﻿योहान रासता बेसता कबुर.
1.
बतले पुट्‍टका मुन्‍ने पोल्‍ले मत्‍ता. आ पोल्‍ले पेनतोनि मत्‍ता. आ पोल्‍ले पेन आंद. 
आ पोल्‍ले मुन्‍नेटाले पेनतोनि कलियसि मत्‍ता. 
दुनियाते मननव अन्‍निटवुन, पेन अदुनहेंदाले पुटिस्ता. अदुन होळसि बतले तयार आयाहिल्‍ले. 
अदुन लोप्पो पिस्वर मत्‍ता. आ पिस्वरे अंटोर लोकुल्‍कुनाहाटीं वेलगु आता. 
आ वेलगु हीकटते एल्‍गंता. हीकट वेल्‍गुन बस्‍केने गेल्सा परो. 
पेन वरोर कबुरतोन लोहता, ओन पोरोल योहान. 
आ वेलगुना बारेमते ओर गवाइ वेहतस्के ओना पोल्‍ले केंजसि, अंटोर लोकुल्‍क आ वेल्‍गुनपोर्रो विस्वासम कियना, इंचि ओर वेहालय वातोर. 
आ वेलगु योहान आयोर. गानि लोकुल्‍कुंक आ वेलगुना बारेमते गवाइ वेहालय योहान वातोर. 
हरेक मनकंक निजमाता वेलगु हियानोर, इद दुनियाते वासेक मत्‍तोर. 
ओर इद दुनियातेन मत्‍तोर. ओनाहेंदाले पेन ई दुनियातुन पुटिस्ता. गानि ई दुनिया ओन एरपाट किया हिल्‍ले. 
ओर ओना लोकुल्‍कुनेन वातोर, गानि कुद्‍दु ओना लोकुल्‍के ओन ओप्कुना हिल्‍लुर. 
गानि बोर अय्ते ओन ओप्‍कुंचि ओना पोरोल पोर्रो विस्वासम कीतुरो, ओर्क अंटोर्क पेनदा मर्क-मियाह्क आयना अदिकारम ओर हीतोर. 
पेनदा मर्क-मियाह्क आयमळ इत्‍ते मनकना पीटाल, मनकना इच्‍चा मत्‍ताप पुटमळ, मुय्दोना इच्‍चा मत्‍ताप पुटमळ आयो. गानि पेने ओर्कुन दाना संतानम कीकुंता. 
आ पोल्‍ले मनकना रूपमते मारियता. अद कुर्पा, सत्‍तेमतोनि पुरागा निंडिस मना नड्‍डुम जेगा आता. मोमोट महिमातुन हूळतोम. अद महिमा बाबाना वरोरे मर्रिना महिमालेसीं मत्‍ता. 
ओना बारेमते योहान, “नावा पज्जोटाल बोर अय्ते वायनद मत्‍तोर, ओर ईरे आंदुर. ओर नाकन्‍ना वेल्‍लेन मुन्‍नेटाल मत्‍तोर इंचि नाकन्‍ना ओर वेल्‍लेन पेद्‍दोड,” इल्‍हा लोकुल्‍कुंक लगांचि मोत्‍कुंचेके गवाइ वेहतोर. 
ओर अन्‍नि तीरकुने पुरागा मत्‍ताहेंका, ओनहेंदाल मनाकु अंटोर्क कुर्पाता आसिर्वाद पोर्रो आसिर्वाद दोर्कता. 
मूसाल इनानोनहेंदाल पेन मनाकु नियमाल्‍क हीता. गानि कुर्पा, सत्‍तेम मनाकु येसु किरिस्‍तुनाहेंदाल दोर्कता. 
पेनदुन बस्‍केने बोरे हूळा हिल्‍लुर. गानि पेनबाबाना संकाते मनना ओना वरोरे मर्रि, ओरे मनाकु ओन हुपिस्तोर. 
“निमे बोन आंदिन?” इंचि योहानुन पूसकियालय येरुसलेम सहरते मनना यहुदि पेद्‍दाल्क, इच्‍चुर पेर्मालोर्कुन आनि लेवि जातितोर्कुन, ओनगा लोहतस्के योहानुना गवाइ इल्‍हा मत्‍ता. 
अस्‍के, “नना किरिस्‍तुन आयोन,” इंचि योहान पोल्‍ले मक्‍साकोंटा कबुल कीतोर. 
