﻿1 कुरेंति.
10.
विस्वासुल्‍कुनिटा! इद पोल्‍ले मीक तेळियका मनमळ नाक इस्‍टम हिल्‍ले. अद बतल इत्‍ते, मना एनकटा तादो-बाबुर अंटोर मब्बु तेर्पेता हिळु मंचि समुद्रमता नड्‍डुमताल ताकतुर. 
इल्‍हा ओर मब्बु तेर्पे हिळु, समुद्रमता नड्‍डुम मत्‍ताहेंदाल ओर अंटोर मूसाना बापतिस्मा एततालेसीं आता 
ओर अंटोर उंदे आत्माता गाटो तित्‍तुर, उंदे आत्माता एर उट्‍टुर. पेन ओर्क बंडाताल एर हीता. अद बंडा इत्‍तेने किरिस्‍तु आंदुर, ओरे ओरतोनि ताकुंदुर. 
गानि पेन ओरव्टेटाल वेल्‍लेटुर लोकुल्‍कुनपोर्रो कूस मनाहिल्‍ले. अदुनहाटीं ओर अदे बय्‍लि जेगाते हातुर. 
बल्हा अय्ते मना तादो-बाबुर पेनदुक इस्‍टम हिल्वा पोल्‍लेने ताकतुर, अल्हा मनम ताका मनि इंचि इव पोल्‍लें मनाकु उदाहरनलेसीं वेहंतां. 
ओरागटाल इच्‍चुर बोम्मां कीसि मोळ्‍कतुर, अल्हा मिमेट बोम्मांक मोळ्‍काना आयो. ओरा बारेमते, “लोकुल्‍क तिनालय, उनालय उदतुर आनि तेदसि एगरालय दल्‍गतुर,” इंचि दर्मसास्‍त्रमते रासि मंता. 
ओरागटाल इच्‍चुर बोगमतनम कियुंदुर. अदुनहाटीं ओराव्टेटाल उंदे रोजते इरवै मूड वेय्‍कुना मंदितुन हव्‍कमळ जर्गता. मनम ओरालेसीं बोगमतनम कियामन्‍नि. 
ओरागटाल इच्‍चुर पेनदा पट्‍टु हूळुंदुर, ओर तरासकु कस्‍किसि हातुर. मनम ओरालेसीं किरिस्‍तुना पट्‍टु हूळा मन्‍नि. 
ओरागटाल इच्‍चुर गुल्‍गुंदुर, नासडेम कियाना दूता हेंदाल ओर नासडेम आतुर. ओरालेसीं मिमेट गुल्‍गमट. 
मना तादो-बाबुर्क जर्गता पोल्‍लें उंदि उदाहरनलेसीं मंचि, मनम आकिर युगमते एवताहाटीं मनाकु तेळियागोम इंचि रासमळ जर्गता. 
बोर अय्ते नना विस्वासमते गट्‍टिगा नित्‍तिसि मंतन इंचि विचारम कींतोरो, ओर विस्वासमताल अर्रामन्‍नि इंचि कापाळकुनना. 
अंटोर्क वायानसोंटवे परिक्‍सां मीक वातां, दानकन्‍ना एक्‍को परिक्‍सां मीक वाया हिल्‍लें. गानि पेन विस्वासमगल्‍लद आंद. अद मीतोनि आया परवसोंटा एक्‍को परिक्‍साने अर्रा हिय्यो, परिक्‍सां वाते मिमेट सहन कियागोम इंचि अव्टेटाल पेय्‍सना हर्रिगुडा पेन कींता. 
अदुनहाटीं नावा पावरमगल्‍ला विस्वासुल्‍कुनिटा! बोम्मना पूजेनाल लक्‍कु मंटु. 
मिमेट बुद्‍दिमंतुल्कु आंदिर इंचि नना वेहसेक मंतन. नना वेहाना पोल्‍लेन मिमेट कुद निरनायम एतट. 
