﻿ጳዉሎስ ቆሮንቶሳ አሳዉ ጻፌዳ ላኤንꬆ ኪታ.
1.
ታን ጳዉሎስ፥ ጾሳ ሸንያን፥ ክርስቶስ የሱስ ኪቴዳዌነ ኑ እሻይ ጽሞቶስ ጾሳዉ ጎይንያ ቆሮንቶሳ ካታማን ደእያ አማንያዋንቶነ አካይያን ደእያ ጾሳ ናናቶ ሀ ዳብዳቢያ ጻፌቶ። 
ጾሳ ኑ አዉዋፐነ ጎዳ የሱስ ክርስቶሳፐ፥ አꬎ ኬካተꬃይነ ሳሮተꬃይ ህንተንቶ ግዶ። 
ጾሳ ኑ ጎዳ የሱስ ክርስቶሳ አዉዋ፥ ማሮተꬃ አዉዋነ መንꬁዋ ኡባ ጾሳ ጋላታይ ጋኮ፤ 
ጾሳይ ኑና ኑ ሁጰዉ መንꬄዳ መንꬁዋዳን፥ ዳሮ ዋይያ ዋየትያዋንታ ኑንካ መንꬃናዳን፥ ኑ ዋይያ ኡባን እ ኑና መንꬄ። 
አያዉ ጎፐ፥ ኑን ክርስቶሳ ባጋና ዳሮ ዋይያ ዋየትያዋዳን፥ ሄዋዳንካ፥ ቃይ ኑና አ ባጋና ዳሮ መንꬁዋን መንꬄ። 
ኑን ዋየቶፐ፥ ሄዌ ህንተና መንꬃናሳነ ህንተና አሻናሳ፤ ቃይ ኑን ምነቶፐ፥ ኑን ዳንዳዬዳ ዋይያ ማላ ህንተካ ገንጪደ ዳንዳያና ማላ፥ ጾሳይ ህንተዉካ ቃይ መንꬁዋነ ዳንዳያ እማናሳ። 
ህንተ ደማና ጊደ፥ ህዶታን ናግ ኡቴዳዌ ዳሮ ምና፤ አያዉ ጎፐ፥ ህንተ ኑናና ዋየቴዳዋዳን፥ ሄዋዳን መንꬁዋካ ኑናና አካናዋ ኑን ኤሬቶ። 
ኑ ኑናዳን ጾሳ ካልያዋንቶ፥ ኑን ኢስያ ጋድያን ዋየቴዳ ዋይያ ህንተና ሀሳይሳናዉ ኮዬቶ፤ ኑ ዋዪ ኑ ዎልቃፐ ዳርና፥ ኑና ዎꬌ ጊደ፥ ህርጋና ጋካናዉ፥ ኑና ዎጋይ ባይናዋ ዴጼዳ። 
ኑን ኑ ቦላ ሀይቁዋ ፕርዳይ ፕርደቴዳ ያጊደ ቆፔዶ፤ ሽን ሄዌ ሀኔዳዌ ሀይቄዳ አሳ ሀይቁዋፐ ደንꬅያ ጾሳን ኑን አማነታናፐ አትን፥ ኑ ሁጲያን አማነተናዳና። 
ጾሳይ ሀዋ ማላ ኢታ ሀይቁዋፐ ኑና አሼዳ፤ እ ኑና አሻና፤ ስንꬃፐካ እ ኑና አሻናዋ ጊደ፥ ህዶታን ናግ ኡቴዶ። 
ህንተ ዎሴዳ ዳሮ ዎሳን ኑዉ አንጁ ስሜዳ ድራዉ፥ ዳሮ አሳይ ኑ ድራዉ ጾሳ ጋላታና ማላ፥ ህንተካ ቃይ ኑና ዎሳን ማዳና ኮሼ። 
