﻿प्रेरितुल्कुना कबाह्‍क.
27.
आयंका माकुन डोंगाते उद्‍दिस, इटलि एरियाते लोहाना निरनायम कीतुर. कीसि, पौलुसुनतोनि इच्‍चुर जेलने मत्‍तुर्कुन, अगस्तुस दलमता युलियुस पोरोलता दरोगाना कय्‍दे अप्पजेपतुर. 
अद्रमुतियुम सहरता डोंगाते मोमोट उदतोम, अद डोंगा आसिया एरियाता ओड्‍डु पीसि मत्‍ता नाहकुनाल पेय्सता. मेसिडोनिया एरियाता तेसलोनि सहरतोर अरिसतरकुसगुडा मावातोनि मत्‍तोर. 
इंकुंदि रोजु मोमोट सिदोन सहरतगा एवतोम. अगा एवतस्‍के युलियुस दरोगानकु पौलुसुनपोर्रो दया वाता. अदुनहाटीं पौलुसुना दंटागाह्‍क ओन अवरिचगोम इंचि, “निमे होंचि नीवा दंटागाह्‍कुंक कलियसि वा,” इंचि दरोगाल पौलुसुन इत्‍तोर. 
अगटाल मोमोट पेयसनहेके वळि माकु एदुर मत्‍ताहाटीं साइप्रस दीबेता वळि वायवा बाजुनाल पेय्‍सतोम. 
मर्रा मोमोट किलिकिया आनि पंपुलिया एरिया दग्‍गेटा समुद्रम दाटसि, लुकिया एरियाता मूरा इनना सहरतगा रेयतोम. 
अगा सिकंदरिया सहरताल इटलि एरियाक होनालय डोंगा तयार मत्‍ता. माकुन ओयना दरोगाल अद डोंगाते उपिस्तोर. 
वळि माक एदुर मत्‍ताहाटीं, मेल्‍लगा-मेल्‍लगा बच्‍चुंगो रोजकुनदाका वेल्‍ले कस्‍टमते कनिदुस सहरकु दग्‍गेरा एवतोम. एदुर वळि माकुन मुन्‍ने होना हियुवाहाटीं, मोमोट क्रेति दीबेता ओड्‍डु साटने, सलमोने इनना जेगा पक्‍का पीसि दाटतोम. 
अदुन दाटसि, समुद्रमता ओड्‍डुनाल वेल्‍ले तकलिपने डोंगातुन मुन्‍नेळ्‍क जर्पुसेके, डोंगा नित्‍तना बेसता जेगा, इनना जेगातगा एवतोम. अगटाल लसया सहर दग्गेरेने मत्‍ता. 
पय्‍नेमते वेल्‍ले रोजकु आसि ओक्‍कापोद्‍दुना रोजगुडा पेय्सि होत्‍ता. वातावरनम कराब मत्‍ताहाटीं डोंगातुन मुन्‍ने ओयालयगुडा वेर्रे मत्‍ता. अदुनहाटीं, 
“दादालोरिटा! मनम इगेटाल पेय्सते वेल्‍ले तकलिप आंता इंचि नाकु अनपिच्‍चेक मंता. डोंगा आनि अवुने मत्‍ता सामानय्ते मुळगारे गानि मना जीवां इंका होना परांतां,” इंचि पौलुस डोंगाते मत्‍तोर्कुन इत्‍तोर. 
गानि पौलुसना पोल्‍लेतुन दरोगाल केंजाका, डोंगा ताकिचनोर आनि डोंगा मालकुना पोल्‍लेतुन एक्‍को विस्वासम कीतोर. 
अद जेगा पीनि कालमते (इग्गमते) मनालय बेस मनाहिल्‍ले, अदुनहेंके वेल्‍लेटुर लोकुल्‍क, “बच्‍चोन बिराना आया परते अच्‍चोन बिराना क्रेति दीबेता पिनिक्‍स सहरतगा होंचि आगते बेस मनंता,” इंचि इत्‍तुर. बारित्‍ते पिनिक्‍स सहरतगा डोंगां आगना उंदि जेगा इल्‍हा मंता: दक्‍सिन-पस्‍चिम आनि उत्‍तर-पस्‍चिमता हेंदाल होळिया वांता. पीनि कालमते अद जेगाते वळि दल्‍गो. 
