﻿እብራዌ አሳዉ ጻፈቴዳ ኪታ.
1.
ጾሳይ በን ዎደ፥ ኑ አዎቱ ናባቱዋ ባጋና ዱማ ዱማ ኦግያንነ ዳሮ ዎድያን ሃሳዬዳ። 
ሽን ሀ ዉርሰꬃ ዎድያን፥ ኡባባ አ ላትሲደ፥ የለታ አ ባጋና መꬌዳ ባረ ናኣ ባጋና ኑዉ ሃሳዬዳ። 
ናአይ ጾሳ ቦንቾ ፖኡዋ ጶሌ፤ ቃይ ኩመንꬃ ጾሳ ኤሻ አኪደ፥ ባረ ዎልቃማ ቃላን ሀ ሳኣ ናጌ፤ ያቲደ አሳ ናጋራፐ ጌሺደ፥ ኡባፐ ቦላ ጾሳፐ ኡሸቻ ባጋና ሳሉዋን ኡቴዳ። 
ጾሳይ አዉ እሜዳ ሱንꬃተꬃይ ኪታንቻቱዋፐ ꬎቃ ግድያዋዳንካ፥ ኡንቱንቱፐ አ ሎይꬅ ꬎቁ ኦꬄዳ። 
አያዉ ጎፐ፥ ጾሳይ ባረ ኪታንቻቱዋፐ ኦና፥ “ኔን ታ ናኣ፤ ታን ሀቼ ነዉ አዉዋ ግዳድ” ጌዴ? ዎይ ቃይ ኦና፥ “ታን አዉ አዉዋ ግዳና፤ እካ ታዉ ናኣ ግዳና” ጌዴ? 
ቃይ ጾሳይ ባረ ባይራ ናኣ ሀ ሳኣ የዳና ሀኒደ፥ “ታ ኪታንቻቱዋ ኡባቱካ አዉ ጎይንኖ” ያጌዳ። 
ጸሳይ ኪታንቻቱዋባ ሃሳዪደ፥ “ታን ታ ኪታንቻቱዋ ጫርኩዋ ከሳይ፤ ቃይ ታ ኦሳንቻቱዋካ ታማ ላጩዋ ከሳይ” ያጌ። 
ሽን ባረ ናኣዋ ሃሳዪደ፥ “ጾሳዉ፥ ነ ካዉተꬃ ኦይዲ፥ መꬍ መꬍናዉ ደኤ። ነ ካዉተꬃ ጽሎተꬃን አሃሳ። 
ኔን ጽሎተꬃ ሲቃደ፤ ናቁዋ እጻዳ። ጾሳይ፥ ነ ጾሳይ ኔና፥ ነ ላገቱዋፐ አꬂደ፥ ናሸቻን እልልስያ ዛይትያ ኦኬዳዌ ሀዋሳ” ያጌ። 
ጾሳይ ሀዋዳን ያጌ፤ “ጎዳዉ፥ ኮይሮ ኔን ሳኣ መꬋዳ፤ ሳሉዋካ ነ ኩሽያን መꬋዳ። 
ሄዋንቱ ኡባይ ꬋያና፤ ሽን ኔን ደአና። ኡንቱንቱ ኡባይካ አፍላዳን ዉራና። 
ኔን ኡንቱንታ ጋብያዳን ዳኮያና፤ ቃይ ኡንቱንቱ አፍላዳን ላመታናዋንታ። ሽን ኔን ኔናካ፤ ነ ላይꬃይ ኡባካ ዉረና” ያጌ። 
ሽን ጾሳይ ባረ ኪታንቻቱዋፐ እቱዋነ፥ “ታን ነ ሞርከቱዋ ኔን ገድያን የꬍያዋ ኦꬃና ጋካናዉ፥ ሀዋን ታፐ ኡሸቻ ባጋን ኡታ” ግቤና። 
ኪታንቻቱ ኡባይ ጾሳዉ ኦꬃናዉነ አቶተꬃ ደማና አሳቱዋ ማዳናዉ ጾሳይ ኪቴዳ አያናቱዋ ግድክኖዬ? 
