GEN 1:1 Omwanzo, Nluku aphattucha pinku na vathi.
GEN 1:2 Olumwenku waari ohineeyane matthentto na khayaarimo hatha etthu, yaarivo yiizaru vatulu wa pahari yawiicha. Rooho ya Nluku yaari ozukulela vatulu wa maati.
GEN 1:3 Aphano Nluku khuri: “Yiiyevo nuuru!” Khwiiyavo.
GEN 1:4 Nluku khoona yoori nuuru yaari yooshapweya; khuvalula nuuru na yiiza.
GEN 1:5 Nuuru khutthaja “nthana”, yiiza khutthaja “osikhu”. Khuripa khucha, siikhu yamwanzo.
GEN 1:6 Aphano Nluku khulupa theenya yoori: “Wiiyevo mwaawanyo vakatthi wa maati onvalulaaye maati na maati!”
GEN 1:7 Nluku khuretta mwaawanyo ovaluliyeeyo maati vathi na vatulu. Khurettikhana etthiipo.
GEN 1:8 Mwaawanyo opule, Nluku khutthaja “pinku”. Khuripa khucha, siikhu yaphiiri.
GEN 1:9 Nluku khuri: “Akusanyeye maati apa ari vathi wa pinku vahali vamote epuwe tuulu yawuuma!” Khurettikhana etthiipo.
GEN 1:10 Tuulu yaya ethiito yawuuma khutthaja nzina la “tuniya”, maati apale aakusanyeyiyeeyo khutthaja n zina la “pahari”. Nluku khoona yoori pi zooshapweya.
GEN 1:11 Nluku khulupa theenya yoori: “Tuniya yootthele tthuttu: waaza nyaani ziniimaaye peewu na miitthi ziniimaaye mishumo, wakhula nshumo na phunje yaya!” Khurettikhana etthiipo.
GEN 1:12 Tuniya khootthela tthuttu: nyaani ziniimaaye peewu, miitthi ziniimaaye mishumo. Nluku khoona yoori pi zooshapweya.
GEN 1:13 Khuripa khucha, siikhu yattaatthu.
GEN 1:14 Aphano Nluku khuri: “Otulu ziiyewo vimwasikhelo yoori ovaluleye nthana na osikhu! Ziiye alama zinthoonyezaaye elimwe na mwiita, siikhu na nyaakha.
GEN 1:15 Vimwasikhelo ziriiye otulu ziiye zoomwasikhela vathi.” Khurettikhana etthiipo.
GEN 1:16 Nluku khuphattucha vimwasikhelo piiri khuulu. Emwasikhelo eti khuulu yaya yoori esala elokozela nthana, eti ttiitthi esala elokozela osikhu. Na theenya khuphattucha matthottowa.
GEN 1:17 Nluku khutthaawo vimwasikhelo epile otulu yoori zisala zimwasikhela vathi,
GEN 1:18 na olokozela nthana na osikhu, zaawanye nuuru na yiiza. Khoona yoori pi zooshapweya.
GEN 1:19 Khuripa khucha, siikhu yanne.
GEN 1:20 Aphano Nluku khuri: “Mpahari ziiyemo zumpe za waatta za wiiyana ohaayi, na eeyevo anyannyi anvavaaye otulu!”
GEN 1:21 Nluku khumpa zumpe z'oohaayi khuluzeene za mpahari, na jaati zooshi za zumpe zineettettaaye na ziniitaalaaye mpahari. Khumpa theenya jaati zooshi za anyannyi. Nluku khoona yoori pi zooshapweya.
GEN 1:22 Nluku khuparikhiya araka: “Mwittheerelane mwaattelane, mwiitaale mpahari, na anyannyi aattelane vatuniya!”
GEN 1:23 Khuripa khucha, siikhu yathaanu.
GEN 1:24 Aphano Nluku khuri: “Ziiyemo ntuniya jaati zooshi za zumpe za wiiyana ohaayi, nyama za ntthuttu, mifuwo za vaje na nyama zoojipurula!” Khurettikhana etthiipo.
GEN 1:25 Nluku khumpa nyama za ntthuttu za wakhula jaati, zoojipurula za wakhula jaati, na mifuwo za wakhula jaati. Khoona yoori pi zooshapweya.
GEN 1:26 Nluku khulupa theenya yoori: “Nimumpe pinaatamu woonishapihi wa wiiya nkhama Fweeyo! Yoori eeyane owahi wooshintta swi za mpahari na anyannyi o'otulu; mifuwo za vaje na nyama za ntthuttu mpakha nyama zooshi zinjipurulaaye vathi.”
GEN 1:27 Aphano Nluku khumumpa pinaatamu wa wiiya nkhama Ye; nlume na muukha ompiwa ti Ye.
GEN 1:28 Nluku khuwaaparikhiya khuwooza yoori: “Mwivokolelane, mwaattelane mwiitaale voolumwenku! Mwiiyane oshintta vatuniya, swi za mpahari, anyannyi o'otulu na nyama zooshi zineettettaaye vathi!”
GEN 1:29 Nluku khulupa theenya araka: “Yoori mweeyo mwiiyane etthu-yooja, kiniwinkhani nyaani zooshi za ntuniya ziniimaaye peewu, miitthi zooshi ziniimaaye mishumo na phunje zaya.
GEN 1:30 Kininkha mathapa ooshi nkhama vitthu-zooja za nyama zooshi ziriina ohaayi: anyannyi ooshi o'otulu na nyama zooshi mpakha epile zinjipurulaaye vathi.” Khurettikhana etthiipo.
GEN 1:31 Nluku khoona yoori pi zooshapweya channu. Khuripa khucha, siikhu yasiitha.
GEN 2:1 Ti nanna yiishisiweezo ophattuchiwa pinku na vathi na zooshi ziriimo.
GEN 2:2 Nluku amarisiyeevo khaazi yawe, siikhu yasaapa khuvumula.
GEN 2:3 Siikhu ethiito yasaapa, Nluku khuparikhiya na khuttakatthisa mwaasa woovumula khwa khaazi yawe aakholiyeeyo yoophattucha.
GEN 2:4 Eti hatiithi yoophattuchiwa pinku na vathi. Siikhu Mbwana Nnyizinku aphattuchiyeevo pinku na vathi,
GEN 2:5 vatuniya khawaarivo hatha muutthi wala nyaani zaari zihinootthe, maana Mbwana Nnyizinku aari ahinanyisele vuula vathi na khaarivo hatha ntthu woolima tuniya.
GEN 2:6 Ila maati aari opuwa vathi khusala anaanisa tuniya yooshi.
GEN 2:7 Aphano, Nnyizinku khumumpa pinaatamu khwa ottophe wa vathi. Khunvitelela mphula mwawe khumwinkha phuumu y'oohaayi, pinaatamu khwiiya yumpe haayi.
GEN 2:8 Mbwana Nnyizinku khuzala woorotha nti wa Eeteni, phantte y'ookhu lintthamuwaawo njuwa, khuntthaamo pinaatamu otule aamumpiyeeyo.
GEN 2:9 Mbwana Nnyizinku khootthisa miitthi za wakhula nanna, zooshapweya woona na zootuva oja mishumo zaya. Vakatthi wa woorotha khuzalavo muutthi woohaayi, na muutthi onjuwisaaye yooshapweya na yootakhala.
GEN 2:10 N'Eeteni nttumpho waarimo muuttho waari okhuwaraaye woorotha opule; muuttho otthuupo khwaawanyeya khupuwavo nyuuttho mine.
GEN 2:11 Wamwanzo oniitthiwa Pishoni, opo wazukulela nti wooshi wa Havila, ohali wa waattawo thahapu.
GEN 2:12 Thahapu za nti opo pi zooshapweya na theenya ewaakho miitthi enlazaaye manlela oonukhela na mawe ootafikhana.
GEN 2:13 Muuttho opu waphiiri oniitthiwa Kihoni, ozukuleliyeeyo nti wooshi wa Kuushi.
GEN 2:14 Muuttho opo wattaatthu, onviraaye phantte lintthamuwaawo njuwa ya nti wa Shuuru, oniitthiwa Tiikiri. Opu wanne Efwarathi.
GEN 2:15 Mbwana Nnyizinku khunthuula pinaatamu otule khunttha nwoorotha wa Eeteni yoori asala alimela na weekesela.
GEN 2:16 Mbwana Nnyizinku khunruma pinaatamu otule yoori: “Miitthi epi ziriiye nwoorotha mphu oje mishumo zaya woohiina hatha shaakha.
GEN 2:17 Ila muutthi opo woojuwisa yooshapweya na yootakhala ohije; siikhu onttelaaye oja satakithu ontta ofwa.”
GEN 2:18 Aphano Mbwana Nnyizinku khuri: “Khahi yooshapweya pinaatamu wiiya otthwe, kintta omumpa pinaatamu wa wiiya nkhama ye asala ankhiza.”
GEN 2:19 Paata ya Mbwana Nnyizinku wumpa khwa ottophe wa vathi nyama zooshi za ntthuttu na anyannyi apa o'otulu, zooshi khuntiisela Adamu yoori amoone nanna aari weettelaazo otthaja; wakhula yumpe aari otthajaaye, nzina laya laari wiiya nttinttho.
GEN 2:20 Adamu khutthaja mazina mifuwo za vaje, anyannyi o'otulu na nyama zooshi za ntthuttu. Ila khuhipuwivo hatha moote ya wiiya nkhama ye yaari weettelaaye onkhiza.
GEN 2:21 Aphano, Mbwana Nnyizinku khuntiisela Adamu osikizi wa waatta. Eettaka olala, khunlaza likhonkolo limote la pavu yawe, aphale vaya aalaziyeevo khuttiyavo na nyama.
GEN 2:22 Likhonkolo limote la pavu anlaziyeeyo Adamu, Mbwana Nnyizinku khumumpa muukha, khumwinkha Adamu.
GEN 2:23 Ye khuri: “Ahee! Ntthi likhonkolo la likhonkolo laka na nyama ya nyama yaka. Nka eetthiwaka oriwa muukha, maana alaziwa vamwiili wanlume.”
GEN 2:24 Ti eto nlume oninlikha papaawe na mamaawe khukusanyeya na muukhaawe oowiiri khwiiya nyama moote.
GEN 2:25 Oowiiri, Adamu na muukhaawe aari wiiya waazu woohiina haaya.
GEN 3:1 Nyookha yaari nlavilavi zayita nyama zooshi za ntthuttu Mbwana Nnyizinku ompiyeeyo. Khumuuzela muukha eraka: “Atthi Nluku alupa yoori mwihije mishumo za miitthi zooshi ziriiye nwoorotha mphu?”
GEN 3:2 Muukha otule khujipu yoori: “Ninaaye ruhusa yooja mishumo za miitthi ziriiye nwoorotha mphu,
GEN 3:3 ila Nluku anuuza yoori: ‘Nshumo wa muutthi oriiye vakatthi wa woorotha mwihije wala mwihisape. Mwijaru mwintta ofwa.’”
GEN 3:4 Aphano nyookha khumuuza muukha otule yoori: “Hatha khamwimfwa!
GEN 3:5 Maana Nluku ajuwa yoori siikhu mwinttelaavo oja nshumo opo antta ofunuwa maasho enu, mweeyo mwinttela wiiya nkhama Ye, ojuwa yooshapweya na yootakhala.”
GEN 3:6 Muukha khoona yoori muutthi opule waari wooshapweya, mishumo zaya zaari zooshapweyela oja na zaarina fwayita yoojuwisa. Attaapho, khushuma khuja, khumwinkha mannawe na-ye khuja.
GEN 3:7 Paata ya toowo, oowiiri khufunuwa maasho aya khujuwa yoori ari waazu. Khurukela mathapa a muutthi oniitthiwaaye mfikeera khuretta wiiya kuwo zaya.
GEN 3:8 N'oosiila shintto ya Mbwana Nnyizinku eettettaka nwoorotha mphule, wakathi wa pheevo ya matulayi njuwa-looveva, pinaatamu na muukhaawe khujivitha na miitthi nwoorotha nttumphule yoori Mbwana Nnyizinku ahiwoone.
GEN 3:9 Mbwana Nnyizinku khunkhuwela pinaatamu khumuuzela yoori: “Ori vayi?”
GEN 3:10 Ye khujipu araka: “Keetta osiila shintto yawo nwoorotha mphu, miiyo khoova na khujivitha mwaasa wa wiiya waazu.”
GEN 3:11 Mbwana Nnyizinku khumuuzela theenya yoori: “Wooziwa paani yoori ori waazu? Nshumo wa muutthi opule kookhattaziyeeyo yoori ohije weetta oja?”
GEN 3:12 Pinaatamu khujipu yoori: “Muukha otu okinkhiyeeyo yoori asala akikhiza, ti ye akinkhiyeeyo nshumo aya opo miiyo khuja.”
GEN 3:13 Mbwana Nnyizinku khumuuzela muukha araka: “Niini eto orettiyeeyo?” Muukha khujipu yoori: “Nyookha ti ye ekittettekhiyeeyo miiyo khuja.”
GEN 3:14 Aphano Mbwana Nnyizinku khuuza nyookha yoori: “Wiiya waretta vitthu epi, woolaanikha ti weyo vakatthi wa mifuwo za vaje na nyama zooshi za ntthuttu, nka weettettanaka erukulu na ojaka ottophe siikhu zooshi z'oohaayi awo.
GEN 3:15 Kinttela otthaavo wuumani weeyo na muukha; peewu yawo na peewu ya muukha. Peewu ya muukha nka yuuvulalisaka eeshwa yawo, na weeyo nka ottovolaka ekwakuno yaya.”
GEN 3:16 Mbwana Nnyizinku khumuuza muukha yoori: “Kintta ozitisa thwaapu yawo amana wiimittha ompatthaka mwaana. Weeyo onlawa watakhe onlokozela mannawo, ila mannawo onlawa ooshintte.”
GEN 3:17 Ye khumuuza Pinaatamu yoori: “Wiiya wansiileza muukhaawo khuja nshumo wa muutthi opu kookhattaziyeeyo, yalaanikha tuniya yooshi mwaasa wa weeyo, nka okholaka khaazi yoolipa yoori opatthe etthu-yooja ohaayi awo wooshi.
GEN 3:18 Tuniya eniwinkha wakhula nanna ya miiwa, weeyo nka ojaka mishumo za ntthuttu.
GEN 3:19 Okholaka khaazi yoovujuwela yoori opatthe etthu-yooja yawo mansha awo ooshi. Maana weeyo wompaniwa ottophe, n'oofwa mpakha orutele voottophe.”
GEN 3:20 Pinaatamu khuntthaja muukhaawe nzina la Haawa, mwaasa wa wiiya maama wa anaatamu ooshi.
GEN 3:21 Mbwana Nnyizinku khwaattala kuwo za shapala khunwalisa pinaatamu na muukhaawe.
GEN 3:22 Mbwana Nnyizinku khuri: “Mpakha apha pinaatamu wampattha wiiya nkhama fweeyo, ajuwa etthu yooshapweya na yootakhala. Ye ahilikheleliwe oshuma nshumo wa muutthi w'oohaayi aja yoori eeyane ohaayi wa mileele.”
GEN 3:23 Paata ya toowo, Mbwana Nnyizinku khumwiikaramo nwoorotha wa Eeteni, yoori asala alima ottophe otthuupule ompaniweeyo.
GEN 3:24 N'oomwiikaramo pinaatamu nwoorotha phantte lintthamuwaawo njuwa ya Eeteni, khutthaamo kerupiina na phanka ya moottho yaari ozukulelaaye. Ye aarettiye toowo yoori esala yeekesela tarikhi yaari weettaaye okhule oriiwo muutthi w'oohaayi.
GEN 4:1 Adamu khurapalelana muukhaawe Haawa, khwiimittha khumpattha mwaana khuntthaja nzina la Kayiini. Ye khulupa yoori: “Khwa otakha wa Nnyizinku kampattha mwaana wanlume.”
GEN 4:2 Khwiimittha theenya khumpattha mwaana nkina wanlume, ttwiiye Kayiini. Khuntthaja nzina la Apeele. Apeele khwiiya makhampuzi wa pwittipwitthi, Kayiini khwiiya namalima.
GEN 4:3 Siikhu moote, Kayiini khutiisa mishumo za mmashapa oteela omwinkha zaakha Nnyizinku.
GEN 4:4 Apeele na-ye zwaamu yawe khutiisa pwittipwitthi etile yaari yamwanzo ottheeriwa ya nliphanko mwawe, khushija khuthawula phantte epile zoosamini waya oteela omwinkha zaakha Nnyizinku, Ye khwiiya wootuveliwa ti Apeele na zaakha yawe.
GEN 4:5 Ila Kayiini na zaakha yawe etile aatiisiyeeyo, Nnyizinku khuhituveliwi. Kayiini khukatipukha khujiinamela.
GEN 4:6 Nnyizinku khumuuzela araka: “Wakatipukhela-ni khujiinamela?
GEN 4:7 Amana weeyo weettetta saana akinuukhupalela? Ila amana weeyo oheettetti saana, ojuwe yoori twampi eri vanlako entta wuuwejela yoori ewiirukhele yuushintte. Weeyo enuuhithajiya oshintta twampi yaya eto.”
GEN 4:8 Aphano Kayiini khumuuza ttwiiye Apeele yoori: “Nlawe ntthuttu.” N'oofiya khunzukuluwela khumuula.
GEN 4:9 Paata ya toole, Nnyizinku khumuuzela Kayiini araka: “Ttwiiyo Apeele ori vayi?” Khujipu yoori: “Akijuweeni! Namweekesela wa ttwiiyaku ti miyo?”
GEN 4:10 Nnyizinku khumuuzela theenya araka: “Warettela-ni etthu nkhama eti? Huula ya taamu ya ttwiiyo entta okikhuwela vathi.
GEN 4:11 Nasaapi ethiiti, woolaanikha ti weyo vatuniya ethiito enywiiyeeyo taamu ya ttwiiyo.
GEN 4:12 Amana weeyo olima nka ohiruweraka. Vatuniya weeyo nka weettaka ojeettettela nkhama ntthu wootthira.”
GEN 4:13 Kayiini khumuuza Nnyizinku yoori: “Hukhumu yaka khuluyeene channu akinkhitiri.
GEN 4:14 Leelo wakiikara vatuniya apha yoori kihiiye vamote na-weyo, miiyo kinttela ojeettettela nkhama namatthira vatuniya na wakhula anttelaaye okisikana ontta okuula.”
GEN 4:15 Nnyizinku khunjipu yoori: “Wala! Khahiyo toowo! Wakhula otule anttelaaye owuula oniiya woohukhumwiwa swaafu sapa.” Ye khunttha alama vamwiili yoori wakhula aninsikanaaye ahimuule.
GEN 4:16 Aphano Kayiini khwumwazeyanana Nnyizinku khulawa khwiikhala nti wa Nooti, okhu lintthamuwaawo njuwa phantte ya Eeteni.
GEN 4:17 Ye khurapalelana muukhaawe, khwiimittha khumpattha mwanawe Enookhi. Kayiini khujeka sitati khutthaja nzina nttintthile la mwanawe Enookhi.
GEN 4:18 Enookhi khunvokola Eraati, Eraati khunvokola Mehuyayele, Mehuyayele khunvokola Lameekhi
GEN 4:19 Lameekhi khuwaarala aakha awiri, mmote nzina lawe laari Aada. Otu nkina lawe laari Siila.
GEN 4:20 Aada khumpattha mwanawe khuntthaja nzina la Yapaali, paapa wa atthu apale aari wiikhalaaye mmaheema aari ofuwaaye nyama.
GEN 4:21 Ttwiiye nzina lawe laari Yupaali, oto aari paapa wa atthu apale ooshi animpiyaaye tthakare na apale ampiyaaye phivi.
GEN 4:22 Siila khumpattha mwaana khuntthaja nzina la Tupaali-Kayiini, ye aari funti wa waattala zaana za khoopiri na zuuma. Tupaali-Kayiini aarina nlupuwe aari wiitthiwaaye Naama.
GEN 4:23 Lameekhi khuwooza aakhaawe yoori: “Aada na Siila! Mwikisiileze aakhaaka: Kamuula ntthu mwaasa wookivulalisa, na shapu mmote mwaasa wookiluwattha.
GEN 4:24 Amana Kayiini ariphiwa hukhumu swaafu sapa, Lameekhi onttela oriphiwa swaafu sapiini na sapa.”
GEN 4:25 Adamu khurapalelana muukhaawe theenya khumpattha mwaana khuntthaja nzina la Seethi, Haawa khuri: “Nnyizinku akinkha mwaana nkinoko wonriphelavo Apeele otule ooliweeyo ti Kayiini.”
GEN 4:26 Seethi na-ye khumpattha mwaana khuntthaja nzina la Enooshi. Wakathi aya otthuupo phi laaziyeevo waaputwiwa nzina la Nnyizinku.
GEN 5:1 Eti warakha yoovokola wa peewu ya Adamu. Wakathi Nluku amumpiyeeyo pinaatamu, aamumpiye wa wiiya nkhama ye;
GEN 5:2 nlume na muukha ti ye awompiyeeyo. N'oowompa khuwaaparikhiya. Khuwaatthaja nzina la “anaatamu”.
GEN 5:3 Adamu afiiyeevo nyaakha miiya na talaathiini khumpattha mwaana wa wiiya nkhama ye na khwa wumpo awe khuntthaja nzina la Seethi.
GEN 5:4 Paata yonvokola Seethi, Adamu khwiikhala theenya nyaakha miiya naane khuwaapattha aana a waatta aalume na aakha.
GEN 5:5 Adamu afwa arina nyaakha miiya tiisiya na talaathiini.
GEN 5:6 Seethi afiiyeevo nyaakha miiya na mithaanu, khunvokola Enooshi.
GEN 5:7 Paata yonvokola Enooshi, Seethi khwiikhala theenya nyaakha miiya naane na sapa khuwaapattha aana akina aalume na aakha.
GEN 5:8 Seethi afwa arina nyaakha miiya tiisiya na khumi na miwiri.
GEN 5:9 Enooshi afiiyeevo nyaakha tiisiini, khunvokola Kenaani.
GEN 5:10 Paata yonvokola Kenaani, Enooshi khwiikhala theenya nyaakha miiya naane na khumi na mithaanu, khuwaapattha aana akina aalume na aakha.
GEN 5:11 Enooshi afwa arina nyaakha miiya tiisiya na mithaanu.
GEN 5:12 Kenaani afiiyeevo nyaakha sapiini, khunvokola Mahalaleeli.
GEN 5:13 Paata yonvokola Mahalaleeli, Kenaani khwiikhala theenya nyaakha miiya naane na arupayiini, khuwaapattha aana akina aalume na aakha.
GEN 5:14 Kenaani afwa arina nyaakha miiya tiisiya na khumi.
GEN 5:15 Mahalaleeli afiiyeevo nyaakha siithiini na mithaanu, khumpattha mwaana khuntthaja nzina la Yareeti.
GEN 5:16 Paata yonvokola Yareeti, Mahalaleeli khwiikhala nyaakha miiya naane na talaathiini khuwaapattha aana akina aakha na aalume.
GEN 5:17 Mahalaleeli afwa arina nyaakha miiya naane na tiisiini na mithaanu.
GEN 5:18 Yareeti afiiyeevo nyaakha miiya na siithiini na miwiri, khumpattha mwaana khuntthaja nzina la Henookhi.
GEN 5:19 Paata yonvokola Henookhi, Yareeti khwiikhala nyaakha miiya naane, khuwaapattha aana akina aalume na aakha.
GEN 5:20 Yareeti afwa arina nyaakha miiya tiisiya na siithiini na miwiri.
GEN 5:21 Henookhi afiiyeevo nyaakha siithiini na mithaanu, khumpattha mwaana khuntthaja nzina la Methuseela.
GEN 5:22 Paata yonvokola Methuseela, Henookhi khulotta mwentto wa Nnyizinku nyaakha miiya ttatthu, khuwaapattha aana akina aalume na aakha.
GEN 5:23 Ye eekhaliye nyaakha miiya ttatthu na siithiini na mithaanu.
GEN 5:24 Henookhi aarina osiilana nwulweene na Nluku. Ye eettiye woophaziwa ti Nluku.
GEN 5:25 Methuseela afiiyeevo nyaakha miiya na thamaaniini na sapa, khunvokola Lameekhi.
GEN 5:26 Paata yonvokola Lameekhi, Methuseela khwiikhala nyaakha miiya sapa na thamaaniini na miwiri, khuwaapattha aana akina aalume na aakha.
GEN 5:27 Methuseela afwa arina nyaakha miiya tiisiya na siithiini na tiisiya.
GEN 5:28 Lameekhi afiiyeevo nyaakha miiya na thamaaniini na miwiri khumpattha mwaana mmote.
GEN 5:29 Mwaana otule mmote ampatthiyeeyo khuntthaja nzina la Nuuhi, ye khulupa yoori: “Khwa khaazi zoolwaaza ninkholaazo nilimaka tuniya eti elaaniweeyo ti Nnyizinku, mwaana otu ti ye anttela wiitthaaza rooho zetthu.”
GEN 5:30 Paata yonvokola Nuuhi, Lameekhi khwiikhala theenya nyaakha miiya thaanu na tiisiini na mithaanu, khuwaapattha aana akina aalume na aakha.
GEN 5:31 Lameekhi afwa arina nyaakha miiya sapa na sapiini na sapa.
GEN 5:32 Nuuhi eekhaliye nyaakha miiya thaanu khuwaapattha aana aalume khuwaatthaja mazina: Sheemu, Haamu na Yafeeti.
GEN 6:1 Wakathi anaatamu aaziyeevo waattelana muulumwenku na khuwaavokola aana aakha,
GEN 6:2 mahaakhimu khuwoona yoori aakha apale aari ooshapweya, wakhula mmote wa yo khusala awaathuula apale aari owaatakhaaye.
GEN 6:3 Aphano Nnyizinku khuri: “Akinteela onlikhela pinaatamu phuumu z'oohaayi khwa mileele, maana ye nyama ya taamu; siikhu zawe enttela wiiya nyaakha miiya na eshiriini.”
GEN 6:4 Wakathi aya opo muulumwenku aarimo atthu awulu-awulu na oozivala, aruteliye wiiyavo theenya. Aari aana aalume aavokoliweeyo pi mahaakhimu n'oorapalelana aana aakha a anaatamu. Aana atthaapo, pa yo aari atthu oozivala na ootafikhana.
GEN 6:5 Nnyizinku khoona yoori vatuniya zootakhala za anaatamu zeetta ovira zeekezeleyaka; Menttezi aya ooshi aari ooretta vitthu zootakhala wakhula siikhu.
GEN 6:6 Aphano Nnyizinku khukasirikha mwaasa woomumpa pinaatamu vatuniya, khwiiya woolemeliwa nroho mwawe.
GEN 6:7 Khuri: “Kintta owaafujavo anaatamu aya apa kiwompiyeeyo voolumwenku apha; waaza anaatamu, nyama, anyanyama, na anyannyi o'otulu, kiwookasirikha mwaasa woowumpa.”
GEN 6:8 Ila Nuuhi khwiiya ntthu aapatthiiyeeyo rehema omaasho wa Nnyizinku.
GEN 6:9 Eti hatiithi ya Nuuhi. Vakatthi wa atthu ooshi ye otthwe paasi ti ye ari ntthu w'eekhweeli na washariya, aari weettettelaaye mwentto wa Nluku
GEN 6:10 Nuuhi awaavokoliye aanaawe aalume attatthu; Sheemu, Haamu na Yafeeti.
GEN 6:11 Olumwenku waazukuleliwe pi vitthu zootakhala na zoohusuti omaasho wa Nnyizinku.
GEN 6:12 Nnyizinku khweekesa olumwenku khusala oona ori wooharipweya, maana zumpe zooshi zaari zooharipweya menttezi aya.
GEN 6:13 Nnyizinku khumuuza Nuuhi yoori: “Kintta wiishisa zumpe zooshi z'oohaayi, vamote na olumwenku aya kipweche.
GEN 6:14 Weeyo omwaattale aaraka nwulweene na thaapwa za mpila, onremule ontthe kaatthi, onkokotte ontthe piriniisi oje waya na nkatthi.
GEN 6:15 Omwaattale nanna eti: phiima miiya na talaathiini na thaanu olepa waya, phiima eshiriini na piiri na nuusu owula waya, phiima khumi na ttatthu chanka yaya.
GEN 6:16 Ontthe tarato enfiyaaye nuusu ya phiima vatulu vaya. Waawanye tarato moote vathi, moote vakatthi, kinoko vatulu, ontthe nlako mpavu mwaya.
GEN 6:17 Onjuwa! Miiyo kasaleela ozamisa olumwenku wooshi na maati a nnyeri, kiishise zumpe zooshi ziriina phuumu z'oohaayi ziriiye vathi wa pinku. Zooshi ziriiye vatuniya zinttela ofwa.
GEN 6:18 Ila wahati aka kinretta na-weyo, onttela weetta mmwaaraka, weeyo, muukhaawo, aanaawo na aakhaaya.
GEN 6:19 Othuule nyama wakhula jaati piiri-piiri, yeelume na yeekha opakhire mmwaaraka mwawo yoori ziiye haayi vamote na-weyo.
GEN 6:20 Wakhula jaati ya anyannyi, wakhula jaati ya nyama, wakhula jaati ya epile zinjipurulaaye vathi, zooshi piiri-piiri ziiye vamote na-weyo yoori ziiye haayi.
GEN 6:21 Othuule vitthu zooshi zinjiwaazo opwehe yoori osala oja weeyo na nyama epo zooshi.”
GEN 6:22 Nuuhi khuretta zooshi epile aarumiweezo ti Nnyizinku.
GEN 7:1 Aphano Nnyizinku khumuuza Nuuhi yoori: “Weeyo na ajamaazo ooshi opakhire mmwaaraka. Vakatthi wa atthu apa ooshi ariivo, Miiyo kawoona weeyo paasi wiiya ntthu washariya.
GEN 7:2 Othuule nyama za halaali sapa zeelume na sapa zeekha ila epile zoohiiyi za halaali othuule piiri-piiri yeelume na yeekha.
GEN 7:3 Owaathuule theenya anyannyi sapa eelume na sapa eekha yoori jaati yaya ehaashikhe.
GEN 7:4 Mmana zivira siikhu sapa kinlawa kanyisele vuula vatuniya siikhu arupayiini nthana na osikhu, kipweteche zumpe zooshi kumpiyeezo.”
GEN 7:5 Nuuhi khuretta zooshi epile Nnyizinku anrumiyeezo.
GEN 7:6 Wakathi maati aazamisiyeevo tuniya, Nuuhi aari oretta arina nyaakha miiya sitha.
GEN 7:7 Ye khupakhira mmwaaraka vamote na muukhaawe, aanaawe na aakhaaya mwaasa wa maati a nnyeri aari oteelaaye ozamisa olumwenku.
GEN 7:8 Nyama za halaali na zoohiiyi za halaali, anyannyi na nyama epile zinjipurulaaye vathi,
GEN 7:9 khupakhira mmwaaraka vamote na Nuuhi piiri-piiri zeelume na zeekha, nkhama etthiipo Nnyizinku aamuuziyeezo.
GEN 7:10 Ziviriyeevo siikhu sapa, maati oozamisa olumwenku khwaaza opuwa vatuniya.
GEN 7:11 Siikhu Nuuhi afiiyeevo nyaakha miiya sitha, mweezi waphiiri orina siikhu khumi na sapa, khuphutuwa matthatta a vathi ooshi apale awiicha na milako za pinku khufukuwa.
GEN 7:12 Khunya vuula vatuniya siikhu arupayiini nthana na osikhu.
GEN 7:13 Siikhu ethiito Nuuhi, muukhaawe, aanaawe Sheemu, Haamu, Yafeeti, na aakha attatthu a aanaawe aarettiye ari mmwaaraka.
GEN 7:14 Nuuhi aapakhiriye nyama zooshi za ntthuttu, mifuwo zooshi za vaje, nyama epile zooshi zinjipurulaaye, na anyannyi a wakhula jaati na epile zooshi za wiiyana mapaphelo.
GEN 7:15 Zumpe zooshi ziriina phuumu z'oohaayi khupakhira piiri-piiri mmwaaraka mphule vamote na-ye.
GEN 7:16 Nyama zooshi zeettiyeemo zaari zeekha na zeelume za wakhula jaati nkhama etthiipo Nluku anrumiyeezo. Nawiisha opakhira, Nnyizinku khufuka nlako wa aaraka.
GEN 7:17 Nnyeri weeshiye siikhu arupayiini vatuniya. Maati khuvira eekezeleyaka mpakha khweeleela aaraka
GEN 7:18 Maati eetta ovira atepaka waatta mpakha aaraka otule khusala eeleela vatulu a maati.
GEN 7:19 Khwaatta channu mpakha khufiyelela ozamisa nyaako.
GEN 7:20 Maati khuvikana nyaako epile kiyasi ya phiima sapa.
GEN 7:21 Zumpe zooshi z'oohaayi zaari vatuniya khufwa; anyannyi, mifuwo za vaje, nyama za ntthuttu, epile zinjipurulaaye vathi na anaatamu ooshi.
GEN 7:22 Zumpe zooshi epile zaariina phuumu y'oohaayi, zaari ovumulaaye voolumwenku apha khufwa.
GEN 7:23 Nnyizinku khupwetecha zumpe zooshi z'oohaayi zaari vatuniya. Pinaatamu, nyama za ntthuttu, na epile zinjipurulaaye vathi na anyannyi o'otulu zooshi khupwetheya. Khusala Nuuhi otthwe na ajamaaze na nyama epile zaari vamote na-ye mmwaaraka.
GEN 7:24 Maati aarupaziye vatuniya siikhu miiya na hamusiini.
GEN 8:1 Ila Nluku khuhinsahawu Nuuhi na nyama epile za ntthuttu na mifuwo za vaje epile aarinaazo mmwaaraka, khuperekha pheevo yoori evitelele vatuniya, maati khwaaza ovwa.
GEN 8:2 Matthatta apale awiicha na milako za pinku khufukiwa, vuula khwaamusa,
GEN 8:3 maati khwaaza ovwa vattiitthi-vattiitthi mpakha siikhu miiya na hamusiini.
GEN 8:4 Siikhu khumi na sapa ya mweezi wasaapa aaraka otule khuphweruwa vanyaako za Araraati.
GEN 8:5 Maati apale khusala avwa paasi mpakha siikhu yamonsi mweezi wakhuumi khwaaza wooneya mithoma za nyaako.
GEN 8:6 N'oovira siikhu arupayiini Nuuhi khufukula ettakha ya aaraka etile aattaliyeeyo.
GEN 8:7 Khumfukulela nakhuku khusala avava azukulelaka mpakha maati ovwa.
GEN 8:8 Elottelanaka khufukulela jiwa yoori yoone nkhama maati avwa vatuniya.
GEN 8:9 Ila jiwa etile khuhisikani puuro yoomorela khurutela mmwaaraka, mwaasa yoori tuniya nalelo yaari ehinavuuwe. Jiwa khurutela wa Nuuhi, khusarula nkhono awe khukhola jiwa etile khuvirisa mmwaaraka.
GEN 8:10 Nuuhi khuvira awejaka mpakha siikhu sapa, khuruma jiwa ethiitile swaafu yaphiiri.
GEN 8:11 Khuruti njuwa-looveva elumiye nthapa liwishi l'ooluveera, aphano Nuuhi nawoona khujuwa yoori maati avwa vatuniya.
GEN 8:12 Khuweja theenya siikhu sapa khuruma jiwa ethiitile opheya, ila swaafu eti khuhiruti.
GEN 8:13 Siikhu yamonsi ya mweezi wa mfunko monsi wakathi Nuuhi aarinaavo nyaakha miiya sitha na mmote, maati apale aazamisiyeeyo tuniya khukakhamela. Nuuhi khufunula tarato ya aaraka khoona yoori nshaka wooma.
GEN 8:14 Siikhu eshiriini na sapa ya mweezi waphiiri, tuniya khuuma saaneene.
GEN 8:15 Aphano Nnyizinku khumuuza Nuuhi yoori:
GEN 8:16 “Wiishukhemo mmwaaraka mpho weeyo, muukhaawo, aanaawo na aakhaaya.
GEN 8:17 Wiishushe nyama zooshi oriinaazo waaza anyannyi, nyama na epi zinjipurulaaye vathi. Osarule zimwazeyele vatuniya, zittheerelane zaattelane.”
GEN 8:18 Nuuhi na muukhaawe, aanaawe na aakhaaya khwiishukha mmwaaraka mphule.
GEN 8:19 Khusarulamo nyama epile zooshi zinjipurulaaye vathi, anyannyi ooshi, na zooshi etthiipile zineettettaaye vatuniya, wakhula moote na jaati yaya.
GEN 8:20 Nawiisha, Nuuhi khunjeka alitaari woorettavo twaha yoomwinkha kafwara Nnyizinku. Ye khuthawula nyama epile kinoko zaya za halaali, na anyannyi a halaali akinoko aya, khushija, khulawa khuretta twaha yoolukuziwa vaalitaari.
GEN 8:21 Nnyizinku khusiila arufu yonkhurunusha rooho khulupa mwennyeweru yoori: “Akinteela orutela theenya olaani tuniya mwaasa wa pinaatamu, eeyaru pure wootakhala rooho ovokoliwa-wene. Akinteela orutela opwetecha zumpe zooshi nkhama nanna eti kirettiyeezo.
GEN 8:22 Mmana olumwenku wiiyakavo oniiyana wakathi woozala na wa wuurula, woozizima na wa haari, elimwe na mwiita, nthana na osikhu, vitthu epo khinteela wiisha.”
GEN 9:1 Nluku khumparikhiya Nuuhi na aanaawe awoozaka yoori: “Mwivokolelane mwaattelane mwiitaale voolumwenku.
GEN 9:2 Nyama zooshi za voolumwenku, epi za ntthuttu, anyannyi o'otulu, epi zinjipurulaaye vathi, na swi za mpahari, zinttela wiiya zoowoovani mweeyo channu. Zooshi epo mwinttela oshintta.
GEN 9:3 Zooshi zinoonaaye na zineettettaaye zinttela wiiya etthu-yooja yenu, nkhama etthiipo kiwinkhiyeenini mathapa, zooshi kawinkhani.
GEN 9:4 Ila mwihije nyama na taamu yaya, maana taamu ohaayi.
GEN 9:5 Wakhula nyama enimuulaaye ntthu, na pinaatamu animuulaaye nzaawe, anttela ojipu mmakhono Mwaka.
GEN 9:6 ‘Mwaasa yoori Nluku amumpa pinaatamu ajilattanisaka mwennyewe, otule animuulaaye pinaatamu na-ye ontta wuuliwa ti pinaatamu.’
GEN 9:7 Ila mweeyo mwivokolelane mwaattelane mwiitaale voolumwenku.”
GEN 9:8 Aphano Nluku khumuuza Nuuhi vamote na aanaawe araka:
GEN 9:9 “Nasaapi eti Kinretta wahati aka na-weyo na peewu yawo,
GEN 9:10 na zooshi ziriinaazo ohaayi opakhuwaniyeeyo mmwaaraka ziriiye vamote na-weyo: anyannyi, mifuwo, nyama za ntthuttu na zumpe zooshi za ntuniya.
GEN 9:11 Kinretta wahati aka na-mweyo; akinteela opwetecha theenya zumpe zooshi na maati a nnyeri, wala tuniya khinteela ozama theenya na maati a nnyeri.”
GEN 9:12 Nluku khulupa theenya: “Eti alama ya wahati aka miiyo na-weyo na zumpe zooshi ziriiye vamote na-weyo, khwa mileele:
GEN 9:13 katthaamo nkhankanyama mmawiku yoori wiiye alama ya wahati miiyo na tuniya.
GEN 9:14 Amana kifinikha pinku na mawiku, khupuwa nkhankanyama,
GEN 9:15 phi kinttelaaye wuupuwela wahati aka miiyo na-weyo na zumpe zooshi. Khanrutela theenya maati a nnyeri ozamisa zumpe zooshi z'oohaayi.
GEN 9:16 Nkhankanyama n'oopuwa mmawiku, nka kifikhiraka wahati opule kirettiyeeyo wa mileele miiyo na zumpe zooshi z'oohaayi ziriiye vatuniya.”
GEN 9:17 Nawiisha Nluku khumuuza Nuuhi yoori: “Eti alama ya wahati kirettiyeeyo miiyo na zumpe zooshi ziriiye vatuniya.”
GEN 9:18 Aana a Nuuhi aapakhuwaniyeeyo mmwaaraka mphule pi apa: Sheemu, Haamu na Yafeeti. Haamu aari paapa wa Kanaani.
GEN 9:19 Apa attatthu aari aana a Nuuhi, atthu ooshi amwazeyeliyeeyo vatuniya avokoliwa khwa yo.
GEN 9:20 Nuuhi aari namalima, ye ti tthakuzi woozala mirayi za wuuva.
GEN 9:21 Siikhu moote, khunywa viinyu ya nshumo opule khunhapala khuvuleya kuwo zawe zooshi nheema mwawe.
GEN 9:22 Haamu, paapa wa Kanaani, khuvira nheema khoona owaazu wa papaawe. Khulawa khuwooza attwiize apale awiri aari vaje.
GEN 9:23 Aphano khulankha Sheemu na Yafeeti khuthuulaza juupa khuvikela mmafuzi mwaya khusala eettetta na enyokonyoko yoori ahoone owaazu wa papaaya n'oofiya khumfinikha.
GEN 9:24 Wakathi Nuuhi emwaamuwiyeevo viinyu etile, khujuwa mattakhuzi aaviriseliweeyo ti mwanawe otu w'eefutti.
GEN 9:25 Aphano ye khuri: “Woolaanikha ti Kanaani, onttela wiiya mwiitthwaana wa amwiitthwaana a attwiize.”
GEN 9:26 Theenya khuri: “Asifwiwe Mbwana Nnyizinku wa Sheemu, anrette Kanaani wiiya mwiitthwaana wa Sheemu.
GEN 9:27 Nnyizinku anwulise Yafeeti; khapila yawe yiiye vamote na ya Sheemu, Kanaani eeye mwiitthwaana aya.”
GEN 9:28 Paata yawiisha nnyeri, Nuuhi eekhaliye nyaakha miiya ttatthu na hamusiini.
GEN 9:29 Nuuhi afwa arina nyaakha miiya tiisiya na hamusiini.
GEN 10:1 Eti warakha ya peewu ya Sheemu, Haamu na Yafeeti, aana a Nuuhi. Yo aawaapatthiye aana wakathi opule wiishiyeevo nnyeri.
GEN 10:2 Aana a Yafeeti aari apa: Komeeri, Makooku, Matayi, Yavani, Tupaali, Mesheki na Tirasi.
GEN 10:3 Aana a Komeeri aari apa: Ashikenazi, Rifwathi na Tokaama.
GEN 10:4 Aana a Yavani aari apa: Elisha, Tarishishi, Kitimu na Rotanimu.
GEN 10:5 Khwa aana atthaapo, atthu khumwazeyela nkerekhere wa nttima na mvisura. Eti peewu ya Yafeeti wakhula khapila na lihimo laya na nti aya na luuka yaya.
GEN 10:6 Aana a Haamu aari apa: Kuushi, Misuri, Puuti na Kanaani.
GEN 10:7 Aana a Kuushi aari apa: Seepa, Havila, Saapita, Raama na Sapiteeka. Aana a Raama aari apa: Sheepa na Tetaani.
GEN 10:8 Kuushi khunvokola theenya Ninrooti, otu ti ye aaziyeeyo wiiya ntthu wooshintta vathi apha.
GEN 10:9 Ye aari namasaya wookhomaala omaasho wa Nnyizinku. Ti eto enlupiwaaye yoori “Ntthu nkhama Ninrooti, namasaya wookhomaala omaasho wa Nnyizinku”.
GEN 10:10 Ofwalume awe waaza nti wa Babeeli, Ereki na Akati, zooshi epo zaari nti wa Shinaari.
GEN 10:11 Khulankha nti wa Shinaari khulawa mpakha Ashuuru khujeka sitati ya Neniive, ya Rehopoothi-Yiiri na ya Kaala,
GEN 10:12 na sitati ya Reseeni, sitati khuluyeene yaari vakatthi wa sitati ya Neniive na ya Kaala.
GEN 10:13 Misuri khunvokola Aluti, Anaamu, Alehaapi, Anafituhi,
GEN 10:14 Apaturusi na Akasuluhi (apa pa yo awaavokoliyeeyo Afiliishiti) na Akafitoori.
GEN 10:15 Kanaani khunvokola Sitooni mwanawe wa mwanzo na Ahiiti,
GEN 10:16 theenya na Ayepuzi, Amoori na Akirikashi,
GEN 10:17 Ahivi, Ariki, Asiini,
GEN 10:18 Aravati, Azemaari na Ahamati. Khwa etthiipo lihimo la Akanaani khumwazeya.
GEN 10:19 Mwiinano wa Akanaani waaziye Sitooni olawaka Keraari, mpakha Gaaza, na phantte ya Sotooma na Komoora, Atima na Sepooyimu mpakha Laasha.
GEN 10:20 Apa aari aana a Haamu na mahimo aya, luuka zaya, miti zaya na khapila zaya.
GEN 10:21 Sheemu nttunkhulu wa Yafeeti, na-ye aawaavokoliye aana; Sheemu aari pwaapu wa aana a Heebere.
GEN 10:22 Aana a Sheemu aari apa: Elamu, Ashuuru, Arifwakisaati, Luthi na Aramu.
GEN 10:23 Aana a Aramu aari apa: Wuuzi, Huuli, Keteeri na Maashi.
GEN 10:24 Arifwakisaati khunvokola Sheela, na-ye Sheela khunvokola Heebere.
GEN 10:25 Heebere khuwaavokola aana awiri: mmote khuntthaja nzina la Peleekhi mwaasa yoori siikhu zawe tuniya yeettiye waawanyiwa. Otu waphiiri khuntthaja nzina la Yokitaani.
GEN 10:26 Yokitaani khunvokola Alimotathi, Shelefu, Hazarimawethi, Yeera,
GEN 10:27 Hatoramu, Yuzaali, Tiikala,
GEN 10:28 Opaali, Apimayeeli, Sheepa,
GEN 10:29 Ofiiri, Havila na Yopaapu, ooshi apa aana a Yokitaani.
GEN 10:30 Apa aari wiikhala waaza nti wa Meesha mpakha nnyaako phantte ya malawa-juwa nti wa Sefaari.
GEN 10:31 Apa aari aana a Sheemu na mahimo aya, luuka zaya, miti zaya na khapila zaya.
GEN 10:32 Opu ojama wa aana a Nuuhi, waawanyeyiyeeyo khapila khwa khapila na peewu yaya paata yawiisha nnyeri. Khapila zooshi zimwazeyeliyeeyo voolumwenku zalankha voojama otthuupo.
GEN 11:1 Wakathi aya opo olumwenku wooshi waarina luuka moote na nanna moote yoottakhula.
GEN 11:2 Atthu aalankhiye malawa-juwa khusikana nttapo la Shinaari khwiikhala attaapho.
GEN 11:3 Khusiilana yoori: “Nlaweni nuupe thizolo nooche saaneene.” Thizolo epile khuretta wiiya mawe, piriniisi khunretta wiiya mattakha.
GEN 11:4 Theenya khuri: “Nlaweni nijeke sitati yawiiyana korofwa khuluyeene enkomaaye pinku, yoori nzina letthu liiye loojuwanikha, nihiiye woomwazeyela olumwenku wooshi.”
GEN 11:5 Paata ya toole, Nnyizinku khwiishukha yoori oone sitati ya korofwa etile aari ojekaaye atthu apale.
GEN 11:6 Ye khuri: “Moone! Atthu apa amoteru, ooshi anttakhula luuka moote. Eti arettiyeeyo eetta waaza, khaavo anttelaaye owaakarawela etile awaziyeeyo.
GEN 11:7 Nlaweni niishukhe navirikanise luuka anttakhulaaye yoori ahisala asiilana mmote na nzaawe.”
GEN 11:8 Ethiito, khukaraweleya ojekiwa sitati etile, Nnyizinku khuwaamwazela olumwenku wooshi.
GEN 11:9 Ti eto sitati etile khutthajiwa nzina la “Babeeli”, mwaasa wa Nnyizinku ovirikanisa luuka ya anaatamu ooshi. Attaapho, Nnyizinku khuwaamwazela olumwenku wooshi.
GEN 11:10 Eti peewu ya Sheemu. Sheemu afiiyeevo nyaakha miiya khunvokola mwanawe Arifwakisaati, nyaakha miwiri paata ya nnyeri ovira.
GEN 11:11 N'onvokola Arifwakisaati, eekhaliye nyaakha miiya thaanu, khuwaavokola theenya aana aalume na aakha.
GEN 11:12 Arifwakisaati afiiyeevo nyaakha talaathiini na mithaanu, khunvokola Sheela.
GEN 11:13 Paata yonvokola Sheela, eekhaliye nyaakha miiya nne na mittatthu, khuwaavokola theenya aana aalume na aakha.
GEN 11:14 Sheela afiiyeevo nyaakha talaathiini khunvokola Heebere.
GEN 11:15 N'onvokola Heebere, eekhaliye nyaakha miiya nne na mittatthu, khuwaavokola theenya aana aakha na aalume.
GEN 11:16 Heebere afiiyeevo nyaakha miiya nne na talaathiini khunvokola Peleekhi.
GEN 11:17 N'onvokola Peleekhi, eekhaliye nyaakha miiya nne na talaathiini, khuwaavokola theenya aana aalume na aakha.
GEN 11:18 Peleekhi afiiyeevo nyaakha talaathiini khunvokola Reewu.
GEN 11:19 N'onvokola Reewu, eekhaliye nyaakha miiya piiri na tiisiya, khuwaavokola theenya aana aalume na aakha.
GEN 11:20 Reewu afiiyeevo nyaakha talaathiini na miwiri khunvokola Serukhi.
GEN 11:21 N'onvokola Serukhi, eekhaliye nyaakha miiya piiri na sapa khuwaavokola theenya aana aakha na aalume.
GEN 11:22 Serukhi afiiyeevo nyaakha talaathiini khunvokola Nahoori.
GEN 11:23 N'onvokola Nahoori, eekhaliye nyaakha miiya piiri khuwaavokola theenya aana aalume na aakha.
GEN 11:24 Nahoori afiiyeevo nyaakha eshiriini na tiisiya khunvokola Teera.
GEN 11:25 N'onvokola Teera, eekhaliye nyaakha miiya na khumi na tiisiya, khuwaavokola theenya aana aalume na aakha.
GEN 11:26 Teera afiiyeevo nyaakha sapiini, khunvokola Eburamu, Nahoori na Hara.
GEN 11:27 Eti peewu ya Teera. Teera khunvokola Eburamu, Nahoori na Hara. Hara khunvokola Loothi.
GEN 11:28 Hara khufwa sitati ya Wuuri, nti wa Babilooniya tuniya aavokoliweewo, ila papaawe khusala ari haayi.
GEN 11:29 Eburamu na Nahoori khuloola. Muukha wa Eburamu aari wiitthiwa Suhuriiya, na-ye muukha wa Nahoori nzina lawe aari Miilika, mwaana wa Hara, aarina mwaana nkina theenya aari wiitthiwaaye Ishika.
GEN 11:30 Ila Suhuriiya khaarina aana mwaasa woohiina mavokozi.
GEN 11:31 Teera khulankha sitati ya Wuuri, nti wa Babilooniya, eettaka Kanaani. Alawaka khunthuula mwanawe Eburamu na ntuuluwe Loothi, mwaana wa Hara, vamote na nkhwewe Suhuriiya, muukha wa Eburamu. Ila afiiyeevo sitati ya Harani khuhivikani, khwiikhala ottuukho.
GEN 11:32 Teera khufwa Harani arina nyaakha miiya piiri na mithaanu.
GEN 12:1 Siikhu moote, Nnyizinku khumuuza Eburamu araka: “Olikhe tuniya yawo, na ajamaazo, na vaje wa apapazo olawe tuniya kinttelaaye wuuthoonyeza.
GEN 12:2 Kinteela wuuretta wiiya paapa wa peewu ya waatta, kinteela wuuparikhiya na onteela wiiya woojuwanikha, kinteela owaaparikhiya atthu akina mwaasa wa weeyo.
GEN 12:3 Kiniwaaparikhiya apale anuuparikhiyaaye, na kininlaani otule anuulaanaaye. Khwa weyo enteela wiiya zooparikhiyiwa khapila zooshi za voolumwenku.”
GEN 12:4 Eburamu khulankha khusala alawa nkhama etthiipo Nnyizinku anrumiyeezo. Ye aalawiye vamote na Loothi, wakathi aaliiyeewo Harani aari oretta arina nyaakha sapiini na mithaanu.
GEN 12:5 Khunthuula muukhaawe Suhuriiya na Loothi mwaana wa ttwiiye, na mali zawe zooshi aariinaazo, vamote na amwiitthwaana awe aawaapatthiyeeyo Harani, khusala alawa tuniya ya Kanaani. N'oofiya tuniya ya Kanaani,
GEN 12:6 ye khuvira eettettaka tuniya aya etile, khulawa mpakha Shekemu, phantte ya Moore ohali waariiwo muutthi nwulweene. Wakathi aya opule Akanaani aari oretta eekhalaka tuniya ethiitile.
GEN 12:7 Nnyizinku khunteela Eburamu, khumuuza yoori: “Tuniya eti kinteela winkha peewu yawo”. Aphano Eburamu khunjekela alitaari Nnyizinku attaaphale.
GEN 12:8 Eeshiyeevo, khusala eetta phantte ya kusini onyaako wa malawa-juwa ya Beetele. N'oofiya onyaako okhule, khweemesa heema yawe. Beetele yaari okhu lintupweelaawo njuwa, Aayi yaari okhu lintthamuwaawo njuwa. Ye khunjekela alitaari Nnyizinku khwaaputu nzina la Nnyizinku.
GEN 12:9 Aphano, ye khusala avira alawaka mpakha Nikeepu, phantte ya kusini ya Kanaani.
GEN 12:10 Tuniya ya Kanaani yaapuwiyewo jala ya waatta, aphano Eburamu khulankha khusala alawa tuniya ya Misuri yoori eekhalewo siikhu vattitthiiru.
GEN 12:11 Asaleelaka ofiya, khumuuza muukhaawe Suhuriiya yoori: “Osiileze, miiyo kajuwacha yoori weeyo o muukha wooshapweya.
GEN 12:12 Amisuri n'oowoona anttela olupa yoori weeyo o muukhaaka, antta okuula yoori weeyo osale na-yo.
GEN 12:13 Amana wuuzeliwa olupe yoori nlupwaaka, ahikuule na akikhole saana mwaasa wa weeyo.”
GEN 12:14 Wakathi Eburamu afiiyeevo, Amisuri khumoona Suhuriiya yoori aari muukha wooshapweya channu.
GEN 12:15 Mifwalume za Firawuuna, amooniyeevo muukha otule, khulawa omuuza Firawuuna yoori amoona muukha wooshapweya. Pi apho khunthuula khunlawana wa Firawuuna.
GEN 12:16 Eburamu aakholiwe saana ti Firawuuna mwaasa wa muukha otule, khwinkhiwa pwittipwitthi, mompe, amwiitthwaana aalume na aakha, apuuru na khavalo.
GEN 12:17 Ila Nnyizinku khunhukhumu Firawuuna, khuntiisela pala ya waatta na ajamaaze, mwaasa wa Suhuriiya muukha wa Eburamu.
GEN 12:18 Aphano, Firawuuna khunkhuwelisa Eburamu, khumuuzela yoori: “Mwaasa aya niini okirettelaka toono? Wahaakuuziye yoori otu muukhaawo?
GEN 12:19 Khi apho waari olupaaye yoori ti nlupuwo? Mwaasa wa weeyo ori nlupuwo, ti eto yaakipatthisiyeeyo onrala. Apho muukhaawo otu, onthuule olawe!”
GEN 12:20 Aphano Firawuuna khuwaaruma atthu awe omperekha Eburamu yoori aleemo mmuti mphule na muukhaawe na vitthu zawe zooshi.
GEN 13:1 Aphano Eburamu khulaawo Misuri khweetta phantte ya kashikhazini khulawa mpakha Nikeepu, ye na muukhaawe na vitthu zawe zooshi, vamote na Loothi.
GEN 13:2 Eburamu aari thaajiri nwulweene. Aarina nyama za waatta, na feeta na thahapu.
GEN 13:3 Ye khulaawo Nikeepu, khulawa phantte ya kashikhazini ajeettettelaka wakhula phantte mpakha nti wa Beetele, attaaphale eemesiyeevo heema yawe omwanzo, nakatthi-nakatthi ya Beetele na Aayi.
GEN 13:4 Attaaphale anjekiyeevo alitaari, ye khwaaputu nzina la Nnyizinku.
GEN 13:5 Na-ye Loothi otule aari weettettanaaye Eburamu, aarina pwittipwitthi, mompe na heema za waatta.
GEN 13:6 Khayaari owaheya wiikhala vamote mwaasa yoori nti opule khawaarina tthuttu yoofiyela ojisa nyama zaya.
GEN 13:7 Pi apho, khupuwa onyakulisana amakhampuzi a Eburamu na amakhampuzi a Loothi. Wakathi aya opo Akanaani na Aperizi aari oretta eekhalaka nti otthuupule.
GEN 13:8 Eburamu khumuuza Loothi yoori: “Ohiiyevo ohisiilani miiyo na-weyo, wala amakhampuzi aka na awo, mwaasa yoori ojama etthu mmote.
GEN 13:9 Tuniya yooshi khiri mmakhono mwawo? Nlawe nimwazeyane, othawule phantte ontakhaaye olawa. Weeyo weettaru nkhono-nkha, miiyo kintta nkhono-nlume, weettaru nkhono-nlume miiyo kintta nkhono-nkha.”
GEN 13:10 Loothi khulansa maasho awe khoona nttapo la muuttho Yorotaani lihiniishaaye maati liri looripelela mpakha nti wa Zowaari. Nttapo ntthile laari nkhama woorotha wa Eeteni, na loolattanana tuniya ya Misuri. Wakathi aya opo Nnyizinku aarettiye ahinapweche nti wa Sotooma na Komoora.
GEN 13:11 Aphano, Loothi khuthawula nttapo la Yorotaani, khumwazeyana na Eburamu, khusala alawa phantte ya malawa-juwa.
GEN 13:12 Eburamu khusala eekhala tuniya ya Kanaani, Loothi khweemesa heema zawe waattamana na Sotooma, kharipu na sitati za nkerekhere wa nttapo la Yorotaani.
GEN 13:13 Ila atthu a Sotooma aari ootakhala rooho, aari annya-twampi ooziti mmakhono wa Nnyizinku.
GEN 13:14 Paata ya Loothi olawa, Nnyizinku khumuuza Eburamu araka: Olanse maasho awo attaapho oriivo, weekese kashikhazini na kusini, na okhu lintthamuwaawo njuwa mpakha lintupweelaawo.
GEN 13:15 Tuniya eto yooshi onoonaaye kinteela owinkha weeyo na peewu yawo khwa mileele.
GEN 13:16 Kinteela waattisa peewu yawo nkhama mishaka za voolumwenku, nkhama etthiipo ahinteelaaye wiiyavo ntthu wa waalaka mishaka za voolumwenku, na peewu yawo khinteela waalakeya.
GEN 13:17 Olankhe ozukulele tuniya eti woone olepa waya na owula waya, mwaasa yoori kinttela owinkha weeyo.
GEN 13:18 Aphano Eburamu khuthamisa heema zawe, khulawa khwiikhala aphale zaariivo miitthi miwulu-miwulu nti wa Manre sitati ya Heporooni. Attaaphale ye khunjekela alitaari Nnyizinku.
GEN 14:1 Wakathi aya opo Amirafeele aari mfwalume wa Shinaari, Ariyookho mfwalume wa Elazaari, Ketorilameeri mfwalume wa Elamu, na Titaali mfwalume wa Koyiimu,
GEN 14:2 khulankhaza olawa wuumanana viittha Peera mfwalume wa Sotooma, Piirisha mfwalume wa Komoora, Shinaapu mfwalume wa Aatima, Shemeepere mfwalume wa Zeboyimu, na mfwalume wa sitati ya Peela, yaari wiitthiwaaye Zowaari.
GEN 14:3 Afwalume apa athaanu khuwaakusanya anajanka aya nttapo la Siitimu (liiyiyeeyo ntthatta la maati majiphwaani).
GEN 14:4 Mfwalume Ketorilameeri, aawaashinttiye afwalume apale athaanu khwa nyaakha khumi na miwiri, ila mwaakha wakhuumi na ttaatthu aya khunzukuluwelaza.
GEN 14:5 Mwaakha wakhuumi na nne Ketorilameeri khuta vamote na afwalume apale aaphakanyeyaniyeeyo, khuwaashintta Arefayi o'Ashiteroothi-Karinayimu, Azuuzimu o'Haamu, na Aheemi o'Shave-Kiriyatayimu.
GEN 14:6 Theenya khuwaashintta Ahoori omwaako wa Seyiiri, khuwiikarisa mpakha Paraani ohali yaaziyeewo yaara.
GEN 14:7 Arutaka khuviraza Kateeshi waari wiittheliwakaawo Emishipathi, khuwaattapwattha atthu ooshi a nti wa Amalekiita na theenya Amoori aari wiikhalaaye nti wa Hazaazoni-Tamara.
GEN 14:8 Aphano khulankha mfwalume wa Sotooma, mfwalume wa Komoora, mfwalume wa Atima, mfwalume wa Zeboyimu, na mfwalume wa sitati ya Peela (eti yaari wiitthiwaaye Zowaari), khulankha olawa wuumanisa viittha nttapo la Siitimu.
GEN 14:9 Aari wuumanaza na Ketorilameeri mfwalume wa Elamu, Titaali mfwalume wa Koyiimu, Amirafeele mfwalume wa Shinaari, na Ariyookho mfwalume wa Elazaari. Aari afwalume athaanu aari wuumananaaye afwalume wane.
GEN 14:10 Nttapo la Siitimu laarina milipu za waatta za piriniisi. Wakathi aari otthiraavo afwalume a Sotooma na Komoora, anajanka aya eetta okwela mmilipu, apale akinoko aya khutthirela nnyaako.
GEN 14:11 Afwalume apale wane aashinttiyeeyo khuthuula maali zooshi za Sotooma na Komoora na vitthu-zooja zaya khulawaza.
GEN 14:12 Na theenya khunthuula Loothi, mwaana wa ttwiiye Eburamu na mali zawe zooshi, mwaasa aya ye aari wiikhala Sotooma.
GEN 14:13 Aarivo mwinyi mmote oosurukhiyeeyo, ye khulawa khumweeleza zooshi Eburamu Mwiibereewu, aari wiikhalaaye kharipu na miitthi miwulu-miwulu za Manre Mmori. Manre na attwiize, Sikhoole na Aneeri, aari atthu oosiilana na Eburamu.
GEN 14:14 Asiiliyeevo Eburamu oriwa ntuuluwe akholiwa, khuwaathuula alume miiya ttatthu na khumi na wanaane aawaakhupaliyeeyo, oovokoliwa vaje vawe, khusala aweekarisa afwalume apale wane mpakha nti wa Daani.
GEN 14:15 Ye khuwaawanya alume apale khuntti-khuntti, khuumanisa viittha osikhu mpakha owaashintta maatuwi aya, khuweekarisa mpakha nti wa Hoopa, phantte ya kashikhazini ya Tamaashiku.
GEN 14:16 Khuwaanyakanya maali zooshi aathuuliyeeyo, khunthuula Loothi ntuuluwe na mali zawe, vamote na aakha na atthu akinoko aakholiweeyo khuwaarutisa.
GEN 14:17 Wakathi Eburamu anshinttiyeevo mfwalume Ketorilameeri na afwalume aaphakanyeyaniyeeyo, mfwalume wa Sotooma khusala alawa ompokherela nttapo la muuttho Shaawe liniittheliwaaye “Nttapo la Mfwalume”.
GEN 14:18 Aarivo mfwalume wa nti wa Salemu, aari wiitthiwaaye Melikiseetekhi. Khutiisa phaawu na viinyu. Ye aari haakhimu wa tiini ya Nluku Nwulu wa Pinkuuni,
GEN 14:19 khumparikhiya Eburamu araka: “Aparikhiyiwe Eburamu ti Nluku Nwulu wa Pinkuuni, otu ompiye pinku na vathi.
GEN 14:20 Woottitthimisiwa eeye Nluku Nwulu wa Pinkuuni, otu awinkhiyeeyo owaashintta maatuwi awo.” Aphano, Eburamu khulaza lifunku lakhuumi khwa zooshi epile aataniyeezo, khumwinkha Melikiseetekhi.
GEN 14:21 Mfwalume wa Sotooma khumuuza yoori: “Miiyo okinkhe atthu paasi. Maali zooshi osalane weeyo.”
GEN 14:22 Eburamu khunjipu mfwalume araka: “Kalansa makhono aka kinlanselaka Nnyizinku, Nluku Nwulu wa Pinkuuni ompiye pinku na vathi,
GEN 14:23 na kinlapha yoori akinsalana hatha etthu yaawo, wala luuzi wala nliiza wa jampali, ohiri nawiikhala, olupa yoori ‘Eburamu kanreelisa’.
GEN 14:24 Miiyo khina etthu moote kintakhaaye, yoohiiyi etile ajiiye atthu aka. Ila apale aaphakanyeyiyeeyo na-miyo, Aneeri, Sikhoole na Manre, apa ana ya wiiyana lifunku laya”.
GEN 15:1 Paata ya vitthu epile, Nnyizinku anttakhulaniye Eburamu nkatthi wa ezimu amuuzaka yoori: “Eburamu ohoove! Miiyo ki namwaakisa awo, na tthuvo yawo enteela wiiya yooziti owula.”
GEN 15:2 Eburamu khujipu: “Mbwanaaka Nnyizinku ontakha okinkha-ni na miiyo akina hatha mwaana wa waarithi aka? Antakhaaye orithi vaje vaka ti Elizeeri wa Tamaashiku.
GEN 15:3 Khukinkheeni mwaana; apho, karumeya wa vaje vaka ti ye anttelaaye orithi vitthu zaka.”
GEN 15:4 Aphano Nnyizinku khunjipu: “Namarithi vitthu zawo khanttela wiiya oto, ila mwaana woovokoliwa ti weyo ti anttelaaye orithi.”
GEN 15:5 Khunsarulamo nheema mwawe khumuuza yoori: “Weekese otulu, waalake matthottowa nkhama anaalakeya. Peewu yawo enteela wiiya etthiipo.”
GEN 15:6 Ye khumwaamini Nnyizinku, na-ye khukhupaliwa ti Nnyizinku wiiya ntthu wa shariya.
GEN 15:7 Nnyizinku khumuuza Eburamu theenya: “Miiyo ki Nnyizinku kuulaziyeeyo Wuuri nti wa Babilooniya yoori kiwinkhe tuniya eti orithi.”
GEN 15:8 Eburamu khumuuzela yoori: “Oo Mbwanaaka Nnyizinku, kihakikhi toovi yoori kinteela orithi tuniya eti?”
GEN 15:9 Nnyizinku khujipu: “Okitiisele mwaana wa mompe, wa puuzi, na wa pwittipwitthi, zooshi za wiiyana nyaakha mittatthu, na theenya likhoko na jiwa moote”.
GEN 15:10 Ye khutiisa nyama epile zooshi, khusala ashija vakatthi wakhula nyama n'oothata wakhula erikitthili omaasho wa erikitthili kiina yaya. Ila likhoko na jiwa khuhishiji vakatthi.
GEN 15:11 Mirepo khusala ziishukhela mphule zaariimo nyama epile zooshijiwa, ila Eburamu khusala eekara.
GEN 15:12 Njuwa leettelaka otupweela, Eburamu khunkhola osikizi wa waatta khusala oona yiiza ya waatta na woova.
GEN 15:13 Aphano Nnyizinku khumuuza yoori: “Ojuwache yoori peewu yawo enteela omaka nti woohiiyi waaya, enteela orettiwa omwiitthwaana na ohoochiwa nyaakha miiya nne.
GEN 15:14 Ila miiyo kinteela owaahukhumu atthu apo anttelaaye oretta omwiitthwaana, na enteela olaawo na maali za waatta.
GEN 15:15 Weeyo onttela wuuluvala ori wooparikhiyiwa na onteela ofwa na heeri.
GEN 15:16 Paata yoovira nyaakha epo miiya nne, peewu yawo enteela orutela tuniya eti, amana Amoori apa aniikhalaaye nttumphu atepa oretta vitthu zootakhala, miiyo kinteela owaahukhumu na kiweekare.”
GEN 15:17 Litupweeliyeevo njuwa, waariipiye vathi khupuwa loosi la njocho na mweeke wa moottho khuvira vakatthi wa virikitthili za nyama epile zaashijiweezo.
GEN 15:18 Siikhu ethiitile, Nnyizinku khuretta wahati na Eburamu, khumuuza yoori: “Tuniya eti kinteela winkha peewu yawo, waaza muuttho wa Misuri mpakha muuttho nwulu oniitthiwaaye Efwarathi,
GEN 15:19 otthaamo nti wa Akeni, wa Akenizi, wa Akatemoni,
GEN 15:20 wa Ahiiti, wa Aperizi, wa Arefayi,
GEN 15:21 wa Amoori, wa Akanaani, wa Akirikashi na wa Ayepuzi.”
GEN 16:1 Wakathi aya opo, Suhuriiya muukha wa Eburamu khaari ovokola. Ye aarina njaazi mmote wa Misuri aari wiitthiwaaye Hajira.
GEN 16:2 Siikhu moote, Suhuriiya khumuuza mannawe Eburamu yoori: “Nnyizinku khanikinkha mwaana, apho orapalelane njaazi aka, khinjuweya kimpatthaka mwaana khwa ye.” Asiiliyeevo toole, Eburamu khukhupalela mattakhuzi apale a muukhaawe.
GEN 16:3 Suhuriiya khunthuula njaazi otule khumwinkha Eburamu yoori eeye muukhaawe waphiiri. Vitthu epi zarettikhana Eburamu arina nyaakha khumi eekhalaka tuniya ya Kanaani.
GEN 16:4 Eburamu khurapalela na Hajira, ye khwiiya wa wiimittha. Ooniyeevo yoori eemittha khwaaza ontwayifu nhano awe.
GEN 16:5 Suhuriiya khumuuza Eburamu yoori: “Miiyo kanthuula njaazi aka khuwinkha, ye n'oojuwa yoori eemittha aaza okitwayifu. Okitwayifusha opu anikirettelaaye Hajira, khahi etthu ya shariya, ti weyo onintakhelaaye. Nnyizinku ti aniphuke miiyo na-weyo.”
GEN 16:6 Eburamu khunjipu Suhuriiya yoori: “Ye nalelo njaazi awo, onrettele khwa nanna ontakhaazo.” Aphano Suhuriiya khwaaza ontarawu Hajira mpakha khufiyelela otthira.
GEN 16:7 Nlayikha la Nnyizinku khunsikana Hajira n'yaara eemeliye kharipu na naattuuttu wa maati aattameliyeeyo tarikhi ya Shuuri.
GEN 16:8 Nlayikha ntthile khumuuzela liraka: “Weeyo Hajira njaazi wa Suhuriiya! Onlankha vayi wala ontta vayi?” Ye khujipu: “Keetta otthira vaje wa nhano aka Suhuriiya othuuto.”
GEN 16:9 Nlayikha khumuuza yoori: “Orutele wa nhano awo, wanshututele.”
GEN 16:10 Khumuuza theenya yoori: “Kinteela waattisa peewu yawo khwa nanna ehinaalakeyaaye.
GEN 16:11 Apho wiimitthiyeevo onteela ompattha mwaana ontthaje nzina la Esumayila, mwaasa yoori Nnyizinku oona ohoowa wawo.
GEN 16:12 Ye onteela wiiya woohisiilaneyi nkhama nyama ya ntthuttu; onteela wiiya muumani wa atthu ooshi, na-yo anteela wuumana na ye, na onteela wiiya wa waattuwana na attwiize.”
GEN 16:13 Hajira khujuuzela mwennyeweru yoori: “Kamoona Nluku, nalelo kiri haayi?” Aphano khunkhuwelela Nnyizinku nzina liriina maana a “Nluku anikoonaaye”.
GEN 16:14 Pi apho nlipu aya opule oniittheliwa “Peeri-Lahayi-Rooyi”. Nlipu aya opu ori enakatthi-nakatthi ya Kateeshi na Peereti.
GEN 16:15 Hajira khumpattha mwaana wa Eburamu. Eburamu khuntthaja mwaana otule nzina la Esumayila.
GEN 16:16 Wakathi Hajira ampatthiyeevo mwaana otule, Eburamu aarettiye arina nyaakha thamaaniini na sitha.
GEN 17:1 Wakathi Eburamu afiiyeevo nyaakha tiisiini na tiisiya, Nnyizinku anteeliye khusala amuuza araka: “Miiyo ki Nluku Woowahi Zooshi: weettettele mwentto kintakhaaye miiyo, wiiye ntthu nkemaani,
GEN 17:2 yoori kirette wahati miiyo na-weyo, na kinteela owinkha peewu ya waatta.”
GEN 17:3 Aphano Eburamu khukokhora khulawa sijita, Nluku khusala anttakhulana ye araka:
GEN 17:4 “Wahati opu kinrettanaaye weeyo, phantte yaka kiniwaahiti yoori onteela wiiya paapa wa khapila za waatta.
GEN 17:5 Waaza leelo nzina lawo khahiyo Eburamu, ila Eburahiima ti linttelaaye wiiya nzina lawo, mwaasa yoori kinttela wuuretta opaapa wa khapila za waatta.
GEN 17:6 Kinteela waattisa channu peewu yawo, khwa weyo kinretta khapila za waatta, akinoko aya anteela wiiya afwalume.
GEN 17:7 Wahati opu kinrettaaye na-weyo na peewu yawo, onttela wiiya wa mileele; Miiyo ki Nluku awo na wa peewu yawo.
GEN 17:8 Kinteela owinkha tuniya eti oniikhalaaye, weeyaru pure mmalapo. Tuniya yooshi ya Kanaani kinteela winkha peewu yawo khwa mileele, na-miyo kinteela wiiya Nluku aya.”
GEN 17:9 Nluku khurutela omuuza yoori: “Phantte yawo ona yooshututela wahati aka, weeyo na peewu yawo khwa mileele.
GEN 17:10 Wahati onttelaaye oshuka, waaka Miiyo na-weyo na peewu yawo pi opu: wakhula mwaana wanlume ona yookhiriyisiwa.
GEN 17:11 Okhiriya waya opo, alama ya wahati aka miiyo na-mweyo.
GEN 17:12 Wakhula mwaana anvokoliwaaye wanlume vakatthi wa peewu yawo, n'oofiya siikhu yanaane ona yookhiriyisiwa, hatha nkhama karumeya woovokoliwa vaje vawo, mpakha amwiitthwaana apale amalapo a wuuzanyiwa na apale oohiiyi a peewu yawo.
GEN 17:13 Hatha nkhama pi apa oovokoliwa vaje vawo mpakha apa a wuuzanyiwa ana yookhiriyisiwa. Alama eti yookhiriya vamwiili venu, enthoonyeza wahati aka na-mweyo khwa mileele.
GEN 17:14 Otule ahinttelaaye okhiriya eekariwemo muumathi mwenu, mwaasa yoori akattha wahati aka.”
GEN 17:15 Nluku khumuuza Eburahiima theenya yoori: “Muukhaawo khanteela wiitthiwa theenya Suhuriiya, ila nka eetthiwaka Suhura.
GEN 17:16 Kinteela omparikhiya na kimwinkhe mwaana wawo; khweele, miiyo kinimparikhiya na onteela wiiya maama wa khapila za waatta, afwalume anteela opuwa khwa ye.”
GEN 17:17 Aphano Eburahiima khukokhora khusijiti, ila khusala ajitheyela nroho mwawe ajuuzelaka toono: “Nlume wa nyaakha miiya eeyane mwaana? Khi Suhura ariina nyaakha tiisiini ate ampatthe mwaana?”
GEN 17:18 Eburahiima khumuuza Nluku: “Omparikhiye Esumayila, eeye namarithi aka.”
GEN 17:19 Ila Nluku khunjipu: “Miiyo kiniwuuza khweele yoori, muukhaawo Suhura onteela ompattha mwaana, ontthaje nzina la Esiyaakha. Kinteela oshuka wahati aka na-ye, na peewu yawe entaaye khwa mileele.
GEN 17:20 Kasiila oveka wawo khwa Esumayila. Kinteela omparikhiya na kinteela omwinkha peewu ya waatta. Ye onteela wiiya paapa wa mifwalume khumi na awiri, khwa ye enteela opuwa theenya khapila ya waatta.
GEN 17:21 Ila wahati aka kinteela oshuka mmakhono wa Esiyaakha, otu anttelaaye ovokoliwa ti Suhura wakathi otthuupu wa mwaakhani.”
GEN 17:22 Nawiisha ottakhula na Eburahiima, Nluku khulawa.
GEN 17:23 Siikhu ethiitile, Eburahiima khunthuula mwanawe Esumayila na ooshi aavokoliweeyo vaje vawe na apale aawuuzanyiyeeyo. Khulawa owaakhiriyisa, nkhama etthiipo Nluku aamuuziyeezo.
GEN 17:24 Wakathi aakhiriyaziyeevo, Eburahiima aarettiye arina nyaakha tiisiini na tiisiya
GEN 17:25 na mwanawe Esumayila aari oretta arina nyaakha khumi na mittatthu.
GEN 17:26 Eburahiima na mwanawe aakhiriyiye siikhu moote,
GEN 17:27 vamote na apale aavokoliweeyo owawe, mpakha amalapo apale a wuuzanyiwa.
GEN 18:1 Siikhu moote, Nnyizinku aatiiye ottakhula na Eburahiima vahali zaariivo miitthi miwulu-miwulu za Manre. Yaari elukuluku na yaarivo haari ya waatta, Eburahiima aarettiye eekhaliye vanlako wa heema yawe.
GEN 18:2 Ye khulansa maasho awe khuwoona alume attatthu eemeliye kharipu. Aphano awooniyeevo khulankhavo aphale vaya, khusala awaatthirela. Awaafiyeliyeevo khukokhora khulawa sijita.
GEN 18:3 Khuwooza yoori: “Mbwanaaka, nkhama kinaaye sehemu mmakhono mwenu, kinuuvekelani yoori mwihivikane vaje vaka, mwihivumuleeni vattitthiiru.
GEN 18:4 Mwiikhale vamwiivuuli wa muutthi opu mwivumule, antta otiisiwa maati vattitthiiru moose moolweenu,
GEN 18:5 wiiya mwavira vaje wa karumeyeenu, kintta weettela etthu ttiitthiiru mwisapeye, yoori mwipatthe kuvu yoorutela safwari yenu.” Yo khujipu yoori: “Kemaani! Erettikhane khwa nanna onlupaazo.”
GEN 18:6 Aphano Eburahiima khutthira eettaka nheema mwawe khumuuza Suhura yoori: “Othuule miphimo miwulu mittatthu z'oofu wa tiriku yooshapweya, okhatte wooche phaawu wa waakuvavo.”
GEN 18:7 Nawiisha, khutthirela onzizi wawe khunthuula mwaana wa mompe woonenevacha, khumwinkha karumeyaawe yoori anshije na amwiipikhe wa waakuveyavo.
GEN 18:8 Eburahiima khuthuula mompe etile yawiipikhiwa saana, manteeka na leethi khuwenkha aletto apale, ye khweemela nshini wa muutthi kharipu na aletto apale eettaka oja.
GEN 18:9 Yo khumuuzela: “Khi muukhaawo Suhura ori vayi?” Eburahiima khujipu: “Ori nheema mpho.”
GEN 18:10 Mmote wa yo khuri: “N'oovira mwaakha, kinrutela vaje vawo attaapha, na muukhaawo onretta ampatthiye mwaana.” Suhura aari oretta ari vanlako wa heema onyoko wa Eburahiima, eettaka osiila mattakhuzi apale aari ottakhuliwaaye.
GEN 18:11 Eburahiima na Suhura aari a wuuluvala na kuvu, na Suhura zanvireliye siikhu zoovokola.
GEN 18:12 Ye khusala ajitheyela nroho mwawe otthwe ajuuzelaka yoori: “Khwa nanna eti nuuluvaliyeezo miiyo na mbwanaaka, kinteela wiiyana furaha yaya eto?”
GEN 18:13 Aphano Nnyizinku khumuuzela Eburahiima yoori: “Muukhaawo ontheya-ni? Wala alupisiwa-ni yoori ‘kinteela ompattha toovi mwaana kuuluvaliye?’
GEN 18:14 Ewaapho etthu yoolipa mmakhono wa Nnyizinku? Nkhama etthiipo kilupiyeeyo yoori n'oovira mwaakha kinta wuuthotola, wakathi aya otthuupo Suhura onteela ompattha mwaana wanlume.”
GEN 18:15 Mwaasa wa woova Suhura khusala akhana yoori: “Akitheyeeni.” Ye khuri: “Khahiye toowo, khweele weeyo watheya.”
GEN 18:16 Wakathi alume apale attatthu alankhiyeevo eeshukhelaka nti wa Sotooma, Eburahiima alankhiye khusala awaaperekha alawaka oleezanana.
GEN 18:17 Aphano Nnyizinku khujuuzela mwennyeweru yoori: “Akinta kimuuze Eburahiima etthu kinttelaaye oretta?
GEN 18:18 Khweele-khweele Eburahiima onteela wiiya paapa w'oomathi nwulweene woowahi; khwa ye, kinteela oparikhiya khapila zooshi za voolumwenku.
GEN 18:19 Maana miiyo kanthawula ye yoori awaanozele aanaawe na omathaawe, weettettela saana tarikhi ya Nnyizinku, arettaka etile yiiyiye ya shariya na yoolotteya, yoori miiyo Nnyizinku kirette khwa Eburahiima etile kaahitiyeeyo.”
GEN 18:20 Nnyizinku khumuuza Eburahiima yoori; “Kinsiila nkhuwo yoori atthu a Sotooma na Komoora anretta vitthu zootakhala na twampi zaya pi zooziti.
GEN 18:21 Kineetta ottuukhu kilawe koone khiima za twampi epo anrettaazo nkhama khweele pi etthiipo kinsiilaazo, kinttela ohakikhi.”
GEN 18:22 Attaaphale, alume apale awiri khusala alawa Sotooma, ila Nnyizinku khusala ari vamote na Eburahiima.
GEN 18:23 Eburahiima khunsusela Nnyizinku khumuuzela yoori: “Onttela owooleela vamote anashariya na anapaathuli?
GEN 18:24 Khi amana eeyawo atthu hamusiini anashariya, ompwecha sitati etile? Khunteela owaaswaamihi mwaasa wa atthu apo hamusiini anashariya?
GEN 18:25 Ohiiye weeyo wooretta etthu nkhama eto, yoowuuleela vamote anashariya na anapaathuli. Khawaari oteela owaahukhumu anashariya mwaasa wa vitthu zoorettiwa pi anapaathuli. Weeyo o namaphuka w'oolumwenku wooshi, khunteela ophuka na shariya?”
GEN 18:26 Nnyizinku khujipu araka: “Amana kifiya Sotooma kiwaasikana anashariya hamusiini ari nsitati nttumphule, kinttela oswaamihi sitati yaya etile kiiswa ya yo.”
GEN 18:27 Eburahiima khurutela ottakhula araka: “Okiswaamihi na ruhusa kiriina yoottakhulana weeyo Mbwanaaka, keeyaru ottophe na fuutha.
GEN 18:28 Khi amana asaleelaka athaanu yoori afiyele hamusiini, onipwecha sitati etile mwaasa wa apa ansaleelaaye?” Mbwana khuri: “Amana kiwaasikana arupayiini na athaanu akimpwecha.”
GEN 18:29 Khumuuzela theenya; “Khi amana owaasikana arupayiini?” Mbwana khujipu: “Wala, akimpwechawo mwaasa wa apale arupayiini.”
GEN 18:30 Khuvira amuuzelaka theenya: “Mbwanaaka, ohikatipukhe amana kirutela ottakhula: khi amana owaasikana anashariya talaathiini?” Mbwana khuri: “Amana kiwaasikanawo talaathiini akinretta hatha etthu.”
GEN 18:31 Eburahiima khurutela olupa yoori: “Okiswaamihi na nthiti kiriinaayo la wuuttakhulana Mbwanaaka, khi amana owaasikana anashariya eshiriini?” Ye khuri: “Akimpwechawo mwaasa wa anashariya apale eshiriini.”
GEN 18:32 Khulupa theenya Eburahiima: “Mbwanaaka, ohikatipukhe, kiniwuuzela swaafu moote ethiiti paasi; khi amana owaasikanawo anashariya khumi?” Ye khunjipu: “Akimpwechawo mwaasa wa anashariya apale khumi.”
GEN 18:33 Nawiisha Nnyizinku ottakhula na Eburahiima, khulankha khusala alawa. Na-ye Eburahiima khurutela owawe.
GEN 19:1 Malayikha apale mawiri khufiya Sotooma makaaripi, Loothi aarettiye eekhaliye vanlako wa sitati ethiitile, ye nawoona malayikha apale khusala athepeeza atthirelaka. N'oofiyela khukokhora khusijiti.
GEN 19:2 Khuwooza yoori: “Ambwana zaka kookholani moolu, kintakha mwisapuwe owaka miiyo karumeyeenu; moose moolweenu na mwilale, mwilawe meesho supuyeene.” Yo khujipu yoori: “Khinhithajiya, fweeyo ninwahi olala vaparasa veetakale.”
GEN 19:3 Loothi khuwaakhanyerela na kuvu mpakha yo okhupali olawa omaka owawe. Ye khurumisa wiipikhiwa etthu-yooja ya nnofu na khoochiwa phaawu yoohiina fwaramento, aletto apale khuja.
GEN 19:4 Ila ahinalawe olala, eetta ota alume ooshi a sitati ethiitile waaza attunkhulu mpakha mashaapu khuzukulela nyuupa ya Loothi.
GEN 19:5 Khusala anyakula ankhuwelaka Loothi araka; “Alume apa atiiyeeyo nnyupa mwawo mphu osikhu otthuupu ari vayi? Owaasarulele vaje apha, fweeyo nintakha niwaalalane”.
GEN 19:6 Loothi khusaruwela vaje, khufuka nlako awe afukelaka onyoko wawe.
GEN 19:7 Khuwooza yoori: “Safwatali ajamaazaku; mwihirette etthu eto otakhala
GEN 19:8 Mweyo! Miiyo kinaaye aanaaka awiri ahiniwaajuwaaye alume. Kintta owinkhani atthaapo, mwiwaarettele wakhula etile mwintakhaaye. Ila mwihiwaarettele etthu yootakhala aletto apa ata nnyupa mwaka, na miiyo kina yoowiinanela.”
GEN 19:9 Yo khuri: “Oleevo apha! Weeyo o mmalapo mmuti mphu, ontakha ojinkhe ofwalume na mmuti mwetthu? Fweeyo nintta wuurettela vitthu zooziti epi naari otakhaaye owaarettela apo.” Aphano yo khunsukhuma Loothi, khusala asusela nlako awe yoori apwechaze.
GEN 19:10 N'ooretta toole, aletto apale khunkhola Loothi khumfutthela nnyupa khufuka nlako,
GEN 19:11 na khuwoola maasho alume apale a Sotooma aari vanlako wa Loothi. Waaza attunkhulu mpakha mashaapu khusala apapasela nlako khuhisala asikana.
GEN 19:12 Alume apale khumuuzela Loothi: “Onaaye ajaama akina nsitati mphu? Oleemo, owaathuule aanaawo, akhwewo, muukhaawo na ooshi apale eeyiye aawo,
GEN 19:13 mwaasa aya nateela opwecha sitati eti. Nnyizinku asiila nkhuwo nwulweene wa vitthu zootakhala anrettaazo atthu a Sotooma, apha aniruma yoori nite nipweche sitati yaya eti.”
GEN 19:14 Aphano ye khulawa owooza akhwewe, apale aari weettelaaye owaarala aanaawe yoori: “Mwileemo nsitati mphu, maana Nnyizinku onttela opwecha.” Ila akhwewe apale khusala oona nkhama nzaha.
GEN 19:15 Lifwajiri, malayikha apale khusala amuuza Loothi antumereraka yoori: “Olankhe nasaapi ethiiti, onthuule muukhaawo na aanaawo oowiiri mwileemo mphu. N'oohiretti toowo, amana etaka hukhumu nsitati mphu mweeyo mwintta ofwa.”
GEN 19:16 Khusala arupaza, malayikha apale khuwaakhola makhono, ye na muukhaawe na aanaawe oowiiri khuwaalawana othetekele, mwaasa wa Nnyizinku wiiyana huruma na-ye.
GEN 19:17 Paata yoolaziwamo nsitati mphule, nlayikha limote khumuuza yoori: “Tthira wuusuru ohaayi awo, na oheekese nyuma wala oheemele hatha vahali ohifiyeeni omwaako yoori ohipwetheye.”
GEN 19:18 Loothi khujipu; “Toowo wala safwatali ambwana zaka!
GEN 19:19 Wakirettela saana, khukoonela huruma venkivene, khuusuru ohaayi aka. Ila onyaako khu woolepawo, opwechiwa wa sitati eti ontta okisikana kihinafiye.
GEN 19:20 Kharipu apho ewaapho sitati ttiitthiiru, kinwahi otthirela ottuukho. Hatha nkhama yeetta opushuwa, mwikilikhe kitthirele ottuukho kuusurukhe.”
GEN 19:21 Nlayikha khujipu yoori: “Kakhupali eto ovekiyeeyo, akinteela opwecha sitati yaya eto olupiyeeyo.
GEN 19:22 Ila waakuve olawe nasaapi ethiiti, miiyo akinretta hatha etthu, weeyo ohifiyeeni ohali onttaawo.” Ti eto sitati yaya eto eniittheliwaaye Zowaari.
GEN 19:23 Njuwa litthamuwaka na-ye Loothi afiyaka nti wa Zowaari.
GEN 19:24 Aphano Nnyizinku khukwisa mawe a moottho otulu, akwiselaka Sotooma na Komoora.
GEN 19:25 Khupwecha sitati epile na miti zaattamananiyeeyo, na atthu aya apale aari wiikhalaamo na tthuttu yaya.
GEN 19:26 Ila muukha wa Loothi khuzukuluwa khweekesa onyoko ohali aari olankhaawo, khuthatuwa khwiiya sanamu ya mwiinyu.
GEN 19:27 Supuyeene Eburahiima aalankhiye khulawa puuro etile aari ottakhulanaavo Nnyizinku.
GEN 19:28 Khweekesa phantte ya Sotooma na Komoora na miti zooshi za shiini yaya etile, khusala oona loosi la waatta leettaka otthuwela mmuti mphule nkhama njocho lookhoziwa.
GEN 19:29 Nkatthi woopwecha sitati zooshi za tuniya etile, Nluku khufikhiri etile aavekeliweeyo ti Eburahiima, khumuusuru Loothi vakatthi wa pala yaarettikhaniyeeyo sitati etile aari wiikhalaaye.
GEN 19:30 Loothi eetta woova wiikhala Zowaari, khuthama na aanaawe oowiiri khusala eekhala omwaako. Oottaatthu khusala eekhala nlikurakuza.
GEN 19:31 Siikhu moote, mwanawe otu nwulu khumuuza otu nttiitthi yoori: “Papeetthu ooluvala na nti opu niriiyo khaamo alume oonirala yoori niwaapatthe aana, nkhama enrettikhanaazo olumwenku wooshi.
GEN 19:32 Nlawe nithuule viinyu ninnywise papeetthu ahapaliwe, niwahi orapalelana anivokolele aana, yoori peewu ya papeetthu ehiishe.”
GEN 19:33 Osikhu otthuupule khuthuula viinyu khunnywisa papaaya, mwaana otu nwulu aya khulawa khulalana papaawe. Papantthu woohijuwi wakathi arapaleliyeevo wala alankhiyeevo.
GEN 19:34 Mmeesho mwaya, otule nwulu khumuuza ttwiiye: “Taana osikhu karapalelana paapa, apho osikhu opu wa leelo nlawe ninhapalise na weeyo olawe warapalelane zwaamu yawo. Anivokolele aana yoori peewu ya papeetthu ehiishe”.
GEN 19:35 Osikhu otthuupule khumwinkha papaaya viinyu swaafu yaphiiri, na-ye otu nttiitthi aya khulawa khulalana, theenya papantthu khuhijuwi wakathi arapaleliyeevo wala alankhiyeevo.
GEN 19:36 Aana apale oowiiri khwiimittha erukulu ya papaaya.
GEN 19:37 Otu nwulu aya khumpattha mwaana wanlume khuntthaja nzina la Mowaabu, ye paapa wa Amowaabu apa ariiwo mpakha leelo.
GEN 19:38 Elottelanaka otule nttiitthi aya khumpattha mwaana wanlume khuntthaja nzina la Ben-Ami, ye paapa wa Amooni, apa ariiwo mpakha leelo.
GEN 20:1 Eburahiima aalankhiye Manre khulawa nti wa Nikeepu, khwiikhala enakatthi-nakatthi ya Kateeshi na Shuuri. Khuthamela theenya nti wa Kerari.
GEN 20:2 Ottuukhule, Eburahiima aalupiye yoori Suhura nlupuwe, khupe ari muukhaawe. Aphano Apimeleekhi mfwalume wa nti aya opule, khuruma weetteliwa Suhura, ye khunthuula.
GEN 20:3 Osikhu aya, Nluku khunteela Apimeleekhi khusala amuuza nkatthi wa jozi yoori: “Ontta ofwa mwaasa wa muukha otu onthuuliyeeyo, ye onaaye mannawe.”
GEN 20:4 Ila Apimeleekhi aari ahinarapalelane muukha otule, ye khujipu: “Mbwana, onttela okuula miiyo na atthu aka woohiivo hatha paathuli?
GEN 20:5 Ti Eburahiima aakuuziye yoori Suhura nlupuwe! Na Suhura khukuuza etthiipo yoori nlupuwe. Miiyo karetta eti na rooho y'ookemaani woohijuwivo etthu.”
GEN 20:6 Nluku khunjipu njozi nttumphule yoori: “Miiyo kajuwa yoori vitthu epi waretta na rooho y'ookemaani. Ti eto miiyo kiwiinaneliyeeyo yoori ohikikose, pi apho kihuutakheleeni onsapa muukha oto.
GEN 20:7 Apho, onrutisele mannawe muukha oto. Ye napiyu, ontta wuulompela yoori ohifwe, ila amana ohinrutiseli kiniwuuza khweele yoori ontta ofwa weeyo na zooshi epi ziiyiye zaawo.”
GEN 20:8 N'oolankha mmeesho mwaya supu, Apimeleekhi khuwaakhuwela mawaziiri awe khusala awooza epile aalotthiyeezo, yo khwiiya awoova channu.
GEN 20:9 Nawiisha, khuruma okhuweliwa Eburahiima khusala amuuzela yoori: “Niini eti oniretteliyeeyo? Kookosela-ni okikwiselaka paathuli ya twampi khuluyeene nkhama eti, miiyo na atthu aka? Etthu okiretteliyeeyo khinrettelaniwaka.
GEN 20:10 Woopuweliye niini okirettelaka vitthu nkhama epi?”
GEN 20:11 Eburahiima khunjipu: “Miiyo kaari woona yoori atthu a nti opu khanimoova Nluku, antta okuula mwaasa wa muukhaaka.
GEN 20:12 Na khweele phantte kiina nlupwaaka, mwaana wa paapa ila khahiyo mwaana wa maama. Ti nanna afiyeleliyeeyo wiiya muukhaaka.
GEN 20:13 Wakathi Nluku akilaziyeemo mmuti wa apapazaku, kaamuuziye muukhaaka yoori: ‘Safwatali kintta wuuvekela, wakhula vahali nimfiyaavo osala olupa yoori nlupwaaka’.”
GEN 20:14 Aphano Apimeleekhi khuthuula pwittipwitthi, mompe na amwiitthwaana aalume na aakha khumwinkha Eburahiima na theenya khunrutisela muukhaawe.
GEN 20:15 Apimeleekhi khuri: “Nti opu pu waaka ohiiyane shaakha, wiikhale wakhula vahali ontakhaavo.”
GEN 20:16 Khumuuza Suhura yoori; “Kamwinkha nlupuwo mizurukhu za feeta alufu, ajamaazo ooshi ajuwe yoori khutthekeeni hatha etthu, na ahiiyevo antakhaaye owaakanyerela.”
GEN 20:17 Nnyizinku aawaarettiye aakha ooshi a vaje wa Apimeleekhi yoori ahisala avokola, mwaasa wa epile zanrettikhaneliyeeyo Suhura muukha wa Eburahiima. Aphano Eburahiima khunvekela Nluku zwaamu ya Apimeleekhi, Nluku khunvonisa vamote na muukhaawe na akarumeyaawe aakha yoori asala avokola.
GEN 21:1 Paata ya toole, Nnyizinku khumparikhiya Suhura, khunrettela etile aamwaahitiyeeyo.
GEN 21:2 Suhura khwiimittha khumpattha mwaana wa Eburahiima ari wa wuuluvala, wakathi otthuupule Nluku aamuuziyeeyo.
GEN 21:3 Mwaana otule aavokoliweeyo ti Suhura, Eburahiima khuntthaja nzina la Esiyaakha.
GEN 21:4 Siikhu yanaane, Eburahiima khunthuula mwaana otule khulawa onkhiriyisa nkhama etthiipo Nluku anrumiyeezo.
GEN 21:5 Wakathi Eburahiima ampatthiyeevo mwanawe Esiyaakha, aarettiye arina nyaakha miiya.
GEN 21:6 Suhura khuri: “Nluku akinkha otheya, na atthu ooshi apale anttelaaye osiila anttela otheya vamote na-miyo.
GEN 21:7 Paani aari waakanyeraaye yoori Eburahiima aari oteela ompatthela mwaana Suhura? Na wuuluvala wawe, miiyo kampatthela mwaana!”
GEN 21:8 Mwaana otule khusala awula mpakha ofiyelela olikha nziwa. Alikhiyeevo nziwa mwaana otule, papaawe khuretta njampo la furaha.
GEN 21:9 Ila Suhura khumoona Esumayila mwaana wa Hajira mmisuri, otule aavokoliweeyo ti Eburahiima anveyisaka mwanawe.
GEN 21:10 Suhura khulawa omuuza Eburahiima yoori: “Omwiikare njaazi otule na mwanawe. Ye khanteela orithi vamote na mwanaka Esiyaakha.”
GEN 21:11 Eburahiima khwiiya woozinkireya na kuvu na mattakhuzi apale mwaasa wa Esumayila wiiya mwanawe.
GEN 21:12 Aphano Nluku khumuuza Eburahiima yoori: “Ohizinkireye mwaasa wa mwanawo na njaazi awo, osiileze etile aniwuuzaaye Suhura, mwaasa yoori peewu yawo enttela olankha vakatthi wa Esiyaakha.
GEN 21:13 Mwaana wa njaazi otule onteela wiiyana omathi wa waatta mwaasa yoori na-ye peewu yawo.”
GEN 21:14 Mmeesho mwaya, Eburahiima khuthuula phaawu na ttompwiyo ya maati, khunvikelisa Hajira khunleeza vamote na mwanawe. Yo khusala alawa ajeettettelaka n'yaara ya Beeresheba ahijuwaka ohali anttaawo.
GEN 21:15 Wakathi amwiisheliyeevo maati nttompwiyo, ye khunlikha mwanawe nshini wa muutthi.
GEN 21:16 Khulankha khulawa khwiikhala ohali woolepawo vattitthiiru na okhule aariiwo mwanawe, mwaasa yoori khaari otakha omoona mwanawe afwaka. Eekhaliye etthiipile, khusala alila.
GEN 21:17 Nluku khusiila theenya huula ya mwaana otule eettaka olila. Nlayikha la Nluku khukhuwa pinkuuni linkhuwelaka Hajira, khumuuza yoori: “Wakafilikhela-ni Hajira? Ohoove, Nluku asiila huula yawe mwaana oto alilaka vahali ariivo.
GEN 21:18 Olankhe onlanse mwanawo onkholele nkhono, phantte yawe kinteela waattisa omathaawe.”
GEN 21:19 Elottelanaka Nluku khunthoonyeza Hajira nlipu wa maati, khulawa khuttekhelela ttompwiyo yawe khunnywisa mwanawe.
GEN 21:20 Esumayila khusala awula mmakhono wa Nluku. Ye aari wiikhala n'yaara na aari njuwi wa weesa mattetthe.
GEN 21:21 Aari wiikhala n'yaara ya Paraani, mamaawe khumweekesela muukha wa Misuri khunlooza.
GEN 21:22 Wakathi aya opo, Apimeleekhi aalokoziwe ti Fikhoole namalokozela wa anajanka, khumuuza Eburahiima yoori: “Nluku ori vamote na-weyo khwa wakhula etile onrettaaye.
GEN 21:23 Nasaapi ethiiti olaphe khwa nzina la Nluku yoori khunteela okihata miiyo wala aanaaka ama otuulwaka, nkhama etthiipile kuuretteliyeezo zooshapweya, na-miyo okirettele etthiipo na mmuti mphu oniikhalaamo.”
GEN 21:24 Khujipu Eburahiima araka: “Miiyo kinlapha”.
GEN 21:25 Attaaphale Eburahiima khusala ajiliza mwaasa wa nlipu aanyakanyiweeyo pi akarumeyaawe Apimeleekhi.
GEN 21:26 Apimeleekhi khunjipu: “Miiyo akaajuwiyevo etthu na khawaakuuziye, kintta osiilaru nasaapi ethiiti.”
GEN 21:27 Aphano Eburahiima khuthuula pwittipwitthi na mompe khumwinkha Apimeleekhi. Oowiiri aya khusiilana.
GEN 21:28 Elottelanaka Eburahiima khuphakula pwittipwitthi sapa za nliphanko lawe.
GEN 21:29 Apimeleekhi khumuuzela yoori: “Pwittipwitthi epo sapa omphakulaaye maana aya niini?”
GEN 21:30 Eburahiima khujipu: “Okhupalele pwittipwitthi epi sapa kiniwinkhaaye khwa lifunku looshaahiti yoori nlipu opu ti miyo kithipiyeeyo.”
GEN 21:31 Pi apho puuro yaya eto eniitthiwaaye Beeresheba, mwaasa yoori oowiiri aya aalaphisaniye attaapho.
GEN 21:32 Paata yawiisha oosiilana opule Beeresheba okhule aariiwo, Apimeleekhi na Fikhoole namalokozela wa anajanka, khurutela nti wa Afiliishiti.
GEN 21:33 Eburahiima n'oosala Beeresheba okhule khuzala muutthi wa nkolokope, khumwaaputu Nnyizinku, Nluku wa Mileele.
GEN 21:34 Ye khwiikhala nti wa Afiliishiti khwa nyaakha za waatta.
GEN 22:1 Paata yoovira nyaakha, Nluku aamweeziye Eburahiima, khunkhuwela araka: “Eburahiima!” Ye khujipu: “Lapeekha!”
GEN 22:2 Nluku khumuuza araka: “Onthuule mwanawo Esiyaakha, othuuto mmote oriinaaye onimphetachaaye, olawe mpakha nti wa Moriya, vamwaako oriiye ottuukho kinttelaaye wuuthoonyeza, onrette twaha yoolukuziwa”.
GEN 22:3 Ye khulankha mmeesho mwaya lifwajiri khunthuula puuru awe khufukavo zaana zawe, khuwaathuula akarumeyaawe awiri na mwanawe Esiyaakha. Khurema khuuni zoolawa orettela twaha yoolukuziwa, khusala alawa ottuukhule Nluku aamuuziyeewo.
GEN 22:4 Siikhu yattaatthu, Eburahiima khweesa maasho awe khoona puuro etile ari ohali woolepawo.
GEN 22:5 Ye khuwooza akarumeyaawe apale yoori: “Mwisale attaapha na puuru otu, miiyo na shapu otu nintta aphale, ninttela omwaaputu Nluku. Amana niisha nintta oruti nite niiye vamote na-mweyo.”
GEN 22:6 Eburahiima khuthuula khuuni epile aari weettelaaye orettela twaha yoolukuziwa, khunttikha Esiyaakha mmafuzi mwawe. Ye khuthuula eesu na moottho khusala alawa.
GEN 22:7 Esiyaakha khunkhuwela papaawe yoori: “Mweyo paapa!” Ye khujipu: “Lape mwanaka!” Aphano Esiyaakha khumuuzela papaawe: “Nathuula moottho na khuuni, khi pwittipwitthi yoolawa otwahi eri vayi?”
GEN 22:8 Ye khujipu araka: “Nluku ti ye anjuwaaye pwittipwitthi ninttelaaye orettela twaha yoolukuziwa mwanaka.” Yo khusala alawa vamote.
GEN 22:9 N'oofiya ohali okhule aathoonyeziweewo ti Nluku, khunjeka alitaari vatulu vaya khuthatelavo khuuni. Khumfuka mwanawe Esiyaakha khunttha vatulu wa khuuni.
GEN 22:10 Khuthuula eesu, khulansa makhono awe yoori antwahi mwanawe.
GEN 22:11 Ila nlayikha la Nnyizinku khukhuwa pinkuuni liraka: “Eburahiima! Eburahiima!” Ye khujipu: “Lapeekha!”
GEN 22:12 Khumuuza yoori: “Ohimwaavulele eesu shapu oto, na ohinrettele hatha etthu. Aphano kinjuwa yoori onimoova Nluku, mwaasa woohikikhattazi mwanawo mmote othuuto oriina.”
GEN 22:13 Eburahiima khuzukuluwa khoona pwittipwitthi ewayiye manyaka aya valikukhu. Ye khulawa khuthuula khurettela twaha yoolukuziwa khwa zwaamu ya mwanawe.
GEN 22:14 Aphano khutthaja nzina puuro etile “Nnyizinku ti ye anjuwaaye”. Mpakha eleelo eti oniittheliwavo yoori: “omwaako wa Nnyizinku ti ye anjuwaaye”.
GEN 22:15 Elottelanaka, nlayikha la Nnyizinku khukhuwa theenya pinkuuni linkhuwelaka Eburahiima.
GEN 22:16 Khumuuza yoori: “Nnyizinku ari: ‘Kinjilaphela ki mwennyeweru, mwaasa weeyo oretta etile kiwuuziyeeyo, ohikikhattazi mwanawo mmote paasi oriinaayo,
GEN 22:17 khweele, kinteela wuuparikhiya na kiwinkhe peewu ya waatta nkhama matthottowa o'otulu na mishaka za mmattima, yo anteela othuula nti wa maatuwi aya.
GEN 22:18 Atthu ooshi a voolumwenku anteela oparikhiyiwa, mwaasa wa peewu yawo, maana weeyo wakishututela.’”
GEN 22:19 Eburahiima na Esiyaakha khurutela aphale aawaalikhiyeevo akarumeyaawe. Ooshi khurutela Beeresheba ohali Eburahiima aari wiikhalaawo.
GEN 22:20 N'oovira vitthu epile khuuziwa Eburahiima oriwa: “Miilika avokoleliwa aana ti ttwiiyo Nahoori;
GEN 22:21 w'oomwanzo aya nzina lawe ti Wuuzi, na ttwiiye Buuzi, khulotteliwa ti Kemuweeli, papaawe Aramu,
GEN 22:22 Keseeti, Haazo, Pilitashi, Yitalafu, na Betuweeli.”
GEN 22:23 Betuweeli khunvokola Repeekha. Aana apo wanaane aawaavokoliye ti Miilika na Nahoori ttwiiye Eburahiima.
GEN 22:24 Nahoori aarina muukha nkinoko aari wiitthiwaaye Rewuma, na-ye anvokoleliye aana; Teepa, Kahaamu, Tahaashi na Maaka.
GEN 23:1 Suhura eekhaliye nyaakha miiya na eshiriini na sapa.
GEN 23:2 Khufwa Kiriyati-Aarapa (oniittheliwaawo Heporooni) tuniya ya Kanaani. Eburahiima khusala alila na ojikhupanyera ofwa wa Suhura.
GEN 23:3 Ye khunlikha muukhaawe ari woofwa, khulawa ottakhulana Ahiiti yoori:
GEN 23:4 “Miiyo ki mmalapo na ki nletto mmuti mphu; ila kinuuvekelani okinkha ruhusa ya wiiyana vilalo yaka mmuti mwenu mphu, yoori kinzikhemo muukhaaka.”
GEN 23:5 Ahiiti apale khunjipu Eburahiima yoori:
GEN 23:6 “Osiileze mbwaneetthu, fweeyo niniwinkha hishima nkhama mfwalume wa Nluku. Apho olawe wanzikhe muukhaawo wakhula vilalo etile enuufwayaaye. Khaavo mmote wa fweyo antakhaaye wuukhattaza khapuri yonzikhavo muukhaawo.”
GEN 23:7 Aphano Eburahiima khulankha khwiinama omaasho wa Ahiiti, ennyewe nti opule.
GEN 23:8 Khuwuuza yoori: “Nkhama khweele mwinaaye niiya yookikhupalela onzikha muukhaaka, mwikivekelele Eforoni, mwaana wa Zohaari,
GEN 23:9 yoori akuuzanyeze likurakuza la Makhipeela liriiye mmwiinano wa nshapa lawe. Miiyo kininripha hisapu yoolikana mooshi moonaka, yoori likurakuza laya nttho liiye vilalo yoowaazikhamo ajamaazaku”.
GEN 23:10 Eforoni, Nhiiti otule, aarettiye eekhaliye vamote na attunkhulu a sitati ethiitile, ye khunjipu Eburahiima vakatthi wa Ahiiti ooshi aari vanlako wa sitati ethiitile yoori:
GEN 23:11 “Wala mbwanaaka! Okisiileze, miiyo kiniwinkha nshapa na likurakuza liriiye nttumpho, kiniwinkha atthu ooshi apa ariiye apha eettaka woona. Olawe wanzikhe muufwi awo.”
GEN 23:12 Eburahiima khwiinama swaafu yaphiiri, omaasho wa atthu apale a mmuti mphule.
GEN 23:13 Ye khumuuza Eforoni atthu ooshi eettaka osiila yoori: “Safwatali mwikisiileze, kintta oripha hisapu la nshapa ntthile. Okhupalele yoori kiwahi onzikhamo muukhaaka.”
GEN 23:14 Eforoni khunjipu Eburahiima yoori:
GEN 23:15 “Okisiileze mbwanaaka! Nti aya opo pu wa mizurukhu za feeta miiya nne. Eto yaya niini miiyo na weeyo? Wanzikhemo muufwi awo.”
GEN 23:16 Hisapu etile aalupiyeeyo Eforoni atthu ooshi asiilaka, Eburahiima khukhupalela. Khuphima miphimo miiya nne za mizurukhu wa feeta khumwinkha, nkhama etthiipo aari ophimakaazo anamuuzanyisa.
GEN 23:17 Waaza attaapho nshapa la Eforoni laariiye Makhipeela kharipu na Manre, na likurakuza laariimo na miitthi zooshi khwinkhiwa Eburahiima. Ahiiti ooshi apale aari vanlako wa sitati etile eettaka woona.
GEN 23:19 Wakathi enkhiweevo nti aya opule, khunthuula muukhaawe Suhura khulawa khunzikha nlikurakuza la Makhipeela kharipu na Manre eriiye Heporooni, tuniya ya Kanaani.
GEN 23:20 Khwa etthiipo, khuhakikhiwa nshapa ntthile na likurakuza laya pi Ahiiti wiiya vilalo ya Eburahiima.
GEN 24:1 Eburahiima aarettiye ooluvaliye arina nyaakha za waatta, Nnyizinku amparikhiyiye khwa zooshi.
GEN 24:2 Siikhu moote, khumuuza karumeya nwulu wa vaje vawe aari weettettisaaye mali zawe zooshi aariinaazo, araka: “Othuule nkhono awo otthe vathi wa liphaja laka yoori
GEN 24:3 kuulaphise khwa nzina la Nnyizinku, Nluku wa pinkuuni na vathi, yoori khunteela omweekesa muukha wa nti otthuupu kiniikhalaaye wa wiiya mwaana wa Akanaani.
GEN 24:4 Ila olankhe olawe nti w'oowaka wamweekese muukha vakatthi wa ajamaazaku, ate eeye muukha wa Esiyaakha.”
GEN 24:5 Karumeya otule khumuuzela yoori: “Khi amana muukha aya oto ahitakhi ota na-miyo mmuti mphu, kinthuule mwanawo kinlawane nti otthuupo olankhiyeeyo?”
GEN 24:6 Eburahiima khunjipu: “Phoole! Hatha vattitthiiru ohirette onlawana mwanaka.
GEN 24:7 Nnyizinku, Nluku wa pinkuuni akilaza vaje wa apapazaku nti wa ajamaazaku khukaahiti na olapha araka: ‘Nti opu kinttela winkha peewu yawo.’ Ye ontta operekha nlayikha lawe yoori luulokoze, omweettele muukha yoori ate araliwe ti mwanaka Esiyaakha.
GEN 24:8 Amana muukha aya oto ahitakhi ota na-weyo, olapha wawo oniiya woofujeya. Ila ohiiye wonthuula mwanaka onlawana.”
GEN 24:9 Aphano karumeya otule khuthuula nkhono awe khuttha vathi wa liphaja la Eburahiima mbwanaawe. Khulapha yoori aari weettela oretta etthiipile ooziweezo.
GEN 24:10 Karumeya otule khuthuula enkamiiya khumi za mbwanaawe na majathi apale enkhiweeyo khusala alawa nti wa Mezapotaaniya sitati ya Nahoori.
GEN 24:11 Afiiyeevo, njuwa looveva wakathi opule aakha anttelakaaye ottekha maati, khukokhorisa enkamiiya zawe epile onlipu kharipu ya sitati.
GEN 24:12 Attaaphale khusala alompa araka: “Oh! Nnyizinku, Nluku wa mbwanaaka Eburahiima, kinuuvekela yoori siikhu eti ya leelo okiparikhiye, na onthoonyeze pheta ya waamineya mbwanaaka Eburahiima.
GEN 24:13 Onikoonelaavo apha kiri wa weemela kharipu na nlipu, aanaakha a atthu a sitati eti antakaavo ottekha maati.
GEN 24:14 Mwaari othuuto kinttelaaye omuuza yoori: ‘Wiinamise yuuku yawo okimeele maati kinywe,’ ye khulupa yoori: ‘Apa nywa, na kintta onywisa enkamiiya zawo,’ eeye othuuto onthawuleliyeeyo Esiyaakha. Ti etthu enttelaaye okijuwisa yoori wanthoonyeza pheta ya waamineya mbwanaaka Eburahiima.”
GEN 24:15 Ahineeshe olompa, nasaapiru onimoona Rapekha mwaana wa Betuweeli eettaka ota alankhaka nsitati athuuliye yuuku atthiye valifuzi. Betuweeli aari mwaana wa Miilika muukha wa Nahoori, ttwiiye Eburahiima.
GEN 24:16 Rapekha aari mwaari wooshapweya channu woohinjuwi nlume, ye khwiishukhela vanlipu khuttekha maati khwiitaaza yuuku yawe khuwelela.
GEN 24:17 Karumeya otule khulankha khusala antthirela, khumuuza yoori: “Safwatali kimeele maati apo ari n'yuku mwawo kinywe.”
GEN 24:18 Ye khujipu araka: “Mwiinyi apa mwinywe.” Khurula yuuku khukholelela mmakhono khumwinkha khunywa.
GEN 24:19 Nawiisha omwinkha maati, khumuuza yoori: “Kinttela ottekha makina theenya kinkhe enkamiiya zenu zinywe mpakha zooshi ziishe”
GEN 24:20 Nasaapiru khwiitthela maati apale n'yopo zaari onywaamo nyama, khwaakuva khulawa vanlipu ottekha swaafu za waatta yoori zinywe enkamiiya zooshi.
GEN 24:21 Mwinyi otule khusala anyamaliye amweekesaka mwaari otule saaneene yoori ajuwe nkhama Nnyizinku aparikhiya safwari yawe ama wala.
GEN 24:22 Ziishiyeevo onywa enkamiiya epile, khulaza kharawu ya thahapu ya karaama sitha na kakhana piiri za thahapu zaari ochiraaye karaama miiya olemela waya khunwalisa mmakhono mwawe.
GEN 24:23 Khumuuzela yoori: “Weeyo o mwaana waani? Safwatali nkakuuze nkhama wa papaawo ewaakho puuro y'oolalawo miiyo na ashirikhaaka apa.”
GEN 24:24 Ye khujipu: “Miiyo ki mwaana wa Betuweeli, mwaana wa Miilika na Nahoori.
GEN 24:25 Onti ewaakho puuro yoolalawo mweeyo, na nyaani za waatta zooja enkamiiya zenu.”
GEN 24:26 Aphano karumeya otule khukokhora khumwaaputu Nnyizinku,
GEN 24:27 araka: “Asifwiwe Nnyizinku, Nluku wa mbwanaaka Eburahiima, ahisahaweeni onthoonyeza pheta yawe ya waamineya, maana akilokoza mpakha vaje wa ajamaaze mbwanaaka.”
GEN 24:28 Aphano mwaari otule khutthira eettaka owawe, khuwooza ajamaaze vitthu zaarettikhaniyeezo.
GEN 24:29 Rapekha aarina nlupuwe aari wiitthiwaaye Labani. Ye khutthira eettaka onlipu yoori amoone ntthu aya otule.
GEN 24:30 Mwaasa wa woona kharawu na kakhana aawalisiweeyo nlupuwe, na khusiila vitthu ooziweeyo Rapekha ti nlume otule, ye khulankha khusala alawa omoona nlume otule ottuukhule aariiwo na enkamiiya zawe nshini wa nlipu.
GEN 24:31 Labani khuri: “Ote okhuno, weeyo wooparikhiyiwa ti Nnyizinku! Weekhalela-ni veetakale apho? Kawaattalelela puuro onti na vahali woopwehavo enkamiiya zawo.”
GEN 24:32 Labani khuta na karumeya otule mpakha owawe, khuruma wiishushiwa mapwattha vankamiiya epile na khwinkhiwa nyaani yoori zije. Khwinkhiwa maati yoori oose moolu awe na atthu apale aarinaaye.
GEN 24:33 Nawiisha khutiisiwa etthu-yooja khwinkhiwa, ila karumeya otule khuri: “Akinja kihaazeeni olupa eti kaateeliyeeyo.” Labani khumuuza yoori: “Haya lupa.”
GEN 24:34 Aphano khwaaza olupa araka: “Miiyo ki karumeya wa Eburahiima.
GEN 24:35 Nnyizinku amparikhiya venkivene, amwinkha maali khwiiya woojuwanikha; onaaye pwittipwitthi na mompe, feeta na thahapu, akarumeya aalume na aakha, enkamiiya na apuuru.
GEN 24:36 Suhura muukha wa mbwanaaka Eburahiima, anvokola mwaana ooluvaliye. Mwaana aya otu amwinkha vitthu zooshi ariinaazo.
GEN 24:37 Mbwanaaka khukilaphisa araka: ‘Nti opu kiniikhalaaye ohimweekesemo muukha wa aana a Akanaani.
GEN 24:38 Ila olawe wa apapazaku vakatthi wa ajamaazaku wamweekese ottuukho muukha yoori ate araliwe ti mwanaka.’
GEN 24:39 Aphano miiyo khunjipu mbwanaaka: ‘Khi muukha aya oto amana ahitakhi ota na-miyo?’
GEN 24:40 Ye khukijipu yoori: ‘Nnyizinku otu kininrumeelaaye ontta operekha nlayikha luulokoze, na ontta oparikhiya safwari yawo yoolawa omweekesa muukha wa wiiya jamaayaku na wa vaje wa apapazaku yoori ate araliwe ti mwanaka.
GEN 24:41 Amana ofiya wa ajamaazaku yo khuhitakhi owinkha, eti koolaphisiyeeyo entta owiishela.’
GEN 24:42 Phi kiriyeevo n'oofiya onlipu leelo, khusala kimuuza Nnyizinku kiraka: ‘Oo Nnyizinku! Nluku wa mbwanaaka Eburahiima, nkhama safwari eti kineettaaye otakha wawo, okijaaliwe.
GEN 24:43 Nasaapi eti miiyo kiri apha nshini wa nlipu opu wa maati; mwaari othuuto antelaaye ottekha maati amana kinvekela yoori: “Kimeele maati ariiye n'yuku mwawo,”
GEN 24:44 ye khukuuza yoori: “Apa onywe, na kinttela ottekha makina kinkhe nyama zawo,” eeye othuuto muukha aya athawuliweeyo ti Nnyizinku yoori araliwe ti mwaana wa mbwanaaka.’
GEN 24:45 Ahineeshevo mattakhuzi apale oolompa varoho vaka, kinimoona Rapekha athuuliye yuuku valifuzi vawe eettaka vanlipu ottekha maati, miiyo khumuuza yoori: ‘Safwatali kimeele maati kinywe.’
GEN 24:46 Ye khwiishusha yuuku yawe nasaapiru khukuuza yoori: ‘Apa onywe, na kintta winkha enkamiiya zawo zinywe.’ Khukinkha miiyo khunywa na khwiinkha enkamiiya zaka khunywa.
GEN 24:47 Aphano miiyo khumuuzela yoori: ‘O mwaana waani?’ Ye khujipu yoori: ‘Miiyo ki mwaana wa Betuweeli mwaana wa Nahoori na Miilika.’ Ethiito miiyo khunwalisa kharawu vaphula vawe khunwalisa kakhana makhono awe.
GEN 24:48 Miiyo khukokhora, khwiinama khumwaaputu Nnyizinku, khunshukhurwela Nnyizinku, Nluku wa mbwanaaka Eburahiima akeettettisiyeeyo tarikhi yooshapweya yoori kimweettele mwaana wa ttwiiye mbwanaaka ate araliwe ti mwanawe.
GEN 24:49 Aphano, nkhama mwatakha onthoonyeza pheta ya waamineya mbwanaaka Eburahiima, mwikuuze. Nkhama khamweepu, mwikuuze kijuwe etthu yooretta.”
GEN 24:50 Labani na Betuwele khujipu araka: “Epo zalankha wa Nnyizinku, fweeyo khanina etthu yoowaza.
GEN 24:51 Rapekha aya otu ari apha, onthuule alawe eeye muukha wa mwaana wa mbwanaawo, etthiipo Nnyizinku alupiyeezo.”
GEN 24:52 N'oosiila mattakhuzi apale karumeya wa Eburahiima khukokhora khwiinama khufiyisa ajihi vathi omaasho wa Nnyizinku.
GEN 24:53 Elottelanaka khusarula vitthu za feeta na za thahapu na kuwo khumwinkha Rapekha, khulaza vitthu kiina theenya za mali khumwinkha nlupuwe na mamaawe.
GEN 24:54 Nawiisha, yo khuja na khunywela khulala mpakha supu. N'oocha karumeya otule khulupa yoori: “Mwikilikhe kirutele wa mbwanaaka.”
GEN 24:55 Ila nlupuwe Rapekha na mamaawe khumuuza yoori: “Mwaari otu eekhale attaapha na-fweyo nenkawu siikhu khumi, nawiisha osala olawa saana.”
GEN 24:56 Ye khuri: “Mwihikirupazise maana Nnyizinku ashapweyisa safwari yaka. Mwikilikhe kirutele wa mbwanaaka.”
GEN 24:57 Aphano yo khunjipu: “Nintta onkhuwela mwaari oto nimuuzele mwennyewe.”
GEN 24:58 Khukhuweliwa Rapekha khuuzeliwa: “Ontakha olawa na mwinyi otu?” Ye khujipu yoori: “Kakhupali.”
GEN 24:59 Ajamaaze khuleezanana Rapekha na yaaya awe na karumeya wa Eburahiima na atthu apale aataniyeeyo.
GEN 24:60 Khuparikhiyiwa Rapekha na mattakhuzi apa: “Weeyo nlupweetthu wiiye maama wa peewu alufu alufu zene; Peewu yawo eto eshintte sitati ya maatuwi aya.”
GEN 24:61 Rapekha khulankha na akarumeyaawe a aakha khuwela enkamiiya zaya khusala alawa na nlume otule. Attaaphale karumeya khunthuula Rapekha khusala alawa.
GEN 24:62 Esiyaakha aarettiye arutaka onlipu oniitthiwaaye Layi-Rooyi, aari wiikhala Nikeepu, phantte ya kusini ya Kanaani.
GEN 24:63 Siikhu moote, njuwa-looveva wakathi Esiyaakha aari othepelaavo mmashapa, khulansa maasho khoona enkamiiya zeettaka ota.
GEN 24:64 Rapekha khulansa maasho khumoona Esiyaakha, ye khwiishukha vankamiiya vawe.
GEN 24:65 Khumuuzela karumeya: “Khi mwinyi otule anlankhaaye mmashapa mphule ataka okhuno niriiwo ti paani?” Ye khujipu araka: “Ti mbwanaaka.” N'oosiila toole ye khuthuula nshukwi lawe khujifinikha.
GEN 24:66 Karumeya khumuuza Esiyaakha zooshi epile ziviriyeezo.
GEN 24:67 Esiyaakha khunthuula Rapekha khunttha nheema etile yaari ya mamaawe Suhura. Khunrala khwiiya muukhaawe wompheta. Aphano Esiyaakha khumpattha ntthu wonkhiza paata yoofwa mamaawe.
GEN 25:1 Eburahiima khunrala muukha nkina aari wiitthiwaaye Khetuura.
GEN 25:2 Ye khunvokolela aana apa: Zimraani, Yokishaani, Medaani, Midiyaani, Ishibaaki na Shuuwa.
GEN 25:3 Yokshaani khunvokola Sheeba na Dedaani, aana a Dedaani aari Waashuuru, Waletushi na Walewumi.
GEN 25:4 Aana a Midiyaani aari Eefa, Eferi, Hanooki, Abiida na Eelida. Ooshi apa aari aana na atuulu a Khetuura.
GEN 25:5 Eburahiima khumwinkha Esiyaakha vitthu zooshi aariinaazo.
GEN 25:6 Ila aanaawe apale aawaavokoleliyeeyo na aakha akina, ari haayi nalelo, khuwenkha vitthu zaya na-yo, khuweekarela phantte ya malawa-juwa yoori ahiikhale vamote na mwanawe Esiyaakha.
GEN 25:7 Eburahiima eekhaliye nyaakha miiya na saapiini na mithaanu.
GEN 25:8 Ye afwa ari wa wuuluvala arina nyaakha za waatta, khulawa khuzikhiwa vamote na ajamaaze apa afwiiyeeyo.
GEN 25:9 Esiyaakha na Esumayila, khunthuula khulawa khunzikha nlikurakuza la Makhipeela kharipu na Manre, nshapa la Eforoni mwaana wa Zohaari nhiiti.
GEN 25:10 Nshapa nttintthile oozanyeziweeyo Eburahiima pi Ahiiti, pi ottuukho azikhiweewo ye na muukhaawe Suhura.
GEN 25:11 Paata ya Eburahiima ofwa, Esiyaakha aari wiikhala nti wa Peeri-Lahayi-Rooyi, Nnyizinku khusala amparikhiya.
GEN 25:12 Eti hatiithi ya peewu ya Esumayila mwaana wa Eburahiima, aavokoliweeyo ti Hajira wa Misuri karumeya wa Suhura.
GEN 25:13 Apa mazina a aana aavokoliweeyo ti Esumayila: Nebayoothi, mwaana wa mwanzo wa Esumayila, Kedaari, Adibeeli, Mibisaamu.
GEN 25:14 Miishima, Duuma na Maasa.
GEN 25:15 Hadaadi, Teema, Yetuuri, Nafiishi na Kedeema.
GEN 25:16 Apa aana Esumayila khumi na awiri, pi atthaapo aari afwalume, wakhula mwaana na lihimo lawe na nhali aari omakaamo.
GEN 25:17 Esumayila eekhaliye nyaakha miiya na talaathiini na sapa. Khufwa khulawa khuzikhiwa vamote na ajamaaze apa afwiiyeeyo.
GEN 25:18 Peewu yawe yeekhaliye waaza Hawila mpakha Shuuri kharipu na Misuri tarikhi yaweetta Ashuuru. Yo aari woohisiilani na ojama nkina wa Eburahiima.
GEN 25:19 Eti hatiithi ya peewu ya Esiyaakha mwaana wa Eburahiima: Eburahiima khunvokola Esiyaakha.
GEN 25:20 Esiyaakha n'oopattha hirimo ya nyaakha arupayiini khunrala Rapekha mwaana wa Betuweeli, nlupuwe Labani. Yo aari Araamu aari wiikhalaaye Paata-Araamu, tuniya ya Mesopotamiya.
GEN 25:21 Mwaasa wa muukhaawe ohiina mavokozi, Esiyaakha khulompa wa shariyavo anvekelaka Nnyizinku. Ye khusiila lompa yawe Rapekha khwiimittha.
GEN 25:22 Aana awiri khusala oomana mwiirukulu mwawe. Ye khushanka khusala ajuuzela yoori: “Niini enrettikhanaaye mwiirukulu mwaka, nkhama pi toono keemitthela-ni?” Aphano ye khumuuzela Nnyizinku.
GEN 25:23 Nnyizinku khunjipu: “Mahimo mawiri pi ariiye mwiirukulu mwawo. Weeyo onttela ovokola khapila piiri zoohisiilani: moote enttela wiiya ya kuvu zayita eti kiina. Nttunkhulu onteela onrumeyela nsimaana.”
GEN 25:24 Zifiiyeevo siikhu zoopattha ekumi, khuwaavokola aana a maphapo.
GEN 25:25 Otu woovokoliwa mwanzo aari wookhuttuwa na wa waatta ovuzi, ti maana yootthajiwa nzina la Ezawu.
GEN 25:26 Elottelanaka khuvokoliwa ttwiiye, nkhono awe okholeliye ekwakuno ya Ezawu. Ti maana yootthajiwa nzina la Yaakhumpa. Ampattikhanaru aana aya apa, Esiyaakha aarettiye arina nyaakha siithiini.
GEN 25:27 Aana apale khuwula, Ezawu khwiiya namasaya nwulu na aari wontuvela weettetta ntthuttu, ila Yaakhumpa aari ntthu woonyamala wontuvela wiikhala vaje.
GEN 25:28 Esiyaakha aari ompheta Ezawu, mwaasa wontuvela orafuna nyama epile aari osayaazo. Ila Rapekha aari ompheta Yaakhumpa.
GEN 25:29 Siikhu moote, Yaakhumpa khwiipikha sekuseku, wakathi aya opo Ezawu aarettiye eettaka orutiru ntthuttu ari wookholiwa ti jala na wooshokhera.
GEN 25:30 Ye khumuuza Yaakhumpa yoori: “Okinkhe vitthu epo oniipikhaazo zookhuttuwela kije. Kintakha ofwa jala!” Ti eto Ezawu enkhiweeyo nzina la Edomu.
GEN 25:31 Yaakhumpa khumuuza yoori: “Waaze okuuzanyeza lifunku lawo l'oomwaana w'oomwanzo khapula.”
GEN 25:32 Ye khumuuza yoori: “Lina fwayita-ni lifunku laya nttho la wiiya mwaana wa mwanzo, miiyo kitakhaka ofwa jala!”
GEN 25:33 Yaakhumpa khusala ankhanyarela yoori: “Olaphe.” Ye khulapha, khumuuzanyeza Yaakhumpa lifunku lawe l'oomwaana wa mwanzo.
GEN 25:34 Aphano ye khumwinkha Ezawu phaawu na sekuseku y'eepwiri. Khuja khunywela, khusala alawa safwari zawe. Woohooneli fwayita lifunku l'oomwaana wa mwanzo.
GEN 26:1 Yaapuwiye jala nti opule nkhama etthiipile yaapuwiyeezo wakathi wa Eburahiima. Ti eto Esiyaakha khulawa nti wa Geraari okutthanana Apimeleekhi mfwalume wa Afiliishiti.
GEN 26:2 Nnyizinku khunteela, khumuuza yoori: “Ohilawe tuniya ya Misuri; weekhale nti kintakhaaye owuuza.
GEN 26:3 Ottuukho miiyo kinttela wiiya vamote na-weyo na kinttela wuuparikhiya. Weeyo na peewu yawo kinttela owinkhani nti opo wooshi, kilipiselaka wahati opule kaalaphiyeeyo kimwaahitaka papaawo Eburahiima.
GEN 26:4 Kinttela waattisa peewu yawo nkhama matthottowa o'otulu, na kinttela winkha tuniya yooshi eti. Mwaasa wa peewu yawo, khapila zooshi za tuniya zinttela wiiya zooparikhiyiwa;
GEN 26:5 maana Eburahiima asiileza huula yaka, ashututela oruma waka, mwentto aka, kano zaka na masomi aka.”
GEN 26:6 Aphano Esiyaakha khusala eekhala nti wa Geraari.
GEN 26:7 Atthu a nti opule n'oomuuzela monkoni wa muukhaawe, ye khuri: “Nlupwaaka.” Mwaasa yoori Rapekha aari wooshapweya, Esiyaakha eetta woova olupa yoori muukhaawe. Ye aari wuupuwela yoori alume a mmuti mphule eetta omuula asale na Rapekha.
GEN 26:8 Esiyaakha eekhaliye Geraari siikhu za waatta. Siikhu moote, Apimeleekhi mfwalume wa Afiliishiti eetta othurumela veettakha khumoona Esiyaakha ampapasaka muukhaawe.
GEN 26:9 Aphano Apimeleekhi khunkhuwela Esiyaakha khumuuza yoori: “Otu, khweele muukhaawo! Khi apho waari oraaye nlupuwo?” Ye khujipu yoori: “Kaari woova wuuliwa mwaasa wa ye.”
GEN 26:10 Apimeleekhi khuri: “Epo zaya niini oniretteliyeeyo? Khi eriwaka ntthu mmote wa fweyo eettiye olalana, weeyo waari onittha paathuli?”
GEN 26:11 Apimeleekhi khuwooza atthu ooshi yoori: “Wakhula otule antakhaaye onsapa mwinyi otu ama muukhaawe ontta ofwa.”
GEN 26:12 Esiyaakha khulima nshapa lawe nti otthuupule, mwaasa wa Nnyizinku omparikhiya mwaakha otthuupo khuurula vitthu swaafu miiya zooziti epile aazaliyeezo.
GEN 26:13 Ye khureela, khusala evira zeekezeleyaka mali zawe, khwiiya thaajiri nwuulweene.
GEN 26:14 Aarina maphanko a pwittipwitthi, puuzi, a mompe na aarina akarumeya a waatta, ti nanna Afiliishiti laawaatiyeeyo nrima.
GEN 26:15 Milipu zooshi epile aathipiyeeyo akarumeya a Eburahiima paapa wa Esiyaakha ari haayi, khusirelaza.
GEN 26:16 Siikhu moote Apimeleekhi khumuuza Esiyaakha yoori: “Oleemo mmuti mphu, maana wareela na kuvu waniziti fweeyo.”
GEN 26:17 Aphano ye khuthama nti opule, khulawa khumaka nttapo la Geraari khwiikhala ottuukho.
GEN 26:18 Khuthipa opheya milipu epile zaathipiweeyo wakathi wa Eburahiima, khusireliwa pi Afiliishiti paata yoofwa Eburahiima, Esiyaakha khwinkha mazina milipu epile atthaapale papaawe aatthajiyeeyo.
GEN 26:19 Siikhu kiina, akarumeyaawe khuthipa mmattapo nttumphule, khunsikana naattuuttu wa maati.
GEN 26:20 Amakhampuzi a Geraari khusala anyakulisana na amakhampuzi a Esiyaakha araka: “Maati apa pi eetthu,” ti eto Esiyaakha aatthajiyeeyo nzina la Eseki nlipu aya opule, mwaasa yoori weetta wuumaneliwa.
GEN 26:21 Akarumeyaawe khuthipa nlipu nkina, ila amakhampuzi apale a Geraari khupuwisa wuumani theenya, ye khutthaja nzina la Sitiina (milattu).
GEN 26:22 Aphano khulaavo aphale vaya khulawa khuthipa nlipu nkina, khuhiivo hatha ntthu mmote wa wuumanelana. Ye khutthaja nzina la Rehopoothi araka: “Aphano Nnyizinku aninkha puuro ya nafwaasi, na ninteela oruwera saaneene nti otthuupu.”
GEN 26:23 Attaaphale Esiyaakha khulawa Beerisheba.
GEN 26:24 Osikhu Nnyizinku khunteela khumuuza yoori: “Miiyo ki Nluku wa papaawo Eburahiima. Ohoove, kiri vamote na-weyo. Kintta wuuparikhiya kaattise peewu yawo mwaasa wa papaawo karumeyaaka.”
GEN 26:25 Attaaphale ye khunjeka alitaari, khwaaputu nzina la Nnyizinku. Khweemesa heema yawe na akarumeyaawe khuthipavo nlipu.
GEN 26:26 Apimeleekhi aalankhiye nti wa Geraari na shawuriiya awe Ahuzaathi na Fikhoole namalokozela wa anajanka olawa okutthanana Esiyaakha.
GEN 26:27 Esiyaakha n'oowoona khuwooza yoori: “Mweeyo khamwintuveliwa ti miyo mweettiye okiikara mmuti mwenu. Khi mwatela-ni?”
GEN 26:28 Yo khunjipu araka: “Neetta woona yoori Nnyizinku ori vamote na-weyo. Khuupuwela yoori enshapweya olapha na winkhana wahati weeyo na-fweyo.
GEN 26:29 Osiilana waya pi opu: Olaphe yoori khunnirettela zootakhala nkhama etthiipo na-fweyo nihuuretteleeni, noorettela zooshapweya na khuulikha olawa na heeri. Weeyo o wooparikhiyiwa ti Nnyizinku.”
GEN 26:30 Esiyaakha khuwenkha etthu-yooja yooshapweya khuja khunywela.
GEN 26:31 Mmeesho mwaya supuyeene khulaphisana. Esiyaakha khuwaaleeza, yo khusala alawa na heeri.
GEN 26:32 Siikhu ethiitile khuta akarumeya a Esiyaakha oteela omuuza hapari za nlipu opule aathipiyeeyo yoori: “Napattha maati.”
GEN 26:33 Nlipu aya opule Esiyaakha khutthaja nzina la Sheba. Mpakha leelo sitati yaya etile eniittheliwa Beeresheba.
GEN 26:34 Wakathi Ezawu apatthiyeevo nyaakha arupayiini khunrala Yudiithi mwaana wa nhiiti aniitthiwaaye Beeri, na Basemaathi mwaana wa nhiiti nkinoko aniitthiwaaye Elooni.
GEN 26:35 Aakha apo awiri, anshukulikhisiye Esiyaakha na Rapekha.
GEN 27:1 Esiyaakha ooluvaliye, maasho awe aashokheriye khuhisala oona. Khunkhuwela Ezawu mwanawe otu nwulu araka “Mwanaka!” Ye khujipu: “Lape!”
GEN 27:2 Khumuuza yoori: “Miiyo kooluvala siikhu kimfwaavo khijuweyeeni.
GEN 27:3 Othuule nttetthe lawo olawe ntthuttu wasaye nyama.
GEN 27:4 Wiipikhe saana wookituvelavo okitiisele kije, kuuparikhiye kihinafwe.”
GEN 27:5 Ezawu khulankha khulawa ntthuttu osaya nyama yoori antiisele papaawe. Rapekha aari onsiila Esiyaakha attakhulanaka mwanawe Ezawu,
GEN 27:6 ye khumuuza mwanawe Yaakhumpa araka: “Weyo! Kansiila papaawo amuuzaka ttwiiyo Ezawu yoori:
GEN 27:7 ‘Okitiisele nyama ya wiipikhiwa wookituvelavo kije, kuuparikheye mmakhono wa Nnyizinku kihinafwe.’
GEN 27:8 Mwanaka, osiileze mattakhuzi apa kinuurumaaye, nasaapi eti
GEN 27:9 olawe oliphanko la nyama wa waathuule aana a puuzi awiri ooneneva, kite kiweepikhe saaneene anttelaaye ontuvela papaawo.
GEN 27:10 Onlawanele aje, ooparikhiye ahinafwe.”
GEN 27:11 Yaakhumpa khunjipu mamaawe Rapekha yoori: “Ezawu ti wa waattana ovuzi, miiyo akina.
GEN 27:12 Paapa amana akipapasela ahikisikanani ovuzi kinttela wiiya ntthu woohata, toowo khankiparikhiya ontta okilaani.”
GEN 27:13 Mamaawe khumuuza yoori: “Laana yaya eto ti ekikwele miiyo mwanaka. Ila orette eti kiwuuziyeeyo: weettele puuzi epile kuurumiyeezo.”
GEN 27:14 Ye khulawa khuthuula puuzi khuntiisela mamaawe, khwiipikha wootuvavo waari weettelaaye ontuvela papaawe.
GEN 27:15 Aphano Rapekha khuthuula kuwo epile zooshapweya za Ezawu mwanawe otule nwulu zaari owawe, khunwalisa Yaakhumpa mwaana otu nttiitthi aya.
GEN 27:16 Khumfinikha na shapala ya puuzi makhono awe na phantte ya mmwisiko mwawe wahaariimo ovuzi.
GEN 27:17 Khuthuula etthu-yooja yootuva etile eepikhiyeeyo na phaawu khumwinkha mwanawe Yaakhumpa.
GEN 27:18 Ye khulawana aphale aariivo papaawe khunkhuwela: “Paapa!” Ye khujipu: “Lape! Weeyo o mwanaka-ni?”
GEN 27:19 Yaakhumpa khunjipu papaawe: “Miiyo ki Ezawu mwanenu wa mwanzo. Katiisa eti mwaakirumiyeeyo. Mwilankhe mwije nyama eti kitiisiyeeyo, nawiisha mwikiparikhiye.”
GEN 27:20 Esiyaakha khumuuzela mwanawe yoori: “Wapattha toovi nasaapiru mwanaka?” Ye khujipu: “Nnyizinku Nluku eenu eetta okiperekheza.”
GEN 27:21 Khumuuza yoori: “Nkakisusele apha kuupapasele, kuujuwe nkhama khweele o mwanaka Ezawu.”
GEN 27:22 Yaakhumpa khunsusela papaawe. Esiyaakha khusala ampapasela, khumuuza yoori: “Huula ti ya Yaakhumpa, ila makhono pa Ezawu.”
GEN 27:23 Ye khuhinjuwi mwaasa wa makhono awe wiiyana ovuzi nkhama apa a ttwiiye Ezawu.
GEN 27:24 Ahinamparikhiye khumuuzela theenya: “Mwanaka Ezawu ti weyeena?” Ye khujipu: “Aa, ti miyo.”
GEN 27:25 Aphano khuri: “Okitiisele apha nyama yaya eto osayiyeeyo kije, yoori kuuparikhiye.” Yaakhumpa khumweettisela khuja na khumwinkha viinyu khunywela.
GEN 27:26 Esiyaakha khumuuza yoori: “Okaattame mwanaka okipatikhe.”
GEN 27:27 Yaakhumpa khumwaattama papaawe khumpatikha. Esiyaakha khusiila muuru wa kuwo zawe, aphano ye khumparikhiya araka: “Muuru wa mwanaka muuru wa nshapa looparikhiyiwa ti Nnyizinku.
GEN 27:28 Nnyizinku awinkhe mmatte wa pinkuuni na oruwera wa vathi, peewu ya waatta na viinyu ya waatta.
GEN 27:29 Khapila za waatta zuurumeele weeyo, na mahimo a waatta ookokhorele. Wiiye mbwana wa attwiizo, na aana a mamaawo ookokhorele weeyo. Oolaanikha pi apale anttelaaye wuulaani, na ooparikhiyiwa pi apale anttelaaye wuuparikhiya.”
GEN 27:30 Paata Yaakhumpa oparikhiyiwa ti Esiyaakha papaawe, ye alaakavo aphale, nasaapiru ttwiiye Ezawu khufiya alankhaka wuusaya.
GEN 27:31 Na-ye khwiipikha etthu-yooja yootuva khuntiisela papaawe, khumuuza yoori: “Mwilankhe paapa mwije nyama eti keetteliyeeyo osaya mwikiparikhiye.”
GEN 27:32 Papaawe khumuuzela: “Weeyo o paani?” Ye khuri: “Ti miyo Ezawu, mwanenu otu wa mwanzo.”
GEN 27:33 Esiyaakha khusuthuwa channu khusala athukumela khulupa yoori: “Khi otule apatthiyeeyo nyama khukitiisela ti paani? Miiyo kaja keesha weeyo ohinate. Kamparikhiya, ti wooparikhiyiwa!”
GEN 27:34 Ezawu n'oosiila mattakhuzi apale a papaawe khwiiphiiriwa khulila venkivene, khunvekela papaawe yoori: “Na-miyo paapa mwikiparikhiye!”
GEN 27:35 Ye khulupa yoori: “Aatiiyevo ttwiiyo apha khukittettekha, khuthuula parakha yawo.”
GEN 27:36 Ezawu khulupa yoori: “Eto swaafu yaphiiri akishinttaka. Ti maana ootthajiwa nzina la Yaakhumpa. Yamwanzo akinyakanya lifunku laka l'oomwaana wa mwanzo. Apho theenya akinyakanya parakha yaka. Paapa khamwinkiparikhiya na miiyo?”
GEN 27:37 Esiyaakha khujipu: “Miiyo kanthawaza Yaakhumpa yoori eeye mbwanaawo weeyo na ajamaazo ooshi anttela onrumeela ye. Onteela wiiyana tiriku ya waatta na viinyu. Kuurettele niini miiyo mwanaka?”
GEN 27:38 Ezawu khumuuzela papaawe: “Mweeyo paapa khamwisalaneeni hatha parakha? Na miiyo mwikiparikhiye!” Khusala alila anyakulaka.
GEN 27:39 Aphano Esiyaakha khunjipu: “Weeyo onttela wiikhala ohali woolepelana na miti zooruweriwa, ohali woothowawo mmatte wa pinkuuni.
GEN 27:40 Yoori weeyo opatthe meekhazi onttela wuumanana phanka yawo na onttela onrumeela ttwiiyo. Amana ojilipisa ontta olaamo nthwaapu mwaya mphu.”
GEN 27:41 Ezawu khwiiya wa wiiphiiriwa ti ttwiiye mwaasa wa parakha etile enkhiweeyo ti papaawe. Khusala oopuwela toono: “Siikhu za matthaka a paapa ziri kharipu. Amana afwa miiyo kintta omuula ttwiiyaku Yaakhumpa.”
GEN 27:42 Wakathi asiiliyeevo Rapekha mattakhuzi apale aari ottakhulaaye mwanawe otu wa mwanzo Ezawu, ye khunkhuwela mwanawe Yaakhumpa otu nttiitthi aya khumuuza yoori: “shawuri ariinaazo Ezawu pi zootakha owuula.
GEN 27:43 Apho weeyo mwanaka osiile eti kiniwuuzaaye. Otthire nasaapi ethiiti, weette wa nlupwaaka Labani aniikhalaaye nti wa Harani.
GEN 27:44 Weekhale ottuukho mpakha ttwiiyo omwiishe okatipukha wawe.
GEN 27:45 Amana omwiishela okatipukha wawe na asahawu eti onretteliyeeyo miiyo kintta wuuperekheza nhupi yoori ote. Akintakha okipwetheya aanaaka oowiiri siikhu moote!”
GEN 27:46 Aphano Rapekha khulawa omuuza Esiyaakha yoori: “Akituveliweeni ohaayi aka wooshi mwaasa wa aakha a Ahiiti apa awaaraliyeeyo Ezawu. Amana Yaakhumpa na-ye awaarala aakha a tuniya ethiiti miiyo kinhithari ofwa.”
GEN 28:1 Esiyaakha khunkhuwela Yaakhumpa khumparikhiya, khumuuza yoori: “Ohinrale hatha muukha mmote wa Kanaani.
GEN 28:2 Olankhe olawe nti wa Paata-Araamu owawe Betuweeli pwapwiyo. Olawe wanrale mwaana wa Labani nlupu wa mamaawo.
GEN 28:3 Nluku Woowahi Zooshi ooparikhiye, awinkhe mavokozi na peewu ya waatta, yoori khwa weyo epuwe khapila za waatta.
GEN 28:4 Awinkhe weeyo na peewu yawo parakha etile aahitiweeyo Eburahiima, wiiye mwennyewe nti opu oniikhalaaye nkhama nletto enkhiweeyo Eburahiima ti Nnyizinku.”
GEN 28:5 Paata ya toole, Esiyaakha khumuuza Yaakhumpa yoori aphano etta. Ye khulawa Paata-Araamu owawe Labani mwaana wa Betuweeli Mwaaramu, nlupuwe Rapekha maama wa Yaakhumpa na Ezawu.
GEN 28:6 Ezawu aajuwiye yoori Esiyaakha amparikhiyiye Yaakhumpa, khumuuza yoori alawe nti wa Paata-Araamu, amweekese muukha w'oottuukho anrale. Na khusiila yoori papaawe amuuza Yaakhumpa yoori ahinrale muukha wa Kanaani.
GEN 28:7 Khujuwa theenya yoori Yaakhumpa anshututela papaawe na mamaawe alawa Paata-Araamu.
GEN 28:8 Ti nanna ye ajuwiyeezo yoori papaawe khaari ontuvela aakha a Kanaani.
GEN 28:9 Aphano Ezawu khulankha khulawa owawe Esumayila mwaana wa Eburahiima, khunrala Mahalaathi mwaana wa Esumayila, nlupu wa Nebayoothi, oohiiyi aakha apale akina aarinaaye.
GEN 28:10 Yaakhumpa khulankha Beeresheba khusala alawa Harani.
GEN 28:11 Eettaka olawa etthiipile, n'ootupweela njuwa ye khufiya puuro yaya eto yoori alale attaapho. Khuthuula liwe laari attaaphale khuretta nsaawu khurapalela.
GEN 28:12 Khulottha khoona yeemesiwe shikatta vathi, janka yaya yaari okomaaye pinku. Malayikha a Nnyizinku aari owela ethiito na wiishukha.
GEN 28:13 Nnyizinku ari kharipu na-ye khumuuza araka: “Miiyo ki Nnyizinku, Nluku wa papaawo Eburahiima na wa Esiyaakha. Nti opo orapaleliyeeyo kinteela owinkha weeyo na peewu yawo yooshi.
GEN 28:14 Peewu yawo enteela wiiya ya waatta nkhama mishaka za voolumwenku, enteela omwazeyela malawa-juwa, makaaripi, kashikhazini na kusini. Khwa weyo na peewu yawo khapila zooshi za voolumwenku enteela oparikhiyiwa.
GEN 28:15 Woone! Miiyo kiri vamote na-weyo, kinteela owiinanela wakhula vahali oneettaavo, na kinteela wuurutisela tuniya ethiiti, akiniwanswi khihiretteeni epile zooshi kiwaahitiyeezo.”
GEN 28:16 Yaakhumpa asisimuwiyeevo aphale aari olalaavo khuri: “Khweele, Nnyizinku ori puuro ethiiti, miiyo akaajuwiye.”
GEN 28:17 Ye khwiiya wa woova channu, khulupa yoori: “Puuro eti ti yawoopisa! Nyuupa ya Nluku, na nlako wa pinkuuni.”
GEN 28:18 Mmeesho mwaya supuyeene, Yaakhumpa khuthuula liwe ntthile aaphiteeziyeeyo, khweemesa khwiitthela mafuttha vatulu vaya.
GEN 28:19 Khutthaja nzina puuro yaya etile, la “Beetele”, ila raku sitati yaya etile yaari wiitthiwa “Luuzhu”.
GEN 28:20 Yaakhumpa khwaahiti yoori: “Amana Nluku eeya vamote na-miyo, eenanela safwari yaka eti, khukinkha etthu-yooja na kuwo zoowala,
GEN 28:21 khukirutisela vaje wa paapa kiri nkumi, Nnyizinku onteela wiiya Nluku aka.
GEN 28:22 Liwe ntthi keemesiyeeyo apha nkhama nripu linttela wiiya nyuupa ya Nluku, na wakhula etile onikinkhaaye kiwinkhaka lifunku la khuumi.”
GEN 29:1 Yaakhumpa khurutela safwari yawe khulawa mpakha nti oriiye phantte lintthamuwaawo njuwa.
GEN 29:2 Siikhu moote, khweekesa nkerekhere wa nttapo khoona nlipu mmote ozukuleliwe ti maphanko mattatthu a pwittipwitthi zirapaleliye. Waari nlipu zaari onywisiwaavo maati, liwe laari ofinikhaniwakaaye nlipu opule laari liwululene.
GEN 29:3 Ti eto amakhampuzi aari owejelanakaaye yoori asusise liwe ntthile enkhe nyama zaya maati oonywa, nawiisha khurutiselavo liwe ntthile.
GEN 29:4 Yaakhumpa khuwoozela amakhampuzi apale araka: “Mweeyo attwiizaku, mwaavayi?” Yo khujipu araka: “Fweeyo nti etthu Harani.”
GEN 29:5 Ye khuri: “Mwininjuwa Labani ntuulu wa Nahoori?” Yo khujipu araka: “Aa, nininjuwa!”
GEN 29:6 Khuwoozela theenya yoori: “Nkumi?” Yo khujipu yoori: “Aa, nkumi! Mwanawe Rakeele ti oto antaaye apho na pwittipwitthi za papaawe.”
