﻿Yeremi.
13.
Matigi Ala k’a fɔ ne ye ko: «Taga cɛsirinan dɔ san, min danna ni lɛnfani ye, i ye a siri i yɛrɛ cɛ ra; nka i kana a to ji ye se a ma.» 
Ayiwa, ne tagara cɛsirinan san, i n’a fɔ Matigi Ala tun k’a fɔ ne ye cogo min na, k’a siri ne yɛrɛ cɛ ra. 
Matigi Ala k’a ta kuma lase ne ma tuun a siɲaga flanan na, ko: 
«I ka cɛsirinan min san k’a siri i cɛ ra, o ta ka taga ni a ye Efirati ba fan fɛ, i ye taga a dogo farawo dɔ kɔnɔ yi.» 
Ne tagara a dogo Efirati ba kɔrɔ i n’a fɔ Matigi Ala tun k’a fɔ cogo min na. 
Wagatijan tɛmɛnin kɔ, Matigi Ala k’a fɔ ne ye ko: «Wuri ka taga Efirati ba ra; ne tun ko i ye taga cɛsirinan min dogo yi, taga o ta.» 
Ne tagara Efirati ba kɔrɔ, ne tun ka cɛsirinan dogo yɔrɔ min na, ne ka o yɔrɔ wɔgɔbi ka cɛsirinan bɔ. Nka ne k’a ye ko cɛsirinan tun torira, a tɛ foyi ɲa tuun. 
Matigi Ala k’a ta kuma lase ne ma tuun; 
a ko: «Matigi Ala ko: ‹Ne bɛna Zuda mara mɔgɔw ta yɛrɛbonya cɛn nin cogo le ra, ani Zeruzalɛmukaw ta yɛrɛbonyaba min bɛ o ra. 
O siya mɔgɔjugu minw bɛ ban ka ne ta kuma lamɛn, minw bɛ tagama ka kaɲa ni o yɛrɛ jusukun ta miiriyaw ye, ka tugu ala wɛrɛw kɔ, ka o kinbiri gban olugu kɔrɔ ka o bato, o mɔgɔw bɛna kɛ i ko nin cɛsirinan min tɛ foyi ɲa tuun. 
Sabu mɔgɔ bɛ cɛsirinan siri a yɛrɛ cɛ ra cogo min na, ne fana tun ka Izirayɛli ta mɔgɔw siri ne cɛ ra o cogo le ra, ani Zuda ta mɔgɔw bɛɛ, Matigi Ala ko ten, janko o ye kɛ ne ta mɔgɔw ye, ani ne tɔgɔ bonya sababu, ani ne tandori sababu, ani ne ta nɔɔrɔ; nka o ma ne lamɛn.› » 
«Ayiwa, nin kuma fɔ o ye, ko Matigi Ala, Izirayɛli ta Ala ko: ‹Rɛzɛnjiforogow bɛɛ kɛra janko o ye fa rɛzɛnji le ra!› O bɛna i jaabi ko: ‹Yala o tuma anw m’a lɔn ko rɛzɛnjiforogow bɛɛ kɛra janko o ye fa rɛzɛnji ra le wa?› 
O tuma i bɛna a fɔ o ye ko Matigi Ala ko: ‹Ne bɛna nin jamana mɔgɔw bɛɛ fa; masacɛ min siginin bɛ Dawuda ta masasiginan kan, ani sarakalasebagaw, ani ciraw, ani Zeruzalɛmukaw bɛɛ, ne bɛna o bɛɛ fa fɔ ka o ɲanamini. 
Ne bɛna o gbasi ɲɔgɔn na ka o cici, facɛw ni dencɛw bɛɛ. Matigi Ala ko ten. Ne tɛna hina, ne tɛna maɲuman, ne tɛna makari mɔgɔ si ra. Foyi le tɛna ne bari ka o halaki.› » 
Aw ye mɛnni kɛ, aw ye aw toro malɔ kosɛbɛ, aw kana yada, sabu Matigi Ala le bɛ kumana. 
Aw ye bonya la Matigi Ala, aw ta Ala kan, sani a ye na dibi lajigi aw kan, sani aw sen ye talon kuruw ra, terebenda dibi ra. Aw bɛ yeelen makɔnɔna, nka a bɛna a yɛlɛma k’a kɛ saya dibi le ye, k’a kɛ dibikuruba ye. 
Nka ni aw ma lamɛnni kɛ, ne bɛna dogo ka kasi aw ta yɛrɛbonya kosɔn; ne bɛna kasi ka ɲaji caman bɔ, sabu o bɛna Matigi Ala ta sagakuru mina ka taga ni a ye. 
«A fɔ masacɛ ni masamuso ye ko: ‹Aw ye jigi ka sigi dugu ma, sabu masafugula min tun ye aw ta masiri ye, o bɔra aw kun na ka ben.› 
Jamana woroduguyanfan duguw ta dondaw datugura, mɔgɔ si tɛ yi min bɛ se ka o dayɛlɛ. Zuda mara mɔgɔw bɛɛ minana, o bɛɛ lajɛnnin minana ka taga ni o ye.» 
«Zeruzalɛmu, i ɲa kɔrɔta ka flɛri kɛ, minw bɛ nana ka bɔ sahiliyanfan fɛ, o flɛ! Sagakuru min tun dira i ma, o bɛ min? O sagakuru min tun ye i ta masiri ye, o bɛ min? 
Ele yɛrɛ ka minw karan, ka o kɛ i kuntigiw ye, ni olugu nana sigi i kunna, i bɛna mun fɔ sa? Yala dimi tɛna ben i kan i ko muso jigibagatɔ ta dimi wa? 
Ni i k’a fɔ i yɛrɛ kɔnɔ ko: ‹Mun kosɔn nin kow sera ne ma sa?› I ta terenbariya caya kojugu le kosɔn, i ta tagafe kɔrɔtara, k’a to o benna i kan. 
«Yala Etiyopika bɛ se k’a fari cogoya yɛlɛma wa? Walama waraninkala bɛ se k’a siw ɲɛgɛn bɔ a yɛrɛ ra wa? Aw fana bɛ se ka koɲuman kɛ cogo di, aw minw derira kojugukɛ ra? 
Ne bɛna aw janjan i ko kongokolon fɔɲɔ bɛ binjalan cɛ ka taga cogo min na. 
«Ele ninyɔrɔ ye nin ye, ne ka min latigɛ i ye. Matigi Ala ko ten, sabu i ɲinana ne kɔ, ka i jigi la faninya alaw kan. 
Ne bɛna i ta tagafe kɔrɔta k’a se fɔ i ɲada ma janko o ye i lebu ye. 
Ne ka i ta jɛnɛyaw ye, ani i ta cɛkokasiw, ani i bɛ i ta jatɔyajugu minw kɛ kongoriw kunna ani kongokɔnɔyɔrɔw ra. Ne ka i ta ko haramuninw ye. E, Zeruzalɛmu, bɔnɔ bɛna ele sɔrɔ, ele bɛna bɔ i ta saninyabariya ra tuma juman le sa?» 
