﻿मत्‍तयाल.
7.
मिमेट वेरेतोरपोर्रो दोसेम दोसमट, अस्‍के मीपोर्रोगुडा पेन दोसेम दोस्‍सो. 
मिमेट बल्हा दोसेम दोस्‍संतिरो, अल्‍हेने मीपोर्रोगुडा पेन दोसेम दोस्‍संता. बद कोल्ताते मिमेट हींतिरो, अदे कोल्ताते मीकु हियमळ जर्गंता. 
अरे डोंगि मनका, नीवा कळ्‍दे अरता सित्‍कुन तेंडका, नीवा दंटातोना कळ्‍दे अरता बुस्सितुन निमे बारि तेंडा हूळंतिन? 
नीवा कळ्‍देन सित्‍कु अर्सि मननेंके, “नीवा कळ्‍दे अरता बुस्सितुन तेंडाहीम इंचि नीवा दंटातोन बल्हा इना पर्रांतिन?” 
मोदाला नीवा कळ्‍दा सित्‍कुन तेंडा. अस्‍के नीवा दंटातोना कळ्‍दा बुस्सितुन तेंडालय नीकु बेस दिस्‍सार. 
पवित्र वस्‍तुक नय्‍कुन मुन्‍ने वाटमट, पद्‍दिना मुन्‍ने मुच्‍च्याल्‍क पोच्‍चुमट. अल्हा कीते पद्‍दिं अवुन काल्कुने जारांतां, नय्‍कु बारे मीपोर्रो अर्सि मीकुने कस्कंतां. 
पेनदुन तल्‍कट मीकु हिय्यार, पह्कट मीकु दोर्कार, तल्‍पुन तनट तल्‍पु तेंडार. 
बारित्‍ते बोर अय्ते तल्कंतोर ओन्क हियमळ जर्गंता, बोर अय्ते पह्कंतोर ओन्क दोर्कंता, बोर अय्ते तल्‍पुन तनंतोर ओनाहाटीं तल्‍पु तेंडमळ जर्गंता. 
मीलोप्‍पो बोरन्‍ना मनकल मंतोरा, ओना मर्रि हारि तल्‍कते बंडा हियानोर? 
हिलाकोंटे जिम्मा तल्‍कते तरास हियना मनकल मंतोरा? इल्‍हा बोरे किय्योर. 
अय्ते मिमेट सेड्‍डोर्क आसिगुडा मीवा पिलाल्कुंक बेसतव हियना इंचि मीकु तेळियतस्के, स्वर्गमते मनना मीवा पेनबाबाल ओन तल्कानोर्कुंक वेल्‍लेन बेसतव हिय्योरा? 
अदुनहाटीं लोकुल्‍क मीवातोनि बल्हा मनना इंचि मिमेट इनकुंतिरो, अल्हेन मिमेट ओरतोनि मंटु. इदे पोल्‍ले मूसाना नियम आनि पेनदा कबुरतोर रासतदगुडा वेहंता. 
नासडेमताहेके होनना हर्रि, तल्‍पु नेर्वुंक नेरवु मंता, आ हरपीसि वेल्‍ले मंदि दांतुर. अदुनहाटीं इर्कुटोम मत्‍ता हरपीसि होळियट. 
पिस्वरताहेके होनना हर्रि आनि तल्‍पु वेल्‍ले इर्कुटोम मंता. आ हर्रि वेल्‍ले तक्‍को मंदिक दोर्कंता. 
आबद्‍दम कबुरतोरागटाल उसारते मंटु. ओर मिहगा सादा गोर्रेतालेसीं वांतुर गानि ओरा लोप्पो तोडेल्‍लिता गुनम मनंता. 
ओर कियाना कबाह्‍कुन हूळसे ओर डोंगि कबुरतोर इंचि एरपाट कींतिर. बल्हा अय्ते हाह्कुना जप्‍पिताल अंगुर पंडिं हादों, हिलाकोंटे ईरामुस्‍टी मराकुनाल मरका पंडिं हादों, 
अल्हेन बेसता मराकु बेसता पंडिं हादंतां, कराब मराकु कराब पंडिं हादंतां. 
बेसता मराकु कराब पंडिं हादों कराब मराकु बेसता पंडिं हादों. 
बव मराकु बेसता पंडिं हादों असोंटव अन्‍नि मराकुन नर्किसि तडमिते वाटंतुर. 
इंचि डोंगि कबुरतोर्कुन मिमेट ओर कियाना कबाह्‍कुन हूळसे एरपाट कीकिट. 
नाकुन सामि सामि इनानोर अंटोर स्वर्ग राज्येमते होळयुर. गानि स्वर्गमते मनना नावा पेनबाबाना मनसु मत्‍ताप बोर अय्ते ताकंतुर ओरे स्वर्ग राज्येमते होळियंतुर. 
नना न्‍यायम कियाना आकिर रोजुने वेल्‍लेटुर नहगा वासि, सामि मोमोट नीवा पोरोलते बविस्यवानि कीतोम, नीवा पोरोलते देय्याल्क-बूताल्कुन पेचाहतोम, नीवा पोरोलते बच्‍चुंगो अद्‍बूतामाता कबाह्‍क कीतोम, इंचेके इनानुर. 
अस्‍के ओर्कुन, ए सेड्‍डा कबाह्‍क कियानोरिटा! नना मीकुन एरपाट किय्योन. मिमेट इगेटाल पेय्सि होंटु इंचि इंतन. 
अदुनहाटीं नावा पोल्‍लें केंजसि दाना परकारम ताकाना हरेक मनकल, बंडा पुनादिपोर्रो लोन दोहकुता तेल्‍विता मनकनलेसीं मंतोर. 
पिर्रु वाता, कम्मुड वाता, वळि-दुमारम वासि लोतुक दल्‍गिना गानि अद कूला हिल्‍ले. बारित्‍ते अद लोता पुनादि बंडातोनि दोहाचि मंता. 
गानि नावा पोल्‍लें केंजसि, दाना परकारम ताकवा हरेक मनकल, उस्केते लोन दोहकुता तेल्वि हिल्वासंटोर आंदुर. 
पिर्रु वाता, कम्मुड वाता वळि-दुमारम वासि लोतुक दल्‍गता अस्‍के अद लोन पूरा कूल्‍सि पाड आता, इंचि येसु इत्‍तोर. 
येसु पेनदा पोल्‍लें कराहमळ महातस्के ओना कराहमळतुन केंजसि लोकुल्‍क वेल्‍ले इचंत्रम आतुर. 
बारित्‍ते येसु ओर्कु ओरा दर्मसास्‍त्रम कराहना गुरुल्‍कुनलेसीं आयो गानि अदिकारम मत्‍ताप कराहतोर. 