ኑን ጬቀትያዌ ሀዋ፤ ሀ ሳኣን ኑን ደእያ ደኡ፥ ኡባ ቃይ ህንተናና ኑዉ ደእያ እትፐተꬃይ ጾሳ አꬎ ኬካተꬃናፐ አትን፥ አሳ አꬌዳ ኤራተꬃና ግደናዋ፥ ቃይ ጾሳይ እሜዳ ጌሻተꬃንነ ሱረተꬃን ኑን ደእያዋ ዎዛና ቆፋይ ኑዉ ማርካቴ። 
አያዉ ጎፐ፥ ህንተ ናባባናዉነ አኬካናዉ ዳንዳይያዋ ጻላላ ህንተንቶ ጻፍያዋፐ አትን፥ ኑን ሀራባ ህንተንቶ ጻፎኮ። ኑ ጎዳ የሱሳ ጋላስ ኑን ህንተናን ጬቀታናዋዳን፥ ህንተካ ኑናን ጬቀታና ማላ፥ ህንተ ሀእ ዉርስ አኬከና የዉዋ ግድን ዉርስ አኬካና ጋደ ቆፓይ። 
ሄዋ ታን ሎይꬃ ኤሬዳ ድራዉ፥ ህንተ ላኡ ገደ ጎኤታና ማላ፥ ኡባፐ ካሰታደ ህንተኮ ባናዉ ቆፋ ቃቻድ። 
ታን ማቅዶንያ ባደ ህንተናና ጋከታናዋነ ቃይ ያፐ ስማደ ህንተ ማታና ይሁዳ አꬍሽን፥ ህንተ ታና ማዳናዋ ቆፓ ኡታድ። 
ሄዋ ድራዉ፥ ታን ሄዋ ቆፓደ ታናን አማነትበይክታ? ታን ታ ቆፋ ቃችያ ዎደ፥ ሳኣ አሳዳን እት ኩꬃን፥ “ኤ፥ ኤ” ዎይ፥ “ግደና፥ ግደና” ጋናዉ ጊጋ ኡታድታ? 
ሽን ጾሳይ አማነቴዳዋ ግድያዌ ቱማ ግድያዋዳን፥ ኑን ህንተንቶ ኦድያ ቃላይ “ኤ” ግያዋነ “ግደና” ግያዋ ግደና። 
አያዉ ጎፐ፥ ታን፥ ስላሰነ ጽሞቶስ ህንተ ግዶን ኦዴዳ ጾሳ ናአይ፥ የሱስ ክርስቶስ “ኤ” ግያዋፐ አትን፥ “ግደና” ግያዋ ግደና። ሽን ጾሳ ባጋና እ ኡባ ዎደካ “ኤ”። 
አያዉ ጎፐ፥ ጾሳይ እማና ጌዳባዉ ኡባዉ ኤኖ ጌዳዌ ክርስቶሳ ባጋና ፖለታና፤ ሄዋ ድራዉ፥ ኑን ክርስቶሳ ባጋና ጾሳ ቦንቾ፥ አመንእ ጌቶ። 
ጾሳይ ክርስቶሳ ባጋና ኑናነ ህንተና መንꬄነ ኦኬ። 
ኑን አዋ ግድያዋ ኤርስያ ማታፋ እ ኑ ቦላ ዎꬂደ፥ ባረ ጌሻ አያና ዋስያዳን፥ ኑ ዎዛና ግዶን ዎꬄዳ። 
ቃይ ታን ቆሮንቶሳ ቤናን አጌዳዌ ህንተና ቆሄናዳና። ሄዌ ዎርዶ ግዶፐ ታና ሙራናዉ ታ ሸምፑዋን ጾሳይ ማርካ። 
ኑን ህንተና ናሸቻናዉ ህንተናና እትፐ ኦꬅያዋንታፐ አትን፥ ህንተ አማንያዋን ህንተና ጎደታናዉ ኮይያዋንታ ግዶኮ፤ አያዉ ጎፐ፥ ህንተንቱ ህንተ አማኑሳን ምኒደ ደኢታ። 
