﻿Ezekiyɛli.
19.
Matigi Ala k’a fɔ ne ye ko ne ye sangadɔnkiri dɔ la Izirayɛli ɲamɔgɔw ta ko ra, 
k’a fɔ ko: E, ele bamuso tun ye jaramusoba le ye dɛ, jara tɔw cɛ ra! A tun bɛ la jarakanbelenw cɛ ra, a tun b’a denw lamɔ. 
A k’a ta den kelen koro, ka o kɛ jarakanbelen ye. Ale ka sogomina degi, a bɛ mɔgɔw fana mina. 
Siya dɔw nana a ko mɛn. Olugu ka dinga sogi a ɲa, k’a laben o kɔnɔ; o k’a mina ka nunnanɛgɛ don a nun na ka taga ni a ye Misiran jamana ra. 
Jaramuso k’a ye ko ale k’a dencɛ makɔnɔ ka dɛsɛ minkɛ, ko ale jigi tigɛra fana, a k’a ta jaraden dɔ wɛrɛ ta ka o fana koro ka o kɛ jarakanbelen ye. 
Ale ka kɛ yaala ye ni jara tɔw ye, a fana kɛra jarakanbelen ye; a ka sogomina degi, a bɛ mɔgɔw fana mina. 
A ka o ta bon barakamanw cɛn, ka o ta duguw halaki. A kasikan mankan kosɔn, jamana ni a mɔgɔw bɛɛ ja bɛ tigɛ. 
Nka siya tɔw ka ɲɔgɔn lajɛn a kama; o bɔra kɛrɛfɛjamanaw ra ka na a kama. O ka o ta jɔ firi a kan; a benna o ta dinga kɔnɔ. 
O ka nunnanɛgɛ don a nun na k’a bla kɛsu dɔ kɔnɔ; o tagara ni a ye Babilɔni masacɛ fɛ. O tagara a datugu bon barakaman dɔ kɔnɔ, janko mɔgɔ si kana a kan mɛn tuun Izirayɛli kuru kunna. 
I bamuso tun bɛ i ko rɛzɛnsun min turura jida ra. Den caman ni flaburu caman tun b’a ra, sabu ji caman tun b’a kɔrɔ. 
Yiriboro barakamanw tun b’a ra; a yiriw kɛra masacɛberew ye. A janyara ka kɛ yiri tɔw bɛɛ san fɛ. Mɔgɔ tun bɛ to fɔ yɔrɔjan k’a ye, a janya kosɔn, ani a ta yiriboro camanba kosɔn. 
Nka o nana a tufa k’a bɔn ni jusugban ye, k’a firi dugu ma. Terebɔyanfan ta fɔɲɔ gbanninman k’a denw jaja; o benbenna. A yiriboro barakamanw jajara, tasuma ka o bɛɛ jɛni. 
Sisan o ka o rɛzɛnsun turu kongokolon le kɔnɔ, dugukolojalan jintan dɔ ra. 
Tasuma dɔ bɔra a yiriborobaw ra k’a yiriboromisɛnw ni a denw jɛni. Yiriboro barakaman t’a ra tuun, masacɛbere tɛ sɔrɔ a ra tuun. Nin dɔnkiri ye sangadɔnkiri le ye; a bɛ la i ko sangadɔnkiri. 
