﻿ኢስያሳ.
53.
ኑን ኦዴዳዋ ኦን አማኔዴ? መꬍና ጎዳይ ባረ ዎልቃ ኦና በሴዴ? 
እ አ ስንꬃን መላ ጋድያን ደእያ ዱሩማፐ ጻጱዋ የዲደ፥ አጭያ ያላጋ አጫዳን ድጬዳ። ኑን አ ሎይꬅ ጼላናዉ፥ አዉ ማላይ ዎይ ፑላይ ባዋ፤ ኑን አኮ ሺቃናዉ አዉ ፑል ባዋ። 
እ አሳን ካቴዳነ እጸቴዳ፤ እ ሀርግያፐነ መቱዋፐ ሻከት ኤረና ካዮትያ አሳ ግዴዳ። እ አሳይ አ በአናፐ ጊደ፥ ባረ ሶምኡዋ ዎራ ዛርያ አሳዳን ካቴዳ፤ ኑንካ አ ቦንችበይኮ። 
እ ቱሙ ኑ ሀርግያ ባረዉ አኬዳ፤ ቃይ ኑ ካዩዋካ ቶኬዳ። ሽን አ ጋኬዳ መቱ፥ ደሸꬃይነ ዋዪ ጾሳፐ አዉ ዬዳዋ ጊደ ኑን ቆፔዶ። 
ሽን እ ኑ ባይዙዋ ድራዉ፥ ጫደቲደ ማዱንጼዳ፤ ኑ ናጋራ ድራዉካ ሾጨቲደ ሊቄዳ። እ ሙረቴዳዋን፥ ኑን ሳሩዋ ደሜዶ፤ አ ማዱꬃን ኑን ፓጼዶ። 
ኑን ኡባይ ኦግያ ባሌዳ ዶርሳቱዋዳን ዎራ ቤዶ፤ ኑን ኡባይካ ኑ ኦግያዉ ኦግያዉ ስሜዳ። መꬍና ጎዳይ ኑ ኡባይ ናቄዳ ናቁዋ አ ቦላ ዎꬄዳ። 
እ ኡንኤቴዳነ ቆሄቴዳ፤ ሽን ባረ ዶና ፖክቤና። ሹካናዉ አፍያ ዶርሳዳን ላገቴዳ፤ ባረ እስክያ ሜድያዋንቱ ስንꬃን ጮኡ ግያ ዶርሳ ማራዳን፥ እካ ባረ ዶና ፖክቤና። 
ኡንቱንቱ አ ኡቁኒደነ አ ቦላ ሱገꬃ ፕርዳ ፕርዲደ አፌድኖ። እ ታ አሳ ባይዙዋ ድራዉ ሾጨቲደ፥ ፓጻ ደእያዋንቱ ቢታፐ እ ክቼዳዋ አ ዛርያፐ ኦኔ አኬኬዳዌ? 
እ ባረ ሀይቁዋን ኢታ አሳቱዋና ፓይደቴዳ፤ ሀይቂደካ ዱረ አሳ ዱፉዋን ሞገቴዳ። ግዶፐነ፥ ኢታባ እ ኦꬅቤና፤ ባረ ዶናንካ ዎርዱዋ ሃሳይቤና። 
ሽን እ ቆሄታናዌ መꬍና ጎዳ ሸነ ግዴዳ፤ ቃይ መꬍና ጎዳይ እ ቱጋታናዳን ኦꬄዳ። እ ባረና ናጋራዉ ያርሹዋ ኦꬅያ ዎደ፥ ባረ ዘረꬃ በአና። አ ባረካ አዱቃና፤ መꬍና ጎዳ ሸኒካ አ ኩሽያን ፖለታና። 
አ ሸምፑ ዋየቴዳዋፐ ጉይያን፥ እ ደኡዋ ፖኡዋ በአና፤ ናሸታና። ታ ጽሎ ቆማይ ባረ ኤራተꬃን ዳሮቱዋ ጽልሳና፤ ኡንቱንቱ ባይዙዋካ ቶካና። 
ሄዋ ድራዉ፥ ዎልቃማ አሳቱ ግዱዋን ታን አዉ ቦንቾ ሳኣ ሻካደ እማና፤ ቃይ ምኖቱዋና እ ኦሞዱዋ ሻካና። አያዉ ጎፐ፥ እ ባረ ሸምፑዋ ሀይቆ አꬂደ እሜዳ፤ ያቲደ ባይዛንቻቱዋና ፓይደቴዳ። ግዶፐነ፥ እ ዳሮ አሳ ናጋራ ቶኬዳ፤ ባይዛንቻቶካ ጋናቴዳ። 
