﻿Mazimuriyaa.
64.
Zammaaretuwaa Kaappoo Yes'etteedda, Daawita mazamuriyaa Abeet S'oossaw, taani maganniyaa maganaa neeni sisa. Taani ta morkketoo yayaad; taana ashsha. 
Iitatuwaa mak'k'uwaappenne, iitaa ootsiyaawanttu shiik'uwaappe taana gentsaa. 
Unttunttu barenttu ins's'arssaa mashshaadan leefeeddino; k'ay marzze k'aalatuwaa, wonddaafiyaa pootsaadan dukkanaw giigisseeddino. 
Unttunttu k'osettiide, barenttu wonddaafiyaa s'illo asaa bolla dafiino; akeekay bayinnan dukkiino; unttunttu yayyikkino. 
Unttunttu barenttu iita mak'k'oo ittuu ittuwaa mintsetsiino; barenttu p'iriyaa k'osiyaasaa zorettiino. Unttunttu, «nuuna ooni be'anee?» yaagiino. 
Unttunttu iitabaa mak'ettiidde, «Nuuni lo"o mak'k'uwaa mak'etteeddo» yaagiino. Hewenne, asaw wozanaynne kahay c'iimma gidiyaawaa bessee. 
Shin S'oossay unttuntta bare wonddaafiyaan dukkana; unttunttu akeekenan madus's'ana. 
Unttunttu mak'k'uwaa diraw, I unttuntta d'ayissana; unttuntta be'iyaa ubbay huup'iyaa k'aatsana. 
He wode Asay ubbay S'oossaw yayana; Aa oosuwaabaa odananne zaari zaariide k'oppana. 
S'illotuu Med'inaa Godaan nashetinonne, aakko bak'atiide attiino; wozanaa suuretuu ubbay galatino. 
