﻿ማዝሙርያ.
143.
ዳውት ጻፌዳ ማዛሙርያ አቤት መꬍና ጎዳዉ፥ ታ ዎሳ ስሳ፤ ታ ዋትዋቱዋ ሀይዛ። ኔን ጽሉዋነ አማነትያዋ ግድያ ድራዉ፥ ታዉ ዛሩዋ እማ። 
ነ ስንꬃን ጽሎ ግዳና አሳይ ባዋ፤ ሄዋ ድራዉ፥ ታና ነ ቆማ ፕርዳዉ ሺሾፓ። 
ታና ታ ሞርኪ የደርሲደ፥ ቢታና ጋꬅ ክንቼሬꬄዳ፤ በን ሀይቄዳ አሳቱዋዳን ታና ꬉማን ዎꬄዳ። 
ሄዋ ድራዉ፥ ታን ህዶታ ቃንጻድ፤ ታ ዎዛናይካ ይባቴዳ። 
ታን በን ዎደቱዋ ሀሳያይ፤ ኔን ኦꬄዳ ኦሱዋ ኡባ ዛራ ዛራደ ቆፓይነ ነ ኩሺ ኦꬄዳዋ አኬካይ። 
ታን ታ ኩሽያ ኔኮ ምጫድ፤ መላ ቢታይ ሃꬃ ኮይያዋዳን፥ ታ ሸምፑ ኔና ሳመቴ። 
አቤት መꬍና ጎዳዉ፥ ታዉ ዛሩዋ እማናዉ ኤሌላ! ታን ህዶታ ቃንጻድ። ታን ዱገ ዱፉዋን ገልያ አሳቱዋ ማላ ግደናዳን፥ ነ ሶምኡዋ ታፐ ገንꬆፓ። 
ታን ኔና አማነትያ ድራዉ፥ ዎንታ ዎንታ አገና ነ ሲቁዋ ታና በሳ። ታን ታ ሸምፑዋፐ ኔና ዎስያ ድራዉ፥ ታን ባናዉ በስያ ኦግያ ታና ታማርሳ። 
አቤት መꬍና ጎዳዉ፥ ታን ኔኮ ባቃቴዳ ድራዉ፥ ታና ታ ሞርከቱዋፐ አሻ። 
ኔን ታ ጾሳ ግድያ ድራዉ፥ ታን ነ ሸንያ ኦꬃና ማላ፥ ታና ታማርሳ፤ ሎኦ አያናን ታና ሱረ ኦግያ ካለꬃ። 
አቤት መꬍና ጎዳዉ፥ ነ ሱንꬃ ድራዉ፥ ታና አሻ፤ ነ ጽሎተꬃን ታና መቱዋፐ ከሳ። 
አገና ነ ሲቁዋን ታ ሞርከቱዋ ዎꬋ፤ ታ ባልጋራቱዋ ኡባ ꬋይሳ፤ አያዉ ጎፐ፥ ታን ነ ቆማ። 
