﻿Mazimuriyaa.
26.
Daawita mazamuriyaa Abeet Med'inaa Godaw, taani suuretetsan hametteedda dirawunne, sid'ii bayinnan Med'inaa Godaa ammanetteeda diraw, taw pirddaa. 
Abeet Med'inaa Godaw, taana paac'c'a, taana bidda; ta wozanaa s'omoosa. 
Ayaw gooppe, aggena ne siik'uu ta sintsan de'ee; taani ne tumatetsaa ogiyaan hamettay. 
Taani c'immiyaa asatuwaana ittippe uttikke; lo"a malatiyaa iitatuwaa maabaran gelikke. 
Iitaa ootsiyaa asatuwaa shiik'uwaa taani is's'ay; makkalanchchatuwaanna ittippe uttikke. 
Abeet Med'inaa Godaw, taani k'ohabeennawaa bessanaw ta kushiyaa meec'c'ay. New yarshshiyaa sa'aa yuuyyay; 
ne galataa yetsaa yes's'aynne neeni ootseedda ooratsabaa ubbaa oday. 
Abeet Med'inaa Godaw, neeni de'iyaa golliyaa, ne bonchchuu ak'iyaa sa'aa taani dosay. 
Taana nagaranchchatuwaanna ittippe pittoppa; woy asaa wod'iyaawanttunna ittippe d'ayissoppa. 
Unttunttu kushiyan iita halchchuu de'ee; k'ay unttunttu ushechcha kushiyan mattaayii kumi utteedda. 
Shin taana gidooppe, taani suuretetsan hamettay. Taana woza; taw k'aretta. 
Ta gedii dembba sa'aan ek'k'eedda; taani wolk'k'aama shiik'uwaan Med'inaa Godaa galatana. 
