त्रम कराहना लोह्कुने पेद्‍दाल्‍क उद्‍दाना जेगा मीकु गावाले इनकुंतिर. हाटुमकुने जोहार वेहागोटकुनमळ इत्‍ते वेल्‍ले इस्‍टम.
LUK 11:44 मीकु गोसा तप्‍पो. बारित्‍ते, अगा बोंदा मंता इंचि तेळियका लोकुल्‍क जारसेके दांतुर, मिमेट आ बोंदानसंटोर आंदिर.”
LUK 11:45 अस्‍के दर्मसास्‍त्रम बेस तेळियतोर वरोर गुरु वासि येसुन, “गुरु, निमे इसोंटा पोल्‍लें वळ्‍किसि मावदगुडा अपमानम कीसंतिन,” इंचि इत्‍तोर.
LUK 11:46 अस्‍के येसु इल्‍हा इत्‍तोर. “अरे मूसाना नियम बेस तेळियतोरिटा, मीकु सिक्‍सा तप्‍पो. बारित्‍ते मिमेट लोकुल्‍कुनपोर्रो, तेहते तेदा पर्रुवा मोता तासंतिट, गानि मिमेट मात्रम अद मोतातुन तेहालय उंदि वेलुगुडा तासिर.
LUK 11:47 इंचि मीकु गोसा तप्‍पो. बारित्‍ते, मीवा एनकटा पेद्‍दाल्‍क हव्‍कता पेनदा कबुरतोराहाटीं गोरिं दोहांतिर.
LUK 11:48 इल्‍हा कीसि, मीवा एनकटा पेद्‍दाल्‍कुने आनि ओर कीता कबाह्‍कुने मिमेट कलियसि मंतिर इत्‍ताप मिमेटे गवाइ मंतिर. बारित्‍ते मीवा एनकटा पेद्‍दाल्‍क पेनदा कबुरतोर्कुन हव्कतुर, मिमेट बारे ओरा गोरिं दोहचंतिर.
LUK 11:49 अचोने आयका पेन दाना बेस बुद्‍दिते मीवा बारेमते इल्‍हा वेहता, नना पेनदा कबुरतोर्कुन आनि प्रेरितुल्कुन ओरगा लोहांतन. अस्‍के ओर, ओराव्टेटाल इच्‍चुर्कुन हव्कानुर, इच्‍चुर्कुन बारे इरगा तिप्‍पल्‍क कियानुर.”
LUK 11:50 “दीनहेंदाल, ई दुनिया पुटतस्केटाल बच्‍चोन मंदि पेनदा कबुरतोरा नेत्‍तुर अय्ते पोंगागोटमळ जर्गतनो, आ ओरा अंटोरा नेत्‍तुरता हिसाब ई पीळितोराहेंदाल एतमळ जर्गंता.
LUK 11:51 इत्‍ते आबेलनगटाल अय्ते, गुळि आनि गद्‍दे नड्‍डुम हव्‍कता जकर्याहनगड्‍क. हां, नना मीकु निजम वेहांतन, ईर अंटोरा नेत्‍तुरता हिसाब ई पीळिता लोकुल्‍कुनहेंदाले एतमळ जर्गंता.
LUK 11:52 अरे मूसाना नियम बेस तेळियतोरिटा, मीक गोसा तप्‍पो. बारित्‍ते मिमेट पेनदा तेल्‍विता तालम कयदुन तेंडकुत्‍तिर. गानि मिमेट कुद्‍दु अय्ते होळिया हिल्‍लिर, होळियानोर्कुनगुडा आपिसि इरतिर.”
LUK 11:53 पजा येसु अगटाल होनालय पेय्सतोर अस्‍के, परिसिर्क आनि दर्मसास्‍त्रम कराहना गुरुल्क ओन्क अड्‍डम तिरियसि, ओन रकारकाल्कुना सवाल्क पूस कीसि परेसान कियालय दल्‍गुतुर.
LUK 11:54 येसु बतलन्‍ना वळकते ओर वळकना पोल्‍लेने ओन दोर्का पियना विचारम ओरा मनसुने मत्‍ताहाटीं ओर अल्हा कियालय दल्‍गुतुर.
LUK 12:1 अच्‍चोटेन अगा वेय्‍कुना मंदि जमा आसि, इरगा गर्दि आताहेंका वरोंक वरोर जारसेके मत्‍तुर. अस्‍के येसु मोट्‍टा मोदाला ओना सिस्युल्कुनतोनि इल्‍हा वळकालय दल्‍गतोर. “परिसिल्क डोंगिर्क आंदुर, ओरा पुल्‍लटा पिंडिता बारेमते जेगर्ता मंटु.
LUK 12:2 मुच्‍चिसि मत्‍तव अन्‍नि पोल्‍लें बय्यर आंता, तेळियाकोंटा मत्‍तव अन्‍नि वस्‍तुक पलातुक वांतां.
LUK 12:3 अदुनहाटीं मिमेट हीकटते वळ्कता पोल्‍लें वेलगुने केंजमळ जर्गंता. आनि लोता लोप्पोटा अर्राते होंचि गुसागूसा वळ्कता पोल्‍लें येनागर्रापोर्रो एक्‍किसि वेहमळ जर्गंता.”
LUK 12:4 “इंचि नावा दंटातोरिटा, नना मीकु वेहानद बतल इत्‍ते, बोर अय्ते मीवा मेंदुल्तुन हव्का परांतुर ओर्क मिमेट वेरियमट. ओर दानकन्‍ना एक्‍को बतल किया परुर.
LUK 12:5 मिमेट बोर्कु वेरियगोमो नना वेहांतन. मीकुन हव्कुतंका नरकमते वाटना अदिकारम बोन्क अय्ते मंतानो, मिमेट ओन्‍के वेरियट. नना वेहनद इदे.”
LUK 12:6 “हेय्युं कोळ्‍का पिट्‍टें रोंडु कोत्‍तांकु अम्मुड दांतां गदा! अय्नागानि अव्टेटाल उंदि पिट्‍टेतुनगुडा पेन मति मर्गो.
LUK 12:7 मीवा तल्‍लाता उंदि-उंदि केल्‍लु लेक्‍किस मंता. अदुनहाटीं वेरियमट! पेनदा मुन्‍ने मिमेट वेल्‍लेन कोळ्‍का पिट्‍टेंकन्‍ना बच्‍चोरो विल्‍वा मत्‍तोर आंदिर.”
LUK 12:8 “नना मीकु वेहांतन, बोर अय्ते लोकुल्‍कुना मुन्‍ने नाकुन एरपाट कींतन इंचि ओप्‍कुंतोरो, मनकना रूपमते पुटतोन ननागुडा ओन पेनदा दूताना मुन्‍ने, ‘एरपाट कींतन’ इंचि ओप्‍कुंतन.
LUK 12:9 गानि बोर अय्ते लोकुल्‍कुना मुन्‍ने नाकुन ‘एरपाट किय्योन’ इंतोरो, ननागुडा ओन पेनदा दूताना मुन्‍ने ‘एरपाट किय्योन’ इंचि इंतन.
LUK 12:10 मनकना रूपमते पुटतोन नाकु विरोदमते बोर वळ्‍किना, पेन ओना तप्‍पुकुन मापि किय्‍यार. गानि पवित्र आत्माता अपमानम कियानोना तप्‍पुकुंक मात्रम मापि हिल्‍ले.”
LUK 12:11 “मीकुन दर्मसास्‍त्रम कराहना लोह्कुने, राज्येम कियानोरा मुन्‍ने इंका अदिकारिल्कुनगा पूसकियालय ओतास्के, अगा मिमेट बतल वळकुगोमो अद, पवित्र आत्मा मीकु अस्‍केन कराहंता. अदुनहाटीं बतल वळ्कना, बतल वळ्‍कानायो इंचि रंदि कियमट.”
LUK 12:13 आ मंदिताल बोरो वरोर मनकल येसुन, “गुरु, नावा दादल नावा बाबाना अस्तिताल नाकु बतले हीसेक हिल्‍लोर, नावा पालुंक वायना आस्‍ति नाकु पंचि हीम इंचि निमे ओन्क वेहा,” इंचि इत्‍तोर.
LUK 12:14 अस्‍के येसु ओन, “अरे दादा! मीवा आस्‍तिं पंचि हियालय नाकुन बोरन्‍ना ‘पेद्‍दा मनकल हिलाकोंटे न्‍यायम कियानोर’ इंचि इरतोरा?” इंचि पूसकीतोर.
LUK 12:15 पजा येसु ओरतोनि, “बेस जेगर्ता मंचि, अन्‍नि लालचकुनाल मीवद मिमेटे लक्‍कु मंटु! बारित्‍ते मनकना पिस्वर वेल्‍लेन आस्‍ति मत्‍तेन बेस मनंता इंचि इनकुन्‍मट,” इंचि इत्‍तोर.
LUK 12:16 पजा येसु ओर्कु उंदि वेसुड वेहतोर: “वरोर वेल्‍लेन सिरमंत मनकल मत्‍तोर. उंदि मल्का बतल आता इत्‍ते, ओना नेदे इरगा पंटा पेय्‍स्‍ता.
LUK 12:17 अस्‍के मनसुने ओनद ओरे, ‘पंटा अय्ते वेल्‍लेन पेय्‍स्‍ता. गानि दीन इर्रालय मात्रम जेगा हिल्‍ले, बतल कीकन?’ इन्कुत्‍तोर.
LUK 12:18 मर्रा विचारम कीसि, ‘सरे! नना नावा पडना जेगातुन कुल्हाचि पेद्‍दागा कींतन. कीसि पूरा पंटातुन, सामानतुन अव्टे वाटसि इर्रांतन.
LUK 12:19 पजा नना नावा जीवक, नीकु वेल्‍लेन वर्सांनदाका हालानाल रुसि आता गाटो दोसतन, तिन्‍नु, उन्‍नु आनंदमते मन्‍नु, रंदि कियमा, इंचि वेहांतन,’ इंचि इत्‍तोर.
LUK 12:20 गानि पेन ओन, ‘अरे तेलिवि तक्‍को मनका, इय्याला नर्कळके नीवा जीवा होनानय्ते निमे संपादिस्तादंता बोन्क आयार?’ इंचि इत्‍ता.
LUK 12:21 बच्‍चोर पेद्‍दा सिरमंत मनकल अयना ओर पेनदा मुन्‍ने सिरमंतुड आयोर, बारित्‍ते ओर ओनाहाटींगें आस्‍ति जमा कींतोर इंचि. ई वेसुडिते ई मनकना गति गुडा अल्हेन आता.”
LUK 12:22 पजा येसु ओना सिस्युल्कुंक इल्‍हा वेहालय दल्‍गतोर: “नना मीकु वेहनद बतल इत्‍ते, जीवा तिंडिकन्‍ना मुक्‍केम, मेंदुल कपडींकन्‍ना मुक्‍केम आंदु. इंचि पिस्‍सनाहाटीं तिनकोम बतल, उनकोम बतल, इंका मेंदुल्ताहेंका केर्कोम बतल इंचेके रंदि कियमट.
LUK 12:23 बारित्‍ते तिंडिकन्‍ना पिस्वर मुक्‍येम, कपडींकन्‍ना मेंदुल मुक्‍येम.
LUK 12:24 आ काकाह्कुन हुळाट! अव वीतों आनि कोय्यों. अचोने आयका अवुनगा गुम्मिं इंका हिल्‍लें. अयना पेन अवुन पोस कीसंता. अदुनहाटीं मिमेट अय्ते आ पिट्‍टेंकन्‍ना बच्‍चोनो विलवा मत्‍तोर आंदिर.
LUK 12:25 रंदि कीसि ओना आवसुन उंदि गंटा एक्‍को बेरसागोटतोर मीवा नड्‍डुम बोरन्‍ना मंतोरा? हिल्‍लोर.
LUK 12:26 इसंटा सिन्‍ना-सिन्‍ना कबाह्के मिमेट किया परिर. अय्ते इंका मिगुल्ता कबाह्‍कुना बारेमते मिमेट रंदि बारि कींतिर?”
LUK 12:27 “आ पूतनहेके हुळट अव बल्हा बेर्ससंतांगो! अव कबळ किय्यों, कपडिं इंका कुट्‍टों. नना वेहानद बतल इत्‍ते, सुलेमान राजाल वेल्‍लेन सिरमंत मंचिगुडा ओना कपडिं आ पूतानाल उंदि पूतातच्‍चोगुडा सोकु मनाहिल्‍लें.
LUK 12:28 अय्ते जाडि इय्याला मंता, नाडि तडमिते वेसि दांता. अयना आ जाडिके पेनबाबाल इच्‍चोन बेसता कपडिं हींतोर. अय्ते अवुंकन्‍ना बेसता कपडिं मीकु हिय्या पर्रोरा रो, विस्वासम तक्‍को लोकुरिटा?
LUK 12:29 अदुनहाटीं बतल तिंदकोम, बतल उंडकोम इंचेके मिमेट रंदि कियमट. अल्‍हेने अवुन दोर्किच्‍कुनाहाटीं गाबरगुडा आयमट.
LUK 12:30 दुनियातोर अंटोर लोकुल्‍क इवुनाहाटींगें तनलाळसेक मनांतुर. गानि मीकु इव अन्‍नि गावाले इंचि मीवा पेनबाबांक एर्के मंता.
LUK 12:31 अदुनहाटीं मिमेट मुन्‍ने स्वर्ग राज्येमतुन आनि पेनदा नीतितुन पह्कट. अस्‍के इव मीकु दोर्कनुं.”
LUK 12:32 “अरे नावा सिस्युल्कुनिटा, ‘मीवा पेनबाबाल ओना राज्येमतुन मीकु हियालय वेल्‍लेन कुसिते तयार मंतोर. अदुनहाटीं मोमोट वेल्‍ले मंदि हिल्‍लोम’ इंचि वेरियमट.
LUK 12:33 अय्ते मिमेट मिहगा मत्‍ता आस्तिनअंता अम्मिसि, गरिबोर्कुंक दान-दर्मम कीसि, बस्‍केने पडन आयाकोंटा मनना कोत्‍ताना संचितुन दोर्किच्‍कुंट. इंका मिमेट मीवाहाटीं स्वर्गमते दनम जमा कीम्‍ट. अगा बोर दोंगलगुडा वायोर, दानकु सेदेलगुडा पिय्यो.
LUK 12:34 बारित्‍ते मीवा दनम बगा मत्‍ते अग्गेन मीवा मनसु मनंता.”
LUK 12:35 “मरमिना कुळपुने होंचि वायना मालकुन एदुर हूळसेक मनना सेवाकुल्कुनलेसीं कबळ कियालय बस्केळक नडिकट्‍टु दोहचि तयार मंटु. अल्हे मीवा वेडसिन इंका बस्केळक एल्‍गिच्‍चे इर्राट. अल्हा मत्‍ते बतल आंता इत्‍ते, मालक वासि तल्‍पुन तंता तन्‍मडे तल्‍पु तेंडालय अल्कगा मनंता.
LUK 12:37 मालक वातस्के एदुर हूळसेक तेल्‍विते मत्‍ता सेवाकुल्कु वेल्‍लेन आसिर्वाद दोर्कुतोर आंदुर. नना मीकु निजम वेहासेक मंतन, मालक वासि अंटोर सेवाकुल्कुन बेस उद्‍दा वेहांतोर. पजा नडिकट्‍टु दोहकुंचि ओरे सेवाकुल्कुना सेवा कियालय तयार आंतोर.
LUK 12:38 मालक बस्के वायिना, इत्‍ते नडजाम नर्का आयि हिलाकोंटे नडजाम नर्का दाटसि होतंका आयि वातस्के, बोर सेवाकुल्क अय्ते तेल्‍विते मनांतुरो आ सेवाकुल्कु वेल्‍लेन आसिर्वाद दोर्कुतोर आंदुर.
LUK 12:39 गानि मिमेट उंदि पोल्‍ले बेस तेळियागोट्‍कुंटु. अद बतल इत्‍ते, दोंगल बद वेलाक वांतोर इंचि ओक्‍कला लोता मालकुंक मुन्‍नेन तेळियसि मत्‍ते ओर तेल्वितेन मनांतोर आनि आ दोंगन लोते होळिया हिय्योर.
LUK 12:40 अल्‍हेने मिमेट इनकुनवा वेलाके मनकना रूपमते पुटतोन नना वांतन. अदुनहाटीं मिमेटगुडा बेस तयारते मंटु.”
LUK 12:41 अस्‍के पत्रु, “सामि, निमे ई वेसुडिं सिराप मावाहाटींगे वेहचंतिना, हिलाकोंटे अंटोर हाटींगा?” इंचि पूसकीतोर.
LUK 12:42 अस्‍के सामि इल्‍हा इत्‍तोर: “मालक हिल्वस्के ओनगा कबळ कियानोर्कुंक वेलापोर्रो गाटो-जावा दोस्‍सालय, वरोर बेस तेल्विगल्‍लोड, विस्वासमलायक दिवांजि मालाकुंक गावाले. अय्ते असोंटा सेवक बोर मंतोर?
LUK 12:43 बोर सेवक अय्ते, मालक मल्सि वातस्के वेहता कबळ बरोबर कीसेक मनांतोर, ओरे सेवक बेस आसिर्वाद दोर्कुतोर आंद.
LUK 12:44 नना मीक निजम वेहांतन. मालक आ सेवाकुन ओना पूरा आस्‍ति-पास्तिनपोर्रो अदिकारि इंचि इर्रंतोर.
LUK 12:45 गानि ओक्‍कला आ सेवकुडु, ‘नावा मालक वायालय अय्ते आल्‍सेमे मंता,’ इनकुंचि कळमता दासि मुरतळ, मांड्‍सा सेवाकुल्कुन तन्‍नुड-गुद्‍दुड कियमळ, इरगा तिंचि-उंचि बदमासिं कियमळ सुरुव कीतोर इनकुन!
LUK 12:46 अस्‍के आ सेवक विचारमगुडा किय्योर असोंटा रोजुने, गळियाते ओना मालक वायानुर. वासि, आ सेवाकुंक पेद्‍दा सिक्‍सा हीसि, ओन अविस्वासुल्‍क मनना जेगाते वाटसीयनुर.”
LUK 12:47 “बा सेवक अय्ते, ओना मालाकुंक बतल गावालेनो तेळियसिगुडा, मालक वेहताप केंजाकोंटा, कियाकोंटा मनांतोर, आ सेवक मात्रम वेल्‍लेन देब्बा तिंतोर.
LUK 12:48 गानि तेळियका बदो कबळ कीसि देब्बाना पाल आता सेवाकुंक मात्रम तक्‍को देब्बां आंतां. पेन बोर्कु अय्ते बेसता कबळ कियनाहाटीं वेल्‍लेन गुनम हीता ओराहेकटाल वेल्‍लेन लेक्‍का तल्कंता. अल्‍हेने बोन्क अय्ते एक्‍को अप्पजेपता, ओनहेकटाल अप्पजेपता दानकन्‍ना एक्‍कोने तल्कंता.”
LUK 12:49 “नना ई बूमिते लोकुल्‍कुनपोर्रो तळमितसोंटा न्‍यायम कियालय वातन. अद इंदकेन अंटुकुंचि मत्‍ते बच्‍चोनो बेस आयवड इंचि इनकुत्‍तन.
LUK 12:50 गानि नाकु उंदि कस्‍टाल्‍कुना बापतिस्मा एतानद मंता, अद एतनदाका नाकु तिप्‍पल्‍क तप्पों.
LUK 12:51 नना इद बूमिपोर्रो सांति हियालय वातन इंचि मिमेट इन्कुंचंतिरा? हिल्‍ले. नना अदुनहाटीं वाया हिल्‍लेन. गानि मीकुन वेरे-वेरे कियालय वातन इंचि नना मीकु वेहासेक मंतन.
LUK 12:52 इंदकेटाल बदन्‍ना उंदि लोते हेय्युर मत्‍ते, ओरद ओर्के अर्राका इव्वुर उंदि पक्‍काक, मुव्वुर इंकुंदि पक्‍काक आसि वेरे आंतुर.
LUK 12:53 अल्‍हेने मर्रिनद बाबोनतोनि-बाबोनद मर्रिनतोनि, मिय्‍याटद तल्‍लुनतोनि-तल्‍लुनद मिय्यळतोनि, कोळियाटद पोरळतोनि-पोराटद कोळियळतोनि अर्राकोंटा आंता.”
LUK 12:54 पजा ओर मंदिक इल्‍हा वेहतोर. “मब्बु तेर्पेन पोळ्‍द अर्रनहेके हूळसि मिमेट, ‘अद हुळट, पिर्रु वासेक मंता,’ इंचि वेह्कुंतिर. अल्हेन आंतागुडा.
LUK 12:55 इंका होव्वोर वळि वायनद हूळसि, ‘इंदके गर्मी अर्रंता’ इंचि इंतिर. अल्हे आंतागुडा.
LUK 12:56 अरे डोंगिरिटा, मीकु बूमि, मब्बुना रूपाल्‍कु एरपाट किया वांता. गानि इद वेलाते बतल जर्गसंता इदुन मिमेट बारि एरपाट कीसेक हिल्‍लिर?”
LUK 12:57 “असल बेस न्‍यायम बद आंद, अद मीवद मिमेटे बारि निरनायम किया परसाहिल्‍लिर?
LUK 12:58 निमे नीवा पगातोनतोनि कलियसि कोरटते मजिस्‍टरनगा होननेंके हरदेन ओनतोनि बेस संबंदम कल्‍पुकुन. अल्हा कियाकोंटे नीकुन नीवा पगातोर कोरटते मजिस्‍टरुंक अप्‍पजेपनुर. मजिस्‍टर नीकुन पोलिसुल्‍कुंक अप्‍पजेपनुर, पोलिसुल्क ओसि नीकुन जेलने वाटानुर.
LUK 12:59 नना नीकु निजम वेहांतन, कोत्‍तक-कोत्‍ता दोहनदाका निमे अगटाल पेय्‍सा पर्रिन,” इंचि वेहतोर.
LUK 13:1 अदे वेलाते अगा मत्‍ता लोकुल्‍कुनाल इच्‍चुर लोकुल्‍क वासि येसुंक, “गालिल एरियाता इच्‍चुर मनकालोर गुळिते मोक्‍कु हीसेक मननेंके पिलातुस ओना सिपाइल्कुन लोहचि ओर्कुन हव्का वेहतोर. आ सिपाइल्क ओर्कुन गुळितेन हव्कतुर. इल्‍हा पिलातुस ओरा नेत्‍तुरतुन मनम मोक्‍कु हियना नेत्‍तुरते कल्‍पतोर,” इंचि वेहतुर.
LUK 13:2 अस्‍के येसु ओर्कु इल्‍हा जवाब हीतोर, “गालिल एरियाताल वाता ई मनकालोर्कुंक इसंटा हामुर वाता अय्ते, ई मनकालोर गालिल एरियाता वेरे मनकालोर्कुंकन्‍ना एक्‍को पापम कीतुर इंचि मिमेट इन्कुंचंतिरा?
LUK 13:3 नना वेहासेक! अल्हा बिल्कुले आयो. गानि पापमताल मनसु मार्सकुंचि पेनदाहेके तिरियाकोंटे मिमेटगुडा ओरालेसींगे हासि नासडेम आंतिर.
LUK 13:4 सरे इंदके वेहाट! सिलो इनना गोपुरमकूलसि अरताहेंका पद्‍देनमिदि मंदि मनकालोर हातुर. अय्ते ई गोपुरम कूलता वेलाते येरुसलेमते मत्‍ता वेरे मनकालोर्कुंकन्‍ना हासोत्‍ता ई पद्‍देनमिदि मनकालोर एक्‍को तप्पु कीतुर इंचि इन्कुंचंतिरा?
LUK 13:5 हिल्‍ले. नना मीकु वेहनद बतल इत्‍ते, पापमताल मनसु मार्सकुनाकुंटे मिमेट अंटोरगुडा ओरालेसींगे हासि नासडेम आंतिर.”
LUK 13:6 ओर्कु बेस तेळियनाहाटीं पजा येसु इंकुंदि वेसुड वेहालय सुरुव कीतोर. “वरोर मनकल ओना अंगुर तोटाते उंदि अंजिर मरा वाटतोर. उंदि रोज अद मरा कायां हादतना, हादा हिल्‍लेना, इंचि हूळालय होत्‍तोर, गानि अदुंक कायां हादसि मनाहिल्‍लें.
LUK 13:7 अस्‍के आ मनकल ओना तोटाते कबळ कियना जीतागानकु, हूळा, ई अंजिर मरा कायां हादता बारे इंचि नना मूड वर्सानाल इगे दीन हूळालय वासंतन, गानि दीनकु बस्‍केने उंदि काया इंका नाकु दिसा हिल्‍ले. इसंटा मरातुन इर्सि बता पायदा? नर्किसि पोहा, इंचि वेहतोर.
LUK 13:8 अस्‍के आ जीतागाड, मालक, ई उंदि वर्सामेड मन्‍निकांटी. नना दीन सुट्‍टु तव्‍सि बेस एरवु वाटंतन.
LUK 13:9 अस्केनना हादते सरे, हिलाकोंटे नर्किसि पोहा वच्‍चु,” इंचि इत्‍तोर.
LUK 13:10 उंदि नोमकेम रोजुननाड येसु उंदि दर्मसास्‍त्रम कराहना लोते कराहसेक मत्‍तोर.
LUK 13:11 देय्यम पीताहेंका पद्‍देनमिदि वर्सानाल बिमार अर्सि मत्‍ता उंदि मुरतळ अगा मत्‍ता. दाना नळि वंकर आसि गूनि पेय्सि मत्‍ताहेंका दान्क बेस नित्‍ता वायाकोंदु.
LUK 13:12 येसु दान हूळसि ओना दग्गेर्क केयतोर. केय्‍सि, “बाई! निमे नीवा रोगमताल पलाते अरतिन,” इंचि, पजा दाना तल्‍लापोर्रो कय इरतोर. कय इरता इरमळे अद बेस नित्‍तिसि पेनदुन तल्‍सकुनालय दल्‍गता.
LUK 13:14 बिमार मत्‍ता मुर्ताटुन नोमकेम रोजुननाड येसु बेस कीताहेंका दर्मसास्‍त्रम कराहना लोता अदिकारिंक इरगा होंगु वाता. अस्‍के ओर लोकुल्‍कुन, “कबाह्‍क कियालय उंदि वारमते हारुं रोजकु मंतां गदा! अय्ते आ रोजकुने वासि मिमेट मीवा बिमारकुनाल बेस आम्टु, गानि नोमकेम रोजुननाड वासि आयो,” इंचि इत्‍तोर.
LUK 13:15 अस्‍के सामि जवाबुने ओर्कुन, “अरे डोंगि लोकुरिटा, नोमकेमनाडु मीवाव्टेटाल हरेक मनकल कोंदातुन आयि गाडदितुन आयि लेहाकुंचि एर उहालय ओयिरा?
LUK 13:16 अय्ते पद्‍देनमिदि वर्सानाल पेद्‍दा देय्यम पीसि मत्‍ता अब्राहामुना वंसमता ई मुरताटुन, नोमकेम रोजुननाड बेस कीते इव्टे तप्पु बतल मंता?” इंचि इत्‍तोर.
LUK 13:17 येसु वळ्‍कुता ई पोल्‍लें केंजसि बोर लोकुल्‍क अय्ते ओना विरोदमते मत्‍तुरो, ओर्क अंटोर्क सिग्गु वाता. गानि येसु कीता इचंत्रम आयना कबाह्‍कुन हूळसि लोकुल्‍क मात्रम इरगा कूस आतुर.
LUK 13:18 पजा येसु इल्‍हा वेहतोर. “पेनदा राज्येम बल्हा मनंता? नना दान बदुनलेह्का मंता इनकन?
LUK 13:19 पेनदा राज्येम आवाल्‍कुना उंदि पेडेतसोंटद आंद. आ पेडेतुन बोरो वरोर मनकल ओसि ओना तोटाते वीततोर. अद मोलियसि, बेर्स्‍सि पेद्‍दा मरा आता. अस्‍के परियना पिट्‍टें दाना पंगांक गूडां दोहकुत्‍तां.”
LUK 13:20 येसु मर्रा इल्‍हा इत्‍तोर. “पेनदा राज्येमतुन नना बदुनलेह्का मंता इंचि इनकन?
LUK 13:21 अद पुल्‍लटा पिंडितसोंटद आंद. बदो उंदि मुरतळ पुल्‍लटा इच्‍चुर पिंडितुन मूड तव्‍वना पिंडिते कल्‍पता. अस्‍के आ पिंडिअंता पुल्‍लगा आता,” इंचि वेहतोर.
LUK 13:22 येसु येरुसलेम होननेंके वेल्‍लेन नाह्कुने, सहरकुने होंचि अगाटा लोकुल्‍कुंक पेनदा पोल्‍लें कराहसेक होत्‍तोर.
LUK 13:23 अस्‍के बोरो वरोर मनकल येसुन, “सामि, पापमताल मुक्‍ति इच्‍चुर मंदिके दोर्कंतना?” इंचि पूसकीतोर.
LUK 13:24 अस्‍के येसु ओन्क इल्‍हा वेहतोर. “मिमेट बस्‍केळ्‍क इर्कुटोम मत्‍ता हरदाल होळियालय इरगा कोसिस कीम्‍ट. नना वेहानद बतल इत्‍ते, आ हरदाल वेल्‍ले मंदि होळियालय हूळांतुर गानि ओर होळिया परुर.
LUK 13:25 लोता मालक तेदसि उंदि मल्का तल्‍पु वाटानय्ते मिमेट पलाते नित्‍तिसि तल्‍पुन टोक-टोक कीसेके, ‘सामि मावाहाटीं तल्‍पु तेंडा,’ इंचि इंदकिर. गानि, ‘मिमेट बगाटाल वातिर? नना मीकुन एरपाट किय्योन,’ इंचि ओर मीकुन इंतोर.
LUK 13:26 अस्‍के मिमेट, ‘नीवातोनि कलियसि मोमोट तित्‍तोम, उट्‍टोम. इंका निमे मावा नाटे वासि माकु बजारकुने पेनदा पोल्‍लें कराहतिन,’ इंचि इंदकिर.
LUK 13:27 गानि ओर मात्रम, ‘नना मीकु वेहासेक मिमेट बगाटाल वातिरो, बोर आंदिरो नना मीकुन एरपाट किय्योन. अरे सेड्‍डा कबाह्‍क कियानोरिटा, मिमेट इगेटाल पेय्सि होंटु,’” इंचि इंतोर.
LUK 13:28 “पेनदा राज्येमते अब्राहाम, इसाक, याकोब अल्‍हेने पेनदा कबुरतोर अंटोर्कुन मिमेट हूळांतिर, गानि मीकुन मात्रम अगटाल, पेन पलाते हीकटते वाटसींता. अगा सिराप अळमळ, पल्कु कोर्कमळे मनंता.
LUK 13:29 अस्‍के उत्‍तर-दक्‍सिनताहेंदाल, पोळ्‍द पेयसनाहेंदाल, पोळ्‍द अर्रानाहेंदाल लोकुल्‍क वासि, पेनदा राज्येमते उद्‍दानुर.
LUK 13:30 गानि हुळाट! मुन्‍ने मत्‍तोर इच्‍चुर पज्जो आयानुर आनि पज्जो मत्‍तोर इच्‍चुर मुन्‍ने आयानुर.”
LUK 13:31 अच्‍चोटेन इच्‍चुर परिसिल्क वासि येसुन, “नीकुन अंतिपस हेरोद राजाल हव्कालय हूळसंतोर, निमे इगेटाल बद्‍दना वेरे जेगाते पेय्सि होन,” इंचि इत्‍तुर.
LUK 13:32 अस्‍के येसु ओर्क इल्‍हा वेहालय दल्‍गतोर. सरे! मिमेट होंचि आ नक्‍काकु वेहट गदा, इय्याला नाडि नना देय्याल्कुन पेचाहसि गेदमंतन, बेस हिलवोर्कुन बेस कींतन, मन्‍ने नावा कबाटुन महांतन.
LUK 13:33 अयना येरुसलेम सहरता पलाते वरोर पेनदा कबुरतोंक हामुर वायमळ बेस आयो. अदुनहाटीं इय्याला, नाडि, मन्‍ने नाकु ताकसेकेन मना पींता.
LUK 13:34 ए येरुसलेमतोरिटा, ए येरुसलेमतोरिटा! मिमेट पेनदा कबुरतोर्कुन हव्‍कानोर आंदिर, इंका पेन मिहगा लोहचीतोर पोर्रो मिमेट बंडां हुक्‍कानोर आंदिर. कोर्रु दाना पीसेन रेक्‍काना हिळु बल्हा जमा कींतनो, अल्हेन ननागुडा मीवा पिलाल्कुन जमा कियना इंचि बच्‍चुंगो मल्कां कोरतन. गानि मिमेट मात्रम कोराहिल्‍लिर.
LUK 13:35 हूळा, मीवा लोन मीहाटीं कुल्‍ला होळ्‍समळ जर्गता. नना मीकु वेहानद बतल इत्‍ते, सामिना पोरोलते वायानोर आसिर्वाद दोर्कतोर इंचि बदवेरदाका अय्ते मिमेट इन्‍निरो अदवेरदाका नाकुन मर्रा हूळिर, इत्‍तोर.
LUK 14:1 उंदि नोमकेम रोजुननाड येसु परिसि अदिकारिल्कुनाल वरोर अदिकारिना लोन गाटो तिनालय होत्‍तोर. अगा मत्‍तोर अंटोर लोकुल्‍क येसुन बदन्‍ना पोल्‍लेते दोर्का पियालय ओनहेके बेस हूळसेक मत्‍तुर.
LUK 14:2 अगा येसुना मुन्‍ने वरोर काल्क-कय्‍क तोयाना बिमार मत्‍ता मनकल मत्‍तोर.
LUK 14:3 अस्‍के येसु, “नोमकेम रोजुननाड बिमार मत्‍तोर्कुन बेस कियमळ दर्मसास्‍त्रम परकारम बेसा, बेस आयोना?” इंचि मूसाना नियम बेस तेळियतोर्कुन आनि परिसिल्कुन पूसकीतोर.
LUK 14:4 गानि ओर बतले वळकाकोंटा चुपचाप मत्‍तुर. पजा येसु आ तोयसि मत्‍ता मनकनपोर्रो कय ताससि ओन बेस कीसि, अगटाल होना वेहतोर.
LUK 14:5 पजा, “मिहागटाल बोनादन्‍ना गाडदि आयि कोंदा आयि नोमकेम रोजुने कुहिते अरते, अदे रोजुने दान बिराना कुहिताल तेंडिरा?” इंचि येसु ओर्कुन पूसकीतोर.
LUK 14:6 अयना ओर मात्रम येसुंक जवाब हिया पराहिल्‍लुर.
LUK 14:7 पजा अगा बोजनमहाटीं वाता मनकालोर्कु, पेद्‍दा मनकालोर उद्‍दाना जेगां पहकिसि उद्‍दालय हूळुंदुर. अदुन हूळसि येसु ओर्कु इल्‍हा वेहतोर.
LUK 14:8 “बोरन्‍ना मीकुन मरमिने गाटो तिनालय केयतस्‍के मिमेट होंचि पेद्‍दा मनकालोर उद्‍दना जेगाते उदमट. बारित्‍ते मीकुन बोर मनकल अय्ते केयतोरो ओर मीकन्‍ना एक्‍को कदर मत्‍ता मनकनगुडा केय्‍सि मनानुर.
LUK 14:9 पजा मीकुन इव्वुर्कुन केयता आ मनकल मिहगा वासि, ‘निमे उद्‍दिसि मनना जेगाते ईन उद्‍दाहीम’ इंचि मीकुन अगटाल तेहानुर. अस्‍के मीवद सिग्गु होंचि अंटोरा मुन्‍ने सिन्‍नाल्क उद्‍दाना जेगाते होंचि हिळु उद्‍दा पींता.
LUK 14:10 अदुनहाटीं बोरन्‍ना मीकुन गाटो तिनालय केयंतोर अस्‍के मिमेट होंचि, सिन्‍नाल्क उद्‍दाना जेगाते हिळु उद्‍दिसि मंटु. बस्के अय्ते मीकुन केयता मनकल वासि मीकुन, ‘दादा, इगेटाल तेदसि आ बेसता जेगाते होंचि उद्‍दा,’ इंचि वेहनुर अस्‍के मीवातोनि कलियसि गाटो तिनना अंटोर हेडमितोरा मुन्‍ने मीकु बेस कदर दोर्कार.
LUK 14:11 बारित्‍ते, बोर अय्ते ओनद ओरे ‘नना पेद्‍दोन’ इंचि वेहकुंतोर, ओन पेन सिन्‍ना किय्‍यार आनि बोर अय्ते ‘नना सिन्‍नोन’ इंचि वेहकुंतोर, ओन पेन पेद्‍दा किय्‍यार.”
LUK 14:12 पजा येसुन बोर अय्ते केयतोरो आ मनकंकगुडा येसु उंदि पोल्‍ले वेहतोर. “निमे नर्का-पिय्यल बस्के बोजनम हिय्‍यिना आ बोजनमते नीवा दंटागाह्कुन, नीवा दादल-तम्मुह्‍कुन, जीवातोर-हेडमितोर्कुन, मीवा पक्‍का लोह्कुना सिरमंत लोकुल्‍कुन केयुमा. ओर्कुन केयते, निमे ओर्कुन केयताप ओरगुडा नीकुन केयांतुर, इल्‍हा नीवा बाकि तीरंता.
LUK 14:13 ओर्कुन केयनदानकन्‍ना निमे गरिबोर्कुन, गुड्‍डोर्क-गूनोर्कुन, ताका परवोर्कुन केया.
LUK 14:14 अस्‍के नीवा बाकि तीरसालय ओर नीकु बतल हिया पर्रुर. गानि पेनदा नदरते नीतिमंतुल्क मत्‍तोर हासि मर्रा जीवाते तेदतस्‍के पेनदाहेंदाल नीकु नीवा इनाम तप्‍पाकोंटा दोर्कंता.”
LUK 14:15 येसु इत्‍ता आ पोल्‍लेतुन केंजसि, उद्‍दिसि गाटो तिनानोराव्टेटाल वरोर मनकल येसुन, “पेनदा राज्येमते उद्‍दिसि बोजनम कियना मनकल आसिर्वाद दोर्कुतोर आंद,” इंचि इत्‍तोर.
LUK 14:16 अस्‍के येसु वेसुडिते इल्‍हा वळकालय दल्‍गतोर. वरोर मनकल पेद्‍दा कुळ्‍पु इर्सि आ कुळ्‍पुंकु वेल्‍लेन मंदितुन केयतोर.
LUK 14:17 कुळ्‍पु तयार आतस्के, अन्‍नि तयारिं आतां, बोर्कुन अय्ते केयतोम आ मनकालोर्कुन केय्‍सि तराहोंटु, इंचि आ मालक ओना दासुन लोहतोर.
LUK 14:18 गानि ओर अंटोर इल्‍हा विनंति कियालय दल्‍गतुर. मोदाला कलियतोर, नना उंदि पूना पोलम अस्तन, नाकु दान हूळापींता, निमे बतल इनिना बेसे, नना वाया पर्रोन, नाकुन मापि कीम इत्‍तोर.
LUK 14:19 इंकावरोर, नना हेय्युं जोडिं कोंदां अस्तन, अव बल्हा कबळ कींतंगों नाकु अवुन हूळापींता. नाकुन मापि कीम, नना वाया पर्रोन, इत्‍तोर.
LUK 14:20 मर्रा इंकावरोर, नना इंदकेन मरमिं आतन, नना वाया पर्रोन, इत्‍तोर.
LUK 14:21 अस्‍के आ दासुड मल्सि वासि जर्गुतद अंता ओना मालकुंक वेहतोर. अस्‍के मालकुंक इरगा होंग वाता. पजा ओर ओना दासुंक इल्‍हा वेहतोर. निमे बिराना सहरता हर्कुन पीसि, मूला-मूलाक होंचि गरिबोर्कुन, गुड्‍डोर-गूनोर्कुन, कुंटोर्कुन इगे केयकुंचि वा, इत्‍तोर.
LUK 14:22 अस्‍के दासुड मालक वेहतापे कीतोर. पजा मर्रा मल्सि वासि मालकुंक इल्‍हा वेहतोर. मालक, निमे वेहतापे नना होंचि केय्‍सि तत्‍तन. अय्नागानि इंका वेल्‍लेन जेगा मिगिल्सि मंता, इत्‍तोर.
LUK 14:23 अस्‍के मालक दासुंक इल्‍हा वेहतोर. “निमे रोडकुन पीसि, हर्कुन पीसि होंचि लोकुल्‍कुन बतिमलाडसि पीसि वा. नावा लोन पुरागा निंडिसि मनगोम अचोने.
LUK 14:24 नना मीकु निजम वेहचंतन, नना मुन्‍ने केय्‍सि मत्‍ता वरोर मनकलगुडा नना हीता बोजनमता रुसि हूळा परुर, इंचि इत्‍तोर.”
LUK 14:25 येसुनतोनि वेल्‍लेन मंदि लोकुल्‍क ताकसि वासेके मत्‍तुर. अस्‍के येसु ओराहेके तिरियसि इल्‍हा वळकालय दल्‍गतोर: “नहगा वांतन इंचि इनकुत्‍तोर बोरन्‍ना आयिर, ओर ओना यावन-बाबान, मुत्‍तो-पिलाल्कुन, तम्मुर-तादन, अक्‍कल-हेलाह्कुन, इंका ओना जीवातुन एक्‍को पावरम कीते, ओर नावा सिस्युड आया परोर.
LUK 14:27 अचोने आयका बोर अय्ते ओना सतता क्रुस पीसि नावा पज्जो वायोन इंतोर, ओरगुडा नावा सिस्युड आया परोर.”
LUK 14:28 “मीवाव्टेटाल बोरन्‍ना आयिर, उंदि एत्‍तुंक एत्‍तु मिद्‍दे दोहंतन इनकुत्‍ते, ओर मोदाला आरामते उद्‍दिसि इद मिद्‍देतुन दोहालय बच्‍चोन वेल्‍ले कर्च वायार? इंका बतल-बतल अय्ते गावालेनो, अव अन्‍नि मंतंगां मरि हिल्‍लेंगां? इवुना बारेमते विचारम किय्योरा? कींतोर.
LUK 14:29 ओक्‍कला अल्हा कियाकोंटे ओर पायवा अय्ते दोहंतोर गानि मिद्‍देता कबळ मात्रम पुरागा किया परोर. असोंटस्के अदुन हूळतोर अंटोर ओन कारेड्‍डाल्‍क कीसेके, अद हुळट रो! ई मनकल मिद्‍दे दोहालय अय्ते सुरुव कीतोर गानि पुरागा दोहा पराहिल्‍लोर, इंचि इंतुर.”
LUK 14:31 “हिलाकोंटे, ‘नना पदि वेय्‍कुना सिपाइल्कुन पीसि इरवै वेय्‍कुना मंदि सिपाइल्कुन गेल्सा परांतना?’ इंचि गिच्‍चचोगुडा विचारम कियाकोंटा लडाइ कियालय दांतोर! असंटोर बोरन्‍ना राजाल मंतोरा?
LUK 14:32 ओक्‍कला अल्हा कीते आ राजाल बोनतोनि अय्ते लडाइ कियानद मंता, ओना सिपाइल्क लक्‍कु मननेंके इच्‍चुर विस्वासमता सिपाइल्कुन एदुर लोहचि सांति-समादानम कियना विचारम कींतोर.
LUK 14:33 इल्हेने मीवाव्टेटाल बोरन्‍ना आयिर, मिहगा मत्‍तव अन्‍नि आस्‍ति-पास्तिन होळसोन इंतोर, ओर नावा सिस्युड आया परोर.”
LUK 14:34 “होव्वोर बेसे मनंता गानि होव्वोर, होव्वोर रुसि वायाकोंटे, अव्टे मर्रा बल्हा होव्वोर रुसि तरा परांतोम?
LUK 14:35 असंटा होव्वोर तोळिते कल्‍पालयगुडा ओज्‍जो, एरवुहाटींगुडा ओज्‍जो. अद सिराप पलाते पोहचियालये ओज्जंता. बोर्कु केंजालय केव्क मंतां ओर केंजट.”
LUK 15:1 उंदि रोज कर वसुल कियानुर आनि पापि लोकुल्‍क येसुना पोल्‍लें केंजालय ओनगा जमा आतुर.
LUK 15:2 जमा आतद हूळसि, परिसिल्कु आनि दर्मसास्‍त्रम कराहना गुरुल्क येसुन, “ई मनकल पापि लोकुल्‍कुन दग्गेर्क केय्‍सि उपसंतोर अल्‍हेने ओरतोनि कलियसि गाटोगुडा तिंतोर,” इंचि गुल्‍गसेक इत्‍तुर.
LUK 15:3 ओर इनानद केंजसि येसु ओर्क उंदि वेसुडि वेहतोर.
LUK 15:4 “मी लोप्पोटाल वरोनगा नूर गोर्रें मंतां इनकुंटु. अवुनाल उंदि गोर्रे तप्‍पिस होनानय्ते, कळमता टोंबै तोम्मिद गोर्रेन अग्गेन मंदा वाटसि, तप्‍सोत्‍ता आ उंदि गोर्रे दोर्कनदाका दान पहकालय होन्‍नोरा?
LUK 15:5 पजा अद गोर्रे दोर्कतस्के, ओर वेल्‍लेन कूस आसि दान हट्‍टापोर्रो वाटकुंचि पीसि वांतोर.
LUK 15:6 वासि, दंटातोर्कुन, लोता पक्‍कातोर्कुन केय्‍सि, ‘नावा तप्‍सोत्‍ता गोर्रे नाक दोर्कुता, नावातोनि कलियसि आनंदम कीम्‍ट,’ इंचि इंतोर.
LUK 15:7 नना मीक वेहानद बतल इत्‍ते, बोर्क अय्ते मनसु मार्सकुनना अव्‍सरम हिल्‍ले, असोंटा टोंबै तोम्मिद मंदि नीतिमंतुल्‍कुना बारेमते आयना आनंदमकन्‍ना, वरोर पापि मनकल मनसु मार्सकुत्‍ते ओनाहाटीं स्वर्गमते बच्‍चोरो आनंदम आंता,” इंचि वेहतोर.
LUK 15:8 “मर्रा उंदि वेसुडि वेहांतन केंजाट. उंदि मुरतटगा पदि एंडि कोत्‍तां मत्‍तां. आ पदि कोत्‍तानाल उंदि कोत्‍ता बगानो अरसि होत्‍ता. अस्‍के अद मुरतळ सिमलि निरिच्‍चि, लोनअंता हेय्सि आ कोत्‍ता दोर्कनदाका पहकंता.
LUK 15:9 पजा अद कोत्‍ता दोर्कतस्के, दाना दंटातवुन, लोता दग्गेटवुन केय्‍सि, ‘नावद बगानो अरसोत्‍ता कोत्‍ता दोर्कुता, मिमेट नातोनि कलियसि आनंदम कीम्‍ट,’ इंचि इंता.
LUK 15:10 नना मीक वेहांतन, इदुनलेसींगे वरोर पापि मनकल ओना पापमताल मनसु मार्सकुत्‍ते ओनाहाटीं स्वर्गमते पेन दाना दूतानतोनि आनंदम कींता,” इंचि इत्‍तोर.
LUK 15:11 येसु इंकुंदि वेसुडि वेहातोर. “वरोर मनकंक इव्वुर मर्क मत्‍तुर.
LUK 15:12 उंदि रोजु सिन्‍ना मर्रि ओना बाबोन, बाबा, संपत्‍तिताल बच्‍चोन नावा पालु मंता, अद नाकु पंचि हीम, इत्‍तोर. इत्‍तस्के ओना बाबो संपत्‍तितुन इव्वुर मर्कुंक पंचि हीतोर.”
LUK 15:13 “कोन्‍नि रोजकुना पजा, सिन्‍ना मर्रि ओना पालुंक वाता संपत्‍तितुन बोत्‍तिगा पीकुंचि, बेकेनो लक्‍कु देसेम पेय्सि होत्‍तोर. अगा होंचि बोगम कबाह्‍कुने ओना संपत्‍तितुन नासडेम कीतोर.
LUK 15:14 ओनगा मत्‍तव अंता मारतस्के आ देसेमते पेद्‍दा करवु अरता, ओनगा बतले हिलाकोंटा आता.
LUK 15:15 अदुनहाटीं ओर आ देसेमता वरोर मनकनगा जीतम मत्‍तोर. आ मनकल ओना पोलाल्कुने पद्‍दिं मेहालय ओन लोहचीतोर.
LUK 15:16 पजा ओर पद्‍दिं मेयाना मेतातुन तिंचि पीर निहकन बारे इंचि इनकुंदुर, गानि अद मेता इंका ओनकु बोरे हिय्या हिल्‍लुर.”
LUK 15:17 “अस्‍के ओनकु लोता मति वाता, नावा बाबानगा बच्‍चुरो जीतागाह्‍क मंतुर, ओर तित्‍ते मारवच्‍चोन गाटो अगा मंता, गानि नना बारे इगे कर्वुंक हासेके मंतन.
LUK 15:18 नना ई देसेम होळसि, नावा बाबानगा मल्सि दांतन. होंचि, ‘बाबा, स्वर्गमता पेन आनि नीकु विरोदमते नना पापम कीतन.
LUK 15:19 इंदके नना नीवा मर्रिन लायक हिल्‍लेन गानि निहगा नाकुन नीवा जीतागानलेसीं ईरकुन इंचि इंतन,’ इल्‍हा इंतन, इनकुत्‍तोर.
LUK 15:20 पजा ओर अगटाल ओना बाबोनहेके पेय्सतोर. पजा ओर ओना बाबाना लोतुक वेल्‍लेन लक्‍कु मत्‍तोर अस्‍के ओना बाबाल ओन हूळतोर. मर्रिन हूळसि बाबोंक वेल्‍ले पापम अनपिस्ता. अदुनहाटीं ओर एदुर वितसि होंचि ओन चातिक अदमुकुंचि बुरतोर.
LUK 15:21 अस्‍के मर्रि बाबोन, ‘बाबा, स्वर्गमता पेन आनि नीकु विरोदमते नना पापम कीतन. इंदके नना नीवा मर्रिन लायक हिल्‍लेन,’ इत्‍तोर.”
LUK 15:22 गानि बाबाल ओन लोन तच्‍चि, जीतागाह्कुनतोनि, बिराना होंचि बेसता कपडिं तच्‍चि ईनकु केरहट, ईना वेलुंक उंदि मुद्‍दा दोस्सट, काल्कुंक हेरपुह्क केरहट.
LUK 15:23 अल्‍हेने बेस बल्सता कुर्रातुन तच्‍चि कोय्यट, अदुन तिंचि मनम कूस आकोम.
LUK 15:24 बारित्‍ते, नावा मर्रि नहागटाल वेल्‍लेन लक्‍कु होंचि हासोत्‍ताप मत्‍तोर, इंदके ओर मल्सि वातोर. तप्‍सोंचि मत्‍तोर गानि इंदके दोर्कतोर, इंचि इत्‍तोर. इल्‍हा ओर कूस आयालय दल्‍गुतुर.
LUK 15:25 “पजा बतल आता इत्‍ते, ओना पेद्‍दा मर्रि नेदहेके होंचि मत्‍तोर. ओर नेदाल लोन वायानेंके लोता दग्‍गेरा एवतोर अस्‍के ओन्क पाटां पारानद, एगरानद अल्किर केंजावाता.
LUK 15:26 केंजा वातस्के ओर वरोन जीतागान केय्‍सि, लोन बतल जर्गुसंता? इंचि पूसकीतोर.
LUK 15:27 अस्‍के आ जीतागाड, ‘नीवा तम्मुर बेस मल्सि वातोर. अदुनहाटीं नीवा बाबाल, बेस बल्सता कुर्रातुन कोय्या वेहातोर,’ इंचि इत्‍तोर.”
LUK 15:28 “इद पोल्‍ले केंजसि पेद्‍दा मर्रिंक इरगा होंग वाता. ओर लोप्पो होळियोन इंचि पलातेन मत्‍तोर. अस्‍के ओना बाबाल पलाते वासि, ओन समजांचलय दल्‍गतोर.
LUK 15:29 गानि पेद्‍दा मर्रि बाबोन, इच्‍चुं वर्सानाल नना नीवा सेवा कीसेके वातन, नीवद बद्‍दे आदेसतुन नना नेम्‍हा हिल्‍लेन. गानि नावा दंटातोरतोनि कलियसि कूस आयालय, नाकु निमे बस्‍केन उंदि एटि पोरिनगुडा हिया हिल्‍लिन.
LUK 15:30 गानि नीवा ई मर्रि, नीवा संपत्‍तितुन बोगम कबाह्‍कुने पूरा नासडेम कीतोर, ओनाहाटीं निमे बेस बल्सता कुर्रातुन कोय्या वेहतिन, इंचि इत्‍तोर.”
LUK 15:31 “इत्‍तस्के ओना बाबाल, नावा पेडा, निमे बस्केळकु नावातोनि मनांतिन, नहगा बतल-बतल अय्ते मंता, अद अंता पूरा नीवादे आंदु.
LUK 15:32 गानि ईर नीवा तम्मुर वेल्‍लेन लक्‍कु होंचि हासोत्‍ताप मत्‍तोर, इंदके पिस्सि मल्सि वातोर. तप्‍सोंचि मत्‍तोर गानि इंदके दोर्कतोर. अदुनहाटीं मनम कूस आयमळ गावाले इत्‍तोर.” इल्‍हा वेहचि येसु वेसुडि वेहमळ महतोर.
LUK 16:1 पजा येसु सिस्‍युल्‍कुंकगुडा वेहालय दल्‍गुतोर: “वरोर सिरमंत मनकल मत्‍तोर. ओनगा वरोर दिवांजि मत्‍तोर. सिरमंत मनकानगा बोरो लोकुल्‍क वासि, ‘नीवा दिवांजि नीवा दनमतुन नासडेम कीसंतोर,’ इंचि वेहातुर.
LUK 16:2 अस्‍के सिरमंत मनकल दिवांजिन केय्‍सि, ‘नीवा बारेमते इल्‍हा बारि केंजसेक मंतन? इंदके नीकुन दिवांजि कबळते ईरा पर्रोन, निमे इच्‍चुं रोजुक कीता कबाटद पूरा इसाब हीम,’ इत्‍तोर.
LUK 16:3 इत्‍ता पजा आ दिवांजि, ‘इंदके नना बतल कीकन? नावा मालक अय्ते नाकुन कबळ पोर्रोटाल तेंडसंतोर. इंदके नहगा कास्‍तकरि कबळ कियानच्‍चो बलम हिल्‍ले आनि बिच्‍चम तल्कालय नाकु सिग्गु वांता,’ इंचि विचारम कियालय दल्‍गतोर.
LUK 16:4 ‘नाकुन दिवांजिता कबाटाल तेंडिना गानि लोकुल्‍क ओरा लोह्कुने केयमळ गावाले इत्‍ते नना बतल कियगोमो अद नाकु तेळियता,’ इंचि इनकुत्‍तोर.
LUK 16:5 इनकुंचि सिरमंत मनकंक बोर अय्ते बाकि मत्‍तुर, ओर्कुन वरोन-वरोन केयतोर, केय्‍सि वरोन पूसकीतोर, ‘निमे मालकुंक बच्‍चोन बाकि मंतिन?’
LUK 16:6 ‘नालुं वेय्‍कु लीटर्क जय्‍तुन निय बाकि मंतन,’ इंचि इत्‍तोर. इत्‍तस्के दिवांजि ओन, ‘इद पीम नीवा काता बुक आनि बिराना दीन रोंड वेय्‍कु लीटर्क रासा,’ इंचि इत्‍तोर.
LUK 16:7 मर्रा इंकावरोन, ‘निमे बच्‍चोन बाकि मंतिन?’ इत्‍तोर. ओर, ‘नूर गिद्‍दें गोह्कु हियना मंतन,’ इंचि इत्‍तोर. इत्‍तस्के ओन इंका, ‘इद पीम नीवा काता बुक! इवने एनबै गिद्‍दें रासा,’ इंचि इत्‍तोर.
LUK 16:8 “पजा सेड्‍डा कबाह्‍क कियाना दिवांजि तेल्‍विते कीता कबाह्‍कुन आ सिरमंत मनकल हूळसि, ‘निमे उसार मंतिन’ इंचि ओन इत्‍तोर. इल्हेने पेनदा लोकुल्‍कुंकन्‍ना एक्‍को, पेनदुन एरपाट किय्युवा दुनियाता लोकुल्‍क वरोंक-वरोर हियमळ-एतमळते वेल्‍ले तेल्‍विते मनांतुर.
LUK 16:9 नना वेहानद बतल इत्‍ते, इद दुनियाते मिमेट संपलिच्‍ता दनमतुन कर्च कीसि, दंटातोर्कुन दोर्किचकुंटु, बारित्‍ते अद दनम बस्के अय्ते मारंता अस्‍के, बस्‍केळ्‍क मनना लोह्कुने मीक जेगा दोर्कंता.
LUK 16:10 “सिन्‍ना पोल्‍लेतेगुडा बोर अय्ते विस्वासमलायक मंतोर ओर पेद्‍दा पोल्‍लेतेगुडा विस्वासमलायक मंतोर. अल्‍हेने बोर अय्ते सिन्‍ना पोल्‍लेतेगुडा विस्वासमलायक हिल्‍लोर ओर पेद्‍दा पोल्‍लेतेगुडा विस्वासमलायक हिल्‍लोर.
LUK 16:11 अदुनहाटीं ओक्‍कला मिमेट दुनियाते संपलिच्‍ता दनमतगा विस्वासमलायक हिलाकोंटे, पेन दाना राज्येमता निजम दनमतुन मीवा कय्‍दे बल्हा हिय्यार?
LUK 16:12 मनद आयवा दनमता बारेमते मिमेट विस्वासमलायक हिलाकोंटे, बद दनमतुन अय्ते पेन मीक हींतन इंचंता, अद मीक बल्हा दोर्कार?
LUK 16:13 “वरोर जीतागाल इव्वुर मालकुल्कुनगा सेवा किया पर्रोर. अल्हा सेवा कीते वरोन बेस पावरम कींतोर, इंकावरोन हयसोर, हिलाकोंटे वरोना पोल्‍ले केंजंतोर, इंकावरोना पोल्‍ले बारे केंजोर. अल्‍हेने मिमेट पेनदुन आनि दनमतुन उंदे मल्का सेवा किया पर्रिर,” इंचि वेहतोर.
LUK 16:14 येसु इव पोल्‍लें वेहनेंके, अगा परिसिल्क मत्‍तुर. ओर कोत्‍ताना पोर्रो बागा जीवा कियुंदुर. अदुनहाटीं येसुना पोल्‍लें केंजसि ओन कारेड्‍डाल्‍क कीतुर.
LUK 16:15 पजा येसु ओर्कुन, “मिमेट लोकुल्‍कुना मुन्‍ने, ‘मोमोट नीतिमंतुल्‍कुम’ इंतिर, गानि पेन मीवा मनसुन एरपाट कींता. बव पोल्‍लें अय्ते मनकना विचारमते कदरतव मंतां, अव पोल्‍लेन पेन बिल्कुल हय्‍सो.”
LUK 16:16 “बापतिस्मा हिय्यना योहान वायानादाका, लोकुल्‍क मूसाना नियमकु आनि पेनदा कबुरतोरा रासता पोल्‍लेन परकारम ताकुंदुर. दाना पजा, पेनदा राज्येमता बारेमते बेसता कबुर लोकुल्‍कुंक वेहमळ जर्गसेक मंता. वेल्‍लेटुर लोकुल्‍क पेनदा राज्येमते जबरदस्‍तिते होळियसेक मंतुर.
LUK 16:17 ओक्‍कला बूमि, मब्बु नासडेम आसि होना पर्रंता गानि दर्मसास्‍त्रमते रासतद उंदि सिन्‍ना पोल्‍लेगुडा नासडेम आयो.”
LUK 16:18 “बोरे आयिर, मुन्‍नेटा मुत्‍तोन होळसि, इंकुंदानतोनि मरमिं आयानय्ते, ओर बोगमतनम कींतोर. अल्‍हेने बोरे आयिर, मुय्दोन होळसीता मुर्ताटुन मरमिं आयानय्ते, ओरगुडा बोगमतनम कींतोर.”
LUK 16:19 इंकुंदि पोल्‍ले केंजाट, वरोर सिरमंत मनकल मत्‍तोर. ओर, एक्‍को दराता नेडि पंडिना रंगुना मलमल कपडिं केर्सि रोज सुकमते, आनंदमते मनुंदुर.
LUK 16:20 गानि वरोर लाजर इनानोर गरिब मनकल मत्‍तोर. ओनकु मेंदुलंता पुनकु आसि मत्‍तां. ओन रोज सिरमंत मनकना गलमातगा बोरो तच्‍चि, होळसि होनुंदुर.
LUK 16:21 सिरमंत मनकल तिननेंके हिळु अरतव मेत्‍कुल्क तिंचि पीर निहंतन इंचि अगा हूळसेक मनुंदुर. इंका ओना मेंदुल्ता पुनकुन नय्‍कु वासि नाकुंदुं.
LUK 16:22 उंदि रोज बतल आता इत्‍ते, आ गरिब मनकल हासोत्‍तोर. अस्‍के पेनदा दूतां वासि ओना जीवातुन स्वर्गमते पीसि ओसि, अब्राहामुना पक्‍काते इरतां. कोन्‍नि रोजकुना पजा सिरमंत मनकल इंका हातोर. ओन बोंदा दोसतुर.
LUK 16:23 सिरमंत मनकना जीवा नरकमते तकलिपने तनलाळसेक मननेंके वेल्‍ले लक्‍कुने ओनकु अब्राहाम दिसतोर. ओना पक्‍काते लाजर मत्‍तोर.
LUK 16:24 अस्‍के ओर अब्राहामुन जोरसे केय्‍सि, “मावा एनकटा मातिर दादा, नावापोर्रो दया कीसि लाजरुन नावाहेके लोहचीम. नना तडमिते तनलाळसेक मंतन. ओर वासि ओना वेल्‍दुन एते मुळाहचि नावा नाल्केतुन सल्‍लागा कियिरकांटी,” इंचि इत्‍तोर.
LUK 16:25 अस्‍के अब्राहाम ओन, “हूळा पेडा, निमे मति कीम, निमे पिस्सि मननेंके नीकु बतल गावाले मत्‍ता अव अन्‍नि दोर्कतां, गानि लाजरुंक मात्रम अव अन्‍नि सुकाल्क दोर्का हिल्‍लें. इंदके इगे ईनकु बतल तकलिप हिल्‍ले गानि निमे मात्रम तडमिते तनलाळसेक मंतिन.
LUK 16:26 मर्रा उंदि पोल्‍ले बतल इत्‍ते, मीवा-मावा नड्‍डुम उंदि पेद्‍दा लोंद्का मंता. अदुनहाटीं मावाहेंदाल मीहेके बोरन्‍ना वाकोम इत्‍ते वाया परुर, मिहगटाल बोरन्‍ना मावाहेके वाकोम इनना गानि वाया परुर, इंचि इत्‍तोर.
LUK 16:27 अस्‍के आ सिरमंत मनकल, ‘अल्हा अय्ते मातिर दादा, नना नीकु विनंति कींतन, लाजरुन नावा बाना लोन लोहचीम.
LUK 16:28 बारित्‍ते नाक हेय्युर तादह्क-तम्मुह्‍क मंतुर. ईर होंचि इव पोल्‍लें ओर्क वेहते, ओर इसोंटा तकलिपना जेगाताल तप्‍पानुर,’ इंचि इत्‍तोर.
LUK 16:29 इत्‍तस्के अब्राहाम, ‘ओरगा मूसाल रासता नियमकु, पेनदा कबुरतोर रासता पुस्तकाल्क मंतां. अवुन हद्‍विसि, अल्हे केंजिर, अल्हे ताकिर,’ इत्‍तोर.
LUK 16:30 अस्‍के सिरमंत मनकल, ‘अल्हा आयो अब्राहाम दादा, हातोरा लोप्पोटाल बोरन्‍ना होंचि ओर्क वेहते, ओर पापाल्कुनाल मनसु मार्सकुंतुर,’ इंचि इत्‍तोर.
LUK 16:31 अस्‍के अब्राहाम, मूसाल रासता नियमकु, पेनदा कबुरतोर रासता पोल्‍लेन बोर अय्ते केंजुर, ओर्कु वेहालय हाता मनकल जीवा अरसि होंचि वेहाना गानि ओर केंजुर,” इंचि ओन इत्‍तोर.
LUK 17:1 उंदि रोज येसु ओना सिस्युल्कुन इल्‍हा इत्‍तोर. “पापमते अरहना पोल्‍लें वायाका मन्‍नों, अव अय्ते वांतंगे. गानि अव बोनाहेंदाल वांतांगो, ओन्क बच्‍चोन गोसा वायार!
LUK 17:2 नापोर्रो विस्वासम कियना ई सिन्‍ना पेडानसंटोन बोरन्‍ना पापमते अरहते, ओना बोंळगेक जोत्‍ता बंडा दोहाचि ओन समुद्रमते ओसि वाटतेने ओनाहाटीं बेस मनंता.
LUK 17:3 अदुनहाटीं मिमेट उसारते मंटु.” “मीवा दंटातोर पापम कीते ओन समजांचटु, ओर कीता पापमताल मनसु मार्सकुत्‍ते, ओन मापि कीम्‍टु.
LUK 17:4 उंदि रोजुने ओर एडुं मल्कां तप्‍पु कीते, एडुं मल्कांगुडा ओर मिहगा वासि, नना तप्‍पु कीतन, इंदकेटाल इल्‍हा किय्योन, इंचि ओप्पुकुत्‍ते, ओन मापि कीम्‍टु,” इंचि येसु वेहातोर.
LUK 17:5 इल्‍हा येसु वेहतद केंजसि, “मावा विस्वासमतुन बेर्सागोटा सामि,” इंचि ओना प्रेरितुल्क इत्‍तुर.
LUK 17:6 अस्‍के सामि ओर्कुन इल्‍हा इत्‍तोर. “ओक्‍कला मीलोप्‍पो आवाल्‍कुना पेळेतच्‍चो विस्वासम मनिनागानि, मिमेट इद पेद्‍दा ताडि मरातुन, ‘निमे नीवा हिह्कुनतोनि पीकका वासि, समुद्रमते होंचि अर्रा,’ इंचि इत्‍ते अद मरा मीवा पोल्‍ले केंजंता,” इंचि इत्‍तोर.
LUK 17:7 येसु मर्रा इल्‍हा वेहातोर, “मिहगा बोनागना वरोर जीतागाल मंतोर इनकुंटु, ओर नांगेल पूहाचि हिलाकोंटे गोर्रें मेहाचि, बस्के अय्ते ओना कबाटाल लोन वांतोर, अस्‍के, ओर वाता वायमळे, ‘गाटो तिनालय उदा,’ इंचि इंतिरा? बस्‍केने इन्‍निर.
LUK 17:8 गानि, ‘नाहाटीं गाटो अट्‍टा, वेरे कपडिं केरसि नाकु गाटो वाटसि हीम, नना तित्‍ता पजा निमे तिन’ इंचि इंतिर.
LUK 17:9 निमे वेहता कबळ जीतागाल कीतोर इंचि ओन्क, दन्यवाद इंचि बस्‍केने हिय्यिर.
LUK 17:10 अल्‍हेने मिमेट इंका पेन वेहता कबळ पूरा मारतस्के, ‘मोमोट मामुल जीतागाह्कुम आंदुम, माक बद कबळ कियाना मत्‍ता अदे कबळतुन कीतोम’ इंचि इंटु,” इंचि येसु वेहातोर.
LUK 17:11 पजा येसु येरुसलेम होनानेंके सामरिया आनि गालिल एरियाना नड्‍डुमताल होंचेके मत्‍तोर.
LUK 17:12 अस्‍के बदो उंदि नाटेने होळियनेंके कुस्‍टरोगम आतोर पदि मंदि, हर्दुक इच्‍चुर लक्‍कु नित्‍तिसि मत्‍तुर.
LUK 17:13 ओर येसुन हूळसि, “ए येसु, ए सामि! मावा पोर्रो दया कीम,” इंचि वरगेयतुर.
LUK 17:14 येसु ओर्कुन हूळसि, “मिमेट होंचि, मीवा मेंदुल पेर्मालोर्कुंक हुप्‍सट,” इंचि इत्‍तोर. इत्‍तस्के ओर होननेंके-होननेंकेन बेस आतुर.
LUK 17:15 अस्‍के ओरागटाल वरोर मनकल नना बेस आतन, इंचि हूळसि पेनदुन जोर-जोरसे तल्‍सकुंचेके येसुनगा मल्सि वातोर.
LUK 17:16 वासि ओना काल्कुनपोर्रो अरसि ओन्क दन्यवाद कीतोर. ओर सामरिया मनकल मत्‍तोर, इत्‍ते सिन्‍ना जातितोर मत्‍तोर.
LUK 17:17 अस्‍के येसु, “पूरा पदि मंदि बेस आया हिल्‍लिरा? कळमता तोम्मिद मंदि बेके होत्‍तुर?
LUK 17:18 पेनदुन स्‍तुति कियालय, ई सामरि जातितोन होळसि, कळमतोर बेस आतोर बोरे वाया हिल्‍लुरा?” इंचि ओन इत्‍तोर.
LUK 17:19 मर्रा येसु, “तेदिस होन! निमे विस्वासम कीताहाटीं बेस आतिन,” इंचि ओन इत्‍तोर.
LUK 17:20 “पेनदा राज्येम बस्के वांता?” इंचि उंदि मल्का परिसिल्कु येसुन पूसकीतुर. अस्‍के येसु, “पेनदा राज्येम कळ्‍कुंक दिस्सेक वायो.
LUK 17:21 पेन मीवा नड्‍डुम राज्येम कींता. अदुनहाटीं पेनदा राज्येम इगे मंता, अगा मंता इंचि लोकुल्‍क इन्‍नुर,” इंचि वेहातोर.
LUK 17:22 अद वेहता पजा सिस्युल्कुन इल्‍हा इत्‍तोर, “मनकना रूपमते पुटतोर वायाना रोजकुनाल उंदि रोजुन हूळना विचारम कींतिर, गानि मिमेट हूळा पर्रिर इसोंटा वेला वायार.
LUK 17:23 अस्‍के, हुळाट! मनकना रूपमते पुटतोर इगे मंतोर, अगा मंतोर इंचि लोकुल्‍क इनानुर, गानि मिमेट अगा होनमट, ओरा पज्जो ताकमट.
LUK 17:24 बारित्‍ते मब्बुने उंदि बाजुंक मेरस्‍ते इंकुंदि बाजुंक बल्हा वेलगु अर्रंतनो, मनकना रूपमते पुटतोन नना वायानस्‍केगुडा अल्हे आयार.
LUK 17:25 गानि दानकन्‍ना मुन्‍ने नाकु बागा तकलिप वायार. इद पीळितोर नाकुन हय्सुर.”
LUK 17:26 नोहाना रोजकुने बल्हा जर्गता, अल्‍हेने मनकना रूपमते पुटतोन नना वायानस्के जर्गार.
LUK 17:27 नोहाल डोंगाते नेंगनदाका लोकुल्‍क तिंचेके-उंचेके मत्‍तुर, मरमिं कीसेके, आसेके मत्‍तुर. अस्‍के पेद्‍दा कम्मुड वासि अंटोर्कुन मुळाहता.
LUK 17:28 लोतुना कालमतेगुडा अल्‍हेने आता. लोकुल्‍क तिनुड, उनुळ, अस्सुड, अम्मुड, वीतुड लोहकु दोहुड कियुंदुर.
LUK 17:29 गानि लोतु सदोम सहरताल बस्के अय्ते पेय्सतोर, अस्‍के मब्बुनाल तडमि डोग्गां अरसि अद नाटेनोर अंटोर्कुन नासडेम कीता.
LUK 17:30 अय्ते मनकना रूपमते पुटतोन नना वायाना रोजुनेगुडा अल्हे आयार.
LUK 17:31 अदुनहाटीं अद रोज बोर अय्ते लोतपोर्रो मंतोर, लोता लोप्पो मंदना सामानतुन पीसि वायालय हिळु रेयानायो. अल्‍हेने बोर अय्ते नेलिने कबळ कीसेक मंतोर, ओर मल्सि वायानायो.
LUK 17:32 लोतुना मुत्‍तो पेनदा पोल्‍ले केंजवा, सदोम सहरतुन तिरियसि हूळतस्‍के, दानकु बल्हा आता, अदुन मति कीम्‍टु.
LUK 17:33 “बोर अय्ते ओना जीवातुन ई दुनियाते पिसागोटालय हूळांतोर, ओर ओना जीवातुन पोगोटकुंतोर. बोर ओना जीवातुन नावाहाटीं पोगोटकुंतोर, ओन्क बस्‍केळ्‍क पिस्सना पिस्वर दोर्कंता.
LUK 17:34 नना मीक वेहानद बतल इत्‍ते, अद नर्का उंदि कटुलते इव्वुर मनानुर. ओराव्टेटाल वरोन तेहाकुंचि ओयमळ जर्गंता, इंकावरोन अग्गेन होळ्‍समळ जर्गंता.
LUK 17:35 अल्‍हेने रोंडु मुर्ताह्क कूळसि गट्‍का नोरसेक मनंतां, उंदितुन ओयमळ जर्गंता, इंकुंदितुन अग्गेन होळ्‍समळ जर्गंता.
LUK 17:36 इव्वुर मनकालोर पोलमते मत्‍ते, पेन वरोन पीसि ओयार, वरोन बारे अग्गेन होळसिय्यार,” इंचि इत्‍तोर.
LUK 17:37 अस्‍के सिस्युल्कु येसुन, “इव पोल्‍लें बगा आयानुं सामि?” इंचि पूसकीतुर. अस्‍के, “बगा अय्ते पीनगु मनंता, अग्गेन गद्‍दलिं जमा आंतां,” इंचि येसु इत्‍तोर.
LUK 18:1 पजा येसु ओना सिस्युल्कुन, “रोज पारतना कीसेके मंदानां, पारतना कियानाहाटीं बस्‍केने पजोळ्क आयामन्‍नि,” इल्‍हा इंचि उंदि वेसुडि वेहातोर.
LUK 18:2 “उंदि नाटेने वरोर न्‍यायम कियाना पेद्‍दा मनकल मत्‍तोर. ओर पेनदुक वेरियाकोंदुर, लोकुल्‍कुना पर्वा कियाकोंदुर.
LUK 18:3 अदे नाटेने उंदि मुंडामोस्ता मुरतळ मत्‍ता. अद ओनगा रोज वासि, ‘नावापोर्रो अन्‍यायम आता, नाकु न्‍यायम कियमळ गावाले,’ इंचि ओन इनुंदु.
LUK 18:4 ओर वेल्‍लेने रोजकुनदाका दाना पोल्‍लेन केंजाकोंटा मत्‍तोर. गानि उंदि रोज ओर इल्‍हा विचारम कीतोर. ‘नना पेनदुक वेरियानोन आयोन, मनकालोर्कुना पर्वा कियानोन आयोन.
LUK 18:5 अय्नागानि इद मुरतळ रोज वासि नाकुन परेसान कीसेक मंता. अदुनहाटीं इंदके नना दीना न्‍यायम कींतन. हिलाकोंटे इद बस्‍केळ्‍के नाकुन परेसान किय्‍यार,’ इनकुत्‍तोर.”
LUK 18:6 मर्रा सामि इत्‍तोर, “सेड्‍डा मजिस्‍टर बतल इत्‍तोर, अद पोल्‍लेतुन मति कीम्‍टु.
LUK 18:7 पेन पेरकुत्‍ता लोकुल्‍क न्‍यायम आयागोम इंचि नर्का-पल्‍हिं पेनदुन पारतना कीसेक मनांतुर, पेन ओर्क सहाय्यम कियालय आलसेम किय्‍यारा?
LUK 18:8 नना मीक वेहासेक मंतन, पेन ओरा न्‍यायम बिराना किय्‍यार. अय्नागानि मनकना रूपमते पुटतोन नना मल्सि वातस्के, इद बूमिते विस्वासम होळसाकोंटा पारतना कीसेक मनानोर दोर्कानुरा?” इंचि वेहतोर.
LUK 18:9 बोर अय्ते लोकुल्‍क मोमोटे नीतिमंतुल्‍कुम इन्कुंचि सतता पोर्रेन बरोसा इर्सि, इंकावरोन सिन्‍ना हूळुंदुर, ओराहाटीं इंका येसु उंदि वेसुडि वेहतोर.
LUK 18:10 इव्वुर मनकालोर गुळिते पारतना कियालय होत्‍तुर. ओरंटे वरोर बारे परिसि मनकल, इंकावरोर बारे कर वसुल कियानोर.
LUK 18:11 परिसि वेरे नित्‍तिसि पारतना कियालय दल्‍गतोर, ए पेनबाबा! नना इंका वरोनलेसीं दोंगन आयोन, इंकावरोन बोंकिचानोन आयोन, बोगम कबाह्‍क कियानोन आयोन, ई कर वसुल कियानोनलेसीं लोकुल्‍कुन मुळहानोन आयोन.
LUK 18:12 वारमकु रोंडु मल्कां ओक्‍कापोद्‍दु मनंतन, नावा कमयता पदि तूसकुनाल उंदि तूसगुडा नीकु हींतन, इंचि इत्‍तोर.
LUK 18:13 “गानि कर वसुल कियानोर लक्‍कु निततोर, ओनकु पोर्रो हूळालयगुडा दैरनेम आयाहिल्‍ले. ओर चातितुन तंचेके पारतना कीतोर, ‘ए पेनबाबा, नना पापि मनकन आंदुन, नावापोर्रो दया कीम,’ इंचि इत्‍तोर.
LUK 18:14 नना मीक वेहांतन गदा, ओरा इव्वुरा लोप्पोटाल कर वसुल कियानोरे पेनदा मुन्‍ने नीतिमंतुड आसि लोन होत्‍तोर. गानि परिसि नीतिमंतुड आयोर. बारित्‍ते, बोर ओनद ओरे नना पेद्‍दोन इंचि इनकुंतोर, पेन ओन सिन्‍नगा कींता. अल्‍हेने बोर ओनद ओरे नना सिन्‍नोन इंचि इनकुंतोर, पेन ओन पेद्‍दा कींता,” इल्‍हा वेहचि येसु सामि वेसुडितुन महतोर.
LUK 18:15 उंदि रोजु लोकुल्‍क ओरा सिन्‍ना पिलाल्कुंक येसु आसिर्वाद हियाना इंचि पीसि वायालय दल्‍गतुर. गानि सिस्युल्क हूळसि ओर्कुन रांगतुर.
LUK 18:16 गानि येसु पिलाल्कुन केय्‍सि इत्‍तोर, “पिलाल्कुन नाहेके वायाहीम्ट, ओर्कुन आपमट. पेनदा राज्येम इसंटोरदे आंद.
LUK 18:17 नना मीक निजम वेहांतन, बोरे आयिर ओरा मनसुने पेनदा राज्येमतुन सिन्‍ना पिलाल्कुनालेसीं ओप्‍कुन्‍नुर, ओर पेनदा राज्येमते होळिया पर्रुर,” इंचि सिस्युल्कुंक वेहातोर.
LUK 18:18 पजा यहुदिल्कुना वरोर लीडर इल्‍हा इत्‍तोर, “गुरु, निमे बेसतोन आंदिन. बस्‍केळ्‍क पिस्सना पिस्वरता वारसदार आयानाहाटीं नना बतल कीते बेस?” इत्‍तोर.
LUK 18:19 अस्‍के येसु ओन इल्‍हा इत्‍तोर. “नाकुन बारि बेसतोर इंतिन? बोरे बेसतोर आयोर, सिराप पेन उंदे बेसतद आंद.
LUK 18:20 नीकु पेनदा आदेसकु अय्ते एरपाटे मंतां: बोगमतनम कियमा, बोने हव्‍कुमा, दोंगातनम कियमा, आबद्‍दम गवाइ हियमा, तल्‍लुर-बाबोना कदर कीम,” इत्‍तोर.
LUK 18:21 अस्‍के ओर, “नना अय्ते इव अन्‍नि सिन्‍नास्केटाल कीसेकेन वातन,” इंचि ओर इत्‍तोर.
LUK 18:22 ओर इत्‍तद केंजसि येसु ओन इल्‍हा इत्‍तोर. “इंदकेगुडा निहगा उंदि पोल्‍ले तक्‍को मंता. निहगा बतल अय्ते मंता, अदुनंता पूरा अम्मिसि, गरिबोर्कुंक तूसि हीम. अस्‍के नीकु स्वर्गमते दनम दोर्कार, पजा नहगा वासि ना पज्जो ताका,” इत्‍तोर.
LUK 18:23 गानि येसुना पोल्‍ले केंजसि, ओन्क इरगा दुक्‍कम वाता. बारित्‍ते ओर वेल्‍लेन सिरमंत मत्‍तोर.
LUK 18:24 येसु ओर्कुन हूळसि इल्‍हा इत्‍तोर. “सिरमंतुल्‍क पेनदा राज्येमते होळियमळ इत्‍ते वेल्‍लेन कस्‍टम.
LUK 18:25 वरोर सिरमंत मनकल पेनदा राज्येमते होळियमळकन्‍ना लोटापेटा सूदि बोंगाताल होनमळ अल्कगा मनंता,” इत्‍तोर.
LUK 18:26 अस्‍के बोर अय्ते येसुना पोल्‍लें केंजतुर, ओर, “अल्हा अय्ते मरि मुक्‍ति बोर्क दोर्का पर्रंता?” इंचि इत्‍तुर.
LUK 18:27 अस्‍के, “मनकालोरतोनि आया पर्रुवा पोल्‍लें, पेन किया पर्रंता,” इंचि येसु ओर्कुन इत्‍तोर.
LUK 18:28 अस्‍के पत्रु, “हूळा, मोमोट अय्ते लोन-दारा होळसिसि नीवा पज्जो वातोम,” इंचि इत्‍तोर.
LUK 18:29 अस्‍के येसु इल्‍हा इत्‍तोर, “नना मीक निजम वेहांतन. पेनदा राज्येमताहाटीं ओना लोन-दारातुन, मुत्‍तोन, तम्मुह्‍क-दादालोर्कुन, पिलाल्कुन, तल्‍लुर-बाबोन होळसीतोरो,
LUK 18:30 आ मनकंक इद कालमते होळसीतवुंकन्‍ना बच्‍चोरो एक्‍को संपत्‍ति, जीवातोर दोर्कानुर, अल्‍हेने वायाना कालमते बस्‍केळ्‍क पिस्सना पिस्वरगुडा दोर्कार,” इत्‍तोर.
LUK 18:31 पजा येसु ओना पन्‍नेंड सिस्युल्कुन बाजुंक ओसि इल्‍हा इत्‍तोर, “हुळाट, मनम येरुसलेम होंचेके मंतोम. मनकना रूपमते पुटतोन, ना बारेमते पेनदा कबुरतोर बतलय्ते रासतुर, अव पूरा आंतां.
LUK 18:32 अगा नाकुन यहुदि आयवोरा कय्‍दे अप्‍पजेपनुर, अस्‍के ओर नाकुन सिडांचनुर, अपमानम कियानुर, नापोर्रो उस्कानुर,
LUK 18:33 पोट्‍टेते तन्‍नुड आतस्के हव्कानुर. गानि मूडोव रोजुने नना मर्रा जीवाते तेदंतन,” इंचि वेहतोर.
LUK 18:34 गानि ओना सिस्युल्कुंक मात्रम ओर वळ्कता पोल्‍ले तेळिया हिल्‍ले. अद पोल्‍ले ओराहाटीं मर्ममते मत्‍ताहेंके, ओर्क बतल अर्तम आयाहिल्‍ले.
LUK 18:35 पजा येसु यरिहो सहरता दग्‍गेरा एव्‍तोर. अगा हर्दा पक्‍काते वरोर गुड्‍डि बिच्‍चागाड बिच्‍चम तल्कसेके उद्‍दिसि मत्‍तोर.
LUK 18:36 ओना पक्‍काताल लोकुल्‍कुना मंदा होनना सप्पुड केंजसि, “इगे बतल आसेके मंता,” इंचि पूसकीतोर.
LUK 18:37 अस्‍के बोरो ओन, “नासरेत नाटेना येसु इग्‍गेटाल होंचंतोर,” इंचि वेहतुर.
LUK 18:38 वेहतस्के, “येसु, दाविद राजाना वंसमतोना! नापोर्रो दया कीम,” इंचि आ गुड्‍डि वरगेयतोर.
LUK 18:39 अस्‍के ओना मुन्‍नेटाल होनानोर अंटोर ओन, “चुपचाप मन,” इंचि रांगतुर. गानि, “दाविद राजाना वंसमतोना, नापोर्रो दया कीम,” इंचि जोरसे मोत्‍कुनालय दल्‍गतोर.
LUK 18:40 अस्‍के येसु आगसि, “ओन नहगा पीसि वटु,” इंचि हुकुम कीतोर.
LUK 18:41 पजा ओन येसुनगा तत्‍तस्के, “नना नीहाटीं बतल कियना इंचि नी मनसु मंता?” इंचि येसु ओन पूसकीतोर. अस्‍के, “सामि, नावा कळ्‍कुना नदर दिस्‍सानाल कीम,” इंचि आ गुड्‍डि इत्‍तोर.
LUK 18:42 पजा येसु ओन, “इंदकेटाल हूळालय दल्‍गा, नीवा विस्वासमे नीकुन बेस कीता,” इंचि इत्‍तोर.
LUK 18:43 अल्हा इत्‍ता इनुडे ओना कळ्‍कुंक नदर वासि पेनदुन तल्‍सकुंचेके ओना पज्जो होत्‍तोर. अगा मत्‍ता लोकुल्‍क अल्हा आतद हूळसि, ओरगुडा पेनदुन तल्‍स्‍कुनालय दल्‍गतुर.
LUK 19:1 अल्हा आता पजा, येसु यरिहो नाटेनाल होंचेके मत्‍तोर.
LUK 19:2 अद नाटेने वरोर जकय्या पोरोलतोर कर वसुल कियानोरा पोर्रो अदिकारि मत्‍तोर. ओर बागा सिरमंत मत्‍तोर.
LUK 19:3 येसु बोर आंदुर हूळंतन इंचि ओर इनकुत्‍तोर, गानि अगा वेल्‍ले गर्दि मत्‍ताहाटीं हूळा पर्रा हिल्‍लोर. बारित्‍ते ओर पोट्‍टिगा मत्‍तोर.
LUK 19:4 अदुनहाटीं ओर येसु होनना हर्दुक मुन्‍ने वितसि, ओन हूळालय उंदि नेडि मरा पोर्रो एकतोर.
LUK 19:5 येसु अद मरातगा एवतस्‍के पोर्रो हूळसि, “जकय्या, बिराना हिळु रेय्‍या! इय्याला नाकु नीवा लोने आगाना मंता,” इंचि इत्‍तोर.
LUK 19:6 इत्‍तारिते जकय्याल बिराना मराताल रेय्‍सि, कुसिते येसुन ओना लोन ओतोर.
LUK 19:7 येसु जकय्याना लोन होत्‍तद हूळसि लोकुल्‍क, “ईर पापि मनकना लोन हेडमिं इंचि होत्‍तोर,” इल्‍हा गुल्‍गालय दल्‍गतुर.
LUK 19:8 पजा जकय्याल नित्‍तिसि सामिन, “सामि, नावा सम्‍सारमताल सगम गरिबोर्कुंक हींतन, नना बोनना मुळाहचि येततद मत्‍ते, येततादानकन्‍ना नालुं अंताल्‍क एक्‍को मलाहचि हींतन,” इंचि इत्‍तोर.
LUK 19:9 अस्‍के येसु, “तप्‍सि होत्‍ता पापि लोकुल्‍कुन पहकिसि, ओर्कुन पिसागोटालय मनकना रूपमते पुटतोन नना वातन. अदुनहाटीं ईरगुडा अब्राहामुना वंसमते पुटतोरे आंदुर इंचि, इय्याला ईना लोतोर पापमताल पिस्तुर,” इंचि वेहतोर.
LUK 19:11 लोकुल्‍क ओर वेहाना पोल्‍लें केंजसेके मत्‍तुर. अगटाल येरुसलेम सहर दग्गेरेने मत्‍ता. इंदके येसु येरुसलेमते एवतस्‍के ओर पेनदा राज्येम निलाहनुर इनकुंचेके मत्‍तुर. अदुनहाटीं येसु ओर्क उंदि वेसुडि वेहतोर.
LUK 19:12 “वरोर पेद्‍दा वंसमतोर मनकल मत्‍तोर, ओर राजाल आसि वायालय लक्‍कुटा देसेम होत्‍तोर.
LUK 19:13 होनाका मुन्‍ने ओना पदि दासुल्‍कुन केय्‍सि, मनकंक पदि बंगारम बंडि हीसि, ‘नना मल्सि वायानादाका इव कोत्‍ताने मिमेट दंदा कीम्‍टु,’ इंचि इत्‍तोर.
LUK 19:14 “गानि नाटेना लोकुल्‍क ओन हय्साकोंदुर, अदुनहाटीं, ‘ओर मापोर्रो राज्येम कियमळ माकु इस्‍टम हिल्‍ले,’ इंचि पेद्‍दा राजांक वेहालय पेरतोर्कुन ओना पज्जेन लोहतुर.
LUK 19:15 पजा आ मनकल राजाल आसि मल्सि वातोर. ओर बोर्क अय्ते कोत्‍तां हीसि मत्‍तोरो ओर दंदा कीसि बच्‍चोन कमय कीतुरो हूळानाहाटीं आ दासुल्‍कुन केया वेहतोर.
LUK 19:16 मोदाटा दासुड वासि, ‘मालक, निमे हीता पदि बंडिनतोनि नना इंका पदि बंगारम बंडिं कमय कीतन,’ इंचि इत्‍तोर.
LUK 19:17 अस्‍के राजाल, ‘निमे बेस कबळ कीतिन, निमे बेसता दासुन आंदिन, निमे सिन्‍ना कबळतगागुडा विस्वासमलायक मत्‍तिन, अदुनहाटीं पदि नाह्कुन ताकसालय नीकु अदिकारम हींतन,’ इंचि इत्‍तोर.
LUK 19:18 अल्‍हेने रोंडो दासुडगुडा वासि, ‘सामि! निमे हीता बंडिनतोनि नना इंका हेय्युं बंडिं कमय कीतन,’ इंचि इत्‍तोर.
LUK 19:19 अस्‍के राजाल ओनगुडा, ‘निमे हेय्युं नाह्कुन पोर्रो अदिकारिन आकिन,’ इंचि इत्‍तोर.
LUK 19:20 पजा इंकावरोर दासुड वासि, ‘सामि! इद हूळा निमे हीता बंगारमता बंडिं. इदुन नना पेगुने दोहाचि मक्‍किचि इरतन.
LUK 19:21 बारित्‍ते निमे कळक मनकन आंदिन, अदुनहाटीं नना वेरियतन. निमे बद अय्ते इर्रा हिल्‍लिन अदुन तेंडकुंतिन, निमे वीतवगा कोय्‍यंतिन,’ इंचि इत्‍तोर.
LUK 19:22 अस्‍के राजाल ओन इल्‍हा इत्‍तोर, ‘अरे निमे लंडु दासुन आंदिन! नीवा तोळ्‍दाल पेय्सता पोल्‍लेतेन नीवा न्‍यायम कींतन. नना कळक मनकन, नना बद अय्ते इर्रा हिल्‍लेन अदुन तेंडकुंतन, नना वीतवगा कोय्‍यंतन इंचि नीकु एरपाटे मत्‍ता.
LUK 19:23 अय्ते नना हीता कोत्‍तातुन बेंकते बारि वाटा हिल्‍लिन? नना मल्सि वातस्के नावा कोत्‍तां वड्‍डितोनि एत्‍कुंचि मन्‍नेन,’ इत्‍तोर.
LUK 19:24 पजा दग्‍गेरा नित्‍तिसि मत्‍तोर्कुन इल्‍हा इत्‍तोर. ‘मिमेट ओनागटाल आ बंगारम बंडितुन एतट. एतसि पदि बंगारम बंडिं मत्‍तोनगा हीम्टु,’ इत्‍तोर.
LUK 19:25 अस्‍के ओर, ‘अय्ते सामि, ओनगा पदि बंगारम कोत्‍तां मंता गदा,’ इंचि इत्‍तुर.
LUK 19:26 नना मीक वेहंतन, बोनगा अय्ते पेनदा पोल्‍लेन तेल्‍पिचकुनना बुद्‍दि मंता, पेन ओन्क इंका हींता, गानि बोनगा पेनदा पोल्‍लेन तेल्‍पिचकुनना बुद्‍दि हिल्‍ले, ओनगा मत्‍ता बुद्‍दितुनगुडा पेन एतकुन्‍नार.
LUK 19:27 गानि, ‘ईर राज्येम कियामन्‍नि,’ बोर पगातोर अय्ते इत्‍तुरो, ओर्कुन नावा मुन्‍ने तच्‍चि हव्कट, इंचि मालक इत्‍तोर,” इल्‍हा वेहचि येसु वेसुडितुन महतोर.
LUK 19:28 इव पोल्‍लें वेहता पजा येसु लोकुल्‍कुना मुन्‍ने-मुन्‍ने येरुसलेमताहेके ताकसेके पेय्सतोर.
LUK 19:29 होननेंके जय्‍तुन मराकुना गुट्‍टापोर्रो मनना बैतपागे आनि बेतानिया इनना नाह्‍कुना दग्‍गेरा एव्‍तोर. पजा येसु ओना इव्वुर सिस्युल्कुन केय्‍सि,
LUK 19:30 ओर्क इल्‍हा वेह्‍चि नाटे लोहतोर. “मी मुन्‍ने दिस्‍सना नाटे होंट. मिमेट अद नाटे होळियतस्‍के बस्‍केने बोरे उद्‍दुवद उंदि गाडदि पोरि दोह्‍चि मत्‍तद मीकु दिसंता, दान लेहकुंचि इग्‍गे पीसि वटु.
LUK 19:31 ओक्‍कला अदुन पीसि वायनेंके, ‘दीन बारि लेहचंतिर?’ इंचि बोरन्‍ना पूसकीते, ‘सामिंक दीना अव्‍सरम मंता’ इंचि वेहट,” इत्‍तोर.
LUK 19:32 बोर्कुन अय्ते लोहमळ जर्गता, ओर नाटे होतस्के येसु वेहतापे ओर्क दिसता.
LUK 19:33 पजा ओर गाडदि पोरिन लेहनेंके, दाना मालकुल्क हूळसि, “मिमेट गाडदि पोरिन बारि लेहसंतिर?” इंचि इत्‍तुर.
LUK 19:34 अस्‍के ओर, “सामिंक दीना अव्‍सरम मंता,” इंचि इत्‍तुर.
LUK 19:35 पजा गाडदि पोरिन येसुनगा तत्‍तुर. तच्‍चि ओरा कपडिं दानपोर्रो तारसि, येसुन दानपोर्रो उपिस्तुर.
LUK 19:36 उद्‍दिसि होननेंके ओन्क कदर हियानाहाटीं लोकुल्‍क ओर केर्ता कपडिं तेंडसि हर्दे तारतुर.
LUK 19:37 अल्‍हेने पजा ओर जय्‍तुन मराकुना गुट्‍टा पोर्रोटाल हिळु रेयनेंके ओना पज्जो वायाना ओना अंटोर सिस्युल्क ओर हूळता अद्‍बूतामाता कबाह्कुनहाटीं वेल्‍ले कुसिते जोर-जोरते पेनदुन इल्‍हा तल्‍सकुनालय दल्‍गतुर.
LUK 19:38 “पेनदा अदिकारम पीसि वायाना राजाल वेल्‍लेन आसिर्वाद दोर्कतोर आंद. पेनदाहेंदाल सांति वायि! पोर्रोटा पेद्‍दा पेनदा कदर आयि!” इंचेके तल्‍सकुनालय दल्‍गतुर.
LUK 19:39 अस्‍के मंदिताल इच्‍चुर परिसिल्क येसुनगा वासि, “गुरु! नीवा सिस्युल्कुन वरगेयमट इंचि गदरिच्‍चा,” इंचि इत्‍तुर.
LUK 19:40 पजा येसु ओर्कुन, “नना मीक वेहंतन, ओक्‍कला ईरगिंटा चुपचाप मत्‍ते, इव बंडां वरगेयालय दल्‍गंतां,” इंचि इत्‍तोर.
LUK 19:41 पजा येरुसलेम सहरता दग्‍गेरा एव्‍तस्‍के, अद सहरतुन हूळसि येसु अळतोर.
LUK 19:42 अळसेके, “सांति दोर्कना पोल्‍लें इय्याला मीकु तेळियसि मत्‍ते बेस आसि मनवळ, गानि इंदके अव पोल्‍लें मीवा कळ्‍कुंक दिस्सों.
LUK 19:43 मीवा पगातोर सुट्‍टु आसि मीकुन नालुं मूलानाल तकलिप कियानुर, असोंटा वेला वायार.
LUK 19:44 मीवा पेन मीकुन पिसागोटालय मिहगा वाता वेलातुन एरपाट किया हिल्‍लिर. अदुनहाटीं मीवा पगातोर मीकुन, मीवा पिलाल्कुन तोळिते कल्‍पानुर. पजा बंडां उंदानपोर्रो उंदि इर्सि दोहता गूरेतुन कूलाह्‍चि समानम कियानुर,” इत्‍तोर.
LUK 19:45 पजा येसु गुळिते होळियतोर, होळियसि अगा अम्मानोर्कुन गेदमालय दल्‍गतोर.
LUK 19:46 पजा येसु ओर्कुन इल्‍हा इत्‍तोर. “नावा लोतुन पारतना कियाना लोन इंतुर, इंचि दर्मसास्‍त्रमते रासि मंता. गानि मिमेट दीन दोंगाल्क मक्‍कना जेगा कीतिर,” इत्‍तोर.
LUK 19:47 इल्‍हा येसु रोज गुळिते पेनदा पोल्‍लें करहुंदुर. गानि पेद्‍दा पेर्मालोर्क, दर्मसास्‍त्रम कराहना गुरुल्क, पेद्‍दा मनकालोर्क ओन हव्कालय हूळुंदुर.
LUK 19:48 गानि अंटोर लोकुल्‍क वेल्‍ले कुसिते येसु वेहाना पोल्‍लें केंजुंदुर. अदुनहाटीं ओन बल्हा हव्कना ओर्क आटम आयाकोंदु.
LUK 20:1 उंदि रोजु येसु लोकुल्‍कुंक गुळिते कराहसेके, बेसता कबुर वेहासेके मत्‍तोर. अस्‍के पेद्‍दा पेर्मालोर, दर्मसास्‍त्रम कराहना गुरुल्क, आनि यहुदि पेद्‍दाल्क येसुनगा वातुर.
LUK 20:2 वासि, “निमे इव कबाह्‍क बद अदिकारमते कीसंतिन? इव कबाह्‍क कियालय नीकु अदिकारम बोर हीतोर? माक वेहा,” इंचि इत्‍तुर.
LUK 20:3 अस्‍के येसु ओर्क इल्‍हा जवाब हीतोर, “ननागुडा मीकुन उंदि सवाल पूसकींतन, अय्ते वेहाट,
LUK 20:4 योहानुंक बापतिस्मा हियाना अदिकारम बगाटाल दोर्कता? स्वर्गमताला हिलाकोंटे मनकालोराहेंदाल दोर्कतना?” इत्‍तोर.
LUK 20:5 अस्‍के, ओर-ओरे इल्‍हा वळ्‍ककुत्‍तुर. “ओक्‍कला स्वर्गमताल दोर्कता इंचि मनम इनानय्ते, ‘मिमेट योहानुन बारि नम्मिर?’ इंचि इनानुर.
LUK 20:6 ओक्‍कला मनम मनकालोराहेंदाल इनानय्ते, अंटोर लोकुल्‍क मनापोर्रो बंडां हुक्‍कानुर, बारित्‍ते योहानुन पेनदा कबुरतोर इंचि ओर नमतुर,” इत्‍तुर.
LUK 20:7 अदुनहाटीं ओर, “ओन्क अदिकारम बगाटाल दोर्कतनो माक एर्का हिल्‍ले,” इंचि इत्‍तुर.
LUK 20:8 “अल्हा अय्ते, इव कबाह्‍क बद अदिकारमते कीसंतनो, ननागुडा मीकु वेहोन,” इंचि येसु इत्‍तोर.
LUK 20:9 पजा येसु लोकुल्‍कुंक ई वेसुडि वेहालय दल्‍गतोर. “वरोर मनकल उंदि अंगुर तोटा कीतोर. पजा वेरेतोर्क बटाइक हीसि वेल्‍लेन रोजकुनाहाटीं वेरे देसेम होत्‍तोर.
LUK 20:10 पजा बस्के अय्ते अंगुर पंडिं कोय्याना वेला वाता, अस्‍के ओरागटाल पंडिना तूस एतालय ओना वरोर दासुन बटाइतोरहेके लोहतोर. गानि बटाइतोर आ दासुन पीसि पक्‍का तंचि उत्‍ता कय्‍के वापस लोहतुर.
LUK 20:11 अस्‍के मालक इंकावरोन दासुन बटाइतोरहेके लोहतोर. आ बटाइतोर ओनगुडा पीसि तंचि कदर हिलाकोंटा कीसि उत्‍ता कय्‍के वापस लोहतुर.
LUK 20:12 पजा मालक मूडोव दासुन लोहतोर. ओनगुडा बटाइतोर नोप्‍पिं आयनाल तंचि तोटाता पलाते दोब्बिसीतुर.
LUK 20:13 पजा तोटाता मालक, ‘नना बतल कीकन?’ इंचि विचारम कीतोर. ‘सरे, इंदके नावा पावरमगल्‍ला मर्रिन लोहंतन, अस्‍के ओन हूळिसन्‍ना कदर हिय्युरा?’ इनकुंचि ओना मर्रिन ओरहेके लोहतोर.
LUK 20:14 गानि बटाइतोर ओर वायानद हूळसि, ‘ईर अय्ते वारसदार आंदुर, दट ओन मनम हव्ककोम, अस्‍के ओना जाय्‍दाद मनाक आया पर्रंता,’ इंचि वरोंक-वरोर इत्‍तुर.
LUK 20:15 पजा ओर अगा वातस्के, ओन तोटाता पलाते ओसि हव्कतुर. “इंदके अंगुर तोटाता मालक वासि ओर्कुन बतल कियानुर?
LUK 20:16 ओर वासि आ बटाइतोर्कुन हव्‍किसि अद तोटातुन वेरेतोर्क बटाइक हिय्यानुर,” इत्‍तोर. अद पोल्‍ले केंजसि, “अल्हा जर्गाकोंटा पेन आपिकांटी,” इंचि अगा मत्‍तोर इत्‍तुर.
LUK 20:17 अस्‍के ओरहेके हूळसि येसु ओर्कुन इल्‍हा इत्‍तोर. “बद बंडातुन अय्ते मिस्‍त्रिल्‍क कबळ्‍क ओज्‍जो इंचि हय्‍सा हिल्‍लुर, अदे बंडा सेंकु मूलाता पुनादि बंडा आता. इल्‍हा पेनदा पोल्‍लें रासि मंतां, इवुना अर्तम बतल आंदु?
LUK 20:18 बोर अय्ते इद बंडापोर्रो अर्रंतुर, ओर तुकडां-तुकडां आयनुर, गानि अद बंडा बोरपोर्रो अय्ते अर्रंता, ओर पिच्‍चि-पिच्‍चि आयानुर,” इंचि इत्‍तोर.
LUK 20:19 येसु वेहता पोल्‍लें केंजसि, दर्मसास्‍त्रम कराहना गुरुल्क आनि पेद्‍दा पेर्मालोर्क, “ईर मनाकुने इंचंतोर,” इंचि एरपाट कीतुर. अदे वेलाते ओन दोर्का पियालय हूळतुर गानि लोकुल्‍कुन हूळसि वेरियतुर.
LUK 20:20 अस्‍के ओर, येसु बतलन्‍ना तप्पु वळ्कते ओन पीसि रोम सरकारता राज्यपालनगा ओकोम इंचि, ओनपोर्रो नदर इरतुर. इच्‍चुर्कुन नीतिमंतुल्‍कुनालेसीं मंचि ओना आयडां गुंजालय येसुनगा लोहतुर.
LUK 20:21 आ आयडां गुंजानोर येसुनगा वासि इल्‍हा इत्‍तुर. “गुरु, निमे सत्‍तेम वळ्‍कानोन, निजम करहानोन आंदिन, बोने सिन्‍ना-पेद्‍दा हूळिन. पेनदा हर्दा बारेमते सत्‍तेमते कराहंतिन इंचि माक एरपाटे मंता.
LUK 20:22 अय्ते नियम परकारम, कैसर राजांक मोमोट कर दोहमळ न्‍यायमेना, आयोना?” इत्‍तुर.
LUK 20:23 येसु ओरा पिलान एरपाट कीतोर.
LUK 20:24 कीसि, “नाक उंदि एंडि बंडि हुप्‍सट, दानपोर्रो बोना पोटुवा आनि पोरोल मंता,” इंचि इत्‍तोर. अस्‍के “कैसर राजानद,” इंचि ओर इत्‍तुर.
LUK 20:25 अस्‍के, “कैसरुंक दोहना कर कैसरुंक दोहाटु, पेनदुक हियानव पेनदुक हीम्टु,” इंचि येसु इत्‍तोर.
LUK 20:26 इल्‍हा लोकुल्‍कुना मुन्‍ने येसुन ओना पोल्‍लेने ओर पिय्या पर्राहिल्‍लुर. गानि ओना पोल्‍लें केंजसि इचंत्रम आसि चुपचाप आतुर.
LUK 20:27 पजा इच्‍चुर सदुकि इनना लोकुल्‍क येसुनगा वातुर. मनकल हासि मर्रा जीवाते तेदोर इंचि ईर नम्मंतुर.
LUK 20:28 वासि इल्‍हा सवाल पूसकीतुर. “गुरु, मूसाना नियम परकारम, वरोर मनकल पिलाल्क आयाका मुन्‍नेने हायानय्ते, ओना मुत्‍तोनतोनि ओना तम्मुर मरमिं आसि, हातोना वंसम बेर्सागोटालय पिलाल्कुन कना परांतोर, इंचि मंता.
LUK 20:29 अय्ते, एडुर दादाल-तम्मुह्‍क मत्‍तुर. ओरा लोप्पोटाल पेद्‍दोड मरमिं आतोर, गानि पिलाल्क आयाका मुन्‍नेन ओर हातोर.
LUK 20:30 हातस्के ओना पज्‍जोटोर दान मरमिं आतोर, ओरगुडा पिलाल्क आयाका मुन्‍नेन हातोर.
LUK 20:31 ओना पज्जोटोरगुडा दान मरमिं आसि पिलाल्क आयाका मुन्‍नेन हातोर. इल्‍हा एडुरगुडा दानतोनि मरमिं आसि, पिलाल्क आयाका मुन्‍नेन हातुर.
LUK 20:32 पजा आ मुरतळगुडा हाता.
LUK 20:33 अय्ते, हातोर अंटोर मर्रा जीवाते तेदतस्‍के, आ एडुर लोप्पोटाल अद बोना मुत्‍तो आयार? बारित्‍ते ओर एडुरगुडा दान मरमिं आसि मत्‍तुर,” इत्‍तुर.
LUK 20:34 अस्‍के येसु इल्‍हा वेहतोर, “ई दुनियाता लोकुल्‍कुने मरमिं आयमळ, मरमिं कीसि हियमळ जर्गंता.
LUK 20:35 गानि बोर अय्ते हामुरताल मर्रा जीवाते तेदनलायक मनंतुर आनि मर्रा जीवाते तेदमळतुन दोर्किच्‍कुंतुर, ओर वायाना कालमते बस्‍केने मरमिं आयुर, मरमिं कीसिगुडा हिय्युर.
LUK 20:36 ओर पेनदा दूतनलेसीं मनांतुर, बस्‍केने हायुर. ओर हामुरताल मर्रा जीवाते तेदताहाटीं, ओर पेनदा पिलाल्क आयानुर.
LUK 20:37 पोत्‍तना पोदाता बारेमते मूसाल बतल रासतोर मिमेट हदवा हिल्‍लिरा? अब्राहाम, इसाक, याकोब ईर वेल्‍लेन मुन्‍ने हासोत्‍तुर. अयना मूसाल पेनदुन अब्राहाम, इसाक, याकोब मोळ्‍काना पेन इंचि इत्‍तोर. पेन हातोरद आयो गानि जीवाते मनानोरद आंद इंचि मनाकु एरपाट मंता. अद पेनदुन एरपाट कियानोरा अंटोरा जीवां पिसंतां. इल्‍हा हातोरगुडा जीवा अर्रंतुर इंचि मूसाल हुपिस्तोर.” इंचि येसु इत्‍तोर.
LUK 20:39 येसु वेहता पोल्‍लेतुन केंजसि, “गुरु! निमे बेस वेहतिन,” इंचि इच्‍चुर दर्मसास्‍त्रम कराहना गुरुल्क इत्‍तुर.
LUK 20:40 पजा येसुन सवाल पूसकियालय बोर्के हिम्मत आयाहिल्‍ले.
LUK 20:41 पजा येसु ओर्कुन इल्‍हा इत्‍तोर. “किरिस्‍तु दाविदना मर्रि आंदुर इंचि दर्मसास्‍त्रम कराहना गुरुल्क बल्हा इना परांतुर?
LUK 20:42 कुद्‍दु दाविदे ओना बजन संहिता पुस्तकमते इल्‍हा रासतोर. ‘सामि, नावा सामिन इत्‍तोर, बदवेरदाका अय्ते नीवा पगातोर्कुन, नीवा काल्कुनगा तर्रोन, अदवेरदाका नावा तिना बाजुंक उद्‍दिसि मन, इत्‍तोर.’
LUK 20:44 इल्‍हा दाविद ओन, ‘सामि’ इंचि इत्‍तोर. अय्ते ओर दाविदना मर्रि बल्हा आया परांतोर?”
LUK 20:45 अंटोर लोकुल्‍क ओना पोल्‍लेतुन केंजसेके मननेंके, येसु ओना सिस्युल्कुन इल्‍हा इत्‍तोर,
LUK 20:46 “दर्मसास्‍त्रम कराहना गुरुल्कुनाल उसारते मंटु. पोर्रोटाल हिळुदाका पोळ्‍गु अंगिं केर्सि तिरियमळ, हाटुमकुने जोहार वेहागोटकुनमळ ओर्क बेस अनपिच्‍चंता. अल्‍हेने दर्मसास्‍त्रम कराहना लोह्कुने, कुळ्‍पुकुने पेद्‍दाल्‍क उद्‍दाना जेगाते उदमळ इत्‍ते ओर्क वेल्‍ले इस्‍टम.
LUK 20:47 ईर मुंडामोस्ता मुर्ताह्‍कुन मुळहंतुर, लोकुल्‍कुंक हुप्‍सालय वेल्‍लेनजेम पारतना कींतुर. गानि ईर्क मात्रम पेन अंटोर्कन्‍ना एक्‍को सिक्‍सा हियार,” इंचि इत्‍तोर.
LUK 21:1 पजा येसु इच्‍चुर लक्‍कु नदर वाटतोर अस्‍के सिरमंत लोकुल्‍क दान पेटिते पेनदाहाटीं कोत्‍तां वाटनेंके ओन्क दिसतुर.
LUK 21:2 अस्‍के मुंडामोस्ता उंदि गरिब मुरतळगुडा दान पेटिते रोंडु रागि कोत्‍तां वाटनेंके येसु हूळतोर.
LUK 21:3 अस्‍के येसु इल्‍हा इत्‍तोर. “नना निजम वेहांतन, इग्‍गे दान पेटिते कोत्‍तां वाटता अंटोर लोकुल्‍कुंकन्‍ना ई मुंडामोस्ता गरिब मुरतळे एक्‍को दानम कीता.
LUK 21:4 इल्‍हा नना बारि वेहासेके इत्‍ते, अंटोर बारे ओरा दनमताल इच्‍चुरे दानम कीतुर. गानि इद मुरतळ मात्रम दान्क पिस्‍सनाहाटीं इरतादानगुडा पेनदुक वाटसीता,” इत्‍तोर.
LUK 21:5 अस्‍के इच्‍चुर लोकुल्‍क, “इद गुळिता बंडां हुळाट बच्‍चोन सोक मंतां! इंका पेनदाहाटीं हीता सामानतोनि तयार कीता आ सिंगारम हुळाट बच्‍चोन बेस मंता,” इंचेके वळ्कसेक मत्‍तुर.
LUK 21:6 अस्‍के येसु ओर्कुन, “इंदके मिमेट हूळना इव बंडां उंदानपोर्रो उंदि मनाकोंटा कूल्‍हाना वेला वायनद मंता,” इंचि इत्‍तोर.
LUK 21:7 अस्‍के सिस्युल्क, “गुरु, इव पोल्‍लें बस्के जर्गनुं? इंका इव गटनां जर्गना मंता इन्‍नेंके माकु बतल चिन्‍ह दिस्‍सार?” इंचि येसुन पूसकीतुर.
LUK 21:8 अस्‍के येसु इल्‍हा इत्‍तोर. “मीकुन बोरन्‍ना पसांचनुर, उसारते मंटु. नावा पोरोल एतसेके बचुटूरो लोकुल्‍क वासि, ‘ओन ननाने आंदुन, इंतुर. इंका अद वेला दग्‍गेरा एव्ता,’ इंचि इनानुर. असंटोरा पज्जो होनमट.
LUK 21:9 लडाईं, जगडाल्‍कुना बारेमते केंजसि वेरियमट. इव अय्ते तप्‍पाकोंटा मोदाला जर्गनुंगें. गानि अच्‍चोटेन आकिर वेला वायो.
LUK 21:10 “इंका देसेमपोर्रो देसेम, राज्येमपोर्रो राज्येम लडाईं आयनुं.
LUK 21:11 पेद्‍दा बूकंपाल्क आयनुं, वेरे-वेरे जेगाने कर्वु अर्रार, तीराता रोगाल्क पुट्‍टानुं. मब्बुने वेल्‍लेन वेरियनसोंटा गटनां जर्गनुं, पेद्‍दा-पेद्‍दा चिन्‍हां दिस अर्रानुं.
LUK 21:12 “गानि इवन्‍नि जर्गाका मुन्‍ने, मिमेट नावापोर्रो विस्वासम इरताहाटीं यहुदिल्कु मीकुन दोर्कापीसि, वेल्‍लेन तकलिप कीसि मीवा न्‍यायम कियनाहाटीं दर्मसास्‍त्रम कराहना लोह्कुने ओयानुर, ओसि मीकुन जेलने वाटानुर. पजा मीवा इच्‍चुर पगातोर मीकुन राजालोरा आनि राज्यपालना मुन्‍ने ओयानुर.
LUK 21:13 दीनहेंदाल मीकु नावा बारेमते गवाइ वेहालय हर्रि दोर्कार.
LUK 21:14 इंचि मीवा न्‍यायम जर्गनेंके बतल वळ्कना इंचेके मोदाले रंदि कियमट.
LUK 21:15 वेला वातस्के नना मीकु इसोंटा पोल्‍लें आनि बुद्‍दि हींतन गदा, मिमेट वळ्कानेंके मीवा पगातोर केंजसि वळ्‍काकोंटा आयनुर, इंका मीवा पोल्‍लेक अड्‍डमगुडा वळ्का पर्राकोंटा आयानुर.
LUK 21:16 अयना मीवा तल्‍लुर-बाबो, तम्मुह्‍क-दादालोर, जीवातोर-हेळमितोर मीवा दंटातोरे मीकुन पीसि पगातोर्कुंक हियानुर. अचोने आयका मीवाव्टेटाल इच्‍चुर्कुन हव्कानुरगुडा.
LUK 21:17 नावा पोरोलताहेंका अंटोर लोकुल्‍क मीकुन हय्सुर.
LUK 21:18 इदंता अय्नागानि मीकुन बोरे नासडेम किया पर्रोर.
LUK 21:19 पेनदापोर्रोटा विस्वासमते आकिरदाका निल्‍सि मत्‍ते, मिमेट मीवा जीवातुन कापाळकुना परांतिर.
LUK 21:20 “हुळाट! सिपाइल्क येरुसलेम सुट्‍टु आतद मिमेट बस्के अय्ते हूळांतिर, अस्‍के सहर नासडेम आयना वेला एव्ता इंचि इनकुंटु.
LUK 21:21 अस्‍के बोर अय्ते यहुदिया एरियाते मंतुरो ओर गुट्‍टनहेके वित्‍तट, बोर अय्ते सहरते मंतुरो ओर सहरता पलाते पेय्सि होनगोम अल्‍हेने नाटे मनना लोकुल्‍क सहरते होळिया मन्‍नि.
LUK 21:22 बारित्‍ते पेनदा पिलान परकारम अव सिक्‍सा हियना रोजुक आंदु. दर्मसास्‍त्रमते रासि मत्‍ता अन्‍नि पोल्‍लें पूरा आयना वेला आंदु.
LUK 21:23 अव रोजकुने पीटे मत्‍ता मुर्ताह्‍कुंक आनि सिन्‍ने मर्तल्‍लुह्‍कुंक वेल्‍लेन तकलिप वांता. बारित्‍ते इद बूमिपोर्रो वेल्‍लेन तिप्‍पल्‍क वायाना मंता. आनि यहुदिल्कुनपोर्रो पेन दाना होंगुन हुपिचना मंता.
LUK 21:24 इच्‍चुर मनकालोर कसेह्कुने कोह्‍ककुंचि हायानुर, इंक्‍किच्‍चुर मनकालोर्कुन बारे वेरे देसेमतोर्कुंक दोर्कापीसि हियनुर. पजा यहुदि आयवा लोकुरा कालम मारनदाका, ओर येरुसलेमता लोकुल्‍कुन ओरा कादा हिळु जारसि इर्रानुर.
LUK 21:25 “पोळ्‍दुनपोर्रो, वेळसिपोर्रो, सुक्‍कनपोर्रो चिन्‍हां दिस्‍सानुं. इंका बूमिपोर्रो समुद्रमता आवाज आनि अव्टे तेदाना पेद्‍दा तडाना सप्पुड केंजसि देसे-देसेल्‍कुना लोकुल्‍क इरगा वेरियानुर.
LUK 21:26 इरगा वेरियसि, इद दुनियाते वायाना तिप्‍पल्‍कुना बारेमते विचारम कीसि, लोकुल्‍कुना जीवा पेय्सोत्‍ताप आयार. बारित्‍ते मब्बुने मनना अन्‍नि सक्‍तिन कदलिच्‍मळ जर्गंता.
LUK 21:27 अस्‍के मनकना रूपमते पुटतोन नना, ताकत आनि पेद्‍दा महिमातोनि, मब्बु तेर्पेनपोर्रो वायानेंके लोकुल्‍क हूळानुर.
LUK 21:28 इल्‍हा जर्गमळ सुरुव आतस्के मिमेट अंटोर मीवा तल्‍ला तेह्‍चि पोर्रोळ्‍क हुळट. बारित्‍ते पेन मीकु मुक्‍ति हियाना वेला दग्गेर्क एवसेकेन मंता.”
LUK 21:29 पजा येसु ओर्क उंदि वेसुडि वेहतोर. “अद अंजिर मरातुन आनि केडाते मत्‍तव अन्‍नि मराकुन हुळट.
LUK 21:30 अवुना आकिं रालतद हूळसि, एद्‍दि कालम दग्‍गेरा एव्ता इंचि मीकु बिराना तेळियसि दांता.
LUK 21:31 इल्‍हा इव अन्‍नि गटनां जर्गनद हूळसि, पेनदा राज्येम दग्गेर्क एव्ता इंचि मिमेट एरपाट कींतिर.
LUK 21:32 नना मीकु निजम वेहांतन, बदवेरदाका अय्ते इव अन्‍नि पोल्‍लें पुरागा आयोंगो, अदवेरदाका ई पीळि मुळगो.
LUK 21:33 इद बूमि, मब्बु नासडेम आसि होंदार, गानि नावा पोल्‍लें बस्‍केने नासडेम आयों.”
LUK 21:34 “अदुनहाटीं मिमेट पार्टिं किय्युड, कल उनुड इंका इद दुनियाता रंदिनेन मीवा मनसु मनना आयो. गानि नना मर्रा वायना रोजु अचानक अर्रना कोम्मालेह्का मीपोर्रो वासि अर्राकोंटा मीवद मिमेट जेगर्ता मंटु.
LUK 21:35 बारित्‍ते अद रोजु इद बूमिपोर्रो मनना अंटोर लोकुल्‍कुनपोर्रो अल्हेन अर्रानद मंता.
LUK 21:36 अदुनहाटीं वेल्‍लेन उसारते मंचि, बव अय्ते गटनां जर्गनद मंता, अव अन्‍नि गटनानाल पिस्‍सनाहाटीं ताकत दोर्कगोम इंचि बस्केळक पारतना कीसेक मंटु. अल्हा मत्‍तिरित्‍ते, बस्के अय्ते मनकना रूपमते पुटतोन नना वांतन, अस्‍के नावा मुन्‍ने वेरियाकोंटा नित्‍ता परकिट.”
LUK 21:37 इल्‍हा येसु हरेक रोजु पोद्‍दाला गुळिते कराहसेक मनुंदुर. गानि नर्कळ्‍क मात्रम सहरताल पलाते जय्‍तुन इनना गुट्‍टातगा होंचि मनुंदुर.
LUK 21:38 हक्‍केर-हक्‍केरा अंटोर लोकुल्‍क तेदसि ओना पोल्‍लें केंजानाहाटीं गुळितगा जमा आयुंदुर.
LUK 22:1 पुल्‍लगा आयवा पिंडिता हारिना पंडुगु दग्गेर्क एव्‍सि मत्‍ता. इद पंडुगुन दाटसि होनना पंडुगुगुडा इंतुर.
LUK 22:2 अस्‍के पेद्‍दा पेर्मालोर, दर्मसास्‍त्रम कराहना गुरुल्क ईर अंटोर उंदगा कलियसि, येसुन बल्हा हव्कना? येसुन बल्हा सप्‍पुडदाका दोर्कापीसि हव्‍कोम, इंचि पिलानकु कियालय दल्‍गुतुर. गानि लोकुल्‍कुंक येसुनपोर्रो मत्‍ता विस्वासमतुन हूळसि ओर वेरियतुर.
LUK 22:3 पजा येसुना पन्‍नेंडु सिस्युल्‍कुनाल वरोर इस्‍कारियोत नाटेना यहुदाना लोप्पो पेद्‍दा देय्यम होळियता.
LUK 22:4 अस्‍के ओर पेद्‍दा पेर्मालोरगा आनि गुळिता कावेल कियना अदिकारिल्कुंक होंचि कलियतोर. कलियसि येसुन ओर बल्हा पीसि हिया पर्रांतोर इदुना बारेमते, ओरतोनि वळ्कतोर.
LUK 22:5 यहुदाना पोल्‍ले केंजसि पेद्‍दा पेर्मालोर आनि अदिकारिल्‍क वेल्‍लेन कूस आसि ओर, ओन्क कोत्‍तां हींतोम, इंचि ओप्‍कुत्‍तुर.
LUK 22:6 अदुनहाटीं गर्दि हिल्‍वद हूळसि येसुन ओरा कय्‍दे पीसि हियालय मोका हूळसेक मनुंदुर.
LUK 22:7 पजा दाटसि होनना पंडुगु एव्ता. मूसाना नियम परकारम अद पंडुगुना मोदाटा रोजु उंदि गोर्रे पोरिना मोक्‍कु हियमळ मत्‍ता.
LUK 22:8 अदुनहाटीं येसु, पत्रुन आनि योहानुन, “मिमेट मुन्‍ने होंचि दाटसि होनना पंडुगुना गाटो तयार कीम्‍टु अस्‍के मनम तिनकोम,” इंचि ओर्कुन लोहतोर.
LUK 22:9 अस्‍के, “मोमोट पंडुगुना गाटो तिनना तयारिं बगा कीकोम इंचि नीवा मनसु मंता सामि?” इंचि ओर येसुन इत्‍तुर.
LUK 22:10 अस्‍के येसु ओर्कु इल्‍हा वेहतोर, “मिमेट सहरते होळियतस्‍के, मीकु वरोर मनकल अळकाते एर पीसि होननेंके कलियंतोर. ओर बद लोन अय्ते दांतोरो, अदे लोतागा मिमेटगुडा ओना पज्जो होंटु.
LUK 22:11 अगा होत्‍तस्के, आ लोता मालाकुंक, ‘गुरु ओना सिस्युल्कुनतोनि कलियसि, दाटसि होनना पंडुगुना गाटो तिननाहाटीं हेळमितोर आगाना अर्रा बगा मंता, इंचि गुरु पूसकीसंतोर,’ इंचि वेहाट.
LUK 22:12 अस्‍के ओर मीकु मिद्‍दे पोर्रोटा उंदि पेद्‍दा अर्रा सजांचि तयार कीसि मत्‍तद हुप्‍सानुर. अदे अर्राते मिमेट पंडुगुना गाटो तयार कीम्‍टु,” इत्‍तोर.
LUK 22:13 अस्‍के ओर होंचि हूळतुर अय्ते, ओर बल्हा वेहतोर अल्‍हेने अगा मत्‍ता. पजा ओर अग्गेन दाटसि होनना पंडुगुना गाटो तयार कीतुर.
LUK 22:14 दाटसि होनना पंडुगुना गाटो तिनना वेला एवतस्‍के, येसु ओना प्रेरितुल्कुनतोनि कलियसि गाटो तिनालय उदतोर.
LUK 22:15 उदतस्‍के येसु ओर्कुन, “नाकु तिप्‍पल्‍क वायका मुन्‍ने मीवातोनि कलियसि ई दाटसि होनना पंडुगुना गाटो तिनना इंचि नाकु वेल्‍लेन आसे मत्‍ता.
LUK 22:16 नना मीकु वेहानद बतल इत्‍ते, इद पंडुगु बद पोल्‍लेतुन अय्ते हुप्‍संता, अद पोल्‍ले पेनदा राज्येमते पुरागा आयनदाका नना इद पंडुगुना गाटो तिन्‍नोन.”
LUK 22:17 पजा ओर अंगुर पंडिना पानकमतोनि निंडिस मत्‍तद उंदि गिलास पीतोर आनि पेनदुक दन्यवाद कीसि अदुन ओना सिस्युल्कुंक हीतोर. हीसि, “इदेट, दीन मिमेट पंचकुंचि उंटु.
LUK 22:18 नना मीक वेहांतन, पेनदा राज्येम बदवेरदाका अय्ते वायोनो, अदवेरदाका, इय्याटाल नना अंगुर पानकम उन्‍नोन,” इंचि येसु इत्‍तोर.
LUK 22:19 पजा येसु उंदि हारितुन पीसि, पेनदुक दन्यवाद कीतोर. पजा आ हारितुन तुकडां कीसि ओना सिस्युल्कुंक पंचि हीसेक, “इद हारि इत्‍ते, मीवाहाटीं मोक्‍कु आयना नावा मेंदुलता चिन्‍ह आंदु. नाकुन मति कियनाहाटीं मिमेट इल्हेन कीसेक मंटु,” इंचि ओर्कु वेहतोर.
LUK 22:20 पजा अंटोरा तिनमळ आतस्के, अंगुर पंडिना पानकमते निंडिस मत्‍ता गिलासुन पीसि, “इद पानकम इत्‍ते मीवातोनि पेन कियना पूना करारता चिन्‍ह आंदु. नना मीवाहाटीं नावा नेत्‍तुरतुन पोंगागोटंतन, अस्‍के पेन दाना राज्येमतुन निलाहंता.
LUK 22:21 “अयना हिके केंजाट, नाकुन दोकाते पीसि हियानोरगुडा इंदके इगे नातोनि गाटो तिनालय उद्‍दिसि मंतोर.
LUK 22:22 मनकना रूपमते पुटतोन नना, नावा बारेमते बल्हा अय्ते रासि मंता, अल्हे दांतन. गानि बोनाहेंदाल अय्ते नाकुन पीसि हियमळ जर्गंता ओन्क बच्‍चोर गोसा आयार,” इत्‍तोर.
LUK 22:23 येसु वेहतदुन केंजसि सिस्युल्क, “अल्हा कियानोर मना नड्‍डुम बोर मंतोर मरि?” इंचि ओरद-ओरे वळ्ककुनालय दल्‍गुतुर.
LUK 22:24 पजा “मना नड्‍डुम अंटोर्कन्‍ना पेद्‍दा बोर मनना?” इत्‍ता पोल्‍लेहाटीं सिस्युल्कुंक ओर्क-ओर्के पोल्‍लें आतां.
LUK 22:25 अस्‍के येसु ओर्कुन इल्‍हा इत्‍तोर. “यहुदि आयवोरा राजालोर लोकुल्‍कुनपोर्रो जबरदस्‍तिते राज्येम कींतुर. आनि ओरपोर्रो अदिकारम ताकसालय हूळानोर, ‘मोमोट लोकुल्‍कुंक बेस सहायम कियानोरम,’ इंचि वेह्‍कुंतुर.
LUK 22:26 गानि मिमेट ओरालेसीं कियमट. मी लोप्पोटाल बोर अय्ते पेद्‍दा मंतोर, ओर अंटोर्कन्‍ना सिन्‍नोनलेसीं आयना. अल्‍हेने बोर मीवा लीडर मंतोर ओर सेवाकुनलेसीं आयना.
LUK 22:27 असल पेद्‍दा इत्‍ते बोर आंद? बोर अय्ते गाटो तिनालय उद्‍दंतोर ओरा? मरि उद्‍दुतोंकु गाटो वाटांतोर ओरा? गाटो तिनालय उद्‍दुतोरे पेद्‍दोड आंद. गानि नना अय्ते मीवा नड्‍डुम गाटो वाटाना सेवाकुनलेसीं मंतन.”
LUK 22:28 “मिमेट अय्ते नना तिप्पल्कुने मत्‍तस्केगुडा नावातोनि मत्‍तोर आंदिर.
LUK 22:29 अदुनहाटीं नावा बाबाल बल्हा नाकु राज्येम कियना अदिकारम हीतोर, अल्हेन ननागुडा मीकु अदिकारम हींतन.
LUK 22:30 अद अदिकारम बद इत्‍ते, मिमेटगुडा नावा राज्येमते नावातोनि उद्‍दिसि तिनकिर, उनकिर. इंका राजगद्‍देन पोर्रो उद्‍दिसि इस्राएलना पन्‍नेंड गोत्राल्कुनोरा न्‍यायम कीकिर,” इंचि इत्‍तोर.
LUK 22:31 येसु मर्रा सिमोन पत्रुन, “सिमोनु, ए सिमोनु हिके केंजा! मीकुन अंटोर्कुन वंजिन हेचाहताप हेचाहचि मी अंटोरा विस्वासमता पट्‍टु हूळानाहाटीं पेद्‍दा देय्यम पेनदुन अदिकारम तल्कता.
LUK 22:32 गानि निमे विस्वासमताल पजोळ्क होनाकोंटा मनना इंचि नना नीवाहाटीं पारतना कीतन. अयना निमे मर्रा विस्वासमते नाहेके तिरियतस्के नीवा दंटाता विस्वासुल्कुना विस्वासमतुनगुडा गट्‍टिगा कीम,” इंचि वेहतोर.
LUK 22:33 गानि सिमोन पत्रु मात्रम, “सामि! नीवातोनि कलियसि जेलुंक होनालय, हायालयगुडा नना तयार मंतन,” इंचि इत्‍तोर.
LUK 22:34 अस्‍के येसु पत्रुन, “पत्रु नना वेहानद केंजा! इय्याला नर्कळ्‍क मोदाटा गोगोड कूसाका मुन्‍ने निमे, ‘नना येसुन एरपाट किय्योन,’ इंचि मूड मल्कां इनकिन,” इंचि इत्‍तोर.
LUK 22:35 पजा येसु ओना सिस्युल्कुन, “उंदि मल्का नना मीकुन कोत्‍तना पाकिट, जोरा इंका हेरपुह्क हिलाकोंटेन लोहचि मत्‍तन. अस्‍के मीकु बतलन्‍ना तक्‍को होंचि मत्‍तना?” इंचि पूसकीतोर. अस्‍के सिस्युल्कु, “हिल्‍ले, बतले तक्‍को होना हिल्‍ले,” इंचि इत्‍तुर.
LUK 22:36 पजा येसु ओर्कु इल्‍हा वेहतोर. “मिहगा बोरागन्‍ना कोत्‍तना पाकिट मत्‍ते, दान पज्जेन पीकुन्‍निर, इंका जोरागुडा पीकुन्‍निर. अल्‍हेने कसेर हिलवोरु ओना कपडिं अम्मिसि उंदि कसेर असकुन्‍निर.
LUK 22:37 बारित्‍ते, नना वेहानद केंजाट! दर्मसास्‍त्रमते, ‘ओन तप्पु कीतोरव्टे कल्‍पतुर,’ इंचि नावा बारेमते रासि मत्‍ता. दर्मसास्‍त्रमते नावा बारेमते बतल अय्ते रासि मंता, अद इंदके नावातोनि निजम आयमळे गावाले,” इंचि वेहतोर.
LUK 22:38 अस्‍के सिस्युल्क, “इद हूळा सामि, इव रोंडु कसेह्‍क मंतां,” इंचि इत्‍तुर. इत्‍तस्के येसु, “सरे! आंतां,” इंचि इत्‍तोर.
LUK 22:39 पजा अद लोताल पेय्सि ओना अलवट परकारम, जय्‍तुन इनना गुट्‍टापोर्रो होत्‍तोर. ओना पज्जो ओना सिस्‍युल्‍कगुडा होत्‍तुर.
LUK 22:40 अगा होत्‍तस्के येसु ओना सिस्युल्कुंक, “मिमेट पट्‍टुने अर्राकोंटा मननाहाटीं पारतना कीसेके मंटु,” इंचि इत्‍तोर.
LUK 22:41 पजा येसु ओरागटाल, इच्‍चोन लक्‍कु होंचि टोंगरां ऊनसि इल्‍हा पारतना कियालय दल्‍गतोर:
LUK 22:42 “ए पेनबाबा! ओक्‍कला नीवा इच्‍चा मत्‍ते, नाकु वायाना ई तकलिपतुन नावा पोर्रोटाल तप्पिच्‍चा. अयना नावा इच्‍चा मत्‍ताप आयो गानि नीवा इच्‍चा बल्हा मंता अल्हे जर्गि,” इंचि इत्‍तोर.
LUK 22:43 अस्‍के अगा उंदि पेनदा दूता स्वर्गमताल वासि ओन्क ताकत हियालय दल्‍गता.
LUK 22:44 येसु वेल्‍लेन दुक्‍कमते निंडिसि पेनदुक पारतना कीतोर. ओर अल्हा पारतना कियनेंके ओना सेमटा, नेत्‍तुरलेसीं आसि बोट्‍टुक-बोट्‍टुक बूमिपोर्रो अरसेक मत्‍ता.
LUK 22:45 पारतना कियमळ मारतस्के, सिस्युल्कुनगा वासि हूळते, ओर दुक्‍कमते तकांचि निद्रा होंचि मत्‍तुर.
LUK 22:46 अस्‍के येसु ओर्कुन, “मिमेट बारि निद्रा होत्‍तिर? तेदट! तेदसि मिमेट पट्‍टुने अर्राकोंटा मननाहाटीं पारतना कीसेके मंटु,” इंचि इत्‍तोर.
LUK 22:47 येसु इव पोल्‍लें वळकसेकेन मत्‍तोर. अच्‍चोटेन अगा उंदि लोकुल्‍कुना मंदा वाता. अद मंदातुन यहुदल पीसि वातोर (ई यहुदल येसुना पन्‍नेंड सिस्युल्‍कुनाल वरोर आंद). तच्‍चि ओर येसुन बुर्रालय ओना दग्गेर्क होत्‍तोर.
LUK 22:48 अस्‍के येसु ओन, “यहुदा, उंदि मुद्‍दु बुर्सि निमे मनकना रूपमते पुटतोन नाकुन दोर्कापीसि हियालय हूळसंतिना?” इंचि इत्‍तोर.
LUK 22:49 येसुन पियानदुन हूळसि कळमता सिस्युल्क, “सामि, महगा कसेह्‍क मंतां, मोमोट ईरकुन नर्क्‍कोमा?” इंचि पूसकीतुर.
LUK 22:50 अच्‍चोटेन ओरा लोप्पोटाल वरोर सिस्युड पेर्मालोरा लीडरना वरोर दासुन कसेटे हीतोर अय्ते ओना तिना केव नेमसोत्‍ता.
LUK 22:51 अस्‍के येसु, “मन्‍नि, अल्हा कियमट,” इत्‍तोर. इंचि ओना नेमसोत्‍ता केवदुन इटसि ओन बेस कीतोर.
LUK 22:52 पजा येसु, ओन्क विरोदमते तेदता पेद्‍दा पेर्मालोर्कुन, गुळिता अदिकारिल्‍कुन आनि यहुदिल्कुना पेद्‍दाल्कुन इल्‍हा इत्‍तोर. “वरोन दोंगन पिय्‍यालय वाताप मिमेट कसेह्‍क, गुत्‍पां पीसि नाकुन पिय्‍यालय वातिरा?
LUK 22:53 नना अय्ते रोज गुळितगा मीतोनि मनुंदुन, मिमेट अस्‍के नाकुन पिया हिल्‍लिर. अयना इद मीवा वेला आंदु, हीकटता राज्येम कियना वेला आंदु,” इंचि इत्‍तोर.
LUK 22:54 पजा ओर येसुन दोर्कापीसि, अगटाल पेद्‍दा पेर्माना लोन ओतुर. पत्रुगुडा लक्‍कुटाले ओना पज्जो-पज्जो होंचेके मत्‍तोर.
LUK 22:55 पेद्‍दा पेर्माना दाराते तडमि माससि ओर अंटोर सुट्‍टु उद्‍दिसि मत्‍तुर. पत्रुगुडा ओरतोनि अग्गेन उदतोर.
LUK 22:56 पत्रु तळमितगा उद्‍दिसि मत्‍ताहेंके तळमि वेलगु ओनपोर्रो अरसि उंदि दासि पोरिंक ओर दिसतोर. अस्‍के आ दासि पोरि पत्रुनहेके हूळसेक, “ई मनकलगुडा येसुनतोने मत्‍तोर,” इंचि इत्‍ता.
LUK 22:57 गानि पत्रु, “नना ओन एरपाट किय्योन बाई,” इंचि इत्‍तोर.
LUK 22:58 जेरासेप आतंका इंकावरोर मनकल पत्रुन हूळसि, “निमेगुडा ओराव्टेटाल वरोन आंदिन गदा,” इंचि इत्‍तोर. अस्‍के पत्रु, “हिल्‍ले दादा, नना आयोन,” इंचि इत्‍तोर.
LUK 22:59 दग्‍गेर-दग्‍गेरा उंदि गंटा आता पजा, इंकावरोर मनकल, “ईर गालिल एरियाता मनकनलेसीं वळ्कसंतोर, अदुनहाटीं निजमे ईर येसुनतोनि मत्‍तोर,” इंचि इत्‍तोर.
LUK 22:60 अस्केगुडा पत्रु, “निमे बतल वळ्‍कसंतिन दादा! नना ओन असले एरपाट किय्योन,” इंचि इत्‍तोर. अल्हा इत्‍ता-इनुडे मोदाटा गोगोड कूसता.
LUK 22:61 अस्‍के सामि पत्रुनहेके तिरियसि हूळतोर. अस्‍के, “इय्याला नर्कळ्‍क गोगोड कूसाका मुन्‍ने निमे नाकुन मूड मल्कां एरपाट किय्योन इंतिन,” इंचि येसु मुन्‍नेने वेह्‍चि मत्‍ता पोल्‍ले पत्रुंक मति वाता.
LUK 22:62 अस्‍के ओर पलाते होंचि इरगा अळतोर.
LUK 22:63 येसुन बोर अय्ते पीसि मत्‍तुरो ओर कारेड्‍डाल्‍क कीसेके इरगा तनालय दल्‍गतुर.
LUK 22:64 ओना कळ्‍कुंक कप्‍पिड गंडा दोह्‍चि, “इंदके नीकुन बोर तंतुर? माकु बविस्यवानि वेहा,” इंचि ओन पूसकीतुर.
LUK 22:65 अचोने आयका ओना अपमानम कियानाहाटीं वेल्‍लेन पोल्‍लें इत्‍तुर.
LUK 22:66 पंगातस्के यहुदि पेद्‍दाल्क उंदि पंचादि उपिस्तुर, अगा पेद्‍दा पेर्मालोर, दर्मसास्‍त्रम कराहना गुरुल्क मत्‍तुर. अद पंचादिते येसुन पीसि तच्‍चि ओरा मुन्‍ने निलाहतुर.
LUK 22:67 पजा ओर येसुन, “ओक्‍कला निमे किरिस्‍तुन आते माक वेहा,” इंचि इत्‍तुर. गानि येसु, “ओक्‍कला नना वेहिनागानि मिमेट नम्मिर.
LUK 22:68 इंका नना सवाल्क पूसकिय्यिनागानि मिमेट जवाबगुडा हिय्यिर.
LUK 22:69 गानि इंदकेटाल, गडसेम मत्‍तंका मनकना रूपमते पुटतोन नना ताकतवर पेनदा तिना बाजुंक उद्‍दंतन,” इत्‍तोर.
LUK 22:70 अस्‍के पंचादिते मत्‍ता अंटोर लोकुल्‍क, “अय्ते निमे पेनदा मर्रिना?” इंचि इत्‍तुर. अस्‍के येसु, “मिमेट इनानद निजमे,” इंचि इत्‍तोर.
LUK 22:71 अस्‍के, “कुद्‍दु ओना तोळ्‍दाल ओरे वेहतद मनम केंजतोम. अय्ते मनाक बतल गवाइ गावाले?” इंचि इत्‍तुर.
LUK 23:1 पजा पंचादिता अंटोर लोकुल्‍क तेदसि येसुन अगटाल पिलातुस इनना राज्यपालनगा ओतुर.
LUK 23:2 ओसि, “ईर मावा यहुदि लोकुल्‍कुंक एकरेवुल्क वेहचि ओर्कु तप्‍पुड हर्रि हुप्‍सानेंके मोमोट हूळतोम. इंका कैसर राजांक कर दोहामन्‍नि इंचि वेहांतोर. अचोने आयका ओनद ओरे, ‘नना किरिस्‍तुन, राजुन आंदुन,’ इल्‍हा वेहकुंतोर,” इंचि दोसेल्क दोसालय दल्‍गतुर.
LUK 23:3 अस्‍के पिलातुस येसुन, “निमे यहुदिल्कुना राजुन आंदिना?” इंचि पूसकीतोर. अय्ते, “निमेन इंचंतिन गदा,” इंचि येसु इत्‍तोर.
LUK 23:4 अस्‍के पिलातुस पेद्‍दा पेर्मालोर्कुन आनि लोकुल्‍कुन, “नाकु ई मनकनगा बतले तप्पु दिस्सेक हिल्‍ले,” इंचि इत्‍तोर.
LUK 23:5 गानि लोकुल्‍क मात्रम पिलातुस राज्यपालना पोल्‍ले केंजाकोंटा, “ईर पुरागा यहुदि लोकुल्‍कुना देसेमते ओना पोल्‍लें कराहचि अंटोर लोकुल्‍कुंक एकरेवुल्क वेहचंतोर. इद कबळ ईर गालिल एरियाते सुरुव कीसि इंदके इग्‍गेळदाका एवतोर,” इंचेके इरगा लोल्‍लि कियालय दल्‍गतुर.
LUK 23:6 लोकुल्‍क इनानदान केंजसि पिलातुस, “बतल, ई मनकल गालिल एरियातोरा?” इंचि पूसकीतोर.
LUK 23:7 अव रोजकुने गालिल एरियापोर्रो हेरोद अंतिपस राजाल राज्येम कीसेके मत्‍तोर. येसु गालिल एरियातोर इंचि तेळियतस्के, पिलातुस ओन हेरोद राजानहेके लोहचीतोर. आ वेलाते हेरोद राजालगुडा येरुसलेम सहरतेन मत्‍तोर.
LUK 23:8 हेरोद अंतिपस राजाल येसुना बारेमते केंजसि मत्‍तोर अदुनहाटीं वेल्‍लेन वर्सानाल येसुन हूळना आसेते मत्‍तोर. इंका ओन्क येसुना कयदाल बतलन्‍ना चिन्‍ह हूळानद मत्‍ता. अदुनहाटीं येसुन हूळसि हेरोद राजांक वेल्‍लेन कुसि आता.
LUK 23:9 अस्‍के ओर येसुन वेल्‍लेन सवाल्क पूसकीतोर. गानि येसु बतले जवाब हिया हिल्‍लोर.
LUK 23:10 पेद्‍दा पेर्मालोर आनि दर्मसास्‍त्रम कराहना गुरुल्क मात्रम येसुनपोर्रो ओरा मनसुंक वाताप तप्पुक-दोसेल्क दोस्सेक मत्‍तुर.
LUK 23:11 पजा हेरोदगुडा ओना सिपाइल्कुनतोनि कलियसि येसुन कारेड्‍डाल्‍क कीसेके कव्‍तोर. येसुंकु राजालोर केर्राना कपडिं केराह्‍चि ओर मर्रा पिलातुसुनहेके लोहचीतोर.
LUK 23:12 अदे रोजु हेरोद अंतिपस राजाल आनि पिलातुस ईर इव्वुर दंटातोर आतुर. दीनकन्‍ना मुन्‍ने ओर वरोंक वरोर विरोदमते मनुंदुर.
LUK 23:13 पजा पिलातुस पेर्मालोर्कुन, राज्येम कियानोर्कुन आनि लोकुल्‍कुन केयतोर.
LUK 23:14 केय्‍सि ओर्कुन इल्‍हा इत्‍तोर, “लोकुल्‍कुंक एकरेवुल्क वेहचि ओर्क तप्‍पुड हर्रि हुपिच्‍चंतोर इंचि येसुन मिमेट इगे तत्‍तिर. नना मीवा मुन्‍नेन ईन बेस परमेरका कीसि पूसकीतन. मिमेट ईनपोर्रो दोसता तप्पुक-दोसेल्कुनाल उंदिगुडा नाकु ईना लोप्पो दिसा हिल्‍लें.
LUK 23:15 इंका हेरोद अंतिपस राजांकगुडा ईना लोप्पो तप्पुक-दोसेल्क दोर्का हिल्‍लें. अदुनहाटीं ओर ईन मर्रा नाहेकेन तिराह्‍चि लोहतोर. ईन्कु हामुर सिक्‍सा हियनलायक ईर बतल तप्पु किया हिल्‍लोर.
LUK 23:16 अदुनहाटीं नना ईन पोट्‍टे देब्बां तंचि होळसींतन,” इंचि इत्‍तोर.
LUK 23:17 इद पंडुगुने एडादिक वरोन यहुदि मनकन जेलनाल होळसा पिय्‍युंदु.
LUK 23:18 अस्‍के अंटोर लोकुल्‍क कलियसि उंदेतीर, “ई येसुंक हामुर सिक्‍सा हीम, मावाहाटीं बरब्बन होळसीम,” इंचि इरगा वरगेयालय दल्‍गतुर.
LUK 23:19 (ई बरब्बल इनानोर सहरता मनकालोर्कुन सरकारता विरोदमते कीसि मत्‍तोर. इंका बचुटूरो लोकुल्‍कुन हव्‍किसिगुडा मत्‍तोर. अदुनहाटीं ओन जेलने वाटसि मत्‍तुर.)
LUK 23:20 पिलातुसना मनसुने येसुन होळसियानद मत्‍ता, अदुनहाटीं ओर लोकुल्‍कुंक इंकुंदि मल्का विनंति कीतोर.
LUK 23:21 गानि लोकुल्‍क मात्रम, “ओन क्रुसुनपोर्रो मोल्‍लां कोह्‍किसि वेलाड वाटट, ओन क्रुसुनपोर्रो वेलाड वाटट,” इंचि इरगा मोत्‍कुंचेके मत्‍तुर.
LUK 23:22 अयना पिलातुस मूडो मल्का ओर्कुन, “बारि? ईर बतल तप्पु कीतोर? ईनकु हामुर सिक्‍सा हियनलायक नाकु बतले तप्पु दोर्काहिल्‍ले. अदुनहाटीं नना ईन पोट्‍टे देब्बां तंचि होळसींतन,” इंचि इत्‍तोर.
LUK 23:23 गानि लोकुल्‍क मात्रम उंदेतीर, “येसुन क्रुसुनपोर्रो वेलाड वाटा,” इंचि इरगा मोत्‍कुंचेके मत्‍तुर. ओरा मोत्‍कुन्‍मळता मुन्‍ने पिलातुसनद उंदिंका पोल्‍ले ताका हिल्‍ले.
LUK 23:24 अदुनहाटीं पिलातुस, लोकुल्‍कुना इच्‍चा परकारमे आयि, इंचि इत्‍तोर.
LUK 23:25 पजा सरकारता विरोद कीसि, लोकुल्‍कुन हव्‍किसि जेलुंक होंचि मत्‍ता बरब्बन लोकुल्‍क तल्कताहेंका ओन होळसिया वेहतोर. येसुन बारे लोकुल्‍कुना इच्‍चा मत्‍ताप कीकुन्‍निर इंचि ओरा कय्‍दुक अप्पजेपतोर.
LUK 23:26 सिपाइल्क येसुन पीसि होननेंके, अच्‍चोटेन कुरेनि सहरतोर वरोर सिमोन इनना मनकल ओना सहरताल वासेके मत्‍तोर, ओर्क कलियतोर. अय्ते सिपाइल्क ओन दोर्कापीसि येसुना क्रुसुन कांजसेक येसुना पज्जो-पज्जो ताका वेहतुर.
LUK 23:27 अस्‍के लोकुल्‍कुनद उंदि पेद्‍दा मंदा येसुना पज्जो होंचेके मत्‍ता. अद मंदाते इच्‍चुं मुर्ताह्क इंका मत्‍तां, अव येसुनाहाटीं वेल्‍लेन बादाते इरगा अळसेके मत्‍तां.
LUK 23:28 अस्‍के येसु अवुनहेके तिरियसि अवुन इल्‍हा इत्‍तोर. “ए येरुसलेम सहरता मुरताह्‍कुनिटा! मिमेट नावाहाटीं अळमट, गानि मीवा मर्क-मियाह्क, मीवा सतताहाटीं अळट.
LUK 23:29 बारित्‍ते मुन्‍ने इसोंटा तकलिपता रोजकु वायानव मंतां गदा, अव रोजकुने, ‘गोड्होत्‍ता मुरतळके सुकम मंता, पिलाल्क आयवा मुरतळके सुकम मंता, बस्‍केने मरतल्‍लुर आयवा मुरतळके सुकम मंता,’ इंचेके लोकुल्‍क इनानुर.
LUK 23:30 इंका ओर, ‘मावा पोर्रो वासि अर्रट,’ इंचि गुट्‍टान इनानुर आनि ‘माकुन पूळसट’ इंचि गुप्पन इनानुर.
LUK 23:31 मरा पच्‍चगा मननेंकेन ईर लोकुल्‍क इल्‍हा कीसंतुर अय्ते, वत्‍सोत्‍ता मरातुन बल्हा कियनुरो?” इंचि इत्‍तोर.
LUK 23:32 पेद्‍दा तप्पु कीता इंका इव्वुर मनकालोर्कुनगुडा हामुर सिक्‍सा हिय्यालय येसुनतोनि ओसेक मत्‍तुर.
LUK 23:33 पजा ओर “तला बोरसेम” इनना जेगातगा एवतुर. एवतस्‍के येसुन क्रुसुनपोर्रो मोल्‍लां कोह्‍किसि वेलाड वाटतुर. अल्‍हेने पेद्‍दा तप्पु कीता आ इव्वुर मनकालोर्कुनगुडा येसुनतोनि ओना तिना बाजुंक वरोन, रोड्‍डा बाजुंक वरोन क्रुसुनपोर्रो वेलाड वाटतुर.
LUK 23:34 अस्‍के, “पेनबाबा, ईर बतल कीसंतुरो, अद ईरके तेळियो. अदुनहाटीं ईर्कुन मापि कीम,” इंचि येसु इत्‍तोर. पजा सिपाइल्क सिट्‍टिं वाट्‍सि ओना कपडिन पंचकुत्‍तुर.
LUK 23:35 अगा जर्गनदुनंता लोकुल्‍क नित्‍तिसि हूळसेक मत्‍तुर. राज्येम कियानोरगुडा, “ईर अय्ते इंकावरोन पिसागोटतोर. अय्ते ईर ओक्‍कला पेन पेरता किरिस्‍तु आयानय्ते, ओना जीवातुन ओरे पिसागोटकुन्‍निर,” इंचि कारेड्‍डाल्‍क कियुंदुर.
LUK 23:36 सिपाइल्कगुडा ओना दग्गेर्क होंचि ओन कारेड्‍डाल्‍क कीसेके, पुल्‍लटा पंडिना पानकम उह्‍चेके, “ओक्‍कला निमे यहुदिल्कुना राजान आते, निमे नीवा जीवातुन पिसागोटकुन,” इंचि इत्‍तुर.
LUK 23:38 इंका ओना तल्‍लातगा पोर्रो, “ईर यहुदिल्कुना राजाल आंदुर,” इंचि उंदि पाटि पोर्रो रासि क्रुसुंक हिरकिस्तुर.
LUK 23:39 अगा येसुनतोनि वेलाड वाट्‍सि मत्‍ता तप्‍पु कीता इव्वुर लोप्पोटाल वरोर, “निमे पेन लोहता किरिस्‍तुने गदा! अय्ते नीवद निमे पिसागोटकुंचि माकुनगुडा पिसागोटा,” इंचि ओना अपमानम कीतोर.
LUK 23:40 गानि तप्पु कीता इंकावरोर मनकल बारे अल्हा इत्‍ता मनकन गदरिच्‍चि, “ईन्क दोर्कता सिक्‍से नीकुगुडा दोर्कता. अयना नीकु पेन इत्‍ते वेर्रे हिल्‍लेना रो?
LUK 23:41 मनम अय्ते तप्पु कीतोम इंचि न्‍यायम परकारम मनाकु सिक्‍सा दोर्कता. गानि ईर अय्ते बतले तप्पु किया हिल्‍लोर,” इंचि इत्‍तोर.
LUK 23:42 मर्रा येसुन, “येसु, निमे राजाल आतस्के नाकुन मति कीम,” इंचि इत्‍तोर.
LUK 23:43 अस्‍के येसु ओन, “नना नीकु निजम वेहचेके, निमे इय्यालेन नावातोनि स्वर्गमते मनकिन,” इंचि इत्‍तोर.
LUK 23:44 अद वेलाक पिय्यटा पन्‍नेंड एगानस्‍केटाल अय्ते मूड एगनदाका पूरा बूमिअंता हीकट आता.
LUK 23:45 पोळ्‍दुना वेल्‍गुगुडा दिसाकोंटा आता. अस्‍के येरुसलेम सहरते मनना गुळिता लोप्पो पवित्र जेगा आनि अन्‍नि जेगांकन्‍ना एक्‍को पवित्र जेगाता नड्‍डुम मत्‍ता परदा, पोर्रोटाल हिळुदाका हर्सि रोंडु तुकडां आता.
LUK 23:46 अस्‍के येसु, “ए पेनबाबा! नना नावा आत्मातुन नीवा कय्‍दे अप्‍पजेपंतन,” इंचि लगांचि वरगेयसि जीवा होळस्तोर.
LUK 23:47 नूर मंदि सिपाइल्कुनपोर्रो मनना दरोगाल अगा जर्गतद हूळसि, “ई मनकल निजमे नीतिमंतुड आंदुर,” इंचेके पेनदुन तल्‍सकुत्‍तोर.
LUK 23:48 अगा हूळालय जमा आता अंटोर लोकुल्‍क अगा जर्गतदुनंता हूळसि ओर ओरा चातिन तनकुंचेके मल्सि होत्‍तुर.
LUK 23:49 गानि येसुन एरपाट कियानोर अंटोर आनि गालिल एरियाताल ओना पज्जो-पज्जो वातव मुर्ताह्क इच्‍चुर लक्‍कु नित्‍तिसि अगा जर्गतदुनंता हूळसेक मत्‍तां.
LUK 23:50 पजा अगा यहुदिया एरियाता अरिमताइ नाटेनोर वरोर योसेप इनना मनकल मत्‍तोर, ओर यहुदिल्कुना पंचादिता मेंबर मत्‍तोर. अल्‍हेने ओर बेस नीतिमंतुड मत्‍तोर. पंचादिते येसुन हव्कना बारेमते येतता निरनायम ओन्क इस्‍टम मनाहिल्‍ले. इस्राएल देसेमते पेन दाना राज्येम बस्के निलाहंता इंचि ओर एदुर हूळसेक मत्‍तोर.
LUK 23:52 ई योसेप पिलातुसनगा होंचि येसुना पीनगुन गति कियनाहाटीं तल्कतोर.
LUK 23:53 तल्किसि येसुना पीनगुन क्रुसुनपोर्रोटाल हिळु रेहतोर. पजा एक्‍को दराता हामुर कप्पिडते ओना पीनगुन हुटतोर. अल्हा कीसि बंडातुन तुल्हाचि तयार कीता बोंदाते ओसि इरतोर. अद बोंदाते दीनकन्‍ना मुन्‍ने बोना पीनगुन इर्रा हिल्‍लुर.
LUK 23:54 आ रोजु नोमकेमताहाटीं तयारिं कियना रोज आंदु. जेरासेप अय्ते पोळ्‍द होंचि नोमकेम रोज होळियानदे मत्‍ता.
LUK 23:55 पजा येसुनतोनि गालिल एरियाताल वाता मुर्ताह्क पीनगुन ओयनेंके बोंदातुन हूळनाहाटीं योसेपुना पज्जो होत्‍तां. इंका अव येसुना पीनगुन बोंदाते बल्हा इरतुर अदुनगुडा हूळतां.
LUK 23:56 आयंका अव मुर्ताह्क अगटाल तिरियसि होंचि बेस गमागमा गब्‍बु वायना वस्‍तुक आनि अत्‍तर निय येसुना पीनगुंक होकानाहाटीं तयार कीतां. गानि वारमता नोमकेम रोजु होळियताहाटीं, आदेस परकारम बद्‍दे कबळ कियामन्‍नि इंचि लोने मत्‍तां.
LUK 24:1 पजा वारमता मोदाटा रोजु इत्‍ते अय्तारम हक्‍केरेन पोळ्‍द पेय्‍सका मुन्‍नेन, आ मुर्ताह्क अव तयार कीता गमागमा गब्‍बु वायना वस्‍तुक पीसि येसुन इरता बोंदातगा एवतां.
LUK 24:2 एवतस्‍के बोंदाता हरदुक अड्‍डम ताससि मत्‍ता बंडा पक्‍काक दोब्‍बिसि मत्‍तदुन अव हूळतां.
LUK 24:3 अस्‍के अव मुर्ताह्क लोप्पो होळियसि हूळतां अय्ते अवुंक अगा येसु सामिना पीनगु दिसा हिल्‍ले.
LUK 24:4 अव इदुना बारेमते इल्‍हा बल्हा आता इंचि विचारमते मननेंकेन अचानक इव्वुर मनकालोर जगा-जगा मेर्सना कपडिं केर्सि अवुनगा वासि निलतुर.
LUK 24:5 अस्‍के अव इरगा वेरियसि तल्‍ला हिळु वराहचि दंडम दोस्तां. पजा ओर मनकालोर अवुन इल्‍हा इत्‍तुर. “जीवाते मनना मनकन हातोरव्टे बारि पह्कसेक मंतिट?
LUK 24:6 ओर इग्‍गे हिल्‍लोर, हामुरताल जीवाते तेदतोर. ओर मीवातोनि गालिल एरियाते मननेंके मीकु, ‘मनकना रूपमते पुटतोन नाकुन पापि मनकालोरा कय्‍दे पीसि हियमळ जर्गार, पजा ओर नाकुन क्रुसुनपोर्रो वेलाड वाट्‍सि हव्कानुर. गानि नना मूड रोजकुने मर्रा जीवाते तेदकन. इवन्‍नि निजम आयनुंगें,’ इंचि वेह्‍चि मत्‍तोर. इद मीकु मति हिल्‍लेना?” इंचि इत्‍तुर.
LUK 24:8 अस्‍के अव मुरताह्कुंक येसु मुन्‍ने वेहता पोल्‍लें मति वातां.
LUK 24:9 पजा अव मुर्ताह्क बोंदातगा हूळता पोल्‍लेन बोंदातगाटाल मल्सि होंचि पदाकोंडु प्रेरितुल्कुंक आनि अगा मत्‍ता कळमता अंटोर सिस्युल्कुंक वेहतां.
LUK 24:10 अव मुर्ताह्कुने, मगदलेनि नाटेना मरियम, योहानि, याकोबुना यावल मरियम, इंका अवुनतोनि मत्‍ता मुर्ताह्क. इवे मुर्ताह्क अव हूळतव, केंजतव अन्‍नि पोल्‍लें प्रेरितुल्कुंक वेहतां.
LUK 24:11 गानि प्रेरितुल्कुंक आ मुरताह्कुना पोल्‍लें अट्‍टिगेन अनपिस्तां. अदुनहाटीं अवुना पोल्‍लेन ओर नम्मा हिल्‍लुर.
LUK 24:12 अयना पत्रु अगटाल तेदसि बोंदातेके विततोर. अगा लोप्पो होळियसि हूळते, सिराप येसुना पीनगुन हुटसि मत्‍ता कपडिं बल्हा मत्‍तव अल्हे अरसि मत्‍तद दिसता. अगा अल्हा हूळसि इल्‍हा बल्हा आता इंचेके ओनद-ओरे मनसुने विचारम कीसेके मल्सि लोन होत्‍तोर.
LUK 24:13 अदे रोजु येसुना सिस्युल्‍कुनाल बोरो इव्वुर इमाउस इनना नार होंचेके मत्‍तुर. अद नार येरुसलेम सहरताल दग्‍गेर-दग्‍गेरा पदाकोंडु किलोमिटर्क लक्‍कु मंता.
LUK 24:14 ओर इव्वुर येरुसलेमते जर्गता अन्‍नि गटनन बारेमते वळ्कसेक होंचेके मत्‍तुर.
LUK 24:15 ओर अव पोल्‍लें वळकसेके होंचेके मननेंके येसु अचानक कुद्‍दु ओरगा वासि ओरतोनि कलियसि ताकालय दल्‍गतोर.
LUK 24:16 गानि ओर बोर आंदुर इंचि ओर्क इव्वुर्क एरपाट आयाकोंटा कियमळ जर्गता.
LUK 24:17 पजा येसु ओर्कुन, “मिमेट बव पोल्‍लेना बारेमते वळ्कसेक ताकसंतिर?” इंचि पूसकीतोर. अस्‍के ओर इव्वुर दुक्‍कमते अग्गेन निततुर.
LUK 24:18 पजा ओर इव्वुरगटाल वरोर किलयुपास इननोर, “इव रोजकुने येरुसलेमते जर्गता गटनन बारेमते नीकु एरपाट हिल्‍लेना? पंडुगुंक वातोरव्टेटाल इव गटनां तेळियवोन निमे वरोने मंतिना?” इंचि जवाब हीतोर.
LUK 24:19 अस्‍के येसु, “बव पोल्‍लें आंदुं?” इंचि पूसकीतस्‍के ओर इल्‍हा वेहालय दल्‍गतुर. “नासरेत नाटेना येसुना बारेमता पोल्‍लें आंदुं दादा. ओर इसंटा मनकल मत्‍तोर गदा, ओर बतल वेहिना, बतल किय्‍यिना पेनदा ताकततोने कियुंदुर. ओर पेनदा कबुरतोर मत्‍तोर. लोकुल्‍कगुडा ओन बेसतोर इंचि इनुंदुर.
LUK 24:20 गानि मावा पेद्‍दा पेर्मालोर, अदिकारिल्‍क ओन्क हामुर सिक्‍सा हियमळ गावाले इंचि ओन पीसि पिलातुसना कय्‍दे हीतुर. पजा लोकुल्‍क ओन क्रुसुनपोर्रो मोल्‍लां कोह्‍किसि हव्कतुर.
LUK 24:21 गानि इस्राएल लोकुल्‍कुन पगातोरा कयदाल ओरे होळसियानुर इंचि मोमोट आसे पळतोम. इव अन्‍नि गटनां हन्‍नेट रोजे जर्गतां.”
LUK 24:22 “अचोने आयका मावाव्टेटाल इच्‍चुं मुर्ताह्कगुडा माकुन इचंत्रमते अरहतां. अव इय्याला हक्‍केरेन बोंदातगा होंचि मत्‍तां.
LUK 24:23 गानि अगा अवुंक येसुना पीनगु दिसा हिल्‍ले. अदुनहाटीं अव मल्सि वासि, माकु पेनदा दूतां दिसतां, अव माकु येसु जीवाते तेदतोर, इंचि वेहतां, इंचेके अव मुर्ताह्क माकु वेहतां.
LUK 24:24 अवुना पोल्‍लें केंजसि मातोनि मत्‍तोर इच्‍चुर बोंदातगा होंचि हूळतुर. अय्ते अव मुर्ताह्क बल्हा वेहतांगो अल्हेन मत्‍ता, येसु अगा मनाहिल्‍लोर,” इंचि वेहतोर.
LUK 24:25 अस्‍के येसु ओर्कुन, “अरे बुद्‍दि तक्‍को लोकुरिटा, पेनदा कबुरतोर मुन्‍ने वेहचि मत्‍ता पोल्‍लेन मिमेट बस्के नम्मंतिर?
LUK 24:26 पेन लोहता पिसागोटना किरिस्‍तु स्वर्गमता महिमाते होळियका मुन्‍ने ओर इवन्‍नि तकलिप बोगांचेपींता,” इंचि इत्‍तोर.
LUK 24:27 पजा, मूसाना नियमते, अंटोर पेनदा कबुरतोर रासता पोल्‍लेने, अल्‍हेने दर्मसास्‍त्रमते ओना बारेमते बगा-बगा रासि मंतानो अवुनंता येसु ओर्कु बेस तेळियानाल वेहतोर.
LUK 24:28 पजा ओर्क होनना मत्‍ता नाटुक दग्‍गेर एवतुर. अस्‍के येसुंक इंकिच्‍चो मुन्‍नेळ्‍क होनानद मंता इत्‍ताप ओर्क अन्‍पिस्‍ता.
LUK 24:29 अदुनहाटीं ओर ओन, “इंदके पोळ्‍द होत्‍ता, इय्याला निमे इगेन महगा आगा दादा!” इंचि वेल्‍लेन विनंति कीतुर. अस्‍के येसु ओरगा मननाहाटीं ओरतोनि लोप्पो होत्‍तोर.
LUK 24:30 पजा येसु ओरतोनि कलियसि गाटो तिनालय उदतस्‍के, हारितुन पीसि पेनदुक दन्यवाद कीतोर. पजा दान तुकडां कीसि ओर्क हियालय दल्‍गुतोर.
LUK 24:31 अल्हा हारि तुकडां हियानेंकेन ओरा इव्वुरा कळ्‍क जग्गरा आतां आनि ईर येसु आंदुर इंचि एरपाट कीतुर. गानि येसु ओर्क दिसाकोंटा मायम आतोर.
LUK 24:32 पजा ओर इव्वुर ओरद-ओरे, “हरपीसि मनातोनि वळकसेके ताकानेंके ओर मनाकु दर्मसास्‍त्रमते रासि मत्‍ता पोल्‍लेना निजम अर्तमतुन बेस तेळियानाल वेहतोर. अस्‍के ओना पोल्‍लें केंजसि बच्‍चोन बेस अनपिच्‍चेक मत्‍ता!” इंचेके वळ्‍ककुत्‍तुर.
LUK 24:33 पजा ओर अगटाल बिराना तेदसि मर्रा तिरियसि येरुसलेम होत्‍तुर. होत्‍तस्के अगा पदाकोंडु मंदि प्रेरितुल्क अल्‍हेने कळमता लोकुल्‍क उंदगा जमा आसि मत्‍तद ओर हूळतुर.
LUK 24:34 अस्‍के आ जमातोर, “हो, इद निजमे! येसु सामि जीवाते तेदतोर. ओर सिमोन पत्रुंक दिसतोर,” इंचि वळकसेके मत्‍तुर.
LUK 24:35 अस्‍के ओर इव्वुरगुडा हरपीसि होननेंके बतल-बतल जर्गता, इंका येसु हारितुन उराहचि ओर्क हियनेंके ओर येसुन बल्हा एरपाट कीतुर, इदंता अंटोर्क वेहतुर.
LUK 24:36 ओर इव्वुर इव पोल्‍लें अंटोर्क वेहचेकेन मत्‍तुर, अच्‍चोटेन येसु ओरा नड्‍डुम वासि निलतोर. निल्‍सि, “मीकु अंटोर्क सांति दोर्कि,” इंचि इत्‍तोर.
LUK 24:37 अस्‍के ओर अंटोर, ‘मोमोट बूतमतुन हूळसंतोम,’ इन्कुंचि इरगा वेरियतुर.
LUK 24:38 गानि येसु ओर्कुन, “मिमेट इच्‍चोन बारि वेरियतिर? मीवा मनसुने नावा बारेमते अनमानम बारि वाता?
LUK 24:39 नावा कय्‍क-काल्‍कुन हुळाट! नाकुन इट्‍टिस हुळाट, ननाने आंदुन! बूतमकु हव्‍विं-बोक्‍कां मन्‍नों गानि नाकु मंतां,” इंचि इत्‍तोर.
LUK 24:40 इल्‍हा वळकसेके येसु ओना कय्‍क-काल्‍कुन ओर्क हुपिस्तोर.
LUK 24:41 अस्‍के ओर वेल्‍लेन कुसिते, इल्‍हा बल्हा आता इंचेके इचंत्रम आसि ओर्क पुरागा विस्वासमगुडा आसेके मनाहिल्‍ले. येसु ओर्कुन अल्हा हूळसि, “मिहगा बतलन्‍ना तिनालय मंतना?” इंचि पूसकीतोर.
LUK 24:42 अस्‍के ओर ओन्क उंदि बोळस्ता जिम्मा तुकडा हीतुर.
LUK 24:43 पजा येसु अद तुकडातुन ओरा मुन्‍नेन तित्‍तोर.
LUK 24:44 तित्‍तारित्‍ते येसु ओर्कु, “इव पोल्‍लें बव इत्‍ते, नाकुन हव्कका मुन्‍ने नना मीवातोनि मत्‍तन, अस्‍के मीकु वेहतव आंदुं. मूसाना नियमते, पेनदा कबुरतोरा पुस्तकाल्कुने आनि बजन संहिताने रासि मत्‍ता अन्‍नि पोल्‍लें निजम आयनदे मत्‍ता,” इंचि इत्‍तोर.
LUK 24:45 पजा दर्मसास्‍त्रमते रासि मत्‍ता पोल्‍लें तेळियना इंचि येसु ओर्क तेल्वि हीतोर.
LUK 24:46 हीसि ओर्कुन इल्‍हा इत्‍तोर. “दर्मसास्‍त्रमते रासि मत्‍ताप, किरिस्‍तुंक वेल्‍लेन तकलिपकु वासि ओर हायानुर, पजा मूड रोजकुने मर्रा जीवाते तेदानुर इद अदे पोल्‍ले आंद.
LUK 24:47 पापाल्क मापि आयनाहाटीं मनसु मार्सकुनुळ अव्‍सरम मंता. इदे कबुरतुन येरुसलेमताल सुरुव कीसि, दुनियाता अन्‍नि देसेल्‍कुना लोकुल्‍कुंक किरिस्‍तुना अदिकारमते वेहमळ जरगार.
LUK 24:48 इव अन्‍नि पोल्‍लेंक मिमेटे गवाइ मंतिर.
LUK 24:49 इंका नावा पेनबाबाल हींतन इंचि पोल्‍ले हीता आ पवित्र आत्मातुन नना मिहगा लोहांतन. गानि बदवेरदाका अय्ते स्वर्गमताल पवित्र आत्माता ताकत मीपोर्रो रेय्योनो, अदवेरदाका मिमेट इदे येरुसलेम सहरते मंटु,” इंचि इत्‍तोर.
LUK 24:50 पजा येसु ओर्कुन येरुसलेम सहर दग्‍गेरा मनना बेतानि इनना नाटाहेके ओतोर. ओसि ओर ओना कय तेहचि ओर्कु आसिर्वाद हीतोर.
LUK 24:51 ओर्क आसिर्वाद हियानेंकेन येसु ओरागटाल लक्‍कु आतोर. पजा ओन पेन स्वर्गमते तेहाचि ओता.
LUK 24:52 अस्‍के ओर अंटोर येसुंक टोंगरां ऊनसि, मोळ्‍किसि अगटाल वेल्‍लेन कुसिते येरुसलेम सहर मल्सि होत्‍तुर.
LUK 24:53 पजा ओर बस्केळक गुळिते जमा आसि पेनदा स्‍तुति कीसेके मनुंदुर.
JOH 1:1 बतले पुट्‍टका मुन्‍ने पोल्‍ले मत्‍ता. आ पोल्‍ले पेनतोनि मत्‍ता. आ पोल्‍ले पेन आंद.
JOH 1:2 आ पोल्‍ले मुन्‍नेटाले पेनतोनि कलियसि मत्‍ता.
JOH 1:3 दुनियाते मननव अन्‍निटवुन, पेन अदुनहेंदाले पुटिस्ता. अदुन होळसि बतले तयार आयाहिल्‍ले.
JOH 1:4 अदुन लोप्पो पिस्वर मत्‍ता. आ पिस्वरे अंटोर लोकुल्‍कुनाहाटीं वेलगु आता.
JOH 1:5 आ वेलगु हीकटते एल्‍गंता. हीकट वेल्‍गुन बस्‍केने गेल्सा परो.
JOH 1:6 पेन वरोर कबुरतोन लोहता, ओन पोरोल योहान.
JOH 1:7 आ वेलगुना बारेमते ओर गवाइ वेहतस्के ओना पोल्‍ले केंजसि, अंटोर लोकुल्‍क आ वेल्‍गुनपोर्रो विस्वासम कियना, इंचि ओर वेहालय वातोर.
JOH 1:8 आ वेलगु योहान आयोर. गानि लोकुल्‍कुंक आ वेलगुना बारेमते गवाइ वेहालय योहान वातोर.
JOH 1:9 हरेक मनकंक निजमाता वेलगु हियानोर, इद दुनियाते वासेक मत्‍तोर.
JOH 1:10 ओर इद दुनियातेन मत्‍तोर. ओनाहेंदाले पेन ई दुनियातुन पुटिस्ता. गानि ई दुनिया ओन एरपाट किया हिल्‍ले.
JOH 1:11 ओर ओना लोकुल्‍कुनेन वातोर, गानि कुद्‍दु ओना लोकुल्‍के ओन ओप्कुना हिल्‍लुर.
JOH 1:12 गानि बोर अय्ते ओन ओप्‍कुंचि ओना पोरोल पोर्रो विस्वासम कीतुरो, ओर्क अंटोर्क पेनदा मर्क-मियाह्क आयना अदिकारम ओर हीतोर.
JOH 1:13 पेनदा मर्क-मियाह्क आयमळ इत्‍ते मनकना पीटाल, मनकना इच्‍चा मत्‍ताप पुटमळ, मुय्दोना इच्‍चा मत्‍ताप पुटमळ आयो. गानि पेने ओर्कुन दाना संतानम कीकुंता.
JOH 1:14 आ पोल्‍ले मनकना रूपमते मारियता. अद कुर्पा, सत्‍तेमतोनि पुरागा निंडिस मना नड्‍डुम जेगा आता. मोमोट महिमातुन हूळतोम. अद महिमा बाबाना वरोरे मर्रिना महिमालेसीं मत्‍ता.
JOH 1:15 ओना बारेमते योहान, “नावा पज्जोटाल बोर अय्ते वायनद मत्‍तोर, ओर ईरे आंदुर. ओर नाकन्‍ना वेल्‍लेन मुन्‍नेटाल मत्‍तोर इंचि नाकन्‍ना ओर वेल्‍लेन पेद्‍दोड,” इल्‍हा लोकुल्‍कुंक लगांचि मोत्‍कुंचेके गवाइ वेहतोर.
JOH 1:16 ओर अन्‍नि तीरकुने पुरागा मत्‍ताहेंका, ओनहेंदाल मनाकु अंटोर्क कुर्पाता आसिर्वाद पोर्रो आसिर्वाद दोर्कता.
JOH 1:17 मूसाल इनानोनहेंदाल पेन मनाकु नियमाल्‍क हीता. गानि कुर्पा, सत्‍तेम मनाकु येसु किरिस्‍तुनाहेंदाल दोर्कता.
JOH 1:18 पेनदुन बस्‍केने बोरे हूळा हिल्‍लुर. गानि पेनबाबाना संकाते मनना ओना वरोरे मर्रि, ओरे मनाकु ओन हुपिस्तोर.
JOH 1:19 “निमे बोन आंदिन?” इंचि योहानुन पूसकियालय येरुसलेम सहरते मनना यहुदि पेद्‍दाल्क, इच्‍चुर पेर्मालोर्कुन आनि लेवि जातितोर्कुन, ओनगा लोहतस्के योहानुना गवाइ इल्‍हा मत्‍ता.
JOH 1:20 अस्‍के, “नना किरिस्‍तुन आयोन,” इंचि योहान पोल्‍ले मक्‍साकोंटा कबुल कीतोर.
JOH 1:21 अस्‍के पेर्मालोर्क आनि लेवि जातितोर, “अय्ते निमे एलियन आंदिना?” इंचि पूसकीतस्‍के, “नना एलियागुडा आयोन,” इंचि योहान इत्‍तोर. अस्‍के ओर, “हिलाकोंटे निमे पेनदा कबुरतोना?” इंचि इत्‍तस्के, “नना पेनदा कबुरतोनिंका आयोन,” इंचि योहान इत्‍तोर.
JOH 1:22 पजा ओर लोकुल्‍क ओन मर्रा, “अय्ते मरि निमे बोन आंदिन? माकुन लोहतोर्कुंक मोमोट होंचि बतल वेहकोम? अदुनहाटीं नीवा बारेमते निमे बतल वेहकुंतिन, माकु वेहा,” इंचि पूसकीतुर.
JOH 1:23 अस्‍के, यसायाह इनना पेनदा कबुरतोर मुन्‍ने वेहताप, “सामिनाहाटीं सवरटा हर्रि तयार कीम्‍टु, इंचि केडाते मोत्‍कुनानोना अल्किरतुन ननाने आंदुन,” इंचि योहान ओर्क वेहतोर.
JOH 1:24 योहानुन पूसकियालय वाता परिसि लोकुल्‍क, “निमे किरिस्‍तुन आयिन, एलियन आयिन, पेनदा कबुरतोनगुडा आयिन. असोंटस्के निमे लोकुल्‍कुंक बारि बापतिस्मा हीसंतिन?” इंचि योहानुन पूसकीतुर.
JOH 1:26 अस्‍के योहान, “नना अय्ते बापतिस्मा एततोनि हींतन. गानि इगे मीवा नड्‍डुम वरोर नित्‍तिसि मंतोर, ओन मात्रम मिमेट एरपाट किय्‍यिर.
JOH 1:27 नावा पज्जोटाल वायानोना कादा हेरपुमता नोंडे लेहना विलुवागुडा नाकु हिल्‍ले,” इंचि योहान जवाब हीतोर.
JOH 1:28 इवन्‍नि गटनां योर्दन बेरेटा हब्बेर, पोळ्‍द पेय्सनेंके मनना बेतानि इनना नाटे जर्गतां. अगा योहान बापतिस्मा हियुंदुर.
JOH 1:29 इंकुंदि रोजु योहान, येसु ओनाहेके वायनद हूळसि, “अद हुळाट, दुनियातुन पापमता सिक्‍साताल तप्‍सानाहाटीं मोक्‍कु आयाना पेनदा गोर्रे पोरिनसंटोर!
JOH 1:30 नना दीनकन्‍ना मुन्‍ने वेहचि मत्‍तन गदा, नावा पज्जोटाल वरोर वायाना मंतोर इंचि! अद ईना बारेमतेन आंद. ओर नाकन्‍ना वेल्‍लेन मुन्‍नेटाल मत्‍तोर, अदुनहाटीं ओर नाकन्‍ना पेद्‍दोड आंदुर.
JOH 1:31 ओर बोर आंदुर कुद्‍दु नाके तेळियो. गानि इस्राएलता लोकुल्‍कुंक ओर दिसगोम, इंचि नना एततोनि बापतिस्मा हियालय वातन,” इंचि योहान इत्‍तोर.
JOH 1:32 मर्रा योहान येसुना बारेमते इल्‍हा गवाइ वेहालय दल्‍गतोर, “नना कुद्‍दु ओन एरपाट कियाकोंदुन. गानि एततोनि बापतिस्मा हियालय नाकुन लोहता पेने नाकु वेहचि मत्‍ता, ‘पवित्र आत्मा पावरेम पिट्‍टे लेह्का आसि बोनपोर्रो अय्ते रेयनेंके निमे हूळंतिन, ओरे लोकुल्‍कुंक पवित्र आत्माते बापतिस्मा हियानोर आंदुर,’ इंचि. पवित्र आत्मा पावरेम पिट्‍टे लेह्का आसि स्वर्गमताल हिळु रेय्‍सि, ओनपोर्रो वासि उदतद नना हूळतन.
JOH 1:34 इदंता नना नावा कळ्‍कुन निंडा हूळतन. अदुनहाटीं, ‘ईरे पेनदा मर्रि आंदुर,’ इंचि नना गवाइ हीसंतन,” इंचि योहान वेहतोर.
JOH 1:35 इंकुंदि रोज योहान ओना सिस्युल्‍कुनाल इव्वुर सिस्युल्कुनतोनि नित्‍तिसि मत्‍तोर.
JOH 1:36 अस्‍के येसु ओना दग्गेटाल होननद हूळसि, “हुळाट, पेनदा गोर्रे पोरि,” इंचि इत्‍तोर.
JOH 1:37 योहान इत्‍ता पोल्‍ले केंजसि ओना इव्वुर सिस्युल्कु येसुना पज्जो होत्‍तुर.
JOH 1:38 येसु पजोळ्क तिरियसि हूळतोर अस्‍के ओर इव्वुर ओना पज्जो वायनद हूळसि ओर्कुन, “मिमेट बतल पहकसंतिर?” इंचि पूसकीतोर. अस्‍के ओर, “रब्‍बी! निमे बगा मनांतिन?” इंचि इत्‍तुर.
JOH 1:39 अस्‍के येसु ओर्कुन, “वट हूळकिर,” इत्‍तोर. ओर येसुनतोनि होंचि ओर मनना जेगातुन हूळतुर. हूळसि येसु मनना जेगातगा एवसि ओनतोनि अग्गेन मत्‍तुर. अस्‍के नुल्‍पेळतां नालुं एगसेक मत्‍ता.
JOH 1:40 योहानुना पोल्‍ले केंजसि येसुना पज्जो होत्‍ता इव्वुर सिस्युल्‍कुनाल वरोन पोरोल अंदरियल. ई आंद्रेयल, सिमोन पत्रु इनानोना तम्मुर आंदुर.
JOH 1:41 आंद्रेयल अगटाल सवरगा ओना दादल सिमोन पत्रुंक होंचि कलियतोर. कलियसि, “दादा मोमोट मेसय्यांक इत्‍ते किरिस्‍तुंक कलियतोम,” इंचि इत्‍तोर.
JOH 1:42 पजा आंद्रेयल ओना दादल सिमोन पत्रुन येसुनगा पीसि वातोर. येसु सिमोनुन हूळसि, “निमे योहानुना मर्रि सिमोन आंदिन. गानि इंदकेटाल नीकुन केपा इत्‍ते पत्रु इंचि केयानुर,” इंचि इत्‍तोर.
JOH 1:43 इंकुंदि रोज येसु गालिल राज्येमते होनना निरनायम एततोर. अस्‍के पिलिपुन कलियसि, “निमे ना पज्जो वा,” इंचि इत्‍तोर.
JOH 1:44 पिलिप, अंदरियल आनि पत्रु ईर मुव्वुरगुडा बेतसेदा इनना सहरतोरे आंदुर.
JOH 1:45 पजा पिलिप होंचि नतेनलुंक कलियतोर. कलियसि, “बोना बारेमते अय्ते मूसाल दर्मसास्‍त्रम रासतोर आनि पेनदा कबुरतोरगुडा रासतुर, ओर माकु दोर्कतोर. ओर नासरेत नाटेना योसेप इनानोना मर्रि येसु आंदुर,” इंचि वेहतोर.
JOH 1:46 अस्‍के नतेनल, “अल्हाना! नासरेततालगुडा बेसता पोल्‍लें वाया परंतंगा?” इंचि इत्‍तोर. अस्‍के पिलिपु, “अय्ते निमेन वासि हूळा!” इंचि इत्‍तोर.
JOH 1:47 येसु नतेनलुन ओनहेके वायनद हूळसि ओना बारेमते, “अद हुळाट, निजम इस्राएल मनकल. ओनालोप्‍पो बतले आबद्‍दम पोल्‍ले हिल्‍ले,” इंचि इत्‍तोर.
JOH 1:48 अद केंजसि नतेनल, “नना बसंटोन, बसंटोन आयोन नीकु बल्हा एर्का?” इंचि येसुन पूसकीतोर. अस्‍के येसु, “पिलिप नीकुन केयाका मुन्‍ने, निमे अंजिर मर्रा हिळु मत्‍तिन. अस्‍केन नना नीकुन हूळतन,” इंचि इत्‍तोर.
JOH 1:49 अस्‍के नतेनल, “रब्‍बी, निमे पेनदा मर्रिन आंदिन, इस्राएलता राजान आंदिन,” इंचि इत्‍तोर.
JOH 1:50 अस्‍के येसु, “नना नीकुन अंजिर मर्रा हिळु मन्‍नेंकेन हूळतन इंचि वेहताहेंका नाकुन नम्मुसंतिना? इंका मुन्‍ने इदुंकन्‍ना पेद्‍दे-पेद्‍दे पोल्‍लें हूळकिन,” इंचि जवाब हीतोर.
JOH 1:51 पजा, “हिके केंजट, नना निजम-निजम वेहासेक! स्वर्गम बैय्यरा आयानद हूळकिर, पेनदा दूतां मनकना रूपमते पुटतोना पोर्रो एक्‍कानदुन-रेयानदुन हूळकिर,” इंचि ओर्क वेहतोर.
JOH 2:1 इद जर्गुता मूडोव रोजुननाड गालिल राज्येमता काना इनना नाटे मरमिं मत्‍तां, आ मरमिने येसुना यावलगुडा मत्‍ता.
JOH 2:2 मरमिंकु येसुन, ओना सिस्युल्कुनगुडा केय्‍सि मत्‍तुर.
JOH 2:3 मरमिने अंगुर पानकम मारतस्के, येसुना यावल, “ओरागटा अंगुर पानकम मारसोत्‍ता कोको,” इंचि येसुन इत्‍ता.
JOH 2:4 अस्‍के येसु, “यावा! निमे नाकु बारि वेहचंतिन? नना बतलन्‍ना कियना वेला इंका वाया हिल्‍ले,” इंचि इत्‍तोर.
JOH 2:5 पजा येसुना यावल अगा मत्‍ता जीतागाह्कुन, “ईर मीकु बतल वेहंतोरो, मिमेट अदे कीम्‍टु,” इंचि इत्‍ता.
JOH 2:6 यहुदिल्कुना सुद्‍दिकरन कियाना रिवाज कियनाहाटीं अगा बंडातोनि तयार कीतव हारुं पेरपुल्क मत्‍तां. आ उंद-उंदि पेरपु नूर (100) लीटर्कुना एर पियनलायक मत्‍ता.
JOH 2:7 “आ पेरपुल्कुने एर निहाट,” इंचि येसु आ जीतागाह्कुंक वेहतोर. अस्‍के ओर आ पेरपुल्क सीगा निंडानाल निहातुर.
JOH 2:8 अस्‍के येसु, “इंदके उंदि पेरपुनाल इच्‍चुर एर पीसि, ई कुळपु हियना पेद्‍दा मनकानगा ओम्टु,” इंचि आ जीतागाह्कुंक वेहतोर, अस्‍के ओर ओतुर.
JOH 2:9 पजा आ पेद्‍दा मनकल एतुन गिचचो उंचि हूळतोर अय्ते, अद एर पुरागा अंगुर पानकम आसि मत्‍ता. इद पानकम बोर तत्‍तोर, बगाटाल वाता इत्‍तद आ पेद्‍दा मनकंक तेळिया हिल्‍ले गानि आ जीतागाह्कुंक मात्रम एर्का मत्‍ता. पजा आ पेद्‍दा मनकल मरमिना पेडन केय्‍सि, “अंटोर अय्ते पिव्‍वर अंगुर पानकम मोट्‍टा मोदाला हींतुर. लोकुल्‍क पीरनिंडा उट्‍टारित्‍ते, पज्जोटाल सप्पटा पानकम हींतुर. गानि निमे अय्ते पिव्‍वर अंगुर पानकम इदवेरदाकागुडा मिगलिच्‍चि इरतिन,” इंचि इत्‍तोर.
JOH 2:11 इल्‍हा येसु गालिल राज्येमता काना नाटे इचंत्रम आयना कबळ कीसि, ओना महिमातुन हुपिस्तोर. इद ओना मोट्‍टा मोदाटा चिन्‍ह आंद. अदुनहाटीं ओना सिस्युल्क ओन नम्मुतुर.
JOH 2:12 पजा येसु, ओना यावल, ओना तम्मुह्‍क, ओना सिस्युल्क अंटोर कलियसि कपर्नाहुम इनना सहर होत्‍तुर. ओर अंटोर अग्गेन कोन्‍नि रोजुक आगतुर.
JOH 2:13 यहुदि लोकुल्‍कुनद दाटसि होनना पंडुगु दग्गेर्क एवसि मत्‍ता. दानहाटीं येसु येरुसलेम होत्‍तोर.
JOH 2:14 अगा होत्‍तस्के गुळिता लोप्पो, लोकुल्‍क पेनदुक मोक्‍कु हियालय कुर्रां, गोर्रें, पावरेम पिट्‍टें अमसेक दिसतुर. अचोने आयका सरकार कोत्‍तां पेनदा गुळिते वाटालय कुदरों इंचि, आ कोत्‍तां बदलांचि यहुदिल्कुना कोत्‍तां हियानोरगुडा अगा उद्‍दिस मत्‍तद येसु हूळतोर.
JOH 2:15 हूळसि, उंदि नोंडे नोटसि पोट्‍टे तयार कीसि, गुळिताल अंटोर्कुन गेदुमतोर. गोर्रें, कुर्रन गुळिताल पलाते गेदमिसि, कोत्‍तां बदलांचानोरा बल्‍लन बोर्ला वाटसि कोत्‍तानंता लीकतोर.
JOH 2:16 पजा पावरेल्क अम्मानोर्कुन, “इवुन इगेटाल पलाते ओम्टु, नावा पेनबाबाना लोतुन हाटुमलेह्का कियमट,” इंचि इत्‍तोर.
JOH 2:17 अगा जर्गतदुन हूळसि, “नीवा लोता बारेमते नावा जीवा बागा तंलाडसंता,” इंचि दर्मसास्‍त्रमते दाविद राजाल रासता पोल्‍ले ओना सिस्युल्कुंक मति वाता.
JOH 2:18 येसु अल्हा कीतदुन हूळसि यहुदि पेद्‍दाल्क ओनगा वासि, “इल्‍हा कियना अदिकारम नीकु मंता इंचि मोमोट नम्मनाहाटीं निमे माकु बसोंटा चिन्‍ह हुपसंतिन?” इंचि पूसकीतुर.
JOH 2:19 अस्‍के येसु, “इद गुळितुन कूल्हाट, नना मूड रोजकुने मर्रा निलाहंतन,” इंचि जवाब हीतोर.
JOH 2:20 अस्‍के यहुदि पेद्‍दाल्क, “इदु गुळितुन दोहालय नल्‍पै हारुं वर्सां दल्‍गतां. अय्ते निमे दीन मूड रोजकुने बल्हा निलाहंतिन?” इंचि पूसकीतुर.
JOH 2:21 गानि येसु मात्रम ओना सतता मेंदुलता गुळिता बारेमते वळ्कतोर.
JOH 2:22 येसु हासि मर्रा जीवाते तेदतस्‍के ओना सिस्युल्कुंक इद पोल्‍ले मति वाता. अस्‍के ओर दर्मसास्‍त्रमते रासि मत्‍तादुन आनि येसु वेहता पोल्‍लेन नम्मुतुर.
JOH 2:23 दाटसि होनना पंडुगुना वेलाते येसु येरुसलेम सहरते मत्‍ताहाटीं, वेल्‍लेटोर लोकुल्‍क ओर कीता अद्‍बूताल्‍क हूळसि, ओनपोर्रो विस्वासम इरतुर.
JOH 2:24 गानि अंटोर लोकुल्‍क बोर-बसंटोर इंचि येसुंक एरपाट मत्‍ताहेंका, ओरा बारेमते येसुंक बोर गवाइ वेहना अव्‍सरम हिल्‍ले. अदुनहाटीं ओर बोरे लोकुल्‍कुन नम्मा हिल्‍लोर.
JOH 3:1 परिसि लोकुल्‍कुनाल वरोर निकोदेमस इनना मनकल मत्‍तोर, ओर यहुदिल्कुना लीडर मत्‍तोर.
JOH 3:2 ओर उंदि रोजु नर्कटा वेलाक येसुंक वासि कलियतोर. कलियसि, “रब्‍बी, निमे कियना ई अद्‍बूतामाता कबाह्‍क पेनदा तोळ हिल्वा बोरे किया परोर. दीनहेंदाल निमे पेनदाहेंदाल वाता गुरुनिंचि मोमोट तेल्‍पिचकुत्‍तोम,” इंचि इत्‍तोर.
JOH 3:3 अस्‍के येसु ओन, “नना निजम-निजम वेहासेक, बोरे आयिर, पूना रीतुने मर्रा पुट्‍टुवा, ओर पेनदा राज्येमतुन हूळा परोर,” इंचि वेहतोर.
JOH 3:4 अस्‍के निकोदेमस, “गानि वरोर मातरल आता मनकल मर्रा बल्हा पुट्‍टा परंतोर? ओर ओना यावाना पीटे होळियसि मर्रा पुट्‍टा परांतोरा?” इंचि येसुन पूसकीतोर.
JOH 3:5 अस्‍के येसु ओन्क इल्‍हा वेहतोर: “नना निजम-निजम वेहासेक, वरोर मनकल एताल आनि पवित्र आत्माहेंदाल पुट्‍टुवद, ओर पेनदा राज्येमते होळिया परोर.
JOH 3:6 मना मेंदुल अय्ते तल्‍लुर-बाबोनहेंदाल पुट्‍टा परंता, गानि आत्मा मात्रम सिराप पवित्र आत्माहेंदाले पुट्‍टा परंता.
JOH 3:7 अदुनहाटीं, मीकु मर्रा पुट्‍टे पींता, इंचि नना मीकु वेहतद केंजसि निमे इचंत्रम आयमा.
JOH 3:8 बल्हा अय्ते वळि दान इस्‍टमाताप बेके इत्‍ते हेक्‍के वित्‍तंता, दाना सप्पुडगुडा नीकु केंजा वांता, गानि अद बेंदाल वासंता, बेके होंचंता इत्‍तद मात्रम नीकु तेळियो. अल्हेन पवित्र आत्माहेंदाल पुट्ता हरेक मनकलगुडा मनंतोर,” इंचि येसु वेहतोर.
JOH 3:9 गानि “इद बल्हा आया परंता?” इंचि निकोदेमस येसुन पूसकीतोर.
JOH 3:10 अस्‍के येसु ओन्क इल्‍हा जवाब हीतोर, “निमे अय्ते इस्राएल लोकुल्‍कुंक कराहना पेद्‍दा गुरुन आंदिन. अयना इव पोल्‍लें नीकु तेळियोंगां?
JOH 3:11 नना निजम-निजम वेहासेक, माकु तेळियता पोल्‍लेंगें मोमोट वेहांतोम, कळ्‍कुने हूळता पोल्‍लेना गवाइ मोमोट मीकु वेहांतोम. अयना मिमेट मावा गवाइतुन ओप्‍कुंचेक हिल्‍लिर.
JOH 3:12 नना मीकु इद दुनियाता पोल्‍लें वेहतेने मिमेट नमसेक हिल्‍लिर. अय्ते नना स्वर्गमता बारेमता पोल्‍लें वेहते मिमेट बल्हा नम्मंतिर?
JOH 3:13 मनकना रूपमते पुट्तोन नना स्वर्गमताल वातन. इंका नाकु तप्‍पा स्वर्गमते वेरे बोरे होना हिल्‍लुर.
JOH 3:14 नाकुन बोर अय्ते विस्वासम कींतोर, ओन्क बस्‍केळ्‍क पिस्सना पिस्वर दोर्कगोम इत्‍ते, मूसाल बल्हा बय्‍लि बूमिते इत्‍तोळता तरासुन कोय्यापोर्रो वेलाड वाटसि मत्‍तोर, अल्‍हेने मनकना रूपमते पुटतोन नाकुनगुडा वेलाड वाटमळ जर्गागोम,” इंचि येसु इत्‍तोर.
JOH 3:16 पेन दुनियातोर्कुन इच्‍चोन पावरम कीता गदा, दाना वरोरे मर्रिनगुडा ई दुनियातोराहाटीं हीता. ओन नम्मना हरेक मनकल नासडेम आयामन्‍नि गानि ओन्क बस्‍केळ्‍क पिस्सना पिस्वर दोर्कना इंचि अद अल्हा कीता.
JOH 3:17 पेन ई दुनियातोर्क सिक्‍सा हिया वेहालय, दाना मर्रिन ई बूमिपोर्रो लोहा हिल्‍ले, गानि दुनियातोर्कुन पिसागोटालय ओन लोहचीता.
JOH 3:18 ओन बोर अय्ते नम्मंतुरो, ओर्क ओर सिक्‍सा हिया वेहोर. गानि बोर अय्ते ओन नम्मुरो, पेनदा वरोरे मर्रिनपोर्रो विस्वासम कियवाहेंका ओर्क पेन मुन्‍नेन सिक्‍सा हीसि इरता.
JOH 3:19 पेन मुन्‍नेन बारि सिक्‍सा हीसि इरता इत्‍ते, पेनदाहेंदाल उंदि वेलगु दुनियाते वाता. गानि दुनियातोर ओरा तप्‍पुड कबाह्कुनहेंका वेलगुने पिसनद होळसि हीकटते पिसमळतुने मेच्‍कुत्‍तुर.
JOH 3:20 तप्‍पुड हरदे ताकाना बोरे मनकल आयि, ओर वेलगुन मेच्‍कुन्‍नोर. ओना तप्‍पुड कबाह्‍क बय्यर दिस अर्रंतां इंचि ओर वेलगुने वायोर.
JOH 3:21 गानि सत्‍तेम हरदे ताकाना मनकल, ओर कियना कबाह्‍क पेनदा सहायमते आसंतां इनकुंचि अव अंटोर्क बय्यर दिस्‍सनाहाटीं ओर वेलगुने वांतोर.
JOH 3:22 ई पोल्‍लें मारतस्के, येसु, ओना सिस्युल्कु अगटाल यहुदिया राज्येमते होत्‍तुर. होंचि अगाटा लोकुल्‍कुंक बापतिस्मा हीसेक कोन्‍नि रोजकु अग्गेन मत्‍तुर.
JOH 3:23 सलिम इनना नाटेंक दग्‍गेरा मनना एनोन पोरोलता जेगाते वेल्‍लेन एर मत्‍ताहेंका, योहानगुडा अगा बापतिस्मा हियुंदुर. लोकुल्‍क ओना कय्‍दे बापतिस्मा एतालय अगा वायुंदुर.
JOH 3:24 ई गटनां योहानुन जेलने वाटका मुन्‍नेने जरगतां.
JOH 3:25 अस्‍के योहानुना सिस्युल्क आनि वरोर यहुदि मनकन नड्‍डुम सुद्‍दिकरन कियाना रिवाजता बारेमते रोंड-रोंड पोल्‍लें आतां.
JOH 3:26 दानहाटीं योहानुना सिस्युल्कु योहानुनगा वासि, “गुरु, निमे योर्दन बेरेटा हब्बेरा मननेंके नीवातोनि बोर अय्ते मत्‍तोरो, निमे बोना बारेमते अय्ते गवाइ हीसि मत्‍तिनो, ओर इंदके लोकुल्‍कुंक बापतिस्मा हीसंतोर. अंटोर लोकुल्‍क ओनहेकेन होंचंतुर,” इंचि वेहतुर.
JOH 3:27 अय्ते योहान ओर्क इल्‍हा जवाब हीतोर, “स्वर्गमताल पेन हियवद बोनके बतल दोर्का परो.
JOH 3:28 नना किरिस्‍तुन आयोन. नना सिराप ओनाहाटीं हर्रि तयार कियालय मुन्‍ने वातोन आंदुन. नना वेहता पोल्‍लेंक मिमेट गवाइ मंतिर!
JOH 3:29 मरमिन पेडल मत्‍तागेन मरमिन पेगिड मनंता. नना अय्ते मरमिन पेडाना पक्‍काते निलसि मनना ओना दंटागानसंटोन आंदुन. मरमिना पेडल बतलन्‍ना वेहते अद केंजसि आ दंटागाल वेल्‍लेन कूस आंतोर. ननागुडा अल्हेन, लोकुल्‍क ओनगा होननद हूळसि नना पुरागा कुसिते निंडसोत्‍तन.
JOH 3:30 इंदके ओना कदर वेल्‍लेन बेर्सगोम, नावा कदर वेल्‍लेन तक्‍को आयगोम अचोने!” इंचि योहान वेहतोर.
JOH 3:31 बोर अय्ते पोर्रोटाल वातोर, ओर अंटोर्कुंकन्‍ना पेद्‍दोड. बोर अय्ते इद दुनियाते पुटतोर, ओर इदे दुनियातोर आंदुर. अदुनहाटीं ओर ई दुनियाते जरगानवुना बारेमतेन वळ्कंतोर. गानि बोर अय्ते स्वर्गमताल वातोर ओर अंटोर्कुंकन्‍ना पेद्‍दोड आंदुर.
JOH 3:32 ओर अगा बतल अय्ते हूळतोर, केंजतोर अदुना बारेमतेन गवाइ वेहंतोर, गानि ओना गवाइतुन बोरे नम्मुर.
JOH 3:33 ओर वेहता गवाइतुन बोर अय्ते नम्मंतुरो, ओर अंटोर पेने सत्‍तेम इंचि पक्‍का कबुल कींतुर.
JOH 3:34 बोन अय्ते पेन लोहचीता, ओन पेन दाना आत्माते पुरागा निहता. अदुनहाटीं ओर सिराप पेनदा पोल्‍लेंगें वेहांतोर.
JOH 3:35 पेन बाबल ओना मर्रिन इरगा पावरम कींतोर, इंचि मर्रिना कय्‍दुक अन्‍नि अप्पजेपतोर.
JOH 3:36 पेनदा मर्रिन बोर अय्ते नम्मंतुरो, ओर्क बस्‍केळ्‍क पिस्सना पिस्वर दोर्कंता. गानि बोर अय्ते मर्रिना पोल्‍ले केंजुरो, ओर्क बस्‍केळ्‍क पिस्सना पिस्वर अय्ते दोर्केन दोर्को, गानि ओनपोर्रो पेन होंग पीसि मनंता.
JOH 4:1 येसु योहानुंकन्‍ना एक्‍को मंदिक बापतिस्मा हीसंतोर, योहानुंकन्‍ना एक्‍को मंदितुन ओना सिस्युल्क कीसंतोर, इंचि परिसिल्कुंक तेळियता.
JOH 4:2 (निजम हूळते, येसु कुद्‍दु बापतिस्मा हियाकोंदुर, ओना सिस्युल्क बापतिस्मा हियुंदुर.)
JOH 4:3 इद पोल्‍ले सामिंक तेळियतस्के ओर यहुदिया राज्येमतुन होळसि, मर्रा गालिल राज्येम होनालय पेय्सतोर.
JOH 4:4 गानि इंदके ओन्क सामरिया इनना राज्येमताल होनापीता.
JOH 4:5 इल्‍हा येसु सामरिया राज्येमते मनना सुकर इनना सहरते एवतोर. ई सुकर सहर, एनकटा यहुदिल्कुना मातिर दादल याकोब ओना मर्रि योसेपुंक हीता जेगाक दग्‍गेरा मत्‍ता.
JOH 4:6 अगा याकोबुना कुहि मत्‍ता. वेल्‍लेन लक्‍कुनाल ताकसि वाताहेंका नेरबळसि येसु, आ कुहिता पक्‍काते उद्तोर. अस्केळ्क पिय्यल आसि मत्‍ता.
JOH 4:7 अस्‍के तिननाहाटीं बतलन्‍ना तर्रालय येसुना सिस्युल्क नाटेंक होंचि मत्‍तुर. अदे वेलाते उंदि सामरिया मुरतळ एतुक वाता. अय्ते येसु, “उनालय नाकु इच्‍चो एर हीम,” इंचि अद मुरतटुन तल्कतोर.
JOH 4:9 अस्‍के अद मुरतळ, “निमे यहुदिन आसिगुडा, उंदि सामरिया मुरतटुन, उनालय एर हीम, इंचेके बल्हा तल्कसंतिन?” इंचि इत्‍ता. (यहुदिल्क सामरिया लोकुल्‍कुनतोनि बदे संबंदम इर्रकोंदुर. अदुनहाटीं अद अल्हा इत्‍ता.)
JOH 4:10 अस्‍के येसु, “ओक्‍कला निमे, पेनदा वरमतुन आनि उनालय एर हीम इंचि नीकुन तल्कानोर बोर आंदुरो, एरपाट कीसि मत्‍ते, निमेने कुद्‍दु नाकुन एर तल्किस मन्‍नेन, अस्‍के नना नीकु पिस्वर हियना एर हीसि मन्‍नेन,” इंचि इत्‍तोर.
JOH 4:11 अस्‍के आ मुरतळ, “कुहि अय्ते वेल्‍लेन लोतु मंता महाराज. निहगा एर तोरालय बाल्टिगुडा हिल्‍ले. इसोंटस्के ई पिस्वर हियना एर नीकु बल्हा दोर्कार?
JOH 4:12 माकु ई कुहि मावा मातिर दादल याकोब हीतोर. ई कुहिता एर ओर कुद्‍दु उनुंदुर, इंका ओना मर्क, एटिं, गोळ्कु-गोदां उनुंदुं. अय्ते निमे ओनकन्‍ना पेद्‍दोना?” इंचि पूसकीता.
JOH 4:13 अय्ते येसु, “ई एतुन उनना हरेक मनकंक मर्रा तप्‍पाकोंटा दूपांता.
JOH 4:14 गानि नना हियना एतुन बोर अय्ते उंटोरो, ओन्क मर्रा बस्‍केने दूपायो. नना हीता एर ओनालोप्‍पो बस्‍केळ्‍क ऊरसेके मनना ऊटालेसीं मारियसि, ओन्क बस्‍केळ्‍क पिस्सना पिस्वरतुन हिय्यार,” इंचि जवाब हीतोर.
JOH 4:15 अय्ते अद मुरतळ, “अल्हा अय्ते अद एर नाकु हीम महाराज! अद एतुन नना उट्‍टुनित्‍ते नाकु बस्‍केने दूपा आयो, नाकु मर्रा बस्‍केने एर ओयालय इच्‍चोर लक्‍कु वायना अव्‍सरमगुडा मन्‍नो,” इंचि इत्‍ता.
JOH 4:16 अस्‍के येसु दान, “होन, होंचि नीवा मुय्दोन केय्‍सि तरा होन,” इंचि इत्‍तोर.
JOH 4:17 अस्‍के अद, “नाकु मुय्दो हिल्‍लोर,” इंचि इत्‍तस्के येसु, “निमे निजमे वेहतिन! नीकु मुय्दो हिल्‍लोर,” इंचि इत्‍तोर.
JOH 4:18 पजा येसु, “अद बल्हा इत्‍ते, नीकु हेय्युर मुय्दुर मत्‍तुर, निमे इंदके बोनतोनि अय्ते मंचंतिनो ओरगुडा नीवा मुय्दो आयोर. अदुनहाटीं निमे निजम वेहतिन,” इंचि इत्‍तोर.
JOH 4:19 अस्‍के अद मुरतळ, “महाराज, नीवा पोल्‍लें केंजसि नाक अय्ते, निमे पेनदा कबुरतोन आंदिन इंचि नाकु तेळियता.
JOH 4:20 मावा एनकटा पेद्‍दाल्क इदे गुट्‍टापोर्रो मोळ्‍कुंदुर. गानि मिमेट बारे, मोळ्‍कना असल जेगा येरुसलेमे आंदु इंतिर,” इंचि अद मुरतळ येसुन इत्‍ता.
JOH 4:21 अस्‍के येसु दान्क इल्‍हा वेहतोर: “बाई नाकुन नम्मा! पेनबाबांक मोळ्‍कनाहाटीं इद गुट्‍टातगा हिलाकोंटे येरुसलेम सहर होनना अव्‍सरम हिल्‍ले, मिमेट बगानना मोळ्‍का परंतिट, इसोंटा वेला मुन्‍ने वासेक मंता.
JOH 4:22 मिमेट सामरिया राज्येमतोर मीकु तेळियवादान मोळ्‍कंतिर. गानि मुक्‍ति यहुदिल्कुनाहेंदाले वासेक मंता. अदुनहाटीं मोमोट यहुदिल्क अय्ते माकु तेळियतदुने मोळ्‍कंतोम.
JOH 4:23 गानि पेनदुन निजम मोळ्‍कानोर पेनदा सत्‍तेमतुन एरपाट कीसि ओर पेनदा आत्माते मोळ्‍कना वेला मुन्‍ने वासेक मंता. आनि अद वेला एव्‍से मंतां. बारित्‍ते इल्‍हा मोळ्‍कानोर्कुने पेन मेच्‍कुंता.
JOH 4:24 पेन आत्मा रूपमते मंता. अदुनहाटीं दान मोळ्‍कानोर अंटोरगुडा आत्माते, सत्‍तेमते मोळ्‍कना,” इंचि वेहतोर.
JOH 4:25 पजा अद मुरतळ, “किरिस्‍तु इनना मेसय्याल वासेक मंतोर इंचि नाकु एरपाटे. ओर वातस्के माकु अंटोर्क अन्‍नि पोल्‍लें वेहानुर,” इंचि येसुन इत्‍ता.
JOH 4:26 अस्‍के, “नीतोनि वळ्‍कानोन, ननाने ओन आंदुन,” इंचि येसु इत्‍तोर.
JOH 4:27 अच्‍चोटेन अगा ओना सिस्युल्क वातुर. येसु उंदि मुरतळतोनि वळकानद हूळसि ओर्क वेल्‍ले इचंत्रम आता. अय्नागानि बोरे ओन, “नीकु बतल गावाले? दानतोनि निमे बारि वळ्‍कसंतिन?” इंचिगुडा इना हिल्‍लुर.
