﻿ማቶሳ ምሽራቹዋ.
13.
የሱስ ሄ ጋላስ ሶይፐ ከሲደ፥ አባ ጋጻን ኡቴዳ። 
ዳሮ ጮራ አሳይ ባረ ዩሹዋን ዩይ አꬊደ ሺቅና፥ ዎንግርያ ግዶ ገሊደ ኡቴዳ፤ አሳይ ኡባይ አባ ጋጻን ኤቄዳ። 
አሳዉ ሌምሱዋን ዳሮባ ሀዋዳን ያጊደ ኦዴዳ፤ “እት ብታኒ ዘረꬃ ዘራናዉ ከሴዳ። 
እ ዘርሽን፥ እት እት ዘረꬃይ ኦግያ ዶናን ዎꬌዳ፤ ያትና ካፉ ዪደ ሜዳ። 
ቃይ እት እት ዘረꬃይ አንጮ ግዴዳ ቢታ ቦላ ዎꬌዳ፤ ዳሮ ቢታይ ባይና ድራዉ፥ ሄ ዘረꬃይ ኤለካ ዶሌዳ። 
ሽን አዋይ ከሴዳ ዎደ ጫርሻይ ሹሌዳ፤ አዱሳ ጻጱዋ የድቤና ድራዉ መል አጌዳ። 
እት እት ዘረꬃይ አጉንꬃ ግዶን ዎꬌዳ፤ ሄዋን ዶሌዳዋ አጉንꬃይ ድጪደ ጩሌዳ። 
እት እት ዘረꬃይ ቱኤ ቢታን ዎꬊደ ዶሌዳ፤ እቱ ጼቱ አይፍያ፥ እቱ ኡሱፑን ታሙዋ፥ እቱ ሀታሙዋ አይፌዳ። 
ስስያ ሀይꬃይ ደእያ ኡራይ ስሶ!” ያጌዳ። 
የሱሳ ካልያዋንቱ አኮ ሺቂደ፥ “ኔን አያዉ አሳዉ ሌምሱዋን ኦዳይ?” ያጌድኖ። 
የሱስ ዛሪደ፥ ኡንቱንቶ ሀዋዳን ያጌዳ፤ “ህንተንቶ ሳሉዋ ካዉተꬃ ጹራ ኤሩሳይ እመቴዳ፤ ሽን ኡንቱንቶ እመትቤና። 
አያዉ ጎፐ፥ ደእያዎ ጉጀታና፤ አዉ ዳራናዋ፤ ሽን ባይናዋፐ ሀራይ አቶ፥ ሄ ደእያዌካ አከታናዋ። 
ታን ኡንቱንቱ ጼሊደ ጼለናዋዳን፥ ስሲደ ስሰናዋዳን ሀንያ ድራዉ፥ ዎይ ቃይ አኬከና ድራዉ ኡንቱንቶ ሌምሱዋን ኦዳይ። 
“እስያስ ኡንቱንቱባ ሀዋዳን ኦዶዌ ፖለታናዋ፤ “ ‘ህንተንቱ ስሳ ስሳና፤ ሽን ህንተንቶ ገለና፤ ህንተንቱ ጼላ ጼላና፤ ሽን በእክታ። 
አያዉ ጎፐ፥ ሀ አሳ ዎዛናይ ጉዙሜዳ፤ ባረንቱ ሀይꬃ ቱልሴድኖ፤ ባረንቱ አይፍያካ ጪሉሜድኖ። ሀዌ ባዌንቶ፥ ኡንቱንቱ ባረንቱ አይፍያን በአና፤ ባረንቱ ሀይꬃን ስሳና፤ ባረንቱ ዎዛናንካ አኬካና፤ ኡንቱንቱ ታኮ፥ ጾሳኮ ስማና፤ ታንካ ኡንቱንታ ፓꬃና’ ያጌ። 
