﻿ሆሰ ትምቢትያ.
1.
ኦዝያነ፥ እዮኣታም፥ አካዝነ ህዝቂያስ ካል ካሊደ ይሁዳን ካተቴዳ ዎደ፥ ቃይ ዮኣሻ ናአይ እዮርባም እስራኤልያን ካተቴዳ ዎደ፥ ብኤራ ናኣ ሆሰኮ ዬዳ መꬍና ጎዳ ቃላይ ሀዋ። 
መꬍና ጎዳይ ኮይሮ ሆሰአ ባጋና ሃሳዬዳ ዎደ፥ መꬍና ጎዳይ ሆሰአ፥ “ባ፤ ሻርሙጻ ምሽራቶ ነዉ አካ፤ ሻርሙጻትፐ ናናቱዋ የላ። አያዉ ጎፐ፥ ሻርሙጽያ ምሽራታ ባረ አስናፐ ሻከትያዋዳን፥ ታ አሳይ ታፐ ሻከቴዳ” ያጌ መꬍና ጎዳይ። 
ቢደ፥ ድብላይማ ናቶ ጎሜሮ አኬዳ፤ ሻሃራደ፥ አቱማ ናኣ አዉ የላዱ። 
ያትና፥ መꬍና ጎዳይ ሆሰአ፥ “ናኣ ሱንꬃ ‘እዝራኤላ’ ያጋደ ሱንꬃ። አያዉ ጎፐ፥ እዝራኤለን ጉኬዳ ሱꬃ አጩዋ ታን ዬሁ ዛራቱዋ ቃንꬃ ዎድያን አቻና፤ እስራኤልያ ካዉተꬃካ ꬋይሳና። 
ሄ ጋላስ ታን እዝራኤላ ዛንጋራን እስራኤልያ ኦላንቻቱዋ መንሬꬃና” ያጌዳ። 
ጎሜራ ላኤንꬁዋ ሻሃራደ፥ ማጫ ናቶ የላዱ። ያትና፥ መꬍና ጎዳይ ሆሰአ፥ “እ ሱንꬃ ‘ሎሩሃሞ’ ያጋደ ሱንꬃ። አያዉ ጎፐ፥ ሀዋፐ ስንꬃናዉ ታን እስራኤልያ አሳዉ ቃረትከ፤ ኡንቱንቶ ሙለካ አቶ ጊከ። 1:6 ሎሩሃሞ: ሎሩሃሞ ግያዌ ቃረተናኖ ግያዋ። 
ሽን ታን ይሁዳ አሳዉ ቃረታና፤ ታን መꬍና ጎዳን፥ ኡንቱንቱ ጾሳን፥ ኡንቱንታ አሻናፐ አትና፥ ዎንዳፍያን ዎይ ማሻን ዎይ ኦላን ዎይ ፓራቱዋን ዎይ ፓራ አሳቱዋን አሽከ” ያጌዳ። 
ጎሜራ ሎሩሃሞ ꬋንꬃ ዱꬄዳዋፐ ጉይያን፥ ሀራ ሻሃራደ፥ አቱማ ናኣ የላዱ። 
ያትና፥ መꬍና ጎዳይ ሆሰአ፥ “አ ሱንꬃ ‘ሎኣማ’ ያጋደ ሱንꬃ። አያዉ ጎፐ፥ ህንተ ታ አሳ ግድክታ፤ ታንካ ህንተ ጾሳ ግድከ” ግያዋ። 
ግዶፐነ “እስራኤልያ አሳይ ልካናዉነ ፓይዳናዉ ዳንዳየተና አባ ሻፍያ ኬሻ ግዳናዋ። ኡንቱንቶ፥ ‘ህንተ ታ አሳ ግድክታ’ ጌተት ኦደቴዳሳን፥ ‘ህንተ ደኡዋ ጾሳ ናናቱዋ’ ጌተታና። 
ይሁዳ አሳይነ እስራኤልያ አሳይ እትፐ ሺቃና፤ ባረዉ እት ካፑዋ ዶራና፤ ኦሞዱዋ ጋድያፐ ስማናነ እሻሊደ ደአና። አያዉ ጎፐ፥ እዝራኤላ ጋላሳይ ዎልቃማ ጋላሳ ግዳናዋ። 
