﻿ጳዉሎስ ሮመ አሳዉ ጻፌዳ ኪታ.
1.
ባረ ምሽራቹዋ ቃላ ኦዳናዉ ጾሳይ ዶሪደ ጼሴዳ ክርስቶሳ የሱሳ ቆማይ፥ የሱስ ክርስቶስ ኪቴዳ ጳዉሎስ፥ ታን ሀ ዳብዳቢያ ጻፋይ። 
ጾሳይ ዳሮ ዎደፐ ካሰ ባረ ናባቱዋ ባጋና ምሽራቹዋ ቃላ እማና ያጌዳዌ ጾሳ ጌሻ ማጻፋቱዋን ጻፈቴዳ፤ 
ሄ ምሽራቹዋ ቃላይ አሳ ግዲደ ዳዊተ ዛርያፐ የለቴዳ ጾሳ ናኣ፥ ኑ ጎዳ የሱስ ክርስቶሳባ። 
ቃይ እ ባረ ጌሻ አያናን ሀይቁዋፐ ደንዴዳዋን፥ ጾሳ ናኣ ግድያዋ ዎልቃማ ዎልቃን በሴዳ። 
አይሁዳ ግደና አሳይ ኡባይ አማናናዳንነ አዛዘታናዳን፥ ኑን ኡንቱንታ ካለꬃና ማላ፥ ጾሳይ ክርስቶሳ ሱንꬃ ድራዉ፥ ክርስቶሳ ባጋና አꬎ ኬካተꬃነ የሱስ ኪቴዳዋንታ ግድያ ማታ ኑዉ እሜዳ። 
የሱስ ክርስቶሳዋ ግዳናዳን፥ ጾሳይ ጼሴዳ ህንተንቱካ ሄዋንቱ ግዶን ደኢታ። 
ጾሳይ ሲቅያዋንቶነ ጌሻባ ኦꬃናዉ ጼሴዳ ሮመ ጋድያን ደእያ ኡባቶ ጾሳ ኑ አዉዋፐነ ጎዳ የሱስ ክርስቶሳፐ አꬎ ኬካተꬃይነ ሳሮተꬃይ ህንተንቶ ግዶ። 
ካሰታደ ታን ህንተንቱ አማኑ ሳኣ ኡባን ስሰቴዳ ድራዉ፥ የሱስ ክርስቶሳ ባጋና ህንተንቶ ታን ጾሳ ጋላታይ። 
አያዉ ጎፐ፥ ታን ኡባ ዎደ ታ ዎሳን ህንተንታ ሀሳይስያዎ፥ ጾሳይ፥ ታን አ ናኣ ምሽራቹዋ ቃላ ኦድያዋን ታ አያናን አዉ ኦꬅያዌ ማርካ። ጾሳይ፥ ባረ ሸንያን፥ ታን ሀእ ህንተንቱኮ ባናዉ ታ ኦግያ ሚኮያናዳን፥ ኡባ ዎደ ዎሳይ። 
አያዉ ጎፐ፥ ታን ህንተንታ ምንሳናዉ፥ ህንተንቱና እትፐ አያና እሞታ ሻካና ማላ፥ ህንተንታ በአናዉ ላሞታይ። 
ታን ግያዌ፥ ህንተንቱካ ታካ እት ዎደ ምነታና። ህንተንቱ ታ አማኑዋን፥ ቃይ ታንካ ህንተ አማኑዋን ምነታና። 
ታናዳን አማንያዋንቶ፥ ታን ኡባ ዎደ ህንተንቱኮ ባናዉ ቆፓድ። ሽን ታና ድግያባይ ደእያዋ ህንተ ኤራናዉ በሴ፤ ታን ሀራይ አቶ አይሁዳ ግደና ሀራ አሳፐካ አይፍያ ደሜዳዋዳን፥ ህንተንቱፐካ አይፍያ ደማናዉ ኮያይ። 
ታን አሳ ኡባዉ፥ ግሪከ አሳዉነ ታማርቤና አሳዉ ቃይ አꬎ ኤራንቻቶነ ኤያቶ ቃንጻና አጩ ደኤ። 
ሄዋ ድራዉ፥ ታዉ ዳንዳየቴዳ ኬናን ሮመን ደእያ ህንተንቶካ ምሽራቹዋ ቃላ ኦዳናዉ አሞታይ። 
ምሽራቹዋ ቃላይ ታና ዬላየና፤ እ አማንያ ኡባ፥ ካሰቲደ አይሁዳ አሳ ቃይ አይሁዳ ግደና አሳ አሻናዉ ጾሳፐ ይያ ዎልቃ። 
አያዉ ጎፐ፥ ጾሳ ማጻፋይ፥ “ጽሉ ጾሳን አማነቲደ ደአና” ያግያዋዳን፥ ጾሳይ አሳ ኮይሮፐ ዉርሰꬃ ጋካናዉ፥ አማኑዋን ጽልስያዋ ምሽራቹዋ ቃላይ ቆንጭሴ። 