“ሽን ህንተንቱ አይፊ ጼልያ ድራዉነ ህንተንቱ ሀይꬃይካ ስስያ ድራዉ፥ ህንተንቱ አንጀቴዳዋንታ። 
ታን ህንተንቶ ቱሙዋ ኦዳይ፤ ዳሮ ናባቱነ ጽላቱ ህንተንቱ በእያዋ በአናዉ አሞቴድኖ፤ ሽን በእበይክኖ። ህንተንቱ ስስያዋ ስሳናዉ አሞቴድኖ፤ ሽን ስስበይክኖ። 
“ስም ካꬃ ዘርያዋ ሌምሱዋ ብለꬃይ ግያዋ ስስተ። 
ካዉተꬃ ቃላ ስሲደ፥ አኬከና ኦንነ ኦግያ ዶናን ዎꬌዳ ዘረꬃ ማላ፤ ጻላህያ ካፑ ዪደ፥ ኡንቱንቱ ዎዛናን ዘረቴዳዋ ማጽ ድጌ። 
አንጮ ቢታን ዎꬌዳ ዘረꬃይ ቃላ ስሲደ፥ ኤለካ ናሸቻን አክያዋንታ ማላቴ። 
ሽን ሄ አሳቱ ሀእሳፐ አትን፥ ኡንቱንቱን ጻጱ ባዋ፤ ቃላ ጋሱዋን መቱ ዎይ የደሳይ ይያ ዎደ፥ ኤለካ ꬉበት አጊኖ። 
ቃይ አጉንꬃ ግዶን ዎꬌዳዌ ቃላ ስስያዋ በሴ፤ ሽን ሀ ሳኣ ደኦ ህርጉሳይነ ዱረተꬃ ሲቁሳይ ቃላ ጩሌ፤ ሀ ጋሱዋን ሄ ዘረꬃይካ አይፈናን አት አጌ። 
ቱኤ ቢታን ዘረቴዳዌ፥ ቃላ ስሲደ፥ አኬክያ አሳ በሴ፤ እካ አይፌ፤ እቱ ጼቱዋ፥ እቱ ኡሱፑን ታሙዋ፥ እቱ ሀታሙዋ አይፌ” ያጌዳ። 
የሱስ ኡንቱንቶ ሀራ ሌምሱዋ ሀዋዳን ያጊደ ኦዴዳ፤ “ሳሉዋ ካዉተꬃይ ባረ ጎሻን ሎኦ ዘረꬃ ዘሬዳ ብታንያ ማላቴ። 
ሽን ቃማ አሳይ ገምእሽድግና፥ አ ሞርኪ ዪደ፥ ዛርጋ ዘሬዳዋ ቦላ ዛርንግያ ዘሪደ ቤዳ። 
ሽን ዛርጋይ ዶል አይፌዳ ዎደ፥ ዛርንጊ ሄ ዎደ ቤቴዳ። 
“አ ቆማቱ አኮ ዪደ፥ ‘ጎዳዉ፥ ኔን ነ ጎሻን ሎኦ ዘረꬃ ዘራበይኪ? ያትና፥ ዛርንጊ ሀቃፐ ዬዴ?’ ያጌድኖ። 
“ሄዋፐ ጉይያን ጎዳይ፥ ‘ሄዋ ሞርኪ ኦꬄዳ’ ያጌዳ። ቆማቱ፥ ‘ኑን ቢደ ሾዳናዳን ዶሳይ?’ ያጌድኖ። 
“ሽን እ፥ ‘አግተ፥ ዛርንግያ ህንተንቱ ሾዲደ፥ ዛርጋና ሾዳንታ። 
ቦቾፕተ፤ ቆይጭያ ዎዲ ጋካናዉ፥ እትፐ ድጭኖ። ቆይጭያ ዎዲ ጋኮደ፥ ታን ቆይጭያዋንታ፥ ካሰቲደ ዛርንግያ ማጽተ፤ ታማን ጉዳናዉ ፖችያን ፖችያን ቃችተ፤ ሽን ዛርጋ ሺሺደ ድይያን ቆልተ’ ጋና” ያጌዳ። 
