﻿Mazimuriyaa.
145.
Daawite s'aafeedda galataa sabaa Abeet ta S'oossaw, ta kaatiyaw, taani neena gitayananne, ne suntsaa med'i med'inaw galatana. 
Taani neena ubbaa gallassi sabbana; ne suntsaakka med'i med'inaw galatana. 
Med'inaa Goday wolk'k'aama; d'ok'k'a galatay aw bessee. Aa gitatetsay asaa k'ofaappe aad'd'ee. 
Itti yeletay hara yeletaw neeni ootseeddawaa odana; ne malalissiyaa oosotuwaakka awaayana. 
Unttunttu ne bonchchuwaanne ne anggaa gitatetsaabaa haasayana; taanikka ne malalissiyaa oosuwaa zaara zaaraadde k'oppana. 
Asay, «Hoola!» giissiyaa ne oosuwaa wolk'k'aabaa haasayana; taanikka ne gitatetsaa awaayana. 
Unttunttu ne keekkatetsaa daruwaa odana; ne s'illotetsaabaakka yes's'ana. 
Med'inaa Goday k'arettiyaawaanne maariyaawaa; I hank'k'ettanaw elleellennawaanne; danddayanchchanne aggena siik'uu dariyaawaa. 
Med'inaa Goday ubbaw keeka; I bare med'd'eedda ubbaw k'arettiyaawaa. 
Abeet Med'inaa Godaw, ne med'etaa ubbay neena galatana; ne asatuu ubbaykka neena sabbana. 
Unttunttu ne kawutetsaa bonchchuwaabaa haasayana; ne wolk'k'aabaa odana. 
Hewenne, ne wolk'k'aama oosuwaabaanne ne kawutetsaa bonchchuwaa anggaabaa asaa erissana. 
Ne kawutetsay med'inaa kawutetsaa; ne maatay yeletaa ubbaa gakkanaassa. Med'inaa Goday bare geedda k'aalaw ubbaw ammanettiyaawaa; I bare oosuwaa ubbaan k'arettiyaawaa. 
Med'inaa Goday hokkeeddawantta ubbaa zemppissee; kunddeeddawantta ubbaa dentsee. 
Ubbaa ayifii neekko s'eellee; unttuntta koshshiyaa wodiyaan neeni unttunttoo k'umaa immaasa. 
Neeni ne kushiyaappe imma; pas'a de'iyaawantta ubbaa amuwaa alaa. 
Med'inaa Goday bare ogiyaan ubbaan s'illuwaa; I bare oosuwaa ubbaan k'arettiyaawaa. 
Med'inaa Goday barena s'eesiyaa ubbaw, tumuwaan barena s'eesiyaa ubbaw matan de'ee. 
I barew yayyiyaawanttu ubbaw, amuwaa kuntsee. K'ay I unttunttu waasuwaa sisiide, unttuntta ashshee. 
Med'inaa Goday barena siik'iyaawantta ubbaa naagee; shin iitatuwaa ubbaa d'ayissana. 
Taani ta doonaan Med'inaa Godaa galatana. Med'etaa ubbay Aa geeshsha suntsaa med'i med'inaw galato! 
