﻿ማዝሙርያ.
71.
አቤት መꬍና ጎዳዉ፥ ታን ኔኮ ባቃታይ፤ አዉደነ ታና ዬላዮፓ። 
ነ ጽሎተꬃን ታና ዎꬃ አካ፤ ነ ሀይꬃ ታኮ የጋደ፥ ታና አሻ። 
ኔን ታዉ ኡባ ዎደ ጌምያ ምኖ ዛላነ፥ ታና አሽያ ምኖ ጌሱዋ ግዳ። ታ አታና ማላ ነ አዛዛ። ኤ፥ ኔን ታ ዛላነ ታ ጌሱዋ። 
አቤት ታ ጾሳዉ፥ ኢታቱዋ ኩሽያፐ፥ ኢታ ኦꬅያዋንቱፐነ ቃረት ባይና አሳቱዋ ዎልቃፐ ታና አሻ። 
አያዉ ጎፐ፥ አቤት ኡባ ሞድያ መꬍና ጎዳዉ፥ ኔን ታን ህዶታን ናግያዋነ ታ ያላጋተꬃ ዎድያፐ ዶማደ፥ ታን አማነትያዋ ግዳዳ። 
ታን የለትያ ዎድያፐ ዶማደ ኔናን ዘምፓድ፤ ታ አት ኡሉዋፐ ዎꬎደፐ ዶማደ፥ ኔን ታና ናጋዳ። ኡባ ገደካ ታ ጋላታይ ኔሳ። 
ኔን ታዉ ባቃታ አትያ ዎልቃማ ሳኣ ግዴዳ ድራዉ፥ ታ ደኡ ዳሮ አሳዉ ሌምሶ ግዴዳ። 
ጋላሳ ኡባን ታ ዶናይ፥ ነ ጋላታንነ ነ ቦንቹዋን ኩሜዳ። 
ታን ጭሜዳ ዎድያን ታና ኦሎፓ፤ ታ ዎልቃይ እጼዳ ዎድያን ታና አጎፓ። 
አያዉ ጎፐ፥ ታ ሞርከቱ ታ ቦላ ሃሳዪኖ፥ ታና ዎꬋናዉ ኮይያዋንቱ እትፐ ሺቂደ ማቀቲኖ። 
ኡንቱንቱ፥ “ጾሳይ አ አጌዳ፤ የደርሲደ አ ኦይቄቶ። አያዉ ጎፐ፥ አ አሻናዌ ኦንነ ባዋ” ያጊኖ። 
አቤት ጾሳዉ፥ ታፐ ኔን ሃኮፓ። አቤት ታ ጾሳዉ፥ ታና ማዳናዉ ኤሌላ። 
ታና ሞትያዋንቱ ዬላቲደ ꬋይኖ። ታና ቆሀናዉ ኮይያዋንቱ፥ ዬላነ ካዉሻ ማይኖ። 
ሽን ታና ግዶፐ፥ ኡባ ገደ ኔና ህዶታን ናጋና። ታን ጉጃ ጉጃደ ኔና ጋላታና። 
ዎይሰንቶ ልክያ ኤራና ꬋዮፐካ፥ ታ ዶናይ ጋላሳ ኡባን ነ ጽሎተꬃባነ አሽያ ነ ኦሱዋባ ኦዳና። 
ታን ኡባ ሞድያ መꬍና ጎዳ ዎልቃን ያና፤ ነ ጻላላይ ጽሎ ግድያዋ አዋያና። 
አቤት ጾሳዉ፥ ኔን፥ ታ ያላጋተꬃፐ ዶማደ ታና ታማርሳዳ። ሀእ ጋካናዉ ታን ነ ማላልስያ ኦሱዋባ ኦዳይ። 
አቤት ጾሳዉ፥ ነ ዎልቃነ ነ ምኖተꬃ፥ ይያ የለታ ኡባዉ ኦዳና ጋካናዉ፥ ታን ጭማደ ፑሉሞፐካ ታና አጎፓ። 
አቤት ጾሳዉ፥ ነ ጽሎተꬃይ፥ ቦላ ሳሉዋ ጋኬዳ። አቤት ዎልቃማባ ኦꬄዳ ጾሳዉ፥ ነ ማል ኦንነ ባዋ። 
ኔን ታ ቦላ ዳሮ መቱዋ አሃዳ፤ ግዶፐነ፥ ኔን ታ ደኡዋ ዛራደ ኦራጽሳና፤ ኔን ታና ቢታ ግዶ ጪሞ ኦላ ገለናዳን ናጋና። 
ኔን ታ ቦንቹዋ ካሰዋፐ ዳርሳና፤ ኔን ታና ዛረꬃደካ ምንꬃና። 
አቤት ታ ጾሳዉ፥ ነ ቱማተꬃ ድራዉ፥ ታን ኔና ዲꬃን ጋላታና። አቤት እስራኤልያ ጌሻዉ፥ ታን ማስንቁዋን ኔና ሳባና። 
ታን ዲጻደ፥ ናሸቻዉ ታ ቃላ ꬎቁ ኦꬃደ የጻና፤ ኔን ታና አሼዳ ድራዉ፥ ታን ኔና ሳባና። 
ታ እንጻርሳይ ነ ጽሎ ኦሱዋባ ኡባ ጋላስ ኦዳና፤ አያዉ ጎፐ፥ ታና ቆሀናዉ ኮይያዋንቱ፥ ዬላቴድኖነ ካዉሼድኖ። 
