﻿इब्रि.
13.
मिमेट अंटोर उंदि लोतोरलेसीं वरोंक-वरोर पावरम कीसेके मंटु. 
वाता हेळमितोर बोरे आयिर, ओर्कुन बेस हूळकुंटु. इल्‍हा इच्‍चुर लोकुल्‍क, एरपाट कियाकोन्‍नागानि पेनदा दूतन बेस हूळकुत्‍तुर. 
पेनदुन विस्वासम कीताहाटीं बोर अय्ते जेलने मंतुरो, ओरा मति कीतस्‍के, मिमेट कुद्‍दु ओरतोनि जेलने मत्‍ताप विचारम कीम्‍टु. अल्‍हेने, बोर अय्ते पेनदुन विस्वासम कीताहाटीं तिप्‍पल्‍क बोगांचेके मंतुरो, ओर्कुन मति कीतस्‍के मिमेट कुद्‍दु ओरतोनि तिप्‍पल्‍क बोगांचेके मत्‍ताप मति कीम्‍टु. 
मरमिन आनि मुत्‍तो-मुय्दोना संबंदमतुन कदर कियाना, ओर वरोनपोर्रो विस्वासम कीसि बदनाम आयाकोंटा मंदना. व्यबिचारम कियानोर्कुन आनि बोगमतनम कियानोर्कुन पेन न्‍यायम कींता, इदुन मतिते इर्राट. अदुनहाटीं मुत्‍तो-मुय्दो वरोनपोर्रो वरोर विस्वासम कीसि बदनाम आयाकोंटा मंदना. 
दनमताहाटीं मिमेट आसे पडानायो. मिहगा बतल अय्ते मंता अव्टेन कूस मंटु. बारित्‍ते पेने कुद्‍दु इल्‍हा इत्‍ता: “नना नीकुन बस्‍केने होळ्‍सोन, नना नीकुन बस्‍केने दिक्‍कु हिल्वोन किय्योन,” इंचि वेहता. 
“अदुनहाटीं, मनम, पेन नाकु सहायम कियानद आंद, नना असले वेरियोन, मनकल नाकुन बतल किया परांतोर?” इंचि दैरनेमते इना पर्रांतोम. 
मीकु मोट्‍टा मोदाला पेनदा पोल्‍ले वेहता मीवा पेद्‍दाल्कुन मति कीम्‍टु. ओर बल्हा आकिरदाका पेनदापोर्रो विस्वासम इरसि पिस्तुरो मति कीसि, अल्हेन मिमेटगुडा ताकट. 
येसु किरिस्‍तु मुन्‍ने मत्‍तापे, इंदके आनि बस्‍केळ्‍दाकागुडा मारियाकोंटा उंदेतीर मंतोर. 
अदुनहाटीं, वेरेतोर वासि कराहना रका-रकाल्कुना बोदां केंजसि मिमेट गयबेत आयमट. बोनके बतल पायदा वायवा, तिंदाना नियमकुन पीसि तनलाळसेक मत्‍ते मना मनसुंकु ताकत दोर्को, गानि पेनदा कुर्पातेन मनसुंकु ताकत वांता. 
मनागा उंदि इसोंटा गद्‍दे मंता गदा, आ गद्‍देपोर्रोटा गाटो डेराने सेवा कियाना यहुदि याजकुल्कुंक तिनना अदिकारम हिल्‍ले. 
बारित्‍ते, पापाल्क मापि आयानाहाटीं मोळ्‍कालय, पेद्‍दा पेर्मल जिवरासिना नेत्‍तुरतुन अय्ते अन्‍निटकन्‍ना पवित्र जेगाते ओंतोर, गानि जिवरासिना मेंदुल्तुन मात्रम डेराता पलाते बोळ्‍संतुर. 
अय्ते येसुगुडा, ओना नेत्‍तुरते लोकुल्‍कुन पवित्र कियानाहाटीं येरुसलेम सहरता पलाते तिप्‍पल्‍क बोगांचि जीवा होळसतोर. 
