﻿1 तिमोति.
4.
वायना रोजकुने, इच्‍चुर लोकुल्‍क दोका हियना आत्माना बोदां आनि देय्यमता पोल्‍लें केंजसि ओरा विस्वासमतुन होळसंतुर, इंचि पवित्र आत्मा किलियर वेहंता. 
बोरा बोदां अय्ते काचाह्ता सलाकिते बोळ्‍सि हासोंचि मंतां, असोंटा दोका हियानोर आनि आबद्‍दम वळकना मनकालोराहेंदाल इल्‍हा जर्गंता. 
मरमिं आयामन्‍नि इंचि ओर कराहंतुर, इंका बव वस्‍तुक अय्ते पेन दाना विस्‍वासुल्‍कुनाहाटीं आनि निजमतुन एरपाट कियनोराहाटीं दान्क दन्यवाद हीसि तिनालय कीता, अव कोन्‍नि वस्‍तुकुन तिनामन्‍नि इंचि ओर कराहंतुर. 
गानि पेन कीता अन्‍नि वस्‍तुक बेसतवे आंद. पेनदुक दन्यवाद कीसि तित्‍ते बवे वस्‍तुक मन्‍नि इननालायक मन्‍नों; 
बारित्‍ते पेनदा पोल्‍ले आनि पारतना अद वस्तुन पवित्र कींता. 
ओक्‍कला निमे इव आदेसकुन विस्वासुल्कुंक कराहनय्ते, निमे विस्वासम कियना बव पोल्‍लें आनि सत्‍तेम बोदानापोर्रो ताकंतिनो अवुनहेंदाल बेरसता, येसु किरिस्‍तुना वरोर बेस सेवक आकिन. 
बक्‍ति हिल्वव अल्हेन तयार कीसि वेहना कतानाल मंटु. बस्‍केळ्‍क बक्‍ति पिस्वरते मुन्‍नेळ्‍क ताकाना कोसिसते मंटु. 
बारित्‍ते मेंदुलताहाटीं कियना टेरनिंगते गोडच्‍चेन पायदा मंता. गानि पेनदा बक्‍ति कीते, अव्टे अन्‍नि तीरकुना पायदा मंता. इंदकेटा पिस्वर आनि मुन्‍नेटा पिस्वरहाटीं पेन हीता पोल्‍ले अव्टे कलियसि मंता. 
ई पोल्‍ले पुरागा ओप्कुननालायक आनि विस्वासम कियनलायक मंता. 
इदुनाहाटींगें मनम बागा कस्‍टपळसेके, पोराटम कीसेके मुन्‍नेळ्‍क ताकसेके मंतोम. बारित्‍ते मनम मना आसे, बस्‍केळ्‍क जीवाते मननद आनि अंटोर लोकुल्‍कुन कापाळना पेनदापोर्रो इरतोम, विसेस कीसि दान विस्वासम कियानोर्कुन पिसागोटना पेनदापोर्रो इरतोम. 
इवे पोल्‍लें कियालय आदेस हीसि अंटोर्क करहा. 
नीवा लेय्यातनमहेंदाल बोरे नीकुन सिन्‍नगा हूळानायो. गानि वळ्कुमळते, ताकमळते, पावरम हूप्‍समळते, विस्वासमते, पवित्र मनमळते विस्वासुल्‍क नीकुन हूळसि करियगोम, अल्हा मन्‍नु. 
नना बदवेरदाका अय्ते वायोनो अदवेरदाका निमे अंटोर नड्‍डुम दर्मसास्‍त्रमतुन हदवुसेके, प्रचार कीसेके, कराहसेके मन्‍नु. 
पेद्‍दाल्क नीपोर्रो कय्‍क इर्सि पारतना कियनेंके, बविस्यवानि कियानोर वेहता आ वरम नीकु दोर्कता. अद वरमतुन निमे वाळकुन, दान मति मर्गुमा. 
इवे पोल्‍लेन निमे नीवा मनसुने इर्सि अवुना परकारमे ताकसेक मन. अस्‍के निमे बक्‍तिते बेस बेर्सनद अंटोर लोकुल्‍कुंक दिस अर्रंता. 
निमे नीवा पिस्वर बारेमते आनि निमे वेहना पोल्‍लेन बारेमते वेल्‍ले जेर्गताते मन. अल्हा मत्‍तिनित्‍ते, नीवद निमे कापाळकुंतिन, नीवा पोल्‍लें केंजानोर्कुनगुडा कापाळंतिन. 