GEN 29:7 Yaakhumpa khulupa yoori: “Nalelo khunaripe, khunafiye wakathi wookusanya maphanko. Mwinkhe maati pwittipwitthi epo mwilawe mwajise opheya.”
GEN 29:8 Ila yo khujipu araka: “Khaninwahi, nina yoowejela pwittipwitthi zooshi zikusanyeye attaapha nisusise liwe ntthi lifinikhaniweeyo nlipu, ninkhe pwittipwitthi zetthu maati zinywe.”
GEN 29:9 Eettaka ottakhula etthiipile khusala ata Rakeele na pwittipwitthi za papaawe, mwaasa yoori aari nshuki.
GEN 29:10 Yaakhumpa n'oomoona Rakeele mwaana wa halwiye Labani eettaka ota na pwittipwitthi, khulawa khufunula nlipu khwinkha maati pwittipwitthi za halwiye.
GEN 29:11 Nawiisha khumwinkha peezhu khusala alila.
GEN 29:12 Aphano Yaakhumpa khumuuza Rakeele yoori: “Miiyo ki jaama wa papaawo, ki mwaana wa Rapekha.” Ye khutthira alawaka omuuza papaawe.
GEN 29:13 Labani n'oosiila hapari za Yaakhumpa mwaana wa nlupuwe, khusala atthira alawaka okutthanana. N'onsikana khumpatikha khumpejari, khunthuula khusala alawana owawe. Ye khumuuza Labani zooshi epile zanvireliyeezo.
GEN 29:14 Aphano Labani khulupa yoori: “Weeyo khweele ojamaayaku, taamu yetthu moote.” Yaakhumpa khwiikhala mpakha wiisha mweezi ari ottuukho.
GEN 29:15 Elottelanaka Labani khuri: “Hatha nkhama ojamaayaku, onakhola khaazi mahala? Kuuze phakari yawo.”
GEN 29:16 Labani aarina aanaawe awiri aakha; otu nwulu aari wiitthiwa Liiya. Nttiitthi aya aari wiitthiwa Rakeele.
GEN 29:17 Liiya aari woosizila maasho, ila Rakeele aari wooshapweya mwiili awe na omaasho wawe.
GEN 29:18 Yaakhumpa mwaasa wootuveliwa ti Rakeele, khulupa yoori: “Kintta okhola khaazi nyaakha sapa okilooze mwanawo otu nttiitthi aya.”
GEN 29:19 Labani khujipu yoori: “Kemaani! Ti yooshapweya wuulooza weeyo zayita onlooza ntthu nkinoko. Osala wiikhala attaapha na-miyo.”
GEN 29:20 Yaakhumpa khukhola khaazi nyaakha sapa yoori anrale Rakeele. Nyaakha epile sapa ye khoona nkhama siikhu vattitthiiru mwaasa wootuveliwa channu.
GEN 29:21 Ye khumuuza Labani yoori: “Aphano kiloozeni muukhaaka, maana zafiyela siikhu naasiilaniyeezo.”
GEN 29:22 Labani khuwaakhuwela atthu a waatta a mmuti mphule khuretta njampo.
GEN 29:23 Ila n'ooripa khunthuula mwanawe Liiya khumwinkha Yaakhumpa khurapalelana.
GEN 29:24 Labani khumwinkha karumeyaawe Ziilipa mwanawe Liiya yoori asala anrumeela.
GEN 29:25 Ochiiyeevo, Yaakhumpa khumoona yoori ti Liiya. Ye khulankha olawa omuuzela Labani yoori: “Niini epi okiretteliyeezo? Miiyo akaari okhola khaazi mwaasa wa Rakeele? Khi kiiswa yaya niini okittettekhaka?”
GEN 29:26 Labani khunjipu yoori: “Fweeyo mmuti mwetthu mphu khanizowereeni onlooza otu nttiitthi nttunkhulu ahinaraliwe.
GEN 29:27 Amana zivira siikhu sapa za njampo ntthi, nintta wuulooza otu nkina, paata onaahitaavo okikholela khaazi theenya nyaakha sapa.”
GEN 29:28 Ye khukhupali, khuvira siikhu epile sapa za njampo la harusi ya Liiya, Labani khunthuula Rakeele khunlooza.
GEN 29:29 Khunthuula karumeyaawe Biila khumwinkha mwanawe Rakeele yoori asala anrumeela.
GEN 29:30 Yaakhumpa khurapalelana Rakeele khwiiya wontuvela zayita Liiya. Khurutela theenya onkholela khaazi Labani mpakha nyaakha sapa.
GEN 29:31 Nnyizinku nawoona yoori Yaakhumpa khaari otuveliwa ti Liiya, khumwinkha mavokozi. Ila Rakeele khaari ovokola.
GEN 29:32 Liiya khwiimittha khumpattha mwaana wanlume, khuntthaja nzina la Ruubeni. Khuri: “Nnyizinku oona ohoowa waka. Aphano phi kinttelaavo ophetiwa ti mannaka.”
GEN 29:33 Khwiimittha theenya khumpattha mwaana nkinoko, khuntthaja nzina la Simiyooni. Khulupa yoori: “Nnyizinku asiila ohituveli waka, akinkha mwaana nkina.”
GEN 29:34 Khwiimittha theenya swaafu kiina khumpattha mwaana khuntthaja nzina la Leevi, khulupa yoori: “Aphano mannaka onttela wiiya wookusanyeya na-miyo mwaasa wompatthela aana attatthu.”
GEN 29:35 Khurutela wiimittha theenya, khumpattha mwaana khulupa yoori: “Swaafu eti kinttela onsifu Nnyizinku.” Ti eto antthajiyeeyo nzina la Yuuda. Aphano khumwiishela mavokozi.
GEN 30:1 Rakeele ooniyeevo yoori Yaakhumpa khaari ompatthela mwaana, khusala anlilela wiivu ttwiiye. Khumuuza Yaakhumpa yoori: “Okipatthele mwaana, n'oohiiyi etthiipo kintta ofwa!”
GEN 30:2 Yaakhumpa khumwiiphiira, khumuuza yoori: “Weeyo onikoona nkhama Nluku? Ye ti ahiniwinkhaaye mavokozi.”
GEN 30:3 Rakeele khumuuza yoori: “Kinaaye karumeyaaka Biila, onthuule othuuto orapalelane yoori ampatthe mwaana zwaamu yaka, kiiye maama khwa ye.”
GEN 30:4 Rakeele khunthuula Biila khumwinkha Yaakhumpa khwiiya muukhaawe.
GEN 30:5 Khwiimittha khumpattha mwaana.
GEN 30:6 Rakeele khulupa yoori: “Nnyizinku akirettela wa shariyavo, asiila lompa yaka akinkha mwaana.” Khuntthaja nzina la Daani.
GEN 30:7 Biila karumeya wa Rakeele khwiimittha theenya khumpattha mwaana waphiiri.
GEN 30:8 Rakeele khulupa yoori: “Kaarina viittha khuluyeene na nuunu, ila kanshintta.” Mwaana otule khuntthaja nzina la Nafitaali.
GEN 30:9 Liiya nawoona yoori alikha ovokola, khunthuula karumeyaawe Ziilipa khumwinkha Yaakhumpa khwiiya muukhaawe.
GEN 30:10 Ziilipa karumeya wa Liiya, khupattheliwa mwaana ti Yaakhumpa.
GEN 30:11 Liiya khulupa yoori: “Kashapweyiwa mwaani!” Khuntthaja nzina la Gaati.
GEN 30:12 Ziilipa karumeya wa Liiya khunvokola mwaana nkinoko theenya.
GEN 30:13 Liiya khuri: “Kafurahi mwaani! Mpakha aakha akina anteela okuuza yoori kenkhiwa furaha!” Mwaana otule khuntthaja nzina la Asheeri.
GEN 30:14 Wakathi wa wuurula tiriku Ruubeni aalankhiye khusala alawa omashapa, khusikana mishumo eniitthiwaaye mathunkuja, khuthuula khulawa khumwinkha Liiya mamaawe. Rakeele khunvekela araka: “Safwatali, kimeeleni mathunkuja vattitthiiru apo atiisiyeeyo mwanenu.”
GEN 30:15 Ye khujipu araka: “Wanthuula mannaka, khootosheeni? Theenya ontakha othuule mathunkuja apa atiisiyeeyo mwanaka?” Rakeele khunjipu araka: “Kemaani! Nlaweni nipatili, mwikinkhe mathunkuja apo, osikhu opu Yaakhumpa mwilawe mwarapalelane mweeyo.”
GEN 30:16 Njuwa-looveva Yaakhumpa arutaka omashapa, Liiya khunthepeeza khusala amuuza yoori: “Leelo onttela orapalelana miiyo, maana keetta wuurentteri na mathunkuja atiisiyeeyo mwanaka.” N'ooripa Yaakhumpa khulala vamote na Liiya.
GEN 30:17 Nnyizinku khusiila lompa ya Liiya, khwiimittha khumpattha mwaana wathaanu wa Yaakhumpa.
GEN 30:18 Liiya khulupa yoori: “Nnyizinku akitthuva mwaasa wonthuula karumeyaaka khumwinkha mannaka.” Ti eto khuntthaja nzina la Esakhaari.
GEN 30:19 Khwiimittha theenya khumpattha mwaana wasiitha.
GEN 30:20 Ye khuri: “Nnyizinku akinkha etthu ya fwayita, aphano mannaka onteela otuveliwa venkivene ti miyo mwaasa wompatthela aana sitha.” Ti eto mwaana otule khuntthaja nzina la Zabulooni.
GEN 30:21 Wiishela waya Liiya khumpattha mwaana nkina wankha khuntthaja nzina la Diina.
GEN 30:22 Nnyizinku khumuupuwela Rakeele, khusiila lompa yawe khumwinkha mavokozi.
GEN 30:23 Ye khwiimittha khumpattha mwaana. Khulupa yoori: “Nnyizinku eeshisa haaya yaka.”
GEN 30:24 Khuntthaja nzina la Yuusufu, alupaka yoori: “Nnyizinku ti akinkhe mwaana nkina.”
GEN 30:25 Paata ya Rakeele ompattha Yuusufu, Yaakhumpa khumuuza Labani yoori: “Kilikheni kirutele nti kivokoliweeyo.
GEN 30:26 Mwikinkhe aakhaaka apa kiwaakholeliyeeyo khaazi na aanaaka kilawe. Mweeyo mwinjuwa khaazi kuukholeliyeenini.”
GEN 30:27 Labani khujipu yoori: “Safwatali nkhama onikisiileza ohilawe, miiyo sako zaka zakuuza yoori Nnyizinku akiparikhiya mwaasa wa weeyo.
GEN 30:28 Apho okuuze phakari ontakhaaye kisala kuuripha.”
GEN 30:29 Yaakhumpa khunjipu: “Mweeyo mwinjuwa khaazi kuukholeliyeenini yoori ti ya waatta na nanna kaari oshukisaazo nyama zenu mpakha waatta.
GEN 30:30 Miiyo kihinate nyama zenu zaari vattitthiiru leelo pi za waatta: Nnyizinku ooparikhiyani mwaasa wa miiyo. Khi ajamaazaku kinttela owaatthantta lini?”
GEN 30:31 Labani khumuuzela yoori: “Kuuriphe niini?” Khujipu Yaakhumpa: “Mwihikiriphe hatha etthu. Kintta orutela oshukisa nyama zenu amana nisiilana saana.
GEN 30:32 Leelo kinttela woona maphanko ooshi a nyama zenu, kilazakamo pwittipwitthi zooriipa, zoottweleela na za malepa, puuzi zoottweleela na za malepa. Eto ti enttelaaye wiiya phakari yaka.
GEN 30:33 Etthiipo enttela okhweya woona okho ninttaawo nkhama ki wa waamineya. Wakathi mwinttelaaye woona nyama zaka, amana yiiyamo nliphanko mwaka puuzi yoottweleela ama yoohiina malepa ama pwittipwitthi yoohiiyi yooriipa, mwintta ojuwa yoori keetta wiiya.”
GEN 30:34 Labani khuri: “Osiilana wetthu wiiye etthiipo olupiyeezo.”
GEN 30:35 Siikhu ethiitile, Labani khuphakula puuzi zeelume na zeekha zaariina malepa oolakala, na pwittipwitthi epile zaariina malepa ooriipa khuwenkha aanaawe oshukisa.
GEN 30:36 Labani khuruma osusisiwa liphanko ntthile, khulawaniwa ohali woolepawo kiyasi ya siikhu ttatthu ntthu ari nsafwari na okhule aariiwo Yaakhumpa. Yaakhumpa khusala ashukisa nyama za Labani epile zaasaliyeezo.
GEN 30:37 Yaakhumpa khushija virapi piishi za miitthi mittatthu zoofwarikhana khuwaka.
GEN 30:38 Ye aajuwiye yoori vahali aari onywaavo maphanko a nyama phi vahali zaari opepheranaavo. Ti eto aari otthaakaaye puutta epile zoophaka omaasho waya amana zinywaka.
GEN 30:39 Amana zipepherana paata yawoona puutta epile, aana zaari owaapatthaaye aari wiiya oophaka, oottweleela, na a malepa.
GEN 30:40 Yaakhumpa khuphakula nyama epile khuttha mphule zaariimo pwittipwitthi zeekha zoolakala yoori zisala zeekesa okhule ziriiwo epile zooriipa na za malepa za nliphanko la Labani. Khufuwa maphanko awe khuphakula khuhikusanyi na epile za Labani.
GEN 30:41 Amana zipepheriwaka epile zeekha za ruthupa, ye eetta otthaka puutta omaasho waya vahali zaari onywakaavo yoori zisala ziimittha zoonaka puutta epile.
GEN 30:42 Ila nawoona yoori nyama eti ti yawootta khaari ottheela puutta. Epile za wootta zaari wiiya za Labani ila epile za ruthupa zaari wiiya za Yaakhumpa.
GEN 30:43 Wa nanna ethiito aari orettaaye, ye khwiiya thaajiri nwulweene khwiiyana maphanko a waatta a nyama, akarumeya aakha na aalume, nkamiiya na apuuru.
GEN 31:1 Yaakhumpa khuuziwa mattakhuzi aari olupaaye aana a Labani araka: “Yaakhumpa athuula zooshi paapa aariinaazo, areela mwaasa wa maali za paapa”.
GEN 31:2 Yaakhumpa khoona yoori Labani khaari omweettettisa saana nkhama aari omweettettisaazo raku.
GEN 31:3 Nnyizinku khumuuza Yaakhumpa yoori: “Orutele nti wa apapazo okhu ovokoliweewo, miiyo kinttela wiiya vamote na-weyo.”
GEN 31:4 Yaakhumpa khuruma okhuweliwa Rakeele na Liiya yoori alawe otthuttu okhule aari ojisaawo nyama zawe.
GEN 31:5 N'oofiya khuwooza yoori: “Kinoona yoori papeenu khanikeettettisa saana nkhama raku. Ila Nluku wa paapa ori vamote na-miyo siikhu zooshi.
GEN 31:6 Mweeyo mwinjuwa yoori kakhola khaazi ya papeenu khwa kuvu zaka zooshi.
GEN 31:7 Papeenu khukittettekha na khuzukulisa phakari yaka swaafu khumi, ila Nluku khuhintakheli yoori akirettele zootakhala.
GEN 31:8 N'oolupa yoori nyama epile zooshi za wiiyana malepa phakari yaka, nyama epile khusala ziwaapattha aana awiiyana malepa paasi. N'oolupa yoori nyama zoottweleela pi zaawo, nyama epile khusala ziwaapattha aana oottweleela.
GEN 31:9 Nluku othuuto ti ye athuuliyeeyo nyama za papeenu khukinkha miiyo.
GEN 31:10 N'oofiya wakathi zaari wiimitthaavo nyama epile, kooniye muulottha mirurumpi zaari opepheraaye ziri za malepa, zoottweleela na zooriipa.
GEN 31:11 Nlayikha la Nluku khukikhuwela muulottha liraka: ‘Yaakhumpa!’ Miiyo khujipu: ‘Lape!’
GEN 31:12 Nlayikha ntthile khulupa yoori: ‘Olanse maasho awo woone nyama zimpepheriwa pi mirurumpi za malepa, zoottweleela, na zooriipa. Miiyo koonoza mwaasa yoori kinoona zooshi epile Labani anuurettelaazo.
GEN 31:13 Miiyo ki Nluku otule oopuweleliyeeyo Beetele okhule waavaaziyeewo mafuttha liwe na khukaahiti. Oleemo mmuti mphu nasaapi ethiiti orutele nti ovokoliweewo.’”
GEN 31:14 Rakeele na Liiya khujipu araka: “Fweeyo khanina hatha etthu yoorithi mmakhono wa papeetthu.
GEN 31:15 Oninoona nkhama amalapo! Anuuzanyisa, nzurukhu etthu wa mahari wooshi aja.
GEN 31:16 Maali epi zooshi Nnyizinku alaziyeeyo mmakhono wa papeetthu pi zeetthu fweeyo na aaneetthu. Apho orette zooshi epi Nnyizinku awuuziyeeyo.”
GEN 31:17 Yaakhumpa khuwaapakhira aanaawe na aakhaawe vankamiiya.
GEN 31:18 Khuthuula nyama zawe na mali zawe zooshi aapatthiyeeyo Paata-Araamu, khusala alawa wa papaawe Esiyaakha tuniya ya Kanaani.
GEN 31:19 Wakathi Labani alawiyeevo okasa ovuzi wa pwittipwitthi zawe, Rakeele khwiiya sanamu za papaawe aarettiyeeyo wiiya miluku zawe.
GEN 31:20 Ti nanna Yaakhumpa anretteliyeezo Labani Mwaarameewu, khutthirawo owawe woohinleezi.
GEN 31:21 Khutthirisa vitthu zawe zooshi arinaazo, khulokha muuttho wa Efwarathi khusala alawa nti wa nyaako Gileyaadi.
GEN 31:22 Eviriyeevo siikhu ttatthu, Labani khuuziwa yoori Yaakhumpa atthira.
GEN 31:23 Ye khuwaathuula ajamaaze khusala amwiikarisa Yaakhumpa mpakha siikhu sapa, khunsikana onyaako wa Gileyaadi.
GEN 31:24 Aphano Nnyizinku khunlotthisa Labani osikhu eettaka olala yoori: “Phoole! Ohimuuze etthu yooshapweya Yaakhumpa ama yootakhala.”
GEN 31:25 Labani khunsikana Yaakhumpa eemesiye heema zawe onyaako wa Gileyaadi ye na ajamaaze, n'oofiya khumaka kharipu na attaaphale aamakiyeevo Yaakhumpa.
GEN 31:26 Ye khumuuzela Yaakhumpa yoori: “Epi okiretteliyeezo niini, zookittettekha khuwaathuula aanaaka nkhama atthu ookholiwa viittha?
GEN 31:27 Wakittettekhela-ni khutthira sirini? Okijuwisiye khaneetta oleezana na furaha niipaka maliipo, koma na tthakare?
GEN 31:28 Weeyo khuhikiweji khapula kileezanana aanaaka na atuulwaka! Epi orettiyeezo vitthu zoololo.
GEN 31:29 Miiyo kinaaye owahi wa wuuhoowisa, ila osikhu wa taana Nluku wa papaawo khukuuza yoori: ‘Phoole! Ohimuuze etthu yootakhala ama yooshapweya.’
GEN 31:30 Aphano nkhama weeyo watthira mwaasa wa wuunukhela wa papaawo, miluku zaka weeyela-ni?”
GEN 31:31 Yaakhumpa khunjipu Labani araka: “Keetta woova, kaari wuupuwela yoori mwintta okinyakanya aaneenu.
GEN 31:32 Amana mwinsikanana ntthu miluku zenu epo, ahiiye haayi. Mashaahiti ajamaazetthu apa; n'oosikana etthu ya wiiya yeenu kirina miiyo mwithuule.” Yaakhumpa khaajuwiye yoori Rakeele ti ye eeyiyeeyo miluku epile.
GEN 31:33 Labani khuvira nheema wa Yaakhumpa na nheema wa Liiya na etile ya akarumeya apale awiri, ila khuhisikanimo. Asaruwiyeemo nheema wa Liiya, khweetta nheema wa Rakeele.
GEN 31:34 Rakeele aarettiye atthiiye vathi wa nsaawu wa enkamiiya eekhaleliye. Labani khuwaathola mmaheema wooshimo khuhiwaasikani.
GEN 31:35 Rakeele khumuuza papaawe yoori: “Mwihikatipukhe mbwanaaka mwaasa woohilankhi n'oowoonani, keetta wiiya mmweezi.” Ye khweekesa miluku zawe epile ila khuhipatthi.
GEN 31:36 Yaakhumpa khwiiphiiriwa, khusala ammaruwela Labani yoori: “Niini kitthekiyeeyo? Wala kakosa-ni yoofiyelela okiikarisa mwiri wookatipukhawene?
GEN 31:37 Mapwattha aka ooshi mwathola, mwasikanamo niini ya wiiya yeenu? Nkhama mwasikanamo etthu yeenu mwitiise apha ariivo attwiizaku na attwiizenu aniphuke fweeyo awiri.
GEN 31:38 Nyaakha eshiriini kiri vamote na-mweyo. Khina pwittipwitthi yenu wala puuzi yenu enaharipweye erukulu yaya na akinarafune hatha pwittipwitthi moote ya liphanko lenu.
GEN 31:39 Akinootiseleni hatha nyama moote yoovulalisiwa khufwa: miiyo keetta oriphelaka. Mweeyo mwaari oveka oriphiwa wakhula nyama yaari wiiyiwaaye osikhu na nthana.
GEN 31:40 Nthana keetta ohoowa mwaasa wa haari, osikhu keetta ohoowa mwaasa wookizizima, osikizi khawaari okikhola.
GEN 31:41 Ti nanna miiyo keekhaliyeeyo vaje venu nyaakha eshiriini: kookholelani khaazi nyaakha khumi na mine yoori eeye mahari a aaneenu oowiiri, na nyaakha sitha kishukisaka nyama zenu phakari yaka yiiyaka nyama etthiipo, ila mweeyo khuzukulisa phakari yaka swaafu khumi.
GEN 31:42 Eriwaka khaari Nluku wa paapa, Nluku wa Eburahiima otu amooviyeeyo Esiyaakha, wiiya vamote na-miyo, mweetta okiikara woohikinkhi etthu. Ila Nluku khoona ohoowa waka na khaazi kikholiyeeyo, taana osikhu Ye khuulikhisani.”
GEN 31:43 Labani khunjipu Yaakhumpa yoori: “Aakha apa aanaaka, aanaaya atuulwaka, nyama epo oriina pi zaaka. Zooshi epi onoonaazo pi zaaka. Miiyo kiwaarettele niini aanaaka na aanaaya apa awaavokoliyeeyo?
GEN 31:44 Apho, nirette wahati miiyo na-weyo, otthuupo wiiye pi oshaahiti etthu.”
GEN 31:45 Aphano Yaakhumpa khuthuula liwe khweemesa nkhama nripu.
GEN 31:46 Ye khuwooza ajamaaze yoori: “Mwilokotthele mawe muukele.” Yo khulokotthela, khwiikhala khusala aja nshini wa mawe atthaapale ookeliyeeyo.
GEN 31:47 Labani khutthaja nzina puuro yaya etile la Yakaare Sahatuuta, na-ye Yaakhumpa khutthaja nzina la Kaleeti.
GEN 31:48 Aphano Labani khulupa yoori: “Mawe apa nuukeliye apha leelo, oshaahiti etthu miiyo na-weyo.” Ti eto yaari wiittheliwaaye nzina la Kaleeti.
GEN 31:49 Khusala yiitteliwa theenya nzina la Misipha, mwaasa ye woolupa araka: “Nnyizinku asala aneekesela amana naattuwana.
GEN 31:50 Amana owaahazula aanaaka na khuweekesa aakha akina oohiiyi yo, hatha nkhama khajuweeni ntthu, wuupuwele yoori Nnyizinku shaahiti etthu.”
GEN 31:51 Labani khumuuza Yaakhumpa yoori: “Woone mawe apa ariiye apha na nripu ntthi keemesiyeeyo vakatthi vetthu miiyo na-weyo.
GEN 31:52 Kulu eti ya mawe na nripu, oshaahiti yoori akinteela wiirukhela kaapu yawo oteela wuuharipwela, wala weeyo ohiirukhe otaaka kaapu yaka oteela okiharipwela.
GEN 31:53 Nluku wa Eburahiima, Nluku wa Nahoori, Nluku wa papaawo ti aniphuke miiyo na-weyo.” Yaakhumpa khulapha khwa nzina la Nluku wa Esiyaakha otule aari omoovaaye.
GEN 31:54 Yaakhumpa khuretta twaha vamwaako khuwaakhuwela ajamaaze ooshi aariinaaye yoori aje vamote, n'ooja nawiisha khulala vamwaako attaapho.
GEN 31:55 Mmeesho mwaya lifwajiri Labani khulankha khuwaapejari aanaawe na atuuluwe, khuwaaparikhiya, nawiisha khusala arutela owawe.
GEN 32:1 Yaakhumpa khulankha khusala alawa safwari yawe khukutthanana malayikha a Nnyizinku.
GEN 32:2 Ye nawoona khuri: “Eti puuro ya anajanka a Nluku.” Aphale vaya khutthajavo nzina la Manayimu.
GEN 32:3 Yaakhumpa khuwaaruma akarumeyaawe yoori alokoze wa ttwiiye Ezawu nti wa Seyiiri tuniya ya Edomu.
GEN 32:4 Khuwaaruma yoori: “Mwilawe mwamuuze mbwanaaka Ezawu yoori karumeyaawo Yaakhumpa alupa toono: ‘Keekhala vaje wa Labani siikhu za waatta mpakha leelo.
GEN 32:5 Kapatthawo mompe, apuuru, pwittipwitthi na puuzi, akarumeya aalume na aakha. Aphano kinimperekheza hapari epi mbwanaaka yoori akipokherele wooshapweyavo.’”
GEN 32:6 Akarumeya apale khurutela wa Yaakhumpa khumuuza yoori: “Naalawiye mpakha wa ttwiiyo Ezawu. Nanlikha eettaka ota, ontana atthu awe miiya nne oteela okutthanana weeyo.”
GEN 32:7 Ye khwiiya wa woova na wooshukulikha, khuwaawanya atthu apale aariina na maphanko a nyama khuntti piiri, pwittipwitthi, puuzi, mompe, na enkamiiya.
GEN 32:8 Arettaka toowo oopuweliye yoori: “Ezawu amana ata okuumanana khushintta khuntti moote, eti kiina entta otthira.”
GEN 32:9 Aphano Yaakhumpa khulompa araka: “Nluku wa paapa Eburahiima na Nluku wa paapa Esiyaakha, Oo Nnyizinku okuuziyeeyo yoori: ‘Orutele nti wa apapazo miiyo kinttela oweettettisa saana’,
GEN 32:10 akinsuhi pheta yawo ya waamineya khwa nanna okikholiyeezo miiyo karumeyaawo; wakathi kaari olokhaavo muuttho Yorotaani miiyo kaathuuliye pakhora yaka paasi, aphano kapattha khuntti piiri za atthu na nyama.
GEN 32:11 Okuusuru mmakhono wa ttwiiyaku Ezawu, maana kinimoova oteela okuula vamote na aakha apa na asimaana.
GEN 32:12 Ila weeyo wakaahiti yoori onttela okeettettisa saana, na waattise peewu yaka nkhama mishaka za mmattima epi zihinaalakeyaaye.”
GEN 32:13 Waari osikhu, ye khulala attaaphale. Mmaphanko wa nyama zawe khuthawulamo nyama zoomwinkha ttwiiye Ezawu:
GEN 32:14 miiya piiri puuzi zeekha na mirurumpi eshiriini, miiya piiri za pwittipwitthi na mirurumpi eshiriini,
GEN 32:15 enkamiiya talaathiini zeekha na aanaaya awaamwa, mompe zeekha talaathiini na zeelume khumi, apuuru eekha eshiriini eelume khumi.
GEN 32:16 Wakhula liphanko la nyama epile khusala amwinkha karumeya mmote, khuwooza yoori: “Mwilokozise, maphanko apa mwaattuwanise.”
GEN 32:17 Otule aalokoziyeeyo khumuuza araka: “Weeyo onlawa wakutthanane ttwiiyaku Ezawu. Amana awuuzela yoori ‘Nyama epi pi zaani wala weeyo ontta vayi?’
GEN 32:18 Weeyo onjipu yoori, ‘Pi za karumeyeenu Yaakhumpa, vitthu animperekhezaaye mbwanaawe Ezawu, ye aya ontta ota nyuma wetthu.’”
GEN 32:19 Khunruma otule waphiiri na wattaatthu na apa akinoko aya aari operekhaaye maphanko a nyama, awoozaka yoori: “Amana mwikutthanana Ezawu, mooshi mwimuuze etthu moote.
GEN 32:20 Mwihisahawu olupa yoori: ‘Yaakhumpa karumeyeenu ontta ota onyuma wetthu okho.’” Maana Yaakhumpa aari wuupuwela yoori: “Kintta onnyamaza wiiphiiriwa wawe Ezawu mwaasa wa vitthu epi kilokozisiyeezo. Amana kikutthanana talili onteela okipwekherela saana.”
GEN 32:21 Khulokozisa vitthu epile, ila ye khulala attaaphale aamakiyeevo.
GEN 32:22 Osikhu otthuupule Yaakhumpa khulankha khuwaathuula aakhaawe oowiri na akarumeyaawe apale awiri aakha, na aanaawe khumi na mmote, khuwaalosa muuttho wa Yabokhi.
GEN 32:23 Khuwaalosa atthu apale na vitthu zawe zooshi aariinaazo.
GEN 32:24 Yaakhumpa khusala otthwe, khumpuwelela nlume mmote khusala oomanana mpakha ocha.
GEN 32:25 Nlume otule ooniyeevo yoori khaari onkhitiri khumpiya n'yuunu mwawe khukurukunyuwa liphaja lawe eettaka wuumana.
GEN 32:26 Aphano nlume otule khuri: “Okilikhe kilawe wacha.” Ye khuri: “Akinuulikha olawa ohikiparikhiyeeni.”
GEN 32:27 Nlume otule khumuuzela yoori: “Nzina lawo o paani?” Khujipu araka: “Miiyo ki Yaakhumpa.”
GEN 32:28 Nlume otule khutukhuru yoori: “Khunteela wiittheliwa theenya nzina la Yaakhumpa, ila nka okhuweleliwaka Ezirayeele. Mwaasa yoori weeyo woomanana Nnyizinku na atthu, khushintta.”
GEN 32:29 Yaakhumpa khumuuza yoori: “Kakhola moolu kuuzeni nzina lenu.” Ye khujipu araka: “Ontakha oretta-nne nzina laka?” Khumparikhiya attaaphale.
GEN 32:30 Yaakhumpa khulupa yoori: “Miiyo kamoona Nnyizinku wuuso khwa wuuso ila nalelo kiri haayi.” Ti eto khutthaja nzina puuro etile la Peniyeele.
GEN 32:31 Yaakhumpa lantthamuweliye njuwa alankhaka Peniyeele eettaka okokoja muulu mmote.
GEN 32:32 Ti eto mpakha leelo atthu a Ezirayeele khanja ntika wa nyama opu onluttaaye liphaja, mwaasa yaari phantte ya mwiili wa Yaakhumpa waapiiweeyo khukurukunyuwa.
GEN 33:1 Yaakhumpa khweekesa okhule aari weettaawo khumoona Ezawu eettaka ota na atthu awe miiya nne. Khuwaawanya aanaawe khumwinkha Liiya, Rakeele na akarumeyaawe apale awiri aakha.
GEN 33:2 Khuwaalokozisa akarumeyaawe apale na aanaaya, khusala alottiwa ti Liiya na aanaawe, khwiishela Rakeele na Yuusufu.
GEN 33:3 Yaakhumpa khuwaalokozela, khukokhora khwiinama swaafu sapa mpakha nttunkhulu awe ofiya aphale aariivo.
GEN 33:4 Ezawu khutthira khulawa khumpatikha khumpejari, oowiiri khusala alila.
GEN 33:5 Ezawu khulansa maasho khuwoona aakha na aana, ye khuuzela yoori: “Khi apa apaani?” Yaakhumpa khunjipu: “Aana apa rehema Nnyizinku amwinkhiyeeyo karumeyeenu.”
GEN 33:6 Aphano akarumeya apale na aanaaya khumwaattama khukokhora khwiinama.
GEN 33:7 Elottelanaka Liiya khuta attaaphale na aanaawe khukokhora khwiinama. Wa wiishela aari Yuusufu na Rakeele, na-yo khuta khukokhora khwiinama.
GEN 33:8 Ezawu khuuzela yoori: “Nyama epile zooshi kisikaniyeeyo ntarikhi ontakhela-ni?” Yaakhumpa khujipu: “Kintakha kipatthe osuhi mmakhono mwenu mbwanaaka.”
GEN 33:9 Ezawu khulupa yoori: “Miiyo kinaaye pure ttwiiyaku, epo zaawo osalane omwennyewe.”
GEN 33:10 Yaakhumpa khusala ankhanyarela araka: “Mwihikatthale! Nkhama kinsuhi mmakhono mwenu safwatali pokherani vitthu epi, maana n'oowoonani mweeyo koona nkhama kimooniye Nnyizinku khwa nanna mwituveliweezo ti miyo.
GEN 33:11 Kinuuvekelani yoori mwipokherele vitthu epi kuutiiseliyeenini mwaasa yoori Nnyizinku akiparikhiya, akinkha zooshi epile kinhithajiyaaye.” Ye khunkhanyarela Ezawu mpakha okhupali.
GEN 33:12 Ezawu khuri: “Nlawe nivire neettettaka.”
GEN 33:13 Ila Yaakhumpa khuri: “Mbwanaaka, mwinjuwa yoori aana apa nalelo asimaana na kinaaye pwittipwitthi na mompe zinaamwisaaye. Amana kikhanyarela weettettisa channu zooshi zintta ofwa siikhu moote.
GEN 33:14 Apho mwilokoze mbwanaaka, miiyo kintta ota vattiitthi-vattiitthi khwa mwentto wa aanaaka na nyama zaka, mpakha ofiya nti wa Seyiiri.”
GEN 33:15 Ezawu khuri: “Kintakha atthu aka akina kuulikhele weeyo.” Yaakhumpa khuuzela yoori: “Mwaasa wa niini? Khinhithajiya. Ethiiti mwikipokhereliyeeyo saana paasi.”
GEN 33:16 Siikhu ethiitile Ezawu khulankha khusala arutela owawe Seyiiri.
GEN 33:17 Yaakhumpa khulankha khusala alawa Sokoota. Ottuukhule khujeka nyuupa yawe na mazizi a nyama zawe. Ti eto atthajiyeevo nzina la Sokoota.
GEN 33:18 Yaakhumpa arutiyeevo Paata-Araamu khufiya Shekemu tuniya ya Kanaani ari nkumi, khweemesa heema zawe kharipu ya sitati ethiitile.
GEN 33:19 Khuuzanya phantte moote ya nshapa puuro ethiitile eemesiyeevo heema zawe, na aana a Hamori, paapa wa Shekemu, khwa hisapu miiya nzurukhu wa feeta.
GEN 33:20 Attaaphale khunjeka alitaari khuntthaja “Nluku yoori Nluku wa Ezirayeele.”
GEN 34:1 Siikhu moote, Tiina mwaana wa Yaakhumpa na Liiya, aalankhiye olawa owaathotola aanaakha a nti otthuupule.
GEN 34:2 Shekemu mwaana wa Hamori nhiivi mfwalume wa nti aya opule, n'oomoona, khunkhola khunjansili.
GEN 34:3 Erettiyeevo toole khwiiya wootuveliwa ti Tiina mwaana wa Yaakhumpa, khumpheta, khumuuza mattakhuzi oomwiitthaaza rooho.
GEN 34:4 Shekemu khumuuza Hamori papaawe yoori: “Mwakuurele mwaari otu kinrale.”
GEN 34:5 Wakathi Yaakhumpa asiiliyeevo yoori mwanawe Tiina ajansiliwa ti Shekemu, aarettiye aanaawe ari ntthuttu ashukisaka nyama. Ye khunyamala khusala awaaweja aanaawe mpakha oruti.
GEN 34:6 Khulankha Hamori paapa wa Shekemu olawa ottakhulana Yaakhumpa.
GEN 34:7 Wakathi arutiyeevo aana a Yaakhumpa ntthuttu, n'oosiila vitthu epile yo khwiiya ooshanka channu, khuweephiira mwaasa yoori Shekemu aarettiye etthu yoopatthisa haaya vakatthi wa Meezirayeele, onjansili mwaana wa Yaakhumpa; eto etthu yahaari orettiwaayo.
GEN 34:8 Hamori khuwooza yoori: “Mwanaka Shekemu atuveliwa ti mwanenu, apho safwatali mwinlooze eeye muukhaawe.
GEN 34:9 Nirette ojama; aaneenu awaarale aaneetthu, na apa eetthu awaarale eenu.
GEN 34:10 Mwiikhale vamote na-fweyo, nti opu pu weetthu mwithawule wakhula phantte mwintakhaaye. Mwiikhale nttumphu mwirette zanshara zenu mpakha muuzanye nti eenu.”
GEN 34:11 Aphano Shekemu khumuuza papaawe Tiina na alupuwe yoori: “Safwatali mwikikhupalele mattakhuzi apa, kintta owinkhani wakhula etile mwinttelaaye olupa.
GEN 34:12 Mwilupe mahari a waatta a mwanenu na tthuvo mwintakhaaye, kintta wuuriphani khwa nanna mwintakhaazo okuuza, ila mwikilooze.”
GEN 34:13 Aphano aana a Yaakhumpa khunjipu Shekemu na papaawe wonhatavo, mwaasa wonjansili nlupwaaya Tiina.
GEN 34:14 Khunjipu yoori: “Khaninwahi onthuula nlupweetthu khunlooza nlume woohikhiriyi koma, enttela wiiya haaya.
GEN 34:15 Fweeyo ninkhupali wuuloozani nlupweetthu amana alume ooshi a mmuti mwenu eeya ookhiriya koma nkhama fweeyo.
GEN 34:16 Toowo phi ninttelaavo wuuloozani aaneetthu na-fweyo owaarala aaneenu, ninttela wiikhala vahali vamote niiye ojama mmote.
GEN 34:17 Ila amana mwihikhupali okhiriya koma, nintta onthuula mwanetthu nileemo mmuti mwenu.”
GEN 34:18 Mattakhuzi apale Hamori na mwanawe Shekemu khukhupalela.
GEN 34:19 Shekemu, shapu wooshitahiwa pi atthu ooshi a vaje wa papaawe, khuhirupazi khulawa khuretta etile aavekeliweeyo mwaasa wontuvela mwaana wa Yaakhumpa.
GEN 34:20 Hamori na mwanawe Shekemu khulankha khulawa vanlako wa sitati ethiitile owooza alume ooshi araka:
GEN 34:21 “Atthu apa pi oosiilaneya, nlaweni niwaalikhe eekhale mmuti mwetthu mphu arettaka zanshara zaya. Nti opu nwulweene ewaamo puuro eniwaafiyelaaye, anilooze aanaaya na-fweyo niwaalooze aaneetthu.
GEN 34:22 Ila yo ankhupali wiikhala vamote na-fweyo khwiiya ajamaazetthu amana alume ooshi akhiriya koma nkhama etthiipo na-yo akhiriyiyeezo.
GEN 34:23 Nyama zaya zooshi na mali zaya zooshi zinttela wiiya zeetthu; nlaweni nikhupalele shawuri zaya yoori eekhale vamote na-fweyo.”
GEN 34:24 Alume ooshi apale aakusanyeyiyeeyo vanlako wa sitati khukhupalela mattakhuzi apale aalupiyeeyo Hamori na mwanawe Shekemu; alume ooshi a sitati ethiitile khukhiriya koma.
GEN 34:25 Siikhu yattaatthu, wakathi alume apale aari woonachaavo olwaaza, aana awiri a Yaakhumpa, Simiyooni na Leevi alupuwe Tiina, khuthuula phanka zaya, khweetta nsitati mphule woohijuwiwi ti hatha ntthu. Khuwoola alume ooshi.
GEN 34:26 Khumuula Hamori na mwanawe Shekemu. Khunthuulawo Tiina owawe Shekemu khusala alawa.
GEN 34:27 Khuta aana a Yaakhumpa apale akina ositati ottuukhule ooliiweewo atthu, khuttapwattha vitthu za mali mwaasa woojansiliwa nlupwaaya.
GEN 34:28 Khuthuula liphanko la pwittipwitthi, la puuzi, mompe, na apuuru, na vitthu zaari nsitati nttumphule na epile zaari omashapa.
GEN 34:29 Yo khuwaathuula aakha na aanaaya na vitthu zooshi za mali zaari mmamanyupa mwaya.
GEN 34:30 Aphano Yaakhumpa khumuuzela Simiyooni na Leevi yoori: “Mweeyo mwakizinkula! Mwaretta yoori atthu apa aniikhalaaye nti otthuupu, Akanaani na Apirizi asala eephiiriwa ti miyo. Fweeyo khanaatteeni, yo amana akusanyeya ateela okuumanana antta okuula na ajamaazaku.”
GEN 34:31 Yo khujipu araka: “Ti yooshapweya yo onretta omalempe nlupweetthu?”
GEN 35:1 Nluku khumuuza Yaakhumpa yoori: “Olankhe olawe Beetele weekhale ottuukho, wanjekewo alitaari wa Nluku otu oopuweleliyeeyo wakathi waari ontthiraavo ttwiiyo Ezawu.”
GEN 35:2 Yaakhumpa khuwooza ajamaaze na atthu apale aariina yoori: “Mweeselele okho miluku zenu epo zoohifwayi mwiriinaazo, mwijitwaharishe mwiwale kuwo kiina.
GEN 35:3 Nilankhe nilawe Beetele, ottuukho kinlawa kanjekewo alitaari woomwaaputuvo Nluku otu aakipuweleliyeeyo siikhu epile kaari mmashakha, otu aakilokoziyeeyo tarikhi zooshi kiviriyeezo.”
GEN 35:4 Yo khumwinkha Yaakhumpa miluku zaya zooshi epile zoohifwayi aariinaazo, na pirinku epile aawaliyeeyo aakha ooshi, ye khuthuula khuthipela nshini wa muutthi nwulweene waari nti wa Shekemu.
GEN 35:5 Wakathi yo alankhiyeevo alawaka, Nluku khuweeshushela woova atthu a sitati epile aattamananiyeezo, mphule aari oviraamo, yo khuhiweekarisi aana a Yaakhumpa.
GEN 35:6 Yaakhumpa khufiya na atthu awe ooshi nti wa Luuzu oniitthiwaaye Beetele, tuniya ya Kanaani.
GEN 35:7 Khunjeka alitaari, puuro yaya etile khutthajavo nzina la Nluku wa Beetele mwaasa yoori Nluku aajithoonyeziye attaaphale wakathi opule Yaakhumpa aari ontthiraavo ttwiiye.
GEN 35:8 Deebora, yaaya wa Rapekha khufwa, khuzikhiwa kharipu ya Beetele nshini wa muutthi nwulweene oniittheliwaaye Alooni-Pakuuti.
GEN 35:9 Yaakhumpa n'ooruti Paata-Araamu, ari Beetele, Nluku ampuweleliye swaafu yaphiiri khumparikhiya.
GEN 35:10 Khumuuza yoori: “Nzina lawo o Yaakhumpa ila waaza leelo walikha, aphano nzina lawo o Ezirayeele.” Ti nanna Nluku antthajiyeeyo nzina la Ezirayeele.
GEN 35:11 Nluku khumuuza theenya araka: “Miiyo ki Nluku Woowahi Wooshi, mwivokolelane na mwaattelane. Khwa peewu yawo weeyo enteela opuwa khapila na khuntti ya khapila za waatta na anlawa apuwevo afwalume.
GEN 35:12 Nti kimwinkhiyeeyo Eburahiima na Esiyaakha kinteela owinkha weeyo na peewu yawo.”
GEN 35:13 Nawiisha ottakhulana Yaakhumpa, Nluku khulawa.
GEN 35:14 Yaakhumpa khweemesa nripu la mawe vahali attaaphale aattakhulaniyeevo Nluku. Khwiitthela viinyu nripu laya ntthile na khuvaaza mafuttha.
GEN 35:15 Ye khutthaja nzina la Beetele puuro yaya etile aari ottakhulanaavo Nluku.
GEN 35:16 Yo khulankha Beetele, nalelo ahinafiye Efwarata Rakeele khwiiyana tafwawuthi khuluyeene ya woona olwaaza asaleelaka ompattha mwaana.
GEN 35:17 Oonaka olwaaza channu, mwaatani khumuuza yoori: “Ohoove! Weeyo wampattha mwaana nkina theenya wanlume.”
GEN 35:18 Ettaka oshakhi ahinattiye phuumu, khuntthaja nzina mwaana otule la Benooni, ila papaawe na-ye khuntthaja nzina la Bejami.
GEN 35:19 Aphano Rakeele khufwa khulawa khuzikhiwa tarikhi ya Efwarata (yiiyiye Belemu).
GEN 35:20 Yaakhumpa khutthaavo alama ya nshuhuti vakhapuri ya Rakeele, mpakha leelo eti liwaapho.
GEN 35:21 Ezirayeele khulankha khuvikana korofwa ya Eeteri khulawa khweemesa heema zawe.
GEN 35:22 Siikhu moote, Ezirayeele eekhalaka nti otthuupule, mwanawe Ruubeni khulawa khulalana Biila, mwiitthwaana otule aari muukha nkina wa papaawe, ila hapari epile khumfiyela papantthu. Ezirayeele aarina aana khumi na awiri.
GEN 35:23 Aana aavokoleliweeyo Liiya ti Yaakhumpa pi apa: wamwanzo ti Ruubeni, alottiwaka ti Simiyooni, Leevi, Yuuda, Esakhaari na Zabulooni.
GEN 35:24 Aana aavokoleliweeyo Rakeele: ti Yuusufu na Bejami.
GEN 35:25 Na-ye aana a Biila karumeya wa Rakeele pi apa: Daani na Nafitaali.
GEN 35:26 Aana a Ziilipa karumeya wa Liiya pi apa: Gaati na Asheeri. Aari atthaapo aana a Yaakhumpa awaapatthiyeeyo nti wa Paata-Araamu.
GEN 35:27 Aphano Yaakhumpa khurutela wa papaawe nti wa Manre kharipu na Kiriyati-Aarapa wiiyiye Heporooni, ohali aari wiikhalaawo Eburahiima na Esiyaakha.
GEN 35:28 Esiyaakha eekhaliye nyaakha miiya na thamaaniini.
GEN 35:29 Afwa ari wa wuuluvala arina nyaakha za waatta, aanaawe Ezawu na Yaakhumpa khunzikha.
GEN 36:1 Eti peewu ya Ezawu anjuwaniwaaye nzina la Edomu.
GEN 36:2 Ezawu khuwaarala aakha a Kanaani. Mmote aari wiitthiwa Aada aari mwaana wa Elooni, nhiiti. Nkinoko aari wiitthiwa Olipama mwaana wa Anahi ntuulu wa Zipiyooni Nhiivi,
GEN 36:3 na Basemaathi mwaana wa Esumayila nlupuwe Nepayoothi.
GEN 36:4 Aada aavokoleliwe mwaana ti Ezawu khuntthaja nzina la Elifazi, na Basemaathi khunvokola Rewele.
GEN 36:5 Na Olipama khunvokola Yewuushi, Yalaamu na Koora. Apa aari aana Ezawu awaavokoliyeeyo tuniya ya Kanaani.
GEN 36:6 Ye khuwaathuula aakhaawe na aanaawe na atthu ooshi aari wiikhalanaaye na vitthu zooshi aapatthiiyeezo tuniya ya Kanaani waaza pwittipwitthi zawe, puuzi na mompe zawe zooshi, khumwazeyanana ttwiiye Yaakhumpa khulawa khwiikhala nti nkina.
GEN 36:7 Ye khuthama mwaasa wa nti opule aari wiikhalaaye khawaarina etthu-yooja yoofiyela oja nyama zaya zooshi, mali zaya zaari za waatta khuhisala ewaheya wiikhala vahali vamote.
GEN 36:8 Ezawu, otu aniitthiwaaye Edomu, khuthama khulawa khwiikhala onyaako wa Seyiiri.
GEN 36:9 Eti peewu ya Ezawu paapa wa Meedomu aniikhalaaye onyaako wa Seyiiri.
GEN 36:10 Apa mazina a aana a Ezawu: Elifazi mwaana wa Aada muukha wa Ezawu, Rewele mwaana wa Basemaathi muukha wa Ezawu.
GEN 36:11 Apa mazina a aana a Elifazi: Teemani, Omari, Zeefo, Katamu na Kenaazi.
GEN 36:12 Tinna, muukha nkina wa Elifazi mwaana wa Ezawu, aavokoleliwe mwaana aari wiitthiwaaye Amaleekhi. Apa atuulu a Aada muukha wa Ezawu.
GEN 36:13 Apa aari aana a Rewele: Nahathi, Zeera, Shaama na Miiza. Apa atuulu a Basemaathi muukha wa Ezawu.
GEN 36:14 Apa aana a Olipama muukha wa Ezawu, mwaana wa Anahi, ntuulu wa Zipiyooni: Yewuushi, Yaalamu, na Koora.
GEN 36:15 Apa mahaakhimu a mahimo a peewu ya Ezawu: Elifazi, mwaana wamwanzo wa Ezawu, aanaawe aari apa: Haakhimu Teemani, haakhimu Omari, haakhimu Zeefo, haakhimu Kinaazi,
GEN 36:16 haakhimu Koora, haakhimu Katamu, na haakhimu Amaleekhi. Apo aari mahaakhimu a peewu ya Elifazi nti wa Edomu. Aari atuulu a Aada.
GEN 36:17 Aana a Rewele, mwaana wa Ezawu aari apa: Haakhimu Nahathi, haakhimu Zeera, haakhimu Shaama na haakhimu Miiza. Apa mahaakhimu a Rewele nti wa Edomu na atuulu a Basemaathi muukha wa Ezawu.
GEN 36:18 Aana a Olipama muukha wa Ezawu, aari apa: Haakhimu Yewuushi, haakhimu Yaalamu na haakhimu Koora. Apa mahaakhimu a peewu ya Olipama muukha wa Ezawu mwaana wa Anahi.
GEN 36:19 Ooshi apa mahaakhimu na aana a Ezawu otu anjuwaniwaaye nzina la Edomu.
GEN 36:20 Apa aana a Seyiiri, nhoori aari wiikhalaaye nti otthuupule; Lotaani, Shobaali, Zipiyooni, Anahi,
GEN 36:21 Diishoni, Eseeri na Diishani. Apa aari mahaakhimu a nti wa Hoori, aana a Seyiiri nti wa Edomu.
GEN 36:22 Aana a Lotaani aari apa: Hoori, Hemani, na Tinna nlupu wa Lotaani.
GEN 36:23 Aana a Shobaali aari apa: Aluvani, Manahati, Ebali, Shefo na Onamu.
GEN 36:24 Aana a Zipiyooni aari apa: Aaya na Anahi othuuto ooneliyeeyo nlipu wa maati oolukuza n'yaara ashukisaka apuuru za papaawe Zipiyooni.
GEN 36:25 Aana a Anahi aari apa: Diishoni na Olipama.
GEN 36:26 Aana a Diishoni aari apa: Hemetaani, Eshipaani, Ethirani na Keerani.
GEN 36:27 Aana a Eseri aari apa: Bilani, Zaawani na Akani.
GEN 36:28 Aana a Diishani aari apa: Wuuzi na Araani.
GEN 36:29 Apa aari mahaakhimu a Ahoori: Lootani, Shopali, Zipiyooni, Anahi,
GEN 36:30 Diishoni, Eseeri na Diishani. Apa aari mahaakhimu a ahoori, ti nanna aawanyeyiyeezo mahimo aya nti wa Seyiiri.
GEN 36:31 Apa afwalume aariina yenzi nti wa Edomu ahineeyevo hatha mfwalume mmote wa mwiizirayeele.
GEN 36:32 Beela mwaana wa Bewoori ti ye aathawaliyeeyo tuniya ya Edomu, sitati yawe yaari wiitthiwa Dinaapa.
GEN 36:33 N'oofwa Beela, khuthawala Yobaabu mwaana wa Zeera wa sitati ya Bozara.
GEN 36:34 Yobaabu khufwa, khuthawala Hushaamu wa nti wa Temaani.
GEN 36:35 Khufwa Hushaamu, khuthawala Hadaadi mwaana wa Bedaadi aawaashinttiyeeyo Amidiyaani nti wa Mowaabu. Sitati yawe yaari wiitthiwa Avithi.
GEN 36:36 Hadaadi khufwa, khuthawala Samula wa nti wa Masareka.
GEN 36:37 Samula khufwa, khuthawala Shawulu wa nti wa Rohopoothi waattameliyeeyo muuttho Efwarathi.
GEN 36:38 Shawulu khufwa, khuthawala Baali-Hanani mwaana wa Akiboori.
GEN 36:39 Afwiiyeevo Baali-Hanani mwaana wa Akiboori khuthawala Hadaari, sitati yawe yaari wiitthiwa Paawu, muukhaawe aari Mehetabeeli mwaana wa Matereeti ntuulu wa Mezahaabu.
GEN 36:40 Mahaakhimu apa aari a peewu ya Ezawu, na mahimo aya na miti zaya: Haakhimu Tinna, Aluvani, Yeteeti,
GEN 36:41 Oholipama, Elaahi, Pinoni,
GEN 36:42 Kenaazi, Temaani, Mibizaari,
GEN 36:43 Makidiyeeli na Iramu. Apa aari mahaakhimu a Edomu; wakhula mmote aari wiikhala puuro etile aari othawalaaye. Meedomu ooshi peewu ya Ezawu.
GEN 37:1 Yaakhumpa aari wiikhala tuniya ya Kanaani ottuukho aasaafireliyeewo papaawe.
GEN 37:2 Eti hatiithi ya peewu ya Yaakhumpa. Yuusufu arina nyaakha khumi na sapa, aari nshuki wa pwittipwitthi na puuzi za papaawe vamote na attwiize aana a Biila na Ziilipa, aakha a papaawe. Yuusufu eetta omuuzaka papaawe vitthu zootakhala aari orettaazo attwiize.
GEN 37:3 Ezirayeele aari ompheta Yuusufu zayita aana apale akinoko aya, mwaasa yoori ampatthiye ooluvaliye. Khunsonela ajapi ya kisawu za waatta.
GEN 37:4 Attwiize nawoona yoori oniiya ophetiwa ti papaaya zayita yo, khwaaza wiiphiiriwa ti ye khuhisala awahi onttakhulana saana.
GEN 37:5 Siikhu moote, Yuusufu khulottha jozi, n'oowooza attwiize yo khutepa wiiphiiriwa ti ye.
GEN 37:6 Ye khuwooza yoori: “Mwisiileze jozi kilotthiyeeyo!
GEN 37:7 Kalottha niri mmashapa nifukaka misama za tiriku, nsama aka khweemela, misama zenu mweeyo khuzukulela khwiinamela opu waaka.”
GEN 37:8 Attwiize khumuuzela yoori: “Apho niri weeyo onttela wiiya mfwalume etthu fweeyo? Ama niri ti weyo onttelaaye onilokozela?” Khutepa wiiphiiriwa mwaasa wa jozi etile na mattakhuzi awe.
GEN 37:9 Khurutela olottha khuwooza attwiize yoori: “Kalottha theenya! Njuwa, mweezi na matthottowa khumi na limote zikiinameliye.”
GEN 37:10 N'oomuuza papaawe na attwiize, papaawe khunshowera araka: “Jozi-ni eto olotthiyeeyo? Niri miiyo, attwiizo na mamaawo ninteela wuukokhorela weeyo?”
GEN 37:11 Waaza attaapho attwiize khuwaata nrima na-ye, papaawe khusala apheleleza vitthu epile varoho vawe.
GEN 37:12 Siikhu moote, attwiize Yuusufu aalawiye oshukisa nyama za papaaya kharipu ya sitati ya Shekemu.
GEN 37:13 Aphano Ezirayeele khumuuza Yuusufu araka: “Attwiizo anshukisa nyama kharipu ya Shekemu. Apho kintakha yoori weeyo olankhe olawe ottuukho.” Ye khujipu: “Kemaani, kasiila paapa.”
GEN 37:14 Papaawe khumuuza: “Wawoone nkhama akumi na nyama zaya, ote okuuze.” Yaakhumpa oninrumaru aarettiye ari mmujokowa wa Heporooni, Yuusufu khulankha khusala alawa Shekemu.
GEN 37:15 Asaleelaka ofiya Shekemu khuthowelela. Khusikaniwa ti mwinyi mmote eettaka ojeettettela ntthuttu khumuuzela yoori: “Weyo! Oneekesa-ni?”
GEN 37:16 Ye khunjipu araka: “Kiniweekesa attwiizaku; safwatali kuuzeni ohali anshukisaawo nyama zaya?”
GEN 37:17 Mwinyi otule khujipu yoori: “Apha avikanavo, kawaasiila araka: ‘Nintta Dotaani.’” Yuusufu khusala aweekesa, khuwaasikana asaleelaka ofiya Dotaani.
GEN 37:18 Attwiize n'oomoona eettaka ota, ari peetiwene ahinawaafiyele khuwaza shawuri zoomuula.
GEN 37:19 Yo khuuzana yoori: “Ahee! Namalottha nwulu oto ontta ota!
GEN 37:20 Aphano akhweya. Nlaweni nimuule nimweeselele valiphotto nalupe yoori eetta orafuniwa ti nyama za ntthuttu. Noone olottha wawe vahali onttelaaye wiishelavo.”
GEN 37:21 Ruubeni n'oosiila khumwaakisela khulupa yoori: “Nihimwankameze!”
GEN 37:22 Khulupa theenya yoori: “Nihimuule. Nimweeselele vanlipu oriiye n'yaara mpho, ila mwihinvulalise.” Ye alupaka toowo, aariye amuusuru ttwiiye arutele wa papaawe ari haayi.
GEN 37:23 Yuusufu n'oowaafiyela attwiize, yo khunvula ajapi etile yooshapweya aawaliiyeeyo,
GEN 37:24 khuntthempa khumweeselela vanlipu woohiivo hatha etthu na oohivo maati.
GEN 37:25 Yo khwiikhala yoori aje, khuwoona annya-zanshara eettaka ota ari ohali woolepawo, annya-esumayila aari olankhaaye Kileyaati na enkamiiya zaya apakhiriye viluko, paalasamu, na mafuttha oonukhela eettaka Misuri.
GEN 37:26 Yuuda khuwoozela attwiize yoori: “Ena fwayita-ni omuula ttwiiyetthu khunvitha?
GEN 37:27 Nihimuule, niwoozanyeze annya-esumayila apo, maana ye ti ttwiiyetthu, taamu yetthu moote.” Attwiize apale akinoko aya khukhupalela.
GEN 37:28 Khunlazavo vanlipu aphale aamweeseleliyeevo, khuwoozanyeza annya-esumayila aari oviraaye, a nti wa Midiyaani, na nzurukhu eshiriini wa feeta. Yo khunthuula khusala alawana Misuri.
GEN 37:29 Wakathi Ruubeni aruteliyeevo vanlipu aphale, khuthurumelavo khuhinsikanivo, attaaphale khuvarula kuwo zawe athoonyezaka yoori ori nhuzuni.
GEN 37:30 Khurutela aphale aariivo attwiize khuwooza yoori: “Mweyo! Shaapu otule khaavo vanlipu aphale! Kiri toovi?”
GEN 37:31 Khuthuula ajapi ya Yuusufu, khuula puuzi moote, taamu yaya khuttukunttela.
GEN 37:32 N'ooretta toole, khuthuula ajapi etile ya waatta kisawu khumweettisela papaaya, khumuuza yoori: “Ajapi eti neetta olokottha. Nkoonani nkhama khahiyo ya mwanenu.”
GEN 37:33 Ezirayeele khufwahamu khuri: “Ajapi ya mwanaka! Khweele-khweele nyama yoohusuti yeetta omuula khunrafuna.”
GEN 37:34 Aphano Yaakhumpa khuvarula kuwo zawe khuwala saakhu khusala anlilela mwanawe siikhu za waatta.
GEN 37:35 Aanaawe ooshi aalume na aakha khuteela onzuru, ila ye khukatthala ozurwiwa waya alupaka yoori: “Kiniikhala woolila etthiipi mpakha olawa okutthanana mwanaka aahera.” Khwiiya wonlilela mwanawe Yuusufu.
GEN 37:36 Wakathi aya opo Amidiyaani aarettiye amuuzanyisiye Yuusufu wa Potifwaari nttunkhulu wa anamweekesela a Firawuuna.
GEN 38:1 Wakathi aya opo Yuuda aamwazeyananiye attwiize khusala eekhala wa mwinyi mmote aari wiitthiwaaye Hiira nti wa Atulaamu.
GEN 38:2 Ottuukho Yuuda ansikaniyeewo mwanankha mmote aari mwaana wa nkanaani aari wiitthiwaaye Shuuwa, ye khunrala.
GEN 38:3 Khwiimittha khumpattha mwaana khuntthaja nzina la Eeri.
GEN 38:4 Khwiimittha theenya khumpattha mwaana nkina khuntthaja nzina la Onaani.
GEN 38:5 Khurutela theenya khumpattha mwaana khuntthaja nzina la Shela, ompattikhanaru Yuuda aarettiye ari nti wa Kezipu.
GEN 38:6 Ye khumweekesa muukha aari wiitthiwaaye Tamaara khunlooza mwanawe Eeri.
GEN 38:7 Ila Nnyizinku khuhintuveli thwapiya za Eeri, khufiyelela omuula.
GEN 38:8 Aphano Yuuda khumuuza Onaani yoori: “Onrale muukha wa marehemu ttwiiyo, ompatthele aana yoori ttwiiyo eeyane peewu khwa weyo.”
GEN 38:9 Ila Onaani aajuwiye yoori aana aari weettelaaye opattikhana, khaari weettela wiiya awe. Ti eto, amana arapalelana muukha wa ttwiiye, zina yawe aari wiitthelaka vathi yoori ahiwaapatthe aana eeya a ttwiiye.
GEN 38:10 Nnyizinku khuhisala zintuvela vitthu epile aari orettaazo khufiyelela omuula.
GEN 38:11 Aphano Yuuda khumuuza Tamaara muukha wa mwanawe yoori: “Orutele wa apapazo ori nankhwele onwejaka mwanaka Shela owula.” Ye aalupiye toowo mwaasa woomoovisa mwanawe Shela ofwa. Tamaara khulawa khwiikhala wa papaawe.
GEN 38:12 Ziviriyeevo siikhu za waatta, khufwa muukha wa Yuuda mwaana wa Shuuwa, nawiisha matthaka khulankha na swaahipu awe Hiira wa nti wa Atulaani, khusala alawa owoona atthu apale ari okasaaye ovuzi wa nyama zaya nti wa Tinna.
GEN 38:13 Khuuziwa Tamaara yoori: “Nkhwewo ontta ovira, oneetta Tinna olawa okasisa nyama zawe.”
GEN 38:14 Khuvula kuwo zawe epile aawaliyeezo z'oonankhwele, khujifinikha nshukwi yoori ahijuwiwe, khulawa khwiikhala vanlako wa sitati ya Enayimu waattamana na tarikhi ya Tinna. Ye aarettiye toowo mwaasa woojuwa yoori Shela awula, ila khwiiya ahinalooziwe.
GEN 38:15 Yuuda n'oomoona khumwaakanyerela omalempe, mwaasa yoori aajifinikhaniye nshukwi omaasho wawe.
GEN 38:16 Ye khunkhuwela araka: “Nkatu! Kinuutakha, kuulalane.” Ye ahijuwaka yoori ti nkhwewe muukha wa mwanawe. Tamaara khumuuzela yoori: “Amana kilalana weeyo onikinkha-ni?”
GEN 38:17 Yuuda khunjipu yoori: “Kintta wuuperekheza puuzi moote ya nliphanko mwaka.” Tamaara khuri: “Aayo! Kasiila. Ila okilikhele etthu kinwahaaye waamini yoori onlawa wakiperekheze puuzi yaya eto.”
GEN 38:18 Ye khumuuzela araka: “Kuulikhele niini?” Tamaara khujipu yoori: “Okilikhele peetthe yawo, mfukho awo na pakhora eto oriina mmakhono mwawo.” Yuuda khumwinkha zooshi epile anvekeliyeezo, khunlalana khwiimittha.
GEN 38:19 Nawiisha Tamaara khurutela owawe khuvula nshukwi khuwala kuwo zawe epile z'oonankhwele.
GEN 38:20 Yuuda khuthuula puuzi khumwinkha swaahipu awe Hiira yoori alawane athuule vitthu epile anlikheliyeeyo muukha otule, ila ye khuhinsikani.
GEN 38:21 Hiira khuwoozela atthu a nti aya opule yoori: “Ori vayi malempe otule aniikhalakaaye ntarikhi?” Yo khujipu araka: “Mmuti mphu khaamo hatha malempe wa wiiya wa nttumphu.”
GEN 38:22 Ye khurutela wa swaahipu awe Yuuda, khumuuza yoori: “Akinsikaneeniwo, atthu a nti aya opule akuuza yoori khaawo hatha malempe wa wiiya wa mmuti nttumphule.”
GEN 38:23 Yuuda khulupa yoori: “Ti asalane epile kimwinkhiyeezo yoori ehikikwele paathuli, miiyo kaaperekhiye puuzi yaya, ila weeyo khuhinsikani ye aya.”
GEN 38:24 N'oovira nyeezi mittatthu, khuuziwa Yuuda yoori: “Nkhwewo Tamaara araruwa, apha eemittha.” Ye khuri: “Athuuliwe alawe alukuziwe!”
GEN 38:25 Athuuliweevo alawaka olukuziwa, khumperekheza nhupi nkhwewe araka: “Erukulu eti kiriina ti ya mwennyewe vitthu epi.” Khulupa theenya yoori: “Moone pakhora eti, mfukho opu na peetthe eti nkhama mwininjuwa mwennyewe.”
GEN 38:26 Yuuda nawoona vitthu epile khulupa yoori: “Ye ti wa shariya zayita miiyo, maana kamwaahitiye oraliwa ti mwanaka Shela.” Na Yuuda khuhiruteli orapalelana.
GEN 38:27 Ofiiyeevo wakathi woopattha ekumi, mwiirukulu mwawe aarimo aana awiri.
GEN 38:28 Apatthaka ekumi otu mmote aya khusarula nkhono awe mmote, mwaatani khuthuula luuzi lookhuttuwa khumfukela khuri: “Otu ti eeyiye tthakuzi woosaruwa.”
GEN 38:29 Otule aasaruliyeeyo nkhono awe khurutiselamo, khusaruwa otule ahaasaruliyeeyo, mwaatani khuri: “Huu! Wapattha toovi tarikhi yoosaruwa?” Khuntthaja nzina la Pereezi.
GEN 38:30 Aphano, khusaruwa ttwiiye otule aafukeliweeyo luuzi lookhuttuwa nkhono awe, khutthajiwa nzina la Zeera.
GEN 39:1 Yuusufu aathuuliwe khulawaniwa Misuri pi annya-esumayila. N'oofiya khuuzanyeziwa Potifwaari mmisuri, karumeya nwulu wa Firawuuna, namalokozela wa anamweekesela.
GEN 39:2 Nnyizinku aari vamote na Yuusufu, khunjaaliwa eekhalaka Misuri vaje wa mbwanaawe.
GEN 39:3 Mbwanaawe otule khoona yoori Nnyizinku ori vamote na Yuusufu, wakhula etthu aari orettaaye Nnyizinku eetta onjaaliwa,
GEN 39:4 Yuusufu khwiiya woofwayi mmakhono wa Potifwaari khumwinkha ottunkhulu wa weettettisela vaje vawe na mali zawe zooshi.
GEN 39:5 Paata yoomwinkha ottunkhulu wa vaje vawe na wa mali zawe zooshi, Nnyizinku khuparikhiya vaje aphale mwaasa wa Yuusufu. Parakha ya Nnyizinku yeeshukheliye khwa zooshi epile aariinaazo, waaza vaje mpakha mmashapa mwawe.
GEN 39:6 Zooshi aariinaazo nttunkhulu aya khwiiya Yuusufu, Potifwaari khaari ojali hatha etthu yoohiiyi etthu-yooja etile ari ojakaaye. Yuusufu aari wooshapweya wumpo na wa weeziwa.
GEN 39:7 N'oorettikhana vitthu epile, muukha wa Potifwaari khwaaza ontakha Yuusufu. Siikhu moote khumuuza yoori: “Weeyo nlawe wakilalane.”
GEN 39:8 Ye khukatthala, khumuuza muukha wa mbwanaawe yoori: “Moone! Mbwanaaka khanjali vitthu za vaje apha; zooshi ariinaazo, ziri mmakhono mwaka.
GEN 39:9 Khaavo mmote akizitiyeeyo miiyo vaje apha, khayiivo hatha etthu moote akikhattaziyeeyo ila mweeyo wala, mwaasa yoori mwa muukhaawe. Etthu yootakhala nkhama eto, kirette mwaasa wa niini? Toowo kintta onkosa Nnyizinku!”
GEN 39:10 Wakhula siikhu muukha otule eetta onkhanyarela yoori alawe anlalane, ila Yuusufu khuhisala ansiileza na khusala anwerawera.
GEN 39:11 Siikhu moote, ye khuvira nnyupa olawa okhola khaazi zawe, aarettiye ahiwo hatha mwiitthwaana mmote.
GEN 39:12 Muukha wa Potifwaari khukhola orempo awe khumuuza yoori: “Haya okilalane!” Yuusufu khunlikhela orempo awe mmakhono mwawe khutthirela vaje.
GEN 39:13 Muukha otule ooniyeevo yoori atthira khulikha orempo awe,
GEN 39:14 khuwaakhuwela akarumeya khuwooza yoori: “Mmoone! Mwiibereewu otu atiisiweeyo ti mannaka aaza onitarawu. Aaviriye okatthi waka khusala atakha okilalana, ila miiyo khusala kikhuwa kinyakulaka.
GEN 39:15 Ye nawoona yoori keetta onyakula khukilikhela orempo awe khutthirela vaje.”
GEN 39:16 Ye khupweha orempo opule mpakha mbwanaawe ota.
GEN 39:17 Wakathi atiiyeevo khumuuza mattakhuzi apale araka: “Mwiitthwaana awo otule wa mwiibereewu onitiiseliyeeyo apha, aakiteeliye khusala atakha okilalana.
GEN 39:18 Kikhuwiyeevo ye khukilikhela orempo awe khutthira.”
GEN 39:19 Paata yoosiila mattakhuzi apale aari wuuziwaaye ti muukhaawe, araka: “Mwiitthwaana awo vitthu akiretteliyeezo pi epo,” ye khukasirikha venkivene.
GEN 39:20 Khuruma weetteliwa Yuusufu khulawa khutthiiwa nkalapooso, nttumpho mfwalume Firawuuna aawaafukeliyeemo atthu awe.
GEN 39:21 Ila Nnyizinku ari vamote na Yuusufu anthoonyezaka pheta ya waamineya, nttunkhulu wa anamweekesela kalapooso khunkola saana.
GEN 39:22 Khumwinkha ottunkhulu Yuusufu wa anamfukeliwa ooshi, khwiiya namalokozela vitthu zooshi za nkalapooso mphule.
GEN 39:23 Nttunkhulu wa anamweekesela a kalapooso etile khuhisala ajali hatha etthu, zooshi zaari mmakhono wa Yuusufu mwaasa yoori Nnyizinku aari vamote na-ye; na wakhula etile aari orettaaye aari wiiya woojaaliwa.
GEN 40:1 Paata yoovira vitthu epile, namootela zoonywa za mfwalume na namuupa-phaawu khunkosa mbwanaaya, mfwalume wa Misuri.
GEN 40:2 Firawuuna khwiiya wa wiiphiiriwa pi annya-khaazi awe apo awiri; nttunkhulu wa wootela zoonywa na nttunkhulu wa wuupa phaawu.
GEN 40:3 Khuruma olawa ofukeliwa nkalapooso ya nttunkhulu wa anamweekesela, nttumphule aafukeliweemo Yuusufu.
GEN 40:4 Nttunkhulu wa anamweekesela khumwinkha Yuusufu atthu apale awiri yoori asala awaatthantta, yo khwiikhala siikhu za waatta nkalapooso.
GEN 40:5 Osikhu mmote oowiri khulottha, wakhula jozi yaarina maana aya, etile ya namuupa-phaawu na ya namootela zoonywa.
GEN 40:6 Mmeesho mwaya supu Yuusufu khulawa owaathotola, khuwaasikana ari ooshukulikha.
GEN 40:7 Aphano ye khuwoozela annya-khaazi a Firawuuna apale aafukelaniweeyo araka: “Leelo mwakafilikhela-ni?”
GEN 40:8 Yo khunjipu yoori: “Neetta wiiyana jozi khuhiivo ntthu wootaphulela maana aya.” Yuusufu khujipu yoori: “Ila Nluku paasi ti ye anttelaaye otaphulela jozi epo, kuuzeni jozi zaya epo.”
GEN 40:9 Nttunkhulu wa wootela zoonywa khumuuza jozi yawe Yuusufu araka: “Kaalotthiye okiteeliye nrayi wa wuuva omaasho waka.
GEN 40:10 Orina virapi ttatthu za waaleya na khwiima mishumo zaari ottokotthaaye miwawa-miwawa.
GEN 40:11 Pilawuri ya Firawuuna eri mmakhono mwaka. Miiyo khuthuula mishumo za wuuva khuvinyela mpilawuri mphule kimwinkha mmakhono mwawe.”
GEN 40:12 Yuusufu khuri: “Maana a jozi yawo eto pi apa: virapi ttatthu enlupa siikhu ttatthu.
GEN 40:13 Nkatthi wa siikhu ttatthu Firawuuna ontta wuulazamo nkalapooso orutele khaazi yawo ya wootela zoonywa za mfwalume na omwinkha pilawuri mmakhono mwawe, nkhama etthiipo waari orettakaazo raku.
GEN 40:14 Ila amana zooshi ziweettettelaka saana ohikisahawu, kinuuhirimiza yoori okoonele huruma omuuze mfwalume monkoni wa miiyo, okaawuni yoori kileemo nkalapooso mphu.
GEN 40:15 Miiyo keetta wiiyiwa nti wa Meebereewu khutiisiwa mmuti mphu khweeseleliwa nkalapooso hatha etthu kihiretteeni.”
GEN 40:16 Asiiliyeevo nttunkhulu wa wuupa phaawu yoori Yuusufu aataphuleliye jozi etile wooshapweyavo, ye khumuuza yoori: “Na-miyo kinaaye yaaka, kalottha kipwecheriye phaawu khelenke ttatthu.
GEN 40:17 Khelenke eti ya vatulu zaarimo wakhula nanna ya phaawu epile zontuvela Firawuuna, ila anyannyi khusala ajoropoja ziri veeshwa vaka.”
GEN 40:18 Aphano Yuusufu khunjipu yoori: “Jozi yawo eto maana pi apa, khelenke ttatthu epo enthoonyeza siikhu ttatthu.
GEN 40:19 Nkatthi wa siikhu ttatthu etthiipo, Firawuuna onlawa athomeye eeshwa mmutthi, mwiili awo osala ojoropojiwa pi anyannyi.”
GEN 40:20 Siikhu yattaatthu yaari siikhu Firawuuna aari orettaaye mwaakha, ye khujisa njampo na annya-khaazi awe ooshi, khuruma okhuweliwa apale aari nkalapooso namuupa-phaawu na namootela zoonywa.
GEN 40:21 Namootela zoonywa khurutiseliwa khaazi yawe ya wootela na yoomwinkha pilawuri Firawuuna mmakhono mwawe.
GEN 40:22 Ila Firawuuna khunthomeya namuupa-phaawu nkhama etthiipile aalupiyeezo Yuusufu.
GEN 40:23 Aphano namootela zoonywa otule khuhinfikhiri Yuusufu khunsahawu eperepere.
GEN 41:1 Eviriyeevo nyaakha miwiri, Firawuuna khulottha ari nshini wa muuttho oniitthiwaaye Niilu.
GEN 41:2 Mmuttho nttumpho zivuuwakamo mompe sapa zooneneva na zooshapweya khusala zittepula nyaani.
GEN 41:3 Elottelanaka theenya khusala zivuuwamo mmuttho Niilu mompe sapa zootakhala za wootta, khulawa khwiiya vamote na epile zaavuuwiyeeyo omwanzo.
GEN 41:4 Epile zootakhala za wootta khurafuna epile zooshapweya zooneneva, attaaphale Firawuuna khusisimuwa.
GEN 41:5 Khurutela olala khulottha theenya, misaasi sapa za tiriku zooshapweya za wiitaala zaari owulaaye vanchina limote.
GEN 41:6 Elottelanaka khoona misaasi sapa za maveya a tiriku a wuuma oolukuziwa ti pheevo ya n'yaara.
GEN 41:7 Misaasi epile sapa za maveya khumiza epile za wiitaala na zooshapweya. Firawuuna khusisimuwa khujuwa yoori eetta olottha.
GEN 41:8 N'oocha mmeesho mwaya supu, nafusi yawe khwiiya yooshukulikha, khurumisa olawa okhuweliwa anamajintta ooshi na anampiya sako a Misuri. Firawuuna khuwooza jozi alotthiyeeyo, ila khuhiivo hatha ntthu mmote aajuwiiyeeyo otaphulela waya.
GEN 41:9 Aphano namootela zoonywa khumuuza Firawuuna yoori: “Leelo kafikhiri koosa zaka.
GEN 41:10 Siikhu moote mweephirisiweeyo pi annya-khaazi eenu mwaarumisiye ofukeliwa miiyo na nttunkhulu wa wuupa phaawu nkalapooso wa nttunkhulu wa anamweekesela.
GEN 41:11 Osikhu mmote fweeyo awiri khulottha wakhula ntthu jozi yawe, wakhula jozi yaarina maana aya.
GEN 41:12 Ila nkalapooso nttumphule aarimo shapu mmote wa mwiibereewu aari mwiitthwaana wa nttunkhulu wa anamweekesela, fweeyo khumweeleza jozi zetthu epile ye khutaphulela.
GEN 41:13 Khurettikhana zooshi nkhama etthiipile aanuuziyeezo: miiyo khurutiseliwa khaazi yaka, otu nkina khuheyiwa.”
GEN 41:14 Firawuuna khuruma olawa okhuweliwa Yuusufu, khulaziwamo nkalapooso nasaapiru. Khunyoola ttevu zawe khuwala kuwo kinoko khulawaniwa wa Firawuuna.
GEN 41:15 Ye khumuuza Yuusufu yoori: “Miiyo keetta olottha jozi moote khuhipuwi hatha ntthu mmote wookitaphulela. Ila khusiila yoori weeyo amana wuuziwa jozi onwahi otaphulela maana aya.”
GEN 41:16 Ye khunjipu Firawuuna araka: “Miiyo akina owahi, ila Nnyizinku onwahi wuutaphulelani wooshapweyavo.”
GEN 41:17 Aphano Firawuuna khusala amuuza jozi etile Yuusufu yoori: “Kalottha keemeliye nshini wa Niilu.
GEN 41:18 Mmuttho mwaya mphule khusala zivuuwamo mompe sapa zooshapweya na zooneneva khusala zittepula nyaani nshini wa Niilu.
GEN 41:19 Theenya khuvuuwa mompe sapa za wootta zootakhala. Nti wooshi wa Misuri akinoone mompe zootakhala nkhama epo.
GEN 41:20 Mompe zaya etthiipile zootakhala na za wootta khumiza mompe epile zooneneva na zooshapweya,
GEN 41:21 ila khusala zumpuwa nkhama zihijeeni etthu nalelo, khwiiya za wootta na zootakhala nkhama zaariizo. Ethiito miiyo khusisimuwa.
GEN 41:22 Khurutela olala khulottha theenya misaasi sapa za tiriku zooshapweya za wiitaala zaari owulaaye vanchina limote.
GEN 41:23 Elottelanaka khoona misaasi sapa za maveya a tiriku a wuuma oolukuziwa ti pheevo ya n'yaara.
GEN 41:24 Misaasi epile sapa za maveya khumiza epile za wiitaala na zooshapweya, miiyo khuwooza anamajintta ila khuhiivo hatha mmote aawahiyeeyo otaphulela.”
GEN 41:25 Aphano Yuusufu khumuuza Firawuuna yoori: “Jozi zenu epo z'oopiri enlupa etthu moote paasi, Nluku eetta wuuthoonyezani eti anttelaaye oretta.
GEN 41:26 Mompe epo sapa zooshapweya zinlupa nyaakha sapa. Misaasi sapa zooshapweya na-yo zinlupa nyaakha sapa. Jozi zaya epo mooteru.
GEN 41:27 Mompe epo sapa za wootta na zootakhala zaavuuwiyeeyo ziwelela aphale zaariivo epile zooshapweya enlupa nyaakha sapa. Misaasi epo sapa za maveya zaalukuziweeyo ti pheevo ya n'yaara, khumiza epile zooshapweya enlupa nyaakha sapa za jala.
GEN 41:28 Mattakhuzi apa kiniwuuzaanini mfwalume, Nluku eetta wuuthoonyezani etile anttelaaye oretta.
GEN 41:29 Nyaakha sapa tuniya ya Misuri enteela oruwera venkivene.
GEN 41:30 Ila theenya zinlawa zate nyaakha sapa za jala, oruwera opo onlawa wasahawiwe. Jala yaya eto enlawa yashintte nti aya opu.
GEN 41:31 Khunteela ofikhireliwa oruwera opule, mwaasa wa jala enttela wiiya yootepa waatta tuniya eti ya Misuri.
GEN 41:32 Eto mwilotthisiweeyo swaafu piiri enlupa yoori Nluku alakela na onretta woohirupazi.
GEN 41:33 Apho mweeyo mfwalume, mwinthawule ntthu mmote woojuwa na wa akhili eeye nttunkhulu wa weettettisa tuniya eti ya Misuri.
GEN 41:34 Mwirette etthiipo, mwiwaattheemo attunkhulu mmuti mphu asala alokotthela phantte ya thaanu za vitthu zinuuruliwaazo tuniya ya Misuri, khwa nyaakha epo sapa zooruweriwa.
GEN 41:35 Yo ana yookusanya epile anttelaazo opattha nyaakha epo zooruwera, theenya ekusanyiwe tiriku yooshi epwehiwe yiiye mmakhono wa Firawuuna, yiiye etthu-yooja ya mmasitati.
GEN 41:36 Vitthu-zoojiwa zaya epo zinttela orumeyeliwa nyaakha epo sapa za jala enttelaaye ota tuniya ya Misuri yoori jala eto ehishintte tuniya eti.”
GEN 41:37 Firawuuna na mashawuriiya awe khoona yoori akhili epile za Yuusufu pi zooshapweya.
GEN 41:38 Ye khuwooza mashawuriiya awe yoori: “Naari oteela ompattha ntthu nkhama otu wa weettettisiwa ti rooho ya Nluku?”
GEN 41:39 Firawuuna khumuuza Yuusufu araka: “Wiiya Nluku oothoonyeza vitthu epi, khaavo nkinoko aya wa akhili na woojuwa nkhama weeyo.
GEN 41:40 Weeyo ti ye onttelaaye wiiya nttunkhulu wa vaje vaka, atthu apa ariivo ooshi nka ashututelaka mattakhuzi awo, ila nkatthi woofwalume miiyo ki nttunkhulu zayita weeyo.
GEN 41:41 Mpakha nasaapi eti kawinkha ottunkhulu wa tuniya eti ya Misuri yooshi.”
GEN 41:42 Aphano, Firawuuna khuvula peetthe yawe khunwalisa Yuusufu, khuruma yoori awalisiwe kuwo zooshapweya na nkufu wa thahapu mmwisiko mwawe.
GEN 41:43 Khupakhiriwa mmwikukutta opule waphiiri, khulokoza anamalaleya alupaka yoori: “Mwinkokhorele!” Yuusufu enkhiweeyo ottunkhulu wa Misuri yooshi.
GEN 41:44 Khulupa theenya Firawuuna amuuzaka Yuusufu yoori: “Miiyo ki Firawuuna, ila khina mmote antakhaaye oretta etthu tuniya eti ya Misuri ahaazeeni wuusikana weeyo.”
GEN 41:45 Firawuuna khuntthaja Yuusufu nzina la Zafenathi-Paneeya. Khunlooza muukha aari wiitthiwaaye Asenaathi, mwaana wa Potifweera, nttunkhulu wa tiini ya Ooni. Aphano Yuusufu khuzukulelisiwa tuniya yaya etile yooshi ya Misuri.
GEN 41:46 Ye azaka khaazi ya mfwalume Firawuuna aarettiye arina nyaakha talaathiini na sitha, khunleeza Firawuuna khwaaza weettetta miti zooshi za Misuri.
GEN 41:47 Nkatthi wa nyaakha sapa epile zooruwera tuniya etile khuruweriwa tiriku ya waatta.
GEN 41:48 Yuusufu khukusanya tiriku yooshi yaaruweriweeyo khwa nyaakha sapa tuniya ya Misuri khupweha mmasitati. Wakhula mashapa apale aattameliye sitati, tiriku yaari wuuruliwaaye yaari opwehiwa ottuukho.
GEN 41:49 Yuusufu khukusanya tiriku ya waatta yahaari waalakeyaaye nkhama mishaka za mmattima, khulikha waalaka mwaasa wa waatta channu.
GEN 41:50 Ehinafiye nyaakha epile za jala, muukha wa Yuusufu Asenaathi, mwaana wa Potifweera, khuwaapattha aana awiri.
GEN 41:51 Otu wa mwanzo Yuusufu khuntthaja nzina la Manaase, alupaka yoori: “Nluku akisahawisa ohoowa waka na vaje wa apapazaku.”
GEN 41:52 Otu waphiiri aya khuntthaja nzina la Efwarayiimu, khulupa yoori: “Nluku akirizikhiya nti opu kihoowiyeeyo.”
GEN 41:53 Aphano nyaakha epile sapa zooruweriwa tuniya ya Misuri khwiisha.
GEN 41:54 Khufiya nyaakha epile sapa za jala aalupiyeeyo Yuusufu. Khupuwa jala tuniya yooshi, ila miti za Misuri zaarina etthu-yoojiwa.
GEN 41:55 Wakathi epariziyeevo jala Misuri, atthu ooshi khunvekela Firawuuna etthu-yoojiwa. Ila ye khuwooza atthu ooshi a Misuri yoori: “Mwilawe mwakutthanane Yuusufu. Wakhula etile anttelaaye owuuzani mwirette ethiito.”
GEN 41:56 Yuusufu nawoona yoori jala yamwazeyela tuniya yooshi khufukulela tiriku etile aapwehiiyeeyo, khusala awoozanyeza Amisuri mwaasa yoori jala etile yaashinttiye.
GEN 41:57 Atthu a tuniya kiina aari ota Misuri oteela wuuzanya tiriku wa Yuusufu, mwaasa yoori jala yaamwazeyeliye olumwenku wooshi.
GEN 42:1 Yaakhumpa n'oojuwa yoori Misuri ewaakho etthu-yoojiwa, khuwooza aanaawe araka: “Mwineekesana yoori niini?
GEN 42:2 Kasiila oriwa Misuri ewaakho tiriku, apho mwilawe moozanye nite nijilelane nihifwe jala.”
GEN 42:3 Aphano khulankha attwiize Yuusufu khumi khusala alawa Misuri wuuzanya tiriku.
GEN 42:4 Yaakhumpa khunkhattaza Bejami ttwiiye Yuusufu owaalotta attwiize amoovisaka ompattha etthu yootakhala.
GEN 42:5 Aana a Yaakhumpa khulawa wuuzanya tiriku nkhama etthiipo aari olawaazo atthu akina, maana tuniya yooshi ya Kanaani yaarina jala.
GEN 42:6 Yuusufu nttunkhulu wa Misuri, ti ye aari owoozanyezaaye tiriku atthu ooshi a mmuti. Attwiize n'oofiya khunkokhorela ajihi zaya khufiisa vathi.
GEN 42:7 Wakathi awooniyeevo khuwaajuwa, ila khumpuwa nkhama ahiwaajuweeni. Khusala awoozela awaatuturuchaka araka: “Mweeyo! Mwinlankha vayi?” Yo khunjipu “Ninlankha tuniya ya Kanaani, naateeliye wuuzanya etthu-yoojiwa.”
GEN 42:8 Yuusufu khuwaajuwa attwiize ila yo khuhinjuwi.
GEN 42:9 Ye khupayini jozi epile aawooziyeeyo khuri: “Mweeyo mw'aahankawaani! Mwaateeliye ojuwa siiri za mmuti mwetthu mphu.”
GEN 42:10 Yo khunjipu araka: “Wala mbwaneetthu! Fweeyo akarumeyeenu naateeliye wuuzanya etthu-yoojiwa.
GEN 42:11 Fooshi papeetthu mmote, n'aatthu awaamineya. Khahi n'aahankawaani.”
GEN 42:12 Yuusufu khusala akhanyarela owooza yoori: “Wala mweeyo mwateela ojuwa kiphenyo za mmuti mwetthu mphu.”
GEN 42:13 Yo khuri: “Fweeyo ninlankha tuniya ya Kanaani, niri aana khumi na awiri paapa mmote. Otu w'eefutti aya nasaapi eti asala onti na paapa, ila otu nkina aya afwa.”
GEN 42:14 Khurutela owooza araka: “Pi etthiipo kilupiyeezo! Mweeyo mw'aahankawaani!
GEN 42:15 Apho kintakha kiwooneni. Kinlapha khwa ohaayi wa Firawuuna, yoori khamwinlaavo apha mwihintiiseeni ttwiiyenu oto w'eefutti.
GEN 42:16 Mwinrume ntthu mmote amweettele, ila apa akina ansalaaye anttela ofukeliwa. Noone nkhama mattakhuzi apa mwilupiyeeyo pi ookhweele. Ila mmana ehiiyi toowo kinlapha khwa ohaayi wa Firawuuna yoori phi mwinttelaavo ojuweya wiiya ahankawaani.”
GEN 42:17 Ye khuwaattha nkalapooso siikhu ttatthu.
GEN 42:18 Siikhu yattaatthu khuwooza yoori: “Miiyo kinimoova Nluku, apho nkhama mweeyo mwintakha wuusuru nafusi zenu, mwiri toono:
GEN 42:19 nkhama mw'aatthu awaamineya mwinlikhe ttwiiyenu mmote nkalapooso, apa akina athuule tiriku awenkhe ajamaazenu ahifwe jala.
GEN 42:20 Mwikitiisele ttwiiyenu oto w'eefutti kihakikhi nkhama mattakhuzi enu pi ookhweele, mwirettaru toowo khamwinuuliwa. Yo khukhupalela oretta epile ooziweezo.”
GEN 42:21 Aphano khusala oozana yoori: “Khweele ninaaye paathuli mwaasa wa ttwiiyetthu. Maana wakathi aashankiyeevo aanivekeliye yoori nimoonele huruma ila fweeyo khuhitakhi, apha t'iiti na-fweyo anipatthiyeeyo matteso apa.”
GEN 42:22 Ruubeni khujipu araka: “Miiyo akaalupiye yoori shapu oto mwihinrettele vitthu zootakhala? Ila mweeyo khuhitakhi okisiileza! Apho nina yoojipu mwaasa w'oofwa wawe.”
GEN 42:23 Yo khaari ojuwa yoori Yuusufu aari osiila epile aari ottakhulaazo, mwaasa yoori attakhulaka aarivo ntthu aari otaphulelaaye.
GEN 42:24 Yuusufu khuwaasusa vattitthiiru khusala alila. Nawiisha khurutela attaaphale khusala attakhula, aphano khunthawula Simiyooni khuruma yoori afukiwe eettaka omoona.
GEN 42:25 Elottelanaka Yuusufu khuwaaruma anakhaazi awe wiitaaza tiriku visurupa za attwiize na owaarutisela nzurukhu aya sirini atthaaka mvisurupa nttumpho, na owenkha etthu-yooja ntarikhi. Khurettiwa etthiipo.
GEN 42:26 Khuthuula visurupa epile wakhula ntthu khuttha vapuuru vawe khusala alawa.
GEN 42:27 N'oofiya vahali aalaliyeevo, mmote khufukula esurupa yawe yoori alazemo etthu-yoojiwa enkhe puuru yawe, khusikana nzurukhu awe ori mwiisurupa nttumphule.
GEN 42:28 Khuwooza attwiize yoori: “Moone! Nzurukhu aka karutiseliwa, opu ori mphu!” Aphano yo khusuthuwa khusala athukumela na woova oozelanaka yoori: “Niini epi Nluku aniretteliyeezo?”
GEN 42:29 N'oofiya wapapaaya Yaakhumpa tuniya ya Kanaani, khusala amuuza zooshi za waavireliyeezo araka:
GEN 42:30 “Nttunkhulu wa Misuri eetta onituturucha anuuzaka yoori n'aahankawaani.
GEN 42:31 Ila fweeyo khujipu yoori: ‘Khahi n'aahankawaani n'aatthu awaamineya.
GEN 42:32 Niri khumi na awiri paapa mmote, mmote afwa, nkina aya w'eefutti asala onti na paapa tuniya ya Kanaani.’
GEN 42:33 Aphano nttunkhulu wa nti aya opule khunuuza yoori: ‘Mwinlikhe ttwiiyenu mmote attaapha, toowo phi kinttelaavo ojuwa yoori mweeyo mw'aatthu awaamineya: mwithuule etthu-yoojiwa mwilawe mwawenkhe ajamaazenu ahifwe jala.
GEN 42:34 Mwitaaka mwintiise ttwiiyenu otu w'eefutti aya, kaamini yoori mweeyo khahi mw'aahankawaani ila mw'aatthu awaamineya. Ttwiiyenu kintta wuurutiselani, kiwinkheni ejaaza yooretta zanshara zenu mmuti mphu.’”
GEN 42:35 Wakathi afukuliyeevo visurupa zaya, wakhula esurupa khusikanamo mfukho wa nzurukhu, yo na papaaya nawoona nzurukhu opule khusala oova.
GEN 42:36 Aphano papaaya khulupa yoori: “Mweeyo! Mwintakha okiishisela aanaaka. Yuusufu ti otule aashikhiyeeyo, Simiyooni khaavo apha na Bejami mwintakha onthuula theenya! Zooshi epo othunku aya ti miyo kinoonaaye.”
GEN 42:37 Ruubeni khumuuza papaawe yoori: “Mwikinkhe miiyo khanaashikha kininrutisa, amana kihinrutisi mwiwoole aanaaka apale awiri.”
GEN 42:38 Yaakhumpa khujipu araka: “Akinintakhisa Bejami olawa na-mweyo, Yuusufu afwa, ye ti asaliyeeyo. Amana empattha etthu yootakhala ntarikhi okho mwineettaawo, mwintta okishukhelisa aahera na pwi zaka kirina huzuni yoototheliwa ti mweyo.”
GEN 43:1 Jala etile yeetta otepa yaattaka mmuti.
GEN 43:2 N'ooweeshela tiriku etile aalaziyeeyo Misuri, papaaya khuwooza yoori: “Mwirutele theenya Misuri moozanye etthu-yoojiwa.”
GEN 43:3 Ila Yuuda khujipu araka: “Kiniwuuzani khweele, nttunkhulu wa Misuri anihirimiza channu yoori nihirutelewo nihinlawaneeni ttwiiyetthu otu w'eefutti.
GEN 43:4 Amana mwinlikha ttwiiyetthu olawa na-fweyo, ninlawa noozanye etthu-yooja yenu.
GEN 43:5 Ila amana mwihininkhi khaninlawa, maana nttunkhulu oto anuuza yoori amana nihinlawani ttwiiyetthu nihirutelewo.”
GEN 43:6 Ezirayeele khuwoozela: “Mwamuuzela-ni yoori mwinaaye ttwiiyenu nkina? Mwakitothela pala khuluyeene.”
GEN 43:7 Yo khujipu araka: “Mwiinyi oto eetta onuuzela yoori anijuwe fweeyo na ajamaazetthu. Khuvira anuuzelaka theenya yoori: ‘Papeenu ori haayi? Mwinaaye ttwiiyenu nkina theenya?’ Fweeyo naarina yoojipu epile aari onuuzelaazo. Fweeyo naajuwiye yoori onttela oniila onlawana ttwiiyetthu?”
GEN 43:8 Aphano Yuuda khumuuza papaawe yoori: “Mwinlikhe shapu otu kilawena miiyo nasaapi ethiiti, nihifwe jala fweeyo na-mweyo na aaneetthu.
GEN 43:9 Mwikikhupali miiyo, kinjaahiti omwiinanela na ontthantta. Amana kihinrutisi ari nkumi, kiniiyana paathuli ohaayi aka wooshi mmakhono mwenu mweeyo.
GEN 43:10 Eriwaka khanaarupaziye nka nilawiye niruteliyewo swaafu yaphiiri.”
GEN 43:11 Aphano Ezirayeele, papaaya khuwooza yoori: “Nkhama pi etthiipo khina nanna kiina. Mwithuule vitthu zooshapweya za mmuti mphu, waaza paalasamu, asali, viluko, mafuttha oonukhela, na vitthu kiina nkhama amentowa, mwilawe mwamwinkhe mwiinyi oto.
GEN 43:12 Mwithuule nzurukhu wa feeta swaafu piiri na opu mwisikaniyeeyo mvisurupa mwenu mwilawane, khinjuweya eettiye ovonyela.
GEN 43:13 Mwinthuule ttwiiyenu mwilawe mwakutthanane mwiinyi oto.
GEN 43:14 Nluku Woowahi Wooshi amwinkhe wiiyana huruma na-mweyo, yoori oorutiseleni ttwiiyenu otu nkina na anlikhe Bejami ate. Maana, amana miiyo akaashikha aanaaka kinsala etthiipo woohiina mwaana.”
GEN 43:15 Yo khuthuula vitthu epile enkhiweezo na nzurukhu vamote na Bejami khusala alawa Misuri wa Yuusufu.
GEN 43:16 Yuusufu n'oomoona Bejami ari vamote na attwiize khumuuza karumeyaawe nwulu yoori: “Owaathuule atthu apa owaalawane owaka, yashijiwe nyama yiipikhiwe, yo anttela oja na-miyo nthana opu.”
GEN 43:17 Ye khuretta etthiipile ooziweezo, khuwaathuula atthu apale khuwaalawana owawe Yuusufu.
GEN 43:18 Yo n'oofiya owawe Yuusufu khusala oova oopuwelaka yoori: “Talili natiiseliwavo mwaasa wa nzurukhu opule naarutiseliweeyo swaafu etile yamwanzo mvisurupa mwetthu. Ye ontakha onihukhumu, aniphuke anirette wiiya amwiitthwaana zawe, aninyakanye apuuru etthu.”
GEN 43:19 Khumweettela karumeya w'oowawe Yuusufu yoori anttakhulane vanlako.
GEN 43:20 Khulupaza yoori: “Safwatali mbwaneetthu! Swaafu etile naatiiyeeyo apha yamwanzo naateeliye wuuzanya etthu-yoojiwa.
GEN 43:21 Ila n'oofiya vahali naalaliyeevo, naafukuliye visurupa zetthu wakhula mmote wa fweyo khusikanamo omilomo waya nzurukhu opule naateeliyeeyo wuuzanyela etthu-yoojiwa ori woolikana. Apha, naateeliye orutisa,
GEN 43:22 na theenya natana nzurukhu nkinoko yoori nuuzanyele etthu-yoojiwa. Khaninjuweeni nlupa aatthiiyeemo nzurukhu aya opu mvisurupa mwetthu.”
GEN 43:23 Aphano karumeya otule khujipu araka: “Mwihoove na wala mwihisuthuwe. Nluku otu weenu mweeyo na otu wa papeenu ti ye atthiiyeemo nzurukhu mvisurupa mwenu, ila miiyo kaapokhereliye nzurukhu opule mwaataniyeeyo.” Karumeya khumfukulela Simiyooni khuntiisa attaaphale aariivo attwiize.
GEN 43:24 Nawiisha khuwaathuula khuwaavirisa nnyupa wa Yuusufu, khuwenkha maati khoosa moolu aya na khwinkha etthu-yoojiwa apuuru aya.
GEN 43:25 Attwiize Yuusufu khwaattalela tthuvo epile aataniyeezo khusala anwejela, maana aajuwiye yoori nthana aari oteela oja vamote na-ye.
GEN 43:26 Wakathi Yuusufu afiiyeevo owawe, yo khweettela tthuvo epile aatiisiyeezo khumwinkha khukokhoraza omaasho wawe khufiisa ajihi zaya vathi.
GEN 43:27 Ye khuwenkha hapari, nawiisha khuwoozela yoori: “Papeenu otule mwaakuuziyeeyo nalelo ori haayi?” Owaakho nkumi?
GEN 43:28 Yo khunjipu yoori: “Karumeyeenu papeetthu ori haayi, owaakho nkumi.” Yo khukokhora khwiinama.
GEN 43:29 Ye khulansa maasho awe khumoona ttwiiye Bejami mwaana wa mamaawe. Khuwoozela yoori: “Ttwiiyenu otu mwaari onlupaaye w'eefutti ti othuutu?” Ye khumuuza Bejami yoori: “Nluku awinkhe rehema mwanaka!”
GEN 43:30 Yuusufu khwiiyana furaha khuluyeene mwaasa wa ttwiiye, khusala atakha olila, nasaapiru khulaavo khweetta okatthi wawe khusala alila.
GEN 43:31 Nawiisha, khufuushula khurutela vansana ari woojiitthaaza khulupa yoori: “Mwininkhe etthu-yoojiwa.”
GEN 43:32 Khusaruliwa etthu-yoojiwa meeza mattatthu, mamote a Yuusufu, makina a attwiize na makina a Amisuri aari ottuukho. Mwaasa yoori yaari haraamu atthu a Misuri oja na Meebereewu.
GEN 43:33 Attwiize Yuusufu khwiikhala vameeza kharipu na-ye, khuthataanya waaza nttunkhulu mpakha efutti, khusala eekesana mmote na nzaawe ari ooshanka.
GEN 43:34 Yuusufu khuruma winkhiwa etthu-yoojiwa ethiitile enkhiweeyo vameeza vawe, sahani ya Bejami khuziti swaafu thaanu sahani za attwiize. Yo khuja, khunywa, khufurahi vamote na Yuusufu.
GEN 44:1 Yuusufu khunruma karumeya nwulu wa vaje vawe yoori: “Wiitaaze saaneene etthu-yoojiwa visurupa za atthu apa anwahaaye othuula, ottheemo nzurukhu aya omilomo wa visurupa zaya.
GEN 44:2 Nawiisha, othuule pilawuri yaka ya feeta otthe omilomo w'eesurupa y'ootu w'eefutti aya na nzurukhu aya opo atiisiyeeyo wuuzanyela tiriku.” Karumeya otule khuretta etthiipo ooziweezo ti Yuusufu.
GEN 44:3 Mmeesho mwaya supuyeene, attwiize Yuusufu khunleeza khuthuula apuuru aya khusala alawa.
GEN 44:4 N'oolaazamo nsitati mphule ahinafiyaze peetiwene, Yuusufu khunruma karumeyaawe yoori: “Olankhe nasaapi apha owaatthirele atthu apale eettiye aphale, amana owaasikana wa woozele yoori: Oretteliwa vitthu zooshapweya mweeyo mwinripha zootakhala?
GEN 44:5 Mweeyela-ni pilawuri ya mbwanaaka? Khahiyo ethiito annywelakaaye na anjuwanaaye vitthu zoorettikhana? Mweeyo mwaretta vitthu zootepa otakhala.”
GEN 44:6 Ye khuwaatthirela mpakha owaasikana khuwooza etthiipile ooziweezo ti Yuusufu.
GEN 44:7 Yo khujipu araka: “Mwaasa aya niini mbwaneetthu alupaka toowo? Fweeyo akarumeyaawe khaninwahi oretta vitthu zaya epo!
GEN 44:8 Onuupuwela yoori fweeyo nawahi orutisa nzurukhu Kanaani naasikaniyeeyo omilomo wa visurupa zetthu? Toowo n'aatthu ninwahaaye wiiya feeta ama thahapu ya vaje wa mbwanaawo?
GEN 44:9 Apha niriivo, karumeya otule onttelaaye onsikanana pilawuri eto afwe. Fweeyo ninttela osala niri amwiitthwaana za mbwaneetthu.”
GEN 44:10 Ye khuri: “Kakhupali epo mwilupiyeezo, ila othuuto kinttelaaye onsikanana ti ye anttelaaye wiiya mwiitthwaana aka, mweeyo khamwiniiyana hatha koosa.”
GEN 44:11 Wakhula ntthu khupakhula esurupa yawe khupweha vathi khufukula nasaapiru.
GEN 44:12 Karumeya otule khwaaza weekesa mwiisurupa y'ootu nwulu khwiishela esurupa y'ootu w'eefutti aya. Attaaphale khusikana pilawuri etile mwiisurupa ya Bejami.
GEN 44:13 N'ooretta toole, khuvarula kuwo zaya, khupakhira opheya visurupa zaya vapuuru khusala arutela ositati ottuukhule.
GEN 44:14 Yuuda na attwiize n'oofiya owawe Yuusufu khunsikana ye ari ottuukho, khukokhora khwiinama attaaphale aariivo Yuusufu.
GEN 44:15 Yuusufu khuwoozela yoori: “Mwarettela-ni etthu eti? Mweeyo khamwinjuwa yoori ntthu nkhama miiyo kinwahi woona vitthu nkhama epo?”
GEN 44:16 Yuuda khujipu araka: “Niwuuze niini mbwanaaka! Apho nijihakikhi toovi? Nluku avithula twampi zetthu. Aphano n'aamwiitthwaana za mbwaneetthu nkhama otule asikananiweeyo pilawuri.”
GEN 44:17 Yuusufu khulupa yoori: “Miiyo akinwahi oretta etthu aya eto! Othuuto asikananiweeyo pilawuri yaka ti ye anttelaaye wiiya mwiitthwaana aka, mweeyo mwirutele wapapeenu na heeri.”
GEN 44:18 Yuuda khunsusela Yuusufu khumuuza yoori: “Safwatali mbwanaaka! Mwinlikhe karumeyeenu awuuzeni nttakhuzi na mwihinkatipukhele, mwaasa yoori mweeyo mwiri nkhama Firawuuna mwennyeweene.
GEN 44:19 Mbwanaaka mwaawoozeliye akarumeyeenu mwiraka: ‘Mwinaaye papeenu na ttwiiyenu?’
GEN 44:20 Fweeyo khujipu yoori: ‘Ninaaye paapa ila ooluvala na ninaaye ttwiiyetthu w'eefutti apattikhaniyeeyo paapa ooluvaliye. Aarina ttwiiye afwa, ye asala otthwe wuumamani wawe, ti woophetiwa na kuvu ti papaawe.’
GEN 44:21 Mweeyo mwaawaarumiye akarumeyeenu yoori antiise mwite mwimoone khwa maasho enu.
GEN 44:22 Ila fweeyo khuujipuni mweeyo mbwanaaka: ‘Mwaana oto khanwahi olikhiwa ti papaawe. Amana ampwetheya, papantthu ontta ofwa.’
GEN 44:23 Ila mweeyo khunuuza yoori: ‘Amana mweeyo mwihintiisi mwihirutelevo vaje vaka apha.’
GEN 44:24 N'oofiya onti, fweeyo khumuuza papeetthu mattakhuzi apale mwaanuuziyeeyo mbwaneetthu.
GEN 44:25 Nawiisha ye khuniruma yoori mwirutelewo mwilawe moozanye etthu-yoojiwa.
GEN 44:26 Fweeyo khumuuza yoori: ‘Khaninwahi orutelawo nihilawaneeni ttwiiyetthu otu wa w'eefutti, amana nihilawani khaninlawa okutthanana mwiinyi oto.’
GEN 44:27 Karumeyeenu papeetthu khunuuza yoori: ‘Mweeyo mwinjuwa yoori muukhaaka akipatthela aana awiri,
GEN 44:28 otu mmote akaashikha mpakha leelo eti akinamoone. Kakhupali yoori ooliwa ti nyama ya ntthuttu khunrafuna.
GEN 44:29 Amana mwinlazavo otu n'ompattha etthu yootakhala, mwintta okiishukhelisa aahera na pwi zaka kirina huzuni yoototheliwa ti mweyo.’
GEN 44:30 Aphano amana nirutela onti ninlikha ye, nintta omuulaana huzuni papeetthu, mwaasa yoori mwanawe animphetachaaye. Akarumeyeenu anttela ompatthisa papaaya wiishukhela aahera na pwi zawe arina huzuni.
GEN 44:32 Olikha eto, miiyo kamwaahiti paapa yoori kininrutisa, amana kihinrutisi kookosani ohaayi aka wooshi.
GEN 44:33 Apho kinuuvekela yoori safwatali, miiyo kintta osala kiri mwiitthwaaneenu mbwanaaka zwaamu ya shapu otu, mwinlikhe ye arutele onti na attwiize.
GEN 44:34 Toowo kinttela orutela toovi wapaapa woohilawani shapu otu? Miiyo akinwahi woona ari mmatteso paapa.”
GEN 45:1 Nawiisha Yuuda ottakhula, Yuusufu khusala oojeela ojilipisela. Khuwooza akarumeyaawe ooshi olaavo, khuhiivo hatha ntthu ajijuwisaka attwiize.
GEN 45:2 Ye khusala alila anyakulaka mpakha khufiyelela osiila Amisuri, hapari epile khufiya wamfwalume Firawuuna.
GEN 45:3 Ye khuwooza attwiize yoori: “Miiyo ki Yuusufu! Nkahayani, paapa ori haayi?” Attwiize khuhisala awahi onjipu mwaasa yoori aari ooshanka channu.
GEN 45:4 Khuwooza attwiize yoori: “Mwisusele apha kiriivo.” Yo khunsusela khuwooza yoori: “Miiyo ki Yuusufu, otule mwaamuuzanyisiyeeyo khutaniwa Misuri.
GEN 45:5 Apho mwihishanke wala mwihishowerane mwaasa wookuuzanyisa khutaniwa okhuno. Ila Nluku eettiye okilokozisa yoori muusuru nafusi zenu.
GEN 45:6 Zavira nyaakha miwiri za jala mmamiti mphule ila zasala theenya nyaakha mithaanu atthu ahinteelaaye olima wala wuurula.
GEN 45:7 Nluku akiperekha vakatthi venu mweeyo yoori kuusuru ohaayi eenu muulumwenku mphu na apa anttelaaye ovokoliwa.
GEN 45:8 Khahiyo mweeyo mwikiperekhiye okhuno, ila Nluku ti ye akiperekhiye, khukiretta wiiya nkhama paapa wa Firawuuna, na nttunkhulu wa vaje vawe na tuniya ya Misuri.
GEN 45:9 Mwaakuve mwirutele wapaapa mwamuuze yoori: Mwanenu Yuusufu alupa yoori: Nluku akinkha ottunkhulu wa Misuri yooshi. Ate okhuno, ahirupaze!
GEN 45:10 Mwite mwiikhale nti wa Gosheni kharipu na-miyo, mweeyo na atuulwenu, aaneenu, pwittipwitthi zenu, mompe zenu, na vitthu zenu zooshi mwiriinaazo.
GEN 45:11 Ottuukho kisala kiwinkhani etile enuuhithajiyaanini, mweeyo na vaje venu na zooshi mwiriinaazo yoori mwihihoowe, maana zasala nyaakha epi mithaanu za jala.
GEN 45:12 Mweeyo mwinikoona na maasho enu, na ttwiiyaku Bejami onikoona, yoori khweele ti miyo kinlupaaye mattakhuzi apa.
GEN 45:13 Mwilawe mwamuuze paapa owahi kiriina Misuri na zooshi epile mooniyeezo. Apho mwaakuve mwilawe mwantiise ottuukhuno.”
GEN 45:14 Yuusufu khumpatikha ttwiiye Bejami khusala alila, na-ye Bejami khumpatikha khusala alila.
GEN 45:15 Nawiisha khuwaapejari attwiize ooshi khusala alila. Attaapho attwiize phi awahiyeevo ottakhula na-ye.
GEN 45:16 Hapari epile khumfiyela Firawuuna, yoori attwiize Yuusufu ata. Firawuuna n'oosiila khwiiya wootuveliwa vamote na akarumeyaawe.
GEN 45:17 Aphano Firawuuna khumuuza Yuusufu yoori: “Owooze attwiizo: Athuule nyama zaya arutele tuniya ya Kanaani.
GEN 45:18 Amweettele papeenu na ajamaazenu ooshi ate okhuno. Miiyo kintta owenkha puuro swaafi mmuti mphu, yoori asala aja vitthu zootuva zinruweriwaaye nttumphu.
GEN 45:19 Athuule mikukutta za Misuri ethiiti aweettele aanaaya, aakhaaya na papeenu.
GEN 45:20 Mwihiiyane hatha shaakha na mali zenu zooshi mwiriinaazo, maana vitthu zooshapweya za tuniya yooshi ya Misuri zinttela wiiya zeenu.”
GEN 45:21 Aana a Yaakhumpa khuretta etthiipile. Yuusufu khuwenkha mikukutta nkhama etthiipile aalupiyeezo Firawuuna, khuwenkha vitthu-zooja ntarikhi alawaka.
GEN 45:22 Wakhula ntthu khumwinkha kuwo pheeya ila Bejami khumwinkha miiya ttatthu za nzurukhu wa feeta na kuwo thaanu pheeya.
GEN 45:23 Khuperekha apuuru khumi zipakhiriye vitthu zaariiwo Misuri zootuva yoori alawe enkhiwe papaawe, khuperekha theenya apuuru khumi zipakhiriye tiriku na phaawu na vitthu kiina za akhipa yoori asala aja ntarikhi.
GEN 45:24 Nawiisha, khuleezana na attwiize yo khulankha khusala alawa, ye khuwooza yoori: “Mwihishowerane ntarikhi.”
GEN 45:25 Yo khulankha Misuri khusala alawa Kanaani wa papaaya Yaakhumpa.
GEN 45:26 N'oofiya khumuuza papaaya yoori: “Yuusufu nalelo ori haayi, nttunkhulu wa Misuri yooshi!” Yaakhumpa n'oosiila khuzileya mwaasa woohaamini.
GEN 45:27 Ila nawuuziwa mattakhuzi apale aalupiyeeyo Yuusufu, na khoona mikukutta epile aaperekhiyeezo yoori zilawe zanthuule papaawe, rooho yawe khutamo.
GEN 45:28 Yaakhumpa khulupa yoori: “Mwanaka ori haayi! Kintta olawa kamoone kihinafwe.”
GEN 46:1 Ezirayeele khuthuula vitthu zawe zooshi aariinaazo, khulawa mpakha Beresheba. N'oofiya okhule, khuretta twaha anrettelaka Nluku aari omwaaputwaaye papaawe, Esiyaakha.
GEN 46:2 Nluku anteeliye Ezirayeele osikhu nkatthi wa jozi khusala ankhuwela araka: “Yaakhumpa! Yaakhumpa!” Ye khujipu yoori: “Lapeekha!”
GEN 46:3 Ye khuri: “Miiyo ki Nluku, Nluku wa papaawo. Ohoove olawa tuniya ya Misuri, maana khwa weyo kinttela opuwisa khapila khuluyeene.
GEN 46:4 Miiyo kinlawa vamote na-weyo Misuri na kinlawa koorutisele mmuti nttumphu. Amana ofwa Yuusufu ti ye anttelaaye ophulula maasho awo.”
GEN 46:5 Aphano, Yaakhumpa khulankha nti wa Beresheba na aanaawe na aakhaaya na aanaaya khupakhira mmikukutta epile zaaperekhiweeyo ti Firawuuna.
GEN 46:6 Khuthuula maphanko a nyama, na mali zaya zooshi epile aapatthiyeeyo tuniya ya Kanaani, Yaakhumpa khusala alawa Misuri na ajamaaze ooshi.
GEN 46:7 Aanaawe aalume na aanaaya, aanaawe aakha na-yo na aanaaya, ajamaaze ooshi khuwaathuula khusala alawa Misuri.
GEN 46:8 Apa mazina a meezirayeele, Yaakhumpa na ajamaaze aalawaniyeeyo Misuri: Ruubeni, mwaana wamwanzo wa Yaakhumpa.
GEN 46:9 Aana a Ruubeni pi apa: Enookhi, Phaalu, Hezorooni na Khariimu.
GEN 46:10 Aana a Simiyooni pi apa: Yemuweeli, Yamiini, Ohaati, Yakhini, Sohaari na Shawuuli mwaana wa nunu mmote wa Kanaani.
GEN 46:11 Aana a Leevi pi apa: Geerishoni, Kohaathi na Meraari.
GEN 46:12 Aana a Yuuda pi apa: Eeri, Onaani, Sheela, Pereezi na Zeera. Eeri na Onaani afwa tuniya ya Kanaani. Aana a Pereezi pi apa: Hezorooni na Hamuuli.
GEN 46:13 Aana a Ezakaari pi apa: Toola, Phuuva, Yashuubu na Shimrooni.
GEN 46:14 Aana a Zabulooni pi apa: Seredi, Elooni, na Yaleeli.
GEN 46:15 Apa atuulu na aana a Yaakhumpa aawaavokoliyeeyo na Liiya nti wa Paata-Araamu, ohintthiimo mwanawe Tiina. Ooshi aari talaathiini na attatthu.
GEN 46:16 Aana a Gaadi pi apa: Sefiyooni, Haaki, Shuuni, Esbooni, Eeri, Aroodi na Areeli.
GEN 46:17 Aana a Asheeri pi apa: Imunna, Eshwiiva, Eshwiivi, Beriiya na ttwiiye Zeera. Aana a Beriiya pi apa; Hepeere na Malikiyeeli.
GEN 46:18 Apa aana a Yaakhumpa na Ziilipa, karumeya otule Labani aamwinkhiyeeyo mwanawe Liiya. Ooshi aari khumi na sitha.
GEN 46:19 Aana a Rakeele muukha wa Yaakhumpa aari apa: Yuusufu, na Bejami.
GEN 46:20 Asenaathi mwaana wa Potifweera, nttunkhulu wa tiini ya Ooni aavokoleliwe aana awiri ti Yuusufu tuniya ya Misuri, Manaase na Efwarayiimu.
GEN 46:21 Aana a Bejami pi apa: Beela, Beekheri, Ashibeeli, Geera, Naamani, Eehi, Rooshi, Muupimu, Huupimu na Haridi.
GEN 46:22 Apa aana a Rakeele aavokoleliweeyo ti Yaakhumpa, ooshi aari khumi na wane.
GEN 46:23 Mwaana wa Daani aari Hushimu.
GEN 46:24 Aana a Nafitaali pi apa: Yaseeli, Kuuni Yeseeri, na Shileemu.
GEN 46:25 Apa aana a Yaakhumpa na Biila, karumeya otule Labani aamwinkhiyeeyo mwanawe Rakeele. Ooshi aari sapa.
GEN 46:26 Atthu ooshi apale aalawaniyeeyo Yaakhumpa Misuri aari ajamaaze, ohiwaatthiimo aakha a aanaawe, aari siithiini na sitha atthweene.
GEN 46:27 Owaatthaamo aana a Yuusufu aavokoliweeyo tuniya ya Misuri, ojama wooshi wa Yaakhumpa waari wa atthu saapiini.
GEN 46:28 Aphano Yaakhumpa khunlokozisa Yuuda wa Yuusufu, yoori alawe amuuze anthepeeze nti wa Gosheeni. Afiiyeevo nti wa Gosheeni,
GEN 46:29 Yuusufu khuthuula nkukutta awe khusala alawa okutthana na papaawe, Ezirayeele. N'oomoona khuntthirela khulawa khumpatikha, khuvira wakathi wa waatta eettaka olila.
GEN 46:30 Yaakhumpa khumuuza Yuusufu yoori: “Aphano kiwooniyeevo yoori ori haayi, kimfwa kihina shaakha.”
GEN 46:31 Yuusufu khuwooza attwiize na ajaama a papaawe yoori: “Kintta wa Firawuuna kamuuze yoori attwiizaku na ajamaaze paapa apa aari wiikhalaaye tuniya ya Kanaani, ata mmuti mphu.
GEN 46:32 Kinttela omuuza yoori yo amakhampuzi, ataaka atiisa nyama zaya, pwittipwitthi, mompe na vitthu zaya zooshi ariinaazo.
GEN 46:33 Amana Firawuuna arumisa oteela okhuweliwa mweeyo, na awuuzelani yoori ‘Mwinkhola khaazi-ni?’
GEN 46:34 Mwinjipu yoori: ‘Fweeyo akarumeyaawo khaazi yetthu oshukisa nyama, waaza osimaana etthu mpakha apha, nkhama etthiipo aari orettaazo apapazetthu.’ Toowo, mwintta okhupaleliwa wiikhala nti wa Gosheeni, mwaasa yoori amakhampuzi ooshi pi ootarawiwa pi a Misuri.”
GEN 47:1 Yuusufu khulankha olawa omuuza Firawuuna yoori: “Paapa na attwiizaku ata ari nti wa Gosheeni, atana maphanko a nyama, mompe, pwittipwitthi na vitthu zaya zooshi ariinaazo.”
GEN 47:2 Khuwaathuula attwiize athaanu olawa owaajuwisa Firawuuna.
GEN 47:3 Aphano Firawuuna khuwoozela attwiize Yuusufu araka: “Mwinkhola khaazi-ni?” Yo khunjipu yoori: “Mbwaneetthu, fweeyo khaazi yetthu oshukisa nyama nkhama apapazetthu apa aviriyeeyo.
GEN 47:4 Fweeyo nateela wiikhala mmuti mphu siikhu vattitthiiru, mwaasa yoori tuniya ya Kanaani yeetta opuwawo jala ya waatta nyama zetthu khuhisala ziiyana etthu-yooja. Safwatali wa safwatali, mwinilikhe niikhale nti opu wa Gosheeni.”
GEN 47:5 Aphano Firawuuna khulupa yoori: “Papaawo na attwiizo ata wiiya vamote na-weyo.
GEN 47:6 Tuniya ya Misuri eri mmakhono mwawo. Apho, papaawo na attwiizo owenkhe Gosheeni ti yiiyiye phantte yooshapweya ya mmuti mphu, eekhale ottuukho. Na amana woona yoori vakatthi wa ajamaazo awaapho atthu ariina akhili, owenkhe ottunkhulu wa mompe zaka.”
GEN 47:7 Yuusufu khunthuula papaawe Yaakhumpa khulawa onjuwisa Firawuuna, Yaakhumpa khumparikhiya.
GEN 47:8 Firawuuna khumuuzela Yaakhumpa araka: “Mwina nyaakha mikavi?”
GEN 47:9 Yaakhumpa khunjipu araka: “Kinaaye nyaakha miiya na talaathiini, keettaka osaafiri kijeettettelaka. Nyaakha epi kivirisiyeeyo vattitthiiru na pi zootakhala, mpakha apha akinafiye nyaakha epile eekhaliyeezo amarehemu apapazaku.”
GEN 47:10 Aphano Yaakhumpa khumparikhiya Firawuuna, nawiisha khuruti.
GEN 47:11 Yuusufu khumwinkha meekhazi papaawe na attwiize phantte yooshapweya ya tuniya ya Misuri waattamana na nti wa Ramesesi, nkhama etthiipile Firawuuna aalupiyeezo.
GEN 47:12 Ye khumwinkha papaawe na attwiize na ajamaaze ooshi etthu-yooja, yowaafiyela wakhula ntthu na aanaawe.
GEN 47:13 Khuthowa etthu-yooja tuniya ya Misuri mpakha Kanaani yooshi. Atthu khusala akureya mwaasa wa jala waatta.
GEN 47:14 Aphano Yuusufu khukusanya nzurukhu wooshi, opule waari orumeeliwaaye Misuri na wa Kanaani opule waari wuuzanyeliwaaye tiriku, khulawa khupweha owawe Firawuuna.
GEN 47:15 Wakathi wiishiyeevo nzurukhu wa Kanaani na Misuri, khulankha Amisuri khulawa onvekhela Yuusufu araka: “Safwatali, oninkhe etthu-yooja nihifwe onoonaka mwaasa woohiina nzurukhu.”
GEN 47:16 Yuusufu khujipu araka: “Nkhama mweeyo khamwina nzurukhu, mwikitiisele nyama zenu nipatili na etthu-yooja.”
GEN 47:17 Amisuri khuthuula pwittipwitthi zaya, mompe, khavalo, na apuuru aya, khulawa khumwinkha Yuusufu, ye khuwenkha etthu-yooja aari weettelaaye oja mwaakha wooshi.
GEN 47:18 Mwaakha aya opule khwiisha, mwaakha nkina khurutelawo wa Yuusufu olawa omuuza yoori: “Mbwaneetthu khaninoona etthu yoovitha, nzurukhu etthu waniishela, nyama zetthu p'iipile niwinkhiyeenini. Khanisalaneeni hatha etthu, nasalana mwiili etthu na mashapa etthu paasi.
GEN 47:19 Ohinilikhe nifwaka na mashapa etthu apwecheyaka weettaka woona. Wuuzanye mashapa etthu na-fweyo aya, oninkhe etthu-yooja. Toowo niniiya amwiitthwaana za Firawuuna na mashapa eetthu anttela wiiya awe. Oninkhe peewu yoozala yoori nipatthe wiiyana meekhazi, nihifwe jala na nti etthu ohiiye yaara.”
GEN 47:20 Khwa nanna ethiito Yuusufu khuuzanya mashapa ooshi a Misuri khwiiya a Firawuuna. Amisuri ooshi aarina yawuuzanyisa mashapa aya mwaasa wa jala yeetta otepa yaattaka, nti wooshi khwiiya wa Firawuuna.
GEN 47:21 Yuusufu khuwaaretta omwiitthwaana atthu ooshi a phantte yooshi ya Misuri.
GEN 47:22 Ila mashapa a attunkhulu a tiini khoozanyiye mwaasa yoori yo aari winkhiwa etthu-yooja ti Firawuuna, ti etthu ahoozanyiseliyeeyo mashapa aya.
GEN 47:23 Aphano Yuusufu khuwooza atthu yoori: “Mwikisiileze! Kawuuzanyani mweeyo na miti zenu zooshi. Waaza leelo mweeyo na mashapa enu anttela wiiya a Firawuuna. Peewu eti mwilawe mwazale.
GEN 47:24 Wakhula etile mwinttelaaye oruwera mwisala mwithuula lifunku la thaanu mwimwinkha Firawuuna. Mafunku apa mane mwinsalanaaye mwisala mwija mweeyo na aaneenu na atthu apale mwiniikhalanaaye. Kinoko khupweha yoori mwirette peewu.”
GEN 47:25 Yo khujipu araka: “Weeyo mbwaneetthu wanuusuru, wanirettela vitthu zooshapweya, fweeyo nakhupali na rooho zetthu zooshi wiiya amwiitthwaana za Firawuuna.”
GEN 47:26 Yuusufu khulaleya kano moote eriivo mpakha leelo eti, yoori lifunku la thaanu la vitthu zooshi zinruweriwaazo tthi la Firawuuna. Mashapa apale paasi a attunkhulu a tiini khuhinkhiwi wiiya awe.
GEN 47:27 Meezirayeele khuthamela Misuri nti wa Gosheeni. Ottuukho khupatthawo meekhazi khuvokolelana khwaattelana.
GEN 47:28 Yaakhumpa eekhaliye tuniya ya Misuri nyaakha khumi na sapa, nyaakha eekhaliyeezo Yaakhumpa ohaayi awe wooshi zaari miiya na arupayiini na sapa.
GEN 47:29 Ooniyeevo yoori mansha awe asala vattitthiiru khunkhuwela mwanawe Yuusufu khumuuza yoori: “Nkhama onikipheta othuule nkhono awo otthe vathi wa liphaja laka, olaphe nkhama onteela oretta na pheta ya waamineya etile kuuvekeliyeeyo, yoori ohikizikhe tuniya ethiiti ya Misuri.
GEN 47:30 Amana kifwa okilazemo tuniya eti olawe wakizikhe nti opule azikhiweewo apapazaku, kilawe keeye vamote na-yo.” Yuusufu khujipu araka: “Kinttela oretta etthiipo mwikirumiyeezo.”
GEN 47:31 Aphano Yaakhumpa khunkhanyerela yoori alaphe, Yuusufu khulapha, Yaakhumpa khwiinamela ovishwa w'oolili.
GEN 48:1 Wakathi ziviriyeevo vitthu epile, khuuziwa Yuusufu oriwa: “Papaawo nlwele.” Ye khulankha khusala alawa omoona, alawaka khuwaathuula aanaawe awiri, Manaase na Efwarayiimu.
GEN 48:2 Khuuziwa Yaakhumpa yoori: “Mwanenu Yuusufu ontta ota oteela owoona.” Ezirayeele khujilipisela khulankha khwiikhala voolili.
GEN 48:3 Aphano Yaakhumpa khumuuza Yuusufu: “Nluku Woowahi Wooshi aakipuweleliye nti wa Luuzu tuniya ya Kanaani khukiparikhiya,
GEN 48:4 akuuzaka yoori: ‘Kinteela owinkha mavokozi na kaattise peewu yawo yoori khwa weyo epuwe khuntti za waatta na kinkhe nti opu peewu yawo khwa mileele.’
GEN 48:5 Aanaawo apa awiri avokoliweeyo Misuri miiyo kihinate, Manaase na Efwarayiimu apa aya pi aka aanaaka, nkhama etthiipo Ruubeni na Simiyooni eeyiyeezo aanaaka.
GEN 48:6 Ila apa onttelaaye owaavokola theenya anttela wiiya awo apa pa yo anttelaaye orithi zwaamu ya attwiizaya.
GEN 48:7 Kirutaka Paata-Araamu akifwela muukhaaka Rakeele tuniya ya Kanaani, kiri ntarikhi kisaleelaka ofiya nti wa Efwarata. Miiyo khunzikha phantte ya tarikhi ya Efwarata oniitthiwaawo Belemu.”
GEN 48:8 Ezirayeele n'oowoona aana a Yuusufu khuuzela araka: “Khi apa apaani?”
GEN 48:9 Yuusufu khunjipu papaawe yoori: “Apa aana akinkhiyeeyo Nluku mmuti nttumphu.” Ezirayeele khulupa yoori: “Okitiisele apha kiriivo yoori kiwaaparikhiye.”
GEN 48:10 Maasho awe Ezirayeele khaari woona saana mwaasa wa wuuluvala, Yuusufu khuwaathuula aana apale khumwaattamisela pwapwaaya, ye khuwaapatikha khuwaapejari.
GEN 48:11 Ezirayeele khumuuza Yuusufu yoori: “Wala akaari wuupuwela yoori kaari oteela woonanana weeyo theenya, ila Nluku akinoza mpakha aanaawo!”
GEN 48:12 Elottelanaka Yuusufu khuwaalazavo aana apale vamakutha wa pwapwaaya khwiinama khufiyisa ajihi yawe vathi.
GEN 48:13 Yuusufu khuwaathuula aanaawe oowiiri, Efwarayiimu nkhono-nlume phantte ya nkhono-nkha wa Ezirayeele, Manaase khunthuula nkhono-nkha phantte ya nkhono-nlume wa Ezirayeele khunttha khuwaattamisela pwapwaaya.
GEN 48:14 Ezirayeele khookola nkhono awe weelume veeshwa wa Efwarayiimu, otu nttiitthi aya, nkhono-nkha khuttha veeshwa wa Manaase otu nwulu.
GEN 48:15 Aphano khumparikhiya Yuusufu araka: “Nluku otu anrumeyeliyeeyo apapazaku, Eburahiima na Esiyaakha, Nluku otu ankishukaaye ohaayi aka wooshi mpakha leelo,
GEN 48:16 Nlayikha ntthi likilaziyeemo nkatthi wa vitthu zootakhala, liwaaparikhiye asimaana apa. Khwa yo livuwisiwe nzina laka na mazina a apapazaku, Eburahiima na Esiyaakha, eeyane peewu ya waatta vatuniya.”
GEN 48:17 Wakathi Yuusufu amooniyeevo papaawe athuuliye nkhono awe nlume khuttha veeshwa wa Efwarayiimu, ye khuhintuveli. Khulazavo nkhono-nlume wa papaawe veeshwa va Efwarayiimu khuttha veeshwa va Manaase.
GEN 48:18 Khumuuza papaawe yoori: “Khahiyo toowo paapa, otu ti ye eeyiye nttunkhulu, apho nkhono-nlume mwinttheele othuuto veeshwa vawe.”
GEN 48:19 Ila papaawe khuhitakhi khuri: “Miiyo kinjuwa mwanaka etthu kinrettaaye. Manaase onttela wiiya khuntti khuluyeene na onteela wiiyana peewu ya waatta, ila ttwiiye otu nttiitthi onteela onziti ye, peewu yawe enttela wiiya khuntti za waatta.”
GEN 48:20 Aphano khuwaaparikhiya siikhu ethiitile araka: “Atthu a Ezirayeele anteela owaaparikhiya azaaya arumeyelaka mazina enu araka: ‘Nluku ooretteni nkhama Efwarayiimu na Manaase.’” Paata ya toowo, khunwulisa Efwarayiimu zayita Manaase.
GEN 48:21 Elottelanaka, Ezirayeele khumuuza Yuusufu yoori: “Apha miiyo nasaapi kimfwa, ila Nluku onttela wiiya vamote na-mweyo na ti ye anttelaaye wuurutiselani nti wa apapazenu.
GEN 48:22 Apho kawinkha nti w'oonyaako wa Shekemu weeyo owaazitiyeeyo attwiizo, etile kiwaanyakanyiyeeyo amoori kuumananaka phanka yaka na mattetthe aka.”
GEN 49:1 Yaakhumpa khuwaakhuwela aanaawe khuwooza yoori: “Mwite apha kiwuuzeni vitthu zinttelaaye orettikhana siikhu epo zintaazo.
GEN 49:2 Mwisusele apha mwisiile aana a Yaakhumpa, mwinsiileze papeenu Ezirayeele.
GEN 49:3 Weeyo Ruubeni, mwaana woomwanzo aka, kuvu zaka, nshumo woomwanzo woojikhitiri wooshapu aka, mwanzo wooshitahiwa channu na wookhomaala.
GEN 49:4 Weeyo o wootumpunyeya nkhama maati a mpahari, omwanzo awo wafujeya, mwaasa woolalana muukha wa papaawo, waphuja voolili wa papaawo.
GEN 49:5 Na-ye Simiyooni na Leevi, ntthu na ttwiiye, phanka zaya puntukhi zoorettana vitthu zoohusuti.
GEN 49:6 Shawuri zaya miiyo akeepu, na rooho yaka khiri vamote na-yo, mwaasa wa wiiphiiriwa waya awoola atthu khushija ttottopwa za mompe za watthu mwayiini.
GEN 49:7 Woolaanikha wiiye wiiphiiriwa waya yo, maana pu woowali, woolaanikha yiiye katapu yaya yo, maana pi zookhomaala. Kinlawa kawaaphakulevo vakatthi wa khapila ya Yaakhumpa, kiwaamwazelaka vakatthi wa Ezirayeele.
GEN 49:8 Weeyo Yuuda, attwiizo anteela wuuttottopela; onttela owaashintta maatuwi awo, aana a papaawo anlawa awiinamele weeyo.
GEN 49:9 Yuuda, mwaana wa siipa, amana akhola nyama khininsuruwa; onlattanana siipa nwulweene arapaleliye, paani amminyalaaye khunlansa?
GEN 49:10 Khweele Yuuda khanteela onyakanyiwa ofwalume awe, wala pakhora y'oofwalume eriiye mmwinyoka mwawe, mpakha ate mwennyewe ofwalume, otu anttelaaye oshututeliwa pi atthu ooshi.
GEN 49:11 Ye onteela ofukelela puuru yawe vanrayi wa wuuva, na mwaanaaya anfukelele veerapi yooshapweya ya nrayi otthuupo. Kuwo zawe nka afulanaka viinyu na ajapi yawe nka afulanaka taamu ya wuuva.
GEN 49:12 Maasho awe anttela wiiya awaara mwaasa woonywa viinyu ya wuuva, meeno awe anttela wiiya oolakala mwaasa w'oonywa leethi.
GEN 49:13 Zabulooni onttela wiikhala phantte ya phwaani, onttela wiiya patari ya makalawa; mwiinano awe onlawa mpakha nti wa Sidooni.
GEN 49:14 Ezakaari puuru wookhomaala arapaleliye vakatthi wa mapwattha mawiri.
GEN 49:15 Wakathi ooniyeevo yoori tuniya etile yaari ya shirehe na yooshapweya ovumula, ye khwiinamisa mafuzi awe khuvikela mapwattha, khusala akhola khaazi nkhama mwiitthwaana.
GEN 49:16 Daani, onteela ophuka washariyavo khapila yawe nkhama lihimo limote la Ezirayeele.
GEN 49:17 Ye onteela wiiya nkhama nyookha eniiyaaye nshini wa tarikhi. Nkhama evili yoovithaalela enlumaaye ekwakuno ya khavalo, namweettettisa khavalo khukwana enyokonyoko.
GEN 49:18 Oo Mbwanaaka! Miiyo kinweja nusura yawo!
GEN 49:19 Gaadi onteela wuumananiwa pi annya-viittha ila ye eettaka owiikarisa.
GEN 49:20 Vitthu-zoojiwa za Azeeri enttela wiiya za nnofu, ye nka avahaka etthu-yooja ethiitile ensuhaaye oja afwalume.
GEN 49:21 Nafitaali nazoro woojitaphula aniwaapatthaaye aana ooshapweya.
GEN 49:22 Yuusufu muutthi wa wiima channu waattameliyeeyo nshini wa maati, virapi zaya khurapela vatulu wa muuri.
GEN 49:23 Maatuwi awe anlawa amuumanane amwiikarisaka na mattetthe aya,
GEN 49:24 ila nttetthe lawe tthi lookhomaala, makhono awe pi oozivala khwa kuvu za Nwali wa Yaakhumpa, khwa kuvu za Nshuki nwulu, Mwaako wa Ezirayeele,
GEN 49:25 khwa kuvu za Nluku wa papaawo, Nluku Woowahi Wooshi. Ye ooparikhiye weeyo Yuusufu na parakha za pinkuuni, na parakha za mmaati ariiye vathi w'oolumwenku, na parakha za nyama za waatta na parakha zoovokola.
GEN 49:26 Parakha za papaawo pi za waatta zayita parakha epile za nyaako epi za raku, na maali za nyaako mittiitthi za mileele. Parakha zooshi epi ziiye veeshwa wa Yuusufu mpakha vaajihi va otule athawuliweeyo vakatthi wa attwiize.
GEN 49:27 Bejami miiji woosaya, supuyeene ontta okhola nyama na orafuna, njuwa looveva na waawanya epile zinsalaazo.”
GEN 49:28 Pi atthaapa mahimo khumi na mawiri a Ezirayeele, na mattakhuzi aawooziyeeyo papaaya awaaparikhiyaka, na amwinkhaka wakhula ntthu parakha yawe etile yaamweeziyeeyo.
GEN 49:29 Elottelanaka Yaakhumpa khuwooza araka: “Kinttela ofwa kilawe kazikhiwe vamote na ajamaazaku apa afwiiyeeyo. Mwakizikhe vamote na apapazaku nlikurakuza liriiye mmashapa wa Eforoni Nhiiti,
GEN 49:30 nttintthile liriiye Makhipeela kharipu ya Manre tuniya ya Kanaani, nttinttho Eburahiima oozanyeziweeyo ti Eforoni Nhiiti yoori yiiye vilalo yawe.
GEN 49:31 Ottuukho azikhiweewo Eburahiima na muukhaawe Suhura, na-ye Esiyaakha na muukhaawe Rapekha na theenya ottuukho phi kinzikhiyeewo Liiya.
GEN 49:32 Nshapa laya na likurakuza laya nttho oozanyaniye Ahiiti.”
GEN 49:33 Nawiisha mattakhuzi apale aari owoozaaye aanaawe, Yaakhumpa khurutisela moolu awe voolili khurapalela khwiittha phuumu khufwa.
GEN 50:1 Yuusufu khumwiinamela papaawe omaasho wawe khumpejari khusala alila.
GEN 50:2 Elottelanaka khuwooza anamajisa thiipa awe yoori anvaaze thiipa ya paalasamu papaawe yoori ahivutte; yo khuretta etthiipo.
GEN 50:3 Ottukuntteliwa thiipa Ezirayeele weeshiye siikhu arupayiini, nkhama etthiipo aazowereliyeezo Amisuri. Yo eeshiye siikhu saapiini ari mmatthaka.
GEN 50:4 Nawiisha matthaka apale, Yuusufu khuwooza attunkhulu apale aari wiikhalanaaye Firawuuna araka: “Kookholani moolu mwilawe mwamuuze Firawuuna yoori;
GEN 50:5 Paapa ahinafwe, aakilaphisiye yoori: ‘N'oofwa kilawe kanzikhe attaapho azikheweevo ajamaaze tuniya ya Kanaani.’ Safwatali mwikilikhe kilawe kanzikhe ottuukho nawiisha kintta ota.”
GEN 50:6 Firawuuna khunjipu araka: “Wiiya oolaphisiye etta wanzikhe papaawo.”
GEN 50:7 Aphano Yuusufu khulankha khusala alawa onzikha papaawe vamote na attunkhulu, akarumeya ooshi a Firawuuna na mamunu-munu ooshi a tuniya ya Misuri.
GEN 50:8 Aalawiye vamote na ajamaaze Yuusufu na attwiize, na ajaama ooshi a Yaakhumpa aasaliiyeeyo aari asimaana na pwittipwitthi na mompe.
GEN 50:9 Atthu aalawiye mmwikukutta akina vakhavalo, atthu aalawiyeeyo aari a waatta.
GEN 50:10 Afiiyeevo nti wa Ataati oriiye phantte ya malawa-njuwa ya muuttho Yorotaani, khwiikhala siikhu sapa Yuusufu ari mmatthaka wa papaawe eettaka olila.
GEN 50:11 Wakathi Akanaani apale aari wiikhalaaye ottuukhule awooniyeevo Amisuri apale eettaka olila nti wa Ataati yo khuri: “Olila opu anlilaaye Amisuri apa nwulweene.” Pi apho khutthaja nzina aphale vaya la Apeele-Misurayiila, eniiyaaye malawa-njuwa ya muuttho Yorotaani.
GEN 50:12 Aana a Yaakhumpa khuretta etthiipile aawooziyeezo ahinafwe.
GEN 50:13 Khunthuula khunlawana tuniya ya Kanaani khulawa khunzikha nlikurakuza la Makhipeela waattamana na Manre, nshapa nttintthile Eburahiima oozanyaniyeeyo Eforoni Nhiiti yoori asala awaazikhawo ajamaaze.
GEN 50:14 Nawiisha ozikha, Yuusufu khurutela Misuri vamote na attwiize na atthu ooshi apale aalawaniyeeyo ozikha.
GEN 50:15 N'oofwa papaaya, attwiize Yuusufu khuri: “Talili Yuusufu khana liphuta varoho vawe mwaasa wa vitthu epile nanretteliyeezo zootakhala, na-ye khanteela onirettela etthiipo?”
GEN 50:16 Attwiize khumperekheza nhupi Yuusufu yoori: “Papaawo ahinafwe aanirumiye
GEN 50:17 yoori niwuuze toono: ‘Safwatali, owaaswaamihi attwiizo khwa koosa na twampi epile ooretteliyeezo mwaasa woohuukholi saana.’ Apho nasaapi eti ninuuvekela yoori, oniswaamihi koosa zetthu, fweeyo niiyiye akarumeya a Nluku otu aari omwaaputwaaye papaawo.” Ye n'oosiila mattakhuzi apale khusala alila.
GEN 50:18 Aphano khuta attwiize khwiinama khukokhora anvekelaka nswammaha araka: “Nata n'aamwiitthwaana awo.”
GEN 50:19 Yuusufu khuwooza yoori: “Wala mwihikoove. Miiyo aki Nluku.
GEN 50:20 Khweele mweeyo mwaakiwazeliye shawuri zootakhala. Ila Nluku khuzukulisa khwiiya zooshapweya. Khwa toowo Nluku awoosuru atthu a waatta mpakha leelo eti.
GEN 50:21 Apho mwihoove. Miiyo kintta wuukholani mweeyo na aaneenu.” Khwa etthiipo Yuusufu khuwaanyamaza attwiize, mattakhuzi apale aawooziyeeyo aawaafiiye nroho mwaya.
GEN 50:22 Yuusufu aari wiikhala Misuri vamote na ajaama a papaawe, ye eekhaliye nyaakha miiya na khumi.
GEN 50:23 Khuwoona aana a Efwarayiimu peewu yattaatthu, theenya khuwaathuula aana a Makhiiri, mwaana wa Manaase, khuwaattha vamoolu vawe.
GEN 50:24 Yuusufu ahinafwe khuwooza attwiize yoori: “Apha miiyo kinttela ofwa, ila Nluku onteela owaawunini oolazenimo mmuti mphu oolawaneni tuniya etile aamwaahitiyeeyo alaphaka yoori onteela omwinkha Eburahiima, Esiyaakha na Yaakhumpa.”
GEN 50:25 Ye khuwaalaphisa aana a Ezirayeele araka: “Kiniwuuzani khweele, Nluku onteela owaawunini. Amana zirettikhana epo zaya, mwilawaka nti aya opo mwithuule makhonkolo aka.”
GEN 50:26 Yuusufu afwa arina nyaakha miiya na khumi. Khuvaaziwa thiipa ya paalasamu mwiili awe yoori ahivutte, khutthiiwa mwiiluza khuzikhiwa tuniya ya Misuri.
EXO 1:1 Apa mazina a aana a Yaakhumpa eettiyeeyo Misuri, wakhula ntthu na ajamaaze:
EXO 1:2 Ruubeni, Simiyooni, Leevi, Yuuda;
EXO 1:3 Ezakaari, Zebulooni, na Bejami;
EXO 1:4 Daani, Nafitaali, Gaati, na Asheeri.
EXO 1:5 Aana na atuuluwe Yaakhumpa ooshi aalawaniyeeyo aari sapiyiini; ila Yuusufu aari Misuri ottuukho rakuzeene.
EXO 1:6 Ziviriyeevo siikhu zawaatta, Yuusufu khufwa na attwiize apale na peewu ya etile.
EXO 1:7 Ila meezirayiilu apale aasaliyeeyo khuvokolelana khweekezeleya khwaattelana khwiiya okhomaala mpakha khufiyelela omwazeyela mmuti mphule wooshimo.
EXO 1:8 Aphano Misuri khuthawala mfwalume nkinoko ahaari ojuwaaye hatha etthu monkoni wa Yuusufu.
EXO 1:9 Aphano ye khuwooza atthu awe yoori: “Mwiwoone meezirayiilu pi awaattelana na ookhomaala zayita fweeyo.
EXO 1:10 Nlaweni niwaalazele olavilavi yoori ahitepe waattelana, ehiri amana enipuwela viittha yo akusanyeya na maatuwi eetthu anirinkaanyela atthiramo mmuti mphu.”
EXO 1:11 Aphano amisuri khuwaaretta yo wiiya anamalokozela a khaazi za nkuumu yoori apatthe owaahukhumu na khaazi zoolipa. Khwa etthiipo meezirayiilu khunjekela Firawuuna sitati piiri za sakafu zaari wiitthiwaaye Pito na Rameesi.
EXO 1:12 Nakhataalikha zaama aari ohukhumwiwaavo, pi aari otepaavo waattelana, tiito amisuri khuwaapattha woova mwaasa wa meezirayiilu;
EXO 1:13 aphano amisuri khwaaza owaakholisa khaazi zoolipa.
EXO 1:14 Khweekezela hukhumu muuhaayi mwaya, khwa owenkha khaazi zoolipa nkhama omeya ottophe na waattala thizolo, na okhola khaazi zooshi za mmashapa. Zooshi aari okholisiwa khwa oviitthwaana wootakhalavo.
EXO 1:15 Mfwalume wa Misuri khuttakhulana anamavokoza a meepereewu aariwitthiwaaye Siifwara na Puuwa yoori:
EXO 1:16 “Amana mwiwaawunaka meezirayiilu atakhaka ovokola, mwisala mwiwoona aanaaya. Eeyaru aalume, mwisala mwiwoola, ila eeyaru aakha, mwisala mwiwaalikha wiiya haayi.”
EXO 1:17 Ila anamavokoza apale khumoova Nluku khuhiretti etile ooziweeyo ti mfwalume wa Misuri, khusala awaalikha aana alume wiiya haayi.
EXO 1:18 Aphano mfwalume wa Misuri khuwaakhuwela khuwoozela yoori: “Mwaari toovi owaalikha aana aalume wiiya haayi?”
EXO 1:19 Anamavokoza apale khujipu yoori: “Aakha a meezirayiilu afwarikhana na apa a Misuri. Yo pi oojikhitiri, ampattha ekumi ahinafiyevo hatha namavokoza.”
EXO 1:20 Nluku khwiiya wemaani khwa anamavokoza apale, na meezirayiilu khusala avira eekezeleyaka wookhomaalavo.
EXO 1:21 Mwaasa wa anamavokoza apale omoova Nluku, ye khuwenkha owahi wa wiiyana ojama waya.
EXO 1:22 Tiito Firawuuna khuwaaruma atthu awe ooshi yoori: “Wakhula mwaana wa meepereewu anvokoliwaaye eeyaru wanlume amweeselele mmuttho oniitthiwaaye Niilu, ila eeyaru wankha asala anlikha.”
EXO 2:1 Mwinyi mmote wa lihimo la Leevi anraliye muukha wa lihimo limote na ye.
EXO 2:2 Khumwiimitthisa khunvokolela mwaana. Amooniyeevo yoori aari wooshapweya khunvitha khwa nyeezi mittatthu.
EXO 2:3 Nawoona yoori khayaari owaheya ovira anvithaka theenya, khuthuula khelenke ya tteketthe khumattha na piriniisi khuntthaamo mwaana otule, khulawa khunttha ntteketthe nkhome wa muuttho Niilu.
EXO 2:4 Nlupuwe mwaana otule eemeliye toole sirini yoori oone niini yaari weettelaaye onrettikhanela.
EXO 2:5 Mwaana wankha wa Firawuuna khwiishukhela mmuttho olawa woowa, ajaazi awe aarina khusala avira nkhome wa muuttho, ye khoona khelenke etile eri ntteketthe khunruma njaazi awe khweettela.
EXO 2:6 Afunuliyeevo, khunsikanamo mwaana eettaka olila. Khumoonela huruma khuri: “Mwaana otu tuwa meezirayiilu.”
EXO 2:7 Aphano, nlupuwe mwaana otule khumwaattama mwaana wa Firawuuna khumuuzela yoori: “Onuupuwela toovi? Ontakha miiyo kilawe kankhuwele nunu mmote mwiizirayiilu ate asala amwaamwisa?”
EXO 2:8 Mwaana wa Firawuuna khunjipu yoori: “Haya etta.” Aphano mwanankha khulawa onkhuwela maama wa mwaana othuutule.
EXO 2:9 Aphano, mwaana wa Firawuuna khumuuza yoori: “Onthuule mwaana otu omwaamwise zwaamu yaka, kintta wuuripha phakari yawo.” Nunu otule khunthuula mwaana khusala amwaamwisa.
EXO 2:10 Paata ya mwaana otule owula khuntiisela mwaana wa Firawuuna khunretta wiiya mwanawe. Khuntthaja nzina la Munsa, araka: “Maana koolaza mmaati.”
EXO 2:11 Siikhu moote, wakathi Munsa apatthiyeevo omwinyi, khulankha khulawa wa attwiize meepereewu khoona khaazi yoolipa aari okholisiwaaye na theenya khumoona mmisuri aari ompiyaaye na onvulalisa mwiipereewu.
EXO 2:12 Khweekesa okhuno na okhuno nawoona yoori khaari otawo hatha ntthu, khumuula mmisuri otule khunttukuttha vanshaka.
EXO 2:13 Siikhu yaphiiri khuwaasikana meepereewu awiri oomanaka khumuuza otule aariina paathuli yoori: “Onimpiyela-ni nzaawo?”
EXO 2:14 Ye khumuuzela yoori: “Paani awinkhiyeeyo onamalokozela weetthu ama onamaphuka? Ontakha okuule nkhama omuuliyeezo mmisuri otule?” Munsa khoova khuri: “Ee, ajuwa etthu kirettiyeeyo!”
EXO 2:15 Firawuuna nawuuziwa vitthu epile khujilakelela omuula Munsa; ye khutthira khulawa mpakha nti wa Miitiya khwiikhala nshini wa nlipu.
EXO 2:16 Namalokozela a tiini wa Miitiya aarina aanaawe sapa aakha, yo khuteela ottekha maati atthe n'yopo mwaya enkhe nyama za papaaya.
EXO 2:17 Aphano khuta mishuki mikina khusala aweekara, ila attaaphale Munsa khulankha khusala awaakisa na khwinkha maati nyama zaya.
