﻿ማዝሙርያ.
77.
አሳፍ ዛማረቱዋ ካፖ ጁዱቶ የጼዳ፥ ማዛሙርያ ታን ጾሳዉ ማጋናይ፤ ታና ስሶ ጋደ ታን ጾሳ ዎሳይ። 
ታን ታ መቱዋ ጋላስ ጎዳ ኮያይ። ቃማን ታን ሸምፐናን ታ ኩሸቱዋ አኮ ምጫይ፤ ግዶፐነ፥ ታን ምነታናዉ ዳንዳይከ። 
ታን ጾሳባ ቆፕያ ዎደ፥ ኦላይ፤ ታን አባ ዩሻ ቆፕያ ዎደ፥ ታ ሸምፑ ዳቡሬ። 
ኔን ቃማ ኡባ ታና ገምእሹዋ ድጋደ አህሳሳ። ታን ሎይꬃ ህርግያ ድራዉ፥ ሃሳያናዉ ዳንዳይከ። 
ታን አꬌዳ ጋላሳቱዋ ቆፓይ፤ ካሰ ላይꬃቱዋካ ሀሳያይ። 
ታን ቆፋ ሼካደ አቃይ፤ ታ ዎዛናይ ዩሽ ቆፕያ ዎደ፥ ታን ታ ሁጲያ ሀዋዳን ያጋደ ኦቻይ፤ 
“ጎዳይ ኑና መꬍናዉ አግ ባሻኔ? ዛረꬂደ እ ኑና ኬካ በሰኔ? 
አ ሲቁ አቴዴ? እ ጌዳዌ ሀዋፐ ስንꬃናዉ ሳኣን ኦኔ? 
ጾሳይ ማርያዋ ዶጌዴ? ባረ ቃረታካ ሀንቁዋን ላሜዴ?” ያጋደ ኦቻይ። 
ቃይካ ታን፥ “ታና ቆሄዳዌ፥ ኡባፐ ꬎቂያ ጾሳ ኡሸቻ ኩሺ፥ ካሰፐ ማድያ ማዱዋ አጌዳዋ” ያጋይ። 
መꬍና ጎዳዉ፥ ነ ኦሶቱዋ ታን ቆፓና። ኤ፤ ኔን በን ዎደ፥ ኦꬄዳ ማላልስያባቱዋ ኡባ ታን ሀሳያና። 
ነ ኦꬄዳዋ ኡባ፥ ታን ዛራ ዛራደ ቆፓና፤ ነ ዎልቃማ ኦሶቱዋ ኡባ ታን ዩሻ ቆፓና። 
አቤት ጾሳዉ፥ ነ ኦጊ ጌሻ፤ አይ ጾስነ ኑ ጾሳ ማላ ዎልቃማ ግደና። 
ኔን ማላልስያባ ኦꬅያ ጾሳ። አሳ ግዶን ነ ዎልቃ ቆንጭስያዋ። 
ነ አሳ፥ ያቆባነ ዮሴፎ ዘረꬃቱዋ፥ ነ ቀስያን ዎዛዳ። 
አቤት ጾሳዉ፥ ሃꬃቱ ኔና በኤድኖ፤ ሃꬃቱ ኔና በኢደ ያዬድኖ። አባ ጪማቱካ ኮኮሬድኖ። 
ሻረቱ እራ ዱገ ዛሪደ ትጌድኖ፤ ጉጉንꬃይ ሳሉዋን ጉሜዳ። ነ ዋልቃንꬃይ ያን ሃን ዋልቃሜዳ። 
ነ ጉጉንꬃይ ጉንꬃይ ጎትያ ግዶን ኮሹሜዳ፤ ነ ዋልቃንꬃ ጶለꬃይ ሳኣ ፖእሴዳ። ቢታይካ ጋጅ ጋጂደ ኮኮሬዳ። 
ኔን አባ ግዱዋና ሀመታሳ፤ ጪሞ አባ ግዱዋና አꬋሳ፤ ግዶፐነ፥ ነ ገዲ የꬌዳ ሳአይ ቤተና። 
ሙሴነ አሮና ኩሽያን ኔን ነ አሳ ዶርሳ ዉድያዳን ካለꬃዳ። 
