﻿1 पत्रु.
3.
अल्‍हेने मुत्‍तोह्कुनिटा, मिमेट मीवा मुय्दुरा कय्‍दा हिळु वेर्रेते मंटु. ओक्‍कला ओर पेनदा पोल्‍लेते ताकाकोंटे, पोल्‍लेनतोनि आयाकोन्‍ना मीवा पवित्र आनि सत्‍तेमते ताकानदुन हूळसि विस्वासमते वायानुर. 
मीवा केल्कुन तीराता जेडां वाटमळ, बंगारमता नगां केरमळ, एक्‍को दराता कपळिं पोंडमळ इसोंटा पलाताल दिस्‍सना सिंगारम कियमट. 
गानि दानकु बदुल मीवा मनसुना गुनम सादा-सिंपल, नासडेम आयवा सांत आत्माते सिंगारम कीम्‍टु. इसोंटद पेनदा मुन्‍ने बच्‍चोनो विलुवातद आंद. 
एनकटा कालमते पेनदापोर्रो आसे इर्राना पवित्रमाता मुर्ताह्क बेसता गुनमते सिंगारिंचुंदुं आनि मुय्दोना पोल्‍लेते ताकुंदुं. 
बल्हा अय्ते अब्राहामुना मुत्‍तो साराल ओन मालक इंचि केयुंदु, ओर वेहताप ताकुंदु, अल्‍हेने मिमेटगुडा बेसता कबाह्‍क कीसेके बदे पोल्‍लेक वेरियाकोंटा मत्‍ते, दाना मियाह्क आंतिर. 
अल्‍हेने मुय्दुर्कुनिटा! मीवा मुत्‍तोह्कुंकगुडा मी अचोने पेनदा कुर्पाता वारसान हक्‍क मंता. गानि अवुंक मीलेसीं ताकत हिल्‍ले. अदुनहाटीं मिमेट मुत्‍तोह्कुंक बेस कदर हीसि पिस्‍सट. अस्‍के मीवा पारतनाकु बतले अड्‍डम वायो. 
आकिरते, मिमेट उंदि मनसुने वरोंक-वरोर पावरम कियमळते, उंदि लोतोरलेसीं जीवा कियमळते, इंकावरोनहाटीं जीवा नोयमळते, सादा-सिंपल मनमळते अंटोर उंदि आसि मंटु. 
कराबता बदला कराबतोनि एतमट; तेराहतोर इंचि तेराहमट गानि ओर्क आसिर्वाद हीम्टु. बारित्‍ते मीक आसिर्वाद दोर्काना इंचि पेन मीकुन केयता. 
दर्मसास्‍त्रम वेहाताप, “बोर अय्ते पिस्वरतुन मेच्‍कुंचि, बेसता रोजकु हूळंतन इंतोर, ओर ओना नाल्केताल कराब पोल्‍लें, ओना पेद्‍विनाल आबद्‍दम पोल्‍लें वळ्‍कमळ आपापींता. 
ओर कराब कबाह्‍कुन होळसिसि बेसता कबाह्‍क कियाना, ओर सांतितुन पहकिसि दान पीसि ताकाना. 
बारित्‍ते सामिना नदर नीतिमंतुल्‍कुना पोर्रो मनंता, ओरा पारतनातुन केव हीसि केंजंतोर, गानि दुस्‍टुल्कुंक सामि विरोद कींतोर.” 
ओक्‍कला मिमेट बेस कियानाहाटींगे जोसने मत्‍ते, मीकुन बोर हेळाहनुर? 
ओक्‍कला मिमेटगिंटा नीति कबाह्‍क कियानेंके मीक कस्‍टाल्‍क वायिना, पेन मीक आसिर्वाद हिय्यार. ओर वेराहते मिमेट वेरियमट, परेसान आयमट. 
गानि मीवा मनसुने किरिस्‍तु मावा सामि इंचि ओनकु कदर हीम्टु. येसुना पोर्रोटा मीवा आसेता बारेमते बोरन्‍ना मीकुन पूसकीते, मिमेट सादा-सिंपल आनि मान-मर्यादाते बस्‍केळ्‍क वेहालय तयार मंटु. 
गानि मिमेट किरिस्‍तुना लोप्पो बेस पिसमळतुन हूळसि बोर अय्ते मीवा अपमानम कींतुर, असंटोर्क मीवा ताकमळतुन हूळसि सिग्गु वायानाल मीवा विवेक बुद्‍दितुन बेस इर्सि ताकट. 
ओक्‍कला बेसता कबाह्‍क कीताहाटींगे तकलिप बोगांचमळ पेनदा इच्‍चा मत्‍ते, कराब कबाह्‍क कीसि तकलिप बोगांचना दानकन्‍ना, इदे बेस. 
बारित्‍ते अंटोरा पापाल्कुनाहाटीं किरिस्‍तु उंदे मल्का हातोर. मनाकुन पेनदागा ओयालय वरोर नीतिमंतुड अनीतिमंतुनाहाटीं हातोर. मेंदुलताल ओन हव्कतुर गानि आत्माते ओन जीवाते तेहमळ जर्गता. 
ओर हातोरा आत्मानगा होंचि, दोहचि वाटताप मत्‍ता आत्मांकु पेनदा कबुर वेहतोर. 
एनकटा नोहाना कालमते डोंगा तयार कियानेंके लोकुल्‍क वायानुर इंचि पेन ओप्के पीसि एदुर हूळसेक मत्‍ता, गानि लोकुल्‍क पेनदा पोल्‍ले केंजा हिल्‍लुर. सिराप एनमिदि लोकुल्‍क पेनदुन नम्मिसि आ कम्मुळता एताल पिस्तुर. 
आ एताल पिस्ता आनवल इत्‍तेने बापतिस्मा आंद. बापतिस्मा एतमळ इत्‍ते मेंदुलता मुर्कि होनालय आयो गानि येसु किरिस्‍तु हासि मर्रा जीवाते तेदताहेंदाल मनाकुन पिसागोटसि, विवेक बुद्‍दिताहाटीं पेनदुन विनंति कियाना करार आंद. 
इंदके येसु किरिस्‍तु स्वर्गमते होंचि पेनबाबाना तिना बाजुंक उद्तोर. अगा पेनदा दूतां, अदिकाराल्‍क, सक्‍तिं ओना कय हिळु मंतां. 