EXO 2:18 Wakathi aruteliyeevo wa papaaya Rewele, ye khuwoozela yoori: “Leelo mwaruti supuyeene mwaasa wa niini?”
EXO 2:19 Yo khujipu yoori: “Mmisuri mmote ti anaakisiye mmakhono wa mishuki mikina na othuuto khunittekhela maati khunywisa nyama zeetthu.”
EXO 2:20 Khuuzeliwa ti papaaya yoori: “Apha yaya ori vayi? Mwanlikhelani? Mwankhuwele ate aje na fweeyo.”
EXO 2:21 Munsa khukhupalela na khutakha wiikhalana mwinyi otule, mwanawe aari wiitthiwaaye Zipoora khunlooza.
EXO 2:22 Zipoora khunvokola mwaana, Munsa khuntthaja nzina la Yeerisoni alupaka yoori: “Kasaafirela nti wa malaponi.”
EXO 2:23 Ziviriyeevo siikhu zawaatta khufwa mfwalume wa Misuri; atthu a Ezirayiilu khusala asisimira na okhuwa monkoni wa oviitthwaana, nkhuwo aya opule khunfiyela Nluku.
EXO 2:24 Nluku noosiila osisimira waya opule khufikhiri wahati aarettaniyeeyo Eburahiima, Esiyaakha na Yaakhumpa.
EXO 2:25 Nluku khuwoona meezirayiilu khumweeleya tafwawuthi aariinaayo.
EXO 3:1 Munsa aari oshukisa nyama za nkhwewe Yeeturu, namalokozela a tiini wa Miitiya; siikhu moote khuthuula nyama khusala eettana phantte kiina ya n'yaara khufiya mpakha va mwaako wa Nluku, waari wiitthiwaaye Hereebe.
EXO 3:2 Attaapho khumpuwelela nlayikha la Nnyizinku va nlimi la moottho waari olankhaaye vakatthi wa muutthi. Munsa khweekesa khoona yoori moottho weetta okholela ila muutthi opule khawaari olukula.
EXO 3:3 Aphano ye khuri: “Vitthu zootikinisa kintta attaaphale kilawe koone, moottho ontta okholela ila muutthi opule khunlukula mwaasa aya niini?”
EXO 3:4 Nnyizinku khumoona yoori ye eetta waattama muutthi opule, olawa woona, Nluku khunkhuwela enakatthi-nakatthi ya muutthi otthuupule araka: “Munsa! Munsa!” Ye khujipu araka: “Lapeekha!”
EXO 3:5 Aphano Nnyizinku khumuuza yoori: “Ohaattamevo apha! Ovule mmoolu mpho jampali zawo maana puuro yaya eti oriivo ttakatthiifu.”
EXO 3:6 Khurutela olupa yoori: “Miiyo ki Nluku wa papaawo, Nluku wa Eburahiima, Nluku wa Esiyaakha na Nluku wa Yaakhumpa.” Munsa khufinikha wuuso awe maana aari woova omweekesa.
EXO 3:7 Nnyizinku khulupa yoori: “Khweele khweele kinoona nanna anhukhumwiwaazo atthu aka Misuri na kasiila nkhuwo aya mwaasa wa khaazi ankholisiwaazo pi anamalokozela a Firawuuna na kinjuwa yoori antta ohoowa;
EXO 3:8 tiito kiishukhiyeeyo oteela owuusuru mmakhono wa amisuri na kiwaalazakamo mphu kiwaalawanaka nti wooshapweya na nwulweene, ohali liniittikhaawo leethi na asali; ottuukho aniikhalaawo akanaani, ahiiti, amoori, aperizi, amwiivi na ayepuzi.
EXO 3:9 Maana nkhuwo wa atthu a Ezirayiilu wakifiyela miiyo, na kinoona nanna amisuri aniwaahukhumwaazo.
EXO 3:10 Kinuuruma nasaapi ethiiti Misuri wa Firawuuna, wawaalazewo atthu aka meezirayiilu.”
EXO 3:11 Aphano Munsa khulupa amuuzaka Nluku yoori: “Ki paani miiyo woolawa wa Firawuuna olawa owaalazawo meezirayiilu?”
EXO 3:12 Nluku khunjipu yoori: “Miiyo kiniiya vamote na-weyo. Eto ti alama yoori keetta wuuruma: Amana owaalazawo atthu Misuri wate vamwaako attaapha okaaputu.”
EXO 3:13 Munsa khumuuzela Nluku yoori: “Miiyo amana kilawa vakatthi wa meezirayiilu kiwooza kiraka: ‘Nluku wa apapazenu akiruma vakatthi-venu,’ khi amana akuuzela yoori: ‘Nzina lawe paani?’ Kiwooze niini?”
EXO 3:14 Nluku khumuuza Munsa araka: “MIIYO TI MIIYO. Owooze etthiipo meezirayiilu, yoori: ‘MIIYO TI MIIYO ti akirumiyeeyo vakatthi venu.”
EXO 3:15 Nluku khulupa theenya amuuzaka Munsa yoori: “Wawooze meezirayiilu yoori: ‘Nnyizinku, Nluku wa apapazenu Nluku wa Eburahiima, Nluku wa Esiyaakha na Nluku wa Yaakhumpa, akiruma vakatthi ve.’ Nttho ti nzina linsalaaye kuupuwelaniwaka peewu khwa peewu mileele.”
EXO 3:16 “Olawe wawaakusanye attunkhulu a meezirayiilu, owooze yoori Nnyizinku, Nluku wa amarehemu apapazenu, Eburahiima, Esiyaakha na Yaakhumpa aakipuweleliye khukuuza yoori: ‘Khweele khweele, Miiyo kinoona tafwawuthi zenu na kinjuwa etthu anuurettelaanini a Misuri.
EXO 3:17 Miiyo kaahiti wuulazanimo nhukhumu za amisuri kiweettaneni nti wa akanaani, wa ahiiti, wa amoori wa aperizi wa amwiivi na wa ayepuzi nti oniitthaaye leethi na asali.’
EXO 3:18 “Attunkhulu anteela wuusiileza. Olankhe na attunkhulu a atthu aya atthaapo mwilawe wa Firawuuna wamuuze yoori: ‘Nnyizinku, Nluku wa meepereewu eettiye oniteela. Apho onilikhe nilawe neettette mwentto wa siikhu ttatthu neette n'yaara namwinkhe twaha Nnyizinku, Nluku etthu.’
EXO 3:19 Miiyo kinjuwa yoori mfwalume wa Misuri khanteela wuulikhani olawa woohiiyi khwa okhanyareliwa pi nkhono woowahi.
EXO 3:20 Nakatalikha kinteela wookola nkhono aka kiwaavulaze amisuri khwa vitthu zootikinisa zooshi kinttelaazo oretta vakatthi vawo, paata ya toowo ontta wuulikhani olawa.
EXO 3:21 Na kinteela owenkha amisuri wiiyana niiya na atthu apa na amana mwilaakawo, khamwinlaawo makhono-ru.
EXO 3:22 Aakha ooshi ana ya owaavekela anamwaattamanana aya na apale aawaamakeliyeeyo vitthu za feeta na za tahapu, na kuwo za owaawalisa aaneenu, aalume na aakha. Khwa etthiipo mwintta ovulula maali zooshi za amisuri.”
EXO 4:1 Munsa khunjipu Nnyizinku araka: “Wala yo khanteela okhupalela, na khanteela okisiileza, na anlupa yoori: ‘Nnyizinku khoopuweleleeni!’”
EXO 4:2 Nnyizinku khumuuzela Munsa araka: “Eto oriina mmakhono niini?” Ye khuri: “Pakhora.”
EXO 4:3 Aphano khumuuza yoori: “Weeselele vathi!” Ye khweesa khuthatuwa khwiiya nyookha Munsa khutthira.
EXO 4:4 Nnyizinku khumuuza Munsa theenya yoori: “Wookole nkhono awo okhole nkhira aya.” Khookola nkhono awe khukhola, khurutela wiiya pakhora.
EXO 4:5 “Eto ti ya owaakhupalisa yoori oopuweleliye Nnyizinku, Nluku wa amarehemu apapazaya, Nluku wa Eburahiima, Nluku wa Esiyaakha, Nluku wa Yaakhumpa.”
EXO 4:6 Nnyizinku khumuuza theenya yoori: “Otthe nkhono awo vamweyo!” Khutthaavo, alazakavo khwiiyana maaharaja khulakala nkhama liwiku.
EXO 4:7 Nnyizinku khumuuza theenya yoori: “Othuule nkhono awo opheya otthe vamweyo.” Khutthaavo, noolazavo khurutela wiiya sawasawa na mwiili awe wooshi.
EXO 4:8 Nnyizinku nalelo khuvira amuuzaka araka: “Amana yo ahikhupaleli ama ahitakhi, alama yamwanzo, yaphiiri anteela okhupalela.
EXO 4:9 Ila amana nalelo eeya ahinakhupalele alama epo piiri wala khuhuusiilezi, ottekhe maati vattitthiiru a mmuttho Niilu, wiitthele tuulu, antta othatuwa maati aya apo a tuulu eeye taamu.”
EXO 4:10 Aphano Munsa khumuuza Nnyizinku yoori: “Oo, Mbwana, thanku raku miiyo akinwahi ottakhula saana; mpakha nasaapi eti waaziyeevo ottakhulana miiyo, amana kittakhulaka kintta okukuma.”
EXO 4:11 Nnyizinku khunjipu yoori: “Paani amwinkhiyeeyo milomo pinaatamu? Paani amwinkhiyeeyo ottakhula wala paani awuumpiyeeyo apale ohisiili? Wala apale awoona ama apale ohooni? Khahiyo miiyo Nnyizinku?
EXO 4:12 Apho olawe, Miiyo kinttela wiiya vamote na milomo zawo na kinuunozela etthu onttelaaye ottakhula.”
EXO 4:13 Ye khujipu araka: “Oo Mbwanaaka, kinuuvekela yoori onrume ntthu nkina.”
EXO 4:14 Aphano Nnyizinku khumpattha katapu khwa Munsa, khumuuza yoori: “Weeyo khuna ttwiiyo Arawu, nleevi? Miiyo kinjuwa yoori ye onwahi ottakhula saaneene. Nasaapi eti ye ontta ota oteela okutthanana weeyo, ye onttela wiiya woofurahi amana oosikana.
EXO 4:15 Weeyo onttela ottakhulana omuuze mattakhuzi anttelaaye olupa; miiyo kintta owaawunini moowiiri yoori mwittakhule na kiwuuzeni etthu yooretta.
EXO 4:16 Arawu onttela ottakhulana atthu khwa zwaamu yawo, onttela wiiya nlomo awo, weeyo onttela wiiya nkhama Nluku khwa ye.
EXO 4:17 Othuule pakhora eti mmakhono, ti ethiiti onttelaaye orettana alama za minjuza.”
EXO 4:18 Aphano Munsa khurutela wa nkhwewe Yeeturu khumuuza yoori: “Safwatali, kilikheni kilawe Misuri kawoone ajamaazaku nkhama nalelo ari haayi.” Yeeturu khujipu araka: “Olawe na heeri.”
EXO 4:19 Nnyizinku aamuziye Munsa ari Miitiya yoori: “Orutele Misuri maana ooshi apale aari otakhaaye owuula afwa.”
EXO 4:20 Aphano Munsa khunthuula muukha awe na aanaawe khuwaattha va puuru vawe khusala arutela Misuri. Mmakhono mwawe aathuuliye pakhora ya Nluku.
EXO 4:21 Nnyizinku khumuuza theenya Munsa yoori: “Miiyo kawinkha owahi wooretta minjuza zawaatta. Amana orutelawo Misuri wiiye woojitthenka yoori orette omaasho wa mfwalume wa nti aya opule minjuza zaya epo, ila miiyo kinlawa koomise rooho yawe ahiwaalikhe atthu apo olawa.
EXO 4:22 Omuuze Firawuuna oraka: ‘Nnyizinku alupa toono: Ezirayiilu mwanaka wamwanzo.
EXO 4:23 Miiyo kalupa yoori: “Onlikhe mwanaka alawe akaaputu.” Ila weeyo amana okatthala kintta omuula mwanawo wamwanzo.’”
EXO 4:24 Eettaka Misuri vahali aamakiyeevo ntarikhi Nnyizinku khunteela Munsa yoori amuule.
EXO 4:25 Ila Zipoora khuthuula liwe loothokolowa khushija shapala ya soola ya mwanawe khupiyana moolu a Munsa. Khuri: “Weeyo omannaka miiyo khwa taamu.”
EXO 4:26 Zipoora khuri: “Omannaka khwa taamu,” athoonyezaka okhiriya opule. Wakathi otthuupule Nnyizinku khunlikha Munsa.
EXO 4:27 Aphano Nnyizinku khumuuza Arawu yoori: “Olawe n'yaara wakutthanane Munsa.” Ye khulawa khukutthanana va mwaako wa Nluku, khunchelisa.
EXO 4:28 Munsa khunthatelela Arawu zooshi epile Nnyizinku anrumiyeezo omuuza, na khumuuza alama zooshi za minjuza arumiweeyo oretta.
EXO 4:29 Aphano Munsa na Arawu khulawa khuwaakusanya attunkhulu ooshi a meezirayiilu.
EXO 4:30 Arawu khuwooza zooshi Nnyizinku amuziyeeyo Munsa. Nawiisha naye Munsa khuretta alama za minjuza vakatthi wa atthu apale,
EXO 4:31 yo khukhupali. Wakathi ajuwiyeevo yoori Nnyizinku awoopuweliye meezirayiilu na aawoniye nanna aari ohoowaazo yo khwiinama khwaaputu.
EXO 5:1 Paata ya toole Munsa na Arawu khulawa ottakhulana Firawuuna amuuzaka yoori: “Nnyizinku, Nluku wa meezirayiilu alupa toono: ‘Owaalikhe atthu aka alawe akirettele njampo n'yaara.”
EXO 5:2 Firawuuna khujipu araka: “Nnyizinku paani wonshututela miiyo khuwaalikha olawa meezirayiilu? Akininjuwa Nnyizinku aya na akiniwaalikha meezirayiilu olaamo mphu.”
EXO 5:3 Munsa na Arawu khukhanyarela araka: “Nluku wa meepereewu ettiye oniteela, safwatali onilikhe nilawe narette safwari ya siikhu ttatthu neettaka n'yaara, namwinkhe twaha Nnyizinku, Nluku etthu, noohiiyi etthiipo antta oniteela marati ama ontta onuula na phanka.”
EXO 5:4 Aphano mfwalume wa Misuri khumuuza Munsa na Arawu yoori: “Mwaasa aya niini mweeyo mwiwantipwaka atthu na khaazi zaya? Haya! Mwilawe mwakhole khaazi zoolipa.”
EXO 5:5 Theenya Firawuuna khulupa yoori: “Atthu apa pi awaatta ila mwintta owaalikhisa okhola khaazi zaya.”
EXO 5:6 Siikhu ethiitile Firawuuna khuwenkha nrumo anamalokozela awe na masuphayi anakhaazi, araka:
EXO 5:7 “Waaza leelo ethiiti mwihirutele owenkha malala awaattalana thizolo nkhama mwaari orettaazo; asala alawa weekesa eenyewe.
EXO 5:8 Ila mwiwaakhanyarele waattala thamani ethiitile aari waattalakaaye, mwihiwaavukule hatha etthu; apa aya anamaviliwa, ti eto aaziyeeyo okhuwa araka ‘ninttela omwinkha twaha Nluku etthu.’
EXO 5:9 Mweekezele khaazi yaya yoolipa yoori ashikheye ahisiileze vitthu zoohatiwa.”
EXO 5:10 Anamalokozela na masuphayi khulawa khuwooza atthu apale yoori: “Firawuuna alupa toono: ‘Nilikhe owinkhani malala.
EXO 5:11 Mwilankhe mwilawe mwawooze yoori alawe akusanye malala nhali anwahaaye opatthamo, na khaazi yenu yoolipa khinteela ovukuwavo hatha etthu.”
EXO 5:12 Aphano atthu apale khumwazeyela nti wooshi wa Misuri khukusanya nyaani khwa zwaamu ya malala.
EXO 5:13 Anamalokozela a khaazi khuwaattitta awoozaka yoori: “Mwiishise khaazi khwa nanna mooziweezo okhola wakhula siikhu wakathi opule mwaari winkhiwaavo malala.”
EXO 5:14 Khujalitiwa masuphayi ameezirayiilu apale atthomiweeyo pi anamalokozela a anakhaazi a Firawuuna, na khusala oozeliwa yoori: “Mwaasa aya niini mwihiishisaka khaazi yenu ya waattala thizolo taana wala leelo nkhama mwaari orettazo raku?”
EXO 5:15 Aphano masuphayi a meezirayiilu khulawa ojiliza wa Firawuuna yoori: “Mwaasa aya niini owaatthanttaka toono akarumeya awo?
EXO 5:16 Malala khaninkhiwa na ninuuziwa waattala thizolo. Woone, nintta ojalitiwa; ila atthu awo pi ariina paathuli.”
EXO 5:17 Ila Firawuuna khujipu yoori: “Anamaviliwa! Mweeyo oviliwa! Tiito mwinraaye; ‘Nintakha olawa omwinkha twaha Nnyizinku.’
EXO 5:18 Nasaapi ethiiti mwirutele okhaazi. Khamwinteela opokhera malala! Ila mwina yawuupa thizolo thamani ethiito mwaari wuupakaaye!”
EXO 5:19 Masuphayi apale a meezirayiilu khujuwa yoori aari nhukhumu, mwaasa woosiila yoori ahivukule thamani ya thizolo ooziweeyo waattala wakhula siikhu.
EXO 5:20 Paata ya masuphayi apale noolaavo aphale aariivo Firawuuna, khunsikana Munsa na Arawu eettaka owaaweja.
EXO 5:21 Yo khulupa yoori: “Nnyizinku ti awooneni na oophukeni; maana mweeyo mwaniretta fweeyo wiiya atthu awiiphira omaasho wa Firawuuna na wa akarumeya awe khuwenkha phanka mmakhono mwaya yoori anuule.”
EXO 5:22 Aphano Munsa khuzukuluwela wa Nnyizinku khumuuza yoori: “Oo Mbwana, wawaahukhumwelani atthu apa? Khi wakirumeliyeeni?
EXO 5:23 Maana thanku kilawiyeevo ottakhulana Firawuuna khwa nzina lawo yoori ontta owaahukhumu atthu apa, weeyo khawaarettiye hatha etthu yoori owaataphule!”
EXO 6:1 Nnyizinku khumuuza Munsa yoori: “Aphano attaapha ontta woona etthu kinttelaaye onrettela Firawuuna, khwa nkhono aka woowahi ontta owaalikha olawa, khwa nkhono aka woowahi ontta owiikara mmuti mwawe.”
EXO 6:2 Nluku khumuuza theenya yoori: “Miiyo ki Nnyizinku.
EXO 6:3 Kampuweleliye Eburahiima, Esiyaakha, na Yaakhumpa nkhama Nluku wa Owahi Wooshi, ila akiwaalikheeni okijuwana nzina la Nnyizinku.
EXO 6:4 Na theenya kaarettaniye wahati aka wa owenkha nti wa Kanaani, nti aari wiikhalaaye ari aletto.
EXO 6:5 Nasaapi eti kasiila ojiliza wa meezirayiilu atthaapo amisuri awaarettiyeeyo oviitthwaana na kafikhiri wahati aka karettaniyeeyo.
EXO 6:6 Nakatalikha owooze meezirayiilu yoori: Miiyo ki Nnyizinku na kinteela owaalazamo nkatthi wa oviitthwaana arettiweeyo pi amisuri. Kiwaataphule khaazi zoolipa epo enkhiweezo na kiniwoosuru na nkhono wookhomaala na owahi nwulweene na hukhumu.
EXO 6:7 Kinuuthuulani mwiiye atthu aka na-miyo kiiye Nluku enu, aphano pi mwinttelaavo ojuwa yoori miiyo ki Nnyizinku, Nluku enu kuulaziyeenini vathi wa khaazi zoolipa mwenkhiweeyo pi amisuri.
EXO 6:8 Na kinuuthuulani kiweettaneni nti kaalaphiyeeyo omwinkha Eburahiima, Esiyaakha na Yaakhumpa; apho kiniwinkhani mweeyo wiiye wenu. Miiyo ki Nnyizinku.”
EXO 6:9 Munsa khuwooza etthiipo meezirayiilu, ila yo khuhitakhi onsiileza, mwaasa wa othunku na hukhumu aari woonaayo nkatthi wa oviitthwaana.
EXO 6:10 Aphano Nnyizinku khumuuza Munsa araka:
EXO 6:11 “Olawe wamuuze Firawuuna mfwalume wa Misuri yoori awaalikhe meezirayiilu aleemu mmuti mwawe.”
EXO 6:12 Munsa khunjipu Nnyizinku araka: “Meezirayiilu khanikisiila, khi nannani anttelaaye okisiileza Firawuuna, khupe miiyo kihijuwaka ottakhula saana?”
EXO 6:13 Ila Nnyizinku anrumiye Munsa na Arawu, yoori awooze meezirayiilu na Firawuuna, mfwalume wa Misuri, yoori etta orumiwa owaalazawo meezirayiilu Misuri.
EXO 6:14 Attunkhulu a ojama aari apa: Aana a Ruubeni, mwaana nwulu wa Yaakhumpa aari apa: Enookhi, Phaalu, Hesherooni, na Khariimu; opu pi waari ojama wa Ruubeni
EXO 6:15 Aana a Simiyooni aari apa: Yemuweeli, Yamiini, Ohaati, Yakhiini, Zowaari na Shawaali mwaana wa nunu mmote wa Kanaani; opu pi waari ojama wa Simiyooni.
EXO 6:16 Apa mazina a aana a Leevi khwa ovokoliwa waya: Yeerisoni, Kowaati, na Meraari. Leevi eekhaliye nyaakha miiya na talaathiini na sapa.
EXO 6:17 Aana a Yeerisoni khwa ojama aya pi apa, Lipiini na Simeeyi.
EXO 6:18 Aana a Kowaati pi apa: Anraawu, Izaari, Heporooni na Uziili. Kowaati eekhaliye nyaakha miiya na talaathiini na mittatthu.
EXO 6:19 Aana a Meraari pi apa; Mali na Muushi. Ntthi laari lihimo la Leevi khwa nanna ya ovokoliwa waya.
EXO 6:20 Anraawu khunrala Yokipeeti nlupu wa papaawe, khunvokolela Arawu na Munsa, Anraawu eekhaliye nyaakha miiya na talaathiini na sapa.
EXO 6:21 Aana a Izaari pi apa: Koora, Nefekhe, na Zikiiri.
EXO 6:22 Aana a Uziili pi apa: Mizayeele, Elizaafwa, na Sithiiri.
EXO 6:23 Arawu anraliye Elisheepa mwaana wa Aminataapi, nlupu wa Nashooni; ye khunvokolela Nataapi, Apiiwu, Elizaari na Itamaari.
EXO 6:24 Aana a Koora pi apa: Asiiri, Elikana na Apiyasaafi; ntthi laari lihimo la Akoora.
EXO 6:25 Elizaari, mwaana wa Arawu, khunrala mwaana mmote wa Putiyeele, khunvokola Fineeya; apa pi attunkhulu a ojama wa Leevi.
EXO 6:26 Ti Arawu na Munsa atthaapo Nnyizinku awaarumiyeeyo yoori: “Mwilazewo Misuri lihimo la meezirayiilu.”
EXO 6:27 Pi atthaapo, Munsa na Arawu, anttakhulaniyeeyo Firawuuna mfwalume wa Misuri na niiya ya owaalazawo meezirayiilu.
EXO 6:28 Siikhu Nnyizinku attakhulaniyeevo Munsa ari nti wa Misuri,
EXO 6:29 Nnyizinku aamuziye yoori: “Miiyo ki Nnyizinku. Omuuze Firawuuna mfwalume wa Misuri zooshi epile kiniwuuzaaye.”
EXO 6:30 Munsa khunjipu Nnyizinku araka: “Miiyo akinttakhula saana; Firawuuna onttela okisiila toovi?”
EXO 7:1 Aphano Nnyizinku khumuuza Munsa yoori: “Miiyo kooretta wiiya nkhama Nluku khwa Firawuuna na ttwiiyo Arawu wiiya nkhama napiyu awo.
EXO 7:2 Weeyo omuuze zooshi epile kuurumiyeeyo, na ttwiiyo Arawu amuuze Firawuuna awaalikhe meezirayiilu aleemo mmuti mwawe.
EXO 7:3 Ila miiyo kinteela wuumisa rooho ya Firawuuna na kinteela wenkeza alama zaka na vitthu zaka zootikinisa nti wa Misuri.
EXO 7:4 Ye khanteela wuusilezani, ila miiyo kinteela wookola nkhono aka khwa Misuri, na khwa khaazi khuluzeene za ophuka, kinteela owaalazawo Misuri atthu a Ezirayiilu.
EXO 7:5 Phi amisuri anttelaavo ojuwa yoori miiyo ki Nnyizinku, amana kookola nkhono aka khwa Misuri kiwaalazavo meezirayiilu vakatthi vaya.”
EXO 7:6 Munsa na Arawu khuretta etthiipo Nnyizinku awaarumiyeezo.
EXO 7:7 Wakathi aattakhulaniyeevo Firawuuna Munsa aarina hirimu ya nyaakha thamaaniini, Arawu aarina hirimu ya nyaakha thamaaniini na mittatthu.
EXO 7:8 Nnyizinku khumuuza Munsa na Arawu yoori:
EXO 7:9 “Amana Firawuuna awuuzani yoori: ‘Mwirette minjuza awahi wuukhupalini,’ omuuze Arawu: ‘Athuule pakhora yawo eeselele enakatthi ya Firawuuna,’ pakhora ya eto entta othatuwa yiiye nyookha.”
EXO 7:10 Aphano Munsa na Arawu khulawa mpakha wa Firawuuna, noofiya khuretta etthiipile Nnyizinku aawaarumiyeeyo. Arawu khuthuula pakhora etile khweeselela enakatthi ya Firawuuna na mashawuriiya awe pakhora etile khuthatuwa khwiiya nyookha.
EXO 7:11 Aphano naye Firawuuna khuruma olawa okhuweliwa ajuwi na anamajintta; na yo khuretta etthiipo khwa majintta aya.
EXO 7:12 Wakhula mmote wa yo khusala eesa pakhora yawe na othatuwa nyookha, ila pakhora ya Arawu khumiza pakhora epile.
EXO 7:13 Ila Firawuuna khuumisa rooho yawe khuhitakhi owaasiileza, nkhama etthiipo Nnyizinku aalupiyeezo.
EXO 7:14 Nnyizinku khumuuza Munsa yoori: “Rooho ya Firawuuna tiya nthiti khanteela owaalikha atthu apo olawa.
EXO 7:15 Olawe wakutthanane Firawuuna supuyeene; ye onlawa woowa omuttho. Weemele nshini wa muuttho osala onweja, olawaka othuule pakhora yawo mmakhono etile yaathatuwiyeeyo nyookha.
EXO 7:16 Omuuze yoori: Nnyizinku, Nluku wa meezirayiilu, akiruma owuuza yoori: Owaalikhe atthu aka alawe akaaputu n'yaara, mpakha leelo khuntakha okisiileza.
EXO 7:17 Nnyizinku alupa toono: Ethiito ti enttelaaye wuujuwisa yoori miiyo ki Nnyizinku: khwa pakhora eti kiriina mmakhono kintakha kipiye maati a Nniilu athatuwe eeye taamu.
EXO 7:18 Swi ziriiye mmuttho zinteela ofwa zooshi, osala onukhamo woohifwayivo. Aphano amisuri ewaapatthe enanaari ya onywa maati a mmuttho mphule.”
EXO 7:19 Nnyizinku khumuuza Munsa theenya yoori: “Omuuze Arawu athuule pakhora yawo ookolele nkhono maati a Misuri, a mmuttho na mpakha a mmatthatta na a mmazuuku athatuwe eeye taamu, Misuri yooshi yiitaale taamu, mpakha zoopo za thaapwa na za mawe.”
EXO 7:20 Munsa na Arawu khuretta nkhama etthiipo Nnyizinku awaarumiyeezo. Arawu khushashula pakhora etile, khujapha maati a mmuttho Firawuuna ari attaapho na mashawuriiya awe, maati apale ooshi khuthatuwa taamu.
EXO 7:21 Swi zooshi zaariimo mmuttho mphule khufwa khusala onukhamo woohifwayivo, Misuri khuhisala owahi onyweyawo maati a mmuttho mwaya mphule nti wooshi waarina taamu.
EXO 7:22 Nayo anamajintta a Misuri khuretta etthiipo na ojuwa waya woojivitha, ila rooho ya Firawuuna nalelo khusala eri yawuuma khuhitakhi onsiileza Munsa na Arawu nkhama etthiipo Nnyizinku aalupiyeezo.
EXO 7:23 Firawuuna khuzukuluwa khusala alawa owawe khuhijali epile zaya.
EXO 7:24 Amisuri ooshi khulawa khuthipa nshini wa muuttho yoori apatthe maati oonywa, maana maati apale a mmuttho khaari onyweya.
EXO 7:25 Zaaviriye siikhu sapa paata ya Nnyizinku othatusha maati apale a mmuttho.
EXO 8:1 Nawiisha Nnyizinku khumuuza Munsa yoori: “Olawe wa Firawuuna wamuuze yoori Nnyizinku alupa toono: Owaalikhe atthu aka alawe akaaputu.
EXO 8:2 Amana weeyo ohitakhi owaalikha olawa, kintta operekha pala ya anaphulu nti awo wooshi.
EXO 8:3 Mmuttho Niilu wooshimo anttela ottheerelanamo anaphulu awaatta, awelele afiye owawo okatthi wawo mpakha voolili vawo na mmanyupa wa mashawuriiya awo mpakha wa atthu awo ooshi na mphule enkhattiwaamo na enoochiwaamu phaawu.
EXO 8:4 Anaphulu aya apo anttela wuuteela weeyo na mashawuriiya awo na atthu awo ooshi.”
EXO 8:5 Aphano Nnyizinku khumuuza Munsa araka: “Omuuze Arawu yoori: Wookole nkhono awo othuule pakhora wookolele mmuttho, mmilipu na mmatthatta yoori owaawelelise anaphulu Misuri yooshi.”
EXO 8:6 Arawu khookolela nkhono yawe maati a Misuri, anaphulu khuwelela khufinikha nti wooshi wa Misuri.
EXO 8:7 Aphano anamajintta na ojuwa waya woojivitha khuwaapuwisa anaphulu Misuri yooshi.
EXO 8:8 Firawuuna khuruma olawa okhuweliwa Munsa na Arawu khuwooza yoori: “Mwinvekele Nnyizinku akilaze anaphulu apa miiyo na atthu aka, yiiyaru etthiipo kintta owaalikha atthu apa alawe amwinkhe twaha Nnyizinku.”
EXO 8:9 Munsa khumuuza Firawuuna yoori: “Ruhusa ti yawo ya okuuza lini ontakhaaye yoori kuulompele weeyo na mashawuriiya awo, atthu awo ooshi, yoori weeyo na vaje vawo mwilaziwe anaphulu asale mmuttho paasi.”
EXO 8:10 Firawuuna khujipu araka: “Meesho.” Munsa khuri: “Enttela wiiya etthiipo ojipwiyeezo opatthe ojuwa yoori khaavo anlikananaaye Nnyizinku Nluku etthu.
EXO 8:11 Anaphulu antta wuulikha weeyo, vaje vawo, mashawuriiya awo na atthu awo; anttelaaye osala pi apale ari mmuttho paasi.”
EXO 8:12 Aphano, Munsa na Arawu khulaavo aphale aarivo Firawuuna, Munsa khunvekela Nnyizinku mwaasa wa anaphulu, nkhama etthiipo aasilaniyeezo na Firawuuna.
EXO 8:13 Nnyizinku khujipwelela oveka wa Munsa; anaphulu apale ooshi aari mmanyupa, vaje na mmashapa khufwa.
EXO 8:14 Khulokottheliwa khuukeliwa nti opule khusala onukha woohifwayivo.
EXO 8:15 Ila wakathi Firawuuna ajuwiyeevo yoori avumula, khurutela wuumisa rooho yawe khuhinsiilezi theenya Munsa na Arawu, khwa epile alupiyeezo Nnyizinku.
EXO 8:16 Nnyizinku khumuuza Munsa yoori: “Omuuze Arawu: Athuule pakhora yawo ookole nkhono ajaphe lifufu la vathi, lithatuwe liiye shaawa khwa Misuri yooshi.”
EXO 8:17 Khuretta etthiipo; Arawu khookola nkhono awe na pakhora etile khujapha lifufu ntthile khuthatuwa khwiiya shaawa khuweetaala atthu mpakha nyama na nti aya opule wooshi khwiitaala shaawa.
EXO 8:18 Anamajintta khweezelela etthiipo na ojuwa waya woovitheya ila khuhiwahi othatusha; shaawa epile khusala evira eweetaalaka atthu na nyama.
EXO 8:19 Aphano anamajintta apale khumuuza Firawuuna yoori: “Eti yaala ya Nluku,” ila rooho yawe Firawuuna khuumisa khuhitakhi owaasiileza, nkhama etthiipo Nnyizinku aalupiyeezo.
EXO 8:20 Aphano Nnyizinku khumuuza Munsa yoori: “Olankhe supuyeene wakutthanane Firawuuna ye onlawa omuttho, omuuze yoori: Nnyizinku alupa toono: Owaalikhe atthu aka alawe akaaputu.
EXO 8:21 Amana weeyo ohiwaalikhi atthu aka olawa, kintta wuuperekheza pala ya mempe zawaatta yoori ziwiiphirise weeyo, mashawuriiya awo, atthu awo na mmavaje mwaya. Manyupa a Misuri na vathi anluwatthaavo zinttela wiitaalavo mempe.
EXO 8:22 Ila siikhu yaya etile kinttela otthantta khwa nanna yoofwarikhana nti wa Gosheeni, okhule aniikhalaawo atthu aka; khinteela opuwawo hatha pala moote ya mempe, yoori weeyo ojuwe yoori miiyo Nnyizinku kiri mmuti nttumphu.
EXO 8:23 Kinlawa kawaafwarikhanise atthu aka na atthu awo. Meesho entta opuwa alama ya eto.
EXO 8:24 Nnyizinku khuretta etthiipo, mempe zawaatta khwiitaala nnyupa wa Firawuuna na mmanyupa wa mashawuriiya awe, nti wooshi khwiiya wootapanyeya mwaasa wa mempe.
EXO 8:25 Aphano Firawuuna khuruma okhuweliwa Munsa na Arawu khuwooza yoori: “Mwilawe mwamwinkhe twaha Nluku enu, mmuti nttumphu.”
EXO 8:26 Ila Munsa khujipu araka: “Khahi yoolikana fweeyo oretta toowo, maana twaha ninttelaaye omwinkha Nnyizinku Nluku eetthu, ti yoohifwayi khwa amisuri, amana niretta twaha nkhama eto anoonaaye ohifwayi, amisuri antta onuula na mawe.
EXO 8:27 Nina yooretta safwari ya siikhu ttatthu niri ntarikhi neettaka n'yaara olawa omwinkha twaha Nnyizinku, Nluku etthu, nkhama etthiipo anuuziyeezo.”
EXO 8:28 Aphano Firawuuna khulupa yoori: “Kintta wuulikhani mwilawe, mwamwaaputu Nnyizinku, Nluku enu n'yaara, ila mwiheette peetiwene, noofiya mwikilompele namiyo.”
EXO 8:29 Munsa khujipu yoori: “Nasaapi eti amana kilaavo vakatthi vawo kinttela onvekela Nnyizinku; meesho mempe epo entta owaattuwa weeyo na mashawuriiya awo na atthu awo, ila safwatali ohikittettekhe theenya ohiwaalikhi atthu apa olawa omwinkha twaha Nnyizinku.”
EXO 8:30 Aphano Munsa khulaavo vakatthi wa Firawuuna khunvekela Nnyizinku.
EXO 8:31 Nnyizinku khujipu lompa ya Munsa, mempe epile khumwaattuwa Firawuuna na mashawuriiya awe mpakha atthu awe, khuhisali hatha mempe moote.
EXO 8:32 Ila nalelo khusala ari wa wuumisa rooho, khuhitakhi owaalikha atthu apale olawa.
EXO 9:1 Nawiisha Nnyizinku khumuuza Munsa araka: “Olawe wa Firawuuna wamuuze yoori: Nnyizinku, Nluku wa meepereewu, alupa toono: Owaalikhe atthu aka alawe akaaputu.
EXO 9:2 Amana weeyo nalelo ohitakhi owaalikha olawa na khukhanyarela owaakhattaza,
EXO 9:3 ojuwe yoori nkhono wa Nnyizinku ontta otiisa pala yawoopisa khwa nyama zawo ziriiye omashapa, khwa khavalo zawo, khwa apuuru awo, khwa nkamiiya zawo, khwa mompe zawo mpakha pwittipwitthi zawo.
EXO 9:4 Na Nnyizinku onteela ophakula nyama za amisuri na epi za meezirayiilu, yoori ehifwe hatha nyama moote ya meezirayiilu.”
EXO 9:5 Nnyizinku atthoma wakathi araka: “Meesho Nnyizinku ontta oretta mmuti mphu etile aahitiyeeyo.”
EXO 9:6 Mmeesho mwaya Nnyizinku khuretta etthiipo: nyama za amisuri zooshi khufwa, ila za meezirayiilu hatha moote khuhifwi.
EXO 9:7 Firawuuna khunruma ntthu olawa woona, khusikana hatha moote ya meezirayiilu ehifweeni; ye khuumisa rooho khuhitakhi owaalikha olawa atthu apale.
EXO 9:8 Aphano Nnyizinku khumuuza Munsa na Arawu yoori: “Mwisavule fuutha ya vamafiya yawiitaala mmakhono Munsa amwazele otulu, Firawuuna ari attaapho.
EXO 9:9 Entta othatuwa yiiye lifufu khwa nti wooshi wa Misuri, puupa entta owaapuwa atthu mpakha nyama, Misuri yooshi.”
EXO 9:10 Yo khuthuula fuutha ya vamafiya khulawa wa Firawuuna; Munsa khumwazela fuutha etile otulu, puupa khuwaapuwa atthu mpakha nyama.
EXO 9:11 Wala anamajintta khuhisala awahi omwaattama Munsa, mwaasa wa makhwatta, awaapatthiyeeyo vamote na amisuri ooshi.
EXO 9:12 Ila Nnyizinku khuumisa rooho ya Firawuuna, ye khuhinsiili Munsa na Arawu nkhama etthiipo Nnyizinku amuuziyeeyo.
EXO 9:13 Nnyizinku khumuuza Munsa yoori: “Olankhe supuyeene olawe wakutthanane Firawuuna, omuuze oraka: Nnyizinku, Nluku wa meepereewu, alupa toono: “Owaalikhe atthu aka alawe akaaputu.
EXO 9:14 Olikha toowo, swaafu eti pala yaka yooshi kinuutiisela omweenyewe, na mashawuriiya awo na atthu awo, yoori ojuwe yoori khina eeyiye nkhama miiyo olumwenku wooshi.
EXO 9:15 Maana miiyo kinwahi wookola nkhono aka khuulwaaza weeyo na atthu awo khwa pala yaari owahaaye wuulazavo voolumwenku.
EXO 9:16 Ila miiyo kinuulikha weeyo ori haayi yoori kithoonyeze owahi waka, yoori nzina laka lilaleyiwe mmuti wooshimo.
EXO 9:17 Nalelo ontta ojikhutupulana atthu aka, khuntakha owaalikha alawa?
EXO 9:18 Ila meesho wakathi otthuupu, kinlawa kanyise vuula ya mawe ehinanyeke nti opu wa Misuri thanku owaziwe mpakha leelo.
EXO 9:19 Apho owaarume atthu awo alawe alokotthele nyama zawo ziriiye omashapa na vitthu zawo ziriiyo waaza atthu mpakha nyama ziriiyo. Amana ohilaziwo otana onti, khunyeliwa vuula ya mawe entta ofwa.”
EXO 9:20 Akarumeya a Firawuuna aari woovaaye nttakhuzi la Nnyizinku khwaakuva khulawa khuwaalazawo, aviitthwaana aya mpakha nyama zaya khulawa khupwehiwa.
EXO 9:21 Ila apale ahaari woovaaye nttakhuzi la Nnyizinku khuwaalikha amwiitthwaana aya na nyama zaya omashapa.
EXO 9:22 Aphano Nnyizinku khumuuza Munsa yoori: “Olanse makhono awo yoori ewaanyele vuula atthu, nyama, na miitthi zooshi za ntthuttu nti wooshi wa Misuri.”
EXO 9:23 Munsa khulansa pakhora yawe khuthoonyeza otulu, Nnyizinku khuvumisa taari na vuula ya mawe, Nnyizinku khwiishusha ozerima na taari khwa nti opule wa Misuri na vuula ya mawe khusala enya.
EXO 9:24 Vuula ya mawe na taari khuvuma yoopakhanyeya na mawe awoopisa ehinanyeke Misuri yooshi thanku ewaziwe.
EXO 9:25 Misuri yooshi vuula etile khutapanya vitthu zaari mmashapa, waaza atthu, nyama na mathapa mpakha miitthi zooshi za ntthuttu.
EXO 9:26 Khusala nti wa Gosheeni paasi, okhule aari wiikhalaawo meezirayiilu, okho khayaanyiyewo vuula ya mawe.
EXO 9:27 Aphano Firawuuna khuruma olawa okhuweliwa Munsa na Arawu khuwooza yoori: “Swaafu eti kakosa. Nnyizinku ti wa shariya, ila miiyo na atthu aka, na makaafiri.
EXO 9:28 Mwilompe wa Nnyizinku, maana ottitthima wa Nluku na mawe ankwaaye a vuula pi awaatta, miiyo kintta wuulikhani mwilawe mwiheekesele etthu kiina theenya.”
EXO 9:29 Munsa khujipu yoori: “Amana miiyo kilaamo nsitati mphu kintta wookolela nkhono aka wa Nnyizinku. Taari enyamale na vuula yaamuse yoori weeyo ojuwe yoori olumwenku pi wa Nnyizinku.
EXO 9:30 Ila weeyo na akarumeya awo, miiyo kinjuwa yoori khamwinimoova Nnyizinku Nluku.”
EXO 9:31 Alikutawu na ntthama zaharipweya mwaasa ntthama waarina phunje na alikutawu aaleyiye.
EXO 9:32 Naye tiriku khayaaharipweyiye maana yaari ehinootthe.
EXO 9:33 Munsa khulaavo aphale aariivo Firawuuna na nsitati mphule, khumookolela nkhono Nnyizinku, taari na vuula khwiisha.
EXO 9:34 Firawuuna nawoona yoori taari na vuula zeesha khurutela okufuru oomisaka rooho yawe na mashawuriiya awe.
EXO 9:35 Ari wawuumisa rooho etthiipo, khuhiwaalikhi meezirayiilu olawa, nkhama etthiipo Nnyizinku aamuziyeezo Munsa.
EXO 10:1 Nnyizinku khumuuza Munsa yoori: “Olawe wakutthanane Firawuuna, maana miiyo koomisa rooho yawe na rooho za mashawuriiya awe, yoori miiyo kithoonyeze alama zaka epo vakatthi vaya yo,
EXO 10:2 na yoori mwiwaathatelele aaneenu na atuulwenu nanna miiyo kiwaahukhumwiyeezo amisuri na minjuza zootikinisa kirettiyeezo vakatthi vaya, khwa etthiipo pi mwinttelaavo ojuwa yoori miiyo ki Nnyizinku.”
EXO 10:3 Aphano Munsa na Arawu khulawa okutthanana Firawuuna, yo khumuuza yoori: “Nnyizinku, Nluku wa meepereewu alupa toono: ‘Mpakha lini weeyo okatthalaka ojipushuwisa mmakhono mwaka miiyo? Owaalikhe atthu aka alawe akaaputu.
EXO 10:4 Amana okhanyarela ohitakhi owaalikha atthu aka olawa, meesho kintiisa pala ya Mapalaka mmuti mwawo.
EXO 10:5 Yo anteela ofinikha vathi ohisala wooneyavo, maana anteela orafuna zooshi epile zaalikhiweeyo ti vuula ya mawe mpakha na miitthi epile zinphutuwaazo mmashapa;
EXO 10:6 anttela wiitaala nnyupa mwawo na mmanyupa wa mashawuriiya awo na wa amisuri ooshi. Vitthu amarehemu apapazenu ahooneeni siikhu epo eekhaliyeezo mphu mpakha leelo.” Elottelanaka Munsa khulankha khulaavo aphale aariivo Firawuuna.
EXO 10:7 Aphano mashawuriiya a Firawuuna khusala alupa yoori: “Mpakha lini ntthu otu anituturushaka? Owaalikhe atthu apa alawe amwaaputu Nnyizinku Nluku aya. Khiniweeleya yoori Misuri yatapanyeya?”
EXO 10:8 Aphano khuthuuliwa Munsa na Arawu opheya khulawaniwa mpakha wa Firawuuna, ye khuwooza yoori: “Ettani mwamwaaputu Nnyizinku, Nluku enu. Oweje, anlawaaye paani?”
EXO 10:9 Munsa khujipu yoori: “Ninlawa na mashaapu etthu, na anakhuuluvale etthu, aaneetthu, pwittipwitthi zeetthu mpakha mompe zeetthu. Maana ninttela onrettela njampo Nnyizinku eetthu.”
EXO 10:10 Firawuuna khuwooza yoori: “Mweeyo mwinttela onhithajiya Nnyizinku amana kuulikhani olawa na aakha enu na aana enu! Eto enthoonyeza yoori mweeyo mwinwaza shawuri zootakhala.
EXO 10:11 Khahiyo toowo! Mwilawe alume-ru mwamwaaputu Nnyizinku maana eto ti waakivekeliyeeyo.” Munsa na Arawu khwiikariwa aphale aariivo Firawuuna.
EXO 10:12 Aphano Nnyizinku khumuuza Munsa yoori: “Wookolele nkhono nti wa Misuri yoori ate nazope vathi apha arafune mathapa ooshi ariimo na zooshi epile zaalikhiweeyo ti vuula ya mawe.”
EXO 10:13 Munsa khookola pakhora yawe ookolelaka nti wa Misuri, Nnyizinku khutiisa pheevo ya ntulayi khuvuma nthana wooshi mpakha osikhu. Noocha pheevo etile khutana nazope.
EXO 10:14 Misuri yooshi khwiitaala nazope-ru woohilikhi hatha vahali, aari awaatta venkivene. Aari ahinapuwewo nkhama apo na paata ya opo khapuwiyewo theenya nkhama apo.
EXO 10:15 Maana aafinikhiye phantte zinki za Misuri mpakha nti wooshi khwiiya wooriipa. Khurafuna zooshi epile zaalikhiweeyo ti vuula ya mawe, mathapa na mishumo za miitthi woohisali hatha etthu piishi waaza mmitthi mpakha mmashapa, nti wooshi wa Misuri.
EXO 10:16 Firawuuna khuruma olawa okhuweliwa Munsa na Arawu woohirupazi, khuwooza yoori: “Kankosa Nnyizinku, Nluku enu na kookosani mweeyo!
EXO 10:17 Apho kinuuvekelani yoori mwikiswaamihi twampi yaka swaafu eti theenya na mwinvekele Nnyizinku, Nluku enu yoori akilaze pala eti yoofwiwa.”
EXO 10:18 Munsa paata ya olaavo aphale vaya aariivo Firawuuna khunvekela Nnyizinku.
EXO 10:19 Aphano Nnyizinku khuvumisa pheevo yawaatta ya phalalazi, ethiito khukhupa mapalaka ooshi khwiitthela mpahari yookhuttuwa; khuhisalimo hatha lipalaka mmote nti opule wa Misuri.
EXO 10:20 Ila nalelo Nnyizinku khuumisa rooho ya Firawuuna; ye khuhitakhi owaalikha meezirayiilu olawa.
EXO 10:21 Aphano Nnyizinku khumuuza Munsa yoori: “Makhono awo olansele pinkuuni yoori Misuri yooshi yiiye yoofinikhiwa ti yiiza yookhomaala.”
EXO 10:22 Munsa khookolela nkhono awe otulu, Misuri yooshi khufinikhiwa ti yiiza yookhomaala khwa siikhu ttatthu.
EXO 10:23 Khuhisala oonana mmote na nzaawe, khaarivo mmote aaliyeevo vahali aariivo khwa siikhu ttatthu; ila meezirayiilu ooshi mmanyupa mwaya yaarimo nuuru.
EXO 10:24 Aphano Firawuuna khunkhuwela Munsa khumuuza yoori: “Ettani mwamwaaputu Nnyizinku enu. Ila esale pwittipwitthi zenu na mompe zenu paasi; ila aakha na aana mwilawane.”
EXO 10:25 Munsa khujipu yoori: “Weeyo ona ya oninkha nyama za orettela twaha na olukuza, yoori nimwinkhe Nnyizinku, Nluku eetthu.
EXO 10:26 Na nyama zeetthu nilawaka nintta othuula hatha likhope khalinsala, maana ninttela orumeyela etthiipo yoori nimwaaputu Nnyizinku Nluku eetthu, khanijuweeni nyama-ni ninttelaaye omwaaputu-na Nnyizinku mpakha ofiya.”
EXO 10:27 Ila Nnyizinku khuumisa rooho ya Firawuuna, ye khuhitakhi owaalikha olawa.
EXO 10:28 Firawuuna khumuuza Munsa yoori: “Oleevo apha na ohirutelevo theenya! Siikhu onttelaavo okoona theenya ontta ofwa.”
EXO 10:29 Munsa khuri: “Walikanisa! Akinteela woona theenya wuuso awo.”
EXO 11:1 Nnyizinku khumuuza Munsa yoori: “Kinimperekheza pala moote theenya Firawuuna na Misuri yooshi. Khwa ethiito ye onlawa awaalikhe olaamo mmuti mphu mpakha onlawa aweekaremo eperepere.
EXO 11:2 Apho owooze meezirayiilu ooshi, waaza alume mpakha aakha, yoori awaavekele anamwaattamanana aya vitthu za feeta na za tahapu.”
EXO 11:3 Nnyizinku khuwaaretta yoori atthu awe apatthe wooneliwa-vahali pi amisuri. Theenya Munsa aari nlume nwulweene nti opule wa Misuri, waaza mmaasho wa mashawuriiya a Firawuuna mpakha wa atthu ooshi.
EXO 11:4 Munsa khuri: “Nnyizinku alupa toono: ‘Osikhu layili kinvira Mmisuri.
EXO 11:5 Aana ooshi aalume amwanzo a nti wa Misuri anttela ofwa, waaza mwaana wa mwanzo wa Firawuuna, anttelaaye orithi khukulu ya mfwalume, mpakha mwaana wa mwanzo wa njaazi ankholaaye khaazi yoochila na aana a mwanzo a nyama zaya.
EXO 11:6 Misuri yooshi onlawa wapuwewo olila nwulweene; waari ohinapuwewo na ohinttelaaye opuwawo theenya.
EXO 11:7 Ila khwa meezirayiilu, waaza atthu mpakha nyama, wala mwanapwa khanlawa owahowula.’ Paata ya toowo, mwinttela ojuwa yoori Nnyizinku awavirikanisa amisuri na meezirayiilu.
EXO 11:8 Aphano mashawuriiya awo ooshi apa, anlawa akeekese na akikokhorele, akivekelaka yoori: ‘Olawe na atthu awo ooshi.’ Attaaphale miiyo kinttela olaawo!” Munsa na okatipukha wawe channu khulaavo aphale aariivo Firawuuna.
EXO 11:9 Aphano Nnyizinku khumuuza Munsa yoori: “Firawuuna khanteela wuusiilani, yoori minjuza zaka zeekezeleye nti wa Misuri.”
EXO 11:10 Munsa na Arawu khuretta minjuza epile zooshi khwa Firawuuna; ila Nnyizinku khukhomaaza rooho ya Firawuuna, khuhisala atakha owaalikha olaamo mmuti mphule meezirayiilu.
EXO 12:1 Nnyizinku khumuuza Munsa na Arawu nti wa Misuri yoori:
EXO 12:2 “Opu ona ya wiiya mweezi wa mwanzo wa mwaakha khwa mweeyo.
EXO 12:3 Munsa na Arawu ana ya olupa yoori: “Ajaama ooshi a Ezirayiilu, siikhu ya khuumi ya mweezi otthuupu, alume ooshi ana yoovalula nshapi la pwittipwitthi leelume ya wakhula liphanko ya wakhula nyuupa.
EXO 12:4 Ojama amana wiiya vattitthiiru ohinwahaaye orafuna nyama yooshi, ona yoowaalaleya anamwaattamanana aya apale a kharipu awaameele nyama enwahaaye owaafiyela khwa hisapu ya atthu aya.
EXO 12:5 Nyama yaya enttelaaye othawuliwa ena ya wiiya yeelume ya mwaakha mmote, yoohiirakali hatha vahali. Ena ya wiiya pwittipwitthi ama puuzi.
EXO 12:6 Mwipwehe mpakha siikhu khumi na nne ya mweezi, mpakha wakathi ajaama ooshi a meezirayiilu anttelaaye oshija njuwa leettelaka otupweela.
EXO 12:7 Mwittukunttele taamu yaya vatulu na mpavu wa milako za manyupa, apale mweeyo mwirafuniyeemu nyama.
EXO 12:8 Osikhu otthuupo mwina ya orafuna nyama yoomanikhiwa va moottho, na mathapa oowaawa na phaawu yoohiina fwaramento.
EXO 12:9 Mwihirafune nyama piishi wala yawiipikhiwa, ila yoomanikhiwa va moottho waaza eeshwa, moolu na marupo aya.
EXO 12:10 Mwihisalise hatha etthu efiya supu; amana esala mwilukuze.
EXO 12:11 Mwiwale, nzako n'yuunu, jampali mmoolu na mwikholele pakhora mmakhono, mwirafune wawaakuvavo; otu paashikowa wa Nnyizinku.
EXO 12:12 Maana osikhu aya otthuupo kinttela ovira nti wa Misuri na kiwoole aana ooshi amwanzo aalume waaza atthu mpakha a nyama, na kiwaahukhumu a miluku ooshi a Misuri: Nnyizinku ti Miiyo!
EXO 12:13 Taamu mwivaziyeeyo milako zenu enttela wiiya alama yoori ethoonyeze manyupa mwiniikhalaaye, amana kiwaavulalisaka amisuri, miiyo kinttela woona taamu kisala kuuvikanani wooheemeli yoori mwihiiye wootapanyiwa ti pala yaya eto.
EXO 12:14 Mwitthapele siikhu ethiito nkhama njampo la tiini muupuwelele yoori ti miiyo, Nnyizinku, kirettiyeeyo epo. Mweeyo na peewu yenu mwina yooretta njampo la paashikowa khwa mileele.
EXO 12:15 Nkatthi wa siikhu sapa mwina yooja phaawu yoohiina fwaramento. Siikhu yamwanzo mwilazemo fwaramento mmanyupa mwenu, maana wakhula otule anttelaaye oja etthu yawiiyana fwaramento, ntthu aya oto ontta wiikariwa vakatthi wa meezirayiilu.
EXO 12:16 Siikhu yamwanzo na siikhu yasaapa ona yawiiyavo nthukumano ttakatthiifu, ahiiyevo hatha ntthu mmote antakhaaye okhola khaazi siikhu zaya epo, woohiiyi wenttekhezela etthu-yoojiwa ya wakhula siikhu; mwina yooretta ethiito paasi.
EXO 12:17 Mwirette njampo la phaawu yoohiina fwaramento, maana siikhu yaya ethiito ti kilaziyeeyo nti wa Misuri mahimo a atthu ooshi a meezirayiilu. Mwitthapele siikhu yaya eto wiiye nrumo wa mileele, waaza wa apaapa mpakha wa aana aya.
EXO 12:18 Mwina yoorafuna phaawu yoohiina fwaramento makaaripi siikhu yakhuumi na nne ya mweezi wamwanzo mpakha makaaripi siikhu zeettettaka eshiriini na moote.
EXO 12:19 Siikhu epi sapa ahiiyevo ntthu mmote anttelaaye wiiyana fwaramento owawe. Wakhula antakhaaye oja etthu ya wiiyana fwaramento ontta wiikariwa muujama wa meezirayiilu, hatha nkhama mmalapo ama nnyunti.
EXO 12:20 Mwihije hatha etthu ya wiiyana fwaramento mmanyupa mwenu wooshimo, ila mwina yooja phaawu yoohiina fwaramento.”
EXO 12:21 Munsa khuruma okhuweliwa attunkhulu a atthu ooshi a meezirayiilu khuwooza yoori: “Mwinthawule nshapi la pwittipwitthi yoori ajaama ooshi a Ezirayiilu ashije pwittipwitthi ya Paashikowa.
EXO 12:22 Mwithuule zankalala mwinaanise na taamu eriiye mpasiya mwittukunttele milako zenu vatulu na mpavu mwaya. Ahiiyevo hatha ntthu mmote antakhaaye osaruwa nnyupa mwawe mpakha ocha.
EXO 12:23 Maana Nnyizinku aviraka mmuti mphule yoori awoole amisuri; amana oona taamu etile mwittukuntteliyeeyo nlako enu phantte na phantte na vatulu vaya, Nnyizinku onttela ovira attaapho khanlawa onlikha namatapanya ovira mmanyupa mwenu yoori awuuleeni.
EXO 12:24 Mwipwehe nrumo opu mweeyo na aana enu ooshi khwa mileele.
EXO 12:25 Amana mwifiya nti opule Nnyizinku awahitiyeenini owinkhani, mwina yooretta njampo ntthi.
EXO 12:26 Aaneenu amana awuuzelani yoori: ‘Njampo laya ntthi maana aya niini?’
EXO 12:27 Mwiwaajipu yoori: ‘Twaha ya Paashikowa wa Nnyizinku, aviriyeeyo vatulu wa manyupa a meezirayiilu nti wa Misuri, na khwiinanela manyupa eetthu wakathi aari owoolaavo amisuri.” Attaaphale meezirayiilu khukokhora khumwaaputu Nnyizinku.
EXO 12:28 Meezirayiilu khulaavo, khulawa khuretta nanna ethiitile Nnyizinku amuuziyeeyo Munsa na Arawu.
EXO 12:29 Aphano osikhu layili, Nnyizinku khuwoola aana ooshi amwanzo a misuri, waaza mwaana wamwanzo wa Firawuuna, namarithi ofwalume awe, mpakha mwaana wamwanzo wa napherezu aari nkalapooso na theenya aana amwanzo a nyama.
EXO 12:30 Osikhu otthuupule, Firawuuna na mashawuriiya awe ooshi na amisuri ooshi khulankha na wapuwiye olila nwulweene, maana khayaarivo nyuupa yahaafwiweemo.
EXO 12:31 Osikhu otthuupule Firawuuna khuruma okhuweliwa Munsa na Arawu khuwooza yoori: “Mwileemo nasaapi mmuti mwaka, mweeyo na meezirayiilu! Mwilawe mwamwaaputu Nnyizinku enu, nkhama etthiipo mwivekiyeezo.
EXO 12:32 Mwithuule pwittipwitthi zenu mompe zenu na puuzi zenu, nkhama mwaalupiyeezo na mwikiparikhiye theenya.”
EXO 12:33 Amisuri aari owaakhanyarela atthu apale yoori aleemo mmuti mphule, alupaka yoori: “Amana mwihiliimo fooshi fweeyo nintta ofwa!”
EXO 12:34 Aphano atthu apale khuthuula tiriku yookhattiwa yoohiina fwaramento, khuputaputela pasiya yaya vakuwo khuvikela mmafuzi.
EXO 12:35 Meezirayiilu khushututela nrumo wa Munsa, khuwaavekela amisuri vitthu za feeta za tahapu na kuwo.
EXO 12:36 Nnyizinku khuwaaretta atthu awe wooneliwa huruma pi amisuri, khwa nanna awenkhiyeevo etile avekiyeeyo; khwa etthiipo khuvulula maali zooshi za amisuri.
EXO 12:37 Meezirayiilu khulankha khusala alawa mwentto khuvira Rameesi eettaka Sukooti. Aari alume alufu miiya sitha, ohiwaalaki aakha na aana.
EXO 12:38 Khuntti khuluzeene zoofwarikhana za amalapo aawaalottiye, na theenya maphanko mawulu-mawulu a nyama, mompe, pwittipwitthi na puuzi.
EXO 12:39 Khoocha phaawu zoohiina fwaramento khwa tiriku etile aathuuliyeeyo Misuri, maana khayaarina fwaramento mwaasa wawiikariwa Misuri, khuhiwahi otthenkeza etthu-yoojiwa.
EXO 12:40 Meezirayiilu eekhaliye Misuri nyaakha miiya nne na talaathiini.
EXO 12:41 Siikhu ethiito afisiyeevo nyaakha miiya nne na talaathiini, atthu ooshi a Nnyizinku eetta olaawo Misuri.
EXO 12:42 Waari osikhu wa weekesela wa Nnyizinku yoori awaalazewo meezirayiilu Misuri wooshiwo. Tiito, osikhu nkhama otthuupu na yo anttela ojeekesela na ojama aya ontaaye mileele.
EXO 12:43 Nnyizinku khumuuza Munsa na Arawu yoori: “Epi kano za Paashikowa: ahiiyevo hatha mmalapo mmote anttelaaye onja.
EXO 12:44 Mwiitthwaana wawuuzanyiwa ona yonja Paashikowa, amana eeya wookhiriya.
EXO 12:45 Ila apale eettiye omaka na apale aateeliye okhola khaazi ahinje.
EXO 12:46 Mweeyo mwina yonja nnyupa nttumpho aattaliweemo, mwihithuule hatha phittula moote mwisarulelaka vaje, wala mwihipweche hatha likhonkolo la nyama mwinttelaaye orafuna.
EXO 12:47 Atthu ooshi a Ezirayiilu ana yontthapela Paashikowa.
EXO 12:48 Wakhula mmalapo anikhalaaye nttumphu antakhaaye oretta njampo ntthi la Paashikowa wa Nnyizinku, mwina yowaakhiriyisa alume ooshi a muujama mwaya; apo ana yontthapela nkhama aana a muujama. Ahiiyevo ntthu woohikhiriyi anttelaaye ontthapela.
EXO 12:49 Kano ethiito enttela orumeyeliwa pi anyunti na amalapo apale amakiyeemo.”
EXO 12:50 Meezirayiilu ooshi khuretta nkhama etthiipo Nnyizinku amuuziyeezo Munsa na Arawu.
EXO 12:51 Siikhu ethiitile Nnyizinku khuwaalazawo meezirayiilu Misuri, khuwaatthenkeza lihimo khwa lihimo.
EXO 13:1 Nnyizinku khumuuza Munsa yoori:
EXO 13:2 “Okithawulele aana aalume ooshi a mwanzo. Aana aalume a mwanzo a meezirayiilu pi aka, khahiyo aana-ru paasi na nyama zooshi za mwanzo zeelume.”
EXO 13:3 Aphano Munsa khuwooza atthu yoori: “Mwifikhirele siikhu eti mweeyo mwiliyeewo Misuri, nti opule mwarettiweeyo omwiitthwaana, maana Nnyizinku oolazaniwo okhule khwa owahi wa makhono awe. Tiito mwihije hatha etthu yootthiiwa fwaramento.
EXO 13:4 Siikhu ethiiti ya mweezi wa Habibi mweeyo mwintta olaawo Misuri.
EXO 13:5 Amana Nnyizinku oofisani nti wa akanaani, wa ahiiti, wa amoori, wa amwiivi na wa ayepuzi nti opule alaphaniyeeyo amarehemu apapazetthu yoori aari oteela owinkhani, nti liniittikhaawo leethi na asali, mweeyo mwina yooretta njampo ntthi mweezi otthuupu.
EXO 13:6 Nkatthi wa siikhu sapa mwina yooja phaawu yoohiina fwaramento siikhu yaya eti ya saapa mwitthapele njampo la Nnyizinku.
EXO 13:7 Mwije phaawu yoohiina fwaramento nkatthi wa siikhu sapa epo, mwihithuule hatha etthu yawiiyana fwaramento wala mmuti mwenu ehiiyemo.
EXO 13:8 Siikhu yaya etile wakhula mmote ona yoomuuza mwanawe yoori: “Mwaasa wa epi Nnyizinku oretteliyeenini mwilankhaka Misuri.”
EXO 13:9 Epi enttela wiiya nkhama alama ya mmakhono mwawo na opheleleza wa mmwishwa mwawo yoori oruma wa Nnyizinku wiiye vanlimi vawo, maana Nnyizinku oolaza Misuri khwa nkhono awe woowahi.
EXO 13:10 Mwishututele nrumo opu khwa siikhu etthomiweeyo, mwaakha khwa mwaakha.
EXO 13:11 Amana Nnyizinku oofisani nti wa akanaani na khuwinkhani, nkhama etthiipo alaphaniyeeyo mweeyo na amarehemu apapazenu,
EXO 13:12 mwinthawulele Nnyizinku aana ooshi amwanzo ovokoliwa aalume. Nyama za mwanzo ovokoliwa zooshi zeelume za maphanko enu pi za Nnyizinku.
EXO 13:13 Mwiwoosuru aana a puuru ooshi a mwanzo mwipatilanaka pwittipwitthi, ila amana mwihitakhi owoosuru waya, mwivuje siiko zaya. Mwiwoosuru theenya aana enu ooshi aalume amwanzo.
EXO 13:14 Meesho amana aaneenu awuuzelani yoori: ‘Maana aya niini?’ Mwiwooze yoori: ‘Khwa oowahi wa nkhono awe, Nnyizinku anilazawo Misuri, nti narettiweewo oviitthwaana.
EXO 13:15 Wakathi Firawuuna aari okhijilaaye na okatthala onilikha olaawo, Nnyizinku khuwoola aana ooshi a mwanzo aalume mpakha aana a mwanzo a nyama. Tiito kinimwinkhaaye twaha Nnyizinku aana aalume a vitthu zooshi na niniwoosuru aaneetthu ooshi a mwanzo ovokoliwa.’
EXO 13:16 Eto enttela wiiya nkhama alama mmakhono mwenu na nthoonyezo wa vaachihi venu yoori Nnyizinku anilaza Misuri na owahi wa nkhono awe.”
EXO 13:17 Wakathi Firawuuna awalikhiyeevo olaawo meezirayiilu, Nluku khawaavirisiye tarikhi ya Afiliishiti, yeettiye wiiyaru tarikhi yoofupheya. Khulupa yoori: “Yo amana awoomanana, talili anttela owaza orutela Misuri.”
EXO 13:18 Etthiipile, Nluku khuwaazukulelisa atthu apale n'yaara mphule, phantte ya pahari yookhuttuwa. Meezirayiilu khulaawo Misuri khujitthenka yoori oomane.
EXO 13:19 Munsa khuthuula makhonkolo a Yuusufu, mwaasa aalaphisaniye na aana a meezirayiilu wakathi aalupiyeeyo yoori: “Weekhweele Nluku onta awaakiseni mweeyo, amana mwilawaka mwithuulewo makhonkolo aka.”
EXO 13:20 Meezirayiilu khulankha Sukooti khulawa khumaka Eeta, ohali yaaziyeewo yaara.
EXO 13:21 Nnyizinku aari vamote na yo, nthana aari owaalokoza nkhama nripu la liwiku yoori eettette saana ntarikhi; amana wiiya osikhu eetta owaalokoza na nuuru ya nripu la moottho amwasikhelaka tarikhi; etthiipo pi aari owahaaye weettetta nthana na osikhu.
EXO 13:22 Nripu la liwiku ntthile khalaari owaasusa meezirayiilu nthana, wala nripu la moottho opule osikhu khalaari owaasusa.
EXO 14:1 Nnyizinku khumuuza Munsa yoori:
EXO 14:2 “Owooze meezirayiilu yoori asapuwe alawe amake kharipu ya Piharoote enakatthi-nakatthi ya Mikotooli na pahari. Mwamake nshini wa pahari omaasho ya Baale-Zefooma.
EXO 14:3 Paata ya toole Firawuuna khusala oopuwela yoori meezirayiilu antta ojeettettela athowelela n'yaara.
EXO 14:4 Khwa etthiipo kinlawa koomise rooho ya Firawuuna, ye onlawa awiikariseni, paata ya toowo miiyo kinlawa kattitthimisiwe vakatthi wa Firawuuna na anajanka awe ooshi. Amisuri anlawa ajuwe yoori miiyo ki Nnyizinku.” Meezirayiilu khuretta etthiipo.
EXO 14:5 Ila wakathi ooziweevo mfwalume wa Misuri yoori meezirayiilu atthira, ye na anakhaazi awe khuzukulisa akhili zaya na khulupa yoori: “Niini nirettiyeeyo? Nawaalikha meezirayiilu olawa anaashikha amwiitthwaana etthu!”
EXO 14:6 Aphano mfwalume khuruma weetteliwa nkukutta awe wa viittha na anajanka awe.
EXO 14:7 Khuthuula theenya mikukutta miiya sitha epile zookhomaala na mikukutta zooshi za Misuri na anamalokozela ooshi.
EXO 14:8 Nnyizinku khukhomaaza rooho ya Firawuuna mfwalume wa Misuri, khusala aweekarisa meezirayiilu aaliiyewo khwa nanna wooshinttavo.
EXO 14:9 Firawuuna khusala aweekarisa na khavalo zawe zooshi, mikukutta zawe zooshi na anakhavalo awe na anajanka awe, khuwaasikana amakiye nshini wa pahari kharipu ya Piharoote omaasho wa Baale-Zefooma.
EXO 14:10 Firawuuna asaleelaka owaasikana, meezirayiilu khweekesa nyuma khuwoona amisuri eettaka ota phantte etile aariiwo. Khuwaapattha woova channu, khusala ankhuwela Nnyizinku.
EXO 14:11 Na khumuuzela Munsa yoori: “Misuri zeetta othowawo vilalo tiito onilaziyeewo yoori nite nifwele n'yaara mphu? Niini eti weeyo oniretteliyeeyo, yoonilazawo okhu?
EXO 14:12 Tiito nawuuziyeeyo Misuri yoori: ‘Onilikhe niiye aviitthwaana amisuri! Afwataali wiiya amwiitthwaana amisuri ehiiyeeni ofwa n'yaara.”
EXO 14:13 Munsa khuwaajipu atthu apale yoori: “Mwihoove, mwiiye wookhomaala na moone nusura Nnyizinku anttelaaye wuutiselani leelo. Maana khamwinttela owoona theenya amisuri apa mwiniwoonaaye leelo.
EXO 14:14 Nnyizinku onttela wuumana mwaasa wa mweeyo, mwiiye woonyamala.”
EXO 14:15 Khulupa theenya Nnyizinku amuuzaka Munsa yoori: “Mwaasa aya niini mwikikhuwelaka miiyo? Owooze meezirayiilu avire alawaka.
EXO 14:16 Weeyo olanse pakhora yawo ojaphe maati, antta waawanyeya yoori meezirayiilu alokhe eri tuulu yawuuma.
EXO 14:17 Miiyo kinttela wuumisa rooho za amisuri, yo anttela wuulottelelani mpahari nttumpho. Miiyo kinttela wiiya woottitthimisiwa amana kinshintta mfwalume wa Misuri na anajanka awe ooshi na mikukutta zawe zooshi za nvittha na anakhavalo awe ooshi.
EXO 14:18 Amisuri anttela ojuwa yoori miiyo ki Nnyizinku amana kittitthimisiwa khwa Firawuuna na mikukutta zawe na anakhavalo awe.”
EXO 14:19 Aphano nlayikha la Nluku ntthile lawaalokoziyeeyo atthu a Ezirayiilu khuwaalikha khurutela nyuma waya; theenya nripu la liwiku khuwaalikha khurutela nyuma waya,
EXO 14:20 khwiiya vakatthi wa amisuri na meezirayiilu. Liwiku laari wiiya looripa phantte ya amisuri khusala liwaamwasikhela meezirayiilu; mwaasa wa ethiito khuhisala liwaattamanisa meezirayiilu na amisuri osikhu wooshi.
EXO 14:21 Munsa khookolela nkhono awe pahari, Nnyizinku khuvumisa pheevo zookhomaala za ntulayi osikhu wooshi mpakha pahari waawanyeya khupuwa mishaka zawuuma mwaasa wa waawanyeya wa maati.
EXO 14:22 Meezirayiilu khulokha vakatthi wa maati khwa mishaka zawuuma, khupuwa muuri phantte ya nkhono nlume na nkhono nkha.
EXO 14:23 Amisuri khusala aweekara na khavalo zaya zooshi, mikukutta zaya za nvittha na anakhavalo ooshi a Firawuuna khusala awaalotta mpakha vakatthi wa pahari.
EXO 14:24 Osaleelaka ocha nkatthi wa nripu la moottho na la liwiku, Nnyizinku khuwoona anajanka amisuri khuwaakarawela.
EXO 14:25 Khuretta etthu yoophara maroota za mikukutta za amisuri nkhama ahaari ojuwaaye weettettisa na khusala akhuwa araka: “Nlaweni niwaatthire meezirayiilu! Nnyizinku ontta wuumanana amisuri khwa zwaamu yaya yo.”
EXO 14:26 Nnyizinku khumuuza Munsa yoori: “Wookolele nkhono awo khwa pahari, yoori maati awaakhutele amisuri na mikukutta zaya na anakhavalo aya.”
EXO 14:27 Munsa khookolela nkhono awe pahari osaleelaka ocha, maati khurutela etthiipile aariizo. Wakathi amisuri aari ariiye atthire, khukutthanana maati a pahari, aphano Nnyizinku khuwaakhutela na pahari.
EXO 14:28 Maana maati aarutiye khukhutela mikukutta na anakhavalo, na anajanka ooshi a Firawuuna eeshukheliyeeyo mpahari; hatha mmote khaarutiye.
EXO 14:29 Ila meezirayiilu khulokha pahari etile eettaka oluwatthela mishaka, maati aari nkhama muuri phantte ya nkhono nlume na phantte ya nkhono nkha.
EXO 14:30 Etthiipile Nnyizinku khuwoosuru meezirayiilu siikhu etile mmakhono wa amisuri, na meezirayiilu khuwoona amisuri ari oofwa mmattima wa pahari etile.
EXO 14:31 Meezirayiilu khoona owahi nwulweene wa Nnyizinku na khumoova Nnyizinku aya na khunkhupali Nnyizinku na Munsa karumeya awe.
EXO 15:1 Aphano Munsa na aana a meezirayiilu khumwiipela liipo ntthi, Nnyizinku yoori: “Kinimwiipela Nnyizinku, mwaasa yoori ashintta wooshapweyavo, khutupweeza mpahari khavalo na anakhavalo aya.
EXO 15:2 Nnyizinku ti kuvu yaka na liipo laka, ye ti nusura yaka! Ye ti Nluku aka na miiyo kininsifu, ti Nluku wa papaaka na miiyo kinimwaaputu!
EXO 15:3 Nnyizinku ti naviittha, nzina lawe ti Nnyizinku.
EXO 15:4 Khutupweeza mpahari mikukutta za nvittha na anajanka a Firawuuna; anamalokozela awe apale awaakhupaliyeeyo khukhuteliwa ti pahari yookhuttuwa.
EXO 15:5 Maati apale awiicha khuwaakhutela khwiiya oozama nkhama mawe.
EXO 15:6 Oo Nnyizinku, nkhono nlume awo onaaye owahi nwulweene; Oo Nnyizinku, nkhono nlume awo wawaashijela maatuwi.
EXO 15:7 Khwa owula wa ofwalume awo wawaakhitiri maatuwi awo, katapu yawo khuwaaja nkhama malala.
EXO 15:8 Khwa ovitelela wa phula yawo maati na mawipi ajikusanya khujakhuwa nkhama muuri, vathi wa pahari khwiiya awuuma nkhama liwe la manlela.
EXO 15:9 Maatuwi khusala alupa yoori: ‘Niweekarise niniwaasikana niwaanyakanye maali nafusi zeetthu zinlawa zatoshiwe pi yo, nasarule phanka yeetthu na makhono eetthu niniwaatapanya.’
EXO 15:10 Khuperekha pheevo yawo, na pahari khuwaafinikha. Khuzama nkhama chumpwi mpahari wawiichamo.
EXO 15:11 Khaziivo miluku zinlikananaaye weeyo oo Nnyizinku. Khaavo woottitthimisiwa woottakatthifu, wawoopisa khwa oretta vitthu zootikinisa na oretta minjuza.
EXO 15:12 Wookoliye nkhono nlume awo nti khuwaamiza.
EXO 15:13 Khwa pheta yawo wawaalokoza atthu awo apale owoosuruyeeyo; na kuvu zawo, khuwaattha puuro yawo yoottakatthifu.
EXO 15:14 Khapila khusiila epile onrettaazo, khusala zithukumela na woova. Afiliishiti khuwaapattha huzuni.
EXO 15:15 Attunkhulu a Meedomu khwiiya ooshanka na anamalokozela a amowaabu khuwaapattha othukumela; akanaani khuwaapattha otteettheya.
EXO 15:16 Osuthuwa na woova khuwaapattha khwa owahi wa nkhono awo, khuhisala asakhinyeya nkhama mawe mpakha ovira atthu awo, Oo Nnyizinku, mpakha ovira atthu apale owoozanyiyeeyo.
EXO 15:17 Oo Nnyizinku, weeyo oniwalawana na waweekhaze vamwaako wa eritho yawo puuro ttakatthiifu nyuupa yawo ojekiyeeyo na makhono awo.
EXO 15:18 Nnyizinku mfwalume wa mileele.”
EXO 15:19 Wakathi khavalo za Firawuuna na mikukutta zawe za nvittha na anakhavalo awe eettiyeevo mpahari, Nnyizinku khuwaazamisa a Misuri na maati a pahari etile; ila meezirayiilu aaviriye mwentto aluwatthelaka mishaka zawuuma vakatthi wa pahari.
EXO 15:20 Nhupiri Miiriyamu nlupuwe Arawu khuthuula nttowu na aakha ooshi khusala anlotta eettaka opiya na wiina.
EXO 15:21 Miiriyamu aari owaajipu eettaka wiipa araka: “Nimwiipele Nnyizinku, mwaasa yoori ashintta wooshapweyavo. Khutupweeza mpahari khavalo na anakhavalo aya.”
EXO 15:22 Aphano Munsa khuwaalokoza meezirayiilu waaza pahari yookhuttuwa mpakha n'yaara ya Shuuri. Siikhu ttatthu eettaka weettetta n'yaara ahipatthaka maati.
EXO 15:23 Aphano khufiya Maara, ila khuhiwahi onywa maati ottuukho mwaasa wa owaawa. Ti maana aya wiittheliweeyo nzina la Maara.
EXO 15:24 Tiito meezirayiilu khusala amwaapa Munsa araka: “Ninttela onywa-ni?”
EXO 15:25 Munsa khunkhuwela Nnyizinku ye khuthoonyeziwa muutthi khuthuula khweeselela mmaati khwiiya ootuva. Puuro etile ya Maara Nnyizinku khuwenkha kano na oruma na khuweeza,
EXO 15:26 awoozaka yoori: “Mweeyo amana mwinsiileza Nnyizinku, Nluku enu na osiileza etile enintuvelaaye na khusiileza mirumo zawe na khushututela kano zawe zooshi, khamwiniiyana hatha orati opule kiwaatiseliyeeyo amisuri, maana miiyo ki Nnyizinku anvonisaaye.
EXO 15:27 Aphano khufiya nti wa Elimu, ottuukho zaariiwo milipu khumi na miwiri na mikokonoothi sapiyiini; khumaka ottuukho khwaattamela maati.
EXO 16:1 Mahimo a atthu a meezirayiilu khulankha nti wa Elimu khulawa mpakha yaara ya Siimu, eriiye enakatthi-nakatthi ya Elimu na Sinaayi. Zaari siikhu khumi na thaanu ya mweezi wa phiiri paata ya olaawo Misuri.
EXO 16:2 N'yaara mphule mahimo a atthu a meezirayiilu khusala amwaapa Munsa na Arawu.
EXO 16:3 Alupaka yoori: “Afwataali nkhono wa Nnyizinku onuuleeliye Misuri! Maana okhu fweeyo naari wiiya nshini wa vikhalako za nyama na naari ojaka etthu-yoojiwa woohiivo hatha shaakha mpakha orupala, ila mweeyo khunitiisa n'yaara mphu yoori mwinuule jala fooshi fweeyo.”
EXO 16:4 Aphano Nnyizinku khumuuza Munsa yoori: “Miiyo kintta okwisa etthu-yoojiwa ya pinkuuni. Atthu nka asaruwaka na olokotthela wakhula siikhu khwa khiima eniwaafiyelaaye siikhu yaya etile, khwa etthiipo kinttela oweeza yoori kiwoone nkhama yo anshututela kano yaka.
EXO 16:5 Siikhu ya sitha mwina yoolokotthela swaafu piiri zayita epile mwinlokotthelakaaye siikhu kiina zaya.”
EXO 16:6 Aphano Munsa na Arawu khuwooza meezirayiilu ooshi yoori: “Makaaripi mwinttela ojuwa yoori ti Nnyizinku oolaziyeenini nti wa Misuri,
EXO 16:7 meesho supu mwinttela woona siifwa ya Nnyizinku maana asiila waapa wenu. Fweeyo na paani mwinnaapaaye?”
EXO 16:8 Khurutela olupa theenya araka: “Nnyizinku oniwinkhani nyama yoorafuna makaaripi na etthu-yoojiwa ya supu yoori mwirupale, maana asiila waapa wenu. Fweeyo na a paani? Mweeyo khamwinnaapa fweeyo, ila Nnyizinku.”
EXO 16:9 Munsa khumuuza Arawu yoori: “Wuuze mahimo a atthu ooshi a meezirayiilu oraka: Mweette mmakhono wa Nnyizinku, maana asiila waapa wenu”.
EXO 16:10 Arawu eettaka ottakhulana meezirayiilu, ooshi khusala eekesa phantte ya n'yaara na siifwa ya Nnyizinku khupuwa mmawiku,
EXO 16:11 na Nnyizinku khumuuza Munsa yoori:
EXO 16:12 “Kinsiila waapa wa meezirayiilu, ila owaajipu yoori: ‘Njuwa leettelaka otupweela mweeyo mwinrafuna nyama, na supu mwiniiyana-yoojiwa ya wuutoshani. Toowo mwinttela ojuwa yoori miiyo ki Nnyizinku Nluku enu.”
EXO 16:13 Makaaripi khupuwa khwaali khwiitaala aphale aamakiyeevo, supu waarivo mmatte phantte yaya etile.
EXO 16:14 Wakathi mmatte opule wuumiyevo, vathi aphale khupuwa vitthu nkhama mavalako zoolattanana cheelu vatulu wa nshaka.
EXO 16:15 Wakathi meezirayiilu ooniyeevo vitthu epile, khwaaza wuuzelana atthaaporu araka: “Niini epiza?” Maana khaari ojuwa etthu yaari orettikhanaaye. Elottelanaka, Munsa khuwooza yoori: “Eti etthu-yoojiwa Nnyizinku awinkhiyeenini yoori mwije.
EXO 16:16 Nnyizinku khurumisa yoori: ‘Wakhula mmote wa mweeyo ona yookusanyela epile antakhaaye yoori aje, khwa hisapu ya atthu ariina vaje vawe, ttompwiyo piiri wakhula ntthu.”
EXO 16:17 Meezirayiilu khuretta etthiipo ooziweezo; akina khukhupa zawaatta, akina vattitthiiru.
EXO 16:18 Wakathi aphimiyeeyo na ttompwiyo, otule aalokottheliyeeyo zawaatta na otule alokottheliyeeyo vattitthiiru ooshi khupattha sawa-sawa. Wakhula mmote aapatthiye epile aari ohithajiyaaye oja.
EXO 16:19 Munsa khuwooza yoori: “Ahiiyevo hatha mmote antakhaaye opweha yoori aje meesho.”
EXO 16:20 Ila yo khuhinsiilezi Munsa, akina khulikha vattitthiiru mana aya yoori aje mmeesho mwaya; ochiyeevo khwiitaala nyunku na khusala anukha. Munsa khuwaakatipukhela yo venkivene.
EXO 16:21 Wakhula siikhu supu, yo eetta olokotthaka epile aari otakhaaye oja, maana haari ya njuwa yeetta othulushaka etile yaari osalaaye vathi.
EXO 16:22 Siikhu ya siitha, khulokottha swaafu piiri, theenya ttompwiyo phiiri khwa wakhula ntthu; attunkhulu a atthu khulawa omuuza Munsa.
EXO 16:23 Khuwaajipu Munsa araka; “Nnyizinku aruma yoori: ‘Meesho enttela wiiya siikhu yoovumula, Saapatu ttakatthiifu ya Nnyizinku etile mwintakhaaye wuumisa vamoottho muumise na etile mwintakhaaye wiipikha na maati, mwiipikhe, zooshi zinttelaaye osala mwipwehe mpakha mmeesho mwaya.”
EXO 16:24 Khupweha mpakha mmeesho mwaya nkhama etthiipo Munsa aalupiyeezo; wala khuhivutti na hatha nyunku khuhiina.
EXO 16:25 Aphano Munsa khulupa yoori: “Mwije leelo maana Saapatu ttakatthiifu ya Nnyizinku maana leelo khamwinsikanavo hatha etthu valipuwa.
EXO 16:26 Siikhu sitha mwina yoolokotthela ila siikhu ya saapa, Saapatu, khazinteela wiiyavo.”
EXO 16:27 Siikhu ya saapa aalankhiye atthu onlawa olokottha ila khuhisikani.
EXO 16:28 Aphano Nnyizinku khumuuza Munsa yoori: “Mpakha lini mwikhijilaka oshututela mirumo zaka na kano zaka?
EXO 16:29 Moone yoori Nnyizinku awinkhani Saapatu, tiito siikhu ya siitha oniwinkhani etthu-yoojiwa ya siikhu piiri yoori siikhu ya saapa wakhula ntthu eeye attaaphale aniiyaavo ahiiyevo ntthu antakhaaye weettetta.”
EXO 16:30 Aphano atthu apale khuvumula siikhu ya saapa.
EXO 16:31 Atthu a Ezirayiilu khutthaja etthu-yoojiwa etile nzina la mana. Zaari nkhama peewu ya phunje zoolakala zootuva nkhama mishikoto za asali.
EXO 16:32 Munsa khulupa araka, “Nnyizinku aruma yoori: ‘Mwilokotthele mana apa ttompwiyo moote mwipwehe, yoori khapila entaaye yoone etthu-yoojiwa mwenkhiweeyo ti Nnyizinku wakathi oolaziyeenini Misuri.”
EXO 16:33 Aphano Munsa khumuuza Arawu yoori: “Othuule ttompwiyo moote ya mana, otthe mmakhono wa Nnyizinku, yoori epweheliwe khapila eto entaaye.”
EXO 16:34 Khwa oshututela etile Nnyizinku aamuuziyeezo Munsa, Arawu khuthuula mana apale khuttha mmakhono wa oshaahiti wa Mbwana.
EXO 16:35 Meezirayiilu khuja mana nyaakha arupayiini mpakha ofiya nti waari wiikhaleyaaye; khuvira ajaka mpakha ofiya mmwiinano wa Kanaani.
EXO 16:36 Mphimo waari ophimaniwaaye mana waari wiitthiwa ttompwiyo, phantte ya khuumi ya eefwa.
EXO 17:1 Mahimo a atthu a meezirayiilu khulaamo n'yaara ya Siimutta, khusala eettetta avumulaka alawaka, nkhama etthiipo aarumiyeeyo Nnyizinku. Khumaka Refidimu ila khaariwo maati oonywa.
EXO 17:2 Mwaasa wa ethiito khusala anyakulisana na Munsa araka: “Oninkhe maati oonywa.” Ye khuwaajipu yoori: “Mwaasa wa niini mwinyakulisanaka na miiyo? Mwinimweezelani Nnyizinku?”
EXO 17:3 Ila atthu apale aarina nnyottha khusala omwaapa Munsa araka: “Waanilazeliyeniwo Misuri? Ontakha onuula na nnyottha na aana eetthu na nyama zeetthu?”
EXO 17:4 Aphano Munsa khunyakula ankhuwelaka Nnyizinku araka: “Kiwaarettele niini atthu apa? Ansaleela okivonya na mawe!”
EXO 17:5 Nnyizinku khunjipu yoori: “Olokoze, olawe wawaathuule attunkhulu a atthu a meezirayiilu na wiiyane pakhora mmakhono ethiito waapiyaniyeeyo muuttho Niilu, olawe.
EXO 17:6 Woone, Miiyo kinttela wiiya ottuukho vatulu wa liwe la Horeepe. Weeyo opiye liwe laya, nttinttho lintta olaza maati yoori atthu apo anywe.” Munsa khuretta etthiipile, attunkhulu a meezirayiilu eettaka omoona.
EXO 17:7 Puuro yaya etile khutthaja nzina la Maasa na Mariiba, maana aphale vaya meezirayiilu aanyakulisananiye na khumweeza Nnyizinku araka: “Nnyizinku ori vamote na fweeyo ama wala?”
EXO 17:8 Elottelanaka khuta Amalekiita oteela owoomanana meezirayiilu nti wa Refidimu.
EXO 17:9 Aphano Munsa khumuuza Yoshuwa yoori: “Owaathawule atthu aalume oomanane Amalekiita. Meesho kinttela wiiya vatulu wa mwaako na pakhora ya Nluku mmakhono mwaka.”
EXO 17:10 Yoshuwa khulawa wuumanana Amalekiita nkhama etthiipile Munsa aalupiyeeyo. Munsa, Arawu na Huri khuwelaza vatulu wa mwaako.
EXO 17:11 Amana Munsa alansa makhono awe meezirayiilu eetta oshintta, amana eeshusha makhono awe Amalekiita ti aari oshinttakaaye.
EXO 17:12 Amana makhono a Munsa ashokhera, Arawu na Huri eetta othuulaka liwe yoori Munsa eekhalevo. Oowiiri khukholelela makhono a Munsa, mmote nkhono nkha nkina nkhono nlume yoori makhono a Munsa eeye aweemela mpakha njuwa otupweela.
EXO 17:13 Yoshuwa khuwaashintta sawasawa anajanka a Amalekiita na phanka.
EXO 17:14 Aphano Nnyizinku khumuuza Munsa yoori: “Waatikhe hapari epi nkithaapu yoori zisala zuupuweleliwa na omuuze Yoshuwa yoori Amalekiita anttela wiiya oosahawiwa khwa mileele vathi wa olumwenku.”
EXO 17:15 Munsa khunjeka alitaari na khuntthaja yoori: “Nnyizinku akinkha oshintta”,
EXO 17:16 na khuri: “Nkhono mmote vakhukulu ya Nnyizinku; Nnyizinku ori nvittha na Amalekiita khapila khwa khapila.”
EXO 18:1 Aphano Yeeturu, haakhimu wa Miitiya, nkhwewe Munsa, khusiila vitthu zooshi Nluku anretteliyeeyo Munsa vamote na atthu a Ezirayiilu khwa nanna Nnyizinku awaalaziyeewo Misuri.
EXO 18:2 Raku, Munsa amperekhiye Zipoora muukha awe owawe nkhwewe Yeeturu, ye khumpwekherela,
EXO 18:3 vamote na aana awe awiri. Mmote aya aari wiitthiwa Yeerisoni, maana aalupiye yoori “Miiyo kaasafireliye nti wa malaponi”;
EXO 18:4 nkina aari wiitthiwa Elizeeri, maana aalupiye yoori: “Nluku wa paapa ti eeyiye awuni yaka na akaawuni khwa phanka ya Firawuuna.”
EXO 18:5 Aphano Yeeturu nkhwewe Munsa na muukhaawe Munsa na aanaawe awiri khulawa n'yaara omwaako wa Nluku okhule Munsa aamakiyeewo.
EXO 18:6 Yeeturu khurumisa nhupi wuuziwa Munsa yoori: “Miiyo, nkhwewo, kata na muukhaawo na aanaawo awiri.”
EXO 18:7 Aphano Munsa khumwaattama nkhwewe khumwiinamela khumpatikha, khusala oozelana hapari mmote na nzaawe eettaka ovira nheema.
EXO 18:8 Elottelanaka Munsa khwaaza omuuza nkhwewe vitthu zooshi Nnyizinku anretteliyeeyo Firawuuna na amisuri mwaasa wa pheta ya meezirayiilu na tafwawuthi zooshi akholiyeeyo ntarikhi na nanna Nnyizinku awaataphuliyeeyo.
EXO 18:9 Yeeturu noosiila mattakhuzi apale ooshapweya Nnyizinku awaretteliyeeyo meezirayiilu, awaataphulaka mmakhono wa amisuri, khwiiya woofurahi.
EXO 18:10 Yeeturu khulupa yoori: “Woottottopeliwa eeye Nnyizinku, ootaphuliyeenini mmakhono wa amisuri na mmakhono wa Firawuuna na khuwaataphula atthu awe vathi wa nkhono wa amisuri.
EXO 18:11 Leelo kajuwa yoori Nnyizinku nwulweene zayita miluku zooshi, maana khwa vitthu epile aari ojikhutupulanaaye atapanya.”
EXO 18:12 Aphano Yeeturu nkhwewe Munsa, khuretta twaha yoolukuziwa khwa Nluku; khuta Arawu na attunkhulu ooshi a meezirayiilu, yoori aje etthu-yoojiwa na nkhwewe Munsa omaasho wa Nluku.
EXO 18:13 Mmeesho mwaya Munsa khwiikhala yoori aphuke onyakulisana wa atthu, atthu apale khweemela ya supu mpakha makaripi.
EXO 18:14 Wakathi nkhwewe ooniyeevo epile aari owaarettelaaye atthu apale, khuri: “Eto onrettaayo niini? Weekhalela-ni atthu ooshi khweemela na khuuzukulela otthowe ya supu mpakha makaripi?”
EXO 18:15 Aphano Munsa khumuuza nkhwewe yoori: “Mwaasa aya atthu apa anikiteela miiyo okuuzela vitthu za Nluku.
EXO 18:16 Amana eeyana milattu zaya, antta okiteela yoori kiphuke mmote na nzaawe na kiwoozaka mwentto wa Nluku na kano zawe.”
EXO 18:17 Nkhwewe Munsa khulupa yoori: “Eto onrettaaye khahiyo yooshapweya oretta.
EXO 18:18 Weeyo na atthu awo mwinttela oshokhera, maana khaazi yaya eto ti yoolipa channu; khunwahi oretta otthowe.
EXO 18:19 Osiile huula yaka! Miiyo kiniwinkha shawuri na Nluku ti eeye vamote na weeyo. Wiiye weeyo namalokozela wa atthu omaasho wa Nluku na othuula tafwawuthi zaya zooshi khwa Nluku.
EXO 18:20 Owooze mwentto na kano na owaajuwise tarikhi ya weettettela na khaazi ya okhola.
EXO 18:21 Ila weeyo vakatthi wa atthu apo, owaathawule atthu a makhaamu ooretta etthu, oomoova Nluku, atthu a haakhi eniweephiraaye ophattha fwayita ya haraamu. Owenkhe ottunkhulu wa atthu alufu wa atthu miiya wa atthu hamusiini wa atthu khumi.
EXO 18:22 Yo anttela wiiya vakatthi wa atthu yoori asala aphuka tafwawuthi zaya. Nka ootiiselaka weeyo tafwawuthi epile zoolipa; epile zookhweya anttela waattalela ottho. Amana oretta toowo enttela wiiya yookhweya khaazi yawo, maana yo anttela wuulikhela otthowe.
EXO 18:23 Amana weeyo oretta etthiipo, nkhama Nluku anrumaazo, nka owahaka oshintta tafwawuthi zaya epo na atthu apa ooshi eettaka orutela onti tafwawuthi zaya ziri zawaattaleliwa.”
EXO 18:24 Munsa khukhupalela wuuziwa ti nkhwewe na khuretta etthiipile ooziweeyo ti ye.
EXO 18:25 Khuwaathawula atthu amakhaamu vakatthi wa meezirayiilu ooshi khuwaaretta wiiya anamalokozela atthu aya apale; nttunkhulu wa atthu alufu, wa atthu miiya, wa atthu hamusiini, na wa atthu khumi.
EXO 18:26 Apa khwiiya nkhama anamaphuka awakhula siikhu, atafwawuthi za atthu. Amana wiiya mwaasa woolipa aari weettiseliwaka Munsa, amana ziiya zookhweya aari ophukaka atthaapo.
EXO 18:27 Aphano Munsa khuleezanana nkhwewe Yeeturu khusala arutela owawe.
EXO 19:1 Mweezi wa ttaatthu siikhu ethiitile, paata ya aana a meezirayiilu olaawo Misuri, khufiya mpakha n'yaara ya mwaako Sinaayi.
EXO 19:2 Noolaawo Refidimu, khulawa mpakha n'yaara ya Sinaayi, meezirayiilu khulawa khumaka ottuukho omaasho wa mwaako Sinaayi.
EXO 19:3 Elottelanaka Munsa khuwela vamwaako yoori akutthanane Nluku. Nnyizinku khunkhuwela vamwaako attaaphale araka: “Olupe mattakhuzi apa wuuzaka peewu ya Yaakhumpa, atthu ooshi a meezirayiilu yoori:
EXO 19:4 ‘Mweeyo moona etthu kiwaaretteliyeeyo amisuri na nanna kiwaathamisiyeeyo nkatthi wa mapaphelo a saaka kijitiiselaka miiyo.
EXO 19:5 Aphano, amana mwikishututela wawaamineyavo mwisiila huula yaka na khuthokorela wahati aka, mweeyo mwinttela wiiya atthu aka, ootafikhana zayita khapila kiina, maana olumwenku wooshi pi waka.
EXO 19:6 Mweeyo mwinttela wiiya ofwalume aka wa anamalokozela a tiini na khapila ttakatthiifu.’ Apo pi mattakhuzi onttelaaye owooza meezirayiilu.”
EXO 19:7 Munsa khuruti khulawa khuwaakhuwela attunkhulu ooshi atthu a meezirayiilu na khuwooza zooshi Nnyizinku anrumiyeeyo olupa.
EXO 19:8 Atthu ooshi khujipu wa swaafu moote yoori: “Ninretta zooshi Nnyizinku arumiyeezo.” Aphano Munsa khulawa khumuuza Nnyizinku mattakhuzi ajipwiyeeyo atthu apale.
EXO 19:9 Nnyizinku khumuuza Munsa yoori: “Woone! Kinttela wuuttakhulana weeyo nkatthi wa liwiku looriipa yoori atthu amana akisiila kittakhulanaka weeyo asala ookhupali khwa mileele.” Aphano Munsa khumuuza Nnyizinku mattakhuzi ooziweeyo pi atthu apale.
EXO 19:10 Nnyizinku khurutela omuuza theenya Munsa araka: “Olawe vakatthi wa atthu apo, wawaattakatthise leelo na meesho. Yo ana ya ofula kuwo zaya,
EXO 19:11 yoori eeye oolikana siikhu ya ttaatthu, maana siikhu ya ttaatthu Nnyizinku onttela wiishukha vamwaako Sinaayi, mooshi mweeyo mwimoone.
EXO 19:12 Otthe mwiinano nkerekhere wa mwaako na owooze atthu yoori: ‘Eeyane phoole ya ohiweli mwaako na ohisapi. Otule anttelaaye osapa mwaako ona ya wuuliwa;
EXO 19:13 ohinsape na nkhono ila onvonye na mawe ama nttetthe, hatha nkhama ntthu ama nyama, khiniiya haayi.’ Ila amana nlope livuma swaafu moote apho pi anttelaavo owela.”
EXO 19:14 Munsa khwiishukhela aphale aariivo atthu apale khuwaattakatthisa na yo khufulaza kuwo zaya.
EXO 19:15 Khuwooza atthu apale yoori: “Mwiiye woolikana ovirisa siikhu ya ttaatthu. Ila ahiiyevo antakhaaye okutthanana muukha awe.”
EXO 19:16 Noocha, siikhu ya ttaatthu khupuwa taari na ozerima, liwiku looriipa khufinikha mwaako na khuvumisiwa nlope channu. Atthu ooshi khuwaapattha woova aphale aarivo.
EXO 19:17 Munsa khuwaalazavo atthu apale aphale vaya yoori akutthanane Nluku, yo khulawa khweemela waattamanana mwaako.
EXO 19:18 Mwaako Sinaayi wooshi weetaaliye loosi, maana Nnyizinku eeshukheliye attaapho na moottho, na loosi laya leetta owela nkhama loosi la vanjocho na mwaako wooshi weetta othukumela channu.
EXO 19:19 Ovuma wa nlope weetta ovira otepaka, elottelanaka Munsa khuttakhula na huula ya Nluku khunjipu.
EXO 19:20 Nnyizinku khwiishukhela vatulu wa mwaako Sinaayi, khunkhuwela Munsa vatulu attaaphale Munsa khuwelela khulawa.
EXO 19:21 Nnyizinku khumuuza Munsa yoori: “Wiishukhe wawooze atthu apo yoori ahivikane mwiinano atakhaka omoona Nnyizinku. Amana avikana enkeene antta ofwa.
EXO 19:22 Hatha nkhama anamalokozela a tiini amana amwaattamelaka Nnyizinku ana yoojittakatthisa. Amana ahijittakatthisi Nnyizinku ontta owaatapanya.”
EXO 19:23 Aphano Munsa khumuuza Nnyizinku yoori: “Atthu khanwahi owela vamwaako Sinaayi maana weeyo waanilikhisiye oraka: ‘Mwirette mwiinano omaasho wa mwaako mwiphakule.”
EXO 19:24 Nnyizinku khunjipu Munsa amuuzaka yoori: “Wiishukhe orutele owela theenya, operekhiwaka ti Arawu. Ila anamalokozela a tiini na atthu ahirukhe mwiinano yoori awelele apha ariivo Nnyizinku, amana aretta toowo Nnyizinku ontta owaatapanya.”
EXO 19:25 Aphano Munsa khwiishukha khulawa owooza atthu apale.
EXO 20:1 Nluku alupa mattakhuzi ooshi apa araka:
EXO 20:2 “Miiyo ki Nnyizinku, Nluku awo, kuulaziyeeyo nti wa Misuri ohali waarettiweewo omwiitthwaana.
EXO 20:3 Ohiiyane miluku mikina omaasho waka miiyo.
EXO 20:4 Ohijaattalele sanamu wala ratarato ya etthu ya otulu wala ya vathi ama vathi a mmaati.
EXO 20:5 Ohikokhorele wala ohaaputu, maana Miiyo ki Nnyizinku, Nluku awo; kintakha wiiye waka paasi, kinoonaaye twampi za apaapa na kifikhirelaka twampi zaya khwa aana aya mpakha khapila ya ttaatthu ama yanne ya apale aari okiphiirisaaye,
EXO 20:6 ila kintthantta na tthakaraka mpakha khapila alufu epile zinikiphetaaye na zinshututelaaye mirumo zaka.
EXO 20:7 Ohilupe nzina la Nnyizinku Nluku awo mahala, maana Nnyizinku khanlawa onlikha ahinhukhumweeni otule anlupaaye nzina lawe mahala.
EXO 20:8 Wuupuwele Saapatu yoori siikhu ttakatthiifu.
EXO 20:9 Ona yookhola khaazi zawo zooshi siikhu sitha,
EXO 20:10 ila siikhu ya saapa Saapatu ti yomwinkha Nnyizinku Nluku awo, siikhu yaya eti ohikhole hatha khaazi moote, waaza weeyo, mwanawo wa nlume ama wankha, wala mwiitthwaana awo wala njaazi awo, wala nyama zawo wala aletto ariiye nlikokoro mwawo.
EXO 20:11 Maana khwa siikhu sitha, Nnyizinku eetta wumpa pinku na vathi, pahari na vitthu zooshi ziriimo, ila Saapatu khuvumula. Paata ya toowo, Nnyizinku khuparikhiya Saapatu ya etile na khuttakatthisa.
EXO 20:12 Onshitahi papaawo na mamaawo, yoori wiikhale siikhu zawaatta vathi apha Nnyizinku, Nluku awo awinkhiyeeyo.
EXO 20:13 Ohuule.
EXO 20:14 Ohiraruwe.
EXO 20:15 Ohiiye.
EXO 20:16 Ohinlokoveze nzaawo.
EXO 20:17 Ohilazele omaashokopho vaje wa nzaawo, wala muukha wa nzaawo, wala amwiitthwaana ama ajaazi awe, wala mompe zawe ama puuru zawe na wala etthu moote etile yiiyiye yawe.”
EXO 20:18 Wakathi atthu apale aari osiilaavo taari na ozerima na ovuma wa nlope na khoona mwaako olazaka loosi, ooshi khusala athukumela mpakha osusela petiwene.
EXO 20:19 Khumuuza Munsa yoori: “Weeyo ottakhulane ye, fweeyo nintta osiila. Ila Nluku amana attakhulana fweeyo nintta ofwa.”
EXO 20:20 Munsa khuwooza atthu apale yoori: “Mwihoove! Nluku aateeliye oweezani, yoori mwisala mwimoova na ooweraweriseni twampi.”
EXO 20:21 Ila atthu apale nalelo khwiiya peetiwene, Munsa khusala avira aattamelaka liwiku ntthile looriipa aariivo Nluku.
EXO 20:22 Nnyizinku khumuuza Munsa yoori: “Owooze meezirayiilu mattakhuzi apa yoori: ‘Mweeyo moona na maasho enu yoori pinkuuni kattakhulana mweeyo.
EXO 20:23 Mwihaattale miluku za feeta wala miluku za tahapu yoori mwikiphakanyane.
EXO 20:24 Mwikaattalele alitaari wa mattophe mwirettevo twaha ya olukuziwa na zaakha za heeri, pwittipwitthi na mompe zenu wakhula vahali mwinrettaavo nka mwifikhirelaka nzina laka, kintta wuuteelani mweeyo na kuparikhiyeni.
EXO 20:25 Amana mwikijekela alitaari wa mawe mwihinjekane mawe ooshijaniwa zaana, eeyaru mawe awaattaliwa saana mwintta onkufurwela.
EXO 20:26 Mwihinwele na shikatta alitaari aka amana mwinjekaka, maana mwintta onfulamela.
JON 1:1 Siikhu moote Nnyizinku anrumiye Yuunusa mwaana wa Amitayi yoori:
JON 1:2 “Olankhe olawe sitati khuulu ya Neniive, walaleye ottuukhu, yoori miiyo kinjuwa zooshi zootakhala zaya anrettaazo.”
JON 1:3 Ila Yuunusa asiiliyeevo toole, khuwaza otthirela tuniya yoolepelana Neniive, antthiraka Nnyizinku. Khulawa mpakha sitati ya Yoope khusikana pankaya vapatari, yaari weettaaye Taarisi. Khuripha pasaji yawe, khweetta mpankaya yoori atthirele Taarisi, antthiraka Nnyizinku.
JON 1:4 Aphano, alawaka, Nnyizinku khuperekha pheevo ya waatta na pahari khutakhala khusala esaleela opwecheya pankaya.
JON 1:5 Mamalinyero ooshi khwiiya awoova, wakhula mmote wayo khusala akhuwa anvekelaka nluku awe, yoori apatthe wuusurukha, na khusala atupweeza mapwattha aya mpahari, yoori eveyaveye pankaya yaya. Wakathi aya opo Yuunusa, aarettiye eeshukheliye mpurawu eettaka olala ajisahawiye.
JON 1:6 Nahota khwiishukhela mpurawu mphule aari olalaamo Yuunusa, khumuuzela yoori: “Weeyo! Onlala-ni? Olankhe onvekele nluku awo! Khinjuweya anoonelaka huruma yoori anuusuru nihifwe.”
JON 1:7 Paata ya toole, mamalinyero khusiilana yoori: “Nlaweni neekese nasipu, ninjuwe nlupa otu anitotheliye hasara eti.” Yo khweekesa nasipu etile, khusala emoona Yuunusa.
JON 1:8 Khuuzeliwa Yuunusa: “Weeyo o nlupa onitotheliyeeyo hasara eti. Nkanuuze! Weeyo onkhola khazi-ni? Wala onlankha vayi? Nti awo nti-ni? Ama lihimo lawo lihimo-ni?”
JON 1:9 Ye khujipu araka: “Miiyo ki Mwipereewu, kinimwaaputu Nnyizinku, Mwennyewe pinku, otu ompiye nti na pahari.”
JON 1:10 Elottelanaka Yuunusa khuwooza yoori aari ontthira Nnyizinku. Wakathi ajuwaziyeevo etthu yaari onrettikhanelaaye, yo khwiiya ootepa woova, na khumuuzela Yuunusa: “Apho niini orettiyeeyo!”
JON 1:11 Pheevo yeetta otepa yaattaka, khufiyelela mamalinyero omuuzela Yuunusa: “Yoori pheevo na pahari eshapweye, fweeyo nuurettele niini?”
JON 1:12 Yuunusa khujipu araka: “Miiyo kajuwa yoori pheevo eti yapuwelela mwaasa wa miiyo. Apho, mwikitthempe mwikeeselele mpahari. Mwirettaru toowo, mwintta woona pahari na pheevo zinyamaliye.”
JON 1:13 Ila mamalinyero apale khuhintupweezazi, khwaaza ofuttha reemu na kuvu zaya zooshi yoori afiye vathi. Khuhisala ewaheya, mwaasa yoori pahari yeetta ovira etepaka otakhala.
JON 1:14 Yo khukhuwa ankhuwelaka Nnyizinku araka: “Oo, Nnyizinku, ohinilikhelele nifwaka mwaasa wa pinaatamu otu, na ohinikwisele paathuli ofwa wa mwinyi otu. Zooshi zarettikhana khwa nanna olakeliyeezo.”
JON 1:15 Nawiisha khuntthempaza Yuunusa khumweeselela mpahari. Aphano pahari na pheevo, zooshi khunyamala.
JON 1:16 Ooniyeevo toole, mamalinyero ooshi khwiiya awoova channu na khumwaaputu Nnyizinku. Khunrettelaza twaha na theenya ahiti.
JON 1:17 Amweeselelaziyeevo mpahari, Nnyizinku khuperekha swi khuluyeene yoori emmize Yuunusa, ye khwiiya mmatthupo wa swi siikhu ttatthu nthana na osikhu.
JON 2:1 Ari mmatthupo wa swi, ye khwaaza olompa anshukhurwelaka Nnyizinku awe:
JON 2:2 “Nhuzuni mwaka kankhuweliye Nnyizinku, na aakijipwiye. Mithili za ahera kaakhuwiye na waasiiliye huula yaka.
JON 2:3 Waakitupweeziye mpahari wa wiichamo, nkatthi wa khilintti, nziko wa maati khukizukulela, na mawipi awo khukikhutela.
JON 2:4 Miiyo khulupa yoori keekareliwa peeti-wene na omaasho wawo weeyo Nnyizinku. Kinta kirutele woona theenya nyuupa yawo yoottakatthiifu?
JON 2:5 Maati khukifiya vakhulo, khilintti khukizukulela na mirawa khukizokonzela eeshwa yaka.
JON 2:6 Khuzama mpakha vanchina la nyaako, tuniya ya vathi, puuro enimfukelaaye ntthu khwa siikhu zooshi. Ila weeyo Mbwanaaka Nnyizinku khuusuru nafusi yaka nkhapuri mphule.
JON 2:7 Wakathi kaari osaleelaavo ofwa, koofikhiriye weeyo Nnyizinku, khuuperekheza lompa yaka, yoori efiye nnyupa mwawo woottakatthiifu.
JON 2:8 Apale anaputwaaye sanamu zoohiina fwayita, antarawu tthakaraka ya Nnyizinku.
JON 2:9 Ila miiyo kinteela wuushukhurwela Nnyizinku na maliipo a siifwa na owinkha twaha, na kinteela oretta eti kaahitiyeeyo, maana nusura ti yaawo weeyo Nnyizinku.”
JON 2:10 Aphano, Nnyizinku khuruma swi etile, yoori yanchuwe Yuunusa nshini wa nttima.
JON 3:1 Aphano Nnyizinku khunruma Yuunusa swaafu ya phiiri yoori:
JON 3:2 “Olankhe olawe sitati khuulu ya Neniive, walaleye ottuukhu mattakhuzi apa kinuurumaaye.”
JON 3:3 Ye khulankha khulawa Neniive, nkhama etthiipo Nnyizinku anrumiyeezo. Neniive yaari sitati khuluyeene ntthu aari wiishishaaye siikhu ttatthu eettaka weettetta mwentto.
JON 3:4 Ila ye n'oofiya sitati etile eettettiye siikhu moote, alaleyaka yoori: “Nkatthi wa siikhu arupayiini Nnyizinku onteela opwecha Neniive.”
JON 3:5 Aneniive khwiiya wonkhupali Nluku khulaleyana yoori afuke, waaza attunkhulu mpakha asimaana, ooshi khuwalaza saakhu.
JON 3:6 Hapari epile za Yuunusa zamfiyeliye mfwalume wa Neniive, ye khwiishukha vakhukulu yoohaakhimu, khuvula kuwo zoofwalume khuwala saakhu na khwiikhala vafuutha.
JON 3:7 Aphano khuruma olaleyiwa Neniive yooshi yoori: “Khwa nzina la mfwalume na mawaziri awe: Ahiiyevo atha ntthu mmote antakhaaye oja na onywa, wala ojisa na onywisa nyama zawe, mompe zawe ama pwittipwitthi zawe.
JON 3:8 Atthu ooshi awale saakhu, na awalise nyama zaya, na akhuwe khwa nzina la Nluku na kuvu zaya zooshi. Attharuwe oretta vitthu zootakhala na ohusuti.
JON 3:9 Khinjuweya Nluku omwiishelaka wiiphiiriwa wawe, anoonele huruma yoori nihifwe.”
JON 3:10 Wakathi Nluku ooniyeevo yoori alikhaza oretta vitthu zootakhala, ye khulikha etile aari wuupuwelaaye owaarettela na khuhiwaahukhumu.
JON 4:1 Erettiyeevo toole, Yuunusa khuhintuveli etile yaya, na khwiiya wookatipukha.
JON 4:2 Ye khusala amuuza Nnyizinku araka: “Oo Nnyizinku aka, khahiyo eti kaalupiiye nalelo kiri onti? Ti ethiito yaakipatthisiyeeyo otthira keettaka Taarisi. Miiyo kaajuwiye yoori weeyo o Nnyizinku wa tthakaraka na wa huruma, woovilela na woopheta channu, onaahitaaye ohukhumu ila khulevelela mmana wiiyavo othupwiya.
JON 4:3 Aphano Mbwanaaka okilaze nafusi yaka, kinhithari ofwa kihiiyeeni wiiya haayi.”
JON 4:4 Ye Nnyizinku khulupa: “Weeyo onaaye shariya yookatipukha?”
JON 4:5 Yuunusa aalawiye khwiikhala mashaarikhi ya sitati ethiitile. Khujeka lipantta lawe, khwiikhala vamwiivuuli, khusala aweja etthu-ni yaari weettelaaye orettikhana sitati etile.
JON 4:6 Aphano, Nnyizinku khootthisa nrayi khurapela vatulu valipantta aphale aariivo Yuunusa, yoori eeye vamwiivuuli na aawuneye haari. Nrayi opule waamwinkhiye furaha ya waatta Yuunusa.
JON 4:7 Ila mmeesho mwaya supuyeene, Nluku khumperekha mwanyanyama khurafuna nrayi opule, khuuma.
JON 4:8 Etthamu-tthamu ya njuwa, Nluku khuperekha pheevo ya mashaarikhi yoolukuza channu, naye njuwa khusala lipiyela veeshwa vawe Yuunusa, khusala asaleela ozileya. Eviriyeevo toole, ye khusala ajitakhela ofwa, na khuri: “Toono afwataali ofwa ehiiyeeni wiiya haayi.”
JON 4:9 Ila Nluku khumuuzela Yuunusa: “Weeyo onaaye shariya yookatipukha mwaasa wa nrayi?” Ye khujipu: “Ayo, kinaaye! Na ki wookatipukha kintakha hatha ofwa.”
JON 4:10 Aphano Nnyizinku khumuuza: “Weeyo onoonela huruma nrayi opo, ohikholeleeni khaazi wala ohiwuliseeni, woottha osikhu mmote na osikhu nkina khufwa.
JON 4:11 Ila Neniive awaakho atthu anzitaaye eshiriini wa miiya alufu, ahinjuwaaye othawula etthu yooshapweya wala etthu yootakhala, na nyama za waatta. Miiyo akaari oteela wiiyana huruma na sitati khuluyeene etile?”
MAT 1:1 Eti warakha ya peewu na mazina aya a amarehemu a phantte ya Yinsa Al-Masiihu, peewu ya Daawuuda na Eburahiima.
MAT 1:2 Eburahiima khunvokola Esiyaakha; Esiyaakha khunvokola Yaakhumpa; Yaakhumpa khunvokola Yuuda na attwiize;
MAT 1:3 Yuuda khunvokola Pereezi na Zeera, mamaawe aari Tamaara; Pereezi khunvokola Hezorooni, Hezorooni khunvokola Arawu;
MAT 1:4 Arawu khunvokola Aminataapi; Aminataapi khunvokola Nashooni; Nashooni khunvokola Salimooni;
MAT 1:5 Salimooni khunvokola Bowaazi, mamaawe aari Rahaape; Bowaazi khunvokola Obeedi, mamaawe aari Ruuti; Obeedi khunvokola Yeese;
MAT 1:6 na Yeese khunvokola mfwalume Daawuuda. Daawuuda khunvokola Seleyimaana, mamaawe aari muukha wa Uriiya;
MAT 1:7 Seleyimaana khunvokola Ropowaawu; Ropowaawu khunvokola Apiiya; Apiiya khunvokola Aasa;
MAT 1:8 Aasa khunvokola Zhuzaafwa; Zhuzaafwa khunvokola Joraawu; Joraawu khunvokola Uziiya;
MAT 1:9 Uziiya khunvokola Jotaawu; Jotaawu khunvokola Akaaze; Akaaze khunvokola Ezakiiya;
MAT 1:10 Ezakiiya khunvokola Manaase; Manaase khunvokola Amooni; Amooni khunvokola Joziiya;
MAT 1:11 Joziiya khunvokola Jekoniiya na attwiize, wakathi eekareliweeyo Babilooniya.
MAT 1:12 Paata ya weettaniwa Babilooniya: Jekoniiya khunvokola Sheyalitiyeeli; Sheyalitiyeeli khunvokola Zorobabeeli;
MAT 1:13 Zorobabeeli khunvokola Apiwuute; Apiwuute khunvokola Eliyakhiimu; Eliyakhiimu khunvokola Azoori;
MAT 1:14 Azoori khunvokola Satookhi; Satookhi khunvokola Akiini; Akiini khunvokola Eliwuuti;
MAT 1:15 Eliwuuti khunvokola Eliyazaari; Eliyazaari khunvokola Maata; Maata khunvokola Yaakhumpa;
MAT 1:16 na Yaakhumpa khunvokola Yuusufu, manna wa Mariyamu, otule anvokoliyeeyo Yinsa, othuuto aniitthiwaaye Al-Masiihu.
MAT 1:17 Khwa etthiipo waaviriye ojama khumi na nne waaza va Eburahiima mpakha Daawuuda, na khumi na nne waaza va Daawuuda mpakha va okholiwa olawaniwa Babilooniya, na khumi na nne waaza Babilooniya mpakha va ovokoliwa wa Yinsa.
MAT 1:18 Ovokoliwa wa Yinsa Al-Masiihu pi toono. Mariyamu ari wooposiwa ti Yuusufu ahinarapalelane, khwiimittha khwa Rooho Ttakatthiifu.
MAT 1:19 Ila Yuusufu, mposi awe, khwiiya ntthu wa shariya na woohitakhi ontwayifusha, ye khulakela sirini okayiri onrala.
MAT 1:20 Ila, paata ya wuupuwela vitthu epile, khumpuwelela nlayikha la Mbwana nkatthi wa olottha, khumuuza yoori: “Yuusufu, mwaana wa Daawuuda, ohoove ompokhera Mariyamu wiiya muukhaawo, maana ye eemittha khwa Rooho Ttakatthiifu.
MAT 1:21 Ye onteela ompattha mwaana, weeyo ontthaje nzina la Yinsa, maana ye onteela owoosuru atthu awe khwa twampi zaya.”
MAT 1:22 Zooshi epo enteela orettikhana yoori ziretteye zooshi epile Mbwana alupiyeeyo khwa napiyu yoori:
MAT 1:23 “Mwaari onteela wiimittha ampatthe mwaana, anttelaaye wiitthiwa Emanuweele, enlupaaye yoori ‘Nluku ori vamote na fweeyo’.”
MAT 1:24 Paata ya olankha, Yuusufu khuretta etile nlayikha la Mbwana laamuziyeeyo khumpokhera Mariyamu muukhaawe.
MAT 1:25 Ye khaarapalelaniye mpakha ompattha mwaana. Khuntthaja nzina la Yinsa.
MAT 2:1 Paata ya Yinsa ovokoliwa Belemu ya Yudeya yenzi ya mfwalume Herooti, ajuwi alankhiye malawa-juwa khuta Yeruzaleemu.
MAT 2:2 Khuuzela yoori: “Mwaana ntteetthe otu avokoliweeyo, mfwalume wa mayaahuuti ori vayi? Fweeyo noona ntthottowa lawe malawa-juwa nateela omwaaputu.”
MAT 2:3 Wakathi mfwalume Herooti asiiliyeevo epo zaya, khwiiya woovelavela, na atthu ooshi a Yeruzaleemu.
MAT 2:4 Aphano khuwaakusanya mahaakhimu a tiini ooshi na anamanozela a kano, khuwoozela vayi aari weettelaawo ovokoliwawo Al-Masiihu.
MAT 2:5 Yo khunjipu yoori: “Belemu ya Yudeya, maana napiyu aatikha toono:
MAT 2:6 ‘Weeyo Belemu, ya nti wa Yudeya, weeyo hatha vattitthiiru khahi owoohafwiifweya khwa sitati khuulu za Yuuda, maana khwa weeyo onteela opuwa mfwalume anttelaaye oweettettisa atthu aka a Ezirayiilu.’”
MAT 2:7 Herooti khuwaakhuwela ajuwi sirini khuwoozela wakathi laapuwiyeeyo ntthottowa nttho.
MAT 2:8 Aphano khuwaaruma Belemu awoozaka yoori: “Mwilawe mweekese ojuwa saaneene monkoni wa mwaana oto, na amana mwinsikana, mwite mwikuuze yoori na miiyo kilawe kamwaaputu.”
MAT 2:9 Paata ya onsiila mfwalume yo khusala alawa, ntarikhi khoona ntthottowa nttintthile ooniyeeyo malawa-juwa, khulokoza khulawa khweemela puuro etile aariivo mwaana.
MAT 2:10 Noorutela woona ntthottowa ntthile, khwiiya oofurahi venkivene.
MAT 2:11 Khuvira nnyupa mphule khunsikana mwaana na Mariyamu mamaawe, khukokhora khumwaaputu. Nawiisha, khufukula maphuta aya khumwinkha tthuvo: Thahapu, ovupa, na mafuttha oonukhela.
MAT 2:12 Khuuziwa muulottha yoori ahirutele wa Herooti, khurutela owaya khwa tarikhi kiina.
MAT 2:13 Paata ya ajuwi olawa, nlayikha la Mbwana khumpuwelela Yuusufu muulottha khumuuza yoori: “Olankhe, onthuule mwaana oto na mamaawe, otthirele Misuri. Weekhale ottuukho mpakha miiyo kiwuuze, maana Herooti onteela omweekesa mwaana oto yoori amuule.”
MAT 2:14 Aphano ye khulankha, khunthuula mwaana na mamaawe osikhu, khweetta Misuri.
MAT 2:15 Ottuukho eekhaliyeeyo mpakha Herooti ofwa. Khwa etthiipo khuretteya etile Mbwana alupiyeeyo khwa napiyu yoori: “Kankhuwela mwanaka aari nti wa Misuri.”
MAT 2:16 Herooti ooniyeevo yoori attettekhiwa ti ajuwi, khwiiya wookatipukha, khuruma wuuliwa aana ooshi a nyaakha miwiri zeettaka vathi, Belemu na miti zawaattamanana nkhama wakathi otthuupo ooziweeyo pi ajuwi.
MAT 2:17 Aphano khurettikhana epile zaalupiweeyo ti napiyu Yeremiiya:
MAT 2:18 “Khusiileya huula nti wa Rama ya olila na ojikhupanyisa nwulweene; aari Rakeele awaalilelaka aana awe akatthalaka ozurwiwa, mwaasa wa ooshi ofwa.”
MAT 2:19 Paata ya Herooti ofwa, nlayikha la Mbwana khumpuwelela Yuusufu muulottha Misuri,
MAT 2:20 khumuuza yoori: “Olankhe, onthuule mwaana na mamaawe, olawe Ezirayiilu, maana apale aari otakhaaye omuula afwa.”
MAT 2:21 Ye khulankha, khunthuula mwaana na mamaawe, khweetta nti wa Ezirayiilu
MAT 2:22 Ila noosiila yoori Arikileewu mwaana wa Herooti ti asalaniyeeyo ofwalume wa papaawe, khwiiya wa woova weettawo. Nawuuziwa muulottha, khweetta nti wa Kalileya.
MAT 2:23 Khusala eekhala sitati eniitthiwaaye Nazareeti, yoori erettikhane epile zaalupiweeyo pi manapiyu araka: “Ye onteela wiitthiwa Nnazare.”
MAT 3:1 Siikhu zaya epile khupuwa Yaahaya Namoosa, alaleyaka n'yaara ya Yudeya.
MAT 3:2 Ye aari okhuwa araka: “Mwithupwiye, Ofwalume wa pinkuuni ori kharipu.”
MAT 3:3 Maana otu ti otule alupiweeyo ti napiyu Ezaaya yoori: “Huula enkhuwa n'yaara eraka: ‘Mwitthenkeze tarikhi ya Mbwana na mookolele miphiitelo zawe.’”
MAT 3:4 Kuwo za Yaahaya zaattalaniwe ovuzi wa nkamiiya, na aari owalaka nzako wa shapala n'yuunu. Etthu yoojiwa yawe aari mapalaka na asali ya ntthuttu.
MAT 3:5 Atthu a nti wa Yeruzaleemu na a Yudeya na miti zooshi za nkerekhere ya Yorotaani aari onteela ye.
MAT 3:6 Yo aari otukhuru twampi zaya, nawoosiwa ti Yaahaya mmuttho Yorotaani.
MAT 3:7 Wakathi ye awooniyeeyo mafwarizeewu na masatukhi enkeene ataaka aphale aari woosaavo, khuwooza yoori: “Ojama wa evili! Ti paani awuuziyeeni otthira katapu entaaye?
MAT 3:8 Mwithoonyeze khwa khaazi zenu yoori weekhweele mwathupwiya twampi zenu!
MAT 3:9 Khahiyo olupa yoori: ‘Eburahiima ti marehemu papeetthu,’ ila miiyo kiniwuuzani yoori, khwa liwe ntthi Nluku onwahi owaattala aana a Eburahiima.
MAT 3:10 Nshokha lanoliwa latthiiwa nshini wa mitathaari za miitthi. Wakhula muutthi ohiniimaaye mishumo zooshapweya ontta oshijiwa weeseleliwe va moottho.
MAT 3:11 “Miiyo kiniwoosani na maati khwa othoonyeza othupwiya wa twampi zenu. Ila paata ya miiyo onta ntthu ariinaaye owahi zayita miiyo, hatha akinsuhi shitaha yawe wala akina makhaamu oothuula jampali zawe. Ye onttela owoosani na Rooho Ttakatthiifu na moottho.
MAT 3:12 Ye ontana fosholo mmakhono mwawe onteela ophakula tiriku na maveya. Tiriku atthe va sakafu vawe, maveya akhoze va moottho ohinzimaaye.”
MAT 3:13 Aphano Yinsa khulankha Kalileya khuta o Muuttho Yorotaani oteela woosiwa ti Yaahaya.
MAT 3:14 Yaahaya khusala atakha okatthala araka: “Miiyo ti kinhithajiya woosiwa ti weeyo, onikiteela toovi miiyo?”
MAT 3:15 Ila Yinsa khunjipu yoori: “Olikhe etthiipo, yoori erettikhane shariya yooshi.” Yaahaya khukhupalela.
MAT 3:16 Yinsa nawoosiwa, khuvuuwa, nasaapiru pinku khufukuwa, khoona Rooho Ttakatthiifu yiishukhaka nkhama jiwa khummorela.
MAT 3:17 Huula ya olankha pinkuuni khuri: “Otu mwanaka wompheta, na wookituvela channu!”
MAT 4:1 Aphano Yinsa khuthuuliwa ti Rooho Ttakatthiifu khweettaniwa n'yaara, yoori alawe azayiniwe ti sheethwani.
MAT 4:2 Paata ya ofuka siikhu arupayiini nthana na osikhu, khunkhola jala
MAT 4:3 Aphano Sheethwani khumwaattama khumuuza yoori: “Nkhama weeyo o Mwaana wa Nnyizinkhu, orume mawe apo athatuwe eeye phaawu.”
MAT 4:4 Ila Yinsa khunjipu araka: “Yaatikhiwa yoori: ‘Khahiyo phaawu paasi enimwinkhaaye ntthu ohaayi, ila nttakhuzi looshi linlankhaaye nkhanyo wa Nluku.’”
MAT 4:5 Elottelanaka, sheethwani khumweettana sitati ttakatthiifu, khunweza phantte yawiishela olepa ya Nyuupa Yoosifwiwamo,
MAT 4:6 khumuuza yoori: “Nkhama o mwaana wa Nluku, ojeeselele vathi aphale. Maana yaatikhiwa yoori: ‘Ye ontta oruma malayikha awe awiinanele, atthaapo antta wuukholelela na makhono aya yoori ohikwakwanttuwe va liwe.’”
MAT 4:7 Yinsa khunjipu yoori: “Theenya yaatikhiwa yoori: ‘Ohimweeze Mbwana, Nluku awo.’”
MAT 4:8 Sheethwani khunthuula khumweettana va mwaako mmote woolepa venkivene khunthoonyeza ofwalume wooshi wa olumwenku na siifwa yaya.
MAT 4:9 Khumuuza yoori: “Amana okikokhorela khukaaputu kintta owinkha zooshi.”
MAT 4:10 Yinsa khumuuza yoori: “Oleevo, Epiliisi! Maana yaatikhiwa yoori: ‘Omwaaputu Mbwana, Nluku awo, na onrumeyele othuuto paasi.’”
MAT 4:11 Aphano sheethwani khumwaattuwa, khuta malayikha oteela onrumeyela.
MAT 4:12 Wakathi Yinsa asiiliyeevo yoori Yaahaya afukiwa, khurutela Kalileya.
MAT 4:13 Khulaawo Nazareeti khulawa khwiikhala Kafwaranaawu, yaari nshini wa pahari, nti wa Zebulooni na Nafitaali,
MAT 4:14 yoori erettikhane etile yaalupiweeyo ti napiyu Ezaaya yoori:
MAT 4:15 “Nti wa Zebulooni, na nti wa Nafitaali, tarikhi ya pahari, kaapu ya Yorotaani, Kalileya ya amalapo!
MAT 4:16 Atthu aari wiikhalaaye n'yiiza oona nuuru khuluyeene; khwa apale aari wiikhalaaye miti za mwiivuli wa ofwa, amwasikheliwa ti nuuru.”
MAT 4:17 Waaza attaapho Yinsa khwaaza olaleya hapari zawe alupaka yoori: “Mwithupwiye, maana ofwalume wa pinkuuni ori kharipu.”
MAT 4:18 Eettaka weettetta nshini wa Pahari ya Kalileya Yinsa khuwoona attwi awiri: Simawu, anitthiwaaye Pheeturu, na ttwiiye Antere. Yo aari weeselela matthavi aya mpahari, maana yo aari anamajiya.
MAT 4:19 Yinsa khuwooza yoori: “Mwikilotte, miiyo kintta wuurettani o namajiya a atthu.”
MAT 4:20 Nasaapiru yo khulikha matthavi aya khusala anlotta.
MAT 4:21 Eettaka olawa etthiipile khuwoona attwi akina awiri: Tiyaaku, mwaana wa Zepeteewu, na Yaahaya, ttwiiye. Yo aari mmwaatiya na papaaya Zepeteewu, attalelaka matthavi aya, Yinsa khuwaakhuwela.
MAT 4:22 Nasaapiru yo khunlikha papaaya na mwaatiya, khunlotta.
MAT 4:23 Yinsa eettettiye Kalileya yooshi asomisaka mmasinakooka, atafusiraka hapari zooshapweya za ofwalume na avonisaka marati ooshi vakatthi wa atthu
MAT 4:24 Hapari monkoni wa ye khumwazeyela Siiriya yooshi, atthu khusala awaatiisa ooshi apale aarina marati, aari olwaaziwaaye na ohoochiwa ti masheethwani, anajilejile, anasupiyaani, ye noowaavonisa.
MAT 4:25 Atthu enkeene khusala anlottelela olankha Kalileya, Tekapooli, Yeruzaleemu, Yudeya na a nti wa phantte kiina ya Yorotaani.
MAT 5:1 Awooniyeevo atthu apale waatta, Yinsa khuwela va mwaako na khwiikhala. Anakhiyoni awe khususela aphale aariivo,
MAT 5:2 Ye khusala awaasomisa, araka:
MAT 5:3 “Ooparikhiyiwa pi apale eeyiye asikhini nroho, maana ofwalume wa pinkuuni pi waaya.
MAT 5:4 Ooparikhiyiwa pi apale anlilaaye, maana anteela ozurwiwa.
MAT 5:5 Ooparikhiyiwa pi apale oojipushuwisa, maana yo anteela orithi olumwenku.
MAT 5:6 Ooparikhiyiwa pi apale ariina jala na nnyottha la shariya, maana anteela orupala.
MAT 5:7 Ooparikhiyiwa pi apale ariina tthakaraka, maana na-yo anteela wooneliwa tthakaraka.
MAT 5:8 Ooparikhiyiwa pi apale ariina rooho yoopakusiwa, maana yo anteela omoona Nluku.
MAT 5:9 Ooparikhiyiwa pi apale oolevelela, maana anteela wiitthiwa aana a Nluku.
MAT 5:10 Ooparikhiyiwa pi apale anlupatthiwaaye mwaasa wa haakhi, maana Ofwalume wa pinkuuni pi waaya.
MAT 5:11 Ooparikhiyiwa ti mweeyo amana mwittukhaniwaka na olupatthiwa, na wakhula zootakhala empuwaaye khwa mweeyo mwaasa wa miiyo.
MAT 5:12 Mwifurahi na mwitthape, maana tthuvo yenu pinkuuni khuluyeene, maana khwa nanna etthiipo awaalupatthiye manapiyu aviriyeeyo khapula ya mweeyo.
MAT 5:13 “Mweeyo mwa mwiinyu wa olumwenku. Ila amana olikha onyuunya waya, onrutiseleya toovi? Khuniiyana hatha fwayita, woohiiyi wiitthiwa khusala oluwattheliwa pi atthu.
MAT 5:14 Mweeyo mwa nuuru ya olumwenku. Sitati yoojekiwa va mwaako khinvitheya.
MAT 5:15 Khina ankhozaaye khantteya khuttha nyuku. Entthiiwa vahali wawooneyavo yoori ewaamwasikhele atthu apale aniiyaaye nnyupa
MAT 5:16 Nakatalikha nuuru yenu mweeyo yaare vakatthi wa atthu, yoori oone khaazi zenu ansifu Papeenu ariiye pinkuuni.
MAT 5:17 “Mwihuupuwele yoori kateela wiishisa kano za Munsa ama masomi a manapiyu, akaateeliye wiishisa, ila omarisela.
MAT 5:18 Kiniwuuzani khweele yoori: Erivo etthiipi pinku na vathi khina nanna entakhaaye waashikha nenkawu alama yiisheliye ya kano ama nttottonka, mpakha zooshi erettikhane.
MAT 5:19 Wooshi otule anttelaaye okhijilela oruma, hatha nkhama weetta opushuwa, na khuwaanozela akinoko oretta etthiipo, onteela wiitthiwa yoori woopepheya muufwalume wa pinkuuni; ila wakhula otule anshututelaaye na khusomisa oruma waya opu, onteela wiitthiwa yoori nwulweene muufwalume wa pinkuuni.
MAT 5:20 Maana miiyo kiniwuuzani yoori shariya yenu amana ehiziti ya mafwarizeewu na ya anamanozela a kano, hatha vattitthiiru khamwinteela weettamo muufwalume wa pinkuuni.
MAT 5:21 “Mweeyo mwasiila vitthu ooziweeyo amarehemu apapazenu yoori: ‘Mwihuule; wakhula anuulaaye oneekesela ophukiwa.’
MAT 5:22 Ila miiyo kiniwuuzani yoori wakhula aninkatipukhelaaye ttwiiye oneekesela ophukiwa naye, na wakhula aninttukhanaaye ttwiiye ona ya olawaniwa wa afwalume ophukiwa. Na otule animuuzaaye ttwiiye yoori: ‘nlolo!’ oninsuhi weetta vamoottho wa motthooni.
MAT 5:23 Nakatalikha, amana weettelaka winkha zaakha va alitaari khufikhiri yoori ttwiiyo ona etthu varoho na-weyo,
MAT 5:24 olikhe zaakha yawo va alitaari attaapho, olawe wasiilane na ttwiiyo, nawiisha ote operekhe saana zaakha yawo.
MAT 5:25 Amana ntthu atakha wuulawana onyuupa wa anamaphuka, osiilanane saana ntthu aya oto ntarikhi mweettaka olawa, maana noohijuwi saana weeyo onttela winkheleliwa wa namaphuka, namaphuka awinkhelele wa namweekesela kalapooso na ye aweeselele nkalapooso.
MAT 5:26 Miiyo kiniwuuza khweele yoori khunlaamo ohiripheeni nzurukhu otthuupo onttelaaye wuuziwa.
MAT 5:27 “Mweeyo mwasiila elupiwaka yoori: ‘Ohiraruwe.’
MAT 5:28 Ila miiyo kiniwuuzani khweele yoori wakhula animweekesaaye muukha na ontakha varoho vawe, anrarusha.
MAT 5:29 Nkhama liisho lawo la phantte ya nkhono nlume lintta wuukosisa, olazemo weesele oje. Afwataali wuupwetheya phantte yawo moote ya mwiili awo zayita mwiili awo wooshi weeseleliwa motthooni.
MAT 5:30 Nkhama nkhono awo nlume ontta wuukosisa, oshije weesele. Afwataali wuupwetheya phantte yawo moote ya mwiili awo woohiiyi mwiili awo wooshi weeseleliwa motthooni.
MAT 5:31 “Yaatikhiwa theenya yoori: ‘Otule animwaashaaye muukhawe ona ya omwinkha talakha.’
MAT 5:32 Ila miiyo kiniwuuzani yoori wooshi otule animwaashaaye muukhaawe, ehiriwaka etta oraruwa, oniiyana paathuli ya onruma oraruwa, na otule aninralaaye muukha aya otule wa waashiwa ontta onrarusha.
MAT 5:33 “Mweeyo mwasiila etthu ooziweeyo amarehemu apapazenu yoori: ‘Mwihilaphe woovonyeyavo, ila mweettettise olapha mwirettiyeeyo omaasho wa Mbwana.’
MAT 5:34 Ila miiyo kiniwuuzani yoori: mwihilaphe hatha vattitthiiru wala khwa vitthu za pinkuuni maana khukulu ya Nluku;
MAT 5:35 wala khwa vitthu za vathi maana phi anvumulisaavo moolu awe, wala khwa Yeruzaleemu maana sitati ya Mfwalume nwulu.
MAT 5:36 Wala ohilaphele khwa eeshwa yawo maana weeyo khunwahi olakaza wala oriipisa hatha nyuuli yawo moote.
MAT 5:37 Entosheleza olupa yoori ‘ayo’ amana yiiya ‘ayo’, na ‘wala’ amana yiiya ‘wala’; noozitisa apho enlankha wa Sheethwani.
MAT 5:38 “Mweeyo mwasiila etile elupiwe yoori: ‘Liisho khwa liisho na liino khwa liino.’
MAT 5:39 Ila miiyo kiniwuuzani yoori: mwihikhanyarele ojiripha khwa atthu apale anuurettelaanini zootakhala. Amana ntthu oopwakula nlaku limote onzukulisele ntthi likina.
MAT 5:40 Amana ntthu atakha wuulawana wa anamaphuka na wuuvula kameza yawo, omwinkhe theenya ajapi yawo.
MAT 5:41 Amana ntthu ookhanyarela othuula lipwattha khwa kiyasi ya phiima alufu moote, othuule phiima alufu piiri.
MAT 5:42 “Amana ntthu oovekela etthu, omwinkhe; ohinnoze enyokonyoko otule anuuvekelaaye omwiipaasha.
MAT 5:43 Mweeyo mwasiila olupiwa yoori: ‘Omphete namwaattamanani awo, omwiine atuwi awo.’
MAT 5:44 Ila miiyo kiniwuuzani yoori, mwiwaaphete maatuwi enu na mwiwaalompele apale anuulupatthanini,
MAT 5:45 yoori mweeyo mwiretteye wiiya aana a Papeenu ariiye pinkuuni. Maana ye oniwaatthamushela njuwa apale anrettaaye zooshapweya na apale anrettaaye zootakhala. Na oniwenkha vuula anashariya na apale ohitakhi shariya.
MAT 5:46 Amana mwiwaaphetaka apale anuuphetaanini paasi, tthuvo-ni mwiineekeselaaye wiiyana? Anamariphisa lumpuru nayo khanretta etthiipo?
MAT 5:47 Na amana mwiiwaachelisaka maswaahipu paasi, mwinrettani yooziti? Hatha na amalapo anretta etthiipo.
MAT 5:48 Nakataalikha mwiiye atthu khaamili, nkhama etthiipo eyiyeeyo khaamili Papeenu wa pinkuuni.
MAT 6:1 “Mwiiyane phoole na oretta khaazi zenu za shariya vahali aniiyavo atthu akina yoori mwisifwiwe pi yo. Amana mwiretta toowo, khamwiniiyana hatha tthuvo ya Papeenu wa pinkuuni.
MAT 6:2 “Nakataalikha, amana mwinkha zimola mwihithuule nlope khusala mwilaleya, nkhama anrettaazo manaafikhi mmasinakooka na mmaliinya, atakhaka yoori asifwiwe pi akina aya. Miiyo kiniwuuza khweele yoori yo apokhera tthuvo yaya.
MAT 6:3 Ila amana weeyo winkha zimola, nkhono awo nkha ohijuwe etthu orettiyeewo nkhono nlume awo,
MAT 6:4 yoori zimola yawo yiiye siiri. Toowo, Papaawo otule anoonaaye epile enrettiwaaye sirini, ontta wuutthuva.
MAT 6:5 “Na amana mwilompaka, mwihiiye nkhama manaafikhi. Yo owaatuvela weemela khusala alompa nsinakooka, mmatarikhi, atakhaka yoori ooniwe pi akinoko aya. Miiyo kiniwuuzani khweele yoori yo apokhera tthuvo yaya.
MAT 6:6 Ila amana weeyo olompaka, weette okatthi wawo ofuke nlako awo, onvekele Papaawo ahinooneyaaye. Aphano, othuuto ontta wuutthuva.
MAT 6:7 Na amana olompaka, khahiyo orutela mattakhuzi mamoteru ooheleyi swaafu zawaatta, nkhama anrettaazo amalapo. Yo anaakhipwela yoori mwaasa wa waattisa ottakhula Nluku ti aniwaasiilaavo.
MAT 6:8 Mwihiiye nkhama atthaapo, maana khapula mweeyo mwihinaveke Papeenu onretta ajuwe etthu mwinihithajiyaaye.
MAT 6:9 Nakataalikha, mweeyo amana mwilompaka mwisala mwiri toono: ‘Papeetthu oriiye pinkuuni, littitthimisiwe nzina lawo loottakatthifu,
MAT 6:10 wiishushe ofwalume awo, mattakhelo awo arettikhane vathi apha nkhama etthiipo enrettikhanaazo otulu!
MAT 6:11 Oninkhe wakhula siikhu etthu-yoojiwa ninihithajiyaaye.
MAT 6:12 Oniswaamihi koosa zeetthu nkhama etthiipi na-fweyo nininswaamihaaye wakhula otule annikosaaye,
MAT 6:13 na ohinilikhelele nizayiniwaka, ila nuusuru khwa ntakhali, [maana ofwalume, owahi, na siifwa zooshi pi zawo, mileele. Amiina.]’
MAT 6:14 Maana amana mwiwaaswaamihi anaatamu koosa zaya, Papeenu wa pinkuuni naye ontta wuuswaamihini,
MAT 6:15 ila amana mwihiswaamihanaka, Papeenu wa pinkuuni naye khanuuswaamihini koosa zenu.
MAT 6:16 “Amana ofuka, ohithoonyeze wuuso wa huzuni nkhama anrettaazo manaafikhi, yo antta ozukulisa wuuso aya yoori akina aya apatthe ojuwa yoori afuka. Miiyo kiniwuuzani khweele yoori nooretta toowo apokhera tthuvo yaya.
MAT 6:17 Ila weeyo amana ofuka, osala woosa wuuso awo, na khushamula nyuuli zawo,
MAT 6:18 yoori akinoko ahijuwe yoori wafuka, ila Papeenu, anoonaaye vitthu za siiri, ye ontta ojuwa yoori wafuka na othuuto ontta wuutthuva.
MAT 6:19 “Ohikusanye maali vathi apha, oriivo oshuwa, na kuuthu enwahaaye oharipu, na ariivo manantarawu oophenya khwiiya.
MAT 6:20 Ila okusanye maali pinkuuni, ottuukho oshuwa na kuuthu ehinwahaawo oharipu wala nantarawu ahimphenyelaawo khwiiya.
MAT 6:21 Maana attaapho eniiyaavo maali zawo, rooho yawo nayo eniiya attaapho.
MAT 6:22 “Maasho khantteya ya mwiili. Amana maasho awo eeya ooshwapweya, mwiili awo oniiyana nuuru;
MAT 6:23 ila amana maasho awo eeya oohishapweyi, mwiili awo wooshi oniiya n'yiiza. Nakataalikha, amana nuuru oriinaaye ezukuluwa yiiya yiiza, yiiza yaya eto eniiya khuluyeene!
MAT 6:24 “Khaavo ntthu anwahaaye owaarumeyela a mbwana awiri, mwaasa yoori ontta omwiiphiirisa mmote, antuvelise otu nkina; ama oniiya wa waamineya khwa otu mmote, antarawu otu nkina. Khinwaheya onrumeyela Nluku na nzurukhu.
MAT 6:25 “Tiito, kiniwuuzanini yoori: Mwihiiye woovelavelela ohaayi enu, khwa etthu-yoojiwa ama yoonywiwa; wala mwiili enu monkoni wa etthu ya owala. Ohaayi enu waziti etthu-yoojiwa. Na mwiili enu waziti kuwo.
MAT 6:26 Mwiwoone anyannyi otulu: Khanzala, khanuurula wala khana sakafu; ila Papeenu wa pinkuuni oniwaajisa. Nakataalikha mweeyo mwinaaye fwayita zayita anyannyi.
MAT 6:27 Paani wa mweeyo anwahaaye weekezela mansha awe hatha nkhama eetta oshukulikhela?
MAT 6:28 Khi mwinvelavelelani kuwo? Moone nanna enwulaazo miitthi za ntthuttu na maluwa aya: yo khazinkhola khaazi, wala khazinsona.
MAT 6:29 Ila wekhweele miiyo kiniwuuzani yoori, Seleyimaana na oshapweya wawe khawaleeni kuwo zooshapweya nkhama maluwa apa.
MAT 6:30 Moone, Nluku onwalisa nyaani za ntthuttu leelo ziniiyaavo meesho khulukuziwa, onuuwalisani mweeyo channu atthu oopushuwa amini!
MAT 6:31 Nakataalikha mwihishukulikhe, mwiraka: ‘Ninja niini?’ Ama ‘ninnywa niini?’ Ama ‘ninwala niini?’
MAT 6:32 Maana amalapo pi anshukulikhelaaye vitthu nkhama epo; ila Papeenu ariiye pinkuuni onjuwa yoori enuuhithajiyani epo zaya.
MAT 6:33 Apho, mweekese khapula Ofwalume wa Nluku na shariya yaya, zooshi epo mwintta winkhiwa.
MAT 6:34 Nakataalikha mwihishukulikhele siikhu ya meesho, maana meesho entana tafwawuthi zaya. Wakhula siikhu eniiyana otakhala waya.
MAT 7:1 “Mwihimphuke nzeenu yoori mwihiphukiwe.
MAT 7:2 Maana khwa khiima ethiito omphukanaaye, na-weyo omphukiwa khwa khiima ethiito; mphimo otthuupo onrumeyelaaye owaaphimelanaka azaawo, na-yo anuuphimelana otthuupo.
MAT 7:3 “Mwaasa aya niini woonaka etutu eriiye mmaasho wa ttwiiyo, ila khuhooni lipikhi liriiye mmaasho mwawo?
MAT 7:4 Nanna-ni onimuuzaaye ttwiiyo yoori: ‘Kintakha kuulaze etutu eriiye mmaasho mwawo,’ khupe weeyo orina lipikhi mmaasho mwawo?
MAT 7:5 Naafikhi! Olazemo khapula lipikhi liriiye mmaasho mwawo, aphano ontta woona saaneene khuwahi olazamo etutu eriiye mmaasho wa ttwiiyo.
MAT 7:6 “Mwihiwenkhe vitthu ttakatthiifu anapwa, antta wuuzukuluwelani na oolumeni, wala mwiheeselele kuluwe mawe ootafikhana mwirettaru toowo entta oluwatthela.
MAT 7:7 “Mwiveke, mwintta winkhiwa; mweekese, mwintta opattha; mwipiye nlako, mwintta ofukuleliwa.
MAT 7:8 Maana wakhula anvekaaye oninkhiwa, aneekesaaye ompattha, ampiyaaye nlako ontta ofukuleliwa.
MAT 7:9 “Paapa-ni mmote wa mweeyo, anraaye mwanawe anvekeliye phaawu khumwinkha liwe?
MAT 7:10 Ama anvekeliye swi khumwinkha nyookha?
MAT 7:11 Mweeyo mwa atthu ootakhala rooho, mwinjuwa owenkha vitthu zooshapweya aaneenu. Papeenu ariiye pinkuuni, atepa owenkha vitthu zooshapweya apale aninvekelaaye.
MAT 7:12 Wakhula etile enuutuvelaanini oretteliwa, na-mweyo mwiwaarettele etthiipo azeenu, maana kano na manapiyu anlupa etthiipo.
MAT 7:13 “Mwivire nlako woophunyeya, maana nlako nwulweene na tarikhi yoomwazeya eninlokoza ntthu motthooni, enkeene anvira nlako otthuupo.
MAT 7:14 Tarikhi na nlako oninkhaaye ohaayi wa mileele nttithiiru, na atthu vattitthiiru ti anttelaaye oviravo.
MAT 7:15 “Phoole na manapiyu oojipanka, yo anuuteelani mweeyo awaliye shapala ya pwittipwitthi, ila nkatthi ari miiji zooluma.
MAT 7:16 Khwa mishumo zaya mwinteela owaajuwa. Khunshumeya wuuva mmiiwa, wala mmuuyu khinshumiwamo ekhuuwa.
MAT 7:17 Khwa etthiipo wakhula muutthi wooshapweya oniima mishumo zooshapweya, na muutthi wootakhala oniima mishumo zootakhala.
MAT 7:18 Khinretteya muutthi wooshapweya wiima mishumo zootakhala, wala muutthi wootakhala wiima mishumo zooshapweya.
MAT 7:19 Wakhula muutthi ohiniimaaye mishumo zooshapweya ontta oshijiwa khweeseliwa va moottho.
MAT 7:20 Khwa etthiipo mwinteela owaajuwa khwa mishumo zaya!
MAT 7:21 “Khahiyo ooshi apale anikiitthaaye yoori: ‘Mbwana, Mbwana,’ anttelaaye weettamo muufwalume wa pinkuuni, ila otule anrettaaye matakhelo a Paapa ariiye pinkuuni.
MAT 7:22 Amana efiya siikhu yaya eto enkeene, anlawa akuuze yoori: ‘Mbwana, Mbwana! Fweeyo nahupiri khwa nzina lawo, neekara masheethwani khwa nzina lawo, na khwa nzina lawo naretta minjuza.’
MAT 7:23 Aphano miiyo kilupe saaneene yoori: ‘Akuujuweenini. Mwikisuse, anamaretta zootakhala.’
MAT 7:24 “Wakhula otule ansiilaaye nttakhuzi laka na khushututela onlattisaniwa ntthu wa akhili ajekiye nyuupa yawe khuthipa khuttha vanchina la mawe;
MAT 7:25 khunya vuula, khwiitaaza nyuuttho khuvuma pheevo khusakhinya nyuupa etile, khuhikwi, maana nchina laya laari va mawe.
MAT 7:26 Wakhula otule ansiilaaye nttakhuzi laka khuhishututeli onlattisaniwa ntthu woololo ajekiye nyuupa yawe va nshaka;
MAT 7:27 khunya vuula, khwiitaaza nyuuttho, khuvuma pheevo khupiya nyuupa etile, khupwaluwa, khupwecheya”.