अदुनहाटीं वटु! मनमगुडा येसुना पोर्रोटा अपमानमतुन मनापोर्रो येतकुंचि, येसुनालेसीं तिप्‍पल्‍क बोगांचालय डेराता पलाते दाकोम. 
इद दुनियाते हमेसा मनालय मनाहाटीं बदे सहर हिल्‍ले. गानि वायाना कालमते मनाहाटीं तयार आयाना सहरते मनालय, आसेते मंतोम. 
अदुनहाटीं, येसु मनाहाटीं कीतदुन मति कीसि, बस्‍केळ्‍क मना तोळ्‍दाल पेनदा पोरोल येतसि, पारतना-दन्यवादाल्कुना मोक्‍कुल्क हीसेक मंदकोम. 
वेरेतोराहाटीं बेस कियमळतुन आनि मिहगा मत्‍तव्टेटाल ओर्कु तूस हियमळतुन होळ्‍समट. इल्‍हा कियमळगुडा उंदि मोक्‍के आंद. दीनहेंदाल पेन कूस मनंता. 
मीवा पेद्‍दाल्क वेहताप मिमेट ताकट. ओर्कु लोंगिस मंटु. मीवा जीवाता कावेल कियमळे ओरा जिम्मेदारि आंद. ओर्कु मीवा बारेमते, पेनदागा लेक्‍का हिय्या पींता. ओर वेहताप मिमेट ताकते, ओरा कबळ ओर कुसिते कींतुर, हिलाकोंटे ओर दुक्‍कमते कबळ कींतुर. ओर दुक्‍कमते कबळ कियानय्ते मीकु बतल पायदा वायो. 
माहाटीं पारतना कीसेके मंटु. अन्‍नि तीरकुने मोमोट निजम बतल अदे कीसेके, बेस कदरते पिस्सेक मंतोम. इंका मावा बुद्‍दिगुडा सत्‍तेम मंता इत्‍ता बरोसा माकु मंता. 
अचोने आयाका, नना मीकु विनंति कीसि वेहना पोल्‍ले बतल इत्‍ते, पेन नाकुन बच्‍चोन बिराना आते, अचोने बिराना मिहगा लोहना इंचि पारतना कीम्‍टु. 
सांति हिय्यना पेन दाना विचारम परकारम मिमेट कियालय, मीकु अन्‍नि तीरकुना बेसता पोल्‍लें हिय्यि. येसु किरिस्‍तुनाहेंदाल मीवा पिस्वरते दान्क नच्‍चना पोल्‍लें जर्गिं. किरिस्‍तु येसुना नेत्‍तुरहेंदाल पेन मातोनि बस्‍केळ्‍क मननाहाटीं पूना करारतुन निल्‍हाता. इद पूना करार निल्‍लना इंचि पेन येसुन हामुरताल मर्रा जीवाते तेहाता. इल्‍हा येसु किरिस्‍तु मावा बेस मेहानोर आतोर. मनकालोर अंटोर बस्‍केळ्‍ताहाटीं ओन्‍के कदर हिय्यिर. आमीन. 
विस्वासुल्‍कुनिटा! मिमेट पेनदा बक्‍तिते इंकिच्‍चो गट्‍टि पळना इंचि, इव इच्‍चुं पोल्‍लें नना इद सिट्‍टिते मीहाटीं रासतन. इवुन बेस सहन कीसेके केंजट इंचि नना मीकु विनंति कीसंतन. 
मना तम्मुनसोंटा तिमोति जेलनाल पेय्सता पोल्‍लेतुन मिमेट तेल्‍पिचकुंटु. ओर ओक्‍कला नहगा बिराना वाते, नना ओनतोनि, मीकु कलियालय वांतन. 
मीवा लीडरकुंक आनि पेनदा अंटोर पवित्र लोकुल्‍कुंक, नावा जोहार वेहाट. इटलि देसेमते मनना विस्वासुल्‍क मीकु जोहार वेहासेक मंतुर. 
पेनदा कुर्पा मी अंटोरतोनि बस्‍केळ्‍क मन्‍निकांटी. आमेन.