JOH 4:28 अस्‍के अद मुरतळ अळकातुन अग्गेन होळसि नाटे होंचि लोकुल्‍कुंक वेहता.
JOH 4:29 “इदवेरादाका नना कीतव अन्‍निना बारेमते वरोर मनकल वेहतोर. ओरे किरिस्‍तु बारे, मिमेट वासि हुळट!” इंचि नाटेनोर्कुन इत्‍ता.
JOH 4:30 अस्‍के नाटेनोर नाटुन होळसि येसु मत्‍ता जेगातगा वातुर.
JOH 4:31 अद मुरतळ नाटे होत्‍तस्के, सिस्युल्क, “गिचचो तिन रब्‍बी!” इंचि येसुन विनंति कीतुर.
JOH 4:32 गानि येसु, “नहगा तिनालय इसंटा तिंडि मंता गदा, अद तिंडिता बारेमते मीकु बतले तेळियो,” इंचि सिस्युल्कुन इत्‍तोर.
JOH 4:33 अस्‍के सिस्युल्क, “गुरुनाहाटीं बोरन्‍ना तिनालय बतलन्‍ना तत्‍तुरा?” इंचि ओरद-ओरे वळ्ककुनालय दल्‍गतुर.
JOH 4:34 अस्‍के येसु ओर्क इल्‍हा वेहतोर: “नाकुन लोहतोना इच्‍चा मत्‍ताप ताकमळ, ओर वेहता कबाह्‍कुन पूरा कियमळ, इदे नावा तिंडि आंद.
JOH 4:35 वंजि वीतता पजा, इंका नालुं नेल्क अय्ते वंजि कोताक वांता, इंचि मिमेट इंतिर. गानि नना वेहनद केंजट, कळ्‍क विच्‍चि पोलमतेके बेस हुळट, पंटा कोताक वासि मंता.
JOH 4:36 पंटा कोय्‍यानोर बूति दोर्किच्‍कुंचेक मंतोर आनि बस्‍केळ्‍क पिस्सना पिस्वरताहाटीं पलम जमा कीसेक मंतोर. दीनहेंदाल वीततोर, कोय्‍यानोर इव्वुरगुडा कुसिते कलियसि मना परांतुर.
JOH 4:37 वरोर वीतंतोर, इंकावरोर कोय्‍यंतोर इनना वेसुड इगे निजम आंता.
JOH 4:38 बोरो वेरेतोर कस्‍टपळसि पंडिस्ता पंटातुन कोय्‍यालय नना मीकुन लोहतन. मिमेट कस्‍टपळा हिल्‍लिर, गानि ओर कीता कस्‍टमता पायदा मीकु दोर्कसंता,” इंचि येसु वेहतोर.
JOH 4:39 “नना कीतव अन्‍निना बारेमते वरोर मनकल नाकु वेहतोर,” इंचि वेहता, आ मुरतटा गवाइतुन केंजसि, अद नाटेना वेल्‍लेन मंदि सामरिया लोकुल्‍क, येसुनपोर्रो विस्वासम इरतुर.
JOH 4:40 सामरिया लोकुल्‍क येसुनगा वासि, “निमे महगा मन्‍नु,” इंचि विनंति कीताहेंके, येसु रोंड रोजकु अगा आगतोर.
JOH 4:41 येसु कराहता पोल्‍लें केंजसि इंका वेल्‍लेन लोकुल्‍क ओन विस्वासम कीतुर.
JOH 4:42 “सिराप निमे वेहताहेंकेन मोमोट येसुन नम्मा हिल्‍लोम. इंदके कुद्‍दु मोमोटे ओना पोल्‍ले केंजसि, दुनियातोर्कुन पिसागोटना निजम किरिस्‍तु ईरे आंदुर इंचि मोमोट विस्वासम कीतोम,” इंचि आ लोकुल्‍क मुरतटुन इत्‍तुर.
JOH 4:43 रोंड रोजकु आतंका, येसु अगटाल गालिल राज्येमते होत्‍तोर.
JOH 4:44 पेनदा कबुरतोंक ओना सतता देसेमते कदर दोर्को, इंचेके येसु मुन्‍नेने वेहचि मत्‍तोर.
JOH 4:45 दाटसि होनना पंडुगुनाहाटीं गालिल राज्येमता लोकुल्‍कगुडा येरुसलेम होंचि मत्‍तुर. अगा येसु कीतव अन्‍नि कबाह्‍कुन ओर हूळतुर. अदुनहाटीं येसु गालिल राज्येमते वातस्के ओर अंटोर येसुन बेस दग्‍गेरा कीकुत्‍तुर.
JOH 4:46 बद नाटे अय्ते येसु एतुन अंगुर पानकम कीतोर, अदे काना नाटे ओर मर्रा होत्‍तोर. गालिल राज्येमता कपर्नाहुम इनना नाटे, राजाना हिळु कबळ कियाना वरोर सायाबुना मर्रि बिमार अरसि मत्‍तोर.
JOH 4:47 अय्ते यहुदिया राज्येमताल गालिल राज्येमते येसु वातोर इंचि ओन्क कबुर तेळियताहेंका ओर येसुंक कलियालय होत्‍तोर. होंचि येसुना काल्कुनपोर्रो अरसि, “नावा मर्रि इरगा बिमार आसि हायनाल आसि मंतोर, निमे ओन बेस कियालय नातोनि ताका,” इंचि विनंति कीतोर.
JOH 4:48 अस्‍के येसु, “चिन्‍हां, इचंत्रमता कबाह्‍क हूळवद मिमेट नम्मनोर आयिर!” इंचि ओन इत्‍तोर.
JOH 4:49 आ सायाब, “ना मर्रि हायका मुन्‍नेन निमे ताका सामि,” इंचि विनंति इत्‍तोर.
JOH 4:50 अस्‍के, “नीवा मर्रि पिस्संतोर, निमे होन,” इंचि येसु ओन इत्‍तस्के, ओना पोल्‍लेतुन नम्मिसि ओर तिरियसि होत्‍तोर.
JOH 4:51 ओर हर्रि पीसि होंचेकेन मत्‍तोर, नड्‍डुम हरदेने ओना जीतागाह्‍क कलियसि, “सायाब, नीवा मर्रि बेस आतोर,” इंचि वेहातुर.
JOH 4:52 अस्‍के “नावा मर्रि बद वेलाक बेस आतोर?” इंचि ओर्कुन पूसकीतोर. “निन्‍ने पिय्यल उंद एगनेंके ओना एळ्कि रेय्ता सायाब!” इंचि ओर वेहतुर.
JOH 4:53 अस्‍के आ सायाब ओर वेहतद केंजसि, बद वेलाते येसु, “नी मर्रि पिस्संतोर,” इंचि इत्‍तोरो, अदे वेलाते ओना मर्रि बेस आतोर, इंचि ओन्क तेळियसोत्‍ता. अदुनहाटीं ओर, ओना लोतोर अंटोर येसुन नम्मुकुत्‍तुर.
JOH 4:54 यहुदियाताल गालिलते वासि येसु कीतद इद रोंडो इचंत्रमायना चिन्‍हे आंद.
JOH 5:1 पजा येसु यहुदिल्कुना उंदि पंडुगुनाहाटीं येरुसलेम सहर होत्‍तोर.
JOH 5:2 येरुसलेम सहरते गोर्रे दरबाजा इनना जेगातगा उंदि सेरवु मंता, दान इब्रानि बासाते बेतेस्‍दा इंचि इंतुर. आ सेरवुना ओड्‍डुंक हेय्युं गुडसें वाटसि मत्‍तां.
JOH 5:3 बदो उंदि वेलाते पेनदा दूता वासि अद एतुन लोपुंदु, अल्हा लोपतस्के, अद एते बोर मनकल अय्ते मुन्‍ने होळियंतोरो ओर मनकल ओना बसोंटा बिमार अयना बेस आयुंदु. अदुनहाटीं पेनदा दूता एतुन बस्के लोपार इंचि एदुर हूळसेक गुड्‍डोर्कु, गूनोर्क, कुंटोर्क, लकवा बिमारतोर इल्‍हा वेल्‍लेन मंदि आ गुडसेने जेगा पीसि मनुंदुर.
JOH 5:5 अगा मत्‍तोरव्टे मुप्‍पै एनिमिदि वर्सानाल बिमार मत्‍ता वरोर मनकल मत्‍तोर.
JOH 5:6 ओर अगा मींडसि मत्‍तद येसु हूळतोर. हूळसि ओर वेल्‍लेन वर्सानाल कुक्‍कि पीसि मत्‍तद एरपाट कीसि ओनगा होत्‍तोर. होंचि ओन, “नीकु बिमारताल बेस आयानद मंतना?” इंचि पूसकीतोर.
JOH 5:7 अस्‍के आ मनकल, “नाकु बेस आयगोम इंचि मंता सामि! गानि बतल कीकन? एतुन लोपतस्के नाकुन आ एतगा ओयालय नहगा बोरे हिल्‍लुर. एतुन लोपतस्के मेल्‍लगा-मेल्‍लगा नना होननदाका बोरन्‍ना वरोर नाकन्‍ना मुन्‍नेन होळियंतोर,” इंचि वेहतोर.
JOH 5:8 अस्‍के येसु ओन, “अय्ते तेदा! तेदसि नीवा कटुल पीसि ताकसेक होन,” इंचि इत्‍तोर.
JOH 5:9 येसु ओन अल्हा इत्‍ता इन्‍मळे आ मनकल बेस आतोर. आसि, ओना कटुल पीसि ताकसेक होत्‍तोर. इद गटना यहुदिल्कुना नोमकेम रोजुननाड जर्गता.
JOH 5:10 अदुनहाटीं बिमारताल बेस आता मनकन, “नोमकेम रोजुने निमे इल्‍हा कटुल तेहचि ताकमळ मावा दर्मसास्‍त्रम परकारम न्‍यायम आयो,” इंचि यहुदि पेद्‍दाल्क इत्‍तुर.
JOH 5:11 जवाबुने आ मनकल, “नाकुन बेस कीतोरे, नाकुन नीवा कटुल पीसि ताकसि होन इत्‍तोर,” इंचि वेहतोर.
JOH 5:12 अस्‍के “नीकुन कटुल पीसि ताका इंचि वेहतोर, ओर बोर आंदुर?” इंचि यहुदि पेद्‍दाल्क ओन पूसकीतुर.
JOH 5:13 गानि अगा वेल्‍लेन मंदि मत्‍तुर, येसुगुडा अगटाल पेय्सि होत्‍तोर. अदुनहाटीं ओन बेस कीतोर बोर आंदुर इंचि, आ बेस आता मनकंकगुडा तेळिया हिल्‍ले.
JOH 5:14 इदंता आतंका येसु आ मनकंक गुळिते कलियसि, “हूळा, निमे इंदके बेस आतिन! मर्रा पापि कबाह्‍कुना जोलिक होन्‍मा. होत्‍तिनित्‍ते दीनकन्‍ना एक्‍को बिमार अर्रंतिन,” इंचि वेहतोर.
JOH 5:15 पजा आ मनकल यहुदिल्कुना पेद्‍दाल्कुंक कलियसि, “नाकुन बिमारताल बेस कीतोर, येसु आंदुर,” इंचि वेहतोर.
JOH 5:16 येसु इसोंटा कबाह्‍क नोमकेम रोजुननाड कीतोर इंचि यहुदि पेद्‍दाल्क येसुन तकलिप कियालय दल्‍गतुर.
JOH 5:17 अस्‍के येसु ओर्कुन, “ना बाबाल बस्‍केळ्‍क कबळ कीसेकेने मनंतोर. अदुनहाटीं ननागुडा कबळ कीसेकेने मनंतन,” इंचि इत्‍तोर.
JOH 5:18 येसु इल्‍हा इत्‍ताहेंका यहुदि पेद्‍दाल्क ओन हव्कालय उंदे पट्‍टु पीतुर. बारित्‍ते नोमकेम रोजुने कबळ कियानायो इत्‍ता नियमतुन ओर हेळाहतोर. आनि पोर्रोटाल, पेनदुन “ना बाबाल,” इंचि वेहचि “नना पेनदुक समानमतोन” इंचि ओनद ओरे वेहकुत्‍तोर.
JOH 5:19 अस्‍के येसु ओर्क इल्‍हा वेहतोर: “नना मीकु निजम-निजम वेहचंतन, मर्रि ओनद-ओर बतले किय्योर. गानि बाबो बतल-बतल अय्ते कींतोर, बाबो कियनदुन हूळसि मर्रि अल्हेन कींतोर.
JOH 5:20 मर्रिनपोर्रो बाबोंक वेल्‍लेन पावरम मंता, अदुनहाटीं ओर कियानव अन्‍नि कबाह्‍कुन ओना मर्रिंक हुपिच्‍चंतोर. वायना रोजकुने इवुंकन्‍ना पेद्‍दा-पेद्‍दा कबाह्‍क कीसि मर्रिंक हुप्‍सना मंता. अस्‍के मिमेट हूळसि अंटोर इचंत्रम आकिर.
JOH 5:21 बल्हा अय्ते बाबो हातोर्कुन मर्रा जीवाते तेहंतोरो, अल्हेन मर्रिगुडा ओन्क इस्‍टमातोर्कुन मर्रा जीवाते तेहंतोर.
JOH 5:22 बाबोनद अंटोर कदर कींतुर. अल्‍हेने मर्रिना कदरगुडा अंटोर लोकुल्‍क कियना इंचि बाबाल बोनदे न्‍यायम कियाकोंटा, न्‍यायम कियना पूरा अदिकारम मर्रिंक हीतोर. मर्रिना कदर बोर किय्युरो, ओर मर्रिन लोहचीता बाबाना कदरगुडा किय्युर.
JOH 5:24 नना निजम-निजम वेहासेक, बोर अय्ते नना वेहना पोल्‍लेन केंजसि नाकुन लोहतोना पोर्रो विस्वासम इर्रंतोर, ओन्क बस्‍केळ्‍क पिस्सना पिस्वर दोर्कंता. पेन ओन्क सिक्‍साता आदेस हिय्यो, ओर हामुरताल पेय्सि पिस्वरतुन संपादिंच्‍कुंतोर.
JOH 5:25 नना निजम-निजम वेहासेक, हासोत्‍तोरगुडा पेनदा मर्रिना अल्किर केंजना वेला वासेक मंता. अद अय्ते वासे मंता. बोर अय्ते अद अल्किरतुन केंजांतुर, ओर्क पिस्वर दोर्कार.
JOH 5:26 बल्हा अय्ते पेनबाबाल कुद्‍दु पिस्वरता मालक आंदुर, अल्हेन मर्रिनगुडा पिस्वरता मालक कीतोर.
JOH 5:27 इच्‍चोने आयाका, पेनबाबाना मर्रि मनकना रूपमते पुटताहाटीं ओन्क लोकुल्‍कुना न्‍यायम कियना अदिकारम हीतोर.
JOH 5:28 मिमेट इदुन केंजसि इचंत्रम आयमटु. बारित्‍ते मुन्‍ने इसोंटा वेला वायनद मंता गदा, हातोर अंटोर पेनदा मर्रिना अल्किर केंजानुर.
JOH 5:29 पजा बोर अय्ते बेस पुन्‍नेम कबाह्‍क कीतुरो ओर अंटोर बस्‍केळ्‍क पिस्सना पिस्वरहाटीं मर्रा जीवाते तेदानुर. आनि पापि कबाह्‍क कीतोर बारे सिक्‍साताहाटीं मर्रा जीवाते तेदानुर.
JOH 5:30 नावद नना बतले किया पर्रोन. पेनबाबानाहेंदाल केंजतापे न्‍यायम कींतन. नना नावा इच्‍चातुन पूरा कियालय वाया हिल्‍लेन, नाकुन लोहचीता पेनबाबाना इच्‍चातुन पूरा कियालय वातन. अदुनहाटीं नना कियना न्‍यायम सत्‍तेम मंता.”
JOH 5:31 “नावा बारेमते ननाने गवाइ वेहकुत्‍ते, नावा गवाइ निजमतद आयो.
JOH 5:32 गानि नावा बारेमते गवाइ वेहालय इंकावरोर मंतोर. ओर वेहना गवाइ सत्‍तेम इंचि नाक एरपाट मंता.
JOH 5:33 मिमेट मीवा मनकालोर्कुन योहाननेके लोहतिर. ओर मीकु सत्‍तेमता गवाइ वेहतुर.
JOH 5:34 मीकु मुक्‍ति दोर्कगोम, इंचि इव पोल्‍लें नना मीकु वेहासेक मंतन अचोने. गानि नावा बारेमते लोकुल्‍कुना गवाइता अव्‍सरम नाकु हिल्‍ले.
JOH 5:35 योहान वेडसिलेह्का पोत्‍सि मीकु वेलगु हीतोर. मीकुगुडा गडसेमताहाटीं आ वेलगुने कूस मनालय बेस अनपिस्ता.
JOH 5:36 गानि योहानुना गवाइकन्‍ना पेद्‍दा गवाइ नहगा मंता. बारित्‍ते पूरा कियनाहाटीं पेनबाबाल नाकु हीता कबाह्‍क आनि नना कियना कबाह्‍क. इवे पेनबाबाल नाकुन लोहतोर इत्‍तादांकु गवाइ मंतां.
JOH 5:37 नाकुन लोहचीता पेनबाबाल कुद्‍दु नावा बारेमते गवाइ वेहतोर. गानि मिमेट बस्‍केने ओना अल्किर केंजा हिल्‍लिर, बस्‍केने ओना रूपमतुन हूळा हिल्‍लिर.
JOH 5:38 अचोने आयका ओर लोहतोना पोर्रो मिमेट विस्वासम इर्रुवाहेंका, ओर कराहता पोल्‍लें मीवा मनसुना लोप्पो मना पर्रों.
JOH 5:39 बस्‍केळ्‍क पिस्सना पिस्वर दर्मसास्‍त्रमहेंदाल दोर्कंता इंचि मिमेट अव्टे पह्कट, अदे दर्मसास्‍त्रम नावा बारेमते गवाइ वेहचंता.
JOH 5:40 अयना, बस्‍केळ्‍क पिस्सना पिस्वरहाटीं मिमेट नहगा वायालय हूळिर.
JOH 5:41 नना मनकालोराहेंदाल कदर कोरोन.
JOH 5:42 बारित्‍ते मिमेट बसंटोर आंदिरो नाकु एरपाटे. मीलोप्‍पो पेनदाहाटीं पावरम हिल्‍ले.
JOH 5:43 नना नावा बाबाना पोरोल्ते वातन, गानि मिमेट नाकुन स्विकार किया हिल्‍लिर. गानि बोरन्‍ना वेरेतोर, ओना पोरोल्ते ओरे वायानय्ते मिमेट ओन स्विकार कींतिर.
JOH 5:44 मीवद मिमेटे कदर कीकुनमळ इत्‍ते मीकु वेल्‍लेन इस्‍टम. गानि पेनदाहेंदाल दोर्कना कदरतुन मात्रम बोरे पहका हूळिर. असोंटस्के मिमेट नापोर्रो बल्हा विस्वासम किया परांतिर?
JOH 5:45 बाबाना मुन्‍ने नना मीपोर्रो तप्पु दोसतन इंचि इनकुन्‍मट. मिमेट अय्ते मूसाना पोर्रो आसे पडसि मनंतिर, आ मूसाले मीवापोर्रो तप्पु दोसंतोर.
JOH 5:46 मिमेटगिंटा मूसान पोर्रो विस्वासम कियानय्ते, नावापोर्रो इंका विस्वासम कींतिर, बारित्‍ते मूसाल नावा बारेमते रासतोर.
JOH 5:47 मूसाल रासता पोल्‍लेन पोर्रोगुडा मीवा विस्वासम हिल्‍ले अय्ते, नावा पोल्‍लेन मिमेट बल्हा नमकिर?” इंचि येसु इत्‍तोर.
JOH 6:1 अद आता पजा येसु गालिल इनना समुद्रमतुन दाटसि हब्बेर ओड्‍डुंक होत्‍तोर.
JOH 6:2 बिमार मत्‍तोर्कुन बेस कीसि येसु इचंत्रम आयाना कबाह्‍क कीतोर. आ कबाह्‍कुन हूळसि, वेल्‍लेन मंदि ओना पज्जो-पज्जो वासेक मत्‍तुर.
JOH 6:3 पजा येसु गुट्‍टापोर्रो एकसि, अगा ओना सिस्युल्कुनतोनि उद्तोर.
JOH 6:4 अव रोजकुने यहुदिल्कुना दाटसि होनना पंडुगु दग्गेर्क एवसि मत्‍ता.
JOH 6:5 पजा येसु अगटाल हूळतोरय्ते, वेल्‍लेन मंदि ओनहेके वायनद ओन्क दिसतुर. अस्‍के, “ईरकु अंटोर्क तिनालय तिंडि मनम बगाटाल अस्सि तरकोम?” इंचि पिलिपुन पूसकीतोर.
JOH 6:6 येसुंक अन्‍नि एर्के मत्‍ता गानि पिलिपुना परिक्‍सा हूळालय, ओन इसोंटा सवाल पूसकीतोर.
JOH 6:7 अस्‍के पिलिपु, “ईराहाटीं रोंड नुह्कु एंडि रूपेना हारिं अस्सि तच्‍चि तासिना, वरो-वरोंक उंद-उंदि मुक्‍कागुडा एव्‍वा परो,” इंचि जवाब इत्‍तोर.
JOH 6:8 अस्‍के येसुना सिस्युल्‍कुनाल वरोर सिस्युड, सिमोन पत्रुना तम्मुर अंदरियल इनानोर, “इगे वरोर सिन्‍ने पेडानगा हेय्युं जोन्‍ना हारिं, रोंड बोळ्स्ता जिम्मां मंतां, गानि इच्‍चा वेल्‍ले मंदिक इव बगा हालनूं?” इंचि येसुन इत्‍तोर.
JOH 6:10 अस्‍के येसु, “अंटोर लोकुल्‍कुन उद्‍दालय वेहाट,” इंचि इत्‍तोर. अगा वेल्‍लेन पच्‍चाटा जाडि मत्‍ता. अगा उदतोरव्टेटाल दग्‍गेर-दग्‍गेर हेय्युं वेय्‍कुना मंदि मांड्‍से मत्‍तुर.
JOH 6:11 पजा येसु आ हारिन कय्‍दे पीसि पेनदुक दन्यवाद कीतोर. पजा आ हारिन उद्तोर अंटोर्क वाटालय ओना सिस्युल्कुंक हीतोर. जिम्मानगुडा अल्हेन कीतोर. अंटोर पीरनिंडा तित्‍तुर.
JOH 6:12 ओर अंटोर पीरनिंडा तित्‍तंका, “बतंगे उत्‍तगा पोच्‍चमन्‍नि, मिगुल्तव अन्‍नि जमा कीम्‍टु,” इंचि येसु सिस्युल्कुंक वेहतोर.
JOH 6:13 तिनालय लोकुल्‍कुंक हीता हेय्युं हारिनाल मय्तव तुकडें जमा कीते, पन्‍नेंड तट्‍टां निंडतां.
JOH 6:14 येसु कीता इसोंटा अद्‍बूतामाता चिन्‍हतुन हूळसि लोकुल्‍क, “निजमे! इद दुनियाते वरोर पेनदा कबुरतोर वायानोर मत्‍तोर, ओर ईरे आंदुर,” इंचि इनालय दल्‍गुतुर.
JOH 6:15 पजा लोकुल्‍क ओन राजाल कियालय बल्हैना बल्‍मि कींतुर, इंचि ओन्क तेळियता. अदुनहाटीं ओर वरोरे मर्रा गुट्‍टातेके पेय्सि होत्‍तोर.
JOH 6:16 नुल्‍पेटा वेलाक येसुना सिस्युल्क गालिल समुद्रमता ओड्‍डुंक होत्‍तुर.
JOH 6:17 हीकट अय्नागानि येसु वायाहिल्‍लोर इंचि सिस्युल्क उंदि डोंगाते उद्‍दिस समुद्रमता हब्बेटा बाजुंक मनना कपर्नाहुम इनना सहर होनालय पेय्‍स्‍तुर.
JOH 6:18 वळि इरगा वासेक मत्‍ताहेंका समुद्रमते पेद्‍दा-पेद्‍दा तडां तेदसेक मत्‍तां.
JOH 6:19 ओरा डोंगा हेय्युं-हारुं किलोमिटर्क मुन्‍ने होत्‍ता बारे, अचानक येसु एतापोर्रो ताकसेके डोंगा दग्‍गेरा वायानद ओर हूळसि, इरगा वेरियतुर.
JOH 6:20 गानि येसु, “ननाने आंदुन! वेरियमट,” इंचि ओर्कुन इत्‍तोर.
JOH 6:21 इत्‍तारित्‍ते ओर कूस आसि, येसुन डोंगाते उपिच्‍कुनालय तयार आतुर. अच्‍चोटेन ओर बगा अय्ते होनालय पेय्‍स्‍तुर अद जेगातगा ओरा डोंगा एवता.
JOH 6:22 येसु सामि पेनदुक दन्यवाद कीसि, अंटोर्क हारिं हीता जेगातगा ओन्क कलियालय लोकुल्‍क इंकुंदि रोजु पंगासि जमा आयालय दल्‍गतुर. अगा सिराप उंदे डोंगा मत्‍ता. अद डोंगाते अय्ते सिराप ओना सिस्युल्‍के उद्‍दिस होत्‍तुर. येसु ओरतोनि होना हिल्‍लोर. इंचि आ लोकुल्‍कुंक एरपाटे मत्‍ता. गानि पज्जोटाल तिबेरिया नाटेनाल वेरे इच्‍चुं डोंगां अगा वासि मत्‍तां.
JOH 6:24 पजा आ लोकुल्‍क येसुन, ओना सिस्युल्कुन पहकतुर, गानि ओर्क बोरे दोर्का हिल्‍लुर. अदुनहाटीं ओर लोकुल्‍क अगा मत्‍ता डोंगाने उद्‍दिस येसुन पहकालय कपर्नाहुम होत्‍तुर.
JOH 6:25 पजा लोकुल्‍क हब्बेर ओड्‍डु एवतंका येसुन अगा हूळसि, “रब्‍बी! निमे इगे बस्के वातिन?” इंचि पूसकीतुर.
JOH 6:26 अस्‍के येसु इल्‍हा वळकालय दल्‍गतोर: “नना निजम-निजम वेहासेक, नना कीता अद्‍बूतामाता चिन्‍हन हूळसि मिमेट नाकुन पह्कसेक हिल्‍लिर. नना मीकु पीरनिंडा तिंडि तासतन इंचि नाकुन पहकसंतिर.
JOH 6:27 हवसोननसोंटा तिंडि पज्जो मिमेट होनमट. दानकु बदुल, बस्‍केळ्‍क पिस्सना पिस्वर हियानद, बस्‍केने हव्वाकोंटा मनना तिंडितुन पह्कट. अदुन हियना अदिकारमता सिक्‍का पेनबाबाल नापोर्रो वाटतोर, अदुनहाटीं असोंटा तिंडि, मनकना रूपमते पुटतोन नना, मीकु हिया परांतन.”
JOH 6:28 अस्‍के लोकुल्‍क, “अय्ते पेनदा कबळ कियालय, मोमोट बतल कियना?” इंचि येसुन पूसकीतुर.
JOH 6:29 पूसकीतस्‍के, “पेन बोन अय्ते लोहतनो, ओनपोर्रो मिमेट विस्वासम इर्रट,” इंचि येसु जवाब हीतोर.
JOH 6:30 पजा लोकुल्‍क, “मावा एनकटा पेद्‍दाल्क इजिप्‍त देसेमताल वायनेंके बय्‍लि जेगातगा मन्‍ना इनना तिंडि तित्‍तुर. ओर्क तिनालय तिंडि मूसाल स्वर्गमताल हीतोर, इंचि दर्मसास्‍त्रमते रासि मत्‍तापे ओर्क आ तिंडि तिनालय दोर्कुता. अय्ते मोमोट नीपोर्रो विस्वासम इर्रलय इंदके निमे माकु बसोंटा चिन्‍ह हुप्‍संतिन?” इंचि पूसकीतुर.
JOH 6:32 अस्‍के येसु, “नना निजम-निजम वेहासेक, स्वर्गमताल तिंडितुन मीकु हीतोर मूसाल आयोर, नावा बाबाल हीतोर. इंदके नावा बाबाल स्वर्गमताल वायना आ निजमाता तिंडितुन मीकु हीसंतोर.
JOH 6:33 बारित्‍ते पेनबाबाल स्वर्गमताल लोहतदे, इद दुनियातोर्क पिस्वरतुन हींता. पेनबाबाल लोहचीता निजमाता तिंडि अदे आंद,” इंचि वेहतोर.
JOH 6:34 अस्‍के लोकुल्‍क, “अय्ते अद तिंडितुन माकु बस्‍केळ्‍क हीम सामि,” इंचि इत्‍तुर.
JOH 6:35 अस्‍के येसु ओर्क इल्‍हा वेहालय दल्‍गतोर, “पिस्वर हियना तिंडि ननाने आंदुन. नहगा बोर अय्ते वांतुर, ओर्क बस्‍केने करवेस्सो. बोर अय्ते नापोर्रो विस्वासम इर्रंतुर, ओर्क बस्‍केने दूपा आयो.
JOH 6:36 गानि नना मीकु मुन्‍नेन वेहताप, मिमेट नाकुन हूळसिगुडा नावापोर्रो विस्वासम इर्रा हिल्‍लिर.
JOH 6:37 अयना बाबाल बोर-बोर्कुन अय्ते नाकु अप्‍पजेप्‍पंतोर, ओरे नहगा वांतुर. नहगा वायानोर्कुन नना बस्‍केने मलाहचि लोहोन.
JOH 6:38 बारित्‍ते नना नावा इच्‍चां पूरा कियालय स्वर्गमताल हिळु रेय्‍सि वाया हिल्‍लेन. नाकुन लोहतोना इच्‍चातुन पूरा कियालय नना वातन.
JOH 6:39 नाकुन लोहतोना इच्‍चा बतल इत्‍ते, नाकु अप्पजेपतोर्कुन वरोरगुडा तप्‍सोनाकोंटा हूळना आनि आकिरता रोजु ओर्कुन मर्रा जीवाते तेहना.
JOH 6:40 नावा बाबाना इच्‍चा बतल मंता इत्‍ते, मर्रिनेके हूळसि ओनपोर्रो विस्वासम कियानोर अंटोर्क बस्‍केळ्‍क पिस्सना पिस्वर दोर्कना. अल्हा बोर अय्ते विस्वासम इर्रंतुरो, ओर्कुन नना आकिरता रोजुने मर्रा जीवाते तेहांतन,” इंचि येसु ओर्क वेहतोर.
JOH 6:41 “स्वर्गमताल रेय्ता तिंडि ननाने आंदुन,” इंचि येसु इत्‍तस्के यहुदि पेद्‍दाल्क ओरद ओरे येसुना बारेमते, “अरे! ईर योसेप इनानोना मर्रि आयोरा! ईना तल्‍लुर-बाबो मनाकु एरपाट. अय्ते ईर, नना स्वर्गमताल वातोनांदुन, इंचि बल्हा इंचंतोर?” इंचेके गुल्‍गालय दल्‍गतुर.
JOH 6:43 अस्‍के येसु ओर्कुन इल्‍हा इत्‍तोर, “मीवद मिमेटे गुल्‍गकुनमट.
JOH 6:44 नाकुन लोहचीता बाबाल, बोना मनसुने अय्ते नहगा वायना इच्‍चातुन पुटसंतोरो, ओरे नहगा वांतुर. वेरे बोरे वाया परुर. आकिर रोजुने नहगा वातोर्कुन ननाने जीवाते तेहांतन.
JOH 6:45 पेनदा कबुरतोरा पुस्तकाल्कुने, अंटोर लोकुल्‍कुंक पेने कराहंता, इंचि रासि मंता. बोर अय्ते बाबाना पोल्‍लें केंजांतुर, करियांतुर, ओर अंटोर नहगा वांतुर.
JOH 6:46 पेनबाबान बोरे हूळा हिल्‍लुर. नना अगटाल वातोनांदुन, ननाने हूळतन.
JOH 6:47 नना निजम-निजम वेहासेक, नापोर्रो विस्वासम कीतोन्कु बस्‍केळ्‍क पिस्सना पिस्वर दोर्कते इनकुंटु.
JOH 6:48 पिस्वर हियना तिंडि ननाने आंद.
JOH 6:49 मीवा एनकटा पेद्‍दाल्क बय्‍लि बूमिते पेन अरहता मन्‍ना इनना तिंडि तित्‍तुर गानि हातुर.
JOH 6:50 गानि स्वर्गमताल हिळु वाता तिंडितुन तित्‍तोर, बस्‍केने हायोर.
JOH 6:51 स्वर्गमताल वाता जीवाते मनना तिंडि ननाने आंद. बोर अय्ते ई तिंडितुन तिंतुरो, ओर बस्‍केळ्‍क जीवातेन मनांतोर. ई तिंडि ना मेंदुल आंद, नना इद मेंदुलतुन दुनियातोरा पिस्वरताहाटीं हींतन,” इंचि इत्‍तोर.
JOH 6:52 इद केंजसि यहुदिल्क, “ओर मनकल ओना मेंदुलतुन मनाकु तिनालय बल्हा हिया परंतोर आयो?” इंचि ओरद-ओरे वदुरकुनालय दल्‍गतुर.
JOH 6:53 अस्‍के येसु, “हिके केंजट, निजम नना वेहांतन. मिमेट, मनकना रूपमते पुट्तोना, मेंदुलतुन तिन्‍वा, ओना नेत्‍तुरतुन उन्‍वा, मीकु पिस्वर हिल्‍ले.
JOH 6:54 गानि बोर अय्ते नावा मेंदुलतुन तिंतुर, नावा नेत्‍तुरतुन उंटुर, ओर्क बस्‍केळ्‍क पिस्सना पिस्वर दोर्कंता. आकिर रोजुने ओर्कुन नना जीवाते तेहांतन.
JOH 6:55 बारित्‍ते नावा मेंदुल निजमाता तिंडि आनि नावा नेत्‍तुर निजमाता उनानद आंदु.
JOH 6:56 बोर अय्ते नावा मेंदुलतुन तिंतुर, नावा नेत्‍तुरतुन उंटुर, ओर नातोनि, नना ओरतोनि निलसि मनंतन.
JOH 6:57 नाकुन लोहता जीवाते मनना नावा बाबाना ताकततोनि, नना जीवाते मंतन. अल्हेन बोर अय्ते नावा मेंदुलतुन तिंतुर, ओर नाहेंदाल जीवाते मनांतुर.
JOH 6:58 स्वर्गमताल हिळु वाता निजम तिंडि ननाने आंदुन. मीवा एनकटा पेद्‍दाल्क मन्‍ना इनना तिंडि तिंचिगुडा हातुर, गानि इद तिंडितुन तिनानोर मात्रम बस्‍केळ्‍क जीवाते मनांतुर,” इंचि येसु ओर्क वेहतोर.
JOH 6:59 कपर्नाहुम सहरता दर्मसास्‍त्रम कराहना लोते, कराहनेंके येसु इव पोल्‍लें वेहतोर.
JOH 6:60 इव पोल्‍लें केंजसि, येसुना सिस्युल्‍कुनाल वेल्‍ले मंदि सिस्युल्क, “इव पोल्‍लें तेळियालय वेल्‍लेन कस्‍टम मंता, इवुन बोर केंजंतुर?” इंचि इनालय दल्‍गतुर.
JOH 6:61 सिस्युल्क गुल्‍गकुंचंतुर इंचि येसु एरपाट कीसि ओरतोनि इल्‍हा वळकालय दल्‍गतोर, “मीकु इव पोल्‍लें केंजसि, कस्‍टमासंतना?
JOH 6:62 अय्ते मनकना रूपमते पुटतोन नना, मुन्‍ने बगा मत्‍तन अगा मल्सि होननेंके हूळानय्ते, अस्‍के मिमेट बतल इंदकिरो मरि?
JOH 6:63 मेंदुल पिस्वर हिया परो, दानकु बतल विलुवा हिल्‍ले. सिराप पेनदा आत्मे पिस्वर हींता. नना वेहना पोल्‍लेंगें आत्मा आनि पिस्वर आंद.
JOH 6:64 गानि मीलोप्‍पो इच्‍चुर नावा पोल्‍लेन नमवोरगुडा मंतुर,” इंचि इत्‍तोर. बारित्‍ते, ओन नम्मनोर बोर, ओन वेरे लोकुल्‍कुंक पीसि हियानोर बोर? इत्‍तद येसुंक मुन्‍नेटाले एर्का मंता.
JOH 6:65 पजा येसु, “नना मीकु वेहचि मत्‍तन गदा, बाबाल लोहवद बोरे नहगा वाया परुर इंचि. अदुनहाटींगे इव अन्‍नि पोल्‍लें नना मीकु वेहतन,” इंचि इत्‍तोर.
JOH 6:66 अस्‍केटाल वेल्‍लेटुर येसुना सिस्युल्क येसुन होळसि मल्सि होत्‍तुर, मर्रा बस्‍केने ओना पज्जो होना हिल्‍लुर.
JOH 6:67 अदुनहाटीं येसु पन्‍नेंड सिस्युल्कुन, “मिमेटगुडा मल्सि होनालय हूळसंतिरा?” इंचि पूसकीतोर.
JOH 6:68 अस्‍के सिमोन पत्रु, “सामि, मोमोट इंका बोनगा दाकोम? बस्‍केळ्‍क पिस्सना पिस्वर हियना पोल्‍लें अय्ते निहागेन मंतां!
JOH 6:69 पेन लोहता पवित्रुन निमेन आंदिन इंचि मोमोट विस्वासम कीसि एरपाट कीतोम,” इंचि इत्‍तोर.
JOH 6:70 अस्‍के येसु, “मीकुन पन्‍नेंड मंदितुन ननाने पेरतन, अय्नागानि मी अव्टे वरोर देय्यम मंतोर,” इंचि सिस्युल्कुन इत्‍तोर.
JOH 6:71 येसु इद पोल्‍ले इस्‍कारियोत नाटेना सिमोनुना मर्रि यहुदाना बारेमते वळ्कतोर. पन्‍नेंड मंदि सिस्युल्‍कुनाल ओर वरोरे येसुन पज्जोटाल दोकाते पीसि हियनोर मत्‍तोर.
JOH 7:1 इद आता पजा, येसु गालिलतेन नार-नार तिरियसेक मत्‍तोर. यहुदि पेद्‍दाल्क ओन हव्कालय पोंचादोस्‍सि मत्‍ताहेंका ओर यहुदिया राज्येमते होना हूळा हिल्‍लोर.
JOH 7:2 गानि अद वेलाते यहुदिल्कुना डेराना पंडुगु दग्गेर्क एवसि मत्‍ता,
JOH 7:3 अदुनहाटीं येसुना तम्मुह्‍क येसुन, “निमे इगेटाल यहुदिया होन. अस्‍केन निमे कियना अद्‍बूतामाता कबाह्‍क नीवा सिस्युल्क हूळा परांतुर.
JOH 7:4 बोर अय्ते ओना पोरोल दुनियाक तेळियगोम इंचि इंतोरो, ओर बतले कबळ मक्‍किस किय्योर. निमे निजमे इसोंटा अद्‍बूतामाता कबाह्‍क कियानय्ते, दुनियातोरा मुन्‍ने कीसि हुप्‍सा,” इंचि इत्‍तुर.
JOH 7:5 ओना तम्मुह्कगुडा ओन नम्मा हिल्‍लुर, अदुनहाटीं ओर अल्हा इत्‍तुर.
JOH 7:6 अस्‍के येसु, “मीकु अय्ते अन्‍नि वेलां मंचिये, मिमेट बस्के इत्‍ते अस्‍के अगा होना परांतिर. गानि नना अगा होनना वेला इंका एव्‍वा हिल्‍ले.
JOH 7:7 दुनियातोर मीकुन हय्साकोंटा मना परुर. गानि नना दुनियातोरा कबाह्‍क बेसतव आयों इंचि दुनियातोरा विरोदमते गवाइ हींतन, अदुनहाटीं नाकुन दुनियातोर हय्सुर.
JOH 7:8 मिमेट पंडुगुंक होंटु. नना वायना वेला इंका एव्‍वा हिल्‍ले, अदुनहाटीं इद पंडुगुंक नना वासेक हिल्‍लेन,” इंचि येसु ओर्क वेहतोर.
JOH 7:9 ओर्क इव पोल्‍लें वेहचि ओर गालिलतेन मत्‍तोर.
JOH 7:10 गानि ओना तम्मुह्‍क पंडुगुंक होतंका, पज्जोटाल येसुगुडा अंटोर्क दिस्सेक आयो, गानि चुपचाप पंडुगुंक होत्‍तोर.
JOH 7:11 यहुदि पेद्‍दाल्क पंडुगुनगा, “ओर बगा मंतोर?” इंचेके ओन पहकालय दल्‍गतुर.
JOH 7:12 अद मंदिताल इच्‍चुर लोकुल्‍क बारे येसुना बारेमते, “ओर बेस मनकल आंदुर,” इंचि इनुंदुर. इंकिच्‍चुर बारे, “हिल्‍ले रो! ओर लोकुल्‍कुन गयबेत कींतोर,” इंचि गुसा-गूसा वळ्ककुनुंदुर.
JOH 7:13 गानि यहुदि पेद्‍दाल्कुना वेर्रेकु बोरे लोकुल्‍क येसुना बारेमते कुल्‍ला-कुल्‍ला वळ्‍काकोंदुर.
JOH 7:14 पजा पंडुगु सुरुव आसि सगम पोळ्‍द आतंका, येसु गुळिते होंचि कराहलय दल्‍गतोर.
JOH 7:15 ओर कराहनदुन केंजसि यहुदि पेद्‍दाल्क, “ई मनकल अय्ते बदे इस्कुलते, बोरे गुरुनगा होंचि करिया हिल्‍लोर. अयना ईन्कु इच्‍चोन वेल्‍ले तेल्वि बगाटाल वाता?” इंचेके इचंत्रमते अरतुर.
JOH 7:16 अस्‍के येसु ओर्क इल्‍हा जवाब हीतोर, “नना कराहना पोल्‍लें नावां आयों, नाकुन लोहचीता पेनदव आंदुं.
JOH 7:17 मीवा लोप्पोटाल बोरे आयिर, पेनदा इच्‍चा मत्‍ताप ताकंतन इनकुनानय्ते, नना कराहना पोल्‍लें नहगटाल वासंतंगा हिलाकोंटे पेनदागटाल वासंतंगा, इंचि ओन्क तेळियंता.
JOH 7:18 बोर अय्ते ओना सतता पोल्‍लें कराहंतोरो, ओर ओना पोरोल्तुने पेद्‍दा कियालय हूळांतोर. गानि बोर अय्ते ओन लोहतोन्कु कदर दोर्कना इंचि इनकुंतोरो, ओर सत्‍तेम मनकल आंदुर, ओनगा बतले आबद्‍दम हिल्‍ले.
JOH 7:19 मूसाल अय्ते मीकु दर्मसास्‍त्रमतुन एव्विचि हीतोर. गानि मिहागटाल वरोरगुडा अव्टेटा नियमकुनपोर्रो ताकसेक हिल्‍लिर. अय्ते बारि नाकुन हव्कालय हूळसंतिर?” इंचि येसु इत्‍तोर.
JOH 7:20 अस्‍के लोकुल्‍क, “नीकुन देय्यम पीताना बतला, अल्हा वळ्‍कसंतिन! बोर नीकुन हव्कालय हूळसंतुर?” इंचि येसुंक जवाब हीतुर.
JOH 7:21 अय्ते येसु इल्‍हा वळ्कालय दल्‍गतोर, “नोमकेम रोजुननाड नना उंदि अद्‍बूतामाता कबळ कीतदुन हूळसि, मिमेट अंटोर वेल्‍लेन इचंत्रमते अरतिर.
JOH 7:22 कतना कियना इंचि मीकु मूसाल वेहचि मत्‍तोर. असल निजम हूळते, ई कतना रिवाज मूसाल सुरुव किया हिल्‍लोर. अद एनकटा पेद्‍दाल्कुनगटाल वाता. मिमेट अय्ते कतना कियना वेला वातस्के, नोमकेम रोजुननाडगुडा मीवा मर्कुना कतना कींतिर.
JOH 7:23 मूसाना नियम तप्पानायो इंचि, नोमकेम रोजुननाड बोनादन्‍ना कतना कियना वेला वायानय्ते मिमेट ओना कतना किया वच्‍चु. गानि अदे नोमकेम रोजुने नना वरोर मनकन पुरागा बेस कीते, मीकु नापोर्रो होंग बारि वायना?
JOH 7:24 मोकोम हूळसि न्‍यायम कियमट, निजम-निजम न्‍यायम कीम्‍टु,” इंचि येसु इत्‍तोर.
JOH 7:25 अस्‍के येरुसलेमतोर इच्‍चुर लोकुल्‍क, “यहुदि पेद्‍दाल्क बोन अय्ते हव्कालय हूळसंतुरो, ओर ईरे अय्ते आयोर गदा!
JOH 7:26 हुळट, ओर लोकुल्‍कुना नड्‍डुम नित्‍तिसि बल्हा कुल्‍लम-कुल्‍ला वळ्कसंतोर! अय्नागानि ओन बोरे बतल इंचेक हिल्‍लुर. ईरे किरिस्‍तु इंचि, मना पेद्‍दाल्कगुडा निजम एरपाट कीतुर बारे!
JOH 7:27 किरिस्‍तु वायनेंके ओर बगाटाल वांतोर, बोनके तेळियो. गानि ईर मनकल बगाटाल वातोर, मनाकु अंटोर्क एरपाटे मंता.” इंचि ओर वरोंक-वरोर वळकालय दल्‍गतुर.
JOH 7:28 येसु गुळितगा कराहनेंके इल्‍हा वळकालय दल्‍गतोर, “हो! नना बोन आंदुन, बगाटाल वातन इदंता मीकु एरपाटे मंता. गानि नावद ननेन इगे वाया हिल्‍लेन. नाकुन लोहतोर सत्‍तेमंतुड आंदुर, ओर बोर आंदुरो मीकु एरपाट हिल्‍ले.
JOH 7:29 गानि नना ओन एरपाट कींतन. बारित्‍ते ओरे नाकुन लोहातोर, नना ओनागटाले इगे वातन,” इंचि लगांचि वेहतोर.
JOH 7:30 पजा यहुदि पेद्‍दाल्क येसुन दोर्का पियालय हूळतुर. गानि अस्केळ्क ओना वेला एव्‍वका मत्‍ता. अदुनहाटीं वरोरगुडा ओन्क कय दोस्‍सा पराहिल्‍लोर.
JOH 7:31 अयना गुळितगा मत्‍ता मंदिताल वेल्‍लेटोर येसुन नमतुर. नम्मिसि, “किरिस्‍तु वातस्के, ईनकन्‍ना एक्‍को अद्‍बूतम आयना कबाह्‍क कियनुरा?” इंचि ओर वळ्कालय दल्‍गुतुर.
JOH 7:32 लोकुल्‍क येसुना बारेमते इसोंटा पोल्‍लें गुसा-गुसा वळ्कानेंके परिसिल्क केंजतुर. केंजसि पेर्मालोर्क आनि परिसिल्क येसुन दोर्का पियानाहाटीं गुळितगा कावेल कीसेक मत्‍ता सिपाइल्कुन लोहतुर.
JOH 7:33 अस्‍के येसु ओर्क, “इंका जेर्रासेप नना मीतोनि मनंतन, पजा नाकुन लोहतोनगा नना तिरियसि दांतन.
JOH 7:34 मिमेट नाकुन पहककिर, गानि मीकु दोर्कोन. इंका नना मनना जेगातगा मिमेट वाया परिर,” इंचि वेहतोर.
JOH 7:35 अल्हा वेहाटेलक, यहुदि पेद्‍दाल्क ओरद-ओरे, “मनम पहकिना गानि दोर्काकोंटा ओर बगा दांतोर आयावच्‍चु? युनानि देसेमते होंचि, सिल्‍लर-सल्‍लर आसि मनना मना लोकुल्‍कुंक पेनदा पोल्‍लें अय्ते करहोर गदा! हिलाकोंटे युनानि लोकुल्‍कुनगा दांतोरा?
JOH 7:36 ‘मिमेट नाकुन पहकाकिर, गानि मीकु दोर्कोन. इंका नना मनना जेगातगा मिमेट वाया परिर,’ इंचि इत्‍ता पोल्‍लेंक अर्तम बतल आयावच्‍चु?” इंचेके वळ्ककुनालय दल्‍गतुर.
JOH 7:37 अद पंडुगुना आकिरता रोजुंकु वेल्‍लेन विलुवा मनंता. अद रोजुने येसु नित्‍तिसि, “दूपातोर नहगा वासि उंडावच्‍चु.
JOH 7:38 दर्मसास्‍त्रमते रासि मत्‍ताप, नापोर्रो विस्वासम कीतोना लोप्पोटाल पिस्वर हियना एता बेरेह्क पोंगनूं,” इंचि लगांचि वेहतोर.
JOH 7:39 येसुनपोर्रो विस्वासम कीतोर्क पेनदा आत्मा दोर्कनद मत्‍ता. अदे आत्माता बारेमते वेहालय येसु इव पोल्‍लें वळ्कतोर. येसु हासि मर्रा महिमाते तेदानदे मत्‍तोर. अदुनहाटीं पेन अदवेरदाका अद आत्मातुन बोर्के हिय्या हिल्‍ले.
JOH 7:40 इव पोल्‍लें केंजतोर इच्‍चुर लोकुल्‍क, “निजमे! बोर पेनदा कबुरतोर अय्ते वायनद मत्‍तोरो, ओर ईरे आंदुर,” इंचि इत्‍तुर.
JOH 7:41 इंकिच्‍चुर बारे, “ओर किरिस्‍तु आंदुर,” इंचि इत्‍तुर. आनि इंकिच्‍चुर लोकुल्‍क, “अरे! गालिल एरियाताल किरिस्‍तु वांतोरा?
JOH 7:42 ‘किरिस्‍तु दाविद राजाना वंसंमते पुट्‍सि, दाविद राजाल पुटता बेतलहेम नाटेनाले वांतोर,’ इंचि दर्मसास्‍त्रमते रासि हिल्‍लेना!” इंचि इत्‍तुर.
JOH 7:43 येसुना बारेमते लोकुल्‍कुंक रकारकाल्कुना विचाराल्क मत्‍ताहेंका, लोकुल्‍क ओरद ओर्के अर्राकोंटा आसि वेरे-वेरे आतुर.
JOH 7:44 इच्‍चुर ओन दोर्का पियालय हूळतुर, गानि बोर वरोरगुडा ओनपोर्रो कय वाटा पराहिल्‍लुर.
JOH 7:45 गुळितगा कावेल कियानोर बोर अय्ते येसुन दोर्का पियालय होत्‍तुर, ओर उत्‍ता कय्‍के मल्सि वातुर. अस्‍के, “मिमेट ओन बारि पीसि तराहिल्‍लिर?” इंचि पेद्‍दा पेर्मालोर आनि परिसिल्क ओर्कुन पूसकीतुर.
JOH 7:46 अस्‍के आ कावेल कियानोर, “ओर वळ्कताप बोरे मनकल बस्‍केने वळ्का हिल्‍लोर,” इंचि जवाब हीतुर.
JOH 7:47 पजा परिसिल्क ओर्कु इल्‍हा जवाब हीतुर. “ओर मीकुनगुडा पसांच्‍तोरा?
JOH 7:48 यहुदि पेद्‍दाल्कुनाल आयि, परिसिल्‍कुनाल आयि, बोर वरोरन्‍ना ओन नम्मुतोर मंतोरा? बोरे हिल्‍लुर.
JOH 7:49 गानि येसुन बोर अय्ते नम्मुतुरो ओर्क मूसाना नियमकु तेळियों, ओर्क तप्‍पाकोंटा सापनेम दल्‍गंता,” इत्‍तुर.
JOH 7:50 अगा निकोदेमस पोरोलतोर वरोर मत्‍तोर, ओर मुन्‍ने उंदि मल्का येसुंक कलियसि मत्‍तोर. ओरगुडा आ परिसिल्‍कुनाल वरोर आंदुर.
JOH 7:51 अय्ते ओर, “वरोर मनकंक मनम ओना गवाइ केंजाकोंटेने, ओर बतल कीतोर तेल्‍पिचकुनाकोंटेने मना दर्मसास्‍त्रमता नियमकुना परकारम, न्‍यायम किया परांतोमा?” इंचि ओर्कुन पूसकीतोर.
JOH 7:52 अय्ते ओर, “अरेय, निमेगुडा गालिल एरियातोना रो? होन! होंचि दर्मसास्‍त्रमते बेस पहकिसि हदवा, गालिलताल बोरे पेनदा कबुरतोर वायोर इंचि रासि मंता,” इत्‍तुर.
JOH 7:53 पजा ओर अंटोर ओरा-ओरा लोह्कुने होत्‍तुर.
JOH 8:1 गानि येसु जय्‍तुन मराकुना गुट्‍टतेके होत्‍तोर.
JOH 8:2 हक्‍केरेन मर्रा गुळितगा वातोर. वेल्‍लेन लोकुल्‍क ओनगा जमा आतुर. येसु उद्‍दिस ओर्क कराहलय दल्‍गतोर.
JOH 8:3 ओर्क कराहसेके मननेंकेन, बोगमतनम कियनेंके दोर्कता उंदि मुरतटुन, दर्मसास्‍त्रम कराहना गुरुल्क आनि परिसिल्क ओनगा पीसि तच्‍चि लोकुल्‍कुना मुन्‍ने निलाहतुर. निल्‍हाचि, “गुरु, इद मुरतटुन बोगमतनम कियानेंके मोमोट दोर्का पीतोम.
JOH 8:5 इसंटा मुरतटुन बंडाने तंचि हव्कना इंचि मूसाना नियम मनाकु आदेस हीता. अय्ते दीना बारेमते निमे बतल इंतिन मरि?” इंचि येसुन पूसकीतुर.
JOH 8:6 ओर वळ्कानेंके बतलन्‍ना तप्पु कीते ओन दोर्का पियना उपायमते, ओर असोंटा सवाल पूसकीतुर. गानि येसु हिळु वंगिसि बूमिपोर्रो बतलो वेलुने रासालय दल्‍गतोर.
JOH 8:7 ओर उंदे हट्‍टु पीताहाटीं, येसु तेदसि ओर्कुन, “सरे! बंडाने तनाटु. गानि मिहगटाल बोर अय्ते बस्‍केने पापम किया हिल्‍लोर, मुन्‍ने ओरे दीन बंडाते तनना,” इंचि वेहतोर. पजा मर्रा वंगिसि बूमिपोर्रो वेलुने रासालय दल्‍गतोर.
JOH 8:9 दान तत्‍तोर अंटोर येसु इत्‍तदुन केंजसि, मोदाला मातरालोर आनि पज्जोटाल अंटोर वरोन पज्जो वरोर अगटाल पेय्सि होत्‍तुर. ओर अंटोर अगटाल होत्‍तस्के लोकुल्‍कुना नड्‍डुम सिराप येसु आनि आ मुरतळे मत्‍तुर.
JOH 8:10 पजा येसु इंकुंदि मल्का तेदसि, “बाई, नीकु सिक्‍साता आदेस हियानोर बेके होत्‍तुर? नीकु बोरे सिक्‍साता आदेस हिय्या हिल्‍लुरा?” इंचि पूसकीतोर.
JOH 8:11 अस्‍के अद मुरतळ, “नाकु बोरे सिक्‍साता आदेस हिय्या हिल्‍लुर सामि!” इंचि इत्‍तस्के येसु, “ननागुडा नीकु सिक्‍साता आदेस हिय्योन. होन, इंका बस्‍केने पापम कियमा,” इंचि दान्क वेहतोर.
JOH 8:12 पजा येसु, “नना दुनियातोराहाटीं वेलगु आंदुन. बोर अय्ते नावा पज्जो ताकंतोर, ओनगा पिस्वरताहेके ओयना वेळसि मनंता, अदुनहाटीं ओर बस्‍केने हीकटते ताकोर,” इंचि वेहतोर.
JOH 8:13 अस्‍के परिसिल्क, “नीवा बारेमते निमेन गवाइ वेहकुंचंतिन, अदुनहाटीं नीवा गवाइते सत्‍तेम हिल्‍ले,” इंचि येसुन इत्‍तुर.
JOH 8:14 अय्ते येसु ओर्क इल्‍हा जवाब हीतोर, “नावा बारेमते ननाने गवाइ वेहिनागानि, नावा गवाइ मात्रम सत्‍तेम आंद. बारित्‍ते, नना बगाटाल वातन, बगा दांतन, इत्‍तद नाक एरपाट मंता. गानि नना बगा वातन, बगा दांतन मीकु बतले एरपाट हिल्‍ले.
JOH 8:15 मिमेट मनकना बुद्‍दिते न्‍यायम कींतिर, गानि नना बोनदे न्‍यायम किय्योन.
JOH 8:16 ओक्‍कला नना न्‍यायम कियिनागानि नावा न्‍यायम निजम मनंता, बारित्‍ते नना वरोने हिल्‍लेन, नाकुन लोहचीता ना बाबाल नाक तोळ मंतोर.
JOH 8:17 इव्वुरा गवाइ उंदि आते, अद गवाइ निजम मनंता इंचि मीवा मूसाना नियमतेन रासि मंता.
JOH 8:18 दीन परकारम, नावाहाटीं नना वरोर गवाइ आनि नाकुन लोहचीता ना बाबल इंकावरोर गवाइ,” इंचि येसु इत्‍तोर.
JOH 8:19 इद केंजसि ओर, “नीवा बाबाल बगा मंतोर?” इंचि पूसकीतुर. अस्‍के येसु, “असल नना बोन, नावा बाबाल बोर? मीकु एरपाट हिल्‍ले. मिमेट नाकुन एरपाट कियानय्ते, ना बाबान इंका एरपाट कींतिर,” इंचि ओर्क वेहतोर.
JOH 8:20 येसु इव पोल्‍लें, गुळिता लोप्पो कोत्‍तां वाटना जेगातगा नित्‍तिसि कराहनेंके वळ्कतोर. अय्नागानि ओन बोरे दोर्का पिया हिल्‍लुर. बारित्‍ते ओना वेला एव्वनदे मत्‍ता.
JOH 8:21 पजा इंकुंदि मल्का येसु ओर्कुन, “नना अय्ते होंचंतन. मिमेट नाकुन पहककिर. मिमेट मीवा पापाल्क मापि आयका मुन्‍नेन हाकिर. नना बगा अय्ते होंचंतन अगा मिमेट वाया परिर,” इत्‍तोर.
JOH 8:22 अस्‍के यहुदि पेद्‍दाल्क ओरद ओरे, “नना बगा अय्ते होंचंतन अगा मिमेट वाया परिर, इंचि बारि इंचंतोर मरि? ओक्‍कला ओना जीवातुन ओरे पोळागोटकुन्‍नोर गदा!” इंचि वळ्कालय दल्‍गतुर.
JOH 8:23 पजा येसु ओर्कुन, “मिमेट हिळतोर आंदिर, नना पोर्रोटोन आंदुन. मिमेट इद दुनियातोर आंदिर, गानि नना आयोन.
JOH 8:24 अदुनहाटींगे, मिमेट मीवा पापाल्क मापि आयका मुन्‍नेन हाकिर, इंचि नना इत्‍तन. ओन ननाने आंदुन इंचि विस्वासम कियाकोंटे, मिमेट मीवा पापाल्क मापि आयका मुन्‍नेन हाकिर,” इंचि इत्‍तोर.
JOH 8:25 अस्‍के ओर, “अय्ते निमे बोन आंदिन मरि? माकु वेहा,” इंचि पूसकीतस्‍के येसु, “नना बोन इंचि मीकु मुन्‍नेटाल वेहचेके वातानो, नना ओने आंदुन.
JOH 8:26 मीवा बारेमते वळ्कालय, मीवा न्‍यायम कियालय, नहगा वेल्‍लेन पोल्‍लें मंतां. गानि नाकुन लोहतोर सत्‍तेमंतुड आंदुर, इंचि नना सिराप ओनागटाल केंजता पोल्‍लेंगें लोकुल्‍कुंक वेहचंतन,” इंचि इत्‍तोर.
JOH 8:27 गानि येसु ओना बाबाना बारेमते वेहतोर इंचि ओर्क इंकागुडा अर्तम आयाहिल्‍ले.
JOH 8:28 अदुनहाटीं येसु, “मनकना रूपमते पुटतोन नाकुन, बस्के अय्ते वेलाड वाटमळ जर्रगंतनो, अस्‍के, ओन ननाने आंदुन इंचि, मीकु एरपाट आयार. अचोने आयका, नना सतागा बतले कीसेक हिल्‍लेन, गानि बव पोल्‍लें अय्ते बाबाल नाकु कराहतोरो, अवे पोल्‍लें नना वेहतन.
JOH 8:29 नाकुन लोहतोर नावा तोळ मंतोर. नना बस्‍केळ्‍क ओन्क कुसि हियना कबाह्के कींतन, अदुनहाटीं ओर नाकुन बस्‍केने ओंटिगा होळसोर,” इंचि वेहतोर.
JOH 8:30 ओना ई पोल्‍लें केंजतोर, वेल्‍लेटोरे ओन नम्मुतुर.
JOH 8:31 पजा येसु, ओनपोर्रो विस्वासम कीता यहुदिल्कुनतोनि, “मिमेट नना कराहता पोल्‍लें पीसि ताकानय्ते निजमे नावा सिस्युल्क आंतिर.
JOH 8:32 अस्‍के मिमेट सत्‍तेमतुन एरपाट कीकिर, आ सत्‍तेमे मीकुन होळसार,” इंचि इत्‍तोर.
JOH 8:33 अस्‍के ओर, “मोमोट अय्ते अब्राहामुना वंसंमतोरम आंदुम, इदवेरदाका मोमोट इद बूमिपोर्रो बोनदे कय हिळु दासुल्क आसि मना हिल्‍लोम. अय्ते, अद सत्‍तेम मीकुन होळसार, इंचि निमे बल्हा इंतिन?” इंचि येसुंक जवाब हीतुर.
JOH 8:34 अस्‍के येसु ओर्क इल्‍हा वेहतोर, “नना निजम-निजम वेहासेक, पापम कियना हरेक मनकल पापमता दासुडे.
JOH 8:35 वरोर दासि मनकल मालकुना लोतोरतोनि बस्‍केळ्‍क मन्‍नोर, गानि मालकुना मर्रि मात्रम बस्‍केळ्‍क मनांतोर.
JOH 8:36 अदुनहाटीं पेनदा मर्रि मीकुन पापमताल होळसीतेने, निजमते मिमेट पापमताल पलाते अर्रंतिर.
JOH 8:37 मिमेट अब्राहामुना वंसमतोर इंचि नाकु एरके. अय्नागानि नावा पोल्‍लेंक मीलोप्‍पो जेगा हिलुवाहेंका मीवा लोप्पोटाल इच्‍चुर नाकुन हव्कालय हूळसंतिर.
JOH 8:38 नना नावा बाबानतोनि मत्‍तस्के बतल अय्ते हूळतनो, अदे मीकु वेहचंतन. आनि मिमेटगुडा मीवा बाबानहेंदाल केंजतद कीसंतिर,” इंचि इत्‍तोर.
JOH 8:39 अस्‍के ओर, “अब्राहाम मावा बाबाल आंदुर,” इंचि इत्‍तुर. पजा येसु, “हिल्‍ले! मिमेटगिंटा अब्राहामुना पिलाल्क आसि मत्‍ते, ओर कीतापे मिमेटगुडा कीसि मन्‍नेर.
JOH 8:40 गानि नना पेनदागटाल केंजता सत्‍तेम पोल्‍लें मीकु वेहते, मिमेट नाकुने हव्कालय हूळसंतिर. अब्राहाम अय्ते अल्हा किया हिल्‍लोर.
JOH 8:41 मिमेट मीवा बाबाल कीताप कीसंतिर,” इंचि इत्‍तोर. अस्‍के ओर, “मोमोट बोगमतनम कीते पुट्‍टा हिल्‍लोम! माकु वरोरे बाबाल मंतोर, ओर पेनबाबाले,” इंचि येसुन इत्‍तुर.
JOH 8:42 अस्‍के येसु ओर्कुन इल्‍हा इत्‍तोर, “पेन मीवा बाबाल आसि मत्‍ते मिमेट नाकुन पावरम कीसि मन्‍नेर. बारित्‍ते नना पेनदागटाल वातन. इगे नावद ननेन वाया हिल्‍लेन. पेने नाकुन लोहता.
JOH 8:43 नना वेहानदुन मिमेट असल केंजिर, अदुनहाटींगे नावा पोल्‍लें मीकु अर्तम आयों.
JOH 8:44 मिमेट देय्यमता पिलाल्क आंदिर, देय्यमे मीवा बाबाल आंदुर. अदुनहाटीं मीवा बाबाल कियना तप्‍पुड कबाह्‍क कियमळ इत्‍ते मीकु वेल्‍लेन इस्‍टम. देय्यम मुन्‍नेटाले जीवां तिंचेके वाता. अद सत्‍तेमतुन बस्‍केने हय्सो. दानागा सत्‍तेम हिल्‍लेन हिल्‍ले. आबद्‍दम वळ्‍कमळे दाना गुनम आंदु, अदुनहाटीं अद बस्‍केळ्‍क आबद्‍दमे वळ्कंता, आबद्‍दमतुन पुट्‍संता.
JOH 8:45 अदुनहाटीं नना मीकु सत्‍तेम वेहिनागानि मिमेट नाकुन नम्मिर.
JOH 8:46 नना बतलन्‍ना पापम कीतन इंचि मिहागटाल बोरन्‍ना हुप्‍सा परांतिरा? नना निजम वेहचंतन, अय्ते मिमेट बारि नाकुन नमसेक हिल्‍लिर?
JOH 8:47 बोर अय्ते पेनदा मनकल, ओर पेनदा पोल्‍लें केंजंतोर. गानि मिमेट पेनदा मनकालोर आयिर, अदुनहाटीं मिमेट अव पोल्‍लेन केंजसेक हिल्‍लिर,” इंचि येसु इत्‍तोर.
JOH 8:48 अस्‍के यहुदिल्क, “निमे सामरियातोन आंदिन, नीकुन देय्यम पीता, इंचि इनानय्ते, मोमोट इनानद निजमे गदा?” इंचि येसुन पूसकीतुर.
JOH 8:49 अस्‍के येसु ओर्क इल्‍हा जवाब हीतोर, “नाकुन देय्यम पिया हिल्‍ले. नना नावा बाबाना कदर कींतन, गानि मिमेट नावा कदर कीसेक हिल्‍लिर.
JOH 8:50 नाकु कदर दोर्कना इंचि नना बस्‍केने इनकुनोन, गानि नाकु कदर दोर्कना इंचि इनानोर वरोर मंतोर. ओरे न्‍यायम कियानोर आंदुर.
JOH 8:51 नना निजम-निजम वेहासेक, बोरे आयिर नना कराहता पोल्‍लेनपोर्रो ताकानय्ते, ओर बस्‍केने हामुरतुन हूळोर,” इंचि इत्‍तोर.
JOH 8:52 इदुन केंजसि यहुदिल्क, “नीकु निजमे देय्यम पीता इंचि इंदके माकु एरपाट आता. अब्राहाम आनि पेनदा कबुरतोरगुडा हातुर, आनि निमे, ‘बोर आयिर, नना वेहता पोल्‍लेनपोर्रो ताकानय्ते, ओर बस्‍केने हामुरतुन हूळोर’ इंचि वेहांतिन.
JOH 8:53 मावा एनकटा पेद्‍दा मातरल अब्राहामगुडा हातोर, निमे ओनकन्‍ना पेद्‍दोना? पेनदा कबुरतोरगुडा हातुर. नीवद निमे बोन आंदिन इंचि इनकुंचंतिन?” इंचि येसुन पूसकीतुर.
JOH 8:54 येसु ओर्क इल्‍हा जवाब हीतोर, “नावद ननाने कदर कीकुत्‍ते, अद कदरक बतले विलुवा मन्‍नो. गानि बोन अय्ते मिमेट, ‘मावा पेन आंदुर’ इंचि इंतिरो, ओरे नावा बाबाल आंदुर, ओरे नाकु कदर हीसंतोर.
JOH 8:55 गानि मिमेट ओन एरपाट किय्‍यिर, नना ओन एरपाट कींतन. ननागिंटा, ‘ओन नना एरपाट किय्योन,’ इंचि इनानय्ते, ननागुडा मीलेसीं आबद्‍दम वळ्‍कानोन आंतन. गानि नना ओन एरपाट कींतन, ओना पोल्‍लेनपोर्रो ताकंतन.
JOH 8:56 नना वायना रोजुन हूळंतन इत्‍ता आसेते, मीवा एनकटा पेद्‍दा मातरल अब्राहाम, कूस मत्‍तोर. पजा अद रोजुन हूळसि ओर वेल्‍लेन कूस आतोर,” इंचि इत्‍तोर.
JOH 8:57 पजा यहुदिल्क, “निमे अब्राहामुन हूळतिना? नीकु अय्ते एबै वर्सांगुडा हिल्‍लें!” इंचि येसुन पूसकीतुर.
JOH 8:58 अस्‍के येसु, “नना निजम-निजम वेहासेक, अब्राहाम मातरल पुट्‍टका मुन्‍नेटाले नना मत्‍तन,” इंचि इत्‍तोर.
JOH 8:59 इद पोल्‍ले पोर्रोटाल, ओन बंडाने तंचि हव्कना इंचि अंटोर बंडां पेरतुर. गानि येसु ओर्क दिसाकोंटा मक्‍किस गुळिताल पेय्सि होत्‍तोर.
JOH 9:1 हरपीसि होननेंके-होननेंके येसु, पुट्तस्केटाल कळ्‍क दिसवोर वरोर मनकन हूळतोर.
JOH 9:2 अस्‍के सिस्युल्कु, “गुरु, ईर इल्‍हा गुड्‍डिगा पुट्‍टालय कारनम बतल आंद? ईर पापम कीताहेंका इल्‍हा पुट्तोरा मरि ईना तल्‍लुर-बाबो पापम कीताहेंकाना?” इंचि येसुन पूसकीतुर.
JOH 9:3 अस्‍के येसु ओर्क इल्‍हा जवाब हीतोर, “ईर पापम कीताहेंकानो मरि ईना तल्‍लुर-बाबो पापम कीताहेंकानो ईर गुड्‍डिगा पुट्‍टा हिल्‍लोर. गानि ईनाहेंदाल पेनदा ताकत दिस अर्रना इंचि ईर इल्‍हा गुड्‍डिगा पुटतोर.
JOH 9:4 नाकुन लोहतोना कबाह्‍कुन मनम, पोळ्‍द होनाका मुन्‍नेन महापींता. बोरे कबळ किया परुर असोंटद नर्का वायनद मंता.
JOH 9:5 गानि नना इद दुनियाते मत्‍तचोनजेम दुनियातोराहाटीं नना वेळ्‍सी आसि मनंतन,” इंचि वेहतोर.
JOH 9:6 पजा ओर बूमिपोर्रो उस्कतोर, उस्किसि आ उच्‍चुलतोनि बुर्दा तयार कीसि आ बुर्दातुन आ गुड्‍डोना कळ्‍कुंक होकतोर.
JOH 9:7 होकसि, “निमे सिलोम सेरवुनगा होंचि कळ्‍कुन नोर्कुन,” इंचि येसु आ गुड्‍डोन इत्‍तोर. अस्‍के ओर गुड्‍डि होंचि कळ्‍कुन नोरतस्के, ओना कळ्‍क दिसालय दल्‍गतां. अस्‍के ओर मल्सि वातोर.
JOH 9:8 पजा ओना पका पीसीतोर, मुन्‍ने ओन बिच्‍चोम तल्कनेंके हूळतोर, इंदके ओन हूळसि, “उद्‍दिस बिच्‍चोम तल्कसेक मनुंदुर, ओर ईरे मनकल गदा!” इंचि वरोंक-वरोर पूसकियालय दल्‍गतुर.
JOH 9:9 इच्‍चुर लोकुल्‍क, “हो, ईर ओरे आंदुर,” इत्‍तुर. इंकिच्‍चुर बारे, “आयोर रो! ओनसंटोर इंकावरोर आंदुर,” इंचि इत्‍तुर. गानि आ मनकल, “हिल्‍ले, ओन ननाने आंदुन,” इंचि इत्‍तोर.
JOH 9:10 अस्‍के ओर लोकुल्‍क, “अय्ते नीवा कळ्‍कुन बोर दिस्‍सानाल कीतोर?” इंचि ओन पूसकीतुर.
JOH 9:11 अस्‍के आ मनकल, “येसु पोरोलतोर वरोर मनकल बुर्दा कीसि, ना कळ्‍कुंक होकतोर, होकसि, ‘सिलोम सेरवुने कळ्‍कुन नोर्कुन,’ इंचि इत्‍तोर. होंचि नोरतन अय्ते, नावा कळ्‍क दिसालय दल्‍गतां,” इंचि ओर जवाब हीतोर.
JOH 9:12 लोकुल्‍क, “आ येसु बगा मंतोर?” इंचि पूसकीतस्‍के, “नाकु एर्का हिल्‍ले,” इंचि आ मनकल इत्‍तोर.
JOH 9:13 पजा आ लोकुल्‍क, मुन्‍ने गुड्‍डि मत्‍ता मनकन परिसिल्कुनेके पीसि ओतुर.
JOH 9:14 येसु बद रोज अय्ते बुर्दा कीसि, कळ्‍क दिसवोना कळ्‍कुंक होकसि कळ्‍क दिस्‍सानाल कीतोर, अद रोज नोमकेम मत्‍ता.
JOH 9:15 तत्‍तस्के, आ मनकन, “नीवा दिसवा कळ्‍क बल्हा दिसालय दल्‍गतां?” इंचि परिसिल्कगुडा पूसकीतुर. अस्‍के आ मनकल, “ओर नावा कळ्‍कुंक बुर्दा होकतोर, पजा होंचि नोरतस्के, नावा कळ्‍क दिसालय दल्‍गतां,” इंचि इत्‍तोर.
JOH 9:16 ओर वेहतद केंजसि इच्‍चुर परिसिल्क, “ओर मनकल नोमकेम रोजुन नोमा हिल्‍लोर, अदुनहाटीं ओर पेनदागटाल वायाहिल्‍लोर,” इंचि इत्‍तुर. इंकिच्‍चुर बारे, “गानि वरोर पापि मनकल इसंटा अद्‍बूतामाता चिन्‍ह बल्हा हुप्‍सा परंतोर?” इंचि इत्‍तुर. इल्‍हा ओरद-ओर्के अर्राका ओर रोंड गेंग्क आतुर.
JOH 9:17 पजा परिसिल्क आ गुड्‍डितनमताल बेस आता मनकन, “ओर नीवा कळ्‍कुन बेस कीतोर, अय्ते निमे ओना बारेमते बतल इंतिन?” इंचि इंकुंदि मल्का पूसकीतुर. अय्ते आ मनकल, “ओर वरोर पेनदा कबुरतोर आंदुर,” इंचि इत्‍तोर.
JOH 9:18 आ मनकल गुड्‍डि मत्‍तोर, इंदके मर्रा ओना कळ्‍क दिसालय दल्‍गतां, इत्‍ता पोल्‍लेतुन यहुदि पेद्‍दाल्क इदवेरादाका गुडा नम्मा हिल्‍लुर. अदुनहाटीं ओर आ मनकना तल्‍लुर-बाबोन केयतुर. केय्‍सि, “ईर मी मर्रेना? पुट्तस्केटाल गुड्‍डिगा पुटतोर इंचि मिमेट इंतिर? अय्ते मरि ईर इंदके बल्हा हूळा परसंतोर?” इंचि पूसकीतुर.
JOH 9:20 अस्‍के ओना तल्‍लुर-बाबो, “ईर मावा मर्रे आंदुर, ईर पुट्नेंकेन गुड्‍डिगा पुटतोर, इद माकु एरपाटे.
JOH 9:21 गानि इंदके ईर बल्हा हूळा परसंतोरो माकु तेळियो, इंका ईन हूळानाल बोर कीतोरो माकु तेळियो. इंदके ईर सतता बारेमते वळ्कनलायक आतोर, मिमेट ओने पूस कीम्‍टु, ओरे वेहंतोर!” इंचि इत्‍तुर.
JOH 9:22 यहुदि पेद्‍दाल्कुंक वेरियसि ओना तल्‍लुर-बाबो अल्हा इत्‍तुर. बारित्‍ते येसुए किरिस्‍तु आंदुर इंचि बोर अय्ते ओप्‍कुंतोर, ओन दर्मसास्‍त्रम कराहना लोताल पेचाहमळ जर्गंता, इंचि ओर मुन्‍नेन उंदि आसि मत्‍तुर.
JOH 9:23 अदुनहाटींगे आ तल्‍लुर-बाबो, “इंदके ईर सतता बारेमते वळ्कनलायक आतोर, मिमेट ओने पूस कीम्‍टु,” इंचि इत्‍तुर.
JOH 9:24 अदुनहाटीं परिसिल्क, गुड्‍डितनमताल दिस्‍सानाल आता मनकन मरुंदि मल्का केय्‍सि, “ई मनकल पापि इंचि माकु एर्के, अदुनहाटीं पेनदुक कदर हीम,” इंचि इत्‍तुर.
JOH 9:25 अस्‍के गुड्‍डितनमताल दिस्‍सानाल आता आ मनकल, “ओर मनकल पापि आंदुरो, आयोरो नाकु एरका हिल्‍ले. गानि मुन्‍ने नाकु कळ्‍क दिस्साकोंदुं, इंदके दिसंतां, इद मात्रम नाकु एरका,” इंचि इत्‍तोर.
JOH 9:26 अयना परिसिल्क मर्रा ओन, “ओर नीकुन बतल कीतोर? ओर नीवा कळ्‍क दिस्‍सानाल बल्हा कीतोर?” इंचि पूसकीतुर.
JOH 9:27 अय्ते गुड्‍डितनमताल दिस्‍सानाल आता आ मनकल, “दीनकन्‍ना मुन्‍नेन नना मीकु वेहतन, गानि मिमेट केंजा हिल्‍लिर. अय्ते मर्रा-मर्रा बारि पूस कीसंतिर? मीकुगुडा ओना सिस्युल्क आयानद मंतना?” इंचि इत्‍तोर.
JOH 9:28 अस्‍के परिसिल्क, “निमेन ओना सिस्युन आंदिन, मोमोट मूसाना सिस्‍युल्‍कुम आंदुम.
JOH 9:29 पेन मूसानतोनि वळ्कता इंचि माकु एरपाट मंता. गानि ई मनकल बगाटाल वातोर? माकु बतले एरपाट हिल्‍ले,” इंचेके ओन तेराहतुर.
JOH 9:30 पजा आ मनकल इल्‍हा वळ्कालय दल्‍गतोर, “इद वेल्‍लेन इचंत्रम आयना पोल्‍ले आंद. ओर बगाटाल वातोर मीकु बतले एरपाट हिल्‍ले. अय्नागानि ओर मात्रम नावा दिसुवा कळ्‍कुन दिस्‍सानाल कीतोर.
JOH 9:31 पेन पापि मनकालोरा पोल्‍लेतुन केंजो, गानि बोर अय्ते दान मोळ्कसेक दाना इच्‍चा परकारम ताकंतोरो ओना पोल्‍लेतुन मात्रम पेन केंजंता, इंचि मनाकु एरपाट मंता.
JOH 9:32 इद दुनिया पुटतस्केटाल अय्ते इदवेरदाका, वरोर मनकल, पुटनेंकेन गुड्‍डिगा पुट्तोना कळ्‍कुन दिस्‍सानाल कीतोर इत्‍ता पोल्‍ले मनम बस्‍केने केंजा हिल्‍लोम.
JOH 9:33 ईर मनकलगिंटा पेनदागटाल वातोर आयाकोंटे, इसोंटव बवे कबाह्‍क किया परा कोन्‍नेर,” इंचि ओर्क वेहतोर.
JOH 9:34 इव पोल्‍लें केंजसि परिसिल्क, “निमे अय्ते पुरागा पापमते पुट्‍सि-बेरस्तोन आंदिन. निमे माकु कराहंतिना?” इंचेके आ मनकन पेचाहचि गेदुमतुर.
JOH 9:35 आ मनकन पेचाहचि गेदुमतुर इंचि येसु केंजतोर. केंजसि, आ मनकंक कलियसि, “निमे मनकना रूपमते पुटतोन पोर्रो विस्वासम इर्रंतिना?” इंचि ओन पूसकीतोर.
JOH 9:36 अय्ते आ मनकल, “नना ओनापोर्रो विस्वासम इर्रनाहाटीं ओर बोर आंदुर, नाकु वेहा सामि!” इंचि येसुन पूसकीतोर.
JOH 9:37 अस्‍के येसु, “निमे ओन हूळतिन, ओर नीतोनि इंदके वळ्कसंतोर,” इंचि वेहतोर.
JOH 9:38 इद पोल्‍ले केंजसि, “नना विस्वासम कींतन सामि,” इंचि ओर येसुना काल्क मोळ्‍कतोर.
JOH 9:39 अस्‍के येसु, “नना इद दुनियाते न्‍यायम कियालय वातन. गुड्‍डिर्क कळ्‍क दिस्सागोटालय आनि बोर अय्ते, ‘मोमोट अन्‍नि हूळा परंतोम’ इनकुंतुर, ओर्क ओर गुड्‍डिर्क इंचि हुप्‍सालय नना वातन,” इंचि इत्‍तोर.
JOH 9:40 अगा मंचि ओना इव पोल्‍लें केंजता इच्‍चुर परिसिल्क, “अय्ते मोमोटगुडा गुड्‍डिर्के इंतिना मरि?” इंचि पूसकीतुर.
JOH 9:41 अस्‍के येसु, “मिमेटगिंटा गुड्‍डिर्क आयानय्ते मिहगा पापम मना कोनवळ. गानि मिमेट, ‘मोमोट बेस हूळा परंतोम’ इंतिर. अदुनहाटीं मीलोप्‍पो पापम मय्सि मनंता,” इंचि वेहतोर.
JOH 10:1 येसु इल्‍हा वळ्कालय दल्‍गतोर, “नना निजम-निजम वेहासेक, बोर अय्ते गोर्रेना पोदिते होळियनेंके, गलमाताल होळियका गूरे पोर्रोटाल दुनकिसि होळियंतोर, ओर दोंगल आनि दोसकुनानोर आंदुर.
JOH 10:2 गानि बोर अय्ते गलमाताल होळियंतोर, ओर गोर्रें मेहानोर आंदुर.
JOH 10:3 गोर्रें मेहानोनहाटीं गलमातगा कावेल कीसेक मनानोर गिल्कोम तेंडांतुर. गोर्रें ओना लेंग केंजंतां. ओर ओना गोर्रेन उंद-उंदाना पोरोल पीसि केय्‍सि, अवुन पलाते ओंतोर.
JOH 10:4 अन्‍नि गोर्रेन पलाते ओसि, ओर अवुना मुन्‍ने-मुन्‍ने दांतोर. गोर्रें ओना पज्जो-पज्जो दांता. बारित्‍ते अव ओना लेंगुन एरपाट कींतां.
JOH 10:5 गानि एरपाट हिलवोना पज्जो अव होन्‍नों, ओनागटाल लक्‍कु वित्‍तंतां. बारित्‍ते अव ओना लेंगुन एरपाट किय्यों,” इंचि ओर्क वेहतोर.
JOH 10:6 येसु इद उदाहरन लोकुल्‍कुंक वेहतोर. गानि येसु बदुना बारेमते वळ्कतोर इत्‍तद ओर्क अर्तम आयाहिल्‍ले.
JOH 10:7 अदुनहाटीं येसु मरुंदि मल्का ओर्क इल्‍हा वेहतोर. “नना निजम वेहासेक केंजट, गोर्रें होळियाना गलमा ननेन आंदुन.
JOH 10:8 नाकन्‍ना मुन्‍ने वातोर अंटोरे दोंगाल्क, दोसकुनानोर आंदुर. गानि गोर्रें ओरा पोल्‍लें केंजा हिल्‍लें.
JOH 10:9 गलमा ननाने आंदुन. बोर अय्ते नहगटाल लोप्पो नेंगंतोर, ओन नना पिसागोटंतन. ओर लोप्पो-पलाते होनुळ-वायुळ कींतोर, तिनालय ओन्क मेता दोर्कंता.
JOH 10:10 दोंगाल्क सिराप दोंगा कियालय, हव्कालय, नासडेम कियालये वांतुर. गानि नना नावा गोर्रेंकु पिस्वर हियालय वातन. अदगुडा पुरागा पिस्वर हियालय वातन.
JOH 10:11 बेस मेहानोन ननाने आंदुन. बेस मेहानोर, गोर्रेनाहाटीं ओर ओना जीवा हींतोर.
JOH 10:12 गानि बूतिक मेहालय वातोर, ओर निजम मेहानोर आयोर. मेहनेंके ओन्क तोडेल्‍लिगिंटा दिस्सानय्ते, गोर्रेन अग्गेन होळसि बेकेनो वित्‍तंतोर. बारित्‍ते अव गोर्रे ओनव आयों. अस्‍के आ तोडेल्‍लि वासि गोर्रेन पोर्रो अर्रंता आनि गोर्रें बारे सिल्‍लर-सिल्‍लर आंता.
JOH 10:13 ओर बूतिक वातोर इंचि अल्हा वित्‍तंतोर. ओन्क गोर्रेना पिकिर हिल्‍ले. अदुनहाटीं ओर वित्‍तंतोर.
JOH 10:14 गानि नना बेस मेहानोन आंदुन. बल्हा अय्ते बाबाल नाकुन एरपाट कींतोर, नना बाबान एरपाट कींतन, अल्हेन नावा गोर्रेन नना एरपाट कींतन, अव नाकुन एरपाट कींतां. नना नावा गोर्रेनाहाटीं जीवा हींतन.
JOH 10:16 इद पोद्‍दितव आयवा गोर्रेंगुडा नहगा मंतां. नाकु अवुनगुडा तरानद मंता, अवगुडा नावा लेंग केंजनूं. अस्‍के अन्‍नि उंदे मंदा आसि मनंतां आनि अवुना मेहानोरगुडा वरोरे मनांतोर.
JOH 10:17 नना हासि मर्रा जीवाते तेदंतन इंचि नना नावा जीवा हीसंतन, इदुनहाटींगे नावा बाबाल नाकुन वेल्‍लेन पावरम कींतोर.
JOH 10:18 नावा जीवातुन नहगटाल बोरे तेंडकुन्‍नुर, नावा जीवातुन नना कुद्‍दे हींतन. नावा बाबाल नाकु आदेस हीताहेंका नावा जीवातुन हियनद, हीसि मर्रा मल्सि तेंडकुनना अदिकारम नाकु मंता,” इंचि येसु इत्‍तोर.
JOH 10:19 इव पोल्‍लेनहेंदाल मरुंदि मल्का यहुदिल्क वरोनद वरोंक अर्राका वेरे-वेरे आतुर.
JOH 10:20 ओराव्टेटाल वेल्‍लेटोर, “ओन्क देय्यम पीसि ओर पिस्सल आतोर, मिमेट ओना पोल्‍लें बारि केंजांतिर?” इंचि इत्‍तुर.
JOH 10:21 गानि इच्‍चुर बारे, “इव पोल्‍लें देय्यम पीतोनां आयों. देय्यम बस्‍केनना कळ्‍क दिसवोना कळ्‍कुन दिस्‍सानाल किया परंतना?” इंचि इत्‍तुर.
JOH 10:22 पीनि कालम वासि मत्‍ता. येरुसलेम सहरते गुळिते होळियाना हानुक इनना पंडुगु मत्‍ता.
JOH 10:23 अय्ते गुळितगा येसु सुलेमान इनना पंदिरतगा तिरियसेक मत्‍तोर.
JOH 10:24 अस्‍के, इच्‍चुर यहुदि लोकुल्‍क येसुना सुट्‍टु आसि, “निमे इंका बच्‍चुं रोजकु माकुन मर्ममते इर्रंतिन? निमे गिंटा किरिस्‍तुन आयानय्ते माकु कुल्‍ला-कुल्‍ला वेहा,” इंचि पूसकीतुर.
JOH 10:25 अस्‍के येसु ओर्क इल्‍हा जवाब हीतोर, “नना मीकु मुन्‍नेन वेहतन, गानि मिमेट नम्मा हिल्‍लिर. नावा बाबाना पोरोल्ते नना कियना कबाह्के नावा बारेमते गवाइ वेहचंतां.
JOH 10:26 गानि मिमेट नावा गोर्रेना मंदातोर आयिर. अदुनहाटीं मिमेट नापोर्रो विस्वासम कीसेक हिल्‍लिर.
JOH 10:27 नावा गोर्रें नावा लेंगुन केंजंतां. नावा गोर्रेन नना एरपाट कींतन, अव नावा पज्जो-पज्जो वांतां.
JOH 10:28 नना अवुंक बस्‍केळ्‍क पिस्सना पिस्वर हींतन, अव बस्‍केने नासडेम आयों, नावा कय्‍दाल अवुन बोरे गुंजकुना पर्रोर.
JOH 10:29 बारित्‍ते अवुन नाकु, नावा बाबाल हीतोर. नावा बाबाल अंटोरकन्‍ना पेद्‍दोड आंदुर. अदुनहाटीं बाबाना कय्‍दाल अवुन बोरे गुंजकुना परोर.
JOH 10:30 बाबल, नना मोमोट इव्वुरोम उंदे आंद,” इंचि इत्‍तोर.
JOH 10:31 अस्‍के मरुंदि मल्का यहुदिल्क येसुन हव्कालय बंडां पेरतुर.
JOH 10:32 अय्ते येसु, “नावा बाबाल नाकु वेहताप नना वेल्‍लेन बेसता कबाह्‍क मीकु कीसि हुपिस्तन. अव्टेटाल बद कबळहाटीं नाकुन बंडाने तनालय हूळसंतिर?” इंचि ओर्कुन पूसकीतोर.
JOH 10:33 अस्‍के ओर, “निमे कीता बेसता कबाह्कुनाहाटीं नीकुन बंडाने तन्‍नोम. गानि निमे पेनदा अपमानम कीतिन. अचोने आयका निमे मनकन आसिगुडा नीवद निमे पेन इंचि वेहकुंतिन, अदुनहाटीं मोमोट नीकुन बंडाने तनंतोम” इत्‍तुर.
JOH 10:34 अस्‍के येसु ओर्क इल्‍हा जवाब हीतोर, “मीवा मूसाना नियमते, ‘मिमेट पेनकु आंदिर इंचि नना इत्‍तन,’ इंचि इच्‍चुर लीडर्कुन पेन इत्‍तद, रासि हिल्‍लेना? मंता.
JOH 10:35 दर्मसास्‍त्रम बस्‍केने तप्पु वेहो. ओक्‍कला, पेन दाना पोल्‍ले, बोर्क-बोर्क अय्ते दोर्कतनो, ओर्कुन पेनकु इंचि इत्‍तय्ते, नाकुन बाबाल पेरसि इद दुनियाते लोहचीतस्के, ‘नना पेनदा मर्रिन’ इल्‍हा इंचि इत्‍ते, नना पेनदा अपमानम कीतन इंचि मिमेट बल्हा इंतिर?
JOH 10:37 नावा बाबाल कियना कबाह्‍क नना कियाकोंटे, नाकुन नममट.
JOH 10:38 गानि नना अव कबाह्‍कुन कींतन इंचि, नाकुन नम्मकोन्‍ना, नना कियना कबाह्कुनपोर्रो अयना विस्वासम इर्रट. अस्‍के, बाबाल ना लोप्पो, नना बाबाना लोप्पो मंतोम इंचि मीकु तेळियार,” इंचि येसु इत्‍तोर.
JOH 10:39 अस्‍के ओर मरुंदि मल्का येसुन दोर्का पियालय हूळतुर, गानि ओर ओरा कय्‍दाल तपिच्‍कुंचि अगटाल होत्‍तोर.
JOH 10:40 येसु मर्रा योर्दन बेरेटा हब्बेरा, बगा अय्ते मुन्‍ने योहान बापतिस्मा हियुंदुर, अदे जेगाते होंचि अग्गेन मत्‍तोर.
JOH 10:41 अस्‍के ओनगा वेल्‍लेन मंदि वासि, “बापतिस्मा हियना योहान इचंत्रम आयनव बवे कबाह्‍क किया हिल्‍लोर. गानि ई मनकना बारेमते ओर बतल अय्ते वेहतोरो, अव अन्‍नि निजम आतां,” इंचि ओरद-ओरे वळ्कालय दल्‍गतुर. पजा अगा वेल्‍लेन मंदि येसुनपोर्रो विस्वासम कीतुर.
JOH 11:1 लाजर पोरोलतोर वरोर मनकल बिमार अर्सि मत्‍तोर. ओर ओना मरियम आनि मार्ता इनना अक्‍काह्कुनतोनि बेतानि इनना नाटे मनुंदुर.
JOH 11:2 मुन्‍ने उंदि मल्का उंदि मुरतळ, सामिना काल्कुंक अत्‍तर निय होकसि दाना केल्कुने उसुमता, अद इदे मरियम आंद. ई बिमार अरता लाजर दाना तम्मुर आंदुर.
JOH 11:3 अदुनहाटीं अव रोंड अक्‍काह्‍क, “सामि, नीवा पावरमगल्‍लोड वरोर, बिमारते मंतोर,” इंचि येसुंक कबुर लोहतां.
JOH 11:4 अद कबुर केंजसि येसु, “लाजरुंक अद बिमारि ओन हव्‍किसि ओयालय वाया हिल्‍ले, गानि पेनदा पेदातनमतुन हुप्‍सालय वाता. इदुनहेंदाल पेनदा मर्रिंक कदर दोर्कार,” इंचि इत्‍तोर.
JOH 11:5 येसुंक मार्ताल, दाना अक्‍कल आनि लाजर ईर इत्‍ते पावरम.
JOH 11:6 लाजर बिमारते मंतोर इत्‍ता कबुर तेळियिनागानि येसु बद नाटे अय्ते मत्‍तोरो, अदे नाटे इंका रोंड रोजकु आगतोर.
JOH 11:7 पजा येसु, “वट, मनम यहुदिया राज्येम मल्सि दाकोम,” इंचि ओना सिस्युल्कुन इत्‍तोर.
JOH 11:8 गानि सिस्युल्क, “रब्‍बी, कोन्‍नि रोजकु मुन्‍नेन अगाटा यहुदि पेद्‍दाल्क नीकुन बंडाने तंचि हव्कालय हूळतुर. अयना निमे मर्रा अग्गेन दांतिना?” इंचि येसुन इत्‍तुर.
JOH 11:9 अस्‍के येसु, “पोद्‍दाला पन्‍नेंड गंटां मन्‍नोंगां? ई वेलाते ताकानोर दुनियाता वेलगुन हूळसेक ताकंतोर, इंचि ओना कादुक बतल दल्‍गो ओर हिळु अर्रोर.
JOH 11:10 गानि नर्काटा वेलाते ताकानोना लोप्पो वेलगु मन्‍नो, अदुनहाटीं ओना कादुक बतलन्‍ना दल्‍गिसि ओर हिळु अर्रा परंतोर,” इंचि ओर्क वेहतोर.
JOH 11:11 इव पोल्‍लें आता पजा मर्रा येसु, “मना दंटगाड लाजर निद्रा होत्‍तोर, गानि ओन नना निद्रताल तेहालय दांतन,” इंचि सिस्युल्कुन इत्‍तोर.
JOH 11:12 अस्‍के सिस्युल्क, “सामि, ओक्‍कला ओर निद्रा होंचि मनानय्ते बेस आंतोर,” इंचि इत्‍तुर.
JOH 11:13 येसु लाजरना हामुरता बारेमते वळ्कतोर. गानि सिस्युल्क अय्ते लाजर निजम निद्रा होंचि आराम कीसंतोर इंचि इनकुत्‍तुर.
JOH 11:14 अदुनहाटीं येसु ओर्क, “लाजर हासोत्‍तोर,” इंचि कुल्‍ला-कुल्‍ला वेहतोर.
JOH 11:15 वेहचि, “हासोत्‍तस्के नना ओनगा मना हिल्‍लेन. इद मीहाटींगे जर्गता, इंचि नना कूस मंतन. दीनहेंदाल मिमेट नापोर्रो विस्वासम कीकिट. वट! इंदके मनम ओनगा दाकोम,” इंचि इत्‍तोर.
JOH 11:16 अस्‍के, “दट! येसुनतोनि हायालय मनमगुडा दाकोम,” इंचि एमडाल्‍कुनाल वरोर तोमल इनना सिस्युड कळमता सिस्युल्कुन इत्‍तोर.
JOH 11:17 बेतानि नाटे एवतस्‍के, लाजरुन बोंदाते ताससि नालुं रोजकु आता, इंचि येसुंक तेळियता.
JOH 11:18 बेतानि नार येरुसलेम सहरताल दग्‍गेर-दग्‍गेरा मूड किलो मीटर्क लक्‍कु मंता.
JOH 11:19 तम्मुर हासोत्‍ताहेंका वेल्‍लेन दुक्‍कमते मनना मार्ता आनि मरियमुंक दैरनेम हियालय वेल्‍लेटोर यहुदिल्क वासि मत्‍तुर.
JOH 11:20 येसु वासंतोर इंचि मार्तांक तेळियतस्के ओन्क कलियालय अद एदुर होत्‍ता. गानि मरियम मात्रम लोने मत्‍ता.
JOH 11:21 मार्ताल येसुंक कलियसि, “सामि, निमे गिंटा इगे मंचि मत्‍ते, नावा तम्मुर हायाकोन्‍नेर.
JOH 11:22 गानि इंदके अयना बतल आयो. निमे पेनदुन बतल तल्‍कते अद, नीकु पेन हींता, इंचि नाकु एरपाट,” इंचि इत्‍ता.
JOH 11:23 अस्‍के येसु, “नीवा तम्मुंक मर्रा जीवा अर्रंता,” इंचि इत्‍तोर.
JOH 11:24 पजा मार्ताल, “हो सामि, हातोर अंटोर्क जीवा अर्रना आकिरता रोजुने, ओर मर्रा जीवाते तेदानुर इंचि नाकु एरपाट मंता,” इंचि इत्‍ता.
JOH 11:25 अद केंजसि येसु, “हातोर्कुन तेहानोन आनि पिस्वरतुन ननाने आंदुन. नापोर्रो विस्वासम कीतोर, हायिनागानि मर्रा जीवाते तेदांतुर.
JOH 11:26 जीवाते मननेंके नापोर्रो विस्वासम इर्रनोर अंटोर्क बस्‍केने हामुर वायो. इद पोल्‍लेतुन निमे नम्मंतिना मार्ता?” इंचि दान पूसकीतोर.
JOH 11:27 अस्‍के अद, “हो सामि, पेनदा मर्रिन निमेन आंदिन, इंचि नना नम्मंतन. इंका इद दुनियाते वायना मत्‍तोर किरिस्‍तुनगुडा निमेन आंदिन,” इंचि इत्‍ता.
JOH 11:28 इच्‍चोन वळ्‍किसि अद अगटाल पेय्सि होंचि, दाना अक्‍कल मरियमुन सपुडदाका पक्‍कक केयता. केय्‍सि, “गुरु वातोर, ओर नीकुन केयसंतोर,” इंचि वेहता.
JOH 11:29 मार्ताना पोल्‍ले केंजता केंजमळे मरियम बिराना तेदसि येसुनगा होत्‍ता.
JOH 11:30 येसु इंका नाटे होळिया हिल्‍लोर. मार्ताल ओन्क बगा अय्ते कलियतनो, अदे जेगाते मत्‍तोर.
JOH 11:31 मरियमुंक दैरनेम हियालय दानतोनि लोते बोर अय्ते मत्‍तुरो, आ यहुदिल्क मरियमुन कुस्कुने तेदसि होननेंके हूळसि, “अद लाजरुना बोंदातगा होंचि अळंता बारे,” इन्कुंचि ओरगुडा दाना पज्जेन होत्‍तुर.
JOH 11:32 येसु मत्‍ता जेगातगा मरियम एवसि, ओन हूळता. हूळसि ओना काल्कुनपोर्रो अरसि, “सामि, निमे इगे मंचि मत्‍ते ना तम्मुर हायाकोन्‍नेर,” इंचि इत्‍ता.
JOH 11:33 मरियम आनि दानतोनि वातोर अंटोर यहुदिल्कुना अळुळ हूळसि, येसुंक बादा अनपिस्ता. मनसुने ओर वेल्‍लेन दुक्‍कमते मत्‍तोर.
JOH 11:34 पजा येसु, “ओन मिमेट बगा इरतिर?” इंचि पूसकीतस्‍के, “वासि हूळा सामि!” इंचि इत्‍तुर.
JOH 11:35 हूळसि येसु अळतोर.
JOH 11:36 अस्‍के यहुदिल्क, “हुळट, लाजर इत्‍ते ओन्क बच्‍चोन पावरमो!” इंचि इत्‍तुर.
JOH 11:37 गानि इच्‍चुर लोकुल्‍क, “ईर मनकल, वरोर गुड्‍डिंक कळ्‍क दिस्‍सानाल कीतोर अय्ते, लाजरुन हामुरताल कापाळा पराकोन्‍नेरा?” इंचि इत्‍तुर.
JOH 11:38 येसुंक मरुंदि मल्का मनसुने बादा अनपिस्ता. पजा ओर लाजरुना बोंदातगा होत्‍तोर. अद बोंदा उंदि पडालेह्का मत्‍ता. दाना सोर्रेक अड्‍डम उंदि बंडा दोब्‍बिसि मत्‍ता.
JOH 11:39 पजा येसु, “अद बंडातुन तेंडट,” इंचि इत्‍तोर. गानि हासोत्‍तोना अक्‍कल मार्ताल, “सामि, ओर हासि नालुं रोजकु आसंता. अदुनहाटीं ओना सेत्‍ता इरगा गब्‍बु पीसि मंदगोम!” इंचि इत्‍ता.
JOH 11:40 अस्‍के येसु, “निमे विस्वासम कियानय्ते पेनदा महिमातुन हूळकिन, इंचि नना नीकु वेहा हिल्‍लेना?” इंचि दान इत्‍तोर.
JOH 11:41 अदुनहाटीं ओर आ बंडातुन तेंडतुर. पजा येसु पोर्रो हूळसेक, “बाबा, निमे ना पारतना केंजताहाटीं, नीकु दन्यवाद.
JOH 11:42 निमे बस्‍केळ्‍के नावा पारतना केंजंतिन इंचि नाकु एरके. गानि नाकुन निमेन लोहतिन इत्‍तादुन, ना सुट्‍टु निलसि मत्‍ता लोकुल्‍क नम्मुगोम इंचि ओराहाटींगे नना ई पोल्‍ले वळ्‍कतन,” इंचि इत्‍तोर.
JOH 11:43 इल्‍हा वळ्‍किसि येसु, “ए लाजर, पलातुक पेय्सि वा!” इंचि लगांचि केयतोर.
JOH 11:44 अस्‍के हासोत्‍ता लाजर पलाते वातोर, अस्‍के ओना कय्‍क-काल्क हामुर कप्पिडते हूट्‍टिस मत्‍तां, ओना मोकोमगुडा उंदि सेल्‍लाते हूट्‍टिस मत्‍ता. पजा येसु, “ओना कट्‍टुकु लेह्‍चि ओन होना हीम्टु,” इंचि इत्‍तोर.
JOH 11:45 येसु कीता अद कबळतुन हूळसि, मरियमुनगा वाता यहुदिल्कुनाल वेल्‍ले मंदि यहुदिल्क, येसुन नम्मुतुर.
JOH 11:46 गानि ओराव्टेटाल इच्‍चुर लोकुल्‍क मात्रम, परिसिल्कुनगा होंचि येसु बतल-बतल कीतोर अदुन वेहतुर.
JOH 11:47 अदुनहाटीं पेर्मालोर्क, परिसिल्क कलियसि उंदि पेद्‍दा पंचादि उपिस्तुर. उपिच्‍चि, “ओर मनकल अय्ते वेल्‍लेन अद्‍बूतामाता चिन्‍हां कीसि हुपिच्‍चंतोर. अय्ते मनम बतल कीकोम?
JOH 11:48 ओर कियानदुनंता मनम इल्हेन हूळसेक मत्‍ते, अंटोर ओने नम्मिसि ओन राजाल कींतुर. पजा रोम सरकारता सिपाइल्क वासि मना गुळितुन, मना लोकुल्‍कुन नासडेम कीसि पोहांतुर,” इंचि वळ्कतुर.
JOH 11:49 ओरव्टे वरोर कयपाल इनानोर मत्‍तोर. अद वर्सा ओरे पेद्‍दा पेर्माल मत्‍तोर. ओर, “मीकु बतले तेळियोना!
JOH 11:50 देसेमता अंटोर लोकुल्‍क नासडेम आयनदानकन्‍ना, लोकुल्‍कुनाहाटीं वरोर मनकल हाते, बेस आयोना!” इंचि इत्‍तोर.
JOH 11:51 सिराप यहुदि लोकुल्‍कुना पायदाहाटींगे आयो गानि, पूरा दुनियाते बेके-बेकेनो सिल्‍लर आसि मत्‍ता पेनदा लोकुल्‍कुन उंदि कियालय, येसु ओना जीवातुन हींतोर इत्‍ता पोल्‍लेतुन ओर वेहतोर. इद पोल्‍ले ओर ओना सतता विचारमताल वळ्का हिल्‍लोर, गानि अद वर्सा ओर पेद्‍दा पेर्माल मत्‍तोर इंचि बविस्यवानि कीतोर.
JOH 11:53 इल्‍हा अद रोजुनाल येसुन हव्कालय यहुदि पेद्‍दाल्क पिलान कीतुर.
JOH 11:54 अदुनहाटीं येसु अस्‍केटाल यहुदिल्कुन नड्‍डुम अंटोर्क दिस्सेक वेलियाकोंदुर. पजा ओर येरुसलेम सहर होळसिसि बय्‍लि जेगाक दग्‍गेर मनना एप्राइम इनना नार होत्‍तोर. होंचि अगा ओना सिस्युल्कुनतोनि मनालय दल्‍गतोर.
JOH 11:55 अस्‍के यहुदिल्कुना दाटसि होनना पंडुगु दग्गेर्क एवसि मत्‍ता. अदुनहाटीं ओरा सततुन सुद्‍द कीकुनना रिवाज कियालय पंडुगुंकन्‍ना मुन्‍नेन वेल्‍लेन लोकुल्‍क नाहकुनाल येरुसलेम होत्‍तुर.
JOH 11:56 ओर अंटोर येसुन पह्कसेक मत्‍तुर. गुळिते नित्‍तिसि, “मीकु बतल अनपिच्‍चेक, ओर ई पंडुगुनाहाटीं वांतोरा, वायोरा?” इंचि वरोंक-वरोर पूसकियुंदुर.
JOH 11:57 अचोने आयका पेर्मालोर्क, परिसिल्क, येसुन दोर्का पियनाहाटीं, “येसु बगा मंतोर इत्‍ता संगति बोर्कन्‍ना तेळियते, माकु वासि वेहाट हुळाट!” इंचि आदेस हीसि मत्‍तुर.
JOH 12:1 दाटसि होनना पंडुगुंकन्‍ना हारुं रोजकु मुन्‍नेन येसु बेतानिया इनना नाटे एवतोर. येसु बोन अय्ते हामुरताल जीवाते तेहतोरो आ लाजर ई बेतानियातेन मनुंदुर.
JOH 12:2 अगा येसुनाहाटीं नर्कटा गाटो तयार कीतुर. मार्ताल गाटो वाटता. लाजरगुडा गाटो तिनानोरतोनि उद्‍दिस मत्‍तोर.
JOH 12:3 अस्‍के मरियम, जटामासि इनना मराता एक्‍को दराता सगोम लीटर अत्‍तर निय तच्‍चि, येसुना काल्कुनपोर्रो वळियता. वळियसि, दाना केल्कुने ओना काल्‍कुन उसुमता. अस्‍के अद नियदा गब्‍बु लोनंता विच्‍चका होत्‍ता.
JOH 12:4 गानि ओना सिस्युल्‍कुनाल इस्‍कारियोत नाटेनोर यहुदल इननोर वरोर मत्‍तोर. ई यहुदले पज्जो, येसुन दोकाते पीसि हियानोर आंदुर. ओर, “अरेरे! ई अत्‍तर नियदुन मूड नुह्कुना एंडि रूपेंक अम्मिसि, आ रूपेन गरिब लोकुल्‍कुंक हियानायोना?” इंचि इत्‍तोर.
JOH 12:6 ओन्क गरिब लोकुल्‍कुना पर्वा मंता इंचि अल्हा इना हिल्‍लोर. गानि ओना दोंगा बुद्‍दिहेंदाल, ओनगा कोत्‍तना संचि मननेंके, आ संचिते वाटता कोत्‍तानाल ओर दोसकुनुंदुर. अदुनहाटींगे ओर अल्हा वळ्कतोर.
JOH 12:7 अस्‍के येसु, “नना हायना रोजु दग्‍गेर एवताहाटीं नाकुन तयार कियालय अदुन होळसीम.
JOH 12:8 गरिब लोकुल्‍क बस्‍केळ्‍क मीतोने मनांतुर, गानि नना मीतोनि बस्‍केळ्‍क मनोन,” इंचि इत्‍तोर.
JOH 12:9 अच्‍चोटेन येसु अगा मंतोर इंचि तेळियतस्के, वेल्‍लेन यहुदि लोकुल्‍क, सिराप येसुन हूळालये आयो गानि, येसु हामुरताल जीवाते तेहता आ लाजरुनगुडा हूळालय अगा होत्‍तुर.
JOH 12:10 ई लाजरुनहेंकेन वेल्‍लेन मंदि यहुदिल्क ओर्कुन होळसि येसुनपोर्रो विस्वासम इरतुर, अदुनहाटीं पेद्‍दा पेर्मालोर लाजरुनगुडा हव्कना पिलान कीतुर.
JOH 12:12 इंकुंदि रोजु, येसु येरुसलेम वासंतोर इंचि, पंडुगुंक वाता लोकुल्‍कुंक तेळियता अय्ते, वेल्‍लेन मंदि लोकुल्‍क कजूर मराकुना कोम्मना-कोम्मां पीसि ओन्क कलियालय एदुर होत्‍तुर. होंचि, “होसन्‍ना! सामिना पोरोल्ते वायना इस्राएलता राजाना वेल्‍लेन दन्यवाद आयि, जय जोहार!” इंचि मोत्‍कुत्‍तुर.
JOH 12:14 दर्मसास्‍त्रमते रासि मत्‍ता पोल्‍ले पूरा आयगोम इंचि येसु उंदि लेय्या गाडदि पोर्रो उद्‍दिस सहरतेके वासेक मत्‍तोर. दर्मसास्‍त्रमते रासता पोल्‍ले इल्‍हा मंता: “सियोनता लोकुल्‍कुनिटा वेरियमटु, हुळाट, मीवा राजाल गाडदि पोर्रो उद्‍दिस वासंतोर.”
JOH 12:16 इव गटनां जर्गनेंके येसुना सिस्युल्कुंक बतले तेळिया हिल्‍ले. गानि येसु हामुरताल जीवाते तेदसि महिमाते स्वर्गम होत्‍तस्के, जर्गता अन्‍नि गटनां, दर्मसास्‍त्रमते रासि मत्‍तापे जर्गतां, लोकुल्‍कगुडा ओनतोनि अल्हेन कीतुर. इंचि ओर्क अर्तम आता.
JOH 12:17 येसु लाजरुन बोंदाताल केय्‍सि जीवा अरहतदुन हूळता लोकुल्‍क, ओर हूळतदुना बारेमते गवाइ वेहतुर.
JOH 12:18 येसु ई अद्‍बूतामाता चिन्‍ह हुपिस्तोर इंचि लोकुल्‍क केंजतुर, अदुनहाटीं ओर ओन्क कलियालय होत्‍तुर.
JOH 12:19 पजा परिसिल्क, “मना पिलानकु बता कबळ्‍क ओज्जा हिल्‍लें. हुळाट, पूरा दुनियंता ओना पज्जो अरसि होंचंता,” इंचि ओरद-ओरे वळ्कालय दल्‍गतुर.
JOH 12:20 पंडुगुने मोळ्‍कालय वाता लोकुल्‍कुनाल इच्‍चुर युनानि लोकुल्‍क मत्‍तुर.
JOH 12:21 ओर गालिल राज्येमता बेतसेदा नाटेना, पिलिपनगा वासि, “महाराज, माकु येसुन कलियाना मंता,” इंचि इत्‍तुर.
JOH 12:22 इद पोल्‍ले पिलिप, अंदरियल इनानोंक वेहतोर. पजा पिलिप आनि अंदरियल इव्वुर कलियसि येसुंक वेहातुर.
JOH 12:23 अस्‍के येसु इल्‍हा वेहालय दल्‍गतोर, “मनकना रूपमते पुटतोन नना, इंदके नावा महिमातुन हुप्‍सना वेला दग्गेर्क एव्ता.
JOH 12:24 नना निजम-निजम वेहासेक, वंजि पेडे बूमिते अर्सि हासोन्‍नाकोंटे अद उंदे मनंता. गानि अद हासोंचि मोल्का वाते मात्रम पेद्‍दा बेर्सि वेल्‍लेन पेडेकुन तयार कींता.
JOH 12:25 अल्‍हेने, बोरे आयिर! इद दुनियाते ओर ओना जीवातुन पावरम कींतोर, ओर ओना जीवातुन पोळागोटकुंतोर. गानि बोर अय्ते इद दुनियाते ओना जीवाता पर्वा किय्योर, ओर ओना जीवातुन बस्‍केळ्‍क पिस्सना पिस्वरहाटीं कापाळसि इर्रंतोर.
JOH 12:26 बोर नावा सेवा कींतन इंतोर, ओर नावा पज्जो ताकना. बारित्‍ते नना बगा मनंतनो, अगा नावा सेवा कियानोरगुडा मना पींता. अल्‍हेने बोर नावा सेवा कींतोर, नावा बाबाल ओन्क कदर हींतोर.
JOH 12:27 इंदके नावा जीवा तकलिपते मंता. नना बतल इंदकन? बाबा, इद तकलिपता वेलाताल नाकुन तप्‍सा, इंचि इंदकना? इनोन. बारित्‍ते नना इद वेलाहाटींगे वातन.
JOH 12:28 बाबा! नीवा पोरोल्क निमेन कदर हीम,” इंचि येसु इत्‍तोर. अल्हा इत्‍तस्के स्वर्गमताल उंदि अल्किर, “नना नावा महिमाता कदरतुन दीनकन्‍ना मुन्‍ने हीतन, मर्रा इंका हींतन,” इंचि केंजावाता.
JOH 12:29 अद अल्किरतुन केंजसि अगा नित्‍तिसि मत्‍ता इच्‍चुर लोकुल्‍क, “मब्बु उरुमसंता रो!” इंचि इत्‍तुर. इंकिच्‍चुर बारे, “आयो, पेनदा दूता ओनतोनि वळ्कता,” इंचि इत्‍तुर.
JOH 12:30 अस्‍के येसु, “अद अल्किर नाहाटीं आयो, मीवाहाटीं वाता.
JOH 12:31 इंदके इद दुनियाता न्‍यायम कियना वेला एवता. इद दुनियापोर्रो राज्येम कियना अदिकारिन पलाते पेचाहचि गेदमना वेला इंदके वाता.
JOH 12:32 बस्के अय्ते नाकुन बूमिताल पोर्रोळ्‍क तेहमळ जर्गंतनो, अस्‍के अंटोर्कुन नाहेके इग्कुंतन,” इंचि इत्‍तोर.
JOH 12:33 इल्‍हा वळ्‍किसि येसु, ओन्क बसोंटा हामुर वायनद मंता इत्‍तदुन वेहतोर.
JOH 12:34 अस्‍के लोकुल्‍क, “किरिस्‍तु बस्‍केळ्‍क जीवातेन मनंतोर, इंचि मोमोट मूसाना नियमते केंजतोम. अय्ते, मनकना रूपमते पुटतोन बूमिताल पोर्रोळ्‍क तेहांतुर, इंचि निमे बल्हा वेहा परंतिन? ई मनकना रूपमते पुटतोर बोर आंदुर?” इंचि येसुन पूसकीतुर.
JOH 12:35 अस्‍के येसु, “वेलगु मीतोनि इंका जेरासेप मनंता. हीकट मीकुन मुच्‍चका मुन्‍नेन, वेलगुने मिमेट ताकसेके मंटु. बारित्‍ते हीकटते ताकानोर, ओर बगा दांतोर ओनद ओन्‍के तेळियो.
JOH 12:36 मीकु इद वेलगुना संतानम आयानद मत्‍ते, मिहगा वेलगु मननेंकेन मिमेट दानपोर्रो विस्वासम इर्रट,” इंचि येसु ओर्क वेहतोर. वेहचि ओर्क दिसाकोंटा ओरागटाल होत्‍तोर.
JOH 12:37 लोकुल्‍कुना मुन्‍ने येसु वेल्‍लेन अद्‍बूतामाता चिन्‍हें कीतोर. अयना ओर लोकुल्‍क येसुनपोर्रो विस्वासम इर्रा हिल्‍लुर.
JOH 12:38 दीनहेंदाल, यसायाह इनना पेनदा कबुरतोर, एनकटा रासता पोल्‍ले, पुरागा आता. अद पोल्‍ले इल्‍हा मत्‍ता: “सामि! मोमोट वेहता कबुरतुन बोर नमतुर? पेनदा ताकततुन बोर्क हुपिचमळ जर्गता?”
JOH 12:39 ओर विस्वासम इर्रा पराहिल्‍लुर. बारित्‍ते, यसायाहल इंकुंदि जेगाते इल्‍हा रासतोर:
JOH 12:40 “ओर ओरा कळ्‍कुन दिसाकोंटा कीतोर आनि ओरा मनसुन बंद कीतोर. अदुनहाटीं ओर कळ्‍कुने हूळा परसेक हिल्‍लुर, मनसुनाल ओर्क तेळियसेक हिल्‍ले. दीनहेंदाल ओर नाहेके तिरियुर, नना ओर्कुन बेस किय्योन.”
JOH 12:41 यसायाहल येसुना महिमातुन हूळताहेंकेन ओना बारेमते ओर इव पोल्‍लें वेहतोर.
JOH 12:42 अय्नागानि वेल्‍ले मंदि यहुदि अदिकारिल्‍क येसुनपोर्रो विस्वासम इरतुर. अव्टे यहुदि पेद्‍दाल्कगुडा मत्‍तुर. गानि परिसिल्कुंक तेळियते, ओर्कुन दर्मसास्‍त्रम कराहना लोते होळिया हिय्युर इत्‍ता वेर्रेक, ओर कुल्‍ला-कुल्‍ला ओप्कुनाकोंदुर.
JOH 12:43 बारित्‍ते, ओराहाटीं पेनदाहेंदाल दोर्कना कदरकन्‍ना, लोकुल्‍कुनहेंदाल दोर्कना कदरे ओर्क एक्‍को पावरम.
JOH 12:44 अस्‍के येसु वरगेय्‍सि, “बोर अय्ते नापोर्रो विस्वासम इर्रंतोर, ओर सिराप ना पोर्रेन आयो गानि, नाकुन लोहचीतोन पोर्रोगुडा विस्वासम इर्रंतोर.
JOH 12:45 अल्हेन बोर अय्ते नाकुन हूळांतोर, ओर नाकुन लोहचीतोनगुडा हूळांतोर.
JOH 12:46 नापोर्रो विस्वासम इर्रनोर ओर बोरे आयिर, हीकटते मनानायो, इंचि नना इद दुनियाते वेल्‍गुनलेह्का वातन.
JOH 12:47 बोरे आयिर, ओक्‍कला नावा पोल्‍लें केंजसिगुडा अवुन परकारम ताकाकोंटे, ओना न्‍यायम नना किय्योन. बारित्‍ते नना इद दुनियाते न्‍यायम कियालय वाया हिल्‍लेन, गानि इद दुनियातोर्कुन पिसागोटलय वातन.
JOH 12:48 बोर अय्ते नाकुन हय्साका नावा पोल्‍लेन पिय्योर, ओना न्‍यायम कियनाहाटीं वेरे उंदि मंता. अद नना मीकु कराहता पोल्‍ले आंद. आकिर रोजुननाड ओना न्‍यायम नावा पोल्‍ले किय्‍यार.
JOH 12:49 बारित्‍ते नना नावा मनसुंक वाताप वळ्का हिल्‍लेन, गानि नना बतल वळकना, बतल वेहना, इंचि नाकुन लोहचीता बाबाले नाकु आदेस हीतोर.
JOH 12:50 ओना आदेस बस्‍केळ्‍क पिस्सना पिस्वरताहेके ओंता इंचि, नाकु एर्का मंता. अदुनहाटीं बाबाल नाकु बल्हा वेहना इंचि वेहतोरो, अल्हेन नना मीकु वेहचंतन,” इंचि ओर्क वेहतोर.
JOH 13:1 इद दुनियातुन होळसि पेनबाबानगा मल्सि होनना वेला दग्गेर्क एव्ता इंचि, येसुंक दाटसि होनना पंडुगुंकन्‍ना मुन्‍नेन तेळियता. इद दुनियाते मनना ओना लोकुल्‍कुन ओर वेल्‍लेन पावरम कीतोर. अचोने आयाका अद पावरमतुन आकिरदाका ओरपोर्रो हुपिच्‍चेकेन मत्‍तोर.
JOH 13:2 येसु, ओना सिस्युल्क नर्कटा वेलाते गाटो तिनालय उद्‍दिस मत्‍तुर. गानि गाटो तिन्‍नका मुन्‍नेन देय्यम, इस्‍कारियोत नाटेना सिमोन इनानोना मर्रि यहुदन लोप्पो वासि, येसुंक दोका हियालय ओन एक्‍किसता.
JOH 13:3 पेनबाबाल अन्‍नि अदिकाराल्‍क येसुना कय्‍दुक हीतोर, इंका ओर पेनदागटाल वातोर, पेनदागेन मल्सि दांतोर इत्‍तद अन्‍नि ओन्क एरपाटे मत्‍ता.
JOH 13:4 अदुनहाटीं ओर गाटो तिनालय उद्‍दिस मत्‍तागटाल तेदतोर. तेदसि, केरसि मत्‍ता अंगितुन तेंडतोर. तेंडसि उंदि सेल्‍लातुन नडिक हुटतोर.
JOH 13:5 पजा उंदि गमेलाते एर पीसि सिस्युल्कुना काल्क नोरसेके, नडिक हुटसि मत्‍ता सेल्‍लाते उस्मालय दल्‍गतोर.
JOH 13:6 अल्हा कीसेके ओर सिमोन पत्रुनगा वातोर. अस्‍के पत्रु, “निमे नावा काल्क बारि नोरसंतिन सामि?” इंचि येसुन पूसकीतोर.
JOH 13:7 अस्‍के येसु, “नना कियानद नीकु इंदके अर्तमायो, गानि मुन्‍ने-मुन्‍ने नीके तेळियार,” इंचि इत्‍तोर.
JOH 13:8 पजा पत्रु, “निमे नावा काल्क बस्‍केने नोरमा,” इंचि इत्‍तोर. अस्‍के येसु, “ननागिंटा नीवा काल्क नोर्रकोंटे, निमे नावोन आया परिन,” इंचि वेहतोर.
JOH 13:9 अस्‍के सिमोन पत्रु, “अय्ते सिराप नावा काल्के आयो, नावा कय्‍कुन, नावा तल्‍लातुनगुडा नोर्रा सामि!” इंचि इत्‍तोर.
JOH 13:10 पजा येसु, “बोर अय्ते एर तुंगतोर, ओर बेस साप मनंतोर. ओर सिराप काल्क नोरकुत्‍ते सालु. अल्हेन मिमेट बेस साप मंतिर, गानि मिहागटाल अंटोर बेस साप हिल्‍लिर,” इंचि वेहतोर.
JOH 13:11 ओन्क दोका हियानोर बोर इंचि, ओन्क एरपाट मत्‍ता. अदुनहाटीं ओर, “मिहागटाल अंटोर बेस साप हिल्‍लिर,” इंचि इत्‍तोर.
JOH 13:12 ओरां अंटोरा काल्क नोरमळ आता पजा, येसु अंगि केरसि, मुन्‍ने उद्‍दिस मत्‍ता जेगाते होंचि उद्तोर. उद्‍दिस इल्‍हा वळ्कालय दल्‍गतोर, “नना मीकु बतल कीतन, मीकु अर्तम आतना?
JOH 13:13 मिमेट नाकुन गुरु, सामि इंचि केयंतिर. नना गुरु, सामिन आंदुन, अदुनहाटीं मिमेट इनानद बरोबरे. नना गुरुन, सामिन आसिगुडा मीवा काल्क नोरतन. अय्ते मिमेटगुडा वरोना काल्क वरोर नोरसेके सेवा कियना. नना मीकु निजम-निजम वेहासेक, वरोर दासि मनकल ओना मालकुंकन्‍ना पेद्‍दा आयोर. अल्हेन वरोर कबुरतोर ओन लोहतोनकन्‍ना पेद्‍दा आयोर. नना बल्हा अय्ते कीतनो, अल्हेन मिमेटगुडा कियना इंचि, इद उंदि उदाहरन हुपिस्तन.
JOH 13:17 इंदके इव पोल्‍लें मीकु तेळियतां. अदुनहाटीं मिमेट इवुन पीसि ताकतिरित्‍ते, पेन मीकु आसिर्वाद हींता.”
JOH 13:18 “नना मी अंटोरा बारेमते वळ्कसेक हिल्‍लेन. नना बोर्कुन अय्ते पेर्कुत्‍तन, ओरा बारेमते नाक बेस एरपाट. गानि, ना हारि तित्‍तोरे नाकु अड्‍डम आतोर, इल्‍हा दर्मसास्‍त्रमते रासि मत्‍ता पोल्‍ले पुरागा आयना इंचि इल्‍हा जर्गपींता.
JOH 13:19 इल्‍हा जर्गतस्के, ओन ननाने आंदुन, इंचि मिमेट विस्वासम कियनाहाटीं, इव पोल्‍लें जर्गका मुन्‍नेन मीकु वेहासेक मंतन.
JOH 13:20 नना निजम-निजम वेहासेक, नना लोहतोन, बोर अय्ते स्विकार कींतोर, ओर नाकुन इंका स्विकार कींतोर. नाकुन स्विकार कियानोर, ओर नाकुन लोहचीतोनगुडा स्विकार कींतोर,” इंचि येसु इत्‍तोर.
JOH 13:21 इव पोल्‍लें वळ्‍कुड आतस्के येसुंक मनसुने बादा अनपिस्ता. पजा ओर, “नना निजम-निजम वेहासेक, मीवा लोप्पोटाल वरोर नाकुन दोकाते पीसि हींतोर,” इंचि इत्‍तोर.
JOH 13:22 येसु बोना बारेमते वळ्कतोरो इंचि तेळियका, सिस्युल्क वरोना मोकोम वरोर हूळकुत्‍तुर.
JOH 13:23 येसुना सिस्युल्‍कुनाल येसु बोन अय्ते पावरम कियुंदुरो, ओर येसुना दग्गेरेन उद्‍दिस मत्‍तोर.
JOH 13:24 अय्ते सिमोन पत्रु, “येसु बोना बारेमते इंचंतोरो पूस कीम,” इंचि ओन्क कय सय्गे कीतोर.
JOH 13:25 अस्‍के आ सिस्युड इंकिच्‍चो येसुनेके जर्गिसि येसुना रोमबोच्‍चेतगा तला इरसि, “ओर बोर आंदुर सामि?” इंचि पूसकीतोर.
JOH 13:26 अस्‍के येसु, “नना ई हारि तुकडातुन कुसिटे मुळ्‍हाचि बोनकय्ते हींतन, ओरे आंदुर,” इंचि जवाब हीतोर. पजा हारि तुकडातुन कुसिटे मुळ्‍हाचि इस्‍कारियोत नाटेना सिमोनुना मर्रि यहुदांक हीतोर.
JOH 13:27 यहुदल हारि तुकडा एतता एतमळे, ओन देय्यम पीता. अस्‍के येसु यहुदन, “निमे कियनद बतलो, अद बिराना कीम,” इंचि इत्‍तोर.
JOH 13:28 गानि येसु ओन अल्हा बारि इत्‍तोर इत्‍ता संगति मात्रम अगा तिनालय उद्‍दिस मत्‍तोर्कुंक बोर्के अर्तम आयाहिल्‍ले.
JOH 13:29 कोत्‍तना जोरा यहुदानगेन मनुंदु. अदुनहाटीं पंडुगुंक अव्‍सरम मत्‍ता बतलन्‍ना सामान अस्सि तर्रालय वेहतोर बारे, इंचि इच्‍चुर इनकुत्‍तुर. इंकिच्‍चुर बारे, अव्टेटाल इच्‍चुं गरिब लोकुल्‍कुंक हीम इंचि वेहतोर आंद, इंचि इनकुत्‍तुर.
JOH 13:30 पजा यहुदल हारि एत्‍कुंचि, बिराना पलाते होत्‍तोर. अस्‍के वेल्‍लेन नर्का आसि मत्‍ता.
JOH 13:31 यहुदल पलाते होत्‍तस्के, येसु इल्‍हा वेहालय दल्‍गतोर. “मनकना रूपमते पुटतोंक नाकु, महिमा दोर्कना वेला इंदके एव्ता. नाकु जर्गना अन्‍निटवुनहेंदाल पेनदुक महिमाता कदर दोर्कार.
JOH 13:32 नावाहेंदाल पेनदुक महिमाता कदर दोर्कानय्ते, पेन नाकु दाना कदर हिय्यार. अद आल्सेम कियाकोंटा बिरानेन हींता.
JOH 13:33 नावा पिलाल्कनिटा! नना इंका गडसेम मीवातोनि मनंतन. पजा मिमेट नाकुन पहककिर. यहुदिल्कुना पेद्‍दाल्कुंक, नना बगा दांतन, अगा मिमेट वाया परिर, इंचि बल्हा नना वेहतनो, अल्हेन मीकुगुडा वेहचंतन.
JOH 13:34 अदुनहाटीं नना मीकु उंदि पूना आदेस हीसंतन, मिमेट वरोंक-वरोर पावरम कीम्‍टु. नना मीकुन बल्हा पावरम कीतन, अल्हेन मिमेटगुडा वरोंक-वरोर पावरम कीम्‍टु.
JOH 13:35 मीवा वरोनद वरोर पावरम कियमळतुन हूळसि, मिमेट नावा सिस्युल्क आंदिर, इंचि अंटोर लोकुल्‍कुंक तेळियसि दांता,” इंचि येसु वेहतोर.
JOH 13:36 पजा सिमोन पत्रु, “निमे बेके दांतिन सामि?” इंचि पूसकीतोर. अय्ते येसु, “नना होनानगा, निमे इंदके वाया परिन. गानि नना होत्‍तंका पज्जोटाल वाकिन,” इंचि इत्‍तोर.
JOH 13:37 गानि पत्रु, “इंदके नना नीतोनि बारि वाया पर्रोन सामि? नीवाहाटीं नना नावा जीवा हियालयगुडा तयार मंतन,” इंचि इत्‍तोर.
JOH 13:38 अस्‍के येसु, “बतल! निमे नावाहाटीं जीवा हींतिना? नना नीकु निजम-निजम वेहासेक, निमे मूड मल्कां, नाकुन एरपाट किय्योन, इंचि इंदकिन, अस्‍केन गोगोड कूसार,” इंचि इत्‍तोर.
JOH 14:1 इंका येसु, “मिमेट मीवा मनसुन कस्‍टमते वाटमट. पेनदापोर्रो विस्वासम इर्रट, इंका ना पोर्रोगुडा विस्वासम इर्रट.
JOH 14:2 नावा बाबाना लोते वेल्‍लेन अर्रां मंतां. ओक्‍कला हिलाकोंटे मंचि मत्‍ते, मीवाहाटीं जेगा तयार कियालय होंचंतन इंचि, नना मीकु वेहचि मन्‍नेन.
JOH 14:3 नना होंचि अवुन सदुरतंका, मल्सि वासि मीकुन ओंतन. अस्‍के नना मनानगेन, मिमेटगुडा मंदकिट.
JOH 14:4 नना होनना हर्रि अय्ते मीकु एर्का मंता,” इंचि सिस्युल्कुन इत्‍तोर.
JOH 14:5 अस्‍के तोमल, “निमे बेके होंचंतिनो माकु अय्ते एरपाटे हिल्‍ले सामि! असोंटस्के, माकु नीवा होनना हर्रि बल्हा तेळियंता?” इंचि इत्‍तोर.
JOH 14:6 पजा येसु, “हर्रि, सत्‍तेम, आनि पिस्वर ननाने आंदुन. नाकुन होळसि बाबानगा बोरे एव्‍वा परोर.
JOH 14:7 नना बोन आंदुन, इंचि मिमेट एरपाट कीसि मत्‍ते, नावा बाबान इंका मिमेट एरपाट कीसि मन्‍नेर. इंदकेटाल मिमेट ओन एरपाट कींतिर, ओन हूळतिरगुडा,” इंचि वेहतोर.
JOH 14:8 अस्‍के पिलिप, “सामि, माकु बाबान हुपिस्ते, अचोने सालु,” इंचि येसुन इत्‍तोर.
JOH 14:9 अस्‍के येसु ओन्क इल्‍हा वेहतोर, “नना इच्‍चुं रोजकुनाल मीवातोने मंतन, अयना निमे नाकुन एरपाट किया हिल्‍लिना पिलिपु? नाकुन हूळतोर, ओर बाबान हूळतोर. अयना, माकु बाबान हुप्‍सा, इंचि निमे बल्हा इंचंतिन?
JOH 14:10 नना बाबाना लोप्पो, बाबाल नावा लोप्पो मंतोर. इदुन निमे विस्वासम कीसेक हिल्‍लिना? नना वेहना पोल्‍लें ना इच्‍चटा नना वेहसेक हिल्‍लेन, गानि नावा लोप्पो मनना नावा बाबाल, ओना कबाह्‍कुन नाहेंदाल कीकुंचंतोर.
JOH 14:11 नना बाबाना लोप्पो, बाबाल नावा लोप्पो मंतोर इत्‍ता पोल्‍लेपोर्रो मिमेट विस्वासम इर्रट. हिलाकोंटे नना कियना कबाह्कुनहेंदाल अयना नाकुन विस्वासम कीम्‍टु.
JOH 14:12 नना मीकु निजम-निजम वेहासेक, बोर अय्ते नाकुन नम्मंतुर, ओरगुडा नना कियनसोंटा कबाह्‍क कियानुर. अचोने आयका नना कियना कबाह्कुंकन्‍ना पेद्‍दा-पेद्‍दा कबाह्‍क कियानुर. बारित्‍ते नना नावा बाबानाहेके होंचंतन.
JOH 14:13 अदुनहाटीं, मिमेट नावा पोरोल्ते बतल तल्‍किना, नावा बाबांक महिमा वायानाहाटीं नना अदुन कींतन.
JOH 14:14 ओक्‍कला मिमेट ना पोरोल्ते बतल तल्‍किना, अद नना कींतन.”
JOH 14:15 “मिमेटगिंटा नाकुन पावरम कीते, नना वेहता आदेसकुन पीसि ताकट.
JOH 14:16 अस्‍के नना बाबांक विनंति कींतन. बाबाल मीवाहाटीं बस्‍केळ्‍क मीवातोनि मनालय इंकावरोर सहायम कियानोन हींतोर.
JOH 14:17 आ सहायम कियानोर इत्‍ते, पवित्र आत्मा मीकु सत्‍तेमतुन हुप्‍संता. दुनियातोर दानहेके हूळसेक हिल्‍लुर, दान एरपाट कीसेक हिल्‍लुर. अदुनहाटीं अद दुनियातोर्क दोर्को. गानि मिमेट दान एरपाट कींतिर. बारित्‍ते अद मीवातोनि मंता आनि पजा मीवा लोप्पेन मन्‍नार.
JOH 14:18 नना मीकुन दिक्‍कु हिलवोरलेह्का होळसि होन्‍नोन, नना मिहगा मल्सि वांतन.
JOH 14:19 इंका कोन्‍नि रोजकु आता पज्जो, दुनियातोर नाकुन हूळा परुर, गानि मिमेट नाकुन हूळा परकिट. बारित्‍ते नना जीवातेन मनंतन, मिमेट इंका जीवातेन मंदकिर.
JOH 14:20 अल्हा जर्गतस्के, नना बाबाना लोप्पो, मिमेट ना लोप्पो, नना मीलोप्‍पो मंतन इंचि मीकु तेळियार.
JOH 14:21 बोर अय्ते नना वेहता आदेसकुन स्विकार कीसि अवुन पीसि ताकंतोर, ओरे नाकुन पावरम कियानोर आंदुर. बोर अय्ते नाकुन पावरम कींतोर, ओन नावा बाबालगुडा पावरम कींतोर. पजा ननागुडा ओन पावरम कीसि, नना कुद्‍दु ओन्क दिस अरकन,” इंचि येसु वेहतोर.
JOH 14:22 पजा इस्‍कारियोत नाटेनोर आयका, इंकावरोर यहुदल, “सामि, निमे माके बारि दिस अरकिन? दुनियातोर्कुंक बारि दिस्सिन?” इंचि पूसकीतोर.
JOH 14:23 अस्‍के येसु ओन्क जवाब हीतोर, “नाकुन पावरम कियानोर अंटोर नना वेहता पोल्‍लेनपोर्रो ताकंतुर, आनि नावा बाबाल ओर्कुन जीवा कींतोर. असंटोनगा मोमोट होंचि ओनालोप्‍पो जेगा पींतोम.
JOH 14:24 नाकुन पावरम कियवोर, ओर नावा पोल्‍लेनपोर्रो ताकोर. मिमेट केंजना पोल्‍लें नावां आयों, गानि नाकुन लोहचीता बाबानव आंदुं.
JOH 14:25 इव पोल्‍लें नना मीवातोनि मननेंकेन वेहतन.
JOH 14:26 अय्नागानि, बाबाल नावा पोरोल्ते लोहना सहायम कियानोर, इत्‍ते पवित्र आत्मा, मीकु अन्‍नि पोल्‍लें करहार. अचोने आयका, नना मीकु वेहता अन्‍नि पोल्‍लें अद मीकु मति कीसि हिय्यार.
JOH 14:27 नना मीकु सांतितुन हीसि होंचंतन. दुनिया हियानसोंटा सांति आयो, गानि नना नावा सांतितुन मीकु हीसंतन. अदुनहाटीं मिमेट मीवा मनसुन कस्‍टमते वाटमट, वेरिया हियमट.
JOH 14:28 नना लक्‍कु होंचंतन, गानि मर्रा तिरियसि मीहेके वांतन, इंचि नना मीकु वेहचि मत्‍तन, अदुन मिमेट केंजतिरे गदा! अय्ते, मिमेट नाकुन निजम पावरम कियानय्ते, नना बाबानाहेके होंचंतन इंचि वेहतस्के मिमेट कूस आसि मंदकिट. बारित्‍ते बाबाल नाकन्‍ना पेद्‍दोड आंदुर.
JOH 14:29 इव अन्‍नि पोल्‍लें निजम आयनुं अस्‍के, मिमेट विस्वासम कियगोम इंचि, नना इव पोल्‍लें जर्गका मुन्‍नेन वेहतन.
JOH 14:30 इंका मीतोनि एक्‍को वळ्‍कोन. बारित्‍ते दुनियापोर्रो राज्येम एलाना अदिकारि वासेकेन मंतोर. वासि अयना नावापोर्रो ओन्क बतले अदिकारम हिल्‍ले.
JOH 14:31 अयना, नना बाबान पावरम कींतन इत्‍ता पोल्‍ले, दुनियाक तेळियगोम इंचि, बाबाल नाकु हीता आदेस परकारमे नना कींतन. सरे तेदट! मनम इगेटाल दाकोम,” इंचि येसु इत्‍तोर.
JOH 15:1 येसु इल्‍हा वेहतोर. “निजम अंगुर वेलितसंटोन ननाने आंदुन. नावा बाबाल बारे अंगुर तोटातुन बेस हूळकुनानोर आंदुर.
JOH 15:2 नावा पंगानाल बव पंगांक अय्ते कायां हादोंगो, अवुन ओर नरकिस पोहांतोर. आनि हादाना पंगान बारे, इंका बेस हादगोम इंचि अवुना कोस्‍सन कत्रिच्‍चंतोर.
JOH 15:3 दीनकन्‍ना मुन्‍ने नना मीकु वेहता पोल्‍लेहेंदाल मिमेट साप आतिर.
JOH 15:4 मिमेट नावातोनि बस्‍केळ्‍क कलियसि मंटु, अस्‍के ननागुडा इंका मीवातोनि बस्‍केळ्‍क कलियसि मनंतन. पंगा वेलिक अंटिस मनाकोंटे दान्क कायां हादों, अल्हेन मिमेटगुडा नावातोनि कलियसि मनाकोंटे बेसता कबाह्‍क किया परिर.”
JOH 15:5 “ननाने अंगुर वेलितसंटोन आंदुन, मिमेट बारे पंगांनसंटोर आंदिर. बोर अय्ते नातोनि कलियसि मनंतुरो, नना बोरतोनि कलियसि मनंतनो, ओर वेल्‍लेन बेसता कबाह्‍क कींतुर. नाहगटाल वेरे आसि मंचि, मिमेट बतले किया परिर.
JOH 15:6 बोर अय्ते नावातोनि कलियसि मन्‍नुरो, ओर्कुन कबळ्‍क ओज्जुवा पंगान पोहताप पोहचियमळ जर्गंता. पजा अव पंगां वत्‍तुतस्के, अवुन जमा कीसि तडमिते वाटसि बोळ्‍संतुर.
JOH 15:7 मिमेट ना लोप्पो आनि नावा पोल्‍लें मीलोप्‍पो मनानय्ते, मीकु गावाले मत्‍तद बतल तल्‍किना, अद मीवाहाटीं कियमळ जर्गंता.
JOH 15:8 मिमेट वेल्‍लेन बेसता कबाह्‍क कियानय्ते नावा बाबांक वेल्‍लेन महिमा दोर्कंता. दीनहेंदाल मिमेट नावा सिस्युल्क इंचि दिस अर्रंतिर.
JOH 15:9 नावा बाबाल नाकुन बल्हा पावरम कीतोर, अल्हेन नना मीकुन पावरम कीतन. मिमेट नावा पावरमते निलसि मंटु.
JOH 15:10 नना नावा बाबाल वेहता आदेसकुनपोर्रो ताकसेके, ओना पावरमते निलसि मंतन. अल्हेन मिमेटगुडा नना वेहता आदेसकुनपोर्रो ताकतिरित्‍ते, नावा पावरमते निलसि मनंतिर.
JOH 15:11 नावा कुसि मीलोप्‍पो मनना, आनि मीवा कुसि पुरागा आयना इंचि, नना मीकु इव पोल्‍लें वेहतन.”
JOH 15:12 “नना मीकुन बल्हा पावरम कीतनो, अल्हेन मिमेटगुडा वरोंक-वरोर पावरम कीकुंटु, इदे नावा आदेस आंदु.
JOH 15:13 वरोर मनकल ओना दंटागानाहाटीं ओना जीवा हियमळकन्‍ना पेद्‍दा पावरम बद्‍दे आयो.
JOH 15:14 नना हियना आदेसकुनपोर्रो गिंटा मिमेट ताकानय्ते, मिमेट नावा दंटातोर आंदिर.
JOH 15:15 इंदकेटाल नना मीकुन दासुल्क इंचि केयोन. बारित्‍ते मालक बतल कींतोर अद ओना दासुंक बतल तेळियो. गानि नना अय्ते मीकुन दंटातोर इंचि केयंतन. बारित्‍ते नावा बाबाल नाकु वेहता अन्‍नि पोल्‍लें मीकु वेहतन.
JOH 15:16 नाकुन मिमेट पेर्रा हिल्‍लिर, गानि मीकुन नना पेरतन. पेरसि, मिमेट बेसता कबाह्‍क कीसेक बेस पलम हियगोम, इंचि नना मीकुन निलाहतन. अल्हा कीते, मिमेट नावा पोरोल्ते बाबान बतल तल्किनागानि, अद मीकु दोर्कंता.
JOH 15:17 मिमेट वरोंक-वरोर पावरम कीकुंटु, इद मीकु नावा आदेस आंदु.”
JOH 15:18 “ओक्‍कला दुनियातोर मीकुन हय्‍साकोंटे, मीकन्‍ना मुन्‍ने ओर नाकुन हय्‍सा हिल्‍लुर, इंचि मीकु एर्के.
JOH 15:19 मिमेट दुनियातोर्क नच्‍चताप मनानय्ते, ओर मीकुन पावरम कीसि मन्‍नेर. गानि मिमेट दुनियातोर्क नच्‍चताप मंचेके हिल्‍लिर. नना मीकुन इद दुनियाताल पेरतन. अदुनहाटीं दुनियातोर मीकुन हय्सुर.
JOH 15:20 वरोर दासुड ओना मालकुंकन्‍ना पेद्‍दोड आयोर, इंचि नना दीनकन्‍ना मुन्‍ने वेहता पोल्‍लेतुन मिमेट मति इर्कुंटु. ओर नाकुने तकलिप कीतुर अय्ते, मीकुनगुडा तकलिप कींतुर. ओर नावा पोल्‍ले परकारम ताकानय्ते, मीवा पोल्‍ले पोर्रोगुडा ताकंतुर.
JOH 15:21 नाकुन लोहचीतोन ओर एरपाट किय्युर, अदुनहाटीं ओर मीकुन नावा पोरोलहाटीं इव अन्‍नि तकलिप्क कींतुर.”
JOH 15:22 “उंदि वेला नना वासि ओरतोनि वळ्‍काकोंटा मंचि मत्‍ते, ओरपोर्रो पापम मना कोनवळ. गानि इंदके मात्रम ओर्क ओरा पापमताल तपिच्‍कुनालय हर्रि हिल्‍ले.
JOH 15:23 नाकुन हय्सवोर, ओर नावा बाबान इंका हय्‍सोर.
JOH 15:24 वेरे बोर किया हिल्‍लोर असोंटा, अद्‍बूतामाता कबाह्‍क नना कियाकोंटा मंचि मत्‍ते, ओरपोर्रो पापम मना कोनवळ. गानि इंदके ओर नना कीता अद्‍बूतामाता कबाह्‍कुन हूळसिगुडा, नाकुन, नावा बाबान हय्सेक हिल्‍लुर.
JOH 15:25 नाकुन हय्साकोंटा मनालय बतले कारनम हिलाकोन्‍ना ओर नाकुन हय्सुर, इंचि ओरा दर्मसास्‍त्रमते रासि मंता. अद पोल्‍ले पुरागा आयानाहाटींगें इल्‍हा जर्गता.
JOH 15:26 गानि बाबानाहेंदाल नना लोहना सहायम कियानोर, इत्‍ते बाबानगटाल वायना सत्‍तेम आत्मा, बस्के अय्ते मिहगा वायार. अद मीकु नावा बारेमते गवाइ वेहंता.
JOH 15:27 नना सेवा सुरुव कीतस्केटाल मिमेट नातोनि मत्‍तिर, अदुनहाटीं मिमेटगुडा नावा बारेमते गवाइ वेहंतिर.”
JOH 16:1 “मिमेट विस्वासमताल पजोळ्क आयामन्‍नि, इंचि मीकु इव पोल्‍लें वेहतन.
JOH 16:2 विस्वासम कियवा पेद्‍दाल्क मीकुन दर्मसास्‍त्रम कराहना लोहकुनाल पेच्‍हांतुर. इंका मीकुन हव्कना हरेक मनकल, नना पेनदा सेवा कीसंतन, इंचि इनकुनना कालम वायाना मंता.
JOH 16:3 बाबाल आनि नना बोर आंदुम, ओर्क तेळियो, अदुनहाटीं ओर मीकुन अल्हा कींतुर.
JOH 16:4 अद कालम वातस्के, नना वेहता पोल्‍लें मीकु मति वायाना इंचि, इव पोल्‍लें नना मीकु वेहचंतन. इव पोल्‍लें नना मीकु मुन्‍ने वेहा हिल्‍लेन, बारित्‍ते नना मीतोने मत्‍तन.”
JOH 16:5 “नना अय्ते इंदके नाकुन लोहतोनगा मल्सि होंचंतन. गानि निमे बगा दांतिन इंचि मीवा लोप्पोटाल वरोरगुडा नाकुन पूसकीसेक हिल्‍लिर.
JOH 16:6 नना इव पोल्‍लें मीकु वेहताहेंका, मिमेट वेल्‍लेन दुक्‍कमते मंतिर.
JOH 16:7 अयना नना मीकु निजम-निजम वेहासेक, नना मिहागटाल होत्‍ते, मीके पायदा आयार. बारित्‍ते नना होनाकोंटे सहायम कियानोर मिहगा वायोर. नना होनानय्ते ओन मिहगा लोहंतन.
JOH 16:8 ओर वातस्के पापम बारेमते, सत्‍तेम बारेमते आनि न्‍यायम बारेमते लोकुल्‍कुन ओप्‍संतोर.
JOH 16:9 ओर नापोर्रो विस्वासम इर्रका पापम कीतुर, इंचि सहायम कियानोर ओर्क हुप्‍संतोर.
JOH 16:10 नना बाबानाहेके होंचंतन, मर्रा मिमेट नाकुन हूळा परिर. अदुनहाटीं सहायम कियानोर सत्‍तेमता बारेमते लोकुल्‍कुंक तेळियागोट्‍सि वेहंतोर.
JOH 16:11 इंका इद दुनियापोर्रो राज्येम एलाना अदिकारिना न्‍यायम अय्ते मुन्‍नेन आसि मंता. अदुनहाटीं सहायम कियानोर न्‍यायमता बारेमते लोकुल्‍कुंक तेळियागोट्‍सि वेहंतोर.
JOH 16:12 मीकु वेहालय नहगा इंका वेल्‍लेन पोल्‍लें मंतां, गानि अवुनंता इंदके ओर्सुकुना परिर.
JOH 16:13 गानि सत्‍तेम आत्मा वातस्के, अद मीकु पूरा सत्‍तेमतुन हुप्‍सार. अद दाना मनसुंक वाताप वळ्को, गानि बतल अय्ते अद बाबानगटाल केंजंता, अदे वेहंता. इंका मुन्‍ने जर्गना बारेमतेगुडा वेहंता.
JOH 16:14 अद नाहगटाल तेंडकुंचि, वासि मीकु वेहंता. अल्हा कीसेके अद नाकु कदर हींता.
JOH 16:15 बव अय्ते बाबानवो, अव अन्‍नि नावां आंदुं. अदुनहाटींगे, अद नाहगटाल तेंडकुंचि, वासि मीकु वेहंता, इंचि नना मीकु वेहतन.
JOH 16:16 इंका जेरासेप आते, मिमेट नाकुन हूळा परिर, पजा इंका जेरासेपुंक, मिमेट नाकुन मर्रा हूळकिर,” इंचि येसु सिस्युल्कुंक वेहतोर.
JOH 16:17 इद पोल्‍ले केंजसि, ओना इच्‍चुर सिस्युल्क वरोंक-वरोर पूसकीसेक, “इंका जेरासेप आते, मिमेट नाकुन हूळा परिर, पजा इंका जेरासेपुंक, मिमेट नाकुन मर्रा हूळकिर, बारित्‍ते नना बाबानगा दांतन, इल्‍हा मनाकु येसु बारि वेहचंतोर मरि?
JOH 16:18 इंका जेरासेप आते इनना पोल्‍लेक अर्तम बतल? असल ओर इनानद बतलो मनाकु अर्तमे आसेक हिल्‍ले,” इंचि वळ्ककुनालय दल्‍गतुर.
JOH 16:19 सिस्युल्क ओन पूसकींतुर इंचि येसुंक तेळियता. अस्‍के येसु ओर्क इल्‍हा वेहतोर, “इंका जेरासेप आते, मिमेट नाकुन हूळा परिर, पजा इंका जेरासेपुंक, मिमेट नाकुन मर्रा हूळकिर, इत्‍ता नावा पोल्‍लेता बारेमते मिमेट वरोंक-वरोर बतां पूस कीकुंचंतिर?
JOH 16:20 नना निजम-निजम वेहासेक, मिमेट मोत्‍कुंचि-मोत्‍कुंचि अळकिर, गानि दुनियातोर कुसिते मनानुर. मीकु दुक्‍कम वासि अळकिर, गानि मीवा दुक्‍कम कुसिते मारियंता.
JOH 16:21 उंदि मुरतळ दाना एरपूराना वेला एवतस्‍के, नोप्‍पिं वासि वेल्‍लेन दुक्‍कमते मनंता. गानि दान्क पेडालो-पेगिडो पुटतस्के, उंदि जीवा दानहेंदाल इद दुनियाते वाता इत्‍ता कुसिते, मुन्‍ने बोगांच्‍ता तकलिपकु मर्रा दान्क मतिगुडा मन्‍नों.
JOH 16:22 इदगुडा अल्हेन! इंदके दुक्‍कम वांता, गानि नना मीकु मर्रा कलियंतन अस्‍के, मिमेट वेल्‍लेन कूस आकिर. अद कुसितुन मिहागटाल बोरे तेंडकुना परुर.
JOH 16:23 अद रोज मिमेट नाकुन बदे तल्किर. गानि नना निजम-निजम वेहासेक, मिमेट नावा पोरोल्ते बाबान बतल तल्किनागानि ओर मीकु अदुन हींतोर.
JOH 16:24 इदवेरदाका मिमेट ना पोरोल्ते बतले तल्का हिल्‍लिर. तल्‍कट मीकु दोर्कार, अस्‍के मीवा कुसि पूरा आयार.”
JOH 16:25 “इव पोल्‍लें नना मीकु उदाहरनकु हीसि वेहतन. गानि मुन्‍ने इंका बस्‍केने उदाहरनकु हीसि वेहोन. बाबाना बारेमते बल्हा मत्‍तद अल्हा कुल्‍ला कीसि वेहना वेला वायनद मंता.
JOH 16:26 अद रोज मिमेट नावा पोरोल्ते ओन तल्ककिट. अस्‍के नना मीवाहाटीं बाबांक विनंति कींतन इंचि मीकु वेहासेक हिल्‍लेन.
JOH 16:27 बारित्‍ते मिमेट नाकुन पावरम कीतिर, नना पेनदागटाल वातन इत्‍ता पोल्‍लेतुन विस्वासम कीतिर, अदुनहाटीं कुद्‍दु बाबाले मीकुन पावरम कीसंतोर.
JOH 16:28 नना बाबानगटाल इद दुनियाते वातन. इंदके मर्रा इद दुनियातुन होळसि बाबानाहेके होंचंतन,” इंचि येसु वेहतोर.
JOH 16:29 अस्‍के सिस्युल्क, “हूळा! इंदके निमे उदाहरन हीसि वळ्कसेक हिल्‍लिन, कुल्‍ला-कुल्‍ला वळ्‍कसंतिन.
JOH 16:30 नीकुन बोरे बतल पूसकियना अव्‍सरम हिल्‍ले. नीकु अन्‍नि तेळियंता इंचि माकु एर्का मंता. दीनहेंदाल, निमे पेनदागटाल वातिन, इंचि मोमोट विस्वासम कींतोम,” इंचि येसुन इत्‍तुर.
JOH 16:31 अस्‍के येसु, “इंदके अयना मिमेट विस्वासम कींतिरा?
JOH 16:32 हुळाट, नाकुन वरोने होळसि, मिमेट बेकेटोर हेके आसि बोना लोन ओर होनना वेला वायनद मंता, अद वासे मंता. अयना नना वरोन हिल्‍लेन, नातोनि बाबाल मंतोर.
JOH 16:33 नाहगटाल मीकु सांति दोर्कि, इंचि इव पोल्‍लें मीकु वेहतन. दुनियाते मीकु तिप्‍पल्‍क-कस्‍टाल्‍क वायनुं, गानि नना दुनियाता ताकततुन गेल्सतन, अदुनहाटीं मिमेट बेस दैरनेमते मंटु,” इंचि येसु वेहतोर.
JOH 17:1 इव अन्‍नि पोल्‍लें वेहमळ आतस्के, येसु पोर्रो स्वर्गमताहेके हूळसेक इल्‍हा पारतना कियालय दल्‍गतोर. “बाबा, अंटोर लोकुल्‍कुनपोर्रो निमे नाकु अदिकारम हीतिन. दीनहेंदाल निमे बोर्कुन अय्ते नाकु हीतिनो, ओर्क अंटोर्क नना बस्‍केळ्‍क पिस्सना पिस्वर हीकन. निमे वरोने सत्‍तेम पेनदुन आंदिन, बोर अय्ते नीकुन, निमे लोहता येसु किरिस्‍तुन एरपाट कींतुरो ओर्के आ बस्‍केळ्‍क पिस्सना पिस्वर दोर्कंता. निमे नाकु बव कबाह्‍क अय्ते कियालय हीतिनो, अवुन पुरागा कीसि, नना बूमिपोर्रो नीवा महिमा कीतन. इंदके नावा वेला एव्ता. अदुनहाटीं निमे नाकु कदर हीते, नना नीवा महिमा कींतन.
JOH 17:5 बाबा, दुनिया पुट्‍टका मुन्‍ने नना नीतोनि मननेंके बसोंटा महिमा मत्‍तानो, असोंटा महिमा इंदकेगुडा नी मुन्‍ने हीम.”
JOH 17:6 “ई दुनियाताल निमे नाकु हीता लोकुल्‍कुंक, नना नीवा पोरोल्तुन हुपिस्तन. ओर बस्‍केळ्‍क नीवोर्के आंदुर. ओर्कुन निमे नाकु हीतिन. ओर नीवा पोल्‍लेपोर्रो ताकतुर.
JOH 17:7 निमे बतल अय्ते नाकु हीतिनो, अव अन्‍नि निहेंदाले दोर्कतव इंचि इंदके ओर्क तेळियता.
JOH 17:8 बारित्‍ते बव पोल्‍लें अय्ते निमे नाकु हीतिनो, अवुन नना ओर्क एविच्‍तन. ओर अवुन ओप्‍कुत्‍तुर. नना निजम निहागटाले वातन, नाकुन निमेन लोहतिन इंचि ओर विस्वासम कीतुर.
JOH 17:9 ईराहाटींगे नना पारतना कीसंतन. दुनियाताहाटीं आयो. निमे बोर्कुन अय्ते नाकु हीतिनो, ओर नीवोरे इंचि ओराहाटींगे नना पारतना कीसंतन.
JOH 17:10 नहगा मनना अन्‍नि पोल्‍लें नीवंगें आंदुं, नीवां अन्‍नि पोल्‍लें नावां आंदुं. अवुनहेंदाल नाकु महिमा दोर्कता.
JOH 17:11 इंदकेटाल नना इद दुनियाते मनोन. नना निहगा वासंतन. गानि ईर ई दुनियाते मनंतुर. पवित्र बाबा! इंदके मनम उंदि आसि मत्‍ताप, ईरगुडा उंदि आसि मनालय, निमे नाकु हीता नीवा पोरोलता ताकतते ईरकुन कापाळा.
JOH 17:12 नना ई दुनियाते ईरतोनि मननेंके, निमे नाकु हीता नीवा पोरोलता ताकतते ओर्कुन कापाळतन. सिराप, दर्मसास्‍त्रमते रासता पोल्‍ले पूरा आयनाहाटीं बोर अय्ते नासडेम आयना मत्‍ता ओन होळसि, वेरे बोरे नासडेम आया हिल्‍लुर, नना ओर्कुन कापाळतन.
JOH 17:13 नना इंदके निहगा वासंतन. गानि नावा आनंदम ओरा लोप्पो पुरागा आयना इंचि, इव पोल्‍लें नना इद दुनियाते मननेंकेन वेहंतन.
JOH 17:14 नीवा पोल्‍ले नना ईरकु वेहतन. नना इद दुनियातोन आयोन. अल्हेन ईरगुडा इद दुनियातोर आयुर. अदुनहाटीं ई दुनियातोर ईरकुन हय्सेक हिल्‍लुर.
JOH 17:15 निमे ईरकुन इद दुनियाताल ओम इंचि नना पारतना कीसेक हिल्‍लेन, गानि पेद्‍दा देय्यमताल ईरकुन कापाळा इंचि पारतना कीसंतन.
JOH 17:16 नना ई दुनियातोन आयोन, अल्हेन ईरगुडा ई दुनियातोर आयुर.
JOH 17:17 नीवा पोल्‍ले सत्‍तेम आंद, नीवा सत्‍तेमते ओर्कुन पवित्र कीम.
JOH 17:18 बल्हा अय्ते निमे नाकुन ई दुनियाते लोहतिन, अल्हेन नना ईरकुन दुनियाते लोहंतन.
JOH 17:19 नीवा सत्‍तेमते ओर पवित्र आयगोम इंचि, नावद ननेन उंदि पवित्र मोक्‍कुनलेह्का आतन.”
JOH 17:20 “नना सिराप ईराहाटींगे पारतना कीसेक हिल्‍लेन, गानि बोर अय्ते ईर वेहना पोल्‍लेतुन केंजसि नापोर्रो विस्वासम इर्रंतुर, ओराहाटींगुडा नना पारतना कीसंतन.
JOH 17:21 बाबा! बल्हा अय्ते निमे नहगा, नना निहगा उंदि आसि मंतोमो, अल्हेन ओरगुडा उंदि आसि मननाहाटीं पारतना कीसंतन. नाकुन निमेन लोहतिन, इंचि दुनियातोर विस्वासम कियना इत्‍ते, ओरगुडा मनांटे उंदि आयापींता.
JOH 17:22 निमे ना लोप्पो मंतिन, नना नी लोप्पो मंतन. निमे नाकु हीता कदरतुन नना ओर्क हीतन. मनम इंदके बल्हा उंदि आसि मंतोमो, अल्हेन ओरगुडा उंदि आसि मंदना. अल्हा मत्‍तेने, नाकुन निमे लोहतिन आनि नाकुन पावरम कीताप ओर्कुनगुडा पावरम कीसंतिन, इंचि दुनियाक एरपाट आयापींता.”
JOH 17:24 “बाबा! बोर्कुन अय्ते निमे नाकु हीतिनो, ओर निमे नाकु हीता कदरतुन हूळानाहाटीं, नना बगा मत्‍ते अगा ओरगुडा मनना इंचि, नना पारतना कीसंतन. बारित्‍ते इद दुनिया पुट्‍टका मुन्‍नेन निमे नाकुन पावरम कीतिन.
JOH 17:25 बाबा! निमेन नीतिमंतुन आंदिन. ई दुनिया नीकुन एरपाट किय्‍यो. गानि नना एरपाट कींतन. अल्हेन नाकुन निमेन लोहतिन इंचि ई सिस्युल्क एरपाट कींतुर.
JOH 17:26 ना पोर्रोटा नीवा पावरम ओरा लोप्पो मननाहाटीं आनि ननागुडा ओरा लोप्पो मनना इंचि, नीवा पोरोल्तुन ओर्क एरपाट कीसीतन. इंका मुन्‍नेगुडा एरपाट कीसि हीसेक मनंतन,” इंचेके येसु पारतना कीतोर.
JOH 18:1 इव पोल्‍लें वळ्‍कमळ आतंका, येसु ओना सिस्युल्कुनतोनि, किद्रोन इनना कुरेटा लोद्‍दि दाटसि हब्बेटा बाजुंक होत्‍तुर. अगा जय्‍तुन मराकुना तोटा मत्‍ता, आ तोटाते येसु, ओना सिस्युल्क होळियतुर.
JOH 18:2 येसु ओना सिस्युल्कुनतोनि अद तोटाते वेल्‍लेन मल्कां वासि मत्‍तोर. अदुनहाटीं ओन्क दोका हियना यहुदांकगुडा अद जेगा एरपाट मत्‍ता.
JOH 18:3 अय्ते यहुदल सिपाइल्कुना गेंगुन, पेद्‍दा पेर्मालोर, परिसिल्क लोहता गुळितगा कावेल कियानोर्कुन पीसि अगा वातोर. ओरतोनि दिव्टीं, कंदिलिं, लडाइ कियना विस्रें मत्‍तां.
JOH 18:4 ओन्क बतल जर्गनद मंता इत्‍तदुन एरपाट कीसि, येसु मुन्‍नेळ्‍क होत्‍तोर. होंचि, “मिमेट बोन पहकसंतिर?” इंचि ओर्कुन पूसकीतोर.
JOH 18:5 अस्‍के ओर, “नासरेत नाटेना येसुन पहकसंतोम,” इंचि जवाब हीतुर. पजा येसु, “ओन ननाने आंदुन,” इंचि इत्‍तोर. येसुंक दोका हियना यहुदलगुडा ओरतोनि निलसि मत्‍तोर.
JOH 18:6 येसु ओर्कुन, “ओन ननाने आंदुन,” इंचि इत्‍तस्के, ओर पजोळ्क जरगिसि बूमिपोर्रो अरतुर.
JOH 18:7 येसु, “मिमेट बोन पहकसंतिर?” इंचि मर्रा उंदि मल्का पूसकीतोर अय्ते ओर, “नासरेत नाटेना येसुन पहकसंतोम,” इंचि इत्‍तुर.
JOH 18:8 अस्‍के येसु, “ओन ननाने आंदुन इंचि वेहतन गदा! ओक्‍कला मिमेट नाकुन पहकानय्ते, ईरकुन होना हीम्टु,” इंचि इत्‍तोर.
JOH 18:9 बारित्‍ते, “निमे नाकु हीतोरव्टेटाल, नना वरोनिंका तप्‍सोना हिय्या हिल्‍लेन,” इंचि ओर इत्‍ता पोल्‍ले पुरागा आयगोम इंचि अल्हा इत्‍तोर.
JOH 18:10 सिमोन पत्रु इनना सिस्युनगा उंदि पेद्‍दा कसेर मत्‍ता. ओर अद कसेटे वरोन हीतोर अय्ते, पेद्‍दा पेर्माना वरोर जीतागाना तिना केव नेमसि अरता. आ जीतागान पोरोल मल्कोसि.
JOH 18:11 गानि येसु, “नीवा कसेर दाळोतगा इर्रा. नावा बाबाल नाकु हीता तिप्पलता वाटिते नना उना मन्‍निआ?” इंचि पत्रुन इत्‍तोर.
JOH 18:12 अस्‍के अगा वाता सिपाइल्कुना गेंग, ओरा दरोगाल आनि गुळितगा कावेल कियानोर येसुन दोर्कापीसि दोह्‍चि वाटतुर. दोह्‍चि वाटसि, मोट्‍टा मोदाला ओन हन्‍ना इनानोनगा ओतुर. ई हन्‍नाल कयपा इनानोना मामाल आंदुर. अद वर्सा ई कयपाल पेद्‍दा पेर्माल मत्‍तोर.
JOH 18:14 “लोकुल्‍कुनाहाटीं वरोर मनकल हाते बेसे,” इंचि यहुदि पेद्‍दाल्कुना मुन्‍ने वळ्‍किसि मत्‍तोर, ओर ईरे कयपाल आंदुर.
JOH 18:15 येसुन अल्हा पीसि होननेंके सिमोन पत्रु आनि इंकावरोर सिस्युड, येसुन पज्जो होत्‍तुर. आ सिस्युड पेद्‍दा पेर्माना एर्कातोर मत्‍ताहेंका, पेद्‍दा पेर्माना दाराते येसुनतोनि ओरगुडा होत्‍तोर.
JOH 18:16 गानि पत्रु पलाते गलमातगेन नित्‍तिसि मत्‍तोर. अदुनहाटीं पेद्‍दा पेर्मांक एर्का मत्‍ता आ सिस्युड पलाते वासि, गलमातगा देकरेकहाटीं मत्‍ता मुरतटुन पूस कीसि, पत्रुन लोप्पो केय्‍सि तत्‍तोर.
JOH 18:17 गलमातगा देकरेकते मत्‍ता आ पासि कबळ कियाना मुरतळ, “निमेगुडा आ मनकना सिस्युल्‍कुनाल वरोन आंदिन गदा!” इंचि पत्रुन पूसकीता. अय्ते पत्रु, “नना आयोन,” इंचि इत्‍तोर.
JOH 18:18 अद वेलाते वेल्‍लेन पीनि मत्‍ता. अदुनहाटीं सेवाकुल्क आनि गुळितगा कावेल कियानोर, तडमि मासि, सेका कासेके मत्‍तुर. अगा पत्रुगुडा ओरतोनि नित्‍तिसि आरसेक मत्‍तोर.
JOH 18:19 पजा पेद्‍दा पेर्माल येसुन, ओना सिस्युल्कुना बारेमते आनि ओना कराहमळ बारेमते पूसकीतोर.
JOH 18:20 अस्‍के येसु, “नना अंटोरा मुन्‍ने कुल्‍ला-कुल्‍ला वळ्‍कतन, यहुदिल्क अंटोर जमा आयना दर्मसास्‍त्रम कराहना लोह्कुने, गुळिने नना बस्‍केळ्‍क कराहतन. नना मक्‍किचि बतले वळ्का हिल्‍लेन.
JOH 18:21 अयना इद सवाल नाकुन बारि पूसकीसंतिन? नना वेहतदुन केंजतोर्कुन पूस कीम, ओर्क एरपाटे नना बतल वेहतन,” इंचि जवाब हीतोर.
JOH 18:22 येसु अल्हा इत्‍तस्के, दग्‍गेरा नित्‍तिसि मत्‍ता वरोर गुळितगा कावेल कियानोर, “पेद्‍दा पेर्मांक इल्हेन जवाब हींतिना?” इंचि येसुना सेंपापोर्रो तंतोर.
JOH 18:23 अस्‍के येसु, “नना वळ्कतव्टे बतलन्‍ना तप्पु मत्‍ते इगे अंटोर्क वेहाट. गानि नना वळ्कतद निजम आते, नाकुन तनंतिर बारि?” इंचि पूसकीतोर.
JOH 18:24 पजा आ हन्‍नाल, दोह्‍चि मननेंकेन येसुन कयपा इनना पेद्‍दा पेर्मानेके लोह्‍चीतोर.
JOH 18:25 सिमोन पत्रु तडमितगा सेका कासेके मत्‍तस्के, अगा मत्‍तोर इच्‍चुर लोकुल्‍क ओन, “निमेगुडा ओना सिस्युल्‍कुनाल वरोन आंदिन गदा?” इंचि पूसकीतस्‍के, “नना आयोन,” इंचि पत्रु आबद्‍दम वळ्कतोर.
JOH 18:26 पत्रु बोना केव्‍दुन अय्ते नर्कतोरो, ओना जीवातोर वरोर, पेद्‍दा पेर्मानगा सेवा कीसेक मत्‍तोर. ओर पत्रुन, “अद रोजु जय्‍तुन मराकुना तोटाते नीकुन नना, ओनतोनि हूळतन,” इंचि इत्‍तोर.
JOH 18:27 मर्रागुडा पत्रु, “नना आयोने आयोन,” इंचि आबद्‍दम वेहतोर. ओर अल्हा इत्‍ता इन्‍मळे, गोगोड कूसता.
JOH 18:28 पजा हक्‍केरेन येसुन ओर कयपानगटाल रोम सरकारता राज्यपालना राजवाडाते ओतुर. अस्‍के रिवाज परकारम अपवित्र आयाकोंटा मनालय आनि दाटसि होनना पंडुगुना गाटो तिनगोम, इंचि ओर राजवाडाते नेंगा हिल्‍लुर.
JOH 18:29 अदुनहाटीं रोम सरकारता राज्यपाल पिलातुस, पलाते ओरगा वासि, “ई मनकनपोर्रो मिमेट बद कसूर ताससंतिर?” इंचि ओर्कुन पूसकीतोर.
JOH 18:30 अस्‍के ओर, “ईर कसूर कियाकोंटे मंचि मत्‍ते, मोमोट ईन नीकु अप्पजेप्पा कोन्‍नेरम,” इंचि जवाब हीतुर.
JOH 18:31 “अल्हा अय्ते ओन ओसि, मीवा सतता नियम परकारम मिमेटे ओना न्‍यायम कीम्‍टु,” इंचि पिलातुस इत्‍तोर. अस्‍के यहुदिल्क, “हामुर सिक्‍सा हियना अदिकारम सिराप, रोम सरकारुंके मंता,” इंचि इत्‍तुर.
JOH 18:32 अद अल्हा बारि जर्गता इत्‍ते, येसुंक बसोंटा हामुर वायनद मंता इंचि येसु कुद्‍दु वेहता पोल्‍ले पुरागा आयनाहाटीं अल्हा जर्गता.
JOH 18:33 पजा पिलातुस ओना राजवाडाते होंचि येसुनलोप्‍पो केया वेहतोर. केय्‍सि, “निमे यहुदिल्कुना राजाना?” इंचि पूसकीतोर.
JOH 18:34 अस्‍के येसु, “ई पोल्‍ले नी इच्‍चटा निमेन इंचंतिना? हिलाकोंटे नावा बारेमते नीकु बोरन्‍ना वेहतुरा?” इंचि पिलातुसुन पूसकीतोर.
JOH 18:35 अय्ते पिलातुस, “नाकुन निमे यहुदि इनकुंचंतिना? कुद्‍दु नीवा लोकुल्‍क आनि ओरा पेर्मालोर नीकुन नाकु अप्पजेपतुर. निमे बतल कीतिन?” इंचि जवाब हीतोर.
JOH 18:36 अस्‍के येसु, “नावा राज्येम ई दुनियाक संबंदिस्तद आयो. ओक्‍कला नावा राज्येम ई दुनियाक संबंदिस्तद आसि मत्‍ते, नाकुन यहुदि पेद्‍दाल्कुंक अप्‍पजेपकोंटा नावा सेवाकुल्क लडाइ कीसि मन्‍नेर. गानि इंदके नावा राज्येम ई दुनियाक संबंदिस्तद आयो,” इंचि जवाब हीतोर.
JOH 18:37 अस्‍के पिलातुस, “अल्हा अय्ते निमे राजाना?” इंचि इत्‍तोर. अय्ते येसु, “निमेन इंचंतिन नाकुन राजाल इंचि! नना अय्ते सत्‍तेम बारेमते गवाइ वेहालय पुटतन. इद कारनमहाटींगे नना ई दुनियाते वातन. सत्‍तेमते ताकाना हरेक मनकल, नावा अल्किरतुन केंजंतोर,” इंचि वेहतोर.
JOH 18:38 अद केंजसि पिलातुस, “सत्‍तेम इत्‍ते बतल?” इंचि येसुन पूसकीतोर. अल्हा पूस कीसि, पलाते यहुदिल्कुनगा होत्‍तोर. होंचि, “नाकु ईना लोप्पो अय्ते बतले कसूर दिस्सेक हिल्‍ले.
JOH 18:39 गानि दाटसि होनना पंडुगुना रोजु, एडादिक उंदि मल्का, जेलने मत्‍तोन वरोन होळसना, इंचि मीवा उंदि रिवाज मंता. अय्ते मीवाहाटीं नना ई यहुदिल्कुना राजान होळ्‍समळ मीकु इस्‍टमेना?” इंचि ओर्कुन पूसकीतोर.
JOH 18:40 अस्‍के ओर वरगेयसेके मर्रा, “मन्‍नि ओन होळ्‍समा, मावाहाटीं बरब्बान होळसा,” इंचि इत्‍तुर. ई बरब्बल इनानोर, पेद्‍दा दोंगल मत्‍तोर.
JOH 19:1 अस्‍के पिलातुस येसुन दोर्कापीसि पोट्‍टे देब्बां तना वेहतोर.
JOH 19:2 सिपाइल्क बारे, उंदि हाह्कुना वेलितुन किरिटम कीसि, येसुना तल्‍लक तासतुर. तासि ओन्क नेळि पंडि रंगुना कपडिं केराहतुर.
JOH 19:3 केराहता पजा, “यहुदिल्कुना राजांक जय” इंचेके ओना सेंपापोर्रो तंतुर.
JOH 19:4 पिलातुस मरुंदि मल्का पलाते पेय्सि, “हुळाट, ओन्क सिक्‍सा हियालय, नाकु ओनालोप्‍पो बतले कसूर दोर्काहिल्‍ले, इद मीकु तेळियना इंचि नना ओन मीहेके पलाते तच्‍चंतन,” इंचि वेहतोर.
JOH 19:5 पजा येसु हाह्कुना किरिटम, नेळि पंडि रंगुना कपडिं केरसि पलाते पेय्‍स्‍तोर. अस्‍के पिलातुस, “हुळाट ई मनकन,” इंचि ओर्कुन इत्‍तोर.
JOH 19:6 येसुन हूळसि, पेद्‍दा पेर्मालोर आनि गुळितगा कावेल कियानोर, “ओन क्रुसुनपोर्रो वेलाड वाटा, ओन क्रुसुनपोर्रो वेलाड वाटा,” इंचि वरगेयतुर. अस्‍के पिलातुस ओर्कुन, “ओन ओसि मिमेटे क्रुसुनपोर्रो वेलाड वाटट, नाकु ओनालोप्‍पो बदे कसूर दोर्काहिल्‍ले,” इंचि इत्‍तोर.
JOH 19:7 अद केंजसि यहुदिल्क इल्‍हा जवाब हीतुर, “माकु उंदि नियम मंता. ओर, नना पेनदा मर्रिन, इंचि इत्‍तोर. अदुनहाटीं मावा नियम परकारम ओर हायमळे गावाले,” इत्‍तुर.
JOH 19:8 ओर अल्हा इन्‍मळतुन केंजसि, पिलातुस वेल्‍लेन वेरियतोर.
JOH 19:9 अस्‍के पिलातुस येसुन मर्रा राजवाडाते ओसि, “निमे बगाटाल वातिन?” इंचि पूसकीतोर. गानि येसु बतले जवाब हिया हिल्‍लोर.
JOH 19:10 अदुनहाटीं, पिलातुस येसुन, “निमे नातोनि बारि वळ्कसेक हिल्‍लिन? नीकुन होळसियना आनि क्रुसुनपोर्रो वेलाड वाटना अदिकारम नाके मंता, इंचि नीकु एर्का हिल्‍लेना?” इंचि पूसकीतोर.
JOH 19:11 अस्‍के येसु, “पोर्रो मनना पेन आ अदिकारम नीकु हीता, अचोने! हिलाकोंटे नीकु नावापोर्रो बतले अदिकारम हिल्‍ले. अदुनहाटीं, नाकुन नीवा कय्‍दुक अप्पजेपतोंके एक्‍को पापम दल्‍गंता,” इंचि इत्‍तोर.
JOH 19:12 अस्‍केटाल पिलातुस, येसुन होळसालय वेल्‍लेन कोसिस कीतोर. गानि यहुदिल्क, “ओक्‍कला निमे ओन होळसियानय्ते, निमे कैसर राजाना दंटातोन आयिन. इंका नना राजान इंचि इनना हरेक मनकल, महाराजाना विरोदमते वळ्कतोर आंतोर,” इंचेके वरगेयालय दल्‍गतुर.
JOH 19:13 अव पोल्‍ले केंजसि, पिलातुस येसुन मर्रा पलाते तत्‍तोर. तच्‍चि, न्‍यायम कियनेंके उद्‍दना कुर्सिते उद्तोर. अद कुर्सि मनना जेगातुन, इब्रानि बासाते, गब्बाता इंतुर.
JOH 19:14 अद रोज, दाटसि होनना पंडुगुना तयारिं कियना रोज आंद. अस्केळ्क, पन्‍नेंड एगसि मत्‍ता. अस्‍के, “इद हुळाट, मीवा राजाल!” इंचि पिलातुस यहुदिल्कुन इत्‍तोर.
JOH 19:15 अस्‍के यहुदिल्क, “ओन लक्‍कु ओम, ओन लक्‍कु ओम! ओसि क्रुसुनपोर्रो वेलाड वाटा,” इंचि वरगेयालय दल्‍गतुर. अय्ते पिलातुस, “बतलु! नना मीवा राजान, क्रुसुनपोर्रो वेलाड वाटकना?” इंचि ओर्कुन पूसकीतोर. अस्‍के पेद्‍दा पेर्मालोर, “माकु कैसर राजान होळसिसि वेरे बोरे राजाल हिल्‍लोर,” इंचि वरगेयतुर.
JOH 19:16 पजा पिलातुस, येसुन क्रुसुनपोर्रो वेलाड वाटालय ओरा कय्‍दुक अप्पजेपतोर अय्ते, ओर येसुन ओतुर.
JOH 19:17 येसु ओना क्रुसुन कांजसेक, “तला बोरसेम” इनना जेगातगा होत्‍तोर. इब्रानि बासाते, अद जेगातुन गोलगोता इंतुर.
JOH 19:18 अगा ओना काल्क-कय्‍कुंक मोल्‍लां कोह्‍किसि ओन क्रुसुंक वेलाड वाटतुर. येसुन नड्‍डुम इरसि ओना रोंड बाजकुंक इंकिव्वुर्कुन क्रुसुंक वेलाड वाटतुर.
JOH 19:19 अस्‍के पिलातुस, “नासरेत नाटेना येसु, यहुदिल्कुना राजाल,” इल्‍हा उंदि बल्‍लापोर्रो कसूर रासि, येसुना क्रुसुंक कोह्का वेहतोर.
JOH 19:20 येसुन वेलाड वाटता जेगा सहरकु दग्‍गेरा मत्‍ता. अद बल्‍लापोर्रो इब्रानि, लटिन आनि युनानि बासाते रासि मत्‍ता. अदुनहाटीं वेल्‍लेटोर यहुदिल्क, आ कसूरतुन हदवुंदुर.
JOH 19:21 पजा यहुदि पेद्‍दा पेर्मालोर पिलातुसनगा होंचि, “यहुदिल्कुना राजाल इंचि रासमा. दान जेगाते, नना यहुदिल्कुना राजान, इंचि ओर इत्‍तोर, इल्‍हा रासा,” इंचि वेहतुर.
JOH 19:22 अस्‍के पिलातुस, “नना रासतन! रासतन. अचोने!”
JOH 19:23 सिपाइल्क येसुन क्रुसुनपोर्रो वेलाड वाटतंका, ओना कपडिं तेंडकुत्‍तुर. तेंडकुंचि, वरो-वरोंक उंदि-उंदि हिस्सा वायना हिसाबते, नालुं पाल्क कीतुर. ओना अंगितुनगुडा तेंडकुत्‍तुर. अद अंगि पोर्रोटाल हिळुदाका पोळ्‍गुंक-पोळ्‍गु कुट्‍टु वाटाकेन मत्‍ता.
JOH 19:24 अदुनहाटीं सिपाइल्क, “दीन मनम हराहमन्‍नि, गानि सिट्‍टिं वाटकोम. अस्‍के अद बोर्क दोर्कंतनो हूळकोम,” इंचि ओर-ओरे इनकुत्‍तुर. “ओर नावा कपडिन हिस्सां कीसि, नावा अंगिहाटीं सिट्‍टिं वाटंतुर,” इंचि दर्मसास्‍त्रमते रासि मत्‍ता पोल्‍ले पुरागा आयनाहाटीं अल्हा जर्गता. सिपाइल्कगुडा अदुनहाटींगे अल्हा कीतुर.
JOH 19:25 येसुन वेलाड वाटता क्रुसुना दग्‍गेरा, येसुना यावल, ओना यावाना हेलड, कोल्‍पाना मुत्‍तो मरियम, आनि मगदलेनि नाटेना मरियम इव निलसि मत्‍तां.
JOH 19:26 येसु, ओना यावल आनि ओर बोन अय्ते पावरम कीतोर आ सिस्युड, ओना दग्‍गेरा निलसि मत्‍तद हूळसि, येसु ओना यावन, “यावा, ईर हूळा नीवा मर्रि!” इंचि वेहतोर.
JOH 19:27 पजा आ सिस्युनहेके हूळसि, “इद हूळा, नीवा यावल!” इंचि वेहतोर. अस्‍केटाल आ सिस्युड दान ओना यावल इंचि लोन ओतोर.
JOH 19:28 पजा, ओर बद कबळहाटीं वातोर, अद कबळ पूरा आता, इंचि ओर एरपाट कीसि, दर्मसास्‍त्रमते रासि मत्‍तद पूरा आयनाहाटीं, “नाकु दूपा आसंता,” इंचि इत्‍तोर.
JOH 19:29 अगा उंदि अळका मत्‍ता, अव्टे मुरगिसि होत्‍ता अंगुर पंडिना पानकम मत्‍ता. ओर अद अळकाते दूदि मुळाहतुर आनि हिस्सोप इनना मराता कोम्मक कळाह्‍चि, येसुना तोळदागा ओतुर.
JOH 19:30 येसु आ मुरगिसोत्‍ता अंगुर पंडिना पानकमता रुसि हूळसि, “पूरा आता,” इंचि इत्‍तोर. अल्हा इंचि, हिळु तला वराहचि जीवा होळ्‍सतोर.
JOH 19:31 अद नोमकेम आनि दाटसि होनना पंडुगुना तयारिं कियना रोज मत्‍ता. अद रोजुने पीनगुल्कु क्रुसुनपोर्रो वेलाड मनमळ यहुदिल्कुंक इस्‍टम हिल्‍ले. अदुनहाटीं यहुदि पेद्‍दाल्क पिलातुसनगा वासि, “ओरा काल्‍कुन उराहचि, सेत्‍तातुन हिळु रेहा वेहा,” इंचि पूसकीतुर.
JOH 19:32 अस्‍के सिपाइल्क वासि, येसुनतोनि क्रुसुनपोर्रो वेलाड वाटसि मत्‍ता इव्वुरा काल्‍कुन उराहतुर.
JOH 19:33 पजा ओर येसुनगा वासि हूळतस्‍के, येसु हासे मत्‍तोर, इंचि ओना काल्क उराह हिल्‍लुर.
JOH 19:34 गानि ओराव्टेटाल वरोर सिपाइ येसुना संका हिळु, गोर्काते कोह्कतोर. अय्ते कोह्कता कोह्कुळे नेत्‍तुर आनि एर पोंगता.
JOH 19:35 अदंता बोर अय्ते हूळतोर ओर, मिमेटगुडा विस्वासम कियगोम इंचि ओना गवाइ वेहतोर. ओर वेहता गवाइ निजम आंद. ओर सत्‍तेम वेहचंतोर इंचि ओन्क एरपाट.
JOH 19:36 “ओना बोक्‍कानाल उंदि बोक्‍किंका उंरुंगो,” इंकुंदि जेगाते, “ओन कोह्कतोनहेके हूळानुर” इंचि दर्मसास्‍त्रमते रासि मत्‍ता पोल्‍लें पुरागा आयगोम इंचि, इल्‍हा जर्गता.
JOH 19:38 अवंता आतंका, अरिमताइ नाटेना योसेप इनानोर, पिलातुसनगा होंचि, “येसुना पीनगुन हीम,” इंचि पूसकीतोर. पिलातुस ओम इत्‍तस्के ओर येसुना पीनगुन ओतोर.
JOH 19:39 उंदि मल्का नर्कटा वेलाक वासि येसुंक कलियता निकोदेमसगुडा योसेपुनतोनि वातोर. ई निकोदेमस, दग्‍गेर-दग्‍गेरा मुप्‍पै (30) किलोना “बोलम” आनि “अगर” इनना गमागमा गब्‍बु वायना वस्‍तुक पीनगुंक होकालय पीसि वातोर.
JOH 19:40 ओर इव्वुर कूळसि, यहुदिल्कुना गति कियना रिवाज परकारम, आ गमागमा वायना वस्तुकुनंता येसुना मेंदुल्क होकतुर. होकसि, येसुना पीनगुन उंदि पूना पोळ्‍गु कप्पिडते हुटतुर.
JOH 19:41 येसुन क्रुसुंक वेलाड वाटता जेगाक दग्गेरेन उंदि तोटा मत्‍ता. आ तोटाते उंदि पूना बोंदा मत्‍ता, अद बोंदाते अदवेरदाका बस्‍केने बोनदे पीनगुन इर्रा हिल्‍लुर.
JOH 19:42 अद बोंदा दग्‍गेरा मत्‍ता, अचोने आयाका अद यहुदिल्कुना दाटसि होनना पंडुगुना तयारिं कियना रोज मत्‍ता. अदुनहाटीं ओर येसुन अदे बोंदाते इरतुर.
JOH 20:1 वारमता मोदाटा रोजु, इत्‍ते अयतारमनाडु, मुसामुसा हीकट मननेंकेन, मगदलेनि नाटेना मरियम बोंदातगा होत्‍ता. अगा अद, बोंदा हर्दुक अड्‍डम इरसि मत्‍ता बंडा तेंडसि मत्‍ताप हूळता.
JOH 20:2 अदुनहाटीं अद मरियम, सिमोन पत्रुनगा आनि येसु बोन अय्ते पावरम कियुंदुरो आ सिस्युनगा विच्‍चि होंचि, “सामिना पीनगुन बोंदाताल बोरो तेंडसि ओतुर, अदुन बगा इरतुरो, माकु तेळियो,” इंचि वेहता.
JOH 20:3 अद वेहतद केंजसि, पत्रु आनि आ इंकावरोर सिस्युड बोंदातेके होनालय पेय्‍स्‍तुर.
JOH 20:4 ओर इव्वुर वितसेके होनंनेके, आ इंकावरोर सिस्युड पत्रुंकन्‍ना मुन्‍ने विच्‍चि, बोंदातगा एवतोर.
JOH 20:5 अगा एवसि, ओर पलाताले माळकिस हूळतोर, अय्ते ओन्क सिराप येसुंक हुटसि मत्‍ता कपडिं दिसतां. गानि ओर लोप्पो नेंगा हिल्‍लोर.
JOH 20:6 पजा सिमोन पत्रुगुडा अगा एव्‍तोर. लोप्पो होळियसि, येसुंक हुटसि मत्‍ता कपडिन हूळतोर. गानि येसुना तल्‍लक हुटसि मत्‍ता कप्‍पिड मडता कीसि, वेरे जेगाते मत्‍तद ओन्क दिसता.
JOH 20:8 पजा, बोंदातगा मुन्‍ने एव्ता सिस्युडगुडा लोप्पो होळियसि, हूळसि विस्वासम कीतोर.
JOH 20:9 अदवेरदाकागुडा, “येसु हासि तप्‍पाकोंटा मर्रा जीवाते तेदंतोर,” इंचि दर्मसास्‍त्रमते रासि मत्‍ता पोल्‍ले ओर्क तेळिया हिल्‍ले.
JOH 20:10 पजा ओर सिस्युल्क ओरा लोह्कुने मल्सि होत्‍तुर.
JOH 20:11 मगदलेनि नाटेना मरियम मात्रम बोंदाता पलाते निलसि अळसेके मत्‍ता. अळसेके-अळसेकेन अद लोप्पो माळकिस हूळता.
JOH 20:12 अस्‍के, तेल्‍लटा कपडिं केरता रोंड पेनदा दूतां दान्क दिसतां. अव येसुना सेत्‍तातुन इरतागा उंदि बारे तल्‍लाताहेके, इंकुंदि बारे काल्कुनहेके उद्‍दिस मत्‍तां.
JOH 20:13 आ दूतां, “बाई, निमे बारि अळसंतिन?” इंचि पूसकीतस्‍के, “नावा सामिना मेंदुलतुन बोंदाताल बोरो बेकेनो ओसि इरतुर, नाकु एरपाट हिल्‍ले,” इंचि मरियम इत्‍ता.
JOH 20:14 अल्हा इंचि अद पजोळ्क तिरियता. अस्‍के अगा येसु निलसि मत्‍तद दान्क दिसता. गानि ओरे येसु इंचि, अद एरपाट किया हिल्‍ले.
JOH 20:15 अस्‍के येसु, “बाई, निमे बारि अळसंतिन? बोर्कुन पहकसंतिन?” इंचि मरियमुन पूसकीतोर. अस्‍के मरियम ओन, ओर तोटाक कावेल मनानोर बारे इन्कुंचि, “महाराज, निमे गिंटा सामिना पीनगुन इगेटाल ओयानय्ते, अदुन बगा इरतिन नाकु वेहा नना होंचि तरकुंतन,” इंचि इत्‍ता.
JOH 20:16 अय्ते येसु, “मरियम,” इंचि दान केयतोर. अस्‍के मरियम ओनहेके तिरियसि हूळसि, दाना इब्रानि बासाते, “रबोनि” इंचि इत्‍ता.
JOH 20:17 अस्‍के येसु, “इदवेरदाका नना बाबानगा होना हिल्‍लेन. निमे नाकुन इट्‍टुमा, गानि नावा तम्मुह्कुनगा होंचि इल्‍हा वेहा: नना नावा बाबाल आनि मीवा बाबाल, इंका नावा पेन आनि मीवा पेनदागा पोर्रो होंचंतन, इंचि ओर्क वेहा,” इंचि दानकु वेहतोर.
JOH 20:18 अस्‍के मगदलेनि नाटेना मरियम सिस्युल्कुनगा होंचि, “नना सामिन हूळतन, ओर मीकु इव पोल्‍लें वेहा इत्‍तोर,” इंचि ओर्क येसु वेहता पोल्‍लें वेहता.
JOH 20:19 अदे रोजु इत्‍ते वारमता मोदाटा रोजु, पोळ्‍द अर्रना वेलाक, सिस्युल्क अंटोर, यहुदि पेद्‍दाल्कुना वेर्रेक, तल्‍पुंक तालम वाटसि, उंदि अर्राते जमा आसि मत्‍तुर. अचानक, येसु ओरा नड्‍डुम वासि निल्‍सि, “मीकु सांति दोर्कि,” इंचि इत्‍तोर.
JOH 20:20 अल्हा वळ्‍किसि, येसु ओर्क ओना कय्‍कुंक आनि पक्‍काक मत्‍ता देब्बां हुपिस्तोर. सामिन हूळसि ओर वेल्‍लेन कुसिते निंडिस होत्‍तुर.
JOH 20:21 येसु मर्रा उंदि मल्का ओर्कुन, “मीकु सांति दोर्कि. बाबाल नाकुन ई दुनियाते लोहताप, ननागुडा मीकुन ई दुनियाते लोहंतन,” इंचि इत्‍तोर.
JOH 20:22 अल्हा वेहचि, “पवित्र आत्मा येतट,” इंचि ओरपोर्रो उह्कुतोर.
JOH 20:23 उह्किसि, “मिमेट बोना पापाल्क मापि कींतिरो, ओरा पापाल्क मापि आंतां, मिमेट बोरा पापाल्क अय्ते मापि किय्यिरो, ओरा पापाल्क मापि आयों,” इंचि ओर्क वेहतोर.
JOH 20:24 येसु वासि मत्‍तोर अस्‍के, ओना पन्‍नेंड सिस्युल्‍कुनाल वरोर, तोमल ईर एमडाल्‍कुनाल वरोर आंदुर, ई सिस्युड मनाहिल्‍लोर.
JOH 20:25 अदुनहाटीं सिस्युल्क, “मोमोट सामिन हूळतोम,” इंचि ओन्क वेहतुर. गानि तोमल, “नना कुद्‍दु ओना कय्‍कुंक कोह्कता पुनकुन हूळसि, आ पुनकुने नना वेलु इर्रुवा, इंका गोर्काते कोह्कता बर्रातगा कय इर्रुवा, नना विस्वासम किय्योन,” इंचि इत्‍तोर.
JOH 20:26 ओर अल्हा इंचि एनिमिदि रोजुक आता पजा, सिस्युल्क मर्रा अदे लोते तल्‍पुंक तालम वाटसि जमा आसि मत्‍तुर. ई मल्का ओरतोनि तोमालगुडा मत्‍तोर. तल्‍पुंक तालम वाटसि मननेंकेगुडा येसु ओरा नड्‍डुम वासि निल्तोर. निलसि, “मीकु सांति दोर्कि,” इंचि इत्‍तोर.
JOH 20:27 पजा येसु तोमान, “तोमा, नावा कय्‍दा पुनकुने नीवा वेलु इर्सि हूळा. नीवा कय हाह्‍चि, नावा पक्‍काक मनना गोर्का बर्राते नीवा कय इर्रा. निमे अनमानमते मन्‍मा, विस्वासम कीम,” इंचि वेहतोर.
JOH 20:28 अस्‍के तोमल, “ना सामि, ना पेनदुना,” इंचि तोमल येसुंक जवाब हीतोर.
JOH 20:29 पजा येसु ओन, “निमे नाकुन हूळसि विस्वासम कीतिन. गानि बोर नाकुन हूळाकोन्‍ना विस्वासम कींतोर, ओर आसिर्वाद दोर्कतोर आंद,” इत्‍तोर.
JOH 20:30 सिराप इवे आयका, सिस्युल्कुना मुन्‍ने येसु वेरे इंका वेल्‍लेन अद्‍बूतामाता चिन्‍हे कीसि हुपिस्तोर. इवन्‍नि ई पुस्तकमते रासमळ जर्गाहिल्‍ले.
JOH 20:31 गानि येसे किरिस्‍तु, ओरे पेनदा मर्रि, इंचि मिमेट विस्वासम कीसि ओना पोरोल्ते पिस्वर दोर्किच्‍कुननाहाटीं, इवन्‍नि रासमळ जर्गता.
JOH 21:1 इवंता आता पज्जो, येसु मरुंदि मल्का सिस्युल्कुंक तिबेरिया समुद्रमता ओड्‍डुंक सिस्युल्कुंक दिसतोर. अद इल्‍हा जर्गता:
JOH 21:2 अगा सिमोन पत्रु, एमडाल्‍कुनाल वरोर तोमल, गालिल राज्येमता काना नाटेना नतेनल, जब्‍दिना मर्क आनि येसुना इंका इव्वुर सिस्युल्कु जमा आसि मत्‍तुर.
JOH 21:3 अस्‍के सिमोन पत्रु, “नना जिम्मां पियालय दांतन,” इंचि ओर्कुन इत्‍तस्के ओर, “मोमोटगुडा नीतोनि वांतोम,” इंचि, होंचि डोंगाते उदतुर. गानि अद नर्कामेड ओर्क उंदिंका जिम्मा दोर्काहिल्‍ले.
JOH 21:4 अद रोजु पंगा आयनेंके येसु वासि ओड्‍डुनगा निलसि मत्‍तोर. गानि ओना सिस्युल्क, ओन येसु आंदुर इंचि एरपाट किया हिल्‍लुर.
JOH 21:5 अस्‍के येसु, “मिहगा इच्‍चुंगना जिम्मां मंतंगा, पिलाल्कनिटा?” इंचि पूसकीतोर. अय्ते ओर, “उंदिंका हिल्‍ले,” इंचि इत्‍तुर.
JOH 21:6 अस्‍के येसु ओर्क, “डोंगाता तिना बाजुंक ओल्‍ला वाटट, अस्‍के मीकु जिम्मां अर्रंतां,” इंचि वेहतोर. येसु वेहतापे ओर ओल्‍ला वाटतुर. अस्‍के हुळाट! ओर ओल्‍लातुन ओड्‍डुंक इग्गा पराहिल्‍लुर, अचोने वेल्‍ले जिम्मां ओल्‍लाते अरतां.
JOH 21:7 अस्‍के येसु बोन अय्ते पावरम कियुंदुरो आ सिस्युड, “ओर सामिए आंदुर,” इंचि पत्रुंक वेहतोर. अय्ते सिमोन पत्रु, ओर अल्हा वेहतदुन केंजता केंजमळे तेंडसि मत्‍ता कपडिं केरसि समुद्रमते दुन्कतोर.
JOH 21:8 ओड्‍डु वेल्‍ले लक्‍कु मनाहिल्‍ले. दग्‍गेर-दग्‍गेरा रोंड नुह्कुना कूटां लक्‍कु मत्‍ता बारे. अदुनहाटीं कळमता सिस्युल्कु, जिम्माने निंडिस मत्‍ता ओल्‍लातुन इग्गिसेक अदे डोंगाते वातुर.
JOH 21:9 ओर ओड्‍डुंक एवतस्‍के, रेय्‍सि हूळते, अगा ओर्क इच्‍चुं हारिं आनि तडमि पोर्रो वाटसि, इच्‍चुं जिम्मां दिसतां.
JOH 21:10 अस्‍के येसु, “मिमेट इंद-इंदके पीता जिम्मानाल इच्‍चुं जिम्मां हीके पीसि वटु,” इंचि ओर्कुन इत्‍तोर.
JOH 21:11 अदुनहाटीं सिमोन पत्रु डोंगाते एक्‍किसि ओल्‍लातुन एताल ओड्‍डुंक इग्गुतोर. अद ओल्‍लाते नूटा एबै मूड पेद्‍दा-पेद्‍दा जिम्मां निंडिस मत्‍तां. अचोने वेल्‍ले जिम्मां निंडिस मनिनागानि अद ओल्‍ला हर्रा हिल्‍ले.
JOH 21:12 पजा येसु, “वटु, वासि नास्ता कीम्‍टु,” इंचि ओर्कुन केयतोर. सिस्युल्कुंक, ओरे सामि इंचि एरपाट आताहाटीं, “निमे बोन आंदिन?” इंचि पूसकियालय बोनके हिम्मत आयाहिल्‍ले.
JOH 21:13 अस्‍के येसु वासि, आ हारिन, जिम्मान येतसि ओर्क हीतोर.
JOH 21:14 येसु हासि मर्रा जीवाते तेदता पज्जो, इल्‍हा सिस्युल्कुंक ओर दिसमळ, इद मूळोव मल्का आंदु.
JOH 21:15 अंटोरा तिनुळ आतास्के येसु सिमोन पत्रुन, “योहानुना मर्रि सिमोनु, ईर अंटोरकन्‍ना निमे नाकुन एक्‍को पावरम कींतिना?” इंचि पूसकीतोर. अस्‍के सिमोन, “हो सामि! नना नीकुन पावरम कींतन इंचि नीकु एर्के मंता,” इंचि इत्‍तोर. “अय्ते निमे नावा गोर्रे पोरिह्कुन मेहा,” इंचि येसु पत्रुंक वेहतोर.
JOH 21:16 रोंडो मल्का, “योहानुना मर्रि सिमोनु, निमे नाकुन पावरम कींतिना?” इंचि येसु पूसकीतस्‍के, “हो सामि! नना नीकुन पावरम कींतन इंचि नीकु एर्के मंता,” इंचि पत्रु इत्‍तोर. “अय्ते निमे नावा गोर्रेन बेस मेहा,” इंचि वेहतोर.
JOH 21:17 येसु मूळोव मल्का पत्रुन, “योहानुना मर्रि सिमोनु, निमे नाकुन पावरम कींतिना?” इंचि पूसकीतोर. “योहानुना मर्रि सिमोनु, निमे नाकुन पावरम कींतिना?” इल्‍हा मूळोव मल्का येसु पूसकीताहाटीं, पत्रुंक दुक्‍कम वासि, “हो सामि! नीकु अय्ते अंता एरपाट मंता. नना नीकुन पावरम कींतन इंचिगुडा नीकु एरपाटे मंता,” इंचि पत्रु इत्‍तोर. अस्‍के येसु, “अय्ते निमे नावा गोर्रें मेहा.
JOH 21:18 नना निजम-निजम वेहासेक, निमे लेयोन मत्‍तिन अस्‍के, नीवा कपडिं निमे हदुरकुनिंदिन. नी इस्‍टमाता जेगातगा होनिंदिन. गानि नीवा मातिरतनमते, निमे नीवा कय्‍क हाह्ते, बोरो वेरेतोर वासि नीवा कपडिं हदुरनुर नीकु इस्‍टम हिलुवा जेगाते नीकुन पीसि ओयनुर,” इंचि वेहतोर.
JOH 21:19 पत्रु बसोंटा हामुर हासि, पेनदुक महिमा हियनुरो, इदुन ओन्क हुप्‍सालय येसु अल्हा वळ्कतोर. अल्हा वळकता पजा, “नावा पज्जो ताका,” इंचि ओन्क वेहतोर.
JOH 21:20 पत्रु पजोळ्क मल्सि हूळतस्‍के, येसु बोन अय्ते पावरम कियुंदुरो आ सिस्युड, बोर अय्ते पंडुगुना गाटो तिननेंके वेल्‍लेन दग्‍गेर उद्‍दिस, सामि, नीकुन बोर दोकाते पीसि हींतोर इंचि, पूसकीता आ सिस्युड, ओना पज्जो वायनद ओन्क दिसतोर.
JOH 21:21 ओन हूळसि पत्रु, “ईनद बता संगति सामि?” इंचि येसुन पूसकीतोर.
JOH 21:22 अस्‍के येसु, “नना मल्सि मर्रा वायनदाका ओर पिस्सि मनगोम इंचि नाकु इस्‍टमातस्के, ओना बारेमते नीकु बतल गावाले? निमे नावा पज्जो ताका,” इंचि पत्रुंक वेहतोर.
JOH 21:23 दानहेंदाल, आ सिस्युड हायोर इत्‍ता पोल्‍ले, कळमता विस्वासुल्कुना नड्‍डुम पैलांचि होत्‍ता. गानि आ सिस्युड हायोर इंचि येसु इना हिल्‍लोर. ओर सिराप “नना मल्सि मर्रा वायनदाका ओर पिस्सि मनगोम इंचि नाकु इस्‍टमातस्के, ओना बारेमते नीकु बतल गावाले?” इंचि इत्‍तोर.
JOH 21:24 ई सिस्युडे इव पोल्‍लेना बारेमते गवाइ वेहचि, रासतोर. ईना गवाइ निजम आंद इंचि मनाकु एरपाटे मंता.
JOH 21:25 बूमिपोर्रो येसु कीतव इंका वेल्‍लेन पोल्‍लें मंतां. आ उंदुंदि पोल्‍लेतुन रासते, रासता पुस्तकाल्कुन इर्रालय दुनियाते जेगा हाला पर्रो बारे, इंचि नाकु अनपिच्‍चंता.
ACT 1:1 नावा पावरमगल्‍ला तियपिलुस, नना मोदाटा पुस्तकमते सुरुवनाल येसु बतल-बतल कीतोर, बतल-बतल कराहतोर अदुना बारेमते रासतन.
ACT 1:2 अचोने आयका येसु पेर्कुत्‍ता प्रेरितुल्कुंक पवित्र आत्माहेंदाल आदेस हीसि, मर्रा स्वर्गमते तिरियसि होननदाका पूरा पिस्वरता बारेमते नना रासतन.
ACT 1:3 येसु हासोंचि तिरियसि तेदतस्‍के, “नना पिस्सि मंतन,” इंचि प्रेरितुल्कुंक गट्‍टिगा रुजुव कीसि हुपिस्तोर. ओर नल्‍पै रोजकुनदाका ओर्क दिस्सेक, पेनदा राज्येम बारेमते वेहासेक मत्‍तोर.
ACT 1:4 उंदि मल्का ओरतोनि कलियसि मननेंके येसु, “येरुसलेम सहर होळसिसि होनमट. नावा पेनबाबाल हीता पोल्‍लेता बारेमते नना मीकु मुन्‍नेन वेहचि मत्‍तन, अद पूरा आयानदाका एदुर हूळसेक मंटु.
ACT 1:5 बारित्‍ते, योहान एतोनि बापतिस्मा हीतोर, गानि मीवा बापतिस्मा कोन्‍नि रोजकुंक पवित्र आत्माताहेंदाल आयार,” इंचि ओर्कुन इत्‍तोर.
ACT 1:6 पजा अंटोर प्रेरितुल्क उंदि जेगाते जमा आतुर. अस्‍के येसुन, “सामि, निमे इदे वेलाते इस्राएल देसेमता लोकुल्‍कुंक ओरा राज्येम मर्रा हींतिना?” इंचि पूसकीतुर.
ACT 1:7 अस्‍के येसु ओर्कुन, “अद सिराप पेनबाबांके तारिक आनि वेलाता निरनायम एतना अदिकारम मंता. दान एरपाट कियमळ मीवा कबळ आयो.
ACT 1:8 गानि पवित्र आत्मा मीपोर्रो वातस्के मिमेट येरुसलेम सहर, पूरा यहुदिया एरिया, सामरिया एरिया अल्‍हेने बूमिता आकिरदाका नावा गवाइ आयना ताकत मीकु वायार,” इंचि इत्‍तोर.
ACT 1:9 येसु इल्‍हा इत्‍तस्के, ओर हूळसेक मननेंकेन ओन स्वर्गमते तेहाचि ओयमळ जर्गुता. ओर्क दिस्‍साकोंटा उंदि मब्बु तेर्पे अड्‍डम वासि ओन मुच्‍चुता.
ACT 1:10 ओर पोर्रोळ्‍क तेदिस होननेंके अगा मत्‍ता प्रेरितुल्क मब्बुनहेके उंदेतीर हूळसेक मत्‍तुर. अस्‍केने इव्वुर तेल्‍ला कपडिं केरतोर ओरगा वासि नित्‍तिसि,
ACT 1:11 “ए गालिल लोकुल्‍कुनिटा, मिमेट इल्‍हा नित्‍तिसि मब्बुनहेके उंदेतीर बारि हूळसेक मंतिर? येसुन मिहागटाल स्वर्गमते तेहकुंचि ओयमळ जर्गुता गदा! अय्ते बल्हा मिमेट ओन स्वर्गमते होननेंके हूळतिरो, अल्‍हेने ओर मर्रा तिरियसि वांतोर,” इंचि इत्‍तुर.
ACT 1:12 पजा प्रेरितुल्क जय्तुन मराकुना गुट्‍टातगटाल नोमकेम रोजुनच्‍चो लक्‍कु मत्‍ता येरुसलेम सहरते मल्सि वातुर.
ACT 1:13 ओर अगा वासि, बद मिद्‍देते मनुंदुरो अदे मिद्‍देता पोर्रोटा अर्राते होत्‍तुर. अगा पत्रु, योहान, याकोब, अंदरियल, पिलिप, तोमल, बरतलमय, मत्‍तयाल, अल्‍पिना मर्रि याकोब, सिमोन (जिलोति), याकोबुना मर्रि यहुदल ईर मत्‍तुर.
ACT 1:14 ईरतोनि इच्‍चुंग मुर्ताह्क, येसुना यावल मरियम, ओना तम्मुह्‍क ईर अंटोर उंदे मनसुने पारतना कीसेके मनुंदुर.
ACT 1:15 उंदि रोजु नूटा इरवै (120) विस्वासि दादालोरा नड्‍डुम पत्रु नित्‍तिसि,
ACT 1:16 “नावा विस्वासुल्‍कुनिटा! दाविद राजाल पवित्र आत्माहेंदाल दर्मसास्‍त्रमते रासि मत्‍ता पोल्‍लेतुन मुन्‍नेन इंचि मत्‍तोर, अद इंदके यहुदाना हेंदाल पूरा आता. ई यहुदाले येसुन पियानोर्कुंक मुन्‍ने अरतोर.
ACT 1:17 यहुदल मना लोप्पोटोरे वरोर मत्‍तोर, मनातोनि कलियसि सेवा कियालय आसर आतोर,” इंचि इत्‍तोर.
ACT 1:18 तप्‍पु कबळ कीसि कमांच्‍ता कोत्‍ताने यहुदल उंदि बूमि अस्तोर. अदे बूमिते बोकबोर्लें अरताहेंका पीर पय्सि ओना पूरा पोदुह्कंता पलाते पेय्सतां.