MAT 7:28 Wakathi Yinsa eeshiyeevo ottakhula, khuntti epile khwiiya zootikinisiwa khwa masomi awe,
MAT 7:29 maana aari osomisa nkhama ntthu ariinaaye ofwalume, woohiiyi nkhama anamanozela a kano.
MAT 8:1 Wakathi eeshukhiyeevo va mwaako, khuntti khuluyeene yeetta onlotta.
MAT 8:2 Nasaapiru khuta namaaharaja mmote khumwaattama, khumwaaputu akokhoriye khulupa yoori: “Mbwana, onwahi okitwaharesha!”
MAT 8:3 Yinsa khookola nkhono awe, khunsapa khuri: “Katakha, ti otwaharesheye!” Nasaapiru ye khwiiya wootwaharesheya khwa maaharaja.
MAT 8:4 Aphano Yinsa khumuuza yoori: “Vitthu epi ohinthatelele hatha ntthu. Ila olawe, wajithoonyeze wa namalokozela a tiini na olaze zaakha etile Munsa alupiyeeyo yoori yiiye oshaahiti.”
MAT 8:5 Wakathi Yinsa afiiyeevo sitati ya Kafwaranaawu, eetta oteeliwa ti nttunkhulu wa anajanka, anvekelaka yoori amwaawuni.
MAT 8:6 Khumuuza yoori: “Mbwana, karumeya aka ori onti, onaaye supiyaani, ontta ohoocheya venkivene.”
MAT 8:7 Yinsa khumuuza yoori: “Miiyo kinlawa kanvonise.”
MAT 8:8 Nttunkhulu wa anajanka otule khunjipu yoori: “Mbwana, miiyo akinsuhi wuupokherela vaje vaka. Ila olupe nttakhuzi limote paasi, karumeya aka ontta ovona.
MAT 8:9 Maana na-miyo ki ntthu kiriiye vathi wa ofwalume na ki nlokozi wa anajanka. Kinimuuza mmote yoori: ‘Olawe,’ khulawa; khumuuza nkina yoori: ‘Ote,’ ye khuta. Kinimuuza karumeya aka yoori: ‘Orette khata,’ ye khuretta.”
MAT 8:10 Yinsa noosiila epo zaya, khushanka, khuwooza apale aari onlottaaye yoori: “Kiniwuuzani khweele: Akinsikaneeni Ezirayiilu ntthu ariina amini nkhama eti.
MAT 8:11 Miiyo kiniwuuzani, atthu enkeene a khipula na malawa-juwa, anttela wiikhala va meeza na Eburahiima, Esiyaakha, Yaakhumpa muufwalume wa pinkuuni.
MAT 8:12 Ila apale aari weettelaaye orithi ofwalume wa Nluku anttela weeseleliwa oje, n'yiiza nhali onttelaaye wiiyamo olila na oluma meeno.”
MAT 8:13 Yinsa khumuuza nttunkhulu wa anajanka otule yoori: “Olawe owawo, entta orettikhana nkhama etthiipo okhupaliyeezo.” Wakathi otthuupule karumeya awe khwiiya woovona.
MAT 8:14 Yinsa khweetta owawe Pheeturu ottuukho khumoona nkhwewe Pheeturu arapaleliye ari nlwele hooma.
MAT 8:15 Yinsa khunsapa nkhono awe, hooma etile khumwiisha. Khulankha khusala anrumeyela.
MAT 8:16 Paata ya otupweela njuwa, khutiiseliwa anamasheethwani awaatta, ye khusala eekara masheethwani khwa nttakhuzi lawe khuwaavonisa alwele ooshi.
MAT 8:17 Khwa etthiipo khurettikhana epile zaalupiweeyo ti napiyu Ezaaya yoori: “Ye athuula marati etthu na apwechera moolwele etthu.”
MAT 8:18 Yinsa noowoona atthu awaatta anzukuleliye, khuwaaruma anakhiyoni awe olokhela kaapu ya ntthatta.
MAT 8:19 Aphano namanozela wa kano mmote khumwaattama khumuuza yoori: “Mwaaliimu, kintta wuulotta wakhula vahali oneettaavo.”
MAT 8:20 Yinsa khunjipu araka: “Ananthala anaaye maphotto aya anyannyi anaaye vijaaro zaya, ila Mwaana wa Pinaatamu khana vahali woovumulisavo eeshwa yawe.”
MAT 8:21 Nakhiyoni awe mmote khuri: “Mbwana, waaze okilikha kilawe kanzikhe paapa.”
MAT 8:22 Yinsa khujipu araka: “Okilotte, owaalikhe ananfwa awaazikhe ananfwa aya eenyewe.”
MAT 8:23 Yinsa apakhiriyeevo mmwaatiya anakhiyoni awe khunlotta.
MAT 8:24 Nasaapiru, pheevo yawoopisa khusala evuma mpahari, mwaatiya khusala ozamisiwa ti mawipi, Yinsa ettaka olala.
MAT 8:25 Anakhiyoni awe khunsusela khusala anlansa, ankhuwelaka araka: “Mbwana, onuusuru nasaleela ofwa!”
MAT 8:26 Ye khuwoozela yoori: “Mwinoovani? Atthu oopushuwa amini!” Ye khulankha khushowera pheevo etile na pahari, zooshi khunyamala.
MAT 8:27 Ooshi khusala ashankiye na khulupa yoori: “Otu aya paani hatha anrumaaye pheevo na pahari khunshututela?”
MAT 8:28 Wakathi afiiyeevo phantte kiina, ya Jerazeenu, khunteela anamasheethwani awiri, alankhiyeeyo ovilalo. Yo aari oowali, khina aari oviraaye tarikhi ya etile.
MAT 8:29 Aphano, yo khusala anyakula araka: “Onnitakhelani fweeyo, Mwaana wa Nluku? Wata okhuno oteela onoopopisa, ohinafiye wakathi aya?”
MAT 8:30 Kharipu ya aphale vaya laarivo liphanko la kuluwe.
MAT 8:31 Aphano masheethwani apale khunvekela Yinsa yoori: “Nkhama onniikara, oniikarile nliphanko la kuluwe.”
MAT 8:32 Yinsa khulupa yoori: “Apho mwilawe!” Masheethwani apale khulawa khweetta nkuluwe, liphanko looshi khwiishukela va ntthatta khuttuluwa khufwa.
MAT 8:33 Atthu apale aari oshukaaye kuluwe epile khutthira khulawa mmuti, khulupa zooshi mpakha epile zaarettikhaniyeeyo khwa anamasheethwani apale awiri.
MAT 8:34 Atthu ooshi a mmuti mphule khusala alawa okutthanana Yinsa, nonsikana, khunvekela amuuzaka yoori aleemo mmuti mwaya.
MAT 9:1 Yinsa noopakhira mmwaatiya, khulokha ntthatta khweetta sitati ya owawe.
MAT 9:2 Khutiisiwa nasupiyaani attattikheliwe va nrepa. Wakathi ooniyeevo amini ya atthu apale antiisiyeeyo, khumuuza nasupiyaani otule yoori: “Ominyale, mwanaka! Twampi zawo zaswaamihiwa.”
MAT 9:3 Noolupa toowo anamanozela a kano khwaaza waapa araka: “Ntthu otu ontta okufuru!”
MAT 9:4 Yinsa noojuwa etthu aari wuupuwelaaye yo, khuwooza yoori: “Mwaasa wa niini mweeyo muupuwelaka nroho mwenu vitthu zootakhala?
MAT 9:5 Apho yookhweya ti tiivi? Olupa yoori: ‘Waswaamihiwa twampi zawo,’ ama olupa yoori: ‘Olankhe weettette?’
MAT 9:6 Mwijuwe yoori Mwaana wa Pinaatamu onaaye ruhusa ya oswaamihi twampi vathi apha” khumuuza nasupiyaani otule yoori: “Olankhe, othuule nrepa lawo olawe owawo.”
MAT 9:7 Khulankha khusala alawa owawe.
MAT 9:8 Paata ya atthu woona vitthu epile khuwaapattha woova, khunsifu Nluku, awenkhiyeeyo anaatamu ofwalume nkhama opo.
MAT 9:9 Elottelanaka Yinsa khulaawo okhule waya, khumoona mwinyi mmote aniitthiwaaye Matewuzhu eekhaliye ariphisaka lumpuru, khumuuza yoori: “Okilotte!” Ye khulankha khunlotta.
MAT 9:10 Yinsa eekhaliyeevo va meeza owawe Matewuzhu, anamariphisa lumpuru enkeene na anatwampi aatiiye khwiikhala attaapho vamote na anakhiyoni awe.
MAT 9:11 Mafwarizeewu nawoona toole khuwoozela anakhiyoni awe araka: “Mwaasa wa niini mwaaliimu enu ajaka na anamariphisa lumpuru na anatwampi?”
MAT 9:12 Yinsa noosiila, khulupa yoori: “Akumi khaninhithajiya tothoro, ila alwele.
MAT 9:13 Mwilawe mwanozeliwe maana a nttakhuzi linlupaaye yoori: ‘Kintakha tthakaraka, khahiyo twaha.’ Maana miiyo akawaateeliye anashariya, kawaateeliye anatwampi.
MAT 9:14 Aphano khuta anakhiyoni a Yaahaya omuuzela yoori: “Fweeyo na mafwarizeewu ninfuka, khi anakhiyoni awo ahisala afuka mwaasa wa niini?”
MAT 9:15 Yinsa khujipu yoori: “Enretteya toovi ofuka anamalaleyiwa harusi, namaposa ari attaapho? Zinlawa zafiye siikhu anttelaaye othuuliwa mposi, na siikhu zaya etthiipo anlawa afuke.
MAT 9:16 “Khina antthaaye yaapa ya tarapu pheeya kuwo ya raku, maana entta ofutthela kuwo etile evaruwe.
MAT 9:17 Wala khinthuliwa viinyu pheeya khutthiiwa nttompwiyo ya shapala ya raku, nooretta toowo entta ophutuwa, viinyu yiittikhe, ttompwiyo yaya eharipweye. Ila viinyu pheeya entthiwa nttompwiyo pheeya, na toowo zoopiiri zintta opweheya.”
MAT 9:18 Ettaka ottakhula etthiipile, khutavo nttunkhulu wa tiini, khunkokhorela na khumuuza yoori: “Mwanaka wankha afwa nasaapi ethiiti; nlawe wanttheele nkhono ontta osisimuwa.”
MAT 9:19 Yinsa khulankha khusala anlotta na anakhiyoni awe.
MAT 9:20 Attaaphale, aarivo muukha mmote aarina nyaakha khumi na miwiri emwiittikhaka taamu, khuta onyoko wa Yinsa khusapa ajapi yawe.
MAT 9:21 Maana ye eettiye ojilakelela yoori: “Kisaparu ajapi yawe paasi, kintta ovona.”
MAT 9:22 Azukuluwiyeevo Yinsa khumoona khumuuza yoori: “Ofurahi, mwanaka wankha; amini yawo yoovonisa. Wakathi otthuupule muukha otule khwiiya woovona”.
MAT 9:23 Afiiyeevo owawe nttunkhulu wa tiini khuwaasiila atthu eepaka liipo la miifwa na enkeene ari ootapanyeya,
MAT 9:24 Yinsa khuwooza yoori: “Mwisaruwe! Otu khafweeni, ontta olala.” Ooshi khusala antheya.
MAT 9:25 Paata ya atthu apale osusa, ye khuvira khunkholela nkhono, khunlansa.
MAT 9:26 Hapari epile khumwazeyela nti opule wooshi.
MAT 9:27 Noolaavo aphale vaya, ananhooni awiri khusala anlotta akhuwaka araka: “Mwaana wa Daawuuda, noonele huruma!”
MAT 9:28 Yinsa noofiya owawe, ananhooni apale khumwaattama, ye khuwoozela yoori: “Mweeyo mwinkhupali yoori miiyo kinaaye owahi wa oretta epo zaya?” Yo khujipu yoori: “Ayo, Mbwana!”
MAT 9:29 Yinsa khuwaasapa maasho aya araka: “Erettikhane khwa matakhelo amini yenu!”
MAT 9:30 Maasho aya khwiiya oovona. Aphano Yinsa khuwooza na kuvu yoori: “Phoole ahiiyevo anttelaaye ojuwa epi.”
MAT 9:31 Yo khulawa, khumwaza hapari zawe epile nti opule wooshi.
MAT 9:32 Paata ya olaavo aphale, namasheethwani ahaari ottakhulaaye khutiiseliwa Yinsa.
MAT 9:33 Noomwiikara sheethwani otule, ye khwaaza ottakhula. Khuntti etile khwiiya yooshanka na khuri: “Khinarettikhane vitthu nkhama epi Ezirayiilu.
MAT 9:34 Ila mafwarizeewu aari olupa yoori: “Oniikara masheethwani khwa owahi wa mfwalume wa masheethwani.”
MAT 9:35 Yinsa aari weettetta sitati zooshi na mmwanttiwa. Ye aari osomisa mmasinakooka, na olaleya hapari monkoni wa ofwalume wa Nluku, na ovonisa wakhula nanna ya marati na moolwele mawulweene a atthu.
MAT 9:36 Paata ya woona khuntti zawaatta, khoonela huruma, maana zaari zoovelavela na zawanswiwa, nkhama pwittipwitthi zoohiina nshuki.
MAT 9:37 Aphano khuwooza anakhiyoni awe yoori: “Wuurula nwulweene, ila anakhaazi vattitthiiru.
MAT 9:38 Apho, mwinvekele Mweenyewe wuurula awaaperekhe anakhaazi a wuurula.”
MAT 10:1 Khuwaakhuwela anakhiyoni awe apale khumi na awiri, khuwenkha owahi wa wiikara masheethwani, na ovonisa moolwele na marati ooshi.
MAT 10:2 Apa mazina a anakhiyoni khumi na awiri: Wamwanzo, Simawu, anjuwaniwaaye nzina la Pheeturu, na ttwiiye Antere; Tiyaaku, mwaana wa Zepeteewu, na Yaahaya ttwiiye;
MAT 10:3 Filiipe na Paturumeewu; Tome na Matewuzhu, namariphisa lumpuru; Tiyaaku mwaana wa Alufeeyu, na Tadeewu;
MAT 10:4 Simawu Zelooti, na Yuuda Eshikariyoote, othuuto anzinkuliyeeyo.
MAT 10:5 Yinsa khuwaaruma apale khumi na awiri na khuwooza yoori: “Mwiheette wa amalapo, wala mwiheette hatha sitati moote ya a Samariiya.
MAT 10:6 Ila khapula mweettele pwittipwitthi zawaashikha za Ezirayiilu.
MAT 10:7 Wakhula vahali mwineettaavo, mwitafusiri hapari epi mwiraka: ‘Ofwalume wa pinkuuni ori kharipu!’
MAT 10:8 Mwiwaavonisaka anamarati, mwiwaasisimulaka ananfwa, mwiwaatwahareshaka anamaharaja, mwiikare masheethwani. Mweeyo mwapokhera mahala na mwina yawinkha mahala.
MAT 10:9 Mwihithuule hatha thahapu, wala feeta, wala khoopiri mmwizako mwenu;
MAT 10:10 Mwihithuule hatha kuwo kiina, wala jampali, wala pakhora, maana nakhaazi eninsuhi wiiyana etthu yoojiwa yawe.
MAT 10:11 Na wakhula sitati ama mmwanttiwa, mwimweekese ntthu woojishitahi, mwiikhale owawe othuuto mpakha malawelo enu.
MAT 10:12 Amana mwivira nnyupa, mwichelise.
MAT 10:13 Nkhama atthu a nyuupa etile eeya oosuhi, heeri yenu mweeyo yiiye vamote na-yo; amana ahisuhi, heeri yenu ti yuuruteleni.
MAT 10:14 Amana ntthu ahuupokherelini na khuhitakhi osiila mattakhuzi enu, mwitathe lifufu la mmoolu mwenu mwileemo nnyupa mwaya mphule ama nsitati mwaya mphule.
MAT 10:15 Miiyo kiniwuuzani khweele yoori, siikhu ya ophukiwa enttela wiiyavo tthakaraka khwa Sotooma na Komoora zayita sitati ya eto.
MAT 10:16 “Miiyo kinuurumani mweeyo nkhama pwittipwitthi vakatthi wa miiji; nakataalikha mwiiye alavilavi nkhama nyookha na oohiina zootakhala nkhama jiwa.
MAT 10:17 Mwiiyane phoole, maana atthu anlawa oottheni nnyupa woophukaniwamo na wuujaphani mmasinakooka mwaya.
MAT 10:18 Mwaasa wa miiyo, mwinlawa mwalawaniwe vakatthi wa misatoro na afwalume, yoori wiiye oshaahiti anttelaaye orumeyela, yo na amalapo monkoni wa hapari zaka.
MAT 10:19 Ila amana oofukelani, mwihishanke etthu yoolupa, ama yooretta. Wakathi aya opo, Nluku onttela owinkhani mattakhuzi olupa,
MAT 10:20 maana khahiyo mweeyo mwinttelaaye ottakhula, ila Rooho ya Papeenu ti enttelaaye ottakhula khwa mweeyo.
MAT 10:21 “Ttwi mmote onlawa anleve ttwiiye yoori ooliwe, na paapa onleva mwanawe; aana anlawa awaazukuluwele apapa zaya na awoole.
MAT 10:22 Atthu ooshi anttela owiinani mwaasa wa miiyo, ila otule anttelaaye ovilela mpakha mwiisho ontta wuusurukha.
MAT 10:23 Amana mwifiya nsitati khulupatthiwa, mwitthirele sitati kiina. Weekhweele miiyo kiniwuuzani yoori khamwinteela wiisha ozukulela Ezirayiilu yooshi Mwaana wa Pinaatamu ahiteeni.
MAT 10:24 “Nakhiyoni khaninziti mwaaliimu awe, wala karumeya khaninziti mbwana awe.
MAT 10:25 Nakhiyoni ona yoofurahi amana anfiyela mwaaliimu awe, na karumeya amana anfiyela mbwana awe. Moone, amana mweenyewe nyuupa attukhaniwa khutthajiwa Belezibuuli, khi ajamaaze khatepeeni!
MAT 10:26 “Nakataalikha mwihiwoove apo aya. Khayiivo yoottiyeleliwa ehinteelaaye othoonyeziwa wala yoovithiwa ehinteelaaye ojuwiwa.
MAT 10:27 Eti kiniwuuzaani n'yiiza mwilupe nthana. Na etile mwisiiliyeeyo sirini mwaamuuze vatulu wa nyuupa.
MAT 10:28 Mwihimoove otule anuulaaye mwiili, ahina owahi wa wuula nafusi. Khapula mwimoove otule anwahaaye otapanya mwiili na nafusi khweeselela motthooni.
MAT 10:29 Anyannyi awiri anuuzanyiwa nzurukhu mmote, ila khina mmote ankwelaaye vathi Papeenu ahitakheeni.
MAT 10:30 Hatha nyuuli za mmwishwa mwenu zooshi pi za waalakiwa.
MAT 10:31 Nakataalikha mwihoove! Mweeyo mwinaaye fwayita zayita anyannyi.
MAT 10:32 “Wakhula otule antukhurwaaye yoori ti waka vakatthi wa atthu, na miiyo kintukhuru khwa ye, vakatthi wa Paapa ariiye pinkuuni.
MAT 10:33 Ila otule anikikatthalaaye vakatthi wa atthu, na miiyo kinttela onkatthala vakatthi wa Paapa ariiye pinkuuni.
MAT 10:34 “Mwihaakanyere yoori miiyo katiisa heeri voolumwenku; akitiseeni heeri, katiisa phanka.
MAT 10:35 Miiyo kata yoori oomane mwaana na papaawe, mwaana wankha na mamaawe, namaraliwa na nkhwewe.
MAT 10:36 Maatuwi khaamili a ntthu anlankha vakatthi wa ajamaaze.
MAT 10:37 Otule animphetaaye mamaawe ama papaawe zayita miiyo khansuhi wiiya namalottela aka; otule animphetaaye mwanawe zayita miiyo, khansuhi wiiya namalottela aka.
MAT 10:38 Otule ahinvikelaaye nsalapa awe akilotta, khansuhi wiiya namalottela aka.
MAT 10:39 Otule aneekesaaye ohaayi awe ontta omwaashikha, na otule onimwaashikhaaye ohaayi awe mwaasa wa miiyo ontta opattha.
MAT 10:40 “Wakhula otule anuupwekherelaanini akipwekherela miiyo, na otule anikipwekherelaaye ampwekherela otule akirumiyeeyo.
MAT 10:41 Otule animpwekherelaaye napiyu mwaasa wa ye wiiya napiyu, ompwekhera tthuvo ya napiyu; otule animpwekherelaaye nashariya mwaasa wa ye wiiya nashariya, ompwekhera tthuvo ya nashariya.
MAT 10:42 Na wakhula otule animwinkhaaye nsimaana hatha nkhama koopho ya maati oozizima, mwaasa wa ye wiiya nakhiyoni aka, kiniwuuza khweele yoori oto aya onlawa apwekhere tthuvo yawe.”
MAT 11:1 Paata ya wiisha owaanozela anakhiyoni awe khumi na awiri, Yinsa khusala alawa osomisa na otafusiri sitati za Kalileya.
MAT 11:2 Yaahaya, paata ya osiila ari nkalapooso vitthu aari orettaazo Al-Masiihu, khuwaaruma anakhiyoni awe olawa omuuzela yoori:
MAT 11:3 “Ti weeyo otule aari weettelaaye ota, ama nimweekesele nkina?”
MAT 11:4 Yinsa khuwaajipu araka: “Mwiruti mwamuuze Yaahaya epi mwinsiilaaye na mwinoonaaye:
MAT 11:5 Ananhooni anoona, anamarakala aneettetta, anamaharaja antta otwahareshiwa, ananhisiili ansiila, ananfwa ansisimuwa, na hapari zooshapweya antafusireliwa asikhini.
MAT 11:6 Ooparikhiyiwa pi apale ahinikoonanaaye hatha etthu ya owaakwakwanttula.”
MAT 11:7 Aphano noolaavo anakhiyoni apale a Yaahaya, Yinsa khusala oozela khuntti etile monkoni wa Yaahaya yoori: “Mweetteliye woona-ni n'yaara? Tteketthe yiinisiwaka ti pheevo?
MAT 11:8 Ama, mweetteliye omoona ntthu awaliye kuwo zooshapweya? Moone, apale anwaalaaye kuwo zooshapweya aniikhala mmanyupa wa afwalume!
MAT 11:9 Nka khuuzeni, mweetteliye woona niini? Napiyu? Wekhweele, miiyo kiniwuuzani yoori anziti napiyu.
MAT 11:10 Otu ti otule yaatikhiweeyo monkoni wa ye yoori: ‘Moone, kinlawa kamperekhe karumeya aka omaasho wawo; yoori atthenkeze tarikhi yawo.’
MAT 11:11 Kiniwuuzani khweele yoori: Khwa aana ooshi avokoliweeyo ti aakha, khapuweenivo hatha mmote wonziti Yaahaya Namoosa. Ila woopushuwa muufwalume wa pinkuuni nwulweene zayita ye.
MAT 11:12 Waaza siikhu za Yaahaya Namoosa mpakha leelo, Ofwalume wa pinkuuni ontta woojopholiwa, apo aya anjopholaaye anthuula.
MAT 11:13 Maana Manapiyu ooshi na Kano za Munsa za ahupiri mpakha yenzi ya Yaahaya.
MAT 11:14 Na amana mwitakha okhupalela, ye ti Aliyaasi otule aari weettelaaye ota.
MAT 11:15 Otule ariina mashiilo ti asiile!
MAT 11:16 “Khapila eti kilattanisane niini? Enlattanana asimaana eekhaliye va parasa eettaka osheza na onyakula na ashirikha aya:
MAT 11:17 ‘Fweeyo noovumiselani kuruneetha, ila mweeyo khuhiini; khwiipa liipo la huzuni, ila mweeyo khuhilili.’
MAT 11:18 Khuta Yaahaya woofuka na ahinnywaaye viinyu, mweeyo mwinri: ‘Ye onaaye masheethwani!’
MAT 11:19 Ata Mwaana wa Pinaatamu anjaaye na annywaaye, mwinri: ‘Otu nsokho na nnywachi, nshirikha wa anamariphisa lumpuru na anatwampi.’ Ila ojuwa onthoonyezeya khwa khaazi onikholeliwaaye.”
MAT 11:20 Aphano Yinsa khwaaza omaruwela sitati epile aviriyeemo khurettamo minjuza zawe zawaatta, maana atthu aari wiikhalaamo khathupwiyiye.
MAT 11:21 “Phoole weeyo, Korazini! Phoole, weeyo Betezayiita! Maana eriwaka Tiiru na Sitooni zeettiye orettiwawo minjuza epi mwiretteliweeyo mweeyo, apale aniikhalaaye ottuukho nka athupwiye raku, khuwala saakhu na khujivaaza fuutha!
MAT 11:22 Ila miiyo kiniwuuzani yoori siikhu ya ophukiwa enteela wiiyavo tthakaraka khwa Tiiru na Sitooni zayita mweeyo.
MAT 11:23 Khi weeyo Kafwaranaawu, onttela oweziwa mpakha pinkuuni? Wala, weeyo onttela weeseleliwa motthooni! Eriwaka minjuza zirettiweeyo vakatthi vawo zeettiye orettiwa Sotooma, zaari weettela opharelela mpakha leelo.
MAT 11:24 Ila miiyo kiniwuuza yoori siikhu ya ophukiwa enteela wiiyavo tthakaraka khwa Sotooma zayita weeyo.”
MAT 11:25 Wakathi otthuupule Yinsa khulupa yoori: “Miiyo kinuusifu Paapa, Mbwana wa pinkuuni na vathi, maana weeyo wawaavithela vitthu epi ajuwi na asomi, na khuwaathoonyeza apa attiitthi.
MAT 11:26 Khweele, Paapa, ti nanna waatakhiyeezo.
MAT 11:27 Vitthu zooshi kenkhiwa ti Paapa. Khina aninjuwaaye Mwaana woohiiyi Paapa, na khina aninjuwaawe Paapa woohiiyi Mwaana na otule mwaana anintakhelaaye yoori anthoonyeze.
MAT 11:28 Mwikiteele miiyo mooshi mweeyo mwiiyiye ooshokhera na oolemeliwa, miiyo kintta wuuvumulisani.
MAT 11:29 Mwithuule tthentte yaka na mwikeezele, maana miiyo kiwoonyamala na woojipushuwisa nroho, mweeyo mwintta opattha ovumula wa nafusi zenu.
MAT 11:30 Maana tthentte yaka ti yookhweya na mapwattha aka pi ooveya.”
MAT 12:1 Wakathi otthuupule Yinsa khusala avira mmashapa wa tiriku, siikhu ya saapatu. Anakhiyoni awe khuwaakhola jala, yo khwaaza okathula misasi za tiriku arafunaka phunje zaya.
MAT 12:2 Mafwarizeewu nawoona epile zaya, khumuuza Yinsa yoori: “Owoone anakhiyoni awo anretta etthu ekhattaziweeyo orettiwa saapatu.”
MAT 12:3 Ye khujipu araka: “Mweeyo khamwisomeeni etthu arettiyeeyo Daawuuda wakathi ye na ashirikha awe aakholiweeyo jala?
MAT 12:4 Ye eettiye Nnyupa ya Nluku, khurafuna phaawu na ashirikha awe enkhiweeyo Nluku, etthu yahaari otakhisiwaaye orettiwa, ila aariina ruhusa yooretta aari mahaakhimu a tiini paasi.
MAT 12:5 Ama mweeyo khamwisomeeni nkano za Munsa yoori saapatu, anamalokozela a tiini aavonyiye kano Nnyupa Woosifwiwamo, siikhu yaya eto, ila khuhiina hatha paathuli?
MAT 12:6 Miiyo kiniwuuza yoori apha ata otu azitiyeeyo Nyuupa Yoosifwiwamo.
MAT 12:7 Ila eriwaka mweeyo mwaari ojuwa maana a mattakhuzi anraaye: ‘Kintakha huruma akintakha twaha,’ khamwaari onhukhumu ntthu ahina paathuli.
MAT 12:8 Maana Mwaana wa Pinaatamu Mbwana wa saapatu.”
MAT 12:9 Khulaavo aphale vaya khweetta nsinakooka yaaya atthaapale.
MAT 12:10 Nttumphule aarimo mwinyi mmote woorakala nkhono. Aphano atthu akina aari otakhaaye onlokoveza Yinsa yoori: “Ti ya halaali monkoni wa kano ovonisa saapatu?”
MAT 12:11 Ye khuwaajipu yoori: “Paani wa mweeyo, amana eeyana pwittipwitthi yawe ekwela valiphotto saapatu, ahinlawaaye okhola alazavo?
MAT 12:12 Ntthu ona fwayita khuluyeene zayita pwittipwitthi! Nakhataalikha ewaapho ruhusa yooretta etthu yooshapweya saapatu.”
MAT 12:13 Aphano khumuuza mwinyi otule yoori: “Wookole nkhono awo.” Ye khookola, khuvonisiwa, khwiiya sawasawa na opu nkina.
MAT 12:14 Ila mafwarizeewu apale khusaruwa khusala awaza shawuri za omuula Yinsa.
MAT 12:15 Yinsa noojuwa shawuri zaya epile, khulaawo okhule waya. Atthu enkeene khusala anlotta, ye khuwaavonisa alwele ooshi aariivo vakatthi wa atthu aya apale,
MAT 12:16 na khuwooza yoori ahilupe hatha etthu monkoni wa ye.
MAT 12:17 Eto yaarettikhaniye yoori eretteye etile yaalupiweeyo ti napiyu Ezaaya yoori:
MAT 12:18 “Otu ari apha karumeya aka, kinthawuliyeeyo, mphetani aka, anfurahisaaye rooho yaka, kanttheela nafusi yaka, ye onteela olaleya ophukiwa wa atthu ooshi.
MAT 12:19 Khanteela okeetisana wala onyakula, khina anttelaaye osiila huula yawe mmatarikhi.
MAT 12:20 Khanteela ovuja tteketthe yoomanyeya, wala khanteela ozimisa mweeke wootthuwela, mpakha athuule oshintta khwa shariya.
MAT 12:21 Amalapo ooshi anttela wiiyana nroromelo khwa nzina lawe.”
MAT 12:22 Paata ya toowo, khutiiseliwa namasheethwani woohooni na khaari ottakhula, Yinsa khunvonisa, khwaaza woona na ottakhula.
MAT 12:23 Atthu ooshi khwiiya ooshanka channu khusala oozelana yoori: “Khahi mwaana wa Daawuuda otu?”
MAT 12:24 Mafwarizeewu akina noosiila toowo khuri: “Otu oniikara masheethwani paasi khwa owahi wa Belezibuuli, mfwalume wa masheethwani.”
MAT 12:25 Aphano Yinsa noojuwa etthu aari wuupuwelaaye yo, khuwooza yoori: “Wakhula ofwalume wa waawanyeya khusala wuumana otthuuporu oniiya wootapanyeya, na wakhula sitati ama nyuupa yawaawanyeya ethiitoru khiniiyavo.
MAT 12:26 Nkhama Epiliisi onimwiikara Epiliisi, eetta ojaawanya otthweru. Toowo ofwalume awe onteela wiiyavo toovi?
MAT 12:27 Nkhama miiyo kiniikara masheethwani khwa owahi wa Belezibuuli, khi aaneenu aniikara toovi? Tiito aaneenu atthaapo ti anttelaaye wuuphukani mweeyo.
MAT 12:28 Ila nkhama kiniikara masheethwani khwa Rooho ya Nluku, eto enthoonyeza yoori Ofwalume wa Nluku woofiyelani.
MAT 12:29 “Ama ntthu onvira toovi nnyupa wa nwali khuthuulamo maali zawe ahaazeeni khapula onfuka? Toowo phi oniwahaavo wiiya vitthu za nnyupa mwawe.
MAT 12:30 “Otule ahi vamote na miiyo ontta okuumanana, na otule ahinkusanyaaye khwa miiyo ontta omwaza.
MAT 12:31 Etthiipo miiyo kiniwuuzani yoori: Twampi na kufuru zooshi za anaatamu zinswamihiwa, ila okufurwela Rooho Ttakatthiifu khunswamihiwa.
MAT 12:32 Wakhula otule anlupaaye nttakhuzi la omuumanana Mwaana wa Pinaatamu onswamihiwa, ila otule anttakhulaaye wawuumananavo Rooho Ttakatthiifu khanswamihiwa, waaza nasaapi eti mpakha okhu ninttaawo.
MAT 12:33 “Muutthi wooshapweya oniima mishumo zooshapweya, muutthi wootakhala oniima mishumo zootakhala, maana wakhula muutthi onjuwiwa khwa mishumo zaya.
MAT 12:34 Ojama wa nyookha, enretteya mweeyo ootakhala rooho, ottakhula vitthu zooshapweya? Maana milomo enttakhula etile eniiyaaye varoho.
MAT 12:35 Ntthu wooshapweya rooho, mmujuju mwawe ensarulamo vitthu zooshapweya, wootakhala rooho mmujuju mwawe ensarulamo vitthu zootakhala.
MAT 12:36 Ila miiyo kiniwuuzani yoori, siikhu ya ophukiwa, atthu anlawa arettiwe hisapu mwaasa wa mattakhuzi ooshi ohiina fwayita aari olupakaaye.
MAT 12:37 Maana khwa mattakhuzi enu mwinteela wonkokha na khwa atthaapo mwinteela ohukhumwiwa.”
MAT 12:38 Aphano mafwarizeewu akina na anamanozela a kano khulupa yoori: “Mwaaliimu, nintakha woona alama ya minjuza yoorettiwa ti weeyo.”
MAT 12:39 Ye khujipu araka: “Khapila yootakhala na yooraruwa enveka alama ya minjuza, ila khinteela winkhiwa hatha moote ya ohiiyi alama ya napiyu Yuunusa.
MAT 12:40 Maana nkhama etthiipo Yuunusa ekhaliyeeyo siikhu ttatthu nthana na osikhu mmatthupo wa swi, khwa etthiipo Mwaana wa Pinaatamu onttela wiikhala siikhu ttatthu nkhapuri.
MAT 12:41 Atthu a Neniive anlawa alankhe siikhu ya ophukiwa, ookwiseleni paathuli mweeyo, maana yo athupwiya twampi zaya paata ya osiila tafusiiri ya Yuunusa, na aphano ori apha otule eeyiyeeyo nwulweene zayita Yuunusa.
MAT 12:42 N'hano wa Kusini onlawa alankhe siikhu ya ophukiwa ookwiseleni paathuli mweeyo, maana ye alankha peetiwene oteela osiila ojuwa wa Seleyimaana, ila nasaapi otu ariiye apha anziti Seleyimaana.
MAT 12:43 “Amana sheethwani anlawa ntthu, onvira nhali woohiimo maati eekesaka vahali woovumulavo, ila amana ahipatthivo.
MAT 12:44 Aphano onri: ‘Kinrutela nyuupa ethiitile kilankhiyeeyo.’ Noofiya khusikana nyuupa eheettiweenimo, ori wooseeliwamo wawaattaleliwamo saana.
MAT 12:45 Ontta oruti khulawa khuwaatana masheethwani sapa ootepa otakhala, khweettamo khusala eekhala nttumpho, ntthu otule khweetta wootepa khuziti khiima etile aariyeeyo raku. Na enttela orettikhana etthiipo khwa khapila eti.”
MAT 12:46 Yinsa nalelo eettaka ottakhula na khuntti etile, mamaawe na attwiize aarettiye ari vaje, antakhaka yoori anttakhulane.
MAT 12:47 Ntthu mmote khumuuza yoori: “Mamaawo na attwiizo ari vaje antakha ottakhulana weeyo.”
MAT 12:48 Ye khujipu yoori: “Maama ti paani? Wala attwiizaku ti paani”?
MAT 12:49 Khookolela nkhono awe phantte ya anakhiyoni awe khulupa araka: “Maama na attwiizaku pi apa ariiye apha.
MAT 12:50 Maana otule anrettaaye matakhelo a Paapa ariiye pinkuuni, oto ti ttwiiyaku, nlupwaaka na ti maama.”
MAT 13:1 Siikhu ethiitile Yinsa khulankha owawe khulawa nshini wa ntthatta.
MAT 13:2 Khuzukuleliwa pi atthu awaatta, aphano ye khupakhira mmwaatiya khwiikhala. Atthu apale khweemela vapatari.
MAT 13:3 Ye khusala awaasomisa khwa milikaniso, araka: “Namalima aalawiiye ozala.
MAT 13:4 Amwazaka peewu yawe, phantte kiina khukwela nshini wa tarikhi, anyannyi khuta khuja.
MAT 13:5 Kiina khukwela vahali aariivo mawe, vahali laarivo nttophe vattitthiiru; nasaapiru khoottha, ila wiiya nttophe ntthile khaleechiye.
MAT 13:6 Aphano noopuwa njuwa khulukula na khuuma; maana khazaarina mitathaari.
MAT 13:7 Peewu kinoko khukwela vanyiiwa, khuwula vamote na nyiiwa, khurapeliwa pi nyiiwa.
MAT 13:8 Kiina khukwela vanshaka wooshapweya, khwiima mishumo zooshapweya, miiya, mikina siithiini na talaathiini wakhula mmote!
MAT 13:9 Otule ariina mashiilo ti asiile.”
MAT 13:10 Anakhiyoni awe khunsusela khumuuzela yoori: “Mwaasa aya niini atthu apa owaattakhulelaka khwa milikaniso?”
MAT 13:11 Ye khuwaajipu: “Mweeyo mwenkhiwa ojuwa siiri za Ofwalume wa pinkuuni, ila yo wala.
MAT 13:12 Maana, otule ariina, onttela winkhiwa, oniiyana zawaatta. Ila otule ahina,hatha etile ariinaaye ontta onyakanyiwa.
MAT 13:13 Tiito miiyo kiniwoozaaye khwa milikaniso: maana yo ana maasho ila khanoona, ana mashiilo ila khansiila, na wala khiniweeleya.
MAT 13:14 Khwa yo wamariseleya ohupiri wa Ezaaya onlupaaye yoori: ‘Hatha nkhama mwasiila khiniweeleyani; hatha nkhama moona khamwinjuwa.
MAT 13:15 Maana rooho za atthu apa pi zookhijili, attiyela mashiilo aya na khuphunya maasho aya, eriwaka khayaari ethiito, aari owahi woona na maasho aya, na osiila na mashiilo aya na oweeleya va rooho vaya khurutela mmakhono mwaka, keetta owaavonisa.’
MAT 13:16 Ila ooparikhiyiwa maasho enu mweeyo, maana anoona; na maashiilo enu, maana ansiila.
MAT 13:17 Miiyo kiniwuuzani khweele yoori: manapiyu enkeene na anashariya aatakhiye woona epi mwinoonaazo, ila khuhooni, na osiila epi mwinsiilaazo ila khuhisiili.
MAT 13:18 “Nakataalikha mwisiile na mwijuwe maana a nlikaniso wa namazala:
MAT 13:19 Amana ntthu asiila nttakhuzi la Ofwalume khuhimweeleyi, Ntakhali ti antaaye khulazavo etile yaazaliweeyo nroho mwawe. Eto peewu etile yaakweliyeeyo nshini wa tarikhi.
MAT 13:20 Etile yaakweliyeeyo vahali aariivo mawe pi apale ansiilaaye nttakhuzi nasaapiru khupokherela na furaha.
MAT 13:21 Ila mwaasa wa ohiina mitathaari eenyeweru, anlipalipa khwa wakathi vattitthiiru. Amana epuwelela miswipa ama lupattha mwaasa wa nttakhuzi la Ofwalume anlikha nasaapiru amini yaya.
MAT 13:22 Etile yaakweliyeeyo va nyiiwa, pi apale ansiilaaye nttakhuzi, ila mwaasa wa tafwawuthi za ohaayi, na ottettekha wa maali entta owaakhupa, ahifiyelelaka wiima mishumo.
MAT 13:23 Ila etile yaakweliyeeyo vahali wooshapweyavo pi apale ansiilaaye nttakhuzi khuweeleya, khwiima mishumo miiya, khwiima siithiini, talaathiini khwa muutthi mmote.”
MAT 13:24 Yinsa khuwooza nlikaniso nkina araka: “Ofwalume wa pinkuuni ori nkhama ntthu mmote azaliyeeyo peewu yooshapweya mmashapa mwawe.
MAT 13:25 Osikhu mmote, atthu ooshi eettaka olala, khuta atuwi vakatthi wa tiriku khuzalavo ntakhatakha, khulawa.
MAT 13:26 Wakathi tiriku ewuliyeevo khupuwa misaasi zaya, naye ntakhatakha khupuwa misaasi zaya.
MAT 13:27 “Akarumeya a mweenyewe nshapa khulawa wa mweenyewe khumuuza yoori: ‘Mbwana, mweeyo mwaazaliye peewu yooshapweya mmashapa mwenu. Khi aphano ntakhatakha lapuwa vayi?’
MAT 13:28 Ye khujipu yoori: ‘Atuwi ti arettiye epo zaya.’ Akarumeya apale khumuuzela yoori: ‘Mbwana mwintakha fweeyo nalazemo?’
MAT 13:29 Ye khujipu yoori: ‘Wala, maana, amana mwikhulakamo ntakhatakha nttho, mwintta okhula vamote na tiriku.
MAT 13:30 Mwilikhe ziwulele vamote mpakha wakathi wa wuurula. Kintta owooza anamuurula yoori: “Mwikusanye khapula ntakhatakha mwifuke mashittha likhoziwe; mwikusanye tiriku mwitthe va sakafu vaka.’”
MAT 13:31 Na khuwooza nlikaniso nkina araka: “Ofwalume wa pinkuuni ori nkhama phunje ya samuli, ntthu anthulaaye khuzala mmashapa mwawe.
MAT 13:32 Eto ttiitthiiru zayita peewu zooshi, amana owula onziti miitthi zooshi za mmashapa, anta anyannyi ojeka vijaaro n'virapi mwaya.”
MAT 13:33 Khuwooza nlikaniso nkina araka: “Ofwalume wa pinkuuni ori nkhama fwaramento muukha anthuulaaye khuphakanya na ofu wa tiriku wa waatta, wooshi khujakhuwa.
MAT 13:34 Yinsa aari wuuza khuntti etile, khwa nlikaniso. Weekhweele, khina etthu moote aari owoozaaye woohiiyi khwa nlikaniso.
MAT 13:35 Eto yaari orettikhana yoori eretteye etile yaalupiweeyo ti napiyu yoori: “Kinteela ofunula milomo zaka khwa nlikaniso, na olaleya vitthu zoovitheya waaza wumpiwa wa olumwenku.”
MAT 13:36 Aphano ye khuwaalikha atthu apale khulawa owawe. Anakhiyoni awe khumwaattama khunvekela yoori: “Oneeleze nlikaniso wa ntakhatakha.”
MAT 13:37 Ye khujipu yoori: “Otule aazaliyeeyo peewu wooshapweya ti Mwaana wa Pinaatamu.
MAT 13:38 Nshapa olumwenku, peewu yooshapweya aana a Muufwalume. Ntakhatakha aana a sheethwani.
MAT 13:39 Atuwi aazaliyeemo ti sheethwani. Wuurula, mwiisho wa wakathi, akarumeya a wuurula malayikha.
MAT 13:40 Nkhama etthiipo ntakhatakha linuuruliwaazo khukhoziwa va moottho, enttela wiiya etthiipo mwiisho wa olumwenku.
MAT 13:41 Mwaana wa Pinaatamu onttela oruma malayikha awe, alazemo muufwalume mwawe zooshi epile zookwakwanttula, na apale anrettaaye vitthu zootakhala.
MAT 13:42 Aweeselele va njocho la moottho, attaapho onttela wiiyavo olila na oluma meeno.
MAT 13:43 Aphano anashariya anttela waara nkhama njuwa muufwalume wa Papaaya. Ariina mashiilo, ti asiile.”
MAT 13:44 Ofwalume wa pinkuuni ori nkhama njuju loovithiwa mmashapa. Ntthu mmote, khulawa khusikana, na ye khuvitha opheya. Mwaasa woofurahi khulawa khuuzanyisa vitthu zawe zooshi aarinaazo khuuzanya nshapa ntthile.
MAT 13:45 Theenya Ofwalume wa pinkuuni ori nkhama nakusiyanti aneekesaaye mawe ootafikhana.
MAT 13:46 Noosikana liwe la fwayita khuluyeene, khuuzanyisa vitthu zooshi aariinaazo khuuzanya.”
MAT 13:47 “Ofwalume wa pinkuuni ori nkhama ntthavi laweesiwa mpahari khuula wakhula jaati ya swi.
MAT 13:48 Amana liitaala, anamajiya anfutthela vathi. Aphano yo khukusanya swi epile zooshapweya khuttha mmakapaja, ila epile zoohishapweyi khweesela.
MAT 13:49 Enttela orettikhana etthiipo mwiisho wa olumwenku. Malayikha anteela owaaphakula ootakhala rooho na anashariya,
MAT 13:50 aweeselele va njocho la moottho apale ootakhala rooho, attaapho onttela wiiyavo olila na oluma meeno.”
MAT 13:51 Aphano Yinsa khuwoozela yoori: “Zaweeleyani vitthu zooshi kilupiyeeyo?” Yo khujipu yoori: “Aaa!”
MAT 13:52 Ye khuwooza yoori: “Tiito wakhula namanozela a kano anozeliweeyo monkoni wa Ofwalume wa pinkuuni onlattanana mweenyewe nyuupa anlazaavo va njuju vawe vitthu pheeya na vitthu zaraku.”
MAT 13:53 Paata ya Yinsa wiisha olupa milikaniso epile, khulaawo okhule waya.
MAT 13:54 Khufiya sitati yawe, ohali aari wiikhalaawo. Ye khwaaza owaasomisa atthu nsinakooka. Atthu ooshi khwiiya ooshankisiwa, khusala oozela yoori: “Ojuwa opu apattha vayi na owahi wa oretta minjuza?
MAT 13:55 Khahi mwaana wa kalapinteero? Nzina la mamaawe khahi Mariyamu? Attwiize khayi Tiyaaku, Yuusufu, Simawu na Yuuda?
MAT 13:56 Alupuwe ooshi khaniikhala nttumphu? Khi vitthu epi apattha vayi?”
MAT 13:57 Atthu ooshi khuhinkhupali. Ila ye khulupa yoori: “Napiyu ti wooshitahiwa phantte zooshi, ila mmuti mwawe na owawe khanshitahiwa.”
MAT 13:58 Yinsa khaarettiye minjuza zawaatta mmuti mphule, maana yo khaarina amini.
MAT 14:1 Wakathi aya opule Herooti Antiipa, nsatoro wa Kalileya, khusiila olupiwa monkoni wa Yinsa.
MAT 14:2 Ye khuwooza akarumeya awe yoori: “Oto ti Yaahaya Namoosa; eetta osisimuwa muufwa! Tiito ariinaaye owahi wa oretta minjuza.”
MAT 14:3 Maana aarettiye Herooti antthiiye Yaahaya nkalapooso, mwaasa wa Herotiiya, muukha wa Filiipe, ttwiiye,
MAT 14:4 mwaasa wa Yaahaya omuuza yoori: “Khahi halaali weeyo onrala ye.”
MAT 14:5 Herooti aari otakha omuula, ila khusala awoova atthu, maana yo aari ojuwa yoori Yaahaya napiyu.
MAT 14:6 Va njampo la oretta mwaakha Herooti, mwaana wa Herotiiya khwiina vakatthi wa atthu ooshi, khuntuvelisa Herooti,
MAT 14:7 ye khumwaahiti khwa olapha omwinkha wakhula etile aari weettelaaye onvekela.
MAT 14:8 Khwa shawuri za winkhiwa ti mamaawe, mwaana otule khulupa yoori: “Mwikitiisele mparathu eeshwa ya Yaahaya Namoosa.”
MAT 14:9 Mfwalume khwiiya wooshukulikha, ila mwaasa wa olapha na mwaasa wa anamalaleyiwa, ye khuruma yoori enkhiwe etile mwaana otule avekiyeeyo.
MAT 14:10 Khuruma olawa oshijiwa eeshwa ya Yaahaya Namoosa nkalapooso.
MAT 14:11 Eeshwa yawe khuthuuliwa mparathu khulawa khwinkhiwa mwaana otule, ye khuthuula khulawa khumwinkha mamaawe
MAT 14:12 Anakhiyoni a Yaahaya khuta, khuthuula mwiili awe khulawa khuzikha. Nawiisha khulawa onthatelela Yinsa.
MAT 14:13 Noosiila vitthu zaarettikhaniyeezo, Yinsa khupakhira mmwaatiya khulaawo okhule waya, khweetta ohali yaariiwo yaara otthwe. Ila atthu noojuwa, khulankha nsitati mphule khusala anlottelela mwentto.
MAT 14:14 Yinsa noopakhuwa khuwoona atthu awaatta, khuwoonela huruma, khuwaavonisa alwele aariivo.
MAT 14:15 Njuwa-looveva, anakhiyoni awe khunsusela khumuuza yoori: “Mphu n'yaara na ontta oripa. Owaamwaze atthu apa eette mmamuti mpho oozanye etthu yoojiwa.”
MAT 14:16 Yinsa khuwaajipu araka: “Khinihithajiya yo olawa. Mweeyo ena mwiwenkhe etthu yoojiwa.”
MAT 14:17 Yo khulupa yoori: “Fweeyo ninaaye phaawu thaanu na swi piiri.”
MAT 14:18 Aphano ye khulupa yoori: “Mwikitiisele.”
MAT 14:19 Khuruma yoori atthu apale eekhale va nyaani, khuthuula phaawu epile thaanu na swi epile piiri, khweekesa otulu, khuparikhiya. Khumeya phaawu epile. Khuwenkha anakhiyoni awe, yo khusala awenkha atthu.
MAT 14:20 Ooshi khuja khurupala, anakhiyoni khulokotthela khelenke khumi na piiri nyeenye zoosala.
MAT 14:21 Atthu aajiyeeyo aari alume alufu thaanu, ohiwaatthiimo aakha na asimaana.
MAT 14:22 Nasaapiru Yinsa khuwaaruma anakhiyoni awe yoori apakhire mmwaatiya alokoze eette phantte kiina, ye aasaliye awaaleezaka atthu apale.
MAT 14:23 Paata ya owaaleeza atthu, khuwela va mwaako olawa olompa. Khuripa ye ari attaaphale otthwe,
MAT 14:24 ila wakathi aya opule mwaatiya waari peetiwene na vathi, weettaka opiiwa ti mawipi venkivene maana pheevo eetta wiinyula.
MAT 14:25 Lifwajiri, Yinsa khusala eetta attaaphale aarivo anakhiyoni awe eettettaka vatulu a maati.
MAT 14:26 Noomoona eettaka weettetta vatulu a maati yo khwiiya oosuthuwa khulupa yoori: “Opu nshitapehe!” Yo khusala anyakula na woova.
MAT 14:27 Ila Yinsa khuwooza yoori: “Mwiminyale! Ti miiyo. Mwihoove!”
MAT 14:28 Khujipu Pheeturu yoori: “Nkhama ti weeyo khweele Mbwana, okirume kite attaapho oriivo, keettettaka vatulu a maati.”
MAT 14:29 Yinsa khunjipu, araka: “Ote.” Aphano Pheeturu khulaamo mmwaatiya, khusala eettetta vatulu a maati eettaka phantte etile aariiwo Yinsa.
MAT 14:30 Paata ya woona khiima pheevo etile yaari ovumaazo, khoova khusala azama vattiitthi-vattiitthi, ettaka onyakula araka: “Mbwana, okuusuru!”
MAT 14:31 Nasaapiru Yinsa khookola nkhono awe khunkholelela. Khumuuza yoori: “Ntthu woopushuwa amini, ohaaminaka mwaasa aya niini?”
MAT 14:32 Paata ya owela mmwaatiya, pheevo etile khwiisha.
MAT 14:33 Apale aari mmwaatiya khumwaaputu alupaka yoori: “Khweele weeyo o Mwaana wa Nluku.”
MAT 14:34 Paata ya olokha pahari, khufiya Jenezare.
MAT 14:35 Wakathi atthu a mmuti mphule anjuwiyeevo yoori ti Yinsa, khumwazela hapari mmuti mphule wooshimo, atthu akina khusala awaatana alwele.
MAT 14:36 Anvekelaka yoori nenkawu asape nshaka la ajapi yawe; ooshi asapiyeeyo aavoniye.
MAT 15:1 Aphano khulankha Yeruzaleemu, Mafwarizeewu akina na anamanozela a kano khuta omuuzela Yinsa yoori:
MAT 15:2 “Mwaasa aya niini anakhiyoni awo akhijilelaka zowera za attunkhulu a tiini, oja ahinaweeni?”
MAT 15:3 Yinsa khuwaajipu araka: “Mwaasa aya niini mweeyo mwikhijilelaka kano za Nluku, mwaasa wa zowera zenu?
MAT 15:4 Maana Nluku alupa yoori: ‘Onshitahi papaawo na mamaawo’ na ‘antakhaaye onlaani papaawe na mamaawe ona ya ohukhumweliwa ofwa.’
MAT 15:5 Ila mweeyo mwinkhupalela yoori amana ntthu amuuza papaawe ama mamaawe yoori: ‘Wakhula etthu kiniwinkhaanini miiyo zaakha ya omwinkha Nluku;
MAT 15:6 ye khankhanyareliwa theenya onshitahi papaawe khwa nanna nkhama eto.’ Khwa etthiipo, mwaasa wa zowera zenu, mweeyo mwimpeepheyisa nttakhuzi la Nluku.
MAT 15:7 Manaafikhi! Ezaaya ahupiri saaneene monkoni wa mweeyo araka:
MAT 15:8 ‘Atthu apa anikaaputu na milomo, ila rooho zaya ziri peetiwene khwa miiyo.
MAT 15:9 Mweeyo mwinikaaputu mahala, mwisomisaka zowera za anaatamu.’”
MAT 15:10 Yinsa khuwaakhuwela atthu apale khuwooza yoori: “Mwisiile na eweeleyeni.
MAT 15:11 Khahiyo etile entthiwaaye nkhanyo eninharamushaaye ntthu; ila etile enlankhaaye nkhanyo ti eninharamushaaye.”
MAT 15:12 Aphano anakhiyoni awe khulawa khumwaattama khumuuzela yoori: “Wajuwa yoori mafwarizeewu noosiila hapari epile eephiriwa?”
MAT 15:13 Yinsa khuwaajipu yoori: “Miitthi zooshi zihizaliweeni ti Paapa wa pinkuuni zinttela okhuliwa na mitathaari zaya.
MAT 15:14 Mwiwaalikhe, maana yo khanoona na aniweettettisa ananhooni. Amana ntthu woohooni amweettettisa nahooni nzaawe ooshi antta okwela nliphotto.”
MAT 15:15 Aphano Pheeturu khunvekela Yinsa yoori: “Onuuze maana a nlikaniso opo.”
MAT 15:16 Yinsa khuwaajipu yoori: “Kiri na mweeyo nalelo khiniweeleyani?
MAT 15:17 Yoori zooshi zintthiwaaye nkhanyo zineetta mwiijohojoho na khunyiwa?
MAT 15:18 Ila vitthu zinlankhaaye nkhanyo zinlankha va rooho na piitthiipo eninharamushaaye pinaatamu.
MAT 15:19 Maana nroho ti zinlankhaamo shawuri zootakhala nkhama epi: wuula, oraruwa, oshawi akhapa, wiiya, olokova na ohankawaani.
MAT 15:20 Epo pi eninharamushaaye ntthu. Ila oja ohinaweeni khininharamusha ntthu.”
MAT 15:21 Paata ya Yinsa olaavo aphale vaya, khusala alawa nti wa Tiiro na Sitooni.
MAT 15:22 Muukha wa Kanaani aari wiikhalaaye nti otthuupule, khuta okutthanana Yinsa eettaka okhuwa yoori: “Mbwana, Mwaana wa Daawuuda, koonele huruma! Mwanaka etta wiiyana masheethwani na ontta ohoowa channu.”
MAT 15:23 Ila Ye khuhinjipu hatha nttakhuzi, anakhiyoni awe khulupa yoori: “Omuuze alawe, ontta onyakula nyuma wetthu.”
MAT 15:24 Yinsa khujipu yoori: “Miiyo kaperekhiwa paasi khwa pwittipwitthi epile zawaashikha za Ezirayiilu.”
MAT 15:25 Muukha otule khuta khukokhora na khuri: “Mbwana, okaawuni!”
MAT 15:26 Aphano Yinsa ajipwaka khuri: “Khahiyo yooshapweya othuula phaawu ya aana khuwenkha aana aanapwa.”
MAT 15:27 Muukha otule khujipu yoori: “Khweele Mbwana, ila na aana aanapwa anja tathela zinkwaaye vameeza wa mweenyewe.”
MAT 15:28 Aphano Yinsa khumuuza yoori: “Oo muukha, amini yawo khuluyeene! Ti erettikhane etile ontakhaaye.” Na wakathi otthuupule mwanawe khwiiya woovona.
MAT 15:29 Yinsa khulaawo okhule waya khulawa mpakha nshini wa pahari ya Kalileya. Khuwela va mwaako khwiikhala attaapho.
MAT 15:30 Khusala ata atthu awaatta, awaatanaka anamarakala, ananhooni, anamakhumuwa, ananhittakhuli na akinoko aya, khuwaalikha nshini wa Yinsa, ye khuwaavonisa.
MAT 15:31 Atthu khwiiya ooshanka wakathi awooniyeevo ananhittakhuli eettaka ottakhula, anamarakala ari oovona, anamakhumuwa eettaka weettetta na ananhooni eettaka woona. Yo khunsifu Nluku wa Ezirayiilu.
MAT 15:32 Yinsa khuwaakhuwela anakhiyoni awe na khuwooza yoori: “Kinaaye tthakaraka na atthu apa; zavira siikhu ttatthu ari vamote na miiyo na khana hatha etthu-yoojiwa. Akintakha owaalikha olawa na jala zaya, maana kinoona yoori antta ozileya ntarikhi.”
MAT 15:33 Anakhiyoni awe khujipu yoori: “Ninttela opattha vayi phaawu zoofiyela, atthu apa waatta na mphu n'yaara?”
MAT 15:34 Ye khuwoozela yoori: “Mwina phaawu kavi?” Yo khujipu yoori: “Sapa, na mattaatta vattitthiiru.”
MAT 15:35 Yinsa khuruma yoori atthu apale eekhale.
MAT 15:36 Khuthuula phaawu epile sapa na swi khushukhurwela khumeya khuwenkha anakhiyoni awe, khusala awaawanyeza atthu.
MAT 15:37 Ooshi khuja khurupala. Anakhiyoni apale khukusanya khelenke sapa za pattaasu zasaliyeeyo.
MAT 15:38 Atthu aajiyeeyo aari alufu nne, ohiwaalaki aakha na asimaana.
MAT 15:39 Paata ya oleezanana atthu apale, Yinsa khupakhira mmwaatiya khulokhela nti wa Makata.
MAT 16:1 Mafwarizeewu na masatukhi khumwaattama Yinsa khusala amweeza anvekelaka alama moote yoolankha pinkuuni.
MAT 16:2 Ye khuwaajipu araka: “Amana njuwa liveva, mweeyo mwinraka, ‘Onttela wiiya wakathi wooshapweya, maana pinku ti yookhuttuwa.’
MAT 16:3 Na leelo supu, ‘Enttela opuwa pheevo, maana pinku ti yookhuttuwa na eetaalawo mawiku.’ Mweeyo mwinjuwa otaphulela nanna ya pinku, ila khamwinjuwa otaphulela alama za wakathi!
MAT 16:4 Khapila yootakhala na yooraruwa anveka alama ya minjuza, ila hatha alama khanlawa winkhiwa yoohiiyi alama ya Yuunusa.” Aphano Yinsa khuwaalikha khulaavo aphale vaya.
MAT 16:5 Paata ya olokhela phantte kiina ya pahari, anakhiyoni khusophela yoori asahawu othuula phaawu.
MAT 16:6 Yinsa khuwooza yoori: “Mwiiye wa woona na mwiiyane phoole na fwaramento za mafwarizeewu na za masatukhi.”
MAT 16:7 Anakhiyoni apale khwaaza onyakulisana atthaaporu, araka “mwaasa aya ohithuuli phaawu.”
MAT 16:8 Asiiliyeevo onyakulisana opule, Yinsa khuwooza yoori: “Atthu oopushuwa amini, mwaasa aya niini mwinnyakulisana mweeyena-ru? Mwaasa woohiina phaawu?
MAT 16:9 Nalelo khina weeleyeni? Khamwimfikhirela phaawu epile thaanu miiyo kawaawanyeziyeeyo atthu alufu thaanu? Khelenke kavi mweetaaziyeeyo?
MAT 16:10 Wala khwa phaawu sapa aarafuniyeeyo atthu alufu nne, na zaari khelenke kavi mwilokottheliyeeyo?
MAT 16:11 Nanna-ni ehiniweeleyaanini yoori akaari owuuzani monkoni wa phaawu? Mwiiyane phoole na fwaramento ya mafwarizeewu na za masatukhi.”
MAT 16:12 Aphano khuweeleya yoori khaari owooza wiiyana phoole na fwaramento ya phaawu, ila khwa masomi a Mafwarizeewu na masatukhi.
MAT 16:13 Yinsa afiyeevo nti wa Sezareeya ya Filiipe, khuwoozela anakhiyoni awe yoori: “Atthu aninlupeza niini Mwaana wa Pinaatamu?”
MAT 16:14 Yo khujipu yoori: “Akina anri o Yaahaya namoosa; akina, anri o Aliyaasi, akina anri o Jeremiiya ama mmote wa manapiyu.”
MAT 16:15 Khurutela owoozela theenya yoori: “Khi mweeyo mwinri ki paani?”
MAT 16:16 Simawu Pheeturu khujipu yoori: “Weeyo o Al-Masiihu, Mwaana wa Nluku haayi.”
MAT 16:17 Yinsa khujipu yoori: “Wooshapweyiwa ti weeyo, Simawu mwaana wa Yoona! Maana vitthu zaya epi khuthoonyeziweeni ti pinaatamu, ila khwa Paapa ariiye pinkuuni.
MAT 16:18 Miiyo kiniwuuza yoori weeyo o Pheeturu, khwa liwe nttintthi kinjekana ojama wa Nluku na milako za motthooni khazinlawa oshintta.
MAT 16:19 Miiyo kiniwinkha efukulo ya Ofwalume wa Pinkuuni; etile onfukaaye vathi apha na pinkuuni entta ofukiwa, na etile weeyo onfukulaaye vathi apha na pinkuuni entta ofukuliwa.”
MAT 16:20 Aphano khuwooza anakhiyoni awe yoori ahiwooze akinoko yoori ye aari Al-Masiihu.
MAT 16:21 Waaza wakathi otthuupule, Yinsa khwaaza oweeleza anakhiyoni awe araka: Yaari ohithajiya olawa Yeruzaleemu ahoochaniwe vitthu zawaatta mmakhono wa attunkhulu a tiini, mahaakhimu a tiini na anamanozela a kano, ooliiwe, siikhu ya ttaatthu asisimuwe nkhapuri.
MAT 16:22 Aphano Pheeturu, khunkhuwelela othetekele khusala amuuza yoori: “Wala Mbwanaaka aka! Khinteela wuurettikhanela!”
MAT 16:23 Yinsa khuzukuluwa khumuuza Pheeturu yoori: “Weette nyuma waka Sheethwani! Weeyo ori nkhama liwe liriiye ntarikhi mwaka yoori likikwakwattule, maana onuupuwela nkhama pinaatamu woohiiyi nkhama anuupuwelaazo Nluku.”
MAT 16:24 Aphano Yinsa khuwooza anakhiyoni awe yoori: “Nkhama ntthu ontakha okilotta, ajikatthale mweenyewe, athuule nsalapa awe akilotte.
MAT 16:25 Maana otule antakhaaye wuusuru ohaayi awe ontta ompwetheya, ila otule onimpwetheyaaye ohaayi awe mwaasa wa miiyo ontta wuusurukha.
MAT 16:26 Ena fwayita-ni ntthu opattha fwayita olumwenku wooshi na khumwaashikha ohaayi awe? Ama niini pinaatamu antakhaaye opatilana ohaayi awe?
MAT 16:27 Apho Mwaana wa Pinaatamu onlawa ate nnuuru wa Papaawe na malayikha awe, amwinkhe phakari wakhula ntthu khwa etile arettiyeeyo.
MAT 16:28 Miiyo kiniwuuzani khweele yoori, awaapho apha atthu akina ahinttelaaye ofwa ahimooneni khapula Mwaana wa Pinaatamu ataka nkhama mfwalume.”
MAT 17:1 Ziviriyeevo siikhu sitha, Yinsa khunthuula Pheeturu, Tiyaaku na Yaahaya ttwiiye Tiyaaku, khuwaalawana othetekele va mwaako woolepa.
MAT 17:2 Attaaphale Yinsa khuzukulisiwa vakatthi vaya. Wuuso awe khwaara nkhama njuwa kuwo zawe khwiiya zoolakala nkhama nuuru.
MAT 17:3 Wakathi otthuupule khupuwelela omaasho waya Munsa na Aliyaasi apiyaka mwaasa na Yinsa.
MAT 17:4 Aphano Pheeturu khumuuza Yinsa yoori: “Mbwana, ti yooshapweya wiiya attaapha. Amana otakha, kintta ojeka heema ttatthu; moote yawo, moote ya Munsa, kiina ya Aliyaasi.”
MAT 17:5 Pheeturu eettaka ottakhula nalelo, khupuwa liwiku lawaara khuwaafinikha, nttumpho khupuwamu huula yaari oraaye: “Otu mwanaka wompheta na wookituvela channu. Mwinsiileze!”
MAT 17:6 Asiiliyeevo mattakhuzi apale anakhiyoni awe khukokhora khufiisa ajihi zaya vathi na khuwaapattha woova.
MAT 17:7 Ila Yinsa khuwaattama, khuwaasapa na khuwooza yoori: “Mwilankhe, mwihoove!”
MAT 17:8 Afunuliyeevo maasho khuhimooni hatha ntthu, khusala amoona Yinsa paasi.
MAT 17:9 Eettaka wiishukha vamwaako aphale, Yinsa khuwooza yoori: “Mwihimuuze hatha ntthu epile mooniyeeyo, mpakha Mwaana wa Pinaatamu asisimuwe muufwa.”
MAT 17:10 Anakhiyoni apale khumuuzela yoori: “Aphano mwaasa aya niini anamanozela a kano anlupaaye yoori enhithajiya Aliyaasi ota khapula?”
MAT 17:11 Yinsa khujipu yoori: “Wekhweele Aliyaasi onta arutisele vitthu zooshi.
MAT 17:12 Ila miiyo kiniwuuzani yoori Aliyaasi ata, yo khuhinjuwi, ila khunrettela zooshi epile atakhaziyeeyo. Khwa nanna etthiipo Mwaana wa Pinaatamu onttela ohoochiwa pi atthaapo.”
MAT 17:13 Aphano anakhiyoni apale khuweeleya yoori Yinsa aari olupa monkoni wa Yaahaya namoosa.
MAT 17:14 Wakathi afiyeevo aphale yaariivo khuntti etile ya atthu, mwinyi mmote khulawa aphale aariivo Yinsa khunkokhorela,
MAT 17:15 khumuuza yoori: “Mbwana, omoonele huruma mwanaka! Eetta wiiyana jilejile entta onhoocha. Swaafu zinki onkwela vamoottho ama mmaati.
MAT 17:16 Miiyo kawaatiseliye anakhiyoni awo, ila khuhiwahi onvonisa.”
MAT 17:17 Yinsa khuwaajipu yoori: “Oo khapila yootakhala na yoohiina amini! Mpakha lini kinttelaaye wiiya vamote na mweeyo? Mpakha lini kuuvilelakani? Mwikitiisele mwanenu apha!”
MAT 17:18 Aphano Yinsa khuruma yoori masheethwani ansaruwe, wakathi otthuupule mwaana otule khwiiya woovona.
MAT 17:19 Paata ya toole, anakhiyoni awe khunsusela Yinsa othetekele, khumuuzela yoori: “Mwaasa aya niini nahaakhitireliyeeyo wiikara?”
MAT 17:20 Ye khuwaajipu yoori: “Maana mweeyo amini mwiriina ttiitthiiru. Miiyo kiniwuuzani khweele yoori eriwaka mweettiye wiiyana amini nkhama phunje ya samuli, mweetta owahi wuuza mwaako opu yoori: ‘Oleevo apha weette aphale’ weetta olawa, na khina etthu moote ya haari weettelaaye owaheya khwa mweeyo.”
MAT 17:21 Ila vitthu epo zinta nkatthi wa lompa na ofuka paasi.
MAT 17:22 Siikhu moote Yinsa na anakhiyoni awe aakusanyeyiye Kalileya, ye khuwooza yoori: “Mwaana wa Pinaatamu onlawa enkheleliwe mmakhono wa atthu.
MAT 17:23 Yo anttela omuula, siikhu ya ttaatthu asisimuwe.” Anakhiyoni awe khuwaapattha huzuni.
MAT 17:24 Wakathi Yinsa na anakhiyoni awe afiiyeeyo Kafwaranaawu, anamariphisa lumpuru khulawa omuuzela Pheeturu yoori: “Mwaaliimu enu khanripha lumpuru la Nnyupa Woosifwiwamo?”
MAT 17:25 Pheeturu khuwaajipu yoori: “Onripha!” Nawiisha Pheeturu khuvira nnyupa, ahinattakhule hatha etthu, Yinsa khuri: “Simawu, onoona toovi? Paani anriphaaye lumpuru na tthuvo ya mfwalume wa olumwenku opu? Atthu a mmuti nttumphu ama aletto?”
MAT 17:26 Pheeturu khujipu yoori: “Aniiya aletto,” Yinsa khumuuza yoori: “Eto enthoonyeza yoori aana a mmuti ana yoohiriphi.
MAT 17:27 Ila yoori nihiweephirise, olawe mpahari wamweese nanjoolo awo. Swi ethiito ya mwanzo onttelaaye olowa, ofunule milomo zaya, ontta osikanamo nzurukhu mmote. Aphano olawe wariphe lumpuru laka na lawo.”
MAT 18:1 Wakathi otthuupule anakhiyoni khuta aphale aariivo Yinsa khumuuzela yoori: “Nwulweene zayita akina aya, ti paani muufwalume wa pinkuuni?”
MAT 18:2 Ye khunkhuwela nsimaana khunttha vakatthi vaya,
MAT 18:3 khuwooza yoori: “Miiyo kiniwuuzani khweele yoori, mweeyo noohithupwiyi na khuhijiretti wiiya nkhama nsimaana otu, khamwinteela weettamo muufwalume wa pinkuuni.
MAT 18:4 Wekhweele anjipushuwisaaye nkhama nsimaana otu, oto ti nwulweene aya muufwalume wa pinkuuni.
MAT 18:5 “Animpwekherelaaye nsimaana nkhama otu khwa nzina laka, onikipwekherela miiyo.
MAT 18:6 Wakhula otule aninkosisaaye mmote wa asimaana apa akikhupaliyeeyo, afwataali ofukeleliwa liwe loovalaza mmwisiko khutupweeziwa nkhilintti ya pahari.
MAT 18:7 Phoole olumwenku, mwaasa wa vitthu za okosisa. Maana khinivonyela ohirettikhani vitthu zaya epo, ila atakhaliwa ntthu otule anttelaaye wiiyana paathuli.
MAT 18:8 Nakataalikha nkhama nkhono awo ama muulu awo onuukosisa, oshije weesele! Maana afwataali weeyo weetta muuhaayi wa mileele ori woorakala ama woovujeya ehiiyeeni wiiyana makhono mawiri na moolu mawiri weeyo aya khweeseleliwa va moottho wa mileele.
MAT 18:9 Nkhama liisho lawo limote linuukosisa, olazemo weeselele peetiwene! Maana afwataali weeyo weetta muufwalume wa pinkuuni na liisho limote ehiiyeeni weeseleliwa motthooni na maasho mawiri.
MAT 18:10 “Phoole, mwihintarawu hatha mmote wa asimaana apa! Miiyo kiniwuuzani khweele yoori malayikha aya anoona wuuso wa Paapa wa pinkuuni wakhula wakathi.
MAT 18:11 Wekhweele Mwaana wa Pinaatamu ateela wuusuru etile yaashikhiyeeyo.
MAT 18:12 Niini onuupuwelaaye weeyo? Amana ntthu eeyana pwittipwitthi zawe miiya khumwaashikhavo moote, khanlikha epile tiisiya wa tiisiini omwaako alawa weekesa etile yaashikhiyeeyo?
MAT 18:13 Miiyo kiniwuuzani khweele yoori, amana asikana oniiya woofurahi mwaasa wa pwittipwitthi yawe etile, zayita epile tiisiya wa tiisiini zoohaashikhi.
MAT 18:14 Etthiipo theenya Paapeenu ariiye pinkuuni khanintakhela hatha nsimaana mmote waashikha.
MAT 18:15 “Amana ttwiiyo ookosa, olawe wanthoonyeze etile avonyiyeeyo, ila orette epo zaya weeyo na ye paasi. Amana ye asiila shawuri zawo, wamwaawuni ttwiiyo.
MAT 18:16 Ila amana ahuusiili, onthuule ntthu mmote ama awiri, ‘yoori khwa oshaahiti wa atthu awiri ama attatthu yoori nttakhuzi lihakikheye.’
MAT 18:17 Amana ye akatthala wuusiila, walupe vakatthi wa ojama wa Nluku. Amana ye akatthala osiileza theenya ojama wa Nluku, ontthantte nkhama kaafiri ama namariphisa lumpuru.
MAT 18:18 Kiniwuuzani khweele yoori, zooshi epile mweeyo mwinfukaaye vathi apha, ziniiya zoofukiwa pinkuuni, na zooshi mwinfukulaaye vathi apha ziniiya zoofukuliwa pinkuuni.
MAT 18:19 kiniwuuzani theenya yoori awiri a mweeyo amana mwikhupalelana vathi apha khwa wakhula etthu etile mwintakhaaye oveka, eniiya yoorettiwa ti Paapa ariiye pinkuuni.
MAT 18:20 Maana vahali ankusanyeyaavo atthu awiri ama attatthu khwa nzina laka, na miiyo kiniiya attaapho.”
MAT 18:21 Aphano Pheeturu khumwaattama Yinsa khumuuzela yoori: “Mbwana, amana ttwiiyaku akikosa kinswamihi swafu kavi? Swaafu sapa?”
MAT 18:22 Yinsa khunjipu araka: “Miiyo kiniwuuza yoori, khahiyo swaafu sapa, ila swaafu saapiini orutela swaafu sapa.
MAT 18:23 “Khwa toowo, Ofwalume wa pinkuuni ori nkhama mfwalume aari otakhaaye waattalela vitthu zawe na karumeya awe.
MAT 18:24 Wakathi aaziyeevo waattalela, khutiiseliwa mwinyi aari omwiilaaye milikhi za nzurukhu wa feeta.
MAT 18:25 Mwaasa wa ohiina nanna yonripha mbwana awe otule aari omwiilaaye, khuruma yoori; ye na muukhaawe, aanaawe na vitthu zawe zooshi, zuuzanyisiwe ariphe teeni.
MAT 18:26 Karumeya khukokhora omaasho wa mbwana awe khunvekela yoori: ‘Okivilele, kintta wuuripha.’
MAT 18:27 Mbwana awe khunhurumiya, khufuja teeni etile na khunlikha olawa.
MAT 18:28 Ila karumeya otule noosaruwa khukutthanana nshirikhaawe wa vakhaazi aari omwiilaaye nzurukhu miiya paasi. Ye khunzola nshirikhaawe mmwisiko khusala anvinya araka: ‘Okiriphe!’
MAT 18:29 Aphano nshirikhaawe otule khukokhora khusala anvekela yoori: ‘Okivilele, kintta wuuripha.’
MAT 18:30 Ila ye khuhikhupaleli, khurumisa olawa otthiiwa nkalapooso mpakha ariphe teeni yawe.
MAT 18:31 Wakathi ooniyeevo akarumeya apale akinoko vitthu epile zaarettikhaniyeeyo, khukatipukha channu na khulawa khumuuza zooshi mbwana aya.
MAT 18:32 Mbwana khunkhuwela karumeya otule khumuuza yoori: ‘Karumeya woohifwayi, weeyo wakivekela miiyo khuuswaamihi teeni yawo.
MAT 18:33 Weeyo khawaarina ya omoonela huruma nshirikhaawo nkhama miiyo kiwooneliyeezo?’
MAT 18:34 Mbwana awe khwiiphiriwa khunttha nkalapooso yoori ahukhumwiwe mpakha ariphe teeni yawe.
MAT 18:35 Paapa wa pinkuuni onttela oretta etthiipo, amana mweeyo mwihinswaamihi ttwiiyenu na rooho yenu yooshi.”
MAT 19:1 Yinsa eeshiyeevo olupa mattakhuzi apale, khulaawo Kalileya khweetta Yudeya kaapu kiina ya Yorotaani.
MAT 19:2 Khuntti khuluyeene khusala enlotta, atthaapale ye khuwaavonisa alwele.
MAT 19:3 Mafwarizeewu akina khuta aphale aariivo Yinsa yoori amweeze khumuuzela yoori: “Halaali nlume omwaasha muukhawe khwa wakhula kiiswa?”
MAT 19:4 Yinsa khuwaajipu araka: “Mweeyo khamwisomeeni yoori omwanzo, Nluku amumpa nlume na muukha,
MAT 19:5 na khulupa yoori: ‘Tiito, nlume onlikha papaawe na mamaawe khujikusanya na muukhaawe, oowiiri khuretteya wiiya mwiili mmote’?
MAT 19:6 Khwa etthiipo khaniiya awiri ila aniiya mwiili mmote. Aphano, etile Nluku akusanyiyeeyo ahiiyevo antakhaaye ophakula.”
MAT 19:7 Mafwarizeewu apale khumuuzela theenya yoori: “Aphano mwaasa aya niini Munsa enkhaka ruhusa ya nlume omwinkha talakha muukha awe na khumwaasha?”
MAT 19:8 Yinsa khuwaajipu yoori: “Munsa aruma yoori mweeyo mwimwaashe muukha enu mwaasa wa wuuma wa rooho zenu. Ila khazaari toowo omwanzweene.
MAT 19:9 Miiyo kiniwuuzani yoori: wakhula otule animwaashaaye muukha awe, woohiiyi mwaasa wa oraruwa, khunrala muukha nkina ontta oraruwa.”
MAT 19:10 Anakhiyoni a Yinsa khuri: “Nkhama pi etthiipo muukha na nlume, afwataali ohilooli.”
MAT 19:11 Yinsa khujipu yoori: “Khiriweeni atthu ooshi eetta wiiyana matakhelo ookhupalela mattakhuzi aya apa, ila otule enkhiweeyo paasi.
MAT 19:12 Alume akinoko afwa nkuwo, maana avokoliwa etthiipo; akinoko arettisiwa pi atthu azaaya; akina eetta ojirettisa mwaasa wa Ofwalume wa pinkuuni. Otule anwahaaye okhupalela vitthu epi, ti akhupalele.”
MAT 19:13 Paata ya vitthu epile, atthu akina khusala awaathuula asimaana nontanela Yinsa yoori awaattheele makhono na awaalompele. Ila anakhiyoni awe khusala awaamaruwela.
MAT 19:14 Aphano Yinsa khuri: “Mwiwaalikhe akiteele miiyo asimaana wala mwihiwaakhattaze; maana Ofwalume wa pinkuuni pi wa apale eeyiye nkhama atthaapo.”
MAT 19:15 Paata ya owaattheela makhono khulaavo aphale vaya khulawa.
MAT 19:16 Ntthu nkina khumwaattama Yinsa khumuuzela yoori: “Mwaaliimu, kirette niini yooshapweya yoori kipatthe ohaayi wa mileele?”
MAT 19:17 Yinsa khunjipu yoori: “Mwaasa aya niini weeyo okuuzelaka etthu yiiyiye yooshapweya? Owaapho ntthu mmote paasi eeyiyeeyo wooshapweya. Nkhama weeyo ontakha weetta muuhaayi wa mileele, oshututele mirumo.”
MAT 19:18 Ntthu otule khumuuzela Yinsa yoori: “Piivi?” Yinsa khunjipu araka: “Ohuule, ohiraruwe, ohiiye, ohilaze oshaahiti woovonyeya,
MAT 19:19 onshitahi papaawo na mamaawo, na omphete namwaattamanana awo nkhama etthiipo onjiphetaazo omweenyewe.”
MAT 19:20 Shapu otule khujipu yoori: “Miiyo kinshututelaka mirumo zooshi. Khi niini enikisaleelaaye nalelo?”
MAT 19:21 Yinsa khunjipu yoori: “Nkhama weeyo ontakha wiiya khaamili, olawe woozanyise zooshi oriinaaye, nzurukhu aya owenkhe asikhini, orettaru toowo ontta wiiyana njuju pinkuuni. Nawiisha, ote okilotte.”
MAT 19:22 Noosiila mattakhuzi apale shapu otule khwiiya woohuzunikha, maana aarina maali zawaatta.
MAT 19:23 Aphano Yinsa khuwooza anakhiyoni awe araka: “Kiniwuuzani khweele yoori, ti yoolipa thaajiri weetta muufwalume wa pinkuuni.
MAT 19:24 Ila ti yookhweya enkamiiya ovira valiphotto wa sikano zayita thajiri weetta muufwalume wa Nluku.”
MAT 19:25 Anakhiyoni a Yinsa asiiliyeevo mattakhuzi apale, khwiiya ooshanka na khumuuzela yoori: “Khwa nanna nkhama eto paani anttelaaye wuusurukha?”
MAT 19:26 Yinsa khuweekesa na khuwaajipu yoori: “Khwa pinaatamu khinwaheya, ila wa Nluku vitthu zooshi zinwaheya.”
MAT 19:27 Aphano Pheeturu khujipu yoori: “Fweeyo nalikha zooshi yoori nuulotte. Ninttela wiiya niini fweeyo?”
MAT 19:28 Yinsa khuwooza araka: “Miiyo kiniwuuzani khweele yoori, amana ofiya wakathi Nluku anttelaaye waattala zooshi opheeya na Mwaana wa Pinaatamu eekhala va khukulu ya siifwa zawe, mweeyo mwinikilottaaye mwinttela wiikhalela khukulu khumi na piiri yoori mwiphuke mahimo khumi na mawiri a Ezirayiilu.
MAT 19:29 Ooshi apale alikhiyeeyo vaje vaya, attwi zaya, alupu aya, apapazaya, aanaaya ama mashapa aya, mwaasa wa miiyo, anlawa apwekhere swaafu miiya na orithi ohaayi wa mileele.
MAT 19:30 Khwa etthiipo, apale amwanzo anttela wiishela, na apale awiishela anttela wiiya amwanzo.
MAT 20:1 “Maana Ofwalume wa pinkuuni ori nkhama mweenyewe nshapa alankhiyeeyo supuyeene olawa oweekesa atthu yoori akhole khaazi mmashapa mwawe.
MAT 20:2 Ye khusiilanana yoori awaariphe nzurukhu mmote wa feeta wakhula siikhu, khuwaaruma olawa omashapa wawe.
MAT 20:3 Wakathi opule wa sattaatthu, ye khulankha khusala alawa khuwoona atthu akina ari ohiina khaazi eekhaliye vaparasa.
MAT 20:4 Aphano khuwooza yoori: ‘Mwilawe mweeyo theenya mwakhole khaazi mmashapa mwaka la wuuva, miiyo kintta wuuriphani etile enttelaaye wiiya ya shariya.’
MAT 20:5 Apale khulawa, khulankha theenya wakathi opule wa atuhuri na wakathi opule wa saakhentta, khuretta nanna nkhama etthiipile.
MAT 20:6 Etthiipo wakathi wa sakhumi na monsi, ye khurutelawo khuwaasikana theenya akina ahaariina khaazi na khuwoozela yoori: ‘Mwaasa aya niini mweeyo mwiiyaka apha mwihikholaka khaazi siikhu yooshi?’
MAT 20:7 Khunjipu yoori: ‘Maana khina mmote aninkhiyeeyo khaazi’. Aphano khuwooza apale aya yoori: ‘Ettani na mweeyo mwakhole khaazi mmashapa mwaka.’
MAT 20:8 Weettelaka oripa, mweenyewe nshapa khumuuza waziri awe yoori: ‘Owaakhuwele anakhaazi na owaariphe phakari yaya, owaazaka apale awiishela mpakha apale a mwanzo.’
MAT 20:9 Khuta anakhaazi apale aattakhulaniweeyo wakathi wa saakhumi na monsi na wakhula ntthu khupwekhera nzurukhu mmote wa feeta.
MAT 20:10 Wakathi atiiyeevo apale aattakhulaniweeyo mwanzo, aari weekesela opwekhera wawaatta, ila wakhula mmote aari opwekhera nzurukhu moote.
MAT 20:11 Apwekheriyeevo khwaaza omwaapa mweenyewe nshapa,
MAT 20:12 amuuzaka yoori: ‘Mamwinyi apa wawaattakhulana yoori akhole khaazi ya wakathi mmote, weeyo mbwana onnilikanisana fweeyo nivileliyeeyo olemela wa khaazi na haari ya nthana wooshi.’
MAT 20:13 Ila ye khujipu yoori: ‘Swaahipu, akiniwiimana shariya. Khawaakhupaleliye okhola khaazi ya opwekhera nzurukhu moote?
MAT 20:14 Opwekhere etile yiiyiye yawo olawe. Miiyo kintakha omwinkha otule kaattakhulaniyeeyo wawiishela nkhama etthiipo kiwinkhiyeeyo.
MAT 20:15 Akina ruhusa ya orettela etile kintakhaaye nzurukhu aka? Ama weeyo ona nrima mwaasa wa miiyo wiiya nkemaani?’
MAT 20:16 Aphano Yinsa khumarisa araka: Apale amwanzo anttela wiishela na apale awiishela anttela wiiya amwanzo.”
MAT 20:17 Awelelaka Yeruzaleemu, Yinsa khuwaakhuwela othetekele anakhiyoni awe apale khumi na awiri, khuwooza yoori:
MAT 20:18 “Mwisiile! Ninwelela Yeruzaleemu, Mwaana wa Pinaatamu onttela winkheleliwa mmakhono wa mahaakhimu a tiini na anamanozela a kano, yo anhukhumwele wuuliiwa,
MAT 20:19 enkheleliwe mmakhono wa amalapo anveyise, anjaphe na akhomeliwe. Ila siikhu ya ttaatthu asisimuwe.”
MAT 20:20 Aphano maama wa aana a Zepeteewu khumwaattama Yinsa na khukokhora khusala anvekela.
MAT 20:21 Yinsa khumuuzela yoori: “Weeyo ontakhani?” Maama otule khujipu yoori: “Kintakha yoori muufwalume mwawo aanaaka apa awiri mmote eekhale nkhono nlume nkina nkhono nkha.”
MAT 20:22 Yinsa khunjipu yoori: “Mweeyo khamwinjuwa etthu mwinvekaaye. Mwinwahi onywela koopho ethiiti kinttelaaye onywela?” Yo khujipu, “ninwahi.”
MAT 20:23 Aphano Yinsa khuri: “Weekhweele mweeyo mwinteela onywela koopho yaka, ila wiikhala nkhono nlume aka ama nkhono nkha khahiiyo miiyo kinlupaaye. Maana puuro eto ti yawe otule aattaleliweeyo ti Paapa.”
MAT 20:24 Wakathi apale akina khumi asiiliyeevo mattakhuzi apale, khwiiya ookasirikha khwa attwi apale awiri.
MAT 20:25 Aphano Yinsa khuwaakhuwela khulupa yoori: “Mwijuwe yoori anamalokozela a khapila anshintta, na attunkhulu aya anthoonyeza ofwalume khwa yo.
MAT 20:26 Mweeyo mwihiiye toowo, ila otule antakhaaye wiiya wa fwayita awaarumeyele azaawe;
MAT 20:27 na otule antakhaaye wiiya wa mwanzo eeye mwiitthwaana enu mweeyo.
MAT 20:28 Nkhama etthiipo, Mwaana wa Pinaatamu khateleeni orumeyeliwa, ila orumeya na winkha ohaayi awe khwa owaakaphula atthu awaatta.”
MAT 20:29 Yo alankhaka Yeriko, atthu awaatta khusala awaalotta.
MAT 20:30 Atthu awiri oohooni eekhaliye nshini wa tarikhi, wakathi asiiliyeevo yoori Yinsa ontta ovira, khwaaza onyakula araka: “Mbwana, Mwaana wa Daawuuda, noonele huruma!”
MAT 20:31 Atthu apale awaatta khusala awaakhattaza, awaatakhelaka yoori anyamale, ila khusala atepa onyakula araka: “Mbwana, Mwaana wa Daawuuda, noonele huruma!”
MAT 20:32 Yinsa khweemela khuwaakhuwela khuwoozela yoori: “Mweeyo mwintakha yoori miiyo kuuretteleni niini?”
MAT 20:33 Yo khujipu yoori: “Mbwana, nintakha noone.”
MAT 20:34 Yinsa khuwoonela huruma na khuwaasapa maasho aya, nasaapiru khwaaza woona khusala anlotta.
MAT 21:1 Ari kharipu ya Yeruzaleemu, khufiya Betifwaaje, va mwaako Oluveera, Yinsa khuwaaruma anakhiyoni awe awiri khuwooza yoori:
MAT 21:2 “Mwilawe nti opo mwinoonaaye omaasho wenu okho, mwinlawa mwansikane mwaana wa puuru weekha afukiwe vamote na weelume. Mwinfukule mwikitiisele.
MAT 21:3 Amana apuwa ntthu awuuzelani, mwimuuze yoori Mbwana ontta owaatakha, ontta wuulikhani nasaapiru mwiwaathuule.
MAT 21:4 Vitthu epo zarettikhana yoori emarisele etile alupiyeeyo napiyu yoori:
MAT 21:5 “Muuze sitati ya Siyooni yoori: ‘Omoone, mfwalume awo ontta wuuteela, woojipushuwisa, aweliye va mwaana wa puuru, nyama yoopakhira.’”
MAT 21:6 Anakhiyoni khuretta etile aarumiweeyo ti Yinsa.
MAT 21:7 Khuntiisa puuru yeekha na mwaana aya nttitthiiru, aphano khutthiiwavo kuwo zawe, ye khuwelavo.
MAT 21:8 Atthu apale awaatta aari onlottaaye khusala attattikha ajapi zaya ntarikhi, akina khusala ashija virapi za miitthi na ottattikha ntarikhi.
MAT 21:9 Apale aalokoziyeeyo na apale aari onlottaaye eetta onyakula araka: “Ozaana khwa mwaana wa Daawuuda! Wooparikhiyiwa ti otule antaaye khwa nzina la Mbwana! Ozaana wa pinkuuni.
MAT 21:10 Wakathi Yinsa aviriyeevo Yeruzaleemu, sitati yooshi khutapanyeya, atthu khusala oozeliwa yoori: “Paani otu aya?”
MAT 21:11 Yo khusala ajipu yoori: “Otu ti Yinsa, napiyu wa Nazareeti ya Kalileya.”
MAT 21:12 Yinsa khuvira Nnyupa Woosifwiwamo, khuwiikaramo ooshi apale aari wuuzanyisaye na apale aari wuuzanyaaye. Khukurumula meeza a anamapatilisa nzurukhu na khateera za apale aari wuuzanyisaaye jiwa.’
MAT 21:13 Khuwooza araka: “Yaatikhiwa yoori; ‘Nyuupa yaka enttela wiitthiwa nyuupa yoosifwiwamo, ila mweeyo mwaretta wiiya puuro ya anamwiiya.
MAT 21:14 Ananhooni na anamarakala khumwaattama Yinsa Nnyupa Woosifwiwamo, ye khuwaavonisa.
MAT 21:15 Mahaakhimu a tiini na anamanozela a kano ooniyeevo vitthu zootikinisa Yinsa aari orettaazo na aasimana aari okhuwaaye araka: “Ozaana mwaana wa Daawuuda!” khushanka khusala oozela yoori:
MAT 21:16 “Onsiila epi anlupaazo apa?” Yinsa khuwaajipu yoori: “Aaa; mweeyo khamwina some yoori: ‘Khwa nlimi la asimaana na apale anamwaaye antthenkeza siifwa khaamili?’”
MAT 21:17 Yinsa khuwaalikha, khulaamo nsitati mphule khulawa Betaaniya ottuukho aalaliiyeewo.
MAT 21:18 Mmeesho mwaya supuyeene, arutelaka ositati, khunkhola jala.
MAT 21:19 Khoona nfikeera nshini wa tarikhi, khwaattama ila khuhisikanani hatha mishumo, khusikanamo mathaparu paasi, aphano khuri: “Weeyo khunteela wiima theenya mishumo!” Nfikeera opule khuuma nasaapiru.
MAT 21:20 Anakhiyoni awe ooniyeevo epile zaarettikhaniyeeyo, khwiiya ooshanka na ootikinisiwa alupaka yoori: “Wooma toovi nasaapiru nfikeera opu?”
MAT 21:21 Yinsa khuwaajipu yoori: “Kiniwuuzani khweele yoori, amana mwiiyana amini na woohiina nshikili, mwinttela oretta woohiiyi epi zirettikhaniyeeyo khwa nfikeera opu paasi, ila hatha wuuza mwaako opu yoori okhuleye ojeeselele mpahari, zintta orettikhana.
MAT 21:22 Amana mwiiyana amini mwinpwekhera zooshi mwinttelaaye oveka khwa lompa.
MAT 21:23 Paata ya Yinsa ofiya Nnyupa woosifwiwamo, eettaka osomisa, mahaakhimu a tiini na attunkhulu a tiini khumwaattama khumuuzela yoori: “Vitthu epi onrettana ofwalume-ni? Wala ti paani awinkhiyeeyo ofwalume aya opu?”
MAT 21:24 Yinsa khuwaajipu yoori: “Miiyo kintta owuuzelani theenya; amana mwikijipu, kintta owuuzani ofwalume kinrettanaaye vitthu epi.
MAT 21:25 Woosa wa Yaahaya waari wa vayi? Wa pinkuuni ama wa anaatamu?” Yo khusala akheetisana atthaapo-ru araka: “Amana niri waari wa pinkuuni, ye ontta onuuzela yoori ‘khi mwaasa aya niini mwihikhupalelaka?’
MAT 21:26 Ila amana nilupa yoori pi wa anaatamu, niniwoova atthu, maana ankhupalela yoori Yaahayanapiyu.”
MAT 21:27 Yo khunjipu Yinsa yoori: “Khanijuweeni.” Ye khuwooza theenya yoori: “Hatha vattitthiiru akiniwuuzani owahi kinrettanaaye vitthu epi.”
MAT 21:28 Mwinoona toovi? Aarivo mwinyi mmote aariina aana awe awiri. Khumweettela otule wa mwanzo khumuuza yoori: ‘Mwanaka, etta wakhole khaazi leelo omashapa.’
MAT 21:29 Khujipu yoori: ‘Akeepu!’ Ila khuupuwela khulawa okhola khaazi etile ooziweeyo.
MAT 21:30 Paapa otule khumwettela mwanawe otule nkina khumuuza nkhama etthiipo amuziyeeyo otule nkina. Mwaana otule khujipu yoori: ‘Kintta olawa mbwana aka!’ Ila khuhilawi.
MAT 21:31 Khwa aana apale awiri ti tuuvi arettiyeeyo matakhelo a papaawe?” Khujipu yoori: “Otule wa mwanzo.” Yinsa khuwooza yoori: “Kiniwuuzani khweele yoori, anamariphisa lumpuru na amalempe antta weetta muufwalume wa Nluku mweeyo mwihineettemu.
MAT 21:32 Maana Yaahaya ata yoori oothonyezeni tarikhi ya shariya, mweeyo khuhinkhupaleli, ila anamariphisa lumpuru na amalempe ankhupalela. Mweeyo moona vitthu epile khuhithupwiyi na wala khuhinkhupaleli.
MAT 21:33 “Mwisiile nlikaniso nkina: Aarivo thaajiri mmote wa mmuti nttumphule aalimiyeeyo nshapa lawe la wuuva. Khujekelela looshi, khwaattala kulaathayini ya onluwatthelamo wuuva na khujeka korofwa ya namweekesela. Khuwaalikhela anamalima apale akina, khulaamo mmuti mphule, khusala alawa safwari yawe.
MAT 21:34 Ofiyeevo wakathi wa wuurula, khuwaaperekha akarumeya awe khwa anamalima apale, yoori apwekherele mishumo zawe.
MAT 21:35 Anamalima khuwaakhola akarumeya a mweenyewe nshapa apale; mmote khunvulalisa, nkina khumuula, wattaatthu khunvonya na mawe.
MAT 21:36 Aphano khuwaaperekha akarumeya awe akina awaatta, anamalima apale khuwaatthantta nkhama etthiipo awaatthanttiyeezo apale akina.
MAT 21:37 Omwiisho khumperekha mwanawe alupaka yoori: ‘Mwanaka otu antta onshitahi.’
MAT 21:38 Ila anamalima amoniyeevo mwaana otule, khulupa yoori: ‘Otu namarithi. Mwite, nimuule nithuule eritho yawe.’
MAT 21:39 Attaaphale yo khunkhola khumweeselela othetekele wa nshapa khumuula.
MAT 21:40 Amana ata mweenyewe nshapa, onttela owaarettela niini anamalima apale?”
MAT 21:41 Yo khujipu yoori: “Wekhweele ontta owoola anamalima apale ootakhala rooho na awenkhe anamalima akina nshapa laya. Apa nka amwinkhaka phantte ya mishumo wakathi wa wuurula.”
MAT 21:42 Yinsa khuwoozela yoori: “Khamwinasome zawaatikhiwa Ttakatthiifu yoori: ‘Liwe anamajeka akatthaliyeeyo, nttho tthi liyiiyeeyo liwe linkhomaazaaye; eto enta wa Mbwana, na etthu yooshapweya khwa fweeyo.’
MAT 21:43 Paata ya toowo kiniwuuzani yoori Ofwalume wa Nluku mwinttela onyakanyiwa enkhiwe apale animaaye mishumo za Ofwalume.
MAT 21:44 Otule anttelaaye okwela liwe laya ntthi ontta othapateya, na otule linttelaaye onkhwela ontta othatuwa lifufu.
MAT 21:45 Mahaakhimu a tiini na mafwarizeewu, asiiliyeevo milikaniso za Yinsa, khuweeleya yoori aari ottakhula monkoni wa yo.
MAT 21:46 Khusala eekesa nanna ya onkhola ila khusala awoova atthu, maana aari onjali nkhama napiyu.
MAT 22:1 Yinsa khurutela owooza milikaniso araka:
MAT 22:2 “Ofwalume wa Pinkuuni onlattanana mfwalume mmote atthekeziyeeyo njampo la harusi ya mwanawe.
MAT 22:3 Aphano khuwaaruma akarumeya awe olawa owaakhuwela anamalaleyiwa yoori ate onjampo; ila yo khuhitakhi ota.
MAT 22:4 Khuwaaruma theenya akarumeya akina araka: ‘Mwawooze anamalaleyiwa yoori: Njampo lalikana; mompe zaka na aana aya ooneneva kashija na zooshi zalikana. Mwite onjampo la harusi.’
MAT 22:5 Ila yo khuhijali khusala alawa, mmote omashapa wawe, mmote nzanshara mwawe,
MAT 22:6 apale asaliyeeyo khuwaakhola akarumeya khuwaahukhumu na khuwoola.
MAT 22:7 Ila mfwalume khwiiya wawiiphiriwa, khuwaaruma anajanka awe olawa owaatapanya anamahusuti apale na khulukuza sitati yaya etile.
MAT 22:8 Aphano khuwooza akarumeya awe yoori: ‘Njampo lalikana, ila anamalaleyiwa khaari osuhi.
MAT 22:9 Mwilawe mmizukulowo za tarikhi mwawaalaleye ooshi apale mwinttelaaye owaasikana.’
MAT 22:10 Aphano akarumeya apale khulawa mmatarikhi na khuwaakusanya atthu ooshi apale awasikaniyeeyo, atthu ooshapweya rooho na atthu ootakhala rooho, nsana waari ojiwaavo njampo khwiiya wawiitaala pi anamalaleyiwa.
MAT 22:11 “Wakathi mfwalume aviriyeevo yoori awoone anamalaleyiwa apale, khumoona mwinyi mmote ahaawaliyeeyo kuwo za njampo.
MAT 22:12 Khumuuzela yoori: ‘Swaahipu, wavira toovi ohiwaleeni kuwo za njampo?’ Mwinyi otule khwiiya woonyamala.
MAT 22:13 Aphano mfwalume otule khuwaaruma akarumeyaawe yoori: ‘Mwinfuke moolu awe na makhono awe mwimweeselele vaje, n'yiiza; nttumpho oniiyamo olila na oluma meeno’.
MAT 22:14 Maana awaatta pi ookhuweliwa, ila vattitthiiru pi oothawuliwa”.
MAT 22:15 Mafwarizeewu khulaavo aphale vaya, khusala awaza shawuri zonvithaalela khwa mmattakhuzi awe.
MAT 22:16 Khuwaaruma anakhiyoni aya na atthu akina a khuntti ya Herooti khusala amuuza Yinsa yoori: “Mwaaliimu, fweeyo najuwa yoori weeyo onlupa khweele na onsomisa na khweele tarikhi ya Nluku, khunjilikha othowelelisiwa ti ntthu, wala khuniwaaphuka atthu khwa nanna ariizo.
MAT 22:17 Nkanuuze, ona shawuri ni? Ti ya shariya onripha lumpuru Seezari ama wala?”
MAT 22:18 Yinsa khujuwa thwapiya zaya zootakhala khuwaajipu yoori: “Manaafikhi, mwaasa aya niini mwikeezaka?”
MAT 22:19 Mwikithoonyeze nzurukhu onriphiwaaye lumpuru.” Khutiiseliwa nzurukhu mmote wa feeta.
MAT 22:20 Ye khuwoozela yoori: “Ratarato eti na nzina ntthi laatikhiweeyo apha tthi laani?”
MAT 22:21 Khujipu yoori: “Seezari”. Aphano khuwooza yoori: “Mwimwinkhe Seezari etile yiiyiye ya Seezari na mwimwinkhe Nluku etile yiiyiye ya Nluku.”
MAT 22:22 Asiiliyeevo mattakhuzi apale, khwiiya ootikinisiwa na khulikha wuuzela khusala alawa.
MAT 22:23 Siikhu ethiitile, khunteela masatukhi akina anlupaaye yoori khawiivo osisimuwa, khusala amuuzela yoori:
MAT 22:24 “Mwaaliimu, Munsa alupa yoori: ‘Amana ntthu afwa, muukha awe ahinvokoleleeni mwaana, ttwiiye ona ya onrala namafweliwa ti mannawe yoori amwinkhe aana ttwiiye otule afwiiyeeyo.
MAT 22:25 Fweeyo naari attwi sapa. Wamwanzo khuloola na khufwa. Muukha awe khanvokoleliye mwaana, khuraliwa ti ttwiiye.
MAT 22:26 Khurettikhana nkhama zanrettikhaneliyeeyo otule wa mwanzo na wa ttaatthu mpakha otule wa saapa.
MAT 22:27 Omwiisho waya paata ya ooshi ofwa, na muukha khufwa.
MAT 22:28 Aphano, wakathi woosisimuwa, khwa alume apale sapa ti tuuvi anttelaaye wiiya mannawe? Maana ooshi anraliye.”
MAT 22:29 Yinsa khuwaajipu yoori: “Mweeyo mwathowelela, maana khamwinjuwa Zawaatikhiwa Ttakatthiifu wala owahi wa Nluku.
MAT 22:30 Maana wakathi woosisimuwa atthu khanloola wala khanlooziwa; anttela wiiya nkhama malayikha pinkuuni.
MAT 22:31 Khwa osisimuwa wa ananfwa, mweeyo khamwisomeeni etile Nluku alupiyeeyo yoori:
MAT 22:32 ‘Miiyo ki Nluku wa Eburahiima wa Esiyaakha na wa Yaakhumpa?’ Ye khahiyo Nluku wa ananfwa, ila wa atthu awoona.”
MAT 22:33 Asiiliyeevo mattakhuzi apale, atthu khwiiya ooshanka khwa osomisa wawe.
MAT 22:34 Paata ya mafwarizeewu ojuwa khuwaanyamaza masatukhi, khukusanyeya.
MAT 22:35 Mmote wa yo, namanozela kano khweeza omuuzela yoori:
MAT 22:36 “Mwaaliimu, nrumo nwulu pi puuvi?”
MAT 22:37 Yinsa khunjipu yoori: “Omphete Mbwana Nluku awo khwa rooho yawo yooshi, khwa nafusi yawo yooshi na akhili zawo zooshi.
MAT 22:38 Opu pi wiiyiyeeyo oruma wa mwanzo na wootepa owula.
MAT 22:39 Waphiiri onlattanana otthuupu: omphete nzaawo nkhama etthiipo onjiphetaazo omweenyewe.
MAT 22:40 Kano zooshi za Munsa na masomi ooshi amanapiyu anrumeyela mirumo etthiipi miwiri.”
MAT 22:41 Mafwarizeewu apale nalelo ari okusanyeya, Yinsa khuwoozela yoori:
MAT 22:42 “Mwinuupuwelani monkoni wa Al-Masiihu? Mwaana waani?” Yo khujipu yoori: “Mwaana wa Daawuuda.”
MAT 22:43 Yinsa khuwoozela theenya yoori: “Aphano, khi toovi Daawuuda khwa Rooho Ttakatthiifu omwiittha yoori Mbwana, alupaka yoori:
MAT 22:44 ‘Mbwana amuuza Mbwana aka yoori: “Wiikhale nkhono nlume aka mpakha maatuwi awo kiwaatthe vathi wa moolu awo?”’
MAT 22:45 Nkhama Daawuuda onimwiittha yoori Mbwana, enrettikhana toovi eeyaka mwanawe?”
MAT 22:46 Khuhiivo mmote awahiyeeyo onjipu, na waaza siikhu ethiitile khina nkina awahiyeeyo omuuzela theenya.
MAT 23:1 Aphano Yinsa khuwooza atthu apale na anakhiyoni awe yoori:
MAT 23:2 “Anamanozela a kano na mafwarizeewu eekhalela khukulu ya Munsa.
MAT 23:3 Mwiwaashututele na mwithokorele zooshi epile aniwuuzaanini. Ila mwihiweezele vitthu anrettaazo. Maana khanrumeyela epile anlupaazo.
MAT 23:4 Yo anfuka maphuta oolemela na ottikha mmafuzi wa atthu, ila yo khantakha hatha oshashula na yaala.
MAT 23:5 Zooshi anrettaazo antakha yoori ooniwe pi anaatamu. Yo anjifukela hirizi mmwishwa mwaya, na olepisa mashaka a ajapi zaya.
MAT 23:6 Owaatuvela puuro zooshapweya za vanjampo na wiikhala wiilokozi nsinakooka,
MAT 23:7 owaatuvela ochelisiwa vamwanttiwa na wiitthiwa Mwaaliimu.
MAT 23:8 Mweeyo khamwinlawa wiitthiwa Mwaaliimu, maana Mwaaliimu enu mmote paasi, mweeyo mooshi mwa attwi.
MAT 23:9 Ahiiyevo vathi apha mwinttelaaye omwinkha khalamu ya ‘opaapa’, maana Papeenu ori mmote paasi, otule ari pinkuuni.
MAT 23:10 Wala ahiiyevo anttelaaye omwinkha khalamu ya namanozela maana namanozela ori mmote paasi, Al-Masiihu.
MAT 23:11 Ila otule eyiiye nwulu vakatthi venu eeye karumeya.
MAT 23:12 Otule anjiwulisaaye ontta opushuwisiwa; otule anjipushuwisaaye ontta owulisiwa.
MAT 23:13 Olaanikha pi weenu mweeyo anamanozela a kano na mafwarizeewu, manaafikhi, maana mwiniwafukela atthu Ofwalume wa pinkuuni, ila na mweeyo khuheettimo na khamwintakha owaalikha weettamo apale antakhaaye!
MAT 23:14 Olaanikha pi wenu mweeyo anamanozela a kano na mafwarizeewu, manaafikhi, maana mwimpala maali za anamfweliwa pi amannazaya na ojitapwatelana oretta lompa zoolepa; khwa etthiipo mwinteela ohukhumwiwa saaneene.
MAT 23:15 Olaanikha pi wenu mweeyo anamanozela a kano na mafwarizeewu, manaafikhi, maana mweeyo mwinlokha pahari na mwineettetta nti wooshi mweekesaka owaathuula atthu mwiwaatthe ntiini mwenu. Na amana mwimpattha ntthu aya oto onretteya swaafu piiri wiiya mwaana wa motthooni zayita mweeyo.
MAT 23:16 Olaanikha pi wenu mweeyo, anamalokozela oohooni! Maana mwinlupa yoori: ‘Amana ntthu alapha khwa omwimpari, eto khina maana. Ila amana ntthu alapha khwa thahapu ya omwimpari oto ona sharuthi ya oretta etile alaphiyeeyo.’
MAT 23:17 Alolo oohooni! Eriina fwayita ti tiivi, thahapu ama mwimpari opule onttakatthisaaye thahapu?
MAT 23:18 Mweeyo mwinlupa theenya yoori: ‘Amana ntthu alapha khwa nzina la alitaari, olapha waya opo khuna maana, ila ntthu amana alapha khwa zaakha etile eriiye vatulu vaya, oto ona yoorumeyela olapha wawe.’
MAT 23:19 Atthu oohooni, eriina fwayita ti tiivi, zaakha ama alitaari anttakatthisaaye zaakha?
MAT 23:20 Nakataalikha otule anlaphaaye khwa alitaari onlapha khwa alitaari na yooshi etile eriivo.
MAT 23:21 Amana ntthu alapha khwa mwimpari, onlapha khwa mwimpari na khwa otule aniikhalaaye nttumpho.
MAT 23:22 Na otule anlaphaaye khwa pinku onlapha khwa khukulu ya Nluku na khwa otule ekhaleliyeeyo.
MAT 23:23 Olaanikha pi wenu mweeyo anamanozela a kano na mafwarizeewu, manaafikhi, maana mweeyo mwinimwinkha Nluku lifunku la khuumi mpakha vitthu za nwoorotha na mwinimwinkha nyaani zootuva na samuli, ila mwinkhijilela oruma wa fwayita wa kano, wiiyiye: Shariya, huruma na waamineya, nakataalikha mwaarina ya oretta epo zaya woohiweraweri epile kiina.
MAT 23:24 Anamalokozela oohooni! Mwinshuja kuuku, ila khumiza enkamiiya.
MAT 23:25 Olaanikha pi wenu mweeyo, anamanozela a kano na mafwarizeewu, manaafikhi, maana mweeyo mwinoosa pilawuri na parathu oje waya, ila nkatthi mwenu weetaalamo wiiya na omaashokopho.
MAT 23:26 Mafwarizeewu ohooni, moose khapula pilawuri nkatthi mwaya, aphano phantte etile ya oje entta wiiya yooshapweya.
MAT 23:27 Olaanikha pi wenu mweeyo, anamanozela a kano na mafwarizeewu, manaafikhi, maana mweeyo mwiri nkhama vilalo yoovaaziwa khinampo, oje waya enumpuwaaye nkhama yooshapweya, ila nkatthi mwaya eetaaliyemo makhonkolo alupa ofwa na wakhula nanna ya vitthu zoovutta.
MAT 23:28 Oje wenu mwinuupuwa nkhama anashariya, ila nkatthi mwenu mweetaala onaafikhi na vitthu zootakhala.
MAT 23:29 Olaanikha pi wenu mweeyo, anamanozela a kano na mafwarizeewu, manaafikhi, maana mwinjeka khapuri zooshapweya za manapiyu, khuretta wiiya vilalo za akemaani.
MAT 23:30 Mwinlupa yoori: ‘Eriwaka neettiye wiiyavo wakathi wa amarehemu apapazetthu, khanaari wiiyana phantte khwa yo ya owoola manapiyu?
MAT 23:31 Etthiipo, mweeyo mwinjilawela oshaahiti yoori mwa aana a apale awooliyeeyo manapiyu.
MAT 23:32 Mwilikhe wiitaaza mphimo wa twampi za amarehemu apapazenu.
MAT 23:33 Nyookha! Ojama wa evili! Mwinttela owerawera toovi hukhumu ya motthooni?
MAT 23:34 Tiito miiyo kooperekhezani manapiyu, ajuwi na anamanozela a kano. Akina mwiwoole, mwiwaakhomele, mwiwaajaphe nsinakooka mwenu na mwiwaalupatthe sitati khwa sitati.
MAT 23:35 Khwa etthiipo eniwiittikhelani taamu yooshi ya anashariya yiittikheliyeeyo vathi, waaza taamu ya nashariya Apeele, mpakha taamu ya Zakariiya mwaana wa Barakiiya, mwimuuliyeeyo vakatthi wa omwimpari na alitaari.
MAT 23:36 Miiyo kiniwuuzani khweele yoori, zooshi epo ziniwateela atthu aleelo.
MAT 23:37 Yeruzaleemu, Yeruzaleemu, weeyo oniwuula manapiyu na owaavonya apale aperekhiweeyo! Swaafu kavi miiyo kitakhaka owaakusanya aana awo nkhama mwanakhu aniwaakusanyaazo aana awe mmapaphelo, ila mweeyo khuhitakhi.
MAT 23:38 Moone, yoori nyuupa yenu enttela wiiya yoothamiwa.
MAT 23:39 Maana miiyo kiniwuuzani yoori, mweeyo khamwinteela okoona theenya, mpakha mwilupe yoori: ‘Wooparikhiyiwa ti otule antaaye khwa nzina la Mbwana.’”
MAT 24:1 Yinsa khusaruwa Nnyupa Woosifwiwamo, khusala alawa, anakhiyoni awe khumwaattama yoori anthoonyeze manyupa apale ooshapweya.
MAT 24:2 Yinsa khuwooza yoori: “Mweeyo mwinoona ooshi apa? Weekhweele miiyo kiniwuuzani yoori khalinsalavo apha liwe vatulu wa liwe lihinttelaaye opwechiwa.”
MAT 24:3 Wakathi Yinsa eekhaliyeevo va mwaako Oluveera, anakhiyoni khulawa khwiitthaalana othetekele na khunvekela yoori: “Nkanuuze, zinttela orettikhana lini vitthu zaya epo, wala amana otaaka, alama-ni enttelaaye wiiyavo na alama-ni ya mwiisho wa olumwenku?”
MAT 24:4 Ye khuwaajipu yoori: “Phoole, ti ahiiyevo hatha ntthu anttelaaye wuuttettekhani!
MAT 24:5 Maana atthu awaatta anlawa ate khwa nzina laka, alupaka yoori: ‘Miiyo ki Al-Masiihu’ na owaattettekha atthu awaatta.
MAT 24:6 Amana mwisiila hapari za viittha ama nzuuzu la viittha, mwihoove.
MAT 24:7 Khapila enttela wuumanana khapila kiina, ofwalume na ofwalume nkina, enttela opuwa esikinyaatthi na jala phantte zawaatta.
MAT 24:8 Zooshi epo yaazo ya vitthu za olwaaza.
MAT 24:9 Aphano yo anteela owinkhelelani yoori mwilupatthiwe na muuliwe, mwinlawa mweeniwe ti khapila zooshi mwaasa wa nzina laka.
MAT 24:10 Wakathi aya opo, atthu awaatta anteela wanswi amini anttela wiiya anamazinkula, na wiinana mmote na nzaawe.
MAT 24:11 Anlawa apuwe manapiyu awaatta oojipanka na awaattettekhe atthu awaatta.
MAT 24:12 Vitthu zootakhala zinttela weekezeleya, na pheta ya atthu awaatta enttela ovukuwa.
MAT 24:13 Ila otule anttelaaye ovilela mpakha mwiisho ontta wuusurukha.
MAT 24:14 Enttela olaleyiwa hapari epi za Ofwalume wa Nluku olumwenku wooshi, nkhama oshaahiti khwa khapila zooshi aphano osala ota mwiisho.
MAT 24:15 “Mwinteela woona okufuru wa woopisa wa pala onttelaaye opuwa Puuro Ttakatthiifu, etile alupiyeeyo napiyu Daniyeele - osome na eweeleye.
MAT 24:16 Aphano apale anttelaaye wiiya Yudeya atthirele omwaako.
MAT 24:17 Otule anttelaaye wiiya vatulu wa nyuupa ahishukhe yoori alazemo etthu nnyupa mwawe,
MAT 24:18 na otule anttelaaye wiiya omashapa ahirutele onti weettela ajapi yawe.
MAT 24:19 Siikhu etile ti ya woopisa khwa apale awiimittha na anaamwisaaye.
MAT 24:20 Mwilompe yoori miswipa epo ehirettikhane mwiita ama jumwa-monsi.
MAT 24:21 Maana wakathi aya opo onlawa wapuwe ohoowa nwulweene, thanku mwanzo wa olumwenku, na khunteela opuwa nkina nkhama otthuupo.
MAT 24:22 Eriwaka wakathi aya opo wa ohoowa khawaavukuliwe, khina aari weettelaaye wuusurukha, ila mwaasa wa apale oothawuliwa, siikhu zaya epo enttela wiiya zoovukuliwa.
MAT 24:23 Aphano amana ntthu awuuzani yoori: ‘Otu ari apha Al-Masiihu!’ ama: ‘Otule ari okhule!’ mwihinkhupalele.
MAT 24:24 Maana anlawa apuwe a al-Masiihu oojipanka na manapiyu oojipanka anttelaaye oretta alama khulukhulu na vitthu zootikinisa yoori awaahate hatha apale oothawuliwa.
MAT 24:25 Miiyo kawuuzani khapula zihinarettikhane epo zaya.
MAT 24:26 Nakataalikha, amana muuziwa yoori: ‘Ori n'yaara,’ mwihilawe, ama oriwa: ‘Ori nnyupa,’ mwihikhupali.
MAT 24:27 Maana, nkhama etthiipo taari enlankhaaye malawa-juwa, na ojithoonyeza okhu lintupweelaawo njuwa, etthiipo onttela wiiya ota wa Mwaana wa Pinaatamu.
MAT 24:28 Vahali aniiyaavo muufwi, akhwaazi ankusanyeya attaapho.
MAT 24:29 Paata ya mashakha a siikhu epo, njuwa linttela ozima na mweezi onttela olikha waara, matthottowa anttela okwa otulu na owahi wa pinkuuni onttela osakhinyeya.
MAT 24:30 Aphano epuwe pinkuuni alama za Mwaana wa Pinaatamu; khapila zooshi za vatuniya enttela ojikhupanyisa na enttela omoona Mwaana wa Pinaatamu ataaka mmawiku a pinkuuni khwa owahi na siifwa yawaatta.
MAT 24:31 Ye onttela operekha malayikha awe na ovuma nwulweene wa malope, yo anttela owaakusanya ananthawuliwa aya ooshi khwa phantte nne zinlankhaawo pheevo, phantte khwa phantte kiina ya pinku.
MAT 24:32 Mwijinozele osomisa wa nfikeera: Amana virapi zaya zootthelaka mathapa mwinjuwa yoori onsaleela ofiya mwiita.
MAT 24:33 Etthiipo na mweeyo, amana moona vitthu epo zooshi, mwijuwe yoori wakathi wafiya, ensaleela waaza.
MAT 24:34 Weekhweele kiniwuuzani yoori, khanteela ovira atthu apa aleelo zihirettikhaneene vitthu zaya epo.
MAT 24:35 Pinku na vathi zooshi zinteela ovira, ila mattakhuzi aka khanviraru.
MAT 24:36 Ila monkoni wa siikhu na wakathi khina anjuwaaye, wala malayikha a pinkuuni, wala Mwaana, ila Paapa paasi.
MAT 24:37 Nkhama etthiipo zaarettikhaniyeeyo wakathi wa Nuuhi, enttela wiiya etthiipo etelo ya Mwaana wa Pinaatamu.
MAT 24:38 Nkhama etthiipo siikhu ziviriyeezo za nnyeri, atthu aari oja na aari onywa, aari oralana na aari oloozana, mpakha ofiya siikhu Nuuhi eettiyeemo mmwaaraka.
MAT 24:39 Yo kaajuwiyevo hatha etthu mpakha wakathi otiiyeevo nnyeri na khuwaathuula ooshi. Enttela wiiya etthiipo ota wa Mwaana wa Pinaatamu.
MAT 24:40 Aphano awiri anttela wiiya omashapa; mmote athuuliwe, alikhiwe mmote.
MAT 24:41 Aakha awiri achilaka tiriku; mmote athuuliwe, mmote alikhiwe.
MAT 24:42 Mwaasa wa ethiito, mwijeekesele, maana khamwinjuwa siikhu anttelaaye ota Mbwana enu.
MAT 24:43 Ila eweeleyeni vitthu zaya epo; maana, mweenyewe nyuupa eriwaka eetta ojuwa wakathi antaavo anamwiiya, eetta ojeekesela na khaari olikhelela opwechiwa nyuupa yawe.
MAT 24:44 Tiito, mweeyo theenya mwiiye woojilikanisa, maana wakathi antaavo Mwaana wa Pinaatamu pi opule mwihinaakhipwelaaye.
MAT 24:45 “Ti tuuvi karumeya wawaamineya na waakhili, otule Mbwana awe amwinkhiyeeyo osala vaje vawe yoori asala awenkha atthu etthu-yoojiwa wakathi khaamili?
MAT 24:46 Wooparikhiyiwa karumeya otule mbwana awe ataaka anttelaaye onsikana arettaka etthiipo.
MAT 24:47 Weekhweele kiniwuuzani yoori onttela olikheliwa weettettisa maali zooshi za mbwana awe.
MAT 24:48 Ila karumeya otule amana eeya wootakhala rooho, ajilupezaka mweenyewe yoori: ‘Mbwana aka ontta orupaza,’
MAT 24:49 na khusala awaapiya ashirikhaawe na oja na onywa na ananhapaliwa,
MAT 24:50 onttela ota mbwana wa karumeya otule khwa siikhu ahaari waakhipwelaaye na wakathi ahinjuwaaye.
MAT 24:51 Ye onta onhukhumu saaneene antthe puuro ya manaafikhi, ottuukho onttelaaye wiiyawo olila na oluma meeno.
MAT 25:1 “Siikhu yaya eto, Ofwalume wa pinkuuni onttela wiiya nkhama aamwari khumi athuuliye makhompe aya, khulawa okutthanana mposi.
MAT 25:2 Athaanu khwa apale khumi aari alolo, athaanu aari akhili.
MAT 25:3 Apale oololo khuthuula makhompe aya, khuhinthuuli patarooya,
MAT 25:4 ila apale a akhili olikha othuula makhompe-ru khunthuula theenya patarooya nttopwiyo.
MAT 25:5 Mposi khurupaza ofiya, na ooshi khuwaakhola osikizi khulala.
MAT 25:6 Ila osikhu layili, khusiileya nkhuwo waari oraaye: ‘Mposi afiya! Mwisaruwe mwampwekherele.’
MAT 25:7 Aamwari apale ooshi khulankha khusala atthenkeza makhompe aya.
MAT 25:8 Apale oololo khusala awooza apale awiiyana akhili yoori: ‘Mwinimeele patarooya enu vattitthiiru, maana makhompe eetthu antta osizila.’
MAT 25:9 Yo khujipu yoori: ‘Wala, khanfiyela onrumeyela mweeyo na fweeyo. Mwilawe mwamuuzanye patarooya.
MAT 25:10 Wakathi alawiyeevo omuuzanya patarooya, mposi khufiya, aamwari apale ajitthekiyeeyo khuvira vamote na mposi olawa oja njampo la harusi na nlako khufukiwa.
MAT 25:11 Wakathi vattitthiiru, khusala ata aamwari apale oololo khusala akhuwa araka: ‘Mbwana, mbwana, mwinifukulele nlako!’
MAT 25:12 Ila ye khuwaajipu yoori: ‘Weekhweele kiniwuuzani yoori akinuujuwani.’
MAT 25:13 Tiito kiniwuuzanini yoori mwijeekesele, maana mweeyo khamwinjuwa siikhu wala wakathi aya.
MAT 25:14 “Theenya Ofwalume wa pinkuuni onttela wiiya nkhama mwinyi mmote atakhaka oretta safwari, khuwaakhuwela akarumeya awe khuwaalikhela maali zawe.
MAT 25:15 Mmote khumwinkha milikhi thaanu za nzurukhu wa feeta, nkina khumwinkha milikhi piiri, nkina theenya khumwinkha milikhi moote, wakhula ntthu amwinkhiye khwa makhaamu awe. Elottelanaka khulankha khusala alawa safwari yawe.
MAT 25:16 Otule enkhiweeyo milikhi thaanu za nzurukhu wa feeta, khulankha nasaapiru olawa oretta zanshara khupattha milikhi thaanu kiina.
MAT 25:17 Otule aariina mizurukhu milikhi piiri khupattha milikhi piiri teenya.
MAT 25:18 Ila otule enkhiweeyo nzurukhu milikhi moote khulankha khulawa khuthipa liphotto vathi khutthaavo khuvitha nzurukhu wa mbwana awe.
MAT 25:19 Paata ya ovira wakathi mwinkeene, mbwana wa akarumeya apale khuruti khuretta thamani na apale aya.
MAT 25:20 Otule aapwekheriyeeyo nzurukhu milikhi thaanu wa feeta, khutiisa theenya nzurukhu milikhi thaanu wa feeta na khuri: ‘Mbwana, waakinkhiye nzurukhu milikhi thaanu wa feeta, woona kapattha theenya fwayita ya milikhi thaanu.’
MAT 25:21 Mbwana khunjipu yoori: ‘Kemaani, karumeya wooshapweya na wawaamineya! Weeyo waamineya khwa ttiitthiiru, apho kintta owinkha yawaatta. Ote ofurahi vamote na mbwana awo.
MAT 25:22 Khuta theenya otule apwekheriyeeyo nzurukhu milikhi piiri wa feeta khuri: ‘Mbwana aka waakinkhiye nzurukhu milikhi piiri wa feeta, kapattha theenya milikhi piiri.’
MAT 25:23 Mbwana awe khunjipu yoori: ‘Kemaani, karumeya wooshapweya na wawaamineya, weeyo waamineya khwa ttiitthiiru, miiyo kiniwinkha zawaatta. Ote ofurahi na Mbwana awo.’
MAT 25:24 Mwiisho khuta otule apwekheriyeeyo nzurukhu milikhi moote khuri: ‘Miiyo kaajuwiye yoori mbwana o ntthu woozivala, onuurulaaye na epile ohikheyeeni na okusanya epile ohizaleeni.
MAT 25:25 Tiito keetta woova, khulawa khuvitha nzurukhu awo milikhi moote wa feeta khuthipela vathi. Woone, apha opu nzurukhu awo.’
MAT 25:26 Mbwana khunjipu yoori: ‘Karumeya wootakhala na wooviliwa! Weeyo waajuwiye yoori kinuurula na epile kihikheyeeni na kinkusanya epile kihizaleeni.
MAT 25:27 Aphano weeyo waarina ya olawana nzurukhu aka opanko yoori amana kiruti kinkhiwe nzurukhu aka wa wiiyana fwayita.
MAT 25:28 Mwinnyakanye nzurukhu opo milikhi moote wa feeta, mwimwinkhe otule ariina milikhi khumi.
MAT 25:29 Maana otule ariina, onttela winkhiwa theenya na oniiyana zawaatta. Ila otule ahina, hatha etile ariina ontta onyakanyiwa.
MAT 25:30 Karumeya woohiina fwayita, mwimweeselele othetekele n'yiiza nttumpho oriimo olila na oluma meeno.’
MAT 25:31 Amana Mwaana wa Pinaatamu ata nsiifwa mwawe na malayikha ooshi, onttela wiikhala vakhukulu vawe ya nuuru ya pinkuuni.
MAT 25:32 Khapila zooshi zinttela okusanyiwa aphale ariivo, avalule khapila khwa khapila kiina nkhama nshuki avalulaka pwittipwitthi zawe vakatthi wa puuzi.
MAT 25:33 Atthe pwittipwitthi nkhono nlume na puuzi nkhono nkha.
MAT 25:34 Aphano Mfwalume onttela owooza apale anttelaaye wiiya nkhono nlume yoori: ‘Mwite mweeyo ooparikhiyiwa ti Paapa! Mwipwekherele Ofwalume nkhama eritho mwitthenkezeliweeyo thanku wumpiwa wa olumwenku.
MAT 25:35 Maana miiyo yaakikholiye jala, mweeyo khukinkha etthu-yoojiwa; lakikholiye nnyottha, mweeyo khukimeela maati oonywa; kaari nletto mweeyo khukinkha puuro ya omaka.
MAT 25:36 Kathaaleliwe, mweeyo khukinkha kuwo; keetta olwaaziwa, mweeyo khukiinanela; kaari nkalapooso, mweeyo khukithotola.’
MAT 25:37 Aphano makhaamili anteela onjipu yoori: ‘Mbwana, lini naawoniyeevo na jala khuwinkha etthu-yoojiwa, ama lookholiye nnyottha khuumeela maati?
MAT 25:38 Wakathi-ni nawooniyeevo ori nletto khuwinkha puuro ya omaka? Ama othaaleliwe, khuwinkha kuwo?
MAT 25:39 Wakathi-ni nawooniyeevo ori nlwele ama nkalapooso khuta khuuthotola?’
MAT 25:40 Mfwalume khujipu yoori: ‘Kiniwuuzani khweele yoori, etile mweeyo mwiwaaretteliyeeyo mmote wa attwiizaku apa attiitthi, mwakirettela miiyo.’
MAT 25:41 Aphano ye onttela owooza apale a nkhono nkha awe yoori: ‘Anamalaanikha mwikaattuwe! Mweette omoottho wa mileele, waattaleleliweeyo Sheethwani na masheethwani awe.
MAT 25:42 Maana miiyo yaakikholiye jala, mweeyo khuhikinkhi hatha etthu-yoojiwa, laakikholiye nnyottha mweeyo khuhikinkhi hatha etthu yoonywa.
MAT 25:43 Kaari nletto mweeyo khihikinkhi hatha puuro yoomakavo, kathaaleliwe mweeyo khuhikinkhi kuwo, keetta olwaaziwa na ofukeliwa nkalapooso, mweeyo wala okithotola.’
MAT 25:44 Yo anjipu yoori: ‘Mbwana, nawoona lini yuukholiye jala wala luukholiye nnyottha ama ori nletto ama ohina kuwo ama olwaaziwaka na ofukeliwe, fweeyo kuhiwaawuni?’
MAT 25:45 Ye ajipu yoori: ‘Kiniwuuzani khweele yoori, etile mwihinretteleeni mmote wa apale attiitthi, khamwikiretteleeni na miiyo.’
MAT 25:46 Apa aneetta ohukhumu khwa mileele, ila makhaamili anttela wiiyana ohaayi wa mileele.”
MAT 26:1 Paata ya olupa vitthu epile, Yinsa khuwooza anakhiyoni awe yoori:
MAT 26:2 “Nkhama mwinjuwaazo, ensaleela siikhu piiri ofiya siikhu ya njampo la Paashikowa, na Mwaana wa Pinaatamu onttela winkheleliwa yoori akhomeliwe.”
MAT 26:3 Aphano mahaakhimu a tiini na attunkhulu a tiini khukusanyeya onyuupa wa haakhimu nwulu aari wiitthiwaaye Kayifwa;
MAT 26:4 khuwaza shawuri yoori ankhole Yinsa sirini na amuule.
MAT 26:5 Ila khusala alupa yoori: “Nihirette wakathi wa njampo yoori atthu ahipuwise nzuzu.”
MAT 26:6 Yinsa eettiye Betaaniya, owawe Simawu otule raku aariinaaye makuttula.
MAT 26:7 Aphano muukha mmote khuta aphale aariivo Yinsa athuuliye suupha ya mafuttha oonukhela awaatta nzurukhu, khwiitthela eeshwa ya Yinsa wakathi ansikaniyeevo eekhaliye vameeza.
MAT 26:8 Anakhiyoni ooniyeevo vitthu epile khushanka na khuri: “Mwaasa aya niini oharipwaka mafuttha apa?
MAT 26:9 Mafuttha apa ahoozanyisiwe, nzurukhu aya enkhiwa asikhini!”
MAT 26:10 Ila Yinsa ajuwiyeevo etthu aari olupaaye, khuri: “Mwinimwantipwelani muukha otu? Ye aretta etthu yooshapweya khwa miiyo.
MAT 26:11 Maana asikhini aniiya vamote na mweeyo wakhula siikhu, ila miiyo wala.
MAT 26:12 Mafuttha apa eettheliyeeyo mwiili aka, ye aretta khwa ontthenkeza ozikhiwa waka.
MAT 26:13 Kiniwuuzani khweele yoori: Wakhula vahali entafusiriwaavo hapari zooshapweya khwa olumwenku wooshi, epi arettiyeeyo muukha otu, zeettaka olupiwa noofikhiriwa ye.”
MAT 26:14 Aphano mmote wa apale khumi na awiri, aariwitthiwaaye Yuuda Eshikariyoote, khulawa okutthanana mahaakhimu a tiini.
MAT 26:15 Khuwoozela yoori: “Mwinikiripha kavi amana miiyo kiwinkhelelani?” Yo khusiilana onripha nzurukhu talaathiini wa feeta.
MAT 26:16 Waaza wakathi otthuupule Yuuda khusala eekesaka nanna ya omwinkhelela Yinsa mmakhono wa maatuwi awe.
MAT 26:17 Siikhu ya mwanzo ya Njampo la Phaawu Yoohiina Fwaramento, anakhiyoni khumwaattama Yinsa khumuuzela yoori: “Ontakha yoori nitthenkeze vayi etthu-yoojiwa ya Paashikowa?”
MAT 26:18 Yinsa khujipu yoori: “Mwilawe nsitati mwakutthanane mwinyi mmote mwimuuze yoori: ‘Mwaaliimu alupa yoori: Wakathi aka onsaleela ofiya. Kinttela onja Paashikowa na anakhiyoni aka vaje vawo.’”
MAT 26:19 Anakhiyoni khuretta etthiipile ooziweezo ti Yinsa na khuntthekeza Paashikowa.
MAT 26:20 Weettelaka oripa, Yinsa khulawa khwiikhala vameeza na anakhiyoni awe apale khumi na awiri.
MAT 26:21 Eettaka oja, khulupa yoori: “Kiniwuuzani khweele, mmote wa mweeyo onlawa akizinkule.”
MAT 26:22 Yo khwiiya oohuzunikha channu na khwaaza wuuzelana yoori: “Weekhweele khahiyo miiyo Mbwana?”
MAT 26:23 Yinsa khujipu yoori: “Nlupa anttelaaye okizinkula kinjana sahani moote.
MAT 26:24 Mwaana wa Pinaatamu onlawa afwe, nkhama etthiipo yaatikhiweeyo monkoni wa ye. Ila wootakhaliwa ti otule anttelaaye onzinkula Mwaana wa Pinaatamu! Afwataali ahivokoliweeni.”
MAT 26:25 Aphano Yuuda, namazinkula, khuri: “Talili ti miiyo Mwaaliimu? Yinsa khujipwela araka: “Ayo, ti weeyo.”
MAT 26:26 Eettaka oja, Yinsa khuthuula phaawu, khuparikhiya, khumeya na khuwenkha anakhiyoni awe araka: “Mwithuule na mwirafune; opu mwiili aka”.
MAT 26:27 Elottelanaka khuthuula jiikira, khushukhurwela na khuwenkha araka: “Mwinywe mooshi mweeyo.
MAT 26:28 Eti taamu yaka ya wahati yiitthiweeyo khwa zwaamu ya atthu awaatta yoori eswaamiheliwe twampi.
MAT 26:29 Miiyo kiniwuuzani yoori, waaza nasaapi mpakha okho ninttaawo, akinlawa onywa nshumo wa nrayi wa wuuva mpakha siikhu kinttelaaye onywa theenya nshumo wa nrayi wa wuuva na mweeyo muufwalume wa Paapa.
MAT 26:30 Paata ya yo wiipa liipo limote, khusala alawa omwaako Oluveera.
MAT 26:31 Aphano Yinsa khulupa yoori: “Osikhu opu, mooshi mweeyo mwinteela okitthira. Maana yaatikhiwa yoori: ‘Kininvulalisa nshuki, pwittipwitthi za liphanko lawe zimwazeye.’
MAT 26:32 Ila paata ya osisimuwa waka, kinttela olokoza Kalileya.”
MAT 26:33 Pheeturu khujipu yoori: “Hatha nkhama ooshi eetta wuutthira, miiyo akinteela wuutthira.”
MAT 26:34 Yinsa khumuuza araka: “Weekhweele kiniwuuza yoori osikhu otthuupu, likukhuwi lihineekhe, weeyo onlawa wakikhane swaafu ttatthu.”
MAT 26:35 Pheeturu khujipu theenya yoori: “Hatha nkhama ofwa vamote na weeyo, akinteela wuukhana!” Anakhiyoni ooshi khulupa etthiipo.
MAT 26:36 Aphano Yinsa khulawa na anakhiyoni awe puuro eniitthiwaaye Yetemaani khuwooza yoori: “Mwiikhale apha, miiyo kinttela olompa aphale.”
MAT 26:37 Khunthuula Pheeturu na aana awiri a Zepeteewu, Yinsa khwaaza ohuzunikha na othunkuwikha.
MAT 26:38 Yinsa khuwooza yoori: “Nafusi yaka ti ya ohuzunikha venkivene, woosaleela ofwa. Apho mwisale apha na nijeekesele fooshi.”
MAT 26:39 Khususa vattitthiiru, khukokhora khufiisa ajihi yawe vathi, khusala alompa araka: “Paapa, nkhama enwaheya, okaattuwanize jiikira eti ya ohoowa; ila ehirettikhane nkhama kintakhaazo, ila nkhama ontakhaazo.
MAT 26:40 Paata ya toole, khurutela aphale aariivo anakhiyoni awe khuwaasikana eettaka olala. Yinsa khumuuzela Pheeturu yoori: “Mweeyo khamwiwaheeni nenkawu ojeekesela fooshi wakathi mmote paasi?
MAT 26:41 Mwijeekesele na mwilompe yoori mwihikwele muuzayiniwa. Rooho ti yookhomaala ila mwiili pi woottettheya.”
MAT 26:42 Khurutela olawa olompa theenya khuri: “Paapa, nkhama khinwaheya okattuwananisa jiikira eti khapula kihinyweeni, ti arettikhane matakhelo awo.”
MAT 26:43 Wakathi arutiyeevo theenya khuwaasikana eettaka olala, maana maasho aya eetta owaalemela.
MAT 26:44 Aphano khuwaalikha theenya, khulawa olompa swaafu ya ttaatthu, alupaka mattakhuzi atthaapale.
MAT 26:45 Nawiisha khurutela attaaphale aariivo anakhiyoni awe na khuwoozela yoori: “Mweeyo nalelo mwintta olala na wiitthuuwa? Wafiya wakathi! Moone yoori Mwaana wa Pinaatamu onttela winkheleliwa mmakhono wa anatwampi.
MAT 26:46 Mwilankhe, nilawe; oto antaaye apho namazinkula!
MAT 26:47 Eettaka ottakhula etthiipile, khuta Yuuda, mmote wa apale khumi na awiri, vamote na khuntti khuluyeene athuuliye phanka na puutta, zaaperekhiweeyo ti mahaakhimu a tiini na attunkhulu a tiini.
MAT 26:48 Namazinkula aawenkhiye alama apale aasiilananiyeeyo araka: “Otule kinttelaaye ompatikha ti othuuto, mwinkhole.”
MAT 26:49 Wakathi Yuuda aari omwaattamaavo Yinsa khuri: “Salaama, Mwaaliimu!” Na khumpatikha.
MAT 26:50 Yinsa khumuuza yoori: “Swaahipu, etile oteeliyeeyo oretta, waakuve orette”. Attaaphale khususeliwa, khukholiwa Yinsa khufukiwa.
MAT 26:51 Mmote wa apale aarina Yinsa khookola nkhono khuthuula phanka khushija nshiilo la karumeya wa haakhimu nwulu wa tiini.
MAT 26:52 Aphano Yinsa khuwooza anakhiyoni awe yoori: “Mwipwehe phanka! Maana wooshi otule anlipanaaye phanka, ofwa khwa phanka ethiito.
MAT 26:53 Mweeyo mwinoona yoori miiyo akinwahi onvekela Paapa khukiperekheza nasaapi khuntti khumi na piiri za malayikha?
MAT 26:54 Nkhama etthiipo enlupaaye Zawaatikhiwa Ttakatthiifu yoori vitthu zaarina ya orettikhana nkhama etthiipi?”
MAT 26:55 Wakathi otthuupule Yinsa khuwoozela atthu apale yoori: “Mwateela okikhola na phanka na puutta, nkhama nlokozi wa anazompere? Siikhu zooshi miiyo kaari osomisa Nnyupa Woosifwiwamo, khi mweeyo ohikikholi!
MAT 26:56 Ila zooshi epi zarettikhana yoori emarisele zawaatikhiwa za manapiyu. Aphano anakhiyoni ooshi khumwanswi na khuntthira.
MAT 26:57 Apale ankholiyeeyo Yinsa khunthuula khunlawana wa Kayifwa, haakhimu nwulu wa tiini ottuukho aakusanyeyiyeeyo anamanozela a kano na attunkhulu a tiini.
MAT 26:58 Pheeturu eetta owaalotta peetiwene mpakha vaje wa haakhimu nwulu wa tiini, khuvira khwiikhala na anamweekesela yoori oone zooshi nanna zaari weettelaaye wiishela.
MAT 26:59 Mahaakhimu a tiini na mashawuriiya ooshi aari weekesa oshaahiti woovonyeya khwa Yinsa yoori anhukhumwele ofwa.
MAT 26:60 Ila khuhinsikanani, aapuwiye-ru atthu awaatta oolaza oshaahiti woovonyeya. Omwiisho khujithoonyeza atthu awiri,
MAT 26:61 khulupa yoori: “Mwinyi otu alupa yoori: ‘Miiyo kinwahi opwecha Mwimpari Nluku na khujeka khwa siikhu ttatthu.”’
MAT 26:62 Aphano haakhimu nwulu wa tiini khulankha khumuuza Yinsa yoori: “Khunjipu epo onlupeziwaaye?”
MAT 26:63 Ila Yinsa nalelo khwiiya woonyamala. Haakhimu nwulu wa tiini khumuuza yoori: “Kinuuvekela yoori weeyo olaphe khwa Nluku woohaayi, nkhama weeyo o Al-Masiihu, mwaana wa Nluku, onuuze.”
MAT 26:64 Yinsa khujipu yoori: “Weeyo walupa. Ila miiyo kiniwuuzani mooshi mweeyo yoori: enttela ofiya siikhu mwinttelaaye omoona Mwaana wa Pinaatamu eekhaliye nkhono nlume wa nwahi zooshi, ataaka khwa mawiku a pinkuuni.
MAT 26:65 Aphano wakathi haakhimu nwulu wa tiini avaruliyeeyo kuwo zawe na khulupa yoori: “Akufuru! Mwaasa wa niini nihithajiyaka oshaahiti nkina theenya? Mweeyo mwasiila nasaapi okufuru wawe!
MAT 26:66 Mwinuupuwela toovi?” Khujipu yoori: “Oninsuhi ofwa!”
MAT 26:67 Akina khusala antthemela omaasho na ompiya, akina khusala ampwakula araka:
MAT 26:68 “Onlupe, Oo Al-Masiihu, ti paani oopiyeeyo?
MAT 26:69 Pheeturu eettiye wiikhala vaje. Njaazi mmote khumwaattama khumuuza yoori: “Na-weyo waari na Yinsa nkalileya.”
MAT 26:70 Ila ye khukhana vakatthi wa atthu ooshi araka: “Akinjuwa etthu onttakhulaaye.”
MAT 26:71 Paata ya toole khuthoonya phantte ya omilako, njaazi nkina khumoona khuwooza apale aari attaaphale yoori: “Mwinyi otu aari na Yinsa wa Nazareeti.”
MAT 26:72 Ye khukhana theenya khwa olapha araka: “Akininjuwa mwinyi aya otu!”
MAT 26:73 Elottelanaka, apale aari attaaphale khumwaattama Pheeturu khumuuza yoori: “Weekhweele weeyo o wawe! Ottakhula wawo onthoonyeza.”
MAT 26:74 Attaaphale ye khwaaza ojilaani na olapha araka: “Akininjuwa!” Nasaapiru likukhuwi khwiikha.
MAT 26:75 Aphano Pheeturu khufikhiri nttakhuzi ooziweeyo ti Yinsa yoori: “Likukhuwi lihineekhe onteela okikhana swaafu ttatthu.” Noolaavo aphale vaya khulila wakatapuvo.
MAT 27:1 Supuyeene, attunkhulu a mahaakhimu na anamalokozela a tiini khujilakelela onhukhumwela Yinsa ofwa.
MAT 27:2 Khunfuka khunthuula khunlawana wa nsatoro Pilaatu.
MAT 27:3 Wakathi Yuuda, otule anzinkuliyeeyo, ooniyeevo yoori Yinsa onttela ohukhumwiwa, khuthupwiya na khulawa owaarutisela attunkhulu a mahaakhimu na anamalokozela a tiini nzurukhu opule talaathiini wa feeta aathuuliyeeyo.
MAT 27:4 Khuri: “Kakosa, khwa ozinkula taamu yoohikosi.” Yo khujipu yoori: “Fweeyo ennijali niini? Epo ti weeyo onjuwaaye.”
MAT 27:5 Aphano Yuuda khweeselela nzurukhu omwimpari. Khusaruwa nawiisha khulawa khujiheya.
MAT 27:6 Mahaakhimu a tiini khukusanya nzurukhu opule, khuri: “Khahi halaali othuula khuttha mmwifukho wa zaakha, maana hisapu ya taamu.”
MAT 27:7 Aphano khusiilana orumeyela nzurukhu aya opule khwa wuuzanyela nshapa la namuupa yoori lirettiwe vilalo la ozikhiwamo aletto.
MAT 27:8 Tiito nshapa laya nttho liniitthiwaaye Nshapa la Taamu mpakha siikhu epi za leelo.
MAT 27:9 Aphano khurettikhana epile zaalupiweeyo ti napiyu Jeremiiya yoori: “Athuula nzurukhu talaathiini wa feeta, hisapu yootthiiwa pi atthu a Ezirayiilu,
MAT 27:10 khuuzanyela nshapa la namuupa, nkhama etthiipo Mbwana aakirumiyeezo.”
MAT 27:11 Yinsa khutthiiwa omaasho wa nsatoro ye khumuuzela yoori: “Weeyo onfwalume wa mayaahuuti?” Yinsa khujipu yoori: “Pi etthiipo olupiyeezo.”
MAT 27:12 Ila eettaka olokoveziwa etthiipile pi attunkhulu a mahaakhimu na anamalokozela a tiini, ye khuhijipu.
MAT 27:13 Aphano Pilaatu khumuuzela yoori: “Weeyo khunsiila vitthu epo onlokoveziwaaye pi atthu apo?”
MAT 27:14 Ila Yinsa khuhijipu hatha nttakhuzi, khwa ethiito nsatoro khwiiya wooshanka.
MAT 27:15 Amana efiya siikhu ya njampo nsatoro aazowereliye onfukulela ntthu woothawuliwa pi atthu.
MAT 27:16 Yo wakathi aya otthuupule aarina napherezu woojuwanikha aari wiitthiwaaye Baraapa.
MAT 27:17 Pilaatu khuwoozela atthu apale athukumaniyeeyo attaaphale yoori: “Ti tuuvi khwa apa awiri mwintakhaaye yoori kinfukulele: Baraapa ama Yinsa aniitthiwaaye Al-Masiihu?
MAT 27:18 Maana aajuwiye yoori anlawaniye okhule mwaasa nrima.
MAT 27:19 Pilaatu eekhaliye onyuupa woophukiwamo, muukha awe khumperekha hapari araka: “Ohijiphakanyane apo, maana leelo muulottha kahoowa venkivene monkoni wa ye.”
MAT 27:20 Ila mahaakhimu a tiini na anamalokozela a tiini khuwaakhitiri atthu apale yoori aveke Ofukuliwa Baraapa na ooliwe Yinsa.
MAT 27:21 Aphano Nsatoro khuuzela yoori: “Khwa atthu apa awiri mwinintakhelaaye yoori miiyo kinfukulele ti tuuvi?” Yo khujipu yoori “Baraapa!”
MAT 27:22 Pilaatu khuuzela yoori: “Khi kinrettele niini Yinsa, aniitthiwaaye Al-Masiihu?” Ooshi khujipu yoori: “Akhomeliwe!”
MAT 27:23 Pilaatu khuuzela yoori: “Niini arettiyeeyo yootakhala?” Ila atthu apale khusala avira atepaka onyakula araka: “Akhomeliwe!”
MAT 27:24 Wakathi Pilaatu asopheliyeevo yoori khaari opattha hatha swamiima, ila olikha toowo khusala oona weekezeleya nzuzu, khurumisa otiiseliwa maati, khunawa omaasho wa atthu apale na khulupa yoori: “Akina paathuli khwa taamu ya ntthu otu; eto zwaamu yenu.”
MAT 27:25 Atthu ooshi apale khujipu yoori: “Taamu yawe ti eniittikhele fweeyo na aana etthu!”
MAT 27:26 Aphano Pilaatu khunfukulela Baraapa, khuruma ojaphiwa Yinsa na khumwinkhelela olawa okhomeliwa.
MAT 27:27 Elottelanaka, anajanka a nsatoro khunthuula Yinsa khunlawana nyuupa khuulu ya nsatoro khukusanyeya anajanka ooshi khunzukulela.
MAT 27:28 Khunvula kuwo zawe khunwalisa ajapi yookhuttuwa;
MAT 27:29 khuvaasha khaara ya miiwa, khunwalisa mmwishwa mwawe na khunttheela puutta nkhono awe nlume, khunkokhorela khusala anveyisa, araka: “Ojuusuru, mfwalume wa mayaahuuti!”
MAT 27:30 Khusala antthemela na khunnyakanya puutta etile, khumpiyana veeshwa.
MAT 27:31 Paata ya onveyisa, khunvula ajapi etile khunwalisa ajapi yawe. elottelanaka khusala alawa onkhomela.
MAT 27:32 Alawaka, khukutthanana nsireene aari wiitthiwaaye Simawu, khukhanyareliwa othuula nsalapa wa Yinsa.
MAT 27:33 Yo khufiya puuro eniitthiwaaye Kolokoota, eriina maana a puuro ya likurakuza la eeshwa,
MAT 27:34 khumwinkha onywa viinyu yoophakanyaniwa wamwe; ila ye wakathi ootiyeevo, khukatthala onywawa.
MAT 27:35 Paata ya onkhomela, khwawanyana kuwo zawe khwa weekesa nasipu.
MAT 27:36 Khwiikhala attaaphale khusala amweekesela.
MAT 27:37 Vatulu wa eeswa yawe khutthiiwavo lipawu laatikhiweeyo khwa olokoveziwa wawe yoori: “OTU TI YINSA, MFWALUME WA MAYAAHUUTI.”
MAT 27:38 Na aakhomelaniwe anamwiiya awiri, mmote nkhono nlume nkina nkhono nkha.
MAT 27:39 Apale aari oviraaye eetta onttukhana na wiinisa viishwa zaya,
MAT 27:40 araka: “Oo weeyo waari weettelaaye opwecha Nyuupa Yoosifwiwamo na khujeka khwa siikhu ttatthu, ojuusuru! Wiishukhe vansalapa apho nkhama omwaana wa Nluku!”
MAT 27:41 Khwa nanna etthiipo mahaakhimu a tiini, anamanozela a kano na attunkhulu a tiini eetta onveyisa,
MAT 27:42 araka: “Wawoosuru akina, ila khunwahi ojuusuru! Mfwalume wa Ezirayiilu! Eeshukhe nasaapi vansalapa apho, nintta onkhupali.
MAT 27:43 Ye amwaamini Nluku. Nluku ti amuusuru nasaapi ethiiti, nkhama ona huruma na ye, maana alupa yoori: ‘Ki mwaana wa Nluku!”’
MAT 27:44 Theenya anamwiiya apale aakhomelaniweeyo khusala anttukhana.
MAT 27:45 Yaapuwiye yiiza nti wooshi, payina ya saasiitha mpakha saakhentta.
MAT 27:46 Paata ya ofiya saakhentta, Yinsa khukhuwa woonyakulavo, araka: “Eloohi, Eloohi, lama sabatani?” Eriina maana a “Nluku aka! Nluku aka! Mwaasa wa niini okanswaka?”
MAT 27:47 Akina aarivo noosiila epile, khulupa yoori: “Ye oninkhuwela Aliyaasi.”
MAT 27:48 Woohirupazi, mmote wa yo khutthirela shiponja, khunaanisa na viinyu yoonyuunya, khuttha pontha wa tteketthe na khumwinkha Yinsa yoori anywe.
