﻿कुरेंति विस्वासुल्कुंक पौलुसना मोदाटा सिट्‍टि.
1.
नना पौलुसुन, किरिस्‍तु येसुना प्रेरित आयालय पेन नाकुन दाना मनसुनाल केयता. नावा आनि सोस्‍तिनेस दादानाहेंदाल जोहर. 
कुरेंति सहरते मनानोर किरिस्‍तु येसुनलोप्‍पो पवित्र आता पेनदा कलिसियातोर्कुंक, आनि वेरे-वेरे जेगाने मना सामि इत्‍ते, ओरा आनि मना येसु किरिस्‍तुना पोरोलते आरादना कियाना अंटोर बक्‍तुल्कुंक रासता सिट्‍टि, 
मना पेनबाबाल आनि सामि येसु किरिस्‍तुनाहेंदाल कुर्पा, सांति दोर्कसेक मन्‍निकांटी. 
किरिस्‍तु येसुनलोप्‍पो मीक पेन हीता कुर्पाताहाटीं, नना पेनदुन बस्‍केळ्‍क दन्यवाद कींतन. 
किरिस्‍तुना गवाइ मीलोप्‍पो गट्‍टिगा मत्‍ता इंचि, मिमेट अन्‍नि तीरुकुने वळ्कुमळते आनि बुद्‍दिते निंडिस होत्‍तिर. 
अदुनहाटीं मिमेट पेनदा बद्‍दे आत्माता वरमते तक्‍को हिल्‍लिर, मिमेट मना सामि येसु किरिस्‍तु मर्रा वायानद एदुर हूळसेक मंतिर. 
सामि येसु किरिस्‍तु मर्रा वायाना रोजुने मिमेट दोसेम हिलाकोंटा मंदना इंचि पेन मीकुन आकिरदाका गट्‍टिगा इर्रंता. 
पेन विस्वासम लायकतद आंद. अद दाना मर्रि मना सामि येसु किरिस्‍तुनतोनि कूळसि मनालय मीकुन केयता. 
विस्वासुल्‍कुनिटा! मीलोप्‍पो जगडाल्‍क आसेक मंतां इंचि क्‍लोयेना लोतोर नाक वेहतुर. अदुनहाटीं मिमेट अंटोर उंदे पोल्‍लेते ताकाटु, मीलोप्‍पो वरोनद-वरोंक अर्राकोंटा मनमट, गानि मिमेट उंदे मनसुने, उंदे विचारमते कलियसि मंटु इंचि नना मीक मना सामि येसु किरिस्‍तुना पोरोलते विनंति कीसेक मंतन. 
नना वेहना पोल्‍ले इदे गदा, मीवव्टेटाल वरोर, “नना पौलुसनोन आंदुन,” इंकावरोर, “नना अप्‍पुलोसनोन आंदुन,” इंकावरोर, “नना केपानोन आंदुन,” इंकावरोर, “नना किरिस्‍तुनोन आंदुन,” इंचि इंतिर. 
बतल, किरिस्‍तुन तूसुक कीतिरा? पौलुस क्रुसुनपोर्रो मीवाहाटीं जीवा हीतोरा? हिलाकोंटे पौलुसुना पोरोलते मिमेट बापतिस्मा एततिरा? 
नना मिहागटाल क्रिसपुसुंक आनि गयुसुंके बापतिस्मा हीतन, बेस आता ओर्क आयाका बोनके हिया हिल्‍लेन, पेनदुक दन्यवाद कींतन. 
हिलाकोंटे नावा पोरोलतेन बापतिस्मा एततिर इंचि बोरन्‍ना इंचि मन्‍नेर. 
नना स्‍टिपनसना लोतोर्कगुडा बापतिस्मा हीतन, ईर आयाका इंका बोर्कन्‍ना नना हीतना, नाक एर्का हिल्‍ले. 
बारित्‍ते किरिस्‍तु नाकुन बापतिस्मा हियालय लोहा हिल्‍लोर, गानि बेसता कबुरतुन वेहालय लोहतोर. अदगुडा मनकना बुद्‍दि मत्‍ताप आयो, अल्हा वेहानय्ते किरिस्‍तु क्रुसुनपोर्रो हाता ताकततद अर्तम मन्‍नो. 