ACT 1:19 इदु येरुसलेम सहरते मत्‍तोर्कुंक अंटोर्क तेळियता. दानहाटीं ओरा बासाते आ नेदुन हकलदामा, इत्‍ते नेत्‍तुरता नेलि इल्‍हा पोरोल अरता.
ACT 1:20 पत्रु मर्रा इल्‍हा इत्‍तोर, “ओना लोन पाडासि दांता, अवुने मनालय वरोरगुडा पिस्‍सोर. ओना पेद्‍दातनम, इंकावरोंक दांता.” इल्‍हा बजन संहिताते रासि मंता.
ACT 1:21 “अदुनहाटीं येसु सामि बच्‍चुं रोजकु मनातोनि कलियसि होंचेके-वासेके मत्‍तोरो, इत्‍ते योहानुना बापतिस्मातगटाल अय्ते येसुन मना नड्‍डुमताल स्वर्गमते तेहाचि ओयनदाका बोर अय्ते मनातोनि मनुंदुर ओरव्टेटाल वरोन पेरते बेस मनंता. येसु हासि मर्रा जीवाते तेदतद ओर मनातोनि गवाइ हियमळ गावाले,” इंचि इत्‍तोर.
ACT 1:23 दानहाटीं इव्वुर मनकालोर्कुन मुन्‍ने तत्‍तुर. अव्टेटाल वरोर योसेप, ईन बरसब्बा इनुंदुर, इंका ईन युसतुस इंचिगुडा एरपाट कियुंदुर. इंकावरोर मत्‍तिया.
ACT 1:24 अस्‍के प्रेरितुल्क पारतनाते, “सामि! निमे अंटोरा मनसुन एरपाट कींतिन, यहुदल अय्ते ओन्क हीता कबळतुन होळसिसि ओर होनना जेगाते होत्‍तोर. गानि निमे ईर इव्वुरा लोप्पोटाल प्रेरित इंचि नीवा सेवा कियालय बोन पेरकुत्‍तिन माकु हुप्‍सा,” इंचि तल्कतुर.
ACT 1:26 अस्‍के ओर ओराहाटीं सिट्‍टिं वाटतुर अय्ते सिट्‍टि मत्‍तियाना पोरोलते पेय्सता. अस्‍के पदाकोंडु मंदि प्रेरितुल्कुने आ मत्‍तियालगुडा कलियतोर.
ACT 2:1 पेंतेकोस्‍त पंडुगु रोजुने अंटोर विस्वासुल्‍क उंदि जेगाते जमा आसि मत्‍तुर.
ACT 2:2 अस्‍के उंदे मल्का मब्बुनाल पेद्‍दा वळि-दुमारम लेह्का वाता. ओर अंटोर उद्‍दिसि मत्‍ता लोन दाना सप्पुडतोनि पूरा निंडिस होत्‍ता.
ACT 2:3 अस्‍के तळमितालेसीं पोत्‍तना नाल्‍कें ओर्कु दिसतां, अव अगा मत्‍तोरा पोर्रो उंद-उंदि रेयतां.
ACT 2:4 ओर अंटोर पवित्र आत्माते निंडिस होत्‍तुर, आ आत्मा ओर्कु वळकाना बलम हीता परकारम ओर वेरे-वेरे बासाने वळ्‍कमळ सुरुव कीतुर.
ACT 2:5 अद वेलाते, मब्बुना हिळु मत्‍ता वेल्‍लेने देसेल्‍कुना यहुदि विस्वासुल्‍क येरुसलेमते मत्‍तुर.
ACT 2:6 आ सप्पुड केंजतस्के ओर उंदगा जमा आतुर. ओर अंटोर ओरा संतम बासाते वळ्कनद केंजसि इचंत्रम आतुर.
ACT 2:7 अस्‍के ओर इचंत्रम आसि, “ईर वळ्कानुर अंटोर गालिल एरियातोरे गदा,
ACT 2:8 अरे मनम अंटोरम मना संतम बासातेन केंजसंतोम गदा! इद बल्हा मरि?
ACT 2:9 मनम पारति, मेदी, एलामि, मेसोपोटामिया, यहुदिया, कप्‍पुदुकिया, पुंतुस, आसिया
ACT 2:10 पुगरिया, पंपुलिया, ई जेगानाल, इजिप्‍त देसेमताल, कुरेनि सहर दग्‍गेरा मत्‍ता लिबिया देसेमताल, रोम सहरताल वाता यहुदिल्कुम, यहुदि मतम पीतोरम. क्रेति, अरब देसेमताल वाता अंटोरम पेनदा इचंत्रमाता पेद्‍दा कबाह्‍कुन मना-मना संतम बासाने केंजसेके मंतोम,” इंचि इत्‍तुर.
ACT 2:12 ओर अंटोर इचंत्रम आसि, “इद बतल आसंता” इंचि तेळियका वरोंक वरोर तल्कतुर.
ACT 2:13 गानि वेरेतोर अय्ते, “ईर अंगुर पंडिना पूना कल्‍लु उंचि मंतुर,” इंचि ओर्कुन कारेड्‍डाल्‍क कीतुर.
ACT 2:14 अस्‍के पत्रु पदाकोंडु मंदितोनि नित्‍तिसि, लोकुल्‍कुंक अंटोर केंजा होनानाल जोरते वळकालय दल्‍गुतोर. यहुदियाता दादालोरिटा, येरुसलेमते मनानोरिटा, नना वेहानद मीकु तेळियमळ गावाले. इंचि मिमेट अंटोर नावा पोल्‍लेतुन बेस केव दोस्‍सि केंजट.
ACT 2:15 मिमेट इनकुत्‍ताप ईर कल्‍लु उंचि रिम्मां आया हिल्‍लुर. इंदके हक्‍केटां तोम्मिद एगसंतां.
ACT 2:16 गानि इय्यला इगे मिमेट हूळता गटनना बारेमते योएल इनना पेनदा कबुरतोर इल्‍हा जर्गंता इंचि मुन्‍नेने वेहचि मत्‍तोर, अद इल्‍हा मंता:
ACT 2:17 पेन इंता गदा, “आकिर रोजकुने नना अंटोर लोकुल्‍कुनपोर्रो, नावा आत्मातुन कुम्मरिचंतन. अस्‍के मीवा मर्क-मियाह्क बविस्यवानिं कियानुर, मीवा लेय्युर्क दर्सनाल्‍क हूळानुर, आनि मात्रालोर कलां हूळानुर.
ACT 2:18 आ रोजकुने नना मुरतळ मांडसा इनाकोंटा, अंटोर नावा दास-दासिह्कुनापोर्रो, आत्मातुन कुम्मरिचंतन आनि ओर बविस्यवानिं कियानुर.
ACT 2:19 नना मब्बुने इचंत्रमता कबाह्‍क हुप्‍संतन. बूमिपोर्रो चिन्‍हां इत्‍ते, नेत्‍तुर, तडमि, मब्बुनसोंटा पोया हुप्‍संतन.
ACT 2:20 पेनदा आ बच्‍चोनो पेद्‍दा, बेसता रोज वायाका मुन्‍ने, पोळ्‍द हीकटा, वेडसि बारे नेत्‍तुरलेह्का आंता.
ACT 2:21 अस्‍के बोर अय्ते पेनदा पोरोल एतंतुरो, ओर्कुन पापाल्कुनाल पिसागोटमळ जर्गंता.”
ACT 2:22 इस्राएल लोकुल्‍कुनिटा, इव पोल्‍लें केंजट. पेन नासरेत नाटेना येसुनाहेंदाल पेद्‍द-पेद्‍दा कबाह्‍क, इचंत्रमता कबाह्‍क आनि चिन्‍हां मीवा मुन्‍ने हुपिच्‍चि, पेन लोहतोर ईरे आंदुर इंचि रुजुव कीता, इद मीकु एरपाटे.
ACT 2:23 पेनदा उंदि पिलान आनि तेल्वि परकारमे येसुन मीवा कय्‍दे हियमळ जर्गुता. मिमेट सेड्‍डा मनकालोर्कुना सायता पीसि ओन क्रुस पोर्रो मोल्‍लां कोह्‍किसि हव्कतिर.
ACT 2:24 गानि येसुन पेन हामुटाल अलग कीसि मर्रा जीवाते तेहाता, अदुनहाटीं हामुर ओन इर्रा पराहिल्‍ले.
ACT 2:25 ओना बारेमते दाविद राजाल इल्‍हा इत्‍तोर, “नना पेनदुन बस्‍केळ्‍क, नावा मुन्‍नेन हूळसेक मत्‍तन, नाकुन कस्‍टाल्कुनाल पिसागोटालय अद नावा तिना बाजुंक मंता,
ACT 2:26 इंचि नावा मनसु आनंदमते मंता, नावा तोड्‍डि कुसिते वळ्कसेके मंता. इचोने आयका नावा मेंदुलगुडा आसेते मनंता.
ACT 2:27 निमे नावा आत्मातुन नरकमते होळसियिन, निमे नीवा पवित्र मनकन, कळियसि होना हिय्‍यिन.
ACT 2:28 निमे नाकु पिस्सना हर्रि हुपिस्‍तिन, नीवा लोप्पो नाकुन आनंदमते इर्रंतिन.”
ACT 2:29 अय्ते नावा विस्वासुल्‍कुनिटा! नना मीवा मुन्‍ने एनकटा मनकल दाविद राजाना बारेमते विस्वासमते वेहा परांतन, ओर हातोर, ओन बोंदा दोस्तुर. ओना बोंदा इदवेरदाकागुडा मना नड्‍डुम मंता.
ACT 2:30 ओर पेनदा कबुरतोर मत्‍तोर. ओना वंसमताल वरोन राजगद्‍देपोर्रो उप्‍संतन इंचि पेन ओट्‍टु तिंचि पोल्‍ले हीता, अद ओन्क एरपाटे मत्‍ता.
ACT 2:31 दानहाटीं मुन्‍ने बतल जर्गनद मंता अदुन एरपाट कीसि, ओन नरकमते होळसिया हिल्‍ले ओना मेंदुल कळियसि होना हिल्‍ले, इंचि वेहचि मत्‍तोर. इत्‍ते किरिस्‍तु हासि मर्रा जीवाते तेदतदुना बारेमते वेहता पोल्‍ले आंद.
ACT 2:32 आ येसुन पेने मर्रा जीवा तेहता इंचि मोमोट अंटोरम गवाइ मंतोम.
ACT 2:33 इंदके पेन येसुन दाना तिना बाजुंक उपिस्ता. पवित्र आत्मातुन हींतन इंचि पेन पोल्‍ले हीसि मत्‍ता अद ओन्क दोर्कता. येसु अदे पवित्र आत्मातुन वळियतोर, अदुन मिमेट हूळसेक, केंजसेक मंतिर.
ACT 2:34 बारित्‍ते दाविद राजाल स्वर्गमते होना हिल्‍लोर, गानि दीना बारेमते ओर कुद वेहतोर: “पेन नावा सामिनतोनि इत्‍ता गदा, नना नीवा पगातोर्कुन नीवा काल्कुनगा तर्रनदाका, निमे नावा तिना बाजुंक उदसि मन.”
ACT 2:36 “अदुनहाटीं इस्राएलता अंटोर लोकुल्‍क बेस एरपाट कीकुनना पोल्‍ले बतल इत्‍ते मिमेट बा येसुन अय्ते क्रुस पोर्रो मोल्‍लां कोहकिस हव्कतिरो, पेन ओन सामि आनि किरिस्‍तु कीता,” इंचि पत्रु वेहतोर.
ACT 2:37 इव पोल्‍लें केंजनेंके ओरा गुंडें दडेल इत्‍तां. अस्‍के ओर, “दादालोरिटा, इंदके मोमोट बतल कीकोम?” इंचि पत्रुन आनि अगा मत्‍ता प्रेरितुल्कुन पूसकीतुर.
ACT 2:38 अस्‍के पत्रु, “मिमेट कीता पापाल्क मापि आयगोम इंचि मनसु मार्सकुंचि पेनदाहेके तिरियट, मिमेट अंटोर येसु किरिस्‍तुना पोरोलते बापतिस्मा एतट. अल्हा कीतिरित्‍ते मीकु पवित्र आत्माता वरम दोर्कंता.
ACT 2:39 ई पोल्‍ले मीहाटीं, मीवा पिलाल्‍कुनाहाटीं आनि बोर अय्ते लक्‍कु मत्‍तोर्कुन मना सामि आता पेन, दग्‍गेरा केयता ओरा अंटोराहाटीं हींता.” इंचि ओर्कु वेहतोर.
ACT 2:40 पजा पत्रु, इंका वेल्‍लेने पोल्‍लेनहेंदाल गवाइ हीसि, “ई युगमता कराब लोकुल्‍कुनाल मिमेट जेगर्ता मंटु,” इंचि विनंति कीतोर.
ACT 2:41 अस्‍के बोर अय्ते ओना पोल्‍लेन ओप्‍कुत्‍तुर, ओर अंटोर बापतिस्मा एततुर. इल्‍हा ओर अंटोर कलियसि मूड वेय्‍कुना मंदि आतुर.
ACT 2:42 ओर अंटोर, प्रेरितुल्कुना कराहमळते, कूळमळते, हारि उरुहमळते आनि पारतना कियमळते उंदि आसि मनुंदुर.
ACT 2:43 प्रेरितुल्क तीराता इचंत्रमता कबाह्‍क, चिन्‍हां किय्युंदुर. अदुनहाटीं अंटोर पेनदा कदर कियालय दल्‍गतुर.
ACT 2:44 विस्वासुल्‍क अंटोर उंदासि कलियसि मनुंदुर. बोनगा बतल मनिनागानि दान अंटोर तूसकुनुंदुर.
ACT 2:45 अचोने आयका ओरा सम्‍सारमतुन, सामानतुन अम्मिसि अव्‍सरम मत्‍तोर्कुंक तूसि हियुंदुर.
ACT 2:46 रोज गुळिते उंदि मनसुने जमा आयुंदुर. ओर लोन-लोन हारि उराहचि, आनंदमते पीटे बतले अन्‍समन्‍स हिलाकोंटा अंटोर कलियसि गाटो तिनुंदुर.
ACT 2:47 ओर रोज पेनदा स्‍तुति कियुंदुर, अंटोर ओरतोनि कूस मत्‍तुर. पापमताल मुक्‍ति दोर्कतोर्कुन, सामि विस्‍वासुल्‍कुने कल्‍पुंदुर.
ACT 3:1 उंदि मल्का पिय्यटा पारतना वेलाक इत्‍ते मूड एगनेंके पत्रु आनि योहान गुळिते होंचेके मत्‍तुर.
ACT 3:2 अस्‍के इच्‍चुर लोकुल्‍क पुट्तस्केटाल कुंटि मत्‍तोन वरोन तेहकुंचि तत्‍तुर. गुळिते होना-वाया कियानोर्कुन बिच्‍चम तल्कागोम इंचि ओन ओर रोजु गुळिता सक्‍कगा इनना गलमातगा उपिच्‍चि इर्रुंदुर.
ACT 3:3 पत्रु आनि योहान गुळिते होळियानद हूळसि ओर ओर्कुन बिच्‍चम तल्कतोर.
ACT 3:4 अस्‍के पत्रु योहानुनतोनि ओनाहेके उंदेतीर हूळसि, “माहेके हूळा” इंचि इत्‍तोर.
ACT 3:5 पजा ओराहेंदाल बतलन्‍ना दोर्कार बारे इंचि आसेते, ओराहेके हूळसेक मत्‍तोर.
ACT 3:6 अस्‍के पत्रु, “नना अय्ते एंडि बंगाराल्क मत्‍तोन आयोन, गानि नहगा बतलय्ते मंतनो अदे नीकु हींतन, नासरेत नाटेना येसु किरिस्‍तुना पोरोलता बलमते नित्‍तिसि ताका,” इंचि इत्‍तोर.
ACT 3:7 पजा ओर ओना तिना कय पीसि तेहता तेहामळे ओना काल्कुने, टोंगराने ताकत वाता.
ACT 3:8 अस्‍के ओर दुनकिसि तेदसि ताकालय दल्‍गुतोर, ताकसेके, दुन्किसेके, पेनदा स्‍तुति कीसेके ओरतोनि गुळिते होत्‍तोर.
ACT 3:9 ओर ताकानदुन आनि पेनदा स्‍तुति कियमळतुन अंटोर लोकुल्‍क हूळतुर.
ACT 3:10 ईर गुळिता सक्‍कगा इनना गलमातगा बिच्‍चम तल्ककुनानोर इंचि लोकुल्‍क एरपाट कीकुत्‍तुर. ओर बेस आतद हूळसि, इद बल्हा आता इंचि अंटोर वेरियसि इचंत्रमते अरतुर.
ACT 3:11 आ कुंटि मनकल पत्रु आनि योहानुन पीसि नित्‍तिसि मत्‍तोर. ओर सुलेमान राजाना पंदिरतगा मत्‍तस्के अंटोर लोकुल्‍क इचंत्रम आसि आ जेगातगा विच्‍चि वातुर.
ACT 3:12 ओर्कुन हूळसि पत्रु इल्‍हा वळकालय दल्‍गतोर. “ए इस्राएलता लोकुल्‍कुनिटा, मिमेट जर्गतदुन हूळसि इल्‍हा बारि इचंत्रम आसि माहेके हूळसेक मंतिर? मोमोट मावा ताकतते, मावा बक्‍तिते ईन ताकानाल-तिरियानाल किया हिल्‍लोम.
ACT 3:13 अब्राहाम, इसाक आनि याकोबुना पेन, इत्‍ते मना एनकाटोरा पेन, दाना सेवक येसुंक कदर हीता. गानि मिमेट ओन दोर्कापीसि हव्कालय हीतिर. अयना पिलातुस ओन होळसियाना विचारम कीतस्‍के मिमेट ओन होळसियामन्‍नि इत्‍तिर.
ACT 3:14 पवित्र आनि नीतिमंतुड मत्‍ता येसुन ओप्‍कुन्‍ना हिल्‍लिर, गानि वेरेतोरा जीवां तेंडाना पापि मनकन गावाले इत्‍तिर.
ACT 3:15 मिमेट लोकुल्‍कुंक बस्‍केळ्‍क पिस्‍साना पिस्वरता हर्रि हुप्‍सानोन हव्कतिर, गानि पेन ओन हातोराव्टेटाल मर्रा जीवा अरहता, दीना मोमोट गवाइ मंतोम.
ACT 3:16 मोमोट येसुन नम्मुताहाटीं ओना पोरोलतेन ईर कुंटि बेस आतोर. ई मनकन मिमेट हूळतिर, एरपाट कींतिर. येसुना पोर्रोटा विस्वासमतेन ई मनकल पुरागा बेस आतोर. इदंता मी मुन्‍नेन जर्गुता.”
ACT 3:17 “नावा दादालोर तम्मुह्कनिटा! मिमेट आनि मीवा राज्येम कियानोर बतल कीतिरो अद मीकु तेळियवा हेंकेन कीतिर इंचि नाकु एर्के.
ACT 3:18 येसु किरिस्‍तुंक तकलिप अर्रापींता इंचि पेन दाना कबुरतोर्कुना हेंदाल मुन्‍नेन वेहचि मत्‍ता, अद इंदके पूरा आता.
ACT 3:19 दानहाटीं मिमेट मनसु मार्सकुंचि पेनदाहेके तिरियसि वाते, मीवा पापाल्क पाय्सि दांता. अस्‍के मीकु पेनदा मुन्‍ने आत्मिक सांतिता वेला वायार.
ACT 3:20 पेन मुन्‍नेटाले तयार कीसि इरता येसु किरिस्‍तुन मीहाटीं लोहार.
ACT 3:21 गानि पूरा दुनियातुन मोदाटालेसीं बेस कींतन, इंचि पेन वेल्‍ले मुन्‍नेने पवित्र कबुरतोराहेंदाल वेहचि मत्‍ता. अद कालम वायनादाका किरिस्‍तु स्वर्गमतेन मनंतोर.”
ACT 3:22 “पेन मीवा लोप्पोटाले वरोन नावसोंटा पेनदा कबुरतोन लोहार, ओर वेहतापे मिमेट ताकाना, बोर अय्ते ओर वेहताप ताकोर, ओर वेहताप ताकानोरव्टेटाल वेरे आसि नासडेम आंतोर, इंचि मूसाल वेहचि मत्‍तोर.
ACT 3:24 अचोने आयका, सामवेल आनि ओना पज्जो वाता पेनदा कबुरतोर अंटोर इव रोजकुना बारेमते वळ्कुतुर.
ACT 3:25 ‘नीवा वंसमतोराहेंदाल बूमि पोर्रोटोर्क अंटोर्क आसिर्वाद दोर्कंता’ इंचि पेन अब्राहामुनतोनि इत्‍ता. मिमेट अय्ते आ करार कीता एनकाटोरा आनि पेनदा कबुरतोरा पिलाल्क आंदिर.
ACT 3:26 पेन ओना सेवक येसुन मर्रा जीवा अरहतस्के, मीकुन कराब हरदाल तप्पिचि आसिर्वाद हियनाहाटीं मोदाला मीहेके लोहता,” इत्‍तोर.
ACT 4:1 पत्रु आनि योहान लोकुल्‍कुनतोनि वळकसेके मननेंके पेर्मालोर्क, गुळिता कावेल कियानोरा दरोगाल आनि सदुकिर ओरगा वातुर.
ACT 4:2 येसु बल्हा अय्ते हातोरा लोप्पोटाल मर्रा जीवाते तेदतोर, अल्‍हेने हातोर मर्रा जीवाते तेदंतुर इंचि पत्रु आनि योहान लोकुल्‍कुंक कराहमळतुन हूळसि ओर्कु इरगा होंग वाता.
ACT 4:3 पजा ओर ओर्कुन पीतुर गानि पोळ्‍दु होत्‍ता इंचि इंकुंदि रोजुनदाका ओर्कुन जेलने बंद कीसि इरतुर.
ACT 4:4 गानि बोर अय्ते ओरा पोल्‍लें केंजतुरो, ओराव्टेटाल वेल्‍लेन मंदि येसुनपोर्रो विस्वासम कीतुर. विस्वासम कीतोरा लोप्पोटाल मांड्‍सा दग्‍गेर-दग्‍गेरा हेय्युं वेयकुनदाका आतुर.
ACT 4:5 इंकुंदि रोजु यहुदि पेद्‍दाल्क, राज्येम कियानोर आनि दर्मसास्‍त्रम कराहना गुरुल्क येरुसलेमते जमा आतुर.
ACT 4:6 इंका पेद्‍दा पेर्माल हन्‍नाल ओना जीवातोर कयपाल, योहान, सिकंदर आनि ओना लोतुर अंटोर अगा मत्‍तुर.
ACT 4:7 ओर पत्रुन आनि योहानुन ओरा नड्‍डुम निलाहचि, “मिमेट बद ताकतते, बोना पोरोलते इव कबाह्‍क कीतिर?” इंचि ओर्कुन पूसकीतुर.
ACT 4:8 अस्‍के पत्रु पवित्र आत्माते निंडसि इल्‍हा वळकालय दल्‍गतोर. ए लोकुल्‍कुनपोर्रो राज्येम कियानोरिटा अल्‍हेने पेद्‍दाल्कुरिटा! इय्याला वरोन कुंटिन बेस कीताहेंके, ओर बल्हा बेस आतोर, इंचि माकुन तल्कसेक मंतिर.
ACT 4:10 अय्ते मीकु अंटोर्क आनि इस्राएलता लोकुल्‍कुंक, नासरेत नाटेना येसु किरिस्‍तुना पोरोलतेन ई मनकल बेस आसि मी मुन्‍ने नित्‍तिसि मंतोर इंचि तेळियमळ गावाले. मिमेट, मीवा लोकुल्‍क, येसु किरिस्‍तुन क्रुस पोर्रो मोल्‍लां कोहकिसि हव्कतिर गानि पेन ओन हातोरा लोप्पोटाल मर्रा जीवाते तेहता
ACT 4:11 “मिमेट लोन दोहालय कबळ्‍क वायो इंचि पोहता बंडे, इंदके लोतुक अव्‍सरमाता बंडा आता, इंचि दर्मसास्‍त्रमते रासि मंता. अदे बंडा ई येसु आंदुर.
ACT 4:12 येसुना पोरोल तप्‍पा मब्बुना हिळु मनानोरा बोना पोरोले मनाकुन पापमताल पिसागोट्‍टो, इंका बोरे मनाकुन पिसागोट्‍टोर,” इंचि वेहतोर.
ACT 4:13 ओर पत्रुन आनि योहानुन हूळसि इस्कुल करियवोर, सादा मनकालोर आंदुर इनकुत्‍तुर, गानि ओरा दैरनेम हूळसि इचंत्रम आतुर. अस्‍के ईर येसुनतोनि मत्‍तोर आंदुर इंचि ओर्कुन एरपाट कीतुर.
ACT 4:14 बेस आता कुंटि ओरतोनि नित्‍तिसि मत्‍तद हूळसि ओर्कु अड्‍डम बतल वळका पराहिल्‍लुर.
ACT 4:15 अदुनहाटीं ओर पत्रुन आनि योहानुन इगेटाल पलाते होंट इंचि इत्‍तुर आनि वरोंक-वरोर विचारम कियालय दल्‍गतुर गदा,
ACT 4:16 ई मनकालोर्कुन मनम बतल कीकोम? येरुसलेमते मनानुर अंटोर्क ईर कुंटिन बेस कीता चिन्‍ह एरपाटे, अदुन मनम निजम आयो इंचि इना परोम.
ACT 4:17 गानि इद पोल्‍ले एक्‍को लोकुल्‍कुंक तेळियामन्‍नि इत्‍ते ओर्कुन मनम, मिमेट येसुना पोरोल इंका बोना मुन्‍ने एतमट, इंचि वेराहकोम, इत्‍तुर.
ACT 4:18 अस्‍के ओर्कुन मर्रा केय्‍सि, “मिमेट येसुना पोरोलते बतले वळ्‍कमट, बतले कराहमट,” इंचि आदेस हीतुर.
ACT 4:19 गानि पत्रु आनि योहान, “पेनदा पोल्‍ले केंजाका मीवा पोल्‍ले केंजमळ इद पेनदा मुन्‍ने न्‍यायामेना? मिमेटे वेहाटु.
ACT 4:20 बदाय्ते मोमोट हूळतोम, केंजतोम अदुन वेहाकोंटा मनमळ मावातोनि आया परो,” इंचि इत्‍तुर.
ACT 4:21 अगा जर्गुतदुन हूळसि, अंटोर लोकुल्‍क पेनदा स्‍तुति कियालय दल्‍गतुर. अदुनहाटीं लोकुल्‍कुना वेर्रेक ओर्क सिक्‍सा हियाका, ओर्कुन मर्रा वेराहचि होळसीतुर.
ACT 4:22 बोर मनकल अय्ते चमत्‍कार आसि बेस आतोरो, आ मनकल नल्‍पै वर्साना पोर्रो मत्‍तोर.
ACT 4:23 पत्रुन, योहानुन होळसीतस्के ओर ओरा दंटातोरगा वापस वासि, पेद्‍दा पेर्मालोर्क, यहुदि पेद्‍दाल्क इत्‍ता पोल्‍लें अंता ओर्कु वेहतुर.
ACT 4:24 ओर वेहतद केंजसि, ओर अंटोर कलियसि उंदे पेद्‍दा आवाजते पेनदुक पारतना कियालय दल्‍गतुर. “सामि! मब्बु, बूमि, समुद्रम आनि अवुना लोप्पो बतल अय्ते मंता, अवुन निमेन पुटिस्तिन.
ACT 4:25 नीवा पवित्र आत्माताहेंदाल नीवा सेवक, मावा एनकटा पेद्‍दा मनकल दाविद राजाना तोळ्‍दाल निमे इल्‍हा वेहतिन गदा, वेरे जाति लोकुल्‍क बारि लोल्‍लिं कीतुर? लोकुल्‍क वट्‍टिदे अव्‍सरम हिल्वा पिलानकु बारि कीसेके?
ACT 4:26 ई बूमिपोर्रोटा राजालोर पेनदुक अड्‍डम लडाइहाटीं तयार आतुर. राज्येम कियानोर अंटोर उंदि आसि, पेनदुक आनि दाना किरिस्‍तुंक अड्‍डम, आतुर.”
ACT 4:27 “निजमे, निमे पेरकुंचि लोहचीता नीवा पवित्र सेवक येसुना विरोदमते हेरोद आनि पुंतुस पिलातुसगुडा वेरे जातितोरतोनि, इस्राएल लोकुल्‍कुनतोनि कलियसि उंदि आतुर.
ACT 4:28 बारित्‍ते नीवा ताकत नीवा इच्‍चाते इल्‍हा जर्गना इंचि निमे मुन्‍नेने निरनायम कीतिन. अल्‍हेने जर्गसि पूरा आता.
ACT 4:29 अदुनहाटीं, सामि! इंदके ओर वेराहसेक हूळा, नीवा पोल्‍ले दैरनेमते वेहालय सेवाकुल्कुंक बलम हीम.
ACT 4:30 रोगाल्क बेस कियालय, नीवा पवित्र सेवक येसुना पोरोलते चिन्‍हां, इचंत्रमता कबाह्‍क किया परालय नीवा कय हाहचि बलम हीम,” इंचि पारतना कीतुर.
ACT 4:31 पारतना कीतारित्‍ते, ओर जमा आसि मत्‍ता जेगा मेदुलता, ओर अंटोर पवित्र आत्माते निंडिसोंचि पेनदा पोल्‍ले वेरियाकोंटा वेहालय दल्‍गुतुर.
ACT 4:32 विस्वासुल्‍क अंटोर उंदि मनसु, उंदि जीवा आसि मत्‍तुर. बोरन्‍ना आयि बदे सोम्मु, इद नावद इंचि इनाकोंदुर, गानि बोनगन्‍ना बतलन्‍ना मत्‍ते दान तूसकुनुंदुर.
ACT 4:33 येसु सामि हासि मर्रा जीवाते तेदतोर, इंचि ओना पेद्‍दा ताकतते प्रेरितुल्क गवाइ हियुंदुर. इल्‍हा ओर अंटोरपोर्रो पेनदा कुर्पा मत्‍ता.
ACT 4:34 ओरा लोप्पो बोनके बतल तक्‍को मनाहिल्‍ले. बूमि, लोहकु मत्‍तोर, अवुन अम्मिसि वाता कोत्‍तन तच्‍चि प्रेरितुल्कुंक हियुंदुर. बोन्क बच्‍चोर गरज मंता अच्‍चोर तूसि हियुंदुर.
ACT 4:36 साइप्रस दीबेते पुटता योसेप इनना लेवि वंसमतोर वरोर मत्‍तोर. ओन्क प्रेरितुल्क बरनाबास इंचि पोरोल दोस्तुर. बरनाबास इत्‍ते “अंटोर्कुन समत कियना मनकल” इंचि अर्तम.
ACT 4:37 ओर ओना नेलितुन अम्मिसि वाता कोत्‍तन अंता प्रेरितुल्कुंक हीतोर.
ACT 5:1 हनन्या पोरोलतोर वरोर मनकल अल्‍हेने ओना मुत्‍तो सपीरा, ईर इव्वुर कूळसि ओरदे इच्‍चो बूमितुन अमतुर.
ACT 5:2 वाता कोत्‍तानाल इच्‍चुं कोत्‍तां इरकुत्‍तोर इंचि ओना मुत्‍तोंक एर्के मत्‍ता, कडमता कोत्‍तां ओसि प्रेरितुल्कुंक हीतोर.
ACT 5:3 अदुन हूळसि पत्रु, “हनन्या! निमे बूमि अमता कोत्‍तानाल इच्‍चुं कोत्‍तां इरकुत्‍तिन. अय्ते पवित्र आत्मातोनि आबद्‍दम वळकालय नीवा मनसुने देय्यम बारि होळियता?
ACT 5:4 आ बूमि अम्मका मुन्‍ने नीवदे मत्‍ता गदा! अम्मुतंकागुडा वाता कोत्‍तन पोर्रो नीवदे अदिकारम मत्‍ता. अय्नागानि पेनदुक इस्‍टम हिलवद कबळ कियालय नीवा मनसुने बल्हा वाता? निमे मनकलोरतोनि आयो गानि पेनतोनि आबद्‍दम वळ्‍कतिन,” इंचि इत्‍तोर.
ACT 5:5 ई पोल्‍लें केंजतारित्‍तेन हनन्‍याल हिळु अर्सि जीवा होळ्‍सतोर. अचोने आयका ई पोल्‍लें केंजतुर अंटोर्क पेद्‍दा वेर्रे दल्‍गता.
ACT 5:6 अस्‍के लेय्युर्क तेदसि ओन्क कपडि हुट्‍सि पलाते ओसि बोंदा दोस्तुर.
ACT 5:7 दग्‍गेर-दग्‍गेरा मूड गंटां आतंका ओना मुत्‍तो लोप्पो वाता. अगा बतल जर्गुता दान्क तेळिया हिल्‍ले.
ACT 5:8 अस्‍के पत्रु अद वातद हूळसि, “मीवा बूमि इच्‍चोट्‍के अमतिरा वेहा!” इंचि तल्कतस्‍के, “आ इच्‍चोट्‍के अमतोम,” इंचि अद इत्‍ता.
ACT 5:9 पत्रु दान मर्रा, “मिमेट इव्वुर सामिना आत्माता परिक्‍सा बारि हूळालय दल्‍गतिर? हूळा नीवा मुय्दोन बोंदा दोसतोर गलमातगेन एवतुर, ओर नीकुन इंका अल्‍हेने ओयानुर.” इंचि इत्‍तोर.
ACT 5:10 ओर अल्हा इत्‍ता इन्‍मळे अद ओना काल्‍कुन मुन्‍ने अर्सि अल्हेन जीवा होळसीता. पजा दाना मुय्दोन बोंदा दोस्ता लेय्युर्क लोप्पो वासि हूळतस्‍के अद मुरतळ हासि दिसता. ओर दान इंका तेहकुंचि ओसि दाना मुय्दोना पक्‍काते बोंदा दोस्तुर.
ACT 5:11 अस्‍के येरुसलेमता कलिसियातोर अंटोर, ई पोल्‍लें बोर अय्ते केंजतुरो ओर अंटोर बागा वेरियतुर.
ACT 5:12 अल्‍हेने प्रेरितुल्कुना कय्‍दाल वेल्‍ले चिन्‍हां, इचंत्रमता कबाह्‍क लोकुल्‍कुना मुन्‍ने आयुंदुं. विस्वासुल्‍क अंटोर गुळिते सुलेमान राजाना पंदिरतगा बस्‍केळ्‍क उंदि मनसुने जमा आयुंदुर.
ACT 5:13 अविस्वासुल्‍क ओरतोनि कलियालय वेरियुंदुर, गानि विस्वासुल्कुना बेस कदर कियुंदुर.
ACT 5:14 अयना वेल्‍लेन मंदि मुर्ताह्क-मांडसा सामिन विस्वासम कीसि ओरगा वासि कलियुंदुर, इल्‍हा एक्‍कोते एक्‍को मंदि बेरस्सेक होत्‍तुर.
ACT 5:15 प्रेरितुल्कुना कबाह्‍कुन हूळसि लोकुल्‍क बिमार मत्‍तोर्कुन कटुल्‍कुने, केत्‍तिने पत्रु होनना हर्दागा तच्‍चि इर्रुंदुर. पत्रु होननेंके ओना नीडाय्‍ना बिमारतोरा पोर्रो अरते ओर बेस आयनुर इंचि लोकुल्‍कुना आसे मनुंदु.
ACT 5:16 अचोने आयका येरुसलेम सहरता पक्‍का पीसि मत्‍ता नाहकुनाल वेल्‍लेटुर बिमार मत्‍तोर्कुन, देय्याल्क पीतोर्कुन अगा पीसि वायुंदुर. ओर अंटोर प्रेरितुल्कुना कय्‍दे बेस आयुंदुर.
ACT 5:17 अस्‍के पेद्‍दा पेर्माल, ओनातोनि मत्‍ता सदुकिर्क, प्रेरितुल्कुन हूळसि ओरा मनसु मसुलुंदु.
ACT 5:18 अदुनहाटीं प्रेरितुल्कुन पीसि जेलने वाटतुर.
ACT 5:19 गानि अदे नर्का उंदि पेनदा दूता वासि जेलना तल्‍पु तेंडसि ओर्कुन पलाते ओता.
ACT 5:20 ओसि, “होंटु, गुळिते नित्‍तिसि ई पूना पिस्वरता अन्‍नि पोल्‍लें अंटोर लोकुल्‍कुंक वेहाटु,” इंचि ओर्कु वेहता.
ACT 5:21 पेनदा दूता वेहतद केंजसि ओर पोळ्‍दु पेय्सतंका गुळिते होंचि लोकुल्‍कुंक कराहलय दल्‍गतुर. हीके, पेद्‍दा पेर्माल आनि ओना दंटातुर, इस्राएलता अंटोर पेद्‍दाल्कुन पंचादिते केय्‍सि, प्रेरितुल्कुन जेलनाल तायालय लोहतुर.
ACT 5:22 गानि सिपाइल्क जेलने होंचि हूळतस्‍के अगा प्रेरितुल्क मना हिल्‍लुर, अदुनहेंके ओर मल्सि वासि,
ACT 5:23 “जेलता तल्‍पुकुंक अय्ते तालम वाटसि मत्‍ता. सिपाइल्कगुडा गलमानगा नित्‍तिसि मत्‍तद मोमोट हूळतोम, गानि तल्‍पु तेंडसि लोप्पो हूळतस्‍के लोप्पो बोरे मना हिल्‍लुर,” इंचि वेहतुर.
ACT 5:24 गुळितगा कावेल कियानोरा अदिकारि आनि पेद्‍दा पेर्मालोर इद केंजसि, “इंदके बतल आयार” इंचि वेल्‍ले विचारम कियालय दल्‍गुतुर.
ACT 5:25 अस्‍के बोरो वरोर मनकल वासि, “हुळट, मिमेट जेलने वाटतुर गुळितगा नित्‍तिसि लोकुल्‍कुंक येसुना पोल्‍लें कराहसेक मंतुर.” इंचि वेहतोर.
ACT 5:26 अस्‍के आ अदिकारि, गुळिता कावेल कियानोर्कुन पीसि गुळितगा होत्‍तोर. होंचि, लोकुल्‍क मापोर्रो बंडां हुक्‍सि हव्कानुर इत्‍ता, वेर्रेते ओर्कुन बतले बल्‍मि कियाकोंटा पंचादितगा तत्‍तोर.
ACT 5:27 ओर्कुन पीसि तच्‍चि पंचादिता मुन्‍ने निलाहतोर. अस्‍के पेद्‍दा पेर्माल ओर्कुन,
ACT 5:28 “ई येसुना पोरोलते करुहमट इंचि मोमोट मीकु कडक आदेस हिय्‍यिना गानि मिमेट पूरा येरुसलेम अंता ओना पोरोलते कराहतिर. अचोने आयाका ओन मोमोटे हव्कतोम इंचेके मावा पोर्रो तप्पु दोसालय हूळसेक मंतिर,” इंचि इत्‍तोर.
ACT 5:29 अदुनहाटीं पत्रु, कळमता प्रेरितुल्क, “माकु मनकालोरा पोल्‍लें आयो, गानि पेनदा पोल्‍ले केंजा पींता.
ACT 5:30 मिमेट येसुन क्रुस पोर्रो वेलाड वाटसि हव्कतिर गानि मावा पेद्‍दाल्कुना पेन ओन हामुरताल मर्रा तेहता.
ACT 5:31 हामुरताल तेहचि ओने पेन, राजाल आनि पिसागोटनोर इंचि निलाहता. मावा इस्राएलता दादालोर्कुंक मनसु मार्सकुनालय, पापाल्कुनाल मापि कियालय पेनदा तिना बाजुंक ओन कदर हीसि उपिस्ता.
ACT 5:32 इव अन्‍नि पोल्‍लेनहाटीं मोमोट गवाइ मंतोम. पेनदा पोल्‍लें केंजसि ताकानोराहाटीं पवित्र आत्मागुडा गवाइ मंता,” इंचि इत्‍तुर.
ACT 5:33 ओरा पोल्‍लें केंजसि, आ पंचादिता पेद्‍दाल्कुंक होंग वासि ओर्कुन हव्कना विचारम कीतुर.
ACT 5:34 गानि पंचादितगा गमलियेल पोरोलतोर वरोर परिसि, ओर मूसाना नियमता गुरुजीगुडा मत्‍तोर, ओन अंटोर कदर कियुंदुर. ओर तेदसि प्रेरितुल्कुन गडसेम पलाते ओयालय वेहतोर.
ACT 5:35 ओर्कुन पलाते ओतस्के, ओर पंचादिता मुन्‍ने, “मावा इस्राएलता लोकुल्‍कुनिटा! मिमेट ओर्कुन बतल कींतोम इंचंतिरो, बेस विचारम कीसि कीम्‍टु.
ACT 5:36 बारित्‍ते कोन्‍नि रोजकु मुन्‍ने तियुदास पोरोलतोर वरोर मनकल, ‘नना पेद्‍दोन’ इंचि वेहकुत्‍तोर. ओना पज्जो नालुं नुह्कुना मंदि इंका मत्‍तुर. गानि ओन हव्कतुर, अस्‍के ओना पज्जो ताकानोर अंटोर बेंदोर-हेके पायसि होत्‍तुर.
ACT 5:37 अद आता पज्जो सिरगंतिता वेलाते गालिल एरियाता यहुदल इनानोर वातोर. ओर इंका वेल्‍लेने लोकुल्‍कुन ओनाहेके कीकुत्‍तोर गानि ओन इंका हव्कतुर. ओना पज्जो ताकानोर अंटोर बेंदोर-हेके पायसि होत्‍तुर.
ACT 5:38 अदुनहाटीं इंदके इंका नना मीकु वेहसेक मंतन, मिमेट पीतोर्कुन बतले कियमट, ओर्कुन होळसीम्टु. ओरां विचाराल्क, ओरां कबाह्‍क मनकानव मनानय्ते मायसि दांतां.
ACT 5:39 गानि पेनदाहेंदाल मनानय्ते दान मिमेट आपा पर्रिर, मिमेट आपालय हूळते मात्रम पेनदुक अड्‍डम आंतिट,” इंचि इत्‍तोर.
ACT 5:40 अस्‍के पंचादितोर, गमलियेलना पोल्‍ले केंजतुर. पजा प्रेरितुल्कुन लोप्पो केय्‍सि ओर्कुन पोट्‍टेते तन्‍ना वेहचि, येसुना पोरोलते बग्‍गेन वेहमटु इंचि वेहचि होळ्‍सीतुर.
ACT 5:41 प्रेरितुल्कुन होळसीतस्के, येसुना पोरोलताहाटीं मोमोट देब्बां तित्‍तोम, इंचि बेस आनंदमते पंचादिताल पेय्सि होत्‍तुर.
ACT 5:42 रोज गुळितगा, लोन-लोन होंचि, येसु ईरे किरिस्‍तु आंदुर इंचि पेनदा बेसता कबुर वेहामळ, कराहमळ होळसा हिल्‍लुर.
ACT 6:1 इल्‍हा विस्वासुल्‍क वेल्‍लेन बेर्स्‍सेक होत्‍तुर. अय्ते अवे रोजकुने युनानि बासा वळ्‍काना यहुदिल्कु, इब्रानि बासा वळकाना यहुदिल्कुनतोनि, “रोज हिय्यना गाटोता बारेमते मावा मुंडामोस्ता मुरताह्कुनहेके बेस हूळसेक हिल्‍लिर,” इंचि जगडम दोस्तुर.
ACT 6:2 अस्‍के आ पन्‍नेंड मंदि प्रेरितुल्क अंटोर विस्‍वासुल्‍कुन उंदगा केय्‍सि, “पेनदा पोल्‍लें कराहमळ पक्‍कक इरसि गाटो पंचि तासेक मनमळ मावाहाटीं बेस आयो.
ACT 6:3 अदुनहाटीं नावा विस्वासुल्‍कुनिटा! मिमेट मीवव्टेटाले बेस कदर, बुद्‍दि आनि पवित्र आत्माते निंडिस मत्‍ता एडुर मांडसातुन पेरकुंट. मोमोट ओर्कुन ई कबळ पोर्रो इर्रांतोम.
ACT 6:4 अस्‍के पारतना, पेनदा पोल्‍लें कराहना मावा सेवा कबळ आगाकोंटा जर्गसेक मनंता.” इंचि वेहतुर.
ACT 6:5 इद पोल्‍ले अंटोर्कुंक नच्‍चुताहेंका ओर विस्वासमते, पवित्र आत्माते निंडिस मत्‍ता स्‍टिपन इनानोन पेरतुर. ओन वरोने आयका पिलिपुस, परकोरस, निकानोर, तिमोन, परमिनास आनि अंताकिया नाटेना निकोलस (ईर ओना जाति होळसि यहुदि जातिते वातोर) पोरोलतोर्कुन पेरतुर.
ACT 6:6 पजा ईर एडुरकुन प्रेरितुल्कुना मुन्‍ने निलाहतुर. अस्‍के प्रेरितुल्क ओरपोर्रो कय इरसि पारतना कीतुर.
ACT 6:7 इल्‍हा पेनदा पोल्‍ले वेल्‍लेन मंदिक एवसेक होत्‍ता. येरुसलेमते विस्वासुल्कगुडा वेल्‍लेन आतुर. अचोने आयका वेल्‍लेन मंदि यहुदि पेर्मालोर्कगुडा विस्वासमते वातुर.
ACT 6:8 पेनदा कुर्पाते, ताकतते निंडिस मत्‍ता स्‍टिपन लोकुल्‍कुना मुन्‍ने पेद्‍दा-पेद्‍दा इचंत्रमता कबाह्‍क, चिन्‍हां कियुंदुर.
ACT 6:9 गानि स्वतंत्रम दोर्कुता यहुदि लोकुल्‍कुना दर्मसास्‍त्रम कराहना लोताल इच्‍चुर लोकुल्‍क वासि स्‍टिपनुनतोनि जगडम दोसकुत्‍तुर. आ लोकुल्‍कुने कुरेनि, सिकंदरिया इनना सहरकुने मनना यहुदि लोकुल्‍क आनि किलिकिया, आसिया इनना एरियान पीसि मनना यहुदिल्कु मत्‍तुर.
ACT 6:10 गानि वळ्‍कानाहाटीं पवित्र आत्मा स्‍टिपनुंक तेल्वि हीता. अदुनहाटीं आ लोकुल्‍क ओना पोल्‍लेंक अड्‍डम वळका पराहिल्‍लुर.
ACT 6:11 पजा आ यहुदि लोकुल्‍क वेरेतोर्क तेळियाकोंटा इच्‍चुर लोकुल्‍कुंक लंचम हीसि, स्‍टिपन, मूसानद आनि पेनदा अपमानम आयना पोल्‍लें वळकानेंके मोमोट केंजतोम, इल्‍हा आबद्‍दम वळकालय वेहतुर.
ACT 6:12 अल्‍हेने ओर अगाटा लोकुल्‍कुन, यहुदि पेद्‍दाल्कुन, दर्मसास्‍त्रम कराहना गुरुल्कुनगुडा एक्‍किस्तुर. अस्‍के ओर स्‍टिपनुन दोर्कापीसि यहुदिल्कुना पेद्‍दा पंचादिते तत्‍तुर.
ACT 6:13 अय्ते आ पंचादिते लंचम तित्‍ता गवाइदार्क निलसि, “ई मनकल पवित्रमाता जेगा इत्‍ते गुळिता बारेमते इंका मूसाल वेहता नियमता बारेमते तप्‍पुड पोल्‍लें बस्‍केळ्‍क वळ्कसेक मनांतोर.
ACT 6:14 बारित्‍ते, नासरेत नाटेना येसु इद गुळितुन कूलाह्‍चि नासडेम कियानुर आनि मूसाल वेहता रीति-रिवाजकुन बदलांचनुर, इंचि वेहनेंके मोमोट केंजतोम” इल्‍हा गवाइ हीतुर.
ACT 6:15 अस्‍के अगा पंचादिते उद्‍दिस मत्‍ता अंटोर लोकुल्‍क स्‍टिपनुनहेके बागा हूळतुर. अय्ते ओर्कु स्‍टिपनुना मोकम पेनदा दूताता मोकमलेह्का दिसता.
ACT 7:1 पजा पेद्‍दा पेर्माल, “ईर वेहना पोल्‍लें निजमेना?” इंचि स्‍टिपनुन पूसकीतोर.
ACT 7:2 अस्‍के स्‍टिपन ओर्कु इल्‍हा वेहालय दल्‍गुतोर, “नावा दादालोर आनि बाबानसोंटा पेद्‍दाल्कुनिटा! नना वेहनद केंजट. मना एनकटा पेद्‍दा मनकल अब्राहाम मातरल मेसोपोटामिया देसेमतुन होळसि हारान इनना सहरते हेराका मुन्‍नेन पेन दाना महिमाते ओन्क दिसता.
ACT 7:3 दिस्‍सि, निमे नीवा देसेमतुन, नीवा जीवातोर्कुन होळसिसि नना नीकु हुपिचना देसेमते होन, इंचि ओन्क वेहता.
ACT 7:4 अस्‍के अब्राहाम कसदिल्कुना देसेम होळसि हारान एरियाते होंचि मनालय दल्‍गुतोर. ओना बाबाल हासोत्‍तंका पेन ओन अगटाल इंदके मिमेट मनना ई देसेमते लोहता.
ACT 7:5 अयना पेन इगे ओन्क अळगुमेड बूमिगुडा हिय्या हिल्‍ले. गानि ओन्क संतानम हिलुवा रोजकुनेगुडा पेन, ई देसेमतुन, ई बूमितुन नीकु हींतन, नीवा पज्जोटाल वायाना नीवा वंसमतोर्कुंक हींतन, इंचि ओन्क पोल्‍ले हीता.”
ACT 7:6 “अचोने आयका पेन ओनातोनि, नीवा वंसमतोर वेरे देसेमते होंचि मनांतुर, अगाटा लोकुल्‍क नीवा वंसमतोर्कुन नालुं नुहकुना वर्सांनदाका गुलामगिरिते इरसि, वेल्‍ले तकलिप हींतुर.
ACT 7:7 गानि बोर अय्ते नी वंसमतोर्कुन गुलामगिरिते इर्रांतुरो ओर्कु नना सिक्‍सा हींतन, पजा नीवा लोकुल्‍क अगटाल पेय्सि वासि इद जेगाते नाकु पूजा कियानुर, इंचि वेहता.”
ACT 7:8 “पजा पेन अब्राहामुनतोनि कतना इनना उंदि करार कीता. अदुनहाटीं अब्राहामुंक इसहाक पुटतस्के ओर एनमिदि रोजकुनोर मनानेंकेन ओना कतना कीतोर. इल्हेन इसाकुंक याकोब पुटतोर. पजा याकोबुंक पन्‍नेंडु मंदि मर्कु पुटतुर. ईरद अंटोरदगुडा कतना आता. इल्‍हा ई पन्‍नेंड मंदि मर्कुनाले मुन्‍ने इस्राएलता पन्‍नेंड वंसाल्कु तयार आतां. ईरे ई पन्‍नेंड वंसाल्कुना मोदोल मनकालोर आतुर.”
ACT 7:9 “याकोबुना मर्कु ओराव्टेटाल योसेप इनानोन पोर्रो अळूंदुर. अदुनहाटीं ओर ओन इजिप्‍त देसेमते गुलामगिरि कियालय अमतुर, गानि ओना पेन ओन्क सायता मत्‍ता.
ACT 7:10 ओन अन्‍नि कस्‍टाल्कुनाल दक्‍किस्ता. इंका पेन ओन्क बेस बुद्‍दि हीता. पेन हीता बुद्‍दितोनि ओर इजिप्‍त देसेमता पिरोन राजाना मनसु गेल्‍स्‍कुत्‍तोर. पजा इजिप्‍त देसेमता पिरोन राजाल ओना देसेमपोर्रो, ओना राजवाडानपोर्रो अदिकारि इंचि इरतोर.”
ACT 7:11 “अच्‍चोटेन कनान आनि इजिप्‍त देसेमते पेद्‍दा करवु अर्सि लोकुल्‍क इरगा कस्‍टाल्‍कुने अरतुर. इंका मना एनकटा पेद्‍दाल्कुंक तिनालय बतल दोर्काकोंटा आता.
ACT 7:12 इजिप्‍त देसेमते गाटो मंता इंचि तेळियतस्के याकोब मना एनकटा पेद्‍दाल्कुन अगा मोट्‍टा-मोदाटा मल्का लोहचीतोर.
ACT 7:13 ओर रोंडो मल्का होतस्के योसेप ओना बारेमते ओना दादालोर-तम्मुह्‍कुंक वेहतोर. अस्‍केन पिरोन राजांकगुडा योसेपना कानदानता बारेमते एरपाट आता.
ACT 7:14 अस्‍के योसेप ओना बाबाल याकोब आनि कानदानता अंटोर्कुन इत्‍ते पूरा डेब्बै हेय्युर मंदितुन इजिप्‍तते केया लोहतोर.
ACT 7:15 अस्‍के याकोब इजिप्‍त देसेमते होत्‍तोर. अग्गेन याकोब आनि मना अंटोर एनकटा पेद्‍दाल्क इंका हातुर.
ACT 7:16 पजा ओरा पीनगुल्कुन इस्राएल देसेमता सेकेम इनना सहर ओसि, अगा हामोर इनना मनकना मर्कुनहेंदाल नगदि कोत्‍तां हीसि अब्राहाम उंदि बोंदा अस्सि मत्‍तोर, अदे बोंदाते ईरदगुडा गति कीतुर.”
ACT 7:17 “अब्राहामुंक पेन हीता पोल्‍ले पूरा आयना वेला दग्गेर्क एव्ता, अस्‍के इजिप्‍त देसेमते मना लोकुल्‍क वेल्‍लेन आतुर.
ACT 7:18 कोन्‍नि रोजकु आतारित्‍ते योसेपुन बारेमते बतले एरपाट हिलुवा बोरो वरोर दुस्‍ट मनकल इजिप्‍त देसेमता राजाल आतोर.
ACT 7:19 ओर राजाल मना लोकुल्‍कुंक वेल्‍ले तकलिप हीतोर. मना लोकुल्‍कुना पिलाल्क पिसा मन्‍नि इंचि ओर्कुन पलाते पोहचियालय वेहतोर.”
ACT 7:20 “अदे कालमते मूसाल पुटतोर. पेनदा नदरते आ पेडल सक्‍कगा मत्‍तोर. आ पेडल मूड नेल्क ओना बाबाना लोते मत्‍तोर.
ACT 7:21 पजा बस्के अय्ते आ पेडन ओना तल्‍लुर-बाबो पलाते होळसीतुरो अस्‍के पिरोन राजाना मिय्यड ओन तेहकुंचि ओसि, दाना मर्रिनलेसीं पोस कीता.
ACT 7:22 मूसांक इजिप्‍त देसेमता बेसता विद्‍दे कराहमळ जर्गुता. मूसाल पोल्‍लेने आनि कबळते रोंडुने इंका बेस हुसार मत्‍तोर.”
ACT 7:23 “ओर नल्‍पै वर्सानोर आतोर अस्‍के ओना लोकुल्‍कुंक इत्‍ते इस्राएलना लोकुल्‍कुंक होंचि कलियना मनसु आता.
ACT 7:24 पजा अगा होत्‍तस्के इस्राएल लोकुल्‍कुनाल वरोन मनकनपोर्रो इजिप्‍त देसेमता वरोर मनकल अन्‍यायम कियानद हूळतोर. हूळसि आ अन्‍यायम कियना इजिप्‍त मनकन हव्‍किसि आ इस्राएल मनकन कापाळसि ओना बदला एततोर.
ACT 7:25 इस्राएल लोकुल्‍कुन पिसागोटनाहाटीं पेन ओन वाळकुंचंता इत्‍ता संगतितुन ओना लोकुल्‍क एरपाट कींतुर इंचि ओर इन्कुत्‍तोर, गानि अद ओर्क तेळिया हिल्‍ले.
ACT 7:26 इंकुंदि रोजु ओना लोकुल्‍कुनाले बोरो इव्वुर मनकालोर उर्रें अर्रनद हूळसि ओर्कुन कल्‍पना उद्‍देसमते, अरे मिमेट बसंटा मनकालोर आंदिर? दादल-तम्मुह्‍क आसिगुडा, वरोनपोर्रो वरोर अन्‍यायम कीसंतिर! इंचि ओर्कुन इत्‍तोर.
ACT 7:27 अस्‍के ओना पक्‍कातोनपोर्रो अन्‍यायम कीसेके मत्‍ता मनकल मूसन पक्‍कक दोब्‍बिसि, माकुन जगडमताल पापसि, मावा न्‍यायम कियना अदिकारम नीकु बोर हीतोर?
ACT 7:28 निन्‍ने आ इजिप्‍त मनकन हव्कुताप, नाकुनगुडा हव्कंतन इनकुंचंतिना?” इत्‍तोर.
ACT 7:29 इद पोल्‍ले केंजसि मूसाल इजिप्‍त देसेम होळसिसि मिदान देसेमते पेय्सि होत्‍तोर. अगा होंचि वरोर पराय देसेमतोनलेसीं पिसालय दल्‍गुतोर. अग्गेन मरमिं आतोर, अस्‍के ओन्क इव्वुर मर्कु पुटतुर.
ACT 7:30 इल्‍हा नल्‍पै वर्सां आसि होत्‍तां. अय्ते उंदि रोजु मूसांकु सिनाइ इनना गुट्‍टा दग्‍गेरा बय्‍लि जेगाते पोत्‍तना पोदाता लोप्पो उंदि पेनदा दूता दिसता.
ACT 7:31 अदुन हूळसि मूसांक इचंत्रंम आता. दग्गेर्क होंचि बेस हूळकोम इंचि मुन्‍नेळ्‍क अळगु वाटनपेडकु ओन्क पेनदा अल्किर केंजावाता.
ACT 7:32 पेन मूसनतोनि, नना नीवा एनकाटोरा तादो-बाबुरा पेनदुन आंदुन, इत्‍ते नना अब्राहाम, इसाक, याकोबना पेनदुन आंदुन, इंचि वळ्कुतोर. अस्‍के मूसाल इरगा वेरियकुत्‍तोर. ओन्क तला तेहचि पोर्रोळ्‍क हूळना हिम्मत आयाहिल्‍ले.
ACT 7:33 अस्‍के पेन ओन, निमे नित्‍तिसि मनना जेगा पवित्र जेगा आंदु. नीवा काल्कुना हेरपुह्क तेंडा.
ACT 7:34 इजिप्‍त देसेमते मनना नावा लोकुल्‍कुना तकलिप नना हूळतन, ओरा अळमळ नना केंजतन. इंचि ओर्कुन कस्‍टाल्कुनाल तेंडानहाटीं नना हिळु रेयतन. अय्ते वा! इंदके नना नीकुन मर्रा इजिप्‍त देसेमते लोहंतन. इंचि इत्‍ता.
ACT 7:35 बा मूसन अय्ते इस्राएल लोकुल्‍क, माकुन जगडमताल पापसि, मावा न्‍यायम कियना अदिकारम नीकु बोर हीतोर? इंचि हय्साकोंटा पकाक दोबसीतुरो, आ मूसाने पेन पोत्‍ताना पोदाते दिसता पेनदा दूताता हेंदाल ओरा राज्येम कियानोर आनि पिसागोटनोर इंचि लोहता.
ACT 7:36 इल्‍हा मूसाल, एर्रा समुद्रम आनि बय्‍लि जेगाते नल्‍पै वर्सनदाका इचंत्रमता कबाह्‍क कीसेक, चिन्‍हां हुप्‍पिचेक आ लोकुल्‍कुन इजिप्‍त देसेमताल पलातुक पेचाहचि तत्‍तोर.
ACT 7:37 ईर, ओरे मूसाल आंदुर, बोर अय्ते इस्राएलना लोकुल्‍कुन, पेन मीहाटीं मीवा लोप्पोटाले वरोन नावसोंटा पेनदा कबुरतोन लोहंता, इंचि इत्‍तोर.
ACT 7:38 मना इस्राएल लोकुल्‍क बय्‍लि जेगाते मत्‍तस्के ओरतोनि कलियसि मत्‍तोर ईरे मूसाल आंदुर. इंका सिनाइ गुट्‍टापोर्रो पेनदा दूतातोनि ईरे मूसाल वळकुतोर. अचोने आयका पेन दाना पिस्वर हियना पोल्‍लेन मनाकु एवसानाहाटीं बोन्क अय्ते हीतानो ओर ईरे मूसाल आंदुर.
ACT 7:39 गानि मना एनकटा पेद्‍दाल्क मात्रम ओर वेहताप ताकालय तयार मना हिल्‍लुर. मर्रा ओरा मनसु इजिप्‍त देसेमताहेकेन तिरियता.
ACT 7:40 अस्‍के आ लोकुल्‍क वरोर हारून इनानोनतोनि, माकुन इजिप्‍त देसेमताल पलाते तत्‍ता आ मूसांक बतल आतानो माकु बतले तेळियसेक हिल्‍ले. अदुनहाटीं मावा मुन्‍ने ताकालय पेनकु तयार कीम, इंचि इत्‍तुर.
ACT 7:41 पजा ओर अंटोर कलियसि पेय्यातसंटा उंदि बोम्मा तयार कीसि, आ बोम्मक मोक्‍कुल्क हियालय दल्‍गुतुर. आ बोम्मातुन ओरे तयार कीता कुसिते दाना मुन्‍ने पेद्‍दा पंडुगु कीतुर.
ACT 7:42 दानहाटीं पेन ओरा हेकेटाल मोकम तिराहकुंचि, मब्बुने मनना पोडदुन, वेडसितुन, सुक्‍काना पूजा कियालय ओर्कुन कुल्‍ला होळसीता. इदुन बारेमते पेनदा कबुरतोरा पुस्तकमते, “ए इस्राएल लोकुरिटा, मिमेट नल्‍पै वर्सनदाका, बय्‍लि जेगाते मोक्‍कुल्क, पूजें नावाहाटीं कीतिरा? हिल्‍ले.
ACT 7:43 मिमेट मोलेक इनना पेनदा डेरा आनि मीवा रिपान इनना सुक्‍का पेनदा बोम्मातुनगुडा मीवातोनि ओतिर. मिमेट मोळ्‍कानाहाटीं मिमेटे तयार कीकुत्‍ता अन्‍नि बोम्मां ओतिर. अदुनहाटीं नना मीकुन वेल्‍लेन लक्‍कु मनना, बेबिलोन सहरकन्‍ना हब्बेर लोहांतन.” इंचि रासि मंता.
ACT 7:44 मना एनकटा पेद्‍दाल्क केडाते मत्‍तस्के ओरगा उंदि गवाइता डेरा मत्‍ता. अद डेरा मूसाल तयार कीता डेरे आंदु. अद डेरा तयार कियाका मुन्‍ने पेन मूसांक उंदि डेराता नमुना हुप्पिचि, अद मत्‍तापे तयार कीम, इंचि आदेस हीता.
ACT 7:45 मना एनकाटोरा मुन्‍नेटाल पेन पेचाहचि गेदुमता वेरे जातितोरा बूमितुन मना लोकुल्‍क, जोसुवाल इनना वरोर मनकन मुन्‍ने अरहचि एतकुत्‍तुर. अस्केगुडा इद डेरा ओरगा मत्‍ता. अद डेरा दाविद राजाना कालमदाका ओरागेन मत्‍ता.
ACT 7:46 दाविद राजांक पेन आसिर्वाद हीता, अदुनहाटीं ओर याकोबुना पेनदाहाटीं उंदि गुळि दोहाना इंचि आसे पडतोर.
ACT 7:47 गानि पेनदाहाटीं गुळि अय्ते सुलेमान राजाल दोहतोर.
ACT 7:48 बच्‍चो बतल अय्नागानि पेन मनकल दोहता गुळिते मन्‍नो. बारित्‍ते इदुन बारेमते पेनदा कबुरतोर इल्‍हा रासतोर.
ACT 7:49 “पेन इत्‍ता, स्वर्गम नावा राजगद्‍दे आंदु, ई बूमि नना काल्क इर्रना पीटे आंदु. अय्ते मिमेट नावाहाटीं बसोंटा गुळि दोहा परांतिर? नावा आराम किय्यना जेगा बल्हा मंदार?
ACT 7:50 इव अन्‍नि नावा कय्‍दे कीतवे आयोंगा!”
ACT 7:51 अरे पिस्‍सा लोकुरिटा, मीवा मनसु बारे वेरे जातितोरा मनसुन लेह्का मंता, मीवा केव्क बारे पेनदा पोल्‍लें केंजाकोंटा डोप्पां अरसोत्‍तां. मिमेट बस्‍केळ्‍क पवित्र आत्मातुन पक्‍काक दोबसेके, इंदके मिमेटगुडा मीवा एनकटा पेद्‍दाल्कुनालेसीं कीसंतिर.
ACT 7:52 मीवा पेद्‍दाल्क तकलिप हियाकोंटा पेनदा कबुरतोन वरोनगुडा होळसा हिल्‍लुर. वरोर नीतिमंतुड वायानोर मंतोर, इंचि वेहानोर्कुन मीवा एनकटा पेद्‍दाल्क हव्कतुर. इंदके मिमेट बारे, ओर बा नीतिमंतुना बारेमते वेहचि मत्‍तुरो आ नीतिमंतुन दोकाते पीसि हव्कतिर.
ACT 7:53 पेनदा दूतानाहेंदाल मीकु मूसाना नियम अय्ते दोर्कुता, गानि मिमेट दाना परकारम ताका हिल्‍लिर.
ACT 7:54 ओना पोल्‍लें केंजसि पंचादिते मत्‍ता पेद्‍दाल्क वेल्‍ले होंगुंक वासि, ओनाहेके हूळसि पटपटा पल्कु कोर्कालय दल्‍गुतुर.
ACT 7:55 गानि पूरा पवित्र आत्मातोनि निंडिस मत्‍ता आ स्‍टिपन स्वर्गमताहेके हूळतोर. अस्‍के ओर पेनदा महिमाता वेल्‍गुन आनि पेनदा तिना बाजुंक नित्‍तिसि मत्‍ता येसुन हूळतोर.
ACT 7:56 हूळसि, “हुळाट! स्वर्गम बय्यर आयानद आनि मनकना रूपमते पुटता पेनदा मर्रि पेनदा तिना बाजुंक नित्‍तिसि मत्‍तद नना हूळसंतन,” इंचि ओर इत्‍तोर.
ACT 7:57 अस्‍के आ मंदि केव्क मुच्‍कुंचि, जोरसे वरगेयसेके अंटोर उंदेदम ओनपोर्रो वासि अरतुर.
ACT 7:58 ओन इग्गिसेक नाटेन पलाते ओसि बंडाने तनालय दल्‍गुतुर. इद जर्गनदान हूळता गवाइदार्क ओरा कपडिं तेंडसि साऊल इनना वरोर लेय्योना काल्‍कुन मुन्‍ने इरतुर.
ACT 7:59 लोकुल्‍क बंडाने तनानेंके स्‍टिपन, “येसु सामि, नावा आत्मातुन निमे एतकुन.” इंचि पारतना कीतोर.
ACT 7:60 पजा ओर टोंगरां ऊनसि, “हे सामि, ई पापम ईरापोर्रो तासुमा,” इंचि जोरसे वरगेयसि, कळ्‍क मुचतोर. इल्‍हा साऊलगुडा ओना हामुरते पोत्‍तु आतोर.
ACT 8:1 अवे रोजकुनाल येरुसलेमता कलिसियातोरपोर्रो पेद्‍दा कस्‍टाल्‍क वायालय सुरुव आता. प्रेरितुल्कुन होळसि कळमातोर अंटोर विस्वासि लोकुल्‍क यहुदिया, सामरिया एरियाता नाहकुने बेकेटोर हेके सिल्‍लर-सल्‍लर आतुर.
ACT 8:2 बोरो इच्‍चुर विस्वासुल्‍क स्‍टिपनुन गति कीसि ओनाहाटीं वेल्‍ले दुक्‍कमते मत्‍तुर.
ACT 8:3 साऊल बारे कलिसियातोर्कुन तकलिप हियमळ सुरुव कीतोर. ओर लोन-लोन होंचि मुर्ताह्क इनाका मांडसा इनाका अंटोर्कुन इग्गिसि ओसि जेलने वाटालय दल्‍गुतोर.
ACT 8:4 गानि सिलर-सिलर आसि होत्‍ता विस्वासि लोकुल्‍क मात्रम बगा-बगा अय्ते होत्‍तुरो अगा-अगा ओर लोकुल्‍कुंक पेनदा बेसता कबुर वेहुंदुर.
ACT 8:5 पिलिपुस इनना वरोर बक्‍तुड सामरिया सहरते होंचि अगाटा लोकुल्‍कुंक किरिस्‍तुना बारेमते वेहामळ सुरुव कीतोर.
ACT 8:6 पिलिपुस कीता चिन्‍हां हूळसि लोकुल्‍क ओर वेहाना पोल्‍लेन मनसु ताससि केंजतुर.
ACT 8:7 वेल्‍लेन मंदिक देय्याल्क पीसि मत्‍तां, आ देय्याल्क इंका इरगा मोत्‍कुंचेके पलाते पेय्सि विततां. अचोने आयका अगा वेल्‍लेन मंदि कुंटोर्क, कय-काल्क अरसोनना रोगमतोरगुडा मत्‍तुर, ओर अंटोरगुडा बेस आतुर.
ACT 8:8 अदुनहाटीं अद सहरते आनंदमे आनंदम मत्‍ता.
ACT 8:9 अद नाटे सिमोन पोरोलतोर वरोर मनकल मनुंदुर. ओर होदें-मंत्राल्कुना बलमते इचंत्रमाता कबाह्‍क कीसि, नाके एक्‍को तेळियंता, इंचि वेहकुंचेके सामरिया सहरता लोकुल्‍कुन इचंत्रमते अरहुंदुर.
ACT 8:10 सिन्‍नाल्क, पेद्‍दाल्क अंटोर, “पेनदा पेद्‍दा ताकत इत्‍ते ईरे आंदुर,” इनकुंचि, ओना पोल्‍लें केव ताससि केंजुंदुर.
ACT 8:11 बारित्‍ते ओर वेल्‍ले रोजकुनाल ओना मंत्राल्कुना बलमते अंटोर लोकुल्‍कुन इचंत्रमते अरहचि मत्‍तोर. दानहाटींगे लोकुल्‍क ओर बतल वेहिना नम्मुंदुर.
ACT 8:12 गानि पेनदा राज्येम आनि येसु किरिस्‍तुना पोरोलता बारेमते पिलिपुस वेहता बेसता कबुर केंजसि मुर्ताह्क-मांडसा नम्मिसि बापतिस्मागुडा एततुर.
ACT 8:13 कुद सिमोन इंका नम्मिसि बापतिस्मा एततोर. इल्‍हा ओर पिलिपुस बेके होत्‍ते हेके होंचेके ओनतोने मनालय दल्‍गुतोर. पजा पिलिपुस कियना चिन्‍हां, अद्‍बूताल्‍क हूळसि इचंत्रमते अर्रुंदुर.
ACT 8:14 सामरिया सहरता लोकुल्‍क पेनदा पोल्‍लेन स्विकार कीतुर इंचि बस्के अय्ते येरुसलेमते प्रेरितुल्कुंक तेळियतनो, अस्‍के ओर पत्रुन आनि योहानुन सामरिया एरियाक लोहचीतुर.
ACT 8:15 पजा ओर अगा वासि अगाटोर्कुंक पवित्र आत्मा दोर्कना इंचि पारतना कीतुर.
ACT 8:16 बारित्‍ते दीनकन्‍ना मुन्‍ने ओरा बोरापोर्रेन पवित्र आत्मा वाया हिल्‍ले. ओर्कु सिराप येसु सामिन पोरोलते बापतिस्मा दोर्कुता अचोने.
ACT 8:17 पजा पत्रु आनि योहान ओरापोर्रो कय इरता इर्रुडे ओर्कु पवित्र आत्मा दोर्कुता. इदुन सिमोन हूळसि, प्रेरितुल्कुनगा होत्‍तोर.
ACT 8:19 होंचि, “नना मीकु कोत्‍तां हींतन, गानि नना बोनपोर्रो अय्ते कय इर्रंतनो ओन्क पवित्र आत्मा दोर्कागोट्‍टना ई बलमतुन नाकुगुडा हीम्टु,” इंचि इत्‍तोर.
ACT 8:20 अस्‍के पत्रु ओन, “निमे कोत्‍ताने पेनदा वरमतुन अस्सा परांतन इंचि इनकुत्‍तिन. अदुनहाटीं नीवा कोत्‍तां नीतोने नासडेम आंतां.
ACT 8:21 पेनदा नदरते नीवा विचारम बेसतद आयो, इंचि ई सेवा कबाह्‍कुने नीकु पोत्‍तु हिल्‍ले, पालु हिल्‍ले.
ACT 8:22 निमे कराब विचाराल्क कियमळ होळसिसि मनसु मार्सकुंचि पेनदुक पारतना कीम. अस्‍के नीवा इसोंटा विचाराल्कुनहाटीं नीकु मापि दोर्का पर्रार.
ACT 8:23 नना नीकुन बेस हूळसंतन, नीवा लोप्पो वेल्‍लेन विसम निंडिस निमे पुरागा तप्‍पुड कबाह्कुनतोनि दोहाचि मंतिन,” इंचि इत्‍तोर.
ACT 8:24 अस्‍के सिमोन, “मिमेट इत्‍तद बद्‍दे पोल्‍ले नापोर्रो वायामन्‍नि इंचि मिमेट सामिंक नाहाटीं पारतना कीम्‍टु,” इंचि इत्‍तोर.
ACT 8:25 पजा पत्रु आनि योहान सामिना बारेमते बतल अय्ते केंजतुर, हूळतुर अदुना गवाइ हीतुर. पजा सामि वेहता पोल्‍लेन वेहचि येरुसलेम मल्सि होनालय पेय्‍स्‍तुर. ओर होननेंके सामरिया नाहकुने वेल्‍लेन जेगाने पेनदा बेसता पोल्‍लें वेहचेके होत्‍तुर.
ACT 8:26 अस्‍के सामिनद उंदि पेनदा दूता पिलिपुसुंक वेहता गदा, “निमे तयार आसि, येरुसलेमताल बद हर्रि अय्ते गाजा सहरताहेके दांता, अदे हर्रि पीसि दक्‍सिनतेके होन्‍नु, आ हर्रि बय्‍लि जेगाताल दांता.”
ACT 8:27 पजा ओर तयार आसि होत्‍तोर. होननेंके हर्दे ओन्क इतोपिया देसेमतोर वरोर आडिगुंल्‍ला मनकल कलियतोर. ओर इतोपिया देसेमता रानि कंदाकेनगा कोत्‍ताना लेक्‍का हूळना पेद्‍दा अदिकारिनलेहका कबळ कियुंदुर. दाना पूरा कजाना ओना कय्‍दा हिडे मत्‍ता. ओर आरादनाहाटीं येरुसलेम वासि, मल्सि होननेंके रतमते उदसि यसायाह इनना पेनदा कबुरतोना पुस्तकम हदविसेके मत्‍तोर.
ACT 8:29 अस्‍के पेनदा आत्मा, “निमे आ रतम दग्गेर्क होंचि दानतोनि ताका,” इंचि पिलिपुसुंक वेहता.
ACT 8:30 अस्‍के पिलिपुस वितसि होंचि आ रतमतुन अंदकुत्‍तोर. रतमते उदिस मनना मनकल यसायाहल रासता पुस्तकम हदवानदुन हूळसि, “निमे बतल अय्ते हदविसंतिनो अदुना अर्तम नीकु तेळियसेके मंतना?” इंचि ओर आ मनकन पूसकीतोर.
ACT 8:31 “इदुना अर्तम बतलो, बोरन्‍ना वेहुवद नाकु बल्हा तेळियंता?” इंचि आ मनकल इत्‍तोर. पिलिपुसुन रतम पोर्रो एक्‍किस ओना पक्‍काते उद्‍दालय वेहतोर.
ACT 8:32 ओर आ पुस्तकमते बतल अय्ते हदविसेके मत्‍तोरो अद इल्‍हा मंता: “हव्कालय ओयना गोर्रेतालेसीं ओन ओतुर, गोर्रे दाना मेंदुल्ता बूरातुन कतरिचिनेंके बल्हा सपुडदाका मनंता, अल्‍हेने ओरगुडा सपुडदाका मत्‍तोर, ओना तोळ्‍दाल उंदि पोल्‍लेगुडा पेय्‍सा हिल्‍ले.
ACT 8:33 ओना अपमानम कीसि ओनपोर्रो अन्‍यायम कीतुर, बूमिपोर्रोटाल ओना पिस्वरतुन तेंडतुर, ओना वंसमतोर बोरे हिल्‍लुर.” इल्‍हा रासि मत्‍ता.
ACT 8:34 अस्‍के, “असल ई कबुरतोर बोना बारेमते वेहचंतोर? ओना सतता बारेमतेना, हिलाकोंटे मरि इंका बोरन्‍ना वेरेतोना बारेमतेना? दया कीसि नाकु तेळियनाल वेहा,” इंचि आ आडिगुंल्‍लोड पिलिपुसुन इत्‍तोर.
ACT 8:35 अस्‍के पिलिपुस, आ मनकल हदवुसेके मत्‍ता वचनाल्कुनाल मोदोल पीसि, येसुना बेसता कबुरदाका अन्‍नि ओन्क वेहतोर.
ACT 8:36 इल्‍हा हर्रि पीसि होननेंके-होननेंके ओर उंदि एर मत्‍ता जेगातगा एव्‍तुर. अस्‍के एतुन हूळसि, “हूळा! इगे एर मंता. इंदके नाकु बापतिस्मा एतालय बतलन्‍ना तकलिप मंतना?” इंचि आ आडिगुंल्‍ला मनकल इत्‍तोर.
ACT 8:37 (निमे गिंटा मनसुनाल पुरागा विस्वासम कियानय्ते बापतिस्मा एता परांतिन, इंचि पिलिपुस वेहतस्के, ओर हां, येसु सामिए पेनदा मर्रि आंदुर इंचि नना विस्वासम कींतन, इंचि जवाब हीतोर.)
ACT 8:38 अस्‍के ओर रतमतुन आपालय वेहतोर. पजा पिलिपुस आनि आ आडिगुंल्‍ला मनकल ईर इव्वुर एते रेयतुर. पिलिपुस आ मनकंक बापतिस्मा हीतोर.
ACT 8:39 ओर एताल पलाते पेय्‍स्‍तस्‍के पिलिपुसुन सामिना आत्मा बेकेनो ओता. आ आडिगुंल्‍लोड ओन मर्रा बस्‍केने हूळा हिल्‍लोर. अयना आ आडिगुंल्‍ला मनकल आनंदमते ओना हर्रि पीसि ओर होत्‍तोर.
ACT 8:40 इल्‍हा पिलिपुस अजोतु इनना सहरते दिसतोर. पजा ओर होननेंके हर्रि पीसि कलियता नाहकंता पेनदा बेसता कबुर वेहचेके कैसरिया सहरते एवतोर.
ACT 9:1 अदे वेलाते साऊल सामिनपोर्रो विस्वासम कियानोर्कुन हव्कंतन इंचि बेदरिचेक मत्‍तोर. ओर पेद्‍दा पेर्मानगा होत्‍तोर.
ACT 9:2 होंचि, “दमिस्‍क सहरते मनना दर्मसास्‍त्रम कराहना लोहकुनाल बोरन्‍ना सामि वेहता हर्रि पीसि ताकाना मुरतळ आयि मांडसा आयि दोर्कुते, ओर्कुन दोहाचि येरुसलेमते वापस तायाना अदिकारमता सिट्‍टि रासि हीम,” इंचि इत्‍तोर.
ACT 9:3 इल्‍हा ओर दमिस्‍क एरियाक दग्‍गेर एवतोर. अस्‍के उंदेदम मब्बुनाल ओना सुट्‍टु उंदि वेलगु जग्गरा मेर्सता.
ACT 9:4 अल्हा आता आयमळ ओर बूमिपोर्रो अरतोर. पजा ओन्क, “साऊल, साऊल निमे नाकुन बारि तकलिप कीसंतिन?” इंचि इत्‍ताप उंदि अल्किर केंजावाता.
ACT 9:5 अस्‍के, “सामि! निमे बोन आंदिन?” इंचि साऊल पूसकीतोर. अस्‍के, “निमे बोन अय्ते तकलिप कीसंतिनो नना आ येसुन आंदुन.
ACT 9:6 निमे इंदके तेदसि सहरतेके होन. बतल कियमळो अद नीकु अगा वेहमळ जर्गंता,” इंचि इत्‍तोर.
ACT 9:7 ओनतोनि होंचेके मत्‍ता मनकालोर्कु अल्किर अय्ते केंजतुर, गानि ओर्क अगा बोरे दिसा हिल्‍लुर. अदुनहाटीं ओर मूकालोरलेसीं वळकाकोंटा अल्हे नित्‍तिसि मत्‍तुर.
ACT 9:8 अस्‍के साऊल बूमिपोर्रोटाल तेदसि कळ्‍क उस्मिसि हूळते अगा ओन्क बतले दिसा हिल्‍ले. पजा ओनतोनि मत्‍तोर ओना कय पीसि दमिस्‍कते ताकिच्‍चेके ओतुर.
ACT 9:9 मूड रोजकुनदाका ओर गुड्‍डोनलेह्का आसि मत्‍तोर. अचोने आयका ओर बतल तिना हिल्‍लोर, उन्‍ना हिल्‍लोर.
ACT 9:10 दमिस्‍कते हनन्‍याल इनना पोरोलतोर वरोर सिस्युड मत्‍तोर. सामि ओन्क दर्सनम हीसि, “हनन्या!” इंचि केयतोर. अस्‍के ओर, “हां सामि,” इंचि इत्‍तस्के,
ACT 9:11 सामि ओन, “तेदा, तेदिस ‘सवरगा’ इनना हरदुक होन. अगा यहुदाना लोन मंता. ओना लोन तरसुस सहरताल वाता साऊल इनना वरोर मनकल मंतोर. अगा ओना बारेमते पूस कीम. ओर इंदके पारतना कीसेके मंतोर.
ACT 9:12 साऊल दर्सनमते, हनन्‍याल इनना मनकल ओनगा वासि ओन्क मर्रा कळ्‍क दिसगोम इंचि ओनपोर्रो कय तासताप हूळतोर,” इंचि इत्‍तोर.
ACT 9:13 अस्‍के हनन्‍याल, “सामि, ई मनकल येरुसलेमते मनना नीवा पवित्र लोकुल्‍कुन बच्‍चोनो तकलिप कीता संगति नना वेल्‍लेन लोकुल्‍कुना तोळ्‍दाल केंजतन.
ACT 9:14 इग्‍गेगुडा नीवा पोरोल एताना हरेक विस्वासिन दोहाचि ओयना अदिकारम, पेद्‍दा पेर्मालोर्कुन हेंदाल एतकुंचि वातोर,” इंचि वेहतोर.
ACT 9:15 अस्‍के सामि ओन, “नावा पोरोलतुन वेरे जातितोरा नड्‍डुम, राजालोरा मुन्‍ने, इस्राएलता लोकुल्‍कुन मुन्‍ने वेहनाहाटीं नना ईन नावा विस्रे इंचि पेर्कुत्‍तन, अदुनहाटीं निमे होन.
ACT 9:16 नावा पोरोल एतानाहाटीं ओन्क बच्‍चोर कस्‍टाल्‍क अर्रा पींतानो नना कुद ओन्क हुप्‍संतन,” इंचि इत्‍तोर.
ACT 9:17 अस्‍के हनन्‍याल अगटाल पेय्सि साऊल बद लोते मत्‍तोरो अद लोन होत्‍तोर. होंचि ओनपोर्रो कय इर्सि, “साऊल दादा, निमे हर्रि पीसि वायानेंके नीकु दिसतोर हूळा! आ येसु सामिए नीकु मर्रा कळकु दिसगोम, निमे पवित्र आत्माते पुरागा निंडिस होनगोम इंचि नाकुन लोहतोर,” इल्‍हा वेहतोर.
ACT 9:18 अस्‍केने ओना कळ्‍कुनाल बतलो पोर्रानसंटव रालसि, ओर हूळालय दल्‍गुतोर. पजा तेदसि बापतिस्मा एततोर.
ACT 9:19 गाटो तित्‍तस्के ओन्क ताकत वाता. इल्‍हा ओर कोन्‍नि रोजकु दमिस्‍कते मत्‍ता सिस्युल्कुनतोनि अग्गेन मत्‍तोर.
ACT 9:20 पजा ओर आल्सेम कियाकोंटा, “येसे पेनदा मर्रि,” इंचेके यहुदि लोकुल्‍कुना दर्मसास्‍त्रम कराहना लोह्कुने होंचि येसुना बारेमते वेहालय सुरुव कीतोर.
ACT 9:21 अगा ओना पोल्‍लें केंजतोर अंटोर इचंत्रमते अर्सि, “येरुसलेमते येसुन नम्मुतोर्कुन दोर्कापीसि ओर्कुन हव्कुता मनकल ईरे आयोरा? इंका इग्‍गेगुडा येसुन नम्मुतोर्कुन पीसि दोहाचि वाटसि पेद्‍दा पेर्मालोरा मुन्‍ने ओयाना विचारमते वातोर गदा!” इंचि इनालय दल्‍गुतुर.
ACT 9:22 गानि साऊलना कराहना तेल्वि मात्रम रोज-रोज बेरसेकेन होत्‍ता. अदुनहाटीं दमिस्‍कते मनना यहुदिल्कुन, येसु सामिए किरिस्‍तु आंदुर, इंचि रुजुव कीसि ओर्कुन वळकाकोंटा कियुंदुर.
ACT 9:23 इल्‍हा वेल्‍लेने रोजकु आतारित्‍ते यहुदिल्क साऊलुन हव्कना उपायम कीतुर.
ACT 9:24 गानि ओन हव्कालय नर्का-पियल सहरता गेटकुनगा यहुदिल्क पोंचादोसि मनना संगति साऊलुंक तेळियसि होत्‍ता.
ACT 9:25 अस्‍के साऊलना सिस्युल्क नर्कटा वेलाते ओन उंदि तट्‍टाते उपिच्‍चि सहरता सुट्‍टु मत्‍ता गूरे पोर्रोटाल वेलाड वाटसि हिळु रेहतुर.
ACT 9:26 साऊल येरुसलेमते वातंका सिस्युल्कुनतोनि कलियसि मनालय हूळतोर. गानि सिस्युल्क मात्रम ईर निजम सिस्युड आदुंरो आयोरो, इंचि विस्वासम हिलाका वेरियुंदुर.
ACT 9:27 बरनाबास मात्रम साऊलुन पीसि प्रेरितुल्कुनहेके वातोर. साऊल वायनेंके हर्दे येसु सामिन बल्हा हूळतोर, येसु सामि ओनतोनि बल्हा वळकुतोर, दमिस्‍कते ओर येसु सामिना पोरोलता बारेमते बल्हा वेरियाकोंटा वेहतोर, इव अन्‍नि पोल्‍लें ओर्कु वेहतोर.
ACT 9:28 इल्‍हा साऊल ओरतोनि कलियसि-मेलियसि मनुंदुर आनि वेरियाकोंटा येसु सामिना पोरोलता बारेमते वेहसेके येरुसलेमते तिरियुंदुर.
ACT 9:29 ओर युनानि बासा वळ्‍काना यहुदिल्कुनतोनि सामिना बारेमते वळ्‍कुंदुर, चर्चा कियुंदुर. गानि ओर मात्रम ओन हव्कालय हूळतुर.
ACT 9:30 बस्के अय्ते इद संगति दादालोर्कुंक तेळियतनो अस्‍के ओर ओन मुन्‍ने कैसरिया ओतुर. पजा अगटाल ओना पुटता सहर तरसुसते लोहचीतुर.
ACT 9:31 इल्‍हा यहुदिया, गालिल, सामरिया एरियाता कलिसियानोर्कुंक कोन्‍नि रोजकु सांति मत्‍ता. आ कलिसियानोर सामिंकु वेरियसि बेस बक्‍तितोनि पिसुंदुर, पवित्र आत्मागुडा ओर्कु बेस प्रोत्‍साहन हियुंदु. अदुनहाटीं ओर बेस ताकतवान आतुर. इल्‍हा ओर वेल्‍लेन आसेक होत्‍तुर.
ACT 9:32 पजा पत्रु देसेमंता तिरियसेक-तिरियसेक लुद्‍दा इनना सहरते मनना पेनदा लोकुल्‍कुनगा होत्‍तोर.
ACT 9:33 अगा ओर, लकवा बिमार आसि एनमिदि वर्सानाल कटुल पीसि मत्‍ता आनियासु पोरोलता वरोर मनकंक कलियतोर.
ACT 9:34 अस्‍के, “आनियासु, येसु किरिस्‍तु नीकुन बेस कींतोर, निमे तेदसि नीवा कटुल्तुन हद्रा,” इंचि पत्रु ओन इत्‍तोर. अस्केटद अस्‍केन आ मनकल तेदतोर.
ACT 9:35 अस्‍के लुद्‍दा आनि सारोन सहरकुने मनना वेल्‍ले लोकुल्‍क आनियासुन हूळसि सामिनहेके तिरियतुर.
ACT 9:36 यापा सहरते उंदि विस्वासि मुरतळ मनुंदु, दाना पोरोल तबिता. तबिता इत्‍ते युनानि बासाते, दोरकस, इत्‍ते तल्‍लुर दुप्‍पि इंचि अर्तम. अद मुरतळ बस्‍केळ्‍क बेसता कबाह्‍क कीसेके, गरिबोर्कुंक दान-दर्मम कीसेके मनुंदु.
ACT 9:37 पत्रु लुद्‍दा सहरते मत्‍ता रोजकुनेन अद बिमार अर्सि हासोत्‍ता. अस्‍के दाना पीनगुंकु एर दोस्‍सि मिद्‍देता पोर्रोटा अर्राते इरतुर.
ACT 9:38 लुद्‍दा नार यापा सहरकु दग्गेरेन मत्‍ता. अय्ते पत्रु अगा मंतोर इत्‍ता संगति सिस्युल्कुंक तेळियतस्के इव्वुर मनकालोर्कुन ओनगा लोहचि, आलसेम कियाकोंटा ओरहेके वायालय विनंति कीतुर.
ACT 9:39 अस्‍के पत्रु बिराना तयार आसि ओरतोनि होत्‍तोर. ओर अगा एव्ता-एव्‍वुडे ओन मिद्‍दे पोर्रोटा अर्राते ओतुर. अगा ओर होत्‍तस्के अगा मत्‍ता मुंडामोस्ता मुर्ताह्क, दोरकस अवुनतोनि मननेंके कुट्‍ता अंगिं आनि कपडिं पत्रुंकु हूपिच्‍चेके ओन सुट्‍टु आसि अळालय दल्‍गतां.
ACT 9:40 गानि पत्रु अवुन अंटोर्कुन पलाते लोहचि टोंगरां ऊनसि पारतना कीतोर. पजा पीनगुनहेके तिरियसि, “तबिता, तेदा!” इंचि इत्‍तोर. अस्‍के अद पत्रुन हूळसि तेदिस उदुता.
ACT 9:41 पजा अद दाना काल्कुनपोर्रो नित्‍तालय कय हीसि सहायम कीतोर. पेनदा लोकुल्‍कुन, मुंडामोस्ता मुर्ताह्‍कुन केय्‍सि जीवाते मत्‍ता तबितान ओर्कु हुपिस्तोर.
ACT 9:42 ई संगति पूरा यापा सहरअंता तेळियसि, वेल्‍ले लोकुल्‍क सामिन नम्मुकुत्‍तुर.
ACT 9:43 आयंका पत्रु यापा सहरतेन सिमोन इनना वरोर तोलकुन कबळ कियानोनगा वेल्‍लेन रोजकु आगतोर.
ACT 10:1 कैसरिया सहरते कुरनेलियुस पोरोलतोर वरोर मनकल मनुंदुर. ओर इटलि इनना पोलिस दलमते नूर मिल्ट्री पोलिसुल्कुन पोर्रो दरोगाल मत्‍तोर.
ACT 10:2 कुरनेलियुस बेस नीतिमंतुड मत्‍तोर. ओर, ओना लोतोरगुडा पेनदुक वेरियुंदुर. ओर गरिब लोकुल्‍कुंक वेल्‍ले सहायम कियुंदुर. बस्केळक पेनदुक पारतना कीसेके मनुंदुर.
ACT 10:3 ओर उंदि रोज पियल मूड एगना पारतना कियनेंके दर्सनमते उंदि पेनदा दूता ओनगा निजम वासि, “कुरनेलियुस!” इंचि ओन केयताप हूळतोर.
ACT 10:4 अस्‍के कुरनेलियुस वेर-वेरियसेक पेनदा दूताहेके हूळसि, “नीकु बतल गावाले वेहा,” इंचि इत्‍तोर. अस्‍के पेनदा दूता, “नीवा पारतनां पेन केंजता. गरिबोर्कुंक निमे कियना सहायमतुन पेन हूळता.
ACT 10:5 निमे इंदके इच्‍चुर मनकालोर्कुन यापा सहर लोहचि सिमोन पोरोलता मनकन (ईन पत्रुगुडा इंतुर) निहगा केया.
ACT 10:6 ओर सिमोन इनना वरोर तोलकुन कबळ कियानोना लोते मंचंतोर. ओना लोन समुद्रम ओड्‍डुंक मंता.” इंचि ओन इत्‍ता.
ACT 10:7 इल्‍हा ओनतोनि वळकसेके मत्‍ता पेनदा दूता अगटाल होत्‍ता होनमळे, कुरनेलियुस ओना लोन कबळ कियाना जीतागाह्कुनाल इव्वुर जीतागाह्कुन आनि पेनदुक वेरियानोर अल्‍हेने ओन्क बेस सेवा कियना वरोर पोलिसुन, इल्‍हा मुव्वुर्कुन केयतोर.
ACT 10:8 पजा अगा बतल अय्ते जरुगुतनो, अद पूरा वेहचि ओर्कुन यापा सहरकु लोहचीतोर.
ACT 10:9 इंकुंदि रोजु ओर यापा सहर दग्‍गेरा एवतस्‍के पिय्यटा वेलाकु पारतनाहाटीं पत्रु मिद्‍देपोर्रो होत्‍तोर.
ACT 10:10 अस्‍के ओन्क कर्वेस्‍सि मत्‍ताहेंका बतलन्‍ना तिनकन बारे इंचि अनपिस्ता. गाटो वेसेकेन मत्‍ता अच्‍चोटेन ओर उंदि दर्सनम हूळतोर.
ACT 10:11 अद दर्सनमते, मब्बु बय्यर आसि, पोर्रोटाल बतलो उंदि वस्तु हिळु वायनद ओर हूळतोर. अद उंदि पेद्‍दा सेदरलेह्का मंता. दाना नालुं मूलां पीसि हिळु रेयताप ओर हूळतोर.
ACT 10:12 अव्टे नालुं काल्क मत्‍ता अन्‍नि तीरकुना जिवरासीं, बेंगाना जिवरासीं आनि मब्बुने परियना पिट्‍टें मत्‍तां.
ACT 10:13 अस्‍के पत्रुंक उंदि अल्किर, “पत्रु, तेदा! अवुन हव्‍किस तिन,” इंचि केंजावाता.
ACT 10:14 गानि पत्रु, “मन्‍नि सामि, नावा पिस्वरते नना बस्‍केने मूसान नियम परकारम तिनुमा इत्‍तद, अपवित्रमातद तिंडि तिना हिल्‍लेन,” इंचि इत्‍तोर.
ACT 10:15 पजा अद अल्किर, “पेन सुद्‍द कीतद बतले वस्तु आयि, दान निमे असुद्‍द इंचि इनुमा,” इल्‍हा रोंडो मल्का ओन्क केंजावाता.
ACT 10:16 इल्‍हा मूड मल्कां जर्गुता. पजा अद सेदरतसोंटा वस्तु बिराने पोर्रोळ्‍क मब्बुनहेके तिरियसि होत्‍ता.
ACT 10:17 पत्रु आ हूळता दर्सनमता अर्तम बतल आयावच्‍चु इंचि विचारम कीसेकेन मत्‍तोर, अद हूळा! कुरनेलियुस लोहता मनकालोर सिमोनुना गुयमाकुल्कुनगा वासि, “पत्रु इनानोर इदे लोते मंचंतोरा?” इंचि पूसकीतुर.
ACT 10:19 पत्रु इंकागुडा अदे दर्सनमता बारेमते विचारम कीसेके मत्‍तोर. अच्‍चोटेन पेनदा आत्मा, “हूळा, मुव्वुर मनकालोर नीकुन पहकसंतुर.
ACT 10:20 अय्ते तेदा, हिळु रेय्‍सि मनसुने बतले अनमानम इर्राकोंटा ओरतोनि होन्‍नु. ओर्कुन ननाने लोहतन,” इंचि ओन इत्‍ता.
ACT 10:21 अस्‍के पत्रु हिळु रेय्‍सि ओरगा होंचि, “मिमेट बोन अय्ते पहकसंतिरो ओर ननाने आंदुन. अय्ते मिमेट हीके बारिंक वातिर?” इंचि पूसकीतोर.
ACT 10:22 अस्‍के आ मनकालोर, “माकुन उंदि पोलिस दलमता दरोगाल कुरनेलियुस इनानोर लोहतोर. ओर बेस नीतिमंतुड आनि पेनदुक वेरियसि ताकाना मनकल आंदुर. यहुदि जातिता लोकुल्‍कुने ओर बेस पोरोल होत्‍तोर. नीकुन ओना लोन केया वेहचि, नीहेंदाल ओन्क पोल्‍लें वेहालय उंदि पवित्र पेनदा दूता ओन्क वेहता,” इंचि इत्‍तुर.
ACT 10:23 पजा पत्रु ओर्कुन लोप्पो केय्‍सि ओर्कुन हेडमितोरलेसीं हूळकुत्‍तोर. इल्‍हा इंकुंदि रोजु तयार आसि ओरतोनि होत्‍तोर. होननेंके यापा सहरता इच्‍चुर विस्वासुल्कगुडा ओनतोनि होत्‍तुर.
ACT 10:24 इंकुंदि रोजु ओर अंटोर कैसरिया सहरते एवतुर. अगा कुरनेलियुस ओना जीवातोर्कुन आनि दग्‍गेटा दंटातोर्कुन केय्‍सि ओना एदुर हूळसेक मत्‍तोर.
ACT 10:25 पत्रु लोप्पो होळियतस्‍के कुरनेलियुस ओना काल्कुनपोर्रो अर्सि ओना काल्क मोळ्‍कतोर.
ACT 10:26 गानि पत्रु ओन तेहचेके, “अरेरे! नित्‍ता, ननागुडा नीलेसीं वरोन मनकने आंदुन,” इंचि इत्‍तोर.
ACT 10:27 पजा पत्रु कुरनेलियुसुनतोनि वळकसेके-वळकसेके लोप्पो होत्‍तोर. अस्‍के अगा ओर वेल्‍लेने मंदि जमा आसि मत्‍तद हूळतोर.
ACT 10:28 हूळसि, “मीकु उंदि पोल्‍ले अय्ते एरपाटे, अद बतल इत्‍ते, यहुदि मनकल वेरे जातिता मनकनगा होनमळ, ओनतोनि बेसता संबंदम इरमळ यहुदि रीति-रिवाजकुने बेस आयो. गानि पेन मात्रम, नना बोने मनकन पास्कामन्‍नि, बोने अपवित्र इना मन्‍नि इंचि नाकु हुपिस्‍ता.
ACT 10:29 अदुनहाटीं नाकुन मिमेट केयतस्‍के नना बतले विचारम कियाकोंटा मीतोनि पेय्सि वातन. अय्ते मिमेट नाकुन बारि केयतिर नाकु वेहाट,” इंचि पत्रु ओर्कुन इत्‍तोर.
ACT 10:30 ओर अल्हा पूसकीताहाटीं कुरनेलियुस, “मूड रोजकु मुन्‍ने इदे वेलाकु पियल मूड एगानेंके नना नावा लोनु पारतना कीसेके मत्‍तन, अस्‍के उंदेदम तलातला मेर्सना कपडिने वरोर मनकल नावा मुन्‍ने वासि निततोर.
ACT 10:31 नित्‍तिसि, ‘कुरनेलियुस, नीवा पारतना पेन केंजता, गरिबोर्कुंक निमे कियना सहायमतुन पेन हूळता.
ACT 10:32 अदुनहाटीं यापाते बोनना लोहचि पत्रुन केया लोहा. ओर समुद्रम ओड्‍डुनगा सिमोन इनना तोलकुन कबळ कियानोन लोन आगसि मंतोर,’ इंचि इत्‍तोर.
ACT 10:33 अदुनहाटीं नना बिराना नीकुन केया लोहतन, निमे इगे वासि बच्‍चोरो बेस आता. इंदके नीकु पेन बतल वेहतनो अव अन्‍नि केंजालय मोमोट अंटोरम इगे पेनदा मुन्‍ने जमा आतोम,” इंचि वेहतोर.
ACT 10:34 अस्‍के पत्रु वळ्‍कमळ सुरुव कीतोर. ओर इत्‍तोर, “पेन हरेक मनकन उंदेतीर हूळंता इंचि इंदके नाकु निजम तेळियता.
ACT 10:35 दुनियाता अन्‍नि देसेल्‍कुना लोकुल्‍क ओर बोरन्‍ना आयिर, ओर पेनदुक वेरियसि नीति कबाह्‍क कियानय्ते पेन ओनपोर्रो कूस मनंता.
ACT 10:36 येसु किरिस्‍तु अंटोरा सामि आंदुर. ओनहेंदाल पेन दाना सांतिता बेसता कबुर इस्राएलता लोकुल्‍कुंक हीता, अद कबुर इदे आंदु.
ACT 10:37 बापतिस्माता बारेमते योहान वेहमळ सुरुव कीता पजा, गालिलते उंदि गटना सुरुव आता. इद गटनाता बारेमते पूरा यहुदिया एरियंता पैलांचता संगति मीकु एरपाटे मंता.
ACT 10:38 नासरेत नाटेना येसुन पेन पवित्र आत्मातोनि अबिसेकम कीसि अद्‍बूतामाता ताकत हीता. पेन ओनतोनि मत्‍ताहेंका, ओर अंटोराहाटीं बेसता कबाह्‍क कियुंदुर, देय्याल्कुना मुक्‍याना कय्‍दा हिळु मत्‍तोर्कुन बेस कीसेके तिरियुंदुर, इद मीकु एरके.
ACT 10:39 येरुसलेम, यहुदिया देसेमते ओर कीता अन्‍नि कबाह्‍कुन मोमोट प्रेरितुल्कुम, कळ्‍कुने हूळतोम. इंका ओर ओन क्रुसुनपोर्रो वेलाड वाटसि हव्कतुर.
ACT 10:40 गानि पेन मात्रम ओन मूड रोजकुने मर्रा जीवाते तेहाचि दिस्‍सानाल कीता.
ACT 10:41 अंटोर लोकुल्‍क ओन हूळा हिल्‍लुर. गानि पेन माकुन मुन्‍नेन गवाइदार्क इंचि पेर्कुत्‍ता. अदुनहाटीं मोमोटे ओन हूळतोम. ओर हासि तेदतारित्‍ते मोमोट ओनतोनि कलियसि तित्‍तोम, उट्‍टोम.
ACT 10:42 जीवाते मत्‍तोर्कुंक, हासोत्‍तोर्कुंक न्‍यायम कियानोर इंचि पेन ईने पेर्कुत्‍ता. इदुना बारेमते लोकुल्‍कुंक बेसता पोल्‍लें कराहना, गवाइ वेहना इंचि ओरे माकु आदेस हीतोर.
ACT 10:43 येसुनपोर्रो विस्वासम इर्रना हरेक मनकंक येसुना पोरोलते पापाल्क मापि आंतां, इंचि अंटोर पेनदा कबुरतोर्क गवाइ हीसि मत्‍तुर.”
ACT 10:44 पत्रुना वळ्‍कमळ सुरुव मनेंकेने पेनदा बेसता पोल्‍लें केंजसेक मत्‍तुरा अंटोरपोर्रो पवित्र आत्मा रेयता.
ACT 10:45 पवित्र आत्माता वरम वेरे जातितोर पोर्रोगुडा वळियतदुन हूळसि पत्रुनतोनि वाता कतना आता विस्वासुल्कुंक इचंत्रम आता.
ACT 10:46 ओर अंटोर्कुन ओर्कु तेळियवा बासाने पेनदा स्‍तुति कीतद केंजतुर. अस्‍के, “मनाकु दोर्कताप ईर्कगुडा पवित्र आत्मा दोर्कुता. ईर एते बापतिस्मा एता मन्‍नि इंचि बोरन्‍ना अड्‍डम वळकानोर मंतुरा?” इंचि पत्रु इत्‍तोर.
ACT 10:48 इल्‍हा पत्रु, येसु किरिस्‍तुना पोरोलते ओर्कु बापतिस्मा हियालय आदेस हीतोर. इदंता आता पजा कोन्‍नि रोजकु पत्रु ओरतोनि मननाहाटीं अंटोर कलियसि पत्रुंक विनंति कीतुर.
ACT 11:1 वेरे जातितोरगुडा पेनदा पोल्‍लेतुन ओप्‍कुत्‍तुर इत्‍ता संगति, प्रेरितुल्क आनि यहुदिया एरियाते मत्‍ता दादालोर केंजतुर.
ACT 11:2 गानि बस्के अय्ते पत्रु येरुसलेमते वातोर अस्‍के, इच्‍चुरकतना आता विस्वासुल्‍क, “निमे वेरे जातितोरा लोहकुने होंचि ओरतोनि गाटो बारि तित्‍तिन.” इंचि ओनतोनि जगडम दोस्तुर.
ACT 11:4 अस्‍के पत्रु बतल अय्ते जरुगुतनो अद बल्हा मत्‍तद अल्हे ओर्कु ई परकारम तेळियागोट्‍सि वेहतोर.
ACT 11:5 “नना यापा सहरते पारतना कीसेक मननेंके उंदि दर्सनम हूळतन. अद दर्सनमते, पेद्‍दा सेदरतसोंटा उंदि वस्तुन नालुं मूलां पीसि मब्बुनाल हिळु रेहानद हूळतन. अद हिळु रेय्‍सि नना मत्‍तागेन वाता.
ACT 11:6 नना दान लोप्पो बेस हूळतस्‍के नाकु अव्टे बूमिपोर्रो मनना नालुं काल्कुना जिवरासीं, केडा जिवरासीं, बेंगना जिवरासीं आनि मब्बुने परियाना पिट्‍टें दिसतां.
ACT 11:7 अस्‍के नाकु, पत्रु तेदा, अवुन हव्‍किसि तिन, इंचि वेहताप उंदि अल्किर केंजावाता.
ACT 11:8 अस्‍के, मन्‍नि सामि, मूसान नियम परकारम तिनुमा इत्‍तद, अपवित्रमातद नना बस्‍केने तिना हिल्‍लेन, इंचि इत्‍तन.
ACT 11:9 अदे अल्किर मब्बुनाल रोंडो मल्का, पेन सुद्‍द कीतद बतले वस्तु आयि, निमे दान असुद्‍द इंचि इनुमा, इंचि केंजावाता.
ACT 11:10 इल्‍हा मूड मल्कां आता. पजा अदुन मर्रा पोर्रोळ्‍क तेहाकुंचि मब्बुनहेके ओयमळ जर्गुता.”
ACT 11:11 अस्‍केने नाकुन केय्‍सि ओयालय कैसरियाताल वाता मुव्वुर मनकालोर नना मत्‍ता लोतागा वासि निल्तुर.
ACT 11:12 बतले अनमानम कियाकोंटा ओरतोनि पेय्सि होन. इंचि पेनदा आत्मा नाकु वेहता. ईर हारुर विस्वासि दादालोरगुडा नावातोनि वातुर. मोमोट अंटोरम माकुन केया वेहता मनकना लोते होळियतोम.
ACT 11:13 आ मनकल माकु वेहतद बतल इत्‍ते, ओर उंदि पेनदा दूतातुन ओना लोते नित्‍तिसि वळ्‍कतदुन हूळतोर. आ पेनदा दूता, यापाते मनकालोर्कुन लोहचि पत्रु इनना सिमोनुन केयकुन.
ACT 11:14 ओर नीकु, नीवा लोतोर्कगुडा मुक्‍ति बल्हा दोर्कंता, अदुन बारेमते वेहांतोर इंचि वेहता.
ACT 11:15 नना वळ्‍कमळ सुरुव कीतारित्‍ते पवित्र आत्मा मुन्‍ने मनापोर्रो बल्हा रेय्तनो अल्हेन ओरापोर्रो इंका रेय्ता.
ACT 11:16 अस्‍के, योहान एततोनि बापतिस्मा हीतोर, गानि मीकु पवित्र आत्माते बापतिस्मा हियमळ जर्गंता. इंचि सामि इत्‍ता आ पोल्‍ले नाकु मति वाता.
ACT 11:17 येसु किरिस्‍तुन मनम सामि इंचि विस्वासम कीतस्‍के मनाकु हीता वरमे ओर्कु इंका हीता. अय्ते पेनदुक अड्‍डम तिरियानोन नना बोन आंदुन?
ACT 11:18 ई पोल्‍लें केंजसि ओर अंटोर सपुडदाका आतुर. पेन वेरे जातितोर्कगुडा पिस्वर दोर्किच्‍कुननाहाटीं मनसु मार्सकुनना वरम हीता, इंचि पेनदा स्‍तुति कीतुर.
ACT 11:19 स्‍टिपन हासोत्‍ता पज्जो वेल्‍लेन कस्‍टाल्‍क वातां, अदुनहाटीं लोकुल्‍क सिल्‍लर आसि हिके-हेके पायसि होत्‍तुर. आ लोकुल्‍क पिनिके, साइप्रस, अंताकिया इनना सहरकुने होंचि अगा सिराप यहुदिल्कुंके पेनदा बेसता पोल्‍ले वेहचेके मत्‍तुर.
ACT 11:20 ई विस्वासुल्कुनाले इच्‍चुर विस्वासुल्‍क साइप्रस आनि कुरेनि इनना सहरतोर मत्‍तुर. ओर अंताकियाक होंचि येसु सामिना बेसता कबुर युनानि लोकुल्‍कुंकगुडा वेहतुर.
ACT 11:21 सामिना ताकत ओरतोनि मत्‍ता इंचि वेल्‍लेटुर लोकुल्‍क विस्वास कीसि सामिनहेके तिरियतुर.
ACT 11:22 बस्के अय्ते ई कबुर येरुसलेमता कलिसियातोर्क तेळियता, अस्‍के ओर बरनाबासुन अंताकियाक लोहतुर.
ACT 11:23 ओर अगा होंचि अगाटा लोकुल्‍कुनपोर्रो पेनदा कुर्पा हूळसि इरगा कूस आतोर, सामिनतोनि बस्‍केळ्‍ताहाटीं पूरा मनसुनाल बेस विस्वासमते नित्‍तिसि मनना, इंचि ओर्क अंटोर्क दैरनेम हीतोर.
ACT 11:24 ओर बेस मनकल मत्‍तोर, अचोने आयका विस्वासम आनि पवित्र आत्माते निंडिस मत्‍तोर. इल्‍हा वेल्‍लेन मंदि सामिन नम्मिसि विस्वासुल्‍क आतुर.
ACT 11:25 पजा बरनाबास साऊलुन पहकालय तरसुस इनना सहर होत्‍तोर.
ACT 11:26 अगा ओन दोर्किच्‍कुंचि अंताकियाक पीसि वातोर. अगा ओर इव्वुर अगाटा कलिसियातोर्क कलियसेके, वेल्‍लेन लोकुल्‍कुंक कराहसेके मत्‍तुर. इल्‍हा ओर इव्वुर उंदि एडादिमेड अंताकियातेन मत्‍तुर. अय्ते मोट्‍टा मोदाला सिस्युल्कुन “किरिस्‍तुनोर” इंचि इन्‍मळ ई अंताकियातेन जर्गुता.
ACT 11:27 अवे तूकुल्कुने इच्‍चुर पेनदा कबुरतोर येरुसलेमताल अंताकियाक वातुर.
ACT 11:28 ओरव्टे वरोर अगबुस पोरोलतोर मत्‍तोर. ओर पवित्र आत्माते निंडिस, पूरा दुनियाते उंदि पेद्‍दा कर्वु अर्रानद मंता, इंचि वेहतोर. इदु कर्वु कलादियुस इनना राजाना कालमते अर्सि मत्‍ता.
ACT 11:29 अस्‍के अंताकियाते मत्‍ता अंटोर सिस्युल्क ओरा-ओरा एलवान परकारम यहुदियाते मनना विस्वासुल्कुंक सहायमहाटीं बतलन्‍ना लोहना इंचि निरनायम एततुर.
ACT 11:30 ओरा निरनायमनुसार सहायमहाटीं जमा कीता सोम्मुन ओर बरनाबास आनि साऊलना कय्‍दे यहुदियाते मनना पेद्‍दाल्कुनहेके लोहचीतुर.
ACT 12:1 अवे रोजकुने हेरोद अग्रिपा राजाल कलिसियानाल इच्‍चुर मंदितुन तकलिप कियालय सुरुव कीतोर.
ACT 12:2 ओर योहानुना दादल याकोबुना तल्‍लातुन कसेटे कोय्‍सि हव्का वेहतोर.
ACT 12:3 ओर कियना कबाह्‍क यहुदि लोकुल्‍कुंक बेस अनपिस्ता इन्कुंचि हेरोद राजाल पत्रुन इंका दोर्का पीतोर. (इद गटना होयवा पिंडिता हारिना पंडुगुना रोजु जर्गुता.)
ACT 12:4 दोर्कापीसि जेलने वाटतोर. पजा तेपाक नालुर सिपाइल्क ओनगा कावेल कियना इंचि, पदाहारुर सिपाइल्कुना कय्‍दे ओन अप्पजेपतोर. दाटसि होनना पंडुगु आतारित्‍ते पत्रुना न्‍यायम कियालय लोकुल्‍कुना मुन्‍ने तायाना विचारम हेरोद राजाना मनसुने मत्‍ता.
ACT 12:5 इल्‍हा पत्रुन ओर जेलने वाटसि इरतोर. गानि ओनाहाटीं कलिसियातोर मात्रम आगाकोंटा उंदेतीर पेनदुक पारतना कीसेके मत्‍तुर.
ACT 12:6 हेरोद राजाल पत्रुन पलाते पीसि वायना उंदि रोज मुन्‍ने, नर्काटा वेलाक पत्रु इव्वुर सिपाइल्कुना नड्‍डुम निद्रा होंचेके मत्‍तोर. सिपाइल्क ओन रोंडु गोल्सुकुने बेडीं वाटसि इरतुर. पलाते तल्‍पुनगा कावेल कियानोर जेलता कावेल कीसेके मत्‍तुर.
ACT 12:7 अचानक सामिनद उंदि पेनदा दूता अगा दिसता. आ अर्रंता पूरा वेल्‍गुनतोनि निंडिस होत्‍ता. आ पेनदा दूता पत्रुन मेलाहचि, बिराना तेदा! इंचि ओन तेहाता. ओना कय्‍कुना बेडीं लेंगसि हिळु अरतां.
ACT 12:8 अस्‍के, बिराना तयार आसि हेरपुह्क केर्रा, इंचि पेनदा दूता ओन्क वेहता. अस्‍के अद वेहतापे ओर कीतोर. पजा पेनदा दूता, नीवा सेदर मुचकुंचि नावा पज्जो वा, इंचि इत्‍ता.
ACT 12:9 ओर पेनदा दूताता पज्जो-पज्जो होंचि जेलनाल पलाते अय्ते पेय्सतोर, गानि पेनदा दूता बतल अय्ते कीसंतनो अद अंता निजमे जर्गुसंता इंचि ओर इनकुना हिल्‍लोर. ओर उंदि दर्सनम हूळसंतन बारे इत्‍ताप अनपिस्ता.
ACT 12:10 पजा ओर मोदाटोन आनि ओना पज्‍जोटा कावेल कियानोन दाटसि सहरकु होनना कच्‍चि तल्‍पुनगाह्कु वातुर. अस्‍के आ तल्‍पु ओराहाटीं दानद अदे पेय्‍स्‍ता. अस्‍के ओर दान दाटसि पलाते पेय्सि होत्‍तुर. इच्‍चोन लक्‍कु होतंका अचानक आ पेनदा दूता ओन होळसि होत्‍ता.
ACT 12:11 पजा पत्रुंक तेल्वि अरता. अस्‍के निजमे! सामिए ओना उंदि पेनदा दूतातुन लोहचि नाकुन हेरोद राजाना कय्‍दाल तप्‍पिस्तोर. यहुदि पेद्‍दाल्क नाकुन बतल-बल्हा कियाना इंचि विचारम कीसेक मत्‍तुरो, अव अन्‍निटावुनालगुडा सामिए नाकुन पिसागोटतोर, इंचि इन्कुत्‍तोर.
ACT 12:12 इदंता तेळियता पजा ओर मरियम इनना मुरतटा लोन होत्‍तोर. ई मरियम योहान (ईन मरकुसगुडा इंतुर) इनानोना यावल आंद. अगा वेल्‍लेन मंदि उंदगा जमा आसि पारतना कीसेके मत्‍तुर.
ACT 12:13 पत्रु पलाताल तल्‍पुन तंतस्के तल्‍पु तेंडालय रुदा इनना उंदि दासि पेगिड वाता.
ACT 12:14 पत्रुना लेंग एरपाट कीसि अद वेल्‍ले आनंदमते तल्‍पु तेंडाकोंटेन मल्सि लोप्पो वित्‍सि, “पत्रु तल्‍पुनगा नित्‍तिसि मंतोर,” इंचि वेहता.
ACT 12:15 अस्‍के, नीकु पिसा पीताना? इंचि अगा मत्‍तोर इत्‍तुर. अद वेहनद निजमे इंचि बच्‍चोनो वेहता. अस्‍के ओर, अद ओना पेनदा दूता आयावच्‍चु, इंचि इत्‍तुर.
ACT 12:16 अयना पत्रु तल्‍पुन अल्हेन तंचेके मत्‍तोर. पजा तल्‍पु तेंडतस्के पत्रुन हूळसि ओर्कु इचंत्रम आता.
ACT 12:17 अस्‍के पत्रु ओर्कुन सपुडदाका मंटु इंचि कय्‍दे सय्गे कीसि वेहतोर. सामि ओन जेलनाल बल्हा पलाते तत्‍तोर, इद ओर्कु पूरा समजांचि वेहतोर. पजा, ई संगति याकोबुंक (येसुना तम्मुर) आनि कळमता विस्वासुल्कुंक वेहाट, इंचि वेहचि अगटाल ओर इंकुंदि वेरे जेगाते पेय्सि होत्‍तोर.
ACT 12:18 पंग आतास्के, पत्रु बेके होत्‍तोर, बतल आता? इंचि सिपाइल्क पेद्‍दा गाबर आतुर.
ACT 12:19 हेरोद राजाल ओन पहकतोर. गानि पत्रु ओन्क बग्‍गेन दोर्का हिल्‍लोर. अस्‍के ओर कावेल इरता सिपाइल्कुन पूस कीसि ओर्कुन हव्कना आदेस हीतोर. हेरोद राजाल यहुदियाताल कैसरियाते वासि मनालय दल्‍गुतोर.
ACT 12:20 हेरोद राजाल सूर आनि सैदा सहरकुना लोकुल्‍कुनपोर्रो वेल्‍ले होंग आसि मत्‍तोर. ओर अंटोर उंदि आसि ओनतोनि वळकालय होत्‍तुर. राजाना वरोर बेस दग्‍गेटा सेवक बलासतुस इनानोन मुन्‍ने अरहचि, माकु सांति गावाले, इंचि ओन्क विनंति कीतुर. बारित्‍ते ईरा देसेमतोर्कु तिनालय तिंडि राजाना देसेमताले दोर्कुंदु.
ACT 12:21 निरनायम कीता रोजु हेरोद राजाल, राजाल केर्राना कपडिं केरसि ओना राजगद्‍देपोर्रो उदसि लोकुल्‍कुंक बासन हियालय दल्‍गुतोर.
ACT 12:22 अस्‍के लोकुल्‍क, “इद अय्ते पेनदा लेंग आंदु, मनकानद आयो,” इंचि वरगेयालय दल्‍गुतुर.
ACT 12:23 अस्‍के राजाल पेनदा कदर कियाकोंटा पोंगसोत्‍तोर. अदुनहाटीं अस्केटद अस्‍केने सामिनद उंदि पेनदा दूता ओन बिमार अरहता आनि ओर पुळकु अरसि हासि होत्‍तोर.
ACT 12:24 गानि पेनदा पोल्‍ले मात्रम पैलांचेके होत्‍ता. अव पोल्‍लें केंजसि वेल्‍लेन लोकुल्‍क विस्वासमते वातुर.
ACT 12:25 बरनाबास आनि साऊल ओरा सेवा कबळ पूरा कीसि येरुसलेमताल वापस अंताकिया होत्‍तुर. होननेंके मरकुस इनना योहानुनगुडा पज्जो पीकुंचि होत्‍तुर.
ACT 13:1 अंताकिया सहरता कलिसियातोरव्टे इच्‍चुर पेनदा कबुरतोर आनि कराहनोर मत्‍तुर. ओर बोर इत्‍ते, बरनाबास, सिमोन ईन निगर (इत्‍ते कर्रेटोर) गुडा इनुंदुर, कुरेनि सहरता लुकियुस, साऊल, गालिल एरियाता राजाल हेरोद अंतिपासुनतोनि बेर्सता मनाहेम ईर आंदुर.
ACT 13:2 उंदि रोज ओर ओक्‍कापोद्‍दु मंचि सामिंक आरादना कीसेके मननेंके पवित्र आत्मा ओर्कुन, “नना बद कबळताहाटीं बरनाबासुन आनि साऊलुन पेरकुत्‍तनो, अदुन कियानाहाटीं ओर्कुन अलग कीम्‍टु,” इंचि इत्‍ता.
ACT 13:3 अस्‍के ओर ओक्‍कापोद्‍दु मंचि पारतना कीसि ओरापोर्रो कय इरसि ओर्कुन लोहचीतुर.
ACT 13:4 पवित्र आत्माहेंदाल ओर्कुन लोहतारित्‍ते ओर सिलुकिया सहरते होत्‍तुर, अगटाल उंदि डोंगाते उद्‍दिस साइप्रस दीबेहेके पेय्‍स्‍तुर.
ACT 13:5 पजा अदे दीबेते मनना सलमीस इनना सहरते एवतारित्‍ते, यहुदिल्कुना दर्मसास्‍त्रम कराहना लोहकुने होंचि पेनदा पोल्‍लें वेहालय दल्‍गतुर. योहान (ईन मरकुसगुडा इनुंदुर) ओर्कु सहायम कियालय ओरतोनि मत्‍तोर.
ACT 13:6 पजा ओर पूरा दीबेतुन तिरियसेक पापूस इनना नाटे एवतुर. अगा ओर्कु वरोर यहुदि जातिता मंत्रगाड आनि पेनदा आबद्‍दम कबुरतोर कलियतोर. ओन पोरोल बार-येसु.
ACT 13:7 अगा वरोर सिरगु पौलुस इनना तेल्‍विता अदिकारि मत्‍तोर, ओनतोने बार-येसु मत्‍तोर. आ अदिकारि पेनदा पोल्‍लें केंजंतन इंचि बरनाबासुन आनि साऊलुन ओनगा केयतोर.
ACT 13:8 गानि एलिमल इनना मंत्राल्कुनोर (युनानि बासाते बार-येसुना पोरोल एलिमल मत्‍ता), बरनाबास आनि साऊलुंक अड्‍डम आसि आ अदिकारि विस्वासम कियामन्‍नि इंचि आपालय हूळतोर.
ACT 13:9 अस्‍के साऊल (ईन पौलुस इंका इनुंदुर) पवित्र आत्माते निंडिसि, एलिमलनाहेके उंदेतीर हूळसेक,
ACT 13:10 “अरे! दोका हियानोना, अन्‍नि तीरकुना नडेह कियाना बुद्‍दिं निंडिस मत्‍ता देय्यमता मर्रिना! अन्‍नि नीति पोल्‍लेंक अड्‍डम तिरियना पगातोन आंदिन. सामिना निजम पोल्‍लेतुन बदवेरदाका आबद्‍दम वळ्कसेक मनांतिन?
ACT 13:11 इंदके हूळा! सामि नीवा पोर्रो कय तेहातोर, निमे गुड्‍डिन आंतिन. कोन्‍नि रोजकुनदाका पोळ्‍दुनगुडा हूळाकोंटा आंतिन,” इंचि इत्‍तोर. इत्‍तस्केने एलिमलना कळकु मागुर-मागुर आतां. हिर्र हीकट आसि दिसाकोंटा आतां, अस्‍के, नाकुन बोरन्‍ना कय पीसि ओयगोम, इंचि ओर हीके-हेके पहकालय दल्‍गुतोर.
ACT 13:12 एलिमलुंक अल्हा आतदुन हूळसि, सामिना बारेमते वेहता पोल्‍लें केंजसि इचंत्रम आसि, आ अदिकारि सामिन विस्वासम कीतोर.
ACT 13:13 आयंका पौलुस ओना दंटातोरतोनि पापूस सहरताल डोंगाते उदसि, पंपुलिया एरियाते मनना पिरगा सहरते होत्‍तुर. अगा होत्‍तारित्‍ते योहान ओर्कुन होळसिसि येरुसलेम मल्सि होत्‍तोर.
ACT 13:14 हेके पौलुस आनि बरनाबास पिरगा सहरताल तिरियसेके पिसिदिया एरियाते मनना अंताकिया सहरते एवतुर. नोमकेम रोजुने यहुदिल्कुना दर्मसास्‍त्रम कराहना लोते होंचि उदतुर.
ACT 13:15 अगा मूसाना नियम आनि पेनदा कबुरतोर रासतव पुस्तकाल्कुन हदुवतुर. हदवुतस्‍के दर्मसास्‍त्रम कराहना लोता अदिकारिल्‍क पौलुसुन आनि बरनाबासुन, “दादालोरिटा! लोकुल्‍कुंक कराहनाहाटीं मिहगा बदाना प्रोत्‍साहन कियाना पोल्‍ले मत्‍ते करहट,” इंचि पूसकियालय लोहतुर.
ACT 13:16 अस्‍के पौलुस नित्‍तिसि, लोकुल्‍कुन सपुडदाका कियालय कय तेहाचि वळ्कालय दल्‍गुतोर, इस्राएलता लोकुरिटा आनि पेनदुक वेरियना वेरे जातितोरिटा, केंजट.
ACT 13:17 ई इस्राएल लोकुल्‍कुना पेन, मना एनकटा पेद्‍दाल्कुन पेर्कुत्‍ता. ओर इजिप्‍त देसेमतोरा कय्‍दा हिळु बस्के अय्ते मत्‍तुरो, अस्‍के ओर्कुन पेद्‍दा कीसि, दाना पेद्‍दा बलमतोने आ देसेमताल पलाते तत्‍ता.
ACT 13:18 मना पेद्‍दाल्क पेनदा पोल्‍लें केंजाकोंदुर, अय्नागानि दग्‍गेर-दग्‍गेरा नल्‍पै वर्सनदाका पेन ओर्कुन बय्‍लि जेगाते ओर्सकुत्‍ता.
ACT 13:19 कनान देसेमता एडुं जातिन नासडेम कीसि, अद बूमि इस्राएल लोकुल्‍कुंक, इद मीवा बूमि, इंचि हीता. इव अन्‍नि आयालय नालुं नुह्कुना एबै वर्सां दल्‍गतां. पजा सामवेल पोरोलता पेनदा कबुरतोर वायानादाका पेन ओर्कु बच्‍चुरो न्‍यायम कियानोर्कुन हीता.
ACT 13:21 आयंका वरोर राजाल गावाले इत्‍ताहाटीं, पेन ओर्कु बेंजामिनना वंसमतोर कीस इननोना मर्रि साऊलुन हीता, ओर नल्‍पै वर्सां राज्येम कीतोर.
ACT 13:22 मर्रा साऊलुनगटाल राज्येम तेंडसि दाविदुंक हीता. दाविदुना बारेमते पेन इल्‍हा गवाइ वेहता, “यिस्‍सल पोरोलतोना मर्रि दाविद, नना इनकुत्‍ताप नाकु दोर्कतोर, नना वेहतव अन्‍नि ओर पूरा कींतोर,” इंचि वेहता.
ACT 13:23 “पेन हीता पोल्‍ले परकारम ईना वंसमताले इस्राएल लोकुल्‍कुंक मुक्‍ति हियानोर इंचि येसुन, पेन लोहता.
ACT 13:24 येसु वायाका मुन्‍ने, बापतिस्मा हियना योहान इस्राएलता अंटोर लोकुल्‍कुन, मनसु मार्सकुंचि बापतिस्मा एतट,” इंचि वेहतोर.
ACT 13:25 योहान ओना कबाटुन पूरा महना वेलाते, “नना बोन इंचि मिमेट इनकुंचंतिर? मिमेट बोनय्ते एदुर हूळसंतिर, ओन नना आयोन. ओर नावा पज्जो वायानुर, नना ओना काल्कुना हेर्पुह्‍क तेंडना लायक इंका हिल्‍लेन,” इंचि इत्‍तोर.
ACT 13:26 मावा दादालोरिटा, अब्राहामुना वंसमतोरिटा आनि पेनदुक वेरियना वेरे जातितोरिटा! मुक्‍ति हियना बेसता कबुरतुन पेन मनागा लोहचीता.
ACT 13:27 येरुसलेमते मनानुर आनि ओरा अदिकारिल्‍क येसुन एरपाट किया हिल्‍लुर. वारा-वारम नोमकेम रोजुने पेनदा कबुरतोरा पोल्‍लें हदवुंदुर, गानि अदुन एरपाट कियवा, येसुन हव्‍किसि आ पेनदा कबुरतोरा पोल्‍लेन पूरा कीतुर.
ACT 13:28 हामुर सिक्‍सा हियनलायक बतले तप्पु येसुनलोप्‍पो दोर्काकोन्‍नागानि ओन हव्कगोम इंचि पिलातुस राज्यपालुंक विनंति कीतुर.
ACT 13:29 येसुन बतल-बतल कियानुर इंचि रासि मत्‍तानो, अव अन्‍नि पूरा आतस्के ओन क्रुसुनपोर्रोटाल हिळु रेहचि बोंदा दोस्तुर.
ACT 13:30 गानि पेन ओन हामुरताल मर्रा तेहता.
ACT 13:31 तेहतारित्‍ते, गालिल एरियाताल येरुसलेमदाका ओनतोनि होत्‍तोर्कुंक वेल्‍लेने रोजकुनदाका ओर दिस्सेक मत्‍तोर. इंदके लोकुल्‍कुना मुन्‍ने येसुना गवाइ इंचि ओरे मंतुर.
ACT 13:32 पेन मना पेद्‍दाल्कुंक मुन्‍नेने पोल्‍ले हीसि मत्‍ता. अदे पोल्‍लेता कबुरतुन मोमोट मीक वेहासेक मंतोम.
ACT 13:33 इल्‍हा पेन येसुन हामुरताल मर्रा तेहाचि, मना पेद्‍दाल्कुंक मुन्‍नेने हीता पोल्‍ले, इंदके मनाहाटीं निजम आता. इदु, बजन संहितता रोंडो बजनते इल्‍हा रासि मंता: “निमे नावा मर्रिन आंदिन, इय्यला नना नीकु बाबोन आतन.”
ACT 13:34 पेन ओन हातोरा लोप्पोटाल तेहता, ओर मर्रा बस्‍केने कळियसि होन्‍नोर. “नना दाविदुंक तप्‍पाकोंटा हींतन इत्‍ता पवित्रमाता आसिर्वाद नीकु हींतन,” इंचि इत्‍ता.
ACT 13:35 अल्‍हेने इंकुंदि बजनते, “नीवा पवित्र मनकन कळियसि होना हिय्‍यिन.” इंचि इत्‍तोर.
ACT 13:36 “दाविद पेनदा इच्‍चा मत्‍तापे ओन्क हीता सेवा-कबाटुन ओना कालमते महाचि हातोर. हातस्के ओना पेद्‍दाल्कुन बगा बोंदा दोस्तुरो, अग्गेन ओन इंका बोंदा दोस्तुर ओर कळियसिगुडा होत्‍तोर.
ACT 13:37 गानि पेन तेहातोर मात्रम कळियसि होना हिल्‍लोर.”
ACT 13:38 अदुनहाटीं मावा दादालोरिटा! मिमेट दीन तेळियागोटकुंटु. येसुनाहेंदाले मीवा पापाल्कुन पेन मापि कींता इंचि मोमोट वेहासेक मंतोम.
ACT 13:39 मूसाना नियम हेंदाल मीकु पापाल्कुनाल मापि दोर्को, गानि येसुना पोर्रो विस्वास इर्रानुर अंटोर्क ओरा पापाल्कुनाल मापि दोर्कंता.
ACT 13:40 अदुनहाटीं पेनदा कबुरतोर रासता पोल्‍लें मीपोर्रो वायाकोंटा उसारते मंटु, इंचि पेन इल्‍हा इत्‍ता:
ACT 13:41 “नावा पोल्‍लेतुन पास्कानोरिटा हुळाट, इचंत्रम आसि, हासि दांतिट. बारित्‍ते, मीवा रोजकुने नना इसोंटा कबळ कींतन गदा, अदुना बारेमते बोर वेहिनागानि मिमेट विस्वासम किय्‍यिर,” इंचि पेन वेहता.
ACT 13:42 पौलुस, बरनाबास दर्मसास्‍त्रम कराहना लोताल पलाते पेय्सतस्के, “इव पोल्‍लें वायाना नोमकेम रोजुने इंका एक्‍को माकु वेहाटु,” इंचि लोकुल्‍क ओरतोनि विनंति कीतुर.
ACT 13:43 वेल्‍लेटुर यहुदिल्कु अल्‍हेने यहुदि जातिते वाता वेरे जातितोर, पौलुस, बरनाबासुना पज्जो होत्‍तुर. ओर, लोकुल्‍कुनतोनि वळकसेके, “बस्‍केळ्‍क पेनदा कुर्पाते मंटु,” इंचि ओर्कु वेहतुर.
ACT 13:44 इंकुंदि नोमकेम रोजुने सामिना पोल्‍लें केंजालय, पूरा नाटेनोर इत्‍ताप जमा आतुर.
ACT 13:45 अच्‍चो वेल्‍ले मंदितुन हूळसि यहुदिल्कुना जीवा मसुल्ता, अदुनहाटीं ओर पौलुसना पोल्‍लेंक विरोद कीसि ओन बदनाम कियालय दल्‍गतुर.
ACT 13:46 गानि पौलुस आनि बरनाबास वेरियाकोंटा, मीकु पेनदा पोल्‍ले मुन्‍नेने वेहना अव्‍सरम मत्‍ता, गानि मिमेट दान हय्सका, बस्‍केळ्‍क पिस्सना पिस्वरकु लक्‍कु आताप हुपिस्‍तिर. अदुनहाटीं इंदके मोमोट यहुदि आयवोरहेके दांतोम.
ACT 13:47 बारित्‍ते पेन माकु इल्‍हा आदेस हीता: “सामि लोकुल्‍कुन बल्हा पिसागोटंतोर इदु पोल्‍ले निमे दुनियंता वेहगोम इंचि, नना नीकुन वेरे जातितोरहाटीं वेडसि हुप्‍सानोन कीतन,” इंचि इत्‍तोर.
ACT 13:48 ई पोल्‍ले केंजसि वेरे जातितोर वेल्‍ले कूस आसि, सामिना पोल्‍लेता कदर कियालय दल्‍गुतुर. बचटूर्कुन अय्ते बस्‍केळ्‍क पिस्सना पिस्वरताहाटीं पेन पेरकुत्‍तनो, अचटुर येसुनपोर्रो विस्वासम कीतुर.
ACT 13:49 इल्‍हा सामिना पोल्‍लें पूरा एरियाता लोकुल्‍कुंक तेळियता.
ACT 13:50 गानि यहुदि लोकुल्‍क मात्रम निजमाता पेनदुन आरादना किय्यानव सहरता कदरगल्‍ला वेरे जातिता मुर्ताह्‍कुन, पेद्‍दाल्कुन एक्‍किस्तुर. अस्‍के ओर पौलुस, बरनाबासुन पक्‍का तकलिप कीसि ओर्कुन आ एरियाताल पलाते पेचाहतुर.
ACT 13:51 ओर इव्वुर ओरा काल्कुना दुब्बा अग्गेन दुल्‍पिसि ओरापोर्रो विरोद हुप्पिचि इकोनिया सहरते पेय्सि होत्‍तुर.
ACT 13:52 गानि अंताकियाता विस्वासुल्‍क पवित्र आत्माते पूरा निंडिस आनंदमते मत्‍तुर.
ACT 14:1 इल्‍हा पौलुस आनि बरनाबास इकोनिया सहरते यहुदिल्कुना दर्मसास्‍त्रम कराहना लोते होत्‍तुर. अगा पेनदा पोल्‍लें बेस वेहतुर. अदुनहाटीं यहुदिल्क आनि युनानि जातितोर वेल्‍लेटुर लोकुल्‍क येसुनपोर्रो विस्वासम कीतुर.
ACT 14:2 गानि विस्वासम कियवा यहुदिल्कु, विस्वासुल्‍कुनतोनि जगडम कियालय वेरे जातितोर्कुन एक्‍किस्तुर.
ACT 14:3 अय्नागानि पौलुस आनि बरनाबास अगा वेल्‍लेने रोजकु आगिसि मत्‍तुर. सामिना कुर्पाता बारेमते वेरियाकोंटा वेहचेके मत्‍तुर. ओर वेहना पोल्‍लें निजम इंचि गवाइ हुप्‍सालय सामि ओरा कय्‍दाल चिन्‍हां, इचंत्रमता कबाह्‍क हुप्‍सुंदुर.
ACT 14:4 गानि हेके सहरते वरोनद वरोंकु अर्राकोंटा आता. इच्‍चुर यहुदिल्कुनहेके, इच्‍चुर बारे प्रेरितुल्कुनहेके आतुर.
ACT 14:5 वेरे जातितोर आनि यहुदिल्कु ओरा अदिकारिल्कुनतोनि कलियसि पौलुसुन आनि बरनाबासुना कदर रेहचि बंडां हुक्‍कालय तयार आतुर.
ACT 14:6 इद पोल्‍ले पौलुसुंक आनि बरनाबासुंक एर्का आता. अदुनहाटीं ओर लुकावनिया जिल्‍लाते विततुर. अद जिल्‍लाता लिसरा, दिरबे सहरते आनि दग्‍गेटा नाहकुने होंचि पेनदा बेसता कबुर वेहुंदुर.
ACT 14:8 लिसराते वरोर कुंटि मनकल उदिस मत्‍तोर. ओर पुटतगाटाल बस्‍केने ताका हिल्‍लोर.
ACT 14:9 पौलुस वेहना पोल्‍लें ओर केंजसेके मत्‍तोर. अस्‍के पौलुस ओन उंदेतीर हूळसि, ई कुंटिन लोप्पो बेस आयना विस्वासम मंता, इंचि इनकुत्‍तोर.
ACT 14:10 अस्‍के पौलुस ओन, “तेदसि बेस नित्‍ता,” इंचि लगांचि इत्‍तस्के, ओर एगरिसि तेदसि ताकालय दल्‍गुतोर.
ACT 14:11 लोकुल्‍क पौलुस कीतदुन हूळसि, लुकावनिया बासाते, “पेनकु मनकना रूपमते मनागा रेय्‍सि वातां,” इंचि लगांचि इत्‍तुर.
ACT 14:12 ओर बरनाबासुन, जेयुस पेन, इत्‍तुर. आनि पौलुस वळ्‍कानंटे पेद्‍दा मत्‍तोर इंचि ओन, हिरमेस पेन, इत्‍तुर.
ACT 14:13 जेयुस पेनदा गुळि, नाटुक मुन्‍ने मत्‍ता. दाना पेर्माल, लोकुल्‍कुनतोनि कलियसि, पौलुस आनि बरनाबासुनाहाटीं मोक्‍कु हियालय कोंदां, पुंगाह्कुना दुम्में पीकुंचि सहरते नेंगना गलमानगा तत्‍तोर.
ACT 14:14 गानि ओर इल्‍हा कीतद केंजसि, प्रेरित बरनाबास आनि पौलुस ओरां कपडिं हराहकुत्‍तुर. लोकुल्‍कुना लोप्पो वितसि,
ACT 14:15 “ए लोकुरिटा, मिमेट इल्‍हा बारि कीसंतिर? मोमोटगुडा मीलेसींटा मनकालोरमे. मिमेट वट्‍टि पोल्‍लेन होळसि, जीवाते मनना पेनदाहेके तिरियट. अदे पेन मब्बुन, बूमितुन, समुद्रमतुन आनि अव्टे मत्‍तव अन्‍निटवुन पुटिस्ता. इंचि अदे पेनदा बेसता कबुर वेहालय मोमोट वातोम.
ACT 14:16 मुन्‍नेटा कालमते पेन, अन्‍नि जातिना लोकुल्‍कुन ओरा इस्‍टमाताप ओर्कुन मोळ्‍का हीता.
ACT 14:17 गानि मीकु मब्बुनाल पिर्रु हीता, कालमनुसार पंटा पंडिस्ता, तिनालय गाटो हीसि, मीकुन आनंदमते इरसि, ‘ननाने निजम पेनदुन आंदुन’ इंचि दाना बेसता कबाह्‍कुनाहेंदाल मीकु हुपिस्‍ता,” इंचि वेहतोर.
ACT 14:18 अच्‍चोन वेहिनागानि वेल्‍ले तिप्पलते ओर्क मोक्‍कु हियालय वातोर्कुन आपा परतुर.
ACT 14:19 आयंका पीसिदियाता अंताकिया सहरताल, इकोनिया सहरताल इच्‍चुर यहुदिल्क वातुर. वासि लोकुल्‍कुन ओरा बाजुंक कीकुंचि, पौलुसुनपोर्रो बंडां हुक्‍तुर. ओर हातोर इनकुंचि ओन सहरता पलाते इग्‍गिस ओतुर.
ACT 14:20 पजा सिस्युल्कु ओनगा वासि सुट्‍टु निततुर. अस्‍के पौलुस तेदिस सहरते होत्‍तोर. मर्रा इंकुंदि रोज बरनाबासुनतोनि दिरबे सहरते होत्‍तोर.
ACT 14:21 पजा पौलुस आनि बरनाबास दिरबे सहरता लोकुल्‍कुंक पेनदा बेसता कबुर वेहचि, वेल्‍लेटोर्कुन सिस्युल्कु कीतुर. पजा लिसरा, इकोनिया, पीसिदियाता अंताकिया सहरते मल्सि होत्‍तुर.
ACT 14:22 अगा होंचि, “पेनदा राज्येमते होनना इत्‍ते तिप्‍पल्‍क वांतां, दानाहाटीं विस्वासमते गट्‍टिगासि मंटु,” इंचि वेहचि दैरनेम हीतोर.
ACT 14:23 पजा ओर, अगाटा हरेक कलिसियाने पेद्‍दाल्कुन निलाहतुर. ओराहाटीं ओक्‍कापोद्‍दु मंचि पारतना कीसि, ओर बा सामिनपोर्रो अय्ते विस्वासम कीतुर, आ सामिंक अप्पजेपतुर.
ACT 14:24 आयंका ओर पिसिदियाताल पंपुलिया एरियाते होत्‍तुर.
ACT 14:25 अगा होंचि, पिरगा सहरते पेनदा बेसता पोल्‍लें वेहचि अतलिया सहरते होत्‍तुर.
ACT 14:26 अगटाल डोंगा उदसि सिरियाता अंताकियाते मल्सि होत्‍तुर. बद कबळ अय्ते ओर पूरा कीतुरो, अद कबळ पेनदा कुर्पाते अदे जेगाताल सुरुव कीसि मत्‍तुर.
ACT 14:27 अगा होत्‍तरित्‍ते, ओर कलिसियातोर्कुन जमा कीसि, पेन ओरा कय्‍दे बल्हा पेद्‍दा-पेद्‍दा कबाह्‍क कीता, वेहतुर. वेरे जातितोर्कुनगुडा विस्वासम कियालय पेन बल्हा हर्रि कीता, इंचि वेहतुर.
ACT 14:28 आयंका सिस्युल्कुनतोनि वेल्‍लेन रोजकु ओर अगा मत्‍तुर.
ACT 15:1 पजा यहुदियाताल इच्‍चुर लोकुल्‍क अंताकियाक वासि, “मूसाना नियम परकारम मीवद कतना आयाकोंटे मीकु मुक्‍ति दोर्का पर्रो” इंचि अगाटा दादालोर्कुंक कराहलय दल्‍गुतुर.
ACT 15:2 ओर लोकुल्‍क कराहता पोल्‍लें पौलुसुंक, बरनाबासुंक नच्‍चा हिल्‍लें. अदुनहाटीं ओरा नड्‍डुम वेल्‍लेन लोल्‍लिं आतां. अय्ते ई लोल्‍लिंकु समादानम पूस कियनाहाटीं पौलुस, बरनाबास आनि इच्‍चुर विस्वासुल्‍क येरुसलेम होंचि अगाटा प्रेरितुल्कुंक, पेद्‍दाल्कुंक कलियना इंचि निरनायम कीतुर.
ACT 15:3 पजा अगाटा कलिसियातोर ओर्कुन सार्ला कीतुर. अय्ते ओर पिनिके, सामरिया इनना एरियानाल तिरियसेक येरुसलेम होत्‍तुर. होननेंके वेरे जातितोर ओरा मनसु बल्हा मार्सकुत्‍तुर, अदुन बारेमते वेहासेक होत्‍तुर. इल्‍हा ओर अगाटा दादालोर्कुन इरगा कूस कीतुर.
ACT 15:4 ओर येरुसलेम एवतस्‍के, अगाटा कलिसियातोर, प्रेरितुल्क, पेद्‍दाल्क ओर्कु बेस आनंदमते कलियतुर. पजा पौलुस आनि बरनाबास पेन ओरतोनि मंचि बता-बता कबाह्‍क कीता, अदंता वेहतुर.
ACT 15:5 अस्‍के परिसिल्‍कुनाल इच्‍चुर विस्वासुल्‍क तेदसि, “वेरे जातितोरद कतना तप्‍पाकोंटा आये पींता, मूसाल वेहता नियम परकारम ओर ताके पींता,” इंचि इत्‍तुर.
ACT 15:6 अस्‍के ई पोल्‍लेन बारेमते विचारम कियालय प्रेरितुल्क आनि पेद्‍दाल्क उंदगा जमा आतुर.
ACT 15:7 बच्‍चोनो जेम विचारम कीतारित्‍ते पत्रु तेदतोर. तेदसि, “नावा दादालोरिटा, वेरे जातितोर नावा तोळ्‍दाले पेनदा बेसता कबुर केंजसि विस्वासमते वायाना इंचि, वेल्‍लेन रोजकु मुन्‍ने पेन मना अंटोर नड्‍डुमताल नाकुन पेर्कुत्‍ता. इद संगति मीकु अंटोर्क एर्के मंता.
ACT 15:8 मनकालोर्कुना मनसुन एरपाट कियाना पेन, बल्हा मनाकु पवित्र आत्मातुन हीता, अल्‍हेने ओर्कु इंका हीसि ओरतोनि कलियसि मत्‍ता संगति मनाकु वेहता.
ACT 15:9 ओर विस्वासम कीताहेंका पेन ओरा मनसुकुन इंका बेस कीसि, ओर्कु, मनाकु बतले बेदबावम इर्रा हिल्‍ले.
ACT 15:10 अय्ते मरि, मनमगुडा मना पेद्‍दाल्कगुडा कांजा पर्रुवा कांडितुन मिमेट सिस्युल्कुना हट्‍टनपोर्रो ताससि, मीकु पेनदा परिक्‍सा हूळानद मंताना?
ACT 15:11 येसु सामिना कुर्पाते मनाकु मुक्‍ति दोर्कंता इंचि मनम नम्मंतोम गदा! अल्हेन ओर्कगुडा मुक्‍ति दोर्कंता इंचि विस्वासम मंता.” इंचि इत्‍तोर.
ACT 15:12 अस्‍के बरनाबास आनि पौलुस, पेन ओर्कुन वेरे जातितोर लोप्पो लोहचि ओराहेंदाल बसंटा चिन्‍हां, इचंत्रमता कबाह्‍क कीता, अदुन ओर वेहालय दल्‍गुतुर अय्ते अंटोर लोकुल्‍क सपुडदाका आसि ओरा पोल्‍लें केंजालय दल्‍गुतुर.
ACT 15:13 ओरा वळकुमळ आतारित्‍ते याकोब इल्‍हा वळकालय दल्‍गुतोर. नावा दादालोरिटा, नना वेहनद केंजट.
ACT 15:14 पेन मोट्‍टा मोदाला वेरे जातितोर पोर्रो दाना दया हुपिच्‍चि ओरागटाल इच्‍चुर्कुन दाना लोकुल्‍कुन लेह्का बल्हा कीकुत्‍ता, इदुना बारेमते सिमोन पत्रु मनाकु वेहचि मत्‍तोर.
ACT 15:15 पेनदा कबुरतोर वेहता पोल्‍लें इंका इद गटनकु कलियंतां. अव पोल्‍लें इल्‍हा रासि मंतां:
ACT 15:16 “नना तिरियसि वासि दाविदना अरसोत्‍ता राज्येमतुन मर्रा निल्‍हंतन, दाना नासडेम आता मुक्‍का-मुक्‍कातुन कल्‍पिसि अद मुन्‍ने मत्‍ताप मर्रा कींतन.
ACT 15:17 अस्‍के पेर्कुत्‍ता वेरे जातितोर आनि मिगिल्सि मत्‍ता अन्‍नि वेरे जातिनोर, पेनदुन पहकानुर, इव पोल्‍लें पेन वेहता.
ACT 15:18 पेन कुद इदुन बारेमते वेल्‍लेन रोजकु मुन्‍ने वेहचि मत्‍ता.”
ACT 15:19 अदुनहाटीं नावा विचारम बतल मंता इत्‍ते, मनसु मार्सकुंचि पेनदाहेके तिरियता आ वेरे जातितोर्कुन मनम तकलिप कियामन्‍नि.
ACT 15:20 गानि बोम्मांक मोळ्‍कतदुन तिनामन्‍नि, व्यबिचारम कियामन्‍नि, गोंदके पिसकिसि हव्‍कता जिवरासिता हव्‍विं, नेत्‍तुरतुन तिनामन्‍नि इंचि ओर्क मनम रासि लोहकोम.
ACT 15:21 बारित्‍ते ओर एनकाटाल मूसाल वेहता नियमतुन, अन्‍नि सहरकुने वेहासेक अल्हेन हरेक नोमकेम रोजुननाड दर्मसास्‍त्रम कराहना लोते हद्‍विसि वेहासेक मंतुर, इत्‍तोर.
ACT 15:22 पजा प्रेरितुल्क, पेद्‍दाल्क आनि कलिसियातोर अंटोर कलियसि, अगाटा विस्वासुल्‍कुनाल इच्‍चुर लोकुल्‍कुन पेरसि पौलुस आनि बरनाबासुनतोनि अंताकियाक लोहना निरनायम कीतुर. पजा बरसब्बान आनि सिलासुन ईर इव्वुर्कुन पेरतुर. ईर इव्वुरगुडा विस्वासुल्‍कुनाल मुक्‍य मनकालोर मत्‍तुर.
ACT 15:23 ओर होननेंके ओरा कय्‍दे उंदि सिट्‍टि हीतुर, अद सिट्‍टिते इल्‍हा रासि मंता. अंताकिया, सिरिया, किलिकिया सहरकुने मनना अंटोर वेरे जाति विस्वासुल्कुंक, येरुसलेमते मनना मीवा पेद्‍दाल्क आनि प्रेरितुल्‍कुना हेंदाल जोहार.
ACT 15:24 मावा पावरमगल्‍ला दादालोरिटा, माकुन पूस कियाकोंटेन महागटाल इच्‍चुर लोकुल्‍क मिहगा वासि ओरा मनसुंक वाताप वळकिसि मी मनसुने अनमानम पुट्‍टिचि मीकु तकलिप हीतुर इत्‍ता संगति मोमोट केंजतोम.
ACT 15:25 अदुनहाटीं मना पावरमगल्‍ला बरनाबास आनि पौलुसुनतोनि, पेर्कुत्‍ता इच्‍चुर लोकुल्‍कुन मीहेके लोहना इंचि मोमोट अंटोरम कलियसि निरनायम कीतोम.
ACT 15:26 मना अंटोरा किरिस्‍तु येसु सामिना पोरोलहाटीं बरनाबास आनि पौलुस ईर ईरा जीवातुन इंका हियालय तयार आता मनकालोर आंदुर.
ACT 15:27 अय्ते मोमोट सिट्‍टिते रासता अन्‍नि पोल्‍लें यहुदल आनि सिलास ओर ओरा तोळ्‍दाल मीकु वेहना इंचि ओर्कुन मीहेके लोहसेक मंतोम.
ACT 15:28 बोम्मांक मोळ्‍कतदुन मिमेट तिनमट, गोंदके पिसकिसि हव्‍कता जिवरासिता हव्‍विन, नेत्‍तुरतुन तिनमट, व्यबिचारमताल लक्‍कु मंटु. इसंटा अवसरमाता नियमकुंक तप्‍पा इंका वेरे बद्‍दे बर्वु मीपोर्रो वाटा मन्‍नि इत्‍ता पोल्‍ले पवित्र आत्माकु आनि माकु बेस अनपिस्ता. मिमेटगिंटा इव पोल्‍लेनाल लक्‍कु मत्‍ते मीके बेस आयार. मीकु अंटोर्क जोहार.
ACT 15:30 इल्‍हा रासि ओर्कुन अगटाल सार्ला कीतंका, ओर पजा अंताकियाक एवतुर. एव्‍सि, अंटोर विस्‍वासुल्‍कुन जमा कीसि अद सिट्‍टितुन ओरा कय्‍दे हीतुर.
ACT 15:31 सिट्‍टिते रासि मत्‍ता प्रोत्‍साहन हियना पोल्‍लें हद्‍विसि ओर्क अंटोर्क वेल्‍लेन कुसि आता.
ACT 15:32 यहुदल आनि सिलास, ईर इव्वुरगुडा पेनदा कबुरतोर आंदुर. अदुनहाटीं अगाटा विस्वासुल्‍कुनतोनि वेल्‍लेनजेम वळ्‍किसि ओर्कुन विस्वासमते गट्‍टिगा कीसि ओर्कु प्रोत्‍साहन हीतुर.
ACT 15:33 इल्‍हा यहुदल आनि सिलास कोन्‍नि रोजकु अगा मत्‍तुर. पजा अंटोर विस्वासुल्‍क जमा आसि, ओर्कुन बोर अय्ते अंताकियाक लोहतुरो ओराहेके वापस येरुसलेम होनालय सांतिते सार्ला कीतुर.
ACT 15:34 गानि सिलास अंताकियातेन मनना विचारम कीतोर.
ACT 15:35 पजा पौलुस आनि बरनाबास कोन्‍नि रोजकु अंताकियातेन आगतुर. अगाटा वेल्‍लेन लोकुल्‍कुनतोनि कलियसि सामिना पोल्‍लें कराहसेक, बेसता कबुर वेहासेक मत्‍तुर.
ACT 15:36 इच्‍चुं रोजकु आतारित्‍ते, “मनम सामिना पोल्‍लें बव-बव सहरकुने वेहतोमो अव अन्‍नि सहरकुने मर्रा दाकोम. पेनदुन नम्मुकुत्‍ता पजा अगाटा विस्वासुल्कुना पिस्वरकु बल्हा बतल मंतांगो हूळसि वाकोम,” इंचि पौलुस बरनाबासुन इत्‍तोर.
ACT 15:37 अय्ते बरनाबासुंक मरकुसुन (ईन योहानगुडा इंतुर) इंका पज्जेके ओयाना मनसु मत्‍ता.
ACT 15:38 गानि, पेनदा कबळते आकिरदाका कलियसि मनाकोंटा नड्‍डुमे पंपुलिया एरियाताल होळसि वापस होत्‍ता मरकुसुन पज्जो ओयमळ पौलुसुंक नच्‍चा हिल्‍ले.
ACT 15:39 इल्‍हा ओर इव्वुर नड्‍डुम वेल्‍लेन पोल्‍लें आसि ओर वेरे-वेरे आतुर. अस्‍के बरनाबास मरकुसुन पीकुंचि डोंगाते उद्‍दिस साइप्रस इनना दीबेक होत्‍तोर.
ACT 15:40 पजा पौलुस ओनतोनि मननाहाटीं सिलासुन पेरकुंचि अगटाल होत्‍तोर. अय्ते अगाटा विस्वासुल्कगुडा पौलुसुंक आनि सिलासुंक पेनदा कुर्पा दोर्कानाहाटीं पारतना कीसि ओर्कुन पेनदा कय्‍दे अप्पजेपतुर.
ACT 15:41 अस्‍के ओर सिरिया, किलिकिया इनना एरियानाल तिरियसेके अगाटा कलिसियानोर्कुंक कलियसि पेनदा विस्वासमते बेस एदगानाहाटीं ओर्कु बेसता पोल्‍लें वेहासेक होत्‍तुर.
ACT 16:1 पजा पौलुस मर्रा दिरबे इनना सहर होंचि अगटाल लिसरा इनना सहर होत्‍तोर. हूळा! अगा तिमोति पोरोलतोर वरोर सिस्युड मत्‍तोर. ओना तल्‍लुर यहुदि जातिता उंदि विस्वासि मुरतळ आंद. गानि ओना बाबाल वेरे जातितोर (युनानि जातितोर) मत्‍तोर.
ACT 16:2 लिसरा, इकोनिया सहरकुने मनना विस्वासुल्‍क ओन बेस मनकल इनुंदुर.
ACT 16:3 अय्ते पौलुस, तिमोतिन ओना पज्जेके ओयाना विचारम कीतोर. गानि अद एरियाते मनना अंटोर यहुदि लोकुल्‍कुंक, तिमोति वेरे जातितोना (युनानि जातितोना मर्रि) मर्रि इंचि एर्का मत्‍ता, अदुनहाटीं यहुदिल्कुंक समादानम आयना इंचि पौलुस तिमोतिना कतना कियागोटतोर.
ACT 16:4 अस्‍के ओर येरुसलेमता प्रेरितुल्क आनि पेद्‍दाल्क वेहता पोल्‍लेन सहर-सहर होंचि वेहचि, अव पोल्‍लेन परकारम ताकना इंचि वेहासेक होत्‍तुर.
ACT 16:5 इल्‍हा अगाटा कलिसियानोरा विस्वासम गट्‍टिगासि इंका वेल्‍लेन लोकुल्‍क विस्वासमते वासि रोज-रोज वेल्‍लेन मंदि आतुर.
ACT 16:6 ओर्कुन पवित्र आत्मा, ‘आसिया एरियाते पेनदा पोल्‍ले वेहा मन्‍नि’ इंचि इत्‍ताहाटीं ओर अदे एरियाता पुगरिया, गलातिया एरियानाल होत्‍तुर.
ACT 16:7 पौलुस आनि तिमोति मूसिया एरियाता गेट्‍टुदाका एवतस्‍के ओर बितुनिया एरिया होनना कोसिस कीतुर. गानि येसुना आत्मा अगा इंका होन्‍ना हिया हिल्‍ले.
ACT 16:8 अय्ते ओर मूसियाताल त्रोआस सहरते एव्‍तुर.
ACT 16:9 अदे नर्का मेसिडोनिया एरियातोर वरोर मनकल, निमे मेसिडोनियाते वासि, मावा सहायम कीम, इंचेक विनंति कीसेके मंतोर. इल्‍हा पौलुस दर्सनमते हूळतोर.
ACT 16:10 ओन्क इल्‍हा दर्सनम आतारित्‍ते, आ लोकुल्‍कुंक पेनदा बेसता पोल्‍लें वेहालय पेन माकुन केयता इल्‍हा इनकुंचि मोमोट अस्‍केन मेसिडोनिया होनानद विचारम पक्‍का कीतोम.
ACT 16:11 इल्‍हा मोमोट त्रोआस सहरताल डोंगाते समुद्रम हर्रि पीसि सवरगा सुमात्राके सहरते एव्‍सि, इंकुंदि रोजु नियापुलिस इनना सहर होत्‍तोम.
ACT 16:12 पजा अगटाल पिलिपिया इनना सहर होत्‍तोम. अद मेसिडोनिया एरियाता मुक्‍य सहर आंदु. अगा रोमि लोकुल्‍क मनुंदुर. अद सहरते मोमोट कोन्‍नि रोजकु मत्‍तोम.
ACT 16:13 उंदि नोमकेम रोजुने, यहुदिल्कुना पारतना कियाना जेगा, सहरता पलाते बेरेड ओड्‍डुंक मंदार इंचेके मोमोट होत्‍तोम. अगा पारतनाकु वासि मत्‍ता मुर्ताह्कुनतोनि उद्‍दिस वळकसेके मत्‍तोम.
ACT 16:14 अवुन लोप्पो उंदि लिदिया पोरोलता मुरतळ मत्‍ता. अद तुयतीरा सहरतद आंद. दान्क पेनदापोर्रो वेल्‍लेन विस्वासम मत्‍ता. अद वेल्‍लेन दराता नेडि पंडि रंगुना कपडिं अम्मुंदु. अद बेस मनसु दोस्‍सि मावा पोल्‍लें केंजसेके मत्‍ता. पौलुस वेहना पोल्‍लेन बेस केंजालय सामि दाना मनसुन तयार कीतोर.
ACT 16:15 अद आनि दाना लोते मत्‍तोर अंटोर बापतिस्मा एततारित्‍ते अद, “मिमेटगिंटा नाकुन पेनदा निजम विस्वासि मुरतळ इंचि इनकुनानय्ते नावा लोन वासि आगट,” इंचि माकुन विनंति कीता. अस्‍के मोमोट दाना लोन होत्‍तोम.
ACT 16:16 उंदि मल्का मोमोट पारतना कियाना जेगातेके होंचेके मत्‍तोम, अस्‍के माकु उंदि दासि पेगिड कलियता, दाना लोप्पो बविस्य वेहाना आत्मा मत्‍ता. अद लोकुल्‍कुंक ओरा बविस्य वेहचि दाना मालकुल्कुंक वेल्‍लेन दनम संपलिच्‍चि हियुंदु.
ACT 16:17 अद, “ई मनकालोर अन्‍निंकन्‍ना पेद्‍दा पेनदा सेवाकुल्क आंदुर. ईर मीकु मीवा पापमताल मुक्‍ति दोर्कना हर्दा बारेमते वेहासेक मंतुर,” इंचि वरगेयसेके पौलुस आनि मावा पज्जो वाता.
ACT 16:18 अद वेल्‍ले रोजकुनाल इल्हेने वेहासेक मत्‍ता अय्ते पौलुस परेसान आतोर. अदुनहाटीं ओर पजोळ्क तिरियसि, “येसु किरिस्‍तुना पोरोलते नना नीकु आदेस हीसेक मंतन, ई पेगिटाल पेय्सि होन,” इंचि आ आत्मातुन इत्‍तोर. अस्‍के आ आत्मा पेगिटाल बिराना पलाते पेय्सता.
ACT 16:19 पजा आ पेगिटा मालकुल्कुंक दोर्कना दनम दोर्काकोंटा आताहेंके ओर पौलुसुन आनि सिलासुन दोर्कापीसि, इग्‍गिसेके नड्‍डुम सहरते अदिकारिल्कुना मुन्‍ने ओतुर.
ACT 16:20 रोमि अदिकारिल्कुना मुन्‍ने ओसि, “ईर यहुदि लोकुल्‍क आंदुर. मावा नाटेने वेल्‍ले तकलिप कीसंतुर.
ACT 16:21 ईर वेहना रीति-रिवाजकुन परकारम ताकमळ मावा रोमि लोकुल्‍कुना नियमकुना विरोदमते मंता,” इंचि इत्‍तुर.
ACT 16:22 लोकुल्‍कुना मंदागुडा पौलुस आनि सिलासुना विरोदमते तिरियतुर. रोमि अदिकारिल्‍क, पौलुस आनि सिलासुना कपडिं हराहचि ओर्कुन दुड्‍डुकुने तनना आदेस हीतुर.
ACT 16:23 ओर्कुन पक्‍का तंतारित्‍ते जेलने वाट्‍सि, ओरपोर्रो कडक पहारा इर्राना इंचि जेलना अदिकारिंक आदेस हीतुर.
ACT 16:24 ओन्क इल्‍हा आदेस दोर्कतारित्‍ते ओर्कुन जेलना लोप्पोटा अर्राते वाट्‍सि, ओरां काल्‍कुन उंदि मोट्‍टुंकु बोल अरहचि दोहतोर.
ACT 16:25 नळजाम नर्काटा वेलाते पौलुस, सिलास पेनदा स्‍तुति पाटां पारसेके, पारतना कीसेक मत्‍तुर. जेलने मत्‍ता वेरेतोर केंजसेके मत्‍तुर.
ACT 16:26 अस्‍के उंदेदम बूमि इल्‍हा कदुलता गदा, जेलना पुनादि कदुलसि जेलनव अन्‍नि तल्‍पुक उंदे मल्का कुल्‍ला आतां. जेलने मत्‍ता अंटोरा बेडीं लेंगसि होत्‍तां.
ACT 16:27 जेलना अदिकारि निद्राताल तेदसि हूळतस्‍के जेलना तल्‍पुक कुल्‍ला दिसतां. अदुन हूळसि, जेलने मत्‍तोर अंटोर पेय्सि वित्‍तुर बारे, इनकुंचि, ओनाद ओरे कोह्‍ककुंचि हांतन इंचि कसेर तेहतोर.
ACT 16:28 गानि पौलुस, “मोमोट अंटोरम इगेने मंतोम, नीवद निमेने नुकसान कीकुनमा,” इंचि जोरते वरगेयतोर.
ACT 16:29 अस्‍के वरोनतोनि वेडसि ताया वेहचि आ अदिकारि बिराना लोप्पो होत्‍तोर. वनकुसेक पौलुस, सिलासुना काल्कुनपोर्रो अरतोर.
ACT 16:30 पजा ओर्कुन पलाते तच्‍चि, “दादालोरिटा, पापाल्कुनाल मुक्‍ति दोर्कालय नाकु बतल किया पींता?” इंचि पूसकीतोर.
ACT 16:31 अस्‍के, “निमे येसु सामिना पोर्रो विस्वासम इर्रा, नीकु, नीवा लोते मत्‍तोर अंटोर्क मुक्‍ति दोर्कंता,” इंचि ओर इत्‍तुर.
ACT 16:32 ओर ओन्क, ओना लोते मत्‍ता अंटोर्क पेनदा पोल्‍लें वेहतुर.
ACT 16:33 अस्‍के जेलना अदिकारि अदे नर्का अदे वेलाते ओर्कुन अगटाल ओसि, ओरां पुनकुन नोरतोर. पजा आल्सेम कियाकोंटा ओर, ओना लोते मत्‍तोर अंटोर बापतिस्मा येततुर.
ACT 16:34 पौलुस, सिलासुन ओर ओना लोन पीसि ओसि ओर्कु गाटो दोस्तोर. इंदके पेनदापोर्रो विस्वासम इरताहेंके ओर, ओना लोते मत्‍तोर अंटोर इरगा कूस आतुर.
ACT 16:35 पंगातारित्‍ते रोमि अदिकारिल्‍क, ओर्कुन होळसीम्टु इंचि जेलना अदिकारिंक वेहालय इच्‍चुर सिपाइल्कुन लोहतुर.
ACT 16:36 जेलता अदिकारि, “मीकुन होळ्‍सगोम इंचि रोमि अदिकारिल्‍क सिपाइल्कुन लोहचीतुर, इंदके मिमेट सांतिते पेय्सि होंटु,” इंचि पौलुसुन इत्‍तोर.
ACT 16:37 अस्‍के पौलुस, “मोमोट इंका रोम देसेमता रहिवासिल्के आंदुम. अय्नागानि ओर मावा बतले तप्पु हूळाकेने माकुन लोकुल्‍कुना मुन्‍ने तंतुर, जेलने वाटसीतुर. इंदके सपुडदाका बोर्कु एरपाट हिलाकोंटा माकुन होळसियालय हूळसंतुर, गानि इल्‍हा आयापर्रो. माकुन होळसानद मत्‍ते ओर कुद इग्‍गे वासि होळसियिरकांटी,” इंचि इत्‍तुर.
ACT 16:38 सिपाइल्क होंचि रोमि अदिकारिल्कुंक इद संगति वेहचीतुर. पौलुस, सिलास ईर रोम देसेमता रहिवासिल्क आंदुर इंचि रोमि अदिकारिल्कुंक तेळियतारित्‍ते ओर इरगा वेरियतुर.
ACT 16:39 आयंका रोमि अदिकारिल्‍क वासि ओर्कुन मापि तल्किसि पलाते ओतुर. ओर्क विनंति कीसि इद सहर होळसि होनालय वेहतुर.
ACT 16:40 पौलुस, सिलास जेलनाल पलाते पेय्सि लिदियाना लोन होत्‍तुर. विस्वासि दादालोर्कुंक कलियसि, ओर्कु प्रोत्‍साहन हीसि अगटाल पेय्सि होत्‍तुर.
ACT 17:1 पजा ओर अंपिपुलि आनि अपुलोनिया सहरकंता तिरियसेके-तिरियसेके तेसलोनि सहरते एवतुर. अगा यहुदिल्कनद उंदि दर्मसास्‍त्रम कराहना लोन मत्‍ता.
ACT 17:2 पौलुस ओना अलवट परकारम यहुदिल्कुना दर्मसास्‍त्रम कराहना लोतागा होत्‍तोर. होंचि मूड नोमकेमकुन दाका ओरतोनि दर्मसास्‍त्रमता बारेमते चर्चा कीतोर.
ACT 17:3 अगा ओर, किरिस्‍तुना हायमळ आनि हामुरताल तिरियसि तेदमळ बच्‍चोनो अवसरम मत्‍ता, इत्‍ता संगतितुन दर्मसास्‍त्रमताल हद्‍विसि ओर्कु बेस तेळियागोट्‍सि वेहतोर. पजा बा येसुना बारेमते अय्ते नना मीवा मुन्‍ने वेहसेक मंतनो आ येसे किरिस्‍तु आंदुर, इंचि ओर्कु वेहतोर.
ACT 17:4 इल्‍हा इच्‍चुर लोकुल्‍कुंक निजम अनपिच्‍चि ओर पौलुस, सिलासुनहेके कलियतुर. पेनदुक वेरियना वेल्‍लेटुर युनानि लोकुल्‍कगुडा ओरतोनि कलियतुर. अचोने आयका वेल्‍लेन बेस पोरोल होत्‍ता मुर्ताह्कगुडा ओरतोनि कलियसि मत्‍तां.
ACT 17:5 गानि यहुदिल्कुंक मात्रम मंटा अरसेक मत्‍ता. ओर इच्‍चुर बदमासुल्कुन जमा कीसि सहरते लोल्‍लिं कीतुर. बल्हा कीसन्‍ना गानि पौलुस, सिलासुन लोकुल्‍कुना मुन्‍ने तायागोम इंचि ओर यासोन इनानोना वरोन लोतपोर्रो होंचि अरतुर.
ACT 17:6 पौलुस, सिलास ओर्कु दोर्का हिल्‍लुर अय्ते यासोनुन आनि इच्‍चुर दादालोर्कुन सहरता अदिकारिल्‍कुन मुन्‍ने इग्‍गिस ओतुर. ओसि, “ईर मनकालोर पूरा दुनियातुने हिळु-पोर्रो कीतुर, इंदके इग्‍गेगुडा वातुर.
ACT 17:7 ईरकु यासोन ओना लोन मनालय जेगा हीतोर. ईर अंटोर कैसर राजाना नियमकुंक अड्‍डम कबळ कींतुर. अचोने आयका ओर, इंकावरोर राजाल मंतोर ओना पोरोल येसु आंद,” इंचि वेहांतुर.
ACT 17:8 इद पोल्‍लेतुन केंजसि अगा मत्‍ता लोकुल्‍क आनि सहरता अदिकारिल्‍क इरगा होंगुंक वातुर.
ACT 17:9 पजा यासोनुन हेंदाल आनि कळमातोरहेंदाल दंडगु तेंडकुंचि, रासकुंचि ओर्कुन होळसीतुर.
ACT 17:10 पजा बिराना नर्काटद-नर्केन दादालोर पौलुस, सिलासुन बिरिया इनना सहर लोहचीतुर. ओर अगा एवतारित्‍ते यहुदिल्कुना दर्मसास्‍त्रम कराहना लोते होत्‍तुर.
ACT 17:11 तेसलोनि सहरता यहुदिल्कुंकन्‍ना इगेटा यहुदिल्क बच्‍चोरो बेस मत्‍तुर. ईर पौलुस वेहना पोल्‍लेन बेस मनसु ताससि केंजुंदुर. हरेक रोजु दर्मसास्‍त्रमतुन हद्‍विसि पौलुस वेहना पोल्‍लें निजमेना इंचि बेस अर्तम कीकुनुंदुर.
ACT 17:12 इल्‍हा वेल्‍लेन मंदि यहुदिल्क विस्वासम कीतुर. यहुदिल्कुन लेह्कने बेस कदर मत्‍ता युनानि मुर्ताह्क-मांड्‍सागुडा विस्वासम कीतुर.
ACT 17:13 गानि बस्के अय्ते पौलुस, पेनदा पोल्‍लें बिरिया सहरतेगुडा होंचि कराहचंतोर इंचि तेसलोनि सहरता यहुदिल्कुंक तेळियतनो, अस्‍के ओर अगा वासि लोल्‍लिं कियमळ, लोकुल्‍कुंक एकरेवुल्क वेहमळ सुरुव कीतुर.
ACT 17:14 अदुनहाटीं दादालोर पौलुसुन बिराना समुद्रम ओड्‍डुनहेके लोहचीतुर. गानि सिलास, तिमोति मात्रम अग्गेन आगतुर.
ACT 17:15 पौलुसुनतोनि बोर अय्ते होत्‍तुरो ओर पौलुसुन एतेंस इनना सहरदाका अरहतुर. पौलुसुन हेंदाल, सिलास, तिमोति बिराना ओनगा वायागोम, इंचि इत्‍ता आदेस पीकुंचि ओर अगटाल मल्सि बिरिया सहरकु वातुर.
ACT 17:16 पौलुस, एतेंस सहरते सिलास आनि तिमोतिना एदुर हूळसेक मत्‍तस्के, अद सहर बोम्मानतोनि निंडिस मत्‍तद हूळसि ओना मनसुने बागा दुक्‍कम वाता.
ACT 17:17 दानहाटीं ओर रोज-रोज दर्मसास्‍त्रम कराहना लोह्कुने होंचि यहुदिल्कुनतोनि आनि पेनदुक वेरियना वेरे जाति लोकुल्‍कुनतोनि चर्चां कियुंदुर. अचोने आयका चौकुल्कुने होंचि बोर दोर्कुते ओरतोने चर्चा कियुंदुर.
ACT 17:18 अस्‍के इच्‍चुर इपिकुरि आनि स्तोइकि इनना एक्‍को तेल्वि मत्‍ता लोकुल्‍क ओनतोनि जगडम दोसकुत्‍तुर. अव्टेटाल इच्‍चुर, “ई पिचुर-पिचुर वळकानोर बतल वेहांतन इंचंतोर?” इंचि इत्‍तुर. इंकिच्‍चुर बारे, “ईर अय्ते वेरे जातितोरा पेनदा बारेमते कराहनोर दिसंतोर” इंचि इत्‍तुर. पौलुस येसुना बारेमते आनि ओर हासि मर्रा जीवाते तेदतदुन बारेमते कराहुंदुर इंचि ओर अल्हा इत्‍तुर.
ACT 17:19 आयंका ओन पीसि अरियपगुस इनना पंचादिते ओसि, “निमे कराहना ई पूना पोल्‍लें बतांगो माकु तेळियानाल वेहा.
ACT 17:20 इंका निमे माकु मोमोट बस्के केंजुवा, तेळियवा पोल्‍लें वेहचंतिन. ई पोल्‍लेना अर्तम बतलो माकु तेळियागोट्‍सि वेहा.” इंचि विनंति कीतुर.
ACT 17:21 एतेंस सहरता लोकुल्‍क आनि वेरेटागटाल वासि अगा मनना पलाता लोकुल्‍क, बस्‍केळ्‍क बतलन्‍ना पूनद केंजालय आनि दाना बारेमते चर्चा कियमळ तप्‍पा इंका वेरे बतले कबळ कियाकोंदुर.
ACT 17:22 अस्‍के पौलुस, अरियपगुस इनना पंचादिते नित्‍तिसि इल्‍हा वळकालय दल्‍गुतोर. एतेंसता लोकुरिटा! मिमेट अन्‍नि तीरकुने पेनदा कदर कीसंतिर इत्‍ता संगति नाकु दिस्‍संता.
ACT 17:23 नना मीवा सहरअंता तिरियसि मिमेट मोळ्‍कना अन्‍नि वस्‍तुकुन हूळतन. अचोने आयका, “एरपाट हिलवा पेनदाहाटीं” इंचि रासि मत्‍ता उंदि गद्‍देतुन इंका नना हूळतन. अय्ते मीकु एरपाट हिलाकोन्‍ना मिमेट मोळ्‍कना आ पेनदा बारेमतेन नना मीकु वेहंतन.
ACT 17:24 इद दुनियातुन, इद दुनियाते मनना अन्‍निटवुन पुटिस्ता पेने, बूमि आनि स्वर्गमता सामि आंद. अदुनहाटीं मनकालोर तयार कीता गुळिने अद मन्‍नो.
ACT 17:25 दानगा बतले तक्‍को हिल्‍ले. इंका अदे अंटोर्क ऊपिरि, पिस्वर आनि गावाले मत्‍तव अन्‍नि वस्‍तुक हींता. अय्ते असोंटा पेनदुक मनकना कय बतल हिया पर्रंता?
ACT 17:26 पेन वरोर मनकन तयार कीता. आ वरोर मनकनतोनि ई दुनियंता निंडिस मननाहाटीं अन्‍नि जातिना लोकुल्‍कुन तयार कीता. इंका ओराहाटीं उंदि वेला, ओर मनना जेगांक गेट्‍टुकु, इल्‍हा पेने कीता.
ACT 17:27 मनकालोर पेनदुन पहकागोम इंचि दाना मनसु मत्‍ता. ओक्‍कला पहकिस-पहकिस दान ओर दोर्काबेटकुनानुर. अयना अद मनागटाल बोर्के लक्‍कु हिल्‍ले.
ACT 17:28 मनम दानतोने पिस्सेक मंतोम, दानतोने तिरियसेक मंतोम, अद मंता इंचे मनम मंतोम. इचोने आयका, मनम दाना पिलाल्क आंदुम, इंचि मीवा लोप्पोटोरे इच्‍चुर पाटां रासाना लोकुल्‍कगुडा वेहातुर.
ACT 17:29 “अय्ते मनम पेनदा मर्कुम आसिगुडा, मनकल ओना तेल्विनुसार तयार कीता एंडि, बंगारम आनि बंडाता बोम्मानलेह्का पेन मनंता इंचि बस्‍केने इननायो.
ACT 17:30 मुन्‍नेटा लोकुल्‍कुना पेनदा बारेमते तेल्वि तक्‍को लेक्‍कनहेंका पेन ओर्कुन हूळसिगुडा हूळवाप कीता. गानि इंदके मात्रम दुनियाता अंटोर लोकुल्‍क मनसु मार्सकुननाहाटीं आदेस हीसंता.
ACT 17:31 अद पेर्कुत्‍ता मनकनाहेंदाल, इद दुनियाते मनना हरेक मनकना न्‍यायम नीतिते कियानाहाटीं पेन उंदि रोजुन पिक्‍स कीता. अचोने आयका अद पेर्कुत्‍ता मनकन हातोराव्टेटाल मर्रा जीवा अरहचि अंटोर मनकालोर्कुंक अद हीता पोल्‍लेतुन रुजुव कीता.”
ACT 17:32 बस्के अय्ते लोकुल्‍क, हातोराव्टेटाल मर्रा जीवाते तेदतोर इत्‍ता पोल्‍ले पौलुसुना तोळ्‍दाल केंजतुरो, अस्‍के इच्‍चुर लोकुल्‍क ओन कव्‍तुर. गानि इंका इच्‍चुर मात्रम, “निमे वेहना पोल्‍ले मर्रा बस्‍केनना केंजंतोम,” इंचि इत्‍तुर.
ACT 17:33 अस्‍के पौलुस पंचादिताल पेय्सि होत्‍तोर.
ACT 17:34 इच्‍चुर लोकुल्‍क विस्वासम कीसि पौलुसुंक कलियतुर. ओराव्टेटाल वरोर दियोनुस इनानोर मत्‍तोर, ओर अरियपगुस पंचादिता मेंबर मत्‍तोर. अचोने आयका दामेरा इनना पोरोलतद उंदि मुरतळ ओरतोनि मत्‍ता, इंका वेरे लोकुल्‍कगुडा मत्‍तुर.
ACT 18:1 पजा पौलुस एतेंस सहर होळसिसि कुरेंति सहरते होत्‍तोर.
ACT 18:2 अगा ओर अकविला इनना पोरोलता यहुदि मनकंक कलियतोर. ई अकविलाल पुंतुस इनना एरियाते पुटतोर. रोम सहरते मनना अंटोर यहुदिल्कुन कलादियुस राजाल पेय्सि होंटु इंचि आदेस हीतोर. अदुनहाटीं ओर इटलि एरियाताल ओना मुत्‍तो पिरिसकिलानतोनि कुरिंति वातोर. अय्ते पौलुस ओर्क कलियालय होत्‍तोर.
ACT 18:3 पौलुसुनद आनि अकविलानद इव्वुरद इंका डेरां निलाहना दंदे मत्‍ता. अदुनहाटीं पौलुस ओरगा वासि आगतोर. ओर अंटोर कलियसि कबळ कियालय दल्‍गुतुर.
ACT 18:4 ओर हरेक नोमकेम रोजुननाड यहुदिल्कुना दर्मसास्‍त्रम कराहना लोहकुने होंचि युनानि, यहुदि लोकुल्‍कुनतोनि चर्चा कीसि ओर्कु बेस तेळियागोट्‍सि वेहुंदुर.
ACT 18:5 सिलास आनि तिमोति मेसिडोनिया एरियाताल वातस्के, पौलुस ओना पूरा वेला पेनदा पोल्‍लें कराहमळतेन तासुंदुर. इंका यहुदिल्कुनतोनि वळकिसि, येसे किरिस्‍तु आंदुर, इंचि वेहचि गवाइ हियुंदुर.
ACT 18:6 गानि यहुदि लोकुल्‍क पौलुसुन हय्‍सा हिल्‍लुर. ओना अपमानम कीतुर. अस्‍के पौलुस ओना कपडिं दुल्‍पसेके ओर्कुन, “मीवा नेत्‍तुर मीवा तल्‍लापोर्रो अर्रि. अव्टे नावद बतल दोसेम हिल्‍ले. इंदकेटाल नना वेरे जातितोर हेके दांतन,” इंचि इत्‍तोर.
ACT 18:7 इल्‍हा पौलुस दर्मसास्‍त्रम कराहना लोताल पेय्सि दाना बाजुंक मनना तीतु-युसतुस पोरोलता वरोर वेरे जाति बक्‍तुना लोन होत्‍तोर.
ACT 18:8 यहुदिल्कुना दर्मसास्‍त्रम कराहना लोतुक अदिकारि मत्‍ता वरोर क्रिसपुस पोरोलता मनकल, ओना लोतोर अंटोर सामिना पोर्रो विस्वासम कीतुर. अचोने आयका कुरेंति सहरतोर वेल्‍लेटुर लोकुल्‍क पौलुसना पोल्‍लें केंजसि, सामिनपोर्रो विस्वासम इर्सि, बापतिस्मा एततुर.
ACT 18:9 उंदि नर्का सामि दर्सनमते पौलुसुंक इल्‍हा वेहतोर, “निमे वेरियाकोंटा वळ्कसेक होन, सपुडदाका मनमा.
ACT 18:10 इद सहरते नावा वेल्‍लेन लोकुल्‍क मंतुर, ननागुडा नीवातोनि मंतन. नीवा पोर्रो बोरे कय तेहुर नीकुन बोरे तकलिप किय्युर,” इत्‍तोर.
ACT 18:11 इल्‍हा पौलुस एडादि नरादाका अग्गेन मंचि ओर्कु पेनदा पोल्‍लें कराहतोर.
ACT 18:12 गल्‍लिया पोरोलतोर वरोर अकाया इनना एरियाक राज्यपाल मत्‍तोर, अस्‍के यहुदिल्क अंटोर उंदि आसि, पौलुसुंक अड्‍डम तिरियतुर आनि ओन कोरटते पीसि वासि, “ई मनकल नियम परकारम हिलुवा पदतकुने पेनदुन आरादना कियालय लोकुल्‍कुंक वेहासेक मंतोर,” इंचि इत्‍तुर.
ACT 18:14 पौलुस वळ्कालय आतोर अच्‍चोटेन गल्‍लिया राज्यपाल यहुदिल्कुनतोनि, “मिमेट वेहना पोल्‍ले बदाना तप्‍पु कीतदुन बारेमते, हिलाकोंटे पेद्‍दा अन्‍यायमता बारेमते आसि मत्‍ते, नना मीवद केंजालय अर्तम मनवड.
ACT 18:15 गानि इद केस, पोल्‍लें, पोरोल्क आनि मीवा दर्मसास्‍त्रमता बारेमते मंता. अदुनहाटीं दीन मीवद मिमेटे नेमाहकुंटु. इसोंटा केसकुना न्‍यायम नना किय्योन,” इंचि इत्‍तोर.
ACT 18:16 इल्‍हा इंचि गल्‍लियाल ओर्कुन कोरटताल पलाते पेचाहतोर.
ACT 18:17 पजा यहुदिल्क, दर्मसास्‍त्रम कराहना लोतुक अदिकारि मत्‍ता सोस्‍तिनेस पोरोलतोन पीसि, कोरटता मुन्‍नेने तंतुर. अय्नागानि गल्‍लियाल मात्रम जर्गनदाना बारेमते विचारम किया हिल्‍लोर.
ACT 18:18 पौलुस वेल्‍लेन रोजकुनदाका अग्गेन कुरेंति सहरते मत्‍तोर. आयंका अगा मत्‍ता विस्‍वासुल्‍कुन होळसि, मोळ्‍ककुत्‍ता परकारम पौलुस किंकिरया सहर होंचि केल्क कोरियकुत्‍तोर. पजा ओनतोनि पिरिसकिला आनि अकविला ईरकुन पीकुंचि सिरिया एरियाक होनना डोंगाते उद्‍दिस इपीसि सहर होत्‍तोर.
ACT 18:19 इल्‍हा ओर इपीसि सहरते एवतुर. पजा पौलुस पिरिसकिल्‍लन आनि अकविलान अग्गेन होळ्‍सतोर. ओर वरोरे दर्मसास्‍त्रम कराहना लोते होंचि यहुदिल्कुनतोनि चर्चा कियालय दल्‍गतोर.
ACT 18:20 आयंका ओर अंटोर, ओन इंका इच्‍चुं रोजकु अग्गेन मननाहाटीं विनंति कीतुर गानि ओर, मनोन, इत्‍तोर.
ACT 18:21 गानि अगटाल पेय्‍सका मुन्‍ने, “ओक्‍कला पेनदा मनसु मनानय्ते नना मिहगा मर्रा वांतन,” इंचि ओर इत्‍तोर. पजा इपीसिताल डोंगाते उद्‍दिस पेय्सतोर.
ACT 18:22 पजा ओर कैसरिया सहरते एव्‍सि, अगटाल येरुसलेम सहर होत्‍तोर. अगा होंचि अगाटा कलिसियातोर्कुंक कलियसि जोहार कीतोर, पजा अगटाल अंताकिया सहर होत्‍तोर.
ACT 18:23 अगा इच्‍चुं रोजकु मत्‍तारित्‍ते मर्रा ओर गलातिया आनि पुगरिया एरियाताल अंटोर सिस्युल्कुना विस्वासम गट्‍टिगा कीसेके तिरियतोर.
ACT 18:24 अच्‍चोटेन अप्‍पुलोस इनानोर वरोर यहुदि मनकल इपीसि सहरते वातोर. ओर सिकंदरिया इनना सहरते पुटतोर. ओर वेल्‍लेन तेल्वि मत्‍ता मनकल मत्‍तोर. ओन्क दर्मसास्‍त्रम पुरागा तेळियुंदु.
ACT 18:25 ओर सामि वेहता हर्दा बारेमते करियसि मत्‍तोर. ओर येसुना बारेमते कराहनेंके वेल्‍ले कुसिते बल्हा मत्‍तद अल्हेन बरोबर कराहुंदुर. गानि बापतिस्माता बारेमते अय्ते सिराप योहानुना बापतिस्माता बारेमतेन एरपाट मत्‍ता.
ACT 18:26 अय्ते ओर यहुदिल्कुना दर्मसास्‍त्रम कराहना लोते होंचि वेरियाकोंटा वळकालय सुरुव कीतोर. उंदि मल्का ओर वळ्कानेंके पिरिसकिला आनि अकविला ईर इव्वुर ओना पोल्‍लें केंजतुर. केंजसि ओन दग्गेर्क केयकुंचि ओन्क पेनदा हर्दा बारेमते इंका बेस तेळियागोट्‍सि वेहतुर.
ACT 18:27 अय्ते अप्‍पुलोस अकाया इनना एरियाक होनना विचारम कीतोर. अस्‍के दादालोरगुडा ओन्क बेस दैरनेम हीतुर. अचोने आयका अकाया एरिया पीसि मनना सिस्युल्कुंक, ईन बेस दग्‍गेर कीकुंटु, इंचि उंदि सिट्‍टि रासतुर. ओर अगा एवतारित्‍ते, पेनदा कुर्पाहेंदाल विस्वासमते वाता लोकुल्‍कुंक वेल्‍ले सहायम कीतोर.
ACT 18:28 बल्हा इत्‍ते, अंटोर लोकुल्‍कुना मुन्‍ने यहुदिल्कुनतोनि जिद्‍दुने चर्चा कियुंदुर. इंका दर्मसास्‍त्रमते, येसु सामिए किरिस्‍तु आंदुर, इंचि ओर्क हुपिच्‍चि दान रुजुव कियुंदुर.
ACT 19:1 अप्‍पुलोस कुरेंति सहरते मननेंके, पौलुस वेरे-वेरे नाहकु तिरियसेके इपीसि सहरते वातोर. अगा ओन्क इच्‍चुर सिस्युल्क कलियतुर.
ACT 19:2 “मिमेट विस्वासमते वातस्के मीपोर्रो पवित्र आत्मा वाताना?” इंचि पौलुस ओर्कुन पूसकीतोर. अस्‍के, “मोमोट अय्ते पवित्र आत्मा मंता इंचिगुडा केंजा हिल्‍लोम,” इंचि आ सिस्युल्क इत्‍तुर.
ACT 19:3 पजा, “अय्ते मरि मिमेट बोना बापतिस्मा एततिर?” इंचि पौलुस पूसकीतस्‍के, “योहानुना बापतिस्मा एततोम,” इंचि ओर वेहतुर.
ACT 19:4 अस्‍के, “योहान अय्ते पापाल्कुनाल मनसु मार्सकुनना बारेमता बापतिस्मा हियुंदुर. इंका ओर लोकुल्‍कुंक, ओना पज्जोटाल वरोर वायानोर मंतोर, ओनपोर्रो, इत्‍ते येसुनपोर्रो विस्वासम कीम्‍टु, इंचि वेहुंदुर,” इंचि पौलुस इत्‍तोर.
ACT 19:5 इद केंजिस ओर येसु सामिना पोरोलते बापतिस्मा एततुर.
ACT 19:6 पजा बस्के अय्ते पौलुस ओरापोर्रो कय इरतोरो अस्‍के ओर अंटोरपोर्रो पवित्र आत्मा रेयता. ओर वेरे-वेरे बासाने वळकालय, बविस्यवानि कियालय दल्‍गुतुर.
ACT 19:7 ओर अंटोर कलियसि पन्‍नेंडु मंदि मत्‍तुर.
ACT 19:8 आयंका पौलुस मूड नेल्कुनदाका यहुदिल्कुना दर्मसास्‍त्रम कराहना लोते होनुंदुर. वेरियाकोंटा ओरतोनि चर्चा कीसि पेनदा राज्येमता बारेमते ओर्कु तेळियागोट्‍सि वेहुंदुर.
ACT 19:9 गानि ओरंटे इच्‍चुर जिद्‍दि मनकालोर मत्‍तुर. ओर विस्वासम किया हिल्‍लुर. अचोने आयका लोकुल्‍कुना मुन्‍ने पेन वेहता हर्दा बारेमते रोता-रोता पोल्‍लें वळ्कसेक मत्‍तुर. अदुनहाटीं पौलुस, सिस्युल्कुन ओना पज्जो केयकुत्‍तोर. आ लोकुल्‍कुन अग्गेन होळसि रोज तरन्‍नुसना मिटिंग बंगलाते होंचि चर्चा कियुंदुर.
ACT 19:10 रोंडु वर्सनदाका इल्हे ताकसेके मत्‍ताहाटीं आसिया एरिया पीसि मनना अंटोर यहुदि आनि युनानि लोकुल्‍क पेनदा पोल्‍लेतुन केंजतुर.
ACT 19:11 पौलुसना कयदाल पेन पेद्‍दा-पेद्‍दा अद्‍बूतामाता कबाह्‍क कीसेक मत्‍ता.
ACT 19:12 इंका लोकुल्‍क पौलुस इटता दस्तिगुड्‍डान, ओना सेल्‍लान रोगम मत्‍तोरगा ओते ओरा रोगाल्कंता होनुंदु, देय्याल्क इंका होळसि वित्‍तुंदुं.
ACT 19:13 इच्‍चुर यहुदि लोकुल्‍क, सुट्‍टु-मट्‍टु एरियाने देय्याल्क पीसि मत्‍तोर्कुन मंत्राल्कुना बलमते बेस कीसेके तिरियुंदुर. इसकिवा इनना वरोर यहुदि पेद्‍दा पेर्मांक एडुर मर्कु मत्‍तुर. ओर इल्हे कियुंदुर. अय्ते उंदि मल्का ओर सामि येसुना पोरोल येत्‍सि, “पौलुस बोना बारेमते अय्ते वेहचंतोरो आ येसुना पोरोलते आदेस हीसंतन, पलाते पेय्‍सा” इंचि देय्याल्कुन इत्‍तुर.
ACT 19:15 अस्‍के आ देय्यम, “येसु अय्ते नाकु एरके, इंका पौलुसगुडा नाकु एरके. मरि मिमेट बोर आंदिर?” इंचि ओर्कुन पूसकीता.
ACT 19:16 पजा आ देय्यम पीसि मत्‍ता मनकल ओरापोर्रो अरसि, ओर्कुन इरगा तंतोर. अदुनहाटीं ओर इरगा देब्बां दल्‍गिसि नेत्‍तुर पोंगनेंकेन अद लोताल कपडिं केर्राकोंटेन पेय्सि विततुर.
ACT 19:17 इद संगति इपीसिते मनना अंटोर यहुदिल्कुंक, युनानि लोकुल्‍कुंक तेळियता. अदुनहाटीं ओर अंटोर इरगा वेरियतुर. येसु सामिना पोरोलता कदर बेर्स्‍सेके होत्‍ता.
ACT 19:18 इल्‍हा बोर लोकुल्‍क अय्ते विस्वासुल्‍क आतुरो, ओर कीता तप्‍पुकुन अंटोरा मुन्‍ने ओप्‍कुनालय दल्‍गतुर.
ACT 19:19 होदें-मंत्राल्कु कियानोर वेल्‍लेटुर लोकुल्‍क ओरा पुस्तकाल्क उंदगा जमा कीसि अवुन अंटोरा मुन्‍ने बोळस्तुर. पजा आ पुस्तकाल्कुना दरा लेक्‍का कीते एबै वेय्‍कुना (50,000) एंडि कोत्‍तानच्‍चोर मत्‍ता.
ACT 19:20 इल्‍हा सामिना पोल्‍ले बेस मजबुत आसेके नालुं मूलां पैलांचेके होत्‍ता.
ACT 19:21 इदंता जर्गुता पज्जो, पौलुस मेसिडोनिया, अकाया इनना एरियानाल येरुसलेम होनना पिलान पवित्र आत्माता सहायमतोनि कीतोर. अगा होत्‍ता पज्जो, बल्हा कीसि अयना रोम सहरतुन हूळापींता, इंचि इत्‍तोर.
ACT 19:22 दानहाटीं ओर तिमोति आनि इरास्‍तुस पोरोलता इव्वुर सेवाकुल्कुन मेसिडोनिया एरियाते लोहचीतोर. ओर कुद बारे इंका इच्‍चुं रोजकु आसिया एरियातेन आगतोर.
ACT 19:23 अव रोजकुने पेन वेहता हर्दा बारेमते वेल्‍लेन लोल्‍लिं आतां.
ACT 19:24 देमेत्रि पोरोलतोर वरोर कमसालोड मत्‍तोर. ओर अर्तेमि इनना पेनदा गुळितालेसींटव एंडिता गुळिं तयार कीसि अम्मुकुनुंदुर. दीनहेंदाल ओनगा कबळ कियानोर्क रिकम हिलाकोंटा कबळ दोर्कुंदु.
ACT 19:25 आ कमसालोड, ओनगा कबळ कियानोर्कुन आनि ओनालेसीं कबळ कियाना इंका वेरेतोर्कुन अंटोर्कुन जमा कीसि ओर्कु इल्‍हा वेहतोर, “दादालोरिटा! मीकु अय्ते एरपाटे गदा, ई दंदाहेंदाल मनाकु बेस कोत्‍तां दोर्कंतां.
ACT 19:26 ई पौलुस इपीसि सहरता आनि दग्‍गेर-दग्‍गेरा पूरा आसिया एरियाता लोकुल्‍कुंक, ‘मनकल कीता पेनकु निजम पेनकु आयों,’ इंचि ओर्क एकरेवुल्क वेहसेक ओर्कुन बदलांचतोर. इद संगतितुन मिमेट हूळतिर आनि केंजतिर गुडा.
ACT 19:27 दीनहेंदाल मना दंदाक मत्‍ता बेस पोरोल बदनाम आंता. मना पेद्‍दा पेन अर्तेमिना गुळिता इलवागुडा दांता. इचोने आयका सिराप आसिया एरियातेन आयो गानि पूरा दुनियाता अंटोर लोकुल्‍क मोळ्‍कनसोंटा ई पेनदुक मत्‍ता पेद्‍दातनमगुडा हिलाकोंटा आंता,” इंचि इत्‍तोर.
ACT 19:28 इसोंटा पोल्‍लें केंजसि ओर इरगा होंगुंक वासि, “इपीसितोरा पेन अर्तेमि अन्‍नि पेनकुंकन्‍ना पेद्‍दा पेन आंद,” इंचि वरगेयालय दल्‍गुतुर.
ACT 19:29 अदुनहाटीं सहरते लोल्‍लि आता. पजा लोकुल्‍क मेसिडोनिया एरियाताल वाता गयुस आनि अरिसतरकुस पोरोलतोर इव्वुर्कुन दोर्का पीतुर. ईर इव्वुरगुडा पौलुसुनतोनि कलियसि पय्‍नेम कियुंदुर. अय्ते लोकुल्‍क अंटोर उंदि आसि ओर्कुन पीसि नाटकम बंगलातगा जोरसे इग्गिसेक पीसि विततुर.
ACT 19:30 पौलुस लोकुल्‍कुना मुन्‍ने होनना इनकुत्‍तोर गानि सिस्युल्कु ओन होना हिया हिल्‍लुर.
ACT 19:31 आसिया एरियाता इच्‍चुर अदिकारिल्‍क पौलुसना दंटातोर मत्‍तुर, ओरगुडा, “निमे नाटकम बंगलाते होंचि दोकाते अरमा,” इंचि कबुर लोहचि ओन्क विनंति कीतुर.
ACT 19:32 अस्‍के बोरो बतलो, बोरो बतलो इल्‍हा पेद्‍दा लोल्‍लि कियालय दल्‍गुतुर. वेल्‍ले मंदिक अय्ते ओर अगा बताहाटीं जमा आतुर अदगुडा एर्का हिल्‍ले.
ACT 19:33 यहुदि लोकुल्‍क सिकंदर पोरोलतोन वरोर मनकन मंदिताल पेरसि मुन्‍ने निलाहतुर. सिकंदर कय ऊपसि-ऊपसि लोकुल्‍कुंक समजांचलय हूळतोर.
ACT 19:34 गानि ओरगुडा वरोर यहुदि मनकल आंदुर इंचि तेळियतारित्‍ते ओर अंटोर रोंडु गंटानदाका उंदे आवाजते, “इपीसितोरा पेन अर्तेमि अन्‍नि पेनकुंकन्‍ना पेद्‍दा पेन आंद,” इंचि वरगेयसेके मत्‍तुर.
ACT 19:35 अस्‍के सहरता अदिकारि मंदितुन सांत कीतोर. सांत कीसि, “अरे इपीसि लोकुरिटा, बेस पोरोल होत्‍ता अर्तेमि पेनदा गुळितुन आनि स्वर्गमताल अरता दाना पवित्र बंडा बोम्मातुन बेस कापाळना सहर इपीसि सहर आंद, इद पोल्‍ले दुनियाकंता एरपाटे मंता.
ACT 19:36 इद पोल्‍लेतुन बोरे हिल्‍ले इन्‍नोर. अदुनहाटीं मिमेट सांत मंटु, विचारम कियाकोंटा गाबर आसि बतले कियमट.
ACT 19:37 ईर मनकालोर अय्ते मना पेनदा गुळिताल बतले दोंगा किया हिल्‍लुर. मना पेनदा अपमानमगुडा किया हिल्‍लुर. अय्नागानि मिमेट ईरकुन इगे पीसि वातिर.
ACT 19:38 ओक्‍कला देमेत्रिसुंक आनि ओनतोनि कलियसि कबळ कियानोर्कुंक गिंटा बोरादन्‍ना विरोदमते बतलन्‍ना वेहनद मनानय्ते कोरटकुना तल्‍पुक कुल्‍ले मंतां, अगा ओर वरोनपोर्रो वरोर तप्पुक-दोसेल्क वेहकुना परांतुर. ओरां केंजालय अगा अदिकारिल्कगुडा मंतुर.
ACT 19:39 अयना इंका बतलन्‍ना वेरेतदुन बारेमते वळकानद मनानय्ते दाना पय्सला मना पंचादिते किया वच्‍चु.
ACT 19:40 इय्याला इगे बतल अय्ते जर्गतनो दीनद पूरा दोसेम मना तल्‍लापोर्रेन अर्रनलायक मंता. इद जर्गुता गटना बेसताहाटींगे जर्गुता इंचि रुजुव कियालयगुडा मनागा बतले हिल्‍ले.” इंचि इत्‍तोर.
ACT 19:41 इल्‍हा इत्‍ता पजा ओर पंचादि मारता इंचि वेहतोर.
ACT 20:1 लोल्‍लिंअंता मगता पज्जो पौलुस सिस्युल्कुन केय्‍सि, ओर्क बेस प्रोत्‍साहन हीसि ओर्कुन होळसि मेसिडोनिया एरियाक होत्‍तोर.
ACT 20:2 मेसिडोनिया एरियाताल होननेंके आ एरिया पीसि मनना विस्वासुल्कुंक प्रोत्‍साहन हियानसोंटव बच्‍चोनो पोल्‍लें ओर्क वेहासेके होत्‍तोर. पजा ओर अकाया एरियाते एवतोर.
ACT 20:3 अगा पौलुस मूड नेल्क मत्‍तोर. अगटाल डोंगाते उद्‍दिस सिरिया एरियाते होनना विचारम कीतोर, गानि अच्‍चोटेन यहुदि लोकुल्‍क ओन हव्काना पिलान कीसंतुर इंचि तेळियतस्के ओर मर्रा मेसिडोनिया एरियाक मल्सि होनना निरनायम कीतोर.
ACT 20:4 बिरिया सहरता पिरूस इनानोना मर्रि सोपत्रु, तेसलोनि सहरता अरिसतरकुस आनि सेकुंदल, दिरबे सहरताल गयुसु, आसिया एरियाताल तुकिकुस आनि तोरोपिमुस, इंका तिमोति. ईर अंटोर आसिया एरिया एवनाल पौलुसुनतोनि मत्‍तुर.
ACT 20:5 ईर अंटोर मुन्‍ने होंचि त्रोआस सहरते मावा एदुर हूळसेक मत्‍तुर.
ACT 20:6 गानि मोमोट पिलिपिया सहरताल होयवा पिंडिता हारिना पंडगु होत्‍तारित्‍ते डोंगाते उदिस पेय्‍सतोम. त्रोआस सहरते ओर्कु होंचि कलियालय माकु हेय्युं रोजकु दल्‍गतां. अगा मोमोट एडुं रोजकु मत्‍तोम.
ACT 20:7 आयंका मोमोट वारमता मुन्‍नेटा रोजु हारि उरहालय उंदगा जमा आतस्के पौलुस लोकुल्‍कुनतोनि वळकालय दल्‍गुतोर. ओन्क इंकुंदि रोजु पय्‍नेम होनना मत्‍ताहाटीं ओर नळजाम नर्कादाका वेहतोर.
ACT 20:8 मोमोट जमा आसि मत्‍ता पोर्रोटा अंतरम पोर्रो वेल्‍लेने वेडसिं मत्‍तां.
ACT 20:9 अगा युतुकुस पोरोलतोर वरोर लेय्या पेडल किडकिते उद्‍दिस मत्‍तोर. पौलुस वेल्‍लेनजेम वळ्कसेक मननेंके ओन्क इरगा निद्रा वासि मूडोव अंतरमताल डोलसि हिळु अरतोर, ओनगा होंचि तेहतारित्‍ते ओर हासि मत्‍तोर.
ACT 20:10 पौलुस हिळु रेय्‍सि ओन रोमबोच्‍चेक अदमुकुंचि, “वेरियमटु, इंदके ओनालोप्‍पो जीवा मंता,” इंचि इत्‍तोर.
ACT 20:11 आयंका पौलुस पोर्रो होत्‍तोर. हारिना तुकडां कीसि तिंचि पंगायनदाका ओरतोनि वळ्कसेक मत्‍तोर. पजा अगटाल पेय्सि होत्‍तोर.
ACT 20:12 लोकुल्‍क आ लेय्या पेडन जीवाते ओना लोन ओतुर, अदुनहाटीं ओर्कु बच्‍चोरो बेस अनपिस्ता.
ACT 20:13 मोमोट पौलुसुन अग्गेन होळसि डोंगाते उदसि मुन्‍नेन अस्सुस सहरतेके होत्‍तोम. पौलुस कुद अस्सुसदाका ताकसि वासि अगा माकु कलियंतन इंचि वेहतोर.
ACT 20:14 ओर अस्सुस सहरते माकु कलियतस्‍के, ओन डोंगाते एकिच्‍कुंचि मोमोट मितुलेन सहरते होत्‍तोम.
ACT 20:15 अगटाल पेय्सि इंकुंदि रोजु मोमोट, कियुस इनना दीबेता मुन्‍नेळ्‍क एवतोम. मर्रा इंकुंदि रोजु सामोस इनना दीबेतुन दाटसि होत्‍तोम. मर्रा इंकुंदि रोजु आतारित्‍ते मोमोट मिलेतुस इनना सहरते एवतोम.
ACT 20:16 बल्हा कीसन्‍ना गानि पेंतेकोस्‍त पंडुगुंक येरुसलेम सहरते मनगोम इंचि पौलुस गाबर आसेक मत्‍तोर. अदुनहाटीं आसिया एरियाते वेल्‍ले रोजकु आगिसि वेला बरबाद कियमळ इस्‍टम हिलाका, इपीसिते आगाकोंटा मुन्‍नेळ्‍क पेय्सि होनना विचारम कीतोर.
ACT 20:17 पौलुस इपीसि सहरता कलिसिया पेद्‍दाल्कुंक कबुर लोहचि ओर्कुन मिलेतुस सहरते ओनगा केयतोर.
ACT 20:18 ओर अंटोर वातारित्‍ते पौलुस ओरतोनि इल्‍हा वळकालय दल्‍गतोर. “नना आसिया एरियाते वातस्के, मोदाटा रोजुनाल मीवातोनि उंदि-उंदि निमसम बल्हा मत्‍तन, इद मीकु एरपाटे मंता.
ACT 20:19 यहुदिल्कुनाहेंदाल नाकु बच्‍चोनो कस्‍टाल्‍क वातां. अयना, नना मनसुनाल गरिब आसि अळसेके सामिना सेवा कीतन.
ACT 20:20 मीवा बेसताहाटीं अवसरम मत्‍ता बदे पोल्‍ले आयि वेहालय नना बस्‍केने पजोळ्क आया हिल्‍लेन. नना अव पोल्‍लें अंटोर लोकुल्‍कुना नड्‍डुम, लोन-लोन होंचि वेरियाकोंटा कराहतन, इद संगति मीकु एर्के मंता.
ACT 20:21 पापाल्कुनाल मनसु मार्सकुंचि पेनदाहाटीं पिस्‍सट, अल्‍हेने मना येसु सामिना पोर्रो विस्वासम कीम्‍टु इंचि नना यहुदिल्कुंक, युनानि लोकुल्‍कुंक गवाइ हीसि वेहुंदुन.
ACT 20:22 इंदके पवित्र आत्मा वेहताप कियना इंचि नना येरुसलेम सहर होंचंतन. गानि अगा होत्‍तारित्‍ते नावद बतल आंतो नाकु एर्का हिल्‍ले.
ACT 20:23 उंदि पोल्‍ले मात्रम नाकु एरपाट मंता. अद बतल इत्‍ते, अन्‍नि सहरकुने जेल, कस्‍टाल्‍क नावाहाटीं एदुर हूळसंतां इंचि पवित्र आत्मा नाकु वेहासेक मंता.
ACT 20:24 नाकु नावा जीवाता पिकिर हिल्‍ले. नना अय्ते सिराप येसु सामिनहेंदाल नाकु दोर्कुता आ पंदेमतुन, सेवातुन पूरा कींतन. अद बतल इत्‍ते, पेनदा कुर्पाता बारेमते बेसता पोल्‍लेना गवाइ वेहामळ आंद.”
ACT 20:25 नना मी अंटोरतोनि कलियसि मंचि मीकु पेनदा राज्येमता बारेमते कराहसेक तिरियतन. मीवाव्टेटाल बोरेगुडा नाकुन मर्रा बस्‍केने हूळा पर्रिर इंचि नाकु एर्के.
