﻿2 कुरेंति.
5.
बूमिपोर्रो मंदना लोतालेसीं मावा मेंदुल मंता. अद लोन नासडेम आतस्के माकु मनालय स्वर्गमते लोन मंता, अद बस्‍केळ्‍क मंदना लोन मनकल तयार कीतद आयो, गानि पेने कीता इंचि माकु एरपाटे मंता. 
इंदकेटा लोतसोंटा मेंदुल्ते मोमोट नेर्बळतोम, अदुनहाटीं स्वर्गमता लोतुन केर्रानाहाटीं वेल्‍ले तनलाळंतोम. 
बारित्‍ते इदुन केर्तस्‍के मोमोट कुळकें दिस्‍सोम. 
मोमोट इद बूमिपोर्रोटा मेंदुल्ते मत्‍तच्‍चोरजेम बर्वुने तन्‍लाळसेक मनंतोम, इद मेंदुल्तुन होळ्‍सीयगोम इंचि आयो, गानि हायना मेंदुल बस्‍केळ्‍क पिस्‍साना मेंदुल्ते मारियागोम इंचि मोमोट कोरसेक मंतोम. 
इदे मेंदुलताहाटीं पेन माकुन तयार कीता. इद गेरांटि इंचि मावा लोप्पो पवित्र आत्मातुन हीता. 
अदुनहाटीं बस्‍केळ्‍क दैरनेमते मनंतोम. मोमोट मेंदुल्ते मत्‍तच्‍चोरजेम सामिनगटाल लक्‍कु मंतोम इंचि माकु एरपाटे मंता. 
बारित्‍ते मोमोट हूळसि आयो गानि सामिनपोर्रो विस्वासम कीसि ताकंतोम. 
मोमोट दैरनेमते मनंतोम, मेंदुल्तुन होळसिसि सामिनतोनि मनमळे बेस इनकुंतोम. 
अदुनहाटीं मोमोट इद मेंदुल्ते मनना, मनाकोन्‍ना, सामिंक इस्‍टाम वाताप ताकमळे मावा उद्‍देसम. 
बारित्‍ते मनक अंटोर्क किरिस्‍तुना न्‍यायम कियाना राजगद्‍दे मुन्‍ने नित्‍ताना मंता. मनागटाल हरेक मनकंक मनम कीता बेसता कबाह्‍क आयि, कराब कबाह्‍क आयि अवुना हिसाबते इनाम हिलाकोंटे सिक्‍सा दोर्कंता. 
पेनदुक वेरियसि बल्हा पिस्सना इद माक तेळियंता, अदुनहाटीं इदुन मोमोट लोकुल्‍कुंक वेहांतोम. मोमोट बसंटोरम इंचि मावा बारेमते पेनदुक पूरा एरपाटे. इव पोल्‍लें मीवा मनसुना लोप्‍पोगुडा एरपाट आता इंचि नावा आसे मंता. 
मोमोट बेसतोर्कुम इंचि मर्रा मी मुन्‍ने वेहकुंचेके हिल्‍लोम, गानि इच्‍चुर लोकुल्‍क मनसुने मत्‍ता पोल्‍लें आयाका पलाताल दिस्‍साना पोल्‍लेना बारेमते पेद्‍दिरकेम कींतुर, ओराहाटीं मावा बारेमते वेहालय मीक जवाब गावाले इंचि वेहासेक मंतोम. 
माकुन गिंटा बोरन्‍ना पिस्‍सालोर इंचि इत्‍ते, पेनदाहाटींगे आतोम. बोरन्‍नागिंटा माकुन बेसता बुद्‍दितोर इंचि इत्‍ते मीवाहाटींगे आतोम. 
किरिस्‍तु अंटोराहाटीं हातोर इंचि मोमोट विस्वासम कींतोम. इंका मावा अंटोरा पळाना पिस्वरगुडा हाता इंचि विस्वासम कींतोम. अदुनहाटीं किरिस्‍तुना पावरम माकुन ओप्‍केते इरसेक मंता. 
अद बल्हा इत्‍ते, इंदकेटाल पूना पिस्वर पिसानोर ओर सतताहाटीं आयो गानि ओराहाटीं बोर अय्ते हासि जीवाते तेदतोर ओनाहाटीं पिसागोम, अदुनहाटींगे ओर अंटोराहाटीं हातोर. 
अदुनहाटीं इंदके मोमोट मनकना विचारम मत्‍ताप हूळना आयो. मोमोट किरिस्‍तुनगुडा मनकना विचारम मत्‍ताप हूळसि मत्‍तोम, गानि इंदके ओन अलग नदरते हूळांतोम. 
बल्हा इत्‍ते, इंदके बोर अय्ते किरिस्‍तुने मंतोर, ओर पूना मनकल आतोर. पळाना पिस्वर होत्‍ता, पूना पिस्वर सुरुव आता. 
इवन्‍नि पोल्‍लें पेनदाहेंदाले मंतां. पेने मनाकुन किरिस्‍तुनाहेंदाल दानतोनि कल्‍पिसि माकु कल्‍पना सेवा अप्पजेपता. 
अद बल्हा इत्‍ते, लोकुल्‍कुना पापाल्क लेक्‍का पिय्याकेन, ओर्कुन किरिस्‍तुना हामुरताहेंदाल दानतोनि कल्‍पता. इल्‍हा कल्‍पना पोल्‍लेतुन लोकुल्‍कुनगा ओयालय माकुन निल्‍हाता. 
अदुनहाटीं मोमोट किरिस्‍तुना राजदूतकुम आंदुम. मावाहेंदाल पेन मीक वेहासेक मंता इनकुंटु. मिमेट पेनतोनि कलियसि मंदना इंचि किरिस्‍तुनाहेंदाल मोमोट मीक विनंति कीसेक मंतोम. 
मनम किरिस्‍तुनाहेंदाल पेनदा लोप्पो नीतिमंतुल्क आयागोम इंचि मना बदलाते मना पापाल्कुनाहाटीं पापम कियवा किरिस्‍तु मोक्‍कु आतोर. 