अस्‍के पेर्मालोर्क आनि लेवि जातितोर, “अय्ते निमे एलियन आंदिना?” इंचि पूसकीतस्‍के, “नना एलियागुडा आयोन,” इंचि योहान इत्‍तोर. अस्‍के ओर, “हिलाकोंटे निमे पेनदा कबुरतोना?” इंचि इत्‍तस्के, “नना पेनदा कबुरतोनिंका आयोन,” इंचि योहान इत्‍तोर. 
पजा ओर लोकुल्‍क ओन मर्रा, “अय्ते मरि निमे बोन आंदिन? माकुन लोहतोर्कुंक मोमोट होंचि बतल वेहकोम? अदुनहाटीं नीवा बारेमते निमे बतल वेहकुंतिन, माकु वेहा,” इंचि पूसकीतुर. 
अस्‍के, यसायाह इनना पेनदा कबुरतोर मुन्‍ने वेहताप, “सामिनाहाटीं सवरटा हर्रि तयार कीम्‍टु, इंचि केडाते मोत्‍कुनानोना अल्किरतुन ननाने आंदुन,” इंचि योहान ओर्क वेहतोर. 
योहानुन पूसकियालय वाता परिसि लोकुल्‍क, “निमे किरिस्‍तुन आयिन, एलियन आयिन, पेनदा कबुरतोनगुडा आयिन. असोंटस्के निमे लोकुल्‍कुंक बारि बापतिस्मा हीसंतिन?” इंचि योहानुन पूसकीतुर. 
अस्‍के योहान, “नना अय्ते बापतिस्मा एततोनि हींतन. गानि इगे मीवा नड्‍डुम वरोर नित्‍तिसि मंतोर, ओन मात्रम मिमेट एरपाट किय्‍यिर. 
नावा पज्जोटाल वायानोना कादा हेरपुमता नोंडे लेहना विलुवागुडा नाकु हिल्‍ले,” इंचि योहान जवाब हीतोर. 
इवन्‍नि गटनां योर्दन बेरेटा हब्बेर, पोळ्‍द पेय्सनेंके मनना बेतानि इनना नाटे जर्गतां. अगा योहान बापतिस्मा हियुंदुर. 
इंकुंदि रोजु योहान, येसु ओनाहेके वायनद हूळसि, “अद हुळाट, दुनियातुन पापमता सिक्‍साताल तप्‍सानाहाटीं मोक्‍कु आयाना पेनदा गोर्रे पोरिनसंटोर! 
नना दीनकन्‍ना मुन्‍ने वेहचि मत्‍तन गदा, नावा पज्जोटाल वरोर वायाना मंतोर इंचि! अद ईना बारेमतेन आंद. ओर नाकन्‍ना वेल्‍लेन मुन्‍नेटाल मत्‍तोर, अदुनहाटीं ओर नाकन्‍ना पेद्‍दोड आंदुर. 
ओर बोर आंदुर कुद्‍दु नाके तेळियो. गानि इस्राएलता लोकुल्‍कुंक ओर दिसगोम, इंचि नना एततोनि बापतिस्मा हियालय वातन,” इंचि योहान इत्‍तोर. 
मर्रा योहान येसुना बारेमते इल्‍हा गवाइ वेहालय दल्‍गतोर, “नना कुद्‍दु ओन एरपाट कियाकोंदुन. गानि एततोनि बापतिस्मा हियालय नाकुन लोहता पेने नाकु वेहचि मत्‍ता, ‘पवित्र आत्मा पावरेम पिट्‍टे लेह्का आसि बोनपोर्रो अय्ते रेयनेंके निमे हूळंतिन, ओरे लोकुल्‍कुंक पवित्र आत्माते बापतिस्मा हियानोर आंदुर,’ इंचि. पवित्र आत्मा पावरेम पिट्‍टे लेह्का आसि स्वर्गमताल हिळु रेय्‍सि, ओनपोर्रो वासि उदतद नना हूळतन. 
इदंता नना नावा कळ्‍कुन निंडा हूळतन. अदुनहाटीं, ‘ईरे पेनदा मर्रि आंदुर,’ इंचि नना गवाइ हीसंतन,” इंचि योहान वेहतोर. 
इंकुंदि रोज योहान ओना सिस्युल्‍कुनाल इव्वुर सिस्युल्कुनतोनि नित्‍तिसि मत्‍तोर. 
अस्‍के येसु ओना दग्गेटाल होननद हूळसि, “हुळाट, पेनदा गोर्रे पोरि,” इंचि इत्‍तोर. 