ACT 20:26 दानहाटीं इय्याला नना वेहासेक मंतन गदा, मीवा लोप्पोटाल बोरन्‍ना आयिर, हासोत्‍ते दान्क जबाबदारी नना आयोन.
ACT 20:27 बारित्‍ते नना पेनदा पूरा इच्‍चातुन मीकु वेहालय बस्‍केने पजोळ्क होना हिल्‍लेन.
ACT 20:28 पवित्र आत्मा मीकुन मीवा कलिसियातोरपोर्रो कोहानोन-मेहानोन लेह्का पेर्कुत्‍ता. अद मंदातुन पेन कुद्‍दु दाना मर्रिना नेत्‍तुर हीसि असकुत्‍ता. अदुनहाटीं मीवद मिमेट अल्‍हेने मीवा जिम्मेदारिते मनना मंदातुनगुडा मिमेट बेस कापाळसेके मंटु.
ACT 20:29 नना होत्‍तारित्‍ते कतरनाक तोडेल्‍लिनसंटा मनकालोर मीवा नड्‍डुम वासि मीकु नुकसान कींतुर इद नाकु एरपाट मंता.
ACT 20:30 अचोने आयका मीवा लोप्पोटाले इच्‍चुर इसंटा मनकालोर पेय्संतुर गदा, ओर सिस्युल्कुन ओरा पज्जो इग्गुकुनालय आबद्‍दम पोल्‍लें वळकांतुर.
ACT 20:31 अदुनहाटींगे मिमेट हुसारते मंटु. मूड वर्सनदाका वरो-वरोंकु, नर्का-पियल अळसि-अळसि जेगर्ता मननाहाटीं वेहमळते नना बस्‍केने पजोळ्क होना हिल्‍लेन इद मति इर्रट.
ACT 20:32 इंदके नना मीकुन पेनदा कय्‍दे आनि दाना कुर्पाता कबुरता कय्‍दे अप्‍पजेपंतन. मीकुन बेस बेरसागोटना ताकत अद कबुरते मंता. पेन पवित्र कीता अंटोर लोकुल्‍कुना लोप्पो मीकुनगुडा वारसदार किया पर्रंता.
ACT 20:33 नना बस्‍केने बोनहेंदाले एंडि-बंगारम हिलाकोंटे बेसता कपडि गावाले इंचि आसे पडा हिल्‍लेन.
ACT 20:34 नना नावा कय्‍कुनतोने कबळ कीसि नावा अवसराल्कु आनि नातोनि मत्‍ता नावा दंटागाह्कुना अवसराल्कु तीरस्‍ता संगति मीकु कुद एरपाटे मंता.
ACT 20:35 वेल्‍लेन कस्‍टम कीसेके नादान मत्‍तोर्कुंक मनम बल्हा सहायम कियगोम इत्‍ता संगतितुन नना मीकु नावा हरेक कबळताल कीसि हुपिस्तन. “एतकुनुळकन्‍ना हियमळतेन एक्‍को सुकम मंता,” इंचि कुद्‍दु येसु सामि इत्‍ता पोल्‍लेतुन मतिते इरमळ बच्‍चोनो अवसरम मंता, इंचि इत्‍तोर.
ACT 20:36 इल्‍हा इंचि ओर टोंगरां ऊनसि, अंटोरतोनि कलियसि पारतना कीतोर.
ACT 20:37 अस्‍के ओर अंटोर इरगा अळसेके बेस पावरमतोनि पौलुसुंक कलियसि ओन बुरतुर.
ACT 20:38 मिमेट मर्रा ना मोकम बस्‍केने हूळा पर्रिर, इंचि पौलुस इत्‍ता पोल्‍लेताहेंदाल ओर अंटोर लोकुल्‍कुंक बागा दुक्‍कम वाता. पजा ओर अंटोर, ओन डोंगादाका सार्ला कीतुर.
ACT 21:1 ओर माकुन सार्ला कीतस्‍के मोमोट डोंगा उदसि सवरगा कोस इनना दीबेक होत्‍तोम. अगटाल इंकुंदि रोजु रुदास इनना दीबेक आनि अगटाल पतरा इनना सहर होत्‍तोम.
ACT 21:2 अगा माकु पिनिके इनना एरियाक होनानद उंदि डोंगा दोर्कता अय्ते मोमोट अंटे उदसि पेय्‍सतोम.
ACT 21:3 बस्के अय्ते माकु साइप्रस दीबे दिसालय दल्‍गता अस्‍के मोमोट दान मावा डेमा बाजुंक होळसि सिरिया एरियाहेके तिरियतोम. सूर सहर सिरिया एरियाते मत्‍ताहेंका डोंगाते मत्‍ता माल सूर सहरते रेहानद मत्‍ता. पजा मोमोटगुडा अग्गेन रेयतोम. अगा माकु सिस्युल्क कलियतुर अय्ते ओरतोनि मोमोट एडुं रोजकुनदाका आगतोम. ओर पवित्र आत्माहेंदाल, निमे येरुसलेम होनमा, इंचि पौलुसुन इत्‍तुर.
ACT 21:5 वारम आता पज्जो अगटाल मोमोट मावा पय्‍नेम पेय्‍सतोम. अगाटा विस्वासुल्‍क ओरा मुत्‍तोह्‍क, पिलाल्क अंटोर सहरता पलाते समुद्रम ओड्‍डुनदाका मातोनि वातुर. अगा मोमोट टोंगरां ऊनसि पारतना कीतोम.
ACT 21:6 ओर माकुन सार्ला कीतंका मोमोट डोंगा एकतोम, ओर ओरा लोहकुने वापस होत्‍तुर.
ACT 21:7 सूर सहरताल डोंगाते उदसि पय्‍नेम कीसेके मोमोट पोलेमा इनना सहरते वासि रेयतोम. अगाटा विस्वासुल्कुंक कलियसि ओरतोनि मोमोट उंदि रोज मत्‍तोम.
ACT 21:8 इंकुंदि रोजु मोमोट अगटाल पेय्सि कैसरिया सहर होत्‍तोम. अगा होंचि मोमोट, पिलिपुस पोरोलता पेनदा सेवाकुना लोन आगतोम. ई पिलिपुस येरुसलेम सहरते गाटो पंचि दोसनाहाटीं पेरता एडुर लोप्पोटाल वरोर मत्‍तोर.
ACT 21:9 ओन्क नालुं मरमिं आयवा मियाह्क मत्‍तां. अय्ते अव नालुंगुडा बविस्यवानि वेहुंदुं.
ACT 21:10 मोमोट अगा कोन्‍नि रोजकु आगसि मत्‍तोम, अस्‍के यहुदिया एरियाताल वरोर पेनदा कबुरतोर वातोर ओन पोरोल अगबुस.
ACT 21:11 ओर मावा दग्गेर्क वासि पौलुसना नडिता पट्‍टा तेंडकुंचि, ओना कय्‍कु-काल्‍कुन दोहकुंचि, “इद पट्‍टा बोनद अय्ते आंदो ओन येरुसलेम सहरते यहुदि लोकुल्‍क इल्हेन दोहाचि वेरे जातितोर्कुंक अप्पजेपंतुर, इंचि पवित्र आत्मा वेहासेक मंता,” इत्‍तोर.
ACT 21:12 इद केंजतारित्‍ते मोमोट आनि अगटा लोकुल्‍क, निमे येरुसलेम सहर होनमा, इंचि विनंति कीतोम.
ACT 21:13 अस्‍के, “इल्‍हा अळसि-अळसि नावा मनसुन कमजोर बारि कीसंतिर? नना येरुसलेम सहरते सिराप दोहांतुर इंचि आयो गानि, येसु सामिना पोरोलहाटीं हायालयगुडा तयार मंतन,” इंचि पौलुस इत्‍तोर.
ACT 21:14 मोमोट बच्‍चोन वेहिनागानि ओर केंजवाहेंका, पेनदा इच्‍चा मत्‍ताप जर्गिकांटी, इंचि मोमोट सपुडदाका आतोम.
ACT 21:15 इल्‍हा कोन्‍नि रोजकुन पजा मोमोट मावा तयारिं कीसि येरुसलेम सहर होत्‍तोम.
ACT 21:16 मावातोनि कैसरिया सहरतोर इच्‍चुर सिस्युल्क इंका वातुर. ओर माकुन साइप्रस दीबेतोर वरोर मनकल मनासोनना लोन ओतुर. मोदोलता विस्वासुल्‍कुनाल ओर वरोर सिस्युड आंदुर. माकु ओनागेन आगनद मत्‍ता.
ACT 21:17 मोमोट येरुसलेम सहर एवतस्‍के अगाटा विस्वासुल्‍क वेल्‍लेन आनंदमते माकुन कल्‍पुकुत्‍तुर.
ACT 21:18 इंकुंदि रोजु पौलुस माकुन अंटोर्कुन पीसि याकोबुंकु कलियालय होत्‍तोर. अगा येरुसलेम सहरतोर अंटोर विस्वासि पेद्‍दाल्क मत्‍तुर.
ACT 21:19 मोदाला पौलुस ओर्क अंटोर्क जोहार कीतोर. पजा पेन ओन दाना सेवाते वाळकुंचि यहुदि आयवोरा लोप्पो बता-बता कबाह्‍क कीता, अव उंदि-उंदि कबळता बारेमते ओर्क वेहतोर.
ACT 21:20 पौलुस वेहतद केंजसि पेद्‍दाल्क अंटोर पेनदा स्‍तुति कीतुर. पजा पौलुसुन, “दादा, बच्‍चोनो वेय्‍कुना मंदि यहुदिल्कु इगे विस्वासुल्‍क आतुर इत्‍ता संगति निमे हूळसेकेन मंतिन. ओर अंटोर मूसाना नियमतुन बेस पीसि ताकसेक मंतुर.
ACT 21:21 गानि, मूसाना नियमतुन पीसि ताकमट, मर्कुनद कतना कियमट इंका यहुदिल्कुना रीति-रिवाजकुन होळसीम्टु इंचि वेरे जातितोरा नड्‍डुम मनना यहुदिल्कुंक निमे कराहतिन इंचि बोरो इग्‍गे वेहतुर.
ACT 21:22 अय्ते इंदके बतल कीकोम मरि? निमे इगे वातिन इत्‍ता संगति ओर्कु बल्हैना तेळियंते.
ACT 21:23 अदुनहाटीं निमे मोमोट वेहताप कीम. महगा मोक्‍कु मोळ्‍ककुत्‍तोर नालुर मनकालोर मंतुर.
ACT 21:24 निमे ईरकुन नीतोनि ओम. ओरतोनि कलियसि नीवदगुडा सुद्‍दिकरन कीकुन. अचोने आयका ओरा तल्‍ला कोरियनाहाटीं कर्सुंक कोत्‍तां इंका निमेने हीम. इल्‍हा कीतिन इत्‍ते नीवा बारेमते केंजतद अंता वट्‍टि आबद्‍दमे. इंका निमे मूसाना नियम परकारमे ताकसंतिन इंचि ओर्कु तेळियसि दांता.
ACT 21:25 मोमोट अय्ते वेरे जातिता विस्वासुल्कुंक दीनकन्‍ना मुन्‍नेन उंदि सिट्‍टि रासि अव्टे, बोम्मांक मोळ्‍कतदुन तिनमट, गोंदके पिसकिसि हव्‍कता जिवरासिना हव्‍विं, नेत्‍तुर तिनमट, बोगमतनमताल लक्‍कु मंटु, इल्‍हा रासि लोहतोम,” इंचि इत्‍तुर.
ACT 21:26 इल्‍हा पौलुस आ नालुर्कुन पीसि इंकुंदि रोजु ओरतोनि कलियसि ओरगुडा सुद्‍दिकरन कीकुत्‍तोर. पजा अगटाल येरुसलेमता गुळिते होंचि, पुरागा सुद्‍दिकरन आयगोम इत्‍ते बच्‍चुं रोजकु एदुर हूळसेक मनापींतनो अदुन बारेमते पेर्मालोर्कुंक वेहतोर. अचोने आयका आकिरता रोजकुने ओनतोनि वाता हरेक मनकंक ओना सतताहेंदाल मोक्‍कु हियापींता इंचिगुडा वेहतोर.
ACT 21:27 एडुं रोजकु पूरा आयानवे मत्‍तां, आसिया एरियाताल वाता इच्‍चुर यहुदिल्क पौलुसुन गुळिते हूळतुर. ओर अंटोर लोकुल्‍कुंक पौलुसना बारेमते एकरेवुल्क वेहचि ओन पीतुर. पजा वरगेयसि, “इस्राएलता लोकुरिटा, मिमेट अंटोर माकु सहायम कीम्‍टु. ईर मनकल अन्‍नि एरियाने तिरियसि मना इस्राएलता लोकुल्‍कुना विरोदमते, मूसाना नियमता विरोदमते आनि ई गुळिता विरोदमते लोकुल्‍कुंक कराहसेक मंतोर. अचोने आयका इंदके युनानि लोकुल्‍कुन गुळिते केय्‍सि तच्‍चि पवित्रामाता गुळितुनगुडा हेळाहतोर,” इंचि इत्‍तुर.
ACT 21:29 (तोरोपिमुस पोरोलतोर वरोर इपीसिता मनकन पौलुसुनतोनि तिरियनेंके लोकुल्‍क हूळसि मत्‍तुर, ओने पौलुस गुळिते तत्‍तोर बारे इनकुत्‍तुर.)
ACT 21:30 अस्‍के पूरा सहरअंता गजबज आता. लोकुल्‍क अंटोर विच्‍चि वासि उंदगा जमा आतुर. पौलुसुन दोर्कापीसि गुळिताल पलाते इग्‍गिस ओसि, बिराना तल्‍पुक वाटतुर.
ACT 21:31 लोकुल्‍क ओन हव्कना विचारम कीसेक मननेंकेन रोमि पोलिस दलमता सिपाइल्कुना अदिकारिंक, पूरा येरुसलेम सहरते लोल्‍लि आता इंचि कबुर तेळियता.
ACT 21:32 अस्‍के ओर बिराना इच्‍चुर सिपाइल्कुन आनि दरोगालोर्कुन पीसि पौलुसुन तनना यहुदिल्कुनहेके पेय्सतोर. सिपाइल्कुना अदिकारि, सिपाइल्कुन हूळतारित्‍ते यहुदिल्क पौलुसुन तनमळ आपतुर.
ACT 21:33 पजा आ सिपाइल्कुना अदिकारि पौलुसनगा होंचि ओन पीसि गोल्सुकुने दोहनाहाटीं आदेस हीतोर. आयंका ओर लोकुल्‍कुन, ईर बोर आंदुर, ईर बतल कीतोर? इल्‍हा पूसकीतोर.
ACT 21:34 अस्‍के इच्‍चुर लोकुल्‍क उंदितीर, इंकिच्‍चुर लोकुल्‍क इंकुंदि तीर वेहालय आतुर. इल्‍हा वेल्‍लेन लोल्‍लि आसि निजम बतल ओन्क तेळिया पराहिल्‍ले. अदुनहाटीं ओर पौलुसुन किल्‍लाते ओयालय आदेस हीतोर.
ACT 21:35 पौलुस पायरिनगळ्‍क एवतस्‍के वेल्‍लेन मंदि लोकुल्‍क, “ओन हव्कट, ओन हव्कट,” इंचेके उंदेतीर मोत्‍कुंचेके इरगा लोल्‍लि कियालय दल्‍गुतुर. अदुनहाटीं सिपाइल्कुंक ओन ओरा बुजाल्कुन पोर्रो तेहकुंचि किल्‍लाता लोप्पो ओया पीता.
ACT 21:37 सिपाइल्क पौलुसुन किल्‍लाता लोप्पो ओयका मुन्‍ने, “नना नीतोनि बतलन्‍ना वळका पर्रांतना?” इंचि पौलुस सिपाइल्कुना अदिकारिन पूसकीतोर. अस्‍के आ सिपाइल्कुना अदिकारि, “अब्‍बा! नीकु युनानि बासागुडा वळका वांताना?
ACT 21:38 अय्ते मरि कोन्‍नि रोजकु मुन्‍ने रोम सरकारुंक विरोद कीसि, नालुं वेय्‍कुना आतंकवादिर्कुन बय्‍लि जेगाते केय्‍सि ओता इजिप्‍त देसेमता मनकन निमेन गदा?” इंचि पौलुसुन पूसकीतोर.
ACT 21:39 अस्‍के, “नना किलिकिया एरियाता उंदि बेस पोरोल होत्‍ता तरसुस सहरता यहुदि मनकन आंदुन. नना नीकु विनंति कींतन, ई लोकुल्‍कुनतोनि नाकुन वळका हीम,” इंचि पौलुस इत्‍तोर.
ACT 21:40 सिपाइल्कुना अदिकारिनहेंदाल वळकाना अदिकारम दोर्कतस्के पौलुस पायरिनपोर्रो नित्‍तिसि लोकुल्‍कुंक कय हुपिच्‍चि सपुडदाका मनालय सय्गे कीतोर. लोकुल्‍क सपुडदाका आतास्के पौलुस इब्रानि बासाते वेहालय दल्‍गुतोर.
ACT 22:1 “दादालोरिटा आनि पेद्‍दाल्कुनिटा, नाकु मीवा मुन्‍ने इच्‍चुर वळ्‍कानद मंता अदुन केंजट.” इंचि पौलुस वळकालय दल्‍गुतोर.
ACT 22:2 ओर इब्रानि बासाते वळकानदुन केंजसि लोकुल्‍क इंका इच्‍चो सपुडदाका आतुर.
ACT 22:3 “नना यहुदि मनकन आंदुन. नना किलिकिया एरियाता तरसुस सहरते पुटतन. इदे येरुसलेम सहरते बेर्सतन. इंका गमलियेल इनानोना कय्‍दा हिळु मंचेके ओनहेंदाल बेस सदवु करियतन. अचोने आयका मना पेद्‍दाल्कुना नियम्‍क, रीति-रिवाज्‍क मत्‍ताप बेस टेरनिंग दोर्कुता. मिमेट बल्हा अय्ते इय्याला पेनदाहाटीं मीवा बक्‍तितुन हुपिच्‍चंतिरो, अल्हेन ननागुडा हप्‍सुंदुन.
ACT 22:4 नना पेनदा हर्रि पीसि ताकाना लोकुल्‍कुन बच्‍चोनो तकलिप कीतन, दीनहेंदाल इच्‍चुर लोकुल्‍कुना जीवां इंका होत्‍तां. मुरतळ-मांडसा इनाकोंटा अंटोर्कुन पीसि जेलने वाटुंदुन.
ACT 22:5 पेद्‍दा पेर्माल आनि अंटोर यहुदि पेद्‍दाल्क नावा ई कबळहाटीं गवाइ मंतुर. अचोने आयका दमिस्‍क सहरते मनना यहुदि दादालोर्कुंक सिट्‍टिं रासि दमिस्‍क सहर होनालय पेय्सतन. अगा होंचि पेनदा हर्रि पीसि ताकानोर्कुन दोर्कापीसि येरुसलेमते तच्‍चि, ओर्कु सिक्‍सा आयगोम. इदे नावा उद्‍देसम मत्‍ता.”
ACT 22:6 इल्‍हा नना दमिस्‍क सहर होनालय पेय्सतन. नना दमिस्‍क सहर दग्गेर्क एवतन बारे! अस्‍के पियल वेलाक मब्बुनाल उंदेदम उंदि पेद्‍दा वेलगु नावा सुट्‍टु जग्गरा मेर्सता.
ACT 22:7 नना अल्हेन बूमिपोर्रो हिळु अरतन. अस्‍के उंदि अल्किर, “साऊल, साऊल! निमे नाकुन बारि तकलिप कीसंतिन?” इंचेके नाकुन इत्‍ता.
ACT 22:8 अस्‍के, निमे बोन आंदिन सामि? इंचि नना पूसकीतस्‍के, “निमे बोन अय्ते तकलिप कीसंतिनो आ नासरेत नाटेना येसुन आंदुन,” इंचि आ अल्किर इत्‍ता.
ACT 22:9 नावातोनि मत्‍तुर ओर अद वेलगुन हूळतुर गानि नावातोनि वळकता अल्किर मात्रम ओर्क केंजा वाया हिल्‍ले.
ACT 22:10 पजा, अय्ते नना बतल कीकन सामि? इंचि पूसकीतस्‍के, “निमे तेदसि दमिस्‍क सहरते होन. बव कबाह्‍क अय्ते कियालय नना नीकुन पेरकुत्‍तनो अव कबाह्‍क अगा नीकु वेहमळ जर्गंता.” इंचि सामि नाकु वेहतोर.
ACT 22:11 आ जग्गरा वेल्‍गुन हूळसि नावा कळकु दिस्‍साकोंटा आतां. अदुनहाटीं नावा दंटातुर नाकुन कय पीसि दमिस्‍क सहरते ओतुर.
ACT 22:12 अगा हनन्‍याल पोरोलतोर वरोर मनकल मत्‍तोर. ओर मूसाना नियम परकारम ताकुंदुर. अगाटा अंटोर यहुदिल्क इंका ओन बेस मनकल इनुंदुर.
ACT 22:13 ओर नाहेके वासि, नावा दग्‍गेरा नित्‍तिसि, “साऊल दादा! नीवा कळकु मर्रा दिस्सींकांटी,” इंचि इत्‍तोर. ओर अल्हा इत्‍ता इन्‍मळे नावा कळकु दिसालय दल्‍गतां. नना ओन हूळतन.
ACT 22:14 पजा ओर नाकुन, “मना एनकटा पेद्‍दाल्कुना पेन दाना इच्‍चातुन एरपाट कियालय, नीतिमंतुड आता दाना सेवकुन हूळालय, ओना तोळ्‍दा पोल्‍लेन केंजालय नीकुन पेर्कुत्‍ता.
ACT 22:15 निमे बतल अय्ते हूळतिन, बतल अय्ते केंजतिन अदुना बारेमते दानाहेंदाल अंटोर लोकुल्‍कुना मुन्‍ने गवाइदार आंतिन.
ACT 22:16 अय्ते इंदके आलसेम बारि कीसंतिन? तेदसि बापतिस्मा एतसि, सामिना पोरोलते पारतना कीम, अस्‍के ओर नीवा पापाल्कुन नोर्रांतोर,” इंचि इत्‍तोर.
ACT 22:17 आयंका नना येरुसलेम तिरियसि वासि गुळिते पारतना कीसेके मत्‍तन, अस्‍के अल्हेन दर्सनम हूळतन.
ACT 22:18 दर्सनमते मननेंकेन नना सामिन हूळतन, अस्‍के, “बिराना तेदसि येरुसलेम सहरताल पेय्सि होन, नावा बारेमते निमे वेहाना गवाइतुन ओर ओप्‍कुन्‍नुर,” इंचि सामि नाकु वेहतोर.
ACT 22:19 अस्‍के नना इत्‍तन. “सामि! यहुदिल्कुना दर्मसास्‍त्रम कराहना हरेक लोते होंचि नीपोर्रो विस्वासम कियानोर्कुन दोर्कापीसि ओर्कुन जेलने वाटता संगति आनि तंता संगति आ लोकुल्‍कुंक बेस एरपाटे मंता.
ACT 22:20 अचोने आयका नीवा गवाइदार स्‍टिपनुन हव्कानेंके, हव्कानंटे नावदगुडा कय मत्‍ता, इंचि हुपिच्‍चेक, ओन हव्कानोरा कपडिना कावेल कीसेक नना अग्गेन नित्‍तिसि मत्‍तन.
ACT 22:21 अस्‍के सामि नाकुन, निमे होन, नना नीकुन वेल्‍लेन लक्‍कु वेरे जातितोरा लोप्पो लोहंतन,” इंचि इत्‍तोर.
ACT 22:22 इद पोल्‍ले वेहनदाका यहुदि लोकुल्‍क पौलुसना बासन केंजतुर, पजा जोरसे वरगेयसि, “ई मनकल जीवाते मनमळ बेस आयो. इसंटा मनकन ई बूमिपोर्रोटाल हिलाकोंटा कीम्‍टु,” इंचि इत्‍तुर.
ACT 22:23 ओर जोर-जोरसे वरगेयसेक मत्‍तुर, अंगिपोर्रो केर्ता कोटकुन तेंडसि विसिरसेके मत्‍तुर, इंका मब्बुनहेके दुब्बा तेहासेक मत्‍तुर.
ACT 22:24 अस्‍के सिपाइल्कुना अदिकारि पौलुसुन किल्‍लाते ओयानाहाटीं आदेस हीतोर. “लोकुल्‍क ओना विरोदमते इल्‍हा बारिंक वरगेयसंतुर, कारनम बतल आंद तेळियनाहाटीं, ओन पोट्‍टे देब्बां तंचि-तंचि पूस कीम्‍टु,” इंचि वेहतोर.
ACT 22:25 गानि बस्के अय्ते पौलुसुन पोट्‍टे देब्बां तनालय दोहचेके मत्‍तास्‍के, “तप्पु कीतोर इंचि निरनायम पेय्‍सका मुन्‍नेन वरोन रोम रहिवासिन पोट्‍टे देब्बां तनमळ मीवाहाटीं न्‍यायामेना?” इंचि अगा नित्‍तिसि मत्‍ता वरोर दरोगान पौलुस पूसकीतोर.
ACT 22:26 अल्हा इत्‍तद केंजसि आ दरोगाल सिपाइल्कुना अदिकारिनगा होंचि, “मिमेट इद बतल कीसंतिर? ईर रोम रहिवासि अले,” इंचि ओन इत्‍तोर.
ACT 22:27 अस्‍के आ सिपाइल्कुना अदिकारि पौलुसनगा वासि, “नाकु वेहा, निमे रोम रहिवासिन आंदिना?” इंचि पूसकीतस्‍के, “आ” इंचि पौलुस इत्‍तोर.
ACT 22:28 पजा, “नना रोम रहिवासि आयानाहाटीं वेल्‍लेन कोत्‍तां कर्स कीतन,” इंचि आ सिपाइल्कुना अदिकारि इत्‍तस्के, “नना अय्ते पुट्तस्केटाले रोम रहिवासिन आंदुन,” इंचि पौलुस इत्‍तोर.
ACT 22:29 पजा ओन पूसकियालय हूळसेक मत्‍ता सिपाइल्क बिराना पजोळ्क आतुर आनि सिपाइल्कुना अदिकारिगुडा, रोम देसेमता वरोन रहिवासिन दोहाचि वाटतोम, इंचि वेल्‍ले वेरियकुत्‍तोर.
ACT 22:30 यहुदि लोकुल्‍क पौलुसुनपोर्रो बारि दोसेम दोस्तुर. निजम बतलो पलाते अरगोम इंचि सिपाइल्कुना अदिकारिना मनसुने मत्‍ता. अदुनहाटीं सिपाइल्कुना अदिकारि इंकुंदि रोजु, पेद्‍दा पेर्मालोर्कुन आनि यहुदिल्कुना पेद्‍दा पंचादितोर्कुन जमा आयालय आदेस हीतोर. अंटोर जमा आतास्के पौलुसुन पेचाहचि ओरा मुन्‍ने तच्‍चि निलाहतोर.
ACT 23:1 पौलुस पेद्‍दा पंचादितगा जमातोर्कुन उंदेतीर हूळसि, “नावा दादालुरिटा! नना, इय्यालादाका पेनदा मुन्‍ने बेसता मनसुने पिसतन,” इंचि इत्‍तोर.
ACT 23:2 अस्‍के हनन्‍याल इनना पेद्‍दा पेर्माल, “ओना तोड्‍डि पोर्रो तन्‍नाटु,” इंचि पौलुसुना पक्‍काते नित्‍तिसि मत्‍तोर्कुंक आदेस हीतोर.
ACT 23:3 अस्‍के पौलुस ओन, “ए चुना होकता गुरेतसंटोना! पेन नीकुन तनंता. बारित्‍ते, निमे दर्मसास्‍त्रमता नियम मत्‍ताप नावा न्‍यायम कियालय उदतिन, गानि दानकु अड्‍डम नाकुन तनालय आदेस बल्हा हीतिन?” इंचि इत्‍तोर.
ACT 23:4 अस्‍के पक्‍काते नित्‍तिसि मत्‍तुर, “निमे पेनदा पेद्‍दा पेर्माना अपमानम कीसंतिना?” इंचि इत्‍तुर.
ACT 23:5 “दादालुरिटा, ईर पेद्‍दा पेर्माल आंदुर इंचि नाकु एरपाट मनाहिल्‍ले. बारित्‍ते, ‘नीवा अदिकारिनाहाटीं सेड्‍डा पोल्‍ले वळका मन्‍नि,’ इंचि नियमते रासि मंता,” इल्‍हा पौलुस इत्‍तोर.
ACT 23:6 अगा यहुदिल्कुना पंचादिते उद्‍दिसि मत्‍ता लोकुल्‍कुने इच्‍चुर सदुकिर आनि इच्‍चुर परिसिल्कु मंतुर इंचि पौलुसुंक तेळियतस्के, ओरा मुन्‍ने जोरसे वरगेय्‍सि, “दादालोरिटा! नना परिसिन आंदुन. नावा तादल-बाबोगुडा परिसिल्कु आंदुर. हातोर मर्रा जीवाते तेदांतुर इत्‍ता ओरा आसेतुन नना विस्वासम कीताहाटीं मीवा मुन्‍ने निल्‍सि मंतन,” इंचि इत्‍तोर.
ACT 23:7 ओर इल्‍हा इत्‍तारित्‍ते परिसिल्कु आनि सदुकिर लोप्पो लोल्‍लि आसि, ओर अलग-अलग आतुर.
ACT 23:8 बारित्‍ते, हातुर मर्रा जीवाते तेदुर, पेनदा दूतां हिल्‍लें, आत्मां हिल्‍लें इल्‍हा सदुकिर इंतुर. गानि परिसिल्कु बारे इव अन्‍नि मंतां इंचि इंतुर.
ACT 23:9 अगा वेल्‍ले लोल्‍लिं आतां. अगा उद्‍दिस मत्‍ता परिसि दर्मसास्‍त्रम कराहना गुरुल्कुनाल इच्‍चुर तेदिसि, “माकु ईना लोप्पो बतल तप्पु दिस्सेक हिल्‍ले. ईनतोनि बदाना आत्मा हिलाकोंटे बदाना पेनदा दूता वळकिस मंदार,” इंचि इत्‍तुर.
ACT 23:10 इल्‍हा ओरा लोप्पो इच्‍चोर लोल्‍लिं आतां गदा, पौलुसुन हव्कानुर बारे इंचि सिपाइल्कुना अदिकारि वेरियतोर. पजा, “पौलुसुन ओरागटाल अलग कीसि किल्‍लाते पीसि ओम्ट,” इंचि सिपाइल्कुंक आदेस हीतोर.
ACT 23:11 अदे नर्का सामि पौलुसनगा वासि, “पौलुस निमे वेरियमा. बल्हा निमे येरुसलेमते नावा गवाइ हीतिन, अल्‍हेने रोम सहरते इंका नीकु नावा गवाइ हियनद मंता,” इंचि इत्‍तोर.
ACT 23:12 इंकुंदि रोजु हक्‍केरे पौलुसुन हव्कालय यहुदिल्कु पिलान कीसि, ओन हव्कवा मोमोट तिन्‍नोम-उन्‍नोम, इंचि ओट्‍टु तित्‍तुर.
ACT 23:13 इल्‍हा पिलान कीतोरु नल्‍पै मंदिकन्‍ना एक्‍को मत्‍तुर.
ACT 23:14 ओर पेद्‍दा पेर्मालोर्कुनगा आनि यहुदि पेद्‍दाल्कुनगा होंचि, “मोमोट बच्‍चोरदाका पौलुसुन हव्‍कोम, अच्‍चोरदाका मोमोट बतले तिन्‍नोम-उन्‍नोम इंचि गट्‍टिगा ओट्‍टु तित्‍तोम.
ACT 23:15 अदुनहाटीं इंदके मिमेट आनि यहुदिल्कुना पेद्‍दा पंचादितोर कलियसि सिपाइल्कुना अदिकारिनगा होंटु. अगा होंचि, पौलुसुन, इंका बेस पूसकियानद मंता, ओन महगा लोहचीम, इंचि तेडियागोटसि वेहाट. ओर मिहगा एव्‍वका मुन्‍नेने ओन हव्कालय तयारते मनंतोम,” इंचि इत्‍तुर.
ACT 23:16 गानि पौलुसुन हव्कालय कोरसंतुर इंचि पौलुसुना हेलटा मर्रि केंजतोर. अस्‍के ओर किल्‍लाते होंचि पौलुसुंक पूरा वेहतोर.
ACT 23:17 वेहतारित्‍ते पौलुस वरोन दरोगान केय्‍सि, “ई लेय्योन सिपाइल्कुना अदिकारिनगा ओम, ईर ओन्क बतलो वेहंतोर अले,” इंचि इत्‍तोर.
ACT 23:18 अस्‍के दरोगाल सिपाइल्कुना अदिकारिनगा ओसि, “जेलने मनना पौलुस ईन मीहेके तायालय नाकुन विनंति कीतोर. ईर नीकु बतलो वेहंतोर अले,” इंचि इत्‍तोर.
ACT 23:19 पजा आ सिपाइल्कुना अदिकारि ओना कय पीसि, बोरे हिल्वगा ओसि, “वेहा, नावातोनि बतल वळकानद मंता?” इंचि पूसकीतोर.
ACT 23:20 अस्‍के लेय्योड, “यहुदिल्क उंदि आसि, पौलुसुन इंका बेस गट्‍टिगा पूसकियाना बहानाते नाडि यहुदिल्कुना पेद्‍दा पंचादिते केयागोटनाहाटीं, नीकुन विनंति कींतुर.
ACT 23:21 गानि निमे ओरा पोल्‍लें केंजमा. बारित्‍ते, नल्‍पैकन्‍ना एक्‍को लोकुल्‍क पौलुसुन हव्कवा मोमोट तिन्‍नोम-उन्‍नोम इंचि ओट्‍टु तित्‍तुर. निमे ‘ओन ओम्टु’ इंचि आदेस हियानद एदुर हूळसंतुर,” इंचि वेहतोर.
ACT 23:22 वेहतस्के, आ सिपाइल्कुना अदिकारि, “निमे नाकु इव पोल्‍लें वेहतिन इंचि बोर्के वेहमा,” इंचि आ लेय्योन लोहचीतोर.
ACT 23:23 अस्‍के आ सिपाइल्कुना अदिकारि ओना इव्वुर दरोगालोर्कुन केय्‍सि, “रोंडु नुह्कु सिपाइल्क, डेब्बै मंदि गुर्राल्कुनपोर्रो उद्‍दिस होनानुर, रोंड नुह्कु गोर्कां पियानोर्कुन नर्काटां तोम्मिद एगानेंके कैसरिया सहरते होनालय तयार इर्रट.
ACT 23:24 पौलुसुन ओयालय गुर्राल्कुन तयार इर्रट. ओन बेस कापाळसि पिलिक्‍स राज्यपालनगा ओम्टु,” इंचि वेहतोर.
ACT 23:25 ओर उंदि इल्‍हा सिट्‍टि रासतोर.
ACT 23:26 “महाराज पिलिक्‍स राज्यपाल नीकु, कलादियुस लुसियाना हेंदाल जोहार.
ACT 23:27 यहुदिल्क ई मनकन पीसि हव्कसेक मत्‍तुर, गानि ईर रोम रहिवासि इंचि नना केंजतस्के सिपाइल्कुन पीसि होंचि ओरागटाल ओन पिसागोटतन.
ACT 23:28 ओना तप्पु बतल आंदु, इदुन एरपाट कियालय ओन ओरा पेद्‍दा पंचादिते ओतन.
ACT 23:29 अगा ओर, ओनपोर्रो तप्पुक दोसतव अन्‍नि ओरा दर्मसास्त्राल्कुना हेंदाले मत्‍तां. अदुनहाटीं ओन हव्कनसोंटा हिलाकोंटे ओन जेलने वाटानसोंटा तप्पु ओनगा दिसा हिल्‍ले.
ACT 23:30 गानि ओन बोरो हव्कना मंता इंचि नाकु तेळियतस्के, ओन बिराना नीहेके लोहचीतन. ओनपोर्रो तप्पु दोस्सानोर बोर अय्ते मंतुर ओर नीवा मुन्‍ने वासि ओना तप्पु बतलो नीकु वेहगोम इंचि ओर्क आदेस हीतन,” इंचि सिट्‍टि रासतोर.
ACT 23:31 सिपाइल्कुंक बल्हा आदेस हीतोर, अल्‍हेने पौलुसुन पीसि नर्कटद-नर्केन अंतिपत्रि सहरते ओतुर.
ACT 23:32 इंकुंदि रोजु गुर्राल्कुनपोर्रो होनानोर्कुन ओनतोनि होनालय होळसि, कळमातोर किल्‍लाते तिरियसि वातुर.
ACT 23:33 ओर कैसरिया सहरते एवतारित्‍ते राज्यपालुंक सिट्‍टि हीसि पौलुसुन ओना मुन्‍ने निलाहतुर.
ACT 23:34 राज्यपाल सिट्‍टि हद्‍विसि, “निमे बद एरियातोन,” इंचि पौलुसुन पूसकीतोर. ओर किलिकिया एरियातोर इंचि तेळियतारित्‍ते,
ACT 23:35 “नीवा पोर्रो तप्पु दोस्सानुर इगे वातारित्‍ते नीवा न्‍यायम कींतन,” इंचि ओर इत्‍तोर. पजा पौलुसुन, हेरोद राजाना किल्‍लाते मनना जेलने इर्सि, ओना पहारा कीम्‍टु, इंचि आदेस हीतोर.
ACT 24:1 हेय्युं रोजकु आतारित्‍ते हनन्‍याल इनना पेद्‍दा पेर्माल, इच्‍चुर यहुदि पेद्‍दाल्कुन, तिरतुल्‍लुस पोरोलतोर वकिलुन पीकुंचि कैसरिया सहरते वासि, राज्यपालुना मुन्‍ने पौलुसना विरोदते केस कीतोर.
ACT 24:2 राज्यपाल पिलिक्‍स, पौलुसुन केयतारित्‍ते, तिरतुल्‍लुस इनना वकिल पौलुसुनपोर्रो तप्पु दोस्‍सि इल्‍हा इनालय दल्‍गतोर, “राज्यपाल सायाब, नीवाहेंदाल मोमोट वेल्‍ले रोजकुनाल सांतिते मंतोम, नीवा तेल्विहेंदाल मावा देसेम सुदरांचेके मंता.
ACT 24:3 दीन मोमोट अन्‍नि जेगाने, अन्‍नि तीरकुने, पूरा मनसुने ओप्‍कुंतोम.
ACT 24:4 नना नीकु वेल्‍लेने पोल्‍लें वेह्‍चि तिप्‍पल किय्योन, गानि मावां रोंड पोल्‍लें केंजा इंचि विनंति कींतन.
ACT 24:5 ई मनकल जगडाल्‍क पुटिच्‍चानोर, दुनियाते मनना अंटोर यहुदिल्कुंक होंग वायागोटनोर आनि ईर नासरेत पार्टिता लीडर आंदुर.
ACT 24:6 मावा गुळितुनगुडा हेडहासेक मत्‍तोर, गानि ईन मोमोट दोर्का पीतोम. (मावा नियम मत्‍ताप ईना न्‍यायम कींतोम इंचि मोमोट हूळतोम,
ACT 24:7 गानि सिपाइल्कुना अदिकारि लुसियाल वासि जबरदस्‍तिते ईन महागटाल इग्‍गिस ओतोर.
ACT 24:8 तप्पु दोस्‍सनुर मीवा मुन्‍ने वायना इंचि आदेस हीतोर.) मोमोट ईना पोर्रो बव तप्पुक अय्ते दोसतोम अव अन्‍नि निजमा-आबद्‍दमा निमेने पूस कीसि हूळा, पूसकीते नीकु पूरा तेळियसि दांता,” इंचि इत्‍तोर.
ACT 24:9 अस्‍के यहुदिल्कगुडा ओनाहेके आसि, इवन्‍नि पोल्‍लें निजमे, आंदुं इंचि इनालय दल्‍गतुर.
ACT 24:10 पजा राज्यपाल, पौलुसुन वळकालय सय्गे कीतस्‍के पौलुस इल्‍हा वळकालय दल्‍गुतोर. “निमे वेल्‍लेने वर्सानाल ई देसेमते न्‍यायम कीसेक मंतिन इंचि तेळियता. अदुनहाटीं नीवा मुन्‍ने नना कुसिते नावा पोल्‍लें वेहंतन.
ACT 24:11 नना येरुसलेमते पेनदुन मोळकालय होंचि पन्‍नेंडु रोजकुंकन्‍ना एक्‍को आयाहिल्‍ले, इद पोल्‍ले निजमे इंचि नीकु तेळियार.
ACT 24:12 नना गुळिते बोनतोने लोल्‍लि कीतद ईर हूळा हिल्‍लुर, दर्मसास्‍त्रम कराहना लोहकुने आयि, सहरते आयि, लोकुल्‍कुनतोनि जगडम पुटिस्तदगुडा ईर हूळा हिल्‍लुर.
ACT 24:13 इंदके नीवा मुन्‍ने, नावापोर्रो दोस्ता तप्‍पुकुन ईर निजम कीसि हुप्‍सा पर्रुर.
ACT 24:14 गानि उंदि पोल्‍लेतुन नीवा मुन्‍ने नना ओप्‍कुंतन. नना पेनदा हर्दे ताकसि, मना पेद्‍दाल्कुना पेनदा सेवा कींतन. आ हर्दुन ईर तप्‍पुड पार्टि इंतुर. मूसाना नियमते, पेनदा कबुरतोरा नियमते रासतव अन्‍नि पोल्‍लेनपोर्रो नना विस्वासम कींतन.
ACT 24:15 नीतिते ताकानोर, नीतिते ताकवोर इव्वुरगुडा हातोरा लोप्पोटाल मर्रा जीवाते तेदांतुर इंचि ईर आसे इरताप, ननागुडा पेनदापोर्रो आसे इरंतन.
ACT 24:16 अदुनहाटीं नना पेनदा मुन्‍ने आयि, लोकुल्‍कुना मुन्‍ने आयि, बस्‍केळ्‍क बेस मनसुने ताकालय हूळंतन.”
ACT 24:17 नना वेल्‍लेने वर्सानाल येरुसलेमते हिलाका मत्‍तन, गानि इंदके मावा गरिब लोकुल्‍कुनाहाटीं दान-दर्मम एविच्‍चि हियालय आनि गुळितगा पेनदुक मोक्‍कु हियालय वासि मत्‍तन.
ACT 24:18 नना गुळितगा सुद्‍दिकरन कीकुंचि, दंडकाल्क महानेंके नाकुन हूळतुर. अस्‍के अगा वेल्‍ले मंदि मना हिल्‍लुर, लोल्‍लि मनाहिल्‍ले.
ACT 24:19 गानि आसियाताल वातुर इच्‍चुर यहुदिल्क अगा मत्‍तुर. नावदगिंटा बतलन्‍ना तप्पु मंचि मत्‍ते, ओर नीवा मुन्‍ने वासि, नापोर्रो तप्पु दोस्‍सि मन्‍नेर.
ACT 24:20 हिलाकोंटे, नना यहुदि पंचादिते निल्‍सि मत्‍तास्‍के नावद बतल तप्‍पु दोर्कुतानो, अदन्‍ना इग्‍गे मत्‍तोर वेहिरकांटी.
ACT 24:21 “हातोर मर्रा जीवाते तेदांतुर,” इंचि ओरा मुन्‍ने नना जोरते इत्‍तन. इद उंदे पोल्‍लेताहेंदाल नावा न्‍यायम मीवा मुन्‍ने जर्गसेक मंता, इंचि पौलुस इत्‍तोर.
ACT 24:22 पिलिक्‍सुंक, पेनदा हर्दा बारेमते बेस एरपाट मत्‍ता. अदुनहाटीं न्‍यायम कियानद आपसि, “सिपाइल्कुना अदिकारि लुसियाल वातारित्‍ते नीवा पोल्‍लेता पय्सला कींतन,” इंचि इत्‍तोर.
ACT 24:23 पजा, “ईन दोहाकोंटा जेलते इर्रा, ईना दंटातुर बतलन्‍ना हियालय वाते ओर्कुन आपमा,” इंचि दरोगांक आदेस हीतोर.
ACT 24:24 कोन्‍नि रोजकु आतारित्‍ते पिलिक्‍स ओना यहुदि जातिता मुत्‍तो दुरसिल्‍लानतोनि अगा वातोर. पजा पिलिक्‍स पौलुसुन केया लोहतोर. अय्ते, येसु किरिस्‍तुनपोर्रो विस्वासम इर्राना बारेमते पौलुस ओर्कु वेहतोर.
ACT 24:25 गानि बस्के अय्ते, सत्‍तेमते बल्हा ताकाना, बल्हा ओप्‍केते मनना, पेन दुनियातोरा न्‍यायम आकिरते बल्हा किय्‍यार इव पोल्‍लेना बारेमते पौलुस पिलिक्‍सुनतोनि चर्चा कीतोर, अस्‍के पिलिक्‍स वेरियसि, “इंदके निमे होन, वेला दोर्कतस्के नना नीकुन मर्रा केयंतन,” इंचि पौलुसुन इत्‍तोर.
ACT 24:26 पौलुस कोत्‍तां हियानुर बारे इंचि पिलिक्‍स आसे पळसि ओन ऊके-ऊके केय्‍सि ओनतोनि वळ्‍कुंदुर.
ACT 24:27 रोंडु वर्सां इल्हेने पेय्सि होत्‍तारित्‍ते पिलिक्‍सना जेगाते पुरकियुस पेसतुस पोरोलतोर राज्यपाल आतोर. पिलिक्‍स होनना वेलाते, यहुदिल्कुन कूस कियानाहाटीं पौलुसुन जेलतेन इरतोर.
ACT 25:1 पेसतुस राज्यपाल कैसरिया सहरते वासि, मूड रोजकु आतारित्‍ते, अगटाल येरुसलेम सहरते होत्‍तोर.
ACT 25:2 अगा पेद्‍दा पेर्मालोर आनि यहुदि पेद्‍दाल्क वासि पेसतुस राज्यपालना मुन्‍ने पौलुसुनपोर्रो तप्पु दोस्तुर.
ACT 25:3 पौलुसुन नड्‍डुम हरदेन हव्कना विचारम मत्‍ताहाटीं, “मावा पोर्रो दया कीसि ओन येरुसलेमते लोहचीम इंचि पेसतुस राज्यपालुन ओर विनंति कीतुर.”
ACT 25:4 अस्‍के पेसतुस इत्‍तोर, “पौलुस कैसरिया सहरता जेलते मंतोर, नना बिराना अगा दांतन.
ACT 25:5 अदुनहाटीं मिहागटाल यहुदि पेद्‍दाल्कुन नावातोनि लोहचीम्टु. आ मनकानद बतलन्‍ना तप्पु मत्‍ते, ओना तप्पुन मिमेट हुप्‍सा परांतिर,” इंचि इत्‍तोर.
ACT 25:6 पेसतुस राज्यपाल एनमिदि पदि रोजकु ओरतोनि मंचि, कैसरिया सहरते वापस होत्‍तोर. इंकुंदि रोजु कोरटते न्‍यायम कियाना जेगातगा उद्‍दिस पौलुसुन तायालय आदेस हीतोर.
ACT 25:7 पौलुस वातारित्‍ते, येरुसलेमताल वाता यहुदिल्कु ओना सुट्‍टु निततुर. ओनपोर्रो पेद्‍दा-पेद्‍दा तप्पुक दोस्तुर, गानि उंदिंका तप्पु निजम कीसि वेहा पर्राहिल्‍लुर.
ACT 25:8 अस्‍के, “नना यहुदिल्कुना दर्मसास्‍त्रमता नियमकुना अड्‍डम बतले कबळ किया हिल्‍लेन, गुळितगा बतले तप्‍पु कबळ किया हिल्‍लेन, कैसर राजांक अड्‍डम बतले वळका हिल्‍लेन,” इंचि पौलुस इत्‍तोर.
ACT 25:9 पौलुस अल्हा इत्‍तस्के, यहुदिल्कुन कूस कियालय, “इव पोल्‍लेना न्‍यायम येरुसलेमते नावा मुन्‍ने आयागोम इंचि नीवा मनसु मंताना,” इंचि पेसतुस पौलुसुन पूसकीतोर.
ACT 25:10 अस्‍के पौलुस इल्‍हा जवाब हीतोर, “इंदके नना कैसरना कोरटतगा नित्‍तिसि मंतन, इग्‍गेने नावा न्‍यायम आयापींता. यहुदिल्कुना विरोदमते नना बतल तप्‍पु किया हिल्‍लेन इंचि नीकुगुडा बेस एरपाट मंता.
ACT 25:11 ओक्‍कला नना तप्‍पु कीतोन आसि, नावा तप्‍पु हामुर सिक्‍सालायक मनानय्ते, नना हायालय तयार मंतन. गानि बव पोल्‍लेन पोर्रोटाल अय्ते लोकुल्‍क नापोर्रो तप्‍पु दोस्सेक मंतुरो, अव पोल्‍लें ओक्‍कला आबद्‍दम पेय्‍सानय्ते, नाकुन बोरे ओरा कय्‍दे हिया पर्रुर. नावा न्‍यायम इग्‍गे आयाकोंटे, कैसर राजाना मुन्‍ने आयागोम इंचि कोरसंतन.”
ACT 25:12 जवाबुने पेसतुस ओना पंचादिते उदता पेद्‍दाल्कुनतोनि वळ्‍किसि, “निमे कैसर राजानगा न्‍यायमताहाटीं विनंति कीतिन अय्ते ओनागेन दाकिन,” इंचि इत्‍तोर.
ACT 25:13 कोन्‍नि रोजकु आतारित्‍ते, अग्रिपा राजाल आनि ओना हेलड बर्निका, पेसतुस राज्यपालुंक कलियालय कैसरिया सहरते वातुर.
ACT 25:14 ओर इव्वुर वेल्‍लेने रोजकु अगा मत्‍तुर. मत्‍तस्के, पेसतुस राज्यपाल पौलुसुना न्‍यायमता बारेमते अग्रिपा राजांक इल्‍हा वेहतोर. मुन्‍नेटा पिलिक्‍स राज्यपाल, वरोर मनकन इग्‍गेने जेलने इरसि होत्‍तोर.
ACT 25:15 नना येरुसलेमते मत्‍तास्‍के, पेर्मालोर्क आनि यहुदि पेद्‍दाल्क ओनपोर्रो तप्पु दोस्‍सि, ओन्क सिक्‍साता आदेस हियालय नाकुन इत्‍तुर.
ACT 25:16 अस्‍के नना ओर्कुन इल्‍हा इत्‍तन, “बदवेरदाका अय्ते तप्पु कीता मनकल, तप्पु दोस्तोरा मुन्‍ने नित्‍तिसि, ओना तप्पुना बारेमते वळ्कोरो, अदवेरदाका ओन्क सिक्‍सा हियना रोमि लोकुल्‍कुना रिवाज हिल्‍ले,” इत्‍तन.
ACT 25:17 अल्हा इत्‍तस्के, ओर लोकुल्‍क नावातोनि इग्‍गे वातुर. नना आल्सेम कियाका, इंकुंदि रोजु न्‍यायम कियाना जेगातगा उद्‍दिस, आ मनकन तायालय आदेस हीतन.
ACT 25:18 ओनपोर्रो तप्पु दोस्सानुर नित्‍तिसि ओना तप्पुक वेहतुर, गानि नना इनकुत्‍ताप बदे तप्पु ओनपोर्रो वेहा हिल्‍लुर.
ACT 25:19 सिराप ओर ओरा दर्मता बारेमते आनि येसु पोरोलता वरोर हासोत्‍ता मनकना बारेमते ओरा लोल्‍लि मत्‍ता. गानि पौलुस मात्रम हासोत्‍ता येसु जीवाते मंतोर इंचि इंतोर.
ACT 25:20 इसोंटा पोल्‍लेन बल्हा न्‍यायम कीकन इंचि नाकु तेळियाकोंदु. अदुनहाटीं नना, “इव पोल्‍लेना पय्सला कियालय येरुसलेम दांतिना?” इंचि ओन पूसकीतन.
ACT 25:21 अस्‍के पौलुस इत्‍तोर, “नावा न्‍यायम कैसर राजानगा आयागोम, अदवेरदाका इग्‍गेने जेलते मनंतन,” इंचि विनंति कीतोर. अदुनहाटीं नना ओन कैसरनगा लोहनदाका ओर इग्‍गेने मन्‍निर, इंचि आदेस हीतन.
ACT 25:22 अस्‍के अग्रिपा राजाल, “आ मनकल इनना पोल्‍लें नाकु केंजना मनसु मंता,” इंचि पेसतुसुनतोनि इत्‍तोर. “अल्हा अय्ते, ओना पोल्‍लें नाडि केंजकिन,” इंचि पेसतुस इत्‍तोर.
ACT 25:23 इंकुंदि रोजु अग्रिपा राजाल आनि बर्निका बेस सोक आसि वातुर. सिपाइल्कुना अदिकारिल्‍क, सहरता पेद्‍दा मनकालोर्कुनतोनि कूळसि पंचादि कियाना जेगाते ओर होत्‍तुर. अस्‍के, पौलुसुन पीसि वटु, इंचि पेसतुस आदेस हीतारित्‍ते, पौलुसुन तत्‍तुर.
ACT 25:24 अस्‍के पेसतुस राज्यपाल इत्‍तोर, “अग्रिपा राजाल आनि इगे जमा आता लोकुरिटा! ई मनकन मिमेट हूळसंतिर, येरुसलेमतोर आनि इग्‍गेटुर वेल्‍लेटोरगुडा यहुदिल्क नहगा वासि, ईन जीवाते इरमळ बेस आयो, इंचि वरगेयसेक विनंति कीतुर.
ACT 25:25 गानि ईर हामुटा सिक्‍सालायक बतले तप्पु कियवाप नाकु दिसता. ओर कुद कैसर राजाना मुन्‍ने न्‍यायम आयागोम इंचि विनंति कीतोर, अदुनहाटीं ईन कैसर राजानहेके रोमते लोहना विचारम कीसेक मंतन.
ACT 25:26 गानि ईना बारेमते कैसर राजांक बतल रासाना नाकु तेळिया हिल्‍ले. अदुनहाटीं ईना पोल्‍लें केंजता पजा, बदन्‍ना पोल्‍ले नाकु रासालय दोर्कार बारे इंचि मीवा मुन्‍ने ईन तत्‍तन, कास कीसि अग्रिपा राजाना मुन्‍ने तत्‍तन.
ACT 25:27 जेलते मत्‍ता मनकना बारेमते ओना तप्पु बतले वेहवा, उंदे मल्का ओन कैसर राजानगा लोहमळ नाकु बेस दिस्सो,” इंचि इत्‍तोर.
ACT 26:1 “इंदके नीवा पोल्‍लें वेहा परांतिन,” इंचि अग्रिपा राजाल पौलुसुन इत्‍तोर. अस्‍के पौलुस, नना वळकंतन, इंचि वेहालय ओना कय तेहचि वळकुमळ सुरुव कीतोर.
ACT 26:2 अग्रिपा राजा! यहुदिल्क नावापोर्रो बव पोल्‍लेना बारेमते अय्ते तप्पु दोस्तुरो, अव अन्‍नि पोल्‍लेन नीवा मुन्‍ने वेहालय नाकु मोका दोर्कता इंचि नना कूस आसेक मंतन.
ACT 26:3 कास कीसि, यहुदिरा रीति-रिवाजकु, ओरा विचाराल्‍कुना बारेमते नीकु बेस एरपाट मंता. अदुनहाटीं दया कीसि नावा नना वळ्‍काना पोल्‍लेन बेस केंजा इंचि विनंति कींतन.
ACT 26:4 नना सिन्‍ना मत्‍तस्केटाल नावा लोकुल्‍कुनतोनि येरुसलेमते मत्‍तन. अदुनहाटीं नावा ताकमळ, नावा पिस्वर बल्हा मत्‍ता अंटोर यहुदिल्कुंक एरपाटे मंता.
ACT 26:5 (यहुदिल्क मोदोटाले नाकुन एरपाट कींतुर. अदुनहाटीं नावा बारेमते गवाइ वेहाना ओरा मनसु मत्‍ते, मावा दर्मता रीति-रिवाजकुन अंटोर्कन्‍ना एक्‍को नोमानोन ननाने इंचि ओर वेहा परांतुर) मावा दर्मतां रीति-रिवाजकुन, परिसिल्कु अंटोर्कन्‍ना एक्‍को नोमुंदुर, अवने नना वरोन परिसिन आंदुन. इदुन यहुदिल्कु बेस एरपाट कींतुर. ओर इनकुत्‍ते इद पोल्‍लेता गवाइगुडा हिया परांतुर.
ACT 26:6 पेन मावा एनकटा पेद्‍दाल्कुंक पोल्‍ले हीसि मत्‍ता, अदे पोल्‍ले निजम इंचि नना आसे पडतन. अदुनहाटींगे, इंदके नावा न्‍यायम आयना मंता.
ACT 26:7 अदे पोल्‍ले पूरा आंता इत्‍ता आसेते, मावा पन्‍नेंडु गोत्राल्कुना इस्राएल लोकुल्‍क पूरा मनसुने नर्का-पिय्यल उंदेतीर पेनदा सेवा कीसंतुर. इदे बरोसा इरताहाटीं राजा, यहुदिल्क नावापोर्रो दोसेम दोस्तुर.
ACT 26:8 अयना, पेन हातोर्कुन मर्रा तेहंता इत्‍ता पोल्‍लेपोर्रो मीवा लोप्पोटाल बोनके विस्वासम बारि हिल्‍ले?
ACT 26:9 मुन्‍ने ननागुडा, नासरेत नाटेना येसुना पोरोलता विरोदमते वेल्‍लेने कबाह्‍क किय्‍याना इंचि विचारम कीसि मत्‍तन.
ACT 26:10 येरुसलेमते नना अल्हा कीतनगुडा. पेर्मालोरकुनाहेंदाल अदिकारम दोर्किच्‍कुंचि, वेल्‍लेटुर पेनदा लोकुल्‍कुन नना जेलने वाटतन. पेनदा लोकुल्‍कुन हव्कानेंके, हव्कट इंचि नना ओप्‍कुनुंदुन.
ACT 26:11 हरेक दर्मसास्‍त्रम कराहना लोते, ओर येसुना अपमानम कियानादाका, ओर्कुन नना तिप्‍पल्‍क किया वेहुंदुन. ओरापोर्रो नाकु इच्‍चोर होंग वायुंदु गदा, ओर्कुन तकलिप कियालय नना पलाते सहरकुनेगुडा होनुंदुन.
ACT 26:12 अल्‍हेने उंदि मल्का नना पेर्मालोरकुनाहेंदाल अदिकारम एत्‍कुंचि दमिस्‍क सहर होंचेके मत्‍तन.
ACT 26:13 होननेंके पिय्यल आता नना हर्देने मत्‍तन, अस्‍के मब्बुनाल उंदि पोळ्‍दुंकन्‍ना एक्‍को वेलगु नावा आनि नातोनि मत्‍तोरा सुट्‍टु मेर्सता.
ACT 26:14 मेर्सतस्के मोमोट अंटोरम हिळु अरतोम. अस्‍के नाकु उंदि अल्किर केंजावाता, अद इब्रानि बासाते नाकुन इल्‍हा इत्‍ता, “साऊल, ए साऊल, नाकुन निमे बारि तकलिप कीसंतिन? मुल्कि पोर्रो कादे तंते नीके कस्‍टम,” इंचि केंजावाता.
ACT 26:15 अस्‍के, “सामि निमे बोन आंदिन?” इंचि नना पूसकीतन. सामि इत्‍तोर, “निमे बा येसुनय्ते तकलिप कीसंतिन ओने नना आंदुन.
ACT 26:16 गानि इंदके निमे तेदसि, काल्कुनपोर्रो नित्‍ता. नावा बारेमते निमे हूळता पोल्‍लेन अल्हेन नना नीकु हुप्‍सना पोल्‍लेन लोकुल्‍कुंक गवाइ वेहालय, नावा सेवक इंचि नीकुन निलाहंतन.
ACT 26:17 नना नीकुन नीवा यहुदिल्कुनगा आनि यहुदि आयवोरगा लोहांतन, अल्हेन ओरागटाल नीकु कापाळंतन.
ACT 26:18 ओर्कुन हीकटताल वेल्‍गुनहेके, देय्यमता अदिकारमताल पेनदाहेके तिरियना हर्रि हुप्‍सालय नीकुन लोहसेक मंतन. ओर अल्हा तिरियते, ओरा पापाल्क मापि आंतां, अल्‍हेने नापोर्रो बोर अय्ते विस्वासम कीसि पवित्र आतुरो, ओरतोनि ओर्कु वारसाहक्‍क दोर्कार,” इंचि येसु नाकु वेहतोर.
ACT 26:19 अदुनहाटीं अग्रिपा राजा! पोर्रोटाल नाक हुपिस्‍ता दर्सनम हूळसि, अद आदेस परकारम ताकतन.
ACT 26:20 आयंका, मुन्‍ने दमिस्‍क सहरतोर्कुंक, पजा येरुसलेमते मनानोर्कुंक, यहुदियाता पूरा एरियाते मनानोर्कुंक आनि वेरे जातितोर्कुंकगुडा मनसु मार्सकुंचि पेनदागा वटु. वासि, मनसु मार्सकुत्‍तोरा लायकता बेसता कबाह्‍क कीसि हुप्‍सट, इंचि वेहतन.
ACT 26:21 इदे कारनमहेंदाल यहुदिल्क नाकुन गुळिते पीसि हव्कालय हूळसेक मत्‍तुर.
ACT 26:22 गानि इदवेरदाका पेन नाकुन सहायम कीता. अदुनहाटीं नना इग्‍गे नित्‍तिसि सिन्‍नाल्क, पेद्‍दाल्क अंटोर मुन्‍ने गवाइ हीसेक मंतन. बव पोल्‍लें अय्ते आयानव मंतां इंचि पेनदा कबुरतोर आनि मूसाल मुन्‍नेन वेहतुर, अव पोल्‍लें तप्‍पा नना वेरे बतले वेहोन.
ACT 26:23 अव पोल्‍लें बव इत्‍ते, किरिस्‍तुंकु तकलिप्‍कु बोगांचा पींता आनि हातोरा लोप्पोटाल ओरे मोदाला मर्रा जीवाते तेदसि, यहुदिल्कुंक, यहुदि आयवोर्कुंक वेलगुना बारेमता पोल्‍लें वेहंतोर, इंचि पौलुस इत्‍तोर.
ACT 26:24 इल्‍हा ओर वेहासेक मननेंके पेसतुस वरगेयसि, “पौलुस निमे पागल आतिन. एक्‍को करियतदे नीकुन पागल कीसंता,” इंचि इत्‍तोर.
ACT 26:25 अस्‍के पौलुस इल्‍हा इत्‍तोर, “पेसतुस महाराज, नना पागल आया हिल्‍लेन, निजमतुन नना बेस बुद्‍दिते वेहासेक मंतन.
ACT 26:26 ई पोल्‍लें मूलाते मक्‍किसि कीतव आयों. इवन्‍नि पोल्‍लें अग्रिपा राजांक बेस तेळियसे मंतां, इंचि नाकु विस्वासम मंता. अदुनहाटीं वेरियाकोंटा ओना मुन्‍ने वळ्कसेक मंतन.
ACT 26:27 अग्रिपा राजा! पेनदा कबुरतोर रासतवुन विस्वासम कींतिना, कियिना? निमे विस्वासम कींतिन नाकु एरपाटे,” इत्‍तोर.
ACT 26:28 अस्‍के, “बिरानेन नाकुन किरिस्‍तुनोन कियालय हूळसंतिना?” इंचि अग्रिपाल पौलुसुन इत्‍तोर.
ACT 26:29 अस्‍के “बिरानेन आयि, आल्‍सेमते आयि, सिराप निमेने आयो, इय्याला इग्‍गे केंजानोर अंटोर, इव बेडीं होळसि, कळमता अन्‍नि पोल्‍लेने नावालेसीं आयना इंचि पेनदुक पारतना कीसेक मंतन,” इंचि पौलुस इत्‍तोर.
ACT 26:30 अल्हा इत्‍तस्के, अग्रिपा राजाल, ओना हेलड बर्निका, राज्यपाल आनि ओरतोनि उद्‍दिस मत्‍तुर अंटोर तेदतुर.
ACT 26:31 अगटाल पलाते पेय्सि ओर-ओरे इल्‍हा वळकालय दल्‍गुतुर, “हामुर सिक्‍सालायक हिलाकोंटे जेल सिक्‍सालायक ईर बतले तप्पु किया हिल्‍लोर,” इंचि इत्‍तुर.
ACT 26:32 पजा, “कैसर राजाना मुन्‍ने नावा न्‍यायम आयगोम इंचि, ईर इनाकोंटा मंचि मत्‍ते, ईन होळसालय कुदुरवळ,” इंचि अग्रिपा राजल पेसतुसुन इत्‍तोर.
ACT 27:1 आयंका माकुन डोंगाते उद्‍दिस, इटलि एरियाते लोहाना निरनायम कीतुर. कीसि, पौलुसुनतोनि इच्‍चुर जेलने मत्‍तुर्कुन, अगस्तुस दलमता युलियुस पोरोलता दरोगाना कय्‍दे अप्पजेपतुर.
ACT 27:2 अद्रमुतियुम सहरता डोंगाते मोमोट उदतोम, अद डोंगा आसिया एरियाता ओड्‍डु पीसि मत्‍ता नाहकुनाल पेय्सता. मेसिडोनिया एरियाता तेसलोनि सहरतोर अरिसतरकुसगुडा मावातोनि मत्‍तोर.
ACT 27:3 इंकुंदि रोजु मोमोट सिदोन सहरतगा एवतोम. अगा एवतस्‍के युलियुस दरोगानकु पौलुसुनपोर्रो दया वाता. अदुनहाटीं पौलुसुना दंटागाह्‍क ओन अवरिचगोम इंचि, “निमे होंचि नीवा दंटागाह्‍कुंक कलियसि वा,” इंचि दरोगाल पौलुसुन इत्‍तोर.
ACT 27:4 अगटाल मोमोट पेयसनहेके वळि माकु एदुर मत्‍ताहाटीं साइप्रस दीबेता वळि वायवा बाजुनाल पेय्‍सतोम.
ACT 27:5 मर्रा मोमोट किलिकिया आनि पंपुलिया एरिया दग्‍गेटा समुद्रम दाटसि, लुकिया एरियाता मूरा इनना सहरतगा रेयतोम.
ACT 27:6 अगा सिकंदरिया सहरताल इटलि एरियाक होनालय डोंगा तयार मत्‍ता. माकुन ओयना दरोगाल अद डोंगाते उपिस्तोर.
ACT 27:7 वळि माक एदुर मत्‍ताहाटीं, मेल्‍लगा-मेल्‍लगा बच्‍चुंगो रोजकुनदाका वेल्‍ले कस्‍टमते कनिदुस सहरकु दग्‍गेरा एवतोम. एदुर वळि माकुन मुन्‍ने होना हियुवाहाटीं, मोमोट क्रेति दीबेता ओड्‍डु साटने, सलमोने इनना जेगा पक्‍का पीसि दाटतोम.
ACT 27:8 अदुन दाटसि, समुद्रमता ओड्‍डुनाल वेल्‍ले तकलिपने डोंगातुन मुन्‍नेळ्‍क जर्पुसेके, डोंगा नित्‍तना बेसता जेगा, इनना जेगातगा एवतोम. अगटाल लसया सहर दग्गेरेने मत्‍ता.
ACT 27:9 पय्‍नेमते वेल्‍ले रोजकु आसि ओक्‍कापोद्‍दुना रोजगुडा पेय्सि होत्‍ता. वातावरनम कराब मत्‍ताहाटीं डोंगातुन मुन्‍ने ओयालयगुडा वेर्रे मत्‍ता. अदुनहाटीं,
ACT 27:10 “दादालोरिटा! मनम इगेटाल पेय्सते वेल्‍ले तकलिप आंता इंचि नाकु अनपिच्‍चेक मंता. डोंगा आनि अवुने मत्‍ता सामानय्ते मुळगारे गानि मना जीवां इंका होना परांतां,” इंचि पौलुस डोंगाते मत्‍तोर्कुन इत्‍तोर.
ACT 27:11 गानि पौलुसना पोल्‍लेतुन दरोगाल केंजाका, डोंगा ताकिचनोर आनि डोंगा मालकुना पोल्‍लेतुन एक्‍को विस्वासम कीतोर.
ACT 27:12 अद जेगा पीनि कालमते (इग्गमते) मनालय बेस मनाहिल्‍ले, अदुनहेंके वेल्‍लेटुर लोकुल्‍क, “बच्‍चोन बिराना आया परते अच्‍चोन बिराना क्रेति दीबेता पिनिक्‍स सहरतगा होंचि आगते बेस मनंता,” इंचि इत्‍तुर. बारित्‍ते पिनिक्‍स सहरतगा डोंगां आगना उंदि जेगा इल्‍हा मंता: दक्‍सिन-पस्‍चिम आनि उत्‍तर-पस्‍चिमता हेंदाल होळिया वांता. पीनि कालमते अद जेगाते वळि दल्‍गो.
ACT 27:13 पजा दक्‍सिन बाजुनाल वळि मेल्‍लगा-मेल्‍लगा वासेके मत्‍तय्ते ओर इंदके मनम पिनिक्‍स सहरते एव्‍वा परांतोम इंचि इनकुत्‍तुर. अस्‍के ओर अगटाल लंगर तेहकुंचि क्रेति दीबेता ओड्‍डु साटने डोंगातुन होना हीतुर.
ACT 27:14 गानि गळसेम मत्‍तारित्‍ते दीबेता हेंदाल उंदि पेद्‍दा वळि दुमारम तेदता. दानु उत्‍तर-पूर्वी तुपान इंतुर.
ACT 27:15 मोमोट मत्‍ता डोंगा तुपान लोप्पो दोर्कता. आ तुपानता वळि एदुर मत्‍ताहाटीं डोंगा मुन्‍नेळ्‍क होना पराहिल्‍ले. अस्‍के मोमोट वळि दोब्बुतेके डोंगा होन्‍निकांटी इंचि दान अल्‍हेने होळसीतोम.
ACT 27:16 अल्हा मोमोट कौदा इनना सिन्‍ना दीबे साटने होननेंके, डोंगाता पज्जो दोहचि इग्गिसि ओयना पडवन वेल्‍लेन तकलिपने डोंगापोर्रो एक्‍किस्तोम.
ACT 27:17 पडवां पोर्रो एक्‍किसतारित्‍ते, डोंगाते कबळ कियानोर बच्‍चुंगो उपायाल्‍क कीसि डोंगातुन नोंडेने, सुट्‍टु इग्‍गिस दोहतुर. सुरतिस इनना उस्‍के जेगाते डोंगा दिगाबडार इंचि आ वेर्रेकु डोंगाता परदातुन रेह्‍चि, डोंगातुन वळिते होळसीतुर.
ACT 27:18 अस्‍के इंकुंदि रोजु वळि दुमारमते पक्‍का तकलिप आताहेंके ओर माल पोहचियालय दल्‍गुतुर.
ACT 27:19 मूडो रोजुने डोंगाता कबळ्‍क ओज्‍जना सामानगुडा ओरा कय्‍कुनेन पोहचीतुर.
ACT 27:20 पजा वेल्‍लेने रोजकु माकु पोळ्‍दु, सुक्‍कां दिसा हिल्‍लें. तुपानते पक्‍का वळि वायुंदु, मोमोट पिस्‍सोम इंचि आसे होळसतोम.
ACT 27:21 वेल्‍ले रोजकुनाल बोरे बतल तिना हिल्‍लुर. अस्‍के पौलुस ओरा नड्‍डुम नित्‍तिसि इल्‍हा इत्‍तोर. दादालोरिटा! नावा पोल्‍लें केंजसि क्रेति दीबेताल पेय्‍सका मंचि मत्‍ते, मनाकु ई तिप्‍पल वायाकोनवड, नुकसानगुडा आयाकोनवड.
ACT 27:22 अल्हा आयिनागानि मीकु विनंति कींतन, मिमेट दैरनेम इर्राट. मीवा लोप्पोटाल बोनदे जीवा होन्‍नो गानि डोंगाता मात्रम नुकसान आंता.
ACT 27:23 बारित्‍ते, बद अय्ते नावा पेन, नना अदे पेनदा सेवा कींतन दाना दूता निन्‍ने नर्का वासि, “पौलुस निमे वेरियमा, नीकु कैसर राजाना मुन्‍ने तप्‍पकोंटा नित्‍तना मंता, हूळा! नीतोनि डोंगाते मत्‍तुर अंटोर्कुनगुडा पेन पिसागोटंता,” इंचि इत्‍ता.
ACT 27:25 अदुनहाटीं दादालोरिटा! दैरनेम इर्राट. पेन नाकु बल्हा वेहता अल्‍हेने आयार, इंचि नाकु विस्वासम मंता.
ACT 27:26 गानि बल्हा अयना मनम बदन्‍ना दीबेतगा उस्केते होंचि हिरकंतोम, इंचि इत्‍तोर.
ACT 27:27 पडनालुं रोजकु आयिना, मोमोट अद्रिया समुद्रमता एते हीके-हेके वळिक तिरियसेक मत्‍तोम. तिरियसेक मननेंके नळजाम नर्काटा वेलाकु मनम बदन्‍ना ओड्‍डुंक एवतोम बारे इत्‍ताप डोंगा ताकसानोर्कुंक अनपिस्ता.
ACT 27:28 ओर समुद्रमता लोतु कहतुर अय्ते अगा नूटा इरवै पूटकु मत्‍ता. इंका इच्‍चुर लक्‍कु होत्‍ता पजा मर्रा कहतुर अय्ते अस्‍के टोंबै पूटकु मत्‍ता.
ACT 27:29 अस्‍के, बंडाना लोप्पो डोंगा हिरकार बारे इंचि वेरियसि, ओर डोंगाता पज्‍जोटा बाजुंक नालुं लंगर्कु वाटसि बस्के पंगांता इंचि हूळसेक मत्‍तुर.
ACT 27:30 डोंगा ताकसानोर्कु अगटाल वित्‍ताना मत्‍ताहाटीं, “डोंगाता मुन्‍नेटा बाजुंक लंगर्कु वाटंतोम,” इंचि बोंकिच्‍चि पडवां रेहतुर.
ACT 27:31 अस्‍के पौलुस, “ईरगिंटा डोंगाते मनाकोंटे मिमेट इंका पीस्‍सिर,” इंचि सिपाइल्कुना अदिकारिन आनि सिपाइल्कुन इत्‍तोर.
ACT 27:32 अस्‍के सिपाइल्क, पडवां दोहता नोंडेन नेमाहचि पडवन एते अरहतुर.
ACT 27:33 पंगायना वेलाते पौलुस अंटोर्कुन गाटो तिननाहाटीं विनंति कीसि इल्‍हा इत्‍तोर, “तुपान मग्‍गंता इंचि मिमेट एदुर हूळ-हूळसि, इय्यळ्‍क पडनालुं रोजकु आसंता. उपासम मंतिर, बतले तिना हिल्‍लिर.
ACT 27:34 अदुनहाटीं मिमेट गाटो तिंटु इंचि विनंति कीसेक मंतन. तित्‍तेने मिमेट जीवाते मनांतिर. मीवा लोप्पोटाल वरोनदगुडा तल्‍लाता उंदि केल्‍ददगुडा नुकसान आयो,” इंचि इत्‍तोर.
ACT 27:35 अल्हा वेह्‍चि, अंटोरा मुन्‍ने ओर हारि पीतोर. पेनदुक दन्यवाद कीसि, हारितुन तुकडां कीसि तिनालय दल्‍गुतोर.
ACT 27:36 ओन हूळसि, अंटोर्क हिम्मत वाता, ओरगुडा तिनालय दल्‍गतुर.
ACT 27:37 डोंगाते मोमोट अंटोरम रोंडु नुहकुना डेब्बै हारुर (276) मंदि मत्‍तोम.
ACT 27:38 ओर पीरनिंडा गाटो तित्‍तारित्‍ते, डोंगाते मत्‍तव गोह्कुन समुद्रमते पोहचि डोंगातुन अल्कगा कीतुर.
ACT 27:39 पंगातारित्‍ते ओर्कु समुद्रमता ओड्‍डु दिसता, गानि अद बद देसेम इंचि एरपाट किया हिल्‍लुर. कुदुरते डोंगातुन इदे ओड्‍डुंक दल्‍गिच्‍चि इरकोम इंचि विचारम कीतुर.
ACT 27:40 ओर लंगर्कुना नोंडें नेमाहचि, अवुन समुद्रमते होळसि, अस्‍केने पतवारकुंक दोहाचि मत्‍ता नोंडेंगुडा ओदोल कीतुर. ओदोल कीसि डोंगातुन वळि मुन्‍नेळ्‍क ओयि इंचि परदां एक्‍किचि डोंगातुन ओड्‍डुनहेके ओयालय दल्‍गुतुर.
ACT 27:41 गानि बगा अय्ते रोंड समुद्राल्क कलियंतां, असोंटा जेगातगा डोंगा होत्‍ता. अगा डोंगाता मुन्‍नेटा बाजु उस्केकु दल्‍गिसि, मुन्‍नेळक जर्गाकोंटा दिगाबळता. पज्‍जोटा बाजु बारे जोरते वायाना तडां दल्‍गिसि डोंगा पय्यालय आता.
ACT 27:42 अस्‍के कैदिल्कु बोरे ईतार्सि वित्‍ता मन्‍नि इंचि सिपाइल्क ओर्कुन हव्कना विचारम कीतुर.
ACT 27:43 गानि दरोगांक पौलुसुन पीसागोटनद मत्‍ता, अदुनहाटीं ओरा पिलानतुन आपिसि ओर्कु इल्‍हा आदेस हीतोर, “बोर्क अय्ते ईता वांता, ओर मुन्‍नेने डेयसि ओड्‍डुंक पेयसट.
ACT 27:44 कळमातोर बारे बल्‍लां आनि डोंगाता उरुंगता तुकडनपोर्रो उद्‍दिस पेयसट,” इंचि इत्‍तोर. इल्‍हा बोर्के बतल आयाकोंटा अंटोर ओड्‍डुंक पेय्‍सतुर.
ACT 28:1 इल्‍हा मोमोट ओड्‍डुंक पेय्सतारित्‍ते, अद माल्टा इनना दीबे इंचि माकु तेळियता.
ACT 28:2 आ दीबेते मनना लोकुल्‍क मावा पोर्रो वेल्‍ले दया हुपिस्तुर. पिर्रु, इरगा पीनि मत्‍ताहेंके, तडमि माससि माकुन बेस दग्‍गेरा केयकुत्‍तुर.
ACT 28:3 पौलुस जमा कीता कट्‍टेना हेरकितुन तडमिते वाटसेके मत्‍तोर. अस्‍के उंदि नय तरासु तळमि सेकाकु हेरकिताल पेय्सि ओना कय्‍दुक हुटकुत्‍ता.
ACT 28:4 तरासु कय्‍दुक वेलाड अरसि मत्‍तद हूळसि दीबेता लोकुल्‍क वरोंक-वरोर इल्‍हा इत्‍तुर, “निजमे, ईर तप्‍पाकोंटा बोनो गानि हव्कतोर. ईर समुद्रमताल अय्ते पिस्सि पेय्सतोर गानि न्‍यायम मात्रम ईन पिस्‍सा हियानाल हिल्‍ले,” इंचि इत्‍तुर.
ACT 28:5 गानि पौलुस आ तरासुन तळमितेन दुल्‍पिसि वाटतोर. ओन्कुगुडा बतल आयाहिल्‍ले.
ACT 28:6 ओना मेंदुल तोयार हिलाकोंटे ओर उंदे मल्का हिळु अरसि हायानुर इंचि लोकुल्‍क हूळसेक मत्‍तुर. वेल्‍लेनजेम आयिनागानि ओन्क बतले आयाहिल्‍ले. अस्‍के ओरा मनसु मार्सकुंचि, “ईर अय्ते बदो पेन आंदुर,” इंचि इत्‍तुर.
ACT 28:7 आ दीबेता पेद्‍दा अदिकारि पबलियुस इनानोना बूमिं दग्गेरेने मत्‍तां. ओर माकुन केय्‍सि ओसि मूड रोजकुनदाका हेडमितोर्कुन हूळकुत्‍ताप बेस हूळकुत्‍तोर.
ACT 28:8 पबलियुसुना बानकु एडकि वासेके मत्‍ता. अल्‍हेने नेत्‍तुर बयलि दोस्‍सि, कटुलते मींडसि मत्‍तोर. पौलुस ओनगा लोप्पो होंचि पारतना कीसि, ओनपोर्रो कय इरसि बेस कीतोर.
ACT 28:9 अल्हा आतद हूळसि आ दीबेते बिमार अर्सि मत्‍ता कळमतोरगुडा अगा वासि बेस आतुर.
ACT 28:10 ओर माकुन वेल्‍ले कदर कीतुर. मोमोट अगटाल पेय्सनेंके माकु बतल-बतल गावाले मत्‍ता अवन्‍नि डोंगाते तच्‍चि इरतुर.
ACT 28:11 मूड नेल्क आतारित्‍ते सिकंदरिया सहरताल वाता डोंगाते मोमोट पेय्‍सतोम. आ डोंगा पीनि कालम पेय्सनदाका माल्टा दीबेतगा आगसि मत्‍ता. डोंगाता मुन्‍नेटा बाजुंक एमडाल्‍कुना पेनकुना बोम्मा रेहचि मत्‍ता.
ACT 28:12 मोमोट सरकुस सहरते एव्‍सि, अगा मूड रोजकु मत्‍तोम.
ACT 28:13 अगटाल मोमोट तिरियसि रेगियुम सहरते एवतोम. इंकुंदि रोजु दक्‍सिन बाजुनाल वळि तेदता. अस्‍के मर्रा उंदि रोजु अगटाल पेय्सि पुतियुलि सहरते वातोम.
ACT 28:14 अगा माकु इच्‍चुर विस्वासुल्‍क कलियतुर. ओर माकुन ओरतोनि एडुं रोजकु मंटु इंचि इत्‍तुर. इल्‍हा मोमोट रोम सहरते एवतोम.
ACT 28:15 बस्के अय्ते रोम सहरता विस्वासुल्कुंक मोमोट वासेक इंचि तेळियता, अस्‍के ओर माकु कलियालय अप्पियुस हाटुमदाका वातुर. इंका आगाना मूड जेगा इनना नारदाका वातुर. ओर्कुन हूळसि, पौलुस पेनदुक दन्यवाद कीतोर, ओना दैरनेम बेरस्‍ता.
ACT 28:16 मोमोट रोम एवतारित्‍ते वरोर सिपाइना पहाराते पौलुसुंक मनालय अलग उंदि लोन दोर्कता.
ACT 28:17 मूड रोजकु आता पजा पौलुस अगाटा यहुदि पेद्‍दाल्कुन केयतोर. ओर उंदगा जमा आतारित्‍ते पौलुस ओरतोनि इल्‍हा वळकालय दल्‍गुतोर, “दादालोरिटा, मना लोकुल्‍कुन आयि मना एनकटा पेद्‍दाल्कुना रीति-रिवाजकुन आयि नना बतले किया हिल्‍लेन गानि नाकुन येरुसलेमते रोम लोकुल्‍कुना कय्‍दे यहुदिल्कु पीसि हीतुर.
ACT 28:18 रोमि अदिकारिल्‍क नावा चौकसि कीतारित्‍ते नाहेके हामुर सिक्‍सातसोंटा बतले तप्पु मनाहिल्‍ले. अदुनहाटीं ओर नाकुन होळसींतोम इत्‍तुर.
ACT 28:19 गानि, ‘ईन होळसियामन्‍नि’ इंचि यहुदिल्क इत्‍तुर. अदुनहाटीं, ‘कैसर राजानगा नावा न्‍यायम आयागोम,’ इंचि नना विनंति कीतन, अचोने. इगे नना नावा लोकुल्‍कुनपोर्रो दोसेम दोसालय वाया हिल्‍लेन.
ACT 28:20 ई पोल्‍लेन मीतोनि कलियसि वळ्कालय मीकुन केयतन. वरोर वायाना मंतोर इत्‍ता आसेते, इस्राएल लोकुल्‍क बोनद एदुर हूळसेक मत्‍तुर, ओर वातोर इंचि नना विस्वासम कीताहाटींगे नाक बेडीं अरतां,” इंचि पौलुस इत्‍तोर.
ACT 28:21 अस्‍के यहुदि पेद्‍दाल्‍क पौलुसुन इल्‍हा इत्‍तुर, “नीवा बारेमते यहुदिया एरियाताल बतले सिट्‍टि दोर्काहिल्‍ले. अगटाल वायाना दादालोरगुडा नीवा बारेमते बतल वेहा हिल्‍लुर, नीवा बारेमते बदे कराब पोल्‍लेगुडा इना हिल्‍लुर.
ACT 28:22 गानि अन्‍नि जेगाने नासरेत पार्टितोरा विरोदतेन वळ्‍कानद माकु एर्का मंता. अयना नीवा विचारम बतल मंता, इद मोमोट नीवाहेंदाले केंजंतोम,” इंचि इत्‍तुर.
ACT 28:23 अस्‍के ओनतोनि कलियालय उंदि रोजु पक्‍का कीतुर. पक्‍का कीता रोजुने ओर आगसि मत्‍ता लोतगा यहुदिल्कु वेल्‍लेटुर जमा आतुर. पौलुस हक्‍केटाल अय्ते पोळ्‍द होननदाका पेनदा राज्येम बारेमते ओर्कु गवाइ वेहतोर. अल्‍हेने मूसाना नियमताल आनि पेनदा कबुरतोर रासता पुस्तकाल्कुनाल येसुना बारेमते ओर्कु तेळियागोट्‍सि वेहतोर.
ACT 28:24 ओर वेहता पोल्‍लें इच्‍चुर्कु नच्‍चुतां, इच्‍चुर्कु नच्‍चुवा ओर विस्वासम किया हिल्‍लुर.
ACT 28:25 पजा ओरद-ओर्के वरोन पोल्‍लें वरोंक अर्राका, अगटाल तेदसि होनालय आयानेंके पौलुस इंकुंदि पोल्‍ले इत्‍तोर, पवित्र आत्मा यसायाह इनना पेनदा कबुरतोनाहेंदाल, मीवा एनकटा पेद्‍दाल्कुनतोनि वेहता पोल्‍ले निजमे आंदु, अद इल्‍हा मंता:
ACT 28:26 “निमे लोकुल्‍कुनगा होंचि इल्‍हा वेहा, मिमेट बस्‍केळ्‍क केंजसेके मनंतिर, गानि अर्तम कीकुन्‍निर. मिमेट बस्‍केळ्‍क हूळसेक मनंतिर, गानि एरपाट किय्‍यिर.
ACT 28:27 बारित्‍ते ई लोकुल्‍कुना मनसु गट्‍टिगा आता, ओर केव्‍कुने तक्‍को केंजांतुर, ओर ओरा कळ्‍क मुच्‍कुत्‍तुर. अल्हा कियाकोंटे ओर कळ्‍कुने हूळसि मन्‍नेर, केव्‍कुने केंजसि मन्‍नेर, मनसुने एरपाट कीसि मन्‍नेर, नावाहेके तिरियसि मन्‍नेर, नना ओर्कुन बेस कीसि मन्‍नेन.”
ACT 28:28 अदुनहाटीं, मुक्‍ति हियना कबुरतुन पेन वेरे जातितोरगा लोहता. ओर अदुन केंजंतुर, इंचि मिमेट एरपाट कियगोम.
ACT 28:29 पौलुस इव पोल्‍लें इत्‍तारित्‍ते यहुदिल्कु वरोंकु वरोर वरगेयसेके अगटाल पेय्सि होत्‍तुर.
ACT 28:30 अगा किरायता लोते पौलुस पूरा रोंड वर्सनदाका मत्‍तोर. बोर कलियालय वायिनागानि ओर्कुन बेस हूळुंदुर.
ACT 28:31 वेरियाकोंटा, आगाकोंटा पेनदा राज्येम बारेमते वेहुंदुर, येसु किरिस्‍तुना बारेमते कराहुंदुर.
ROM 1:1 नना पौलुस, येसु किरिस्‍तुना दासुन आंदुन. नना मीकु इद सिट्‍टि रासेक मंतन. येसु किरिस्‍तुना कबाह्‍क कियालय पेन नाकुन प्रेरित इंचि पेरता. पेरसि दाना बेसता कबुर वेहालय लोह्ता.
ROM 1:2 पेनबाबाल हींतन इत्‍ता इदे बेसता कबुरता बारेमते पेनदा कबुरतोर मुन्‍नेने पवित्र दर्मसास्‍त्रमते रासि इरतुर.
ROM 1:3 इद बेसता कबुर, मनकना रूपमते पुटसि वाता पेनदा मर्रिना बारेमते मंता. ओर दाविद राजाना वंसंमते पुटतोर.
ROM 1:4 गानि मना सामि येसु किरिस्‍ते पेनदा मर्रि आंदुर इंचि हुप्‍सालय पेन दाना पवित्र आत्माता ताकतहेंदाल ओन हातोरा लोप्पोटाल मर्रा जीवाते तेहता.
ROM 1:5 अंटोर लोकुल्‍क ओन विस्वासम कियना, ओर वेहताप ताकना इंचि पेन नावापोर्रो कुर्पा हुपिच्‍चि नाकुन येसुनहेंदाल प्रेरित इंचि निलाहता.
ROM 1:6 येसु किरिस्‍तुना लोकुल्‍क आयनाहाटीं केयतोरव्टे मिमेटगुडा मंतिर.
ROM 1:7 रोम सहरते मनना मीकु अंटोर्क ई सिट्‍टि रासि नना बतल वेहासेक इत्‍ते, पेनदुक मिमेट इत्‍ते वेल्‍लेन पावरम. इंका अद मीकुन दाना पवित्र लोकुल्‍क आयालय केयता. मना पेनबाबाल आनि येसु किरिस्‍तु सामिनहेंदाल मीकु कुर्पा, सांति दोर्कि.
ROM 1:8 मोदाला नना मीकु वेहानद बतल इत्‍ते, मीवा विस्वासम बारेमते पूरा दुनियाक तेळियसि होत्‍ता. इदुन मति कीसेक मीवा अंटोराहाटीं येसु किरिस्‍तुनहेंदाल पेनदुक दन्यवाद कींतन.
ROM 1:9 पेनदा मर्रिना बारेमता बेसता कबुरतुन वेहासेक, नावा पूरा मनसुनाल नना पेनदा सेवा कीसेक मंतन.
ROM 1:10 नना पारतना कियानस्के बस्‍केळ्‍क मीकुन मति कींतन. दीनकु आ पेने गवाइ मंता. पेनदा इच्‍चा मत्‍ते, ई मल्का अयना मिहगा वायना हर्रि दोर्कि इंचि इल्‍हागुडा नना पेनदुक पारतना कीसेक मंतन.
ROM 1:11 सामिनाहेंदाल नाकु दोर्कता आत्माता वराल्कुन मीतोनि पंचकुनना इंचि नावा इच्‍चा मंता. दीनहेंदाल मिमेट पेनदा बक्‍तिते गट्‍टिगा बेर्सकिर, अदुनहाटीं नना मिहगा वायालय हूळसंतन.
ROM 1:12 इत्‍ते, मीकु-नाकु मनालोप्‍पो मत्‍ता विस्वासमताहेंदाल मनम वरोंक-वरोर प्रोत्‍साहन कीकुनना इंचि नावा मनसु मंता.
ROM 1:13 विस्वासुल्‍कुनिटा! नना मीकु वेहानद बतल इत्‍ते, यहुदि आयवा लोकुल्‍कुंक बेसता कबुर वेह्‍चि ओर्क सहायम कीतन, अस्‍के ओर ओरा विस्वासमता पिस्वरते बेस बेर्सतुर. अल्हेन मिमेटगुडा मीवा विस्वासमता पिस्वरते बेस बेर्सना इंचि नना ऊके-ऊके मिहगा वायालय हूळुंदुन, गानि इदवेरादाका बतलन्‍ना-बतल अड्‍डम वासेक मत्‍ता, इद पोल्‍ले मीकु तेळियना इंचि नना वेहासेके मंतन.
ROM 1:14 युनानि बासा, युनानि रीति-रिवाजकु तेळियतोर, तेळियवोर लोकुल्‍कुंक आनि करियतोर्क, करियवोर्क इल्‍हा अंटोर्के पेनदा पोल्‍ले वेहना जिम्मेदारि नावा पोर्रेन मंता.
ROM 1:15 अदुनहाटीं रोम सहरते मनना मीकगुडा नना बेसता कबुर वेहालय तयार मंतन.
ROM 1:16 विस्वासम कियना अंटोर्कुंक, इत्‍ते मुन्‍ने यहुदिल्कुंक पजा युनानि लोकुल्‍कुंक मुक्‍ति हियालय ई बेसता कबुरते पेनदा ताकत मंता. अदुनहाटीं नना पेनदा बेसता कबुर वेहालय सिग्गु अर्रोन.
ROM 1:17 बारित्‍ते पेनदा मुन्‍ने मनकल नीतिमंतुड बल्हा आंतोर इत्‍ता पोल्‍ले बेसता कबुर मनाकु वेहंता. सुरुवनाल आकिरदाका विस्वासमतेन इद आया परंता. “नीतिमंतुल्क विस्वासमतोनि पिस्संतुर,” इंचि दर्मसास्‍त्रमते रासि मंता.
ROM 1:18 बेसता कबुर अंटोर लोकुल्‍कुंक एविच्‍चना अव्‍सरम बारि मंता इत्‍ते, सत्‍तेम हर्दे ताकवा लोकुल्‍क कराब कबाह्‍क कीसि सत्‍तेमतुन दबांचि इरतुर. निजम पेन हिल्‍ले इत्‍ताप ताकसि, तप्‍पुड कबाह्‍क कीतुर. अदुनहाटीं पेन ओरपोर्रो स्वर्गमताल दाना होंगुन हुप्‍संता.
ROM 1:19 निजमाता पेन दाना गुनाल्‍कुन अंटोर लोकुल्‍कुना मुन्‍ने हुपिस्ताहाटीं इव अन्‍नि पोल्‍लें ओर्क एर्के मंतां.
ROM 1:20 बल्हा इत्‍ते, इद दुनिया पुटतस्केटाल पेन तयार कीता दुनियातुन हूळते, दाना बस्‍केने दिसुवा गुनम, बस्‍केळ्‍क मनना ताकत मनाकु दिसंता. अदुनहाटीं पेनदुन एरपाट किय्‍योम इंचि मनकालोर इना परुर.
ROM 1:21 ओर पेनदुन अय्ते एरपाट कींतुरे, गानि पेनदुन बल्हा अय्ते तल्‍सकुनागोम अल्हा तल्सकुन्‍नुर इंका दाना कदरगुडा किय्युर. अल्हा किय्यका ओर अट्‍टि विचाराल्क कीसि ओरा मनसुने हीकटा कीकुत्‍तुर.
ROM 1:22 “मोमोट तेल्विगल्‍लोरम,” इंचि वेहकुंचि ओर बुद्‍दि हिल्‍वोरलेसीं आतुर.
ROM 1:23 बस्‍केळ्‍क नासडेम आयाकोंटा मंदना महिमागल्‍ला पेनदुन ओर मोळ्‍कका, दाना जेगाते नासडेम आयना मनकानव, पिट्‍टेनव, जिवरासिनव आनि तरासुनलेह्का बेंगना जिवरासिना बोम्मां कीसि मोळ्‍कालय दल्‍गतुर.
ROM 1:24 अदुनहाटीं ओरा मनसुने मत्‍ता बोगम विचाराल्कुन पूरा कीकुनालय पेन ओर्कुन होळसीता. अस्‍के ओर वरोना मेंदुल वरोंक कदर हिलाकोंटा बोगमतनाल्क कीतुर.
ROM 1:25 पेनदा बारेमता सत्‍तेम पोल्‍ले आबद्‍दम आंद, इल्‍हा इन्कुंचि ओर्कुन तयार कीता पेनदुन मोळ्‍कका, अद तयार कीतवुन पेन इंचि मोळ्‍कालय दल्‍गतुर. गानि अवुन तयार कीता पेने बस्‍केळ्‍ताहाटीं तल्‍सकुननालायक मंता, आमीन.
ROM 1:26 अदुनहाटीं पेन ओर्कुन ओरा मनसुंक वाता सिग्गु हिल्वा कबाह्‍क कियालय होळसीता. अस्‍के मुर्ताह्क मुय्दुरतोनि मींडानद होळसि, मुर्ताह्कुनतोनि मुर्ताह्के मींडसि बस्‍केने ओप्वा कबाह्‍क कियालय दल्‍गतां.
ROM 1:27 अल्‍हेने मांड्‍सागुडा ओरा मुत्‍तोह्कुनतोनि मींडानद होळसि, मांड्‍सातोनि मांड्‍सा मुत्‍तो-मुय्दोनलेह्का मींडसि बोगमतनम कियालय दल्‍गतुर. इसोंटा बोगमतनम कीताहाटीं ओर्क ओरा पिस्वरते रोगाल्क-तकलिप वासि सिक्‍सागुडा दोर्कता.
ROM 1:28 पेनदा सत्‍तेमता पोल्‍लेतुन ओर एरपाट कियालय हूळा हिल्‍लुर. अय्ते ओर बद कबळ कियमळ बेस आयो, अदे कबळ कियालय पेन ओर्कुन होळसीता.
ROM 1:29 ओरा लोप्पो अन्‍नि तीरकुना कराब कबाह्‍क, पगा, आस्‍ति, सीडातनम निंडिस होत्‍ता. चुगलीं कियमळ, कळ्‍क पोतमळ, हव्‍कमळ, जगडाल्‍क कियमळ, विरोद कियमळ, नळेह कियमळ इसोंटा गुनम निंडिस ओर इंकावरोना बारेमते कराब विचारम कियानोर आतुर.
ROM 1:30 इंकावरोन तेंडसि पोहानोर, पेनदुन हय्सवोर, गर्रा कियानोर, पोंगुळ वळ्कानोर, कराब पोल्‍लें पुटिच्‍चनोर, तल्‍लुर-बाबोना पोल्‍ले केंजवोर;
ROM 1:31 बुद्‍दि हिल्वोर, हीता पोल्‍लेपोर्रो ताकवोर, जीवा नोयवोर, दया हिल्वोर आतुर.
ROM 1:32 इसोंटा मनकालोर्कुंक पेनदाहेंदाल हामुरता सिक्‍सा तप्‍पो इंचि ओर्क एरपाट मंचिगुडा ओर इल्हे ताकंतुर. अचोने आयका अल्हा ताकानोर्कुन “बेस ताकसेक मंतिट,” इंचि मेच्‍चकुंतुर.
ROM 2:1 अरे तप्पु दोसना लोकुरिटा, मिमेट बोरन्‍ना आम्टु! मिमेटगुडा अदे तप्पु कियानोर आंदिर. अदुनहाटीं इंकावरोन पोर्रो मिमेट तप्पु दोसमट. इल्‍हा वेरेतोरपोर्रो तप्पु दोस्‍सि, मीवद मिमेटे “दोसिर्क” इंचि हुपिच्‍कुंतिर. दानहाटीं वेरेतोरपोर्रो तप्पु दोस्‍सि मिमेट तपिच्‍कुना परिर.
ROM 2:2 इसोंटा तप्पु कबाह्‍क कियानोरद पेन सत्‍तेमते न्‍यायम कीसि, ओर्क दगता सिक्‍सा हींता, इंचि मनाकु एरपाटे.
ROM 2:3 अय्ते मिमेटे वेहाट! बव कबाह्कुनहेंका मिमेट वेरेतोरपोर्रो तप्पु दोस्‍संतिरो, अवे कबाह्‍क मिमेट कीसि, पेनदा सिक्‍साताल तपिच्‍कुंतोम इन्कुंचंतिरा?
ROM 2:4 हिलाकोंटे दाना दया, ओप्के आनि मापितुन गम्मत इन्कुंचंतिरा? निजम बतले इत्‍ते, मिमेट मनसु मार्सकुनना इंचि पेने मीवापोर्रो दया हुपिस्‍ता, इद मीकु तेळियोना?
ROM 2:5 गानि गट्‍टि मनसु, हेंडुतनमहेंका बस्‍केने मिमेट मनसु मार्सा हूळिर. इल्‍हा कीसि मीवा सिक्‍सातुन मिमेटे बेरसागोटसंतिर. बस्के अय्ते पेन दाना होंगुन मीपोर्रो हुप्पिचि, मीकु सिक्‍सा हिय्यार अस्‍के लोकुल्‍क दाना सत्‍तेमता न्‍यायमतुन हूळानुर.
ROM 2:6 आ रोजुने पेन हरेक मनकना न्‍यायम ओर कीता कबाह्‍कुन हूळसि कींता.
ROM 2:7 बोर अय्ते बस्‍केळ्‍क बेसता कबाह्‍क कीसेके, पेनदाहेंदाल कदर, दोसेम हिल्वा पिस्वरतुन दोर्किच्‍कुनालय हूळांतुरो पेन ओर्क बस्‍केळ्‍क पिस्सना पिस्वर हींता.
ROM 2:8 गानि बोर अय्ते सत्‍तेमते ताकाकोंटा तप्‍पुड कबाह्‍क कीसेके सतताहाटीं पिस्संतुर, ओरपोर्रो पेन होंग आसि सिक्‍सा हींता.
ROM 2:9 तप्‍पुड कबाह्‍क कियना हरेक मनकंक तिप्‍पल्‍क, दुक्‍काल्क वांतां. अव्टे मोदाला यहुदिल्कुंक, पजा युनानिर्कुंक.
ROM 2:10 गानि अवे रोजकुने बेसता कबाह्‍क कीसेक ताकानोर्कुंक पेद्‍दातनम, कदर, सांति दोर्कार. अव्टे मोदाला यहुदिल्कुंक पजा युनानिर्कुंक.
ROM 2:11 बारित्‍ते पेन मोकम हूळसि कबळ किय्‍यो.
ROM 2:12 मूसाना नियम एरपाट हिल्वोर पापम कीते, मूसाना नियम परकारम सिक्‍सा आयाकोन्‍ना गानि सिक्‍सा अय्ते तप्‍पो. बोर अय्ते मूसाना नियम एरपाट मंचि पापम कीतुर, ओर्क मूसाना नियम परकारमे सिक्‍सा आंता.
ROM 2:13 बारित्‍ते, सिराप मूसाना नियम केंजानोर पेनदा मुन्‍ने नीतिमंतुल्क आयुर, गानि मूसाना नियम केंजसि दान परकारम ताकानोरे पेनदा मुन्‍ने नीतिमंतुल्क आंतुर.
ROM 2:14 यहुदि आयवोर्कुंक मूसाना नियम तेळियो. गानि ओक्‍कला ओरा मनसु मूसाना नियमते वेहताप मनानय्ते, ओर्क मूसाना नियम तेळियाकोन्‍ना गानि मूसाना नियम परकारम ताकतापे आंता.
ROM 2:15 मूसाना नियमकु ओरा मनसुने रासि मंतां इंचि ओर कियना कबाह्के हुप्‍संतां. दीनकु ओरा पिस्वरगुडा गवाइ मंता. बारित्‍ते ओर तप्‍पुड कबळ कियनेंके ओरा मनसे “इद तप्पु” इंचि दोसेम दोसंता. अल्‍हेने बेस कबळ कियनेंके ओरा मनसे ओर्क “इद बेस” इंचि वेहंता.
ROM 2:16 नना वेहना बेसता कबुर परकारम, बोर्क तेळियाकोंटा मनकालोर्क कीता कबाह्‍कुन पोर्रोटाल, अद रोजुने पेन येसु किरिस्‍तुनाहेंदाल लोकुल्‍कुना न्‍यायम किय्‍यार.
ROM 2:17 अय्ते इंदके मीवद मिमेट, “मोमोट यहुदिल्क” इंचि वेह्कुंतिर, मूसाना नियमपोर्रो विस्वासम इर्रंतिर, “मोमोट पेनदुक वेल्‍ले दग्गेटोर्कुम” इंचि पेद्‍दातनम वेह्कुंतिर,
ROM 2:18 मिमेट मूसाना नियम करियसि मंतिर इंचि पेनदा इच्‍चा बल्हा मंता आनि बेस हर्रि बद्‍दु इंचि मीकु तेळियता.
ROM 2:19 मिमेट इल्‍हा इंतिर गदा, “गुड्‍डिर्कुनलेसीं मनानोर्कुंक हर्रि हुप्‍संतोम, हीकटा पिस्वर पिसानोर्कुंक वेल्‍गुनलेसीं मनंतोम.”
ROM 2:20 मूसाना नियमते रासि मत्‍ता पोल्‍लेंगें सत्‍तेम आनि तेल्वि हियानव इंचि मीकु तेळियताहाटीं, “मुर्कालोर्कुंक बुद्‍दि वेहानोरम, पिलाल्कुंक कराहनोरम,” इंचि मिमेट इनकुंतिर.
ROM 2:21 अय्ते मरि वेरेतोर्कुंक कराहना पोल्‍लें मीवद मिमेटे बारि कराहकुनिट? “दोंगातनम कियमट” इंचि कराहचि मिमेटे दोंगातनम कींतिर.
ROM 2:22 बोगमतनम कियामन्‍नि इंचि कराहचि, मिमेटे बोगमतनम कींतिर. बोम्मांक मोळ्‍का मन्‍नि इंचि कराहंतिर, गुळिते होंचि दोसकुंतिर.
ROM 2:23 महगा मूसाना नियम मंता इंचि पेद्‍दातनम वेहकुंतिर गानि नियमते ताकका पेनदा कदरगुडा किय्‍यिर.
ROM 2:24 “मीवा इसोंटा कबाह्कुनहेंका यहुदि आयवोरा नड्‍डुम पेनदा अपमानम आंता,” इंचि दर्मसास्‍त्रमते रासिगुडा मंता.
ROM 2:25 मिमेट मूसाना नियम परकारम ताकानय्ते, कतना कीतद मीकु पाय्दा आंता. गानि मिमेटगिंटा मूसाना नियम परकारम ताकाकोंटे मिमेट कतना कीसिगुडा बतल पाय्दा हिल्‍ले.
ROM 2:26 बोरन्‍ना कतना कियवोर गिंटा मूसाना नियम परकारम ताकते, ओर कतना कियाकोन्‍नागानि पेनदा नदरते कतना कीतोना लेक्‍कातेन वांतोर.
ROM 2:27 मूसाना नियम मिहगा मंचि दाना परकारम कतना आसिगुडा मिमेट नियम परकारम ताकसेक हिल्‍लिर. अदुनहाटीं बोरद अय्ते कतना आयाहिल्‍ले, यहुदि आयवोर, मूसाना नियम मत्‍ताप ताकानोर मीपोर्रो दोसेम दोस्‍सनुर.
ROM 2:28 सिराप यहुदि जातिते पुटतोर, पलाताल कतना आतोर ईर निजम यहुदि मनकालोर आयुर.
ROM 2:29 बोर अय्ते पेनदा इच्‍चा मत्‍ताप ताकंतुर ओरे निजम यहुदिल्क आंदुर. मूसाना नियम परकारम पलाताल आतदे कतना आयो, गानि पेनदा आत्माहेंदाल मनसु मारियता मनकालोरे निजम कतना आता यहुदिल्क आंदुर. इसंटा मनकालोर लोकुल्‍कुना कदरतुन आयो गानि पेनदा कदरतुन पहकंतुर.
ROM 3:1 इद केंजसि, “अय्ते यहुदि आसि बतले पायदा हिल्‍लेना? कतनाकु इच्‍चोगुडा विलवा हिल्‍लेना?” इंचि मिमेट इनकुंतिर बारे.
ROM 3:2 विलवा अय्ते वेल्‍लेने मंता. अद बल्हा इत्‍ते, पेन दाना पोल्‍लेन मोट्‍टा मोदाला यहुदिल्कुंके हीता.
ROM 3:3 यहुदिल्कुना लोप्पो पेनदा पोल्‍ले केंजवोर इच्‍चुर मत्‍तुर. ओर अल्हा मत्‍तुर इंचि पेन विस्वासमतद आयो इनकुंचंतिरा?
ROM 3:4 अल्हा आयापर्रो. लोकुल्‍क अंटोर आबद्‍दम वळकानोर आयिना, पेन मात्रम बस्‍केळ्‍क निजम मनंता. बारित्‍ते दर्मसास्‍त्रमते, “निमे वळ्कते नीवा पोल्‍ले निजम इंचि दिस अर्रंता, निमे न्‍यायम कियनेंके नीवा पोल्‍ले गेल्‍संता,” इंचि रासि मंता.
ROM 3:5 मना तप्‍पुड कबाह्‍कुन हूळसि पेन बच्‍चोरो नीतिमंतुड इंचि एर्का आंता. इल्‍हा आतास्के पेन मनाकु सिक्‍सा हीसि अन्‍यायम कीसंता इंचि मनम इनकुना परंतोम. (इद नना मनकना विचारम मत्‍ताप वळ्‍कसंतन.)
ROM 3:6 गानि अल्हा इनकुनमळ तप्‍पु आंद, अल्हा गिंटा पेन कीते, अद दुनियातोरा न्‍यायम बल्हा किय्‍यार?
ROM 3:7 अचोने आयका, “मावा तप्‍पुड कबाह्कुनहेंदाल पेने सत्‍तेमतद इंचि तेळियसि दाना कदरगुडा वेल्‍लेन आसेके अय्ते, पेन माकुन पापिर्क बल्हा इना परंता?” इंचिगुडा इच्‍चुर लोकुल्‍क लोल्‍लि कींतुर.
ROM 3:8 इल्‍हा कियानोर, “पापम कीते बेस जर्गसेक गदा! अय्ते दट पापम कीकोम,” इंचिगुडा इंतुर. इंका इल्‍हा मोमोटे कराहतोम इंचि इच्‍चुर लोकुल्‍क मापोर्रो दोसेमगुडा दोसंतुर. गानि अल्हा कियानोर अंटोर्कुंक, पेन दगता सिक्‍सा हींता.
ROM 3:9 सरे! अय्ते मनम यहुदिल्कुम, यहुदि आयवोरकन्‍ना बेसतोर्कुमा? असले आयोम. बारित्‍ते यहुदिल्क आयिर, युनानिर्क आयिर. अंटोर पापम कीतोरे इंचि नना मीकु मुन्‍नेन वेहचि मत्‍तन.
ROM 3:10 दर्मसास्‍त्रमतेगुडा इदुना बारेमते इल्‍हा रासि मंता गदा: “बोरे नीतिमंतुड हिल्‍लोर, वरोरगुडा हिल्‍लोर.
ROM 3:11 निजम तेळियतोर बोरे हिल्‍लुर, वरोरगुडा हिल्‍लोर. पेनदुन पह्कानोर बोरे हिल्‍लुर.
ROM 3:12 अंटोर पेनदा निजम हरदाल तप्‍सि तप्‍पुड हर्दुक होत्‍तुर. कबळ्‍क ओज्जनलायक बोरे हिल्‍लुर, बेसता कबळ कियानोर बोरे हिल्‍लुर, वरोरगुडा हिल्‍लोर.
ROM 3:13 ओरा तोळ्‍दाल पेय्‍सना पोल्‍लें, बोंदा कुल्‍ला मत्‍ते पीनगुना गब्‍बु बल्हा वांता अल्हा मंतां. ओरा तोळ्‍दाल पेय्‍सना पोल्‍लें, इंकावरोन मुळाहनव आंदुं. तरासुना विसम वरोन बल्हा हव्कंता, अल्हेन ओरा पेदविनाल पेय्‍सना पोल्‍लें तकलिप कियानव आंदुं.
ROM 3:14 ओरा पोल्‍लें सापनेम आनि कयमुलतोनि निंडिस मंतां.
ROM 3:15 ओर बस्‍केळ्‍क इंकावरोन हव्कालय हूळसेक मनांतुर.
ROM 3:16 ओर बगा अय्ते दांतुर अगा नासडेम कीसि दुक्‍कमतुन हीसि दांतुर.
ROM 3:17 सांति बगा दोर्कंता अद हर्रि ओर्क एरपाट हिल्‍ले.
ROM 3:18 ओरा कळ्‍कुना मुन्‍ने पेनदा वेर्रे हिल्‍ले.”
ROM 3:19 मूसाना नियम परकारम बोर अय्ते ताकंतुर ओराहाटींगे मूसाना नियम मंता, इद मनाकु एरपाटे. अयना पेन न्‍यायम कियनेंके दुनियातोर अंटोर, इत्‍ते यहुदिल्क आयिर यहुदि आयवोर आयिर, अंटोर पेनदुक लेक्‍का हियमळे, बोरे तपिच्‍कुना परुर.
ROM 3:20 मूसाना नियमता कबळताहेंदाल मनम अंटोरम पापिर्के इंचि तेळियंता अचोने. गानि अव्टे वेहचि मत्‍ताप ताकसि पेनदा मुन्‍ने बोरे नीतिमंतुल्क आयुर.
ROM 3:21 गानि इंदके मूसाना नियमते रासि मत्‍ता पोल्‍लेंगे कियवा मनकालोर्कुन नीतिमंतुल्क कियनाहाटीं पेन इंकुंदि हर्रि तयार कीता. अद हरदा बारेमते, मूसाल आनि पेनदा कबुरतोर पोल्‍ले हीसि मुन्‍नेन दर्मसास्‍त्रमते रासि इरतुर.
ROM 3:22 अद हर्रि बतल इत्‍ते, बोरे आयिर येसु किरिस्‍तुनपोर्रो विस्वासम इरते पेन ओर्कुन नीतिमंतुल्क कींता. इव्टे कुलम, जाति इल्‍हा बतल हिल्‍ले.
ROM 3:23 बारित्‍ते अंटोर लोकुल्‍क पापम कीसि, पेनदाहेंदाल दोर्कना कदरताल लक्‍कु आतुर.
ROM 3:24 गानि येसु किरिस्‍तु लोकुल्‍कुन पापाल्कुनाल इळबळिस्तोर. इल्‍हा पेन दाना कुर्पाते येसु किरिस्‍तुन विस्वासम कियानोर्कुन अंटोर्कुन नीतिमंतुल्क कीता. दीनाहाटीं मनम पेनदुक बतल हियना अव्‍सरम हिल्‍ले.
ROM 3:25 मना पापाल्कुना सिक्‍सातगा मोक्‍कु आयालय पेन येसुन लोह्ता. येसु किरिस्‍तु मना पापाल्कुनाहाटीं मोक्‍कु आतोर इंचि मनम विस्वासम कीसि ओप्कुनगोम. दीनहेंदाल येसुनपोर्रो विस्वासम कीतोर्कुन पेन नीतिमंतुल्क कींता. इदवेरदाका बोर अय्ते पापम कीतुरो, ओर्क सिक्‍सा हियाकोंटा पेन ओप्के पीसि मत्‍ता. इल्‍हा अद नीतिमंतुड इंचि हुपिस्‍ता.
ROM 3:27 अदुनहाटीं मनम पेद्‍दिरकेम कियामन्‍नि. मनम पुन्‍नेम कबाह्‍क कीतोम इंचि पेन मनाकुन नीतिमंतुल्क कीतना? हिलाकोंटे मूसाना नियमपोर्रो ताकताहेंकेना? विस्वासम कीताहेंकेन मनम नीतिमंतुल्क आतोम.
ROM 3:28 मूसाना नियमते मत्‍ताप ताकताहाटीं पेन मनाकुन नीतिमंतुल्क इना हिल्‍ले, गानि येसु किरिस्‍तु सामिनपोर्रो विस्वासम कीताहेंकेन नीतिमंतुल्क इत्‍ता.
ROM 3:29 अय्ते दीना अर्तम मिमेटे विचारम कीसि वेहाट. पेन सिराप यहुदिल्कुनदेना? यहुदि आयवोर्कुनद आयोना? पेन यहुदि आनि यहुदि आयवोर, इव्वुरदगुडा आंद.
ROM 3:30 अद बल्हा इत्‍ते, पेन उंदे आंद. कतना आतोर आयिर, कतना आयवोर आयिर, इव्‍वुर्कुनगुडा पेन ओरा विस्वासमहेंदाले नीतिमंतुल्क कींता.
ROM 3:31 “अल्हा अय्ते, विस्वासम कीताहेंका मनाकु मूसाना नियमता अक्‍केर हिल्‍ले, इनकुंचंतिरा?” अल्हा आयो. विस्वासमहेंदाले मूसाना नियमते मनम बेस ताका परंतोम.
ROM 4:1 इंदके मना एनकटा पेद्‍दा मनकल अब्राहामुना बारेमते मनम बतल इनकोम? ओर नीतिमंतुड बल्हा आतोर?
ROM 4:2 ओक्‍कला अब्राहाम कीता बेसता कबाह्कुनहेंका पेन ओन नीतिमंतुड इंचि मत्‍ते, गर्रा कियालय ओनगा बतलन्‍ना कारनम मंचि मनवळ, गानि पेनदा मुन्‍ने ओर अल्हा किया परोर.
ROM 4:3 दर्मसास्‍त्रम बतल वेहांता इत्‍ते, “अब्राहाम पेनदुन विस्वासम कीतोर, ओना विस्वासमतुन हूळसि पेन ओन ‘नीतिमंतुड’ इंचि वेहता.”
ROM 4:4 कबळ कियानोंक दोर्कनद कूलि आंद, दान इनाम इन्‍नुर. ओर कबळ कीतोर, इंचि अद ओन्क दोर्कता.
ROM 4:5 गानि पेनदा मुन्‍ने बोरे मनकल बेसता कबाह्‍क कीसि नीतिमंतुड आयोर. पापिर्कुनगुडा मापि कियना पेनदापोर्रो विस्वासम इरतेने, अद ओन नीतिमंतुड कींता.
ROM 4:6 कबाह्‍क कियाकोन्‍नागानि, पेन बोर्कुन अय्ते नीतिमंतुल्क इंता, ओर आसिर्वाद दोर्कतोर आंदुर इंचि दाविदगुडा इंतोर. अद इल्‍हा मंता:
ROM 4:7 “बोरा तप्पु कबाह्‍कुन पेन मापि कीता, बोरा पापाल्कुन मुच्‍चुता, ओर पेनदा आसिर्वाद दोर्कतोर आंदुर.
ROM 4:8 बोरा पापाल्कुना लेक्‍का पेन पिय्यो, ओर आसिर्वाद दोर्कतोर आंदुर.”
ROM 4:9 अय्ते, इसोंटा आसिर्वाद सिराप कतना आतोर्कुनाहाटींगेना मरि कतना आयवोरहाटींगुडा मंताना? हो, इव्‍वुराहाटींगुडा मंता. बारित्‍ते मना एनकटा पेद्‍दा मनकल अब्राहामुन पेन ओना विस्वासमतुन हूळसि नीतिमंतुड इंचि ओप्‍कुत्‍ता, इल्‍हा मनमे वेहांतोम गदा!
ROM 4:10 अय्ते पेन अब्राहामुन बस्के नीतिमंतुड इंचि इत्‍ता? कतना आतारित्‍तेना, कतना आयाका मुन्‍नेन्‍ना? कतना आयाका मुन्‍नेन ओन नीतिमंतुड इंचि इत्‍ता.
ROM 4:11 अब्राहामुना कतना आयाका मुन्‍नेन ओर पेनदुन विस्वासम कीतोर. अदुनहाटीं पेन ओन नीतिमंतुड इत्‍ता. नीतिमंतुना एरपाटता चिन्‍ह इंचि अब्राहामुंक कतना किया पीता. अदुनहाटीं विस्वासम कियानोर अंटोर कतना आयाकोन्‍नागुडा नीतिमंतुल्क आसि मंतुर. अदुनहाटीं ओर, अंटोर विस्वासुल्कुना बाबोनलेसीं मंतोर.
ROM 4:12 कतना आतोर्क अंटोर्कगुडा अब्राहाम मातिर दादले. गानि सिराप कतना आता इंचि ओर्क अब्राहाम मातिर दादल आया हिल्‍लोर. अब्राहामुना कतना आयाका मुन्‍ने ओना विस्वासम बल्हा मत्‍ता, अल्हेन ओर्कगुडा विस्वासम मत्‍ता इंचि अब्राहाम ओर्क मातिर दादल आतोर.
ROM 4:13 “मीकुन ई दुनियाता वारसदार्क कींतन,” इंचि पेन अब्राहाम आनि ओना वंसंमतोर्क पोल्‍ले हीसि मत्‍ता. अब्राहाम मूसाना नियमते वेहताप ताकतोर इंचि पेन ओन्क पोल्‍ले हिया हिल्‍ले. गानि पेनदापोर्रो ओर विस्वासम कीसि नीतिमंतुड आतोर इंचि पेन ओन्क ई पोल्‍ले हीता.
ROM 4:14 ओक्‍कला मूसाना नियम परकारम ताकतोरे, पेन हीता पोल्‍ले परकारम वारसदार्क आयानय्ते, विस्वासम इनना पोल्‍लेक बतले विलवा मन्‍नो, पेन हीता पोल्‍लेकगुडा अर्तम मन्‍नो.
ROM 4:15 पेन नियमकु हीतस्के अवुन पीसि ताका पींता. ताकाकोंटे पेन सिक्‍सा हींता. गानि नियमकु हिलाकोंटे अवुन नेम्‍हना सवालगुडा वायो.
ROM 4:16 अदुनहाटीं पेन अब्राहामुना वंसंमतोर्क अंटोर्क हीता पोल्‍ले विस्वासम कीतोर्कुंक दाना कुर्पाताहेंदाले दोर्कंता. इद सिराप मूसाना नियम परकारम ताकानोर्कुंके आयो गानि अब्राहामुनलेसीं विस्वासमते ताकानोर अंटोराहाटीं मंता. ओर मना अंटोरा बाबल आंदुर.
ROM 4:17 “नना नीकुन वेल्‍ले लोकुल्‍कुना बाबो कीतन,” इंचि पेन अब्राहामुना बारेमते इत्‍ता पोल्‍ले दर्मसास्‍त्रमते रासि मंता. पेनदा मुन्‍ने अब्राहाम मना अंटोर्क बाबोनलेसींगे मंतोर. हातोर्कुन पेन मर्रा जीवाते तेहंता. हिल्वदुनगुडा पुट्‍टींचंता असोंटा पेनदुन अब्राहाम विस्वासम कीतोर.
ROM 4:18 अब्राहामुंक पिलाल्क आयना आसे हिलाकोन्‍ना, ओर पेनदापोर्रो विस्वासम कीतोर. अदुनहाटीं पेन ओन वेल्‍ले लोकुल्‍कुना बाबो कीता. “नीवा वंसंमताहेंदाल लेक्‍का हिल्वा लोकुल्‍क आंतुर,” इंचि पेन वेहता परकारमे जर्गता.
ROM 4:19 अस्‍के अब्राहामुना वयम नूर वर्सां मत्‍ताहाटीं ओना मेंदुल कमजोर आसि मत्‍ता. अल्‍हेने ओना मुत्‍तो सारांकु पिलाल्क आयाना वयम दाटसि होत्‍ता. इवन्‍नि एरपाट मनिनागानि ओर विस्वासमते कमजोर आयाकोंटा गट्‍टिगा मत्‍तोर.
ROM 4:20 अब्राहाम पेन हीता पोल्‍लेपोर्रो बस्‍केने अनमानम किया हिल्‍लोर, गानि पेनदा विस्वासमते गट्‍टिगा आसि दाना महिमा कीतोर.
ROM 4:21 पेन ओन्क हीता पोल्‍ले, अद पूरा किया परांता इंचि अब्राहामुंक पुरागा बरोसा मत्‍ता.
ROM 4:22 इद पोल्‍लेताहाटींगे, “पेन ओन नीतिमंतुड इत्‍ता.”
ROM 4:23 विस्वासमहेंदाल नीतिमंतुड कीता पोल्‍ले सिराप ओनाहाटींगे हिल्‍ले.
ROM 4:24 गानि अद मनाहाटींगुडा मंता. हातोरव्टेटाल येसु सामिन मर्रा जीवाते तेहता पेनदुन मनम विस्वासम कीतोम, इंचि अद मनाकुनगुडा नीतिमंतुल्क इंता.
ROM 4:25 मना पापाल्कुनाहाटीं हायालय, पेन येसुन वेरेतोरा कय्‍दे अप्पजेपता, आनि मनम पेनदा मुन्‍ने नीतिमंतुल्क आयालय ओन मर्रा हातोरा लोप्पोटाल जीवाते तेहाता.
ROM 5:1 इल्‍हा, मना विस्वासमहेंदाल पेन मनाकुन नीतिमंतुल्क कीता. अदुनहाटीं सामि येसु किरिस्‍तुनाहेंदाल, पेनतोनि मनक सांति मंता.
ROM 5:2 इंदके मनम पेनतोनि कलियसि पिस्सना पिस्वरगुडा पेनदा कुर्पातेन दोर्कतद आंद. अचोने आयाका पेनदा महिमाता वेलगुने मनम उंदि रोज मनांतोम इत्‍ता आसेते वेल्‍लेन कूस मंतोम.
ROM 5:3 इच्‍चोने आयाका, विस्वासम कीताहेंका मनाकु तिप्‍पल्‍क वायिनागानि वेल्‍ले कुसिते मनंतोम. बारित्‍ते तिप्‍पल्‍क वातेने ओप्के पुट्‍टंता.
ROM 5:4 इल्‍हा ओप्के पीसि मत्‍ते मनालोप्‍पो बेसता गुनम वांता. बेसता गुनम मनाकु मुक्‍ति हियाना आसे पुट्‍टिचंता.
ROM 5:5 इद आसे मनाकुन नाराज किय्‍यो, बारित्‍ते पेन दाना पवित्र आत्मातुन मना पिस्वरते हीसि, अद मनाकुन वेल्‍लेन पावरम कींता इंचि हुपिस्‍ता.
ROM 5:6 बस्के अय्ते मनद मनम पिसागोटकुना पराकोंटा आतोम, असोंटा वेलाते मना पापि लोकुल्‍कुनाहाटीं किरिस्‍तु ओना जीवा हीतोर.
ROM 5:7 वरोर नीतिमंतुनाहाटीं बोरन्‍ना जीवा हिय्यालय तयार मनमळ वेल्‍लेने कस्‍टम, गानि वरोर बेसता मनकनाहाटीं बोरन्‍ना जीवा हिय्यालय तयार आया परांतुर आयावच्‍चु.
ROM 5:8 गानि मनम इंका पापमतेन मत्‍तोम, अस्‍केने किरिस्‍तु मनाहाटीं जीवा हीतोर. इदुना हेंदाल पेन मनापोर्रो बच्‍चोन पावरम कींता इंचि दिसंता.
ROM 5:9 येसु सामिना नेत्‍तुरहेंदाल पेन मनाकुन नीतिमंतुल्क कीता. अदुनहाटीं पेनदा होंगुनाल मनाकुन तप्‍पाकोंटा ओनाहेंदाले पिसागोटमळ जर्गंता.
ROM 5:10 उंदास्के मनम अंटोरम पेनदा पगातोरमे मत्‍तोम. अल्हा मननेंकेगुडा अद दाना मर्रिना जीवातुन हीसि मनाकुन दाना दग्गेर्क कीकुत्‍ता. इंदके अय्ते मनम पेनतोनि कलियसि मंतोम. अदुनहाटीं किरिस्‍तुना पिस्वरताहेंदाल अद मनाकुन आकिर सिक्‍साताल तप्‍पाकोंटा कापाळंता.
ROM 5:11 सिराप इच्‍चोने आयो गानि मना सामि येसु किरिस्‍तुनाहेंदाल मनम पेनतोनि मर्रा कलियतोम, अदुनहाटीं मनम वेल्‍लेन कुसिते मंतोम.
ROM 5:12 इद दुनियाते पापम आदामुनाहेंदाल वाता. पापमताहेंदाल हामुर वाता. दुनियाता अंटोर लोकुल्‍कगुडा पापम कीतुर, अदुनहाटीं अंटोर्के हामुर वाता.
ROM 5:13 मूसाना नियम वायका मुन्‍नेन इद दुनियाते पापम मत्‍ता. गानि अस्‍के मूसाना नियमकु मनवाहेंका पापमतुन पेन लेक्‍का किया हिल्‍ले.
ROM 5:14 अय्नागानि आदामुनस्केटाल अय्ते मूसाना कालमदाका मनकालोरपोर्रो हामुर राज्येम कीसेकेन मत्‍ता. आदाम पेनदा पोल्‍लेपोर्रो ताका हिल्‍लोर. लोकुल्‍क पेनदा पोल्‍लेपोर्रो ताकका ओनालेसीं पापम किया हिल्‍लुर, अय्नागानि लोकुल्‍क हायुंदुर. ईर आदाम इत्‍ते मुन्‍ने वायाना किरिस्‍तुना चिन्‍हालेसीं मंतोर.
ROM 5:15 गानि पेनदा वरम आनि आदामुना पापम, इव रोंड पोल्‍लेन नड्‍डुम मात्रम वेल्‍लेन परक मंता. वरोर कीता पापमहेंदाल वेल्‍लेन मंदिक हामुर वाता. गानि दानकन्‍ना एक्‍को पेनदा वरम आनि कुर्पा मंता. ई कुर्पा येसु किरिस्‍तुनाहेंदाल वेल्‍लेन मंदिक दोर्कंता.
ROM 5:16 पेन हीता वरम आनि आदाम कीता पापमता पलम, इव रोंड पोल्‍लें उंदेतीर हिल्‍लें. बारित्‍ते आदामुना पापम अंटोरपोर्रो सिक्‍सातुन तत्‍ता. गानि मनम वेल्‍लेन पापाल्क कीसिगुडा पेन हीता वरमनाहेंदाल नीतिमंतुल्क आतोम.
ROM 5:17 आदाम कीता पापमताहेंदाल अंटोर हामुरता कय हिळु मंतुर. गानि इंकावरोर इत्‍ते येसु किरिस्‍तुनहेंदाल बोर्क अय्ते पेनदा वरम आनि कुर्पा दोर्कता, ओर्क अंटोर्क पेनदुक नच्‍चना नीति पिस्वर दोर्कता.
ROM 5:18 इल्‍हा आदाम कीता पापमताहेंदाल अंटोर लोकुल्‍कुंक सिक्‍सा दोर्कता. अल्‍हेने इंकावरोर इत्‍ते येसु किरिस्‍तु कीता बेस कबाटाहेंदाल, पेन अंटोर्क नीतिमंतुल्क आयालय उंदि हर्रि तयार कीसि ओर्क बस्‍केळ्‍क पिस्सना पिस्वर हीता.
ROM 5:19 वरोर आदाम पेनदा पोल्‍ले केंजवाहेंका वेल्‍लेन लोकुल्‍क पापिर्क आतुर. अल्हेन इंकावरोर मनकल इत्‍ते येसु किरिस्‍तु पेनदा पोल्‍ले केंजताहेंका, वेल्‍लेन लोकुल्‍क नीतिमंतुल्क आंतुर.
ROM 5:20 लोकुल्‍क बल्हा इरगा पापम कीसेक होंचंतुर अदुन ओर्क हुप्‍सनाहाटीं मूसाना नियम वाता. गानि लोकुल्‍क बच्‍चोन वेल्‍ले पापम कीसेक होत्‍तुर अचोने वेल्‍ले कुर्पा पेन कीसेक होत्‍ता.
ROM 5:21 इल्‍हा बारि आता इत्‍ते, बल्हा पापम हामुरताहेंदाल राज्येम कीसेक मत्‍ता, अल्हेन पेनदा कुर्पागुडा सत्‍तेमतोनि मना सामि येसु किरिस्‍तुनहेंदाल बस्‍केळ्‍क पिस्सना पिस्वरताहाटीं राज्येम कींता.
ROM 6:1 अय्ते मरि बतल इनकोम! पेन मनापोर्रो वेल्‍लेने कुर्पा कियाना इंचि पापम कीसेकेन दाकोमा?
ROM 6:2 बस्‍केने कियामन्‍नि. पापि गुनाल्कुनाल उंदि मल्का मनम बस्‍केळ्‍ताहाटीं वेरे आसि हासोत्‍ताप आतोम. मर्रा असोंटा पापि गुनाल्‍कुने बल्हा पिसकोम?
ROM 6:3 मनम अंटोरम येसु किरिस्‍तुनतोनि कलियतोम इंचि हुप्‍सालय बापतिस्मा एततोम. अस्‍केने मनम ओनतोनि हाताप आतोम. इद संगति मीकु तेळियोना?
ROM 6:4 बापतिस्माहेंदाल मनम येसु सामिनतोनि हासि बोंदा दोसताप आतोम. बल्हा अय्ते पेनबाबाना महिमाता ताकतते किरिस्‍तु हामुरताल मर्रा जीवाते तेदतोर, अल्‍हेने मनमगुडा बापतिस्मा एतसि पूना पिस्वरते ताका परांतोम.
ROM 6:5 बारित्‍ते मनमगिंटा ओना हामुरते ओनतोनि उंदि आते, ओना मर्रा जीवाते तेदमळतेगुडा मनम ओनतोनि तप्‍पाकोंटा उंदि आंतोम.
ROM 6:6 मना पडना पिस्वर येसुनतोनि क्रुसुनपोर्रो हाता, अदुनहाटीं पापमतोनि निंडिस मत्‍ता मना गुनम नासडेम आसि होत्‍ता. इंदके मनम पापमता अदिकारमते हिल्‍लोम इद मनाकु एरपाटे.
ROM 6:7 बोर अय्ते पडना पिस्वरतुन हाताप होळसीतोरो, ओर ओना पापाल्कुनाल मुक्‍ति दोर्किसि नीतिमंतुड आतोर.
ROM 6:8 ओक्‍कला मनम किरिस्‍तुनतोनि हायानय्ते ओनतोने मनम पिसंतोम इंचि मनाकु विस्वासम मंता.
ROM 6:9 किरिस्‍तु हामुरताल मर्रा जीवाते तेदतोर, ओर मर्रा बस्‍केने हायोर. अचोने आयका हामुरता ताकत ओन बस्‍केने बतल किया पर्रो, इद मनाकु एरपाटे.
ROM 6:10 पापमता अदिकारमतुन ओळिच्‍चनाहाटीं ओर उंदे मल्का हातोर. गानि ओर इंदके पिस्सना पिस्वर मात्रम पेनदाहाटीं पिस्सेक मंतोर.
ROM 6:11 इल्‍हा मिमेटगुडा पापमताहाटीं हातोरलेह्का मंचि, पेनदाहाटीं येसु किरिस्‍तुने जीवाते मंतोम इनकुंटु.
ROM 6:12 अदुनहाटीं रोंड रोजकु पिस्सना मीवा पिस्वरते पापमता राज्येम वायाकोंटा जेगर्ता मंटु. इंका दाना सेड्‍डा आसेनाल लक्‍कु मंटु.
ROM 6:13 मीवा मेंदुलतुन सेड्‍डा कबाह्‍क कियालय पापमता कय्‍दुक हियमट. अल्हा कियाकोंटा, “मनम हामुरताल जीवाते तेदतोरम,” इद पोल्‍लेतुन मति कीसि, मीपोर्रो पेनदुक अदिकारम हीम्टु आनि मीवा मेंदुलतुन नीति कबाह्‍क कियनाहाटीं पेनदुक अप्‍पजेप्‍पट.
ROM 6:14 अस्‍के मिमेट मूसाना नियमता कय्‍दा हिळु हिल्‍लिर गानि पेनदा कुर्पाते पिस्सेक मंतिर इंचि मीपोर्रो पापम दाना अदिकारम ताकसो.
ROM 6:15 इंदके पेनदा कुर्पा मनाकु दोर्कताहाटीं मनम मूसाना नियमता कय्‍दा हिळु हिल्‍लोम, अय्ते इंदके मनम पापम कीकोमा मरि? अल्हा बस्‍केने कियामन्‍नि.
ROM 6:16 सेवा कींतन इंचि मीवद मिमेट ओप्कुत्‍ते मिमेट बा मालकुनगा अय्ते सेवा कीसंतिरो, ओन्क मिमेट निजमे दासुल्क आंतिर. इद पोल्‍ले मीकु तेळियोना? मिमेट पापमता दासुल्क आते अद मीकु हामुरता हर्रि हुप्‍संता. गानि मिमेट पेनदा पोल्‍ले केंजते अद मीकुन नीतिमंतुल्क कींता.
ROM 6:17 मुन्‍ने मिमेट पापमता दासुल्के मत्‍तिर, गानि मीकु एव्ता पेनदा पोल्‍लेन मिमेट बेस केंजसि, करियसि इंदके अवुन पीसि ताकसंतिर. इंचि पेनदुक नना दन्यवाद कींतन.
ROM 6:18 इंदके पेन मीकुन पापमता कय्‍दाल होळसीता इंचि मिमेट सत्‍तेमता कबाह्‍क कियालय पेनदा दासुल्क आतिर.
ROM 6:19 इव पोल्‍लेन अर्तम कीकुनना ताकत मीकु हिल्‍ले इंचि नना उंदि उदाहरन हीसि मीकु वेहासेके. दीनकन्‍ना मुन्‍ने मिमेट मीवा मेंदुलतुन रोता कबाह्‍क, तप्‍पुड कबाह्‍क कियालय अप्‍पजेपसि मत्‍तिर. दानहेंदाल वेल्‍लेन पापम आता. अल्‍हेने इंदके मिमेट मीवा मेंदुलतुन सत्‍तेमता कबाह्‍क कियालय अप्‍पजेप्‍पट, अस्‍के मिमेट पेनदा पवित्र लोकुल्‍क आकिट.
ROM 6:20 मिमेट बस्के अय्ते पापमकु दासुल्क आसि मत्‍तिर अस्‍के मीपोर्रो नीतिता कबाह्‍क कियालय दबाव मनाहिल्‍ले.
ROM 6:21 अयना मिमेट कीता कबाह्कुनाहाटीं इंदके मीकु सिग्गु वासंता. मिमेट अव कीतस्‍के मीकु बतल इनाम दोर्कता? अव कबाह्‍कुनाहेंदाल सिराप हामुरे दोर्कुंदु.
ROM 6:22 गानि इंदके पेन मीकुन पापमता कय्‍दाल होळसीताहेंका मिमेट दाना दासुल्क आतिर. अदुनहाटीं इंदके मीकु दोर्कना इनाम बतल इत्‍ते, पेन मीकुन दाना पवित्र हर्दे ताक्‍किचि, आकिरते बस्‍केळ्‍क पिस्सना पिस्वरताहेके ओंता.
ROM 6:23 पापि कबाह्‍कुना कूलि इंचि मनाकु हामुर दोर्कंता. गानि पेन मनाकु मना सामि येसु किरिस्‍तुनहेंदाल वरम इंचि बस्‍केळ्‍क पिस्सना पिस्वर हींता.
ROM 7:1 विस्वासुल्‍कुनिटा, नना मूसाना नियम तेळियसि मत्‍तोरतोनि वळ्कसेक मंतन. वरोर मनकल जीवाते मत्‍ताचुं रोजके ओनपोर्रो मूसाना नियमता अदिकारम मनंता इंचि मीकु तेळियोना?
ROM 7:2 सरे, उंदि उदाहरन वेहांतन. मूसाना नियम परकारम उंदि मुरतळ दाना मुय्दो पिस्सि मत्‍ताचुं रोजके अद ओना मुत्‍तो आसि मनंता. गानि दाना मुय्दो हासोत्‍ते, मूसाना नियम परकारम अद मुरतळ मुय्दोंक संबंदिस्‍ता नियमताल इळबळंता.
ROM 7:3 दाना मुय्दो जीवाते मननेंकेन अद वेरे बोनतोनना मरमिं आते, दान बोगमतनम कीता मुरतळ इंतुर. गानि दाना मुय्दो हासोननय्ते मात्रम आ नियमताल अद पलाते अर्रंता. अद वेरे मरमिं अय्नागानि दान बोगमतनम कीता इंचि इन्‍नुर.
ROM 7:4 अय्ते विस्वासुल्‍कुनिटा, इल्हेन मिमेटगुडा बस्के अय्ते किरिस्‍तुनतोनि हातिर अस्‍के मूसाना नियमताल इळबळतिर. इंदके बोर अय्ते हातोरव्टेटाल मर्रा जीवाते तेदतोर आ किरिस्‍तुनतोनि मिमेट कलिया परंतिर. दीनहेंदाल मनम पेनदा सेवाताहाटीं बेसता कबाह्‍क किया परांतोम.
ROM 7:5 मुन्‍ने मनम मना इस्‍ट परकारम ताकुंदुम अस्‍के मना मेंदुलतुन मनालोप्‍पो मत्‍ता पापि आसें वाळकुनुंदुं, मूसाना नियम मनाकु तेळियतस्के आ आसें इंका बेरस्सेक होत्‍तां. दीनहेंदाल मनाकु हामुर दोर्कता.
ROM 7:6 मनम बद नियमते अय्ते दोह्‍चि वाटताप मत्‍तोमो, आ मूसाना नियमताहाटीं इंदके मनम हासि, अव्टेटाल पलाते अरतोम. दानहाटीं मनम आ रासि मत्‍ता पडना नियम परकारम इंदके पिस्सेक हिल्‍लोम. गानि पेनदा आत्मा हुपिस्‍ता पूना हर्दुन एरपाट कीसि अद वेहताप ताकसेके दाना सेवा कीसंतोम.
ROM 7:7 अय्ते मूसाना नियम तप्‍पु इंचि नना वेहसेक इन्कुंचंतिरा? अल्हा असले आयो. ओक्‍कला मूसाना नियम हिलाकोंटा मंचि मत्‍ते, असल तप्‍पु बतलो नाकु बस्‍केने तेळियाकोनवळ. ओक्‍कला मूसाना नियम, “वेरेतोरा दानपोर्रो आसे पळमा,” इंचि वेहाकोंटा मंचि मत्‍ते, आसे पळमळ तप्‍पु इंचि नाकु तेळियाकोनवळ.
ROM 7:8 गानि पापम, मूसाना नियमते मत्‍ता आदेसकुन वाळकुंचि नावा लोप्पो अन्‍नि तीरकुना तप्‍पुड आसें पुटिस्ता. मूसाना नियम हिलाकोंटे पापमकु जीवा हिलवापे.
ROM 7:9 दीनकन्‍ना मुन्‍ने मूसाना नियमतुन एरपाट कियाकोंटेन पिस्सेक मत्‍तन. गानि बस्के अय्ते मूसाना नियमते मत्‍तव अन्‍नि आदेसकु नाकु तेळियतां, अस्‍के नावा लोप्पो पापम कबळ कियालय दल्‍गिसि, नना पेनदा मुन्‍ने हासोत्‍ताप आतन.
ROM 7:10 बद आदेस अय्ते नाकु पिस्वर हियानद मत्‍ता, अदे आदेस नाकु हामुर हीता.
ROM 7:11 पापम मोका हूळसि आदेसतुन वाळकुत्‍ता, नाकु दोका कीता. पजा अदे पापम नावा पिस्वरतुन नासडेम कीता.
ROM 7:12 गानि मूसाना नियम पवित्रमातद आंद. अव्टे रासि मनना आदेसाल्कगुडा पवित्र, नीतितव आनि बेसतव आंदुं.
ROM 7:13 अल्हा अय्ते आ पवित्रमाता बेस आदेसकुनाहेंदाले नाकु हामुर वाता इंचंतिरा? अल्हा असले आयो. आ पवित्रमाता आदेसकुन वाळकुंचि पापम नाकु हामुरतुन हीता. अल्हा कीसि अद दाना असल रूपमतुन हुपिस्‍ता. पापम इत्‍ते बच्‍चोन कतरनाक आंद इंचि आ आदेसकुनाहेंदाल नाकु पुरागा तेळियनाहाटीं अल्हा आता.
ROM 7:14 बारित्‍ते मूसाना नियम पेनदाग्टद आंद इंचि मनाकु एरपाट मंता. गानि नना पापि आसेने निंडिस मत्‍ताहेंका पापमता सेवा कियनाहाटीं अम्मुळ होत्‍तोन आंदुन.
ROM 7:15 नना बतल कीसंतनो नाके तेळियसेक हिल्‍ले. नना बतल अय्ते कियगोमो, अद बारे कीसेक हिल्‍लेन आनि बद अय्ते कियमन्‍नो, अदुन बारे कीसंतन.
ROM 7:16 नना बतल अय्ते कियमन्‍नो अदुने नना कियानय्ते, मूसाना नियम बेसतद इंचि नना ओप्‍कुंतन.
ROM 7:17 गानि कियामन्‍नि इत्‍ता कबाह्‍कुन कियानोन नना आयोन, नाकुन अल्हा किया वेहानद नावा लोप्पो मनना पापम आंद.
ROM 7:18 नावा लोप्पो बदे बेसता पोल्‍ले हिल्‍ले इंचि नाकु एरपाटे मंता. बद अय्ते बेसतदो अदे कियना इच्‍चा नाकगुडा मंता, गानि अल्हा किया परसेक हिल्‍लेन.
ROM 7:19 बव अय्ते बेसता कबाह्को अवे नना कियना इनकुंतन, गानि अव नना किय्योन. बव तप्‍पुड कबाह्‍क अय्ते कियना आयो इंचि इनकुंतनो, अवे तप्‍पुड कबाह्‍क नना कींतन.
ROM 7:20 गानि नना बव कबाह्‍क अय्ते कियानायो अवे कबाह्‍क कियानय्ते, आ कबाह्‍क कियानोन नना आयोन गानि नावा लोप्पो मनना पापम आंदु नाकुन किया वेहानद.
ROM 7:21 अदुनहाटीं नना बस्के अय्ते बेसता कबाह्‍क कियालय हूळंतन, अस्‍के नावा लोप्पो मनना कराब गुनाल्‍क अल्हा कियालय नाकुन आपंतां.
ROM 7:22 पेन हीता नियमते नावा मनसु वेल्‍लेन कूस मंता.
ROM 7:23 गानि नावा मेंदुलपोर्रो मात्रम इंकुंदि बदो वेरे नियम अदिकारम ताकिस्ताप नाक दिस्सेक मंता. आ नियम, नावा बुद्‍दिते मनना मूसाना नियमतोनि लडाइ कीसि नाकुन पापमता कय्‍दे अप्पजेपसंता.
ROM 7:24 अय्यो, नना बच्‍चोन गोसाते मंतन! हामुरता कय्‍दा हिळु मनना नावा ई पापि मेंदुलताल नाकुन बोर होळसा परंतोर?
ROM 7:25 मना सामि येसु किरिस्‍ते नाकुन होळसा परांतोर, नना पेनदुक दन्यवाद कींतन. नना मनसुनाल अय्ते पेनदा नियमतेन ताकाना इनकुंचंतन, गानि नावा मेंदुलते मनना कराब गुनाल्‍क नाकुन पापि कबाह्‍क किया वेहचंतां.
ROM 8:1 अदुनहाटीं बोर अय्ते येसुन नम्मिसि ओनतोनि कलियतुर, ओर्क पेन सिक्‍सा हिय्यो. बारित्‍ते येसुन विस्वासम कीतोर, ओर ओरा बुद्‍दि मत्‍ताप आयो गानि आत्मा वेहताप ताकंतुर.
ROM 8:2 बारित्‍ते पेनदा आत्माता नियम येसु किरिस्‍तुनाहेंदाल मनाकु पूना पिस्वर हीता. मनाकुन पापम आनि हामुरता नियमताल तपिस्ता.
ROM 8:3 मनकालोरा बुद्‍दि पापमता कय्‍दा हिळु मत्‍ताहेंका मनम मूसाना नियमतुन केंजाकोंटा मत्‍तोम. अदुनहाटीं अद नियम मनाकुन पिसागोटा पराहिल्‍ले, अदुन पेने पिसागोटा परता. अद बल्हा इत्‍ते, पेन दाना मर्रिन इद बूमिते लोहचीता. ओर मनकालोरा पापाल्कुन तेंडसि पोहनाहाटीं, मनकाना मेंदुल्ते मारियतोर. अदे मेंदुल्ते ओर मना पापाल्कुना सिक्‍सातुन ओनपोर्रो एतकुत्‍तोर.
ROM 8:4 अल्हा बारि इत्‍ते, मूसाना नियमते रासि मत्‍ता आदेसकु मनाहेंदाल पूरा आयना इंचि. दीनहेंदाल इंदके मनम मना मनसुंक वाताप पिस्सेक हिल्‍लोम गानि पवित्र आत्मा वेहताप पिस्सेक मंतोम.
ROM 8:5 पापि गुनाल्कुना मनकल, पापि विचाराल्के कीसेक मनंतोर, गानि पेनदा आत्मा वेहताप ताकाना मनकल आत्माकु गावाले मत्‍ता विचाराल्के कीसेक मनंतोर.
ROM 8:6 इंका बोर मनकल अय्ते पापि गुनाल्‍कुने पिस्सेक मनंतोरो, ओना हामुर तप्‍पो. बोर मनकल अय्ते आत्मा वेहताप कींतोरो, ओन्क पिस्वर, सांति दोर्कंता.
ROM 8:7 बल्हा इत्‍ते, पापि गुनमता मनकल पेनदुक पगातोर आंदुर. इसोंटा मनकल पेनदा नियमते ताका हिल्‍लोर, आनि ताकोरगुडा.
ROM 8:8 पापि गुनाल्‍कुने पिस्सना मनकल पेनदुन कूस किया पर्रोर.
ROM 8:9 गानि मीवा लोप्‍पोगिंटा पेनदा आत्मा मत्‍ते, मिमेट पापि गुनाल्‍कुने पिस्सेक हिल्‍लिर गानि आत्मा वेहताप पिस्संतिर. बोना पिस्वरते अय्ते किरिस्‍तुना आत्मा हिल्‍ले, ओर किरिस्‍तुना मनकल आयोर.
ROM 8:10 मीवा लोप्‍पोगिंटा किरिस्‍तु मनानय्ते, मीवा मेंदुल पापम कीताहाटीं हासि होत्‍ता, गानि पेन मीकुन सत्‍तेमतोर कीताहाटीं, मीवा आत्मा बस्‍केळ्‍क पिस्सि मंता.
ROM 8:11 येसु किरिस्‍तुन हातोरव्टेटाल मर्रा जीवाते तेहता पेनदा आत्मा ओक्‍कला मीलोप्‍पो मनानय्ते, मीवा नासडेम आसि होनना मेंदुलतुनगुडा, मीलोप्‍पो मनना दाना आत्माहेंदाल जीवाते इर्रंता.
ROM 8:12 अदुनहाटीं विस्वासुल्‍कुनिटा, मनम मना पापि गुनाल्कुंक बाकि मत्‍ताप, अव वेहताप पिस्सना अक्‍केर हिल्‍ले.
ROM 8:13 बारित्‍ते मिमेट पापि गुनाल्‍कुने पिसानय्ते तप्‍पाकोंटा हांतिर. गानि आत्माता सहायमतोनि मीवा पापि गुनाल्‍कुन हव्कानय्ते मिमेट पिस्संतिर.
ROM 8:14 बोर अय्ते पेनदा आत्मा वेहताप ताकंतोर, ओर अंटोर पेनदा मर्क-मियाह्क आंदुर.
ROM 8:15 पेन मीकुन मर्रा दासुल्क कीसि वेराहलय दाना आत्मातुन हिया हिल्‍ले. गानि अद मीकुन दाना मर्क-मियाह्क इनालय तयार कीता. दानहेंदाल मनम पेनदुन, “बाबाल,” इंचि केया परंतोम.
ROM 8:16 इंका पेनदा आत्मा मना आत्मातोनि कलियसि, मनम पेनदा मर्क-मियाह्कुम इंचि गवाइ हीसेक मंता.
ROM 8:17 मनम पेनदा मर्क-मियाह्क आताहाटीं वारसदार्कगुडा आंदुम. पेनदा वारसदार्क आताहेंका किरिस्‍तुनतोनिगुडा मनम वारसदार्के. मनम ओनतोनि कलियसि ओना महिमाते पोत्‍तु आंतोम इनकुनानय्ते, ओना तकलिपतेगुडा पोत्‍तु आयापींता.
ROM 8:18 नना मीकु इद बारि वेहचंतन इत्‍ते, मनाकु इंदके तकलिपकु, दुक्‍काल्क वांतंगे, गानि वायाना कालमते पेन दाना महिमाता वेलगुन हीसि बच्‍चोन मनाकु कदर हिय्यार, दाना मति कीते इंदकेटा तकलिपकु बग्‍गेन दल्‍गों इंचि नना इनकुंचंतन.
ROM 8:19 पेन दाना मर्क-मियाह्कुंक हीता कदरतुन बस्के हुप्‍सार इंचि अद पुट्‍टिस्‍तव अन्‍निटवे वेल्‍लेन आसेते एदुर हूळसेक मंतां.
ROM 8:20 बारित्‍ते पेन पुट्‍टिस्‍तव अन्‍निटव अवुना इच्‍चा परकारम बत्‍तक ओज्‍जाकोंटा आया हिल्‍लें, गानि पेने दाना इच्‍चा परकारम अवुन बतक ओज्‍जाकोंटा कीता.
ROM 8:21 इंचि पेन पुट्‍टिस्‍तव अन्‍निटव नासडेम आयालय मंतां. अदुनहाटीं आ नासडेमताल तप्‍पिसि, पेनदा मर्क-मियाह्कुनतोनि कलियसि पेनदा महिमा आयाना स्वतंत्रमतुन दोर्किच्‍कुनालय पूरा दुनियंता आसेते एदुर हूळसेक मंता.
ROM 8:22 उंदि मुरतळ एरपूराना वेलाते नोप्‍पिं तेदसि बल्हा तनलाळंता, अल्‍हेने इद दुनियंता इदवेरादाका तनलाळसेक मंता, इद मनाकु एरपाटे.
ROM 8:23 पेन पुटिस्तवे आयाका, पेनदाहेंदाल मोदाटा पलम इंचि आत्मा दोर्कतोरम मनमगुडा, दाना मर्क-मियाह्क आयालय मना कराब मेंदुलतुन होळसिसि पूना मेंदुल बस्के दोर्कार इंचि तनलाळसेक मंतोम.
ROM 8:24 मुक्‍ति दोर्कता इंचि इसोंटा आसेते मनम मना परंतोम. गानि मनम बद आसेते अय्ते मंतोम, अद आसेतुन मनम मना कळ्‍कुने हूळसेक मननेंके, अद आसे बल्हा आया परंता? बतल अय्ते मनाकु दोर्कता, अदुन एदुर हूळसेक बोरन्‍ना मनांतुरा? मन्‍नुर.
ROM 8:25 गानि बतल अय्ते मनाकु दोर्काहिल्‍ले, अदुना आसे पळानय्ते मात्रम मनम वेल्‍लेने ओप्‍केते, विस्वासमते एदुर हूळसेक मनांतोम.
ROM 8:26 पारतना बल्हा कियमळो तेळियवस्के पवित्र आत्मा मनाकु सहायम कींता. मनाकु इनावायो असोंटा पोल्‍लेन पवित्र आत्मा मनाहाटीं पेनदागा तनलाळसेक विनंति कीसेक मंता.
ROM 8:27 मना मनसुने मत्‍ता विचाराल्कुन पेन बेस एरपाट कींता. अल्हेन आत्माता विचाराल्क बतल दानकु बेस एरपाट. अदुनहाटीं पेनदा लोकुल्‍कुंक गावाले मत्‍तदुनहाटीं पवित्र आत्मा विनंति कियनेंके पेनदा विचारम मत्‍तापे कींता.
ROM 8:28 बोर अय्ते पेनदुन पावरम कींतुर, बोर्कुन अय्ते पेन दाना पिलान मत्‍ताप केयता, ओर्क बसोंटा परिस्तिति वायिना, पेन आ परिस्तिति ओरा बेसताहाटींगे कींता इत्‍ता पोल्‍ले मनाकु एरपाटे.
ROM 8:29 बारित्‍ते “बोर-बोर नापोर्रो विस्वासम कींतुर” इंचि पेन मुन्‍नेटाले एरपाट कीसि मत्‍ता. दाना मर्रि येसु, ओर अंटोरा दादाल आयगोम इंचि पेन ओर्कुन येसुनसंटोर आयानाहाटीं पेरता.
ROM 8:30 बोर-बोर्कुन अय्ते पेन पेरता ओर्कुन दाना हर्दे ताकालय केयता. इंका बोर-बोर्कुन दाना हर्दे ताकालय केयता ओर्कुन नीतिमंतुल्क कीता. इल्‍हा नीतिमंतुल्क कीतोर्कुंक वेल्‍लेन कदरगुडा हीता.
ROM 8:31 इव अन्‍नि पोल्‍लें केंजतंका मनाकु उंदि विचारम तप्‍पाकोंटा वांता, अद बतल इत्‍ते, पेने मना सायतक मत्‍तस्के मनाकु अड्‍डम तिरियनाहाटीं पगातोर बोर मनांतोर?
ROM 8:32 पेन दानकु मत्‍ता वरोर मर्रिनगुडा मनाहाटीं हीता. वरोरे मर्रि इंचि पज्जो-मुन्‍ने किया हिल्‍ले, अच्‍चोन बेस पेन आंदु. असोंटस्के दाना मर्रिनतोनि कळमातव अन्‍निगुडा मनाकु हिय्योना? तप्‍पाकोंटा हींता.
ROM 8:33 कुद्‍दु पेने मनाकुन पेरसि नीतिमंतुल्क कीता. अय्ते मनापोर्रो दोसेम दोस्सानोर बोर आंदुर?
ROM 8:34 अय्ते मरि मनाकु सिक्‍सा तप्‍पो इंचि बोर इना परांतुर? सिराप पेने इना परंता. गानि येसु किरिस्‍तु मनाहाटीं हातोर अस्‍के पेने ओन मर्रा जीवाते तेहाचि दाना तिना बाजुंक उपिस्ता. इंदके ओर अगा मनाहाटीं पेनतोनि विनंति कीसंतोर.
ROM 8:35 अय्ते मनाकु बदे तिप्‍पल आयि, लोकुल्‍कुना विरोद, दुक्‍कम, कर्वु, कपडिं दोर्काकोंटा आयमळ, दोकाता जेगाते मनमळ आयि, कसेह्‍क-गोर्काने हव्कनसोंटा वेला वायिनागानि इवन्‍नि येसु किरिस्‍तुना पावरमताल मनाकुन लक्‍कु किया पर्रों.
ROM 8:36 बारित्‍ते, “मोमोट नीवोर्क आताहाटीं रोज-रोज लोकुल्‍क माकुन हव्कालय हूळांतुर, मोक्‍कु हियालय मोळकुता गोर्रेनलेसीं मावा पिस्वर मंता,” इंचि दर्मसास्‍त्रमते रासि मंता.
ROM 8:37 इवन्‍नि तकलिप वायिनागानि, मनाकुन पावरम कियना किरिस्‍तु मनातोनि मत्‍ताहेंका मनमे गेल्संतोम.
ROM 8:38 बारित्‍ते नाकु इंदके पुरागा तेळियसोत्‍ता. अद हामुर आयि, पिस्वरे आयि, पेनदा दूतांगें आयिं, देय्याल्क-बूताल्क आयिं, इद कालम आयि, वायना कालम आयि, बवे सक्‍तिं आयिं,
ROM 8:39 बूमिता लोप्पोटव आयिं, बूमि पोर्रोटव आयिं. पेन पुट्‍टिस्‍तव बवे आयिं मना सामि येसु किरिस्‍तुनाहेंदाल मनापोर्रो मत्‍ता पेनदा पावरमताल लक्‍कु किया पर्रों.
ROM 9:1 नावा यहुदि लोकुल्‍क पेनदाल बल्हा लक्‍कु आसि मंतुर मरि? ओर अल्हा आताहाटीं मनसुने नाकु वेल्‍लेन दुक्‍कम, बादा अनपिच्‍चंता. नना किरिस्‍तुना मनकन इंचि इदु पोल्‍ले निजम वेहचंतन, आबद्‍दम आयो. नावा लोप्पो मनना पवित्र आत्मागुडा इद निजम इंचि गवाइ हीसंता. पेन नाकु सापनेम हीसि, नाकुन किरिस्‍तुनाल लक्‍कु किय्‍यिना बेसे! नावा मनसु मात्रम नावा इस्राएल लोकुल्‍क पिसगोम इंचि मंता.
ROM 9:4 पेनदा मर्क-मियाह्क आयाना हक्‍क इस्राएलना वंसंमते पुटतोरदे आंद. पजा बय्‍लि बूमिते मत्‍तस्के पेनदा महिमा पेद्‍दा वेल्‍गासि इस्राएलना वंसंमतोर्के दिसता. करार्क ओरतोने कीता, मूसाना नियम्‍कुगुडा ओर्के हीता, मोळ्‍काना बेस रिवाजकु हीता, अचोने आयका ओर्क पोल्‍लेगुडा हीता.
ROM 9:5 एनकटा पेद्‍दाल्क अब्राहाम, इसाक आनि याकोब ईरगुडा ईरोरे आंदुर. अचोने आयका येसु किरिस्‍तुगुडा मनकन रूपमते ईरा वंसंमतेन पुटतोर. अन्‍निन ताकसना अदिकारम मत्‍ता पेने ई येसु किरिस्‍तु आंदुर. अव अन्‍नि बस्‍केळ्‍क ओने तल्‍सकुन्‍निं. आमीन.
ROM 9:6 पेन इस्राएलना वंसंमतोर्क हीता पोल्‍ले तपता इंचि नना इंचेक हिल्‍लेन, गानि इस्राएल देसेमते पुटतोर अंटोर इस्राएलना वंसंमतोर आयुर इंचि नना वेहचंतन.
ROM 9:7 अचोने आयका अब्राहामुना वंसंमतोर अंटोरगुडा ओना निजम पिलाल्क इंचि मनम इनानायो. बारित्‍ते इदुना बारेमते दर्मसास्‍त्रमते, “सिराप इसाकुना वंसंमतोरे नीवा वंसंमतोर इंचि लेक्‍का कियमळ जर्गंता,” इल्‍हा रासि मंता.
ROM 9:8 दीना अर्तम बतल इत्‍ते अब्राहामुना वंसंमते पुटतोर अंटोर पेनदा मर्क-मियाह्क आया परुर. गानि पेन हीता पोल्‍ले परकारम बोर अय्ते पुटतुर ओरे अब्राहामुना निजम मर्क-मियाह्कुना लेक्‍काते वांतुर.
ROM 9:9 अब्राहामुंक पेन हीता पोल्‍ले इल्‍हा मत्‍ता, “इत्‍ता वेलाक नना मर्रा मल्सि वांतन, साराल वरोर मर्रिन कनंता.”
ROM 9:10 आ मर्रि इत्‍ते मना एनकटा पेद्‍दा मनकल इसाक आंदुर. ओर रेबेका इनानदानतोनि मरमिं आतोर अस्‍के अद नेला तप्‍सि एमडाल्कुन कंता.
ROM 9:11 गानि आ पिलाल्क पुट्‍टका मुन्‍नेन, ओर बद्‍दे मंचि-सेड्‍डा किय्यका मुन्‍नेन पेन रेबेकांकु, “मुन्‍ने पुट्‍टना पेडल पज्जो पुट्‍टनोना सेवा कियानुर,” इंचि वेहचि मत्‍ता. पेन मनकालोर्कुन ओर कीता कबाह्‍कुन पोर्रोटाल केयो, गानि दाना इच्‍चा मत्‍ताप ओर्कुन केयंता, इंचि मनाकु दीनहेंदाल तेळियता.
ROM 9:13 दीना बारेमते दर्मसास्‍त्रमते, “नना याकोबुन कीतच्‍चोन पावरम, एसावुन किया हिल्‍लेन,” इंचि रासि मंता.
ROM 9:14 इदुन केंजसि मनम बतल इंदकोम मर्रि? पेन अन्‍यायम कीता इंदकोमा? असले आयो.
ROM 9:15 बारित्‍ते, “नना बोनपोर्रो दया हुपिच्‍कन, बोनपोर्रो दया कीकन, बोनपोर्रो दया हुपिच्‍कन, बोनपोर्रो दया कीकन, अद नावा इस्‍टम मत्‍ताप नना कींतन,” इंचि पेन मूसांक वेहचि मत्‍ता.
ROM 9:16 इल्‍हा बोनपोर्रो दया किय्यना इंचि पेने निरनायम कींता. इद मनकना कय्‍दे हिल्‍ले. दान दोर्किच्‍कुननाहाटीं मनम बच्‍चोन कस्‍टम किय्‍यिना एर्तमे.
ROM 9:17 पेन पिरोन राजानतोनि इत्‍ता पोल्‍ले दर्मसास्‍त्रमते इल्‍हा रासि मंता: “नावा ताकततुन नीवाहेंदाल हुप्‍संतन अस्‍के नावा पोरोल पूरा दुनियामेळ तेळियसि होन्‍नार. इदुनहाटींगे नना नीकुन राजाल इंचि निलाहतन.”
ROM 9:18 दीनहेंदाल मनाकु बतल तेळियंता इत्‍ते, पेन अद इनकुत्‍तोन पोर्रो दया कींता, अल्‍हेने अद इनकुत्‍तोन कटकेलमरि कींता.
ROM 9:19 इसोंटस्के, “पेन अय्ते अद इनकुत्‍तापे ई दुनियाते किया गोट्‍टंता. अयना मावा पोर्रेन बारि दोसेम दोसंता?” इंचि मिमेट नाकुन इनकिर.
ROM 9:20 गानि मनका, पेनदुन मल्सि पूसकियानोन निमे बोन आंदिन? “निमे नाकुन इल्‍हा बारि तयार कीतिन?” इंचि अळका बस्‍केनना कुम्मन पूस कींतना?
ROM 9:21 उंदे तोळि मुद्‍दाताल सगोम बेस सिंगारम अळकां, इंका सगोमताल सादा अळकां तयार कियना अदिकारम वरोर कुम्मांकु हिल्‍लेना? तप्‍पाकोंटा मंता.
ROM 9:22 अल्‍हेने पेनदुकगुडा अद इनकुत्‍ताप कियना अदिकारम मंता. गानि नासडेम आसि होनानोर्कुन नासडेम कीसि पोहका ओप्के पीसि मत्‍ता.
ROM 9:23 पेन अल्हा ओप्के पीसि बारि मत्‍ता इत्‍ते, पेन दाना महिमा आनि दया बच्‍चोन बेसतद इंचि बोर लोकुल्‍कुंक अय्ते हुप्‍सना मत्‍ता, अद ओर्कुन मुन्‍नेन पेरता.
ROM 9:24 मनम अंटोरम पेन पेरता लोकुल्‍के. गानि पेन सिराप मना यहुदिल्कुनाले पेर्रा हिल्‍ले, यहुदि आयवोर लोप्पोटालगुडा पेरता.
ROM 9:25 यहुदि आयवोरा बारेमते पेन होसे पोरोलता पेनदा कबुरतोना पुस्तकमते इल्‍हा वेहता: “मुन्‍ने नना बोर लोकुल्‍कुन अय्ते नावा लोकुल्‍क इंचि इना हिल्‍लेन, इंदके ओर्कुन नना नावा लोकुल्‍क इंचि केयकन. इंका दीनकन्‍ना मुन्‍ने बोर्कुन अय्ते नना पावरम किया हिल्‍लेन, ओर्कुन नना पावरम कीकन.” इल्‍हा पेनबाबाल रासा वेहतोर. अचोने आयका,
ROM 9:26 “मिमेट नावा लोकुल्‍क आयिर इंचि नना बगा अय्ते इत्‍तनो, अग्गेन मिमेट जीवाते मनना पेनदा मर्क-मियाह्क आतिट इंचि इनानुर,” इल्‍हा रासि मंता.
ROM 9:27 इंका यसायाह इनना पेनदा कबुरतोरगुडा इस्राएल लोकुल्‍कुना बारेमते बतल इत्‍तोर इत्‍ते, “इस्राएल लोकुल्‍क समुद्रमते मनना उस्केलेसीं लेक्‍का परवच्‍चुर मंतुर. अयना पेन हियना सिक्‍साताल इच्‍चुरे पिस्संतुर.
ROM 9:28 बारित्‍ते ई दुनियाते मनना अंटोर लोकुल्‍कुन पेन बिरानेन सिक्‍सा कियानद मंता, अद पुरागा कींता,” इंचि वेहतोर.
ROM 9:29 अचोने आयका, “अन्‍निटकन्‍ना ताकतवार पेन ओक्‍कला मनाहाटीं, मना वंसमतोरव्टेटाल इच्‍चुर्कुन होळसाकोंटा मंचि मत्‍ते, मनम सदोम, गमोरा नह्कुना लोकुल्‍कुनालेसीं नासडेम आसि मन्‍नेरम,” इल्‍हागुडा यसायाहल मुन्‍नेन वेहचि मत्‍तोर.
ROM 9:30 अय्ते मनम इंदके बतल इनकोम? यहुदि आयवोर पेनदा मुन्‍ने नीतिमंतुल्क आयालय हूळा हिल्‍लुर गानि येसु ओराहाटीं कीतदुन ओर विस्वासम कीतुर इंचि पेन ओर्कुन नीतिमंतुल्क कीता.
ROM 9:31 इस्राएल लोकुल्‍क बारे मूसाना नियमते वेहताप ताकसि नीतिमंतुल्क आंतोम इंचि इनकुत्‍तुर. गानि ओर अल्हा नीतिमंतुल्क आया हिल्‍लुर.
ROM 9:32 बारित्‍ते ओर किरिस्‍तुन विस्वासम किय्यका बेसता कबाह्‍क कीसि नीतिमंतुल्क आयालय हूळतुर. इंचि येसु किरिस्‍तु इस्राएल लोकुल्‍कुनाहाटीं ओरा हरदे, दल्‍गिसि हिळु अरहना बंडालेसीं मंतोर.
ROM 9:33 इदुना बारेमते दर्मसास्‍त्रमतेगुडा इल्‍हा रासि मंता: “हुळाट, सियोनते नना उंदि बंडातुन इरसंतन, अद बंडा इच्‍चुर्क दल्‍गंता, इंकिच्‍चुर बारे दान्क दल्‍गिसि हिळु अर्रंतुर. बोर अय्ते दानपोर्रो विस्वासम इर्रंतुरो, ओरद बस्‍केने सिन्‍नातनम आयो.” इंचि रासि मंता.
ROM 10:1 विस्वासुल्‍कुनिटा! नावा इस्राएल लोकुल्‍कुंक पेन मुक्‍ति हिय्यि इंचि नावा वेल्‍लेन मनसु मंता. अदुनहाटीं नना पेनदुक पारतना कीसेकेन मंचंतन.
ROM 10:2 पेनदा सेवा कियना इंचि ओर्क वेल्‍लेन जिद्‍दु मंता, इदुन नना कुद्‍दु हूळतन. गानि पेनदा सेवा कियना निजम हर्रि ओर्क तेळियो.
ROM 10:3 बारित्‍ते पेने लोकुल्‍कुन नीतिमंतुल्क कींता इत्‍ता संगति ओर्क तेळियका, सतता नियमताहेंदाल नीतिमंतुल्क आंतोम इंचि ओर इनकुत्‍तुर. इल्‍हा ओर पेन हुपिस्‍ता हर्दुन ओप्कुना हिल्‍लुर.
ROM 10:4 गानि येसुनपोर्रो विस्वासम कियानोर अंटोर नीतिमंतुल्क आयानाहाटीं किरिस्‍तु मूसाना नियमता आकिरि आंदुर.
ROM 10:5 दर्मसास्‍त्रमते मूसाल बतल रासतोर इत्‍ते, “बोर अय्ते दर्मसास्‍त्रमते मत्‍ताप ताकसि नीतिमंतुड आयालय हूळंतुर, ओर उंदि नियमगुडा तप्‍पाकोंटा ताका पींता, अस्‍केन ओर अवुनहेंदाल नीतिमंतुड आंतोर.”
ROM 10:6 मिमेट, “माकु पेनदा पोल्‍लें कराहलासि स्वर्गमते होंचि किरिस्‍तुन इदु बूमिपोर्रो बोर तर्रा परांतोर, हिलाकोंटे हातोरव्टेटाल किरिस्‍तुन जीवाते तेहचि तर्रालय बोर दांतोर?” इंचि इनकुनमट. गानि विस्वासम कीसि नीतिमंतुड आयनोरा बारेमते दर्मसास्‍त्रम बतल वेहंता इत्‍ते, “पेनदा पोल्‍ले निहागेन मंता, नीवा मनसुना लोप्पो आनि नीवा तोळदेन मंता.” मोमोट मीकु वेहता पोल्‍लें इवे आंदुं.
ROM 10:9 अद बल्हा इत्‍ते, नीवा पिस्वरते, येसुए नावा सामि इंचि निमे तोळ्‍दाल ओप्‍कुंचि, ‘ओन पेन हातोरव्टेटाल मर्रा जीवाते तेहता,’ इंचि निमे नीवा मनसुनाल विस्वासम कीते, पेन नीकु मुक्‍ति हींता.
ROM 10:10 बारित्‍ते मनम मनसुनाल विस्वासम कीतोम इंचि मनाकुन पेन नीतिमंतुल्क कींता. तोळ्‍दाल ओप्कुत्‍तोम इंचि मनाकु पेन मुक्‍ति हींता.
ROM 10:11 दर्मसास्‍त्रमतेगुडा इल्‍हा रासि मंता: “ओनपोर्रो विस्वासम कियानोर बोरे आयिर, पेनदा मुन्‍ने ओनद बस्‍केने सिन्‍नातनम आयो.”
ROM 10:12 पेनदापोर्रो विस्वासम इर्रनोर बोरे आयिर, ओर यहुदि आयिर, युनानिर आयिर अंटोर उंदे, अंटोर्कुंक ओर वरोरे सामि आंदुर. ओना पोरोल एतसि पारतना कियना अंटोर्कुंक ओर वेल्‍लेन आसिर्वाद हींतोर.
ROM 10:13 “सामिना पोरोल एतसि पारतना कियनोर ओर बोरन्‍ना आयिर पेन ओन पिसागोटंता,” इंचि दर्मसास्‍त्रमते रासतद मंता.
ROM 10:14 बोर अय्ते किरिस्‍तुनपोर्रो विस्वासम किया हिल्‍लुर, ओर ओना पोरोल बारि एतनुर? बोर अय्ते ओना बारेमते केंजा हिल्‍लुर ओर बल्हा विस्वासम कियानुर? बोर अय्ते ओर्क वेहानोर हिल्‍लुर, ओर बल्हा केंजानुर.
ROM 10:15 अल्‍हेने पेन बोर्कुने लोहाकोंटे ओरगा होंचि ओर बल्हा वेहा परांतोर? असले वेहा परोर. दीना बारेमते दर्मसास्‍त्रमते इल्‍हा रासतद मंता: “बेसता कबुरतुन पीसि वायना लोकुल्‍कुन हूळते बच्‍चोनो कुसि आंता!” इंचि रासि मंता.
ROM 10:16 गानि इस्राएल लोकुल्‍क अद बेसता कबुरतुन केंजसिगुडा अंटोर विस्वासम किया हिल्‍लुर. बारित्‍ते, “ए सामि! मोमोट वेहता कबुरतुन बोर नम्मुतुर?” इंचि दीना बारेमते दर्मसास्‍त्रमते यसायाहल रासतोर.
ROM 10:17 इल्‍हा किरिस्‍तुना बारेमता बेसता कबुरतुन बोरन्‍ना वेहतेने केंजांतुर, केंजतेने विस्वासम किया परांतुर.
ROM 10:18 अयना नना उंदि पोल्‍ले पूसकींतन, इस्राएलतोर इद कबुरतुन केंजा हिल्‍लुरा? तप्‍पाकोंटा केंजतुर. इदुना बारेमते इल्‍हा रासतद मंता: “ओरा लेंग दुनियंता केंजा होत्‍ता, ओरा पोल्‍ले दुनियाता मूला-मूलादाका एव्ता,” इंचि दर्मसास्‍त्रमते रासि मंता.
ROM 10:19 अयना इंकुंदि पोल्‍ले पूसकींतन, इस्राएल लोकुल्‍क कबुर केंजतस्के अद ओर्क तेळियतना तेळिया हिल्‍लेना? तप्‍पाकोंटा तेळियता. मूसाना नियमते मुन्‍नेन रासि मत्‍ताप, “विलवा हिलुवा यहुदि आयवोर्कुन नना पावरम कीसि, मीकु कळ्‍क पोत्‍तानाल कींतन. अल्हा कीसि नाकुन एरपाट कियवा यहुदि आयवोरहेंदाल, मीकु होंगु वायनाल कींतन,” इंचि पेन इस्राएल लोकुल्‍कुन इत्‍ता.
ROM 10:20 पजा “नाकुन पहकवोर नाकुन दोर्किच्‍कुत्‍तुर. नाकुन पूसकियवोर्कुंक ननाने कुद्‍दु दिसतन,” इल्‍हा पेन वेहता पोल्‍लेतुन दैरनेम कीसि यसायाहलगुडा रासतोर.
ROM 10:21 गानि इस्राएल लोकुल्‍कुना बारेमते पेन बतल इत्‍ता इत्‍ते, “ना पोल्‍ले केंजाकोंटा मर्लाबळता लोकुल्‍कुनाहाटीं, नना दिन्‍नम एदुर हूळसेक मत्‍तन,” इंचि पेन वेहता पोल्‍लेतुन यसायाहल रासतोर.
ROM 11:1 अय्ते मरि, पेन दाना इस्राएल लोकुल्‍कुन होळसीता इत्‍तापा? हिल्‍ले. बारित्‍ते ननागुडा इस्राएल मनकने आंदुन. नना अब्राहामुना वंसंम आनि बेंजामिन गोत्रमतोन आंदुन.
ROM 11:2 पेनदुक मोदोलताले तेळियसि मत्‍ता. दाना इस्राएल लोकुल्‍कुन अद होळसा हिल्‍ले. एलिया इनना पेनदा कबुरतोना बारेमते दर्मसास्‍त्रमते बतल रासि मंता मीकु तेळियोना? ओर इस्राएल लोकुल्‍कुनपोर्रो तप्पुक दोस्सेके इल्‍हा इत्‍तोर, “ए सामि, ई लोकुल्‍क अय्ते नीवा कबुरतोर्कुन हव्कतुर, नीकु मोक्‍कु हिय्यना गद्‍देनंता कूलाहतुर. नना वरोने पिस्सि मंतन. इंदके नाकुनगुडा हव्कालय हूळसंतुर,” इंचि इत्‍तोर.
ROM 11:4 गानि पेन ओन्क बसोंटा जवाब हीता मीकु मति मंतना? “अल्हा इनकुनमा! बाला इनना पेनदुक बस्‍केने मोळ्‍कवसोंटा एडुं वेय्‍कुना मंदितुन नावाहाटीं नना वेरे कीसि इरतन,” इंचि पेन ओन्क वेहता.
ROM 11:5 अल्‍हेने इंदकेगुडा पेनदा कुर्पाहेंदाल इच्‍चुर लोकुल्‍कुन दानाहाटीं वेरे कीसि इरता.
ROM 11:6 ओरा बेसता कबाह्‍कुन हूळसि पेन ओर्कुन पेर्रा हिल्‍ले, गानि अद दाना कुर्पाहेंदाले ओर्कुन पेरता. ओक्‍कला अल्हा जर्गकोंटा मंचि मत्‍ते, दाना कुर्पा निजम कुर्पा मनाकोनवड.
ROM 11:7 इल्‍हा इस्राएल लोकुल्‍क बदुन अय्ते मनसु तासि पह्कसेक मत्‍तुरो, अद ओर्क दोर्काहिल्‍ले. गानि पेन पेरकुत्‍तोर्कुंक मात्रम अद दोर्कता. कळमतोर बोर अय्ते मत्‍तुर, ओर पेनदा पोल्‍ले केंजाकोंटा ओरा मनसुन गळसु कीता.
ROM 11:8 दर्मसास्‍त्रमतेगुडा इल्हेन रासि मंता: “पेन ओर्कुन निद्रा मत्‍ताते वाटसीता, कळ्‍क मंचिगुडा हिलवाप कीता. केव्क मंचिगुडा हिलवाप कीता, इदवेरदाकागुडा ओरा गति इल्हे मंता.”
ROM 11:9 इदुना बारेमते दाविद राजालगुडा दर्मसास्‍त्रमते इल्‍हा इत्‍तोर, “ओर तिनुळ-उनुळ कियना वेलाते, उंदि गत्‍तरा वाताप ओर्क तकलिप वायि. तकलिप वासि ओर हिळु अर्रिर, ओरा पापाल्कुना सिक्‍सा ओरे बोगांचिर.
ROM 11:10 ओरा कळ्‍कुंक हीकट वाताप आसि, निजम बतलो ओर्क दिसाकोंटा आयि. ओरा नडिं कस्‍टाल्‍कुना मोता कांजा पराका, बस्‍केळ्‍ताहाटीं गूनि आसि होन्‍निं,” इंचि इत्‍तोर.
ROM 11:11 अय्ते नना इंकुंदि पोल्‍ले पूसकींतन. इस्राएल लोकुल्‍क पुरागा तेदा पराकोंटा हिळु अरतुरा? अर्रा हिल्‍लुर. गानि ओर पापम कीतुर इंचि ओर्क दोर्कना मुक्‍ति, यहुदि आयवोर्क दोर्कता. दीन हूळसि यहुदि लोकुल्‍कुना कळ्‍क पोत्‍तागोम इंचि पेन अल्हा कीता.
ROM 11:12 यहुदि लोकुल्‍क किरिस्‍तुन हय्सका पापम कीतुर अय्ते दुनियाते मनना वेरे जातितोर्क पेन वेल्‍लेन आसिर्वाद हीता. यहुदि लोकुल्‍कुंक नुकसान आताहेंका यहुदि आयवोर्क पायदा आता. इल्‍हा यहुदि लोकुल्‍कुंक नुकसान आताहेंकेन अंटोर्क पायदा आता अय्ते, मिमेटे विचारम कीम्‍टु, ओक्‍कला ओरगिंटा किरिस्‍तुनहेके पुरागा तिरियानय्ते दुनियाते मनना वेरे जातितोर्क बच्‍चोन वेल्‍ले आसिर्वाद दोर्कार!
ROM 11:13 इंदके यहुदि आयवोरव्टेटाल मिमेट बोर अय्ते विस्वासमते वातिर, मीक वेहानद बतल इत्‍ते, पेन नाकुन प्रेरित इंचि मीवाहाटीं पेरता. अदुनहाटीं नना कियना सेवा बच्‍चोनो बेसतद इंचि वेल्‍लेन कूस मंतन.
ROM 11:14 इल्‍हा कीतेनना मीकु आता पायदातुन हूळसि नावा यहुदि लोकुल्‍कुना कळ्‍क पोत्‍सि ओराव्टेटाल गिच्‍चचुरन्‍ना विस्वासमते वायानुर इंचि नावा आसे.
ROM 11:15 अद बल्हा इत्‍ते, इस्राएल लोकुल्‍क पेनदाल लक्‍कु आताहेंका दुनियातोर पेनदुक दग्‍गेरा आतुर. इसोंटस्के इस्राएल लोकुल्‍कगुडा पेनदुक दग्‍गेरा आंतुर इनकुंट, अस्‍के इद पोल्‍ले वरोर हातोंक मर्रा जीवा अरतापे आयोना!
ROM 11:16 ओक्‍कला अब्राहाम आनि एनकटा पेद्‍दाल्क पवित्रमातोर आते, ओरा पिलाल्कगुडा पवित्रमातोरे आंदुर. ओक्‍कला मराता हिह्कुगिंटा पवित्रमातव आते, मराता कोम्मांगुडा पवित्रमातवे आंदुं.
ROM 11:17 यहुदिल्क इत्‍ते पेन पोस कीता जय्‍तुन मराता कोम्मनसंटोर आंदुर. मिमेट यहुदि आयवोर इत्‍ते केडाते पुटसि-बेर्सता जय्‍तुन मराता कोम्मनसंटोर आंदिर. पेन पोस कीता मराताल सगोम कोम्मन रेब्बिस पोहताप पेन दान नम्मुवा यहुदिल्कुन पोहचीता. पोहचि, केडाते पुट्‍सि-बेर्सता जय्‍तुन मराता कोम्मन तच्‍चि रेब्बिस पोहता कोम्मना जेगाते अंटा वाटताप मीकुन ओरव्टे कल्‍पता. अल्हासि पेन पोस कीता मराता हिह्कुनाल मीकु ताकत दोर्कसंता.
ROM 11:18 बस्‍केळ्‍क आयि, हिह्कुनाले कोम्मांक ताकत दोर्कंता, कोम्मानाल हिह्कुंक आयो इदुन मति इर्रट. अदुनहाटीं “रेब्बिस पोहता कोम्मांकन्‍ना मोमोटे बेसतोरम” इंचि पोंगमट.
ROM 11:19 इद केंजसि, “माकुन अंटा वाटालये कोम्मन रेब्बिस पोहता,” इंचि मिमेट इंदके इनकुंचंतिर बारे!
ROM 11:20 मिमेट इनानद निजमे! गानि उंदि पोल्‍ले मति इर्रट, ओर पेन पोर्रो विस्वासम कियवाहेंका पेन ओर्कुन कोम्मन नर्किसि पोहताप पोह्‍चीता. मिमेट बारे किरिस्‍तुनपोर्रो विस्वासम कीतिर इंचि पेनतोनि कलियसि मंतिट. अदुनहाटीं वट्‍टिदे पोंगसेके तिरियाकोंटा पेनदुक वेरियसि मंटु.
ROM 11:21 बारित्‍ते पेन सतागा पोस कीता मराता कोम्मनसोंटा यहुदिल्कुने रेब्बिस पोहता अय्ते, मिमेट अय्ते केडाते पुटसि-बेर्सता मराता कोम्मनसंटोर, विस्वासमते कमजोर आते मीकुन असले होळसो.
ROM 11:22 नना वेहानद बेस केंजट. मिमेट पेनदा दयातुन, दाना होंगुन बेस एरपाट कीम्‍टु. बोर अय्ते विस्वासमताल पजोळ्क आतुर, ओरापोर्रो पेन होंग हुपिस्‍ता. गानि मिमेट विस्वासमते ताकसेकेन मंतिर इंचि मीवापोर्रो पेनदा दया मंता. हिलाकोंटे मीकुनगुडा कोम्मन नर्किसि पोहताप तेंडसि पोहंता.
ROM 11:23 नर्किसि पोहता कोम्मनसोंटा यहुदि लोकुल्‍क ओक्‍कला मर्रा पेनदापोर्रो विस्वासम कीते, नर्किस पोहता कोम्मन मर्रा अंटा वाटताप पेन ओर्कुन मर्रा दानतोनि कल्‍पकुंता. बारित्‍ते पेन अल्हा किया परंता.
ROM 11:24 मिमेट अय्ते केडाते पुटसि-बेर्सता जय्‍तुन मराता कोम्मनसंटोर आंदिर. यहुदिल्क बारे पेन पोस कीता जय्‍तुन मराता कोम्मनसंटोर आंदुर. अयना मीकुन पेन दाना लोकुल्‍कुने कल्‍पकुत्‍ता अय्ते, यहुदिल्क पेनदागा मर्रा मल्सि वायानय्ते अद ओर्कुन मर्रा अल्कगा कल्‍पकुना परंता.
ROM 11:25 विस्वासुल्‍कुनिटा, “मोमोटे तेल्विगल्‍लोरम” इंचि मिमेट पोंगामन्‍नि. अदुनहाटीं इस्राएलतोरा बारेमता उंदि मर्मम मीकु वेहना इनकुत्‍तन. अद बतल इत्‍ते, पेनदा विचारम परकारम, यहुदि आयवोर बचटुर लोकुल्‍क अय्ते विस्वासमते वायनद मंता ओर अंटोर किरिस्‍तुनपोर्रो विस्वासम कियनदाका इस्राएलता इच्‍चुर लोकुल्‍क पेनदा पोल्‍ले केंजाकोंटा गळसु आसि मनानुर.
ROM 11:26 गानि दाना पजा अंटोर इस्राएल लोकुल्‍कुन पेन पिसागोट्‍टार. इदुना बारेमते इल्‍हा रासि मंता: “पिसागोटनोर सियोनताल वायानुर, ओर याकोब वंसंमतोर्कुन तप्‍पुड हरदाल तिराहचि बेसता हर्दुक तरांतोर,
ROM 11:27 नना ओरा पापाल्कुन मापि कीसि, ओरतोनि कीता करारतुन पूरा कींतन,” इंचि पेन इत्‍ता पोल्‍ले दर्मसास्‍त्रमते रासि मंता.
ROM 11:28 वेल्‍लेटोर इस्राएल लोकुल्‍क किरिस्‍तुना बारेमता बेसता कबुरतुन नम्मुवाहेंका इंदके ओर्कुन पेन बेसता कबुरता पगातोर इंता. दीनहेंदाल मीकु मात्रम पायदा आता. गानि अब्राहाम, इसाक, याकोब ई एनकटा पेद्‍दाल्कुंक हीता पोल्‍ले परकारम यहुदिल्क इंदकेगुडा पेनदा पावरमगल्‍ला लोकुल्‍के आंदुर.
ROM 11:29 बारित्‍ते वरम हियमळता बारेमते आयि, दग्गेर्क केयकुनना बारेमते आयि, पेन बस्‍केने पजोळ्क आयो.
ROM 11:30 यहुदि आयवोर मिमेट, मुन्‍ने पेनदा पोल्‍ले केंजाकोंदिर. गानि इंदके यहुदिल्क पेनदा पोल्‍लेतुन केंजवाहेंका पेन मीकुन दग्‍गेरा कीसि मीवापोर्रो दया कीता.
ROM 11:31 अल्‍हेने इंदके यहुदिल्क पेनदा पोल्‍ले केंजसेक हिल्‍लुर. अदुनहाटीं पेन मीवापोर्रो दया कीता. इदे कुर्पाहेंदाल उंदि रोजु ओरपोर्रोगुडा पेन दया कींता.
ROM 11:32 बारित्‍ते, पेनदुक अंटोर लोकुल्‍कुनपोर्रो दया कियानद मंता. अदुनहाटीं पेन यहुदिल्कुन, यहुदि आयवोर्कुन अंटोर्कुन दाना पोल्‍ले केंजाकोंटा, गळसु कीसि इरता.
ROM 11:33 ओहो, मावा पेनदा दनम, बुद्‍दि आनि तेल्वि बच्‍चोन पेद्‍देद आंद! अद बल्हा न्‍यायम कींता, बस्के कींता, इदुन बोरे एरपाट किया पर्रोर. दाना हर्रि बोर्के तेळियो.
ROM 11:34 दर्मसास्‍त्रमते इल्‍हा रासि मंता: “पेनदा विचाराल्कुन बोर एरपाट किया परंतोर? पेनदुक बोरन्‍ना बुद्‍दि वेहा परांतोरा?
ROM 11:35 हिलाकोंटे बोरन्‍ना पेनदुक बाकिक हीतोर मंतोरा, दान मर्रा तिरियसि तल्कालय? हिल्‍ले.”
ROM 11:36 दुनियाते मनानव अन्‍नि पेनदागटाले वातां, अन्‍निन अदे पुटिस्ता, दुनियाते मनानव अन्‍नि दानाहाटींगे मंतां. युगा-युगाल्‍कुनदाका दानदे महिमा आयि, आमीन.
ROM 12:1 अय्ते विस्वासुल्‍कुनिटा! पेन मनापोर्रो कीता दयातुन मति कीसि, नना मीकुन बतिमलाडसि विनंति कियानद बतल इत्‍ते, मिमेट मीवा पिस्वरतुन पवित्र इरसि, पेनदुक नच्‍चनसोंटा मोक्‍कु हीताप मी पिस्वरतुन जीवाते मननेंकेन अप्‍पजेप्‍पट. इल्‍हा कीतेन मिमेट पेनदा निजम सेवा कीसि तलस्कुत्‍ताप आंता.
ROM 12:2 मिमेट इद दुनियातोर पिसताप पिस्‍सामन्‍नि गानि मिमेट मीवा मनसु मार्सकुंचि पेनदुक नच्‍चना पिस्वर पिस्‍सट. अस्‍के पेनदा इच्‍चा बतलो एरपाट कींतिर. एरपाट कीसि, “अद इच्‍चा वेल्‍लेन बेसतद, कुसि हियानद, बतले तप्पु हिलवद,” इंचि मीकु तेळियंता.
ROM 12:3 पेन दाना कुर्पाते नाकुन सेवक इंचि निलाहता, दानहाटीं नना मीकु वरोर-वरोंक बतल वेहसेक इत्‍ते, पेन मीक तूसि हीता विस्वासमता लेक्‍का परकारमे वळ्कना अचोने, दानकन्‍ना एक्‍को विचारम कियमट.
ROM 12:4 मना मेंदुल उंदे गानि दान्क कय्‍क, काल्क, कळ्‍क, केव्क, तोड्‍डि, मोसोर तल्‍ला इवन्‍नि मंतां. इवन्‍नि उंदे कबळ किय्यका, वेरे-वेरे कबाह्‍क कींतां.
ROM 12:5 अल्हेन मनमगुडा वेल्‍लेन मंदि अय्नागानि किरिस्‍तुनतोनि कलियसि उंदे मेंदुललेह्का मंतोम. इंचि मनम कय्‍क-काल्कुनलेह्का उंदे मेंदुल्क अंटिस मंचि वरोंक-वरोर बेस कलियसि मंतोम.
ROM 12:6 पेन मनापोर्रो कुर्पा हुप्पिचि मनाकु वरोर-वरोंक उंद-उंदि वरम हीता. आ वरमतुन एरपाट कीसि मनम पेनदा सेवा किय्युळ गावाले. ओक्‍कला बोनकन्‍ना पेनदाहेंदाल कबुर तच्‍चि वेहना वरम दोर्कते, ओर ओना विस्वासमता लेक्‍कातेन अद कबळ कियगोम.
ROM 12:7 सेवा कियना वरम दोर्कतोर ओर विस्वासमते सेवा कियगोम, पेनदा पोल्‍लें कराहना वरम दोर्कतोर ओर विस्वासमते पेनदा पोल्‍लें कराहना कबळ कियगोम.
ROM 12:8 कराहचि दैरनेम हियना वरम दोर्कतोर कराहचेके दैरनेम हीसेक होनना, दानम किया परानोर ओर पूरा मनसुनाल दानम कियगोम, लीडर आसि लोकुल्‍कुन ताकसना वरम दोर्कतोर जिम्मेदारिते ओर्कुन ताकिच्गोम आनि दया कियना वरम दोर्कतोर ओर कुसिते दया कियगोम.
ROM 12:9 लोकुल्‍कुंक हुप्‍सना इंचि पावरम कियमट, निजम पावरम कीम्‍टु. तप्पु कबाह्‍कुन हय्समट, बस्‍केळ्‍क बेस कबाह्‍क कीसेक मंटु.
ROM 12:10 उंदि कुटुंबतोरलेसीं वरोंक-वरोर बेस पावरम कीकुंटु, वरोंक-वरोर कदर हियनेंके, मनाकन्‍ना एक्‍को इंकावरोंक कदर हीम्टु.
ROM 12:11 कबळते बस्‍केने लंडु कियमट, पेनदा सेवा कियनाहाटीं मीवा जीवा बस्‍केळ्‍क उसार इर्रट.
ROM 12:12 पेन हीता आसेते मिमेट बस्‍केळ्‍क कूस मंटु. तिप्‍पल्‍क वायिनागानि पजोळ्क होनाकोंटा ओर्सकुंटु. बस्‍केळ्‍क पारतना कीसेके मंटु.
ROM 12:13 पेनदा लोकुल्‍कुंक अव्‍सरम अरतस्के मिहगा मत्‍तद ओर्क हीसि सहायम कीम्‍टु, बोरन्‍ना विस्वासुल्‍क मी लोन वातस्के ओरा सेवा कियालय बस्‍केळ्‍क तयार मंटु.
ROM 12:14 मीकु तकलिप हियानोर्कुंक आसिर्वाद हीम्टु. आसिर्वाद हीम्टु गानि सापनेम हियमट.
ROM 12:15 कुसिते मननोरतोनि मिमेटगुडा कुसिते मंटु, अळानोरतोनि मिमेटगुडा अळट.
ROM 12:16 अंटोरतोनि बेस कलियसि मंटु, पोमाडेंगि वेहकुन्‍मटु. कदर हिल्वा लोकुल्‍कुनतोनि बेस कूळसि मंटु, मोमोटे तेल्विगल्‍लोरम इनकुनमटु.
ROM 12:17 बोरन्‍ना मीकु तकलिप हीते, मिमेट ओर्क तकलिप हीसि बदला येतमट. अंटोरा नदरते बद बेसो, अदे कियना विचारमते बस्‍केळ्‍क मंटु.
ROM 12:18 कुदुरतच्‍चोन अंटोरतोनि बेस कलियसि सांतिते मनना कोसिस कीम्‍टु.
ROM 12:19 “बदला येतना कबळ नावद आंद, मिमेट बदला येतमट,” इंचि पेन वेहता पोल्‍ले पुस्तकमते रासि मंता. अदुनहाटीं नावा पावरमगल्‍ला विस्वासुल्‍कुनिटा, मिमेट बदला येतमट, ओरा बदला पेन येतंता, ओर्कुन पेनदुक होळसीम्टु.
ROM 12:20 अल्हा पगा येतनदानकन्‍ना “मीवा पगातोर कर्वुने मत्‍तस्के ओर्क गाटो दोस्सट, दूपाते मत्‍तस्के एर हीम्ट. अल्हा कीते, अय्यो! मोमोट बच्‍चोन पेद्‍दा तप्पु कीतोम, इनकुंचि ओरद-ओर्के सिग्गु वांता.”
ROM 12:21 मीवा कय्‍दाल सेड्‍डा कबाह्‍क आयाकोंटा उसारते मंटु, बेसता कबाह्‍क कीसि सेड्‍डा कबाह्‍कुन ओळिच्‍चट.
ROM 13:1 इदु दुनियापोर्रो मननव अन्‍नि अदिकाराल्‍क पेनदाहेंदाले वातव आंदु, इंदके राज्येम कियनोर्कगुडा पेने अदिकारम हीता. अदुनहाटीं राज्येम कियनोर वेहाताप अंटोर बेस केंजिस ताका पींता.
ROM 13:2 बारित्‍ते, अदिकारि वेहाताप ताकवोर, पेन निलाहता पद्‍दतकुंक विरोद कीताप आंता. अल्हा ताकवोर ओनद-ओरे सिक्‍सा दोर्किच्‍कुंतोर.
ROM 13:3 बेसता कबाह्‍क कियानोंकु अदिकारिना वेर्रे मन्‍नो, तप्पु कबळ कियानोंक अदिकारिना वेर्रे मनंता. अदुनहाटीं अदिकारिंक वेरियाकोंटा मंदना इत्‍ते, मिमेट सत्‍तेमते ताकट. अस्‍के ओर मीकुन मेच्‍चुकुंतोर.
ROM 13:4 मीवा बेसताहाटींगे अदिकारिल्‍क पेनदा सेवाकुल्कुनलेसीं कबळ कीसेक मंतुर. ओक्‍कला मिमेटगिंटा बतलन्‍ना तप्पु कीते ओर मीकु सिक्‍सा हींतुरे, इंचि मिमेट ओर्क वेरियसि मना पींता. तप्पु कबळ कियानोर्कुंक सिक्‍सा हियनाहाटींगे पेन ओर्कुन निलाहता.
ROM 13:5 अदुनहाटीं मिमेट सिक्‍साताल सिराप तपिच्‍कुनालय आयो गानि, मना आत्मातुन कूस इर्रलय ओर वेहाताप ताका पींता.
ROM 13:6 देसेमतुन ताकसना अदिकारिल्‍क पेनदा सेवकुल्के आंदुर. अदुनहाटीं मिमेट ओर्क कर दोहसेक मंतिर.
ROM 13:7 सरकारुंक बतलय्ते हियना मंतांगो अव हीसीम्टु, कर दोहनद दोहटु, तासिल दोहनद दोहटु, अदिकारिल्कुंक वेरियसि मनना इत्‍ते ओर्क वेरियट, बोर्क कदर हियना मंता ओर्क कदर हीम्टु.
ROM 13:8 मिमेट इंकावरोन पावरम कीम्‍टु, पावरम कियमळ तप्‍पा बोर्के आयि बदे पोल्‍लेता बाकि मनमट. अल्हा मत्‍तोर मूसाना नियमतुन पालन कीताप आंतोर.
ROM 13:9 अदुनहाटीं, “बोगमतनम कियमट, बोर्कुन हव्कमट, दोंगातनम कियमट, इंका वरोनदुनपोर्रो आस्‍ति कियमट,” इंचि आदेसकुने रासि मंता. इंका बवन्‍ना वेरे नियमकु मत्‍ते, अव अन्‍निगुडा उंदे पोल्‍लेते कलियंतां, अद बद पोल्‍ले इत्‍ते, “नीवद निमे बच्‍चोन पावरम कीकुंतिनो अचोने वेरेतोर्कुनगुडा पावरम कीम.”
ROM 13:10 वेरेतोरपोर्रो पावरम हूपिचनोर, ओरा नुकसान किय्योर. अदुनहाटीं पावरमता पोल्‍लेने, दर्मसास्‍त्रमता पोल्‍लें निजम आंतां.
ROM 13:11 मिमेट इवन्‍नि तप्‍पाकोंटा कियना. मनाहाटीं दुनियाताल मुक्‍ति हियना पेनदा वेला वेल्‍लेन दग्‍गेरा एव्ता. मनम सामिन विस्वासम कीता आ वेलाकन्‍ना, इंदके मना मुक्‍ति दग्‍गेरा मंता. अदुनहाटीं मिमेट निद्रताल तेदाना वेला वाता. तेदसि वेलातुन एरपाट कीसि ताकट.
ROM 13:12 इंदके हीकट मारालय आसि, पोळ्‍द पेय्सालय आता. अदुनहाटीं हीकटते कियानसोंटव कराब कबाह्‍कुन होळसिसि वेलगुने कियानसोंटा बेसता कबाह्‍कुन मना जीवाते एतकुनकोम.
ROM 13:13 पोद्‍दला ओप्‍पनालायक मनम ताकाना. अदुनहाटीं लावारिस तिरिया मनि, कराब पार्टिं कियामन्‍नि, रिम्मा वायानव उनामन्‍नि, बोगम कबाह्‍क कियामन्‍नि, जगडाल्‍क कियामन्‍नि, इंकावरोन पोर्रो कळ्‍क पोत्‍ता मन्‍नि, गानि मनम बेसता हर्दे ताकाना.
ROM 13:14 इत्‍ते, सामि येसु किरिस्‍तुना पोल्‍लेन मना जीवाते, मना मनसुनाल एतकुनना. मना मनसुने कराब गुनाल्कुंक हर्रि हियमटु.
ROM 14:1 बोर अय्ते विस्वासमते कमजोर मंतोर, ओन्क बेस कदर हीसि मीलोप्‍पो कल्‍पट. गानि ओनतोनि बद बेसतद, बद बेसतद आयो इंचि वळ्कसेक मनमट.
ROM 14:2 तिनमळ बारेमते केंजट. विस्वासमते मनानोरव्टेटाल इच्‍चुर बारे, “तिननव बवय्ते मंतांगो, अन्‍नि तिनावच्‍चु,” इंचि इंतुर, गानि विस्वासमते पूनें वातोर इच्‍चुर बारे, “हव्‍विं तिनामन्‍नि, सादा कुसिर तिनमळे बेस,” इंचि इंतुर.
ROM 14:3 हव्‍विं तिनानोर आयि, तिनवोर आयि, ओर इव्वुर्कुन पेन दाना मनकालोर इंचि पेर्कुत्‍ता. अदुनहाटीं हव्‍विं तिनानोर तिनवोन पास्कमनि, हव्‍विं तिनवोर तिनानोनपोर्रो तप्‍पु दोस्‍सामन्‍नि.
ROM 14:4 इंकावरोना जीतागान हूळसि, “निमे बेस कबळ कीसंतिना हिल्‍लेना” इंचि वेहानद मीकु अव्‍सरम हिल्‍ले. अद कबटा लेक्‍का ओना मालके हूळांतोर. पेन दाना मनकालोर्कुन गट्‍टिगा निल्‍हा परांता, अदुनहाटीं असोंटा विस्वासुल्‍क गट्‍टिगेन निल्‍लंतुर.
ROM 14:5 बोरो-बोरो बदाना उंदि रोजुन अन्‍नि रोजकुंकन्‍ना बेसता रोजु इंतुर. इंका बोरो बारे अन्‍नि रोजुक उंदेतीर समानमे इंचि इंतुर. बोरे आयिर मी मनसुने बद बेसतद इंचि अनपिस्‍ते अल्हेन कीम्‍टु.
ROM 14:6 बोरन्‍ना बदाना उंदि रोजुन अन्‍नि रोजकुंकन्‍ना बेसता रोज इंचि नोमते, सामिनाहाटींगे नोमंतोर. अन्‍नि तिनानोरगुडा सामिनाहाटीं तिंतोर आनि पेनदुक दन्यवाद कींतोर. बोर अय्ते तिन्‍नोर ओरगुडा सामिनाहाटीं तिनाकोंटा मंचि पेनदुक दन्यवाद कीसेके मनांतोर.
ROM 14:7 मनालोप्‍पो बोरे आयिर, संतम ओनाहाटींगे इंचि पिसोर, सामिनाहाटीं पिस्संतोर. हायिनागानि सामिनाहाटींगे हांतोर. इल्‍हा मनम हायिना, पिस्सिना सामिना लोकुल्‍कुमे आंदुम.
ROM 14:9 जीवाते मत्‍तोर आयि, हासोत्‍तोर आयि, अंटोर्कुंक सामि आसि मनना इंचि किरिस्‍तु हासि मर्रा जीवाते तेदतोर.
ROM 14:10 अदुनहाटीं विस्वासमते गट्‍टिगा हिलुवा विस्वासिर आयिर, विस्वासमते गट्‍टिगा मत्‍ता विस्वासिर आयिर, निमे ओरापोर्रो तप्पु बारि दोस्संतिन? ओर्कुन बारि पास्‍कंतिन? बारित्‍ते मनद अंटोरद उंदि रोज पेनदा राजगद्‍देता मुन्‍ने न्‍यायम आयना मंता.
ROM 14:11 दीना बारेमते पेनदा पुस्तकमते इल्‍हा रासि मंता: “नना ओट्‍टु तिंचि वेहासेक मंतन, अंटोर लोकुल्‍क नावा मुन्‍ने टोंगरां ऊनसि, ननाने पेन इंचि एरपाट कियानुर.” इंचि मंता.
ROM 14:12 अदुनहाटीं मनम अंटोरम पेनदा मुन्‍ने नित्‍तिसि मना लेक्‍का हियापींता.
ROM 14:13 इंदकेटाल मनम वरोना पोर्रो वरोर तप्पु दोस्‍सामन्‍नि. इच्‍चोरे आयाका, दंटाता विस्वासिन विस्वासमताल तप्‍पिच्‍चना कबाह्‍क, पापमते अरहना कबाह्‍क मिमेट कियमट, दीन मति इर्रट.
ROM 14:14 नना येसु सामिनतोनि कलियसि मंतन इंचि अन्‍नि तिंडिं नाकु ओज्जंतां, इदु नना एरपाट कीकुत्‍तन. गानि बोर्क अय्ते बदाना तिंडि ओज्जाकोंटे, ओर अदुन तिनाकोंटा मत्‍तेने बेस मनंता.
ROM 14:15 निमे तिनानवुन हूळसि, पूना विस्वासुल्कुना मनसु नाराज आसि पेनदुन होळसीते, नीवा लोप्पो पेनदा पावरम हिल्‍ले इत्‍तापे. असल ओराहाटींगुडा किरिस्‍तु हातोर, गानि निमे नी गाटोताहेंदाल ओर्कुन नासडेम कियमा.
ROM 14:16 इत्‍ते, “नना बेस कीसंतन, बिल्कुल तप्‍पा हिल्‍लेन इनकुंतिन,” गानि इंकावरोना नदरते निमे तप्पंतिन. दीनहेंदाल नीवदे बदनाम आंता. इंचि तिनुळ-उनुळते जेगर्ता मन्‍नु.
ROM 14:17 पेनदा राज्येम, इत्‍ते मना पिस्वर पोर्रो किरिस्‍ते राज्येम कियना. दाना राज्येम इत्‍ते तिनमळ-उनमळता पोल्‍लेंगें अचोने इंचि इनकुनमट गानि पेनदा मुन्‍ने सत्‍तेमते पिसमळ, पवित्र आत्माहेंदाल दोर्कना सांति, आनंदमते मनमळ आंद.
ROM 14:18 इल्‍हा किरिस्‍तुना सेवा कीतोन पेन मेच्‍चुकुंता, लोकुल्‍कुना नड्‍डुमगुडा ओनकु कदर दोर्कंता.
ROM 14:19 अदुनहाटीं मनम बस्‍केळ्‍क सांति दोर्कानव आनि विस्वासमते बेर्सना कबाह्‍क कीकोम.
ROM 14:20 तिंडिहाटीं पेनदा कबळतुन नासडेम कियमट. अन्‍नि तिंडिं बेसतवे गानि बदाना तिंडि बोनकन्‍ना इस्‍टम हिलाकोंटे, दान मनम तिंचि ओन विस्वासमताल हिळु अरहमळ मनद तप्पे आंदु.
ROM 14:21 हव्‍विं तिनमळ आयि, अंगुर कल्‍लु उनमळ आयि, इंका बतलन्‍ना आयि पूना विस्वासुल्कुंक इस्‍टम हिलाकोंटे, निमे इव अन्‍निनाल लक्‍कु मत्‍तेने बेस मनंता.
ROM 14:22 इवुना बारेमते मीवा विस्वासम बल्हा मंतानो, अद मीकु आनि पेनदुके एरपाट मनगोम. बोर मनकल अय्ते ओना विस्वासमतुन पीसि “तप्‍तन-हेळतन” इंचेके अनमानम कियाकोंटा मनांतोर, ओर वेल्‍लेन आसिर्वाद दोर्कतोर आंदुर.
ROM 14:23 गानि अनमानम कीसेक तिनानोर, पेनदा मुन्‍ने तप्पु कीतोना लेक्‍कातेने वांतोर. बारित्‍ते ओर पेन पोर्रो विस्वासम कियाका तिंचेके मंतोर. पेन पोर्रो विस्वासम कियवा कबाह्‍क, ओन पापमते अरहंतां.
ROM 15:1 अदुनहाटीं, विस्वासमते गट्‍टिगा मत्‍तोरम मनम सिराप मनाकु सुकम हियना कबाह्के कियाकोंटा विस्वासमते कमजोर मत्‍तोर्कुना कबाह्‍कुन हूळसि ओप्के पीसि मंदगोम.
ROM 15:2 मना दंटातोर्कुना बेसताहाटीं ओरा विस्वासम बेर्सना इंचि ओर्कुन कूस इर्रना लायक मनम मनमळ गावाले.
ROM 15:3 किरिस्‍तु इद बूमिपोर्रो वातस्के ओनद ओरे कूस कीकुनालय वायाहिल्‍लोर. गानि, “पेनबाबा, नीकुन अपमानम कीतोरा अपमानम नाक आया पीता.” इंचि किरिस्‍तुना बारेमते दर्मसास्‍त्रमते रासि मत्‍ताप जर्गता.