MAT 27:49 Akina khusala alupa yoori: “Mwinlikhe, nimoone nkhama Aliyaasi onteela omuusuru.”
MAT 27:50 Aphano Yinsa khukhuwa woonyakulavo saaneene khufwa.
MAT 27:51 Wakathi otthuupule phazira ya omwimpari khwaawanyeya vakatthi, waaza vatulu mpakha vathi. Nti khusakhinyeya na mawe khupwecheya.
MAT 27:52 Khapuri epile khufunuwa na mwiili wa attakatthifu awaatta afwiyeeyo khusisimuwa.
MAT 27:53 Noolaamo nkhapuri mphule, paata ya Yinsa osisimuwa, atthu apale akina asisimuwiyeeyo khweetta sitati Ttakatthiifu na khooniwa pi atthu awaatta.
MAT 27:54 Nttunkhulu wa anajanka na apale aari omweekeselaaye Yinsa, nawoona esikinyaatthi na zooshi zaarettikhaniyeeyo, khwiiya awoova channu khulupa yoori: “Khweele-khweele, ntthu otu aari mwaana wa Nluku!”
MAT 27:55 Aakha awaatta aari attaaphale khusala oona ari peetiwene. Apale amperekhiyeeyo Yinsa waaza Kalileya yoori anrumeyele.
MAT 27:56 Vakatthi vaya aarivo Mariyamu Mataleena, Mariyamu mamaawe Yaakhumpa na Yuusufu na Maama wa aana a Zepeteewu.
MAT 27:57 Njuwa leettelaka oveva, khuta mwinyi mmote wa thajiri wa Arimateeya anitthiwaaye Yuusufu aari namalottela wa Yinsa.
MAT 27:58 Khulawa wa Pilaatu, khuveka mwiili wa Yinsa. Pilaatu khuruma winkhiwa.
MAT 27:59 Yuusufu khuthuula mwiili wa Yinsa khuputaputela va joora,
MAT 27:60 khunttha nkhapuri pheeya, aarumiyeeyo othipiwa vamawe. Vanlako wa khapuri yaya khutthaavo liwe liwululene, khulankha khusala alawa.
MAT 27:61 Mariyamu Mataleena na Mariyamu nkina, eekhaliye attaaphale omaasho wa khapuri.
MAT 27:62 Mmeesho mwaya, siikhu ya saapatu, mahaakhimu a tiini na amafwarizeewu khulawa wa Pilaatu.
MAT 27:63 Yo khumuuza yoori: “Mbwana, ninfikhiri yoori wakathi aariiye haayi, namattettekha otule aalupiye yoori siikhu ya ttaatthu ontta osisimuwa.
MAT 27:64 Apho orume yoori khapuri etile yeekeseliwe saaneene mpakha siikhu ya ttaatthu, yoori ehirettikhane ota anamalottela awe khupwecha khapuri na awooze atthu yoori: ‘Asisimuwa muufwa,’ linttela wiiya nzuuzu lootepa zayita la mwanzo.”
MAT 27:65 Pilaatu khulupa yoori: “Apho mwawaathuule anajanka. Mwilawe mweekesele khapuri khwa nanna mwinoonaaye yoori mwinwahi.”
MAT 27:66 Yo khulawa khusoromezavo liwe ntthile lafuukaniweeyo khapuri na khuwaalikha attaaphale anajanka eekeselaka.
MAT 28:1 Paata ya ovira lifwajiri, yeettelaka waaziwa siikhu ya mwanzo ya sumana, Mariyamu Mataleena na Mariyamu nkina khulawa woona ovilalo.
MAT 28:2 Aphano khupuwa esikinyaatthi khuluyeene, maana nlayikha la Mbwana leetta wiishukha pinkuuni khuta mpakha vakhapuri khususisa liwe ntthile laafukaniweeyo khwiikhalela.
MAT 28:3 Ozerima wawe waari nkhama taari na kuwo zawe zaari zoolakala nkhama maphovu.
MAT 28:4 Anamweekesela khusala athukumela mwaasa wa woova khumpuwa nkhama afwiiye.
MAT 28:5 Nlayikha ntthile khuwooza aakha apale yoori: “Mwihoove, kajuwa yoori mweeyo mwinimweekesa Yinsa otule aakhomeliweeyo.
MAT 28:6 Ye khaamo mphu, asisimuwa, nkhama etthiipo aalupiyeezo. Mwite moonevo apha aattattikheliweevo.
MAT 28:7 Mwilawe mwawooze anakhiyoni awe yoori Yinsa asisimuwa muufwa na alokoza kalileya. Mwinttela omoona ottuukho. Mattakhuzi aya pi atthaapa kiwuuziyeenini.”
MAT 28:8 Aakha apale khusaruwa nvilalo mphule na waakuva eettaka woova na arina furaha, na khusala atthira olawa owooza anakhiyoni awe.
MAT 28:9 Nasaapiru, Yinsa khuwaapuwelela na khuwooza yoori: “Salaama!” Yo khumwaattama na khupatikha moolu awe khumwaaputu.
MAT 28:10 Aphano Yinsa khuwooza yoori: “Mwihoove, mwilawe mwawooze attwiizaku apale eette Kalileya; anttela okoona ottuukhu.”
MAT 28:11 Aakha apale nalelo ari ntarikhi, anajanka akina aari weekeselaaye vilalo etile khurutela ositati khuwooza mahaakhimu a tiini zooshi zaarettikhaniyeeyo.
MAT 28:12 Wakathi attunkhulu a mahaakhimu aakusanyeyiyeevo na anamalokozela a tiini, khuwaza shawuri. Khuwenkha anajanka nzurukhu wawaatta,
MAT 28:13 awoozaka yoori: “Alupe yoori: ‘Aatiiye anakhiyoni awe osikhu khumwiiya fweeyo neettaka olala.’
MAT 28:14 Yoori amana zifiya omashiilo wa nsatoro, fweeyo nintta omweeleza na nintta owaakisani khwa wakhula nlattu.”
MAT 28:15 Etthiipile, anajanka khupwekhera nzurukhu opule na khuretta etthiipo anozeliweeyo. Mattakhuzi aya apo khumwazeyela vakatthi wa mayaahuuti mpakha leelo eti.
MAT 28:16 Maswihaapa apale khumi na mmote khulawa Kalileya, omwaako okhule Yinsa awooziyeewo.
MAT 28:17 Wakathi amoniyeevo khumwaaputu; akina khumwakanyera.
MAT 28:18 Aphano Yinsa khuwaattama khuwooza yoori: “Kenkhiwa miiyo ofwalume, pinkuuni na vathi.
MAT 28:19 Nakataalikha, mwilawe mwawaarette anakhiyoni khwa khapila zooshi, mwiwoosaka khwa nzina la Paapa, la Mwaana, na Rooho Ttakatthiifu,
MAT 28:20 mwiwaasomisaka oshututela zooshi epile kirumiyeezo. Na miiyo kinttela wiiya vamote na mweeyo mpakha mwiisho wa wakathi.
MAR 1:1 Omwanzo wa hapari zooshapweya za Yinsa Al-Masiihu, Mwaana wa Nluku.
MAR 1:2 Yaatikhiwa khwa ohupiri wa napiyu Ezaaya yoori: “Moone, kinlawa kamperekhe omaasho wawo karumeya aka, yoori atthenkeze tarikhi yawo;
MAR 1:3 huula enkhuwa enyakulaka n'yaara yoori: ‘Mwitthenkeze tarikhi ya Mbwana na mookolele miphiitelo zawe.
MAR 1:4 Aapuwiye Yaahaya namoosa n'yaara, khusala atafusiri monkoni wa woosiwa na othupwiya khwa nswammaha wa twampi.
MAR 1:5 Atthu ooshi a nti wa Yudeya na apale a Yeruzaleemu aari ovira ataaka na otukhuru twampi zaya na yo aari wiiya a woosiwa khwa ye mmuttho Yorotaani.
MAR 1:6 Kuwo aari owalaazo Yaahaya zaari za shapala za enkamiiya. Ye aarina nzako awe wa shapala na aari ojaka mapalaka na asali ya ntthuttu.
MAR 1:7 Atafusiraka aari ori: “Paata ya miiyo onta otule ariina oowahi zayita miiyo, oto akinsuhi ofukula mikhoyi za jampali zawe.
MAR 1:8 Miiyo kiniwoosani na maati, ila ye onttela owoosani na Rooho Ttakatthiifu.
MAR 1:9 Wakathi otthuupule, khuta Yinsa wa Nazareeti ya Kalileya khoosiwa ti Yaahaya mmuttho wa Yorotaani.
MAR 1:10 Nasaapiru, eettaka ovuuwa mmaati, khoona pinku efukuwiye na Rooho Ttakatthiifu yeettaka omwiishukhela nkhama jiwa.
MAR 1:11 Aphano khuta huula pinkuuni elupaka yoori: “Weeyo o mwanaka wa wuupheta, na wookituvela channu.”
MAR 1:12 Nasaapiru, Rooho Ttakatthiifu khunthuula khunlawana n'yaara.
MAR 1:13 Nttumpho eekhaliyeemo siikhu arupayiini, eettaka ozayiniwa ti Epiliisi. Ye aari vakatthi wa nyama za ntthuttu, ila malayikha aari ovira anrumeyelaka Yinsa.
MAR 1:14 Paata ya Yaahaya ofukeliwa, Yinsa khulankha khusala alawa Kalileya, alaleyaka hapari zooshapweya za Nluku,
MAR 1:15 alupaka yoori: “Wakathi wafiya, na ofwalume wa Nluku ori kharipu; mwithupwiye na mwikhupali hapari zooshapweya.”
MAR 1:16 Eettaka olawa alottaka shiini ya ntthatta la Kalileya, khuwoona attwi awiri Simawu na Antere, eeselelaka matthavi aya mpahari, mwaasa yoori aari anamajiya.
MAR 1:17 Yinsa khuwooza yoori: “Mwikilotte, kintta wuurettani wiiya anamajiya a atthu.”
MAR 1:18 Aphano nasaapiru khulikha matthavi aya khusala anlotta.
MAR 1:19 Eettaka olawa etthiipile, khumoona Yaakhumpa, mwaana wa Zepeteewu na ttwiiye Yaahaya ari mmwaatiya alazelaka matthavi aya.
MAR 1:20 Khuwaakhuwela, nasaapiru khunlikha papaaya mmwaatiya vamote na anakhaazi awe khusala anlotta Yinsa.
MAR 1:21 Paata ya toole, khulawa Kafwaranaawu. Noofiya saapatu khulawa osomisa nsinakooka.
MAR 1:22 Khusala awaatuvela masomi awe, maana aari owaasomisa nkhama ntthu wawiiyana ofwalume na woohiiyi nkhama anamanozela a kano.
MAR 1:23 Aphano khuta nsinakooka mphule nlume aashinttiweeyo ti sheethwani. Ye khusala akhuwa araka:
MAR 1:24 “Onnitakhelani fweeyo, Yinsa wa Nazareeti? Wata yoori onitapanye? Kajuwa yoori weeyo o Ttakatthiifu wa Nluku!”
MAR 1:25 Ila Yinsa khunmaruwela araka: “Onyamale, oleemo mmwiili wa mwinyi otu!”
MAR 1:26 Aphano sheethwani khuntatha ntthu otule woohusutivo khusaruwa mmwiili mwawe eettaka onyakula.
MAR 1:27 Atthu ooshi khwiiya ooshanka mpakha khufiyelela wuuzelana atthaaporu yoori: “Niini epi zaya? Masomi mapheya antanaaye ofwalume! Mpakha onruma masheethwani yo khunshututela!”
MAR 1:28 Hapari epile monkoni wa ye khumwazeyela nasaapiru nti wooshi wa Kalileya.
MAR 1:29 Wakathi aliiyeemo nsinakooka, khulawa na Yaakhumpa na Yaahaya owawe Simawu na Antere.
MAR 1:30 Nkhwewe Simawu eettiye orapalela voolili, yaari onlwaaza hooma, nasaapiru khuuziwa Yinsa.
MAR 1:31 Aphano ye khumwaattama, khunkhola nkhono khunlansa, nasaapiru hooma khumwiisha, khwaaza owaarumeyela.
MAR 1:32 Weettelaka oripa, paata ya otupweela njuwa, atthu khuwaathuula alwele ooshi na anamasheethwani khumweettisela Yinsa.
MAR 1:33 Atthu ooshi a nsitati mphule khukusanyeya vanlako wa nyuupa ethiitile,
MAR 1:34 ye khuwaavonisa awaatta aari ohoochiwaaye pi marati a wakhula nanna. Theenya khwiikara masheethwani awaatta. Ye khaari olikha masheethwani apale ottakhula, maana yo aari onjuwa paani Yinsa.
MAR 1:35 Supuyeene, nalelo ohinache saana, Yinsa khulankha khusaruwa khulawa puuro yawiitthaaleyavo ohali aari olompaawo.
MAR 1:36 Simawu na ashirikhaawe khulawa omweekesa.
MAR 1:37 Nonsikana, khumuuza yoori: “Atthu ooshi antta oweekesa weeyo!”
MAR 1:38 Yinsa khuwaajipu yoori: “Nlaweni ohali okinoko, miti naattamananiyeeyo, yoori kilawe kalaleye, maana tithiito miiyo kiteeliyeeyo.”
MAR 1:39 Aphano ye khweettetta Kalileya yooshi eettaka otafusiri nsinakooka na wiikara masheethwani.
MAR 1:40 Namaharaja mmote khumwaattama na khunkokhorela khunvekela yoori: “Amana otakha onwahi okitwaharesha!”
MAR 1:41 Yinsa ari wawiitaala huruma, khookola nkhono awe khunsapa na khulupa yoori: “Kintakha. Wiiye wootwahareshiwa!”
MAR 1:42 Nasaapiru maaharaja apale khwiiya omwiisha na ye khwiiya wootwahareshiwa.
MAR 1:43 Elottelanaka Yinsa khuwaaleeza na awaaleezaka woomaruwavo,
MAR 1:44 aphano Yinsa khumuuza yoori: “Ohimuuze hatha ntthu, ila olawe, wanvekele haakhimu yoori awoone nkhama wavona, arette twaha etile Munsa arumiyeeyo yoori wiiye oshaahiti.
MAR 1:45 Ila mwinyi otule khusala alawa na khwaaza olaleya vitthu epile na omwaza hapari. Mwaasa wa vitthu epile, Yinsa khuhisala awahi theenya weetta nsitati, ila khwiikhala othetekele puuro yawiitthaaleyavo. Khusala ata atthu wakhula phantte oteela okutthanana Yinsa.
MAR 2:1 Paata ya siikhu vattitthiiru, wakathi Yinsa aaruteliyeeyo theenya Kafwaranaawu, atthu khusiila elupiwaka yoori ye aari owawe.
MAR 2:2 Aphano atthu awaatta khweetta ottuukhule, khwa nanna ya haariivo puuro hatha vamilako, na khusala awaatafusirela nttakhuzi la Nluku.
MAR 2:3 Khutavo atthu akina antiisiyeeyo ntthu aarina supiyaani, athuuliwe pi alume wane.
MAR 2:4 Khuhisala awahi onfiisa aphale aariivo Yinsa mwaasa wa atthu waatta. Elottelanaka khulawa khutamula phantte ya liphala la nyuupa, khuphenyisavo nrepa opule arapaleliyeevo nasupiyaani.
MAR 2:5 Ooniyeevo amini etile aariina, Yinsa khumuuza nasupiyaani otule yoori: “Mwanaka, twampi zawo zaswaamihiwa.”
MAR 2:6 Eekhaliye attaaphale anamanozela a kano akina na khwaaza wuupuwela:
MAR 2:7 “Mwinyi otu onttakhula toowo mwaasa wa niini? Ontta okufuru! Anwahaaye oswaamihi twampi ti paani, woohiiyi Nluku paasi?”
MAR 2:8 Yinsa nasaapiru khumweeleya nroho mwawe yoori zaari etthiipo epile yo aari wuupuwelaaye na khuwooza yoori: “Mwaasa aya niini mweeyo muupuwelaka vitthu epo nroho mwenu?
MAR 2:9 Etthu yookhweya omuuza nasupiyaani titiivi, omuuza yoori: ‘Twampi zawo zaswaamihiwa’ ama ‘Olankhe othuule nrepa lawo weettette?’
MAR 2:10 Ila yoori mwijuwe yoori Mwaana wa Pinaatamu onaaye owahi wa oswaamihi twampi” khumuuza nasupiyaani
MAR 2:11 “Miiyo kiniwuuza: Olankhe, othuule nrepa lawo olawe owawo.”
MAR 2:12 Wakathi otthuupule mwinyi otule khulankha ooniwaka pi atthu ooshi, khuthuula nrepa lawe khusaruwa. Yo khwiiya ooshanka na khunttitthimisa Nluku, alupaka yoori: “Khaninoone vitthu nkhama epi!”
MAR 2:13 Yinsa khulawa theenya kharipu ya ntthatta. Atthu awaatta khumwaattama na khwaaza owaasomisa.
MAR 2:14 Eettaka ovira etthiipile, khumoona Matewuzhu mwaana wa Alufeeyu eekhaliye ariphisaka lumpuru, khumuuza yoori: “Okilotte.” Ye khulankha khunlotta.
MAR 2:15 Wakathi wa etthu yoojiwa, Yinsa eekhaliye va meeza owawe Leevi. Vamote na anakhiyoni awe, na aarivo anamariphisa lumpuru awaatta na “anatwampi” maana atthu aari onlottaaye aari enkeene.
MAR 2:16 Anamanozela a kano apale amafwarizeewu amooniyeevo ajaka na “anatwampi” na anamariphisa lumpuru, khuwoozela anakhiyoni a Yinsa yoori: “Mwaasa aya niini ye ajaka na anamariphisa lumpuru na anatwampi?”
MAR 2:17 Asiiliyeevo vitthu epile, Yinsa khuwooza yoori: “Akumi khaninhithajiya tothoro, ila apale anlwaziwaaye. Miiyo akateeliye owaakhuwela anashariya, ila anatwampi.”
MAR 2:18 Aphano anakhiyoni a Yaahaya na mafwarizeewu eetta ofuka. Atthu akina khunteela Yinsa khusala amuuzela yoori: “Mwaasa aya niini anakhiyoni a Yaahaya na amafwarizeewu ofuka, khi awo ahifukaka?”
MAR 2:19 Yinsa khujipu yoori: “Enretteya toovi ofuka anamalaleyiwa harusi, namaposa ari attaapho? Khinwaheya, ari vamote na yo.”
MAR 2:20 Ila onteela ofiya siikhu mposi anteelaaye olaziwavo, siikhu zaya epo, anlawa afuke.
MAR 2:21 Khina antthaaye yaapa pheeya kuwo yoovutta, maana yaapa etile pheeya enttela ofutthela kuwo yoovutta etepe othaala.
MAR 2:22 Khina antthaaye viinyu nttompwiyo ya shapala ya raku, amana aretta, viinyu entta ophutula ttompwiyo, waaza viinyu mpakha ttompwiyo zintta oharipweya. Ila mwitthe viinyu pheeya nttompwiyo ya shapala pheeya.
MAR 2:23 Saapatu moote, Yinsa eetta ovira nshini wa nshapa la tiriku. Eettaka olawa, anakhiyoni awe khwaaza ovulula phunje zaya.
MAR 2:24 Mafwarizeewu khumuuzela Yinsa yoori: “Oniwoona, mwaasa aya niini yo arettaka etthu enkhattaziwaaye orettiwa saapatu?”
MAR 2:25 Ye khuwaajipu yoori: “Mweeyo khamwinasome etile arettiyeeyo Daawuuda wakathi ye na ashirikha awe aakholiweeyo ti jala?
MAR 2:26 Wakathi wa haakhimu nwulu wa tiini Apiyataari, Daawuuda aaviriye Nnyupa wa Nluku khurafuna phaawu enkhiweeyo Nluku na khuwenkha ashirikhaawe, aariina ruhusa ya orafuna paasi aari anamalokozela a tiini.”
MAR 2:27 Aphano khuwooza yoori: “Saapatu yatiisiwa mwaasa wa anaatamu, ama anaatamu mwaasa wa saapatu.
MAR 2:28 Etthiipo, Mwaana wa Pinaatamu ti Mbwana hatha na Saapatu.”
MAR 3:1 Yinsa khurutela theenya nsinakooka, nttumphule aarimo mwinyi waarakaliyeeyo nkhono awe.
MAR 3:2 Atthu akina aari weekesa nanna ya onlokoveza Yinsa, yoori amoone nkhama aari weettela ovonisa siikhu ya saapatu.
MAR 3:3 Yinsa khumuuza mwinyi otule woorakala nkhono yoori: “Olankhe ote vakatthi apha.”
MAR 3:4 Aphano Yinsa khuuzela yoori: “Niini entakheliwaaye orettiwa saapatu, oretta yooshapweya ama yootakhala, wuusuru ama wuula?” Ila atthu apale nalelo khwiiya oonyamala.
MAR 3:5 Yinsa khusala aweekesa ari wookatipukha na khuhituveliwi mwaasa wa wuuma rooho zaya na khumuuza mwinyi otule yoori: “Wookole nkhono awo.” Ye khookola nkhono awe na khwiiya woovonisiwa.
MAR 3:6 Aphano mafwarizeewu apale khulankha na khwaaza owaza shawuri vamote na khuntti ya Herooti eekesaka nanna ya omuula Yinsa.
MAR 3:7 Yinsa na anakhiyoni awe, khulawa mpakha ontthatta la Kalileya na nyumani wawe yaari ota khuntti khuluyeene ya nti wa Kalileya.
MAR 3:8 Wakathi asiiliyeevo vitthu zooshi aari orettaazo, atthu awaatta aari olankhaaye Yudeya, Yeruzaleemu, Itumeeya, akina akaapu wa muuttho Yorotaani na apale a Tiiro na Sitooni khuta okutthanana ye.
MAR 3:9 Mwaasa wa khuntti khuluyeene etile, Yinsa khuwooza anakhiyoni awe yoori antthekezele mwaatiya yoori awerawere ophunyiwa.
MAR 3:10 Maana ye awaavonisiye atthu awaatta, khwa nanna ya apale aari olwaaziwaaye aari ofiyelelaaye osukhumana yoori apatthe onsapa.
MAR 3:11 Theenya masheethwani, amana amoona eetta onkokhorela omaasho wawe na onyakula araka: “Weeyo o Mwaana wa Nluku.”
MAR 3:12 Ila ye aari owenkha oruma wookhomaala yoori ahinlupe paani yaya.
MAR 3:13 Yinsa khuwela vakulu na khuwaakhuwela apale aari owaatakhaaye, apo aya khuta aphale aariivo.
MAR 3:14 Khuwaathawula khumi na awiri na khuwenkha nzina la maaswihaapa yoori eeye vamote na-ye na yoori ye awaarume olaleya,
MAR 3:15 na eeyane owahi wa wiikara masheethwani.
MAR 3:16 Apa pi apale khumi na awiri awathawuliyeeyo aari witthiwaaye yoori: Simawu, otule amwinkhiyeeyo nzina la Pheeturu;
MAR 3:17 Tiyaaku, mwaana wa Zepeteewu, na Yaahaya ttwiiye, atthaapo aatthajiweeyo nzina la Buneerije, liriina maana a “Aana a Ottitthima”;
MAR 3:18 Antere, Filiipe, Barutulumeewu, Matewuzhu, Tome, Tiyaaku, mwaana wa Alufeeyu, Tadeewu, Simawu Zelooti;
MAR 3:19 na Yuuda Eshikariyoote, otule ankholisiyeeyo Yinsa.
MAR 3:20 Aphano, ye khulawa owawe, khukusanyeya opheya khuntti khuluyeene, khwa nanna ye na anakhiyoni awe aari woojelaavo oja.
MAR 3:21 Wakathi ajamaaze asiiliyeevo vitthu epile, khulankha khusala alawa onthuulawo, maana aari olupa yoori: “Ye eetta ovevereya.”
MAR 3:22 Anamanozela a kano aalankhiyeeyo Yeruzaleemu aari olupa yoori: “Ye ti wooshinttiwa ti Epiliisi! Mfwalume wa masheethwani ti othuuto aniweekaranaaye masheethwani.”
MAR 3:23 Aphano Yinsa khuwaakhuwela khusala awaanozela nkatthi wa milikaniso yoori: “Nanna-ni Epiliisi antakhaaye omwiikara Epiliisi?
MAR 3:24 Amana ofwalume mmote ojaawanya, khunwahi ojishintta otthuuporu.
MAR 3:25 Ama nyuupa amana ejaawanya, theenya khinwahi wiikhala ethiitoru.
MAR 3:26 Na Sheethwani nkhama ontta ojuumanana, na amana aawanyeya, khanlawa owahi wiiyavo na wafiya mwiisho wawe.
MAR 3:27 Weekhweele khina anwahaaye ovira nnyupa wa ntthu wookhomaala na khuthuula maali zawe aheetteeni onfuka khapula. Toowo ti anwahaaye omwiiyela nnyupa mwawe.
MAR 3:28 “Miiyo kiniwuuzani khweele yoori: Twampi zooshi na okufuru wooshi wa anaatamu onlawa waswaamihiwe,
MAR 3:29 ila otule ankufurwelaaye Rooho Ttakatthiifu, khana nswammaha mileele, maana ona twampi ya mileele.”
MAR 3:30 Yinsa aalupiye mattakhuzi apa mwaasa wa yo aari olupa yoori: “Ona sheethwani.”
MAR 3:31 Elottelanaka, mamaawe na attwiize Yinsa khuta. Khwiiya vaje na khuruma okhuweliwa Yinsa.
MAR 3:32 Aarivo atthu awaatta eekhaliyeeyo aphale aariivo, na khuuziwa yoori: “Mamaawo na attwiizo ari vaje apho antta oweekesa.”
MAR 3:33 Yinsa khuuzela yoori: “Maama ti tuuvi, wala ttwiiyaku ti tuuvi?”
MAR 3:34 Aphano khuweekesa apale eekhaliyeeyo aphale aariivo na khuwooza yoori: “Apha owaapho maama na attwiizaku!
MAR 3:35 Otule anrettaaye matakhelo a Nluku, ti eeyiye ttwiiyaku, nlupwaaka na maama.”
MAR 4:1 Yinsa khurutela osomisa kharipu ya ntthatta. Khutavo atthu awaatta aphale aariivo, khusala ahithajiya weetta nkalawa na eekhale nttumpho. Kalawa yaari mpahari, atthu ooshi khwiikhala nshini wa pahari.
MAR 4:2 Ye aari owaasomisa vitthu zawaatta nkatthi wa nlikaniso, asomisaka khuri:
MAR 4:3 “Mwisiile! Namalima khulawa ozala.
MAR 4:4 Wakathi aari ozalaavo peewu, phantte kiina khukwela nshini wa tarikhi anyannyi khuta khuja.
MAR 4:5 Kiina khukwela vahali aariivo mawe, vahali laarivo nttophe vattitthiiru; nasaapiru khoottha, maana nttophe ntthile khaleechiye.
MAR 4:6 Aphano noopuwa njuwa khulukuza; maana khazaarina mitathaari, khuuma.
MAR 4:7 Peewu kinoko khukwela vanyiiwa, khuwula vamote na nyiiwa, khurapeliwa pi nyiiwa, khwa nanna zahawahiyeeyo wiima mishumo.
MAR 4:8 Kiina khukwela vanshaka wooshapweya, khoottha, khuwula na khwiima mishumo zooshwapweya, talaathiini, siithiini na mpakha miiya wakhula mmote.
MAR 4:9 Yinsa khwiishela alupaka yoori: “Otule ariina mashiilo, ti asiile!”
MAR 4:10 Wakathi ye aari otthwe, anakhiyoni apale khumi na awiri na akinoko aari kharipu ya attaaphale khumuuzela monkoni wa nlikaniso.
MAR 4:11 Ye khuwooza yoori: “Mweeyo mwenkhiwa ojuwa kano za ofwalume wa Nluku, ila apale ari oje, zooshi anuuzaniwa nlikaniso,
MAR 4:12 yoori ‘hatha nkhama oona ahijuwe, hatha nkhama asiila ehiweeleye yoori ahizukulise rooho zaya aswaamihiwa!’”
MAR 4:13 Aphano Yinsa khuwoozela yoori: “Mweeyo khuniweeleyani nlikaniso opu, nanna-ni onteela oweeleyani epi mikina?
MAR 4:14 Namazala onzala nttakhuzi.
MAR 4:15 Atthu akina ari nkhama peewu eriiye nshini wa tarikhi, nhali lizaliweemo nttakhuzi. Paata ya osiila, Epiliisi onta, khulazavo nttakhuzi ntthile nroho mwawe.
MAR 4:16 Akina, ari nkhama peewu ezaliweeyo vahali wawiiyavo mawe, ansiilaaye nttakhuzi nasaapiru khupwekherela na furaha.
MAR 4:17 Ila paata ya wakathi vattitthiiru, atthu aya apo anlawa akatthale hapari maana kharetteeni wiiya nchina laya, amana ziwaapattha tafwawuthi ama lupattha mwaasa wa mattakhuzi apale antta wanswi.
MAR 4:18 Theenya akina anlattanana na peewu ezaliweeyo vakatthi wa mwiiwa. Apo ansiila hapari,
MAR 4:19 ila, amana ziwaapuwelelaka tafwawuthi za olumwenku opu, tuvela za maali na otakha nkina, vitthu zaya epo enshawa nttakhuzi na epo zaya khaziniimisa mishumo.
MAR 4:20 Awaapho theenya atthu akina, anlikananaaye peewu ezaliweeyo nti wooshapweya. Apo aya ansiila nttakhuzi khukhupalela na khuttheerisa talaathiini, siithiini na mpakha miiya khwa etile aazaliyeeyo.”
MAR 4:21 Ye khuwooza yoori: “Paani ankhozaaye khantteya yawe khuttha n'yuuku ama nlivuku? Olikha toowo khampweha vahali wawooneyavo?
MAR 4:22 Maana khayiivo hatha etthu moote ya siiri, ehinttelaaye wiiya payana na khayiivo moote yoovithiwa ehinttelaaye ovitthuliwa.
MAR 4:23 Nkhama ntthu onaaye mashiilo oosiila, asiile!”
MAR 4:24 Aphano, khuwooza yoori: “Phoole na epile mwinsiilaaye. Na mphimo otthuupo mwinttelaaye owaaphimela azeenu, mwinttela ophimeliwa otthuupo, na theenya mwinkeene mwinlawa mweekezeliwe.
MAR 4:25 Otule ariina, onlawa eekezeliwe; ila otule ahina hatha etile vattitthiiru ariinaaye ontta onyakanyiwa.”
MAR 4:26 Ye khurutela olupa yoori: “Ofwalume wa Nluku ori nkhama ntthu anzalaaye peewu yawe vathi.
MAR 4:27 Hatha nkhama eetta olankha, ama hatha nkhama eetta olala, yo zinoottha na zinwula, ye woohijuwi nanna erettikhaniyeeyo.
MAR 4:28 Otthuupo oniima mishumo zaya: yamwanzo nyaani, elottelanaka ntathi, mwiisho, phunje zawiitaala va ntathi.
MAR 4:29 Amana peewu ekhomaala, ntthu onttela othuula eesu, maana wafiya wakathi wa wuurula.”
MAR 4:30 Yinsa khurutela olupa theenya yoori: “Ofwalume wa Nluku onlattanana niini? Nlikaniso-ni ninttelaaye orumeyela yoori nithoonyeze?
MAR 4:31 Ori nkhama phunje ya samuli, etile yiiyiye phunje yootepa opushuwa vathi apha.
MAR 4:32 Ila, paata ya ozala, zintta owula channu, zayita mathapa ooshi.”
MAR 4:33 Khwa milikaniso zooshi zoolattana, Yinsa aari owooza monkoni wa nttakhuzi, nanna aari owahaaye oweeleya.
MAR 4:34 Khaari owooza hatha etthu ahirumeyeleeni nlikaniso, ila amana eeya na anakhiyoni awe paasi, eetta owoozaka zooshi.
MAR 4:35 Siikhu etile, weettelaka oripa, Yinsa khuwooza anakhiyoni awe yoori: “Nlaweni kaapu kiina.”
MAR 4:36 Paata ya osusa khuntti etile, yo khupakhira nkalawa mphule aariimo Yinsa. Na kalawa kiina zeetta owaaperekha.
MAR 4:37 Khwaaza ovuma pheevo yookhomaala, na mawipi khusala apiya kalawa yaya khwa nanna aari wiitaalaamo maati.
MAR 4:38 Yinsa aarettiye eettaka olala sheezi aphiteeziye nsaawu. Aphano anakhiyoni awe khunlansa na khumuuza yoori: “Mwaaliimu, khinuujali fweeyo nifwaka?”
MAR 4:39 Yinsa khulankha khunyamaza pheevo na khuuza pahari yoori: “Otthe nreke! Onyamale!” Pheevo khunyamala na zooshi khwiiya zawiitthaala.
MAR 4:40 Aphano khuwoozela anakhiyoni awe yoori: “Mwaasa aya niini moovaka toowo? Nalelo khamwina amini?”
MAR 4:41 Anakhiyoni apale ari awoova channu, khusala oozana yoori: “Ti paani otu aya, anshututeliwaaye ti pheevo na pahari?”
MAR 5:1 Yo khulokha pahari, khufiya Jerazeenu.
MAR 5:2 Wakathi Yinsa apakhuwiyeevo nkalawa, mwinyi mmote aariina sheethwani khusaruwa nvilalo khuta attaaphale.
MAR 5:3 Mwinyi aya oto aari wiikhala nvilalo, khina mmote aari owahaaye onkhola, hatha ari ntthentte.
MAR 5:4 Maana swaafu zawaatta aari wiiya ntthentte moolu awe na makhono awe, ila ye eetta opwechaka tthentte yaya na ovuja zuuma zaari otthiwaaye mmoolu mwawe. Khaarivo ntthu wookhomaala aari owahaaye onshintta.
MAR 5:5 Osikhu na nthana ye aari weettettaka nvilalo na nnyaako na ojishija na mawe.
MAR 5:6 Wakathi amooniyeevo Yinsa ari peetiwene, khutthira khulawa khukokhora omaasho wawe.
MAR 5:7 Khukhuwa na huula yawe yooshi araka: “Onikitakhelani miiyo, Yinsa mwaana wa Nluku Nwulu? Kinuuvekela khwa Nluku yoori ohikoopopise!”
MAR 5:8 Maana Yinsa aamuuziye yoori: “Oleemo mmwiili wa mwinyi otu, sheethwani.”
MAR 5:9 Aphano Yinsa khumuuzela yoori: “Nzina lawo enriwa paani?” Khujipu yoori: “Nzina laka enriwa khuntti, maana niri awaatta.”
MAR 5:10 Khusala anvekela wonkhanyarelavo yoori ahiwaarume olaamo mmuti mwaya mphule.
MAR 5:11 Liphanko liwululene la kuluwe laari oshukisiwaaye kharipu ya mwaako.
MAR 5:12 Masheethwani apale khusala anvekela Yinsa yoori: “Onirume yoori neette nkuluwe mphule.”
MAR 5:13 Yinsa khwinkha ruhusa masheethwani apale, khusaruwa khweetta nkuluwe. Liphanko laarina thamani ya alufu piiri za kuluwe, khwaaza otthira zilankhaka omwaako ziishukhelaka mpahari, zooshi khuzama khufwa.
MAR 5:14 Apale aari oshukaaye kuluwe zaya epile, khutthira khulawa olupa vitthu epile zaarettikhaniyeeyo waaza nsitati mpakha mmashapa, atthu khulankha olawa woona epile zaarettikhaniyeeyo.
MAR 5:15 Wakathi amwaattamiyeeyo Yinsa, khumoona mwinyi otule aamwitaliyeeyo masheethwani awaatta, eekhaliye awaliye saana na atthiiyemu akhili zawe, atthu apale khwiiya awoova.
MAR 5:16 Apale aari attaaphale, khuwooza atthu zooshi epile zanrettikhaneliyeeyo mwinyi otule aariina masheethwani, na theenya khulupa monkoni wa kuluwe.
MAR 5:17 Aphano atthu apale khusala anvekela Yinsa yoori aleemo mmuti mwaya mphule.
MAR 5:18 Wakathi Yinsa aari owelaaye nkalawa, mwinyi otule aariina masheethwani khunvekela Yinsa yoori anlikhe alawe na ye.
MAR 5:19 Yinsa khuhinkhupaleli, ila khumuuza yoori: “Olawe owawo wawuuze ajamaazo zooshi epile Mbwana ooretteliyeeyo na tthakaraka awooneliyeeyo.”
MAR 5:20 Aphano, mwinyi otule khulawa na khwaaza olupa nti wa Tekapoliishi etile Yinsa anretteliyeeyo. Atthu ooshi khwiiya ooshanka.
MAR 5:21 Yinsa khupakhira theenya nkalawa alokhelaka kaapu kiina, khuntti khuluyeene khuta khwiitaala aphale aariivo Yinsa nshini wa nttima.
MAR 5:22 Aphano khuta attaaphale namalokozela mmote wa nsinakooka aari wiitthiwaaye Yaayiru, amooniyeevo Yinsa, khukokhora nshini wa moolu awe.
MAR 5:23 Khunvekela wookhanyarelavo yoori: “Mwanaka wankha onsaleela ofwa! Safwatali ote, wanttheele makhono yoori eeye woovona na eeye haayi.
MAR 5:24 Yinsa khusala alawa vamote na-ye, khuntti khuluyeene khusala enlotta na omphunya.
MAR 5:25 Attaaphale, aarivo muukha aariina nyaakha khumi na miwiri eettaka ohoowa mwaasa wa omwiittikha taamu.
MAR 5:26 Ye ahoowiye channu khwa oweekesa anamavonisa na khuharipu nzurukhu awe wooshi aariina, olikha ovona khusala eetta wootepa.
MAR 5:27 Asiiliyeevo ovuwa wa Yinsa, khuta nyuma wawe vahali wawaattiwavo na khusapa ajapi yawe.
MAR 5:28 Maana aari wuupuwela yoori: “Miiyo kisaparu paasi ajapi yawe, kintta ovona.”
MAR 5:29 Nasaapiru yeetta olikha wiittikha taamu etile na muukha otule khoona yoori mmwiili mwawe aari wootaphuliwa ohoowa opule.
MAR 5:30 Wakathi otthuupule, Yinsa khoona yoori wansaruwa owahi, khuzukuluwa khweekesa khuntti etile khuuzela yoori: “Paani asapiyeeyo ajapi yaka?”
MAR 5:31 Anakhiyoni awe khujipu yoori: “Woonaka khuntti khuluyeene eti ekusanyeyiyeeyo, khusala wuuzela yoori: ‘Paani akisapiyeeyo?’”
MAR 5:32 Ila Yinsa nalelo khusala eekesaka vakatthi wa khuntti etile yoori amoone otule aarettiyeeyo etthu yaya etile.
MAR 5:33 Aphano muukha otule, ajuwiyeevo etthu yaarettikhaniyeeyo, khumwaattama khukokhora nshini wa moolu awe eettaka othukumela mwaasa wa woova, khulupa haakhi yooshi.
MAR 5:34 Yinsa khumuuza yoori: “Mwanaka, amini yawo yoovonisa. Olawe na heeri, na wiiye wootaphuliwa ohoowa wawo.”
MAR 5:35 Nalelo Yinsa eettaka ottakhula, khutavo atthu a owawe Yaayiru, namalokozela wa nsinakooka khumuuza yoori: “Mwanawo afwa. Khinihithajiya onwuti theenya Mwaaliimu!”
MAR 5:36 Yinsa khumuuza namalokozela wa nsinakooka mphule yoori: “Ohoove; okhupali paasi.”
MAR 5:37 Na khuhinlikhi hatha ntthu onlotta, woohiiyi Pheeturu, Tiyaaku na Yaahaya ttwiiye Tiyaaku.
MAR 5:38 Wakathi afiiyeevo owawe namalokozela wa nsinakooka, Yinsa khoona tafwawuthi na atthu eettaka olila na ojiliza na huula ya onyakula.
MAR 5:39 Yinsa khuvira nnyupa na khuuzela yoori: “Tafwawuthi yaya eti ti-ya niini na mwinjilizelani? Mwaana khafweeni, ontta olala.”
MAR 5:40 Ila ooshi khwaaza ontheya Yinsa. Ye khurumisa yoori aleemo ooshi, khunthuula papaawe na mamaawe mwaana na anakhiyoni awe apale aariina na khulawa aphale aariivo mwaana.
MAR 5:41 Khunkhola nkhono awe khuri: “Talitha cumi!” liriina maana a “Mwanankha, miiyo kinuuruma yoori olankhe!”
MAR 5:42 Nasaapiru mwanankha otule, aariina hirimu ya nyaakha khumi na miwiri, khulankha na khwaaza weettetta. Ooshi aariivo khwiiya ooshanka.
MAR 5:43 Ila Yinsa khuwooza woosileyavo yoori: Ahiiyevo hatha ntthu anttelaaye ojuwa, na khuruma winkhiwa etthu-yoojiwa.
MAR 6:1 Yinsa khulaawo okhule waya, khweetta sitati ya owawe, anakhiyoni awe khusala amperekha.
MAR 6:2 Noofiya saapatu, khwaaza osomisa nsinakooka, awaatta aari onsiilaaye khwiiya ooshanka, alupaka yoori: “Zininlankha vayi vitthu zaya epi?” ‘Ojuwani opu enkhiweeyo? Na onretta toovi minjuza?
MAR 6:3 Khahiyo kalapinteero otu, mwaana wa Mariyamu, ttwiiye Tiyaaku, Yuusufu, Yuuda na Simawu! Alupuwe khari nttumphu!” Khwiiya awiiphiriwa ti Yinsa.
MAR 6:4 Yinsa khuwooza yoori: “Mmuti mwawe, vakatthi wa ajamaaze na vaje vawe pi attaapho napiyu ahinshitahiwaavo.”
MAR 6:5 Ye khawahiye oretta minjuza Nazareeti, woohiiyi owaavonisa alwele akina khwa owaattheela makhono.
MAR 6:6 Khwiiya wooshanka mwaasa wa othowawo amini okhule waya. Yinsa khuvira asomisaka miti zaattameliyeeyo ottuukhule.
MAR 6:7 Khuwaakhuwela anakhiyoni awe apale khumi na awiri, khuwaaruma awiri khwa awiri na khuwenkha owahi wa wiikara masheethwani.
MAR 6:8 Khuwaaruma yoori: “Mwihithuule hatha etthu, yohiiyi pakhora, khamwaarina ya othuula etthu-yoojiwa wala kaapiyaka wa safwari na nzurukhu.
MAR 6:9 Mwiwale jampali, ila mwihithuule nkhumi wa phiiri.
MAR 6:10 Amana mwifiya nyuupa moote, mwiiye attaapho mpakha siikhu mwinttelaaye olaavo.
MAR 6:11 Na miti mikinoko amana zihuupwekhereleni na khuhuusiilini, mwitathe lifufu la mmoolu mwenu mwilaakamo, nkhama oshaahiti vakatthi vaya.”
MAR 6:12 Yo khulawa na khulaleya atthu yoori athupwiye.
MAR 6:13 Yo aari wiikara masheethwani awaatta na owaavaaza mafuttha mmwishwa mwaya na owaavonisa alwele awaatta.
MAR 6:14 Mfwalume Herooti khusiila elupiwaka hapari epile, maana nzina la Yinsa laajuwiwe saaneene. Atthu akina khwaaza olupa yoori: “Yaahaya Namoosa eetta osisimuwa muufwa! Tiito zinrettikhanaaye minjuza zootikinisa khwa ye.”
MAR 6:15 Akina aari olupa yoori: “Ye ti Aliyaasi.” Akinoko khusala olupa araka: “Ye napiyu, nkhama manapiyu apale a raku.”
MAR 6:16 Ila Herooti wakathi asiiliyeevo vitthu epile, khuri: “Yaahaya, mwinyi kinshijiyeeyo, asisimuwa muufwa!”
MAR 6:17 Maana Herooti aarumiye yoori akholiwe Yaahaya, afukeliwe nkalapooso, mwaasa wa Herootiiya, muukha wa Filiipe ttwiiye, othuuto anraliyeeyo.
MAR 6:18 Mwaasa wa Yaahaya aari omuuza Herooti yoori: “Khahi halaali weeyo onrala muukha wa ttwiiyo.”
MAR 6:19 Herotiiya aarina katapu khwa Yaahaya, khusala atakha omuula, ila khuhisala awahi oretta,
MAR 6:20 mwaasa Herooti aari omoova Yaahaya na aari omwiinanela, maana aari ojuwa yoori ye mwinyi wa shariya na ttakatthiifu. Amana ansiilaka, eetta oshanka; khwa etthiipo waari ontuvela onsiila.
MAR 6:21 Omwiisho Herotiiya khupattha kiphenyo siikhu ya oretta mwaakha Herooti. Khuretta njampo Herooti na anamalokozela awe awulu, attunkhulu a anajanka na ooshi apale eeyiye afwalume a nti wa Kalileya.
MAR 6:22 Wakathi mwaana wa Herotiiya aviriyeeyo khwiina, khuntuvela Herooti na apale awaakharipushiyeeyo. Mfwalume khumuuza mwanankha otule yoori: “Okivekele wakhula etile ontakhaaye kintta owinkha”.
MAR 6:23 Khumwaahiti khwa olapha yoori: “Wakhula onikivekelaaye, kintta owinkha, mpakha phantte ya ofwalume aka.”
MAR 6:24 Mwaana otule khusaruwa khumuuza mamaawe yoori: “Kiveke niini?” Mamaawe khunjipu yoori: “Oveke eeshwa ya Yaahaya Namoosa.”
MAR 6:25 Nasaapiru mwanankha otule khwaakuva khulawa wa mfwalume khuveka yoori: “Kintakha mwikinkhe nasaapi eeshwa ya Yaahaya Namoosa mparathu.”
MAR 6:26 Mfwalume khwiiya woohuzunikha channu, ila mwaasa wa olapha opule aalaphiyeeyo na wa apale awaakharipushiyeeyo, khuhiwahi okatthala etile avekeliweeyo ti mwanankha otule.
MAR 6:27 Nasaapiru khunruma najanka khumuuza ontiisela eeshwa ya Yaahaya Namoosa. Ye khulawa okalapooso, khushija eeshwa ya Yaahaya Namoosa.
MAR 6:28 Khuttha mparathu khumwinkha mwanankha otule na ye khumwinkha mamaawe.
MAR 6:29 Noosiila hapari epile anakhiyoni a Yaahaya namoosa, khuta khuthuula mwiili awe khulawa khuzikha.
MAR 6:30 Maaswihaapa khurutela aphale aariivo Yinsa khumuuza zooshi arettiyeezo na asomisiyeeyo.
MAR 6:31 Aarivo atthu awaatta aari otaaye na olaavo, paata ya Yinsa na anakhiyoni awe woona yoori khaarina kiphenyo ya oja. Ye khuwooza yoori: “Mwite nilawe puuro yawiitthaleya navumule vattitthiiru.”
MAR 6:32 Aphano yo khulawa nkalawa mpakha puuro yawiitthaliye.
MAR 6:33 Atthu awaatta khuwoona alawaka paata ya owaajuwa. Atthu a miti zooshi za ottuukhule, khutthira khufiyawo yo ahinafiye.
MAR 6:34 Eeshukhaka nkalawa Yinsa, khoona khuntti khuluyeene ya atthu, khuwoonela huruma, maana aari nkhama pwittipwitthi zoohiina makhampuzi. Aphano khwaaza owaasomisa vitthu zawaatta.
MAR 6:35 Weettelaka oripa, anakhiyoni awe khunsusela khumuuza yoori: “Puuro eti ti yawitthaaleya, na waripa.
MAR 6:36 Owaamwaze atthu apa yoori alawe mmashapa na miti epile naattamiyeeyo yoori oozanye etthu yoojiwa aje.”
MAR 6:37 Ila ye khuwaajipu yoori: “Mwiwenkhe mweeyo ena etthu yoojiwa.” Yo khumuuza yoori: “Atthu apa yoori aje, ninhithajiya miiya piiri za nzurukhu wa feeta!”
MAR 6:38 Yinsa khuuzela yoori: “Mwina phaawu kavi? Mwilawe moone.” Anakhiyoni apale khulawa khoona khujipu yoori: “Ninaaye phaawu thaanu na swi piiri.”
MAR 6:39 Aphano, Yinsa khuwaaruma yoori ooshi eekhale, khuntti khwa khuntti va nyaani piishi
MAR 6:40 Khuretta etthiipo khwaawanyeya khwa khuntti ya miiya na khuntti ya hamusiini.
MAR 6:41 Athuuliyeevo phaawu epile thaanu na swi piiri khweekesa pinkuuni khuparikhiya. Nawiisha khumeya phaawu epile khuwenkha anakhiyoni awe yoori awaawanyeze atthu apale. Theenya khuwaawanyeza swi epile piiri ooshi aya.
MAR 6:42 Ooshi khuja khurupala,
MAR 6:43 na anakhiyoni khulokotthela khwiitaala khelenke khumi na piiri za nyeenye za phaawu na za swi.
MAR 6:44 Atthu aajiyeeyo aari alufu thaanu alume ene.
MAR 6:45 Elottelanaka, Yinsa khuwaaruma anakhiyoni awe yoori awele nkalawa alokoze Betezayiita phantte ya kaapu ya ntthatta, wakathi ye asaliyeeyo aleezananaka atthu.
MAR 6:46 Paata ya oleezanana, khuwela vakulu yoori alompe.
MAR 6:47 Weettelaka oripa, kalawa yaari vakatthi wa pahari na Yinsa aari otthwe vathi.
MAR 6:48 Ye khuwoona anakhiyoni awe afutthaka kaafi woovelavelavo, maana eetta wiinyula pheevo. Lifwajiri, Yinsa khulawa aphale aariivo eettettaka vatulu wa pahari, khusala asaleela owaavikana.
MAR 6:49 Wakathi amooniyeevo eettettaka vatulu wa pahari, khusala amoona nkhama nshitapehe, aphano khusala anyakula.
MAR 6:50 Maana ooshi aamoniyeeyo aari oosuthuwa. Ila Yinsa nasaapiru khuwooza yoori: “Mwiminyale! Ti miiyo! Mwihoove!”
MAR 6:51 Aphano Yinsa khuwela nkalawa khwiiya vamote na anakhiyoni awe, na pheevo khunyamala, na yo khwiiya ooshanka,
MAR 6:52 maana khazaaweleyiye minjuza za phaawu. Rooho zaya zaari zookhomaala.
MAR 6:53 Paata ya olokha pahari, khufiya Jenezare, ottuukho khufukelela kalawa yaya.
MAR 6:54 Wakathi apakhuwiyeevo atthu khunjuwa Yinsa.
MAR 6:55 Yo aari ovira azukulelaka nti wooshi opule, na owaathuula alwele aya va nrepa awaalawanaka ohali aari osiilaawo yoori Yinsa ori ottuukho.
MAR 6:56 Wakhula vahali aari weettaawo, mmamuti, nsitati ama mmashapa, aari othuuliwaka alwele na olawaniwa mparasa. Noovekeliwa yoori nenkawu awahi osapa nshaka la ajapi yawe; maana ooshi apale aari osapaaye aari wiiya oovona.
MAR 7:1 Mafwarizeewu na akina anamanozela a kano alankhiye Yeruzaleemu khukusanyeya na Yinsa.
MAR 7:2 Khusala awoona anakhiyoni awe akina eettaka oja na makhono aharaamu, enlupaaye yoori khanaweeni.
MAR 7:3 Mafwarizeewu na mayaahuuti ooshi khanja ahinaweeni wotwahareshiwavo, alottelaka zowera za attunkhulu a tiini.
MAR 7:4 Amana aruti oparasa, khannja ahaazeeni woosa makhono aya khapula. Anthokorela masomi makina a waatta, nkhama woosa pilawuri, mirinki, zoopo za malaatha na moolili.
MAR 7:5 Aphano mafwarizeewu na anamanozela a kano khumuuzela Yinsa yoori: “Mwaasa aya niini anakhiyoni awo ahilottelaka zowera za attunkhulu a tiini, khusala aja ahinaweeni?’”
MAR 7:6 Ye khuwaajipu yoori: “Manaafikhi! Ezaaya ahupiri saaneene monkoni weenu mweeyo nkhama etthiipo yaatikhiweeyo yoori: ‘Atthu apa anikishitahi na malimi, ila rooho zaya ziri peetiwene na miiyo.
MAR 7:7 Anikaaputu mahala na ansomisa mwentto wa oruma wa eenaatamu.
MAR 7:8 Mweeyo mwintarawu mirumo za Nluku na khusala mwilottela zowera za enaatamu.
MAR 7:9 Yinsa khwiishelana awoozaka yoori: “Mweeyo mwineekesa yoori mwitthe othetekele mirumo za Nluku mwaasa wa oshututela masomi enu!
MAR 7:10 Maana Munsa alupa yoori: ‘Onshitahi papaawo na mamaawo,’ na ‘antakhaaye onlaani papaawe na mamaawe ona ya ohukhumweliwa ofwa.’
MAR 7:11 Ila mweeyo mwinkhupalela yoori amana ntthu amuuza papaawe ama mamaawe yoori: Wakhula etthu kiniwinkhaanini miiyo zaakha ya omwinkha Nluku,’
MAR 7:12 khwa nanna eto mwiwerawere ojikhanyarela omwaawuni papeenu na mameenu.
MAR 7:13 Toowo mweeyo khamwinttha fwayita nttakhuzi la Nluku, khwa opatilana zowera zinlankhaaye wa paapa khwa aana aya. Na mwinretta vitthu zawaatta nkhama etthiipi.
MAR 7:14 Yinsa khuwaakharipusha theenya atthu apale khuwooza yoori: “Mwikisiileze mooshi na eweeleyeni epi saana yoori:
MAR 7:15 khina etthu moote ya oje wa pinaatamu enraaye nonvira khunttha oharaamu, ila epile zininlankhaaye nroho mwawe ti eninharamushaaye.
MAR 7:16 Nkhama ntthu onaaye mashiilo oosiila ti asiile!
MAR 7:17 Paata ya owaalikha atthu apale olawa owaya, anakhiyoni khunvekela yoori awooze maana a nlikaniso aya opule.
MAR 7:18 Yinsa khuwoozela yoori: ‘Kiri na mweeyo khiniweeleyani? Yoori khina etthu moote eninviraaye pinaatamu eninharamushaaye?
MAR 7:19 Maana khineetta nroho mwawe, ila mwiijohojoho mwawe, nawiisha khwiitthiwamo.” Khwa etthiipo mattakhuzi apale, Yinsa khutukhuru ottha wiiya halaali vitthu zoojiwa zooshi.
MAR 7:20 Khurutela olupa yoori: “Etile eninsaruwaaye pinaatamu ti eninharamushaaye.
MAR 7:21 Maana nrooho ti, enlakhaamo zawuupuweliwa zootakhala, oshawi akhapa, wiiya, wuula,
MAR 7:22 oraruwa, okhwiririwa,vitthu zootakhala, ohata, oralana woohiiyi wa halaali, nrima, waapa, ojoona na ololo.
MAR 7:23 Zootakhala zooshi zinlankha nroho wa ntthu na piitthiipo zininharamushaaye pinaatamu.”
MAR 7:24 Yinsa khulaawo okhule waya khulawa phantte ya Tiiro na Sitooni, khweetta nyuupa yaya eto na khaatakhiye ojuwiwa ti ntthu, ila khuhiwahi ojittha sirini.
MAR 7:25 Ila nasaapiru muukha mmote, aarina mwanawe wa nnatti ariina sheethwani, asiiliyeevo monkoni wa ye, khuta khukokhora nshini wa moolu a Yinsa.
MAR 7:26 Muukha otule aari nkereeka ya siiro-fineesiya aavokoliweewo, khusala anvekela Yinsa yoori amwikare sheethwani otule aari mmwiili wa mwanawe.
MAR 7:27 Ila Yinsa khumuuza yoori: “Owaalikhe khapula aana aje arupale. Khahi yoolotteya othuula phaawu ya aana khuwenkha anapwa.”
MAR 7:28 Muukha otule khujipu yoori: “Khweele, Mbwana aka, ila hatha anapwa, annja tathela vathi wa meeza eniwaakwaayo asimaana.
MAR 7:29 Aphano ye khumuuza yoori: “Mwaasa wa nanna ojipwiyeezo, weeyo, etta; sheethwani ansaruwa mwanawo.”
MAR 7:30 Muukha otule khurutela owawe na khunsikana mwanawe arapaleliye voolili, sheethwani otule anlikhiye.
MAR 7:31 Elottelanaka, Yinsa khulankha mmuti mphule wa Tiiro na khulokha Sitooni mpakha ntthatta la Kalileya nti wa Tekapoliishi.
MAR 7:32 Aphano khutiiseliwa mwinyi mmote woohisiili na wookukuma, khunvekela yoori anttheele makhono ye.
MAR 7:33 Yinsa khunlazavo vakatthi wa atthu apale awaatta na khunttha zaala omashiilo wawe. Elottelanaka khutthema na khusapa nlimi la mwinyi aya otule.
MAR 7:34 Aphano khweekesa otulu, khwiittha phuumu na khumuuza mwinyi otule yoori: “Efata” enlupaaye yoori: “Ofunule.”
MAR 7:35 Wakathi otthuupule mashiilo a mwinyi otule khufunuwa na nlimi lawe khuveya, ye khwaaza ottakhula woohiina tafwawuthi.
MAR 7:36 Yinsa khuwooza yoori ahimuuze hatha ntthu. Ila olikha toowo, khwa nanna aari owaakhattazaavo, yo aari otepa olaleya.
MAR 7:37 Atthu ooshi aari osiilaaye aari wiiya ootikinisiwa channu na khusala alupa yoori: “Ye onretta vitthu zooshi saana, mpakha oniwaattakhulisa apale ohittakhuli na owaasiilisa ananhisiili.”
MAR 8:1 Ziviriyeevo siikhu vattitthiiru, atthu akina awaatta khukusanyeya vamote na Yinsa. Mwaasa wa atthu apale khaarina etthu yoojiwa, khuwaakhuwela anakhiyoni awe khuwooza yoori:
MAR 8:2 “Kiniwoonela huruma atthu apa, maana ana siikhu ttatthu ari vamote na miiyo na khana hatha etthu yoojiwa.
MAR 8:3 Amana miiyo kiwooza olawa owaya najala zaya, yo antta okwa ntarikhi maana akina alankha peetiwene.
MAR 8:4 Anakhiyoni awe khujipu yoori: “Vayi khwa puuro eti niriiyo ya wiitthaleya ntthu anwahaaye opattha phaawu zoofiyela oja atthu apa?”
MAR 8:5 Yinsa khuuzela yoori: “Mweeyo mwina phaawu kavi?” Yo khujipu yoori: “Sapa.”
MAR 8:6 Ye khuwaaruma atthu apale yoori eekhale vathi. Elottelanaka khuthuula phaawu epile sapa, khunshukhurwela Nluku, khumeya khuwenkha anakhiyoni awe yoori awawanyele atthu apale. Yo khuretta etthiipile,
MAR 8:7 Aarina theenya swi kiina ttiitthittiitthi, khuthuula, khuparikhiya na khuwooza anakhiyoni awe yoori awawanyele atthu apale.
MAR 8:8 Atthu apale khuja mpakha orupala. Na khukusanya nyeenye zaasaliiyeeyo khwiitaala khelenke sapa.
MAR 8:9 Aarivo thamani ya atthu alufu nne, khuleezanana.
MAR 8:10 Nasaapiru khweetta mmwaatiya na anakhiyoni awe khusala alawa nti wa Talimanuuta.
MAR 8:11 Mafwarizeewu khuta na khwaaza omuuzela Yinsa yoori amoone, na khunvekela alama ya pinkuuni.
MAR 8:12 Ye khusisimira nkatthi-nkatthi na khuri: “Mwaasa aya niini khapila eti evekaka alama moote ya minjuza? Miiyo kinhakikhi yoori hatha alama moote khanlawa winkhiwa.”
MAR 8:13 Aphano khuwaalikha apale aya, khurutela nkalawa khusala alawa phantte kiina.
MAR 8:14 Anakhiyoni apale eettiye osahawu othuula phaawu, aarina phaawu moote paasi nkalawa.
MAR 8:15 Yinsa khuwooza yoori: “Mwijeekesele na mwiiyane phoole na fwaramento za mafwarizeewu na ya Herooti.”
MAR 8:16 Yo khusala akheetisana araka: “Mwaasa aya woohiina phaawu.”
MAR 8:17 Yinsa ajuwiyeevo yoori antta okheetisana, khuwoozela yoori: “Mwaasa aya niini mwinkhetisanaka monkoni wa ohiina phaawu? Nalelo khiniweeleyani wala khamwinsiila? Rooho zenu mweetta wuumisa?
MAR 8:18 Mweeyo mwinaaye maasho ila Khamwinoona, mwinaaye mashiilo ila khamwinsiila, hatha khamwinfikhiri?
MAR 8:19 Wakathi opule kaameyiyeeyo phaawu khuwenkha atthu apale alufu thaanu, khelenke kavi za nyeenye zasaliyeeyo?” Anakhiyoni apale khujipu yoori: “Khumi na piiri.”
MAR 8:20 Khi wakathi opule kaameyiyeeyo phaawu sapa yoori kiwenkhe atthu apale alufu nne, zaasaliye khelenke kavi za nyeenye mwaakhupeliyeeyo? Anakhiyoni khujipu yoori sapa.
MAR 8:21 Ye khuwooza yoori: “Mweeyo nalelo khiniweeleyani?”
MAR 8:22 Aphano yo khufiya Betezayiita, atthu akina ottuukhule khuntanela Yinsa ntthu woohooni, khusala anvekela yoori ansape.
MAR 8:23 Ye khunthuula ntthu otule khunlawana othetekele wa mmuti mphule, khulawa khutthemela mmaasho na khunttheela makhono. Yinsa khumuuzela yoori: “Weeyo onwahi woona etthu?”
MAR 8:24 Ntthu otule khweekesa otulu khuri: “Kiniwoona atthu anumpuwa nkhama miitthi enttaaye weettetta.
MAR 8:25 Theenya, Yinsa khunttheela makhono ntthu otule na khufinikha maasho awe. Aphano maasho awe khufunuwa na khurutela woona zooshi saaneene.
MAR 8:26 Yinsa khunruma olawa owawe amuuzaka yoori: “Ohivire mmuti.”
MAR 8:27 Yinsa na anakhiyoni awe khulawa nti waattamananiyeeyo Sezareeya ya Filiipe. Ntarikhi eettaka olawa, khusala awoozela yoori: “Atthu anri miiyo ki paani?”
MAR 8:28 Yo khunjipu yoori: “Akina anri weeyo o Yaahaya Namoosa, akina anri o Aliyaasi, akinoko aya anri weeyo ommote wa manapiyu.”
MAR 8:29 Yinsa khuwoozela yoori: “Khi mweeyo? Mwinri miiyo ki paani?” Pheeturu khujipu yoori: “Weeyo o Al-Masiihu!”
MAR 8:30 Yinsa khuwaaruma yoori ahimuuze hatha ntthu monkoni wawe ye.
MAR 8:31 Aphano ye khusala owaasomisa araka: Mwaana wa Pinaatamu aarina ya ohoochiwa pi vitthu zawaatta na okatthaliwa pi mahaakhimu a tiini na attunkhulu a tiini, anamanozela a kano na ooliwe, ila siikhu ya ttaatthu asisimuwe.
MAR 8:32 Ye khulupa woosileyavo monkoni aya opo. Aphano Pheeturu khunkhuwelela othetekele khusala anshowera.
MAR 8:33 Yinsa khurutela aphale aariivo anakhiyoni awe khusala aweekesa na khunshowera Pheeturu yoori: “Osale nyuma waka, Sheethwani! Weeyo khunuupuwela vitthu za Nluku, ila vitthu za eenaatamu.
MAR 8:34 Aphano khuwaakhuwela atthu na anakhiyoni awe khuwooza yoori: “Nkhama ntthu ontakha okilotta, ajikatthale mweenyewe, athuule nsalapa awe akilotte.
MAR 8:35 Maana otule antakhaaye wuusuru ohaayi awe ontta omwaashikha, ila otule onimwaashikhaaye ohaayi awe, mwaasa wa miiyo na mwaasa wa hapari zooshapweya ontta wuusurukha.
MAR 8:36 Ena fwayita-ni ntthu oshintta olumwenku wooshi, mwiisho waya khumwaashikha nafusi yawe?
MAR 8:37 Ama niini ntthu anwahaaye opatili na nafusi yawe?
MAR 8:38 Amana ntthu apatthiwa haaya khwa miiyo na mattakhuzi aka khwa khapila epi zoovonya na za twampi, Mwaana wa Pinaatamu onteela opatthiwa haaya khwa otu aya wakathi anttelaaye ota nsiifwa wa Papaawe na malayikha ttakatthiifu.”
MAR 9:1 Khusala alupa theenya yoori: “Kiniwuuzani khweele yoori: Khwa apa ariiye apha, akina khanfwa ahooneeni ofwalume wa Nluku otakha na owahi.”
MAR 9:2 Ziviriyeevo siikhu sitha, Yinsa khunthuula Pheeturu, Tiyaaku na Yaahaya paasi, khuwaalawana vamwaako woolepa woohiivo hatha ntthu nkina. Attaaphale Yinsa khwiiya woozukulisiwa ettaka omoona.
MAR 9:3 Kuwo zawe khwiiya zoottakattha nkhama etthu yawaara ameenaatho ahinwahaaye ofula khuttakatthisa nkhama toowo.
MAR 9:4 Khuwaapuwelela Aliyaasi na Munsa, khusala attakhulana Yinsa.
MAR 9:5 Aphano Pheeturu khumuuza Yinsa yoori: “Mwaaliimu ti yooshapweya wiikhala attaapha. Nintta ojeka heema ttatthu, moote yawo, moote ya Munsa na kiina ya Aliyaasi.”
MAR 9:6 Pheeturu khaari ojuwa etthu yoolupa, maana yo aari wa woova.
MAR 9:7 Elottelanaka khupuwa liwiku khuwaakhutela, na khusiileya huula yaari oraaye: “Otu Mwanaka wompheta waka; mwinsiileze”.
MAR 9:8 Nasaapiru, wakathi eekesiyeeyo nkerekhere, khuhimooni hatha ntthu nkina theenya woohiiyi Yinsa.
MAR 9:9 Eettaka wiishukha vamwaako aphale, Yinsa khuwooza yoori ahimuuze hatha ntthu etile oniyeeyo, mpakha Mwaana wa Pinaatamu asisimuwe muufwa.
MAR 9:10 Mwaasa opule khuthokorela atthaaporu paasi, khusalana okeetisana maana a “osisimuwa muufwa”.
MAR 9:11 Khumuuzela yoori: “Mwaasa wa niini, anamanozela a kano alupaka wiiya yoohithajiya Aliyaasi ota khapula?”
MAR 9:12 Yinsa khuwaajipu yoori: “Khweele Aliyaasi ona ya ota khapula, amana ata onrutisela opheeya vitthu zooshi. Khi mwaasa aya niini yaatikhiwaka yoori Mwaana wa Pinaatamu ona ya ohoowa channu, okatthaliwa na otarawiwa?
MAR 9:13 Ila, miiyo kiniwuuzani yoori Aliyaasi ata, yo khunrettela zooshi aatakhiyeeyo nkhama zaatikhiweezo monkoni wa ye”.
MAR 9:14 Wakathi afiyeevo aphale aariivo anakhiyoni apale akina, khoona khuntti khuluyeene ewaazukuleliye apale na anamanozela a kano eettaka okheetisana na anakhiyoni.
MAR 9:15 Atthu apale paata ya omoona Yinsa, khwiiya ooshanka khutthirela khunchelisa.
MAR 9:16 Yinsa khuwoozela yoori: “Mwinkhetisana niini?”
MAR 9:17 Mwinyi mmote aari vakatthi wa khuntti etile khujipu yoori: “Mwaaliimu, miiyo kootisela mwanaka ariina sheethwani aninkhattazaaye ottakhula.
MAR 9:18 Wakhula vahali aninsikanaavo, ontta onkwisela vathi. Khusala alaza maphovu na owina meeno, na wookowa. Kawaavekela anakhiyoni awo yoori amwiikare sheethwani aya oto, ila yo khuhinkhitiri.
MAR 9:19 Aphano Yinsa khujipu yoori: “Oo, atthu oohaamini, mpakha lini kiiyaka vamote na mweeyo? Mpakha lini kuuvilelakani? Mwikitiisele shapu oto.”
MAR 9:20 Aphano yo khuntiisa. Wakathi sheethwani amooniyeevo Yinsa, nasaapiru khuntothela mwaana otule ozoromowa woohusutivo khukwela vathi, khwaaza ojuupurusha alazaka maphovu.
MAR 9:21 Yinsa khumuuzela paapa wa mwaana otule yoori: “Zamwaaza lini epi?” Papaawe mwaana khujipu yoori: “Thanku avokoliwe.
MAR 9:22 Swaafu zawaatta, sheethwani oto, ontta onkwisela vamoottho na mmaati yoori amuule. Ila nkhama onwahi oretta etthu, noonele huruma onaawuni.”
MAR 9:23 “Onwahi?” Alupaka Yinsa. “Zooshi zinwaheya khwa otule ankhupalaaye.”
MAR 9:24 Nasaapiru paapa wa mwaana otule khunyakula araka: “Kinkhupali; okaawuni muuhikhupali mwaka!”
MAR 9:25 Wakathi Yinsa ooniyeevo yoori khuntti khuluyeene yeettaka okusanyeya, khunsukisa sheethwani araka: “Sheethwani woohittakhuli na ohisiili, miiyo kinuuruma yoori onlikhe na ohinrutele theenya.”
MAR 9:26 Sheethwani khunyakula, khunsakhinya woohusutivo khusaruwa, shapu khwiiya nkhama ntthu woofwa, khufiyelela atthu akina olupa yoori: “Afwa.”
MAR 9:27 Ila Yinsa khunkhola nkhono awe khunlansa, na khwiiya wa weemela.
MAR 9:28 Paata ya Yinsa orutela owawe, anakhiyoni awe khumuuzela othetekele yoori: “Mwaasa aya niini nahaakhitireliyeeyo omwiikara?”
MAR 9:29 Ye khuwaajipu yoori: “Eto oniikareya khwa lompa na ofuka paasi.”
MAR 9:30 Yo khulaawo okhule aariiwo na khulokhela Kalileya. Yinsa khaatakhiye atthu ojuwa ohali aariiwo,
MAR 9:31 maana eetta owaasomisa anakhiyoni awe na awoozaka yoori: “Mwaana wa Pinaatamu onsaleela winkheleliwa mmakhono wa anaatamu. Yo anlawa amuule, ila siikhu ya ttaatthu onlawa asisimuwe.”
MAR 9:32 Ila yo khayaaweleyiye etthu aari otakhaaye olupa na eetta woova omuuzela.
MAR 9:33 Khufiya Kafwaranaawu. Ari owawe, ye khuwoozela anakhiyoni awe yoori: “Ntarikhi mwaari okheetisana niini?”
MAR 9:34 Ila yo khuhilupi hatha etthu, maana aari onyakulisana yoori anjuwe paani eeyiyeeyo nwulweene channu vakathi vaya.
MAR 9:35 Eekhaliyeevo, Yinsa khuwaakhuwela apale khumi na awiri khuwooza yoori: “Nkhama ntthu ontakha wiiya wa mwanzo, ona ya wiiya wawiishela na eeye karumeya wa ooshi.”
MAR 9:36 Khunthuula mwaana mmote khunttha vakatthi vaya, khunkholela nkhono awe na khuwooza yoori:
MAR 9:37 “Wakhula otule animpwekherelaaye nsimaana nkhama otu, khwa nzina laka, onikipwekherela miiyo, na otule anikipwekherelaaye khanikipwekherela miiyo, ila onimpwekherela otule akiperekhiyeeyo.
MAR 9:38 Yaahaya khunkhuwela Yinsa khumuuza yoori: “Mwaaliimu, namoona mwinyi mmote eekaraka masheethwani khwa nzina lawo, fweeyo khunlikhisa mwaasa woohiiyi wa khuntti yeetthu.”
MAR 9:39 Yinsa khumuuza yoori: “Mwihinkhattaze, maana khina anrettaaye minjuza khwa nzina laka, elottelanaka khukittakhula wootakhalavo.
MAR 9:40 Maana otule ahiniiphiriwaaye ti fweeyo, ori khwa fweeyo.
MAR 9:41 Nakatalikha, kiniwuuzani khweele yoori: Otule aniwinkhaanini maati oonywa, koopho moote khwa nzina laka, mwaasa wa mweeyo wiiya atthu a Al-Masiihu, weekhweele khinteela omwaashikha phakari yawe.
MAR 9:42 “Amana ntthu ankwisa mmote wa apa attiitthi akikhupaliyeeyo miiyo, afwataali weeseleliwa mpahari afukeliwe liwe liwululene mmwisiko.
MAR 9:43 Na nkhono awo amana wuukosisa, oshije. Afwataali weetta muuhaayi ori woorakala, ehiiyeeni wiiyana makhono awo mawiri khweetta motthooni, ohali oriiwo moottho ohinzimaaye.
MAR 9:44 [Ottuukho nyunku yaya ehinfwaaye wala moottho aya ohinzimaaye.]
MAR 9:45 Na muulu awo amana wuuthowelelisa, oshije. Afwataali weetta muuhaayi ori woorakala, ehiiyeeni wiiyana moolu mawiri khweetta motthooni,
MAR 9:46 [ottuukho nyunku yaya ehinfwaaye na moottho aya ohinzimaaye.]
MAR 9:47 Na amana liisho lawo limote luuthowelelisa, olazemo. Afwataali weetta muufwalume wa Nluku na liisho limote paasi ehiiyeeni wiiyana oomawiri ila khweeseleliwa motthooni,
MAR 9:48 ottuukho nyunku yaya ehinifwaaye na moottho aya ohinzimaaye.
MAR 9:49 Maana wakhula mmote onlawa alukaniwe moottho.
MAR 9:50 Mwiinyu pi wooshapweya; ila mwiinyu aya amana olikha onyuunya, wala khunrutiseleya! Mwiiye mwiinyu mweeyo ena, na mwiikhale na heeri mmote na nzeenu.”
MAR 10:1 Aphano Yinsa khulaavo aphale vaya khusala alawa nti wa Yudeya na phantte kiina ya Yorotaani. Theenya khuntti moote khuta aphale aariivo. Nkhama etthiipo aazowereliyeezo khusala awaasomisa.
MAR 10:2 Mafwarizeewu akina khunsusela yoori amweeze amuuzelaka yoori: “Halaali nlume omwaasha muukha awe?”
MAR 10:3 Ye khuwaajipu yoori: “Munsa aruma niini?”
MAR 10:4 Yo khulupa yoori: “Munsa aninkha ruhusa ya waatikha talakha khumwiikara.”
MAR 10:5 Yinsa awaajipwaka khuri: Mwaasa wa wuuma rooho, tiito ye oolikheliyeeni oruma opo aatikhiyeeyo.
MAR 10:6 Ila Nluku omwanzo amumpa nlume na muukha.
MAR 10:7 Mwaasa wa ethiito, nlume oninlikha papaawe na mamaawe khujikusanya na muukhaawe,
MAR 10:8 na oowiiri anretteya wiiya mwiili mmote paasi. Toowo, yo khaniiya awiri, ila oniiya mwiili mmote.
MAR 10:9 Nakatalikha, etile Nluku akusanyiyeeyo, ahiiyevo anvalulaaye.”
MAR 10:10 Wakathi Yinsa ari owawe, anakhiyoni awe khumuuzela theenya monkoni wa mattakhuzi atthaapale.
MAR 10:11 Ye khuwaajipu yoori: “Wakhula otule animwaashaaye muukhaawe na khunrala muukha nkina, ontta oraruwa.
MAR 10:12 Muukha naye amana antthira mannawe khuraliwa ti nlume nkina, ontta oraruwa”.
MAR 10:13 Atthu akina aari owaatana asimaana yoori asapiwe ti Yinsa, ila anakhiyoni awe eetta owaashoweraka.
MAR 10:14 Yinsa paata ya woona vitthu epile, khuhintuveli na khuwooza yoori: “Mwiwaalikhe asimaana akiteele miiyo, mwihiwaakhattaze; maana ofwalume wa Nluku pi waya.
MAR 10:15 Kiniwuuzani khweele yoori: Otule ahimpwekherelaaye ofwalume wa Nluku nkhama nsimaana, khanteela weettamo.
MAR 10:16 Elottelanaka, khuwaathuula asimaana, khuwaattheela makhono na khuwaaparikhiya.
MAR 10:17 Wakathi Yinsa aari weettelaaye osaruwa, mwinyi mmote khutthira amweettelaka khulawa khunkokhorela na khumuuzela yoori: “Mwaaliimu woosaana, kiretteniini yoori kipatthe ohaayi wa mileele?”
MAR 10:18 Yinsa khunjipu yoori: “Mwaasa aya niini okiitthaka woosaana? Khaavo woosaana, woohiiyi mmote paasi Nluku.
MAR 10:19 Weeyo onjuwa oruma onraaye: ‘Ohuule, ohiraruwe, ohiiye, Ohilupe oshaahiti woovonyeya, ohinhate ntthu na onshitahi papaawo na mamaawo.’”
MAR 10:20 Mwinyi otule khulupa yoori: “Mwaaliimu, zooshi epo kinshututela thanku oshaapu aka.”
MAR 10:21 Yinsa khumweekesa na khumpheta. Khumuuza yoori: “Enuusaleela etthu moote. Olawe woozanyise vitthu zawo zooshi, nzurukhu aya owenkhe asikhini na weeyo ontta wiiyana njuju pinkuuni; nawiisha ote okilotte.”
MAR 10:22 Paata ya mattakhuzi apale, shapu otule khwiiya woottettheya khulaavo ari woohuzunikha, maana aarina maali zawaatta.
MAR 10:23 Yinsa khweekesa nkerekhere khuwooza anakhiyoni awe yoori: “Nanna enlipaazo thaajiri weetta muufwalume wa Nluku.”
MAR 10:24 Anakhiyoni awe khwiiya ooshanka khwa mattakhuzi apale. Ila Yinsa khurutela olupa theenya yoori: “Aanaaka, nanna enlipaazo weetta muufwalume wa Nluku!
MAR 10:25 Eniiya yookhweya Enkamiiya ovira valiphotto la sikano, zayita thajiri weetta muufwalume wa Nluku.”
MAR 10:26 Anakhiyoni awe khwiiya ooshanka, khusala oozelana mmote na nzaawe yoori: “Nkhama pi toowo, paani anttelaaye wuusurukha?”
MAR 10:27 Yinsa khuweekesa khuwooza yoori: “Khwa pinaatamu khinwaheya, ila Nluku wala; khwa Nluku vitthu zooshi zinwaheya.”
MAR 10:28 Aphano Pheeturu khwaaza omuuza yoori: “Fweeyo nalikha zooshi yoori nuulotte.”
MAR 10:29 Yinsa khujipu araka: “Kiniwuuzani khweele yoori: khaavo anlikhaaye vaje vawe, ttwiiye, nlupuwe, mamaawe, papaawe, aana awe ama mashapa awe, mwaasa wa miiyo na hapari zooshapweya,
MAR 10:30 ahipwekheraaye venkivene ohaayi otthuupu, swaafu miiya theenya ya manyupa, attwi, alupu, maama, paapa, aana ama mashapa na olupatthiwa. Mwiisho waya ohaayi wa mileele.
MAR 10:31 Awaatta eeyiye amwanzo, anttela wiishela; na awiishela anttela wiiya amwanzo.”
MAR 10:32 Yo eetta owelela Yeruzaleemu, Yinsa khuwaalokoza. Anakhiyoni khwiiya onshanka, na apale aari onlottaaye khwiiya awoova. Theenya Yinsa khuwaakhuwela apale khumi na awiri na khuwooza vitthu zaari weettelaaye onrettikhanela araka:
MAR 10:33 “Moone, fweeyo ninwelela Yeruzaleemu, mwaana wa pinaatamu onlawa enkheleliwe mahaakhimu a tiini na anamanozela a kano. Yo anttela onhukhumwela ofwa na omwinkhelela mmakhono wa amalapo,
MAR 10:34 anttela onveyisa, ontthemela, onjapha na amuule. Paata ya siikhu ya ttatthu asisimuwe.”
MAR 10:35 Aphano Tiyaaku na Yaahaya, aana a Zepeteewu, khumwaattama Yinsa khumuuza yoori: “Mwaaliimu, nintakha yoori oninkhe etthu ninttelaaye wuuvekela.”
MAR 10:36 Yinsa khuwoozela yoori: “Mwintakha yoori kuuretteleni niini?”
MAR 10:37 Khujipu yoori: “Oninkhe ruhusa yoori khwa nsiifwa mwawo, fweeyo neekhale mmote nkhono nlume mmote nkhono nkha.”
MAR 10:38 Ila Yinsa khuwooza yoori: “Khamwinjuwa etthu mwinvekaaye. Mwinwahi mweeyo onywela koopho etile kinyweliyeeyo ama opwekherela woosiwa opu khoosiweeyo miiyo?”
MAR 10:39 Yo Khujipu yoori: “Ninwahi.” Yinsa khuwooza yoori: “Mweeyo mwinlawa mwanywele koopho kinyweliyeeyo na mwinlawa moosiwe nkhama khoosiweeyo miiyo;
MAR 10:40 ila phantte eto ya wiikhala nkhono nlume aka ama nkhono nkha khahi miiyo kininkhaaye. Maana puuro yaya eto ti ya apale oothokoreliwa.”
MAR 10:41 Noosiila vitthu epile, apale khumi khwiiya ookasirikha khwa Yaahaya na Tiyaaku.
MAR 10:42 Ila Yinsa khuwaakhuwela khwiiya vamote naye, khuwooza yoori: “Mweeyo mwinjuwa yoori apale aninkhiwaaye ofwalume wa olokozela khapila anshintta na owahi ariinaaye.
MAR 10:43 Ila vakatthi venu mweeyo ehiiye toowo. Otule antakhaaye wiiya nttunkhulu vakatthi venu mweeyo ona ya wiiya othuuto anrumeyaaye;
MAR 10:44 otule antakhaaye wiiya wa mwanzo vakatthi venu eeye namarumeya enu mooshi mweeyo.
MAR 10:45 Maana Mwaana wa pinaatamu khateleeni orumeyeliwa, ila orumeya na winkha ohaayi awe khwa owaakaphula atthu awaatta.
MAR 10:46 Khweetta Yeriko. Wakathi Yinsa na anakhiyoni awe vamote na khuntti khuluyeene yaari olankhaaye Yeriko Baritimeewu woohooni mwaana wa Timeewu nazimola eettiye wiikhala kharipu ya tarikhi.
MAR 10:47 Noosiila yoori Yinsa wa Nazareeti ontta ovira, khwaaza okhuwa araka: “Yinsa, mwaana wa Daawuuda, koonele huruma!”
MAR 10:48 Atthu awaatta khusala anshowera yoori eeye woonyamala, ila ye khusala akhanyarela araka: “Mwaana wa Daawuuda, koonele huruma!”
MAR 10:49 Yinsa khweemela khuri: “Mwinkhuwele.” Khukhuweliwa otule woohooni khumuuza yoori: “Ofurahi, olankhe, Ye ontta wuukhuwela!”
MAR 10:50 Khweesela ajapi yawe toole, khwiirukha khweemela khulawa aphale aariivo Yinsa.
MAR 10:51 Yinsa khumuuzela yoori: “Ontakha yoori miiyo kuurettele niini?” Mwinyi otule woohooni khujipu yoori: “Mwaaliimu, miiyo kintakha woona!”
MAR 10:52 Yinsa khumuuza yoori: “Olawe! Amini yawo yawuusuru.” Nasaapiru khwaaza woona na khusala anlotta Yinsa ntarikhi mphule.
MAR 11:1 Wakathi aattameliyeevo Yeruzaleemu, khufiya Betifwaaje na Betaaniya, kharipu ya mwaako wa oluveera, Yinsa khuwaaruma anakhiyoni awe awiri,
MAR 11:2 khuwooza yoori: “Mwilawe mmuti mpho mwaattameliyeemo, mwifiyaka mwininsikana mwaana wa puuru afukiwe ahinaweliweke ti hatha ntthu. Mwinfukule mwintiise.
MAR 11:3 Amana apuwa ntthu awuuzelani yoori: ‘Mwaasa niini mwirettaka vitthu epo?’ Mwinjipu yoori: ‘Mbwana ontta onhithajiya na oninrutisa nasaapi.’”
MAR 11:4 Yo khulawa khunsikana mwaana wa puuru afukeleliwe, vanlako nwulu wa ntarikhi ya vaje, anfukulaka.
MAR 11:5 Atthu aari attaaphale khuwoozela araka: “Eto mwinrettaaye niini ya onfukula mwaana wa puuru oto?”
MAR 11:6 Anakhiyoni apale khujipu etthiipile Yinsa awooziyeeyo, na ye khuwaalikha olawana.
MAR 11:7 Khuntiisela mwaana wa puuru otule Yinsa, khutthaavo kuwo zawe na khuwela.
MAR 11:8 Atthu awaatta khusala attattikha kuwo zaya ntarikhi na akina khusala atthaamo virapi aashijiyeeyo ntthuttu.
MAR 11:9 Apale aalokoziyeeyo na apale aari onlottaaye khusala anyakula araka: “Hosaana!” Wooparikhiyiwa ti otule antaaye khwa nzina la Mbwana!”
MAR 11:10 Wooparikhiyiwa saana ofwalume ontaaye wa papeetthu Daawuuda!” Hosaana pinkuuni!”
MAR 11:11 Yinsa khufiya Yeruzaleemu na khulawa mpakha nnyupa woosifwiwamo. Khoona zooshi na wiiya waaripiye, khulawa Betaaniya na anakhiyoni awe apale khumi na awiri.
MAR 11:12 Mmeesho mwaya, wakathi aari olankhaaye Betaaniya, Yinsa khunkhola jala.
MAR 11:13 Ari peetiwene, khoona muutthi wa mfikeera wooripelela mathapa, khulawa woona nkhama aari osikanamo nshumo. Wakathi aattameliyeeyo, khuhisikanimo hatha etthu, woohiiyi mathapa, maana khawaari wakathi wa wiima fiiku.
MAR 11:14 Aphano khuuza mfikeera opule yoori: “Khina anttelaaye oja theenya mishumo khwa weeyo.” Anakhiyoni awe khusiila alupaka mattakhuzi apale.
MAR 11:15 Yinsa khufiya Yeruzaleemu, khuvira nnyupa woosifwiwamo na khwaaza oweekara apale aari wuuzanyisaaye na apale aari wuuzanyaaye. Khupwalula khukulu za anamapatilisa nzurukhu na za apale aari wuuzanyisaaye jiwa.
MAR 11:16 Khaari ontakhela ntthu oviranamo etthu yawuuzanyisa nnyupa woosifwiwamo.
MAR 11:17 Khusala asomisa araka: “Khayaatikhiweeni yoori: ‘Nyuupa yaka enttela wiiya nyuupa yoolompiwamo khwa atthu ooshi ila mweeyo mwarettisa wiiya likurakuza la manantarawu.”’
MAR 11:18 Mahaakhimu a tiini na anamanozela a kano khusiila mattakhuzi apale na khwaaza weekesa nanna ya omuula, maana eetta omoova, mwaasa wa khuntti khuluyeene yaari oshankisiwa pi masomi awe.
MAR 11:19 Weettelaka oripa, yo khulaamo nsitati mphule.
MAR 11:20 Mmeesho mwaya supuyeene, khoona mfikeera opule ori wawuuma mpakha na mitathaari zaya.
MAR 11:21 Pheeturu khuupuwela na khumuuza Yinsa yoori: “Mwaaliimu! Woone mfikeera opule waalaaniyeeyo wooma.”
MAR 11:22 Yinsa khunjipu yoori: “Wiiyane amini khwa Nluku.
MAR 11:23 Miiyo kiniwuuzani khweele yoori, wakhula otule anttelaaye wuuza mwaako opu yoori: ‘Okhuleyevo apha waajeeselele mpahari,’ na khuhiina hatha nshikili nroho mwawo, ila khukhupalela yoori enrettikhana etile olupiyeeyo, entta oretteya.
MAR 11:24 Apho, miiyo kiniwuuza yoori, zooshi weeyo onvekaazo khwa lompa, khukhupalela yoori apwekherela, onteela opattha.
MAR 11:25 Na amana olompaka, khwiiyana nzaawo okosiyeeyo, onswaamihi, yoori naye Paapa wa pinkuuni oswaamihi twampi zawo.
MAR 11:26 Ila mweeyo amana mwihiswaamihi, na mweeyo Paapa wa pinkuuni khanswaamihi twampi zenu.
MAR 11:27 Khufiya theenya Yeruzaleemu, wakathi Yinsa aari oviraaye nnyupa woosifwiwamo, khususeliwa ti mahaakhimu a tiini, anamanozela a kano na attunkhulu a tiini,
MAR 11:28 khusala amuuzela yoori: “Vitthu epi, onrettana ofwalume waani? Paani awinkhiyeeyo ofwalume wa orettana?”
MAR 11:29 Yinsa khujipu yoori: “Miiyo kintakha kiwuuzele, amana okijipu, kintta owuuza ofwalume kinrettanaaye vitthu epi.
MAR 11:30 Nkakuuze, woosa wa Yaahaya waari wa pinkuuni ama waari wa anaatamu?”
MAR 11:31 Yo khusala anyakulisana araka: “Amana niri ‘ti-ya pinkuuni,’ ontta onuuzela yoori: ‘Aphano mwaasa aya niini mwihinkhupalelaka?’
MAR 11:32 Ila nihijilipisane olupa yoori waari wa atthu!” Maana yo aari owoova atthu, weekhweele atthu aari ookhupali yoori Yaahaya aari napiyu.
MAR 11:33 Aphano khunjipu Yinsa araka: “Khanijuweeni.” Yinsa zwaamu yawe khujipu yoori: “Hatha vattitthiiru, miiyo akiniwuuzani owahi kinrettanaaye vitthu epi.”
MAR 12:1 Aphano Yinsa khwaaza ottakhula na milikaniso yoori: “Mwinyi mmote khuzala miitthi za wuuva, khujekelela khwiiya nkatthi, khuthipa kulaathayini yoori asala atthaamo wuuva na khujeka korofwa. Paata ya toole khurentteriwa anamalima ye khusaafiri.
MAR 12:2 Wakathi wa wuurula, khunruma karumeya awe khwa anamalima yoori enkhiwe phantte ya mishumo za wuuva.
MAR 12:3 Ila yo khunkhola khumpiya na khumwiikara woohimwinkhi etthu.
MAR 12:4 Aphano khumperekha karumeya awe nkina yo khunvonya khunwozola veeshwa, na khunttukhana.
MAR 12:5 Khumperekha theenya nkina khumuula. Khuwaaperekha theenya awaatta akina; khupiiwa na akina khuuliiwa.
MAR 12:6 Aari osala mmote yoori amperekhe, mwanawe wompheta wawe. Mwiisho waya khumperekha na khuri: ‘Otu mwanaka antta onshitahi.’
MAR 12:7 Ila anamalima apale khuuzana yoori: ‘Otu ti namarithi. Nlaweni nimuule, nirithi fweeyo.’
MAR 12:8 Aphano khunkhola mwaana otule, khumuula khumweeselela oje wa nshapa.
MAR 12:9 Yinsa khuuzela yoori: “Mweenyewe nshapa onttela owaarettela niini? Ye ontta ota awoole anamalima apale nshapa laya awenkhe anamalima akina.
MAR 12:10 Khamwinasome etthu enlupaaye zawaatikhiwa ttakatthiifu? ‘Liwe anamajeka akatthaliyeeyo, nttho laya laretteya wiiya liwe linkhomaazaaye!
MAR 12:11 Eto enlankha wa Mbwana na ti yootikinisa khwa fweeyo.’”
MAR 12:12 Aphano khwaaza weekesa nanna ya onkhola, maana eettiye ojuwa yoori nlikaniso opule aalupiyeeyo waari owaalupa yo. Ila eetta owoova atthu, attaaphale khunlikha khusala alawa safwari yaya.
MAR 12:13 Paata ya toole, khurumiwa mafwarizeewu akina na attunkhulu akina a khuntti ya Herooti olawa ottakhulana Yinsa eekesaka yoori ansikanane nttakhuzi loovonyeya.
MAR 12:14 Wakathi afiyeevo aphale aariivo Yinsa khulupa yoori: “Mwaaliimu, ninjuwa yoori o weekhweele na khunjilikha oshawurisiwa ti ntthu. Maana khuniwaaphuka atthu khwa nanna ariizo, ila onsomisa wawaamineyavo tarikhi ya Nluku. Nkanuuze: Halaali onripha lumpuru Seezari ama wala?
MAR 12:15 Ila Yinsa khumweeleya onaafikhi waya khuwoozela yoori: “Mwaasa aya niini mweeyo mwikootootaka? Mwikitiisele nzurukhu yoori moone.”
MAR 12:16 Yo khutana nzurukhu opule, ye khuwoozela yoori: “Ratarato eti na waatikha opu pi waani?” Khujipuza yoori: “Seezari.”
MAR 12:17 Aphano Yinsa khuri: “Mwimwinkhe Seezari etile yiiyiye ya Seezari, na ya Nluku etile yiiyiye ya Nluku.” Khwiiya onshankela.
MAR 12:18 Masatukhi akina, apale anlupaaye yoori khawiivo osisimuwa, khuta aphale aariivo Yinsa khulupa yoori:
MAR 12:19 “Mwaaliimu, Munsa anilikhela zawaatikhiwa yoori, amana afwa ttwi na khunlikha muukhaawe ahinvokoleleeni aana, alooziwe ttwiiye yoori epuwe peewu khwa zwaamu ya ttwiiye.
MAR 12:20 Moone, aarivo attwi sapa, otu wa mwanzo khuloola na khufwa ahiwaalikheeni hatha aana.
MAR 12:21 Waphiiri khulooziwa muukha otule aafweliweeyo ti mannawe na ye khufwa, woohinlikhi mwaana; na wattaatthu khwiiya etthiipo.
MAR 12:22 Etthiipile oosaapa khuhiwaalikhi hatha aana. Mwiisho waya muukha otule na ye khufwa.
MAR 12:23 Wakathi woosisimuwa, khwa ooshi apa sapa anttelaaye wiiya muukhawe tuuvi? Maana ooshi anrala!”
MAR 12:24 Yinsa khuwaajipu yoori: “Mweeyo mwattettekhiwa, maana khamwinjuwa zawaatikhiwa ttakatthiifu wala owahi wa Nluku!
MAR 12:25 Pi toono, wakathi woosisimuwa muufwa, khamwinlawa oloola, wala olooziwa, ila mwinttela wiiya nkhama malayikha a pinkuuni.
MAR 12:26 Mweeyo khamwina some nkithaapu ya Munsa etthu yaatikhiweeyo monkoni wa osisimuwa? Wakathi aari ottakhulaaye va muutthi opule waari okholelaaye, yaatikhiwa yoori Nluku aamuuziye Munsa yoori: “Miiyo ki Nluku wa Eburahiima, wa Esiyaakha na wa Yaakhumpa.”
MAR 12:27 Moone, Nluku khahiyo wa ananfwa, ila Nluku wa atthu haayi. Mwattettekheya venkivene.
MAR 12:28 Namanozela wa kano mmote noowasiila akheetisanaka khunsusela, ajuwiyeevo yoori ajipu saana, khumuuzela yoori: “Khi oruma wamwanzo khwa zooshi pi puuvi?”
MAR 12:29 Yinsa khujipu yoori: “Oruma wamwanzo khwa zooshi pi opu: Osiileze, Ezirayiilu, Mbwana Nluku eetthu ti eeyiye Mbwana otthwe paasi.
MAR 12:30 Omphete paasi Mbwana Nluku awo khwa rooho yawo yooshi na nafusi yawo yooshi na akhili zawo zooshi na kuvu zawo zooshi.
MAR 12:31 Waphiiri pi opu: ‘Omphete nzaawo nkhama etthiipo onjiphetaazo omweenyewe. “Khawiivo nrumo nkina nwulu nkhama opu.’
MAR 12:32 Namanozela wa kano otule khuri: “Kemaani, Mwaaliimu, walupa na haakhi yoori ye mmote paasi, na khaavo nkina woohiiyi ye,
MAR 12:33 na omphete na rooho yawo yooshi na akhili zawo na kuvu zawo zooshi na omphete nzaawo nkhama etthiipo onjiphetaazo ti yooziti zaakha yoolukuziwa na twaha.
MAR 12:34 Yinsa amooniyeevo yoori ajipu waakhilivo, khumuuza yoori: “Weeyo khuri peetiwene na ofwalume wa Nluku.” Elottelanaka, khuhiivo hatha mmote aari omuuzelaaye.
MAR 12:35 Yinsa eettaka osomisa nnyupa ya Nluku, khuwoozela yoori: “Anlupa toovi anamanozela kano yoori Al-Masiihu mwaana wa Daawuuda?
MAR 12:36 Daawuuda aya alupa khwa Rooho Ttakatthiifu yoori: ‘Mbwana amuuza Mbwana aka yoori wiikhale nkhono nlume aka, mpakha miiyo kiwaatthe maatuwi awo vathi wa moolu awo.’
MAR 12:37 Daawuuda aya onimwiittha yoori ‘Mbwana’. Toovi anttelaaye wiiya mwaanawe?” Khuntti khuluyeene yaari osiileza wootuveliwavo.
MAR 12:38 Yinsa eettaka owaasomisa, aari owooza yoori: “Phoole na anamanozela kano. Yo oniwaatuvela weettetta awaliye ajapi zoolepa na opwekherela mwacheliwa vaparasa,
MAR 12:39 owaatuvela wiikhala wiilokozi nsinakooka na puuro zooshitahiwa mmajampo,
MAR 12:40 atthaapo antapanya mmanyupa ananfweliwa pi amannazaya na ojihakikhi khwa oretta lompa zoolepa; apa aya anttela ohoowa khwa ophukiwa woolwaazavo!”
MAR 12:41 Yinsa eekhaliye waattamela puuro etile eninkhiwaavo zaakha, aari woona nanna khuntti etile yaari otthaamo nzurukhu n'yoopo ya zaakha. Mathaajiri awaatta aari otthaamo wawaatta.
MAR 12:42 Khumoona muukha namafweliwa ti mannawe mmote wa masikhini, atthaakamo ttoosu piiri.
MAR 12:43 Yinsa khuwaakhuwela anakhiyoni awe khusala awooza yoori: “Kiniwuuzani khweele yoori namafweliwa otu ti mannawe atthaamo n'yoopo wa zaakha zayita akina aya.
MAR 12:44 Maana ooshi enkha tathela, ila otu na osikhini awe enkha wooshi aari ororomelaaye.
MAR 13:1 Wakathi Yinsa aari osaruwaavo nnyupa yoosifwiwamo, nakhiyoni awe mmote khumuuza yoori: “Mwaaliimu nkoona! Maweni mawulweene toono na manyupa ooshapweyisana toono!”
MAR 13:2 Yinsa khunjipu yoori: “Woona manyupa mawulumawulu apa? Khalinlawa liwe wiiya vatulu wa liwe nzaaya lihinttelaaye opwechiwa.”
MAR 13:3 Yinsa aarettiye eekhaliye vamwaako Oluveera omaasho wa nyuupa yoosifwiwamo, Pheeturu, Yaakhumpa, Yaahaya na Antere khumuuzela othetekele yoori:
MAR 13:4 “Onuuze, wakathi-ni enttelaaye orettikhana vitthu zaya epo, na enttela wiiyavo alama-ni yoothoonyeza yoori zooshi zasaleela orettikhana?”
MAR 13:5 Yinsa khuwooza yoori: “Phoole yoori mwihihatiwe ti hatha ntthu.
MAR 13:6 Maana awaatta anta khwa nzina laka alupaka yoori: ‘Miiyo ki Al-Masiihu!’ na aniwaahata atthu awaatta.
MAR 13:7 Amana mwisiila viittha ama hapari za viittha, mwihoove maana epo ena zoorettikhana, ila nalelo kinttela wiiya mwiisho.
MAR 13:8 Khapila moote enlawa yoomanane khapila kiina, na ofwalume onlawa woomanane ofwalume nkina. Zinlawa zeeyevo visikinyaatthi khwa phantte zoofwarikhana na jala. Epo zaya yaazo ya vitthu za olwaaza.
MAR 13:9 Mweeyo mwiiyane phoole, maana mwinlawa mwenkheleliwe wa anamaphuka na mwinlawa mwajaphiwe mmasinakooka, na mwilawaniwe wa misatoro na wa afwalume, mwaasa wa miiyo, yoori mwiiye mashaahiti.
MAR 13:10 Ila enihithajiya olaleyiwa hapari zooshapweya khapula khwa khapila zooshi.
MAR 13:11 Amana mwithuuliwa olawa ofukiwa na ophukiwa, mwihishukulikhe etthu yoolupa, ila ethiito mwinttelaaye winkhiwa wakathi aya otthuupo mwilupe ethiito, maana khahiyo mweeyo mwinttakhulaaye, ila Rooho Ttakatthiifu.
MAR 13:12 Ttwi mmote onlawa anleve ttwiiye yoori ooliwe, na paapa onleva mwanawe. Aana anlawa awaazukuluwele apapa zaya awoole.
MAR 13:13 Atthu ooshi anttela owiinani mwaasa wa miiyo. Ila otule anttelaaye ovilela mpakha mwiisho, ontta wuusurukha.
MAR 13:14 Amana moona okufuru wa woopisa wa pala nhali woohifwayi wiiyamo (ansomaaye ti emweeleye), aphano apale anttelaaye wiiya Yudeya atthirele omwaako.
MAR 13:15 Otule anttelaaye wiiya vatulu wa nyuupa ahiishukhevo yoori alawe owawe, wala ahivire othuula etthu ya nnyupa mwawe.
MAR 13:16 Otule aniiyaaye ntthuttu ahirutele onti yoori athuule juupa yawe.
MAR 13:17 Ootakhaliwa aakha apale anttelaaye osikaniwa ari awiimittha ama eettaka waamwisa!
MAR 13:18 Mwinvekele Nluku yoori vitthu zaya epo ehirettikhane mwiita.
MAR 13:19 Maana, siikhu zaya epo onttela wiiyavo ohoowa ohineeyekevo thanku Nluku ompe olumwenku, na khunteela opuwa nkina nkhama opo.
MAR 13:20 Eriwaka Nluku khaafupheyisiye siikhu zaya epo, khaavo aari weettelaaye wiiya haayi, ila mwaasa wa apale awathawuliyeeyo, afupheyisa siikhu zaya epo.
MAR 13:21 Aphano, amana ntthu awuuzani yoori: ‘Al-Masiihu otu ariiye apha!’ ama ‘Moone, otule ari okhule!’ mwihikhupali.
MAR 13:22 Maana anlawa apuwe Al-Masiihu oojipanka na manapiyu oojipanka anttelaaye othoonyeza alama na vitthu zootikinisa yoori kusapi awahi owaattettekha ananthawuliwa.
MAR 13:23 Mweeyo mwiiyane phoole! Miiyo kiniwuuzani zooshi epo zihinarettikhane.
MAR 13:24 Ila siikhu zaya epo, paata ya pala eto ya ohoowa, njuwa linttela oriipa na mweezi onttela olikha waara.
MAR 13:25 Matthottowa akhwe pinkuuni na kuvu ziriiye pinkuuni zinttela osakhinyeya.
MAR 13:26 Aphano, mwinttela omoona Mwaana wa Pinaatamu mmawiku na owahi nwulweene na siifwa.
MAR 13:27 Ye onttela oruma malayikha awe khwa phantte nne zooshi za nkerekhere wa olumwenku mpakha nkerekhere ya pinkuuni yoori awaakusanye ananthawuliwa awe.
MAR 13:28 “Mwijinozele nlikaniso wa nfikeera. Amana virapi zaya zinyoowela na mathapa khwaaza ophutuwela enthoonyeza yoori mwiita ontta waattamela.
MAR 13:29 Etthiipo theenya mweeyo, amana moona vitthu epo zeettaka orettikhana, mwijuwe yoori ye ori kharipu ya va milako.
MAR 13:30 Miiyo kiniwuuzani khweele yoori khapila eti kinvira vitthu epi zihirettikhaneeni.
MAR 13:31 Pinku na vathi zooshi zinteela ovira, ila mattakhuzi aka khanviraru.
MAR 13:32 Ila monkoni wa siikhu ama wakathi khina anjuwaaye; wala malayikha pinkuuni wala Mwaana, woohiiyi Paapa.
MAR 13:33 Phoole, mwiiye woojeekesela, maana khamwinjuwa ofiya wa wakathi aya opo.
MAR 13:34 Eri nkhama ntthu anlikhaaye nyuupa yawe khuretta safwari ya peetiwene; ila ahinalawe, khuwaalikhela ofwalume, akarumeya awe wakhula mmote sharuthi yawe, khunruma namweekesela yoori asale aweekeselaka.
MAR 13:35 Tiito, mwijeekesele, maana mweeyo khamwinjuwa wakathi mweenyewe nyuupa anttelaaye oruti; enttela wiiya njuwa looveva, osikhu layili, lifwajiri ama supu.
MAR 13:36 Amana ye ata woohileezi, ti ahiwaasikane eettaka olala.
MAR 13:37 Epile kiniwuuzaanini, kiniwuuzani mooshi: ‘Mwijeekesele!’”
MAR 14:1 Zaari osaleela siikhu piiri paasi yoori efiye siikhu ya Paashikowa na siikhu ya Njampo la Phaawu Zoohiina Fwaramento. Mahaakhimu a tiini na anamanozela a kano aari weekesa nanna ya onkhola Yinsa sirini yoori amuule.
MAR 14:2 Yo aari olupa yoori: “Khanininkhola vanjampo yoori nihipuwise nzuuzu vakatthi wa atthu.”
MAR 14:3 Yinsa ari Betaaniya, eekhaliye vameeza owawe mwinyi mmote anitthiwaaye Simawu namaharaja, khutawo muukha aataniyeeyo suupha ya mafuttha oonukhela awaatta nzurukhu. Khupwecha suupha etile khumwiitthela Yinsa veeswa vawe.
MAR 14:4 Apale aari attaaphale khwiiya ookatipukha khusala oozana atthaaporu yoori: “Aharipwela-ni mafuttha apale.
MAR 14:5 Maana aari owahi wuuzanyisa miiya ttatthu za nzurukhu wa paratha, aari weettelaaye winkhiwa asikhini.” Yo khunshowera muukha otule.
MAR 14:6 Ila Yinsa khuwaalikhisa araka: “Mwinlikhe muukha otu khwa heeri, Mwanvelaveliselani? Ye akirettela miiyo etthu yooshapweya.
MAR 14:7 Maana asikhini mwina mweeyo mileele, na mwinwahi owaawuni mwitakharu. Ila miiyo akinteela wiiya vamote na mweeyo mileele.
MAR 14:8 Ye aretta etile awahiyeeyo. Avaaza mafuttha oonukhela mwiili aka raku zeene, atthenkezaka ozikhiwa waka.
MAR 14:9 Kiniwuuzani khweele yoori: wakhula vahali lintafusiriwaavo nttakhuzi la Nluku khwa olumwenku wooshi, epi arettiyeeyo muukha otu, zeettaka olupiwa noofikhiriwa ye.”
MAR 14:10 Aphano Yuuda Eshikariyoote, mmote wa apale khumi na awiri, khulawa wa mahaakhimu a tiini khwa shawuri za onzinkula Yinsa.
MAR 14:11 Yo wakathi ansiliyeevo khwiiya oofurahi na khumwaahiti Yuuda omwinkha nzurukhu. Khwa wakathi aya opo Yuuda aari weekesa kiphenyo saana yoori anzinkule.
MAR 14:12 Siikhu ya mwanzo ya Njampo la Phaawu Yoohiina Fwaramento, wakathi waazoweriweeyo orettiwa twaha pwittipwitthi yoojeliwa paashikowa, anakhiyoni a Yinsa khumuuzela yoori: “Ontakha yoori neette vayi nootthenkesele etthu yoojiwa ya paashikowa?”
MAR 14:13 Yinsa khuwaaruma anakhiyoni awe awiri khuwooza yoori: “Mwilawe mpakha ositati, ottuukho mwinlawa mwansikane mwinyi athuuliye yuuku ya maati. Mwinlotte othuuto,
MAR 14:14 mwimuuze mweenyewe nyuupa ethiito anttelaaye oviramo yoori ‘Mwaaliimu ontta wuuzela: Orivayi nsana aka wa omaka-vo, kinttelaaye onja-vo paashikowa na anakhiyoni aka?’
MAR 14:15 Aphano ye ontta wuunozani mweeyo khwa nyuupa ya vatulu nsana nwulweene na zooshi mwinihithajiyaaye. Mwitthenkeze attaapho njampo letthu.”
MAR 14:16 Anakhiyoni apale awiri khulawa mpakha ositati, khusikana zooshi nkhama etthiipile Yinsa aalupiyeezo na khuntthekeza paashikowa.
MAR 14:17 Wakathi oripiyeevo, Yinsa khuta na anakhiyoni awe apale khumi na awiri.
MAR 14:18 Ari vameeza eettaka oja Yinsa khuri: “Weekhweele kiniwuuzani yoori mmote wa mweeyo anjaaye na miiyo onkizinkula.”
MAR 14:19 Ooshi khwiiya oohuzunikha na khwaaza wuuzela wakhula mmote khwa zwaamu yawe yoori: “Talili khahiyo miiyo?”
MAR 14:20 Yinsa khujipu yoori: “Mmote wa khumi na awiri anjanaaye miiyo parathu moote.
MAR 14:21 Mwaana wa Pinaatamu onlawa afwe, nkhama etthiipo yaatikhiweeyo monkoni wa ye. Ila wootakhaliwa ti otule anttelaaye onzinkula Mwaana wa Pinaatamu! Afwataali ahivokoliweeni!”
MAR 14:22 Eettaka oja, Yinsa khuthuula phaawu, khuparikhiya, khumeya, khuwenkha anakhiyoni awe na khuwooza yoori: “Mwithuule; opu mwiili aka.”
MAR 14:23 Elottelanaka, khuthuula jiikira, khushukhurwela, khuwenkha anakhiyoni awe na ooshi khunywa.
MAR 14:24 Khuwooza yoori: “Eti ti taamu yaka ya wahati yiitthiweeyo khwa zwaamu ya atthu ooshi.
MAR 14:25 Miiyo kiniwuuzani khweele yoori akinteela onywa theenya nshumo wa nrayi wa wuuva, mpakha siikhu kinttelaaye onywa theenya na mweeyo muufwalume wa Nluku.”
MAR 14:26 Paata ya yo wiipa liipo, khulankha khusala alawa omwaako Oluveera.
MAR 14:27 Aphano Yinsa khuwooza yoori: “Mooshi mweeyo mwinlawa mwakanswi. Maana yaatikhiwa yoori: ‘Kininvulalisa nshuki aya, na pwittipwitthi zaya zinttela omwazeya.’
MAR 14:28 Ila paata ya osisimuwa waka, kinttela olokoza Kalileya.”
MAR 14:29 Aphano Pheeturu khutukhuru araka: “Hatha nkhama ooshi eetta wuutthira, miiyo akinuutthira.
MAR 14:30 Yinsa khunjipu yoori: “Weekhweele kiniwuuza yoori leelo osikhu otthuupu, likukhuwi lihineekhe swaafu piiri, onteela okikhana swaafu ttatthu.”
MAR 14:31 Ila Pheeturu khusala akhanyarela channu araka: “Hatha nkhama kintakha wuuliwa vamote na weeyo, akinteela wuukhana.” Ooshi khulupa etthiipo.
MAR 14:32 Aphano khulankha khulawa puuro eniitthiwaaye Yetemaani, khuwooza anakhiyoni awe yoori: “Mwiikhale apha, miiyo kinttela olompa.”
MAR 14:33 Khunthuula Pheeturu, Tiyaaku na Yaahaya khwaaza oshukulikha, othunkuwikha na ohuzunikha.
MAR 14:34 Yinsa khuwooza yoori: “Nafusi yaka ti ya ohuzunikha venkivene woosaleela ofwa; mwisale apha na mwijeekesele.”
MAR 14:35 Yinsa khuwaasusa vattitthiiru khukokhora na khusala alompa yoori nkhama enwaheya aattuwananisiwe wakathi opu wa ohoowa.
MAR 14:36 Aari olupa toono: Oo Paapa zooshi khwa weeyo zinwaheya. Okaattuwananise miiyo jiikira eti ya ohoowa. Ila ehirettikhane khwa matakhelo aka, ila khwa matakhelo awo.
MAR 14:37 Apho khurutela aphale aariivo anakhiyoni awe, khuwaasikana eettaka olala. Khumuuza Pheeturu yoori: “Simawu, ontta olala? Khuwaheeni ojeekesela nenkawu wakathi mmote?
MAR 14:38 Mwijeekesele na mwilompe, yoori mwihikwele muuzayiniwa; rooho ti yookhomaala, ila mwiili pi woottettheya.”
MAR 14:39 Yinsa khuwaasusa opheya khusala alompa, arutelaka mattakhuzi mamoteru.
MAR 14:40 Wakathi arutiyeevo khuwaasikana eettaka olala theenya, mwaasa maasho aya eetta owaalemela; khaari ojuwa etthu yoojipu.
MAR 14:41 Khuta swaafu ya ttaatthu khuwooza yoori: “Nalelo mwintta olala na ovumula? Zafiyela! Wafiya wakathi wa Mwaana wa Pinaatamu winkheleliwa mmakhono wa anatwampi.
MAR 14:42 Mwilankhe, nilawe! Mwimoone namazinkula ori kharipu.
MAR 14:43 Yinsa nalelo eettaka ottakhula, khusala ata Yuuda mmote wa anakhiyoni apale khumi na awiri. Aari ota na atthu awaatta athuuliye phanka na kolomontto, aarumiweeyo ti mahaakhimu a tiini, anamanozela a kano na attunkhulu a tiini.
MAR 14:44 Namazinkula aawooziye alama araka: “Otule kinttelaaye ompatikha, ti othuuto; mwinkhole mwinthuule saana.”
MAR 14:45 Wakathi afiyeevo, ye khumwaattama khumuuza yoori: “Mwaaliimu!” na khumpatikha.
MAR 14:46 Atthu apale khunkhola Yinsa na khunkholelela.
MAR 14:47 Aphano mmote wa anakhiyoni awe aariina kharipu, khufuttha phanka khunvavela khushija nshiilo la karumeya wa haakhimu nwulu wa tiini.
MAR 14:48 Yinsa khuwooza yoori: “Mwakiteela na phanka na mikokontto yoori mwikikhole nkhama nantarawu?
MAR 14:49 Siikhu zooshi kaari vamote na mweeyo kisomisaka Nnyupa Woosifwiwamo, khuhikikholi; ila zooshi epi zaariye yoori emarisele zawaatikhiwa ti manapiyu.
MAR 14:50 Anakhiyoni awe ooshi khumwanswi na khutthira.
MAR 14:51 Ila shapu mmote, aajifinikhiyeeyo nkhumi woolakala paasi aari onlottaaye Yinsa. Yo khunkhola,
MAR 14:52 ila khuvula nkhumi opule, khutthira waazu.
MAR 14:53 Khunthuula Yinsa khunlawana wa haakhimu nwulu wa tiini na khuthukumana mahaakhimu a tiini ooshi, attunkhulu a tiini na anamanozela a kano.
MAR 14:54 Pheeturu khusala awaalotta ari peetiwene mpakha nlikokoro wa haakhimu nwulu wa tiini, na khulawa khwiikhala na anamarumeyela, ootthaka moottho.
MAR 14:55 Mahaakhimu a tiini na Mashawuriiya ooshi aari weekesa onsikanana Yinsa paathuli moote yoori anhukhumwele ofwa, ila khuhinsikanani hatha moote.
MAR 14:56 Maana awaatta aari olawela oshaahiti woovonyeya khwa Yinsa, ila tukhuru zaya khazaari sawasawa.
MAR 14:57 Aphano khulankha atthu akina na onlupeza vitthu zoovonyeya.
MAR 14:58 “Fweeyo nansiila alupaka yoori: ‘Kimpwecha Nyuupa eti Yoosifwiwamo yoojekiwa pi makhono a anaatamu, na siikhu ttatthu kijeke kiina, yoohijekiwi pi makhono eenaatamu.’”
MAR 14:59 Ila hatha nkhama piitthiipo, mattakhuzi aya khaari wiiya sawasawa.
MAR 14:60 Khulankha haakhimu nwulu wa tiini khumuuzela Yinsa yoori: “Khunjipu mattakhuzi apa onlokoveziwaaye?”
MAR 14:61 Ila Yinsa khwiiya woonyamala, khuhijipu hatha etthu. Haakhimu nwulu wa tiini khurutela omuuzela theenya yoori: “Weeyo o Al-Masiihu, mwaana wa Nluku Wooparikhiyiwa?”
MAR 14:62 Yinsa khujipu yoori: “Miiyo ki othuuto, na mwinlawa mwamoone Mwaana wa Pinaatamu eekhaliye nkhono nlume wa Nluku wa owahi zooshi, na ataaka mmawiku a pinkuuni.”
MAR 14:63 Aphano haakhimu nwulu wa tiini khuvarula kuwo zawe na khuri: “Khi ninrettanna oshaahiti nkina!
MAR 14:64 Mweeyo mwasiila okufuru wawe. Mwinuupuwela niini?” Atthu ooshi anri onsuhi wuuliwa.
MAR 14:65 Aphano akina khwaaza ontthemela khunfinikha omaasho wawe khusala ampwakula na amuuzela yoori: “Ti paani oopiyeeyo? Onlupe!” Anamweekesela khunkhola na khumpwakula.
MAR 14:66 Pheeturu aarettiye ari vathi nlikokoro wa nyuupa etile wakathi atiyeeyo njaazi wa haakhimu nwulu wa tiini.
MAR 14:67 Amooniyeevo Pheeturu eettaka woottha moottho khuri: “Weeyo waari na Yinsa wa Nazareeti.”
MAR 14:68 Ila Pheeturu khukhana araka: “Akininjuwa, na wala akinsiila etthu onlupaaye.” Khusaruwela nlako wa nlikokoro.
MAR 14:69 Wakathi njaazi otule amooniyeevo theenya, khuwooza apale aariina attaaphale yoori: “Otu mmote wa atthaapo.”
MAR 14:70 Ila khukhana theenya. Oviriyeevo wakathi vattitthiiru, apale aariina atthaapale theenya khumuuza Pheeturu yoori: “Weekhweele, weeyo o mmoteru na atthaapo, maana onkalileya.
MAR 14:71 Ye khwaaza onlaani na olapha yoori: “Akininjuwa pinaatamu aya oto oninlupaaye.”
MAR 14:72 Nasaapiru likukhuwi khwiikha swaafu ya phiiri. Pheeturu khuupuwela mattakhuzi Yinsa amuuziyeeyo yoori: “Likukhuwi lihineekhe swaafu piiri, onikikhana swaafu ttatthu.” Khulaavo aphale vaya khusala alila.
MAR 15:1 Supuyeene, khukusanyeya Mahaakhimu a tiini, attunkhulu a tiini, anamanozela a kano na Mashawuriiya ooshi, khunfuka Yinsa khunthuula khumwinkha Pilaatu.
MAR 15:2 Pilaatu khumuuzela yoori: “Weeyo o mfwalume wa mayaahuuti?” Ye khujipu yoori: “Weeyo ti onlupaaye.”
MAR 15:3 Mahaakhimu a tiini khunlokoveza vitthu zawaatta Yinsa.
MAR 15:4 Pilaatu khurutela omuuzela theenya yoori: “Weeyo khunjipu? Nkoona vitthu kavi anuulokovezaaye.”
MAR 15:5 Ila Yinsa khuhijipu hatha etthu Pilaatu khwiiya wooshanka.
MAR 15:6 Yaari zowera yaya, wakathi wa Njampo la Paashikowa, Pilaatu onfukulela napherezu mmote, otule aari ovekiwaaye ti atthu.
MAR 15:7 Mwinyi mmote anitthiwaaye Baraba aafukeliwe vamote na anamakhijili mwaasa wa omuula ntthu wakathi wa nzuzu.
MAR 15:8 Khuntti ya atthu etile khuta na khunvekela Pilaatu yoori arette etile awaazoweziyeeyo owaarettela.
MAR 15:9 Aphano Pilaatu khuwoozela yoori “Mweeyo mwintakha yoori kinfukulele mfwalume wa mayaahuuti?”
MAR 15:10 Maana ye aari ojuwa saaneene, yoori mahaakhimu a tiini anleviye Yinsa mwaasa wa nrima.
MAR 15:11 Ila mahaakhimu a tiini awaakhanyareliye atthu apale yoori anvekele Pilaatu aaze onfukulela Baraba khwa otakha waya.
MAR 15:12 Pilaatu khuwoozela theenya yoori: “Kinrettele niini mwinyi otu mweeyo mwinimwiitthaaye mfwalume wa mayaahuuti?”
MAR 15:13 Yo khunyakula araka: “Akhomeliwe!”
MAR 15:14 Ila Pilaatu khuwoozela yoori: “Niini arettiyeeyo yootakhala?” Ila yo khusala atepa onyakula araka: “Akhomeliwe!”
MAR 15:15 Pilaatu eekesaka otuvelisa khuntti etile ya atthu, khunfukulela Baraba na khuruma ojaphiwa Yinsa na olawa okhomeliwa.
MAR 15:16 Anajanka khunthuula Yinsa, khunlawana nlikokoro wa nyuupa khuulu ya nsatoro khukusanya khuntti khuluyeene ya anajanka.
MAR 15:17 Khunwalisa juupa yookhuttuwa, khuvaasha khaara ya miiwa khunwalisa mmwishwa.
MAR 15:18 Khusala anchelisa araka: “Wiiye haayi, mfwalume wa mayaahuuti!”
MAR 15:19 Khusala ampiya veeshwa vawe na nthala na ontthemela, akokhoraka na omwaaputu.
MAR 15:20 Paata ya onttukhana, anajanka apale khunvula kuwo yookhuttuwa khunwalisa kuwo za wiiya zawe. Aphano khunsarulela vaje yoori alawe ankhomele.
MAR 15:21 Khukutthanana mwinyi mmote wa Sireene aari wiitthiwaaye Simawu, papaawe Alishantere na Ruufu, aari olankhaaye omashapa. Khunkhanyarela othuula nsalapa wa Yinsa.
MAR 15:22 Yo khunthuula Yinsa khunlawana puuro eniitthiwaaye Kolokoota, eriina maana a puuro ya likurakuza la eeshwa.
MAR 15:23 Khusala atakha omwinkha viinyu yoophakanyaniwa mafuttha oonukhela, ila ye khuhinywi.
MAR 15:24 Aphano khunkhomela na khwaawanyana kuwo zawe khwa weekesa nasipu yoori ajuwe wakhula ntthu phantte ari weettelaaye osalana.
MAR 15:25 Aakhomelaniwe wakathi wa saa-ttaatthu, supu.
MAR 15:26 Pi etthiipo yaatikhiweeyo khwa olokoveziwa wawe yoori: MFWALUME WA MAYAAHUUTI.
MAR 15:27 Vamote na ye aakhomeliwe manantarawu awiri, mmote nkhono nlume, nkina nkhono nkha,
MAR 15:28 [na khurettikhana epile zawaatikhiwa zaalupiyeeyo yoori: “Ye aatthanttiwe nkhama namatapanya.”]
MAR 15:29 Apale aari oviraaye attaaphale, eetta onttukhana na osakhinya viishwa zaya araka: “Haya, weeyo ompwechaaye Nyuupa Yoosifwiwamo, khwa siikhu ttatthu khujeka.
MAR 15:30 Wiishukhe vansalapa apho na ojuusuru omweenyewe!”
MAR 15:31 Khwa nanna etthiipile, mahaakhimu a tiini na anamanozela a kano khusala alupa atthaaporu anveyisa yoori: “Awoosuru akina, ila khanwahi ojuusuru mweenyewe.
MAR 15:32 Wiishukhe vansalapa apho O Al-Masiihu, mfwalume wa Ezirayiilu, wiishukhe yoori niwoone na nuukhupali.” Apale aakhomeliweeyo, na yo eetta onttukhana theenya.
MAR 15:33 Yaapuwiye yiiza olumwenku wooshi, waaza atuhuri mpakha alaasiri.
MAR 15:34 Payina ya alaasiri, Yinsa khukhuwa na huula ya onyakula, araka: “Elooyi, Elooyi, Lama sabatani?” Eto ena maana ya “Nluku aka, Nluku aka, mwaasa aya niini okanswaka?
MAR 15:35 Wakathi atthu apale aari attaaphale asiiliyeevo mattakhuzi apale, khulupa yoori: “Mwisiile, oninkhuwela Aliyaasi!”
MAR 15:36 Mmote aari attaaphale khutthira khulawa khunaanisa shiponja na vinaakiri, khupweha va muutthi na khumwinkha Yinsa yoori anywe na khuri: “Mwinlikhe, nimoone nkhama Aliyaasi onta anlazevo aphale vaya.
MAR 15:37 Ila Yinsa khunyakula channu khwiittha phuumu.
MAR 15:38 Phazira ya Nnyupa Woosifwiwamo khuvaruwa khwaawanyeya phantte piiri, waaza vatulu mpakha vathi.
MAR 15:39 Wakathi namalokozela wa anajanka aariiye omaasho wa Yinsa, ooniyeevo nanna afwiyeeyo, khuri: “Wekhweele mwinyi otu aari Mwaana wa Nluku!”
MAR 15:40 Aakha akina aari oretta eettaka woona vitthu epile zaari orettikhanaaye ari peetiwene. Khwa atthaapo aarivo Mariyamu Mataleena, Mariyamu mamaawe Tiyaaku, nsimaana wa Yuusufu, na Salome.
MAR 15:41 Aakha aya apo amperekhiye Yinsa na omwaawuni wakathi ariiyo Kalileya. Owaalikha apo aya, aarivo aakha akina awaatta aalawaniyeeyo Yeruzaleemu.
MAR 15:42 Njuwa leettelaka otupweela, mwaasa wa wiiya siikhu ya otthenkeza Saapatu,
MAR 15:43 Yuusufu wa Arimateeya, mwinyi wa fwayita na aari oretta phantte ya Mashawuriiya, oto naye aari oweja ota wa ofwalume wa Nluku, khulawa woominyalavo wa Pilaatu na khuveka mwiili wa Yinsa.
MAR 15:44 Pilaatu khwiiya wooshanka noosiila yoori Yinsa afwa. Khunkhuwela namalokozela wa anajanka khumuuzela nkhama Yinsa afwa.
MAR 15:45 Wakathi ooziweevo ti namalokozela wa anajanka, khumwinkha mwiili wa Yinsa Yuusufu.
MAR 15:46 Aphano Yuusufu khuuzanya kuwo yoolakala yoopeepheya, khwiishusha mwiili wa Yinsa vansalapa aphale, khumputaputela va kuwo etile yoolakala na khunttha nkhapuri yaathipiweeyo va mwaako. Nawiisha, khutthaavo liwe vanlako vaya.
MAR 15:47 Mariyamu Mataleena na Mariyamu mamaawe Yuusufu, aarettiye eettaka woona na khoona mwiili wa Yinsa vahali waatthiiweevo.
MAR 16:1 Paata ya ovirisa Saapatu, Mariyamu Mataleena, Salome na Mariyamu mamaawe Tiyaaku, khuuzanya mafuttha oonukhela yoori eetthele mwiili wa Yinsa.
MAR 16:2 Siikhu ya mwanzo ya sumana supuyeene, njuwa leettelaka opuwa, aakha apale khulawa okhapuri.
MAR 16:3 Ntarikhi khusala oozelana yoori: “Paani anttelaaye onilazelavo liwe lifukaniweeyo nlako wa khapuri?”
MAR 16:4 Maana liwe laya laari liwululene. Ila noofiya okhule, khoona liri loolaziwavo.
MAR 16:5 Aviriyeevo nkhapuri mphule, khumoona shaapu awaliye kuwo zoolakala eekhaliye nkhono nlume, na khwiiya awoova.
MAR 16:6 Khuwooza yoori: “Mwihoove, mweeyo mwinimweekesa Yinsa wa Nazareeti, aakhomeliweeyo. Ye asisimuwa! Khaamo mphu, moone puuro aattattikheliwevo.
MAR 16:7 Mwilawe na mwawooze anakhiyoni awe na Pheeturu yoori: ‘Ye alokoza eettaka Kalileya.’ Ottuukho mweeyo mwinlawa mwamoone, nkhama etthiipo awuuziyeenini.”
MAR 16:8 Eettaka othukumela na osuthuwa, aakha apale khulaawo na khutthiramu nkhapuri mphule. Na khuhimuuzi hatha ntthu, maana aari awoova.
MAR 16:9 Wakathi Yinsa asisimuwiyeevo lifwajiri la siikhu ya mwanzo ya sumana, khumpuwelela omwanzo ene Mariyamu Mataleena, otule eekariweeyo mmwiili mwawe masheethwani sapa.
MAR 16:10 Ye khulawa owooza ashirikha awe Yinsa, maana yo aari oohuzunikha na olila.
MAR 16:11 Wakathi asiiliyeevo yoori Yinsa ori haayi na ampuweleliye Mariyamu Mataleena yo khuhikhupali.
MAR 16:12 Paata ya vitthu epile, Yinsa khujithoonyeza khwa wuuso nkina vakatthi wa anakhiyoni awe awiri alottaka tarikhi ya omashapa.
MAR 16:13 Yo khuruti khuta khuwooza mattakhuzi apale azaaya; ila theenya apale khuhikhupali.
MAR 16:14 Omwiisho waya Yinsa khuwaapuwelela apale khumi na mmote, wakathi aariiyo vameeza, na khuwaashowera mwaasa woohikhupali na wuuma rooho zaya, maana khawaasileziye apale aamoniyeeyo wakathi asisimuwiyeevo.
MAR 16:15 Khuwooza yoori: “Mwilawe olumwenku wooshi mwawalaleyele atthu ooshi hapari zooshapweya.
MAR 16:16 Otule ankhupalelaaye na khoosiwa ontta wuusurukha, ila otule ahinkhupalelaaye oniiyana paathuli.
MAR 16:17 Alama epi enttela owaalokoza apale anikikhupalaaye miiyo: khwa nzina laka aniikara masheethwani, anlawa attakhule luuka pheeya,
MAR 16:18 ankhola nyookha na onywa amali ya wuula, ila khuhiwaaretti hatha etthu na owaattheela atthu makhono khuvona.”
MAR 16:19 Paata ya owooza mattakhuzi apale, Mbwana Yinsa khuweziwa pinkuuni khwiikhala nkhono nlume wa Nluku.
MAR 16:20 Aphano anakhiyoni apale khulankha khulawa olaleya phantte zooshi, Mbwana aari owaawuni ahakikhaka mattakhuzi aya na alama zaari owaalottaaye.
LUK 1:1 Weeyo Tiyoofilu woohishimiwa, atthu a waatta aajilipisiye waatikha hatiithi ya vitthu ziviriyeeyo vakatthi vetthu.
LUK 1:2 Apale aari mashaahiti ooniyeeyo omwanzweene zirettikhanaka, khwiiya anamalaleya a hapari zooshapweya za nttakhuzi la Nnyizinku, atthaapo pi anifiseliyeeyo fweeyo.
LUK 1:3 Na miiyo zaamu yaka khusala kitholathola woohilazeli varanka epile zirettikhaniyeezo zaazaka, khulakela owaatikhela zooshi woolotteyavo,
LUK 1:4 yoori wiiyane nroromelo khwa mattakhuzi apa a haakhi osiiliyeeyo.
LUK 1:5 Wakathi Herooti ari nsatoro wa Yudeya, aarivo haakhimu wa tiini mmote wa khuntti ya Abiiya aari wiitthiwaaye Zakariiya. Muukhaawe aari wiitthiwa Elizabeeti aari woojama wa mahaakhimu a tiini.
LUK 1:6 Oowiiri aya aari atthu ookhweele nkatthi wa mwentto wa Nnyizinku na ooshututela wa waamineyavo kano na oruma wooshi wa Mbwana.
LUK 1:7 Elizabeeti khaarina mwaana mwaasa woohiina mavokozi na oowiiri aya aari awuuluvala.
LUK 1:8 Siikhu moote Zakariiya aari okhola khaazi yoohaakhimu wa tiini Nnyuupa wa Nnyizinku Yeruzaleemu, mwaasa yoori yaari zwaamu ya khuntti yawe okhola khaazi yaya etile.
LUK 1:9 Nkhama etthiipo aazowereliyeeyo attunkhulu a tiini, ye aathawuliwe nkatthi wa nasipu yoori asala akhoza ovupa puuro ttakatthiifu ya Mbwana.
LUK 1:10 N'oofiya wakathi wookhoza ovupa, atthu ooshi apale aari vaje aari ovira alompaka.
LUK 1:11 Aphano nlayikha la Mbwana khunteela Zakariiya nkhono-nlume vaalitaari onkhoziwaavo ovupa.
LUK 1:12 Wakathi ye ooniyeevo nlayikha ntthile, khwiiya wooshanka na wa woova channu.
LUK 1:13 Nlayikha khumuuza yoori: “Ohoove Zakariiya! Nnyizinku asiila lompa yawo; muukhaawo Elizabeeti onteela ompattha mwaana. Weeyo onteela ontthaja nzina la Yaahaya.
LUK 1:14 Ye onttela wiiya furaha yootuveliwa wawo, atthu a waatta anteela ofurahela ovokoliwa wawe,
LUK 1:15 maana ye onteela wiiya nttunkhulu mmakhono wa Mbwana Nnyizinku. Khanteela onywa viinyu wala onywa vitthu zoohapala. Onttela wiiya wa wiitaazaniwa Rooho Ttakatthiifu ari mwiirukulu wa mamaawe.
LUK 1:16 Onteela owaatana atthu awaatta a Ezirayeele wa Mbwana Nnyizinku aya.
LUK 1:17 Onteela operekhiwa ti Mbwana na onttela wiiya wookhomaala na woowahi nkhama napiyu Aliyaasi, yoori azukulise rooho za apaapa eeyane osiilana na aanaaya, na yoori awaazukuluse anamakhijili eettettise haakhi, toowo phi anttelaavo ozukulisa rooho zaya yoori ampokherele Mbwana ataaka.”
LUK 1:18 Aphano Zakariiya khuuzela nlayikha ntthile yoori: “Kinteela ohakikhi toovi etthu yaya eto? Miiyo kooluvala na muukhaaka ooluvala.”
LUK 1:19 Khujipu nlayikha liraka: “Miiyo ki Jipiriilu, kiniiya vamote na Nnyizinku, akiruma yoori kite kiwuuze hapari epi zooshapweya.
LUK 1:20 Wiiya khukhupaleeni mattakhuzi apa kiwuuziyeezo, onttela wiiya woohittakhuli mpakha siikhu zinttelaaye orettikhana vitthu epi. Zinteela orettikhana wakathi aya otthuupo.”
LUK 1:21 Nalelo atthu aari onwejaaye Zakariiya khushanka mwaasa woorupaza Nnyupa wa Nnyizinku.
LUK 1:22 N'oosaruwa, khuhisala awahi ottakhulana atthu apale. Yo khujuwa yoori wanteeliye wahayi Nnyupa wa Nnyizinku. Khwiiya woohittakhuli khusala attakhula na makhono.
LUK 1:23 Wakathi eeshisiyeevo siikhu zookhola khaazi z'oottunkhulu wa Nnyupa wa Nnyizinku, khurutela owawe.
LUK 1:24 Paata ya toole, muukhaawe Elizabeeti khwiimittha, khuhisala asaruwa nnyupa mpakha nyeezi mithaanu.
LUK 1:25 Khuri: “Aphano Mbwana ajipu lompa yaka, eeshisa haaya etile kaariina na atthu.”
LUK 1:26 Mweezi wasiitha wa erukulu ya Elizabeeti, Nnyizinku khuruma nlayikha Jipiriilu olawa sitati ya Kalileya nti wa Nazareeti
LUK 1:27 yoori lilawe wa mwaari mmote woohijansiliwi aari wiitthiwaaye Mariyamu, aaposiweeyo ti shapu mmote aari wiitthiwaaye Yuusufu woojama wa mfwalume Daawuuda.
LUK 1:28 Nlayikha ntthile n'onsikana khumuuza yoori: “Heeri yiiye vamote na-weyo Mariyamu! O wooziti oshapweyiwa, Mbwana ori vamote na-weyo.”
LUK 1:29 Ye khwiiya woozinkireya mwaasa wa mattakhuzi apale, khuvira aphelelezaka maana a hapari zaya epile.
LUK 1:30 Nlayikha khurutela omuuza liraka: “Ohoove Mariyamu, wapattha rehema omaasho wa Nnyizinku.
LUK 1:31 Onteela wiimittha ompatthe mwaana wanlume ontthaje nzina la Yinsa.
LUK 1:32 Ye onteela wiiya nttunkhulu, nka eetthiwaka Mwaana wa Nnyizinku Nwulu wa Pinkuuni. Mbwana Nnyizinku onteela omwinkha ofwalume wa papaawe Daawuuda.
LUK 1:33 Na onteela wiiya mfwalume wa Ezirayeele khwa mileele, ofwalume awe khunteela wiisha.”
LUK 1:34 Aphano Mariyamu khuuzela nlayikha yoori: “Zinttela orettikhana toovi na miiyo akininjuwa nlume?”
LUK 1:35 Nlayikha khujipu liraka: “Rooho Ttakatthiifu ontta owiishukhela, owahi wa Nnyizinku Nwulu wa Pinkuuni onttela wuufinikha na mwiivuuli awe. Ti eto Mwaana onttelaaye ompattha, onteela wiitthiwa Ttakatthiifu, Mwaana wa Nnyizinku.
LUK 1:36 Omoone jamaayo Elizabeeti, otule yaari oriwakaaye khanvokola, ila apha na wuuluvala wawe nasaapi eti eemittha opu mweezi wasiitha.
LUK 1:37 Maana, mmakhono wa Nnyizinku khayiivo etthu moote ehinwaheyaaye.”
LUK 1:38 Mariyamu khuri: “Kiri raati miiyo karumeya wa Mbwana; mattakhuzi apa onlupaaye phi arettikhane khwa miiyo.” Nlayikha ntthile khulaavo khulawa.
LUK 1:39 Ziviriyeevo siikhu, Mariyamu khujilokotthela khusala alawa na waakuva sitati moote yaari nti wa nnyaako za Yudeya.
LUK 1:40 N'oofiya khuvira nnyupa owawe Zakariiya khunchelisa Elizabeeti.
LUK 1:41 Ye n'oosiila mwacheliwa etile ya Mariyamu, mwaana aari mwiirukulu mwawe khujisakhinya. Elizabeeti khwiiya wa wiitaazaniwa Rooho Ttakatthiifu.
LUK 1:42 Khukhuwa na kuvu araka: “Wooparikhiyiwa ti weyo Mariyamu vakatthi wa aakha, na wooparikhiyiwa mwaana oto ariiye mwiirukulu mwawo!
LUK 1:43 Miiyo ki paani wooteela wooniwa ti maama wa Mbwanaaka?
LUK 1:44 N'oosiila mwacheliwa yawo, mwaana ariiye mwiirukulu mwaka eetta ojisakhinya wafurahavo.
LUK 1:45 Wooparikhiyiwa ti weyo okhupaliyeeyo yoori anteela orettikhana mattakhuzi apa wuuziweeyo a phantte ya Mbwana.”
LUK 1:46 Aphano Mariyamu khuri: “Nafusi yaka enlaleya owula wa Mbwana,
LUK 1:47 Rooho yaka ti yomfurahela Nnyizinku namuusuru aka,
LUK 1:48 mwaasa yoori Ye akuupuwela miiyo karumeyaawe woohiitaali mmaasho. Waaza attaapha, peewu za atthu ooshi zinttela okiittha yoori muukha wooparikhiyiwa,
LUK 1:49 mwaasa yoori Nnyizinku Woowahi aretta vitthu khuluzeene muuhaayi mwaka; nzina lawe ttakatthiifu.
LUK 1:50 Ye oniwaahurumiya atthu a peewu zooshi apale animoovaaye.
LUK 1:51 Aretta vitthu khuluzeene na makhono awe, khuwaamwaza apale oojikhupali khwa shawuri za nroho mwaya.
LUK 1:52 Awaalaza afwalume ohaakhimu aya khuwaalansa atthu apale oojipushuwisa.
LUK 1:53 Aweetaaza vitthu apale ariina jala, na khuweekara mathaajiri makhonoru.
LUK 1:54 Amwaawuni karumeyaawe Ezirayeele, oopuwelaka huruma aarinaaye
LUK 1:55 na Eburahiima na peewu yawe khwa mileele, nkhama etthiipo aawooziyeezo amarehemu apapazetthu.”
LUK 1:56 Mariyamu eekhaliye nyeezi mittatthu wa Elizabeeti nawiisha khurutela owawe
LUK 1:57 Khufiya wakathi wa Elizabeeti opattha ekumi, khunvokola mwaana wanlume.
LUK 1:58 Anamwaattamanani awe na ajamaaze khusiila elupiwaka huruma khuluyeene Mbwana amooneliyeeyo Elizabeeti, khulawa khufurahi vamote na-ye.
LUK 1:59 Efiiyeevo siikhu yanaane, mwaana otule khulawa khukhiriyisiwa khusala atakha otthajiwa nzina la papaawe Zakariiya.
LUK 1:60 Ila mamaawe khujipu araka: “Ii wala! Nzina lawe linttela wiiya Yaahaya.”
LUK 1:61 Yo khulupa yoori: “Weeyo khuna jamaayo ariina nzina laya nttho!”
LUK 1:62 Aphano khwinkhiwa alama papaawe yoori lijuwiwe nzina aari otakhaaye ontthaja mwaana otule.
LUK 1:63 Zakariiya khuveka lipawu nttitthiiru, khwaatikhavo yoori: “Nzina lawe ti Yaahaya.” Atthu ooshi khushanka.
LUK 1:64 Nasaapiru Zakariiya milomo zawe khufunuwa na nlimi lawe khushashuwa, khwaaza ottakhula ansifwaka Nnyizinku.
LUK 1:65 Anamwaattamanani awe ooshi khwiiya awoova, hapari epile khumwazeyela nti wooshi wa nnyaako wa Yudeya.
LUK 1:66 Atthu ooshi aasiiliyeeyo khusala oopuwela oozelanaka yoori: “Mwaana aya otu onttela wiiya paani?” Nkhono wa Mbwana ori vamote na-ye.
LUK 1:67 Zakariiya paapa wa mwaana otule, khumwiitaala Rooho Ttakatthiifu khwaaza olaleya mattakhuzi a Nnyizinku araka:
LUK 1:68 “Asifwiwe Mbwana Nnyizinku, Nluku wa Ezirayeele, ateeliyeeyo owaawuni na owaataphula atthu awe.
LUK 1:69 Nnyizinku aninkha nusura yookhomaala khwa ojama wa karumeyaawe mfwalume Daawuuda,
LUK 1:70 nkhama aalupiyeezo rakuzeene khwa manapiyu awe oottakatthiifu.
LUK 1:71 Ye aanaahitiye onuusuru nkatthi wa maatuwi etthu, anitaphulaka mmakhono wa apale aniiphiiriwaaye ti fweyo,
LUK 1:72 awaathoonyezaka huruma amarehemu apapazetthu, na oopuwelaka wahati woottakatthiifu aarettiyeeyo na-yo.
LUK 1:73 Na olapha aalaphisaniyeeyo na marehemu papeetthu Eburahiima,
LUK 1:74 alaphaka yoori aari oteela onoopola mmakhono wa maatuwi etthu, yoori ninrumeyele Ye woohoovi,
LUK 1:75 woottakatthifuvo na washariyavo omaasho wawe siikhu zooshi zoohaayi etthu.
LUK 1:76 Weeyo mwanaka onteela wiitthiwa oriwa napiyu wa Nnyizinku Nwulu wa Pinkuuni, onttela wiiya namalokozisiwa wa Mbwana yoori omwaattalelele tarikhi zawe,
LUK 1:77 owaalaleyelaka atthu awe nusura entaaye khwa nswammaha wa twampi zaya,
LUK 1:78 maana Nnyizinku etthu ti wa huruma. Onteela othoonyeza nuuru yawe vakatthi vetthu,
LUK 1:79 ewaamwasikhele apale ari n'yiiza na vamwiivuuli woofwa, yoori eneettettise ntarikhi ya heeri.”
LUK 1:80 Mwaana otule khuvira awulaka na rooho yawe khusala ekhomaala, khwiikhala makuluttu mpakha siikhu apuweleliyeevo vakatthi wa atthu a Ezirayeele.
LUK 2:1 Wakathi aya opo Seezari Akuushitu mfwalume nwulu, aarumiye yoori atthu ooshi apale a nkatthi woofwalume wa Rooma aarina yoolawa waatikhiwa nwarakha ya afwalume.
LUK 2:2 Waatikhiwa opo wamwanzo waarettikhaniye Kureeniyo ari mfwalume wa Siiriya.
LUK 2:3 Wakhula ntthu khusala alawa nti aavokoliweewo olawa waatikhiwa.
LUK 2:4 Yuusufu na-ye khulankha Kalileya sitati ya Nazareeti, khusala alawa Yudeya sitati ya Belemu ottuukho aavokoliweewo wa mfwalume Daawuuda. Ye eetteliye waatikhiwa maana aari woojama wa Daawuuda.
LUK 2:5 Aalawiye na mposaawe Mariyamu ari wa wiimittha.
LUK 2:6 Siikhu zaya epo ari Belemu ottuukhule, Mariyamu khumfiyela siikhu zoopattha ekumi.
LUK 2:7 Khumpattha mwaana w'oomwanzo awe wanlume, khumputaputela vakuwo, khunttattikhela nkashothi zaari ojaamo nyama, mwaasa yoori khaarina puuro yoomaka.
LUK 2:8 Nti otthuupule aariwo amakhampuzi aari wiikhalaaye ntthuttu ashukisaka pwittipwitthi zaya na weekesela osikhu wooshi.
LUK 2:9 Nlayikha la Mbwana khwiishukhela attaaphale aariivo amakhampuzi apale. Nuuru ya Mbwana khuwaamwasikhela, khwiiya awoova channu.
LUK 2:10 Ila nlayikha ntthile khuwooza yoori: “Mwihoove! Miiyo kateela owuuzani hapari zooshapweya za furaha khuluyeene, enttelaaye wiiya ya atthu ooshi.
LUK 2:11 Leelo ethiiti, sitati ya Daawuuda mwavokoleliwa Namuusuru eeyiye Al-Masiihu, Mbwana.
LUK 2:12 Alama yenu ti eto: mwininsikana mwaana aputaputeliwe vakuwo, attattikheliwe nkashothi enjakaamo nyama.”
LUK 2:13 Nasaapiru khupuwa malayikha a waatta, khuphakanyeya na ntthile lamwanzo, khusala ansifu Nnyizinku araka:
LUK 2:14 “Asifwiwe Nnyizinku otulu, na vathi apha heeri yiiye vamote na atthu ooshi awaatakheliyeeyo osaana.”
LUK 2:15 Wakathi malayikha apale aruteliyeevo pinkuuni, amakhampuzi khuuzana yoori: “Nlaweni Belemu noone etthu erettikhaniyeewo, etile Mbwana anuuziyeeyo.”
LUK 2:16 Yo khuhirupazi, khulawa khunsikana Mariyamu na Yuusufu na mwaana otule attattikheliwe nkashothi zinjakaamo nyama.
LUK 2:17 N'oomoona mwaana otule, yo khusala alupa epile ooziweezo ti nlayikha monkoni wa Ye.
LUK 2:18 Ooshi apale aasiiliyeeyo hapari aari olupaaye amakhampuzi apale, khwiiya ooshanka.
LUK 2:19 Ila Mariyamu aatthiiye varoho vawe vitthu epile aari osiilaazo, khusala apheleleza maana aya.
LUK 2:20 Paata ya toole, amakhampuzi apale khurutela ntthuttu anttitthimisaka Nnyizinku na ansifwaka khwa zooshi aasiiliyeezo na ooniiyeezo, etthiipile nlayikha laawooziyeezo.
LUK 2:21 N'oofiya siikhu naane, mwaana otule khukhiriyisiwa, khutthajiwa nzina la Yinsa, nttintthile aalupiyeeyo nlayikha ahineemitthiwe.
LUK 2:22 N'oovira siikhu zootwahareshiwa Mariyamu na Yuusufu, nkhama etthiipo zaari olupaazo kano za napiyu Munsa, khunthuula mwaana otule khunlawana Yeruzaleemu yoori enkheleliwe mmakhono wa Mbwana
LUK 2:23 maana yaatikhiwa nkano wa Mbwana yoori: “Mwaana wamwanzo wanlume ona yoophakuliwa khwinkhiwa Mbwana.”
LUK 2:24 Yuusufu na Mariyamu khwinkha twaha nkhama etthiipo zinrumaazo kano za Mbwana: “makhoko mawiri ama jiwa piiri.”
LUK 2:25 Wakathi aya opo Yeruzaleemu aariwo mwinyi mmote aari wiitthiwaaye Simiyooni, aari wa shariya na woomoova Nnyizinku. Ye aari owejela wuusurwiwa wa atthu a Ezirayeele. Rooho Ttakatthiifu yaari vamote na-ye
LUK 2:26 na khunthoonyeza yoori khaari ofwa ahimooneeni Al-Masiihu wa Mbwana.
LUK 2:27 Simiyooni khweetta Nnyupa wa Nnyizinku alokoziwe ti Rooho Ttakatthiifu, wakathi apapaze antaniyeevo Yinsa yoori aretteliwe etile yaalupiweeyo nkano,
LUK 2:28 Simiyooni khunthuula mwaana otule mmakhono mwawe khunshukhurwela Nnyizinku araka:
LUK 2:29 “Mbwanaaka, aphano kimfwa na heeri maana yarettikhana etile waahitiyeeyo.
LUK 2:30 Koona nusura yawo
LUK 2:31 owaattaleleliyeeyo atthu ooshi.
LUK 2:32 Ye nuuru yoomwaasikhela khapila zooshi za amalapo na siifwa ya atthu awe a Ezirayeele.”
LUK 2:33 Papaawe na mamaawe khwiiya ooshanka mwaasa wa mattakhuzi apale aari onlupezaaye Simiyooni mwaana otule.
LUK 2:34 Simiyooni khuwaaparikhiya, khumuuza Mariyamu maama wa mwaana yoori: “Mwaana otu Nnyizinku anthawula yoori atthu awaatta a Ezirayeele ajikwise ama awoosuru. Ye alama ya Nnyizinku ila atthu a waatta anlawa ankatthale.
LUK 2:35 Mwaasa wa ethiito, wuupuwela wa nroho wa atthu a waatta onteela osaruwa; weeyo Mariyamu enteela wuupattha huzuni khuluyeene nkhama phanka yoonoliwa yoori eshije nafusi yawo.”
LUK 2:36 Attaaphale aarivo sharifwa mmote aari wiitthiwaaye Aana. Aari mwaana wa Fwanuweele wa lihimo la Asheeri, aari wa wuuluvala. Eekhalaniye mannawe nyaakha sapa,
LUK 2:37 paata yomfwela mannawe, khuhiraliwi mpakha opattha nyaakha thamaaniini na mine. Khaari olaamo Nnyupa wa Nnyizinku nthana na osikhu, khaazi yawe yaari omwaaputu Nnyizinku ofuka na olompa.
LUK 2:38 Wakathi otthuupo khwaaza onshukhurwela Nnyizinku attakhulaka monkoni wa mwaana otule, awoozaka atthu ooshi apale aari owejelaaye wookhowa wa Yeruzaleemu.
LUK 2:39 Yuusufu na Mariyamu nawiisha oretta zooshi epile zaari orumaazo kano ya Mbwana, khurutela Kalileya sitati ya Nazareeti owaya.
LUK 2:40 Mwaana khusala awula saaneene na khwiiya njuwi nwulweene, rehema ya Nnyizinku yaari vamote na-ye.
LUK 2:41 Wakhula mwaakha Mariyamu na Yuusufu aari weettaka Yeruzaleemu onjampo la Paashikowa.
LUK 2:42 Wakathi Yinsa apatthiyeevo nyaakha khumi na miwiri, Mariyamu na Yuusufu khulankha khusala alawa onjampo la Paashikowa nkhama etthiipile aazowereliyeezo, alawaka anthuuliye Yinsa.
LUK 2:43 N'oofiya khuretta njampo ntthile khwiisha, khusala arutela owaya. Yinsa khusala Yeruzaleemu, mamaawe na papaawe woohijuwi.
LUK 2:44 Yo aari woona yoori ori khuntti etile yaari orutelaaye onti, khuvira siikhu ntero eettaka weettetta, aphano khwaaza omweekesa awoozelaka ajamaaze na ashirikhaawe.
LUK 2:45 Khuhisala ampattha, khurutela Yeruzaleemu olawa omweekesa.
LUK 2:46 Eviriyeevo siikhu ttatthu, khunsikana ari Nnyupa wa Nnyizinku eekhaliye na anamasomisa awulu a tiini eettaka onsiila na omuuzela.