मनम दन्यवाद कीसि, उंदे गिलासते अंगुर पानकम उट्‍टस्के, किरिस्‍तुना नेत्‍तुर मना अंटोराहाटीं हीतोर इंचि हुपिच्‍चेक मंतोम. मनम उंदे हारितुन तुकडां कीसि तित्‍तस्के किरिस्‍तुना मेंदुल मना अंटोराहाटीं हीतोर इंचि हुपिच्‍चेक मंतोम. 
मनम अंटोरम उंदे हारिता तुकडां तित्‍ताहाटीं, मनम वेल्‍लेटुर मंचिगुडा उंदे मेंदुललेसीं मंतोम. 
इस्राएल लोकुल्‍कुनहेके हुळाट! गद्‍देपोर्रो मोक्‍कु हीतवुन तित्‍तस्के, गद्‍देपोर्रोटा मोक्‍कु मावा अंटोराहाटीं इंचि हुपिच्‍चेक मंतुर. 
नना बतल वेहसेक इत्‍ते, बोम्मांक मोळ्कता गाटोक बतल हिल्‍ले, बोम्मन लोप्‍पोगुडा बतल हिल्‍ले. 
इच्‍चोरे गदा, बोम्मांक मोळ्‍कानोर, देय्याल्‍कुंक मोळ्कसेक गानि पेनदुक आयो. अदुनहाटीं मिमेट देय्याल्कुनतोनि पोत्‍तु आयमळ नाक इस्‍टम हिल्‍ले. 
मिमेट सामिना गिलासतद आनि देय्यमता गिलासतद इल्‍हा रोंडुनद उन्‍ना पर्रिर, अल्‍हेने सामिना उपारम आनि देय्यमता उपारम रोंडुने पोत्‍तु आया पर्रिर. 
इल्‍हा कीसि मनम सामिंक होंग वायानाल कींतोम. मनम पेनदुकन्‍ना बलवंतुल्कुमा? आयोम. 
अन्‍नि मनाहाटीं बेसे आंदुं, गानि अन्‍नि कबळतव आयों. अन्‍नि मनाहाटीं बेसे आंदुं, गानि अन्‍नि बक्‍तिते एद्गनाहाटीं बेस आयों. 
बोरे आयिर ओना पायदातुने हूळा मनि, इंकावरोना पायदातुनगुडा हूळना. 
हाटुमताल बवन्‍ना हव्‍विं अस्सि तिनावच्‍चु. तिनकना, तिना मन्‍निआ इंचेके मीवा मनसुन सवाल कियमट. 
बारित्‍ते, “बूमि, बूमि पोर्रोटव अन्‍नि सामिनवे आंदुं” इंचि दर्मसास्‍त्रमते रासि मंता. 
बोरन्‍ना विस्वासम कियवोर मीकुन गाटोक केयानय्ते, मीक होनना मनसु आते, होंट. अगा होत्‍ता पजा, बतलय्ते मीक तिनालय हींतोर अदुन मनसुने बतले सवाल कियाका तिंटु. 
गानि मीकुन बोरन्‍ना, “इद बोम्मनगा मोळ्कतद आंद,” इंचि इनानय्ते, वेहतोनाहाटीं आनि बेस बुद्‍दिताहाटीं तिनमट. 
इत्‍ते, “बेस बुद्‍दि” मीवद आयो गानि मुन्‍नेटोना बेस बुद्‍दिता बारेमते इंचेके मंतन. मीवाहाटीं इंकावरोन बारि वेहा हिय्यना. 
नना दन्यवाद कीसि गाटो तिंतन अय्ते, दन्यवाद कीताहाटीं बदनाम बारि आयाना? 
अदुनहाटीं मिमेट उनमळ, तिनमळ बतल कियाना गानि पेनदा महिमाताहाटींगे कियाना. 
यहुदि लोकुल्‍कुंक, युनानि लोकुल्‍कुंक आनि कलिसियातोर्कुंक अड्‍डम आयाना लायक मनमट. 
ननागुडा ओर पिसागोम इंचि, नावा पाय्दा हूळाका, वेल्‍लेटुर लोकुल्‍कुना पाय्दाताहाटीं, अन्‍नि पोल्‍लेने अंटोर्कुन कूस इरंतन. बारित्‍ते ओर्क मुक्‍ति दोर्कगोम. 
