﻿ህዝቄላ.
27.
መꬍና ጎዳ ቃላይ ታኮ ሀዋዳን ያጊደ ዬዳ፤ 
“ላ አሳ ናአዉ፥ ጺሮሳዉ ዝላላ። 
አባ ዶናን ደእያነ አባ ዶና ዳሮ ቢታቱዋን ደእያ አሳና ዛልእያ፥ ሄ ካታማዉ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ኔኖ ጺሮሳ፥ ኔን፥ ታን ፑላን ልከትያዌ ባይና ኩመንꬃ ያጋደ ኦቶረታዳ። 
ነ ዛዋይ አባ ጉልኣና፤ ኔና ኬጽያዋንቱ ኔና ሎይꬂደ ኬጼድኖ። 
ነ ሳንቃ ሳኒራ ግያ ሳኣፐ ቃንጼዳ ጺዳን ኦꬄድኖ፤ ነ ማርካብያ ቱሳ ሊባኖሳፐ ዬዳ ዝጋፐ ጊግሴድኖ። 
ማርካብያ ሶልድሳናዉ ሃꬃ ጉየ ፑሻክያ ነ ሞቀቱዋ ባሳነ ኤꬃፐ ኦꬄድኖ፤ ነ ዉይግያ ቆጲሮሳፐ ዬዳ ዱማ ጺዳ ሳንቃን ኦꬄድኖ፤ ሄ ዉይግያ ዳንጋርሳ ዛልያን አሌቀቴዳ። 
ነ ሻራይ ባንድራዳን ሃኩዋን ቤታና ማላ፥ ኩሽያን ስኪደ አሌቂሴዳ ግብጼቱዋ ሊኑዋፐ ኦሰቴዳዋ፤ ኔና ካምያ ጋርዶቱካ ኤሊሻ ዎምባፐ ዬዳ፥ ሳሉዋ ማላትያነ ኦቻ ቴራ ማላትያ ጫርቂያፐ ኦሰቴዳዋንታ። 
ነ ማርካብያ ሶልድስያዋንቱ ሲዶናነ አርዋዳ ጌተትያ ካታማቱዋፐ ዬዳዋንታ፤ ነ ማርካብያ ላግያዋንቱ ሎሄዳ ነ አሳቱዋ። 
ማርካብያ ግዶን ዛኤዳሳ ሽድያዋንቱ ገባላፐ ዬዳ ጭማቱዋነ ኤራንቻ አሳቱዋ፤ አባን ብያ ማርካብያ ኡባን ደእያ ኦሳንቻቱ ነ ግዶን ዎꬋ ዎይ ጉጃ ጊደ ፓሉመቲደ ዛልኢኖ። 
“ ‘ “ፓረሳፐ፥ ሊድያፐነ ሊብያፐ ዬዳ ኦላንቻቱ ነ ኦላንቻቱዋ ማዲደ ኦለቴድኖ፤ ባረንቱ ጎንዳልያነ ባረንቱ ኦላ ቆብያ ነ ግዶን ካቄድኖ፤ ኡንቱንቱ ኔና ቦንችሴዳዋንታ። 
አርዋደፐነ ሄሌካፐ ዬዳ ኦላንቻቱ ነ ድርሳ ግምቢያን ናጊኖ፤ ጋማዳፐ ዬዳ አሳቱ ነ አዱሳ ግምቢያን ናጊኖ። ኡንቱንቱ ባረንቱ ጎንዳልያ ነ ግምቢያ ዩሹዋን ካቄድኖ፤ ነ ፑላና ልከትያዌ ባይና ኩመንꬃ ግዳናዳን ኦꬄዳዋንቱ ኡንቱንታ። 
“ ‘ “ነ ዱረተꬃ ዳሩዋ ጋሱዋን ታርሴስ ኔናና ዛልኤዳ፤ እ ብራ፥ ብራታ፥ ቆርቆሩዋነ እርሳስያ እሚደ፥ ነ ሚሻና ላሜዳ። 
ግሪኪ፥ ቱባልነ መሸክ ኔናና ዛልኤድኖ፤ አይለቱዋነ ናስያ ብራታፐ ኦሰቴዳ ሚሻ እሚደ፥ ነ ሚሻና ላሜድኖ። 
ቤት-ቶጋርም ቶግያ ፓራቱዋ፥ ኦላ ፓራቱዋነ ባሉቆቱዋ እሚደ፥ ነ ሚሻና ላሜዳ። 
ሮዳ ቢታ አሳይ ኔናና ዛልኤዳ፤ ቃይ አባ ዶና ቢታቱዋን አሳይ ዳንጋርሳ ዛልያነ ዞጵያ ግያ ምꬃ አሂደ፥ ነዉ ቃንጼዳ። 
“ ‘ “ነ ዱረተꬃ ዳሩዋ ጋሱዋን፥ ሶርያ አሳቱካ ኔናና ዛልኤድኖ፤ ኡንቱንቱ ማታ ማላትያ እንቁዋ፥ ዞኦ እንቁዋ፥ የሌሉዋፐ ኦሰቴዳ አሌቁዋ፥ ኦቻ ቴራ ማላትያ ጫርቂያ፥ ሌኦ ሊኑዋነ አሌቁዋ ስኬዳ ማዩዋ እሚደ፥ ነ ሚሻና ላሜድኖ። 
ይሁዳነ እስራኤልያ አሳቱ ኔናና ዛልኤድኖ፤ ኡንቱንቱ ምንተ ጋደ ዛርጋ፥ ማልዱዋ፥ ኤሳ፥ ዛይትያነ ባላሳመ ግያ ꬋልያ ዛይትያ እሚደ፥ ነ ሚሻና ላሜድኖ። 
