LUK 2:6 Ga Bethlehem-ŋurnydja ŋunhi buṉbu ŋuli ganha yolŋu walal ŋorra'-ŋurranha, ŋunhiliyiny buṉbuŋur dhaŋaŋdhin ŋäthil yan, ga bäyŋuthinan ŋunhi Mary-wnydja ga Joseph-kuny dhaḻakarr ŋorranharaw. Bala maṉḏa ŋorrany warra kan'kalnha wäŋaŋur. Bala nhanukalaŋaw yothuwnydja waluny galkithinan dhawal-guyaŋanharawnha. Bala nhanukuŋ ŋunhi Mary-wuŋuny yothuny maḻamarrnydja dhawal-guyaŋanan ḏirramuny, ga ŋayiny ŋanya Mary-nydja garrpir girriy'nha, bala ŋanya ŋayi yorrkuŋalnydja ŋunhi yothunhany ŋunhiwilidhin bala'palalilnydja mulmumirrililnha, ŋunhi gan ŋatha malany ŋorran warrakan'ku malaŋuw ŋunhilidhi.
LUK 2:8 Ga ŋunhili bili yan waŋganyŋur wäŋaŋur, yurr ḏiltjiŋurnha, warrakan'‑djägamirr mala gan djäga walalaŋgiyingalaŋaw bimbiw malaŋuw. Ga ŋuriŋi bili munhay,
LUK 2:9 God‑Waŋarrgu dhäwu‑gänhamirrnydja yolŋu maḻŋ'thurra walalaŋgal ŋunhiliyiny warrakan‑djägamirriwalnydja malaŋuwal, ga baḏayalayny'tja walalany ŋunhi Garray Godkalnydja ḻiw'maraŋalnha djeŋarra'yaŋalnha, ga barrarinan walal ŋunhi mirithinan yan.
LUK 2:10 Ga ŋayiny ŋunhi God-Waŋarrguny dhäwu-gänhamirrnydja yolŋu waŋan walalaŋ bitjarr, “Yaka walal barrari. Ŋarrany dhuwal marrtjin räli gäŋal mirithirrnha manymak dhäwu nhumalaŋ, ga dhiyaŋiyin dhu ŋunhi dhäwuynydja galŋa-djulŋithinyamaramany yolŋunhany walalany bukmaknhan yan.
LUK 2:11 Bili dhiyaŋuny bala munhay gäthurnydja nhumalaŋ Walŋakunhamirrnydja bilin dhawal‑guyaŋanan ŋunhan David-kalnha wäŋaŋurnydja, yurr ŋayi ŋunhi Maŋutji‑dhunupayanhawuynha Godkuŋun.
LUK 2:12 Maḻŋ'maramany nhuma dhu ŋanya ŋunhidhiny yothunhany garrpinawuynha girriy'nha, ga ŋorrany ŋayi ga ŋunha warrakan'kalnha mulmupuyŋurnha bala'palaŋurnha. Ga dhuwalatjanna nhuma dhu nhanŋu marŋgithirrnydja ŋunhi ga dharaŋandja ŋunhi ŋayiny ŋunhiyin Maŋutji‑dhunupayanhawuynha Godkuŋun.”
