﻿ሲቁዋ ሳቢያ ማጻፋ.
1.
ማዛሙርያ ኡባፐ አꬍያ ሶሎሞና ማዛሙሪ ሀዋ። 
“ነ ሲቁ ዎይንያ ኤሳፐ አꬍ ናሸችያ ድራዉ፥ ነ መተርሻን ዛራ ዛራደካ ታና የራ። 
ነ ኦከትያ ሽቱ ዎት ሳዊ! ነ ሱንꬃይ ጼሰትያ ዎደካ አያ ናሸቺ! ጌላዮቱ ኔና ሲቅያዌ ሄዋሳ። 
ታና ኔናና አካደ ባ። ሃያ፥ አነ ላኡ እትፐ ዎጾይተ! ታ ካትያዉ፥ ታና ነ ሲርጻ ገልሳ” ያጋዱ። የሩሳላመ ማጫ አሳቱ: አባን ኑን አይ ኬሻ ናሸቴዶ! ኑን አ ሲቁዋ ዎይንያ ኤሳፐካ አꬂደ ናሸቶ። ቱሙካ ማጫ አሳይ ኡባይ ኔና ሲቃናዉ በሴ ያጌድኖ። 
ህንተኖ፥ የሩሳላመ ማጫ አሳቶ፥ ስስተ፥ ታን ካረꬃ፤ ግዶፐነ፥ ማላንቻ። ታ ካረꬃተꬃይ ቄዳረ ዱንካንያ ማላ፤ ሽን ታ ማላይ ሶሎሞና ካትያ ጎልያ ጋርዳቱዋ ማላ። 
ታ ማላ ካረጽሴዳዌ ጹግያ አዋ፤ ታን ካረꬃ ግዴዳ ድራዉ፥ ታና ካꬎፓ። ታ እሻቱ፥ ታ አት ናናቱ ታናና ዋላቀቲደ፥ ታና ዎይንያ ቱራ ናጋንቻ ኦꬄድኖ፤ ያትና፥ ታን ታና ናጋበይከ። 
ታ ሲቆዉ፥ አነ ታዉ ኦዳ፤ ነ ዶርሳ ዉድያ ኔን ሄምያዌ ሀቃኔ? ጋላስ አዋፐ ነ ኡንቱንታ ሸምፕስያዌ ሀቃኔ? ኔና ደማናዉ ነ ላገቱዋ ዉድያ ካላደ፥ አያዉ ዩሻንቻ ማጫ አሳ ግዶ? ያጋዱ። 
ሀነ፥ ማጫ አሳ ኡባፐ አꬋ ሎእያ ማላንቻቴ! ሳኣ ኤራና ꬋዮፐ፥ ዶርሳይ ቤዳ ሳ ካላደ ባ፤ ነ ዴሻ ማራቱዋካ ሄንꬃንቻቱዋ ዱንካንያ ማታን ሄማ። 
ታ ሲቃቴ! ግብጼ ካትያ ፓራ ጋርያ ጎችያ ፓራቱዋ ግዶን ደእያ ማጋያቲዳን ሎኣሳ። 
አቤት፥ ነ ሀይꬃን ጎላካትያ አሌቁዋና ሺቂደ፥ ነ ጋጩ አያ ሎኢ! ነ ዚዚካ እንቁዋን አሌቀቴዳዋ። 
ኑን ነዉ ብራን አሌቀቴዳ፥ ዎርቃ አሌቁዋ ኦስሳና ያጌድኖ። 
ካቲ ማዳን ኡት ደእሽን፥ ታ ሽቱዋ ሳዉ ጎልያ ግዶ ኡባን ቶሹኩ ጌዳ። 
ታ ሲቁ ታ ꬋንꬃቱዋፐ ግዱዋን ሸምፕያ ዎደ፥ አ ፔኑ ቃርጪትያና ደእያ ካዋራዳን ሳዌ። 
ታ ሲቁ ኤንጋደ ጌተትያ ዎይንያ ሳኣን ዶሌዳ፥ ባዙዋ ጪሻ ማላ ያጋዱ። 
ታ ሲቃቴ፥ ኔን ዋታ ሎአይ! ኔን ዋታ ሎአይ! ነ አይፈቱ ሀራጵያ አይፍያዳን ሎኢኖ ያጌዳ። 
ታ ሲቆዉ፥ ኔን አያ ሎአይ! አያ ናሸቻይ፤ ኑ አርሳይካ አጬዳ ማታዳን ናሸችያዋ። 
ኑ ጎልያ ዛሩ ዝጋ፤ ካራይካ ጺዳን ዳደቴዳዋ ያጋዱ። 