ነ ዱረተꬃ ዳሩዋ ጋሱዋንነ ነ ሺሼዳ ዱማ ዱማ ሚሻቱዋ ጋሱዋን ዳማስቆ አሳቱ ኔናና ዛልኤድኖ፤ ኡንቱንቱ ሄልቦና ዎይንያ ኤሳነ ሳሆራ ዶርሳ እስክያ እሚኖ። 
ኡዛላን ደእያ ዳናዌቱነ ግሪከ አሞናቱ ነ ሚሻና ላሜድኖ። ሄዋዳንካ ቃይ፥ ቆጼዳ ብራታነ ዱማ ዱማ ቅማመቱዋ ነዉ እሚደ ላሜድኖ። 
“ ‘ “ዳዳና አሳቱ ኮራ ግላስያ አሂደ ዛልኤድኖ። 
አራባቱነ ቄዳረ ቢታ ካፓቱ ኡባይ ነ ዛልእያ ሚሻዉ ዶርሳ ማራቱዋ፥ ዶርሳ ኦርገቱዋነ ዴሻቱዋ አሂደ ዛልኤድኖ። 
ሳባነ ራእማ ዛልአንቻቱ እንቁዋ፥ ዎርቃነ ሎኦ ዶረቴዳ ቅማመቱዋ እሚደ፥ ነ ሚሻና ላሜድኖ። 
ካራነ፥ ካኔሀ፥ ኤደነ፥ ሳባ፥ አሶረነ ክልማዳ ጌተትያ ካታማቱ ኡባይ ኔናና ዛልኤድኖ። 
ኡንቱንቱ ሎኦ ማዮቱዋ፥ ሳሉዋ ማላትያ ማዩዋ፥ አሌቁዋ ስኬዳ ማዩዋ፥ ጋዛ ምንጻፈቱዋ፥ ሎይꬅ ዶቄዳ ባቀꬃነ ዎዶሩዋ እሚደ፥ ነ ገያን ሚሻና ላሜድኖ። 
“ ‘ “ነ ሚሻቱ ተርሴሰ ዛልአንቻቱዋ ዎልቃማ ማርካባቱዋን ጫነቲደ ቤድኖ። ኔንካ ዳሮባይ ጫነትና ኩማደ፥ አባ ቦላን ብያ ማርካብያ ማላ ግዳዳ። 
ነ ማርካብያ ሶልድስያዋንቱ ኔና አኪደ፥ አባዉ ግዶ ግሻቻ አፌድኖ፤ ሽን አዋይ ዉልያ ባጋ ጫርኩ ኔና አባዉ ግዶ ግሸቻን መንሬꬄዳ። 
ኔን መኤረቴዳ ጋላስ ነ ዱረተꬃይነ ነ ዛልእያ ሚሻይ ኡባይ፥ ነ ማርካብያ ሶልድስያዋንቱ፥ ነ ማርካብያ ላግያዋንቱ፥ ነ ማርካብያ ግዶን ዛኤዳሳ ሽድያዋንቱ፥ ነ ዛልአንቻቱነ ነ ግዶን ኦላንቻቱ ኡባይ አባ ግዶ ሙከቴድኖ። 
ማርካብያን ብያ አሳቱዋ ዋሱዋ ኮሻይ አባ ጋጻ ጋካናዉ ስሰቴ። 
“ ‘ “ማርካብያ ሶልድስያዋንቱነ ላግያዋንቱ ኡባይ ባረንቱ ማርካበቱዋፐ ከሲደ፥ አባ ጋጻን ኤቄድኖ። 
ኡንቱንቱ ኡባይካ ባረንቱ ሁጲያን ባና ቆሊደ፥ ብድንꬃን ጎንዶረቲደ፥ ነ ባየꬃ ድራዉ፥ ኢታ ዬኩዋ ዬኬድኖ። 
ነዉ ካዮቲደ፥ ባረንቱ ሁጲያ ሜዲደ፥ ማቃ ማዬድኖ፤ ኡንቱንቱ ዳሮ ሴለቲደ፥ ነዉ ዬኬድኖ። 
ነዉ ኡንቱንቱ ሀዋዳን ያጊደ ዝላሌድኖ፤ “ ‘ “ሀእ አባ ግዶን ስርጵ ጌዳ፥ ጺሮሳና ልከትያዌ ኦኔ? 
ነ ዛልእያ ሚሻይ አባ ፕኒደ ይያ ዎደ፥ ቢታን ደእያ ዳሮ አሳ ካልሳዳ፤ ነ ማጹዋን ካተቱ ዱረቴድኖ። 
ሽን ሀእ አባ ጪማን መኤረታዳ። ነ ዛልእያ ሚሻይካ፥ ነዉ ኦꬅያ አሳቱ ኡባቱካ፥ ኔናና አባ ግዶን ሙከቲደ ꬋዬድኖ። 
አባ ዶና ቢታቱዋን ደእያ አሳይ ኡባይ፥ ነ ቦላ ጋኬዳዋ በኢደ ዳጋሜድኖ። ኡንቱንቱ ካተቱካ ዳሮ ያዬድኖ፤ ኡንቱንቱ ሶምኢ ያሻ ኤርሴ። 
ነ ዉርሰꬃይ ዳጋንꬅያዋ ግዴዳ፤ ኔን ላኤንꬆ ኡባካ ደአካ። ሄዋ ድራዉ፥ ቢታ ኡባን ደእያ፥ ዛልአንቻቱ፥ ፖራ! ጌድኖ ያጊደ ዝላሌድኖ” ያጌ’ ያጋ” ያጊደ ዬዳ። 
