﻿ማዝሙርያ.
141.
ዳውት ጻፌዳ ማዛሙርያ አቤት መꬍና ጎዳዉ፥ ታን ኔና ጼሳይ፤ ታና ማዳናዉ ኤሌላ። ታን ኔኮ ዋስያ ዎደ፥ ታ ኮሻ ስሳ! 
ታ ዎሳይ እጻና ጩዋዳን፥ ነ ስንꬃ ሺቆ፤ ታን ታ ኩሽያ ምጭያዌ፥ ነዉ ኦማርሳ ያርሹዋ ማላ ግዶ። 
አቤት መꬍና ጎዳዉ፥ ታ ዶና ናግያዋ ዎꬃ፤ ታ መተርሻቱዋ ፐንግያን ዛባይንያ ኤሳ። 
ባይዙዋ ኦꬅያ አሳቱዋና፥ ኢታ ኦሱዋ ኦና ማላ፥ ታ ዎዛና ኢታባኮ ዛሮፓ። ኡንቱንቱ ግብራካ ታና ሙዞፓ። 
ጽሎ አሳይ ታና አገና ሲቁዋን ሴራናዉነ ሙራናዉ ዳንዳዬ፤ ኡንቱንቱ ታና ባቆፐ ሄዌ ታ ሁጲያን ዛይትያ ኦክያዋ ማላ፤ አያዉ ጎፐ፥ ታን ኡባ ገደካ ኢታቱዋ ኦሱዋ ቦላ ዎሳይ። 
ኡንቱንቱ ዳናቱ ዛላ አፉዋና፥ ዱገ ኦለትያ ዎደ፥ ታ ቃላይ ቱማ ግድያዋ ኡንቱንቱ አሳይ ኤራና። 
ቢታይ ጎሸትያዋዳንነ ጉሉ መኤረትያዋዳን ኡንቱንቱ መቀꬃይካ ዱፉዋ ዶናን ላለታና። 
አቤት ኡባ ሞድያ መꬍና ጎዳዉ፥ ታ አይፊ ኔና ጼሌ፤ ታን ኔኮ ባቃታደ አታይ፤ ታና ሀይቆ አꬃደ እሞፓ። 
ኡንቱንቱ ታዉ ዎꬄዳ ግትያፐነ፥ ኢታ ኦꬅያዋንቱ ጲርያፐ ታና ናጋ። 
ታን ሳሮ አꬍያ ዎደ፥ ኢታቱ ባረንቱ ዎꬄዳ ግትያን ኦይቀትኖ። 