पजा दक्‍सिन बाजुनाल वळि मेल्‍लगा-मेल्‍लगा वासेके मत्‍तय्ते ओर इंदके मनम पिनिक्‍स सहरते एव्‍वा परांतोम इंचि इनकुत्‍तुर. अस्‍के ओर अगटाल लंगर तेहकुंचि क्रेति दीबेता ओड्‍डु साटने डोंगातुन होना हीतुर. 
गानि गळसेम मत्‍तारित्‍ते दीबेता हेंदाल उंदि पेद्‍दा वळि दुमारम तेदता. दानु उत्‍तर-पूर्वी तुपान इंतुर. 
मोमोट मत्‍ता डोंगा तुपान लोप्पो दोर्कता. आ तुपानता वळि एदुर मत्‍ताहाटीं डोंगा मुन्‍नेळ्‍क होना पराहिल्‍ले. अस्‍के मोमोट वळि दोब्बुतेके डोंगा होन्‍निकांटी इंचि दान अल्‍हेने होळसीतोम. 
अल्हा मोमोट कौदा इनना सिन्‍ना दीबे साटने होननेंके, डोंगाता पज्जो दोहचि इग्गिसि ओयना पडवन वेल्‍लेन तकलिपने डोंगापोर्रो एक्‍किस्तोम. 
पडवां पोर्रो एक्‍किसतारित्‍ते, डोंगाते कबळ कियानोर बच्‍चुंगो उपायाल्‍क कीसि डोंगातुन नोंडेने, सुट्‍टु इग्‍गिस दोहतुर. सुरतिस इनना उस्‍के जेगाते डोंगा दिगाबडार इंचि आ वेर्रेकु डोंगाता परदातुन रेह्‍चि, डोंगातुन वळिते होळसीतुर. 
अस्‍के इंकुंदि रोजु वळि दुमारमते पक्‍का तकलिप आताहेंके ओर माल पोहचियालय दल्‍गुतुर. 
मूडो रोजुने डोंगाता कबळ्‍क ओज्‍जना सामानगुडा ओरा कय्‍कुनेन पोहचीतुर. 
पजा वेल्‍लेने रोजकु माकु पोळ्‍दु, सुक्‍कां दिसा हिल्‍लें. तुपानते पक्‍का वळि वायुंदु, मोमोट पिस्‍सोम इंचि आसे होळसतोम. 
वेल्‍ले रोजकुनाल बोरे बतल तिना हिल्‍लुर. अस्‍के पौलुस ओरा नड्‍डुम नित्‍तिसि इल्‍हा इत्‍तोर. दादालोरिटा! नावा पोल्‍लें केंजसि क्रेति दीबेताल पेय्‍सका मंचि मत्‍ते, मनाकु ई तिप्‍पल वायाकोनवड, नुकसानगुडा आयाकोनवड. 
अल्हा आयिनागानि मीकु विनंति कींतन, मिमेट दैरनेम इर्राट. मीवा लोप्पोटाल बोनदे जीवा होन्‍नो गानि डोंगाता मात्रम नुकसान आंता. 
बारित्‍ते, बद अय्ते नावा पेन, नना अदे पेनदा सेवा कींतन दाना दूता निन्‍ने नर्का वासि, “पौलुस निमे वेरियमा, नीकु कैसर राजाना मुन्‍ने तप्‍पकोंटा नित्‍तना मंता, हूळा! नीतोनि डोंगाते मत्‍तुर अंटोर्कुनगुडा पेन पिसागोटंता,” इंचि इत्‍ता. 
अदुनहाटीं दादालोरिटा! दैरनेम इर्राट. पेन नाकु बल्हा वेहता अल्‍हेने आयार, इंचि नाकु विस्वासम मंता. 
गानि बल्हा अयना मनम बदन्‍ना दीबेतगा उस्केते होंचि हिरकंतोम, इंचि इत्‍तोर. 
पडनालुं रोजकु आयिना, मोमोट अद्रिया समुद्रमता एते हीके-हेके वळिक तिरियसेक मत्‍तोम. तिरियसेक मननेंके नळजाम नर्काटा वेलाकु मनम बदन्‍ना ओड्‍डुंक एवतोम बारे इत्‍ताप डोंगा ताकसानोर्कुंक अनपिस्ता. 
ओर समुद्रमता लोतु कहतुर अय्ते अगा नूटा इरवै पूटकु मत्‍ता. इंका इच्‍चुर लक्‍कु होत्‍ता पजा मर्रा कहतुर अय्ते अस्‍के टोंबै पूटकु मत्‍ता. 
