﻿1 तेसलोनि.
5.
विस्वासुल्‍कुनिटा! अव गटनां जर्गना वेला, कालमता बारेमते मोमोट मीक रासाना अव्‍सरम हिल्‍ले. 
बारित्‍ते नर्कटा वेलाते दोंगल बल्हा अचानक वांतोर, अल्‍हेने सामि वायाना रोजुगुडा मनंता इंचि मीकु एरपाटे. 
बस्के अय्ते लोकुल्‍क, “मोमोट सांतिते मंतोम, माक वेर्रे हिल्‍ले,” इंचि वेहासेक मनंतुर, अस्‍केने पीटे मंदना मुरतळकु बल्हा नोप्‍पिं तेदंतां अल्हा, पीळा ओरापोर्रो अचानक वांता. ओर बल्हा किय्यिनागानि पिस्सुर. 
गानि विस्वासुल्‍कुनिटा! अद रोजु दोंगानलेसीं अचानक मीपोर्रो वायालय मिमेट बारे हीकटते हिल्‍लिर. 
मिमेट अंटोर वेल्‍गु आनि पोद्‍दलता पिलाल्क आंदिर, मनम नर्का आनि हीकटतोरम आयोम. 
अदुनहाटीं मनम वेरेतोरालेसीं मींडसि मनमळ आयो गानि तेल्‍विते, उसारते मंदकोम. 
मींडानोर नर्कळ्‍क मींडंतुर, रिम्मा आयानोर नर्कळ्के रिम्मा आंतुर. 
गानि मनम पोद्‍दलतोरम आताहाटीं सांतिते मंदकोम. मना चातितुन कापाळना कच्‍चिता अंगिलेसीं विस्वासम आनि पावरमते ताककोम. मना तल्‍लक टोपिलेसीं मुक्‍तिता आसे इरकोम. 
बारित्‍ते पेन मनापोर्रो होंग हुप्‍सालय आयो, गानि मना येसु किरिस्‍तु सामिनाहेंदाल मुक्‍ति दोर्किच्‍कुनालय मनाकुन निलाहता. 
मनम हायिना, पिस्सिना किरिस्‍तुनतोनि मंदना इंचि ओर मनाहाटीं जीवा हीतोर. 
अदुनहाटीं, मिमेट इंदके कीसेके मंतिट अल्‍हेने वरोंक-वरोर दैरनेम हीम्टु, वरोन-वरोर विस्वासमते निलाहट. 
विस्वासुल्‍कुनिटा! बोर अय्ते मीवा नड्‍डुम कस्‍टपळसि, सामिना हर्दे मीकुन मुन्‍ने अर्सि ताकिचेके कराहंतुर, ओर्क मिमेट कदर हीम्टु. ओर कियाना बेसता कबाह्कुनाहाटीं पावरमते ओर्क एक्‍को मान-मर्यादा कीम्‍टु, वरोंक-वरोर बेस सांतिते मंटु, इंचि मीकु विनंति कींतन. 
मावा विस्वासुल्‍कुनिटा! लंडोर्कुंक समजांचि वेहाट, वेरियानोर्कुंक दैरनेम हीम्टु, कमजोर मत्‍तोर्कुंक सहायम कीम्‍टु, अंटोरतोनि ओप्‍केते मंटु इंचि मोमोट मीक तेळियागोट्‍सि विनंति कीसेके मंतोम. 
मीलोप्‍पो बोरन्‍ना सेड्‍डातनमता बदला सेड्‍डातनम कियाकोंटा हूळकुंटु. गानि बस्‍केळ्‍क वरोंक-वरोर आनि अंटोराहाटींगुडा बेस कियालय कोसिस कीम्‍टु. 
बस्‍केळ्‍क कुसिते मंटु. 
बस्‍केळ्‍क पारतना कीसेके मंटु. 
अन्‍नि परिस्तितिने मिमेट पेनदुक दन्यवाद कीम्‍टु, बारित्‍ते मिमेट येसु किरिस्‍तुनलोप्‍पो इल्हे मंदना इंचि पेनदा इच्‍चा मंता. 
पवित्र आत्माता वेलगुन पिरुहमट. 
पेनदा कबुरतोरा पोल्‍लेन पास्कमट. 
गानि अन्‍निटवुन परिक्‍सा कीसि हुळाट, बव बेसतवो अवुन पीसि मंटु. 
अन्‍नि तीरकुना कराब पोल्‍लेनाल लक्‍कु मंटु. 
सांति हियना पेने कुद मीकुन पुरागा पवित्र किय्‍यिकांटी, मावा येसु किरिस्‍तु सामि मर्रा वायानादाका मीवा आत्मातुन, जीवातुन, मेंदुलतुन दोसेम हिलाकोंटा कापाळिकांटी. 
मीकुन केयता पेन विस्वासमगल्‍लद आंदु, अद अल्‍हेने कींता. 
विस्वासुल्‍कुनिटा! मावाहाटीं पारतना कीम्‍टु. 
अंटोर विस्वासुल्‍क, वरोंक-वरोर कय कल्‍पिसि पवित्र पावरमते जोहार कीम्‍टु. 
इद सिट्‍टि अंटोर विस्वासुल्‍क केंजानाल हद्‍विसि हुप्‍सा इंचि नना सामिना अदिकारमते वेहासेक मंतन. 
मना सामि येसु किरिस्‍तुना कुर्पा मीपोर्रो मन्‍निकांटी. आमेन.