ROM 15:4 दर्मसास्‍त्रमते मुन्‍नेटाले रासि मत्‍तद उंदि-उंदि पोल्‍ले मनाकु कराहनाहाटींगे मंता. अदुन करियते मनम ओप्के पीसि दैरनेमते पिस्‍सा परांतोम इत्‍ता आसे दोर्कंता.
ROM 15:5 अदुनहाटीं मिमेट येसु किरिस्‍तुना विचारम मत्‍ताप, अंटोर कूळसि मंदालय पेन मीकु दैरनेम, ओप्के हियिकांटीं.
ROM 15:6 इल्‍हा मिमेट अंटोर उंदे मनसु, उंदे लेंग आसि मना सामि येसु किरिस्‍तुना पेनबाबन तल्‍सकुना परांतिर.
ROM 15:7 किरिस्‍तु मीकुन बल्हा ओप्‍कुत्‍तोरो, अल्‍हेने मिमेटगुडा विस्वासमते कमजोर मत्‍तोर्कुन पेनदुक महिमा दोर्कना इंचि ओप्‍कुंटु.
ROM 15:8 नना वेहानद बतल इत्‍ते, एनकटा यहुदि पेद्‍दाल्कुंक पेन पोल्‍ले हीसि मत्‍ता, अद पोल्‍ले निजम आयाना इंचि, कतना आतोरा लोप्पो किरिस्‍तु सेवक आसि वातोर. इद पोल्‍लेतुन मर्गमटु.
ROM 15:9 अचोने आयाका यहुदि आयवोरगुडा पेन ओरापोर्रो कीता दयाताहाटीं दान तल्‍सकुनना इंचि किरिस्‍तु वातोर. बजन संहिताते इल्‍हा मंता: “नना यहुदि आयवोरतोनि कलियसि, नीकुन तल्‍सकुंतन.”
ROM 15:10 इंका इल्‍हागुडा रासि मंता. “ए यहुदि आयवोरिटा, पेनदा लोकुल्‍कुनतोनि मिमेटगुडा कूस आम्टु.”
ROM 15:11 मर्रा इल्‍हागुडा रासि मंता: “ए यहुदि आयवा लोकुरिटा, मिमेट सामिन तल्सकुंटु, पूरा देसेमतोर ओन तल्सकुंटु.”
ROM 15:12 मर्रा यसायाहल रासतोर: “यिस्‍साना वंसंमताल वरोर पुट्‍टानुर, ओर अन्‍नि जातिनोरपोर्रो राज्येम कियानुर, इंका अंटोर ओनपोर्रो आसे इर्रनुर.”
ROM 15:13 मिमेट विस्वासम कीताहाटीं, मीकु आसे हियना पेन अन्‍नि तीरकुना कुसि, सांति हियिकांटीं. इल्‍हा पवित्र आत्माता ताकतहेंदाल मीवा आसे बेरस्सेक होंदार.
ROM 15:14 विस्वासुल्‍कुनिटा! मीलोप्‍पो वेल्‍ले बेसतनम आनि तेल्वि मंता. अदुनहाटीं मिमेट वरोंक-वरोर बुद्‍दि वेहकुना परांतिर इंचि नाक पुरागा बरोसा मंता.
ROM 15:15 पेनदा कुर्पाहेंदाल यहुदि आयवोरा नड्‍डुम येसु किरिस्‍तुना सेवक आसि पेर्मनालेसीं बेसता कबुर वेहालय नाकु अदिकारम दोर्कता. अदुनहाटीं कोन्‍नि पोल्‍लें मीकु मति कीसि हियना इंचि मीकु दैरनेमते रासतन. ना मनसुने बतल मंता इत्‍ते, यहुदि आयवोर पवित्र आत्माहेंदाल पवित्र आयाना आनि पेन ओर्कुन ओप्कुननालायक कियना.
ROM 15:17 येसु किरिस्‍तुना लोप्पो कलियसि मंचि, इल्‍हा पेनदा सेवा कीसेके इंचि नना वेल्‍लेन कुसिते मंतन.
ROM 15:18 यहुदि आयवोर नना वेहता पोल्‍लेन केंजतुर, नना कीतव चिन्‍हां आनि इचंत्रमता कबाह्‍कुन हूळतुर. केंजसि, हूळसि ओर किरिस्‍तुनपोर्रो विस्वासम इरतुर. इल्‍हा नना पवित्र आत्माता बलमते येरुसलेम सहरताल इलुरिकुम एरिया एवनदाका किरिस्‍तुना बेसता कबुरतुन वेहतन. अदुनहाटीं किरिस्‍तुनाहेंदाल कीता पोल्‍लेंगें नना दैरनेमते वेहंतन. इवुंक तप्‍पा वेरे बवे पोल्‍लें वेहोन.
ROM 15:20 किरिस्‍तुना पोरोल बगा अय्ते केंजा हिल्‍लुर अगा होंचि नना बेसता कबुर वेहना इंचि नावा मनसु तनलाळसेक मंता. गानि इंकावरोर दोहता पुनादिपोर्रो लोन दोहमळ इस्‍टम हिल्वाहेंका, इंकावरोर वेहता नाहकुने होंचि वेहमळ नाकु इस्‍टम हिल्‍ले.
ROM 15:21 गानि दर्मसास्‍त्रमते इल्‍हा रासि मंता: “ओना बारेमते बेसता कबुर एरपाट हिल्वोर ओन हूळानुर. ओना बारेमते केंजवोर, ओर्क तेळियार.”
ROM 15:22 इल्‍हा बेसता कबुर एववगा नना होनगोम इत्‍ता विचारमतेन मनुंदुन, अदुनहाटीं नना मिहगा वाया पराहिल्‍लेन.
ROM 15:23 गानि इंदके, हींदा एरियाने येसु किरिस्‍तुना बेसता कबुर वेहना कबळतुन महतन, इगे बतल कबळ हिल्‍ले. अल्‍हेने वेल्‍लेने वर्सानाल मिहगा वांतन इंचि नावा जीवा तनलाळसेक मंता.
ROM 15:24 अदुनहाटीं नना स्‍पेन देसेम होननेंके मिहगा वांतन इंचि आसे पळसंतन. मीवातोनि कोन्‍नि रोजकु मंचि नावा मनसु निंडता पजा नाकुन अगटाल मुन्‍नेटा पय्‍नेमताहाटीं सार्ला कीम्‍टु.
ROM 15:25 गानि इंदके नना पेनदा लोकुल्‍कुंक सेवा कियालय येरुसलेम दांतन.
ROM 15:26 बारित्‍ते मेसिडोनिया, अकाया एरियातोर विस्वासुल्‍क संदा वाटसि, येरुसलेम सहरते मत्‍ता पेनदा लोकुल्‍कुनाल बोर अय्ते गरिब मंतुरो ओर्क सहायम कियना इंचि विचारम कीसि नाक हीतुर.
ROM 15:27 ओर इल्‍हा कीसि कूस मत्‍तुर, इल्‍हा कियमळे गावाले. बारित्‍ते यहुदि आयवोर्क पेनदा लोप्पो कलियालय आसिर्वाद दोर्कता, ओर यहुदि लोकुल्‍कुंक अव्‍सरम मत्‍तवुना सेवा कियमळ गावाले.
ROM 15:28 अदुनहाटीं जमा कीता कोत्‍तन नना बेस ओसि ओर्क अप्‍पजेपंतन, पजा अगटाल होननेंके मीकु कलियसि स्‍पेन देसेम दांतन.
ROM 15:29 नना मिहगा वातस्के मनम अंटोरम किरिस्‍तुना आसिर्वादते निंडांतोम इंचि नाकु एरपाटे.
ROM 15:30 विस्वासुल्‍कुनिटा! मना येसु किरिस्‍तु सामिनाहेंदाल आनि पवित्र आत्माता पावरमहेंदाल मीकु बतल विनंति कीसेक इत्‍ते, यहुदिया एरियाते मनना अविस्वासि लोकुल्‍कुना कय्‍दाल नना पिस्सना आनि येरुसलेमते नना कियना सेवातुन पेनदा लोकुल्‍क ओप्कुनना, इंचि मिमेट नावाहाटीं उंदि मनसुने पेनदुक पारतना कीम्‍टु.
ROM 15:32 मनम पारतना कीताप पेनदुक इस्‍टम मत्‍ते, नना मिहगा वासि कोन्‍नि रोजकु मीवातोनि कुसिते मनंतन.
ROM 15:33 सांति हिय्यना पेन मीवा अंटोरतोनि मन्‍निकांटी. आमीन.
ROM 16:1 मना विस्वासि अक्‍कल पीबे इनानद बच्‍चोरो बेसतद आंद. अद किंकिरया नाटेना कलिसियाते सेवा कीसेक मंता.
ROM 16:2 अद वेल्‍लेटोर्क सहायम कीता, अल्‍हेने नाकगुडा सहायम कीता. अद मिहगा वायानय्ते, पेनदा लोकुल्‍क ओप्‍पनालायक मिमेट दान बेस हूळकुंटु. अल्‍हेने दान्क बतलन्‍ना अव्‍सरम मत्‍ते सहायम कीम्‍टु.
ROM 16:3 पिरिसकिला आनि दाना मुय्दो अकविलांक नावाहेंदाल जोहार वेहाटु. ओर नावातोनि येसु किरिस्‍तुना सेवा कियानोर आंदुर.
ROM 16:4 ओर नाकुन पिसागोटनाहाटीं ओरा जीवातुन हियालयगुडा तयार मत्‍तुर. नना ओर्क दन्यवाद कींतन. सिराप ननाने आयो गानि यहुदि आयवोरा अन्‍नि कलिसियानोरगुडा दन्यवाद कींतुर.
ROM 16:5 ओरा लोतगा जमा आयाना कलिसियातोर्कगुडा नावाहेंदाल जोहार वेहाटु. आसिया एरियाते अंटोर्कन्‍ना मुन्‍ने किरिस्‍तुन विस्वासम कीतोर ना दंटागाल इपेनितुस इननोंक, नावा जोहार वेहाटु.
ROM 16:6 मीवाहाटीं वेल्‍ले कस्‍टपळतद मरियमुंक नावा जोहार वेहाटु.
ROM 16:7 अंदरिनिकुस आनि युनियास ओर नावा जीवातोर आंदुर, ओर नातोनि जेलने मत्‍तुर, ओर प्रेरितुल्कुना लोप्पो पोरोल पेय्सतोर इंचि अंटोर ओर्कुन एरपाट कींतुर, ओर नाकन्‍ना मुन्‍नेने किरिस्‍तुन विस्वासम कीतुर, ओर्क नावा जोहार वेहाटु.
ROM 16:8 सामिन लोप्पो ना पावरमगल्‍ला अंपलितुसुंक जोहार.
ROM 16:9 मावातोनि कलियसि किरिस्‍तुना सेवा कियानोर उरबानुसुंक नावा जोहार, अल्‍हेने नावा पावरमगल्‍ला इस्‍तुकुसुंकगुडा नावा जोहार वेहाट.
ROM 16:10 किरिस्‍तुनलोप्‍पो तकलिप वायिनागानि होळसाकोंटा इमानदारते मत्‍ता अपिलेस इनानोंक नावा जोहार. अरिस्‍तुबुलुसना लोतोर्कुंकगुडा जोहार वेहाट.
ROM 16:11 नावा जीवातोर हेरोदियोंकु जोहार वेहाट. नरकियुसुना लोतोर बोर अय्ते सामिन विस्वासम कीतुर ओर्क जोहार वेहाटु.
ROM 16:12 तिरुपेना आनि तिरुपोसा इनना अक्‍काह्‍क सामिनाहाटीं कस्‍टपळंतां, अवुंक जोहार वेहाट. नावा पावरमगल्‍ला परसिस इनना अक्‍कलगुडा सामिनाहाटीं वेल्‍ले कस्‍टपळता, दान्क जोहार वेहाट.
ROM 16:13 बोनय्ते पेन पेरकुत्‍ता, आ रुपुस इनानोंक आनि ओना यावल इत्‍ते नावा यावानसोंटद, ओर्क नावाहेंदाल जोहार वेहाट.
ROM 16:14 असुकिरितुसुंक, पिलगोनिंक, हिरमेसुंक, पत्रुबासुंक आनि हिर्मोसुंक जोहार वेहाट, ओरतोनि मनना विस्वासुल्कुंकगुडा जोहार.
ROM 16:15 पिलोलोगुसुंक, युलियंक, नेरयुसुंक आनि ओना हेलड्‍क जोहार वेहाट, उलुम्पासुंक आनि ओरतोनि मनना पेनदा लोकुल्‍कुंक जोहार.
ROM 16:16 मिमेट वरोंक वरोर कलियतस्‍के पवित्र पावरमते जोहार कीम्‍टु. किरिस्‍तुना अन्‍नि कलिसियानाहेंदाल मीकु जोहार.
ROM 16:17 विस्वासुल्‍कुनिटा! इच्‍चुर लोकुल्‍क मिमेट करियता पोल्‍लेन हेळाहलय ई पोल्‍लेंक विरोदमते वेरे पोल्‍लें वेहचि मीलोप्‍पो वरोनद-वरोंक अर्राकोंटा कींतुर. असंटोरतोनि उसारते मंचि, ओर्क लक्‍कु मंटु इंचि नना मीकु विनंति कीसेक मंतन.
ROM 16:18 असंटोर मना सामि किरिस्‍तुना सेवा किय्युर, गानि ओरा पीटाहाटीं सेवा कींतुर. ओरा तिय्यटा पोल्‍लेनाहेंदाल सीदा-सादा लोकुल्‍कुन मुळहंतुर.
ROM 16:19 बेसता कबुरता पोल्‍लें मत्‍ताप मिमेट ताकसेक इंचि अंटोर केंजतुर, अदुनहाटीं नना वेल्‍ले कुसिते मंतन. मिमेट बेसता पोल्‍लेनहाटीं बुद्‍दितोर आसि मंटु, सेड्‍डा पोल्‍लेनहाटीं लक्‍कु मंटु इंचि नना मीकु वेहासेक मंतन.
ROM 16:20 मनाकु सांति हियना पेन बिराने देय्यमतुन मीवा काल्कुनगा तच्‍चि जारसि पोहंता. मना सामि येसु किरिस्‍तुनद मीवापोर्रो कुर्पा मन्‍निकांटी, आमेन.
ROM 16:21 नावातोनि कलियसि किरिस्‍तुना सेवा कियानोर तिमोतिनाहेंदाल मीकु जोहार. नावा जीवातोर लुकियुस, यासोन आनि सोसिपत्रु ईराहेंदाल मीकु जोहार.
ROM 16:22 पौलुस वेहताप इद सिट्‍टितुन नना तेरतियुस इननोन रासतन, सामिना लोप्पो मीकु अंटोर्क जोहार.
ROM 16:23 नाकुन, कलिसियातोर्कुन हेडमितोरलेसीं बेस हूळना गयुसनाहेंदाल मीकु जोहार. इद नाटेना कोत्‍तना व्यवहार कियानोर, इरास्‍तुसना हेंदाल मीकु जोहार. अल्‍हेने कवारतुस दादानाहेंदाल मीकु जोहार.
ROM 16:25 येसु किरिस्‍तुना बारेमते नना वेहता बेसता कबुर परकारम, पेन मीकुन विस्वासमते इंका गट्‍टिगा किया परांता. इद बेसता कबुर एनकटा कालमताल मर्ममते मत्‍ता. गानि इंदके पेनदा कबुरतोर रासता पुस्‍तकाल्‍कुना हेंदाल मर्ममते मत्‍ता बेसता कबुरतुन बय्यारा कियालय माकु वेहता. अंटोर लोकुल्‍क इद कबुरतुन विस्वासम कीसि, पेनदा पोल्‍लेने ताकाना इंचि पेन आदेस हीता. आ बस्‍केळ्‍क मनना उंदे तेल्‍विगल्‍ला पेनदुन, मनम येसु किरिस्‍तुनाहेंदाल बस्‍केळ्‍क महिमा कीकोम. आमीन.
1CO 1:1 नना पौलुसुन, किरिस्‍तु येसुना प्रेरित आयालय पेन नाकुन दाना मनसुनाल केयता. नावा आनि सोस्‍तिनेस दादानाहेंदाल जोहर.
1CO 1:2 कुरेंति सहरते मनानोर किरिस्‍तु येसुनलोप्‍पो पवित्र आता पेनदा कलिसियातोर्कुंक, आनि वेरे-वेरे जेगाने मना सामि इत्‍ते, ओरा आनि मना येसु किरिस्‍तुना पोरोलते आरादना कियाना अंटोर बक्‍तुल्कुंक रासता सिट्‍टि,
1CO 1:3 मना पेनबाबाल आनि सामि येसु किरिस्‍तुनाहेंदाल कुर्पा, सांति दोर्कसेक मन्‍निकांटी.
1CO 1:4 किरिस्‍तु येसुनलोप्‍पो मीक पेन हीता कुर्पाताहाटीं, नना पेनदुन बस्‍केळ्‍क दन्यवाद कींतन.
1CO 1:5 किरिस्‍तुना गवाइ मीलोप्‍पो गट्‍टिगा मत्‍ता इंचि, मिमेट अन्‍नि तीरुकुने वळ्कुमळते आनि बुद्‍दिते निंडिस होत्‍तिर.
1CO 1:7 अदुनहाटीं मिमेट पेनदा बद्‍दे आत्माता वरमते तक्‍को हिल्‍लिर, मिमेट मना सामि येसु किरिस्‍तु मर्रा वायानद एदुर हूळसेक मंतिर.
1CO 1:8 सामि येसु किरिस्‍तु मर्रा वायाना रोजुने मिमेट दोसेम हिलाकोंटा मंदना इंचि पेन मीकुन आकिरदाका गट्‍टिगा इर्रंता.
1CO 1:9 पेन विस्वासम लायकतद आंद. अद दाना मर्रि मना सामि येसु किरिस्‍तुनतोनि कूळसि मनालय मीकुन केयता.
1CO 1:10 विस्वासुल्‍कुनिटा! मीलोप्‍पो जगडाल्‍क आसेक मंतां इंचि क्‍लोयेना लोतोर नाक वेहतुर. अदुनहाटीं मिमेट अंटोर उंदे पोल्‍लेते ताकाटु, मीलोप्‍पो वरोनद-वरोंक अर्राकोंटा मनमट, गानि मिमेट उंदे मनसुने, उंदे विचारमते कलियसि मंटु इंचि नना मीक मना सामि येसु किरिस्‍तुना पोरोलते विनंति कीसेक मंतन.
1CO 1:12 नना वेहना पोल्‍ले इदे गदा, मीवव्टेटाल वरोर, “नना पौलुसनोन आंदुन,” इंकावरोर, “नना अप्‍पुलोसनोन आंदुन,” इंकावरोर, “नना केपानोन आंदुन,” इंकावरोर, “नना किरिस्‍तुनोन आंदुन,” इंचि इंतिर.
1CO 1:13 बतल, किरिस्‍तुन तूसुक कीतिरा? पौलुस क्रुसुनपोर्रो मीवाहाटीं जीवा हीतोरा? हिलाकोंटे पौलुसुना पोरोलते मिमेट बापतिस्मा एततिरा?
1CO 1:14 नना मिहागटाल क्रिसपुसुंक आनि गयुसुंके बापतिस्मा हीतन, बेस आता ओर्क आयाका बोनके हिया हिल्‍लेन, पेनदुक दन्यवाद कींतन.
1CO 1:15 हिलाकोंटे नावा पोरोलतेन बापतिस्मा एततिर इंचि बोरन्‍ना इंचि मन्‍नेर.
1CO 1:16 नना स्‍टिपनसना लोतोर्कगुडा बापतिस्मा हीतन, ईर आयाका इंका बोर्कन्‍ना नना हीतना, नाक एर्का हिल्‍ले.
1CO 1:17 बारित्‍ते किरिस्‍तु नाकुन बापतिस्मा हियालय लोहा हिल्‍लोर, गानि बेसता कबुरतुन वेहालय लोहतोर. अदगुडा मनकना बुद्‍दि मत्‍ताप आयो, अल्हा वेहानय्ते किरिस्‍तु क्रुसुनपोर्रो हाता ताकततद अर्तम मन्‍नो.
1CO 1:18 क्रुसता पोल्‍ले वेहमळ इत्‍ते नासडेम आयानोराहाटीं मुर्कतनम आंदु, गानि पेन मनाकुन पिसागोटता, अदुनहाटीं पेनदा पोल्‍ले मनाकु बलम आंदु.
1CO 1:19 इदुना बारेमते, दर्मसास्‍त्रमते इल्‍हा रासि मंता, “तेल्विगल्‍लोर्कुना तेल्‍वितुन नासडेम कींतन, उसारगल्‍लोर्कुना उसारतनमतुन पास्कंतन.”
1CO 1:20 अय्ते, बगा मंतोर तेल्विगल्‍लोड? बगा मंतुर दर्मसास्‍त्रम कराहना गुरुल्क? ई दुनियाता वाद-विवाद कियानोर बगा मंतुर? इद दुनियातोरा तेल्वि पेनदा मुन्‍ने मुर्कतनम आंद.
1CO 1:21 बारित्‍ते, पेनदा तेल्‍वितुन, दुनियाता लोकुल्‍क ओरा सतता तेल्‍विते पेनदुन एरपाट किया हिल्‍लुर. मोमोट बदाय्ते मुर्कतनमता कबुर वेहंतोमो, अदुना हेंदाल विस्वासम कीतोर्क मुक्‍ति दोर्कना, इदे पेनदुक बेस अनपिच्‍चंता.
1CO 1:22 बारित्‍ते यहुदिल्क अय्ते चिन्‍हां गावाले इंतुर, युनानि लोकुल्‍क बारे तेल्वि पहकंतुर.
1CO 1:23 गानि मोमोट अय्ते क्रुसुनपोर्रो हाता किरिस्‍तुना पोल्‍लें वेहंतोम. इद यहुदिल्कुंक विस्वासम किया परवसोंटा पोल्‍ले आंद. आनि यहुदि आयवोर्कुंक मुर्कतनमतसोंटा पोल्‍ले आंद.
1CO 1:24 गानि पेन बोर्कुन अय्ते केयता, ओर यहुदिल्क आयिर, युनानिर आयिर, ओराहाटीं पेनदा ताकत, पेनदा तेल्वि किरिस्‍तु आंदुर.
1CO 1:25 बारित्‍ते पेनदा मुर्कतनम इत्‍ते, मनकालोर्कुना तेल्विकन्‍ना वेल्‍ले तेल्वितद आंद, पेनदा ताकत कमजोर इत्‍ते, मनकालोर्कुंकन्‍ना वेल्‍ले बलमतद आंद.
1CO 1:26 विस्वासुल्‍कुनिटा! विचारम कीम्‍टु, दुनियाता लेक्‍काते मिमेट तेल्वितोर आयिर, एक्‍को बलमतोर आयिर, पेद्‍दा लोतोर आयिर, अय्नागानि पेन मीकुन केयता.
1CO 1:27 बुद्‍दि मत्‍तोर्कुंक सिग्गु वायालय दुनियाते बुद्‍दि हिल्वोर्कुन पेन पेरता. बलमता मनकालोर्कुंक सिग्गु वायालय, दुनियाते बलम हिल्वोर्कुन पेन पेरता.
1CO 1:28 पेनदा मुन्‍ने बोरे मनकल पेद्‍दिर्केम कियामन्‍नि इंचि दुनियाते बतले हिल्वोर्कुन, हय्सवोर्कुन, बतले कबळ्‍क ओज्जुवोर्कुन, पेन पेरता.
1CO 1:30 पेनदाहेंदाले येसु किरिस्‍तुनलोप्‍पो मीवा पिस्वर मंता, किरिस्‍तुनाहेंदाल मनाकु तेल्वि, नीति, पवित्र आतोम आनि पापमता सिक्‍साताल पिसतोम.
1CO 1:31 अदुनहाटीं, “पेद्‍दिरकेम कियानोर बोरे आयिर, सामि ओनाहाटीं बतलय्ते कीतोरो, अव्टे ओर पेद्‍दिर्केम कियागोम,” इंचि दर्मसास्‍त्रमते रासि मंता.
1CO 2:1 विस्वासुल्‍कुनिटा! नना मिहगा वातस्के, नावा पेद्‍दा पोल्‍लेने हिलाकोंटे पेद्‍दा तेल्‍विते पेनदा बारेमते गवाइ वेहा हिल्‍लेन.
1CO 2:2 गानि नना मीवा नड्‍डुम मननेंके क्रुसुंक वेलाड वाटता येसु किरिस्‍तु आयाका इंका वेरे बद्‍दे पोल्‍ले वळ्‍कोन इंचि निरनायम कीसि मत्‍तन.
1CO 2:3 नना मिहगा मननेंके मेंदुल्ते कमजोर आसि मत्‍तन. वेल्‍ले वेर्रेते वनुकसेके मत्‍तन.
1CO 2:4 नावा वळ्‍कमळ आनि नना वेहता कबुर, नावा तेल्‍विता पोल्‍लेने मनाहिल्‍ले, गानि पेनदा आत्मा आनि ताकतते निंडसि मत्‍ता.
1CO 2:5 अदुनहाटीं मीवा विस्वासम मनकालोर्कुना तेल्वि परकारम आयो गानि पेनदा ताकत परकारम मनागोम.
1CO 2:6 मोमोट इद दुनियाता हिलाकोंटे इद दुनियाते नासडेम आयाना अदिकारिल्कुना तेल्वि वेहोम, गानि विस्वासमते गट्‍टिगा मत्‍तोर्कुंके तेल्वि वेहंतोम.
1CO 2:7 मोमोट मर्ममते मक्‍किचि मत्‍ता पेनदा तेल्‍वितुन वेहंतोम, अद बूमि पुट्‍टका मुन्‍नेने मावा पेद्‍दातनमहाटीं पेन तयार कीसि इरता.
1CO 2:8 ई तेल्‍विता बारेमते दुनियाता अदिकारिल्कुंक बोर्के तेळिया हिल्‍ले, ओर्क गिंटा तेळियसि मत्‍ते, महिमागल्‍ला सामि येसु किरिस्‍तुन क्रुसुनपोर्रो मोल्‍लां कोह्का कोन्‍नेर.
1CO 2:9 गानि दर्मसास्‍त्रमते, “कळ्‍कुने बोरे हूळवव, केव्‍कुने बोरे केंजवव, बोरा मनसुने वायवव पोल्‍लें, दानपोर्रो पावरम कियानोराहाटीं पेन तयार कीसि इर्ता,” इंचि रासि मंता.
1CO 2:10 गानि पेन दाना आत्माताहेंदाल अवुन मनाकु हुपिस्‍ता. बारित्‍ते अद आत्माकु अन्‍नि एरपाटे, पेनदा मर्ममगुडा एरपाटे.
1CO 2:11 वरोर मनकना विचाराल्क मनकना आत्मा आयाका इंका बोर एरपाट कींतोर? अल्‍हेने पेनदा विचाराल्क पेनदा आत्मा आयाका इंका बोरे एरपाट किय्योर.
1CO 2:12 इंदके मनाकु दुनियाता आत्मा दोर्काहिल्‍ले, पेन हीता पोल्‍लें तेळियालय पेनदा आत्मा मनाकु दोर्कता.
1CO 2:13 माक इव पोल्‍लें मनकना तेल्‍विते कराहतव आयों गानि पेनदा आत्माते कराहतव आंदुं. अवे पोल्‍लेन मीक तेळियागोट्‍सि वेहंतोम.
1CO 2:14 बोनगा अय्ते पेनदा आत्मा हिल्‍ले ओर पेनदा आत्माता पोल्‍लेन ओप्‍कुन्‍नोर. ओनकु अव मुर्क पोल्‍लें अनपिच्‍चंतां. बारित्‍ते अव पोल्‍लें पेनदा आत्मातेने तेळिया परांतां, अदुनहाटीं ओनकु तेळिया पर्रों.
1CO 2:15 बोनगा अय्ते पेनदा आत्मा मंता, ओर अन्‍निन अर्तम किया परांतोर, गानि ओना बारेमते वेरे मनकल बोरे अर्तम किया पर्रोर.
1CO 2:16 इदुन बारेमते, “सामिना मनसु बोनकु तेळियंता, ओनकु बोर करहा परांतुर? गानि किरिस्‍तुना मनसु मनागा मंता, इंचि दर्मसास्‍त्रमते रासि मंता.”
1CO 3:1 विस्वासुल्‍कुनिटा! पेनदा आत्मा मत्‍तोर्कुनतोनि वळ्कताप मीवातोनि वळ्का पर्राहिल्‍लेन. पेनदा आत्मा हिल्वा दुनियातोरलेसीं आनि किरिस्‍तुनलोप्‍पो इंदकेगुडा पिलाल्कुनसंटोरे इंचि मीवातोनि वळ्‍कतन.
1CO 3:2 नना मीक पाल उह्‍तन, गाटो तिहा हिल्‍लेन; बारित्‍ते मिमेट गाटो तिना पराकोंदिर, गानि इंदकेगुडा मिमेट गाटो तिना परानालायक हिल्‍लिर.
1CO 3:3 बारित्‍ते इंदकेगुडा मिमेट मेंदुल्ता इच्‍चा मत्‍तापे ताकसेक मंतिट. इंकावरोना पोर्रो कळ्‍क पोत्‍तना, जगडाल्‍क कियाना गुनम मंता. अय्ते मिमेट मनकना इच्‍चाते ताकानोर आयिरा? दुनियाता लोकुल्‍कुनालेसीं ताकसेक हिल्‍लिरा?
1CO 3:4 मिहगटाल वरोर, “नना पौलुसनोन आंदुन”, इंकावरोर, “नना अप्‍पुलोसनोन आंदुन” इंचि इंतिर. इल्‍हा मिमेट दुनियातोरलेसीं पेनदुन एरपाट कियवोर आतिरा बतला?
1CO 3:5 अप्‍पुलोस बोर आंदुर? नना पौलुसुन बोन आंदुन? मोमोट इव्वुरमगुडा पेनदा सेवाकुल्कुमे. पेन माक बतल अय्ते कबळ अप्पजेपता, अदुन वेहतोम, मिमेट विस्वासम कीतिर.
1CO 3:6 नना पेळे वाटतन, अप्‍पुलोस एर दोस्तोर, गानि दान बेर्सागोटनद पेने आंदु.
1CO 3:7 इत्‍ते, पेळे वाटनोर आयिर, एर दोस्सानोर आयिर ईर पेद्‍दोर आयुर, गानि दान बेर्सागोटनद पेने पेद्‍देदि आंदु.
1CO 3:8 वरोर वाटतोर, वरोर एर दोस्तोर, इल्‍हा ओरा-ओरा कबळता इसाबते ओर्क बूति दोर्कार.
1CO 3:9 मोमोट पेनतोनि कलियसि कबळ कियानोर्कुम आंदुम, मिमेट पेनदा नेलितसंटोर, पेनदा लोतसंटोर आंदिर.
1CO 3:10 नाक पेन हीता कुर्पाहेंदाल, वरोर बेसता मिस्‍त्रिनलेसीं पुनादि दोहतन, दानपोर्रो इंकावरोर रद्‍दा दोस्सेक मंतोर, इल्‍हा वरोर-वरोर दानपोर्रो दोस्सानोर बल्हा रद्‍दा दोस्सेक मंतोर, ओर बेस हूळसि दोसना.
1CO 3:11 येसु किरिस्‍ते पुनादि आंदुर. ओर दोहता पुनादि आयाका, इंका बोरे वेरे पुनादि दोहा पर्रुर.
1CO 3:12 बोरन्‍नागिंटा बंगारम, एंडि, एक्‍को दराता बंडां, कट्‍टे, जाडि, बुस्सिते पुनादि दोहना मत्‍ते,
1CO 3:13 किरिस्‍तु मर्रा वायाना रोजुने अंटोरा कबळ दिसंता. बारित्‍ते अद रोज ओर तळमितोनि वांतोर, बोर बतल कबळ कीतोर इंचि तळमिते परिक्‍सा कियमळ जर्गंता.
1CO 3:14 अद पुनादिपोर्रो दोहता कबळ निल्‍सि मनानय्ते, ओनकु इनाम दोर्कंता.
1CO 3:15 बोनदन्‍ना गिंटा ओर कीता कबळ वेसि होत्‍ते, ओनकु नुकसान आंता. ओर अय्ते पिस्संतोर गानि तळमिताल पेय्सताप पिस्संतोर.
1CO 3:16 मिमेट पेनदा गुळि आंदिर, पेनदा आत्मा मीलोप्‍पो मनंता, इद मीक तेळियोना?
1CO 3:17 बोरन्‍नागिंटा पेनदा गुळितुन नासडेम कियानय्ते, पेन ओन नासडेम किय्‍यार. पेनदा गुळि पवित्र मनंता, अद मिमेटे आंदिर.
1CO 3:18 बोरे आयिर ओनद-ओरे पसांचकुनामन्‍नि. बोरन्‍नागिंटा मिहागटाल ई दुनियाते नना तेल्वितोन इनकुनानय्ते, पेनदा नदरते तेल्वितोर आयालय, मोदाला मुर्कनलेसीं आयापींता.
1CO 3:19 दुनियाता तेल्वि पेनदा मुन्‍ने मुर्कतनमतद आंद. बारित्‍ते, “पेन तेल्वितोर्कुन ओरा उस्सारतनमता लोप्पो पसांचंता,” इंचि दर्मसास्‍त्रमते रासि मंता.
1CO 3:20 आनि मर्रा, “तेल्वितोर्कुना विचाराल्क एर्तम आंदुं इंचि पेनदुक एरपाटे,” इंचिगुडा दर्मसास्‍त्रमते रासि मंता.
1CO 3:21 अदुनहाटीं नना ईना हेंदोन, नना ओना हेंदोन इंचि मनकालोर्कुना पोर्रो पेद्‍दिरकेम कियामन्‍नि, अन्‍नि मीवंगे आंदुं.
1CO 3:22 पौलुस आयिर, अप्‍पुलोस आयिर, केपाल आयिर, दुनिया आयि, पिस्वर आयि, हामुर आयि, ताकाना कालमता पोल्‍लें आयि, वायाना कालमता पोल्‍लें आयि, अन्‍नि मीवंगे आंदुं.
1CO 3:23 मिमेट किरिस्‍तुनोर आंदिर, किरिस्‍तु पेनदोड आंदुर.
1CO 4:1 अदुनहाटीं मोमोट किरिस्‍तुना सेवाकुल्‍कुम आनि पेनदा मर्ममता देकरेक कियानोरम आंदुम इंचि मीक तेळियमळ गावाले.
1CO 4:2 अल्‍हेने पेनदा मर्ममता देकरेक कियानोर विस्वासम कियानालायक मनमळ गावाले.
1CO 4:3 गानि नाकुन मीवाहेंदाल आयि हिलाकोंटे लोकुल्‍कुना पंचायतता हेंदाल आयि, विस्वासमते मंतोरा हिल्‍लोरा इंचि परिक्‍सा कीसि हूळमळ गावाले इद नावाहाटीं सिन्‍ना पोल्‍ले आंद. नावद ननाने न्‍यायमगुडा किय्योन.
1CO 4:4 नहगा बतले दोसेम दिस्सेक हिल्‍ले, गानि नना दोसेम हिल्वोन आयोन. पेने नाकुन परिक्‍सा कीसि हूळंता.
1CO 4:5 अदुनहाटीं न्‍यायम कियाना वेला वायाका मुन्‍ने बोने न्‍यायम कियमट, सामि वायानाल एदुर हुळाट. ओर हीकटते मक्‍किस मत्‍ता पोल्‍लेन वेल्‍गुने तरंतोर, मनसुने मत्‍तवुन पलाते अरहंतोर. अस्‍के पेन अंटोर्कुन मिमेट बेस कीतिट इंचि मेच्‍चुकुंता.
1CO 4:6 विस्वासुल्‍कुनिटा! नना मीवाहाटीं अप्‍पुलोसना आनि नावा उदाहरन हीसि वेहतन. बारित्‍ते “दर्मसास्‍त्रमते रासता पोल्‍लेंक हब्बेर होनमट” इंचि मंता. इदुन पोर्रोटाल मिमेट वरोन बेसतनमते, इंकावरोन विरोदमते पेद्‍दिरकेम कियमट.
1CO 4:7 बारित्‍ते नीकुन आनि इंकावरोन बोर अलग हूळंतुर? निहगा मत्‍तव अन्‍नि पेन हीतवे गदा, अय्ते इवन्‍नि नावांगे बोरे हिया हिल्‍लुर इत्‍ताप बारि पेद्‍दिरकेम कींतिन?
1CO 4:8 ओहो! मीक गावाले मत्‍तव अन्‍नि पूरा आतां, मिमेट अय्ते सिरमंत आसि होत्‍तिर, मोमोट हिलाकुना मिमेट राजुल्कु आतिट. गानि मिमेट निजमे राजुल्कु आसि मत्‍ते मोमोटगुडा मीवातोनि राज्येम किय्येम.
1CO 4:9 गानि बोर्क अय्ते हामुर सिक्‍साता आदेस हियमळ जर्गता, असंटोरालेसीं, प्रेरितुल्क आता मनाकुन पेन अंटोर्कुंकन्‍ना आकिरते इरता, इंचि नाकु अनपिच्‍चंता. बारित्‍ते, मनम पेनदा दूतानाहाटीं, दुनियाताहाटीं, मनकालोराहाटीं सिराप तमासा हुप्‍सानोर आसि मंतोम.
1CO 4:10 मोमोट किरिस्‍तुनाहाटीं मुर्कालोरम आंदुम, गानि मिमेट किरिस्‍तुना लोप्पो तेल्वितोर आंदिर. मोमोट बलम हिल्‍वोरम आंदुम, गानि मिमेट बलम मत्‍तोर आंदिर. मिमेट कदर मत्‍तोर आंदिर, गानि मोमोट कदर हिल्‍वोरम आंदुम.
1CO 4:11 इदवेरादाका मोमोट कर्वुने-दूपाते मंतोम, केर्रालय कपळिं हिल्‍लें, देब्बां तिंचेके मंतोम, लोन-दारा हिलाका मंतोम.
1CO 4:12 मावद मोमोटे कबळ कीसेक मंतोम. माकुन तेराहनोर्कुन, आसिर्वाद हींतोम. ओर माकुन तकलिप कींतुर, गानि मोमोट सहन कींतोम.
1CO 4:13 ओर मावा अपमानम कींतुर, मोमोट दयाते वळ्‍कंतोम. इदवेरदाकागुडा दुनियाता नदरते मोमोट कचरालेसीं, मैलालेसीं मंतोम.
1CO 4:14 नना मीक सिग्गु वायागोम इंचि इव पोल्‍लें रासेक हिल्‍लेन, गानि नावा पावरमगल्‍ला पिलाल्कुनसंटोर इंचि तेळियागोट्‍सि वेहासेक मंतन.
1CO 4:15 मिहगा किरिस्‍तुना बारेमते कराहनोर पदि वेय्‍कुना गुरुल्क मंदानुर, गानि मिहगा वेल्‍लेटुर बाबुर हिल्‍लुर. बारित्‍ते मुन्‍ने ननाने किरिस्‍तु येसुना बेसता कबुर तत्‍तन, अदुन मिमेट विस्वासम कीतिर इंचि ननाने मीवा बाबोनसंटोन आंदुन.
1CO 4:16 अदुनहाटीं मिमेट नावालेसीं ताकट इंचि विनंति कीसेक मंतन.
1CO 4:17 इदे पोल्‍ले वेहनाहाटीं नना पावरम कियानोर आनि सामिना लोप्पो नावा विस्वासमगल्‍ला मर्रिनसंटोर तिमोतिन मिहगा लोहतन. नना किरिस्‍तु येसुना बक्‍तिते बल्हा ताकसेक मंतानो, अल्‍हेने अन्‍नि जेगाना कलिसियाने नना कराहना बोदाता बारेमते ओर मीक मति कीसि हींतोर.
1CO 4:18 नना मिहगा वासेक हिल्‍लेन इंचि इच्‍चुर लोकुल्‍क पेद्‍दिरकेम कीसेक मंतुर.
1CO 4:19 गानि सामिना मनसु मनानय्ते नना बिराने मिहगा वांतन, अस्‍के पेद्‍दिरकेम कियानोरा पोल्‍लेन आयो गानि ओर्क बच्‍चोर ताकत मंतनो हूळंतन.
1CO 4:20 बारित्‍ते पेनदा राज्येम पोल्‍लेने आयो गानि दाना ताकतते मनंता.
1CO 4:21 मीक बतल गावाले? नना मिहगा कट्‍टे पीसि वाकाना, हिलाकोंटे पावरमते, मेत्‍ताटा आत्माते वाकाना?
1CO 5:1 मीवा नड्‍डुम वरोर बोगमतनम कीतोर इंचि नाक केंजावाता. ओर ओना बाबोना मुत्‍तो इत्‍ते सिन्‍ना यावान इरकुत्‍तोर अले! इसोंटा तप्‍पुड कबळ अविस्वासुल्‍कगुडा किय्युर.
1CO 5:2 इदुनाहाटीं मीक दुक्‍कम आया मत्‍ता, गानि मिमेट पेद्‍दिरकेम कीसेक मंतिर. असंटोन मीवा लोप्पोटाल पेचाहचि गेदुमगोम.
1CO 5:3 नना मिहागटाल मेंदुल्ते लक्‍कु मंतन, गानि आत्माते मीवातोनि मंतन. आत्माते मीवातोनि मत्‍ताहाटीं ओनद नना मुन्‍नेने न्‍यायम कीतन.
1CO 5:4 बस्के अय्ते मिमेट येसु सामिना पोरोलते उंदगा जमा आसि उदंतिर, अस्‍के आत्माते अगा मनंतन, अल्‍हेने मना सामि येसुना ताकत मीवातोनि मनंता.
1CO 5:5 असोंटा तप्‍पुड कबळ कियानोना मेंदुल्तुन नासडेम कियालय पेद्‍दा देय्यमता कय्‍दे अप्पजेप्पना. बारित्‍ते, ओक्‍कला ओर पस्‍चातापम कियानय्ते, सामि वायाना रोजुने ओना आत्मा पिस्सार.
1CO 5:6 मिमेट पेद्‍दिरकेम कियमळ बेस आयो, इच्‍चुर पुल्‍लाटा पिंडि वेल्‍लेन पिंडिते कल्‍पते, पूरा पिंडितुन पुल्‍लगा कींता अद मीक एरपाटे मंता.
1CO 5:7 पळाना पुल्‍लाटा पिंडितसंटोन तेंडसि पोहाचि मिमेट पूना पिंडि मुद्‍दा आया परांतिर, बारित्‍ते मिमेट निजमे पुल्‍लाटोर आयवाहाटीं, येसु किरिस्‍तु मना दाटसि होनना पंडुगुना गोर्रे पोरिनलेसीं मोक्‍कु आतोर.
1CO 5:8 अदुनहाटीं मनम पळाना पुल्‍लाटा पिंडितसोंटा कराब कबाह्‍कुने, दुस्‍ट गुनाल्‍कुने आयो गानि इमानदारता, सत्‍तेमता पुल्‍लगा आयवा हारिनसोंटा पंडुगु कियमळ गावाले.
1CO 5:9 नना मुन्‍ने रासि लोहता सिट्‍टिते, बोगमतनम कियानोरतोनि कलियसि मनमट इंचि रासि मत्‍तन.
1CO 5:10 इदुना अर्तम बोगमतनम कियानोरतोनि, आस्‍ति कियानोरतोनि, दोंगा कीसि तिनानोर्कुनतोनि, बोम्मांक मोळ्‍कानोर्कुनतोनि कलियसि मनामन्‍नि इत्‍ताप आयो. इल्‍हा इनानय्ते मरि दुनियातुने होळ्‍सा पींता.
1CO 5:11 नना इनना पोल्‍ले बतल इत्‍ते, मीवा लोप्पोटाल बोरन्‍ना ओनद ओर विस्वासिन इंतोर, गानि ओर बोगमतनम कियमळ, आस्‍ति कियमळ, बोम्मान मोळ्कमळ, अपमानम कियमळ, रिम्मा आयमळ, दोंगा कीसि तिनमळ इसोंटा गुनम ओनालोप्‍पो मनानय्ते ओनतोनि कलियसि मनमट, ओनतोनि गाटो तिनमट इंचि रासि मत्‍तन.
1CO 5:12 विस्वासम कियवोरा न्‍यायम नना बारि कीकन? बोर अय्ते विस्वासमते मंतुर, ओरा न्‍यायम मिमेट किय्‍यिरा?
1CO 5:13 विस्वासम कियवोरा न्‍यायम पेने कींता. अदुनहाटीं आ बोगमतनमतोन पेचाहचि गेदमट.
1CO 6:1 बस्के अय्ते मीलोप्‍पो जगडम आंता, आ जगडमता न्‍यायम कियालय मिमेट पेनदा लोकुल्‍कुनगा होनाका विस्वासम कियवोरगा होंचि न्‍यायम कियाना हिम्मत बारि कींतिर?
1CO 6:2 पेनदा लोकुल्‍क आकिर वेलाते दुनियाता न्‍यायम कींतुर, इद मीक एरपाट हिल्‍लेना? मिमेट पूरा दुनियाता न्‍यायम कींतिर अय्ते, इव सिन्‍ना-सिन्‍ना पोल्‍लेना न्‍यायम कियानालायक हिल्‍लिरा?
1CO 6:3 मिमेट पेनदा दूतनगुडा न्‍यायम कींतिट इंचि मीक एरपाटे मंता. अय्ते रोजता पिस्वरते जर्गानव सिन्‍ना-सिन्‍ना पोल्‍लेन न्‍यायम मिमेट किया परिरा?
1CO 6:4 मीवा लोप्‍पोगिंटा इल्‍हा जगडाल्‍क मनानय्ते, बोर अय्ते कलिसियाता पोल्‍लें बतले तेळियवोर मंतुर, असंटोरगा न्‍यायम किया वेहालय बारि दांतिर?
1CO 6:5 मी विस्वासुल्कुना नड्‍डुम न्‍यायम कियानालायक तेल्विगल्‍लोड वरोरगुडा हिल्‍लोरा? मीक सिग्गु वायगोम इंचि इल्‍हा इंचेके मंतन.
1CO 6:6 वरोर विस्वासि इंकावरोर विस्वासिंक अड्‍डम न्‍यायम कियालय पंचादितगा दांतोर, अदगुडा विस्वास कियवोरा मुन्‍ने.
1CO 6:7 निजम इत्‍ते मीलोप्‍पो लोल्‍लिं कियमळे तप्पु आंद. दानकन्‍ना अन्‍यायम ओर्सकुनमळ बेस आयोना? नुकसानतुन ओप्कुनमळ बेस आयोना?
1CO 6:8 अल्हा कियवा, मिमेट तप्पु कबळ कींतिर, अन्‍यायम कींतिर, अदगुडा मीवा दंटा विस्वासुल्‍कुंके कींतिर.
1CO 6:9 अन्‍यायम कियाना लोकुल्‍क पेनदा राज्येमते वारसदार आयुर इंचि मीक तेळियोना? मिमेट दोकाते अरमट. व्यबिचारम कियानोर, बोम्मांक मोळ्‍कानोर, बोगमतनम कियानोर, मांडसा मांड्‍सातोनि बोगमतनम कियानोर, मुरतळ मुरतळतोनि बोगमतनम कियानद, दोंगातनम कियानोर, आस्‍ति कियानोर, कल्‍लु उनानोर, तेराहनोर, इंकावरोन मुळाहनोर पेनदा राज्येमता वारसदार आयोर.
1CO 6:11 मुन्‍ने मीवा नड्‍डुम इच्‍चुर इल्हे मत्‍तिर. गानि मिमेट येसु किरिस्‍तुना पोरोलते आनि पेनदा आत्माते नोर्कुंचि, पवित्र आसि नीतिमंतुल्क आतिर.
1CO 6:12 नना बतलन्‍ना किया वच्‍चु, गानि अव अन्‍नि पायदातव आयों. नना बतलन्‍ना किया वच्‍चु, गानि नना अवुना कय्‍दा हिळु मन्‍नोन.
1CO 6:13 गाटो पीटाहाटीं, पीर गाटोताहाटीं मंता इंचि मिमेट इंतिर, गानि पेन इव रोंडुन इंका नासडेम कींता. मेंदुल बोगमतनम कियालय आयो सामिनाहाटीं मंता, सामि मना मेंदुलताहाटीं मंतोर.
1CO 6:14 पेन दाना ताकततोनि सामिन हामुरताल जीवाते तेहता, अल्‍हेने मनाकुनगुडा हामुरताल जीवाते तेहंता.
1CO 6:15 मीवा मेंदुल्क किरिस्‍तुना मेंदुल्ता उंदि बागाल्क आंदुं इंचि मीक एरपाट मंता गदा! एरपाट मत्‍तस्के नना अवुन ओसि बोगमदाना मेंदुललेसीं कीकाना? बस्‍केने किय्योन.
1CO 6:16 बोर अय्ते बोगमदानतोनि मींडंतोर, ओर दानतोनि उंदि मेंदुल आंतोर. “ओर इव्वुर उंदि मेंदुल आंतुर” इंचि दर्मसास्‍त्रमते रासि मंता.
1CO 6:17 गानि बोर अय्ते सामिनतोनि उंदि आंतोर, ओर ओनतोनि आत्माते उंदि आंतोर.
1CO 6:18 व्यबिचारमताल लक्‍कु मंटु. मेंदुल्ता पलाताल वायना पापाल्क अच्‍चोर बतल किय्यों, गानि बोर अय्ते व्यबिचारम कींतोर, ओर ओनादे मेंदुल्क अड्‍डम पापम कींतोर.
1CO 6:19 मीवा मेंदुल पवित्र आत्माता गुळि आंद, अद पेनदाहेंदाल मीलोप्‍पो वासि मनंता, ई मेंदुल मीवद आयो, इंचि मीक तेळियोना?
1CO 6:20 बारित्‍ते पेन मीकुन दरा दोस्‍सि अस्‍कुत्‍ता, अदुनहाटीं मिमेट मीवा मेंदुलताहेंदाल दाना महिमा कीम्‍टु.
1CO 7:1 अव पोल्‍लेने बारेमते मिमेट नाक रासि मत्‍तिर. नना मीक वेहासेके, मांडसा बदन्‍ना मुरतटुन इट्‍टाकोंटेन ओनाहाटीं बेस मनंता.
1CO 7:2 गानि व्यबिचारम जर्गामन्‍नि इंचि हरेक मांडसक मुत्‍तो गावाले, हरेक मुरतळ्‍क मुय्दो गावाले.
1CO 7:3 मुय्दो ओना मुत्‍तोना हक्‍कु पूरा कियमळ गावाले, मुत्‍तो दाना मुय्दोना हक्‍कु पूरा कियमळ गावाले.
1CO 7:4 मुत्‍तोंक दाना मेंदुलपोर्रो अदिकार हिल्‍ले गानि दाना मुय्दोंक अदिकार मंता, अल्‍हेने मुय्दोंक ओना मेंदुलपोर्रो अदिकार हिल्‍ले गानि मुत्‍तोंक मंता.
1CO 7:5 अदुनहाटीं मिमेट वरोंक-वरोर अलग मनमट. गानि कोन्‍नि रोजकु पारतना कियालय अलग मनकोम इंचि मिमेट इव्वुर इनकुत्‍ते, अलग मंटु. दाना पजा मर्रा कलियसि मंटु. बारित्‍ते, कुदता मनसुन आपकुना परवस्के देय्यम मीकुन पट्‍टुने अरहालय हूळंता.
1CO 7:6 नना वेहानद आदेस आयो, गानि अल्हा कीते मीके बेस मनंता.
1CO 7:7 अंटोर लोकुल्‍क नावालेसीं मनागोम इंचि नाक अनपिच्‍चंता. गानि हरेक मनकंक पेनदाहेंदाल अलग-अलग वरम दोर्किस मंता, बोनको बदो तीरनद, इंका बोनको इंकुंदि तीरनद वरम दोर्किस मंता.
1CO 7:8 मरमिं आयवोर्कुंक आनि मुंडा मोस्तवुंक नना वेहसेक मंतन, ओर नावालेसीं मरमिं आयाकुंटा मत्‍तेने ओराहाटीं बेस.
1CO 7:9 गानि ओरगिंटा कुदता मनसुन आपा पराकोंटे मरमिं आयिर. बारित्‍ते मेंदुल्ता इच्‍चा आसि तनलाळसेक मनना दानकन्‍ना मरमिं आयमळ बेस.
1CO 7:10 गानि बोरां अय्ते मरमिं आतां, ओर्क नावद आयो, सामिना आदेस मंता, मुत्‍तो दाना मुय्दोन होळ्‍सा मनि.
1CO 7:11 अदगिंटा होळसानय्‍ते, अद इंकावरोनतोनि मरमिं आयाकोंटेन मंदना, हिलाकोंटे दाना मुय्दोनतोनि मर्रा सांतिते कलियसि मंदना. मुय्दो ओना मुत्‍तोन होळसिया मनि.
1CO 7:12 इंदके कळमतोराहाटीं नना वेहसेक मंतन, पेन आयो. बोनदन्‍ना विस्वासि दादाना मुत्‍तो पेनदुन विस्वासम किय्‍यो, गानि दानकु ओनातोनि मनालय पसंद मत्‍ते, ओर दान होळ्‍सा मनि.
1CO 7:13 अल्‍हेने ओक्‍कला बदन्‍ना विस्वासि अक्‍कना मुय्दो विस्वासम किय्योर, गानि ओर दानतोनि कूस मंतोर, अय्ते अद ओन होळ्‍सा मनि.
1CO 7:14 बारित्‍ते अविस्वासि मुय्दो, विस्वासम कीता ओना मुत्‍तोनतोनि मंचि पवित्र आतोर. अल्‍हेने विस्वासम कियवा मुत्‍तो, विस्वासम कीता दाना मुय्दोनतोनि मंचि पवित्र आसि दांता. अल्हा आयाकुंटा मंचि मते मीवा पिलाल्क पवित्र आयाकोन्‍नेर, गानि ओर इंदके पवित्र मंतुर.
1CO 7:15 अय्नागानि अविस्वासि मुत्‍तो आयि मुय्दो आयि ओक्‍कला ओर होळसंतन इनानय्ते होळसिरकांटी. इद पोल्‍लेतुन विस्वासम कियाना दादल आयि अक्‍कल आयि आपामन्‍नि. बारित्‍ते, पेन मनाकुन सांतिते पिसालय केयता.
1CO 7:16 ए मुरतटुना, नीवा विस्वासम कियवा मुय्दोन पिसागोटंतिन इंचि नीकु बतल एरपाट? ए मांड्‍सातुना, नीवा विस्वासम कियवा मुत्‍तोन पिसागोटंतिन इंचि नीकु बतल एरपाट?
1CO 7:17 गानि बल्हा अय्ते मीकुन सामि निलाहतोर, बल्हा अय्ते मीकुन पेन केयता, अल्‍हेने मिमेट मंटु. इद अन्‍नि कलिसियाने नावा नियम आंद.
1CO 7:18 अद बल्हा इत्‍ते, पेनदुन विस्वासम कियाका मुन्‍ने कतना कीसि मनानय्ते, अदुन मकिच्‍चा मनि. पेनदुन विस्वासम कियाका मुन्‍ने कतना कियाकोंटा मत्‍ते, ओर कतना कीकुन्‍ना मनि.
1CO 7:19 कतना कियाना, कियाकुन्‍ना बतल आयो, गानि पेनदा आदेसते ताकमळे पेद्‍दा पोल्‍ले आंद.
1CO 7:20 हरेक मनकन ओर बल्हा मननेंके पेन ओन केयतनो, अल्‍हेने ओर मनागोम.
1CO 7:21 निमे गिंटा दास आसि मत्‍तस्के पेन केयते, निमे अदुना पिकिर कियमा. गानि अव्टेटाल इळबळाना मोका वाते, दाना पायदा एता.
1CO 7:22 बारित्‍ते, दास आसि मत्‍तस्के निमे सामिन विस्वासम कीतिन, अव्टेटाल इळबळतिन. इळबळतस्के सामिन विस्वासम कीतिन अय्ते किरिस्‍तुना दास आतिन.
1CO 7:23 पेन मीकुन दरा दोस्‍सि अस्‍कुत्‍ता, दानहाटीं मनकालोरा दास आयमटु.
1CO 7:24 विस्वासुल्‍कुनिटा! पेन मीकुन केयतस्‍के बल्हा मत्‍तिरो, अल्‍हेने दानतोनि कलियसि मंटु.
1CO 7:25 मरमिं आयववुना बारेमते सामि नाकु बतले आदेस हिया हिल्‍लोर, गानि नावा मनसुना पोल्‍ले मीक वेहसेक मंतन. सामिना दयाहेंदाल, नना दान बरोसा कींतन.
1CO 7:26 इंदकेटा तकलिपकुनाहाटीं मनकल बल्हा मंतोर अल्‍हेने मत्‍ते बेस इंचि नना इनकुंचेके मंतन.
1CO 7:27 नीकु मुत्‍तो मत्‍ते अदुन होळ्‍सना कोसिस कियमा, मुत्‍तो हिलाकोंटे मरमिं आयना विचारम कियमा.
1CO 7:28 निमे मरमिं कीकुत्‍ते बतल पापम आयो, लेय्या पेगिळ मरमिं कीकुत्‍ते अदगुडा बतल पापम आयो. अय्नागानि बोर अय्ते मरमिं आंतुर, ओरा पिस्वरते तकलिपकु वांतां. असोंटा तकलिपकुने अर्रानायो इंचि नना कोरसंतन.
1CO 7:29 विस्वासुल्‍कुनिटा! नना वेहानद बतल इत्‍ते, वेला तक्‍को मंता. अदुनहाटीं इंदकेटाल मुन्‍ने बोन्क मुत्‍तो मंता, ओर मुत्‍तो हिल्‍वाप मंदना.
1CO 7:30 अळानोर मत्‍ते, अळवोर लेहका मंदना, आनंदमते मत्‍तोर आनंदमते हिल्‍वाप मंदना, सामानकु अस्सानोर बतले हिल्‍वाप मंदना.
1CO 7:31 इद दुनियाते मनम बतलय्ते कींतोम दाना लोप्पेन मंदनायो. बारित्‍ते दुनियातव अन्‍नि नासडेम आयानव आंदुं.
1CO 7:32 मिमेट बदे पोल्‍लेते पिकिर किया मनि इंचि नना इनकुंचेके मंतन. मरमिं आयवोर पेनदुन बल्हा कूस इर्राना इंचि पेनदा पोल्‍लेना पिकरते मनंतोर.
1CO 7:33 गानि मरमिं आता मनकल ओना मुत्‍तोन बल्हा कूस इर्राना इंचि दुनियाता पोल्‍लेने पिकरते मनंतोर.
1CO 7:34 अदुनहाटीं ओरा मनसु रोंडु तीरुकुने कबळ कींता. अल्‍हेने मरमिं आयवा मुरतळ पेनदुन बल्हा कूस कियाना इंचि मेंदुल्ते आनि आत्माते पवित्र मंचि पेनदा पोल्‍लेना पिकरते मनंता. गानि मरमिं आता मुरतळ मुय्दोन बल्हा कूस इर्राना इंचि दुनियाता पिकरते मनंता.
1CO 7:35 नना मीवा पायदाताहाटींगे इद पोल्‍ले वेहासेक मंतन, मीकुन पसांचालय आयो. गानि मिमेट सत्‍तेमते ताकसि, उंदि मनसुने पेनदा सेवाते मंटु.
1CO 7:36 बोरन्‍नागिंटा, “मना मिय्यटा लेय्यातनम होंचेके मंता, दाना अपमानम आयाका मुन्‍ने मरमिं कियमळ गावाले,” इंचि इनकुनानय्ते मरमिं कीसि हिय्यिरकांटी, अद पापम आयो.
1CO 7:37 गानि ओर ओक्‍कला मरमिं कीसि हियमळ अव्‍सरम हिल्‍ले इंचि मनसुनाल निरनायम कियानय्ते, अद दाना इच्‍चान आपापर्ते दान्क मरमिं कियवा बेसे कीतोर.
1CO 7:38 बोर अय्ते ओना मिय्यटा मरमिं कीतोर, ओर बेसे कीतोर. अल्‍हेने बोर अय्ते ओना मिय्यटा मरमिं किया हिल्‍लोर ओर इंका बेसे कीतोर.
1CO 7:39 मुय्दो पिस्सि मत्‍तच्‍चोरजेम मुत्‍तो मुय्दोनतोनि होळसाकोंटा मनंता, गानि ओरगिंटा हायानय्ते अद बोनतोनना सामिन विस्वासम कीतोनतोनि मरमिं आया परांता.
1CO 7:40 गानि अद इंकावरोनतोनि मरमिं आयाकोंटा मत्‍तेने बेस इंचि नना इनकुंचेके मंतन, अल्‍हेने नावा लोप्पो मनना पेनदा आत्माता हेंदाले नना मीक वेहासेक इंचि इनकुंचेके मंतन.
1CO 8:1 इंदके, बोम्मनगा मोळ्कता उपारमता बारेमते वेहंतन, मनम अंटोरम तेल्वितोर्कुम इंचि मनाकु एरपाटे मंता. तेल्‍विता हेंदाल गर्रा वांता, गानि पावरम बक्‍तितुन बेर्सागोटंता.
1CO 8:2 बोरन्‍नागिंटा नाक पूरा तेळियंता इंचि इनकुनानय्ते, ओन्क बतलय्ते तेळियमळ गावाले, अद इंदकेगुडा तेळिया हिल्‍ले.
1CO 8:3 गानि बोरन्‍नागिंटा पेनदुन पावरम कीते, पेनदुक ओर एरपाटे.
1CO 8:4 अदुनहाटीं बोम्मनगा मोळ्कता उपारमतुन तिनना बारेमते नना मीक वेहंतन, दुनियाते मनना बोम्माने पेन हिल्‍ले. पेन उंदे मंता, अद आयाका इंका वेरे पेन हिल्‍ले.
1CO 8:5 अय्नागानि स्वर्गमते आयि, बूमिपोर्रो आयि पेनकु, सामि इंचि इनानव वेल्‍लेने मंतां. गानि मनाकु उंदे पेन, ओरे मना बाबो आंदुर. ओनाहेंदाले इवन्‍नि तयार आतां, मनम ओनाहाटींगे मंतोम. अल्‍हेने सामि वरोरे आंदुर. ओर येसु किरिस्‍तु आंदुर. पेन, ओनाहेंदाले इवन्‍नि तयार कीता, मनमगुडा ओनाहेंदाले पिस्सि मनंतोम.
1CO 8:7 गानि अंटोर विस्वासुल्कुंक ई तेल्वि हिल्‍ले. इच्‍चुर मोदाटाले बोम्मन मोळ्‍किसि मत्‍ताहाटीं, अगा मोळ्कता उपारमतुन तिंतुर. अदुनहाटीं ओरा कमजोर मनसु कराब आसि दांता.
1CO 8:8 गाटो मनाकुन पेनदा दग्गेर्क ओयो. मनम तिनाकुन्‍ना मनद नुकसान आयो, तिनना बतल पायदा आयो.
1CO 8:9 मिमेट बदन्‍ना उपारम तिंतिर आयावच्‍चु गानि उंदि पोल्‍ले मति इर्राट, मीवाहेंदाल विस्वासमते कमजोर मत्‍तोर पापमते अर्रानायो.
1CO 8:10 बारित्‍ते निमे तेल्‍विता मनकन, निमेने गुळिते बोम्मनगा मोळ्कता उपारमतुन तिनानय्ते, वरोर कमजोर विस्वासि अदुन हूळतस्‍के, गुळिते मोळ्कतवुन तिनालय ओना मनसु आयोना?
1CO 8:11 ओनाहाटींगुडा किरिस्‍तु हातोर, इल्‍हा नीवा तेल्विहेंदाल, विस्वासमते कमजोर मत्‍ता विस्वासि पेनदागटाल लक्‍कु आंतोर.
1CO 8:12 इल्‍हा निमे नीवा दंटाता विस्वासुल्कुना विरोदमते पापम कीसि, कमजोर विस्वासिना मनसुन नोप्पिचि, किरिस्‍तुना विरोदमते तप्पु कींतिन.
1CO 8:13 अदुनहाटीं ओक्‍कला उपारमताहेंदाल नना नावा दंटाता विस्‍वासुल्‍कुन पापमते अरहानय्ते, नना बस्‍केने हव्‍विं तिन्‍नोन. नावाहेंदाल ओर बस्‍केने पापमते अर्रा मनि.
1CO 9:1 नना दासतनमताल इळबळसि हिल्‍लेना? नना प्रेरितुन आयोना? मना सामि येसुन नना हूळा हिल्‍लेना? सामिना लोप्पो नावा कबळता पलम मिमेट आयिरा?
1CO 9:2 नना वेरे लोकुल्‍कुनाहाटीं प्रेरित आयाकोन्‍ना गानि मीवाहाटीं अय्ते प्रेरितुने आंदुन. नना सामिन लोप्पो प्रेरितुन इंचि मिमेटे सिक्‍कालेसीं निसान आंदिट.
1CO 9:3 बोर अय्ते नावातोनि वाद-विवाद कियालय हूळांतुर, ओराहाटीं इद नावा जवाब आंद.
1CO 9:4 माकु तिनना-उनना अदिकारम हिल्‍लेना?
1CO 9:5 कळमता प्रेरितुल्क, सामिना तम्मुह्‍क आनि केपल (पत्रु) ईर ओरा मुत्‍तोह्‍कुन पीकुंचि तिरियताप मोमोटगुडा विस्वासि मुरतळतोनि मरमिं आसि पज्जेके पीकुंचि तिरियना अदिकारम माक हिल्‍लेना?
1CO 9:6 हिलाकोंटे पिस्वरहाटीं कबळ कियाकोंटा मनालय सिराप बरनाबास आनि नाके अदिकारम हिल्‍लेना?
1CO 9:7 बोर ओना संतम कोत्‍तां कर्स कीसि सिपाइना नौकरि कींतोर? बोर अंगुरता बगिचा कीसि अंगुर पंडिं तिनाका मनंतोर? आनि बोर गोळ्कु-गोर्रें पोसकीसि अवुना पाल उनाका मनंतोर? बोरे मन्‍नोर.
1CO 9:8 नना मनकना रीतिते इल्‍हा इंचेके मंताना? हिल्‍ले.
1CO 9:9 “कळाते बंति तिराहनेंके कोंदांक मूस्का बुट्‍टि दोहा मनि.” इद पोल्‍ले सिराप कोंदानाहाटींगे पेन वेहा हिल्‍ले, मूसाना नियमतेगुडा इल्हे रासि मंता.
1CO 9:10 मनाहाटींगुडा वेहता. बारित्‍ते ऊडानोर आसेतेन ऊडंतोर आनि बंति तिरहानोरगुडा पंटाते पाल गावाले इत्‍ता आसेतेन बंति तिरहंतोर.
1CO 9:11 मोमोट मीलोप्‍पो बेस आत्माता विज्‍जां वीततोम. अय्ते माक अव्‍सरम मत्‍तवुन मिमेट हीते, अवुन एतमळ बतल तप्पु आंदा? तप्पु आयो.
1CO 9:12 वेरेतोर्क गिंटा मीपोर्रो अदिकारम मत्‍ते, दानकन्‍ना एक्‍को माक अदिकारम मनंता. गानि किरिस्‍तुना बेसता कबुरतुन वेहनेंके मावाहेंदाल बतले अड्‍डम वायामन्‍नि इंचि मोमोट आ अदिकारम एताका अन्‍नि सहन कीसेक मंतोम.
1CO 9:13 मीक अय्ते एरपाटे मंता, गुळितगा सेवा कियानोर्कुंक गुळितगटाले गाटो दोर्कंता. गद्‍देतगा सेवा कियानोर्कुंक अगा अरतवुनाल तूस दोर्कंता.
1CO 9:14 अल्‍हेने किरिस्‍तुना बेसता कबुर वेहानोर्कुंक, बोर अय्ते अद कबुर केंजसि विस्वास कींतुर, ओरा हेंदाले पिस्वर दोर्कागोम इंचि सामि हुकुम हीतोर.
1CO 9:15 गानि बोरन्‍ना नावा पेद्‍दिरकेम एर्तम कियानादानकन्‍ना नाक हायमळे बेस अनपिच्‍चंता. अदुनहाटीं नना बोनाहेंदाले पिस्वरता पाय्दा एता हिल्‍लेन, मिमेट नावाहाटीं इल्‍हा कीम्‍टु इंचिगुडा रासेक हिल्‍लेन.
1CO 9:16 नना बेसता कबुर वेहचि बतल पेद्‍दिरकेम कीसेक हिल्‍लेन. बारित्‍ते इद नावा जिम्मेदारि आंद, नाक बेसता कबुर वेहमळे गावाले. ओक्‍कला वेहाकोंटे नना बूळ्‍दि आकन.
1CO 9:17 नना ओक्‍कला नावा इच्‍चाताल इदुन कीते नाक इनाम दोर्कंता. ना इच्‍चाताल कियाकोन्‍नागानि दाना जिम्मेदारि पेन नाक अप्पजेपता.
1CO 9:18 अय्ते नावा इनाम बतल? नना बेसता कबुर वेहनेंके नाक दोर्कना अदिकारम एताका बेसता कबुर पुक्‍कटते वेहमळ, इदे नावा इनाम आंद.
1CO 9:19 बारित्‍ते, नना बोना कय्‍दा हिळु हिल्‍लेन, अय्नागानि वेल्‍लेटोर्कुन किरिस्‍तुनगा पीसि वायाना इंचि नावद-नना अंटोरा दासुन आतन.
1CO 9:20 यहुदिल्कुन किरिस्‍तुनगा तर्रालय नना यहुदिल्कुनालेसीं आतन. मूसाना नियमते ताकानोर्कुन किरिस्‍तुनगा तर्रालय मूसाना नियमते ताकाना अव्‍सरम हिलाकोन्‍ना गानि नियम पीसि ताकतन.
1CO 9:21 मूसाना नियम पीसि ताकवोर्कुन किरिस्‍तुनगा तर्रालय नियम हिल्‍वोरलेसीं आतन. इत्‍ते पेनदा नियमतुन पास्कंतन इंचि आयो, गानि किरिस्‍तुना नियम पीसि ताकानोन आंदुन.
1CO 9:22 विस्वासमते कमजोर मत्‍तोर्कुन किरिस्‍तुनगा तर्रालय, नना ओरालेसीं आतन. बल्हैना आयि इच्‍चुरन्‍ना पिसागोम इंचि, बोर बल्हा मंतुर, ननागुडा ओरालेसीं आतन.
1CO 9:23 ओरतोनि बेसता कबुरता आसिर्वादते नाकगुडा तूस दोर्कना इंचि इवन्‍नि कीसेक मंतन.
1CO 9:24 पंदेम वाटसि वितनेंके अंटोरे वित्‍तंतुर, गानि इनाम वरोंके दोर्कंता इंचि मीक एरपाटे मंता. मिमेटगुडा वितनेंके इनाम दोर्कनालेसीं वित्‍तट.
1CO 9:25 कर्सानोर अंटोर बेस करियसि ओरद-ओर तयारते मनंतुर, अदगुडा नासडेम आयाना किरिटम दोर्किच्‍कुनालय इवन्‍नि कींतुर. गानि मनम अय्ते बस्‍केने नासडेम आयवा किरिटम दोर्किच्‍कुनालय कींतोम.
1CO 9:26 अदुनहाटीं नना बद जेगातगळ्क अय्ते वित्‍तना, अगळ्क बेस वित्‍तंतन, ननागुडा पिळ्किलते गुद्‍सेक लडांचंतन, वळिते लडांचताप आयो.
1CO 9:27 नना ना मेंदुल्तुन आपकुंचि इरंतन. नना वेरेतोर्कुंक बेसता कबुर वेहचि, नावा लोप्पेने तक्‍को मत्‍ते नना बाता कबळतोन आयोन.
1CO 10:1 विस्वासुल्‍कुनिटा! इद पोल्‍ले मीक तेळियका मनमळ नाक इस्‍टम हिल्‍ले. अद बतल इत्‍ते, मना एनकटा तादो-बाबुर अंटोर मब्बु तेर्पेता हिळु मंचि समुद्रमता नड्‍डुमताल ताकतुर.
1CO 10:2 इल्‍हा ओर मब्बु तेर्पे हिळु, समुद्रमता नड्‍डुम मत्‍ताहेंदाल ओर अंटोर मूसाना बापतिस्मा एततालेसीं आता
1CO 10:3 ओर अंटोर उंदे आत्माता गाटो तित्‍तुर, उंदे आत्माता एर उट्‍टुर. पेन ओर्क बंडाताल एर हीता. अद बंडा इत्‍तेने किरिस्‍तु आंदुर, ओरे ओरतोनि ताकुंदुर.
1CO 10:5 गानि पेन ओरव्टेटाल वेल्‍लेटुर लोकुल्‍कुनपोर्रो कूस मनाहिल्‍ले. अदुनहाटीं ओर अदे बय्‍लि जेगाते हातुर.
1CO 10:6 बल्हा अय्ते मना तादो-बाबुर पेनदुक इस्‍टम हिल्वा पोल्‍लेने ताकतुर, अल्हा मनम ताका मनि इंचि इव पोल्‍लें मनाकु उदाहरनलेसीं वेहंतां.
1CO 10:7 ओरागटाल इच्‍चुर बोम्मां कीसि मोळ्‍कतुर, अल्हा मिमेट बोम्मांक मोळ्‍काना आयो. ओरा बारेमते, “लोकुल्‍क तिनालय, उनालय उदतुर आनि तेदसि एगरालय दल्‍गतुर,” इंचि दर्मसास्‍त्रमते रासि मंता.
1CO 10:8 ओरागटाल इच्‍चुर बोगमतनम कियुंदुर. अदुनहाटीं ओराव्टेटाल उंदे रोजते इरवै मूड वेय्‍कुना मंदितुन हव्‍कमळ जर्गता. मनम ओरालेसीं बोगमतनम कियामन्‍नि.
1CO 10:9 ओरागटाल इच्‍चुर पेनदा पट्‍टु हूळुंदुर, ओर तरासकु कस्‍किसि हातुर. मनम ओरालेसीं किरिस्‍तुना पट्‍टु हूळा मन्‍नि.
1CO 10:10 ओरागटाल इच्‍चुर गुल्‍गुंदुर, नासडेम कियाना दूता हेंदाल ओर नासडेम आतुर. ओरालेसीं मिमेट गुल्‍गमट.
1CO 10:11 मना तादो-बाबुर्क जर्गता पोल्‍लें उंदि उदाहरनलेसीं मंचि, मनम आकिर युगमते एवताहाटीं मनाकु तेळियागोम इंचि रासमळ जर्गता.
1CO 10:12 बोर अय्ते नना विस्वासमते गट्‍टिगा नित्‍तिसि मंतन इंचि विचारम कींतोरो, ओर विस्वासमताल अर्रामन्‍नि इंचि कापाळकुनना.
1CO 10:13 अंटोर्क वायानसोंटवे परिक्‍सां मीक वातां, दानकन्‍ना एक्‍को परिक्‍सां मीक वाया हिल्‍लें. गानि पेन विस्वासमगल्‍लद आंद. अद मीतोनि आया परवसोंटा एक्‍को परिक्‍साने अर्रा हिय्यो, परिक्‍सां वाते मिमेट सहन कियागोम इंचि अव्टेटाल पेय्‍सना हर्रिगुडा पेन कींता.
1CO 10:14 अदुनहाटीं नावा पावरमगल्‍ला विस्वासुल्‍कुनिटा! बोम्मना पूजेनाल लक्‍कु मंटु.
1CO 10:15 मिमेट बुद्‍दिमंतुल्कु आंदिर इंचि नना वेहसेक मंतन. नना वेहाना पोल्‍लेन मिमेट कुद निरनायम एतट.
1CO 10:16 मनम दन्यवाद कीसि, उंदे गिलासते अंगुर पानकम उट्‍टस्के, किरिस्‍तुना नेत्‍तुर मना अंटोराहाटीं हीतोर इंचि हुपिच्‍चेक मंतोम. मनम उंदे हारितुन तुकडां कीसि तित्‍तस्के किरिस्‍तुना मेंदुल मना अंटोराहाटीं हीतोर इंचि हुपिच्‍चेक मंतोम.
1CO 10:17 मनम अंटोरम उंदे हारिता तुकडां तित्‍ताहाटीं, मनम वेल्‍लेटुर मंचिगुडा उंदे मेंदुललेसीं मंतोम.
1CO 10:18 इस्राएल लोकुल्‍कुनहेके हुळाट! गद्‍देपोर्रो मोक्‍कु हीतवुन तित्‍तस्के, गद्‍देपोर्रोटा मोक्‍कु मावा अंटोराहाटीं इंचि हुपिच्‍चेक मंतुर.
1CO 10:19 नना बतल वेहसेक इत्‍ते, बोम्मांक मोळ्कता गाटोक बतल हिल्‍ले, बोम्मन लोप्‍पोगुडा बतल हिल्‍ले.
1CO 10:20 इच्‍चोरे गदा, बोम्मांक मोळ्‍कानोर, देय्याल्‍कुंक मोळ्कसेक गानि पेनदुक आयो. अदुनहाटीं मिमेट देय्याल्कुनतोनि पोत्‍तु आयमळ नाक इस्‍टम हिल्‍ले.
1CO 10:21 मिमेट सामिना गिलासतद आनि देय्यमता गिलासतद इल्‍हा रोंडुनद उन्‍ना पर्रिर, अल्‍हेने सामिना उपारम आनि देय्यमता उपारम रोंडुने पोत्‍तु आया पर्रिर.
1CO 10:22 इल्‍हा कीसि मनम सामिंक होंग वायानाल कींतोम. मनम पेनदुकन्‍ना बलवंतुल्कुमा? आयोम.
1CO 10:23 अन्‍नि मनाहाटीं बेसे आंदुं, गानि अन्‍नि कबळतव आयों. अन्‍नि मनाहाटीं बेसे आंदुं, गानि अन्‍नि बक्‍तिते एद्गनाहाटीं बेस आयों.
1CO 10:24 बोरे आयिर ओना पायदातुने हूळा मनि, इंकावरोना पायदातुनगुडा हूळना.
1CO 10:25 हाटुमताल बवन्‍ना हव्‍विं अस्सि तिनावच्‍चु. तिनकना, तिना मन्‍निआ इंचेके मीवा मनसुन सवाल कियमट.
1CO 10:26 बारित्‍ते, “बूमि, बूमि पोर्रोटव अन्‍नि सामिनवे आंदुं” इंचि दर्मसास्‍त्रमते रासि मंता.
1CO 10:27 बोरन्‍ना विस्वासम कियवोर मीकुन गाटोक केयानय्ते, मीक होनना मनसु आते, होंट. अगा होत्‍ता पजा, बतलय्ते मीक तिनालय हींतोर अदुन मनसुने बतले सवाल कियाका तिंटु.
1CO 10:28 गानि मीकुन बोरन्‍ना, “इद बोम्मनगा मोळ्कतद आंद,” इंचि इनानय्ते, वेहतोनाहाटीं आनि बेस बुद्‍दिताहाटीं तिनमट.
1CO 10:29 इत्‍ते, “बेस बुद्‍दि” मीवद आयो गानि मुन्‍नेटोना बेस बुद्‍दिता बारेमते इंचेके मंतन. मीवाहाटीं इंकावरोन बारि वेहा हिय्यना.
1CO 10:30 नना दन्यवाद कीसि गाटो तिंतन अय्ते, दन्यवाद कीताहाटीं बदनाम बारि आयाना?
1CO 10:31 अदुनहाटीं मिमेट उनमळ, तिनमळ बतल कियाना गानि पेनदा महिमाताहाटींगे कियाना.
1CO 10:32 यहुदि लोकुल्‍कुंक, युनानि लोकुल्‍कुंक आनि कलिसियातोर्कुंक अड्‍डम आयाना लायक मनमट.
1CO 10:33 ननागुडा ओर पिसागोम इंचि, नावा पाय्दा हूळाका, वेल्‍लेटुर लोकुल्‍कुना पाय्दाताहाटीं, अन्‍नि पोल्‍लेने अंटोर्कुन कूस इरंतन. बारित्‍ते ओर्क मुक्‍ति दोर्कगोम.
1CO 11:1 नना किरिस्‍तुनलेसीं ताकतन, मिमेटगुडा नावालेसीं ताकट.
1CO 11:2 अन्‍नि पोल्‍लेने नाकुन मिमेट मति कीसेक मंतिट, नना मीक कराहचि अप्पजेपता पोल्‍लेने ताकसेके मंतिट, इंचि नना मीकुन तल्‍सकुंचेके मंतन.
1CO 11:3 गानि मीक इद पोल्‍ले तेळियमळ गावाले, किरिस्‍तु, मांडसाता तल्‍लातालेसीं आंदुर, मांडसा मुरताह्कुना तल्‍लातालेसीं आंदुर, पेन किरिस्‍तुना तल्‍लातालेसीं आंदु.
1CO 11:4 बोरन्‍ना मांडसा पारतना कियानेंके, हिलाकोंटे बविस्यवानि कियानेंके तल्‍लातुन मुच्‍कुनानय्‍ते ओर तल्‍लातुन अपमानम कींतोर.
1CO 11:5 गानि बदन्‍ना मुरतळ पारतना कियानेंके हिलाकोंटे बविस्यवानि कियानेंके दाना तला मुच्‍कुनाकोंटे, अद दाना तल्‍लाता अपमानम कीताप आनि गुंडु कीताप आंद.
1CO 11:6 बदन्‍ना मुरतळ ओक्‍कला तल्‍लातुन मुच्‍कुनाकुंटे दाना केल्कुन कतरिचकुनना. अद केल्कुन कतरिचकुनमळ, हिलाकोंटे गुंडु कीकुनमळ इद सिग्गु पोल्‍ले आंद इंचि अनपिस्‍ते, अद तल्‍लातुन मुच्‍कुनना.
1CO 11:7 मांडसा ओना तल्‍लातुन मुचमळ बेस आयो, ओर पेनदा रूपम आनि महिमा आंदुर, गानि मुरतळ अय्ते मांडसाता कदर आंद.
1CO 11:8 बारित्‍ते, मांडसा मुरतटाल वायाहिल्‍लोर, गानि मुरतळ मांडसाताल वाता.
1CO 11:9 मांडसा मुरतटाहाटीं तयार कियमळ जर्गाहिल्‍ले, गानि मुरतळ मांडसाताहाटीं तयार कियमळ जर्गता.
1CO 11:10 अदुनहाटीं पारतना कियानेंके पेनदा दूतां हूळसेक इंचि मुरतळ, मांडसाता अदिकारमता कय्‍दा हिळु मंतन इंचि हुप्‍सालय दाना तला मुच्‍कुनमळ गावाले.
1CO 11:11 अय्नागानि पेनदा लोप्पो मांडसा हिल्वा मुरतळ मंदा पर्रो, मुरतळ हिल्वा मांडसा मंदा पर्रोर.
1CO 11:12 बारित्‍ते, मुरतळ मांडसाताल तयार आता, अल्‍हेने मांडसा मुरतटाल पुटसेक मंतोर, गानि इवन्‍नि पेनदाले तयार आसेक मंता.
1CO 11:13 अय्ते, मिमेटे विचारम कीम्‍टु, मुरतळ तला मुचकुनवा पेनदा पारतना कियमळ बेसे ना?
1CO 11:14 मांडसा तल्‍लाता केल्क बेर्सागोटकुनमळ ओनाहाटीं सिग्गु होनना पोल्‍ले आंद, इद मीक एरपाटे मंता.
1CO 11:15 गानि मुरतळ दाना केल्क पोळगु बेर्सागोटकुत्‍ते दानकु कदर आंद. दाना तल्‍लातुन मुचकुनालय पेन दानकु केल्क हीता.
1CO 11:16 इदुना बारेमते बोरन्‍ना लोल्‍लि कियानय्ते, ओनकु तेळियाना गदा, मावा इसोंटा रीति आयो, कलिसियातोरदगुडा इसोंटा रीति आयो.
1CO 11:17 मिमेट कलिसियाने जमा आयमळ पाय्दा आयो गानि नुकसाने आंता. अदुनहाटीं नना मीवा पेद्‍दातनम कीसेक हिल्‍लेन.
1CO 11:18 बस्के अय्ते मिमेट कलिसियाते जमा आंतिर, अस्‍के मीक वरोनद-वरोंक अर्राका अलग आसेक मंतिट इंचि नना मोदाला केंजतन, इदुन नना नम्मंतनगुडा.
1CO 11:19 मीलोप्‍पो अलग आयमळ बेसे. बारित्‍ते बोर निजमते पिस्संतोर, ओर दिस्‍सि अर्रंतोर.
1CO 11:20 मिमेट सामिना उपारम तिनालय जमा आंतिर, गानि अदुन सामिना उपारम इन्‍नुर.
1CO 11:21 बारित्‍ते मिमेट तिनानस्के वरोंक मुन्‍ने वरोर, बोनद ओरे तिंतिर. अदुनहेंदाल बोरो कर्वुने मनंतुर, बोरो रिम्मांतुर.
1CO 11:22 मीक तिनालय-उनालय लोन हिल्‍लेना? हिलाकोंटे पेनदा कलिसियातोर्कुन हय्साकुंटा आनि गरिबोर्कुना इज्जत पोगोटालय आतिरा? इंदके मीकुन नना बतल इनकन? इदुनाहाटीं मिमेट बेस कीतिर इनकना? बस्‍केने इन्‍नोन.
1CO 11:23 बारित्‍ते, सामिनाहेंदाल इव पोल्‍लें नाक दोर्कतां, अवुन नना मीक अप्पजेपतन. येसु सामिन बद रोज अय्ते पीसि हिय्याना मत्‍ता अद नर्का उंदि हारि एततोर,
1CO 11:24 पेनदुक दन्यवाद कीसि, हारितुन उराहतोर, उराहचि ओर्क हीसेक, “इद मीवाहाटीं नावा मेंदुल आंद, नावा मतिताहाटीं इल्हेने कीम्‍टु,” इंचि वेहतोर.
1CO 11:25 इल्‍हा अद तित्‍ता पजा, अंगुर पानकमता गिलास एतसि, “इद पानकम नावा नेत्‍तुरते पूना करार आंद, इदुन बस्के अय्ते उंटिर अस्‍के नावा मति कियाना,” इंचि वेहतोर.
1CO 11:26 बारित्‍ते, मिमेट बस्के-बस्के अय्ते इद हारितुन तिंतिर, अंगुर पानकम उंटिर, अस्‍के सामिना हामुरतुन ओर मल्सि वायानादाका वेहंतिर.
1CO 11:27 अदुनहाटीं बोर अय्ते सामिंक इस्‍टम हिल्वा रीतुने ताकसि, हारितुन तिंतोर, अंगुर पानकम उंटोर, ओर सामिना मेंदुल आनि नेत्‍तुरता दोस्‍सि आंतोर.
1CO 11:28 इंचि हरेक मनकल कुद बल्हा मंतोर इंचि ओनद ओर परिक्‍सा कीसि हूळकुत्‍ता पजाने हारितुन तिनमळ गावाले आनि अंगुर पानकम उनमळ गावाले.
1CO 11:29 बारित्‍ते सामिना मेंदुल बारेमते तेल्‍पिचकुनाका तिनमळ-उनमळ कीते, ओर ओना पोर्रोने सिक्‍सा तरकुंतोर.
1CO 11:30 अदुनहाटीं मीलोप्‍पो वेल्‍लेटुर कमजोर आतुर, बिमार्क आतुर, वेल्‍लेटुर हासिगुडा होत्‍तुर.
1CO 11:31 गानि मनम कुद बल्हा मंतोम इंचि परिक्‍सा कीसि हूळते, पेन मनाकु सिक्‍सा हिय्यो.
1CO 11:32 गानि मनाकु दुनियातोरतोनि सिक्‍सा आयामन्‍नि इंचि सामि मनाकुन बेस पोल्‍ले वेहचि सुदरांचतोर.
1CO 11:33 अदुनहाटीं विस्वासुल्‍कुनिटा! सामिना उपारम तिनालय जमा आतस्के अंटोर वायानाल एदुर हूळसि, कूळसि तिंटु.
1CO 11:34 बोरन्‍नागिंटा कर्वुने मत्‍ते लोने तिंचि वायिर. इल्‍हा कलियमळता हेंदाल सिक्‍सा तपंता. कळमता पोल्‍लेन बारेमते नना वातस्के वेहंतन.
1CO 12:1 विस्वासुल्‍कुनिटा! आत्माता वराल्‍कुना बारेमते मीक तेळियका मनमळ नाक इस्‍टम हिल्‍ले.
1CO 12:2 मिमेट पेनदुन विस्वासम कियाका मुन्‍ने, वळ्कवा बोम्मान मोळ्‍कानाहाटीं मीक बल्हा वेहते, मिमेट अल्हे ताकिंदिर.
1CO 12:3 अदुनहाटीं पेनदा आत्माते वळ्कानोर बोरे आयिर, “येसु सापनेम दल्‍गतोर आंदुर,” इंचि इन्‍नुर. अल्‍हेने पवित्र आत्माते ताकवोर बोरे आयिर, “येसु सामि आंदुर,” इंचि इन्‍नुर.
1CO 12:4 वरमकु वेरे-वेरे मनना गानि पवित्र आत्मा उंदे आंद.
1CO 12:5 सेवागुडा वेरे-वेरे तीरकुना मनना गानि सामि वरोरे आंदुर.
1CO 12:6 वेरे-वेरे तीरकुना अद्‍बूतामाता कबाह्‍क मनना गानि ओरा लोप्पो कबाह्‍क कियालय दैरनेम हियना पेन उंदे आंदु.
1CO 12:7 अंटोर विस्वासुल्कुंक पाय्दा आयागोम इंचि मा अव्टेटाल हरेक मनकानगा पेनदा आत्मा हियमळ जर्गता.
1CO 12:8 बल्हा इत्‍ते, अदे आत्माताहेंदाल वरोर बुद्‍दिता पोल्‍लें वेहंतोर, अदे आत्माताहेंदाल इंकावरोर तेल्‍विता पोल्‍लें वेहंतोर.
1CO 12:9 अदे आत्माताहेंदाल वरोर विस्वासमते गट्‍टिगा मनंतोर, अदे आत्माताहेंदाल इंकावरोंक बिमार्क बेस कियाना वरम हियमळ जर्गंता.
1CO 12:10 अद आत्मा बोर्को-बोर्को अद्‍बूतामाता कबाह्‍क कियानद ताकत, बोर्को बविस्यवानि कियानद, बोर्को आत्मान लोप्पो तेडा बतल हूळानद, बोर्को वेरे-वेरे बासां वळकानद आनि इंका बोर्को बासाना अर्तम वेहना वरम हींता.
1CO 12:11 गानि इवन्‍नि अद उंदे आत्मा दाना इस्‍टम वाताप वरोंक-वरोंक तूसि हीसि कबाह्‍कुन पूरा कींता.
1CO 12:12 मना मेंदुल उंदे गानि अवने बागाल्क वेरे-वेरे मंतां. अवन्‍नि बागाल्क वेल्‍लेने मनना गानि उंदे मेंदुल्तव आंद, अल्‍हेने किरिस्‍तुगुडा मेंदुललेसीं मंतोर.
1CO 12:13 बारित्‍ते, मनम अंटोरम यहुदिल्क आयिना, युनानि आयिना, दासुल्क आयिना, दासुल्क आयाकोन्‍ना उंदे आत्माहेंदाल, उंदे मेंदुल आयालय बापतिस्मा एततोम, मना अंटोर्क उंदे आत्मा उहमळ जर्गता.
1CO 12:14 अदुनहाटीं मेंदुल्ते सिराप उंदे बागम हिल्‍ले गानि वेल्‍लेने बागाल्क मंतां.
1CO 12:15 ओक्‍कला, काल गिंटा, “नना कय आयोन, अदुनहाटीं मेंदुल्ता बागम आयोन,” इंचि इनकुनिना गानि अद मेंदुल्ता बागामे आंदु.
1CO 12:16 अल्‍हेने केव गिंटा, “नना कळु आयोन, अदुनहाटीं मेंदुल्ता बागम आयोन,” इंचि इनकुनिना गानि अद मेंदुल्ता बागामे आंदु.
1CO 12:17 ओक्‍कला, पूरा मेंदुल कळे आसि मत्‍ते, बगाटाल केंजसि मन्‍नेम? पूरा मेंदुल केव्वे आसि मत्‍ते, बगाटाल मूस्‍किसि मन्‍नेम?
1CO 12:18 अदुनहाटीं पेन दाना इच्‍चा मत्‍ताप, हरेक बागमतुन मेंदुल्ते बगा-बगा इर्रानो अगा इर्ता.
1CO 12:19 अव अन्‍नि गिंटा उंदे बागम मंचि मत्‍ते, मेंदुल बगा मनवळ?
1CO 12:20 अदुनहाटीं बागाल्क वेल्‍लेने मंतां, गानि मेंदुल उंदे आंदु.
1CO 12:21 इंदके कळु कय्दुन, “नीवातोनि नाक कबळ हिल्‍ले,” इंचि इना पर्रो. आनि तला काल्‍कुन, “नीवातोनि नाक कबळ हिल्‍ले,” इंचि इना पर्रो.
1CO 12:22 गानि मेंदुल्ते कमजोर मत्‍ताप दिस्सानव बागाल्के मनाकु वेल्‍ले अव्‍सरमतव आंदुं.
1CO 12:23 मना मेंदुल्ते बव बागाल्कुनय्ते तक्‍को कदरतव इनकुंतोमो अवुने मनम एक्‍को कदर कींतोम, अव बव अय्ते सिंगारम हिल्वव अव इंका एक्‍को सिंगारम आंतां.
1CO 12:24 गानि मुन्‍नेटाले सिंगारम मत्‍ता बागाल्‍कुन सिंगारम कियाना अव्‍सरम हिल्‍ले, गानि बवय्ते बागाल्क कदर हिल्‍लेंगों अवुंक एक्‍को कदर दोर्कमळ गावाले. अव बागाल्क सिन्‍ना-पेद्‍दा बतल इनाका उंदांक-उंदि रंदि कियमळ गावाले, इंचि पेन इल्‍हा मेंदुल तयार कीता.
1CO 12:26 अदुनहाटीं ओक्‍कला मेंदुल्तद उंदि बागम नोते, दानतोनि अव अन्‍नि बागाल्कुंक नोंता. ओक्‍कला उंदि बागमकु कदर दोर्कते, अव अन्‍नि बागाल्क कूस आंतां.
1CO 12:27 अल्‍हेने मिमेट अंटोर कलियसि किरिस्‍तुना मेंदुल आंदिर, हरेक मनकल आ मेंदुल्ता बागाल्क आंदिर.
1CO 12:28 कलिसियाता लोप्पो पेन मोदाला प्रेरितुल्कुन, ओरा पज्जो पेनदा कबुरतोर्कुन, ओरा पज्जो पेनदा पोल्‍लें कराहनोर्कुन, ओरा पज्जो अद्‍बूतामाता कबाह्‍क कियानोर्कुन, ओरा पज्जो बिमार्कुन बेस कियानोर्कुन, ओरा पज्जो सहायम कियानोर्कुन, राज्येम ताकसानोर्कुन आनि वेरे-वेरे बासां वळ्कानोर्कुन निलाहता.
1CO 12:29 इत्‍ते, अंटोर प्रेरितुल्क आयुर, अंटोर पेनदा कबुरतोर आयुर, अंटोर पेनदा पोल्‍लें कराहनोर आयुर, अंटोर अद्‍बूतामाता कबाह्‍क कियानोर आयुर,
1CO 12:30 अंटोर्क बिमार्क बेस कियाना वरम दोर्काहिल्‍ले, अंटोर वेरे-वेरे बासां वळ्कानोर आयुर, अंटोर अव पोल्‍लेना अर्तम वेहा पर्रुर,
1CO 12:31 मिमेट पेद्‍दा-पेद्‍दा वराल्‍कुना आसेते मंटु, इवे आयाका इवुंकन्‍ना बेसता हर्रि वेहंतन.
1CO 13:1 नना मनकालोर्क आनि पेनदा दूतां वळ्कना बासां वळ्कतेगुडा, नावा लोप्पो पावरम हिलाकोंटे, नना टंग-टंग इनना इत्‍तोळतसंटोन हिलाकोंटे गल-गल इनना गज्जेनसंटोन आंदुन.
1CO 13:2 नाक गिंटा बविस्यवानि वेहना वरम मनना, अन्‍नि मर्माल्‍कु आनि तेल्‍विता पोल्‍लें तेळियना, गुट्‍टान जर्पनच्‍चो पूरा विस्वासम मनना गानि नावा लोप्पो पावरम हिलाकोंटे नना बतले कबळतोन आयोन.
1CO 13:3 नावा पूरा दनमतुन गिंटा गरिबोर्कुंक तूसि हिय्‍यिना, बेसता कबुर वेहनाहाटीं नावा मेंदुल बोळ्‍सालय हिय्‍यिना, नावा लोप्पो पावरम हिलाकोंटे बतल पाय्दा मन्‍नो.
1CO 13:4 पावरमते ओप्के मंता, दया मंता. पावरम इंकावरोन पोर्रो कळ्‍क पोत्‍ता हिय्यो, पावरम पोमाडेंगि किया हिय्यो, पेद्‍दिरकेम किया हिय्यो.
1CO 13:5 रीति हिल्वा कबाह्‍क किया हिय्यो, नाके पाय्दा गावाले इंचि इना हिय्यो, सिडांचा हिय्यो, बोरन्‍ना तकलिपकु कियाना अदुन मनसुने इर्रा हिय्यो.
1CO 13:6 कराब कबाह्‍कुने कूस आया हिय्यो, गानि सत्‍तेमते कूस आंता.
1CO 13:7 पावरम अन्‍नि पोल्‍लें सहन किया वेहंता, अन्‍नि पोल्‍लेनपोर्रो विस्वासम किया वेहंता. अन्‍नि पोल्‍लेनपोर्रो आसे इर्रा वेहंता, अन्‍नि पोल्‍लेने ओप्‍केते इर्रंता.
1CO 13:8 पावरम बस्‍केने मारो. गानि बविस्यवानि वेहना वरम मारंता, वेरे-वेरे बासां वळ्कना वरम आगसि दांता, मर्मम तेल्‍पिचकुनना तेल्वि मत्‍ते अदगुडा कबळ किय्‍यो.
1CO 13:9 बारित्‍ते मना तेल्वि पुरागा हिल्‍ले अल्‍हेने बविस्यवानि वेहना वरम पुरागा हिल्‍ले.
1CO 13:10 गानि बस्के अय्ते अन्‍निन पुरागा कियाना पोल्‍ले वायार, अस्‍के पुरागा हिल्‍वद मायसि दांता.
1CO 13:11 नना सिन्‍ना-पेडन मत्‍तस्के, सिन्‍ना-पेडनलेसीं वळ्‍कुंदुन, सिन्‍ना-पेडनलेसीं विचारम कियुंदुन, सिन्‍ना-पेडनलेसीं मनसु मत्‍ता, गानि पेद्‍दागा आतारिते सिन्‍ना-पेडनलेसीं वळ्कना पोल्‍लें होळ्‍सीतन.
1CO 13:12 इंदके मनाकु अद्‍दमते हूळताप मागुर-मागुर दिस्सेक मंता, गानि आयंका ओना मुन्‍ने नित्‍तिसि हूळंतोम. इंदके नाक पुरागा तेळियो, नावा बारेमते पेनदुक पुरागा तेळियंता. ओर वाता पजा, नाकगुडा पुरागा तेळियंता.
1CO 13:13 इंदके विस्वासम, आसे, पावरम इव मूड पोल्‍लें बस्‍केळ्‍क मनानवे आंदुं, गानि इव्टेटाल पावरम अन्‍निंकन्‍ना पेद्‍दा पोल्‍ले आंद.
1CO 14:1 पावरम इद मीवा लक्‍से मन्‍निकांटी. आत्माता वराल्कुन पह्काटु, बविस्यवानि वेहना वरम पहकसेकेन मंटु.
1CO 14:2 बारित्‍ते, तेळियवा बासाते वळ्कानोर, ओर मनकालोर्कुनतोनि आयो गानि पेनतोनि वळ्कंतोर. ओर मर्ममता पोल्‍लें पेनदा आत्माताल वळ्कंतोर, अव पोल्‍लें मनकालोर्कुंक तेळियों.
1CO 14:3 गानि बविस्यवानि वेहानोर, मनकालोर्कुना बक्‍तितुन बेर्सागोटालय, दैरनेम हियालय, सांतिते मनालय वेहंतोर.
1CO 14:4 वेरे-वेरे बासाते वळ्कानोर, ओनदे बक्‍तितुन बेर्सागोटंतोर. गानि बविस्यवानि वेहानोर, कलिसियातोरा बक्‍तितुन बेर्सागोटंतोर.
1CO 14:5 मिमेट अंटोर वेरे-वेरे बासाते वळ्‍कगोम इंचि नना इनकुंतन. गानि दीनकन्‍ना एक्‍को बविस्यवानि वेहमळे बेस इंचि इनकुंतन. बारित्‍ते वेरे-वेरे बासाते वेहानोर, कलिसियातोर्कुन बक्‍तिते बेर्सागोटालय ओरा बासाते वेहाकोंटे बतल पाय्दा हिल्‍ले. अदुनहाटीं वेरे-वेरे बासाने वेहानदाकन्‍ना बविस्यवानि वेहमळे एक्‍को पाय्दातद आंद.
1CO 14:6 विस्वासुल्‍कुनिटा! नना मिहगा वासि पेन नाक हीता पोल्‍लेन वेहकन, तेल्‍विता पोल्‍लेन वेहकन, बविस्यवानि वेहकन, कराहकन अस्‍के मीक पाय्दा आयार. अवुन होळसिसि वेरे-वेरे बासाते वेहते मीक बतल पाय्दा आयार?
1CO 14:7 अल्‍हेने तूरीला आनि तरास बुर्राते जीवा हिल्‍ले. अय्नागानि अवुन बरोबर नेकिचाकोंटे, बतल नेकसेक मंता इंचि बल्हा तेळियंता?
1CO 14:8 तूताकोमता आवाज बरोबर पेय्साकोंटे लडाइ कियालय बोर तयार आंतुर?
1CO 14:9 अल्‍हेने मिमेटगुडा वेरेतोर्क तेळियना पोल्‍लेते वेहाकोंटे, मीवा पोल्‍ले ओर्क बल्हा तेळियार? मिमेट वळिते वळ्कताप आंता.
1CO 14:10 दुनियाते बच्‍चुंगो तीरकुना बासां मंतां, गानि अर्तम हिल्‍वद बदे बासा हिल्‍ले.
1CO 14:11 अदुनहाटीं अद बासाता अर्तम नाक तेळियाकोंटे, नना वळ्कानोनतोनि वेरे देसेमतोन आंतन, ओर नावाहाटीं वेरे देसेमतोर आंतोर.
1CO 14:12 अल्‍हेने मिमेटगुडा पेनदा आत्माता वराल्‍कुने निंडिस मंतिट, अवुनाहेंदाल कलिसियातोर्कुना बक्‍ति बेर्सना कोसिस कीम्‍टु.
1CO 14:13 अदुनहाटीं वेरे-वेरे बासाते वळ्कानोर, दाना अर्तम वेहाना ताकत हीम इंचि पारतना कियाना.
1CO 14:14 बारित्‍ते, ननागिंटा वेरे-वेरे बासाते पारतना कीते, नावा आत्मा पारतना कींता गानि नावा बुद्‍दि कबळ किय्‍यो.
1CO 14:15 अय्ते नाक बतल कियमळ गावाले? नना नावा आत्माते पारतना कींतन, नना नावा बुद्‍दितेगुडा पारतना कींतन. नना नावा आत्माते पाटा पारंतन, नना नावा बुद्‍दितेगुडा पाटा पारंतन.
1CO 14:16 ओक्‍कला निमे सिराप आत्माते दन्यवाद कियानय्ते, नीवा पोल्‍ले तेळियवोर अगा उद्‍दुता मनकल आमीन इंचि बल्हा इनानुर? निमे बतल वळ्‍कतिन ओनकु तेळिया हिल्‍ले.
1CO 14:17 निमे अय्ते पेनदुक बेस दन्यवाद कींतिन, गानि इंकावरोना बक्‍ति बेर्सालय अद कबळ किय्‍यो.
1CO 14:18 मी अंटोर्कन्‍ना एक्‍को वेरे-वेरे बासाने वळ्‍कना वरम नाक मंता, अदुनहाटीं नना पेनदुक दन्यवाद कींतन.
1CO 14:19 गानि कलिसियातोर्कुनतोनि वेरे-वेरे बासाते पदि वेय्‍कुना पोल्‍लें वळ्कनदानकन्‍ना, ओर्क कराहलय तेळियना बासाते हेय्युं पोल्‍लें ना बुद्‍दिते वेहामळे नाक बेस.
1CO 14:20 विस्वासुल्‍कुनिटा! मिमेट तेल्‍विते सिन्‍ना-पिलाल्कुनालेसीं मनमट, गानि पेद्‍दा मनकालोर्कुनालेसीं मंटु. कराब पोल्‍लेने सिन्‍ना-पिलाल्‍कुनलेसीं तेळियवाप मंटु. विचारम कियमळते पेद्‍दोरालेसीं मंटु.
1CO 14:21 दर्मसास्‍त्रमते, “नना तेळियवा बासाने वळ्‍कानोर्कुना हेंदाल, पराया लोकुल्‍कुना तोळ्‍दाल, ईरतोनि वळ्‍कंतन, अय्नागानि ईर नावां केंजुर,” इंचि पेन वेहंता.
1CO 14:22 अदुनहाटीं तेळियवा बासाते वळ्‍कमळ, विस्‍वासुल्‍कुनाहाटीं आयो, गानि विस्वासम कियवोराहाटीं चिन्‍ह आंद. बविस्यवानि वेहमळ विस्वासम कियवोराहाटीं आयो, गानि विस्वासम कीतोराहाटीं चिन्‍ह आंद.
1CO 14:23 ओक्‍कला कलिसियातोर उंदगा जमा आतस्के, अंटोर तेळियवा बासाते वळ्कालय दल्‍गते, मीलोप्‍पो बासा तेळियवोर, अविस्वासि वायानय्ते, ओर मीकुन पागल आतुर इंचि इंतुर.
1CO 14:24 गानि मिमेटगिंटा तेळियना बासाते बविस्यवानि वेहते, बोरन्‍ना विस्वासम कियवोर हिलाकोंटे तेळियवोर मनकल मिहगा वासि केंजते, ओना तप्पुक ओन्क तेळियसि, ओर पापमतुन एरपाट कीकुंतोर.
1CO 14:25 ओना मनसुने मक्‍किस मत्‍तव पूरा दिसंतां. अदुनहाटीं ओर बोकबोर्लें अर्सि पेनदुन मोळ्‍कंतोर आनि “निजमे पेन मीलोप्‍पो मंता,” इंचि ओप्‍कुंतोर.
1CO 14:26 विस्वासुल्‍कुनिटा! इंदके बतल कियाना? बस्के अय्ते मिमेट जमा आंतिर, अस्‍के वरोर पाटा पारालय, वरोर कराहलय, वरोर पेनदा पोल्‍ले बैय्यरा कीसि वेहालय, वरोर वेरे बासाते वळ्कालय, वरोर वेरे बासाता अर्तम वेहालय तयार मनंतुर. इवन्‍नि कलिसियातोर्कुना बक्‍ति बेर्सनाहाटीं आयमळ गावाले.
1CO 14:27 वेरे-वेरे बासाते वळ्कना मते, इव्वुर हिलाकोंटे एक्‍कोते-एक्‍को मुव्वुर वरोन पजा वरोर वळ्‍किर आनि वरोर दाना अर्तम तेळियागोट्‍सि वेहिर.
1CO 14:28 गानि अर्तम तेळियागोट्‍सि वेहानोर गिंटा हिलाकोंटे, वेरे बासाते वळ्कना मनकल कलिसियाते चुपचाप मंचि ओना मनसुने पेनतोनि वळ्कना.
1CO 14:29 पेनदा कबुरतोर इव्वुर हिलाकोंटे मुव्वुरे वेहिर, कळमतोर वेहता पोल्‍लेन परिक्‍सा कीसि हूळिर.
1CO 14:30 गानि उद्‍दिस मत्‍तोरव्टेताल बोर्कन्‍ना अदे वेलाते पेनदा पोल्‍ले दोर्कसि अदुन वेहंतन इनकुनानय्ते, मुन्‍नेटाल वेहासेक मत्‍तोर चुपचाप उद्‍दना.
1CO 14:31 मिमेट अंटोर करियना, अंटोर सांतिते मंदना इंचि वरोर-वरोर बविस्यवानि वेहा परांतिट.
1CO 14:32 पेनदा कबुरतोर ओरा आत्मातुन ओर इनकुत्‍ताप तिरहा परांतुर.
1CO 14:33 बारित्‍ते पेन गळबळ कियानद आयो, सांति हियना पेन आंद. अन्‍नि कलिसियाना पेनदा लोकुल्‍क इल्हे मनंतुर.
1CO 14:34 कलिसियातोर जमा आतस्के मुर्ताह्क चुपचाप मंदना, बारित्‍ते अवुंक वळ्कना अदिकार हिल्‍ले. गानि कय हिळु मंदना आदेस मंता. इल्‍हा दर्मसास्‍त्रमतेगुडा रासि मंता.
1CO 14:35 अवुंक बतलन्‍ना करियना इच्‍चा मत्‍ते, लोन होत्‍ता पजा अव अवुना मुय्दुर्कुन पूसकियाना. बारित्‍ते कलिसियाते मुरतळ पूसकियमळ इत्‍ते सिग्गु होनना पोल्‍ले आंद.
1CO 14:36 बतल! पेनदा पोल्‍ले मिहगाटाले पेय्सतना? सिराप मिहागळ्के वाताना?
1CO 14:37 बोरन्‍नागिंटा, “नना पेनदा कबुरतोन” हिलाकोंटे, “नना पेनदा आत्मा मत्‍तोन” इंचि इनकुनानय्ते, नना मीक रासता पोल्‍लें सामिना आदेसाल्‍क आंदुं इंचि ओन्क तेळियाना.
1CO 14:38 गानि बोरन्‍नागिंटा इदुन ओप्कुनाकोंटे, ओनगुडा ओप्कुनमट.
1CO 14:39 अदुनहाटीं विस्वासुल्‍कुनिटा! बविस्यवानि वेहालय तयार मंटु, वेरे बासाते वेहते ओन आपमटु.
1CO 14:40 गानि अन्‍नि पोल्‍लें बेस उंदान पज्जो उंदि जर्गिंकांटी.
1CO 15:1 विस्वासुल्‍कुनिटा! नना मीक वेहता बेसता कबुरतुन मर्रा उंदि मल्का मति कीसि हीसेक मंतन. अद बेसता कबुरतुन ओप्कुत्‍तिर, अवने गट्‍टिगा निल्सिगुडा मंतिर.
1CO 15:2 नना वेहता बेसता कबुरतुन मिमेट होळसाकोंटा पीसि मत्‍ते पेन मीकुन पिसागोटंता. हिलाकोंटे मीवा विस्वासम कियमळ एर्तम आंता.
1CO 15:3 अदुनहाटीं अन्‍निंकन्‍ना मुन्‍ने नहगा एवता पोल्‍लेतुने मिहगा एविस्तन. अद बतल इत्‍ते, दर्मसास्‍त्रमता पोल्‍ले मत्‍ताप, किरिस्‍तु मना पापाल्कुनाहाटीं हातोर,
1CO 15:4 बोंदा दोस्तुर, दर्मसास्‍त्रमते रासताप मूडो रोजुने जीवातेगुडा तेदतोर.
1CO 15:5 जीवाते तेदतस्‍के केपांक दिसतोर, पजा पन्‍नेंडु प्रेरितुल्कुंक दिसतोर.
1CO 15:6 अद आता पजा, हेय्युं नुह्कुंकन्‍ना एक्‍को विस्वासुल्कुंक उंदे मल्का दिसतोर. ओरागटाल वेल्‍लेटुर इदवेरदाकागुडा जीवाते मंतुर, गानि इच्‍चुर हातुर.
1CO 15:7 मर्रा याकोबुंक दिसतोर, दाना पजा अंटोर प्रेरितुल्कुंक दिसतोर.
1CO 15:8 नना नेलां निंडका मुन्‍नेन पुट्तोनलेसीं अंटोर्कन्‍ना आकिरते नाकुगुडा दिसतोर.
1CO 15:9 बारित्‍ते, नना अंटोर प्रेरितुल्‍कुन लोप्‍पो सिन्‍नोन आंदुन, नना पेनदा कलिसियातोर्कुन तिप्‍पल्‍क कीतोन आंदुन. अदुनहाटीं प्रेरित इनना लायकगुडा हिल्‍लेन.
1CO 15:10 गानि इंदके बतलय्ते मंतानो, पेनदा कुर्पाहेंदाले मंतन. अद कुर्पा नाक एर्तम आयाहिल्‍ले. नना कळमता प्रेरितुल्‍कुंकन्‍ना एक्‍को कस्‍टम कीतन. अय्नागानि निजम इत्‍ते नना किया हिल्‍लेन, पेनदा कुर्पा नावातोनि मत्‍ता, अदे कीता.
1CO 15:11 अदुनहाटीं नना पेनदा पोल्‍ले वेहना, ओर वेहना मोमोट अंटोरम उंदे पोल्‍ले वेहंतोम. अदुन मिमेट विस्वासम कीतिर.
1CO 15:12 किरिस्‍तु हातोरा लोप्पोटाल जीवाते तेदतोर इंचि मोमोट गिंटा कबुर वेहानय्ते, हातोर मर्रा जीवाते तेदुर इंचि मीवा लोप्पोटोर इच्‍चुर इंतुर. अल्हा बारि इंतुर?
1CO 15:13 हातोर मर्रा जीवाते तेदाकोंटे, किरिस्‍तुगुडा हासि जीवाते तेदा हिल्‍लोर.
1CO 15:14 किरिस्‍तु गिंटा जीवाते तेदाकोंटे, मोमोट वेहाना बेसता कबुर एर्तमे, मीवा विस्वासमगुडा एर्तमे आंद.
1CO 15:15 अचोने आयाका, किरिस्‍तु हातोरा लोप्पोटाल जीवाते तेदतोर इंचि मोमोट मीक वेहतोम. हातोर गिंटा जीवाते तेदाकोंटे, पेन किरिस्‍तुनगुडा जीवाते तेहा हिल्‍ले इंचि तेळियंता. अदुना हेंदाल मोमोट पेनदा बारेमते आबद्‍दम गवाइ वेहताप आंता.
1CO 15:16 अल्‍हेने हातोर गिंटा जीवाते तेदाकोंटे, किरिस्‍तुगुडा जीवाते तेदा हिल्‍लोर.
1CO 15:17 किरिस्‍तु गिंटा जीवाते तेदाकोंटे, मीवा विस्वासम एर्तम आंद आनि मिमेट इदवेरादाका पापमतेन पसांचि मंतिर.
1CO 15:18 अल्हा अय्ते, किरिस्‍तुन विस्वासम कीसि हातोरगुडा नासडेमताल पिसा पर्राहिल्‍लुर.
1CO 15:19 सिराप इद बूमिपोर्रोटा पिस्वरहाटींगे किरिस्‍तुनपोर्रो मना आसे इरते, मना गति अंटोर मनकालोर्कुंकन्‍ना एक्‍को गोसातद आयार.
1CO 15:20 गानि निजम बतल इत्‍ते, किरिस्‍तु हामुरताल जीवाते तेदतोर. बोर अय्ते विस्वासुल्‍क हासि होत्‍तुर, ओरव्टेटाल जीवाते तेदतोर ओरे मुन्‍नेटोर आंदुर.
1CO 15:21 बल्हा अय्ते वरोर मनकनहेंदाल हामुर वाता, अल्‍हेने वरोर मनकनाहेंदाल हातोर मर्रा जीवाते तेदमळगुडा वाता.
1CO 15:22 बारित्‍ते, आदामुन लोप्पो अंटोर हासि दांतुर, किरिस्‍तुनलोप्‍पो अंटोर जीवाते तेहमळ जर्गार.
1CO 15:23 हरेक मनकल वरोन पजा वरोर, मोदाला किरिस्‍तु जीवाते तेदतोर, किरिस्‍तु मर्रा वाता पजा ओना लोकुल्‍क जीवाते तेदांतुर.
1CO 15:24 अदुन पजा, पूरा सरकार, पूरा अदिकार आनि ताकत इव अन्‍निन किरिस्‍तु नासडेम कीसि पेनबाबाना कय्‍दे राज्येम अप्‍पजेप्‍पंतोर. अस्‍के बूमिता आकिर आयार.
1CO 15:25 बारित्‍ते, किरिस्‍तु ओना पगातोर्कुन काल्कुना हिळु तायनादाका, ओर राज्येम कियमळ गावाले.
1CO 15:26 हामुर अन्‍निंकन्‍ना आकिर पगातद आंद, अदुनगुडा नासडेम कींतोर.
1CO 15:27 बारित्‍ते, पेन अन्‍निन किरिस्‍तुना काल्कुना हिळु इरता. अन्‍निन इंचि इत्‍ते, पेनदुन होळसिसि अन्‍निन इंचि बरोबर एर्का आंता.
1CO 15:28 अन्‍निन ओना अदिकारमते इरता पजा, पेन अन्‍निन ताकिचगोम इंचि मर्रि कुद दाना अदिकारमते आंतोर. बारित्‍ते पेने अन्‍निन ताकिचंता.
1CO 15:29 मर्रा जीवाते तेदाकोंटे, हातोराहाटीं येसुना पोरोलते बापतिस्मा एततुर, ओर बतल कियानुर? हातोर गिंटा जीवाते तेदाकोंटे ओराहाटीं बापतिस्मा बारि एताना?
1CO 15:30 बस्‍केळ्‍क मना जीवातुन बारि डेंजरते इर्राना?
1CO 15:31 विस्वासुल्‍कुनिटा! मिमेट मना सामि येसु किरिस्‍तुना लोप्पो विस्वासमते गट्‍टिगा मत्‍ताहाटीं, नना मीवा बारेमते पेद्‍दिरकेम वेहकुंचेके मंतन. अदुनहाटींगे नावा हामुरतुन रोज हूळसेक मंतन.
1CO 15:32 इपीसि सहरतगा, नना केडा जिवरासिनसोंटा मनकालोर्कुना रीतिते लडांचतन, अय्ते बतल पाय्दा आता? हातोर गिंटा तेदाकोंटे, दर्मसास्‍त्रमते रासि मत्‍ताप, “नाळि अय्ते हायानदे मंता, अदुनहाटीं तिनकोम-उनकोम,” इंचि मन्‍नेम.
1CO 15:33 गानि हातोर मर्रा जीवाते अर्रुर इंचि इनानोरा हेंदाल दोकाते अरमट. “कराब लोकुल्‍कुना दंटा, बेस ताकानोर्कुन हेडहंता.”
1CO 15:34 अदुनहाटीं नीतिते ताकसि उसारते मंटु, पापम कियमट. मीलोप्‍पो बच्‍चुटुरो पेनदुन एरपाट कियवोरगुडा मंतुर, मीक सिग्गु वायागोम इंचि इद पोल्‍ले वेहसेक मंतन.
1CO 15:35 गानि बोरन्‍ना, “हातोर जीवाते बल्हा तेदंतोर? जीवा अरता पजा मेंदुल बल्हा मनंता?” इंचि पूसकिया परांतुर.
1CO 15:36 ए बुद्‍दि हिल्वोना! निमे बूमिते एदता पेळे, मुन्‍ने हासि, पजाटाल मोलियंता.
1CO 15:37 निमे एदतद, मोल्का आयो, पेळे आंद. अद गोह्कुना पेळे आयावच्‍चु, इंका बदाना पेळे आयावच्‍चु.
1CO 15:38 गानि पेन दाना इच्‍चातीर दान्क रूपम हींता. वेरे-वेरे पेडेक, वेरे-वेरे रूपम हींता.
1CO 15:39 गानि अन्‍नि मेंदुल्क उंदेतीर मन्‍नों, मनकना मेंदुल वेरे, जिवरासिना मेंदुल वेरे, पिट्‍टेना मेंदुल वेरे, जिम्माना मेंदुल वेरे मंता.
1CO 15:40 स्वर्गमते मनानोर्क मेंदुल मनंता अल्‍हेने बूमिपोर्रो मनानोर्कगुडा मेंदुल मनंता. गानि स्वर्गमतोरा मेंदुल्ता वेल्‍गु वेरे, बूमि पोर्रोटोरा मेंदुल्ता वेल्‍गु वेरे मनंता.
1CO 15:41 पोळ्‍दुना वेल्‍गु वेरे, वेळ्‍सिता वेल्‍गु वेरे, सुक्‍काना वेल्‍गु वेरे. सुक्‍काना वेल्‍गु उंदानद-उंदांक परक मनंता.
1CO 15:42 हातोर मर्रा जीवाते तेदमळगुडा इल्हे मंता. कळियसि होनना मेंदुल्तुन बूमिते दोसंतोम, गानि बस्‍केने कळियसि होनवा मेंदुल मर्रा जीवाते तेदंता.
1CO 15:43 मेंदुल बूमिते दोस्सनेंके दाना कदर मन्‍नो, गानि अद मर्रा जीवाते तेदानेंके दानकु वेरेने कदर दोर्कंता. मेंदुल बूमिते दोस्सनेंके दानकु ताकत मन्‍नो, गानि अद मर्रा जीवाते तेदानेंके वेल्‍लेने ताकतते तेदंता.
1CO 15:44 बूमिते दोसतद मना दिस्‍सना मेंदुल आंदु, मर्रा जीवाते तेदानद आत्माता मेंदुल आंदु. अल्‍हेने दिस्‍सना मेंदुल मंता, आत्माता मेंदुलगुडा मंता.
1CO 15:45 दर्मसास्‍त्रमते इदुना बारेमते, “मोट्‍टा मोदाटा जीवाता मनकल आदाम आतोर” इंचि रासि मंता. आकिर आदाम, इत्‍ते किरिस्‍तु, पिस्वर हियना आत्मा आतोर.
1CO 15:46 गानि आत्माता मेंदुल मोदाटद आयो, दिस्‍सना मेंदुले मोदाटद आंद. दाना पजाने आत्माता मेंदुल वांता.
1CO 15:47 मोदाटा मनकल बूमिता तोळिते तयार आतोर, गानि पजाटाल वायाना मनकल स्वर्गमताल वातोर.
1CO 15:48 तोळिताल तयार आतुर अंटोर मनकालोर्क, तोळिता मनकनलेसींगे आतुर. स्वर्गमता मनकालोर्क, स्वर्गमतालेसींगे मंतुर.
1CO 15:49 मनम बल्हा अय्ते तोळिते तयार आतोना रूपम एततोम, अल्‍हेने स्वर्गमताल वायानोना रूपमगुडा एतंतोम.
1CO 15:50 विस्वासुल्‍कुनिटा! नना वेहानद बतल इत्‍ते, हव्वि, नेत्‍तुरता मेंदुल्क पेनदा राज्येम दोर्का पर्रो, आनि कळियना मेंदुल्क, कळियवा मेंदुल्तगा अदिकार दोर्का पर्रो.
1CO 15:51 केंजाट, नना मीक मर्ममता पोल्‍ले वेहसेक मंतन. अद बतल इत्‍ते, मनम अंटोरम हायोम, गानि मना रूपम मारियंता.
1CO 15:52 इदंता, उंदि सेकंदतेन, कळु रेप्‍पा तंतच्‍चोरजेमनेन जर्गंता. आकिरता तूताकोम उह्‍कुता उह्‍कुळे, हातोर अंटोर बस्‍केने नासडेम आयाकोंटा मननाहाटीं मर्रा जीवाते तेदानुर आनि मना रूपम बारे मारियंता.
1CO 15:53 बारित्‍ते, कळियसि होनना मेंदुल बस्‍केने कळियसि होनवा मेंदुललेसीं, आनि हायना मेंदुल बस्‍केने हायाकोंटा मनना मेंदुललेसीं मारिया पींता.
1CO 15:54 बस्के अय्ते कळियसि होनना मेंदुल, कळियसि होनवा मेंदुल्ते मारियंता आनि हायाना मेंदुल हायवा मेंदुल्ते मारियंता, अस्‍के दर्मसास्‍त्रमते रासि मत्‍ताप, “पेन हामुरतुन मिंगसि वाटता” इंचि रासि मत्‍ता पोल्‍ले पूरा आंता.
1CO 15:55 “ए हामुरतुना! निमे माकुन बगा गेल्‍स्‍तिन? ए हामुरतुना, नीवा कस्कना कोंडि बगा मंता?” इंचि रासि मंता.
1CO 15:56 हामुरता कोंडि पापम आंद, पापमता ताकत मूसाना नियम आंद.
1CO 15:57 मना सामि येसु किरिस्‍तुनाहेंदाल पेन मनाकुन गेल्‍सागोटंता. अदुनहाटीं पेनदुक दन्यवाद.
1CO 15:58 नावा पावरमगल्‍ला विस्वासुल्‍कुनिटा! सामिना लोप्पो मीवा कस्‍टम एर्तम होन्‍नो इंचि मीक एरपाटे मंता. अदुनहाटीं मिमेट विस्वासमते हीके-हेके आयाकुंटा, गट्‍टिगा निल्‍सि मंटु, सामिना कबळते इंका एक्‍को बेर्स्‍सेके होंटु.
1CO 16:1 येरुसलेमता पेनदा लोकुल्‍कुनाहाटीं चंदा जमा कियाना बारेमते, बल्हा अय्ते गलातिया एरियाता कलिसियातोर्क वेहतानो, अल्‍हेने मिमेटगुडा कियाना.
1CO 16:2 नना वाता पजाने चंदा जमा कियमट, गानि मीवव्टेटाल हरेक मनकल ओना कमाइता इसाबते वारमता मोदाटा रोज इच्‍चुक कोत्‍तां जमा कीसि इर्रट.
1CO 16:3 नना वाता पजा, मिमेट बोर्कुनय्ते इद कबळताहाटीं पेर्रांतिरो, ओर्क नना सिट्‍टिं हीसि, ओरा कय्देने मिमेट जमा कीता चंदा येरुसलेम लोहचींतन.
1CO 16:4 ओक्‍कला नना होनमळ कुदुरते, ओर नावातोनि वांतुर.
1CO 16:5 नाक मेसिडोनिया एरियाते होनना मंता, मेसिडोनियाताल पजा मिहगा वांतन.
1CO 16:6 मिहगा वासि, आया परते कोन्‍नि रोजकु हिलाकोंटे पूरा पीनि कालम मीवातोनि मनंतन. दाना पजा नाक बेके होनना मंता, हेके सार्ला कीम्‍टु.
1CO 16:7 बारित्‍ते, मेसिडोनियाते होनानेंके नड्‍डुम आगसि मीक कलियमळ नाक इस्‍टम हिल्‍ले. सामिना इच्‍चा मते, मीवातोनि कोन्‍नि रोजकु मंदना इंचि नावा आसे मंता.
1CO 16:8 गानि इंदके, पेंतेकोस्‍त पंडुगुनदाका इपीसि सहरतेन मनंतन.
1CO 16:9 बारित्‍ते, इगे बेसता कबळ कियालय, नाक उंदि पेद्‍दा मोका दोर्कता, इंका विरोद कियानोरगुडा वेल्‍लेटुरे मंतुर.
1CO 16:10 तिमोति मिहगा वातस्के ओर मीवा नड्‍डुम दैरनेमते मननाल हुळट. ओरगुडा नावालेसीं सामिना सेवा कीसेक मंतोर.
1CO 16:11 अदुनहाटीं ओन बोरे सिन्‍नगा हूळा मन्‍नि, ओन सांतिते नहगा लोहट. मिहगटा विस्वासुल्‍कुनतोनि ओर वायानुर इंचि नना एदुर हूळसेक मंतन.
1CO 16:12 अप्‍पुलोस दादान, विस्वासि दादालोर्कुनतोनि होन इंचि नना बच्‍चुंगो मल्कां बतिमलाडसि वेहतन, गानि इंदके मिहगा वायाना विचारम ओनद हिल्‍ले, पजा मोका दोर्कतस्के वायानुर.
1CO 16:13 इंदके मिमेट उसारते मंटु, विस्वासमते गट्‍टिगा मंटु, दैरनेमते मंटु, बलमगल्‍लोर्क आसि मंटु.
1CO 16:14 मिमेट कियाना कबाह्‍क अन्‍नि पावरमतेन कीम्‍टु.
1CO 16:15 विस्वासुल्‍कुनिटा! स्‍टिपनसना लोतोर्कुना बारेमते मीक एरपाटे मंता, ओर अकाया एरियाते मोदाला विस्वासम कीतुर. ओर पेनदा लोकुल्‍कुना सेवा कियालय ओरद-ओर अप्पजेपकुत्‍तुर.
1CO 16:16 मिमेटगुडा असंटोरा आनि ओरालेसीं सेवा कियानोरा पोल्‍ले केंजसि ताकट इंचि बतिमलाडसंतन.
1CO 16:17 मिहागटाल मिमेट वायाकोन्‍ना गानि स्‍टिपनस, पुरतुनातुस, अकयकुस नहगा वातुर. ओर वाताहाटीं मिमेट वाताप आता. इंचि नना वेल्‍ले कूस आतन.
1CO 16:18 ओर वातुर इंचि नावा जीवक आनि मीवा जीवक सांति दोर्कता. अदुनहाटीं इसंटोर्कुन कदर हीम्टु.
1CO 16:19 आसिया राज्येमते मनना कलिसियातोर मीक जोहर वेहतुर. अकविला, ओना मुत्‍तो पिरिसकिला आनि ओरा लोतागा जमा आयाना कलिसियातोरगुडा सामिना पोरोलते मीक जोहर वेहतुर.
1CO 16:20 इग्‍गेटा अंटोर विस्वासुल्‍क मीकुन जोहर कीसेक मंतुर. मिमेट वरोंक-वरोर पवित्र पावरमते कलियसि जोहार वेहकुंट.
1CO 16:21 नना पौलुसुन, नावा कय्‍दे जोहर इंचि मीक रासेक मंतन.
1CO 16:22 बोरन्‍नागिंटा सामिन पावरम कियाकोंटा मत्‍ते, ओन्क सापनेम दल्‍गि. “मारानाता” इत्‍ते, मा सामि वा.
1CO 16:23 सामि येसुना कुर्पा मी तोळ मन्‍निकांटी.
1CO 16:24 येसु किरिस्‍तुना लोप्पोटा नावा पावरम मीवा अंटोरतोनि मंदना. आमेन.
2CO 1:1 पेनदा इच्‍चाताहेंदाल किरिस्‍तु येसुना प्रेरित आतोन नना पौलुसुन आनि मना तम्मुर तिमोति ओक्‍कला कुरेंति सहरते मंदना कलिसियातोर्क अल्‍हेने अकाया एरियाता अंटोर पवित्र लोकुल्‍कुंक सिट्‍टि रासेक मंतोम.
2CO 1:2 मना पेनबाबाल आनि सामि येसु किरिस्‍तुनाहेंदाल मीक कुर्पा, सांति दोर्कसेके मनि.
2CO 1:3 मना सामि येसु किरिस्‍तुना पेनबाबाल दयागल्‍लोड अल्‍हेने अन्‍नि तीरकुना सांति हियाना पेन आंदुर, अदुनहाटीं ओन्क दन्यवाद आयि.
2CO 1:4 मनम इंकावरोंक सांति हियागोम इंचि पेन मनाकु अन्‍नि तकलिपकुने सांति हीसेक मंता. बोर अय्ते तकलिपते मंतुर, पेन मनाकु हीता सांतितुने मनम ओर्क हिया परगोम इंचि दाना इच्‍चा मंता.
2CO 1:5 बारित्‍ते मनम किरिस्‍तुनाहाटीं बच्‍चोर एक्‍को तकलिप अर्रंतोम, अच्‍चोर एक्‍को किरिस्‍तुनहेंदाल मनाकु सांतिगुडा बेर्स्‍सेके दांता.
2CO 1:6 मीक सांति आनि मुक्‍ति दोर्कागोम इंचे मोमोट तकलिप बोगांचेके मंतोम. माक सांति दोर्कता इत्‍ते, अद मीवा सांतिताहाटींगे आंद. इदुनहेंदाल बद तकलिपतुन अय्ते मोमोट ओर्सकुत्‍तोम, मिमेटगुडा अदे तकलिपतुन ओप्‍केते ओर्सकुना परांतिर.
2CO 1:7 मावा तकलिपते मिमेट बल्हा कलियसि मंतिरो अल्‍हेने मावा सांतितेगुडा मिमेट कलियसि मंतिर. अदुनहाटीं मीवा बारेमते मावा आसे गट्‍टिगा मंता.
2CO 1:8 विस्वासुल्‍कुनिटा! आसिया एरियाते माक वेल्‍लेने तकलिप वाता, अद तकलिप मोमोट आपकुना परवच्‍चो मत्‍ता, मोमोट पिसंतोम इंचिगुडा इनकुना हिल्‍लोम. अद पोल्‍ले मीक तेळियसि मनागोम इंचि वेहासेक मंतोम.
2CO 1:9 निजमे, माक हामुरता सिक्‍सा दोर्कता इंचि इनकुंचेके मत्‍तोम, गानि कुद मनापोर्रो मनम बरोसा इर्रामन्‍नि, हातोर्कुन तेहाना पेन पोर्रो बरोसा इरमळ गावाले इंचि इल्‍हा जर्गता.
2CO 1:10 पेने माकुन इच्‍चोर पेद्‍दा हामुरता गंडेमताल पिसागोटता, पिसागोटसेक मंता, मुन्‍नेगुडा माकुन पिसागोटसेक मनंता इंचि माक अदुन पोर्रो आसे मंता.
2CO 1:11 वेल्‍लेटोरा पारतनाहेंदाल पेन मापोर्रो दया हुपिच्‍चि माकुन पिसागोटता, अदुनहाटीं वेल्‍लेटुर लोकुल्‍क माहेंदाल पेनदुक दन्यवाद कीसेक मंतुर. अय्ते मिमेटगुडा अंटोर कूळसि माहाटीं पारतना कीसि माक सहायम कीम्‍टु.
2CO 1:12 मोमोट दुनियाते मननेंके कास कीसि मीवा नड्‍डुम मननेंके, पेनदुक इस्‍टामाताप पवित्र आनि सत्‍तेमते मत्‍तोम, अद मनकना तेल्‍विते आयो गानि पेनदा कुर्पातोनि मत्‍तोम इंचि मावा मनसु गवाइ वेहासेक मंता. इद मावाहाटीं पेद्‍दिरकेमता पोल्‍ले आंद.
2CO 1:13 मिमेट हदविते मीक, तेळियाना पोल्‍लेंगे मोमोट रासेक मंतोम, अव आयाका वेरे बवे पोल्‍लें मीक रासेक हिल्‍लोम. आनि आकिरदाका मिमेट अवुन कबुल कींतिर इंचि नाक आसे मंता. अचोने आयाका सामि येसु वायाना रोजुने मोमोट मीपोर्रो पेद्‍दिरकेम कीताप, मिमेटगुडा मापोर्रो पेद्‍दिरकेम कीकिट.
2CO 1:15 इद बरोसाता हेंदाले नना मोदाला मिहगा आगिसि, मिहागटाल मेसिडोनिया दांतन. मर्रा मेसिडोनियाताल मल्सि वायानेंकेगुडा मीकु रोंडु पाय्‍दां आयगोम इंचि मिहगा आगंतन. पजा अगटाल मिमेट नाकुन यहुदिया एरियाताहाटीं सार्ला किया परांतिर इंचि इनकुंचेके मंतन.
2CO 1:17 नना इव पिलानकु बतले विचारम कियाकेने कीतोर इंचेके मंतिरा? दुनियाता लोकुल्‍कुनालेसीं उंदि मल्का “हो” इंचि इंकुंदि मल्का “हिल्‍ले” इंचि इनानोन आयोन.
2CO 1:18 पेन विस्वासमगल्‍लद आंद. अल्हेन मोमोटगुडा “हो” आनि “हिल्‍ले” इल्‍हा रोंडु पोल्‍लें वळ्‍कोम.
2CO 1:19 बारित्‍ते, नना, सिल्‍वानुस आनि तिमोति मोमोट मीवा नड्‍डुम पेनदा मर्रि येसु किरिस्‍तु आंदुर इंचि वेहतोम. येसु किरिस्‍तु “हो, हिल्‍ले” इल्‍हा रोंडु पोल्‍लें वळ्‍कोर गानि ओर बस्‍केळ्‍क “हो” इंचे इंतोर.
2CO 1:20 पेनदा अन्‍नि पोल्‍लें येसुनगा पूरा आतां. अदुनहाटीं मनम आमीन इंचि पेनदा महिमा कींतोम.
2CO 1:21 मीवातोनि अबिसेकम कीसि, किरिस्‍तुनलोप्‍पो गट्‍टिगा निलाहनोर पेने आंदु.
2CO 1:22 पेन मनापोर्रो सिक्‍का वाटता अल्‍हेने गेरंटितालेसीं मनालोप्‍पो दाना पवित्र आत्मातुन इरता.
2CO 1:23 मीकुन इंका नोप्‍पिचमळ नाक इस्‍टम हिल्‍ले, अदुनहाटीं नना इदवेरादाका मिहगा कुरेंति सहर वाया हिल्‍लेन. इद पोल्‍ले निजम इंचि ना मनसुन हूळना पेने गवाइ मंता.
2CO 1:24 मीवा विस्वासम पोर्रो अदिकारम हुप्‍सना इंचि मोमोट वेहासेक हिल्‍लोम, मिमेट विस्वासमते गट्‍टिगा निल्‍सि मंतिट, मीवा आनंदमते मोमोटगुडा मीवा तोळ मनंतोम.
2CO 2:1 नना मिहगा वासि मीक मर्रा दुक्‍कम वायागोटोन इंचि मनसुने इनकुत्‍तन.
2CO 2:2 बारित्‍ते नना मीकुन दुक्‍कम कीते, नाकुन बोर आनंदम कियानुर? मीक तप्‍पा बोरे किय्युर!
2CO 2:3 नना अगा वातस्के नाक बोराहेंदाल अय्ते कुसि आयाना मंता, ओरा अंटोराहेंदाल नाक दुक्‍कम आयामन्‍नि इंचि नना मुन्‍ने अद सिट्‍टि रासि लोहतन. नाक मी बारेमते विस्वासम मंता, नावा कुसि मीवा अंटोरदगुडा कुसि आंदु.
2CO 2:4 नना नावा मनसुनाल वेल्‍ले दुक्‍कमते, बादाते अळसेके अद सिट्‍टि रासि मीक लोहतन. नना मीक दुक्‍कम कियालय आयो गानि मीवापोर्रो नावा पावरम बच्‍चो वेल्‍ले मंता, अद मीक तेळियगोम इंचि नना रासि मत्‍तन.
2CO 2:5 बोरन्‍नागिंटा दुक्‍कम हियानय्ते, ओर सिराप नाकुने दुक्‍कम हीतोर इत्‍ताप आयो, तक्‍को-एक्‍को मीक अंटोर्कगुडा हीतोर. इदुना बारेमते नना दीनकन्‍ना एक्‍को बतल वेहोन.
2CO 2:6 असंटोनाहाटीं मिमेट वेल्‍लेटुर हीता सिक्‍सा साल आंता.
2CO 2:7 अदुनहाटीं ओन्क इंका सिक्‍सा हियाका, मापि कीसि, समजांचटु. अल्हा कियाकोंटे ओर इंका एक्‍को रंदि कीसेक मनंतोर.
2CO 2:8 अदुनहाटीं मिमेट ओनपोर्रो एक्‍को पावरमतुन हुप्‍सट इंचि मीक विनंति कीसेक मंतन.
2CO 2:9 मिमेट नना वेहता अन्‍नि पोल्‍लेने ताकंतिरा, ताकिरा इंचि मीकुन परिक्‍सा कीसि हूळालयगुडा अद सिट्‍टि रासतन.
2CO 2:10 मिमेट बोनन्‍ना मापि कीते ओन ननागुडा मापि कींतन, नना बतलय्ते मापि कीतानो किरिस्‍तुना मुन्‍ने मीवाहाटीं मापि कीतन.
2CO 2:11 मापि कियाकोंटे देय्यम बस्‍केनना तकलिप हिय्या परांता. बारित्‍ते दाना गुनम बसोंटदो मनक एरपाटे मंता.
2CO 2:12 नना बस्के अय्ते किरिस्‍तुना बारेमता बेसता कबुर वेहालय त्रोआस सहरते होत्‍तनो, अस्‍के सामिनाहेंदाल नाकु हर्रि पुटता.
2CO 2:13 ना तम्मुर तीतु अगा कलिया हिल्‍लोर, अय्ते ना मनसुंक सांति दोर्काहिल्‍ले. अदुनहाटीं दांतन इंचि ओर्कु वेहचि, मेसिडोनिया एरियाते पेय्सि होत्‍तन.
2CO 2:14 पेनदुक दन्यवाद आयि! अद किरिस्‍तुनलोप्‍पो मनाकुन बस्‍केळ्‍क गेल्‍सागोटसेक ओंता आनि गमा-गमा गब्‍बुनसोंटा दाना तेल्‍वितुन मनाहेंदाल अन्‍नि जेगाने पैलांचंता.
2CO 2:15 बारित्‍ते मुक्‍ति दोर्कानोरा लोप्पो आनि नासडेम आयानोरा लोप्पो मनम पेनदाहाटीं किरिस्‍तुना बेसता गब्‍बु आंदुम.
2CO 2:16 नासडेम आयानोराहाटीं हामुर गब्‍बुलेसीं मंतोम आनि मुक्‍ति दोर्कानोराहाटीं पिस्वरता बेसता गब्‍बुलेसीं मंतोम. इसोंटा कबळ कियानालायक बोर मंतुर?
2CO 2:17 बोर अय्ते पेनदा पोल्‍लें वेहचि सतता पायदा कीकुंतुर, असंटा वेल्‍लेटोरव्टेटाल मोमोट हिल्‍लोम. गानि मोमोट सत्‍तेम मनसुने, किरिस्‍तुना अदिकारमते पेनदा पोल्‍लें वेहासेक मंतोम. माकुन लोहता पेन माकुन हूळसेक मंता इंचि माक एरपाट मंता.
2CO 3:1 मावद मोमोटे मर्रा पेद्‍दातनम वेहकुंचेके मंतोम इनकुंचंतिरा? हिलाकोंटे वेरेतोर्कुंक अव्‍सरम मत्‍ताप माकगुडा मीवाहाटीं सिपारिस सिट्‍टिं मिहगा तरमळ, मिहागटाल एतमळ अव्‍सरमा?
2CO 3:2 मावा सिट्‍टिं अय्ते मिमेटे आंदिर, अद मावा मनसुने रासि मंता, अदुन अंटोर एरपाट कींतुर, हदवंतुर.
2CO 3:3 निजमे, मिमेट माहेंदाल हीता किरिस्‍तुना सिट्‍टि आंदिर इंचि अंटोर्क दिस्सेक मंतिट. अद साइते आयो गानि जीवाते मंदना पेनदा आत्माते रासि मंता, अद पर्पु बंडनपोर्रो आयो गानि मनकना मनसुनपोर्रो रासि मंता.
2CO 3:4 किरिस्‍तुनाहेंदाल माकु पेनदापोर्रो इसोंटा बरोसे मंता.
2CO 3:5 मावद मोमोटे बदाना पोल्‍लेता विचारम कियानालायक हिल्‍लोम, गानि इवुन कियाना बलम पेने माकु हीसेक मंता.
2CO 3:6 पेन माकुन पूना करारता सेवक आयाना लायकगुडा कीता. अद करार मूसाना नियमते रासि मत्‍ताप आयो गानि, पेनदा आत्माताहेंदाल मंता. मूसाना नियम हामुरतेके ओंता गानि पवित्र आत्मा पिस्वरताहेके ओंता.
2CO 3:7 पर्पु बंडनपोर्रो पेन दाना नियमकुन रासि मूसांक हीता, अस्‍के अवुन ओर इस्राएल लोकुल्‍कुंक हियनेंके ओना मोकम पेनदा महिमाता वेल्‍गुने निंडिसि मत्‍ता. गानि अद वेल्‍गु तक्‍को आयानेंकेगुडा ओर ओना मोकमतुन हूळा पर्राहिल्‍लुर. इल्‍हा हामुरताहेके ओयाना मूसाना नियमता महिमाता वेल्‍गु इच्‍चोर मत्‍ता अय्ते, पेनदा आत्माता महिमाता वेल्‍गु इंका बच्‍चोर पेद्‍दा मनंता.
2CO 3:9 बारित्‍ते सिक्‍साहेके ओयाना मूसाना नियमे अच्‍चोर महिमाता वेल्‍गुने मत्‍ता, अय्ते मनकालोर्कुन नीतिमंतुल्क कियाना नियमते दानकन्‍ना इंका बच्‍चोर महिमाता वेल्‍गु मंदार.
2CO 3:10 इंदकेटा महिमाता वेल्‍गु, मुन्‍नेटा महिमाता वेल्‍गुंकन्‍ना बच्‍चोरो एक्‍को मंचि अद हिल्‍ले इत्‍ताप आता.
2CO 3:11 तक्‍को आसेके होनानदुना महिमाता वेल्‍गु इच्‍चोन मत्‍ते, इंका बस्‍केळ्‍क मनानदुना महिमाता वेल्‍गु बच्‍चोन वेल्‍ले मंदार!
2CO 3:12 अदुनहाटीं इदे आसेता हेंदाल मनम बच्‍चोरो दैरनेमते वळ्‍कंतोम.
2CO 3:13 इस्राएल लोकुल्‍क तक्‍को आयाना महिमाता वेल्‍गुन हूळा मनि इंचि मूसाल ओना मोकमपोर्रो मुस्‍कु वाटकुनुंदुर, गानि मनम ओरालेसीं मुस्‍कु वाटकुन्‍नोम.
2CO 3:14 इस्राएल लोकुल्‍कुना मनसुक गट्‍टिगा आसि होत्‍तां. इव रोजकुनेगुडा बस्के अय्ते ओर पळाना नियम हदवंतुर, अस्‍के अदे मुस्‍कु ओरा मनसुन मुच्‍चंता. सिराप किरिस्‍तुनपोर्रो विस्वासम इरते, किरिस्‍तुए ओरा मुस्‍कुन तेंडा परांतोर.
2CO 3:15 निजमे, इंदकेगुडा मूसाना पुस्तकम हदवंतुर अय्ते मुस्‍कु वाटताप अव पोल्‍लेना अर्तम तेळियो.
2CO 3:16 गानि बस्के अय्ते ओरा मनसु सामिनहेके तिरियार, अस्‍के सामि ओरा मुस्‍कु तेंडसि ओर्क तेळियाना बुद्‍दि हिय्यानुर.
2CO 3:17 सामि अय्ते आत्मा आंदुर. बगा अय्ते सामिना आत्मा मंता, अगा बोना कय्‍दा हिळु हिल्‍लोम.
2CO 3:18 मनम अंटोरम अद मुस्‍कुन तेंडसि पोहतोम, इंदके अद्‍दमते हूळताप सामिना महिमाता वेल्‍गुन हूळसेक मंतोम. ओना आत्मा मनालोप्‍पो मत्‍ताहाटीं ओनालेसींगे मनम मारियसेके मंतोम.
2CO 4:1 पेन मापोर्रो दया कीसि, दाना पोल्‍ले वेहाना इद सेवा माक हीता, अदुनहाटीं मोमोट दैरनेमते वेहांतोम.
2CO 4:2 सिग्गु होनानव आनि मक्‍किस कियाना कबाह्‍कुन मोमोट होळसीतोम. इंकावरोन दोका हियमळ आयि, पेनदा पोल्‍लेतुन उल्टा-पल्टा कीसि वेहमळ आयि इसोंटा कबाह्‍क किय्‍योम. गानि पेनदा मुन्‍ने सत्‍तेम पोल्‍लेतुन वेहाना हेंदाल, मोमोट बसंटोरम इंचि हरेक मनकंक ओरा मनसुने तेळियंता.
2CO 4:3 मना बेसता कबुरगिंटा मुस्‍कु वाटताप मनानय्ते, अद नासडेम आयानोराहाटींगे मंता.
2CO 4:4 किरिस्‍तु पेनदा रूपम आंदुर, ओना महिमाता बेसता कबुरता वेल्‍गुन हूळा मनि इंचि ई दुनियातोरा पेन विस्वासम कियवोरा मनसुन हीकट कीसि पोहता.
2CO 4:5 अदुनहाटीं येसु किरिस्‍तु सामि आंदुर, ओनाहेंदाले मोमोट मी सेवाकुल्‍कुम आंदुम इंचि प्रचार कींतोम, गानि मावा बारेमते मोमोट प्रचार कीकुन्‍नोम.
2CO 4:6 बारित्‍ते, “हीकटताल वेल्‍गु आयि” इंचि पेने इत्‍ता. मनम येसु किरिस्‍तुना मोकमते दिस्‍सना पेनदा महिमाता तेल्‍वितुन एरपाट कियागोम इंचि मनाकुन इदे वेल्‍गुने मना मनसुने मेर्सागोटता.
2CO 4:7 मनालोप्‍पो मंदना इद वेल्‍गु पेद्‍दा दनमलेसीं मंता. गानि ई दनमतुन तोळिता अळकातसोंटा मना मेंदुल्कुने पेने इरता. इदुनहेंदाल ई वेहा परवच्‍चो ताकत मनद आयो गानि पेनदाहेंदाल मंता इंचि माकु तेळियंता.
2CO 4:8 माकु नालुं मूलानाल आपत्‍तिं अय्ते वांतां, गानि आपत्‍तिते अर्सि होन्‍नोम, वेल्‍लेने मल्कां गाबर आंतोम, गानि आसे हिल्‍वाप मन्‍नोम.
2CO 4:9 लोकुल्‍क तकलिप अय्ते कींतुर गानि पेन माकुन होळसो. पगातोर हिळु अरहंतुर गानि नासडेम आयोम.
2CO 4:10 येसुना पिस्वर मावा मेंदुल्ते दिस्‍सागोम इंचि येसुना हामुटुन बस्‍केळ्‍क मा मेंदुल्ते पीसि तिरियंतोम.
2CO 4:11 येसुना पिस्वर मावा हायाना मेंदुल्ते दिस्‍सागोम इंचि मोमोट पिस्सि मंचिगुडा बस्‍केळ्‍क येसुनाहाटीं हामुरता कय्‍दे मनंतोम.
2CO 4:12 अदुनहाटीं मावा लोप्पो हामुर, मीलोप्‍पो पिस्वर कबळ कींता.
2CO 4:13 दर्मसास्‍त्रमते, “नना विस्वासम कीतन, अदुनहाटीं वळ्‍कतन” इंचि रासि मत्‍ताप मोमोट विस्वासम कीतोम, अदे विस्वासमता आत्मा मावा लोप्पो मंता इंचि मोमोट वळ्‍कतोम. बारित्‍ते अदे विस्वासमता आत्मा मावा लोप्पो मंता.
2CO 4:14 बारित्‍ते, सामि येसुन जीवाते तेहता पेने मोमोट येसुना लोप्पो कलियसि मत्‍ताहाटीं माकुनगुडा जीवाते तेहंता आनि मीवातोनि माकुनगुडा दाना मुन्‍ने निप्‍संता इंचि माक एरपाटे मंता.
2CO 4:15 पेनदा कुर्पा वेल्‍लेटुर लोकुल्‍कुनगा एवसि, दाना महिमा कियालय एक्‍कोते-एक्‍को दन्यवादाल्‍क वेहाना पारतनां बेर्सगोम इंचि इवन्‍नि मीवाहाटीं मंतां.
2CO 4:16 अदुनहाटीं मोमोट दैरनेम होळसोम. मावा मेंदुल पलाताल जिग्‍गि हिलाकोंटा आसेके मंता, गानि लोप्पो मंदना आत्मा मात्रम रोज पूनगा आसेके मंता.
2CO 4:17 बारित्‍ते, माकु गळसेमताहाटीं वायाना तकलिपकु, मावाहाटीं मोमोट विचारम किय्‍योम अच्‍चोर अव्‍सरम आतव आनि बस्‍केळ्‍क मंदना महिमातुन तयार कींतां.
2CO 4:18 अय्ते इंदके मोमोट दिस्‍साना वस्‍तुकुन पोर्रो आयो, गानि दिस्‍सुवा वस्‍तुकुन पोर्रो नदर वाटंतोम. दिस्‍सना वस्‍तुक गळसेम मनंतां, दिस्‍सुवा वस्‍तुक बारे बस्‍केळ्‍क मनंतां.
2CO 5:1 बूमिपोर्रो मंदना लोतालेसीं मावा मेंदुल मंता. अद लोन नासडेम आतस्के माकु मनालय स्वर्गमते लोन मंता, अद बस्‍केळ्‍क मंदना लोन मनकल तयार कीतद आयो, गानि पेने कीता इंचि माकु एरपाटे मंता.
2CO 5:2 इंदकेटा लोतसोंटा मेंदुल्ते मोमोट नेर्बळतोम, अदुनहाटीं स्वर्गमता लोतुन केर्रानाहाटीं वेल्‍ले तनलाळंतोम.
2CO 5:3 बारित्‍ते इदुन केर्तस्‍के मोमोट कुळकें दिस्‍सोम.
2CO 5:4 मोमोट इद बूमिपोर्रोटा मेंदुल्ते मत्‍तच्‍चोरजेम बर्वुने तन्‍लाळसेक मनंतोम, इद मेंदुल्तुन होळ्‍सीयगोम इंचि आयो, गानि हायना मेंदुल बस्‍केळ्‍क पिस्‍साना मेंदुल्ते मारियागोम इंचि मोमोट कोरसेक मंतोम.
2CO 5:5 इदे मेंदुलताहाटीं पेन माकुन तयार कीता. इद गेरांटि इंचि मावा लोप्पो पवित्र आत्मातुन हीता.
2CO 5:6 अदुनहाटीं बस्‍केळ्‍क दैरनेमते मनंतोम. मोमोट मेंदुल्ते मत्‍तच्‍चोरजेम सामिनगटाल लक्‍कु मंतोम इंचि माकु एरपाटे मंता.
2CO 5:7 बारित्‍ते मोमोट हूळसि आयो गानि सामिनपोर्रो विस्वासम कीसि ताकंतोम.
2CO 5:8 मोमोट दैरनेमते मनंतोम, मेंदुल्तुन होळसिसि सामिनतोनि मनमळे बेस इनकुंतोम.
2CO 5:9 अदुनहाटीं मोमोट इद मेंदुल्ते मनना, मनाकोन्‍ना, सामिंक इस्‍टाम वाताप ताकमळे मावा उद्‍देसम.
2CO 5:10 बारित्‍ते मनक अंटोर्क किरिस्‍तुना न्‍यायम कियाना राजगद्‍दे मुन्‍ने नित्‍ताना मंता. मनागटाल हरेक मनकंक मनम कीता बेसता कबाह्‍क आयि, कराब कबाह्‍क आयि अवुना हिसाबते इनाम हिलाकोंटे सिक्‍सा दोर्कंता.
2CO 5:11 पेनदुक वेरियसि बल्हा पिस्सना इद माक तेळियंता, अदुनहाटीं इदुन मोमोट लोकुल्‍कुंक वेहांतोम. मोमोट बसंटोरम इंचि मावा बारेमते पेनदुक पूरा एरपाटे. इव पोल्‍लें मीवा मनसुना लोप्‍पोगुडा एरपाट आता इंचि नावा आसे मंता.
2CO 5:12 मोमोट बेसतोर्कुम इंचि मर्रा मी मुन्‍ने वेहकुंचेके हिल्‍लोम, गानि इच्‍चुर लोकुल्‍क मनसुने मत्‍ता पोल्‍लें आयाका पलाताल दिस्‍साना पोल्‍लेना बारेमते पेद्‍दिरकेम कींतुर, ओराहाटीं मावा बारेमते वेहालय मीक जवाब गावाले इंचि वेहासेक मंतोम.
2CO 5:13 माकुन गिंटा बोरन्‍ना पिस्‍सालोर इंचि इत्‍ते, पेनदाहाटींगे आतोम. बोरन्‍नागिंटा माकुन बेसता बुद्‍दितोर इंचि इत्‍ते मीवाहाटींगे आतोम.
2CO 5:14 किरिस्‍तु अंटोराहाटीं हातोर इंचि मोमोट विस्वासम कींतोम. इंका मावा अंटोरा पळाना पिस्वरगुडा हाता इंचि विस्वासम कींतोम. अदुनहाटीं किरिस्‍तुना पावरम माकुन ओप्‍केते इरसेक मंता.
2CO 5:15 अद बल्हा इत्‍ते, इंदकेटाल पूना पिस्वर पिसानोर ओर सतताहाटीं आयो गानि ओराहाटीं बोर अय्ते हासि जीवाते तेदतोर ओनाहाटीं पिसागोम, अदुनहाटींगे ओर अंटोराहाटीं हातोर.
2CO 5:16 अदुनहाटीं इंदके मोमोट मनकना विचारम मत्‍ताप हूळना आयो. मोमोट किरिस्‍तुनगुडा मनकना विचारम मत्‍ताप हूळसि मत्‍तोम, गानि इंदके ओन अलग नदरते हूळांतोम.
2CO 5:17 बल्हा इत्‍ते, इंदके बोर अय्ते किरिस्‍तुने मंतोर, ओर पूना मनकल आतोर. पळाना पिस्वर होत्‍ता, पूना पिस्वर सुरुव आता.
2CO 5:18 इवन्‍नि पोल्‍लें पेनदाहेंदाले मंतां. पेने मनाकुन किरिस्‍तुनाहेंदाल दानतोनि कल्‍पिसि माकु कल्‍पना सेवा अप्पजेपता.
2CO 5:19 अद बल्हा इत्‍ते, लोकुल्‍कुना पापाल्क लेक्‍का पिय्याकेन, ओर्कुन किरिस्‍तुना हामुरताहेंदाल दानतोनि कल्‍पता. इल्‍हा कल्‍पना पोल्‍लेतुन लोकुल्‍कुनगा ओयालय माकुन निल्‍हाता.
2CO 5:20 अदुनहाटीं मोमोट किरिस्‍तुना राजदूतकुम आंदुम. मावाहेंदाल पेन मीक वेहासेक मंता इनकुंटु. मिमेट पेनतोनि कलियसि मंदना इंचि किरिस्‍तुनाहेंदाल मोमोट मीक विनंति कीसेक मंतोम.
2CO 5:21 मनम किरिस्‍तुनाहेंदाल पेनदा लोप्पो नीतिमंतुल्क आयागोम इंचि मना बदलाते मना पापाल्कुनाहाटीं पापम कियवा किरिस्‍तु मोक्‍कु आतोर.
2CO 6:1 मोमोट पेनतोनि कलियसि कबळ कियानोर्कुम आताहाटीं मीक विनंति कीसेक मंतोम, मीक दोर्कता पेनदा कुर्पातुन एर्तम आया हियमटु.
2CO 6:2 बारित्‍ते पेनदा दर्मसास्‍त्रमते, “बेसता वेलाते नना नीवा पोल्‍ले केंजतन, मुक्‍तिता रोजुने नना नीकु सहाय्यम कीतन,” इंचि रासि मंता. हुळाट, बेसता वेला इदे आंद, इदे मुक्‍तिता रोजु आंदु.
2CO 6:3 मावा सेवाते बतले तप्पु जर्गामन्‍नि इंचि, बदे पोल्‍लेते इंकावरोंक अड्‍डम ताकोम.
2CO 6:4 गानि अन्‍नि पोल्‍लेने मोमोट पेनदा बेसता सेवाकुल्‍कुम आंदुम इंचि हुपिच्‍चेक मंतोम. ओप्‍केते, बादाने, कस्‍टाल्‍कुने, तकलिपकुने,
2CO 6:5 देब्बां तिनमळते, जेलते होनमळते, मावा विरोदमते लोल्‍लिं आयमळते, कस्‍टम कियमळते, निद्र हायमळते, उपासमते,
2CO 6:6 पवित्र मनमळते, तेल्‍विते, ओर्सकुनमळते, दयाते, पवित्र आत्माते, कपटम इर्राका पावरम कियमळते,
2CO 6:7 सत्‍तेम पोल्‍लेते, पेनदा ताकतते, नीतिता आयदार्क तिना कय्‍दे, रोड्‍डा कय्‍दे पीसि,
2CO 6:8 इंकावरोर माकुन कदर हिय्‍यिना-हिय्याकोन्‍ना, बेसतोर इन्‍निना-इन्‍नाकोन्‍ना, माकुन नळेह कियानोर इंचि इंतुर गानि मोमोट सत्‍तेमतोर्कुम आंदुम.
2CO 6:9 एरपाट कियवोरालेसीं मनना, अंटोर एरपाट कींतुर. हायानोरालेसीं मनना, जीवाते मंतोम. माकु सिक्‍सा हियाना गानि मोमोट हाया हिल्‍लोम.
2CO 6:10 मोमोट दुक्‍कमतेगुडा बस्‍केळ्‍क आनंदमते मनंतोम, मोमोट गरिब मनिनागानि वेल्‍लेटोर्कुन पेनदा लोप्पो सिरमंतुल्‍क कींतोम. महगा बतल हिलाकोन्‍ना गानि अन्‍नि मत्‍तापे मंतोम.
2CO 6:11 कुरेंति सहरतोरिटा! मोमोट अन्‍नि पोल्‍लें मीक कुल्‍लम-कुल्‍ला वेहतोम, मीहाटीं मावा मनसु कुल्‍ला मंता.
2CO 6:12 मोमोट मीकुन लक्‍कु इरसेक हिल्‍लोम, गानि मिमेटे मावा दग्‍गेरा वायालय हूळसेक हिल्‍लिर.
2CO 6:13 मोमोट कीतापे मिमेटगुडा मीवा मनसुन कुल्‍ला कीम्‍टु. इद नना मीकुन नावा पिलाल्क इंचि वेहासेक मंतन.
2CO 6:14 विस्वासम कियवोरतोनि मिमेट जोडि आयमटु. बारित्‍ते नीतितद आनि नीति हिल्‍वद इव बल्हा कलिया परांतां? वेल्‍गु आनि हीकट बल्हा दंटा आया पर्रंता? आया पर्रों.
2CO 6:15 किरिस्‍तु आनि देय्यम उंदि बल्हा आया परांतुर? विस्वासिंक अविस्वासिनतोनि बता पोत्‍तु?
2CO 6:16 बोम्मांक, पेनदा गुळिकु बाता संबंदम? बारित्‍ते मनम अय्ते जीवाते मनना पेनदा गुळि आंदुम. पेनदा दर्मसास्‍त्रमते, “नना ओरा लोप्पो मनंतन, ओरतोनि तिरियंतन, नना ओरा पेन आसि मनंतन, ओर नावा लोकुल्‍क आयानुर,” इंचि रासि मंता.
2CO 6:17 पेन इल्‍हागुडा इंता गदा, “विस्वासम कियवोरागटाल पेय्‍सट, अलग आम्टु, सापसुतरा हिल्वा वस्‍तुकुन इटमट, अस्‍के नना मीकुन ओप्‍कुंतन.
2CO 6:18 नना मीवा बाबान आकन, मिमेट नावा मर्क-मियाह्क आकिट इल्‍हा पेद्‍दा सक्‍तिमंतुड पेन इंता,” इंचिगुडा रासि मंता.
2CO 7:1 पावरमगल्‍लोरिटा! पेन हीता इव पोल्‍लें मनकगुडा दोर्किसे मंतां, अदुनहाटीं मनम मना मेंदुल्क, आत्माक अंट्‍सि मत्‍ता मुर्कितुन नोर्सि साप कीकोम, पेनदुक वेरियसि पूरा पवित्र आसेके दाकोम.
2CO 7:2 मीवा मनसुने मावाहाटीं जेगा हीम्टु. मोमोट बोनतोने अन्‍यायम किया हिल्‍लोम, बोने बोंकिच्‍चा हिल्‍लोम, बोनाहेंदाल गलत पायदा एता हिल्‍लोम.
2CO 7:3 नना इल्‍हा इंचि बतल मीवापोर्रो तप्पु दोस्सेक हिल्‍लेन. मिमेट मावा मनसुने मंतिट, मोमोट हायिना, पिस्सिना मीवातोने मनंतोम इंचि नना मुन्‍नेने वेहतन.
2CO 7:4 नना मीवातोनि बतले मक्‍किचाकोंटा वेहासेक मंतन, नाक मीपोर्रो एक्‍को पेद्‍दिरकेम मंता. नना सांतिते निंडतन. मावा अन्‍नि तकलिपकुनेगुडा नना वेल्‍ले कुसिते मंतन.
2CO 7:5 मोमोट मेसिडोनिया एरियाते वातस्‍केगुडा मावा मेंदुल्‍कु सुकम दोर्काहिल्‍ले, गानि नालुं मूलानाल तकलिपके-तकलिपकु मनुंदु, पलाताल जगडाल्‍क आनि लोप्पोटाल वेर्रेते निंडिसि मत्‍तोम.
2CO 7:6 अयना गानि कमजोर मत्‍तोर्कुंक दैरनेम हिय्याना पेन तीतुन महगा लोहचि माक दैरनेम हीता.
2CO 7:7 सिराप ओर वाताहेंकेन आयो गानि मीहेंदाल ओनकु दोर्कता आ दैरनेमता हेंदालगुडा. ओर नावापोर्रो मत्‍ता मीवा इच्‍चाना बारेमते, दुक्‍कमता बारेमते, जोसता बारेमते वेहतोर. अदुनहाटीं नना इंका एक्‍को आनंदमते मंतन.
2CO 7:8 नना सिट्‍टि रासि मीकुन दुक्‍कमते अरहतन. मुन्‍ने ननागुडा दुक्‍कमते मत्‍तन गानि इंदके हिल्‍लेन, अद दुक्‍कम गळसेमताहाटींगे मत्‍ता.
2CO 7:9 इंदके नना आनंदमते मंतन, मीकुन दुक्‍कमते अरहतन इंचि आयो, गानि मीवा दुक्‍कमता हेंदाल मिमेट मनसु मार्सकुत्‍तिर इंचि. इवन्‍नि पेनदा इच्‍चा मत्‍तापे आतां इंचि मीक माहेंदाल बतले नुकसान आयाहिल्‍ले.
2CO 7:10 बारित्‍ते पेनदाहेंदाल वायाना दुक्‍कम, मनसु मार्सकुनागोटसि मुक्‍तिताहेके ओंता, ई दुक्‍कमते नाराज हिल्‍ले. गानि ई दुनियाता दुक्‍कम हामुरताहेके ओंता.
2CO 7:11 निजम हूळते, पेनदाहेंदाल वाता दुक्‍कम बक्‍तिते मनालय मीकुन बच्‍चोनो बदलांचता. मीलोप्‍पो बच्‍चोनो जोस, सत्‍तेमतोरम इंचि हुपुसमळ, अन्‍यायमता विरोद कियमळ, वेर्रेते मनमळ, नाकु कलियानाहाटीं मीवा जीवा बागाने तन्‍लाळमळ, सेवाता इच्‍चा, तप्‍पु कीतोन सिक्‍सा कियमळ. इवन्‍नि पोल्‍लेने मीलोप्‍पो तप्‍पु हिल्‍ले इंचि मिमेट निजम कीसि हुपिस्‍तिर.
2CO 7:12 नना मुन्‍ने लोहता सिट्‍टिते, बोर तप्‍पु कीतोर? बोन्क अन्‍यायम जर्गता? इंचि ईराहाटीं रासा हिल्‍लेन. गानि पेनदा मुन्‍ने मिमेट माकुन बच्‍चोन बेस हूळकुंतिर इद मीक तेळियागोम इंचि रासि मत्‍तन.
2CO 7:13 अदुनहाटीं माक सांति दोर्कता. मीवा अंटोराहेंदाल तीतुना जीवा कूस आसि आनंदम आतोर. ओना आनंदम हूळसि मोमोटगुडा वेल्‍लेने आनंदम आतोम.
2CO 7:14 नना ओनतोनि मीवा बारेमते पेद्‍दिरकेम वेहकुत्‍तन. मोमोट मीक वेहतव अन्‍नि पोल्‍लें निजमे आंदुं. अदुनहाटीं तीतुना मुन्‍ने नावा पेद्‍दिरकेम निजम कीसि हुपिस्‍तिर, नाकुन सिग्गु होननाल किया हिल्‍लिर.
2CO 7:15 मिमेट अंटोर तीतु वेहताप नावा आदेसतुन केंजतिर, वेर्रेते, कदर हीसि ओनकु कलियतिर. इद मति वातस्के मुन्‍नेटकन्‍ना इंका एक्‍को ओना पावरम मीवाहाटीं बेर्संता.
2CO 7:16 अन्‍नि पोल्‍लेने मीपोर्रो नाक बरोसा मंता, इद नावाहाटीं कुसिता पोल्‍ले आंद.
2CO 8:1 विस्वासुल्‍कुनिटा! मेसिडोनिया एरियाता कलिसियातोर्कुंक पेन कीता कुर्पाता बारेमते मीक वेहसेक मंतोम.
2CO 8:2 अद बल्हा इत्‍ते, ओरापोर्रो वेल्‍लेने तकलिपकुना परिक्‍सां वातां, ओर वेल्‍लेने कूस आनि गरिब आसि मत्‍तुर. अयना गानि लोकुल्‍कुंक हिय्याना सहायम वेल्‍लेन बेर्सता.
2CO 8:3 ओरा बारेमते ना गवाइ इदे गदा, ओर बच्‍चोर हिय्या पर्तुर अचोने आयो गानि, दानकन्‍ना एक्‍को कुसिते हीतुर.
2CO 8:4 पेनदा लोकुल्‍कुन सहायम कियाना सेवाते माकुनगुडा कलियालय दया कीम्‍टु इंचि ओर मावातोनि ऊके-ऊके वेल्‍ले विनंति कीतुर.
2CO 8:5 मोमोट आसे पळसि मत्‍ता दानकन्‍ना एक्‍को ओर कीतुर. ओरा पिस्वरंता पेनदाहाटीं हीतुर, आनि पेनदा इच्‍चा मत्‍ताप मावाहाटींगुडा हीतुर.
2CO 8:6 इल्‍हा सहायम कियमळ मुन्‍ने तीतुए मीलोप्‍पो सुरुव कीतोर, अय्ते अदुन महना कबळगुडा किय्‍यिर इंचि ओन विनंति कीतोम.
2CO 8:7 मिमेट विस्वासमते, पोल्‍लेने, तेल्‍विते, अन्‍नि तीरुकुने कोसिस कियमळते आनि मावा पोर्रो मिमेट कियाना पावरमते बेर्सेक मंतिट. अल्‍हेने दानम कियाना कबळतेगुडा बेर्सेक होंदना.
2CO 8:8 नना मीक आदेस हीसेक हिल्‍लेन, गानि कळमता विस्वासुल्‍क इद कबळते उसारते मंतुर, ओराच्‍चोन मिमेटगुडा निजम पावरम कीसेक मंतिरा इंचि परिक्‍सा कीसि हूळसेक मंतन.
2CO 8:9 मना सामि येसु किरिस्‍तुना कुर्पा बच्‍चोर पेद्‍दादि मीक एरपाटे मंता. ओनगा अन्‍नि मंचिगुडा मीवाहाटीं गरिब आतोर. ओना गरिबतनमताहेंदाल मिमेट दनवंतुल्‍क आयना इंचि ओर अल्हा आतोर.
2CO 8:10 इगे नना वेहाना पोल्‍ले इदे गदा, नीरेटाल कोत्‍तां जमा कीसि हियमळ मोदाला मिमेटे सुरुव कीतिर, अद कबाटुन महमळ मीक बेस मनंता. बारित्‍ते, कोत्‍तां जमा कियाना इंचि बल्हा अय्ते मीवा इच्‍चा मत्‍ता, अल्हा मिमेट हिय्या पर्तच्‍चो जमा कीसि अद कबाटुन पूरा कीम्‍टु.
2CO 8:12 कोत्‍तां हिय्याना इंचि मीवा इच्‍चा मत्‍ते, मिमेट बच्‍चोन हींतिट, अद पोल्‍ले आयो गानि, मिमेट पूरा मनसुनाल हीते पेन अदुन ओप्‍कुंता.
2CO 8:13 इंकावरोना बर्वुन अल्कगा कियानाहाटीं मिमेट बर्वु कांजना इंचि नना इंचेक हिल्‍लेन गानि इव्वुर समानम मंदना.
2CO 8:14 इंदकेटा वेलाते मिहगा अन्‍नि मंता, अय्ते हिल्‍वोरा अव्‍सराल्‍कुने कबळ्‍क वायमळ गावाले. पजा उंदि वेला मिहगा हिल्वस्के ओर मीवा अव्‍सराल्‍कुने कबळ्‍क वायमळ गावाले, इल्‍हा इव्वुरगुडा समानम आंतिर.
2CO 8:15 इदुना बारेमते दर्मसास्‍त्रमते, “वेल्‍ले जमा कीतोनगा, वेल्‍ले मिग्ला हिल्‍लें, तक्‍को जमा कीतोनगा, तक्‍को होन्‍ना हिल्‍लें,” इंचि रासि मंता.
2CO 8:16 मी बारेमते ना मनसुने मत्‍ता इच्‍चातुन, पेन तीतुना मनसुनेगुडा पुटिस्ता. अदुनहाटीं पेनदुक नना दन्यवाद कींतन.
2CO 8:17 मोमोट तीतुन मीहेके लोहालय विनंति कीतस्‍के ओर अद पोल्‍लेतुन ओप्‍कुंचि कुद कुसिते मिहगा वायालय तयार आतोर.
2CO 8:18 अल्‍हेने तीतुनतोनि अन्‍नि कलिसियाने बेसता कबुरतुन वेहालय पोरोल पेय्सतोर वरोर दादनगुडा लोहसेक मंतोम.
2CO 8:19 अचोने आयका, इद चंदातुन मोमोट येरुसलेम ओयानेंके ओन मातोनि लोहना इंचि कलिसियातोर पेरतुर. मोमोट सामिना महिमाताहाटीं आनि मावा सहायम कियाना जिद दिस्‍सनाहाटीं इद चंदा ओसेक मंतोम.
2CO 8:20 ई जमा कीता चंदाता जिम्मेदारि मावा पोर्रो मत्‍ताहाटीं, माकुन बोरे तप्‍पु इनामन्‍नि इंचि उसारते ताकसेक मंतोम.
2CO 8:21 सिराप पेनदा मुन्‍नेने तप्‍पु हिल्‍वाप आयो, गानि मनकालोरा मुन्‍नेगुडा तप्‍पु हिल्‍वाप मंतोम.
2CO 8:22 अल्‍हेने ओरतोनि मोमोट इंकावरोन मना दादन लोहासेक मंतोम. आ दादन मोमोट बच्‍चुंगो मल्कां परिक्‍सा कीसि हूळतोम, ओर वेल्‍लेने पोल्‍लेने बेस मंतोर. ओर मीवापोर्रो वेल्‍लेने बरोसा कीताहाटीं, मीक इंका वेल्‍लेने सहाय्यम कियाना ओना इच्‍चा मंता.
2CO 8:23 ओक्‍कला बोरन्‍ना तीतु बोर आंदुर? इंचि पूसकीते, ओर नावा दंटातोर, नावातोनि कलियसि मीवा सेवा कियानोर आंदुर, इंचि वेहट. इंका विस्वासि दादालोरा बारेमते पूसकीते, ओर कलिसियातोर लोहचीतोर आनि किरिस्‍तुना कदरगल्‍लोर आंदुर, इंचि वेहट.
2CO 8:24 अदुनहाटीं मिमेट ओर्कुन बच्‍चोन पावरम कींतिट इंचि कलिसियाता मुन्‍ने हुप्‍सट, अल्‍हेने मीवा बारेमते मोमोट पेद्‍दिरकेम वेहकुत्‍तद निजम कीसि ओर्कु हुप्‍सट.
2CO 9:1 इंदके यहुदिया राज्येमता पेनदा लोकुल्‍कुनाहाटीं कियाना ई सेवाता बारेमते मीक रासाना अव्‍सरम हिल्‍ले.
2CO 9:2 बारित्‍ते सहाय्यम कियालय मिमेट बस्‍केळ्‍क तयार मनंतिर नाक एरपाटे मंता. नना मीवा बारेमते, अकाया एरियाता लोकुल्‍क उंदि वर्साताल चंदा हियालय तयार मंतुर इंचि मेसिडोनियाता लोकुल्‍कुंक पेद्‍दिरकेमते वेहुंदुन. इद केंजसि वेल्‍लेटुर लोकुल्‍क चंदा हियालय तयार आतुर.
2CO 9:3 नना मीवा बारेमते पेद्‍दिरकेम वेहता पोल्‍लें एर्तम आयामन्‍नि इंचि ई दादालोर्कुन लोहसेक मंतन, नना वेहतापे मिमेट चंदा तयार कीसि इर्रट.
2CO 9:4 मिमेट अल्हा तयार कीसि इर्राकोंटे, मेसिडोनियातोर बोरन्‍ना नावातोनि वासि तयार हिल्‍वद हूळते, मीवापोर्रो बरोसा कीताहाटीं मावा सिग्गु होनना वेला वायार. मीवदगुडा सिग्गु दांता इनमळ अव्‍सरम हिल्‍ले.
2CO 9:5 अदुनहाटीं मिमेट चंदा हींतोम इंचि मोदाले पोल्‍ले हीसि मत्‍तिर. अय्ते आ चंदा मिमेट तयार कीसि इर्राट इंचि बतिमलाडालय ई दादालोर्कुन मुन्‍नेने मिहगा लोहमळ नना अव्‍सरम इनकुत्‍तन. ओर वाता पजा जबरदस्‍तिते आयो गानि, मीवा मनसुनाल हियमळ गावाले.
2CO 9:6 इद पोल्‍ले मति इर्राट: इच्‍चुन वीततोर इच्‍चुने पंटा कोय्‍यंतोर, वेल्‍ले वीततोर वेल्‍लेने पंटा कोय्‍यंतोर.
2CO 9:7 अदुनहाटीं गुल्‍गामन्‍नि, जबरदस्‍ति कियामन्‍नि हरेक मनकल बल्हा हींतन इंचि विचारम कीतोरो, अल्‍हेने हिय्याना. अल्हा आनंदमते हियानोन पेन पावरम कींता.
2CO 9:8 मिमेट अन्‍नि बेसता कबाह्‍क कियालय, मीक अव्‍सरम मत्‍तव अन्‍नि मिहगा बस्‍केळ्‍क मंदालय, पेन दाना दयाते अव अन्‍निन हिया परांता.
2CO 9:9 इदुना बारेमते दर्मसास्‍त्रमते, “ओर गरिबोर्कुंक अन्‍समन्‍स कियाका हींतोर, ओना नीति बस्‍केळ्‍क निल्‍सि मनंता,” इंचि रासि मंता.
2CO 9:10 अदुनहाटीं वीतानोंकु पेन विज्‍जां हींता, तिनालय तिंडि हींता. अद मीक वेल्‍ले विज्‍जां हीतस्के मीवा नीतिता पलम बेरसंता.
2CO 9:11 मिमेट बस्‍केळ्‍क अन्‍समन्‍स कियाकोंटा हियालय पेन मीकुन अन्‍निटवुने गट्‍टिगा कींता. अल्‍हेने मिमेट मावा कय्‍दे चंदा लोहतिट इंचि वेल्‍लेटुर पेनदुक दन्यवाद कियानुर.
2CO 9:12 मिमेट कियाना सहायमता सेवाहेंदाल पेनदा लोकुल्‍कुना अव्‍सराल्क पूरा आंतां, अचोने आयाका ओराहेंदाल पेनदुक वेल्‍ले दन्यवाद आसेक मनंता.
2CO 9:13 बारित्‍ते मिमेट इद सेवा कीसि, किरिस्‍तुना बेसता कबुरतुन ओप्‍कुंचि अद मत्‍ताप ताकसेक मंतिर. अचोने आयाका पेनदा लोकुल्‍कुंक, वेरे अंटोर्कुंक मीवा मनसुनाल सहायम कीसेक मंतिट. इदुन हूळसि ओर पेनदा महिमा कींतुर.
2CO 9:14 मीवापोर्रो पेनदा कुर्पा वेल्‍लेने मंता, अदुनहाटीं ओर मीकुन हूळना इंचि तनलाळसेके ओर मीवाहाटीं वेल्‍लेने पावरमते पारतना कींतुर.
2CO 9:15 पेन हीता वेहा परवच्‍चो वरमताहाटीं दानकु दन्यवाद आयि.
2CO 10:1 नना पौलुसुन, मीवातोनि मननेंके सिन्‍नागासि मनंतन, गानि लक्‍कु मननेंके वेर्रे हिलाकोंटा मनंतन इंचि इच्‍चुर इंतुर. नना मीकु किरिस्‍तुना सादा-सिंपल आनि मेत्‍तटा गुनमता हेंदाल विनंति कीसेक मंतन,
2CO 10:2 नना वातारिते बोर अय्ते माकुन, “दुनियातोरालेसीं ताकसेक मंतुर” इंचि इनकुंतुर, ओरतोनि नाक कडक वळ्‍काना वेला वायामन्‍नि इंचि विनंति कीसेक मंतन.
2CO 10:3 निजमे, मोमोट दुनियातोरालेसीं मंतोम, गानि दुनियातोरालेसीं लडाइ किय्‍योम.
2CO 10:4 मोमोट लडाइ कियाना विस्रें दुनियातोरसंटव आयों, गानि किल्‍लान कूलाहनाहाटीं पेनदाहेंदाल ताकततव आंदुं.
2CO 10:5 इवुनाहेंदाल मोमोट पेनदुन एरपाट कियालय बतां अय्ते आपंतां, अवुन अन्‍निन नासडेम कींतोम, ओरां अन्‍नि विचाराल्कुन मिळाहचि किरिस्‍तुना इच्‍चा मत्‍ताप ताकानाल कींतोम.
2CO 10:6 मिमेट किरिस्‍तुना पोल्‍लेते पुरागा ताकालय आतस्के, किरिस्‍तुना पोल्‍ले केंजवोर अंटोर्कुन मोमोट सिक्‍सा हियालय तयार मंतोम.
2CO 10:7 मिमेट सिराप मुन्‍ने मत्‍तवुन मीवा कळ्‍कुने हूळसेक मंतिट. मीक गिंटा बोर्कन्‍ना ओनद-ओन्क नना किरिस्‍तुनोन आंदुन इंचि बरोसा मनानय्ते बल्हा ओर किरिस्‍तुनोर आंदुर, अल्‍हेने मोमोटगुडा किरिस्‍तुनोर्कुम आंदुम इंचि ओन्क तेळियगोम
2CO 10:8 मीकुन नासडेम कियालय आयो गानि, मीकुन बेर्सागोटालय सामि माक अदिकारम हीतोर इंचि नना इंकागुडा पेद्‍दिरकेम वेहकुनिना नाक सिग्गु हिल्‍ले.
2CO 10:9 नना बारि वेहसेक इत्‍ते, नावा सिट्‍टिना हेंदाल नना मीकुन वेराहसेक मंतन इंचि मीक अनपिच्‍चमन्‍नि.
2CO 10:10 बारित्‍ते, “ओर सिट्‍टिने अय्ते मजबुत आनि कडक पोल्‍लें रासंतोर, गानि मेंदुल्ते कमजोर मंतोर, पोल्‍लेंगुडा बेस पेय्‍सों,” इंचि इच्‍चुर इंतुर.
2CO 10:11 अल्हा इनानोर्क इद पोल्‍ले तेळियि: मोमोट हिल्वस्के सिट्‍टिने बल्हा रासि वळ्‍कंतोमो अल्‍हेने मोमोट मीवातोनि मत्‍तस्के ताकंतोमगुडा.
2CO 10:12 बोर-बोर अय्ते ओरद-ओरे पेद्‍दातनम वेह्‍कुंतुर, गानि मोमोट ओरालेसीं वेहकुन्‍नोम, ओरा लोप्पो तुलना किय्‍योम. ओर वरोनद वरोर कहकुंचेके मंतुर, वरोनद-वरोर तुलना कीकुंचेके मंतुर. इद पेद्‍दा मुर्कतनम आंद.
2CO 10:13 मोमोट अय्ते मावा अदिकारता पलाते बस्‍केने होन्‍नोम, गानि पेन माक हीता गेट्‍टुना लोप्‍पोने मंचि मोमोट पेद्‍दिरकेम कींतोम. इदे गेट्‍टुन लोप्पो मिमेट मंतिर.
2CO 10:14 मोमोटे मोदाला मिहगा किरिस्‍तुना बेसता कबुर तत्‍तोम. अदुनहाटीं मोमोट पेन हीता सेवातुन गेट्‍टुना लोप्‍पोने मंचि पेद्‍दिरकेम कींतोम.
2CO 10:15 वेरेतोर कीता कबळतुन मोमोटे कीतोम इंचि पेद्‍दिरकेम किय्‍योम. बल्हा-बल्हा मीवा विस्वासम बेर्स्‍सेके दांता, अल्हा-अल्हा मावा सेवा मना गेट्‍टुना लोप्‍पोने मीवाहाटीं पैलांचेके दांता इंचि आसे मंता.
2CO 10:16 इंकावरोर कबळ कीता एरियाते होंचि पेद्‍दिरकेम कियाका, मोमोट बोरे होनवा एरियाते होंचि बेसता कबुर वेहंतोम.
2CO 10:17 गानि दर्मसास्‍त्रमते, “बोर अय्ते पेद्‍दिरकेम कींतोर, ओर सामि कीता कबळतुन पीसे पेद्‍दिरकेम किय्‍यिर,” इंचि रासि मंता.
2CO 10:18 बोर अय्ते ओनद-ओरे मेच्‍कुंतोर ओर कबळतोर आयोर, गानि सामि बोनय्ते मेच्‍कुंतोर ओर कबळतोर आंदुर.
2CO 11:1 नना इच्‍चुर बुद्‍दि हिल्वोनलेसीं वळ्‍किना गानि नाकुन ओर्सकुंटु, अल्‍हेने मिमेट नाकुन ओर्सकुंचेकेन मंतिट.
2CO 11:2 मीवा बारेमते नना आसेते मंतन, इद आसे नावा लोप्पो पेनदाहेंदाले मंता. बारित्‍ते ओना वरोरे मंदना मांडसाता कय्‍दे हियालय, मरमिं आयवा पवित्र लेय्याटालेसीं मीकुन किरिस्‍तुना कय्‍दे अप्पजेप्पना इंचि नाक मंता.
2CO 11:3 गानि तरास चालाकिते हव्‍वान पसांचतापे, किरिस्‍तुनतोनि इमानदार, पवित्र मंदना मीवा मनसुनगुडा लक्‍कु किय्‍यार इंचि नना वेरियंतन.
2CO 11:4 बारित्‍ते बोरन्‍नागिंटा मिहगा वासि, मोमोट वेहवासोंटा वेरे येसुना पोल्‍ले मीक वेहते, हिलाकोंटे बदन्‍ना मुन्‍ने मिहगा हिल्‍वसोंटा आत्मा दोर्कते, हिलाकोंटे इंका बदन्‍ना मुन्‍ने मिमेट ओप्‍कुन्‍वसोंटा बेसता कबुर वाते, अदुन मिमेट कुसिते ओप्‍कुंतिर.
2CO 11:5 नना पेद्‍दा-पेद्‍दा प्रेरितुल्‍कुंकन्‍ना सिन्‍नोन इंचि इनकुंचेक हिल्‍लेन.
2CO 11:6 नना वळ्‍कमळते कमजोर मनिनागानि तेल्‍विते हिल्‍लेन. इदुन मोमोट अन्‍नि पोल्‍लेने, अन्‍नि तीरुकुने मीक हुपिस्‍तोम.
2CO 11:7 मीक पेनदा बेसता कबुर पुक्‍कटते वेहतन, मीक पेद्‍दातनम वायागोम इंचि, नावद नना सिन्‍नातनम कीकुत्‍तन, इद बतल पापम कीताना?
2CO 11:8 मीवा सेवा कियालय नना वेरे कलिसियानाहेंदाल मदत एतसि ओर्कुन लुटांचतन.
2CO 11:9 नना मिहगा मत्‍तस्के, नावा अव्‍सराल्‍कुन पूरा कियालय बोनपोर्रो बर्वु आसि मना हिल्‍लेन. मेसिडोनिया एरियाताल वाता विस्वासि दादालोर नावा अव्‍सराल्‍कुन पूरा कीतुर. इदवेरादाका नना बदे पोल्‍लेते मीपोर्रो बर्वु आया हिल्‍लेन, इंका मुन्‍नेगुडा आयोन.
2CO 11:10 किरिस्‍तुना सत्‍तेम नावा लोप्पो मंता, अदुनहाटीं अकाया एरियातोर बोरे नावा इद पेद्‍दिरकेमतुन विरोद किया पर्रुर.
2CO 11:11 नना मिहगाटाल मदत एता हिल्‍लेन इत्‍ते, मीपोर्रो नाक पावरम हिल्‍ले इत्‍तापा बतल? असले आयो! मीकुन नना बच्‍चोन पावरम कींतन अद पेनदुक एरपाट.
2CO 11:12 ओर बतलय्ते कीसेक मंतुर अदे कबळ मोमोट कीसेक मंतोम इंचि बोर अय्ते पेद्‍दिरकेम वेहकुंचेके मंतुर, ओर्कुन कमजोर कियानाहाटीं नना बतलय्ते कींतन, अदे कीसेक मनंतन.
2CO 11:13 बारित्‍ते इसोंटा लोकुल्‍क आबद्‍दम प्रेरितुल्क आंदुर. ओर आबद्‍दम वळ्‍कंतुर, ओर इंकावरोन पसांचना कबळ कींतुर, ओर किरिस्‍तुना प्रेरितुल्‍कुनालेसीं मनंतुर.
2CO 11:14 इवने इचंत्रम बतल हिल्‍ले, देय्यमगुडा वेल्‍गु हिय्याना पेनदा दूतालेसीं आंता.
2CO 11:15 अदुनहाटीं देय्यमता सेवाकुल्कगुडा सत्‍तेमते ताकाना सेवाकुल्कुनलेसीं मारियते इद पेद्‍दा पोल्‍ले आयो, गानि आकिरते ओर कियाना कबळता इसाबते सिक्‍सा आयार.
2CO 11:16 नना मर्रा वेहसेक मंतन, नाकुन बोरे मूर्कुड इनकुनमटु, मिमेटगिंटा नाकुन मूर्कुडे इनकुनानय्ते बतल आयो, अल्‍हेने ओप्‍कुंटु, इदुनहेंदाल नाकगुडा इच्‍चुर पेद्‍दिरकेम कियालय दोर्कार.
2CO 11:17 नना इंदके वेहना पोल्‍ले सामिना विचारम मत्‍ताप आयो, गानि वरोर मूर्कुड वेहताप वेहासेक मंतन.
2CO 11:18 वेल्‍लेटुर लोकुल्‍क ओर कीता पोल्‍लेन पोर्रोटाल पेद्‍दिरकेम वेह्‍कुंतुर, ननागुडा अल्‍हेने वेहकुंतन.
2CO 11:19 मिमेट अय्ते बुद्‍दि मत्‍तोर आंदिर, अदुनहाटींगे बुद्‍दि हिल्‍वोरा पोल्‍लेन कुसिते ओर्सकुंचेके मंतिर.
2CO 11:20 अचोने आयाका, ओर मीकुन गुलाम किय्‍यिना, लुटांचना, मीवा पायदा येताना, ओरद-ओरे पेद्‍दा कीकुन्‍निना, मीकुन सेंपापोर्रो तनिना इवन्‍नि मिमेट ओर्सकुंचेके मंतिर.
2CO 11:21 नाक सिग्गु वायाना पोल्‍ले बतल इत्‍ते, ओर कीताप मोमोट किया हिल्‍लोम. गानि बोरे आयिर पेद्‍दिरकेम कियालय दैरनेम कीते, ननागुडा मूर्कुनालेसीं दैरनेमते पेद्‍दिरकेम कींतन.
2CO 11:22 ओरद-ओर इब्रि जातितोर्कुम इंचि इंतुर, ननागुडा इब्रि जातितोने. ओर इस्राएल मनकालोर्कुम इंतुर, ननागुडा इस्राएल मनकने. ओर अब्राहामुना वंसमतोर्कुम इंतुर, ननागुडा अब्राहामुना वंसमतोने.
2CO 11:23 ओर किरिस्‍तुना सेवाकुल्क आंदुरा? नना ओर्कन्‍ना एक्‍को किरिस्‍तुना सेवा कियानोन आंदुन इंचि पिस्‍सनलेसीं इंचेके मंतन. ओर्कन्‍ना एक्‍को कस्‍टम कीतन, ऊके-ऊके जेलुंक होनुंदुन, देब्बां तिनुंदुन, बच्‍चुंगो मल्कां हायाना वेला वासि मत्‍ता.
2CO 11:24 नना हेय्युं मल्कां यहुदिल्कुना कय्‍दे मुप्‍पै तोम्मिद पोट्‍टे देब्बां तित्‍तन.
2CO 11:25 मूड मल्कां नाकुन दुड्‍डुने तंतुर, उंदि मल्का बंडाने तंतुर, मूड मल्कां नावा पय्‍नेमते डोंगां पैतां, उंदि मल्का नर्का-पल्‍हिं पिय्यल-पोळ्‍दु समुद्रमते मत्‍तन.
2CO 11:26 ऊके-ऊके पय्‍नेमते होनुंदुन. बेरेह्‍कुना दोका, दोंगाल्‍कुना दोका, नावा लोकुल्‍कुनाहेंदाल दोका, वेरे जातितोरहेंदाल दोका, सहरते दोका, बय्‍लि जेगाते दोका, समुद्रमते दोका, विस्‍वासुल्‍कुम इंचि नळेह कियाना मनकालोर्कुना हेंदालगुडा नाक दोका मत्‍ता.
2CO 11:27 नना मेहनतते, कस्‍टमते मत्‍तन. बच्‍चुंगो मल्कां निद्र हिलाकोंटा मनमळते, कर्वुने-दूपाते, उपासम, पीनिते मत्‍तन, कपडिं हिलाका मत्‍तन.
2CO 11:28 इच्‍चोरे आयाका, अन्‍नि कलिसियाना पिकिर नाकुन रोज परेसान कीसेक मनुंदु.
2CO 11:29 बोरन्‍ना विस्वासि विस्वासमते कमजोर आते, ननागुडा कमजोर आताप नाक अनपिच्‍चोना? बोरन्‍ना मनकल इंकावरोन विस्वासमताल अरहानय्ते नाक होंग वायोना?
2CO 11:30 नाकु गिंटा पेद्‍दिरकेम कियाना मत्‍ते, नना किया पर्रुवा कबाह्‍कुना बारेमते पेद्‍दिरकेम कींतन.
2CO 11:31 नना वळ्‍कानद आबद्‍दम आयो इंचि सामि येसुना पेनबाबांक एरपाटे मंता. ओन्क बस्‍केळ्‍क दन्यवाद आयि.
2CO 11:32 नना दमिस्‍क सहरते मत्‍तस्के, अरितास राजाना हेंदाल ओना राज्यपाल नाकुन पियालय सहरते पहारा कीसेक मत्‍तोर.
2CO 11:33 गानि अस्‍के नाकुन इच्‍चुर उंदि तट्‍टाते उप्‍पिचि गूरेता किळकिताल हब्बेर रेहतुर. इल्‍हा नना ओना कय्‍दाल पिस्‍तन.
2CO 12:1 नना पेद्‍दिरकेम कीते नाक बतल पायदा दोर्को, गानि पेद्‍दिरकेम किया पीसेक मंता. सामि नाक हीता दर्सनम आनि हुपिस्‍ता मर्ममता पोल्‍लेन बारेमते वेहंतन.
2CO 12:2 किरिस्‍तुन विस्वासम कीतोर वरोर मनकल नाक एरपाट. पडनालुं वर्साना मुन्‍ने पेन ओन मूडो स्वर्गमदाका पीसि ओता. अस्‍के ओर मेंदुल्ते मत्‍तोरा, मना हिल्‍लोरा नाक तेळियो. पेनदुके तेळियंता.
2CO 12:3 आ मनकल मेंदुल्ते मत्‍तोरा, मना हिल्‍लोरा? अद नाक तेळियो, पेनदुके तेळियंता. गानि इच्‍चोर एरपाट गदा, ओन पेन सुकमता जेगाते ओता. मनकंक वेहालय अदिकारम हिल्‍वसोंटव पोल्‍लें अगा ओर केंजतोर.
2CO 12:5 इसोंटा मनकना बारेमते नना पेद्‍दिरकेम वेहकुंतन. गानि ना बारेमते नावा कमजोरिन तप्‍पा, इंका बवे पोल्‍लेन बारेमते पेद्‍दिरकेम वेहोन.
2CO 12:6 नना पेद्‍दिरकेम वेहतेगुडा, निजम वेहताहाटीं नाकुन मूर्कुड इनावायो. गानि नना अल्हा वेहोन. बारित्‍ते नना कीता कबाह्‍कुन हूळता दानकन्‍ना आनि वेहता पोल्‍लेन केंजता दानकन्‍ना एक्‍को मान नाक हिय्यामन्‍नि.
2CO 12:7 नाक हुपिस्‍ता मर्ममता पोल्‍लें वेल्‍लेने मत्‍ताहाटीं नावा लोप्पो पेद्‍दिरकेम वायामन्‍नि इंचि पेन नावा मेंदुलते उंदि हापु इरता. अद नाकुन दबांचि इर्रालय देय्यमता दूतालेसीं कोह्‍कसेके मनंता.
2CO 12:8 अद हापु नहागटाल तेंडा इंचि, मूड मल्कां सामिन विनंति कीतन.
2CO 12:9 गानि सामि नाकुन, “नावा कुर्पा नीकु सालांता, बारित्‍ते निमे कमजोर मत्‍तस्‍केन नावा ताकत कबळ कींता,” इंचि जवाब हीतोर. अदुनहाटीं नना कमजोर मत्‍तस्के किरिस्‍तुना ताकत नाकु तोळ आयागोम इंचि वेल्‍लेने कुसिते पेद्‍दिरकेम कीसेक मंतन.
2CO 12:10 नना कमजोर आतस्‍केने, किरिस्‍तुना लोप्पो गट्‍टिगा मनंतन. अदुनहाटीं कमजोर आयिना, अपमानम आयिना, कस्‍टम आयिना, सताव आयिना आनि आपत्‍तिं वायिना नना कुसिते मनंतन.
2CO 12:11 मीवा बल्‍मितेन नना मुर्कनलेसीं पेद्‍दिरकेम कीसेक मंतन. नना कदरलायक हिल्‍लेन आयावच्‍चु, गानि पेद्‍दा-पेद्‍दा प्रेरितुल्‍कुंकन्‍ना बदे पोल्‍लेते तक्‍को हिल्‍लेन, अदुनहाटीं मिमेट नावा पेद्‍दिरकेम किया मत्‍तिर.
2CO 12:12 मीवा नड्‍डुम नना ओप्‍केते मत्‍तन, नावाहेंदाल चिन्‍हां, इचंत्रमता कबाह्‍क, पेनदा पेद्‍द-पेद्‍दा कबाह्‍क जर्गताहाटीं ननागुडा निजम प्रेरितुने इंचि दिसंता.
2CO 12:13 वेरे कलिसियांकन्‍ना मिमेट बद पोल्‍लेते तक्‍को मत्‍तिट? सिराप इदे गदा, नना मीपोर्रो बर्वु आसि मना हिल्‍लेन, इदे नावा तप्‍पु, नावा तप्‍पुन मापि कीम्‍टु.
2CO 12:14 इंदके नना मूडो मल्का मिहगा वायालय तयार मंतन, इंदकेगुडा नना मीपोर्रो बर्वु अरहोन. बारित्‍ते पिलाल्क तल्‍लुर-बाबोनहाटीं दनम संपालिच्‍चुर गानि, तल्‍लुर-बाबो पिलाल्‍कुनाहाटीं दनम संपालिच्‍चंतुर. अदुनहाटीं नाक मीहेंदाल बतल मन्‍नि, मिमेटे गावाले.
2CO 12:15 नना मीवा आत्माता पायदाताहाटीं नना इरगा कुसिते कर्स कींतन, अवसरम अरते नना कुद्‍दु कर्स आंतन. नना मीकुन वेल्‍ले पावरम कींतन इंचि मिमेट नाकुन तक्‍को पावरम कींतिरा?
2CO 12:16 नना अय्ते मीपोर्रो बर्वु वाटा हिल्‍लेन गानि, “पिलान कीसि माकुन बोंकिच्‍तोर” इंचि मिमेट नाकुन इना वच्‍चु.
2CO 12:17 नना मिहगा लोहता लोकुल्‍कुनाल बोरा हेंदालन्‍ना कपटमते नना पायदा एततना?
2CO 12:18 नना तीतुन मिहगा होन इंचि विनंति कीसि, ओनतोनि वरोर दादानगुडा लोहतन. तीतु कपटमते मीहेंदाल बतलन्‍ना पायदा एततोरा? अल्हा एतोर. नना आनि तीतु इव्वुरोम उंदे आत्माते, उंदे रीतुने ताकंतोम.
2CO 12:19 महगा तप्‍पु हिल्‍ले इंचि हुप्‍सालय इवन्‍नि मोमोट मीक वेहसेक मंतोम इंचि मिमेट इनकुंचंतिर आयावच्‍चु, गानि आयो. मोमोट अय्ते पेनदा मुन्‍ने किरिस्‍तुना अदिकारमते वळ्‍कंतोम. पावरमगल्‍लोरिटा! इवन्‍नि पोल्‍लें मीवा विस्वासम बेर्सनाहाटींगे वेहसेक मंतोम.
2CO 12:20 बारित्‍ते नना मिहगा वातास्‍के, मिमेट इनकुत्‍ताप नना मीक दोर्का पर्रोन आयावच्‍चु इंका नना इनकुत्‍ताप मिमेट मंदक होननिर. बोर्क एरपाट, मीलोप्‍पो जगडाल्‍क, कळ्‍क पोतमळ, होंग, सतता पायदा, अपमानम, पेद्‍दिरकेम, चुगलीं, लोल्‍लिं इसोंटवगुडा दिस अर्रानुं इंचि नना वेरियसेक मंतन.
2CO 12:21 अल्‍हेने नना मर्रा वाता पजा, इच्‍चुर विस्वासुल्‍क कराब कबाह्‍क, बोगमतनम, लंजेतनम इसोंटा पापाल्कुनाल मनसु मार्सकुनाकुंटे नाक वेल्‍ले दुक्‍कम आयार. अचोने आयाका पेनदा मुन्‍ने नावा सिग्गु होनना वेला वायारो बतल इंचिगुडा वेरियतन.
2CO 13:1 नना रोंडो मल्का मिहगा वासि मत्‍तस्के, पापम कियमट इंचि वेहचि मत्‍तन. इंदके नना मिहागटाल लक्‍कु मंतन गानि, मर्रा उंदि मल्का अदे पोल्‍लेतुन नना वायाका मुन्‍ने मीक वेहसेक मंतन. नना मूडो मल्का वातस्के, बोर अय्ते मुन्‍ने पापम कीतुर, इंदकेगुडा कीसेकेने मंतुर ओर्कु, अल्‍हेने कळमतोर अंटोर्क सिक्‍सा तप्‍पो. बारित्‍ते दर्मसास्‍त्रमते, “हरेक पोल्‍लेतुन निजम कियालय इव्वुर हिलाकोंटे मुव्वुर गवाइदार्कुना अव्‍सरम मनंता,” इंचि रासि मंता.
2CO 13:3 किरिस्‍तुनाहेंदाल वळ्कंतोर इत्‍तदुना बारेमते, मिमेट आनवल बतल इंचि पूसकींतिर. किरिस्‍तु मीहाटीं कमजोरि आयो गानि मीलोप्‍पो ताकत आसि मनंतोर.
2CO 13:4 बारित्‍ते, किरिस्‍तु कमजोर आसि मत्‍तस्के ओन क्रुसुनपोर्रो मोल्‍लां कोह्‍किसि वेलाळ वाटतुर, अयना गानि पेनदा ताकतते ओर मर्रा तेदसि जीवाते मंतोर. मोमोटगुडा ओनालेसींगे कमजोर मंतोम, गानि मोमोट मीवाहाटीं पेनदा ताकतते किरिस्‍तुनतोनि जीवाते मनंतोम.
2CO 13:5 मिमेट नाकुन परिक्‍सा कीसि हूळना दानकन्‍ना, मिमेट विस्वासमते मंतिरा हिल्‍लिरा, मीवद-मिमेट परिक्‍सा कीसि हुळाट. अस्‍के येसु किरिस्‍तु मीलोप्‍पो मंतोर इंचि अनपिच्‍चोना? अल्हा अनपिच्‍चाकोंटे मिमेट ओना लोकुल्‍क आयिर इनकुंटु.
2CO 13:6 नावा आसे मंता, मिमेट परिक्‍सा कीसि हूळते, मोमोट निजमे किरिस्‍तुना प्रेरितुल्कुम इंचि मीक अनपिच्‍चंता.
2CO 13:7 ओक्‍काला मोमोट निजम प्रेरितुल्‍कुनालेसीं मीक दिस्‍साकोन्‍नागुडा, बतल सत्‍तेम मंता अदे कियाना इंचि मीहाटीं पेनदुक पारतना कीसेक मंतोम.
2CO 13:8 मिमेट सत्‍तेमते ताकते दानकु विरोद मोमोट किय्‍योम, गानि सत्‍तेमताहाटींगे सहायम कींतोम.
2CO 13:9 मोमोट कमजोर मत्‍तोरालेसीं दिस्‍साना गानि बतल आयो, मिमेट ताकतते मत्‍ते माक आनंदम आंता. इल्‍हा मिमेट ताकतते बेर्सेक होंदना इंचि, मोमोट पारतना कीसेक मंतोम.
2CO 13:10 अदुनहाटीं सामि मीकुन नासडेम कियालय आयो गानि, गट्‍टिगा निलाहलय नाक अदिकारम हीतोर. नना मिहगा वातस्के नावा अदिकारमते मीतोनि कडक वळ्कना वेला वायामन्‍नि इंचि, मिहागटाल लक्‍कु मनेंकेने इव पोल्‍लें रासेक मंतन.
2CO 13:11 विस्वासुल्‍कुनिटा! नना आकिरते वेहानद इदे गदा, कुसिते मंटु. मीवा गुनम बेस इर्राट, वरोंक-वरोर दैरनेम हीम्टु, उंदि मनसुने मंटु, सांतिते मंटु, अस्‍के पावरम आनि सांति हियाना पेन मीवातोनि मनंता.
2CO 13:12 मिमेट वरोंक-वरोर कलियतस्‍के पवित्र पावरमते जोहार कीम्‍टु.
2CO 13:13 इग्‍गेटा पवित्र लोकुल्‍क अंटोर मीकु जोहर वेहासेक मंतुर.
2CO 13:14 सामि येसु किरिस्‍तुना कुर्पा, पेनदा पावरम आनि पवित्र आत्माता तोळ मी अंटोरतोनि मन्‍निकांटी.
GAL 1:1 नना येसु किरिस्‍तुना वरोर प्रेरितुन आंदुन, नावा पोरोल पौलुस. नना प्रेरित इंचि मनकालोराहेंदालो हिलाकोंटे बोरो वरोर मनकल नाकुन कीताहेंका आया हिल्‍लेन, गानि कुद्‍दु येसु किरिस्‍तु आनि ओन हामुरताल मर्रा जीवाते तेहता आ पेनबाबाले नाकुन केयतोर.
GAL 1:2 इद सिट्‍टि गलातिया इनना एरियाते मनना कलिसियानोर्क, इत्‍ते मीवाहाटींगे नना नावातोनि मनना दादालोराहेंदाल रासतन.
GAL 1:3 मना पेनबाबाल आनि मना सामि येसु किरिस्‍तुनहेंदाल मीकु कुर्पा, सांति दोर्कि.
GAL 1:4 मनम मनना ई पापि दुनियाताल मनाकुन पिसागोटना इंचि मना पेनबाबाना इच्‍चा मत्‍ता. अदुनहाटीं येसु किरिस्‍तु मनाहाटीं ओना जीवा हीसि पेनबाबाना इच्‍चातुन पूरा कीतोर.
GAL 1:5 दुनियाता लोकुल्‍क युगा-युगाल्‍कुनदाका ओनदे कदर किय्‍यिर, आमीन.
GAL 1:6 बद पेन अय्ते येसु किरिस्‍तुना कुर्पाहेंदाल मीकुन दग्‍गेरा कीकुत्‍ता, असोंटा पेनदुन इच्‍चोन बिराना होळसिसि, बदो वेरे बेसता कबुरतेके तिरियतिर. इदुन केंजसि नाकु वेल्‍लेन इचंत्रम आसंता.
GAL 1:7 असल निजम बतल इत्‍ते, वेरे बदे बेसता कबुर हिल्‍ले. गानि इच्‍चुर लोकुल्‍क मंतुर ओर मीकुन गयबेत कीसि किरिस्‍तुना बारेमता बेसता कबुरतुन बदलांचलय हूळसंतुर.
GAL 1:8 ओक्‍कला मोमोट आयि स्वर्गमताल वाता पेनदा दूता आयि, मोमोट मीकु वेहता बेसता कबुर तप्‍पा इंका वेरे कबुर वेहानय्ते, असंटोर्कुन पेन नासडेम कीसि पोहि.
GAL 1:9 मोमोट मीकु मुन्‍ने वेहता पोल्‍लेतुन इंकुंदि मल्का वेहचंतोम बेस केंजट. बोरे आयिर, मिमेट मुन्‍ने नम्मुता बेसता कबुर तप्‍पा वेरे कबुरगिंटा वेहानय्ते पेन ओन नासडेम किय्यि.
GAL 1:10 अय्ते नना इंदके लोकुल्‍क नाकुन मेच्‍चुकुनगोम इंचि हूळसंतना मरि पेनदा आसिर्वाद दोर्कगोम इंचि हूळसंतना? हिलाकोंटे लोकुल्‍कुन कूस कियानसंटोना? ओक्‍कला नना लोकुल्‍कुन कूस कियानसंटोन आसि मत्‍ते किरिस्‍तुना सेवाकुन आयाकोन्‍नेन.
GAL 1:11 विस्वासुल्‍कुनिटा, नावा पोल्‍ले बेस केंजट! नना वेहता बेसता कबुर मनकनहेंदाल आयो, इद मिमेट मतिते तासकुंटु.
GAL 1:12 इंका इद नाकु बोर मनकालोरहेंदालगुडा दोर्काहिल्‍ले आनि बोर मनकल नाकु कराह हिल्‍लोर. इदु नाकु कुद्‍दु येसु किरिस्‍ते कुल्‍ला कीसि वेहतोर.
GAL 1:13 नना यहुदि रिवाजते पिसनेंके नावा पिस्वर बल्हा मत्‍ता मीकु एरपाटे. अस्‍के नना पेनदा कलिसियातुन इरगा तकलिप कीतन, ओर्कुन नासडेम कियालय बस्‍केळ्‍क ओरा पज्जो अरसि मनुंदुन.
