﻿इपीसि.
6.
पिलाल्‍कुनिटा, सामिना पोल्‍ले परकारम, मिमेट मीवा तल्‍लुर-बाबो वेहताप ताकट, इदे मीवाहाटीं बेस. 
बारित्‍ते, “मिमेट मीवा तल्‍लुर-बाबोना कदर कीम्‍टु, अस्‍के मीकु अन्‍नि बेसे जर्गंता आनि बूमिपोर्रो मीवा आव्‍सुगुडा बेरसंता,” इल्‍हा दर्मसास्‍त्रमते रासि मंता. पेन हियाना पोल्‍ले कलियसि मनना मोदाटा आदेस इदे आंद. 
बाबालोरिटा! मिमेट मीवा पिलाल्कुंक होंग वाया हियमट. दान्क बदुल सामि वेहता हरदुन, पोल्‍लेन ओर्क कराहसेके ओर्कुन बेस पोस कीम्‍टु. 
दासुल्‍कुरिटा! इद बूमिपोर्रोटा मीवा मालकुल्‍कुना पोल्‍लेपोर्रो मंटु. मिमेट किरिस्‍तुना कदर कीताप, ओरदगुडा कपटम हिलुवा मनसुनाल कदर कीसेके ओर्कु वेरियसि ताकट. 
सिराप लोकुल्‍क कूस आयगोम इंचि हुप्‍सालय सेवा कियानोरलेसीं मिमेट कियमट. दानकु बदुल, पेनदा इच्‍चा परकारम किरिस्‍तुना सेवा कियाना दासुल्‍कुनलेसीं मनसु तासि कबळ कीम्‍टु. 
मिमेट कियना सेवा मनकानद आयो गानि सामिना सेवा आंद इन्कुंचि कुसिते कीम्‍टु. 
कबळ कियानोर दासुडे आयिर, दासुड आयवोर आयिर! ओर कियाना बेस कबळतुन पीसि ओन्क सामिनाहेंदाल इनाम दोर्कंता, इद मिमेट मति इर्राट. 
मालकुरिटा! मिमेट मीवा दासुल्‍कुन वेरहुळ-बेदरिच्‍चुळ कियमट, ओर्कुन बेस हूळकुंटु. मीवा इव्वुरागुडा मालक स्वर्गमते मंतोर. ओर सिन्‍ना-पेद्‍दा हूळोर, इद मति इर्कुंटु. 
आकिरते नना वेहानद बतल इत्‍ते, सामिनतोनि ओना पेद्‍दा ताकतते उंदासि मंटु. 
देय्यमता ताकतता मुन्‍ने वेरियाकोंटा नित्‍तालय मिमेट पेन हीता अन्‍नि आयुदाल्कुन वाळकुंटु. 
मना लडाइ मनकालोरा विरोदमते आयका, हीकट राज्येमतुन ताकसानोरा विरोदमते, हीकट राज्येमता अदिकारिल्कुना विरोदमते, हीकट राज्येमते मनना सक्‍तिना विरोदमते आनि मब्बुने दिस्‍सना दुस्‍ट सक्‍तिना विरोदमते मंता. 
इंचि आ सेड्‍डा रोजकु वातस्के वेरियाकोंटा नित्‍तालय मिमेट पेन हीता अन्‍नि आयुदाल्कुन पीकुंटु. अस्‍के मिमेट कियानद अन्‍नि पुरागा कीसि आकिरदाकागुडा नित्‍तिसि मना परकिट. 
अदुनहाटीं मिमेट सत्‍तेमतुन नडि पट्‍टालेह्‍का दोह्‍चि, नीतितुन इनुम अंगिलेह्का मेंदुल्क केरसि, 
सांति हियना बेसता कबुरतुन वेहना तयारिता हेरपुह्कुन कालकुंक केरसि तयारते मंटु. 
इव अन्‍निंकन्‍ना मुक्‍केमातद बतल इत्‍ते, लडाइ कियनेंके मिहगा डालुनलेह्का विस्वासम मनगोम. अस्‍के देय्यमताहेंदाल पोतसेके वायना अन्‍नि बानाल्कुन मिमेट आपा परकिट. 
इंका मुक्‍तितुन हेल्‍मेटलेह्का तल्‍लक कळाह्सि, आत्माता कसेर इत्‍ते पेनदा पोल्‍लेतुन कसेरलेह्का कय्‍दे पीकुंटु. 
अन्‍नि वेलाने पवित्र आत्माते बस्‍केळ्‍क पारतनां, विनंतिं कीसेके मंटु. इंका अंटोर विस्‍वासुल्‍कुनाहाटीं आगाकोंटा बस्‍केळ्‍क पारतना कीसेके मंटु. 
इंका नना बस्के-बस्के अय्ते पेनदा पोल्‍लें कराहलय तोड्‍डि तेहांतन, अस्‍के-अस्‍के नाकुंदि बेसता कबुर दोर्कालय नावाहाटींगुडा पारतना कीम्‍टु. दीनहेंदाल नना पेनदा बेसता कबुरते मत्‍ता मर्ममतुन वेरियाकोंटा वेरेतोर्क वेहा परकन. 
दीनाहाटींगे नना कयकुंक बेडीं वाटसि मत्‍ता पेनदा कबुरतोन आतन. दीनहेंदाल नना बल्हा अय्ते वळ्‍कागोमो अल्हा वळकालय नाकु दैरनेम दोर्कानाहाटीं पारतना कीम्‍टु. 
तुकिकुस इनना वरोर पावरमगल्‍ला दादाल मंतोर. ओर सामिना वरोर बेस विस्वासमगल्‍ला सेवक आंदुर. नना इगे बल्हा-बतल मंतन इंचि अन्‍नि पोल्‍लें मीकु वेहानुर. 
मावा परिस्तिति बल्हा मंता इद मीकु तेळियागोम आनि मी अंटोरा जीवांक दैरनेम, सांति दोर्कगोम, इंचि नना ओन मिहगा लोहतन. 
अंटोर विस्वासुल्कुंक पेनबाबाल आनि सामि येसु किरिस्‍तुनहेंदाल, सांति आनि विस्वासमतोनि पावरम दोर्कि. 
मना सामि येसु किरिस्‍तुन बोर अय्ते आगाकोंटा पावरम कींतुर, ओर अंटोरतोनि पेनदा कुर्पा हमेसा मन्‍निकांटी.