የሱስ ኡንቱንቶ ሀራ ሌምሱዋ ያጊደ ኦዴዳ፤ “ሳሉዋ ካዉተꬃይ ሳናፍጭያ ጌተትያ ጉꬃ ምꬃት አይፍያ ማላቴ፤ ሄ ምꬃት አይፍያ አሳይ አኪደ፥ ባረ ጎሻን ዘሬዳ። 
ሄ ዘረꬃታ ሀራ ዘረꬃ ኡባፐ ጉጻዉ፤ ሽን ድጬዳ ዎደ፥ ሀራ አታክልትያ ኡባፐ ዳራዉ፤ ካፉ ዪደ፥ እዝ ቃንካን ኬጽያዋ ኬና ዎጋ ምꬃ ግዳዱ” ያጌዳ። 
ቃይ የሱስ ሀራ ሌምሱዋ ኡንቱንቶ ያጊደ ኦዴዳ፤ “ሳሉዋ ካዉተꬃይ እት ምሽራታ ሄዙ ከርያ ꬊልያ አካደ፥ ሙናቄዳ ሙናቃይ ኡባይ ደንዳና ጋካናዉ፥ አን ትጌዳ እርሹዋ ማላቴ” ያጌዳ። 
የሱስ አሳዉ ሄ ኡባ ሌምሱዋን ኦዴዳ፤ ሌምሱ ባይናን እ እትባካ ኦደና፤ ናቢ፥ “ታን ኡንቱንቶ ሃሳይያ ዎደ፥ ሌምሱዋን ሃሳያይ። አላሚ መቶደፐ ዶሚደ ጌሜዳ የዋቱዋ ኦዳይ” ያጌዳዌ ፖለታና ማላ፥ ሄዋ እ ኦዴዳ። 
ሄዋፐ ጉይያን፥ የሱስ አሳ አጊደ፥ ሶይ ገሌዳ፤ አ ካልያዋንቱ አኮ ቢደ፥ “ጎሻን ደእያ ዛርንግያ ሌምሱዋ ብለꬃ ኑዉ ኦዳ” ያጌድኖ። 
የሱስ ዛሪደ፥ ሀዋዳን ያጌዳ፤ “ሎኦ ዘረꬃ ዘርያዌ አሳ ናኣ፤ 
ጎሻይ ሀ አላምያ፤ ሎኦ ዘረꬃይ ጾሳ ካዉተꬃ አሳ፤ ዛርንጊ ጻላህያ ካፑዋ ናና። 
ዛርንግያ ዘሬዳዌ ሞርክያ ጻላህያ፤ ቆይቻ ዎዲ፥ ዎድያ ዉርሰꬃ፤ ቃይ ቆይጭያዋንቱ ኪታንቻቱዋ። 
“ሄዋ ድራዉ፥ ዛርንግያ ማጺደ፥ ታማን ጉድያዋዳን፥ ዎድያ ዉርሰꬃን ሄዋ ማላ ግዳናዋ። 
አሳ ናአይ፥ ኪታንቻቱዋ ኪታናዋ፤ ኡንቱንቱ አ ካዉተꬃ ግዶን ናጋራዉ ጋሶ ግድያ ኡባቱዋነ ኢታባ ኦꬅያዋንታ ማጺደ ከሳናዋንታ። 
ያቲደ ቶኤና ታማን ኦላናዋንታ፤ ሄዋን ኡንቱንቱ ዬካናዋንታነ አቻ ꬋቃናዋንታ። 
ሄ ዎደ ጽላቱ ባረንቱ አቡ ካዉተꬃን አዋዳን ፖአና። ስስያ ሀይꬃይ ደእያ ኡራይ ስሶ! 