अस्‍के, बंडाना लोप्पो डोंगा हिरकार बारे इंचि वेरियसि, ओर डोंगाता पज्‍जोटा बाजुंक नालुं लंगर्कु वाटसि बस्के पंगांता इंचि हूळसेक मत्‍तुर. 
डोंगा ताकसानोर्कु अगटाल वित्‍ताना मत्‍ताहाटीं, “डोंगाता मुन्‍नेटा बाजुंक लंगर्कु वाटंतोम,” इंचि बोंकिच्‍चि पडवां रेहतुर. 
अस्‍के पौलुस, “ईरगिंटा डोंगाते मनाकोंटे मिमेट इंका पीस्‍सिर,” इंचि सिपाइल्कुना अदिकारिन आनि सिपाइल्कुन इत्‍तोर. 
अस्‍के सिपाइल्क, पडवां दोहता नोंडेन नेमाहचि पडवन एते अरहतुर. 
पंगायना वेलाते पौलुस अंटोर्कुन गाटो तिननाहाटीं विनंति कीसि इल्‍हा इत्‍तोर, “तुपान मग्‍गंता इंचि मिमेट एदुर हूळ-हूळसि, इय्यळ्‍क पडनालुं रोजकु आसंता. उपासम मंतिर, बतले तिना हिल्‍लिर. 
अदुनहाटीं मिमेट गाटो तिंटु इंचि विनंति कीसेक मंतन. तित्‍तेने मिमेट जीवाते मनांतिर. मीवा लोप्पोटाल वरोनदगुडा तल्‍लाता उंदि केल्‍ददगुडा नुकसान आयो,” इंचि इत्‍तोर. 
अल्हा वेह्‍चि, अंटोरा मुन्‍ने ओर हारि पीतोर. पेनदुक दन्यवाद कीसि, हारितुन तुकडां कीसि तिनालय दल्‍गुतोर. 
ओन हूळसि, अंटोर्क हिम्मत वाता, ओरगुडा तिनालय दल्‍गतुर. 
डोंगाते मोमोट अंटोरम रोंडु नुहकुना डेब्बै हारुर (276) मंदि मत्‍तोम. 
ओर पीरनिंडा गाटो तित्‍तारित्‍ते, डोंगाते मत्‍तव गोह्कुन समुद्रमते पोहचि डोंगातुन अल्कगा कीतुर. 
पंगातारित्‍ते ओर्कु समुद्रमता ओड्‍डु दिसता, गानि अद बद देसेम इंचि एरपाट किया हिल्‍लुर. कुदुरते डोंगातुन इदे ओड्‍डुंक दल्‍गिच्‍चि इरकोम इंचि विचारम कीतुर. 
ओर लंगर्कुना नोंडें नेमाहचि, अवुन समुद्रमते होळसि, अस्‍केने पतवारकुंक दोहाचि मत्‍ता नोंडेंगुडा ओदोल कीतुर. ओदोल कीसि डोंगातुन वळि मुन्‍नेळ्‍क ओयि इंचि परदां एक्‍किचि डोंगातुन ओड्‍डुनहेके ओयालय दल्‍गुतुर. 
गानि बगा अय्ते रोंड समुद्राल्क कलियंतां, असोंटा जेगातगा डोंगा होत्‍ता. अगा डोंगाता मुन्‍नेटा बाजु उस्केकु दल्‍गिसि, मुन्‍नेळक जर्गाकोंटा दिगाबळता. पज्‍जोटा बाजु बारे जोरते वायाना तडां दल्‍गिसि डोंगा पय्यालय आता. 
अस्‍के कैदिल्कु बोरे ईतार्सि वित्‍ता मन्‍नि इंचि सिपाइल्क ओर्कुन हव्कना विचारम कीतुर. 
गानि दरोगांक पौलुसुन पीसागोटनद मत्‍ता, अदुनहाटीं ओरा पिलानतुन आपिसि ओर्कु इल्‍हा आदेस हीतोर, “बोर्क अय्ते ईता वांता, ओर मुन्‍नेने डेयसि ओड्‍डुंक पेयसट. 
कळमातोर बारे बल्‍लां आनि डोंगाता उरुंगता तुकडनपोर्रो उद्‍दिस पेयसट,” इंचि इत्‍तोर. इल्‍हा बोर्के बतल आयाकोंटा अंटोर ओड्‍डुंक पेय्‍सतुर. 
