﻿इपीसि.
5.
मिमेट पेनदा पावरमगल्‍ला पिलाल्क आंदिर, अदुनहाटीं पेन कीताप मिमेटगुडा कीम्‍ट. 
किरिस्‍तु मनाकुन पावरम कीसि मनाहाटीं पेनदा मुन्‍ने मोक्‍कु आसि, पेनदुक नच्‍चना गुगलेमलेसीं ओनद ओर बलि आतोर. अदे पावरमते मिमेटगुडा ताकट. 
मीवा नड्‍डुम बोगमतनमता बारेमते, अन्‍नि तीरकुना अपवित्र पोल्‍लेना बारेमते इंका आस्तिक संबंदिस्‍ता पोल्‍लेना बारेमते आयि, बस्‍केने उद्‍दुलिं जर्गानायो. बारित्‍ते पवित्र लोकुल्‍क इसोंटवुना बारेमते उद्‍दुलिंगुडा किय्युर. 
अचोने आयका रोता पोल्‍लें, तेल्वि तक्‍को पोल्‍लें, कराब कारेड्‍डाल्‍क मिमेट कियानायो, मीकु अव सोबांचों. मीवा तोळ्‍दाल सिराप पेनदुक दन्यवाद इनना पोल्‍लेंगे पेय्‍सगोम. 
बारित्‍ते, बोगमतनम कियानोर, अपवित्र मनकल हिलाकोंटे लालचि मनकल (लालच कियमळ इत्‍ते, बोम्माना पूजें कीतापे आंता) ईरकु बोर्के आयि, किरिस्‍तुना आनि पेनदा राज्येमते वारसाहक्‍क हिल्‍ले, इंचि मीकु तेळियसे मंता. 
उत्‍तुत्‍ता पोल्‍लें वळ्‍किसि मीकुन बोरन्‍ना पोक्‍कते अरहानायो हुळाट. बारित्‍ते इसोंटा कबाह्कुनहेंकेन पेन दाना आदेस परकारम ताकवोरपोर्रो होंग हुपसंता. 
अदुनहाटीं मिमेट इसोंटा लोकुल्‍कुनतोनि पोत्‍तु कियमट. 
उंदास्के मिमेट हीकटते पिस्सेक मत्‍तिर. गानि सामिनपोर्रो बरोसा इरताहाटीं इंदके मीकु पेनदा वेलगु दोर्कता. अदुनहाटीं वेलगुने पिस्‍सानोरा संतानमलेह्का ताकट. 
वेलगुने पिसते सिराप अन्‍नि तीरकुना बेसतनम, नीतितनम आनि निजम इवे दिसंतां. 
इंका बतल कीते सामिंकु कुसि दोर्कार, इंचि सामिन कूस कियाना विचारमतेन बस्‍केळ्‍क मंटु. 
अचोने आयका, बताके ओज्जुवा हीकटता कबाह्‍कुने मिमेट पोत्‍तु आयमट. गानि असोंटा कबाह्‍कुन पलाते अरहट. 
बारित्‍ते मक्‍किस कियना ओरा कबाह्‍कुना बारेमते वळ्‍कमळगुडा पेद्‍दा सिगलसेटे आंदु. 
गानि इसोंटा पलाते अरता अन्‍नि कबाह्‍क वेलगुने दिस अर्रंतां. अन्‍निटवुन दिस्‍सानाल कियानद वेलगु आंद. 
अदुनहाटींगे मरि, “अरे निद्राते मनानोना, हातोराव्टेटाल तेदसि उद्‍दा. किरिस्‍तुना वेलगु नीपोर्रो मेर्संता,” इंचि रासि मंता. 
अदुनहाटीं मिमेट बल्हा ताकंतिर? परमेर्का कीसि हुळाट. बुद्‍दि हिल्वोनलेसीं ताकमट, बुद्‍दि मत्‍तोनलेसीं ताकट. 
इव रोजकु बेसतव आयों, इंचि दोर्कता हरेक मोकातुन बेसताहाटीं वाळकुंटु. 
अदुनहाटीं सामिना इच्‍चा बतल मंतानो, बेस एरपाट कीसि ताकट, बुद्‍दि हिल्‍वोरलेसीं मनमट. 
