﻿मत्‍तयाल.
3.
अदे कालमते, पेनदा पोरोलते एते मुळ्‍हाचि बापतिस्मा हियना योहान यहुदिया एरियाता बय्‍लि जेगाते वातोर. वासि, “स्वर्ग राज्येम दग्गेर्क एव्ता, मिमेट मनसु मार्सकुंटु,” इंचेके वरगेयसि वेहालय दल्‍गतोर. 
एनकटा कालमते यसायाहल इनना पेनदा कबुरतोर, ई योहानुना बारेमते इल्‍हा वळ्‍किसि मत्‍तोर गदा: “सामिनाहाटीं हर्रि तयार कीम्‍टु, ओना हर्रि सवरगा कीम्‍टु, इंचि केडाते केयानद उंदि अल्किर केंजावाता.” 
आ योहान लोटापेटा बूराते तयार कीता कपडिं केरसि तोल्‍दा पट्‍टा नडिक तासकुनुंदुर. ओर गोल्‍लाबामां आनि तेने इवे तिंडि तिनुंदुर. 
येरुसलेम सहरताल, यहुदिया राज्येमता अन्‍नि जेगानाल आनि योर्दन बेरेटा सुट्‍टु-मट्‍टुना जेगाता लोकुल्‍क योहानुनगा वातुर. 
वासि ओरा पापाल्क ओप्‍कुंचि ओनहेंदाल योर्दन बेरेटे बापतिस्मा येतकुत्‍तुर. 
बापतिस्मा हियना जेगातगा वेल्‍लेन मंदि परिसिल्क,सदुकिर्क वायानद हूळसि योहान ओर्कुन, “ए कट्‍ला तरासनसंटोरिटा, पेनदा होंगुनाल तपिच्‍कुनालय बापतिस्मा येतट इंचि मीकु बोर वेहतुर? 
अय्ते मरि, निजमे मीवा मनसु मार्सुकुत्‍तिर इंचि रुजुव कीसि हुप्‍सट. 
वट्‍टिदे, मोमोट अब्राहामुना वंसमतोरम आंदुम, इंचि बस्‍केने इनकुनमट. नना मीकु निजम वेहांतन, पेन अब्राहामनाहाटीं ई बंडानालगुडा पिलाल्क पुट्‍टिचि हिया परंता. 
इंदके मराकुना हिह्‍कुनगा मर्सु इरसि मंता. बव मराकुंक अय्ते बेसता पंडिं हादोंगों, अवुन नर्किसि तडमिते वाटमळ जर्गंता. 
मिमेट मीवा मनसु मार्सकुत्‍ताहाटीं नना मीकु एते मुळ्‍हाचि बापतिस्मा हीसेक मंतन. गानि नाकन्‍ना सक्‍तिमंतुड नावा पज्जोटाल वासंतोर. ओना हेरपुह्कुन इटाना लायकगुडा नना हिल्‍लेन. ओरे मीकु पवित्र आत्माते आनि तडमिते बापतिस्मा हींतोर. 
ओना कय्‍दे हेती मंता. ओर ओना कडातुन बेस साप कीतारित्‍ते गोह्कुन तूरपाल्क पीसि गुम्मिते दोसंतोर, पोट्‍टुनबारे बस्‍केने पिर्रुवा तडमिते वाटसि बोळसंतोर,” इंचि इत्‍तोर. 
पजा येसु, गालिल एरियाताल योर्दन बेरेटगा, योहानुनाहेंदाल बापतिस्मा एतालय वातोर. 
अस्‍के “नना नीवा कयदाल बापतिस्मा येतकुनगोम, गानि निमे नहगा वासि बापतिस्मा एतकुन्‍मळा!” इंचि योहान येसुन आपालय हूळतोर. 
अस्‍के येसु, “पेनदा इच्‍चागुडा मनम इल्हेन कियाना इंचि मंता. अदुनहाटीं ई नीतिता दंडकम इल्हेने जर्गिकांटी,” इंचि इत्‍तोर. इल्‍हा योहान येसुंक बापतिस्मा हियालय तयार आतोर. 
येसु बापतिस्मा एतसि एताल पलाते पेय्‍स्‍तस्‍के मब्बु बय्यारा आता. पेनदा आत्मा उंदि पावरेम पिट्‍टेतालेसीं आसि येसुनपोर्रो रेयतद येसु हूळतोर. 
अस्‍केन स्वर्गमताल, “ईर ना पावरमगल्‍ला मर्रि आंदुर. ईर इत्‍ते नाकु बच्‍चोनो संबरम,” इंचि उंदि अल्किर केंजावाता. 
