﻿ማዝሙርያ.
91.
ኡባፐ ꬎቂያ ጾሳን ናገቲደ ደእያዌ፥ ኡባፐ ዎልቃማ ጾሳ ኩዋ ግዶን አቄ፤ 
መꬍና ጎዳዉ፥ “ኔን ታዉ ጌሱዋነ ባቃታ አትያ ሳኣ፤ ኔን ታን አማንꬅያ ታ ጾሳ” ያጋና። 
እ ኔና ሻንካንቻቱዋ ግትያፐካ፥ ዎꬍ ዉርስያ ኢታ ሀርግያፐካ አሻና። 
እ ባረ ባለቱዋን ኔና ካማና፤ አ ቀፈቱዋ ጋርሳ ኔን ባቃታደ ቆሰታ አታና። አ አማነቱሳይ ነዉ ጎንዳለ። 
ኔን ቃማ ዳጋንꬅያባዉ፥ ዎይ ጋላስ ጾንገትያባዉ ያያካ፤ 
ዎይ ꬉማን ኦይቂያ ሀርግያዉ፥ ዎይ ጋላሳ ሴታን ዉርስያ ኢታ ሀርግያ ህርጋካ። 
ሻአይ ነ ምይያን፥ ቃይ ታሙ ሻአይ ኔፐ ኡሸቻ ባጋና ኩንዳና፤ ሽን ኔና አያይነ ቦቼና። 
ኔን ነ አይፍያ ጻላላን ጼላና፤ ኢታቱ ሙረትያዋካ በአና። 
መꬍና ጎዳ ኔን ነዉ ባቃታ አትያ ሳኣ ኦꬄዳ ድራዉነ፥ ኡባፐ ꬎቂያ ጾሳ ነዉ፥ ደእያ ሳኣ ኦꬄዳ ድራዉ፥ 
ኢታባይ ኔና ቦቼና፤ ቦሻይካ ነ ጎልያ ሺቀና። 
አያዉ ጎፐ፥ ነ ኦግያን ኡባን ኔና ናጋና ማላ፥ ጾሳይ ባረ ኪታንቻቱዋ አዛዛና። 
ነ ገዲ ሹቻን ꬉበተና ማላ፥ ኪታንቻቱ ባረንቱ ኩሽያን ኔና ደንꬃና። 
ኔን ጋሙዋነ ሾሻ ቦላን ሄመታና፤ ቃይ ዎዳላ ጋሙዋነ ዎꬍያ ሾሻ ኔን የꬋና። 
መꬍና ጎዳይ ሀዋዳን ያጌ፤ “እ ታና ሲቄዳ ድራዉ፥ ታን አ አሻና። እ ታ ሱንꬃ ኤሬዳ ድራዉ፥ ታን አ ናጋና። 
እ ታና ጼግያ ዎደ፥ ታን አዉ ኮያና። መቱዋን ታን አናና እትፐ ግዳና፤ ታን አ አሻናነ ቦንቻና። 
ታን አ ላይꬃ አዱሳደ ካልሳና፤ ታ አቶተꬃ አ በሳና” ያጌ። 