क्रुसता पोल्‍ले वेहमळ इत्‍ते नासडेम आयानोराहाटीं मुर्कतनम आंदु, गानि पेन मनाकुन पिसागोटता, अदुनहाटीं पेनदा पोल्‍ले मनाकु बलम आंदु. 
इदुना बारेमते, दर्मसास्‍त्रमते इल्‍हा रासि मंता, “तेल्विगल्‍लोर्कुना तेल्‍वितुन नासडेम कींतन, उसारगल्‍लोर्कुना उसारतनमतुन पास्कंतन.” 
अय्ते, बगा मंतोर तेल्विगल्‍लोड? बगा मंतुर दर्मसास्‍त्रम कराहना गुरुल्क? ई दुनियाता वाद-विवाद कियानोर बगा मंतुर? इद दुनियातोरा तेल्वि पेनदा मुन्‍ने मुर्कतनम आंद. 
बारित्‍ते, पेनदा तेल्‍वितुन, दुनियाता लोकुल्‍क ओरा सतता तेल्‍विते पेनदुन एरपाट किया हिल्‍लुर. मोमोट बदाय्ते मुर्कतनमता कबुर वेहंतोमो, अदुना हेंदाल विस्वासम कीतोर्क मुक्‍ति दोर्कना, इदे पेनदुक बेस अनपिच्‍चंता. 
बारित्‍ते यहुदिल्क अय्ते चिन्‍हां गावाले इंतुर, युनानि लोकुल्‍क बारे तेल्वि पहकंतुर. 
गानि मोमोट अय्ते क्रुसुनपोर्रो हाता किरिस्‍तुना पोल्‍लें वेहंतोम. इद यहुदिल्कुंक विस्वासम किया परवसोंटा पोल्‍ले आंद. आनि यहुदि आयवोर्कुंक मुर्कतनमतसोंटा पोल्‍ले आंद. 
गानि पेन बोर्कुन अय्ते केयता, ओर यहुदिल्क आयिर, युनानिर आयिर, ओराहाटीं पेनदा ताकत, पेनदा तेल्वि किरिस्‍तु आंदुर. 
बारित्‍ते पेनदा मुर्कतनम इत्‍ते, मनकालोर्कुना तेल्विकन्‍ना वेल्‍ले तेल्वितद आंद, पेनदा ताकत कमजोर इत्‍ते, मनकालोर्कुंकन्‍ना वेल्‍ले बलमतद आंद. 
विस्वासुल्‍कुनिटा! विचारम कीम्‍टु, दुनियाता लेक्‍काते मिमेट तेल्वितोर आयिर, एक्‍को बलमतोर आयिर, पेद्‍दा लोतोर आयिर, अय्नागानि पेन मीकुन केयता. 
बुद्‍दि मत्‍तोर्कुंक सिग्गु वायालय दुनियाते बुद्‍दि हिल्वोर्कुन पेन पेरता. बलमता मनकालोर्कुंक सिग्गु वायालय, दुनियाते बलम हिल्वोर्कुन पेन पेरता. 
पेनदा मुन्‍ने बोरे मनकल पेद्‍दिर्केम कियामन्‍नि इंचि दुनियाते बतले हिल्वोर्कुन, हय्सवोर्कुन, बतले कबळ्‍क ओज्जुवोर्कुन, पेन पेरता. 
पेनदाहेंदाले येसु किरिस्‍तुनलोप्‍पो मीवा पिस्वर मंता, किरिस्‍तुनाहेंदाल मनाकु तेल्वि, नीति, पवित्र आतोम आनि पापमता सिक्‍साताल पिसतोम. 
अदुनहाटीं, “पेद्‍दिरकेम कियानोर बोरे आयिर, सामि ओनाहाटीं बतलय्ते कीतोरो, अव्टे ओर पेद्‍दिर्केम कियागोम,” इंचि दर्मसास्‍त्रमते रासि मंता. 
