﻿Mazimuriyaa.
21.
Zammaaretuwaa Kaappoo Yes'etteedda, Daawita Mazimuriyaa Abeet Med'inaa Godaw, kaatii ne minotetsan hashshu gee; neeni immeedda s'oonuwaan I ayaa nashettii! 
Neeni Aa wozanaa amuwaa aw immaadda; k'ay I neena bare ins's'arssan oochcheeddawaa diggabaakka. 
Neeni lo"o anjjuwaan Aa mokkaasa; geeshsha work'k'aa kallachchaa Aa huup'iyaan wotsaasa. 
Neeni de'uwaa aw immanaadan neena woosseedda; Aw c'ora laytsaanne adussa de'uwaa immaadda. 
Neeni s'oonuwaa immeedda diraw, Aa bonchchuu daree; gitatetsaanne anggaa aw immaadda. 
Neeni aw med'inaa anjjuwaa immaasa; neeni ittippe de'iyaawaan Aa nashechchaasa. 
Kaatii Med'inaa Godaan ammanettee. Ubbaappe D'ok'k'iyaa S'oossaa lo"otetsaa diraw, I k'aas'enna. 
Ne kushii ne morkkatuwaa ubbaa kutuutana; ne ushechchay neena is's'iyaawantta demmana. 
Neeni k'onc'c'iyaa wode, unttuntta c'ooc'iyaa tamaadan s'uuggana. Med'inaa Goday bare hank'k'uwaa suuluwaan unttuntta mittana; Aa tamaykka unttuntta mi d'ayissana. 
Neeni unttunttu naanatuwaa biittaappe, unttunttu zeretsaakka asaa giddoppe d'ayissana. 
Ne morkketuu ne bolla shiik'inonne iitabaa mak'ettiino; shin polikkino. 
Ayaw gooppe, neeni unttuntta ne wonddaafiyaa pootsan dukkanaw baabisana; guyye zaaraadde bak'atissana. 
Abeet Med'inaa Godaw, ne minotetsan d'ok'k'u d'ok'k'u ga; ne wolk'k'aa diraw new galataa mazimuriyaa yes's'eetto. 
