﻿ሲቁዋ ሳባ.
2.
ታን፥ “ሳሮና ግያ ሳኣን ዶልያ ጪሻነ፥ ዎምባን ዶልያ ሎኦ ጪሻ ማላ” ያጋዱ። 
ኤ ታ ሲቃታ ማጫ አሳ ግዶን ጼልያ ዎደ፥ አጉንꬃ ግዶን ቤትያ ሎኦ ጪሻ ማላታዉ ያጌዳ። 
ታ ሲቁ ሀራ ዎዳላቱዋ ግዶን ጼልያ ዎደ፥ ዎራን ደእያ አፕልያ ግያ ምꬃ ማላቴ፤ ታና ሎይꬅ ናሸችና፥ አ ኩዋ ግዶን ኡታድ፤ አ አይፊ ሚና፥ ታና ሎይꬅ ማልኤ። 
እ ታና ቁማ ምያ አኮ ዉይግያ ገልሴዳ፤ ባረ ሲቁዋ ባንድራዳን ታ ቦላ ꬎቁ ꬎቁ ኦꬄዳ። 
ታን አ ሲቁዋን ኦከታደ ሀርጌዳ ድራዉ፥ ዛቢብያ አይፍያ ታና ምዚደ ምንስተ፤ አፕልያ ታና ምዚደ፥ ታ ዎልቃ ኩንꬅተ። 
ባረ ሀድርሳ ኩሽያ ታና ቦርኮትሴዳ፤ ባረ ኡሸቻ ኩሽያን ታና ቆሜዳ። 
ህንተኖ የሩሳላመ ያላጋ ማጫ አሳዉ፥ ሲቁ ባረዉ ዶሲደ ደንዳና ጋካናዉ፥ አ ህንተ ቤጎና ማላ፥ ታን ህንተና ገንኤቱዋንነ ባዙዋ ዶገቱዋን ጫላይ። 
ስስተ፥ ሄዌ ታ ሲቁዋ ኮሻ! በእተ ደርያና ፕሪደ፥ ዞዘቱዋ ቦላና ጾንገቲደ ጋኬዳ! 
ታ ሲቁ ዉሻ ማላ፤ ዎይ ገንእያ ማራ ማላቴ። በእተ፥ እ ኑ ጎልያ ድርሳ ማታን ኤቄዳ፤ ማስኮትያና ጎለ ጼሌ፤ ጋርዱዋ ጋርሳናካ ሉጻይ ጼሌ። 
ታ ሲቁ ታና ሀዋዳን ያጌ፤ ታ ሲቃቴ፥ ደንዳ! ታ ማላንቻቴ፥ ሃያ! እትፐ አነ ቦይተ። 
በአ፥ ባልጉ አꬌዳ፤ እራይካ ኤቄዳ። 
ቢታን ጪሻይ ጪሼዳ፤ የꬃ የጽያ አግናይካ ጋኬዳ፤ ሀራጵያ የꬃይ ኑ ቢታን ስሰቴ። 
ባላሲ አይፍያ ዶሜዳ፤ ዎይኒ ጪሼዳ፤ አ ጪሻ ሳዉ ቢታን ቶሹኩ ጌ። ሄዋ ድራዉ፥ ታ ሲቃቴ፥ ደንዳ፤ ታ ማላንቻቴ፥ ሃያ፤ አነ እትፐ ቦይተ ያጌ ያጋዱ። 
ኔን አፉዋ ዶና ዛላ ዛአን ቆሰቴዳ ሀራጳት ማላ፤ አነ እት ገደ ታና ነ ሶምኡዋ በሳ፤ ነ ኮሻካ ስሳ። አያዉ ጎፐ፥ ነ ኮሻይ ታና ቃረꬄ፤ ነ ሶምኡካ ዳሮ ሎኤ ያጌዳ። 
ኑ ዎይኒ ጪሼዳ፤ ሄዋ ድራዉ፥ ኑ ዎይንያ ግዱዋ ባይዝያ ዎራካናቱዋ፥ ሄ ቄር ዎራካናቱዋ ጲርያ ዎꬂደ ኦይቂተ ያጌድኖ። 
ታ ሲቁ ታዋ፤ ታንካ አኖ፤ ጪሻ ግዶን እ ባረ ዉድያ ሄሜ። 
ቃማ ꬉማይ ቃረታናዉ፥ ዎንታ ጫርኩ ጫርካናዉ፥ ታ ሲቆዉ፥ ገንእያዳን ዎይ ያላጋ ዶግያዳን፥ አፎትያ ደርያና ዎጻደ ሃ ስማ ያጋዱ። 
