﻿Mazimuriyaa.
47.
Zammaaretuwaa Kaappoo Yes'etteedda, K'oore Naanatuwaa Mazimuriyaa Kawutetsatuu ubbay hintte kushiyaa bak'k'ite; k'aalaa d'ok'k'u ootsiide, S'oossaw galataa yes's'ite. 
Ubbaappe D'ok'k'iyaa Med'inaa Goday yayettanaw bessee; sa'aa ubbaa bollan I wolk'k'aama kaatiyaa. 
Gadiyaa asaa nuuppe garssaana, kawutetsatuwaakka nu gediyaappe garssaana wotsiide, Nuw moodissee. 
I nuw laattiyaa biittaa dooreedda; he biittay, I siik'iyaa Yaak'ooba zaratuu c'eek'ettiyaawaa. 
S'oossay pude kawutetsaa araataa keseedda. Med'inaa Goday pude kesiyaa wode, nashshechchaa hombboc'etsaynne malakataa punnay sisetteedda. 
S'oossaa sabbite; ee, Aa sabbite. Nu kaatiyaa sabbite; ee, Aa sabbite. 
S'oossay sa'aa ubbaa kaatiyaa gidiyaa diraw, galataa sabaa sabbite. 
S'oossay bare geeshsha kawutetsaa araatan utteedda; S'oossay kawutetsatuwaa ubbaa mooddee. 
Kawutetsatuwaa kaappatuu, Abrahaama S'oossaa asatuwaana ittippe shiik'iino. Ayaw gooppe, sa'aan de'iyaa wolk'k'aamatuu ubbay S'oossaassa; I loytsi d'ok'k'u geedda. 
