﻿पत्रु रासता रोंडो सिट्‍टि.
1.
नना सिमोन पत्रुन, येसु किरिस्‍तुना दासुन आनि प्रेरितुन आंदुन. बोर अय्ते मना पेन आनि मुक्‍ति हियना येसु किरिस्‍तुना सत्‍तेमताहेंदाल मावालेसीं विलुवाता विस्वासम दोर्किच्‍कुत्‍तुर, ओर्क इद सिट्‍टि रासेके मंतन. 
पेन आनि मना सामि येसुना तेल्विहेंदाल मीकु कुर्पा, सांति वेल्‍लेने बेर्स्‍सेके मन्‍निकांटी. 
मना पिस्वर आनि बक्‍तिताहाटीं पेन दाना ताकतताहेंदाल मनाकु बतल गावाले अव अन्‍नि हीता. मनम अदुन एरपाट कीताहाटीं अव मनाकु दोर्कतां. अद मनाकुन दाना महिमा आनि बेसतनमहेंदाल केयता. 
दुनियाते मनना कराब आसेनाल पुट्‍टना रोता गुनमताल तपिच्‍कुंचि, मनम पेनदा बेस गुनमता हिस्सेदार्क आयाना इंचि अद मनाकु विलुवाता पोल्‍लें हीता. 
अदुनहाटीं मिमेट अन्‍नि तीरकुना कोसिस कीम्‍टु गदा, विस्वासमते बेसता गुनाल्‍क, बेसता गुनाल्‍कुने तेल्वि, 
तेल्‍विते सततुन आपकुनमळ, सततुन आपकुनमळते दैरनेम, दैरनेमते बक्‍ति. 
बक्‍तिते दादल-तम्मुना कूळमळ, दादल-तम्मुना कूळमळते पावरम कल्‍पट. 
ओक्‍कला इव अन्‍नि पोल्‍लें मीलोप्‍पो मंचि बेर्स्‍सेके होनानय्ते, अव मीकुन मना सामि येसु किरिस्‍तुना तेल्‍विता बारेमते एक्‍को हुसार, बेस कबळलायक कींतां. 
गानि बोनगा इव गुनाल्‍क हिल्‍लेंगो ओर गुड्‍डि आंदुर, लक्‍कुटा नदर हिल्वोर आंदुर. ओना पडाना पापाल्कुन पेन नोर्सि ओना सुद्‍दिकरन कीतदगुडा मति मर्गतोर. 
अदुनहाटीं विस्वासुल्‍कुनिटा! पेन मीकुन केय्‍सि पेरता इत्‍ता पोल्‍लेतुन पक्‍का कियालय बस्‍केळ्‍क आतच्‍चोन कोसिस कीम्‍टु, अल्हा कीते मिमेट बस्‍केने विस्वासमताल अर्सि होन्‍निर. 
इल्‍हा मिमेट मना सामि, मुक्‍ति हियना येसु किरिस्‍तुना बस्‍केळ्‍क मंदना राज्येमते वेल्‍ले कदरते होळिया परांतिट. 
अदुनहाटींगे, इव पोल्‍लें मीक तेळियसि मनिना, मीकु दोर्कता सत्‍तेमते मिमेट गट्‍टिगा निल्‍सि मनिना, नना मीकु बस्‍केळ्‍क मति कीसि हीसेक मनंतन. 
नना इद मेंदुलते मत्‍तच्‍चोरजेम मीक इवुन मति कीसि हीसि मीकुन हुसार कियमळे, बेस इनकुंतन. 
बारित्‍ते, मना सामि येसु किरिस्‍तु नाकु हुपिस्ताप, नावा मेंदुल्तुन बिराने होळसंतन इंचि नाकु एरपाट मंता. 
अदुनहाटीं नना हासोत्‍तंकागुडा मिमेट इव पोल्‍लेन बस्‍केळ्‍क मति कियनलायक मिमेट आयगोम इंचि नना कोसिस कीसंतन. 
बारित्‍ते, मना सामि येसु किरिस्‍तुना ताकत आनि ओना मल्सि वायाना बारेमते मोमोट मीकु वेहतस्के, तयार कीसि वेहता कतन कल्‍पिसि वेहा हिल्‍लोम. गानि मोमोट ओना पेद्‍दातनमता वेलगुन कळ्‍कुने हूळसि वेहतोम. 
बस्के अय्ते पेनबाबानाहेंदाल कदर आनि महिमा दोर्कता, अस्‍के आ स्वर्गमताल, “ईर नावा पावरमगल्‍ला मर्रि आंदुर, ईनतोनि नना आनंदमते मंतन,” इंचि उंदि अल्किर आ महिमाता वेल्‍गुनाल केंजावाता. 
स्वर्गमताल वाता आ अल्किरतुन केंजतस्के, मोमोट पवित्र गुट्‍टापोर्रो येसुनतोनि मत्‍तोम. 
मनाकु पेनदा कबुरतोरा पोल्‍लेपोर्रो एक्‍को बरोसा अनपिस्ता. अद पोल्‍ले हीकटते एलगना वेळसिलेसीं दिसंता. अदुनहाटीं पंगातारित्‍ते हक्‍केटा सुक्‍का मीवा मनसुने एलगनदाका आ पोल्‍ले परकारम ताकते मीके बेस. 
दर्मसास्‍त्रमते मत्‍तव पेनदा कबुरतोरा पोल्‍लें ओरा सतता मनसुना विचारमतोनि रासतव आयों, इदुन मिमेट मुन्‍ने एरपाट कियमळ गावाले. 
बारित्‍ते बवे बविस्यवानिं मनकना इच्‍चाताहेंदाल वाया हिल्‍लें, गानि पवित्र आत्माते निंडता लोकुल्‍के पेनदाहेंदाल वळ्‍कुंदुर. 