“ሳሉዋ ካዉተꬃይ ጎሻን ሞገቴዳ ሚሻ በሴ፤ እት ብታኒ ሄ ሚሻ ደሚደ፥ ዛሪደ ሞግ አጌዳ፤ ዳሮ ናሸቲደ ቢደ፥ ባረዉ ደእያዋ ኡባ ዛልኢደ፥ ሄ ጎሻ ሻሜዳ። 
“ቃይ ሳሉዋ ካዉተꬃይ እንቁዋ ጌተትያ ዳሮ አልኦ ሹቻ ሻማናዉ ኮይያ ዛልአንቻ ማላቴ። 
ሄ ዛልአንቻይ ዳሮ አልኦ እንቁዋ ደሚደ፥ ቢደ ባረዉ ደእያዋ ኡባ ዛልኢደ፥ አ ሻሜዳ። 
“ቃይ ሳሉዋ ካዉተꬃይ ኡባ ቆሞ ሞልያ ኦይቂያ፥ አባን የገቴዳ ዳባ ማላቴ። 
ሞሊ ዳባ ኩሜዳ ዎደ፥ ሞልያ ኦይቂያ አሳቱ አባፐ ጋጻ ከሲደ ኡቴድኖ፤ ያቲደ ሎኦ ሞልያ ቆሪደ፥ የግያ ሚሻን የጌድኖ፤ ሽን ኢታ ሞልያ ዎራ ኦሌድኖ። 
ዎድያ ዉርሰꬃን ሄዋዳን ሀናና፤ ኪታንቻቱ ዪደ፥ ናጋራንቻቱዋ ጽላቱዋ ግዶፐ ቆሪደ፥ 
ቶኤና ታማን ኦላናዋንታ፤ ሄዋን ኡንቱንቱ ዬካናዋንታነ አቻ ꬋቃናዋንታ። 
“ሀዌ ኡባይ ህንተንቶ ገሌዴ?” ያጊደ ኡንቱንታ ኦቼዳ። ኡንቱንቱ፥ “ኤ” ያጌድኖ። 
እ፥ “ሄዋ ድራዉ፥ ሳሉዋ ካዉተꬃ ጹራ ሎይꬅ ኤርያ፥ ህግያ ታማርስያ ኡባይ፥ ባረ ሚሻ ሺሽ ዎꬄዳ ጎልያፐ ኦራꬃ ሚሻነ ኤጫ ሚሻ ሻክ ከስያ እዛዋ ማላቴ” ያግ ዛሬዳ። 
የሱስ ሀ ሌምሳቱዋ ኦድ ዉርሶዋፐ ጉይያን፥ ሄዋፐ ደንዲደ፥ 
ባረ ካታማ ናዝሬተ ቤዳ። አይሁዳ ዎሳ ጎለን ታማርስያዋ ስሴዳ አሳይ ማላለቲደ፥ ሀዋዳን ያጌዳ፤ “ሀዌ ሀ አꬎ ኤራተꬃነ ጾሳይ ኦꬅያ ማላታ ኦꬃናዉ ዎልቃ ሀቃፐ አኬዴ? 
ሀዌ አናጽያ ናኣ ግደኔ? አ ዳያ ማይራሞ ግደኬ? አ እሻቱ ያቆባ፥ ዮሴፎ፥ ስሞናነ ይሁዳ ግድክኖ? 
አ ምቻቱ ኡባይ ኑናና ደእክኖ? ያትና፥ እ ሀ ኤራ ኡባ ሀቃፐ ደሜዴ?” ያጌድኖ። 
ኡንቱንቱ እ ግያባ አከናን እጼድኖ። ሽን የሱስ ሄ አሳዉ፥ “ናቢ ባረ ጋድያንነ ባረ ሶይ አሳን ቦንቼተና፤ ሽን ሀራሳ ኡባን ቦንቼቴ” ያጌዳ። 
ኡንቱንቱ አማንቤና ድራዉ፥ የሱስ ዳሮ ማላታ ሄ ሳን ኦꬅቤና። 