GAL 1:14 यहुदिल्कुना रीति-रिवाजकुने ताकमळते नना नावा वय्सुनोर्कन्‍ना उंद अळ्‍गु मुन्‍नेन मनुंदुन. नावा तादो-बाबुरहेंदाल दोर्कता रीति-रिवाजकुन पोर्रो ताकमळ नाकु वेल्‍लेन इस्‍टम मत्‍ता.
GAL 1:15 गानि पेन मात्रम नना यावाना पीटे मननेंकेन नाकुन पेरता. पजा दाना कुर्पाते नाकुन केय्‍सि, दाना मर्रि येसु किरिस्‍तुना बारेमते तेळियागोट्‍सि वेहता.
GAL 1:16 अदुनहाटीं नना यहुदि आयवा लोकुल्‍कुन लोप्पो होंचि दाना मर्रिना बारेमता बेसता कबुरतुन वेहा परतन. इल्‍हा जर्गतस्के नना बोरे मनकंक होंचि कलिया हिल्‍लेन बोने बतल पूसकिया हिल्‍लेन.
GAL 1:17 नाकन्‍ना मुन्‍ने आता प्रेरितुल्कुंक कलियना इंचि येरुसलेमगुडा होना हिल्‍लेन. दाना बदुल, अस्केटद अस्‍केन नना अरब इनना देसेम होंचि, पजा दमिस्‍क सहरतेन मल्सि वातन.
GAL 1:18 पजा मूड वर्सां आतंका नना केपांक कलियालय येरुसलेम होंचि, ओनतोनि पदहेन रोजकु मत्‍तन.
GAL 1:19 गानि याकोब इनना सामिना तम्मुंक तप्‍पा इंका बोरे प्रेरितुंक कलिया हिल्‍लेन.
GAL 1:20 नना पेनदा मुन्‍ने निल्‍सि वेहचंतन, बतल अय्ते नना मीकु रासेक मंतन, अव्टे गिचचोगुडा आबद्‍दम हिल्‍ले.
GAL 1:21 पजा नना सिरिया, किलिकिया इनना एरियाने होत्‍तन.
GAL 1:22 गानि यहुदिया एरियाते मनना कलिसियानोर अय्ते नाकुन बस्‍केने हूळा हिल्‍लुर.
GAL 1:23 ओर नाकुन एरपाट कियाकोन्‍ना, “बोर मनकल अय्ते मना लोकुल्‍कुन मुन्‍नेटा कालमते तकलिप कीसि नासडेम कियालय हूळुंदुर, ओरे इंदके किरिस्‍तुना बारेमता बेसता कबुरतुन वेहचंतोर,” इंचि वेरेतोर वळ्कानेंके मात्रम केंजतुर.
GAL 1:24 इल्‍हा इंचेके ओर नावाहेंदाल पेनदुन तल्‍सकुनुंदुर.
GAL 2:1 पजा पडनालुं वर्सां आतंका नना मर्रा येरुसलेम होत्‍तन. अस्‍के नातोनि बरनाबास मत्‍तोर. मोमोट होननेंके नातोनि तीतु इनानोनगुडा पीसि ओतन.
GAL 2:2 नाकु अगा तप्‍पाकोंटा होनापींता इंचि पेन वेहचि हुपिस्ताहाटीं नना होत्‍तन. पेनदाहाटीं नना कीता कस्‍टम एर्तम आयानायो इंचि यहुदि आयवोर्क नना वेहता बेसता कबुरतुन अगटा लीडर्कुन बाजुंक केय्‍सि ओर्क वेहतन.
GAL 2:3 नातोनि मत्‍ता तीतु युनानि मनकल आंदुर. अयना ओना कतना कियनाहाटीं ओर लीडर्क जबरदस्‍ति किया हिल्‍लुर.
GAL 2:4 गानि मावा लोप्पो इच्‍चुर लोकुल्‍क विस्वासुल्‍कुनलेसीं आसि मक्‍किस होळियतुर. येसु किरिस्‍तु माकुन यहुदिल्कुना नियमाल्कुना गुलामगिरिताल पलाते पेचाह्तदुन चुपचाप हूळसि, माकुन मर्रा गुलामगिरिते अरहचि नासडेम कियना उद्‍देसमते ओर वातुर.
GAL 2:5 गानि येसु सामिना बेसता कबुरता सत्‍तेम बस्‍केळ्‍क मीलोप्‍पो मनना इंचि मोमोट मात्रम ओरा पोल्‍लेन असले नम्मा हिल्‍लोम.
GAL 2:6 अगा मत्‍ता लीडर्क, नना वेहतव्टे बवे पोल्‍लें कल्‍पा हिल्‍लुर. पेनदा मुन्‍ने अंटोर समानमे. अदुनहाटीं ओर लोकुल्‍क बच्‍चोर पेद्‍दोर्क अयना बेसे, नाकु बतल पिकिर हिल्‍ले.
GAL 2:7 गानि कतना आतोर्कुंक बेसता कबुर वेहना जिम्मेदारि पेन पत्रुंक हीतापे, कतना आयवोर्कुंक बेसता कबुर वेहना जिम्मेदारि पेन नाकु हीता, इंचि याकोब, केपाल आनि योहान ई पोरोल होत्‍ता पेद्‍दा मनकालोर तेलपिच्‍कुत्‍तुर. यहुदिल्कुनाहाटीं प्रेरित इंचि पेन पत्रुन पेरसि ओन्क बेस हिम्मत हीता. अल्हेन नाकगुडा अदे पेन यहुदि आयवा लोकुल्‍कुनाहाटीं प्रेरित इंचि सेवा कियालय हिम्मत हीता. पेन नाकु हीता आसिर्वादतुन मतिते इरसि ओर नाकुन, बरनाबासुन ओप्‍कुत्‍तुर. पजा ओर बारे यहुदिल्कुनगा मोमोट बारे यहुदि आयवा लोकुल्‍कुनगा होनना इंचि ओर निरनायम कीतुर.
GAL 2:10 ओर माकु उंदे पोल्‍ले वेहतुर, अद बतल इत्‍ते मोमोट अगा होत्‍तस्के गरिब लोकुल्‍कुंक सहायम कियना इंचि. नाकगुडा अदे कबळ कियना आसे मत्‍ता.
GAL 2:11 कोन्‍नि रोजकुंक केपल अंताकिया सहरते वातोर. अगा वातस्के ओर उंदि तप्पु कीतोर. अदुनहाटीं ओर कीतद तप्पु इंचि ओन्क मोकोम मुन्‍नेन वेहतन.
GAL 2:12 असल बतल आता इत्‍ते, याकोबनगटाल इच्‍चुर यहुदि विस्वासुल्‍क केपानगा (पत्रु) वातुर. आ लोकुल्‍क वायनदाका केपल यहुदि आयवा विस्वासुल्‍कुनतोनि कलियसि तिनुड-उनुळ कियुंदुर. गानि बस्के अय्ते ओर वातुर, अस्‍केटाल मात्रम कतना आता लोकुल्‍कुंक वेरियसि, केपल यहुदि आयवा विस्वासुल्‍कुनाल लक्‍कु आतोर.
GAL 2:13 इंका ओर कियनद हूळसि वेरे यहुदि विस्वासुल्कगुडा अल्हे कियालय दल्‍गतुर. अचोने आयका बरनाबासगुडा ओरव्टेन कलियतोर.
GAL 2:14 पजा ओर बेसता कबुरता सत्‍तेमतुन एरपाट कीसि ताकसेक हिल्‍लुर इंचि नाकु तेळियतस्के नना केपन, “निमे यहुदि जातितोन आसिगुडा यहुदिल्कुना रीति-रिवाजकुन पीसि ताकसेक हिल्‍लिन. असोंटस्के यहुदि आयवोर्कुन यहुदिल्कुना रीति-रिवाजकुन पीसि ताकालय बारि जबरदस्‍ति कीसंतिन?” इंचि अंटोर मुन्‍नेन पूसकीतन.
GAL 2:15 बोर्कुन अय्ते मना यहुदिल्क पापिर्क इंचि इंतुर आ जातिते मनम पुट्‍टा हिल्‍लोम, मनम पुटतस्केटाल यहुदिल्कुमे.
GAL 2:16 अयना मूसाना नियमतुन पीसि ताकते आयो, गानि येसु किरिस्‍तुन विस्वासम कीतेन वरोर मनकल नीतिमंतुड आंतोर इंचि इंदके मनाकु एरपाट मंता. अदुनहाटीं येसु किरिस्‍तुन विस्वासम कीताहेंका नीतिमंतुल्क आयगोम इत्‍ता उद्‍देसमते मनम यहुदिल्क येसुनपोर्रो विस्वासम कीतोम. बारित्‍ते मूसाना नियमतुन पीसि ताकतोर बोरे मनकल नीतिमंतुड आयोर.
GAL 2:17 नीतिमंतुल्क आयनाहाटीं नियमाल्‍कुन पीसि ताकका, मनम किरिस्‍तुन विस्वासम कींतोम. इंचि इच्‍चुर यहुदिल्क मनाकुन पापिर्क इंचि इनकुंतुर. इत्‍ते बतल किरिस्‍तु पापम किया वेहालय वातोरा? अल्हा असले आयो.
GAL 2:18 यहुदिल्कुना बव नियमकुन अय्ते नना होळसीतनो, अवे नियमकुनपोर्रो मर्रा ताकानय्ते नना मूसाना नियमाल्‍क तपतोने आंतन.
GAL 2:19 इत्‍ते मुन्‍ने नना मूसाना नियम परकारम ताकसेके पिसालय हूळुंदुन, गानि बस्‍केळ्‍क अवुन पीसि ताका पराकोंदुन. इंदके पेनदाहाटीं पिस्सना इंचि अवुनंता होळस्‍तन. दीना अर्तम बतल इत्‍ते यहुदिल्कुना रीति-रिवाजकुनाहाटीं नना हाताप आतन.
GAL 2:20 नाकुन किरिस्‍तुनतोनि क्रुसुनपोर्रो वेलाड वाटमळ जर्गता इत्‍ते, इंदके नावा पळाना पिस्वर हासोत्‍ता. गानि नावा लोप्पो किरिस्‍तु जीवाते मंतोर. इंदके नावा ई मेंदुलते मनना जीवा, नाकुन बच्‍चोनो पावरम कीसि नावाहाटीं ओना जीवातुन हीता पेनदा मर्रिनपोर्रो नना विस्वासम कीताहेंका दोर्कतद आंद.
GAL 2:21 पेनदा कुर्पातुन नना विलवा हिल्‍ले इंचेक हिल्‍लेन. गानि मूसाना नियम परकारम ताकसि मनकालोर नीतिमंतुल्क आयानय्ते मनाहाटीं येसु किरिस्‍तु हायना अव्‍सरम मनाहिल्‍ले मरि.
GAL 3:1 ए गलातिया एरियाता लोकुरिटा, मिमेट निजमे बुद्‍दि हिल्वोर आंदिर. येसु किरिस्‍तुन क्रुसुनपोर्रो बारि वेलाळ वाटतुर? दाना अर्तम बतल? इदंता नना मीकु बेस तेळियानाल वेहचि मत्‍तन. असल मीकुन तप्‍पुड हर्दुक तिराहतोर बोर?
GAL 3:2 इंदके मिमेटे वेहाट, मूसाना नियम परकारम ताकताहेंका मीकु पवित्र आत्मा दोर्कतना मरि किरिस्‍तुना बारेमता बेसता कबुरपोर्रो विस्वासम इरताहेंकाना?
GAL 3:3 पवित्र आत्माता सहायमतोनि सुरुव कीता मीवा पूना पिस्वरतुन मिमेट मीवा बलमतेन पुरागा कियालय हूळसंतिरा? मीकु गिचचोगुडा बुद्‍दि हिल्‍लेना?
GAL 3:4 बेसता कबुरताहेंका मिमेट वेल्‍लेन तिप्‍पल्‍क अरतिर, अदंता एर्तमेना? नना मात्रम ओप्कुन्‍नोन.
GAL 3:5 पेन मीकु दाना पवित्र आत्मातुन हीसि मीवा नड्‍डुम पेद्‍दा-पेद्‍दा अद्‍बूताल्‍क कींता. अद बल्हा? मिमेट मूसाना नियम परकारम पिस्संतिट इंचा? हिल्‍ले. मिमेट किरिस्‍तुना बारेमता बेसता कबुर केंजसि दानपोर्रो विस्वासम कीतिर इंचि अल्हा कींता.
GAL 3:6 दर्मसास्‍त्रमते वेहताप, अब्राहाम पेनदा पोल्‍ले केंजसि विस्वासम कीतोर, इंचि पेन ओन नीतिमंतुड इत्‍ता. इदगुडा अल्हेन आंद.
GAL 3:7 अदुनहाटीं बोर अय्ते पेनदापोर्रो विस्वासम इर्रंतोर, ओरे अब्राहामुना निजमाता वंसमतोर आंदुर, इद मीकु तेळियगोम.
GAL 3:8 यहुदि आयवोर अंटोर्कुन पेन ओरा विस्वासमतुन हूळसि नीतिमंतुल्क कींता इंचि दर्मसास्‍त्रमते रासि मंता. इदुना बारेमते पेन अब्राहामुंक, “अन्‍नि जातिनोर्कुंक नीवाहेंदाले आसिर्वाद दोर्कंता,” इंचि मुन्‍नेन वेहचि मत्‍ता.
GAL 3:9 इंचि अब्राहामुनलेसीं पेनदा पोल्‍लेपोर्रो बोर अय्ते विस्वासम इर्रंतोर, ओन्‍के अब्राहामुंक दोर्कताप पेनदाहेंदाल आसिर्वाद दोर्कंता.
GAL 3:10 गानि बोर अय्ते मूसाना नियमतुन नम्मिसि मनंतोरो, ओन्क सिराप सापनेमे दोर्कंता. बारित्‍ते, “मूसाना नियमते रासि मत्‍ता अन्‍नि नियमकुन अन्‍नि वेलाते बरोबर पीसि ताकवोर अंटोर्क पेनदा सापनेम दल्‍गंता,” इंचि दर्मसास्‍त्रमते रासतद मंता.
GAL 3:11 दीनहेंदाल इंदके मनाकु तेळियता गदा, मूसाना नियमतुन पीसि ताकानोर बोरे पेनदा मुन्‍ने नीतिमंतुड आयोर. बारित्‍ते, “पेनदुन विस्वासम कीसि नीतिमंतुड आतोरे पिसनुर,” इंचि दर्मसास्‍त्रमते रासि मंता.
GAL 3:12 इगे मूसाना नियम आनि विस्वासमकु बतले संबंदम हिल्‍ले. बारित्‍ते, “बोर अय्ते अवुन पीसि ताकंतोर, ओर अवुनतोने पिसंतोर,” इंचि दर्मसास्‍त्रमते रासि मंता.
GAL 3:13 “मराकु वेलाड वाटता हरेक मनकल सापनेम दल्‍गतोरे,” इंचि दर्मसास्‍त्रमते रासतद मंता. अदुनहाटीं मूसाना नियमहेंका मनाकु दल्‍गता सापनेमतुन किरिस्‍तु कुद्‍दु येतकुत्‍तोर. इल्‍हा किरिस्‍तु सापनेम दल्‍गतोर आसि मनाकुन आ सापनेमताल कापाळतोर.
GAL 3:14 अब्राहामुंक पेन हीता आसिर्वाद येसु किरिस्‍तुनहेंदाल यहुदि आयवोर्कगुडा दोर्कना इंचि किरिस्‍तु मनाकुन पिसागोटतोर. दीनहेंदाल मनम ओनपोर्रो विस्वासम कीसि पेन हीता पोल्‍ले परकारम पवित्र आत्मातुन दोर्किच्‍कुना परंतोम.
GAL 3:15 अय्ते विस्वासुल्‍कुनिटा! मना रोजता पिस्वरताल उंदि पोल्‍ले नना मीकु वेहांतन. अद बतल इत्‍ते, मनकालोरा नड्‍डुम आता करारतुनगुडा, “इद करार ताको, हिलाकोंटे इदुन बदलांचा पींता,” इंचि मनम इना परोम.
GAL 3:16 अल्हेन अब्राहाम आनि ओना वंसंमतोनतोनि पेन कीता करारता बारेमते मंता. गानि दर्मसास्‍त्रमते, “वंसंमतोर्क” इंचि रासि हिल्‍ले. अगा अल्हा रासि मंचि मत्‍ते वेल्‍लेन मंदिताहाटीं आसि मनवळ. गानि अल्हा रासाकोंटा वरोनाहाटीं इत्‍ताप, “नीवा वंसंमतोन्क” इंचि रासि मंता. आ वरोर इत्‍ते किरिस्‍तु आंदुर.
GAL 3:17 इंदके इदुन बेस केंजाट! नालुं नुह्कुना मुप्‍पै वर्साना पज्जो वाता मूसाना नियम, पेन मुन्‍नेन कीसि मत्‍ता करारतुन बल्हा बदलांचा परंता? बदलांचा परो. अदुनहाटीं अद इंदकेगुडा ताकसंता.
GAL 3:18 ओक्‍कला वारसान हक्‍क गिंटा मूसाना नियमतुन पीसि ताकताहेंका दोर्कता इनानय्ते, अद पेन हीता पोल्‍ले परकारम दोर्कतद आयो. गानि अब्राहामुंक अय्ते अद पेन हीता पोल्‍ले परकारमे दोर्कता.
GAL 3:19 अय्ते मरि पेन मूसाना नियमकु बारि हीता इंतिर? पेन अब्राहामुनतोनि उंदि करार कीता. अद करार परकारम ओना वंसंमताल वरोर वायनद मत्‍ता. ओर वायनजेम पापम इत्‍ते बतल मनाकु तेळियनाहाटीं पेन अव नियमकु हीता अचोने. पेन ई नियमकुन दाना दूतानहेंदाल मूसाना कय्‍दुक हीता. बारित्‍ते मूसाल पेन आनि लोकुल्‍कुनाहाटीं नड्‍डुम मनकल मत्‍तोर.
GAL 3:20 इव्वुर्कुन कल्‍पालय नड्‍डुमतोना अव्‍सरम मनंता. गानि इगे पेन सीदा अब्राहामुनतोनि करार कीता.
GAL 3:21 अय्ते मरि मूसाना नियमकु पेन हीता पोल्‍लेना विरोदमते मंतंगा? असले हिल्‍लें. ओक्‍कला मूसाना नियमकु पिस्वर हियानव अय्ते, मनम अवुनतोने नीतिमंतुल्क आसि मन्‍नेरम.
GAL 3:22 गानि दर्मसास्‍त्रम अय्ते, “पूरा दुनिया पापमते दोह्‍चि मंता,” इंचि वेहंता. अल्हा बारि आता इत्‍ते, हीता पोल्‍ले परकारम दोर्कना आसिर्वाद, येसु किरिस्‍तुनपोर्रो विस्वासम कीतोर्के दोर्कना इंचि.
GAL 3:23 गानि येसु किरिस्‍तुनपोर्रो विस्वासम कियना कालम वायका मुन्‍ने मनम मूसाना नियमकुने दोह्‍चि वाटताप मत्‍तोम. इंदके बोर मनकल अय्ते अव नियमकुने दोह्‍चि वाटताप मंतोरो, ओर येसु किरिस्‍तुनपोर्रो विस्वासम कीसि अव नियमकुनाल पलाते अर्रा परंतोर इंचि पेन मनाकु हुपिस्‍ता.
GAL 3:24 इत्‍ते मनम किरिस्‍तुनपोर्रो विस्वासम कीसे नीतिमंतुल्क आयना इंचि, ओर वायनदाका मूसाना नियमकु मनाहाटीं वरोर बेस ऊळगेम कियानोन लेह्का मनाकुन किरिस्‍तुंक दग्‍गेरा कियना कबळ कीसेक मत्‍तां.
GAL 3:25 इंदके किरिस्‍तुन विस्वासम कियना कालम वाता, अदुनहाटीं मनाकु मूसाना नियमता कय्‍दा हिळु मनना अव्‍सरम हिल्‍ले.
GAL 3:26 येसु किरिस्‍तुनपोर्रो विस्वासम कीताहेंका मिमेट अंटोर इंदके पेनदा पिलाल्क आतिर.
GAL 3:27 अद बल्हा इत्‍ते, बोर अय्ते किरिस्‍तुना पोरोल्ते बापतिस्मा येतंतुरो, ओर अंटोर किरिस्‍तुने कलियसोत्‍तुर.
GAL 3:28 इंदके यहुदि, युनानि, जीतागाड, मालक, मांड्‍सा, मुरतळ इल्‍हा बतले परक हिल्‍ले. किरिस्‍तुने मिमेट अंटोर उंदे.
GAL 3:29 मिमेट किरिस्‍तुना लोकुल्‍क आतिर, इत्‍ते अब्राहामुना वंसमतोर आंदिर. दीनहेंदाल पेन अब्राहामुंक हीता पोल्‍ले परकारम, पेन ओन्क हियना आसिर्वादता वारसदार्कगुडा आंदिर.
GAL 4:1 नना वेहानद बतल इत्‍ते, वारसदार बदवेरादाका सिन्‍ना पेडल मनंतोर, अदवेरदाका ओर लोता मालक आसिगुडा जीतागानलेसीं मनंतोर.
GAL 4:2 इत्‍ते, बाबो निरनायम कीता वेला एवनदाका ओर ओन कापाळनोरा आनि दनमता देकरेक कियानोरा कय्‍दा हिळु मनंतोर.
GAL 4:3 अल्‍हेने मनमगुडा सिन्‍ना पेडनलेसीं तेळियवोर्कुम मत्‍तस्के, दुनियाता नियमकुने दोहचि वाटताप अवुना दासुल्क आसि मत्‍तोम.
GAL 4:4 गानि बस्के अय्ते पेन निरनायम कीता वेला एवता, अस्‍के दाना मर्रिन ई दुनियाते लोहता. ओर मूसाना नियम परकारम ताकानोरा लोप्पो उंदि मुरतटा पीटे पुटतोर.
GAL 4:5 बारित्‍ते, मनम पेनदा पिलाल्क आयना इंचि, मूसाना नियमकुने दोह्‍चि वाटताप मत्‍ता मनाकुन लेहलाये पेनदा मर्रि वातोर.
GAL 4:6 मनम पेनदा पिलाल्क आताहाटीं अद मनालोप्‍पो दाना मर्रिना आत्मातुन लोह्ता. अद आत्मा मनालोप्‍पो मंचि पेनदुन, “बाबा! बाबा!” इंचेके केयसेक मनंता.
GAL 4:7 अदुनहाटीं मिमेट इंदके दासुल्क आयिर, गानि पेनदा मर्क आंदिर. मिमेट मर्क आताहाटीं पेन मीकुन दाना वारसदार्कगुडा कीता.
GAL 4:8 दीनकन्‍ना मुन्‍ने मिमेट निजम पेनदुन एरपाट किया हिल्‍लिर, अदुनहाटीं अट्‍टि पेनकुना कय्‍दा हिळु मत्‍तिर.
GAL 4:9 गानि इंदके पेनदुन एरपाट कीतिर. निजम हूळते पेने मीकुन एरपाट कीता. अदुनहाटीं मिमेट दुनियातां अंगळमतव रीति-रिवाजकुने पजोळ्क बारि होंचंतिर? मर्रा मीकु अवुना कय्‍दा हिळे मनना मंताना?
GAL 4:10 मिमेट रोजकु, नेलां, कालाल्क, वर्सां इवुन नोमसेक मंतिर.
GAL 4:11 नना मीवाहाटीं कीता कस्‍टम वट्‍टिदे आंता बारे इंचि नाकु मीवा बारेमते वेर्रे वस्‍सेक मंता.
GAL 4:12 विस्वासुल्‍कुनिटा, नना मीलेसीं नियमकुन नोमवोन आतन, मिमेटगुडा नावालेसीं आम्टु, इंचि मीकुन विनंति कीसेक मंतन. इदवेरादाका मिमेट नापोर्रो बतले अन्‍यायम किया हिल्‍लिर.
GAL 4:13 मुन्‍नेटा मल्का नना वातस्के, ना जीवा बेस मनाहिल्‍ले, अस्‍के मीकु किरिस्‍तुना बेसता कबुर वेहतन. अद मीकु एरपाटे.
GAL 4:14 ना जीवा बेस हिल्वका मीकु कस्‍टम आयिनागानि मिमेट नाकुन सिन्‍ना हूळा हिल्‍लिर, बेस हूळतिर. नाकुन पेनदा दूतालेसीं, येसु किरिस्‍तुनलेसीं बेस हूळतिर.
GAL 4:15 नना निजम वेहंतन, अद वेलाते ना सेवाहाटीं नाक कळ्‍दा अव्‍सरम मंचि मत्‍ते, कळु इंका तेंडसि हियालय मिमेट तयार मत्‍तिर. अच्‍चोन नावापोर्रो पावरम कियिंदिर इंचि नना वेहा परांतन, अय्ते अद कुसि इंदके बेके होत्‍ता?
GAL 4:16 नना मीवातोनि निजम वळ्कताहाटीं मीकु पगातोन आताना?
GAL 4:17 आबद्‍दम पोल्‍लें कराहनोर मीकुन ओरा पट्‍टुने अरहालय वेल्‍लेन कोसिस कीसेक मंतुर. ओरा अद कोसिस मीवा बेसताहाटीं आयो गानि मिमेट ओरा लोप्पो कलियसि मंचि मावाहेंदाल अलग आयना इंचि ओरा विचारम मंता.
GAL 4:18 नना मिहगा मनिना, हिलाकुना गानि बस्‍केळ्‍क बोरन्‍ना बेसता पोल्‍लें कराहते वेल्‍लेने कुसिते ओना पज्जो होनना.
GAL 4:19 ना पिलाल्कनिटा, मीकु बदवेरादाका किरिस्‍तुनलेसीं गुनम वायोनो अदवेरदाका, एरपूरनेंके बल्हा नोप्‍पिं वांतंगो अल्‍हेने नना मीवाहाटीं मर्रा उंदि मल्का तकलिप अरसेक मंतन.
GAL 4:20 मीवा बारेमते नना बतल कीकन नाक तोससेक हिल्‍ले. अदुनहाटीं इंदके नना मिहगा वासि, मीतोनि वेरे तरिकाते वळ्कना इंचि नावा आसे मंता.
GAL 4:21 मूसाना नियमते ताकंतोम इननोर्कुन नना पूसकींतन, अवने बतल रासि मंता मीकु एरपाट मंताना?
GAL 4:22 अब्राहामुंक इव्वुर मर्क मत्‍तुर, वरोर दासिदानकु पुटतोर, इंकावरोर बारे ओना मरमिना मुत्‍तोंक पुटतोर, इंचि दर्मसास्‍त्रमते रासि मंता.
GAL 4:23 दासिदानकु पुटता पेडल इस्माइल, मनकना विचारमताल पुटतोर. आनि मरमिना मुत्‍तोंक पुटता पेडल इसाक बारे पेन हीता पोल्‍ले परकारम पुटतोर.
GAL 4:24 इव पोल्‍लें उंदि उदाहरनलेसीं मंतां. इव रोंड मुत्‍तोह्कु इत्‍ते, पेन लोकुल्‍कुनतोनि कीता रोंड करारकुनालेसीं मंतां. उंदि करार इत्‍ते सिनाइ गुट्‍टाता करार आंदु. ई करारता हेंदाल पुटता पिलाल्क, हाजिरानालेसीं दासुल्क आतुर.
GAL 4:25 हाजिरा अरब देसेमता सिनाइ गुट्‍टालेसीं मंता इनकुंटु, हाजिरा आनि दाना मर्कगुडा सिनाय गुट्‍टातगा हीता आ नियमकुना कय्‍दा हिळे मंतुर, अदुनहाटीं हाजिरा इत्‍ते इंदकेटा येरुसलेमतोरलेसीं आंद.
GAL 4:26 गानि स्वर्गमता येरुसलेम बारे मरमिना मुत्‍तो सारानालेसीं मंता, अद मना विस्वासुल्कुना तल्‍लुर आंदु.
GAL 4:27 दर्मसास्‍त्रमते इल्‍हा रासि मंता: “गोड्‍डुमुर्रा मुरतटुना! निमे बोर्कुन क‍ना हिल्‍लिन, निमे कूस आम. एरपूराना तकलिप आयवादाना, निमे कुसिते केया. बारित्‍ते मुय्दो मत्‍ता मुरतळकन्‍ना, मुय्दो होळसीता मुरतळके वेल्‍लेटुर पिलाल्क मंतुर.”
GAL 4:28 अदुनहाटीं विस्वासुल्‍कुनिटा, मनम मनकल विचारम कीताप आयो गानि पेन करार कीताप इसाकुनालेसीं दाना मर्क आतोम.
GAL 4:29 अस्‍के मनकना विचारमते पुटतोर, पेन करार कीता परकारम पुटतोन बल्हा तकलिप कियुंदुरो अल्‍हेने इंदकेगुडा जर्गसेक मंता.
GAL 4:30 गानि दर्मसास्‍त्रमते बतल रासि मंता? “दासिदानकु पुटता मर्रिंक, मरमिना मुत्‍तोंक पुटता मर्रिनतोनि वारसान हक्‍क दोर्का परो. अदुनहाटीं दासिदान दाना मर्रिन पलाते पेचहट!” इल्‍हा रासि मंता.
GAL 4:31 अदुनहाटीं विस्वासुल्‍कुनिटा, मनम दासिदानोर्कुम आयोम गानि मरमिना मुत्‍तोना पिलाल्‍कुम आंदुम.
GAL 5:1 मनम नियमकुना लोप्पो दासुनलेसीं मनामन्‍नि इंचि किरिस्‍तु मनाकुन अव्टेटाल इळबळिस्तोर. अदुनहाटीं विस्वासमते गट्‍टिगा मंटु, मिमेट नियमकुना बर्वु दासुल्‍कुनलेसीं मर्रा कांजमटु.
GAL 5:2 केंजाट, नना पौलुसुन मीकु वेहसेक मंतन, मिमेट कतना कीसि दर्मसास्‍त्रमता नियम मत्‍ताप ताकंतोम इनानय्ते, मीकु किरिस्‍तुनाहेंदाल बतल पाय्दा आयो.
GAL 5:3 सिराप कतना कीकुत्‍तेने पेनदा मुन्‍ने नीतिमंतुड आंतन इंचि इनकुंचि कतना कीतोर मूसाना पूरा नियमकु मत्‍ताप ताका पींता, इंचि नना मीकु मर्रा उंदि मल्का वेहासेक मंतन.
GAL 5:4 मी लोप्पोटाल बोर अय्ते मूसाना नियम मत्‍ताप ताकसि नीतिमंतुल्क आंतोम इंचि इनकुंचेके मंतिर, मिमेट किरिस्‍तुनाल अलग आतिर, ओना कुर्पाताल लक्‍कु आतिर.
GAL 5:5 बारित्‍ते मनम विस्वासमताहेंदाल पेनदा मुन्‍ने नीतिमंतुल्क आतोम इंचि आसे इरतोम. अदे आसेताहाटीं आत्मा बलमते दाना एदुर हूळसेक मंतोम.
GAL 5:6 येसु किरिस्‍तुनलोप्‍पो कतना किय्‍यिना, कतना कियाकोन्‍ना अद बाता कबळतद आयो, गानि पावरमते कबळ कियना विस्वासमे कबळतद आंद.
GAL 5:7 मिमेट मुन्‍ने बरोसाते बेस बेरस्सेक मत्‍तिर. गानि इंदके मीकुन बोरो आपसेक मंतुर, इंचि सत्‍तेम हर्दे ताकसेक हिल्‍लिर.
GAL 5:8 इद आपाना कबळ मीकुन केयता पेनदद आयो.
GAL 5:9 वेल्‍लेने बेस पिंडिते इच्‍चुर पुल्‍लाटा पिंडि वाटते, पूरा पिंडितुन पुल्‍लागा कीसि पोहंता इद मनाकु एरपाटे.
GAL 5:10 नना कराहता निजम पोल्‍लें मत्‍ताप मिमेट ताकंतिर इंचि नाकु सामिनाहेंदाल पूरा बरोसा मंता. मीवा विस्वासमतुन तप्‍सानोर बोरन्‍ना आयिर ओर्क तप्‍पाकोंटा सिक्‍सा दोर्कंता.
GAL 5:11 विस्वासुल्‍कुनिटा! ननागिंटा कतना कियना इंचि वेहासेक तिरियसि मत्‍ते, नाकुन यहुदिल्क वेल्‍लेन तकलिप कियाकोन्‍नेर, येसु सामि क्रुसुनपोर्रो हीता मोक्‍कुता हेंदाले बस्‍केळ्‍क पिस्सना पिस्वर मंता इंचि वेहताहेंकेन ओर्क होंग वाता.
GAL 5:12 मीकुन कतना कियागोम इंचि तिप्‍पल्‍क कियानोर, कुद आडिगुनलोरलेसीं आते बेस मनंता.
GAL 5:13 गानि विस्वासुल्‍कुनिटा! पेन मीकुन नियमकुना लोप्पोटाल इळबळिस्ता. अदुनहाटीं नना वेहासेक मंतन, मिमेट मीवा पापि विचाराल्कुन पूरा कियालय मीकु विचारम वाताप ताकानायो गानि पावरमते वरोंक-वरोर सहायम कीसेक मंदना.
GAL 5:14 बारित्‍ते मूसाना अन्‍नि नियमकु उंदे आदेसते कलियसि मंतां. अद बतल इत्‍ते, “मीवद मिमेट बच्‍चोन पावरम कीकुंतिर, अचोने पावरम इंकावरोनगुडा कीम्‍टु.”
GAL 5:15 गानि मिमेटगिंटा नय्‍कु बल्हा उंदांक-उंदि कस्कसेक, इग्‍गिस तिंचेके मनंतंगो अल्हा मनानय्ते उसारते मंटु! उंदि रोज मिमेट वरोनहेंदाल वरोर नासडेम आया परांतिर.
GAL 5:16 नना वेहानद बतल इत्‍ते, पेनदा आत्मा मीकुन ताकिस्ताप ताकट, अल्हा ताकते मीवा मनसुना पापि विचाराल्कुनाल लक्‍कु मनांतिर.
GAL 5:17 बल्हा इत्‍ते, मनकना पापि विचाराल्क, पेनदा आत्माता विचाराल्कुंक अड्‍डम मनंतां अल्हेन पेनदा आत्माता विचाराल्क मनकना पापि विचाराल्कुंक अड्‍डम मनंतां. इव रोंडुना विचाराल्क बस्‍केने कलियों. अदुनहाटीं मिमेट बतल अय्ते कींतोम इंतिर, अद किया परिर.
GAL 5:18 गानि मिमेट पेनदा आत्मा ताकिस्ताप ताकते, मिमेट मूसाना नियमकुना कय्‍दा हिळु हिल्‍लिर.
GAL 5:19 मनकना पापि कबाह्‍क मनाकु एरपाटे मंतां. अव इव आंदुं: बोगमतनम, अपवित्र कबाह्‍क, सिग्गु हिल्वा कबाह्‍क, बोम्मा पूजें, होदें, वरोंक-वरोर हय्साकोंटा मनमळ, जगडाल्‍क, कळ्‍क पोत्‍तमळ, होंग, नाके गावाले इनमळ, लोकुल्‍कुना नड्‍डुम पुटपाट कियमळ, वेरे गेंग तयार कियमळ, कल्‍लु उनमळ, विद्‍दुरतनम इसोंटव इंका वेल्‍लेन पोल्‍लें मंतां. इसोंटा कबाह्‍क कियानोर पेनदा राज्येमते वारसदार आया परुर. इद पोल्‍ले नना मीकु मुन्‍नेने वेहतन, अल्‍हेने इंदकेगुडा वेहासेक मंतन.
GAL 5:22 पेनदा आत्माता कबाह्‍क इल्‍हा मंतां: पावरम कियमळ, कुसिते मनमळ, सांतिते मनमळ, ओप्के पीसि मनमळ, दया कियमळ, मंचितनम, इमानदारते मनमळ, मेत्‍तगा मनमळ, बसोंटा परिक्‍सा वायिनागानि अव्टे अर्राकोंटा सततुन आपकुनमळ.
GAL 5:23 इल्‍हा ताकते इवुंक अड्‍डम बदे नियम हिल्‍ले.
GAL 5:24 बोर अय्ते येसु किरिस्‍तुन विस्वासम कीतोर मंतुर, ओर ओरा पापि विचाराल्कुन, पापि आसेन क्रुसुनपोर्रो वेलाड वाटताप अवुंक लक्‍कु आतुर.
GAL 5:25 मनमगिंटा पेनदा आत्माते पिसानय्ते, आत्मा वेहतापे ताककोम.
GAL 5:26 इंकावरोर होंगुंक वायाकोंटा, गर्रा कियाकोंटा, कळ्‍क पोत्‍तकोंटा मनम मंदकोम.
GAL 6:1 गानि विस्वासुल्‍कुनिटा! मीलोप्‍पो बोरन्‍ना पापम कीते, पेनदा आत्माते ताकानोर मिमेट होंगुंक वायाकोंटा ओनगा होंचि ओन बेस समजांचि, सत्‍तेम हर्दे तटु. अल्‍हेने मिमेटगुडा असोंटा परिक्‍साते अर्रामन्‍नि इंचि, उसारते मंटु.
GAL 6:2 मिमेट तकलिपते वरोंक-वरोर सहायम कीम्‍टु, अल्हा कीतेने किरिस्‍तु हीता नियमतुन पूरा किया परांतिर.
GAL 6:3 बारित्‍ते, बोरे आयिर पेद्‍दातनम हिलाकुना गानि पेद्‍दातनम हुप्‍संतुर, असंटोर ओरद-ओरे पसांचकुंचेके मंतुर.
GAL 6:4 हरेक मनकल ओना सतता कबाह्‍कुन कुद्‍दु परिक्‍सा कीसि हूळना, वेरेतोना कबाह्‍क बल्हा मंता इंचि हूळना आयो. अस्‍के ओना कबाह्‍क बेस मत्‍ते ओर सतता कबाह्‍कुन हूळसि कूस आयावच्‍चु.
GAL 6:5 बारित्‍ते बोरे आयिर, ओना जिम्मेदारि ओरे एतमळ गावाले.
GAL 6:6 बोर अय्ते पेनदा पोल्‍ले करियतुर, ओर अन्‍नि बेसता वस्‍तुक ओन्क कराहतोंक पंचि हियमळ गावाले.
GAL 6:7 पेनदुक बतल तेळियो इंचि नाळेम कीसि पसांचमटु, मिमेट बवय्ते वीतकिर, अवने कोयकिर.
GAL 6:8 बोर अय्ते ओना पापि गुनम वेहताप वीतंतोर, ओर नासडेमता पंटा कोय्‍यंतोर. गानि बोर अय्ते आत्मा वेहताप वीतंतोर, ओर आत्माताहेंदाल बस्‍केळ्‍क पिस्सना पिस्वरता पंटा कोय्‍यंतोर.
GAL 6:9 मनम उंदेतीर बेसता कबळ कीते, पेन निरनायम कीता वेला एवतस्‍के मनाकु दाना पाय्दा दोर्कंता. अदुनहाटीं मनम नेरबळाकोंटा बेस कबळ कियाना.
GAL 6:10 अय्ते मरि, मनाकु बल्हा मोका दोर्कते अल्हा अंटोराहाटीं, एक्‍कोते-एक्‍को मना विस्‍वासुल्‍कुनाहाटीं बेस सहायम कीकोम.
GAL 6:11 हुळाट, इद सिट्‍टि पेद्‍दा-पेद्‍दा अक्‍सराल्कुने नावा कय्‍दे मीकु रास्संतन.
GAL 6:12 नालुरा मुन्‍ने नना बेसतोन इंचि हुप्‍सानोर, ओरे मीकुन कतना कियागोम इंचि बल्‍मि कींतुर. इल्‍हा बारि कींतुर इत्‍ते, किरिस्‍तुना क्रुसताहेंका वायाना तकलिपताल तपिच्‍कुननाहाटीं ओर इल्‍हा कींतुर.
GAL 6:13 बोर अय्ते कतना कीसि मंतुर, ओरगुडा मूसाना नियमते ताकुर. गानि ओर वेहताप मिमेट कतना कीते ओर्क पेद्‍दातनम दोर्कंता इंचि, ओर मीकु इल्‍हा वेहांतुर.
GAL 6:14 गानि नना अय्ते, मना सामि येसु किरिस्‍तु क्रुसुनपोर्रो हातोर इंचि विस्वासम कींतन, दीन पोर्रेने नाकु पूरा विस्वासम मंता. आ क्रुसुनहाटींगे दुनियाता पोल्‍लें नाक कलियों, नावा पोल्‍लें ओर्क कलियों.
GAL 6:15 बारित्‍ते कतना किय्‍यिना, कतना कियाकोन्‍ना बतल पाय्दा हिल्‍ले. पेन मनालोप्‍पो पूना पिस्वर हीता अदे पाय्दातद आंदु.
GAL 6:16 अदुनहाटीं, बचुटुर अय्ते ई नियमते ताकंतुर अचटूर्कुंक आनि पेनदुन विस्वासम कीता अंटोर इस्राएल लोकुल्‍कुंक सांति, दया दोर्किकांटी.
GAL 6:17 इंदकेटाल आबद्‍दम कराहना पोल्‍लें केंजसि मिमेट नाक मर्रा तकलिप हियमटु. येसु सामिना पोल्‍लें वेहताहाटींगे नना नावा मेंदुलपोर्रो देब्बाना बर्रां पीसि तिरियसेक मंतन.
GAL 6:18 विस्वासुल्‍कुनिटा! मना सामि येसु किरिस्‍तुना कुर्पा मी अंटोरतोनि मन्‍निकांटी. आमीन.
EPH 1:1 नना पौलुसुन, पेनदा इच्‍चा परकारम, किरिस्‍तु येसुना प्रेरितुन आतन. इपीसि सहरते मनना किरिस्‍तु येसुन विस्वासम कियाना पेनदा लोकुल्‍कुंक नना इद सिट्‍टि रासेक मंतन.
EPH 1:2 मना पेनबाबानहेंदाल आनि सामि येसु किरिस्‍तुनाहेंदाल मीकु कुर्पा, सांति दोर्किकांटी.
EPH 1:3 मना सामि येसु किरिस्‍तुना पेनबाबांक दन्यवाद. ओर किरिस्‍तुनाहेंदाल, मना बक्‍तिकु संबंदिस्‍तव स्वर्गमते मनना अन्‍नि आसिर्वादाल्‍क मनाकु हीसीतोर.
EPH 1:4 अद बल्हा इत्‍ते, मनम पेनदा नदरते पवित्र आनि दोसेम हिलाकोंटा मंदना इंचि, पेन ई दुनियातुन पुट्‍सकामुन्‍नेन अद मनाकुन किरिस्‍तुना लोप्पो पेरकुत्‍ता.
EPH 1:5 पेनदा पावरमता पिलान परकारम, येसु किरिस्‍तुनाहेंदाल मनम दाना पिलाल्क आयाना इंचि अद मनाकुन मुन्‍नेन पेरता. ई पिलान पेनदा इच्‍चा परकारम मत्‍ता इंचि पेनदुक इल्‍हा कियमळते कुसि दोर्कता.
EPH 1:6 दाना पावरमगल्‍ला मर्रि मनाहाटीं कीतदुन पीसि, अद मनापोर्रो लेक्‍का परवच्‍चोन कुर्पातुन पुक्‍कटते कुम्मरिच्‍ता. अदुनहाटीं मनम पेनदा महिमाता स्‍तुति कीकोम.
EPH 1:7 किरिस्‍तु ओना सतता नेत्‍तुरतुन पोंगागोटताहेंका मना पापाल्क मापि आसि मनाकु मुक्‍ति दोर्कता. इल्‍हा पेन दाना वेल्‍लेन कुर्पातुन मनापोर्रो कुम्मरिच्‍ता.
EPH 1:8 अद मना बुद्‍दिक, तेल्‍विक हालानाल दाना दया हियमळ जर्गता.
EPH 1:9 पेन मुन्‍नेने निरनायम कीता, दाना इच्‍चा परकारम मत्‍ता मर्ममता पिलानतुन, मनाकु किरिस्‍तुनाहेंदाल कुल्‍ला कीसि वेहता.
EPH 1:10 अद बतल इत्‍ते, पेन दाना पिलान परकारम इन्‍कुत्‍ता वेला एवतस्‍के, स्वर्गमते मत्‍तव, बूमिपोर्रो मत्‍तव अन्‍निगुडा उंदगा कीसि अवुन किरिस्‍तुना अदिकारम हिळु हियमळ गावाले.
EPH 1:11 पेन अन्‍निटवुन दाना इच्‍चा मत्‍ताप पिलान कीसि ताकसंता. अदे पिलान परकारम मनाकुन पेनदा लोकुल्‍क इंचि मुन्‍नेने किरिस्‍तुना लोप्पो पेरमळ जर्गता.
EPH 1:12 मनम बोर अय्ते मुन्‍नेटाले किरिस्‍तुनपोर्रो आसे इरतोम, दाना महिमातुन तल्‍सकुनागोम इंचि दाना विचारम मंता.
EPH 1:13 मीकु मुक्‍ति हीता बेसता कबुर सत्‍तेम आंद अदुन मिमेटगुडा केंजतिर. केंजसि किरिस्‍तुना लोकुल्‍क आयानाहाटीं ओनपोर्रो विस्वासम इर्तिट. अस्‍के पेन हीता पोल्‍ले परकारम पवित्र आत्माता सिक्‍का मीपोर्रो वाटमळ जर्गता.
EPH 1:14 पेन बोर्कुन अय्ते अस्‍कुत्‍ता ओरा मुक्‍तिहाटीं, दाना पवित्र आत्मातुन वारसान हक्‍कता उंदि इसारालेसीं मनागा इरता. अदुनहाटीं लोकुल्‍क दाना महिमातुन तल्‍सकुंतुर.
EPH 1:15 अदुनहाटीं बस्केटाल अय्ते नना, सामि येसुना पोर्रोटा मीवा विस्वासम बारेमते आनि पवित्र लोकुल्‍कुन मिमेट बेस पावरमते हूळांतिर इत्‍तदुना बारेमते केंजतन, अस्‍केटाल नना नावा पारतनाते मीकुन मति कीसेके, मीवाहाटीं पेनदुक बस्‍केळ्‍क दन्यवाद वेहासेक मनंतन.
EPH 1:17 अचोने आयाका मना सामि येसु किरिस्‍तुना पेन, इत्‍ते महिमाते निंडिस मत्‍ता पेन बाबल, ओना बारेमते मिमेट इंका बेस एरपाट कियानाहाटीं ओना पवित्र आत्माहेंदाल मीकु बुद्‍दि आनि बेस तेल्‍पिचकुननाहाटीं तेल्वि हिय्यिर इंचि पारतना कीसेक मंतन.
EPH 1:18 अल्‍हेने, पेन मीकुन बद आसेताहाटीं केयता? दाना पवित्र लोकुल्‍कुंक अद हिय्याना वारसानहक्‍कताल दोर्काना महिमाता दनम बल्हा मंता? इदुना बारेमते तेळियानाहाटीं मीवा मनसुना वेळसि एल्‍गागोट्‍टि.
EPH 1:19 अचोने आयाका किरिस्‍तुन हामुरताल मर्रा जीवाते तेहाचि स्वर्गमते दाना तिना बाजुंक उपिच्‍नेंके पेन दाना पेद्‍दा ताकततुन हुपिस्‍ता. अय्ते मनम किरिस्‍तुन विस्वासम कियानोरम उंदि आयालयगुडा अदे पेद्‍दा ताकत दानागा मंता. पेनदा ताकत बस्‍केन मारो, इदुन पेन मीकु तेळियागोट्‍टि इंचि नना विनंति कीसेके मंतन.
EPH 1:21 इद कालमतेन आयो गानि, मुन्‍ने वायाना कालमतेगुडा किरिस्‍तुनलेसीं कदर आनि अदिकारम मत्‍तोर बोरे मन्‍नोर. इल्‍हा किरिस्‍तु दुनियाते मनना राज्येम कियाना अदिकारिल्‍क, वेरे अदिकाराल्‍क, कळ्‍कुंक दिस्‍सुवव अन्‍नि ताकतकु आनि इंका अन्‍निटवुंकन्‍ना पेद्‍दोड आंदुर.
EPH 1:22 पेन इव अन्‍निटवुन किरिस्‍तुना काल्कुना हिळु कीसि, इव अन्‍निटवुनपोर्रो ओन्क अदिकारम हीता. हीसि ओरे अन्‍निटवुना मुक्‍यल आयागोम इंचि ओन कलिसियाकु हीसीता.
EPH 1:23 कलिसियातोर इत्‍ते किरिस्‍तुना मेंदुल आंदुर. ओना मेंदुल्तुन ओर अन्‍नि तीरकुने, अन्‍नि पोल्‍लेने पुरागा निह्‍चि अन्‍निटतुन पुरागा कियानोरगुडा ओरे आंदुर.
EPH 2:1 मुन्‍ने मिमेट तप्‍पु कबाह्‍क कीसि, पापाल्क कीसि आत्माते हासि मत्‍तिर. गानि मीकुनगुडा किरिस्‍तु जीवाते तेहातोर.
EPH 2:2 मिमेट मुन्‍ने इद दुनियातोर ताकाना रीति-रिवाजकुन पीसि ताकिंदिर. पोर्रो वळिते तिरियना देय्याल्कुना मुक्‍यल बल्हा ताकिस्‍ते अल्हा ताकिंदिर. इंदकेळ्‍कगुडा पेनदा पोल्‍ले परकारम ताकवोर लोप्पो अद आत्मा कबळ कीसेके मंता.
EPH 2:3 मनम अंटोरमगुडा मुन्‍ने मना मेंदुल्ता आसेन परकारम पिस्‍सुंदुम, मेंदुल आनि मनसुना इच्‍चां पुरागा कियानाहाटीं कराब विचाराल्क कीसेके, ओरा नड्‍डुम ओरालेसीं ताकतोरमे आंदुम. पेनदुन बरोसा कियवोरा गुनम मत्‍ताप मना गुनमगुडा मत्‍ताहेंका, मनम पेनदुक होंग वायाना पिस्वर पिस्सेक मत्‍तोम.
EPH 2:4 गानि पेन बच्‍चोनो दयागल्‍लद आंद, अद दाना पेद्‍दा पावरमते मनाकुन पावरम कीता.
EPH 2:5 मनम तप्‍पु कबाह्‍क कीसि हासि मत्‍तास्‍के मनाकुन अद किरिस्‍तुनतोनि जीवाते तेहाता. पेन कुर्पा कीताहेंकेन मीकु मुक्‍ति दोर्कता.
EPH 2:6 अचोने आयाका किरिस्‍तु येसुनतोनि मनाकुन जीवाते तेहाचि, स्वर्गमते ओनतोनि मनाकुनगुडा उपिस्ता.
EPH 2:7 इंका किरिस्‍तु येसुन मनाहाटीं लोहचि मनाकुन वेल्‍लेन पावरम कीता. इल्‍हा पेन मनापोर्रो लेक्‍का हिल्‍वच्‍चोन कुर्पा कीता, इदुन वायाना कालमते अंटोर्क हुप्‍सानाहाटीं पेन अल्हा कीता.
EPH 2:8 पेन कुर्पा कीताहेंकेन मिमेट किरिस्‍तुनपोर्रो विस्वासम कीतिर. मीवा विस्वासमतुन पीसि मीकु मुक्‍ति दोर्कता. इदंता मीवा कय्‍दाल जर्गतद आयो गानि पेन हीता वरम आंदु.
EPH 2:9 इद कबाह्‍कुनाहेंदाल दोर्कतद आयो, अदुनहाटीं बोरे पोंगुडतनम वेह्‍कुना मन्‍नि.
EPH 2:10 बारित्‍ते, पेने मनाकुन पुट्‍टिस्‍ता. मनम किरिस्‍तु येसुनलोप्‍पो बेसता कबाह्‍क कियाना इंचि अद मनाकुन पुटिस्ता. अव बेसता कबाह्‍क बव आंदुंगो अवुन पेन मुन्‍नेने तयार कीसि इरता.
EPH 2:11 मिमेट यहुदि आयवोर इंचि मीवा कतना आयाहिल्‍ले. गानि बोरद अय्ते कतना मनकानाहेंदाल आतानो, ओर मोमोट कतना आतोरम, इंचि वेह्‍कुंतुर. मीकुन बारे, कतना आयवोर, इंचि कारेड्‍डाल्‍क कींतुर. अदुनहाटीं मिमेट बल्हा मनिंदिरो अदुन मति कीम्‍ट.
EPH 2:12 अद कालमते मिमेट किरिस्‍तुनलोप्‍पो कलियका मत्‍तिर, मिमेट इस्राएल लोकुल्‍क आयवाहेंका मीकु पेनदा नियमाल्‍क दोर्का हिल्‍लें, करार्क कियाना बारेमते पेन हीता पोल्‍लेताल मीकुन लक्‍कु इरमळ जर्गता. मिमेट इद दुनियाते बदे आसे हिलुवा, पेन हिलुवा पिस्वर पिस्सेक मत्‍तिट.
EPH 2:13 मुन्‍ने मिमेट पेनदागटाल लक्‍कु मत्‍तिर. गानि किरिस्‍तुना नेत्‍तुरहेंदाल इंदके मिमेट किरिस्‍तु येसुना लोप्पो पेनदुक दग्‍गेरा आतिर.
EPH 2:14 बारित्‍ते, यहुदिल्क आनि यहुदि आयवा मना नड्‍डुम मनाकुन वेरे कियानाहाटीं पगातद उंदि गूरे मत्‍ता, अदुन कूलाह्‍चि मनाकुन इव्वुर्कुन कल्‍पतोर किरिस्‍ते आंदुर. ओनाहेंदाले मनाकु सांति दोर्कता.
EPH 2:15 यहुदिर्कुन आनि यहुदि आयवोर्कुन इव्‍वुर्कुनगुडा उंदगा कल्‍पिसि वरोर पूना मनकन पुट्‍टिस्‍ताप, अंटोर्कुन उंदि कीतोर. इल्‍हा वेरे-वेरे आसि पिसानोर्कुन कल्‍पतोर. इल्‍हा ओर्कुन कल्‍पानाहाटीं ओर ओना मेंदुल्तुन हीसि आदेसाल्‍कुना बव अय्ते यहुदिल्कुना नियमाल्‍क मत्‍तांगो, अवुन नासडेम कीतोर. आनि मनाकु सांतितुन हीतोर.
EPH 2:16 पजा ओर ओना जीवा क्रुसुनपोर्रो हीसि मना नड्‍डुम मत्‍ता पगातुन नासडेम कीतोर. इल्‍हा वेरे-वेरे आसि मत्‍ता मनाकुन उंदि मेंदुल कीसि पेनदा लोप्पो कल्‍पतोर.
EPH 2:17 किरिस्‍तु इद दुनियाते वासि, पेनदागटाल लक्‍कु आसि मत्‍ता मीकु आनि दग्‍गेरा मत्‍ता ओर्कु सांतिता बेसता कबुरतुन वेहातोर.
EPH 2:18 बारित्‍ते ओनाहेंदाले मनम इव्वुरमगुडा उंदे पवित्र आत्माते पेनबाबानगा होना परांतोम.
EPH 2:19 अदुनहाटीं मिमेट इंदके परायतोर, वेरे देसेमतोर आयिर, गानि पवित्र लोकुल्‍कुनतोनि दंटाते कूळसि मननोर आनि पेनदा लोता लोकुल्‍क आंदिर.
EPH 2:20 अचोने आयाका प्रेरितुल्क आनि पेनदा कबुरतोरा पुनादिपोर्रो येसु किरिस्‍तुन मूला बंडालेसीं इर्सि दोहता लोह्‍कु मिमेटे आंदिर.
EPH 2:21 पूरा लोन ओनाहेंदाले तयार आंता आनि सामिना लोप्पो उंदि पवित्र गुळि आयालय बेरसेकेन होंचंता.
EPH 2:22 अव्टे मिमेटगुडा पेनदा आत्माहेंदाल पेनदुक मनालय उंदि आसि जेगा तयार कीसेक मंतिर.
EPH 3:1 मिमेट यहुदिल्क आयिर. अय्नागानि मीकु किरिस्‍तु येसुना बारेमता बेसता कबुर वेहताहाटीं नना पौलुस, जेलने बंद मंतन.
EPH 3:2 पेन दाना कुर्पाता बारेमते मीकु वेहना जिम्मेदारि नाकु हीता इंचि मिमेट केंजसे मंदकिट.
EPH 3:3 पेनदा सत्‍तेम मोदाला मर्ममते मत्‍ता, गानि अदुन इंदके पेन नाकु बैय्यरा कीसि हुपिस्‍ता. इदुना बारेमते मीकु नना मुन्‍ने गिचच्‍चो रासि मत्‍तन.
EPH 3:4 अदुन मिमेट हदुवकिर अस्‍के किरिस्‍तुना बारेमता आ मर्ममता पोल्‍लें नाक बल्हा तेळियतां इंचि मिमेट एरपाट कीकिट.
EPH 3:5 आ मर्ममता सत्‍तेमतुन पवित्र आत्माहेंदाल पेन दाना प्रेरितुल्कुंक आनि दाना कबुरतोर्कुंक इंदके बल्हा वेहतानो, अल्हा अस्‍केटा कालमता लोकुल्‍कुंक वेहमळ जर्गाहिल्‍ले.
EPH 3:6 आ मर्ममता पोल्‍ले बतल इत्‍ते, यहुदि आयवोर लोकुल्‍क बेसता कबुर केंजसि किरिस्‍तु येसुनपोर्रो विस्वासम इरतुर, अदुनहेंदाल ओरगुडा यहुदि विस्वासुल्‍कुनतोनि कलियसि येसुनगा दोर्काना हक्‍कुने वारसदार्क आतुर. इल्‍हा ओर उंदि मेंदुलतोर आनि पेन हीता पोल्‍लेते हिस्‍सादार्क आतुर.
EPH 3:7 पेन दाना कुर्पाता वरम परकारम अद नाकु हीता ताकतहेंदाले नना ई बेसता कबुर वेहाना सेवाकुन आतन.
EPH 3:8 पवित्र लोकुल्‍कुना लोप्पो नना अंटोर्कन्‍ना सिन्‍नोन आंदुन. अयना पेन नापोर्रो कुर्पा कीता. अद बतल इत्‍ते, किरिस्‍तुनगा लेक्‍का हिलुवा आसिर्वादाल्‍क मंतां, अदुना बारेमते यहुदि आयवोरगा होंचि वेहना वरम पेन नाकु हीता.
EPH 3:9 अन्‍निटतुन पुट्‍टिस्‍ता पेन, मोदोलताल मर्ममते इर्सि मत्‍ता दाना पिलानतुन बल्हा पुरागा कीता, इत्‍तदुना बारेमते हरेक मनकंक कुल्‍ला-कुल्‍ला कीसि वेहनाहाटीं नाकुन पेरता.
EPH 3:10 इंदके पोर्रो वळिते राज्येम कियाना सक्‍तिंक आनि अदिकारम ताकिचानवुंक पेन दाना बच्‍चुंगो तीरकुना तेल्‍वितुन कलिसियाहेंदाल हुप्‍संता.
EPH 3:11 मुन्‍नेटाले पेन इल्‍हा कियाना विचारमते मत्‍ता. इंदके मना सामि किरिस्‍तु येसुनाहेंदाल पुरागा कीता.
EPH 3:12 किरिस्‍तुनपोर्रो विस्वासम इरताहाटीं, इंदके वेरियाकोंटा दैरनेमते पेनदा दग्‍गेरा होना पर्रांतोम.
EPH 3:13 मीहाटीं नाकु आयाना तकलिपकुन हूळसि मिमेट पजोळ्क आयमट इंचि मीकु विनंति कीसेक मंतन. नना अर्रना तकलिपकुनाहेंदाल मीके कदर दोर्कंता.
EPH 3:14 इदुनाहाटींगें नना पेनबाबाना मुन्‍ने टोंगरां ऊनसि पारतना कीसेके मनंतन.
EPH 3:15 सिराप ओनाहेंदाले स्वर्गमते आनि बूमिपोर्रो मनना हरेक कुटुंबकु पोरोल इरमळ जर्गता.
EPH 3:16 पेनबाबाल ओना वेल्‍लेन कदरगल्‍ला महिमाता दनमतुन पीसि, ओना आत्मातोनि मीवा पिस्वरतुन लोप्पोटाल इरगा गट्‍टिगा किय्‍यिर इंचि पारतना कीसंतन.
EPH 3:17 दीनहेंदाल मीवा विस्वासम परकारम किरिस्‍तु मीवा मनसुने जेगा पीसि मनंतोर. अस्‍के मरा हिह्‍कु बल्हा बूमिते लोप्‍पोळ्‍क होंचि मरातुन गट्‍टिगा पीसि मनंतंगो, अल्हेन मिमेटगुडा पेनदा पावरमता पुनादिपोर्रो हिह्‍कुनलेसीं गट्‍टिगा निल्‍सि मंदकिट.
EPH 3:18 पेनदा लोकुल्‍कुनतोनि मीकुगुडा किरिस्‍तुना पावरमता नेरवुन, पोड्‍गुन, एत्‍तुन आनि लोतुन तेल्‍पिचकुनना ताकत दोर्कि.
EPH 3:19 अचोने आयाका, मना तेल्‍वितोनि मनम तेल्‍पिचकुना पर्रोम, असोंटा किरिस्‍तुना पावरमतुन तेल्‍पिचकुंचि, पेनदा गुनमते पुरागा निंडिस होंटु, इंचि पारतना कीसेके मंतन.
EPH 3:20 इंदके पेन मना पिस्वरता लोप्पो दाना ताकत परकारम कबळ कीसेकेन मंता. इच्‍चोने आयो, मनम तल्‍कानदुंकन्‍ना, मनम विचारम कियानादानकन्‍ना एक्‍को, अद मनालोप्‍पो कबळ किय्‍या पर्रंता.
EPH 3:21 कलिसियाते किरिस्‍तु येसुनाहेंदाल बस्‍केळ्‍क पीळि-पीळिनदाका पेनदुके कदर दोर्कि, आमीन.
EPH 4:1 मीकुन पेन दाना लोकुल्‍क आयानाहाटीं केयता, अय्ते दाना लोकुल्‍क बल्हा अय्ते पिसानो अल्हा मिमेट पिस्‍सट इंचि, सामिनाहाटीं जेलुंक होत्‍तोन नना मीकु विनंति कीसंतन.
EPH 4:2 दीना अर्तम बतल इत्‍ते, मिमेट सादा सिंपल मनना, बोर बतल इनिनागानि ओप्के पीसि मनना, वरोंक-वरोर ओर्सकुंचेके पावरमते पिस्‍सट.
EPH 4:3 पेनदा पवित्र आत्मा मीकुन सांतिते उंदि कीता. अय्ते आ सांतिता एकतातुन मिमेट बेस कापाळसि इर्राना कोसिसते मंटु.
EPH 4:4 अंटोर विस्‍वासुल्‍कुनद उंदे मेंदुल आंद. अव्टे मनना पवित्र आत्मागुडा उंदे आंद. अल्हे अंटोर विस्‍वासुल्‍कुनगुडा पेन उंदे आसेते पिस्‍सालय केयता.
EPH 4:5 मना अंटोरा सामि वरोरे, मनम अंटोरम उंदे विस्वासम कींतोम आनि बापतिस्मागुडा उंदे बापतिस्मा एततोम.
EPH 4:6 मनाकु अंटोर्क वरोरे पेनबाबाल मंतोर, ओरे मना अंटोरा पोर्रो मंतोर, ओर मना नड्‍डुम मंतोर, अंटोरा नड्‍डुम ओरे मंतोर.
EPH 4:7 गानि किरिस्‍तु, वेरे-वेरे कबाह्‍क कियानाहाटीं, मनाव्टेटाल वरो-वरोंक ओना पूरा मनसुनाल उंद-उंदि विसेस कुर्पाता वरम हीतोर.
EPH 4:8 अदुनहाटींगे ओना बारेमते दर्मसास्‍त्रमते इल्‍हा रासि मंता: “ओर पोर्रो एत्‍तु एक्‍किसि होत्‍तोर, जेलने मत्‍तोर्कुन दोहचि ओतोर, मनकालोर्कुंक वराल्‍क हीतोर.” इंचि रासि मंता.
EPH 4:9 ओर, “पोर्रो एक्‍किसि होत्‍तोर” इत्‍ता पोल्‍लेता अर्तम बतल? दीना अर्तम, ओर बूमिता हिळुदाकागुडा रेय्‍सि वातोर इत्‍तापे गदा!
EPH 4:10 बोर अय्ते हिळु रेय्‍सि वातोरो, ओरे बतले तक्‍को मनाकोंटा अन्‍निटतुन पुरागा कियानाहाटीं अन्‍नि मब्‍बुकुंकन्‍ना एत्‍तु जेगाते एक्‍किसि होत्‍तोर.
EPH 4:11 ओर, पेनदा सेवाहाटीं पवित्र लोकुल्‍कुन तयार कियालय आनि किरिस्‍तुना मेंदुललेसीं मनना कलिसियातोर्कुन बेस बक्‍तिते, बरोसाते बेर्सागोटनाहाटीं, इच्‍चुर्कुन प्रेरितुल्क, इच्‍चुर्कुन पेनदा कबुरतोर, इच्‍चुर्कुन बेसता कबुर वेहानोर आनि इंकिच्‍चुर्कुन बारे पास्‍टर आनि कराहनोर इंचि पेर्सि ओर्कु वराल्‍क हीतोर.
EPH 4:13 दीनहेंदाल मनम अंटोरम पेनदा मर्रिना पोर्रोटा विस्वासम आनि ओना बारेमता जानकारिते उंदासि मनंतोम. इंका बद्‍दे पोल्‍लेते आयि किरिस्‍तु बल्हा अय्ते बतले तक्‍को हिलाकोंटा मत्‍तोर, अल्‍हेने मनमगुडा मना पर्रंतोम.
EPH 4:14 इल्‍हा मत्‍ते बतल आंता इत्‍ते, बोर अय्ते आबद्‍दम, तप्‍पुड बोदां कराहचि मनाकुन विस्वासमता हरदाल तप्‍सालय हूळांतुरो, असंटोरा पोल्‍लेने अर्राकोंटा, वळिकु हीके-हेके आयाकोंटा मनंतोम. इल्‍हा मुन्‍ने मनम सिना पिलाल्कुनलेह्का आयोम.
EPH 4:15 इंका पावरमते निजम वळ्कसेक, मना तल्‍लालेसीं मनना किरिस्‍तुना बेसतनम मनालोप्‍पो बेर्सि, मनम हरेक पोल्‍लेते ओनालेसीं आयागोम.
EPH 4:16 मेंदुल्ते मनना कील्‍कु-नर्राल्‍कु मेंदुल्ता वेरे-वेरे बागाल्‍कुन बल्हा अय्ते उंदान्‍कु-उंदि अंटिच्‍चि इर्रांतंगों, अल्हे किरिस्‍तुना मेंदुल आसि मत्‍तोर्कुन ओरे अंटिच्‍चि इर्रंतोर. मेंदुल्ता हरेक बागम, मेंदुलतोनि कलियसि अवुना कबाह्‍क अव बरोबर कीतेने मेंदुल बेस बरोबर मनंता. अल्‍हेने कलिसियातोरगुडा वरोन-वरोर पावरमते हूळसेक, ओर्क पेन हीता कबाह्‍कुन बरोबर कीते, ओर पेनदापोर्रोटा बरोसाते बेस बेर्संतुर.
EPH 4:17 अदुनहाटीं सामिना पोरोलते नना मीकु विनंति कीसि वेहानद बतल इत्‍ते, यहुदि आयवोर बल्हा ओरा बत्‍तक ओज्जुवा विचाराल्कुन परकारम ताकंतुरो, अल्हा मिमेट इंदकेटाल मर्रा ताकमट.
EPH 4:18 ओरा विचाराल्क बत्‍ताके ओज्‍जाकोंटा आतां. ओर्कु तेल्वि तक्‍को मत्‍ताहाटीं ओरा मनसु बंडालेसीं गट्‍टिपळसोत्‍ता. अदुनहाटीं ओर पेनदुन तेल्‍पिचकुना हिल्‍लुर. इल्‍हा पेन हिय्याना पूना पिस्वरताल ओर्कुन लक्‍कु कियमळ जर्गता.
EPH 4:19 ओर्कु सिग्गु इत्‍तद बतले हिलुवाहेंका अन्‍नि तीरकुना कराब कबाह्‍क कियाना लालचतेन ओर कूस मनंतुर.
EPH 4:20 गानि मिमेट किरिस्‍तुना बारेमते करियतस्‍के इसोंटा पोल्‍लें करिया हिल्‍लिर.
EPH 4:21 मिमेट निजमे किरिस्‍तुना बारेमता पोल्‍लें केंजतिर. अचोने आयाका येसुना बारेमता सत्‍तेमतुन, बल्हा मत्‍तद अल्हे करियतिर.
EPH 4:22 अय्ते मीवा पडाना पिस्वरते मत्‍ता गुनाल्‍कुन इंदके तेंडसि पोहाट. अव गुनाल्‍क मीलोप्‍पो कराब कबाह्‍क कियाना आसे पुट्‍टिचि मीकुन पाडगीसि पोहंतां.
EPH 4:23 मिमेट बतल अय्ते करियतिरो अदुन पीसि, मीवा आत्माते पूना गुनाल्‍क वासि मिमेट बेस एदगट.
EPH 4:24 पूना गुनाल्‍कुन पेन दानालेह्‍का सत्‍तेमते तयार कीता, पवित्र कीता. अदुनहाटीं मीवा पडाना गुनाल्‍कुन होळसिसि पेन हियाना पूना गुनाल्‍कुने ताकट.
EPH 4:25 मनम अंटोरम उंदे मेंदुल्ता वेरे-वेरे बागाल्क आताहाटीं, इंदकेटाल वरोनतोनि-वरोर आबद्‍दम वळ्‍कमळ होळसिसि, हरेक मनकल सत्‍तेमे वळ्‍कगोम.
EPH 4:26 होंग आम्टु गानि, पापम कियमट. पोळ्‍द अर्राका मुन्‍नेन मीवा होंग सल्‍लारगोम.
EPH 4:27 मीवा पिस्वरते देय्यमतुन होळिया हियमट.
EPH 4:28 बोर अय्ते मुन्‍ने दोंगातनाल्‍क कियुंदुर, ओर इंदके अदुन होळसियना. सतता कय्‍कुने कस्‍टम कीसि, बेस तरिकाते कमांचना. अस्‍केन, अव्‍सरम मत्‍तोर्क ओर सहायम किया पर्रंतोर.
EPH 4:29 मीवा तोळ्‍दाल बस्‍केन कराब पोल्‍ले पेय्‍सानायो. केंजानोर्कुंक कुर्पा दोर्किसि, ओरा बक्‍तिते पायदा वायाना बेसता पोल्‍लेंगे पेय्‍सगोम. ओरा अव्‍सरमतुन पीसि मिमेट वळ्‍काना.
EPH 4:30 मुक्‍तिता रोजुनदाका, “ईर ना लोकुल्‍क” इंचि पेन मीपोर्रो उंदि सिक्‍का तंचि इर्ता. अदुनहाटीं मिमेट दाना पवित्र आत्माकु दुक्‍कम वायाकोंटा पिस्‍सट.
EPH 4:31 मिहगा मनना हेळाह्‍ना गुनम, पगा, होंग, वरगेयना बुद्‍दि, अपमानम कियाना बुद्‍दि इसोंटा अन्‍नि कराब गुनाल्‍क-पोल्‍लेन मिहागटाल लक्‍कु कीम्‍टु.
EPH 4:32 वरोनपोर्रो वरोंक जीवा नोसि बेस दया हुपिच्‍चेक, पेन बल्हा किरिस्‍तुनाहेंदाल मीवा तप्‍पुकुन मापि कीता, अल्हेन मिमेटगुडा वरोना तप्पुक वरोर मापि कीम्‍टु.
EPH 5:1 मिमेट पेनदा पावरमगल्‍ला पिलाल्क आंदिर, अदुनहाटीं पेन कीताप मिमेटगुडा कीम्‍ट.
EPH 5:2 किरिस्‍तु मनाकुन पावरम कीसि मनाहाटीं पेनदा मुन्‍ने मोक्‍कु आसि, पेनदुक नच्‍चना गुगलेमलेसीं ओनद ओर बलि आतोर. अदे पावरमते मिमेटगुडा ताकट.
EPH 5:3 मीवा नड्‍डुम बोगमतनमता बारेमते, अन्‍नि तीरकुना अपवित्र पोल्‍लेना बारेमते इंका आस्तिक संबंदिस्‍ता पोल्‍लेना बारेमते आयि, बस्‍केने उद्‍दुलिं जर्गानायो. बारित्‍ते पवित्र लोकुल्‍क इसोंटवुना बारेमते उद्‍दुलिंगुडा किय्युर.
EPH 5:4 अचोने आयका रोता पोल्‍लें, तेल्वि तक्‍को पोल्‍लें, कराब कारेड्‍डाल्‍क मिमेट कियानायो, मीकु अव सोबांचों. मीवा तोळ्‍दाल सिराप पेनदुक दन्यवाद इनना पोल्‍लेंगे पेय्‍सगोम.
EPH 5:5 बारित्‍ते, बोगमतनम कियानोर, अपवित्र मनकल हिलाकोंटे लालचि मनकल (लालच कियमळ इत्‍ते, बोम्माना पूजें कीतापे आंता) ईरकु बोर्के आयि, किरिस्‍तुना आनि पेनदा राज्येमते वारसाहक्‍क हिल्‍ले, इंचि मीकु तेळियसे मंता.
EPH 5:6 उत्‍तुत्‍ता पोल्‍लें वळ्‍किसि मीकुन बोरन्‍ना पोक्‍कते अरहानायो हुळाट. बारित्‍ते इसोंटा कबाह्कुनहेंकेन पेन दाना आदेस परकारम ताकवोरपोर्रो होंग हुपसंता.
EPH 5:7 अदुनहाटीं मिमेट इसोंटा लोकुल्‍कुनतोनि पोत्‍तु कियमट.
EPH 5:8 उंदास्के मिमेट हीकटते पिस्सेक मत्‍तिर. गानि सामिनपोर्रो बरोसा इरताहाटीं इंदके मीकु पेनदा वेलगु दोर्कता. अदुनहाटीं वेलगुने पिस्‍सानोरा संतानमलेह्का ताकट.
EPH 5:9 वेलगुने पिसते सिराप अन्‍नि तीरकुना बेसतनम, नीतितनम आनि निजम इवे दिसंतां.
EPH 5:10 इंका बतल कीते सामिंकु कुसि दोर्कार, इंचि सामिन कूस कियाना विचारमतेन बस्‍केळ्‍क मंटु.
EPH 5:11 अचोने आयका, बताके ओज्जुवा हीकटता कबाह्‍कुने मिमेट पोत्‍तु आयमट. गानि असोंटा कबाह्‍कुन पलाते अरहट.
EPH 5:12 बारित्‍ते मक्‍किस कियना ओरा कबाह्‍कुना बारेमते वळ्‍कमळगुडा पेद्‍दा सिगलसेटे आंदु.
EPH 5:13 गानि इसोंटा पलाते अरता अन्‍नि कबाह्‍क वेलगुने दिस अर्रंतां. अन्‍निटवुन दिस्‍सानाल कियानद वेलगु आंद.
EPH 5:14 अदुनहाटींगे मरि, “अरे निद्राते मनानोना, हातोराव्टेटाल तेदसि उद्‍दा. किरिस्‍तुना वेलगु नीपोर्रो मेर्संता,” इंचि रासि मंता.
EPH 5:15 अदुनहाटीं मिमेट बल्हा ताकंतिर? परमेर्का कीसि हुळाट. बुद्‍दि हिल्वोनलेसीं ताकमट, बुद्‍दि मत्‍तोनलेसीं ताकट.
EPH 5:16 इव रोजकु बेसतव आयों, इंचि दोर्कता हरेक मोकातुन बेसताहाटीं वाळकुंटु.
EPH 5:17 अदुनहाटीं सामिना इच्‍चा बतल मंतानो, बेस एरपाट कीसि ताकट, बुद्‍दि हिल्‍वोरलेसीं मनमट.
EPH 5:18 इरगा कल उंचि ऊंगसेके मनमट, कल रिम्माते मीहेंदाल पापम जर्गा पर्रंता. कल उंचेके मनानदानकन्‍ना पवित्र आत्माते निंडिसि मंटु.
EPH 5:19 इंकावरोनतोनि वरोर बस्‍केळ्‍क बक्‍ति पाटां, पेनदुन तल्‍सकुनना पाटां, पेनदा पाटां पारसेके, सामिन मीवा मनसुने बस्‍केळ्‍क मति कीसेके मंटु.
EPH 5:20 अन्‍नि पोल्‍लेनाहाटीं, मना सामि येसु किरिस्‍तुना पोरोलते मना पेनबाबांक बस्‍केळ्‍क दन्यवाद कीसेके मंटु.
EPH 5:21 मनसुने किरिस्‍तुना वेर्रे इर्सि वरोंक-वरोर लोंगिस मंटु.
EPH 5:22 मरमिं आता मुरताह्‍कुनिटा, बल्हा अय्ते मिमेट सामिंकु लोंगिस मंतिटो, अल्हेन मिमेट मीवा मुय्‍दुर्कुंकगुडा लोंगिस मंटु.
EPH 5:23 बारित्‍ते, किरिस्‍तु बल्हा कलिसियाता तल्‍लालेसीं मंचेके कलिसियातुन ताकसंतोर, अल्हेन मीवा मुय्दो मीकु तल्‍लालेसीं मंतोर. कलिसियातुन पिसागोटनोरगुडा किरिस्‍ते आंदुर.
EPH 5:24 कलिसियातोर अंटोर बल्हा किरिस्‍तुंक लोंगिस मनांतुर, अल्‍हेने, मुत्‍तोह्‍कगुडा अन्‍नि पोल्‍लेने अवुना मुय्‍दुर्कुंक लोंगिस मनागोम.
EPH 5:25 अय्ते ए मरमिं आता मांडसुरिटा! किरिस्‍तु बल्हा कलिसियातुन पावरम कीसि, दानाहाटीं ओना सतता जीवातुन हीतोर, अल्हेन मिमेटगुडा मीवा मुत्‍तोह्‍कुन पावरम कीम्‍टु.
EPH 5:26 अस्‍के दान किरिस्‍तु, पेनदा पोल्‍लेतोनि सक्‍कगा साप नोर्सि पवित्र कींतोर.
EPH 5:27 अस्‍के अद पवित्र आनि दोसेम हिलाकोंटा आंता. पजा दान बदे कसुरता डाग हिलुवा, पापमता मच्‍चा हिलुवा इंका बदे तप्‍पु हिलुवा जगाजगा मेर्सना कलिसिया कीसि, ओना दग्‍गेरा निल्‍हाकुंतोर.
EPH 5:28 अल्‍हेने मुय्दुर्कगुडा ओर ओरा मेंदुल्तुन बल्हा पावरम कींतुर, अल्हेन ओर ओरा मुत्‍तोह्‍कुन पावरम कियगोम. सतता मुत्‍तोन पावरम कियानोर, सतातुनगुडा पावरम कींतोर.
EPH 5:29 बोरे मनकल बस्‍केने ओना सतता मेंदुल्तुन हय्साकोंटा मनाहिल्‍लोर. दान्क बदुल ओर दान बेस ऊळगेम कींतोर. अल्हेन कलिसियातोर मनम अंटोरम किरिस्‍तुना मेंदुल्ता वेरे-वेरे बागाल्क आंदुम. अदुनहाटीं किरिस्‍तु ओना कलिसियातुन बेस हूळकुंतोर.
EPH 5:31 इदुना बारेमते दर्मसास्‍त्रमतेगुडा, “इदुनहाटींगे वरोर मांड्‍सा ओना तल्‍लुर-बाबोन होळसि, ओना मुत्‍तोनतोनि कलियसि मनांतोर, ओर इव्वुर उंदे मेंदुल आसि पिस्संतुर,” इंचि रासि मंता.
EPH 5:32 इद अय्ते उंदि पेद्‍दा मर्मम आंद. अयना नना अय्ते किरिस्‍तु आनि कलिसियाता बारेमते वेहचंतन.
EPH 5:33 बल्हैना बेसे! मीवाव्टेटाल हरेक मांड्‍सा, मीवद मिमेट सतातुन बच्‍चोन पावरम कींतिरो, अचोने मीवा मुत्‍तोनगुडा पावरम कीम्‍टु. अल्‍हेने मुत्‍तोगुडा मुय्दोना कदर कियगोम.
EPH 6:1 पिलाल्‍कुनिटा, सामिना पोल्‍ले परकारम, मिमेट मीवा तल्‍लुर-बाबो वेहताप ताकट, इदे मीवाहाटीं बेस.
EPH 6:2 बारित्‍ते, “मिमेट मीवा तल्‍लुर-बाबोना कदर कीम्‍टु, अस्‍के मीकु अन्‍नि बेसे जर्गंता आनि बूमिपोर्रो मीवा आव्‍सुगुडा बेरसंता,” इल्‍हा दर्मसास्‍त्रमते रासि मंता. पेन हियाना पोल्‍ले कलियसि मनना मोदाटा आदेस इदे आंद.
EPH 6:4 बाबालोरिटा! मिमेट मीवा पिलाल्कुंक होंग वाया हियमट. दान्क बदुल सामि वेहता हरदुन, पोल्‍लेन ओर्क कराहसेके ओर्कुन बेस पोस कीम्‍टु.
EPH 6:5 दासुल्‍कुरिटा! इद बूमिपोर्रोटा मीवा मालकुल्‍कुना पोल्‍लेपोर्रो मंटु. मिमेट किरिस्‍तुना कदर कीताप, ओरदगुडा कपटम हिलुवा मनसुनाल कदर कीसेके ओर्कु वेरियसि ताकट.
EPH 6:6 सिराप लोकुल्‍क कूस आयगोम इंचि हुप्‍सालय सेवा कियानोरलेसीं मिमेट कियमट. दानकु बदुल, पेनदा इच्‍चा परकारम किरिस्‍तुना सेवा कियाना दासुल्‍कुनलेसीं मनसु तासि कबळ कीम्‍टु.
EPH 6:7 मिमेट कियना सेवा मनकानद आयो गानि सामिना सेवा आंद इन्कुंचि कुसिते कीम्‍टु.
EPH 6:8 कबळ कियानोर दासुडे आयिर, दासुड आयवोर आयिर! ओर कियाना बेस कबळतुन पीसि ओन्क सामिनाहेंदाल इनाम दोर्कंता, इद मिमेट मति इर्राट.
EPH 6:9 मालकुरिटा! मिमेट मीवा दासुल्‍कुन वेरहुळ-बेदरिच्‍चुळ कियमट, ओर्कुन बेस हूळकुंटु. मीवा इव्वुरागुडा मालक स्वर्गमते मंतोर. ओर सिन्‍ना-पेद्‍दा हूळोर, इद मति इर्कुंटु.
EPH 6:10 आकिरते नना वेहानद बतल इत्‍ते, सामिनतोनि ओना पेद्‍दा ताकतते उंदासि मंटु.
EPH 6:11 देय्यमता ताकतता मुन्‍ने वेरियाकोंटा नित्‍तालय मिमेट पेन हीता अन्‍नि आयुदाल्कुन वाळकुंटु.
EPH 6:12 मना लडाइ मनकालोरा विरोदमते आयका, हीकट राज्येमतुन ताकसानोरा विरोदमते, हीकट राज्येमता अदिकारिल्कुना विरोदमते, हीकट राज्येमते मनना सक्‍तिना विरोदमते आनि मब्बुने दिस्‍सना दुस्‍ट सक्‍तिना विरोदमते मंता.
EPH 6:13 इंचि आ सेड्‍डा रोजकु वातस्के वेरियाकोंटा नित्‍तालय मिमेट पेन हीता अन्‍नि आयुदाल्कुन पीकुंटु. अस्‍के मिमेट कियानद अन्‍नि पुरागा कीसि आकिरदाकागुडा नित्‍तिसि मना परकिट.
EPH 6:14 अदुनहाटीं मिमेट सत्‍तेमतुन नडि पट्‍टालेह्‍का दोह्‍चि, नीतितुन इनुम अंगिलेह्का मेंदुल्क केरसि,
EPH 6:15 सांति हियना बेसता कबुरतुन वेहना तयारिता हेरपुह्कुन कालकुंक केरसि तयारते मंटु.
EPH 6:16 इव अन्‍निंकन्‍ना मुक्‍केमातद बतल इत्‍ते, लडाइ कियनेंके मिहगा डालुनलेह्का विस्वासम मनगोम. अस्‍के देय्यमताहेंदाल पोतसेके वायना अन्‍नि बानाल्कुन मिमेट आपा परकिट.
EPH 6:17 इंका मुक्‍तितुन हेल्‍मेटलेह्का तल्‍लक कळाह्सि, आत्माता कसेर इत्‍ते पेनदा पोल्‍लेतुन कसेरलेह्का कय्‍दे पीकुंटु.
EPH 6:18 अन्‍नि वेलाने पवित्र आत्माते बस्‍केळ्‍क पारतनां, विनंतिं कीसेके मंटु. इंका अंटोर विस्‍वासुल्‍कुनाहाटीं आगाकोंटा बस्‍केळ्‍क पारतना कीसेके मंटु.
EPH 6:19 इंका नना बस्के-बस्के अय्ते पेनदा पोल्‍लें कराहलय तोड्‍डि तेहांतन, अस्‍के-अस्‍के नाकुंदि बेसता कबुर दोर्कालय नावाहाटींगुडा पारतना कीम्‍टु. दीनहेंदाल नना पेनदा बेसता कबुरते मत्‍ता मर्ममतुन वेरियाकोंटा वेरेतोर्क वेहा परकन.
EPH 6:20 दीनाहाटींगे नना कयकुंक बेडीं वाटसि मत्‍ता पेनदा कबुरतोन आतन. दीनहेंदाल नना बल्हा अय्ते वळ्‍कागोमो अल्हा वळकालय नाकु दैरनेम दोर्कानाहाटीं पारतना कीम्‍टु.
EPH 6:21 तुकिकुस इनना वरोर पावरमगल्‍ला दादाल मंतोर. ओर सामिना वरोर बेस विस्वासमगल्‍ला सेवक आंदुर. नना इगे बल्हा-बतल मंतन इंचि अन्‍नि पोल्‍लें मीकु वेहानुर.
EPH 6:22 मावा परिस्तिति बल्हा मंता इद मीकु तेळियागोम आनि मी अंटोरा जीवांक दैरनेम, सांति दोर्कगोम, इंचि नना ओन मिहगा लोहतन.
EPH 6:23 अंटोर विस्वासुल्कुंक पेनबाबाल आनि सामि येसु किरिस्‍तुनहेंदाल, सांति आनि विस्वासमतोनि पावरम दोर्कि.
EPH 6:24 मना सामि येसु किरिस्‍तुन बोर अय्ते आगाकोंटा पावरम कींतुर, ओर अंटोरतोनि पेनदा कुर्पा हमेसा मन्‍निकांटी.
PHI 1:1 पिलिपिया सहरते येसु किरिस्‍तुना लोप्पो मनना पेनदा अंटोर पवित्र लोकुल्‍कुंक, पेद्‍दाल्कुंक आनि अदिकारिल्कुनाहाटीं नना पौलुस, नावा दंटातोर तिमोति, मोमोट येसु किरिस्‍तुना सेवाकुल्‍कुम इद सिट्‍टि रासेक मंतोम.
PHI 1:2 मना पेनबाबानाहेंदाल, मना सामि येसु किरिस्‍तुनहेंदाल मीकु कुर्पा, सांति दोर्कि.
PHI 1:3 मीकुन नना बस्के-बस्के अय्ते मति कींतन, अस्‍के-अस्‍के पेनदुक दन्यवाद कींतन.
PHI 1:4 बेसता कबुर केंजसि विस्वासम कीता रोजुनाल अय्ते इदवेरदाकागुडा बेसता कबुरतुन वेहना नावा कबळते मिमेट नाकु तोळ मंतिर. अदुनहाटीं नना बस्के-बस्के अय्ते पारतना कींतन अस्‍के-अस्‍के वेल्‍लेन कुसिते मीवाहाटीं पारतना कींतन.
PHI 1:6 मीवा नड्‍डुम इच्‍चोन बेसता कबळतुन पेने सुरुव कीता. इद कबळ पुरागा आयनदाका, इत्‍ते येसु किरिस्‍तु मर्रा तिरियसि वायना रोजुनदाका पेने इद कबाटुन ताकिच्‍चेक इर्रंता इंचि नाकु पुरागा बरोसा मंता.
PHI 1:7 नना मीवा बारेमते इल्‍हा विचारम कियमळ बेसे आंद. बारित्‍ते, नना जेलने मत्‍तस्के आयि, बेसता कबुर वेहचि अव्टे मत्‍ता निजमतुन हुपिच्‍चि कापाळसेके तिरियतस्के आयि, इव अन्‍निटवुने पेनदाहेंदाल कुर्पा दोर्कता, अवुने नावातोनि मिमेटगुडा तोळ मंतिर. अदुनहाटीं मिमेट इत्‍ते नाकु वेल्‍लेन पावरम!
PHI 1:8 किरिस्‍तु येसुनलेसीं ननागुडा मीकुन पावरम कींतन, इंचि नावा जीवा मीकुन हूळानाहाटीं बस्‍केळ्‍क तनलाळंता. दीनकु कुद्‍दु पेने गवाइ मंता.
PHI 1:9 मीवा पावरम बेस बेरस्सेक मनना, पेनदाहेंदाल मीकु बुद्‍दि, मंचि-सेड्‍डातुन एरपाट कियना तेल्वि बेरसना इंचि नना बस्‍केळ्‍क पेनदुक पारतना कीसेक मनंतन.
PHI 1:10 दीनहेंदाल मिमेट मंचि-सेड्‍डातुन एरपाट कीसि बेस पिस्वर पिसकिट. अस्‍के किरिस्‍तु वातस्के मिमेट अंटोरगुडा ओना मुन्‍ने नीतिमंतुल्क आनि दोसेम हिलवोर आसि निलकिट.
PHI 1:11 मीवा पिस्वरते येसु किरिस्‍तु मत्‍ताहाटीं, मिमेट बस्‍केळ्‍क नीति कबाह्के कीसेक मंदना. दीनहेंदाल पेनदा पोरोल, कदर वेल्‍लेन बेरस्सेक दांता.
PHI 1:12 नावा विस्वासुल्‍कुनिटा! मिमेट उंदि पोल्‍ले अर्तम कीकुंटु, नावा पिस्वरते जर्गता अन्‍नि गटनां किरिस्‍तुना बारेमता बेसता कबुर बेरसालये सहायम आतां.
PHI 1:13 इल्‍हा जर्गताहेंकेन, किरिस्‍तुनाहाटींगे नाकुन जेलने वाटतुर इंचि राजवाडाते कावेल कियना अंटोर सिपाइल्कुंक आनि अगा मत्‍ता अंटोर लोकुल्‍कुंक तेळियसोत्‍ता.
PHI 1:14 इचोने आयका, नना जेलने मत्‍ताहेंका सामिनाहाटीं वेल्‍लेन मंदि विस्वासुल्कुंक दैरनेम दोर्कता. ओर बोर्के वेरियाकोंटा वेल्‍लेन दैरनेमते किरिस्‍तुना बारेमता पोल्‍लेतुन वेहालय तयार आतुर.
PHI 1:15 अव्टेटाल इच्‍चुर कळ्‍क पोत्‍सि, नावा पोर्रोटा पगा तीरिचकुनालय किरिस्‍तुना बारेमते वेहचंतुर, इंका इच्‍चुर बारे बेस उद्‍देसमते वेहचंतुर.
PHI 1:16 बेस उद्‍देसमते वेहानोर, नावा पोर्रोटा पावरमहेंका अल्हा कींतुर. बारित्‍ते येसु किरिस्‍तुना बारेमता बेसता कबुर सत्‍तेम आंद इंचि हुप्‍सालये नना इगे मंतन इंचि ओर्क एरपाट मंता.
PHI 1:17 गानि नापोर्रो कळ्‍क पोत्‍सि, किरिस्‍तुना बारेमता पोल्‍लेतुन वेहना लोकुल्‍क मात्रम नना जेलने मननेंके नाकु इरगा तकलिप आयागोम इंचि, ओरा सतता पाय्दाहाटीं अल्हा कीसंतुर.
PHI 1:18 अयना बतल आयो. बेस उद्‍देसमते आयि, कराब उद्‍देसमते आयि, अद बल्हे आयि! किरिस्‍तुना बारेमतेन वेहमळ जर्गसंता इंचि नाकु वेल्‍लेन कुसि आसंता. आनि नना इल्हेन कुसिते मनंतन.
PHI 1:19 बारित्‍ते मीवा पारतनां अल्हेन येसु किरिस्‍तुना आत्माता सहायमतोनि नाकु वायना ई कस्‍टाल्के नाकुन तप्‍पाकोंटा पलाते पेच्‍हंतां इंचि नाकु एरपाट मंता.
PHI 1:20 नाकु बसोंटा परिस्तिति वायिना सिग्गु अर्रोन, नना इदवेरादाका दैरनेमते किरिस्‍तुना सेवा कीतन, अल्‍हेने इंदकेगुडा कीसेक मंतन. नना हायिना-पिस्सिना नावा पिस्वरताहेंदाल किरिस्‍तुना पोरोल्तुन अंटोर कदर कियगोम इंचि नना वेल्‍लेन आसेते एदुर हूळसेक मंतन.
PHI 1:21 बारित्‍ते नना पिस्‍संतन इत्‍ते किरिस्‍तुनाहाटींगे. नना हायिनागानि किरिस्‍तुनगेन दांतन इंचि हामुरगुडा नावा पायदातदे आंद.
PHI 1:22 इव रोंडुन नड्‍डुम नना इरगा अचाह्ताप आतन. नना पिस्सि मत्‍ते पेनदाहेंदाल इनाम दोर्कनलायक बेस कबळ किया परंतन. इल्‍हा नना हामुरतुन पेरकाना मरि पिस्वरतुन पेरकाना नाकु बतले तेळियसेक हिल्‍ले. नाक अय्ते इद मेंदुलतुन होळसि किरिस्‍तुनगेन होंचि मंदकन बारे अनपिच्‍चंता. बारित्‍ते इदे बच्‍चोनो बेस.
PHI 1:24 गानि नना मीवाहाटीं, पिस्सि मनमळ वेल्‍लेन अव्‍सरम.
PHI 1:25 नना पिस्सि मंचि, मिमेट विस्वासमते बेस गट्‍टि पळना इंका मीवा पिस्वरते मीकु बेस कुसि दोर्कनाहाटीं सहायम कीसेके मीवातोने मनंतन इंचि नाकु पूरा बरोसा मंता.
PHI 1:26 इल्‍हा नना बस्के अय्ते मर्रा मिहगा वांतनो, अस्‍के सामि नावाहेंदाल बतल-बतल अय्ते कीतोर अवुन केंजसि मिमेट येसु किरिस्‍तुन वेल्‍ले कदर हीकिट.
PHI 1:27 बद बतले आयि, मीवा पिस्वर मात्रम किरिस्‍तुना बेसता कबुरते मत्‍ताप मनना. अस्‍के बतल आंता इत्‍ते, नना मिहगा वायिना, वायाकोन्‍ना मिमेट अंटोर उंदे आत्माते गट्‍टिगा बेस मंतिर आनि बेसता कबुरहाटीं अंटोर कलियसि पिस्सेक मंतिर इंचि वेरेतोरा हेंदाल नना केंजना.
PHI 1:28 बदे पोल्‍लेक आयि, बेसता कबुर वेहते तकलिप कियानोर्कुंक मिमेट वेरियमट, दैरनेमते मंटु. मीवा दैरनेमतुन हूळसि, मोमोट नासडेम आंतोम, पेन ओर्कुन कापाळंता इंचि तकलिप कियानोर्कुंक तेळियंता. इद पेनदा कबळे आंद.
PHI 1:29 सिराप किरिस्‍तुन विस्वासम कियालये आयो गानि ओनाहाटीं तिप्‍पल्‍क अर्रालयगुडा पेन किरिस्‍तुनहेंदाल मीकु आसिर्वाद हीता.
PHI 1:30 नना अरता तिप्पल्कुन मिमेट हूळतिर, इंदके केंजसंतिर आनि मिमेटगुडा अदे तिप्पल्कुने मंतिर.
PHI 2:1 किरिस्‍तुनतोनि कलियसि मीवा दैरनेम बेर्सता, ओना पावरमहेंदाल मीकु समादानम दोर्कता, मिमेट ओना आत्माते उंदि आतिर, इंका ओना दया मीतोनि मंता.
PHI 2:2 इव अन्‍नि पोल्‍लें निजमे गदा! अय्ते मीवा अंटोरा विचाराल्क बस्‍केळ्‍क उंदे मन्‍निंकांटी, मिमेट वरोंक-वरोर उंदच्‍चोने पावरम कीम्‍टु, मीवा अंटोरद उंदे मनसु, उंदे उद्‍देसम मनना. इल्‍हा पिसतिरित्‍ते नना निजमते पुरागा कूस मनंतन.
PHI 2:3 सतता पाय्दाताहाटीं आयि, पेद्‍दातनम हुप्‍सालय आयि बदे कबळ कियमट. गानि वेरेतोरा कदर कीसेके मनम कुद्‍दु ओरा मुन्‍ने सिन्‍नोड आसि मनना.
PHI 2:4 बोरे आयिर, सिराप सतता इस्‍टाल्कुना बारेमतेन आयो, गानि वेरेतोरा बारेमतेगुडा विचारम कियगोम.
PHI 2:5 येसु किरिस्‍तुना गुनम मत्‍तापे मीवा गुनमगुडा मनना.
PHI 2:6 ओर अय्ते कुद्‍दु पेने आंदुर, अयना पेनदालेसीं मनना विचारमगुडा किया हिल्‍लोर.
PHI 2:7 दान्क बदुल ओर ओनगा मत्‍ता अदिकाराल्कुन होळ्‍सीतोर. होळसिसि वरोर दासुनलेसीं आसि मनकन रूपमते इद बूमिपोर्रो पुटतोर.
PHI 2:8 इल्‍हा मनकना रूपमते पुटसि ओनद ओर सिन्‍नगा कीकुत्‍तोर. इच्‍चोने आयका पेनबाबाना इच्‍चातुन पूरा कियालासि क्रुसुनपोर्रो जीवातुनगुडा हीतोर.
PHI 2:9 अदुनहाटीं पेन ओन अन्‍निटवुंकन्‍ना पेद्‍दोड कीसि ओना पोरोल्तुन अन्‍नि पोरोलींकन्‍ना पेद्‍दा कीता.
PHI 2:10 बारित्‍ते, मब्बुन पोर्रोटव, बूमि पोर्रोटव, बूमि हिळतव अन्‍नि येसुना मुन्‍ने टोंगरां ऊनसि ओन्‍के मोळ्‍काना.
PHI 2:11 इंका “येसु किरिस्‍ते सामि आंदुर,” इंचि हरेक नाल्के ओप्कुनगोम. इल्‍हा पेनबाबांक कदर दोर्कना इंचि अल्हा कीता.
PHI 2:12 अदुनहाटीं नावा पावरमगल्‍ला विस्वासुल्‍कुनिटा! नना मीकु वेहनद बतल इत्‍ते, नना मीवातोनि मत्‍तस्के बस्‍केळ्‍क मिमेट नना वेहतापे ताकतिट. इंदके नना मीवातोनि हिलाकोन्‍ना गानि अस्केटदानकन्‍ना एक्‍को जेगर्ताते सामिना आदेसकुन पीसि ताकट. पेनदा इच्‍चा परकारम बतलन्‍ना कीकुनगोम इंचि मीवा मनसुने वाता इत्‍ते, अद इच्‍चा पेने मीवा मनसुने वाटता. अदुन पूरा कियालय गावाले मत्‍ता ताकतगुडा मीकु पेने हींता. इंचि पेनदुन बेस कदर कीसेके, वेर्रे कोद्‍दिगा पेन हीता मुक्‍ति परकारम मत्‍ता कबाह्‍क कीसेके पिस्‍सट.
PHI 2:14 बद कबळ कियिनागानि गुल्‍गाकोंटा, जगडम कियाकोंटा कीम्‍टु.
PHI 2:15 अस्‍के मिमेट बतले दोसेम हिलवा बेस लोकुल्‍क आकिट. तप्‍पुड कबाह्‍क किय्‍याना ई दुनियाता लोकुल्‍कुना नड्‍डुम आनि पापि लोकुल्‍कुना नड्‍डुम मिमेट बतले दोसेम हिलवोर आसि पेनदा मर्क-मियाह्कुनलेसीं मंदकिट. इंका मिमेट हीकटते पिस्वर पिस्सना लोकुल्‍कुना नड्‍डुम पोत्‍तना वेडसीलेसीं दिसकिट.
PHI 2:16 पिस्वर हियना पेनदा पोल्‍लेतुन गट्‍टिगा पीसि ताकट. इदुना हेंदाल किरिस्‍तु वायाना रोजुने, मीवाहाटीं नना कीता कस्‍टम, वितलाटा एर्तम आयाहिल्‍ले इंचि कुसिते वेहंतन.
PHI 2:17 पेनदा सेवा कियनाहाटीं मिमेट उंदि मोक्‍कुनलेह्का आसि वेल्‍लेन तिप्‍पल्‍क अरसंतिर. इदंता मीकु पेनदापोर्रो वेल्‍लेन विस्वासम मत्‍ताहेंका आसंता. अदुनहाटीं इसोंटा मीवा मोक्‍कुनतोनि नावा जीवा हीसि नेत्‍तुर वारागिच्‍चालयगुडा नना पजोळ्क होन्‍नोन, गानि वेल्‍लेन कूस मनंतन.
PHI 2:18 इल्‍हा मिमेट इरगा कूस मंटु, मीवातोनि ननागुडा कूस मनंतन.
PHI 2:19 तिमोतिन मिहगा बिरानेन लोहकन इंचि नना सामि येसुनाहेंदाल आसे पळसंतन. ओर मीवा बारेमता कबुर नाकु वासि वेहनुर, अस्‍के नाकु इरगा कुसि आयार.
PHI 2:20 मीवा बेसताहाटीं मनसुनाल चिंता कियानोर नहगा ओन्क तप्‍पा वेरे बोरे हिल्‍लोर.
PHI 2:21 अंटोर ओर-ओरा कबाह्‍कुने मुळ्‍गिसि मंतुर, येसु किरिस्‍तुना बारेमते विचारम कियानोर बोरे हिल्‍लुर.
PHI 2:22 गानि तिमोति असंटोर आयोर. वरोर मर्रि बाबनतोनि कलियसि कबळ कीताप, ओर बेसता कबुर वेहना सेवाते नावातोनि इमानदारिते कस्‍टपळतोर. ओना गुनम बसंटदो मीकु बेस एरपाट.
PHI 2:23 जेलनाल नाकुन होळसींतुरो, होळसुरो इद पोल्‍ले तेळियतारित्‍ते ओन नना मीहेके लोहकन इंचि आसे पळसंतन.
PHI 2:24 ननागुडा बिरानेन मिहगा वांतन, इंचि सामिनपोर्रो नाकु पुरागा बरोसा मंता.
PHI 2:25 नाकु अव्‍सरम अरतस्के सहायम कियनाहाटीं मिमेट इपपरदिसुन नाहेके लोहतिर. बेसता कबुर वेहनेंके वरोर सिपाइन लेह्का ओर नावा तोळ मत्‍तोर आंदुर, ओर नावा तम्मुनसंटोर आंदुर. गानि ओन मर्रा मीहेके लोहना इंचि नावा मनसु मंता. मीकुन हूळालय ओर इरगा गाबर आसंतोर. ओर बिमार अरता संगति मिमेट केंजतिर इंचि ओन्क तेळियतस्के ओर वेल्‍लेन नाराज आतोर.
PHI 2:27 ओर बिमार अर्सि हायानाल आसि मत्‍तोर इद निजमे! गानि पेनदा दया ओनपोर्रो मत्‍ताहेंका ओन्क बतल आयाहिल्‍ले. ओर बिमारताल बेस आयाकोंटा मंचि मत्‍ते, नावा दुक्‍कम इंका बेरसि मनवळ इंचि पेन नावा पोर्रोगुडा दया हुपिच्‍चि ओन बेस कीता.
PHI 2:28 अय्ते ओन मिहगा बल्हैना लोहना इंचि नना विचारम कीतन. ओर मिहगा वाते मिमेट ओन हूळसि कूस आकिट, अस्‍के नावा चिंतागुडा तक्‍को आंता.
PHI 2:29 मिमेट नावाहाटीं किया पर्वा सेवातुन ओर ओना जीवाक तेग्गिचि पूरा कीतोर. किरिस्‍तुना कबळतुन पूरा कियनाहाटीं ओर हायालय आसि मत्‍तोर. अदुनहाटीं ओर मिहगा वातस्के मावा दंटाता विस्वासि इंचि सामिना पोरोलते मिमेट ओन बेस कल्‍पकुंटु. ओनालेसीं सेवा कियना हरेक मनकना बेस कदर कीम्‍टु.
PHI 3:1 विस्वासुल्‍कुनिटा! आकिरते नना इंकुंदि मल्का वेहांतन, पेनदापोर्रोटा मीवा विस्वासमते मिमेट कूस मंटु. रासता पोल्‍लेंगें ऊके-ऊके रासालय नाक बतल तकलिप आयो. बारित्‍ते इव पोल्‍लें मीकुन तप्‍पुड बोदानाल कापाळंतां.
PHI 3:2 अदुनहाटीं तप्‍पुड कबाह्‍क कियना नयकस्‍केल गुनमतोरगटाल जेगर्ता मंटु. कतना रिवाज कीतेन नीतिमंतुल्क आंतुर इंचि ओर कराहंतुर.
PHI 3:3 गानि मनकालोरा कबाह्कुनपोर्रो बरोसा इरताहेंका मनाकु मुक्‍ति दोर्कता इंचि आयो. येसु सामि मनाकुन पिसागोटतोर इंचि ओन्क मनम बस्‍केळ्‍क कदर हींतोम. अदुनहाटीं पेनदा आत्मा वेहताप दान मोळ्‍कानोरम मनमे निजम कतना आतोरम आंद, ओर आयुर.
PHI 3:4 बोरन्‍नागिंटा सतता कबाह्कुनपोर्रो बरोसा इरसि पोंगसेके तिरियानय्ते, नावा कबाह्कुनपोर्रो बरोसा इरसि पोंगालय ओनकन्‍ना एक्‍को कारनाल्क नहगा मंतां.
PHI 3:5 अद बल्हा इत्‍ते, नना पुट्ता एनिमिदि रोजकुंके नावा कतना आता, नना इस्राएल देसेमते पुट्ता पिव्‍वर यहुदि जातितोन, बेंजामिनना गोत्रमतोन आंदुन, मूसाना नियमकुन उंदि पोल्‍लेगुडा तप्‍पाकोंटा पीसि ताकाना परिसिल्कुना गुंपुनोन आंदुन, इब्रानि कुंटुबते पुट्ता इब्रानि मनकन आंदुन.
PHI 3:6 जोसने वासि, नना कलिसियातुन वेल्‍लेन तकलिप कियुंदुन. इंका मूसाना नियम परकारम नीतिते ताकमळते अय्ते नना बदे तप्‍पु किया हिल्‍लेन.
PHI 3:7 इव अन्‍नि पोल्‍लें नाकु वेल्‍लेन पायदातव इंचि नना मुन्‍ने इनकुनुंदुन. गानि इंदके किरिस्‍तु नावाहाटीं कीतदुन मुन्‍ने, अव अन्‍नि एर्तमे इंचि नाक तेळियसोत्‍ता.
PHI 3:8 अचोने आयाका, नावा सामि येसु किरिस्‍तुन एरपाट कीतदे पेद्‍दा पोल्‍ले आंद. कळमतव अन्‍नि अट्‍टि पोल्‍लेंगें, येसु किरिस्‍तुन दोर्किच्‍कुनालय अव अन्‍निन नना लेक्‍का किय्योन कचरा इनकुंतन.
PHI 3:9 इंका किरिस्‍तुनतोनि उंदि आसि मनमळे नावा उद्‍देसम. मूसाना नियमपोर्रो बरोसा कीसि नीतिमंतुड आया पराहिल्‍लेन, गानि किरिस्‍तुनपोर्रो विस्वासम कीताहाटीं पेनदा नदरते नीतिमंतुड आतन.
PHI 3:10 येसु किरिस्‍तुन आनि ओर हासि मर्रा जीवाते तेदता ताकततुन तेलपिचकुनना इंचि नाकु मंता. ओर बोगांच्‍ता तकलिपकु आनि हामुरतुनगुडा बोगांचि, ओनलेह्केन नाकु आयगोम. बल्हा अय्नागानि उंदि रोजु पेन नाकुन हामुरताल जीवाते तेहंता इंचि नावा आसे.
PHI 3:12 पोर्रो बव पोल्‍लें अय्ते रासतन, अव नावा पिस्वरते पूरा आतां इंचि वेहोन. अगा एवतन इंचि इनोन, गानि बगा एवालय अय्ते किरिस्‍तु नाकुन पीतोर, अगा एवालय नना वित्सेक मंतन.
PHI 3:13 विस्वासुल्‍कुनिटा! नना अगा एवतन इंचि विचारम किय्योन, गानि इद कबळ कींतन. पज्जो जर्गता पोल्‍लेन मति मरंग्सि, मुन्‍ने जर्गना पोल्‍लेन अंदकुनालय वित्सेक मंतन.
PHI 3:14 स्वर्गमतगा एवानोर्कुंक पेन बद इनाम हींतन इंचि केयता, अद इनामतुन येसु किरिस्‍तुनाहेंदाल दोर्किच्‍कुनालय नना वित्सेक मंतन.
PHI 3:15 अदुनहाटीं मना लोप्पोटाल विस्वासमते बेस बेर्सतोरम मनम अंटोरम, इव अन्‍नि पोल्‍लेना बारेमते उंदासि मंदकोम. ओक्‍कला बद्‍दना पोल्‍ले बारेमते मीवद वेरे बतलन्‍ना विचारम मत्‍ते, अदुनगुडा पेन मीकु समजांचि वेहंता.
PHI 3:16 अय्नागानि मनम मात्रम पेन मनाकु इदवेरादाका हुपिस्‍ता सत्‍तेमतुन पीसे ताकसेक मनना.
PHI 3:17 विस्वासुल्‍कुनिटा! मिमेट अंटोर उंदासि, नना ताकतापे ताकट. इंका मोमोट वेहताप बोर अय्ते ताकसंतुरो, ओर्कुन हूळसि मिमेट करियट.
PHI 3:18 बारित्‍ते वेल्‍लेटुर लोकुल्‍क किरिस्‍तु क्रुसुनपोर्रो हातोर इत्‍ता पोल्‍लेक विरोदमते ताकसेक मंतुर. ओर किरिस्‍तुना क्रुसता पगातोर आंदुर. ओरा बारेमते नना मीकु बच्‍चुंगो मल्कां वेहतन, इंदकेगुडा अळसेके वेहासेक मंतन.
PHI 3:19 आकिरते ओर नासडेम आयानुर, ओरा पिस्वर पीटाहाटींगे. सिग्गु होनना कबाह्‍क कीसेके ओर पेद्‍दातनम वेह्‍कुंतुर. दुनियाता पोल्‍लेन पोर्रेन ओरा मनसु मनंता.
PHI 3:20 गानि मनम अय्ते ई दुनियाता लोकुल्‍कुम आयोम, मनम स्वर्गमता लोकुल्‍कुम आंदुम. अगाटाले मनाकुन पिसागोटानोर सामि येसु किरिस्‍तु वांतोर इंचि मनम ओना एदुर हूळसेक मंतोम.
PHI 3:21 अन्‍निटवुन ओना कय्‍दा हिळु इर्रना ताकत ओनगा मंता. ओर वातस्के आ ताकततोने मना नासडेम आयाना इद मेंदुलतुन बदलांचि ओर हासि तेदतस्‍के ओन्क दोर्कतसोंटा महिमाता मेंदुललेसीं कियानुर.
PHI 4:1 अदुनहाटीं विस्वासुल्‍कुनिटा! मिमेट सामिना विस्वासमते गट्‍टिगा मंटु. मीकुन हूळागोम इंचि नावा जीवा बच्‍चोरो तनलाळसेक मंता. नावा पावरमतोर मिमेटे आंदिर. किरिस्‍तु वातस्के, नना नावा कबळ महतन इंचि हुप्‍सानोर मिमेटे आंदिर.
PHI 4:2 युवादिया, सुंतुके अक्‍काह्कुनिटा मिमेट येसु किरिस्‍तुनोर आंदिर, अदुनहाटीं मिमेट जगडाल्‍क होळसि सामिना लोप्पो उंदि मनसुने मनना इंचि नना विनंति कीसंतन.
PHI 4:3 नावा दंटातोना! अव रोंड मुर्ताह्क जगडाल्‍क होळसि उंदासि मनालय निमे सहायम कीम इंचि नीकु विनंति कीसेक मंतन. बारित्‍ते किलेमेन्‍स आनि नावातोनि कबळ कियानोरतोनि कलियसि अव रोंड मुर्ताह्क बेसता कबुर वेहालय वेल्‍ले कस्‍टपळतां. अल्हा कबळ कियानोरा पोरोल्क पेनदागा मनना बस्‍केळ्‍क पिस्सना पिस्वरता पुस्तकमते रासि मंता.
PHI 4:4 मिमेट सामिना लोप्पो बस्‍केळ्‍क कुसिते मंटु, नना मर्रा इदे पोल्‍ले वेहासेक मंतन मिमेट बेस कुसिते मंटु.
PHI 4:5 मिमेट सादा-सिंपलतोर इंचि अंटोर्क तेळियनाल पिस्‍सट, बारित्‍ते सामि वायाना वेला दग्‍गेरा मंता.
PHI 4:6 बदे पोल्‍लेक पिकिर कियमट, गानि अन्‍नि पोल्‍लेनहाटीं पेनदुक पारतना कीसि मीवा अव्‍सरमतुन वेहाटु, दन्यवाद कीसि दान तल्‍कट.
PHI 4:7 अस्‍के बोरे अर्तम किया परवसोंटा सांतितुन पेन मीकु हींता. मिमेट येसुनोर आताहाटीं अद सांति मीवा मनसुन, विचाराल्कुन बेस कापाळसि इर्रंता.
PHI 4:8 विस्वासुल्‍कुनिटा! आकिरते इंकुंदि पोल्‍ले वेहानद मंता. अद बतल इत्‍ते, बव पोल्‍लें अय्ते सत्‍तेम, तल्‍सकुननालायक मंतां, अव पोल्‍लेना बारेमतेन विचारम कीसेक मंटु. इत्‍ते, बरोसालायक पोल्‍लें, कदरलायक पोल्‍लें, नीतिता पोल्‍लें, पवित्र पोल्‍लें, कुसिता पोल्‍लें, सोबांचना पोल्‍लें इवे पोल्‍लेना बारेमते विचारम कीसेके मंटु.
PHI 4:9 मिमेट नावाहेंदाल करियसि दोर्किच्‍कुत्‍ता पोल्‍लें, केंजता पोल्‍लें, आनि हूळता कबाह्‍क इव मत्‍ताप ताकट. अस्‍के सांति हियना पेन मीकुन कापाळंता.
PHI 4:10 मिमेट मर्रा उंदि मल्का नावा बारेमते विचारम कीसि नाक सहायम कीतिर. अदुनहाटीं नना सामिना लोप्पो वेल्‍लेन कूस मंतन. इल्‍हा सहायम कियना इंचि मिमेट मुन्‍नेन विचारम कीसि मत्‍तिर, गानि मीकु मोका दोर्काहिल्‍ले.
PHI 4:11 नाकु बदुनदो अव्‍सरम मंता इंचि नना इल्‍हा इंचेक हिल्‍लेन. बारित्‍ते बसोंटा परिस्तिति वायिनागानि कुसितेन पिसमळ नना करियतन.
PHI 4:12 बतले हिलवस्के बल्हा पिस्सना, मत्‍तस्के बल्हा पिस्सना इद इंका नाक तेळियता. बसोंटा वेला वायिना, बसोंटा परिस्तिति वायिना, कर्वेस्‍सि मनिना, पीर निंडिस मनिना, वेल्‍ले मत्‍तस्के बल्हा मनना, तक्‍को मत्‍तस्के बल्हा मनना इव अन्‍नि नना करियतन.
PHI 4:13 किरिस्‍तु नाक ताकत हीसेक इंचि, बसोंटा परिस्तिति वायिनागानि नना अन्‍नि किया परांतन.
PHI 4:14 बतलन्‍ना आयि, मिमेट नावा तकलिपते सहायम कीतिर, बेस कीतिर.
PHI 4:15 नना सुरुवुने बेसता कबुर वेहचि मेसिडोनिया इनना मीवा एरियाताल होत्‍तन. अस्‍के मिमेट पिलिपियाता विस्वासुल्‍क तप्‍पा, वेरे बदे कलिसियातोर नाक सहायम किया हिल्‍लुर. इद पोल्‍ले मीकु एरपाटे.
PHI 4:16 इल्हेने नना बस्के अय्ते तेसलोनि सहरते मत्‍तन, अस्केगुडा अव्‍सरम मत्‍तस्के नाक मिमेट वेल्‍लेन मल्कां सहायम कीतिर.
PHI 4:17 नाक मीहेंदाल सहायम गावाले इंचि आयो, गानि मिमेट कियना बेसता कबाह्कुनहेंका मीकु पेनदाहेंदाल आसिर्वाद दोर्कसेकेन मनना इंचि नावा विचारम मंता.
PHI 4:18 नहगा अन्‍नि मंतां, नाक बच्‍चोर अय्ते गावाले दानकन्‍ना एक्‍को मंतां. मिमेट इपपरदिसुनतोनि लोहता सहायम नाक दोर्कता. अवुनतोनि नावा अव्‍सराल्क अन्‍नि तीरतां. बल्हा अय्ते मोक्‍कु हीतारित्‍ते पेन दाना गब्‍बु एतंता, अल्‍हेने मिमेट लोहतवुन पेन कुसिते एतकुंता.
PHI 4:19 नना सेवा कियना पेनदागा मनाकु गावाले मत्‍तादुंकन्‍ना एक्‍को संपत्‍ति मंता. अदुनहाटीं मनाकु बतल अव्‍सरम मनिनागानि, मनम किरिस्‍तु येसुना लोकुल्‍क आताहाटीं पेने दाना महिमाहेंदाल अदुन पूरा कींता.
PHI 4:20 मना पेनबाबान युगा-युगाल्‍कुनदाका स्‍तुति कीकोम. आमीन.
PHI 4:21 येसु किरिस्‍तुन विस्वासम कीतोर अंटोर पेनदा लोकुल्‍कुंक नावा जोहार. इगे नावातोनि मत्‍तोर विस्वासुल्कगुडा मीकु जोहार वेहसेक मंतुर.
PHI 4:22 इग्‍गेटा पेनदा लोकुल्‍क अंटोर, कास कैसर राजांक सेवा कियानोर विस्वासुल्‍क मीकु जोहार वेहसेक मंतुर.
PHI 4:23 मना किरिस्‍तु येसु सामिना कुर्पा मीवा आत्मातोनि मन्‍निकांटी.
COL 1:1 पेनदा इच्‍चाताल किरिस्‍तु येसुना प्रेरित आतोन नना पौलुसुन आनि तम्मुर तिमोतिनाहेंदाल, कुलुसि सहरते मंदना पवित्र अल्हेन किरिस्‍तुनलोप्‍पो विस्वासमलायक कलिसियाता लोकुल्‍कुंक इद सिट्‍टि रासेक मंतन. मना पेनबाबानाहेंदाल मीक कुर्पा, सांति दोर्किकांटी.
COL 1:3 मोमोट मीवाहाटीं बस्‍केळ्‍क पारतना कीसेके, मना सामि येसु किरिस्‍तुना पेनबाबांक दन्यवाद कीसेके मंतोम.
COL 1:4 बारित्‍ते, किरिस्‍तु येसुना पोर्रोटा मीवा विस्वासम आनि अंटोर पेनदा लोकुल्‍कुन मिमेट कियाना मीवा पावरमता बारेमते केंजतोम.
COL 1:5 मीवाहाटीं स्वर्गमते उंदि आसे इर्सि मंता इंचि, अदुना बारेमते मिमेट मुन्‍नेने बेसता कबुरता सत्‍तेम पोल्‍लेते केंजतिर.
COL 1:6 अदे बेसता कबुर मिहगा वासि, पूरा दुनियाते पैलांचि लोकुल्‍कुना पिस्वरतुन बदलांचेके मंता. अल्‍हेने बस्के अय्ते अदुन मिमेट केंजतिर, केंजसि पेनदा निजम कुर्पातुन एरपाट कीसि स्विकार कीतिर, अस्‍केटाल अद मीवा पिस्वरतुनगुडा बदलांचेके मंता.
COL 1:7 आ बेसता कबुर मावा पावरमगल्‍ला इपप्रासुनाहेंदाल मिमेट करियतिर. ओर मावातोनि कलियसि कबळ कियानोर आनि मीवाहाटीं किरिस्‍तुना विस्वासमलायक सेवक आंदुर.
COL 1:8 पवित्र आत्माते मत्‍ता मीवा पावरमता बारेमते ओरे माक वेहतोर.
COL 1:9 अदुनहाटीं मोमोट अव पोल्‍लें केंजतस्‍केटाल, मिमेट पूरा आत्माता तेल्‍विते, बुद्‍दिते दाना इच्‍चा मत्‍ताप निंडागोम इंचि बस्‍केळ्‍क पारतना कीसेके मंतोम.
COL 1:10 इदुनहेंदाल, मिमेट अन्‍नि तीरुकुने सामिन कूस कियालय मीवा पिस्वर दानकु इस्‍टमाताप मनंता, मीक हरेक बेसता कबळते पलम दोर्किसि, पेनदा तेल्‍विते बेर्स्‍सेके दांतिट.
COL 1:11 दाना महिमाता अन्‍नि तीरकुना बलमतोनि मीकुन गट्‍टिगा कींता, अदुनहाटीं अन्‍नि तीरकुना ओप्के, ओर्सकुनमळ इद मीक आनंदमतोनि दोर्कंता.
COL 1:12 अदुनहाटीं पेनबाबांक मिमेट दन्यवाद कीम्‍टु. ओर मनाकुन वेलगुने मंदना पेनदा लोकुल्‍कुना वारसानहक्‍कुते तूस एताना लायक कीतोर. मनाकुन हीकटता कय्‍दाल इळबळिच्‍चि ओना पावरमगल्‍ला मर्रिना राज्येमते होळाहतोर.
COL 1:14 ओना मर्रिनाहेंदाले मनाकु मुक्‍ति दोर्कंता, इत्‍ते ओनाहेंदाल पापाल्कुनाल मापि दोर्कंता.
COL 1:15 ओर दिस्‍सवसोंटा पेनदा रूपम आंदुर, ओर दुनिया पुट्‍टका मुन्‍नेटाले मत्‍ताहाटीं, दुनियाते पुटतवुने अन्‍निनपोर्रो पेद्‍दोड आंदुर.
COL 1:16 बारित्‍ते, स्वर्गमते आयि, बूमिपोर्रो आयि, दिस्सानव आयि, दिस्‍सुवव आयि, राजगद्‍दें आयिं, सरकार आयि, पेद्‍दाल्‍क आयिर, आदिकारिल्‍क आयिर इव अन्‍निन ओनतोनि, ओनाहेंदाल आनि ओनाहाटीं पुटिच्‍मळ जर्गता.
COL 1:17 पुटिस्ता अन्‍निने ओरे मोदाटोर, ओनाहेंदाले अन्‍नि नित्‍तिसि मंतां.
COL 1:18 मेंदुललेसीं मंदना कलिसियाकु ओर तल्‍ला आंदुर. अन्‍नि पोल्‍लेने पेद्‍दोड आयागोम इंचि हातोरा लोप्पोटाल मोट्‍टा मोदाला तेदतोर ओरे आंदुर. ओरे मोदोल आंदुर.
COL 1:19 बारित्‍ते ओनालोप्‍पो पेनदा गुनम पूरा निंडसि मत्‍तेने बाबो कूस मनंतोर.
COL 1:20 क्रुसुनपोर्रो किरिस्‍तु पोंगागोटता नेत्‍तुरताहेंदाल, बूमिपोर्रो आनि स्वर्गमते मंदना अन्‍नि वस्‍तुकुन ओनतोनि कल्‍पिसि ओरा नड्‍डुम सांति मनागोम इंचि पेनदा इच्‍चा.
COL 1:21 दीनकन्‍ना मुन्‍ने मिमेट पेनदागटाल लक्‍कु मत्‍तिर, कराब कबाह्‍कुनाहेंदाल दाना पगातोर आसि मत्‍तिर.
COL 1:22 इंदके मीकुन पेनदा मुन्‍ने पवित्र, डाग हिलाकोंटा, दोसेम हिलाकोंटा निल्‍हागोम इंचि ओर ओना हामुरहेंदाल मीवा मेंदुल्ता हव्‍वितुन ओना मेंदुल्ते कल्‍पकुत्‍तोर.
COL 1:23 गानि मिमेट विस्वासमते हीके-हेके आयाकुंटा गट्‍टिगा निल्‍सि मंटु, मिमेट केंजता बेसता कबुरता आसेतुन होळ्‍समट. अद बेसता कबुर मब्बुन हिळता अंटोर लोकुल्‍कुंक वेहमळ जर्गसेक मंता. अदे सेवा कियानाहाटीं नना, इत्‍ते पौलुसुन पेनदा सेवक आतन.
COL 1:24 किरिस्‍तुना मेंदुलतसोंटा कलिसियाताहाटीं बवय्ते बादां तक्‍को मत्‍तां. अव बादन नावा मेंदुलताहेंदाल पूरा कीसेके मंतन, अदुनहाटीं इंदके मीवाहाटीं बवय्ते नावा दुक्‍काल्क मंतां अवुने नना आनंदमते मंतन.
COL 1:25 पेनदा पोल्‍लेतुन मीकु पूरा वेहानाहाटीं पेन नाक अप्पजेपता जिम्मेदारिहेंदाल नना कलिसियाता सेवकुन आतन. अद पोल्‍ले वेल्‍लेन कालाल्‍कुनाल, पीळि-पीळिनाल मर्ममते मत्‍ता, गानि इंदके दाना पवित्र लोकुल्‍कुंक तेळियागोटता.
COL 1:27 यहुदि आयवोरा लोप्पो इद मर्ममता महिमाता विलुवा बतल आंद मना लोकुल्‍कुंक तेळियाना इंचि पेन इनकुत्‍ता. मीवालोप्‍पो महिमाता आसे आसि मनना किरिस्‍ते आ मर्मम आंद.
COL 1:28 हरेक मनकन किरिस्‍तुनलोप्‍पो पूरा कीसि पेनदा मुन्‍ने निल्‍हागोम इंचि, मोमोट किरिस्‍तुना बारेमते हरेक मनकंक कडकते वेहांतोम, हरेक मनकंक पूरा तेल्‍विते करहंतोम.
COL 1:29 इदुनहाटीं किरिस्‍तुना पूरा ताकत नावा लोप्पो गट्‍टिगा कबळ कीसेके मंता, दानाहेंदाल नना मनसु दोस्‍सि बागा कस्‍टम कीसेके मंतन.
COL 2:1 मिमेट नाकुन हूळाकोन्‍ना गानि मीवाहाटीं, लोदिकिया सहरते मंदना विस्‍वासुल्‍कुनाहाटीं आनि कळमता अंटोर विस्‍वासुल्‍कुनाहाटीं नना वेल्‍लेन कस्‍टम कीसेके मंतन, इद मीक तेळियाना इंचि नावा इच्‍चा मंता.
COL 2:2 इद कस्‍टम बारि कीसेके इत्‍ते, मिमेट मीवा विस्वासमते दैरनेमते मनना, मिमेट पावरमते वरोंक-वरोर कलियसि मंदना, मीक पूरा बुद्‍दिता पूरा दनम दोर्कना, पेनबाबाना मर्मम इत्‍ते किरिस्‍तुना लोप्पो मक्‍किस मत्‍ता बुद्‍दि, तेल्‍विता कजानातुन एरपाट कियाना.
COL 2:4 बोरन्‍ना तिय्यटा पोल्‍लेनतोनि मीकुन पसांचामन्‍नि इंचि नना इद वेहासेक मंतन.
COL 2:5 नना मेंदुल्ते मिहागटाल लक्‍कु मंतन, गानि आत्माते मिहागेन मंतन. मीवा रोजता पिस्वर आनि किरिस्‍तुनलोप्‍पो मंदना मीवा गट्‍टि विस्वासम हूळसि नाक वेल्‍लेन कुसि आसेक मंता.
COL 2:6 इंदके मिमेट किरिस्‍तु येसुन सामि इंचि स्विकार कीतिर, अय्ते ओर बल्हा वेहतोर अल्‍हेने ताकाटु.
COL 2:7 मराता हिह्‍कुनलेसीं मिमेट किरिस्‍तुनलोप्‍पो होळियसि होंटु, बेर्स्‍सेके होंटु. मीक कराहतालेसीं विस्वासमते गट्‍टिगा आसेके होंटु, बस्‍केळ्‍क पेनदुक दन्यवाद कीसेके मंटु.
COL 2:8 मिमेट जेगर्ताते मंटु! बोरन्‍ना वासि मीकुन दुनियाता तेल्वि पोल्‍लें, एर्तम दोका हिय्यना पोल्‍लें वेह्‍चि पसांचा परांतुर, अव पोल्‍लें मनकालोर्कुना रीतिरिवाजकुनालेसीं, दुनियाते एनकटा कराहता पोल्‍लेनलेसीं मंतां गानि किरिस्‍तुना पोल्‍लेनलेसीं हिल्‍लें.
COL 2:9 बारित्‍ते पेनदाव अन्‍नि गुनाल्‍क किरिस्‍तुना मेंदुल्ते मनंतां.
COL 2:10 अंटोर राज्येम कियानोर्कुनपोर्रो, अदिकारकुनपोर्रो किरिस्‍तु तल्‍लालेसीं मंतोर, ओनालोप्‍पो मिमेट पूरा आतिर.
COL 2:11 मीवा मेंदुल्ता पापाल्क पायताहाटीं ओनालोप्‍पो मीकुन कतना कियमळ जर्गता. अद कतना कय्‍दे कीतद आयो गानि किरिस्‍तुनलोप्‍पो कीतद आंद.
COL 2:12 अचोने आयाका, मिमेट बापतिस्मा एतताहेंका किरिस्‍तुनतोनि बोंदा दोस्‍ताप आतिट. हातोरव्टेटाल ओन जीवाते तेहाता पेनदा सक्‍ति पोर्रो मिमेट विस्वासम इरताहाटीं ओनतोनि जीवातेगुडा तेदतिट.
COL 2:13 मिमेट तप्‍पु कबाह्‍क कीतिर, यहुदि आयवोर मत्‍तिर, अदुनहाटीं आत्माते हासि मत्‍तिर. गानि पेन मना अन्‍नि पापाल्कुन मापि कीसि किरिस्‍तुनतोनि मीकुन जीवाते तेहता.
COL 2:14 नियमकुना पुस्तकम मनाकु विरोदमते मत्‍ता, गानि पेन किरिस्‍तुन क्रुसुनपोर्रो मोल्‍लां कोह्‍किसि अद पुस्‍तकमताल मनाकु विरोदमते मत्‍ता पोल्‍लें तेंडसि पोहता.
COL 2:15 इल्‍हा राज्येम कियानोर्कुंक आनि अदिकारकुंक पेन ताकत हिलाकोंटा कीता. कीसि किरिस्‍तु क्रुसुनपोर्रो जीवा हीसि गेल्‍सताहाटीं ओरा अंटोरा मुन्‍ने तमासा आसि सिग्गु हिलाकोंटा आता.
COL 2:16 अदुनहाटीं मीवा तिनना-उनना बारेमते आयि, पंडुगुना बारेमते आयि, अमासा हिलाकोंटे नोमकेम रोजुना बारेमते आयि बोर्कुने मीवा न्‍यायम किया हियमटु.
COL 2:17 इवन्‍निगुडा मुन्‍ने वायाना निजम पोल्‍लेना नीडा आंदु, आ निजम पोल्‍ले किरिस्‍तु आंदुर.
COL 2:18 बोरन्‍ना सतागा सिन्‍नातनम हुपिच्‍कुनानोर, दूताना पूजा कियानोर, हूळता पोल्‍लेनपोर्रो, ओना मनसुना पालतु पोल्‍लेनपोर्रो पेद्‍दिरकेम कियानोना हेंदाल मीवा पेनदा इनामतुन तपिच्‍कुना हियमटु.
COL 2:19 असोंटा मनकल पूरा मेंदुल्ता कील्‍कुन, नराल्‍कुन उंदि कीसि, पेनदाहेंदाल मेंदुल्तुन बेर्सागोटना तल्‍ला, इत्‍ते किरिस्‍तुन पीसि मन्‍नोर.
COL 2:20 गानि इंदके मिमेट दुनियाता पोल्‍लेनाल किरिस्‍तुनतोनि हासि होत्‍तिर, अय्ते “अद इटमट, अदुन तिनमट, अदुन पियमट” इंचि दुनियातोरालेसीं नियमकुने बारि ताकसेक मंतिट?
COL 2:22 इवन्‍नि पोल्‍लें वाळकुत्‍तारित्‍ते नासडेम आसि होनना वस्‍तुकुनलेसीं मंतां, बारित्‍ते अव सिराप मनकना नियमाल्‍क आनि कराहमळ्‍क संबंदिस्‍तव आंदुं.
COL 2:23 इव नियमकुने मना मनसुनाल तयार कीता बक्‍ति कियालय, सिन्‍नातनम हुपिच्‍कुनालय, मना मेंदुल्तुन तीराता कस्‍टम कीकुनालय बुद्‍दि अय्ते मंता, गानि मना मेंदुल्ता कराब इच्‍चान आपालय इव बतल कबळ्‍क ओज्‍जों.
COL 3:1 मिमेट किरिस्‍तुनतोनि जीवाते तेदसि मंतिट, किरिस्‍तु स्वर्गमते पेनदा तिना बाजुंक उदसि मंतोर, अय्ते अगाटा पोल्‍लेन दोर्किच्‍कुनना कोसिस कीम्‍टु.
COL 3:2 इंदके मीवा पडाना पिस्वर हासि होत्‍ता आनि मीवा पूना पिस्वर किरिस्‍तुनतोनि पेनदा लोप्पो मक्‍किचि मंता. अदुनहाटीं मिमेट बूमिपोर्रोटा पोल्‍लेने आयो गानि स्वर्गमता पोल्‍लेने मनसु इर्रट.
COL 3:4 मनाकु पिस्वर हीता किरिस्‍तु बस्के अय्ते मर्रा दिस्‍सानुर, अस्‍के मिमेटगुडा ओनतोनि ओना महिमाते दिस्‍किर.
COL 3:5 अदुनहाटीं बूमि पोर्रोटव मना कराब गुनाल्‍क इत्‍ते बोगमतनम, कराब विचाराल्क, जोसते मनमळ, इंकावरोनद आसे पडमळ, आस्‍ति कियमळ इद अय्ते बोम्मांक मोळ्कता लेक्‍कातेन वांता. इव अन्‍निन हव्‍किस पोहाट.
COL 3:6 इवुनाहाटींगे पेनदा होंग दाना पोल्‍ले केंजवोरा पोर्रो वांता.
COL 3:7 मिमेटगुडा मुन्‍ने आ पिस्वरते पिसानस्‍के, ओरालेसींगे ताकिंदिर.
COL 3:8 गानि इंदके मिमेट होंग आयमळ, गुल्‍गमळ, पगा पियमळ, अपमानम कियमळ, तोळ्‍दाल कराब पोल्‍लें वळ्‍कमळ इवन्‍निन होळसीम्टु.
COL 3:9 मिमेट वरोंक-वरोर आबद्‍दम वळ्‍कमटु, बारित्‍ते मीवा पडाना गुनमतुन आनि दाना कबाह्‍कुन तेंडसि पोहतिर.
COL 3:10 इंदके पूना पिस्वर पिसमळ सुरुव कीतिर, मनाकुन पुटिस्ता पेनदा गुनम मत्‍ताप, मिमेट तेल्वि दोर्किच्‍कुनालय पूनगा तयार आसेक मंतिट.
COL 3:11 इवने युनानि आयिर, यहुदि आयिर, कतना कीतोर आयिर, कतना कियवोर आयिर, केडाते मनानोर आयिर, स्‍कूति जातितोर्क आयिर, दासुड आयिर, दासुड आयवोर आयिर ईरा लोप्पो बतल तेडा हिल्‍ले. किरिस्‍तु अन्‍निने, अंटोर लोप्पो मनंतोर.
COL 3:12 पेन मीकुन पवित्र आनि पावरमगल्‍ला लोकुल्‍कुनलेसीं पेर्कुत्‍ता. अदुनहाटीं दया कियमळते, पायदा कियमळते, सिन्‍नागासि मनमळते, सादा-सिंपल मनमळते ओप्के पीसि ताकट.
COL 3:13 सामि मीवा तप्‍पुकुन मापि कीतोर, अय्ते मिमेटगुडा वरोना तप्‍पुकु वरोर मापि कीम्‍टु. मीलोप्‍पो बोनकन्‍ना इंकावरोन पोर्रो बतलन्‍ना तप्‍पु दोस्‍साना मत्‍ते, ओर ओप्‍केते वरोनद वरोर तप्‍पुकुन मापि कीकुंटु.
COL 3:14 अचोने आयाका मिमेट अंटोर उंदासि पावरमते दोहताप मंटु.
COL 3:15 मीवा मनसुने किरिस्‍तुना सांतिता राज्येम ताकिकांटी, इदुनहाटींगे मीकुन उंदि मेंदुल आसि केयमळ जर्गता. पेनदुक बस्‍केळ्‍क दन्यवाद कीम्‍टु.
COL 3:16 किरिस्‍तुना पोल्‍ले मीलोप्‍पो निंडिसि मन्‍निकांटी, मिमेट पूरा तेल्‍विते वरोंक-वरोर करहट, तेळियागोट्‍सि वेहाटु, पेनदुक दन्यवाद कीसेके मना मनसुनाल बजनकु, कीर्तनकु, पाटां पारसेके होंटु.
COL 3:17 अचोने आयाका, पोल्‍ले आयि, कबळ आयि बतल किय्‍यिना मिमेट सामि येसुना पोरोलतेन कीम्‍टु. ओनाहेंदाले पेनबाबांक दन्यवाद कीम्‍टु.
COL 3:18 मरमिं आता मुरताह्‍कुनिटा! मिमेट पेनदुक नच्‍चानालायक मीवा मुय्‍दुर्कुना पोल्‍लेपोर्रो ताकट.
COL 3:19 मुय्दुर्कुनिटा! मीवा मुत्‍तोह्‍कुन पावरम कीम्‍टु, अवुनतोनि कडकते मनमट.
COL 3:20 पिलाल्‍कुनिटा! मिमेट अन्‍नि पोल्‍लेने मीवा यावल-बाबाल वेहताप ताकट, इल्‍हा ताकते सामिंक आनंदम आंता.
COL 3:21 बाबोरिटा! मिमेट मीवा पिलाल्कुन चिड-चिड कियमट, अल्हा कीते, ओर निरास आंतुर.
COL 3:22 दासुल्‍कुनिटा! मिमेट अन्‍नि पोल्‍लें ई दुनियाते मनना मीवा मालकुल्क वेहताप कीम्‍टु. मिमेट कियानद मनकालोर्कुन कूस कियाना दासुनलेसीं हुप्‍सालय आयो गानि बेस मनसुने, पेनदा वेर्रेते कीम्‍टु.
COL 3:23 मिमेट बतलय्ते कींतिर मीवा मनसुनाल कीम्‍टु, मिमेट मनकालोर्कुनाहाटीं आयो गानि सामिनाहाटीं कीसेके मंतिट. मिमेट सामि किरिस्‍तुना सेवा कीसेके मंतिट. अदुनहाटीं ओनाहेंदाल मीकु वारसानता इनाम दोर्कंता, इद मीकु एरपाटे मंता.
COL 3:25 पेन बोने मोकम हूळसि न्‍यायम किय्‍यो, बोर अय्ते तप्‍पु कींतोर, दाना सिक्‍सा ओनकु दोर्कंता.
COL 4:1 मालाकुल्‍कुनिटा! स्वर्गमते मीकुगुडा वरोर मालक मंतोर, इदुन मति इर्सि मिमेट मीवा दासुल्‍कुनतोनि न्‍यायमते, बेदबाव हिलाकोंटा ताकट.
COL 4:2 मिमेट बस्‍केळ्‍क पेनदुक पारतना कीसेके मंटु. दानकु दन्यवाद कीसेके जेगर्ताते मंटु.
COL 4:3 नना किरिस्‍तुना मर्ममता पोल्‍ले वेहताहाटीं जेलते मंतन, इदे पोल्‍लेतुन मोमोट अंटोर्क वेहानाहाटीं पेन माकु मोका हिय्यि इंचि मावाहाटींगुडा पारतना कीम्‍टु.
COL 4:4 नाकु बल्हा वेहाना मंता अल्‍हेने नना इद कबुरतुन बेस तेळियागोट्‍सि वेहानाहाटीं पारतना कीम्‍टु.
COL 4:5 विस्वासम कियवोरतोनि बेस तेल्‍विते ताकट, मोका दोर्कतस्के ओर्क बेसता कबुर वेहाना पायदा तप्‍पाकोंटा एतट.
COL 4:6 हरेक मनकंक बेस जवाब हिया वायमळ गावाले इंचि मीवा पोल्‍ले बस्‍केळ्‍क कुर्पाते आनि होव्वोर वाटते रुसि मत्‍ताप मना पींता.
COL 4:7 पावरमगल्‍ला तुकिकुस दादल विस्वासमलायक सेवक आंदुर. ओर नावा बारेमते अन्‍नि पोल्‍लें मीक वेहांतोर, ओर नावातोनि कलियसि सामिन लोप्पो सेवा कियानोर आंदुर.
COL 4:8 ओर मावा बारेमते अन्‍नि पोल्‍लें मीक तेळियागोट्‍सि मीवा मनसुकुंक दैरनेम हियाना उद्‍देसमते नना ओन मीहेके लोहतन.
COL 4:9 नना ओनतोनि मीवा लोप्पोटोरे विस्वासमलायक, पावरमगल्‍ला उनेसिम दादानगुडा लोहतन, ओर इग्‍गेटव अन्‍नि पोल्‍लें मीक वेहानुर.
COL 4:10 नावातोनि जेलने मनना अरिसतरकुस पोरोलतोर दादल मीक जोहार वेहासेक मंतोर, अल्‍हेने बरनाबासुना दग्‍गेटा दादाल मरकुस इनानोरगुडा मीक जोहार वेहासेक मंतोर. (नना मीक मुन्‍नेने वेहताप, मरकुस मिहगा वाते ओन बेस हुळाट.)
COL 4:11 युसतुस इनना येसुगुडा मीक जोहार वेहासेक मंतोर, कतना आतोराव्टेटाल सिराप ईर मुव्वुरे पेनदा राज्येमताहाटीं नावातोनि कबळ कीसेक मंतुर, ईराहेंदाल नावा जीवाक सांति दोर्कसेक मंता.
COL 4:12 किरिस्‍तु येसुना दासुड इपप्रास ईर मीवा लोप्पोटोरे आंदुर, मीक जोहार वेहासेक मंतोर. मिमेट पेनदा इच्‍चा मत्‍ताप पुरागा आसि, विस्वासमते गट्‍टिगा निल्‍सि मनागोम इंचि ओर बस्‍केळ्‍क मीवाहाटीं जोर हीसि पारतना कीसेके मंतोर.
COL 4:13 मीवाहाटीं, लोदिकिया आनि हियरापोलि सहरता विस्‍वासुल्‍कुनाहाटीं ओर वेल्‍लेने मेहनत कीसेके मंतोर इंचि, इद पोल्‍लेक नना ओना गवाइ मंतन.
COL 4:14 पावरमगल्‍ला डाक्‍टर लूकाल आनि देमास ईर मीक जोहार वेहासेक मंतुर.
COL 4:15 लोदिकियाता विस्वासुल्कुंक आनि नुंपा अक्‍कांक अल्‍हेने दाना लोतागा जमा आयाना कलिसियातोर्कुंक नावा जोहार वेहाट.
COL 4:16 इद सिट्‍टितुन मिमेट हदुव्‍ता पजा, इदुन लोदिकिया सहरता कलिसियातोर्क लोहचि, अगागुडा हदवा वेहाट आनि लोदिकियाताल वाता सिट्‍टितुन मिमेटगुडा मीवा कलिसियाते हद्‍विसि वेहाट.
COL 4:17 अल्‍हेने अरकिपुसुंक, “सामि नीकु अप्पजेपता सेवातुन तप्‍पाकोंटा पूरा कीम,” इंचि वेहाट.
COL 4:18 नना पौलुसुन, नावा कय्‍देन रासि मीकु जोहार वेहासेक मंतन, नना जेलते मंतन इंचि पारतनाते मति कीम्‍टु. पेनदा कुर्पा मीवातोनि मन्‍निकांटी. आमेन.
1TH 1:1 नना पौलुस, सिल्‍वानुस आनि तिमोति मोमोट इद सिट्‍टि मीक तेसलोनि सहरते मंदना कलिसियातोराहाटीं रासेके मंतोम. मिमेट पेनबाबाल आनि सामि येसु किरिस्‍तुनतोनि कलियसि मंतिट इंचि मीक पेनदाहेंदाल कुर्पा, सांति दोर्किकांटी.
1TH 1:2 मोमोट पारतनाने मीवा मति कीसेके, मी अंटोराहाटीं पेनदुक बस्‍केळ्‍क दन्यवाद कींतोम.
1TH 1:3 मिमेट विस्वासमते कियाना कबाटुन, पावरमते कियाना मीवा कस्‍टमतुन अल्‍हेने सामि येसु किरिस्‍तुनापोर्रोटा आसेते ओप्के पीसि मत्‍तादुन मोमोट मना पेनबाबाना मुन्‍ने बस्‍केळ्‍क मति कीसेके मंतोम.
1TH 1:4 विस्वासुल्‍कुनिटा! पेन मीकुन पावरम कीसि पेर्ता इंचि माक एरपाटे मंता.
1TH 1:5 बारित्‍ते, मोमोट वेहता बेसता कबुर सिराप पोल्‍लेनतोने आयो गानि ताकतते, पवित्र आत्माते आनि पूरा गट्‍टि विस्वासमते मिहगा वाता. मोमोट मीवा नड्‍डुम मंचेके बल्हा ताकतोम मीक एरपाटे मंता.
1TH 1:6 मिमेट वेल्‍ले दुक्‍कमते मत्‍तस्केगुडा पवित्र आत्मा हियना कुसिते बेसता कबुरतुन केंजतिर. मिमेट मावालेसीं, सामिनलेसीं ताकालय सुरुव कीतिर.
1TH 1:7 इल्‍हा मिमेट अकाया आनि मेसिडोनिया राज्येमता विस्वासुल्‍क मीकुन हूळसि ताकालय, मिमेट ओर्क उंदि उदाहरनलेसीं आतिर.
1TH 1:8 बारित्‍ते मीहेंदाल सामिना पोल्‍ले सिराप मेसिडोनिया आनि अकाया राज्येमतेन एवता इंचि आयो गानि पेनदापोर्रोटा मीवा विस्वासमता बारेमते अन्‍नि जेगाने तेळियसि होत्‍ता. अदुनहाटीं मोमोट मीक वेहाना बतल अव्‍सरम हिल्‍ले.
1TH 1:9 बारित्‍ते मोमोट मिहगा वातस्के, मिमेट माकुन दग्‍गेरा कीसि बल्हा बेस हूळतिर, ओरे मावा बारेमते वेहासेक मंतुर. अल्‍हेने मिमेट बोम्माना पेनकुन होळसिसि, जीवाते मनना निजम पेनदा सेवा कियालय बल्हा मलतिर इंचि वेहासेक मंतुर.
1TH 1:10 पेन येसुन हातोरव्टेटाल तेहता. इंदके स्वर्गमताल दाना मर्रि येसु मल्सि वायानदुन एदुर हूळसेक मंतिर, इंचि इव पोल्‍लें अंटोर्क वेहासेक मंतुर. वायाना पेनदा होंगुनाल ओरे येसु मनाकुन पिसागोटंतोर.
1TH 2:1 विस्वासुल्‍कुनिटा! मोमोट मिहगा वातद एर्तम आयाहिल्‍ले इंचि मीक एरपाटे मंता.
1TH 2:2 गानि दीनकन्‍ना मुन्‍ने पिलिपिया सहरते माकुन बदनाम कीसि वेल्‍लेन दुक्‍कम हीतुर. लोकुल्‍क माकुन बागाने विरोद कीतुर. विरोद किय्यिनागानि पेनदा बेसता कबुर मीक वेहालय पेन दैरनेम हीता, इदगुडा मीकु एरपाटे मंता.
1TH 2:3 बारित्‍ते मावा बोदा गलतितेनो, कराब विचाराल्कुनेनो, पसांचना उद्‍देसमते वेहतद आयो.
1TH 2:4 गानि पेन माकुन दाना बेसता कबुरता लायक कीसि, बेसता कबुरतुन वेहालय माक अप्पजेपता. अदुनहाटीं मावा मनसुन परिक्‍सा कीसि हूळना पेनदुन कूस कियालय वेहंतोम गानि मनकालोर्कुन कूस कियालय पेनदा पोल्‍ले वेहोम.
1TH 2:5 बारित्‍ते मोमोट मीकुन बस्‍केने बुद्रगिच्‍चना पोल्‍लें वळ्का हिल्‍लोम. अल्‍हेने मावा आस्तिताहाटीं मीकुन नळेह किया हिल्‍लोम, दीनकु पेने गवाइ मंता, इंचि मीक एरपाटे मंता.
1TH 2:6 इच्‍चोरे आयाका, मोमोट अय्ते किरिस्‍तुना प्रेरितुल्कुम इंचि मीपोर्रो मावा अदिकारम हूपिस्तोमे, गानि मिमेट आयि, वेरेटोर आयि, इंका बोनाहेंदाले आयि पेद्‍दातनम दोर्किच्‍कुनालय मोमोट हूळा हिल्‍लोम.
1TH 2:7 तल्‍लुर दाना पिलाल्कुन बल्हा अवरिच्‍कुंतनो, अल्हे मोमोटगुडा मीकुन बेस हूळकुत्‍तोम.
1TH 2:8 अदुनहाटीं मीपोर्रो इच्‍चोर पावरम मंता गदा, मोमोट मीक सिराप पेनदा बेसता कबुरे आयो, मावा जीवागुडा हियालय तयार मत्‍तोम. मिमेट अच्‍चोर पावरमतोर आसि मत्‍तिट.
1TH 2:9 विस्वासुल्‍कुनिटा! मावा कस्‍टम, तकलिप मीक मते मंदार. मोमोट मीक बोनके बर्वु आयामन्‍नि इंचि नर्का-पिय्यल कबळ कीतोम. अल्हा कीसेके पेनदा बेसता कबुर मीक वेहचि मत्‍तोम.
1TH 2:10 मी विस्वासुल्कुना नड्‍डुम मोमोट बल्हा पवित्रते, सत्‍तेमते, दोसेम हिलाकोंटा मत्‍तोम, इदुना मिमेटे गवाइ मंतिट, पेनगुडा गवाइ मंता.
1TH 2:11 पेन मीकुन दाना राज्येमते आनि दाना पेद्‍दातनमते कलियालय केयता, अदुनहाटीं दानकु नच्‍चनालायक मिमेट ताकट इंचि वेहतोम. बाबाल बल्हा ओना पिलाल्कुन अवरिच्‍कुंतोर अल्‍हेने, मोमोट मीक हरेक मनकंक तेळियागोट्‍सि वेहासेके, दैरनेम हीसेक, विनंति कीसेके मत्‍तोम, इद मीक एरपाटे.
1TH 2:13 बस्के अय्ते पेनदा पोल्‍ले मावाहेंदाल मिहगा एव्ता, अस्‍के अद मनकालोराहेंदाल वातद आयो, गानि पेनदाहेंदाल वाता निजम पोल्‍ले आंद इंचि मिमेट केंजसि ओप्कुत्‍तिर. अदुनहाटीं मोमोट पेनदुक बस्‍केळ्‍क दन्यवाद कींतोम. मीवा विस्वासुल्कुना नड्‍डुम पेनदा पोल्‍लेगुडा कबळ कीसेके मंता.
1TH 2:14 अद बल्हा इत्‍ते, विस्वासुल्‍कुनिटा! यहुदिया राज्येमते येसु किरिस्‍तुनलोप्‍पो मत्‍ता पेनदा कलिसियातोरलेसीं मिमेट ताकसेक मंतिट. बारित्‍ते बल्हा मिमेट मीवा देसेमतोराहेंदाल तकलिप बोगांच्‍तिरो, अल्‍हेने ओर ओरा यहुदिल्कुनाहेंदाले तकलिप बोगांच्‍तुर.
1TH 2:15 ओरे सामि येसुन आनि पेनदा कबुरतोर्कुन हव्कतुर. ओर माकुन पलाते दोबतुर. पेन ओरतोनि कूस हिल्‍ले. ओर अंटोर लोकुल्‍कुना विरोदमते मंतुर.
1TH 2:16 पेनदा पिसागोटमळ बारेमते यहुदि आयवोर्कुनतोनि वळ्कते, ओर माकुन आपंतुर. इल्‍हा कीसि बस्‍केळ्‍क ओरा पापाल्कुन निहकुंतुर. गानि आकिरते पेनदा होंग ओरपोर्रो रेयंता.
1TH 2:17 विस्वासुल्‍कुनिटा! गडसेमताहाटीं मोमोट मिहागटाल लक्‍कु आतोम, गानि मनसुनाल लक्‍कु आया हिल्‍लोम. मर्रा मोमोट वेल्‍लेने आसेते मीवा मोकम हूळना इंचि बच्‍चोरो कोसिस कीतोम.
1TH 2:18 बारित्‍ते माक मिहगा वायागोम इंचि मंता. नना पौलुस, बच्‍चुंगो मल्कां कोसिसगुडा कीतन, गानि देय्यम माक अड्‍डम आयुंदु.
1TH 2:19 मावा आसे आयि, मावा कुसि आयि, मना येसु सामि मर्रा वायानस्के ओना मुन्‍ने मावा पेद्‍दातनमता किरिटम आयि! बतल आंद? मिमेट आयिरा?
1TH 2:20 हो, मावा पेद्‍दातनम, मावा कुसि मिमेटे आंदिर.
1TH 3:1 अदुनहाटीं, इंका सहन कियमळ मातोनि आया पर्राका, एतेंस सहरते होंचि ओंटिगा मंदना विचारम कीतोम.
1TH 3:2 किरिस्‍तुना बेसता कबुरतुन मावातोनि कलियसि वेहानोर पेनदा दासुड तिमोति तम्मुन मिहगा लोहतोम. मीक बसोंटा तकलिप वायिनागानि पजोळ्क-मुन्‍नेळ्‍क आयाकोंटा विस्वासमते गट्‍टिगा मंदना इंचि ओर मीकु समजांचि वेहंतोर. बारित्‍ते इसोंटा तकलिपकु बोगांचालये पेन मनाकुन निलाहता इंचि मीक एरपाटे.
1TH 3:4 मोमोट मीवातोनि मत्‍तस्के, इसोंटा तकलिपकु वांतां इंचि मुन्‍नेने वेहतोम. अल्‍हेने जर्गता, अद मीक एरपाटे.
1TH 3:5 अदुनहाटीं नना आगा पर्राहिल्‍लेन. पट्‍टु हूळानोर मीवा पट्‍टु हूळतोरा बतला, मोमोट कीता कस्‍टम एर्तम आताना बतला इंचि, मीवा विस्वासमतुन कन्कुनालय नना तिमोतिन लोहतन.
1TH 3:6 गानि तिमोति इंदके मिहागटाल महगा, मीवा विस्वासम आनि पावरमता बारेमते बेसता कबुर पीसि वातोर. मोमोट बल्हा मीकुन हूळालय बागा तनलाळंतोम, अल्‍हेने माकुन हूळालय मिमेटगुडा मावा बस्‍केळ्‍क मति कींतिट इंचि वेहतोर.
1TH 3:7 अदुनहाटीं विस्वासुल्‍कुनिटा! मोमोट तकलिपते, दुक्‍कमते मनिनागानि मीवा विस्वासमताहेंदाल, मीवा बारेमते माकु सांति दोर्कता.
1TH 3:8 बारित्‍ते मिमेट सामिन लोप्पो गट्‍टिगा निल्‍सि मत्‍ते, मोमोट जीवाते मत्‍तापे.
1TH 3:9 मीवाहेंदाल मोमोट मना पेनदा मुन्‍ने वेल्‍ले कुसिते मंतोम. अदुना बारेमते मीवाहाटीं मोमोट पेनदुक वेल्‍लेने दन्यवाद कींतोम.
1TH 3:10 मोमोट मीकुन हूळसि, मीवा विस्वासमते तक्‍को मत्‍तदुन पूरा कियाना इंचि नर्का-पिय्यल पेनदुक पारतना कीसेके मंतोम.
1TH 3:11 इंदके मना पेनबाबाल आनि मना येसु सामि, मोमोट मिहगा वायालय हर्रि तयार कियिरकांटी.
1TH 3:12 मोमोट मीकुन पावरम कीताप, मिमेटगुडा मीलोप्‍पो वरोंक-वरोर पावरम कियालय, अंटोर लोकुल्‍कुनतोनि पावरम बेर्सालय सामि मीक सहायम कियिरकांटी.
1TH 3:13 बस्के अय्ते मना सामि येसु ओना अंटोर पवित्र लोकुल्‍कुनतोनि वांतोरो, अस्‍के मनम पेनबाबाना मुन्‍ने पवित्रते दोसेम हिलाकोंटा मनालय मना मनसुकुन गट्‍टिगा कियिरकांटी, आमीन.
1TH 4:1 विस्वासुल्‍कुनिटा! बल्हा पिसते पेनदुन कूस ईरा परांतोम इंचि मिमेट मावाहेंदाल करियतिर, अल्‍हेने मिमेट पिस्सेकगुडा मंतिट, इंकागुडा मुन्‍ने अल्‍हेने पिस्सेक होंट इंचि विनंति कीसेके मंतोम आनि येसु सामिना लोप्पो तेल्‍पिच्‍चि वेहासेक मंतोम.
1TH 4:2 मोमोट येसु सामिनाहेंदाल बव-बव आदेसकु हीसि मत्‍तोम, अव मीक एरपाटे.
1TH 4:3 बारित्‍ते मिमेट बोगमतनमताल लक्‍कु मत्‍ते पवित्र मनंतिर, इदे पेनदा इच्‍चा आंद.
1TH 4:4 मीवा लोप्पोटाल हरेक मनकल ओना मेंदुल्तुन ओप्के पीसि, पवित्र, कदर कियानालायक मनमळ गावाले.
1TH 4:5 लालचते मनानोर पेनदुन एरपाट किय्युर, असंटोरतोनि इल्‍हा मनमळ आयापर्रो.
1TH 4:6 दीना बारेमते बोरे आयिर दंटाता विस्वासिन पसांचामन्‍नि, पसांचते सामि ओर्क सिक्‍सा हींतोर इंचि मोमोट मीक मुन्‍नेने गट्‍टिगा वेहतोम.
1TH 4:7 बारित्‍ते पेन मनाकुन पवित्र मनालय केयता, कराब मनालय आयो.
1TH 4:8 अदुनहाटीं बोर अय्ते इद पोल्‍लेतुन पास्कंतोर, ओर मनकन पास्‍कोर गानि मीक पवित्र आत्मा हियना पेनदुन पास्कंतोर.
1TH 4:9 इंदके वरोंक-वरोर पावरम कियमळ मिमेट पेनदाहेंदाले करियतिर. अदुनहाटीं दादाल-तम्मुह्कुनालेसीं मिमेट वरोंक-वरोर पावरम कीम्‍टु इंचि रासनद अव्‍सरम हिल्‍ले.
1TH 4:10 मिमेट मेसिडोनिया राज्येमते मनना अंटोर विस्‍वासुल्‍कुन पावरम कीसेके मंतिट. गानि विस्वासुल्‍कुनिटा! मिमेट इंका एक्‍को पावरम कीम्‍टु इंचि मोमोट विनंति कीसेके मंतोम.
1TH 4:11 मोमोट मीक आदेस हीताप, सांतिते पिस्सना, बोना कबाह्‍क ओरे कियाना, बोना कयकुने ओरे कबळ कियाना कोसिस कीम्‍टु.
1TH 4:12 इल्‍हा मत्‍ते मिमेट विस्वासम कियवोरा मुन्‍नेगुडा कदरलायक मनंतिर, बोना पोर्रोने बर्वु आयिर.
1TH 4:13 विस्वासुल्‍कुनिटा! हातोरा बारेमते मीक तेळियाकोंटा मनमळ माक इस्‍टम हिल्‍ले. बदे आसे हिल्वोर दुक्‍कमते मनंतुर, गानि ओरालेसीं मिमेट मनमट.
1TH 4:14 बारित्‍ते येसु हासि मर्रा जीवाते तेदतोर इंचि मनम विस्वासम कींतोम, अल्‍हेने बोर अय्ते येसुन विस्वासम कीसि हातुर, ओर्कुन पेन येसुनतोनि पीसि वायार.
1TH 4:15 सामिना पोल्‍ले परकारम मोमोट मीक वेहानद बतल इत्‍ते, सामि मर्रा वायानस्के मनम पिस्सि मनिनागानि, हाता विस्वासुल्कुंकन्‍ना मुन्‍ने सामिनगा होना पर्रोम.
1TH 4:16 बारित्‍ते सामि स्वर्गमताल हिळु रेयानुर अस्‍के पेद्‍दा आवाजते आदेस हियमळ, पेद्‍दा दूताता पोल्‍लेते आनि पेनदा तूताकोमता आवाज कियमळ जर्गंता. अस्‍के बोर अय्ते किरिस्‍तुनलोप्‍पो हातुर, ओर मुन्‍ने जीवाते तेदानुर.
1TH 4:17 पजा ओरतोनि पिस्सि मत्‍ता मनाकुनगुडा, मब्बु तेर्पेनपोर्रो वळिते किरिस्‍तुनतोनि कलियालय तेहकुंचि ओयमळ जर्गंता. इल्‍हा मनम बस्‍केळ्‍क सामिनतोनि मनंतोम.
1TH 4:18 अदुनहाटीं इव पोल्‍लेनाल वरोंक-वरोर दैरनेम हीसेक मंटु.
1TH 5:1 विस्वासुल्‍कुनिटा! अव गटनां जर्गना वेला, कालमता बारेमते मोमोट मीक रासाना अव्‍सरम हिल्‍ले.
1TH 5:2 बारित्‍ते नर्कटा वेलाते दोंगल बल्हा अचानक वांतोर, अल्‍हेने सामि वायाना रोजुगुडा मनंता इंचि मीकु एरपाटे.
1TH 5:3 बस्के अय्ते लोकुल्‍क, “मोमोट सांतिते मंतोम, माक वेर्रे हिल्‍ले,” इंचि वेहासेक मनंतुर, अस्‍केने पीटे मंदना मुरतळकु बल्हा नोप्‍पिं तेदंतां अल्हा, पीळा ओरापोर्रो अचानक वांता. ओर बल्हा किय्यिनागानि पिस्सुर.
1TH 5:4 गानि विस्वासुल्‍कुनिटा! अद रोजु दोंगानलेसीं अचानक मीपोर्रो वायालय मिमेट बारे हीकटते हिल्‍लिर.
1TH 5:5 मिमेट अंटोर वेल्‍गु आनि पोद्‍दलता पिलाल्क आंदिर, मनम नर्का आनि हीकटतोरम आयोम.
1TH 5:6 अदुनहाटीं मनम वेरेतोरालेसीं मींडसि मनमळ आयो गानि तेल्‍विते, उसारते मंदकोम.
1TH 5:7 मींडानोर नर्कळ्‍क मींडंतुर, रिम्मा आयानोर नर्कळ्के रिम्मा आंतुर.
1TH 5:8 गानि मनम पोद्‍दलतोरम आताहाटीं सांतिते मंदकोम. मना चातितुन कापाळना कच्‍चिता अंगिलेसीं विस्वासम आनि पावरमते ताककोम. मना तल्‍लक टोपिलेसीं मुक्‍तिता आसे इरकोम.
1TH 5:9 बारित्‍ते पेन मनापोर्रो होंग हुप्‍सालय आयो, गानि मना येसु किरिस्‍तु सामिनाहेंदाल मुक्‍ति दोर्किच्‍कुनालय मनाकुन निलाहता.
1TH 5:10 मनम हायिना, पिस्सिना किरिस्‍तुनतोनि मंदना इंचि ओर मनाहाटीं जीवा हीतोर.
1TH 5:11 अदुनहाटीं, मिमेट इंदके कीसेके मंतिट अल्‍हेने वरोंक-वरोर दैरनेम हीम्टु, वरोन-वरोर विस्वासमते निलाहट.
1TH 5:12 विस्वासुल्‍कुनिटा! बोर अय्ते मीवा नड्‍डुम कस्‍टपळसि, सामिना हर्दे मीकुन मुन्‍ने अर्सि ताकिचेके कराहंतुर, ओर्क मिमेट कदर हीम्टु. ओर कियाना बेसता कबाह्कुनाहाटीं पावरमते ओर्क एक्‍को मान-मर्यादा कीम्‍टु, वरोंक-वरोर बेस सांतिते मंटु, इंचि मीकु विनंति कींतन.
1TH 5:14 मावा विस्वासुल्‍कुनिटा! लंडोर्कुंक समजांचि वेहाट, वेरियानोर्कुंक दैरनेम हीम्टु, कमजोर मत्‍तोर्कुंक सहायम कीम्‍टु, अंटोरतोनि ओप्‍केते मंटु इंचि मोमोट मीक तेळियागोट्‍सि विनंति कीसेके मंतोम.
1TH 5:15 मीलोप्‍पो बोरन्‍ना सेड्‍डातनमता बदला सेड्‍डातनम कियाकोंटा हूळकुंटु. गानि बस्‍केळ्‍क वरोंक-वरोर आनि अंटोराहाटींगुडा बेस कियालय कोसिस कीम्‍टु.
1TH 5:16 बस्‍केळ्‍क कुसिते मंटु.
1TH 5:17 बस्‍केळ्‍क पारतना कीसेके मंटु.
1TH 5:18 अन्‍नि परिस्तितिने मिमेट पेनदुक दन्यवाद कीम्‍टु, बारित्‍ते मिमेट येसु किरिस्‍तुनलोप्‍पो इल्हे मंदना इंचि पेनदा इच्‍चा मंता.
1TH 5:19 पवित्र आत्माता वेलगुन पिरुहमट.
1TH 5:20 पेनदा कबुरतोरा पोल्‍लेन पास्कमट.
1TH 5:21 गानि अन्‍निटवुन परिक्‍सा कीसि हुळाट, बव बेसतवो अवुन पीसि मंटु.
1TH 5:22 अन्‍नि तीरकुना कराब पोल्‍लेनाल लक्‍कु मंटु.
1TH 5:23 सांति हियना पेने कुद मीकुन पुरागा पवित्र किय्‍यिकांटी, मावा येसु किरिस्‍तु सामि मर्रा वायानादाका मीवा आत्मातुन, जीवातुन, मेंदुलतुन दोसेम हिलाकोंटा कापाळिकांटी.
1TH 5:24 मीकुन केयता पेन विस्वासमगल्‍लद आंदु, अद अल्‍हेने कींता.
1TH 5:25 विस्वासुल्‍कुनिटा! मावाहाटीं पारतना कीम्‍टु.
1TH 5:26 अंटोर विस्वासुल्‍क, वरोंक-वरोर कय कल्‍पिसि पवित्र पावरमते जोहार कीम्‍टु.
1TH 5:27 इद सिट्‍टि अंटोर विस्वासुल्‍क केंजानाल हद्‍विसि हुप्‍सा इंचि नना सामिना अदिकारमते वेहासेक मंतन.
1TH 5:28 मना सामि येसु किरिस्‍तुना कुर्पा मीपोर्रो मन्‍निकांटी. आमेन.
2TH 1:1 नना पौलुस, सिल्‍वानुस आनि तिमोति मोमोट इद सिट्‍टि मीकु तेसलोनि सहरते मंदना कलिसियातोर्कुंक रासेक मंतोम. मना पेनबाबाल आनि सामि येसु किरिस्‍तुनाहेंदाल कुर्पा, सांति दोर्किकांटी.
2TH 1:3 विस्वासुल्‍कुनिटा! मीवा विस्वासम वेल्‍ले बेरस्सेक मंता, मिमेट वरोन-वरोर कीकुनना पावरम वेल्‍ले बेरस्सेक मंता. अदुनहाटीं मोमोट बस्‍केळ्‍क मीवा बारेमते पेनदुक दन्यवाद कियमळ गावाले. इदे बरोबर मंता.
2TH 1:4 अचोने आयाका मिमेट तकलिपकुन, बादन ओप्के पीसि पेनदा लोप्पो गट्‍टिगा विस्वासमते निल्‍सि मंतिर. अदुनहाटीं मोमोट मीवा बारेमते पेनदा कलिसियाने पेद्‍दातनम वेहकुंचेके मंतोम.
2TH 1:5 इद पेनदा सत्‍तेम न्‍यायमता रुजुव आंदु. मिमेट पेनदा राज्येमते होननालायक आयागोम इंचि इवन्‍नि बादां अरसेक मंतिर.
2TH 1:6 बोर अय्ते मीकुन तकलिप कींतुर, दानकु बदुल पेन ओर्क तकलिप हियमळ न्‍यायमे आंद.
2TH 1:7 बस्के अय्ते सामि येसु ओना बलमगल्‍ला दूतनतोनि पोत्‍तना तळमिते स्वर्गमताल दिस्‍सानुर, अस्‍के तकलिपते मत्‍तोर्कुंक आनि माकु सांति हियानुर.
2TH 1:8 बोर अय्ते पेनदुन एरपाट किय्युर, बोर अय्ते मना सामि येसुना बेसता कबुरतुन पीसि ताकुर, ओर्क पेन सिक्‍सा हिय्यार.
2TH 1:9 ओर सामिना मुन्‍नेटाल आनि ओना ताकतता महिमाताल लक्‍कु आसि ओर्क बस्‍केळ्‍क मनना नासडेमता सिक्‍सा आयार.
2TH 1:10 बस्के अय्ते येसु सामि मर्रा वायानुर अस्‍के ओना पवित्र लोकुल्‍कुनाहेंदाल महिमा एतंतोर आनि विस्वासम कीतुर अंटोराहेंदाल ओर पेद्‍दातनम दोर्किच्‍कुंतोर. बारित्‍ते मोमोट वेहता गवाइतुन मिमेट विस्वासम कीतिट.
2TH 1:11 इदुनहाटीं, मना पेन मीकुन बताहाटीं अय्ते केयता अदुनलायक मिमेट मनालय, अन्‍नि बेसता कबाह्‍क पूरा कियालय आनि विस्वासमतव पूरा कबाह्‍क पेनदा ताकततोनि पूरा आयालय मोमोट मीवाहाटीं बस्‍केळ्‍क पारतना कीसेके मंतोम.
2TH 1:12 इल्‍हा मना पेन आनि मना सामि येसु किरिस्‍तुना कुर्पातुन पीसि, मीवाहेंदाल मना येसु सामिना पोरोल्क कदर दोर्काना आनि ओनहेंदाल मीक कदर दोर्काना.
2TH 2:1 विस्वासुल्‍कुनिटा! इंदके मना सामि येसु किरिस्‍तु मर्रा वायाना बारेमते, आनि मनम जमा आसि ओनतोनि कलियाना बारेमते मीक विनंति कीसेके मंतोम.
2TH 2:2 अद बतल इत्‍ते, सामि मल्सि वायाना रोजु वाता इंचि मिमेट आत्माताहेंदाल आयि, पोल्‍लेताहेंदाल आयि, मावाहेंदाले सिट्‍टि वाता इत्‍ताप आयि मीक केंजा वाते, मीवा मनसुन हीके-हेके आया हियमटु, वेरियमट.
2TH 2:3 बोरे आयिर बदे रीतुने मीकुन दोका किया हियमटु; बारित्‍ते मुन्‍ने वरोना पोल्‍ले वरोर केंजाकोंटा आयाना कालम वायार, पजा पेनदा पोल्‍लेतुन विरोद कियाना नासडेमता मर्रि दिस्‍सानुर, दाना पजाने किरिस्‍तु मर्रा वायाना रोजु वायार.
2TH 2:4 आ नासडेमता मर्रि, पेन इंचि इनानवुन अन्‍निन, मनकालोर मोळ्‍कानवुन अन्‍निन विरोद कीसि, ओनद ओरे पेद्‍दोन इंचि वेहकुंतोर. ओर पेनदालेसीं पेनदा गुळिते होंचि उद्‍दानुर, आनि ननाने पेनदुन इंचि वेहकुनानुर.
2TH 2:5 नना मीवातोनि मत्‍तस्के इव पोल्‍लें वेहतन, मीक मति हिल्‍लेना?
2TH 2:6 पेनदा पोल्‍लेक विरोदमते तिरियानोर ओना वेला वातारित्‍तेन दिस्‍सानुर, इंदके ओन बतल आपसेके मंतानो मीक एरपाटे मंता.
2TH 2:7 पेनदा पोल्‍लेतुन विरोद कियानोना मर्ममता ताकत इंदकेगुडा कबळ कीसेकेन मंता; गानि दान आपानोन पक्‍कक कियानादाका पेन ओन आपसेकेने मनंता.
2TH 2:8 बस्के अय्ते पेनदा पोल्‍लेतुन विरोद कियानोर दिस्‍सानुर, अस्‍के येसु सामि ओना तोळ्‍दा ऊपिरते ओन हव्‍किसि, ओर वायानेंके दिस्‍सना वेलगुने ओन नासडेम कियानुर.
2TH 2:9 पेनदा पोल्‍लेतुन विरोद कियानोर वायमळ इत्‍ते, देय्यमतदे उंदि कबळ आंदु, ओर वासि आबद्‍दम पोल्‍लेने देय्यमतव अन्‍नि ताकतकुनतोनि चिन्‍हां, इचंत्रमता कबाह्‍क कियानुर.
2TH 2:10 पजा कराब कबाह्‍क कीसि नासडेम आयानोर्कुन अन्‍नि तीरुकुने पसांचंतोर. बारित्‍ते बद सत्‍तेमतुन अय्ते पावरमते ओप्‍कुंचि मत्‍ते मुक्‍ति दोर्किस मनवळ, ओर अदुन ओप्पकुन्‍ना हिल्‍लुर.
2TH 2:11 अदुनहाटीं ओर आबद्‍दमतुने विस्वासम किय्‍यिर इंचि पेन ओरा लोप्पो गयबेत कियाना सक्‍तितुन लोहंता.
2TH 2:12 बचुटुर अय्ते सत्‍तेम पोल्‍लेतुन विस्वासम कियवा, कराब कबाह्‍कुने कूस आंतुर, ओर अंटोर्क पेन सिक्‍साता आदेस हिय्यार.
2TH 2:13 सामिना पावरमगल्‍ला विस्वासुल्‍कुनिटा! मिमेट पवित्र आत्माताहेंदाल पवित्र आसि, सत्‍तेमते विस्वासम इर्सि पिसालय पेन मीकुन मुन्‍नेने पेरता. अदुनहाटीं माकु मीवा बारेमते पेनदुक बस्‍केळ्‍क दन्यवाद कियमळ गावाले.
2TH 2:14 इल्‍हा मिमेट मना सामि येसु किरिस्‍तुना महिमातुन दोर्किच्‍कुनना इंचि, पेन मोमोट वेहता बेसता कबुरताहेंदाल मीकुन केयता.
2TH 2:15 अदुनहाटीं विस्वासुल्‍कुनिटा! गट्‍टिगा निल्‍सि मंटु, मावा तोळ्‍दाल पेय्सता पोल्‍लेहेंदाल, सिट्‍टिताल बव रीति-रिवाजकु अय्ते मीक कराहतोम अवुन पीसि ताकट.
2TH 2:16 मना सामि येसु किरिस्‍तु आनि पेनबाबाल मनाकुन पावरम कीसि, ओना कुर्पाहेंदाल बस्‍केळ्‍क मनना सांति, बेसता आसे हीतोर.
2TH 2:17 मीवा हरेक बेस कबळते, हरेक पोल्‍लेते पेन मीकुन गट्‍टिगा किय्‍यिकांटी, इंका मीवा मनसुने सांति हिय्यिकांटी.
2TH 3:1 विस्वासुल्‍कुनिटा! मीक आकिरते वेहानद बतल इत्‍ते, सामिना पोल्‍ले मीलोप्‍पो पैलांचतापे, वेरेतोरा लोप्‍पोगुडा बिराना पैलांचि पेद्‍दातनम दोर्कनाहाटीं पारतना कीम्‍टु.
2TH 3:2 अल्‍हेने अंटोर लोकुल्‍क विस्वासुल्‍क आयुर, अदुनहाटीं तेडा आनि दुस्‍ट लोकुल्‍कुनाल पेन माकुन पिसागोट्‍टि.
2TH 3:3 गानि सामि विस्वासमगल्‍लोड आंदुर; ओर मीकुन देय्यमता कयदाल कापाळसि गट्‍टिगा निलाहंतोर.
2TH 3:4 मोमोट आदेस हीताप मिमेट ताकसेके मंतिट. मुन्‍नेगुडा अल्हे ताकंतिर इंचि सामिन लोप्पो माक मीवा बारेमते बरोसा मंता.
2TH 3:5 सामि मीवा मनसुकुन पेनदा पावरमते अल्‍हेने किरिस्‍तुना गट्‍टि ओप्‍केते ताकसा परांतोर.
2TH 3:6 विस्वासुल्‍कुनिटा! बोर अय्ते लंडु आसि मंतुर, मोमोट वेहता रीति-रिवाज परकारम ताकसेक हिल्‍लुर, असोंटा हरेक मनकानाल लक्‍कु मंटु इंचि मना सामि येसु किरिस्‍तुना पोरोलते मीक आदेस हीसेक मंतोम.
2TH 3:7 मोमोट मीवातोनि मत्‍तस्के लंडु आसि मना हिल्‍लोम, अदुनहाटीं मालेसीं बल्हा ताकाना इंचि मीक कुद एरपाटे मंता.
2TH 3:8 मोमोट बोनगागुडा पुक्‍कटता गाटो तिना हिल्‍लोम, मी लोप्पोटाल बोनके बर्वु आयामन्‍नि इंचि नर्का-पिय्यल कबळ, कस्‍टम कीसि गाटो तित्‍तोम.
2TH 3:9 माक मीपोर्रो बर्वु आयाना अदिकारम हिल्‍ले इत्‍ताप आयो, गानि मिमेटगुडा मावालेसीं मंदना इंचि मीक हुप्‍सालय मोमोट कबळ कीसि तित्‍तोम.
2TH 3:10 मोमोट मीवातोनि मत्‍तस्के, “बोर्कन्‍नागिंटा कबळ कियानद हिलाकोंटे, ओर गाटो तिनामन्‍नि” इंचि आदेस हीसि मत्‍तोम.
2TH 3:11 गानि मिहगा इच्‍चुर लोकुल्‍क लंडोर्क मंतुर, ओर बतले कबळ किय्युर, सिराप इंकावरोना जोलिक होनना कबाह्‍क कीसेके मनंतुर इंचि मोमोट केंजतोम.
2TH 3:12 असोंटा लोकुल्‍क चुपचाप कबळ कीसि ओरा पिस्वरता कमाइ कियिरकांटी, ओर्क मोमोट सामि येसु किरिस्‍तुना पोरोलते आदेस हीसि, बुद्‍दि वेहंतोम.
2TH 3:13 विस्वासुल्‍कुनिटा! मिमेट बेसता कबाह्‍कुने नेरबळताप मनमट.
2TH 3:14 बोरन्‍नागिंटा इद सिट्‍टिते रासता पोल्‍लेन केंजसि ताकाकोंटे, ओनपोर्रो नदर इर्राट, ओनकु सिग्गु वायागोम इंचि ओनतोनि दंटा पियमट.
2TH 3:15 अयना ओन पगातोनलेसीं हूळमट, गानि तम्मुनालेसीं ओन्क वेर्रे वेहाट.
2TH 3:16 कुद सांति हियना सामि, बस्‍केळ्‍क अन्‍नि तीरुकुने मीक सांति हिय्यिर, बस्‍केळ्‍क मी अंटोरतोनि मन्‍निरकांटी.
2TH 3:17 नना पौलुसुन आंदुन, नावा कयदेने मीक जोहार रासेक मंतन. अन्‍नि सिट्‍टिने इद नावा आनवल आंद, नना इल्हे रासंतन.
2TH 3:18 मना सामि येसु किरिस्‍तुना कुर्पा मी अंटोरतोनि मन्‍निकांटी.
1TI 1:1 इद सिट्‍टि पौलुसुनद आंद. मनम बोनपोर्रो अय्ते आसे पडसि मंतोम, आ किरिस्‍तु येसु आनि मनाकुन कापाळाना पेनदा आदेसताहेंदाल नना किरिस्‍तु येसुना प्रेरित आतन.
1TI 1:2 विस्वासमते नावा निजम मर्रि आता तिमोतिंकु इद सिट्‍टि रासतन. मना पेनबाबानाहेंदाल आनि मना सामि येसु किरिस्‍तुनहेंदाल नीकु कुर्पा, दया आनि सांति दोर्कि.
1TI 1:3 नना मेसिडोनिया राज्येम होननेंके नीकु नना विनंति कीसि वेहतन. दाना परकारम निमे इपीसि सहरते मन्‍नु. निमे अगा मत्‍ते, बोर अय्ते सत्‍तेमकु बदुल वेरे बोदां कराहंतुर, ओर्कुन अल्हा कराहकोंटा आपा.
1TI 1:4 पुट्‍टिचि वेहना कतां, वंसाल्कुना जोलीं ओर होळसियालय आदेस हीम. बारित्‍ते अवुनहेंदाल वाद-विवादकु आंतां विस्वासमहेंदाल जर्गना पेनदा पिलानगुडा पुरागा आयो.
1TI 1:5 ई आदेसता उद्‍देसम, पवित्र गुंडेताल, मनसुना बेस पोल्‍लेताल आनि निजम विस्वासमताल पुट्‍टना पावरम आंद.
1TI 1:6 इच्‍चुर लोकुल्‍क इवनाल तप्‍पिसि वट्‍टि पोल्‍लें वळ्कालय दल्‍गतुर.
1TI 1:7 ओर वेहना पोल्‍लेना अर्तम बतलो ओर्के तेळियाकोन्‍ना, गट्‍टि विस्वासमते ओर, मूसाना नियमाल्कुना गुरुल्क आयाना इनकुंचंतुर.
1TI 1:8 मूसाना नियमकुने मत्‍ताप बरोबर ताकानय्ते, अद मंचिदे इंचि माकु एरपाटे.
1TI 1:9 इंका इव नियमकु नीतिमंतुल्‍कुनाहाटीं रासमळ जर्गाहिल्‍ले. गानि अव अय्ते, नियमकुन पीसि ताकवोराहाटीं, आदेसकुन पीसि ताकवोराहाटीं, बक्‍ति कियवोर आनि पापि लोकुल्‍कुनाहाटीं, अपवित्र आनि सत्‍तेमते ताकवोराहाटीं, तल्‍लुर-बाबोन हव्कानोराहाटीं, मनकालोर्कुन हव्कानोराहाटीं,
1TI 1:10 बोगमतनम कियानोराहाटीं, मांड्‍सा-मांड्‍सातोनि बोगमतनम कियानोराहाटीं, मनकालोर्कुन दोर्कापीसि अम्मानोराहाटीं, आबद्‍दम वळ्कानोराहाटीं, तप्‍पुड गवाइ वेहानोराहाटीं इंका सत्‍तेम पोल्‍लेन आबद्‍दम कियानोराहाटीं ई मूसाना नियमकु मंतां.
1TI 1:11 तल्‍सकुननालायक पेनदाहेंदाल वाता महिमामय बेसता कबुरतुन नना कराहना इंचि नाकु अप्पजेपमळ जर्गता.
1TI 1:12 मना सामि येसु किरिस्‍तु नाकु बलम हीतोर अदुनहाटीं नना ओन्क दन्यवाद कींतन. इंका नाकुन विस्वासम लायकतोर इन्कुंचि ओना सेवाताहाटीं निलाहतोर.
1TI 1:13 मुन्‍ने नना बदनाम कियुंदुन, तकलिप हियुंदुन, तेंडसि पोहचि वळ्‍कुंदुन. अयना नाकु सामिना दया दोर्कता, बारित्‍ते नना कियानद बतलो तेळियका, अविस्वासमते अल्हा कीतन.
1TI 1:14 मना सामिना कुर्पा नाकु वेल्‍लेन दोर्कता. अचोने आयका, येसु किरिस्‍तु ओनगा मनना विस्वासम आनि पावरमगुडा नाकु हीतोर.
1TI 1:15 पापिर्कुन पिसागोटनाहाटीं येसु किरिस्‍तु इद दुनियाते वातोर. ई पोल्‍ले सत्‍तेम आनि पूरा ओप्कुननालायक मंता. अंटोर्कन्‍ना पेद्‍दा पापिन नना आंदुन.
1TI 1:16 अय्नागानि येसु किरिस्‍तु नापोर्रो दया हुपिस्तोर. अल्हा दया हुपिच्‍चि, मुन्‍ने बोर अय्ते बस्‍केळ्‍क पिस्सना पिस्वर दोर्कना इंचि ओनपोर्रो विस्वासम कींतुरो, ओर्क ओना अंतेम हिलुवा सहनमतुन हुपिचनाहाटीं उंदि उदाहरनता रूपमते नावसोंटा पापिन इरतोर.
1TI 1:17 बस्‍केळ्‍क मनना राजाल, बस्‍केने नासडेम आयवोर, बस्‍केने दिस्सोर असोंटा मावा उंदे पेनदुक पीळि-पीळिनदाका कदर, पेदातनम दोर्कि. आमीन.
1TI 1:18 कोको तिमोति! पेनदा कबुरतोर नीवा बारेमते मुन्‍ने बव पोल्‍लें अय्ते वेह्‍चि मत्‍तुरो, आ पोल्‍लेना परकारम, निमे नीवा विस्वासमतुन गट्‍टिगा पीसि, मनसुना बेस पोल्‍ले पीसि वरोर बेस सिपाइलेह्का लडाइ कीसेके मनना इंचि नना नीकु आदेसतुन अप्पजेपसंतन. बारित्‍ते मनसुना पोल्‍लेतुन हय्सका वेल्‍लेन मंदि लोकुल्‍क, उंदि डोंगा रोंडु तुकडां आसोत्‍ताप, ओर ओरा विस्वासमतुन नासडेम कीकुत्‍तुर.
1TI 1:20 विस्वासमतुन नासडेम कीकुत्‍तोरव्टेटाल हुमिनयुस आनि सिकंदर ईर इव्वुर मंतुर. पेनदुन बदनाम कियाकोंटा बल्हा मनना इत्‍ता पोल्‍ले करियना इंचि नना ईर्कुन देय्यम्‍क अप्पजेपतन.
1TI 2:1 अन्‍निटकन्‍ना मुन्‍ने नना नीकु विनंति कींतन गदा, पेनदुक विनंति कियनेंके, पारतना कियनेंके, वरोनाहाटीं वरोर पारतना कियनेंके, दन्यवाद कियनेंके अंटोर लोकुराहाटीं कियगोम.
1TI 2:2 मनम राजालोराहाटीं आनि पेद्‍दा-पेद्‍दा अदिकारिल्कुनाहाटीं पारतना कियगोम. अल्हा कीते मनम आरामते, सांतिते आनि पेनदुक नच्‍चना कदरगल्‍ला पिस्वर पिसा पर्रांतोम.
1TI 2:3 इल्‍हा कियमळ मंचिद आंद. मनाकुन कापाळना पेनदा नदरतेगुडा इदे ओप्कुननालायक मंता.
1TI 2:4 लोकुल्‍क अंटोर्कुंक मुक्‍ति दोर्कना आनि निजमतुन एरपाट कियना इंचि पेनदा इच्‍चा मंता.
1TI 2:5 बारित्‍ते पेन उंदे आंद. इंका मनकन आनि पेनदुन कल्‍पालय नड्‍डुमगुडा वरोरे मंतोर. ओरगुडा वरोर मनकले. ओरे किरिस्‍तु येसु आंदुर.
1TI 2:6 अंटोर लोकुल्‍कुंक मुक्‍ति अस्सि हियनाहाटीं ओर सततुन कुदुवा इरसि ओनद ओर अप्पजेपकुत्‍तोर. मंचि वेलापोर्रो ओना गवाइ हीतोर.
1TI 2:7 इदे गवाइतुन वेहनाहाटीं, नाकुन प्रचार कियानोर प्रेरित इंचि पेरमळ जर्गता. इंका यहुदि आयवोर्कुंक विस्वासम आनि सत्‍तेमता बारेमते कराहनोर इंचि निलाहमळ जर्गता. नना निजम वेहचंतन, आबद्‍दम वेहासेक हिल्‍लेन.
1TI 2:8 अदुनहाटीं पारतना कियना अन्‍नि जेगाने मनसुने बतले होंगु-जगडम इर्रांकोंटा पवित्र कय्‍कु पोर्रो तेहचि मांडसा पारतना कियना इंचि नावा इच्‍चा मंता.
1TI 2:9 अल्‍हेने मुरताह्कुना हेंदाल नना कोरानद बतल इत्‍ते, अव सादा-सिंपल कपडिं पोंडसि, साप मनसुने मनगोम. इंका बेस कबाह्‍क कीसि पेनदा बेस बक्‍ति कियनावुनलेसीं मनगोम. गानि बंगाराल्क, डिस्‍को पूसाना दुम्मे वाटकुंचि, वेल्‍लेन दराता कपडिं केरसि, रका-रकाल्कुना जेडां वाटसि सिंगाराल्क अर्रानायो. बारित्‍ते मुरताह्कुंक अदे बेस.
1TI 2:11 मुरतळ सिराप सांतिते कय हिळु मंचि अन्‍नि करियगोम.
1TI 2:12 उंदि मुरतळ, मांडसक कराहमळ, ओनपोर्रो अदिकारम ताकिचमळता बारेमते, नना ओप्कुन्‍नोन. मुरतळ सिराप चुपचाप मनगोम.
1TI 2:13 बारित्‍ते पेन मोदाला आदामुन कीसि पज्जोटाल हव्‍वान कीता.
1TI 2:14 इचोने आयका, आदाम पसांचा हिल्‍लोर गानि मुरतळ पसांचि पापमते अरता.
1TI 2:15 गानि अद ओक्‍कला विस्वासम, पावरम, पवित्र आनि ओप्‍केते पिलाल्क कंचेके तल्‍लुना जिम्मेदारिं पूरा कियानय्ते, दानकु तप्‍पाकोंटा मुक्‍ति दोर्कार.
1TI 3:1 ओक्‍कला बोरन्‍ना मनकल कलिसियाता पेद्‍दा मनकल आयना मनसु इरते, ओर तप्‍पाकोंटा बेस कबळ कियना इनकुंतोर, इत्‍ता पोल्‍ले मात्रम निजम आंद.
1TI 3:2 पजा आ पेद्‍दा मनकना पिस्वरते बतले दोसेम मननायो. ओर उंदे मुरतटा मुय्दो आयगोम, ओर ओप्के पीसि मनानोर आयगोम, ओर विचारम कीसि ताकानोर आयगोम, अंटोर ओना कदर कियनालायक ओर मनगोम, ओर वेरेतोर्कुन बेस हूळकुनानोर आयगोम आनि वेरेतोर्क कराहनालायकगुडा मनगोम.
1TI 3:3 इंका ओर कल्‍लु उनानोर, मर्लाबळानोर, जगडम कियानोर मनामन्‍नि गानि मेत्‍तटा मनसुनोर मनगोम. ओन्क कोत्‍तना लालच मनामन्‍नि.
1TI 3:4 ओर ओना सतता कुटुंब बारेमता अन्‍नि जिम्मेदारिं बेस हूळकुनानोर मनगोम, ओना मर्क-मियाह्क ओना देकरेकते मंचेके ओना बेस कदर कियनोर मनगोम.
1TI 3:5 बारित्‍ते वरोर मनकंक ओना कुटुंबता देकरेक किय्युडे तेळियाकोंटे, ओर पेनदा कलिसियाता देकरेक बल्हा किया परांतोर?
1TI 3:6 इंका ओर पूनें-पूनें विस्वासमते वातोर आयामन्‍नि, बारित्‍ते असंटोंकु गर्रा वासि देय्यम्‍क दोर्कानसोंटा सिक्‍साता आदेस ओन्क दोर्कार.
1TI 3:7 इच्‍चोने आयका वेरे लोकुल्‍कुना विचाराल्कगुडा ओना बारेमते बेस मनगोम. अल्हा मनाकोंटे ओर सिग्गु पोळागोट्‍कुंचि देय्यमता कय्‍दुक दोर्का परांतोर.
1TI 3:8 कलिसियाता सेवाकुल्कगुडा अल्हेन कदरलायक मनना. ओर रोंड नाल्केनोर इत्‍ते चुगलीं कियानोर मनामन्‍नि, ओर्कु कल्‍लु उनना अलवट मनामन्‍नि, ओर तप्पु कबाह्‍क कीसि संपादिंचनोर मनामन्‍नि.
1TI 3:9 ओर विस्वासम बारेमता मर्ममतुन मनसुना बेस पोल्‍ले वेहताप तेल्‍पिचकुंचि दान गट्‍टिगा पीसि मनानोर आयगोम.
1TI 3:10 ईरा गुनम बसंटदो तेळियनाहाटीं ईरदगुडा परिक्‍सा येतगोम. परिक्‍साते ओरगा बतले दोसेम दोर्काकोंटे, ओर्कुन कलिसियाता सेवक इंचि कबळ किया हियना.
1TI 3:11 इल्हेने मुर्ताह्कगुडा अंटोर कदर हियनलायक मनगोम. अवुनगा वेरेतोर्कुन अपमानम कियना गुनम मनामन्‍नि. गानि बेस ओप्‍केते अन्‍नि पोल्‍लेने विस्वासम कियनलायक अव मनगोम.
1TI 3:12 कलिसियाता सेवाकुंक उंदे मुत्‍तो मनगोम. ओर ओना सतता मर्क-मियाह्क आनि ओना संसारमतुन बेस ताकसानोर आसि मनगोम.
1TI 3:13 बारित्‍ते बोर अय्ते सेवक इंचि कबळ कींतोर ओर बेस कदर दोर्किच्‍कुना परांतोर. अचोने आयका किरिस्‍तु येसुना पोर्रो मनना ओना विस्वासमते ओन्क वेल्‍लेन दैरनेम दोर्कंता.
1TI 3:14 नाकु निहगा बिराना वायना आसे मंता. गानि ओक्‍कला नाकु वायालय आल्सेम आते, पेनदा कुटुंबते, इत्‍ते जीवाते मनना पेनदा कलिसियाते वरोर मनकल बल्हा मनगोम इत्‍ता पोल्‍ले नीकु एरपाट आयगोम इंचि इद सिट्‍टि रासेक मंतन. बारित्‍ते कलिसिया निजमता निटड गुंजा आनि पुनादि आंदु.
1TI 3:16 मना बक्‍तिता सत्‍तेमता मर्मम वेल्‍लेन पेद्‍देद, इव्टे बतले अनमानम हिल्‍ले: किरिस्‍तु मनकना रूपमते पुटतोर, ओनगा बतले दोसेम हिल्‍ले इंचि पवित्र आत्मा वेहता, पेनदा दूतांक ओर दिसतोर, ओना बारेमते दुनियाता अन्‍नि देसेल्‍कुना लोकुल्‍कुंक प्रचार कियमळ जर्गता, दुनियातोर ओनपोर्रो विस्वासम इरतुर आनि पेनदा कदरते ओन मर्रा स्वर्गमते तेहामळ जर्गता.
1TI 4:1 वायना रोजकुने, इच्‍चुर लोकुल्‍क दोका हियना आत्माना बोदां आनि देय्यमता पोल्‍लें केंजसि ओरा विस्वासमतुन होळसंतुर, इंचि पवित्र आत्मा किलियर वेहंता.
1TI 4:2 बोरा बोदां अय्ते काचाह्ता सलाकिते बोळ्‍सि हासोंचि मंतां, असोंटा दोका हियानोर आनि आबद्‍दम वळकना मनकालोराहेंदाल इल्‍हा जर्गंता.
1TI 4:3 मरमिं आयामन्‍नि इंचि ओर कराहंतुर, इंका बव वस्‍तुक अय्ते पेन दाना विस्‍वासुल्‍कुनाहाटीं आनि निजमतुन एरपाट कियनोराहाटीं दान्क दन्यवाद हीसि तिनालय कीता, अव कोन्‍नि वस्‍तुकुन तिनामन्‍नि इंचि ओर कराहंतुर.
1TI 4:4 गानि पेन कीता अन्‍नि वस्‍तुक बेसतवे आंद. पेनदुक दन्यवाद कीसि तित्‍ते बवे वस्‍तुक मन्‍नि इननालायक मन्‍नों;
1TI 4:5 बारित्‍ते पेनदा पोल्‍ले आनि पारतना अद वस्तुन पवित्र कींता.
1TI 4:6 ओक्‍कला निमे इव आदेसकुन विस्वासुल्कुंक कराहनय्ते, निमे विस्वासम कियना बव पोल्‍लें आनि सत्‍तेम बोदानापोर्रो ताकंतिनो अवुनहेंदाल बेरसता, येसु किरिस्‍तुना वरोर बेस सेवक आकिन.
1TI 4:7 बक्‍ति हिल्वव अल्हेन तयार कीसि वेहना कतानाल मंटु. बस्‍केळ्‍क बक्‍ति पिस्वरते मुन्‍नेळ्‍क ताकाना कोसिसते मंटु.
1TI 4:8 बारित्‍ते मेंदुलताहाटीं कियना टेरनिंगते गोडच्‍चेन पायदा मंता. गानि पेनदा बक्‍ति कीते, अव्टे अन्‍नि तीरकुना पायदा मंता. इंदकेटा पिस्वर आनि मुन्‍नेटा पिस्वरहाटीं पेन हीता पोल्‍ले अव्टे कलियसि मंता.
1TI 4:9 ई पोल्‍ले पुरागा ओप्कुननालायक आनि विस्वासम कियनलायक मंता.
1TI 4:10 इदुनाहाटींगें मनम बागा कस्‍टपळसेके, पोराटम कीसेके मुन्‍नेळ्‍क ताकसेके मंतोम. बारित्‍ते मनम मना आसे, बस्‍केळ्‍क जीवाते मननद आनि अंटोर लोकुल्‍कुन कापाळना पेनदापोर्रो इरतोम, विसेस कीसि दान विस्वासम कियानोर्कुन पिसागोटना पेनदापोर्रो इरतोम.
1TI 4:11 इवे पोल्‍लें कियालय आदेस हीसि अंटोर्क करहा.
1TI 4:12 नीवा लेय्यातनमहेंदाल बोरे नीकुन सिन्‍नगा हूळानायो. गानि वळ्कुमळते, ताकमळते, पावरम हूप्‍समळते, विस्वासमते, पवित्र मनमळते विस्वासुल्‍क नीकुन हूळसि करियगोम, अल्हा मन्‍नु.
1TI 4:13 नना बदवेरदाका अय्ते वायोनो अदवेरदाका निमे अंटोर नड्‍डुम दर्मसास्‍त्रमतुन हदवुसेके, प्रचार कीसेके, कराहसेके मन्‍नु.
1TI 4:14 पेद्‍दाल्क नीपोर्रो कय्‍क इर्सि पारतना कियनेंके, बविस्यवानि कियानोर वेहता आ वरम नीकु दोर्कता. अद वरमतुन निमे वाळकुन, दान मति मर्गुमा.
1TI 4:15 इवे पोल्‍लेन निमे नीवा मनसुने इर्सि अवुना परकारमे ताकसेक मन. अस्‍के निमे बक्‍तिते बेस बेर्सनद अंटोर लोकुल्‍कुंक दिस अर्रंता.
1TI 4:16 निमे नीवा पिस्वर बारेमते आनि निमे वेहना पोल्‍लेन बारेमते वेल्‍ले जेर्गताते मन. अल्हा मत्‍तिनित्‍ते, नीवद निमे कापाळकुंतिन, नीवा पोल्‍लें केंजानोर्कुनगुडा कापाळंतिन.
1TI 5:1 पेद्‍दा वयम मनकन तेराहताप वळ्कुमा, गानि ओन नीवा बाबाल इन्कुंचि ओन्क तेल्‍पिचि वेहा. सिन्‍नोर्कुन तम्मुर इन्कुंचि ओरतोनि व्यवहार कीम.
1TI 5:2 अल्हेन पेद्‍दा वयम मुर्ताह्‍कुन यावह्क इन्कुंचि आनि सिन्‍ना वयम मुर्ताह्‍कुन हेलाह्क इन्कुंचि पुरागा पवित्र मंचेके अवुंक तेल्‍पिचि वेहा.
1TI 5:3 बव मुर्ताह्क अय्ते निजम मुंडामोसि मंतां, अवुना निमे कदर कीम.
1TI 5:4 ओक्‍कला बद्‍दना मुंडामोस्ता मुरतळकु मर्क-मियाह्क आयि, तंगमर्क-मियाह्कगिंटा मत्‍ते, मोदाला ओर बेस बक्‍तिते ताकसेके सतता कुटुंबतुन पोस कियमळ करियगोम. पजा सतता तल्‍लुर-बाबो ओराहाटीं कीता मंचितनमता रुनम तिरिचनाहाटीं, ओर्क मंचितनमतुन मलाहचि हियगोम. बारित्‍ते इल्‍हा कियमळ पेनदुक नच्‍चनालायक मंता.
1TI 5:5 बद मुरतळ अय्ते निजमते मुंडामोसि, बोरे दिक्‍कु हिलाका उंदे मनंता, अद मुरतळ दाना आसे पेनदापोर्रो इर्सि, नर्का-पल्हीं पेनदुक विनंतिं, पारतनां कीसेके मनंता.
1TI 5:6 गानि बद मुरतळ अय्ते सिराप सुकमता आसेते पिसंता, अद मुरतळ पिस्सि मंचिगुडा हाता लेक्‍कातेन वांता.
1TI 5:7 इंचि बोरे तप्पुने दोर्काकोंटा मननाहाटीं, इव पोल्‍लेना बारेमतेगुडा अंटोर विस्वासुल्कुंक आदेस हीम.
1TI 5:8 ओक्‍कला बोरन्‍ना ओना हेडमितोर्कुन बेस हूळकुनाकोंटे, विसेस कीसि सतता लोतोर्कुन बेस हूळकुनाकोंटे, ओर विस्वासमता कदर कियवोर आंतोर. अचोने आयका विस्वासम कियवोंकन्‍ना एक्‍को कराब मनकना लेक्‍काते वांतोर.
1TI 5:9 मुंडामोस्ता मुरतटा वय्सु अरवै वर्सांकन्‍ना तक्‍को मनानय्ते, आ मुरतटा पोरोल मुंडामोस्ता मुरताह्कुना रजिस्‍टरते रासानायो. अचोने आयका आ मुरतळ मुन्‍ने वरोने मुय्दोन मरमिं आसि मत्‍तद आयगोम.
1TI 5:10 इंका अद मुरतळ बेस कबाह्‍कुने बेस पोरोल तरकुंचि मनगोम, मर्क-मियाह्कुन पोस कीतद आयगोम, वाता हेळमितोरा सेवा कीतद आयगोम, पवित्र लोकुल्‍कुना काल्क नोरतद आयगोम, तकलिपने मत्‍तोर्कुंक सहायम कीतद आयगोम इंका अन्‍नि परिस्तितिने बेस कबाह्‍क कियालय अप्पजेपतद आयगोम.
1TI 5:11 गानि लेय्यातनमते मुंडामोस्ता मुरताह्कुना पोरोल अद रजिस्‍टरते रासमा. बारित्‍ते बस्के अय्ते अवुना मेंदुलता इच्‍चां एक्‍को आसि, किरिस्‍तुनापोर्रोटा विस्वासम तक्‍को आंता, अस्‍के अवुंक मरमिं आयाना इच्‍चा आंता.
1TI 5:12 इल्‍हा अव अवुना मोदाटा निरनायमताल तपिच्‍कुंचि सिक्‍साता आदेस तरकुंतां.
1TI 5:13 अचोने आयका लोन-लोन तिरियना अलवट अर्सि लंडुंक हेडंतां. सिराप लंडुंक हेळमळे आयो, गानि हेकेटां-हीकेटां जोलीं केंजंतां, वेरेतोरा कबाह्‍कुने कय कुच्‍चंतां, बव पोल्‍लें अय्ते अव वळकना आयोनो, असोंटा पोल्‍लें वळकालय दल्‍गंतां.
1TI 5:14 अदुनहाटीं लेय्यातनमते मुंडामोस्ता मुर्ताह्क मरमिं आसि, पिलाल्कुन कंचेके संसारम कियना इंचि नावा इच्‍चा मंता. अल्हा कीते पगातोर्कुंक तप्पुक दोसना मोका दोर्को.
1TI 5:15 नना इल्‍हा वेहना कारनम बतल इत्‍ते, कोन्‍नि मुर्ताह्क हर्रि तप्‍सि देय्यम हरदे ताकसंतां.
1TI 5:16 बदन्‍ना विस्वासि मुरतटा लोन ओक्‍कला मुंडामोस्ता मुर्ताह्क मत्‍ते, अवुंक आ लोता विस्वासि मुरतळे कुद्‍दु सहायम कियगोम, अवुना मोता कलिसियातोरपोर्रो वाटानायो. अस्‍के निजमते मुंडामोसि मत्‍ता मुरताह्कुंक कलिसिया सहायम कियगोम.
1TI 5:17 कलिसिया ताकसानोरव्टेटाल बोर अय्ते बेस कलिसिया ताकसंतोरो, ओन्क वेल्‍ले कदर हियगोम. विसेस कीसि बोर अय्ते प्रचार कियालय, कराहलय कस्‍टपळंतोरो ओन्क रोंड अंताल्‍क कदर दोर्कुगोम.
1TI 5:18 बारित्‍ते, “बंति तिराहनेंके कोंदाता मुस्किरकु मूस्का बुट्‍टि दोहामन्‍नि,” आनि “बूतिगानकु बूति दोर्कना,” इंचि दर्मसास्‍त्रम वेहंता.
1TI 5:19 कलिसिया ताकसाना पेद्‍दा मनकना पोर्रो बोरन्‍ना दोसेम दोसते, इव्वुर-मुव्वुरन्‍ना गवाइदार्क हिल्‍वद निमे अद दोसेमतुन नम्मुमा.
1TI 5:20 बस्‍केळ्‍क पापम कीसेक मनानोन अंटोरा मुन्‍ने तेरहा. अस्‍के कळमातोर अल्हा कियाकोंटा वेर्रेते मनांतुर.
1TI 5:21 पेन, किरिस्‍तु येसु आनि पेन पेरता पेनदा दूतन मुन्‍ने इर्सि नना नीकु गट्‍टिगा आदेस हीसेक गदा, बदे उंदि बाजुन पियाकोंटा, सिन्‍ना-पेद्‍दा इनाकोंटा निमे इव नियमकुन पीसि ताका.
1TI 5:22 कलिसियाता पेद्‍दा मनकल इंचि निलाहनाहाटीं, बोन पोर्रेन गाबर आसि कय इरमा. वेरेतोरा पापाल्कुने निमे पालिगाड आयमा. इंका नीवद निमे बस्‍केळ्‍क पवित्र ईर्कुन.
1TI 5:23 सिराप एरे उंचेके मन्‍मा, नीवा पीर साप मननाहाटीं, इंका वेरे बिमार्क ऊके-ऊके वायाकोंटा मननाहाटीं, अस्‍के-अस्‍के अंगुर पानकम उंचेके होन.
1TI 5:24 कोन्‍नि लोकुल्‍कुना पापाल्क बय्यर दिस अर्रंतां, न्‍यायम जर्गनाहाटीं अवुन मुन्‍ने तरांतुर. गानि कोन्‍नि लोकुल्‍कुना पापाल्क मात्रम पज्जोटाल दिस अर्रंतां.
1TI 5:25 इल्हेने बेस कबाह्कगुडा बय्यर दिस अर्रंतां, बव बेस कबाह्‍क दिस अर्रोंगों, अवगुडा वेल्‍ले रोजकु मक्‍किस मन्‍नों.
1TI 6:1 बोर अय्ते दासि कबळ कीसेके मंतुरो, ओर अंटोर ओरा मालकुल्कुन अन्‍नि तीरकुना मान-मर्यादालायक इनकुनगोम. अस्‍केने पेनदा पोरोल आनि कराहता पोल्‍ले बदनाम आयाकोंटा मनंता.
1TI 6:2 इंका बोर दासुल्कुना मालकुल्क अय्ते विस्वासमते मंतुर, आ दासुल्क ओरा मालकुल्कुन, ‘ईर मना विस्वासि आंदुर’ इंचि ओन सिन्‍नगा हूळानायो. मीवा सेवाता पायदा येतानोरगुडा मीवसोंटा पावरमगल्‍ला विस्वासुल्‍क आंदुर. इंचि ओरद इंका एक्‍को सेवा कियना. इसोंटव पोल्‍लें निमे ओर्क कराहचि गट्‍टि दैरनेम हीम.
1TI 6:3 इंका ओक्‍कला बोरन्‍ना ई पोल्‍लें तप्‍पा वेरे कराहनय्ते, अचोने आयाका मना सामि येसु किरिस्‍तुना निजम पोल्‍लेन पियाकोंटा, ओर वेहता बक्‍तितुन ओप्कुनाकोंटे,
1TI 6:4 ओर इरगा गर्राते निंडिस मंतोर, ओन्क बतले तेळियो. असंटोर लोल्‍लिं आनि पोल्‍लेन पीसि जगडाल्‍क कियना बिमार आसि मंतोर. दीनहेंदाल अय्ते कळ्‍क पोतमळ, जगडम, अपमानम, कराब अनमानाल्क तयार आंता.
1TI 6:5 आनि इसोंटोरा नड्‍डुम बस्‍केळ्‍क लोल्‍लिं-जगडाल्‍क आसेकेन मनंतां. इंका इसंटोरा बुद्‍दि हेळसोंचि, ओर निजमताल लक्‍कु आतोर आंद. अदुनहाटीं ओर पेनदा बक्‍तितुन कमाइ कियना उंदि हर्रि इनकुंतुर.
1TI 6:6 पेनदा बक्‍ति समादानमते कियमळे पेद्‍दा दनम आंद.
1TI 6:7 बारित्‍ते मनम ई दुनियाते वायनेंके बतल तर्रा हिल्‍लोम, इगेटाल होननेंकेगुडा बतले ओया परोम.
