﻿ጳዉሎስ ተሰሎንቀ አሳዉ ጻፌዳ ላኤንꬆ ኪታ.
1.
ኑን ጳዉሎስ፥ ስላሰነ ጽሞቶስ፥ ተሰሎንቀን ደእያ አማንያ አሳቶ ሀ ዳብዳቢያ ጻፌቶ። ሄዋንቱ ጾሳ ኑ አቡዋንታነ ጎዳ የሱስ ክርስቶሳዋንታ። 
ጾሳ ኑ አዉዋፐነ ጎዳ የሱስ ክርስቶሳፐ፥ አꬎ ኬካተꬃይነ ሳሮተꬃይ ህንተንቶ ግዶ። 
ኑናዳን ጾሳ ካልያዋንቶ፥ ህንተንቱ አማኑ ሎይꬅ ድጭያ ድራዉነ፥ ህንተንቱ እቱ እቱዋ ሲቅያ ሲቁ ዳርያ ድራዉ፥ ኑን ህንተንቶ በስያዋዳን፥ ጾሳ ኡባ ዎደ ጋላታናዉ በሴ። 
ሄዋ ድራዉ፥ ህንተንታ የደሳይነ ዋይያ ኡባይ ጋክናካ ህንተንቱ ገንጭያዋነ አማንያዋ ኑን ኑ ሁጰዉ ጾሳ አማንያዋንቶ ኦዲደ፥ ህንተዋን ጬቀቴቶ። 
ህንተንቱ ዋየትያ ጾሳ ካዉተꬃዉ በስያዋንታ ግዲደ ፓይደታና ማላ፥ ጾሳይ ፕርድያ ጽሎ ፕርዳ በስያ ማላ። 
ጾሳይ ቱሙ ፕርዳ ፕርዳና። ጎዳይ የሱስ ባረ ዎልቃማ ኪታንቻቱዋና ታማ ላጩዋ ግዶን ሳሉዋፐ ይያ ዎደ፥ ጾሳይ ህንተንታ ዋይስያዋንቱ ቦላ ዋይያ አሀና። ቃይ ዋየትያ ህንተናነ ኑና ሸምፕሳና። 
ቃይ ጾሳይ ባረና ኤረናዋንታነ ኑ ጎዳ የሱስ ክርስቶሳ ዎንጋላ ምሽራቾ አዛዘተናዋንታ ሙራና። 
ሄ ጋላስ እ ባረ ጌሻቱዋን ቦንቼታናዉነ ቃይ ባረና አማንያ ኡባቱዋን ሳበታናዉ ይያ ዎደ፥ ኡንቱንቱ ጎዳ ስንꬃፐነ አ ዎልቃ ቦንቹዋፐ ሻከቲደ፥ መꬍና ባሻን ሙረታና። ጋሱነካ፥ ኑን ህንተንቶ ኦዴዳ ኪታይ አማነቴዳ። 
ኑን ህንተንቶ ኡባ ዎደ ጾሳ ዎስያዌ ሄዋሳ። ኑ ጾሳይ ጼሴዳ ደኦ ህንተንታ በስያዋንታ ጊደ ፓይዳናዳን፥ ኑን አ ዎሴቶ፤ ህንተንቱ ሎኦባ ኡባ አሞትያዋነ ህንተንቱ አማኑዋ ኦሱዋ እ ባረ ዎልቃን ፖሎ። 
ሄዋን ኑ ጾሳ አꬎ ኬካተꬃንነ ቃይ ኑ ጎዳ የሱስ ክርስቶሳ አꬎ ኬካተꬃን፥ ጎዳ የሱሳ ሱንꬃ ህንተንቱ ቦንቻና፤ ህንተናካ እ ቦንቻና። 
