﻿मत्‍तयाल.
4.
पजा पेद्‍दा देय्यम येसुना पट्‍टु हूळागोम इंचि पेनदा आत्मा ओन बय्‍लि जेगाते ओता. 
अगा येसु नल्‍पै रोजकु, नल्‍पै नर्कां उपासम मत्‍तोर. अदुनहाटीं येसुंक इरगा कर्वेस्‍ता. 
अस्‍के आ पट्‍टु हूळानोर येसुनगा वासि, “ओक्‍कला निमे पेनदा मर्रिन आते ई बंडां हारिं आयिं इंचि आदेस हीम,” इंचि इत्‍ता. 
अस्‍के येसु इल्‍हा जवाब हीतोर, “मनकल सिराप वट्‍टि हारिं तिंचे पिस्‍सोर, गानि पेनदा तोळ्‍दाल पेय्‍सना उंदि-उंदि पोल्‍लेताहेंदाल पिस्संतोर. इल्‍हा दर्मसास्‍त्रमते रासि मंता.” 
पजा आ पेद्‍दा देय्यम येसुन येरुसलेम इनना पवित्र सहरते ओसि, गुळि पोर्रो कोस्‍सक निल्‍हाचि इल्‍हा इत्‍ता. 
“ओक्‍कला निमे पेनदा मर्रिन आते हिळु दुनका, बारित्‍ते, नीकुन कापाळालय पेन दाना दूतांक आदेस हींता, आनि आ दूतां वासि नीवा काल्कुंक देब्बां दल्‍गामन्‍नि इंचि, नीकुन पोर्रोटद पोर्रेन अंदकुंतां, इल्‍हा दर्मसास्‍त्रमते रासि मंता.” 
अस्‍के येसु दान इल्‍हा इत्‍तोर, “निमे सामि इनना नीवा पेनदा पट्‍टु हूळमा, इल्‍हागुडा दर्मसास्‍त्रमते रासि मंता.” 
पजा आ पेद्‍दा देय्यम येसुन उंदि एत्‍तु गुट्‍टापोर्रो ओसि ओन्क दुनियाता अन्‍नि राज्येल्‍क, अवुना पेद्‍दातनाल्‍क बोत्‍तिगा हुपिच्‍चि, 
“निमे नावा मुन्‍ने वंगिसि, नावा काल्क मोळ्‍कानय्‍ते, अवंता बोत्‍तिगा नीके हींतन,” इंचि इत्‍ता. 
अस्‍के, “ए देय्यमतुना हब्बेर होन, बारित्‍ते निमे नीवा पेनदुने मोळ्‍कना, सिराप दानादे सेवा कियना, इल्‍हा दर्मसास्‍त्रमते रासि मंता.” इंचि येसु दान इत्‍तोर. 
अल्हा इत्‍तरित्‍ते पेद्‍दा देय्यम ओन होळसि होत्‍ता. अस्‍के हुळाट! पेनदा दूतां वासि येसुना सेवा कीतां. 
योहानुन जेलते वाटतुर इंचि येसुंक तेळिय्ताहेंका ओर गालिल एरियाता नासरेत नाटेने होत्‍तोर. 
अगटाल नासरेत नाटेने आगाकोंटा कपर्नाहुम इनना सहर होंचि मनालय दल्‍गतोर. आ सहर गालिल सेरवु पकापीसि मनना नप्‍तालि आनि जबलुन इनना एरियांक दल्‍गिसि मंता. 
ओर अगा मत्‍ताहाटीं यसायाह इनना पेनदा कबुरतोनतोनि पेन वेहता पोल्‍ले निजम आता. आ पोल्‍ले इल्‍हा मत्‍ता, 
“जबलुन आनि नप्‍तालि एरियाता सेरवुना हरदाहेंदाल, योर्दन बेरेटा हब्बेटा बाजुंक, यहुदि आयवोरा गालिल एरियाते, 
बोर अय्ते लोकुल्‍क हीकटते उदिस मत्‍तुरो ओर पेद्‍दा वेलगुन हूळतुर. आनि बोरपोर्रो अय्ते हामुरता नीडा अर्सि मत्‍तानो, ओर अंटोरपोर्रो वेल्‍गु अरता.” 
अस्‍केटाल येसु इल्‍हा वेहालय सुरुव कीतोर, “स्वर्ग राज्येम दग्गेर्क एव्ता इंचि मिमेट मनसु मार्सकुंटु.” 
येसु गालिल समुद्रम ओड्‍डु पीसि होननेंके वरोर सिमोनुन ओन पत्रुगुडा इनुंदुर आनि ओना तम्मुर अंदरियन हूळतोर. ओर जिम्मां पिय्‍यानोर आताहाटीं, समुद्रमते ओल्‍लां वाटसि जिम्मां पीसेक मत्‍तुर. 
ओर्कुन हूळसि, “नावा पज्जो वट, नना मीकुन मनकालोर्कुन नहगा तायानोर कींतन,” इंचि येसु इत्‍तोर. 
अस्‍के ओर, बिराना ओरा ओल्‍लां अग्गेन होळसि ओना पज्जो होत्‍तुर. 
अगटाल इंकिच्‍चो मुन्‍नेळ्‍क होत्‍तारित्‍ते येसु इव्वुर दादाल-तम्मुन इत्‍ते जब्‍दिना मर्कु याकोब आनि ओना तम्मुर योहानुन हूळतोर. ओर ओना बाबोनतोनि डोंगापोर्रो ओल्‍लां सवरिच्‍नेंके येसु ओर्कुन केयतोर. 
अस्‍के ओर, बिराना ओरा बान आनि डोंगातुन होळसि ओना पज्जो होत्‍तुर. 
यहुदिल्कुना दर्मसास्‍त्रम कराहना लोतागा येसु पेनदा पोल्‍लें कराहतोर. स्वर्ग राज्येम बारेमते बेसता कबुर वेहचेके, लोकुल्‍कुना अन्‍नि तीरकुना रोगाल्‍कुन, कमजोरिन बेस कीसेके गालिल एरियाते पूरा तिरियतोर. 
येसु कियना कबळ पूरा सिरिया देसेमंता तेळियसि होत्‍ता. दानहाटीं तीरतीराता रोगाल्कुनोर, नोप्पिनोर, देय्याल्क पीतोर, कुंदेल रोगमतोर आनि लकवा बिमारतोर इसंटा लोकुल्‍कुन ओनगा तत्‍तुर. येसु ओर अंटोर्कुन बेस कीतोर. 
गालिल एरिया, देकापोलिस एरिया, येरुसलेम सहर, यहुदिया एरिया आनि योर्दन बेरेटा हब्बेटाल वाता लोकुल्‍कुना मंदा येसुना पज्जो होनालय दल्‍गुतुर. 