1TI 6:8 अदुनहाटीं मनगा तिनालय तिंडि, केर्रालय कपडिं मत्‍ते, अव्टेन मनम समादानम मनना.
1TI 6:9 गानि सिरमंत आंतोम इनकुनना लोकुल्‍क कतरनाक परिक्‍साने, उर्रिने, अव्‍सरम हिल्वव वेल्‍लेन नुकसान कियनसोंटा इच्‍चाने हिरकंतुर. असोंटा इच्‍चां मनकालोर्कुन हेळाहचि नासडेम कींतां.
1TI 6:10 बारित्‍ते कोत्‍तन पोर्रोटा पावरम, अन्‍नि रकाल्कुना सेड्‍डातनाल्कुंक हर्रि पुट्‍टिचंता. बचुटूरो लोकुल्‍क ओरा इच्‍चान दोर्किच्‍कुननाहाटीं विस्वासमताल तप्‍सोत्‍तुर आनि ओरा पिस्वरते वेल्‍लेन दुक्‍कमतुन संपादिंच्‍कुंतुर.
1TI 6:11 गानि निमे पेनदा बक्‍ति कियाना मनकन आंदिन. इव अन्‍नि सेड्‍डातनाल्कुनाल लक्‍कु मंचेके नीतिते, बक्‍तिते, विस्वासमते, पावरमते, दैरनेमते आनि सादा-सिंपल पज्जो ताका.
1TI 6:12 नीवा विस्वासमतुन दक्‍किच्‍कुनालय बेस लडाइ कीसेके मन्‍नु, बस्‍केळ्‍क पिस्सना पिस्वरतुन गट्‍टिगा पीसि ताका, इद पिस्वरहाटींगे नीकुन केयमळ जर्गता. ई मंचि पोल्‍लेतुन निमे वेल्‍लेन मंदि गवाइदार्कुना मुन्‍ने ओप्कुत्‍तिन.
1TI 6:13 अन्‍निटवुन जीवाते इर्रना पेनदा मुन्‍ने आनि पुंतुस पिलातुसना मुन्‍ने बेस गवाइ हीता किरिस्‍तु येसुना मुन्‍ने, नना नीकु आदेस हीसेक गदा, मना सामि येसु किरिस्‍तु मर्रा वायनदाका, निमे ई आदेसतुन बदे तप्पु डागु आनि दोसेम अंटाकोंटा कापाळसेके इर्रा.
1TI 6:15 राजुल्कुना राजु, सामिल्‍कुना सामि, अन्‍निनपोर्रो अदिकारम इर्रना आ आसिर्वाद दोर्कता, बरोबर वेलाकु ओन मनाकु हुप्‍संतोर.
1TI 6:16 ओन्क बस्‍केने हामुर हिल्‍ले. मनम बोरे होना पर्रोम असोंटा वेल्‍गुने ओर मनंतोर. ओन इदवेरादाका बोरे हूळा हिल्‍लुर, बस्‍केने हूळा परुरगुडा. अंटावुंकन्‍ना बलमाता आ पेनदुके बस्‍केळ्‍क कदर दोर्कि. आमीन.
1TI 6:17 ई दुनियाते मनना सिरमंत लोकुल्‍क, गर्रा कियामन्‍नि. नासडेम आसि होनना दनम पोर्रो आसे इर्राकोंटा, जीवाते मनना पेनदापोर्रो विस्वासम इर्राना. आ पेने मना आनंदमहाटीं गावाले मत्‍तव आ अन्‍नि बेसतवुन इरगा हींता, इंचि ओर्क आदेस हीम.
1TI 6:18 इचोने आयका इंका ओर्क आदेस हीम गदा, ओर बेस कबाह्‍क कीसेक मनना, बेस कबाह्‍क कीसे सिरमंत आयाना. मनागा मत्‍तदुनाल अव्‍सरम मत्‍तोंक, पंचि हियालय बस्‍केळ्‍क मनसुनाल तयार मनगोम.
1TI 6:19 इल्‍हा कीसेके मत्‍ते, मुन्‍नेटा पिस्वरहाटीं ओर उंदि बेस पुनादि तयार कीकुंतुर, आनि बस्‍केळ्‍क पिस्सना पिस्वर पिस्सेक मनंतुर.
1TI 6:20 तिमोति, नीकु अप्पजेपतदुन निमे कापाळकुन. बक्‍ति हिल्वा कराब पोल्‍लेनाल लक्‍कु मन. इंका इदे “निजम तेल्वि” इंचि वेहना आबद्‍दम कतानाल लक्‍कु मन.
1TI 6:21 इच्‍चुर लोकुल्‍क असोंटा पोल्‍लेन नम्मिसि विस्वासमताल तप्‍सोत्‍तुर. पेनदा कुर्पा बस्‍केळ्‍क नीतोनि मन्‍निकांटी.
2TI 1:1 पेनदा इच्‍चाताहेंदाल किरिस्‍तु येसुना प्रेरित आता पौलुसना इद सिट्‍टि आंद. किरिस्‍तु येसुनपोर्रो विस्वासम इरते, बस्‍केळ्‍क पिस्सना पिस्वर दोर्कंता इंचि पेन पोल्‍ले हीसि मत्‍ता, इदुना बारेमते वेहनाहाटीं नाकुन लोहचियमळ जर्गता.
2TI 1:2 नावा पावरमगल्‍ला मर्रि तिमोतिंकु नना रासतन. नीकु मना पेनबाबनहेंदाल, सामि किरिस्‍तु येसुनाहेंदाल कुर्पा, दया, सांति दोर्किकांटी.
2TI 1:3 नावा पारतनाने नीकुन बस्‍केळ्‍क मति कीसेके, ना तादो-बाबुरालेह्का नना मनसुना पोल्‍लेते, बद पेनदद अय्ते सेवा कीसंतनो, अद पेनदुक दन्यवाद वेहचंतन.
2TI 1:4 नावाहाटीं निमे पोंगागोटता कांडेरतुन मति कीसि नना नर्का-पिय्यल नीकु कलियाना इंचि इच्‍चा कीसंतन, इवटेन नावा आनंदम पुरागा आंता.
2TI 1:5 नीवा आ सत्‍तेम विस्वासम नाकु मति मंता. आ विस्वासम, मुन्‍ने नीवा काको लुइस आनि नीवा यावल युनिसनगागुडा मनुंदु. अदे विस्वासम निहगागुडा मंता इंचि नाकु बरोसा मंता.
2TI 1:6 इदुनहाटीं नना नीकु मति कीसि हियानद बतल इत्‍ते, नना नीवा पोर्रो कय इरतस्के, पेनदाहेंदाल नीकु उंदि वरम दोर्कता. अद वरमतुन निमे बस्‍केळ्‍क एल्‍गिच्‍चि इर्रा.
2TI 1:7 बारित्‍ते मनाकु पेन हीता आत्मा मनाकुन पिरकिर्क किय्यका, मनालोप्‍पो अद बलम, पावरम आनि ओप्केतुन निहंता.
2TI 1:8 अदुनहाटीं मना सामिना बारेमते आयि, ओनाहाटीं जेलने मनना नावा बारेमते आयि वेरेतोर्क गवाइ वेहालय बस्‍केने सिग्गु अरमा. दानकु बदुल, बेसता कबुरतुन वेहनाहाटीं पेन हीता बलमते निमे नातोनि तकलिप्क सहन कियालय तयार मन्‍नु.
2TI 1:9 पेन मनाकुन कापाळसि, दाना पवित्र पोल्‍लेते केयता. इदंता मना कबाह्कुनहेंदाल जर्गाहिल्‍ले गानि सिराप ओना पिलान परकारम आनि ओना कुर्पाहेंकेन जर्गता. ई दया-मायातुन पेनबाबाल मनाकु ई दुनिया पुट्‍टका मुन्‍नेन किरिस्‍तु येसुनाहेंदाल हीतोर.
2TI 1:10 गानि इंदके इद पोल्‍ले, मनाकुन कापाळना किरिस्‍तु येसु वाताहेंका मनाकु तेळियसोत्‍ता. ई किरिस्‍ते हामुरतुन रद्‍द कीसि, बेसता कबुरताहेंदाल पिस्वरतुन आनि बस्‍केळ्‍क जीवाते मनानदुन पलाते अरहतोर.
2TI 1:11 इदे बेसता कबुरतुन प्रचार कियनाहाटीं प्रेरित अल्हेन कराहनोर इंचि नाकुन निलाहमळ जर्गता.
2TI 1:12 इदुनाहाटींगे नना इद जेलते तकलिप्क बोगांचेक मंतन. अय्नागानि नना सिग्गु अर्रोन. बारित्‍ते नना बोनपोर्रो विस्वासम इरतन ओर नाकु एर्के. इंका ओर नाकु बतल अय्ते अप्पजेपतोरो अदुन, मल्सि वायाना आ रोजु वायनदाका कापाळा परांतोर इंचि नाकु बरोसा मंता.
2TI 1:13 किरिस्‍तु येसुना लोप्पो मनना विस्वासम आनि पावरमताहेंदाल निमे बव सत्‍तेम पोल्‍लें अय्ते नाहेकेटाल केंजतिनो, अवुन पीसि वेरेतोराहाटीं मन्‍नु.
2TI 1:14 मनालोप्‍पो मनना पवित्र आत्माता बलमतोनि, नीकु अप्पजेपता मंचितनमतुन निमे कापाळकुन.
2TI 1:15 आसिया राज्येमते मनानोर अंटोर नाकुन होळसि होत्‍तुर इत्‍ता पोल्‍ले नीकु एरपाटे. अव्टे पुगिलुस आनि हिरमुगिनेसगुडा मंतुर.
2TI 1:16 नावा कय्‍कुंक बेडीं वाटसि मंतां इंचि सिग्गु अर्राकोंटा, उनेसिपुरुस इनानोर, नाकु ऊके-ऊके कलियसि नाकु वेल्‍लेन दैरनेम हीतोर. सामि ओना कुटुंबमपोर्रो दया हुप्‍सिरकांटी.
2TI 1:17 अचोने आयका ओर रोम सहरते वातस्के, नना दोर्कनदाका नाकुन मनसु तासि पह्कसेक मत्‍तोर.
2TI 1:18 नना इपीसि सहरते मननेंके, ओर नाकु वेल्‍लेन रकाल्कुना सहायम कीतोर नीकु अय्ते बेस तेळियसि मंता. सामिना मल्सि वायाना आ रोजुने, ओनपोर्रो दया हुप्‍सालय पेन सहायम किय्यि इंचि नना कोरसेक मंतन.
2TI 2:1 ना मर्रि तिमोति, किरिस्‍तु येसुनगा मनना कुर्पाते निमे बेस ताकतवर आम.
2TI 2:2 वेल्‍लेन मंदि लोकुल्‍कुना मुन्‍ने नाहेंदाल निमे केंजता पोल्‍लेन, बोर अय्ते वेरेतोर्क कराह परांतुर, असोंटा विस्वासमलायक मनानोर्कुंक अप्पजेप्पा.
2TI 2:3 किरिस्‍तु येसुना वरोर बेस सिपाइनालेसीं निमेगुडा तकलिप्क बोगांचा.
2TI 2:4 लडाइहाटीं पेय्सता बोरे सिपाइ वट्‍टि सम्‍सारम पोल्‍लेने हिरकोर. बारित्‍ते ओन्क अद नवकरि बोर अय्ते हीतोरो ओन्क कुसि हियमळे ओना गुरि मनंता.
2TI 2:5 अल्‍हेने वरोर कुस्ति अर्रानोर नियमकुन पीसि कुस्ति अर्राकोंटे ओन्क किरिटम दोर्को.
2TI 2:6 कस्‍टपळना कास्तकारि मनकंक, पंडता पंटाता मोदाटा पाल एतना अदिकारम मंता.
2TI 2:7 नना वेहना पोल्‍लेना बारेमते विचारम कीम, अन्‍नि पोल्‍लें तेळियानाहाटीं सामि नीकु बुद्‍दि हियानुर.
2TI 2:8 नना वेहता बेसता कबुर परकारम, दाविद राजाना वंसंमते पुटसि, हामुरताल मर्रा जीवाते तेदता येसु किरिस्‍तुन मतिते इर्रा.
2TI 2:9 इदे बेसता कबुर वेहताहाटीं नना जेलुंक होत्‍तन. वरोर तप्पु कीतोना कय्‍कुंक वाटताप नावा कय्‍कुंक बेडीं वाटतुर. गानि पेनदा पोल्‍ले मात्रम बेडिने दोह्‍चि हिल्‍ले.
2TI 2:10 अदुनहाटींगे नना, किरिस्‍तु येसुना लोप्पो दोर्कना मुक्‍ति पेन पेरतोर्क, बस्‍केळ्‍क मनना दाना महिमातोनि दोर्कना इंचि बच्‍चुं कस्‍टाल्‍क अयना सहन कींतन.
2TI 2:11 इद पोल्‍ले विस्वासम कियनलायक मंता, अद बतल इत्‍ते, ओक्‍कला मनम ओनतोनि हातोम इनानय्ते, ओनतोनि पिस्संतोमगुडा.
2TI 2:12 मनम ओर्सकुंचेके मनानय्ते, ओनतोनि राज्येम इंका कींतोम. ओक्‍कला मनम ओन एरपाट किय्योन इनानय्ते, ओर इंका मनाकुन एरपाट किय्योर.
2TI 2:13 मनम विस्वासमलायक मनाकोन्‍ना ओर मात्रम विस्वासमलायक मनंतोर. बारित्‍ते ओनद ओर बस्‍केने एरपाट किय्योन इंचि इन्‍नोर.
2TI 2:14 इव अन्‍नि पोल्‍लें निमे ओर्कु मति कीसि हीसेक मन्‍नु. इंका केंजानोर्कुन हेळाहनालायक बतले पायदा हिलुवा पोल्‍लेनाहाटीं लोल्‍लिं कियामन्‍नि, इंचि ओर्कुन सामिना मुन्‍ने निलाहचि दटांचि वेहा.
2TI 2:15 बस्‍केने सिग्गु होनाकोंटा, पेनदा पोल्‍लेता सत्‍तेमतुन बरोबर कराहनोनलेसीं पेन निल्‍हाता वरोर सेवाकुड आसि मनालय कोसिस कीम.
2TI 2:16 बक्‍ति हिलुवा वट्‍टि पोल्‍लेनाल तप्पिच्‍कुन, असोंटा पोल्‍लें लोकुल्‍कुन हेळाहचि पेनदागटाल इंकिच्‍चो लक्‍कु कींतां.
2TI 2:17 असोंटा लोकुल्‍कुना वळ्‍कमळ उंदि कुल्‍लिसि-कुल्‍लिसि पेद्‍दागा आयना पुन्‍नुलेह्का मनंतां. हुमिनयुस आनि पिलेतुस असंटोरे आंदुर.
2TI 2:18 ओर इव्वुरगुडा सत्‍तेम हरदाल तप्‍सोंचि, हासि मर्रा जीवाते तेदमळ आसोत्‍ता इंचि इंतुर. इसोंटा पोल्‍ले वळ्‍किसि ओर इच्‍चुर लोकुल्‍कुन विस्वासमतुन हेळाहचंतुर.
2TI 2:19 गानि पेन दोहता पुनादि बस्‍केळ्‍क नित्‍तिसि मनंता. अद पुनादिपोर्रो, “सामिंक ओना लोकुल्‍क बोर आंदुर, ओन्क एरपाटे,” आनि “सामिना पोरोल एताना हरेक मनकल, तप्‍पुड कबाह्कुनाल लक्‍कु मनगोम,” इंचि सिक्‍का वाटसि मंता.
2TI 2:20 सिरमंतुल्कुना लोह्कुने सिराप एंडि-बंगारमता बोळिंगें मनंतां इंचि आयो, अगा कट्‍टेतव आनि तोळितवगुडा बोळिं मनंतां. अव्टे एक्‍को इलुवातवुन पेद्‍दा-पेद्‍दा कबाह्कुनेन वाळकुंतुर आनि तक्‍को इलुवातवुन बारे बस्‍केळ्‍क वाळकुंतुर.
2TI 2:21 अदुनहाटीं बोरन्‍ना मनकल इलुवा तक्‍कोतोर मनानय्ते, ओर पेद्‍दा-पेद्‍दा कबाह्‍कुने वाळकुनना बोळिंलेह्काटोर आयनुर. अस्‍के ओर पवित्र आसि ओना मालकुना कबळ्‍क ओज्‍जंतोर पजा अन्‍नि तीरकुना बेसता कबाह्‍क कियालय ओर तयार मनंतोर.
2TI 2:22 लेय्यातनमते वायाना कराब इच्‍चानाल लक्‍कु मन. पवित्र मनसुने सामिंक आरादना कीसेके मनानोरतोनि कलियसि नीतिते, विस्वासमते, पावरमते, सांतिते मनालय कोसिस कीम.
2TI 2:23 तेल्वि तक्‍को अल्हेन बेकार पोल्‍लेनाल लक्‍कु मन. नीकु अय्ते एरपाटे, असोंटा पोल्‍लें वाद-विवाद जगडाल्‍कुन पुटसंतां.
2TI 2:24 इंका सामिना सेवाकुड बस्‍केने जगडम कियाकोंटा, अंटोरपोर्रो दया हुप्पिचानोर आयगोम, ओर कराहनालायक मनगोम, ओप्‍केते मनगोम.
2TI 2:25 नीवा विरोदमते वळ्कानोर्कुंक सांत मनसुने तेळियागोट्‍सि वेहा. सत्‍तेमता बारेमते तेल्‍पिचकुननाहाटीं पेन ओर्कु मार मनसु हिय्यार.
2TI 2:26 अस्‍के ओर्कु बेस तेल्वि वासि, ओरा सतता इच्‍चातुन दोर्किच्‍कुननाहाटीं देय्यमता कयदाल इळबळानुर. बारित्‍ते देय्यम सतता इच्‍चान दोर्किच्‍कुननाहाटीं ओर्कुन दोह्‍चि वाटसि इर्ता.
2TI 3:1 आकिर रोजकुने इरगा तकलिपकुना कालम वायना मंता, इद मति इर्रा.
2TI 3:2 बारित्‍ते अव रोजकुने मनकालोर सतता बारेमतेन विचार कींतुर, कोत्‍तन पावरम कींतुर, सतता बारेमते पेद्‍दा-पेद्‍दा पोल्‍लें वेह्‍कुंतुर, गर्राते मनंतुर, बदनाम कियानोर आंतुर, तल्‍लुर-बाबोना पोल्‍ले केंजुर, दन्यवाद वेहुर, अपवित्र आंतुर,
2TI 3:3 दया-माया मन्‍नो, मापि कियना मनसु मन्‍नो, वेरेतोरा अपमानम कींतुर, ओप्‍केते मन्‍नुर, ओरा जीवा नोय्यो, जिवरासिनलेह्का कींतुर, बेसतदुन हय्सुर,
2TI 3:4 पसांचंतुर, मंचि-सेड्‍डा विचारम किय्युर, सतता बारेमते पोंगुडतनम पोंगंतुर, पेनदा पावरमकन्‍ना सुकमतुने एक्‍को पावरम कींतुर,
2TI 3:5 पलाताल पेनदा बक्‍ति कीतापे दिसंतुर गानि आ बक्‍तिता बलमतुन मात्रम नम्मुर. इसंटोरगटाल लक्‍कु मन.
2TI 3:6 ई लोकुल्‍कुने इच्‍चुर इसंटोर मंतुर गदा, बव मुर्ताह्क अय्ते कमजोर मनसुने पापमता मोताते रका-रकाल्कुना आसेने निंडिस पिस्सेक मंतां, अव मुरताह्कुना लोह्कुने होंचि अवुन ओराहेके कीकुंतुर.
2TI 3:7 इव मुर्ताह्क बस्‍केळ्‍क करियसेकेन मनंतां, गानि सत्‍तेम बतल अव तेल्‍पिचकुन्‍नों.
2TI 3:8 यन्‍नेस, यंब्रेस इनानोर मूसांक अड्‍डम तिरियतुर. ओरालेसींगे ई मनकालोरगुडा सत्‍तेमकु अड्‍डम तिरियंतुर. ई मनकालोरा बुद्‍दि हेळसोंचि विस्वासमते हर्रि तप्‍सि मंतुर.
2TI 3:9 गानि ईर इंका मुन्‍नेळ्‍क होना परुर. बारित्‍ते मूसांक अड्‍डम तिरियता इव्वुर मनकालोर बल्हा तेल्वि तक्‍कोतोर इंचि अंटोर्क तेळियसि होत्‍ता, अल्हेन ईरा तेल्वि तक्‍कोतनमगुडा अंटोर्क तेळियसि होन्‍नार.
2TI 3:10 गानि निमे नावा कराहमळतुन, ताकमळतुन, नना पिस्सना उद्‍देसमतुन, विस्वासमतुन, ओप्केतुन, पावरमतुन, नावा दैरनेमतुन,
2TI 3:11 नना अंताकिया, इकोनिया आनि लिसरा इनना सहरकुने बोगांच्‍ता तकलिप्क, नना अरता बादां, इव अन्‍नि नीकु एरपाटे मंतां. आयना इव अन्‍नि तकलिपकुनाल सामि नाकुन कापाळतोर.
2TI 3:12 किरिस्‍तु येसुना लोप्पो पेनदा बक्‍तिते ताकंतन इंचि इच्‍चा इर्राना अंटोर्क कस्‍टाल्‍क अय्ते वायानुंगे.
2TI 3:13 गानि कराब कियानोर, मुळाहनोर, वेरेतोर्कुंक दोका हीसेक, ओर दोकाते अरसेक इंकिच्‍चो कराब आंतुर.
2TI 3:14 गानि निमे बतल करियतिनो, बतल विस्वासम कीतिनो आनि अवुन निमे बोनहेंदाल करियतिन नीकु एरपाट मंता. अवुने उंदेतीर ताकसेक मन.
2TI 3:15 अचोने आयका, निमे सिन्‍नास्केटाल पवित्र दर्मसास्‍त्रमता पोल्‍लेन करियतोन आंदिन. अव नीकु किरिस्‍तु येसुनपोर्रो विस्वासम इरते दोर्कना मुक्‍तितुन दोर्किच्‍कुननाहाटीं बुद्‍दि, तेल्वि हींतां.
2TI 3:16 दर्मसास्‍त्रमते रासि मनना पूरा पोल्‍लें पेन वेहताहेंकेन रासतव आंदुं. अव पोल्‍लें कराहनाहाटीं, तेळियागोट्‍सि वेहनाहाटीं, तप्पुन सुदरांचनाहाटीं आनि नीतिमंतुल्क आयानाहाटीं टेरनिंग हियालय कबळ्‍क ओज्जंतां.
2TI 3:17 अद बल्हा इत्‍ते, दर्मसास्‍त्रमहेंदाल पेन दाना हरेक मनकन पुरागा दानालायक कीसि, अन्‍नि तीरकुना बेसता कबाह्‍क कियनाहाटीं, ओर्कुन तयार कींता.
2TI 4:1 पेनदा मुन्‍ने आनि जीवाते मत्‍तोरद, हातोरद न्‍यायम कियना किरिस्‍तु येसुना मुन्‍ने इंका ई दुनियाते ओना मर्रा वायमळतुन आनि ओना राज्येमतुन मुन्‍ने इरसि नना नीकु आदेस हींतन गदा, इद दुनियाते पेनदा मुन्‍ने, मर्रा वासि राज्येम कियानुर अस्‍के जीवाते मत्‍तोरद आनि हातोरद न्‍यायम कियना येसु किरिस्‍तुना मुन्‍ने, नना नीकु दटांचि वेहानद बतल इत्‍ते,
2TI 4:2 पेनदा पोल्‍लेतुन, टाइम दोर्किना दोर्काकोन्‍ना प्रचार कियालय तयार मन, अन्‍नि तीरकुना ओप्‍केते ओर्कु कराहसेके, दटांच्‍सेके तेळियागोट्‍सि वेहा.
2TI 4:3 नना इल्‍हा बारि वेहासेक इत्‍ते, बेस बोदातुन लोकुल्‍क केंजुर असोंटा कालम वायना मंता. ओर ओरा मनसुंक वाताप ताकंतुर, ओरां दुर्दा केव्कुंक बतल अय्ते केंजमळ इस्‍टमो, असोंटा पोल्‍लें कराहना गुरुल्‍कुन सततातोनि कल्‍पकुंतुर.
2TI 4:4 ओर सत्‍तेम पोल्‍लेन केंजुर, तयार कीसि वेहना कतां केंजालय दांतुर.
2TI 4:5 गानि निमे बसोंटा परिस्तिति वायिना, पजोळ्क होनाकोंटा नित्‍तिसि मन. तकलिप्क वाते सहन कीम, बेसता कबुरतुन वेहाना नीवा कबळतुन कीसेके, निमे कियना पेनदा सेवाता कबळ पुरागा कीम.
2TI 4:6 नना अय्ते पेनदुक मोक्‍कु हियना पट्‍टुनगड्‍क एवतन. दुनियातुन होळसि होनना नावा वेला दग्गेर्क एव्ता.
2TI 4:7 सामिना पोर्रोटा विस्वासम बारेमता लडाइते, नना लडाइ बेस कीतन, नना बेस वित्‍तुतन. नावा विस्वासमतुन नना कापाळकुत्‍तन.
2TI 4:8 नावाहाटीं इर्सि मत्‍ता नीतिता किरिटम, सत्‍तेमते न्‍यायम कियना सामि, ओर मल्सि वातानाडु नाकु अदुन हींतोर. सिराप नाके आयो गानि, बोर-बोर अय्ते ओर दिस्‍सना रोजुन पावरमते एदुर हूळसेक मंतुरो, ओर्कु अंटोर्कगुडा हींतोर.
2TI 4:9 बच्‍चोर बिराना आते अच्‍चोर बिराना निमे नहगा वायाना कोसिस कीम.
2TI 4:10 बारित्‍ते देमासु इनानोर ई दुनियाता पावरमते नाकुन होळसि तेसलोनि सहर होत्‍तोर. क्रेसेंस इनानोर गलातिया एरियाते होत्‍तोर आनि तीतु इनानोर दलमतिया राज्येमते होत्‍तोर.
2TI 4:11 सिराप लूकाले नातोनि मंतोर. निमे वायनेंके मरकुसुन नीतोनि पीसि वा. सेवा कबळते ओर नाकु वेल्‍लेन सहायम कींतोर.
2TI 4:12 तुकिकुस इनानोन नना इपीसि सहर लोहतन.
2TI 4:13 त्रोआस सहरते करपुस इनानोना लोन नना नावा कोट इर्सि वातन. निमे वायनेंके दान पीसि वा. अल्‍हेने नावा पुस्तकाल्क, विसेस कीसि तोलतोनि तयार कीता, हुटसि मत्‍ता पुस्तकाल्कगुडा पीसि वा.
2TI 4:14 सिकंदर इनना कम्मरि नावाहाटीं वेल्‍लेन कराब कबाह्‍क कीतोर. ओर कीता कबाह्‍कुन पीसि, सामिगुडा ओन्क अल्हे हियानुर.
2TI 4:15 मनम वेहता पोल्‍लेंक ओर वेल्‍लेन अड्‍डम तिरियतोर. अदुनहाटीं निमेगुडा ओनागटल जेगर्ता मन.
2TI 4:16 नावा न्‍यायम जर्गनेंके, नना मोट्‍टा मोदाटा जवाब हीतस्के, नावाहेंदाल जवाब हियालय बोरे मना हिल्‍लुर. अंटोर नाकुन होळसि होत्‍तुर. ओर अल्हा कीतदुनहाटीं पेन ओर्कुन लेक्‍का तल्काकोंटेन बेस.
2TI 4:17 गानि नाहेंदाल बेसता कबुर अंटोर्क एव्‍सि, दान यहुदि आयवोर अंटोर केंजगोम इंचि, सामि नाकु तोळ मंचेके नाकु बलम हीतोर. इल्‍हा नाकुन सिंहम तोळ्‍दाल कापाळतोर.
2TI 4:18 सामि मनना स्वर्ग राज्येमते नना होनालय, ओर नाकुन हरेक कराब कबाटाल कापाळनुर. ओनके बस्‍केळ्‍ताहाटीं पेद्‍दातनम दोर्कि. आमीन.
2TI 4:19 पिरिसकिला, अकविला आनि उनेसिपुरुसना लोतोर्कुंक नावा जोहार वेहा.
2TI 4:20 इरास्‍तुस इनानोर कुरेंति सहरते आगतोर. तोरोपिमुस इनानोर बिमार मत्‍ताहाटीं नना ओन मिलेतुस इनना सहरतेन होळसि वातन.
2TI 4:21 पीनि कालम वायाका मुन्‍नेन निमे इगे वायना कोसिस कीम. इबुलुस, पुदेंस, लिनुस, क्‍लवदिया आनि कळमातोर अंटोर दादालोर नीकु जोहार वेह्‍चंतुर.
2TI 4:22 सामि नीवा आत्माकु तोळ मन्‍निर. सामिना कुर्पा नीकु तोळ मन्‍निकांटी.
TIT 1:1 नना पौलुस, पेनदा दासुन आनि येसु किरिस्‍तुना प्रेरित आंदुन. पेन पेरता लोकुल्‍कुना विस्वासमतुन बेर्सागोटलय, ओर्क सत्‍तेमता बारेमते तेळियागोट्‍सि वेहालय नाकुन लोहमळ जर्गता.
TIT 1:2 ई सत्‍तेम, बस्‍केळ्‍क पिस्सना पिस्वरता आसे पोर्रो निल्‍सि मंता. बस्‍केने आबद्‍दम वळ्कुवा पेन इदुन हींतन इंचि वेल्‍लेन मुन्‍ने पोल्‍ले हीसि मत्‍ता.
TIT 1:3 बरोबर गावाले मत्‍ता वेलातेन पेन दाना पोल्‍लेन मनाकु वेहचि हुपिस्‍ता. इदे बेसता कबुरतुन वेहनाहाटीं मनाकुन कापाळना पेन नाकु आदेस हीसि अप्पजेपता.
TIT 1:4 विस्वासमते नावा समानम मनना नावा मर्रि तीतुंक इद सिट्‍टि नना रासेक मंतन. पेनबाबनहेंदाल आनि मनाकुन पिसागोटनोर किरिस्‍तु येसुनहेंदाल नीकु कुर्पा, सांति दोर्किकांटी.
TIT 1:5 क्रेति दीबेते, बव कबाह्‍क अय्ते मय्सि मंतां, अव कबाह्‍कुन सुदरांचनाहाटीं आनि नना नीकु आदेस हीता परकारम निमे हरेक सहरते पेद्‍दाल्कुन निलाहना इंचि नीकुन नना अगा होळसि वातन.
TIT 1:6 निलाहना पेद्‍दा मनकनपोर्रो बदे दोसेम मननायो, ओन्क उंदे मुत्‍तो मनगोम. ओना मर्क-मियाह्क विस्वासुल्‍क आसि ओर सिग्गु हिल्वा कराब कबाह्‍क कियानोर, बोना पोल्‍ले केंजाकोंटा मनानोर इंचि ओरापोर्रो तप्‍पु मनामन्‍नि.
TIT 1:7 बारित्‍ते आ अदिकारि पेनदा कबाटुन मुन्‍ने ताकसानोर आंदुर. अदुनहाटीं ओनपोर्रो बदे दोसेम मननायो, ओर जिद्‍दि मनकल मनामन्‍नि, ओर बिराना होंगुंक वायानोर आयामन्‍नि, ओर कल्‍लु उनामन्‍नि, जगडाल्‍क कियामन्‍नि, तप्‍पुड कमाइ कियानोर आयामन्‍नि.
TIT 1:8 गानि आ अदिकारि हेडमितोन बेस हूळकुनानोर आयगोम, बेस कियमळतुन पावरम कियानोर आयगोम, मनसुना आसेन आपिसि पीसि मनानोर आयगोम, ओर सादा-सिंपल मनागोम, पवित्र आनि सततुन आपकुंचि मनानोर आयगोम.
TIT 1:9 इंका ओन्क कराहता सत्‍तेम पोल्‍लेतुन ओर विस्वासमते गट्‍टिगा पीसि मनगोम. अल्हा मत्‍तेने ओर लोकुल्‍कुंक सत्‍तेम पोल्‍लें वेहचि ओर्क कराह पर्रांतोर आनि एदुर वळकानोरा तोड्‍डिं मुच्‍चा पर्रांतोर.
TIT 1:10 बारित्‍ते विसेस कीसि कतना कीतोरव्टेटाल वेल्‍लेटुर लोकुल्‍क मर्लाबळानोर, बतक ओज्जाकोन्‍ना वट्‍टिदे वळ्कानोर, दोका कियानोर वेल्‍लेन मंतुर.
TIT 1:11 ईरकुन वळ्‍काकोंटा कियमळे गावाले. बारित्‍ते ईर लोकुल्‍क, बव पोल्‍लें अय्ते कराहना आयनो, अव पोल्‍लें कराहचि तप्‍पुड कमाइ कियनाहाटीं अन्‍नि कुटुंबाल्कुनंता पाळ कींतुर.
TIT 1:12 क्रेति दीबेतोर वरोर ओरा कबुरतोरे, “केरेतु दीबेता लोकुल्‍क बस्‍केळ्‍क आबद्‍दम वळ्‍कंतुर, केडा जिवरासिनसंटोर, लंडु आनि तिंडितोरे,” इंचि वेहतोर.
TIT 1:13 ओर वेहता गवाइ निजमे आंद. अदुनहाटीं आबद्‍दम बोदातुन नम्मना विस्वासुल्कुंक गट्‍टिगा वेर्रे वेहा. अस्‍केन ओर सत्‍तेम विस्वासमते गट्‍टिपळांतुर.
TIT 1:14 यहुदिल्कुना तयार कीता वेसुडिन पोर्रो विस्वासम इर्राकोंटा, सत्‍तेमताल तप्‍सोत्‍ता मनकालोरा आदेसकुनाल लक्‍कु मनांतुर.
TIT 1:15 मनसु पवित्र मत्‍तोर्कुंक अन्‍नि वस्‍तुक पवित्रे मनंतां, गानि हेळसोत्‍ता मनसु आनि पेनदापोर्रो विस्वासम हिल्वोर्क मात्रम बतले पवित्र मन्‍नो. ओरा मनसु, मनसु वेहता पोल्‍ले इव रोंडगुडा हेळसोंचि मनंतां.
TIT 1:16 पेन माकु एरपाटे इंचि ओर वेहांतुर, गानि ओरा कियना कबाह्‍क हूळते, ओर पेनदुन एरपाट किय्युर इत्‍तद दिस अर्रंता. ओर हय्सवोर, वेहता पोल्‍ले केंजवोर आंदुर, ओर असल बदे बेस कबळ कियनालायक हिल्‍लुर.
TIT 2:1 निमे मात्रम बस्‍केळ्‍क सत्‍तेम बोदाकु ओप्‍पनालायक पोल्‍लें करहा.
TIT 2:2 ओप्‍केते, इमानदार मनमळते, सततुन आपकुनमळते, विस्वासमते, पावरमते, दैरनेमते, ओर्सकुनमळते गट्‍टिगा मंदालय मातरलोर्कुंक करहा.
TIT 2:3 अल्‍हेने मातरिह्कुंक करहा गदा, अवुना पिस्वर पवित्र लोकुल्‍कुना पिस्वरलेह्का मंदना. वेरेतोरा पोर्रो दोसेल्क दोस्साकोंटा, कल्कु उनाकोंटा, अव बस्‍केळ्‍क बेसता बारेमतेन कराहगोम.
TIT 2:4 अल्‍हेने अव लेय्या मुरताह्कुंक, अवुना मुय्दुर्कुन, पिलाल्कुन पावरम कियाना,
TIT 2:5 सततुन आपकुंचि पिस्‍साना, पवित्र मंदना, लोतुन आवरिच्‍कुनना, दयाता गुनम मंदना, मुय्दोना पोल्‍लेपोर्रो बेस मंदना, इंचि कराह. अल्हा कराहते, अवुनाहेंदाल पेनदा पोल्‍ले बदनाम आयाकोंटा मनंता.
TIT 2:6 अल्‍हेने लेय्युर्कुंक जोर हीसि वेहा गदा, ओर सततुन आपकुंचि पिस्सिरकांटी.
TIT 2:7 बेस कबाह्‍क कीसि निमे अन्‍नि पोल्‍लेने ओराहाटीं उंदि उदाहरनलेसीं मन्‍नु. नीवा कराहमळ सत्‍तेम आनि लोकुल्‍क बेस केंजनालायक मनगोम.
TIT 2:8 निमे कराहना बोदा इच्‍चोन सत्‍तेम मनना गदा, अव्टे बोरे तप्पु तेंडामन्‍नि आनि नीवा विरोदमते वळ्कानोर्कुंक मना बारेमते बतले तप्पु दोर्कका ओर्क सिग्गु वायगोम.
TIT 2:9 दासुल्‍कुंक करहा गदा, बस्‍केळ्‍क ओर ओरा माल्कुल्कुना पोल्‍लेपोर्रो मंदना आनि अन्‍नि परिस्तितिने मालकुल्कुंक तिरियसि वळ्‍काकोंटा, ओर्कुन कूस कियना.
TIT 2:10 इंका मालकुल्कुनगटाल दोंगातनम कियामन्‍नि गानि अन्‍नि पोल्‍लेने बेस विस्वासमलायक ओर मंदना. अल्हा मत्‍ते, मनाकुन कापाळना मना पेनदा बारेमता कराहमळतुक ओर इंकिच्‍चो कदर तर्रांनोर आंतुर.
TIT 2:11 बारित्‍ते अंटोर लोकुल्‍कुंक मुक्‍ति हियनाहाटीं पेन दाना कुर्पातुन हुपिस्‍ता.
TIT 2:12 अद दया मनाकु, मनम पेनदुक नच्‍चुवा पिस्वर आनि सततुन आपकुंचि, इद दुनियाते बेस बक्‍तिते, सवरटा हर्दे आनि पेनदुक नच्‍चना पिस्वर पिसगोम, इंचि कराहंता.
TIT 2:13 अचोने आयका मना कदरगल्‍ला पेन आनि मनाकु मुक्‍ति हियना येसु किरिस्‍तु ओना महिमाते वांतोर इत्‍ता आ सक्‍कटा आसेतुन मनम एदुर हूळसेक मंदना इंचेकगुडा कराहंता.
TIT 2:14 इंका किरिस्‍तु मनाकुन अन्‍नि तीरकुना तप्‍पुड कबाह्कुनाल तपिच्‍चि, बस्‍केळ्‍क बेसता कबाह्के कियगोम इंचि मनसु इर्राना ओना सतता लोकुल्‍क मनम आयगोम इंचि, मनाकुन पवित्र कियनाहाटीं ओना सतता जीवातुन हीतोर.
TIT 2:15 इव अन्‍नि पोल्‍लें निमे पूरा अदिकारमते दटांचि तेळियागोट्‍सि वेहा, करहा. नीकुन सिन्‍नगा बोने हूळा हियमा.
TIT 3:1 राज्येम कियानोरद आनि अदिकारिल्कुना पोल्‍ले केंजसि ओर वेहताप ताकना, इंचि लोकुल्‍कुंक मति कीसि हीम. इंका कदरलायक मंदना हरेक बेस कबळ कियालय बस्‍केळ्‍क तयार मंदना.
TIT 3:2 बोर्कुने बदनाम कियानायो, बोरतोने जगडाल्‍क कियानायो, मेत्‍तटा गुनम मंदना आनि अंटोरतोनि सादा-सिंपलते कलियसि मंदना इंचि ओर्क वेहा.
TIT 3:3 मुन्‍ने मनमगुडा तेल्वि तक्‍कोतोरम, बोरदे पोल्‍ले केंजवोरम, वेरेतोरा पोल्‍लेने मुळ्‍गुतोरम, वेरे-वेरे इच्‍चां आनि सुकाल्कुना गुलामगिरि कीसेके मत्‍तोम. इंका होंगु-पगाते निंडिस मत्‍ता पिस्वर पिसुंदुम, कळकु पोत्‍तुमळ, वेरेतोर मनाकुन हय्साकोंदुर, मनमगुडा वरोंक-वरोर हय्साकोंदुम.
TIT 3:4 गानि मनाकुन पिसागोटना पेनबाबाल ओना बेसतनम आनि पावरमते निंडिस मत्‍ता दयातुन मनापोर्रो हुपिच्‍चि,
TIT 3:5 मनाकुन कापाळतोर. मनम कीता नीति कबाह्‍कुनाहेंका ओर मनाकुन कापाळा हिल्‍लोर गानि ओना सतता दयाहेंदाले मनाकुन कापाळतोर. पूना रीतुने पुट्‍टना एर तुंगमळहेंदाल आनि पवित्र आत्मा मनाकुन पूनगा कियमळहेंदाल इल्‍हा आता.
TIT 3:6 ई पवित्र आत्मातुन, मनाकुन पिसागोटना येसु किरिस्‍तुनाहेंदाल ओर मनापोर्रो इरगा वळियतोर.
TIT 3:7 ओर इल्‍हा बारि कीतोर इत्‍ते, मनम ओना कुर्पाहेंदाल नीतिमंतुल्क आयगोम आनि बस्‍केळ्‍क पिस्सना पिस्वरता आसेते मनम ओना वारसदार्क आयाना इंचि.
TIT 3:8 इद पोल्‍ले निजम आंद. आनि निमे इव पोल्‍लें दटांचि वेहाना इंचि नावा इच्‍चा मंता. निमे दटांचि वेहतेने, बोर अय्ते पेनदुन विस्वासम कीतुर, ओर जेर्गताते मंचेके बेसता कबाह्‍क कीसेके मनांतुर. बारित्‍ते इव अन्‍नि मनकालोरहाटीं बच्‍चोनो बेस आनि पायदता पोल्‍लें आंदुं.
TIT 3:9 गानि अर्तम हिल्वा लोल्‍लिनाल, वंसाल्कुना बारेमता पोल्‍लेनाल, जगडाल्कुनाल इंका मूसाना नियमकुना बारेमता लोल्‍लिनाल निमे लक्‍कु मन. अव बतक ओज्जानव आयों, अवुनाहेंदाल बतल पायदा इंका वायो.
TIT 3:10 अल्हा चुगली कीसि वेरे-वेरे कियालय हूळानोंक, उंदि-रोंड मल्कां दटांचा. केंजाकोंटे, ओर मनकल हर्रि तप्‍सि पापम कीसंतोर, ओनद-ओरे दोस्‍सि इंचि हुपिच्‍कुंचंतोर इंचि एरपाट कीसि ओना दंटा होळसीम.
TIT 3:12 बस्के अय्ते नना, अरतिमास इनानोन हिलाकोंटे तुकिकुस इनानोन निहगा लोहकन, अस्‍के बल्हा कीसि अयना निमे, निकोपोलिस सहरते नाकु वासि कलियना कोसिस कीम. बारित्‍ते पीनि कालमते नना अग्गेन मनंतन इंचि निरनायम येततन.
TIT 3:13 जेनास वकील आनि अप्‍पुलोसुंक ओरा पय्‍नेमते ओर्क बतले तक्‍को होनाकोंटा हूळकुंचि, ओर्कुन सार्ला कीम.
TIT 3:14 अवसराल्कुन दोर्किच्‍कुननाहाटीं मना लोकुल्‍कगुडा बेस कबाह्‍क कीसेके मनमळ करियगोम, अल्हा कीते ओर पलम हियानोरलेह्का मनांतुर.
TIT 3:15 नावातोनि मनानोर अंटोर नीकु जोहर वेह्‍चंतुर, इंका विस्वासमहेंदाल मनाकुन पावरम कियानोर्कुगुडा जोहर. पेनदा कुर्पा मी अंटोरतोनि मन्‍निकांटी.
PHM 1:1 नना पौलुस, किरिस्‍तु येसुना बारेमता बेसता कबुर वेहताहाटीं कैदिन आसि जेलने मंतन. ना तम्मुनलेसीं मनना तिमोतिनाहेंदाल ना पावरमगल्‍ला दंटातोर पिलेमोनुंक, मावा हेलड अपियांक, बेसता कबुर वेहानाहाटीं मावालेसीं लडाइ कियना अरकिपुसुंक, अल्‍हेने नीवा लोते जमा आयाना कलिसियातोर्क इद सिट्‍टि रासेक मंतन.
PHM 1:3 मना पेनबाबानाहेंदाल आनि सामि येसु किरिस्‍तुनाहेंदाल मीकु कुर्पा, सांति दोर्किकांटी.
PHM 1:4 पिलेमोन, सामि येसुना पोर्रोटा नीवा विस्वासम बारेमते, अल्‍हेने पेनदा लोकुल्‍कुनपोर्रो निमे हुप्‍सना पावरम बारेमते नना केंजतन. अदुनहाटीं नना पारतना कियनेंके बस्‍केळ्‍क नीकुन मति कीसि पेनदुक दन्यवाद वेहंतन.
PHM 1:6 येसु किरिस्‍तुना अन्‍नि बेसता पोल्‍लेना तेल्वि, नीकु दोर्कताहाटीं वेरेतोरगुडा नी विस्वासमते पोत्‍तु आयागोम इंचि नना पारतना कीसेक मंतन.
PHM 1:7 तम्मा! निमे पेनदा लोकुल्‍कुन पावरम कीसि ओरा मनसुकुंक सांति हीतिन. अदुनहाटीं नी पावरमहेंदाल नाकुगुडा वेल्‍लेन सुकम, सांति दोर्कता.
PHM 1:8 बद अव्‍सरमो अदुन कीम इंचि, किरिस्‍तुना पोरोल्ते नीकु वेहाना अदिकारम नाकु मंता. अय्नागानि नना पौलुसुन, मातरन आसि किरिस्‍तु येसुनाहाटीं जेलते मंचि, पावरमते नीकु विनंति कीसंतन.
PHM 1:10 ओनेसिमुसुनपोर्रो निमे दया हुप्‍सा इंचि नीकु विनंति कीसंतन. नना जेलते मननेंके ओर पेनदुन विस्वासम कीसि नावा मर्रि आतोर.
PHM 1:11 मोदाला ओर नीकु बता कबळ्‍क ओज्‍जाकोंटा मत्‍तोर. गानि इंदके ओर मना इव्‍वुर्कगुडा कबळ्‍क ओज्‍जंतोर.
PHM 1:12 अय्ते नना बच्‍चोरो पावरम किय्‍याना ना मर्रिनसोंटा ओनेसिमुसुन नीहेके वापस लोह्‍चंतन
PHM 1:13 बेसता कबुर वेहताहाटीं नना जेलते मंतन. नीवा बदलिपोर्रो ओनेसिमुस नावा सेवा कीते बेस मनंता इनकुंचि ओन नाहगेन इर्राना विचारम कीसि मत्‍तन,
PHM 1:14 गानि निमे किय्‍याना इसोंटा बेसता कबळ कुसिते कियगोम, बल्‍मितोनि जर्गामन्‍नि इंचि नीवा पोल्‍ले हिल्वा नना इल्‍हा कियमळ नाकु बेस दल्‍गाहिल्‍ले.
PHM 1:15 ओनेसिमुस कोन्‍नि रोजकु निहागटाल लक्‍कु आसि मत्‍तोर, गानि बोर्क एरपाट! बस्‍केळ्‍ताहाटीं नीकु दग्‍गेरा आयगोम इंचि अल्हा जर्गता बारे!
PHM 1:16 इंदकेटाल ओनेसिमुसुन दासुनलेक्‍काते आयो गानि, दासुंकन्‍ना एक्‍को, इत्‍ते नीवा दंटाता वरोर विस्वासि दादाना लेक्‍काते हूळकुन. नना अय्ते ओन बच्‍चोनो पावरम कींतन. गानि इंदके ओर सामिन विस्वासम कीसि, नीतोनि मनंतोर, निमेगुडा ओन नाकन्‍ना एक्‍को पावरम कीम.
PHM 1:17 ओक्‍कला निमे नाकुन सेवालोप्‍पो नीवा पालिगाड इनकुनानय्ते, नाकुन दग्‍गेरा कीकुत्‍ताप ओनगुडा दग्‍गेरा कीकुन.
PHM 1:18 ओर नीवद बतलन्‍ना नुकसान कीते, नीकु बतलन्‍ना बाकिगिंटा मत्‍ते, नावा पोरोलते रासि इर्रा.
PHM 1:19 अदुन निहचींतन इंचि, नना पौलुस, नावा सतता कय्‍दे रासि हीसेक मंतन. अल्हा हूळते निमेन नाकु बाकि मंतिन. इद नीकु वेहना अव्‍सरम हिल्‍ले.
PHM 1:20 अदुनहाटीं नावा तम्मा! सामिना पोरोलते ओनेसिमुसना बारेमता विनंतितुन ओप्‍कुंचि, किरिस्‍तुना लोप्पो नावा मनसुंकु सांति हीम.
PHM 1:21 नना वेहतद निमे केंजंतिन इत्‍ता बरोसाते इद सिट्‍टि रासेक मंतन. अचोने आय्‍का नना वेहतादानकन्‍ना निमे एक्‍को कींतिन इंचि नाक एर्के.
PHM 1:22 अल्‍हेने, नाहाटीं मंदालय उंदि जेगा हूळसि इर्रा. मिमेट किय्‍याना पारतनां केंजसि सामि नाकुन मिहगा लोहंतोर बारे इत्‍ता आसे नाकु मंता.
PHM 1:23 किरिस्‍तु येसुनाहाटीं जेलने अरता एपप्रास इनानोर इग्‍गे नातोनि मंतोर, ओर मीकु जोहार वेहचंतोर.
PHM 1:24 अल्‍हेने नातोनि कलियसि कबळ कियाना मरकुस, अरिसतरकुस, देमास, लूकाल ईरगुडा नीकु जोहार वेहासेक मंतुर.
PHM 1:25 मना सामि येसु किरिस्‍तुना कुर्पा मीवा आत्मांकु तोळ मन्‍निकांटी, आमीन.
HEB 1:1 वेल्‍लेन मुन्‍नेटा कालमते पेन बच्‍चुंगो मल्कां बच्‍चुंगो तीरकुने पेनदा कबुरतोराहेंदाल मना तादो-बाबुरतोनि वळ्कता.
HEB 1:2 गानि ई आकिरता रोजकुने बारे, पेन दाना मर्रिनाहेंदाल मनातोनि वळ्कता. दाना मर्रिनाहेंदाले इद पूरा दुनियातुन तयार कीसि, ओन ई दुनियाता वारसदार इंचि निलाहता.
HEB 1:3 आ मर्रि पेनदा महिमाता वेलगु आंदुर. इंका पेनदा गुनम आनि मर्रिना गुनम उंदेतीर मंता. मर्रि ओना बलमगल्‍ला पोल्‍लेने ई दुनियातुन ताकिच्‍चेके मंतोर. ओर मना पापाल्कुनंता नोर्सि मनाकुन पवित्र कीतोर. पजा एत्‍तुने स्वर्गमते मंदना अन्‍निटकन्‍ना पेद्‍दा पेनदा तिना बाजुंक होंचि उदतोर.
HEB 1:4 इल्‍हा ओर पेनदा दूतांकन्‍ना वेल्‍ले बेस पोरोल आनि कदर दक्‍किचकुत्‍तोर.
HEB 1:5 बारित्‍ते, पेन दाना मर्रिना बारेमते, “निमे नावा मर्रिन आंदिन, इय्याला ननाने नीकुन पुटिस्तन. इंका नना ओना बाबोन आंदुन, ओर ना मर्रि आंदुर.” इंचि येसुन तप्‍पा बस्‍केने बदे दूतातुन पेन इना हिल्‍ले.
HEB 1:6 इदे आयवा, बस्के अय्ते पेन दाना तोल्सूर मर्रिन बूमितगा तत्‍ता, अस्‍के, “पेनदा अन्‍नि दूतां ओन मोळ्‍किं,” इंचि इत्‍ता.
HEB 1:7 पजा पेन दाना दूताना बारेमते वेहतस्के, “अद दाना दूतन वळिलेह्का आनि दाना सेवकुल्‍कुन पोत्‍तना तळमिलेह्का कींता,” इंचि वेहता.
HEB 1:8 गानि दाना मर्रिना बारेमते, “पेनदुना, नीवा राजगद्‍दे बस्‍केळ्‍क निल्‍सि मनंता, निमे नीतिते राज्येम कियानदुन आंदिन.
HEB 1:9 सत्‍तेमतुन निमे पावरम कीतिन, सत्‍तेम हिलुवादान निमे हय्सिन. अदुनहाटींगे नना, नीवा पेनबाबन, नीवा दंटातोरा लोप्पोटाल नीकुन पेरसि, वेल्‍ले आनंदमता निय होक्‍सि नीवा अबिसेकम कीतन,” इंचि पेन इत्‍ता.
HEB 1:10 इच्‍चोने आयका, पेन दाना मर्रिना बारेमते, “सामि! मोट्‍टा मोदाला बूमिक पुनादि दोहतोन निमेने आंदिन. मब्बुकुन नीवा कय्‍दे तयार कीतिन.
HEB 1:11 अव अन्‍नि नासडेम आसि होनानुं, गानि निमे बस्‍केळ्‍क मनांतिन, कपडिं पडन आसि हर्सोत्‍ताप, अव अन्‍नि पडानव आसि होनानुं.
HEB 1:12 निमे सेद्‍दरतुन आटमूट कीताप, अवुन आटमूट कीकिन. अव कपडिनालेसीं बदलांचनूं, गानि निमे मात्रम बस्‍केळ्‍क उंदेतीर मनानोन आंदिन, नीवा कालाल्क बस्‍केने मारों,” इंचि इत्‍ता.
HEB 1:13 मर्रा, “बदवेरदाका अय्ते नीवा पगातोर्कुन नीवा काल्कुना हिळु तर्रोन अदवेरदाका, निमे नावा तिना बाजुंक उद्‍दिसि मन्‍नु, इंचि बद्‍दे दूतातुन बस्‍केने पेन इना हिल्‍ले.”
HEB 1:14 पेनदा अन्‍नि दूतां दाना सेवा कियाना आत्मांगें आयोंगां! बोर्क अय्ते पापाल्क मापि आसि मुक्‍ति दोर्कतनो ओर्कु सहायम कियानाहाटीं पेन इवुन लोहांता.
HEB 2:1 अदुनहाटीं मनम केंजता सत्‍तेम पोल्‍लेनाल लक्‍कु आयामन्‍नि इंचि अवुनहेके मनम बेस लक्‍से हियगोम.
HEB 2:2 बारित्‍ते, पेनदा दूतानाहेंदाल वेहता पोल्‍ले सत्‍तेम इंचि रुजुव आता, अस्‍के आ पोल्‍ले परकारम कबळ कियाका तप्पु कीतोर्कु आनि ताकुवोर्कु दग्गुता सिक्‍सा दोर्कता.
HEB 2:3 अय्ते इच्‍चोर पेद्‍दा मुक्‍तिता कबुरतेके लक्‍से इर्राकोंटे, वायाना सिक्‍साताल मनम बल्हा तपिच्‍कुना पर्रांतोम? इदुना बारेमते मोट्‍टा मोदाला सामिए वेहतोर. अद कबुरतुन सामिनगटाल बोर अय्ते केंजतुरो, ओर अद कबुरतुन मनाकु तेळियागोट्‍सि रुजुव कीतुर.
HEB 2:4 अचोने आयका पेनगुडा चिन्‍हां, इचंत्रमता कबाह्‍क, तीराता अद्‍बूताल्‍क आनि पवित्र आत्माता वराल्‍क दाना इच्‍चा परकारम दाना बक्‍तुल्कुंक हीसि, ई मुक्‍तिता बारेमते गवाइ हीसेक मत्‍ता.
HEB 2:5 मुन्‍ने वायाना बद दुनियाता बारेमते मोमोट वेहचंतोम, आ दुनियातुन पेन दाना दूताना कय हिळु इर्रा हिल्‍ले.
HEB 2:6 इदुना बारेमते दर्मसास्‍त्रमते उंदगा बोरो वरोर गवाइ वेहासेक इल्‍हा इत्‍तोर: “मनकल इत्‍ते असल बोर आंदुर, ओना बारेमते निमे इच्‍चोन विचारम कीसंतिन. हिलाकोंटे निमे इच्‍चोर पिकिर कियनाहाटीं, असल मनकना रूपमते पुटतोर बोर आंदुर?
HEB 2:7 निमे ओन पेनदा दूतांकन्‍ना गिचचो सिन्‍नगा कीतिन, गानि निमे ओन्क पेद्‍दातनम आनि कदरता किरिटम हीसि, निमे नीवा कय्‍दा कबाह्कुनपोर्रो ओन्क अदिकारम हीतिन,
HEB 2:8 अन्‍निटतुन ओना काल्कुनगा इरतिन.” इंचि इत्‍तोर. पेन अन्‍निटवुनपोर्रो ओन्क अदिकारम हीता, ओना अदिकारमते हिलाकोंटा बतातुने होळसा हिल्‍ले. गानि इंदके अन्‍नि ओना अदिकारमते मत्‍ताप दिस्सेक हिल्‍ले.
HEB 2:9 अयना जेरासेपताहाटीं पेनदा दूतांकन्‍ना सिन्‍नागासि मत्‍ता येसुन मनम हूळसंतोम. पेनदा कुर्पाहेंदाल अंटोर मनकालोरहाटीं ओर ओना जीवातुन हीसि हामुरता रुसि हूळतोर. हामुरतुन सहन कीताहाटीं पेन ओन्क पेद्‍दातनम आनि कदरता किरिटम केराहता.
HEB 2:10 पेन अन्‍निटवुन सतताहाटीं तयार कीता आनि सतागे अन्‍निटवुन ताकिच्‍चंता. आ पेन दाना महिमाता राज्येमते वेल्‍लेन मंदितुन सतता मर्क-मियाह्क कीसि तर्रानाहाटीं, दाना सतता मर्रि येसुन पेरता. मनाकु मुक्‍ति दोर्कगोम इंचि येसुन अद वेल्‍लेन तिप्पल्कुनतोनि ओन पुरागा कीता.
HEB 2:11 मनाकुन पवित्र किय्‍याना येसु आनि पवित्र आतोरम मनम, वरोर बाबाना पिलाल्कुमे आंदुम. अदुनहाटीं मनाकुन तम्मुह्‍क-हेलाह्क इंचि वेहालय येसु सिग्गु अर्रोर.
HEB 2:12 अदुनहाटीं, “नावा तम्मुह्‍कुंक-हेलाहकुंक नीवा पोरोल वेहकन, कलिसियातोरा मुन्‍ने नना नीकुन तल्सकुनकन,” इंचि ओर पेनदुन इत्‍ता पोल्‍ले दर्मसास्‍त्रमते रासतद मंता.
HEB 2:13 मर्रा, “नना पेनदापोर्रो बरोसा इर्रांतन.” अचोने आयका, “इग्‍गे नना, नाकु पेन हीता पिलाल्कुनतोनि मंतन,” इंचि दर्मसास्‍त्रमते रासतद मंता.
HEB 2:14 पेनदा पिलाल्क आता मनम, मेंदुल रूपमते मत्‍ताहाटीं येसुगुडा हरेक पोल्‍लेते मनालेहका आसि वातोर. मना पिस्वरंता हामुरता वेर्रे मनागा मत्‍ताहेंका देय्यमता अदिकारम मनापोर्रो मत्‍ता. गानि येसु ओना हामुरताहेंदाल, देय्यमता अदिकारमतुन नासडेम कीसि, मनाकुन हामुरता वेर्रेताल इळबळिस्तोर.
HEB 2:16 पेनदा दूतांक सहायम कियालय येसु असले वायाहिल्‍लोर गानि अब्राहामुना वंसंमतोर्के सहायम कियालय वातोर.
HEB 2:17 इदुनाहाटींगें येसुंक अन्‍नि तीरकुने ओना तम्मुह्‍क-हेलाह्‍कुनलेसीं रूपम येतमळ अव्‍सरम मत्‍ता. इल्‍हा रूपम येतते ओर पेनदा मुन्‍ने सेवा कियाना वरोर दयागल्‍लोड आनि विस्वासमलायक पेद्‍दा पेर्मल आंतोर. अस्‍केन ओर लोकुल्‍कुना पापाल्कुनाहाटीं मोक्‍कु हिय्या पर्रंतोर.
HEB 2:18 ओर कुद्‍दु परिक्‍साते अर्सि तिप्‍पल्‍क बोगांचि मंतोर, अदुनहाटीं इंदके बोर अय्ते परिक्‍साते अर्सि तिप्‍पल्‍क बोगांचंतुरो, ओर्कु ओर सहायम किया पर्रंतोर.
HEB 3:1 अदुनहाटीं, पवित्र विस्वासुल्‍कुनिटा! मुक्‍तिता पालिगाह्क आयालय पेन मीकुन केयता. येसुन पेन पेद्‍दा पेर्मल आनि प्रेरित आयालय लोहचीता इंचि मनम ओप्कुत्‍तोम, अय्ते ओना बारेमते मिमेट विचारम कीम्‍टु.
HEB 3:2 पेनदा पूरा कुटुंबमते मूसाल अन्‍नि कबाह्‍कुने विस्वासमलायक मत्‍तोर, अल्‍हेने येसुगुडा ओन निल्‍हाता पेनदाहाटीं विस्वासमलायक मत्‍तोर.
HEB 3:3 हरेक लोतुन दोहानोर बोरन्‍ना वरोर मनकल मनंतोर, गानि अन्‍निन तयार कीतोर मात्रम पेने आंदु. बल्हा अय्ते लोतुकन्‍ना लोन दोहानोंक एक्‍को कदर मनंता, अल्हेन येसुगुडा मूसांकन्‍ना एक्‍को कदरगल्‍लोड इंचि पोरोल तरकुत्‍तोर.
HEB 3:5 वायाना कालमते पेन बतल-बतल अय्ते वेहाना मंतानो, अवुना गवाइ लोकुल्‍कुंक वेहनाहाटीं मूसाल, पेनदा पूरा लोतोरगा वरोर विस्वासमलायक सेवक आसि मत्‍तोर.
HEB 3:6 गानि पेनदा विस्वासमगल्‍ला मर्रि, किरिस्‍तु, पेनदा पूरा लोतोरा अदिकारि आसि मत्‍तोर. मनमगिंटा मना विस्वासम आनि आसेता बारेमते आकिरदाका इरगा गट्‍टिगा मत्‍ते, मनमगुडा पेनदा लोतोरम आसि मनंतोम.
HEB 3:7 अस्‍के पवित्र आत्मा दर्मसास्‍त्रमते इल्‍हा इंता: “मिमेट इय्याला पेनदा पोल्‍लें केंजानय्ते, पेन वेहतद मोमोट केंजोम इंचेके, इस्राएल लोकुल्‍क बय्‍लि जेगातगा पेनदा पट्‍टु हूळालय बल्हा मुजोरिं कीतुरो, अल्हा मिमेट मीवा मनसुकुने मुजोरिं कियमट.
HEB 3:9 अगा नल्‍पै वर्सनदाका नना कीता कबाह्‍कुन हूळसिगुडा, मीवा पेद्‍दाल्क परमेर्का कीसि नावा पट्‍टु हूळतुर.
HEB 3:10 अदुनहाटीं नना आ पीळिता लोकुल्‍कुनपोर्रो होंग पीसि, ‘ईरा मनसु बस्‍केळ्‍क नहागटाल तप्‍सोंचि लक्‍कु मनंता, ईर नावा हरदुन बस्‍केने एरपाट किया हिल्‍लुर,’ इंचि ओर्कुन इत्‍तन.
HEB 3:11 अदुनहाटीं नना होंगुने, ‘ओर्कुन आराम दोर्कना जेगाते बस्‍केने होळिया हिय्योन,’ इंचि ओट्‍टु तिंचि वेहतन.” इंचि इत्‍ता.
HEB 3:12 विस्वासुल्‍कुनिटा, जेगर्ता! जीवाते मंदना पेनदापोर्रोटा विस्वासमताल लक्‍कु कियागोट्‍टनसोंटा कराब, विस्वासम हिलुवा मनसु, मीलोप्‍पो बोरागेन मनानायो.
HEB 3:13 गानि पापम मीलोप्‍पो वासि मीवा मनसु मुजोरि कियाकोंटा मननाहाटीं, “इय्याला” इनना वेला मनानेंकेने दररोज वरोंक-वरोर दैरनेम हीसेक मंटु.
HEB 3:14 बारित्‍ते, सुरुवने मनम इर्ता बरोसातुन मना पिस्वरता आकिरदाका गट्‍टिगा पीसि मत्‍तेन, मनम किरिस्‍तुना पालिगाह्क आंतोम.
HEB 3:15 दीनकन्‍ना मुन्‍ने दर्मसास्‍त्रमते इल्‍हा वेहतद मंता: “मिमेट इय्याला पेनदा अल्किर केंजानय्ते, पेन वेहतद मोमोट केंजोम इंचेके, इस्राएल लोकुल्‍क बय्‍लि जेगातगा पेनदा पट्‍टु हूळालय बल्हा मुजोरिं कीतुरो, अल्हा मिमेट मीवा मनसुकुने मुजोरिं कियमट.” इंचि रासि मंता.
HEB 3:16 पेनदा पोल्‍ले केंजसिगुडा दाना विरोदमते ताकतोर बोर आंदुर? मूसानतोनि कलियसि इजिप्‍त देसेमताल पलाते अरता आ अंटोर लोकुल्‍के गदा!
HEB 3:17 नल्‍पै वर्सनदाका पेन बोरा पोर्रो होंग पीसि मत्‍ता? पापम कीसि बय्‍लि जेगाते बोरा पीनगुल्क अय्ते अर्सि मत्‍तांगो, ओरा पोर्रेन आयोना?
HEB 3:18 “ओर्कुन आराम दोर्कना जेगाते बस्‍केने होळिया हिय्योन,” इंचि पेन बोरा बारेमते ओट्‍टु तित्‍ता? दाना पोल्‍ले परकारम बोर अय्ते ताका हिल्‍लुरो, ओरा बारेमतेन गदा!
HEB 3:19 इल्‍हा ओर्कु विस्वासम हिलुवाहेंकेन, ओर आराम दोर्कना जेगाते होळिया पर्राहिल्‍लुर, इंचि मनाकु तेळियंता.
HEB 4:1 आराम दोर्कना जेगाते होळियाना बारेमता पेन हीता पोल्‍ले, इदवेरदाकागुडा ताकसेके मंता. अद मना लोप्पोटाल बोनागटालन्‍ना तप्‍सोनामन्‍नि इंचि, मनम पेनदा वेर्रेते मंदकोम.
HEB 4:2 बारित्‍ते, ई आराम दोर्कना जेगाता बारेमता बेसता कबुर इस्राएल लोकुल्‍कुंक एवताप मनकगुडा वेहमळ जर्गता. गानि ओर आ कबुरपोर्रो विस्वासम इर्रा हिल्‍लुर, अदुनहाटीं ओर्कु दानद बतले पायदा आयाहिल्‍ले.
HEB 4:3 विस्वासम कीतोरम मनम, आ आराम दोर्कना जेगाते तप्‍पाकोंटा होळियंतोम. बारित्‍ते एडोव रोजुना बारेमते इल्‍हा रासतद मंता: “पेन अद कीता अन्‍नि कबाहकुनाल एडोव रोजुननाड आराम कीता,” इंचि रासि मंता. अयना आ जेगातुन तयार कियाना कबळ, पेन दुनियातुन पुटिस्तस्केन पुरागा कीसि इर्ता. बारित्‍ते, विस्वासम इर्रुवोरा बारेमते पेन होंगुने इल्‍हा इत्‍ता: “ओर्कुन आराम दोर्कना जेगाते बस्‍केने होळिया हिय्योन, इंचि ओट्‍टु तिंचि वेहतन.” इल्‍हा इत्‍ता.
HEB 4:5 आनि मर्रा, “ओर्कुन आराम दोर्कना जेगाते बस्‍केने होळिया हिय्योन,” इंचि इंकुंदि मल्का इत्‍ता.
HEB 4:6 दीनकन्‍ना मुन्‍ने मना पेद्‍दाल्क बेसता कबुर परकारम ताकुवाहेंका ओर आराम दोर्कना जेगाते होळिया पर्राहिल्‍लुर. अयना अद आराम दोर्कना जेगाते इच्‍चुर लोकुल्‍क इंदकेगुडा होळियाना मंता.
HEB 4:7 अदुनहाटीं, पेन उंदि रोजु इंकुंदि रोज तयार कीसि इरता, अदुन “इय्याला” इंचि इंतुर. पेद्‍दाल्क हर्रि तप्‍ता वेल्‍लेन वर्सांक, बल्हा अय्ते मुन्‍ने वेहताप, “मिमेट इय्याला पेनदा पोल्‍ले केंजानय्ते, इय्याला पेन वेहतद मोमोट केंजोम इंचेके, इस्राएल लोकुल्‍क बय्‍लि जेगातगा पेनदा पट्‍टु हूळालय बल्हा मुजोरिं कीतुरो, अल्हा मिमेट मीवा मनसुकुने मुजोरिं कियमट,” इंचि दाविदना बजन संहिता पुस्तकमते पेन वेहता.
HEB 4:8 ओक्‍कला जोसुवाल ओर्कुन आराम कियाना जेगाते ओसि मत्‍ते इंकुंदि रोजुना बारेमते पेन मर्रा वळकाकोनवळ.
HEB 4:9 अदुनहाटीं पेनदा लोकुल्‍क आराम कियाना रोजु इंका वायानदे मंता.
HEB 4:10 बल्हा अय्ते पेन दाना कबाह्‍कुन महाचि एडोव रोजु आराम कीता, अल्हेन दाना आराम कियाना जेगाते होळियानोरगुडा ओरा कबाह्‍कुन महाचि आराम कियानुर.
HEB 4:11 इस्राएल लोकुल्‍क पेनदा पोल्‍ले परकारम ताकुवाहेंका ओर नासडेम आतुर, गानि मनम ओरालेसीं आयाकोंटा, पेनदा पोल्‍ले परकारम ताकसेके अद जेगाते होळियाना इरगा कोसिस कियागोम.
HEB 4:12 बारित्‍ते पेन वेहता ई पोल्‍ले, जीवा मत्‍तद आनि बलमगल्‍लद आंद, अद रोंडु बाजकुनाल करा-करा मनना कसेरकन्‍ना एक्‍को करा-करा मंता. अद बल्हा बोक्‍कानाल पूलगुन वेरे-वेरे कींता, अल्हेन आत्माताल जीवातुन वेरे कींता. इंका अद मनसुना विचाराल्कुन, अवुना उद्‍देसाल्कुना बारेमते बरोबर वेहा पर्रंता.
HEB 4:13 इद दुनियाते मनानव बतांगें पेनदा नदरताल मक्‍किसि हिल्‍लें. मनम मना बारेमते लेक्‍का अप्पजेप्पना पेनदा मुन्‍ने अन्‍निगुडा कुल्‍ला-कुल्‍ला मंतां.
HEB 4:14 अंटोर्कन्‍ना पेद्‍दा पेर्मल, स्वर्गमते होत्‍ता पेनदा मर्रि येसु, मनातोनि मंतोर. अदुनहाटीं अंटोरा मुन्‍ने ओप्‍कुत्‍ता मना विस्वासमतुन मनम गट्‍टिगा पीसि मंदकोम.
HEB 4:15 मना पेद्‍दा पेर्मल येसुंकगुडा मनालेसीं पापम कियाना अन्‍नि परिक्‍सां वातां, गानि ओर बस्‍केने पापमते अर्रा हिल्‍लोर. अदुनहाटीं ओर मना कमजोरिन, दुक्‍काल्कुन तेल्‍पिचकुंतोर.
HEB 4:16 अय्ते वट! गट्‍टिगा दैरनेम कीसि मनम पेनदा दयाता राजगद्‍दे दग्गेर्क दाकोम. दीनहेंदाल मनाकु अव्‍सरम मत्‍तस्के, मना सहायमहाटीं ओना कुर्पा आनि दया दोर्कार.
HEB 5:1 हरेक पेद्‍दा पेर्मन, लोकुल्‍क ओरा लोप्पोटाल पेर्रांतुर. लोकुल्‍कुना पापाल्क मापि आयानाहाटीं लोकुल्‍कुनाहेंदाल ओर पेनदुक मोक्‍कुल्क हिय्यना, सेसां वाटाना कबळ कियालय ओन निलाहंतुर.
HEB 5:2 आ पेर्मलगुडा वेल्‍ले तीरकुने कमजोर मंतोर, अदुनहाटीं तेळियका तप्पु कीतोर्कुन, हर्रि तप्‍सोत्‍तोर्कुन ओर दयाते हूळा पर्रंतोर.
HEB 5:3 अदुनहाटीं ओर लोकुल्‍कुना पापाल्क मापि आयालय मोक्‍कु हीताप, ओना सतता पापाल्कुनाहाटींगुडा मोक्‍कु हियापींता.
HEB 5:4 बल्हा अय्ते मोट्‍टा मोदाटा पेद्‍दा पेर्मल आयानाहाटीं पेन हारूनुन केयता, अल्हेन पेन केयवद बोरे मनकल ओनद ओरे पेद्‍दा पेर्माना कदरता जेगा येता पर्रोर.
HEB 5:5 अल्हेन किरिस्‍तुगुडा ओनद ओर पेद्‍दा पेर्मल आया हिल्‍लोर. गानि बद पेन अय्ते ओन, “निमे नावा मर्रिन आंदिन, इय्याला ननाने नीकुन पुटिस्तन,” इंचि इत्‍तानो अदे पेन ओन पेद्‍दा पेर्मल इंचि निल्‍हाता.
HEB 5:6 अल्हेन, “निमे मेल्किसेदेकुनलेह्का बस्‍केळ्‍ताहाटीं पेद्‍दा पेर्मल आसि मंदकिन” इंचि मरुंदि जेगातेगुडा पेन ओन इत्‍ता.
HEB 5:7 येसु इद बूमिपोर्रो मनकना रूपमते मत्‍ता रोजकुने, ओन हामुरताल कापाळाना पेनबाबांक अळसि, मोत्‍कुंचि विनंतिं-पारतनां कीतोर. अस्‍के ओना बक्‍तितुन पीसि पेन ओना पारतनातुन केंजता.
HEB 5:8 येसु कुद्‍दु पेनदा मर्रि आसिगुडा तिप्‍पल्‍क बोगांचेके, पोल्‍लेपोर्रो ताकमळ इत्‍ते बतल, करियतोर.
HEB 5:9 इल्‍हा, ओन्क बल्हा अय्ते आयाना मत्‍ता अल्हा पुरागा आसि, ओना पोल्‍लेपोर्रो ताकाना अंटोराहाटीं ओर, बस्‍केळ्‍ताहाटीं मुक्‍ति हियानोर आतोर.
HEB 5:10 इल्‍हा पेन ओन मेल्किसेदेकुनलेह्का पेद्‍दा पेर्मल इंचि निलाहता.
HEB 5:11 ई मेल्किसेदेकुना बारेमते वेहकोम इत्‍ते वेल्‍लेन पोल्‍लें मंतां. गानि मिहगा केंजना मनसु हिलुवाहेंका, बेस तेळियागोट्‍सि वेहमळ इत्‍ते वेल्‍लेन कस्‍टम.
HEB 5:12 अल्हा हूळते इदवेरदाका मिमेट गुरुल्क आया मत्‍ता. गानि इंदके मीके वेरे बोरन्‍ना वासि पेन हिय्यना मुक्‍ति बारेमता पोल्‍लें मर्रा कराहना अव्‍सरम मंता. मिमेट इदवेरदाकागुडा पाल उनानोरालेसींगे मंतिट, गाटो तिननालायक आया हिल्‍लिट.
HEB 5:13 बारित्‍ते पाल उनना हरेक पेडल, ओर पसि पेडले मनंतोर. ओन्क नीति पोल्‍लेना बारेमते तेळियो.
HEB 5:14 गानि बोर अय्ते तेल्वि बेर्सि, मंचि-सेड्‍डातुन एरपाट कीसि अल्हा ताकतुरो, ओरे गाटो तिनानोरालेसीं आतुर.
HEB 6:1 अस्‍के किरिस्‍तुना बारेमते सुरुवने करियता बोदाना बारेमते मर्रा-मर्रा वळ्‍कमळ होळसिसि, गिचचो मुन्‍नेळ्‍क होंचि पेद्‍दा बेर्सतोरालेक्‍कते दाकोम. मरुंदि मल्का हामुरतेके ओयाना कबाह्कुनाल मनसु मार्सकुन्‍मळ, पेनदापोर्रो विस्वासम इरमळ,
HEB 6:2 बापतिस्माता बारेमते करियमळ, तल्‍लापोर्रो कय इरमळ, हासि मर्रा जीवाते तेदमळ आनि बस्‍केळ्‍ताहाटीं मनना न्‍यायम बारेमते करियमळ, इसोंटा किरिस्‍तुना बारेमते सुरुवने करियता बोदाना बारेमते मीकु मर्रा-मर्रा वेहाना अव्‍सरम हिल्‍ले.
HEB 6:3 अयना पेनदा इच्‍चा मत्‍ते इल्‍हागुडा कीकोम.
HEB 6:4 बोर अय्ते पेनदुन विस्वासम कीसि पजा आ विस्वासमताल पजोळ्क आंतुर, ओर्कुन मनम बल्हा मर्रा मलाहकोम? बारित्‍ते ओर्क अय्ते ओरा पिस्वरते उंदि मल्का वेल्‍गु दोर्किस मत्‍ता,
HEB 6:5 ओर अय्ते स्वर्गमताल दोर्कना वराल्‍कुना रुसि हूळतुर, पवित्र आत्माते पालिगाह्क आतुर, इंका पेनदा बेस पोल्‍लेनद आनि वायना कालमता ताकतता रुसि हूळतुर,
HEB 6:6 असंटोर पेनदा मर्रिन मर्रा अंटोरा मुन्‍ने क्रुसुनपोर्रो वेलाड वाटसि ओन बदनाम कीसंतुर. अदुनहाटीं असंटोर्कुन पेनदा विस्वासमताल लक्‍कु आयानय्ते मर्रा मनसु मार्सकुननालायक कियमळ असल कुदरेन कुदरो.
HEB 6:7 विस्वासमताल पजोळ्क होत्‍ता ई लोकुल्‍क, कराब बूमितसंटोर आंदुर. बारित्‍ते, बूमि दानपोर्रो अरता पिरदा एतुनंता उंचि, दान ऊळाना कास्‍तकरि मनकंक बेस पंटा हियानय्ते पेन दान्क आसिर्वाद हींता.
HEB 6:8 गानि अदे बूमि ओक्‍कला हाह्कु, हाह्कुना पोदां पुट्‍टिचानय्ते अद कबळ्‍क ओज्‍जाकोंटा आसि पेनदा सापनेमलायक आंता. आकिरते दान बोळसि पोहमळ जर्गंता.
HEB 6:9 अय्ते नावा पावरमगल्‍लोरिटा, मोमोट इंदके इल्‍हा वळ्‍कसंतोम. अयना मीहेंदाल मोमोट इवुंकन्‍ना बेस पोल्‍लें आसे पडसंतोम. मिमेट कियाना कबाह्‍कुन हूळसि, मीकु निजमे मुक्‍ति दोर्कता इंचि माकु बरोसा मंता.
HEB 6:10 बारित्‍ते, पेन अन्‍यायम कियानद आयो. दाना पोरोलते मिमेट कियाना बेस कबाह्‍कुन, दाना पवित्र लोकुल्‍कुनपोर्रो मिमेट हुपिस्‍ता पावरमतुन आनि कीसेके मनना सहायमतुन अद बस्‍केने मति मर्गो.
HEB 6:11 मनम बदुनाहाटीं अय्ते आसे पळसि एदुर हूळसेक मंतोमो अद दोर्कनदाका, मी लोप्पोटा हरेक मनकल पुरागा गट्‍टि आसेते आकिरदाका कोसिस कीसेके मनना इंचि मोमोट मनसुनाल कोरसंतोम.
HEB 6:12 अदुनहाटीं मिमेट लंडोर्क आयमट. गानि बोर लोकुल्‍क अय्ते विस्वासम आनि ओप्केहेंदाल पेन हींतन इत्‍तादुन दक्‍किच्‍कुंतुरो ओरा अळगुने अळगु वाटसि मिमेट ताकट इंचि कोरसंतोम.
HEB 6:13 पेन अब्राहामुंक पोल्‍ले हीतस्के, ओट्‍टु तिनानाहाटीं दानकन्‍ना पेद्‍दोड बोर हिलुवाहेंका अद दाना सतता ओट्‍टु तित्‍ता.
HEB 6:14 तिंचि, “नना नीकु तप्‍पाकोंटा आसिर्वाद हींतन, इंका नीवा वंसंमतुन वेल्‍लेन बेर्सागोट्‍टंतन,” इंचि इत्‍ता.
HEB 6:15 इल्‍हा अब्राहाम वेल्‍ले ओप्‍केते एदुर हूळतोर इंचि पेन ओन्क हींतन इंचि पोल्‍ले हीतद ओन्क दोर्कुता.
HEB 6:16 मनकालोर्क ओट्‍टु तिनानस्के, ओरकन्‍ना पेद्‍दोरद ओट्‍टु तिंतुर. ओरा हरेक जगडमता पैसला आ ओट्‍टु तिननाहेंदाले पक्‍का आंता.
HEB 6:17 पेन दाना पिलानतुन बस्‍केने मार्सो इत्‍ता संगति, अद पोल्‍ले हीतोर्कुंक बेस तेळियाना इंचि पेनदा इच्‍चा मंता. अदुनहाटीं अद अल्हा ओट्‍टु तिंचि दाना पोल्‍लेता गेरांटि हीता.
HEB 6:18 पेन हीता पोल्‍ले आनि ओट्‍टु, इव रोंडु बस्‍केने बदलांचो. इवुना बारेमते पेन बस्‍केने आबद्‍दम वळ्का पर्रो. मनम बद आसेहेके अय्ते होनालय पेय्सतोमो, अद आसेहेके मनम इंकिच्‍चो गट्‍टि दैरनेमते होनना इंचि पेन अल्हा माकु रोंडु मल्कां गेरांटि हीता.
HEB 6:19 अद आसे इत्‍ते मना जीवाहाटीं उंदि कोय्याता कुसितसोंटद आंद. अद बेस गट्‍टिगा आनि मेसलाकोंटा पीसि मनंता. पेन मनना पवित्र जेगातगळ्क अद मनाकुन एव्‍सा पर्रंता.
HEB 6:20 अद जेगातगा येसु मनाहाटीं मनाकन्‍ना मुन्‍नेन होळियतोर. होळियसि मेल्किसेदेकुना रीतिते बस्‍केळ्‍ताहाटीं पेद्‍दा पेर्मल आतोर.
HEB 7:1 ई मेल्किसेदेक सालेम सहरता राजाल आनि अन्‍निटकन्‍ना पेद्‍दा पेनदा पेर्मल मत्‍तोर. अब्राहाम वेरे राजालोरतोनि लडाइ कीसि ओर्कुन गेल्सि, मल्सि वायनेंके मेल्किसेदेक ओन्क कलियसि आसिर्वाद हीतोर.
HEB 7:2 अस्‍के अब्राहाम लडाइते गेल्सि तत्‍ता पूरा दनम-संपत्‍तितुन तूस कीसि, पदोव तूस मेल्किसेदेकुंक हीतोर. मेल्किसेदेक इनना पोरोल्कु अर्तम, “नीतिता राजाल” इंका इब्रानि बासाते सालेम इनना पोरोल्कु “सांति” इंचि अर्तम आंद. इत्‍ते ओन सुकमता राजाल इंचिगुडा इनावच्‍चु. मेल्किसेदेकुना तल्‍लुर-बाबो बोर आंदुर, ओना तम्मुह्‍क-तादालोर बोर आंदुर, ओना पुट्‍कु-हामुरता बारेमतेगुडा दर्मसास्‍त्रमते बतले रासि हिल्‍ले. पेनदा मर्रिनलेह्का ओरगुडा बस्‍केळ्‍ताहाटीं पेर्मल आसि मनंतोर.
HEB 7:4 ई मेल्किसेदेक इत्‍ते बच्‍चोन पेद्‍दा मनकालो मनमे विचारम कियाना मंता. मना मोदोलता मनकल अब्राहाम पगातोरहेंदाल गेल्सता बेसता मालुना पदिताल उंदि तूस ओन्क हीतोर.
HEB 7:5 मूसाना नियमते उंदि आदेस मंता. अद बतल इत्‍ते, लेवि वंसंमताल पेर्मालोर आतुर, वेरे वंसंमता लोकुल्‍क ओर अब्राहामुना वंसंमतोर आयिना ओरा तम्मुह्‍क-तादालोर, ओरा कमयता पदिताल उंदि तूस पेर्मल आतोर्कु हिय्युडे गावाले.
HEB 7:6 गानि मेल्किसेदेक लेविना वंसंमतोर आयोर. अय्नागानि मेल्किसेदेक, बोन्क अय्ते पेन पोल्‍ले हीसि मत्‍ता आ अब्राहामुनाहेंदाल पदि तूसकुनाल उंदि तूस येतकुंचि ओन्क आसिर्वाद हीतोर. दीनहेंदाल मेल्किसेदेक पेद्‍दोड आंदुर.
HEB 7:7 इंदके पेद्‍दोड सिन्‍नोंक आसिर्वाद हींतोर इत्‍ता पोल्‍लेपोर्रो बतले अनमानम हिल्‍ले.
HEB 7:8 लेविना वंसंमताल पेर्मालोर आतोर पदिताल उंदि तूस येतंतुर. गानि ओर अय्ते उंदि रोज हायना मनकालोरे आंदुर. गानि बस्‍केळ्‍क पिस्सि मनना मेल्किसेदेकगुडा पदिताल उंदि तूस येतंतोर इंचि गवाइ वेहताप दर्मसास्‍त्रमते रासि मंता.
HEB 7:9 अल्हा हूळते, पदिताल उंदि तूस येताना लेविगुडा अब्राहामुनाहेंदाल, पदिताल उंदि तूस मेल्किसेदेकुंक हीतोर इंचि इनावच्‍चु.
HEB 7:10 अद बल्हा इत्‍ते, अब्राहाम मेल्किसेदेकुंक कलियसि पदोव तूस हीतस्के, लेवि पुट्‍टा हिल्‍लोर, अय्नागानि ओर ओना तादो-बाबो अब्राहामुना मेंदुल्ते जीवा पेळेतालेसीं मत्‍तोर.
HEB 7:11 मूसाना नियमते, लेविना वंसंमतोरे पेर्मालोर्क आयाना इंचि रासतद मंता. अय्ते ओर कियाना कबाह्कुनहेंदाल लोकुल्‍क पुरागा नीतिमंतुल्क आया पर्सि मत्‍ते, हारूननसोंटोन वरोन पेर्मन पेन लोहचि मनवळ. गानि मेल्किसेदेकुना रीतिते वरोर पेर्माना अव्‍सरम बतल मत्‍ता?
HEB 7:12 बारित्‍ते पेर्माना कबळ मारियतस्के, मूसाना नियमगुडा मारिया पींता.
HEB 7:13 इवन्‍नि पोल्‍लें इंदके वेरे कानदानते पुट्ता येसुना बारेमते वेहासेक मंतां. ई कानदानते पुट्तोर बोरेगुडा मोक्‍कु हिय्यना जेगातगा सेवा किया हिल्‍लुर.
HEB 7:14 मना सामि यहुदाना वंसंमते पुट्तोर. ई कानदानतोर पेर्मालोर आयाना बारेमते मूसाल बग्‍गेन बतल रासा हिल्‍लोर, इंचि अंटोर्क तेळियसे मंता.
HEB 7:15 गानि मेल्किसेदेकुनसंटोर इंकावरोर पेर्मल वांतोर इत्‍तस्के, इद पोल्‍ले इंकिच्‍चो किलियर आंता.
HEB 7:16 उंदि कानदानतोर पेर्मालोर आयाना, इंचि मूसाना नियमते रासतद मंता. गानि येसु आ हिसाबते पेर्मल आया हिल्‍लोर. ओनगा बस्‍केळ्‍क पिस्सि मनना बलम मंता, अदे बलमते ओर पेर्मल आतोर.
HEB 7:17 बारित्‍ते, “मेल्किसेदेकुना रीतिते निमे बस्‍केळ्‍ताहाटीं पेर्मल आसि मंदकिन,” इंचि ओना बारेमते दर्मसास्‍त्रमते रासतद मंता.
HEB 7:18 इल्‍हा, मूसाना नियमते रासि मत्‍ता आदेसाल्‍क लोकुल्‍कुन नीतिमंतुल्क किया पर्राहिल्‍ले. अद नियम कमजोर आसि बताके ओज्‍जाकोंटा आता इंचि, पेन दान पक्‍काक इरता. दाना जेगाते, पेन दानकन्‍ना मंचि आसेतुन इरता. इद आसेतुन पीसि मनम पेनदा दग्गेर्क होना पर्रांतोम.
HEB 7:20 इंकुंदि पोल्‍ले बतल इत्‍ते, हारूनना कानदानतोर ओट्‍टु तिनाकोंटेन पेर्मालोर आतुर. गानि येसु पेर्मल आयानेंके पेन ओन इल्‍हा इत्‍ता: “निमे बस्‍केळ्‍ताहाटीं पेर्मल आसि मंदकिन इंचि पेन ओट्‍टु तित्‍ता, अद दाना पोल्‍लेतुन बस्‍केने मार्सो,” इंचि रासतद मंता. इल्‍हा पेन ओट्‍टु तित्‍ताहाटीं येसु पेर्मल आतोर.
HEB 7:22 अदुनहाटीं इंदके पेनदा मुन्‍नेटा पडाना करारकन्‍ना, पूना करार बच्‍चोनो बेसतद इंचि येसु गेरांटि आसि निल्तोर.
HEB 7:23 इंकुंदि पोल्‍ले बतल इत्‍ते, वेल्‍लेटोर लोकुल्‍क पेर्मालोर आसि मत्‍तुर, गानि हामुर ओर्कु हमेसाताहाटीं पेर्मल आसि मनालय अड्‍डम आता.
HEB 7:24 गानि येसुंक बस्‍केने हामुर हिल्‍ले, इंचि ओना पेर्मलतनम बस्‍केळ्‍ताहाटीं मनंता.
HEB 7:25 अदुनहाटीं येसु, ओनाहेंदाल बोर अय्ते पेनदागा वांतुरो, ओराहाटीं विनंति कियालय ओर बस्‍केळ्‍क जीवातेन मनंतोर. इल्‍हा येसु माकुन पुरागा पिसागोटा पर्रांतोर.
HEB 7:26 येसु पवित्र मत्‍तोर, ओनगा बतले कसूर मनाहिल्‍ले, ओन्क बस्‍केने पापम अंटा हिल्‍ले, पापिल्कुनाल लक्‍कु मत्‍तोर. अदुनहाटीं ओन स्वर्गमकन्‍ना एत्‍तु तेहामळ जर्गता. इसोंटा पेद्‍दा पेर्मले मनाहाटीं बेस कुदरंतोर.
HEB 7:27 वेरे पेद्‍दा पेर्मालोर मुन्‍नेन सतता पापाल्क मापि आयगोम इंचि मोक्‍कु हीकुंतुर आनि पज्जोटाल वेरे लोकुल्‍कुना पापाल्क मापि आयालय मोक्‍कुल्क हींतुर. इल्‍हा ओर दिन्‍नम कियुंदुर. गानि किरिस्‍तु लोकुल्‍कुना पापाल्क मापि आयानाहाटीं उंदे मल्का ओना मेंदुल्तुन मोक्‍कु हीतोर. अदुनहाटीं ओन्क वेरे पेर्मालोरलेसीं कियाना अव्‍सरम हिल्‍ले.
HEB 7:28 मूसाना नियम कमजोर मनकालोर्कुन पेद्‍दा पेर्मालोर इंचि निलाहंता. गानि मूसाना नियमकन्‍ना पज्जोटाल, ओट्‍टुनतोनि वाता आ पोल्‍ले, पेनदा मर्रिन पेद्‍दा पेर्मल इंचि निल्‍हाता. आ मर्रि अन्‍नि तीरकुने पुरागा मंतोर. ओर बस्‍केळ्‍ताहाटीं पेद्‍दा पेर्मल आसि मंतोर.
HEB 8:1 इदवेरदाका वेहासेक वाता पोल्‍लेता मेन पोल्‍ले बतल इत्‍ते, स्वर्गमते अन्‍निटकन्‍ना पेद्‍दा पेनदा तिना बाजुंक राज्येम कियालय बोर अय्ते उद्‍दिसि मंतोरो, ओरे मावाहाटीं पेद्‍दा पेर्मल आतोर.
HEB 8:2 कुद्‍दु पेने निल्‍हाता अन्‍निटकन्‍ना पवित्र जेगा आनि निजम डेराते येसु सेवक आसि पेनदा सेवा कीसेके मंतोर.
HEB 8:3 हरेक पेद्‍दा पेर्माना कबळ अय्ते पेनदुक मोक्‍कु हियमळ, दानम वाटमळ आंद. अल्‍हेने मावा पेद्‍दा पेर्मल येसुनगागुडा मोक्‍कु हियालय बतलन्‍ना मनमळ अव्‍सरम मंता.
HEB 8:4 मूसाना नियम परकारम दानम वाटानोर बूमिपोर्रो वेल्‍लेन पेर्मालोर मंतुर. अदुनहाटीं येसु बूमिपोर्रो मंचि मत्‍ते, पेर्मलगुडा आयाकोन्‍नेर.
HEB 8:5 पेनदा डेरा निल्हाका मुन्‍ने, “निमे गुट्‍टापोर्रो नावातोनि मत्‍तस्के नना नीकु बद नक्‍से हुपिस्तनो, बरोबर अल्‍हेने नाहाटीं डेरा निल्‍हा,” इंचि पेन मूसांक वेहचि मत्‍ता. दीना अर्तम बतल इत्‍ते, पोर्रो स्वर्गमते मंदना पेनदा डेराता नीडालेसींगे, इद बूमिते पेर्मालोर सेवा कियाना जेगा मनंता.
HEB 8:6 गानि इंदके पेनदा पूना करारते माकुन कल्‍पानोर येसे आंदुर. इद करार, मुन्‍नेटा पडाना करारकन्‍ना बच्‍चोनो बेस मंता. अद बल्हा इत्‍ते, पूना करारते पेन वेहता पोल्‍लें, मुन्‍नेटा पडाना करारते मत्‍ता पोल्‍लेंकन्‍ना बच्‍चोनो बेस मंतां, इल्‍हा इद बूमिते मनना पेर्मालोर्कन्‍ना येसुंक वेल्‍ले बेस सेवा दोर्कता.
HEB 8:7 ओक्‍कला पडाना करारते बतले दोसेम हिलाकोंटा मंचि मत्‍ते, पूना करारता अव्‍सरमे अर्राकोनवड.
HEB 8:8 गानि पेन दाना लोकुल्‍कुनगा दोसेल्क दिसतस्के ओर्कुन इल्‍हा इत्‍ता: “हुळाट, नना इस्राएल राज्येमतोनि आनि यहुदिया राज्येमतोनि, पूना करार कियाना रोजकु वासेकेन मंतां.
HEB 8:9 नना ओरा तादो-बाबुर्कुन कय पीसि इजिप्‍त देसेमताल पलाते तच्‍चि मत्‍तन. अस्‍के ओरतोनि कीता करारलेह्का इद पूना करार मन्‍नो. नना ओरतोनि कीता करार परकारम ओर ताका हिल्‍लुर, अदुनहाटीं नना ओर्कुन लेक्‍का किय्योन.
HEB 8:10 गानि अव रोजकु दाटसोत्‍ता पजा, नना इस्राएल लोकुल्‍कुनतोनि कियाना पूना करार इल्‍हा मनंता. नना नावा नियमकुन ओरा मनसुल्कुने रासि, अवुन ओरा बुद्‍दिते इर्रानालायक कींतन. नना ओरा पेनदुन आकन, ओर नावा लोकुल्‍क आयानुर.
HEB 8:11 अद वेलाते सिन्‍नाल्क-पेद्‍दाल्क अंटोरे नाकुन एरपाट कीसि मनांतुर, अदुनहाटीं, पेनदुन एरपाट कीम्‍टु, इंचि लोता पक्‍कातोर्क आयि जीवातोर्क आयि, ओर-ओरा नाटेनोर्क वेहना अव्‍सरम हिल्‍ले.
HEB 8:12 बारित्‍ते, ओर कियाना तप्‍पुड कबाह्‍कुन नना दयाते मापि कीकन, ओरा पापाल्कुन मर्रा बस्‍केने मति किय्योन,” इंचि रासतद मंता.
HEB 8:13 इदुन पेन “पूना करार” इत्‍ताहाटीं मोदाटा करार कबळ्‍क ओज्‍जाकोंटा आसि पडानद आसोत्‍ता. अद इंदके बिराने दिसाकोंटा आयार.
HEB 9:1 इस्राएल लोकुल्‍कुतोनि कीता मोदाटा करारते, पेनदुन मोळ्‍काना बारेमते नियमकु रासतव मत्‍तां. आ नियम परकारम मोळकानाहाटीं इद बूमिते उंदि डेरा मत्‍ता.
HEB 9:2 अद डेरा इल्‍हा मत्‍ता. आ डेराता मुन्‍नेटा अर्राते पोतसेके मनना पंतें इर्रालय उंदि दीसोडि आनि उपारमता हारिं इर्रालय उंदि टेबल मनुंदु. अद अर्रातुन पवित्र जेगा इंतुर.
HEB 9:3 दीना पज्जो इंकुंदि परदा मत्‍ता, अद परदाता पज्‍जोटा अर्रातुन अन्‍निटकन्‍ना पवित्र जेगा इंतुर.
HEB 9:4 अद अर्राते गुगलेम वाटनाहाटीं बंगारमतोनि तयार कीतद उंदि दूपम कुळका आनि करारकुना संदगु मत्‍ता.. आ करारकुना संदगु पुरागा पिव्‍वर बंगारमता पालिस हीसि मत्‍ता. आ संदगुने उंदि बंगारमता बुड्‍डि मत्‍ता, अव्टे ‘मन्‍ना’ इरसि मत्‍ता इंका आ संदगुने हारूनना दुड्‍डु मत्‍ता, अदुंक इग्गुर वासि मत्‍ता. इंका अव्टे पेनदा करार्क रासि मत्‍ता बंडाता बल्‍लांगुडा मत्‍तां.
HEB 9:5 आ संदगुना मूताता पोर्रोटा बाजुन “पापाल्क मापि कियाना जेगा” इंतुर. महिमाता वेल्‍गुने निंडिसि मत्‍ता रोंडु करूब इनानवुना बोम्मां आ जेगापोर्रो नीडा कीसि कावेल कीसेके मनुंदुं. इव अन्‍निटवुना बारेमते तेल्‍पिच्‍चि वेहालय इंदके वेला हिल्‍ले.
HEB 9:6 इल्‍हा इवन्‍नि तयार कीता पजा, डेरालोप्पो मोळ्‍काना जेगातगा पेर्मालोर होंचि रोज सेवा कीसेके मनुंदुर.
HEB 9:7 गानि इंकुंदि परदाता पज्‍जोटा अर्राते, सिराप पेद्‍दा पेर्मल ओना सतता पापाल्कुनाहाटीं आनि लोकुल्‍क तेळियका कीता पापाल्कुनाहाटीं मोक्‍कु हियालय नेत्‍तुर पीसि, वर्साक उंदि मल्के दांतोर.
HEB 9:8 इवुनंता हूळसि बतल अर्तम आंता इत्‍ते, बदवेरदाका अय्ते इसोंटा मोदाटा डेरा मनंतनो, अदवेरदाका अन्‍निटकन्‍ना पवित्र जेगाते होनालय हर्रि कुल्‍ला हिल्‍ले, इंचि पवित्र आत्मा वेहांता.
HEB 9:9 ई डेरा इत्‍ते, इंदकेटा कालमते जर्गनदुना बारेमता उंदि चिन्‍ह आंद. अगा हियना मोक्‍कुल्क, दानम वाटमळ इवंता मनकाना मनसुन पुरागा समादानम किय्यों.
HEB 9:10 अद बल्हा इत्‍ते, तिनुळ-उनुळ कियाना मोक्‍कुल्क, पवित्र आयाना कबाह्‍क इव नियमकु सिराप पलाताल पवित्र आयानाहाटींगें कबळ्‍क ओज्जंतां. गानि पेनदा पूना करार वातस्के इव बवे बतले कबळ्‍क ओज्‍जों.
HEB 9:11 गानि किरिस्‍तु पेद्‍दा पेर्मल आसि, माहाटीं बेसता पोल्‍लें पीसि वातोर. ओर इंदके स्वर्गमते मनना अन्‍निटवुंकन्‍ना पेद्‍दोड आनि अन्‍नि तीरकुने पुरागा मनना डेरातगा सेवा कियालय होळियतोर. अद मनकानाहेंदाल कीतद आयो, इत्‍ते अद दुनियातद आयो.
HEB 9:12 ओर अगा एटिना नेत्‍तुरो, पेय्याना नेत्‍तुरो पीसि होळिया हिल्‍लोर. गानि ओना सतता नेत्‍तुरतुन पोंगागोटसि, उंदे मल्का आ अन्‍निटकन्‍ना पवित्र जेगातगा होळियतोर. अदुनहेंदाल मनम अन्‍नि पापाल्कुनाल बस्‍केळ्‍ताहाटीं मुक्‍तितुन दोर्किच्‍कुत्‍तोम.
HEB 9:13 मूसाना नियम परकारम, एटिं, कोंदाना नेत्‍तुर, कमरिस्ता पेय्याता बूळ्‍दि, मुट्‍टुने मत्‍तोरपोर्रो सल्‍लानय्ते अव सिराप ओरा मेंदुल्तुन पलाताले पवित्र कींतां.
HEB 9:14 गानि किरिस्‍तुना नेत्‍तुर, हामुरताहेके ओयाना कबाह्‍क कियाना मना मनसुन अवुंकन्‍ना बच्‍चोर सुद्‍द किय्‍यार! अद बल्हा इत्‍ते, बस्‍केळ्‍क मनना पेनदा पवित्र आत्माता बलमतोनि, बतले दोसेम हिलुवा येसु, पेनदा मुन्‍ने सतागा मोक्‍कु आतोर. बस्‍केळ्‍क जीवाते मंदना पेनदुन मनम मोळ्‍काना इंचि येसु अल्हा कीतोर.
HEB 9:15 पडाना करारते मत्‍ता नियमकुन पीसि ताकुवाहेंका अस्‍केटा लोकुल्‍क पापम कीसि अद करारतुन नेम्‍हातुर. ओर्कुन ओरा पापाल्कुना सिक्‍साताल तप्‍सानाहाटीं किरिस्‍तु हासोत्‍तोर. इल्‍हा पेन अद केयता लोकुल्‍कुन पूना करारते कल्‍पंता. अद केय्‍सि मत्‍तोर्कुंक, दाना बस्‍केळ्‍क मनना वारसान हक्‍कुन हींतन इंचि केय्‍सि पोल्‍ले हीतानो, ओर्क अद दोर्कता. इल्‍हा किरिस्‍तु ई पूना करारते नड्‍डुमतोर आतोर.
HEB 9:16 वरोर मनकल ओना बूमिं-जेगां बोन्क आयाना इंचि रासंतोर, ओर हातास्केन ओर रासि इरता कायदोम सेल्‍लांता. ओर पिस्सि मत्‍ताचुं रोजकु अद कायदोम सेल्‍लो. पेनदा करारगुडा इल्हे मंता.
HEB 9:18 इंचे मरि, मोदाटा करारगुडा नेत्‍तुर पोंगागोट्‍टुवा निल्‍ला पर्राहिल्‍ले.
HEB 9:19 अदुनहाटीं मूसालगुडा दर्मसास्‍त्रमते रासि मत्‍ता अन्‍नि आदेसकुन अंटोर लोकुल्‍कुंक वेहतोर अस्‍के, कुर्रां-एटिना नेत्‍तुरतुन येते कल्‍पिसि, जूपा इनना पोर्काता कोम्माक गोर्रेता एर्रा बूरा हुट्‍सि, दर्मसास्‍त्रमता पुस्तकाल्कुनपोर्रो आनि अंटोर लोकुल्‍कुनपोर्रो सल्तोर.
HEB 9:20 पजा, “पेन मीकुन बद आदेसकुना परकारम ताकट, इंचि वेहतानो, ई नेत्‍तुर अदे करारतद आंद,” इंचि वेहतोर.
HEB 9:21 अल्‍हेने, मोळ्‍काना डेरापोर्रो आनि मोळ्‍कानेंके वाळ्कुनना अन्‍नि वस्‍तुकुन पोर्रोगुडा मूसाल आ नेत्‍तुरतुन सल्तोर.
HEB 9:22 मूसाना नियम परकारम हूळते, दग्‍गेर-दग्‍गेरा अन्‍निगुडा नेत्‍तुर सल्‍लिसे सुद्‍द कियमळ गावाले. नेत्‍तुर पोंगागोट्‍टाकोंटा पापाल्कुंक मापि हिल्‍ले.
HEB 9:23 अदुनहाटीं स्वर्गमते मनना वस्तुकुनालेसीं दिस्सानव मनकालोर तयार कीता ई नकलि वस्‍तुकुन, जिवरासिना मोक्‍कु हीसि पवित्र कियाना अव्‍सरम अरता. गानि स्वर्गमते मनना वस्‍तुकुन पवित्र कियागोम इत्‍ते, ई जिवरासिना नेत्‍तुरकन्‍ना इंका बच्‍चोनो बेसता मोक्‍कुल्क हियापींता.
HEB 9:24 बूमिपोर्रो मनकालोर कीता अन्‍निटकन्‍ना पवित्र जेगा इत्‍ते, स्वर्गमते मनना निजम पवित्र जेगातसोंटा उंदि पोटवे आंद. बारित्‍ते, मनकालोर कीता पवित्र जेगाते किरिस्‍तु होळिया हिल्‍लोर, गानि इंदके ओर मना अंटोराहाटीं सीदा स्वर्गमते होळियसि पेनदा मुन्‍ने विनंति कियालय निल्‍सि मंतोर.
HEB 9:25 अचोने आयका, एटा-एटा पेद्‍दा पेर्मल मोक्‍कु हियालय सतता नेत्‍तुर आयो गानि जिवरासिना नेत्‍तुर पीसि बूमिपोर्रोटा अन्‍निटकन्‍ना पवित्र जेगाते होळियंतोर. अल्हा ऊके-ऊके सतता मोक्‍कु हियालय किरिस्‍तु स्वर्गमते होना हिल्‍लोर.
HEB 9:26 ओक्‍कला अल्हा ऊके-ऊके मोक्‍कु हियमळगिंटा आसि मत्‍ते, दुनिया पुट्तस्केटाल इदवेरदाका बच्‍चुंगो मल्कां किरिस्‍तुंक ओना जीवा हिय्या पियवड. गानि इद युगमता आकिरते, किरिस्‍तु सतता मोक्‍कु हीसि, पापमतुन नासडेम कियानाहाटीं उंदे मल्का वातोर.
HEB 9:27 बल्हा लोकुल्‍क अंटोर उंदि मल्का हासि दांतुर, पजा पेन ओरा न्‍यायम कींता, इंचि मुन्‍नेन निरनायम कीसि मंता,
HEB 9:28 अल्हेन किरिस्‍तु, वेल्‍लेटोरा पापाल्कुन नासडेम कियानाहाटीं उंदे मल्का ओना सतता जीवातुन मोक्‍कु हीतोर. ओर मरुंदि मल्का मल्सि वायना मंतोर. अय्ते ई मल्का ओर पापमतुन नासडेम कियालय आयो, गानि ओनाहाटीं बच्‍चोनो ओप्‍केते बस्के वांतोर इंचेके एदुर हूळसेक मनानोर्कुन पिसागोटनाहाटीं वायानुर.
HEB 10:1 मूसाना नियम अय्ते, मुन्‍ने बव बेस पोल्‍लें जर्गानव मंतांगो, अवुना सिराप नीडे आंद, निजम रूपम आयो. अदुनहाटीं एटा-एटा पेर्मालोर, आगाकोंटा हिय्यना उंदे तीरकुना मोक्‍कुल्क, पेनदा दग्गेर्क होनानोर्कुन पापमताल पुरागा पवित्र किया पर्रों.
HEB 10:2 ओक्‍कला अल्हा आसि मत्‍ते, बक्‍तुल्कुना मनसुल्कुने, “मोमोट पापिर्क” इत्‍ता विचारम वायाकोनवळ आनि ओर सुद्‍द आसि मत्‍ताहाटीं मोक्‍कुल्क हियमळ आपिसि मन्‍नेर.
HEB 10:3 गानि एटिना नेत्‍तुर आयि, कोंदाना नेत्‍तुर आयि, पापाल्कुन बस्‍केने लक्‍कु किया पर्रो. बारित्‍ते एटा-एटा ओर हिय्यना मोक्‍कुल्क, ओर्क ओरा पापाल्कुन मति कीसि हीसेकेन मंतां.
HEB 10:5 अदुनहाटींगे, किरिस्‍तु इद दुनियाते वातस्के पेनतोनि इल्‍हा इत्‍तोर: “निमे मोक्‍कुल्क आयि, दानाल्‍क आयिं कोराहिल्‍लिन, गानि नाहाटीं उंदि मेंदुल तयार कीतिन.
HEB 10:6 कमुरबोलिं आयिं, पापम मापि आयानाहाटीं हीता मोक्‍कुल्क आयिं, नीकुन कूस किय्यों.”
HEB 10:7 अस्‍के किरिस्‍तु, “पेनदुना! दर्मसास्‍त्रमते नावा बारेमते रासि मत्‍ता परकारम, नीवा इच्‍चातुन पुरागा कियालय नना वातन.” इंचि इत्‍तोर.
HEB 10:8 पोर्रो वेहताप, “मोक्‍कुल्क, दानाल्‍क, कमुरबोलिं आनि पापम मापि आयानाहाटीं हिय्यना मोक्‍कुल्क इवन्‍निगुडा निमे कोराहिल्‍लिन इव नीकुन कूस किय्यों,” इंचि पेनतोनि वेहतोर.
HEB 10:9 अल्हा वेहचि, “पेनदुना हूळा! नीवा इच्‍चातुन पुरागा कियालय नना वातन,” इंचि इत्‍तोर. पेनदा इच्‍चातुन पुरागा कियानाहाटीं येसु किरिस्‍तु ओना सतता मेंदुल्तुन उंदे मल्का मोक्‍कु हीतोर. हीसि रोंडो करारतुन सुरुव कियानाहाटीं, मोदाटा करारतुन बंद कीतोर. इल्‍हा पेन मनाकुन पवित्र कीता.
HEB 10:11 मोदाटा करार परकारम, हरेक पेर्मल सेवाताहाटीं ओन्क रोजु गद्‍दे मुन्‍ने निल्‍ले पींता आनि हीता मोक्‍कुल्के ऊके-ऊके हियापींता. गानि अव मोक्‍कुल्क मात्रम बस्‍केने पापाल्कुन लक्‍कु किया पर्रों
HEB 10:12 गानि किरिस्‍तु अय्ते मना पापाल्कुन लक्‍कु कियालय, हमेसाताहाटीं उंदे मल्का ओना मेंदुल्तुन मोक्‍कु हीतोर. हीसि पेनदा तिना बाजुंक होंचि उद्‍दिसि मंतोर.
HEB 10:13 इल्‍हा अस्‍केटाल, किरिस्‍तु ओना पगातोर्कुन पेन ओना काल्क इर्राना कुत्‍तुललेसीं बस्के कींता इंचेके एदुर हूळसेक मंतोर.
HEB 10:14 बारित्‍ते, पवित्र आयानाहाटीं पेन वेरे कीता मनासंटोर्कुन, ओर सिराप उंदे मल्का मोक्‍कु आसि, हमेसाताहाटीं अन्‍नि तीरकुने पुरागा कीतोर.
HEB 10:15 इदुना बारेमते इल्‍हा रासतद मंता: “अव रोजकु दाटसि होत्‍ता पजा, नना इस्राएल लोकुल्‍कुनतोनि कियाना पूना करार इल्‍हा मनंता. अद बतल इत्‍ते, नना नावा नियमकुन ओरा गुंडेने रासि, अवुन ओरा मनसुल्कुने वाटंतन,” इंचि पेन वेहता. इल्‍हा पवित्र आत्मागुडा मनाकु दर्मसास्‍त्रमते गवाइ वेहता.
HEB 10:17 अचोने आयाका, “ओरा पापाल्कुन आनि ओर कीता तप्पु कबाह्‍कुन मर्रा बस्‍केने मति किय्योन,” इल्‍हागुडा पवित्र आत्मा वेहता.
HEB 10:18 पेन मावा अन्‍नि पापाल्कुन मापि कीता अय्ते, इंका मर्रा अवुनाहाटीं मोक्‍कुल्क हिय्यना अव्‍सरमे हिल्‍ले.
HEB 10:19 अय्ते विस्वासुल्‍कुनिटा, येसु मनाहाटीं ओना नेत्‍तुरतुन पोंगागोटतोर. अदुनहाटीं मनाकु इंदके आ पूनद, जीवाते मनना हर्रि पीसि पवित्र जेगाते होनना दैरनेम वाता.
HEB 10:20 येसु ओना मेंदुलताहेंदाल परदातुन पक्‍काक कीताहाटीं, मनम पेनदागा विस्वासमते होना पर्रंतोम.
HEB 10:21 अचोने आयका, येसे मना पेद्‍दा पेर्मल आंदुर, ओर पेनदा लोकुल्‍कुनपोर्रो अदिकारि आंदुर.
HEB 10:22 अदुनहाटीं मनम सत्‍तेम मनसुने, पुरागा विस्वासमते, इंका मना विवेकमतुन दोसेम हिलाकोंटा कियानाहाटीं मना मनसुनपोर्रो किरिस्‍तुना नेत्‍तुर सल्सि, इंका मेंदुल्तुन बेस साप एते नोर्सि पेनदा दग्गेर्क दाकोम.
HEB 10:23 मनाकु बद पेन अय्ते पोल्‍ले हीतानो अद विस्वासमगल्‍लद आंद. अदुनहाटीं मनम वेरेतोरा मुन्‍ने ओप्‍कुत्‍ता आसेताल पजोळ्क आयाकोंटा, गट्‍टि दैरनेमते मंदकोम.
HEB 10:24 मनम वरोंक वरोर पावरम कियालय, बेसता कबाह्‍क कियालय आनि बतल-बल्हा कीते बेस इंचि वरोंक-वरोर दैरनेम हियालय विचारम कीकोम.
HEB 10:25 आरादनाहाटीं उंदगा जमा आयाना जेगाते वायाकोंटा मनमळ इच्‍चुर्कु अलवट आसि मंता. गानि मनम ओरलेह्का मनामन्‍नि. मुक्‍केमाता पोल्‍ले बतल इत्‍ते, येसु सामि मरुंदि मल्का वायाना रोजु दग्गेर्क वासंता, अदुनहाटीं मनम अंटोरम उंदासि, वरोंक-वरोर दैरनेम हीसेक मुन्‍ने अरकोम इंचि इंकिच्‍चो जिद्‍दिते वेहासेक मंदना.
HEB 10:26 इव पोल्‍लें नना बारि रासेक इत्‍ते, सत्‍तेम इत्‍ते बतल मनाकु तेळियता. इल्‍हा सत्‍तेम तेळियसिगुडा तेळियवाप पापम कीसेके होत्‍ते, इव पापाल्कुनाहाटीं मात्रम इंका बद्‍दे मोक्‍कु हिल्‍ले.
HEB 10:27 गानि दाना बदुलते, बोर अय्ते पेनदा विरोदमते ताकतुरो ओराहाटीं पेन सिक्‍साता आदेस हीसि, ओर्कुन बरा-बरा पोत्‍तना तळमिते वाट्‍सि बूळ्‍दि किय्‍यार इत्‍ता, वेरियानसोंटा पोल्‍लें मात्रम मिगिल्सि मंतां.
HEB 10:28 मूसाना नियमतुन विरोद कियाना मनकाना बारेमते, इव्वुर हिलाकोंटे मुव्वुर गवाइदार्कुना पोल्‍लें केंजसि ओनापोर्रो दया कियाकोंटेन ओन्क हामुर सिक्‍सा हींतुर.
HEB 10:29 अय्ते, इंदके पेनदा मर्रिन पास्काना मनकंक, बद नेत्‍तुरहेंदाल अय्ते पवित्र कियमळ जर्गता आ पूना करारता नेत्‍तुरतुन, पवित्र आयो इंचि इनना मनकंक, कुर्पा हुप्‍साना पेनदा आत्मातुन पास्कानोंक, बच्‍चोन पेद्‍दा सिक्‍सा दोर्कारो, मिमेटे विचारम कीसि हुळट.
HEB 10:30 बारित्‍ते पेन इत्‍ता गदा, “बद्‍ला येताना कबळ नावद आंद, ननाने बद्‍ला येतंतन,” आनि मर्रा, “सामि ओना लोकुल्‍कुना न्‍यायम कींतोर,” इंचि इत्‍ता. इद पोल्‍ले मनाकु एरपाटे मंता.
HEB 10:31 जीवाते मंदना पेनदा कय्‍दे दोर्कना सिक्‍सा इत्‍ते, इरगेन वेरियानाल मनंता.
HEB 10:32 मिमेट बेसता कबुर केंजसि पेनदा वेलगुन दोर्किच्‍कुत्‍ता आ एनकटा रोजकुन मति कीम्‍टु, अव रोजकुने बच्‍चुंगो तकलिपकु वातां, अयना मिमेट ओर्सकुत्‍तिट.
HEB 10:33 बस्के-बस्के अय्ते अंटोरा मुन्‍ने मीकुन रोता-रोता पोल्‍लें इंचि बदनाम कियमळ जर्गता. इंका बस्के-बस्‍केनो अय्ते, इसोंटा तिप्‍पल्‍क बोगांचनोरा तोळने मिमेट निल्तिर.
HEB 10:34 अचोने आयका बेसता कबुर वेहताहाटीं जेलने अर्सि दुक्‍कमते मत्‍तोरा दुक्‍कमते मिमेट कलियतिर. मीवा संपत्‍तितुन दोसकुंचि ओयिना गानि मिमेट कुसिते मत्‍तिट. बारित्‍ते दोसकुंचि ओतादानकन्‍ना बेसतद, बस्‍केळ्‍क मनानद संपत्‍ति पेन मीहाटीं इरता इंचि मिमेट तेल्‍पिचकुत्‍तिर.
HEB 10:35 पेनदापोर्रोटा मीवा विस्वासमतुन पीसि, मीकु वेल्‍लेन पेद्‍दा इनाम मंता. अदुनहाटीं बतल आयिनागानि मिमेट विस्वासमताल पजोळ्क होनमट.
HEB 10:36 मिमेट दैरनेमते सहन कियमळ अव्‍सरमे मंता, अल्हा मत्‍तेन मिमेट पेनदा इच्‍चातुन पुरागा किया परकिट आनि पेन मीकु बतल अय्ते हींतन इंचि पोल्‍ले हीतानो अद मीकु दोर्कार.
HEB 10:37 बारित्‍ते, “बोर सामि वायानोर मंतोर, ओर बिरानेन वांतोर, ओर आल्सेम किय्योर. ओर वायनादाका, नावापोर्रो विस्वासम कीता नीतिमंतुल्क विस्वासमतेन पिस्संतुर. गानि ओराव्टेटाल बोरन्‍ना ना पोर्रोटा विस्वासमताल पजोळ्क आते, ओन नना मेच्‍चुकुन्‍नोन,” इंचि दर्मसास्‍त्रमते पेनदा पोल्‍ले रासतद मंता.
HEB 10:39 गानि मनम अय्ते, विस्वासमताल पजोळ्क आसि, नासडेम आयानोर लेसींटोरम आयोम. विस्वासम कीताहाटीं मनम पेनदाहेंदाल पिसांतोम.
HEB 11:1 विस्वासम इत्‍ते बतल? मनम आसे पळसि मत्‍तव पोल्‍लें मनाकु तप्‍पाकोंटा दोर्कानूं आनि मना कळ्‍कुंक दिस्साकोन्‍नागानि अव मंतां इत्‍ता गेरांटिए, विस्वासम आंद.
HEB 11:2 मना एनकटा पेद्‍दाल्कुनगा इसोंटा विस्वासम मत्‍ता, अदुनहाटींगे पेन ओर्कुन मेच्‍कुत्‍ता.
HEB 11:3 विस्वासमहेंदाले, पेन इद दुनियातुन दाना पोल्‍लेतोने पुटिस्ता इत्‍ता पोल्‍ले, मनम तेल्‍पिचकुना पर्रंतोम. दीना अर्तम बतल इत्‍ते, मनाकु इंदके दिस्सानव अन्‍नि पोल्‍लें, दिसुवा पोल्‍लेनाहेंदाल पेन कीता, इंचि मनाकु तेळियता.
HEB 11:4 विस्वासमहेंदाले आदामना मर्रि आबेल, ओना दादाल काइनुंकन्‍ना बच्‍चोनो बेसता मोक्‍कु पेनदुक हीतोर. काइन बतल अय्ते हीतोर अदुन पेन मेच्‍कुना हिल्‍ले गानि, आबेलना मोक्‍कुन पेन मेच्‍कुंचि ओन नीतिमंतुड इंचि गवाइ हीता. आबेल अय्ते हातोर, गानि ओना विस्वासमहेंदाल मनम इदवेरदाकागुडा करियसेक मंतोम.
HEB 11:5 विस्वासमहेंदाले हानोकुंक हामुर वायाका मुन्‍नेन, उंदि रोज ओर गायप आतोर. बारित्‍ते पेन ओन तेहाकुंचि ओता. अदुनहाटीं ओना जाळा बोनके दोर्काहिल्‍ले. पेन ओन स्वर्गमते ओयाका मुन्‍ने ओर पेनदुन कूस कीतोर इंचि ओना बारेमते दर्मसास्‍त्रमते रासतद मंता.
HEB 11:6 विस्वासम हिल्‍वद पेनदुन बोरे कूस किया पर्रुर. पेनदागा वायाना हरेक मनकल, पेन निजमते मंता आनि दान हट्‍टु पीसि पहकानोंक अद बेसता इनाम हींता इंचि विस्वासम किया पींता.
HEB 11:7 विस्वासमहेंदाले नोहाल, कम्मुड वायाना मंता इंचि पेन ओन्क वेर्रे वेहतस्के ओर कम्मुडतुन बस्‍केने हूळा हिल्‍लोर गानि, पेनदा पोल्‍लेक कदर हीसि, कम्मुड वायाका मुन्‍नेन ओना कुटुंबतोर्कुन कापाळनाहाटीं पेद्‍दा डोंगा तयार कीतोर. इल्‍हा ओर दुनियातोर अंटोर तप्‍तुर इंचि ओना विस्वासमहेंदाल पेन दुनियातोर्कुन दोसिल्‍क इंचि वेहता. ओना इदे विस्वासमहेंदाल ओर, पेनदा मुन्‍ने नीतिमंतुल्क आतोरा लोप्पो कलियतोर.
HEB 11:8 विस्वासमहेंदाले पेन अब्राहामुन, “नना नीकु हुप्‍साना देसेमते होन, अगाटा पूरा जेगा नीकु हीकन” इंचि इत्‍तस्के, बेके होनना इंचि तेळियाकोन्‍ना गानि तेळियवा जेगाहेके होनालय पेय्सतोर.
HEB 11:9 विस्वासमहेंदाले अब्राहाम, पेन ओन्क हींतन इंचि पोल्‍ले हीता देसेमते होंचि, पराइ देसेमतोनलेसीं डेरा वाट्‍सि पिस्सेक मत्‍तोर. ओनतोनि ओना मर्रि इसाक आनि इसाकुना मर्रि याकोब, ईरगुडा अद देसेमता वारसदार्के. ओरगुडा अगा डेरां वाट्‍सि पराइ देसेमतोरलेसीं पिस्सेक मत्‍तुर.
HEB 11:10 बारित्‍ते, कुद्‍दु पेने सारे पीसि, पुनादि दोह्‍चि, बस्‍केळ्‍ताहाटीं निल्‍हाता सहरते मनालय ओर विस्वासमते एदुर हूळसेक मत्‍तुर.
HEB 11:11 विस्वासमहेंदाले अब्राहामुंक ओना मुत्‍तो सारानतोनि कलियसि, मातिरतनमतेगुडा मर्रिन कनाना बलम दोर्कता. बारित्‍ते, ओन्क संतानम हींतन इंचि बद पेन अय्ते पोल्‍ले हीतानो, अद पोल्‍ले तप्‍पो इंचि ओर दानपोर्रो विस्वासम इरतोर.
HEB 11:12 अदुनहाटीं डुग-डुग मातरल आसि हासोत्‍तोनलेह्का मत्‍ता वरोरे अब्राहामुंक पेन, मब्बुने मनना सुक्‍कनच्‍चोन आनि समुद्रम ओड्‍डुंक मनना उस्केतच्‍चोन, लेक्‍का परुवच्‍चो संतानमतुन हीता.
HEB 11:13 पेनदापोर्रो विस्वासम इरतोर अंटोरगुडा दानपोर्रो विस्वासम इरसे हासोत्‍तुर. पेन हींतन इंचि पोल्‍ले हीतद ओर्कु दोर्काहिल्‍ले. गानि पेन हींतन इत्‍तादुन लक्‍कुटाले हूळताप हूळसि कूस आतुर. पजा मनम इद बूमिपोर्रो पय्‍नेम कीसेके वाता पराइतोरम इंचि ओप्‍कुत्‍तुर.
HEB 11:14 इसोंटा पोल्‍लें बोर अय्ते वळ्कंतुरो, ओर ओरा सतता देसेमतुन पहकसंतुर इंचि मनाकु अर्तम आंता.
HEB 11:15 ओक्‍कला, ओर होळसि वाता देसेमता बारेमते विचारम कीसि मत्‍ते, ओर्क ओरा होळसि वाता देसेम मल्सि होनना मोका दोर्किसि मनवळ. गानि ओर होळसि वाता देसेमता विचारमते मना हिल्‍लुर.
HEB 11:16 दाना बदुलते ओर, होळसि वाता देसेमकन्‍ना एक्‍को बेसता देसेम, इत्‍ते ओराहाटीं पेन स्वर्गमते तयार कीसि इरता देसेमते होनना विचारमते मत्‍तुर. अदुनहाटीं पेन, ‘नना ओरा पेनदुन’ इंचि इनालय सिग्गु अर्रो.
HEB 11:17 विस्वासमहेंदाले, पेन अब्राहामुना पट्‍टु हूळतस्‍के, ओर ओना वरोरे मर्रि इसाकुन मोक्‍कु हियालय तयार आतोर. पेन हींतन इंचि मत्‍ता पोल्‍लेतुन ओर विस्वासम कीसि मत्‍तोर.
HEB 11:18 अयना, “इसाकुनाहेंदाल नीकु दोर्काना वंसंम नावा लोकुल्‍क आयानुर,” इंचि पेन अब्राहामुंक मुन्‍नेन पोल्‍ले हीसि मत्‍ता. आयनागानि ई इसाकुने अब्राहाम, पेनदुक मोक्‍कु हियालय तयार आसि मत्‍तोर.
HEB 11:19 बारित्‍ते, पेन हासोत्‍तोर्कुंकगुडा जीवा अरहा पर्रंता, इंचि ओर विस्वासम कीतोर. हातोन जीवाते तेहाचि हीतापे, पेन अब्राहामुंक ओना मर्रिन हीतागुडा.
HEB 11:20 विस्वासमहेंदाले इसाक, ओना याकोब, एसाव इनना इव्वुर मर्कुंक, वायाना कालमते ओर्कु बल्हा जर्गार इंचि आसिर्वाद हीतोर.
HEB 11:21 विस्वासमहेंदाले याकोब, जीवा होळसका मुन्‍ने, योसेपुना इव्वुर मर्कुन वरो-वरोन केय्‍सि, आसिर्वाद हीतोर आनि दुड्‍डुना पोर्रो ऊनसि पेनदुन आरादना कीतोर.
HEB 11:22 विस्वासमहेंदाले योसेप, इस्राएल लोकुल्‍क इजिप्‍त देसेमताल पेय्सि होनानुर इंचि जीवा होळसका मुन्‍नेन वेहा परतोर. अचोने आयाका, अद देसेमताल पेय्सि होनंनेके ओना बोक्‍कनगुडा पीसि पेय्‍सना इंचि आदेस हीतोर.
HEB 11:23 विस्वासमहेंदाले, मूसाल पुट्तस्के ओना तल्‍लुर-बाबो ओन मूड नेल्क मक्‍किच्‍चि इरतुर. “मावा पेडल सक्‍कगा मंतोर” इंचि तल्‍लुर-बाबो तेल्‍पिचकुत्‍तुर. अदुनहाटीं “इब्रितोर्क पुटता अंटोर मांड्‍सा पिलाल्कुन हव्कट” इंचि राजाल हीता आदेसुंक ओर वेरियाकोंटा मत्‍तुर.
HEB 11:24 विस्वासमहेंदाले मूसाल पेद्‍दा बेर्सतस्‍के, पिरोन राजाना मिय्यटा मर्रिन इंचि वेहकुनालय ओप्कुना हिल्‍लोर.
HEB 11:25 दान्क बदुलते, पापमहेंदाल दोर्कना जेर्रासेपाटा सुकमते पिस्सनदानकन्‍ना, पेनदा लोकुल्‍कुनतोनि कलियसि तिप्‍पल्‍क बोगांच्मळे बेस इन्कुत्‍तोर.
HEB 11:26 पेनदाहेंदाल दोर्कना इनामुनाहाटीं ओर उंदितीर एदुर हूळसेक मत्‍तोर. अदुनहाटीं ओर इजिप्‍त देसेमता दनम-संपत्‍तिकन्‍ना, किरिस्‍तुनाहाटीं अपमानम सहन कियमळतुने पेद्‍दा दनम इन्कुत्‍तोर.
HEB 11:27 विस्वासमहेंदाले, इजिप्‍त देसेमता राजाल होंगुंक वायिनागानि, वेरियाकोंटा मूसाल इजिप्‍त देसेम होळसीतोर. बोर्के दिसुवा पेन ओन्क दिसताप, ओर गट्‍टि दैरनेमते मत्‍तोर.
HEB 11:28 इजिप्‍त लोकुल्‍कुना तोल्सूर मर्कुन हव्कालय पेन लोहता दूता, इस्राएलतोरा मर्कुन इट्‍टानायो इंचि, विस्वासम कीताहाटींगे मूसाल, गोर्रेता नेत्‍तुरतुन लोता दारसाकक होकालय वेहचि, दाटसि होनना पंडुगुन सुरुव कीतोर.
HEB 11:29 विस्वासमहेंदाले, इस्राएल लोकुल्‍क, वत्‍तुता बूमिपोर्रो ताकताप, एर्रा समुद्रमते ताकसेके होनना दैरनेम कीतुर. ओरालेह्केन इजिप्‍त लोकुल्‍क कियालय हूळतुर अय्ते, अव्टेन मुळ्‍गिसि हातुर.
HEB 11:30 विस्वासमहेंदाले, इस्राएल लोकुल्‍क यरिहो सहरता गूरे सुट्‍टु एडुं रोजकु तिरियतुर, अस्‍के आ गूरे कूलसि अरता.
HEB 11:31 विस्वासमहेंदाले, यरिहो सहरता रहाब इनना वेस्या, तेळियाकोंटा जाळा कियालय वाता इस्राएलतोर्कुन दाना लोते केय्‍सि सांतिते सहायम कीता, अदुनहाटीं पेनदा पोल्‍ले केंजवा लोकुल्‍कुनतोनि दाना नासडेम पेन किया हिल्‍ले.
HEB 11:32 इंका नना बोरा-बोरा बारेमते वेहासेक मंदकन? गिदोन, बाराक, समसोन, इपताल, दाविद राजाल, सामवेलनसोंटा पेनदा कबुरतोर. ईरा बारेमते वेहालय नाकु पुरसत हिल्‍ले.
HEB 11:33 विस्वासमहेंदाले इरव्टेटाल इच्‍चुर लोकुल्‍क राज्येल्‍क गेल्सतुर, इच्‍चुर लोकुल्‍क सत्‍तेम कबाह्‍क कीतुर, इच्‍चुर लोकुल्‍क, पेन हींतन इंचि पोल्‍ले हीतदुन दोर्किच्‍कुत्‍तुर, इच्‍चुर लोकुल्‍क सिंहाना कतराताल पलाते अरतुर.
HEB 11:34 इंकिच्‍चुर लोकुल्‍क पोत्‍तना तडमितुन पिरहातुर, इच्‍चुर लोकुल्‍क तलवारकुना अय्दरताल तपिच्‍कुना परतुर, इंकिच्‍चुर बारे बलम हिल्वस्केगुडा बलमगल्‍लोर्क आतुर, लडाइने वीरूल्क आतुर आनि पराइ देसेमता सिपाइल्कुन गेद्‍मिसीतुर.
HEB 11:35 विस्वासमहेंदाले कोन्‍नि मुरताह्कुंक, अवुना हासोत्‍ता जीवातोर्क, मर्रा जीवा अर्सि वापस दोर्कतुर. गानि इंकिच्‍चुर मात्रम पेनदापोर्रो विस्वासम इरताहाटीं देब्बां तिंचि-तिंचि हासोत्‍तुर. हासि मर्रा जीवाते तेदतस्‍के, पेन माकु बेसता पिस्वर हिय्यार इत्‍ता आसेते, इगेटा पिस्वरतुन दक्‍किच्‍कुनालय पेनदुन होळसा हिल्‍लुर.
HEB 11:36 इंकिच्‍चुर्कुन बारे कारेड्‍डाल्‍क कीसेके पोट्‍टेने तंतुर, इंका गोल्सुकुने दोह्‍चि जेलने वाटतुर.
HEB 11:37 सगोमतोर्कुन अय्ते बंडाने तंतुर, आरेने कोय्‍सि तुकडां कीतुर, ओरा पट्‍टु हूळतुर, तलवारकुने कोह्‍किसि हव्कतुर. गरिब-कंगाल आसि दुक्‍कमते, एटिं-गोर्रेना तोल्कु मुच्‍कुंचि बेके-बेकेनो तिरियसेके मत्‍तुर. लोकुल्‍क ओर्कुन बागेने तकलिप कीतुर.
HEB 11:38 दुनियाता लोकुल्‍क, पेनदापोर्रो विस्वासम इरतोरालायक मना हिल्‍लुर. अदुनहाटीं ओर उस्‍के बूमिने, गुट्‍टानपोर्रो, पडाने, बंडा सोर्रेने मंचेके तिरियुंदुर.
HEB 11:39 ईरा अंटोरा विस्वासमतुन हूळसि पेन अय्ते ओर्कुन मेच्‍कुत्‍ता. गानि पेन ओर्कु बद आसिर्वाद अय्ते हींतन इंचि पोल्‍ले हीसि मत्‍तानो, अद आसिर्वाद मात्रम ओर्कु दोर्काहिल्‍ले.
HEB 11:40 बारित्‍ते अन्‍निटकन्‍ना बेसतद उंदि पोल्‍ले पेन मनाहाटीं मुन्‍नेटाले तयार कीसि इरता. अद पोल्‍लेतुन मनाकु, ओर्कु उंदे मल्का दोर्काना इंचि पेन अल्हा कीता.
HEB 12:1 इचोन मंदिता गवाइं, मब्बुनलेसीं मना सुट्‍टु आताप मंतां. अदुनहाटीं मनाकुन आपाना हरेक बर्वुन आनि अल्कगा पट्‍टुने अरहना पापमतुन होळसिसि, पेन मनाकु हुपिस्‍ता हरदे ओप्‍केते वितकोम.
HEB 12:2 वितनेंके मना नदर येसुनपोर्रेन इरकोम. मनालोप्‍पो विस्वासमतुन पुट्‍टिचानोर आनि दान पुरागा कियानोर ओरे आंदुर. मुन्‍ने दोर्काना आनंदमहाटीं येसु क्रुसुनपोर्रो जीवा हियालयगुडा तयार आतोर. अगा ओन्क जर्गता अपमानमतुनगुडा लेक्‍का किया हिल्‍लोर. इंदके ओर पेनदा राजगद्‍देता तिना बाजुंक उद्‍दिसि मंतोर.
HEB 12:3 पापि लोकुल्‍क ओना पोर्रोटा पगाते ओन बच्‍चोनो तिप्‍पल्‍क-बादां कीतुर. गानि मिमेट दैरनेम होळसि विस्वासमताल पजोळ्क आयामन्‍नि इंचि ओर अवन्‍नि ओर्सकुत्‍तोर. मिमेट ओना बारेमते विचारम कीम्‍टु.
HEB 12:4 मिमेट पापमतोनि लळांच्‍नेंके, उंदि पोल्‍ले मति इर्राना. अद बतल इत्‍ते, येसु बल्हा ओना जीवातुन हीतोर, अल्हा मीकु मीवा नेत्‍तुर पोंगागोट्‍टाना अव्‍सरम अर्राहिल्‍ले.
HEB 12:5 मीकुन अंटोर्कुन मर्क-मियाह्क इन्कुंचि, मीकु दैरनेम हियानाहाटीं पेन मीकु वेहता आ पोल्‍लेतुन पुरागेन मति मरुंग्तिरा? “नावा मर्रिना, पेन हीता टेरनिंगतुन, मामुल पोल्‍ले इनकुन्‍मा. पेन नीकुन सुद्रांचनस्के, निमे दैरनेम होळ्‍समा, बारित्‍ते, पेन बोन अय्ते पावरम कींतानो ओन्क टेरनिंगगुडा हींता. अचोने आयका, अद बोन अय्ते मर्रि इंचि इंतानो, ओन्क सिक्‍सागुडा हींता,” इंचि रासतद मंता.
HEB 12:7 पेन मीकुन दाना मर्क-मियाह्कुनलेसीं हूळंता. अदुनहाटीं मीकु बस्के अय्ते तिप्‍पल्‍क वांतां, अस्‍के पेन मीकुन सुद्रांचनाहाटीं टेरनिंग हीसंता इंचि अदुन ओर्सकुंटु. बारित्‍ते मर्रि सुद्रांचनाहाटीं ओन्क टेरनिंग हियवोर बोरन्‍ना बाबो मनंतोरा?
HEB 12:8 पेन दाना अंटोर मर्क-मियाह्कुन सुद्रांचनाहाटीं टेरनिंग हींता. आ टेरनिंगगिंटा मीकु दोर्काकोंटे, मिमेट दाना निजम मर्क आयिर.
HEB 12:9 मनाकुन पुटिस्ता मना बाबुर्क अय्ते मनम सुद्रांचनाहाटीं टेरनिंग हीतुर. अदुनहाटीं मनम ओरा कदरगुडा इरतोम. अय्ते मनम बस्‍केळ्‍क पिस्सि मननाहाटीं, मना आत्मांकु बाबो आता पेनदुक मनम बच्‍चोन वेल्‍ले लोंगिस मत्‍ते बेस? विचारम कीम्‍टु.
HEB 12:10 मनाकुन पुटिस्ता बाबुर्क, कोन्‍नि वर्सानाहाटीं ओर्क तेळियताप, मनम सुद्रांचना इंचि टेरनिंग हीतुर. गानि पेन मना बेसताहाटीं, मनाकुन दानालेह्‍का पवित्र कियालय टेरनिंग हींता.
HEB 12:11 इंदके इव टेरनिंगकु येतनेंके मनाकु कुसि अनपिच्‍चो, दुक्‍कम वांता. गानि बोर अय्ते ओर्सकुंचेके टेरनिंग बेस मनसु तासि करियंतुरो, ओर्कु सत्‍तेम, सांतिते निंडता पिस्वर दोर्कंता.
HEB 12:12 अदुनहाटीं, अरसोत्‍ता मीवा कय्‍कुन आनि ताकत हिलुवा मीवा टोंगरन मजबुत कीम्‍टु.
HEB 12:13 मिमेट मीवा विस्वासमता हरदे सवरगा ताकाटु. अस्‍के बोर अय्ते विस्वासमते कुंटि आसि मंतोरो, ओर विस्वासमते इंकिच्‍चो कुंटि आयाकोंटा गट्‍टि पळानुर.
HEB 12:14 अंटोर मनकालोरतोनि सांतिते कलियसि पवित्र मनना कोसिस कीम्‍टु, अल्हा मनाकोंटे बोरे मनकल सामिनगा होना पर्रोर.
HEB 12:15 पेनदा कुर्पाताल वरोरगुडा तप्‍सोनामन्‍नि इंचि जेगर्ता मंटु. अल्हा तप्‍सोंचि हेळतोर बोरन्‍ना मी नड्‍डुम मनानय्ते, ओर कळमातोर्कुन हेळाहचि, पेनदाल लक्‍कु कींतोर. इदुन जरा जेगर्ता हुळट.
HEB 12:16 मीवा नड्‍डुम बोरे व्यबिचारम कियानोर हिलाकोंटे, एसावुनलेसीं नीति हिलुवा मनकल मनामन्‍नि. उंदि पूटाता गाटोहाटीं ओर ओना जेस्‍टम पालुंक विलुवा हिय्याकोंटा तम्मुंक अम्मुकुत्‍तोर.
HEB 12:17 पजा एसावुना गति बतल आता मीक अय्ते तेळियसे मंता. वारसान हक्‍कुनाहाटीं बाबोनगा आसिर्वाद येतालय होत्‍तस्के, बाबो ओन्क आसिर्वाद हिय्या हिल्‍लोर. ओर अळसि-अळसि वेल्‍ले कोसिस कीतोर गानि ओन्क मनसु मार्सकुनालय मोका दोर्काहिल्‍ले.
HEB 12:18 इस्राएल लोकुल्‍क अय्ते कय्‍दे इट्‍टा पर्रानाल मत्‍ता गुट्‍टातगा होत्‍तुर. अद गुट्‍टा तळमिते पोतसेके मत्‍ता, हिर्रु-हीकाटा, वळि-दुमारम, अद गुट्‍टातगा मत्‍ता. गानि मिमेट अय्ते असोंटा गुट्‍टातगा होना हिल्‍लिर. अद गुट्‍टातगा इस्राएल लोकुल्‍क, तूताकोमता आवाज आनि पेनदा वळ्कना पेद्‍दा लेंगुन केंजतुर. केंजसि, “मर्रा बस्‍केने इसोंटा लेंग माकु केंजा वायामन्‍नि” इंचि पेनदुक विनंति कीतुर.
HEB 12:20 बारित्‍ते, “इद गुट्‍टातुन, उंदि जिवरासि इट्‍टिना, दान बंडाने तंचि हव्काना,” इंचि पेन आदेस हीसि मत्‍ता, अद आदेसतुन ओर सहन किया पर्राहिल्‍लुर.
HEB 12:21 अगा जर्गता गटना इच्‍चोन वेरियानाल मत्‍ता गदा, अदुना बारेमते मूसालगुडा, “नना इरगा वेरियसि गजा-गजा आसंतन,” इंचि इत्‍तोर.
HEB 12:22 गानि मिमेट अय्ते सियोन गुट्‍टातगा वातिट. जीवाते मनना पेनदा, स्वर्गमते मनना येरुसलेम सहर इदे आंद. कुसिते उंदगा जमा आता, लेक्‍का हिलुवच्‍चोन पेनदा दूतानगा मिमेट वातिट.
HEB 12:23 नीतिमंतुड लोकुल्‍कुना आत्माना कलिसियातगा मिमेट वातिट. आ कलिसियातगा अंटोरा पोरोलीं रासि मंतां, अंटोर्क जेस्‍टम पालना अदिकारम मंता. अंटोर्कुन पेन दानतोनि मनालय पुरागा कीता. दुनियाते मनना अन्‍निटवुना न्‍यायम कियाना पेनदागा मिमेट वातिट.
HEB 12:24 इंका पूना करारता नड्‍डुमतोर आता येसुनगा मिमेट वातिट. आदामना मर्रि आबेलना नेत्‍तुर इत्‍ते, ओना दादाना बद्‍ला येतालय पेनदुन केयताप मत्‍ता. गानि येसुना नेत्‍तुर अय्ते मीवापोर्रो सल्सि मीवा पापाल्कुन मापि कीम इंचि पेनदुन केयताप मंता.
HEB 12:25 इद दुनियाते, लोकुल्‍कुंक जेगर्ता मनालय पेन वेहतस्के, ओर पेनदा पोल्‍ले केंजा हिल्‍लुर. अदुनहाटीं ओर पेन हीता सिक्‍साताल तपिच्‍कुना पर्राहिल्‍लुर. अय्ते इंदके मनम स्वर्गमताल वेहनोना पोल्‍लेतुन केंजाकोंटे, पेन हिय्यना सिक्‍साताल बल्हा तपिच्‍कुना पर्रांतोम? अदुनहाटीं जरा जेगर्ता मंटु, बोर अय्ते वळ्‍कसंतोरो ओना पोल्‍लेन पास्काकोंटा, बेस केंजट.
HEB 12:26 अद कालमते पेन वळ्कतस्के, दाना आवाजते, बूमिअंता गजा-गजा ऊंगता. गानि इंदके, “नना सिराप बूमितुने आयो गानि, मब्बुनगुडा मरुंदि मल्का गजा-गजा ऊपांतन,” इंचि पेन पोल्‍ले हीता.
HEB 12:27 “मरुंदि मल्का” इनना पोल्‍लेता अर्तम बतल इत्‍ते, इद दुनियाते गजा-गजा आयानव बव अय्ते मंतांगो, अव अन्‍नि तयार कीतव आंदुं, अदुनहाटीं अव नासडेम आसि दांतां, गानि बव अय्ते गजा-गजा आयाकोंटा मनंतांगो, अव बस्‍केळ्‍क अल्हेन मनंतां.
HEB 12:28 बोरे कदलिच्‍चा परुवसोंटा राज्येम मनाकु दोर्कसेक मंता. अदुनहाटीं मनम पेनदुक दन्यवाद वेहकोम. अचोने आयाका, दाना वेर्रे मनसुने इर्सि दाना सेवा कीसेके, दान्क नच्‍चना आरादना कीसेके मंदकोम.
HEB 12:29 बारित्‍ते, मना पेन, बूळ्‍दि कीसि पोहना तळमिलेसींटद आंदु.
HEB 13:1 मिमेट अंटोर उंदि लोतोरलेसीं वरोंक-वरोर पावरम कीसेके मंटु.
HEB 13:2 वाता हेळमितोर बोरे आयिर, ओर्कुन बेस हूळकुंटु. इल्‍हा इच्‍चुर लोकुल्‍क, एरपाट कियाकोन्‍नागानि पेनदा दूतन बेस हूळकुत्‍तुर.
HEB 13:3 पेनदुन विस्वासम कीताहाटीं बोर अय्ते जेलने मंतुरो, ओरा मति कीतस्‍के, मिमेट कुद्‍दु ओरतोनि जेलने मत्‍ताप विचारम कीम्‍टु. अल्‍हेने, बोर अय्ते पेनदुन विस्वासम कीताहाटीं तिप्‍पल्‍क बोगांचेके मंतुरो, ओर्कुन मति कीतस्‍के मिमेट कुद्‍दु ओरतोनि तिप्‍पल्‍क बोगांचेके मत्‍ताप मति कीम्‍टु.
HEB 13:4 मरमिन आनि मुत्‍तो-मुय्दोना संबंदमतुन कदर कियाना, ओर वरोनपोर्रो विस्वासम कीसि बदनाम आयाकोंटा मंदना. व्यबिचारम कियानोर्कुन आनि बोगमतनम कियानोर्कुन पेन न्‍यायम कींता, इदुन मतिते इर्राट. अदुनहाटीं मुत्‍तो-मुय्दो वरोनपोर्रो वरोर विस्वासम कीसि बदनाम आयाकोंटा मंदना.
HEB 13:5 दनमताहाटीं मिमेट आसे पडानायो. मिहगा बतल अय्ते मंता अव्टेन कूस मंटु. बारित्‍ते पेने कुद्‍दु इल्‍हा इत्‍ता: “नना नीकुन बस्‍केने होळ्‍सोन, नना नीकुन बस्‍केने दिक्‍कु हिल्वोन किय्योन,” इंचि वेहता.
HEB 13:6 “अदुनहाटीं, मनम, पेन नाकु सहायम कियानद आंद, नना असले वेरियोन, मनकल नाकुन बतल किया परांतोर?” इंचि दैरनेमते इना पर्रांतोम.
HEB 13:7 मीकु मोट्‍टा मोदाला पेनदा पोल्‍ले वेहता मीवा पेद्‍दाल्कुन मति कीम्‍टु. ओर बल्हा आकिरदाका पेनदापोर्रो विस्वासम इरसि पिस्तुरो मति कीसि, अल्हेन मिमेटगुडा ताकट.
HEB 13:8 येसु किरिस्‍तु मुन्‍ने मत्‍तापे, इंदके आनि बस्‍केळ्‍दाकागुडा मारियाकोंटा उंदेतीर मंतोर.
HEB 13:9 अदुनहाटीं, वेरेतोर वासि कराहना रका-रकाल्कुना बोदां केंजसि मिमेट गयबेत आयमट. बोनके बतल पायदा वायवा, तिंदाना नियमकुन पीसि तनलाळसेक मत्‍ते मना मनसुंकु ताकत दोर्को, गानि पेनदा कुर्पातेन मनसुंकु ताकत वांता.
HEB 13:10 मनागा उंदि इसोंटा गद्‍दे मंता गदा, आ गद्‍देपोर्रोटा गाटो डेराने सेवा कियाना यहुदि याजकुल्कुंक तिनना अदिकारम हिल्‍ले.
HEB 13:11 बारित्‍ते, पापाल्क मापि आयानाहाटीं मोळ्‍कालय, पेद्‍दा पेर्मल जिवरासिना नेत्‍तुरतुन अय्ते अन्‍निटकन्‍ना पवित्र जेगाते ओंतोर, गानि जिवरासिना मेंदुल्तुन मात्रम डेराता पलाते बोळ्‍संतुर.
HEB 13:12 अय्ते येसुगुडा, ओना नेत्‍तुरते लोकुल्‍कुन पवित्र कियानाहाटीं येरुसलेम सहरता पलाते तिप्‍पल्‍क बोगांचि जीवा होळसतोर.
HEB 13:13 अदुनहाटीं वटु! मनमगुडा येसुना पोर्रोटा अपमानमतुन मनापोर्रो येतकुंचि, येसुनालेसीं तिप्‍पल्‍क बोगांचालय डेराता पलाते दाकोम.
HEB 13:14 इद दुनियाते हमेसा मनालय मनाहाटीं बदे सहर हिल्‍ले. गानि वायाना कालमते मनाहाटीं तयार आयाना सहरते मनालय, आसेते मंतोम.
HEB 13:15 अदुनहाटीं, येसु मनाहाटीं कीतदुन मति कीसि, बस्‍केळ्‍क मना तोळ्‍दाल पेनदा पोरोल येतसि, पारतना-दन्यवादाल्कुना मोक्‍कुल्क हीसेक मंदकोम.
HEB 13:16 वेरेतोराहाटीं बेस कियमळतुन आनि मिहगा मत्‍तव्टेटाल ओर्कु तूस हियमळतुन होळ्‍समट. इल्‍हा कियमळगुडा उंदि मोक्‍के आंद. दीनहेंदाल पेन कूस मनंता.
HEB 13:17 मीवा पेद्‍दाल्क वेहताप मिमेट ताकट. ओर्कु लोंगिस मंटु. मीवा जीवाता कावेल कियमळे ओरा जिम्मेदारि आंद. ओर्कु मीवा बारेमते, पेनदागा लेक्‍का हिय्या पींता. ओर वेहताप मिमेट ताकते, ओरा कबळ ओर कुसिते कींतुर, हिलाकोंटे ओर दुक्‍कमते कबळ कींतुर. ओर दुक्‍कमते कबळ कियानय्ते मीकु बतल पायदा वायो.
HEB 13:18 माहाटीं पारतना कीसेके मंटु. अन्‍नि तीरकुने मोमोट निजम बतल अदे कीसेके, बेस कदरते पिस्सेक मंतोम. इंका मावा बुद्‍दिगुडा सत्‍तेम मंता इत्‍ता बरोसा माकु मंता.
HEB 13:19 अचोने आयाका, नना मीकु विनंति कीसि वेहना पोल्‍ले बतल इत्‍ते, पेन नाकुन बच्‍चोन बिराना आते, अचोने बिराना मिहगा लोहना इंचि पारतना कीम्‍टु.
HEB 13:20 सांति हिय्यना पेन दाना विचारम परकारम मिमेट कियालय, मीकु अन्‍नि तीरकुना बेसता पोल्‍लें हिय्यि. येसु किरिस्‍तुनाहेंदाल मीवा पिस्वरते दान्क नच्‍चना पोल्‍लें जर्गिं. किरिस्‍तु येसुना नेत्‍तुरहेंदाल पेन मातोनि बस्‍केळ्‍क मननाहाटीं पूना करारतुन निल्‍हाता. इद पूना करार निल्‍लना इंचि पेन येसुन हामुरताल मर्रा जीवाते तेहाता. इल्‍हा येसु किरिस्‍तु मावा बेस मेहानोर आतोर. मनकालोर अंटोर बस्‍केळ्‍ताहाटीं ओन्‍के कदर हिय्यिर. आमीन.
HEB 13:22 विस्वासुल्‍कुनिटा! मिमेट पेनदा बक्‍तिते इंकिच्‍चो गट्‍टि पळना इंचि, इव इच्‍चुं पोल्‍लें नना इद सिट्‍टिते मीहाटीं रासतन. इवुन बेस सहन कीसेके केंजट इंचि नना मीकु विनंति कीसंतन.
HEB 13:23 मना तम्मुनसोंटा तिमोति जेलनाल पेय्सता पोल्‍लेतुन मिमेट तेल्‍पिचकुंटु. ओर ओक्‍कला नहगा बिराना वाते, नना ओनतोनि, मीकु कलियालय वांतन.
HEB 13:24 मीवा लीडरकुंक आनि पेनदा अंटोर पवित्र लोकुल्‍कुंक, नावा जोहार वेहाट. इटलि देसेमते मनना विस्वासुल्‍क मीकु जोहार वेहासेक मंतुर.
HEB 13:25 पेनदा कुर्पा मी अंटोरतोनि बस्‍केळ्‍क मन्‍निकांटी. आमेन.
JAM 1:1 नना याकोबुन, पेन आनि सामि येसु किरिस्‍तुना सेवकुन आंदुन. वेरे-वेरे देसेल्कुने पैलांचि होंचि मत्‍ता पन्‍नेंडु गोत्राल्‍कुनोर्कुंक नना इद सिट्‍टि रासेके मंतन. मीक अंटोर्क जोहार.
JAM 1:2 नावा विस्वासुल्‍कुनिटा, बस्के अय्ते मीवापोर्रो तीर-तीराता परिक्‍सां वांतां, अस्‍के अद मीवा पूरा आनंदमता पोल्‍ले इनकुंटु.
JAM 1:3 बारित्‍ते विस्वासमता परिक्‍सानाहेंदाले ओप्के पुटंता इंचि मीक एरपाटे मंता.
JAM 1:4 मिमेट ओप्केतुन दाना कबळ पूरा किया हीम्टु, अस्‍के मिमेट विस्वासमते गट्‍टिगा, पुरागा आनि बवे पोल्‍लेने बतले तक्‍को हिलाकोंटा आंतिट.
JAM 1:5 गानि मीवा लोप्पोटाल बोनकन्‍ना बुद्‍दि तक्‍को मत्‍ते पेनदुन तल्‍कट, अस्‍के पेन हींता. बारित्‍ते अद बतले तप्‍पु दोस्‍साका, तल्कतोर अंटोर्कुंक वेल्‍लेने हींता.
JAM 1:6 गानि अनमानम कियाका विस्वासमते तल्कमळ गावाले. अनमानम कियानोर समुद्रमते वळिक वायाना एता तळानसंटोर आंदुर.
JAM 1:7 असंटोर रोंडु तीरुकुने विचारम कियाना मनकल आंदुर, ओर बदे हर्दे गट्‍टिगा मन्‍नोर. अदुनहाटीं सामिनाहेंदाल बतलन्‍ना दोर्कंता इंचि इनकुना मन्‍नि.
JAM 1:9 गरिब विस्वासि, पेन ओनकु हीता पेद्‍दातनमता हेंदाल आनंदमते मंदना.
JAM 1:10 अल्हेन सिरमंत विस्वासि, पेन हीता सिन्‍नातनमता हेंदाल आनंदमते मंदना. ओर जाडि पुंगार राल्सि होत्‍ताप हासि दांतोर.
JAM 1:11 बारित्‍ते पोळ्‍दु पेय्संता अस्‍के एर्राना एद्‍दि मनंता, दानहेंदाल जाडि वतसि दांता, पजा दाना पुंगाह्कु राल्सि होंचि सिंगारम हिलाकोंटा आंता. अल्‍हेने सिरमंत मनकलगुडा ओना कमाइ कियाना विचाराल्‍कुनेन मुळ्‍गिसि मंचि नासडेम आसि दांतोर.
JAM 1:12 बोर अय्ते परिक्‍सां वातस्के अवुन ओर्सकुंतोर, ओर आसिर्वाद दोर्कतोर आंदुर. बारित्‍ते परिक्‍साने गट्‍टिगा नित्‍तिसि मंचि बोर अय्ते पेनदुन पावरम कींतोर, ओनकु पिस्वरता किरिटम हींतन इंचि पेन पोल्‍ले हीसि मत्‍ता, अद ओनकु हिय्यार.
JAM 1:13 पेन परिक्‍सां वाया हिय्यो अल्हेन बोर्कुने परिक्‍साने अरहो. अदुनहाटीं बोर्कन्‍ना परिक्‍सां वायानय्ते, पेनदाहेंदाले परिक्‍सां वासेक मंतां इंचि इना मन्‍नि.
JAM 1:14 गानि हरेक मनकन, ओना लालच दानहेके गुंजकुंता. पजा पसांचि, ओन परिक्‍साते अरहंता.
JAM 1:15 आयंका आ लालच नेला तप्‍सि एरपूरताप, पापमतुन कनंता आनि पापम बेर्सि हामुरतुन पुटसंता.
JAM 1:16 नावा पावरमगल्‍ला विस्वासुल्‍कुनिटा! मिमेट पसांचकुनमट.
JAM 1:17 हरेक बेसता वरम आनि अन्‍निंकन्‍ना बेसता इनाम पोर्रोटाले वांता, वेल्‍गुल्कुना पेनबाबानगटाल वांता, ओनालोप्‍पो बतले तेडा हिल्‍ले, ओर नीडातालेसीं बदलांचानोर आयोर.
JAM 1:18 ओर पुटिस्तवुन लोप्पो मोट्‍टा मोदाटा पलम मनमे आयागोम इत्‍ता ओना सतता इच्‍चातुन पीसि, सत्‍तेम पोल्‍लेताल मनाकुन पुटिस्तोर.
JAM 1:19 नावा पावरमगल्‍ला विस्वासुल्‍कुनिटा, मिमेट इद पोल्‍ले तेल्‍पिचकुंटु, हरेक मनकल केंजालय बिराना तयार मंदना, वळ्कालय ओप्के मंदना आनि बिराना होंग वायाकोंटा मंदना.
JAM 1:20 बारित्‍ते मनकना होंग पेनदा नीति पोर्रो कबळ किय्‍यो.
JAM 1:21 अदुनहाटीं मीलोप्‍पो मत्‍ता कराब पोल्‍लेन आनि दुस्‍ट मनसुन तेंडसि पोहाचि, पेन मीवा मनसुने हीता बेसता पोल्‍लेतुन मिमेट पेद्‍दातनम हूळाकोंटा पीकुंटु. बारित्‍ते अद मीवा आत्मान पिसागोटनाहाटीं बलमतद आंद.
JAM 1:22 अद पोल्‍ले सिराप केंजालये आयो गानि अद वेहताप ताकानोर आम्टु. अल्हा ताकाकोंटे मीवद मिमेटे पसांचकुंतिर.
JAM 1:23 बारित्‍ते बोर अय्ते पेनदा पोल्‍ले केंजसि अदुना परकारम ताकोर, आ मनकल अद्‍दमते मोकम हूळसि पलाते होत्‍ता पजा बल्हा मत्‍तानो इंचि बिराने मरुंगनसंटोर आंदुर.
JAM 1:25 गानि बोर अय्ते मुक्‍तिता तप्पु हिल्वा नियम मत्‍ताप ताकंतोर आनि अदुन मरगोर, असंटोना कबळ लोप्पो पेनदा आसिर्वाद मनंता.
JAM 1:26 बोरन्‍नागिंटा ओनद-ओर बक्‍तुन इनकुंतोर गानि ओना नाल्केतुन आपकुन्‍नोर, अय्ते ओर, ओनद-ओरे पसांचकुंचेके मंतोर. ओना बक्‍ति एर्तमे आंदु.
JAM 1:27 बोर अय्ते दिक्‍कु हिल्वोर्कुना, मुंडामोस्तवुना तकलिप लोप्पो सहायम कींतोर, इद दुनियाता कराब कबाह्कुनाल लक्‍कु मनंतोर, असंटोर मना पेनबाबाना मुन्‍ने दोसेम हिल्वोर पवित्र आंदुर.
JAM 2:1 नावा विस्वासुल्‍कुनिटा! मीवा विस्वासम मना महिमाता सामि येसु किरिस्‍तुनपोर्रो मंता, अदुनहाटीं मीलोप्‍पो बेदबाव मनामन्‍नि.
JAM 2:2 बारित्‍ते, वरोर मनकल बंगारमता मुद्‍दा, एक्‍को दरातव कपडिं केर्सि, इंकावरोर गरिब मनकल बोंतुल कपडिं केर्सि पारतना कियाना लोते वातुर इनकुंटु,
JAM 2:3 अस्‍के मिमेट एक्‍को दराता कपडिं केर्सि वातोनहेके हूळसि, “निमे इगे बेसता जेगाते उद्‍दा” इंचि वेहचि, गरिब मनकन, “निमे अगा नित्‍ता हिलाकोंटे नावा काल्कुनगा उद्‍दा” इंचि वेहानय्ते,
JAM 2:4 मिमेट मीवा लोप्पेन बेदबाव कीताप आया हिल्‍लिरा? इंका दुस्‍ट विचारमते न्‍यायम कीतोर आया हिल्‍लिरा?
JAM 2:5 नावा पावरमगल्‍ला विस्वासुल्‍कुनिटा! केंजाट, ई दुनियाते बोर अय्ते गरिब मंतुर ओर्कुन विस्वासमते दनवंतुल्‍क कींतन इंचि, आनि दान पावरम कीतोर्कुंक दाना राज्येमते वारसदार्क कींतन इंचि, मुन्‍नेने पोल्‍ले हीसि मत्‍ता, अद हियालय ओर्कुन पेरता.
JAM 2:6 गानि मिमेट आ गरिब मनकन अपमानम कीतिर. मीपोर्रो अदिकारम ताकिच्‍चेके, मीकुन कोरटते इग्गिसेक ओयानुर दनवंतुल्के गदा?
JAM 2:7 किरिस्‍तुना कदर हियना पोरोल मीक दोर्कता, अद पोरोलतुनगुडा अपमानम कियानुर ईरे दनवंतुल्‍क गदा?
JAM 2:8 मिमेटगिंटा, “नीवद-निमे पावरम कीतापे पक्‍कातोर्कुनगुडा पावरम कीम,” इंचि दर्मसास्‍त्रमते वेहताप ताकानय्ते, मिमेट निजमे बेस कीसेक मंतिट.
JAM 2:9 गानि ओक्‍कला मिमेट बेदबाव कियानय्ते, मिमेट पापम कीसेक मंतिट, दर्मसास्‍त्रम मीकुन दोसिल्‍क कींता.
JAM 2:10 बारित्‍ते बोरे आयिर दर्मसास्‍त्रमतव अन्‍नि पोल्‍लेन पालन कीसिगुडा उंदि पोल्‍ले तपते, ओर अन्‍नि पोल्‍लेने दोसि आंतोर.
JAM 2:11 बल्हा इत्‍ते, “बोगमतनम कियमट” इंचि पेन वेहता, आनि अदे पेन, “इंकावरोन हव्कमट” इंचिगुडा वेहता. निमे व्यबिचारम किया हिल्‍लिन गानि इंकावरोन हव्कतिन, अय्ते निमे दर्मसास्‍त्रमता पालन किया हिल्‍लिन.
JAM 2:12 बोरद अय्ते पापमताल इळबळिचना नियम परकारम न्‍यायम आयाना मंता. मिमेट ओरालेसींगे वळ्कट, कबळ कीम्‍टु.
JAM 2:13 बारित्‍ते बोर अय्ते दया किय्योर, न्‍यायम कियाना रोज पेन ओनपोर्रो दया किय्‍यो. दया कियानोर न्‍यायमतुन गेल्संतोर.
JAM 2:14 नावा विस्वासुल्‍कुनिटा! बोरन्‍नागिंटा नाक विस्वासम मंता इन्कुंचि, विस्वासम परकारम कबळ कियाकोंटे, अद विस्वासम बता पाय्दातद असोंटा विस्वासम ओन पिसागोटा परंतना?
JAM 2:15 बोरन्‍ना दादाल आयि, अक्‍कल आयि ओर्क केर्रालय कपडिं, तिनालय रोजता तिंडि हिल्‍ले,
JAM 2:16 अस्‍के मिमेट ओर्कुन, “सांतिते होंटु, गरम कपडिं केर्रट, पीरमेड तिंटु,” इंचि इनकिर. गानि ओरा मेंदुल्क अव्‍सरम मत्‍तव ओर्क हिय्यिर, अय्ते दाना बता पाय्दा?
JAM 2:17 अल्‍हेने विस्वासम मत्‍ताप कबळ हिलाकोंटे, आ विस्वासमगुडा हातापे आंद.
JAM 2:18 गानि बोरन्‍ना, “नीकु विस्वासम मंता, नाक बेसता कबळ मंता” इंचि इत्‍तोर इनकुंटु. अस्‍के, “बेसता कबळ हिल्वा विस्वासम नाक हुप्‍सा, बेसता कबळताहेंदाल विस्वासम नीकु हुप्‍संतन” इंचि ओर इनानुर.
JAM 2:19 पेन उंदे मंता इंचि मिमेट विस्वासम कीतिर, बेसे आंद. गानि देय्याल्कुगुडा विस्वासम कीसि गजा-गजा वनकंतां.
JAM 2:20 अरे बुद्‍दि हिल्वा मनका! कबळ हिल्वा विस्वासम एर्तम इंचि, नीकु तेळियोना?
JAM 2:21 मना एनकटा बाबो अब्राहाम ओना मर्रि इसाकुन मोक्‍कु हियालय गद्‍देपोर्रो इरतोर, अय्ते पेन ओना कबळतुन हूळसि, नीतिमंतुड इंचि ओन ओप्कुत्‍ताना हिल्‍लेना?
JAM 2:22 मिमेट हूळसेक मंतिट, विस्वासम ओर कीता कबाह्कुनतोनि कलियसि मंता, अल्हेन विस्वासम ओना कबाह्‍कुनाहेंदाल पूरा आता.
JAM 2:23 अय्ते, “अब्राहाम पेन पोर्रो विस्वासम कीतोर, अस्‍के पेन ओन नीतिमंतुड इत्‍ता,” इंचि दर्मसास्‍त्रमता पोल्‍ले पूरा आता. अल्‍हेने अब्राहाम पेनदा दंटातोर इंचि पोरोल दोर्किच्‍कुत्‍तोर.
JAM 2:24 अदुनहाटीं मनकल सिराप विस्वासम कीतेने आयो गानि बेसता कबाह्कुनालगुडा पेन ओन नीतिमंतुड कींता.
JAM 2:25 अल्‍हेने रहाब इनना वेस्यागुडा कबर्‍यालोर्कुन दाना लोते मक्‍किचि इर्सि, इंकुंदि हरदाल वापस लोहता. अद बेसता कबळ कीताहाटीं नीति मुरतळ आता.
JAM 2:26 बल्हा अय्ते आत्मा हिल्वा मेंदुल हांतानो, अल्‍हेने कबळ हिल्वा विस्वासमगुडा हातापे.
JAM 3:1 नावा विस्वासुल्‍कुनिटा! मिहागटाल वेल्‍लेटुर कराहनोर आयमटु, बारित्‍ते मनम कराहनोर्कुंक वेल्‍ले गट्‍टिगा न्‍यायम जर्गंता इंचि मीक एरपाटे मंता.
JAM 3:2 मनम अंटोरम बच्‍चुंगो तप्पुक कींतोम, गानि बोर अय्ते वळ्कानेंके उंदिगुडा तप्पु किय्योर, ओर अन्‍नि गुनाल्‍कुने पूरा मत्‍ता मनकल आंदुर आनि ओर ओना मेंदुलतुनगुडा पग्‍गमते दोहताप ईरा परांतोर.
JAM 3:3 गुर्रम मना कय्‍दे ताकागोम इंचि दाना तोड्‍डिते कल्‍लेम दोसंतोम, अस्‍केने दाना पूरा मेंदुल्तुन तिरहा परांतोम.
JAM 3:4 अल्‍हेने डोंगन हुळाट, अव वेल्‍लेन पेद्‍दगा मनंतां, वेल्‍ले वळिते ताकंतां, अय्नागानि अवुन ताकसानोर सिन्‍ना पतवार हेंदाल बेके इत्‍ते हेके तिरहा परांतोर.
JAM 3:5 अल्‍हेने मना मेंदुल्ते सिन्‍ना नाल्के मंता, अद पेद्‍दा-पेद्‍दा पोल्‍लें पोंगंता. हुळाट, सिन्‍ना मिन्गुरते पेद्‍दा केडा वेसि दांता.
JAM 3:6 मना नाल्केगुडा तळमितालेसीं मंता. दानगा अन्‍नि कराब पोल्‍लें निंडसि मंतां. अद मना मेंदुल्ते मंचि पूरा मेंदुल्तुन बदनाम कीसि मना पिस्वरते तडमि दोसंता. अद तडमि नरकमताल वांता.
JAM 3:7 बारित्‍ते अन्‍नि तीरकुना केडा जिवरासीं, पिट्‍टें, पुळकु आनि समुद्रमते मंदना जिवरासिन मनकल ओना कय्‍दे कीकुन्‍ना परांतोर, कीकुत्‍तोरगुडा.
JAM 3:8 गानि नाल्केतुन आपमळ बोनतोने आयापर्रो. अद आग्वद, कराबतद आंद. दानगा हामुरता विसम निंडसि मंता.
JAM 3:9 इदुनतोने मनम मना सामि पेनबाबाना स्‍तुति कींतोम, आनि इदुनतोने मनम पेन दाना रूपमते पुटिस्ता मनकालोर्कुन सापनेम हींतोम.
JAM 3:10 उंदे तोळ्‍दाल आसिर्वाद, सापनेम रोंडु पेय्‍संतां, नावा विस्वासुल्‍कुनिटा, इल्‍हा आयामन्‍नि.
JAM 3:11 बतल, उंदे ऊटाताल उनाना एर, होव्वोर एर रोंडु पेय्‍संतंगां?
JAM 3:12 नावा विस्वासुल्‍कुनिटा, अंजिर मराकु जय्तुन पंडिं हादांतंगा हिलाकोंटे अंगुर वेलिक अंजिर पंडिं हादांतंगा? हादों. अल्‍हेने होव्वोर एता ऊटाताल, उनाना एर पेय्‍सा पर्रो.
JAM 3:13 मीलोप्‍पो तेल्वितोर, तेळियतोर बोर मंतोर? ओर ओना बेसता पिस्वर हेंदाल, तेल्‍विते सीदा-सादा मंचि ओर कियाना कबाह्‍कुन हुप्‍सना.
JAM 3:14 गानि मीवा मनसुने वेल्‍लेने कूटा-कूटा, लालचता इच्‍चां निंडिस मत्‍ते, नीवा तेल्‍विता बारेमते पेद्‍दिरकेम कीसि, सत्‍तेमता विरोदमते पापम कियामन्‍नि.
JAM 3:15 ई तेल्वि पोर्रोटाल रेय्‍सि वातद आयो, गानि दुनियातागटाल, मनकनगटाल आनि देय्यमतगटाल आंद.
JAM 3:16 बल्हा इत्‍ते, बगा अय्ते कूटा-कूटा आनि लालचता इच्‍चां मनंतंगो, अगा आपत्‍तिं आनि अन्‍नि तीरकुना कराब कबाह्‍क मनंतां.
JAM 3:17 गानि पोर्रोटाल वायाना तेल्वि अद मोदाला अय्ते पवित्र मनंता, आयंका सांति हियानद, सीदा-सादा गुनमतद, इंकावरोना पोल्‍ले केंजालय तयारते मनानद, दया आनि बेसता कबाह्‍क कियानद, अद बेदबाव कियवद, इमानदारते मनानद आंद.
JAM 3:18 सांतितुन वरोंक-वरोर कल्‍पानोर्क, सांतिता विज्‍जाता हेंदाल नीतिता पंटा दोर्कंता.
JAM 4:1 मीलोप्‍पो लडाईं, जगडाल्‍क, आयाना कारनम बतल? मीलोप्‍पो मंदना कराब आसेना लडाइताहेंदाले गदा.
JAM 4:2 मिमेट इच्‍चा कींतिट गानि अद मीक दोर्को, अदुनहाटीं मिमेट इंकावरोन हव्कंतिर. गावाले इंचि इनकुंतिर गानि अद मीक दोर्को, मिमेट लडाईं, जगडाल्‍क कींतिर. अय्ते मीक दोर्कवा कारनम बतल इत्‍ते, मिमेट पेनदुन तल्कसेक हिल्‍लिर.
JAM 4:3 मिमेट तल्कंतिर गानि मिमेट मीवा सुकमताहाटीं कराब आसेतेन तल्कंतिर, अदुनहाटीं मीक दोर्को.
JAM 4:4 विस्वासम हिल्वोरिटा! दुनियातोनि दंटा कियमळ इत्‍ते पेनदुक पगा आयमळ इद मीक तेळियोना? अदुनहाटीं बोर अय्ते दुनियातोनि दंटा कींतोर, ओर पेनदुक पगातोर आंतोर.
JAM 4:5 दर्मसास्‍त्रमते वेहता पोल्‍लें एर्तमे इंचि मिमेट इनकुंचंतिरा? बद पवित्र आत्मातुन अय्ते पेन मनालोप्‍पो इरता, अद मना नुकसान आयगोम इंचि कोरंतना?
JAM 4:6 पेन अय्ते इंका एक्‍को कुर्पा कींता. अदुनहाटीं, “पेन पेद्‍दिरकेम कियानोर्कुंक विरोद कींता आनि सिन्‍नातनम आसि मनानोर्कुंक कुर्पा कींता,” इंचि दर्मसास्‍त्रमते रासि मंता.
JAM 4:7 अदुनहाटीं पेनदा पोल्‍लेपोर्रो ताकट, देय्यमकु एदुर तिरियट. अस्‍के अद मिहागटाल वित्‍तंता.
JAM 4:8 मिमेट पेनदुक दग्‍गेरा वट, अस्‍के पेन मीवा दग्‍गेरा वांता. ए पापि लोकुरिटा! मीवा पापाल्कुन नोर्राट. रोंडु मनसुकुने ताकानोरिटा, मीवा मनसुन साप इर्राट.
JAM 4:9 पापि लोकुल्‍कुम इंचि दुक्‍कमते मंटु, अळट. मिमेट कव्वानद होळसिसि दुक्‍कमते मंटु, आनंदमते मनानद होळसिसि नाराजते मंटु.
JAM 4:10 सामिना मुन्‍ने मिमेट सिन्‍नातनम आसि मंटु, अस्‍के मीकुन पेन पोर्रोळ्‍क तेहांता.
JAM 4:11 विस्वासुल्‍कुनिटा! वरोना-वरोर अपमानम कीकुनमट, बोर अय्ते ओना दंटातोन अपमानम कींतोर, ओनपोर्रो तप्पु दोसंतोर, असोंटा मनकल दर्मसास्‍त्रमता अपमानम कींतोर, दानपोर्रो तप्पु दोसंतोर. अय्ते निमे गिंटा दर्मसास्‍त्रमपोर्रो तप्पु दोसते, निमे नियम परकारम ताकानोन आयिन गानि न्‍यायम कियानोनालेसीं आंतिन.
JAM 4:12 दर्मसास्‍त्रम हियानद आनि न्‍यायम कियानद पेन उंदे आंद. दानके पिसागोटना आनि नासडेम किय्‍याना ताकत मंता, गानि निमे बोन आंदिन पक्‍कातोनपोर्रो तप्पु दोस्सानोन?
JAM 4:13 केंजाट, “इय्याला हिलाकोंटे नाडि पलाना सहरते होंचि, वर्सामेड मंचि, दंदा कीसि कमांचकोम,” इंचि मिमेट इंतिट.
JAM 4:14 गानि नाडि बतल आंता मीक तेळियो, मीवा पिस्वर इत्‍ते गळसेम दिस्‍सि मर्रा दिसाकोंटा आयाना मूळमतसोंटद आंद.
JAM 4:15 अदुनहाटीं मिमेट, “सामिना इच्‍चा मत्‍ते मनम जीवाते मंदकोम, इदो, अदो बदो उंदि कबळ कीकोम,” इंचि इनमळ गावाले.
JAM 4:16 गानि इंदके मीवा पोल्‍लेने मिमेट गर्राते मनंतिर, इसोंटा अन्‍नि तीरकुना गर्रा बेस आयो.
JAM 4:17 अदुनहाटीं बोर अय्ते बेस कबळ कियाना इंचि तेळियसिगुडा ओर कियाकोंटे, ओनाहाटीं अद पापम आंद.
JAM 5:1 दनवंतुल्कुनिटा, केंजाट! मीपोर्रो वायाना गंडाल्कुनाहाटीं वरगेयाटु, अळट.
JAM 5:2 मीवा दनम नासडेम आंता, मीवा कपडिन सेदेल पींता.
JAM 5:3 मीवा बंगारम, एंडि सिलुम पींता. अद सिलुम मीक अड्‍डम गवाइ वेहचि, तळमितालेसीं मीवा मेंदुल्तुन नासडेम कींता. मिमेट ई आकिर युगमतेगुडा दनम जमा कीसेक मंतिर.
JAM 5:4 हुळाट! मीवा नेदे कबळ कीता बूतिनोर्कुंक मिमेट बूति हिया हिल्‍लिर, अद बूति मीक अड्‍डम वरगेयसेक मंता, बूतिनोर्कुना अळमळ स्वर्गमते मंदना बलमगल्‍ला सामिना केव्कुंक केंजावाता.
JAM 5:5 मिमेट ई दुनियाते अन्‍नि तीरकुना आरामते, सुकमते पिस्तिर आनि मिमेट हायना रोजुनाहाटीं मीवा मनसुन बल्सागोटतिर.
JAM 5:6 नीतिमंतुनपोर्रो मिमेट दोसेम दोस्‍सि हव्कतिरगुडा. गानि ओर मीपोर्रो मर्लाबळा हिल्‍लोर.
JAM 5:7 अदुनहाटीं विस्वासुल्‍कुनिटा! सामि मर्रा वायानादाका ओप्के पीसि मंटु. बल्हा इत्‍ते, वरोर कास्‍तकरि मनकल ओना नेदा पिस्वरता पंटाहाटीं मोदाटा पिर्रु आनि आकिरता पिर्रु वायानादाका ओप्‍केते एदुर हूळांतोर,
JAM 5:8 अल्‍हेने सामि मल्सि वायना वेला दग्‍गेरा वासि मंता. अदुनहाटीं मिमेटगुडा मीवा मनसुन गट्‍टिगा कीसि, ओप्‍केते मंटु.
JAM 5:9 विस्वासुल्‍कुनिटा! वरोनपोर्रो वरोर चुगलीं वेहमट, अल्हा वेहतिर इत्‍ते मी पोर्रोने दोसेम दोसमळ जर्गंता. हुळाट, न्‍यायम कियानोर गलमातगा नित्‍तिसि मंतोर.
JAM 5:10 विस्वासुल्‍कुनिटा! सामिना पोरोलता बारेमते वेहता पेनदा कबुरतोर तकलिप बोंगाचिगुडा ओप्‍केते मत्‍तुर, मिमेटगुडा ओरालेसीं मंटु.
JAM 5:11 हुळाट! बोर अय्ते ओप्के पीसि मत्‍तुर, ओर्कुन आसिर्वाद दोर्कतोर इंतोम. अय्यूब ओप्के पीसि मत्‍ताहेंका ओन्क पेनदाहेंदाल आसिर्वादगुडा दोर्कता इंचि मिमेट केंजतिरे. इदुनहेंदाल पेन एक्‍को जीवा कियानद, दया कियानद आंदु, इंचि तेळियंता.
JAM 5:12 गानि नावा विस्वासुल्‍कुनिटा! अन्‍निंकन्‍ना पेद्‍दा पोल्‍ले बतल इत्‍ते, मिमेट स्वर्गमतद आयि, बूमितद आयि आनि बदे पोल्‍लेतद आयि ओट्‍टु तिनमट. मत्‍ते मंता इंटु, हिलाकोंटे हिल्‍ले इंटु. इल्‍हा इत्‍ते पेन मीकु सिक्‍साता आदेस हिय्यो.
JAM 5:13 मीवा लोप्‍पोगिंटा बोरन्‍ना दुक्‍कमते मत्‍ते ओर पारतना कियाना, आनंदमते मत्‍ते पेनदा स्‍तुति कीसेक पाटां पाराना.
JAM 5:14 मीवा लोप्‍पोगिंटा बोरन्‍ना बिमारते मनानय्ते, कलिसियाता पेद्‍दाल्कुन केयाना. ओर वासि सामिना पोरोलते ओनकु निय होकसि, पारतना किय्‍यिर.
JAM 5:15 ओर विस्वासमते कीता पारतनाते बिमारतोर बेस आयानुर. सामि ओन बिमारताल तेहाचि निप्‍संतोर, ओर पापम किय्यिनागानि ओना पापमतुन मापि कींतोर.
JAM 5:16 अदुनहाटीं मिमेट वरोना मुन्‍ने वरोर मीवा पापाल्कुन ओप्‍कुंटु, वरोनाहाटीं वरोर पारतना कीम्‍टु, अस्‍के मिमेट बेस आकिट. नीति मनकना पारतनाते वेल्‍लेने ताकत मनंता.
JAM 5:17 एलियालगुडा मनासोंटा गुनमता मनकल मत्‍तोर, ओर पिर्रु वायामन्‍नि इंचि ऊके-ऊके पारतना कीतोर, अय्ते मूडुननरा वर्सनदाका बूमिपोर्रो पिर्रु वाया हिल्‍ले.
JAM 5:18 दाना पजा, पिर्रु वायागोम इंचि मर्रा पारतना कीतोर, अस्‍के मब्बुनाल पिर्रु वाता आनि बूमिपोर्रो पंटा पेय्सता.
JAM 5:19 नावा विस्वासुल्‍कुनिटा! मीवा लोप्पोटाल बोरन्‍ना सत्‍तेमता हरदाल तप्‍सि होनानय्ते, ओन इंकावरोर बोरन्‍ना सत्‍तेमता हर्दे वापस तायाना.
JAM 5:20 ओनकु इद तेळियना गदा, बोरन्‍ना सत्‍तेमता हरदाल तप्‍सि होत्‍ता पापि मनकन, सत्‍तेमता हर्दे वापस तायते ओर ओना जीवातुन हामुरताल पिसागोटतोर आनि ओना अन्‍नि पापाल्कुन मुच्‍चि हीतोर.
1PE 1:1 नना पत्रुन, येसु किरिस्‍तुना प्रेरितुन आंदुन. रोम देसेमता पुंतुस, गलातिया, कप्‍पुदुकिया, आसिया आनि बितुनिया राज्येल्कुने पैलांचि होंचि, पराय देसेमतोर आसि मत्‍ता लोकुल्‍कुंक नना इद सिट्‍टि रासेके मंतन.
1PE 1:2 पेनबाबाल मीकुन मुन्‍नेन पेरसि निलाहतोर. अदुनहाटींगे, मिमेट येसु किरिस्‍तु वेहताप ताकगोम, ओना पोंगता नेत्‍तुरते मीवा पापाल्क पायसि होनगोम इंचि पवित्र आत्माताहेंदाल मीकुन पवित्र कीतोर. पेनदा कुर्पा, सांति मीक इरगा दोर्किकांटी.
1PE 1:3 मना सामि येसु किरिस्‍तुना पेनबाबाना दन्यवाद आयि! ओना वेल्‍ले दयाताहेंदाल मनाकुन पूना रीतुने पुटिचमळ जर्गता. अद बल्हा इत्‍ते, पेनबाबाल येसु सामिन हातोरा लोप्पोटाल मर्रा तेहाचि, मनाकु उंदि पिस्वरता आसे हीतोर.
1PE 1:4 इंका अद बस्‍केने नासडेम आयवद, तप्पु हिलवद आनि कर्गुवसोंटा वारसान हक्‍क स्वर्गमते मीवाहाटीं इर्सि मंता.
1PE 1:5 आकिरि रोजकुने पेन अंटोर्कुंक हुप्‍सालय तयार कीसि इरता मुक्‍ति, मीकु दोर्कनाहाटीं मीवा विस्वासम परकारम पेन मीकुन दाना बलमते कापाळसि स्वर्गमते इरसंता.
1PE 1:6 अदुनहाटीं मिमेट इरगा कूस आम्टु. इंदके मीक गडसेमताहाटीं बच्‍चुंगो तीरकुना परिक्‍सां सहन किया पींता.
1PE 1:7 नासडेम आयाना बंगारमतुन तळमिते करगागोटसि परिक्‍सा कींतुर. गानि आ बंगारमकन्‍ना बच्‍चोरो विलुवाता मीवा विस्वासमतुनगुडा परिक्‍सा एतमळ जर्गंता. येसु किरिस्‍तु मर्रा वातस्के, मीकुन मेच्‍कुंचि पेद्‍दातनम आनि कदर दोर्काना कारनम आयगोम.
1PE 1:8 मिमेट येसुन हूळाकोन्‍ना गानि पावरम कींतिट; इंदके ओर दिसाकोन्‍ना ओन विस्वासम कीसि, पोल्‍लेने वेहा परवच्‍चोन आनंदमते आनि महिमाते निंडिस मंतिर.
1PE 1:9 इल्‍हा मीवा विस्वासमता पलम इंचि मिमेट मीवा आत्मांकु मुक्‍ति दोर्किचेके मंतिट.
1PE 1:10 मीक दोर्कना मत्‍ता कुर्पाता बारेमते बोर पेनदा कबुरतोर अय्ते बविस्यवानि कीसि मत्‍तोरो, ओर इदे मुक्‍तिता बारेमते पूसकीसेके, पहकसेक मत्‍तुर.
1PE 1:11 किरिस्‍तु बल्हा तकलिप वासि हायनुर, दाना पजा बल्हा ओनकु स्वर्गमते कदर दोर्कार इंचि ओरा लोप्पो मनना किरिस्‍तुना आत्मा मुन्‍नेन वेहचि मत्‍ता. गानि इव पोल्‍लें बोना बारेमते, बस्के आयनुं इंचि पेनदा कबुरतोर पहकुंदुर.
1PE 1:12 इव पोल्‍लें ओरा पायदाताहाटीं आयों गानि मीवाहाटीं इंचि पेने ओर्क तेळियागोट्‍सि वेहचि हुपिस्‍ता. इदवेरादाका बदाय्ते बेसता कबुर वेहतुर, अद स्वर्गमताल लोहचीता पवित्र आत्माहेंदाले मीक वेहतुर. इव पोल्‍लेना बारेमते पेनदा दूतांगुडा बल्हा आंतानो इंचि हूळना इच्‍चाते मंतां.
1PE 1:13 अदुनहाटीं मिमेट बेसता बुद्‍दितोनि, हुसारते मंटु. येसु किरिस्‍तु मर्रा मल्सि वातस्के मीक दोर्कना कुर्पाताहाटीं पूरा आसेते मंटु.
1PE 1:14 येसु किरिस्‍तुना बारेमते मीक तेळियवस्के मीलोप्‍पो मत्‍ता कराब अलवटकुना जोलिक होनाकोंटा, पोल्‍ले वेहते केंजाना पिलाल्कुनालेसीं मंटु.
1PE 1:15 गानि बद पेन अय्ते मीकुन केयता, अद पवित्र मंता. अल्‍हेने मिमेटगुडा मीवा ताकमळते अन्‍नि तीरकुने पवित्र मंटु.
1PE 1:16 बारित्‍ते दर्मसास्‍त्रमते, “नना पवित्र मंतन इंचि मिमेटगुडा पवित्र आम्टु,” इल्‍हा पेन इंता.
1PE 1:17 हरेक मनकन सिन्‍ना-पेद्‍दा इनाकोंटा ओरा कबाह्‍कुन हूळसि न्‍यायम कियाना पेनदुन मिमेटगिंटा “बाबा” इंचि पारतना कीते, दुनियाते मतच्‍चोरजेम परायतोरम इंचि वेर्रेते ताकाटु.
1PE 1:18 मीवा तादो-बाबुरागटाल ताकसेके वाता एर्तम पिस्वरतुन, नासडेम आयाना एंडि-बंगारम इळबळिचा हिल्‍ले, गानि दोसेम हिल्‍वद, मर्का हिल्‍वद गोर्रे पोरिनसोंटा किरिस्‍तुना विलुवाता नेत्‍तुरताहेंदाल मिमेट इळबळतिर, इदु मीकु एरपाटे मंता.
1PE 1:20 दुनिया पुट्‍टका मुन्‍नेन किरिस्‍तुन पेन पेरता, गानि मीवाहाटीं इव आकिर रोजकुने ई दुनियाते वातोर.
1PE 1:21 ओनहेंदाल मिमेट पेनदापोर्रो बरोसा कीतिर. पेन ओन हातोरा लोप्पोटाल मर्रा जीवाते तेहाचि, ओन्क पेद्‍दातनम हीता. अदुनहाटीं मीवा आसे आनि विस्वासम पेनदापोर्रो मंता.
1PE 1:22 मिमेट सत्‍तेमता हर्रि ताकसि मीवा आत्मातुन पवित्र कीकुत्‍तिर. अदुनहाटीं मिमेट वरोंक-वरोर पावरम कीसेके मंतिट. अल्‍हेने इंदके मीलेसीं विस्वासुल्‍क आतोर्कुन मिमेट पूरा मनसुनाल पावरम कीम्‍टु.
1PE 1:23 इंदके मिमेट पूना पिस्वरते पुटतिर, नासडेम आयाना पेडेहेंदाल आयो, गानि बस्‍केन नासडेम आयवद, बस्‍केळ्‍क जीवाते मनना पेनदा पोल्‍लेताहेंदाल, पूना पिस्वरते पुटतिर.
1PE 1:24 दर्मसास्‍त्रम इल्‍हा वेहंता गदा, “अंटोर मनकालोर जाडितालेसीं मंतुर, ओरा अन्‍नि पेद्‍दातनाल्‍क पुंगाह्कुनालेसीं मंतां. जाडि वतंता, पुंगाह्कु रालंतां. गानि सामिना पोल्‍ले मात्रम पीळि-पीळिनदाका मनंता.” इदुने मीक बेसता कबुर इंचि वेहमळ जर्गता.
1PE 2:1 पेन बच्‍चोर दया कियानद आंद इंचि मिमेट अय्ते एरपाट कीतिट. अदुनहाटीं अन्‍नि तीरकुना तप्पु कबाह्‍क, अन्‍नि तीरकुना बोंकिचमळ, नडेह कियमळ, कळ्‍क पोतमळ, अन्‍नि तीरकुना अपमानम कियमळ इवुन होळसीम्टु.
1PE 2:2 इंदके पुटता पसिबाला बल्हा पाल उन्‍नालय तनलाळंता, अल्‍हेने मिमेटगुडा बेसता पाललेसीं मनना पेनदा पोल्‍लेताहाटीं तनलाळट. अल्हा तनलाळते मिमेट मुक्‍तिहाटीं पेनदा पोल्‍ले परकारम बेरस्सेक दांतिट.
1PE 2:4 मिमेट जीवाते मंदना बंडातसोंटा किरिस्‍तुनगा वट, मनकालोर्क ओन हय्‍सा हिल्‍लुर गानि ओर पेनदा लोप्पो पेरकुत्‍तोर आनि विलुवातोर आंदुर.
1PE 2:5 मिमेटगुडा जीवाते मंदना बंडानलेसीं पवित्र आत्माता लोन दोहचेक मंतिट. येसु किरिस्‍तुनाहेंदाल पवित्र आत्माता बक्‍तितुन मोक्‍कु हीताप पेनदुक ओप्‍पनालायक मनालय, मिमेट पवित्र पेर्मालोरलेसीं निलाहतुर आंदिर.
1PE 2:6 बारित्‍ते दर्मसास्‍त्रमते पेन इल्‍हा इत्‍ता गदा: “नना सियोनते सेंकुमूला बंडतसंटोन वरोन इरसेक मंतन, ओन नना पेरतन, ओर वेल्‍ले विलुवातोर आंदुर. ओनापोर्रो बोर अय्ते विस्वासम इर्रंतोर, ओर बस्‍केने सिग्गुना पाल आयोर.”
1PE 2:7 अदुनहाटीं मिमेट विस्वासम कीतिर इंचि अद बंडा मीक विलुवातद, गानि बोर अय्ते अदुन विस्वासम किय्युर, ओराहाटीं दर्मसास्‍त्रम इल्‍हा वेहता गदा: “बद बंडातुन दोहानोर बतक ओज्‍जो इत्‍तुर, अदे बंडा इंदके सेंकु मूलाता मोदोल बंडा आता.”
1PE 2:8 इंका दर्मसास्‍त्रमते इल्‍हा मंता गदा, “अद बंडा लोकुल्‍कुंक दल्‍गंता, इंका पर्पु बंडा ओर्कुन हिळु अरहंता. बारित्‍ते, ओर पेनदा पोल्‍लेने ताकवाहेंके, बंडा दल्‍गिसि हिळु अर्रंतुर. ओर हिळु अर्रनाहाटींगे इल्‍हा निलाहमळ जर्गता.”
1PE 2:9 गानि मिमेट अय्ते पेन पेरकुत्‍ता वंसमतोर, राजुल्कुनसोंटा पेर्मालोर्क, पवित्र राज्येमतोर, पेनदा लोकुल्‍क आंदिर. अदुनहाटीं मिमेट दाना अद्‍बूतामाता कबाह्‍कुन वेहाना इंचि मीकुन हीकटताल अद्‍बूतामाता वेल्‍गुने तत्‍ता.
1PE 2:10 मुन्‍ने मिमेट पेनदा लोकुल्‍कगुडा मना हिल्‍लिर, गानि इंदके मिमेट पेनदा लोकुल्‍क आतिर. मुन्‍ने मीपोर्रो पेनदा दया मनाहिल्‍ले, गानि इंदके मीवापोर्रो पेनदा दया मंता.
1PE 2:11 नावा पावरमगल्‍लोरिटा, मिमेट वेरे देसेमतोर, वेरे नाटेनोर आसि मंतिर. अदुनहाटीं मी आत्माकु अड्‍डम मनानव दुनियातां अन्‍नि सेड्‍डा आसेनाल लक्‍कु मंटु इंचि विनंति कीसेके मंतन.
1PE 2:12 मिमेट अविस्वासुल्‍कुना नड्‍डुम मंतिट इंचि बेस ताकट. ओर मीकुन कराब लोकुल्‍क इंचि बदनाम किय्यिनागानि मीवा बेस कबाह्‍कुन हूळसि, पेन वायाना रोजुने ओर इंका पेनदा कदर कियानुर.
1PE 2:13 मिमेट सामिनाहाटीं दुनियाते मनना अदिकारिल्कुना कय्‍दा हिळु मंटु. राजाल पेद्‍दोड इंचि ओना कय्‍दा हिळु मंटु. अदिकारिल्कुना पोल्‍ले केंजाट, बारित्‍ते बेसता कबळ कियानोर्कुंक मेच्‍कुनालय आनि कराब कियानोर्कुंक सिक्‍सा हियालय ओर्कुन लोहमळ जर्गता.
1PE 2:15 बारित्‍ते, मीवां बेसता कबाह्‍कुन हूळसि, तेल्वि तक्‍को लोकुल्‍कुना तोड्‍डि बंद कियाना इंचि पेनदा इच्‍चा मंता.
1PE 2:16 मिमेट बोना कय्‍दा हिळु हिल्‍वाप मना परांतिट गानि “बोना कय्‍दा हिळु हिल्‍लोम” इंचि मीवा मनसुंक वाताप कराब कबाह्‍कुने ताकमट, पेनदा सेवाकुल्कुनलेसीं ताकट.
1PE 2:17 अंटोरा कदर कियाना, मना दंटता विस्‍वासुल्‍कुन पावरम कियाना. पेनदुक वेरियसि ताकना, राजाना कदर इर्राना.
1PE 2:18 जीतागाह्कुनिटा, मिमेट मीवा मालकुंक पूरा कदर हीसेक ओरा कय्‍दा हिळु मंटु. सिराप बेसता गुनम, सादा सिंपल मत्‍तोरहेकेन आयो गानि कडक मनना मालकुनगा गुडा ओर वेहताप ताकट.
1PE 2:19 बारित्‍ते बोरे आयिर पेनदा लोप्पो ताकानेंके तप्पु हिलाकोन्‍ना गानि देब्बां तिन्‍निना, तिप्‍पल्‍क वायिना, ओप्के पीसि मनानय्ते अद मेच्‍कुनना पोल्‍ले आंद.
1PE 2:20 निमे तप्‍पु कीसि देब्बां तित्‍तिन, ओप्के पीसि मत्‍तिन, अय्ते अव्टे नीकु बता पायदा वाता? गानि निमे ओक्‍कला बेसता कबाह्‍क कीसि देब्बां तिंचि ओप्के पीसि मनानय्ते, पेनदुक नच्‍चानोन आंदिन.
1PE 2:21 इदुनहाटींगे मीकुन पेन केयता आनि किरिस्‍तु मीवाहाटीं तकलिप अरतोर, मिमेट इंका ओना अळगुने अळगु वाटसि ओना पज्जो तकलिप अर्सि ताकना इंचि उंदि उदाहरनलेसीं पेन मीकुन निलाहता.
1PE 2:22 ओर बतले पापम किया हिल्‍लोर, ओना तोळ्‍दाल बस्‍केने बोंकिच्‍चना पोल्‍ले पेय्‍सा हिल्‍ले.
1PE 2:23 ओन तेरहिना गानि दानकु बदुल ओर बोने तेरहा हिल्‍लोर. ओन बच्‍चोनो तकलिप कीतुर गानि दानकु बदुल ओर बोर्कुने बेदरिचा हिल्‍लोर, दानकु बदुल सत्‍तेमते न्‍यायम कियाना पेनदुक ओनद-ओर अप्पजेपतोर.
1PE 2:24 मनम पापाल्कुनाहाटीं हासि होंचि सत्‍तेमताहाटीं पिसागोम इंचि येसु ओना मेंदुल्तुन क्रुस पोर्रो हीतोर. ओर तित्‍ता देब्बाना हेंदाल मना बिमार्क बेस आतां.
1PE 2:25 मुन्‍ने मिमेट हर्रि तप्‍ता गोर्रेनलेसीं तिरियसेक मत्‍तिर. गानि इंदके मीवा जीवातुन कापाळसि कोहानोनगा मल्सि वातिर.
1PE 3:1 अल्‍हेने मुत्‍तोह्कुनिटा, मिमेट मीवा मुय्दुरा कय्‍दा हिळु वेर्रेते मंटु. ओक्‍कला ओर पेनदा पोल्‍लेते ताकाकोंटे, पोल्‍लेनतोनि आयाकोन्‍ना मीवा पवित्र आनि सत्‍तेमते ताकानदुन हूळसि विस्वासमते वायानुर.
1PE 3:3 मीवा केल्कुन तीराता जेडां वाटमळ, बंगारमता नगां केरमळ, एक्‍को दराता कपळिं पोंडमळ इसोंटा पलाताल दिस्‍सना सिंगारम कियमट.
1PE 3:4 गानि दानकु बदुल मीवा मनसुना गुनम सादा-सिंपल, नासडेम आयवा सांत आत्माते सिंगारम कीम्‍टु. इसोंटद पेनदा मुन्‍ने बच्‍चोनो विलुवातद आंद.
1PE 3:5 एनकटा कालमते पेनदापोर्रो आसे इर्राना पवित्रमाता मुर्ताह्क बेसता गुनमते सिंगारिंचुंदुं आनि मुय्दोना पोल्‍लेते ताकुंदुं.
1PE 3:6 बल्हा अय्ते अब्राहामुना मुत्‍तो साराल ओन मालक इंचि केयुंदु, ओर वेहताप ताकुंदु, अल्‍हेने मिमेटगुडा बेसता कबाह्‍क कीसेके बदे पोल्‍लेक वेरियाकोंटा मत्‍ते, दाना मियाह्क आंतिर.
1PE 3:7 अल्‍हेने मुय्दुर्कुनिटा! मीवा मुत्‍तोह्कुंकगुडा मी अचोने पेनदा कुर्पाता वारसान हक्‍क मंता. गानि अवुंक मीलेसीं ताकत हिल्‍ले. अदुनहाटीं मिमेट मुत्‍तोह्कुंक बेस कदर हीसि पिस्‍सट. अस्‍के मीवा पारतनाकु बतले अड्‍डम वायो.
1PE 3:8 आकिरते, मिमेट उंदि मनसुने वरोंक-वरोर पावरम कियमळते, उंदि लोतोरलेसीं जीवा कियमळते, इंकावरोनहाटीं जीवा नोयमळते, सादा-सिंपल मनमळते अंटोर उंदि आसि मंटु.
1PE 3:9 कराबता बदला कराबतोनि एतमट; तेराहतोर इंचि तेराहमट गानि ओर्क आसिर्वाद हीम्टु. बारित्‍ते मीक आसिर्वाद दोर्काना इंचि पेन मीकुन केयता.
1PE 3:10 दर्मसास्‍त्रम वेहाताप, “बोर अय्ते पिस्वरतुन मेच्‍कुंचि, बेसता रोजकु हूळंतन इंतोर, ओर ओना नाल्केताल कराब पोल्‍लें, ओना पेद्‍विनाल आबद्‍दम पोल्‍लें वळ्‍कमळ आपापींता.
1PE 3:11 ओर कराब कबाह्‍कुन होळसिसि बेसता कबाह्‍क कियाना, ओर सांतितुन पहकिसि दान पीसि ताकाना.
1PE 3:12 बारित्‍ते सामिना नदर नीतिमंतुल्‍कुना पोर्रो मनंता, ओरा पारतनातुन केव हीसि केंजंतोर, गानि दुस्‍टुल्कुंक सामि विरोद कींतोर.”
1PE 3:13 ओक्‍कला मिमेट बेस कियानाहाटींगे जोसने मत्‍ते, मीकुन बोर हेळाहनुर?
1PE 3:14 ओक्‍कला मिमेटगिंटा नीति कबाह्‍क कियानेंके मीक कस्‍टाल्‍क वायिना, पेन मीक आसिर्वाद हिय्यार. ओर वेराहते मिमेट वेरियमट, परेसान आयमट.
1PE 3:15 गानि मीवा मनसुने किरिस्‍तु मावा सामि इंचि ओनकु कदर हीम्टु. येसुना पोर्रोटा मीवा आसेता बारेमते बोरन्‍ना मीकुन पूसकीते, मिमेट सादा-सिंपल आनि मान-मर्यादाते बस्‍केळ्‍क वेहालय तयार मंटु.
1PE 3:16 गानि मिमेट किरिस्‍तुना लोप्पो बेस पिसमळतुन हूळसि बोर अय्ते मीवा अपमानम कींतुर, असंटोर्क मीवा ताकमळतुन हूळसि सिग्गु वायानाल मीवा विवेक बुद्‍दितुन बेस इर्सि ताकट.
1PE 3:17 ओक्‍कला बेसता कबाह्‍क कीताहाटींगे तकलिप बोगांचमळ पेनदा इच्‍चा मत्‍ते, कराब कबाह्‍क कीसि तकलिप बोगांचना दानकन्‍ना, इदे बेस.
1PE 3:18 बारित्‍ते अंटोरा पापाल्कुनाहाटीं किरिस्‍तु उंदे मल्का हातोर. मनाकुन पेनदागा ओयालय वरोर नीतिमंतुड अनीतिमंतुनाहाटीं हातोर. मेंदुलताल ओन हव्कतुर गानि आत्माते ओन जीवाते तेहमळ जर्गता.
1PE 3:19 ओर हातोरा आत्मानगा होंचि, दोहचि वाटताप मत्‍ता आत्मांकु पेनदा कबुर वेहतोर.
1PE 3:20 एनकटा नोहाना कालमते डोंगा तयार कियानेंके लोकुल्‍क वायानुर इंचि पेन ओप्के पीसि एदुर हूळसेक मत्‍ता, गानि लोकुल्‍क पेनदा पोल्‍ले केंजा हिल्‍लुर. सिराप एनमिदि लोकुल्‍क पेनदुन नम्मिसि आ कम्मुळता एताल पिस्तुर.
1PE 3:21 आ एताल पिस्ता आनवल इत्‍तेने बापतिस्मा आंद. बापतिस्मा एतमळ इत्‍ते मेंदुलता मुर्कि होनालय आयो गानि येसु किरिस्‍तु हासि मर्रा जीवाते तेदताहेंदाल मनाकुन पिसागोटसि, विवेक बुद्‍दिताहाटीं पेनदुन विनंति कियाना करार आंद.
1PE 3:22 इंदके येसु किरिस्‍तु स्वर्गमते होंचि पेनबाबाना तिना बाजुंक उद्तोर. अगा पेनदा दूतां, अदिकाराल्‍क, सक्‍तिं ओना कय हिळु मंतां.
1PE 4:1 बल्हा अय्ते किरिस्‍तु मेंदुल्ते मत्‍तस्के तकलिप बोगांचतोर, मिमेटगुडा ओनसोंटा मनसु इर्सि दान मीवा विस्रेलेसीं वाळकुंटु. बारित्‍ते, बोर अय्ते तकलिप बोगांचंतोर, ओर पापमतुन होळसींतोर.
1PE 4:2 ओर वायाना रोजकुने मेंदुल्ता इच्‍चाना परकारम आयो गानि पेनदा इच्‍चा परकारम पिस्संतोर.
1PE 4:3 मोदाला मिमेट यहुदि आयवोरा इच्‍चाना परकारम बोगमतनम कियमळ, जोसते मनमळ, कल्‍लु उनमळ, पार्टिं कियमळ, रिम्मा आयमळ, नियमकु विरोदमते ताकमळ, बतक ओज्जुवा बोम्मन मोळ्कमळ इल्‍हा कियिंदिर, इद वेल्‍लेने आता.
1PE 4:4 इंदके मिमेट असोंटा पेद्‍दा बोगमतनाल्कुने ओरतोनि कलियसेके हिल्‍लिर इंचि ओर इचंत्रम आसेक मंतुर. अदुनहाटीं ओर मीकुन बदनाम कीसंतुर.
1PE 4:5 गानि हातोरा, पिस्तोरा न्‍यायम कियालय तयार मनना पेनदुक ओरा पिस्वरता लेक्‍का हियापींता.
1PE 4:6 मेंदुल्ते मत्‍तास्‍के न्‍यायम मनकालोरा इच्‍चातुन पीसि आयिनागानि, आत्मा मात्रम पेनदा इच्‍चा परकारम पिस्‍साना इंचि बोर अय्ते हासि मत्‍तुर, ओर्कगुडा बेसता कबुर वेहमळ जर्गता.
1PE 4:7 इंदके दुनियाते मनना अन्‍निटवुना आकिर रोजकु दग्‍गेरा एवतां. अदुनहाटीं मिमेट पारतना कियानेंके बेस विचारमते, तेल्‍विते मंटु.
1PE 4:8 अन्‍निंकन्‍ना पेद्‍दा पोल्‍ले बतल इत्‍ते, वरोंक-वरोर एक्‍को पावरम कीम्‍टु, अल्हा कीते वेल्‍लेने पापाल्कुन मापि किया परकिर.
1PE 4:9 बतले गुल्‍गाकोंटा वरोंक-वरोर हेडमितोरलेसीं बेस हूळकुंटु.
1PE 4:10 अंटोर्क वेरे-वेरे वरम दोर्कता, अदुनहाटीं वरोंक-वरोर सेवा कियालय पेनदा तीरतीराता कुर्पा दोर्कता बेसता दिवांजिनलेसीं अदुन वाळकुंटु.
1PE 4:11 बोन्क अय्ते पेनदा पोल्‍ले वेहाना वरम दोर्कता, ओर पेन वेहतापे वळ्कना. बोर अय्ते सेवा कींतोर, ओर पेन हिय्यना बलमतेने कियाना. अन्‍नि पोल्‍लेने येसु किरिस्‍तुनाहेंदाल पेनदुके महिमा दोर्काना. महिमा आनि ताकत युगा-युगाल्‍कुनदाका पेनदादे आंद. आमीन.
1PE 4:12 नावा पावरमगल्‍लोरिटा! मीवा परिक्‍सा कियानाहाटीं मीवापोर्रो तळमितसोंटा तकलिपकु वांतां, अस्‍के मिमेट “बस्‍केने जर्गवद जर्गना मंता” इंचि, परेसान आयमटु. गानि मोमोटगुडा किरिस्‍तुना दुक्‍कमते पोत्‍तु आतोम इंचि कुसिते मंटु. किरिस्‍तु मल्सि वासि ओना पेद्‍दातनमतुन हुपिस्तस्के मिमेट वेल्‍ले कूस आकिट.
1PE 4:14 मीकुन ओक्‍कला बोरन्‍ना किरिस्‍तुना पोरोलताहेंदाल अपमानम कीते, मिमेट आसिर्वाद दोर्कतोरे आंदिर. बारित्‍ते पेनदा महिमाता आत्मा मीपोर्रो मंता.
1PE 4:15 गानि मीवा लोप्पोटोर बोरे आयिर, हव्कताहेंका, दोंगातनम कीताहेंका, तप्‍पुड कबळ कीताहेंका, वेरेतोरा कबळते कय वाटताहेंका दुक्‍कम बोगांचा मन्‍नि.
1PE 4:16 ओक्‍कला मीलोप्‍पो बोरन्‍ना किरिस्‍तुनोर आताहाटीं तकलिपकु बोगांचनय्ते, ओर सिग्गु अर्रानायो, गानि किरिस्‍तुना पोरोल दोर्कताहाटीं पेनदुक महिमा हियागोम.
1PE 4:17 बारित्‍ते न्‍यायम कियाना वेला एवता. पेन मनातोने न्‍यायम सुरुव कींता अय्ते, बोर अय्ते पेनदा बेसता कबुरतुन केंजुर ओरा गति बतल आयार?
1PE 4:18 ओक्‍कला नीतिमंतुके मुक्‍ति दोर्कुळ कस्‍टम आयानय्ते, दुस्‍टुल्क आनि पापिल्कुनद बतल आयार?
1PE 4:19 अदुनहाटीं बोर अय्ते पेनदा इच्‍चा मत्‍ताप तकलिप अरसेक मंतुरो, ओर बेसता कबाह्‍क कीसेके, मनाकुन पुटिस्ता विस्वासमल्‍ला पेनदुक ओरा आत्मानु अप्पजेप्पना.