LUK 2:47 Ooshi apale aari onsiilaaye khunshankela mwaasa woojuwa wawe na nanna aari owaajipwaazo.
LUK 2:48 Aphano apapaze n'oomoona khushanka, mamaawe khumuuzela araka: “Mwanaka! Niini epi oniretteliyeezo? Miiyo na papaawo naari wa wantipweya naaza raku oweekesa.”
LUK 2:49 Ye khujipu yoori: “Mwaari okeekesela-ni? Khamwaari ojuwa yoori miiyo kaarina ya wiiya Nnyupa wa Paapa?”
LUK 2:50 Yo khuhiweeleyi etthu aari olupaaye.
LUK 2:51 Yinsa khurutela nti wa Nazareeti na papaawe na mamaawe khusala awaashututela. Mamaawe aari oretta athokorelaka vitthu epile zooshi nroho mwawe.
LUK 2:52 Yinsa khusala avira awulaka nkatthi wa ojuwa, hirimu na nrehema ya Nnyizinku na atthu.
LUK 3:1 Mwaakha wakhuumi na thaanu Seezari Tibeeriyu ari mfwalume nwulu wa Rooma, Pontiyu Pilaatu ari liwaali wa Yudeya. Herooti ari nsatoro wa Kalileya na ttwiiye Filiipe na-ye ari wa Itureeya na Tarakhoniiti, Lusaaniya ari nsatoro wa Abileeni.
LUK 3:2 Anaasi na Khayiifwa aari mahaakhimu awulu a tiini. Mwaakha aya pi otthuupo enkhiweeyo mattakhuzi a Nnyizinku Yaahaya mwaana wa Zakariiya makuluttu.
LUK 3:3 Ye khuzukulela miti zooshi zaattameliyeeyo muuttho Yorotaani, awoozaka atthu yoori athupwiye twampi zaya aswaamihiwe ti Nnyizinku na oosiwe.
LUK 3:4 Nkhama etthiipo zaatikhiweezo nkithaapu ya napiyu Ezayiiya: “Owaapho ntthu ankhuwaaye n'yaara araka: ‘Mwaattalele tarikhi ya Mbwana, na mwishapweyise miphiitelo zaya.
LUK 3:5 Makunte ooshi asireliwe, nyaako na kulu zooshi zipwejiwe, tarikhi zoonyokowa zookoleliwe, epile zoothipeya zishottheliwe.
LUK 3:6 Atthu ooshi anteela woona nusura ya Nnyizinku.’”
LUK 3:7 Yaahaya khusala awooza atthu apale aari otaaye woosiwa araka: “Khapila za nyookha! Paani awuuziyeenini otthira hukhumu ya Nnyizinku entaaye?
LUK 3:8 Mwirette vitthu enthoonyezaaye yoori khweele mwathupwiya, khahiyo ojilupeza yoori ‘Eburahiima ti papeetthu’. Miiyo kiniwuuzani yoori khwa liwe ntthi Nnyizinku onwahi owaattala aana a Eburahiima.
LUK 3:9 Nshokha latthiiwa nshini wa mitathaari za miitthi, wakhula muutthi ohiniimaaye mishumo zooshapweya ontta oshijiwa weeseleliwe vamoottho.”
LUK 3:10 Atthu khusala amuuzela araka: “Apho nirette niini?”
LUK 3:11 Ye khuwaajipu yoori: “Otule ariina hempe piiri, moote amwinkhe otule ahina. Otule ariina etthu-yoojiwa awaameele apale ahina.”
LUK 3:12 Khulankha anamariphisa lumpuru yoori alawe oosiwe khumuuzela Yaahaya yoori: “Mwanliimu, khi fweeyo nirette niini?”
LUK 3:13 Ye khuwaajipu araka: “Mwihiriphise mwizitisa hisapu mwirumiweeyo.”
LUK 3:14 Anajanka na-yo khumuuzela yoori: “Khi fweeyo niri toovi?” Khuwaajipu yoori: “Mwihiwaanyakanye atthu mwiroromelaka kuvu zenu, wala mwihiwaalokoveze vitthu zoohiiyi etthiipo, mwishukhurwele ethiito mwimpatthaaye.”
LUK 3:15 Nroromelo wa atthu khusala ovira weekezeleyaka oonaka yoori Yaahaya ti Al-Masiihu.
LUK 3:16 Ye khuwooza ooshi apale aariivo yoori: “Weekhweele miiyo kiniwoosanani maati, ila onta nkina ariina owahi wookiziti miiyo, wala akinsuhi ofukula mikhoyi za jampala zawe. Ye onteela owoosani na Rooho Ttakatthiifu na moottho.
LUK 3:17 Onaaye fosholo mmakhono mwawe anttelaaye ophakulana tiriku na maveya. Athuule tiriku atthe vantthala vawe, maveya aya eeselele vamoottho ohinzimaaye.”
LUK 3:18 Khwa mattakhuzi makina a waatta, Yaahaya aari owaahirimiza na owaatafusirela atthu hapari zooshapweya.
LUK 3:19 Na khunshowera nsatoro Herooti mwaasa wonrala Herodiya muukha wa ttwiiye na oretta vitthu zootakhala za waatta.
LUK 3:20 Elottelanaka Herooti khweekezela zooshi epile, khuruma ofukeliwa Yaahaya nkalapooso.
LUK 3:21 Wakathi Yaahaya aari owoosaavo atthu ooshi apale, Yinsa na-ye khuta attaaphale oteela woosiwa. Ye alompaka pinku khufukuwa,
LUK 3:22 Rooho Ttakatthiifu khumwiishukhela nkhama jiwa. Khusiileya huula yoolankha pinkuuni eraka: “Weeyo o mwanaka kinuuphetachaaye na wookituvela channu.”
LUK 3:23 Yinsa wakathi aaziyeevo olaleya hapari zooshapweya, aarettiye arina nyaakha talaathiini. Ye aari mwaana wa Yuusufu nkhama etthiipo atthu aari waakanyeraazo, Yuusufu aari mwaana wa Heeli,
LUK 3:24 Heeli aari mwaana wa Mataati, Mataati aari mwaana wa Leevi, Leevi aari mwaana wa Melikhi, Melikhi aari mwaana wa Yanaayi, Yanaayi aari mwaana wa Yuusufu.
LUK 3:25 Yuusufu aari mwaana wa Matathiiya, Matathiiya aari mwaana wa Amooshi, Amooshi aari mwaana wa Nahuumu, Nahuumu aari mwaana wa Heshiili, Heshiili aari mwaana wa Nakhaayi,
LUK 3:26 Nakhaayi aari mwaana wa Maathi, Maathi aari mwaana wa Matathiiya, Matathiiya aari mwaana wa Shemeeni, Shemeeni aari mwaana wa Yosheekhi, Yosheekhi aari mwaana wa Yuuda,
LUK 3:27 Yuuda aari mwaana wa Yohanaani, Yohanaani aari mwaana wa Reesa, Reesa aari mwaana wa Zorobabeeli, Zorobabeeli aari mwaana wa Sheyalitiyeeli, Sheyalitiyeeli aari mwaana wa Neeri,
LUK 3:28 Neeri aari mwaana wa Meelikhi, Meelikhi aari mwaana wa Aadi, Aadi aari mwaana wa Kosaamu, Kosaamu aari mwaana wa Elimadaamu, Elimadaamu aari mwaana wa Eeri,
LUK 3:29 Eeri aari mwaana wa Yoshuwa, Yoshuwa aari mwaana wa Eliyezeeri, Eliyezeeri aari mwaana wa Yoriimu, Yoriimu aari mwaana wa Mathaati, Mathaati aari mwaana wa Leevi,
LUK 3:30 Leevi aari mwaana wa Simiyooni, Simiyooni aari mwaana wa Yuuda, Yuuda aari mwaana wa Yuusufu, Yuusufu aari mwaana wa Yonaamu, Yonaamu aari mwaana wa Eliyakhiimu,
LUK 3:31 Eliyakhiimu aari mwaana wa Meleeya, Meleeya aari mwaana wa Meena, Meena aari mwaana wa Matatha, Matatha aari mwaana wa Nathaani, Nathaani aari mwaana wa Daawuuda,
LUK 3:32 Daawuuda aari mwaana wa Yeese, Yeese aari mwaana wa Obeedi, Obeedi aari mwaana wa Bowaazi, Bowaazi aari mwaana wa Salimooni, Salimooni aari mwaana wa Nashooni,
LUK 3:33 Nashooni aari mwaana wa Aminadabu, Aminadabu aari mwaana wa Adimiini, Adimiini aari mwaana wa Ariini, Ariini aari mwaana wa Hesherooni, Heshorooni aari mwaana wa Pereezi, Pereezi aari mwaana wa Yuuda,
LUK 3:34 Yuuda aari mwaana wa Yaakhumpa, Yaakhumpa aari mwaana wa Esiyaakha, Esiyaakha aari mwaana wa Eburahiima, Eburahiima aari mwaana wa Teera, Teera aari mwaana wa Nahoori.
LUK 3:35 Nahoori aari mwaana wa Serukhi, Serukhi aari mwaana wa Reewu, Reewu aari mwaana wa Peleekhi, Peleekhi aari mwaana wa Ebeeri, Ebeeri aari mwaana wa Saala,
LUK 3:36 Saala aari mwaana wa Kayinaamu, Kayinaamu aari mwaana wa Arifwakisaati, Arifwakisaati aari mwaana wa Sheemu, Sheemu aari mwaana wa Nuuhi, Nuuhi aari mwaana wa Lameekhi,
LUK 3:37 Lameekhi aari mwaana wa Methusaleemu, Methusaleemu aari mwaana wa Henookhi, Henookhi aari mwaana wa Yareeti, Yareeti aari mwaana wa Mahalaleeli, Mahalaleeli aari mwaana wa Kayinaamu.
LUK 3:38 Kayinaamu aari mwaana wa Enooshi, Enooshi aari mwaana wa Seethi, Seethi aari mwaana wa Adamu, Adamu wa Nnyizinku.
LUK 4:1 Yinsa aarutiye omuttho Yorotaani ari wa wiitaala Rooho Ttakatthiifu, aalokoziwe ti Rooho Ttakatthiifu ethiito mpakha makuluttu.
LUK 4:2 Nttumpho khuzayiniwa ti Sheethwani siikhu arupayiini. Siikhu zaya epile khaari oja etthu, nawiisha khunkhola jala.
LUK 4:3 Sheethwani khumuuza yoori: “Nkhama o mwaana wa Nnyizinku orume liwe nttho lithatuwe liiye phaawu.”
LUK 4:4 Ila Yinsa khunjipu araka: “Yaatikhiwa nkithaapu yoori: ‘Khahiyo phaawu paasi enimwinkhaaye ohaayi pinaatamu’.”
LUK 4:5 Sheethwani khunweza vatulu, nasaapiru khunnoza ofwalume wooshi w'oolumwenku.
LUK 4:6 Khumuuza yoori: “Kintta owinkha ofwalume na siifwa z'oolumwenku opu wooshi, mwaasa yoori zooshi kenkhiwa miiyo, na miiyo kinimwinkha otule kinintakhelaaye.
LUK 4:7 Amana okikokhorela miiyo na khukaaputu, zooshi zintta wiiya zaawo.”
LUK 4:8 Yinsa khunjipu yoori: “Nttakhuzi la Nnyizinku lalupa yoori: ‘Omwaaputu Mbwanaawo Nnyizinku na onrumeyele othuuto paasi.’”
LUK 4:9 Aphano Sheethwani khunlawana Yeruzaleemu khunweza vatulu woolepavo wa Nyuupa ya Nnyizinku khumuuza yoori: “Nkhama o mwaana wa Nnyizinku ojeeselele vathi aphale,
LUK 4:10 maana yaatikhiwa nkithaapu yoori: ‘Ye ontta oruma malayikha awe awiinanele.
LUK 4:11 Atthaapo antta wuukholelela na makhono aya yoori ohikwakwanttuwe valiwe.’”
LUK 4:12 Yinsa khunjipu yoori: “Nttakhuzi la Nnyizinku lalupa yoori: ‘Ohimweeze Mbwana Nnyizinku awo.’”
LUK 4:13 Sheethwani nawiisha onzayini wooshi, khumwaattuwa khusala awejela wakathi wonkhweyela.
LUK 4:14 Aphano Yinsa khurutela Kalileya, owahi wa Rooho Ttakatthiifu ori vamote na-ye. Hapari zaari olupaaye monkoni wa ye khumwazeyela miti zooshi za nkerekhere.
LUK 4:15 Aari osomisa mmanyupa woosifwiwamo Nnyizinku, atthu ooshi khusala anttottopela.
LUK 4:16 Khulawa mpakha sitati ya Nazareeti ohali aleliweewo. Siikhu ya saapatu khweetta nnyupa woosifwiwamo Nnyizinku nkhama etthiipo aazowereliyeezo. Khulankha yoori asome.
LUK 4:17 Khwinkhiwa kithaapu ya napiyu Ezaaya. Khufunula khusala athola khusikana vahali yaatikhiweevo yoori:
LUK 4:18 “Rooho ya Mbwana eri vamote na-miyo, akithawaza yoori kiwaatafusirele hapari zooshapweya asikhini na olaleya otaphuliwa wa anamahuzunikha, owoonisa apale oohooni, owaavumulisa apale oohukhumwiwa,
LUK 4:19 na olaleya yoori wafiya mwaakha wa rehema ya Mbwana.”
LUK 4:20 Yinsa khufinikha kithaapu etile khumwinkha karumeya wa nnyupa woosifwiwamo Nnyizinku, Ye khwiikhala. Atthu ooshi apale aariimo khusala amweekesa.
LUK 4:21 Ye khuwooza yoori: “Leelo zarettikhana epile zaatikhiweeyo, etthiipi mwinttaaye wiisharu osiila.”
LUK 4:22 Atthu ooshi khusala anttottopela, na khwiiya ootikinisiwa mwaasa wa mattakhuzi a rehema aari olankhaaye nkhanyo mwawe, khusala oozelana yoori: “Khahi mwaana wa Yuusufu otu?”
LUK 4:23 Yinsa khuwooza yoori: “Khweele khweele mweeyo mwinlawa mwakuuze kittaphi mmote enraaye toono: ‘Tothoro ojivonise omweenyewe! Orette mmuti mwawo mphu minjuza nisiiliyeeyo epile orettiyeezo Kafwaranawu.’”
LUK 4:24 Khulupa theenya yoori: “Wookhweele kiniwuuzani yoori khaavo napiyu mmote ankhupaliwaaye mmuti mwawe.
LUK 4:25 Na weekhwele wakathi wa napiyu Aliyaasi, Ezirayeele aariwo aakha oofweliwa pi amanna zaya wakathi yaafukiweevo pinku nyaakha mittatthu na nyeezi sitha, yaapuwiye jala miti zooshi.
LUK 4:26 Ila Nnyizinku khuhinrumi Aliyaasi Ezirayeele, okhule aari wiikhalaawo apale aya, khunruma Sarefathi tuniya ya Sitooni aariiwo muukha mmote woofweliwa ti mannawe.
LUK 4:27 Siikhu za napiyu Elizeewu, Ezirayeele aariwo anamakuttula a waatta, khuhiivo hatha mmote aavonisiweeyo ila Naamani wa nti wa Siiriya ti ye aavonisiweeyo otthwe.”
LUK 4:28 Atthu ooshi aari nnyupa woosifwiwamo Nnyizinku, n'oosiila mattakhuzi apale aari olupaaye Yinsa yo khwiiphiiriwa.
LUK 4:29 Khwiikariwamo nsitati mphule khulawaniwa vamwaako yaajekiweevo sitati yaya etile, yoori ansukhumele vathi.
LUK 4:30 Ila Yinsa khuvira vakatthi vaya khusala alawa.
LUK 4:31 Paata ya toole Yinsa khwiishukhela sitati ya Kafwaranawu, nti wa Kalileya, khusala awaanozela siikhu ya saapatu.
LUK 4:32 Yo aari ooshankisiwa na onozela wawe, mwaasa yoori nttakhuzi lawe laarina ofwalume.
LUK 4:33 Nnyupa woosifwiwamo Nnyizinku aarimo ntthu mmote aariina sheethwani. Aphano sheethwani khunyakula na kuvu zawe zooshi araka:
LUK 4:34 “Eeee! Onnitakhela-ni weeyo Yinsa wa Nazareeti? Wateela onankameza? Miiyo kinuujuwa weeyo yoori o Ttakatthiifu wa Nnyizinku!”
LUK 4:35 Yinsa ansukisiye sheethwani araka: “Nyamala, mwaattuwe ntthu oto!” Attaaphale sheethwani khunkwisela vathi ntthu otule atthu eettaka omoona, khuhinvulalisi khumwaattuwa.
LUK 4:36 Atthu ooshi aari ooshankisiwa, khusala oozana atthaaporu: “Nttakhuzi-ni ntthi? Khwa ofwalume na owahi wawe otu onruma masheethwani khusaruwa!”
LUK 4:37 Aphano siifwa ya Yinsa yaamwazeyeliye miti zooshi za nkerekhere.
LUK 4:38 Yinsa khusaruwamo nnyupa woosifwiwamo Nnyizinku khweetta owawe Simawu. Nkhwewe Simawu aari nlwele hooma, yo khunvekelaza Yinsa yoori anvonise.
LUK 4:39 Ye khwiinama khwiikara hooma etile khunlikha, nasaapiru nunu otule khulankha khusala awaarumeyela.
LUK 4:40 Njuwa litupweelaka atthu ooshi apale aariina marati khusala atiiseliwa Yinsa, Ye n'oowaattheela makhono n'oowaavonisa.
LUK 4:41 Theenya aarivo atthu a waatta aari owaasaruwaaye masheethwani anyakulaka araka: “Weeyo o mwaana wa Nnyizinku!” Yinsa khusala amaruwa alikhisaka masheethwani apale ottakhula, maana yo aari ojuwa yoori ye ti Al-Masiihu.
LUK 4:42 N'oocha Yinsa khulankha khusala alawa mmakuluttu. Atthu a waatta khusala amweekesa, n'onsikana khuhisala atakha onlikha olawa.
LUK 4:43 Ye khuwooza yoori: “Enhithajiya theenya miiyo olawa sitati kiina olaleya hapari zoofwalume wa Nnyizinku, kaperekheliwa etthiipo.”
LUK 4:44 Ye aari otafusiri mmanyupa woosifwiwamo Nnyizinku a Yudeya.
LUK 5:1 Siikhu moote, Yinsa aari nshini wa ntthatta la Kalileya, khuzukuleliwa pi atthu a waatta yoori asiile nttakhuzi la Nnyizinku.
LUK 5:2 Ye khoona nyaatiya miwiri ziri vapatari wa ntthatta nttintthile, zaalikhiweevo pi anamajiya aari woosaaye matthavi aya.
LUK 5:3 Yinsa khupakhira mmwaatiya mmote waari wa Simawu khunvekela yoori asusisele mpahari, khwiikhala khusala awaanozela atthu.
LUK 5:4 Nawiisha onozela khumuuza Simawu yoori: “Othuule mwaatiya awo mwilawe vahali wa wiichavo mwajiye.”
LUK 5:5 Simawu ajipwaka khuri: “Mbwana, najiya osikhu na osikhu khuhipatthi etthu, wiiya walupa yoori neese, nintta weesa.”
LUK 5:6 Yo khulawa khweesa matthavi aya khuula swi za waatta mpakha khusala avaruwa matthavi aya.
LUK 5:7 Khuwaakhuwela ashirikhaaya aari mwaatiya nkina yoori ate arinkaanyele, khwiitaaza nyaatiya zaya zoomiwiri mpakha osaleela ozama.
LUK 5:8 Simawu Peeturu nawoona etthu etile yaarettikhaniyeeyo, khunkokhorela Yinsa amuuzaka yoori: “Mbwana, okisuse maana miiyo ki natwampi.”
LUK 5:9 Simawu na ashirikhaawe khuzinkuwa mwaasa wa swi epile za waatta apatthiyeezo.
LUK 5:10 Yaakhumpa na Yaahaya, aana a Zebedayo, ashirikha a Simawu aari ojiyanaaye khwiiya ootikinisiwa. Aphano Yinsa khumuuza Simawu yoori: “Ohoove, waaza nasaapi eti onttela wiiya namajiya wa atthu.”
LUK 5:11 Khuwelelisa nyaatiya zaya nkulu, khulikha vitthu zaya zooshi khusala anlotta Yinsa.
LUK 5:12 Yinsa ari sitati moote, khuvira mwinyi mmote aariina makuttula. N'oomoona Yinsa khukokhora khusijiti khumuuza araka: “Kinuuvekela yoori nkhama watakha Mbwanaaka, kivonise.”
LUK 5:13 Ye khookola nkhono awe khunsapa khumuuza yoori: “Katakha vona!” Wakathi otthuupule khweele khuvona.
LUK 5:14 Yinsa khumuuza yoori: “Vitthu epi ohimuuze hatha ntthu, ila olawe wajithoonyeze wa haakhimu wa tiini, othuuto oorettele twaha yoovonisiwa wawo nkhama etthiipile alupiyeezo napiyu Munsa, yoori wiiye oshaahiti vakatthi wa atthu aya apale.”
LUK 5:15 Aphano hapari zawe zaari ovira zimwazeyaka. Atthu a waatta khusala ata oteela osiila hapari, na oteela ovonisiwa marati aya.
LUK 5:16 Yinsa aari olaakavo n'oolawa makuluttu olompa.
LUK 5:17 Siikhu moote Yinsa eetta onozela, apho vaya aari onozelaavo aarivo mafwarizeewu na anamanozela a kano aalankhiyeeyo miti mikina za Kalileya na Yudeya mpakha Yeruzaleemu. Owahi wa Mbwana waari vamote na-ye woowaavonisa alwele.
LUK 5:18 Aphano atthu akina khuntana mwinyi aariina supiyaani anttattikheliye vanrepa, yo aari otakha omphenyisa ampwehe omaasho wa Yinsa.
LUK 5:19 Ila nawoona yoori khayiivo kiphenyo mwaasa wa atthu waatta, khuwela vatulu wa nyuupa khutamula liphala khumwiishushela vakatthi wa atthu omaasho wa Yinsa.
LUK 5:20 Ye nawoona amini aariina atthu apale, khumuuza nasupiyaani otule yoori: “Swaahipu twampi zawo zaswaamihiwa.”
LUK 5:21 Aphano mafwarizeewu na anamanozela a kano khusala attettha araka: “Otu aya paani ankufurwaaye? Ti paani anwahaaye oswaamihi twampi woohiiyi Nnyizinku?”
LUK 5:22 Yinsa khujuwa etthu aari ofikhiraaye, khuwoozela yoori: “Mwashukulikhela-ni nroho mwenu?
LUK 5:23 Yookhweya ti tiivi omuuza yoori twampi zawo za swaamihiwa ama yoori olankhe weettette?
LUK 5:24 Apho mwijuwe yoori Mwaana wa Pinaatamu onaaye owahi wooswaamihi twampi vathi apha.” Khumuuza nasupiyaani otule yoori: “Olankhe othuule nrepa lawo olawe owawo.”
LUK 5:25 Nasaapiru ntthu otule khulankha vakatthi wa atthu khuthuula nrepa lawe ntthile aattattikheliweevo khusala alawa owawe ansifwaka Nnyizinku.
LUK 5:26 Atthu ooshi aariivo khwiiya ooshanka na woova channu, khusala ansifu Nnyizinku araka: “Leelo noona vitthu zootikinisa.”
LUK 5:27 Paata yawiisha vitthu epile, Yinsa khulankha khusala alawa, khunsikana mwinyi mmote aari oriphisaaye lumpuru aari wiitthiwaaye Leevi eekhaliye vahali aari oriphisaavo malumpuru awe, khumuuza yoori: “Okilotte.”
LUK 5:28 Ye khulikha khaazi zawe zooshi khusala anlotta.
LUK 5:29 Leevi khuretta njampo liwululene owawe vamote na Yinsa, aarivo theenya anamariphisa lumpuru akinoko aya na atthu akina eekhaliye vamote na-ye.
LUK 5:30 Mafwarizeewu na anamanozela a kano khusala a waattakhula anakhiyoni a Yinsa araka: “Mwaasa aya niini mweeyo mwijanaka na mwinywanaka anamariphisa malumpuru na anatwampi?”
LUK 5:31 Yinsa khuwaajipu araka: “Akumi khanlawaniwa wa tothoro ila alwele,
LUK 5:32 miiyo akaawaateeliye anashariya kaawaateeliye anatwampi yoori alikhe oretta twampi.”
LUK 5:33 Atthu akina khumuuza Yinsa yoori: “Anakhiyoni a Yaahaya Namoosa na anakhiyoni a mafwarizeewu amfuka na anlompa, ila awo weeyo khamfuka, antta oja na onywa.”
LUK 5:34 Yinsa khuwaajipu yoori: “Enrettikhana toovi owooza anamalaleyiwa harusi ofuka namaposa arivo?
LUK 5:35 Ila onteela ofiya wakathi mposi anttelaaye olaziwavo vakatthi vaya, wakathi aya opo, anteela ofuka.”
LUK 5:36 Elottelanaka Yinsa khulupa nlikaniso mmote araka: “Khaavo anshijaaye patakha ya kuwo pheeya yoori arette yaapa ya kuwo yoovutta, n'ooretta toowo etile pheeya entta oharipweya, mwaasa wa patakha etile ya kuwo pheeya etthiiweevo oheezani na etile yoovutta.
LUK 5:37 Khaavo anthuulaaye viinyu pheeya ottha nttompwiyo ya shapala ya raku. N'ooretta toowo entta ophutuwa, viinyu ya yiittikhe ttompwiyo zaya ziharipweye.
LUK 5:38 Viinyu pheeya entthiiwa nttompwiyo pheeya.
LUK 5:39 Khaavo anraaye anywiye viinyu ya raku khutakha onywa viinyu pheeya, maana ontta olupa yoori: ‘Poora etile ya raku.’”
LUK 6:1 Saapatu moote, Yinsa eetta ovira nshini wa nshapa la tiriku. Anakhiyoni awe khusala avurula asusuraka na makhono arafunaka phunje zaya.
LUK 6:2 Mafwarizeewu khusala awoozela yoori: “Mwaasa aya niini mwirettaka vitthu ziiyiye mwiikho orettiwa saapatu?”
LUK 6:3 Ye khuwaajipu araka: “Khamwinasome etthu aarettiyeeyo Daawuuda wakathi yankholiyeevo jala na ashirikha awe?
LUK 6:4 Ye aaviriye Nnyupa wa Nnyizinku khuthuula phaawu zoohalaalishiwa khurafuna kiina khuwenkha ashirikhaawe, ila alupa aarina ruhusa yoorafuna aari mahaakhimu a tiini paasi.”
LUK 6:5 Yinsa khulupa araka: “Mwaana wa pinaatamu ti Mbwana mwennyewe saapatu.”
LUK 6:6 Saapatu kiina, Yinsa khuvira nnyupa woosifwiwamo Nnyizinku khusala awaanozela, aarimo mwinyi mmote waarakaliyeeyo nkhono nlume.
LUK 6:7 Anamanozela a kano na mafwarizeewu eetta omweekesela yoori amoone Yinsa nkhama aari onvonisa siikhu ya saapatu, yoori ankwisele paathuli.
LUK 6:8 Ila ye aari ojuwa etthu aari wuupuwelaaye atthu apale. Khumuuza mwinyi otule woorakala nkhono nlume yoori: “Olankhe ote vakatthi apha.” Mwinyi khulankha khweemela.
LUK 6:9 Aphano Yinsa khuwoozela yoori: “Ensuhaaye orettiwa saapatu ti tiivi? Yooshapweya ama yootakhala, wuusuru ama wuula?”
LUK 6:10 Khuweekesa atthu ooshi apale aariivo khumuuza mwinyi otule yoori: “Wookole nkhono awo.” Ye khookola, khuvona.
LUK 6:11 Anamanozela a kano na mafwarizeewu khwiiphiiriwa khusala awaza etthu yonrettela Yinsa.
LUK 6:12 Siikhu zaya epile Yinsa khulankha khusala alawa omwaako olompa, khwiisha osikhu wooshi eettaka olompa.
LUK 6:13 N'oocha khuwaakhuwela anakhiyoni awe khuwaathawula khumi na awiri, atthaapo theenya khuwenkha nzina la owaaswihaapa.
LUK 6:14 Simawu antthajiye nzina la Pheeturu, Antere ttwiiye Simawu, Yaakhumpa, Yaahaya, Filiipe, Paturumeewu.
LUK 6:15 Mateewuzhu, Tome, Yaakhumpa mwaana wa Alufayo na Simawu aniitthiwaaye Zelooti,
LUK 6:16 Yuuda mwaana wa Yaakhumpa, na Yuuda Iskariyooti otule aari weettelaaye onkholisa Yinsa.
LUK 6:17 Yinsa khwiishukha vamwaako na maaswihaapa awe khweemela nshini wa mwaakho vahali aariivo anakhiyoni awe na khuntti ya atthu a Yudeya yooshi na a Yeruzaleemu, mpakha apale a miti za waattamela pahari, Tiiro na Sitooni.
LUK 6:18 Apale aateeliyeeyo osiila na ovonisiwa moolwele aya, mpakha na apale aari wantipwiwaaye ti masheethwani aari ovonisiwa.
LUK 6:19 Atthu ooshi aari otakha onsapa Yinsa mwaasa yoori waari onsaruwa owahi khusala owaavonisa ooshi.
LUK 6:20 Aphano Yinsa khulansa maasho khuweekesa anakhiyoni awe khuwooza yoori: “Ananshapweyiwa ti mweyo mwiiyiye asikhini, maana Ofwalume wa Nnyizinku pu weenu.
LUK 6:21 Ananshapweyiwa ti mweyo enuukholaanini jala aphano, maana mwinlawa mwarupale. Ananshapweyiwa ti mweyo mwinlilaaye aphano, maana mwinteela otheya.
LUK 6:22 Ananshapweyiwa ti mweyo, mmana atthu eephiiriwaka ti mweyo, awiikarani, oottukhanani na khuwoonani ohifwayi mwaasa wonlotta Mwaana wa Pinaatamu.
LUK 6:23 Wakathi aya otthuupo, mwiiye woofurahi na mwitthape, maana tthuvo yenu eniiya khuluyeene pinkuuni. Maana wa nanna etthiipi, apapa zaya na-yo aawaaretteliye manapiyu.
LUK 6:24 Ila olaanikha pu weenu mweeyo mwaamathaajiri, maana mwapokhera tthuvo yenu vathi attaapha.
LUK 6:25 Olaanikha pu weenu mweeyo ziwiitaaleliyeenini vitthu-zoojiwa, maana mwinteela okholiwa ti jala. Olaanikha pu weenu mweeyo mwiriina furaha eleelo eti, maana mwinteela ojikhupanyera na olila.
LUK 6:26 Olaanikha pu weenu mweeyo mmana mwittottopeliwaka pi atthu ooshi, maana apapa zaya aawaaretteliye etthiipo manapiyu oojipanka.
LUK 6:27 Nakataalikha mweeyo mwinikisiilaaye, kiniwuuzani yoori mwiwaaphete maatuwi enu, mwiwaarettele saana apale aniiphiiriwaaye ti mweyo.
LUK 6:28 Mwiwaaparikhiye apale anuulaanaanini na mwiwaalompele apale anuurettelaanini zootakhala.
LUK 6:29 Nkhama ntthu oopwakula nlaku limote, na ntthi likina ontheteezele. Nkhama ntthu oovula juupa yawo, ohinkhattaze othuula hempe yawo.
LUK 6:30 Omwinkhe wakhula otule anuuvekelaaye, nkhama ntthu athuula etile yiiyiye yaawo, ohinkhanyarele wuurutisela.
LUK 6:31 Epile mweeyo zinuutuvelaanini oretteliwa pi azeenu, na-mweyo mwiwaarettele azeenu etthiipo.
LUK 6:32 Amana mwiwaaphetaka apale anuuphetaanini paasi, fwayita-ni mwineekeselaaye mmakhono wa Nnyizinku? Hatha anatwampi atthaapo aniwaapheta apale na-yo aniwaaphetaayo.
LUK 6:33 Amana mwiwaarettelaka saana apale na-yo anuurettelaanini saana paasi, fwayita-ni mwinteelaaye wiiyana? Hatha anatwampi atthaapo na-yo anretta etthiipo.
LUK 6:34 Amana mwiweepaashaka paasi apale mwinkhupalaaye wuurutiselani, fwayita-ni mwinteelaaye wiiyana? Hatha anatwampi atthaapo aniipaashana aroromelaka orutiselana.
LUK 6:35 Mwiwaaphete maatuwi enu, mwiwaarettele zooshapweya, mwiweepaashe mwiheekeselaka wuurutiselani. Toowo tthuvo yenu enttela wiiya khuluyeene na mwinttela wiiya aana a Nnyizinku Wooziti, maana Nnyizinku oniwaashapweyela rooho hatha na apale ahininshukhurwaaye na alupa ootakhala rooho.
LUK 6:36 Mwiiye woohurumiya nkhama etthiipi Papeenu wa pinkuuni na-ye eeyiye wa huruma.
LUK 6:37 Mwihimphuke ntthu nzeenu na Nnyizinku khanuuphukani, mwihinhukhumu ntthu nzeenu na Nnyizinku khanuuhukhumuni. Mwinswaamihi ntthu nzeenu na Nnyizinku ontta wuuswaamihini.
LUK 6:38 Mwiwenkhe azeenu na Nnyizinku ontta owinkhani: na mphimo khwaamili, wookhitteleliwa na wa wiitaala mpakha wiittikha. Maana mphimo otthuupo mwimphimanaaye na-mweyo mwinteela ophimeliwa otthuupo.”
LUK 6:39 Yinsa khulupa nlikaniso mmote araka: “Atthu oohooni khanlokozana, antta okwiselana nliphotto.
LUK 6:40 Nakhiyoni khaninziti mwanliimu awe, ila wakhula otule ansomiseyaaye saana oniiya nkhama mwanliimu awe.
LUK 6:41 Onri je woona etutu eriiye mmaasho wa nzaawo ohoonaka muutthi opule oriiye mmaasho mwawo?
LUK 6:42 Enrettikhana toovi weeyo omuuzaka nzaawo yoori: ‘Ttwiiyaku, nkankaani kuulaze etutu eto eriiye mmaasho mwawo,’ na khupe weeyo ohiwahaka woona muutthi opule oriiye mmaasho mwawo? Naafikhi! Olazemo khapula muutthi oriiye mmaasho mwawo, toowo ontta woona saana, na phi onlazaamo etutu eriiye mmaasho wa nzaawo.”
LUK 6:43 “Khawiivo muutthi wooshapweya oniimaaye mishumo zootakhala, wala muutthi wootakhala oniimaaye mishumo zooshapweya.
LUK 6:44 Maana wakhula muutthi onjuweya mwaasa wa mishumo zaya; nnyiiwa khinshumiwamo mishumo za muuyu, mmutthalala khanshumiwamo wuuva.
LUK 6:45 Ntthu wookemaani, nroho mwawe onsarulamo vitthu zooshapweya, na ntthu wootakhala rooho, nroho mwawe onsarulamo vitthu zootakhala, maana milomo zawe zinttakhula etthiipile ziitaaliyeeyo nroho mwawe.
LUK 6:46 Mwinkikhuwelela-ni yoori ‘Mbwana, Mbwana’, mwihirettaka epile kiniwuuzaanini?
LUK 6:47 Miiyo kinuuthoonyezani ntthu anlikananaaye otule ansiilaaye mattakhuzi aka na khushututela.
LUK 6:48 Onlikanana ntthu ajekaka nyuupa yawe khuthipa khwiichisa saaneene khutha vanchina la mawe woozivalavo. Khuta nnyeri khupiya nyuupa etile ila khuhisakhinyeyi mwaasa woozivalisiwa.
LUK 6:49 Ila otule ansiilaaye mattakhuzi aka khuhishututeli onlikanana ntthu ajekiye nyuupa yawe vanshaka woohizivalivo. Khuta nnyeri khupiya nyuupa etile nasaapiru khukwa, khupwecheya khuhisali hatha etthu.”
LUK 7:1 Eeshiyeevo mattakhuzi apale aari owoozaaye atthu, khweetta sitate ya Kafaranawu.
LUK 7:2 Ottuukho aariwo namalokozela mmote wa anajanka w'eerooma, aariina karumeyaawe wompheta aari olwaaziwaaye khusala asaleela ofwa.
LUK 7:3 Wakathi namalokozela wa anajanka otule asiiliyeevo monkoni wa Yinsa, khuwaaperekha attunkhulu akina amayaahuuti yoori anvekele Yinsa ate anvonise.
LUK 7:4 Yo n'onsikana khunvekela wookhanyarelavo araka: “Mwinyi oto onsuhi waawuniwa,
LUK 7:5 mwaasa yoori oniiya owaapheta atthu etthu na anijekela nyuupa yoosifwiwamo Nnyizinku.”
LUK 7:6 Aphano Yinsa khulankha khusala alawa vamote na-yo, asaleelaka ofiya, namalokozela otule khuwaaruma ashirikha awe olawa omuuza yoori: “Mbwana, ohijantipu khinsuhi weeyo ovira nnyupa mwaka.
LUK 7:7 Ti eto miiyo kinoona yoori akinsuhi okutthanana weeyo, ila olupe nttakhuzi limote paasi karumeyaaka ontta ovona.
LUK 7:8 Miiyo kinaaye afwalume akizitiyeeyo, ila na miiyo theenya kinaaye anajanka ankishututelaaye. Kinimuuza najanka mmote yoori: ‘Olawe’, khulawa; nkina yoori: ‘Aruti’, khuruti. Kinimuuza karumeyaaka yoori: ‘Retta eti’, ye khuretta.”
LUK 7:9 Yinsa asiiliyeevo mattakhuzi apale khwiiya wooshanka, khuzukuluwa khuwooza atthu apale aari omperekhaaye yoori: “Hatha Ezirayeele ottuukho akooneeniwo amini nkhama eti.”
LUK 7:10 Ashirikha apale aarumiweeyo khurutela owawe namalokozela otule, khunsikana karumeya otule avoniye.
LUK 7:11 Mmeesho mwaya Yinsa khulankha khusala alawa sitati ya Nayiini, anakhiyoni awe na khuntti ya atthu a waatta khusala enlotta.
LUK 7:12 Asaleelaka ofiya vanlako wa sitati etile, khusala asaruwa atthu aari weettelaaye ozikha. Otule aari weettelaaye ozikhiwa aari mwaana wa nunu mmote woofweliwa ti mannawe, ye aarina mwaana mmote othuuto paasi; atthu a waatta aari olawa vamote na-ye.
LUK 7:13 Wakathi Mbwana Yinsa amooniyeevo nunu otule, khumoonela huruma khunkhuwela khumuuza yoori: “Ohilile!”
LUK 7:14 Aphano khuwaasusela khusapa janaayiza, apale aathuuliyeeyo khweemela. Yinsa khulupa araka: “Shapu! Kinuuruma yoori olankhe!”
LUK 7:15 Shapu otule khulankha khwiikhala khusala attakhula; Yinsa khumwinkha mamaawe.
LUK 7:16 Atthu ooshi khwiiya awoova khusala ansifu Nnyizinku araka: “Napiyu nwulweene aniteela, ninoona yoori Nnyizinku aateeliye owuusuru atthu awe.”
LUK 7:17 Hapari epile za Yinsa khumwazeyela Yudeya yooshi mpakha miti epile zaattamananiyeeyo.
LUK 7:18 Yaahaya khuuziwa pi anakhiyoni awe vitthu epile zooshi. Ye khuwaakhuwela awiri,
LUK 7:19 khuwaaruma yoori alawe amuuzele Mbwana yoori: “Weeyo ti otu naari onwejaaye ama ninweje nkina?”
LUK 7:20 Yo khulawa mpakha ottuukhule aariiwo Yinsa khumuuza yoori: “Neetta orumiwa ti Yaahaya yoori nite niwuuzele nkhama otule naari onwejaaye ti weyo, ama nivire ninwejaka nkina?”
LUK 7:21 Wakathi otthuupule Yinsa khuwaavonisa alwele a waatta, anamarakala, apale aariina masheethwani, khuwaafunula maasho apale oohooni.
LUK 7:22 Aphano Yinsa khuwaajipu yoori: “Mwilawe mwamuuze Yaahaya etthiipo mooniyeezo na mwisiiliyeezo; apale oohooni antta woona, apale oorakala antta weettetta, anamakuttula antta otwahareshiwa, apale oohisiili ansiila, anamfwa asisimuliwa, na hapari zooshapweya antta olaleyeliwa asikhini.
LUK 7:23 Wooshapweyiwa ti otule ahiniphiiriwaaye ti miiyo.”
LUK 7:24 Anakhiyoni a Yaahaya n'oolaavo, Yinsa khusala owoozaka atthu monkoni wa Yaahaya yoori: “Makuluttu mweetteliye woona niini? Tteetthe yiinisiwaka ti pheevo?
LUK 7:25 Ama moona niini? Mwinyi mmote awaliye kuwo zooshapweya? Apale anwalaaye kuwo zootafikhana aniiya nraaha na aniikhala nkorofwa y'oofwalume.
LUK 7:26 Khi moona niini? Napiyu? Pi etthiipo kiniwuuzani yoori, Yaahaya awaaziti manapiyu akinoko aya.
LUK 7:27 Otu ti otule laari onlupaaye Nttakhuzi la Nnyizinku yoori: ‘Kinlawa kamperekhe karumeyaaka omaasho wawo yoori aattalele tarikhi yawo.’
LUK 7:28 Miiyo kiniwuuzani yoori vakatthi wa apale avokoliweeyo pi aakha, khina mmote anzitiyeeyo Yaahaya; ila otule eeyiye nttitthiiru muufwalume wa Nnyizinku, nwulweene zayita ye.”
LUK 7:29 Atthu ooshi mpakha anamariphisa lumpuru khusiila mattakhuzi a Yinsa. Yo khukhupalela shariya ya Nnyizinku, maana aari awoosiwa ti Yaahaya.
LUK 7:30 Ila mafwarizeewu na anamanozela a kano khukhijilela matakhelo a Nnyizinku khuhoosiwi ti Yaahaya.
LUK 7:31 “Anaatamu apa a leelo eti kiwaalattisane niini?
LUK 7:32 Alattanana khuntti ya asimaana eekhaliye vaparasa akhuwelanaka araka. ‘Fweeyo n'oovumiselani phivi za vaharusi mweeyo khuhiini; khwiipa liipo la huzuni mweeyo khuhilili.’
LUK 7:33 Khuta Yaahaya Namoosa woofuka na ahinnywaaye viinyu, mweeyo mwinri: ‘Ye onaaye masheethwani.’
LUK 7:34 Ata Mwaana wa Pinaatamu onja na onnywa, mweeyo mwinri: ‘Mmoone nsokho otu! Nanhapaliwa, nshirikha wa anamariphisa lumpuru na anatwampi.’
LUK 7:35 Apale anlottaaye ojuwa wa Nnyizinku, anthoonyeza yoori pi wookhweeli.”
LUK 7:36 Mfwarizeewu mmote anvekeliye Yinsa yoori alawe aje owawe. N'oofiya Yinsa khwiikhala yoori aje.
LUK 7:37 Omuuta otthuupule muukha mmote wa natwampi wa sitati ethiitile, khujuwa yoori Yinsa ontta oja wa mfwarizeewu, khuthuula suupha yawe ya mafuttha oonukhela.
LUK 7:38 Khulawa khweemela onyoko wa Yinsa nshini wa moolu awe khusala alila. Mishozi zawe khusala zittonkela moolu a Yinsa. Khusala akukuttha na nyuuli zawe na opejari moolu a Yinsa avaazaka mafuttha oonukhela.
LUK 7:39 Aphano mfwarizeewu otule nawoona vitthu epile khusala alupa nroho mwawe araka: “Otu eriwaka aari napiyu eetta ojuwa yoori mwanankha otu aninsapaaye natwampi.”
LUK 7:40 Yinsa khumuuza Simawu yoori: “Kintakha owuuza etthu.” Simawu khujipu yoori: “Kuuzeni mwanliimu.”
LUK 7:41 Yinsa khumuuza yoori: “Atthu awiri eetta wiiliwa nzurukhu ti mwinyi mmote aari wiipaashisakaaye, otu mmote aari wiiliwa miiya thaanu, otu nkina aari wiiliwa hamusiini.
LUK 7:42 Ila oowiiri khuhiivo mmote aawahiyeeyo onripha, ye khuwaaswaamihi oowiiri. Atthu apa awiri amphetachiyeeyo ti tuuvi?”
LUK 7:43 Simawu khujipu araka: “Kinoona yoori ti otule aswaamihiweeyo wa waattavo.” Yinsa khumuuza yoori: “Walikanisa.”
LUK 7:44 Ye khumuuza Simawu anthoonyezaka muukha otule araka: “Onimoona mwanankha otu? Miiyo kata vaje vawo apha khuhikinkhi hatha maati yoori koose moolu aka, ila ye oosa moolu aka na mishozi zawe khukukuttha na nyuuli zawe.
LUK 7:45 Khukipokhereleeni na peeju, ila ye khalikheleleeni opejari moolu aka.
LUK 7:46 Khukivaazeeni mafuttha oonukhela mmwishwa mwaka, ila otu avaaza mafuttha moolu aka.
LUK 7:47 Pi apho kiniwuuzaaye yoori twampi zawe epile za waatta ariinaazo za swaamihiwa; mwaasa woophetacha wawe. Ila otule aswaamihiweeyo vattitthiiru opheta wawe vattitthiiru.”
LUK 7:48 Yinsa khumuuza mwanankha otule yoori: “Twampi zawo za swaamihiwa.”
LUK 7:49 Apale eekhaliyeeyo khusala oozelana yoori: “Otu paani anwahaaye owaaswaamihi twampi atthu.”
LUK 7:50 Ila Yinsa khumuuza muukha otule yoori: “Waamini wawo wa wuusuru: olawe na heeri.”
LUK 8:1 Paata ya toole, Yinsa khusala eettetta sitati khwa sitati na nti khwa nti alaleyaka hapari zooshapweya zoofwalume wa Nnyizinku. Anakhiyoni awe apale khumi na awiri aari vamote na-ye,
LUK 8:2 na aakha akinoko aya apale aavonisiweeyo masheethwani na marati: Mariyamu aari wiitthiwaaye Mataleena, otule ansaruwiyeeyo masheethwani sapa,
LUK 8:3 na Zhuwaana muukha wa Kuuza, nsatoro wa Herooti, Suzaana na aakha akinoko aari ontthanttaaye Yinsa na vitthu zaya vamote na anakhiyoni awe.
LUK 8:4 Phantte za waatta za miti aari otawo atthu enkeene oteela okutthanana Yinsa. Aphano ye khulupa nlikaniso mmote araka:
LUK 8:5 “Aarivo namazala mmote aalawiiye ozala peewu zawe. Amwazaka, kinoko khukwela nshini wa tarikhi, khuluwatthiwa na khujiwa pi anyannyi.
LUK 8:6 Peewu kinoko khukwela vahali aariivo mawe, khoottha ila khuuma mwaasa woohiivo maati.
LUK 8:7 Peewu kinoko khukwela vanyiiwa, khuwula vamote na nyiiwa, khurapeliwa pi nyiiwa khufwa.
LUK 8:8 Ila peewu kinoko khukwela vanshaka wooshapweya, khuwula khwiima mishumo miiya wakhula peewu.” Alupiyeevo toole, ye khukhuwelela araka: “Ariina mashiilo ti asiile!”
LUK 8:9 Anakhiyoni awe khumuuzela maana a nlikaniso aya opule.
LUK 8:10 Yinsa khuwaajipu yoori: “Mweeyo mwenkhiwa ojuwa zootikinisa zoofwalume wa Nnyizinku, ila akinoko anuuzaniwa nlikaniso yoori oonaka ahisala ajuwa, asiilaka ehisala eweeleya.”
LUK 8:11 Maana a nlikaniso opu pi toono: peewu eti enthoonyeza nttakhuzi la Nnyizinku.
LUK 8:12 Peewu zaakweliiye ntarikhi, zinlikanisaniwa atthu apale ansiilaaye nttakhuzi la Nnyizinku ila sheethwani khulazavo varoho vaya nttakhuzi ntthile yoori ahaamini apattha wuusurukha.
LUK 8:13 Peewu epi zaakweliiye vamawe, zinlikanisaniwa atthu apale ansiilaaye nttakhuzi la Nnyizinku khupokherela na furaha. Ila mwaasa woohiina mitathaari, wakathi vattitthiiru nawootootiwa ti sheethwani anlikha waamini waya.
LUK 8:14 Peewu epi zaakweliiye vanyiiwa, zinlikanisaniwa atthu apale ansiilaaye nttakhuzi la Nnyizinku, ila mwaasa wooshukulikhela opattha tuvela na haali za meekhazi, yo waamini waya vattiitthi-vattiitthi onzima, ahifiyelelaka wiima mishumo.
LUK 8:15 Peewu epi zaakweliiye vanshaka wooshapweya, zinlikanisaniwa atthu apale ansiilaaye nttakhuzi la Nnyizinku khuthokorela nroho mwaya khushututela na khwiiyana niiya, apo aniima mishumo zooshapweya.
LUK 8:16 Khaavo ankhozaaye khantteya khufinikha na enyipo wala khupweha nlivuku. Entthiiwa vahali onooneyaavo yoori esala ewaamwasikhela apale anviraaye nnyupa.
LUK 8:17 Khayiivo envithiwaaye ehinttelaaye osaruwela oje, zooshi epile za siiri enttela wiiya payana.
LUK 8:18 Apho mwiyane ophoole wa nanna yoosiila, otule ariina ontta weekezeliwa, ila otule ahina hatha na etile anuupuwelelaaye wiiyana ontta onyakanyiwa.
LUK 8:19 Mamaawe na attwiize Yinsa khulankha yoori amoone, ila khuhisala ewaheya mwaasa yoori aarivo atthu a waatta.
LUK 8:20 Khuuziwa Yinsa yoori: “Vaje apho atavo mamaawo na attwiizo.”
LUK 8:21 Ye khuwaajipu araka: “Maama na attwiizaku pi apale ansiilaaye Nttakhuzi la Nnyizinku khushututela.”
LUK 8:22 Siikhu moote, Yinsa khuwooza anakhiyoni awe yoori: “Olawa neette phantte ya kaapu kinoko.” Khupakhira nkalawa khusala alawa.
LUK 8:23 Aphano eettaka olawa Yinsa khusala alala, khupuwa pheevo ya waatta kalawa khusala esaleela ozama.
LUK 8:24 Anakhiyoni apale khoova khusala anlansa Yinsa araka: “Mwanliimu, Mwanliimu nasaleela ozama!” Yinsa khulankha khunyamaza pheevo na mawipi, khupuwa nreke.
LUK 8:25 Nawiisha khuwoozela anakhiyoni awe yoori: “Waamini wenu ori vayi?” Yo khwiiya awoova na ooshanka khusala oozelana, araka: “Otu aya paani anrumaaye pheevo na mawipi khunshututela?”
LUK 8:26 Yinsa na anakhiyoni awe khulankha khulokhela Keraaza, kaapu ya Kalileya.
LUK 8:27 Wakathi Yinsa apakhuwiweevo nkalawa, khuta nlume mmote wa sitati ethiitile aariina masheethwani a waatta. Ye eekhaliye siikhu za waatta ahiwalaka kuwo na ahiikhalaka vaje, aari wiikhala mvilalo.
LUK 8:28 N'oomoona Yinsa khunyakula, khunkokhorela khukhuwa araka: “Onkitakhela-ni, Yinsa mwaana wa Nnyizinku Nwulu wa Pinkuuni? Safwatali ohikihukhumu.”
LUK 8:29 Ye aalupiye mattakhuzi apa mwaasa yoori Yinsa aarumiye onsaruwa masheethwani. Masheethwani apale eekhaliye siikhu za waatta mmwiili wa nlume otule. Na afukaniwaavo makwinjili khwinkhiwa atthu oomweekesela, eetta ottumulaka n'oothuuliwa pi masheethwani n'onlawana makuluttu.
LUK 8:30 Aphano Yinsa khumuuzela yoori: “Weeyo nzina lawo o paani?” Ye khujipu yoori: “Miiyo nzina laka ki omathi,” mwaasa yoori ntthu otule aamweettiye masheethwani a waatta mmwiili mwawe.
LUK 8:31 Masheethwani apale khusala anvekela Yinsa yoori ahiikarele khilintti.
LUK 8:32 Liphanko liwululene la kuluwe laari oshukisiwa vamwaako, masheethwani apale khunvekela ruhusa Yinsa yoori eette nkuluwe, ye khukhupalela.
LUK 8:33 Wakathi aliiyeemo masheethwani apale mmwiili wa nlume otule khweetta nkuluwe, aphano kuluwe khusala zitthira ziishukhela vantthatta khutupweela.
LUK 8:34 Apale aari oshukisaaye kuluwe epile nawoona vitthu epile zaarettikhaniyeezo, khutthira khulawa khulupa hapari epile nsitati mphule na miti mikinoko zaya.
LUK 8:35 Khulawa atthu a waatta olawa woona vitthu epile zaarettikhaniyeezo. Wakathi amwaattamiyeeyo Yinsa, khumoona nlume otule ansaruwiyeeyo masheethwani eekhaliye nshini wa moolu a Yinsa awaliye kuwo zawe na atthiiyemo akhili zawe, yo khwiiya awoova.
LUK 8:36 Apale ooniiyeeyo, khulawa khuwooza atthu nanna aavonisiweezo nlume otule.
LUK 8:37 Aphano atthu ooshi apale a nti opule wa Keraaza khunvekela Yinsa yoori aleemo mmuti mwaya mwaasa wa woova channu, Ye khuwela nkalawa khulaawo.
LUK 8:38 Nlume otule ansaruwiyeeyo masheethwani khusala anvekela Yinsa amuuzaka yoori anlikhe alawe vamote na-ye. Ila Yinsa khumuuza olawa araka:
LUK 8:39 “Orutele owawo wawooze atthu etile Nnyizinku ooretteliyeeyo.” Nlume otule khulankha khusala alawa owawe alaleyaka sitati yooshi etile aaretteliweeyo ti Yinsa.
LUK 8:40 Wakathi Yinsa arutiyeevo, khuntti khuluyeene ya atthu ooshi atthaapale aari onwejaaye khumpokherela na furaha.
LUK 8:41 Aphano mwinyi mmote aari wiitthiwaaye Yayiiru namalokozela wa nyuupa yoosifwiwamo Nnyizinku, khuta khunkokhorela Yinsa nshini wa moolu awe anvekelaka yoori alawe owawe,
LUK 8:42 mwaasa yoori mwanawe aariina mmote paasi wa nyaakha khumi na miwiri aari osaleela ofwa. Yinsa alawaka, atthu khusala aphunyana-phunyana.
LUK 8:43 Attaaphale khutavo muukha aariina nyaakha khumi na miwiri ari nlwele, yaari omwiittikhaaye taamu wakhula siikhu. Khuharipu nzurukhu awe wooshi aariina nkatthi wa akulukhala, ila khuhiivo mmote aawahiyeeyo onvonisa.
LUK 8:44 Ye khuta mpakha onyoko wa Yinsa khusapa ajapi yawe vattitthiiru, omuuta otthuupule khulikha wiittikha taamu etile.
LUK 8:45 Yinsa khuuzela yoori: “Paani akisapiyeeyo?” Atthu ooshi khusala akhana, Pheeturu khulupa yoori: “Mbwana, atthu pi a waatta pa yo anuuphunyaaye na wuusukhuma!”
LUK 8:46 Ila Yinsa khusala avira akhanyarelaka yoori: “Nna akisapiyeeyo keetta woona okisaruwiye owahi waka.”
LUK 8:47 Aphano muukha otule ooniyeevo yoori khaari owahi ojivitha, khuta eettaka othukumela khunkokhorela Yinsa vakatthi wa atthu ooshi khusala alupa wa nanna ansapiyeezo na avoniyeezo nasaapiru.
LUK 8:48 Attaaphale Yinsa khumuuza yoori: “Mwanankha waamini wawo woovonisa! Olawe na heeri.”
LUK 8:49 Attakhulaka etthiipile Yinsa, khuta karumeya mmote wa vaje vawe Yayiiru khumuuza yoori: “Ohimwantipu Mbwana olawa vamote na-weyo, maana mwanawo aya afwa.”
LUK 8:50 Yinsa n'oosiila khumuuza Yayiiru yoori: “Ohoove, wiiyane amini, mwanawo ontta wiiya nkumi.”
LUK 8:51 N'oofiya owawe Yayiiru, Yinsa khuhinlikhi hatha ntthu ovira nnyupa mphule, khuvira na Pheeturu, Yaahaya, Yaakhumpa, papaawe mwaana na mamaawe.
LUK 8:52 Atthu ooshi aasaliye vaje eettaka olila, Yinsa khuwooza yoori: “Mwihilile, otu khafweeni ontta olala.”
LUK 8:53 Yo khusala antheya Yinsa mwaasa wa ojuwa yoori afwa.
LUK 8:54 Ye khuntheteezela nkhono awe khumuuza yoori: “Mwaari, lankha!”
LUK 8:55 Rooho yawe khunrutela khulankha nasaapiru. Aphano Yinsa khumuuza papaawe yoori amwinkhe etthu-yoojiwa.
LUK 8:56 Papaawe na mamaawe khwiiya ooshanka, ila Yinsa khuwooza yoori mwihimuuze hatha ntthu vitthu epi zirettikhaniyeezo.
LUK 9:1 Yinsa khuwaakusanya maaswihaapa awe khumi na awiri khuwenkha owahi na ofwalume wa wiikara masheethwani a wakhula nanna na woovonisa.
LUK 9:2 Khuwaaruma olawa olaleya ofwalume wa Nnyizinku na owaavonisa alwele.
LUK 9:3 Khuwooza yoori: “Mwilawaka mwihithuule hatha etthu, wala pakhora, wala mfukho, wala phaawu, wala nzurukhu, wala ajapi yaphiiri.
LUK 9:4 Nyuupa ethiito mwinttelaaye opokhereliwa, mwimake attaapho mpakha olaavo.
LUK 9:5 Amana mwihipokhereliwi saana, mwilaakamo nsitati mwaya mpho mwitathe lifufu la mmoolu mwenu khwa oshaahiti waya yo.”
LUK 9:6 Aphano yo khulankha khusala alawa aviraka mmamiti alaleyaka hapari zooshapweya na awaavonisaka alwele wakhula phantte.
LUK 9:7 Nsatoro Herooti khusiila vitthu zaari orettikhanaazo ye khwiiya wootikinisiwa mwaasa atthu akina aari olupa yoori Yaahaya ti ye asisimuwiye muufwa.
LUK 9:8 Akina aari olupa yoori Aliyaasi ti ye awaapuweleliye, akina aari olupa yoori oto napiyu mmote wa raku eetta osisimuwa.
LUK 9:9 Ila Herooti khulupa yoori: “Yaahaya miiyo kaarumiye yoori ashijiwe, khi oto kininsiilaaye alupiwaka na anrettaaye vitthu epo ti paani?” Khusala atakhacha yoori amoone.
LUK 9:10 Maaswihaapa apale n'ooruti khumuuza Yinsa zooshi aarettaziyeezo. Aphano, ye khuwaathuula khusala alawa sitati moote yaari wiitthiwaaye Betesayita.
LUK 9:11 Ila khuntti ya atthu n'oojuwa khusala anlotta. Ye khuwaapokherela khusala awooza monkoni woofwalume wa Nnyizinku na awaavonisaka apale aari ohithajiyaaye ovonisiwa.
LUK 9:12 Njuwa leettelaka oveva, apale khumi na awiri khumwaattama Yinsa khumuuza yoori: “Owooze atthu apa alawe mmamiti mpho amake eekesaka etthu-yoojiwa, maana mphu niriimo makuluttu.”
LUK 9:13 Ye khuwaajipu yoori: “Mweeyeena mwiwenkhe etthu-yoojiwa.” Yo khunjipu araka: “Niriinaaye apha, phaawu thaanu na swi piiri paasi, woohiiyi olawa wuuzanya etthu-yoojiwa khiniwaafiyela atthu ooshi apa.”
LUK 9:14 Alume aariivo aari etthu ya alufu thaanu, ila ye khuwooza anakhiyoni awe yoori: “Mwiweekhaze atthu hamusiini wakhula khuntti.”
LUK 9:15 Yo khuretta etthiipo khuweekhaza ooshi.
LUK 9:16 Khuthuula phaawu thaanu na swi epile piiri khweekesa otulu, khuparikhiya khumeya khuwenkha anakhiyoni awe yoori awaawanyeze atthu apale.
LUK 9:17 Ooshi khuja khurupala, epile zaasaliiye khulokottheliwa khwiitaala khelenke khumi na piiri.
LUK 9:18 Siikhu moote, Yinsa eetta olompa otthwe, anakhiyoni awe ari kharipu, nawiisha khuwoozela yoori: “Atthu anri miiyo ki paani?”
LUK 9:19 Yo khunjipu yoori: “Akina anri weeyo o Yaahaya Namoosa, akina Aliyaasi, akina theenya anlupa yoori weeyo o napiyu mmote wa raku weetta osisimuwa.”
LUK 9:20 “Khi mweeyo mwinri ki paani?” Pheeturu khujipu araka: “Weeyo o Al-Masiihu wa Nnyizinku.”
LUK 9:21 Yinsa khuwaahirimiza yoori vitthu epile ahimuuze hatha ntthu.
LUK 9:22 Khuwooza araka: “Mwaana wa Pinaatamu ona yoohoowa nkatthi wa vitthu za waatta na okatthaliwa pi anamalokozela a tiini na attunkhulu a mahaakhimu a tiini mpakha anamanozela a kano; onlawa afwe, siikhu yattaatthu asisimuwe.”
LUK 9:23 Khuvira awoozaka atthu ooshi yoori: “Nkhama ntthu atakha okilotta miiyo, ona yoojikatthala mwennyewe, khuvikela nsalapa awe wakhula siikhu khusala akilotta.
LUK 9:24 Amana ntthu atakha wuusuru ohaayi awe, ontta ompwetheya; ila otule onimpwetheyaaye ohaayi awe mwaasa wa miiyo, oto onteela wuusurukha.
LUK 9:25 Ona fwayita-ni ntthu opattha vitthu zooshi z'oolumwenku, ila khujipwetecha ama khujitapanya mwennyeweru?
LUK 9:26 Otule anikoonelaaye haaya miiyo na mattakhuzi aka, na Mwaana wa Pinaatamu onteela omoonela haaya mmana ataaka nnuuru mwawe na nnuuru wa Paapa na malayikha oottakatthiifu.
LUK 9:27 Kiniwuuzani khweele yoori awaapo apha akina ahinteelaaye ofwa mpakha oone ofwalume wa Nnyizinku.”
LUK 9:28 Ziviriyeevo etthu ya siikhu naane paata yoolupa mattakhuzi apale, Yinsa khunthuula Pheeturu, Yaahaya na Yaakhumpa, Ye khuwela vamwaako olawa olompa.
LUK 9:29 Alompaka etthiipile omaasho wawe khuzukuluwawo, kuwo zawe khwiiya zoolakala na za waara nkhama ozerima.
LUK 9:30 Nasaapiru khumpuwelela atthu awiri khusala attakhulana, aari Munsa na Aliyaasi.
LUK 9:31 Aatiiye nnuuru ya pinkuuni khusala amuuza Yinsa khwa nanna aari weettelaazo ohoowa na ofwa Yeruzaleemu nkhama etthiipo Nnyizinku asharutheliyeeyo.
LUK 9:32 Pheeturu na ashirikha awe aarettiye eettaka olala, wakathi asisimuwiyeevo khoona nuuru ya Yinsa na atthu awiri amweemeleliye.
LUK 9:33 Atthu apale eettaka olawa Pheeturu khumuuza Yinsa yoori: “Mwanliimu, ti yooshapweya wiikhala attaapha! Nintta ojeka mapantta mattatthu, limote laawo, limote la Munsa, na limote la Aliyaasi.” Pheeturu khaari ojuwa etthu aari ottakhulaaye.
LUK 9:34 Attakhulaka etthiipile, khuta liwiku khuwaafinikha, anakhiyoni apale khwiiya awoova wakathi ooniyeevo liwiku liwaafinikhaka atthu apale.
LUK 9:35 Mmawiku mphule khupuwamo huula yaari oraaye: “Otu mwanaka woothawuliwa; mwinsiileze etile anlupaaye.”
LUK 9:36 Paata yoonyamala huula etile Yinsa khusalavo otthwe. Siikhu zaya epile anakhiyoni apale khwiiya oonyamala, khuhimuuzi hatha ntthu vitthu epile ooniyeezo.
LUK 9:37 Mmeesho mwaya nawiishukha vamwaako, khuta khuntti ya atthu a waatta oteela okutthanana Yinsa.
LUK 9:38 Vakatthi wa khuntti ya atthu atthaapale khupuwavo mwinyi aari okhuwaaye araka: “Mwanliimu, kinuuvekela yoori wamoone mwanaka, maana kina mmote othuuto paasi.
LUK 9:39 Sheethwani eetta onvelavelisa khusala anthukumelisa, onnyakulisa na onkwisela vathi n'oolaza maphovu, khaninlikha ahinvulaliseeni.
LUK 9:40 Kaawaavekeliye anakhiyoni awo yoori amwiikare sheethwani aya oto, yo khumoojeela.”
LUK 9:41 Yinsa khujipu araka: “Oo! Atthu oohaamini na ootakhala rooho! Mpakha lini kiiyaka vamote na-mweyo na kuuvilelakani? Ontiise apha mwanawo aya oto.”
LUK 9:42 Alawaniwaka etthiipile, sheethwani khunkwisela vathi khusala anthukumelisa, Yinsa khumwiikara sheethwani khuvona mwaana otule, khumwinkha papaawe.
LUK 9:43 Atthu ooshi khwiiya ooshanka mwaasa woowahi wa Nnyizinku. Yo aashankeliye vitthu epile aari orettaazo Yinsa, ye khuwooza anakhiyoni awe yoori:
LUK 9:44 “Mwisiileze saana mattakhuzi apa kiniwuuzaanini: Mwaana wa Pinaatamu onttela winkheleliwa mmakhono wa anaatamu.”
LUK 9:45 Ila yo khuhisala ajuwa maana a mattakhuzi aya apale mwaasa yoori aari ovitheya yoori ahiweeleye na khusala oova omuuzela.
LUK 9:46 Khupuwa onyakulisana vakatthi wa anakhiyoni apale eekesaka onjuwa paani wa yo aari weettelaaye wiiya nttunkhulu.
LUK 9:47 Ila Yinsa khujuwa etthu aari wuupuwelaaye yo, khunthuula mwaana khumweemesa omaasho wawe.
LUK 9:48 Aphano khuwooza anakhiyoni awe yoori: “Otule animpokherelaaye mwaana otu khwa nzina laka, onikipokherela miiyo; otule anikipokherelaaye, onimpokherela otule akirumiyeeyo. Otule anjipushuwisaaye vakatthi venu mooshi, nttunkhulu ti othuuto.”
LUK 9:49 Yaahaya khulupa yoori: “Mwanliimu, namoona ntthu aniikaraaye masheethwani khwa nzina lenu. Fweeyo khunkhattaza mwaasa woohiiyi wa khuntti yetthu.”
LUK 9:50 Yinsa khuwooza yoori: “Mwihinkhattaze. Maana otule ahinvirikanaaye na-fweyo ori phantte yetthu.”
LUK 9:51 Osaleelaka ofiya wakathi wa Yinsa orutela pinkuuni, khujilakelela weetta sitati ya Yeruzaleemu.
LUK 9:52 Khuwaalokozisa akarumeya awe, yo alawaka khusapuwa nti wa Samariiya yoori amweekesele puuro yoomakavo.
LUK 9:53 Ila atthu a nti wa Samariiya khuhimpokhereli, maana aajuwiye yoori eetta ovira eettaka Yeruzaleemu.
LUK 9:54 Yaakhumpa na Yaahaya nawoona vitthu zaya epile khumuuza Yinsa yoori: “Mbwana, ontakha yoori nirume moottho wa pinkuuni owaalukuze, nkhama etthiipo Aliyaasi aaretiiyeezo?”
LUK 9:55 Ila Yinsa khuzukuluwa khuwaamaruwela araka: “Mweeyo khamwinjuwa rooho mwiriinaazo.
LUK 9:56 Mwaana wa Pinaatamu khateeleeni opwetecha nafusi za atthu, aateeliye wuusuru.” Aphano khulankha khusala alawa nti nkina.
LUK 9:57 Eettaka olawa ntarikhi khupuwa ntthu mmote khumuuza yoori: “Kintta wuulotta wakhula vahali oneettaavo.”
LUK 9:58 Yinsa khunjipu araka: “Ananthala anaaye maphotto aya, anyannyi anaaye vijaaro zaya, ila Mwaana wa Pinaatamu khana vahali woovumulisavo eeshwa yawe.”
LUK 9:59 Yinsa khumuuza ntthu nkina yoori: “Okilotte.” Ye khujipu araka: “Mbwana, okilikhe khapula kilawe kanzikhe paapa.”
LUK 9:60 Yinsa khumuuza yoori: “Owaalikhe anamfwa awaazikhe anamfwa aya; weeyo olawe walaleye ofwalume wa Nnyizinku.”
LUK 9:61 Khupuwa ntthu nkina theenya khumuuza Yinsa yoori: “Kintta wuulotta Mbwana, ila okilikhe khapula kawaaleeze ajamaazaku.”
LUK 9:62 Yinsa khunjipu yoori: “Otule aneesaaye makhono awe alimaka khusala eekesa nyuma khaneezela muufwalume wa Nnyizinku.”
LUK 10:1 Paata ya toole, Mbwana khuwaathawula anakhiyoni awe akinoko sapiyiini na awiri, khuwaaruma yoori alawe awiri-awiri alokoze nsitati na mmiti wooshimo mphule aari weettelaaye oviramo.
LUK 10:2 Ye khuwooza yoori: “Wuurula pu wa waatta, ila anakhaazi vattitthiiru. Mwinvekele Mwennyewe nshapa yoori awaaperekhe anakhaazi a wuurula.
LUK 10:3 Mwilawe, kinuurumani nkhama pwittipwitthi zinttaaye vakatthi wa miiji.
LUK 10:4 Mwihithuule mfukho wala napampa, ama jampali wala mwiheemele ntarikhi mwichelisa.
LUK 10:5 Wakhula nyuupa mwimfiyaaye mwilupe khapula yoori: ‘Heeri yiiye vamote na-mweyo vaje apha.’
LUK 10:6 Amana eeyavo ntthu wa heeri, heeri yenu enttela wiiya vamote na othuuto; amana ahiivo entta wuurutelani.
LUK 10:7 Mwiheettette nyuupa khwa nyuupa, ila mwiikhale nyuupa ethiito mwije mwinywe wakhula etile mwinttelaaye winkhiwa, maana nakhaazi eninsuhi phakari yawe.
LUK 10:8 Wakhula sitati mwimfiyaaye khupokhereliwa saana, mwije etthu-yoojiwa mwinttelaaye winkhiwa.
LUK 10:9 Mwiwaavonise alwele mwinttelaaye owaasikana na mwiwooze atthu yoori: ‘Ofwalume wa Nnyizinku ori kharipu na-mweyo.’
LUK 10:10 Wakhula sitati mwineettaaye amana mwihipokhereliwi, mwileemo mwilawe ntarikhi mwiwooze yoori:
LUK 10:11 ‘Lifufu la sitati yenu ntthi liniphariyeeyo mmoolu mwetthu, nootathelani mwamwennyewe; ila mwijuwe yoori ofwalume wa Nnyizinku ori kharipu na-mweyo.’”
LUK 10:12 Yinsa khuwooza theenya yoori: “Kiniwuuzani yoori siikhu ya khiyaama, Nnyizinku onteela woonela tthakaraka Sotooma zayita sitati eto.
LUK 10:13 Olaanikha pu waawo weeyo Korazini, na weeyo Betesayita! Eriwaka minjuza epi zirettikhaniyeezo mphu, zeettiye orettikhana sitati ya Tiiro na Sidooni, athupwiyiye raku twampi zaya awala saakhu eekhala vafuutha.
LUK 10:14 Nakataalikha siikhu ya khiyaama, Nnyizinku onteela woonela tthakaraka Tiiro na Sidooni zayita mweeyo.
LUK 10:15 Weeyo Kafwaranawu onoona yoori onsifwiwa mpakha pinkuuni? Wala! Apho onteela wiishukhela motthooni.
LUK 10:16 Otule anuusiilezaanini, onikisiileza miiyo; otule anuukatthalaanini, onikikatthala miiyo. Otule anikikatthalaaye miiyo, oninkatthala otule akirumiyeeyo.”
LUK 10:17 Anakhiyoni apale sapiyiini na awiri khuruti ari oofurahi khulupa yoori: “Mbwana, hatha masheethwani aari onishututela amana nittakhulaka khwa nzina lawo.”
LUK 10:18 Yinsa khuwaajipu yoori: “Miiyo kamoona Epiliisi akwaka otulu nkhama ozerima.
LUK 10:19 Mwikisiileze! Kiniwinkhani owahi wooluwattha nyookha, wenye khuhuurettini hatha etthu, na oshintta owahi wooshi wa atuwi.
LUK 10:20 Mwihifurahi mwaasa wa masheethwani wuushututelani, mwifurahele mazina enu waatikhiwa pinkuuni.”
LUK 10:21 Wakathi otthuupule Yinsa khwiiya woofurahi nkatthi wa Rooho Ttakatthiifu, khuri: “Kinuusifu weeyo Paapa, Mbwana wa pinkuuni na vathi maana vitthu epi zeeya zoovitheya vakatthi wa ajuwi na asomi, khuwaathoonyeza asimaana; khweele Paapa, ti nanna waatakhiyeezo.
LUK 10:22 Zooshi kenkhiwa ti Paapa; na khaavo aninjuwaaye Mwaana woohiiyi Paapa, wala aninjuwaaye Paapa woohiiyi Mwaana, na otule Mwaana anintakhelaaye yoori anjuwise.”
LUK 10:23 Paata ya toole, khuwaakhuwela anakhiyoni aweru paasi khuwooza yoori: “Ooparikhiyiwa pi apale anoonaaye epi mwinoonaazo.
LUK 10:24 Kiniwuuzani yoori manapiyu a waatta na afwalume aari otakha woona vitthu etthiipi mwinoonaazo ila khuhooni na aari otakha osiila epi mwinsiilaazo ila khuhisiili.”
LUK 10:25 N'ooretta toole, namanozela mmote wa kano khulankha yoori amweeze Yinsa khuri: “Mwanliimu, kirette-ni yoori kipatthe ohaayi wa mileele?”
LUK 10:26 Yinsa khumuuzela yoori: “Yaatikhiwa niini nkithaapu ya kano wala eniweeleya toovi amana osomaka?”
LUK 10:27 Ye khujipu araka: “‘Omphete Mbwana Nnyizinku awo na rooho yawo yooshi na nafusi yawo yooshi, na kuvu zawo zooshi na akhili zawo zooshi’ na ‘omphete namwaattamanani awo nkhama etthiipo onjiphetaazo omwennyewe’.”
LUK 10:28 Aphano Yinsa khumuuza yoori: “Wajipu saana. Orettaru etthiipo ontta opattha ohaayi wa mileele.”
LUK 10:29 Ila namanozela wa kano otule aari otakha ojihakikhi khumuuzela Yinsa theenya yoori: “Namwaattamanani aka ti paani?”
LUK 10:30 Yinsa khunjipu araka: “Aarivo ntthu mmote aari olankhaaye Yeruzaleemu eettaka Yeriko, khuvithaaleliwa pi malatarawu khunyakanyiwa vitthu zawe, khuvuliwa kuwo zawe, khupiiwa khulikhiwa asaleelaka ofwa.
LUK 10:31 Erettiyeevo toole, khuviravo haakhimu wa tiini mmote, n'oomoona ntthu otule khunwerawera.
LUK 10:32 Khuviravo theenya nleevi mmote, n'oomoona ntthu otule ari ntarikhi mphule khunwerawera.
LUK 10:33 Aphano khuviravo nsamariiya mmote aari weettaaye safwari zawe, n'oomoona ntthu otule khumoonela huruma.
LUK 10:34 Khumwaattamela khoosa makhwatta awe na mafuttha na aalikoro khufuka na alikatuura, khunthuula khunttha vapuuru vawe khunlawana onyuupa ya aletto khumwiinanela.
LUK 10:35 Mmeesho mwaya, khulaza mizurukhu miwiri za feeta aariinaazo khumwinkha mwennyewe nyuupa khumuuza yoori: ‘Omwiinanele ntthu otu mpakha wakathi kinrutaavo, wakhula etile onttelaaye oharipu khwa ye, kintta ota kuuriphe n'ooruti.’”
LUK 10:36 Aphano Yinsa khumuuzela namanozela wa kano otule yoori: “Khwa atthu apa attatthu paani omooniyeeyo wiiya namwaattamanani awe nampiiwa pi malatarawu?”
LUK 10:37 Ye khujipu yoori: “Ti otule amooneliyeeyo huruma.” Yinsa khumuuza yoori: “Na-weyo olawe warette etthiipo.”
LUK 10:38 Yinsa na anakhiyoni awe eetta ovira alawaka khufiya mmuti, khupuwa muukha mmote aari wiitthiwaaye Maarata, khumpokherela.
LUK 10:39 Ye aarina ttwiiye aari wiitthiwaaye Mariyamu, eekhaliye nshini a moolu wa Mbwana Yinsa khusala asiila mattakhuzi apale aari olupaaye.
LUK 10:40 Ila Maarata eetta ojizukulela mwaasa wa waatta khaazi, khulawa aphale aariivo Yinsa khumuuza yoori: “Mbwana, khinuujali ttwiiyaku okilikhela khaazi za waatta otthome? Omuuze ate akikholise!”
LUK 10:41 Mbwana khunjipu yoori: “Weeyo Maarata washukulikha na wajikhaza na vitthu za waatta.
LUK 10:42 Ila eti moote ti yiiye yootafikhana. Mariyamu athawula phantte yooshapweya ahinnyakanyeyaaye.”
LUK 11:1 Siikhu moote Yinsa eetta olompa vahali vaya apho, eeshiyeevo mmote wa anakhiyoni awe khuri: “Mbwana, oninozele olompa nkhama etthiipile Yaahaya Namoosa na-ye awaanozeliyeezo anakhiyoni awe.”
LUK 11:2 Aphano, Yinsa khuwooza yoori: “Amana mwilompaka mwisala mwiri toono: Papeetthu, littitthimisiwe nzina lawo loottakatthifu. Wiishushe Ofwalume awo.
LUK 11:3 Oninkhe wakhula siikhu etthu-yoojiwa ninhithajiyaaye.
LUK 11:4 Oniswaamihi twampi zetthu, nkhama etthiipi na-fweyo nininswaamihaaye wakhula otule annikosaaye. Ohinilikhelele nizayiniwaka ti sheethwani, [[ila onuusuru khwa vitthu zootakhalaa]].”
LUK 11:5 Yinsa khuwooza theenya yoori: “Nkaakanyerelani mmote wa-mweyo anlankhaaye osikhu layili, khulawa ompiyela nlako swaahipu awe araka: ‘Swaahipu, kiipaashe phaawu ttatthu,
LUK 11:6 mwaasa yoori eetta ota swaahipu aka onti na akina hatha etthu yoomwinkha.’
LUK 11:7 Khi amana swaahipu enu oojipuni ari nnyupa mwawe araka: ‘Ohikantipu! Miiyo kafuka milako zaka, karapalela na aanaaka alala; akinwahi olankha yoori kuupatthise phaawu zaya.’
LUK 11:8 Weekhweele miiyo kiniwuuzani yoori, hatha nkhama khatakheeni olankha yoori oopatthise phaawu mwaasa w'ooswaahipu, oniishela olankha na awinkhe zooshi onhithajiyaazo mwaasa wa nthiti.
LUK 11:9 Ti eto kiniwuuzaanini yoori: Mwiveke, mwintta winkhiwa; mweekese mwintta opattha; mwipiye nlako mwintta ofukuleliwa.
LUK 11:10 Maana wakhula anvekaaye oninkhiwa, aneekesaaye ompattha, ampiyaaye nlako ontta ofukuleliwa.
LUK 11:11 Paapa-ni mmote wa mweeyo anraaye mwanawe anvekeliye phaawu khumwinkha liwe? Ama anvekeliye swi khumwinkha nyookha?
LUK 11:12 Wala anvekeliye laayi khumwinkha wenye?
LUK 11:13 Moone, mweeyo wootakhala rooho mwinjuwa owenkha aaneenu vitthu zooshapweya, sapiseni Paapa wa pinkuuni khanziti owenkha Rooho Ttakatthiifu apale aninvekelaaye?”
LUK 11:14 Siikhu moote, Yinsa aari omwiikara sheethwani mmwiili wa mwinyi mmote antotheliyeeyo ohittakhuli. Wakathi ansaruwiyeevo sheethwani otule, ye khwaaza ottakhula; apale aari omoonaaye khushanka.
LUK 11:15 Ila atthu akina khusala alupa yoori: “Ye oniikara masheethwani na owahi wa Belezibuuli, mfwalume wa masheethwani.”
LUK 11:16 Akinoko eetta omweeza, khusala anvekela alama moote ya pinkuuni.
LUK 11:17 Yinsa khujuwa vitthu aari ofikhiraazo, khuwooza yoori: “Ofwalume woojaawanya khusala wuumana oniishelana otapanyeya, na ojama wa waawanyeya oniishelana wiisha.
LUK 11:18 Nkhama Epiliisi eetta ojaawanya, ofwalume awe onttela wiiyavo toovi? Mweeyo mwinlupa yoori miiyo kiniikara masheethwani khwa owahi wa Belezibuuli.
LUK 11:19 Nkhama pi etthiipo, khi aaneenu aniikara na owahi waani? Atthaapo pa yo anttelaaye wuuthoonyezani yoori khamwina shariya.
LUK 11:20 Ila nkhama khweele masheethwani apa kiniikhara na owahi wa Nnyizinku, eto enthoonyeza yoori ofwalume wa Nnyizinku wafiya vakatthi venu.
LUK 11:21 Ntthu woozivala na woojuumaanya, amana eekeselaka vaje vawe saaneene, mali zawe ziniiya zookholeleleya.
LUK 11:22 Ila ntthu woozivala zayita ye, amana ankukuttela khunshintta ontta onnyakanya zaana zawe anroromelaazo athuule phantte ya mali zawe.
LUK 11:23 Otule ahina vamote na-miyo oto ona lupattha na-miyo, otule ahinkusanyaaye na-miyo ontta omwaza.”
LUK 11:24 Yinsa khurutela olupa yoori: “Sheethwani, amana alaamo mmwiili oneekesa puuro yoohiina maati yoori avumule, n'oohisikani puuro ye onlupa yoori kintta orutela mphule kaariimo.
LUK 11:25 Amana aruti asikana nnyupa ori wooseeliwamo na wa waattaleliwamo,
LUK 11:26 ontta oruti eettele masheethwani makinoko sapa ootepa zayita otule, aviremo asala eekhala nttumphule. Attaaphale ohaayi wa ntthu aya otule oniiya wootepa zayita omwanzo.”
LUK 11:27 Yinsa eettaka olupa mattakhuzi apale, muukha mmote aari attaaphale khunyakula araka: “Wooshapweyiwa muukha otule oovokoliyeeyo khuwaamwisa.”
LUK 11:28 Ila Yinsa khunjipu araka: “Ooshapweyiwa pi apale ansiilaaye nttakhuzi la Nnyizinku khushututela.”
LUK 11:29 Wakathi atthu akusanyeyiyeevo vahali vamote, Yinsa khusala alupa yoori: “Atthu a leelo pi ootakhala rooho, anveka woona alama ya minjuza ila khanlawa othoonyeziwa hatha alama moote, yoohiiyi etile ya napiyu Yuunusa.
LUK 11:30 Nkhama etthiipo Yuunusa eeyiyeeyo alama ya atthu a Neniive, na-ye Mwaana wa Pinaatamu onttela wiiya alama ya atthu a leelo.
LUK 11:31 Siikhu ya khiyaama rayisi wa kusini onttela olankha awaaphuke atthu a aphano; maana ye alankha okhu wiisheliyeewo olumwenku oteela osiila ojuwa wa Seleyimaana, ila otu mwiriina apha anziti Seleyimaana.
LUK 11:32 Siikhu ya khiyaama atthu a Neniive anttela wuuphukani mweeyo, maana yo athupwiya twampi zaya, n'oosiila tafusiiri epile aari olupaazo Yuunusa; otu mwiriina apha nasaapi anziti Yuunusa.”
LUK 11:33 Yinsa khuvira alupaka yoori: “Khaavo ntthu ankhozaaye khantteya khuvitha ama khukhutela na yuuku, ila entthiiwa vahali wa wooneyavo yoori esala ewaamwasikhela apale anviraaye nnyupa.
LUK 11:34 Khantteya ya mwiili maasho, amana maasho awo eeya oosaana, mwiili awo wooshi oniiya wa nuuru. Ila amana maasho awo ahiiyi saana mwiili awo oniiya n'yiiza.
LUK 11:35 Wiiyane phoole na nuuru eto oriinaaye yoori ehiiye yiiza.
LUK 11:36 Amana mwiili awo wooshi wiiyana nuuru khuhiina hatha phantte moote ya yiiza, oniiya woomwasikheliwa nkhama khantteya yuumwasikhelaka weeyo.”
LUK 11:37 Wakathi Yinsa eeshiyeevo ottakhula, mfwarizeewu mmote khumuuza olawa oja owawe. Ye n'oofiya khwiikhala vameeza.
LUK 11:38 Mfwarizeewu otule khushanka mwaasa woomoona Yinsa eettela oja woohinawi.
LUK 11:39 Mbwana khuwooza yoori: “Mweeyo mafwarizeewu, mwinoosa koopho na parathu oje waya, ila rooho zenu zeetaala vitthu za omaasho kopho na zoohusuti.
LUK 11:40 Alolo! Otule aattaliyeeyo oje khahi othuuto attaliyeeyo nkatthi?
LUK 11:41 Khapula mwaaze winkha etile eriiye nkatthi wa rooho yenu nkhama zimola, toowo mwintta woona zooshi ziwiikhaleliyeni saana.
LUK 11:42 Olaanikha pu weenu mweeyo mafwarizeewu, maana mwininkha lifunku lakhuumi mathapa na vitthu za nwoorotha, ila khusala mwitarawu shariya na pheta ya Nnyizinku! Mweeyo mwina yooretta vitthu epo woohilikhi phantte kiina.
LUK 11:43 Olaanikha pu weenu mweeyo mafwarizeewu, wawuutuvelani puuro ya wiilokozi nnyupa woosifwiwamo Nnyizinku na ochelisiwa wa shitahavo vamwanttiwa.
LUK 11:44 Olaanikha pu weenu mweeyo, mwiiyiyeeyo nkhama khapuri yoohooneyi anviraavo atthu vatulu vaya khuhijuwi.”
LUK 11:45 Aphano namanozela wa kano mmote khunjipu Yinsa araka: “Khahiyo toowo! Mattakhuzi apo kinoona yoori annithoonya fweeyo.”
LUK 11:46 Yinsa khuri: “Olaanikha pu weenu mweeyo anamanozela a kano, mwiniwaapwecherisaaye atthu mapwattha oolemela wala mweeyo mwihinwahaaye osapa na yaala yenu.
LUK 11:47 Olaanikha pu weenu mweeyo mwiniwaajekelaaye khapuri zooshapweya manapiyu, atthaapale ooliiweeyo pi amarehemu apapazenu.
LUK 11:48 Apho mweeyo mwinthoonyeza yoori mwinlawela oshaahiti wookhupalela epile apapazenu arettiyeeyo, yo awoola manapiyu, mweeyo khuwaajekela khapuri zooshapweya.
LUK 11:49 Ti eto Nnyizinku alupiyeeyo nkatthi woojuwa wawe yoori: ‘Kinlawa kawaaperekhe manapiyu na maaswihaapa; yo anteela owoola, akina aweekarise.’
LUK 11:50 Mwaasa wa manapiyu apa ooliiweeyo tokhiya olumwenku waazaka, atthu ooshi apa a leelo eti ana paathuli.
LUK 11:51 Waaza taamu ya Apeele mpakha taamu ya Zakariya otule ooliiweeyo kharipu ya vaalitaari vaje wa nyuupa ya Nnyizinku. Kiniwuuzani yoori, atthu a leelo anlawa ahukhumwiwe mwaasa wa ethiito.
LUK 11:52 Olaanikha pu weenu mweeyo anamanozela a kano, maana mwathuula efukulo yoojuwa, ila khuhivirimo na khuwaakhattaza apale aari otakhaaye oviramo.”
LUK 11:53 Paata ya Yinsa olaavo aphale vaya, mafwarizeewu na anamanozela a kano khwaaza omuuzela vitthu za waatta ari ookatipukha.
LUK 11:54 Yo aari onwazela shawuri yoori kusapi onalupa etthu, apatthe onlokoveza.
LUK 12:1 Khuntti ya atthu khukusanyeya, mwaasa wa waatta akinoko khusala aluwatthana. Yinsa khuwooza khapula anakhiyoni awe yoori: “Phoole na thwapiya zoonaafikhi za mafwarizeewu.
LUK 12:2 Khayiivo yoovithiwa ehinteelaaye ovithuliwa na zooshi epile zoottiyeleliwa zinteela ojuwiwa.”
LUK 12:3 Zooshi zinlupiwaazo n'yiiza, zinlawa zasaruleliwe veetakale, na zooshi epile zinlupiwaazo sirini zinlawa zeeye payana.
LUK 12:4 Yinsa khuvira attakhulaka araka: “Miiyo kiniwuuzani ashirikha yoori: Mwihiwoove apale anuulaaye mwiili, nawiisha khuhiretteli hatha etthu.
LUK 12:5 Miiyo kintta wuuthonyezani paani woomoova: Mwimoove Nnyizinku otule anwahaaye wuula mwiili enu, nafusi yenu khweeselela motthooni. Oto ti mwiriina yoomoova.
LUK 12:6 Anyannyi athaanu attiitthi-attiitthi khanuuzanyisiwa sinku piiri? Ila apo aya khaavo mmote Nnyizinku aninsahawaaye.
LUK 12:7 Hatha na nyuuli za mmwishwa mwenu zooshi pi za waalakiwa. Mwihoove, mweeyo mwinaaye fwayita zayita anyannyi apo a waatta.”
LUK 12:8 Yinsa khuri: “Miiyo kiniwuuzani yoori: otule antukhurwaaye vakatthi wa atthu yoori namalottela aka, Mwaana wa Pinaatamu onteela otukhuru vakatthi wa malayikha a Nnyizinku.
LUK 12:9 Ila otule ankikatthalaaye vakatthi wa atthu, na-ye onteela okatthaliwa vakatthi wa malayikha a Nnyizinku.
LUK 12:10 Wooshi otule anintarawaaye Mwaana wa Pinaatamu onswaamihiwa, ila otule ankufurwelaaye Rooho Ttakatthiifu khanswaamihiwa.
LUK 12:11 Amana mwithuuliwa olawa ophukiwa nnyupa woosifwiwamo Nnyizinku ama wa afwalume, mwihiiyane shaakha khwa nanna mwinttelaaye ojaakisa ama etthu mwinttelaaye olupa.
LUK 12:12 Wakathi otthuupo Rooho Ttakatthiifu entta wuuthoonyezani etthu yoolupa.”
LUK 12:13 Mwinyi mmote wa khuntti etile khunvekela Yinsa araka: “Mwanliimu, omuuze ttwiiyaku akaawanyele maali epile alikhiyeeyo papeetthu.”
LUK 12:14 Yinsa khunjipu araka: “Weyo, paani akirettiye wiiya namaphuka enu wala namwaawanya wa maali zenu?”
LUK 12:15 Khuwooza yoori: “Phoole na omaashokopho wooshi wa vitthu, mwaasa yoori ohaayi wa pinaatamu khunlipa na vitthu epile ampatthaazo za waatta.”
LUK 12:16 Yinsa khulupa nlikaniso araka: “Aarivo mwinyi mmote wa thaajiri aaruweriyeeyo channu.
LUK 12:17 Ye khusala awaza toono: ‘Kirette-ni? Akina vahali wootthaavo peewu zaka epi.’
LUK 12:18 Khulupa yoori: ‘Aa, kajuwa etthu yooretta. Kintta opwecha matthala apa mattiitthi kijeke mawulu-mawulu yoori kittheemo peewu zaka na vitthu zaka zooshi epile kiriinaazo.
LUK 12:19 Nawiisha, kuuze nafusi yaka yoori: onaaye peewu na vitthu za waatta zintoshelezaaye nyaakha za waatta; ovumule, oje, onywe na opuhe.’
LUK 12:20 Ila Nnyizinku khumuuza yoori: ‘Nlolo! Osikhu otthuupu ontta ofwa. Maali zawo paani anttelaaye osalana?’”
LUK 12:21 Yinsa khumarisela araka: “Ntthu oto ori nkhama atthu apale anlipanaaye maali zaya ila khuhiiyi mathaajiri mmakhono wa Nnyizinku.”
LUK 12:22 Aphano Yinsa khuwooza anakhiyoni awe araka: “Ti eto kiniwuuzaanini yoori: mwihiiyane shaakha na ohaayi enu, wala etthu mwinttelaaye oja ama etthu mwinttelaaye owala.
LUK 12:23 Maana ohaayi ona fwayita khuluyeene zayita etthu-yoojiwa na mwiili ona fwayita khuluyeene zayita kuwo.
LUK 12:24 Mwiwoone anakhuku; khanzala wala khanuurula hatha ntthala khana loopwehavo vitthu-zoojiwa zaya, ila Nnyizinku oniwenkha etthu-yoojiwa. Mweeyo mwinaaye fwayita khuluyeene zayita anyannyi apo!
LUK 12:25 Paani vakatthi venu anwahaaye weekezela mansha awe hatha nkhama eetta oshukulikhela?
LUK 12:26 Mweeyo khamwinwahi oshintta vitthu ttiitthi-ttiitthi, khi mwinshukulikhela toovi kinoko zaya?
LUK 12:27 Moone nanna anwulaazo maluwa oshapweya ntthuttu, khankhola khaazi wala khanvaasha kuwo, ila kiniwuuzani yoori: Seleyimaana aari thaajiri nwulweene, ila khawaleeni kuwo zooripelela nkhama maluwa atthaapo.
LUK 12:28 Nnyizinku onwalisa nyaani ziriiye ntthuttu leelo meesho zeettelaka olukula, sapiseni mweeyo atthu a amini ttiitthiiru khatepeeni wuuwalisani?
LUK 12:29 Mwihishukulikhele etthu mwinttelaaye oja ama onywa.
LUK 12:30 Atthu apale ahininjuwaaye Nnyizinku pa yo anshukulikhelaaye vitthu epo, ila mweeyo Papeenu onjuwa yoori enuuhithajiyani vitthu epo.
LUK 12:31 Mweekese khapula Ofwalume wa Nnyizinku, vitthu zaya epo mwintta weekezeliwa.”
LUK 12:32 Yinsa khulupa theenya araka: “Mwihoove mweeyo mwiiyiye nkhama khuntti ttiitthiiru ya pwittipwitthi, maana Papeenu ti ye atakhiye owinkhani Ofwalume awe.
LUK 12:33 Muuzanyize zooshi mwiriinaazo nzurukhu aya mwiwenkhe asikhini, mwijaattalelele mifukho zihinvaruwaaye, toowo mwinthokorela maali pinkuuni zihiniishaawo, okhu ahimfiyaawo nantarawu wala maweephe yoori aharipu.
LUK 12:34 Maana attaapho eniiyaavo maali zawo rooho yawo eniiya attaapho.”
LUK 12:35 Yinsa khuvira alupaka yoori: “Mwiiye anamarumeyela oojeekesela na khantteya zenu ziri zookhoziwa.
LUK 12:36 Mwina yawiiya nkhama anamarumeyela aninwejelaaye mbwanaaya yoori arutaka onjampo la harusi, amana apiya nlako amfukulele nasaapiru.
LUK 12:37 Ooshapweyiwa anamarumeyela apale mbwanaaya anttelaaye owaasikana eettaka ojeekesela. Kiniwuuzani khweele yoori mbwanaaya na-ye ontta ojiwalisa yoori arumeye, awooze wiikhala vameeza asala awaarumeyela.
LUK 12:38 Hatha nkhama ata osikhu layili ama lifwajiri, ooshapweyiwa anamarumeyela apale mbwanaaya anttelaaye owaasikana ari oojeekesela.
LUK 12:39 Mwijuwe yoori eriwaka mwennyewe nyuupa eetta ojuwa wakathi nantarawu antaavo, toono ahinlikhaka ovira nnyupa mwawe.
LUK 12:40 Na-mweyo mwiiye woojeekesela, maana Mwaana wa Pinaatamu ataaka khaavo anjuwaaye wakathi aya.”
LUK 12:41 Aphano Pheeturu khumuuzela Yinsa yoori: “Mbwana, nlikaniso opo pu weetthu ama pu wa atthu ooshi?”
LUK 12:42 Mbwana khujipu araka: “Paani eeyiyeeyo karumeya wa waamineya na w'aakhili, mbwanaawe amwinkhiyeeyo owaalokozela akarumeya azaawe na owenkha etthu-yoojiwa mmana ofiya wakathi?
LUK 12:43 Wooshapweyiwa karumeya otule mbwanaawe amana ataaka anttelaaye onsikana arettaka etthiipo.
LUK 12:44 Weekhweele, kiniwuuzani yoori onttela wiiya wa waaminiwa alikheliwe weettettisa maali zooshi.
LUK 12:45 Mwaakanyerele, karumeya otule amana alupa nroho mwawe yoori: ‘Mbwanaaka khanta nasaapi,’ khwaaza owaapiya akarumeya apale akina aakha na aalume, okhuno ajaka, anywaka na ahapaliwaka,
LUK 12:46 mbwanaawe onttela ota siikhu etile ye ahaari waakanyerelaaye na wakathi ahaari ofikhirelaaye, ahukhumwiwe venkivene atthiiwe puuro ya atthu oohaamineyi.
LUK 12:47 Karumeya otule anjuwaaye matakhelo a mbwanaawe, ila khuhisala ajeekesela na khuhisala aretta epile antakhaazo mbwanaawe, onteela ohukhumwiwa na ojaphiwa venkivene.
LUK 12:48 Ila otule ahinrettaaye matakhelo a mbwanaawe mwaasa woohijuwi, onteela ojaphiwa na ohukhumwiwa vattitthiiru. Wakhula otule enkhiweeyo za waatta ona yoorutisa za waatta; na otule aaminiweeyo venkivene, onlawa avekeliwe zooziti channu.”
LUK 12:49 Yinsa khuri: “Miiyo kateela okhoza moottho vatuniya, enikituvela ovira okholelaka!
LUK 12:50 Ila yamwanzo kina yoohoowa kifwe, kina huzuni mpakha vitthu epi zirettikhane ziishe!
LUK 12:51 Mweeyo mwinaakanyera yoori miiyo katana heeri vatuniya? Wala! Kiniwuuzani khweele yoori miiyo katiisa ohisiilani.
LUK 12:52 Waaza leelo eti mpakha okho ninttaawo, nkatthi woojama wa atthu athaanu, onteela opuwamo waawanyeya; attatthu ohisiilanani apale awiri, apale awiri ohisiilanani apale attatthu.
LUK 12:53 Paapa wuumana na mwanawe na mwaana wuumana na papaawe. Maama wuumana na mwanawe wankha, mwaana wankha wuumana na mamaawe, namaraliwa wuumana na nkhwewe, akhwe wuumana na namaloola.”
LUK 12:54 Yinsa khuwooza atthu aakusanyeyiyeeyo yoori: “Mweeyo amana moona liwiku liwelelaka phantte y'ookhu lintupweelaawo njuwa mwinlupaka yoori: ‘Entakha onya vuula’, khweele khurettikhana.
LUK 12:55 Amana moona pheevo ya kuusi mwinlupaka yoori: ‘Enteela opuwa haari’, khweele khurettikhana.
LUK 12:56 Manaafikhi! Mweeyo mwinjuwa olupa alama za vatuniya na z'ootulu; aphano toovi mwihijuwaka olupa alama za wakathi opu?
LUK 12:57 Mwaasa aya niini mwihijuwaka othawula etile yiiyiyeeyo ya shariya?
LUK 12:58 Amana weeyo na muumani awo mwilawaka wa namaphuka, enhithajiya osiilana khapula rakuzeene mwihinalawe, maana amana ofiya wa namaphuka ontta omuuza namweekesela ootthe nkalapooso.
LUK 12:59 Miiyo kiniwuuza khweele yoori khunlaamo ohiripheeni khapula.”
LUK 13:1 Wakathi aya opule, atthu aariivo khumuuza Yinsa yoori Pilaatu awoola atthu akina a Kalileya wakathi aari orettaavo twaha zaya.
LUK 13:2 Yinsa khuwaajipu yoori: “Mweeyo mwinoona yoori akalileya apo aari anatwampi zayita atthu akina, mwaasa woohoowa toowo?
LUK 13:3 Miiyo kiniwuuzani yoori: wala! Apho amana na-mweyo mwihithupwiyi twampi zenu, mooshi mwintta opwetheya nkhama yo.
LUK 13:4 Ama mweeyo mwinaakanyera yoori apale khumi na wanaane yaawaakweliyeeyo korofwa ya Siloowe aari anapaathuli zayita apale aniikhalaaye Yeruzaleemu?
LUK 13:5 Wala! Kiniwuuzani theenya yoori amana mwihithupwiyi twampi zenu mooshi mwintta opwetheya nkhama etthiipo na-yo apwetheyiyeezo.”
LUK 13:6 Aphano Yinsa khulupa nlikaniso opu onraaye: “Mwinyi mmote aarina mfikeera awe aazaliyeeyo mmashapa mwawe. Khulankha olawa oshuma mishumo zaya, hatha mmote khuhisikanimo.
LUK 13:7 Aphano khumuuza namalimela nshapa ntthile yoori: ‘Kina nyaakha mittatthu kitaaka oshuma, kihisikanakamo hatha etthu. Okakatte! Mwaasa wa etthu-ni ottiyelelaka puuro ya mahala?’
LUK 13:8 Ila karumeyaawe otule khunjipu araka: ‘Mbwana, kinuuvekelani yoori mwilikhe mfikeera opu wiiye nttumphu mpakha mwaakhani; miiyo kintta othipa nshini mwaya kisala kiitthela vitutu.
LUK 13:9 Mwaakha nkina amana wiima mishumo ti yooshapweya; amana ohiimi okakatte.’”
LUK 13:10 Siikhu ya saapatu, Yinsa eetta osomisa nnyupa moote yoosifwiwamo Nnyizinku.
LUK 13:11 Nttumphule aarimo muukha aari ohoochiwaaye ti sheethwani khwa nyaakha khumi na minaane, aari wookhutupuwa ahaari owahaaye wookowa.
LUK 13:12 Wakathi Yinsa amooniyeevo khunkhuwela khumuuza yoori: “Maama mwavona orati enu.”
LUK 13:13 Yinsa khunttheela makhono nunu otule omuuta otthuupule khookowa, khwaaza otthapa ansifwaka Nnyizinku.
LUK 13:14 Ila haakhimu wa nyuupa yoosifwiwamo Nnyizinku khwiiya wa wiiphiiriwa mwaasa wa Yinsa ovonisa siikhu ya saapatu, ti eto aawooziyeeyo atthu yoori: “Ziwaapho siikhu sitha zookhola khaazi; mwisala mwita siikhu etthiipo yoori mwivonisiwe, ila saapatu wala.”
LUK 13:15 Aphano Mbwana khujipu araka: “Manaafikhi! Paani mmote wa mweyo anraaye efiiye saapatu khuhifukuli mompe zawe na apuuru awe olawa onywisa maati?
LUK 13:16 Nunu otu peewu ya Eburahiima, eettiye ofukiwa ti Epiliisi khwa nyaakha khumi na minaane, nanna-ni ahaari weettelaaye otaphuliwa mwaasa wa wiiya saapatu?”
LUK 13:17 Alupiyeevo mattakhuzi apale, maatuwi awe Yinsa ooshi khuwaapattha haaya, atthu ooshi aariivo khwiiya oofurahi mwaasa wa vitthu zooshapweya epile aari orettaazo Yinsa.
LUK 13:18 Yinsa khulupa yoori: “Ofwalume wa Nnyizinku onlattana na niini, wala kilattisane niini?
LUK 13:19 Opo ori nkhama phunje ya mfikeera, mwinyi mmote anthuulaaye khulawa khuzala mmashapa mwawe. Khuwula khwiiya muutthi nwulweene, anyannyi o'otulu khusala ajekamo vijaaro zaya nvirapi mwaya.”
LUK 13:20 Yinsa khulupa theenya araka: “Ofwalume wa Nnyizinku walattana na niini?
LUK 13:21 Opo ori nkhama fwaramento muukha anthuulaaye khuttha ofu koopho ttatthu, khujakhuwa wooshi.”
LUK 13:22 Yinsa eetta ovira anozelaka nsitati na miti mikina za waatta eettaka Yeruzaleemu.
LUK 13:23 Ntthu mmote khumuuzela yoori: “Mbwana, vattitthiiru atthu anttelaaye wuusurukha?”
LUK 13:24 Yinsa khunjipu araka: “Mwijilipise yoori mwivire vanlako woophunyeya, maana a waatta anlawa eekese ovira ila khanteela owahi.
LUK 13:25 Mwennyewe nyuupa amana alankha afuka nlako awe, mweeyo mwinsala vaje mwipiyaka nlako na mwivekaka yoori: ‘Mbwana mwinifukulele!’ Ye ontta wuujipuni araka: ‘Akinjuwa ohali mwinlankhaawo.’
LUK 13:26 Aphano mwinlawa mwalupe yoori: ‘Naja vamote, khunywa vamote na wanozela mmuti mwetthu.’
LUK 13:27 Ila ye onlawa ajipu yoori: ‘Akinuujuwani wala ohali mwinlankhaawo akinjuwawo, mwikisuse mweeyo anamaretta zootakhala.’
LUK 13:28 Mwinlawa mwamoone Eburahiima, Esiyaakha, Yaakhumpa na manapiyu ooshi ari muufwalume wa Nnyizinku, ila mweeyo mwiikareliwe oje. Attaapho onlawa weeyevo olila na oluma meeno.
LUK 13:29 Atthu anttela olankha malawa-njuwa akina okhu lintupweelaawo njuwa, kusini na kashikhazini ate eekhale vameeza woofwalume wa Nnyizinku.
LUK 13:30 Miiyo kiniwuuzani khweele yoori, awaapho amwanzo anttelaaye wiiya awiishela, na awiishela anttelaaye wiiya amwanzo.”
LUK 13:31 Wakathi otthuupule khutavo mafwarizeewu khumuuza Yinsa yoori: “Oleevo apha, maana Erooti ontakha owuula.”
LUK 13:32 Ye khuwaajipu yoori: “Mwilawe mwamuuze nanthala aya oto yoori: Leelo na meesho kiniikara masheethwani na owaavonisa alwele, siikhu yattaatthu kintta wiishisa khaazi yaka.
LUK 13:33 Enhithajiya, leelo, meesho na nrotto ovira kilawaka; maana weekhweele khaavo napiyu amfwaaye nti nkina woohiiyi Yeruzaleemu!
LUK 13:34 Yeruzaleemu, Yeruzaleemu, oniwoolaaye manapiyu na owaavonya anamalaleya apale omperekheziwaaye! Swaafu kavi miiyo kitakhaka owaakusanya aanaawo nkhama mwanakhu aniwaakusanyaazo aanaawe mmapaphelo mwawe, ila weeyo khuhitakhi?
LUK 13:35 Apho moone yoori nyuupa yenu enttela wiiya puuro yoohiikhaliwi. Weekhwele kiniwuuzani yoori khamwinteela okoona theenya mpakha wakathi mwinttelaaye olupa yoori: ‘Attottopeliwe otule antaaye khwa nzina la Mbwana!’”
LUK 14:1 Saapatu moote, Yinsa aalawiye wa nttunkhulu mmote wa mafwarizeewu olawa oja, atthu aari nttumphule khusala amweekesela Yinsa.
LUK 14:2 Attaaphale aariivo, arivo mwinyi aavipiyeeyo mwiili awe wooshi.
LUK 14:3 Yinsa khuwoozela mafwarizeewu na anamanozela a kano araka: “Enkhupaleliwa onvonisa nlwele saapatu ama wala?”
LUK 14:4 Ila yo khwiiya oonyamala. Attaaphale, khunkhola mwinyi otule nkhono awe, khunvonisa khumuuza olawa safwari zawe.
LUK 14:5 Aphano khuwoozela yoori: “Paani wa mweyo anraaye amooniye mwanawe ama mompe yawe ekweliye vanlipu khuhilazivo nasaapiru eri saapatu?”
LUK 14:6 Yo khuhiwahi ojipu.
LUK 14:7 Wakathi ajuwiyeevo yoori atthu apale aalaleyiweeyo njampo aari othawula puuro za wiilokozi, Ye khulupa nlikaniso opu:
LUK 14:8 “Amana olaleyiwa njampo la harusi, ohithawule puuro etile ya wiilokozi, maana khinjuweya alaleyiwe ntthu wootepa oshitahiwa zayita weeyo.
LUK 14:9 N'oota otule oolaleyiyeeyo ontta owuuza yoori: ‘Puuro eto omwinkhe otu’. Attaaphale weeyo oniiya woopatthiwa ti haaya olawaka wiikhala puuro ya wiishela.
LUK 14:10 Ila amana olaleyiwa ona yawiikhala puuro ya wiishela, n'oota otule oolaleyiyeeyo ontta owuuza yoori: ‘Swaahipu, ote wiikhale puuro eti ya wiilokozi’. Aphano, weeyo onttela wiiya woohishimiwa venkivene vakatthi wa ananlaleyiwa ooshi.
LUK 14:11 Maana wakhula otule anjiwulisaaye ontta opushuwisiwa na otule anjipushuwisaaye ontta owulisiwa.”
LUK 14:12 Attaaphale Yinsa khumuuza mwinyi otule anlaleyiyeeyo yoori: “Amana wiiyana etthu-yoojiwa yawo ama njampo lawo ohiwaalaleye attwiizo, ashirikhaawo, ajamaazo ama anamwaattamanani awo oothaajiri, yoori na-yo ahuulaleye wumpuwa nkhama oriphana.
LUK 14:13 Ila amana wiiyana njampo owaalaleye asikhini, anamarakala na atthu oohooni.
LUK 14:14 Toowo oparikhiyiwa onttela wiiya wawo, maana apo aya khanlawa wiiyana etthu yawuurutisela. Oriphiwa wawo onttela ota siikhu yoosisimuliwa anashariya.”
LUK 14:15 Ntthu mmote wa atthaapale aariina vameeza asiiliyeevo mattakhuzi apale khumuuza Yinsa yoori: “Ooshapweyiwa pi apale anttelaaye oja njampo l'oofwalume wa Nnyizinku.”
LUK 14:16 Aphano Yinsa khujipu yoori: “Mwinyi mmote aarina njampo lawe khuwaalaleya atthu a waatta.
LUK 14:17 N'oofiya wakathi khunruma karumeyaawe olawa owooza anamalaleyiwa yoori: ‘Mwite, zalikana.’
LUK 14:18 Ila wakhula mmote khwaaza olupa tafwawuthi zawe, wamwanzo khulupa yoori: ‘Keetta wuuzanya nshapa laka, apha kinttela woona, kinveka nswammaha.’
LUK 14:19 Waphiiri khulupa yoori: ‘Keetta wuuzanya mompe khumi zoolima, kintakha kilawe keezelele, kinveka nswammaha.’
LUK 14:20 Wattaatthu khuri: ‘Kintta wiisharu oloola, akinwahi olawa.’
LUK 14:21 Karumeya otule khuruti khulawa khumuuza mbwanaawe vitthu epile. Mwennyewe njampo khwiiya wa wiiphiiriwa khulupa yoori: ‘Waakuve olawe mmatarikhi na mmamuti wa sitati wawaatiise anamarakala, asikhini na apale oohooni.’
LUK 14:22 Karumeya otule n'ooruti khulupa yoori: ‘Mbwana, karetta epile mwaakirumiyeezo, ila nalelo zinsala puuro.’
LUK 14:23 Mbwanaawe khumuuza yoori: ‘Olawe mmatarikhi khuulu na mmamiphiitelo, wa waakhanyarele apale onttelaaye owaasikana ate eetaale vaje vaka.
LUK 14:24 Kiniwuuzani yoori khaavo khwa apale aalaleyiweeyo anttelaaye oja njampo laka.’”
LUK 14:25 Siikhu moote, atthu a waatta eetta onlottelela Yinsa, Ye khuzukuluwa khuwooza yoori:
LUK 14:26 “Otule antakhaaye okilotta, ona yookipheta channu zayita papaawe, mamaawe, muukhaawe, aanaawe, attwiize, alupuwe, ama ohaayi awe, n'oohiretti etthiipo khaniiya nakhiyoni aka.
LUK 14:27 Wakhula otule ahinthuulaaye nsalapa awe akilotta khaniiya nakhiyoni aka.
LUK 14:28 Paani wa mweeyo anraaye atakhaka ojeka korofwa yawe, ahinaazaaye wiikhala khapula attheela hisapu vitthu zintakhaavo oona nkhama onwahi wiishisa?
LUK 14:29 Ahirettiru etthiipo, ye ontta waaza ila khaniishisa. Atthu apale anttelaaye omoona antta ontheya alupaka yoori:
LUK 14:30 ‘Mwinyi otu aaza ojeka ila khanwahi wiishisa.’
LUK 14:31 Ama mfwalume-ni anraaye alawaka wuumana viittha na mfwalume nkina khuhaazi wiikhala khapula apheleleza na anajanka awe apale alufu khumi, nkhama anlawa awaakhitiri apale alufu eshiriini anttelaaye wuumanana?
LUK 14:32 Amana ahiretti toowo, apale ahinafiye ari peetiwene nalelo, ontta onruma waziri awe olawa owaavekela heeri.
LUK 14:33 Khwa nanna etthiipo wakhula mmote wa mweyo ahinlikhaaye epile ariinaazo khansuhi wiiya nakhiyoni aka.
LUK 14:34 Mwiinyu ona fwayita, khi mmana olikha onyuunya onrutiseleya toovi onyuunya waya?
LUK 14:35 Khunretteliwa etthu wala mmashapa ama shituruumu, ontta wiitthiwa. Otule ariina mashiilo, ti asiile.”
LUK 15:1 Wakathi nkina anamariphisa lumpuru na anatwampi khusala ata oteela onsiila Yinsa.
LUK 15:2 Mafwarizeewu na anamanozela a kano khusala aapa araka: “Mwinyi otu oniwaapokherela anatwampi khusala aja vamote na-yo.”
LUK 15:3 Aphano Yinsa khuwooza nlikaniso mmote araka:
LUK 15:4 “Paani mmote wa mweyo anraaye arina pwittipwitthi zawe miiya khumwaashikha moote, khuhilikhi ntthuttu epile tiisiini na tiisiya zisaliyeezo, eettela etile moote emwaashikhiyeeyo mpakha opattha?
LUK 15:5 Amana asikana ontta ovikela ari woofurahi,
LUK 15:6 khusala arutela owawe. N'oofiya oniwaakhuwela maswaahipu zawe na anamwaattamanani awe awooze yoori: ‘Nlaweni nitthape, maana kapattha pwittipwitthi yaka etile yaakaashikhiyeeyo.’
LUK 15:7 Khwa nanna etthiipo kiniwuuzani yoori onttela wiiyawo otthapa nwulweene pinkuuni mwaasa wa natwampi othupwiya, zayita atthu tiisiini na tiisiya anashariya ahinhithajiyaaye othupwiya.”
LUK 15:8 Kuvira araka: “Ama muukha-ni anraaye arina nzurukhu awe khumi, khumwaashikha mmote khuhikhozi khantteya aseela nnyupa mwawe, eekesa w'aakhilivo mpakha opattha?
LUK 15:9 Amana apattha oniwaakhuwela maswaahipu zawe na anamwaattamanani awe awooze yoori: ‘Nlaweni nitthape, maana kapattha nzurukhu aka opule waakaashikhiyeeyo.’
LUK 15:10 Miiyo kiniwuuzani yoori eniiyavo furaha khuluyeene vakatthi wa malayikha a Nnyizinku mwaasa wa natwampi mmote othupwiya.”
LUK 15:11 Yinsa khurutela theenya yoori: “Aarivo mwinyi mmote aariina aanaawe awiri.
LUK 15:12 Otu nttiitthi aya khumuuza papaawe yoori: ‘Paapa, mwikinkhe lifunku la erathi yaka.’ Papaawe khuwaawanyela maali epile aanaawe.
LUK 15:13 Oviriyeevo wakathi vattitthiiru, mwaana otule nttiitthi khuthuula maali zawe epile aawanyeliweezo khulawa tuniya kiina ya woolepawo. Ottuukho khuharipu maali zawe epile khwa mwentto woololo.
LUK 15:14 N'ooharipu zooshi khupuwa jala ya waatta mmuti mwaya mphule, ye khusala ahankayikha.
LUK 15:15 Khulankha mpakha wa mwinyi mmote wa tuniya ethiitile khunvekela khaazi, ye khumwinkha oshukisa kuluwe zawe ntthuttu.
LUK 15:16 Ye aari ohithajiya oja vitthu epile zaari ojiwaazo pi kuluwe na khaavo aari omwinkhaaye etthu-yoojiwa.
LUK 15:17 Khujipayini khuri: ‘Anakhaazi a paapa ana etthu-yoojiwa yoowaafiyela, miiyo kiri okhuno entta okikhola jala.
LUK 15:18 Kintta olankha kilawe wa paapa khamuuze yoori: Paapa, kakosa mmakhono wa Nnyizinku na mmakhono mwenu.
LUK 15:19 Akinsuhi theenya wiitthiwa yoori ki mwanenu, mwikipokherele nkhama mmote wa anakhaazi enu.’
LUK 15:20 Khulankha khusala alawa mpakha wa papaawe. Nalelo ari peetiwene papaawe khumoona, khwiiyana huruma khuluyeene khusala antthirela khulawa khumpatikha na khumpejari.
LUK 15:21 Attaaphale mwaana otule khumuuza papaawe yoori: ‘Paapa, kakosa mmakhono wa Nnyizinku na mmakhono mwenu. Akinsuhi wiitthiwa yoori ki mwanenu.’
LUK 15:22 Ila papaawe khuwooza akarumeya awe yoori: ‘Mwaakuve, mwitiise kuwo zooziti oshapweya mwinwalise. Na peetthe mwinwalise nzaala mwawe na shapattho mmoolu mwawe.
LUK 15:23 Mwilawe onzizi mwanthuule mwaana wa mompe otule eesheliyeeyo oneneva mwite mwishije, nirette njampo la furaha.
LUK 15:24 Mwaasa yoori mwanaka otu aafwiiye apha ori haayi; aashikhiye apha apattikhana.’ Khwaaziwa njampo.
LUK 15:25 Epo zaari orettikhana mwaana otule nwulu ari omashapa. Khuta mpakha kharipu na vaje, khusala asiila koma zeettaka ovuma na atthu eettaka wiina.
LUK 15:26 Aphano ye khunkhuwela karumeya mmote wa vaje attaaphale khumuuzela niini yaari orettikhanaaye.
LUK 15:27 Ye khumuuza yoori: ‘Ttwiiyo ti ye arutiyeeyo, papaawo khunshijela mwaana wa mompe otule eesheliyeeyo oneneva, mwaasa wompokherela ari haayi.’
LUK 15:28 Mwaana otule nwulu khwiiphiiriwa khuhisala atakha oviramo. Attaaphale papaawe khusaruwa khusala ankhanyarela.
LUK 15:29 Ila ye khumuuza papaawe yoori: ‘Moone! Nyaakha za waatta kuurumeyelakani, wala akinakhijilele hatha nttakhuzi lenu limote. Ila khamwinakinkhe hatha puuzi moote yoori kirette njampo na ashirikha aka.
LUK 15:30 Arutiyeevo mwanenu oto aharipwiyeeyo vitthu zenu na amalempe, mwanshijela mwaana wa mompe otule wooneneva aya.’
LUK 15:31 Aphano papaawe khumuuza yoori: ‘Mwanaka! Wakhula siikhu oniiya vamote na-miyo, wakhula etile kiriina ti yaawo.
LUK 15:32 Ila yaari ohithajiya oretta njampo la furaha, mwaasa yoori ttwiiyo aafwiiye apha ori haayi, aashikhiye apha apattikhana.’”
LUK 16:1 Yinsa khuwooza anakhiyoni awe yoori: “Aarivo mwinyi mmote wa thaajiri aariina namalokozela wa anakhaazi awe, khuuziwa yoori: ‘Namalokozela otule ontta oharipu maali zawo.’
LUK 16:2 Ye khunkhuwelisa khumuuzela yoori: ‘Niini epi kinsiilaazo onrettaazo weeyo? Otiise warakha za kontha koone etthu oretteliyeeyo nzurukhu aka. Maana khunteela orutela wiiya namalokozela wa anakhaazi.’
LUK 16:3 Namalokozela wa anakhaazi otule khuupuwela toono: ‘Kinttela oretta-ni mbwanaaka amana akilikhisa khaazi? Othipa akinkhitiri na olawa olola enikipattha haaya.
LUK 16:4 Aa, kajuwa etthu yooretta yoori amana kiikariwa atthu akipokherele mmavaje mwaya.’
LUK 16:5 Aphano ye khuwaakhuwela ooshi apale aari wiiliwaaye ti mbwanaawe. Khumuuzela otule wamwanzo yoori: ‘Oniwiila kavi mbwanaaka?’
LUK 16:6 Ye khujipu yoori: ‘Onikiila ttompwiyo miiya za mafuttha.’ Namalokozela wa anakhaazi otule khuri: ‘Teeni yawo ti eti eriiye vawarakha apha, wiikhale waatikhe hamusiini.’
LUK 16:7 Elottelanaka khumuuzela otule waphiiri yoori: ‘Khi weeyo oniiliwa kavi ti mbwanaaka?’ Ye khujipu yoori: ‘Kiniiliwa miphimo miiya za tiriku.’ Namalokozela wa anakhaazi otule khumuuza yoori: ‘Teeni yawo eti eriiye vawarakha apha, waatikhe thamaaniini.’
LUK 16:8 Aphano mbwanaawe khunttottopela namalokozela wa anakhaazi otule woohaamineyi mwaasa wa akhili epile aariinaazo. Miiyo kiniwuuzani yoori, atthu a voolumwenku apha ana akhili za waatta mmenttezi mwaya, zayita atthu apale aneettettaaye nnuuru.
LUK 16:9 Apho kiniwuuzani yoori: mwirumeyele maali zenu za voolumwenku apha zoohiiyi za shariya yoori mwiiwaapatthe ashirikha, amana ziwiishelani yo oopokhereleni pinkuuni.
LUK 16:10 Otule anaamineyaaye khwa etthu ttiitthiiru onaamineya khwa etthu khuluyeene; otule ahinaamineyaaye khwa etthu ttiitthiiru hatha etthu khuluyeene khanaamineya.
LUK 16:11 Nkhama khamwaamineyeeni na maali za voolumwenku zoohiiyi za shariya, paani anttelaaye owaaminini na maali zookhweele?
LUK 16:12 Nkhama khamwaamineyeeni na vitthu za watthu, paani anttelaaye owinkhani etthu enttelaaye wiiya yeenu?
LUK 16:13 Khaavo karumeya anwahaaye owaarumeyela a mbwana awiri, mwaasa yoori ontta omwiiphiirisa mmote, antuvelise otu nkina; ama oniiya wa waamineya khwa otu mmote, antarawu otu nkina. Khinwaheya onrumeyela Nnyizinku na Nzurukhu.”
LUK 16:14 Mafwarizeewu apale oopheta nzurukhu na kuvu, n'oosiila mattakhuzi apale khusala antheya Yinsa antarawaka.
LUK 16:15 Aphano Ye khuwooza yoori: “Mweeyo pi apale oojoona wiiya anashariya vakatthi wa atthu, ila Nnyizinku onjuwa rooho zenu. Etile atthu anoonaaye wiiya ya fwayita, omaasho wa Nnyizinku ti yootaraweya.
LUK 16:16 Kano na manapiyu khazilikheleleeni mpakha wakathi wa Yaahaya. Waaza wakathi otthuupo hapari za Ofwalume wa Nnyizinku zinvira zilaleyiwaka, wakhula ntthu onjilipisa yoori eettemo.
LUK 16:17 Ti yookhweya pinku na vathi wiisha zayita olaziwavo alama ttiitthiiru ya nttakhuzi la kano.
LUK 16:18 Wakhula nlume animwaashaaye muukhaawe khunrala muukha nkina ontta oraruwa; na aninralaaye muukha otule wa waashiwa na-ye ontta oraruwa.”
LUK 16:19 Yinsa khurutela olupa theenya yoori: “Aarivo mwinyi mmote wa thaajiri aari owalaaye kuwo zooshapweya na zootafikhana, na wakhula siikhu eetta opuha, owawe yaari wiipikhiwawo etthu-yoojiwa ya nnofu.
LUK 16:20 Vanlako wa thaajiri otule aattattikheliwevo masikhini mmote wa waatta makhwatta aari wiitthiwaaye Laazaru.
LUK 16:21 Aari ohithajiya oja tathela zaari okwaazo vameeza wa thaajiri otule, anapwa khusala ata olapa makhwatta awe.
LUK 16:22 Masikhini otule khufwa, khuthuuliwa pi malayikha khulawa khwiiya vamote na Eburahiima. Na-ye thaajiri otule khufwa khulawa khuzikhiwa.
LUK 16:23 Motthooni okhule eettaka woona shaani, ye khulansa maasho awe khweekesa otulu khumoona Laazaru ari mpavu wa Eburahiima.
LUK 16:24 Ye khusala akhuwa araka: ‘Paapa Eburahiima, kooneleni huruma! Mwinrume Laazaru anaanise yaala yawe na maati ate azizimise nlimi laka, maana kintta ohukhumweya vamoottho apha kiriivo.’
LUK 16:25 Eburahiima khunjipu yoori: ‘Mwanaka, omfwahamu yoori muuhaayi mwawo waapokheriye vitthu zooshapweya, ila Laazaru muuhaayi mwawe eetta ohoowa. Aphano ye asithirikha, weeyo ontta ohoowa.
LUK 16:26 Olikha eto, vakatthi vetthu yatthiiwavo khilintti khuluyeene ehinlokheyaaye ntthu olankha okhuno ataaka okho wala okho ataaka okhuno.’
LUK 16:27 Thaajiri khulupa yoori: ‘Paapa Eburahiima, safwatali kinuuvekelani yoori mwinrume Laazaru alawe wa ajamaazaku,
LUK 16:28 kinaaye attwiizaku athaanu alawe awooze yoori ahipatthe ota okhuno kiriiwo woohoowiwawo.’
LUK 16:29 Eburahiima khunjipu yoori: ‘Attwiizo anaaye kano za Munsa na kithaapu za manapiyu, asiileze etthiipo.’
LUK 16:30 Thaajiri khukhanyarela araka: ‘Wala paapa Eburahiima! Amana ntthu asisimuwa muufwa alawa awooza, antta othupwiya.’
LUK 16:31 Eburahiima khujipu yoori: ‘Ahisiileziru kano za Munsa na za manapiyu, hatha nkhama ntthu eetta osisimuwa muufwa, yo khanteela okhupali.’”
LUK 17:1 Yinsa khuwooza anakhiyoni awe yoori: “Enteela opuwa vitthu zinteelaaye owaakwisela atthu ntwampi, ila atakhaliwa otule anttelaaye othowelela.
LUK 17:2 Afwataali ntthu otupweeziwa mpahari afukeleliwe liwe liwululene mmwisiko, ehiiyeeni owaathowelelisa apele eeyiye oohikhomaali.
LUK 17:3 Mwiiyane ophoole: ttwiiyo amana ookosa, onshowere; amana athupwiya, onswaamihi.
LUK 17:4 Amana ookosa swaafu sapa siikhu moote, na wakhula swaafu khusala ata olupa yoori: ‘Kathupwiya’, onswaamihi.”
LUK 17:5 Maaswihaapa khunvekela Yinsa yoori: “Mbwana, weekezele amini yetthu!”
LUK 17:6 Mbwana khujipu araka: “Eriwaka amini yenu yeettiye wiiya nkhama phunje ttiitthiiru ya muuyu, mweetta wuuza muutthi opu yoori: ‘Okhuleye watupweele mpahari,’ opo weetta wuushututelani.”
LUK 17:7 Yinsa khuvira alupaka yoori: “Paani mmote wa mweyo anraaye nakhaazi awe woolima, ama wooshukisa pwittipwitthi ntthuttu, eettaka otaru animuuzaaye yoori: ‘Ote niikhale vameeza apha nije!’
LUK 17:8 Kinoona yoori khaavo! Ila khapula onimuuza yoori: ‘Wiipikhe etthu-yoojiwa, owale kuwo zawo okirumeyele kijaka na kinywaka. Aphano amana kiisha na weeyo oje na onywe!’
LUK 17:9 Karumeya otule oninsuhi oshukhurweliwa mwaasa wooretta etile aarumiweeyo? Kinoona yoori wala!
LUK 17:10 Etthiipo na-mweyo, amana mwiretta epile mwirumiweezo, mwina yoolupa yoori: ‘Naakarumeya oohiina maana; naretta etile naariina yooretta paasi.’”
LUK 17:11 Yinsa eettaka Yeruzaleemu, aaviriye enakatthi-nakatthi ya Samariiya na Kalileya.
LUK 17:12 N'oofiya nti aya opo, khuta anamakuttula khumi khweemela peetiwene
LUK 17:13 khusala ankhuwela araka: “Yinsa, Mwanliimu, noonele huruma!”
LUK 17:14 Ye n'oowoona khuwooza yoori: “Mwilawe mwajithoonyeze wa mahaakhimu a tiini.” Eettaka olawa etthiipile, yo khwiiya oovona.
LUK 17:15 Mmote wa apale khumi, nawoona yoori avona, khuruti ansifwaka Nnyizinku na huula yoonyakula.
LUK 17:16 Khukokhora khufiyisa ajihi yawe vathi, khunshukhurwela Yinsa; ye aari nsamariiya.
LUK 17:17 Yinsa khumuuzela yoori: “Khahi atthu khumi avoniyeeyo? Khi apa akina tiisiya ari vayi?
LUK 17:18 Khaavo awahiyeeyo oruti oteela onshukhurwela Nnyizinku, woohiiyi otu wa malaponi?”
LUK 17:19 Yinsa khumuuza yoori: “Olankhe olawe amini yawo yawuusuru.”
LUK 17:20 Yinsa eetta wuuzeliwa pi a mafwarizeewu wakathi waari weettelaavo ota Ofwalume wa Nnyizinku. Ye khujipu araka: “Ofwalume wa Nnyizinku otaaka khunttela wiiya etthu enooneyaaye.
LUK 17:21 Khina anttelaaye olupa yoori: ‘Moone, opu ori apha!’ ama ‘Opule oriiye okhule!’ Maana ofwalume wa Nnyizinku ori vakatthi venu.”
LUK 17:22 Attaaphale khuwooza anakhiyoni awe yoori: “Onteela ofiya wakathi mwinttelaaye otakha wiiyana vamote nenkawu siikhu moote Mwaana wa Pinaatamu, ila ehisala ewaheya.
LUK 17:23 Akinoko anlawa alupe yoori: ‘Ori okhule!’ ama ‘Ori apha!’ ila mwihilankhe olawa omweekesa.
LUK 17:24 Nkhama etthiipo taari enzerimaaye phantte moote yeettaka phantte kiina, enteela wiiya etthiipo siikhu anttelaaye ota Mwaana wa Pinaatamu.
LUK 17:25 Ila mwanzo ye ona yoohoowa venkivene na okatthaliwa pi atthu a leelo.
LUK 17:26 Nkhama zaarettikhaniyeezo wakathi opule wa Nuuhi, enttela orettikhana etthiipo wakathi wa Mwaana wa Pinaatamu.
LUK 17:27 Atthu eetta oja na onywa, na oralana, mpakha siikhu Nuuhi aapakhiriyeeyo mmwaaraka, khuta nnyeri ooshi khufwa.
LUK 17:28 Nkhama zaarettikhaniyeezo wakathi wa Loothi. Atthu eetta oja na onywa, wuuzanya na wuuzanyisa, ozala na ojeka manyupa aya.
LUK 17:29 Wakathi Loothi aliiyeewo Sotooma, khukwa vuula pinkuuni ya moottho na oka, khuwoola atthu ooshi.
LUK 17:30 Enttela orettikhana etthiipo siikhu anttelaavo ota Mwaana wa Pinaatamu.
LUK 17:31 Siikhu yaya eto, otule anttelaaye wiiya vatulu wa nyuupa ahiishukhe yoori alokotthele vitthu ziriiye nnyupa mwawe; otule anttelaaye wiiya ntthuttu ahirutele onti.
LUK 17:32 Mwimfikhirele muukha wa Loothi!
LUK 17:33 Otule antakhaaye wuusuru ohaayi awe ontta ompwetheya, ila otule onimpwetheya ontta wuusuru.
LUK 17:34 Miiyo kiniwuuzani yoori: osikhu wa siikhu ethiitile, atthu awiri oorapalela olili mmote, onttela othuuliwavo mmote asalevo mmote.
LUK 17:35 Atthu awiri achilaka tiriku, onttela othuuliwavo mmote asale mmote.
LUK 17:36 [Atthu awiri ari mmashapa, onttela othuuliwavo mmote asale mmote.]”
LUK 17:37 Yo khumuuzela Yinsa yoori: “Mbwana, enttela orettikhana vayi?” Yinsa khuwaajipu yoori: “Vahali aniiyaavo muufwi, anakhuku aniiya attaapho.”
LUK 18:1 Yinsa khuwooza anakhiyoni awe nlikaniso mmote yoori aarina yoolompa woohilikheleli wala woohinyoonyeyi.
LUK 18:2 Ye khulupa yoori: “Sitati moote aariwo namaphuka mmote ahaari omoovaaye Nnyizinku, wala ahaari onshitahaaye ntthu.
LUK 18:3 Sitati ethiitile aariwo nunu mmote woofweliwa ti mannawe aalawiiyeeyo onvekela namaphuka otule araka: ‘Okaawanyele haakhi khwa muumani aka.’
LUK 18:4 Khunkatthalela wakathi mwinkeene, ila omwiisho waya khusala alupa nroho mwawe yoori: ‘Nakihimoovi Nnyizinku na ohinshitahi ntthu,
LUK 18:5 nunu otu aaza raku okantipu; kintta omwaawanyela haakhi na paathuli yoori ahirutele okiwuti.’”
LUK 18:6 Mbwana Yinsa khuvira alupaka yoori: “Mwisiileze saana etthu anlupaaye namaphuka otu woohiiyi wa shariya.
LUK 18:7 Nnyizinku khaniwaawanyela shariya ananthawuliwa awe apale aninvekelaaye nthana na osikhu, hatha nkhama Ye eetta orupaza owaajipu?
LUK 18:8 Kiniwuuzani yoori Ye oniwaawanyela shariya woohirupazi. Aphano Mwaana wa Pinaatamu wakathi anrutelaavo voolumwenku apha, onteela osikanavo amini?”
LUK 18:9 Yinsa khulupa nlikaniso mmote awoozaka atthu apale aari ojoonaaye wiiya makhaamili khusala awaatarawu azaaya. Ye khuri:
LUK 18:10 “Alume awiri aaviriye Nnyupa wa Nnyizinku khusala alompa; mmote aari mfwarizeewu, nkina aari namariphisa lumpuru.
LUK 18:11 Mfwarizeewu ari wa weemela, aari olompa nkatthi-nkatthi araka: ‘Nnyizinku, miiyo kinuushukhurwela maana miiyo aki nkhama atthu, apale oheettetteli shariya, malatarawu anamararuwa, wala nkhama namariphisa lumpuru oto ariiye apho.
LUK 18:12 Miiyo kimfuka siikhu piiri wakhula sumana na kininkha zaakha khwa lifunku lakhuumi ya wakhula etile kimpatthaaye.’
LUK 18:13 Ila namariphisa lumpuru eemeliye peetiwene, ye hatha khaari wiinuwa yoori eekese otulu, ila ajipiyaka veefuwa aari ori: ‘Oo Nnyizinku koonele huruma, miiyo ki natwampi.’
LUK 18:14 Miiyo kiniwuuzani yoori, namariphisa lumpuru aalawiye owawe ari woohakikhiwa ti Nnyizinku, ila otule woojikhupali wala. Maana otule anjiwulisaaye ontta opushuwisiwa, ila otule anjipushuwisaaye ontta owulisiwa.”
LUK 18:15 Atthu akina khusala awaatiisa asimaana yoori asapiwe ti Yinsa. Ila anakhiyoni awe n'oowoona khusala awaamaruwela.
LUK 18:16 Ila Yinsa khuwaakhuwela asimaana apale araka: “Mwiwaalikhe asimaana akiteele miiyo, mwihiwaakhattaze; maana Ofwalume wa Nnyizinku pu waaya apale eeyiye nkhama asimaana.
LUK 18:17 Miiyo kiniwuuzani khweele yoori wakhula otule ahimpokherelaaye Ofwalume wa Nnyizinku nkhama nsimaana, khanteela weettamo.”
LUK 18:18 Nttunkhulu mmote khumuuzela Yinsa yoori: “Mwanliimu woosaana, kirette niini yoori kipatthe ohaayi wa mileele?”
LUK 18:19 Yinsa khunjipu araka: “Mwaasa wa niini okikhuwelaka yoori woosaana? Khaavo ntthu woosaana woohiiyi Nnyizinku paasi.
LUK 18:20 Weeyo onjuwa mirumo za Nnyizinku: ohiraruwe, ohuule, ohiiye, wala ohilawele oshaahiti woovonyeya, onhishimu papaawo na mamaawo.”
LUK 18:21 Mwinyi otule khujipu yoori: “Waaza osimaana aka zooshi epo kinretta.”
LUK 18:22 Yinsa n'oosiila mattakhuzi apale khumuuza yoori: “Enuusaleela etthu moote. Wuuzanyise vitthu zawo zooshi nzurukhu aya owenkhe asikhini, toowo ontta wiiyana maali pinkuuni; nawiisha ote okilotte.”
LUK 18:23 N'oosiila mattakhuzi apale khwiiya woozinkuwa venkivene, mwaasa yoori ye aari thaajiri nwulweene.
LUK 18:24 Yinsa n'oomoona yoori azinkuwa khulupa yoori: “Nanna enlipaazo thaajiri weetta muufwalume wa Nnyizinku!
LUK 18:25 Ti yookhweya enkamiiya ovira valiphotto la sikano zayita thaajiri weettamo muufwalume wa Nnyizinku.”
LUK 18:26 Apale aari onsiilaaye khumuuzela yoori: “Nkhama pi toowo, paani anwahaaye wuusurukha?”
LUK 18:27 Yinsa khujipu yoori: “Etile pinaatamu ahinwahaaye Nnyizinku onwahi.”
LUK 18:28 Aphano Pheeturu khumuuza Yinsa yoori: “Woone! Fweeyo nalikha vitthu zetthu zooshi, khusala nuulotta.”
LUK 18:29 Yinsa khujipu araka: “Miiyo kiniwuuzani khweele yoori, wakhula otule anlikhaaye nyuupa yawe ama muukhaawe, ama attwiize ama apapaze, ama aanaawe mwaasa wa Ofwalume wa Nnyizinku,
LUK 18:30 oto onteela opokhera venkivene vathi attaapha, na omwiisho waya apokhere ohaayi wa mileele.”
LUK 18:31 Yinsa khuwaakhuwelela othetekele anakhiyoni awe apale khumi na awiri khuwooza yoori: “Mwisiileze! Apha nintta Yeruzaleemu, ottuukho zinttelaawo orettikhana zooshi epile zaatikhiweeyo pi manapiyu monkoni wa Mwaana wa Pinaatamu.
LUK 18:32 Ye onttela winkheleliwa mmakhono wa amalapo, antheye, anveyise, antthemele,
LUK 18:33 anjaphe na amuule. Ila siikhu yattaatthu onttela osisimuwa.”
LUK 18:34 Anakhiyoni awe khuhiweeleyi mattakhuzi aya apale maana aari oovitheya, yo khuhijuwi etthu aari olupaaye.
LUK 18:35 Yinsa asaleelaka ofiya Yeriko, mwinyi mmote woohooni eekhaliye nshini wa tarikhi alolaka zimola.
LUK 18:36 N'oosiila shintto za atthu aari oviraaye, ye khuuzela etthu yaari orettikhanaaye.
LUK 18:37 Khuuziwa yoori: “Yinsa wa Nazareeti ti ye anviraaye.”
LUK 18:38 Aphano ye khusala akhuwa araka: “Yinsa, Mwaana wa Daawuuda, koonele huruma!”
LUK 18:39 Atthu apale aari oviraaye khusala ammaruwela yoori anyamale, ila ye khusala atepa okhuwa araka: “Yinsa, Mwaana wa Daawuuda, koonele huruma!”
LUK 18:40 Aphano Yinsa khweemela khuruma yoori atiiseliwe mwinyi otule. N'ootiiseliwa khumuuzela yoori:
LUK 18:41 “Ontakha yoori kuurettele niini?” Ye khujipu yoori: “Mbwana, kintakha kirutele woona.”
LUK 18:42 Attaaphale Yinsa khumuuza yoori: “Ona! Amini yawo yoovonisa.”
LUK 18:43 Nasaapiru ye khurutela woona, khusala anlotta Yinsa ansifwaka Nnyizinku. Wakathi atthu ooniyeevo etile yaarettikhaniyeeyo, khunsifu Nnyizinku.
LUK 19:1 Yinsa khuvira sitati ya Yeriko ettaka olawa.
LUK 19:2 Ottuukho aariwo mwinyi mmote aari wiitthiwaaye Zakewu, nttunkhulu wa anamariphisa lumpuru na aari thaajiri.
LUK 19:3 Ye aari otakha omoona Yinsa, ila khuhisala awahi mwaasa woofupheya channu na atthu aari enkeene.
LUK 19:4 Aphano khutthira khulokoza khulawa khuwela mmutthi yoori awahi omoona, mwaasa yoori Yinsa aari weettela ovira attaaphale.
LUK 19:5 Yinsa n'oofiya puuro etile, khweekesa otulu khumoona khumuuza yoori: “Zakewu, waakuve wiishukhe, leelo kinttela omaka vaje vawo.”
LUK 19:6 Attaaphale, ye khwiishukha wa waakuvavo khumpokherela Yinsa na furaha.
LUK 19:7 Atthu apale akinoko aari woonaaye vitthu epile, khwaaza ottettha araka: “Nka mooneni otu onttela omaka vaje wa natwampi!”
LUK 19:8 Zakewu khulankha khweemela khumuuza Mbwana yoori: “Woone Mbwana! Kintta owenkha asikhini phantte moote ya maali zaka na apale kaari oweeyelaaye, kintta owaarutisela swaafu nne.”
LUK 19:9 Aphano Yinsa khulupa yoori: “Leelo vaje apha yafiyavo nusura maana otu na-ye peewu ya Eburahiima.
LUK 19:10 Mwaasa yoori Mwaana wa Pinaatamu ateela oweekesa apale aashikhiiyeeyo awoosuru.”
LUK 19:11 Yinsa aattameliyeevo Yeruzaleemu, atthu khusala oopuwela yoori Ofwalume wa Nnyizinku waari oteela orettikhana nasaapiru. Aphano Yinsa khulupa nlikaniso opu araka:
LUK 19:12 “Nlume mmote w'oojama wootafikhana, aasaafiriye khulawa nti woolepawo yoori athawaziwe ofwalume nawiisha aruti.
LUK 19:13 Ahinalawe khuwaakhuwela akarumeya awe khumi, wakhula mmote khumwinkha nzurukhu wa feeta khuwooza yoori: ‘Mwirettele zanshara mpakha miiyo oruti.’
LUK 19:14 Ila atthu a mmuti mwawe khwiiya awiiphiiriwa, khunruma waziri onlotta olawa olupa yoori: ‘Khanimweepu wiiya mfwalume etthu.’
LUK 19:15 N'oothawaziwa ofwalume khurutela owawe, khulawa khuwaakhuwela akarumeya awe apale aawenkhiyeeyo nzurukhu wa feeta yoori ajuwe fwayita apattheliyeeyo wakhula ntthu.
LUK 19:16 Khuta otule wamwanzo khulupa yoori: ‘Mbwana, nzurukhu opule mmote mwaakinkhiyeeyo kapatthela fwayita, wafiya khumi.’
LUK 19:17 Mbwanaawe khunjipu yoori: ‘Waretta saana, o karumeya wa waamineya. Mwaasa yoori weeyo waamineya khwa vitthu vattitthiiru, apho onttela wiiya mfwalume wa sitati khumi.’
LUK 19:18 Otule waphiiri khuta khulupa yoori: ‘Mbwana, nzurukhu enu opule mwaakilikheliyeeyo, kapatthela fwayita wafiya mithaanu.’
LUK 19:19 Khumuuza yoori: ‘Kemaani, weeyo onttela wiiya mfwalume wa sitati thaanu.’
LUK 19:20 Otule wa wiishela khuta khulupa yoori: ‘Mbwana, nzurukhu enu opu, miiyo kaatthiiye mmufukho khuthokorela.
LUK 19:21 Miiyo keetta owoovani mwaasa woojuwa yoori mweeyo mwa awoopisa, mwinthuula etthu mwihithokoreleeni na mwinuurula mwihizaleeni.’
LUK 19:22 Mbwana otule khuri: ‘Karumeya wootakhala rooho! Kintta wuuphuka khwa mattakhuzi awo atthaapo! Weeyo waajuwiye yoori ki ntthu wa woopisa, kinthuulavo etile kihithokoreleeni na kinuurula etile kihizaleeni.
LUK 19:23 Khi wahaathuuliye nzurukhu aka ottha mpanko n'ooruti kisikana ottheerelaniye?’
LUK 19:24 Khuwooza apale aari attaaphale yoori: ‘Mwinnyakanye nzurukhu aya opo mwimwinkhe otule ariina khumi.’
LUK 19:25 Yo khujipu yoori: ‘Otu aya mwinlupaaye yoori nimwinkhe onaaye nzurukhu khumi!’
LUK 19:26 Mbwana khulupa yoori: ‘Kiniwuuzani khweele yoori otule ariina ontta weekezeliwa, otule ahina hatha etile ariina ontta onyakanyiwa.
LUK 19:27 Maatuwi aka apale ahaari okitakhelaaye ofwalume, mwiwaatiise apha ooliiwe kiwoonaka.’”
LUK 19:28 Paata ya wiisha olupa mattakhuzi apale, Yinsa khusala avira awelelaka eettaka Yeruzaleemu.
LUK 19:29 Asaleelaka ofiya nti wa Betifwaye na wa Betaaniya kharipu ya mwaako Oluveera, khuwaalokozisa anakhiyoni awe awiri.
LUK 19:30 Khuwooza yoori: “Mwilawe mmuti mphule, mwifiyaka mwinlawa mwansikane mwaana wa puuru afukeleliwe woohaazi opakhiriwa. Mwimfukule mwintiise.
LUK 19:31 Amana apuwa ntthu awuuzelani yoori: ‘Mwinimfukulela-ni?’ Mwinjipu yoori: ‘Mbwaneetthu ti ye anintakhaaye.’”
LUK 19:32 Apale aawaarumiyeeyo khulawa khusikana nkhama etthiipile aalupiyeezo Yinsa.
LUK 19:33 Wakathi aari omfukulaavo mwaana wa puuru otule, ennyewe khuwoozela yoori: “Mweyo! Mwaana wa puuru oto mwinimfukulela-ni?”
LUK 19:34 Yo khujipu yoori: “Mbwaneetthu ti ye anintakhaaye.”
LUK 19:35 Aphano khuntiisela Yinsa, yo khuttattikhavo kuwo zaya vapuuru Ye khupakhiravo.
LUK 19:36 Ataaka Yinsa, atthu khusala attattikha kuwo zaya ntarikhi.
LUK 19:37 Wakathi aattameliyeevo vamwiishukhelo wa mwaako Oluveera, khuntti ya anakhiyoni ooshi khwiiya oofurahi khwaaza onyakula ansifwaka Nnyizinku khwa minjuza epile ooniiyeezo,
LUK 19:38 araka: “Attottopeliwe mfwalume antaaye khwa nzina la Mbwana. Yiiyewo heeri pinkuuni na siifwa otulu.”
LUK 19:39 Mafwarizeewu apale aari vakatthi wa atthu apale khusala amuuza Yinsa yoori: “Mwanliimu, owooze anakhiyoni awo anyamale.”
LUK 19:40 Ye khuwooza yoori: “Atthu apa amana anyamala, mawe pi anttelaaye onyakula.”
LUK 19:41 Wakathi Yinsa afiiyeevo Yeruzaleemu, nawoona sitati etile khulila,
LUK 19:42 araka: “Oo! Yeruzaleemu, eriwaka waari onjuwa otule aniwinkhaaye heeri leelo! Ila apho epo zaya zavitheya khwa weyo.
LUK 19:43 Onlawa wafiye wakathi maatuwi enu anttelaaye wuukukuttelani phantte zooshi ari mmaphotto mwaya.
LUK 19:44 Onttela ophwantteliwa vamote weeyo na aanaawo, khalinlawa osala hatha liwe vatulu wa liwe nzaaya, maana weeyo khumpokhereleeni Nnyizinku wakathi aateeliyeeyo owuusuru.”
LUK 19:45 Yinsa khuvira Nnyupa wa Nnyizinku khusala aweekara apale aari wuuzanyisaamo,
LUK 19:46 awoozaka yoori: “Yaatikhiwa yoori: ‘Nyuupa yaka enttela wiiya nyuupa yoolompiwamo, ila mweeyo mwarettisa wiiya puuro ya malatarawu.’”
LUK 19:47 Wakhula siikhu Yinsa eetta onozela Nnyupa wa Nnyizinku, ila attunkhulu a mahaakhimu a tiini, anamanozela a kano na anamalokozela a atthu aari weekesa shawuri zoomuula,
LUK 19:48 ila khuhisala apattha nanna yooretta, maana atthu ooshi aari omwiitaalela Ye n'onsiileza.
LUK 20:1 Siikhu moote, Yinsa aari owaanozela atthu Nnyupa wa Nnyizinku na awaatafusirelaka hapari zooshapweya. Nttumphule khutamo attunkhulu a mahaakhimu a tiini, anamanozela a kano na anamalokozela a tiini.
LUK 20:2 Yo khusala amuuzela araka: “Vitthu epi onrettana ofwalume-ni, wala ti paani awinkhiyeeyo ofwalume aya opo?”
LUK 20:3 Yinsa khuwaajipu yoori: “Na-miyo kintta owuuzelani etthu moote mwikuuze;
LUK 20:4 woosa wa Yaahaya waari wa pinkuuni ama wa anaatamu?”
LUK 20:5 Yo khusala oozelana atthaaporu araka: “Amana nilupa yoori waari wa pinkuuni, ontta onuuzela yoori: ‘Khi mwaasa aya niini mwihinkhupalelaka?’
LUK 20:6 Na amana nilupa yoori waari wa anaatamu, atthu ooshi antta onivonya na mawe maana ankhupalela yoori Yaahaya napiyu.”
LUK 20:7 Attaaphale yo khujipu yoori: “Khanijuweeni nlupa amwinkhiyeeyo ofwalume.”
LUK 20:8 Aphano Yinsa khuwooza yoori: “Na-miyo akiniwuuzani ofwalume kinrettanaaye vitthu epi.”
LUK 20:9 Yinsa khulupa nlikaniso awoozaka atthu yoori: “Aarivo mwinyi mmote aazaliyeeyo mmashapa mwawe miitthi za wuuva, khuweekesa atthu yoori asala alimela, ye khulawa safwari yawe khwiikhala siikhu za waatta.
LUK 20:10 N'oofiya wakathi wa wuurula khunruma karumeyaawe mmote yoori alawe enkiwe wuuva, ila anamalima apale khumpiya, khumwiikara woohimwinkhi etthu.
LUK 20:11 Mwennyewe nshapa khunruma nkina, na oto theenya yo khunveyisa, khumpiya khumwiikara woohimwinkhi etthu.
LUK 20:12 Aphano khunruma wattaatthu, anamalima apale khumpiya, khunvulalisa na khumwiikara.
LUK 20:13 Paata ya toole, mwennyewe nshapa khusala oopuwela araka: ‘Kirette-ni? Aa! Kintta onruma mwanaka kinimphetachaaye, n'oomoona khweele khweele antta onhishimu.’
LUK 20:14 Anamalima apale wakathi amooniyeevo mwaana wa mwennyewe nshapa ntthile khulupa yoori: ‘Namarithi nshapa ntthi ti otu. Olawa nimuule, liiye leetthu.’
LUK 20:15 Khunsukhumela othetekele wa nshapa khumuula. Mwennyewe nshapa onttela owaarettela niini?
