﻿रोम.
15.
अदुनहाटीं, विस्वासमते गट्‍टिगा मत्‍तोरम मनम सिराप मनाकु सुकम हियना कबाह्के कियाकोंटा विस्वासमते कमजोर मत्‍तोर्कुना कबाह्‍कुन हूळसि ओप्के पीसि मंदगोम. 
मना दंटातोर्कुना बेसताहाटीं ओरा विस्वासम बेर्सना इंचि ओर्कुन कूस इर्रना लायक मनम मनमळ गावाले. 
किरिस्‍तु इद बूमिपोर्रो वातस्के ओनद ओरे कूस कीकुनालय वायाहिल्‍लोर. गानि, “पेनबाबा, नीकुन अपमानम कीतोरा अपमानम नाक आया पीता.” इंचि किरिस्‍तुना बारेमते दर्मसास्‍त्रमते रासि मत्‍ताप जर्गता. 
दर्मसास्‍त्रमते मुन्‍नेटाले रासि मत्‍तद उंदि-उंदि पोल्‍ले मनाकु कराहनाहाटींगे मंता. अदुन करियते मनम ओप्के पीसि दैरनेमते पिस्‍सा परांतोम इत्‍ता आसे दोर्कंता. 
अदुनहाटीं मिमेट येसु किरिस्‍तुना विचारम मत्‍ताप, अंटोर कूळसि मंदालय पेन मीकु दैरनेम, ओप्के हियिकांटीं. 
इल्‍हा मिमेट अंटोर उंदे मनसु, उंदे लेंग आसि मना सामि येसु किरिस्‍तुना पेनबाबन तल्‍सकुना परांतिर. 
किरिस्‍तु मीकुन बल्हा ओप्‍कुत्‍तोरो, अल्‍हेने मिमेटगुडा विस्वासमते कमजोर मत्‍तोर्कुन पेनदुक महिमा दोर्कना इंचि ओप्‍कुंटु. 
नना वेहानद बतल इत्‍ते, एनकटा यहुदि पेद्‍दाल्कुंक पेन पोल्‍ले हीसि मत्‍ता, अद पोल्‍ले निजम आयाना इंचि, कतना आतोरा लोप्पो किरिस्‍तु सेवक आसि वातोर. इद पोल्‍लेतुन मर्गमटु. 
अचोने आयाका यहुदि आयवोरगुडा पेन ओरापोर्रो कीता दयाताहाटीं दान तल्‍सकुनना इंचि किरिस्‍तु वातोर. बजन संहिताते इल्‍हा मंता: “नना यहुदि आयवोरतोनि कलियसि, नीकुन तल्‍सकुंतन.” 
इंका इल्‍हागुडा रासि मंता. “ए यहुदि आयवोरिटा, पेनदा लोकुल्‍कुनतोनि मिमेटगुडा कूस आम्टु.” 
मर्रा इल्‍हागुडा रासि मंता: “ए यहुदि आयवा लोकुरिटा, मिमेट सामिन तल्सकुंटु, पूरा देसेमतोर ओन तल्सकुंटु.” 
मर्रा यसायाहल रासतोर: “यिस्‍साना वंसंमताल वरोर पुट्‍टानुर, ओर अन्‍नि जातिनोरपोर्रो राज्येम कियानुर, इंका अंटोर ओनपोर्रो आसे इर्रनुर.” 
मिमेट विस्वासम कीताहाटीं, मीकु आसे हियना पेन अन्‍नि तीरकुना कुसि, सांति हियिकांटीं. इल्‍हा पवित्र आत्माता ताकतहेंदाल मीवा आसे बेरस्सेक होंदार. 
विस्वासुल्‍कुनिटा! मीलोप्‍पो वेल्‍ले बेसतनम आनि तेल्वि मंता. अदुनहाटीं मिमेट वरोंक-वरोर बुद्‍दि वेहकुना परांतिर इंचि नाक पुरागा बरोसा मंता. 
पेनदा कुर्पाहेंदाल यहुदि आयवोरा नड्‍डुम येसु किरिस्‍तुना सेवक आसि पेर्मनालेसीं बेसता कबुर वेहालय नाकु अदिकारम दोर्कता. अदुनहाटीं कोन्‍नि पोल्‍लें मीकु मति कीसि हियना इंचि मीकु दैरनेमते रासतन. ना मनसुने बतल मंता इत्‍ते, यहुदि आयवोर पवित्र आत्माहेंदाल पवित्र आयाना आनि पेन ओर्कुन ओप्कुननालायक कियना. 
