﻿ማዝሙርያ.
147.
መꬍና ጎዳ ጋላትተ! ኑ ጾሳ ሳቢያዌ ሎአ፤ አ ሳቢያዌ ናሸችያባነ በስያዋ። 
መꬍና ጎዳይ የሩሳላመ ኦራꬃና፤ እስራኤልያ አሳቱዋፐ በቴዳዋንታካ ሺሻና። 
ዎዛናይ መኤዳዋንታ እ ፓꬄ፤ ኡንቱንቱ ማዱꬃካ እ ቃቼ። 
እ ጾልንተቱዋ ኡንቱንቱ ፓይዱዋን ኤሬ፤ ኡንቱንታ ኡባካ ኡንቱንቱ ሱንꬃን ሱንꬃን ጼሴ። 
ኑ ጎዳይ ዎልቃማ፤ አ ዎልቃይ ዳራ፤ አ አኬካይ ልክያፐ አꬍያዋ። 
መꬍና ጎዳይ ናቀቴዳዋንታ ዘምፕሴ፤ ሽን ኢታቱዋ ቢታን ዱገ ኦሌ። 
መꬍና ጎዳዉ ጋላታ የꬃ የጽተ፤ ኑ ጾሳዉ ዲꬃ ዲጽተ። 
እ ሳሉዋ ሻርያ ካሜ፤ ሳአዉ እራ ቡክሴ፤ ቄሪ ደረቱዋ ቦላ ማታ ሞክሴ። 
መሄቶነ ዋስያ ቁሩዋ ማራቶ፥ ምያዋ እ እሜ። 
እ ናሸትያዌ ፓራቱዋ ዎልቃንነ፥ ቶራንቻቱ ምኖተꬃን ግደና። 
መꬍና ጎዳይ ባረዉ ያይያዋንቱንነ አገና አ ሲቁዋን፥ ባረንቱ ህዶታ ዎꬄዳዋንቱን ናሸቴ። 
የሩሳላመ ካታማቴ፥ መꬍና ጎዳ ጋላታ! ጽዮኔ፥ ነ ጾሳ ጋላታ! 
አያዉ ጎፐ፥ እ፥ ነ ፐንግያ ኩልባቱዋ ምንሴ፤ ነ ግዶን ደእያ ነ አሳካ አንጄ። 
እ ነ ዛዋ ሳሮተꬃን ናጌ፤ ኔና ሎይꬅ ሎእያ ዛርጋ ካልሴ። 
እ ባረ ኪታ ሳአዉ ኪቴ፤ አ ቃላይካ ኤለ ጋኬ። 
እ ሻቻ ቡሉኩዋዳን ምጬ፤ ከተርሳ ብድንꬃዳን ላሌ። 
እ ባረ ዎልቃማ ሻቻ ሹቻዳን ዱገ ኦሌ። ሄ ሜጉዋን ኤቃናዉ ኦንነ ዳንዳየና። 
እ ባረ ቃላ ኪቲደ፥ ሻቻ ሙሽሴ። እ ጫርኩዋ ጫርክስና፥ ሃꬃይ ጎጌ። 
እ ባረ ቃላ ያቆባ ዘረꬃዉ፥ ባረ አዋዩዋነ ፕርዳ እስራኤልያ አሳዉ አዋዬ። 
እ ሀራ ካዉተꬃ አሳዉ፥ ሀዋ ኦꬅቤና፤ ኡንቱንቱ አ ፕርዳ ኤርክኖ። መꬍና ጎዳ ጋላትተ! 