LUK 20:16 Ye ontta ota awoole anamalima apale, nshapa laya ntthile awenkhe atthu akina.” Atthu apale aariivo n'oosiila mattakhuzi apale khulupa yoori: “Zihirettikhane vitthu epo!”
LUK 20:17 Yinsa khuweekesa khuwoozela yoori: “Maana a mattakhuzi apa aatikhiweeyo anlupa-ni? ‘Liwe ntthile eeseliyeeyo anamajeka nyuupa, larettiwa wiiya liwe lootafikhana zayita mawe ooshi.’
LUK 20:18 Otule anttelaaye okwela liwe nttho ontta onyenyeya, na otule lininkwelaaye ontta osakeya eeye lifufu.”
LUK 20:19 Attunkhulu a mahaakhimu a tiini na anamanozela a kano khusala eekesa nanna yonkhola wakathi otthuupule, maana yo aajuwiye yoori nlikaniso opule oniwaalupa yo. Ila khuhisala akholeya mwaasa woowoova atthu apale aari attaaphale.
LUK 20:20 Aphano yo khusala anlupattha, khuwaaruma atthu aari ojinkhelelaaye wiiya anashariya onsaya sirini, yoori ansikanane paathuli ankhole anlawane wa mfwalume.
LUK 20:21 Yo khusala amuuzela yoori: “Mwanliimu, fweeyo najuwa yoori onttakhula na onnozela epile ziiyiyeeyo za shariya, ninjuwa yoori khuninthawula ntthu, onnozela haakhi wa nanna Nnyizinku antakhaazo.
LUK 20:22 Nkanuuze, nkhama ti yooshapweya oripha lumpuru la Seezari ama wala?”
LUK 20:23 Yinsa khujuwa olavilavi aya khuwooza yoori:
LUK 20:24 “Nkakitiiseleni nzurukhu apha. Ratarato eti vanzurukhu apha ti yaani?” Atthu khujipu yoori: “Ti ya Seezari!”
LUK 20:25 Khuwooza yoori: “Mwimwinkhe Seezari etile yiiyiye ya Seezari na mwimwinkhe Nnyizinku etile yiiyiye ya Nnyizinku.”
LUK 20:26 Yo khuhisala ansikanana hatha paathuli vakatthi wa atthu apale; khwiiya ootikinisiwa pi mattakhuzi apale aajipwiweeyo ti Yinsa, yo khunyamala.
LUK 20:27 Masatukhi apale ahaari okhupalaaye osisimuwa wa anamfwa, khulawa akina khumwaattama Yinsa.
LUK 20:28 Khusala alupa yoori: “Mwanliimu, Munsa aatikha yoori, nlume amana afwa, muukhaawe ahinvokoleleeni mwaana, ona yooraliwa ti ttwiiye ampatthele aana eeye a marehemu ttwiiye.
LUK 20:29 Aarivo attwi sapa: otu nwulu aya khuloola khufwa, muukhaawe ahimpattheleeni mwaana.
LUK 20:30 Khuraliwa ti ttwiiye, khufwa ahimpattheeni mwaana,
LUK 20:31 khuraliwa ti ttwiiye wattaatthu, khufwa ahimpattheleeni mwaana, ooshi apale sapa khufwa woohimpattheli mwaana.
LUK 20:32 Omwiisho waya muukha otule khufwa.
LUK 20:33 Siikhu yoosisimuwa onttela wiiya muukha waani maana oosaapa anraliye?”
LUK 20:34 Aphano Yinsa khuwaajipu yoori: “Atthu a voolumwenku apha anloola na anraliwa.
LUK 20:35 Ila atthu apale anttelaaye osuhi olawa pinkuuni noosisimuwa muufwa, khanlawa oloola wala oraliwa;
LUK 20:36 maana khamfwa theenya, anttela wiiya nkhama malayikha na aana a Nnyizinku, mwaasa yoori asisimuleliwa muuhaayi.
LUK 20:37 Hatha napiyu Munsa athoonyeza monkoni woosisimuwa wa anamfwa, wakathi moottho opule waari okholelaaye vamutthi nwishi, ye khunkhuwela Mbwana yoori, Nnyizinku wa Eburahiima wa Esiyaakha na wa Yaakhumpa.
LUK 20:38 Eto enthoonyeza yoori Nnyizinku khahiyo wa anamfwa, Nnyizinku wa atthu awoona. Maana khwa Ye atthu ooshi anaaye ohaayi.”
LUK 20:39 Anamanozela akina a kano apale aari attaaphale khumuuza yoori: “Wajipu saana Mwanliimu!”
LUK 20:40 Khuhiivo hatha ntthu kiina wootakha omuuzela theenya.
LUK 20:41 Elottelanaka Yinsa khuwoozela yoori: “Mwaasa aya niini atthu alupaka yoori Al-Masiihu mwaana wa Daawuuda?
LUK 20:42 Daawuuda alupa nkithaapu ya Zaapuuri yoori: ‘Mbwana Nnyizinku, amuuza Mbwanaaka yoori: “Wiikhale nkhono-nlume aka,
LUK 20:43 mpakha miiyo kitthe moolu awo vatulu wa maatuwi awo.”’
LUK 20:44 Nkhama Daawuuda onimwiittha Al-Masiihu yoori Mbwana, enrettikhana toovi wiiya mwanawe?”
LUK 20:45 Atthu ooshi khusala ansiileza, Yinsa khuwooza anakhiyoni awe yoori:
LUK 20:46 “Phoole na anamanozela a kano, apale woowaatuvela owala ajapi zoolepisana, ochelisiwa vaparasa na woowaatuvela wiikhala puuro za wiilokozi nnyupa woosifwiwamo Nnyizinku na puuro za wiilokozi vanjampo,
LUK 20:47 aniweeyelaaye anamfweliwa pi amanna zaya vitthu zaya, ajinkhaka oretta lompa zoolepa. Apo aya anlawa apokherele hukhumu khuluyeene.”
LUK 21:1 Yinsa khuwoona mathaajiri alazaka zaakha zaya atthaaka n'yopo ya zaakha.
LUK 21:2 Khumoona theenya nunu mmote wa masikhini woofweliwa ti mannawe, alazaka zaakha ttoosu piiri.
LUK 21:3 Yinsa khulupa yoori: “Kiniwuuzani khweele yoori nunu otu wa masikhini woofweliwa ti mannawe, enkha zayita atthu ooshi.
LUK 21:4 Maana apale ooshi na othaajiri aya enkha tathela na khusalana, ila nunu otu na osikhini awe enkha wooshi aari ororomelaaye.”
LUK 21:5 Anakhiyoni awe akina khusala attottopela Nyuupa ya Nnyizinku yaajekaniweeyo mawe ooshapweya na vitthu zaatthiiweemo zoolaziwa nkhama zaakha, Yinsa khuwooza yoori:
LUK 21:6 “Enlawa zafiye siikhu vitthu zaya epo mwinoonaazo zinttelaavo opwecheliwa, maana khalinlawa olikhiwa liwe vatulu wa liwe nzaaya.”
LUK 21:7 Yo khumuuzela yoori: “Mwanliimu, vitthu zaya epo zinteela orettikhana lini? Wala alama-ni enttelaaye onijuwisa yoori zasaleela orettikhana?”
LUK 21:8 Yinsa khuwaajipu yoori: “Phoole! Mwihihatiwe, maana anlawa apuwe atthu a waatta araka, ‘Al-Masiihu ti miyo!’ ama ‘Wakathi wafiya!’ Ila mwihiwaalotte apo aya.
LUK 21:9 Amana mwisiilaka viittha ama nzuuzu mwihoove, maana epo zaya zina yoorettikhana khapula, ila wakathi aya opo khahiyo wiisha w'oolumwenku.”
LUK 21:10 Yinsa khulupa theenya yoori: “Khapila moote enlawa yoomanane na khapila kiina, na ofwalume woomanane ofwalume nzaaya.
LUK 21:11 Phantte za waatta za miti zinlawa zapuwe visikinyaatthi khulu-khulu, jala, marati, vitthu zootikinisa na theenya alama khulu-khulu zoolankha pinkuuni.
LUK 21:12 Khapula zihinarettikhane vitthu zaya epo, mwinlawa mwalupatthiwe, mwilawaniwe mmakhono wa afwalume na mahaakhimu, mwiphukiwe nnyupa woosifwiwamo Nnyizinku, mwifukeliwe mwaasa wookilotta miiyo.
LUK 21:13 Enttela orettikhana yoori wiiye oshaahiti enu.
LUK 21:14 Mwiiye awiitthaaza rooho zenu, mwihishukulikhele etthu mwinttelaaye ojipu mmana ofiya wakathi aya opo.
LUK 21:15 Maana miiyo kinlawa kawinkheni mattakhuzi na ojuwa nanna yoowaajipu maatuwi enu, ahinttelaaye owahi ozukulisa wala okheeti.
LUK 21:16 Mwinlawa mwafukisiwe wa afwalume pi apapazenu, attwiizenu, ajamaazenu na ashirikha enu, akinoko a mweeyo anlawa ooliiwe.
LUK 21:17 Atthu awaatta anttela wiiya awiiphiiriwa ti mweyo mwaasa wa nzina laka.
LUK 21:18 Ila hatha nyuuli yenu moote khinlawa waashikha.
LUK 21:19 Mwiiye woovilela, toowo mwintta wuusurukha.”
LUK 21:20 Yinsa khulupa theenya yoori: “Amana moona sitati ya Yeruzaleemu ezukuleliwe pi anajanka, mwijuwe yoori wafiya wakathi woopwechiwa.
LUK 21:21 Aphano apale anttelaaye wiiya nti wa Yudeya atthirele omwaako, apale anttelaaye wiiya nsitati atthiremo na apale anttelaaye wiiya ntthuttu ahirutele ositati.
LUK 21:22 Maana siikhu zaya epo enttela wiiya siikhu za hukhumu khuluyeene yoori erettikhane zooshi epile zaatikhiweezo nkatthi wa nttakhuzi la Nnyizinku.
LUK 21:23 Atakhaliwa muukha otule anttelaaye osikaniwa ari wa wiimittha ama eettaka waamwisa siikhu zaya epo, maana vatuniya anlawa apuwevo mashakha mawulweene na hukhumu vakatthi wa anaatamu ooshi.
LUK 21:24 Awaatta anttela wuuliiwa na phanka, akinoko athuuliwe nkhama anapherezu eettettisiwaka miti zooshi z'oolumwenku. Yeruzaleemu enlawa yakurumuliwe pi amalapo mpakha yenzi ya amalapo wiisha.”
LUK 21:25 Yinsa khuvira awoozaka theenya yoori: “Zinlawa zeeyevo alama vanjuwa, vamweezi na vamatthottowa. Atthu a voolumwenku anteela wiiyana huzuni na woova nwulweene mwaasa woottitthima na otapanyeya wa pahari.
LUK 21:26 Anlawa azirikhe atthu a waatta mwaasa wa woova vitthu zinttelaaye orettikhana voolumwenku, maana owahi wa pinkuuni onttela osakhinyeya.
LUK 21:27 Aphano phi anttelaavo wooneya Mwaana wa Pinaatamu ataaka enakatthi-nakatthi ya mawiku na owahi na nuuru khuluyeene.
LUK 21:28 Mmana zaazaka vitthu zaya epo, mwilankhe mwiinuwe mweekese otulu, maana wuusurukha wenu ori kharipu na-mweyo.”
LUK 21:29 Elottelanaka Yinsa khulupa nlikaniso mmote araka: “Moone mfikeera na miitthi zooshi.
LUK 21:30 Amana aazaka ophutuwela mathapa aya, mwinoona na mwinjuwa yoori wasaleela ofiya mwiita.
LUK 21:31 Wa nanna etthiipo, amana moona zirettikhanaka vitthu epo, mwijuwe yoori Ofwalume wa Nnyizinku wasaleela ofiya.
LUK 21:32 Miiyo kiniwuuzani khweele yoori atthu apa aleelo khanlawa ofwa ooshi vitthu epi zihirettikhaneeni.
LUK 21:33 Pinku na vathi zooshi zinteela ovira, ila mattakhuzi aka khanviraru.”
LUK 21:34 Yinsa khulupa yoori: “Mwiiye woojeekesela yoori rooho zenu zihipakhire vitthu zoohifwayi, ohapaliwa, ama tafwawuthi za muuhaayi mwenu, yoori siikhu yaya ethiito ehuusikaneleni.
LUK 21:35 Maana siikhu yaya eto enttela owaatela atthu ooshi a voolumwenku nkhama nraakho.
LUK 21:36 Mwiiye woojeekesela na olompa wakhula wakathi, yoori zuuwerawereni vitthu zaya epo zinttelaaye orettikhana na yoori mwapatthe weemela omaasho wa Mwaana wa Pinaatamu amana ata.”
LUK 21:37 Yinsa wakhula siikhu aari onozela vaje wa Nyuupa ya Nnyizinku, mmana oripa aari weettaka vamwaako Oluveera khwiiya ottuukho mpakha ocha.
LUK 21:38 Atthu ooshi supuyeene aari weettaka vaje wa Nyuupa ya Nnyizinku olawa osiila vitthu aari onozelaazo Yinsa.
LUK 22:1 Osaleelaka ofiya wakathi woorettiwa njampo la phaawu yoohiina fwaramento, liniitthiwaaye Paashikowa,
LUK 22:2 attunkhulu a mahaakhimu a tiini na anamanozela a kano aari owaza shawuri zoomuula Yinsa sirini, khuhisala ewaheya mwaasa woowoova atthu.
LUK 22:3 Ila Epiliisi khumweetta Yuuda, aari wiittheliwaaye Shikariyooti, wa khuntti ya apale khumi na awiri.
LUK 22:4 Ye khulawa osiilanana attunkhulu a mahaakhimu a tiini na attunkhulu a anamweekesela a Nyuupa ya Nnyizinku, yoori eekese shawuri yonkholisa Yinsa.
LUK 22:5 Yo khuwaatuvela khumwaahiti Yuuda omwinkha nzurukhu wa feeta.
LUK 22:6 Ye khukhupali khusala eekesa kiphenyo yonkholisa Yinsa, woohiivo hatha ntthu.
LUK 22:7 Khufiya siikhu yoorettiwa njampo la phaawu yoohiina fwaramento, siikhu yaya ethiito yaarina yootwahiwa pwittipwitthi yoojeliwa Paashikowa.
LUK 22:8 Yinsa khunruma Pheeturu na Yaahaya araka: “Mwilawe mwaattalele etthu-yoojiwa ya Paashikowa.”
LUK 22:9 Yo khumuuzela yoori: “Ontakha naattalele vayi?”
LUK 22:10 Ye khuwaajipu yoori: “N'oofiya ositati mwinlawa mwansikane mwinyi apwecheriye yuuku ya maati. Mwinlotte mpakha nyuupa anttaamo.
LUK 22:11 Mwimuuze mwennyewe nyuupa yaya eto yoori: ‘Mwanliimu eetta oniruma owuuzelani yoori puuro anttelaaye ojavo njampo la Paashikowa na anakhiyoni awe pi vayi?’
LUK 22:12 Othuuto ontta wuuthoonyezani nsana nwulweene wa vatulu oriina zaana zooshi, mwaattalele attaapho njampo nttho.”
LUK 22:13 Yo khulawa khusikana epile Yinsa aawooziyeezo, khwaattalela etthu-yoojiwa ya Paashikowa.
LUK 22:14 N'oofiya wakathi Yinsa na maaswihaapa awe khwiikhala vameeza.
LUK 22:15 Khuwooza yoori: “Kaari ohithajiya venkivene onja Paashikowa vamote na-mweyo kihinalawe ohoowa.
LUK 22:16 Kiniwuuzani yoori akinteela oja theenya njampo ntthi mpakha linttelaavo omariseliwa muufwalume wa Nnyizinku.”
LUK 22:17 Athuuliyeevo jiikira khunshukhurwela Nnyizinku, khuwooza yoori: “Mwithuule mwaawanyena.
LUK 22:18 Kiniwuuzani yoori akinrutela onywa nshumo wa nrayi wa wuuva mpakha ontaavo Ofwalume wa Nnyizinku.”
LUK 22:19 Athuuliyeevo phaawu khunshukhurwela Nnyizinku, khumeya khuwenkha khuwooza yoori: “Opu mwiili aka onttelaaye ovahiwa khwa mweeyo, mwisala mwiretta etthiipi mwikifikhiraka miiyo.”
LUK 22:20 Khwa nanna ethiito nawiisha oja khuthuula jiikira khulupa yoori: “Jiikira eti wahati mpheya onrettiwaaye ti taamu yaka, enttelaaye wiittikha khwa mweeyo.
LUK 22:21 Ila mwijuwe yoori, otule anttelaaye okikholisa ori vameeza attaapha vamote na-miyo.
LUK 22:22 Mwaana wa Pinaatamu onttela ofwa khwa nanna etthiipo Nnyizinku asharutheliyeezo. Ila atakhaliwa otule anttelaaye onkholisa.”
LUK 22:23 Yo khusala oozelana atthaaporu yoori anjuwe nlupa aari weettelaaye oretta etthu yaya eto.
LUK 22:24 Aphano maaswihaapa khusala anyakulisana atakhaka onjuwa paani eezeliyeeyo ottunkhulu vakatthi vaya.
LUK 22:25 Yinsa khuwooza yoori: “Afwalume a vathi apha aniiyana oshintta vakatthi wa atthu aya, na apale aneettettisaaye ofwalume oniwaatuvela olupeziwa onamaretta saana.
LUK 22:26 Ila mweeyo mwihiiye toowo, nttunkhulu vakatthi venu eeye ti nttiitthi aya, otule anlokozelaaye eeye ti namarumeyela aya.
LUK 22:27 Nttunkhulu ti paani, ti otule aniikhalaaye vameeza ama otule anrumeyaaye? Khaniiya otule aniikhalaaye vameeza? Ila vakatthi venu mweeyo, miiyo kiri nkhama otule anrumeyaaye.
LUK 22:28 Mweeyo ti ye mwiriiye vamote na-miyo mphule kinzayiniwaamo.
LUK 22:29 Nkhama etthiipo Paapa akinkhiyeeyo ofwalume, na miiyo kiniwinkhani mweeyo,
LUK 22:30 yoori mwije na mwinywe vameeza vaka muufwalume mwaka, na mwiikhale vakhukulu y'oofwalume yoori mwiphuke mahimo khumi na mawiri a Ezirayeele.
LUK 22:31 Simawu, Simawu, Epiliisi avekela yoori awootooteni nkhama empepetthiwaazo tiriku.
LUK 22:32 Ila miiyo koolompela yoori amini yawo ehiwaashikhe. Amana orutela wiiya vamote na-miyo, owaalipisele azaawo.”
LUK 22:33 Simawu khujipu yoori: “Mbwanaaka, miiyo kakhupali wuulotta hatha nkhama nkalapooso, hatha nkhama ofwa.”
LUK 22:34 Ila Yinsa khunjipu araka: “Miiyo kiniwuuza weeyo Pheeturu yoori leelo eti likukhuwi lihineekhe, onkikhana swaafu ttatthu oraka khunkijuwa.”
LUK 22:35 Aphano Yinsa khuwooza araka: “Wakathi opule koorumiyeenini mwihina hatha mfukho wala napampa, ama shapatthu, niini yoosaleeliyeenini?” Yo khujipu yoori: “Hatha etthu khayaanisaleeliye.”
LUK 22:36 Ye khuwooza yoori: “Ila nasaapi eti otule ariina mfukho athuule na napampa awe anthuule. Otule ahina phanka oozanyise ajapi yawe oozanye.
LUK 22:37 Nkhama etthiipo Nttakhuzi la Nnyizinku linlupaazo yoori: ‘Ye onaalakiwa nkhama nanretta zootakhala.’ Miiyo kiniwuuzani khweele yoori sharuthi vitthu epi zirettikhane khwa miiyo, maana etile yaatikhiweeyo monkoni wa miiyo ena yoorettikhana.”
LUK 22:38 Maaswihaapa apale khulupa yoori: “Fweeyo apha Mbwana ninaaye phanka piiri.” Ye khujipu araka: “Weesha mwaasa aya opo!”
LUK 22:39 Khulankha khusala alawa vamwaako wa Oluveera nkhama etthiipo aazowereliyeezo, anakhiyoni awe khunlotta.
LUK 22:40 N'oofiya khuwooza yoori: “Mwilompe yoori mwihikwele muuzayiniwa.”
LUK 22:41 Ye khuwaasusa vattitthiiru khukokhora khusala alompa araka:
LUK 22:42 “Paapa amana otakha, okilaze jiikira eti yoohoowa; ila ehirettikhane otakha waka miiyo, arettikhane matakhelo awo.”
LUK 22:43 [Aphano khumpuwelela nlayikha la pinkuuni khusala linlipisela.
LUK 22:44 Ari mmashakha, khusala alompa woojilipisavo, mattottonka oovujuwela wawe khuretteya wiiya taamu khusala akwela vathi.]
LUK 22:45 N'oolaavo aphale aari olompaavo, khweetta aphale aariivo anakhiyoni awe, khuwaasikana eettaka olala mwaasa woohuzunikha.
LUK 22:46 Khuwoozela araka: “Mwinlala-ni? Mwilankhe mwilompe yoori mwihikwele muuzayiniwa.”
LUK 22:47 Eettaka ottakhula etthiipile, khutavo atthu a waatta alokoziwe ti mmote wa anakhiyoni apale khumi na awiri aari wiitthiwaaye Yuuda. Ye khuta aphale aariivo Yinsa yoori amwinkhe peezhu.
LUK 22:48 Attaaphale Yinsa khuri: “Yuuda, Mwaana wa Pinaatamu oninkholisa na peezhu?”
LUK 22:49 Anakhiyoni awe nawoona vitthu epile khulupa yoori: “Mbwana, niwoomanane na phanka?”
LUK 22:50 Aphano nakhiyoni mmote khunshija nshiilo la nkhono-nlume mwiitthwaana wa haakhimu nwulu wa tiini.
LUK 22:51 Ila Yinsa khuri: “Onlikhe ohinrutele!” Ye khukhola nshiilo la ntthu otule khunvonisa.
LUK 22:52 Aphano Yinsa khuwoozela attunkhulu a mahaakhimu a tiini na attunkhulu a anamweekesela a Nyuupa ya Nnyizinku na anamalokozela a tiini apale aateeliye onkhola araka: “Mwakiteela na phanka na puutta nkhama kiiyiye namalokozela wa anazompere?
LUK 22:53 Wakhula siikhu kaari wiiya vamote na-mweyo vaje wa Nyuupa ya Nnyizinku khuhisala mwikikhola, aphano, opu wakathi enu na otule ariina ofwalume wa n'yiiza.”
LUK 22:54 Aphano Yinsa n'ookholiwa khulawaniwa mpakha vaje wa haakhimu nwulu wa tiini. Pheeturu khusala anlottelela Yinsa woohimwaattami.
LUK 22:55 Yo khukhoza moottho vaje khusala oottha, na-ye Pheeturu khuta attaapho khwiikhala.
LUK 22:56 Njaazi mmote aariivo n'oomoona eekhaliye nshini wa moottho khumweekesa saaneene khuri: “Otu aari vamote na Yinsa.”
LUK 22:57 Pheeturu khukhana araka: “Weyo mwanankha! Miiyo akininjuwa ntthu aya oto.”
LUK 22:58 N'oovira wakathi vattitthiiru, Pheeturu khooniwa ti ntthu nkina khumuuza yoori: “Weeyo o wa khuntti ethiitile.” Ila Pheeturu khukhana araka: “Mwinyi, khahiyo miiyo!”
LUK 22:59 Oviriyeevo wakathi mmote, ntthu nkina theenya khulupachacha yoori: “Khweele-khweele otu aari vamote na-ye, maana otu aya na-ye nkalileya.”
LUK 22:60 Pheeturu khujipu araka: “Mwinyi! Miiyo akinjuwa etthu mwinlupaaye.” Eettaka ottakhula etthiipile, likukhuwi khwiikha.
LUK 22:61 Mbwana khuzukuluwa khumweekesa Pheeturu, ye khufikhiri mattakhuzi apale ooziweeyo ti Mbwana yoori: “Leelo ethiiti likukhuwi lihineekhe, onteela okikhana swaafu ttatthu.”
LUK 22:62 Pheeturu khulaavo aphale vaya khusala alila ari wookafilikha.
LUK 22:63 Atthu apale aari omweekeselaaye Yinsa khusala anveyisa na ompiya,
LUK 22:64 khumfinikha omaasho wawe khusala amuuzela yoori: “Weeyo khahi o napiyu? Onlupe otu oopiyiyeeyo!”
LUK 22:65 Khusala anlupeza mattakhuzi a waatta a mattukhano.
LUK 22:66 N'oocha khukusanyeya attunkhulu a mayaahuuti, attunkhulu a mahaakhimu a tiini na anamanozela a kano, khuthuuliwa Yinsa khulawaniwa nhali anthukumanaamo attunkhulu oophuka milattu.
LUK 22:67 Khusala amuuzela yoori: “Nkahaya, nkanuuze nkhama weeyo o Al-Masiihu.” Ye khujipu araka: “Amana kiwuuzani khamwinkaamini,
LUK 22:68 na amana kiwuuzelani khamwinkijipu.
LUK 22:69 Ila waaza nasaapi ethiiti Mwaana wa Pinaatamu onttela wiikhala nkhono-nlume wa Nnyizinku Woowahi.”
LUK 22:70 Aphano ooshi khumuuzela yoori: “Apho niri weeyo o Mwaana wa Nnyizinku?” Yinsa khujipu araka: “Mweeyo mwalupa yoori ti miiyo.”
LUK 22:71 Yo khulupa yoori: “Nininhithajiya shaahiti theenya? Mwennyewe alupa na nlomo awe.”
LUK 23:1 Khulankha khuntti yooshi khunthuula Yinsa khusala anlawana wa Pilaatu.
LUK 23:2 N'oofiya khusala anlokoveza yoori: “Nansikana otu awaalikhisaka atthu etthu oripha lumpuru la Seezari, khusala ajilupeza yoori ti Al-Masiihu na mfwalume.”
LUK 23:3 Aphano Pilaatu khumuuzela yoori: “Ti weeyo mfwalume wa mayaahuuti?” Yinsa khujipu yoori: “Weeyo walupa.”
LUK 23:4 Pilaatu khuwooza attunkhulu a mahaakhimu a tiini apale na khuntti ya atthu etile yaariivo yoori: “Miiyo akinimoonana hatha paathuli otu.”
LUK 23:5 Atthu apale khusala avira akhanyarelaka olupa yoori: “Otu ontta owaatapanya atthu a Yudeya yooshi eti, aaza Kalileya mpakha ofiya okhuno.”
LUK 23:6 Paata yoosiila mattakhuzi apale, Pilaatu khuuzela yoori: “Otu aya nkalileya?”
LUK 23:7 Pilaatu ajuwiyeevo yoori Yinsa aari wa nti wa mfwalume Herooti, khuruma olawaniwa ottuukho. Wakathi aya opo Herooti na-ye aarettiye ari Yeruzaleemu.
LUK 23:8 Herooti n'oomoona Yinsa, khwiiya woofurahi venkivene maana aaziye raku otakha omoona mwaasa woosiila vitthu aari orettaazo, khusala aweeja woona minjuza arettaka.
LUK 23:9 Aphano khusala amuuzela vitthu za waatta, ila ye khuhisala anjipu hatha etthu.
LUK 23:10 Attunkhulu a mahaakhimu a tiini na anamanozela a kano khusala anlokoveza mattakhuzi mawulu-mawulu.
LUK 23:11 Herooti na anajanka awe khwaaza onveyisa Yinsa na ontarawu, khunwalisa ajapi y'oofwalume khuruma yoori arutiseliwe wa Pilaatu.
LUK 23:12 Herooti na Pilaatu khaari osiilanaka, ila siikhu ethiito khupuwa oshirikha.
LUK 23:13 Aphano Pilaatu khuwaakhuwela attunkhulu a mahaakhimu a tiini, anamaphuka milattu na atthu,
LUK 23:14 khuwooza yoori: “Mwakitiisela otu mwinlupezaka yoori ontta owaatapanya atthu, ila miiyo kamuuzela vakatthi venu mweeyo, akimoonaneeni hatha paathuli khwa vitthu epo mwininlupezaazo.
LUK 23:15 Herooti na-ye khamoonaneeni hatha paathuli, ti eto arumiyeeyo orutiseliwa okhuno. Eto enthoonyeza yoori kharetteeni etthu yoosuhi wuuliiwa.
LUK 23:16 Miiyo kintta oruma opiiwa nawiisha kinleve.”
LUK 23:17 [[N'oofiya siikhu ya njampo la Paashikowa, Pilaatu aarina sharuthi yoowaafukulela atthu napherezu mmote.]]
LUK 23:18 Attaaphale atthu ooshi khusala anyakula araka: “Mwimuule oto! Mwinifukulele Baraba!”
LUK 23:19 Baraba aafukeliwe mwaasa woolaza onazompere nsitati na khumuula ntthu.
LUK 23:20 Aphano Pilaatu khurutela owooza atthu atakhaka onleva Yinsa.
LUK 23:21 Ila atthu khusala anyakula venkivene araka: “Akhomeliwe, akhomeliwe vansalapa!”
LUK 23:22 Pilaatu khuwoozela swaafu yattaatthu: “Niini arettiyeeyo yootakhala? Miiyo akinimoonana hatha paathuli yoosuhi wuuliiwa. Kinruma yoori mwinhukhumu nawiisha kinleve.”
LUK 23:23 Ila yo khusala avira anyakulaka avekaka yoori Yinsa alawe akhomeliwe, akhanyarelaka onyakula.
LUK 23:24 Aphano Pilaatu khukhupalela oretta etile aari otakhaaye atthu apale.
LUK 23:25 Ye khumfukulela Baraba otule aafukeliweeyo mwaasa woolaza onazompere na wuula, khuwenkha Yinsa otule anvekiyeeyo yoori alawe anrettele etile aari ontakhelaaye.
LUK 23:26 Yinsa khuthuuliwa khusala alawaniwa, eettaka olawaniwa etthiipile, khusikaniwa mwinyi mmote wa Sireeni aari wiitthiwaaye Simawu, aari olankhaaye omashapa. Khukholiwa khuthuulisiwa nsalapa opule yoori anlottisele Yinsa.
LUK 23:27 Aari olottiwa pi atthu a waatta na aarivo aakha aari onlilelaaye ankhupanyeraka.
LUK 23:28 Yinsa khuzukuluwa khuweekesa aakha apale aari onlilelaaye khuwooza yoori: “Aakha a Yeruzaleemu, mwihikililele miiyo, ila mwijililele mweeyo na aaneenu.
LUK 23:29 Maana zinteela ofiya siikhu mwinttelaaye olupa yoori: ‘Ashapweyiwa aakha apale oohiina mavokozi, ahinavokole na ahinaamwise.’
LUK 23:30 Siikhu ethiito mwinlawa mwalupe yoori: ‘Nyaako zinikwele kulu zinifinikhe!’
LUK 23:31 Muutthi nwishi onretteliwa toono khi wa wuuma onttela wiiya toovi?”
LUK 23:32 Khuthuuliwa theenya anazompere awiri yoori alawe ooliiwe vamote na Yinsa.
LUK 23:33 N'oofiya puuro eniitthiwaaye Kalavaariyu, Yinsa khukhomeliwa na anazompere apale awiri, mmote nkhono-nlume nkina nkhono-nkha.
LUK 23:34 [Aphano Yinsa khulupa yoori: “Paapa, owaaswaamihi atthu apa maana khanjuwa etthu anrettaaye.”] Elottelanaka yo khwaawanyelana kuwo epile za Yinsa nkatthi wa nasipu.
LUK 23:35 Atthu aari attaaphale aari woona zooshi. Mahaakhimu a Yudeya khusala antarawu Yinsa araka: “Ye awoosuru atthu akina, mwinlikhe ajuusuru mwennyewe nkhama khweele ti Al-Masiihu nanthawuliwa ti Nnyizinku.”
LUK 23:36 Anajanka na-yo khusala antarawu Yinsa antiiselaka viinyu yoonyuunya,
LUK 23:37 n'oomuuza yoori: “Nkhama khweele weeyo o mfwalume wa mayaahuuti, ojuusuru omweenyewe.”
LUK 23:38 Vansalapa attaaphale aakhomeliweevo, khutthiiwavo lipawu laatikhiweeyo yoori: “OTU MFWALUME WA MAYAAHUUTI.”
LUK 23:39 Anazompere apale aakhomeliweeyo vamote na Yinsa, mmote aya khusala anveyisa amuuzaka yoori: “Nkhama weeyo o Al-Masiihu, ojuusuru na onuusurwaka na-fweyo.”
LUK 23:40 Otule nkina khujipu ammaruwelaka nzaawe araka: “Weeyo khunimoova Nnyizinku, ye na-fweyo hukhumu yetthu moote?
LUK 23:41 Fweeyo khweele ninsuhi ohukhumweliwa epile nirettiyeezo, ila ye kharetteeni hatha etthu yootakhala.”
LUK 23:42 Aphano khulupa yoori: “Yinsa, okuupuwele amana ofiya muufwalume mwawo.”
LUK 23:43 Yinsa khujipu yoori: “Miiyo kiniwuuza khweele yoori leelo eti weeyo onttela wiiya vamote na-miyo pephooni.”
LUK 23:44 Esaleelaka ofiya elukuluku njuwa khuzima, khupuwa yiiza olumwenku wooshi mpakha makaaripi.
LUK 23:45 Phazira khuluyeene yaari Nnyupa wa Nnyizinku khuvaruwa vakatthi.
LUK 23:46 Aphano Yinsa khukhuwa na kuvu araka: “Paapa, rooho yaka kininkhelela mmakhono mwawo.” N'oolupa nttakhuzi ntthile, khuttiya phuumu.
LUK 23:47 Nrooma mmote aari nttunkhulu wa anajanka, nawoona vitthu epile zaarettikhaniyeezo, khunsifu Nnyizinku araka: “Khweele-khweele otu aari ntthu aari weettettisaaye shariya.”
LUK 23:48 Ooshi apale aari attaaphale, nawoona vitthu epile zaarettikhaniyeezo, khuruti apiyaka vifuwa zaya athoonyezaka huzuni.
LUK 23:49 Ashirikha awe Yinsa ooshi na aakha apale anlottiyeeyo a Kalileya, aarettiye ari peetiwene eettaka woona vitthu epile.
LUK 23:50 Aarivo mwinyi mmote aari wiitthiwaaye Yuusufu wa sitati ya Arumateeya nti wa Yudeya. Ye aari wooshapweya rooho na wa shariya, na aari weekeselaaye ota wa Ofwalume wa Nnyizinku. Aari wa khuntti ya mashawuriiya, ila ye khaakhupaleliye epile mashawuriiya aawaziyeezo na aarettiyeezo.
LUK 23:52 Ye khulawa wa Pilaatu oveka mwiili wa Yinsa.
LUK 23:53 Khulazavo vansalapa aphale, khuputaputela vajoora khulawa khuzikha nliphotto la mwaako laari ahinazikhiwemo hatha ntthu.
LUK 23:54 Epo zaarettikhaniye juumwa ochelaniwa jumwaa-monsi.
LUK 23:55 Aphano, aakha apale aataniyeeyo Yinsa Kalileya, khunlottelela Yuusufu omwaako okhule eetteliyeewo ozikha mwiili wa Yinsa, olawa woona khapuri na mwiili nanna waazikhiweezo.
LUK 23:56 Nawiisha, khurutela owaya olawa waattalela mafuttha oonukhela yoori alawe avaaze mwiili wa Yinsa. Jumwaa-monsi yo khuvumula nkhama etthiipo enrumaazo kano.
LUK 24:1 Siikhu yamwanzo ya sumana, jumwaa-phiili supuyeene, aakha apale khusala alawa okhapuri okhule aazikhiweewo Yinsa athuuliye mafuttha oonukhela apale aattaliyeeyo.
LUK 24:2 Yo n'oofiya khoona liwe ntthile laafukaniweeyo nlako wa khapuri liri loolaziwavo.
LUK 24:3 N'ooviramo, mwiili wa Mbwana Yinsa khusikana ohimo.
LUK 24:4 Khwiiya oozinkuwa venkivene, attaaphale khuwaapuwelela atthu awiri awaliye kuwo za waara.
LUK 24:5 Aakha apale khuwaapattha woova khukokhora khufiyisa ajihi zaya vathi, atthu apale khusala awoozela yoori: “Mwinimweekesela-ni ntthu wa woona vakatthi wa alupa oofwa?
LUK 24:6 Ye khaamo mphu; asisimuwa, muupuwele mattakhuzi apale aawuuziyeenini ari nti wa Kalileya!
LUK 24:7 Aalupiye yoori: ‘Mwaana wa Pinaatamu ona ya winkheleliwa mmakhono wa anatwampi, akhomeliwe vansalapa, siikhu yattaatthu asisimuwe.’”
LUK 24:8 Aphano aakha apale khuupuwela mattakhuzi apale aalupiyeeyo Yinsa.
LUK 24:9 N'ooruti okhapuri okhule, khuwooza vitthu epile zooshi maaswihaapa apale khumi na mmote na atthu apale akinoko aariivo.
LUK 24:10 Aakha aya aari Mariyamu Mataleena, Yowaana na Mariyamu mamaawe Yaakhumpa na aakha akinoko aalawaniyeeyo ottuukhu. Yo khuwooza maaswihaapa vitthu epile.
LUK 24:11 Ila maaswihaapa khuhisala akhupali mattakhuzi aakha apale, oonaka yoori aari oololo.
LUK 24:12 Aphano Pheeturu khulankha khusala atthira alawaka okhapuri, n'oofiya khuthurumelamo khusikanamo jooraru, khusala aruti ari wootikinisiwa khwa epile zaarettikhaniyeezo.
LUK 24:13 Siikhu ethiitile, anakhiyoni awiri a Yinsa khulankha khusala alawa nti waari wiitthiwaaye Emawu woolepelana Yeruzaleemu kiyasi ya phiima alufu khumi na moote.
LUK 24:14 Yo aari olawa attakhulaka monkoni wa vitthu epile zaarettikhaniyeezo.
LUK 24:15 Eettaka olawa etthiipile apiyaka mwaasa na akheetisanaka, Yinsa mwennyeweene khuwaatthoowela khusala alawa vamote na-yo.
LUK 24:16 Ila yo khumpuwa nkhama oowaariipa omaasho, khuhisala anjuwa yoori Yinsa aya aari othuutule.
LUK 24:17 Ye khuwoozela yoori: “Niini mwinnyakulisanelaaye ntarikhi mphu mweettaka weettetta?” Yo khweemela omaasho waya athoonyezaka ohuzunikha.
LUK 24:18 Mmote wa yo aari wiitthiwaaye Keleyoopa, khumuuzela Yinsa yoori: “Niri weeyo o nletto mmote paasi wa Yeruzaleemu ohinjuwaaye vitthu zirettikhaniyeezo siikhu epi?”
LUK 24:19 Yinsa khuwoozela yoori: “Niini erettikhaniyeeyo?” Yo khunjipu yoori: “Epile zinrettikhaneliyeeyo Yinsa wa Nazareeti. Ye aari napiyu woowahi khwa zooretta zawe na mattakhuzi awe vakatthi wa Nnyizinku mpakha wa atthu ooshi.
LUK 24:20 Ila attunkhulu a mahaakhimu a tiini na afwalume a mmuti mwetthu, khuruma ohukhumweliwa ofwa khulawa khukhomeliwa vansalapa.
LUK 24:21 Fweeyo naari ororomela yoori ti ye aari weettelaaye owoosuru atthu a Ezirayeele, thanku zirettikhane vitthu zaya epo leelo siikhu yattaatthu.
LUK 24:22 Neeya wooshanka mwaasa yoori aakha akina a nkhuntti mwetthu, aalawiye okhapuri leelo lifwajiri
LUK 24:23 khuhisikani mwiili awe, khuta khunuuza yoori ooniye malayikha, atthaapo pi alupiyeeyo yoori Ye asisimuwa ori haayi.
LUK 24:24 Khulawa ashirikha etthu akina okhapuri, khusikana etthiipile aalupiyeezo aakha apale, ila yo khuhimooni.”
LUK 24:25 Aphano Yinsa khuwooza yoori: “Atthu oorupaza weeleyiwa na oolipa waamini zooshi epi alupiyeezo manapiyu!
LUK 24:26 Al-Masiihu khaarina yoohoowa etthiipo, yoori eette nnuuru mwawe?”
LUK 24:27 Khusala aweeleza mattakhuzi ooshi aatikhiweeyo nkithaapu aari onlupaaye Ye, waaza kithaapu ya napiyu Munsa mpakha za manapiyu akinoko.
LUK 24:28 Asaleelaka ofiya nti opule aari weettaaye, Yinsa khusala ompuwa nkhama aari otakhaaye owaavikana.
LUK 24:29 Ila yo khunkhanyarela araka: “Ohivikane wiiye attaapha na-fweyo, njuwa linttela otupweela waripa.” Yinsa khuvira nnyupa khwiiya vamote na-yo.
LUK 24:30 Wakathi eekhaliyeevo vameeza vamote na atthaapale awiri, khuthuula phaawu khuparikhiya, khumeya khuwenkha.
LUK 24:31 Attaaphale, oowiiri maasho aya khufunuwa khunjuwa yoori ti Yinsa, na-Ye khunaanela.
LUK 24:32 Aphano khusala oozelana araka: “Wakathi opule naari ottakhulanaavo ntarikhi aneelezaka mattakhuzi a nkithaapu, rooho zetthu khazeetta onikaphula?”
LUK 24:33 Yo khulankha nasaapiru khusala arutela Yeruzaleemu, khuwaasikana maaswihaapa apale khumi na mmote na anakhiyoni akina a Yinsa akusanyeyiye vahali vamote,
LUK 24:34 alupaka yoori: “Khweele Mbwana asisimuwa, ampuwelela Simawu.”
LUK 24:35 Na-yo apale awiri khusala alupa epile ooniyeezo ntarikhi na nanna anjuwiyeezo Mbwana wakathi ameyiyeevo phaawu.
LUK 24:36 Anakhiyoni apale nalelo eettaka ottakhula etthiipile, Yinsa khuta vakatthi vaya, khulupa yoori: “Heeri yiiye vamote na-mweyo.”
LUK 24:37 Yo khwiiya oosuthuwa na woova amoonaka nkhama nshitapehe.
LUK 24:38 Yinsa khuwoozela yoori: “Mwasuthuwa-ni? Wala mishikili ziriiye nroho mwenu pi za niini?
LUK 24:39 Moone makhono aka na moolu aka yoori ti miyo! Mwikikhole moone, maana nshitapehe khuniiyana nyama wala makhonkolo nkhama etthiipo mweeyo mwinikoonaazo.”
LUK 24:40 Attakhulaka etthiipile, khuwaathoonyeza makhono awe na moolu awe.
LUK 24:41 Mwaasa wa furaha khuluyeene na oshanka, yo khuhisala aamini nalelo, aphano Yinsa khuwoozela yoori: “Mwinaaye etthu-yoojiwa mwikinkhe kije?”
LUK 24:42 Yo khumwinkha phantte ya swi yawoochiwa.
LUK 24:43 Khuthuula khusala arafuna attaapho yo amoonaka.
LUK 24:44 Nawiisha khulupa yoori: “Pi etthiipi kaawuuziyeenini wakathi opule kaari vamote na-mweyo, yoori zaarina yoorettikhana zooshi epile zaatikhiweeyo khwa miiyo nkithaapu ya kano ya napiyu Munsa na kithaapu za manapiyu akina na nzaapuuri.”
LUK 24:45 Aphano Yinsa khuwaapatthisa fwahamu yoori ziweeleye zawaatikhiwa za nkithaapu.
LUK 24:46 Khuwooza araka: “Yaatikhiwa yoori Al-Masiihu aarina yoohoowa na osisimuwa siikhu yattaatthu vakatthi wa anamfwa;
LUK 24:47 na khwa nzina lawe onlawa walaleyiwe othupwiya yoori ziswaamihiwe twampi, waaza Yeruzaleemu mpakha khapila zooshi za voolumwenku.
LUK 24:48 Mweeyo mwa amashaahiti wa vitthu zaya epi.
LUK 24:49 Miiyo kinlawa kooperekhezeni etile Paapa aahitiyeeyo, mweeye Yeruzaleemu ottuukho mpakha mwiitaazaniwe owahi wa pinkuuni.”
LUK 24:50 Aphano Yinsa khuwaathuula anakhiyoni awe khulawana Betaaniya, n'oofiya khulansa makhono awe khuwaaparikhiya.
LUK 24:51 Awaaparikhiyaka etthiipile, khuwaasusa khusala aweziwa alawaka pinkuuni.
LUK 24:52 Yo khumwaaputu, khurutela Yeruzaleemu na furaha khuluyeene.
LUK 24:53 Wakhula siikhu aari othukumana vaje wa Nyuupa ya Nnyizinku ansifwaka Nnyizinku.
JOH 1:1 Omwanzo laari Nttakhuzi. Nttakhuzi laari vamote na Nluku na Nttakhuzi laari Nluku.
JOH 1:2 Ye laari vamote na Nluku omwanzo.
JOH 1:3 Vitthu zooshi zarettiwa khwa ye; eriwaka khaari ye khayiivo moote yaari weettelaaye orettiwa.
JOH 1:4 Ohaayi waari nkatthi mwawe, ohaayi opo yaari nuuru ya anaatamu.
JOH 1:5 Nuuru enaara n'yiiza, na yiiza khuhikhitiri oshintta.
JOH 1:6 Aarivo nlume mmote aaperekhiweeyo ti Nluku aari wiitthiwaaye Yaahaya.
JOH 1:7 Ye ata nkhama shaahiti yoori alawele oshaahiti monkoni wa nuuru, yoori atthu ooshi apatthe osiila hapari na akhupali khwa ye.
JOH 1:8 Ye khaari nuuru, ila ata nkhama shaahiti wa nuuru.
JOH 1:9 Nuuru yeekhweele, eniwaamwasikhelaaye anaatamu ooshi, yata voolumwenku.
JOH 1:10 Nttakhuzi laari voolumwenku na olumwenku wompiwa ti ye, ila olumwenku khuhinjuwi.
JOH 1:11 Awaateliye apale eeyiyeeyo awe, yo khuhimpwekhereli.
JOH 1:12 Ila apale ampwekhereliyeeyo na akhupaliyeeyo nzina lawe, awenkha ruhusa yooretteya aana a Nluku.
JOH 1:13 Atthaapo ahivokoliweeni khwa ephattu, wala khwa matakhelo a onaatamu wala ohiiyi makhaamu a nlume, ila avokoliwa khwa matakhelo a Nluku.
JOH 1:14 Nttakhuzi khujiretta ntthu na khwiikhala na-fweyo. Noona siifwa yawe, siifwa nkhama mwaana mmote paasi wa Paapa wawiitaala rehema na khweele.
JOH 1:15 Yaahaya alaza oshaahiti awe araka: “Otu ti otule kaari onlupaaye, aari otaaye paata ya miiyo na nwulu zayita miiyo, maana ye aarivo miiyo kihineeyevo.”
JOH 1:16 Maana fooshi fweeyo napokherela phantte ya zooshi ariina na rehema khwa rehema.
JOH 1:17 Maana kano zatiisiwa khwa vakatthi wa Munsa; rehema na haakhi yata khwa Yinsa Al-Masiihu.
JOH 1:18 Khina anamoone Nluku, ila Nluku mmote paasi, othuuto ariiye mpavu wa Paapa, ti anithoonyeziyeeyo.
JOH 1:19 Opu oshaahiti wa Yaahaya, wakathi mayaahuuti a Yeruzaleemu awaaperekhiyeevo anamalokozela a tiini na aleevi yoori amuuzele yoori: “Opaani weeyo aya.”
JOH 1:20 Ye khutukhuru na khuhikatthali, khulupa woosileyavo yoori: “Akiiyo Al-Masiihu!”
JOH 1:21 Khumuuzela yoori: “Aphano, weeyo o paani? Ti weeyo Aliyaasi?” Khuri: “Akiiyo!” “Ti weeyo Napiyu aari weettelaaye ota?” Khujipu yoori: “Wala!”
JOH 1:22 Khumuuzela yoori: “Khi o paani? Onijipu yoori nawooze apale anirumiyeeyo. Nanna eti onjilupezaaye omweenyewe?”
JOH 1:23 Yaahaya khujipu na mattakhuzi a napiyu Ezaaya araka: “Miiyo ki huula enkhuwaaye n'yaara eraka: ‘Mookolele tarikhi ya Mbwana.”
JOH 1:24 Apale aarumiweeyo aari akhuntti ya mafwarizeewu,
JOH 1:25 khumuuzela yoori: “Khi oniwooselani atthu ohi Al-Masiihu wala Aliyaasi ama Napiyu?
JOH 1:26 Yaahaya khuwaajipu yoori: “Miiyo kinoosa na maati, ila vakatthi venu mweeyo owaapho ntthu mwihininjuwaaye,
JOH 1:27 antaaye paata ya miiyo na wala akinsuhi ofukula mikhoyi za jampali zawe.”
JOH 1:28 Vitthu epo zarettikhana nti wa Betaaniya phantte ya khipula ya muuttho Yorotaani, ottuukho Yaahaya aari orettaawo njampo la woosa.
JOH 1:29 Mmeesho mwaya Yaahaya khumoona Yinsa eettaka ota khuri: “Mwimoone! Oto antaaye apho, pwittipwitthi ya Nluku anlazaaye twampi voolumwenku!
JOH 1:30 Otu ti otule kaari onlupaaye, wakathi opule kaari oraaye: ‘Onta nyumani waka ntthu akizitiye maana ye aarivo miiyo kihineeyevo.’
JOH 1:31 Miiyo akaari onjuwa paani yaya, kateela omoosa na maati yoori athoonyeziwe Ezirayiilu.”
JOH 1:32 Aphano Yaahaya khulawela oshaahiti alupaka theenya yoori: “Miiyo koona Rooho Ttakatthiifu yiishukhaka pinkuuni nkhama jiwa khummorela ye.
JOH 1:33 Miiyo akaari onjuwa paani yaya, ila otule akirumiyeeyo omoosa na maati, khukuuza yoori: ‘Weeyo onteela woona Rooho Ttakatthiifu yiishukhaka na emmorelaka, ntthu aya oto ti anoosanaaye Rooho Ttakatthiifu.’
JOH 1:34 Miiyo koona vitthu epo, tiito kinlawelaaye oshaahiti yoori ye Mwaana wa Nluku.”
JOH 1:35 Mmeesho mwaya Yaahaya aari attaaphale opheya na anakhiyoni awe awiri.
JOH 1:36 Noomoona Yinsa aviraka, khuri: “Mwimoone! Oto antaaye apho Pwittipwitthi ya Nluku!”
JOH 1:37 Anakhiyoni apale awiri a Yaahaya noosiila mattakhuzi apale khusala anlotta Yinsa.
JOH 1:38 Aphano Yinsa khuzukuluwa khweekesa nyuma, khuwoona anakhiyoni apale awiri eettaka onlotta khuwoozela yoori: “Mweeyo mwineekesani?” Khujipu araka: “Rabi” (liriina maana a mwaaliimu), “wamaka vayi?”
JOH 1:39 Khuwaajipu yoori: “Olawa moonewo.” Khulawa khoonawo ohali Yinsa amakiyeewo na khwiiya vamote na ye siikhu yaya etile yooshi. Epo zaarettikhaniye payina ya saa-khuumi ya njuwa-looveva.
JOH 1:40 Antere, ttwiiye Simawu Pheeturu, aari mmote wa mamwinyi apale awiri ansiliyeeyo Yaahaya attakhulaka monkoni wa Yinsa, tiito anlottiyeeyo.
JOH 1:41 Mwanzo wonsikana aari ttwiiye Simawu, na khumuuza yoori: “Nampattha Al-Masiihu” (enlupaaye yoori Namathawaziwa).
JOH 1:42 Antere khunthuula ttwiiye khunlawana wa Yinsa. Yinsa khumweekesa Simawu khuri: “Weeyo o Simawu, mwaana wa Yaahaya, ila waaza nasaapi nzina lawo eriwaka Seefwa.” (Seefwa enlupa yoori Pheeturu).
JOH 1:43 Mmeesho mwaya Yinsa khulakela olawa Kalileya na khunsikana Filiipe, khumuuza yoori: “Okilotte!”
JOH 1:44 Filiipe aari wa sitati ya Betezayiita ottuukho waari owawe Pheeturu na Antere
JOH 1:45 Filiipe khunsikana Natanayeele khumuuza yoori: “Nampattha otule Munsa aatikhiyeeyo nkithaapu ya kano monkoni wa ye na manapiyu. Ti Yinsa wa Nazareeti, mwaana wa Yuusufu!”
JOH 1:46 Natanayeele khuuzela yoori: “Nazareeti, enlankhawo etthu yooshapweya?” Filiipe khunjipu yoori: “Ote woone!”
JOH 1:47 Yinsa amooniyeevo Natanayeele amwaattamaka khuri: “Oto mwiizirayiilu weekhweele, ntthu woohiina ottettekha va rooho vawe.”
JOH 1:48 Aphano Natanayeele khumuuzela Yinsa yoori: “Mwaari okijuwa vayi?” Yinsa khunjipu yoori: “Filiipe ahinookhuwele miiyo kiwooniye wiikhaliye nshini wa nfikeera opule.
JOH 1:49 Attaaphale Natanayeele khushanka khuri: “Rabi, weeyo o Mwaana wa Nluku. Weeyo O Mfwalume wa Ezirayiilu!”
JOH 1:50 Yinsa khunjipu yoori: “Weeyo wakikhupali mwaasa wa olupa yoori kaawooniye nshini wa nfikeera? Toowo onttela woona vitthu khulukhulu zayita epi.”
JOH 1:51 Khuvira alupaka yoori: “Miiyo kiniwuuzani khweele yoori, mwinoona pinku eri yoofukuwa na malayikha a Nluku awelaka na wiishukha amwiishukhelaka Mwaana wa Pinaatamu.”
JOH 2:1 Siikhu ya ttaatthu, khwiiyawo harusi Kanaani ya Kalileya na mamaawe Yinsa aari ottuukho.
JOH 2:2 Yinsa na anakhiyoni awe khulaleyiwa awe olawa oharusi.
JOH 2:3 Paata ya wiisha viinyu, mamaawe Yinsa khumuuza yoori: “Yaweeshela viinyu.”
JOH 2:4 Ila Yinsa khujipu araka: “Muukha, enihithajiya okuuza? Nalelo khunafiye wakathi aka.”
JOH 2:5 Aphano mamaawe khuwooza anamarumeyela yoori: “Mwirette zooshi epile anttelaaye owuuzani.”
JOH 2:6 Attaaphale, zaarivo zuuku sitha mayaahuuti aari orumeyelakaaye wakathi wa otwahareshiwa zaari za maliituru thamaaniini kiina zaari za maliituru miiya na eshiriini.
JOH 2:7 Yinsa khulupa yoori: “Mwiitaaze maati wakhula yuuku,” yo khwiitaaza mpakha omilomo waya.
JOH 2:8 Aphano Yinsa khuwooza yoori: “Mwittekhe vattitthiiru mwimweettisele mahutumu wa njampo.” Yo khuretta etthiipile.
JOH 2:9 Attaaphale mahutumu wa njampo khoota maati apale aarettiweeyo viinyu woohijuwi ohali yaalankhiyeewo, aari ojuwaaye anamarumeyela apale attekhiyeeyo maati aya. Aphano mahutumu khumuuza mposi,
JOH 2:10 araka: “Atthu ooshi azowerela owenkha atthu viinyu ya mwanzo anamalaleyiwa, amana anywa ewaatosha phi mwiniwenkhaavo viinyu yoohafwiifweya, ila weeyo nalelo wapweha viinyu yooshapweya mpakha apha.”
JOH 2:11 Alama ya eto ya minjuza, yaari ya mwanzo Yinsa oretta nti wa Kanaani ya Kalileya. Siifwa yawe yaathonyezeyiye attaapho, na anakhiyoni awe khunkhupali.
JOH 2:12 Paata ya vitthu epile khusala alawa Kafwaranaawu na mamaawe, attwiize na anakhiyoni awe. Khwiiya ottuukhule siikhu vattitthiiru.
JOH 2:13 Osaleelaka ofiya wakathi wa njampo la Paashikowa wa mayaahuuti, Yinsa khuwelela Yeruzaleemu.
JOH 2:14 Khuwaasikana Nnyupa Woosifwiwamo Nluku atthu aari wuuzanyisaaye mompe, pwittipwitthi, jiwa, na atthu aari opatilisaaye nzurukhu.
JOH 2:15 Aphano khweesa puutta ya nkhoyi, khuweekaramo atthu ooshi Nnyupa Woosifwiwamo Nluku, vamote na pwittipwitthi mpakha mompe zaya. Khumwazela vathi nzurukhu wa apale aari opatilisaaye na khuphinttula meeza aya.
JOH 2:16 Na khuwooza apale aari wuuzanyisaaye jiwa yoori: “Mwilazemo vitthu zooshi! Mwilikhe oretta pazari nyuupa ya Paapa.”
JOH 2:17 Aphano anakhiyoni awe khuupuwela zawaatikhiwa ttakatthiifu enraaye: “Ojilipisana waka khwa nyuupa yawo, Oo Nluku, enlukuzela nkatthi mwaka nkhama moottho.”
JOH 2:18 Attaaphale anamalokozela amayaahuuti khumuuzela yoori:” Alama-ni ya minjuza ontakhaaye onithoonyeza” yoori weeyo onaaye owahi wooretta vitthu zooshi epo?”
JOH 2:19 Yinsa khujipu yoori: “Mwipweche nyuupa eti ya Nluku, miiyo kintta ojeka opheya khwa siikhu ttatthu!”
JOH 2:20 Yo khulupa yoori: “Ojekiwa wa nyuupa eti yaathuuliye nyaakha arupayiini na sitha, weeyo onlupa yoori onttela ojeka opheya khwa siikhu ttatthu?”
JOH 2:21 Ila Yinsa nyuupa aari olupaaye waari mwiili awe.
JOH 2:22 Wakathi Yinsa asisimuwiyeevo nkhapuri, anakhiyoni awe khuupuwela epile aalupiyeeyo, aphano khukhupalela zawaatikhiwa ttakatthiifu na mattakhuzi awe.
JOH 2:23 Wakathi Yinsa aari Yeruzaleemu, onjampo la Paashikowa, atthu awaatta khunkhupali nzina lawe mwaasa wa woona alama za minjuza epile aari orettaazo.
JOH 2:24 Ila Yinsa khaari owaamini maana aari owaajuwa ooshi.
JOH 2:25 Khaari ontakha ntthu woomwinkha oshaahiti monkoni wa pinaatamu, maana ye aari ojuwa niini ephattu ya onaatamu.
JOH 3:1 Aarivo mfwarizeewu mmote aari wiitthiwaaye Nikoteemu, nttunkhulu wa mayaahuuti.
JOH 3:2 Ye khulawa okutthanana Yinsa osikhu na khumuuza yoori: “Rabi, ninjuwa yoori onsomisa khwa phantte ya Nluku, maana khina anwahaaye oretta alama za minjuza nkhama epo, aheetteeni Nluku wiiya vamote na-ye.”
JOH 3:3 Yinsa khujipu yoori: “Miiyo kiniwuuzani khweele yoori, khina antakhaaye woona ofwalume wa Nluku aheetteeni ovokoliwa opheya.”
JOH 3:4 Nikoteemu khumuuzela yoori: “Nanna-ni ntthu anvokoliwaaye opheya ooluvaliye? Kinretteya ntthu weetta mwiirukulu wa mamaawe swaafu yaphiiri khuvokoliwa opheya!”
JOH 3:5 Yinsa khujipu yoori: “Miiyo kiniwuuzani khweele yoori, aheetteeni ovokoliwa na maati na Rooho khina anwahaaye weetta muufwalume wa Nluku.
JOH 3:6 Maana otule anvokoliwaaye khwa mwiili, mwiili, na otule anvokoliwaaye khwa Rooho, rooho.
JOH 3:7 Ohiiye wootikinisiwa mwaasa wa miiyo olupa yoori: ‘Enihithajiya mweeyo ovokoliwa opheya.’
JOH 3:8 Pheevo envitelela aphale entakhaavo, ensiileya evumaka, ila khinjuweya ohali enlankhawo wala eneettaawo. Enrettikhana etthiipo khwa apale ooshi oovokoliwa khwa Rooho.”
JOH 3:9 Nikoteemu khuuzela theenya yoori: “Epo enttela orettikhana toovi?”
JOH 3:10 Yinsa khujipu araka: “Weeyo o mwaaliimu wa nti wa Ezirayiilu khiniweeleya vitthu epo?
JOH 3:11 Miiyo kiniwuuzani khweele yoori, fweeyo ninlupa etile ninjuwaaye na ninlawela oshaahiti wa etile nooniyeeyo; ila mweeyo khamwinkhupalela oshaahiti etthu.
JOH 3:12 Miiyo kawuuzani vitthu za vathi khamwinkhupaleeni khi mwinttela okhupalela toovi amana kiwuuzakani vitthu za pinkuuni?
JOH 3:13 Maana khina anawele pinkuuni woohiiyi otule alankhiyeeyo pinkuuni: Mwaana wa Pinaatamu.
JOH 3:14 Nkhama etthiipo Munsa alansiyeeyo nyookha n'yaara, etthiipo theenya enihithajiya Mwaana wa Pinaatamu wiiya woolansiwa,
JOH 3:15 yoori wakhula otule aninkhupalaaye eeyane ohaayi wa mileele.
JOH 3:16 Khwa nanna etthiipo Nluku apheta olumwenku afiyelela onleva Mwanawe mmote paasi, yoori wakhula otule aninkhupalaaye ahipwetheye ila eeyane ohaayi wa mileele.
JOH 3:17 Nluku amperekha Mwanawe voolumwenku, khahiyo yoori ahukhumu olumwenku, ila yoori olumwenku wuusurukhe khwa ye.
JOH 3:18 Wakhula otule aninkhupalaaye khamphukiwa, ila otule ahininkhupalaaye aphukiwa, mwaasa wa ohikhupali nzina la Mwaana mmote paasi wa Nluku.
JOH 3:19 Ophukiwa waya pi opu; nuuru yata voolumwenku, ila atthu khupheta yiiza, khwiiphiiriwa ti nuuru, mwaasa wa menttezi aya aari ootakhala.
JOH 3:20 Otule anrettaye zootakhala oniiphiiriwa ti nuuru na wala kheepu waattamela nuuru ontakha yoori khaazi zawe zihooneye.
JOH 3:21 Ila otule aneettettisaaye haakhi onta nnuuru, yoori zooneye saaneene, yoori khaazi zawe enkholiwa khwa Nluku.”
JOH 3:22 Paata ya vitthu epile Yinsa na nakhiyoni awe khweetta nti wa Yudeya, ottuukho eeshiyeewo wakathi vattitthiiru nooretta njampo la woosa.
JOH 3:23 Yaahaya naye aari owoosa atthu nti wa Enoomi, kharipu ya Saliimi maana aariwo maati awaatta na atthu aari ota oteela woosiwa.
JOH 3:24 (Vitthu epo zarettikhana Yaahaya ahinatthiwe nkalapooso).
JOH 3:25 Khupuwa onyakulisana khwa anakhiyoni akinaaya a Yaahaya na yaahuuti mmote monkoni wa njampo la otwahareshiwa.
JOH 3:26 Yo khulawa wa Yaahaya na khumuuza yoori: “Rabi, mwinyi otule waariina kaapu ya muuttho Yorotaani wanlaweliyeeyo oshaahiti, ontta woosa na atthu ooshi antta olawa ottuukho ariiwo.”
JOH 3:27 Yaahaya khujipu yoori: “Khina ampwekheraaye etthu aheetteeni winkhiwa pinkuuni.
JOH 3:28 Mweeyo mwa mashaahiti wa etile kilupiyeeyo yoori: “Miiyo akiiyo Al-Masiihu, ila ki otule aperekhiweeyo wiilokozi wawe.”
JOH 3:29 Namaposiwa ti wa namaposa. Swaahipu aninrumeyelaaye namaposa oninjali na onsiileza oniiya woofurahi amana asiila huula ya namaposa. Eto furaha yaka yookamilikha.
JOH 3:30 Enihithajiya yoori ye awule na miiyo kijipushuwise.
JOH 3:31 Otule anlakhaaye otulu weekhweele ori vatulu wa vitthu zooshi. Otule ari wa vathi ti wa vathi na onttakhula vitthu za vathi; ila otule alankhiyeeyo pinkuuni ori vatulu wa vitthu zooshi.
JOH 3:32 Ye ahakikhi epile oniyeezo na asiiliyeezo ila khina ankhupalelaaye oshaahiti awe.
JOH 3:33 Otule ankhupalelaaye oshaahiti awe onhakikhi yoori Nluku haakhi.
JOH 3:34 Otule Nluku amperekhiyeeyo onttakhula mattakhuzi a Nluku, maana ye oninkha Rooho Ttakatthiifu woohiphimi.
JOH 3:35 Paapa onimpheta Mwanawe na zooshi attha mmakhono mwawe.
JOH 3:36 Otule aninkhupalaaye Mwaana onaaye ohaayi wa mileele, ila otule aninkatthalaaye Mwaana khanlawa woona ohaayi na theenya katapu ya Nluku empharelela khwa ye.”
JOH 4:1 Wakathi Yinsa asiiliyeevo yoori mafwarizeewu asiila yoori Yinsa ontta owaaretta anakhiyoni na owoosa zayita Yaahaya,
JOH 4:2 (eettiye ohiiyiru Yinsa aari woosaaye ila anakhiyoni awe),
JOH 4:3 Yinsa khulaawo Yudeya khurutela Kalileya.
JOH 4:4 Ila yaari ohithajiya ye ovira nti wa Samariiya.
JOH 4:5 Ye khufiya sitati moote ya Samariiya yaari wiitthiwaaye Sikaari yaattamananiyeeyo nshapa la Yaakhumpa amwinkhiyeeyo mwanawe Yuusufu.
JOH 4:6 Ottuukhule waariwo nlipu wa Yaakhumpa. Yinsa ari wooshokhera nkatthi wa safwari, khulawa khwiikhala nshini wa nlipu. Zarettikhaniye payina ya atuhuri.
JOH 4:7 Wakathi otthuupule khuta muukha wa Samariiya ottekha maati. Yinsa khumuuza yoori: “Kimeele maati vattitthiiru kinywe.”
JOH 4:8 (Zarettikhaniye wakathi anakhiyoni awe eettiyeevo ositati wuuzanya etthu-yoojiwa.)
JOH 4:9 Muukha otule wa Samariiya khumuuzela Yinsa yoori: “Weeyo oyaahuuti onikivekela maati miiyo, muukha wa Samariiya?” (Maana mayaahuuti na asamariiya khansiilana saana.)
JOH 4:10 Yinsa khunjipu yoori: “Weeyo eriwaka waari ojuwa tthuvo ya Nluku na paani anuuvekelaaye maati, weeyo weetta onvekela na-ye eetta owinkha maati ohaayi.”
JOH 4:11 Muukha otule khuri: “Mbwana khuna etthu yoottekhana maati maana nlipu opu wiicha. Onttela opattha vayi maati aya apo ohaayi?
JOH 4:12 Talili weeyo onwulweene zayita papeetthu Yaakhumpa? Ye aninkha nlipu otthuupo aari onywakaavo na aana awe na mompe zawe.”
JOH 4:13 Yinsa khumuuza yoori: “Otule annywaaye maati apa onlawa eeyane nnyottha theenya,
JOH 4:14 ila otule anttelaaye onywa maati kinttelaaye omwinkha khanlawa wiiyana nnyottha theenya. Olikha toowo, maati kinttelaaye owinkha anttela oretteya naattuuttu wa wiittikha maati a ohaayi wa mileele.”
JOH 4:15 Muukha otule khumuuza yoori: “Mbwana, kimeele maati aya apo yoori kihirutele wiiyana theenya nnyottha, wala kihirutele vanlipu apha ottekha maati theenya.”
JOH 4:16 Yinsa khumuuza yoori: “Olawe owawo, wankhuwele mannawo ote.”
JOH 4:17 Muukha otule khujipu araka: “Akina manna.” Yinsa khuri: “Weeyo wajipu saana olupa yoori khuna manna.
JOH 4:18 Maana waarina amanna athaanu, ila aphano otu oriina nasaapi khahiyo mannawo. Eto olupiyeeyo nasaapi khweele.”
JOH 4:19 Muukha otule khuri: “Mbwana, kiniwoona yoori o napiyu.
JOH 4:20 Amarehemu apapazetthu aari waaputwaka vamwaako apha, ila mweeyo mayaahuuti mwinri Yeruzaleemu ti yiiyiye puuro ya waaputwiwawo.”
JOH 4:21 Yinsa khumuuza yoori: “Okhupali epi kiniwuuzaaye muukha, maana ontta waattamela wakathi mweeyo mwihinttelaaye omwaaputu Paapa vamwaako apha wala Yeruzaleemu.
JOH 4:22 Mweeyo asamariiya mwinaaputu etthu mwihinjuwaaye, ila fweeyo ninaaputu etile ninjuwaaye maana nusura enta khwa mayaahuuti.
JOH 4:23 Khwa attaapho ontta ofiya wakathi na khweele wafiya, anamwaaputu eekhweele anttela omwaaputu Paapa khwa rooho na khweele. Anamwaaputu Paapa aniweekesaaye pi atthaapo.
JOH 4:24 Nluku rooho ti eto eniwaahithajiyaaye apale animwaaputwaaye ana ya omwaaputu khwa rooho na khweele.”
JOH 4:25 Muukha otule khuri: “Miiyo kajuwa yoori o Al-Masiihu (aniitthiwaaye Namathawaziwa) onsaleela ota. Amana ata onteela onuuza zooshi.”
JOH 4:26 Aphano Yinsa khumuuza yoori: “Ti miiyo! Othuuto onttakhulanaaye.”
JOH 4:27 Wakathi otthuupule anakhiyoni awe khuruti khwiiya ooshanka mwaasa wa onsikana apiyaka mwaasa na muukha. Ila khuhiivo hatha mmote aamuzeliyeeyo yoori: “Oneekesa-ni?” Ama “Ottakhulanaka ye mwaasa aya niini?”
JOH 4:28 Aphano muukha otule khulikha yuuku yawe khurutela ositati khuwooza atthu yoori:
JOH 4:29 “Mwite mwimoone mwinyi akuuziyeeyo zooshi kinrettaazo. Talili khahiyo Al-Masiihu?”
JOH 4:30 Aphano khulankha atthu nsitati khulawa okhule aariiwo Yinsa.
JOH 4:31 Wakathi wa vitthu epile anakhiyoni awe aari onkhanyarela yoori: “Rabi, mwije etthu-yoojiwa.”
JOH 4:32 Ila ye khuwooza yoori: “Kinaaye etthu-yoojiwa mwihinjuwaaye.”
JOH 4:33 Aphano anakhiyoni awe khusala oozelana araka: “Talili ena ntthu antiseliyeeyo etthu-yoojiwa?”
JOH 4:34 Yinsa khuri: “Etthu yoojiwa yaka oretta matakhelo a otule akiperekhiyeeyo na okhola khaazi zawe.
JOH 4:35 Mweeyo khamwinlupaka yoori: ‘Nkatthi wa nyeezi mine ninuurula?’ Miiyo kiniwuuzani yoori: Mwifunule maasho enu na moone mmashapa! Vitthu zakhomaala entakha wuuruliwa.
JOH 4:36 Otule anuurulaaye ompwekhera phakari yawe na onuurula mishumo za ohaayi wa mileele, khwa nanna namuurula anttelaaye ofurahi vamote na anamazala.
JOH 4:37 Maana khweele etile elupiweeyo yoori: ‘Mmote onzala nkina khuurula.’
JOH 4:38 Miiyo koorumani yoori moorule epile mwihizaleeni. Akina akhola khaazi, mweeyo khuta opuhela khaazi yaya.”
JOH 4:39 Asamariiya awaatta a sitati etile khunkhupali Yinsa mwaasa wa oshaahiti aalupiyeeyo muukha otule araka: “Ye akuuza zooshi epile kaarettiyeeyo.”
JOH 4:40 Attaaphale paata ya Asamariiya ofiya aphale aariivo Yinsa, khunvekela yoori eeye vamote na-yo. Yinsa khwiiya vamote na-yo siikhu piiri.
JOH 4:41 Mwaasa wa mattakhuzi awe atthu awaatta khunkhupali.
JOH 4:42 Na khumuuza muukha otule yoori: “Aphano nakhupali, khahiyo mwaasa wa mattakhuzi apale olupiyeeyo, maana fweeyo nansiila na najuwa yoori khweele Namuusuru wa olumwenku.”
JOH 4:43 Ziviriyeevo siikhu piiri, khulaawo okhule waya khusala eetta Kalileya.
JOH 4:44 Maana Yinsa Mweenyeweene alupa yoori napiyu khanshitahiwa saana mmuti mwawe.
JOH 4:45 Afiiyeevo Kalileya, akalileya khumpwekherela saana yo ooniye zooshi aarettiyeezo Yeruzaleemu, vanjampo la Paashikowa, maana yo aari ottuukho.
JOH 4:46 Khurutela theenya othotola Kanaani ya Kalileya, ottuukho athatushiyeewo maati khwiiya viinyu. Aariwo waziri mmote aariina mwanawe aari olwaaziwaaye Kafwaranaawu.
JOH 4:47 Wakathi asiiliyeevo elupiwaka yoori Yinsa ori Yudeya onlankha Kalileya, khusala amweekesa nonsikana khunvekela yoori anvonise mwanawe, aari osaleelaaye ofwa.
JOH 4:48 Yinsa khuri: “Mweeyo mwinkhupali paasi amana moona alama za minjuza miwulu-miwulu.”
JOH 4:49 Waziri otule khuri: “Mbwana, waakuve okilotte mwanaka ahinafwe.”
JOH 4:50 Yinsa khujipu yoori: “Olawe, mwanawo ontta wiiya haayi.” Mwinyi otule khukhupalela mattakhuzi apale a Yinsa khulawa owawe.
JOH 4:51 Nalelo mwinyi otule ari ntarikhi, akarumeya awe khusala anthepeeza oteela omuuza yoori mwanawo ori haayi.
JOH 4:52 Paata awoozeliyeevo yoori wakathi-ni mwaana otule apatthiyeevo ashikhaali, yo khujipu yoori: “Hooma yanlikha taana payina ya saa-sapa ya makaaripi.”
JOH 4:53 Aphano papaawe mwaana khufwahamu yoori wakathi ooziweeyo ti Yinsa waari otthuupule yoori: “Mwanawo ontta wiiya haayi.” Attaaphale khunkhupali Yinsa ye na vaje vawe wooshivo.
JOH 4:54 Eto yaari alama yaphiiri ya minjuza Yinsa aarettiyeeyo, paata ya olankha Yudeya eettaka Kalileya.
JOH 5:1 Ziviriyeevo vitthu epile, Yinsa khulawa Yeruzaleemu mwaasa wa njampo la mayaahuuti.
JOH 5:2 Ewaakho Yeruzaleemu, kharipu ya Vanlako wa Pwittipwitthi, kulaathayini khwa luuka ya meepereewu eniitthiwa Betezita, eriina mapantta mathaanu oovikhiwa.
JOH 5:3 Attaapho aari orapalelakaavo anamarati enkeene; anamarakala, anahooni na anasupiyaani awejaka nziko wa maati,
JOH 5:4 maana nlayikha la Mbwana laari wiishukhaka swaafu kiina na wunttula maati apale. Otule aari wiiyaaye wa mwanzo weetta nkulaathayini noovona marati awe.
JOH 5:5 Attaaphale aarivo mwinyi aariina nyaakha talaathiini na minaane arina supiyaani.
JOH 5:6 Yinsa khumoona mwinyi otule ari woorapalela ajuwiyeevo yoori aaza raku olwaaziwa, khumuuzela yoori: “Weeyo ontakha ovonisiwa?”
JOH 5:7 Nlwele otule khujipu yoori: “Mbwana aka, akina hatha ntthu wookaawuni okittha nkulaathayini amana maati onttuliwa. Kitakhaka weettamo, akina antta weettamo miiyo kihineettemo.”
JOH 5:8 Aphano Yinsa khumuuza yoori: “Olankhe, othuule nrepa lawo weettette!”
JOH 5:9 Nasaapiru mwinyi otule khwiiya woovona, khuthuula nrepa lawe khwaaza weettetta. Siikhu yaya etile yaari saapatu.
JOH 5:10 Mwaasa wa ethiito mayaahuuti khumuuza otule aavonisiweeyo yoori: “Leelo saapatu, enikhattaziwa weeyo othuula nrepa lawo.”
JOH 5:11 Ye khuwaajipu yoori: “Ntthu akivonisiyeeyo ti akuuziyeeyo yoori: ‘Othuule nrepa lawo na weettette.”
JOH 5:12 Khumuuzela theenya yoori: “Paani mwinyi aya oto awuuziyeeyo: ‘Othuula nrepa lawo na weettetta?”
JOH 5:13 Mwinyi otule aavonisiweeyo khaari onjuwa paani otule aya, maana Yinsa khaari wooneya mwaasa wa wawaattiwavo.
JOH 5:14 Paata ya vitthu epile, Yinsa khukutthanana Nnyupa Woosifwiwamo khumuuza yoori: “Woone, weeyo wavonisiwa! Ohirutele ntwampi yoori ehuurettikhanele etthu yooziti.”
JOH 5:15 Mwinyi otule khulawa khuwooza mayaahuuti yoori aari Yinsa anvonisiyeeyo.
JOH 5:16 Aphano mayaahuuti khwaaza onlupattha Yinsa, maana ye eetta ovonisa saapatu.
JOH 5:17 Ila Yinsa khuwooza yoori: “Paapa ontta okhola khaazi mpakha leelo, na-miyo kintta okhola.”
JOH 5:18 Mwaasa wa ethiito mayaahuuti khusala atakha omuula, woohiiyi paasi mwaasa wa ohishututeli kano monkoni wa saapatu, ila theenya eetta olupa yoori Nluku ti Paapa na ajilikanisanaka Nluku.
JOH 5:19 Aphano Yinsa khuwooza yoori: “Miiyo kiniwuuzani khweele yoori, Mwaana khanretta etthu yawe, ila onretta etile animoonaaye Paapa arettaka. Maana zooshi epile anrettaaye Paapa, Mwaana onretta etthiipo.
JOH 5:20 Maana Paapa onimpheta Mwaana na oninthonyeza zooshi anrettaazo, onteela onthoonyeza khaazi kiina zooziti epi yoori mweeyo mwishanke.
JOH 5:21 Maana etthiipo Paapa aniwaasisimulaaye ananfwa na khuwinkha ohaayi, Mwaana naye oniwinkha ohaayi apale ye aniwatakhaaye.
JOH 5:22 Paapa khanimphuka hatha ntthu, ila Paapa amwinkha Mwanawe ophuka wooshi,
JOH 5:23 yoori ooshi anshitahi Mwaana nkhama aninshitahaazo Paapa. Otule ahininshitahaaye Mwaana khaninshitahi Paapa otule anrumiyeeyo.
JOH 5:24 Miiyo kiniwuuzani khweele yoori, otule ansiilaaye nttakhuzi laka na aninkhupalaaye otule akiperekhiyeeyo onaaye ohaayi wa mileele, wala khamphukiwa, ila avirela ofwa yoori eeyane ohaayi.
JOH 5:25 Miiyo kiniwuuzani khweele yoori ontta ofiya wakathi, na wafiya, ananfwa anttelaaye osiila huula ya Mwaana wa Nluku na otule anttelaaye osiila oniiya haayi.
JOH 5:26 Nkhama etthiipo Paapa eeyiyeeyo mweenyewe ohaayi, amwinkha mwanawe wiiya mweenyewe ohaayi,
JOH 5:27 na amwinkha ofwalume yoori aphuke, maana ye Mwaana wa Pinaatamu.
JOH 5:28 Mwihiiye wooshankela epo zaya, maana ontta ofiya wakathi wa ooshi apale ari nkhapuri anttelaaye osiila huula yawe
JOH 5:29 anlawa asisimuwe nkhapuri. Apale aari orettaaye zooshapweya anttela osisimuwa eeye haayi, apale aari orettaaye zootakhala anttela osisimuwa eeye ophukiwa.
JOH 5:30 Otthome akinwahi oretta hatha etthu. Miiyo kimphuka khwa nanna Paapa akuuziyeeyo, na ophuka waka pi wa shariya maana akineekesa ojituvelisa, ila matakhelo a otule akiperekhiyeeyo.
JOH 5:31 Nkhama kinjilawela oshaahiti kimweenyewe, oshaahiti aka khahi wa khweele.
JOH 5:32 Ila owaapho nkina anlawelaaye oshaahiti monkoni wa miiyo na miiyo kinjuwa yoori oshaahiti aya opo alupiyeeyo monkoni wa miiyo haakhi.
JOH 5:33 Mwawaarumiye atthu olawa omuuzela Yaahaya, yo khulaza oshaahiti wa khweele.
JOH 5:34 Miiyo akininhithajiya hatha ntthu okilawela oshaahiti, ila kinlupa vitthu epo yoori mweeyo mwiiye wa wuusurukha.
JOH 5:35 Yaahaya aari nkhama likhompe laari okholelaaye nuuru yaya nawuumwasikhelani, mweeyo khukhupalela khwa wakathi vattitthiiru ofurahela nuuru yaya eto.
JOH 5:36 Ila miiyo kinaaye oshaahiti nwulweene zayita Yaahaya, mwaasa wa khaazi akinkhiyeeyo Paapa yoori kikhole. Ethiito oshaahiti yoori Paapa ti akirumiyeeyo.
JOH 5:37 Paapa otu akiperekhiyeeyo, onlaza oshaahiti monkoni wa miiyo. Mweeyo khamwina siile huula yawe, wala khamwina moone nanna ariiyo,
JOH 5:38 theenya khamwina nttakhuzi lawe nroho, maana khamwinkhupaleeni otule amperekhiyeeyo.
JOH 5:39 Mwasoma zawaatikhiwa ttakatthiifu, maana mwinoona yoori khwa yo mwinaaye ohaayi wa mileele, ila pi etthiipo zinikilawelaaye oshaahiti,
JOH 5:40 ila mweeyo khamwintakha okiteela miiyo yoori mwiiyane ohaayi.
JOH 5:41 Miiyo akinkhupalela siifwa za anaatamu.
JOH 5:42 Maana miiyo kajuwa yoori mweeyo khamwina pheta ya Nluku nkatthi mwenu.
JOH 5:43 Miiyo kata khwa nzina la Paapa, ila khamwikipwekhereleeni. Nkina amana ata khwa nzina lawe mweenyewe, weekhweele mwintta ompwekherela.
JOH 5:44 Mwinttela okhupali toovi mwitakhaka osifwiwa pi atthu, mwihitakhaka siifwa ya Nluku mmote paasi?
JOH 5:45 Khwa etthiipo mwihaakanyere miiyo wuulokovezani mmakhono wa Paapa. Anttelaaye wuulokovezani ti Munsa, othuuto mwiriinaaye nroromelo enu.
JOH 5:46 Eriwaka mwaari okhupalela epile Munsa alupiyeeyo, mweetta okikhupalela na-miyo, maana ye aatikha vitthu monkoni wa miiyo.
JOH 5:47 Ila amana mwihikhupalaka etile aatikhiyeeyo, nanna-ni mwinttelaaye okhupalela etile miiyo kinlupaaye?”
JOH 6:1 Paata ya vitthu epile, Yinsa khulokha ntthatta la Kalileya theenya liniitthiwaaye Tiperiyaati.
JOH 6:2 Khuntti khuluyeene ya atthu khusala enlotta, maana eettiye woona alama za minjuza aarettiyeezo za owaavonisa alwele.
JOH 6:3 Ye khuwela vamwaako khwiikhala attaapho na anakhiyoni awe.
JOH 6:4 Esaleelaka ofiya siikhu ya orettiwa njampo la Paashikowa la mayaahuuti.
JOH 6:5 Aphano alansiyeevo maasho khoona khuntti khuluyeene ya atthu yeettaka onteela, Yinsa khumuuzela Filiipe yoori: “Noozanye vayi phaawu niwenkhe atthu apa aje?”
JOH 6:6 Aamuzeliye yoori amweeze, maana ye aajuwiye etthu aari weettelaaye oretta.
JOH 6:7 Filiipe khujipu araka: “Nzurukhu miiya piiri wa feeta khunfiyela wuuzanya phaawu yoori wakhula ntthu apatthe pattaasu.”
JOH 6:8 Aphano nakhiyoni mmote anitthiwaaye Antere, ttwiiye Simawu Pheeturu, khuri:
JOH 6:9 “Shaapu otu ariiye apha onaaye phaawu thaanu na swi piiri, ila epo zaya niini khwa atthu awaatta apa?”
JOH 6:10 Yinsa khuri: “Mwiwooze atthu apo eekhale.” Puuro yaya etile zaarivo nyaani zawaatta. Atthu apale khwiikhala, alume aari etthu ya alufu thaanu.
JOH 6:11 Aphano Yinsa khuthuula phaawu khunshukhurwela Nluku, khwaawanya na khuretta etthiipo khwa swi, wakhula ntthu khwa khiima aari otakhaaye.
JOH 6:12 Paata ya orupalaza, Yinsa khuwooza anakhiyoni awe yoori: “Mwilokotthele zooshi epo zisaliyeezo yoori ehaashikhevo hatha moote.”
JOH 6:13 Khulokotthela tathela za phaawu epile thaanu, khwiitaala khelenke khumi na piiri, aalikhiyeeyo apale aari orafunaaye.
JOH 6:14 Ooniyeevo alama etile ya minjuza Yinsa aarettiyeezo khulupaza yoori: “Woohiivo hatha shaakha otu ti Napiyu aari weettelaaye ota voolumwenku.”
JOH 6:15 Yinsa noojuwa yoori aari otakha onthuula na kuvu zaya anrette wiiya mfwalume aya, khulaavo aphale vaya khulawa theenya omwaako otthwe.
JOH 6:16 Njuwa-looveva anakhiyoni a Yinsa khwiishukhela ontthatta.
JOH 6:17 Khupakhira nkalawa, khulokhela kaapu phantte ya Kafwaranaawu. Vathi waariipiyevo, ila Yinsa khaari vamote na-yo.
JOH 6:18 Khusala evuma pheevo yookhomaala na mpahari khupuwamo mawipi.
JOH 6:19 Anakhiyoni eettaka ofuttha alawaka etthiipile eettettiye kiyasi ya phiima alufu thaanu ama sitha, khusala amoona Yinsa eettaka ota eettettaka vatulu wa maati aattamelaka kalawa; yo khwiiya awoova.
JOH 6:20 Ila Yinsa khuwooza yoori: “Ti-miyo! Mwihoove!”
JOH 6:21 Aphano anakhiyoni apale khumpwekherela na furaha nkalawa mphule nasaapiru khufiya ohali aari weettaawo.
JOH 6:22 Mmeesho mwaya, atthu apale asaliyeeyo phantte etile kiina ya ntthatta, khujuwa yoori kalawa moote etile yaari aphale, Yinsa kapakhiriyemo, anakhiyoni awe aalawiye ottho.
JOH 6:23 Elottelanaka, kalawa kiina za sitati ya Tiperiyaati khufiya kharipu ya aphale atthu aari orafunaavo phaawu wakathi Yinsa anshukhurweliyeevo Mbwana.
JOH 6:24 Wakathi atthu apale ajuwiyeevo yoori Yinsa khaarivo aphale na anakhiyoni awe, khweetta nkalawa mwaya khusala alawa Kafwaranaawu olawa omweekesa.
JOH 6:25 Nonsikana kaapu ya ntthatta, khumuuzela yoori: “Rabi, wafiya lini okhuno?”
JOH 6:26 Yinsa khuwaajipu yoori: “Miiyo kiniwuuzani khweele yoori, mweeyo mwinikeekesa, khahiyo mwaasa wa woona alama za minjuza, ila mwaasa wa orafuna phaawu khwiiya woorupala.
JOH 6:27 Mwihikhole khaazi khwa etthu-yoojiwa enharipweyaaye, ila khwa etthu-yoojiwa eninkhaaye ohaayi wa mileele, ethiito Mwaana wa Pinaatamu aniwinkhaanini. Maana, Nluku Paapa, anttheliyeeyo alama yawe ya onhakikhi.”
JOH 6:28 Aphano khumuuzela Yinsa yoori: “Ninhithajiya oretta niini yoori nikhole khaazi Nluku antakhaaye?”
JOH 6:29 Yinsa khuwaajipu yoori: “Khaazi Nluku antakhaaye tiiti, onkhupali otule amperekhiyeeyo.”
JOH 6:30 Aphano khumuuzela yoori: “Alama-ni ya minjuza onttelaaye onithoonyeza yoori noone na nuukhupali weeyo? Wala onttela oretta-ni?
JOH 6:31 Amarehemu apapazetthu aja mana n'yaara, nkhama etthiipo enlupaazo zawaatikhiwa ttakatthiifu eraka: ‘Ye awenkha etthu-yoojiwa ya pinkuuni.’”
JOH 6:32 Yinsa khuwooza yoori: “Miiyo kiniwuuzani khweele yoori: Khahiyo Munsa awinkhiyeenini phaawu ya pinkuuni, ila Paapa ti aninkhaaye phaawu ya khweele ya pinkuuni.
JOH 6:33 Maana phaawu ya Nluku ti otule eeshukhiyeeyo pinkuuni khwinkha ohaayi olumwenku.”
JOH 6:34 Yo khuri: “Mbwana, oninkhe phaawu ethiito khwa mileele!”
JOH 6:35 Aphano Yinsa khulupa yoori: “Miiyo ki phaawu ya ohaayi. Otule anikiteelaaye miiyo khinteela onkhola theenya jala na otule anikikhupalaaye miiyo khalinteela onkhola theenya nnyottha.
JOH 6:36 Ila nkhama etthiipo miiyo kiwuuziyeenini yoori, mweeyo mwakoona, ila nalelo khamwinkikhupali.
JOH 6:37 Wakhula otule Paapa anikinkhaaye, onikiteela miiyo, na otule anikiteelaaye miiyo akinteela onthanya
JOH 6:38 Maana keeshukha pinkuuni, khahiiyo yoori kirette matakhelo aka, ila kirette matakhelo awe otule akiperekhiyeeyo.
JOH 6:39 Matakhelo a otule akiperekhiyeeyo pi apa: ahikaashikhe hatha mmote wa otule akinkhiyeeyo, ila miiyo kinsisimule siikhu ya mwiisho.
JOH 6:40 Maana matakhelo a Paapa pi yoori wooshi otule animoonaaye Mwaana na khunkhupali eeyane ohaayi wa mileele na miiyo kintta onsisimula siikhu ya mwiisho.”
JOH 6:41 Mayaahuuti khusala aapa mwaasa wa Yinsa owooza yoori: “Miiyo ki phaawu yiishukhiyeeyo pinkuuni.”
JOH 6:42 Khurutela olupa yoori: “Khahi Yinsa otu, mwaana wa Yuusufu? Onoona yoori fweeyo khanninjuwa papaawe na mamaawe? Onlupa toovi yoori: ‘Keeshukha pinkuuni?”
JOH 6:43 Yinsa khuwaajipu yoori: “Mwilikhe okaapa.
JOH 6:44 Khaavo ankiteelaaye miiyo woohiiyi otiisiwa ti Paapa, otule akiperekhiyeeyo na miiyo kininsisimula siikhu ya mwiisho.
JOH 6:45 Yaatikhiwa nkithaapu za manapiyu yoori: ‘Ooshi anttela osomisiwa ti Nluku.’ Nakatalikha, wooshi otule asiiliyeeyo phantte ya Paapa na khujuwa, onikiteela miiyo.
JOH 6:46 Khina anamoone Paapa, ila otule alankhiyeeyo wa Nluku ti amooniyeeyo Paapa.
JOH 6:47 Miiyo kiniwuuzani khweele yoori: Otule anikikhupalaaye onaaye ohaayi wa mileele.
JOH 6:48 Miiyo ki phaawu ya ohaayi.
JOH 6:49 Apapazenu aja mana n'yaara na khufwa.
JOH 6:50 Eti phaawu yiishukhiyeeyo pinkuuni, yoori wakhula otule anjaaye ahifwe.
JOH 6:51 Miiyo ki phaawu ya ohaayi yiishukhiyeeyo pinkuuni. Ntthu amana aja phaawu yaya eto, ontta wiiyana ohaayi wa mileele na phaawu kininkhaaye olumwenku yoori wiiyane ohaayi, mwiili aka.”
JOH 6:52 Aphano mayaahuuti khwaaza onyakulisana atthaaporu araka: “Mwinyi otu onttela oninkha toovi mwiili awe yoori nirafune?”
JOH 6:53 Yinsa khuwooza yoori: “Miiyo kiniwuuzani khweele yoori: Amana mweeyo mwihirafuni mwiili wa Mwaana wa Pinaatamu na khuhinywi taamu yawe, khamwina ohaayi mwaamweenyewe.
JOH 6:54 Wakhula otule anrafunaaye mwiili aka na khunywa taamu yaka onaaye ohaayi wa mileele na miiyo kinteela onsisimula siikhu ya mwiisho.
JOH 6:55 Maana mwiili aka etthu-yoojiwa ya khweele na taamu yaka etthu yoonywiwa ya khweele.
JOH 6:56 Otule anrafunaaye mwiili aka na khunywa taamu yaka oto oniikhala khwa miiyo na miiyo khwa ye.
JOH 6:57 Nkhama Paapa akiperekhiyeeyo eeyiyeeyo haayi, na miiyo kiniikhala mwaasa wa ye. Khwa etthiipo otule anrafunaaye mwiili aka oniiyana ohaayi mwaasa wa miiyo.
JOH 6:58 Eti phaawu elankhiyeeyo pinkuuni. Apapazenu aja mana na khufwa, ila otule anrafunaaye phaawu eti oniiya haayi mileele.”
JOH 6:59 Ye aalupiye mattakhuzi apa wakathi aari osomisaaye nsinakooka ya Kafwaranaawu.
JOH 6:60 Paata ya osiila mattakhuzi apale, anakhiyoni enkeene khulupa yoori: “Olipa mattakhuzi aya apa. Paani anwahaaye okhitiri?”
JOH 6:61 Ila Yinsa khujuwa nkatthi mwawe yoori anakhiyoni awe eetta onyakulisana khuwoozela yoori: “Mattakhuzi aka antta wuutapanyani?
JOH 6:62 Khi enttela wiiya toovi amana mwimoona Mwaana wa Pinaatamu arutelaka okhu alankhiyeewo?
JOH 6:63 Rooho ya Nluku eninkha ohaayi, ila mwiili khuna fwayita; mattakhuzi apa kiwuuziyeenini pi a rooho na ohaayi.
JOH 6:64 Ila khwa etthiipo awaapho vakatthi venu akina ahinkhupalelaaye.” Ila Yinsa aari ojuwa omwanzweene paavi apo aya ahaari okhupalaaye na paani aari weettelaaye onzukuluwela.
JOH 6:65 Ye khuri: “Tiito kiniwuuzanini yoori, khina anwahaaye okiteela miiyo kiheetteeni winkhiwa ti Paapa.”
JOH 6:66 Wakathi otthuupule anakhiyoni enkeene khuntthira na khulikha onlotta.
JOH 6:67 Yinsa khuwoozela apale khumi na awiri yoori: “Na mweeyo mwintakha okitthira mwilawe?”
JOH 6:68 Simawu Pheeturu khujipu yoori: “Ninttela onlotta paani? Weeyo onaaye mattakhuzi a ohaayi wa mileele.
JOH 6:69 Fweeyo ninkhupalela na ninjuwa yoori o Ttakatthiifu wa Nluku.”
JOH 6:70 Aphano Yinsa khujipu yoori: “Khahi miiyo kiwaathawuliyeeyo apale khumi na awiri? Ila mmote wa mweeyo sheethwani.”
JOH 6:71 Ye aari onlupa Yuuda, mwaana wa Simawu Eshikariyoote, aari mmote wa apale khumi na awiri, ila ti aari weettelaaye onzukuluwela Yinsa.
JOH 7:1 Paata ya vitthu epile, Yinsa khusala eettetta nti wa Kalileya, maana khaari otakha wiiya Yudeya, mwaasa wa mayaahuuti aari otakha omuula.
JOH 7:2 Ila njampo la heema la mayaahuuti leetta waattamela.
JOH 7:3 Yinsa khuuziwa ti attwiize yoori: “Weeyo ona yoolaamo mphu olawe Yudeya yoori anakhiyoni awo awahi woona khaazi onkholaaye.
JOH 7:4 Maana khina aneekesaaye ojuwiwa pi atthu awaatta ankholaaye khaazi zawe sirini. Nkhama weeyo onretta vitthu epi, othoonyeze vamwanttiwa.”
JOH 7:5 Maana hatha attwiize khaari onkhupali.
JOH 7:6 Yinsa khuwooza yoori: “Wakathi aka nalelo khunafiye, ila khwa mweeyo wakhula wakathi pi woolikana.
JOH 7:7 Olumwenku khunwahi wiiphiiriwa ti mweeyo, ila oniiphiiriwa ti miiyo, maana miiyo kininkha oshaahiti wa yoori khaazi zaya pi zootakhala.
JOH 7:8 Mwilawe onjampo, ila miiyo akinlawa maana khunafiye wakathi aka.”
JOH 7:9 Paata ya olupa mattakhuzi apale khwiikhala Kalileya ottuukhule.
JOH 7:10 Aphano paata ya attwiize olawa onjampo, ye khaalawiye payana, ila sirini.
JOH 7:11 Vanjampo aphale mayaahuuti eetta onsaya na omuuzelela araka: “Mwinyi otule ori vayi?”
JOH 7:12 Vakatthi wa atthu apale waarivo waapa monkoni wa ye, akina aari olupa toono: “Mwinyi wooshapweya rooho.” Akina araka: “Wala, oniwaattettekha atthu.”
JOH 7:13 Ila khaavo aari ottakhulaaye payana mwaasa wa owoova mayaahuuti.
JOH 7:14 Wakathi lifiiyeevo vakatthi njampo ntthile, Yinsa khweetta Nnyupa Woosifwiwamo khwaaza osomisa.
JOH 7:15 Amayaahuuti khwiiya ooshanka na khuuzela yoori: “Mwinyi otu ajuwa toovi kano ahisomeeni?”
JOH 7:16 Yinsa khuwaajipu yoori: “Osomisa waka khahiyo waka, walankha wa otule akiperekhiyeeyo.
JOH 7:17 Amana ntthu ajilakelela oretta matakhelo a Nluku, ontta osophela nkhama osomisa waka onlankha wa Nluku ama kinjilupa ki mweenyewe.
JOH 7:18 Otule anjilupaaye mweenyewe oneekesa siifwa yawe, ila otule aneekesaaye siifwa ya otule amperekhiyeeyo, oto ti wa khweele; khayiivo hatha etthu yoovonyeya vakatthi vawe.
JOH 7:19 Munsa awinkhani kano! Ila khina mmote wa mweeyo anshututelaaye. Khi mwineekeselani okuula?”
JOH 7:20 Atthu apale khujipu yoori: “Weeyo ona sheethwani! Antakhaaye owuula ti paani?”
JOH 7:21 Aphano Yinsa khuri: “Keetta oretta minjuza, mooshi mweeyo khwiiya wooshanka.
JOH 7:22 Mwaasa wa yoori Munsa awenkha okhiriya (weetta ohiiyiru woolankha wa Munsa ila walankha wa amarehemu apapazetthu), mweeyo mwinkhiriyisana saapatu.
JOH 7:23 Moone, nkhama athuuliwa nlume khukhiriyisiwa saapatu, yoori kano za Munsa zimariseliwe, khi mwiniphireliwani ti miiyo mwaasa wa ovonisa mwiili wooshi wa ntthu otu saapatu?
JOH 7:24 Mwihiphukane mwaasa woona nanna ariizo ntthu aya, ila mwisala mwiphukana khwa shariya.”
JOH 7:25 Atthu akina a Yeruzaleemu khusala alupa yoori: “Khahiyo mwinyi othuutu mwaari omwekesaaye yoori mwimuule?
JOH 7:26 Mwimoone, ye onttakhula vamwanttiwa, ila khuhisala apuwa hatha ntthu wonkheeti! Talili afwalume anjuwa saaneene yoori otu ti Al-Masiihu?
JOH 7:27 Ila fweeyo ninjuwa ohali alankhiyeeyo. Amana Al-Masiihu ata, khina anttelaaye ojuwa ohali alankhiyeewo.”
JOH 7:28 Wakathi aari osomisaaye Nnyupa Woosifwiwamo, Yinsa khuttakhula woosileyavo araka: “Aaa, mweeyo mwakijuwa na mwinjuwa ohali kilankhiyeewo. Miiyo akiri apha khwa matakhelo aka, ila otule akiperekhiyeeyo ti eeyiye khweele. Otule mweeyo mwihininjuwaaye,
JOH 7:29 ila miiyo kininjuwa maana kata khwa ye na ti akiperekhiyeeyo.”
JOH 7:30 Aphano khusala atakha onkhola, ila khuhiivo mmote ansapiyeeyo maana wakathi waari ohinafiye.
JOH 7:31 Atthu enkeene aari aphale khumkhupali na khusala alupa yoori: “Amana Al-Masiihu ata, onteela oretta alama zootikinisa zayita epi arettiyeeyo mwinyi otu? Wala!”
JOH 7:32 Mafwarizeewu noowasiila atthu aapaka monkoni wa Yinsa, aphano mahaakhimu a tiini na mafwarizeewu khuwaaruma anamweekesela a Nnyupa Yoosifwiwamo yoori ankhole.
JOH 7:33 Yinsa khuwooza yoori: “Kiri vamote na mweeyo wakathi vattitthiiru nawiisha kinlawa wa otule akiperekhiyeeyo.
JOH 7:34 Mweeyo mwinlawa mwakeekese, ila mwihikipatthe; maana mweeyo khamwinwahi ofiya okhu kinttelaaye wiiyawo.”
JOH 7:35 Mayaahuuti khusala oozelana atthaaporu yoori: “Ontta vayi mwinyi aya otu nihinttelaaye onsikana? Talili onttela wiikhala na mayaahuuti apale anikhalaaye malaponi, ama onttela owaasomisa akereeku?
JOH 7:36 Maana aya niini, a eto aalupiyeeyo yoori: ‘Mweeyo mwinlawa mwakeekese ila mwihikipatthe,’ maana ‘mweeyo khamwinwahi ofiya okhu kinttelaaye wiiyawo?”
JOH 7:37 Siikhu ya mwiisho, siikhu khuulu ya njampo, Yinsa khulankha khweemela khukhuwelela araka: “Nkhama owaapho linkholiyeeyo nnyottha, akiteele miiyo anywe.
JOH 7:38 Maana otule anikikhupalaaye miiyo, nkhama enlupaazo zawaatikhiwa ttakatthiifu; ‘nkatthi mwawe zinttela wiittikhamu nyuuttho za maati ohaayi.”
JOH 7:39 Ye aari olupa monkoni wa Rooho Ttakatthiifu etile aari oteelaaye winkhiwa apale akhupaliyeeyo. Maana nalelo Yinsa aari ahinasifwiwe.
JOH 7:40 Aphano noosiila atthu apale athukumaniyeeyo aphale khuri: “Otu ti Napiyu weekhweele!”
JOH 7:41 Akina khusala alupa yoori: “Ye ti Al-Masiihu!” Akina khusala oozelana yoori: “Al-Masiihu onttela olankha Kalileya?
JOH 7:42 Zawaatikhiwa ttakatthiifu zinlupa yoori Al-Masiihu onttela olankha khwa peewu ya Daawuuda nti wa Belemu, okhu aari wiikhalaawo Daawuuda.”
JOH 7:43 Mwaasa wa ye khupuwa waawanyeya khwa atthu apale.
JOH 7:44 Akina khusala atakha onkhola Yinsa, ila khuhiivo hatha ntthu ansapiyeeyo.
JOH 7:45 Anamweekesela khulawa wa mahaakhimu a tiini na mafwarizeewu, atthaapo oozeliyeeyo yoori: “Mwaasa aya niini mwihintisaka?”
JOH 7:46 Yo khujipu yoori: “Khina anattakhule nkhama mwinyi oto anttakhulaazo.”
JOH 7:47 Mafwarizeewu khuuzela yoori: “Niri talili na mweeyo mweetta ohatiwa?
JOH 7:48 Awaapho afwalume ama mafwarizeewu ankhupaliyeeyo?
JOH 7:49 Ila atthu apo ahinjuwaaye hatha etthu ya kano alaanikha.”
JOH 7:50 Mmote wa atthaapale aari wiitthiwaaye Nikoteemu, otule swaafu moote alawiyeeyo okutthanana Yinsa, khuuzela yoori:
JOH 7:51 “Kano zeetthu khazininhukhumu ntthu, ahaazeeni khapula osiiliwa khujuwiwa etthu arettiyeeyo, khahi etthiipo?”
JOH 7:52 Yo khujipu yoori: “Na weeyo wa Kalileya? Woone na ontta ojuwa yoori Kalileya khampuwawo hatha napiyu.”
JOH 7:53 Aphano wakhula mmote khulankha khusala alawa owawe.
JOH 8:1 Attaaphale Yinsa khulankha khusala alawa omwaako wa Oluveera.
JOH 8:2 Supuyeene khurutela Nnyupa Woosifwiwamo, atthu ooshi khusala alawa onkutthanana, ye khwiikhala khusala awaasomisa.
JOH 8:3 Anamanozela a kano na mafwarizeewu khuntana muukha mmote ansikaniyeeyo eettaka oraruwa. Khumweemesa vakatthi wa atthu apale.
JOH 8:4 Khuuziwa Yinsa yoori: “Mwaaliimu, muukha otu asikaniwa eettaka oraruwa.
JOH 8:5 Muukha toowo, nkatthi wa kano za Munsa, enniruma onvonya na mawe. Khi weeyo onlupa ni?”
JOH 8:6 Aari olupa toowo atakhaka yoori apatthe nanna yonlokoveza. Ila Yinsa khwiinama khusala aatikha vathi na yaala.
JOH 8:7 Wiiya eetta okhanyarela omuuzela, Yinsa khulankha khuwooza yoori: “Otule khwa mweeyo, ahina twampi eeye wamwanzo omweeselela liwe muukha otu.”
JOH 8:8 Khurutela wiinama khusala aatikha theenya vathi.
JOH 8:9 Noosiila mattakhuzi apale, ooshi khulaazavo mmote mmote, aaziye apale awulu. Khusalavo Yinsa na muukha otule eemeliye, attaaphale.
JOH 8:10 Aphano Yinsa khulankha khweemela khumuuzela yoori: “Muukha, ari vayi apale aya? Khina oohukhumwiyeeyo?”
JOH 8:11 Ye khujipu yoori: “Khina mmote, Mbwana.” Aphano Yinsa khumuuza yoori: “Na miiyo akinuuhukhumu. Olawe na ottharuwe oretta twampi.”
JOH 8:12 Yinsa khurutela owooza theenya yoori: “Miiyo ki nuuru ya olumwenku; otule anikilottaye khaneettetta n'yiiza, ila oniiyana nuuru ya ohaayi.”
JOH 8:13 Mafwarizeewu khusala amuuza yoori: “Weeyo ojilawela oshaahiti omwenyeweru. Apho oshaahiti awo khahiyo wa khweele.”
JOH 8:14 Yinsa khuwaajipu araka: “Hatha nkhama kintta ojilawela oshaahiti, oshaahiti aka pi wa okhweele, maana kinjuwa ohali kilankhiyeewo na ohali kineettaawo. Ila mweeyo khamwinjuwa ohali kilankhiyeewo wala ohali kineettaawo.
JOH 8:15 Ophuka wenu mweeyo pi wa phantte ya onaatamu; ila miiyo akinimphuka hatha ntthu.
JOH 8:16 Hatha nkhama kintta ophuka, ophuka waka pi wa khweele, maana akiri otthome. Kina Paapa otule akiperekhiyeeyo.
JOH 8:17 Nkano zenu mweeyo yaatikhiwa yoori oshaahiti wa atthu awiri pi wa khweele.
JOH 8:18 Miiyo kinjilawela oshaahiti na Paapa otule akiperekhiyeeyo onikilawela oshaahiti.”
JOH 8:19 Aphano khumuuzela yoori: “Papaawo aya ori vayi?” Yinsa khuwaajipu yoori: “Mweeyo khamwinikijuwa miiyo na khamwininjuwa Paapa, eriwaka mwaari okijuwa, mweetta onjuwa Paapa.”
JOH 8:20 Ye aalupiye mattakhuzi apa eettaka osomisa Nnyupa Woosifwiwamo, kharipu ya puuro etile entthiwaamo zaakha. Ila khina mmote ankholiyeeyo, maana waari ohinafiye wakathi aya.
JOH 8:21 Yinsa khurutela olupa theenya yoori: “Miiyo kintta olawa, mweeyo mwinlawa mwakeekese na mwinfwa na twampi zenu. Ohali kineettaawo mweeyo khamwineettawo.”
JOH 8:22 Aphano mayaahuuti khuuzelana yoori: “Talili ye onttela ojuula? Tiito anlupaaye yoori: ‘Ohali kineettaawo mweeyo khamwineettawo?”
JOH 8:23 Yinsa khurutela olupa theenya yoori: “Mweeyo mwa atthu a vathi attaapha; miiyo ki wa otulu. Mweeyo mwa voolumwenku; ila miiyo akiiyo wa olumwenku.
JOH 8:24 Tiito kinlupaaye yoori mwinttela ofwa ntwampi mwenu. Nkhama mweeyo khamwinkhupali yoori Miiyo Ti Miiyo, weekhweele mwinttela ofwa ntwampi mwenu.”
JOH 8:25 Aphano khumuuzela Yinsa yoori: “O paani weeyo?” Yinsa khujipu yoori: “Tokhiya omwanzo kawuuzani.
JOH 8:26 Kinaaye vitthu zawaatta zoolupa na ophuka monkoni weenu mweeyo. Ila otule akiperekhiyeeyo ti wa khweele na kinuuza olumwenku epile kinsiliyeeyo paasi.”
JOH 8:27 Yo khuhiweeleyi yoori Yinsa aari owuuza monkoni wa Paapa.
JOH 8:28 Aphano Yinsa khuri: “Amana mweeyo mwinsifu Mwaana wa Pinaatamu, mwintta ojuwa yoori Miiyo Ti Miiyo na akinretta hatha etthu ya matakhelo aka, ila kinlupa etile Paapa akisomisiyeeyo.
JOH 8:29 Otule akiperekhiyeeyo ori vamote na-miyo, ye khakilikheeni wiiya otthome, maana wakhula wakathi kinretta etile enintuvelaaye.”
JOH 8:30 Alupiyeevo mattakhuzi apale, atthu awaatta khumkhupali.”
JOH 8:31 Yinsa khuwooza mayaahuuti apale ankhupaliyeeyo yoori: “Amana mweeyo mwijilipisana nttakhuzi laka, mwinttela wiiya anakhiyoni aka khweele;
JOH 8:32 na mwinttela ojuwa haakhi, na haakhi ethiito entta wuutaphulani.”
JOH 8:33 Yo khunjipu yoori: “Fweeyo na peewu ya Eburahiima wala khanineeyeke viitthwaana za ntthu nkina. Weeyo onlupa toovi yoori ninttela wiiya wootaphuliwa?”
JOH 8:34 Yinsa khuwaajipu araka: “Miiyo kiniwuuzani khweele yoori, wooshi otule ankosaaye mwiitthwaana wa twampi.
JOH 8:35 Mwiitthwaana khaniiyana puuro ya mileele vakatthi wa ajaama, ila mwaana oniiyana puuro ya mileele.
JOH 8:36 Amana Mwaana ootaphulani, weekhweele mwiniiya wootaphuwa.
JOH 8:37 Miiyo kinjuwa saaneene yoori mweeyo mwa peewu ya Eburahiima, ila mwineekesa okuula, maana khwa mweeyo nttakhuzi laka khalina puuro.
JOH 8:38 Miiyo kiniwuuzani epile kooniyeezo wa Paapa, na mweeyo mwinretta epile mwisiiliyeezo wa papeenu.”
JOH 8:39 Aphano yo khunjipu yoori: “Papeetthu ti Eburahiima!” Yinsa khuwooza theenya yoori: “Nkhama mwa aana a Eburahiima, mwikhole khaazi epile Eburahiima akholiyeezo.
JOH 8:40 Ila mweeyo mwintakha okuula, kiri miiyo kiwuuziyeenini haakhi etile kisiiliyeeyo wa Nluku. Eburahiima kharetteeni toowo.
JOH 8:41 Mweeyo mwinretta etile papeenu arettiyeeyo.” Yo khujipu yoori: “Fweeyo khaniiyo aana pure, ninaaye Paapa mmote paasi Nluku.”
JOH 8:42 Yinsa khuwooza yoori: “Eriwaka Nluku aari Papeenu, mweetta okipheta, maana miiyo kalankha wa Nluku tiito kiriiyo apha. Miiyo akijitiiseeni otthome, ila ye ti akiperekhiyeeyo.
JOH 8:43 Mwaasa wa niini mweeyo ehiweeleyakani hapari zaka? Ama mwintta woona olipa nttakhuzi laka.
JOH 8:44 Mweeyo mwinaaye papeenu, sheethwani, na mwintakha oretta etile enintuvelaaye. Ye namahusuti waaza omwanzweene wala khanalotteleke haakhi, maana ye khana haakhi. Amana ahataka onlupa mattakhuzi awe, maana namahata, paapa wa ohata.
JOH 8:45 Maana mwaasa wa miiyo olupa haakhi khamwinkitakha!
JOH 8:46 Paani wa mweeyo anwahaaye okilokoveza oretta twampi? Nkhama kinlupa haakhi, khi mwaasa wa niini mwihikikhupalaka?
JOH 8:47 Otule eeyiyeeyo wa Nluku onsiila mattakhuzi a Nluku; mweeyo khamwininsiileza maana khayi mwa a Nluku.”
JOH 8:48 Mayaahuuti khumuuza Yinsa yoori: “Fweeyo khanivonyeleeni olupa yoori weeyo o nsamariiya na onaaye sheethwani.”
JOH 8:49 Yinsa khuwaajipu yoori: “Miiyo akina hatha sheethwani; olikha toowo, kininshitahi Paapa, ila mweeyo mwinkitarawu.
JOH 8:50 Miiyo akineekesa ojisifu, ila owaapho anekesaaye khwa miiyo na namaphuka.
JOH 8:51 Miiyo kiniwuuzani khweele yoori, otule anshututelaaye nttakhuzi laka khanteela woona ofwa.”
JOH 8:52 Mayaahuuti khujipu araka: “Aphano ninjuwa yoori khweele onaaye sheethwani! Eburahiima afwa, na manapiyu, ila weeyo onlupa yoori: ‘Ntthu amana ashututela nttakhuzi aka khanteela ofwa.’
JOH 8:53 Weeyo onwulweene zayita papeetthu Eburahiima? Ye afwa na manapiyu afwa, khi weeyo onjoona nkhama paani?”
JOH 8:54 Yinsa khuwaajipu yoori: “Nkhama kintta ojisifu, ojisifu waka khuna maana. Paapa otule mweeyo mwinraaye ‘Nluku etthu,’ ti ankisifwisaaye.
JOH 8:55 Mweeyo khamwininjuwa, ila miiyo kininjuwa. Eriwaka keettiye olupa yoori akininjuwa, kaari wiiya namahata nkhama mweeyo, ila miiyo weekhweele kininjuwa na kinshututela nttakhuzi lawe.
JOH 8:56 Eburahiima papeenu aari woofurahi paata ya woona siikhu ya ota waka; khoona na khufurahela.”
JOH 8:57 Mayaahuuti khumuuzela yoori: “Weeyo nalelo khuneeyane nyaakha hamusiini, wamoona toovi Eburahiima?”
JOH 8:58 Yinsa khuwaajipu yoori: “Miiyo kiniwuuzani khweele yoori, Eburahiima ahinavokoliwe Miiyo Ti Miiyo.”
JOH 8:59 Aphano mayaahuuti khuthuula mawe yoori anvonye, ila Yinsa khujivitha na khusaruwamu Nnyupa Woosifwiwamo.
JOH 9:1 Yinsa alawaka, ntarikhi khumoona mwinyi mmote aavokoliweeyo ari woohooni.
JOH 9:2 Anakhiyoni awe khumuuzela yoori: “Rabi, otu ovokoliwa ahoonaka, mwaasa wa twampi zawe, ama, twampi za apapaze?”
JOH 9:3 Yinsa khuwaajipu yoori: “Khahiyo ye wala apapaze akosiyeeyo, ila vitthu epi zarettikhana yoori owahi wa Nluku othoonyezeye muuhaayi mwawe.
JOH 9:4 Maana enihithajiya okhola khaazi nthana otthuupu za otule akiperekhiyeeyo, amana oripa khina anwahaaye okhola khaazi.
JOH 9:5 Wiiya kiri voolumwenku, ki nuuru ya olumwenku.”
JOH 9:6 Paata ya olupa mattakhuzi apale khutthemela vathi, maattha awe khuphakanya na mattophe khuttukunttela mmaasho wa mwinyi otule.
JOH 9:7 Aphano khumuuza yoori: “Olawe wajoose nkulaathayini ya Siloowe” (liriina maana a “operekhiwa”). Mwinyi otule khulawa khujoosa khuruti eettaka woona.
JOH 9:8 Anamwaattamanana awe na apale aamoniyeeyo raku alolaka zimola khuuzela yoori: “Khahiyo mwinyi othuutu aari wiikhalakhaaye na olola zimola?”
JOH 9:9 Akina khusala alupa yoori aari ye. Akina khusala alupa yoori: “Khahiyo, eetta olattanana.” Ila mweenyeweene khusala akhanyarela yoori: “Ti miiyo ena.”
JOH 9:10 Aphano khusala amuuzela yoori: “Afunuliwa toovi maasho awo?”
JOH 9:11 Mwinyi otule khuwaajipu yoori: “Mwinyi anitthiwaaye Yinsa eetheyiye mattophe, khuttha mmaasho mwaka na khukuuza olawa ojoosa okulaathayini ya Siloowe. Miiyo khulawa khujoosa apha kinoona.”
JOH 9:12 Yo khumuuzela yoori: “Ori vayi mwinyi aya oto?” Mwinyi otule khujipu yoori: “Akijuweeni.”
JOH 9:13 Khuthuuliwa mwinyi otule ahaari woonaaye khulawaniwa wa mafwarizeewu.
JOH 9:14 Siikhu Yinsa eetheyiyeeyo mattophe khufunulana maasho a mwinyi otule, yaari Saapatu.
JOH 9:15 Aphano mafwarizeewu khumuuzela theenya mwinyi otule nanna awahiyeezo woona. Mwinyi otule khujipu yoori: “Ye eettiye weetheya mattophe khuttha mmaasho mwaka miiyo khulawa khujoosa, apha kinoona.”
JOH 9:16 Mafwarizeewu akina khulupa yoori: “Mwinyi oto khahiyo wa Nluku, maana khanshitahi Saapatu.” Akina aya khusala oozela yoori: “Natwampi onretta nanna-ni alama nkhama epo zootikinisa?” Attaaphale khupuwavo ohisiilani.
JOH 9:17 Khurutela omuuzela otule ahaariwoonaaye yoori: “Khi weeyo onttela olupa niini monkoni wa oto aya, maana oofunula maasho awo?” Mwinyi otule khujipu yoori: “Ye napiyu.”
JOH 9:18 Mayaahuuti khaari okhupalela yoori ye khaari woonaka apha ti anwahaaye woona. Tiito khukhuweliwa apapaze.
JOH 9:19 Khuwoozela yoori: “Otu mwanenu othuutu mwaari onlupaaye yoori avokoliwa woohooni? Khi nanna-ni anoonaavo nasaapi ti?”
JOH 9:20 Apapaze khujipu yoori: “Fweeyo ninjuwa yoori otu mwanetthu na avokoliwa ari woohooni;
JOH 9:21 ila khanijuweeni nanna oniyeezo nasaapi eti na ntthu anfunuliyeeyo maasho khaninjuweeni. Mwimuuzele mweenyewe, hirimu eto ariina, onwahi onlupa.”
JOH 9:22 Apapaze aajipwiye toowo mwaasa wa owoova mayaahuuti; maana eettiye olupa yoori otule anttelaaye olupa yoori Yinsa ti Al-Masiihu, ontta wiikariwa nsinakooka.
JOH 9:23 Tiito apapaze alupiyeeyo yoori: “Khwa hirimu eto ariina, mwimuuzele mweenyewe.”
JOH 9:24 Khunkhuwela swaafu ya phiiri mwinyi otule ahaari woonakaaye khumuuza yoori: “Olaphe khwa Nluku na olupe haakhi. Maana najuwa yoori mwinyi aya oto natwampi.”
JOH 9:25 Mwinyi otule khujipu yoori: “Nkhama natwampi miiyo akijuweeni; etthu kinjuwaaye ti yoori miiyo akaari woona ila apha kinoona!”
JOH 9:26 Khumuuzela theenya yoori: “Oorettela niini? Ama oofunula toovi maasho?”
JOH 9:27 Mwinyi otule khujipu yoori: “Miiyo kawuuzani! Mweeyo khuhikisilezi. Mwaasa niini mwintakhelaaye osiila theenya? Na-mweyo mwintakha mwiiye anakhiyoni awe?”
JOH 9:28 Aphano khunttukhana na khulupa yoori: “Nakhiyoni awe ti weyo! Fweeyo na anakhiyoni a Munsa!
JOH 9:29 Fweeyo ninjuwa yoori Nluku attakhula na Munsa; ila mwinyi oto fweeyo wala khaninjuwa ohali alankhiyeewo.”
JOH 9:30 Mwinyi otule ahaari woonakaye khujipu yoori: “Eto etthu yootikinisa! Mweeyo khamwinjuwa ohali alankhiyeewo, ila akifunula maasho miiyo.
JOH 9:31 Ninjuwa yoori Nluku khaninsileza natwampi; ila olikha toowo, nkhama ntthu onimoova Nluku na khusala aretta matakhelo awe, oto Nluku ontta onsiila.
JOH 9:32 Tokhiya olumwenku wumpiwe khina hatha ntthu mmote ana siile yoori maasho a ntthu woovokoleliwa ohooni afunuliwa.
JOH 9:33 Eriwaka mwinyi oto khaari wa Nluku, khaari owahi oretta hatha etthu.”
JOH 9:34 Mayaahuuti khunjipu yoori: “Weeyo wavokoliwa ntwampi; onaaye makhaamu oonisomisa fweeyo?” Attaaphale khumwiikara.
JOH 9:35 Yinsa khusiila yoori mwinyi otule eekariwa nsinakooka. Khulankha olawa omweekesa nonsikana khumuuzela yoori: “Weeyo oninkhupali Mwaana wa Pinaatamu?”
JOH 9:36 Ye khujipu yoori: “Mbwana, paani oto aya yoori na miiyo kinkhupali?”
JOH 9:37 Yinsa khumuuza yoori: “Weeyo wamoona ti othuutu onttakhulanaaye.”
JOH 9:38 Aphano mwinyi otule khulupa yoori: “Oo Mbwana, kookhupali!” Khunkokhorela.
JOH 9:39 Yinsa khuri: “Miiyo kata voolumwenku apha oteela ophuka, na yoori apale ahinoonaaye oone, apale anoonaaye azukuluwe eeye oohooni”.
JOH 9:40 Mafwarizeewu akina aya aari attaaphale nonsiila alupaka mattakhuzi apale khumuuzela yoori: “Talili na-fweyo khaninoona?”
JOH 9:41 Yinsa khuwaajipu yoori: “Eriwaka mweeyo mweettiye wiiya woohooni, khamwaari wiiyana paathwili ya twampi; ila apha wiiya mwinlupa yoori mwinwahi woona, paathwili yenu nalelo mwinaaye.”
JOH 10:1 “Miiyo kiniwuuzani khweele yoori: Otule ahinviraaye vanlako wa nzizi la pwittipwitthi, ila khweetta wawiirukhelamo, oto nantarawu na nazompere.
JOH 10:2 Otule anviraaye vanlako, oto nshuki wa pwittipwitthi.
JOH 10:3 Amana ataaka oto aya, namweekesela ontta ofukula nlako na pwittipwitthi zintta osiila huula yawe na ye ontta okhuwela wakhula moote na nzina laya asarulelaka vaje.
JOH 10:4 Paata ya osarula zooshi epile ziiyiyeeyo zawe, ontta olokozela, khusala zinlotta maana zinjuwa huula yawe.
JOH 10:5 Ila khazinlawa onlotta ntthu woohijuweyi: zinintthira oto aya, maana khazinjuwa huula yawe.”
JOH 10:6 Yinsa awooziye nlikaniso opo, ila yo khuhiweeleyi maana a epile aari owoozaaye.
JOH 10:7 Yinsa khurutela owooza theenya yoori: “Miiyo kiniwuuzani khweele yoori: Miiyo ki nlako wa pwittipwitthi.
JOH 10:8 Ooshi apale atiiyeeyo kihinate, manantarawu na anazompere, ila pwittipwitthi khuhiwaasiili.
JOH 10:9 Miiyo ki nlako; otule anviraaye khwa miiyo ontta wuusurukha. Na onaaye ruhusa ya ovira khusaruwa na onsikana nnyepu.
JOH 10:10 Nantarawu onteela wiiya, wuula na otapanya; ila miiyo kata yoori mwiiyane ohaayi wawaatta na woolikana.
JOH 10:11 Miiyo ki nshuki wookhaamili. Nshuki wookhaamili onleva ohaayi awe mwaasa wa pwittipwitthi zawe.
JOH 10:12 Namapokhera, khahiyo nshuki wa pwittipwitthi na khahiyo mweenyewe, amana oona miiji zitaaka, ontta otthira khulikha pwittipwitthi ottho. Aphano miiji ontta wiikarisa pwittipwitthi zimwazeye.
JOH 10:13 Ye ontta otthira maana ontta opokhera na khanjali pwittipwitthi zaya.
JOH 10:14 Miiyo ki nshuki wookhaamili; kinjuwa pwittipwitthi zaka na yo zinikijuwa,
JOH 10:15 etthiipo Paapa anikijuwaaye na-miyo kininjuwa Paapa; na kininkha ohaayi aka pwittipwitthi zaka.
JOH 10:16 Kinaaye theenya pwittipwitthi kiina zihimo mmwizizi mphu. Epo enikihithajiya weettela kikusanye na epi ziiye liphanko limote na nshuki mmote na epo zinteela osiila huula yaka.
JOH 10:17 Tiito Paapa onikipheta, maana miiyo kininkha ohaayi aka yoori kipwekherele opheya.
JOH 10:18 Khina anikinyakanyaaye, ila miiyo kininkha khwa matakhelo aka ooshi. Kinaaye ruhusa ya winkha na othuula. Oruma opo kapokhera wa Paapa.”
JOH 10:19 Mwaasa wa mattakhuzi atthaapo, mayaahuuti khurutela waawanyeya theenya.
JOH 10:20 Akinoko aari olupa yoori: “Ye onaaye masheethwani na ona tuutu! Mwininsiilezela-ni?”
JOH 10:21 Akina khusala alupa yoori: “Nanna nkhama eto yoottakhula khahiyo ya namasheethwani; sheethwani khanwahi ofunula maasho a ntthu woohooni!”
JOH 10:22 Waari wakathi wa mwiita Yeruzaleemu laariwo njampo la winkhelela.
JOH 10:23 Yinsa aari ovira Nlivenu la Seleyimaana vaje wa Nnyupa Woosifwiwamo.
JOH 10:24 Aphano mayaahuuti khunzukulela khusala amuuzela yoori: “Onnilikhela mishikili mpakha lini? Onuuze saana nkhama weeyo o Al-Masiihu?”
JOH 10:25 Yinsa khuwaajipu yoori: “Miiyo kawuuzani, ila mweeyo khuhikhupali. Khaazi kinkholaazo miiyo khwa nzina la Paapa enhakikhi monkoni waka miiyo.
JOH 10:26 Ila mweeyo khamwinkhupalela maana khayi mwa pwittipwitthi zaka.
JOH 10:27 Pwittipwitthi zaka ensiila huula yaka na miiyo kinjuwa na enikilotta.
JOH 10:28 Miiyo kininkha ohaayi wa mileele; wala khazimpwetheya na khaavo anttelaaye olazamo mmakhono mwaka.
JOH 10:29 Paapa otu akinkhiyeeyo epi, nwulweene zayita vitthu zooshi, na mmakhono wa Paapa khina anwahaaye olazamo.
JOH 10:30 Miiyo na Paapa na amote.”
JOH 10:31 Mayaahuuti khuthuula mawe opheya yoori anvonye,
JOH 10:32 Yinsa khuwooza yoori: “Miiyo karetta vakatthi venu vitthu zawaatta zooshapweya Paapa akirumiyeeyo oretta, khwa zooshi ti tiivi mwintakhelaaye okivonyela?”
JOH 10:33 Mayaahuuti khunjipu Yinsa yoori: “Khahiyo mwaasa wa khaazi zooshapweya ninttelaaye wuupwechela, mwaasa wa okufuru, maana weeyo o pinaatamu, ila onjiretta wiiya Nluku.”
JOH 10:34 Yinsa khuwooza yoori: “Yaatikhiwa nkano mwenu na ‘Miiyo khulupa yoori: Mweeyo mwa miluku!’
JOH 10:35 Nkhama ye awaatthaja o miluku apale liwaateliyeeyo nttakhuzi la Nluku, (na zawaatikhiwa ttakatthiifu khazinfujiwa),
JOH 10:36 aphano otule Paapa anttakatthisiyeeyo na khumperekha voolumwenku, mwinri: ‘Weeyo onamakufuru,’ mwaasa wa niini kilupaka yoori ‘Ki mwaana wa Nluku?’
JOH 10:37 Amana kihikholi khaazi ya paapa, khamwinkikhupalela miiyo.
JOH 10:38 Ila nkhama kinretta, hatha nkhama khamwinkikhupali miiyo, mwikhupalele khaazi ethiito, yoori mwiwahi ojuwa na oweeleyani yoori Paapa ori vamote na miiyo na miiyo kiri wa paapa.”
JOH 10:39 Khusala atakha onkhola theenya, ila Yinsa khusuruwamo mmakhono mwaya.
JOH 10:40 Aphano Yinsa khulokha opheya muuttho Yorotaani khulawa mpakha puuro etile Yaahaya aari owoosaawo atthu, eettaka waazaru khaazi yawe. Khwiikhala ottuukho.
JOH 10:41 Atthu awaatta khulawa mpakha aphale aariivo khusala alupa yoori: “Yaahaya khaarettiye alama za minjuza, ila zooshi epile aari olupaazo monkoni wa mwinyi otu zaari za haakhi.”
JOH 10:42 Attaaphale atthu awaatta khumkhupali Yinsa.
JOH 11:1 Aarivo mwinyi mmote aariwitthiwaaye Laazaru ye aari wa nti wa Betaaniya, ottuukho aari wiikhalaawo Mariyamu na ttwiiye Maarata. Laazaru otule khwiiya nlwele.
JOH 11:2 Mariyamu otu, nlupuwe Laazaru aari olwaaziwaaye, ti otule aavaziyeeyo mafuttha oonukhela moolu a Yinsa khukukuttha na nyuuli zawe.
JOH 11:3 Alupuwe khunruma ntthu olawa omuuza Mbwana yoori: “Mbwana, jiraani awo nlwele.”
JOH 11:4 Wakathi Yinsa asiiliyeevo vitthu epile khuri: “Olwele aya opo khunlawa omuula, pi wa siifwa ya Nluku, yoori Mwaana wa Nluku asifwiwe khwa olwele otthuupo.”
JOH 11:5 Yinsa aari ompheta Maarata, Mariyamu na Laazaru.
JOH 11:6 Ila wakathi asiiliyeevo olwele opule aarupaziyewo siikhu piiri okhule aariiwo.
JOH 11:7 Nawiisha khuwooza anakhiyoni awe yoori: “Nlaweni theenya nirutele Yudeya.”
JOH 11:8 Anakhiyoni khulupa araka: “Rabi, onfwahamu yoori khwa siikhu vattitthiiru mayaahuuti aari otakha wuuvonya, apho onrutela ottuukho?”
JOH 11:9 Yinsa khujipu araka: “Nthana khuna wakathi khumi na miwiri? Ntthu amana eettetta nthana khankwakwattuwa, maana onoona nuuru ya olumwenku otthuupu.
JOH 11:10 Ila amana ntthu eettetta osikhu ontta okwakwanttuwa maana khiniiyavo nuuru.”
JOH 11:11 Paata ya olupa toowo, khurutela theenya araka: “Swaahipu eetthu Laazaru ontta olala, ila miiyo kineetta ottuukhu kanlanse.”
JOH 11:12 Aphano anakhiyoni awe khumuuza theenya yoori: “Mbwana, nkhama ye ontta olala, onvona.”
JOH 11:13 Ila Yinsa aari olupa yoori Laazaru afwa. Ila yo aari waakanyera yoori aari olupa osikizi paasi.
JOH 11:14 Aphano Yinsa khuwooza saana yoori: “Laazaru afwa,
JOH 11:15 ila Miiyo ki woofurahi mwaasa woohiiwo okhuwaya, maana toowo mweeyo mwinttela okikhupali. Nlaweni mpakha owawe.”
JOH 11:16 Aphano Tome aari wiitthiwaaye Maphapo khuwooza anakhiyoni azaawe: “Nlaweni nafwe vamote na-ye.”
JOH 11:17 Wakathi Yinsa afiiyeevo ansikaniye Laazaru azikhiwe ziviriyeevo siikhu nne.
JOH 11:18 Betaaniya waari kharipu kiyasi ya mwentto wa phiima alufu ttatthu olankha Yeruzaleemu,
JOH 11:19 na mayaahuuti enkeene aalawiye onthotola Maarata na Mariyamu na onzuru mwaasa wa opwetheyiwa ti nlupwaaya.
JOH 11:20 Maarata noosiila yoori Yinsa ontta ota khunthepeeza, ila Mariyamu aasaliye eekhaliye onti.
JOH 11:21 Maarata khumuuza Yinsa yoori: “Mbwana, eriwaka waarivo, nlupwaaka khaari ofwa.
JOH 11:22 Ila theenya kinjuwa yoori hatha nkhama nasaapi eti, Nluku oniwinkha wakhula etile oninvekelaaye.”
JOH 11:23 Yinsa khumuuza: “Nlupuwo onteela osisimuwa.”
JOH 11:24 Maarata khuri: “Miiyo kajuwa yoori onsisimuwa va osisimuliwa wa siikhu ya mwiisho.”
JOH 11:25 Yinsa khulupa araka: “Miiyo ki osisimuwa na ohaayi; otule anikaaminaaye miiyo hatha nkhama eetta ofwa oniiya ohaayi,
JOH 11:26 na wakhula otule ari haayi na khukaamini miiyo khanfwaru. Weeyo onkhupali epo zaya?”
JOH 11:27 Ye khujipu yoori: “Miiyo, Mbwana kinkhupali yoori o Al-Masiihu, mwaana wa Nluku, aari weettelaaye ota voolumwenku.”
JOH 11:28 Paata ya olupa mattakhuzi apale, khulawa owawe na khunkhuwelela Mariyamu othetekele khumuuza yoori: “Oo, Mwaaliimu otu ari apha onuukhuwela weeyo.”
JOH 11:29 Wakathi Mariyamu asiiliyeevo mattakhuzi apale, khulankha nasaapiru na khulawa okutthanana Yinsa.
JOH 11:30 Yinsa nalelo aari ahinafiye oluwani, ila aari ottuukhule Maarata eetteliyeeyo onkutthananawo.
JOH 11:31 Mayaahuuti aari nnyupa na Mariyamu, aateliyeeyo onzuru, khusala oopuwela yoori ye aari weetta ovilalo yoori alile ottuukho. Na-yo khulankha khusala anlotta.
JOH 11:32 Wakathi Mariyamu afiiyeevo aphale aariivo Yinsa, noomoona khunkokhorela moolu awe khumuuza yoori: “Mbwana, eriwaka waari attaapha nlupwaaka khaari ofwa.”
JOH 11:33 Yinsa amooniyeevo eettaka olila na mayaahuuti apale aataniyeeyo, ye khwiiya wawantipweya nroho mwawe venkivene na wooshukulikha.
JOH 11:34 Ye khuuzela yoori: “Mwanzikha vayi?” Yo khujipu yoori: “Mbwana, ote omoone.”
JOH 11:35 Yinsa khulila.
JOH 11:36 Mayaahuuti khulupa yoori: “Mmoone nanna aari omphetaazo!”
JOH 11:37 Akina khusala alupa yoori: “Otu aari owaavonisa apale ohooni, khaari owahi oretta etthu Laazaru khuhifwi?”
JOH 11:38 Yinsa nalelo ari woohuzunikha khulawa ovilalo. Yaari likurakuza laattiyelelaniweeyo liwe liwululene va nlako vaya.
JOH 11:39 Yinsa noofiya khulupa yoori: “Mwilazevo liwe nttho.” Maarata khulupa araka: “Leelo ona siikhu nne; aaza onukha.”
JOH 11:40 Yinsa khunjipu yoori: “Akaawuuziye yoori amana okhupali ontta woona siifwa ya Nluku?”
JOH 11:41 Aphano yo khulazavo liwe ntthile. Yinsa khweekesa otulu khulupa yoori: “Paapa, miiyo kinuushukhurwela mwaasa wookisiila.
JOH 11:42 Miiyo kinjuwa yoori weeyo onikisiila wakathi wooshi, ila mwaasa wa khuntti eti ya atthu apa ariivo ti eto, kinlupaaye toowo yoori yo apatthe okhupali yoori weeyo ti okiperekhiyeeyo.”
JOH 11:43 Paata ya olupa toono, khukhuwa venkivene araka: “Laazaru, osaruwele oje okhuno!”
JOH 11:44 Otule aafwiyeeyo khusaruwa, moolu awe na makhono awe ari oopachiwa na tarapu na wuuso awe na makhono awe khuzukulelisiwa. Aphano Yinsa khulupa yoori: “Mwintaphule tarapu eto mwinlikhe alawe.”
JOH 11:45 Mayaahuuti enkeene alawiyeeyo onthotola Mariyamu, ooniyeevo vitthu epile arettiyeeyo Yinsa, yo khunkhupali.
JOH 11:46 Ila akina khulankha olawa owooza mafwarizeewu monkoni wa epile Yinsa arettiyeezo.
JOH 11:47 Aphano mahaakhimu a tiini na mafwarizeewu khuwaakhuwela mashawuriiya khusala awooza yoori: “Niri je? Okho owaakho mwinyi oto anrettaaye alama zawaatta za minjuza.
JOH 11:48 Amana ninlikha etthiipo, atthu ooshi antta onkhupali na antta ota arooma aninyakanye puuro yeetthu ttakatthiifu na nti etthu.”
JOH 11:49 Aphano mmote wa-yo, aari wiitthiwaaye Kayifwa, aari haakhimu nwulu wa tiini wa mwaakha aya opule, ye khulupa yoori: “Mweeyo khamwinjuwa hatha etthu!
JOH 11:50 Khamwinjuwa yoori afwataali ofwa ntthu mmote awaafwelaka atthu ooshi zayita olikha khapila zooshi waashikha.”
JOH 11:51 Wakathi aya opule Kayifwa khaari ojilupa mweenyewe. Ila mwaasa wa yoori ye aari haakhimu nwulu wa tiini mwaakha aya opule, etta ohupiri yoori Yinsa aari oteela ofwela khapila ya mayaahuuti,
JOH 11:52 khahiyo paasi khwa khapila ya mayaahuuti, ila theenya yoori awaakusanye khwa mwiili mmote aana a Nluku apale amwazeyiyeeyo.
JOH 11:53 Waaza siikhu ethiitile khusiilana omuula.
JOH 11:54 Khwa ethiito Yinsa khuhisala ajithoonyeza vakatthi wa mayaahuuti, khulawa nti waattameliyeeyo n'yaara waari wiitthiwaaye Efwarayiimu. Khwiikhala ottuukho na anakhiyoni awe.
JOH 11:55 Yaarettiye esaleelaka ofiya siikhu ya Paashikowa wa mayaahuuti, atthu enkeene a nti aya opule aalawiye Yeruzaleemu olawa ojitwaharesha ehinafiye siikhu ya Paashikowa
JOH 11:56 Yo aari omweekesa Yinsa oozelanaka ari vaje wa Nnyupa Woosifwiwamo: “Nkahayani niri toovi? Talili onta vanjampo?”
JOH 11:57 Ila mahaakhimu a tiini na mafwarizeewu aarumiye yoori, amana ntthu amoona Yinsa vahali ariivo, awooze, yoori yo alawe ankhole.
JOH 12:1 Siikhu sitha ehinafiye siikhu ya Paashikowa Yinsa eettiye Betaaniya, ottuukho aari wiikhalaawo Laazaru, otule Yinsa ansisimuliyeeyo muufwa.
JOH 12:2 Ottuukho khwiipikheliwa etthu woojiwa ya osikhu; Maarata khusala arumeya, Laazaru eekhaliye vameeza vamote na Yinsa.
JOH 12:3 Aphano Mariyamu khuthuula suupha ya mafuttha oonukhela awaatta nzurukhu, khuttukunttela moolu a Yinsa khusala akukuttha na nyuuli zawe. Nnyupa wooshimo khwiitaalamo arufu ya mafuttha apale.
JOH 12:4 Aphano mmote wa anakhiyoni awe, Yuuda Eshikariyoote othuuto aari weettelaaye onzukuluwela khulupa yoori:
JOH 12:5 “Ahoozanyisiwe mafuttha aya apo nzurukhu aya enkhiwa asikhini? Nzurukhu aya yaari phakari ya nakhaazi khwa mwaakha mmote!”
JOH 12:6 Ye khaalupiye toowo mwaasa wa wiiyana huruma na asikhini ila mwaasa wa wiiya nantarawu; na tiye aari opwehaaye nfukho wa nzurukhu, amana otthiiwamo eetta olazakamo.
JOH 12:7 Yinsa khunjipu araka: “Onlikhe khwa heeri! Yoori apwehe mafuttha apo mpakha siikhu ya ozikhiwa waka.
JOH 12:8 Asikhini ari vamote na mweeyo mpakha mileele, ila miiyo khanniiya vamote mpakha mileele.”
JOH 12:9 Paata ajuwiyeevo yoori Yinsa aari attaaphale, khuntti khuluyeene ya mayaahuuti khuta, woohiiyi mwaasa wa Yinsa paasi, ila theenya yoori amoone Laazaru, otule ansisimuliyeeyo muufwa.
JOH 12:10 Khwa etthiipo mahaakhimu a tiini khuwaza shawuri zoomuula Laazaru naye;
JOH 12:11 maana atthu enkeene mwaasa wa ye eetta ophakuwanana mayaahuuti na khusala ankhupali Yinsa.
JOH 12:12 Siikhu ya phiiri, khuntti khuluyeene ya atthu yaatiyeewo onjampo khusiila yoori Yinsa ontta ota Yeruzaleemu.
JOH 12:13 Khuthuula virapi za mirita, khusala alawa onkutthanana ye, anyakulaka araka: “Ozaana! Woottitthimisiwa ti otule atiiyeeyo khwa nzina la Mbwana, Woottitthimisiwa ti Mfwalume wa Ezirayiilu!”
JOH 12:14 Yinsa ampatthiyeevo mwaana wa puuru khupakhira attaapho, nkhama etthiipo yaatikhiweezo yoori:
JOH 12:15 “Atthu a Yeruzaleemu, mwihoove mfwalume enu onta aapakhiriye va mwaana wa puuru!”
JOH 12:16 Omwanzo anakhiyoni awe khazaaweleyiye epo za; ila wakathi aaziyeevo osifwiwa Yinsa yo eetta wuupuwela yoori etthu yaya eto yaatikhiye monkoni wa ye, na khweele khurettikhana etthiipo.
JOH 12:17 Atthu apale aariina wakathi opule anrumiyeeyo Laazaru osaruwamo nkhapuri khusisimuwa muufwa, yo khuvira alawelaka oshaahiti vitthu epile zaarettikhaniyeeyo.
JOH 12:18 Mwaasa wa ethiito, khuwaakusanya atthu awaatta olawa okutthanana, maana eettiye osiila elupiwaka yoori Yinsa aarettiye alama eto.
JOH 12:19 Aphano mafwarizeewu khusala oozana yoori: “Khanipattheenivo etthu. Nkoonani olumwenku wa atthu ontta onlottelela.”
JOH 12:20 Khwa atthu apale aalawiyeeyo omwaaputu Nluku onjampo la Paashikowa akina aari akereeku.
JOH 12:21 Yo, khulawa ottakhulana Filiipe aari wa nti wa Betezayiita ya Kalileya, khunvekela araka: “Mwinyi, nintakha omoona Yinsa”.
JOH 12:22 Filiipe khulawa khumuuza Antere; aphano yo oowiiri khumuuza Yinsa.
JOH 12:23 Yinsa khujipu yoori: “Wafiya wakathi woosifwiwa Mwaana wa Pinaatamu.
JOH 12:24 Miiyo kiniwuuzani khweele yoori, amana phunje ya tiriku ehikweli vathi na ehifwi nalelo eniiya phunje paasi, ila amana efwa empuwisa mishumo zawaatta.
JOH 12:25 Otule amphetaaye ohaayi awe, onteela ompwetheya; ila otule antarawaaye ohaayi awe khwa voolumwenku apha, onthokorela ohaayi wa mileele.
JOH 12:26 Otule antakhaaye okirumeyela, akilotte; na puuro kiniiyaavo na karumeya aka oniiya attaapho. Otu anikirumeyelaaye, Paapa onteela onttitthimisa.
JOH 12:27 Nasaapi eti rooho yaka ti yoohankayikha. Kiri niini? Kiri paapa, okuusuru wakathi opu wa ohoowa waka? Wala! Maana miiyo kateela ethiito.
JOH 12:28 Paapa osifu nzina lawo!” Aphano khuta huula yoolankha pinkuuni yaari olupaaye yoori: “Koosifu na kinteela wuusifu opheya.”
JOH 12:29 Khuntti etile yaariivo noosiila aariye taari eto; akina khusala alupa yoori: “Nlayikha ti lattakhulaniyeeyo Yinsa.”
JOH 12:30 Yinsa khulupa yoori: “Huula eto khiteeni mwaasa wa miiyo yata mwaasa wa mweeyo.
JOH 12:31 Wafiya wakathi woophukiwa olumwenku opu, nasaapi eti onttela wiikariwa mfwalume wa olumwenku opu.
JOH 12:32 Ila miiyo amana kilansiwa vathi apha kintta ojitiisela atthu ooshi.”
JOH 12:33 Ye aalupiye mattakhuzi apa yoori athoonyeze nanna aari weettelaazo ofwa.
JOH 12:34 Khuntti etile khunjipu yoori: “Fweeyo ninsiilaka kano elupaka yoori: Al-Masiihu ona yawiiyavo khwa mileele, khi weeyo onlupa toovi yoori Mwaana wa Pinaatamu ona ya olansiwa? Mwaana wa Pinaatamu aya oto ti paani?”
JOH 12:35 Aphano Yinsa khuwooza yoori: “Nuuru eri vamote na mweeyo khwa wakathi vattitthiiru. Mweettette wakathi otthuupu mwiriinaavo nuuru, yoori yiiza ehuusikaneni, maana ntthu aneettettaaye n'yiiza khanjuwa ohali aneettaawo.
JOH 12:36 Wakathi otthuupu mwiriinaavo nuuru mwikhupalele nuuru ethiito yoori mwiretteye wiiya aana a nnuuru.” Paata ya olupa toowo Yinsa khulaavo khujivitha khuhisala amoona.
JOH 12:37 Hatha nkhama Yinsa eettiye owaarettela alama epile zooshi za minjuza vakatthi vaya, khankhupaleliye,
JOH 12:38 yoori limariseleye nttakhuzi la napiyu Ezaaya, linraaye: “Mbwana, paani akhupaleliyeeyo tafusiiri yeetthu? Na paani athoonyeziweeyo nkhono wa Mbwana?”
JOH 12:39 Khwa ethiito yo khaari oteela okhupali, nkhama etthiipo aalupiyeeyo Ezaaya theenya yoori:
JOH 12:40 “Oola maasho aya na oomisa rooho zaya, yoori ahoone na maasho aya, eweeleya nroho mwaya aruti kiwaavonisa.”
JOH 12:41 Ezaaya aalupiye mattakhuzi apa maana ooniye siifwa ya Yinsa na khulupa monkoni wa ye.
JOH 12:42 Nakatalikha, attunkhulu awaatta a mayaahuuti khunkhupali Yinsa. Ila mwaasa wa mafwarizeewu, khuhisala atukhuru amini yaya, na woova wiikariwa nsinakooka.
JOH 12:43 Maana yo waari owaatuvela venkivene osifwiwa pi atthu zayita osifwiwa ti Nluku.
JOH 12:44 Aphano Yinsa khulupa woosileyavo araka: “Otule anikaaminaaye miiyo, khanikaamini miiyo paasi, ila otule akiperekhiyeeyo.
JOH 12:45 Na otule anikoonaaye, amoona otule akiperekhiyeeyo.
JOH 12:46 Miiyo kata voolumwenku nkhama nuuru, yoori wakhula otule anikikhupalaaye miiyo, ahijileme n'yiiza.
JOH 12:47 Amana ntthu asiila mattakhuzi aka na khuhishututeli, miiyo akininphuka. Maana miiyo akaateeliye ophuka olumwenku ila wuusuru olumwenku.
JOH 12:48 Owaapho namaphuka wa otule anikikatthalaaye na ahinkhupalelaaye mattakhuzi aka; nttakhuzi laka nttinttho kinlupiyeeyo ti linttelaaye omphuka siikhu ya mwiisho.
JOH 12:49 Akinjilupa miiyo, ila Paapa otu akiperekhiyeeyo ti akirumiyeeyo etthu yoolupa na olaleya.
JOH 12:50 Miiyo kinjuwa yoori oruma wawe ohaayi wa mileele. Nakatalikha etile akirumiyeeyo paapa kinlupa ethiito.”
JOH 13:1 Esaleelaka ofiya siikhu ya Paashikowa, Yinsa aajuwiye yoori wafiya wakathi wa ye olikha olumwenku opu eette wa Paapa, khuwaapheta apale awe aari voolumwenku, awaaphetiye mpakha mwiisho.
JOH 13:2 Wakathi wa etthu-yoojiwa ya osikhu, sheethwani aarettiye ahatiye rooho ya Yuuda Eshikariyoote mwaana wa Simawu, yoori anzukuluwele,
JOH 13:3 Yinsa aajuwiye yoori Paapa vitthu zooshi attha mmakhono mwawe, na alankhiye wa Nluku na aari orutela wa Nluku,
JOH 13:4 khulankhavo vameeza aphale, khuvula ajapi yawe khuthuula epakuso khujifukelela n'yuunu.
JOH 13:5 Khuttha maati mpasiya khwaaza woosa moolu a anakhiyoni awe awaapakusaka na epakuso etile aafukeleliyeeyo n'yuunu mwawe.
JOH 13:6 Khufiya zwaamu ya Simawu Pheeturu, othuuto aamuziyeeyo yoori: “Mbwana, ontakha woose moolu aka?”
JOH 13:7 Yinsa khunjipu yoori: “Eti kinrettaaye apha nasaapi khiniweeleya; ila owulu-othana enteela oweeleya.”
JOH 13:8 Pheeturu khulupa yoori: “Wala! Khinretteya weeyo woosa moolu aka.” Yinsa khunjipu araka: “Miiyo amana kihiwoosi, weeyo khunteela wiiyana phantte na-miyo.”
JOH 13:9 Simawu Pheeturu khulupa yoori: “Mbwana, khayi moolu aka paasi na theenya na makhono aka na eeshwa yaka!”
JOH 13:10 Yinsa khujipu: “Ntthu owiyeeyo eninhithajiya woosa moolu paasi, maana mwiili awe wooshi pi woottakattha. Mweeyo mwa oottakattha, ila khahi mooshi.”
JOH 13:11 Maana ye aari onjuwa ntthu aari weettelaaye onzukuluwela; ti eto aalupiyeeyo yoori: “Khayi mooshi mwiiyiyeeyo oottakattha.”
JOH 13:12 Paata ya wiisha owoosa moolu, khuthuula ajapi yawe khuwala khurutela aphale eekhaliyeevo. Aphano khuwoozela yoori: “Eniweeleyani vitthu epi khuuretteliyeenini?
JOH 13:13 Mweeyo mwikiitthaka miiyo mwinri ‘Mwaaliimu’ na ‘Mbwana,’ mwina shariya, miiyo ki othuuto.
JOH 13:14 Aayo, pi etthiipo miiyo kiiyiye Mbwana na Mwaaliimu enu, kawoosani moolu, na-mweyo theenya mwina ya woosana moolu mmote na nzaawe.
JOH 13:15 Miiyo kawinkhani nthoonyezo yoori etthiipi kirettiyeezo na-mweyo mwisala mwiretta etthiipi.
JOH 13:16 Miiyo kiniwuuzani khweele yoori, khaavo karumeya wonziti mbwana awe, nkhama etthiipo nanhupi khaninziti otule anrumiyeeyo.
