﻿कुलुसि.
4.
मालाकुल्‍कुनिटा! स्वर्गमते मीकुगुडा वरोर मालक मंतोर, इदुन मति इर्सि मिमेट मीवा दासुल्‍कुनतोनि न्‍यायमते, बेदबाव हिलाकोंटा ताकट. 
मिमेट बस्‍केळ्‍क पेनदुक पारतना कीसेके मंटु. दानकु दन्यवाद कीसेके जेगर्ताते मंटु. 
नना किरिस्‍तुना मर्ममता पोल्‍ले वेहताहाटीं जेलते मंतन, इदे पोल्‍लेतुन मोमोट अंटोर्क वेहानाहाटीं पेन माकु मोका हिय्यि इंचि मावाहाटींगुडा पारतना कीम्‍टु. 
नाकु बल्हा वेहाना मंता अल्‍हेने नना इद कबुरतुन बेस तेळियागोट्‍सि वेहानाहाटीं पारतना कीम्‍टु. 
विस्वासम कियवोरतोनि बेस तेल्‍विते ताकट, मोका दोर्कतस्के ओर्क बेसता कबुर वेहाना पायदा तप्‍पाकोंटा एतट. 
हरेक मनकंक बेस जवाब हिया वायमळ गावाले इंचि मीवा पोल्‍ले बस्‍केळ्‍क कुर्पाते आनि होव्वोर वाटते रुसि मत्‍ताप मना पींता. 
पावरमगल्‍ला तुकिकुस दादल विस्वासमलायक सेवक आंदुर. ओर नावा बारेमते अन्‍नि पोल्‍लें मीक वेहांतोर, ओर नावातोनि कलियसि सामिन लोप्पो सेवा कियानोर आंदुर. 
ओर मावा बारेमते अन्‍नि पोल्‍लें मीक तेळियागोट्‍सि मीवा मनसुकुंक दैरनेम हियाना उद्‍देसमते नना ओन मीहेके लोहतन. 
नना ओनतोनि मीवा लोप्पोटोरे विस्वासमलायक, पावरमगल्‍ला उनेसिम दादानगुडा लोहतन, ओर इग्‍गेटव अन्‍नि पोल्‍लें मीक वेहानुर. 
नावातोनि जेलने मनना अरिसतरकुस पोरोलतोर दादल मीक जोहार वेहासेक मंतोर, अल्‍हेने बरनाबासुना दग्‍गेटा दादाल मरकुस इनानोरगुडा मीक जोहार वेहासेक मंतोर. (नना मीक मुन्‍नेने वेहताप, मरकुस मिहगा वाते ओन बेस हुळाट.) 
युसतुस इनना येसुगुडा मीक जोहार वेहासेक मंतोर, कतना आतोराव्टेटाल सिराप ईर मुव्वुरे पेनदा राज्येमताहाटीं नावातोनि कबळ कीसेक मंतुर, ईराहेंदाल नावा जीवाक सांति दोर्कसेक मंता. 
किरिस्‍तु येसुना दासुड इपप्रास ईर मीवा लोप्पोटोरे आंदुर, मीक जोहार वेहासेक मंतोर. मिमेट पेनदा इच्‍चा मत्‍ताप पुरागा आसि, विस्वासमते गट्‍टिगा निल्‍सि मनागोम इंचि ओर बस्‍केळ्‍क मीवाहाटीं जोर हीसि पारतना कीसेके मंतोर. 
मीवाहाटीं, लोदिकिया आनि हियरापोलि सहरता विस्‍वासुल्‍कुनाहाटीं ओर वेल्‍लेने मेहनत कीसेके मंतोर इंचि, इद पोल्‍लेक नना ओना गवाइ मंतन. 
पावरमगल्‍ला डाक्‍टर लूकाल आनि देमास ईर मीक जोहार वेहासेक मंतुर. 
लोदिकियाता विस्वासुल्कुंक आनि नुंपा अक्‍कांक अल्‍हेने दाना लोतागा जमा आयाना कलिसियातोर्कुंक नावा जोहार वेहाट. 
इद सिट्‍टितुन मिमेट हदुव्‍ता पजा, इदुन लोदिकिया सहरता कलिसियातोर्क लोहचि, अगागुडा हदवा वेहाट आनि लोदिकियाताल वाता सिट्‍टितुन मिमेटगुडा मीवा कलिसियाते हद्‍विसि वेहाट. 
अल्‍हेने अरकिपुसुंक, “सामि नीकु अप्पजेपता सेवातुन तप्‍पाकोंटा पूरा कीम,” इंचि वेहाट. 
नना पौलुसुन, नावा कय्‍देन रासि मीकु जोहार वेहासेक मंतन, नना जेलते मंतन इंचि पारतनाते मति कीम्‍टु. पेनदा कुर्पा मीवातोनि मन्‍निकांटी. आमेन.