1PE 5:1 मीलोप्‍पो बोर अय्ते पेद्‍दाल्क मंतुर, ओरालेसींगे ननागुडा पेद्‍दा मनकन, किरिस्‍तु बोगांचता तकलिपकुना गवाइतोन, ओर मल्सि वायानस्के ओना पेद्‍दातनमते कलियानोन आंदुन इंचि, नना आ पेद्‍दाल्कुंक वेहासेक मंतन.
1PE 5:2 मीवा जिम्मेदारिते मत्‍ता पेनदा मंदातुन पोस कीम्‍टु. इद कबळ बलमिते आयो गानि पेनदा इच्‍चा परकारम कुसिते कीम्‍टु, दोंगा कमाइताहाटीं आयो गानि मनसुनाल कीम्‍टु.
1PE 5:3 मीकु अप्पजेपता मंदापोर्रो अदिकारम हूप्‍साकोंटा, ओरा मुन्‍ने उंदि उदाहरनलेसीं मंटु.
1PE 5:4 इल्‍हा मत्‍तिर इत्‍ते अंटोर्कुंकन्‍ना पेद्‍दा कोहानोर किरिस्‍तु वायानुर अस्‍के, बस्‍केने कळियसि होनवसोंटा पेद्‍दातनमता किरिटम मीकु दोर्कार.
1PE 5:5 अल्‍हेने ए लेय्युरिटा! मिमेटगुडा पेद्‍दाल्क वेहताप ताकट, वरोंक-वरोर सेवा कियानाहाटीं सिन्‍नागासि मुन्‍ने ताकट. बारित्‍ते, पेन गर्रा कियानोर्कुंक अड्‍डम तिरियंता, गानि सादा-सिंपल मंचि ताकानोर्कुंक कुर्पा हींता.
1PE 5:6 पेन मीकुन इनकुत्‍ता वेला वातारिते पेद्‍दा कियाना इंचि मिमेट दाना बलमगल्‍ला कय्‍दा हिळु सिन्‍नागासि मंटु.
1PE 5:7 पेन मीवा रंदि कींता, अदुनहाटीं मीवा अन्‍नि रंदिं अदुनपोर्रेन होळसीम्टु.
1PE 5:8 मीवा पगातद पेद्‍दा देय्यम बोन तिनकन इंचि सिंहमतालेसीं वरगेयसेके नालुं मूलां तिरियसेक मंता, अदुनहाटीं हुसारते, तेल्‍विते मंटु.
1PE 5:9 मिमेट विस्वासमते गट्‍टिगा मंचि, दान्क विरोद कीम्‍टु. दुनियाते मनानोर विस्वासुल्कगुडा इल्हेने तकलिप बोगांचेके मंतुर इद मीक एरपाटे मंता.
1PE 5:10 अन्‍नि तीरकुना कुर्पा कियाना पेन मीकुन किरिस्‍तुना लोप्पो दाना बस्‍केळ्‍क मनना पेद्‍दातनमहाटीं केयता. मिमेट कोन्‍नि रोजकु तकलिपकु बोगांचतंका अदे पेन मीकुन दानलायक कींता, मीकु बलम हीसि निलाहंता.
1PE 5:11 दानादे राज्येम युगा-युगाल्‍कुनदाका मन्‍निकांटी, आमीन.
1PE 5:12 विस्वासमगल्‍ला तम्मुर इंचि नना नम्मुता सिल्‍वानुसना कय्‍दे इद सिन्‍ना सिट्‍टि रासतन. इदे पेनदा निजम कुर्पा आंदु, इव्टे मिमेट गट्‍टिगा निल्‍सि मंटु, इंचि नना मीकु इद सिट्‍टिते रासि तेळियागोट्‍सि वेहासेक मंतन.
1PE 5:13 मीवा लेसींगे बेबिलोनते पेन पेरता लोकुल्‍क मंतुर, ओर मीक जोहार वेहासेक मंतुर. नावा मर्रिनसंटोर मरकुसगुडा मीक जोहार वेहासेक मंतोर.
1PE 5:14 मिमेट वरोंक-वरोर कय कल्‍पिसि पवित्र पावरमते जोहार कीम्‍टु. बोर अय्ते किरिस्‍तुने मंतुर मी अंटोर्क सांति दोर्कि.
2PE 1:1 नना सिमोन पत्रुन, येसु किरिस्‍तुना दासुन आनि प्रेरितुन आंदुन. बोर अय्ते मना पेन आनि मुक्‍ति हियना येसु किरिस्‍तुना सत्‍तेमताहेंदाल मावालेसीं विलुवाता विस्वासम दोर्किच्‍कुत्‍तुर, ओर्क इद सिट्‍टि रासेके मंतन.
2PE 1:2 पेन आनि मना सामि येसुना तेल्विहेंदाल मीकु कुर्पा, सांति वेल्‍लेने बेर्स्‍सेके मन्‍निकांटी.
2PE 1:3 मना पिस्वर आनि बक्‍तिताहाटीं पेन दाना ताकतताहेंदाल मनाकु बतल गावाले अव अन्‍नि हीता. मनम अदुन एरपाट कीताहाटीं अव मनाकु दोर्कतां. अद मनाकुन दाना महिमा आनि बेसतनमहेंदाल केयता.
2PE 1:4 दुनियाते मनना कराब आसेनाल पुट्‍टना रोता गुनमताल तपिच्‍कुंचि, मनम पेनदा बेस गुनमता हिस्सेदार्क आयाना इंचि अद मनाकु विलुवाता पोल्‍लें हीता.
2PE 1:5 अदुनहाटीं मिमेट अन्‍नि तीरकुना कोसिस कीम्‍टु गदा, विस्वासमते बेसता गुनाल्‍क, बेसता गुनाल्‍कुने तेल्वि,
2PE 1:6 तेल्‍विते सततुन आपकुनमळ, सततुन आपकुनमळते दैरनेम, दैरनेमते बक्‍ति.
2PE 1:7 बक्‍तिते दादल-तम्मुना कूळमळ, दादल-तम्मुना कूळमळते पावरम कल्‍पट.
2PE 1:8 ओक्‍कला इव अन्‍नि पोल्‍लें मीलोप्‍पो मंचि बेर्स्‍सेके होनानय्ते, अव मीकुन मना सामि येसु किरिस्‍तुना तेल्‍विता बारेमते एक्‍को हुसार, बेस कबळलायक कींतां.
2PE 1:9 गानि बोनगा इव गुनाल्‍क हिल्‍लेंगो ओर गुड्‍डि आंदुर, लक्‍कुटा नदर हिल्वोर आंदुर. ओना पडाना पापाल्कुन पेन नोर्सि ओना सुद्‍दिकरन कीतदगुडा मति मर्गतोर.
2PE 1:10 अदुनहाटीं विस्वासुल्‍कुनिटा! पेन मीकुन केय्‍सि पेरता इत्‍ता पोल्‍लेतुन पक्‍का कियालय बस्‍केळ्‍क आतच्‍चोन कोसिस कीम्‍टु, अल्हा कीते मिमेट बस्‍केने विस्वासमताल अर्सि होन्‍निर.
2PE 1:11 इल्‍हा मिमेट मना सामि, मुक्‍ति हियना येसु किरिस्‍तुना बस्‍केळ्‍क मंदना राज्येमते वेल्‍ले कदरते होळिया परांतिट.
2PE 1:12 अदुनहाटींगे, इव पोल्‍लें मीक तेळियसि मनिना, मीकु दोर्कता सत्‍तेमते मिमेट गट्‍टिगा निल्‍सि मनिना, नना मीकु बस्‍केळ्‍क मति कीसि हीसेक मनंतन.
2PE 1:13 नना इद मेंदुलते मत्‍तच्‍चोरजेम मीक इवुन मति कीसि हीसि मीकुन हुसार कियमळे, बेस इनकुंतन.
2PE 1:14 बारित्‍ते, मना सामि येसु किरिस्‍तु नाकु हुपिस्ताप, नावा मेंदुल्तुन बिराने होळसंतन इंचि नाकु एरपाट मंता.
2PE 1:15 अदुनहाटीं नना हासोत्‍तंकागुडा मिमेट इव पोल्‍लेन बस्‍केळ्‍क मति कियनलायक मिमेट आयगोम इंचि नना कोसिस कीसंतन.
2PE 1:16 बारित्‍ते, मना सामि येसु किरिस्‍तुना ताकत आनि ओना मल्सि वायाना बारेमते मोमोट मीकु वेहतस्के, तयार कीसि वेहता कतन कल्‍पिसि वेहा हिल्‍लोम. गानि मोमोट ओना पेद्‍दातनमता वेलगुन कळ्‍कुने हूळसि वेहतोम.
2PE 1:17 बस्के अय्ते पेनबाबानाहेंदाल कदर आनि महिमा दोर्कता, अस्‍के आ स्वर्गमताल, “ईर नावा पावरमगल्‍ला मर्रि आंदुर, ईनतोनि नना आनंदमते मंतन,” इंचि उंदि अल्किर आ महिमाता वेल्‍गुनाल केंजावाता.
2PE 1:18 स्वर्गमताल वाता आ अल्किरतुन केंजतस्के, मोमोट पवित्र गुट्‍टापोर्रो येसुनतोनि मत्‍तोम.
2PE 1:19 मनाकु पेनदा कबुरतोरा पोल्‍लेपोर्रो एक्‍को बरोसा अनपिस्ता. अद पोल्‍ले हीकटते एलगना वेळसिलेसीं दिसंता. अदुनहाटीं पंगातारित्‍ते हक्‍केटा सुक्‍का मीवा मनसुने एलगनदाका आ पोल्‍ले परकारम ताकते मीके बेस.
2PE 1:20 दर्मसास्‍त्रमते मत्‍तव पेनदा कबुरतोरा पोल्‍लें ओरा सतता मनसुना विचारमतोनि रासतव आयों, इदुन मिमेट मुन्‍ने एरपाट कियमळ गावाले.
2PE 1:21 बारित्‍ते बवे बविस्यवानिं मनकना इच्‍चाताहेंदाल वाया हिल्‍लें, गानि पवित्र आत्माते निंडता लोकुल्‍के पेनदाहेंदाल वळ्‍कुंदुर.
2PE 2:1 अस्‍के बल्हा लोकुल्‍कुना नड्‍डुम आबद्‍दम कबुरतोर मत्‍तुर, अल्‍हेने मीवा नड्‍डुमगुडा आबद्‍दम कराहनोर मंदानुर. नासडेम कियाना नियमकुन ओर मक्‍किस पीसि वांतुर आनि बोर सामि अय्ते ओर्कुन अस्तोर, ओनगुडा ओर ओप्‍कुन्‍नुर. इल्‍हा ओरद-ओरे नासडेमतुन बिराना ओरापोर्रो तरकुंतुर.
2PE 2:2 वेल्‍ले लोकुल्‍क ओरा सिग्गु हिल्वा कबाह्‍कुन हूळसि ओरालेह्केन कियानुर. ओरसंटोराहाटींगे सत्‍तेमता हर्रि बदनाम आंता.
2PE 2:3 आबद्‍दम कराहनोर, आस्तिताहाटीं तिय्यटा पोल्‍लें वेह्‍चि मीकुन ओरा पायदाहाटीं वाळकुंतुर. ओर्क हीता सिक्‍साता आदेस मुन्‍नेटाल मंता, ओरा नासडेम कूर्कसेके हिल्‍ले.
2PE 2:4 बारित्‍ते, बस्के अय्ते पेनदा दूतां पापम कीतां, अस्‍के पेन अवुनगुडा होळसा हिल्‍ले. न्‍यायमता रोजु वायानादाका अवुन नरकमते हीकटता पोक्‍काने वाटसि इरता.
2PE 2:5 अचोने आयाका पेन एनकटा कालमता दुनियातुनगुडा होळसा हिल्‍ले, अद कालमते बक्‍ति हिल्वा लोकुल्‍कुना दुनियापोर्रो पेद्‍दा कम्मुळतुन वायागोटता. गानि सत्‍तेमता पोल्‍लें वेहता नोहानतोनि एडुरकुन पिसागोटता.
2PE 2:6 अल्‍हेने सदोम, गमोरा सहरकुने लोत इनानोर वरोर नीतिमंतुड मत्‍तोर. ओर आ सहरता दुस्‍ट लोकुल्‍कुना दुस्‍ट कबाह्‍कुनाहेंका वेल्‍ले दुक्‍कमते मनुंदुर. अदुनहाटीं पेन ओन सिक्‍साताल पिसागोटसि, आ सहरकुन बूळ्‍दि कीसि पोहता. इल्‍हा बोर अय्ते बक्‍ति हिलाका पिसंतुर ओर्कु इसोंटा सिक्‍सा वांता इंचि उदाहरनलेसीं हुपिस्‍ता.
2PE 2:8 आ नीतिमंतुड ओरा नड्‍डुम मत्‍ताहाटीं ओर कियाना रोता कबाह्‍क हूळसि, ओरा पोल्‍लें केंजसि, ओना जीवाक रोज-रोज इरगा बादा अनपिच्‍चुंदु.
2PE 2:9 इल्‍हा, बक्‍तिगल्‍लोर्कुन परिक्‍सानाल बल्हा कापाळना आनि बक्‍ति हिल्वोर्कुन न्‍यायमता रोजुनदाका सिक्‍साते बल्हा वाटसि इर्राना इत्‍तद सामिंक तेळियसे मंता.
2PE 2:10 कास कीसि, बोर अय्ते पापमते अल्हेन मेंदुलता आसेता अदिकारमते मंतुर, ओर इरगा गर्रा आनि जिद्‍दिते निंडसि मत्‍ताहेंका स्वर्गमकु संबंदिंचि मत्‍तोर्कुनगुडा तेराहलय वेरियुर.
2PE 2:11 पेनदा दूतां अय्ते ओरकन्‍ना एक्‍को ताकत, बलम मत्‍तव आंदुं, अयना सामिना मुन्‍ने ओरा बारेमते तेराहनसोंटा पोल्‍लें वळ्‍किसि ओरपोर्रो दोसेम दोस्‍सों.
2PE 2:12 गानि ईर ई लोकुल्‍क ओर्क तेळियवा पोल्‍लेना बारेमते तेराहसेक मनांतुर, दोर्कापीसि हव्कानाहाटीं पुटता बुद्‍दि हिल्वा जिवरासिनसंटोर ईर आंदुर. अवुनालेसीं ईरगुडा नासडेम आंतुर.
2PE 2:13 ओरा तप्‍पुड कबाह्‍कुन पीसि ओर्कु पलम दोर्कंता. पोद्‍दला तिनुळ-उनुळ कियमळतेन वेल्‍लेन कुसि मंता इनकुंतुर. ओर मीवातोनि कलियसि गाटो तिननेंकेगुडा अल्हेन कीसि ओर ओरा मजां येतसेके मनंतुर. अदुनहाटीं ओर मीवा नड्‍डुम उंदि डाग आनि कलंक आंदुर.
2PE 2:14 ओरा कळ्‍क बोगमतनमते निंडिस मंतां. ओर पापम कियाका मन्‍ना पर्रुर. विस्वासमते गट्‍टिगा हिल्वोर्कुन नळेह कीसि पापमते अरहंतुर. ओरा मनसु आस्तिक अलवट आसि मंता. ओर सापनेमते मत्‍तोरा मर्क आंदुर,
2PE 2:15 ओर सवरटा हरदाल तप्‍सोत्‍तोर आंदुर, बोअरना मर्रि बिलाम इननोना हर्रि पीतुर. बिलामुंकु कराब कबाह्‍कुना कूलि पसंद मत्‍ता.
2PE 2:16 गानि ओर कीता कराब कबाह्कुनाहाटीं ओनकु तेळियागोट्‍सि वेहमळ जर्गता. वळ्का वायवा उंदि गाडदि मनकना लेंगुने आ पेनदा कबुरतोना मुर्कतनमतुन आपता.
2PE 2:17 ओर एर हिल्वा कुहिं आनि दुमारम तेह्‍कुंचि ओयाना मब्बु तेर्पे आंदुर. ओराहाटीं बस्‍केळ्‍क हीकट मनना उंदि जेगा तयार कीसि मंता.
2PE 2:18 ओर बत्‍तक ओज्जुवा पोंगुळ पोल्‍लें वळ्कसेके मनंतुर, तप्‍पुड हर्रि ताकानोरव्टेटाल तपिच्‍कुंचि इंदके-इंदकेने बेसता हर्दे वातोर्कुन, ओर ओरा मेंदुल्ता रोता आसेना हेंदाल बोगमतनमते अरहंतुर.
2PE 2:19 ओर कुद्‍दे कराब कबाह्‍कुना दासुल्क आसि, इंकावरोन असोंटा गतिताल तेंडांतोम इंचि पोल्‍ले हींतुर. बारित्‍ते वरोर मनकन बतलय्ते गेल्संतोरो, ओर अदुना दासुड आसि मनंतोर.
2PE 2:20 ओरगिंटा मना सामि मुक्‍ति हियना येसु किरिस्‍तुना तेल्‍विता हेंदाल दुनियाता कराब कबाह्कुनाल पलाते अरतंका, मर्रा अवे कराब कबाह्‍कुने हिरकिसि अवुना लोप्‍पोने ताकते, ओना गति मुन्‍नेटा गतिकन्‍ना आकिरता गति वेल्‍ले कराब मनंता.
2PE 2:21 बारित्‍ते ओर सत्‍तेमता हरदुन एरपाट कीसि, ओर्क हीता पवित्र आदेसताल तप्‍सि होनमळकन्‍ना, अद हर्रि ओर्कु तेळियका मनमळे बेस मत्‍ता.
2PE 2:22 इद ओरा बारेमते, “नय अद कक्‍कुतदुन तिनालय मर्रा मल्‍लंता, बेस नोरता पद्‍दि मर्रा बुर्दातेन पोर्लंता,” इनना निजम सात्रम परकारम जर्गता.
2PE 3:1 पावरमगल्‍लोरिटा! इद रोंडो सिट्‍टि नना मीक रासतन. इव रोंडु सिट्‍टिने मीवा पवित्र मनसुन जेगर्ताते इर्राट इंचि नना मति कीसि हीतन.
2PE 3:2 अदुनहाटीं मिमेट पवित्र पेनदा कबुरतोर मुन्‍नेने वेहचि मत्‍ता पोल्‍लेन अल्‍हेने प्रेरितुल्‍कुना हेंदाल वेहतव सामि आनि मुक्‍ति हियानोना आदेसकुन मति इर्रागोम.
2PE 3:3 आकिर रोजकुने मीकुन कारेड्‍डाल्‍क कियानोर वायानुर, वासि ओर ओरा कराब इच्‍चाना परकारम ताकानुर, इद पोल्‍ले मीक मुन्‍ने तेळियमळ गावाले.
2PE 3:4 इंका ओर वासि, “ओर मर्रा वांतोर इंचि हीता पोल्‍ले बतल आता? मावा एनकटा पेद्‍दाल्क अय्ते हासोत्‍तुर, दुनिया पुटतस्केटाल अन्‍नि पोल्‍लें बल्हा मत्‍तव अल्हे मंतां,” इंचि मीकुन पूसकींतुर.
2PE 3:5 इंका ओर, वेल्‍लेन वर्सां मुन्‍ने पेन दाना पोल्‍लेतोनि बूमितुन, मब्बुन एताल पुटिस्ता. पुट्‍टिचि एतुन वेरे कीसि निल्‍हाता, इद पोल्‍ले ओर्क तेळियसिगुडा मति मरुंगतुर.
2PE 3:6 अद कालमता दुनिया कम्मुळते मुळगिसि एताहेंदाले नासडेम आता.
2PE 3:7 गानि इंदके मनना मब्बु, बूमितुन, अदे पोल्‍लेते तळमितोनि नासडेम कियाना रोजुनदाका कापाळसि इरसेक मंता. बक्‍ति हिल्‍वोरा न्‍यायम नासडेम आयाना रोजुनदाका अल्हेन मनंता.
2PE 3:8 गानि पावरमगल्‍लोरिटा! सामिनगा उंदि रोजु वेय वर्सानालेसीं आनि वेय वर्सां उंदि रोजुनलेसीं मनंतां इद पोल्‍लेतुन मति मर्गमटु.
2PE 3:9 सामि हीता पोल्‍ले पूरा कियालय ओर आल्सेम कीसेक मंतोर इंचि इच्‍चुर इंतुर, ओर अल्हा आल्सेम कीसेक हिल्‍लोर. गानि बोरे मनकल नासडेम आयाकोंटा, अंटोर्क ओरा मनसु मार्सकुनना मोका दोर्कना इंचि मीवा बारेमते ओर्सुकुंचेके मंतोर.
2PE 3:10 गानि सामि मल्सि वायाना रोजु दोंगानलेसीं वांता. अस्‍के मब्बु पेद्‍दा आवाजतोनि दिसाकोंटा आंता. मब्बुने मनानव अन्‍नि तळमिते कर्गिस दांतां आनि बूमि, बूमिपोर्रो मत्‍तव अन्‍नि वेसि दांतां.
2PE 3:11 इवन्‍नि नासडेम आयाना मंता, अदुनहाटीं मिमेट पवित्र अल्हेन पेनदा पिस्वरते बल्हा मंदगोम, विचारम कीम्‍टु.
2PE 3:12 पेन वायाना रोजुनाहाटीं मिमेट एदुर हूळसेक मंतिर, अद बिराना वायाना इंचि कोरसेके मंटु. अद रोजु मब्बु तळमिते वेसि नासडेम आंता आनि अवुने मत्‍तव अन्‍नि बारे तळमि दगडाकु कर्गिस दांतां.
2PE 3:13 गानि पेन हीता पोल्‍ले परकारम मनम पूना मब्बु, पूना बूमिताहाटीं एदुर हूळसेक मंतोम. अगा सत्‍तेमे निल्‍सि मनंता.
2PE 3:14 अदुनहाटीं पावरमगल्‍लोरिटा, मिमेट इवुनाहाटीं एदुर हूळसेक मंतिट, अय्ते पेनदा मुन्‍ने सांतिते, डाग हिलाकोंटा, दोसेम हिलाकोंटा मनालय कोसिस कीम्‍टु.
2PE 3:15 मना सामिना ओप्के पीसि मनमळ मना मुक्‍तिहाटींगे इंचि इनकुंटु. सामि हीता बुद्‍दि परकारमे मना पावरमगल्‍ला पौलुस दादल मीक इव पोल्‍लें रासतोर.
2PE 3:16 इवुना बारेमते ओर ओना अन्‍नि सिट्‍टिने रासतोर. गानि अव्टेटाल इच्‍चुं पोल्‍लें तेळियालय वेल्‍लेन कस्‍टम मंतां. करियवोर, उंदि पोल्‍लेते निल्‍सि मनवोर, वेरे दर्मसास्‍त्रमते मत्‍ता पोल्‍लेन कीताप इवुनगुडा कींतुर. अल्हा कीसि ओरा नासडेमतुन ओरे तरकुंतुर.
2PE 3:17 अदुनहाटीं पावरमगल्‍लोरिटा! मीक इव पोल्‍लें मुन्‍नेटाले एरपाट मंतां, नीति हिल्वा लोकुल्‍कुना तप्पुकुने हिरकिसि, मीवा गट्‍टिगा निल्‍सि मत्‍ता हरदाल तप्‍पिसि होनाकोंटा हुसारते मंटु.
2PE 3:18 मना सामि मुक्‍ति हियना येसु किरिस्‍तुना कुर्पाते, तेल्‍विते मिमेट बेर्स्‍सेके होंटु. इंदके बस्‍केळ्‍क ओन्‍के पेद्‍दातनम दोर्किकांटी, आमीन.
1JO 1:1 मोट्‍टा मोदोल्ताल बोर अय्ते मत्‍तोर, ओना बारेमते मोमोट मीकु वेहचंतोम. ओन मोमोट केंजतोम, ओन मावा कळ्‍कुने हूळतोम, मंचिगा हूळसि मावा कय्‍कुने ओन इट्तोम. पिस्वर हिय्यना पोल्‍ले ओरे आंदुर.
1JO 1:2 आ बस्‍केळ्‍क पिस्‍साना पिस्वर हिय्यना पोल्‍ले मोदाला पेनबाबानतोनि मत्‍तोर. ओन पेन मनकाना रूपमते मारियागोटसि बूमिते लोहताहेंका मोमोट ओन हूळतोम, इंचि गवाइ वेहांतोम. अल्‍हेने आ बस्‍केळ्‍क पिस्‍साना पिस्वरता बारेमता कबुर मीकु वेहांतोम.
1JO 1:3 मोमोट अय्ते पेनबाबानतोनि ओना मर्रि येसु किरिस्‍तुनतोनि कलियसि उंदासि पिस्सेक मंतोम, अदुनहाटीं मोमोट बतल अय्ते हूळतोम, केंजतोम, अदुना बारेमते मीकुगुडा वेहासेक मंतोम. दीनहेंदाल मिमेटगुडा मातोनि कलियसि मनम उंदासि मंदकोम.
1JO 1:4 मिमेट मातोनि कलियसि मावा आनंदम पुरागा आयाना इंचि मोमोट इव पोल्‍लें मीकु रासेक मंतोम.
1JO 1:5 येसुनाहेंदाल मोमोट बद कबुर अय्ते केंजतोमो, अदे कबुर मीकु वेहांतोम. अद बतल इत्‍ते, पेन वेलगु आंद, दानागा गिचचोगुडा हीकट हिल्‍ले.
1JO 1:6 ओक्‍कला मनम पेनतोनि कलियसि मंतोम इंचि वेहचि, हीकटते ताकानय्ते मनम आबद्‍दम वळ्‍कंतोम, सत्‍तेमते ताकसेक हिल्‍लोम.
1JO 1:7 गानि पेन बल्हा वेलगुने मंता, अल्हा मनमगुडा वेलगुने ताकानय्ते, मनम वरोनतोनि वरोर कलियसि उंदासि मत्‍ताप मनंतोम. अस्‍के पेनदा मर्रि येसुना नेत्‍तुर, मनाकुन मना अन्‍नि पापाल्कुनाल पुरागा बेस साप कींता.
1JO 1:8 ओक्‍कला मनमगिंटा, महगा बदे पापम हिल्‍ले इंचि वेहकुनानय्ते, मनद मनमे पसांचकुंचंतोम, मनालोप्‍पो सत्‍तेम हिल्‍ले.
1JO 1:9 गानि पेन नीति आनि विस्वासमगल्‍लद आंद. अदुनहाटीं ओक्‍कला मनम मना पापाल्कुन दाना मुन्‍ने ओपकुनानय्ते, अद मना पापाल्कुन मापि कीसि, मनाकुन मना अन्‍नि तप्‍पुड कबाह्कुनाल बेस साप कींता.
1JO 1:10 ओक्‍कला, “मोमोट पापम किया हिल्‍लोम” इंचि मनम इनानय्ते, मनम पेनदुन आबद्‍दम हिळु अरहंतोम. दाना पोल्‍ले मनालोप्‍पो हिल्‍ले.
1JO 2:1 नावा पिलाल्‍कुनिटा! मिमेट पापम कियामन्‍नि इंचि नना इव पोल्‍लें मीकु रासेक मंतन. गानि ओक्‍कला बोरन्‍ना पापम कियानय्ते, मनाहेंदाल पेनबाबानतोनि वळ्कालय ओनगा वरोर सहायम कियानोर मंतोर, ओरे नीतिमंतुड येसु किरिस्‍तु आंदुर.
1JO 2:2 मना पापाल्क मापि आयाना इंचि ओर मनाहाटीं मोक्‍कु आतोर. ओर सिराप मना पापाल्क मापि आयानाहाटींगे आयो, पूरा दुनियातोरा पापाल्क मापि आयानाहाटीं मोक्‍कु आतोर.
1JO 2:3 मनम ओक्‍कला ओना आदेसकुन पीसि ताकानय्ते, ओन मनम बेस तेल्‍पिचकुत्‍तोम इंचि मनाकु बरोबर तेळियंता.
1JO 2:4 बोर अय्ते, “नना पेनदुन तेल्‍पिचकुत्‍तन,” इंचि इंतोर, गानि दाना आदेसकुन पीसि ताकोर ओर पोंगुळ आंदुर. ओनगा सत्‍तेम हिल्‍ले.
1JO 2:5 गानि बोर अय्ते पेनदा पोल्‍लेतुन पीसि ताकंतोर, ओनगा पेनदा पावरम निजमे पुरागा आता. दीनहेंदाले, मनम वरोनतोनि वरोर कलियसि उंदासि मंतोम इत्‍तद तेळियसि दांता.
1JO 2:6 बोर अय्ते, “नना पेनतोनि कलियसि पिस्सेक मंतन,” इंचि वेहंतोरो, ओर कुद्‍दु किरिस्‍तु पिसतसोंटा पिस्वर पिसागोम.
1JO 2:7 नावा पावरमगल्‍लोरिटा! नना इंदके मीकु पूना आदेस रासेक हिल्‍लेन, मोदोटाल मीकु तेळियसि मत्‍ता पडाना आदेसे आंदु.
1JO 2:8 अयना नना उंदि पूना आदेसतुन मीकु रासेक मंतन. इद किरिस्‍तुना लोप्पो, मीलोप्‍पो सत्‍तेमते मंता. बारित्‍ते हीकट माय्‍सि होनालय आसंता, सत्‍तेमता वेलगु अय्ते मेर्सेकेन मंता.
1JO 2:9 बोर अय्ते, “नना वेलगुने मंतन,” इंचि वेहकुंचि, ओना दंटा विस्वासिन हय्‍सोर, ओर इंकागुडा हीकटतेन मंतोर.
1JO 2:10 बोर अय्ते ओना दादन पावरम कींतोर, ओर वेलगुने निल्‍सि मनंतोर. ओनगा पापमते अर्रना लायकतद बदे पोल्‍ले हिल्‍ले.
1JO 2:11 गानि बोर अय्ते ओना दादन हय्‍सोर, ओर हीकटते मंतोर. हीकटतेन पिस्सेक मंतोर. हीकटहाटीं ओना कळ्‍कु दिस्‍साकोंटा आताहाटीं, ओर बेके होंचंतोरो ओनद ओन्‍के तेळियो.
1JO 2:12 नावा पिलाल्‍कुनिटा! किरिस्‍तुना पोरोलतेन मीकु मीवा पापाल्कुना मापि दोर्कुता. अदुनहाटींगे नना मीकु इव पोल्‍लें रासेक मंतन.
1JO 2:13 बाबोरिटा! मोट्‍टा मोदोल्ताल मत्‍तोन मिमेट तेल्‍पिचकुत्‍तिर, इंचि नना मीकु रासेक मंतन. लेय्युरिटा! मिमेट सेड्‍डातनमतुन गेल्‍सतिर, इंचि नना मीकु रासेक मंतन. पिलाल्‍कुनिटा! मिमेट पेनबाबान तेल्‍पिचकुत्‍तिर इंचि नना मीकु रासेक मंतन.
1JO 2:14 बाबोरिटा! मोट्‍टा मोदोल्ताल मत्‍तोन मिमेट तेल्‍पिचकुत्‍तिर, इंचि नना मीकु रासेक मंतन. लेय्युरिटा! मिमेट गट्‍टिपळतिर. पेनदा पोल्‍ले मीलोप्‍पो निल्‍सि मनंता. मिमेट सेड्‍डातनमतुन गेल्‍सतिर, इंचि नना मीकु रासेक मंतन.
1JO 2:15 दुनियातुन आयि दुनियाते मनना वस्‍तुकुन आयि पावरम कियमट. ओक्‍कला बोरन्‍नागिंटा दुनियातुन पावरम कियानय्ते, ओनगा पेनबाबाना पावरम हिल्‍ले.
1JO 2:16 बारित्‍ते दुनियाते मननव इत्‍ते, मेंदुल्ता इच्‍चा, कळ्‍कुना इच्‍चा आनि पिस्वरता गर्रा इव पेनबाबानगटाल वातव आयों. इव ई दुनियातवे आंदुं.
1JO 2:17 ई दुनिया, दुनियाताल वाता इच्‍चां, इव रोंडगुडा माय्‍सि होनानुं, गानि बोर अय्ते पेनदा पोल्‍लेपोर्रो ताकंतोरो, ओर मात्रम बस्‍केळ्‍क पिस्सि मनानुर.
1JO 2:18 पिलाल्‍कुनिटा! इद आकिरता वेला आंद, किरिस्‍तुना पगातोर वायानुर इंचि मिमेट केंजसि मत्‍तिर. अल्‍हेने इंदके किरिस्‍तुना वेल्‍लेटोरे पगातोर वातुर. इदुनहेंदाल, इद आकिरता वेला आंद इंचि मनाकु तेळियंता.
1JO 2:19 ओर लोकुल्‍क मना लोप्पोटाले पेय्‍सतुर, गानि ओर मनोर्क आयुर. ओर निजमे मनोर्क आसि मत्‍ते मनातोनि मंचि मन्‍नेर. ओर बोरे मनोर्क आयुर इंचि मनाकु तेळियानाहाटीं ओर अल्हा पेय्सि होत्‍तुर.
1JO 2:20 गानि मीवद अय्ते पवित्र मत्‍तोनहेंदाल अबिसेकम आता, अदुनहाटीं मिमेट अंटोर सत्‍तेमतुन एरपाट कींतिर.
1JO 2:21 मीकु सत्‍तेम तेळियो इंचि नना मीकु रासा हिल्‍लेन. मीकु सत्‍तेम एरपाटे मंता, इंका सत्‍तेमताहेंदाल बद्‍दे आबद्‍दम पोल्‍ले वायो इंचिगुडा मीकु तेळियसे मंता. अदुनहाटीं नना मीकु रासतन.
1JO 2:22 बोर अय्ते, येसुन “किरिस्‍तु” इंचि ओप्‍कुन्‍नोरो, ओर असल आबद्‍दम वळ्कानोर आंदुर. ओरे किरिस्‍तुना पगातोर आंदुर. ओर बाबन, मर्रिन ओप्‍कुन्‍नोर.
1JO 2:23 बोर अय्ते मर्रिन ओप्‍कुन्‍नोर, ओर बाबोनगुडा ओप्‍कुन्‍नोर. मर्रिन ओप्‍कुनानोर बाबोनगुडा ओप्‍कुंतोर.
1JO 2:24 मोदोलताल मिमेट बतल अय्ते केंजतिरो, अदुन मीलोप्‍पो बस्‍केळ्‍ताहाटीं इर्राट. अल्हा इर्रानय्ते, मिमेट मर्रि आनि बाबोनतोनि उंदासि मंदकिट.
1JO 2:25 किरिस्‍तु मनाकु बस्‍केळ्‍क पिस्सना पिस्वर हींतन इंचि पोल्‍ले हीतोर, अद इदे आंद.
1JO 2:26 मीकुन पसांचालय हूळना लोकुल्‍कुना बारेमते नना इव पोल्‍लें मीकु रासेक मंतन.
1JO 2:27 गानि बदुनतोनि अय्ते मीवा अबिसेकम आता, अद मीलोप्‍पो निल्‍सि मनंता. अदुनहाटीं बोर मीकु कराहना अवसरम हिल्‍ले. मीलोप्‍पो मनना अबिसेकम, मीकु अन्‍निटवुना बारेमते कराहंता. अद सत्‍तेम आंद, दाना कराहमळ आबद्‍दमतद आयो. अद मीकु बल्हा कराहंता, अल्हा मिमेट किरिस्‍तुना लोप्पो निल्‍सि मंटु.
1JO 2:28 अदुनहाटीं नावा पिलाल्‍कुनिटा! मिमेट किरिस्‍तुने निल्‍सि मंटु. अल्हा मत्‍ते, ओर बस्के अय्ते इद बूमिते मल्सि वायानुर अस्‍के, मनम वेर्रे हिल्‍वोरम आसि ओर वातंका ओना मुन्‍ने सिग्गु वायाकोंटा मंदा परकोम.
1JO 2:29 मिमेट ओक्‍कला किरिस्‍तु नीतिमंतुड इंचि तेल्‍पिचकुत्‍तोर आयानय्ते, सत्‍तेमता कबळ कियाना हरेक मनकल पेनदाहेंदाले पुट्तोर इंचिगुडा मीकु तेळियंता.
1JO 3:1 हुळट! पेन मनाकुन बच्‍चोन वेल्‍ले पावरम कींता! अदुनहाटीं मनाकु पेनदा पिलाल्क इंचि पोरोल दोर्कता, आनि मनम आंदुमगुडा. गानि दुनियातोर पेनदुन एरपाट किय्युवाहेंका ओर मनाकुन तेल्‍पिचकुन्‍नुर.
1JO 3:2 नावा पावरमगल्‍लोरिटा! इंदके मनम पेनदा पिलाल्‍कुम आंदुम. गानि वायाना कालमते मनम बल्हा बतल मनंतोम इत्‍तद, इंका तेळिया हिल्‍ले. अय्नागानि, किरिस्‍तु मर्रा मल्सि वायानुर अस्‍के, ओर बल्हा मंतोर अल्हे ओन मनम हूळांतोम. अस्‍के मनमगुडा ओनालेसींगे मनंतोम इंचि माकु एरपाट मंता.
1JO 3:3 किरिस्‍तुनपोर्रो इसोंटा आसे इर्राना हरेक मनकल किरिस्‍तु पवित्र मत्‍ताप कुद्‍दुगुडा पवित्र कीकुंतोर.
1JO 3:4 पापम कियाना हरेक मनकल, दर्मसास्‍त्रमता विरोदमते मनंतोर. दर्मसास्‍त्रमता विरोदमते ताकमळ इत्‍तेन पापम आंद.
1JO 3:5 गानि पापाल्कुन लक्‍कु कियानाहाटींगे किरिस्‍तु वातोर इंचि मीकु एरपाटे मंता. ओनगा बतले पापम हिल्‍ले.
1JO 3:6 बोर अय्ते किरिस्‍तुना बक्‍तिते निल्‍सि मनंतुर, ओर पापम कीसेके मन्‍नुर. गानि बोर अय्ते पापम कीसेके मनांतुर, ओर किरिस्‍तुन हूळा हिल्‍लुर, ओन एरपाटगुडा किया हिल्‍लुर.
1JO 3:7 पिलाल्‍कुनिटा! मीकुन बोरे पसांचकोंटा जेगर्ता मंटु. बोर अय्ते सत्‍तेम कबाह्‍क कींतोर, ओर किरिस्‍तुनलेसीं नीतिमंतुडे आंदुर.
1JO 3:8 पापम कीसेके मनना हरेक मनकल देय्यमता बाजुनोरे आंदुर. बारित्‍ते सुरुवनाले देय्यम पापम कीसेके वासंता. गानि देय्यमता कबाह्‍कुन नासडेम कियानाहाटींगे पेनदा मर्रि इद दुनियाते वातोर.
1JO 3:9 पेनदा संतानम आतोर बोरे आयिर, ओरा लोप्पो पेनदा गुनम मनंता. अदुनहाटीं ओर पापम किय्युर. ओर पेनदा संतानम आताहाटीं, ओर पापम किय्ये पर्रुर.
1JO 3:10 इदुन पीसे, पेनदा पिलाल्क बोर आंदुर, देय्यमता पिलाल्क बोर आंदुर? इत्‍तद तेळियसि दांता. बोर अय्ते सत्‍तेमते ताकुर, ओरा दादन पावरम किय्युर, ओर पेनदा संतानम आयुर.
1JO 3:11 मनम वरोंक-वरोर पावरम कियागोम इनना ई बोदा, मिमेट सुरुवनेन केंजतद आंद.
1JO 3:12 मनम काइनुनालेसीं मननायो. ओर देय्यमता बाजुनोर आसि ओना तम्मुन हव्कतोर. ओर ओना तम्मुन बद कारनमते हव्कतोर? बारित्‍ते, ओना तम्मुना कबाह्‍क नीतितव मत्‍तां आनि ओना कबाह्‍क बारे तप्‍पुनव मत्‍तां.
1JO 3:13 विस्वासुल्‍कुनिटा! मीकुन दुनियातोर हय्सुर, अस्‍के मिमेट इचंत्रम आयमट.
1JO 3:14 मनम मना दंटाता विस्‍वासुल्‍कुन पावरम कींतोम. अदुनहाटीं मनम हामुरताल पेय्सि पिस्वरते वातोम, इंचि मनाकु एरपाट मंता. बोर अय्ते पावरम किय्योर ओर हातोनलेसीं मंतोर.
1JO 3:15 बोर अय्ते ओना दादन, तम्मुन हय्‍सोर, ओर मनकन हव्‍कानसंटोर आंदुर. मनकन हव्‍कानोनगा बस्‍केळ्‍क पिस्सना पिस्वर मन्‍नो इंचि मीके अय्ते एरपाटे मंता.
1JO 3:16 किरिस्‍तु मनाहाटीं ओना सतता जीवा हीतोर. दीनाहेंदाल, पावरम इत्‍ते बतल मनाकु तेळियता. अदुनहाटीं मनम मना दंटा विस्‍वासुल्‍कुनाहाटीं जीवा हियालय तयार मनगोम.
1JO 3:17 गानि बोनागन्‍ना वेल्‍लेन दनम-संपत्‍ति मंचि, ओना दादांको, तम्मुंको अवसरम मंता इत्‍तद तेळियसिगुडा ओना जीवा नोय्याकोंटे, ओनगा पेनदा पावरम मंता इंचि बल्हा इनकोम?
1JO 3:18 अदुनहाटीं नावा पिलाल्‍कुनिटा! मनम मना पावरम सिराप तोळ्‍दा पोल्‍लेनेन आयो गानि, सत्‍तेमते बेसता कबाह्‍क कीसि पावरम हुप्‍साना.
1JO 3:19 अल्हा कीतेन, मनम सत्‍तेमता बाजुनोरम इंचि मनाकु एरपाट आंता. अस्‍के मनम वेरियाकोंटा दैरनेमते पेनदा मुन्‍ने नित्‍ता पर्रंतोम.
1JO 3:20 मना मनसु मनापोर्रो दोसेम दोस्‍सिनागानि मना मनसुंकन्‍ना पेन बच्‍चोनो पेद्‍देद आंद, दान्क अन्‍नि तेळियंता.
1JO 3:21 पावरमगल्‍ला दंटातोरिटा! मना मनसु मनापोर्रो दोसेम दोस्‍साकोंटे, पेनदा मुन्‍ने मनम दैरनेमते मना पर्रंतोम.
1JO 3:22 इंका दाना आदेस परकारम ताकसेके, अद कूस आयाना कबाह्‍क कीसेके मत्‍ते, मनम बतल तल्‍किना अद मनाकु हींता.
1JO 3:23 दाना आदेस बतल इत्‍ते, मनम दाना मर्रि येसु किरिस्‍तुनपोर्रो विस्वासम इर्राना आनि ओना आदेस परकारम मनम वरोंक-वरोर पावरम कियाना.
1JO 3:24 बोर अय्ते पेनदा आदेस परकारम ताकंतोर, ओर पेनदा लोप्पो निल्‍सि मनंतोर, ओनालोप्‍पो पेन निल्‍सि मनंता. इल्‍हा, पेन मना पिस्वरते निल्‍सि मनंता इंचि, मनाकु हीता पवित्र आत्माहेंदाल, एरपाट आंता.
1JO 4:1 पावरमगल्‍लोरिटा! नहगा पेनदा आत्मा मंता इनना अंटोरपोर्रो विस्वासम कियमट. मोमोट पेनदा कबुरतोरम इंचेके, तप्‍पुड बोदां कराहनोर वेल्‍लेन मंदि दुनियाते वेलियसंतुर. अदुनहाटीं बरोसा कियाका मुन्‍ने आ वळ्‍कानोनगा मनना आत्मां पेनदागटाल वातावेना इंचि, परिक्‍सा कीसि हुळट.
1JO 4:2 पेनदा आत्मातुन मिमेट इल्‍हा एरपाट किय्‍याना; बद आत्मा अय्ते, “येसु किरिस्‍तु मनकना रूपमते वातोर,” इंचि ओप्‍कुंता, आ हरेक आत्मा पेनदाहेंदाल वातद आंद.
1JO 4:3 गानि बद आत्मा अय्ते, येसु मनकना रूपमते वातोर इंचि ओप्‍कुन्‍नो, अद आत्मा पेनदाहेंदाल वातद आयो. अद किरिस्‍तुना पगातोना आत्मा आंद. असोंटा आत्मा वायाना मंता इंचि मिमेट मुन्‍नेन केंजसि मत्‍तिर, अद इंदके दुनियाते वासि मंता.
1JO 4:4 पिलाल्‍कुनिटा! मिमेट पेनदा हेंदोर आंदिर. मीलोप्‍पो मनना आत्मा, दुनियाते मनना आत्माकन्‍ना बच्‍चोनो पेद्‍देद आंद. अदुनहाटीं आ आबद्‍दम कबुरतोरा आत्मान मिमेट गेल्‍सतिर.
1JO 4:5 आबद्‍दम कबुरतोरा आत्मां दुनियातव आंदुं, अदुनहाटीं अव दुनियाता पोल्‍लेंगे वळ्‍कंतां, दुनियातोर अवुना पोल्‍लें केंजंतुर.
1JO 4:6 गानि मनम पेनदा लोकुल्‍क आंदुम. पेनदुन एरपाट कियानोर, मना पोल्‍लें केंजंतुर. गानि पेनदुन एरपाट कियवोर, ओर मना पोल्‍लें केंजुर. इल्‍हा मनम, बद सत्‍तेमता आत्मा आनि बद आबद्‍दमता आत्मा इंचि परक एरपाट किया पर्रंतोम.
1JO 4:7 पावरमगल्‍लोरिटा! पावरम पेनदाहेंदाल वातद आंद. अदुनहाटीं मनम वरोंक-वरोर पावरम कियागोम. पावरम किय्यना हरेक मनकल पेनदा संतानम आंदुर. ओर पेनदुन एरपाट कींतोर.
1JO 4:8 पेन पावरम आंद. अदुनहाटीं बोर अय्ते पेनदुन पावरम किय्योर, ओर पेनदुन एरपाट किय्योर.
1JO 4:9 दाना मर्रिनाहेंदाल मनाकु बस्‍केळ्‍क पिस्‍साना पिस्वर दोर्कना इंचि पेन दाना वरोरे मर्रिन, इद दुनियाते लोहता. इल्‍हा पेन, मनापोर्रोटा दाना पावरमतुन मनाकु हुपिस्‍ता.
1JO 4:10 मनम पेनदुन पावरम कीतोम इंचि आयो, गानि पेने मनाकुन पावरम कीता. अदुनहाटींगे, पेन दाना मर्रिन मना पापाल्क मापि आयाना इंचि मोक्‍कु आयालय लोहता. इदे निजम पावरम आंद.
1JO 4:11 पावरमगल्‍लोरिटा! पेन मनाकुन इच्‍चोन पावरम कीता अय्ते, मनमगुडा वरोंक-वरोर पावरम कियगोम.
1JO 4:12 पेनदुन बोर बस्‍केन हूळा हिल्‍लुर. गानि मनम, वरोंक-वरोर पावरम कियानय्ते पेन मनालोप्‍पो मनंता आनि दाना पावरम मनालोप्‍पो पुरागा आंता.
1JO 4:13 इल्‍हा पेन मनालोप्‍पो मनंता, मनम पेनदा लोप्पो मनंतोम इंचि मनाकु एरपाट आंता. बारित्‍ते, पेन मनाकु दाना सतता आत्मातुन हीता.
1JO 4:14 दीन मनम हूळतोम आनि मनम दीना साक्‍सि मंतोम, मना पेन बाबल दुनियाता पापाल्क पायिचालय ओना मर्रिन लोहतोर.
1JO 4:15 बोरन्‍ना ओक्‍कला, येसुए पेनदा मर्रि इंचि ओप्‍कुनानय्ते, पेन ओनालोप्‍पो निल्‍सि मनंता, ओर पेनदा लोप्पो निल्‍सि मनंतोर.
1JO 4:16 पेन माकुन पावरम कीता इंचि इंदके तेल्‍पिचकुत्‍तोम. माकु दानपोर्रो विस्वासमगुडा मंता. पेन पावरम आंद. अदुनहाटीं बोर अय्ते पावरम कींतोर, ओर पेनदा लोप्पो मनंतोर, पेन ओनालोप्‍पो मनंता.
1JO 4:17 मनालोप्‍पो पेनदा पावरम पुरागा आंता. अदुनहाटीं पेन न्‍यायम कियाना रोजुने मनम वेरियाकोंटा मना परकोम. बारित्‍ते किरिस्‍तु मत्‍तापे, मनमगुडा इद दुनियाते पिस्सेक मंतोम.
1JO 4:18 पावरमते वेर्रे मन्‍नो. पुरागा आता पावरम, वेर्रेतुन पोळागोट्‍टंता. वेर्रे सिक्‍साक संबंदिस्तद आंद, अदुनहाटीं बोर अय्ते वेरियंतुरो, ओरगा इसोंटा पावरम पुरागा आयापर्रो.
1JO 4:19 मनम पावरम कींतोम, बारित्‍ते मुन्‍ने मनाकुन पेन पावरम कीता.
1JO 4:20 ओक्‍कला बोरन्‍ना, “नना पेनदुन पावरम कींतन,” इंचि वेह्‍चि, ओना दादन हय्‍साकोंटे, ओर आबद्‍दम मनकल आंदुर. बारित्‍ते ओर हूळना ओना दादाने ओर पावरम कियुवस्‍के, हूळवा पेनदुन ओर बल्हा पावरम किया परांतोर?
1JO 4:21 पेनदाहेंदाल मनाकु इदु आदेस दोर्कता. बोर अय्ते पेनदुन पावरम कींतोर, ओर ओना दादानगुडा पावरम कियाना.
1JO 5:1 येसु, किरिस्‍तु आंदुर इंचि बोरय्ते विस्वास कींतोर, ओर पेनदा मर्रि आंतोर आनि बोरय्ते पेनतोनि पावरम कींतोर, ओर दाना मर्रिनतोनि इंका पावरम कींतोर.
1JO 5:2 इल्‍हा मनम बस्के अय्ते पेनदुन पावरम कींतोम आनि दाना आदेसकुना परकारम ताकंतोम अय्ते, अस्‍के एरपाट कींतोम गदा मनम पेनदा मर्कुनतोनिगुडा पावरम कींतोम.
1JO 5:3 पेनदा आदेसकुना परकारम ताकते, दानतोनि पावरम कींतोम इंचि एरपाट आंता. दाना आदेसकु कटिनम (वसेम आयवसोंटव) हिल्‍लें.
1JO 5:4 बारित्‍ते बोरय्ते पेनदा मर्रि आंतोर, ओर दुनियातुन गेल्संतोर आनि मना विस्वासमहेंदाले दुनियापोर्रो मनाकु गेल्‍पु दोर्कंता.
1JO 5:5 येसु पेनदा मर्रि इंचि बोरय्ते विस्वासम कींतोर, ओरे दुनियापोर्रो गेल्संतोर.
1JO 5:6 मनागा एर आनि नेत्‍तुरतोनी वातोर, ओर येसु किरिस्‍तु आंदुर. सिराप एतोनि आयो, एर आनि नेत्‍तुरतोनी. आनि ओना साक्‍सि हियानद आत्मा आंदु. बारित्‍ते आत्मे सत्‍तेम आंदु.
1JO 5:7 साक्‍सि हिय्यनोर मुव्वुर आंदुर.
1JO 5:8 आत्मा, एर आनि नेत्‍तुर आनि ईर मुव्वुरा साक्‍सि उंदे आंदु.
1JO 5:9 मनम मनकनाहेंदाल हीता साक्‍सितुन मानांचंतोम अय्ते, पेनदाहेंदाल हीता साक्‍सि बच्‍चोर पेद्‍दा. बद साक्‍सि अय्ते पेन तना मर्रिना बारेमते हीता. अदे साक्‍सि पेनदा साक्‍सि आंदु.
1JO 5:10 बोरय्ते पेनदा मर्रिनपोर्रो विस्वास इर्रंतोर, ओर ओनालोप्‍पो पेनदा साक्‍सितुन इर्रंतोर. पेन इत्‍ता पोल्‍लेनपोर्रो बोरय्ते विस्वास इर्रोर, ओर पेनदुन आबद्‍दम कींतोर. बारित्‍ते पेन तना मर्रिना बारेमते हीता साक्‍सितुन ओर विस्वास किया हिल्‍लोर.
1JO 5:11 पेन मनाकु बस्‍केळ्‍क पिस्सना पिस्वर हीता, ई पिस्वर दाना मर्रिनगा मंता. इदे पेनदा गवाइ आंद.
1JO 5:12 बोरय्ते पेनदा मर्रिन स्विकार कींतोर, ओनाकु ई पिसवर दोर्कंता गानि बोनगा अय्ते पेनदा मर्रि हिल्‍लोर, ओनगा ई पिसवर हिल्‍ले.
1JO 5:13 पेनदापोर्रो विस्वास इर्रानोरिटा! बस्‍केळ्‍क पिस्सना पिस्वर मिहगा मंता. दीन मिमेटु एरपाट कीम्‍टु इंचि नना मीकु इव पोल्‍लें रासा मंतन.
1JO 5:14 मना पेन पोर्रो इदु विस्वास मंता. मनमगिंटा दाना मनसु मत्‍ताप तल्कानय्ते अद मनद केंजंता.
1JO 5:15 आनि मनम बतलय्ते दान तल्‍कंतोम अद केंजंता, इदु मनाकु एरपाट मंता. दानहाटीं मनम दान बतलय्ते तल्‍कंतोम, अव मनाकु दोर्कतां इदिंका मनाकु एरपाट मंता.
1JO 5:16 ओक्‍कला मना दंटा विस्वासि हामुर हिल्वा पापम कियनेंके हूळानय्ते ओनाहाटीं पारतना कियागोम. पेन ओना पापमताल पायिचंता. इत्‍ते बोरय्ते हामुरते होनानसोंटा पापम कींतोर ओनाहाटीं आयो. इसोंटा पापमगुडा मनंता दाना परिनाम हामुरे. नना मीकुन इसोंटा पापमताहाटीं पेनदुन तल्कागोम इंचेके हिल्‍ले.
1JO 5:17 अन्‍नि कराब कबाह्‍क पापमे आंदु. गानि अन्‍नि पापाल्क हामुरताहेके ओयों.
1JO 5:18 मनाकु एरपाट, बोरय्ते पेनदा मर्रि आतोर, ओर पापम किय्योर. पेनदा मर्रि ओना कापाळांतोर. आ देय्यम ओना बतल किया पर्रो.
1JO 5:19 मनाकु एरपाट मनम पेनदा हेंदोरम आंदुम. पूरा दुनिया आ देय्यम कय्‍दे मंता.
1JO 5:20 गानि मनाकु एरपाट मंता, पेनदा मर्रि वासि, मनम निजम पेनदुन एरपाट कियागोम इंचि मनाकु तेल्वि हीतोर. बारित्‍ते मनम निजम पेनदुन एरपाट कियागोम इंचि. इत्‍ते, मनम पेनदा मर्रि येसु किरिस्‍तुनलोप्‍पो मंतोम. पेनबाबाले निजम पेन आंदुर आनि बस्‍केळ्‍क पिस्सना पिस्वर ओरे आंदुर.
1JO 5:21 पिलाल्‍कुनिटा! मिमेटु मूर्तिनाल लक्‍कु मंटु.
2JO 1:1 नना मीवा कलिसियाते बेस पोरोल होत्‍ता मनकन आंदुन. पेन पेरता बाई आनि दाना पिलाल्कुंक, इद सिट्‍टि रासेके मंतन. नना मीकुन पावरम कींतन. नना वरोने आयो, पेनदा सत्‍तेमतुन तेल्‍पिचकुत्‍तोर अंटोरे मीकुन पावरम कींतुर. बारित्‍ते, मनम सत्‍तेमतुन तेल्‍पिचकुत्‍तोम. अदुनहाटीं अद सत्‍तेम मना पिस्‍वरतगा निल्‍सि मंता आनि बस्‍केळ्‍के अद मनातोनि मनंता.
2JO 1:3 पेनबाबानहेंदाल आनि पेनबाबाना मर्रि येसु किरिस्‍तुनहेंदाल कुर्पा, दया, सांति इव सत्‍तेमते आनि पावरमते बस्‍केळ्‍क मनातोने मन्‍निंकांटी.
2JO 1:4 पेनबाबाल मनाकु हीता आदेस परकारम, नीवा इच्‍चुर पिलाल्क, सत्‍तेमते ताकानदुन हूळसि नाकु वेल्‍लेन कुसि आसेके मंता.
2JO 1:5 अय्ते बाई! नना मीकु बतल विनंति कीसेके इत्‍ते, मनम वरोंक-वरोर पावरम कियाना. इदु पूना आदेस इंचि नना मीकु रासेक हिल्‍लेन, गानि मुन्‍नेटाल मनगा मत्‍तादे आंद.
2JO 1:6 मिमेट सुरुवनाल बतल अय्ते केंजतिरो, अल्‍हेने वरोंक-वरोर पावरम कीम्‍टु इंचि पेन आदेस हीता. आ आदेसकुना परकारम ताकमळे पावरम कियमळ आंद.
2JO 1:7 येसु किरिस्‍तु मनकना रूपमते पुट्‍सि वायाहिल्‍लोर इंचि वेह्‍चि पसांचनोर वेल्‍लेन लोकुल्‍क इद दुनियाते पेय्‍सतुर. इसंटोरे हूळा! पसांचनोर आनि किरिस्‍तुना पगातोर्क.
2JO 1:8 मोमोट कीता कबाह्‍क, मीहेंदाल एर्तम आयाकोंटा हूळकुंटु. कीता कबाह्‍कुना पुरागा इनाम दोर्कानादाका जेगर्ता मंटु.
2JO 1:9 किरिस्‍तु कराहता बोदा परकारम ताकाकोंटा बोर अय्ते मुन्‍ने-मुन्‍ने दांतोर, ओर पेनतोनि कलिया हिल्‍लोर. गानि बोर अय्ते किरिस्‍तु कराहता बोदा परकारम ताकंतोर, ओनतोनि पेनबाबाल, मर्रि इव्वुरगुडा मनांतुर.
2JO 1:10 ओक्‍कला बोरन्‍ना मिहगा वासि, किरिस्‍तु कराह्ता बोदा तप्‍पा वेरे बोदा कराहनय्ते, ओन मी लोता लोप्पो वाया हियमटु, इंका ओन्क जोहारगुडा कियमट.
2JO 1:11 बारित्‍ते, बोर अय्ते असंटोन हेरा हींतोर, ओर ओना तप्‍पुड कबाह्‍कुने कलियसि मत्‍तोना लेक्‍काते वांतोर.
2JO 1:12 इंका वेल्‍लेन पोल्‍लें मीहाटीं रासाना इंचि नावा मनसु मंता. गानि अवुन नना साइते कायदोमपोर्रो रासोन. बारित्‍ते, मिहगा वासि मीकुन कलियसि, मीतोने अन्‍नि पोल्‍लें वळ्‍काना इंचि मनसुने आसे पडसेक मंतन. अस्‍के मना कुसि इत्‍तदगुडा पुरागा आंता.
2JO 1:13 पेन पेरता मीवा अक्‍कना पिलाल्क, मीकु जोहार वेहासेक मंतुर.
3JO 1:1 नना योहानुन, कलिसियाते बेस पोरोल होत्‍ता वरोन मनकन आंदुन. नना बोन अय्ते निजमते पावरम कींतन आ गयुसुंक इद सिट्‍टि रासेक मंतन.
3JO 1:2 पावरमगल्‍ला दंटातोना! निमे बक्‍तिते पेनतोनि बल्हा बेस मंचंतिनो, अन्‍नि पोल्‍लेनेगुडा निमे अल्‍हेने मन, नीकु बदे रोगम वायाकोंटा निमे बस्‍केळ्‍क सुकमते मनना इंचि नना पारतना कीसेके मंतन.
3JO 1:3 बारित्‍ते, गयुस निजमे सत्‍तेमते ताकसंतोर इंचि इच्‍चुर दादालोर निहागटाल वासि, नीवा बारेमते गवाइ वेहतुर. अदुन केंजसि नाकु वेल्‍लेन कुसि आता.
3JO 1:4 नावा पिलाल्क सत्‍तेमते ताकसेक मंतुर, इत्‍ता पोल्‍ले नाकु वेल्‍लेन कुसितुन हींता. दीनकु तप्‍पा इंका बद्‍दे पोल्‍ले केंजसि नाकु इच्‍चोन कुसि आयो.
3JO 1:5 पावरमगल्‍ला दंटातोना! निमे एरपाट कियवोर निहगा वायिनागानि, वाता दादालोराहाटीं निमे बतल अय्ते कींतिनो, अद निमे वेल्‍ले विस्वासमतोनि कींतिन.
3JO 1:6 ओर दादालोर नीवा पावरमता बारेमता गवाइ कलिसियाते वेहतुर. पेनदा लोकुल्‍कुन बल्हा अय्ते सार्ला कींतुरो अल्हा, निमे ओरा सेवा कीसि सार्ला कियानय्ते, नीवाहाटीं इंका बेस मनंता.
3JO 1:7 बारित्‍ते ओर किरिस्‍तुना सेवाहाटीं पेय्‍स्‍तुर आंद. विस्वासम कियावोराहेंदाल ओर बतले सहायम येतुर.
3JO 1:8 असोंटा मनकालोर्कुंक मनम सहायम कीसि ओर्कुन बेस हूळना. अस्‍के मनमगुडा सत्‍तेमताहाटीं कबळ कियानोरा लेक्‍काते वांतोम.
3JO 1:9 नना कलिसियातोर्क उंदि सिट्‍टि रासि लोहतन. गानि कलिसियाते पेद्‍दा आयालय हूळना दियुतिरपेस इनानोर नना वेहानदुन ओप्‍कुंचेक हिल्‍लोर.
3JO 1:10 अचोने आयका, कलिसियाते पूनें वायाना विस्‍वासुल्‍कुन ओर अय्ते बेस हूळोर आनि हूळकुंतोम इनानोर्कुनगुडा बेस हूळा हिय्योर. इंका बोर अय्ते बेस हूळकुंतुरो ओर्कुन कलिसियाताल पलाते पेच्‍हांतोर. मावा बारेमते कराब-कराब पोल्‍लें वळ्कंतोर, अदुनहाटीं नना बस्के अय्ते वांतन, अस्‍के ओना बारेमते कलिसियाते अंटोर्क वेहांतन.
3JO 1:11 पावरमगल्‍ला दंटातोना! निमे ओनालेसीं कराबता जोलिक होन्‍मा, सिराप बेस बतल अदे कीसेके मन. बेसता कबाह्‍क कियानोर पेनदा मनकल आंदुर, सेड्‍डा कबाह्‍क कियानोर पेनदा मनकल आयोर.
3JO 1:12 देमेतिरियुसना बारेमते अंटोरगुडा बेसतोर इंचि गवाइ वेहांतुर. पेनदा सत्‍तेमते ताकतोर इंचि सत्‍तेमता नदरतेगुडा ओर बेस मनकल आंदुर. ओर बेसतोर इंचि ननागुडा गवाइ हींतन, नावा गवाइ सत्‍तेम इंचि मीकु अय्ते एरपाटे मंता.
3JO 1:13 नीकु वेहालय नहगा इंका वेल्‍लेन पोल्‍लें मंतां, गानि साइतोनि ई कायदोमते रासमळ नाकु इस्‍टम हिल्‍ले.
3JO 1:14 बिरानेन नीकु कलियना इंचि नना आसे पडसेक मंतन. कलियतस्‍के, मनम मोकोम मुन्‍नेन वळ्‍क्‍कुनकोम.
3JO 1:15 पेन बाबल हिय्यना सांति बस्‍केळ्‍क नीतोनि मन्‍निकांटी. इग्‍गेटा नीवा दंटागाह्‍क नीकु जोहार वेहासेक मंतुर. अगा मनना अंटोर दंटागाह्‍कुंक पोरोल येत्‍सि नावा जोहार वेहा.
JUD 1:1 नना यहुदन, येसु किरिस्‍तुना सेवकुन आनि याकोबुना तम्मुन आंदुन. पेनबाबाल मीकुन केय्‍सि पावरम कीतोर आनि येसु किरिस्‍तुना कय्‍दे कापाळसेक मंतोर, मी अंटोर्क नना जोहर कींतन.
JUD 1:2 मीक दया, सांति, पावरम वेल्‍लेन दोर्किकांटी.
JUD 1:3 पावरमगल्‍लोरिटा! मनाक अंटोर्क दोर्कता मुक्‍तिता बारेमते मीकु रासाना इंचि इनकुंचेके मत्‍तन, गानि इंदके विस्वासमता बारेमते रासि दाना सत्‍तेमतुन कापाळनाहाटीं मीक तेळियागोटसि वेहाना इंचि नाक अव्‍सरम अनपिस्ता. ई सत्‍तेमतुन पवित्र लोकुल्‍कुंक बस्‍केळ्‍ताहाटीं उंदे मल्का हियमळ जर्गता.
JUD 1:4 बारित्‍ते चुपचाप इच्‍चुर लोकुल्‍क मीलोप्‍पो होळियतुर, ओर पेनदा बक्‍तुल्क आयुर. ओर पेनदा कुर्पातुन बिगडांचि पापमता कबाह्‍क कियानाहाटीं मना वरोरे मालक सामि येसु किरिस्‍तुन ओप्‍कुन्‍नुर. असंटोर्क सिक्‍सा आंता इंचि मोदाटाले दर्मसास्‍त्रमते रासि मंता.
JUD 1:5 मीक इवन्‍नि पोल्‍लें मोदाटाले एरपाट मंतां, अय्नागानि इव पोल्‍लें मीक मति कीसि हींतन इंचि इनकुंचेके मंतन. पेन दाना लोकुल्‍कुन इजिप्‍त देसेमताल पेचाह्ता पजा बोर अय्ते दान विस्वासम किया हिल्‍लुर, ओर्कुन नासडेम कीता.
JUD 1:6 अचोने आयाका, बवय्ते पेनदा दूतां अवुना अदिकारमता जेगान इर्रा हिल्‍लें, अल्हेन अव जेगान होळ्‍सीतां, पेन अवुनगुडा न्‍यायम कियाना रोजुनहाटीं हीकटते बस्‍केन नेम्मुवा गोल्सुल्कुने दोहचि इर्ता.
JUD 1:7 अल्‍हेने सदोम, गमोरा सहरतोर, अल्हेन पकापीसि मत्‍ता सहरकुनोर व्यबिचारम कीतुर आनि परायतोर पज्जो अर्सि मत्‍तुर. इद उंदि उदाहरनलेसीं, ओर बस्‍केळ्‍क पोत्‍तना तळमिते सिक्‍सा बोगांचेक मंतुर.
JUD 1:8 अल्‍हेने कलां हूळना लोकुल्‍कगुडा मेंदुल्तुन पापमते अरहंतुर, पेनदा अदिकारमतुन हय्सुर आनि स्वर्गमकु संबंदिंचि मत्‍तोर्कुना अपमानम कींतुर.
JUD 1:9 गानि पेनदा पेद्‍दा दूता मिकायेलगुडा बस्के अय्ते मूसाना पीनगुना बारेमते देय्यमतोनि लोल्‍लि कीता, अस्‍के अदुन बतले अपमानम आयानसोंटा पोल्‍लें इना हिल्‍ले गानि, “पेने नीकुन तेरहिकांटी” इंचि सिराप इच्‍चोने इत्‍ता.
JUD 1:10 ई लोकुल्‍कुंक बव पोल्‍लें अय्ते तेळियों अवुन हय्सुर, गानि बुद्‍दि हिल्वा जिवरासिनलेसीं बव पोल्‍लें अय्ते ओर्क तेळियंतां अवुनाहेंदाले ओर नासडेम आंतुर.
JUD 1:11 अय्यो, बच्‍चोर गोसा आयार! बारित्‍ते ओर काइन ताकता हर्दे ताकतुर, पाय्दाताहाटीं बिलाम इनानोर कीता तप्पु कीतुर आनि कोरह बल्हा विरोद कीसि नासडेम आतोर, अल्हे ईरगुडा नासडेम आंतुर.
JUD 1:12 ईर, मिमेट कलियसि-मेलियसि तिंदना बोजनाल्‍कुन हेळाह्‍नोर आंदुर, इंका मीवातोनि उद्‍दिस सिग्गु हिलाकोंटा तिंचि पीर निहकुंतुर. ओर वळितोनि वित्‍ताना मब्बुनसंटोर आंदुर. आकिं रालाना कालमते कायां हिलाका रोंडु मल्कां हासि पीकिसि पोहता मराकुनसंटोर आंदुर.
JUD 1:13 ओर, समुद्रमता तडाने एतपोर्रो तेलाना कराब पोंगुरतालेसीं सिग्गु हिल्वा कबाह्‍क कियानोर आंदुर. ओर हर्रि तप्‍सि तिरियना सुक्‍कानसंटोर आंदुर. ओराहाटीं बस्‍केन मारवा हिर्र-हीकट तयार कीसि मंता.
JUD 1:14 आदामनगटाल एडुंगो पीळितोर हानोक इनानोर ईरा बारेमते इल्‍हा बविस्यवानि कीतोर, “हूळा, सामि वेय्‍कुना पवित्र लोकुल्‍कुनतोनि अंटोरा न्‍यायम कियालय वांतोर. ओर अंटोर बक्‍ति हिल्वा लोकुल्‍क ओर कीता अन्‍नि तप्‍पुड कबाह्कुनाहाटीं अल्हेन बक्‍ति हिल्वा पापि लोकुल्‍क सामिंक विरोदमते वळ्‍कतव अन्‍नि पोल्‍लेनाहाटीं ओर्क सिक्‍सा हियमळ जर्गंता,” इंचि वेहतोर.
JUD 1:16 इसोंटा लोकुल्‍क गुल्‍गसेक मनानोर, नसीब बरोबर हिल्‍ले इनानोर, ओरा इच्‍चां मत्‍ताप ताकानोर, पेद्‍दिरकेम पोल्‍लें वळ्कानोर, सतता पाय्दाताहाटीं तिय्यटा पोल्‍लें वळकानोर आंदुर.
JUD 1:17 पावरमगल्‍लोरिटा! मना सामि येसु किरिस्‍तुना प्रेरितुल्‍कु मीवातोनि मुन्‍नेने, “आकिर वेलाते बक्‍ति हिल्वा इच्‍चां मत्‍ताप ताकानोर, मीकुन सिडांचंतुर,” इंचि वेहतुर, इव पोल्‍लेन मिमेट मति कीम्‍टु.
JUD 1:19 ई लोकुल्‍क मीलोप्‍पो वरोनद-वरोंक अर्राकोंटा कींतुर, ईरा मनसुंक वाताप ताकंतुर, ईरा लोप्पो पेनदा आत्मा हिल्‍ले.
JUD 1:20 गानि पावरमगल्‍लोरिटा! पवित्र आत्माते पारतना कीसेके वेल्‍ले पवित्र विस्वासमते मीवद मिमेट बेर्सेक होंटु.
JUD 1:21 बस्‍केळ्‍क मनना पिस्वरताहाटीं मना सामि येसु किरिस्‍तुना दयाता आसेते एदुर हूळसेक पेनदा पावरमते निल्‍सि मंटु.
JUD 1:22 बोर अय्ते विस्वासमतुन अनमानम कींतुर, ओरापोर्रो दया कीम्‍टु.
JUD 1:23 तळमिताल इग्‍गिस पिस्‍सागोटताप इच्‍चुर्कुन पिस्‍सागोटट आनि वेल्‍लेटोरा पोर्रो वेर्रेतोनि मिमेट दया कीम्‍टु. गानि मेंदुल्ते कियाना पापाल्कुन मिमेट हय्समट.
JUD 1:24 पेन मीकुन तप्‍पुळ बोदानाल हिळु अर्राकोंटा कापाळसि, दाना महिमाता मुन्‍ने आनंदमते आनि दोसेम हिलाकोंटा निल्‍हा परांता,
JUD 1:25 अद उंदे पेनदुक, मनाकु मुक्‍ति हियानोर सामि येसु किरिस्‍तुनाहेंदाल, महिमा, पेद्‍दातनम, ताकत, अदिकारम मुन्‍नेटा कालमते मत्‍ताप इद कालमते आनि युगा-युगाल्‍कुनदाका मन्‍निकांटी, आमीन.
REV 1:1 इव पोल्‍लें, वायाना कालमते बिरानेन जर्गानव आंदुं, इवुन येसु किरिस्‍तु ओना सेवाकुल्कुंक वेहना इंचि पेन ओन्क अप्पजेपता. अस्‍के येसु ओना उंदि दूतातुन योहान इनना वरोन सेवाकुनगा लोहचि, ओन्क रासालय वेहतोर.
REV 1:2 अस्‍के ओर पेनदा पोल्‍लेता बारेमते, येसु किरिस्‍तुना गवाइता बारेमते आनि ओर हूळता अन्‍नि पोल्‍लेना बारेमते गवाइ वेहतोर.
REV 1:3 पेनदाहेंदाल वाता ई वायाना कालमते जर्गना पोल्‍लेन बोर अय्ते हदवंतुर, केंजांतुर आनि अव्टे रासि मत्‍ता परकारम ताकंतुर ओर आसिर्वाद दोर्कतोर आंदुर. बारित्‍ते इव पोल्‍लें जर्गना वेला दग्गेर्क एवता.
REV 1:4 आसिया राज्येमते मनना एडुं कलिसियानोर्क नना योहानुन बतल रासेक इत्‍ते, इंदके मनानद, मोदोलताल मत्‍तद आनि मुन्‍ने वायाना मंता आ पेनदाहेंदाल, दाना राजगद्‍देता मुन्‍ने मनना आ एडुं आत्मानाहेंदाल इंका विस्वासमलायक गवाइ मत्‍ता येसु किरिस्‍तुनाहेंदाल मीकु कुर्पा, सांति दोर्किकांटी. येसु हातोराव्टेटाल जीवाते तेदता मोदाटा मनकल आंदुर. ओर ई बूमिपोर्रोटा राजालोरा राजाल आंदुर. मना अंटोर्कुन पावरम कियानोर आंदुर, इंका ओना नेत्‍तुरतुन पोंगागोटसि मनाकुन मना पापाल्कुनाल पाय्सतोर.
REV 1:6 मना पेनबाबाना पेद्‍दातनम, अदिकारम बस्‍केळ्‍क मननाहाटीं ओर मनाकुन पेनदा राज्येमतोर आनि पेर्मालोर्क कीतोर. आमीन!
REV 1:7 हुळाट, येसु किरिस्‍तु मब्बु तेर्पेनतोनि वासेक मंतोर. अंटोर ओन हूळानुर. ओरव्टे ओन कोह्‍कतोरगुडा मंदानुर. दुनियातोर अन्‍नि वंसाल्कुना लोकुल्‍क सातितुन तंचेके दुक्‍कम कियानुर. हो इल्हे आयार आमीन!
REV 1:8 “ननाने अल्‍पा आनि ओमेगा आंदुन. ननाने मोदाटोन, इंदके मनानोन, मर्रा वायानोन आनि अन्‍निटकन्‍ना सक्‍तिमंतुनगुडा ननाने आंदुन” इंचि पेन इंता.
REV 1:9 नना योहानुन मीवा दादान आंदुन. येसु बोगांसता तिप्पल्कुने, राज्येमते आनि ओप्के पियमळते मीवातोनि दंटाते मंतन. नना पेनदा पोल्‍ले आनि येसुना बारेमते गवाइ वेहताहाटीं पतमोस इनना दीबेतगा बंद कीसि मंतन.
REV 1:10 सामिना रोजुननाड, इत्‍ते अय्तारम, नना पवित्र आत्माते निंडिस मत्‍तन. नावा पज्जो तूताकोमता आवाजनसोंटा पेद्‍दा आवाज केंजावाता.
REV 1:11 “निमे बतल अय्ते हूळांतिन अदुन पुस्तकमते रासि, इपीसि, स्मुरना, पेर्गमम, तुयतीरा, सरदिस, पिलाडेलपिया आनि लोदिकिया इव एडुं कलिसियानोर्क लोहचीम” इंचि इत्‍ता.
REV 1:12 अस्‍के, नातोनि बोर वळ्कसेक मंतोर इंचि हूळालय पज्जो तिरियसि हूळतन अय्ते, नाक बंगारमता एडुं दीसोडिं दिसतां.
REV 1:13 अव एडुं दीसोडिन नड्‍डुम वरोर मनकना रूपमते पुटतोर मत्‍तोर. ओर पोडगु कपडि केरसि मत्‍तोर ओना सातिक बंगारमता पट्‍टा दोहचि मत्‍ता.
REV 1:14 ओना तल्‍ला, ओना केल्क तेल्‍ला गोर्रेता बूरालेसीं, बर्पुनलेसीं तेल्‍लगा दिस्सेक मत्‍ता. ओना कळ्‍क तळमिता वेल्‍गुनलेसीं मत्‍तां.
REV 1:15 ओना काल्क कोल्‍मिते वाटसि एर्रगा आता इत्‍तोळलेसीं मेर्सेक मत्‍तां. ओना लेंग समुद्रमता वेल्‍लेने एता तळालेसीं मत्‍ता.
REV 1:16 ओर ओना तिना कय्‍दे एडुं सुक्‍कान पीसि मत्‍तोर. ओना तोळ्‍दाल रोंडु बाजुकुंक आयदार्क मत्‍ता कसेरलेसीं पेय्सेक मत्‍ता. पिय्यल आतस्के पोळ्‍दु बल्हा मेर्संता अल्हा ओना तोड्‍डि मेर्सेक मत्‍ता.
REV 1:17 बस्के अय्ते ओन नना हूळतन, अस्‍के नना हाताप आसि ओना काल्कुनगा अरतन. अस्‍के ओर ओना तिना कयदुन नापोर्रो इरसि, “निमे वेरियमा सुरुव आनि आकिर ननाने आंदुन, नना पिस्सि मंतन.
REV 1:18 नना अय्ते हासि मत्‍तन गानि हूळा, इंदके नना बस्‍केळ्‍ताहाटीं पिस्सि मनंतन. हामुर आनि नरकमता चाबि नहागेन मंता.
REV 1:19 निमे इदवेरादाका हूळता पोल्‍लें, बव अय्ते जर्गसेक मंतांगो आनि मुन्‍ने जर्गानव अन्‍नि पोल्‍लें रासि इर्रा.
REV 1:20 निमे नावा तिना कय्‍दे हूळता एडुं सुक्‍कां आनि बंगारमता एडुं दीसोडिना मर्ममता अर्तम इल्‍हा मंता; एडुं दीसोडिं इत्‍ते एडुं कलिसियां आंदु आनि एडुं सुक्‍कां इत्‍ते, उंदि-उंदि कलिसियाता उंदि-उंदि दूता आंदु” इंचि इत्‍ता.
REV 2:1 इपीसि सहरता कलिसियाता दूताक इल्‍हा रासा. बोर अय्ते ओना तिना कय्‍दे एडुं सुक्‍कां पीसि मनांतोर, आनि बंगारमता एडुं दीसोडिन नड्‍डुम तिरियंतोर इव ओना पोल्‍लें आंदु.
REV 2:2 निमे कियाना कबाह्‍क, नीवा मेहनत आनि ओप्के नाक एरपाटे. अल्‍हेने निमे सेड्‍डा लोकुल्‍कुन हय्सिन आनि बोर अय्ते “नना प्रेरित” इंचि इनकुंतुर गानि ओरा परिक्‍सा एततस्के ओर नीकु आबद्‍दम वळ्कतद दिसतुर.
REV 2:3 निमे ओप्के पीसि मनांतिन. नावा पोरोलहाटीं तकलिप अरसेक मंतिन गानि तकांचा हिल्‍लिन इंचि नाक एरपाटे.
REV 2:4 गानि नीवा विरोदमते नाकु उंदि पोल्‍ले मंता. अद बतल इत्‍ते, निमे मुन्‍ने नाकुन बल्हा पावरम कियिंदिनो अल्हा इंदके कीसेक हिल्‍लिन.
REV 2:5 निमे बद परिस्तितिते अय्ते अरतिनो अदुन मति कीम. मनसु मार्सकुंचि मुन्‍ने कीता कबाह्‍कुन मर्रा कीम. निमे गिंटा मनसु मार्सकुनाकुंटे नना वासि नी वेडसितुन अद जागाताल तेंडसि पोहांतन.
REV 2:6 अयना नी लोप्पो इद उंदि बेसता पोल्‍ले मंता अद बतल इत्‍ते, निमे निकोलिया लोकुल्‍कुना कबाह्‍कुन हय्सिन, अवुन ननागुडा हय्सोन.
REV 2:7 पवित्र आत्मा कलिसियातोर्क बतल वेहांता अदुन, केव्क मत्‍तोर बेस केंजिर. बोर अय्ते गेल्सांतोर नना ओन्क स्वर्गमते पेनदागा मनना पिस्वरता मराता पंडि तिनालय हींतन.
REV 2:8 स्मुरना सहरता कलिसियाता दूताक इल्‍हा रासा. बोर अय्ते मोदोल आनि आकिर आंदुर, बोर अय्ते हासि मर्रा जीवाते तेदतोर ओर बतल इंतोर इत्‍ते,
REV 2:9 “नीवा तिप्‍पल्‍क आनि गरिबतनम नाकु एरपाटे. (गानि निमे सिरमंतुने आंदिन) बोर अय्ते नीवा अपमानम कींतुर, मोमोट यहुदिल्क आंदुम इंचि इंतुर, गानि असल ओर आयुर. ओर देय्यमता दर्मसास्‍त्रम कराहना लोतुर आंदुर.
REV 2:10 बव तिप्‍पल्‍क अय्ते नीकु वायानव मंतां अवुना बारेमते निमे वेरियमा. हुळाट! देय्यम मी अव्टेटाल इच्‍चुर लोकुल्‍कुन जेलने वाटंता, मीवा विस्वासमता परिक्‍सा एतालय अल्हा जर्गार. मीकु पदि रोजकु तिप्‍पल्‍क अर्रापींता. हायाना वेला वायिनागानि मिमेट विस्वासमते गट्‍टिगा मंटु. अस्‍के मीकु पिस्वरता किरिटम हींतन” इंचि इत्‍ता.
REV 2:11 पवित्र आत्मा कलिसियातोर्क बतल वेहंता अदुन, केव्क मत्‍तोर बेस केंजिर. बोर अय्ते गेल्सांतोर ओन्क रोंडो हामुरताहेंदाल बतल नुकसान आयो.
REV 2:12 पेर्गममता सहरता कलिसियाता दूताक इल्‍हा रासा. बोर अय्ते रोंडु आयदार्कुना कसेर पीसि मनांतोर ओर बतल इंतोर इत्‍ते,
REV 2:13 बगा अय्ते देय्यमता राजगद्‍दे मंता अग्गेन निमे मनांतिन इंचि नाकु एरपाटे. अयना ना पोरोलते निमे निल्‍सि मंतिन. नावा विस्वासमगल्‍ला सेवक अंतिपान मीवा नड्‍डुमे देय्यम मनना जेगाते हव्कतुर, अव रोजकुनेगुडा निमे नावा पोर्रोटा विस्वासमताल पजोळ्क होना हिल्‍लिन.
REV 2:14 गानि नीवा विरोदमते नाकु कोन्‍नि पोल्‍लें वेहनद मंता. इस्राएल लोकुल्‍कुन हिड अरहानाहाटीं बिलाम इनना कबुरतोर बालाक इनना राजांक बतल अय्ते कराहतोरो, अवुन पीसि ताकानोर मीवा नड्‍डुम मंतुर. बोम्मांक मोळ्कता वस्‍तुकुन तिनगोम, बोगमतनम कियगोम इंजि बिलाम करहुंदुर.
REV 2:15 अल्‍हेने मीलोप्‍पो इच्‍चुर लोकुल्‍क निकोलियातुरा करहाताप ताकानुर मंतुर, ओर्कुन ननागुडा हय्सोन.
REV 2:16 अदुनहाटीं मीवा मनसु मार्सकुंटु. इल्‍हा कियाकोंटे नना बिरानेन मिहगा वासि, ना तोळ्‍दा कसेरतोने ओरतोनि लडाइ कींतन.
REV 2:17 पवित्र आत्मा कलिसियातोर्क बतल वेहांता अदुन, केव्क मत्‍तोर बेस केंजिर. बोर अय्ते गेल्सांतोर ओन्क मक्‍किचि इरता मन्‍ना आनि उंदि तेल्‍ला बंडा हींतन. आ बंडापोर्रो उंदि पूना पोरोल रासि मनंता अद बोन्क अय्ते दोर्कार ओन्‍के तेळियार.
REV 2:18 तुयतीराता सहरता कलिसियाता दूताक इल्‍हा रासा. बोना कळ्‍क अय्ते पोत्‍तना तळमिलेसीं मंतां, काल्क कोल्‍मिते काचाह्ता इत्‍तोडिलेसीं मंतां आ पेनदा मर्रि इल्‍हा वेहांतोर:
REV 2:19 निमे कियाना कबाह्‍क, ना पोर्रोटा नीवा पावरम, विस्वासम, निमे कियाना सेवा, तिप्पल्कुने नीवा ओप्के, इव अन्‍नि नाकु तेळियसे. नीवा सुरुवना कबाह्कुंकन्‍ना इंदकेटा कबाह्‍क एक्‍को बेस मंतां.
REV 2:20 गानि नी विरोदमते नाकु उंदि पोल्‍ले वेहानद मंता. जेजेबेल इनना मुरतळ, नना पेनदा कबुरतदुन इंचि वेह्कुंचेके नावा सेवाकुल्कुंक, बोम्मांक मोळ्कता वस्तु तिनगोम, बोगमतनम कियगोम इंचि कराहचि ओर्कुन पसांचेके मंता. असोंटा मुर्ताटुन निमे निहगा मना हीसंतिन.
REV 2:21 मनसु मार्सकुननाहाटीं नना दानकु मोका हीतन, गानि बोगमतनमताल मनसु मार्सकुनालय दाना इच्‍चा हिल्‍ले.
REV 2:22 अय्ते हुळाट! नना दानु कटुल पिया गोटंतन, दानतोनि बोर अय्ते बोगमतनम कींतुर ओरगुडा असोंटा कबाह्कुनाल मनसु मार्सकुनाकुंटे ओर्कुन बागा तिप्पल्कुने अरहंतन.
REV 2:23 अद कराहता पोल्‍लेन पीसि ताकाना दाना पिलाल्कुन नना हव्‍किसि पोहंतन. अस्‍के, बुद्‍दितुन आनि मनसुन एरपाट कियानोन ननाने आंदुन इंचि अन्‍नि कलिसियातोर्क तेळियार. पजा मीकु वरो-वरोंक मिमेट कीता कबाह्‍कुन पीसि, इनाम हींतन.
REV 2:24 गानि तुयतीराते अद कराहताप ताकवोर कळमतोर मिमेट बोर अय्ते विस्वासिर मंतिरो, मीक नना बतल वेहांतन इत्‍ते, मिमेट देय्यमता लोप्पोटा मर्ममतुन एरपाट किया हिल्‍लिर अदुनहाटीं नना मीपोर्रो इंका बर्वु वाटोन.
REV 2:25 नना मल्सि वायनदाका सिराप मिहगा मनना विस्वासमतुन गट्‍टिगा पीसि मंटु.
REV 2:26 बोर अय्ते गेल्सि आकिरदाका नावा कबाह्‍कुन कींतोर ओन्क नना अन्‍नि दुनियाता अन्‍नि देसेल्‍कुना लोकुल्‍कुनपोर्रो अदिकारम हींतन.
REV 2:27 कुम्मल कीता अळकन कच्‍चिता दुड्‍डुने तुकडां-तुकडां कीताप लोकुल्‍कुनपोर्रो ओर राज्येम कींतोर. बाबानाहेंदाल नाकगुडा इसोंटदे अदिकारम दोर्कता.
REV 2:28 अल्हे ननागुडा ओनकु हक्‍केटा सुक्‍कातुन हींतन.
REV 2:29 कलिसियातोर्क पवित्र आत्मा बतल वेहांता अदुन, केव्क मत्‍तोर बेस केंजिरकांटी.
REV 3:1 सरदिस सहरता कलिसियाता दूताक इल्‍हा रासा. बोनगा अय्ते पेनदा एडुं सुक्‍कां आनि एडुं आत्मां मंतां ओर बतल इंतोर इत्‍ते, निमे कियाना कबाह्‍क नाकु एरपाटे; नीवद निमे “जीवाते मंतन” इंचि इनकुंचंतिन गानि असल इत्‍ते निमे हासि मंतिन.
REV 3:2 निमे तेल्‍विते मन, पेनदा मुन्‍ने नीवा कबाह्‍क पुरा आताप नाक दिस्सेक हिल्‍ले. अदुनहाटीं, मय्सि मत्‍ता कबाह्‍कुन पुरागा कीम. मायसि होनालय आता विस्वासमतुन गट्‍टिगा कीम.
REV 3:3 अदुनहाटीं केंजता बोदातुन निमे बल्हा ओप्कुत्‍तिनो अदुन मति कीम. मति कीसि अल्हे ताका आनि मनसु मार्सकुन. ओक्‍कला निमे जेगर्ता मनाकोंटे, नना वरोर दोंगानलेसीं वांतन, नना बद वेलाक निहागा वांतन, दाना पत्‍तागुडा नीकु दल्‍गो.
REV 3:4 गानि सरदिस सहरता इच्‍चुर विस्वासुल्‍क, ओरा कपडिंक डाग अंटाकोंटा इरताप, ओरा ताकमळतुन बेस इरतुर. ओर तेल्‍ला कपडिं केरताप सत्‍तेमते नावातोनि ताकनुर; ओर अल्हा ताकना लायक मंतुर.
REV 3:5 बोर अय्ते गेल्सांतोर, ओन्क इसोंटा तेल्‍ला कपडिं केर्समड जर्गार आनि नना ओना पोरोल्तुन पिस्वरता पुस्‍तकमताल तंचि पोहोन. अल्‍हेने नावा बाबाना मुन्‍ने आनि दूताना मुन्‍ने ओना पोरोलतुन ओपकुंतन.
REV 3:6 पवित्र आत्मा सरदिसता कलिसियातोर्क बतल वेहांता अदुन, केव्क मत्‍तोर बेस केंजिरकांटी.
REV 3:7 पिलाडेलपिया सहरता कलिसियाता दूताक इल्‍हा रासा. बोर अय्ते पवित्र आनि सत्‍तेमतोर मंतोर, ओर दाविदना अदिकारता चाबि इर्रंतोर, ओर तेंडता तल्‍पुन बोरे बंद किया पर्रोर आनि ओर बंद कीता तल्‍पुन बोरे तेंडा पर्रोर, ओर बतल इंतोर इत्‍ते,
REV 3:8 निमे कियाना कबाह्‍क नाक एरपाटे, नीवा ताकत तक्‍को मंता गानि नावा पोल्‍लेता पालन कीतिन आनि नावा पोरोलतुन एतोन इंचि इना हिल्‍लिन. अदुनहाटीं हूळा! नीवा मुन्‍ने उंदि तल्‍पु कुल्‍ला कीसि इरतन, अदुन बोरे बंद किया पर्रुर.
REV 3:9 हूळा! नना देय्यमता दर्मसास्‍त्रम कराहना लोता लोकुल्‍कुन निहगा वायागोटंतन, ओर “मोमोट यहुदिर्क आंदुम इंचि इंतुर” ओर यहुदि आयुर गानि ओर आबद्‍दम वळ्कसेक मंतुर. नना ओर्कुन निहागा तायसि नीवा काल्क मोळ्‍का गोटांतन. अस्‍के नना मीकुन बच्‍चोन पावरम कींतन इंचि ओर्क तेळियंता.
REV 3:10 निमे ओप्के पीसि नावा पोल्‍लेते ताकतिन अल्हेन, केंजतिनगुडा. अदुनहाटीं ई दुनियाता लोकुल्‍कुना पट्‍टु हूळालय बतलय्ते परिक्‍सा वायाना मंता, अव्टेटाल नीकुन कापाळंतन.
REV 3:11 नना बिरानेन निहागा वांतन. नीवा किरिटमतुन निहागटाल बोरे गुंजा मन्‍नि इंचि, निहागा बतलय्ते विस्वासम मंता अदुन इंका गट्‍टिगा पीसि ताका.
REV 3:12 बोर अय्ते गेल्सांतोर, ओन नना नावा पेनदा गुळिते बस्‍केने पलाते पेय्साकोंटा उंदि कंबालेसीं निपसंतन. नना ओनपोर्रो नावा पेनदा पोरोल, नावा पेनदागटा स्वर्गमताल हिळु वायाना पूना येरुसलेमता पोरोल आनि नावा पूना पोरोल रासंतन.
REV 3:13 पवित्र आत्मा पिलदेलपियाता कलिसियातोर्क बतल वेहांता अदुन, केव्क मत्‍तोर बेस केंजिरकांटी.
REV 3:14 लोदिकिया सहरता कलिसियाता दूताक इल्‍हा रासा. बोर अय्ते आमीन इननोर, विस्वासमगल्‍लोड, निजम गवाइ वेहानोर, इंका पेन तयार कीता अन्‍निटवुने मोदोल मनकल आसि मंतोर, इव पोल्‍लें ओनव आंदुं.
REV 3:15 निमे कियाना कबाह्‍क नाकु एरपाटे, विस्वासमते निमे सल्‍लागा हिल्‍लिन गरम हिल्‍लिन. निमे सल्‍लगा हिलाकोंटे गरम मंचि मत्‍ते बेस आसि मनवळ.
REV 3:16 निमे सल्‍लगा हिल्‍लिन, गरम हिल्‍लिन एच्‍चगा मंतिन. अदुनहाटीं नीकुन नना ना तोळ्‍दाल पलाते कक्‍कंतन
REV 3:17 निमे अय्ते, “नना सिरमंतुन, नहगा अन्‍नि मंतां, नाकु बतल तक्‍को हिल्‍ले”, इंचि इनकुंचंतिन. गानि नीकु इदु एरपाट हिल्‍ले गदा, निमे पेद्‍दा हेडसोत्‍तोन, गति हिल्वोन, गरिबोन, गुड्‍डिन, कुळकें मंतिन इंचि.
REV 3:18 अदुनहाटीं, निमे विस्वासम लोप्पो निजम मत्‍ता मनकल आयानाहाटीं नना नीकु उंदि उपायम वेहांतन अद बतल इत्‍ते, तळमिते सुद्‍द कीता बंगारम निमे नहागटाल एता. दानहेंदाल निमे सिरमंतुन आकिन. कुळकें मत्‍तद हूळसि सिग्गु होनामन्‍नि इंचि केर्रालय तेल्‍ला कपडि नहागटाल एता. कळ्‍क बेस दिस्‍सनाहाटीं कळ्‍कुने वाटालय मत्‍तु अस्सा.
REV 3:19 बोन-बोन अय्ते नना पावरम कींतन, ओनकु गट्‍टिगा वेह्‍चि, सुद्रांचा गोट्‍टंतन. अदुनहाटीं इरगा जोसुने मंचि मनसु मार्सकुन्‍नु.
REV 3:20 हूळा, नना तल्‍पुनगा नित्‍तिसि तल्‍पुन टोक-टोक तंतस्के; बोर अय्ते ना लेंग केंजसि तल्‍पु तेंडांतोर, नना ओनगा लोप्पो दांतन, होंचि ओनतोनि कलियसि गाटो तिंतन, आनि ओर नातोनि तिंतोर.
REV 3:21 बल्हा अय्ते नना गेल्सि नावा पेनबाबानतोनि ओना राजगद्‍देपोर्रो होंचि उदतन. अल्हे बोर अय्ते गेल्सांतोर ओन नना नातोनि नावा राजगद्‍देपोर्रो उपसंतन.
REV 3:22 पवित्र आत्मा लोदिकियाता कलिसियातोर्क बतल वेहांता इत्‍ते, केव्क मत्‍तोर बेस केंजिरकांटी.
REV 4:1 इव अन्‍नि आतस्के, स्वर्गमते उंदि तल्‍पु कुल्‍ला मत्‍तद नाकु दिसता. मोट्‍टा मोदाला नना केंजता आवाज तूताकोमता आवाजलेह्का मत्‍ता. अदे आवाज नाकुन, “निमे इगे पोर्रो वा, इव अन्‍नि आतस्के बव पोल्‍लें अय्ते जर्गानव मंतांगो अवुन हुपसंतन,” इंचि इत्‍ता.
REV 4:2 अस्‍केने नना पवित्र आत्माते निंडतन. नाक स्वर्गमते राजगद्‍देपोर्रो बोरो वरोर उद्‍दिस मत्‍तद दिसतोर.
REV 4:3 आ राजगद्‍देपोर्रो बोर अय्ते उद्‍दिस मत्‍तोर ओर यसब आनि मानिक इनना मेर्सना बंडालेसीं दिस्सेक मत्‍तोर. आ राजगद्‍देता सुट्‍टु मरकत इनना मेर्सना बंडानलेसीं उंदि सिंगिड दिस्सेक मत्‍ता.
REV 4:4 राजगद्‍देता सुट्‍टु इरवै नालुं राजगद्‍दें मत्‍तां. अव राजगद्‍देन पोर्रो इरवै नालुर एनकटा पेद्‍दाल्क तेल्‍ला कपडिं केरसि उद्‍दिस मत्‍तुर. ओरा तल्‍लानपोर्रो बंगारमता किरिटाल्कु दोस्‍सि मत्‍तां.
REV 4:5 आ राजगद्‍देताल पिडगु वाटाना वेलगु, उरुमना आवाज आनि पेद्‍दा लेंग पलाते पेय्सेक मत्‍ता. राजगद्‍देता मुन्‍ने तळमितव एडुं वेडसिं पोतसेके मत्‍तां. अव वेडसिं इत्‍ते, पेनदा एडुं आत्मा आंदुं.
REV 4:6 राजगद्‍देता मुन्‍ने अद्‍दमतसोंटा समुद्रम दिस्सेक मत्‍ता. आ राजगद्‍देता नड्‍डुम, सुट्‍टु नालुं जीवाते मत्‍ता जिवरासीं नित्‍तिसि मत्‍तां. अवुंक पज्जो-मुन्‍ने कळ्के कळ्‍क निंडिस मत्‍तां.
REV 4:7 मोदाटा जिवरासि सिंहमतालेसीं, रोंडो जिवरासि कोंदातलेसीं, मूडो जिवरासिता मोकोम मनकनलेसीं मत्‍ता. आनि नालुंगो जिवरासि गुव्वा डेगातलेसीं दिस्सेक मत्‍ता.
REV 4:8 जीवाते मनना नालुं जिवरासिंक हारुं-हारुं रेक्‍कां मंतां, अवुना मेंदुलता सुट्‍टु, लोप्पो कळ्के-कळ्‍क मंतां. अव पोद्‍दाला नर्का पल्हीं आराम कियाकोंटा उंदेतीर, “निमेने पवित्र, पवित्र, पवित्र, सामि पेनबाबाल, अन्‍निटकन्‍ना सक्‍तिमंतुन आंदिन. निमेने मुन्‍नेटाल मत्‍तिन, इंदके मंतिन, मुन्‍नेगुडा मनांतिन” इंचि इंचेक मत्‍तां.
REV 4:9 बस्के अय्ते अव नालुं जिवरासीं, राजगद्‍देपोर्रो उद्‍दिस मत्‍ता बस्‍केळ्‍क जीवाते मनना पेनदा स्‍तुति, महिमा, दन्यवाद कींतां,
REV 4:10 अस्‍के ओर इरवै नालुर पेद्‍दाल्क पेनदा मुन्‍ने टोंगरां ऊनसि ओरा तल्‍लानपोर्रो मत्‍ता किरिटाल्कुन हिळु इर्सि,
REV 4:11 “निमेने ई दुनियाता अन्‍नि वस्‍तुक तयार कीतिन, इव अन्‍नि नीवा इच्‍चा परकारम तयार आतां. नीवा इच्‍चा परकारमे मंतां, निमेने मावा पेन, मावा सामिन आंदिन. महिमा, स्‍तुति आनि ताकत नीवदे आंदु,” इंचि इंतुर.
REV 5:1 पजा आ राजगद्‍देपोर्रो उद्‍दिस मत्‍तोना तिना कय्‍दे नाकु उंदि पुस्तकम दिस्ता. अद लोप्पो, पलाते रोंडु पक्‍काने रासि मत्‍ता आनि दान्क एडुं सिक्‍कां तंचि गुंडूर्गा हुट्‍सि मत्‍ता.
REV 5:2 वेल्‍लेन ताकत मत्‍ता उंदि पेनदा दूतातुन नना अगा हूळतन. पेद्‍दा आवाजते अद, “गुंडूर्गा हुट्‍सि मत्‍ता पुस्तकमपोर्रोटा एडुं सिक्‍कान नेम्‍हाचि, दान विच्‍चनालायक बोर मंतोर?” इंचि इनालय दल्‍गता.
REV 5:3 गानि स्वर्गमते आयि, बूमिपोर्रो आयि, बूमि हिळु आयि अद पुस्तकमतुन विच्‍चिसि दाना लोप्पो हूळना लायकतोर बोरे मनाहिल्‍लोर.
REV 5:4 अद पुस्तकमतुन विच्‍चिसि हूळानालायक बोरे दोर्कुवाहेंका नना इरगा अळतन.
REV 5:5 अस्‍के “निमे अळमा. हूळा! आ गुंडूर्गा हुट्‍सि मत्‍ता पुस्तकमपोर्रोटा सिक्‍कान नेम्‍हाचि अदुन विच्‍चिसि हूळानाहाटीं दाविदना वंसंमतोर, यहुदाना गोत्रमता सिंहम इंचि पोरोल होत्‍तोर वरोर, गेल्सि मंतोर” इंचि आ पेद्‍दाल्कुना अव्टेटाल वरोर नाकुन इत्‍तोर.
REV 5:6 अस्‍के आ राजगद्‍दे, जीवाते मनना नालुं जिवरासीं आनि पेद्‍दाल्कुना नड्‍डुम, मोक्‍कु हीतदुनलेसीं उंदि गोर्रे पोरि नित्‍तिसि मत्‍तद नना हूळतन. दान्क एडुं कोह्कु, एडुं कळ्‍क मत्‍तां. आ एडुं कळ्‍क इत्‍ते, पेन बूमिपोर्रो अन्‍नि दिक्‍कुल्कुने लोहता दाना एडुं आत्मां आंदुं.
REV 5:7 अद गोर्रे पोरि, राजगद्‍देपोर्रो उद्‍दिस मत्‍तोनगा वासि, ओना तिना कय्‍दे मत्‍ता पुस्तकमतुन तेंडकुत्‍ता.
REV 5:8 बस्के अय्ते गोर्रे पोरि आ पुस्तकमतुन तेंडकुत्‍ता, अस्‍के आ नालुं जिवरासि आनि इरवै नालुर पेद्‍दाल्क गोर्रे पोरिना मुन्‍ने काल्कुनगा बोक-बोर्लें अर्सि मोळ्‍कतुर. ओर अंटोरा कय्‍दे उंद-उंदि टांबुरा आनि दूपमते निंडिसि मत्‍ता बंगारमता कुळ्‍कां मत्‍तां. आ दूपमते निंडिसि मत्‍ता कुळ्‍कां इत्‍ते, पेनदा लोकुल्‍कुना पारतनां आंदुं.
REV 5:9 पज्जो ओर अंटोर उंदि पूना पाटा पारालय दल्‍गतुर, “निमे इद पुस्तकमतुन एतसि, दाना सिक्‍कान नेम्‍हाचि विच्‍चनालायक मंतिन. बारित्‍ते, निमे मोक्‍कु आसि नीवा नेत्‍तुर कुदुवा दोस्‍सि हरेक जातिताल, हरेक बासानोरव्टेटाल, हरेक लोकुल्‍कुनाल आनि हरेक देसेमतोरव्टेटाल पेनदाहाटीं अस्‍कुत्‍तिन. निमे ओर्कुन पेनदाहाटीं दाना राज्येमतोर आनि पेर्मालोर्क कीतिन. ओर बूमिपोर्रो राज्येम कींतुर.”
REV 5:11 पजा नना अगा हूळते, आ राजगद्‍दे सुट्‍टु, अव नालुं जिवरासिना सुट्‍टु आनि पेद्‍दाल्कुना सुट्‍टु पेनदा वेल्‍लेन दूताना लेंग केंजावाता. अव दूतां लेक्‍कुते लाकुल्क, कोट्‍कुने मत्‍तां.
REV 5:12 “मन्कालोर इद गोर्रे पोरिन हव्‍किस मत्‍तुर गानि, संपत्‍ति, बुद्‍दि, बलम, कदर, महिमा आनि स्‍तुतिता लायक इदे आंद,” इल्‍हा अव अन्‍नि दूतां पेद्‍दा आवाजते इंचेके मत्‍तां.
REV 5:13 अचोने आयाका स्वर्गमते, बूमिपोर्रो, बूमि हिळु, समुद्रम आनि अवुने मनानव अन्‍निगुडा, “राजगद्‍देपोर्रो उद्‍दनोनद आनि गोर्रे पोरिनद, स्‍तुति, कदर, महिमा आनि बलम बस्‍केळ्‍ताहाटीं मन्‍निकांटी,” इंचि इनानद नना केंजतन.
REV 5:14 अस्‍के जीवाते मनना नालुं जिवरासीं “आमीन” इत्‍तां. पजा पेद्‍दाल्क टोंगरां ऊनसि आरादना कीतुर.
REV 6:1 पजा एडुं सिक्‍कानाल उंदि सिक्‍कातुन आ गोर्रे पोरि नेम्‍हाचि विच्‍चुता. अस्‍के जीवाते मत्‍ता आ नालुं जिवरासिनाल उंदि जिवरासि, पिडगु वाटते वायानसोंटा आवाजते, “वा” इत्‍तद नना केंजतन.
REV 6:2 अस्‍के अगा नाकु उंदि तेल्‍ला गुर्रम दिसता, दानपोर्रो वरोर बानम पीसि उद्‍दिस मत्‍तोर. ओन्क उंदि किरिटम हियमळ जर्गता. ओर लडाईं गेल्सतोर, अय्नागानि इंका गेल्सना इंचि पेय्सतोर.
REV 6:3 गोर्रे पोरि रोंडो सिक्‍कातुन नेम्‍हाचि विच्‍चुता अस्‍के, जीवाते मत्‍ता आ नालुं जिवरासिनाल रोंडो जिवरासि, “वा” इंचि इत्‍तद नना केंजतन.
REV 6:4 अस्‍के उंदि एर्राटा गुर्रम पलाते पेय्सानद नना हूळतन. लोकुल्‍क वरोंक-वरोर हव्ककुनना इंचि, अद गुर्रमपोर्रो उद्‍दिस मत्‍तोन्कु, बूमिपोर्रोटाल सांतितुन येतकुनना अदिकारम हियमळ जर्गता. ओन्क उंदि पेद्‍दा कसेर हियमळ जर्गता.
REV 6:5 बस्के अय्ते गोर्रे पोरि मूडो सिक्‍कातुन नेम्‍हाचि विच्‍चुता, अस्‍के मूडो जिवरासि, “वा” इत्‍तद नना केंजतन. पजा नाकु अगा उंदि कर्रे रंगुना गुर्रम दिसता. आ गुर्रमपोर्रो उद्‍दिस मत्‍तोना कय्‍दे उंदि तराजु मत्‍ता.
REV 6:6 अच्‍चोटेन, जीवाते मत्‍ता आ नालुं जिवरासिना नड्‍डुमताल, “उंदि रोजुना बूतितच्‍चोन कोत्‍ताने, उंदि किलो गोह्कु दोर्कंता, इंका अचोने कोत्‍ताने मूड किलोना जोन्‍नां दोर्कंता. गानि नियदुन, अंगुर पानकमतुन नासडेम कियमा,” इंचि उंदि लेंग केंजावाता.
REV 6:7 गोर्रे पोरि नालुंगो सिक्‍कातुन नेम्‍हाचि विच्‍चुतस्के जीवाते मत्‍ता आ नालुं जिवरासिनाल नालुंगो जिवरासि, “वा” इत्‍तद नना केंजतन.
REV 6:8 पजा नाकु अगा उंदि पस्पु रंगुना गुर्रम दिस्ता. आ गुर्रमपोर्रो उद्‍दिस मत्‍तोना पोरोल हामुर, ओना पज्जो-पज्जो नरकम वासेक मत्‍ता. ओन्क बूमिता नालुं बागाल्कुनाल उंदि बागमपोर्रोटा लोकुल्‍कुन कसेरते, कर्वुने, बिमार्कुने आनि केडाता जिवरासिन हेंदाल नासडेम कियाना अदिकारम हियमळ जर्गता.
REV 6:9 गोर्रे पोरि हेय्युंगो सिक्‍कातुन नेम्‍हाचि विच्‍चुतस्के, पेनदा पोल्‍लें लोकुल्‍कुंक वेहताहाटीं आनि ओरा गवाइ वेहताहाटीं मोक्‍कु हिय्यना गद्‍दे हिळु हव्‍किसि मत्‍तोर्कुना आत्मान हूळतन.
REV 6:10 आ आत्मां पेद्‍दा आवाजते, “ए सामि, पवित्र आनि सत्‍तेम मनानोन, माकुन हव्कुता बूमिपोर्रोटा लोकुल्‍कुना न्‍यायम निमे बस्के कींतिन? ओरा न्‍यायम कीसि मावा नेत्‍तुरता बदला बस्के एतांतिन?” इंचि वरगेयालय दल्‍गतां.
REV 6:11 पजा ओर्क अंटोर्क तेल्‍ला कपडिं हीसि, “मीकुन हव्‍कुतापे मीवा दंटाता सेवाकुल्कुन आनि विस्‍वासुल्‍कुन हव्कना मंता, ओरा लेक्‍कांगुडा पुरागा आयानदाका मिमेट गळसेप आराम कीम्‍टु,” इंचि ओर्कु वेहतोर.
REV 6:12 गोर्रे पोरि हारुंगो सिक्‍कातुन नेम्‍हाचि विच्‍चुता, अस्‍के पेद्‍दा बुकंप आतद नना हूळतन. अस्‍के पोळ्‍दु कर्रे गोंगोळिलेसीं कर्रेगा आनि वेळ्‍सिअंता बारे नेत्‍तुरलेसीं एर्रगा आता.
REV 6:13 पेद्‍दा वळि दुमारम वाते तोया मराता पंडिं बल्हा हिड अर्रंता, अल्‍हेने सुक्‍कां मब्बुनाल बूमिपोर्रो अरतां.
REV 6:14 मब्बु उंदि कागदेम हुटताप हुटकुंचि मायसोत्‍ता. अल्हेन हरेक गुट्‍टा, दीबे अवुना जागानाल जर्गतां.
REV 6:15 अस्‍के बूमिपोर्रोटा राजालोर, अदिकारिल्‍क, सायाबुल्क, सिरमंतुल्‍क, ताकतवर्क, दासुल्क, दासुल्क आयवोर, इल्‍हा अंटोर लोकुल्‍क गुट्‍टाना बुयाराल्कुने, पेद्‍दा बंडा सोर्रेने होंचि मकतुर.
REV 6:16 मक्‍किसि गुट्‍टां आनि बंडानतोनि, “मापोर्रो अर्सि, राजगद्‍देपोर्रो उद्‍दिस मत्‍तोना नदरताल आनि गोर्रे पोरिना होंगुनाल माकुन मक्‍किचट.
REV 6:17 बारित्‍ते, पेनदा होंग हुप्‍सना कतरनाक रोजु एवता. ओरा मुन्‍ने बोर नित्‍ता परांतुर?” इंचि इनालय दल्‍गतुर.
REV 7:1 इवन्‍नि जर्गतारित्‍ते, बूमिता नालुं मूलांक पेनदा नालुं दूतां नित्‍तिसि मत्‍तद नना हूळतन. अव बूमिपोर्रो आयि, समुद्रमते आयि आनि बवे मराकुन पोर्रो आयि वळितुन वायाकोंटा आपसि पीसि मत्‍तां.
REV 7:2 अस्‍के मर्रा उंदि दूतातुन जीवाते मनना पेनदा सिक्‍कातुन पीसि पोळ्‍द पेयसनाहेंदाल पोर्रो वासेक मनानद हूळतन. बव नालुं दूतांक अय्ते, बूमितुन आनि समुद्रमतुन नासडेम कियाना अदिकारम हीसि मत्‍ता, अव नालुं दूतन अद पेद्‍दा आवाजते, “बदवेरादाका अय्ते मोमोट पेनदा सेवाकुल्कुना कपालमपोर्रो सिक्‍कां तन्‍नोम अदवेरदाका बूमितुन आयि, समुद्रमतुन आयि, अल्‍हेने मराकुन आयि नासडेम कियमट” इंचि इत्‍ता.
REV 7:4 अस्‍के सिक्‍कां तंचि मत्‍तोरा लेक्‍का केंजतन अय्ते, ओर उंदि लक्‍सा नल्‍पै नालु वेय्‍कु मत्‍तुर आनि अव्टे इस्राएलना हरेक वंसंमता लोकुल्‍क मत्‍तुर.
REV 7:5 यहुदाना वंसंमताल पन्‍नेंड वेय्‍कु लोकुल्‍कुंक सिक्‍का तनमळ जर्गता. रुबेनना वंसंमताल पन्‍नेंड वेय्‍कु, गादना वंसंमताल पन्‍नेंड वेय्‍कु, अस्सेरना वंसंमताल पन्‍नेंड वेय्‍कु, नप्‍तालिना वंसंमताल पन्‍नेंड वेय्‍कु, मनसेना वंसंमताल पन्‍नेंड वेय्‍कु, सिमोनुना वंसंमताल पन्‍नेंड वेय्‍कु, लेविना वंसंमताल पन्‍नेंड वेय्‍कु, इसाकुना वंसंमताल पन्‍नेंड वेय्‍कु, जबलुनना वंसंमताल पन्‍नेंड वेय्‍कु, योसेपना वंसंमताल पन्‍नेंड वेय्‍कु, बेंजामिनना वंसंमताल पन्‍नेंड वेय्‍कु, इल्‍हा पन्‍नेंड गोत्राल्कुना लोकुल्‍कुंक सिक्‍कां वाटमळ जर्गता.
REV 7:9 अद आता पजा, पेनदा राजगद्‍दे आनि गोर्रे पोरिना मुन्‍ने तेल्‍ला कपडिं केरसि, कजूर मराता कोम्मां कय्‍दे पीसि हरेक जातितोर, हरेक बासातोर, हरेक लोकुल्‍क आनि अन्‍नि देसेल्‍कुनोर इल्‍हा लेक्‍कुते बोरे लेक्‍का पर्रुर अच्‍चोन मंदितुन नना हूळतन.
REV 7:10 ओर अंटोर पेद्‍दा आवाजते, “राजगद्‍देपोर्रो उद्‍दिस मनना मना पेनबाबानगा, गोर्रे पोरिनगा मुक्‍ति हियना सक्‍ति मंता” इंचि इनालय दल्‍गतुर.
REV 7:11 अन्‍नि दूतां राजगद्‍दे सुट्‍टु, पेद्‍दाल्क आनि जीवाते मत्‍ता आ नालुं जिवरासिना सुट्‍टु नित्‍तिसि मत्‍तां. अव अन्‍नि दूतां राजगद्‍दे मुन्‍ने बोक-बोर्लें अर्सि पेनदुन आरादना कीसेके इल्‍हा इनालय दल्‍गतां, “आमीन, स्‍तुति, महिमा, तेल्वि, ताकत आनि दन्यवाद बस्‍केळ्‍ताहाटीं मावा पेनदावे आंदुं, आमीन” इंचि इत्‍तां.
REV 7:13 अस्‍के पेद्‍दाल्कुना अव्टेटाल वरोर “तेल्‍ला कपडिं केरसि मन्‍नानुर ईर बोर आंदुर? ईर बगाटाल वातुर?” इंचि नाकुन पूसकीतोर.
REV 7:14 अस्‍के, “नीकु एरपाटे महाराज,” इंचि नना ओन इत्‍तन. अस्‍के ओर, “ईर अंटोर वेल्‍ले तिप्पल्कुनाल पलाते वातोर आंदुर. ईर ईरा कपडिं गोर्रे पोरिना नेत्‍तुरते हुक्‍किसि तेल्‍लगा कीतुर आंदुर.
REV 7:15 अदुनहाटीं ईर अंटोर इंदके पेनदा राजगद्‍दे मुन्‍ने मंतुर. नर्का-पिय्यल गुळितगा मंचि दाना सेवा कींतुर. राजगद्‍देपोर्रो उद्‍दिस मनानोर ईरापोर्रो डेरा कीसि कापाळांतोर.
REV 7:16 ईरकु इंदकेटाल बस्‍केने दूपा आयो, कर्वेस्सो, अचोने आयाका ईरकु पोळ्‍दुना एद्‍दिहेंदाल दगळागुडा दल्‍गो.
REV 7:17 बारित्‍ते ईर अंटोर्कुन मेहानोर, राजगद्‍दे नड्‍डुम उद्‍दिस मनना गोर्रे पोरि आंदुर. ओर ईरकुन पिस्वरता एता उटानगा ओंतोर. पेन ओरा कळ्‍कुना कंडेह्कुन पुरागा उसमंता,” इंचि वेहतोर.
REV 8:1 गोर्रे पोरि एडुंगो सिक्‍कातुन नेम्‍हाचि विच्‍चुतस्के स्वर्गमते सगम गंटादाका सुम-साम आता.
REV 8:2 अस्‍के पेनदा मुन्‍ने नित्‍तिसि मननव एडुं दूतन नना हूळतन. अवुंक एडुं तूताकोम्‍कु हियमळ जर्गता.
REV 8:3 अगा इंकुंदि पेनदा दूता गद्‍देतगा वासि नित्‍तुता. दाना कय्‍दे बंगारमता गुगलेम कुळका मत्‍ता. दान्क राजगद्‍दे मुन्‍ने मनना बंगारमता गद्‍देपोर्रो अंटोर पेनदा लोकुल्‍कुना पारतनांतोनि गुगलेम वाटानाहाटीं वेल्‍लेन गुगलेम हियमळ जर्गता.
REV 8:4 अस्‍के पेनदा दूताना कयदाल अद गुगलेमता पोया पेनदा लोकुल्‍कुना पारतनांतोनि पेनदागा एवता.
REV 8:5 आ दूता दूपमता कुळकाते गद्‍देतगा मत्‍ता तळमितुन निहाचि अदुन बूमिपोर्रो पोह्‍चीता, अदुनहेंदाल मब्बु गळ-गळा इंचेके उरमालय, मेर्सालय, बुकंप आयालय दल्‍गता.
REV 8:6 अस्‍के तूताकोम पीसि मत्‍ता अव एडुं दूतां तूताकोम्‍कु उह्कालय तयार आतां.
REV 8:7 मोदाटा दूता तूताकोम उह्कता, अस्‍के नेत्‍तुर कलियसि मत्‍ता बंडां आनि तळमि बूमिपोर्रो अरता. अरतस्के बूमिता मूड बागाल्कुनाल उंदि बागम आनि मराकुना मूड बागाल्कुनाल उंदि बागम कर्विसोत्‍ता. इंका पच्‍चाटा जाळिगुळा पुरागा वेसोत्‍ता.
REV 8:8 रोंडो दूता तूताकोम उह्कता, अस्‍के तळमितोनि पोतसेके मत्‍ता उंदि पेद्‍दा गुट्‍टातसोंटद बतलो समुद्रमते वाटमळ जर्गता. दानहेंदाल समुद्रमता मूड बागाल्कुनाल उंदि बागम नेत्‍तुरलेसीं आसोत्‍ता.
REV 8:9 अदुनहेंदाल समुद्रमते जीवाते मत्‍ता जिवरासिना मूड बागाल्कुनाल उंदि बागम जिवरासीं हासोत्‍तां. आनि समुद्रमते मत्‍ता जहाजकुना मूड बागाल्कुनाल उंदि बागम नासडेम आता.
REV 8:10 पेनदा मूडो दूता तूताकोम उह्कता, अस्‍के मब्बुनाल डिव्टितलेसीं पोतसेके उंदि पेद्‍दा सुक्‍का बूमिपोर्रो अरता. अद सुक्‍का मूड बागाल्कुनाल उंदि बागम बेरेह्क आनि एता उटानपोर्रो अरता.
REV 8:11 अद सुक्‍काता पोरोल कयमुल. दानहेंदाल एता मूड बागाल्कुनाल उंदि बागम एर कयमुल आसोत्‍ता. अद एर उट्‍टाहाटीं वेल्‍लेन मनकालोर हासोत्‍तुर.
REV 8:12 नालुंगो दूता तूताकोम उह्कता, अस्‍के पोळ्‍दु, वेडसि आनि सुक्‍कां इवुना मूड बागाल्कुनाल उंदि बागम नासडेम आता. अदुनहाटीं अवुना मूड बागाल्कुनाल उंदि बागम हीकट आता. पोद्‍दाला-नर्कागुडा मूड बागाल्कुनाल उंदि बागम हीकट आसोत्‍ता.
REV 8:13 पज्जो उंदि गुव्वा डेगातुन मब्बुन नड्‍डुमताल परियसेक वायनद हूळतन अद जोरते इल्‍हा इनानद केंजतन: “इंदके मूड दूतां अवुना तूताकोम उह्कानदे मंता, अव अवुना तूताकोम उह्कतस्के बूमिपोर्रो मनना अंटोर्क इरगा गोसा आयार! गोसा आयार! गोसा आयार!”
REV 9:1 पजा हेय्युंगो दूता तूताकोम उह्कता, अस्‍के मब्बुनाल उंदि सुक्‍का बूमिपोर्रो अरता. आ सुक्‍काक वेल्‍लेन लोत मत्‍ता पोक्‍काता चाबि हीतद नना हूळतन.
REV 9:2 आ सुक्‍का, लोत मत्‍ता पोक्‍काता तल्‍पुन तेंडता, अस्‍के पेद्‍दा बट्‍टिताल पेय्‍सना पोयालेह्का आ पोक्‍काताल पोया पेय्सता. दानहेंदाल पोळ्‍दु, वळि हीकट आसोत्‍तां.
REV 9:3 आ पोयाताल गोल्‍लाबामा पुळ्कु पेय्सि बूमिपोर्रो वातां. बूमिपोर्रोटा मिच्‍चोंक बसोंटा ताकत मंतनो असोंटदे ताकत अवुंक हियमळ जर्गता.
REV 9:4 आ गोल्‍लाबामांकु, बूमिपोर्रोटा जाळितुन आयि, बवे पच्‍चटा पोर्कां, मराकुन आयि, नासडेम कियानायो. बोरा कपालमपोर्रो अय्ते पेनदा सिक्‍का तंचि हिल्‍लेनो सिराप ओर्कुने नासडेम कियाना इंचि वेहामळ जर्गता.
REV 9:5 मनकालोर्कुन हव्काना अदिकारम अय्ते अवुंक हिल्‍ले, गानि हेय्युं नेल्कुनदाका ओर्कुन तकलिपते अरहना अदिकारम हियमळ जर्गता. अवुनाहेंदाल आयाना तकलिप, मनकन मिच्‍चो कस्कुते बल्हा मनंता अल्हा मत्‍ता.
REV 9:6 अव रोजकुने लोकुल्‍क हामुरतुन पहकंतुर, गानि ओर्कु हामुर दोर्को. हामुर कोरांतुर गानि ओर्कु हामुर दोर्को.
REV 9:7 आ गोल्‍लाबामां, लडाइहाटीं तयार कीता गुर्राल्कुनलेसीं दिस्सेक मत्‍तां. अवुना तल्‍लानपोर्रो बंगारमता किरिटम दोसताप मत्‍ता. अवुना मोकाल्क मनकालोरा मोकाल्कुनलेसीं दिस्सेक मत्‍तां.
REV 9:8 अवुना केल्क मुरताह्कुना केल्कुनलेसीं मत्‍तां. अवुना पल्कु सिंहमता पल्कुनलेसीं मत्‍तां.
REV 9:9 अव कच्‍चिता अंगिं केरसि मत्‍तां. अवुना रेक्‍काना आवाज अय्ते, लडाइ कियालय वित्‍तना वेल्‍लेन गुर्राल्कुना रताल्कुनलेसीं मत्‍तां.
REV 9:10 अवुंक मिच्‍चोनलेसीं तोकां, कोंडिं मत्‍तां. मनकालोर्कुन हेय्युं नेल्कुनदाका तकलिपते अरहचि इर्राना ताकत, अवुना तोकाने मत्‍ता.
REV 9:11 वेल्‍लेन लोत पोक्‍काता दूता, अवुंक राजाल आसि मत्‍ता. इब्रानि बासाते दान अबदोन आनि ग्रीक बासाते अपुलोन इंचि इंतुर.
REV 9:12 इद मोदाटा गंडम पेय्सि होत्‍ता. मुन्‍ने इंका रोंडु गंडाल्कु वायानव मंतां.
REV 9:13 हारुंगो दूता तूताकोम उह्कता, अस्‍के पेनदा मुन्‍ने मत्‍ता बंगारमता गद्‍देता नालुं कोह्कुनाल उंदि लेंग नना केंजतन.
REV 9:14 आ लेंग, तूताकोम पीसि मत्‍ता हारुंगो दूतातुन, “परात इनना पेद्‍दा बेरेटगा दोहासि मत्‍ता नालुं दूतन होळसीम,” इंचि इत्‍ता.
REV 9:15 अदे वेला, अदे रोजु, अदे नेला, अदे वर्साताहाटीं होळसालय पेन अवुन तयार कीसि मत्‍ता. बूमिपोर्रोटा लोकुल्‍कुना मूड बागाल्कुनाल उंदि बागम लोकुल्‍कुन हव्कानाहाटीं आ नालुं दूतन होळ्‍सीयमळ जर्गता.
REV 9:16 आ गुर्राल्कुनपोर्रो वायना सिपाइल्क लेक्‍काते पुरा इरवै कोट्‍कु मत्‍तुर इत्‍तद नना केंजतन.
REV 9:17 नना हूळता दर्सनमते, आ गुर्राल्कुनपोर्रो उद्‍दिस मत्‍तोर केरता कच्‍चिता अंगिं, तळमितलेसीं रगारगा, नेळि पंडि रंगुलेसीं आनि गंदकम रंगुनव मत्‍तां. अवुना तल्‍लां सिंहमता तल्‍लानलेसीं दिस्सेक मत्‍तां. इंका अवुना तोळ्‍दाल तळमि, पोया, गंदकम पेय्सेक मत्‍ता.
REV 9:18 आ मूड गंडाल्कुनाहेंदाल इत्‍ते, गुर्राल्कुना तोळ्‍दाल पेय्‍सना तळमि, पोया, गंदकम इवुनाहेंदाल बूमिपोर्रोटा मूड बागाल्कुना लोकुल्‍कुनाल उंदि बागम लोकुल्‍कुन हव्‍किसि पोहमळ जर्गता.
REV 9:19 आ गुर्राल्कुना ताकत अवुना तोड्‍डिने, तोकाने मत्‍ता. अवुना तोकांक तरास तल्‍लानलेसीं तल्‍लां मत्‍ताहाटीं, अव लोकुल्‍कुन कस्‍किसि ओर्कुन तिप्‍पल्‍क किय्युंदूं.
REV 9:20 अव गंडाल्कुनाहेंदाल अच्‍चोन तिप्‍पल्‍क वायिनागानि बोर अय्ते हाया हिल्‍लुरो, ओर ओरा कराब कबाह्कुनाल मनसु मार्सकुन्‍ना हिल्‍लुर. ओर देय्याल्कुन इत्‍ते, वळ्का पर्रुवव, केंजा पर्रुवव, ताका पर्रुवव बंगारम, एंडि, रागि, बंडा, कट्‍टेतोनि तयार कीता बोम्मन मोळ्‍कसेकेन मत्‍तुर.
REV 9:21 अचोने आयका लोकुल्‍कुन हव्‍कमळ, होदें कियमळ, बोगमतनाल्क कियमळ, दोंगातनाल्‍क कियमळ इसोंटा कबाह्कुनालगुडा मनसु मार्सकुन्‍ना हिल्‍लुर.
REV 10:1 पजा, उंदि ताकतवर दूता मब्बु तेर्पेतुन मुच्‍कुंचि स्वर्गमताल हिळु रेय्‍सि वायानद नना हूळतन. दाना तल्‍लापोर्रो सिंगिड मत्‍ता. मोकोम पोळ्‍दुनलेसीं आनि काल्क तळमिता कंबालेसीं मत्‍तां.
REV 10:2 विच्‍चिसि मत्‍तद उंदि सिन्‍ना पुस्तकम दाना कय्‍दे मत्‍ता. अद दाना तिना कादुन समुद्रमपोर्रो, आनि रोड्‍डा कादुन बारे बूमिपोर्रो इरता.
REV 10:3 पजा सिंहम मोत्‍कुत्‍ताप पेद्‍दा आवाजते मोतकुत्‍ता. अस्‍के एडुं मल्कां उरुमताप गड्‍डेल इंचि आवाज वाता.
REV 10:4 आ एडुं मल्कां गड्‍डेल इत्‍ता आवाज वातस्के, अवुन नना रासानदे मत्‍ता, अस्‍केने स्वर्गमताल उंदि लेंग, “एडुं मल्कां उरुमता आवाजताल केंजता पोल्‍लेन रासमा, अवुन मक्‍किचि इर्रा,” इंचि इत्‍तद नना केंजतन.
REV 10:5 समुद्रमपोर्रो आनि बूमिपोर्रो काल्क इरसि नित्‍तिसि मत्‍ता दूता, स्वर्गमताहेके तिना कय हाहतद नना हूळतन.
REV 10:6 पजा अद दूता, बोर अय्ते स्वर्गमतुन आनि अव्टे मनना अन्‍निटवुन, बूमितुन आनि अव्टे मनना अन्‍निटवुन, समुद्रमतुन आनि अव्टे मनना अन्‍निटवुन तयार कीतोर, बस्‍केळ्‍क जीवाते मनना आ पेनबाबाना पोरोलते ओट्‍टु तिंचि इल्‍हा इत्‍ता, “इंका आल्सेम आयो.”
REV 10:7 गानि एडुंगो दूता दाना तूताकोम बस्के अय्ते उह्कारो, अस्‍के पेन दाना सेवाकुल्कु आता कबुरतोर्कुंक वेह्‍चि मत्‍ता परकारम, दाना मर्ममता पोल्‍लें पुरागा आयनुं.
REV 10:8 स्वर्गमताल वाता बद लेंगुन अय्ते नना केंजसि मत्‍तानो, अदे लेंग मर्रा नाकुन, “होन! होंचि समुद्रमपोर्रो आनि बूमिपोर्रो काल्क इरसि नित्‍तिसि मनना दूताता कय्‍दे, विच्‍चिसि मत्‍ता पुस्तकमतुन तेंडकुन,” इंचि इत्‍तद नना केंजतन.
REV 10:9 अस्‍के आ दूतातगा होंचि, “नीवा कय्‍दे मनना अद सिन्‍ना पुस्तकमतुन नाकु हीम,” इंचि इत्‍तन. अस्‍के अद नाकुन, “इदे दीन पीसि तिन्‍नु. इद नीवा पीटुन अय्ते कयमुल कींता, गानि नीवा तोड्‍दुक मात्रम तेनेलेसीं तिय्यगा दल्‍गंता” इंचि इत्‍ता.
REV 10:10 अस्‍के आ पुस्तकमतुन दूताता कय्‍दाल तेंडकुंचि तित्‍तन. तित्‍तस्के अय्ते ना तोड्‍दुक अद तेनेलेसीं तिय्यागेन दल्‍गता गानि पीर मात्रम कयमुल आसोत्‍ता.
REV 10:11 पजा आ दूता नाकुन, “मरुंदि मल्का निमे होंचि हरेक बासा वळकानोर्कुंक, राजुल्‍कुंक, वेल्‍लेन लोकुल्‍कुंक आनि दुनियाता अन्‍नि देसेल्‍कनोर्कुंक, वायाना कालमते ओरपोर्रो बतल जर्गानद मंतानो, अदुना बारेमते बविस्यवानि वेहा” इंचि इत्‍ता.
REV 11:1 पजा, कहाना पट्‍टितसोंटद उंदि पट्‍टि हीसि बोरो नाक इल्‍हा वेहतोर, “निमे तेदसि, पेनदा गुळितुन आनि गद्‍देतुन कहा. इंका गुळितगा बच्‍चोर लोकुल्‍क अय्ते आरादना कींतुर ओर्कुन लेक्‍का.
REV 11:2 गानि गुळिता पलाते दारातुन कहामा, अद यहुदि आयवोर्कुंक हीसि मंता. पवित्र सहरतुन नल्‍पै रोंडु नेल्‍लांदाका ओर जारांतुर.
REV 11:3 पजा नना नावा इव्वुर गवाइदारकुंक बविस्यवानि कियाना अदिकारम हींतन, ओर पोतां हुटकुंचि पन्‍नेंड नुह्कुना अरवै रोजकुनदाका बविस्यवानि कींतुर.”
REV 11:4 आ इव्वुर गवाइदार्क इत्‍ते, बूमिपोर्रोटा सामिना मुन्‍ने नित्‍तिसि मनना रोंडु जय्तुन मराक आनि रोंडु दीसोडिं आंदुं.
REV 11:5 ओक्‍कला बोरन्‍ना आ गवाइदार्कुनपोर्रो अन्‍यायम कियालय हूळते, ओरा तोळ्‍दाल तळमि पेय्सि ओरा नुकसान कियालय हूळना पगातोर्कुन बूळ्‍दि कीसि पोहंता. अवुना नुकसान कियालय हूळानोर्कुंक तप्‍पाकोंटा इसोंटा हामुरे वायार.
REV 11:6 आ गवाइदार्क बविस्यवानि कियाना रोजकुने ओक्‍कला पिर्रु वायानय्ते अदुन आपाना अदिकारम ओर्कु हीसि मत्‍ता. अचोने आयाका ओर्कु बस्के अनपिस्‍ते अस्‍के, एतुन नेत्‍तुरते मार्समळ आनि बूमिपोर्रोटा लोकुल्‍कुंक तीराता तकलिप्क हियना अदिकारमगुडा ओर्कु हीसि मत्‍ता.
REV 11:7 पेनदा बारेमते ओरा गवाइ वेहामळ आतस्के, लोत पोक्‍काताल उंदि जिवरासि पलाते पेय्सि वासि ओरतोनि लडाइ किय्‍यार. लडाइ कीसि ओर्कुन गेल्सि हव्कार.
REV 11:8 ओरा पीनगुल्कु आ पेद्‍दा सहरता हर्दे अरसि मनंतां. इगेन ओरा सामिनगुडा क्रुसुनपोर्रो वेलाड वाट्‍सि मत्‍तुर. वेरे अर्तमते, अद सहरतुन सदोम आनि इजिप्‍त इंचि इंतुर.
REV 11:9 मूडुननरा रोजकुनदाका अन्‍नि जातिनोर, हरेक बासा वळ्कानोर, अंटोर लोकुल्‍क, दुनियाता अन्‍नि देसेल्‍कुनोर ओरा पीनगुल्कुन हूळांतुर, गानि ओर्कुन बोंदा मात्रम दोस्‍सा हिय्युर.
REV 11:10 ओर इव्वुर कबुरतोराहेंदाल बूमिपोर्रो वेल्‍लेन तकलिपकु वासि मत्‍तां. अदुनहाटीं ओर हातुर इंचि बूमिपोर्रोटा लोकुल्‍क वेल्‍लेन कुसिते पंडगुल्कु कियानुर, वरोंक-वरोर इनामकु हीकुनानुर.
REV 11:11 गानि मूडुननरा रोजकुना पज्जो, पेनदाहेंदाल पिस्वरता ऊपिर वासि ओरव्टे नेंगता. अस्‍के ओर तेदसि निततुर. अस्‍के ओर्कुन हूळता लोकुल्‍क इरगा वेरियतुर.
REV 11:12 पजा स्वर्गमताल उंदि पेद्‍दा लेंग, “इगे पोर्रो वटु” इंचि इत्‍तद ओर इव्वुर गवाइदार्क केंजतुर. केंजसि उंदि मब्बु तेर्पेते कलियसि ओरा पगातुर हूळानेंकेन स्वर्गमताहेके पोर्रो होत्‍तुर.
REV 11:13 अच्‍चोटेन अदे वेलाते अगा पेद्‍दा बुकंप आता, अद सहरता पदि बागाल्कुनाल उंदि बागम नासडेम आता. अद बुकंपता हेंदाल एडुं वेय्‍कुना लोकुल्‍क हासि होत्‍तुर. आनि बोर अय्ते पिस्सि मत्‍तुरो, ओर इरगा वेरियतुर, वेरियसि स्वर्गमते मनना पेनदा महिमा कीतुर.
REV 11:14 रोंडो गंडम आसोत्‍ता. हुळाट! मूडो गंडम बिरानेन वासेक मंता.
REV 11:15 एडुंगो दूता तूताकोम उह्कता, अस्‍के स्वर्गमते पेद्‍दा आवाज केंजावाता. अद आवाज, “दुनियाता पूरा राज्येम मना सामिनद आनि ओना किरिस्‍तुनद आता. युगा-युगाल्‍कुनदाका ओरे राज्येम कींतोर,” इंचि इत्‍ता.
REV 11:16 अल्हा इत्‍तस्के, राजगद्‍देन पोर्रो उद्‍दिस मत्‍ता आ इरवै नालुर पेद्‍दाल्क पेनदा मुन्‍ने काल्कुनगा बोकबोर्लें अर्सि, पेनदुक आरादना कीतुर.
REV 11:17 कीसि, “अन्‍निटकन्‍ना एक्‍को सक्‍तिमंतुन आता मावा पेनदुना! निमे मुन्‍ने मत्‍तिन, इंदकेगुडा मंतिन. इंदके निमे नीवा ताकततुन हुपिच्‍चि राज्येम कियालय सुरुव कीतिन. अदुनहाटीं मोमोट नीकु दन्यवाद कींतोम.
REV 11:18 नीकुन एरपाट कियवा लोकुल्‍क नीवा विरोद कीताहाटीं नीकु होंग वाता. हातोरा न्‍यायम कियाना वेला इंदके एव्ता. अल्‍हेने नीवा सेवाकुल्कुंक, नीवा पोल्‍लें वेहाना कबुरतोर्कुंक, नीवा लोकुल्‍कुंक, नीकु वेरियसि पिस्‍साना सिन्‍नाल्कुंक-पेद्‍दाल्कुंक इनाम हियना वेला एवता. अचोने आयाका बूमितुन नासडेम कीतोर्कुन नासडेम कियाना वेलागुडा वाता,” इंचि इत्‍तुर.
REV 11:19 पजा स्वर्गमते मत्‍ता पेनदा गुळि कुल्‍ला आता. अय्ते अगा पेनदा करारकुना संदुग दिस्ता. अस्‍के इरगा मेर्समळ, उरुममळ, पिडगु वाटमळ, बुकंम आयमळ जर्गता पजा इरगा बंडां अरतां.
REV 12:1 अद आता पजा, स्वर्गमते नाकु उंदि पेद्‍दा चिन्‍ह दिस्ता. अद बतल इत्‍ते, उंदि मुरतळ पोडदुन कप्पिडलेसीं पोंडसि मत्‍ता. दाना काल्कुना हिळु वेळसि आनि तल्‍लापोर्रो बारे पन्‍नेंड सुक्‍काना किरिटम मत्‍ता.
REV 12:2 अद मुरतळ पीटे मत्‍ता. मुरतटा एरपूराना वेला वासि मत्‍ताहेंका अद नोप्पिने तनलाळसेक मत्‍ता.
REV 12:3 पजा स्वर्गमते नाकु इंकुंदि चिन्‍ह दिस्ता. अद बतल इत्‍ते, उंदि एर्राटा पेद्‍दा मासुल तरास मत्‍ता. दानकु एडुं तल्‍लां, पदि कोह्कु मत्‍ता. एडुं तल्‍लानपोर्रो एडुं किरिटाल्कु मत्‍तां.
REV 12:4 अद तरास दाना तोकाते, मब्बुने मनना सुक्‍काना मूड बागाल्कुनाल उंदि बागम सुक्‍कान इग्‍गिस बूमिपोर्रो अरहता. एर पूरालय आसि मत्‍ता मुरतळ, एर पूरतारित्‍ते, दाना पेळान मिंगनाहाटीं आ तरास, मुरतटा मुन्‍ने होंचि नित्‍तिसि मत्‍ता.
REV 12:5 अद मुरतळ वरोर मर्रिन कंता. ओर अन्‍नि राज्येल्कुनपोर्रो कच्‍चिता सलाकिलेसीं कडक राज्येम कियानोर मत्‍तोर. गानि आ पेळान पेनदागा, दाना राजगद्‍देतगा ओयमळ जर्गता.
REV 12:6 अस्‍के अद मुरतळ बय्‍लि जेगातेके वित्‍तुता. अगा दानाहाटीं, पंन्‍नेड नुह्कुना अरवै रोजकुनदाका बेस हूळकुननाहाटीं पेन जेगा तयार कीसि मत्‍ता.
REV 12:7 पजा स्वर्गमते उंदि लडाइ आता. पेनदा मिकायेल इनना दूता, दाना दंटा दूतन पीसोंचि, मासुल तरास आनि दाना दूतानतोनि लडाइ कीता. अस्‍के मासुल तरासगुडा दाना दूतन पीसि मिकायेलुनतोनि लडाइ कीता.
REV 12:8 गानि मासुल तरास, दाना दूतां लडाइ गेल्सा परा हिल्‍लें. अदुनहाटीं स्वर्गमते मनालय अवुंक जेगा दोर्काहिल्‍ले.
REV 12:9 पजा अद मासुल तरासतुन आनि दाना दूतन बूमिपोर्रो दोब्‍बिसीयमळ जर्गता. अद तरास दाना दूतनतोनि कलियसि पूरा दुनियातुन पसांचेके मंता. इद मासुल तरासुन पडाना तरास, हिलाकोंटे पसांचनदु, हिलाकोंटे देय्यम इंचि इंतुर.
REV 12:10 पजा स्वर्गमताल उंदि पेद्‍दा लेंग केंजावाता. अद इल्‍हा मत्‍ता, “मा पेनदा मुन्‍ने मावा विस्वासुल्‍कुनपोर्रो नर्का-पिय्यल बस्‍केळ्‍क दोसेम दोस्सेके मनानदुन हिळु बूमिपोर्रो दोब्‍बिसीयमळ जर्गता. अदुनहाटीं पेन मनाकु हियना मुक्‍ति, ताकत, राज्येम आनि दाना किरिस्‍तुना अदिकारम पलाते अरता.
REV 12:11 गोर्रे पोरिना नेत्‍तुरताहेंदाल, ओर वेहता गवाइ हेंदाल देय्यमतुन गेल्सतुर. ओर्कु हामुर वायिनागानि ओर ओरा जीवाता पर्वा किया हिल्‍लुर.
REV 12:12 अदुनहाटीं स्वर्गम आनि स्वर्गमते मनानोरिटा मिमेट कुसिते मंटु. गानि बूमिपोर्रो आनि समुद्रमते मनानोर्क मात्रम बच्‍चोन गोसा वायार! बारित्‍ते देय्यमतगा वेल्‍ले टाइम हिल्‍ले इंचि दान्क तेळियसे मंता, अदुनहाटीं अद वेल्‍लेन होंगुने मिहगा वाता,” इंचि केंजावाता.
REV 12:13 बस्के अय्ते अद तरासतुन बूमिपोर्रो दोब्सीतुर, अस्‍के अद तरास आ पेळान कंता मुर्ताटुन परेसान कियालय दान पज्जो दल्‍गता.
REV 12:14 गानि दानाहाटीं पेन तयार कीसि इरता जेगातगळ्क, अद तरासुनाल तपिच्‍कुंचि परियिसि होनालय पेन दानकु गद्‍दल रेक्‍कानसोंटव रोंडु रेक्‍कां हीता. दानहेंदाल मूडुननरा वर्सनदाका अद मुरतटुन बेस हूळकुन्‍मळ जर्गता.
REV 12:15 आ मुरतळ कम्मुटे पोंगिस होनना इंचि तरास दाना तोळ्‍दाल बेरेडतालेसीं एर पेचाह्ता.
REV 12:16 गानि बूमि आ मुरतळ्‍क सहायम कीता, तरास तेंडता एतुन अद मिंगसि वाटता.
REV 12:17 इदुनहेंदाल तरासुंक मुरतळ पोर्रो बागा होंग वाता. अस्‍के तरास आ मुरतटा कळमता वंसंमतोरतोनि, पेनदा आदेसकुनपोर्रो ताकानोरतोनि आनि येसुना गवाइ वेहानोरतोनि लडाइ कियालय होत्‍ता.
REV 12:18 पजा अद तरास समुद्रमता उस्‍के पोर्रो होंचि नित्‍तुता.
REV 13:1 पजा नना उंदि जिवरासि समुद्रमताल पेय्सानद हूळतन, दानकु पदि कोह्कु, एडुं तल्‍लां मत्‍तां. कोह्कुनपोर्रो पदि किरिटाल्कु मत्‍तां, तल्‍लानपोर्रो पेनदुन अपमानम कियानव पोरोलीं रासि मत्‍तां.
REV 13:2 नना हूळता जिवरासि सिर्तागंडुनलेसीं मत्‍ता, दाना काल्क एडजुना काल्कुनालेसीं मत्‍तां आनि दाना तोड्‍डि सिंहमता तोड्‍डिलेसीं मत्‍ता. मासुल तरास दाना ताकत, दाना राजगद्‍दे आनि पेद्‍दा अदिकारम आ जिवरासिक हीता.
REV 13:3 अद जिवरासिता एडुं तल्‍लानाल उंदि तल्‍लाक हायानसोंटा देब्बा दल्‍गिसि पुन्‍नु आसि मत्‍ता, गानि अद पुन्‍नु बेस आतद हूळसि, दुनियातोर अंटोर इचंत्रम आसि दान पज्जो होनालय दल्‍गतुर.
REV 13:4 अद जिवरासिक मासुल तरास अदिकारम हीताहाटीं अंटोर मासुल तरासतुन मोळ्‍कालय दल्‍गतुर. पजा ओर, “अद जिवरासितालेसीं बोरन्‍ना मंतुरा? दानतोनि बोरन्‍ना लडाइ किया पर्रांतुरा?” इंचि अद जिवरासितुनगुळा मोळ्‍कालय दल्‍गतुर.
REV 13:5 अद जिवरासि पेद्‍दिरकेमते आनि अपमानम कियाना पोल्‍लें वळ्‍कानाहाटीं पेन दानकु नल्‍पै रोंडु नेल्‍लांदाका अदिकारम हीता.
REV 13:6 पजा अद जिवरासि, पेनदुन, दाना पोरोलतुन, दाना जागातुन, अल्‍हेने दानतोनि स्वर्गमते मनानोर्कुनगुडा अपमानम कियालय दल्‍गता.
REV 13:7 दान्क पेनदा लोकुल्‍कुनतोनि लडाइ कीसि ओर्कुन गेल्सानद अदिकारम हियमळ जर्गता. इच्‍चोने आयाका दान्क हरेक जाति, हरेक बासा, हरेक लोकुल्‍क आनि दुनियाता अन्‍नि देसेल्‍कुना लोकुल्‍कुनपोर्रो अदिकारम हियमळ जर्गता.
REV 13:8 बूमिपोर्रो मनना अंटोर इद दुनिया तयार आतागटाल, बोरा पोरोल्क अय्ते, मोक्‍कु आता गोर्रे पोरिना पिस्वरता पुस्तकमते हिल्‍लेंगो, ओर अद जिवरासितुन मोळ्‍कानुर.
REV 13:9 बोर्क अय्ते केव्क मंता ओर बेस केंजिरकांटी.
REV 13:10 जेलुंक होनना मत्‍तोर, जेलने अर्रानुर. बोर अय्ते कसेटे हव्कंतोर, ओनगुडा कसेटेन हव्‍कमळ जर्गार. इदुन पीसि पेनदा लोकुल्‍कुना विस्वासम, ओप्के दिस अर्रंता.
REV 13:11 पजा नना मरुंदि जिवरासितुन बूमि लोप्पोटाल पोर्रो वायानद हूळतन, दान्क गोर्रे पोरिनलेसीं रोंडु कोह्कु मत्‍तां. अद मासुल तरासुनलेसीं वळ्कसेक मत्‍ता.
REV 13:12 इद जिवरासि, हायानसोंटा देब्बा दल्‍गिसि बेस आता मोदाटा जिवरासिता पूरा अदिकारम दाना मुन्‍नेने वाळकुंचि कबळ कियुंदु आनि बूमिपोर्रो मनना अंटोर्कुन आ मोदाटा जिवरासितुन मोळ्‍कानाल कियुंदु.
REV 13:13 अल्‍हेने लोकुल्‍क हूळानेंकेन स्वर्गमताल बूमिपोर्रो तळमि अरहुंदु, इल्‍हा अरहचि अद पेद्‍दा-पेद्‍दा चिन्‍हां हुप्‍सुंदु.
REV 13:14 मोदाटा जिवरासिता मुन्‍ने इद जिवरासिक चिन्‍हां हुप्‍सना अदिकार दोर्कता, अदुनहाटीं चिन्‍हां हुपिच्‍चेक बूमिपोर्रो मनना लोकुल्‍कुन, “बद जिवरासिक अय्ते हायानसोंटा देब्बा दल्‍गिसि मत्‍ता, अद जीवाते मंता अदुना बोम्मा कीम्‍टु,” इंचि बोंकिचुंदु.
REV 13:15 मोदाटा जिवरासिता बोम्मा वळ्‍कागोम इंचि बोम्माते जीवोत्रम वाटानद, आनि अदुन बोर अय्ते मोळ्‍कुर, ओर अंटोर्कुन हव्कना अदिकार दीनकु हियमळ जर्गता.
REV 13:16 अचोने आयाका अद, सिन्‍नुर-पेद्‍दुर, सिरमंत-गरिब, दासुल्क आयवोर, दासुल्क ईर अंटोर्कुन ओरा तिना कयपोर्रो हिलाकोंटे कपालमपोर्रो उंदि-उंदि सिक्‍का वाटागोटता.
REV 13:17 अद सिक्‍का इत्‍ते जिवरासिता पोरोल हिलाकोंटे दाना उंदि नंबर आंद. इल्‍हा सिक्‍का बोर्क अय्ते मन्‍नो ओनकु बतले अम्मावायो, आनि एतावायो.
REV 13:18 इद पोल्‍ले तेळियगोम इत्‍ते बुद्‍दि गावाले. बुद्‍दि मत्‍ता मनकल जिवरासिना लेक्‍का कियिरकांटी. अद लेक्‍का वरोर मनकन हुप्‍संता आनि अद हारुं नुह्कुना अरवै हारुं आंदु (666).
REV 14:1 मर्रा नना सियोन इनना गुट्‍टापोर्रो पेनदा गोर्रे पोरि नित्‍तिसि मत्‍तद हूळतन. अगा दानतोनि उंदि लक्‍सा नल्‍पै नालुं वेय्‍कुना (1,44,000) मंदि मत्‍तुर. ओरा कपालमपोर्रो गोर्रे पोरिना आनि दाना बाबाना पोरोल रासि मत्‍ता
REV 14:2 नना स्वर्गमताल उंदि इसोंटा आवाज केंजतन गदा, अद पोंगाना एता वेल्‍लेन वर्दानालेसीं आनि बागा मब्बु उरुमनालेसीं मत्‍ता. अद आवाज टांबुरा नेकिसते बल्हा केंजा वांतनो अल्हे केंजा वासेक मत्‍ता.
REV 14:3 आ उंदि लक्‍सा नल्‍पै नालुं वेय्‍कुना मंदि राजगद्‍देता मुन्‍ने, नालुं जिवरासिना मुन्‍ने आनि पेद्‍दाल्कुना मुन्‍ने पूना पाटा पारसेके मत्‍तुर. बूमिपोर्रोटाल पेन अस्‍कुत्‍ता लोकुल्‍कुनाल ईर तप्‍पा बोरे आ पाटा पारा पर्राहिल्‍लुर.
REV 14:4 ईर अंटोरगुडा मरमिं आयवोर, मुर्ताह्कुनाल लक्‍कु मंचि सतातुन पवित्र इरतोर आंदुर. गोर्रे पोरि बगा-बगा अय्ते होनुंदु ईर अंटोर दाना पज्जो-पज्जो होनानोर आंदुर. ईर अंटोरगुडा पेन आनि गोर्रे पोरिनाहाटीं मोदाटा पलम आयगोम इंचि अस्‍कुत्‍तोर आंदुर.
REV 14:5 ओरा तोळ्‍दाल बस्‍केन आबद्‍दम पोल्‍ले पेय्‍सा हिल्‍ले, ओर बेकसुर लोकुल्‍क आंदुर.
REV 14:6 अद आता पजा नना पेनदा इंकुंदि दूतातुन मब्बुना नड्‍डुमताल परियसेक मननद हूळतन, दानागा बूमिपोर्रो मनना अंटोर्क, हरेक जातितोर्क, हरेक बासा वळ्कानोर्क, अंटोर लोकुल्‍कुंक आनि दुनियाता अन्‍नि देसेल्‍कुना लोकुल्‍कुंक वेहालय बस्‍केळ्‍क पिस्सना पिस्वर बारेमता बेसता कबुर मत्‍ता.
REV 14:7 अद दूता पेद्‍दा आवाजते, “पेन न्‍यायम कियाना वेला दग्गेर्क एवता. अदुनहाटीं दानकु वेरियटु, दाना महिमा कीम्‍टु. स्वर्गमतुन, बूमितुन, समुद्रमतुन आनि एता ऊटान तयार कीता पेनदा आरादना कीम्‍टु” इंचि इत्‍ता.
REV 14:8 अद आता पजा इंकुंदि दूता वासि, “नासडेम आता, नासडेम आता, पेद्‍दा बेबिलोन सहर नासडेम आता, अद अन्‍नि जातिना लोकुल्‍कुंक दाना बोगमतनमता होंग वायानसोंटा कल्‍लु उह्ता” इंचि इत्‍ता.
REV 14:9 पजा इंकुंदि मूडोव दूता वासि, “बोरे आयिर अद जिवरासितुन आनि दाना बोम्मातुन मोळ्‍किसि, ओना कपालमपोर्रो आयि हिलाकोंटे कयपोर्रो आयि दाना चिन्‍हाता सिक्‍का वाटकुंतोर, ओरगुडा तालिते वळियसि मत्‍ता पेनदा होंगुना पिव्‍वर कल्‍लु उनानुर, उंचि पवित्र दूतन मुन्‍ने, गोर्रे पोरिन मुन्‍ने रमा-रमा पोत्‍तना तळमिते आनि गंदकमता सिक्‍साते अर्रानुर.
REV 14:11 अल्हा ओर वेयनेंके पेय्‍सना पोया बस्‍केळ्‍क पोर्रो तेदसेकेन मनंता. बोर अय्ते आ जिवरासितुन आनि दाना बोम्मातुन मोळ्‍कंतुर, दाना पोरोलता चिन्‍हाता सिक्‍का वाटकुंतुर ओर नर्का-पिय्यल तकलिपतेने मनंतुर,” इंचि इत्‍ता.
REV 14:12 अदुनहाटीं पेनदा आदेस परकारम ताकानोर आनि येसु सामिना पोर्रो विस्वासम कियाना पेनदा लोकुल्‍क तिप्पल्कुने ओप्के पियमळे गावाले.
REV 14:13 अस्‍के स्वर्गमताल उंदि आवाज, “इल्‍हा रासा, बोर अय्ते सामिन विस्वासम कीसि हातुर, ओर इंदके नसिबतोर आंदुर,” इंचि नाक केंजावाता. “हो! निजमे, ओरा कस्‍टमताल ओर्क आराम दोर्कंता. ओर कीता कबाह्‍क ओरतोने दांतां,” इंचि आत्मा इत्‍तद केंजावाता.
REV 14:14 पजा नना हूळतस्‍के, नाक तेल्‍ला मब्बु तेर्पे दिसता. आ तेल्‍ला मब्बु तेर्पेपोर्रो मनकना रूपमते पुटतोनलेसीं वरोर उद्‍दिस मत्‍तोर. ओना तल्‍लापोर्रो बंगारमता किरिटम आनि ओना कय्‍दे वेल्‍लेन करा-करा मत्‍ता उंदि हेटेळ मत्‍ता.
REV 14:15 इंका उंदि दूता पेनदा गुळिताल पेय्सि, मब्बु तेर्पेपोर्रो उद्‍दिस मत्‍तोन, “बूमिपोर्रोटा पंटा कोताक वासि अदुन कोय्याना वेला एवता अदुनहाटीं निमे नीवा हेटेटे अद पंटातुन कोय्या” इंचि जोरसे वेहाता.
REV 14:16 अस्‍के तेल्‍ला मब्बु तेर्पेपोर्रो उद्‍दिस मनानोर ओना हेटेळ तिरहातोर, तिराहचि बूमिपोर्रोटा पंटातुन कोयमळ जर्गता.
REV 14:17 अस्‍के पेनदा इंकुंदि दूता स्वर्गमते मनना गुळिताल पेय्सता. दानागा गुडा वेल्‍लेन करा-करा मत्‍ता हेटेळ मत्‍ता.
REV 14:18 अस्‍के गद्‍देताल पेनदा इंकुंदि दूता वाता. अद दूताक तळमिता अदिकारम हीसि मत्‍ता. इरगा करा-करा मत्‍ता हेटेळ पीसि मत्‍तोनु पेद्‍दा आवाजते, “बूमिपोर्रो मनना अंगुर पंडिना पंटा पंडता अदुनहाटीं नीवा इरगा करा-करा मत्‍ता हेटेटे अंगुर गुत्‍तिं कोय्या” इंचि इत्‍ता.
REV 14:19 अस्‍के आ दूता दाना हेटेटे, बूमिपोर्रोटा अंगुर पंडिना गुत्‍तिं कोय्‍सि, पेनदा होंगु इनना अंगुर पंडिना गानगुने वाटसीता.
REV 14:20 पजा सहरता पलाते मत्‍ता गानगुनगा गानगु पियमळ जर्गता. अद गानगुताल नेत्‍तुर पोर्रो वाता. अद नेत्‍तुर इच्‍चोर पेय्सता गदा, गुर्राल्कुना मोसोटुन दोहाना पट्‍टानच्‍चोर एत्‍तु आनि मूड नुह्कुना किलोमिटर पोंगसेक होत्‍ता.
REV 15:1 अस्‍के स्वर्गमते नना मरुंदि पेद्‍दा इचंत्रमता चिन्‍ह हूळतन. अद बतल इत्‍ते, एडुं दूतानगा, एडुं गंडाल्कु मत्‍तां. अव आकिरता गंडाल्कु आंदुं. अव आता पजा पेनदा होंग सल्‍लारंता.
REV 15:2 बोर अय्ते आ जिवरासि, बोम्मा आनि दाना पोरोलता नंबरतोनि लडाइ कीसि गेल्सि मत्‍तुर, ओर अंटोर पेनदा टांबुरां पीसि आ समुद्रमता ओड्‍डुनपोर्रो नित्‍तिस मत्‍तद नना हूळतन
REV 15:3 पेनदा सेवाकुड मूसाना पाटा आनि गोर्रे पोरिना पाटा पारसेके ओर इल्‍हा इनुंदुर, “ए अन्‍निटकन्‍ना एक्‍को सक्‍तिमंतुन आता मावा सामि पेनदुना, नीवा कबाह्‍क पेद्‍देय आनि इचंत्रमतव आंदुं, निमे बस्‍केळ्‍क मंदना राजान आंदिन, नीवा हर्रि नीतितद, आनि सत्‍तेमतद आंदु,
REV 15:4 हे सामि सिराप निमेने पवित्र मंतिन, असोंटस्के नीकु वेरियाकोंटा, नीवा पोरोलता महिमा कियाकोंटा बोर मना पर्रांतोर? नीवा न्‍यायमतुन अंटोर हूळतुर, अदुनहाटीं दुनियाता अन्‍नि देसेल्‍कुना लोकुल्‍क निहगा वासि नीके मोळ्‍कानुर.”
REV 15:5 अद आता पजा, गवाइता डेराता गुळितुन, स्वर्गमते कुल्‍ला कीसि मत्‍तद नना हूळतन.
REV 15:6 आ गुळिताल एडुं दूतां एडुं गंडाल्‍कुन पीसि पलाते पेय्सतां, अव जगा-जगा तेल्‍लगा मेर्सना कपडिं केरसि मत्‍तां. अवुना सातिक बंगारमता पट्‍टां दोहाचि मत्‍तां.
REV 15:7 अस्‍के आ नालुं जिवरासिनाल उंदि जिवरासि, अव एडुं दूतांक, बंगारमता एडुं वाटिं हिता. आ वाटिने युगा-युगाल्क जीवाते मंदना पेनदा होंग निंडिस मत्‍ता.
REV 15:8 अस्‍के अद पूरा गुळि पेनदा महिमाता वेल्‍गुने आनि ताकतहेंदाल पोयातोनि निंडिस होत्‍ता. पजा आ एडुं दूताना अव एडुं गंडाल्कु पूरा मारनदाका अद गुळि लोप्पो बोरे नेंगा पर्राहिल्‍लुर.
REV 16:1 अस्‍के गुळिताल उंदि पेद्‍दा आवाज आ एडुं दूतनतोनि, “होन्‍टु! पेनदा होंगुना अव एडुं वाटिन बूमिपोर्रो वळियटु” इत्‍तद नाकु केंजावाता.
REV 16:2 अदुनहाटीं पेनदा मोदाटा दूता होंचि, दाना वाटितुन बूमिपोर्रो वळियसीता, अस्‍के अद जिवरासिता निसानि मत्‍तोर्कु आनि बोर अय्ते दाना बोम्मातुन मोळ्‍कुंदुर ओर्कु इरगा नोयाना लसा-लसा पुनकु आतां.
REV 16:3 पेनदा रोंडो दूता दाना वाटितुन समुद्रमते वळियसीता, अस्‍के अद समुद्रम हाता मनकना नेत्‍तुरलेसीं आसोत्‍ता, पजा समुद्रमते मनानव अन्‍नि जिवरासि हासोत्‍तां.
REV 16:4 पेनदा मूडोव दूता दाना वाटितुन बेरेह्कुने आनि एता ऊटान पोर्रो वळियसीता, अस्‍के अव्टे मत्‍ता पूरा एर नेत्‍तुरलेसीं आसोत्‍ता.
REV 16:5 एतापोर्रो अदिकारम मत्‍ता पेनदा दूता इल्‍हा इनानद नना केंजतन, “ए पवित्र पेनदुना, निमे इंदके मंतिन, मोदालागुडा मत्‍तिन. निमे न्‍यायम कियाना पेनदुन, निमेने इवुना इल्‍हा न्‍यायम कीतिन.
REV 16:6 बारित्‍ते ओर नीवा पवित्र लोकुल्‍कुन, नीवा कबुरतोर्कुन हव्‍किसि ओरा नेत्‍तुर पोंगागोटतुर. अदुनहाटीं निमे ओर्कु उनालय नेत्‍तुर हीतिन, ओर इदुना लायके मंतुर,” इंचि इत्‍ता.
REV 16:7 अच्‍चोटेन मोक्‍कु हिय्याना गद्‍देताल, “ए पेनबाबा, सामि, निमेने अन्‍निटकन्‍ना सक्‍तिमंतुन आता पेनदुन आंदिन. निमे कियाना न्‍यायमते निजम आनि सत्‍तेम मंता,” इंचि नाकु केंजावाता.
REV 16:8 नालुंगो दूता दाना वाटितुन पोडदुन पोर्रो वळियसीता, अस्‍के लोकुल्‍कुन दाना दगळाते कर्वगोटाना अदिकारम पोळ्‍दुंक हियमळ जर्गता.
REV 16:9 कडक दगडाहेंदाल लोकुल्‍क कर्विसोत्‍तुर, अस्‍के आ गंडाल्‍कुन पोर्रो अदिकारम मत्‍ता पेनदुन अपमानम कीतुर गानि ओर दाना महिमा कियानाहाटीं सतता पापाल्कुनाल मनसु मार्सकुन्‍ना हिल्‍लुर.
REV 16:10 पेनदा हेय्युंगो दूता दाना वाटितुन आ जिवरासिता राजगद्‍देपोर्रो वळियसीता. अस्‍के दाना राज्येमते पुरागा हीकट आता. पजा तिप्पल्‍कुंक आगा पर्राका लोकुल्‍क ओरा नाल्‍कें ओरे कोर्ककुनालय दल्‍गतुर.
REV 16:11 ओर्क वाता तिप्‍पल्‍क, ओर्क आता पुनकुन हेंदाल स्वर्गमते मनना पेनदा अपमानम कीतुर. गानि ओर कीता पापाल्कुनाल मनसु मार्सकुना हिल्‍लुर.
REV 16:12 पेनदा हारुंगो दूता दाना वाटितुन परात इनना पेद्‍दा बेरेटे वळियसीता. अस्‍के अद बेरेटा एर बोत्‍तिगा इनकिसि होत्‍ता, पोळ्‍द पेय्‍सना दिक्‍कुने मनना राजालोर्कुंक हर्रि आयगोम इंचि आ दूता अल्हा कीता.
REV 16:13 पजा नना अद मासुल तरासता तोळ्‍दाल, आ जिवरासिता तोळ्‍दाल, पेनदा आबद्‍दम कबुरतोना तोळ्‍दाल पन्‍नेतसोंटा मूड दुस्‍टात्मां पलाते पेय्सानद हूळतन.
REV 16:14 इव चिन्‍हां हुप्‍सना देय्याल्कुना आत्मां आंदु. आत्मा अन्‍निटकन्‍ना एक्‍को सक्‍तिमंतुड आता पेनबाबानतोनि आकिरता रोजकुने लडाइ कियानाहाटीं, दुनियाता अंटोर राजालोर्कुन उंदि कियालय ओरगा होंचेके मंतां.
REV 16:15 अव आत्मां आ राजालोर्कुन इब्रानि बासाते अरमिगदोन इनना जेगातगा कल्‍पतां. अदुनहाटीं येसु, “हुळाट नना मिहगा दोंगानलेसीं वांतन, बोर अय्ते तेल्‍विते मंचि, केर्राना कपडिन कापाळकुंतोर ओरे आसिर्वाद दोर्कतोर आंद. बोरे आयिर अल्हा मनाकोंटे मेंदुल कुळकें दिस्‍सि लोकुल्‍कुना मुन्‍ने ओनद ओरे सिग्गु पोगोटकुत्‍तोर आंतोर” इंचि वेहतोर.
REV 16:17 पेनदा एडुंगो दूता दाना वाटितुन वळि पोर्रो वळियसीता, अस्‍के स्वर्गमते मनना गुळिता राजगद्‍देताल पेद्‍दा आवाजते, “बोत्‍तिगा आता” इत्‍तद केंजावाता.
REV 16:18 अस्‍के मब्बु मेर्सालय, गळ-गळा इंचि उरमालय दल्‍गता, पजा इद बूमिपोर्रो लोकुल्‍क पुटतस्केटाल अय्ते, बस्‍केने आयाहिल्‍ले असोंटा पेद्‍दा बुकंप आता.
REV 16:19 अस्‍के आ पेद्‍दा सहरता मूड तुकळां आतां. वेरे-वेरे देसेल्‍कुना सहरकंता कूल्‍सि अरतां. पेन दाना तलातला आयाना होंगुना अंगुर कल्‍दुन पेद्‍दा बेबिलोन सहरकु उहानाहाटीं अद मति मर्गाहिल्‍ले.
REV 16:20 दीबें अवुना जागाताल मायसोत्‍तां, गुट्‍टां बग्‍गेन दिसाकोंटा आतां.
REV 16:21 मब्बुनाल एबै किलो वजन मत्‍ता बर्प बंडां लोकुल्‍कुनपोर्रो अरताहाटीं लोकुल्‍कुंक इरगा तकलिप आसि, ओर पेनदा अपमानम कीतुर. अद तकलिप वेल्‍लेने कतरनाक मत्‍ता.
REV 17:1 अस्‍के गंडाल्कुना एडुं वाटिं पीसि मत्‍ता दूतानाल उंदि दूता नाकुन, “हिक्‍के वा! वेल्‍लेन एता जलनपोर्रो उद्‍दिस मत्‍ता बोगमदान्‍कु दोर्काना सिक्‍सा बदो नीकु हुप्‍संतन,
REV 17:2 बूमिपोर्रोटा राजालोर दानतोनि बोगमतनम कीतुर, दाना बोगमतनमता कल्‍दुन उंचि बूमिपोर्रोटा लोकुल्‍क रिम्मालोर आतुर.” इंचि इत्‍ता.
REV 17:3 नना पवित्र आत्माते निंडतस्के, आ दूता नाकुन बय्‍लि जेगाते ओता. अगा पदि कोह्कु आनि एडुं तल्‍लां मत्‍ता उंदि एर्राटा जिवरासिपोर्रो उंदि मुरतळ उद्‍दिस मत्‍तद नाकु दिस्ता. आ जिवरासिता मेंदुलमेड पेनदा अपमानम कियाना पोल्‍लेंगे रासि मत्‍तां.
REV 17:4 अद मुरतळ नेडि पंडि रंगु आनि एर्रा रंगुना कपडिं केरसि मत्‍ता. इंका डिस्‍को पूसां, मोतीना दुम्में वाटकुंचि मत्‍ता. अल्‍हेने दाना कय्‍दे बंगारमता वाटिं मत्‍ता. अद वाटिते दाना बोगमतनम कियाना अपवित्र वस्तु आनि दाना पापाल्क निंडिस मत्‍तां.
REV 17:5 दाना कपालमपोर्रो, “पेद्‍दा बेबिलोन, बोगामोताह्‍कुना अल्हेन हय्‍सुवा वस्‍तुकुना तल्‍लुर” इंचि मर्ममते रासि मत्‍ता.
REV 17:6 अद मुरतळ पेनदा लोकुल्‍कुना नेत्‍तुरतुन आनि येसु सामिना गवाइताहाटीं जीवा हीतोरा नेत्‍तुरतुन उंचि रिम्मा आतद हूळसि नाकु वेल्‍ले इचंत्रम आता.
REV 17:7 अस्‍के पेनदा दूता नाकुन, “निमे इचंत्रम बारि आतिन? नना इद मुरतळता आनि अद उद्‍दिस मत्‍ता पदि कोह्कु आनि एडुं तल्‍लां मत्‍ता जिवरासिता मर्ममतुन वेहांतन,
REV 17:8 निमे हूळता जिवरासि मोदाला मत्‍ता गानि इंदके हिल्‍ले, अद वेल्‍लेन लोत पोक्‍काताल पेय्सि नासडेमते अर्रार. दुनिया पुटतस्केटाल बूमिपोर्रो मनानोरा बोरा पोरोलीं अय्ते पिस्वरता पुस्तकमते रासि हिल्‍लें, ओर अद जिवरासितुन हूळसि, ‘इद मोदाला मत्‍ता, इंदके हिल्‍ले गानि मर्रा वायानद मंता’ इंचि इचंत्रम आयानुर.
REV 17:9 इव पोल्‍लें तेळियगोम इत्‍ते तेल्वि-बुद्‍दि गावाले. अव एडुं तल्‍लां इत्‍ते, अद मुरतळ उद्‍दिस मत्‍ता एडुं गुट्‍टां आंदुं.
REV 17:10 अल्‍हेने एडुर राजालोर इंचिगुडा दाना अर्तम आंद. एडुर राजालोरव्टेटाल हेय्युर अय्ते अर्सोत्‍तुर. इंदके वरोर मंतोर, इंकावरोर इदवेरदाका वायाहिल्‍लोर. ओर वातस्के ओन्क कोन्‍नि रोजकु राज्येम किय्ये पींता.
REV 17:11 मोदाला मत्‍ता इंदके हिल्‍ले इत्‍ता जिवरासि इत्‍ते, एनमिदो राजाल आंदु. ओरगुडा एडुर राजालोरसंटोरे गानि ओरगुडा नासडेम आयानुर.
REV 17:12 निमे हूळता पदि कोह्कु इत्‍ते, ओर पदि राजालोर आंदुर. आ राजालोर इदवेरादाका राज्येम ताकसा हिल्‍लुर गानि ओर्कु आ जिवरासितोनि उंदि गंटादाका राज्येम ताकसना अदिकारम हियमळ जर्गंता.
REV 17:13 ओर अंटोर उंदि मनसु आसि ओरा ताकत, अदिकारमतुन अद जिवरासिक हींतुर.
REV 17:14 ईर राजालोर गोर्रे पोरिनतोनि लडाइ कियानुर. गानि गोर्रे पोरि सामिल्‍कुना सामि, राजालोरा राजाल आताहाटीं, अद दाना केयतोर, पेरतोर आनि विस्वासुल्‍कुनतोनि कलियसि आ राजालोर्कुन गेल्‍संता,” इंचि इत्‍ता.
REV 17:15 अद आता पजा दूता नातोनि, “बोगामोतळ उद्‍दिस मत्‍ता बव एता जलां अय्ते निमे हूळतिन, अव जलां इत्‍ते, वेरे-वेरे लोकुल्‍क, वेरे-वेरे लोकुल्‍कुना मंदां, वेरे-वेरे देसेल्‍कुनोर, वेरे-वेरे बासां वळकानोर आंदुर.
REV 17:16 इंका निमे हूळता जिवरासि आनि दाना पदि कोह्कु, आ बोगमतनम कीता मुरतटुन हैय्सों. दान दिक्‍कु हिल्‍लाकोंटा कीसि दाना कपडिं हिलाकोंटा कींतां. दाना मेंदुलता हव्‍विन तिंचि, तळमिते वाटसींतां.
REV 17:17 बारित्‍ते पेनदा पोल्‍ले पुरागा आयानदाका, ओर अंटोर राजालोर उंदि मनसु आसि ओरा राज्येमतुन जिवरासिक हियना इंचि पेने ओरा मनसुने वाटता.
REV 17:18 इंका निमे हूळता मुरतळ इत्‍ते, दुनियाता राजालोरपोर्रो राज्येम कियाना पेद्‍दा सहर आंदु” इंचि वेहता.
REV 18:1 अद आता पजा नना उंदि पेनदा दूतातुन स्वर्गमताल हिळु रेयसेक मत्‍तद हूळतन, आ दूताक वेल्‍लेने अदिकारम हीसि मत्‍ता. दाना महिमाता वेल्‍गुने बूमिअंता जग्गरा आता.
REV 18:2 आ दूता पेद्‍दा आवाजते वरगेयसि, “हिळारता, बेबिलोन पेद्‍दा सहर हिळारता. इंदके अद देय्याल्क, दुस्‍ट आत्मां मनना जागा आता. बताके ओज्‍जुवव आनि हय्‍सुवा पिट्‍टें अगा जागा पीतां.
REV 18:3 बारित्‍ते, दाना बोगमतनमता कल्‍लु अन्‍नि देसेल्‍कुनोर उट्‍टुर. बूमिपोर्रोटा राजालोर दानतोनि बोगमतनम कीतुर, अद बोगमतनम कीसि कमय कीता दनमताहेंदाल बूमिपोर्रो दंदा कियाना लोकुल्‍क सिरमंतुल्‍क आतुर” इंचि वेहता.
REV 18:4 अस्‍के स्वर्गमताल इंकुंदि आवाज इल्‍हा केंजावाता गदा, “ना लोकुल्‍कुनिटा दाना पापमते कलियमटु, दानपोर्रो वायना गंडाल्कु मीपोर्रो वायामन्‍नि इत्‍ते दानगटाल पलाते पेय्‍सट.
REV 18:5 दाना पापाल्‍कगुडा वेल्‍लेन आसि स्वर्गमदाका एवतां, पेनगुडा दाना तप्‍पुड कबाह्‍कुन मति कीता.
REV 18:6 अद मीतोनि बल्हा कीतनो अल्हे मिमेटगुडा दानतोनि कीम्‍टु, अद कीता कबाह्‍कुनाहेंदाल दान्क रोंडु अंताल्‍क हीम्ट. बद वाटिते अय्ते अद मीकु निहाचि हीता अदे वाटिते मिमेटगुडा रोंडु अंताल्‍क निहाचि हीम्ट.
REV 18:7 अद बल्हा अय्ते पेद्‍दिरकेमते, सुकमते मत्‍ता, अल्‍हेने दान्क तिप्‍पल्‍क, दुक्‍काल्क हीम्ट. बारित्‍ते अद दाना मनसुल्कुने, नना रानिन आंदुन, मुंडामोस्तादान आयोन, इंका नना बस्‍केने तिप्पल्कुने अर्रोन,” इंचि इनकुंता.
REV 18:8 अदुनहाटीं हामुर, दुक्‍कम, कर्वु इवन्‍नि तकलिपकु उंदे रोजुने दानपोर्रो वायानुं, दाना न्‍यायम कियाना सामि पेनबाबाल दानकन्‍ना वेल्‍लेन बलम मत्‍तोर आताहाटीं अदुन तळमिते बोळ्‍सि बूळ्‍दि कियानुर.
REV 18:9 बूमिपोर्रोटा बोर राजालोर अय्ते दानतोनि बोगमतनम कीसि सुकमते मत्‍तुर, आ राजालोर दानु वेयानद हूळसि, सतता साति तंचेके अळानुर.
REV 18:10 ओर दाना तकलिपकुन हूळसि, वेरियसि वेल्‍लेन लक्‍कु होंचि नित्‍तिसि, “अय्यो पेद्‍दा सहर, ताकत मत्‍ता बेबिलोन, उंदे गंटालोप्‍पो नीपोर्रो पेनदा सिक्‍सा वासि अरता” इंचि इनानुर.
REV 18:11 ई बूमिपोर्रो दंदा कियानोर, अद वेय्यनदुन हूळसि, इंदके ओरा सामानतुन अस्सानोर बोरे हिल्‍लुर इंचि अळानुर, दुक्‍कम कियानुर.
REV 18:12 अव सामान बव इत्‍ते, बंगारम, एंडि, डिस्‍को पूसां, मुच्याल्‍कु, मेत्‍तटा कपडिं, नेडि पंडि रंगुना कपडिं, रेसिम कपडिं, अन्‍नि रकाल्कुना गमागमा गब्‍बु वायाना कट्‍टें, एक्‍को दराता कट्‍टें, कच्‍चि, इत्‍तोडिता सामान, नुन्‍नटा बंडाना टाइल्‍स्‍कु, अन्‍नि तीरकुना मसालां, मसालाते वाटाना सेक्‍का, दालचिनि, मसालां, ऊदु, अत्‍तरनिय्‍कु, अंगुर कल्‍लु, निय्‍कु, मैदा, गोह्कु, गोडकु-कोंदा, एटिं-गोर्रें, गुर्राल्कु, रताल्कु, दासुल्क, लोकुल्‍कुना जीवां अम्मुंदुर, गानि इंदकेटाल इवुन बोरे अस्सुर.
REV 18:14 नीकु इस्‍टामाता पंडिं निहागटाल लक्‍कु होत्‍तां, रुसि आता तिंडि, नीकु सुकम दोर्कना वस्‍तुक नासडेम आतां. मर्रा अव निहगाटोर्क बोर्के बस्‍केने दोर्को.
REV 18:15 इव वस्‍तुकुन अम्मिसि अद सहरताहेंदाल सिरमंतुल्‍क आता आ दंदा कियानुर, दाना तिप्पल्कुन हूळसि वेरियसि लक्‍कु होंचि, “नेडि पंडि रंगुना आनि एर्रा रंगुना कपडिं, बंगारम, डिस्‍को पूसां, मुच्याल्‍कुना दुम्मे वाटसि मत्‍ता पेद्‍दा सहरतुना, उंदे गंटालोप्‍पो नासडेम आसोत्‍तिन इंचि बादा पळसेके अळंतुर.” जहाजकु ताकसानुर, अव्टे उद्‍दिस होनानुर, अव्टे कबळ कियानुर, अल्‍हेने समुद्रमताहेंदाल कोत्‍तां कमांचना हरेक मनकल दान नासडेम आयानद हूळसि लक्‍कु होंचि नित्‍तांतुर.
REV 18:18 अद सहर वेयाना पोया हूळसि, “अद सहरतालेसीं पेद्‍दा सहर बदाना मंताना?” इंचि इनानुर.
REV 18:19 पजा ओर वेल्‍लेन दुक्‍कमते, ओरा तल्‍लनपोर्रो दुब्बा दोसकुंचि, दुक्‍कमते, अळसेके, वरगेयसेके, “अय्यो पेद्‍दा सहरतुना, समुद्रमते जहाजकु मनना हरेक मनकल नीहेंदाल सिरमंतुल्‍क आतुर. गानि उंदे गंटालोप्‍पो निमे पुरागा नासडेम आतिन” इंचि इनालय दल्‍गंतुर.
REV 18:20 “ए स्वर्गमते मनानोरिटा, पेनदा पवित्र लोकुल्‍कुनिटा, प्रेरितुल्कुनिटा आनि पेनदा कबुरतोरिटा, अद सहर नासडेम आताहाटीं कूस आम्टु, अद सहर मीकुन हर्रि तप्‍पिस्‍ता इंचि पेन दानकु दगता सिक्‍सा हीता” इंचि आ पेनदा दूता वेहता.
REV 18:21 अस्‍के वेल्‍लेन बलम मत्‍ता उंदि पेनदा दूता, जोत्‍तातसोंटा पेद्‍दा बंडातुन तेहचि समुद्रमते वाटसि इल्‍हा इत्‍ता, “पेद्‍दा बेबिलोन सहरतुन नासडेम कियानाहाटीं पेनगुडा इल्हे पोच्‍चंता, पजा अद मर्रा बस्‍केन दिस्‍साकोंटा आयार.
REV 18:22 टांबुरा नेकसानोरा, पाटा पारानोरा, तूरीला उह्‍कानोरा, तूताकोम उह्‍कानोरा आवाज इंदकेटाल बस्‍केने नीवा लोप्पो केंजा वायो. निहगा कबाह्‍क कियानोरगुडा इंदकेटाल बस्‍केने दिस्सुर. जोत्‍ता नोराना आवाज गुडा निहगा केंजा वायो.
REV 18:23 इंदकेटाल नीवा लोप्पो पंतेना वेळसि बस्‍केने दिस्सो. मरमिने एगराना-दुनकाना सप्पुड बस्‍केने केंजा वायो. बारित्‍ते निहगा दंदा कियाना लोकुल्‍क पूरा बूमिपोर्रो पेद्‍दाल्क मत्‍तुर, इंका निमे नीवा होदें-मंत्राल्कु कीसि अन्‍नि देसेल्‍कुनोर्कुन पसांचतिन.
REV 18:24 निहगा पेनदा कबुरतोरा नेत्‍तुर, पेनदा लोकुल्‍कुना नेत्‍तुर अल्‍हेने वेरे लोकुल्‍कुना नेत्‍तुर दिस्ता” इंचि वेहता.
REV 19:1 अस्‍के स्वर्गमते वेल्‍लेन मंदिलेसीं पेद्‍दा आवाजते, “हालेलुया! मुक्‍ति, महिमा आनि ताकत मा पेनदा कय्‍देन मंता,
REV 19:2 अद कियाना न्‍यायम सत्‍तेमतद आनि नीतिगल्‍लद आंदु, बारित्‍ते बेबिलोन सहर बोगमतनम कीसि पूरा दुनियातुन हेळाहता. अदुनहाटीं पेन दान्क सिक्‍सा हीसि दाना सेवाकुल्कुना बदला येतता,” इंचि इनानद केंजावाता.
REV 19:3 मरुंदि मल्का ओर, “हालेलुया! अद सहर वेय्याना पोया युगा-युगाल्‍कुनाहाटीं पेय्सेकेन मनंता,” इंचि इत्‍तुर.
REV 19:4 अस्‍के आ इरवै नालुर एनकटा पेद्‍दाल्क आनि आ नालुं जिवरासीं राजगद्‍देपोर्रो उद्‍दिस मत्‍ता पेनदा काल्कुनगा टोंगरां ऊनसि, “आमीन हालेलुया!” इंचि मोळ्‍कतुर.
REV 19:5 अस्‍के राजगद्‍देताल उंदि आवाज, “ए पेनदुक वेरियसि पिस्‍साना दाना सेवाकुरिटा, मिमेट सिन्‍ना-पेद्‍दा बोरे आम्टु, अंटोर पेनदा स्‍तुति कीम्‍टु,” इंचि इनानद केंजावाता.
REV 19:6 पजा नाकु वेल्‍लेन मंदितालेसीं आवाज, वेल्‍लेन एता तळाना आवाज आनि मब्बु उरुमताप आवाज केंजावाता. अद आवाज, “हालेलुया! सामि मना पेनबाबाल वेल्‍लेन सक्‍तिमंतुड आंदुर. ओरे राज्येम ताकिचेके मंतोर.
REV 19:7 गोर्रे पोरिना मरमिं दग्गेर्क एवतां, मरमिं आयालय मरमिना पेगिडगुडा तयारे मंता. अय्ते वटु, मनम आनंदमते, कुसिते दाना स्‍तुति कीकोम.
REV 19:8 दान्क पोंडालय साप-सुतरा तेल्‍लाटा आनि मेर्सना मलमल कपडिं हीतुर. आ मलमल कपडिं इत्‍ते, पेनदा लोकुल्‍क कीता नीति कबाह्‍क आंदु” इंचि वेहानद नना केंजतन.
REV 19:9 पजा पेनदा दूता नाकुन, “गोर्रे पोरिना मरमिना गाटो तिनालय बोर्कुनय्ते केयमळ जर्गता ओरे आसिर्वाद दोर्कतोर आंदुर.” पजा, “इद पेनदा सत्‍तेम पोल्‍ले आंद, इदुन रासा,” इंचि मर्रा इत्‍ता.
REV 19:10 पजा नना आ दूताता काल्क मोळ्‍कालय दाना काल्कुनपोर्रो अरतन अय्ते अद नाकुन, “निमे नाकुन मोळ्‍कमा. ननागुडा नीलेसीं, नीवा दंटाता विस्वासुल्‍कुनलेसीं येसुना बारेमता गवाइ वेहासेके सेवा कियानोने आंदुन. निमे सिराप पेनदुने मोळ्‍का. बारित्‍ते येसुना बारेमता गवाइ इत्‍तेने बविस्यवानिता आत्मा आंदु.”
REV 19:11 अस्‍के स्वर्गम कुल्‍ला आसि मत्‍तद हूळतन, अगा नाकु उंदि तेल्‍ला गुर्रम दिस्ता. दानपोर्रो उद्‍दिस मत्‍तोन, विस्वासमगल्‍लोड, सत्‍तेमतोर इंतुर. ओर नीतिते न्‍यायम कीसि लडाइ कींतोर.
REV 19:12 ओना कळ्‍क पोत्‍तना तळमितालेसीं मंतां, ओना तल्‍लापोर्रो वेल्‍लेन किरिटाल्कु मत्‍तां. ओनापोर्रो उंदि पोरोलगुडा रासि मंता, आ पोरोलता अर्तम ओन्क तप्‍पा बोर्के तेळियो
REV 19:13 ओर नेत्‍तुरते मुळहाता कपडिं केरसि मत्‍तोर. ओना पोरोल “पेनदा पोल्‍ले” आंद.
REV 19:14 स्वर्गमते मनना सिपाइल्क तेल्‍लगा साप-सुतरा मलमल कपडिं केरसि, तेल्‍ला गुर्राल्कुनपोर्रो उद्‍दिस ओना पज्जो-पज्जो होंचेके मत्‍तुर.
REV 19:15 अन्‍नि देसेल्‍कुनोर्कुन हव्कनाहाटीं ओना तोळ्‍दाल उंदि वेल्‍लेन करा-करा मत्‍ता कसेर पलाते पेय्संता. ओर आ देसेल्‍कुनापोर्रो कडक राज्येम ताकसंतोर आनि अन्‍निटकन्‍ना सक्‍तिमंतुड पेनदा होंगुना अंगुर रसमता गानगु पोक्‍कातुन जारांतोर.
REV 19:16 ओना कपडि आनि तोडापोर्रो, “राजालोर्कुना राजाल, सामिल्‍कुना सामि,” इंचि रासि मंता.
REV 19:17 अस्‍के पोळ्‍दुनपोर्रो उंदि दूतातुन निलसि मननद नना हूळतन. अद मब्बुन पोर्रो परियना अन्‍नि पिट्‍टेन पेद्‍दा आवाजते, “वट! पेनदा गाटो तिननाहाटीं जमा आम्टु,
REV 19:18 मिमेट वाते, राजालोरा हव्‍विं, सिपाइल्कुना हव्‍विं, अदिकारिल्कुना हव्‍विं, गुर्राल्कुना हव्‍विं, गुर्राल्कु ताकसानोरा हव्‍विं, दासुल्कुना हव्‍विं, दासुल्क आयवोरा हव्‍विं, इल्‍हा सिन्‍ना-पेद्‍दा अन्‍नि लोकुल्‍कुना हव्‍विं तिनालय मीकु दोर्कंता” इंचि इत्‍ता.
REV 19:19 अस्‍के अद जिवरासि, दुनियाता राजालोर आनि ओरा सिपाइल्क गुर्रमपोर्रो उद्‍दिस मत्‍तोनतोनि आनि ओना सिपाइल्कुनतोनि लडाइ कियालय जमा आतद नना हूळतन.
REV 19:20 पजा अद जिवरासितुन आनि पेनदा आबद्‍दम कबुरतोन दोर्का पियमळ जर्गता. ओर कीता चिन्‍हाना हेंदाल, अद जिवरासिता सिक्‍का तंचि मत्‍तुर्कुन आनि दाना बोम्मातुन मोळ्‍कानोर्कुन पसांचमळ जर्गता. ओर इव्‍वुर्कुनगुडा गंदकमते रमारमा पोत्‍सेके मनना तळमि गुंडमते जीवाते मननेंकेन वाटसीयमळ जर्गता.
REV 19:21 कळमातोर्कुन बारे आ गुर्रमपोर्रो उद्‍दिस मत्‍तोना तोळ्‍दाल पेय्सता कराकरा कसेटे हव्‍कमळ जर्गता. पजा पिटें वासि ओरा अंटोरा हव्‍विन पीरमेड तित्‍तां.
REV 20:1 पजा उंदि दूता, स्वर्गमताल हिळु रेय्‍सि वायनद नना हूळतन. दानागा वेल्‍लेन लोत पोक्‍काता तालम कय्‍क आनि उंदि पेद्‍दा गोल्सु मत्‍ता.
REV 20:2 पजा आ दूता, बदुन अय्ते इबलीस, देय्यम इंतुरो आ पळाना मासुल तरासतुन दोर्कापीसि वेय वर्सानाहाटीं दोहाचि वाटता.
REV 20:3 पजा, वेय वर्सां निंडनदाका वेरे-वेरे देसेल्‍कुनोर्कुन बोंकिच्‍चा मन्‍नि इंचि आ दूता दान वेल्‍लेन लोत पोक्‍काते वाटसि बंद कीसि दानपोर्रो सिक्‍कां तंता. वेय वर्सां निंडतस्के जेरासेपताहाटीं दान होळसा पिय्यार.
REV 20:4 मर्रा राजगद्‍दें हूळतन. अवुनपोर्रो उद्‍दिस मत्‍तोर्कुंक न्‍यायम कियाना अदिकारम हीसि मत्‍ता. इंका येसुना बारेमते गवाइ वेहताहाटीं आनि पेनदा पोल्‍ले वेहताहाटीं बोरा तल्‍लां अय्ते कोयमळ जर्गता, बोर अय्ते जिवरासितुन हिलाकोंटे दाना बोम्मातुन मोळ्‍का हिल्‍लुर आनि कपालमपोर्रो हिलाकोंटे कय्दापोर्रो दाना चिन्‍ह वाटकुना हिल्‍लुर असंटोरा आत्मान नना अगा हूळतन. ओर मर्रा जीवाते तेदसि किरिस्‍तुनतोनि कलियसि वेय वर्सनदाका राज्येम कीतुर.
REV 20:5 इदे मोट्‍टा मोदाटा हासि मर्रा जीवाते तेदमळ आंद. कळमातोर बोर अय्ते हासि मत्‍तुरो, ओर इव वेय वर्सां निंडनदाका मर्रा जीवाते तेदा हिल्‍लुर. इल्‍हा मोट्‍टा मोदाटा मर्रा जीवाते तेदतोर बोर अय्ते मत्‍तुरो ओर पवित्र आनि आसिर्वाद दोर्कतोर आंदुर. ओरपोर्रो रोंडो हामुरता ताकत कबळ किय्‍यो. गानि ओर पेनदा आनि किरिस्‍तुना पेर्मालोर आंतुर. आसि किरिस्‍तुनतोनि कलियसि वेय वर्सां राज्येम कींतुर.
REV 20:7 वेय वर्सां आतारित्‍ते, दोहाचि मत्‍ता देय्यमतुन होळ्‍सीयमळ जर्गार.
REV 20:8 अस्‍के आ देय्यम पलाते वासि, बूमिपोर्रो नालुं मूलाने मनना अन्‍नि देसेल्‍कुनोर्कुन इत्‍ते, गोग, मागोग इनना लोकुल्‍कुन नडेह कीसि लडाइहाटीं जमा कींता. समुद्रमता उस्केलेसीं लेक्‍का परवच्‍चोन लोकुल्‍क ओर मंतुर.
REV 20:9 ओर पूरा बूमिअंता पैलांचि होत्‍तुर. पजा ओर पेनदा लोकुल्‍कुना डेरां आनि पेनदा पावरमगल्‍ला सहरता सुट्‍टु आतुर. गानि स्वर्गमताल तळमि हिळु रेय्‍सि ओर्कुन नासडेम कीसि पोह्ता.
REV 20:10 अस्‍के, जिवरासितुन आनि आबद्‍दम कबुरतोर्कुन बगा अय्ते मुन्‍नेन वाटतुरो, अदे गंदकमतोनि बगा-बगा पोतसेके मनना तडमिते, ओर्कुन नडेह कियाना देय्यमतुन वाटमळ जर्गता. अगा ओर नर्का-पिय्यल युगा-युगाल्‍कुनाहाटीं तडमि मंटाते तनलाळसेक मनांतुर.
REV 20:11 पजा नना, उंदि तेल्‍लाटा राजगद्‍दे आनि दानपोर्रो उद्‍दिस मत्‍तोन हूळतन. बूमि, मब्बु ओना मुन्‍नेटाल पेय्सि वित्‍तुतां. मर्रा अवुंक बग्‍गेन जेगा दोर्काहिल्‍ले.
REV 20:12 पजा, हासि मत्‍ता सिन्‍नाल्कुन-पेद्‍दाल्कुन अंटोर्कुन राजगद्‍देता मुन्‍ने नित्‍तिसि मत्‍तद नना हूळतन. पुस्तकाल्क विच्‍चिसि मत्‍तां. पजा इंकुंदि पुस्तकम विच्‍चुमळ जर्गता, अद पुस्तकम इत्‍ते पिस्वरता पुस्तकम आंद. पुस्तकाल्कुने रासि मत्‍ता पोल्‍लेन पोर्रोटाल, हासि मत्‍तोर कीता कबाह्‍कुन पीसि ओरा न्‍यायम कियमळ जर्गता.
REV 20:13 अस्‍के समुद्रम, दानागा हासि मत्‍तोर्कुन अप्पजेपता. पातालम आनि नरकम, अवुनगा हासि मत्‍तोर्कुन अप्पजेपता. ओर कीता कबाह्‍कुन पीसि ओरा अंटोरा न्‍यायम कियमळ जर्गता.
REV 20:14 पजा पातालमतुन आनि नरकमतुन तळमिता सेरवुने वाटमळ जर्गता. ई तळमिता सेरवु इत्‍ते रोंडो हामुर आंदु.
REV 20:15 पिस्वरता पुस्तकमते बोरा-बोरा पोरोलीं अय्ते रासि मना हिल्‍लेंगों, ओर्कुन अंटोर्कुन तळमिता सेरवुने वाटमळ जर्गता.
REV 21:1 पजा नना उंदि पूना स्वर्गम, उंदि पूना बूमितुन हूळतन. बारित्‍ते, मोदाटा स्वर्गम, मोदाटा बूमि मायम आसि होत्‍ता, इंका समुद्रमगुडा मनाहिल्‍ले.
REV 21:2 अस्‍के, पेनदागटाल पवित्र सहर पूना येरुसलेम, स्वर्गमताल हिळु रेयानद नना हूळतन. मरमिना पेडानाहाटीं, मरमिना पेगिड बल्हा तयार आंता, अल्हा अद सहर दिस्सेक मत्‍ता.
REV 21:3 पजा राजगद्‍देतगटाल उंदि पेद्‍दा लेंग इल्‍हा केंजावाता, “हुळाट, पेन इंदके मनकालोरा नड्‍डुम जेगा आता. अद ओरतोने मनंता. ओर दाना लोकुल्‍क आंतुर, अद कुद्‍दु ओरा पेन आसि ओरतोने मनंता.
REV 21:4 अद ओरा कळ्‍कुना कांडेह्कुन उस्मंता. मोदाटा पोल्‍लें मायसोत्‍तां, अदुनहाटीं ओर्कु हामुर, दुक्‍काल्क, बादां, तिप्‍पल्‍क मन्‍नों,” इंचि केंजावाता.
REV 21:5 अस्‍के राजगद्‍देपोर्रो उद्‍दिस मत्‍तोर ओर, “हुळाट! नना अन्‍निटवुन पूनाव कीसि वाटंतन” इंचि इत्‍तोर. मर्रा ओर, “इव पोल्‍लें सत्‍तेम, विस्वासमलायकतव आंदुं, इवुन रासा,” इंचि नाकु वेहतोर.
REV 21:6 पजा मरुंदि मल्का नाकु इल्‍हा वेहतोर, “इव पोल्‍लें पुरागा आतां. अल्‍पा आनि ओमेगा, मोदोल आनि आकिर ननाने आंदुन. दूपाते मत्‍तोर्कुंक नना पिस्वरता एता ऊटाताल एर पुक्‍कटते हींतन.
REV 21:7 गेल्सानोर अंटोर इव अन्‍निटवुना वारसदार्क आंतुर. नना ओरा पेनदुन आंतन, ओर नावा पिलाल्क आंतुर.
REV 21:8 गानि वेरियानोर, विस्वासम हिल्वोर, कराब कबाह्‍क कियानुर, हव्कानुर, बोगमतनम कियानुर, होदें कियानुर, बोम्मान मोळ्‍कानुर आनि आबद्‍दम वळ्कानुर अंटोर, गंदकमते गबा-गबा पोतसेके मनना तळमिता सेरवुने अर्रानुर. इदु रोंडो हामुर आंद,” इंचि वेहतोर.
REV 21:9 पजा, एडुं वाटिने आकिरता एडुं गंडाल्‍कुन पीसि मत्‍ता एडुं दूतानाल उंदि दूता नहगा वासि, “हिक्‍के वा! नना नीकु मरमिना पेगिटुन, इत्‍ते गोर्रे पोरिना मुत्‍तोन हुप्‍संतन” इंचि इत्‍ता.
REV 21:10 अस्‍के आ दूता, नना पवित्र आत्माते निंडिसि मन्‍नेंके नाकुन उंदि पेद्‍दा एत्‍तु गुट्‍टापोर्रो ओता. ओसि, पेनदागटाल पवित्र येरुसलेम सहर स्वर्गमताल हिळु रेयानदुन नाकु हुपिस्‍ता.
REV 21:11 अद सहर पेनदा महिमाता वेल्‍गुने निंडिस मत्‍ताहेंका दाना कांति यसब इनना वेल्‍लेन दाराता बंडालेसीं मेर्सेक मत्‍ता.
REV 21:12 अद सहर सुट्‍टु उंदि पेद्‍दा एत्‍तु गूरे मत्‍ता. दान्क पन्‍नेंड गल्‍मां मत्‍तां. पन्‍नेंड गल्‍मानगा पन्‍नेंड दूतां मत्‍तां. आ गल्‍मनपोर्रो इस्राएल लोकुल्‍कुना पन्‍नेंड वंसाल्कुना पोरोलीं रासि मत्‍तां.
REV 21:13 पोळ्‍द पेय्सनहेके मूड गल्‍मां, पोळ्‍द अर्रनहेके मूड गल्‍मां, दक्‍सिनतेके मूड गल्‍मां आनि उत्‍तरतेके मूड गल्‍मां मत्‍तां.
REV 21:14 अद सहर सुट्‍टु मत्‍ता गूरे पन्‍नेंड पूनादिनपोर्रो निल्‍सि मत्‍ता. आ पन्‍नेंड पूनादिनपोर्रो गोर्रे पोरिना पन्‍नेंड प्रेरितुल्कुना पन्‍नेंड पोरोलीं रासि मत्‍तां.
REV 21:15 नातोनि वळ्कता दूतातगा, अद सहरतुन, दाना गूरेन आनि दाना गल्‍मन कहालय, बंगारमता उंदि सलाकि मत्‍ता.
REV 21:16 अद सहर नालुं मूलाना आकारमते दोहाचि मत्‍ता. अद सहरता पोडगु आनि नेर्वु समानम मत्‍ता. अद बंगारमता पट्‍टिते सहरतुन कहता, अस्‍के अद सहर 2,400 किलोमिटर पेय्सता. सहरता एत्‍तु, नेर्वु, पोळ्‍गु समानम मत्‍ता.
REV 21:17 पजा आ दूता सहरता गूरेतुन कह्तस्के, आ गूरे मनकना कूटाते इत्‍ते दूताता कूटातेगुडा नूटा नल्‍पै नालुं कूटां मत्‍ता.
REV 21:18 अद गूरे यसब इनना एक्‍को दराता बंडाते दोहाचि मत्‍ता आनि अद सहर काचुनलेसीं मेर्सना पिव्‍वर बंगारमते दोहचि मत्‍ता.
REV 21:19 अद सहरता पुनादि, रका-रकाल्कुना एक्‍को दराता बंडां वाटसि दोहाचि मत्‍ता. मोदाटा पुनादि यसब बंडाते, रोंडो पुनादि निलमनि बंडाते, मूडो पुनादि यमुना बंडाते, नालुंगो पुनादि मरकत बंडाते, हेय्युंगो पुनादि गोमेद बंडाते, हारुंगो पुनादि मानिक बंडाते, एडुंगो पुनादि पीतमनि बंडाते, एनमिदो पुनादि पेरोज बंडाते, तोम्मिदो पुनादि पुकराज बंडाते, पदो पुनादि लहसनि बंडाते, पदाकोंडो पुनादि दुम्रकांत बंडाते आनि पन्‍नेंडो पुनादि याकूत बंडाते दोहाचि मत्‍ता.
REV 21:21 आ पन्‍नेंड गल्‍मां पन्‍नेंड मुच्याल्कुनतोनि तयार कीसि मत्‍तां. उंद-उंदि गल्‍मा उंद-उंदि मुच्येमतोनि दोहाचि मत्‍ता. सहरता हर्रि, काचुनलेसीं मेर्सना पिव्‍वर बंगारमते तयार कीसि मत्‍ता.
REV 21:22 अद सहरते नाकु गुळि दिसा हिल्‍ले. बारित्‍ते अगाटा गुळि अन्‍निटकन्‍ना सक्‍तिमंतुड आता पेनबाबाल आनि गोर्रे पोरि आंद.
REV 21:23 अद सहरते वेलगु हियालय पोळ्‍दु, वेडसिता अव्‍सरम हिल्‍ले, बारित्‍ते पेनदा महिमाता वेल्‍गु अगा कांति हींता आनि गोर्रे पोरि दाना वेळसि आंद.
REV 21:24 अन्‍नि देसेल्‍कुना लोकुल्‍क दाना वेडसिता वेलगुने ताकानुर आनि दुनियाता राजालोर अद सहरते ओरा पेद्‍दातनम पीसि वायानुर.
REV 21:25 अद सहरते नर्का बस्‍केने आयो. अदुनहाटीं दाना गल्‍मां बस्‍केळ्‍क कुल्‍लाये मनंता.
REV 21:26 अद सहरता लोप्पो अन्‍नि देसेल्‍कुना लोकुल्‍क ओरा पेद्‍दातनम आनि कदर पीसि वांतुर.
REV 21:27 गोर्रे पोरिना पिस्वरता पुस्तकमते बोरा पोरोलीं अय्ते रासि मंतां, ओरे अद सहरते होळिया परांतुर. गानि अपवित्र लोकुल्‍क, पापि कबाह्‍क कियानुर हिलाकोंटे आबद्‍दम वळ्कानुर अद सहरते होळिया पर्रुर.
REV 22:1 अस्‍के पेनदा दूता नाकु सक्‍कगा मिटकरा मनना पिस्वरता एर हिय्यना बेरेटुन हुपिस्‍ता. अद बेरेड पेनदा आनि गोर्रे पोरिना राजगद्‍देताल सुरुव आसि, अद सहरता पेद्‍दा हरदा नड्‍डुमताल पोंगसेक मनुंदु. अद बेरेटा ओड्‍डुंक रोंडु पक्‍काने पिस्वर हियना मराक मत्‍तां. अव मराक वर्साता हरेक नेलाते पन्‍नेंड तीरकुना पंडि हादसेकेन मनुंदु. दुनियाता अन्‍नि देसेल्‍कुना लोकुल्‍क अव मराकुना आकिने बेस आयुंदुर.
REV 22:3 अद सहरते वायना रोजकुने बस्‍केने सापनेम मन्‍नो. बारित्‍ते अगा पेनदा आनि गोर्रे पोरिना राजगद्‍दे मनंता. अवुना सेवाकुल्क पेनदा सेवा कियानुर.
REV 22:4 ओर दाना मोकोम हूळांतुर. ओरा कपालमपोर्रो पेनदा पोरोल रासि मनंता.
REV 22:5 अगा हीकट बस्‍केने मन्‍नो. ओर्कु पोळ्‍दु, वेडसि वेलगुना अव्‍सरम मन्‍नो. बारित्‍ते सामि पेनबाबाले ओर्कु वेलगु हियानुर. युगा-युगाल्‍कुनदाका ओरे राज्येम ताकसंतोर.
REV 22:6 पजा अद पेनदा दूता नातोनि, “इदवेरादाका बतल अय्ते वेहामळ जर्गता अव पोल्‍लें विस्वासमलायक आनि सत्‍तेम पोल्‍लें आंदुं, बव पोल्‍लें अय्ते बिराना जर्गमळ अव्‍सरम मंता, अव पोल्‍लेन दाना सेवाकुल्कुंक हुप्‍सानाहाटीं, कबुरतोरा आत्मान ताकसाना पेने दाना दूतातुन लोहता,” इंचि इत्‍ता.
REV 22:7 इवन्‍नि आता पजा येसु सामि, “हुळाट! नना बिरानेन वासेक मंतन. इद पुस्तकमते वेह्‍चि मत्‍ता पोल्‍लेन परकारम बोर अय्ते ताकंतोर, ओरे आसिर्वाद दोर्कुतोर आंद,” इंचि वेहतोर.
REV 22:8 नना योहानुन, इव पोल्‍लें केंजतन, हूळतन. केंजुड, हूळुड आतस्के, अव पोल्‍लें वेहता दूताता काल्क मोळ्‍कानाहाटीं दाना काल्कुनपोर्रो अरतन.
REV 22:9 गानि अद नाकुन, “निमे नावा काल्क मोळ्‍कमा, ननागुडा नीलेसीं, नी दंटाता कबुरतोरलेसीं, इद पुस्तकमते वेह्‍चि मत्‍ता पोल्‍लेन परकारम ताकानोरलेसीं पेनदुन मोळ्‍कानोने आंदुन. निमे सिराप पेनदुने मोळ्‍का,” इंचि इत्‍ता.
REV 22:10 अद दूता मर्रा नातोनि, “इद पुस्तकमते वेह्‍चि मत्‍ता पोल्‍लें निजम आयाना वेला दग्‍गेरा एवता, अदुनहाटीं इद पुस्तकमतुन निमे मक्‍किचि इर्रुमा,” इंचि इत्‍ता.
REV 22:11 “अन्‍यायम कीसेके मनानोर अन्‍यायम कीसेकेन मन्‍निरकांटी, हेळ्‍सोत्‍तोर ओर हेळ्‍सोंचे मन्‍निरकांटी, नीतिमंतुड मत्‍तोर, ओर नीतिमंतुडे मन्‍निरकांटी, पवित्र मत्‍तोर, ओर पवित्र मन्‍निरकांटी,” इंचि इत्‍ता.
REV 22:12 पजा येसु सामि, “हुळाट! नना बिरानेन वासेक मंतन. हरेक मनकंक ओर कीता कबाह्‍कुन पीसि, ओन्क इनाम हींतन.
REV 22:13 ननाने अल्‍पा, ननाने ओमेगा आंदुन. ननाने मोदाटोन, ननाने आकिर आंदुन. इंका ननाने सुरुव कियानोन, ननाने महानोन आंदुन.
REV 22:14 बोर अय्ते ओरा कपडिं हुक्‍सि बेस साप कीतुर ओर आसिर्वाद दोर्कतोर आंदुर. ओर्क पिस्वर हियना मराता पंडि तिनालय आनि आ गल्‍माताल सहरते होळियालय अदिकारम दोर्कार.
REV 22:15 गानि नयकस्‍केल लोकुल्‍क, होदेगाह्‍कु, बोगमतनम कियानुर, हव्कानुर, बोम्मांक मोळ्‍कानुर, आबद्‍दमतुन पावरम कियानुर, आबद्‍दम वळ्कानुर अंटोरगुडा सहरता पलातेन मनांतुर.
REV 22:16 येसुन आंदुन. दाविदना वंसंमतोन ननाने आंदुन. हक्‍केटा मेर्सना सुक्‍कातुनगुडा ननाने आंदुन, इंचि इव पोल्‍लेना बारेमता गवाइ कलिसियातोर्क वेहनाहाटीं नावा उंदि दूतातुन मिहगा लोहतन” इंचि वेहता.
REV 22:17 पेनदा आत्मा आनि मरमिना पेगिड, “हिक्‍के वा” इंचि वेहांता. केंजानोरगुडा, “वा” इंचि इन्‍निरकांटी. दूपा आसि मत्‍तोर बोरे आयिर इद पिस्वर हियना एतुन पुक्‍कटते उन्‍ना वच्‍चु.
REV 22:18 इद पुस्तकमते वेह्‍चि मत्‍ता वायाना कालमते जर्गना पोल्‍लेन केंजना हरेक मनकंक इल्‍हा गट्‍टिगा वेहासेक मंतन गदा, बोरन्‍ना इव पोल्‍लेन बतलन्‍ना एक्‍को कल्‍पानय्ते, इद पुस्तकमते रासि मत्‍ता गंडाल्कु पेनबाबाल ओनपोर्रो वायागोटनुर.
REV 22:19 अल्‍हेने ओक्‍कला बोरन्‍ना, इद पुस्तकमते रासि मत्‍ता मुन्‍ने जर्गाना पोल्‍लेनाल, बदन्‍ना पोल्‍लेतुन तक्‍को किय्‍यिना, इद पुस्तकमते वेह्‍चि मत्‍ता, पिस्वर हियना मरा आनि पवित्र सहरताल पेन ओना हिस्सातुन तेंडकुंता.
REV 22:20 इव अन्‍नि पोल्‍लेना गवाइ हीता येसु सामि, “हो नना बिरानेन वासेक मंतन” इंचि वेहासेक मंतोर. आमीन! वा! येसु सामि वा!
REV 22:21 पेनदा अंटोर लोकुल्‍कुनपोर्रो येसु सामिना कुर्पा मन्‍निकांटी! आमीन!