JOH 13:17 Nkhama mwinjuwa vitthu zaya epo, amana mwiretta, mwaparikhiyiwa.
JOH 13:18 Akinuulupani mooshi, kiniwaajuwa apale kiwaathawuliyeeyo. Ila epo enttela orettikhana yoori emariseleye epile zilupiyeeyo zawaatikhiwa ttakatthiifu, yoori: “Othuuto kimeelaniyeeyo phaawu yaka akizukuluwela.”
JOH 13:19 Kinaaza nasaapi ethiiti owuuzani ehinarettikhane, yoori amana erettikhanaka mweeyo mwikhupali yoori Miiyo Ti Miiyo.
JOH 13:20 Miiyo kiniwuuzani khweele yoori: Otule animpokherelaaye otule kininrumaaye onikipokherela miiyo; na anikipokherelaaye, onimpokherela otule akirumiyeeyo.”
JOH 13:21 Paata ya olupa toowo, rooho yawe khwiiya yawaantipweya, khutukhuru alupaka yoori: “Miiyo kiniwuuzani khweele yoori, ntthu mmote wa mweeyo onlawa akizukuluwele.”
JOH 13:22 Anakhiyoni khusala eekesana mmote na nzaawe ahinjuwaka paani aninlupaaye.
JOH 13:23 Mpavu mwawe eekhaliyemu nakhiyoni mmote otule aari omphetachaaye.
JOH 13:24 Simawu Pheeturu khunttheela alama nakhiyoni othuutule; yoori amuuzele Yinsa anlupe oto ari weettelaaye onzukuluwela.
JOH 13:25 Aphano nakhiyoni otule khwiinamela vamweyo wa Yinsa khumuuzela yoori: “Mbwana, paani oto aya?”
JOH 13:26 Yinsa khunjipu yoori: “Ti otule kinttelaaye omwinkha pattaasu ya phaawu kinaanisiye n'yopo.” Aphano khunaanisa pattaasu ya phaawu, khumwinkha Yuuda Eshikariyoote, mwaana wa Simawu.
JOH 13:27 Paata ya Yuuda orafuna phaawu etile, Epiliisi eetta omweetta. Yinsa khumuuza yoori: “Etthu ontakhaaye oretta, orette nasaapi.”
JOH 13:28 Ila apale aari vameeza khuhiivo mmote yamweliyiyeeyo mwaasa niini Yinsa aamuzeliyeeyo toowo.
JOH 13:29 Maana Yuuda ti aari opwehaaye nfukho wa nzurukhu, akina aari waakanyera yoori Yinsa amuuza olawa wuuzanya vitthu zooretteliwa njampo, ama yoori alaze etthu awinkhe asikhini.
JOH 13:30 Paata ya wiisha orafuna phaawu etile, Yuuda khulankha nasaapiru. Na waari osikhu.
JOH 13:31 Wakathi Yuuda aliyeevo, Yinsa khulupa yoori: “Nasaapi Mwaana wa Pinaatamu onsifwiwa, na Nluku onsifwiwa khwa ye.
JOH 13:32 Nkhama Nluku onsifwiwa khwa ye, na-ye Nluku onsifwiwa mwanawe khwa ye mweenyewe, na onteela osifwiwa woohirupazivo.
JOH 13:33 Aanaaka, nalelo khwa wakathi vattitthiiru kiri vamote na-mweyo. Mweeyo mwinlawa mwakeekese, ila miiyo kiniwuuzani nkhama kiwooziyeezo mayaahuuti yoori: ohali kineettaawo mweeyo khamwinlawa. Na-mweyo enasaapi eti kiniwuuzani etthiipo.
JOH 13:34 Kiniwinkhani oruma mpheya kiraka: mwiphetane mmote na nzeenu. Nkhama etthiipo kuuphetiyeenini, mwiphetane mmote na nzeenu.
JOH 13:35 Khwa etthiipo atthu ooshi antta ojuwa yoori mwa anakhiyoni aka, amana mwiphetanaka mmote na nzaawe.”
JOH 13:36 Simawu Pheeturu khumuuzela yoori: “Ontta vayi Mbwana?” Yinsa khunjipu: “Ohali kineettaawo, weeyo khunikilotta nasaapi eti, ila owulu-othana onteela okilotta.”
JOH 13:37 Aphano Simawu khuri: “Mbwana, mwaasa wa niini kihuulottaka nasaapi? Miiyo kinleva ohaayi aka mwaasa wa weeyo!”
JOH 13:38 Aphano Yinsa khujipu araka: “Weeyo onleva ohaayi awo mwaasa wa miiyo? Miiyo kiniwuuza khweele yoori, khapula likukhuwi lihineekhe, weeyo onteela okikhana swaafu ttatthu.
JOH 14:1 Mwihihankayikhise rooho zenu. Mwinkhupali Nluku, na theenya mwikikhupali miiyo.
JOH 14:2 Owawe papaaka awaakho mapuro menkeene; eriwaka khayaari ethiito, akaari owuuzani, yoori kinttela otthenkeza puuro yenu.
JOH 14:3 Na amana kilawa kitthenkeza puuro yaya eto, kinlawa karuti kuuthuleni mweeye vamote na-miyo attaapho kinttelaaye wiiyavo.
JOH 14:4 Mweeyo mwinjuwawo ohali kineettaawo na tarikhi yaya.”
JOH 14:5 Khujipu Tome yoori: “Mbwana, fweeyo khaninjuwa ohali oneettaawo! Khi ninjuwa toovi tarikhi yaya?”
JOH 14:6 Yinsa khujipu yoori: “Miiyo ki tarikhi, haakhi na ohaayi. Khina anfiyaaye wa Paapa, ahiiyeeni khwa miiyo.
JOH 14:7 Eriwaka khweele mwaari okijuwa, nka mwinjuwaka Paapa. Apha enasaapi eti mwininjuwa na mwaaza omoona.”
JOH 14:8 Filiipe khulupa yoori: “Mbwana, onithoonyeze Paapa, ethiito ennitosheleza.”
JOH 14:9 Yinsa khunjipu yoori: “Filiipe, kiikhaliyeezo wakathi mwinkeene na-mweyo; nalelo khunikijuwa? Otule akooniye miiyo amoona Paapa. Khi onlupa toovi yoori: ‘Onithoonyeze Paapa'?
JOH 14:10 Weeyo khunkhupali yoori miiyo kiri wa Paapa na Paapa ona miiyo? Mattakhuzi apa kiniwuuzanini khahiyo aka paasi. Ila, Paapa aniikhalaaye khwa miiyo, ontta okhola khaazi yawe.
JOH 14:11 Mwikikhupali miiyo amana kilupa yoori kiri khwa Paapa na Paapa ori khwa miiyo; ama nenkawu mwikikhupali mwaasa wa khaazi epi kinkholaazo.
JOH 14:12 Miiyo kiniwuuzani khweele yoori, otule anikikhupalaaye miiyo onkhola khaazi epi kikholiyeezo hatha okhola zooziti epi, maana miiyo kineetta wa Paapa.
JOH 14:13 Na zooshi mwinttelaaye oveka khwa nzina laka, miiyo kinretta, yoori Paapa asifwiwe khwa mwanawe.
JOH 14:14 Wakhula etile mwinvekaaye khwa nzina laka kintta oretta.
JOH 14:15 Nkhama mweeyo mwinikipheta, mwinteela oshututela oruma waka.
JOH 14:16 Miiyo kinttela onvekela Paapa yoori awinkheni Namalipisela nkina, yoori eeye vamote na-mweyo khwa mileele,
JOH 14:17 Rooho ya okhweele, atthu a voolumwenku ahinttelaaye opokhera, maana, khanteela woona na wala khanjuwa. Ila mweeyo mwinjuwa, maana Yo eniikhala nkatthi mwenu na enttela wiiya na-mweyo.
JOH 14:18 Miiyo akinuulikhani mwiri anasisa, kinlawa kooruteleni.
JOH 14:19 Khwa wakathi vattitthiiru atthu a voolumwenku khanteela okoona theenya, ila mweeyo mwinlawa mwakoone. Mwaasa wa miiyo wiiya haayi, na mweeyo mwinlawa mweeyane ohaayi.
JOH 14:20 Siikhu ethiito enteela oweeleyani yoori kiri khwa Paapa, mweeyo mwiri khwa miiyo na-miyo kiri khwa mweeyo.
JOH 14:21 Otule ansiilaaye oruma waka na khushututela oto ti anikiphetaaye; na otule anikiphetaaye oniiya woophetiwa ti Paapa, na-miyo theenya kininpheta na kinjithoonyeza khwa ye.”
JOH 14:22 Yuuda (nkina woohiiyi Yuuda Eshikariyoote) khuri: “Mbwana, mwaasa aya niini weeyo ontakhaaye ojithoonyeza khwa fweeyo paasi khuhijithoonyezi olumwenku wooshi?”
JOH 14:23 Yinsa khujipu yoori: “Nkhama ntthu onikipheta, onshututela mattakhuzi aka na Paapa ontta ompheta. Paapa na-miyo nintta wiikhala na-ye.
JOH 14:24 Otule ahinikiphetaaye khanshututela mattakhuzi aka. Na nttakhuzi mwinsiilaaye khahiyo laka, ila tthi la Paapa otule akirumiyeeyo.
JOH 14:25 Kaari olupaka zooshi epo nalelo niri vamote.”
JOH 14:26 Ila Namalipisela, Rooho Ttakatthiifu, eto Paapa anttelaaye omperekha khwa nzina laka, onteela wuusomisani mweeyo vitthu zooshi na wuukupuselani zooshi epile kiwuuziyeenini.
JOH 14:27 Kinuulikhelani heeri, heeri yaka kiniwinkhani, ila akiniwinkhani nkhama oninkhaazo olumwenku. Mwihihankayikhise rooho zenu, wala mwihoove.
JOH 14:28 Mwasiila eti kilupiyeeyo: ‘Miiyo kintta olawa, ila kinlawa kooruteleni mweeyo. Eriwaka mwaari okipheta, mweetta ofurahi mwaasa wa miiyo weetta wa Paapa, maana Paapa akiziti miiyo.
JOH 14:29 Kiniwuuzani nasaapi eti zihinarettikhane, yoori wakathi zinttelaavo orettikhana, mweeyo mwikhupalele.
JOH 14:30 Enasaapi eti akinlawa ottakhulana mweeyo, maana mfwalume wa voolumwenku ontta ota; ye khana hatha ruhusa khwa miiyo,
JOH 14:31 nakatalikha yoori atthu a voolumwenku ojuwe yoori miiyo kininpheta Paapa, enikihithajiya oretta etile akirumiyeeyo. Lankhani, nileevo apha.”
JOH 15:1 Yinsa khulupa yoori: “Miiyo ki nrayi wa wuuva weekhweele, Paapa namalima.
JOH 15:2 Wakhula erapi etile eriiye khwa miiyo khuhisala yiima, ye ontta oshija; na wakhula etile eniimaaye ontta okasurela yoori etepe wiima.
JOH 15:3 Mweeyo mwattakatthisiwa ti nttakhuzi kiwuuziyeenini.
JOH 15:4 Mwijilipisane miiyo, na-miyo kintta ojilipisana mweeyo. Nkhama etthiipo erapi ehiniimaaye ottho ehijilipisaneeni nrayi, na-mweyo pi etthiipo khamwiniima mishumo woohijilipisani miiyo.
JOH 15:5 Miiyo ki nrayi, mweeyo mwa virapi. Otule anjilipisanaaye miiyo, na-miyo khwa ye, oto aya oniima mishumo zawaatta; maana mweeyo woohiiyani miiyo, khina etthu mwinwahaaye oretta.
JOH 15:6 Amana ntthu ahilipani miiyo, ontta weeseleliwa oje, oome nkhama erapi enlokotthiwaaye khweeseleliwa va moottho khulukuziwa.
JOH 15:7 Ila amana mwijilipisana miiyo na mattakhuzi aka khwiiya na mweeyo, mwiveke wakhula etile mwintakhaaye mwintta winkhiwa.
JOH 15:8 Paapa onsifwiwa mwaasa wa mweeyo wiima mishumo zawaatta, etthiipo enthoonyeza yoori mweeyo mwa anakhiyoni aka.
JOH 15:9 Khwa nanna etthiipo Paapa akiphetiyeezo, na-miyo koophetani; mwijilipisane pheta yaka.
JOH 15:10 Amana mweeyo mwishututela oruma waka mwiniiya nkatthi wa pheta yaka, nkhama etthiipo na miiyo kinshututelaaye oruma wa Paapa na kiriyeeyo nkatthi wa pheta yawe.
JOH 15:11 Kaawuziyeni vitthu epi yoori furaha yaka yiiye khwa mweeyo, na yoori furaha yenu ekamilikhe.
JOH 15:12 Oruma waka pi opu: Mwiphetane mmote na nzaawe nkhama etthiipi miiyo khinuuphetanini mweeyo.
JOH 15:13 Khina ariina pheta yooziti, woohiiyi otule aninkhaaye ohaayi awe khwa maswaahipu zawe.
JOH 15:14 Mweeyo mwa maswaahipu zaka, mwirettaru etile kinuurumanini.
JOH 15:15 Akiniwiitthani theenya akarumeya, maana karumeya khanjuwa niini anrettaaye Mbwana awe. Nakatalikha, miiyo kiniwiitthani yoori maswaahipu zaka, maana zooshi epile kinsiliyeeyo Paapa koojuwisani.
JOH 15:16 Khahiyo mweeyo mwikithawuliyeeyo miiyo, ila miiyo ti kuuthawuliyeenini mweeyo na khuutthomani yoori mwilawe mweeme mishumo, mishumo zoolipaneya, yoori Paapa awahi owinkhani wakhula etile mwinvekaaye khwa nzina laka.
JOH 15:17 Opo pi oruma waka: mwiphetane mmote na nzaawe.
JOH 15:18 Amana atthu a voolumwenku eephiriwaka ti mweeyo, mwifikhiri khapula yoori yo eephiriwe ti miiyo.
JOH 15:19 Eriwaka mweeyo mwaari atthu a voolumwenku, yo aari otuveliwa ti mweeyo mwaasa wa wiiya aya. Nakatalikha mweeyo khahi mwa atthu a olumwenku, ila miiyo koothawulani khulazani vakatthi wa atthu a olumwenku. Tiito atthu a olumwenku aniiphiriwaaye ti mweeyo.
JOH 15:20 Mwifikhiri mattakhuzi kiwuuziyeenini yoori: ‘Khaavo karumeya anzitiyeeyo Mbwana awe.’ Nkhama akilupatthiyeezo miiyo, na anlawa oolupattheni mweeyo theenya. Nkhama anshututela mattakhuzi aka, theenya anlawa ashututele apale mwinttelaaye olupa mweeyo.
JOH 15:21 Zooshi epo anlawa ooretteleni mweeyo, mwaasa wa nzina laka, maana khaninjuwa otule akirumiyeeyo.
JOH 15:22 Eriwaka akaatiiye kilupa, yo khaari wiiyana paathwili ya twampi. Ila apha khana hatha nanna ya ojaakisa monkoni wa twampi zaya.
JOH 15:23 Otule aniiphiriwaaye ti miiyo na theenya oniiphiiriwa ti Paapa.
JOH 15:24 Eriwaka akeettiye oretta vitthu vakatthi vaya ahinwahaaye oretta ntthu nkina, yo khaariwiiyana paathuli ya twampi. Ila yo oona epi kirettiyeezo na khusala akhanyarela wiiphiiriwa ti miiyo na Paapa.
JOH 15:25 Ila epo zaya zarettikhana yoori lilikaniseliwe nttakhuzi ntthile laatikhiweeyo nkatthi wa kano zaya yoori: ‘Yo eephiiriwa ti miiyo woohiivo hatha kiiswa.’
JOH 15:26 Ila, amana ata Namalipisela, otule kinttelaaye wuuperekhezani woolankha phantte ya Paapa, Rooho ya okhweele ya olankha wa Paapa, ye onttela olaza oshaahiti monkoni wa miiyo.
JOH 15:27 Na mweeyo mwinlawa mwalawele oshaahiti, maana mwina miiyo thanku omwanzo.
JOH 16:1 Miiyo kawuuzani mattakhuzi apa yoori mwihanswi amini yenu.
JOH 16:2 Mweeyo mwinteela wiikariwa nsinakooka; weekhweele, onlawa wafiye wakathi onraaye ntthu amana awuulaani khoona nkhama ankholaaye khaazi ya Nluku.
JOH 16:3 Yo anttela oretta toowo mwaasa woohinjuwi Paapa wala miiyo.
JOH 16:4 Mattakhuzi apa kiniwuuzani yoori amana ofiya wakathi enttelaavo orettikhana muupuwele yoori miiyo kaawuziyeni
JOH 16:5 Ila enasaapi eti kineetta wa otule aakirumiyeeyo, khaavo mmote anikuuzelaaye yoori: ‘Oneetta vayi?’
JOH 16:6 Ila mwaasa woolupa vitthu epo, rooho zenu zahuzunikha.
JOH 16:7 Miiyo kiniwuuzani haakhi yoori ena fwayita khwa mweeyo miiyo olawa, maana amana kihilawi, Namalipisela khanteela ota, ila amana kilawa, kintta omperekha.
JOH 16:8 Ye amana ata onteela owaakhitiri atthu a olumwenku monkoni wa twampi, wa shariya na ophuka:
JOH 16:9 khwa twampi, mwaasa wa ohikikhupali miiyo;
JOH 16:10 khwa shariya, maana kineetta wa Paapa, khamwinteela okoona theenya;
JOH 16:11 khwa ophuka, maana mfwalume wa voolumwenku apha aphukiwa.
JOH 16:12 Kinaaye nalelo vitthu zawaatta za owuuzani, ila nasaapi eti mweeyo khamwinteela ovilela.
JOH 16:13 Ila amana Rooho ya khweele eta, ye enttela wuusomisani khweele yooshi mweeyo. Ye kinteela ojilupa, ila enttela olupa zooshi esiiliyeeyo na owuuzani mweeyo vitthu zinttelaaye orettikhana.
JOH 16:14 Ye enteela okisifu, maana enteela opokherela etile yiiyiye yaka na owuuzani mweeyo.
JOH 16:15 Yooshi Paapa ariinaaye ti yaka, tiito kilupiyeeyo yoori Rooho Ttakatthiifu epokheraka etile yiiyiye yaka na owuuzani mweeyo.
JOH 16:16 Khwa wakathi vattitthiiru khamwinteela okoona, ila khwa wakathi vattitthiiru theenya mwinteela okoona opheya.”
JOH 16:17 Anakhiyoni awe khuhiweeleyi khusala oozelana yoori: “Khwa mattakhuzi apo anlupaaye araka: ‘Wakathi vattitthiiru khamwinteela okoona; wakathi vattitthiiru mwinteela okoona opheya.’ Theenya onri: ‘Maana kineetta wa Paapa.’ Onri niini?”
JOH 16:18 Aphano khuuzelana theenya yoori: “Khwa wakathi vattitthiiru enlupa niini? Khinneleya etthu ye anlupaaye.”
JOH 16:19 Ajuwiyeevo Yinsa yoori aari otakha omuuzela, monkoni wa mattakhuzi apale, ye khuwooza yoori: “Mweeyo mwintta wuuzelana monkoni wa mattakhuzi apa kilupiyeeyo yoori: ‘Khwa wakathi vattitthiiru khamwinteela okoona; khwa wakathi vattitthiiru theenya mwinteela okoona opheya'?
JOH 16:20 Miiyo kiniwuuzani khweele yoori mwinteela olila na ojikhupanyisa, ila atthu a olumwenku afurahiye. Mweeyo mwiri oohuzunikha, ila huzuni ya ethiito ezukuluwe yiiye furaha.
JOH 16:21 Muukha amana atakhaka ompattha mwaana, onoona olwaaza channu mwaasa wa ofiya wakathi awe woohoowa, ila amana ampattha oniiyana furaha, onsahawu olwaaza opule oniyeeyo mwaasa wa ontana mwaana voolumwenku.
JOH 16:22 Zinrettikhana etthiipo khwa mweeyo: opu wakathi wa huzuni khwa mweeyo, ila miiyo kinteela owoonani swaafu kiina theenya, na mwinteela ofurahi, na furaha eto khaavo anttelaaye wuulazani.
JOH 16:23 Siikhu yaya eto khamwinteela okuuzela hatha etthu. Miiyo kiniwuuzani khweele yoori, amana mwinvekela etthu Paapa khwa nzina laka miiyo, ye ontta owinkhani.
JOH 16:24 Mpakha nasaapi eti khamwinaveke hatha etthu khwa nzina laka. Mwiveke, mwintta winkhiwa, yoori furaha yenu ekamilikhe.”
JOH 16:25 “Miiyo kiniwuuzani vitthu epo khwa nlikaniso. Onteela ofiya wakathi kihinttelaaye orumeyela mattakhuzi nkhama apo, ila kinteelaaye owuuzani saaneene monkoni wa Paapa.
JOH 16:26 Siikhu yaya eto, mweeyo mwinteela oveka khwa nzina laka na khinlawa ohithajiya miiyo oveka zwaamu yenu mweeyo,
JOH 16:27 Paapa mweenyeweene onuuphetani, maana mweeyo mwinikipheta na mwinkhupalela yoori miiyo kalankha wa Nluku.
JOH 16:28 Kalankha wa Paapa khuta voolumwenku; nakatalikha, kinlaavo voolumwenku kirutele wa Paapa.”
JOH 16:29 Aphano anakhiyoni awe khulupa araka: “Onlupa woosileyavo, woohiiyi khwa milikaniso!
JOH 16:30 Nasaapi eti enneleya yoori onjuwa vitthu zooshi khinihithajiya opuwa ntthu owuuzela, khwa etthiipo nakhupali yoori weeyo walankha wa Nluku.”
JOH 16:31 Yinsa khuwaajipu yoori: “Mwinkhupali nasaapi?
JOH 16:32 Wakathi waattama, weekhweele wafiya, mweeyo mwinttelaaye omwazeya wakhula ntthu alawe owawe, mwikilikhe otthome. Ila akiri otthome, maana Paapa ona miiyo.
JOH 16:33 Miiyo kawuuzani vitthu epi yoori mwiiyane heeri khwa miiyo. Voolumwenku apha mwinteela wiiyana tafwawuthi; ila mwivilele! Miiyo kashintta olumwenku.”
JOH 17:1 Paata ya Yinsa wiisha olupa vitthu opo, khweekesa otulu na khulompa araka: “Paapa, wafiya wakathi. Onsifu mwanawo, yoori naye mwanawo oosifu.
JOH 17:2 Maana wamwinkha ofwalume khwa anaatamu ooshi, yoori awenkhe ohaayi wa mileele ooshi apale omwinkhiyeeyo.
JOH 17:3 Na ohaayi opo wa mileele pi opu: Oojuwe weeyo, Nluku mmote paasi weekhweele, na Yinsa Al-Masiihu otule omperekhiyeeyo.
JOH 17:4 Miiyo koosifu vathi, kimariselaka khaazi okinkhiyeeyo oretta.
JOH 17:5 Na, nasaapi eti, okisifu oo Paapa, vamote na-weyo khwa siifwa kaarinaaye na-weyo khapulathi olumwenku ohineeyevo.
JOH 17:6 Kawaathoonyeza nzina lawo apale okinkhiyeeyo voolumwenku. Apo aya aari awo; weeyo khukinkha miiyo, na yo anshututela nttakhuzi lawo.
JOH 17:7 Aphano yo anjuwa yoori vitthu zooshi onikinkhaaye zinlankha khwa weeyo.
JOH 17:8 Maana miiyo kawooza mattakhuzi okinkhiyeeyo yo khupokherela, ajuwa yoori khweele miiyo kalankha mmakhono mwawo na khukhupalela yoori weetta okiruma.
JOH 17:9 Miiyo kiniwaavekelela yo. Akiniwaavekelela atthu ooshi a voolumwenku, ila apale okinkhiyeeyo maana pi awo.
JOH 17:10 Zooshi kiriinaazo pi zawo, na zooshi oriinaazo pi zaka. Miiyo kinsifwiwa mwaasa wa yo.
JOH 17:11 Nasaapi eti akinteela wiikhala voolumwenku ila yo ari voolumwenku, maana miiyo kineetta okho oriiwo weeyo. Paapa woottakatthifu, oweenanele khwa nzina lawo, nzina okinkhiyeeyo, yoori yo eeye vamote nkhama niiyiyeezo fweeyo.
JOH 17:12 Wakathi kaari vamote na-yo voolumwenku, miiyo kaaweenaneliye na khuwaathokorela khwa owahi wa nzina lawo, nzina nttinttho okinkhiyeeyo. Kaaweenaneliye na khuhiivo mmote aashikhiyeeyo, woohiiyi otule atthomeliweeyo waashikha yoori epile zilupiyeezo zawaatikhiwa ttakatthiifu zirettikhane.
JOH 17:13 Ila nasaapi eti kintta okho oriiwo weeyo, kinlupa mattakhuzi apo nalelo kiri voolumwenku, yoori yo eeyane furaha yaka yookamilikha.
JOH 17:14 Miiyo kawinkha nttakhuzi lawo, atthu a voolumwenku khwiiphiiriwa ti yo, maana yo khahiyo a voolumwenku, nkhama etthiipi miiyo kihiiyeeni.
JOH 17:15 Akinuuvekela yoori owaalazevo voolumwenku, ila oweenanele khwa ntakhali.
JOH 17:16 Yo khahi a voolumwenku nkhama etthiipo miiyo kihiiyeeni.
JOH 17:17 Owaattakatthise na haakhi; nttakhuzi lawo haakhi.
JOH 17:18 Nkhama etthiipo weeyo okirumiyeezo miiyo voolumwenku, na miiyo kawaaruma voolumwenku.
JOH 17:19 Khwa zwaamu yaya kinjittakatthisa miiyo, yoori na-yo attakatthe khwa haakhi.
JOH 17:20 Akiniwaavekelela apa ottho paasi, ila na apale anteelaaye okikhupali miiyo khwa nttakhuzi laya yo,
JOH 17:21 yoori ooshi eeye amote, nkhama etthiipo niriizo miiyo na weeyo, na-yo ti eeye khwa fweeyo, yoori atthu a voolumwenku akhupali yoori weeyo weetta okiruma.
JOH 17:22 Miiyo kawinkha siifwa etile weeyo okinkhiyeeyo, yoori yo eeye amote nkhama fweeyo niiyiyeeyo amote.
JOH 17:23 Miiyo khwa yo na weeyo khwa miiyo. Khwa nanna ethiito osiilana waya onttela wiiya khaamili, yoori atthu a voolumwenku ajuwe yoori weeyo ti okirumiyeeyo, na yoori oniwaapheta nkhama etthiipo onikiphetaazo miiyo.
JOH 17:24 Paapa, niiya yaka ti yoori attaapho kiriivo miiyo na-yo eeye attaapho ooshi apale okinkhiyeeyo, yoori oone siifwa okinkhiyeeyo, maana wakipheta khapulathi olumwenku ohinompiwe.
JOH 17:25 Paapa wa shariya, atthu a olumwenku khanuujuwa, ila miiyo kinuujuwa; na apa okinkhiyeeyo anjuwa yoori weeyo weetta okiruma.
JOH 17:26 Miiyo kawaajuwisa nzina lawo, na nalelo kinvira kiwaajuwisaka, yoori pheta etile okiphetaniyeeyo yiiye vamote na-yo, na miiyo kiiye vamote na-yo.”
JOH 18:1 Paata ya Yinsa wiisha olompa, khulankha na anakhiyoni awe khulokhela kaapu ya nttapo la Kedroni. Waariwo woorotha, ye khweetta ottuukho na anakhiyoni awe.
JOH 18:2 Yuuda namazukuluwela aari ojuwa ohali okhule, maana Yinsa swaafu zinkizene aari okusanyeyaka ottuukho na anakhiyoni awe.
JOH 18:3 Aphano Yuuda khuthuula khuntti ya anajanka khweetta ottuukho na mawaziri akina aya arumiweeyo pi mahaakhimu a tiini na mafwarizeewu, athuuliye vimwasikhelo, na zuuma za nvittha.
JOH 18:4 Yinsa, ajuwaka niini yaari weettelaaye orettikhana khwa ye, khuweettela khuwoozela yoori: “Mwinimweekesa paani?”
JOH 18:5 Yo khujipu: “Yinsa, wa Nazareeti!” Aphano ye khuwooza yoori: “Ti-miyo.” Yuuda namazukuluwela, ti aariina atthu apale.
JOH 18:6 Wakathi Yinsa alupiyeevo yoori “ti-miyo,” yo etta osusa khukwela vathi.
JOH 18:7 Yinsa khuwoozela opheya yoori: “Mwinimweekesa paani?” Yo khujipu: “Yinsa wa Nazareeti!”
JOH 18:8 Yinsa khuwooza yoori: “Miiyo kawuuzani yoori ti-miyo. Nkhama mwinikeekesa miiyo, mwiwaalikhe apa alawe.”
JOH 18:9 Yinsa aalupiye toowo yoori eretteye etile aalupiyeeyo rakuzeene yoori: “Paapa, ooshi apale okinkhiyeeyo khakaashikheeni hatha mmote.”
JOH 18:10 Aphano Simawu Pheeturu khusarula phanka, khunshija karumeya mmote wa haakhimu nwulu wa tiini, nshiilo lawe la nkhono nlume. Nzina lawe karumeya aya otule laari Maliko.
JOH 18:11 Ila Yinsa khumuuza Pheeturu yoori: “Opwehe phanka yawo mmufukho mwawo! Niri akinteela onywela jiikira akinkhiyeeyo Paapa?”
JOH 18:12 Elottelanaka khuntti etile ya anajanka, namalokozela aya na anamweekesela wa mayaahuuti khunkhola Yinsa na khunfuka.
JOH 18:13 Omwanzweene khumweettana wa Anaasi, nkhwewe Kayifwa, aari haakhimu nwulu wa tiini mwaakha aya opule.
JOH 18:14 Ti othuuto awooziyeeyo mayaahuuti yoori yaari yooshapweya ntthu mmote owaafwela atthu ooshi.
JOH 18:15 Simawu Pheeturu na nakhiyoni nkina eetta onlottelela Yinsa. Mwaasa wa yoori nakhiyoni oto aari ojuwanana haakhimu nwulu wa tiini, ye awahiye ofiya vaje wa nyuupa ya haakhimu nwulu wa tiini,
JOH 18:16 ila Pheeturu aasaliye anwejaka othetekele wa nlako. Nakhiyoni otule nkina, aari ojuwananaye haakhimu nwulu wa tiini, khusaruwa, khulawa khuttakhulana nakhinzi otule aari weekeselaaye nlako khunlikha Pheeturu ovira.
JOH 18:17 Aphano njaazi otule aari weekeselaaye milako, khumuuzela Pheeturu yoori: “Weeyo khahi ommote wa anakhiyoni wa mwinyi otu?” Ye khujipu araka: “Akiiyo!”
JOH 18:18 Mwaasa wa ozizima, akarumeya na anamweekesela khusikhanyela moottho khusala oottha. Pheeturu khweemela attaapho na ye, khusala oottha.
JOH 18:19 Aphano, haakhimu nwulu wa tiini khumuuzela Yinsa monkoni wa anakhiyoni awe na masomi awe.
JOH 18:20 Yinsa khujipu araka: “Miiyo kawooza atthu a voolumwenku woosileyavo saaneene, na kaari osomisa nsinakooka mpakha Nnyupa Woosifwiwamo, nttumpho aari othukumanaamu mayaahuuti. Khina etthu kilupiyeeyo sirini.
JOH 18:21 Khi oniikuzelelani? Owoozele apale akisiiliyeeyo, anjuwa saaneene vitthu kilupiyeeyo.”
JOH 18:22 Wakathi Yinsa alupiyeevo toowo, namweekesela mmote amwaattamiyeeyo khumpiya omaasho, araka: “Haakhimu nwulu wa tiini onjipwiwa etthiipo?”
JOH 18:23 Yinsa khunjipu yoori: “Nkhama kajipu etthu yootakhala, olupe yootakhala, ila nkhama kattakhula haakhi, khi mwakipiyelani?”
JOH 18:24 Aphano, Anaasi khumperekha Yinsa wa Kayifwa haakhimu nwulu wa tiini ari woofukiwa.
JOH 18:25 Pheeturu nalelo aari oretta eettaka woottha moottho. Aphano khuuzeliwa yoori: “Weeyo khahi mmote wa anakhiyoni a mwinyi otu?” Ye khukhana araka: “Miiyo akiyiiyo.”
JOH 18:26 Elottelanaka, karumeya wa haakhimu nwulu wa tiini, jaama mmote wa otule Pheeturu anshijiyeeyo nshiilo, khumuuza yoori: “Miiyo kaawooniye nwoorotha orina othuuto!”
JOH 18:27 Pheeturu khurutela theenya okhana. Wakathi otthuupo likukhuwi khwiikha.
JOH 18:28 Nawiisha khuthuuliwawo Yinsa wa Kayifwa khulawaniwa nyuupa khuulu ya nsatoro. Yaari supuyeene. Anamalokozela a mayaahuuti khuhivirimo nnyupa mphule, aari ontakha yoori ehiwaalawe twahara, yoori awahi onja Paashikowa.
JOH 18:29 Aphano Pilaatu khusaruwa olawa ottakhulana yo na owoozela yoori: “Niini mwininlupezaye ntthu otu?”
JOH 18:30 Yo khujipu yoori: “Eriwaka khaari oretta vitthu zootakhala khanaari wuutisela weeyo.”
JOH 18:31 Pilaatu khuwaajipu yoori: “Mwinthuule mwilawe mwamphuke khwa nanna enlupaazo kano zenu.” Aphano mayaahuuti khujipu yoori: “Enikhattaziwa fweeyo omuula ntthu.”
JOH 18:32 Epo zaarettikhaniye toowo yoori emarisele mattakhuzi apale Yinsa aalupiyeeyo, wakathi aari ottakhulaavo monkoni wa nanna aari weettelaazo ofwa.
JOH 18:33 Pilaatu khurutela nnyupa khuulu ya nsatoro, khunkhuwela Yinsa khumuuzela yoori: “Weeyo o mfwalume wa mayaahuuti?”
JOH 18:34 Yinsa khujipu yoori: “Mattakhuzi aya apo onikuuzelaaye pi awo, ama atthu akina ti awuuziyeeyo monkoni wa miiyo?”
JOH 18:35 Pilaatu khunjipu yoori: “Miiyo ki yaahuuti? Atthu awo na mahaakhimu a tiini ti akitiseeliyeeyo weeyo. Niini orettiyeeyo?”
JOH 18:36 Yinsa khujipu yoori: “Ofwalume aka khayi wa voolumwenku apha! Eriwaka ofwalume aka waari wa voolumwenku apha, akarumeya aka eetta wuumanana mayaahuuti awaakhattazaka okikhola, ila wa ekhweele ofwalume aka khahiyo wa voolumwenku attaapha.”
JOH 18:37 Aphano Pilaatu khulupa yoori: “Khupe weeyo o mfwalume.” Yinsa khunjipu yoori: “Weeyo ti onlupaaye yoori ki mfwalume. Miiyo kavokoleliwa ethiito na ti ethiito ekitaniyeeyo voolumwenku, yoori kite kilawele oshaahiti wa haakhi. Wakhula otule eeyiye wa haakhi onsiila huula yaka.”
JOH 18:38 Pilaatu khumuuzela yoori: “Haakhi niini?” Noolupa toowo khulankha opheya khulawa aphale aariivo mayaahuuti khuwooza yoori: “Miiyo akinimoonana hatha nlattu.
JOH 18:39 Ila khwa zowera yenu mweeyo, miiyo kintta ontaphula napherezu mmote mwaasa wa ofiya wakathi wa Paashikowa. Mwintakha yoori miiyo kintaphule mfwalume wa mayaahuuti?”
JOH 18:40 Yo khunyakula ajipwaka yoori: “Wala, ye wala! Ninintakha Baraba.” Ila Baraba aari namahusuti.
JOH 19:1 Aphano Pilaatu khuruma ojaphiwa Yinsa.
JOH 19:2 Anajanka khuvaasha khaara ya miiwa khunwalisa mmwishwa. Na khunwalisa ajapi yookhuttuwa.
JOH 19:3 Ansuselaka amuuzaka yoori: “Mfwalume wa mayaahuuti, otulu!” Na khusala ampiya omaasho wawe.
JOH 19:4 Swaafu kiina Pilaatu khulankha khuwooza mayaahuuti yoori: “Moone! Miiyo kinuutiselani mweeyo yoori mwijuwe yoori miiyo akimoonaneeni hatha nlattu.”
JOH 19:5 Wakathi atiisiweeyo vaje awaliye khaara ya miiwa, na ajapi yookhuttuwa, Pilaatu khuwooza yoori: “Mmoone mwinyi otule, otu ari apha!”
JOH 19:6 Wakathi amooniyeevo Yinsa mahaakhimu a tiini na anamweekesela, khusala anyakula alupaka yoori: “Akhomeliwe! Akhomeliwe!” Ila Pilaatu khujipu yoori: “Mwinthuule mweeyo-ena mwankhomele, miiyo akinimoonana hatha nlattu.”
JOH 19:7 Yo khujipu yoori: “Fweeyo ninaaye kano, kano etthiipo enlupa yoori ooliwe maana onjilupeza yoori Mwaana wa Nluku.”
JOH 19:8 Paata ya osiila toowo, Pilaatu khutepa woova.
JOH 19:9 Khurutela nyuupa khuulu ya nsatoro, khumuuzela Yinsa yoori: “Weeyo owa vayi?” Ila Yinsa khuhinjipu.
JOH 19:10 Aphano, Pilaatu khumuuza yoori: “Khunikijipu? Khunjuwa yoori miiyo kinaaye owahi wa wuutaphula ama wuukhomela?”
JOH 19:11 Yinsa khunjipu yoori: “Weeyo khawaari wiiyana hatha owahi khwa miiyo, eriwaka khawenkhiwe otulu. Ti eto otule ootiseliyeeyo Miiyo ona paathuli ya twampi yooziti.”
JOH 19:12 Waaza wakathi otthuupule Pilaatu khusala atakha ontaphula Yinsa, ila mayaahuuti khusala anyakula araka: “Amana onlikha Mwinyi oto ojitatha, khuniiya swaahipu wa Seezari. Wakhula otule anjilupanaaye ofwalume oniiya muumani wa Seezari!”
JOH 19:13 Pilaatu noosiila toowo, khunsarulela Yinsa vaje, khwiikhala vakhukulu ya namaphuka puuro yaari wiitthiwaaye ‘Eshotthelo ya mawe’, khwa luuka ya meepereewu enriwa ‘Kabata’.
JOH 19:14 Yaari payina ya saasiitha, yaari Siikhu ya Ojilokotthela, maana yaari sumana ya njampo la Paashikowa. Aphano Pilaatu khuwooza mayaahuuti araka: “Mwimoone, otu ari apha Mfwalume enu!”
JOH 19:15 Ila yo khusala anyakula araka: “Onsarulele oje! Onsarulele oje! Akhomeliwe!” Pilaatu khuwoozela yoori: “Kinkhomele mfwalume enu?” Mahaakhimu a tiini khujipu araka: “Khanina mfwalume fweeyo woohiiyi Seezari!”
JOH 19:16 Aphano Pilaatu khunthuula Yinsa khuwenkha anajanka yoori ankhomele, yo khunthuula.
JOH 19:17 Yinsa khusaruwa attikhiwe nsalapa awe, khusala alawaniwa puuro yaari wiitthiwaaye Kalavaariyu, khwa luuka ya meepereewu yaari wiitthiwa Kolokoota,
JOH 19:18 attaapho akhomeliweevo ye na atthu awiri, wakhula mmote mpavu mwawe, ye khwiiya vakatthi.
JOH 19:19 Pilaatu khwaatikha lipawu khuthomeya pontha wa nsalapa; aatikhiyevo yoori: “YINSA WA NAZAREETI, MFWALUME WA MAYAAHUUTI!
JOH 19:20 Mayaahuuti enkeene aasomiye lipawu ntthile, maana puuro etile Yinsa akhomeliweeyo yaari kharipu na va sitati, lipawu ntthile laatikhiwe luuka ya meepereewu, ya elatiinu na ekereeku.
JOH 19:21 Mahaakhimu a tiini aari omuuza Pilaatu yoori: “Ohaatikhe yoori: ‘Mfwalume wa Mayaahuuti’, waatikhe etile aalupiyeeyo yoori: ‘Miiyo ki Mfwalume wa mayaahuuti.”
JOH 19:22 Pilaatu khujipu yoori: “Etile kaatikhiyeeyo kaatikha.”
JOH 19:23 Anajanka paata ya onkhomela, khuthuula kuwo zawe, khwaawanya phantte nne yoori wakhula najanka apatthe phantte moote; na khuthuula ajapi yawe theenya. Ila ajapi yaari yoohisoniwi waaza vathi mpakha vatulu.
JOH 19:24 Yo khulupa yoori: “Nihivarule, ila neekese nasipu nimoone anttelaaye opattha.” Epo zaarettikhaniye yoori emarisele zawaatikhiwa ttakatthiifu enlupaaye yoori: “Aawanya kuwo zaka, na khweekesa nasipu khwa ajapi yaka. Na pi etthiipo anajanka aarettiyeezo.”
JOH 19:25 Kharipu ya vansalapa wa Yinsa aarivo mamaawe, na ttwiiye mamaawe, na Mariyamu muukha wa Kolopa, na Mariyamu Mataleena.
JOH 19:26 Yinsa noomoona mamaawe ari vamote na nakhiyoni otule wompheta wawe, khumuuza mamaawe yoori: “Muukha mwanawo oto,”
JOH 19:27 na khumuuza nakhiyoni awe yoori: “Omoone, mamaawo oto.” Waaza wakathi otthuupule, nakhiyoni otule khuretteya wiiya jaama.
JOH 19:28 Paata ya Yinsa woona yoori zooshi zintta omariseleya, khushankela yoori zirettikhane epi zaari olupaazo zawaatikhiwa ttakatthiifu yoori: “Lakikhola nnyottha!”
JOH 19:29 Yaarivo suupha aarimo viinyu yoonyuunya khuthuuliwa khunywisiwa etthiiwe va shiponja yoofukeleliwa va tteketthe ya hisoopo na khuweziwa mpakha omilomo wa Yinsa.
JOH 19:30 Yinsa wakathi anywiiyeevo maati apale oonyuunya khulupa yoori: “Zooshi zamariseliwa”, khwiinamisa eeshwa yawe khwinkhelela rooho yawe.
JOH 19:31 Yaari Siikhu ya Ojilokotthela na Saapatu eti yaari siikhu yootepa wiiya ttakatthiifu. Wiiya khaari otakha yoori mwiili wa Yinsa wiiye vansalapa mpakha Saapatu, mayaahuuti khunvekela Pilaatu yoori arume okakattiwa moolu otule akhomeliweeyo na olaziwavo vansalapa.
JOH 19:32 Khuta anajanka khukakatta moolu a ntthu otule wa waaza aakhomeliweeyo vamote na Yinsa elottelanaka khukakattiwa a otule nkina.
JOH 19:33 Ila noofiyeliwa Yinsa, khooniwa yoori ye aari woofwa, khuhikakattiwi moolu awe.
JOH 19:34 Ila najanka mmote khukuphula pavu ya Yinsa na nkokhi, nasaapiru khusala esaruwa taamu na maati.
JOH 19:35 Otule oniyeeyo vitthu zaya epo alawela oshaahiti, na oshaahiti awe pi wookhweele. Ye onjuwa yoori onlupa haakhi, na onlaza oshaahiti yoori na-mweyo mwikhupali.
JOH 19:36 Vitthu epo zarettikhana yoori emariseleye epile enlupaazo zawaatikhiwa ttakatthiifu yoori: “Hatha likhonkolo lawe limote khalinteela opwecheya,”
JOH 19:37 na nkhama theenya enlupaazo zawaatikhiwa phantte kiina yoori: “Yo anttela omoona othuuto anshomiyeeyo.”
JOH 19:38 Paata ya toole Yuusufu wa sitati ya Arimateeya, khunvekela Pilaatu mwiili wa Yinsa. Yuusufu aari nakhiyoni wa Yinsa, ila wa sirini, maana aari owoova mayaahuuti. Pilaatu khwinkha ruhusa, na Yuusufu khulawa na khulazavo mwiili opule wa Yinsa.
JOH 19:39 Ye aaperekhiwe ti Nikoteemu, otule alawiyeeyo ottakhulana Yinsa osikhu. Nikoteemu aathuliye mafuttha oonukhela oophakanyaniwa ela yaari ofiyaaye etthu ya miphimo talaathiini na thaanu.
JOH 19:40 Khuthuula mwiili wa Yinsa, khuputaputela va joora yoottukuntteliwa ofu woonukhela, nkhama anrettaazo mayaahuuti va ozikha.
JOH 19:41 Vahali akhomeliwevo Yinsa waariwo woorotha, waariina khapuri pheeya, yoohizikhiwivo hatha ntthu.
JOH 19:42 Maana yaari osaleela ofiya Siikhu ya Ojilokotthela wa mayaahuuti, na khapuri yaari kharipu, khuzikhiwa attaapho.
JOH 20:1 Siikhu ya mwanzo ya sumana Jumwaa-phiili supuyeene, Mariyamu Mataleena khulawa ovilalo, khoona liwe ntthile laattiyelaniweeyo khapuri lilaziwevo.
JOH 20:2 Aphano khutthira khulawa mpakha vahali aariivo Simawu Pheeturu na nakhiyoni nkina, otule Yinsa aari omphetaaye, khuwooza yoori: “Mbwana alaziwamo nkhapuri, khanijuweeni vahali atthiiweevo!”
JOH 20:3 Pheeturu khulankha na nakhiyoni nkina khulawa mpakha okhapuri.
JOH 20:4 Oowiiri khulankha eettaka otthira, ila otu nkina khutthira channu khunziti Pheeturu, khwiiya mwanzo woofiya ovilalo.
JOH 20:5 Khwiinama khutturumelamo, khoona joora, ila khuhivirimo nkhapuri mphule.
JOH 20:6 Aphano, Simawu Pheeturu otule aari onlottaaye, khufiya khuvira nkhapuri mphule na ye khoona joora etile,
JOH 20:7 na joora etile yaari veeshwa wa Yinsa, eri yooputaputeliwa eri phantte kiina.
JOH 20:8 Aphano naye nakhiyoni otule aari mwanzo woofiya khuvira nkhapuri nttumphule, khoona na khukhupali.
JOH 20:9 Yo nalelo zaari ehinaaweeleye zawaatikhiwa ttakatthiifu, zaari olupaaye yoori yaari ohithajiya Yinsa osisimuwa muufwa.
JOH 20:10 Anakhiyoni apale khurutela onti theenya.
JOH 20:11 Ila Mariyamu, khusala nalelo ari vanlako wa khapuri, eettaka olila, khwiinama khuthurumela nkatthi.
JOH 20:12 Khoona malayikha mawiri awaliye kuwo zoolakala, eekhaliye aphale waariivo mwiili wa Yinsa, mmote ovishwa nkina omoolu.
JOH 20:13 Aphano malayikha apale khumuuzela yoori: “Weeyo muukha, onlila-ni?” Ye khujipu araka: “Yo anthuula Mbwana aka khulawana safwari zaya na akinjuwa vahali antthiiyeevo.”
JOH 20:14 Paata ya olupa toowo, khuzukuluwa khumoona Yinsa eemeliye, ila khuhinjuwi yoori ti Yinsa.
JOH 20:15 Aphano Yinsa khumuuzela yoori: “Weeyo, muukha onlila-ni? Onimweekesa paani?” Ye khusala oopuwela yoori aari namalimela woorotha, khunjipu yoori: “Mwinyi, nkhama mweetta onlazamu, nkakuuzeni vahali mwintthiyeevo, miiyo kilawe kanthuule.”
JOH 20:16 Yinsa khuri: “Mariyamu!” Ye khuzukuluwa, khulupa khwa luuka ya meepereewu yoori: “Raboni!” (Eriina maana la Mwaaliimu).
JOH 20:17 Yinsa khulupa yoori: “Ohikikholele, maana nalelo akinarutele wa Paapa. Olawe vakatthi wa attwiizaku wawooze yoori: ‘Miiyo kintta orutela wa Paapa na Papeenu mweeyo, wa Nluku aka na Nluku wenu mweeyo.”
JOH 20:18 Aphano Mariyamu Mataleena khulawa khuwooza anakhiyoni a Yinsa yoori: “Kamoona Mbwana!” Na khuwooza zooshi epile oziweeyo ti Yinsa.
JOH 20:19 Njuwa-looveva siikhu ethiitile, siikhu ya mwanzo ya sumana, jumwaa-phiili, anakhiyoni akhusanyeyiye milako ziri zoofukiwa, mwaasa wa owoova mayaahuuti, Yinsa khuvira khweemela vakatthi vaya khuri: “Heeri yiiye vamote na-mweyo!”
JOH 20:20 Alupiyeevo vitthu epile khuwaathonyeza makhono awe na pavu yawe. Anakhiyoni apale khwiiya ofurahi paata ya omoona Mbwana.
JOH 20:21 Yinsa khulupa theenya yoori: “Heeri yiiye vamote na-mweyo! Nkhama etthiipo Paapa akirumiyeeyo, na-miyo kinuurumani mweeyo.”
JOH 20:22 Paata ya olupa toowo khuwaavitelela khuri: “Mwipokhere Rooho Ttakatthiifu.
JOH 20:23 Amana mwiswaamihi twampi za ntthu, twampi zaya epo eniiya zooswamihiwa, ila amana mwihiswaamihi khazinswamihiwa.”
JOH 20:24 Tome, aniitthiwaaye Maphapo, mmote wa anakhiyoni apale khumi na awiri, kaari vamote na anakhiyoni wakathi Yinsa awaapuweleliyeevo.
JOH 20:25 Anakhiyoni apale akina khumuuza yoori: “Namoona Mbwana!” Ila ye khuri: “Miiyo noohooni mmakhono alama za misumari epile, kitthaamo yaala yaka mphule aakhomeliweemo, na kittha nkhono pavu yawe, hatha vattitthiiru akinkhupali!”
JOH 20:26 Paata ya ovira siikhu naane anakhiyoni awe khurutela okusanyeya nttumphule theenya na Tome aarivo. Milako ziri zoofukiwa, Yinsa khuta khweemela vakatthi vaya khuri: “Heeri yiiye vamote na-mweyo!”
JOH 20:27 Aphano Yinsa khumuuza Tome yoori: “Otthe yaala yawo apha, na woone makhono aka, na wookole nkhono awo ottheele pavu yaka. Ohiiye nanhikhupali, ila wiiye namakhupali.”
JOH 20:28 Tome khujipu araka: “Mbwana aka na Nluku aka!”
JOH 20:29 Yinsa khumuuza yoori: “Mwaasa wa okoona, wakhupali? Ooparikhiyiwa pi apale ahooneeni ila khukhupali.”
JOH 20:30 Yinsa khuretta alama za minjuza kiina zinkizene vakatthi wa anakhiyoni zihaatikhiweenimo nkithaapu mphu,
JOH 20:31 ila epi zaatikhiwa yoori mweeyo mwikhupali yoori Yinsa ti Al-Masiihu, Mwaana wa Nluku na yoori amana mwinkhupali mwiiyane ohaayi khwa nzina lawe.
JOH 21:1 Paata ya toowo Yinsa khuwaapuwelela anakhiyoni awe opheya nshini wa ntthatta liniitthiwaaye Tiperiyaati. Ti nanna ye aajithonyeziyeeyo:
JOH 21:2 aari vamote Simawu Pheeturu, Tome aniitthiwaaye Maphapo, Natanayeele wa nti wa Kanaani ya Kalileya, na aana a Zepeteewu na anakhiyoni akina awiri.
JOH 21:3 Simawu Pheeturu khuwooza ashirikha awe yoori: “Kinttela ojiya.” Akinoko aya khulupa yoori: “Fweeyo nintta wuulotta!” Yo khulawa na khweetta mmwaatiya, ila osikhu aya opule khuhipatthi hatha etthu.
JOH 21:4 Ekhunkumu ya lifwajiri Yinsa aarettiye ari vapatari, ila anakhiyoni awe khuhinjuwi.
JOH 21:5 Ye khuwoozela yoori: “Aanaaka, mwapattha swi?” Yo khujipu yoori: “Wala!”
JOH 21:6 Ye khulupa yoori: “Mweeselele ntthavi phantte ya nkhono nlume ya mwaatiya, mwintta opattha.” Yo khweesa, khuhisala awahi ofuttha ntthavi mwaasa wa swi waatta.
JOH 21:7 Nakhiyoni wa Yinsa woophetacha khumuuza Pheeturu yoori: “Oto aya ti Mbwana!” Wakathi Simawu Pheeturu asiiliyeevo elupiwaka yoori aari Mbwana, khuwala juupa, maana eettiye ovula na khujeeselela mmaati.
JOH 21:8 Anakhiyoni akina khuta na mwaatiya, eettaka ofuttha ntthavi liitaaliye swi, aari kiyasi ya phiima miiya asaleela ofiya vapatari.
JOH 21:9 Wakathi afiiyeevo vapatari, khoona vahali waariivo moottho, na swi vatulu a makhala; na erivo phaawu.
JOH 21:10 Aphano Yinsa khuwooza yoori: “Mwitiise swi vattitthiiru etthiipo mwijiyiyeeyo nasaapi.”
JOH 21:11 Aphano Simawu Pheeturu khuwela mmwaatiya khupurulela ntthavi vathi. Liri lawiitaala swi miiya na hamusiini na ttatthu khuluzeene, ila ntthavi khuhivaruwi.
JOH 21:12 Aphano Yinsa khuwooza yoori: “Mwite mwije!” Khuhiivo hatha nakhiyoni awe mmote aminyaliyeeyo khumuuzela yoori: “Weeyo aya o paani?” Maana anjuwiye yoori otu ti Mbwana.
JOH 21:13 Yinsa khuwaattama khuthuula phaawu, khuwenkha na khuretta etthiipo khwa swi.
JOH 21:14 Eto yaari swaafu ya ttaatthu Yinsa ajithoonyezaka vakatthi wa anakhiyoni awe, paata ya osisimuwa nkhapuri.
JOH 21:15 Paata ya wiisha oja Yinsa khumuuzela Simawu yoori: “Simawu, mwaana wa Yaahaya, onikipheta zayita apa?” Ye khuri: “Aa Mbwana, hatha na-weyo onjuwa yoori miiyo kinuupheta.” Yinsa khumuuza yoori: “Ojise pwittipwitthi zaka.”
JOH 21:16 Khumuuzela theenya swaafu ya phiiri yoori: “Simawu, mwaana wa Yaahaya, weeyo onikipheta?” Ye khujipu yoori: “Aa Mbwana, hatha na-weyo onjuwa yoori miiyo kinuupheta.” Yinsa khumuuza yoori: “Oshuke pwittipwitthi zaka.”
JOH 21:17 Khumuuzela theenya swaafu yattaatthu, yoori: “Simawu, mwaana wa Yaahaya, weeyo onikipheta?” Pheeturu khunyoonyeya mwaasa wa Yinsa omuuzela swaafu ya ttaatthu, yoori: “Weeyo onikipheta?” Ye khuri: “Mbwana, weeyo onjuwa vitthu zooshi na onjuwa yoori miiyo kinuupheta.” Yinsa khumuuza yoori: “Ojise pwittipwitthi zaka.
JOH 21:18 Miiyo kiniwuuza khweele yoori, wakathi opule waari shaapu, weetta ojiwalisa, khweetta wakhula aphale ontakhaavo, ila amana wuuluvala onteela owookolela makhono, azaawo oothuule aweettane ohali ohintakhaawo weettawo.”
JOH 21:19 Yinsa aalupiye toowo yoori athoonyeze nanna ya ofwa Pheeturu aari weettelaaye onsifwana Nluku. Nawiisha, khumuuza yoori: “Okilotte!”
JOH 21:20 Pheeturu azukuluwiyeevo khumoona yoori nakhiyoni otule Yinsa aari omphetachaaye etta owaalotta. Oto ti aari mpavu wa Yinsa wakathi wa etthu-yoojiwa ya osikhu, na ti othuuto eenameliyeeyo vamweyo wa Yinsa khumuuzela yoori: “Mbwana paani anttelaaye wuuzukuluwela?”
JOH 21:21 Wakathi Pheeturu amooniyeevo khuri: “Mbwana, khi otu?”
JOH 21:22 Khunjipu Yinsa yoori: “Hatha nkhama miiyo katakha yoori ye eeye haayi mpakha miiyo oruti, weeyo enuujali niini? Ila weeyo okilotte miiyo.”
JOH 21:23 Khwa etthiipo khumwazeyela vakatthi wa attwi yoori nakhiyoni otule khaari oteela ofwa. Ila Yinsa khaalupiye yoori khaari oteela ofwa; aalupiye yoori: “Nkhama miiyo katakha yoori eeye haayi mpakha miiyo oruti, weeyo enuujali niini?”
JOH 21:24 Otu ti nakhiyoni anlazaaye oshaahiti wa vitthu zaya epo na aatikhiyeeyo. Ninjuwa yoori oshaahiti awe pi wookhweele.
JOH 21:25 Yinsa aretta vitthu kiina theenya zawaatta. Eriwaka wakhula moote yeettiye waatikhiwa, kinoona yoori hatha voolumwenku wooshi khayaari wiiyavo puuro zootthiiwavo kithaapu zaari weettelaaye waatikhiwa.
ACT 1:1 Warakha yaka yamwanzo khaatikhiye kiwuuzaka weeyo Tiyoofilu, monkoni wa zooshi epile Yinsa arettiyeezo na anozeliyeezo,
ACT 1:2 mpakha siikhu aweziweevo pinkuuni, paata ya owaanozela khwa owahi wa Rooho Ttakatthiifu atthu apale awaathawuliyeeyo yoori eeye maaswihaapa.
ACT 1:3 Yinsa n'oosisimuwa awaapuweleliye ajithoonyezaka nanna nannazene yoori ti ye entta osisimuwa. Khwiiya vamote na yo mpakha siikhu arupayiini enttaka omoona, opiyana mwaasa na ojama vamote, na attakhulaka vitthu monkoni wa ofwalume wa Nnyizinku.
ACT 1:4 Wakathi aari ojaavo na maaswihaapa awe Yinsa khuwaaza yoori: “Mwihileewo Yeruzaleemu, mwiwejele etile kiwuuziyeenini aahitiyeeyo Paapa.
ACT 1:5 Yaahaya awoosani na maati, ila nkatthi wa siikhu vattitthiiru, mweeyo mwinteela woosiwa na Rooho Ttakatthiifu.”
ACT 1:6 Yo khumuuzela: “Mbwama, wakathi aya pi otthuupo ontelaaye owminkha ofwalume wa Nnyizinku atthu a Ezirayeele?”
ACT 1:7 Yinsa khuwaajipu yoori: “Kahi pantte yenu ojuwa wakathi ama siikhu Paapa attattikhyeevo ofwalume awe.
ACT 1:8 Ila mweeyo mwinteela winkhiwa owahi wa Rooho Ttakatthiifu ewiishukelani, mwinteela wiiya mashahiti aka, waaza Yeruzaleemu na Yudeya yooshi, Samariya mpakha ohali wiisheliyeewo olumwenku.”
ACT 1:9 Paata ya wiisha olupa mattakhuzi apa, khuweziwa pinkuuni, eettaka omweekesesela olawaka khupuwa liwiku khunkutela khuhisala amoona.
ACT 1:10 Yo khusala nalelo ari wookhontola maasho aya enkesaka otulu ye eettaka olawa, khupuwa aluke awiri awaliye kuwo zoolakala,
ACT 1:11 khuwooza yoori: “Mweyo akalileya, otulu mwineekesa-niwo? Yinsa alaziweeyo vakatthi venu khuweziwa pinkuuni onteela oruti khwa nanna etthiipile mwimooniyeezo alawaka.”
ACT 1:12 Aphano maaswihaapa khulankha vamwaako oniitthiwaaye Oluveera oriiyeeyo kharipu na sitati ya Yeruzaleemu.
ACT 1:13 N'oofiya khuwela nyuupa ya vatulu nhali amakiyeemo, maaswihaapa aya apo aari Pheeturu, Yaahaya, Yaakhumpa na Antere; Filiipe, Tome, Paturumeewu na Mateewuzhu; Yaakhumpa mwaana wa Alufayo, Simawu Zelooti na Yuuda mwaana wa Yaakhumpa.
ACT 1:14 Apo khaazi yaya yaari okhusanyeya na olompa wakhula siikhu, na aakha akinaaya vamote na Mariyamu mamaawe Yinsa na atthwiize.
ACT 1:15 Aphano siikhu moote mamuumini miiya na eeshiriini aakusanyeyiye vahali vamote. Pheeturu khulankha khweemela khulupa awoozaka mamuumini ooshi yoori:
ACT 1:16 “Atthwiizaku, zaarina yoorettikhana zooshi epile Rooho Ttakatthiifu alupeyeezo nkatthi ya nttakhuzi la Nnyizinku khwa Daawuuda monkoni ya Yuuda, othuuto awaalokoziyeeyo atthu olawa onkhola Yinsa.
ACT 1:17 Yuuda aya oto aari wa khuntti yetthu, aari oretta phantte ya khaazi ethiiti.
ACT 1:18 Ila mwaasa wa nzurukhu enkhiweeyo khumuuzanyisa Yinsa, nzurukhu aya khuuzanyela nshapa. Aakhweliye mmashapa mwawe nttumpho khufwa. Erukulu yawe khuphwetuwa marupo awe ooshi khumwazeyela vathi.
ACT 1:19 Atthu ooshi a Yeruzaleemu khujuwa. Apho nshapa ntthile khutthajiwa nzina khwa luuka yaya yo la Akelataama: liriina maana a ‘nshapa la taamu’.
ACT 1:20 Nliivuru la Zaburi yaatikhiwamo yoori: ‘Nhali mwawe ethamiwe ahiikhalemo hatha ntthu.’ Khwaatikhiwa theenya yoori ‘khaazi yawe asalane ntthu nkina.’
ACT 1:21 Apho ninthawula ntthu nkina nintthe nkhuntti mwetthu eeya shaahitiwa osisimuwa wa Mbwana Yinsa. Ila ona ya wiiya ntthu aari onilottakaaye mphule naari ovirakamo Yinsa ari haayi,
ACT 1:22 waaza wakathi opule Yaahaya aari woosavo mpakha siikhu Yinsa alaziweevo vakatthi vetthu aweziwaka pinkuuni.”
ACT 1:23 Aphano, khuthoonyiwa atthu awiri: Yuusufu aarina nzina likina la Barisapa, woojuwaniwa wiiya ntthu wa waaminey, na nlume nkina aari wiitthiwaaye Matiiyasi.
ACT 1:24 Nawiisha atthu khulompa araka: “Mbwana, weeyo ti onjuweeyo rooho za atthu ooshi. Khwa atthu apa awiri nintakha onithoonyeze onthawuliyeeyo
ACT 1:25 yoori akhole khaazi ya omaaswihaapa vamote na-fweyo, eti Yuuda ahitakheeni khweetta puuru yaari onsuhaaye.”
ACT 1:26 Paata ya toole khweekesiwa nasipu khusala enthoonya Matiiyasi. Khwa etthiipo ye khuphakanyeya na apale khumi na mmote aasaliiyeyo khwiiya khumi na awiri.
ACT 2:1 Efiyeevo siikhu ya takhiriima amamlottela a Yinsa ooshi aakhusanyeyiye vamote.
ACT 2:2 Nasaapiru khuta huula yoolankha pinkuuni wuupuka nkama pheevo yaari ovumaaye saaneene, khwiitaala nnyupa wooshimo mphule aakusanyeyiyeemo.
ACT 2:3 Khuwaapuwela etthu yaari wuupuwaaye nkhama nlimi la moottho laari waawanyeyaaye khusala linkwela vakhula ntthu veeshwa vawe.
ACT 2:4 Ooshi khwiiya awiitaala Rooho Ttakatthiifu, khwaaza ottakhula luuka pheeya khwa nanna wakhula ntthu Rooho Ttakatthiifu yaari onthoonyezaazo ottakhula.
ACT 2:5 Yeruzaleemu aarivo ayudeya awaatta aari omwaaputwaaye Nnyizinku aalankhiyeeyo khapila zooshi za olumwenku.
ACT 2:6 Ooshi n'oosiila huula etile khwiiya ooshanka. Khukusanyeya vahali vamote maana ooshi aasiiliye ovuma wa huula ya etile, na wakhula ntthu aari osiila khwa luuka yawe.
ACT 2:7 Aari oshankawene etthiipo milomo khuuma khusala olupa yoori: “Atthu apa nttakhulaaye apha ooshi khahi akalileya apa?
ACT 2:8 Khi ensulukhwana toovi fweeyo niwaasiilaka khwa luuka zetthu?
ACT 2:9 Fweeyo nalankha Parithiya, akina alankha Mediiya, akina Elaami, akina Mesopotamiya, akina Yudeya, akina Kapatosiya, akina Pontu na Aasiya,
ACT 2:10 akina alankha Firijiya, akina Pamfiiliya, akina Misuri na pantthe za Liibiya kharipu na Sireeni, na anamathotola alankhiyeeyo Rooma.
ACT 2:11 Waaza mayaahuti mpakha apale eettiyeeyo ntiini ya maya huuti, akereeti na aarapu. Ila nawaasiila khwa luuka zetthu yo alupaka vitthu zootikinisa na khuluzeene za Nnyizinku.
ACT 2:12 Ooshi aari oshankisiwa khuhisala ajuwa hatha etthu yoolupa, khusala oozelana araka: “Maana a vitthu zaya epi niini?”
ACT 2:13 Atthu akina khusala awaatheya maaswihaapa apale owoozaka yoori eetta ohapaliwa.
ACT 2:14 Aphano Pheeturu na ashirikhaawe apale khumi na mmote khulankha khusala owooza atthu yoori: “Maswahipu zaka mayaahuti mpakha mooshi mweeyo mwiniikhalaaye nti wa Yerusaleemu, mwisiileze etthu kintakhaaye olupa:
ACT 2:15 mweeyo mwinoona nkhama atthu apa eettiye ohapaliwa, ila wala khahapaliweeni nkhama mwinaakanyerazo mpakha apha saawuuni ya supu.
ACT 2:16 Vitthu zaya epi zirettikhaniyeeyozo zaalupiwe rakuzeene ti napiya Yowele araka:
ACT 2:17 ‘Nnyizinku alupa yoori: “Siikhu za mwiisho kinteela oweeshushela atthu ooshi Rooho Ttakatthiifu. Aana enu aalume na apa aakha anteela alupa vitthu zinteelaaye orettikhana khwa nzina laka, mashaapu anteela oothoonyeziwa vitthu zootikinisa. Ana khuuluvale anteela wiiyana jozi.
ACT 2:18 Khwa akarumeya aka aalume na aakha, yo kiniweekha Rooho yaka siikhu zaya etthiipo yo anteela olaleya hapari zaka.
ACT 2:19 Kinteela othoonyeza vitthu zootikinisa, kinteelaazo ottha otulu pinkuuni kinteela opuwisa vitthu zootikinisa vathi voolumwenku, zinteela orettikhana minjuza, enteela wiiyavo taamu na moottho mawiku na loosi.
ACT 2:20 Njuwa lithatuwe liiye looripa, mweezi na-ye othatuwe wiiye taamu, epoza enteela orettikhana khapula ehinafiye siikhu khuulu ya siifwa za Nnyizinku.
ACT 2:21 Ila atthu ooshi apale anttelaaye onkhuwela Nnyizinku yoori awaawuuni antta wuusurukha!”’
ACT 2:22 Mweeyo mwa atthu a Ezirayeele mwisiileze mattakhuzi apa: Yinsa wa Nazareeti tu wookhupaliwa ti Nnyizinku. Ye Nnyizinku oretta minjuza za waatta vakatthi venu mweeyo na alama kiina zaya khwa ye.
ACT 2:23 Othuuto Nnyizinku awinkhiyeenini mweeyo arina shawurina, ila mweeyo khkusanyeya na atthu ootakhala rooho khunkhomela vansalapa khumuula.
ACT 2:24 Nnyizinku othuuto ansisimula muufwa na khunsinttisa owahi woofwa maana yaari etthu yooronyiwa ye oshintti ti oofwa.
ACT 2:25 Daawuuda anlopeziye yoori: ‘Wakhula wakathi kaari omoona Mbwana ari omaasho waka maana ye ori nkhona-nlume aka, yoori kihiveveluwe.
ACT 2:26 T'iito rooho yaka yoofurahi na nlimi laka lininttitthimisa; miili aka onteela onvumula orina nroromelo,
ACT 2:27 maana khunteela olikha nafusi yaka nkhapuri khunteela okanswi, khukhupaleli na khunteela okhupalela yoori Nttakatthiifu awo oone vitthu zootakhala nkhapuri.
ACT 2:28 Wakinozela tarikhi ya ohaayi, onteela okiitaaza furaha amana kiiya vamote na-weyo.’
ACT 2:29 Pheeturu khuri: “Attwizaka, mwikiwejele kiwuuzeni saana saana monkoni wa papeetthu Daawuuda yoori ye afwa khuzikhiwa khapuri yawe eri mmuti mwetthu nttmphu mpakha leelo eti.
ACT 2:30 Ye aari napiyu na aari ojuwa yoori Nnyizinky ahitiye yoori vakatthi wa peewu yawe aari onteela opuwavo mfwalume ari oteelaaye osalana puuro yawe ya ofwalume.
ACT 2:31 Daawuuda aari ojuwa etthu Nnyizinkku aari weettelaaye oretta t'iito aari aalupiyeeyo monkoni wa osisimuwa wa Al-Masiihu othuuto Nnyizinku ahanlikhiyeeyo nkhapuri, wala mwiili awe ophomowa.
ACT 2:32 Nnyizinku ansisimula Yinsa, fweeyo naamashaahiti a vitthu zaya epo.
ACT 2:33 Khuweziwa olawa wiikhala nkhono-nlume wa Nnyizinku, ye enkhiwa Rooho Ttakatthiifu ti Papaawe nkhama etthiipile aamwahitiyeeyo apha eetta oniitthelela t'iithiiti mwinoonaaye na mwinsiilaaye enasaapi eti.
ACT 2:34 Daawuuda khaweziweeni pinkuuni, ila atukhunu alupaka yoori: ‘Mbwana amuuza Mbwanaaka yoori: “Wiikhale pantteya nkhono weelume aka,
ACT 2:35 mpakha miiyo kiwaattha maatuwi awo awaaluwatthele.”’
ACT 2:36 Aphano, atthu ooshi a Ezirayeele ana yoojuwa yoori: Yinsa, othuuto mweeyo mwankhameliyeeyo, Nnyizinku omwinkha wiiya Mbwana na wiiya Al-Masiihu.
ACT 2:37 Paata yoosiila mattakhuzi apale, khuwaapattha kupari nroho mwaya, khumuuzela Pheeturu na maaswihaapa apale akinaaya yoori nkahayani: “Attwiizetthu, apho niri je?”
ACT 2:38 Pheeturu khawaajipu araka: “Mwithupwiye na wakhula mmote wa mweeyo oosiwe khwa nzina la Yinsa Al-Masiihu yoori mwipatthe nswammaha wa twampi zenu. Mwintta opokhera tthuvo ya Rooho Ttakatthiifu.
ACT 2:39 Ahiti yaya eto ti yenu, mweeyo mpakha aaneenu na atthu akina awoolepawo: khwa apale ooshi Mbwaneetthu Nnyizinku awaakhuweliyeeyo.”
ACT 2:40 Khwa mattakhuzi menkeene Pheeturu khusala awaalipisela atthu na awaatumenela araka;” Mwijuusuru vakatthi ya khapila ya atthu apa otakhala rooho.”
ACT 2:41 Atthu awaatta khukhupalela tafusiiri ya Pheeturu, khujilakelela olawa woosiwa. Siikhu yaya etile atthu eekezeleyiye khwiiya alufu ttatthu.
ACT 2:42 Yo aari ooshututela masomi apale oosomisiwa ti maaswihaapa aari oosiilana, na okusanyeya oja vamote na olompa vamote.
ACT 2:43 Ooshi aarina woova nwulweene, maana Nnyizinku eetta ovira aretttaka vitthu zootikinisa na minjuza zawaatta khwa khaazi ya maaswihaapa apale.
ACT 2:44 Atthu ooshi apale ankhupaliyeeyo Yinsa aarina osiilana wookhomaala saaneene, wakhula etile yaari opattikhanaaye eetta omeelana.
ACT 2:45 Akina aari wuuzanyisa mashapa aya na vitthu zaya: onzurukhu aya n'ootiisa oteela owaamela azaaya, wakhula ntthu aari winkhiwa khwa khiiwa ya othowiwa wawe.
ACT 2:46 Yo aazowereliye okusanyeya wakhula siikhu vaje wa Nyuupa ya Nnyizinku na mmawaya na omeyelana phaawu ajaka na furaha khuluyeene na rooho yeemaani,
ACT 2:47 ansifwaka Nnyizinku. Atthu ooshi aari wiiya ootuveliwa phi menttezi aya. Apho Nnyizinku wakhula siikhu aari ovira oweekezelaka atthu ootakha wuusurukha.
ACT 3:1 Siikhu moote Pheeturu na Yaahaya eetta owelela nnyupa woosifwiwamo Nnyizinku wakathi woolompa wakathi mittatthu wa makaaripi.
ACT 3:2 Aarettiye athuuliwe ntthu aavokoliweeyo ari woorakala eettaniwaka vanlako wa nyuupa yoosifwiwamo Nnyizinku, onittheliwaaye Nlako Wooshapweya, yoori asala awaavekela zimoola atthu apale aari oviramo.
ACT 3:3 Amooniyeevo Pheeturu na Yaahaya aviraka nnyupa mphule, khusala awaavekela zimola.
ACT 3:4 Pheeturu na Yaahaya khusala amweekesa saana khulupa yoori; “Oneekese fweeyo!”
ACT 3:5 Mwinyi otule khusala aweekesa woophalevo awejelaka opwekherele etthu ya wenkhiwa pi yo.
ACT 3:6 Pheeturu khulupa yoori: “Akina feeta na tahapu, etthu kiriina ethiito kintta owinkha. Khwa nzina la Yinsa Al-Masiihu Nnazareeti, ettetta!”
ACT 3:7 Khunkhalela nkhono-nlume awe khusala anshashulela yoori alankhe, nasaapiru moolu na khoza zawe khwiiya za wookowa.
ACT 3:8 Mwinyi otule khwiirukha khweemela khwaaza weettetta. Khuvira nnyupa woosifwiwamo Nnyizinku vamote na Pheeturu na Yaahaya, eettataka na wiirukha ansifwaraka Nnyizinku.
ACT 3:9 Wakathi atthu ooshi amooniyeevo eettaka weettetta na ansifwaka Nnyizinku,
ACT 3:10 khunjuwa yoori mwinyi othuutule aari okitirakaaye wiikhala vaNlako Wooshapweya wa nyuupa yoosifwiwamo Nnyizinku khusala alola zimola. Ooshi aya khwiiya ootikinisiwa na oshanka channu wa vitthu zanrettikaneliyeeyo.
ACT 3:11 Wakathi mwinyi otule aavoniseweeyo ti Pheeturu na Yaahaya aari owaaperekhaavo. Atthu ooshi khwiiya ootikinisiwa, khusala atthirela attaaphale aarivo Pheeturu na Yaahaya, puuro yaari wiithiwaaye nlako wa Seleyimaana.
ACT 3:12 Ooniyeevo vitthu epile, Pheeturu khuwaaza yoori: “Meezirayeele mwaasa aya niini mwisutisiwaka pi vitthu epo? Mwaasa aya niini mweeyo mwineekesaka fweeyo nkhama etthu emweettettisiyeeyo mwinyi otu owahi wetthu ama tthakaraka yetthu?
ACT 3:13 Nnyizinku wa Eburahiima wa Esiyaakha na wa Yaakhumpa, Nnyizinku wa mamarehemu etthu ansifu karumeya awe Yinsa, othuutule mweeyo mwaawenkhiyeeyo atthu yoori amuule na khunkatthala vamote na Ponsiyu Pilatu, ye afilakeleliye onfukula.
ACT 3:14 Mweeyo mwankhana vamwantiiwa Nttakatthiifu wa shariya, khuveka yoori afukuliwe namahusuti.
ACT 3:15 Mweeyo khumuula mwennyewe ohaayi, ila Nnyizinku khunsisimula muufwa na fweeyo namashahiti wa vitthu zaya epo.
ACT 3:16 Mwaasa wa waamini nzina la Yinsa, nzina nttiittho lanvonisa mwinyi otu mwinimaanaaye na mwininjuwaaye. Amini entaaye khwa nzina la Yinsa yamwinkha ekumi y'eekhweele, nkhama etthiipo mwinoonaaye mooshi.
ACT 3:17 Aphano attwizaku, miiyo kajuwa yoori mwaarettiye mwihijuwaka ata na anamalokozela enu.
ACT 3:18 Ti nanna yaya Nnyizinku eettettisiyeezo etile aalupiyeeyo awoozaka yoori Al-Masiihu awe aari oteela ohoowa.
ACT 3:19 P'aapho mwithapwiye mwirutele wa Nnyizinku yoori twampi zenu ziiye zooswammihiwa.
ACT 3:20 Neekeselaka wakathi woovumula ontaaye wa Mbwana na Al-Masiihu aperekhiweeyo tokhiya asulani aniitthiwaaye Yinsa.
ACT 3:21 T'iito Yinsa ona ya wiiya pinkuuni mpakha ofiya wakathi Nnyizinku anttelaaye arutisa vitthu zooshi etthiipile Nnyizinku aari olupaazo waaza raku vakatthi wa manapiyu.
ACT 3:22 Munsa khulupa yoori: ‘Mbwana Nnyizinku onlawa anlanse vakatthi wa attwiize napiyu mmote nkhama miiyo; mwinsiileze zooshi anttelaaye owuuzani.
ACT 3:23 Otule ahininsiilezaaye napiyu aya ota antta olaziwavo vakatthi wa atthu awe.’
ACT 3:24 W'ookhweele manapiyu ooshi, waaza Samuweele na apale akinoko aya, alaleya vitthu zinrettikanaazo siikhu epi.
ACT 3:25 Mweeyo mwaanamarithi wa manapiyu na olapha Nnyizinku alaphaniyeeyo mamarehemu aya, ye aamuuziye Eburahiima yoori: ‘Mwaasa wa peewu yawo atthu ooshi a voolumwenku anttela wiiya aaparikhiyiwa.
ACT 3:26 Nnyizinku nansisimula karumeya awe, amperekha omwanzo eene vakatthi venu mweeyo yoori ooparikhiyeni na oolikisakani zootakhala epile mwaari orettaazo wakhula ntthu.”
ACT 4:1 Wakathi Pheeturu na Yaahaya aari ottakhulaavo owoozaka atthu, khutavo mahaakhimu na attunkhulu a anamweekesela a nyuupa ya Nnyizinku na masatukhi.
ACT 4:2 Yo aari ookafilikha venkivene mwaasa wa yoori maaswihaapa entta owaasomisa atthu, na owooza yoori owaapho osisimuwa wa ananfwa nkhama etthiipile Yinsa asisimuweyiyeezo.
ACT 4:3 Aphano yo khunkhola Pheeturu na Yaahaya, khuwaattha nkalapooso yaari makaaripi khuwaalikha mpakha ocha.
ACT 4:4 Ila atthu asiiliyeeyo hapari epile aari olupaaye enkeene eyiye omwamini Yinsa. Khwa etthiipo mamuuni khusala avira eekezeleyaka khufiya etthu ya alufu thaanu.
ACT 4:5 Siikhu yaphiiri khuthukumana afwalume, mashawuriya na anamwaatikha nti wa Yerusaleemu.
ACT 4:6 Atthu aarivo pi apa: Anaasi, nttunkhulu wa mahaakhimu a tiini, Khayiifwa, Yaahaya, Alishantere na atthu ooshi apale aari oojama wa nttunkhulu wa mahaakhimu a tiini.
ACT 4:7 Yo khuruma okhuweliwa maaswihaapa apale awiri Pheeturu na Yaahaya. Khusala owoozela araka: “Mwirettaniyeeyo vitthu epi owahi-ni wala nzina-ni?”
ACT 4:8 Pheeturu aari wa wiitaazaniwa Rooho Ttakatthiifu, khusala alupa awoozaka: “Afwalume na mashawuriya,
ACT 4:9 yoori mweeyo mwanikhuwela leelo yoori mwinuuzele vitthu zooshaphe ninretteliyeezo ntthu otule woorakala na nanna ovonisiweezo.
ACT 4:10 Ila apho mwijuwe saana mweeyo mooshi mpakha na atthu a nti wa Ezirayeele yooshi yoori khwa nzina la Yinsa Al-Masiihu wa Nazareeti, othuutule mweeyo ena mwankhomeliyeeyo na othuuto Nnyizinku ansisimuliyeeyo muufwa, nzina lawe tthi linvoniyeeyo namarakala otu mwinimoonaaye apha.
ACT 4:11 Yinsa othuuto ‘liwe lookatthaliwa ti mweeyo anamajeka manyupa, ila khurettiwa wiiya ti liwe linkhomaazaaye nyupa.’
ACT 4:12 Khaavo ntthu nkina ariina owahi wa owoosuru atthu: vathi apha wooshivo khahiivo nzina la ntthu nkina linuusurwaaye.”
ACT 4:13 Attunkhulu apale ooshi khwiiya onshankela Pheeturu na Yaahaya mwaasa wa ominyala aarinaaye, yo khuhaakikhi yoori khweele apa Yinsa ori vamote na-yo.
ACT 4:14 Mwaasa yoori aari oretta omoonaka ntthu otule woorakala aavonisiweeyo, yo khuhisala oona hatha paatuli khwa Yaahaya na Pheeturu.
ACT 4:15 Khuwooza yoori asaruliwemo nnyupa mphule aathukumaneliweemo. Aphano atthunkhulu apale khwaaza onyakulisana atthaaporu,
ACT 4:16 oozelanaka yoori: “Nkahayani niwaarettele niini? Atthu ooshi Yeruzaleemu eti ajuwa yoori yo aretta minjuza zawooneya zihinikheeteyaazo.
ACT 4:17 Apho yoori vitthu epo zihitepe omwajeyela mmuti wooshimo, nlaweni na atthu ooshi asiila, nlaweni niwoopopisa niwoozaka yoori ahirutele owooja atthu vitthu monkoni wa nzina la Yinsa.”
ACT 4:18 Aphano khukhuweliwa Pheeturu na Yaahaya khurutela nnyupa nttumpule aasaruliyeemo, khuriwa yoori ahittakhule hatha etthu na ahisomise monkoni wa Yinsa.
ACT 4:19 Pheeturu na Yaahaya khuwaajipu araka: “Mwinoona yoori etthu ya eto ti yoohaakhi mmakhono wa Nnyizinku wuushututelani mweeyo khunlikha Nnyizinku.
ACT 4:20 Fweeyo khaninwahi olikha olupa epile nooniyeezo na nisiiliyeezo.”
ACT 4:21 Khuwaatutushu khuwoojela khuwaalikha, maana khaari woona etthu woowaahukhumwela na atthu ooshi aari onsifwu Nnyizinku mwaasa wa minjuza epile zarettikhiyeeyo.
ACT 4:22 Mwinyi otule aavonisiweeyo wa minjuzavo aarina hirimu yooziti nyaakha arupayiini.
ACT 4:23 Wakathi Pheeturu na Yaahaya aleviweevo, n'oofiya vahali aarivo ashirikhaaya, khusala awaathatelela zooshi epile aari wuuziwaaye phi attunkhulu a mahaakhimu na anamalokozela a tiini.
ACT 4:24 Paata ya ashirikhaaaya apale osiila mattakhuzi apale, ooshi aya khusala alompa araka: “Mbwana, ti weyo wumpiyeeyo pinku na vathi, pahari na vitthu zooshi ziriye voolumwenku.
ACT 4:25 Weeyo wattakhula khwa Rooho Ttakatthiifu vakatthi wa papeetthu Daawuuda nrumeya awo oraka: ‘Makaafiri ankatipukhaka-ni wala atthu anaakanyerelaka-ni vitthu zoohiiyi etthiipo?
ACT 4:26 Attunkhulu a vathi ajilokottela na afwalume akhusanyeya yoori anlupatthe Mbwana na alupatthe Al-Masiihu otule Ye anthawuliyeeyo.’
ACT 4:27 Ekhweele-khweele, Herooti na Pontiyu Pilaatu akusanyeya na makaafiri na atthu akina a Ezirayeele, ooshi ari sitati ethiiti na niiya yonlupattha Yinsa nrumeya awo othuutu onthawaziyeeyo.
ACT 4:28 Na theenya amarisela maana aretta zooshi epile weeyo walakeliyeeyo oretta khwa owahi orinaaye.
ACT 4:29 Apho weeyo Mbwana, woone shawuri ariinazo zootakhala khwa fweeyo na onikhomaze yoori nilaleye nttakhuzi lawo woohoovi hatha etthu.
ACT 4:30 Wookole nkhono awo waaze ovonisa na oretta minjuza na vitthu zooshankisa khwa nzina la nrumeya awo Yinsa.”
ACT 4:31 Paata ya maaswihaapa apale wiisha olompa puuro etile aari akhusanyeyiyeevo, khusala esakhinyeya ooshi khuweelaala Rooho Ttakatthiifu, khusala alaleya nttakhuzi la Nnyizinku woohoovi hatha etthu.
ACT 4:32 Ooshi rooho zaya zaari moote, akhili zaya zaari sawa-sawa. Khaarivo hatha mmote aari yoonaaye etthu yawe wiiya yaawe. Apale aari opatthaaye ama apattha etta waawanya na azaaya zooshi aari wiiyanaazo.
ACT 4:33 Maaswihaapa aari ovira alawelaka oshaahiti osisimuwa wa Bwana Yinsa na owahi nwulweene, na yaaweeshukheliye rehema khuluyeene.
ACT 4:34 Vakatthi vaya khaarivo hatha ntthu mmote woothowiwa, apale aarina mapuwa ama manyupa eetta wuuzanyisa, nzurukhu aya n'ootiisa,
ACT 4:35 n'oowenkha maaswihaapa yoori awaawanyeze atthu ooshi wakhula ntthu khwa khiima yoothowiwa wawe.
ACT 4:36 Yuusufu, antthajiweeyo nzina la Baranabe, aari haakhimu, owawe waari Shiipere, nzina lawe lirina maana oori ‘maatumerela’,
ACT 4:37 khuuzanyisa nshapa lawe, nzurukhu aya khutiisa khuwenkhe maaswihaapa.
ACT 5:1 Aarivo mwinyi mmote ari wiitthiwaaye Ananiiya, muukhaawe aari wiitthiwa Safiira, na-yo khuzanyisa nshapa laya.
ACT 5:2 Ye khusiilana na muukhaawe yoori nzurukhu opule ahilawane wooshi olawa owenkha maaswihaapa wooshi, khuthuula nkina khupweha opule nkina muukhaaya khulawana wa maaswihaapa.
ACT 5:3 Aphano, Pheeturu khumuuzela Ananiiya yoori: “Weyo, wanlikhelela toovi sheetwani oozokaka nrooho mwawo mpakha weeyo ofiyelela ohata Rooho Ttakatthiifu na khujivithela nzurukhu wuuzanyisiyeeyo nshapa lawo?
ACT 5:4 Niri talili khalaari nshapa lawo? Wala paata ya wuuzanyisa nzurukhu aya khawarina weeyo enu omwennyewe? Khi eti ewuupuwelisiye oretta vitthu nkhama epo niini? Weeyo apho ohooni yoori wawaahata anaatamu, ila wanhata Nnyizinku.”
ACT 5:5 Paata ya Pheeturu wiisha olupa mattakhuzi apale, Ananiiya eetta ofwa attaaphale. Atthu ooshi apale aari omoonaaye na aari osiilaaye mattakhuzi aya apale khwiiya awoova.
ACT 5:6 Khuta atthu khunkafwani khusala alawa onzikha.
ACT 5:7 Eviriyeevo woora mittatthu muukhaawe khuteela weekesa ojuwa etthu emuuliyeeyo mannawe.
ACT 5:8 Pheeturu khumuuzela yoori: “Nkahaya nkakuuze nzurukhu muuzanyisiyeeyo nshapa lenu pi otthuupo?” Muukha otule khujipu yoori: “Pi otthuupo.”
ACT 5:9 Pheeturu khumuuza yoori: “Epo za niini mweeyo osiilana yoori mootoote Rooho ya Mbwana? Atthu apo oniwoonaaye vamilako apho pi atthaapo anzikhiyeeyo mannawo, alawa oozikhe na-weyo.”
ACT 5:10 Kharipuzeena attaaphale, na-ye etta ofwa. Khuthuuliwa khulawa khuzikhiwa mpawa wa mannawe.
ACT 5:11 Atthu ooshi a khuntti etile yaari onlottaaye Nnyizinku khwiiya awoova na apale ooshi aasiiliyeeyo vitthu epo zaarettikhaniyeezo.
ACT 5:12 Minjuza za waatta zaari orettikhanaazo vakatthi wa atthu zaari orettiwaazo pi maaswihaapa. Atthu ooshi apale onkhupaliyeeyo Yinsa aari okusanyeya nlipantta laajekiyeeyo ti Seleyimaana.
ACT 5:13 Atthu akina etta woova okusanyeyana yo, ila atthu enkeene aari owaattottopela maaswihaapa apale.
ACT 5:14 Atthu omwamini Yinsa khusala atepa weekezeleya waaya alume mpakha aakha,
ACT 5:15 khufiyelela atthu akina awaathuula alwele n'oowaapweha ntarikhi awaatthiiye vanrepa ama voolili yoori nenkawu Pheeturu amana avirikha, yo owaapatthe mwiifuli awe.
ACT 5:16 Aari ota atthu enkeene theenya oolankha miti mikina za waattamela Yeruzaleemu awaatisika alwele aya na apale aari ohoochiwaaye pi majini: ooshi khusala eeya oovonisiwa.
ACT 5:17 Aphano, nttunkhulu a mahaakhimu na ashirikhaaya ooshi mpakha na atthu ooshi a khuntti ya masatukhi khuwaata nrima.
ACT 5:18 Khuruma yoori okholiwa maaswihaapa khuwaafukela nkalapooso.
ACT 5:19 Aphano osikhu wa siikhu ethiitile, nlayikha la Nnyizinku khufukula milako za kalapooso khuwaasarulela vaje,
ACT 5:20 khuwooza yoori: “Mwilawe nnyupa wa Nnyizinku, mwilawe mwawaasomise atthu monkoni wa ohaayi opu mpheya.”
ACT 5:21 Maaswihaapa khushututela mattakhuzi apale ooziweeyo ti nlayikha ntthile, n'oocha khulawa mpakha vaje wa nyuupa ya Nnyizinku, khwaaza owaasomisa atthu. Aphano nttunkhulu a mahaakhimu a tiini na ashirikhaaya khuwaakusanya atthu na anamalokozela a tiini ooshi a Ezirayeele, khuruma olawa olaziwamo maaswihaapa apale nkalapooso.
ACT 5:22 Anamweekesela apale a kalapooso, n'oofiya nkalapooso khuhiwaasikanimo, khuruti n'oota khusala alupa yoori:
ACT 5:23 “Khaniwaasikaneenimo na nasikana kalapooso ya eri etthiipile naafukiyeezo na vaje aarivo anamweekesela akina, ila vakatthi nifukuliyeeyo milako khuhiimo hatha ntthu.”
ACT 5:24 Paata ya atthunkhulu apale, anamweekesela a nyuupa ya Nnyizinku na atthunkhula a mahaakhimu osiila mattakhuzi apale, yo khwiiya ooshanka mwaasa woohijuwi nanna eettettiyeezo maaswihaapa apale.
ACT 5:25 Wakathi otthuupule khutavo ntthu aari olupaaye owoozaka yoori: “Atthu apale mweeyo mwawaatthiyeeyo nkalapooso, miiyo kawaasikana vaje wa nyuupa wa Nnyizinku eettaka owaasomisa atthu.”
ACT 5:26 Khulankha anamweekesela na nttunkhulu aya khuweettela khusala awaatiisa, woohiwaalazili hatha kuvu, maana aari woova ovonyiwa pi atthu apale aari owaasomisaaye.
ACT 5:27 Khuwaalawana nnyupa aari othukumanaamo atthunkhulu yoori oozeliwe ti nttunkhulu wa mahaakhimu.
ACT 5:28 Khuwooza yoori: “Fweeyo khanaawuuziyeni yoori mwihirutele owaasomisa atthu mattakhuzi monkoni wa nzina nttho. Ila mweeyo khusala mwivira mwisomisaka Yeruzaleemu yooshi na olikha toowo mwintakha onilokoveza fweeyo ofwa wa ntthu aya oto.”
ACT 5:29 Pheeturu na ashirikhaawe khujipu araka: “Ti yooshapweya yamwanzo onshututela Nnyizinku zayita anaatamu!
ACT 5:30 Nnyizinku wa apapa zetthu ansisimula Yinsa nkhapuri, othuuto mweeyo mwankhomeliyeeyo vansalapa khumuula.
ACT 5:31 Ila Nnyizinku antta phantte ya nkhono-nlume awe khumwinkha ofwalume na khunretta wiiya namusuru yoori atthu a Ezirayeele apatthe othupwiya na opokherele nswammaha wa twampi zaya.
ACT 5:32 Fweeyo n'aamashahiti a vitthu zaya epo, vamote na Rooho Ttakatthiifu, etile Nnyizinku owenkhiyeeyo apale aninshututelaaye.”
ACT 5:33 Paata ya maaswihaapa olupa matthakhuzi apale, yo khwiiya okafilikha khusala atakha owoola.
ACT 5:34 Aarivo mfwarizeewu mmote aari wiitthiwaaye Kamaliyeele, aari namanozela wa kano na aari ntthu wooshitahiwa pi atthu a waatta. Ye khulankha khweemela vakatthi wa afwalume apale, khulupa yoori maaswihaapa asuruleliwe vaje khapula vattitthiiru.
ACT 5:35 Khuwooza attunkhulu azaawe apa yoori: “Mweeyo atthu a nti ya Ezirayeele, mwiiyane ophoole na vitthu mwintakhaazo owaarettela apo.
ACT 5:36 Khwa siikhu ziviriyeezo nyumani aapuweleliye ntthu aari wiitthiwaaye Thewuda aari ojilupezaaye wiiya mfwalume, aarina atthu aari onlottaaye oofiya miiya nne. Aphano ye khuuliwa, atthu awe apale aari onlottaaye khuhiisheli hatha vahali ooshi khumwazeya.
ACT 5:37 N'oofwa ye aapuweleliye nkina wa Kalileya aari wiitthiwaaya Yuuda, wakathi atthu aari waatikhiwaayo yoori alawe anthawule mfwalume, oto atthu enkeene aakhupaleliye onlotta, ila na-ye khuuliwa anamalottela awe ooshi khumwazeya.
ACT 5:38 Apho, kiniwuuzani yoori atthu apa awiri mwiwaarettele hatha etthu, mwiwaalikhe alawe maana nkhama shawuri za ntthu na khaazi ya ntthu khinrupaza ehiisheeni.
ACT 5:39 Ila nkhama ti ya Nnyizinku, mweeyo khaninteela wiishisa, amana mwitakha oretta toowo mwinshittanana Nnyizinku.”
ACT 5:40 Attunkhulu apale khukhupalela mattakhuzi apale alupiyeeyo Kamaliyeele, khuruma okhuweliwa maaswihaapa apale yoori avire nnyupa, khujaphiwa khuuri yoori ahirutela olaleya hapari za Yinsa, nawiisha khulikhiwa.
ACT 5:41 Maaswihaapa apale khusaruwa ari woofurahi mwaasa woohukhumweliwa olaleya nzina la Yinsa.
ACT 5:42 Yo khuhilikhi khusala avira alaleya wakhula siikhu nnyupa wa Nnyizinku na nyuupa khwa nyuupa, woohilikhi olupa Yinsa ti Al-Masiihu.
ACT 6:1 Siikhu etthiipile eettaka ovira aattaka atthu aari anlattaaye Yinsa, mayaahuuti aari ettakhulaaye ekereeku atthaaporu aari owaattakhula mayaahuuti apale aari attakhulaaye eheberayiku, mwaasa yoori manankhwele aya eetta osahawiwaka amana yaawanyiwaka etthu-yooja ya wakhula siikhu.
ACT 6:2 T'iito maaswihaapa apale khumi na awiri aawaakhusanyiyeeyo anakhiyoni ooshi, khusala awooza yoori: “Ajama zetthu, khaninwahi alikha alaleya nttakhuzi la Nnyizinku khusala nawanya etthu-yoojiwa.
ACT 6:3 Attwiizetthu, mwiwaathawule vakatthi venu atthu sapa ooshitahiwa, awiitaala Rooho Ttakatthiifu na oofuwa yoori niwenkhe khaazi eto,
ACT 6:4 na-fweyo nisala nilompa na olaleya nttakhuzi la Nnyizinku.
ACT 6:5 Mattakhuzi apale khuwaatuvela ooshi aya, khunthawula Shiteefanu, nlume wa wiitaala amini na Rooho Ttakatthiifu, anlikha Filipi, Porokoro, Nikanore, Timomu, Parimenashi na Nikolawu, otule aari owaalattelelaaye mayaahuuti wa nti wa Antiyookiya.
ACT 6:6 Khuwaathoonyeza atthu apale vakatthi wa maaswihaapa, atthaapo khuwaalampela awaattheliye a makhono.
ACT 6:7 Etthiipile nttakhuzi la Nnyizinku khusala limwazeya. Khusala avira awulaka anakhiyooni wa waakhuvavo Yeruzaleemu. Theenya khuntti khuluyeene ya mahaakhimu a tiini khusala ashutulele amini.
ACT 6:8 Stefanu ntthu wa wiitaala mahala na owahi wa Nnyizinku aari oretta vitthu zootikinisa na alama vakatthi wa atthu.
ACT 6:9 Attaaphale khupuwa atthu a nnyupa enthukumaniwaamo apale ‘Ooleviwa’, mayaahuuti a Sireene na Alishanteriya na apale a nti ya Silisiya na Aasiya. Atthu aya apo khwaaza onyakulisanana Shiteefanu,
ACT 6:10 ila khuhisala awahi oshintta opuwa na Rooho etile aari ottakhulanaaye.
ACT 6:11 Aphano khupankiwa atthu akinoko alupe yoori: “Nansiila Shiteefanu attakhulaka mattakhuzi onkufurwela napiyu Munsa na Nnyizinku.”
ACT 6:12 Mwaasa wa mattakhuzi atthaapo, khuwaatapanya atthu, anamalokozela a tiini na anamanozela kano khunkhola Shiteefanu khunthuula khulawana onyuupa woophuteyiwawo milattu.
ACT 6:13 N'oofiya khusala anlokoveza mattakhuzi oovanyeya aari oraaye: “Mwinyi otu okhitiri ottakhulawo pure opuuro okhuno woottakatthifuwo na nkatthi wa kano.
ACT 6:14 Nasiila eriwaka Yinsa Nnazareeti apwechela puuro eti na khuzukuliza thwapiya aalikhiyeezo napiyu Munsa.”
ACT 6:15 Wakathi amweekesiyeevo, ooshi apale eekhaliye onyuupa woophukaniwawo khoona omaasho wawe ompuwaka nkhama nlayikha.
ACT 7:1 Aphano, nttunkhulu wa mahaakhimu a tiini khumuuzela Shitefaanu yoori: “Shariya mattakhuzi apa onlokoveziwaaye?”
ACT 7:2 Shiteefanu khujipu araka: “Atwiizaku na apapazaku mwisiileze! Nnyizinku wa Nuuru ampuweleliye Eburahiima, papeetthu, wakathi ari nti wa Mesopotamiya ahinalawe wiikhala Harani,
ACT 7:3 khumuuza yoori: “Oleemo mmuti mwawo vakatthi wa ajamaazo, olawe nti kinttelaaye wuuthoonyeza.”
ACT 7:4 Eburahiima khulankha nti wa Akaliteeni, khulawa khwiikhala Harani. Paata yoofwa papaawe, Nnyiziniku khuntiisa nti opu mwiniikhalaaye.
ACT 7:5 Nnyizinku khawinkheene hatha eritho moote, wala puuro ya luwattho yawe, ila amwaahitiye yoori: ‘Paata ya weeyo, peewu yawe enlawa yapatthe olumwenku.’ Hatha nkhama wakathi aya opule eettiye hiina pure mwaana.
ACT 7:6 Nnyizinku anttakhulaniye khwa nanna etthiipo yoori: ‘Peewu yawe enttela osafirela nti wa malaponi, anlawa arettiwe oviitthwaana na ohukhumwiwa nyaakha miiya nne.
ACT 7:7 Miiyo kinhukhumu nti onttalaaye owaaretta oviitthwaana, attaapho aleewo okhulewa ate akaaputu puuro etthiiti.’
ACT 7:8 Nnyizinku khumwinkha Eburahiima osiilana wa okiriya. T'iito, Eburahiima khunvokola Esiyaakha khunkhiriyisa siikhu yanaane yoovokoliwa wawe. Elottelanaka Esiyaakha khunvokola Yaakhumpa, khwa apaapa atthaapa khupuwa khumi na awiri.
ACT 7:9 Apapa zetthu aya atthaapo khusala anlazela nrima Yuusufu. Khumuuzanisa a mwiitthwaana khulawaniwa Misuri, ila Nnyizinku aari vamote na ye.
ACT 7:10 Khunkholelela muhoowa wawe wooshimo na khumwinkha akhili khumpatthisa oshapweyiwa mmakhono wa lipili Firawuuna, mfwalume wa Misuri. Mfwalume otu aamwinkhiye Yuusufu onsatoro wa Misuri na khumwinkha ottunkhulu wa atthu ooshi a vaje vawe.
ACT 7:11 Paata ya toole, khupuwa jala Misuri yooshi na Kanaani na ohoowa mwinkeene, amarehemu etthu khuhisala awahi opattha etthu-yoojiwa.
ACT 7:12 Yaakhumpa n'oosiila yoori eewaakho tiriku Misuri, khuwaaperekha amarehemu etthu swaafu yamwanzo.
ACT 7:13 Swaafu yaphiiri yoorutelawo amarehemu etthu, Yuusufu khujijuwisa vakatthi wa attwiize, Firawuuna khuwahi owaajuwa ajaama a Yuusufu.
ACT 7:14 N'oojijuwisa Yuusufu khuwaaruma atthu omweetala papaaze na ajamaaze ooshi, aari sapiini na athaanu atthu eene.
ACT 7:15 Aphano Yaakhumpa khusala alawa Misuri, ottuukho afwiyeewo ye na amarehemu etthu akina.
ACT 7:16 Mwiili aya khuthuuliwa khurutiseliwa Shekemu khuzikhiwa nlikulukupo ntthile oozanyiyeeyo Eburahiima na aana Hamori wa nzurukhu khata.
ACT 7:17 Ofiyaka wakathi Nnyizinku aari weettelaaye oretta etile aamwaahitiyeeyo Eburahiima, khuweekezela atthu etthu khwiiya a waatta nti wa Misuri.
ACT 7:18 Khwinkhiwa ofwalume ntthu nkina, ahaari ojuwaawe hatha etthu monkoni wa Yuusufu, khwiiya mfwalume wa Misuri.
ACT 7:19 Mfwalume otule khusukuliwela ajama etthu na khuwaahukhumu amarehemu etthu, awaakhanyerelaka owaalikha aana aya yoori ahiwahi owula.
ACT 7:20 Wakathi otthuupule khuvokoliwa Munsa, oto aari mwaana wooshapweya oomaasho wa Nnyizinku. Khwa nyeezi mittatthu eettaka oleliwa vaje wa apapaze.
ACT 7:21 N'oolikha oleliwa pi apapaze, mwaana wa Firawuuna khunthuula khusala anlela nkhama mwanawe wonvokola.
ACT 7:22 Munsa khuleliwa na ojuwa wooshi wa Amisuri, khwiiya ntthu woowahi khwa a mattakhuzi awe na khaazi zawe.
ACT 7:23 Apatthiyeevo hirimu ya nyaakha arupayiini, Munsa khulekela olawa owaathotola attwiize Meezirayeele.
ACT 7:24 Amooniyeevo Mmisuri anhukhumwaka Mwiizirayeele, khumpattha katapu mwaasa woohukhumwiwa, khumuula Mmisuri otule.
ACT 7:25 Ye aari woona yoori attwiize enlawa yaweeleye yoori Nnyizinku ontta onrumeyela yoori awoosuru, ila yo khayaari oweeleya hatha etthu.
ACT 7:26 Siikhu yaphiiri, Munsa khulawa vahali aari oshezaavo Meezirayeele awiri, khusala awooza yoori: ‘Alume, mweeyo mwa ntthu na ttwiiye; khi mwaasa aya niini mwilwaazanaka?’
ACT 7:27 Ila nlume otule aari onlwaazaaye nzaawe, khunsukhuma Munsa khumuuza yoori: ‘Paani oothawuliyeeyo yoori wiiye namalokozela etthu na namphuka milattu zetthu fweeyo?
ACT 7:28 Ontakha okuula nkhama omuuliyeezo Mmisuri taana?’
ACT 7:29 N'oosiila mattakhuzi apale, Munsa khutthirela nti wa Midiyana, khusala eekhala ottuukho nkhama nletto, khuwaapattha aana awe awiri.
ACT 7:30 Avirisiyeevo nyaakha arupayiini ottuukhule, khumpuwelela nlayikha vamweeke wa moottho wa haari ozimaaye n'yaara, kharipu ya mwaako Sinaayi.
ACT 7:31 Munsa vakatthi wa moottho opule khwiiya wootikinisiwa. Khususela attaaphale yoori oonachache, khusiila huula ya Mbwana Nnyizinku:
ACT 7:32 ‘Miiyo ki Nnyizinku wa amarehemu apapazenu, Nnyizinku wa Eburahiima, Nnyizinku wa Esiyaakha, Nnyizinku wa Yaakhumpa.’ Munsa eettaka othukumela mwaasa wa woova, khuhisala awahi ofunula maasho awe.
ACT 7:33 Aphano Mbwana Nnyizinku khumuuza yoori: ‘Ovule jampali epo ziri mmoolu mwawo, mwaasa wa puuro li weeyo oriiyo nti ttakatthiifu.
ACT 7:34 W'eekhweele keetta owoona atthu aka ahukhumwiwaka nti wa Misuri. Kasiila olila waya khwiishuka yoori kiwoosuru apho. Ote nasaapi, miiyo kurutisele nti wa Misuri.
ACT 7:35 Otu ti napiyu Munsa, othuuto mwankatthaliyeeyo na mattakhizi apa yoori: ‘Ti paani oothawuliyeeyo yoori wiiye namalokozela etthu na namaphuka etthu?’ Ye aaperekhiwe ti Mwennyewe Nnyizinku yoori eeye namalokozela na namwawuni aya vakatthi wa nlayikha lampuweleliyeeyo vamweeke wa moottho wa haari ozimaaye.
ACT 7:36 Munsa othuuto awaalaziyeewo amarehemu etthu Meezirayeele nti wa Misuri, arettaka vitthu zootikinisa na minjuza za waatta nti wa Misuri, pahari yookhuttuwa na nyaara aavirisiyeemo nyaakha arupayiini.
ACT 7:37 Otu ti Munsa othuuto awooziyeeyo Meezirayeele yoori: ‘Nnyizinku onlawa ampuwise vakatthi wa attwiizenu napiya mmote nkhama miiyo.’
ACT 7:38 Ye aari woothukumana, n'yaara na nlayikha laari onttakhulanaaye vamwaako Sinaayi na amarehemu etthu, khupwekherela mattakhuzi haayi yoori anuuze na fweyo.
ACT 7:39 Ila amarehemu etthu khukatthala oshututela, na theenya khunkhijilela na nroho mwaya khurutela Misuri.
ACT 7:40 Khumuuza Arawu yoori: ‘Onaattalele nluku yoori anilokoze maana Munsa aya otule anilaziyeeyo Misuri khanijuweeni etthu empatthiyeeyo.’
ACT 7:41 Wakathi otthuupule khwaattala sanamu yoolattanana mompe. Khutiisela twaha na khuretta njampo khwa osifu etile aarettiyeeyo na makhono aya.
ACT 7:42 Ila Nnyizinku khuwaasusu na khuwenkha waaputu matthottowa nkhama etthiipo yaatikhiweeyo a kithaapu ya manapiyu yoori: ‘Kaari miiyo otule mweeyo mwanliseliyeeyo twaha na zaakha nyaakhu epile arupayiini mweekhaliyeezo n'yaara, mweeyo omathi wa Ezirayeele?
ACT 7:43 Olikha toowo, mwajeka puuro ttakatthiifu ya Moloke na matthottowa a nluku enu Reefwa sanamu mweeyo mwaattaliyeeyo yoori mwisale mwaaputu wa attaapho, miiyo kintta wuuperekhani ohali okinoko olikha Babiloniya.’
ACT 7:44 N'yaara amarehemu etthu aarina huma yoosiilana, nttumpho Nnyizinku aari ottakhulananaamo Munsa heema yaya eto yaattaliwe nkhama etthiipo Nluku anrumiyeezo Musa yoori aattale, alikanisanaka etile anthoonyeziweeyo.
ACT 7:45 N'oopwekherela heema etile yoosiilana, amarehemu etthu khuthuula khumwinkha olokozela Yoshuwa, wakathi athuuliyeevo nti wa omathi opule Nnyizinku eekariyeeyo. Heema yaya eto khwiiya nti otthuupo mpakha wakathi wa Daawuuda.
ACT 7:46 Otu khupwekherala mahala mmakhono wa Nnyizinku, khuveka yoori anjekele nyuupa Nnyizinku wa Yaakhumpa.
ACT 7:47 Ila ti Seleyimaana anjekeliye nyuupa yaya.
ACT 7:48 T'iito Nnyizinku khaniikhala nnyuupa yoojekiwa ti pinaatamu, nkhama etthiipo alupiyeezo napiyu yoori:
ACT 7:49 ‘Pinku khukulu yaka, vathi tarikhi ya moolu aka. Nanna-ni ya nyuupa mweeyo mwinttelaaye okijekela? alupaka Mbwana, ama, onteela wiiya vayi puuro yaka yoovumula?
ACT 7:50 Khihiye miiyo kaattaliyeeyo vitthu zaya epo zooshi?’
ACT 7:51 Atthu ookifilina ootakhala rooho zaya epo zooshi! Mweeyo mwinlikanana na amarehemu enu aari okatthalaaye Rooho Ttakatthiifu!
ACT 7:52 Napiyu-ni amarehemu enu ahinlupattheeni? Yo amuula otule aari ohaayi wa anashariya, othuuto mwinrettiyeeyo onamalupattha na ohusuti.
ACT 7:53 Mweeyo mwipwekhereliyeeyo kano khwa khaazi za malayikha wala khuhi shutuleli.”
ACT 7:54 Asiiliyeevo mattakhuzi apale khuwaapattha katapu nroho mwaya, khusala anlumele meeno.
ACT 7:55 Ila Shiteefanu wawiitaala wene Rooho Ttakatthiifu khweekesa otulu khoona siifwa za Nnyizinku na Yinsa ari nkhono-nlume wa Nnyizinku.
ACT 7:56 Khulupa yoori: “Kinoona pinku eri yoofukuwa na Mwaana wa Pinaatamu eemeliye nkhono-nlume wa Nnyizinku.”
ACT 7:57 Ye khwaaza okhuwa woonyakulavo, yo khuttiyela mashiilo aya na khunrikanyela.
ACT 7:58 Khunsusisela othetekele wa sitati khusala anoonya na mawe, oshahiti aya khunlikhavo shapu aari wiitthiwaaye Saawulu yoori asalane kuwo zawe epile aawaliyeezo.
ACT 7:59 Eettaka onvonya etthiipile, Shiteefanu khusala alompa araka: “Mbwanaaka Yinsa, pwekherela nafusi yaka.”
ACT 7:60 Attaaphale khukokhora khusala akuwa channu araka: “Mbwanaaka, ohiwaalokoveze twampi eti!” Nawiisha olupa mattakhuzi apale, khufwa.
ACT 8:1 Saawulu na-ye aari khuntti ya atthu atthaapale akhupaleliyeeyo wuuliwa Shiteefanu. Siikhu zaya epile yaapuwiye lupattha khuluweene ya anamalottela a Yinsa Yeruzaleemu. Ila maaswihaapa khayaawaasikaniye maana yo aarettiye amwazeyiye ari Yudeya mpakha Samariya.
ACT 8:2 Atthu akina ooshapweya rooho khunthuula Shiteefanu otule khulawa khunzikha eettaka onlilela.
ACT 8:3 Aphano Saawulu aari ojilipisa yoori eeshise khuntthi ya atthu apale aari onlottaaye Yinsa. Ye aari ovira nyuupa khwa nyuupa khusala awaakho alume na aakha apale aari onlottaaye Yinsa n'oowaattha nkalapooso.
ACT 8:4 Atthu apale omwaziyeyeeyo aari ovira alaleyaka hapari wakhula vahali aari ofiyaavo.
ACT 8:5 Filiipe eettiye sitati ya Samariya, n'oofiya khusala owooza atthu monkoni wa Yinsa.
ACT 8:6 Wakathi atthu asiiliyeevo saneene hapari epile aari olupaazo Filiipe na knoona minjuza aari arettaazo, yo aashineheliye mattakhuzi apale ye aari olupaaye.
ACT 8:7 Atthu akina aariina majini aari owaasaruwa eettaka onyakhula, alupa oorakala enkeene opiya ti sapiyeene na apale oorakala.
ACT 8:8 Sitati yaya etile waapuwiyeyo furaha khuluyeene.
ACT 8:9 Aarivo mwinyi mmote aari wiitthiwaaye Simawu, aari wiikhalaaye sitati ethiitile, aari nshawi, atthu ooshi asamariya aari onshankela vitthu za majintta aari orettaazo. Ye aari ojoona wiiya munumunu,
ACT 8:10 atthu ooshi, waaza nttunkhulu mpakha nsimaana na onttottopela araka: “Otu onaaye aariinaaye walankha pinkuuni, onjuwiwaaye yoori owahi nwulweene.”
ACT 8:11 Aphano, yo khusala alipana othuuuto mwaasa yoori aaziye raku oretta vitthu za majintta za owaatikinisa.
ACT 8:12 Ila paata ya Filiipe owaatafusirela monkoni wa hapari zooshapweya ya ofwalume wa Nnyizinku khwa nzina la Yinsa Al-Masiihu, yo khukhupali na khulawa khoosiwa, alume enkeene mpakha aakha.
ACT 8:13 Simawu othuuto aari orettaaye majintta, na-ye khunkhupali Yinsa khoosiwa, khusala onlottelela Filiipe wakhula phantte aari weettaaye, oonaka vitthu zootikinisa na minjuza miwuluzene zaari orettikhanaazo.
ACT 8:14 Wakathi maaswihaapa asiiliyeevo ari Yeruzaleemu, oriwa atthu a Samariya opokherela nttakhuzi la Nnyizinku, khumperekhawo Pheeturu na Yaahaya.
ACT 8:15 Yo n'oofiya khwaalompela atthu aya apale yoori apokherela Rooho Ttakatthiifu.
ACT 8:16 Maana khaarivo hatha mmote wa yo ompokhereliyeeyo Rooho Ttakatthiifu, ila eettiye woosiwa paasi khwa nzina la Bwana Yinsa.
ACT 8:17 Pheeturu na Yaahaya khuwaattela makhono atthu apale khupokherela Rooho Ttakatthiifu.
ACT 8:18 Simawu nawoona yoori ntthu aari opokherela Rooho Ttakatthiifu paata ya ottheeliwa makhono ti maaswihaapa, ye khulaza nzurukhu,
ACT 8:19 khuwooza maaswihaapa yoori: “Kintakha na-miyo mwikinkhe owahi nkhama otthuupo mwiriina, kisala kiwaattheela makhono atthu n'oopokherela Rooho Ttakatthiifu.”
ACT 8:20 Pheeturu khunjipu yoori: “Nzurukhu awo otthuupo ontta wuuthowelelisa! Weeyo onoona yoori tthuvo ya Nnyizinku enuuzanyiwa na nzurukhu?
ACT 8:21 Weeyo nkatthi wa khaazi yetthu eti Nnyzinku khaniwinkha hatha phantte maana rooho yawo khahi rooho saana.
ACT 8:22 Othupwiye vitthu zootakhala na olompe khwa nzina la Nnyizinku. Talili othuuto oswammihi khwa ofikhiri opo woovonyeya wa nroho mwawo,
ACT 8:23 kinoona yoori nroho mwawo ziwaamo pure vitthu zoovonyeya na washawashawiwa ti twampi.”
ACT 8:24 Simawu khujipu yoori: “Mwikilopele, yoori zooshi epo mwilupiyeezo khwa miiyo zihikirettikhanele.”
ACT 8:25 Paata ya Pheeturu na Yaahaya olawela oshahipi na otafusiri nttakhuzi la Nnyizinku khulankha khusala arutela Yeruzaleemu, olawaka aari ovira atafusiraka miti mikina za Samariya ethiitile.
ACT 8:26 Nlayikha la Mbwana khumuuza Filiipe yoori: “Weette ntarikhi elikhiya raku oviriwa eriiye phantte ya kusini elankhiyeeyo Yeruzaleemu eniishukhelaaye sitati ya Kaaza.”
ACT 8:27 Filiipe nawuuziwa khulankha khusala alawa. Ntarikhi khunsikana mwinyi mmote wa Etiyoopiya woohimemi, alankhaka Yeruzaleemu eettaka owawe. Oto aya aari nakhazi nwulu enkhiweeyo othokorela mizurukhu za Rayisi nwulu wa Etiyoopiya aari wiitthiwaaya Khantase. Eettiye Yeruzaleemu omwaaputu Nnyizinku.
ACT 8:28 Arutaka, apakhiriye varikisho khusala asoma kithaapu ya napiyu Ezaaya.
ACT 8:29 Aphano, Rooho Ttakatthiifu khumuuza Filiipe yoori: “Otthirele rikisho etile osala olottelela.”
ACT 8:30 Filiipe khutthirela rikisho etile khusikana khusala ansiila mwiitiyoopiya otule asomaka kithaapu ya napiyu Ezaaya, ye khumuuzela yoori: “Mattakhuzi apo mwinsomaaye aniweeleyani?”
ACT 8:31 Ye khujipu araka: “Anikeeleza toovi kihina ntthu wookeeleza?” Khumuuza Filiipe yoori owele varikisho attaaphale aarivo ye.
ACT 8:32 Mattakhuzi aari osomaaye mwiitiyoopiya otu a nkithaapu mpule ari olupa toono: “Ye aathuuliwe nkhama pwittipwitthi eneettelaaye wuuliwa, nkha pwittipwitthi yoohittakhuli eri vakatthi wa apale ankasaaye ovuziwa pwittipwitthi, Ye khaattakhuliye hatha etthu.
ACT 8:33 Ye aari woojipushuwisa ila khukattaliwa khuretteliwa vitthu zoohiyi ya shariya. Khi paani ariina ruhusa ya owaattakhula apale aninlottaaye? Ye ohaayi awe khahiyo wa vathi apha.”
ACT 8:34 Aphano, mwiitiyoopiya khumuuzela Filiipe yoori: “Mattakhuzi apa a nkithaapu eti ya Ezaaya aninlupa paani? Ye mwennyewe ama ntthu nkina?”
ACT 8:35 Paata ya toole, Filiipe khwaaza omuuza hapari zooshapweya mwiitiyoopiya otule, khwa mattakhuzi atthaapale ari osomaaye a nkithaapu ya Ezaaya.
ACT 8:36 Ari ntarikhi enttaka olawa ooshi, khufiya vahali aarivo maati. Mwiitiyoopiya otu khumuuza Filiipe yoori: “Apha awaapho maati. Niini ekhattazaaye woosiwa miiyo?”
ACT 8:37 Filiipe khunjipu yoori: “Khayiivo hatha etthu moote enkhattazaaye paata ya weeyo okhupali na rooho yawo yooshi.” Ye khujipu yoori: “Miiyo kinkhupali yoori Yinsa Mwaana wa Nnyizinku.”
ACT 8:38 Aphano, khweemesa rikisho etile, khwiishukha owiri, Filiipe khulawa khumoosa mwiitiyoopiya otule.
ACT 8:39 Wakathi ovuwiyeemo mmati, Rooho Ttakatthiifu khunthuula Filiipe, mwiitiyoopiya otule khuhimooni theenya, na-ye khurutela safari yawe etile aari weettaaye ari woofurahi saaneene.
ACT 8:40 Filiipe khulawaniwa sitati ya Azotu, khulikhiwa ottuukho ti Rooho Ttakatthiifu, khusala avira alawaka mpakha Sezareeya alaleyaka hapari zooshapweya wakhula vahali aari ofiyaavo.
ACT 9:1 Zinrettikhanaru vitthu zaya epo, Saawulu aarettiye ahilikhelelaka owaatuturucha na owaala maaswihaapa a Mbwana. Khulankha khulawa wa nttunkhulu a mahaakhimu a tiini,
ACT 9:2 khumvekela warakha yoori alawe mmamanyupa anthukumaniwaamo sitati ya Damashiku yoori amana awaasikanamo anamalottela a Yinsa, waaza alume mpakha aakha awaathuule awaalawane Yeruzaleemu awaatthe nkalapooso.
ACT 9:3 Khulankha khusala alotta tarikhi, asaleelaka ofiya Damashiku, khumpuwela nuuru yaalankha pinkuuni khusala yaara aphale aarivo,
ACT 9:4 Aphano ye khukwela vathi, khusiila huula yaari omuuzaaye yoori: “Saawulu, Saawulu mwaasa aya niini onikilupatthelaaye?”
ACT 9:5 Saawulu khuuzela yoori: “O paani weeyo, Mbwana?” Ye khujipu araka: “Miiyo ki Yinsa, otule weeyo oninlupatthaaye.
ACT 9:6 Olankhe olawe nsitati ena anttelaaye owuuza weeyo etthu yooretta.”
ACT 9:7 Atthu aari olawanaaye vamote Saawulu khweemela ari oosuthuwa, khusiila huula khuhisala amoona hatha ntthu.
ACT 9:8 Saawulu khulankha vathi aphale akweliyeevo, afumulaka maasho khuhisala awahi woona hatha etthu, atthu khunkholela khunlawana mpakha Damashiku.
ACT 9:9 Khwiikhala siikhu ttatthu ari woohooni, woohiji etthu na woohinywi etthu.
ACT 9:10 Damashiku aarivo namalottela aari wiitthiwaaye Ananiiya. Mbwana khunkhuwela muulottha yoori: “Ananiiya!” Khujipu yoori: “Lape, Mbwana.”
ACT 9:11 Mbwana khumuuza yoori: “Olawe owawe Yuuda, tarikhi enitthiwaaye Yookowa, omuuzelele ntthu mmote wa Tarusu aniitthiwaaye Saawulu. Otu aya entta olompa;
ACT 9:12 muulottha khumoona mwinyi aari wiitthiwaaye Ananiiya atiye anttheeliye makhono yoori arutele woona.”
ACT 9:13 Ananiiya khujipu yoori: “Mbwanaaka, kaaza raku osiila vitthu anrettazo mwinyi oto na vitthu zooshi zootakhala aniwaarettelaazo mattakatthiifu awo Yeruzaleemu.
ACT 9:14 Ye ata okhuno khwa ruhusa ya attunkhulu a tiini yoori ate awaakhole ooshi apale ansifwaaye nzina lawo.”
ACT 9:15 Ila Mbwana khumuuza Ananiiya yoori: “Olawe! Mwinyi oto tu waaka, yaana yaka ethawuliweeyo yoori ethuule nzina laka ewaalawanelaka makafiri na afwalume awe na vakatthi wa atthu a Ezirayeele.
ACT 9:16 Kinlawa koothoonyezeni nanna atthu anttelaazo ohoowa mwaasa wa nzina laka.”
ACT 9:17 Aphano, Ananiiya khulankha khulawa. N'oofiya khuvira nnyupa khunttheela makhono khumuuza yoori: “Ttwiiyaku Saawulu, Mbwana Yinsa, otule oopuweleliyeeyo ntarikhi ataaka ohali waari olankhaawo, akiperekha miiyo yoori orutele woona na wiiye wa wiitaala Rooho Ttakatthiifu.”
ACT 9:18 Nasaapiru vitthu nkhama mavalako khusaruwa mmaasho, khwaaza woona opheya. N'oolankha khulawa khoosiwa.
ACT 9:19 Wakathi ajiiyeevo etthu-yoojiwa, khurutelamo kuvu zawe. Saawulu aavirisiye siikhu vattitthiiru aari na anamalottela sitati wa Damashiku.
ACT 9:20 Wakathi otthuupule khwaaza olaleya mmanyupa a Nnyizinku yoori Yinsa mwaana wa Nnyizinku.
ACT 9:21 Ooshi apale aari onsiilaaye khwiiya ootikinisiwa channu, khusala alupa yoori: “Khahiyo otthuutu nlume otule aari weekesakaaye owoola apale ooshi aari osifwaaye nzina la Yinsa? Khaatiye okhuno oteela owaathuula atthu nkhama anamafukiwa yoori awaalawane Yeruzaleemu wa attunkhulu a anamalokozela a tiini?”
ACT 9:22 Saawulu khusala avira ajilipisaka wakhula siikhu, mayaahuuti khusala amwaakanyerela yoori oniikhala Damashiku athoonyezaka yoori Yinsa ti Almasiihu.
ACT 9:23 Ziviriyeevo siikhu za waatta, mayaahuuti khusiilana ooshi aya wahati woomuula,
ACT 9:24 ila Saawulu khwiiya woojuwa shawuri zaya epile. Nthana na osikhu aari wiiya oothotolela milako za sitati etile yoori apatthe omuula.
ACT 9:25 Anakhiyoni awe khunthuula n'oosikhu khunwelisa khumwishushela onyuma khwa vahali wa pwejiweevo wa muuri.
ACT 9:26 Wakathi afiiyeevo Yeruzaleemu khutakha owaakusanya anakhiyoni a Yinsa, ila ooshi khusala amoova mwaasa woohinkhupali yoori khweele nakhiyoni.
ACT 9:27 Aphano Baranabe khuwaathuula maswihaapa khusala awooza yoori ntarikhi, Saawulu amoona Mbwana amuuziyeeyo nanna awahiyeezo olaleya hapari zooshapweya woominyalavo khwa nzina la Yinsa Damashiku.
ACT 9:28 Attaaphale, Saawulu khwiiya vamote na yo, khusala eettetta woohoovi Yeruzaleemu, alaleyaka woominyalavo khwa nzina la Mbwana.
ACT 9:29 Khusala attakhula na weelezana na mayaahuuti aari ottakhulaaye luuka ya ekereeku, ila apo aya aari otakha omuula.
ACT 9:30 Attwiize n'oojuwa mattakhuzi apale, khunthuula khunlawana nti wa Sezareeya khumpakhirisa yoori alawe nti wa Tarusu.
ACT 9:31 Siikhu zaya epo kereja yaari ya heeri nti wooshi wa Yudeya, Kalileya na wa Samariya. Atthu a waamini aari otepa okhomaala na Rooho Ttakatthiifu na waatta, khwa meekhazi oomoova Mbwana.
ACT 9:32 Pheeturu khusala eettetta wakhula phantte, khulawa owaathotola attakatthiifu apale aari wiikhalaaye Liida.
ACT 9:33 Otthuukhule khunsikana ntthu woorakala aari wiitthiwaaye Aneya eettiye orapalela nyaakha minaane.
ACT 9:34 Pheeturu khumuuza yoori: “Aneya, Yinsa Al-Masiihu ontta wuvonisa! Olankhe okhuje olili awo.” Ye khulanka nasaapiru.
ACT 9:35 Atthu ooshi apale aari wiikhalaaye Liisa na Sarona, n'oosiila khunkhupali Mbwana.
ACT 9:36 Yoopa aariwo nakhiyoni wankha aari wiitthiwaaye Tabita, khwa luuka ya ekereeku lina maana a Dooroka. Ye aari orettakaaye vitthu zooshapweya na winkha zimola.
ACT 9:37 Khumpattha olwele khufwa, mwiili awe khoosiwa khupwehiwa nnyupa ya korofwa yootulu.
ACT 9:38 Liida waattamaniye nti wa Yoopa. Wakathi asiiliyeevo anakhiyoni yooriwa Pheeturu ari nti wa Liida, khuwaaruma atthu awiri olawa omuuza yoori: “Ohirupaze ota okhuno niriiwo.”
ACT 9:39 Pheeturu khulawa vamote na yo, n'oofiya khuthuuliwa khulawaniwa nnyupa ya korofwa y'ootulu. Anakhwele ooshi khunzukulela khusala alila na anthoonyezaka ajapi na kuwo kiina Dooroka aattaliyeezo ari vamote na yo.
ACT 9:40 Pheeturu khuwooza ooshi osaruwa okatthi okhule, attaaphale khukokhora khusala alompa. Khulankha khulawa aphale aarivo muukha otule woofwa, khumuuza yoori: “Tabita, olankhe!” Ye khufunula maasho awe, khumoona Pheeturu khwiikhala.
ACT 9:41 Khunkholela khusala anlansa yoori eemele, aphano khuwaakhuwela anakhiyoni a anakhwele apale khuwenkha eettaka woona.
ACT 9:42 Vitthu epile khwiiya zoofuwiwa sitati yooshi ya Yoopa, atthu a waatta khunkhupali Mbwana.
ACT 9:43 Pheeturu eekhaliye nti wa Yoopa siikhu za waatta, owawe mwinyi mmote aari wiitthiwaaye Simawu aari waattalaaye shapala za nyama.
1TI 1:1 Miiyo Paawulu, aswihaapa wa Yinsa Al-Masiihu khwa oruma wa Nnyizinku namuusuru etthu na wa Yinsa Al-Masiihu nroromelo etthu,
1TI 1:2 kiniwaatikhela weeyo Timootiyu, mwanaka w'eekhweele nkatthi wa tiini yoori rehema, huruma na heeri ya Nnyizinku papeetthu na ya Yinsa Al-Masiihu Mbwaneetthu, yiiye vamote na-weyo.
1TI 1:3 Nkhama etthiipo kaawuuziyeezo wakathi opule kaari weettaavo nti wa Masedoniya, yoori amana osala nti wa Efeeziyu owaahirimize atthu akina yoori ahikhanyarele osomisa mwentto woovonyeya.
1TI 1:4 Owoozaka theenya yoori alikhe olottela hantisi na waalaka mazina a marehemu. Epo zaya zintiisa onyakulisana na enlikhisa mwentto wa Nnyizinku onlottaniwaaye amini.
1TI 1:5 Maana a masomi aya apa ophetana wa rooho y'ookemaani, na ojuwa othawula yooshapweya vakatthi wa yootakhala, na amini yoohiiyi yoonaafikhi.
1TI 1:6 Akinoko ajilaziyeemo, arutelaka olottela vitthu zootakhala zoohiina fwayita.
1TI 1:7 Yo antakha ojiretta wiiya anamanozela a kano za Nnyizinku, ila khiniweeleya, wala epile anlupaazo na haakhi yaya khanjuwa.
1TI 1:8 Apha ninjuwacha yoori kano pi zooshapweya zirumeeyeliwaru khwa nanna zinlupaazo.
1TI 1:9 Nijuwaka etthiipo yoori kano khazaawaateeliye atthu apale aneettettelaaye shariya, ila zaawaateeliye apale oohiiyi a shariya na anamakhijili, zaawaateeliye makaafiri na anatwampi, zaawaateeliye anamatakhala-rooho na anamakufuru, zaawaateeliye apale aniwoolaaye apapazaya na amamazaya, zaawaateeliye apale aniwoolaaye azaaya,
1TI 1:10 zaawaateeliye anamajansili na apale aniwaalalanaaye alume azaaya, zaawaateeliye apale aniwaakholaaye atthu na owoozanyisa na anamahata, zaawaateeliye apale anlaphaaye eettaka ohata, na ooshi apale mwentto woozuri ahintakhaaye.
1TI 1:11 Mwentto opo ori nhapari zooshapweya zinlankhaaye nkatthi wa nuuru ya Nnyizinku wa parakha, kinkhiweeyo miiyo olaleya.
1TI 1:12 Yinsa Al-Masiihu Mbwaneetthu akinkhiyeeyo kuvu, Ye akoona wiiya ntthu wa waamineya, khukinkha onrumeeyela, kininshukhurwela.
1TI 1:13 Miiyo-ena omwanzo kaari namakufuru, namalupattha, namahusuti, wakathi aya opule miiyo akaarina amini, etthu kaari orettaaye akaari ojuwa, apha kooneliwa huruma.
1TI 1:14 Rehema yooziti ya Mbwaneetthu khukiishukhela, khukipatthisa ompheta na omwaamini Ye.
1TI 1:15 Mattakhuzi apa pi ookhweele na ansuhi okhupaleliwa: Yinsa Al-Masiihu ti ye aatiiyeeyo voolumwenku oteela owoosuru anatwampi, wootepacha waya ti miyo.
1TI 1:16 Ti eto kooneliweeyo huruma, yoori khwa miiyo, wootepacha waya, Yinsa Al-Masiihu akivilela yoori awaathoonyeze ooshi apale anttelaaye omwaamini apatthe ohaayi wa mileele.
1TI 1:17 Apho, Mfwalume wa mileele attottopeliwe na asifwiwe siikhu zooshi, Ye ahinifwaaye wala ahinooneyaaye, Nnyizinku mmote othuuto. Amiina!
1TI 1:18 Masomi atthaapo kinuutumerela weeyo mwanaka Timootiyu, nkhama khwa weyo yuulupeziyeezo Rooho Ttakatthiifu, wuupuwelaka mattakhuzi apa wuuziweeyo, onttela owahi wuumana viittha ya nnafusi,
1TI 1:19 ojilipisanaka amini na ojuwa othawula yooshapweya vakatthi wa yootakhala. Mwaasa woohitakhi othawula yooshapweya, atthu akina amini yaya apwetecha.
1TI 1:20 Akina aya ti Hemeeni na Alishantere. Yo kawaalikhela Epiliisi yoori awaahoowise, ajuwe ohikufuru.
1TI 2:1 Apho, ehinarettiwe hatha etthu, kinuuhirimizani olompa; lompa yookhola moolu, yoovekeleliwa anaatamu ooshi na lompa yooshukhurwela.
1TI 2:2 Mwiwaalompele afwalume na attunkhulu ooshi apale ariinaaye yenzi yoori fweeyo niiyane meekhazi a wiitthaala, a heeri, eemaani na hishima khuluyeene.
1TI 2:3 Epo pi ziiyiye zooshapweya na zontuvela Nnyizinku Namuusuru etthu.
1TI 2:4 Ye ontakha yoori eeye a wuusurukha atthu ooshi na ajuwe haakhi.
1TI 2:5 Nnyizinku ori mmote paasi, na namasiilanisa wa atthu na Nnyizinku na-ye ori mmote paasi, Yinsa Al-Masiihu pinaatamu,
1TI 2:6 otu aleviyeeyo ohaayi awe khuripha hisapu za twampi za atthu ooshi, oshaahiti opu Nnyizinku enkha wakathi khwaamili.
1TI 2:7 Akintta ohata kinlupa khweele, keetta othawuliwa yoori kiiye namalaleya, kiiye aswihaapa na kiiye namanozela wa mattakhuzi apa a amini na a haakhi, khwa khapila zooshi.
1TI 2:8 Apho, alume ooshi kintakha yoori wakhula vahali ankusanyeyaavo alompe alansaka makhono na rooho y'eemaani woohikatipukhi na woohinyakulisani.
1TI 2:9 Aakha na-yo kintakha yoori awale kuwo wa hishimavo, ajishapweyise woohijitayiti khwa nanna eneezelaazo, oshapweya waya ohiiye woofuka mattunttu oohifwayi wala owala thahapu wala osaka ama kuwo za waatta nzurukhu,
1TI 2:10 oshapweya waya wiiye wa khaazi zooshapweya nkhama aakha animwaaputwaaye Nnyizinku.
1TI 2:11 Aakha, amana anozeliwaka ana yoojiitthaaza na ojinyamaza.
1TI 2:12 Akiniwaatakhisa aakha onozela wala ojinkha yenzi vakatthi wa alume, ana yawiiya oonyamala.
1TI 2:13 Maana tthakuzi wa wumpiwa ti Adamu, aphano khumpiwa Haawa.
1TI 2:14 Aattettekhiweeyo khahiyo Adamu, muukha ti ye aattettekhiweeyo pi ohata wa Epiliisi, khusutukhwana akwelaka ntwampi.
1TI 2:15 Apho, aakha hatha nkhama awaapattha aana, anuusurukha eeyaru nkatthi wa epaata na pheta, na ottakatthifu na hishima.
1TI 3:1 Mattakhuzi apa pi ookhweele: amana ntthu atakha wiiya namalokozela wa Ojama wa Nnyizinku, onhithajiya khaazi yooshapweya.
1TI 3:2 Namalokozela wa Ojama wa Nnyizinku eeye ntthu woohaakanyereliwi etthu, eeye nlume wa wiiyana muukha mmote, woojiinanela, woojiitthaaza, wooshitahiwa, woomakeleya na ankhitiraaye osomisa.
1TI 3:3 Ahiiye ntthu woohapaliwa ama woohusuti, eeye ntthu woovilela na wa heeri. Ahiiye ntthu wontuvela nzurukhu.
1TI 3:4 Eeye ntthu wa weettettisa vaje vawe saana, wooshututeliwa pi aanaawe na wooshitahanana.
1TI 3:5 Nkhama ntthu khaneettettisa saana vaje vawe, onlokozela toovi ojama wa Nnyizinku?
1TI 3:6 Namalokozela wa Ojama wa Nnyizinku ahiiye ntthu anttaaye onjuwaru Yinsa, maana enwaheya ompattha ojikhupali, khukwelana ophukiwa otthuupo aphukiweeyo Sheethwani.
1TI 3:7 Apho, namalokozela wa Ojama wa Nnyizinku eeye ntthu wooshitahiwa pi atthu apale oohiiyi a Ojama wa Nnyizinku, yoori ahikwele mmiraakho za Sheethwani eeya wootaraweya.
1TI 3:8 Khwa nanna etthiipo anamarumeyela na-yo eeye atthu ooshitahiwa, ahiiye amwanomwaano, ahiiye oohapaliwa wala oowaatuvela opattha fwayita yoohiiyi ya haakhi.
1TI 3:9 Eeye atthu oohikheetiwi pi rooho zaya na oojilipisana mwentto wa amini athoonyeziweeyo ti Nnyizinku.
1TI 3:10 Na-yo ahinenkhiwe orumeyela ana yawooniwa khapula mwentto aya, amana ahoonaniwi mwentto wootakhala phi aninkhiwaavo orumeyela.
1TI 3:11 Khwa nanna etthiipo na-yo aakha anrumeyelaaye eeye ooshitahiwa, eeye atthu oohittakhuli pure, oosuluheya na awaamineya khwa zooshi.
1TI 3:12 Anamarumeyela eeye alume awiiyana muukha mmote, oowaalela aanaaya saana na aweettettisa vaje vaya.
1TI 3:13 Amana arumeyela saana ampattha shitaha khuluyeene na okhomaala nkatthi wa amini ariinaaye na Yinsa Al-Masiihu.
1TI 3:14 Kiniwaatikhela weeyo Timootiyu warakha eti, keekeselaka oteela wuuthotola nasaapi,
1TI 3:15 ila amana kirupaza, warakha eto entta owuuza nanna yoojeettettisa vakatthi wa Ojama wa Nnyizinku. Opu wiiyiyeeyo kerezha ya Nluku Woohaayi, nripu na nchina l'ookhweele.
1TI 3:16 Khaavo hatha ntthu mmote antakhaaye okheeti yoori etile Nnyizinku athoonyeziyeeyo monkoni wa Yinsa Al-Masiihu ti yootikinisa: Ye aajithoonyeziye nkhama pinaatamu khuhakikhiwa ti Rooho Ttakatthiifu, khooniwa pi malayikha, khulaleyiwa tuniya zooshi, khukhupaliwa voolumwenku, khuweziwa pinkuuni nkatthi wa nuuru.
1TI 4:1 Rooho Ttakatthiifu enlupa saaneene yoori omwiisho anlawa atthu akina alikhe amini, asiilezaka nafusi zoottettekha na masomi a masheethwani.
1TI 4:2 Masomi aya apo anlankha mmakhono wa manaafikhi na anamahata, ariina rooho zoolukula ahinjuwaaye etthu yootakhala wala yooshapweya.
1TI 4:3 Yo aniwooza atthu yoori oralana mwiikho na vitthu-zoojiwa kinoko zaya haraamu. Vitthu-zoojiwa epile Nnyizinku aphattucha yoori apale animwaaminaaye na anjuwaaye haakhi, aje anshukhurwelaka.
1TI 4:4 W'eekhweele, epile Nnyizinku aphattuchiyeeyo pi zooshapweya zooshi, ehiiyevo hatha moote enthanyiwaaye amana yiiya yoopokhereliwa wonshukhurwelavo Nnyizinku.
1TI 4:5 Vitthu-zoojiwa zaya epo zinhalaalishiwa ti nttakhuzi la Nnyizinku na lompa.
1TI 4:6 Amana weeyo owaanozela attwiizo mattakhuzi apa, oniiya karumeya wa Yinsa Al-Masiihu wookemaani, ojilipisanaka mattakhuzi a amini na masomi ookhweele apa olottiyeeyo.
1TI 4:7 Masomi oovonyeya na hantisi zoololo ojiwerawerisane. Ojikhomaaze na emaani.
1TI 4:8 Okhomaaza makhonkolo fwayita yaya vattitthiiru, ila emaani ti ye eriina fwayita khwa zooshi, maana entana nroromelo w'oohaayi otthuupo na aahera.
1TI 4:9 Mattakhuzi apa pi awaamineya na ansuhi okhupaleliwa.
1TI 4:10 Ti eto ninjuumanisaaye na okhola khaazi mwaasa yoori nroromelo etthu nattha wa Nnyizinku Woohaayi. Ye Namuusuru wa anaatamu ooshi, haaswa-haaswa khwa apale animwaaminaaye.
1TI 4:11 Mattakhuzi apa ohirimize na osomise.
1TI 4:12 Hatha ntthu mmote ahitarawu oshaapu awo, ila khwa ottakhula wawo, menttezi awo, pheta, amini na wookemaanivo wiiye nthoonyezo wa anamwaamini.
1TI 4:13 Vakatthi wa anamalottela, mpakha miiyo ota, olipane osoma, otafusiri na osomisa Nttakhuzi la Nnyizinku.
1TI 4:14 Wakathi waattheeliweevo makhono pi attunkhulu veeshwa vawo oolompelaka, Nnyizinku nkatthi wa Rooho Ttakatthiifu awinkha tthuvo. Ohisahawu orumeyela.
1TI 4:15 Vitthu epi weettettise saana na ojilipisane etthiipi yoori okhomaala wawo nkatthi wa amini wiiye wa wooniwa pi atthu ooshi.
1TI 4:16 Ojiinanele weeyo na wiiyane phoole na mwentto opu onsomisaaye, vitthu epo ojilipise oretta. Amana okhanyarela oretta etthiipo, ontta ojuusuru weeyo na apale anuusiilaaye.
1TI 5:1 Nlume wa wuuziti owula ohisala ommaruwela, ila onlipisele saana nkhama papaawo, mashaapu nkhama attwiizo,
1TI 5:2 aakha a wuuziti owula nkhama amamazo, na aamwari nkhama alupuwo wookemaanivo.
1TI 5:3 Owaatthantte aakha oofweliwa pi amanna zaya, apale khweele ahina ntthu woowaatthantta.
1TI 5:4 Ila nkhama owaapho namafweliwa ti mannawe ariina aana ama atuulu, atthaapo mwanzo asome mwentto wa tiini antthanttaka jamaayaya. Etthiipo apapazaya phi aniwaariphaavo. Eto etthu enintuvelaaye Nnyizinku.
1TI 5:5 Muukha woofweliwa ti mannawe, woohiina ntthu wontthantta, nroromelo awe onttha wa Nnyizinku, akhanyarelaka olompa avekaka waawunikha nthana na osikhu.
1TI 5:6 Ila otule anjitupweezaaye nkatthi wa tuvela z'oolumwenku, hatha nkhama ori haayi oniiya woofwa.
1TI 5:7 Owaarume oretta etthiipo theenya, yoori vakatthi vaya ehooniwevo paathuli.
1TI 5:8 Ntthu amana ajamaaze haaswa-haaswa mamaawe na pipiyaawe ahiwaatthantti, akatthala epaata yawe na oninziti kaafiri.
1TI 5:9 Ahaatikhiwe nwarakha yawiinaneliwa namafweliwa ti mannawe muukha woohiina nyaakha siithiini na eeye muukha araliweeyo nlume moote paasi.
1TI 5:10 Amana eeya muukha woojuwaniwa oretta vitthu zooshapweya, woowaalela saana aanaawe, woomakeleya, amana eeya muukha aari woosakaaye moolu a atthu oottakatthiifu a Nnyizinku, aari owaawunakaaye anamathowiwa na aari okholakaaye khaazi zooshi zooshapweya, othuuto ti aatikhiwe nwarakha ya anamafweliwa pi amanna zaya.
1TI 5:11 Aakha awiiya anakhinzi nwarakha ya anamafweliwa pi amanna zaya ohiwaatikhemo, maana amana tuvela zaya ziziti ojinkha mmakhono wa Yinsa Al-Masiihu, antakha oraliwa.
1TI 5:12 Khwa nanna ethiito, antta ojipatthisa paathuli mwaasa wookattha wahati aya opule wamwanzo aarettaniyeeyo Nnyizinku.
1TI 5:13 Theenya antta ojinozela oviliwa, weettetta nyuupa khwa nyuupa, khahiyo oviliwaru paasi, ohankawaani, waapa na ottakhula vitthu zoohifwayi.
1TI 5:14 Apho, kintumerela yoori anamafweliwa pi amanna zaya apale eeyiye anakhinzi araliwe, eeyane aana alokozele vaje vaya, ahimwinkhe kiphenyo atuwi etthu yoowaalupeza vitthu zootakhala.
1TI 5:15 Akinoko aya apathuli anlotta Epiliisi.
1TI 5:16 Muumini amana eeyana jamaaye woofweliwa ti mannawe, ona yontthantta, ahinlikhele Ojama wa Nnyizinku. Alikhe yoori owahi owaatthantta apale akina oofweliwa pi amanna zaya ahina ntthu woowaatthantta.
1TI 5:17 Attunkhulu apale ankholaaye khaazi saana, Ojama wa Nnyizinku ona yoowaashitahi swaafu piiri, haaswa-haaswa apale antafusiraaye na apale ansomisaaye.
1TI 5:18 Nttakhuzi la Nnyizinku linlupa yoori: “Milomo za mompe ettukuttaka tiriku mwihifuke.” Khulupa theenya liraka: “Nakhaazi onsuhi wiiyana phakari yawe.”
1TI 5:19 Otule eeyiye nttunkhulu wa Ojama wa Nnyizinku ohikhupalele olokoveziwa, aheetteeni opuwa atthu awiri ama attatthu awiiya mashaahiti.
1TI 5:20 Wakhula otule anrettaaye twampi onshowere vakatthi wa Ojama wa Nnyizinku yoori theenya apale akina aya oove.
1TI 5:21 Miiyo kiniwuuza kuulipiselaka channu mmakhono wa Nnyizinku na Yinsa Al-Masiihu na malayikha apale oothawaziwa, kuutumerelaka yoori mattakhuzi apa oshututele, ohiinanelaka wala ohinthawulaka hatha ntthu.
1TI 5:22 Ohaakuve onthawaza ntthu nkatthi wa khaazi ya Nnyizinku yoori oheettemo ntwampi za atthu akina; ojiwerawerise wookemaanivo.
1TI 5:23 Mwaasa wa ejohojoho yawo na marati apale oniiyanakaaye, ohisala onywa maatiru paasi, osala onywa nenkawu viinyu vattitthiiru.
1TI 5:24 Awaapho atthu akinoko zinooneyaaye twampi zaya ahineeyane paathuli, ila twampi za atthu akinoko wooneya waya ziniiya zoorupaza.
1TI 5:25 Khwa nanna ethiito na-ye khaazi zooshapweya zinooneya, hatha epile zoohooneyi khazinwahi ojivitha.
1TI 6:1 Ooshi apale eeyiye amwiitthwaana ambwana zaya ana yoowaashitahi, yoori nzina la Nnyizinku na masomi etthu ahitarawiwe.
1TI 6:2 Apale ariina mbwana wa wiiya namalottela wa Yinsa, ahilikhe onshitahi maana ttwiiyaya. Okinoko waya ana yoowaakholela khaazi yooshapweyacha, maana apale ampatthelaaye fwayita khaazi etile ankholaaye yo mamuumini na pi oophetiwa. Mattakhuzi apa osomise na ohirimize.
1TI 6:3 Nkhama ntthu onsomisa mwentto woofwarikhana ohinkholananaaye na mattakhuzi oolikana a Mbwaneetthu Yinsa na mwentto wa emaani,
1TI 6:4 ntthu aya oto tu woojikhupali na woohijuwi hatha etthu. Onaaye olwele wontuvela onyakulisana na okheetisana nkatthi wa mattakhuzi antisaaye nrima, wuumani, mattukhano, waakanyerelana vitthu zootakhala,
1TI 6:5 na oshinttana woohilikheleli. Nkhama etthiipile azowereliyeezo atthu awiiyana akhili za wuntuwanyiwa, eeyeliweeyo haakhi yaya, apo aya anoona yoori tiini etthu enreelisaaye.
1TI 6:6 W'eekhweele, tiini enreelisa channu khwa atthu apale amfurahelaaye epile ariinaazo.
1TI 6:7 Voolumwenku apha khanaataniyevo hatha etthu na khaninthuulavo hatha etthu.
1TI 6:8 Amana niiyana kuwo na etthu-yoojiwa nifurahele etthiipo.
1TI 6:9 Ila apale aneekesaaye oreela ankwela muuzayiniwa na mmiraakho za Sheethwani, alottelelaka tuvela zoololo zimpwetechaaye. Etthiipo eniwaatupweeza muuthowelela na nwantipweya.
1TI 6:10 W'eekhweele pheta ya nzurukhu nchina la vitthu zooshi zootakhala. Mwaasa w'oomaashokopho na nzurukhu, atthu akina alikha epaata yaya khusala ajihoowisa venkivene.
1TI 6:11 Ila weeyo, ntthu wa Nnyizinku, vitthu zaya epo owerawere. Weekese weettettisa shariya, emaani, epaata, pheta, ovilela na ojithuza.
1TI 6:12 Wuumane viittha yooshapweya y'eepaata, okholelele ohaayi wa mileele. Okhuweleliweeyo n'oolaza oshaahiti wooshapweya wa tukhuru yawo omaasho wa atthu a waatta.
1TI 6:13 Aphano, mmakhono wa Nnyizinku otule aninkhaaye ohaayi zumpe zooshi, na mmakhono wa Yinsa Al-Masiihu, otule alaziyeeyo oshaahiti wooshapweya wa tukhuru omaasho wa Pontiyu Pilaatu, miiyo kinuuruma weeyo,
1TI 6:14 yoori otthe nroho nrumo swaafi na woohilokoveziwi hatha etthu, mpakha epuwelelo ya Mbwaneetthu Yinsa Al-Masiihu.
1TI 6:15 Etthu yaya eto Nnyizinku onlawa arettikhanise, amana ofiya wakathi wa khweele. Nnyizinku othuuto eeyiyeeyo wooshapweya na ariina owahi vatulu wa zooshi, Mfwalume wa afwalume na mbwana wa ambwana.
1TI 6:16 Ye otthwe khamfwa na oniikhala nnuuru ehinaattameyaaye, khina anamoone, wala anwahaaye omoona. Ottitthimisiwa wiiye Waawe na owahi khwa mileele. Amiina.
1TI 6:17 Monkoni wa mathaajiri voolumwenku apha, owaahirimize yoori ahisala ajinkhelela, wala thwaama zaya ahitthe nkatthi wa maali epile zoohilipaneyi; ila thwaama zaya atthe wa Nnyizinku, Ye oninkha wa waattavo vitthu zooshi yoori nisala nijirela.
1TI 6:18 Owaahirimize oretta saana na eeye mathaajiri a khaazi zooshapweya, awiiyana rooho yooleva na wiiya atthu anwahaaye omeela epile aniiyanaazo.
1TI 6:19 Khwa nanna ethiito antta wiiyana okhu ninttaawo akhipa yookhomaala, yoori apatthe ohaayi wa khweele.
1TI 6:20 Weyo Timootiyu! Etile olikheliweeyo otthe nroho. Owerawere mattakhuzi oololo aninveyisaaye Nnyizinku na akhili zoovonyeya zinooniwaaye nkhama ojuwa ila zihiiyeeni.
1TI 6:21 Akinoko aari olottelaaye akhili zaya epo, alaamo mwiipaata. Rehema ya Nnyizinku yiiye vamote na mweeyo.
