﻿2 कुरेंति.
6.
मोमोट पेनतोनि कलियसि कबळ कियानोर्कुम आताहाटीं मीक विनंति कीसेक मंतोम, मीक दोर्कता पेनदा कुर्पातुन एर्तम आया हियमटु. 
बारित्‍ते पेनदा दर्मसास्‍त्रमते, “बेसता वेलाते नना नीवा पोल्‍ले केंजतन, मुक्‍तिता रोजुने नना नीकु सहाय्यम कीतन,” इंचि रासि मंता. हुळाट, बेसता वेला इदे आंद, इदे मुक्‍तिता रोजु आंदु. 
मावा सेवाते बतले तप्पु जर्गामन्‍नि इंचि, बदे पोल्‍लेते इंकावरोंक अड्‍डम ताकोम. 
गानि अन्‍नि पोल्‍लेने मोमोट पेनदा बेसता सेवाकुल्‍कुम आंदुम इंचि हुपिच्‍चेक मंतोम. ओप्‍केते, बादाने, कस्‍टाल्‍कुने, तकलिपकुने, 
देब्बां तिनमळते, जेलते होनमळते, मावा विरोदमते लोल्‍लिं आयमळते, कस्‍टम कियमळते, निद्र हायमळते, उपासमते, 
पवित्र मनमळते, तेल्‍विते, ओर्सकुनमळते, दयाते, पवित्र आत्माते, कपटम इर्राका पावरम कियमळते, 
सत्‍तेम पोल्‍लेते, पेनदा ताकतते, नीतिता आयदार्क तिना कय्‍दे, रोड्‍डा कय्‍दे पीसि, 
इंकावरोर माकुन कदर हिय्‍यिना-हिय्याकोन्‍ना, बेसतोर इन्‍निना-इन्‍नाकोन्‍ना, माकुन नळेह कियानोर इंचि इंतुर गानि मोमोट सत्‍तेमतोर्कुम आंदुम. 
एरपाट कियवोरालेसीं मनना, अंटोर एरपाट कींतुर. हायानोरालेसीं मनना, जीवाते मंतोम. माकु सिक्‍सा हियाना गानि मोमोट हाया हिल्‍लोम. 
मोमोट दुक्‍कमतेगुडा बस्‍केळ्‍क आनंदमते मनंतोम, मोमोट गरिब मनिनागानि वेल्‍लेटोर्कुन पेनदा लोप्पो सिरमंतुल्‍क कींतोम. महगा बतल हिलाकोन्‍ना गानि अन्‍नि मत्‍तापे मंतोम. 
कुरेंति सहरतोरिटा! मोमोट अन्‍नि पोल्‍लें मीक कुल्‍लम-कुल्‍ला वेहतोम, मीहाटीं मावा मनसु कुल्‍ला मंता. 
मोमोट मीकुन लक्‍कु इरसेक हिल्‍लोम, गानि मिमेटे मावा दग्‍गेरा वायालय हूळसेक हिल्‍लिर. 
मोमोट कीतापे मिमेटगुडा मीवा मनसुन कुल्‍ला कीम्‍टु. इद नना मीकुन नावा पिलाल्क इंचि वेहासेक मंतन. 
विस्वासम कियवोरतोनि मिमेट जोडि आयमटु. बारित्‍ते नीतितद आनि नीति हिल्‍वद इव बल्हा कलिया परांतां? वेल्‍गु आनि हीकट बल्हा दंटा आया पर्रंता? आया पर्रों. 
किरिस्‍तु आनि देय्यम उंदि बल्हा आया परांतुर? विस्वासिंक अविस्वासिनतोनि बता पोत्‍तु? 
बोम्मांक, पेनदा गुळिकु बाता संबंदम? बारित्‍ते मनम अय्ते जीवाते मनना पेनदा गुळि आंदुम. पेनदा दर्मसास्‍त्रमते, “नना ओरा लोप्पो मनंतन, ओरतोनि तिरियंतन, नना ओरा पेन आसि मनंतन, ओर नावा लोकुल्‍क आयानुर,” इंचि रासि मंता. 
पेन इल्‍हागुडा इंता गदा, “विस्वासम कियवोरागटाल पेय्‍सट, अलग आम्टु, सापसुतरा हिल्वा वस्‍तुकुन इटमट, अस्‍के नना मीकुन ओप्‍कुंतन. 
नना मीवा बाबान आकन, मिमेट नावा मर्क-मियाह्क आकिट इल्‍हा पेद्‍दा सक्‍तिमंतुड पेन इंता,” इंचिगुडा रासि मंता. 
