﻿ጳዉሎስ ተሰሎንቀ አሳዉ ጻፌዳ ኮይሮ ኪታ.
1.
ኑን ጳዉሎስ፥ ስላሰነ ጽሞቶስ ተሰሎንቀን ደእያ አማንያ አሳቶ ሀ ዳብዳቢያ ጻፌቶ፤ ሄዋንቱ ጾሳ ኑ አቡዋንቶነ ጎዳ የሱስ ክርስቶሳዋንቶ፥ አꬎ ኬካተꬃይነ ሳሮተꬃይ ግዶ። 
ኑን ዎሳን ጾሳ ጋላቲደ፥ ኡባ ዎደ ህንተና ኡባቱዋ ሀሳዬቶ። 
ኑን ኑ ጾሳ፥ ኑ አዉዋ ስንꬃን አማኑዋን ህንተንቱ ኦꬄዳ ኦሱዋነ፥ ሲቁዋን ህንተንቱ ዳቡሬዳ ዳቡራ፥ ቃይ ኑ ጎዳ የሱስ ክርስቶሳን ህንተዉ ደእያ ህዶታን ገንጭያ ገንጩዋ ኡባ ዎደ ሀሳዬቶ። 
ኑናዳን ጾሳ ካልያዋንቶ፥ ጾሳይ ህንተና ሲቅያዋነ ህንተና ባረዉ ናና ኦꬃናዉ ዶሬዳዋ ኑን ኤሬቶ። 
አያዉ ጎፐ፥ ኑን ዎንጋላ፥ ዎልቃን፥ ጌሻ አያናንነ ሄ ዎንገሊ ቱማ ግዴዳዋ ዉርስ አማንያዋን ህንተንቶ አሄዳዋፐ አትን፥ አሳ ቃላ ጻላላን አህበይኮ። ኑን ህንተናና ደእያ ዎደ፥ ህንተንቱ ድራዉ ዋን ደኤደንቶ፥ ህንተንቱ ኤሪታ። 
ቃይ ህንተንቱ ዳሮ ዋየቶፐካ፥ ጌሻ አያናይ እሜዳ ናሸቻን ኪታ አኬድታ፤ ሄዋን ኑ ሌምሱዋነ ጎዳዋ ካሌድታ። 
ሄዋ ድራዉ፥ ማቅዶንያንነ አካይያ ግያ ጋድያን ደእያ አማንያ ኡባቶ ሌምሱዋ ግዴድታ። 
አያዉ ጎፐ፥ ጎዳ ቃላይ ህንተፐ ከሲደ፥ ማቅዶንያንነ አካይያ ጻላላን ስሰትቤና፤ ሽን ጾሳ ህንተንቱ አማንያዌ ኡባ ሳን ስሰቴዳ። ስም ኑን ሃሳያናዉ ኮሽሽን አቶዌ አይነ ባዋ። 
አያዉ ጎፐ፥ ኑን ህንተኮ ቤዳ ዎደ፥ ህንተንቱ ኑና ዎት ሞኬደንቶነ ቃይ ህንተንቱ ህንተንቱ ኤቃዉ ኦꬅያዋ አጊደ፥ ዎርዶተና ደኡዋ ጾሳዉ ኦꬃናዉ ዋን ጾሳኮ ስሜድተንቶ፥ ኡንቱንቱ ባረንቱ ሁጲያን ሃሳዪኖ። 
ቃይ ጾሳ ናአይ የሱስ፥ ጾሳይ ሀይቁዋፐ ደንꬄዳዌ፥ ኑና ስንꬃፐ ያና ጾሳ ሀንቁዋፐ አሽያዌ ሳሉዋፐ ያናዋ ህንተንቱ ናግያዋ ኡንቱንቱ ሃሳዪኖ። 