येसु किरिस्‍तुना लोप्पो कलियसि मंचि, इल्‍हा पेनदा सेवा कीसेके इंचि नना वेल्‍लेन कुसिते मंतन. 
यहुदि आयवोर नना वेहता पोल्‍लेन केंजतुर, नना कीतव चिन्‍हां आनि इचंत्रमता कबाह्‍कुन हूळतुर. केंजसि, हूळसि ओर किरिस्‍तुनपोर्रो विस्वासम इरतुर. इल्‍हा नना पवित्र आत्माता बलमते येरुसलेम सहरताल इलुरिकुम एरिया एवनदाका किरिस्‍तुना बेसता कबुरतुन वेहतन. अदुनहाटीं किरिस्‍तुनाहेंदाल कीता पोल्‍लेंगें नना दैरनेमते वेहंतन. इवुंक तप्‍पा वेरे बवे पोल्‍लें वेहोन. 
किरिस्‍तुना पोरोल बगा अय्ते केंजा हिल्‍लुर अगा होंचि नना बेसता कबुर वेहना इंचि नावा मनसु तनलाळसेक मंता. गानि इंकावरोर दोहता पुनादिपोर्रो लोन दोहमळ इस्‍टम हिल्वाहेंका, इंकावरोर वेहता नाहकुने होंचि वेहमळ नाकु इस्‍टम हिल्‍ले. 
गानि दर्मसास्‍त्रमते इल्‍हा रासि मंता: “ओना बारेमते बेसता कबुर एरपाट हिल्वोर ओन हूळानुर. ओना बारेमते केंजवोर, ओर्क तेळियार.” 
इल्‍हा बेसता कबुर एववगा नना होनगोम इत्‍ता विचारमतेन मनुंदुन, अदुनहाटीं नना मिहगा वाया पराहिल्‍लेन. 
गानि इंदके, हींदा एरियाने येसु किरिस्‍तुना बेसता कबुर वेहना कबळतुन महतन, इगे बतल कबळ हिल्‍ले. अल्‍हेने वेल्‍लेने वर्सानाल मिहगा वांतन इंचि नावा जीवा तनलाळसेक मंता. 
अदुनहाटीं नना स्‍पेन देसेम होननेंके मिहगा वांतन इंचि आसे पळसंतन. मीवातोनि कोन्‍नि रोजकु मंचि नावा मनसु निंडता पजा नाकुन अगटाल मुन्‍नेटा पय्‍नेमताहाटीं सार्ला कीम्‍टु. 
गानि इंदके नना पेनदा लोकुल्‍कुंक सेवा कियालय येरुसलेम दांतन. 
बारित्‍ते मेसिडोनिया, अकाया एरियातोर विस्वासुल्‍क संदा वाटसि, येरुसलेम सहरते मत्‍ता पेनदा लोकुल्‍कुनाल बोर अय्ते गरिब मंतुरो ओर्क सहायम कियना इंचि विचारम कीसि नाक हीतुर. 
ओर इल्‍हा कीसि कूस मत्‍तुर, इल्‍हा कियमळे गावाले. बारित्‍ते यहुदि आयवोर्क पेनदा लोप्पो कलियालय आसिर्वाद दोर्कता, ओर यहुदि लोकुल्‍कुंक अव्‍सरम मत्‍तवुना सेवा कियमळ गावाले. 
अदुनहाटीं जमा कीता कोत्‍तन नना बेस ओसि ओर्क अप्‍पजेपंतन, पजा अगटाल होननेंके मीकु कलियसि स्‍पेन देसेम दांतन. 
नना मिहगा वातस्के मनम अंटोरम किरिस्‍तुना आसिर्वादते निंडांतोम इंचि नाकु एरपाटे. 
विस्वासुल्‍कुनिटा! मना येसु किरिस्‍तु सामिनाहेंदाल आनि पवित्र आत्माता पावरमहेंदाल मीकु बतल विनंति कीसेक इत्‍ते, यहुदिया एरियाते मनना अविस्वासि लोकुल्‍कुना कय्‍दाल नना पिस्सना आनि येरुसलेमते नना कियना सेवातुन पेनदा लोकुल्‍क ओप्कुनना, इंचि मिमेट नावाहाटीं उंदि मनसुने पेनदुक पारतना कीम्‍टु. 
मनम पारतना कीताप पेनदुक इस्‍टम मत्‍ते, नना मिहगा वासि कोन्‍नि रोजकु मीवातोनि कुसिते मनंतन. 
सांति हिय्यना पेन मीवा अंटोरतोनि मन्‍निकांटी. आमीन. 