इरगा कल उंचि ऊंगसेके मनमट, कल रिम्माते मीहेंदाल पापम जर्गा पर्रंता. कल उंचेके मनानदानकन्‍ना पवित्र आत्माते निंडिसि मंटु. 
इंकावरोनतोनि वरोर बस्‍केळ्‍क बक्‍ति पाटां, पेनदुन तल्‍सकुनना पाटां, पेनदा पाटां पारसेके, सामिन मीवा मनसुने बस्‍केळ्‍क मति कीसेके मंटु. 
अन्‍नि पोल्‍लेनाहाटीं, मना सामि येसु किरिस्‍तुना पोरोलते मना पेनबाबांक बस्‍केळ्‍क दन्यवाद कीसेके मंटु. 
मनसुने किरिस्‍तुना वेर्रे इर्सि वरोंक-वरोर लोंगिस मंटु. 
मरमिं आता मुरताह्‍कुनिटा, बल्हा अय्ते मिमेट सामिंकु लोंगिस मंतिटो, अल्हेन मिमेट मीवा मुय्‍दुर्कुंकगुडा लोंगिस मंटु. 
बारित्‍ते, किरिस्‍तु बल्हा कलिसियाता तल्‍लालेसीं मंचेके कलिसियातुन ताकसंतोर, अल्हेन मीवा मुय्दो मीकु तल्‍लालेसीं मंतोर. कलिसियातुन पिसागोटनोरगुडा किरिस्‍ते आंदुर. 
कलिसियातोर अंटोर बल्हा किरिस्‍तुंक लोंगिस मनांतुर, अल्‍हेने, मुत्‍तोह्‍कगुडा अन्‍नि पोल्‍लेने अवुना मुय्‍दुर्कुंक लोंगिस मनागोम. 
अय्ते ए मरमिं आता मांडसुरिटा! किरिस्‍तु बल्हा कलिसियातुन पावरम कीसि, दानाहाटीं ओना सतता जीवातुन हीतोर, अल्हेन मिमेटगुडा मीवा मुत्‍तोह्‍कुन पावरम कीम्‍टु. 
अस्‍के दान किरिस्‍तु, पेनदा पोल्‍लेतोनि सक्‍कगा साप नोर्सि पवित्र कींतोर. 
अस्‍के अद पवित्र आनि दोसेम हिलाकोंटा आंता. पजा दान बदे कसुरता डाग हिलुवा, पापमता मच्‍चा हिलुवा इंका बदे तप्‍पु हिलुवा जगाजगा मेर्सना कलिसिया कीसि, ओना दग्‍गेरा निल्‍हाकुंतोर. 
अल्‍हेने मुय्दुर्कगुडा ओर ओरा मेंदुल्तुन बल्हा पावरम कींतुर, अल्हेन ओर ओरा मुत्‍तोह्‍कुन पावरम कियगोम. सतता मुत्‍तोन पावरम कियानोर, सतातुनगुडा पावरम कींतोर. 
बोरे मनकल बस्‍केने ओना सतता मेंदुल्तुन हय्साकोंटा मनाहिल्‍लोर. दान्क बदुल ओर दान बेस ऊळगेम कींतोर. अल्हेन कलिसियातोर मनम अंटोरम किरिस्‍तुना मेंदुल्ता वेरे-वेरे बागाल्क आंदुम. अदुनहाटीं किरिस्‍तु ओना कलिसियातुन बेस हूळकुंतोर. 
इदुना बारेमते दर्मसास्‍त्रमतेगुडा, “इदुनहाटींगे वरोर मांड्‍सा ओना तल्‍लुर-बाबोन होळसि, ओना मुत्‍तोनतोनि कलियसि मनांतोर, ओर इव्वुर उंदे मेंदुल आसि पिस्संतुर,” इंचि रासि मंता. 
इद अय्ते उंदि पेद्‍दा मर्मम आंद. अयना नना अय्ते किरिस्‍तु आनि कलिसियाता बारेमते वेहचंतन. 
बल्हैना बेसे! मीवाव्टेटाल हरेक मांड्‍सा, मीवद मिमेट सतातुन बच्‍चोन पावरम कींतिरो, अचोने मीवा मुत्‍तोनगुडा पावरम कीम्‍टु. अल्‍हेने मुत्‍तोगुडा मुय्दोना कदर कियगोम. 
