﻿रोम.
11.
अय्ते मरि, पेन दाना इस्राएल लोकुल्‍कुन होळसीता इत्‍तापा? हिल्‍ले. बारित्‍ते ननागुडा इस्राएल मनकने आंदुन. नना अब्राहामुना वंसंम आनि बेंजामिन गोत्रमतोन आंदुन. 
पेनदुक मोदोलताले तेळियसि मत्‍ता. दाना इस्राएल लोकुल्‍कुन अद होळसा हिल्‍ले. एलिया इनना पेनदा कबुरतोना बारेमते दर्मसास्‍त्रमते बतल रासि मंता मीकु तेळियोना? ओर इस्राएल लोकुल्‍कुनपोर्रो तप्पुक दोस्सेके इल्‍हा इत्‍तोर, “ए सामि, ई लोकुल्‍क अय्ते नीवा कबुरतोर्कुन हव्कतुर, नीकु मोक्‍कु हिय्यना गद्‍देनंता कूलाहतुर. नना वरोने पिस्सि मंतन. इंदके नाकुनगुडा हव्कालय हूळसंतुर,” इंचि इत्‍तोर. 
गानि पेन ओन्क बसोंटा जवाब हीता मीकु मति मंतना? “अल्हा इनकुनमा! बाला इनना पेनदुक बस्‍केने मोळ्‍कवसोंटा एडुं वेय्‍कुना मंदितुन नावाहाटीं नना वेरे कीसि इरतन,” इंचि पेन ओन्क वेहता. 
अल्‍हेने इंदकेगुडा पेनदा कुर्पाहेंदाल इच्‍चुर लोकुल्‍कुन दानाहाटीं वेरे कीसि इरता. 
ओरा बेसता कबाह्‍कुन हूळसि पेन ओर्कुन पेर्रा हिल्‍ले, गानि अद दाना कुर्पाहेंदाले ओर्कुन पेरता. ओक्‍कला अल्हा जर्गकोंटा मंचि मत्‍ते, दाना कुर्पा निजम कुर्पा मनाकोनवड. 
इल्‍हा इस्राएल लोकुल्‍क बदुन अय्ते मनसु तासि पह्कसेक मत्‍तुरो, अद ओर्क दोर्काहिल्‍ले. गानि पेन पेरकुत्‍तोर्कुंक मात्रम अद दोर्कता. कळमतोर बोर अय्ते मत्‍तुर, ओर पेनदा पोल्‍ले केंजाकोंटा ओरा मनसुन गळसु कीता. 
दर्मसास्‍त्रमतेगुडा इल्हेन रासि मंता: “पेन ओर्कुन निद्रा मत्‍ताते वाटसीता, कळ्‍क मंचिगुडा हिलवाप कीता. केव्क मंचिगुडा हिलवाप कीता, इदवेरदाकागुडा ओरा गति इल्हे मंता.” 
इदुना बारेमते दाविद राजालगुडा दर्मसास्‍त्रमते इल्‍हा इत्‍तोर, “ओर तिनुळ-उनुळ कियना वेलाते, उंदि गत्‍तरा वाताप ओर्क तकलिप वायि. तकलिप वासि ओर हिळु अर्रिर, ओरा पापाल्कुना सिक्‍सा ओरे बोगांचिर. 
ओरा कळ्‍कुंक हीकट वाताप आसि, निजम बतलो ओर्क दिसाकोंटा आयि. ओरा नडिं कस्‍टाल्‍कुना मोता कांजा पराका, बस्‍केळ्‍ताहाटीं गूनि आसि होन्‍निं,” इंचि इत्‍तोर. 
अय्ते नना इंकुंदि पोल्‍ले पूसकींतन. इस्राएल लोकुल्‍क पुरागा तेदा पराकोंटा हिळु अरतुरा? अर्रा हिल्‍लुर. गानि ओर पापम कीतुर इंचि ओर्क दोर्कना मुक्‍ति, यहुदि आयवोर्क दोर्कता. दीन हूळसि यहुदि लोकुल्‍कुना कळ्‍क पोत्‍तागोम इंचि पेन अल्हा कीता. 
यहुदि लोकुल्‍क किरिस्‍तुन हय्सका पापम कीतुर अय्ते दुनियाते मनना वेरे जातितोर्क पेन वेल्‍लेन आसिर्वाद हीता. यहुदि लोकुल्‍कुंक नुकसान आताहेंका यहुदि आयवोर्क पायदा आता. इल्‍हा यहुदि लोकुल्‍कुंक नुकसान आताहेंकेन अंटोर्क पायदा आता अय्ते, मिमेटे विचारम कीम्‍टु, ओक्‍कला ओरगिंटा किरिस्‍तुनहेके पुरागा तिरियानय्ते दुनियाते मनना वेरे जातितोर्क बच्‍चोन वेल्‍ले आसिर्वाद दोर्कार! 
