﻿Mazimuriyaa.
141.
Daawite s'aafeedda mazamuriyaa Abeet Med'inaa Godaw, taani neena s'eesay; taana maaddanaw elleella. Taani neekko waassiyaa wode, ta kooshshaa sisa! 
Ta woosay is'aanaa c'uwaadan, ne sintsa shiik'o; taani ta kushiyaa mic'c'iyaawe, new omarssa yarshshuwaa mala gido. 
Abeet Med'inaa Godaw, ta doonaa naagiyaawaa wotsa; ta mettershshatuwaa penggiyaan zabayinyaa essa. 
Bayzzuwaa ootsiyaa asatuwaanna, iita oosuwaa ootsenna mala, ta wozanaa iitabaakko zaaroppa. Unttunttu gibiraakka taana muzoppa. 
S'illo Asay taana aggena siik'uwaan seeranawunne muranaw danddayee; unttunttu taana bak'k'ooppe hewe ta huup'iyaan zayitiyaa okkiyaawaa mala; ayaw gooppe, taani ubbaa gedekka iitatuwaa oosuwaa bolla woossay. 
Unttunttu daannatuu zaallaa aafuwaana, duge olettiyaa wode, ta k'aalay tuma gidiyaawaa unttunttu Asay erana. 
Biittay goshetiyaawaadaaninne guullu me"eretiyaawaadan unttunttu mek'etsaykka duufuwaa doonaan laalettana. 
Abeet Ubbaa Mooddiyaa Med'inaa Godaw, ta ayifii neena s'eellee; taani neekko bak'ataade attay; taana hayk'oo aatsaade immoppa. 
Unttunttu taw wotseedda gitiyaappenne, iitaa ootsiyaawanttu p'iriyaappe taana naaga. 
Taan saro aad'd'iyaa wode, iitatuu barenttu wotseedda gitiyaan oyk'k'ettino. 