ቱማተꬃይ ኤረታናዋ ባረንቱ ኢታ ሀኖታን ድግያ ናጋራ ኦሱዋ ኡባ ቦላንነ አሳ ኢታ ኦሱዋ ኡባ ቦላን፥ ጾሳ ሀንቁ ሳሉዋፐ ዎꬊደ ቆንጫና። 
ኡንቱንቱ ጾሳባ ኤራና ዳንዳይያዌ ኡንቱንቶ ቆንጬ፤ አያዉ ጎፐ፥ ጾሳይ ኡንቱንቶ ቆንጭሴዳ። 
ቤተና አ ሀኖታይ፥ ሄዌካ አ መꬍና ዎልቃይነ አ ጾሳተꬃይ እትፐ ጾሳይ ሀ አላምያ መꬌዳዋፐ ዶሚደ፥ ኡንቱንቶ ቆንጪደ ቤቴዳ፤ ኡንቱንቱ ሄዋ ጾሳይ መꬌዳባፐ በአናዉ ዳንዳይያ ድራዉ፥ ኡንቱንቶ ጋሶይያባይ ባዋ። 
አያዉ ጎፐ፥ ኡንቱንቱ ጾሳ ኤሮፐካ፥ አዉ በስያ ቦንቹዋ እምበይክኖ፤ ቃይ አ ጋላትክኖ። ሽን ኡንቱንቱ አላለ ከሰናባ ቆፒኖ፤ ቃይ ኡንቱንቱ አኬከና ዎዛናይ ꬉሜዳ። 
ኡንቱንቱ ባረንታ አꬌዳ ኤራንቻ ጊኖ፤ ሽን ኡንቱንቱ ኤያ። 
ኡንቱንቱ ሀይቀና ጾሳዉ ጎይንያዋ እጺደ፥ ሀይቂያ አሳ መታ፥ ካፋቱዋ መታ፥ ዶአቱዋ መታነ ትራን ጎሸትያዋንቱ መታ መቴዳዋንቶ ጎይኔድኖ። 
ሄዋ ድራዉ፥ ኡንቱንቱ እቱ እቱዋና ፖኮባ ኦꬃና ማላ፥ ጾሳይ ኡንቱንቱ ዎዛናይ አሞትያ ቱናባ ኦꬃናዳን ኡንቱንታ አጌዳ። 
አያዉ ጎፐ፥ ኡንቱንቱ ጾሳ ቱማተꬃ ዎርዱዋን ላሜድኖ፤ ቃይ መꬌዳ ጾሳ አጊደ፥ እ መꬌዳባዉ ጎይኔድኖነ ኦꬄድኖ። ጾሳይ መꬍናዉ ጋላተቴዳዋ። አመንእ። 
ሄዋ ድራዉ፥ ጾሳይ ኡንቱንቱ ፖኮባ አሞታና ማላ፥ ኡንቱንታ አጌዳ፤ ሀራይ አቶ ኡንቱንቱ ማጫዋንቱ ባረንቶ በስያዋ አጊደ፥ በሰናዋ ሀኔድኖ። 
ሀዋዳንካ፥ አቱማ አሳይ ቃይ ባረንቶ በስያዋዳን ማጫዋንቱና ጋከትያዋ አጊደ፥ እቱ እቱዋና ጋከታናዉ ኮዬድኖ፤ አቱማ አሳይ እቱ እቱዋና ፖኮባ ኦꬂደ፥ ባረንቱ ኦꬄዳ ባላን ባረንቶ በስያ ፕርዳ አኬድኖ። 
ኡንቱንቱ ጾሳ ኤራናዉ ዶሰናን እጼዳዋ ኬና ጾሳይ ኡንቱንቱ በሰናዋ ኦꬃና ማላ፥ ኡንቱንቶ ፓና ቆፋ እሜዳ። 
ኡንቱንቱን ቱናተꬃይ፥ ኢታተꬃይ፥ ዮራተꬃይነ ኢታ ሀኖታይ ኩሜዳ፤ ቃይ ኡንቱንቱን ቃናቲ፥ ሸምፑዋ ዎꬍያ ቆፋይ፥ ፓሉማይ፥ ጭሙሳይነ ኢታ ቆፋይ ኩሜዳ፤ ቃይ ኡንቱንቱ ሶቅያዋንታ፥ 
ዝግርያዋንታ፥ ጾሳ እጽያዋንታ፥ ቦርያዋንታ፥ ኦቶረትያዋንታ፥ ጬቀትያዋንታ፥ ኢታባ ኦꬃናዉ ኮይያዋንታነ ባረንቱ አዎነ አትዉ አዛዘተናዋንታ፥ 
ቆፋይ ባይናዋንታ፥ አማኑ ባይናዋንታ፥ ሀራንቶ ቃረተናዋንታነ ማረናዋንታ። 
ኡንቱንቱ ሀዋንቱ ማላ ኦꬅያዋንቶ ሀይቁ በሴ ግያ ጾሳ ህግያ ኤሪደ፥ ሀዋንታ ኦꬂኖ፤ ሄዋ ጻላላ ግደናን፥ ሀዋንታ ኦꬅያዋንታካ ኦꬅተ ጊደ ምንሲኖ። 
