﻿ያይቆብ ጻፌዳ ኪታ.
1.
ታን ያቆብ ጾሳ አይሊነ ጎዳ የሱስ ክርስቶሳ አይሊ፥ ቢታ ኡባን ላለቴዳ ታማነ ላኡ ዘረꬃቶ ሳሮታ ኪታይ። 
ታናዳን ጾሳ ካልያዋንቶ፥ ህንተ አማኑ ፓጨትያዌ ህንተንቶ ዳንዳያ እማናዋ ኤሪደ፥ ዱማ ዱማ ፓጪ ህንተና ጋክያ ዎደ፥ ሄዋ ኩመንꬃ ናሸቻዳን ፓይድተ። 
ህንተ ዳንዳያይ አይነ ባል ባይናን ህንተና ምኔዳዋንታነ ፓጭ ባይናዋንታ ኦꬂደ፥ ባረ ኦሱዋ ፖሎ። 
ሽን ህንተፐ ኦንነ ባረዉ አꬌዳ ኤራተꬃይ ꬋዮፐ፥ ካናን ኡባዉ ኬካተꬃን እምያ ጾሳ ዎሶ። እ አዉ እማና። 
ሽን እ አያንነ ስናን አማኑዋን ጾሳ ዎሶ። አያዉ ጎፐ፥ ስꬍያ ኡራይ ጫርኩ ሱግና ቃጽያ አባ ቤታ ማላ። 
አያዉ ጎፐ፥ ላኡ ቆፋይ ደእያ ኡራይ፥ ባረ ኦግያ ኡባን ባረ ቆፋ ቃቼናዌ፥ ሄ ኡራይ ጎዳፐ አይነ ደማናዉ ቆፖፖ። 
ሽን ህዬሳ እሻይ ጾሳይ አ ꬎቁ ኦꬄዳ ዎደ ናሸቶ። 
ቃይ ዱረ እሻይካ ጾሳይ አ ካዉሽሴዳ ዎደ ናሸቶ። አያዉ ጎፐ፥ ዱረ ብታኒ ማታ ግዶን ድጭያ ጪሻዳን ꬋያና። 
አያዉ ጎፐ፥ አዋይ ባረ ሴላና ከሲደ፥ ማታ መልስና፥ ጪሻይ ꬋዬ፤ ቃይ አ ማላ ሎኦተꬃይካ ꬋዬ፤ ሄዋዳንካ ቃይ ዱረ ብታኒ ባረዋ ኦꬂደ ꬋያና። 
ዋይያን ገንጭያ ኡራይ አንጀቴዳዋ፤ አያዉ ጎፐ፥ ሄ ዋይያ ጾኔዳዋፐ ጉይያን፥ ጾሳይ ባረና ሲቅያዋንቶ እማና ጌዳ ደኡዋ ካላቻ እ አካና። 
ኦንነ ፓጨቴዳ ዎደ፥ “ታና ጾሳይ ፓጬ” ጎፖ። አያዉ ጎፐ፥ ጾሳይ ኢታን ፓጨታናዉ ዳንዳየና፤ ቃይ እ ባረ ሁጰዉ ኦናነ ፓጨና። 
ሽን አሳይ ሁጲያን ሁጲያን ባረ ሁጰ ኢታ አሙዋን ጎሸትያ ዎደነ ጭመትያ ዎደ ፓጨቴ። 
ሄዋፐ ጉይያን፥ አሙ ሻሃሪደ፥ ናጋራ የሌ፤ ቃይ ናጋራይ ድጪደ፥ ሀይቁዋ የሌ። 
ታናዳን ጾሳ ካልያዋንቶ፥ ጭመቶፕተ። 
ሎኦ እሙዋ ኡባይነ ኩመንꬃ ዎይታ ኡባይ ሳሉዋፐ ዬ። ሳሉዋ ፖኡዋ መꬌዳ አዉዋፐ ዬ፤ ጾሳይ ባረ ሁጰዉ ዱማተናነ ዎይ ባረ ኩዋ ላመና። 
ኑን እ መꬌዳ መታቱዋ ግዶን ꬎቃሳ አካናዳን፥ ኑና ባረ ሸንያን ቱሙ ቃላን የሌዳ። 
ታናዳን ጾሳ ካልያዋንቶ፥ ሀዋ ሀሳይተ፤ አሳይ ኡባይ ስሳናዉ ኤሌሎ፤ ሽን ሃሳያናዉነ ሀንቀታናዉ ኤሌሎፖ። 
አያዉ ጎፐ፥ አሳ ሀንቁ ጾሳይ ኮይያ ጽሎተꬃ አሄና። 
ሄዋ ድራዉ፥ ቱና ሀኖታ ኡባነ ኢታተꬃ ኡባ ህንተፐ ꬋይሲደ፥ ጾሳይ ህንተ ዎዛናን ቶኬዳ ህንተ ሸምፑዋ አሻናዉ ዳንዳይያ ቃላ አሽከተꬃን አክተ። 
ሽን ጾሳ ቃላ ኦሱዋን ፔሽተፐ አትን፥ ስሳ ጻላላን ህንተ ሁጲያ ጭሞፕተ። 
አያዉ ጎፐ፥ ቃላ ስሲደ ኦና ኡራይ ደኦፐ፥ እ ባረ ማላ ማስቶትያ ጼልያ ኡራ ማላ። 
እ ባረና ጼሊደ ቤ፤ ኤለካ እ አይ ማለንቶነ ዶግ አጌ። 
ሽን ኦንነ አይለተꬃፐ ከስያ ባል ባይና ህግያ ጼሊደ፥ አን አቅያዌ ቃይ አ ናግያዌ፥ ስሴዳዋካ ዶገናዌ፥ ሄ ኡራይ ባረ ኦꬅያ ኦሱዋን አንጀታና። 
ባረ እንጻርሳ ናገናን ባረና ጭሚደ፥ ባረዉ ጾሳ ጎይንያዋ ማላትያ ኡራይ ደኦፐ፥ አ ጎይናይ መላ። 
ጾሳ አዉዋ ስንꬃን ፖኩ ባይና ጌሻ ጎይናይ ሀዋ፤ ሄዌ ሀቃዌ ጎፐ፥ አታ አዉ ባይና ናናቱዋነ ዋየትያ አምኤቱዋ ማዳናዋነ ሳኣ ናጋራ ቅታፐ ባረ ሁጲያ ናጋናዋ። 