इंदके यहुदि आयवोरव्टेटाल मिमेट बोर अय्ते विस्वासमते वातिर, मीक वेहानद बतल इत्‍ते, पेन नाकुन प्रेरित इंचि मीवाहाटीं पेरता. अदुनहाटीं नना कियना सेवा बच्‍चोनो बेसतद इंचि वेल्‍लेन कूस मंतन. 
इल्‍हा कीतेनना मीकु आता पायदातुन हूळसि नावा यहुदि लोकुल्‍कुना कळ्‍क पोत्‍सि ओराव्टेटाल गिच्‍चचुरन्‍ना विस्वासमते वायानुर इंचि नावा आसे. 
अद बल्हा इत्‍ते, इस्राएल लोकुल्‍क पेनदाल लक्‍कु आताहेंका दुनियातोर पेनदुक दग्‍गेरा आतुर. इसोंटस्के इस्राएल लोकुल्‍कगुडा पेनदुक दग्‍गेरा आंतुर इनकुंट, अस्‍के इद पोल्‍ले वरोर हातोंक मर्रा जीवा अरतापे आयोना! 
ओक्‍कला अब्राहाम आनि एनकटा पेद्‍दाल्क पवित्रमातोर आते, ओरा पिलाल्कगुडा पवित्रमातोरे आंदुर. ओक्‍कला मराता हिह्कुगिंटा पवित्रमातव आते, मराता कोम्मांगुडा पवित्रमातवे आंदुं. 
यहुदिल्क इत्‍ते पेन पोस कीता जय्‍तुन मराता कोम्मनसंटोर आंदुर. मिमेट यहुदि आयवोर इत्‍ते केडाते पुटसि-बेर्सता जय्‍तुन मराता कोम्मनसंटोर आंदिर. पेन पोस कीता मराताल सगोम कोम्मन रेब्बिस पोहताप पेन दान नम्मुवा यहुदिल्कुन पोहचीता. पोहचि, केडाते पुट्‍सि-बेर्सता जय्‍तुन मराता कोम्मन तच्‍चि रेब्बिस पोहता कोम्मना जेगाते अंटा वाटताप मीकुन ओरव्टे कल्‍पता. अल्हासि पेन पोस कीता मराता हिह्कुनाल मीकु ताकत दोर्कसंता. 
बस्‍केळ्‍क आयि, हिह्कुनाले कोम्मांक ताकत दोर्कंता, कोम्मानाल हिह्कुंक आयो इदुन मति इर्रट. अदुनहाटीं “रेब्बिस पोहता कोम्मांकन्‍ना मोमोटे बेसतोरम” इंचि पोंगमट. 
इद केंजसि, “माकुन अंटा वाटालये कोम्मन रेब्बिस पोहता,” इंचि मिमेट इंदके इनकुंचंतिर बारे! 
मिमेट इनानद निजमे! गानि उंदि पोल्‍ले मति इर्रट, ओर पेन पोर्रो विस्वासम कियवाहेंका पेन ओर्कुन कोम्मन नर्किसि पोहताप पोह्‍चीता. मिमेट बारे किरिस्‍तुनपोर्रो विस्वासम कीतिर इंचि पेनतोनि कलियसि मंतिट. अदुनहाटीं वट्‍टिदे पोंगसेके तिरियाकोंटा पेनदुक वेरियसि मंटु. 
बारित्‍ते पेन सतागा पोस कीता मराता कोम्मनसोंटा यहुदिल्कुने रेब्बिस पोहता अय्ते, मिमेट अय्ते केडाते पुटसि-बेर्सता मराता कोम्मनसंटोर, विस्वासमते कमजोर आते मीकुन असले होळसो. 
नना वेहानद बेस केंजट. मिमेट पेनदा दयातुन, दाना होंगुन बेस एरपाट कीम्‍टु. बोर अय्ते विस्वासमताल पजोळ्क आतुर, ओरापोर्रो पेन होंग हुपिस्‍ता. गानि मिमेट विस्वासमते ताकसेकेन मंतिर इंचि मीवापोर्रो पेनदा दया मंता. हिलाकोंटे मीकुनगुडा कोम्मन नर्किसि पोहताप तेंडसि पोहंता. 
नर्किसि पोहता कोम्मनसोंटा यहुदि लोकुल्‍क ओक्‍कला मर्रा पेनदापोर्रो विस्वासम कीते, नर्किस पोहता कोम्मन मर्रा अंटा वाटताप पेन ओर्कुन मर्रा दानतोनि कल्‍पकुंता. बारित्‍ते पेन अल्हा किया परंता. 
