﻿ዮሃንስ ጻፌዳ ኮይሮ ኪታ.
1.
ኑን ኮይሩዋፐ ዶሚደ ደእያ፥ ኑ አይፍያን በኢደ፥ ኑ ኩሽያን አ ቦች በኤዳ ደኡዋ ቃላባ ህንተንቶ ጻፌቶ። ኑን አ በኤዶ፤ ኑ ኩሺካ አ ቦች በኤዳ። 
ሄ ደኡ ቆንጭና፥ ኑን አ በኢደ፥ አባ ህንተንቶ ማርካቴቶ፤ ቃይ ጾሳ አዉዋ ማታን ደእያ ኑዉ ቆንጬዳ መꬍና ደኡዋባ ህንተንቶ ኦዴቶ። 
ቃይ ኑናና ህንተንቶ እትፐተꬃይ ደአና ማላ፥ ኑን በኤዳዋነ ስሴዳዋ ህንተንቶ ኦዴቶ፤ ኑዉ አዉዋናነ አ ናኣ የሱስ ክርስቶሳና እትፐተꬃይ ደኤ። 
ኑን ኑ ናሸቻይ ፖለታና ማላ፥ ሀዋ ህንተንቶ ጻፌቶ። 
ኑን ጾሳ ናኣፐ ስሲደ፥ ህንተንቶ ኦድያ ኪታይ፥ “ጾሳይ ፖኡዋ፤ አን ꬉማይ ሙለካ ባዋ” ያግያዋ። 
ኑን ኑዉ አናና እትፐተꬃይ ደኤ ጊደ ꬉማን ደኦፐ፥ ኑ ሃሳያንነ ኑ ኦሱዋን ዎርዶቴቶ። 
ሽን ፖኡዋን እ ደእያዋዳን፥ ኑንካ ፖኡዋን ደኦፐ፥ ኑዉ እቶ እቱዋና እትፐተꬃይ ደኤ፤ ቃይ አ ናኣ፥ የሱስ ክርስቶሳ ሱꬃይ ናጋራ ኡባፐ ኑና ጌሼ። 
ኑን ናጋራ ኦꬅበይኮ ጎፐ፥ ኑረካ ኑና ጭሜቶ፤ ኑናን ቱማተꬃይካ ባዋ። 
ሽን ኑን ጾሳዉ ኑ ናጋራ ፓጾፐ፥ እ ኑ ናጋራ አቶ ጋናዉነ ኑ ባይዞ ኦሱዋ ኡባፐ ኑና ጌሻናዉ፥ አማነትያዋነ ቱሙዋ ኦꬅያዋ። 
ኑን ናጋራ ኦꬅበይኮ ጎፐ፥ ጾሳ ዎርዱዋ ጌቶ፤ አ ቃላይካ ኑ ዎዛናን ደኤና። 
