﻿ማዝሙርያ.
108.
ዳዊታ ማዛሙርያ፥ የꬃ አቤት ጾሳዉ፥ ታ ዎዛናይ ምኒደ ደኤ። ታን ነዉ ታ ኩመንꬃ ዎዛናፐ የጻናነ ኔና ሳባና። 
ዲꬃዉነ ማስንቆ ቤጎትተ! ታንካ ዎንታ ጉራና ቤጎታና። 
አቤት መꬍና ጎዳዉ፥ ታን ኔና አሳ ግዶን ጋላታና፤ ቃይ ካዉተꬃ ግዶን ኔና ሳባና። 
አያዉ ጎፐ፥ አገና ነ ሲቁ ዎልቃማ፤ ሳሉዋፐ ቦላዉ አꬌ። ነ ቱማተꬃይካ ቦላ ሻርያዳን ꬎቄ። 
አቤት ጾሳዉ፥ ሳሎቱዋፐ ቦላና ꬎቁ ꬎቁ ጋ! ነ ቦንቹ ሳኣ ኡባ ቦላ ግዶ። 
ኔን ሲቅያዋንቱ አታና ማላ፥ ነ ኡሸቻ ኩሽያን ኑና አሻ፤ ኔን ታዉ አላ። 
ጾሳይ ባረ ጌሻ ሳኣን ሀዋዳን ያጌዳ፤ “ታን ጾናደ ሰኬማ ቢታ ሻካና፤ ቃይ ሱኮታ ዛንጋራ ግሻና። 
ጋላኣደ ታዋ፤ ምናሰካ ታሳ፤ ኤፍሬም ታ ሁጲያ አሽያ ቆብያ፤ ይሁዳይ ታ ካዉተꬃ ጻምኣ። 
ሞኣበ ታን ሜጨትያ ኩይጻሩዋ፤ ኤዶም ታዋ ግድያዋ ኤርሳናዉ ታ ጫማ አ ቦላ ዎꬃይ። ታን ፕልስጼማ ጾናደ ገሬራይ” ያጌዳ። 
ግምበቴዳ ካታማኮ፥ ታና ኦኔ አፋናዌ? ኤዶማ ጋካናዉ ታና ኦኔ ካለꬃናዌ? 
አቤት ጾሳዉ፥ ኑና አጌዳዌ ኔና ግድኪ? አቤት ጾሳዉ፥ ኔን ኑ ቶራንቻቱዋና ኦላዉ ከሳካ። 
አሳ ማዱ ፓና ድራዉ፥ ሞርክያና ኦለታናዉ ኔን ኑና ማዳ። 
ጾሳ ዎልቃን ኑን ኑ ሞርከቱዋ ጾናና፤ ኑ ሞርከቱዋ የꬋናዌ አ። 