मिमेट अय्ते केडाते पुटसि-बेर्सता जय्‍तुन मराता कोम्मनसंटोर आंदिर. यहुदिल्क बारे पेन पोस कीता जय्‍तुन मराता कोम्मनसंटोर आंदुर. अयना मीकुन पेन दाना लोकुल्‍कुने कल्‍पकुत्‍ता अय्ते, यहुदिल्क पेनदागा मर्रा मल्सि वायानय्ते अद ओर्कुन मर्रा अल्कगा कल्‍पकुना परंता. 
विस्वासुल्‍कुनिटा, “मोमोटे तेल्विगल्‍लोरम” इंचि मिमेट पोंगामन्‍नि. अदुनहाटीं इस्राएलतोरा बारेमता उंदि मर्मम मीकु वेहना इनकुत्‍तन. अद बतल इत्‍ते, पेनदा विचारम परकारम, यहुदि आयवोर बचटुर लोकुल्‍क अय्ते विस्वासमते वायनद मंता ओर अंटोर किरिस्‍तुनपोर्रो विस्वासम कियनदाका इस्राएलता इच्‍चुर लोकुल्‍क पेनदा पोल्‍ले केंजाकोंटा गळसु आसि मनानुर. 
गानि दाना पजा अंटोर इस्राएल लोकुल्‍कुन पेन पिसागोट्‍टार. इदुना बारेमते इल्‍हा रासि मंता: “पिसागोटनोर सियोनताल वायानुर, ओर याकोब वंसंमतोर्कुन तप्‍पुड हरदाल तिराहचि बेसता हर्दुक तरांतोर, 
नना ओरा पापाल्कुन मापि कीसि, ओरतोनि कीता करारतुन पूरा कींतन,” इंचि पेन इत्‍ता पोल्‍ले दर्मसास्‍त्रमते रासि मंता. 
वेल्‍लेटोर इस्राएल लोकुल्‍क किरिस्‍तुना बारेमता बेसता कबुरतुन नम्मुवाहेंका इंदके ओर्कुन पेन बेसता कबुरता पगातोर इंता. दीनहेंदाल मीकु मात्रम पायदा आता. गानि अब्राहाम, इसाक, याकोब ई एनकटा पेद्‍दाल्कुंक हीता पोल्‍ले परकारम यहुदिल्क इंदकेगुडा पेनदा पावरमगल्‍ला लोकुल्‍के आंदुर. 
बारित्‍ते वरम हियमळता बारेमते आयि, दग्गेर्क केयकुनना बारेमते आयि, पेन बस्‍केने पजोळ्क आयो. 
यहुदि आयवोर मिमेट, मुन्‍ने पेनदा पोल्‍ले केंजाकोंदिर. गानि इंदके यहुदिल्क पेनदा पोल्‍लेतुन केंजवाहेंका पेन मीकुन दग्‍गेरा कीसि मीवापोर्रो दया कीता. 
अल्‍हेने इंदके यहुदिल्क पेनदा पोल्‍ले केंजसेक हिल्‍लुर. अदुनहाटीं पेन मीवापोर्रो दया कीता. इदे कुर्पाहेंदाल उंदि रोजु ओरपोर्रोगुडा पेन दया कींता. 
बारित्‍ते, पेनदुक अंटोर लोकुल्‍कुनपोर्रो दया कियानद मंता. अदुनहाटीं पेन यहुदिल्कुन, यहुदि आयवोर्कुन अंटोर्कुन दाना पोल्‍ले केंजाकोंटा, गळसु कीसि इरता. 
ओहो, मावा पेनदा दनम, बुद्‍दि आनि तेल्वि बच्‍चोन पेद्‍देद आंद! अद बल्हा न्‍यायम कींता, बस्के कींता, इदुन बोरे एरपाट किया पर्रोर. दाना हर्रि बोर्के तेळियो. 
दर्मसास्‍त्रमते इल्‍हा रासि मंता: “पेनदा विचाराल्कुन बोर एरपाट किया परंतोर? पेनदुक बोरन्‍ना बुद्‍दि वेहा परांतोरा? 
हिलाकोंटे बोरन्‍ना पेनदुक बाकिक हीतोर मंतोरा, दान मर्रा तिरियसि तल्कालय? हिल्‍ले.” 
दुनियाते मनानव अन्‍नि पेनदागटाले वातां, अन्‍निन अदे पुटिस्ता, दुनियाते मनानव अन्‍नि दानाहाटींगे मंतां. युगा-युगाल्‍कुनदाका दानदे महिमा आयि, आमीन. 