योहान इत्‍ता पोल्‍ले केंजसि ओना इव्वुर सिस्युल्कु येसुना पज्जो होत्‍तुर. 
येसु पजोळ्क तिरियसि हूळतोर अस्‍के ओर इव्वुर ओना पज्जो वायनद हूळसि ओर्कुन, “मिमेट बतल पहकसंतिर?” इंचि पूसकीतोर. अस्‍के ओर, “रब्‍बी! निमे बगा मनांतिन?” इंचि इत्‍तुर. 
अस्‍के येसु ओर्कुन, “वट हूळकिर,” इत्‍तोर. ओर येसुनतोनि होंचि ओर मनना जेगातुन हूळतुर. हूळसि येसु मनना जेगातगा एवसि ओनतोनि अग्गेन मत्‍तुर. अस्‍के नुल्‍पेळतां नालुं एगसेक मत्‍ता. 
योहानुना पोल्‍ले केंजसि येसुना पज्जो होत्‍ता इव्वुर सिस्युल्‍कुनाल वरोन पोरोल अंदरियल. ई आंद्रेयल, सिमोन पत्रु इनानोना तम्मुर आंदुर. 
आंद्रेयल अगटाल सवरगा ओना दादल सिमोन पत्रुंक होंचि कलियतोर. कलियसि, “दादा मोमोट मेसय्यांक इत्‍ते किरिस्‍तुंक कलियतोम,” इंचि इत्‍तोर. 
पजा आंद्रेयल ओना दादल सिमोन पत्रुन येसुनगा पीसि वातोर. येसु सिमोनुन हूळसि, “निमे योहानुना मर्रि सिमोन आंदिन. गानि इंदकेटाल नीकुन केपा इत्‍ते पत्रु इंचि केयानुर,” इंचि इत्‍तोर. 
इंकुंदि रोज येसु गालिल राज्येमते होनना निरनायम एततोर. अस्‍के पिलिपुन कलियसि, “निमे ना पज्जो वा,” इंचि इत्‍तोर. 
पिलिप, अंदरियल आनि पत्रु ईर मुव्वुरगुडा बेतसेदा इनना सहरतोरे आंदुर. 
पजा पिलिप होंचि नतेनलुंक कलियतोर. कलियसि, “बोना बारेमते अय्ते मूसाल दर्मसास्‍त्रम रासतोर आनि पेनदा कबुरतोरगुडा रासतुर, ओर माकु दोर्कतोर. ओर नासरेत नाटेना योसेप इनानोना मर्रि येसु आंदुर,” इंचि वेहतोर. 
अस्‍के नतेनल, “अल्हाना! नासरेततालगुडा बेसता पोल्‍लें वाया परंतंगा?” इंचि इत्‍तोर. अस्‍के पिलिपु, “अय्ते निमेन वासि हूळा!” इंचि इत्‍तोर. 
येसु नतेनलुन ओनहेके वायनद हूळसि ओना बारेमते, “अद हुळाट, निजम इस्राएल मनकल. ओनालोप्‍पो बतले आबद्‍दम पोल्‍ले हिल्‍ले,” इंचि इत्‍तोर. 
अद केंजसि नतेनल, “नना बसंटोन, बसंटोन आयोन नीकु बल्हा एर्का?” इंचि येसुन पूसकीतोर. अस्‍के येसु, “पिलिप नीकुन केयाका मुन्‍ने, निमे अंजिर मर्रा हिळु मत्‍तिन. अस्‍केन नना नीकुन हूळतन,” इंचि इत्‍तोर. 
अस्‍के नतेनल, “रब्‍बी, निमे पेनदा मर्रिन आंदिन, इस्राएलता राजान आंदिन,” इंचि इत्‍तोर. 
अस्‍के येसु, “नना नीकुन अंजिर मर्रा हिळु मन्‍नेंकेन हूळतन इंचि वेहताहेंका नाकुन नम्मुसंतिना? इंका मुन्‍ने इदुंकन्‍ना पेद्‍दे-पेद्‍दे पोल्‍लें हूळकिन,” इंचि जवाब हीतोर. 
पजा, “हिके केंजट, नना निजम-निजम वेहासेक! स्वर्गम बैय्यरा आयानद हूळकिर, पेनदा दूतां मनकना रूपमते पुटतोना पोर्रो एक्‍कानदुन-रेयानदुन हूळकिर,” इंचि ओर्क वेहतोर. 
